Hekel Idees

Valentyns Kaartjie

noreply@blogger.com (Unknown) — Thu, 02 Feb 2017 12:35:00 +0000

Valentyns Kaartjie

Met 'n swaaiende arm en groot glimlag groet ek julle liewe vriende en vriendinne! 🙋

Julle wonder seker wat van my geword het want ek hou my lyf maar baie skaars. Daar is 'n spreekwoord wat sê: Goeie goed is skaars! (grappie julle 🙈) Tussen voltyds werk en ouma wees bly daar nie veel tyd oor vir ander dinge nie. Kom ons sê maar net dat die lewe gebeur en ons probeer maar ons beste om by alles uit te kom. Ek is baie dankbaar om vandag 'n tydjie te kon afknyp om weereens so ietsie met julle te mag deel!!!

Met Valentynsdag wat om die draai loer deel ek 'n lekker maklike idee met julle. Hekel 'n paar hartjies en maak hierdie kaartjie vir jou geliefde. Die patroon vir die hartjies kan hier gevind word. Die heel kleinste hartjie aanwysigings word gebruik.

Benodighede

Elle Premier Cotton DK

3,50 mm hekelpen

Wit Karton vir Kaartjie

Sharpie Pen

So Maak Mens

Stap kombuis toe en maak 'n koppie koffie of tee of gooi vir jou in net waarvoor jy lus is. Ek drink Wilde Jasmyntee. Pure lekkerte!
Kry jou benodighede bymekaar en gaan sit iewers waar jy lekker kan ontspan.
Moenie die foon of rekenaar vergeet nie. Instruksies kan ook natuurlik uitgedruk word indien verkies.
Volg instruksies vir klein hartjie en hekel 5 hartjies altesaam.
Werk alle los draadjies weg.
Plaas 'n klein juweliers ringetjie deur elke hartjie.
Moenie vergeet van jou koffie of tee nie.
Hekel 'n kettingsteek strook en ryg dit deur al 5 ringetjies. (Ek het 70 kettingsteke gehekel)
Plaas eenkant tot later.
Druk 'n gaatjie aan weerskante van kaartjie en ryg die hartjie banier deur albei.
Ryg 'n paar kraaltjies aan elke punt van kettingsteek strook vir afronding. (Opsioneel)
Skryf jou boodskappie aan die binnekant van die kaartjie en versier verder volgens smaak .

'n Valentynskaartjie gemaak met liefdevolle hande en 'n liefdevolle hart!

Tot volgende keer lekker hekel almal!

♥

Mandjieweef Steek / Basketweave Stitch

noreply@blogger.com (Unknown) — Wed, 27 Jul 2016 13:27:00 +0000

Hallo julle!

Sjoe, maar daar het baie lanklaas enige iets hier op die webblad aangegaan. Die dae gaan so vinnig verby mens sukkel om by te bly. Ek is oortuig daarvan dat die ure beslis vinniger verby gaan soos die jare aanstap. Wat egter saak maak is dat ek vandag 'n tydjie kon inruim om ietsie met julle te kan deel.

My dogter Erica is nou ook deel van Hekelidees en ons het groot planne vir die toekoms. Erica is mede - administreerder van ons Facebook webblad waaroor ek verheug is. 'n Groot welkom aan haar!

Vandag wys ek vir julle hoe om die Mandjieweef steek te doen. In Engels word dit die "Basketweave stitch" genoem want dit lyk nes 'n gevlegde mandjie. Dit is glad nie 'n moeilike steek nie en kan binne 'n japtrap aangeleer word.

Hierdie Mandjieweef patroon herhaal met 8 steke wat bestaan uit relieflangbene wat afwisselend om die voorkant en agterkant van die stam van 'n langbeen gewerk word. Die geweefde patroon wat gevorm word vertoon nes 'n geweefde mandjie vandaar die naam van die steek.

Goed kom ons oefen die steek deur 'n paar rye te hekel. Eers moet ons 'n paar sommetjies doen om te bepaal met hoeveel kettingsteke daar begin moet word.

Om die patroon 3 keer te herhaal lees die som 3 x 8 = 24. (3 patroon herhalings x 8 steke in elke herhaling = 24 steke. Hierby moet 2 kettingsteke getel word om die aantal kettingsteke waarmee begin word te bepaal. Dus 24 + 2 = 26 kettingsteke.

Fondasie ry: Begin met 26 kettingsteke. Werk 1 lb in die 4e kettingsteek vanaf pen, hekel nou nog 1 lb in elk van die oorblywende kettingsteke. Aan die einde van hierdie ry sal daar altesaam 24 bene wees, hekel nou 3 kettingsteke en draai.

'n Relieflangbeen is niks anders as 'n doodgewone langbeen nie. Die enigste rede hoekom dit 'n relieflangbeen voor of agter genoem word is omdat die langbeen nie in die steek gewerk word nie maar om die stam van die steek. Kyk na die foto hierbo. Die naald is ingesteek van voor na agter om die stam van 'n langbeen om dan weer voor uit te kom. Dit dui presies aan hoe die relieflangbeen voor gewerk sal word, dus die hekelpen word ingesteek van die voorkant af in die spasie langs die langbeen sodat dit om die stam en weer na die voorkant toe kan uitkom.

In die foto bo kan gesien word hoe die relieflangbeen voor vertoon. Dit is 'n doodgewone langbeen wat om die stam van 'n langbeen in die vorige ry gehekel word. Dus: relieflangbeen voor is slaan draad om pen, steek pen van voor na agter en weer na die voorkant , slaan draad om pen en trek draad deur, daar is 3 lusse, slaan draad om pen, trek deur 2 lusse, slaan draad om pen en trek deur oorblywende 2 lusse. Die afkorting vir hierdie steek is rlbv (In Engelse terminologie UK genoem frontpost treble - fptr en Amerikaans USA frontpost double crochet - fpdc)

'n Relieflangbeen agter word weer van die agterkant af ingesteek, om die stam en die pen kom dan uit aan die agterkant sodat die langbeen voltooi kan word. Dus: relieflangbeen agter is slaan draad om pen, steek pen van agter na voor en weer na agter, slaan draad om pen en trek draad deur, daar is 3 lusse, slaan draad om pen, trek deur 2 lusse, slaan draad om pen en trek deur oorblywende 2 lusse. Die afkorting vir hierdie steek is rlba (In Engelse terminologie UK genoem backpost treble - bptr en Amerikaans USA backpost double crochet bpdc)

Ry 1 en ry 2 is dieselfde: Werk 3 relieflangbene van voor om die volgende 3 langbene. In die begin word daar net 3 gehekel omdat daar met die omdraai van die vorige ry 3 kettingsteke gemaak is en dit verteenwoordig die heel eerste relieflangbeen in die ry. Werk dan volgende 4 relieflangbene van agter. Herhaal die patroon deur 4 relieflangbene van voor en 4 relieflangbene van agter te hekel tot aan die einde van die ry. Hekel 3 kettingsteke en draai.

Ry 3 en ry 4 is dieselfde: Die relieflangbene van voor staan duidelik meer na vore en die relieflangbene van agter lê na agter. Werk nou 'n relieflangbeen van agter in elk van die voorste langbene en 'n relieflangbeen van voor in elk van die agterste langbene. Die volgorde van die steke word dus omgekeer. Hierdie 2 rye sal dus lees: 3 relieflangbene van agter, 4 relieflangbene van voor, 4 relieflangbene van agter ens.

Ek hoop julle kan die steek goed gebruik. Op die foto bo kan gesien word hoe die patroon gevorm word. Dit is 'n baie kompakte patroon en hier gehekel met 'n Chunky draad en 6 mm hekelpen, maar dit kan maklik met 'n groter pen gewerk word om die eindproduk meer sagtheid te gee. Die beste raad is om 'n stukkie te oefen met 'n paar verskillende groottes hekelpenne voordat daar met 'n projek begin word. Sal heerlik wees om hierdie patroon te gebruik vir handsakke, komberse, kussings, hoedjies en enige patroon waar tekstuur verkry wil word. 'n Pragtige patroon om by jou versameling te voeg.

Tot volgende keer warm bly julle!

Lekker hekel!

♥

Spykersteek

noreply@blogger.com (Unknown) — Mon, 21 Mar 2016 12:27:00 +0000

Die Spykersteek

In Afrikaans noem ons dit die Spykersteek.

In Engels genoem die Spike Stitch.

Hierdie steek is dekoratief en kan op allerlei maniere gebruik word in hekelwerk.

Boonop is dit maklik om te onthou want die naam vertel al klaar hoe die steek vertoon. Kyk mooi en jy sal sien dit lyk net soos 'n ry spykers met die koppies wat ewe netjies bo uitsteek. Ek hou daarvan om assosiasie te gebruik wanneer ek iets nuuts leer. Wanneer ek dink aan die Spykersteek sien ek 'n stukkie hout met verskillende lengtes van spykers wat in 'n ry daarin gekap is. Sou die hout in die lengte dwars gesaag word sal mens die spykers kon sien.

Die hout verteenwoordig vir my die hekelwerk wat eers gedoen moet word sodat die "spykers" daarin gekap kan word.

Hout = 'n paar kortbeen rye

Spykers = lang verlengde kortbene wat bo-oor die kortbeen rye lê

Ek hoop dit maak sin julle .....

Kom ek wys gou vir julle hoe maklik dit is.

Afkortings gebruik: ks = kettingsteek; kb = kortbeen; vlg = volgende;

Hoe maak mens die kortbeen?

Kortbeen = Steek pen in aangeduide steek, slaan draad om pen en trek deur vanaf die agterkant na vore, daar is 2 lusse op pen, slaan draad weer om pen en trek deur albei lusse. Dit voltooi die kortbeen.

Spykersteek is niks anders as 'n verlengde kortbeen nie! Kom ek wys hoe maklik dit is!

Gryp 'n hekelpen en oorskietwol in 2 verskillende kleure en oefen gou so stukkie.

Begin met 20 ks in kleur A

Ry 1: kb in 2e ks vanaf pen, 1kb in elk van vlg 18ks, [19kb in ry], 1ks, draai

Ry 2: 19kb, 1ks, draai

Ry 3 - 7: Herhaal ry 2 en aan einde van 7e ry kan draad geknip word en 2e kleur gelas word.

Ry 8: kb in elk van vlg 2kb,

steek nou die pen in reg onder die volgende kb, met ander woorde slaan 1ry oor en steek die pen onder die vlg kb in. Op die foto dui die speld aan presies waar hierdie steek gemaak moet word.

Maak 'n gewone kb in die aangeduide plek en trek die draad egalig na bo. Let daarna op dat die draad nie te styf opgetrek word sodat dit die hekelwerk op 'n knop trek nie. Dit moet net genoeg getrek word sodat dit gelyk en presies op dieselfde hoogte is as die ry waarmee besig is.

Raai wat? Jy het jou eerste spykersteek gehekel. Maklik is dit nie? Die steke kan in enige patroon oor enige aantal rye gemaak word nes jy wil.

In die foto hierbo kan gesien word hoe 'n dekoratiewe patroon verkry word deur die Spykersteek te gebruik. Daar is ook 2 en 3 rye oorgeslaan om die "spykers" dieper te laat vertoon. Die belangrikste om te onthou is dat daar altyd reg onder die volgende steek ingehekel moet word. Tel maar in die begin die aantal steke in 'n ry totdat jy die steek verstaan anders kan daar maklik 'n steek oorgeslaan word of dit kan ook gebeur dat jy dalk vermeerder. Onthou elke Spykersteek neem die plek in van 'n kortbeen in daardie ry.

Hier het ek in rooi 7 rye kortbene gehekel, in groen 1 ry spykersteek en 3 rye kortbene. Daarna het ek oorgeslaan na rooi en 1 ry spykersteek gewerk. Dit behoort julle 'n idee te gee van hoe hierdie steek gebruik kan word om 'n patroon te vorm.

Jy ken nou nog 'n steek wat jy kan byvoeg om jou hekelwerk mee op te tower van gewoon na uniek. Maak dit jou eie en ontwerp jou eie patrone!

Lekker hekel en geniet dit!

♥

Ouma Hekel Heerlik!

noreply@blogger.com (Unknown) — Thu, 17 Mar 2016 18:06:00 +0000

Ai dit is lekker om ouma te wees!

Die oorweldigende liefde en vreugdevolle glimlag wat my hart toevou elke keer wanneer ek aan haar dink is iets wat ek nie in my wildste drome van ouma-wees verwag het nie.

Ek het in hierde jaar (en so bietjie), darem 'n paar goedjies gedoen gekry. Die eerste paar maande het ek rustig gesit en brei en hekel vir die nuwe kleinding. Op die fotos hieronder is links bo 'n gebreide truitjie en ook 'n langbroekie wat aanmekaar geslaan is op my naaimasjien met 'n bandjie aan die agterkant wat lees .. "Ouma se skat xxx" Daar is 'n paar houthangers wat oortreksels gekry het. Vinnis se Serina het gesorg vir 'n sagte paar gehekelde skoentjies. En dan moet daar mos natuurlik ook 'n ou bersie wees. Met Pure Gold en 'n Granny riffelpatroon was hierdie kombersie ook 'n heerlike projek om aan te werk.

