මගේ සටහන්

HTML හා PHP ඇසුරෙන් form භාවිතය :: 3 වන පියවර : ආරක්ෂාව තර කරමු

2012-04-11T09:20:00.001+05:30

මේ ලිපිය මීට මාස ගානකට කලින් ලියපු ලිපි පෙලක අන්තිම ලිපිය. කලින් ලිපි බලන්න ඕන නම්

HTML හා PHP ඇසුරෙන් form භාවිතය :: 3 වන පියවර :Database එක හා Login page එක සම්බන්ධ කරන අකාරය යන ලිපියේ ඉඳන් පසුපසට බලන් ගියහම හරි.

මෙම කොටසින් අපි සිදුකිරීමට යන්නේ සාදාගත් login system එකේ ආරක්ෂාව ගැන මදක් සොයා බැලීමටයි.

Databases භාවිතාවන මෙවැනි පද්ධති hack කිරීම සඳහා භාවිතා කරන එක් ක්‍රමයක් ලෙස SQL Injection හඳුන්වාදිය හැක. SQL Injectionහිදී සිදුවන්නේ form එකේ input ලබාදෙන තැනකට අනවශ්‍ය සංකේත ( unwanted characters ) ඇතුලත් කර නව SQL query එකක් සෑදවීමයි.

මෙය උදාහරණයකින් පැහැදිලි කරගමු. Login page එකේ user name යන ස්ථානයට ' OR 1=1 -- යන code එක ඇතුලු කර Login button එක ඔබන්න( ' OR 1=1 -- හි -- ලකුනට පසු හිස්තැනක්( space) ඇති බව සලකන්න ). පද්ධතිය මගින් මෙය සාර්ථක log in වීමක් ලෙස සලකා පරිශීලකයෙකුගේ විස්තර පෙන්වන බව ඔබට පෙනෙනු ඇත. දැන් අපි බලමු මෙකන සත්‍ය වශයෙන්ම වෙන්නේ කුමක්ද කියා.

මේ සඳහා අපට login.php හි කේතය දෙස බැලීමට සිදුවේ. අප ලබාදුන් ' OR 1=1 -- දත්තය සමග එහි ඇති,

$userName=$_POST['name'];

කොටස ක්‍රියාත්මක වී userName හි අගය ' OR 1=1 -- ට සමාන වේ. ඉන්පසු SQL query එක සැදෙන තැනදී ( එනම් $query= "SELECT * FROM profiles WHERE userName='$userName' AND password='$pass'" හිදී ) එම query එක පහත query එක බවට පත්වේ.

$query= "SELECT * FROM profiles WHERE userName='' OR 1=1 -- AND password='$pass'".

කුමක්ද මෙහි ඇති වරද? මෙහිදී සිදුවී ඇත්තේ අප userName විචල්‍යයට ලබා දුන් අගය නිසා අලුත්ම SQL query එකක් නිර්මාණය වීමයි. SQL query එකකදී -- ලකුන මගින් sinlge line comment එකක් දැක්වේ. එමනිසා -- ලකුනෙන් පසු අදාල SQL query එකේ ඇති සියලු දෑ නොසලකා හැරේ. එම නිසා සෑදෙන අලුත් SQL query එක වන්නේ,

$query= "SELECT * FROM profiles WHERE userName='' OR 1=1

යන්නයි. දැන් අපි බලමු වැරදි login වීමක් සිදුවන්නේ කෙසේද කියා. ඉහත සෑදුන් query එක database system එකට යැවූ විට database system එක විසින් එහි ඇති WHERE userName='' OR 1=1 කොටස දකින්නේ එකම වාක්‍ය කොටසක් ලෙසිනි. 1=1 යන්න සැමවිටම සත්‍යක් බැවින් WHERE userName='' OR 1=1 යන කොටස සැමවිටම සත්‍ය වේ. එම නිසා database system එක මගින් අදාල table එක කියවාගෙන යාමේදී හමුවන ඕනෑම පේලියක්( row ) අදාල query එකට ගැලපෙන පේලියක් ලෙස සලකයි. එමනිසා අවසානයේදී $result විචල්‍යයේ table එකේ හැම පේලියකටම references අඩංගු වේ. එනිසා $row විචල්‍යය ලබාදෙන පලමු user profile එකට පද්ධතිය login වේ.

ආරක්ෂාකාරී form සෑදීම

Form වල ආරක්ෂාව වැඩි කිරීම සඳහා PHP වල සහය ලබාගත හැක.

1]. හිස්තැන් ඉවත් කිරීම

user inputs වල මුලට හා අගට හිස්තැන්( spaces ) එක්කිරීම මගින් විවිධ විනාශකාරී ක්‍රියා සිදු කල හැක( උදා : ඉහත උදාහරණයේ -- වලට පසුව හිස්තැනක් යෙදීම ). මෙය වැලැක්වීමට මුල හා අග ඇති හිස්තැන් ඉවත් කල යුතුය. මෙවන් හිස්තැන් ඉවත් කිරීමට PHP හි ඇති trim() function එක භාවිතා කල හැක.

උදා: ඉහත උදාහරණයේ$userName=$_POST['name'] යන කොටස $userName=trim($_POST['name']) ලෙස නැවත ලිවීමෙන් user name එකට ඇතුලත් කෙරෙන දත්ත වල මුල හා අග ඇති හිස්තැන් ඉවත් කල හැක.

2]. අනවශ්‍ය characters ඉවත් කිරීම

“ හා ' වැනි characters මගින් SQL query සඳහා විවිධ බලපෑම් කල හැක( ඉහත උදාහරණයේ කර ඇතිවාක් මෙන් ). එම නිසා query එකකදී user input එකේ මෙවැනි characters ඇත්නම් ඒවා escape characters හා සම්බන්ධ කර භාවිතයට ගැනීම වඩාත් සුදුසුය. මේ සඳහා mysqli_real_escape_string() යන function එකේ උදව් ලබා ගත හැක. එම function එකට input ලබාදිය යුත්තේ පහත ආකාරයටයි.

mysqli_real_escape_string(DB connection එක සහිත විචල්‍යය , User input එක )

Note: mysqli_real_escape_string() යනු database function එකකි. එමනිසා එය සමග වැඩකිරීමේදී dB connection එක සහිත විචල්‍යය එයට සැපයීමට අවශ්‍යය වේ.

දැන් අපි login.php හි සම්පූර්ණ කරන ලද කේතය දෙස බලමු.

<?php

$dbc = mysqli_connect('localhost', 'root', '','test') or die('Error connecting to MySQL server.');

$userName=mysqli_real_escape_string($dbc, trim($_POST['name']));

$pass=mysqli_real_escape_string($dbc, trim($_POST['pass']));

$query= "SELECT * FROM toHack WHERE userName='$userName' AND password='$pass'";

$result=mysqli_query($dbc, $query);

$row= mysqli_fetch_array($result);

if($row){

echo "Welcome...!<br/>";

echo "<br/>User name: ";

echo $row['userName'];

echo "<br/>First name: ";

echo $row['firstName'] . " ".$row['lastName'];

echo "<br/>E-mail: ";

echo $row['email'];

}

else {

echo "Wrong User name or Password.<br/><br/>";

echo "Modified user name:".$userName."</br>";

echo "Modified password:".$pass;

}

mysqli_close($dbc);

කලින් form එකේ ගැටළු මෙහි තිබේදැයි පරීක්ෂා කර බලන්න....!

මේ ලිපියත් සමග HTML හා PHP ඇසුරෙන් form භාවිතය ලිපි පෙල අවසන් වෙනවා. කියවූ සැමට ස්තුතියි...!

තවත් ආදර අන්දරයක්.....

2012-04-10T00:01:00.018+05:30

අරුමයකින් අරුණලු දිවියට කැන්දා
ආ හැටි තවම පුදුමයි මට ඒ ලන්දා
සැප දුක් සුසුම් හසරැලි සිත තුල රන්දා
සිටියෙමි තුන් මසක් ආලය හද රන්දා....

ආගිය ගමන් ඔබ අත ගෙන සිත කැන්දා
සිහිවන විට නැගෙයි හසරැලි මුවගට කැන්දා
දවසින් දවස ලියලන මේ ආදර අන්දා
ගෙන දෙයි මගේ දිවියට සතුටම කැන්දා....

ලංවී ගෙවූ කාලය මතු නොමැකෙන්න
සතුටු කඳුලු මිස සෝ කඳුලැලි නොවැටෙන්න
ආදර හැඟුම් හසරැලි මතු මතුවෙන්න
පතනෙමි දිනක ඔබ මා හට හිමිවෙන්න....

මතකයන්

2012-03-16T21:13:00.002+05:30

නිකලැල් සුකොපුල් රසයෙන් තවලා,
ගෙවුනු සැඳෑවන් අඳුරෙන් වැසිලා,
ඔබ මා ගිය මං කඳුලින් වැසිලා,
දෙමගක යමු අපි අද වෙන් වීලා......

HTML හා PHP ඇසුරෙන් form භාවිතය :: 3 වන පියවර :Database එක හා Login page එක සම්බන්ධ කරන අකාරය

2011-12-18T11:10:00.017+05:30

Database එක හා login page එක දත්ත හුවමාරු කරගැනීමට කිසියම් ක්‍රමයක් තිබිය යුතුය. මෙම සම්බන්ධය ඇති කරන්නේ PHP script එකක් මගිනි. මෙය ගැන අවබෝධයක් ලබා ගැනීමට නැවත login page එකේ කේතය ( source ) දෙස බලමු.

<html>

<body>

<form name="login" action="login.php" method="post">

<p>Name: <input type="text" name="name" value="" /></p>

<p>Password: <input type="password" name="pass" value=""</p>

<input type="submit" value="Login" />

</form>

</body>

</html>

මෙහි ඇති action="login.php" යන කොටස මගින් මෙම form එකට දත්ත ඇතුලත් කර Login බොත්තම එබූ විට login.php යන ගොණුව වෙත එම දත්ත යැවිය යුතු බව මෙම html ගොණුවට දැනුම් දෙයි. දැන් අපි login.php ගොණුවේ අන්තර්ගතය බලමු.

<?php

$userName=$_POST['name'];

$pass=$_POST['pass'];

$dbc = mysqli_connect('localhost', 'root', '','loginData') or die('Error connecting to MySQL server.');

$query= "SELECT * FROM profiles WHERE userName='$userName' AND password='$pass'";

$result=mysqli_query($dbc, $query);

$row= mysqli_fetch_array($result);

if($row){

echo "Welcome...!<br/>";

echo "<br/>User name: ";

echo $row['userName'];

echo "<br/>First name: ";

echo $row['firstName'] . " ".$row['lastName'];

echo "<br/>E-mail: ";

echo $row['email'];

}

else {

echo "Wrong User name or Password.";

}

mysqli_close($dbc);

?>

තේරුම් ගැනීමට අපහසු code එකක් මෙන් පෙනුනත් සැබැවින්ම මෙය තේරුම් ගැනීමට පහසු code එකකි. තේරුම් ගැනීම පහසු වීමට code එකේ කොටසින් කොටස ගෙන විශ්ලේෂණය කර බලමු.

$userName=$_POST['name'];

$pass=$_POST['pass'];

මෙම code කොටසින් සිදුවන්නේ පරිශීලකයා විසින් login page එකේ ඇතුලත් කරන ලද දත්ත ( user name හා password) userName හා pass යන විචල්‍ය( variables ) වල ගබඩා කිරීමයි. මෙය සිදුවන්නේ කෙසේද යන්න තේරුම් ගැනීම සඳහා login page එකේ

<form name="login" action="login.php" method="post">

යන කොටස දෙස බැලීමට අවශ්‍ය වේ. එහි method="post" කොටසෙන් කියැවෙන්නේ post යන ක්‍රමය මගින් login.php එකට දත්ත යවන ලෙසයි. PHP script එකකදී මෙම දත්ත ලබාගන්නේ $_POST[] යන associative array එක මගිනි. login page එකේ ඇති යම් input field එකක දත්ත කියැවීමට අවශ්‍ය විට කල යුත්තේ $_POST['input field එකේ නම '] යන ආකාරයටයි.

උදා: login page එකේ තිබූ User name input field එක මතකද? එහි code එක තිබ්බේ

Name: <input type="text" name="name" value="" />

අකාරයටයි. මෙම input field එකේ දත්ත PHP script එක ඇතුලේදී කියවීමට අවශ්‍ය නම් භාවිතා කල යුතු code එක වන්නේ $_POST['name'] යන්නයි.

