Islahi News - ഇസ്ലാഹി ന്യൂസ്

മതരംഗത്ത് പ്രവര്‍ത്തിക്കുന്നവര്‍ ജാഗരൂഗരാകണം - ഇസ്ലാഹി പ്രബോധക സംഗമം

2012-02-06T18:15:00.001+05:30

ജിദ്ദ: കാലഘട്ടത്തിന്റെ സ്‌പന്ദനങ്ങള്‍ ഉള്‍ക്കൊണ്ട്‌ ഉയര്‍ന്ന് പ്രവര്‍ത്തിക്കുവാനും പ്രബോധന വീഥിയില്‍ പ്രവാചക മാതൃക അനുധാവനം ചെയ്യാനും പണ്ഡിതന്മാരും പ്രബോധകന്മാരും മാതൃക കാണിക്കണമെന്ന് ജിദ്ദയില്‍ ചേര്‍ന്ന ഇസ്ലാഹി പ്രബോധകരുടെ സംഗമം അഭിപ്രായപ്പെട്ടു. വിജ്ഞാനവും ഗുണകാംക്ഷയും നല്ല വാക്കും പക്വമായ സമീപനവും ഈ മേഖലയിലെ അനിവാര്യമായ ഘടകങ്ങളാണ്. നിലപാടുകളില്‍ വിയോജിക്കുന്നവരെ ശത്രുക്കളായി ഗണിക്കുന്ന പ്രബോധനശൈലി പ്രോത്സാഹിപ്പിക്കുവാന്‍ കഴിയില്ല. മതരംഗം വികാരത്തേക്കാള്‍ കൂടുതല്‍ വിചാര ബന്ധിതമാകേണ്ടത് അനിവാര്യമാണെന്ന് ഈ രംഗത്തെ പുതു പ്രവണതകള്‍ നമ്മെ ഓര്‍മിപ്പിക്കുന്നുണ്ട്. ആധുനിക സാങ്കേതിക വിദ്യയുടെ സഹായത്തോടെ പ്രചരിപ്പിക്കപ്പെടുന്ന തിന്മകളെ ചെറുക്കുവാനും തെറ്റുദ്ദാരണകള്‍ തിരുത്താനും നന്മയുടെ വക്താക്കള്‍ കൂടുതല്‍ സജീവമായ ഇടപെടലുകള്‍ക്ക് തയ്യാറാവണമെന്നും സംഗമം ആഹ്വാനം ചെയ്തു.

സൌദി ഇന്ത്യന്‍ ഇസ്ലാഹി സെന്റര്‍ നാഷണല്‍ കമ്മറ്റിയാണ് സംഗമം സംഘടിപ്പിച്ചത്. ജിദ്ദ ഇസ്ലാഹി സെന്റര്‍ ഓഡിറ്റോറിയത്തില്‍ നടന്ന സംഗമം പ്രബോധനരംഗത്തെ പുതിയ വെല്ലുവിളികളും പ്രബോധകര്‍ സ്വീകരിക്കേണ്ട സമീപനങ്ങളും ചര്‍ച്ച ചെയ്‌തു. കെ എന് ‍എം സംസ്ഥാന ജനറല്‍ സെക്രട്ടറി സിപി ഉമര്‍ സുല്ലമി, കെ എം ഫൈസി തരിയോട്, എം അഹ്‌മദ് കുട്ടി മദനി എടവണ്ണ എന്നിവര്‍ നേതൃത്വം നല്‍കി. സൌദി ഇന്ത്യന്‍ ഇസ്ലാഹി സെന്റര്‍ നാഷണല്‍ കമ്മറ്റി ചെയര്‍മാന്‍ ഹസ്സൈനാര്‍ എഞ്ചിനീയര്‍ ഉദ്ഘാടനം നിര്‍വ്വഹിച്ചു. സമാപന സെഷനില്‍ സൌദി ഇന്ത്യന്‍ ഇസ്ലാഹി സെന്റര്‍ നാഷണല്‍ കമ്മറ്റി ജനറല്‍ സെക്രട്ടറി കുഞ്ഞഹമ്മദ്‌ കോയ , ജിദ്ദ ഇസ്ലാഹി സെന്റര്‍ പ്രസിഡണ്ട് മൂസക്കോയ പുളിക്കല്‍, ജിദ്ദ സെന്റര്‍ അഡ്വൈസറി ബോര്‍ഡ് ചെയര്‍മാന്‍ മുഹമ്മദലി ചുണ്ടാക്കാടന്‍ എന്നിവര്‍ സംസാരിച്ചു.