Vir die van julle wat nog wonder oor die gehalte van Elle Pure Gold wol. My dogter getuig dat sy die kombersie hier onder op die foto al menige male gedurende hierdie jaar in die wasmasjien gewas het en dit lyk nog splinternuut. (ek word glad nie betaal om dit te sê nie hoor) :)

Katia Belice, 'n katoenmengsel, het gesorg vir 'n kleurvolle gehekelde baadjie met bypassende skoentjies.

Abigail het haar opwagting gemaak op die 2e April.

Toe ek haar die eerste keer sien het sy my voete onder my uitgeslaan. Dit was liefde met die eerste oogopslag.... 'n bondeltjie liefde en kleine ou poppie van 2.4kg. So so klein en so volmaak.

Tien klein toontjies wat nou al amper trippe trappe trone en tien klein vingertjies wat kan raakvat! :)

En kyk net hoe sit sy ewe grootoog en kyk saam met Ollie na een van haar gunsteling movies: Winnie the Pooh.

Daar is ook hard gebrei en gehekel vir Kersfees. Die 'ratlle' (wat noem mens dit in Afrikaans?) 'n ratel ... gits dit klink nie vir my reg nie, Indien enige een van julle weet wat die korrekte Afrikaanse benaming is help tog asseblief..... is sommer so op gevoel gehekel. Vir die poppie en legkaartbal het ek patrone gebruik. Dit was baie moeilik om die geskenke te laat oorstaan tot Kersdag. Ek is gewoonlik meer opgewonde om geskenke uit te deel as om te ontvang?

So tussen-in was daar ook nog 'n tydjie om vir die kombuis 'n mat met t-yarn te hekel.

Ek laat sak my kop in skaamte en ek moet bieg oor iets wat ek gesê het ek gaan doen.

Hier sit ek 'n jaar later en dit is nog steeds nie gedoen nie. Al my goeie voornemens om al die WIPS klaar te maak gedurende die jaar het net nooit gebeur nie. Dit is nog veilig in die kas...... elkeen netjies verpak in plastiek asof dit my nou moet laat beter voel. Die probleem ontstaan gewoonlik wanneer ek nog besig is met een projek en iets anders vang my oog. Plaas dat ek eers die projek waarmee ek besig is voltooi, maar nee.... o wee dit is 'n geval van "soooo baie wol en soooo min tyd en sooooo baie inspirasie en net twee hande.

Gedurende die jaar het ek baie tyd gehad om te dink oor my gesondheid en my pad vorentoe. Ek het besluit om hierdie keer minder posts te doen per maand sodat ek ook tyd kan maak vir ander dinge wat saak maak. Ek het 'n paar goed in gedagte wat ek wil doen maar wil nie nou te veel daarop uitbrei nie.

'n Groot dankie vir almal wat nog hier by Hekel Idees kuier!

Lekker hekel!

Ek neem 'n Blog Sabbatsverlof.

noreply@blogger.com (Unknown) — Thu, 01 Jan 2015 13:07:00 +0000

Totsiens 2014 en Hallo 2015!

Die eerste patroon wat ek gedeel het hier op Hekel Idees was hierdie teepot mussie wat ek geskryf het in die begin van 2013.

Die idee agter Hekel Idees was om sommer net 'n plekkie op die net te hê waar ek so nou en dan 'n ietsie kon plaas oor hekel en my idees wat hekel betref. 'n Plek om my hekel idees te stoor. Ek het nie gedink daar sou veel belangstelling wees nie want die aanlyn wêreld is immers "Engels" en ek het in Afrikaans geskryf. Was ek nie verkeerd nie!

Met elke nuwe patroon en tutoriaal wat ek opgelaai het, het die navrae en boodskappe ingestroom en met tye kon ek nie voorbly om almal terug te antwoord nie. Ek werk voltyds en baie aande het ek gesit en eposse beantwoord tot laat.

Ek het al hoe besiger geraak en met die oopmaak van Hekel Idees se Facebook blad het al hoe meer hekelaars aangesluit en ingeskryf wat beteken het die druk het al hoe groter op my skouers gerus om aan te hou met nuwe idees en tutoriale. Ek wou niemand in die steek laat nie. Ek het hard probeer om almal tevrede te hou deur so gereeld as moontlik te sorg dat daar iets nuuts verskyn.

Ek glo nie mense besef hoeveel werk gaan in die skryf van 'n patroon of selfs tutoriaal nie. Dit neem ure om al die fotos te neem en gereed te kry. Om van elke stap 'n ordentlike en duidelike foto te neem is nie altyd maklik nie en daar moet letterlik 'n hele paar fotos van elke stap geneem word sodat die bestes gebruik kan word. Dit neem laaaaaaank!!! Dit is tydrowend en harde werk glo my.

Dit is wonderlik om terugvoer te kry van oral oor. Die sommer net dankie sê epossie wat my dag kan ophelder en my weer nuwe inspirasie gee om voort te gaan al het ek met tye vreeslik gesukkel met my gesondheid en liewer net sou wou in die bed gaan klim en slaap. Al die dankies en inspirerende booskappe maak alles die moeite werd en ek waardeer elke liewe een! Ek onthou die eerste keer wat 'n klient by die winkel waar ek werk ingestap het met afgerolde afdrukke van my hekel patrone wat sy op internet gekry het. Die dame wou hulp hê met die patroon maar was glad nie bewus daarvan dat ek die persoon was wat die patroon geskryf het nie. Ek het haar gehelp sonder om iets te sê en toe sy vra of ek seker is van die keuse en ek sê dat ek glo dit sal werk want ek het die patroon geskryf en ek is Monica van Hekel Idees het haar gesig soo opgehelder ek het skoon 'n knop in my keel gekry. Of wanneer iemand in die wolafdeling instap met hulle Tab of foon en hulle scroll op en af en begin soek na wolle en ek stap nader om te vra of ek kan help en ek sien hulle scroll op en af op my blog ... dit bring so 'n gevoel van warmte en genot om te weet dit wat ek doen is nie verniet nie en word gebruik!

My besoekers kom van reg oor die wêreld wat vir my wys hoe wyd die Afrikaanse gemeenskap versprei is en dat daar 'n behoefte is vir enige iets in Afrikaans. Ek besef maar alte goed dat mense slegs sal terugkeer na 'n blog indien daar iets is wat die moeite werd. Daar is soveel kompetisie om met nuwe idees vorendag te kom en om bo te bly beteken jy moet aanhou verander en aanhou groei anders bly jy agter. Daar is soveel kreatiewe mense daarbuite en dit is absoluut wonderlik want kreatiwiteit is vir so 'n lang tyd onderdruk in ons samelewing. Die potensiaal wat in elke mens ingebore is moet net ontgin word om die beste in hom uit te bring en dit begin alles deur vir mense die gereedskap te gee en hulle dan te wys hoe om iets te doen.

Verlede jaar hierdie tyd het ek soveel voornemens gehad van idees wat ek wou deel maar ek kon nie by alles uitkom nie. Daar is baie wat ek wou doen. Dit het net nooit gebeur nie. Tyd is die grootste vyand en wanneer die liggaam nie sy samewerking wil gee nie vererger dit sake so ietwat.

Vanaf 2013 het soveel goeie goed gebeur:

My werk verskyn in Rooi Rose:

En in die Kuier Tydskrif: [Ek vra om verskoning vir die tikfout "Vroue Keur" wat ek nou verander het na Kuier Tydskrif!]

En in die Saprotex Boekie: Winter Warmers.

Ek het ook my eerste klein boekie bekend gestel met 10 patrone vir motiewe. Dankie ook vir almal se belangstelling en ondersteuning om van hierdie projek van my 'n sukses te maak!

Ek begin patrone skryf vir verskeie wolhandelaars. Meer daaroor in die toekoms. Sommige is reeds afgehandel, ander is amper voltooi en daar is ook een vir 'n tydskrif hierdie jaar.

Ek het soveel vriendinne leer ken en soveel talentvolle vroue ontmoet in hierdie tyd. Daar is diegene wat wou leer om te hekel en wat nou al 'n hele paar projekte voltooi het. Daar is die gesoute hekelaar vriendinne wat die mees asemrowende items hekel. Almal van julle is my inspirasie nou en sal ook so wees in die toekoms. Dankie dat julle almal deel is van my lewe. Ek wil nie enige name noem nie want daar is te veel en ek wil nie hê enige iemand moet uitgesluit voel nie. Almal wat ek ontmoet het hier by Hekel Idees of deur Hekel Idees of dit nou was via epos, Facebook of in lewende lywe ... baie baie dankie!

Maar met al die goeie goed wat gebeur het word ek nou verplig om sabbatsverlof te neem vanaf Hekel Idees vir 'n paar maande. My gesondheid het 'n knou weg en ek het tyd nodig om weer terug te keer na myself. Ek moet ontspan wanneer ek van die werk af kom en moet meer rus en beter kyk na myself. Alles dinge wat ek afgeskeep het nou al vir 'n hele paar jaar. My hele wese en liggaam is besig om waarskuwingstekens uit te gooi en ek moet luister. Ek kan dit nie langer verontagsaam of probeer uit my gedagtes stoot nie. Ek hoop om oor 'n paar maande weer te kan sê ek voel fantasties en gesonder as ooit wanneer ek in die oggend opstaan. Dit is goed om dryfkrag te hê maar mens moet weet wanneer die streep getrek moet word. Ek moet luister na my liggaam en doen wat die beste is vir my sonder om skuldig te voel daaroor.

Ek word ook vir die eerste keer ouma en die kleinding se verwagte datum is 19 April... 'n dogtertjie! Hierdie ouma moet ook begin voorberei vir die kleinding en sien vreeslik uit daarna om haar te ontmoet! Ek sit nog met WIP'S wat vanaf 2013 saam met my kom en ek wil hierdie tydjie van rus gebruik om almal klaar te maak. Daar is te veel onvoltooide projekte wat aandag nodig het en waarby ek net nooit uitkom nie.

Ek sal wel nog beskikbaar wees by die Facebook groep "Want ons hekel terapie komberse" Ek is besig met my eie terapie kombers en wil dit baie graag voltooi. Ek het beslis die terapie nodig!

Hiermee wil ek vir al julle liewe lesers dankie sê vir julle wonderlike ondersteuning die afgelope tyd. Mag 2015 vir almal net voorspoedig wees. Mag nuwe drome verwesenlik word en mag julle dae gevul word met liefde, vrede, vreugde, glimlaggies en fantastiese kreatiwiteit.

Sien julle oor 'n paar maande en dan is ek terug met tonne nuwe Hekel Idees!! O en net om julle te laat uitsien na iets. Alles wat ek vir die nuwe kleinding hekel sal ek fotos van neem en vir julle wys wanneer ek terug is. Ek wys ook sommer dan vir julle al my voltooide WIP'S en vertel dan meer van die patrone waarmee ek besig is.

Mooi bly en lekker hekel!
Tot weersiens

Hekelgroete

♥

Idees vir Kersfees: Tafelversierings.

noreply@blogger.com (Unknown) — Sun, 12 Oct 2014 15:16:00 +0000

Gehekelde tafelversierings vir die Kersfees tafel!

Vandag deel ek met julle patrone vir miniatuur kersfees kousies asook jassies vir klein kersies wat sommer so oral kan staan en brand.

Jassie vir 'n klein kersie.

Materiaal gebruik: Elle Premier Katoen 4 draad en 3mm hekelpen.

Ry 1: Begin met 'n garesirkel, 1ks en werk 15hlb in sirkel, gs in eerste hlb.

Ry 2: 1ks, werk 2hlb in elk van die 15hlb, gs in eerste hlb [30hlb in hierdie ry]

Ry 3: 1ks, werk 1kb in elke hlb maar steek die pen deur die agterste lus van elk van die hlb/e. [Sien foto 1 en 2]

Ry 4: 4ks, 1lb in dies st, * slaan kb oor, in vlg kb werk [1lb,1ks,1lb]; herh vanaf * tot einde van ry, gs in eerste sp [daar is 15 "V" steek-groepe in ry] [Sien foto 3 en 4]

Ry 5: 2ks, gs in vlg 1ks-sp, *1ks, gs in vlg 1ks-sp; herh vanaf * tot einde van ry.

Miniatuur Kersfees Kousies

Materiaal gebruik: Elle Premier Katoen 4draad en 3mm hekelpen.

Ry 1: Begin met 'n garesirkel, 1ks, werk 12hlb in sirkel, gs in 1e hlb, 1ks.

Ry 2: Vermeerder in elke 2e hlb soos volg: [1hlb, 2hlb in vlg hlb]; herh tot einde van ry, gs in 1e hlb. [18hlb in ry]

Ry 3 - 5: 1ks, 1hlb in elke hlb, gs in 1e hlb. [18hlb in ry]

Ry 6 - 8 : 1ks, 10hlb, 1ks, draai, vou agterste naat met regte kante na mekaar en glipsteek naat tesame of knip draad en werk agterste naat aan mekaar vas.