අමතර කරුණක්:

post අකාරයටම input fields වල දත්ත ලබා ගත හැකි තවත් ක්‍රමයක් GET නමින් ඇත. වැඩි විස්තර අවශ්‍ය නම් google කර බලන්න ( Google පවා search box එකේ ඇති දත්ත තම servers වලට යැවීමට භාවිතා කරන්නේ GETය...! ).

$dbc = mysqli_connect('localhost', 'root', '','loginData') or die('Error connecting to MySQL server.');

මෙම code එකෙන් dbc යන විචල්‍යය අප සාදාගත් loginData යන database(DB) එකට සම්බන්ධ කරනු ලැබේ. mysqli_connect() function එකට input සැපයිය යුතු ආකාරය පහත දැක්වේ.

mysqli_connect('server එකේ ලිපිනය', 'DB එකේ පරිශීලක නාමය ', 'අදාල DB පරිශීලකගේ මුර පදය ', ' DB එකේ නම ' )

server එකේ ලිපිනය: mySql database එක ඇත්තේ කුමන server එකේද යන වග දැක්වේ. අප භාවිතා කරන mySql database එක ඇත්තේ වෙබ් පිටුව ඇති පරිගණකයේම නිසා මෙයට localhost ලෙස ලබා දිය යුතුය.

DB එකේ පරිශීලක නාමය: database එකක් භාවිතා කිරීමට පරිශීලක නාමයක්( user name ) අවශ්‍ය වේ. එම පරිශීලක නාමය මෙහිදී ලබා දී ඇත.

අදාල DB පරිශීලකගේ මුර පදය: පරිශීලකයාට අදාල මුර පදය( password )

DB එකේ නම: dbc විචල්‍ය සම්බන්ධ කිරීමට අවශ්‍ය database එකේ නම

or die('Error connecting to MySQL server.') යන කොටස මගින් dbc විචල්‍ය database එකට සම්බන්ධ කිරීමට නොහැකි වුවහොත් " Error connecting to MySQL server. ” ලෙස පණිවිඩයක් ලබා දෙමින් PHP script එක නැවැත්වීමට උපදෙස් ලබා දේ.

$query= "SELECT * FROM profiles WHERE userName='$userName' AND password='$pass'"

යනු SQL query එකකි. SQL database එකකින් දත්ත ලබාගැනීම සඳහා queries භාවිතා වේ. ඉහත query එකෙන් කියැවෙන්නේ userName යන field එකේ අගය userName යන විචල්‍යයේ ( $userName ) අගයට සමාන වන හා password යන field එකේ අගය pass යන විචල්‍යයේ ( $pass ) අගයට සමාන වන පේලියේ ( row එකේ- සෑම පරිශීලකයෙකුගේම විස්තර database එකෙහි table එකේ එක row එකක තිබේ) සෑම field එකක්ම( * යන සලකුනෙන් සෑම field එකක්ම ලබාගත යුතු බව database එකට දැනුම් දෙයි) ලබාගන්න කියායි.

$result=mysqli_query($dbc, $query);

ඉහත සෑදූ SQL query එක ක්‍රියාවට නංවන්නේ මෙම function එක මගිනි. mysqli_query() function එකට input සැපයිය යුතු ආකාරය පහත දැක්වේ.

mysqli_query(DB එක සමග සබඳතාවය සාදාගෙන ඇති විචල්‍යය , SQL query එක )

මෙම mysqli_query() function එක ක්‍රියාත්මක කල පසු result යන විචල්‍යයේ ගබඩා වන්නේ අදාල දත්තයන්ට reference එකක් පමනි. මෙම දත්ත සැබැවින්ම ලබාගැනීම සඳහා

$row= mysqli_fetch_array($result);

යන්න භාවිතා වේ. ඉන් පසුව ඇති,

if($row){

echo "Welcome...!<br/>";

echo "<br/>User name: ";

echo $row['userName'];

echo "<br/>First name: ";

echo $row['firstName'] . " ".$row['lastName'];

echo "<br/>E-mail: ";

echo $row['email'];

}

කොටසේ ඇති if($row) යන කොටස මගින් row යන විචල්‍යයේ සත්‍ය වශයෙන්ම දත්ත ගබඩා වී ඇත්ද, නැද්ද යන වග පරීක්ෂා කෙරේ. දත්ත ගබඩා වී ඇත්නම් අදාල දත්ත browser එකේ දිස්වීමට සැලැස්විය හැක.

Note: row විචල්‍යයේ ගබඩා වී ඇති දත්ත ලබා ගැනීම සඳහා $_POST භාවිතා කලාක් මෙන් row[' field එකේ නම ' ] යන ක්‍රමයෙන් අදාල field එක ලබා ගත හැක.

උදා : email field එක ලබා ගැනීමට $row['email'] භාවිතා කල හැක.

else {

echo "Wrong User name or Password.";

}

row යන විචල්‍යයේ සත්‍ය වශයෙන්ම දත්ත ගබඩා වී නැත්නම් Wrong User name or Password යන පනිවිඩය දැක්වේ.

mysqli_close($dbc);

මෙමගින් dbc විචල්‍යය හා database එක අතර ඇති සම්බන්ධය( connection ) එක වසා දමනු ලැබේ.

දැන් ඔබට login page එක පරීක්ෂා කල හැක. Database එකේ ඇති user name එකක් හා password සංයෝගයක් ලබාදුන් විට පද්ධතිය එම පරිශීලකයාගේ විස්තර පෙන්වන බවත් , වැරදි සංයෝගයක් ලබා දුන් විට Wrong User name or Password යන පනිවිඩය දැක්වෙන බවද ඔබට පෙනී යනු ඇත.

මීලග ලිපියෙන් බලමු කොහොමද මේ login script එක වඩා ආරක්ෂාකාරී කරන්නේ කියලා.

HTML හා PHP ඇසුරෙන් form භාවිතය :: 2 වන පියවර : Database එක සාදා ගන්නා අකාරය

2011-12-09T15:38:00.000+05:30

කලින් ලිපිය දාලා ගොඩක් කල් ගත උන එකට සමාවෙන්න ඕනේ. සෙමෙස්තරේ හමාර වෙන විභාගේ කඩන් පාත් උනානේ. (කලින් ලිපිය කියවපු නැති කෙනෙක් ඉන්නවනම් මෙතනින් ගිහින් බලන්න).ඔන්න ඒ ලිපි පෙලේ තවත් කොටසක් අද දානවා.

ඔබට දැනටමත් වැටහී ඇති පරිදි මෙම form එක භාවිතා කිරීමේදී user name එක හා password එක ලබා දී පද්ධතියට ඇතුල් විය යුතුය. නමුත් පරිශීලකයා ඇතුලත් කරන user name හා password නිවැරදිදැයි පරීක්ෂා කරන්නේ කෙසේද? මෙය කිරීමට නම් සෑම පරිශීලකයකුගේම user name හා password පද්ධතියේ කොහේ හෝ ගබඩා කරගත යුතු බව පැහැදිලිය. මෙසේ පරිශීලකයකුගේ දත්ත ගබඩා කිරීම සඳහා Database එකක් භාවිතා කල හැක. MySql යනු මෙවන් database වර්ගයකි.

දැන් අපි mySql database එකක් සාදා ගනිමු. මේ සඳහා පලමුව localhost/phpmyadmin යන ලිපිනයට යන්න. පහත ආකාරයේ පිටුවක් ඔබට පෙනෙනු ඇති.

මුලින්ම කල යුත්තේ අපගේ පද්ධතියට අදාලව database එකක් සකස් කර ගැනීමයි. මේ සඳහා Create new Database යන ස්ථානය භාවිතා කල හැක( database එකේ නම ලෙස loginData දෙන්න ).

Database එකක දත්ත ගබඩා කරන්නේ table වලයි. දැන් අපි පරිශීලකයන්ට අදාල දත්ත ඇතුලත් කිරීමට table එකක් සාදමු. පරිශීලකයාට login වීමට අත්‍යවශ්‍ය දත්ත වන user name හා password යන fields මෙම table එකට ඇතුලත් විය යුතුමය. ඊට අමතරව පරිශීලකයා හඳුනා ගැනීම සඳහා ඔහුගේ first name, last name හා email ලිපිනය යන දත්තද මෙමෙ table එකටම ඇතුලත් කරමු. එවිට මුලු fields ගනන 5ක් වේ. එම නිසා Number of fields අගය 5 ලෙස තැබිය යුතුය. අනෙක් තැන් වල වෙනස්කම් නොකරන්න. ඉන්පසු Go එබීමෙන් table එක සාදාගත හැක.

දැන් table එකට අදාල properties සැකසීමට අදාලවූ වෙබ් පිටුවක් දිස්වනු ඇත.

Field: අප table එකේ සුරැකීමට බලාපොරොත්තු වන fields මෙහි ඇතුලත් කල යුතුය. උදා: userName, password, firstName, lastName, email ( පහත රූප සටහනේ දැක්වෙන පරිදිම field සඳහා නම් ලබා දෙන්න ).

Type: field එකක වර්ගය සැකසීම සඳහා භාවිතා වේ. මෙම table එකේ අපි භාවිතා කරන සියලුම fields ගබඩා කරගන්නේ වචන බැවින්( උදා: first name එකට බොහෝ විට වචනයකි) type එක ලෙස VARCHAR භාවිතා කරන්න .

Length/Values: field එකක ගබඩා කල හැකි දත්ත වල උපරිම දිග මෙහි දැක්වේ. උදා: userName=10, password=15, firstName=15, lastName=15, email=20

ඊට පසු save බොත්තම ඔබන්න.

දැන් සාදාගත් table එකට පරිශීලකයන් කීපදෙනෙක්ගේ දත්ත ඇතුලත් කරමු.

Note: සාමාන්‍යයෙන් පරිශීලකයන්ට login වීමට අවශ්‍යය වන වෙබ් අඩවියක් සෑදීමේදී පරිශීලකයන්ට තම දත්ත database එකට ඇතුලත් කිරීමට භාවිතා කල හැකි වෙබ් පිටුවක්ද සාදනු ලැබේ. නමුත් එම පිටුව සැකසීම ගැන මෙහිදී සාකච්ඦා නොවේ. එවැනි පිටුවක් භාවිතා කරනු වෙනුවට මෙහිදී phpMyAdmin භාවිතයෙන්ම දත්ත ඇතුලත් කරමු. නමුත් ඔබට එවැනි වෙබ් පිටුවක් සාදන ආකරය ගැන දල අවබෝධයක් 3 වැනි පියවරේදී ලබාගත හැකි වනු ඇත.

Database එකට දත්ත ඇතුලත් කිරීම සඳහා Insert සබැඳුම භාවිතා කල හැක.

Value inputs පුරවා Go බොත්තම එබීමෙන් table එකට දත්ත ඇතුලත් කල හැක.

සෑම පරිශීලකයකුගේම දත්ත මගින් table එකේ එක් පේලියක් ( row ) දැක්වේ.

මීලග ලිපියෙන් අපි බලමු කොහොමද database එක හා login page එක සම්බන්ධ කරන්නේ කියලා.

HTML හා PHP ඇසුරෙන් form භාවිතය :: 1 වන පියවර : Form සාදා ගන්නා ආකාරය

2011-10-12T17:57:00.002+05:30

හුඟ දවසකට පස්සේ ලිපියක් ලියන්න යන්නේ. මේ ලිපිය ලිපි පෙලක පළමුවැන්න. මේ ලිපි පෙලින් මම HTML හා PHP ඇසුරින් forms හදාගන්නා ආකාරය, එහෙම හදාගත්ත form එක database එකකට සම්බන්ධ කරගන්නා ආකාරය, හදාගත්ත form එක SQL injection (form වැරදි විදියට භාවිතා කරනන පුළුවන් ක්‍රමයක්) වලින් ආරක්ෂා කරගන්නා ආකාරය ගැන සාකච්ඡා කරන්නයි හිතන් ඉන්නේ.

