Guayes de señardá

Resume del actu d'Iniciativa Internacionalista

2009-06-03T18:07:00.000-07:00

Pa los que nun tovieren nel actu d'Iniciativa Internacionalista esti miércoles vos lo resumo:

Enantes de nada destacar la coherente presencia y discursu de Doris Benegas pa colos plantegamientos de la candidatura, pero non asina pa coles realidaes del ámbetu asturianu, nos que nun quixo moyase por, creyo, prudencia y falta de prepotencia.

La mesma prepotencia que-y sobró a los dos asturianos de la mesa, sobremanera al ñembru de SOFITU a quien-y parez que ñegar a pueblos como'l cántabru o'l llionés, de los qu'amás garra un bón cachu, ye de ser "braeramente independentistes", escluyendo a la mayoría del nacionalismu asturianu que nun comulga pa colos sos plantegamientos panasturianistes (tanta llectura de Vilareyu nun debe ser bono). Del nivel d'asturianu nin falemos, muncha vindicación, pero poco exemplu.

Paez que la hestoria de les guerres de los "mapes pulpu" mos enseñó que nun deprendiemos ren. ¿Nun tenemos problemes d'abondo n'Asturies como p'andar ganándonos "amiguinos" per aciu mapes supuestamente "hestóricos" sacaos d'un llibru que nun atiende a criterios etno-culturales? Tanto criticar a los galleguistes de NÓS... esti discursu de los territorios ye una espada de doble filu que sigún-yos convenga empleguen o critiquen.

Desconozo si la omisión de la bandera cántabra o llionesa nos sos cartelos débase, más que probablemente, a engarradielles con IZCA. Como si pol fechu de que'l castellanu ñaciera en Valderrible el restu de Cantabria seya castellana...mamina. Anque pongan los manifiestos en llionés, en cántabru, n'estremeñu y reciba'l sofitu (inocente) de dalguna organización como Agora Páis Llionés.

Ente tanta lliteratura nos discursos sobro'l pueblu trabayador asturianu, la guinda púnxola un bogayu del "públicu" que fexo una riestra plantegamientos mui acertaos sobro la clas trabayadora asturiana, que como bien dixo, "ye más bien prexubilada, y d'asturiana...nin falemos". Renembró la complicidá de los sindicatos y munchos "trabayadores" nos pieslles de los pozos y les sos pertinentes prexubilaciones, etc...Foron los aplausos meyor aprovechaos del actu.

Luis Ocampo retrucó a esti collaciu mentando los socesos del 34 y l'exemplu que dio al restu los pueblos...pero ¿qué tenía que ver esa llucha del 34, que pinta tan bien nos sos mítines, cola rialidá social y llaboral que afuega'l nuesu país anguañu? ¿Qué soluciones propunxo? Francamente, a Ocampo sóbra-y llingua y fálta-y llectura y realismu. Más que a la política podría dedicase a la vida eclesiástica, dando sermones (o predicanzaines) na illesia, porque namás-y faltó danos la hostia consagrada.

Llueu se quexen de qu'Europa de los pueblos dexare a UNA y a AA na cuneta, cuando Iniciativa nin tien asturianos nes sos files nin reconoz de facto nin a cántabros nin a llioneses.

¿Braeramente sigue habiendo daquién que piense que pol fechu de pone-l'asturina nos cartelos de propaganda van mirar pa nós ensin cayer na "collor"?

La idega d'esta candidatura, qu'enantes d'esto asumía como un votu útil, me quedó engochada. Nun voi dicir a naide qu'Iniciativa seya una mala opción de votu de castigu hacia la esquierda "tradicional", pero si quier ver representada a Asturies que nun s'engañe, yo prefiero votar a un partíu de nueso, magar que nun faiga coalición o saque diputáu, ensinón...¿pa que vivimos n'Asturies y nun colamos pa Euskal Herria? Bono, eso ye daqué polo que dellos tienen suaños llentos (y ciertamente debe ser mui fashion), pero quixera entamar por costruyir castiellos na tierra, y si ye na nuesa, muncho meyor.

Antroxu Xixón 2009

2009-02-20T10:57:00.000-08:00

Programa d'actividaes del Antroxu Xixón 2009

Xueves, 19
Comadres: el Xueves de Comadres ye la antesala del Antroxu xixonés. La cita oficial sedrá la de la Tertulia Les Comadres, qu'entregarán la Comadre d'Oro y el Felpeyu 2009, a les doce de la nueche, nel Llagar Cortina.

Vienres, 20
19.30 hores: actuación de la Banda de Música de Xixón en Begoña.
20 hores: pregón. Socarronería xixonesa n'estáu puru. Begoña.
21 hores: pasacais de les charangues na placia'l Marqués, p'amazcarar a Pelayu.

Sábadu, 21
12 hores: XV Desfile Infantil de Disfraces, nel Teatru Xovellanos.
19 hores: entama'l XXII Concursu de Charangues. Nel Teatru Xovellanos actuarán Xaréu nel Ñeru, Los Revoltosos, Los Gayoleros, Perdíos de los Nervios, Brasileiros do Xixón, Los Acoplaos, Folixa pa toos y Echa un culín.
22 hores: concierto de Boudet en Begoña.