Ry 9: Las draad in steek wat regs langs agterste naat is, 1ks, werk nou weer 18hlb reg rondom soos volg: 5 steke aan sykante elk en 8 hlb aan bokant van kous.

Ry 10 - 16: 1ks, hlb in elk van 17hlb, gs in 1e hlb.

Randjie: kb in gs van vorige ry, *1ks, 3lb in dies st, slaan 2 hlb oor kb in vlg hlb, herh tot einde van ry. Heg af. Vou randjie om. Hekel nou 16 ks en gebruik as lussie waaraan kousie opgehang kan word. Ryg deur agter aan bokant van kousie en werk alle los drade weg.

Blommetjie: [6ks, gs in 1e ks] herh nog 4 keer en heg af. Trek blommetjie stewig vas en werk vas aan kous.

Indien enige probleme ondervind word met die hekel van hierdie kousie gaan kyk na die aanwysings vir die groter weergawe vir meer duidelikheid oor die vorming van die kousies.

Idee!

Hekel 'n kousie vir elke gas. Plaas 'n bederfie soos 'n sjokolade binne in elke kousie en hang dit aan elke glas met 'n klein wasgoed pennetjie. Dit kan sommer ook dien as 'n nagereggie en elke gas kan sy kousie huis toe neem en volgende jaar aan sy of haar boom hang. Of hekel 'n paar en hang dit in die kersboom met bederfies binne.

Heerlike Sondag vir almal en lekker hekel!

Groete

♥

Gratis Patroon: Hekel 'n Kerskous.

noreply@blogger.com (Unknown) — Sat, 11 Oct 2014 07:29:00 +0000

Dit is weer tyd om Kersfees Kouse te hekel!

Hartlike goeie dag alle liewe hekel vriendinne,

Kersfees lê al weer en loer om die draai! Wil jy graag 'n paar kersfees kouse hekel hierdie jaar? Nou ja, hier is 'n maklike patroon wat sommer in 'n japtrap gehekel kan word. Hekel sommer 'n paar van hulle en hang dit oral op met bederfies binne in. Jy kan die kouse ook versier op allerlei maniere of vir elke familie-lid 'n kous maak met hulle name daarop geborduur.

Materiaal gebruik: Raeesah "Cotton Soft" van Kismet Yarns en 'n 4,5mm hekelpen.
Die kous is ongeveer 20cm lank en die voetgedeelte meet ongeveer 17cm in lengte.

Indien jy 'n kleiner kous wil hekel gebruik 'n dunner gare en kleiner hekelpen.

Nou kom ons begin!

Voorste deel van kous:

Ry 1: Met rooi gare maak 'n garesirkel en werk 12 hlb in sirkel. [Indien jy nie weet hoe om 'n garesirkel te maak nie begin met 5ks, gs om ring te vorm en werk dan 12hlb in ring]

Ry 2: Maak 2hlb in elk van die 12hlb [24hlb in hierdie ry]

Ry 3: *1hlb in vlg hlb, 2hlb in vlg hlb,* herh tot einde van rondte. [36hlb in hierdie ry]

Ry 4 - 12: hlb in elke hlb [36hlb in elke ry] Heg af aan einde van ry 12.

Hak van kous:

Ry 1: Met groen gare: Tel 12 steke terug van waar glipsteek in ry 15 gewerk is en heg draad in die 12e hlb, werk nou 24hlb, 1ks, draai.

Ry 2 - 8: 24hlb, 1ks, draai. Heg af na die 8e ry.

Vou die agterste naat om en glipsteek aanmekaar vas. Heg af.

Been van kous:

Met geel gare heg draad in 'n steek reg langs die agterste naat. Daar gaan nou reg rondom gehekel word. Werk 11hlb aan elk van die sykante en 12hlb aan die bokant van voetdeel. [34hlb altesaam]

Werk oor hierdie 34hlb en hekel nog 5 rye in geel, daarna 5 rye in rooi en laastens 6 rye in groen en heg af.

Rand:

Heg geel gare in vlg steek, 1kb in dieselfde st, * 1ks, 4lb in dieselfde steek, slaan vlg 2 hlb oor, kb in vlg steek; * herh van * tot * einde van rondte en heg af.

Vou die boonste rand oor na buitekant, hekel met geel 30ks en ryg dit deur die bo-rand om te dien as lus waaraan kous opgehang kan word.

Blommetjie:

Met rooi maak [5ks, 1kb in 2e ks, 1lb in elk van vlg 2ks, kb in vlg ks]; herh totdat 6 blare voltooi is.

Knip draad ongeveer 30cm vanaf begin sodat daar genoeg is vir inryg en vaswerk van blom.

Met geel gare borduur klein knoppies in senter van blom en werk dan die blom in posisie op kous vas.

En dit is dan die Kersfees kous! En wat eet mens wanneer jy Kersfees hekelwerk doen?

Jy eet heerlike Kersfees koek met baaaie ekstra neute en kersies natuurlik.

Mooi bly almal en lekker hekel!

♥

September Maand Hekel Inspirasie

noreply@blogger.com (Unknown) — Sun, 05 Oct 2014 15:51:00 +0000

Hallo almal!

Hoop dit gaan sommer baie goed met julle!

September maand het behoorlik verby gevlieg en tyd om te blog was maar bitter min. Dit beteken nie dat ek gesit en niks doen het nie. Hier is 'n klompie fotos om vir julle te wys wat alles gebeur het.

Soos meeste van julle seker al by die tyd weet was Judi Sheard van Karoo Moon in die Kaap om vir ons bekend te stel aan haar pragtige wol. Sy was op 24 September by The Crafters Inn en ek het hierdie fotos geneem so tussen die gesels deur. Dit was 'n heerlike oggend en die Hekel in die Kaap groepie van Chriselle was ook daar in tientalle en is met baie tevrede harte en hande vol sakkies wol daar weg. 'n Groot dankie ook aan Chriselle wat gehelp het om die woord te versprei.

Karoo Moon

En kyk wie het ook die oggend daar opgedaag om haar Karoo Moon te kom koop. :)

Hanlie van Tonder se pragtige handewerk wat pryk agter op haar motorkar. Ek het haar gister raakgeloop in die winkel en toe vertel sy my sy het ingeskryf vir 'n kompetisie en toe ook die prys gewen vir haar gehekelde wiel.

Baie geluk Hanlie!

Sien julle die bolletjies wol van Karoo Moon wat regs onder op die boonste foto lees "Myne"... dit was my aankope en dit hekel fantasties lekker!

Hierdie grys bolletjies Karoo Moon is net 'n proe om vir julle te wys waarmee ek besig is. Meer daaroor in die toekoms.

Tunisiese Hekelklas

Daar was gister weer 'n heerlike vol klas en almal het heerlik gehekel!

Hekel Inspirasie

Al die fotos het ek geneem van goeters wat hier in my plekkie rondstaan. Sommer net bietjie inspirasie vir julle.

1. Gehekelde doilie kry 'n plekkie in die badkamer. Ek drapeer dit sommer net oor die gaste handoekie vir die mooi.
2. Ek was net 'n klein stukkie blou katoengare kort met die hekel van hierdie kombuis lappie maar dit het my nie onder gekry nie.... ek het net eenvoudig die laaste 3 skulpe met die groen klaar gehekel. Ek dink dit werk!
3. Ek moes my Karoo Moon wol gou uittoets nadat ek dit gekoop het en tada!.... 'n selfoon sakkie!
4. 'n Gehekelde doilie bo-oor die bek van my botteltuin!
5. Besig om te werk aan my terapie kombersie wanneer ek 'n tydjie kry. 'n Hartjie van gips waarop ek met 'n swart pen gedoodle het! :)
6. Nog 'n gehekelde kombuis lappie.
7. Gehekelde chunky katoen blom werk mooi onder die kers en lyk ook baie dekoratief.
8. Weer my terapie kombersie.... met my handgeverfde kussing wat ook ingesluip het.
9. En weer die kers.... en katoen blom van bo gesien. :)

Kersie borsspeld.

Die tydskrif Mollie Makes het hierdie maand 'n gratis geskenkie ingehad. 'n Pakkie met alles wat jy nodig het om hierdie borsspeld te maak. My vriendin het die tydskrif gekoop en die pakkie vir my gegee. Hier is my borsspeldjie klaar gehekel en net reg om aan te sit.

Wonderlike week vir julle almal en mag Oktober 'n mooi maand wees. Hoe kan dit anders met al die pragtige bloeisels en blomme wat oral alles opvrolik. Die heerlike soet reuk van blomme wat buite sweef en die gesing van die voëltjies is genoeg om enige dag sommer mooier te maak. Hemels!

Hekel groete

♥

10 Steek Tunisiese Blokkie

noreply@blogger.com (Unknown) — Sat, 30 Aug 2014 15:16:00 +0000

Dagsê almal!

Hier is 'n lekker blokkie vir die van julle wat daarvan hou om Tunisiese hekelwerk te doen. Wat hierdie blokkie so besonders maak is dat daar met net 10 steke op 'n slag gewerk word. Die kombers groei blokkie vir blokkie en omdat 10 steke nie baie plek opneem nie doen ek dit sommer met 'n gewone hekelpen. Jy het nie eens 'n Tunisiese hekelpen nodig nie!

Ek het verlede week 'n Facebook groepie begin met die naam "want ons hekel terapie komberse" nadat ek baie goeie terugvoer ontvang het oor die terapie kombersie projek waarmee ek besig is. Gedurende die week het dit duidelik geword dat daar ook 'n behoefte is vir brei blokkies want hekel is nie almal se sterk punt nie en omdat ek graag sal wil hê almal wat wil moet kan deel hieraan het ek hierdie week gaan sit en hierdie patroon uitgewerk vir hierdie Tunisiese blokkie en deel ook dan 'n patroon vir 'n gebreide blokkie wat Sonia Horn goedgunstelik vir my gegee het om te deel met almal. Baie dankie Sonia. Die link na die dokument vir die gebreide blokkie kan gekry word hier: Eerste deel van Blokkie en die Tweede deel van Blokkie

En hiermee dan my 10 Steek Tunisiese Blokkie Patroon!

Indien jy nie weet hoe om Tunisiese hekelwerk te doen nie gaan lees eers hier hoe om die Tunisiese Steek te doen want dit is die steek wat ons gaan gebruik.

Goed noudat jy weet hoe om die Tunisiese Steek te doen kan ons begin.

Begin met 10ks en werk die basis ry. [Daar sal 11 lusse op die pen wees]

Voltooi nou 8 rye. Moenie afheg nie maar knip die draad en trek die lus langer sodat jy later weer die nuwe kleur kan heg om verder te hekel. Indien verkies kan jy eers een lang strook hekel wat beteken jy gaan jou nuwe kleur nou heg en die volgende blokkie van 8 rye hekel. Ek is regshandig en werk my blokkies van links na regs. Dit beteken nadat ek my eerste blokkie voltooi het moet die tweede blokkie aan die regterkant vasgehekel word soos op die fotos gesien kan word.

Die rooi blokkie aan die linkerkant is voltooi en nou gaan ek begin met my tweede blokkie in groen. Ek begin met 10ks en tel my lusse op soos normaalweg.

Nou moet daar deur die eerste blokkie gewerk word. Druk die hekelpen deur in die steek waar die speld aandui.

Slaan draad om pen en trek dit deur die eerste blokkie sowel as die eerste lus op pen.

So ......

Slaan draad om pen en werk deur 2 lusse soos normaal.

Werk alle lusse nou weer twee-twee af tot 1 lus oor is op pen.

Nou moet die lusse weer opgetel word en sodra al 10 lusse opgetel is moet die volgende hegting gedoen word.

Druk pen weer deur, slaan draad om pen en trek deur die eerste lus op pen.

Werk weer twee-twee lusse af soos gewoonlik.

Baie belangrik!

Maak seker dat die heel laaste steek nie per ongeluk gemis word nie. Hier wys die speld waar hierdie heel laaste lus lê.

Hier is die heel laaste lus gewerk. Julle kan sien dit is die lus wat reg teen die kant lê.

Hier is die hegting in die 3e ry.

En die voltooide hegtingsteek.

Herhaal totdat 8 rye voltooi is. Knip draad en begin dan met volgende blokkie wat aan die regterkant van die groen blokkie aangehekel sal word. Besluit self hoe jy jou kombers wil laat groei. Jy kan van links na regs in stroke werk en dan weer bo-op die rooi blokkie begin en die volgende strook van links na regs werk of jy kan eers 'n lang regop strook werk en dan weer 'n strook aan die regterkant op laat beweeg.

Ek hoop julle geniet hierdie manier van hekel ook net soveel soos ek. Ek gebruik 'n gewone 4mm hekelpen en 'n dubbeldraad wol. Dit werk heerlik en is erg terapeuties hoor!

Mooi dag vir almal!

Hekelgroete

♥

Hekel Tutoriaal: 2-kortbene in plaas van 3-kettingsteke: 'n Nuwe Tegniek?

noreply@blogger.com (Unknown) — Sat, 23 Aug 2014 12:22:00 +0000

Skewe, onegalige, gaterige, knopperige langbeen rye? Met hierdie tegniek sal jy nooit weer sukkel om langbeenrye netjies en reguit te hekel nie!