පින්තූරෙ ගත්තේ http://www.learn-html-tutorial.com/Images/sol-reg2.gif වලින්

Form එකක් කියන්නේ මොකක්ද කියලා නොදන්න එක්කෙනෙක් ඉන්නවනම් උඩ පින්තූරේ බලන්න. ක්‍රියාකාරීත්වය දැකගන්න ඕන නම් www.ishans.info/test කියන URL එකට ගිහින් බලන්න. එතන Google වලින් search කියලා කොටුවකුයි, button එකකුයි ඇවිල්ලා තියෙන්නේ form එකකින්. හරියටම කිව්වොත් Form එකක් කියන්නේ අපිට ඒක පුරවලා වෙබ් සයිට් එකට දත්ත ලබාදෙන්න පුලුවන් ක්‍රමයක්.

මම හදන්න යන්නේ ඉතා සරල log in form එකක්. ඒ කියන්නේ web site එකකට log in වෙනකොට වගේ පාවිච්චි කරන්න පුළුවන් form එකක්. මේක කොටස් තුනකින් සමන්විත වෙනවා.

index.html - වෙබ් සයිට් එකට log in වෙන්න එන කෙනාට මුලින්ම පේන්නේ මේ පිටුව
login.php - මේ පිටුව තමයි database එකත් එක්ක සම්බන්ධ වෙලා පද්ධතියට log in වෙන එක පාලනය කරන්නේ
Database - database එකේ තමා සියලුම usersලගේ දත්ත තියෙන්නේ.

මුලින්ම අපි index.html වල code එක බලමු.



<html>



<body>



<form name="login" action="login.php" method="post">



<p>Name: <input type="text" name="name" value="" /></p>



<p>Password: <input type="password" name="pass" value=""</p>



<input type="submit" value="Login" />



</form>



</body>



</html>

ඉහත ඇති html code එක index.html යනුවෙන් නම් කරන ලද ගොණුවකට( file ) copy කරගෙන එම ගොණුව htdocs folder එකෙහි සුරකින්න( save ). දැන් ඔබගේ browser එකේ address bar එකේ localhost යන ලිපිනයට යාමෙන් ඔබට User name හා Password ලෙස නම් කර ඇති input field දෙකක් සහිත වෙබ් පිටුවක් දක්නට ලැබෙනු ඇති.

දැන් අපි ඉහත form එකේ කේතය( code ) විමර්ෂනය කරමු.



<p>Name: <input type="text" name="name" value="" /></p>



<p>Password: <input type="password" name="pass"



value=""</p>

Input ලබාදීම සඳහා ඇති input text box දෙකේ සැකසුම්( settings ) මෙහි දැක්වේ.

type: Input එකේ වර්ගය( type ) විස්තර කෙරේ.

name: මෙම input field එකේ නම ( මෙම නම login.php එකේදී අවශ්‍ය වේ ).

value: ආරම්භයේදී Input text box එකේ තිබිය යුතු අගය ( default value )



<input type="submit" value="Login" />

Login button එක සඳහා අදාල code එක මෙයයි.

මීලඟ ලිපියෙන් අපි database එක හදාගන්නා විදිය ඉගෙනගමු.

IDEA Challenge 2011- පාසල් වෙබ් අඩවි නිර්මාණ තරඟාවලිය

2011-04-30T18:30:00.001+05:30

Idea Challenge යනු .........

ශ්‍රී ලංකා ඉංජිනේරු ආයතනය( Institute of Engineers,Sri Lanka-IESL) සහ මොරටුව විශ්ව

විද්‍යාලයීය පරිගණක විද්‍යා හා ඉංජිනේරු අංශය( Computer Science and Engineering

department, University of Moratuwa -CSE,Uom) එක්ව LakApps අනුග්‍රාහකත්වයෙන්

සංවිධානය කරනු ලබන පාසල් මට්ටමේ තරඟාවලියකි.

ඔබ මේ සඳහා සහභාගි විය යුත්තේ ඇයි?

මෙය ජාතික මට්ටමේ වේදිකාවක ඔබගේ දක්ෂතා ප්‍රදර්ශනය කිරීමට වටිනා අවස්ථාවකි.

ජයග්‍රාහකයන්ට හිමි ත්‍යාග සහ සහතික පත්‍ර Techno 2011 ත්‍යාග ප්‍රදානෝත්සවයේදී පිරිනැමේ

ඔබ කල යුත්තේ කුමක්ද?

ඔබගේ පාසැල සඳහා වෙබ් අඩවියක් නිර්මාණය කිරීම.

ඔබ දැනගතයුත්තේ මොනවාද?

කිසිදු පූර්ව දැනුමක් අවශ්‍ය නොවේ.

ඔබ දැනගතයුතු සියලු දෑ නොමිලේ පවත්වනු ලබන පුහුණු සැසි මගින් ආවරණය කරනු

ලැබේ.

තරඟ නීති

තරගාවලිය සියලුම පාසැල් සිසුන් සඳහා විවෘත වන අතර ඒකල වශයෙන් හෝ කණ්ඩායම් වශයෙන් තරඟවැදිය හැකිය.
එක් කණ්ඩායමක් සඳහා උපරිම වශයෙන් සාමාජිකයින් 4ක් ඇතුලත් කල හැකි අතර එක් පාසලකින් කණ්ඩායම් ඕනෑම සංඛ්‍යාවක් ඉදිරිපත් කල හැක.
වෙබ් අඩවිය අවම වශයෙන් ද්විභාෂා විය යුතු අතර Unicode භාවිතයෙන් නිර්මාණය නිර්මාණය කල යුතුය.

වැඩි විස්තර සඳහා නිල වෙබ් අඩවියට පිවිසෙන්න.

http://www.lakapps.lk/idea/

වෙබ් අඩවියේ දැක්වෙන Error pages cPanel භාවිතයෙන් customize කිරීම- Creating customized error pages using cPanel

2011-01-29T18:03:00.002+05:30

අපි වෙබ් අඩවියකට සම්බන්ධ උනාම ඔබ දැකලා ඇති සමහර වෙලාවට error pages දිස්වෙනවා. මේ error pages නොයෙක් හේතු නිසා ඇතිවෙන්න පුළුවන්. උදාහරණයක් විදියට අපිට ඔනෑ කරන පිටුව එම සර්වර් එකේ නොතිබීම, අපිට එම පිටුව ලබාගැනීමට බලතල මදිවීම ( authorization problems) ආදී කාරණා නිසා error pages දිස්වෙන්න පුළුවන්. නමුත් ඔබ දැකලා ඇති මෙහෙ දිස්වෙන error pages ගොඩක් වෙලාවට බොහොම සරලව සැකසුනු පිටු. බොහොමයක් ඒවා සුදු පසුබිමේ කළු අකුරු වලින් වරද( error එක) පෙන්නනවා. මේ ලිපියෙන් මම පෙන්වන්න යන්නේ cPanel භාවිතයෙන් මෙම error pages customize කරන්නේ කොහොමද කියන එකයි (ඔබට කැමති theme එකක් එහෙම දාලා මේ error pages සකසාගන්න පුළුවන්). මේ සඳහා ක්‍රම දෙකක් තියනවා.

පළමු ක්‍රමය:

cPanel වලට log වෙන්න. ඉන්පසු Advanced--> Error pages වෙතට යන්න. එතනදී ඔබට පෙනෙයි cPanel වලට දර්ශණය කරවිය හැකි error pages වල ලැයිස්තුවක්. ඒ ඕන එකක් උඩ click කලාම ඒ page සංස්කරණය කරන්න පුළුවන් පිටුවකට ඔබව යොමුවෙයි. එතනින් ඔබට කැමති පරිදි අදාල error page එක සංස්කරණය කරගන්න පුළුවන්.

දෙවෙනි ක්‍රමය:

ඔබට පොඩ්ඩක් සංකීර්ණ error page එකක් හදන්න ඔනේ නම් අනුගමනය කරන්න ඕන ක්‍රමය මේකයි. මුලින්ම අවශ්‍ය error page එක(සාමාන්‍ය html පිටුවක්) ඔබේ පරිගණකයෙන් හදාගන්න. ඊට පස්සේ එම පිටුව අවශ්‍ය පරිදි නාමකරණය කරලා ( rename) server එකේ public_html folder එකට upload කරන්න. නාමකරණය කරන්න ඕනෑ ආකාරය මෙසේයි.

400.shtml : Bad request
401.shtml : Authentication required
403.shtml : Forbidden
404.shtml : Page not found
500.shtml : Internal server error

මතක තියාගන්න ඕන දෙයක් තමා පිටුව rename කරද්දී පිටුවේ extension එක .shtml විදියට වෙනස් කරන්න ඕන බව.

මම මේ විදියට හදපු "Page not found" error page එකක් www.ishans.info/අංජබකල් වෙත යාමෙන් බලාගන්න පුළුවන්.

( මෙම ලිපියේ ඉංග්‍රීසි පරිවර්ථනය http://blog.ishans.info/2011/01/18/create-custom-error-pages-in-cpanel/ වෙතට යාමෙන් ඔබට පරිශීලිනය කල හැක

You can view the English version of this article by visting http://blog.ishans.info/2011/01/18/create-custom-error-pages-in-cpanel/)

උබුන්ටු ලිනක්ස් සඳහා ඉබේ වෙනස් වන wallpapers සාදා ගන්නා ආකාරය - How to create a wallpaper slideshow in Ubuntu

2011-01-19T18:02:00.000+05:30

උබුන්ටු පාවිච්චි කරන අය දැකලා ඇති desktop එකේ background එක වෙනස් කරන තැන තියනවා cosmos කියලා wallpapers set එකක්. ඒක Wallpaper එක විදිහට ඒක තේරුවාම යම් කාල පරාසයකට වතාවක් wallpaper එක ඉබේ වෙනස් වෙන බව ඔබ දැකලා ඇති. අද මම කියලා දෙන්න යන්නේ මේ වගේ ඉබේ වෙනස් වන wallpapers set එකක් අපිට ඕන wallpapers දාලා හදාගන්නේ කොහොමද කියලායි. ( මේ වැඩේ උබුන්ටු වල විතරක් නෙමේ, Gnome තියෙන ඕනම ලිනක්ස් පද්ධතියක පුළුවන් මම දන්න විදියට). මේක පහසුවෙන් කරගන්න පුළුවන් softwareත් තියෙනවා( CreBS වගේ). නමුත් මම කියලා දෙන්න යන්නේ වෙන software මුකුත් නැතිවම වැඩේ කරගන්න විදියක්.

මුලින්ම කරන්න ඕනේ xml file එකක් හදාගන්න එක( කැමති ඕනම නමකින්, මම නම දාන්නම්කෝ test.xml කියලා). මේ xml file එකේ යොදන්න ඕන syntax පහත ආකාරයට විස්තර කරන්න පුළුවන්.

මුලින්ම යොදන්න ඔනේ මේ ටික.



<background>



  <starttime>



    <year>2009</year>



    <month>08</month>



    <day>04</day>



    <hour>00</hour>



    <minute>00</minute>



    <second>00</second>



  </starttime>

මෙතන <background> කියන syntax එකෙන් මෙම xmlfile එක කුමන කාර්යක් සඳහා සෑදූවක්ද කියලා පද්ධතියට දැනුම් දෙනවා. ඊට පස්සේ තියෙන <starttime> කියන block එක ඇතුලේ තියන අගයන් මගින් මෙම wallpaper slideshow එක කවදා ආරම්භ කල යුතුද කියලා තීරණය කෙරෙනවා. අද දිනයට වඩා අතීතයේ දිනයක් මෙහි තිබුනොත් වහාම මෙම slideshow එක පටන් ගන්නවා. අද දිනයට වඩා අනාගතයේ දිනයක් තිබුනොත් එදින වෙනකන් slideshow එක පටන් ගන්නේ නෑ. ( ඉහත උදාහරණයේ දැක්වෙන slideshow එක පටන් ගන්නේ 2009-අගෝස්තු-4 වැනිදා ආරම්භ වන වෙලාවට, දැන් ඒ දිනය පහුවෙලා නිසා අපි slideshow එක තෝරපු ගමන් slideshow එක වැඩ කරන්න පටන් ගන්නවා).

ඊට පස්සේ යොදන්න ඔනේ මේ ටික.





  <static>



    <duration>500.0</duration>



    <file>/home/ishan/Desktop/blog/1.jpg</file>



  </static>

මෙයින් loop එකේ පළමුවෙන්ම wallpaper එක විදියට පෙන්වන්න ඕන පින්තූරය තීරණය කෙරෙනවා. <duration> කියන කොටසෙන් wallpaper එක දර්ශණය වන වෙලාව තීරණය කරනවා. <file> කියන කොටසෙන් එවෙලේ පෙන්නන්න ඕනේ පින්තූරය තීරණය කෙරෙනවා.