ISM കുടുംബസദസ്സ് സംഘടിപ്പിച്ചു

2012-02-06T17:53:00.000+05:30

കൊടുവള്ളി: 'മതം-ധാര്‍മികത-നവോത്ഥാനം' എന്ന സന്ദേശവുമായി ഐ.എസ്.എം നടത്തുന്ന പ്രചാരണത്തിന്റെ ഭാഗമായി ആരാമ്പ്രം, കൊട്ടക്കാവയല്‍ എന്നിവിടങ്ങളില്‍ കുടംബ സദസ്സുകള്‍ സംഘടിപ്പിച്ചു. കെ.എന്‍.എം. ആരാമ്പ്രം ശാഖാ പ്രസിഡന്റ് പി. ഇബ്രാഹിംകുട്ടി അധ്യക്ഷതവഹിച്ചു. ഇ.വി. അബാസ് സുല്ലമി, മമ്മൂട്ടി മുസ്‌ല്യാര്‍ വയനാട് എന്നിവര്‍ പ്രഭാഷണം നടത്തി. ശുക്കൂര്‍ കോണിക്കല്‍, കെ.പി. അബ്ദുസ്സലാം, വി.കെ. ഹസന്‍കോയ, മുസ്തഫ നുസ്‌രി എന്നിവര്‍ പ്രസംഗിച്ചു.

CIER മദ്രസ വിജ്ഞാനോത്സവം; എളേറ്റില്‍ സലഫി മദ്രസ ചാമ്പ്യന്മാര്‍

2012-02-06T17:49:00.000+05:30

കൊടുവള്ളി: കെ.എന്‍.എം. കൊടുവള്ളി വെസ്റ്റ് മണ്ഡലം സി.ഐ.ഇ.ആര്‍. മദ്രസ വിജ്ഞാനോത്സവത്തില്‍ എളേറ്റില്‍ വട്ടോളി സലഫി മദ്രസ 200 പോയന്റ് നേടി ഓവറോള്‍ ചാമ്പ്യന്മാരായി. 179 പോയന്റ് നേടി പുള്ളിക്കോത്ത് സലഫി മദ്രസ രണ്ടും 149 പോയന്റ് നേടി ആരാമ്പ്രം ഹുദാ സെന്റര്‍ മൂന്നും സ്ഥാനങ്ങള്‍ നേടി. എളേറ്റില്‍ ജി.എം.യു.പി. സ്‌കൂളില്‍ നടന്ന വിജ്ഞാനോത്സവം വി.എം. ഉമ്മര്‍ എം.എല്‍.എ. ഉദ്ഘാടനം ചെയ്തു. കെ.എന്‍.എം. മണ്ഡലം പ്രസിഡന്റ് എം.കെ. ഇബ്രാഹിം അധ്യക്ഷത വഹിച്ചു.

വിജയികള്‍ക്ക് അഡ്വ. പി.ടി.എ. റഹീം എം.എല്‍.എ. ട്രോഫികള്‍ വിതരണം ചെയ്തു. വാര്‍ഡ് അംഗം കെ. ആലി, സുഹറ ആഷിഖ്, പി.പി. അബ്ദുറഹിമാന്‍, കെ.കെ. അബ്ദുറഹിമാന്‍കുട്ടി, എം. അബ്ദുല്‍ സത്താര്‍, ശുക്കൂര്‍ കോണിക്കല്‍, എം. അബ്ദുല്‍ റഷീദ് കെ.കെ. ഖമറുദ്ദീന്‍, കെ. മൂസ, ടി. മുഹമ്മദാലി എന്നിവര്‍ പ്രസംഗിച്ചു.

