Habari TV

Mtoto wa Aunt Ezekiel awa kivutio shuleni

2016-06-24T01:39:00.001-07:00

Aunt Ezekiel na mwanaye Cookie.

Na Imelda Mtema

MTOTO wa staa wa filamu Bongo, Aunt Ezekiel, Cookie amegeuka kivutio baada ya kufikishwa kwenye Shule ya LJAY BUSY BEES iliyopo maeneo ya Leaders Club, Kinondoni jijini Dar.

Cookie.

Cookie mwenye umri wa mwaka mmoja na siku 30 amefikishwa kwenye shule hiyo hivi karibuni kuanza masomo yake ambapo siku ya kwanza akiwa na mama yake aligeuka kivutio kwa walimu na wanafunzi wenzake huku akionekana mwenye uelewa mkubwa wa mambo.

“Cookie tumeona akulie kwenye mazingira ya shule, tumekubaliana na baba yake (Moze Iyobo) aanze shule tukiamini itakuwa na faida. Ana umri mdogo lakini anaonekana kuwa na uelewa mkubwa wa mambo hadi walimu wanamshangaa. Mungu amsaidie kwenye masomo yake,” alisema Aunt.

Johari aanika wa kumpa penzi lake

2016-06-24T01:24:00.000-07:00

IMELDA MTEMA, Amani Dar es Salaam: Mwigizaji wa kitambo kunako Bongo Movies, Blandina Chagula ‘Johari’ ameweka wazi kuwa, ni bora ajihusishe na uhusiano wa kimapenzi na mwanaume ‘kapuku’ (asiye tajiri wala maarufu) kuliko kutoa penzi lake kwa staa yeyote wa Kibongo kwa sababu wengi wao ni ‘michosho’. Johari (pichani) aliliambia Amani hivi karibuni kwamba, kwa upande wake, hivi sasa kutoka na msanii au mtu maarufu ni kujidhalilisha na kujivua nguo kwa sababu anajua tabia za mastaa wengi wa Kibongo kuwa hawana mapenzi ya kweli na zaidi sana ni pasua kichwa.

“Nimejifunza mengi kuhusu kujihusisha na mapenzi na mastaa. Sasa hivi siwezi na ni bora nimpe penzi langu hata kapuku, najua wazi atalithamini na si staa maana ataniaibisha bure,” alisema Johari na kuongeza:

“Katika maisha yangu nimejifunza mambo mengi sana ikiwemo kuumizwa hivyo kwa sasa nahitaji pumziko la moyo na siyo karaha ya wanaume wasiokuwa waaminifu kama walivyo wanaume wengi mastaa.

“Unajua mastaa wengi wanaume wanajijua ni watu wenye uwezo wa kuwa na yeyote hivyo hutumia nafasi huyo kuliza wapenzi wao jambo ambalo kwa mimi nasema nilishalitambua na sihitaji kulia jamanis. ”

Johari aliwahi kudaiwa kuwa na uhusiano wa kimapenzi na mwigizaji ambaye ni mkurugenzi mwenzake kwenye kampuni yao ya RJ Production, Vincent Kigosi ‘Ray’ lakini katika mazungumzo yake hakufunguka kama anamzungumzia jamaa huyo ambaye kwa sasa moyo wake umetua kwa ‘ndege mnana’ mwingine wa Bongo Movies, Chuchu Hans.

Lakini mbali na Johari, mastaa wengi wa kike wamekuwa wakilalamikia kulizwa katika uhusiano na mastaa wa kiume kuliko wao wanaume kulizwa na wanawake mastaa.

Aidha, ndoa nyingi za mastaa kwa mastaa zimekuwa hazifiki mbali na kuvunjika kuliko ndoa za mastaa na wenza wao wakiwa ni watu wa kawaida.

Mpaka sasa, staa mwingine ambaye analia ndoa yake kuvunjika kwa kuolewa na staa ni Salome Urassa ‘Thea’ ambaye ndoa yake na staa nwenzake, Michael Sangu ‘Mike’ imevunjika huku mwanaume huyo akitangaza kuoa tena hivi karibuni.

