Iran Green Voice Feed - Turkish

موسوی: رفراندوْم گئچیرین

Wed, 06 Oct 2010 13:44:44 +0000

میر حسین موسوی کلمه وبسایتی‌له دانیشیق‌دا دؤلتین سیاست‌لرین ییٛخیجی و تالان ائدیجی تانیدیب، حاکمیت‌دن ایسته‌دی بو سیاست‌لری رفراندوْم قوْنوسو ائتسین.

موسوی حاکمیته خیطاب دئدی سانالیم بیزلر هامیمیز خالقین و اؤلکه‌نین دۇشمانی‌ییق. سیز اؤزونوز بیزدن آسیلی اوْلمایاراق یاشیل بایراقی قالخیزین و دیکتاتوْرلوق‌دان اۇزاق‌لاشیب خالقا ساری گلین.
موسوی سوْروشدو کیم سیزه ایذن وئریب ماجرالی سیاست‌لرله ایرانی بۆتون دونیاایله قارشیلاندیریب خالقی و اۆلکه‌نی سیاسی و ایقتیصادی چتین‌لیکلره سالاسینیز. یالتاقلانماق یئرینه بۇ ییٛخیجی سیاست‌لری رفراندوْما قوْیون گؤره‌لیم خالق بونلاری دستک‌له‌ییر یا یوخ.
موسوی آرتیردی تاسف‌له بو گرگین دۇرومدا باجاریقلی یؤنتیجی‌لردن (مدیرلردن) اؤلکه‌نی قۇرتارماق اۆچون یارارلانماق یئرینه اوْنلاری دوستاقلاییب‌لار.

علیرضا فرشی، بیلی‌یۇردو اؤگرتمنی ایخراج اوْلدو

Fri, 24 Sep 2010 03:43:31 +0000

آلینان بیلگیلره گؤره میللی فعال، بیلی‌یۇردو اؤگرتمنی (اونیوئرسیته اۇستادی)، بیلگی‌سایار مۆهندیسی، علیرضا فرشی یئنی تحصیل ایلی باشلاماسیلا جولفا آزاد بیلی‌یۇردو رییسی‌نین قرارینا دایاناراق ایخراج اوْلونوب. بۇ اوْ حالدا اوْلور کی بیلی‌یوردو رییسینین قانونٲ بو ایشه یئتگیسی یوخدور.
علیرضا فرشی ۸۸- جی ایل خۇردادین بیرینده «تۆرک دیلینده مدرسه» شوعارینا اؤترو تبریزده تۇتوقلانیب و اۇچ آی ایطیلاعات و تبریز زیندانیندا تۇتوقلو قالاندان سوْنرا حایات یولداشیٛلا بیرلیکده آلتی آی حبسه محکوم اوْلونوموشدو.

رژیم مامۇرلاریی میرحسین موسوی‌نین دفترینه یۆگوروب دفتری آختاردیلار

Fri, 17 Sep 2010 02:38:16 +0000

رژیم مامورلاری میرحسین موسوی‌نین دفترینه یۆگوروب، دفتری آختاریب اوْردا‌کی وسیله‌لری توقیف ائتدیلر. بۇندان اؤنجه دفترین رئیسی تۇتولموشدو.
مامورلار دفتری ایشغال ائدیبلر و موسوی‌یه دفتره گیرمک ایجازه‌سین وئرمیرلر. موسوی‌نین گؤروشلری و گل گئت‌لری ده آغیر نیظارت و محدودیت آلتیندادی و بو محدودیتلره رغماً موسوی ائو حصری دۇروموندادیر. بۇندان قاباق کروبی‌نین دا علیهی‌نه‌ده ساختا ایعتیراض‌چیلار وسیله‌سیله تعرروض اوْلموشدو.
موسوی بۇ جرکت‌لری پیسله‌ییب و آیدینلادیب یاشیل حرکتی بیر ایکی شخصیتین خذفیله دایانمایاجاق و حاکمیت ریضایت‌سیز جمعیت‌دن قوْرخمالیدیر.

قادین حاقلاری چالیشقانی، فاطمه نصیرپور آلتی آی دوْستاغا محکوم اوْلدو

Tue, 14 Sep 2010 21:43:01 +0000

فاطمه نصیرپور، «آذربایجان قادینی» آدلی اؤیرنجی درگیسینین باش یازاری و «آرمان» آدلی قاپاتیلمیش اؤیرنجی قۇرولوشونون اۆیه‌سی مرندین اینقیلاب محکمه‌سی طرفیندن آلتی آی حبسه محکوم اوْلدو.