പ്രവാചകനെ സ്‌നേഹിക്കേണ്ടത് പ്രവാചക മാതൃക ഉള്‍കൊണ്ടു കൊണ്ട് - അഹ്‌മദ് കുട്ടി മദനി

2012-02-06T17:03:00.000+05:30

ജിദ്ദ: പ്രവാചക കേശങ്ങളോ മറ്റു ഭൌതിക അവശിഷ്‌ടങ്ങളോ പ്രതിഷ്‌ടിക്കലല്ല, വിശ്വാസ വിശുദ്ധിയുടെയും ആത്‌മ സമര്‍പ്പണത്തിന്റെയും പ്രവാചക മാതൃകയാണ് പൊതുജനങ്ങള്‍ക്ക് മുമ്പില്‍ ഇസ്‌ലാമിന് സമര്‍പ്പിക്കുവാനുള്ളതെന്ന് പണ്ഡിതനും ഇസ്‌ലാഹിസെന്റര്‍ ജിദ്ദ പ്രബോധകനുമായ അഹ്‌മദ് കുട്ടി മദനി പ്രസ്‌താവിച്ചു. ഇസ്‌ലാഹി സെന്റര്‍ ജിദ്ദ ഓഡിറ്റോറിയത്തില്‍ ‘പ്രവാചക സ്‌നേഹത്തിന്റെ അര്‍ത്ഥ തലങ്ങള്‍’ എന്ന വിഷയത്തില്‍ പ്രഭാഷണം നടത്തുകയായിരുന്നു അദ്ദേഹം. പ്രവാചക ജീവിതത്തില്‍ നിന്നും മാതൃക ഉള്‍ക്കൊണ്ട് ജീവിതം ക്രമീകരികരിക്കുന്നതാണ് പ്രവാചക സ്‌നേഹത്തിന്റെ അടിസ്ഥാനം. പ്രവാചകന്‍ ജനിച്ച് ജീവിച്ച് മരണം വരിച്ച നാട്ടിലോ പ്രവാചക ചരിത്രത്തിലോ മാതൃകയില്ലാത്ത രീതിയില്‍ പ്രവാചക സ്‌നേഹം പ്രകടിപ്പിക്കുന്നത് ഇസ്‌ലാമിക വിരുദ്ധമാണ്. പ്രവാചക കേശത്തിന്റെ പേരില്‍ ആത്മീയചൂഷണങ്ങള്‍ നടത്തുകയും നിരത്തുകളിലും പൊതുമാധ്യമങ്ങളിലും വിവാദങ്ങള്‍ സൃഷ്‌ടിക്കുകയും ചെയ്യുന്നവര്‍ യഥാര്‍ത്ഥത്തില്‍ പ്രവാചകനെ ഇകഴ്ത്തുകയാണ് ചെയ്യുന്നത്. പ്രവാചക കേശം സൂക്ഷിക്കുവാന്‍ കോടികള്‍ ചിലവഴിച്ച് പള്ളി പണിയിക്കുന്നവര്‍ ലാളിത്യത്തിന്റെയും കഷ്‌ടപ്പാടുകളുടെയും പ്രവാചക ചരിത്രത്തിലേക്ക് മടങ്ങണമെന്നും അദ്ദേഹം ഓര്‍മ്മിപ്പിച്ചു. അബ്‌ദുല്‍ കരീം സുല്ലമി അദ്ധ്യക്ഷനായിരുന്നു.

ഫോക്കസ് ജിദ്ദ മാധ്യമ ശിൽപശാല 10ന്

2012-02-06T11:19:00.000+05:30

ജിദ്ദ : ഫോക്കസ് ജിദ്ദ മീഡിയ വിഭാഗം സംഘടിപ്പിക്കുന്ന ‘മാധ്യമ ശില്‍പശാല‘ ഫെബ്രുവരി 10 വെള്ളിയാഴ്‌ച രാവിലെ 9 മുതല്‍ ശറഫിയ്യയിലെ ഇസ്ലാഹി സെന്റര്‍ ഓഡിറ്റോറിയത്തില്‍ നടക്കും. മാധ്യമ രംഗത്തെ പുതിയ പ്രവണതകളെ അടുത്തറിയാനും മുതിര്‍ന്ന പത്രപ്രവര്‍ത്തകരുമായി ആശയ വിനിമയം നടത്താനും എഴുത്തിന്റെയും റിപ്പോര്‍ട്ടിങ്ങിന്റെയും പ്രാഥമിക പാഠങ്ങള്‍ മനസ്സിലാക്കുവാനും സാധാരണക്കാര്‍ക്ക് അവസരമൊരുക്കുകയാണ് ഇത്തരമൊരു ശില്പശാല കൊണ്ട് ഉദ്ദേശിക്കുന്നതെന്ന് ഫോക്കസ് ഭാരവാഹികള്‍ പറഞ്ഞു.