Domingu, 22
12.30 hores: XV Desfile Infantil de Disfraces acompangaos pola Banda de Música de Xixón. Dende la Plazuela fasta Begoña.
13 hores: conciertu de los colombianos G'Loba y La Hermandad Latina, en Begoña.
16.30 hores: XVII Concursu Infantil de Disfraces y IV Concursu de Disfraces con Papel de Periódicu. Dambos nel Xovellanos.
19 hores: XXIl Concursu de Charangues, nel Xovellanos. Actuarán Los Pebetes de Xixón, Los Restallones, Xolgoriu baxo l'horru, Tracaná, Batucada-Los Playos, Los Tardones, Los Rescamplaos y Kop'a vino.

Llunes, 23
19 hores: desfile d'Antroxu. Dende la carretera de La Cuesta fasta l'Humedal.
22 hores: conciertu de Jerónimo Granda en Begoña.
23.15 hores: verbena en Begoña cola Orquesta Asia.

Martes, 24
12 hores: conciertu de Los Empollones y Los Pingüinos Asesinos en Begoña.
13 hores: muerte de la sardina. En Begoña.
17 hores: velatoriu. En Begoña.
18 hores: entrega de premios. En Begoña.
19.30 hores: cortexu fúnebre dende Begoña fasta la placia'l Marqués.
20.30 hores: llectura de la tiestamuña. Na placia'l Marqués.
20.45 hores: entierru, fuebos artificiales y tamborrada final.

Diez velines pa Miranda

2009-01-29T06:53:00.000-08:00

"En bermeyu, les llendes de la llingua mirandesa. En mariellu la Tierra de Miranda."

Arrequexada y troceada nuna faza de 500Km2 nel postreru nordés de los mapes oficiales del Estáu Pertués, y con una población que rolda los 18.000 habitantes enántase la Tierra de Miranda.

Escontra'l sieglu XII, l'entóncenes conde de Purtucale, D.Fonsu Enriquez xunificó a la fuercia los territorios galaicos de "Entre-Douro-e-Minho", más los restantes ente'l Ríu D'Onor y el Dueru pa posteriormente proclamase rei de Purtucale, percanciando la so reconocencia per parte'l Reinu de Llión nel tratáu de Zamora en 1143.

Independencia algamada pesie los enterrios col rei de Llión y la usurpación de territorios y placies llioneses, como les de Cáceris, Badaxoz o Monfragüe, etc... que de las cuales foi obligáu a renunciar, nun asocediendo lo mesmo pa cola Tierra de Miranda. Pero esiste un fechu na vida de Fonsu I de Pertual que diba a pecuñarizar la formación d'esi estáu, y que los detrautores de la "lhengua" (y al empar combayones de la nación pertuesa) escaecen comenientemente a la hora de mitificar al padre de la so nación, atribuyéndo-y erróniamente la frase;

"La mio patria ye la llingua pertuesa".

Fonsu I yera fíu de dos llioneses, el Conde de Purtucale, Enrique de Borgoña (nacíu n'Astorga) y de la infanta Teresa de Llión (fía ilexítima de Fonsu VI de Llión). N'otres pallabres, el rei al que tába-y reclamiando la independencia, nun yera otru que'l so propiu primu, y daquella, tanto como los sos pas, ayes, y tola corte llionesa xunto al nuevu rei de Pertual falaben llionés, o lo que güei dellos llamen mirandés.

Asinamesmo, foi educáu por Don Egas Moniç na rexón de Lamego, onde falábase gallegu-pertués, polo que tamién domeñaba esta llingua, lo que nun quier dicir qu'escaeciera la otra, como bien amosó en Zamora al dirixise en llionés a los sos familiares.

En definitiva, Fonsu Enriquez coñocía a la perfeición les dos llingües del reinu que fundó, polo que dambes pueden coxitase como "llingües fundadores".
Esta ye la razón pola que los más de los mirandeses siéntense dafechu pertueses y poro, nun esiste na Tierra de Miranda movimientu independentista o rexonalista de gran trescendencia.

A lo llargo los sieglos el pertués y el mirandés foren evolucionando, fasta qu'alrodiu'l sieglu XVI entama una "aportuguesación" y progresiva influyencia'l pertués so la "lhengua". Los mirandeses escaecieren el so pasáu llionés, y el so idioma pasó a ser dispreciáu y ninguniáu como un falaxe "charru" o "cazurru" fasta que en 1885, el llingüista Leite de Vasconcelos asoleya "Flores Mirandesas", sacando a la lluz la llingua mirandesa.

En 1906, Menéndez Pidal englóbala dientro'l tueru astur-llionés na so obra "El dialecto Leonés", pero tres munchos otros años d'estudios y esfuercios entama la so normalización en 1995 (emplegando la grafía pertuesa).
La so oficialidá allegó'l 29 de xineru de 1999 per parte l'Asambleya de la República Pertuesa énte'l fervor y la gayola de los mirandeses.