Goeiemiddag liewe lesers,

Die afgelope week het ek verskeie navrae gekry van nuwe hekelaars wat swoeg en sweet om daardie verdekselse langbeenrye netjies te kry.

Ons leer dat 3 kettingsteke die 1e langbeen vervang reg? Jip, dit is een honderd persent reg, maar doen ons dit so dan sit ons met gate waar ons nie gate wil hê nie en dit lyk sommer slordig ook. Ek het al voorheen hieroor geblog en het al 'n alternatiewe metode in die verlede gebruik. Julle kan hier gaan lees hoe ek dit in die verlede gedoen het. Dit was 'n verbetering op die tradisionele manier maar dit was nog nie perfek nie.

Ek het google ingespan om te gaan kyk of daar nie iewers 'n perfekte oplossing is nie. Daar is 'n paar oulike idees op internet oor hoe om die probleem op te los en ek het ook op 'n paar oulike videos afgekom. Gewapen met my wolletjie en hekelpen het ek gesit en hekel terwyl en na al die videos gekyk het. Nadat ek almal probeer het was ek egter nog nie oortuig dat ek die antwoord gekry het nie. Daar moes 'n manier wees om dit anders te doen as al die metodes wat ek gesien het.

Ek sit nog so en hekel en lostrek en hekel en lostrek toe ek meteens iets doen wat uiteindelik perfekte sin maak en whala! Die oplossing en resultaat waarna ek gesoek het! Ek dink nie enige iemand het hierdie metode al gebruik nie. Ek het oral gesoek en dit was beslis nie op enige webblad wat ek gesien het nie. Dit is natuurlik moontlik dat so iets wel bestaan maar nie waarvan ek weet nie.

Nietemin wil ek dan ook graag hierdie metode van my met julle almal deel en hoop dit sal julle ook kan help in die vervolg. Met hierdie metode wil ek dit amper waag om te sê jy hoef nooit weer 3 kettingsteke te gebruik om die eerste langbeen in 'n ry te vervang nie. Hekel net eenvoudig 2 kortbene bo-op mekaar!

Kom ek wys julle hoe!

Begin deur 'n aantal kettingsteke te maak en hekel soos normaalweg die eerste ry langbene.

In die volgende 2 fotos kan duidelik gesien word waar die heel laaste 2 langbene van hierdie ry gewerk moet word. Dit is baie belangrik om nie die heel laaste langbeen te vergeet nie en dit is ook die meeste van die tyd die oorsaak dat werk skeef trek.... die heel laaste steek is nie gewerk nie. Indien jy die 2-kortbeen metode gaan gebuik sal hierdie die enigste ry wees waar daar in die bo-punt van die 3 kettingsteke gewerk gaan word. Hierna sal daar aan elke einde van 'n ry 'n kortbeen wees wat duidelik gesien kan word en dit sal sake sommer heelwat vergemaklik!

Deur van die 2-kortbeen metode gebruik te maak in plaas van 3kettingsteke-draai in die begin van die ry vertoon die werk sommer baie beter dink ek!

Ek sal graag wil hoor wat julle dink. Probeer dit en laat weet my of dit vir julle ook werk. Ek sal terugvoer baie waardeer.

Wonderlike daggie vir julle almal!

Lekker hekel!

♥

Monica Se Terapie Kombersie

noreply@blogger.com (Unknown) — Sat, 16 Aug 2014 12:50:00 +0000

Goeie dag almal!

In hierdie gejaagde lewe met al die negatiewe dinge waarmee ons daagliks te doen kry het ek gaan soek vir idees spesifiek vir 'n terapie kombersie maar kon nie enige iets kry wat ek wou toepas of wat vir my gegee het waarna ek soek nie.

Daar is wel baie oor "mood blankets". Dit is 'n wonderlike idee maar dit is nie wat ek wil doen nie. Vir die van julle wat nie weet wat 'n "mood blanket" is nie. Kortliks beteken dit jy kies vir jou kleure wat jy koppel aan 'n spesifieke emosie vir die dag en hekel dan 'n blokkie of 'n ry wat die dag verteenwoordig. Jy kan elke dag of weekliks hekel. Die keuse is joune. Maar soos ek reeds gesê het dit was nie presies waarna ek gesoek het nie.

Ek het toe begin oplees oor kleur terapie en notas begin maak en het uiteindelik op 'n idee besluit wat ek wil gebruik en so is my Terapie kombersie gebore. Die rede hoekom ek my kombersie eerder 'n Terapie kombersie noem is omdat ek nie enige negatiewe konnektasies wil heg aan enige kleur nie. Met die "mood blanket" kies jy byvoorbeeld bruin vir die dag wanneer jy af voel. Dit verteenwoordig dus 'n negatiewe emosie.

Ek wil nie na kleure kyk en enige negatiewe gevoelens daarom bou nie. Vir my is kleur wonderlik en ek wil dit eerder gebruik in die vorm van terapie. Kleur moet my beter laat voel. Dit moet my opbou. Ek wil lekker voel wanneer ek daarna kyk. Maak nie saak watse kleur dit is nie. Dit moet 'n plekkie in my hart vul wat my goed laat voel en wat my omstandighede net so bietjie mooier en beter kan maak deur daarna te kyk.

Kleur is wonderlik en moet geniet word en daarmee bedoel ek alle kleure. Selfs swart sien ek as 'n kleur waarmee ek alle negatiewe dinge kan begrawe. Gooi swart bo oor iets en dit bedek dit totaal en al. Ek kyk na die positiewe kant van kleur en wil dit dan ook so gebruik vir hierdie projek.

Ek het besluit om kleurterapie, meditasie en hekel te kombineer.

Ek sal klein blokkies hekel wat net sal bestaan uit halwe langbene omdat ek 'n soliede blokkie wil hê. Dit sal ook net 'n paar minute neem met 7 rye en 'n randjie. Ek beoog om dan ook sommige van die blokkies te versier met mooi knope en borduurwerk ens. Omdat my lewe baie gejaagd is wil ek myself nie koppel aan 'n spesifieke hoeveelheid blokkies per dag of week nie. Daar is dae wanneer dit moeilik is om by alles uit te kom en op daardie dae mag ek dalk glad nie by 'n blokkie uitkom nie maar op dae wanneer ek tyd het kan ek dalk deur twee of drie meditasies werk wat sal beteken ek kan drie blokkies op daardie dag hekel. Dit hang alles van omstandighede af. Hierdie is my terapie en dus maak ek my eie reels wanneer dit kom by my menswees. Die belangrikste is dat ek met elke blokkie 'n tydjie sal kry om terug te keer na myself.

Hoe gaan ek die kleure gebruik?

Ek sal mediteer terwyl ek 'n blokkie hekel deur die betekenis te lees en dit dan te herhaal terwyl ek my blokkie sit en hekel. Ek sal dit doen deur stil te word, die woorde oordink en daarmee saam ook kalmte en vrede in my gemoed bring. En terwyl my kombersie groei sal ek ook groei in krag en menswees. Aan die einde van my reenboog terapie kombersie sal ek die pot goud vind. 'n Groot pot vol meditasies wat gevul is met wonderlike positiewe en kleurvolle affirmasies en wanneer die storms kom kan ek my toevou in my eie terapie kombersie en onthou dat elke blokkie en elke kleur daar is om my te herrinner aan die dinge waarvoor ek dankbaar is.

Hier is 'n lys met kleure en die betekenis wat ek aan elkeen toegeken het.

Kleur	Betekenis
Blou	Vreedsaam en Rustig. Omvou jouself met kalmte.
Groen	Vrede en Balans. Wees dankbaar vir gesondheid.
Rooi	Passievol en Opbeurend. Onthou jy is in beheer. Neem terug jou krag.
Pink	Gee onvoorwaardelike liefde. Sê dankie vir jou vrouwees
Pers	Kreatiwiteit. Daar is net een jy. Jy is uniek en kosbaar.
Goud	Jy verdien geluk en sukses. Sê dankie vir wat jy het.
Silwer	Gee van jouself met ‘n opregte hart en met ‘n glimlag.
Bruin	Jy is veilig in die warmte van jou huis, familie en vriende.
Oranje	Wees optimisties en entoesiasties. Leef voluit en glimlag.
Geel	Die son skyn oor ons almal. Laat dit jou dag ophelder. Kweek selfvertroue.
Magenta	Spandeer tyd aan jou eie menswees. Dit bring balans terug in jou lewe.
Wit/Ivoor	Elke dag is ‘n nuwe begin. Moenie in die verlede leef nie.
Indigo	Laat intuisie jou lei. Wees wys en opreg in alles wat jy doen en sê.
Olyfgroen	Nuwe groei, hoop en vrede vir jou.
Koraal	Wees lief vir jouself. Jy verdien liefde net soveel soos enige ander mens.
Perel	Laat jou liggie skyn sodat al die donker skaduwees kan verdwyn.
Swart	Begrawe alle negatiewe gedagtes en emosies.

Indien jy ook graag wil saamhekel. Hier is 'n dokument wat ek saamgestel het sodat julle dit kan 'print' en by julle hou.

Hier is my kleure wat ek gekies het:

Ek gebruik Pure Gold en Family Knit dubbeldraad omdat ek sekere kleure wil gebruik en 'n 4mm hekelpen.
Enige skakering van 'n spesifieke kleur kan gebruik word. Vir rooi het ek byvoorbeeld 'n donker skakering gebruik en vir blou 'n sagte Aqua kleur.

Enige patroon kan natuurlik gebruik word. Ek deel met julle die patroon vir die blokkie wat ek gaan gebruik.

Terapie Kombersie Blokkie:

1e ry: Begin met 12ks, hlb in 3e ks vanaf pen, 1hlb in elk van vlg 9ks, 2ks, draai,
2e - 6e ry: 10hlb, 2ks, draai
7e ry: 10hlb, 3ks, draai

Hekel nou 'n randjie om die blokkie sodat die blokkies aanmekaar gehekel kan word soos jy vorder.

Randjie:
In die eerste hoek werk [1lb, 2ks, 2lb] en in elke ander hoek werk [2lb, 2ks, 2lb]
Hekel tussen die hoeke 1ks, slaan 1 steek oor, lb in vlg steek, herhaal totdat daar 4 langbene tussen elke hoek gehekel is. Kyk na die illustrasie vir meer duidelikheid.

Die blommetjie is gedoen met glipsteke wat ek aan die bokant van blokkie gehekel het. Hier volg 'n paar fotos ter verduideliking om te wys hoe dit gedoen word. Die hekelpen is aan die bokant van werk en die werkende draad aan die agterkant. Trek draad deur na die voorkant en werk 'n glipsteek. Steek pen dan weer deur na agter, haak die draad en trek deur die lus op pen. Herhaal die stappe. Dit is 'n vinnige en maklike manier om hekelwerk te versier.

Ek sal julle van tyd tot tyd op hoogte hou van hoe my kombersie vorder en indien julle graag wil saamhekel laat weet my.

Pragtige dag vir julle en lekker hekel almal!

♥

Gratis Patroon: Vingerlose Handskoene.

noreply@blogger.com (Unknown) — Sat, 26 Jul 2014 11:01:00 +0000

Goeie middag almal,

Vandag wil ek met julle my patroon deel vir 'n lekker paar vingerlose handskoene. Hierdie is dieselfde patroon wat verlede jaar in die Rooi Rose verskyn het en wat ook op hulle webwerf te siene is. Ek kry egter soveel navrae vir vingerlose handskoene dat ek besluit het om 'n volledige artikel daaroor te doen en sommer die patroon vir almal beskikbaar te stel.

In die foto bo kan duidelik gesien word hoe die rib gedeelte vertoon wanneer daar slegs in die agterste lusse van die kortbene gewerk word.

Hier volg die instruksies vir die werk van die relieflangbeen voor asook die relieflangbeen agter. Daar word ook soms na die steek verwys as die agterom steek of die voorom steek. Die steek kan ook gebruik word vir rib effekte en verleen wonderlike tekstuur aan die hekelwerk. 'n Wonderlike steek en beslis 'n moet om te leer.

'n Relieflangbeen voor word presies gewerk soos 'n gewone langbeen met een verskil. In plaas van die hekelpen in die steek of spasie te steek word die pen van voor na agter en dan weer na die voorkant om die stammetjie van die steek gewerk. Dus: slaan draad om pen, steek pen van voorkant na agter om die stammetjie van die langbeen en bring die pen weer deur na die voorkant, slaan draad om pen en trek deur, [3 lusse op pen] slaan draad om, werk deur 2 lusse, slaan draad om pen en trek deur oorblywende 2 lusse. Dit voltooi die rlbv.