മലയാള ഭാഷാ പ്രയോഗങ്ങളെയും സാധാരണ കണ്ടുവരാറുള്ള തെറ്റുകളെയും മനസ്സിലാക്കാന്‍ അവസരമൊരുക്കുന്ന ഒരു സെഷനും ശില്പശാലയില്‍ ഉള്‍പെടുത്തിയിട്ടുണ്ട്. വാര്‍ത്ത, അക്ഷരാശ്രമം, റിപ്പോര്‍ടിംഗ് എന്നീ മൂന്നു സെഷനുകള്‍ക്ക് യഥാക്രമം കാസിം ഇരിക്കൂര്‍ (മാധ്യമം), ഉസ്‌മാന്‍ ഇരിങ്ങാട്ടിരി (ബ്ലോഗര്‍), സി ഒ ടി അസീസ് (മലയാളം ന്യൂസ്) എന്നിവര്‍ നേതൃത്വം നല്‍കും. ക്യാമ്പിന്റെ സമാപനത്തോടനുബന്ധിച്ചു നടത്തുന്ന മത്സരങ്ങളില്‍ വിജയികള്‍ ആകുന്നവര്‍ക്ക് സമ്മാനങ്ങള്‍ വിതരണം ചെയ്യുമെന്നും ഫോക്കസ് ഭാരവാഹികള്‍ അറിയിച്ചു. പരിപാടിയില്‍ പങ്കെടുക്കുവാന്‍ താല്‍പര്യമുള്ളവര്‍ 0506078928, 0535651238 എന്നീ മൊബൈല്‍ നമ്പറിലോ chengara@focusjeddah.comഎന്ന ഇമെയില്‍ അഡ്രസിലോ പേര്‍ രജിസ്റ്റര്‍ ചെയ്യേണ്ടതാണ്

ഖുര്‍ആന്‍ വിജ്ഞാന പരീക്ഷ : നജ്റാന്‍ പ്രാദേശിക സമ്മാനങ്ങള്‍ വിതരണം ചെയ്തു

2012-02-04T09:54:00.001+05:30

നജ്റാന്‍: : സൗദി ഇന്ത്യന്‍ഇസ്ലാഹി സെന്‍റര്‍ സംഘടിപ്പിച്ച ആറാമത് സൗദി മലയാളി ഖുര്‍ആന്‍ വിജ്ഞാന പരീക്ഷയുടെ നജ്റാന്‍ പ്രാദേശിക സമ്മാനങ്ങള്‍ വിതരണം ചെയ്തു. സമ്മാന ദാനവും ഏഴാമത് പരീക്ഷയുടെ രജിസ്ട്രേഷന്‍ ഉദ്ഘാടനവും ഡോ: നസീര്‍ നിര്‍വഹിച്ചു. അഹമ്മദ് മധുര ആദ്യ കോപ്പി ഏറ്റുവാങ്ങി. അബ്ദുലതീഫ് കാടഞ്ചേരി അധ്യക്ഷത വഹിച്ചു. അബ്രഹാം (ഒ ഐ സി സി), മുസ്തഫ (പ്രതിഭ), നിസാര്‍ ഫൈസി (ഇസ്ലാമിക് സെന്‍റര്‍), അഷ്‌റഫ്‌ കണ്ണൂര്‍ (കെ എം സി സി) എന്നിവര്‍ ആശംസകള്‍ നേര്‍ന്നു. സി പി ശഫീഖ് സ്വാഗതവും ഹനീഫ രാമപുരം നന്ദിയും പറഞ്ഞു. സൗദി മതകാര്യ മന്ത്രാലയത്തിനു കീഴില്‍ പ്രവര്‍ത്തിക്കുന്ന "സൊസൈറ്റി ഓഫ് മേമ്മോരൈസിംഗ് ദ ഹോളി ഖുര്‍ആന്‍" റിയാദ് ഘടകത്തിന്‍റെ മേല്‍നോട്ടത്തിലാണ് ഏഴാമത് സൗദി മലയാളി ഖുര്‍ആന്‍ വിജ്ഞാന പരീക്ഷ സംഘടിപ്പിക്കുന്നത്.

മര്‍ഹും മുഹമ്മദ്‌ അമാനി മൗലവി എഴുതിയ വിശുദ്ധഖുര്‍ആന്‍ വിവരണ സമാഹാരത്തിലെ സൂറത്ത് അന്‍ആം പരിഭാഷയെ അവലംബമാക്കിയാണ് ചോദ്യങ്ങള്‍. മാര്‍ച്ച്‌ മുപ്പതു വരെ ഉത്തര കടലാസുകള്‍ സ്വീകരിക്കുന്നതാണ്. കോപ്പികള്‍ ലഭ്യമാക്കാന്‍ ഇസ്ലാഹി സെന്‍റര്‍ ഭാരവാഹികളുമായി ബന്ധപ്പെടുക.