La importancia de ser una de les "llingües fundadores" y la so reconocencia como llingua oficial foi relativo. Relativo perque'l pueblu caltuvo'l so falaxe fasta los nuesos díes ensin avíu de naide, ensin que l 'Estáu pertués invirtiera n'elli. Güei los más de los falantes son mayores d'edá, y ente los falantes de les nueves xeneraciones la so presencia a lo llargo la vida de cutio ye circunstancial, nun ye rialmente emplegada como llingua de tresmisión y entellocución dala. Un allugamientu mui malu pa un idioma que nun falen más de 8.000 presones.

¿Una preba más de que les naciones culturales precisen duna nación política propia pal so caltenimientu?

"Apúrrovos un mui interesante documental na canal d'Hestoria (en pertués) dixebráu en 7 estayes."

Otra vuelta, los castellanistes van de guais.

2009-01-27T07:44:00.000-08:00

Sentí la selmana pasada nel programa de Radio Sele, Ixuxú (venceyada con Fai) la entrevista a un tal Carlitos, de Yesca. Podríen entrevistar a los aragonesistes, baskistes, cantabristes, cartaxenistes, pero non... Nun sé qué meza d'alcohol y drogues-yos llevo a tal atropiellu cognitivu. Quiciabes l'ardicia por meter nel barbuyu programa, a fuercia d’emburriones, toa frasca d’entrevistes y charres con organizaciones independentistes o nacionaliegues que tienen como finxu cimeru reivindicar el falaxe, la llingua y cultura popular, quiciás pa facer ver lo bien arreyaos que tán nel mundín del internacionalismu. Tou dignu d’aplaudir, eso sí.

Vamos ver lo que mos diz Carlitos:

“Blablbalabla….Yesca ye una organización que nagua pola xunidá de Castiella…blablabla…”anque nun ñegamos la nuesa collaboración entenacional pa con otros pueblos del Estáu Español...blablabla….y el nuesu ámbetu territorial ye Castiella la Vieya, Cantabria, La Rioh.a , Castiella-La Mancha, blablabla...y el Reinu de Llión…”

La xunidá de Castiella Cartlitos, ta mui bien, ta como dios Carlitos, pero...Cantabria y Llión….Ye como decir: “Nós los escoceses reivindicamos la xunidá d’Escocia, colos territorios d’Inglaterra y Gales”. Vamos ver Carlitos, yá sabemos toos qu'a los tos ventimunchos años les tases d'afiliación a Yesca páguenteles los tos pás, con quieni seguramente vivirás. Pero yá que nun trabayes, nun perque teas en paru pola crisis (tan horrible pa tí), ensinón perque de xuro que sedrá daqué enforma duru y extresante pa la to manicura, podríes aprofitar esi avagu pa estudiar, pa estudiar un poco d'hestoria más que nada. Pa ver nes hemeroteques o n'Internet ADSL de Telefónica pagao tamién polos tos pás (nun como yo y munchos otros afortunaos tocaos pola divina mán del WIFI del vecín) per qué fuxeron los rioh.anos o los cántabros de los cerialistes de Valladolid, o perqué nun cuntaren coles provincies llioneses pela formación d'esi enxendru de comunidá, anexonándoles per aciu dún Rial Decretu. ¿Cantabria castellana dicís? “¡La que más, que el castellano nació en Cantabria! blablabla…que ñaciera nún valle (Valderredible) d'influyencies bárdules nun significa que ñaciera en Besaya o nel Pas, sitios onde tendríes de t'averar (ya que pues permitítelo) pa sentir si ellí fálase castellanu…En fin….Si queréis mar ponéivos a mexar…

Otra cosa que ye como p’afogalos en Coca Cola ye esi rollu de pueblu oprimíu polos españoles ¿Qué ye oprimir a un pueblu? Añapar la so identidá, desaniciar la so llingua y cultura en pro de la del invasor…pero, ¿Entós quieni invadió a los castellanos?

Yo sí sé quieni invadió a los llioneses, a los gallegos, a los asturianos, a los catalanes, a los…

Ye como si agora los ingleses-yos dicen a los galeses y a los escoceses cuánto malos son los “británicos” que-yos imponen la llingua y la cultura…

Ún de los llocutores de Fai entruga poles llingües que coxiten como propies de Castiella….Carlitos menta'l fechu de qu'ellos nun quieren que'l falaxe de Madrid o de Burgos seya despreciáu polo que les asambleyes rialícense na variante del llugar. Al empar, nagüen por aparar la pérdiga léxicu-gramatical del castellanu. Vamos ver el cultu y prestixosu dialeutu madrilán: “Ejque claro, le dije a la esta que me diera el ejte…el boli, y como no me le dio, la pegué una ojtia…” Que bello…¡qué conservador y enchido de cultura!

Tuvo qu’atociar. Dexándo-y claro que-y entrugaba pola so postura respeutu pa col llionés, a lo que retrucó (nún tonu que paecía que taba camentando “a si ye verdá, qu'eso tamién esiste”)

“Que muches naciones cuntan con más duna llingua y que nun xenera problemática dala” Referiríase a les naciones politiques, perque nun hai naciónes culturales con dos llingües, eso implica necesariamente dos naciones culturales….Y en tou casu exemplos de naciones polítiques con dos o más naciones culturales/llingües podemos poner a Bélxica, a España, a Francia, onde nun hai enterrios llingüístico-culturales…¿Acuei?