Uhusiano mwingine ambao haukudumu ni wa Mbongo Fleva, Nasibu Abdul ‘Diamond’ na Wema Sepetu achilia mbali Jokate na Alikiba.

Alichokisema Askari Anayetuhumiwa Kumuua Mwangosi

2016-06-24T01:15:00.000-07:00

Mtuhumiwa wa mauaji ya aliyekuwa mwandishi wa habari wa Chanel Ten mkoani hapa, Daudi Mwangosi, Pacificus Simoni ametoa ushahidi wake mbele ya mahakama na kuieleza kuwa alilazimishwa kusaini ungamo mbele ya mlinzi wa amani bila kujua nini kilichoandikwa.

Alidai kuwa baada ya kutoka kuhojiwa kwa Kamanda wa Polisi wa Mkoa (RPC) na Ofisa wa Makosa ya Jinai ya Mkoa (RCO), akifananishwa na picha ya gazeti la Mwananchi la Septemba 3, 2012 alipokana siyo yeye, alipelekwa kwenda kufanya ungamo kwa mlinzi wa amani, Frola Mhelela ambaye alikuwa shahidi namba tatu.

Alidai wakati anakwenda kwa mlinzi wa amani alisindikizwa na Staff Sajent Erick, ambaye alikuwa ameshika bahasha na kumkabidhi kwa mlinzi huyo. Mtuhumiwa huyo alidai mlinzi huyo alitoa karatasi na kuisoma kisha baadaye alimuambia aisaini, naye bila kuhoji alisaini ile karatasi kwa sababu ilitoka kwa kiongozi wake ambaye ni RCO, Nyegesa Wankyo.

Katika kesi hiyo wakili wa utetezi, Rwezaura Kaijage aliiomba Mahakama kwamba mawakili wa upande wa Jamhuri wataleta majumuisho ya mwisho leo.

Hata hivyo, upande wa jamhuri ambao uliongozwa na wakili Sunday Hyera, ulisema hawana pingamizi lolote juu ya upande wa utetezi baada ya kukaa na kukubalina kwa pande zote mbili saa nane mchana watawasilisha majumuisho hayo.

Jaji wa Mahakama Kuu Kanda ya Iringa, Dk Paulo Kihwelo alisema Mahakama imekubali ombi la wakili wa utetezi kuleta majumuisho, huku Juni 27 wakisikiliza maoni ya wazee wa baraza kwa ajili ya kupanga hukumu.

Baba ajiweka tatoo kufanana na mwanawe aliyefanyiwa upasuaji

2016-06-24T01:08:00.000-07:00

Baba wa miaka 28 nchini Marekani amenyoa kichwa chake na kuweka mchoro wa tatoo unaofanana na kovu la kichwa cha mwanawe aliyefanyiwa upasuaji.

Josh Marshall,ambaye anatoka Kansas aliingia katika shindano la kila mwaka linaloendeshwa na shirika la hisani kuhusu saratani ya watoto na kushinda taji la #BestbaldDad{baba mwenye kipara kizuri} wikendi iliopita.

Akikiri aliandika: Mimi na mwanangu katika hafla ya St. Baldtricks huko Wichita Kansas.

Niliwekwa tatoo ya kovu la mwanangu ili kuimarisha motisha yake.

Shindano hilo huwashirkisha watu wa familia na marafiki wa mtoto aliye na saratani.

Mwanawe alipatikana na uvimbe katika ubongo mnamo mwezi Machi.

''Mwanangu alikuwa na wasiwasi mwingi baada ya kufanyiwa upasuaji,alijihisi kama hayawani'',alisema Josh Marshal.

Jamie Vardy aendelea kubaki Leicester City

2016-06-24T00:43:00.000-07:00

Leicester imesema kuwa mchezaji huyo wa miaka 29 ambaye mabao yake yameisaidia klabu hiyo kushinda taji la ligi ya Uingereza msimu uliopita ameongeza mkataba wa miaka minne na klabu hiyo.

Aidha, uamuzi wa mchezaji huyo utafuta uvumi wa hivi karibuni kuhusu Jamie Vardy kuachana na klabu hiyo na kwenda Arsenal.