بۇ اؤیرنجی چالیشقانی، اۇلوسلار آراسی قادین گۆنو مۆناسیبتیله قادین حاقلارینا عایید اؤزل درگی یایماق اۆچون، نیظاما قارشی تبلیغ ائتمک‌له سۇچلانمیشدی.
تبریز آزاد بیلی‌یوردونون اؤیرنجی قۇرولوشلارا نیظارت کوْمیته‌سی بۇ اؤزل درگی‌یه اساسلاناراق آرمان تشکیلاتی‌نی قاپالامیشدی.
فاطمه نصیرپور و وکیلی نقی محمودی، اینقیلاب محکمه‌سینین حۆکموندن تجدیدنظر ایسته‌ییبلر.

شیوا نظرآهاری ۵۰۰ میلیوْنلوق وثیقه‌ایله بۇراخیلدی

Sun, 12 Sep 2010 19:41:15 +0000

شیوا نظر آهاری، اۇشاق حاقلاری چالیشقانی و اینسان حاقلاری مۆخببیرلر کوْمیته‌سینین یازمانی، ۵۰۰ میلیون وثیقه‌له بۇراخیلدی. اوْ آذر آیینین ۲۹ – دان تۇتولموشدو.

شیوا نظر آهاری آیت الله منتظری‌نین قۇمدا ختم مراسیمینه گئدرکن یوْلدا آوتوْبوسدا تۇتولموشدو. بۇ اینسان حاقلاری چالیشقانینی مۇحاریب آدلاندیرماغینا باخاراق، آغیر جزا اوْنون اۆچون گؤزلنیر و دۇنیا سویه‌سینده مدنی چالیشقان‌لار شیوانین بۇراخیلماسی اۆچون گئنیش کمپئین ایجاد ائدیبلر.

رژیم تبریز یاشیل‌لارینا فیطر نامازی قیلماق ایجازه‌سین وئرمه‌دی

Fri, 10 Sep 2010 02:29:13 +0000

ایطیلاعات باخانلیغینین مامورلاری تبریزین یاشیل لاری و ایصلاحچی‌لاریله تاماسلاشیب، تۇتوب باسدیرما تهدیدیله اوْنلاری فیطر نامازی مراسیمی گئچیرمه‌دن منع ائتدیلر.

رژیمین مامورلاری فیطر نامازی قیلینماسینا چاغیریشی جۆرم بیلیب مراسیمی لغو ائتدیردیلر. بوندان اؤنجه ده رژیم مۇخالیفتچی‌لرین طریفیندن مذهبی مراسیمیلرین گئچیریلمه‌سینه ایجازه وئرمه‌میشدی. اؤرنک اۆچون هر ایل ایصلاحچی‌لارین طرفیندن گئچیریلن قدر گئجه‌لری مراسیمی تبریز شهرینده و تبریز و آزاد تبریز بیلی‌یوردلاریندا لغو اوْلونوب.
ایرانین باشقا یئرلرینده ده بۇ وضعیت حاکیمدیر و حوکومتچیلر فیطر نامازی مراسیمین اینحیصاری اوْلاراق مصادره ائدیبلر. بۇ دۇروما باخاراق آیت الله یوسف صانعی فیطر نامازینین واجیب اوْلماماسی و جماعتله قیلینماسینین لازیم اوْلماماسینی آیدینلادیب.

یۇرد دیشی ایرانلیلار توْپلانتی‌سینین دانیشانی جاسۇسوموش؟

Wed, 08 Sep 2010 06:40:40 +0000

ریچارد فرای، ایرانلی مکتب نظریه‌سینین مۆبدعی، ایطیلاعات باخانلیغینین سندلرینه گؤره سیانین جاسۇسودور و بۇندان اؤنجه ده جاسوسلوق و بیلگی توْپلاما مقصدیله ایرانا گلمیشدی.
ریچارد فری یاخینلیقدا رحیم مشایی نین تشبوثیله گئچیریلمیش یۇرددیشی ایرانلیلار توْپلانتیسیندا دانیشدی. اوْ بیر ایران-شوناس کیمی تانیلیر و دفعه‌لرله ایصفاهاندا قۇیلانماق دیلگین بیلدیریب. بۇ توْپلانتی‌له یاناشی بیر قیمتلی قدیمی ایصفاهان ائوی اوْنا تقدیم اوْلدو. پارلمان نیوزون یازدیغینا گؤره ایطیلاعات باخانلیغی ۱۳۷۶- جی ایلده یاییلان بیر کیتابدا فرایین جاسۇسلوق نیتیله ایرانا گلمیشدی.