Die relieflangbeen agter is weer presies soos die rlbv met een verskil. In plaas van die hekelpen van voor na agter te steek word die pen van agter na voor en weer na agter deurgesteek om die stammetjie van die langbeen. Hierdie steek word dus aan die agterkant van die stammetjie voltooi. Dus: slaan draad om pen, steek pen van agter na voor om die stammetjie van die langbeen en bring die pen weer deur na die agterkant, slaan draad om pen en trek deur, [3 lusse op pen] slaan draad om, werk deur 2 lusse, slaan draad om pen en trek deur oorblywende 2 lusse. Dit voltooi die rlba.

Neem asseblief kennis van die korreksie op boonste aanwysings. Dit moet lees: Ry 30: [verwys na illustrasies bo vir die maak van 'n relieflangbeen agter [rlba] en relieflangbeen voor [rlbv]

Hier kan die patroon duidelik gesien word. Die rlbv lê aan die voorkant en die rlba lê meer na agter.

Om die handskoene te voltooi ryg 'n wolnaald met breidraad en werk naat toe van bo na onder, maar los 'n gedeelte oop vir die duim om deur te pas.

Duim:

Werk nou 2 rye van ongeveer 18 halwe langbene rondom duim gedeelte. [Die aantal hlb om die duim opening sal afhang van die grootte wat oop gelos is maar 18 steke gee 'n gerieflike opening.

Hier is fotos van die afgelope 2 hekelklasse wat ek aangebied het by The Crafters Inn. Dit was 2 heerlike groepe en is altyd so lekker om al die dames te ontmoet. Ek dink die fotos kan beter verduidelik hoe lekker dit was.

Hanlie van Tonder het al menige hekelklas van my bygewoon. Nadat sy die Tunisiese hekelkas gedoen het is hierdie 2 pragtige kussings deur haar gehekel. Ek dink dit is pragtig met die uiltjies op. Is hulle nie te dierbaar nie? So 'n oorspronklike ontwerp en die randjie wat sy omgehekel het vertoon lieflik! Dankie vir jou foto Hanlie!

Cheryl van Staden, het vir my 'n foto gestuur van haar Beanie wat sy gehekel het. Sy het my patroon gebruik en is baie in haar skik met hoe dit uitgekom het. Ek dink ook haar Beanie lyk pragtig! Kyk net hoe mooi lyk dit en haar hekelwerk is so netjies! Dankie vir die deel van jou werk Cheryl! :)

Dit reen alweer hier in die Kaap en is bitterkoud. Ek gaan nou eers 'n lekker koppie stomende koffie maak en wat doen mens wanneer dit koud is? Jy hekel natuurlik! :)

Mooi bly almal en lekker hekel!

♥

Hekel Tutoriaal: Granny Ripple Patroon

noreply@blogger.com (Unknown) — Sat, 21 Jun 2014 12:59:00 +0000

Wou jy nog altyd geleer het hoe om die Granny Ripple Patroon te hekel? Jy hoef nie verder te soek nie. Vandag wys ek hoe dit gedoen word. Hierdie is een van daardie heerlike patrone wat gebruik kan word om sommer in 'n japtrap 'n kombersie te hekel. Die enigste bietjie konsentrasie is om met die eerste ry te sorg dat alle steke in plek is en die res is sommer doodmaklik en net 'n herhaling.

Ek het in hierdie tutoriaal Raeesah Katoen en 'n 5mm hekelpen gebruik.

En ek gaan maar maak of ek nie die vingerfout sien wat ingesluip het op die foto nie. Het julle dit raakgesien? Hier is 'n leidraad Rippel en Ripple :)

In die boonste foto kan die kettingsteek strook gesien word soos dit aan die voorkant vertoon. Wanneer die strook omgedraai word is daar duidelik hobbels of lussies wat aan die agterkant van elke "V" geplaas is. Die beste afwerking word altyd verkry deur in hierdie agterste hobbels of lussies te werk. Kyk na die foto hier onder. Daar is duidelike swart kolletjies wat aandui presies waar hierdie hobbels lê.

Goed kom ons begin met die eerste ry!

Ry 1:

Stap 1: Werk 3lb in die 6e ks vanaf pen; * slaan 2 ks oor, werk 3lb in vlg ks, slaan weer 2 ks oor en werk 3lb in vlg ks

Stap 2: Slaan 5 ks oor en werk 3lb in vlg ks [dit gaan die onderste punt van patroon vorm]

Stap 3: Slaan 2 ks oor en werk 3lb in vlg ks

Stap 4: Slaan 2 ks oor en werk in die vlg ks [3lb, 3ks, 3lb] Dit vorm die boonste punt van patroon

Stap 5: Slaan 2ks oor en werk 3lb in vlg ks, slaan weer 2ks oor en werk 3lb in vlg ks

Herhaal nou Stap 2, 3 en 4. Die ry eindig met 'n boonste punt. [Dit beteken die ry eindig deur in die heel laaste steek 2 groepe te werk = 3lb, 3ks, 3lb]

Werk 5ks en draai indien daar met dieselfde kleur gewerk gaan word in ry 2.

Indien ry 2 met 'n ander kleur gewerk gaan word volg die stappe soos verduidelik in die onderstaande fotos.

Ry 2: 3lb in die eerste 3ks spasie, 3lb in elk van vlg 2 sp/s, die onderste punt word gevorm deur die vlg sp oor te slaan, 3lb in elk van vlg 2 sp/s, in vlg 3ks sp werk boonste punt deur daarin die vlg te werk: [3lb, 3ks, 3lb]; werk dan in elk van die vlg 2 sp/s weer 3lb, slaan 1 sp oor, 3lb in elk van vlg 2 sp, en in die heel laaste 5ks spasie word weer [3lb, 3ks, 3lb] gewerk.

Hierdie 2e ry word nou deurgaans herhaal. Die ry sal dus altyd begin met 5ks, en sal altyd eindig met 'n dubbelgroep van 3lb, 3ks, 3lb alles saamgewerk in die laaste 5ks sp.

Ek hoop julle het die tutoriaal geniet!

Mooi dag verder en lekker hekel!

♥

Vakansie, Tydskrif en Hekelgoeters

noreply@blogger.com (Unknown) — Wed, 11 Jun 2014 13:00:00 +0000

Hartlike goeie more almal,

Ek het 'n wonderlike geleentheid gehad om vir so paar daggies heerlik te gaan ontspan in Kommetjie. Vir die van julle wat nie weet waar dit is nie gaan kyk hier. Julle kan hier ook pragtige fotos sien van hoe dit daar lyk en hier kan julle gaan lees wat alles te siene en te doene is. Dit is 'n pragtige plekkie met 'n wonderlike atmosfeer en 'n vriendelike gemeenskap.

Die dag toe ek hierdie pad gestap het was die reenboog reg agter die vuurtoring. Ek kon nie vir 'n beter agtergrond gevra het nie.

Die uitsig vanaf die huis waar ek oorgebly het. Dit was heerlik om na die branders te kyk en elke aand met die gedruis daarvan aan die slaap te raak.

Die kamele by Imhoff Farm was prentjie mooi. Ek het nou wel nie op een se rug gery nie maar het wel een se kop gestreel en met hom gesels. Lyk dit nie ook vir julle of hulle altyd glimlag nie? Hulle is te pragtig!

Dit was ook my eerste besoek aan Kirstenbosch tuine. Die mooiste plantegroei kan in hierdie tuin gesien word.

Papagayo in Kalkbaai het die mooiste klere. Kleurvol en so reg in my kraal!

Daar is ook vele ander wonderlike winkels maar ek was so besig om rond te kyk en my te vergaap aan al die mooi dinge dat ek skoon vergeet het om fotos van alles te neem.

Daar was nie veel tyd vir hekel nie want ons het ver ente gestap, koffie gedrink by verskeie plekkies en rondgery en gekuier by allerhande interessante plekkies.

Ek het wel in die aande so bietjie kans gekry om te hekel aan hierdie serp en het dit eers klaargehekel toe ek hier by die huis aankom.

Tasse was nog nie eens behoorlik uitgepak nie toe gryp ek die serp en besluit om dit eers gou klaar te maak.

Dit is 100% wol en gehekel met 5mm hekelpen. Die steek wat ek gebruik het is 'Broomstick'. Dieselfde patroon wat ek in my vorige artikel vir julle gewys het. Ek het 30 steke gebruik en dit 'n 'twist' gegee voordat ek die twee kante aanmekaar vasgewerk het. Vertoon baie mooi en is heerlik warm.

En ek moet ook darem so bietjie wys dat van my hekelpatrone in die nuutste uitgawe van die Kuier tydskrif is.

Dankie Raylentia en Kuiertydskrif vir die blootstelling van my werk! Dit is vir my 'n groot voorreg om van my patrone te deel met die Afrikaanse gemeenskap. :)

Die 7e Junie het die uwe ook verjaar en is ek weereens heerlik bederf met 'n pragtige bos rose, 'n bottel Chocoholic en heerlike Nougat.

Terwyl ek vanoggend probeer orde skep hier by my het ek ook sommer 'n paar fotos geneem van projekte waarmee ek besig is.

Ek het 'n paar van hierdie geborduurde skinkbord lappies wat al jare in my kas lê. Dit is lappies wat my skoonma se moeder nog geborduur het. Die een lappie se randte is ook met die fynste draad omgehekel. Ek het dit gou vanoggend omskep in kussing oortreksel en dink dit lyk pragtig tussen die gehekelde werk op my bank.

Dit is ook 'n manier om die pragtige erfstukke wat in die kas lê waar niemand dit sien nie te gebruik en te waardeer.

Dalk het jy ook so paar lappies wat omgetower kan word en nou weet jy wat om daarmee te doen. :)

Hierdie is ook nog 'n ou Granny bersie wat besig is om te groei. Ek sal dit wys wanneer dit klaar is maar daar moet nog baie ure se hekel in hom ingaan.

Hier is so paar fotos van my gehekelde juwele wat ek graag dra.

Ek hou van die sagtheid van die gehekelde armbande. Hulle dra soos 'n droom.

Hier is so paar idees wat julle kan inspireer om ook julle eie gehekelde juwele te maak.

Versier dit met kant, knopies en dies meer.

Satynroos, knope, gehekelde sirkels en 'n paar krale geryg aan 'n organza lint.

Oorbelle is klein sirkeltjies met fyn kraaltjies ingevoed in die laaste ry.

Hierdie armband was die binnekant van 'n klein hout borduurraam. Ek het met navy blou katoendraad 'n reguit strook gehekel en rondom die raam getrek. Die rooi koord het ek toe rondom gedraai en alles is vasgewerk met 'n naald en gare.

Rooi oorbelle met katoen en glas krale.

Verskeidenheid van oorbelle. Baie maklike ontwerpe gehekel met fyn fyn katoen.

Armband detail van naby gesien. Verskillende knopies is baie treffend.

Knoopsgate gehekel aan die een kant van armband vir maklik oop en toemaak.

En hiermee gaan ek eers voldoen en groet. Ek het baie werk wat gedoen moet word hier by die huis voordat ek terugkeer werk toe volgende week. Daar is ook baie van julle wat my gekontak het terwyl ek weg was en ek het ure se eposse wat ek nog moet beantwoord. Dankie vir julle geduld.

Wonderlike week vir julle almal. Dit is baie koud hier by ons in die Kaap met die sneeu wat geval het. Bly warm en lekker hekel!

Groete

♥

Hekelsteek: "Broomstick" Hekelsteek.

noreply@blogger.com (Unknown) — Tue, 03 Jun 2014 11:03:00 +0000

Die Broomstick steek word deesdae oral gesien op die net en in die tydskrifte. Dit is 'n pragtige steek om te leer en die eindresultaat is 'n pragtige kantagtige patroon.

Ek het verskeie navrae gekry en almal wil weet hoe word die steek gewerk. Ek is vanoggend by die huis en het besluit om vir julle 'n tutoriaal te doen. Ek het probeer om die fotos so duidelik as moontlik te neem en alhoewel die son maar baie skaars is hier in die Kaap vanoggend hoop ek dat dit tog duidelik genoeg is sodat julle sommer in 'n japtrap ook hierdie steek sal kan baasraak!

Materiaal benodig:

In hierdie tutoriaal het ek Vinnis Nikkim gebruik met 'n 5mm hekelpen. Jy kan enige dikte draad gebruik met 'n hekelpen grootte wat geskik is vir die draad. Normaalweg gebruik ek of 'n 3.75mm of 4mm hekelpen wanneer ek met 'n dubbeldraad hekel, maar in hierdie geval het ek 'n nommer groter gegaan omdat ek wil hê die eindproduk moet lossies wees en dit moet goed drappeer wat die ideale voorkoms sal wees vir 'n serp.

Vir die optel van die lusse benodig jy ook 'n groooooot nommer breipen. Ek gebruik hier 'n 20mm maar jy kan enige groot nommer gebruik. Die grootte van die breipen bepaal die lengte van die lusse wanneer die steek gewerk word.