Arriendes d'ello, Carlitos nun ponía torgues (sigún elli taba d'atroxu) cola defensa y recuperación de la llingua llionesa. Eso ye daqué que toos somos a adicar, que los cursos de llionés impártenlos los castellanistes y l'apueste pola llingüa cismontana ye una prioridá pa Yesca, ye nidio...

Lluéu-y entruguen sobro “¿Una comida tradicional? “Una sopa castellana” (caro, la sopa d’ayu namái esiste en Castiella. Agora a les pataques asaes vamos llamales pataques asturianes…) “¿Una ciodá que nun te pues perder? “Salamanca” (Caro, caro, por eso’l fueru de Salamanca ta escritu en llionés, perque ye una ciodá castellana).

Lo pior foi la carencia de crítica na entrevista por parte de los llocutores d'Ixuxú que dexaba a ésta como una fueya en blancu de dogmes valeros. A la fin, entrevistar a los castellanistas m'abultó como una tortura a la sencia. Lo que sí qu'hai d'aloyar ye la evolución (pa bien) que toviere'l programa de Fai dende unos cuantos episodios atrás. Agora la coherencia nes seiciones, el nivel llingüísticu, y la calidá de les entrevistes y demás faise más patente.

Por últimu, nun se pue ñegar el llabor social que fai Yesca, el poder de convocatoria antifascista y anticapitlista, pero...¿Puede concedese drechos y llibertaes a un pueblu que-y los ñega a otru?

*Podéis sentir la mentada entrevista equí:

La que va de prota

2009-01-26T17:40:00.000-08:00

Tanta moralidá como conocencia...

2009-01-22T06:35:00.000-08:00

Video de l'Aición énte la convocatoria hipócrita del PSOE

2009-01-16T14:01:00.000-08:00

Video de la manifestación por Palestina del sábadu 11 n'Uviéu

2009-01-15T12:56:00.000-08:00

Ta dixebráu en tres estayes

Alderique 17 de xineru

2009-01-13T16:49:00.001-08:00

Uxente: Concentración, xueves 8 de xineru en Xixón escontra'l xenocidiu palestín

2009-01-07T15:45:00.000-08:00

Xueves 8 de Xineru, a les 20 hores na Plaza'l Parchí. Convoca:

Comité en Solidaridad con la Causa Árabe

Video de la manifestación en sofitu a Fer

2009-01-05T20:39:00.001-08:00

Ésti nun trái inciensu nin regalos, nin siquier llancia carambelos...

2009-01-05T04:34:00.000-08:00

Y pa enriba d'ello los camellos somos nós, asina tamos, gorrumbos dafechu...

Urxente: Concentración en Xixón el Domingu 4 de Xineru.

2009-01-04T06:48:00.000-08:00

Énte la nueva fase de la ofensiva sionista, col entamu de los ataques terrestres so territoriu Palestín, güei domingu 4 de Xineru aconcéyase una concentración na Plaza'l Parchís a les 20:00h.

Sábadu 3 de Xineru en Xixón

2008-12-30T16:54:00.000-08:00

Terroristes

2008-12-29T13:28:00.001-08:00

Martes 30 a les 12:00 hores énte la Xunta Xeneral d'Asturies.

Convoca: Comité de Solidaridá cola Causa Árabe

Más maniqueísmu en Telecinco

2008-12-23T16:44:00.000-08:00

Entamaren con dellos videos sobro drogues, prostitución infantil, etc...Agora tóca-y la breda a los movimientos sociales d'esquierdes. Estes imáxenes correspuenden a les dún reportaxe emitíu por Telecinco, demientres el 11 d'avientu dientro'l marcu de les protestes de solidaridá con Grecia, sobro la supuesta violencia de les "bandes" d'antifascistes que, por mor de ser (los periodistes) descobiertos pola xente del CSO 1924 de Madrid nun percanciaron completar el reportaxe.

http://www.nodo50.org/antifa/
http://theplatform.nuevaradio.org/

Feliz Navidad, súbditos¡

2008-12-20T03:47:00.000-08:00

¿Per qué nun se siente? Pol barullu la fartura.....

2008-12-18T11:21:00.000-08:00

Per ónde pueden metese solidariamente'l boli....Aldovínalo Elenina

2008-12-15T04:53:00.000-08:00

El bolígrafu solidariu, patrocináu pola Cá Rial per aciu la Infanta Elena. Cuesta 5 euros, y sigún la organización, "Un Juguete una Ilusión" toó destinarase pa financiar ONG y costruyir centros d'educación y la puta so madre, toó mui guapo, pero....¿qué ONG?

Chái un güeyu a esti recorte de la so páxina ueb, equí teo endiciáu los países receutores d'estos fondos por parte la "ONG" "Mensajeros de la Paz". Agora despaladínovos perqué.