ඊට පස්සේ යොදන්න ඔනේ මේ ටික.



  <transition>



    <duration>5.0</duration>



    <from>/home/ishan/Desktop/blog/1.jpg</from>



    <to>/home/ishan/Desktop/blog/2.jpg</to>



  </transition>

මේකෙන් තීරණය කරන්නේ පින්තූර දෙකක් අතර මාරුවීම සිදුවන ආකාරයයි. <duration> මගින් මාරුවීමට ගතවන කාලයත්, <from> හා <to> syntax මගින් කුමන පින්තූරයක සිට කුමන පින්තූරයක් දක්වා මාරු විය යුතුද කියන එකත් තීරණය කරනවා.

ඊට පස්සේ ඊලඟ පින්තූරය පෙන්වන කාල සීමාව තීරණය කිරීම සඳහා ආයි,



  <static>



    <duration>500.0</duration>



    <file>/home/ishan/Desktop/blog/2.jpg</file>



  </static>

ආකාරයේ කොටසක් දාන්න වෙනවා. මේ ආකාරයට ඔබ කැමති ගනනක් පින්තූර දාගන්න පුළුවන්. ඊට පස්සේ අන්තිම පින්තූරේ ආවාම ආයි මුල පින්තූරෙටම පින්තූරේ මාරු වෙන්න ඔනෙනේ. ඒක හන්දා පහල ආකාරයේ කොටසකුත් අන්තිමටම file එකට එකතු කරන්න(මගේ උදාහරණයේදී නම් මම පින්තූර තුනයි දැම්මේ).



  <transition>



    <duration>5.0</duration>



    <from>/home/ishan/Desktop/blog/3.jpg</from>



    <to>/home/ishan/Desktop/blog/1.jpg</to>



  </transition>







</background>

හරි, දැන් අපි wallpaper slideshow එක හදලා ඉවරයි. දැන් කොහොමද මේක install කරන්නේ? ඒ වැඩෙත් හරිම ලේසියි. Desktop එකේ හිස් තැනක right click කරලා "Change Desktop Background" තෝරන්න. එහි "Background" කියන tab එකට ගිහින් "Add" කියන button එක උඩ click කරන්න. එතකොට එන window එකේ "Open" කියන button එකට උඩින් තියෙන button එකේ තේරිලා ඇත්තේ "Images" කියලා. ඒක උඩ click කරලා "All files" තෝරන්න. දැන් ඔබ xml file එක save කරපු තැනට ගිහින් ඒක උඩ double click කලාම හරි. ඔබට පෙනේවි ලස්සනට wallpaper slideshow එක වැඩ කරන ආකාරය.

ඔබට මගේ වෙබ් අඩවියට යාමෙන් මම Gears of war game එකේ images දාලා හදපු wallpaper slideshow එකක් භාගත කරගන්න පුළුවන්. ( code එක ලියන ආකාරය ගැටළු සහගත නම් ඒ file එක අරගෙන මම ඒකේ ලියලා තියන code එක බලන්න).

තව දෙයක්, මම ඉංග්‍රීසි බ්ලොග් එකක් පටන් ගත්තා. www.blog.ishans.info වෙත යාමෙන් ඔබට එය කියවිය හැකියි .

මොහොතක් සිතන්න -Think for a while

2011-01-13T17:30:00.003+05:30

හුඟ කාලෙකින් කතාවක් කිව්වේ නැති හන්දා ඔන්න අද කතන්දරයක් කියන්නයි යන්නේ. හැබැයි මේක එසේ මෙසේ කතාවක් නෙමේ, තවත් එක් සත්‍ය කතාවක්. මේ කතාව කියෙව්වාම ඔගොල්ලන්ට තේරෙයි අපි කරන ඉතාම සුළු දේකින් මනුස්සයෙක්ගේ ජීවිතයක් අපිට කොච්චර වෙනස් කරන්න පුළුවන්ද කියලා. ඔන්න එහෙනම් වැඩි කතා නැතුව මම කතාව පටන් ගන්නම්.

මේ කතාවේ කතා නායකයා 19 වැනි සියවසේ මුල් භාගයේ ජීවත් උන තරුණයෙක්. මේ තරුණයගේ ලොකුම සිහිනය උනේ ලේඛකයෙක් වෙන එක. දන්නවනේ ඉතිං ඔය වගේ උණවල් හැදුනම අපි ඒ වෙනුවෙන් කොච්චරනම් කටු කනවද, නේද? මේ තරුණයත් ඒ වගේම තමා. ලේඛකයෙක් වෙන්න පුදුම මහන්සියක් ගත්තේ. හැබැයි ඉතිං මේ තරුණයගේ ජීවිතේ හැමදේම තිබුනේ ඔහුගේ සිහිනයට විරුද්ධවයි. ලේඛකයෙක් වෙන්න ලියන්න පුළුවන් වෙන්න එපැයි, නමුත් මේ තරුණයාට පාසල් යන්න පුළුවන් වෙලා තියෙන්නේ අවුරුදු හතරයි. මේ තරුණයගේ තාත්තාට තමන්ගේ ණය තුරුස් ගෙවා දමාගන්න බැරි උන නිසා සිරගත වෙලා හිටියේ. මේ තරුණයා දුප්පත්කම නිසා බඩගින්නේ හිටපු වාර ගාන අනන්තයි.

කොහොම කොහොම හරි මේ තරුණයාට පුළුවන් උනා රස්සාවක් හොයාගන්න. මහ ලොකු රස්සාවක් නෙමේ, මීයෝ පිරිච්ච ගබඩා කාමරේක ඉඳන් බෝතල් වල ලේබල් අලවන්න. මොහුට රෑට නිදාගන්න උනේ කුඩා සොල්දර කාමරේක තවත් ඔහු වගේම තවත් තරුණයෝ දෙන්නෙක් එක්ක ( මේ තරුණයන් දෙන්නගේ රස්සාව උනේ කුණු කාණු සුද්ධ කරන එක ).

නමුත් මොන බාධක තිබුනත් මෙම තරුණයගේ ලිවීමේ ආසාව නම් නැති උනේ නැහැ. නමුත් මෙයා ලැජ්ජා උනා තමන්ගේ ලේඛන හැකියාව ගැන එලිපිට කතා කරන්න. මොකද මෙයාට තමන්ගේ ලේඛන හැකියාව ගැන කිසිම විස්වාසයක් තිබුනේ නෑ. අළුත් රස්සාවට ආවට පස්සේ එයා එයාගේ පලවෙනි අත් පිටපත තැපැල් කලේ මහ රෑ කළුවරේම කාටත් හොරෙන් එලියට ගිහින්. එයා බය උනා අනික් අය දැනගත්තොත් ඒගොල්ලෝ තමන්ට හිනා වෙයි කියලා.

එයා ලියපු කිසිම කතාවක් පත්තරේ පල උනේ නෑ. නමුත් මේ තරුණයා දිගින් දිගටම ලිපි යැව්වා.ඔහුට කිසිම ගෙවීමක් ලැබුනෙත් නෑ. එදා වේල කන්න නැතත් ඔහු දිගින් දිගටම ලිවීමේ යෙදුනා. අන්තිමේදී ඒ වාසනාවන්ත දවස ආවා. ඔහුගේ ලිපියක් පත්තරේ පල වෙලා තිබ්බා. ඔහුට කිසිම ගෙවීමක් ලැබුනේ නෑ, නමුත් එම පුවත්පතේ කතුවරයා ඔහුගේ ලිපිය ගැන පැසසුමක් කරලා තිබ්බා. මේ පැසසුම දැක්කම මේ තරුණයට කොච්චර සතුටු හිතුනද කිව්වොත් එම ප්‍රීතිය නිසාම ඔහු කම්මුල දිගේ කඳුලු වගුරමින් පාරවල් පුරා ඉබාගාතේ ගිය බව සඳහන්.

අර කතුවරයාගේ සුළු පැසසුම හන්දා වඩ වඩාත් ධෛර්ය්‍යට පත් උන ඔහු ඊටත් වඩා හොඳින් ලේඛන කලාවට අවතීර්ණ උනා. ඒ පැසසුම ඔහුගේ මුළු ජීවිතයම වෙනස් කලා. ජීවිත කාලයම අඳුරු ගබඩා කාමරයක ලේබල් අලවමින් සිටීමට ඉඩ තිබූ මෙම තරුණයා පසු කලෙක ඉතා සුප්‍රසිද්ධ ලේඛකයෙක් උනා. මෙම තරුණයාගේ නම "චාල්ස් ඩිකන්ස් ( Charles Dickens)".

XAMPP භාවිතයෙන් ලිනක්ස් වලදී ඔබේම server එකක් නොමිලේ( හා පහසුවෙන්) අටවා ගන්නා ආකාරය - Easily and freely create a server for yourself using XAMPP

2011-01-04T18:00:00.006+05:30

ඔබ සැමට කිරි නැතත් පැණි ගොජ ගොජ ගා පෙරෙන සුභම සුභ අළුත් අවුරුද්දක් වේවා...!. ඔන්න ඉතිං අළුත් අවුරුද්දේ හා හා පුරා කියලා පලවෙනියෙන්ම කියලා දෙන්න යන්නේ ඔබේම කියා සර්වර්(server) රාජයෙක් ඔබේම පරිගණකයේ නොමිලේම පහසුවෙන් අටවාගන්නා විදියයි...!

ඈ... මොකක්ද බොලේ සර්වරයක්(server) කියන්නේ....#$%*^&$#$???

ආ... හැමෝටම වැටහෙන විදියට කිව්වොත් අන්තර්ජාලයේ වෙබ් අඩවි(web sites) දාලා තියෙන්නේ සර්වර් වල. අපි මොකක්හරි වෙබ් අඩවියකට යන්න හිතාගෙන වෙබ් ලිපිනයක් ගැහුවම ( උදා:- www.ishans.info ) අපිව ගිහිල්ලා සම්බන්ධ වෙන්නේ ඒ ලිපිනයට අදාල සර්වර්(server) එකට තමයි. හරියට address එක දුන්නම ගෙදෙට්ට යනවා වගේ .

ඉතිං හත්ඉලව්වේ මට බෝල ගහන්නයැ සර්වර් එකක්... ?

ආ, මාත් ඉස්සර හිතුවේ පොඩ්ඩක් ඔය වගේ තමා. ඒත් පොඩ්ඩ පොඩ්ඩ වේබ් අඩවි වල වැඩ කිඩ ගැන උනන්දුවක් එන්න පටන් ගත්තම මටත් තේරුනා සර්වර් එකක තියන වටිනාකම. ඉතිං මමත් ඔය Internet එකේ තියන එක එක hosting services වල register වෙලා ඒවායෙන් නිකම් හම්බෙන ඉඩේ එක එක විකාර අටව අටව හිටියා. ඕවායේ වැඩ කරලා තියන අයියලා දන්නවා ඇතිනේ ඒවා කොච්චර fast ද කියලා . අනික මම සතියම රත්තරන් වගේ පරිස්සම් කරන් පාවිච්චි කරන මගේ අහිංසක මෙගාබයිට් 200 ( මම Mobitel 3g weekly delight connection එකකින් Internet එන්නේ) හුටුස් ගාලා වාෂ්ප වෙලා යනවා අර සර්වර් වල ඉඳන් දවසක් වැඩ කලාම . ඔන්න ඔය වෙලාවේ තමා අමිල සුරේන්ද්‍ර මගේ මිත්තර රත්නය මට කිව්වේ මගේම computer එකේ සර්වර් එකක් අටවගන්න පුළුවන් කථාව . මම ඔය වැඩේ ගැන දැනගෙන හිටියේ නෑ මුලින්. මම හිතුවේ සර්වර් එකක් අටවගන්න එක හෙනම හෙන අමාරු වැඩක් වෙන්න ඇති කියලා. බැලුවම මේක කිරි කජු ටොයිස් වැඩක්නේ .

ඉතිං බොල ⵞⵟⵖⵕⵔⵋⵎⵏⵌⵥⵣ, _මට_ අවහල් එකටද සර්වර් එකක්?