'n Verdere puntjie is ook dat ek die patroon afwissel met 2 rye kortbene en dan 1 ry Broomstick, weer 2 rye kortbene en 1ry Broomstick. Daar is verskillende kombinasies om die Broomstick te gebruik. Ek gebruik ook veelvoude van 5 in hierdie patroon maar daar is patrone waar veelvoude van 4 byvoorbeeld gebruik kan word. Die beginsel van die patroon is dat sou jy in veelvoude van 5 werk beteken dit jy werk 5 lusse af op 'n keer en in veelvoude van 4 word 4 lusse afgewerk. Binne in elke groepie van 4 of 5 lusse wat van die breipen verwyder word moet daar 'n aantal kortbene gewerk word. Sou ek 4 lusse verwyder moet ek dit vervang met 4 kortbene. Dit klink nog Grieks op hierdie stadium maar kom ek wys julle wat ek bedoel.

Goed kom ons begin!

Begin met 26 kettingsteke en werk 2 rye kortbene. Die heel eerste kortbeen word in die 2e kettingsteek vanaf pen gewerk wat beteken daar sal 25 kortbene in elke rye wees. Onthou ons werk in veelvoude van 5.

Wanneer die 2e kortbeen ry voltooi is verwyder die hekelpen en steek die breipen deur die lus soos aangedui op die foto. Indien jy regshandig is soos ek dan sal jy van links na regs werk. Indien jy linkshandig is sal jy van regs na links werk.

Neem die hekelpen en steek deur die volgende kortbeen, slaan die draad om die pen en trek die lus deur na vorentoe.

Trek die lus lank genoeg uit sodat dit om die breipen gehaak kan word en trek dan die draad stywer. Moet nie die draad te styf trek nie. Werk lossies want wanneer die hekelpen met die volgende stap deur die lusse gesteek moet word moet daar genoeg spasie wees sodat dit gerieflik die 5 lusse sal kan afhaak.

Herhaal die stappe soos reeds verduidelik.

Steek die hekelpen in die volgende kortbeen, haak die draad en trek deur na vorentoe.

Plaas die lus om die breipen.

Herhaal totdat daar deur al die kortbene gewerk is. Daar is 25 lusse op die breipen.

Steek die hekelpen deur die eerste 5 lusse op breipen en sorg dat die werkende draad aan die agterkant lê. Slaan die draad om hekelpen en trek dit deur die 5 lusse.

Sodra dit deurgetrek is slaan die draad weer om maak 'n kettingsteek. Dit trek die 5 lusse tesame.

Die 5 lusse is nou gereed om van die breipen verwyder te word.

Werk nou 5 kortbene in die 5 lus- spasie soos die foto illustreer.

Haak nou die volgende 5 lusse bymekaar op die breipen.

Jy sal merk dat die werkende draad nie nou aan die agterkant lê nie maar meer na vore trek. Slaan die draad om en trek deur die 5 lusse.

Daar is nou 2 lusse op die pen. Die heel laaste lus van die laaste kortbeen wat gewerk is plus die lus wat so pas deur die 5 lusse op die pen getrek is.

Slaan die draad om pen en trek deur albei lusse.

Hierdie steek tel ook as die eerste kortbeen. Werk nou nog 4 kortbene in dieselfde spasie.

Herhaal die stappe totdat alle lusse in groepe van 5 afgewerk is. Maak 1ks en draai werk om.

Werk nou weer 2 rye kortbene en maak seker dat daar weer 25 kortbene in elke ry is.

Na elke tweede ry word die hekelpen verwyder en die breipen word dan weer gebruik om die volgende ry lusse op te tel.

Die eindresultaat is 'n pragtige kantagtige patroon wat lieflik vertoon.

Die agterkant van die patroon.

Die voorkant van die patroon.

En dit is dan die "Broomstick" patroon.

Geniet dit en lekker hekel almal!

Hekelgroete!

♥

Hekel Patroon en Tutoriaal: Moderne "Granny Square".

noreply@blogger.com (Unknown) — Fri, 16 May 2014 13:15:00 +0000

Hierdie moderne "Granny Square" lyk so bietjie anders as die tradisionele een. Dit is basies dieselfde stappe wat gevolg word met 'n effense kinkel. Kom ek wys julle hoe maklik dit is om hierdie vierkantjie te hekel.

Materiaal gebruik: Elle Premier Katoen 4-draad en 3mm hekelpen.

Kleur A = Gold; Kleur B = Burnt Orange; Kleur C = Moss; Kleur D = Brown; Kleur E = Taupe.

Grootte van blokkie: 12 x12 cm

Kleur A: Begin met 5ks, gs om ring te vorm.

Ry 1: 3ks, werk 2lb in die ring, 2ks, * werk weer 3lb in ring, 2ks,* herh vanaf * tot * nog 2 keer. [Daar is altesaam 4 groepies van 3 langbene in hierdie ry]; Glipsteek in die 3e ks om die ry te voltooi. Heg af.

Ry 2: Heg Kleur B in enige 2ks sp en werk 3ks, werk in dies sp die vlg: [2lb, 2ks, 3lb]; 1ks, * werk nou in vlg 2ks sp die vlg: [3lb, 2ks, 3lb]; 1ks, * herh weer van * tot * nog 2 keer en gs in 3e ks om ry te voltooi. Heg af.

Ry 3: Heg Kleur C in enige hoekspasie en werk 3ks, werk in dies sp 2lb, 1ks, 3lb in vlg sp, 1ks, werk in vlg hoekspasie [3lb, 2ks, 3lb]; 1ks, 3lb in vlg sp, 1ks, 3lb in vlg hoekspasie. 4ks en draai . Die volgende ry word in die teenoorgestelde rigting gehekel.

Ry 4: Werk 3lb in die 1e sp, 1ks, 3lb in vlg sp, 1ks, werk in vlg hoekspasie [3lb, 2ks, 3lb]; 1ks, 3lb in vlg sp, 1ks, 3lb in laaste sp, 1ks, 1lb in bo-punt van 3ks. Heg af en draai werk weer om.

Ry 5: Heg Kleur D in spasie soos aangedui op foto en werk 3ks, werk in dies sp nog 2lb, 1ks, 3lb in vlg sp, 1ks, 3lb in vlg sp, 1ks, in vlg hoekspasie werk [3lb, 2ks, 3lb]; 1ks, 3lb in vlg sp, 1ks, 3lb in vlg sp, 1ks, 3lb in laaste sp, 4ks, draai werk om.

Ry 6: [3lb in vlg sp, 1ks] herh nog 2 keer, werk in vlg hoekspasie [3lb, 2ks, 3lb], 1ks; werk nou [3lb in vlg sp, 1ks,] herh nog 2 keer, 1ks, 1lb in laaste lb. Heg af en draai werk weer om.

Ry 7: Heg Kleur E in hoekspasie soos aangedui op foto en werk in dies sp die vlg: [3ks, 2lb, 2ks, 3lb], 1ks, [3lb in vlg sp, 1ks], herh nog 2 keer, werk vlg hoekspasie: [3lb, 2ks, 3lb], 1ks, * [in vlg ks sp werk 3lb, 1ks] herh nog 2 keer, werk hoekspasie soos volg: [3lb, 2ks, 3lb] 1ks; * herh van * tot * tot einde van rondte en gs in die 3e ks.

Ry 8: Glipsteek deur tot in die hoekspasie, 3ks, werk in dies sp die vlg: [2lb, 3ks, 3lb], * in elk van vlg 4 ks spasies werk [1lb, 2ks, 1lb]; werk hoekspasie: [3lb, 2ks, 3lb]; * herh van * tot * nog 2 keer, in elk van vlg 4 ks spasies werk [1lb, 2ks, 1lb], gs in 3e ks. Heg af.

Onthou julle die bos geel rose wat ek vir Moedersdag gekry het? Hulle het intussen hulle gesiggies oopgemaak en is tog te pragtig!

Ek is vandag so bietjie dagaf wat beteken 'n heerlike dag wat ek by die huis kan deurbring! En kuier ek nie lekker hier by myself nie! Het besluit om All Bran Muffins te bak vir middagete. Wel dit is een van daardie klaargemengde pakkies waarby mens net olie, eier en melk meng. Daar dryf so 'n hemelse geur hier deur die huis. Ek het die vuurwarm muffins oopgesny en eet appelkoos konfyt en kaas daaroor. En natuurlik 'n beker koffie om alles mee af te spoel.

En op hierdie heerlike Vrydag middag groet ek eers weer.

Mag julle almal 'n heerlike naweek hê!

Lekker hekel almal!

♥

Tunisiese Hekel klas, Moedersdag en Hanlie se Kombers.

noreply@blogger.com (Unknown) — Sun, 11 May 2014 15:52:00 +0000

Goeie dag liewe lesers,

Ek hoop dit gaan sommer baie goed met almal en dat al die Moeders bederf is vandag!

Vanoggend het my dogter hierdie pragtige bos geel rose vir my gebring. Die pragtige goudgeel gesiggies bring ook sommer 'n tikkie sonskyn hier binne in die huis.

In 'n geskenk pakkie het ek ook 'n lekker paar pantoffels, 'n heerlike sjokolade asook 'n ietsie wat lekker ruik en wat goed is vir die lyf gekry. En die woorde "Oneindig lief vir Mams" op die kaartjie. En ook 'n telefoon oproep van my seun wat te vêr is op by my te wees maar wat net wil sê hy is lief vir my. Dit is al wat enige Moeder nodig het. Om te weet haar kinders is lief vir haar. :)

En hier is die fotos van die Tunisiese klas gister oggend by The Crafters Inn. Ons het heerlik gekuier. Ek het 4 verskillende steke gedemonstreer en elkeen het blokkies gehekel om die steke te oefen. Daar is geleer hoe om te verminder en te vermeerder. 'n Paar tips is gegee oor kleure verander en daar is ook gepraat oor ekstra tegnieke. Hier onder is Sharloom, Hanlie en Anje besig om te konsentreer en hulle het nie eens agtergekom ek neem 'n foto nie.

Hier onder is 'n kombers wat Hanlie gehekel het. Sy was ook in een van my meer gevorderde hekel klasse en hierdie kombers is die resultaat daarvan. Pragtig Hanlie! Baie dankie dat jy my toelaat om dit met almal hier te deel!

Ek wens almal 'n wonderlike week toe. 'n Week van heerlike hekel en lekker gesellige aande met 'n hekelwerkie op die skoot.

Warm bly almal!

Tot volgende keer

Lekker hekel almal!

♥

Wys ons jou hekelwerk.

noreply@blogger.com (Unknown) — Tue, 29 Apr 2014 19:37:00 +0000

Ek beplan al lankal om 'n "Spogblad" oop te maak en toe woon Melanie Human so rukkie terug een van my Tunisiese klasse by en raai net wat haal sy uit haar sak om vir my te wys? 'n Kussing oortreksel waarmee sy besig is. En die patroon wat sy gebruik is toe so welliswaar my patroon wat ek hier op my blog geplaas het. Ek was so in my skik om dit te sien en net daar en dan het ons ooreengekom dat sy vir my fotos sal stuur sodra sy klaar is sodat ek dit vir almal kan wys.

Hier is my oorspronklike patroon!

En hier is Melanie se weergawe!

Dit is wonderlik om te sien hoe die kussing vertoon in die groene en roesrooi kleur wat Melanie gekies het. Haar kussing is vir my pragtig!

En die agterkant lyk net so mooi!

Hout knope!

Hiermee wil ek dan ook almal uitnooi om vir my fotos te stuur van enige item wat gehekel is vanaf 'n Tutoriaal of Patroon wat ek hier op Hekel Idees geplaas het. Ek gaan 'n afdeling oopmaak met die naam "Spogblad" en sal die fotos daar plaas soos wat ek dit ontvang. Dit behoort baie interessant te wees om te sien hoe elke persoon se skepping lyk. Hoe lyk dit? Hierdie is jou kans om jou hekelwerk hier te plaas. Ek sal ook seker maak dat jou naam by elke foto geplaas word.

Onthou net asseblief die Spogblad wys slegs fotos van items wat gehekel is met patrone of tutoriale wat hier op Hekel Idees gekry is.

Moenie skaam wees nie! Stuur daardie fotos en spog so bietjie! :)

Hekelgroete

♥

10 Hekel Motiewe: Romantiese Ontwerpe

noreply@blogger.com (Unknown) — Sat, 26 Apr 2014 14:46:00 +0000

My heel eerste digitale eboekie is nou beskikbaar!

Die boekie bevat 10 hekel motiewe en daar is 22 bladsye. Elke patroon is duidelik saamgestel met volkleur fotos en illustrasies en is so geskryf dat selfs die groentjie kan saamhekel.

Die boekie word in PDF formaat beskikbaar gestel en word gestuur via epos op dieselfde dag nadat bewys van betaling daarvan ontvang is. Dit geld slegs vir PDF boekies en nie boekies wat eers gedruk en gepos moet word nie. Omdat drukkers kostes hoog is word ~~boekies slegs op aanvraag gedruk.~~ daar slegs gedrukte boekies aangebied vir die eerste 10 bestellings.

Ek aanvaar geen aanspreeklikheid vir die aflaai, lees en uitdruk van die dokument nie. Maak dus asseblief seker dat jou rekenaar wel PDF dokumente kan lees voordat enige aankope gedoen word.