¿Albidráis quieni ye la presidente d'honor d'esta "ONG"? Sí, Ana Botella, la muyer del nuesu estimáu ex-presidente. Pero lo meyor nun ye eso, el presidente fundador y en funciones ye el Padre Ángel García, el mesmu qu'añalmente cellebra les mises de los cabudaños de FRANCO, de José Antonio Primo de Rivera, fundador de Falanxe, de Luis Carreros Blaco y el que nun podía faltar, José María Escrivá de Balaguer, fundador del Opus Dei. Si queréis agüeyar más mierda embaxo l'alfombra namái adicái esti artículu:

"Mensajeros de la Paz" es una ONG que dirige el sacerdote responsable de una Fundación del PP

¿Más coses? Sí, nidio que sí...Como por exemplu la sentencia dún Xulgáu d'Albacete qu'obligaba a esta ONG a readmitir a dos trabayadores pol simple fechu d'aniciar unes elleiciones pa escoyer un delegáu sindical. El drechu a sindicase ye daqué que'l Padre Ángel prohíbe a los sos trabayadores nun sólo equí, ensinón nos países Iberoamericanos onde "collabora". Asina como que nun paga nin les hores extres, nin permite vacancies, etc...una ayalga d'ONG vamos...

Tamién ye de solliñar les denuncies que tienen por retención de menores ¿Per qué? Cenciello, mientres tean "aidando" a los neños siguirán recibiendo sobenciones.

Llueu dirán na so ueb que son apolíticos y alloñaos de toa ideoloxía o partíu políticu. Yá veo, como la Cá Rial...Va mundiu más enllenu puxarra....

Déxovos cola sorrisa oligofrénica de la nuesa Infanta.

PD: Prohibíu masturbase, que llueu hai que-y lo confesar al cura.

Salú xermanos.

Comunicáu de los collacios del xoven asasináu Alexandros

2008-12-13T12:18:00.000-08:00

Naguamos por un mundiu meyor. Aidainos.

Nun somos terroristes, “encapuchaos”, “gnostoi-agnostoi”*
Somos los vuesos fíos.
Ellos, "oi gnostoi-agnostoi"…
Habemos enfotu – nun aparéis el nuesu enfotu.

Renembrái. Una vegada tamién vós fuisteis mozos.
Agora persiguís el dineru, esmolecéis namái pol “escaparate”,
Engordeciérais, quedáreis calvos, escaeciérais.
Esperábemos que mos sofitareis, esperábemos que vos interesárais, que mos fexéreis sentir arguyosos por una vegada...Devanéu.

Vivís vides de mentira, engorguzáreis, baxáreis los pantalones y esperáis el día en que morreréis.
Nun maxináis, Nun vos namoráis, nun criyáis.
Namái vendéis y mercáis.
Lo material per dayuri. Amor per nenyuri. Verdá per nenyuri.
¿Áu tán los pas?
¿Áu tán los artistes?
¿Per qué nun salen a la cai?
Aidainos a nós los fíos.

PS: Nun mos llanciéis más gases lacrimóxenos.
Yá lloramos nós pola nuesa cuenta.

*”Oi gnostoi agnostoi” ye una espresión que la sociedá griega y sobremanera los medios de comunicación afayaren pa encartichar los mesmos gurupos de xóvenes que de cutio provoquen boréu na ciodá. La torna lliteral ye “los conocíos-desconocíos” y nómense asina perque lleven capirote y nun ye de xuru pero hai mermurios sobro que la policía conócelos y nun los prinda perque son axentes provocadores de la mesma policía.

Llatinoamérica "esa gran nación"

2008-11-21T01:32:00.000-08:00

Neños esfarrapaos, sucios, andinocaribeños, probetayos, trabayando en vertederos o picando piedra les 27 hores del día y pa más INRI dellos analfabetos qu'entá nun falen bien la tan entenacional y prestixosa llingua "ejpañola" (d'Ejpaña").

Ye esa típica imaxe de "Llatinoamérica" que yes a alcontrar en toles ONG baxo'l nome "Llatinoamérica".

Un asasináu nel xornal...parez que lu mató un home de nacionalidá "Llatinoamericana".
Vaya, nun dixeron la nacionalidá del porteru discoteca que recientemente mató a un tal Álvaro Ussía...

Chávez, Morales, Correa, toa esa gandaya medio indíxena que gobiernen países enllenos de delincuencia ya incultura, llueu vien lo que mos vien a Ejpaña, bono como nel restu de "Llatinoamérica".

Nos telediarios sal que detuvieron a una banda de perigrosos atracadores "Llatino/Sudamericanos". Nun importa de qué país, eso nun ye lo importante, toos ellí, en "llatinoamérica", son de la mesma nación, del mesmu país.

N'Europa, les coses son diferentes; tamos nós, Francia, Inglaterra, Italia, Alamania, etc...y llueu tán los d'Europa del Este, y nesi país tán mecíes les bandes d'AlbanoKosavares, Rumanos, Polacos...ehm...Rumanos, Albanos....bono, muncha xente mala que mos vien a robar a casa.