මෙහෙමයි... ඔයාට වැඩ ගොඩක් ගන්න පුළුවන් සර්වර් එකකින්. ඔය Joomla!, Wordpress වල වගේ වැඩ කරන අයට පුළුවන් තමන්ගෙම computer එකේ තියාගෙන site එක develop කරලා පස්සේ තමන්ගේ Internet එකේ තියන සර්වර් එකට ඒක upload කරන්න. තමන්ගෙම computer එකේ සර්වර් එකක තියන් site එක හදනකොට වැඩ කරන්න පුලුවන් මාර ඉක්මනට. Joomla! වගේ ඒවායින් පට පට ගාලා editing කරන්න පුළුවන්.

තව ඉතින් ඔය php වගේ scripting languages ඉගෙන ගන්න අයට server එකක් නැතුව බැහැනේ. අනික mySql වගේ database handling වැඩ වලටත් සර්වර්(server) එකක් ඔනෙනේ. ඔක්කොටම වඩා සර්වර්(server) එකක් ඇටෙව්වාම, ඒක එක්ක පොඩ්ඩක් වැඩ කලාම එන දැනුම...? ආදී මෙකී නොකී කරුණු ගොඩක් හන්දා තමන්ගෙම සර්වර්(server) එකක් අටවගන්න එක ගොඩක් වටිනවා. දැන්ම අවශ්‍ය නොවුනත් IT පැත්තේ වැඩ කරන බොහෝ අයට ජීවිතේ එක අවස්ථාවක් හරි එයි සර්වර් එකක් එක්ක වැඩ කරන්න වෙන.

වැඩේ නරකම නෑ වගේ.. දැන් කොහොමද ඕක කරන්නේ ?

මෙහෙමයි, මම මේ tutorial එක ලියන්නේ ලිනක්ස් වලින් සර්වර් එක අටවගන්න හැටි කියලා දෙන්නයි. මේකට ඔන වෙනවා XAMPP කියන මෘදුකාංගය. ඒක මෙතනින් භාගත කරගන්න පුළුවන්.( ඔබ windows පාවිච්චි කරනවා නම් windows සඳහා XAMPP භාගත කරගැනීමෙනුත් සර්වර් එකක් අටවගන්න පුළුවන්). XAMPP භාගත කරගත්තට පස්සේ ඒක /opt වලට extract කරගන්න ඔනේ.( මතක තියාගන්න, /opt වලටමයි extract කරන්න ඔනේ, වෙන තැන් වලට extract කලාට හරියන්නේ නෑ.මොකද XAMPP හදලා තියෙන්නේ /opt වල ඉඳන් වැඩ කරන්නයි). Terminal එකෙන් ඔබ XAMPP භාගත කරපු තැනට ගිහින්

sudo tar xvfz xampp-linux-1.7.3a.tar.gz -C /opt

කියලා command එක දෙන්න. හරි, දැන් ඔබ සර්වර් එක install කරලා ඉවරයි..! . කොහොමද වැඩේ? මාර ලේසියි නේද?? දැන් තියෙන්නේ සර්වර් එක පටන් ගන්න( සර්වර් එකත් මෘදුකාංගයක්නේ, ඒක වැඩ කරන්න නම් අපි ඒක පටන් ගන්න ඔනෙනේ).ඒකත් හරීම ලේසියි. කරන්න තියෙන්නේ

sudo /opt/lampp/lampp start

කියන විධානය දෙන එක විතරයි..!. දැන් අපි කොහොමද දන්නේ සර්වර් එක වැඩද කියලා? ඒක බලාගන්න එකත් හරිම ලේසියි. ඔබේ browser එකට ගිහින් address bar එකේ localhost කියලා ගහලා enter කලාම පහත පිටුව එයි...!.

පේනවනේ..? වැඩේ ගොඩ . අපි localhost කියලා ගහලා අපිට අවශ්‍ය භාෂාව තෝරගත්තට පස්සේ load වෙන්නේ XAMPP වල administration කරන තැනයි. ඒකේ පින්තූරයක් තමා මේ තියෙන්නේ.

මෙතනින් ඔයාට පුළුවන් ඔයාගේ databases ගැන එහෙම බලාගන්න( ඒවා දන්නේ නැත්තම් ප්‍රස්නයක් නෑ, අමතක කරලා දාන්න ).

අපිට මොකක්හරි වෙබ් අඩවියක් අටවාගන්න ඔන උනාම අපි ඒක copy කරන්න ඔනේ /opt/lampp/htdocs කියන folder එකටයි. හැබැයි ඉතිං ඕකට file copy කරන්න administrator( root) වෙලා ඉන්න ඔනේ. ලේසිම වැඩේ තමා

sudo nautilus /opt/htdocs

ගහලා file browser එකෙන් ගිහින් file copy කරන එක. අපි කියමු අපි htdocs folder එක ඇතුලේ test කියලා folder එකක් හදලා ඒකට අපේ web site එක දැම්මා කියලා. එතකොට browser එක හරහා ඒ site එක බලන්නේ address bar එකේ localhost/test කියලා ගහලා. පේනවනේ..? වැඩේ මාරම ලේසියි..!

පහත තියෙන්නේ XAMPP එක්ක වැඩ කරද්දී නිතරම ඕනේ වෙන තවත් command දෙකක්.

sudo /opt/lampp/lampp stop : XAMPP සර්වර් එක නවත්තනවා

sudo /opt/lampp/lampp restart : XAMPP සර්වර් එක restart කරනවා(නවත්තලා ආයි පටන් ගන්නවා)

වැඩි විස්තර ඕන නම් මෙතනට ගිහින් බලාගන්න පුළුවන්.

ආ තව දෙයක්. ඔබට පිට අයට ඔබේ වෙබ් අඩවියක් පෙන්නන්න ඔනේ නම් "ඔබේ IP ලිපිනය\අදාල folder එකේ ලිපිනය" යන ආකාරයට අදාල පුද්ගලයාට ලිපිනය ලබාදීමෙන් ඔබ හැදූ web site එක ඔහුට/ඇයට පෙන්නන්න පුළුවන්. උදාහරණයක් ලෙස ඔයාට test කියන folder එකේ තියන website එක පෙන්නන්න ඔනේ නම් , ඔබේ IP ලිපිනය 192.43.32.09 නම් "192.43.32.09/test" ලෙස ලිපිනය ලබාදීමෙන් වැඩේ කරගන්න පුළුවන්( හැබැයි ඉතිං මේක හරියට වැඩ කරන්න ඔබේ roමter එකේ settings හරියට තියෙන්න ඔනේ. අනික මගේ Mobitel HSDPA connectin එකෙත් මේක වැඩකරන්නේ නෑ).

XAMPP අයින් කරන්න ඕනේ නම්

sudo /opt/lampp/lampp stop
sudo rm -rf /opt/lampp

කියන command දෙක දුන්නාම හරි.

එහෙනම්, XAMPP සමඟ සතුටෙන් ගතකල හැකිවන සුභ අළුත් අවුරුද්දක් වේවා....!

Blogger සඳහා නිවැරදිව Domain එකක් set up කරගන්නා ආකාරය - How to setup a domain for Blogger correctly

2010-12-18T19:45:00.007+05:30

මේ ලිපිය ලියන්නේ blogger blog එකක් සඳහා නිවැරදිව domain එකක් set up කරගන්නා ආකාරය කියා දීමටයි. මම පහුගිය දවස් ටිකේම මගේ blog එක අටවගන්න දඟලපු දැඟලිල්ලෙන් ලැබුනු අත්දැකීම් අනුව තමා මේ ලිපිය ලියන්නේ. මෙය කියවීමෙන් ඔබට ප්‍රධාන වශයෙන් කරුණු දෙකක් දැනගැනීමට පුළුවන් වෙනවා.

1. නිවැරදිව domain name එකක් set up කරගන්නා ආකාරය
2. නිවැරදිව sub-domain name එකක් set up කරගන්නා ආකාරය

දැන් ඔබ බලනවද domain name එකෙයි, sub-domain name එකෙයි වෙනස මොකක්ද කියලා? Domain name එකකට උදාහරණයක් තමා www.ishans.info. Sub-domain name එකකට උදාහරණයක් ලෙස www.siblog.ishans.info දක්වන්න පුළුවන්. Sub-domain name එකක් කියන්නේ domain name එකක් ඇතුලෙම අපිට හදා ගන්න පුළුවන් දෙයක්.

ඔබ domain name එක blog එකට භාවිතා කරන්න සැලසුම් කලත්, sub-domain name එකක් blog එකට භාවිතා කරන්න සැලසුම් කලත් කිරීමට අවශ්‍යය දේ එක වගේමයි. මුලින්ම කල යුත්තේ ඔබ domain name එක ගත්ත වෙලෙන්දා ඔබට ලබාදුන් පාලක පුවරුව(control panel) වෙත යාමයි. එහි ඇති "DNS manager" වැනි නමක් ඇති සබැඳුමට(link) යාමෙන් ඔබට domain/sub-domain සාදාගන්නා තැනට යා හැකියි.

ඔබ පාවිච්චි කරන්නේ goDaddy නම් එහි
dashboard එකේ More settings තෝරන්න.

ඉන් පසු DNS manager වෙත යන්න.

ඔබ settings හදන්නේ cPanel එකක නම්
Advanzed DNS Editor Zone වෙත යන්න.

මේ තියෙන්නේ cPanelහි DNS edtitor එක

එහිදී ඔබට කිරීමට ඇත්තේ ඉතා සුළු දේවල් කීපයක්.අවශ්‍ය පරිදි A name හා CNAME records සකස් කිරීමෙන් ඔබට පහසුවෙන්ම domain/sub-domain එක set up කරගන්න පුළුවන්.

උදාහරණයක් විදියට අපි හිතමු ඔබට ඔබේ blogger blog එකට දෙන්න ඕන ලිපිනය www.ishans.info කියලා. එවිට ඔබ කරන්න ඕන පලමු දේ තමා ishans.info කියන ලිපිනයට A Name record හතරක් හදන එක( www.ishans.info කියලා නෙමෙයි හදන්න ඕන, ishans.info කියලයි). හදන්න ඕන record හතර හා ඒවට අදාල IP address තමා මේ.

A name record එකක් එකතු කරන හැටි

Name: ishans.info
TTL:14400
Type: A
Record: 216.239.32.21

Name: ishans.info
TTL:14400
Type: A
Record: 216.239.34.21

Name: ishans.info
TTL:14400
Type: A
Record: 216.239.36.21

Name: ishans.info
TTL:14400
Type: A
Record: 216.239.38.21

හරි, දැන් අපි අපේ domain name එක google ලගේ servers ටිකකට redirect වේන්න හදලයි තියෙන්නේ( අපි උඩ දුන්න IP address හතර google ලගේ). දැන් කවුරු හරි "ishans.info" කියලා address bar එකේ ලියලා ඔයාගේ site එකට එන්න හැදුවොත් එයාව forward වෙනවා google ලගේ server එකකට( මේක ඉතිං මෙහෙම කිව්වට දැන්ම මෙහෙම වෙන්නේ නෑ, මොකද අපි හදපු settings අන්තර්ජාලයේ හරි හැටි ක්‍රියාත්මක වෙන්න අඩුම ගානේ පැය 4ක් වත් යනවා).
එතකොට කවුරුහරි www.ishans.info කියලා ගැහුවොත් මොකද වෙන්නේ? ඕගොල්ලෝ සමහරවිට හිතයි වෙනසක් නෑ නේද ishans.info කියලා ගැහුවත් www.ishans.info කියලා ගැහුවත් කියලා.ඇත්තටම් අන්තර්ජාලයේදී මේ දෙක ලිපින දෙකක් හැටියටයි ගනන් ගැනෙන්නේ. ඒක නිසා අපි settings හදන්න ඔන කෙනෙක් www.ishans.info කියලා ගැහුවම එයාවත් ishans.info වෙතම යන්න. කොහොමද ඉතිං මේක කරන්නේ?

හරිම පහසුයි. ඔබට කරන්න තියෙන්නේ cName record එකක් දාන එක විතරයි.

cName record එකක් දාන හැටි

Name: www
TTL:14400
Type: CNAME
Record: ghs.google.com

දැන් කවුරුහරි www.ishans.info කියලා adddress bar එකේ ගැහුවම එයාවත් googleලගේ server එකක් වෙත redirect වෙනවා. හරි, දැන් ඉතිං වැඩේ ඉවරද? නෑ නෑ, තාම නෑ. අපි settings හැදුවේ ishans.info කියලා ගැහුම google ලගේ server එකකට යන්න විතරනේ. ඔය server එකේ තියෙන්නේ ඉතිං අපේ blog එක විතරක්යැ. තව blog කී දාහක් නම් ඕක ඇතුලේ ඇද්ද? ඉතිං අපි කොහොමද ishans.info අපේ blog එකටම යන්න හදාගන්නේ. ඒකට blogger වල settings වලින් වැඩක් කරන්න වෙනවා.( මේ පියවරට යන්න කලින් පැය 4ක් 5ක් යන්න අරින්න අපි කලින් හදපු AName හා cName records හරියට හැදෙනකන්).