*Indien jy nie 'n rekenaar tot jou beskikking het nie kan ek die boekie hier by my laat druk en dit aanstuur met gewone pos. Posgeld asook drukkers kostes sal dan bygereken moet word wat beteken die boekie sal duurder wees. Die drukkers kostes is hoog en word in kleur gedoen wat beteken indien die boekie gedruk en gepos word sal die prys R100,00 beloop. * Die gedrukte boekie aanbod is net geldig tot 28 April 2014 waarna slegs PDF's aangekoop kan word.*

Ek het maande gewerk hieraan en elke patroon is oor en oor gehekel om te verseker dat alle aanwysings korrek is.

Die prys is R50,00 wat beteken dat elke patroon slegs R5,00 kos!

Vir verdere besonderhede kontak my gerus deur die "kontak my" vorm wat bo aan hierdie bladsy verskyn in te vul. Stuur asseblief jou naam en epos adres deur na my en dui aan dat jy belangstel om die boekie aan te koop.

Kontak my op Facebook deur 'n persoonlike boodskap na my toe deur te stuur en laat asseblief 'n epos adres sodat ek kan terug antwoord.

Voorbeeld van gedrukte boekie in A4 vorm.

Mooi bly!

♥

Hekelsteek Kombinasies: 'V" Steek #2: Langbeen groepe.

noreply@blogger.com (Unknown) — Thu, 24 Apr 2014 19:11:00 +0000

Pragtige gehekelde patroonsteek om te leer!

Grootte van blokkie: 17 x 17cm

Materiaal gebruik: Elle Pure Gold Dubbeldraad en 4mm hekelpen.

Spesiale Instruksies in hierdie patroon: Langbeen groep [Afkorting = lbgr] Werk in dieselfde steek die volgende: [2lb,1ks,2lb]

Begin met 35 ks.

Ry 1: 1lb in 4e ks vanaf pen, * slaan 2ks oor, werk 'n lbgr in vlg ks, slaan vlg 2 ks oor, 1lb in vlg ks,* herh vanaf * tot * nog 4 keer, 1lb in laaste ks, draai

Ry 2: 3ks, 1lb in vlg lb, * lbgr in 1ks spasie van vlg lbgr, 1lb in vlg lb, * herh vanaf * tot * nog 4 keer, 1lb in laaste lb, draai

Herhaal ry 2 tot 14 rye voltooi is.

Laaste ry: 2ks, hlb in vlg lb, * 2ks, kb in 1ks spasie van vlg lbgr, 2ks, hlb in vlg lb,* herh vanaf * tot * nog 4 keer, hlb in laaste steek. Heg af.

Idees:

Hekel hierdie blokkie langer vir 'n baie mooi serp!
Hekel blokkies in verskillende kleure vir 'n mooi kantagtige baba kombersie.
Gebruik die patroonsteek in lang rye vir 'n lekker groot kombers.
Hekel 'n toppie of baadjie en gebruik hierdie steek.

Wat jy ookal besluit om te hekel. Hierdie steek is altyd 'n wenner!

Geniet dit en lekker hekel almal!

♥

Gratis Patroon: Gehekelde Granny Skouerserp.

noreply@blogger.com (Unknown) — Sun, 06 Apr 2014 10:41:00 +0000

Materiaal gebruik:

2 x 50g balle Elle Timber Dubbeldraad [Kleur: Witchhazel]
1 x 50g Elle Family Knit Dubbeldraad [Kleur: Claret]
1 x 50g Elle Family Knit Dubbeldraad [Kleur: Anitque]
1 x 100g Elle Pure Gold Dubbeldraad [Kleur: Navy]
4mm hekelpen

Die verwisseling van kleure word nie uiteengesit nie en kan gedoen word volgens eie smaak.

Begin met 6 ks en gs om ring te vorm.

Ry 1: Werk in ring soos volg: 3ks, 2lb, 2ks, 3lb, 3ks, draai.

Ry 2: 2lb in die 1e lb, 1ks, werk nou in vlg 2ks sp die volgende: [3lb, 2ks, 3lb]; 1ks, slaan vlg 2lb oor en werk dan in die volgende steek wat hierna die laaste steek genoem word weer 3lb, 3ks en draai.

Ry 3: 2lb in die 1e lb, 1ks, 3lb in vlg 1ks sp, 1ks, werk in vlg sp wat hierna die hoekspasie genoem word: [3lb, 2ks, 3lb]; 1ks, 3lb in vlg sp, 1ks, 3lb in laaste steek, 3ks, draai.

Ry 4 tot ry 44: Herhaal soos uiteengesit in ry 3 deur 3lb en 1ks in elke spasie aan sykante te werk en in elke hoekspasie word [3lb, 2ks, 3lb] gehekel. Eindig met 3ks, draai.

Werk 'n ry langbene eweredig oor slegs die boonste reguit gedeelte. Heg af.

Randafwerking:

Sykante het spasies waarin gewerk kan word.

Heg randkleur in enige kettingsteek spasie aan sykant en werk dan soos volg: 5ks, lb in dies sp, werk nou in elke ks spasie [1lb, 2ks,1lb] en in elk van die 3 hoeke werk [1lb, 2ks, 1lb, 2ks, 1lb, 2ks, 1lb]. herh tot einde van ry en gs in die 3e ks. [Merk daar is spasies waarin steke gewerk word aan die 2 sykante maar die boonste rand bestaan uit die ry langbene.

Werk die boonste rand deur 1 langbeen oor te slaan en dan 2 langbene om sodoende te verseker die steke word egalig versprei. Verwys na die rooi kolletjies op die foto.

Vlg ry: Glipsteek in sp, 5ks, 1lb in dies sp, werk nou in elk van die vlg 2ks sp soos volg: [1lb, 3ks, 1lb] herh tot einde van ry, gs in 3e ks.

Laaste ry: Glipsteek in sp, werk in dies sp soos volg: [5 ks, 1lb]; * werk nou 1kb in vlg lb, werk in vlg sp weer [1lb, 2ks, 1lb] * herh vanaf * tot * oor al 3 sye en eindig met gs in 3e ks. Heg af.
Weef alle los drade weg.

Tot volgende keer!

Lekker hekel almal!

Hekel groete

♥

Google tot jou diens. Hoe om hekelpatrone te soek.

noreply@blogger.com (Unknown) — Tue, 01 Apr 2014 16:24:00 +0000

'n Hartlike goeie middag almal!

Dit is vanuit 'n bewolkte en koue Somerset Wes wat ek groet vandag. Ek dink die winter is hier en dit beteken net een ding. Tyd om lekker snoesige komberse te hekel wat sommer die bene en lyf warm hou terwyl dit groter en groter groei so op die skoot!

Maar voordat ek drome begin droom oor snoesige hekel aande en toekomstige projekte wil ek vandag bietjie gesels oor die soek van hekel patrone.

Ek ontvang daagliks verskeie versoeke vir hekelpatrone. Wat my veral opgeval het is dat vroue noem dat hulle al oral gesoek het maar kry glad nie 'n patroon vir die of dat nie. Dit het my laat besef dat daar baie vroue in Suid Afrika is wat nie weet hoe om Google te gebruik nie.

Wat doen ek wanneer iemand my vra vir 'n hekelpatroon? Ek gebruik Google en ek soek vir 'n patroon. Ek werk voltyds en tyd is bitter kosbaar wat beteken ek kan nie in die aande na werk tot watter tyd sit en patrone soek vir mense nie. Na-ure tyd word gebruik vir die ontwikkeling van my eie reeks patrone, vir die skryf van tutoriale wat gewoonlik verskeie fotos insluit en dan moet ek ook nog kans kry om te hekel en my ander aktiwiteite inpas. Ek is nie 'n voorstander vir die 'scan' of 'copy' van enige patrone wat dan aangestuur word nie. Dit is nie net onwettig nie maar krap my geweldig om wanneer iemand my vra of ek dit sal doen. Ek sal gaan soek en sal 'n 'link' aanstuur en dit is hoe vêr ek bereid is om te gaan. Dit gaan dus nie help wanneer jy vra of ek vir jou 'n patroon het van dit of dat nie. Ek stuur 'n link en jy kan gaan kyk of jy iets daar kry.

Dit is in my natuur om mense te help daarom dat ek ook nie omgee om tyd te spandeer om mense te leer hoe om dinge vir hulself te doen nie. Dit is my beskeie poging om mense te 'empower' [sorrie maar ek kan nie nou dink aan 'n beter woord in Afrikaans nie] Deur mense die gereedskap te gee om hulself te help maak jy die lewe nie net vir jouself nie maar ook vir hulle baie makliker.

En indien jy een van die is wat my al gekontak het vir patrone of indien jy raad gevra het wil ek groot asseblief vra dat jy nou nie moet sleg voel nie. Daar is letterlik honderde en ek bedoel regtig honderde eposse wat ek al beantwoord het en wat nog daagliks instroom.

My deur is altyd oop en indien jy sukkel met 'n patroon of indien jy raad nodig het met 'n projek. Ek help graag en ek maak tyd daarvoor. Moet asseblief nie huiwer om te vra nie. Al wat ek probeer doen is om sover moontlik onnodige eposse te verminder. Dit sal baie minder frustrasie vir jou en my bring, want jy sal jouself baie vinniger kan help en hoef nie te wag totdat ek 'n tydjie kry om terug te antwoord nie. Soos reeds genoem my tyd is baie beperk!

Dus het ek besluit om 'n hele artikel te wy deur vir julle te wys hoe jy iets op die internet kan soek en dit te kry sonder sukkel.

Enige iets! en ek bedoel enige iets kan opgespoor word op die internet. Indien jy na iets soek en dit nie kry nie beteken dit jy soek net verkeerd.

Indien jy geen probleem het om iets op te spoor nie dan is hierdie artikel 'perdalkies' nie vir jou nie, maar miskien kan ek jou tog nog so ietsie leer wat jy nie geweet het nie.

'n Verdere punt wat ek wil aanspreek is die 'Kontak My' vorm. Daar is gereeld navrae sonder om enige epos adres te los. Dit het al soveel keer gebeur dat iemand vra vir 'n patroon of vir raad maar hulle laat nie 'n epos adres nie. En dan is daar diegene wat wel 'n adres laat maar dit is verkeerd ingetik en bly terug hop na my toe. Daar is geen manier wat ek jou dan kan opspoor nie. Maak dus asseblief baie seker dat daar nie vinger-foute insluip wanneer jy die 'Kontak My' vorm gebruik nie.

Het jy 'n Blackberry of iphone tot jou beskikking dan stel ek voor jy lees die volgende artikel wat jou alles verduidelik oor hoe Dropbox werk. Dropbox is fantasties want jy kan jou patrone daar gaan bêre en dit is beskikbaar wanneer jy dit nodig het. Lees ook hier wat Dopbox is. Ek dink dit werk met enige van die nuwer fone ook en jy kan dit sinkroniseer met omtrent enige foon, rekenaar en tab.

So kom ons begin!

Ek gaan begin deur vir julle 'n voorbeeld te gee. Die ander dag gesels ek met 'n dame en sy noem aan my dat sy al oral gesoek het vir 'n sig-sag hekel patroon maar daar is nêrens op die internet 'n patroon wat vir haar wys hoe om dit te hekel nie. Nodeloos om te sê dat ek amper verstik aan my tee toe ek dit hoor. Ek vra toe ewe kalm vir haar; "Het jy dit gegoogle en niks gekry nie?" "Ja, niks nie en ek is al moedeloos gesoek!" sê sy. "Nou sê gou vir my. Wat het jy ingetik op Google." Sy antwoord toe dat sy allerhande woorde probeer het. Sy het woorde gebruik soos 'riffel patrone' en 'sig-sag patrone' en noem ook 'n hele klompie ander woorde op wat my nou ontgaan. Ek vra toe of sy 'free crochet ripple pattern' of 'ripple crochet tutorial' of 'crochet zig-zag pattern' probeer het. Haar antwoord was nee sy het nie daaraan gedink nie. Ek verduidelik toe aan haar dat wanneer sy op die internet iets soek gaan Google presies vir jou gee wat jy vra. Wanneer jy dus net vra vir 'n 'ripple pattern' of 'n 'riffel patroon' is dit presies wat jy gaan kry. Google weet nie jy praat van 'n hekel patroon as jy dit nie vir hom intik nie.

Vir ons "Ou gesoute Googlelaars" mag dit dalk vergesog klink maar glo my daar is nog baie onkundiges wat nog nie die fynere punte geleer het nie. Jy moet eers leer om ook te dink soos Google.

Die swart en wit foto met die riffel patroon sowel as die grys en rooi dotjies sig-sag patroon is wat Google vir jou sal gee indien jy slegs "zigzag pattern" intik, maar tik "crochet zigzag pattern" en die foto links is die tipe informasie wat Google vir jou sal gee.

Dit gebeur ook telke male dat die Kontak My vorm hier ingevul word en dan word daar gevra vir patrone of tutoriale wat ek alreeds in die verlede behandel het. Kyk aan die regterkant van die blad is daar 'n 'Soek Boks'. Tik in die aangeduide oop spasie in waarna jy soek en dit sal jou deurneem na die patroon of tutoriaal indien dit wel reeds behandel is in 'n vorige artikel.