Nun sé nin onde coyones ta Bolivia o Venezuela, pero hai d'odialos, perque'l telediariu diz que los sos presidentes son andinoscaribeños sabrosón que nun fain otra cosa que dicir babayaes, insultar al rei y nacionalizar les nueses empreses, que son nueses, nun d'ellos...¿O piensen que pueden españar los sos propios recursos ensin que nós (bono les nueses emperiales y benéfiques empreses como REPSOL) metanos el focicu. ¿Y qué más me da que la sida pola que les nueses empreses tean ellí ganándose la vida seya que ficieran tratos fraudolentos colos "caziques" qu'enantes humildamente gobernaben nesos páises?

Eso sí, si n'Ejpaña o EEXX nacionalizamos daqué, hai d'aplaudir al unísonu ¡qué gran idega!

Yo soi un ejpañol (mui arguyosu) que nun ye racista o xenófobu colos inmigrantes "Llatinoamericanos" anque yá podríen quedase nel so putu país, perque caro, los ejpañoles enxamás emigramos pa nenyuri (como muncho colizamos, conquistamos, esclavizamos...bono, bono resumiendo, trayímos-yos l'ejpañol y la civilización).

"Llatinoamérica" ye un país tropical, y como vego muncho el telediariu, sélo toó sobro elli.

Sé por exemplu que n'Uruguay son toos medioindíxenes andinocaribeños sabrosón, hai muncha probeza y delincuencia (manque seyan toos europeos, heba clima templáu, tengan pagáu la delda esterna...) y debe paecese muncho a Paraguay (deben ser xermanos o dalgo).

Los arxentinos son los más bonos de toos, perque nun parecen tan indíxenes y baillen tangu y tomen mate (nun como n'Uruguay), qué grande Galdell...qué arxentinu (manque nun ñaciera ellí)...D'Arxentina conozo munches coses y llugares como Buenos Aires, las Malvinas....ehm...Buenos Aires...

De Chile nun sé muncho agora que lu pienso...¿Ta prieto México non? Como fain la salsa picante esa, bono...Debe ser otru país tropical más enllenu Ñetes y Latinkin d'esos...

De Cuba nin falemos, que ta toó enllenu de prostitución infantil (sélo perque vi un documental en Telecinco mui fiyable y oficial) y son toos comunistes, manque faigan ron y puros.

Sé que Colombia, por exemplu, fain muncho café y cocaína ¿Ye ehí onde gobierna Chávez...non? Sicasí el so presidente debe ser un roxu comunista d'esos....Bono, sé que les FARC son mui males, magar que nun sepia nin de qué van.

Toi camentando que como les demás provincies de Llatinoamérica nun tienen presidentes (sólo Bolivia, Ecuador y Colombia-Venezuela) nós, los ejpañoles, podríemos tornar pa goberna-yos. Podríemos entamar a mandar aida humanitario a países con fame pa que vaigan fiyándose de nós.

L'otru día merqué'l boli solidariu (patrocináu pola infanta Elena, casa rial and company) ¡Qué gran idega! De los 3 euros que cuesta, 2 van p'aida a ONGs d'África y "Llatinoamérica" como por exemplu "Mensajeros de la Paz", manque toi estrañáu de que nun dixeran que la presidenta d'honor ye Ana Botella (la illustre muyer del illustrísimu ex-presidente Aznar) . Tampoco dixeron que'l fundador y presidente ye El Padre Ángel qu'añalmente cellebra les mises y cabudaños de la muerte del ditador, de José Antonio Primo de Rivera, de Luis Carrero Blanco, el so almiráu proteutor; y como non, del beatu José María Escrivá de Balaguer, fundador del Opus Dei y santu devotu del Padre Ángel.

Por ciertu pa dedicase a l'aida humanitario tien unes cuentes mui saneaes, tou gracies al negociu de Dios.

Lo bono de Mensajeros de la Paz ye que nun permite a los sos trabayadores el drechu a sindicase (pos son xustamente dispidíos o represaliaos), nin-yos paguen les hores extres nin permite vacancies, etc...(vamos oh, falaba eso). Pa encima d'ello dicen que trabayen en plena precariedá (por dios en "Llatinoamérica" ¿qué esperen?).

Tan mui bien xestionando la miseria, pos viven de les aides que-yos manden por eso, asina que retienen a los neños que deberíen tar yá -aidaos- pa que nun se-yos acabe'l chiringu. Pesie ser tan bonos, dellos infieles y malñacíos-yos entepunxieren milenta denuncies, magar que pola gracia de Dios nenguna vistigacción punxiérase en marcha.

Otra cosa cola que sedréis a collaborar ye PRONIÑO de la Fundación Telefónica (sí d'esos que nun permiten espublizar coses sobro les manifestaciones de los sos trabayadores inda siendo 3000 y curtien la Gran Vía, sólo faltaba face-yos publicidá...). Tienen tantos millonarios proyeutos en países tan probes y onde hai tanto por facer como Uruguay (collaborando feblemente con Gurises Unidos escontra'l "trabayu infantil" con una cifra menor que n'Ejpaña y por supuestu menor qu'en munchos otros países averaos)...raro que nun lo ficieran asina pa con Paraguay o BOLIVIA (entiéndolo perque con tanta deluncuencia y corrupción político ye normal). Lo que m'entrugo ye onde guarden les perres hasta entóncenes con tan bona voluntá. Estos de Telefónica...qué coral más puru, patrióticu y desinteresáu.