അഭിനവ സാമിരിമാരെ തിരിച്ചറിയണം : കരുംബിലാക്കല്‍

2012-02-04T09:40:00.000+05:30

കൂറ്റനാട് : ഇസ്ലാഹി ആദര്‍ശ വഴിത്താരയില്‍ വഴിമുടക്കികളായി യഥാര്‍ത്ഥ ഇസ്ലാഹി ആദര്‍ശത്തില്‍ നിന്ന് മുജാഹിദുകളെ വഴിപിഴപ്പിക്കുന്ന അഭിനവ സാമിരിമാരെ തിരിച്ചറിയാന്‍ മുജാഹിദ് പ്രവര്‍ത്തകര്‍ ശ്രമിക്കണമെന്നും, ആദര്‍ശത്തിന്റെ പാതയില്‍ ഒന്നിക്കുവാനും,നവ യാഥാസ്ഥികരുടെ ഗൂടതന്ത്രങ്ങളെ കരുതിയിരിക്കണമെന്നും അബ്ദുല്‍ ലത്തീഫ് കരുമ്പിലാക്കല്‍ പറഞ്ഞു. ISM നവോഥാന സമ്മേളനം കൂറ്റനാട്ടില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.മജീദ്‌ മാസ്റ്റര്‍ അധ്യക്ഷത വഹിച്ചു. ഈസ മദനി, നാസര്‍ കൂറ്റനാട്, മുഹമ്മദ്‌ ഫാറൂഖി എന്നിവര്‍ സംസാരിച്ചു.‍

MGM എറണാകുളം ജില്ലാ സമ്മേളനം 5നു ഖമറുന്നിസ അന്‍വര്‍ ഉദ്ഘാടനം ചെയ്യും

2012-02-03T11:54:00.000+05:30

ആലുവ : സാമൂഹ്യനവോത്ഥാനത്തിന് സ്ത്രീ മുന്നേറ്റം എന്ന സന്ദേശവുമായി 05-02-2012 ഞായറാഴ്ച രാവിലെ 9 മുതല്‍ ആലുവ തോട്ടുംമുഖം എന്‍.കെ.എം. ഓഡിറ്റോറിയത്തില്‍ നടക്കുന്ന മുജാഹിദ് ജില്ലാ വനിതാ സമ്മേളനം സംസ്ഥാന വനിതാ വികസന കോര്‍പറേഷന്‍ ചെയര്‍പേഴ്‌സണ്‍ ശ്രീമതി. ഖമറുന്നിസ അന്‍വര്‍ ഉദ്ഘാടനം ചെയ്യും. കീഴ്മാട് ഗ്രാമപഞ്ചായത്ത് പ്രസിഡന്റ് ശ്രീമതി. ലൈസ സെബാസ്റ്റ്യന്‍ മുഖ്യാതിഥിയായിരിക്കും. ഷഹാദത്ത് സുല്ലമിയ്യ അദ്ധ്യക്ഷത വഹിക്കുന്ന ഉദ്ഘാടന സമ്മേളനത്തില്‍ കെ.എന്‍.എം. ജില്ലാ സെക്രട്ടറി അബ്ദുല്‍ ഗനി സ്വലാഹി, ഐ.എസ്.എം. ജില്ലാ പ്രസിഡന്റ് എം.കെ. ഷാക്കിര്‍, പാറക്കടവ് ബ്ലോക്ക് പഞ്ചായത്ത് മെമ്പര്‍ നസീമ സലാം, കൊച്ചി കോര്‍പറേഷന്‍ കൗണ്‍സിലര്‍ മുംതാസ് ടീച്ചര്‍, ശ്രീമൂലനഗരം പഞ്ചായത്ത് മെമ്പര്‍ സീനത്ത് താഹിര്‍ എന്നിവര്‍ ആശംസകള്‍ നേരും. നൗഫിയ ഖാലിദ് സ്വാഗതവും ഐഷ അസ്‌ലം നന്ദിയും പറയും.

തുടര്‍ന്ന് നടക്കുന്ന പഠനക്ലാസ്സില്‍ സി.എം. മൗലവി, 'ഉമ്മയും ഉപ്പയും സ്‌നേഹസാഗരം മക്കള്‍ അല്ലാഹുവിന്റെ സമ്മാനം' എന്ന വിഷയവും ജമീല ടീച്ചര്‍ എടവണ്ണ 'വിശ്വാസ ജീര്‍ണതകള്‍ക്കെതിരെ സ്ത്രീശക്തി' എന്ന വിഷയവും ശമീമ ഇസ്‌ലാഹിയ്യ 'സാമൂഹ്യ നവോത്ഥാനത്തിന് സ്ത്രീമുന്നേറ്റം' എന്ന വിഷയവും കുഞ്ഞുബീവി ടീച്ചര്‍ രണ്ടത്താ ണി 'വന്നത്‌പോലെ തിരിച്ചുപോകാനുകമോ?' എന്ന വിഷയവും അവതരിപ്പിക്കും.