ساتاشقانلار و تالانچیلار یاشیل شخصیتلره قارشی مانئور گئچیردیلر.

Sat, 04 Sep 2010 17:41:26 +0000

ایکی تانیلمیش روحانی‌نین بیت‌لری ساتاشقانلار و تالانچیلارین حمله‌لرینه معروض قالدیلار. بۇ اوْباش تهراندا یاشیل لیدری مهدی کروبی و شیرازدکی مرجع آیت الله دستغیبین ائو و مسجیدلرینه یۆگوروب قوْرخوتماق مانئوری گئچیرتدیلر.
حۆکومتچی دارغاشاگیردلار نئچه گۆندور مهدی کروبی‌نین ائوین حصر ائدیب محله‌نی دؤیوش میدانینا چئویریبلر. اینتیظامی قۆوه‌لرین ده تحررۆکسوزلوکلاری واراقلی دیر. بۇ قۇلدورلار ائوین قاپیسین یاندیریب ائوه ساری یۆگورمک ایسته‌دیلر آنجاق مۆحافیظلرین قارشیلاشماسیله اۆزلشدیلر. بو دارتیشمالاردا کروبی‌نین باش مۆحافیظی صدمه گؤروب هوشدان گئتدی.
بۇ یۆگوروش کسگین مۆخالیفتلرله اۆزلشدی. میر حست موسوی بیلدیری وئریب اوْنو پیسلدی و کروبی‌له دانیشیق دا اوْنون ائوینه گلمک ایستدی. کروبی تشکر ائدیب بو ایستگی رد ائتدی. خاتمی ده کروبی‌له دانیشیب حیمایتین بیلدیردی.
عئینی زاماندا ساتاشقانلار شیرازدا آیت الله دستغیبین قبا مسجیدینه تعرض ائتدیلر. بۇ تعرضه قارشی شیرازلیلار ییغیشیب آیت الله دستغیبی دستکله‌ییب شۇعار وئردیلر.

رحیم مشایی‌نین جۆمهور باشقانلیغی آدایلیغینا عایید وبسایت ایشه باشلادی

Thu, 02 Sep 2010 01:32:43 +0000

مشانیوز وبسایتی رحیم مشایی‌نی اۆچ ایل سوْنرا باشقانلیق سئچگی‌لرینده تبلیغ ائتمک قصدیله ایشه دۆشدو. بۇ وبسایتدا بۆتون مشاییه عایید خبرلر، مشایی‌نین دانیشیقلاری و موْضعلری و هابئله اوْنون مۇخالیفلرینین سؤزلری گلیب.
بو سایتین هر طرفینده مشایی‌نین چئشیدلی عکس‌لری گؤرونور و ماراقلیدیر سایتین یۇخاریسیندا مشایی‌‌له احمدی‌نژادین عکسی گلیب کی بو عکسده مشایینین بۆتون باشی گؤرونور آنجلق احمدی‌نژاددان تکجه چنه و آغیز عکسده یئرلشیب. بئله گلیر بۇ عکس مشایی‌نین نۇفوذون آنلادیر.
بئله گلیر بۇ سایت مشایی‌نی گلن جۆمهور باشقانی کیمی تبلیغ ائتمک و اوْنون آدین داها آغیزلارا سالماق اۆچون قۇرولوب آنجاق بعضی حۇکومتچی سایت‌لار اوْنو مشایی‌نین مۇخالیف‌لرینه عایید بۇلوبلر و قصدینی مشایینی تخریب ائتمه تانیتدیریبلار.

رسا تئلئوئزیاسی ساتئلیت‌ یایینین باشلادی

Wed, 01 Sep 2010 18:54:00 +0000

رسا، ایران یاشیل حرکتینین تئلئوئزیاسی اۇیدو (ساتئلیت) طریقیله یایینین باشلادی. بۇندان اؤنجه مشروطه گۆنویله یاناشی رسا اینترنت یایینین باشلامیشدی و بۇگون شهریورین اوْنوندان اۇیدو یایینین (پخش ماهواره‌ای) باشلادی.
بۇ تئلئویزیانی بیرپارا یاشیل چالیشقانلار ایداره ائدیرلر و یاشیل حرکتنین استراتژی لری یانی عۇمومی آگاهلیغی آرتیرماق و یالان‌لارا مۆباریزه اۇغروندا چالیشاجاق.
بو تئلئوئزیانین اۇیدو یایینی اۆچون آشاغداکی معلوماتدان فایدالانین:
Telstar 12
Transponder 6, 15.0°W
Polarisation: Vertical
Frequency: 11527 MHz
Symbol Rate: 1630 MHz
FEC: 2/3