Dit geld vir enige ander webwerf. Soek na die "Search Box" wat gewoonlik aan die kant of bo aan geplaas is. Dit is die vinnigste manier om binne 'n webblad na iets spesifieks te soek. Indien dit nie op 'n webblad verskyn nie soek dan na 'Labels' of die Argiewe. Dit is nie altyd so doeltreffend soos die soek boks nie maar dit is 'n alternatief om te onthou.

Maar om terug te kom na Google!

Hier is 'n lys met 'n paar tips wat as riglyne gebruik kan word vir die soek van hekelpatrone in Google.

Sleutelwoorde is belangrik!
Gebruik sinonieme vir verskillende woorde. [Ripple, zig-zag, chevron, wave] of [ladies shawl, stole, mantle, scarf, wrap] of [baby beanie, baby hat, baby cap, baby skullcap] Probeer verskillende woorde en moet nie vergeet om vooraan die woorde "crochet pattern" in te tik nie.
Sinonieme kan ook soos volg ingetik word deur die volgende teken te gebruik: ~ Tik dus in Google soos volg: ["crochet pattern beanie" ~hat]
Google is nie gepla of jy 'n komma of hoofletter gebruik nie. Voorbeeld: [free crochet pattern socks girls]
Wanneer jy na iets spesifieks soek plaas dit binne aanhalingstekens soos volg: "crochet for therapy"
Soek jy 'n hekelpatroon wat in PDF formaat is? Soek dan soos volg : [crochet pattern adult beanie filetype : pdf]
Soek jy na 'n spesifieke hekelboek plaas die naam van die boek ook in aanhalingstekens of die skrywer se naam indien jy nie die naam van die boek kan onthou nie.
Het jy 'n foto opgespoor maar weet nie waar om die patroon te kry nie? Regs click op die foto. Kies dan die opsie "search google for this image"
Soek jy na 'n patroon wat of gehekel of gebrei kan word soek dan so: [crochet pattern beanies OR knitting pattern] Dit is belangrik dat OR in hoofletters getik word.

Daar is nog baie ander truuks wat gebruik kan word maar die boonste lys kan jou internet soekery alreeds baie vergemaklik. En moet ook nie vergeet van die "Skakels" afdeling heel bo aan die blad nie. Daar is verskeie skakels na webwerwe met duisende patrone. Ek sal ook nog meer skakels plaas mettertyd.

Ek hoop dit help so effens en maak die lewe so bietjie makliker.

Indien enige van julle dalk ook 'n tip het om die lewe te vergemaklik met die internet soekery is julle welkom om dit met ons te deel deur 'n boodskappie te los.

Mooi dag almal en lekker hekel!

♥

Hekel Tutoriaal: Krapsteek.

noreply@blogger.com (Unknown) — Fri, 14 Mar 2014 15:47:00 +0000

In opvolg van die Kamma Tartan Vadoekie wys ek vandag vir julle hoe om die krapsteek te hekel. Die krapsteek is 'n pragtige steek om te gebruik vir die afronding van items soos vadoekies, kombersies, some van baadjies, moue, krae ens. Dit gee 'n voorkoms van gedraaide koord en lyk net so pragtig om die rand van 'n gehekelde mandjie of selfs 'n babakombersie.

Die krapsteek is eintlik 'n kortbeen wat in die teenoorgestelde rigting gehekel word. Wanneer 'n gewone kortbeen gehekel word, word die pen in die volgende steek aan die linkerkant gesteek en dan gewerk. Daar word normaal weg na die linkerkant toe gewerk indien jy regshandig is. Wanneer 'n krapsteek gehekel word, word die pen in die volgende steek aan die regterkant gesteek en dan gewerk. Dit beteken jy werk jou krapsteek na die regterkant toe. Maar kom ek wys julle hoe maklik dit is!

Heg die draad in enige steek en werk 1ks, steek dan die pen in die steek wat aan die regterkant lê ....

slaan die draad om die pen

en trek deur die steek na vore [daar is 2 lusse op die pen]

slaan draad weer om hekelpen

en trek deur albei lusse. Dit voltooi die eerste krapsteek.

steek pen in die volgende steek wat aan die regterkant lê

haak die lus en trek deur na vore [2 lusse op die pen], slaan draad weer om pen

en trek deur albei lusse.

Herhaal die stappe. Indien jy regshandig is en gewoonlik na die linkerkant beweeg wanneer jy hekel beteken dit dat jy nou na die regterkant beweeg. Indien jy linkshandig is werk dit net anders om. Linkshandiges sal na die linkerkant toe beweeg.

Vadoekies lyk pragtig afgerond met so 'n krapstekie om die buitenste rand.

Pragtige dag almal en lekker hekel!

♥

Gratis Patroon: Gehekelde Kamma Tartan Vadoekie.

noreply@blogger.com (Unknown) — Sun, 09 Mar 2014 08:09:00 +0000

'n Gehekelde vadoekie of waslappie is een van daardie vinnige en maklike items wat in 'n japtrap gehekel kan word. Die vadoekie word eers klaar gehekel en dan word die strepe gehekel deur glipsteke in die oop gedeeltes op te werk.

'n Baie maklike maar pragtige vadoekie wat elke keer uniek sal wees afhangende van die kleure wat gebruik word.

Kom ek wys julle hoe maklik dit is om hierdie vadoekie te hekel!

Materiaal gebruik:

Vinnis Nikkim en 'n 3.75mm hekelpen. 1x50g van elke kleur wat jy wil gebruik. Hier is 3 kleure gebruik.

Grootte van lappie is ongeveer 30x30cm.

Voordat jy begin hekel kyk na die tweede laaste foto vir die aanduiding van die verwisseling van kleure.

Instruksies:

Begin met 57 kettingsteke.

Ry 1: 1lb in 4e ks vanaf pen, 1lb in vlg ks, *1ks, slaan 1ks oor, 1lb in elk van vlg 2ks, 1ks, slaan vlg ks oor, 1lb in elk van vlg 2ks, 1ks, slaan vlg ks oor, 1lb in elk van vlg 5ks, 1ks, slaan vlg ks oor, 1lb in vlg ks, 1ks, slaan vlg ks oor, 1lb in elk van vlg 3ks, 1ks, slaan vlg ks oor, 1lb in elk van vlg 3ks, 1ks, slaan vlg ks oor, 1lb in elk van vlg 5ks, 1ks, slaan vlg ks oor, 1lb in vlg ks, 1ks, slaan vlg ks oor, 1lb in vlg ks, 1ks, slaan vlg ks oor, 1lb in elk van vlg 3ks, 1ks, slaan vlg ks oor, 1lb in elk van vlg 3ks, 1ks, slaan vlg ks oor, 1lb in elk van vlg 5ks, 1ks, slaan vlg ks oor, 1lb in elk van laaste 5ks, 3ks, draai

Ry 2: 1lb in elk van vlg 4lb, 1ks, 5lb, 1ks, 3lb, 1ks, 3lb, 1ks, 1lb, 1ks, 1lb, 1ks, 5lb, 1ks,3lb, 1ks, 3lb, 1ks, 1lb, 1ks, 5lb, 1ks, 2lb, 1ks, 2lb, 1ks, 3lb, 3ks, draai.

Ry 3: 1lb in vlg 2lb, 1ks, 2lb, 1ks, 2lb, 1ks, 5lb, 1ks, 1lb, 1ks, 3lb, 1ks, 3lb, 1ks, 5lb, 1ks, 1lb, 1ks, 1lb, 1ks, 3lb, 1ks, 3lb, 1ks, 5lb, 1ks, 5lb, 3ks, draai.

Herhaal ry 2 en 3 deurgaans totdat die lappie 30cm lank is. [Ongeveer 30 rye of totdat dit 'n vierkant is]

Nou gaan die Tartan strepe gehekel word!

Al die oop spasies word gebruik vir die hekel van die strepe.

Begin in een van die oop spasies en in die heel onderste blokkie by ry 1 en werk dan die glipsteke oor elke ry op tot by die laaste ry.

Die draad is aan die agterkant van die werk terwyl die glipsteke aan die voorkant oor elke ry gehekel word.

Die hekelpen is dus altyd aan die voorkant. Die maklikste is om die lappie mooi plat te lê terwyl gewerk word. Moet ook nie die glipsteke styf trek nie. Dit moet redelik los wees sodat dit nie die lappie inmekaar trek nie. Volg net die spanning van die rye en maak seker dat jou spanning dieselfde bly.

Herhaal totdat al die oop spasies gevul is met 'n glipsteek.

Werk alle los drade weg.

Verwisseling van kleure.

Die stappe vir die hekel van die rye is soos volg:

4 rye in wit

2 rye in khaki

1 ry in grys

2 rye in khaki

Vir die glipsteke wissel die kleure af volgens eie keuse.

En dit voltooi die Kamma Tartan Vadoekie!

Lekker hekel julle!

♥

Kuiergas #9: Louisa van Taak

noreply@blogger.com (Unknown) — Sun, 02 Mar 2014 13:20:00 +0000

Goeiedag almal!

Ons kuiergas vandag is Louisa van Taak.

Kyk net hoe mooi is haar versameling! Kom ons laat haar toe om ons meer oor haarself te vertel.

Ek is ‘n oud-Suidwester wat nou al omtrent vir 22 jaar in die Vrystaat bly. Ek is ‘n grasweduwee, het twee getroude dogters en twee lieflike kleinkinders. Dan is ek ook nog “ma” vir twee honde , twee katte en ‘n erg bedorwe African Grey.

Ek was die jongste van drie kinders en om hierdie woelige dogtertjie besig te hou terwyl die ander kinders by die skool is, het my ma my leer hekel. Mensig, dit beteken dat ek al vir meer as ‘n halwe eeu aan die hekel is!

Ek het basies in die hippie-era grootgeword en van kleins-af het hulle kleredrag my geweldig gefasineer. Toe ek ouer was het ek vir my toppies en baadjies soos hulle sin met oumablokkies , vlinders en blomme op gehekel – weet nie wat die ander jongeres daarvan gedink het nie! (Jammer ek het nie fotos van daardie tyd nie…)

Ek het al met enige iets onder die son gehekel – wol, gare, tou, naaimasjiengare (vir baie fyn blommetjies) en dan ook met draad vir ‘n armband van draad en krale wat ‘n vriendin wou he.

In die winter hekel ek meestal komberse, serpe ens en wanneer die hitte ons slaan, hou ek my besig met kleiner hekelartikels. Ek is ook baie lief om iets anders as die gewone te hekel – dit laat my vriende altyd wonder “wat’s volgende?”

Met die dat manlief in die buiteland werk en my kinders al reeds uit die huis is, is my tyd my eie. Ek kan hekel van vroeg tot laat en dan nog deurnag ook as ek sou wou!

In die verlede (soos ons nou nog se^, “in die ou tyd”) is hekel geassosieer met ou tannies wat doilies hekel. Enige handwerk is deesdae weer hoogmode en hekel is die inding. Alles word deesdae gehekel: klere, gordyne, komberse, geskenke, matte, noem enige iets en iemand iewers het dit al probeer hekel.

Ek hou van enige kleur, maar menige keer vang ek myself dat ek weereens besig is met skakerings van blou en pers!

Hekel is een van my stokperdjies. Ek hekel gewoonlik vir myself, maar op die ou einde gee ek dit gewoonlik vir familie of vriende.

Ek het bietjie gaan oplees oor die oorsprong van hekel, maar eintlik is baie min bekend. Daar is wel op ‘n sekere manier met die vingers in die 16-1700s “gehekel”. In die 1800s was hekel ‘n goedkoper manier om kant te vervaardig. Die arm en middelklas het gehekel, want net die ryk mense kon regte kant bekostig!Koningen Victoria het hekel weer gewild gemaak toe sy vir die Britse soldate serpe gehekel het in die oorlog. Siestog, sy het toe ‘n groter hap afgebyt as wat sy kon kou en het toe net agt serpe gehekel , vir die res van die soldate het sy toe maar sjokolade gestuur!

Dit was baie lekker om hier by julle te kuier.

Hekelgroete uit die Vrystaat.

Louisa.

'n Groot dankie vir jou Louisa! Dit was heerlik om jou te ontmoet en dankie vir die lekker gesels en vir die wys van jou pragtige handewerk!

Ek dink almal sal saamstem dat Louisa beslis 'n pragtige versameling hekelwerk het. Pragtige unieke items. Ek hou veral van die spinnekopweb in die boom. [Ek hoop dit is 'n rubber spinnekop wat daar sit!] Nog 'n paar persoonlike gunstelinge is die pragtige ontwerpe wat in die draadringe geplaas is, en daar is ook heelwat van die komberse wat beslis volpunte kry in my boek. Die pienk toppie is gehekel met die Elle Premier Katoen wat Louisa gewen het in die Mezomode kompetisie so 'n rukkie terug hier by Hekel Idees.

En op hierdie laat Sondag middag groet ek eers weer.

Pragtige week vir julle almal!

Hekelgroete

♥