Blogger dashboard එකේ Settings වල publishing වලට යන්න. එතන ඇති Custom domain කියලා link එකක්. ඒක තෝරලා Advanced settings වලට යන්න. එතන තියන Your Domain කියන තැන අදාල ලිපිනය ලියන්න. ~~(මේ උදාහරණයට අදාලව නම් ලියන්න ඕනේ ishans.info කියලා).~~

පහත දැක්වෙන කොටස අලුතෙන් එක් කරන ලදී:

මෙතනදී ලිපිනය දෙනකොට www කොටස අනිවාර්යෙන්ම යොදන්න.( මේ උදාහරණයේ හැටියට නම් www.ishans.info). ඊට පස්සේ එක පාරක් "save settings" button එක ඔබලා page එක reload කලාම ලිපිනය යටින් option එකක් මතුවෙයි " Redirect ishans.info to www.ishans.info කියලා. ඒකට හරියක් දාන්න.ඊට පස්සේ ආයි "save settings" ඔබන්න.

හරි....! එච්චරයි කරන්න තියෙන්නේ...!.

Sub-domain එක හදා ගන්නෙත් මේ විදියටමයි. එකම වෙනස domain name එක දාපු හැම තැනකටම sub-domain name එක දාන එකයි. උදාහරණයක් විදියට අපිට පාවිච්චි කරන්න ඕනේ siblog.ishans.info කියන sub-domain එකනම් කලින් පියවර වල ishans.info කියලා දාපු හැම තැනටම siblog.ishans.info කියලා දාන එක විතරයි තියෙන්නේ.

වැඩිදුර දැන ගැනීමට යමක්: සමහර වෙබ් අඩවි වල තියනවා sub-domain හදනකොට AName හදන්න ඕනේ නෑ, cName විතරක් හැදුවම ඇති කියලා. නමුත් එහෙම කලොත් ඔබේ blog එකේ feeds අවුල් යන්න පුළුවන්. එම නිසා AName record හතරකුත් හදන එක කෝකටත් ඇඟට ගුණයි.

ආදරණීය followersලා වෙතයි - To my dear Followers...

2010-12-12T11:23:00.001+05:30

මේ ලිපිය ලියන්නේ ඔබලාට මගේ හදේ පිරී ඇති අවංක නිකලැල් ආදරයෙන් යුතුව බැව් පලමුව දැනුම් දීමට කැමැත්තෙමි. පසුගිය දින කීපය තුල සයිබර් අවකාශයේ එහෙට මෙහෙට පනිමින් මගේ බ්ලොග් රාජයා ඔබ සමග හැංගිමුත්තන් කල බව ඔබ සැමට මතක ඇතැයි සිතමි. එසේ ලිපින මාරු කරමින් පැන පැන සිටි බ්ලොග් රාජයා අල්ලා අවසානයේ එක තැනකට කූඩු කිරීමට මා සමත් වූ බව ඔබට දන්වා සිටින්නේ හෘදය විදාරණය විය හැකි තරම් මට්ටමක වූ අප්‍රමාණ ප්‍රීති ප්‍රමෝදයකින් යුක්තවය. ඒ අනුව මින් පසුව "මගේ සටහන්" බ්ලොග් රාජයා දිගින් දිගටම ( වෙනත් බාල්දියක් ඇද නොවැටෙන තාක් කල්) www.siblog.ishans.info යන ලිපිනයේ රැඳී සිටිනු ඇති බව ඔබ සැමට මා දන්වා සිටින්නේ ප්‍රීති ප්‍රමෝද සාගරයේ ගිලී නැහැවෙමිනි.

ප්‍රිය මිතුරනි, අප නැග්ගොත් පුවක් ගසෙත් දෙබලක් ඇති බැව් ඔබට අමතක වී නැතැයි මා සිතමි. එම නිසා මෙම ඇඩ්‍රස් මාරුවේදීද සුපුරුදු පරිදි මා විසින් වැඩ වර්චස් කරගනිමින් එම වාර්තාව දිගටම පවත්වා ගැනීමට සමත් වී ඇති බවද ඔබට සතුටින් දැනුම් දීමට කැමැත්තෙමි. මගේ ගොන් කතා ඉවසිමින් මගේ පසු පස දිගින් දිගටම එලවූ followers රැලට තව දුරටත් මගේ බ්ලොග් රාජයාගේ feeds නොලැබෙන අතර ඔබේ blogger dashboard එකේ තවදුරටත් මගේ අලුත් ලිපි පිලිබඳ විස්තර නොවැටෙනු ඇත. ඔබට තව දුරටත් මගේ පච කතා අසා සිටීමට අවශ්‍යය නම් පලමුව මගේ බ්ලොග්ගිය unfollow කර නැවත follow කිරීමට පටන් ගන්න. එයින් සියලු ගැටලු නිවාරණය වනු ඇත.

මගේ බ්ලොග් රාජයා පස්සෙන් සපැමිනෙන ඔබ සැමට දෙයියන්ගේම පිහිටයි........!

කලකට පසුව නැවතත්....

2010-12-03T00:25:00.002+05:30

මාස ගානක නිහැඬියාවකින් පස්සේ ඔන්න ආයෙත් ලිපියක් ලියන්න වෙලාවක් හදාගත්තා. පහුගිය දවස් ටිකේම බ්ලොග් එකේ URL එක එහෙට මෙහෙට හරව හරව එක එක URL පාවිච්චි කර කර හිටියනේ. අන්තිමේදී මම තීරණය කලා www.siblog.ishans.info කියන ලිපිනය දිගටම පාවිච්චි කරන්න. siblog කියලා ලිපිනයේ දැම්මේ Sinhala blog කියන අර්ථයෙන්. ලඟදිම ඉංග්‍රීසි භාසාවෙනුත් බ්ලොග් එකක් පටන් ගන්න අදහසක් තියනවා, බ්ලොග් දෙකක් ලියන්න වෙලාව තමා නැත්තේ :-/ .

මේ බ්ලොග් එක දැන් සින්ඩි වල එහෙම පෙන්නනවද දන්නෙත් නෑ. අනික URL එක වෙනස් කරපු නිසා මේ බ්ලොග් එකට සින්ඩි හරහා එන්න පුළුවන්ද දන්නේත් නෑ. ඒ කරුණු කාරණා ගැන පස්සේ නිවිහැනහිල්ලේ හොයලා බලන්න ඕනේ. Semester එක ඉවර වෙන්න ලඟ නිසා වැඩ ගොඩගැහිලා. මම මේ ලිපිය දැම්මේ බ්ලොග් එක තවම සක්‍රිය බව පෙන්නන්නයි. ලබන ජනවාරියේ ඉඳන් හම්බෙන මාස දෙක-තුනක නිවාඩුවෙදි බ්ලොග් එකේ වැදගත් ලිපි කීපයක් ලියන්නත් බලාපොරොත්තුවක් තියනවා. එහෙනම් තවත් ලිපියකින් ලඟදීම හමුවෙමු....!

Happy Birthday To Me......!

2010-09-05T07:58:00.000+05:30

Happy B'day to Me,
Happy B'day to Me,
Happy B'day dear බ්ලොග්ගී,
Happy B'day to Me..........!

පහුගිය දවස් ටිකේ තිබුන වැඩ කන්දරාවේ තරම හන්දා හරියට බ්ලොග් එක ගැන හොයන්නවත් ලැබුනේ නෑ. ඊයේ පරණ ලිපි check කරන කොට තමා දැක්කේ මගේ සටහන් තබන්න පටන් අරන් අදට අවුරුද්දක්ම ගතවෙලා!.

මම බ්ලොග් කෙරුවාව පටන් ගත්තේ කැම්පස් පටන් ගත්ත කාලේ. හරියටම කිව්වොත් pre-academic term එකේ කරන්න වැඩක් නැතුව වේලි වේලි ඉන්න කාලේ( මොකද ඉතිං මොරටුවේ ගෑණු පරානයක් දිහා බලන්න කියලද!?). මගේ සටහන් පටන් ගන්න මාව ධෛර්මත් කලේ සමීර ශාකුන්තල අයියයි, Octa Helix කොළුවයි තමා( කොළුවා කිව්වට තද වෙයිද මන්දා !). සමීර අයියගේ ශාකුන්තලගේ සටහන් පොත කියව කියව ඉන්න කොට මටත් හිතුනා වැඩේ පටන් ගන්න. ඊට පස්සේ තමා මාත් හා හා පුරා කියලා දකුණු අත පෙරට තියලා මගේ සටහන් ලියන්න පටන් ගත්තේ!.

ගතවුන අවුරුද්දක කාලය තුල මගේ අතින් එක එක ජාතියේ දේවල් ලියවුනා මේ බ්ලොග් එකේ. බ්ලොග් එකේ නමෙන්ම කියවෙන විදියට මේක ඇත්තටම මගේ සටහන් වල එකතුවක්. මම දන්න කියන දේ, මට හිතෙන දේ, මට දැනෙන දේ යනාදී අනං මනං භූත විකාර ඔක්කොගෙම එකතුවක්. මුල් දවස් වල නම් මම ගොඩක් බර උනේ මගේ ජීවන අත්දැකීම් ගැන ලියන්න.

අන්තිම දවසේ ක්‍රිකට්....

අපේ කාලේ මෝල් කරත්තයක්- අහිංසක කොල්ලන්ටයි මේ අනතුර...

අපේ BMICH book fair ගමන

Freshers Welcome එකට අපි music practice කරපු හැට...

වගේ ලිපි ලියැවුනේ ඒ කාලෙදීයි.

පස්සේ පස්සේ මම ලිනක්ස් ගැනත් ලියන්න පටන් ගත්තා. ඒ ගමන්ම අතරින් පතර මට දැනෙන දේවල් තියන

ජෙනරාල්, මහ රජානෝ, කඩේ යන්නෝ හා ...

මොට්ටසෝරි ක්‍රමයට ඡන්දය දැමීම

රස්සාවක අමාරුව

දෙවියෝ

වගේ ලිපිත් ලියැවුනා. පුදුම වැඩේ කියන්නේ මගේ සටහන් ලියන්න පටන් ගත්තට පස්සේ මගේ අතින් කවි වගේ මොනවදත් ලියවෙන්න පටන් ගත්තනේ!. ඒවට උදාහරණ විදියට

මොරටු මැවිසුරුවා

ජීවිතේ

තවත් ගොන් කවි කීපයක්......

වගේ ලිපි දක්වන්න පුළුවන්. ඒත් ඇත්තටම බැලුවොත් මගේ සටහන් වල වැඩිපුරම තියෙන්නේ තාක්ෂණික ලිපියි. උදාහරණ විදියට,

මූර්ජනයෙන් අතුරුදහන් කරවනු ලැබේ.

විදුලි රැහැන් ඔස්සේ පරිගණක ජාළකරණය

ඇළ පහරේ දත්ත සැඟවීම

සුදු ගුගල්, කළු ගූගල් හා විදුලි බලය

ලිපි දක්වන්න පුලුවන්. ඔය අතර එහෙන් මෙහෙන් විහිළු තහළු දෙක-තුනකුත් කරලා තියනවා!.

ටිකක් හිනාවෙමු

අයින්ස්ටයින්

ඇත්තටම බ්ලොග් ලියන්න පටන් ගත්ත එකෙන් මගේ ජීවිතේට ලැබුන අත්දැකීම් නම් බොහොමයි. තමන්ගේ මතය නිරවුල්ව ඉදිරිපත් කරන්නේ කොහොමද, කෙනෙක් එක්ක බුද්ධිමත් විදියට වාද විවාද කරන්නේ කොහොමද කියන දේවල් මට හරියටම වැටහෙන්න පටන් ගත්තේ මේ බ්ලොග් එක නිසයි. බ්ලොග් මැරතන් දුවපු එකත් අළුත්ම අත්දැකීමක් උනා!. ඒ වගේම මගේ බ්ලොග් එක නිසාම මට අඳුනගන්න ලැබුන ධනික අයියා හා කණි අයියා වැනි මොරටුව සරසවියේ ඉහල batch වල අය මට ලබා දීපු සහයෝගයනුත් මේ වෙලාවේ විශේෂයෙන් මතක් කරන්න ඕනේ. සමහරු බ්ලොග් කෙරුවාව වෙලාව කන වැඩක් විදියට අර්ථ දැක්වූවත් බ්ලොග් කෙරුවාවෙන් ජීවිතයට එකතු වෙන අළුත් දේවල් ගැන කල්පනා කරලා බැලුවම ඒ සඳහා වැයවෙන කාලය ඒ වගේ දෙගුණයක් වටින බවයි මගේ නම් හැඟීම.