Bono, marcho perque teo partíu de Padel colos collacios de la parroquia, déxovos, esos sí, unos enllaces:

Mensajeros de la paz

PRONIÑO

http://barcelona.indymedia.org/newswire/display_any/72941

Mesajeros de la paz es una ONG que dirige un padreresponsable de...

Toledo, la meca les coses friquis...

2008-11-18T05:34:00.000-08:00

Ablucante lo que yes a ver pela Ciodá Emperial...

EEXX o como diz el refrán; embaxo la manta lo mesmo da prieta que blanca...

2008-11-05T00:58:00.000-08:00

Chando un güeyu en Kaos en la red atopé un artículu que resume perbien el perqué nun va suponer, la elleición de Barack Obama, cambéu dalu de la política xeneral yanki. Apúrrovos-lo equí:

"Equí un breve llistáu de midíes que braeramente empobinaríen hacia cambéos cualitativos, hacia l'ardiciada “New Age” :

a) Un seguru social y de salú pa toes y toos;

b) Abolición de la pena de muerte;

c) Ratificación del Protocolu de Kyoto sobro l'amenorgamientu de les emisiones de CO2; ch) Esame críticu del Estáu policíacu que, espiando la vida de los otros, recueye datos presonales y ficha- sistemática y burocráticamente- a críticos, opositores y sospechosos;

d) Control y llimitaciones de les autividaes de la CIA -dientro y fuera'l país-, asina como del Department of Homeland Security, DHS / Ministeriu pa la Seguridá de la Patria;

e) Esame de les funciones y atribuciones, siempres nel marcu de la Costitución, del Automated Targeting System, ATS y de la Patriotic Act;

f) Refugue al lobbysmu armamentista y control de los gurupos proclives al entevencionismu militar escontra Irán;

g) Final de la guerra illegal nel Cercanu Oriente y retiru de les algares d'Irak y Afganistán;

h) Amenorgamientu del escomanáu presupuestu militar;

i) Ratificación del “Estatutu de Roma” pa la escorribanda y sanción de delitos per aciu'l Tribunal Penal Entenacional na Haya EScontra crímenes de la Humanidá;

l) Cancelar la “inmunidá” (?) de los soldaos norteamericanos fronte a esi Estatutu y al Tribunal;

n) Desixencia a Israel pal acatamientu de les vieyes y actuales resoluciones de la ONU a la escontra de los asentamientos xudíos so territoriu palestín;

ñ) Tematizar nes Naciones Xuníes, en pro de la paz nel Cercanu Oriente, la necesidá de reconocer el drechu al retornu de los palestinos espulsaos del so territoriu, asina como la imperiosa obligación d'Israel pa pagar indemnización material polos males y daños causaos;

m) Control o prohibición de la posesión d'armes a lo qu'opónese dafechu la National Rifle Association, NRA;

o) Prohibición de la produción, de la venta y del emplegu de les bombes-recimbu;

p) Suspensión o fin del embargu escontra la República Socialista de Cuba;

q) Impedimentu de los planes de desestablización política y social en Venezuela y Bolivia;

r) Pieslle del Centru de Reclusión de Guantánamo y reconocencia de los sos acupantes como prisioneros con drechu a un procedimientu xurídicu y patrociniu llegal;

s) Revisión del contratu con Polonia sobro la istalación d'un sistema d'entecedimientu de cohetes so'l so territoriu qu'inquieta a Rusia;

t) Suspensión de los planes y de les mariaxes cola República Checa pa la istalación d'un sistema de radares que reviven los años de la Guerra Friya, promueven una carrera armamentista y pueden ocasionar un enterriu nuclear."

Quiciabes faltáron-y dos puntos que yá los enanto yo:

u) Condonación de la delda esterna a Llatinoamérica, conderga a los ñembros de la CIA cuyos planes istauraron rexímenes neo-fascistes que propiciaren l'aducimientu de la mentada delda arriendes de xenocidios y ecorribandes polítiques.

x) Reconocencia de los drechos de los indíxenes nos EEXX.

Pero en fin....suañar ye barato...

Plan Bolonia, o como terminar de privatizar la Universidá

2008-11-03T00:34:00.000-08:00

¿Daquién sabe qué ye'l Plan Bolonia? La verdá, pa ser un plan tan "européu", tan "progresista", tan "modernu". El gobiernu nun destinara munches perres (nin un céntimu) a campañes (que son nules) pal so espurrimientu pesie a que va ser un cambéu escomanáu de la mentalidá educativo nel Estáu. Poco o nada sábese del asuntu, y a cualisquier que-y entrugues la reaición que más esperes ye qu'encueya los costazos. La bisarma Bolonia allégase a boriaes pa golsianos col so fluyíu eutoplásmicu, un llobu con pelleya reciellu.

Déxovos un estrautu de los prencipales puntos del mentáu Plan ufríu na páxina del Movimientu non a Bolonia

"
¿Qué ye'l Procesu de Bolonia?