സമാപന സമ്മേളനം കെ.എന്‍.എം. സംസ്ഥാന ട്രഷറര്‍ എം. സലാഹുദ്ദീന്‍ മദനി ഉദ്ഘാടനം ചെയ്യും. സുബൈദ സുല്ലമിയ്യ അദ്ധ്യക്ഷത വഹിക്കും. കെ.എന്‍.എം. ജില്ലാ പ്രസിഡന്റ് എം.എം. ബഷീര്‍ മദനി, എം.എസ്.എം. ജില്ലാ പ്രസിഡന്റ് എ.എ. അജ്മല്‍ എന്നിവര്‍ ആശംസകളര്‍പ്പിക്കും. സല്‍മ അന്‍വാരിയ്യ മുഖ്യപ്രഭാഷണം നിര്‍വഹിക്കും. കെ.വി. മുഹമ്മദ് മൗലവി കോക്കൂര്‍ സമാപന പ്രസംഗം നടത്തും. ഷീബ ഷമീര്‍ സ്വാഗതവും മുഹ്‌സിന മജീദ് നന്ദിയും പ്രകാശിപ്പിക്കും.

CIER വാര്‍ഷിക സമ്മേളനം നടത്തി

2012-02-01T22:30:00.000+05:30

കൊടുവള്ളി: ഭൗതികതയുടെ അതിപ്രസരത്തിനും വളര്‍ന്നുവരുന്ന അധാര്‍മിക പ്രവണതകള്‍ക്കുമെതിരെ പ്രതിരോധം തീര്‍ക്കാന്‍ കലയും സാഹിത്യവും സഹായകമാകണമെന്ന് വി.എം.ഉമ്മര്‍ എം.എല്‍.എ. അഭിപ്രായപ്പെട്ടു. പുത്തൂരില്‍ സി.ഐ.ഇ.ആര്‍. വാര്‍ഷിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഒ. അബ്ദുല്ലത്തീഫ് മദനി അധ്യക്ഷത വഹിച്ചു. പി. ഹനീഫ്, എം.പി. അബ്ദുല്‍ഖാദര്‍ മദനി, പി. ഇബ്രാഹിം, എം.കെ. നജീബ്, പി. അബൂബക്കര്‍ മദനി എന്നിവര്‍ പ്രസംഗിച്ചു. സെക്രട്ടറി എം.കെ. പോക്കര്‍ സുല്ലമി സ്വാഗതവും കെ.പി. അബ്ദുല്ലത്തീഫ് സ്വലാഹി നന്ദിയും പറഞ്ഞു.

വിദ്യാര്‍ഥി ക്വട്ടേഷന്‍ ഗ്രൂപ്പുകള്‍ സര്‍ക്കാര്‍ ഗൗരവമായി കാണണം - MSM

2012-02-01T11:46:00.000+05:30

കോഴിക്കോട്‌: മാനവരാശിക്ക്‌ നന്മയുടെയും സ്‌നേഹത്തിന്റെയും സന്ദേശം കൈമാറി ധിഷണാപരമായ പ്രവര്‍ത്തനങ്ങളില്‍ ശ്രദ്ധ കേന്ദ്രീകരിക്കേണ്ട വിദ്യാര്‍ഥി സമൂഹം സംഹാരാത്മകമായ പ്രവര്‍ത്തനങ്ങളില്‍ പങ്കാളികളാവുന്നത്‌ നിയമപാലകരും പൊതുസമൂഹവും ഗൗരവമായി കാണണമെന്ന്‌ എം എസ്‌ എം സംസ്ഥാന സെക്രട്ടറിയേറ്റ്‌ അഭിപ്രായപ്പെട്ടു. പത്തനംതിട്ട റാന്നി സെന്റ്‌ തോമസ്‌ കോളെജിലെ വിദ്യാര്‍ഥികള്‍ ഗൂഢാലോചന നടത്തി ആവിഷ്‌കരിച്ച ക്വട്ടേഷന്‍ അക്രമത്തില്‍ സഹായിയായി വര്‍ത്തിച്ച മിത്ര സൂസന്‍ എബ്രഹാം എന്ന വിദ്യാര്‍ഥിനിയുടെ അറസ്റ്റ്‌ ഞെട്ടലോടെയാണ്‌ വിദ്യാര്‍ഥി സമൂഹം ശ്രവിച്ചത്‌. പ്രസിഡന്റ്‌ ഡോ. മുബശ്ശിര്‍ അധ്യക്ഷത വഹിച്ചു. ജാസിര്‍ രണ്ടത്താണി, സൈദ്‌ മുഹമ്മദ്‌, കെ കെ ഖമറുദ്ദീന്‍, ജലീല്‍ മാമാങ്കര, അഡ്വ. മുസ്‌തഫ, ഹാഫിദുര്‍റഹ്‌മാന്‍, സഹീറലി പന്താവൂര്‍, ആഷിദ്‌ഷാ, അഫ്‌സല്‍ മടവൂര്‍, തസ്‌ലീം വടകര, ശഫീക്ക്‌ മമ്പറം, മുഹമ്മദലി പയ്യോളി പ്രസംഗിച്ചു.