Vardy alitarajiwa kununuliwa na klabu ya Arsenal kwa kitita cha pauni milioni 20 kabla ya kuanza kwa michuano ya Euro 2016.

Chanzo BBC.

Mkataba wa kubadilishana wake watibuka Kenya

2016-06-24T00:13:00.002-07:00

Ndoa ni moja kati ya taasisi muhimu sana za kijamii kote duniani na haswa hapa barani Afrika.

Si aghalabu harusi na ndoa huwa moja kati ya sherehe muhimu katika maisha ya waja.

Hata hivyo nchini Kenya kumetokea kisa kimoja cha kustaajabisha sana.

Wanaume wawili walikubaliana kubadilishana wake baada ya mmoja wao kumfumania mwenziye na mkewe katika ''Mazingira'' tatanishi.

Hata hivyo makubaliano yao yalitibuka majuzi baada ya mume aliyenaswa akichovya asali ya mwenziwe kutishia kutengua mkataba huo kwa sababu ya upweke.

Yamkini bwana Patrick Mangala, 25 ambaye ni mhudumu wa pikipiki za uchukuzi zinazofahamika huko Kakamega Kenya kama 'bodaboda' alimtishia maisha mume wa 'mkewe' kuwa angemtoa uhai iwapo hatamrejeshea mkewe.

Lakini bwana Ernest Anjeche, 42 ambaye tayari alikuwa kesha onja asali ya mke wake ''mbichi'' na mchanga zaidi kwa umri ,amekataa kata kata kurejesha ''kibuyu''.

Anjeche amegundua ubora wa kijana jike huyo Susan.

''Mimi na mwenzangu Mangala tulikubaliana kuwa kwa sababu alikuwa akiiba mke wangu nikiwa nimekwenda kazini heri basi amchukue kabisa waishi naye.

Hata hivyo sifahamu tena kilichotokea kwa sababu yeye ndiye aliyerudi kwangu akimdai Susan eti kuwa mwenzake amemkimbia'' Alisema bawabu wa usiku bw Anjeche.

Anjeche aligundua mkewe alikuwa amesaliti penzi lake na uchunguzi wake ukabaini kuwa mkewe alikuwa akiondoka kila usiku kushiriki ''wizi'' wa mapenzi na kijana huyo.

Mke 'mpya' wa bawabu huyo Susan naye ameganda kama gundi hataki kurudi alikotoka.

“Bwanangu alikuwa anatoka asubuhi akienda kazi atarudi keshoye asubuhi. Nikimuuliza unatoka wapi ananiambia eti natoka kazi,” Susan aliiambia runinga ya NTV.

Tatizo lilitokea baada ya majuma mawili.

Mpenzi wa siri wa mwendesha boda boda huyo mwenye umri wa miaka 25 alimtoroka.

Mangala sasa anamtaka mkewe wa zamani Susan arejee nyumbani.

Anjeche, tayari ameripoti kisa hicho kwa polisi akidai kutishiwa maisha na kuwa Mangala alikuwa ''amekiuka mkataba''

“Lakini huyu amekataa. Amesema hawezi toka hapa, atakaa tu hapa.

''Na mimi nikasema sawa sawa huyo mke aliyenitoroka akija na akubali kukaa hapa kama mke wa pili pia yeye anakaribishwa'' alisema Anjeche.

Uingereza yaamua kujiondoa kwenye EU

2016-06-24T00:04:00.000-07:00

Asilimia kubwa ya raia wa Uingereza wamepiga kura ya maoni wakiitaka ijiondoe kwenye muungano wa bara Ulaya EU.

Huku asilimia kubwa ya kura zikiwa zimekwisha hesabiwa, asilimia 52% ya raia wa Uingereza wamepiga kura ya kumaliza uanachama wa Uingereza ndani ya EU uliodumu miaka 43.

Watu wanaoishi katika mji London na Scotland ndio waliopiga kura kwa wingi kusalia ndani ya muungano huo.