El Procesu o Declaración de Bolonia ye'l nome que se-y da a la firma de los ministros d'educación de la Xunión Europea del Espaciu Européu d'Educación Soperior (EEES) en 1999 (Bolonia, Italia), que sinificó l'entamu'l llamáu Procesu de Converxencia Europea. El EEES acaba col modelu d'Universidá d'anguañu pos, per aciu Riales Decretos nel Estáu Español, desaniacien Diplomatures y Llicenciatures, creyándose los nuevos Graos y Posgraos (Máster y Doctoráu). Nún entamu podría abultar positiva la esistencia d'un espaciu universitariu único a nivel européu, de móu que...

¿Per qué Non a Bolonia?

- Dexarán d'esistir les Beques tal y como les conocemosapruciendo les llamaes Beques-Préstamu (préstamos bancarios a devolver con intereses), ye dicir, que tendremos de pidir préstamos bancarios pa rializar el nuesu Grau o Posgrau. ¡Ya nun sedrán precisos pisos o coches pa tener hipoteca!

- De los cuatro años de duración del Grau, sigún el llamáu Eurocrédito, o ECTS (European Credit Transfer System), namái añu y mediu sedrá de formación específica arreyada cola titulación, perdiéndose les atribuciones profesionales qu'anguañu garanticen Diplomatures y Llicenciatures, reduciendo les posibilidades d'acesu a un mercáu llaboral de calidá.

- El ECTS cincará la obligatoriedá de trabayu per unes 40 horas selmanales, de les cuales namái 10 sedrán lleutivas, y el restu repartiránse ente seminarios, trabayos en gurupu, etc, lo qu'imposibilitará compaxinar l'estudiu universitariu col trabayu (condición imprescindible pa munchos), apruciendo lo que viniérase en llamar la "Xornada Estudiantil".

- El Grau servirá d'entamu y adautación al mercáu llaboral, y sedrá comparable a la FP d'anguañu, siendo orientáu al exerciciu d'autividades profesionales, y a la fabricación, de trabayadores precarios, qu'obtendrán una formación xeneral, básica, y poco especializada, y que veránse sometíos a les desixencies de movilidá en territoriu européu que les empreses requieren.

- Pa obtener el Grau, sedrán precises práutiques d'un añu n'empreses o istituciones, lo que tórnase nún añu de trabayu nun remuneráu pa poder aceder al títulu.

- Pa recibir una educación cimera de mayor calidá, sedrá precisu pagar un Posgrau, de cálter elitista al ser los sos precios ente 3 y 6 vegaes cimeros a los de les carreres universitaries d'anguañu, y de cuasi tres vegaes el de los Graos. El preciu de dambos ciclos cincarase esclusivamente en base a al so coste, ensin tener en cuenta la capacidá económico de la ciudadanía p'aceder a los mesmos.

- Sedrá la llamada Axencia Nacional d'Evaluación de la Calidá y Acreditación (ANECA), guiada por criterios de rentabilidá y atendiendo a intereses empresariales, la que decidirá qué carreres podranse o non estudiar. La Universidá Pública dexará de ser el llugar del conocimientu, de toos y pa toos, pa pasar a tar al serviciu de las grandes empreses, atendiendo únicamente a les sos demandes. Sigún l'informe económicu nesta materia del Comité de Coordinación Universitariu, les tases d'ineficiencia son, n'Humanidaes d'un 37%, en Ciencies Sociales y Xurídiques d'un 41,2%, en Ciencies Esperimentales del 41,6%, nes Téuniques del 46,3%, y en Ciencies de la Salú del 25,6%, ¿Áu fincarán carreres con poca demanda, que nun producen más que conocimientu?

- Les lleis reguladores d'esti procesu nel Estáu Español, síguense aprebando ensin un indispensable debate públicu onde se sienten les voces d'estudiantes, profesores universitarios y, sobremanera, de la ciudadanía. Un procesu como ésti, que provocará un cambéu radical nel nuesu sistema educativu, nun puede realizrse per aciu la decisión impositiva de los dirixentes de la Xunión Europea.

- La Universidá sedrá concebida como una empresa, produtora de beneficios, como un negociu más del seutor servicios, convirtiendo asina al conocimientu en mercancía, y a los alumnos en clientes.

- La vistigación científica nes universidaes dexará de tar guiada por un espíritu humán de soperación y solidaridá ermuna, y pasará a talo por criterios estriutamente empresariales y de rentabilidá económico.

- Como consecuencia de tou ello, acentuaranse les diferencies sociales ente quienes puedan y non pagar l'acesu a una educación cimero col Posgrau (destináu a obtener una mayor cualificación y especialización). Bolonia ye retroceder a los años 40, Bolonia ye xenerar desigualdá.

- L'oxetivu de Bolonia nun ye la meyora educativo, ensinón la obtención de mayores beneficios económicos empresariales. Pa quienes boguen el Procesu, si la cultura y el desenrollu humán nun son rentables, nun deben ser potenciaos.
"

Video 12 d'Ochobre

2008-10-16T11:27:00.000-07:00