කොහොම උනත් පහුගිය මාස කීපයේම මට එච්චර බ්ලොග් එක ගැන හොයන්න බලන්න වේලාවක් හම්බුනේ නෑ. පේනවනේ, ජුනි, ජූලි, අගොස්තු කියන මාස තුනටම තියෙන්නේ ලිපි තුනයි . ඒත් මේ හම්බුන කෙටි නිවාඩු කාලෙන් උපරිම ප්‍රයෝජන අරන් වැදගත් ලිපි කීපයක් ඉදිරියට මගේ සටහන් වලින් ඉදිරිපත් කරන්න මම බලාපොරොත්තු වෙනවා.

පුරා අවරුද්දක් තිස්සේ මා එක්ක හිටපු ඔබ සැම ඉදිරියේදීත් දිගටම මගේ සටහන් සමග රැඳෙයි කියලා මම බලාපොරොත්තු වෙනවා. ඔබේ comments තමා මගේ ශක්තිය.

නැවත තවත් සටහනකින් හමුවන තුරු ඔබ සැමට බුදු සරණයි.

උබුන්ටු Tweak - Ubuntu Tweak

2010-09-04T19:05:00.001+05:30

අද මම කියන්න යන්නේ උබුන්ටු පාවිච්චි කරන අයට වැදගත් වෙන මෘදුකාංගයක් ගැනයි. මේකේ නම Ubuntu Tweak (Homepage- http://ubuntu-tweak.com/). නමෙන්ම තේරෙන විදියට මේක උබුන්ටු වල පොඩි පොඩි වෙනස්කම් කරන්න හදපු( ක්‍රියාකාරීත්වය වැඩිදියුණු කිරීම සඳහා) මෘදුකාංගයක්. මේ මෘදුකාංගය ආධාරයෙන් අපිට පුළුවන් උබුන්ටු වල හැංගිලා තියන සැකසුම් බොහෝමයක් පහසුවෙන් සොයාගෙන ඒවාට අදාල වෙනස්කම් කරන්න. උදාහරණ විදියට මේ මෘදුකාංගයෙන් පුළුවන් උබුන්ටු වල Log in screen එක පොඩ්ඩක් customize කරන්න, Gnome වල සැඟවුනු සැකසුම් වෙනස් කරන්න,Nautilus හි Scripts හා Templates වෙනස් කරන්න. උබුන්ටු පාවිච්චි කරන බොහොමයක් අයට මේ මෘදුකාංගය ගොඩක් වැදගත් වෙයි.

මේක පරිගණකයේ ස්ථාපනය කරන්නේ මෙහෙමයි.
මුලින්ම Menu එකේ system--> Administration--> Synaptic Package Manager වලට යන්න. මෙහිදී ඔබගේ root ගිණුමේ password එක ඉල්ලයි. එය ලබාදුන් පසු Synaptic Package Managerහි menu bar එකේ settings--> Repositories වලට යන්න. එහි Other Software කියන tab එකට ගිහින් Add button එක click කරන්න. එහි එන APT Line: කියන තැනට පහල පේලිය paste කරන්න.

ppa:tualatrix/ppa

ඊට පස්සේ windows දෙක close කරලා නැවත Synaptic Package Manager වෙත ගියාම package list එක reload කරන්නද කියලා අහයි. ඒකට ඉඩදෙන්න( reload කරන්නද කියලා ඇහුවේ නැත්තම් Synaptic Package Managerහි තියන Reload කියන button එක උඩ click කරලා manually realod කරන්න ඕනේ). Reload වෙන එක සම්පූර්ණ උනාට පස්සේ Synaptic Package Managerහි තියන Search කියන button එක උඩ click කරලා ubuntu-tweak කියලා type කරලා සොයන්න. ඊට පස්සේ සෙවුම් ප්‍රතිඵලයේ එන ubuntu-tweak කියන package එක install කරන්න. ඊට පස්සේ Applications menu එකේ System Tools වල තියන Ubuntu Tweak කියන තැනට ගිහින් මේ මෘදුකාංගය භාවිතා කරන්න පුළුවන්.

ඉවරායී............................

2010-09-02T13:02:00.000+05:30

මගේ අම්මියෝ පහුගිය කාලේ වින්ද දුකක් :s. ලිපියක් ලියන්න තියා බ්ලොග් එක දිහා හරියට බලන්නවත් වෙලාවක් හම්බුනේ නෑ තිබුන වැඩ කන්නදරාව හන්දා :-/ . දෙවෙනි semester එකේ අන්තිම විභාගේ ඉවර උනේ ඊයේ. කට්ටියට නිකන් මැරිලා පන ආවා වගේ!. පහුගිය semester එකේ වෙච්ච වැඩ ගැන ලියන්න ගියොත් මට මේ නිවාඩු කාලෙම ඒවා ගැන ලිය ලිය තමා ඉන්න වෙන්නේ :D . ඒ වෙනුවට ලිනක්ස් ගැන තවත් ලිපි පෙලක් ලියන්න මම බලාපොරොත්තු වෙනවා.

මම නැති කාලේ blogger වල ගොඩක් වෙනස් කම් වෙලා තියන බව නම් පේනවා. Spam comments නවත්තන්න ක්‍රම වගේම Stats මෙවලමත් ගොඩක් වටින බව මගේ හැඟීමයි. ඔය මෙවලම් ටික පාවිච්චි කරලා බලන කොට තමා පහල තියන link එක හම්බුනේ.

http://www.elakiri.com/forum/showthread.php?t=787431

මේක මගේ කියන ගූගල් මගින් කාර්යක්ෂමව සොයමු ලිපිය අමු අමුවේ කොපි කරලා ලියපු එකක් :-/ .

එළකිරි එකේ accounts තියන කට්ටියට මේක ගැන adminට පැමිණිලි කරලා මට පොඩි සහයෝගයක් දෙන්න පුළුවන් නම් ඒක මට කරන ලොකු උදව්වක්.

තවත් ගොන් කවි කීපයක්......

2010-08-01T13:20:00.000+05:30

උදේ ඉඳන් ඇක දමලා හරිම මහන්සියි,
විභාගෙකුත් ලඟ එනවා කෙලම වෙලා යයි,
මලක් කඩන්නටවත් මට වෙලා නැති හැඩයි,
මොරටු අපිට මල් කොයින්ද අපෙ ලෝකෙ ඇක තමයි.

එකයි එකයි දෙකයි කියලා ඇක දාපන් දැන්,
ඇක දාලා ඉන්න බැරිද උඩ පැනපන් දැන්,
උඩ පැනලා ඉන්න බැරිද වරෙන් බිමට දැන්,
ඔය ගොන් වැඩ නවත්තලා ඇක දාපන් බන්.

ඇක දාන්න ඇක දාන්න ඇයි බයවෙන්නේ,
ඇක දැම්මොත් උඩ යනවලු කවුද කියන්නේ,
අපිට මෙහෙම කෙලාස් උනේ ඇක හින්දානේ,
ඇක දැම්මොත් විනාස වේ මතකෙට ගන්නේ.....

ජීවිතේ

2010-07-30T21:39:00.000+05:30

කඳුළු ලංවෙයි,

ජීවිතේ........

සුසුම නලියයි,
සොවින් බරවෙයි,
ජීවිතේ........

දුර්ග බාධක,
සතුරු කරදර,
ජය පරාජය,
ජීවිතේ........

ගමන වෙහෙසයි,
මගද කටුකයි,
කිසිත් තිර නැත,
ජීවිතේ........

සැපත ලංවෙයි,
කඳුළු පැනයයි,
සැපත සතුටයි,
ජීවිතේ........

ලොවක් නැලවෙයි,
ලොවක් සැනසෙයි,
සතුට රජයයි,
ජීවිතේ........

පලක් නැතිමුත්,
නිමක් නැතිමුත්,
තුටින් සිටියුතු,
ජීවිතේ........

තවත් එක් අමුතු කතාවක්

2010-06-18T19:32:00.000+05:30

රාත්‍රිය මනරම්ය,
සීතලය,
පිවිතුරුය,
සොඳුරු ඒ මතකයන් ,
ඉමිහිරිය,
දුක්බරය.........

අතීතයේ වූ කඳුළු සයුරේ,
නැගුනු රැලි බාධක අතර,
පාව ගිය මුත් හුදකලාවේ,
ගොඩබිමක් ගැන නොසිතමින් මම

පාවි යද්දී ඉබාගාතේ,
ලැබුනි දක්නට සොඳුරු ගොඩබිම,
අගය වටහා නොගත් මුත් මා,
ගොඩබැසිමි එහි චපල සිතැතිව

සැරිසැරුව මුත් ගොඩබිමේ මා,
පුරා සිව් මසක් සිත් තොටින,
නොදැනුනි එහි අගය කිසිදින,
පෙනුනේ එහි අඩුපාඩුමයි මට

එපා වූ කල ගොඩබිමම මට,
පැදෙව්වෙමි ඉවතකට ජීවන නෞකාව,
නොසිතුවෙමි යලි ගොඩබිමක් ගැන,
ගොඩබිම් අපමනක් ඇති මුත් අවට

ගෙවී ඇත වර්ෂයක් සයුරේ,
සරිලන ගොඩබිමක් නැත්තේය නොදුරේ,
මතක එයි ඒ මිහිරි කාලේ,
ගොඩබිමේ මා ගෙවූ කාලේ

ආපසු හැරිය නොහැක දැන් මට,
නැවත එම ගොඩබිම කරා යන්නට,
ලැබුනි සෝබර පුවත මා හට,
ගිලී ගොස් ඇත ගොඩබිම............ කඳුළු සයුරේ පතුලටම...................

අංක විස්තරේ

2010-05-25T08:35:00.001+05:30

මේකත් මට ඊ-මේල් වලින් ආපු දෙයක්. වැදගත්කමක් පේන නිසයි දාන්න හිතුවේ. මේකේ පෙන්නන්නේ අංකයක වටිනාකම හා එහි පවතින කෝණ ගනන අතර ඈති සම්බන්ධය.

මේක මට එව්වේ රජිත රංදීප(මගේ යාලුවෙක්). බොහොම ස්‍තුතියි රජිත :D

The Beauty and the cruel hearted Beast

2010-05-23T09:42:00.001+05:30

First of all before you read this I want to tell you that this is not a poem, Its just a stream of thoughts born in my mind......

His world was empty,
filled with happiness......,
Then she came by,
to offer him love,
But with in inside,
he was a Beast,
who doesn't know love,
who only knew lust,
But they became a couple,
and there they were,
the Beauty and the Beast,
As the days went past,
the Beast became cruel,
and betrayed the Beauty,
destroyed her world,
Now again,
his world is empty,
but filled with sorrow,
because he has become,
a human again,
enduring sorrow for the things he did............

මොරටු මැවිසුරුවා

2010-05-16T20:35:00.000+05:30

කැම්පස් කොල්ලෙකි,
ඌ හෙන ජගතෙකි,
ඇකටත් සමතෙකි,
කෑමට රුසියෙකි.

පමාවි නැගිටී,
දත් ටික මදිතී,
මූණත් තෙමතී,
කැම්පස් දුවතී.

ගොඩෙන්ම කන්නේ,
පෝලිමේ ඉන්නේ,
ලෙක්චර් එන්නේ,
මූ නිදියන්නේ.

Lunch hour වලදී,
කෑමට බරදී,
Full plate මිලදී,
කයි මූ පැහැදී.

දවසේ අවසන,
විඩාව යැවුමට,
ටැංකිය වෙතටම,
ඇදේවි සැමදින.

රෑවී එන්නේ,
බෝඩිම වෙතටේ,
පිරිසිදු වෙන්නේ,
ඇඳටයි යන්නේ.