Wandani wa maswala ya afisi ya waziri mkuu bwana David Cameron,wanasema kuwa sasa Britain imeingia katika eneo jipya.

Wadadisi wa maswala ya kisiasa wanahofu athari za kujiondoa kwa Uingereza kwenye muungano huo utabainika katika masoko ya hisa huku kukitarajiwa athari kubwa kiuchumi kisiasa ndani na nje ya bara Ulaya

Sarafu ya Euro imepanda katika masoko ya fedha huku Paundi ya Uingereza ikiendelea kuporomoka ikiwa ni ishara kuwa wafanyabiashara wanatarajia Uingereza kubakia ndani ya Umoja wa Ulaya.

Kwa mujibu wa ripoti waliojitokeza kupiga kura hiyo ya maoni inaonyesha kuwa wengi.

Hadi sasa ni majimbo machache ndio hayametangaza matokeo yao na inaonyesha mchuano ni mkali kati ya wanaotaka kubakia na wale wanaotaka Uingereza kujiondoa ndani ya Umoja huo wa Ulaya.

Alex Msama Amwangukia Mwakyembe Kumuomba Radhi Baada ya Gazeti ya DIRA Analolimiliki Kuchapisha Habari Zenye Utata

2016-06-23T23:52:00.000-07:00

MFANYABIASHARA Alex Msama amemuomba radhi Waziri wa Sheria na Katiba, Dk. Harrison Mwakyembe kufuatia habari mbili zilizochapishwa katika Gazeti la Dira ya Mtanzania analolimiliki.

Akizungumza leo na waandishi wa habari jijini Dar es Salaam, Msama alisema amejiridhisha kuwa habari hiyo iliyobeba kichwa cha habari ‘Utapeli wa Mwakyembe wamwagwa hadharani’ haikufuata misingi ya uandishi wa habari.

Habari nyingine ambayo imeonekana kumchafua Dk Mwakyembe ni ile ya Mwakyembe atuhumiwa kutapeli bilioni 2 ambazo zimemuumiza kiongozi huyo.

Alisema yeye kama mmiliki wa gazeti hilo amesikitishwa na habari hiyo na kwamba hatua ya kwanza anayoichukua ni kumuomba radhi Waziri Mwakyembe.

Msama alisema sambamba na kuomba radhi atamfikishia barua Mwakyembe ya kumtaka radhi kwa tukio hilo.

“Nimesikitishwa na habari hii kwa kuwa haikuzingatia misingi ya uandishi wa habari, ilihukumu na kuonyesha kuwa lengo lake lilikuwa kumharibia jina Waziri Mwakyembe, ninachukua nafasi hii kumuomba radhi nikiwa mmiliki wa gazeti hilo,” alisema Msama.

Aidha Msama alisema hatua nyingine anayochukua ni kumsimamisha kazi mhariri wa gazeti hilo, Mussa Mkama kwa kuwa alishindwa kufanya kazi yake kwa umakini ya kuhakikisha habari anazozipitisha zinafuata misingi ya uandishi wa habari na weledi.

Alisema Mkama alipaswa kuhakikisha anafuata weledi lakini alishindwa kufanya hivyo kwa hiyo anamsimamisha kazi na kwamba hatua nyingine kali za kinidhamu zitafuata.

“Mimi ni mfanyabiashara sijui mambo ya uandishi, nilimuajiri nikiamini atasimamia yale aliyofundishwa chuoni, kwa kuwa ameshindwa inabidi akae pembeni kwanza,” alisisitiza Msama.

Ameahidi kuwa katika Gazeti la Dira ya Mtanzania litakalotoka Juni 27, kwa ukubwa uleule atamuomba radhi Waziri Mwakyembe.

Hivi karibuni Waziri Mwakyembe aliitisha mkutano wa waandishi wa habari mjini Dodoma akilalamikia kuwa habari mbili za gazeti hilo iliyochapishwa na Gazeti la Dira ya Mtanzania la Juni 20 na la Juni 23 mwaka huu zililenga kumchafua na kuahidi kuwa atalishtaki kupitia habari hizo mbili.

Chanzo: Mpekuzi