സോഷ്യല്‍ നെറ്റ്‌വര്‍ക്കുകളെ നിരോധിക്കാനുള്ള നീക്കം ഉപേക്ഷിക്കണം- MSM

2012-02-01T11:42:00.000+05:30

കോഴിക്കോട്‌: സോഷ്യല്‍ നെറ്റ്‌വര്‍ക്കുകളടക്കമുള്ള 21 പ്രമുഖ വെബ്‌സൈറ്റുകള്‍ക്കെതിരെ കേന്ദ്രസര്‍ക്കാര്‍ ഡല്‍ഹി മെട്രോപൊളിറ്റന്‍ കോടതിയില്‍ നല്‍കിയ റിപ്പോര്‍ട്ട്‌ ഗൗരവതരമാണെന്ന്‌ എം എസ്‌ എം കോഴിക്കോട്‌ സൗത്ത്‌ ജില്ലാ സെക്രട്ടേറിയറ്റ്‌ അഭിപ്രായപ്പെട്ടു. പ്രസിഡണ്ട്‌ ഡോ. ജംഷിദ്‌ ഉസ്‌മാന്‍ അധ്യക്ഷത വഹിച്ചു. ജരീര്‍ സലഫി, ഷാഹിദ്‌ നല്ലളം, മുഹാവിന്‍ മുബാറക്‌, നസീഫ്‌ അത്താണിക്കല്‍, നബീല്‍ ഫാറൂഖി, ജസീല്‍ പൊക്കുന്ന്‌, ബാസില്‍, ഫൈസല്‍ പാലത്ത്‌ പ്രസംഗിച്ചു.

മദ്‌റസകളുടെ സേവനം വിലമതിക്കാനാവാത്തത്‌ - മന്ത്രി ഇബ്‌റാഹീം കുഞ്ഞ്‌

2012-02-01T11:40:00.000+05:30

ആലുവ: മതബോധന, പ്രബോധന രംഗത്ത്‌ മദ്‌റസകള്‍ വഹിക്കുന്ന പങ്ക്‌ വിലമതിക്കാനാവാത്തതാണെന്ന്‌ പൊതുമരാമത്ത്‌ വകുപ്പ്‌ മന്ത്രി വി കെ ഇബ്‌റാഹീം കുഞ്ഞ്‌ അഭിപ്രായപ്പെട്ടു. ചൊവ്വര ചുള്ളിക്കാട്ട്‌ മുസ്‌ലിം ജമാഅത്ത്‌ കീഴിലെ ഹിദായത്തുല്‍ ഇസ്‌ലാം മദ്‌റസയുടെ പുനര്‍നിര്‍മാണ പ്രവര്‍ത്തനങ്ങള്‍ ഉദ്‌ഘാടനം ചെയ്യുകയായിരുന്നു അദ്ദേഹം. രാജ്യത്തെ മുസ്‌ലിംകളെ സമൂഹത്തിന്റെ മുഖ്യധാരയില്‍ എത്തിക്കുന്നതിലും രാഷ്‌ട്ര പുനര്‍നിര്‍മിതിയില്‍ അവരെ പങ്കാളികളാക്കുന്നതിലും മദ്‌റസകള്‍ നിര്‍ണായക പങ്കുവഹിച്ചിട്ടുണ്ട്‌. ഒരു റൊട്ടിയില്‍ എന്തൊക്കെ അടങ്ങിയിട്ടുണ്ടെന്ന്‌ ഒരു ശാസ്‌ത്ര വിദ്യാര്‍ഥിക്ക്‌ കണ്ടെത്താന്‍ ഭൗതികപഠനത്തിലൂടെ സാധിക്കുമ്പോള്‍ റൊട്ടി വിശക്കുന്നവന്‌ നല്‍കിയാല്‍ പുണ്യം ലഭിക്കുമെന്ന ധാര്‍മികപാഠം മതപഠനത്തിലൂടെ ലഭിക്കും. എ പി മുഹമ്മദലി അധ്യക്ഷതവഹിച്ചു. അന്‍വര്‍ സാദത്ത്‌ എം എല്‍ എ, മുന്‍ എം എല്‍ എ എ.എം യൂസുഫ്‌, കെ വി മുഹമ്മദ്‌ മൗലവി, എം കെ ശാക്കിര്‍, ഇ എം ജമാല്‍ പ്രസംഗിച്ചു.