ඇඳ උඩ ඉන්නේ,
වෙන වැඩ නැත්තේ,
මල් වැඩ ඇත්තේ,
කඩමින් ඉන්නේ.

නිදිමත එන්නේ,
මල් ඇති වෙන්නේ,
ඇක නැත දැම්මේ,
ඇඳෙ ඇලවෙන්නේ.

මැවිසුරු කොල්ලා,
නින්දට යන්නා,
මෙවන් දිනක් යලි,
හෙටත් නැගෙන්නා.

මේකයි තත්වේ,
මොරටුව පැත්තේ,
මෙවන් උනුත්,
මැවිසුරුවෝ වෙන්නේ..........

තේරුම්: ඇක- Academic වැඩ කටයුතු(ඇක දැමීම යනු පාඩම් කිරීමයි).
ගොඩ-මොරටුව සරසවියේ පහසු මිලට කෑම දෙන canteen එකකි.
ටැංකිය- මොරටුව සරසවියේ පරිගණක විද්‍යාගාරයකි(අන්තර්ජාල පහසුකම් සහිත)
මැවිසුරුවා- Engineer යන්නට සිංහල වචනයයි.

නියම වැඩ්ඩෙක්

2010-04-29T12:43:00.000+05:30

මේ පින්තූර ටික මට ඊ මේල් එකකින් හම්බුනේ. මේ මනුස්සයා නම් නියම වැඩකාරයෙක්. අනික ඩෝසරෙත් හොඳ හයිය එකක් වෙන්නැති :p

අපේ අයත් මෙව්වා දැකලා වැඩ දාන්න යයිද දන්නෑ O_o

දෙවියෝ

2010-04-28T19:17:00.001+05:30

පහුගිය දොහේ JAVA කරලා කරලා කර්පට් වෙලා තිබ්බ මගේ ඔලු ගෙඩිය ඇතුලේ අද නාන කොට දෙවියෝ ගැන පහල උන අමුතු සිතුවිලි ටිකක් තමා මේ ලියන්න යන්නේ.

දෙවියෝ ගැන කොච්චර අහල තිබ්බත් කෝ ඉතිං අපි එක්කෙනෙක්වත් හැබැහින් දැකලා තියන එකක්යැ නේද? ඒ කාලේ තිස් තුන් කෝටියක්ම හිටියලුනේ. ඔච්චර තොගයක් මනුස්සයන්ගේ ඇහැට වහන් වෙලා ඉන්නේ කොහොමද කියන එක තමා ප්‍රස්නේ.සමහරවිට ඒ උත්තමයෝ අපිට දෘෂ්‍ය පරාසයේ නැතුව ඇති.

ඇත්තටම ඇයි දෙවියෝ අපිව හම්බෙන්න එන්නේ නැත්තේ? ඔන්න මිනිස්සු නම් දෙයියෝ ඉන්න තැනක් දන්නේ නෑයි කියලා කියන්න පුළුවන්. නමුත් අපේ ආගම් වල තියන විවිධ කතා(උදා: ජාතක කතා) වල හැටියට දෙවියෝ නම් අපි ගැන දන්නවනේ. ඉතිං ඔය තිස් තුන් කෝටියක්ම ඉන්නවයි කියපු දෙවියන් අතරින් කාටවත්ම හිතෙන්නේ නැද්ද ඇවිත් මනුස්ස ලෝකෙට පොඩ්ඩක් ඔලුව දාලා යන්න?? කාටවත්ම හිතෙන්නේ නැද්ද මනුස්ස ලොකේයි දෙවියන්ගේ ලෝකෙයි අතර පොඩි ෆිට් එකක් ඇති කරවන්න?? එහෙම කලොත් දෙගොල්ලන්ටම වාසිනේ. ඒගොල්ලන්ට පුළුවන් අපට උදව් කරන්න, ඒකට ගෙවීමක් වශයෙන් අපිට පුළුවන්නේ ඒගොල්ලන්ට පින් පමුනවන්න. එතකොට දෙපැත්තටම වාසිනේ !!.

ඔය දෙවියෝ තිස් තුන් කෝටියක්ම ඉන්නවා කිව්වේ ඒ කාලේනේ. දැන් ඔය ගාන හෙනට වැඩිවෙලා ඇති නේද?? මොකද කාලයක් යනකොට ඉතිං ඕන ලෝකෙක ජනගහනය වැඩිවෙනවනේ ;) . (මේක කිව්වම මතක් උනේ, දැන් අපායෙත් ෆට්ට traffic එකක් ඇති. මේ ලෝකේ මිනිස්සු කරන පව් වැඩ කන්දරාවේ හැටියට මැරෙන මැරෙන අයගෙන් 3/4කටත් වඩා යන්න ඕනේ අපායටනේ :p ). දැන් සමහරවිට දිව්‍ය ලෝකෙත් ඉඩකඩ ප්‍රස්න ඇති.

හැබැයි මේකේ අනික් පැත්ත වෙන්නත් බැරි නෑ. මොකද අපේ මිනිස්සු කරන වැඩ දෙවියන්ටත් පුරුදු වෙලා දෙවියන්ගේ පින් ඉවර වෙලා දෙවියොත් මනුස්ස ලෝකේ හරි අපායේ හරි ඉපදිලාද දන්නෑ(සමහර විට මේක හන්දා වෙන්නැති මනුස්ස ලෝකේ ජනගහනය අම්බානෙට ඉහල යන්නේ, දෙවියෝ තිස් තුන් කෝටියක්ම එන්න ඉන්නවනේ !!). සමහරවිට දෙයියෝ දිව්‍ය ලෝකෙන් චුත වෙලාම දැන් දිව්‍ය ලෝකෙ නිකන් නිරුදක කාන්තාරයක් වගේ වෙලාද දන්නෑ, බෙහෙතකටවත් දෙවියෙක් හොයාගන්න අමාරුද දන්නෑ. මට පෞද්ගලිකව හිතෙන්නේ එහෙම වෙලා ඇති කියලා. මොකද ඉස්සර නම් දෙවියෝ ආවලුනේ මිනිස්සුන්ට උදව් කරන්න. දැන් ඉතිං එහෙම එන්නේ නැත්තේ අපිට උදව් කරන්න තියා දෙවියන්ට උදව් කරගන්නවත් දෙවියෝ දිව්‍ය ලෝකෙ නැති හන්දා වෙන්නැති.

අනික අද කාලේ මනුස්ස ලෝකේ තියන සැප දැක්කම අඩු පින් ලබාගෙන දිව්‍ය ලෝකෙ ගිය දෙවියන්ට දිව්‍ය සැප එපා උනොත් ඒකත් පුදුමයක් නෙමේ. සමහර දෙවිවරු ඉන්නවනේ ඔය ගස් වලට එහෙම අරක් අරන් ඉන්න. ඒ වගේ දෙවිවරුන්ට එහෙම අනිවාර්යෙන්ම හිතෙනවා ඇති ගහට වෙලා වේලි වේලි වේලි ඉන්නේ නැතුව තමන් දෙවියෙක් වෙන්න රැස් කරගත්ත පුණ්‍ය බල මහිමයෙන් දිව්‍ය ලෝකෙන් චුත වෙලා මනුස්ස ලෝකේ හොඳ සැප ඇති තැනක ඉපදිලා ෆුල් ආතල් එකේ ජොලියක් දාගෙන ඉන්න. අනික එහෙම ඉන්න ගමන් පුළුවන්නේ තව කුසල් ටිකක් රැස් කරගෙන ලබන ආත්මෙත් මනුස්ස ලෝකෙ ඉපදිලා තවත් ආතල් ගන්න(දෙවියන්ට පින් කරන්න බෑලුනේ, මනුස්සයෝ අනුමෝදන් කරන කුසල් විතරලුනේ දෙවියන්ට ගන්න පුළුවන්).

මට තියන තව අවුලක් තමා එක එක ජාති වල දෙවිවරු සිටීම. බෞද්ධ දෙවිවරු, සිංහල දෙවිවරු, හින්දු දෙවිවරු, ග්‍රීක දෙවිවරු, බැබිලෝනියානු දෙවිවරු ආදී මෙකී නොකී සියළුම ජාතියේ දෙවිවරු ඉන්නවනේ. මේ දෙවිවරු අයිති සංස්කෘතීන් වෙනස් නිසා මේ දෙවිවරුන්ගේ චාරිත්‍ර වාරිත්‍ර එහෙමත් වෙනස් ඇතිනේ. වෙනස් කම් ඇති තැන ගැටළු ඇති වෙනවා වගේ(අපේ ලංකාවෙත් වෙලා තියෙන්නේ!) මේ විවධ සංස්කෘතීන් වල දෙවිවරුන් අතරත් සමහර විට ගැටුම් ඇතිවෙනවා ඇති.අනික ඉතින් වලි වලදී දෙවිවරු පාවිච්චි කරන ආයුධත් ලේසි පාසු ඒවා නෙමේනේ (ඔය ෆිල්ම් වල ෆිල්ම් එක හඳපු මනුස්සයා ඇහින් දැක්කා වගේ පෙන්නන්නේ :p ). එක එක සංස්කෘතීන් වල දෙවියන්ට ඉන්නේ එක එක නායකයොනේ.උදාහරණ විදියට අපගේ ශක්‍ර දෙවියා හා ග්‍රීකයන්ගේ zeus දෙවියා දක්වන්න පුළුවන්. ඉතිං ඔය නායක දෙවිවරු අතර වැඩි බලය සඳහා ගැටුම් ඇතිවෙන්නේ නෑ කියලා කාටද කියන්න පුළුවන්!? ඒ අතින් බලන් ගියාම දිව්‍ය ලෝකේ ජීවත් වෙන එකත් හිතන තරම් ලේසි පාසු නෑ වගේ :s .

දෙවියන්ටත් සමහරවිට අපිට වගේ කාලේ කන්න වැඩ ඇති නේද? අපිට ඉන්ටනෙට් එකේ දවසට කොච්චර කාලේ කනවද?( රැකියා බර, පවුල බර මැද්දේ ආදී අනේක විධ බරවල් මැද්දේ උනත්!!). දෙවිවරුන්ට ඔය එක බරක්වත් තියන එකක්යැ ඉතිං. ඒ නිසා දෙවිවරුන්ටත් කාලේ කන්න අපේ වගේ මොකක් හරි ක්‍රමයක් ඇති( අපේ මූණු පොත වගේ එකකුත් ඇති සමහර විට!!). සමහරවිට දෙවියන්ටත් computer games වගේ එව්වා, ඉන්ටනෙට් වගේ එව්වා ඇති. මනුස්ස ලෝකේ දියුණු වෙනවා නම් දිව්‍ය ලෝකේ දියුණු නොවෙන්න හේතුවක් නෑනේ !!.

අපේ ජනකථා වල හැටියට දෙවිවරු මිනිස්සු එක්ක කතා කරලත් තියනවනේ. ඒ කියන්නේ දෙවියන්ට සිංහල කතා කරන්නත් පුළුවන්. සමහරවිට ඒ උතුමන්ලට සිංහල කියවන්නත් පුළුවන් ඇති. කලින් කිව්වා වගේ දෙවියොත් ඉන්ටනෙට් වගේ එකක් පාවිච්චි කරනවා නම් සමහර geek දෙවිවරු අපේ ඉන්ටනෙට් එකටත් හොරෙන්ම ඇතුල් වෙනවා ඇති. සමහරවිට ඒගොල්ලෝ බ්ලොගුත් කියවනවා ඇති. සිංහල පුළුවන් දෙවිවරු සිංහල බ්ලොගුත් කියවනවා ඇති. හප්පොච්චියේ, සමහරවිට මගේ මේ පෝස්ට් එක දෙවියොත් දකින්නැති :s . අනේ දෙවි හාමුදුරුවනේ, මට සමාවෙන්න ඕනෑ, මම මේක ලිව්වේ නාලා ඔලුව තෙමිලා (= මොලේ පෙඟිලා) ඉන්න වෙලාවකයි. ගැත්තාට අනුකම්පා කරන සේක්වා :'( .

පසුව ලියමි: මෙම ලිපිය පුරා දෙවිවරු ගැන පමනක් සඳහන් කර තිබීම ගැන ලිපිය කියවන( කියෙව්වොත් ) දේවතාවියන් වහන්සේලා මා සමග උදහස් නොවන සේක්වා!.