മതസൗഹാര്‍ദ്ദം ശക്തിപ്പെടുത്തുന്നതില്‍ മുജാഹിദ്‌ പ്രസ്ഥാനത്തിന്റെ പങ്ക്‌ നിസ്‌തുലം - എം കെ രാഘവന്‍ എം പി

2012-02-01T11:36:00.001+05:30

നന്മണ്ട: മതസൗഹാര്‍ദ്ദം ശക്തിപ്പെടുത്തുന്നതിലും നവോത്ഥാന പ്രവര്‍ത്തനങ്ങള്‍ക്ക്‌ നേതൃത്വം നല്‍കുന്നതിലും കേരളത്തിലെ മുജാഹിദ്‌ പ്രസ്ഥാനം വഹിച്ച പങ്ക്‌ നിസ്‌തുലമാണെന്ന്‌ എം കെ രാഘവന്‍ എം പി പറഞ്ഞു. അല്‍ഫുര്‍ഖാന്‍ എജുക്കേഷണല്‍ & ചാരിറ്റബ്‌ള്‍ ട്രസ്റ്റിന്റെ കീഴില്‍ നന്മണ്ടയില്‍ ആരംഭിക്കുന്ന നവോത്ഥാന നിലയം ഉദ്‌ഘാടനം ചെയ്‌തു സംസാരിക്കുകയായിരുന്നു അദ്ദേഹം. അന്ധവിശ്വാസങ്ങള്‍ക്കും അനാചാരങ്ങള്‍ക്കുമെതിരെയുള്ള മുജാഹിദ്‌ പ്രസ്ഥാനത്തിന്റെ പ്രവര്‍ത്തനങ്ങള്‍ മാതൃകാപരമാണെന്ന്‌ അദ്ദേഹം അഭിപ്രായപ്പെട്ടു. മാനുഷിക ബന്ധങ്ങള്‍ ദുര്‍ബലമാകുന്ന പുതിയ സാഹചര്യത്തില്‍ പരസ്‌പരബന്ധം ശക്തിപ്പെടുത്താന്‍ ഉതകുന്ന പ്രവര്‍ത്തന പദ്ധതികള്‍ ആവിഷ്‌കരിക്കാന്‍ സാംസ്‌കാരിക സംഘടനകള്‍ മുന്നിട്ടിറങ്ങണമെന്നും അദ്ദേഹം ആഹ്വാനം ചെയ്‌തു. അബൂബക്കര്‍ നന്മണ്ട അധ്യക്ഷത വഹിച്ചു.

എജ്യു കെയര്‍ ഉദ്‌ഘാടനം എ കെ ശശീന്ദ്രന്‍ എം എല്‍ എയും ദഅ്‌വ സെന്റര്‍ ഉദ്‌ഘാടനം ഡോ. ഹുസൈന്‍ മടവൂരും മെഡികെയര്‍ ഉദ്‌ഘാടനം കുണ്ടൂര്‍ ബിജുവും ലൈബ്രറി ഉദ്‌ഘാടനം അബ്‌ദുല്ല നന്മണ്ടയും നിര്‍വഹിച്ചു. കെ എന്‍ എം ജില്ലാ സെക്രട്ടറി സി മരക്കാരുട്ടി ആശംസയര്‍പ്പിച്ചു. കെ എന്‍ എം സംസ്ഥാന ട്രഷറര്‍ എം സ്വലാഹുദ്ദീന്‍ മദനി പ്രഭാഷണം നടത്തി. പി ഫൈസല്‍ സ്വാഗതവും എം വി പി അബൂബക്കര്‍ നന്ദിയും പറഞ്ഞു. വനിതാ സമ്മേളനം ഗ്രാമപഞ്ചായത്ത്‌ പ്രസിഡണ്ട്‌ ഒ പി ശോഭന ഉദ്‌ഘാടനം ചെയ്‌തു. ടി റൈഹാന ടീച്ചര്‍ അധ്യക്ഷത വഹിച്ചു. എം ജി എം സംസ്ഥാന പ്രസിഡണ്ട്‌ ശമീമ ഇസ്വ്‌ലാഹിയ, മറിയക്കുട്ടി സുല്ലമിയ്യ, ജമീല ടീച്ചര്‍ എടവണ്ണ ക്ലാസ്സെടുത്തു. പി സി നൂര്‍ജഹാന്‍ സ്വാഗതവും എം പി ആരിഫ നന്ദിയും പറഞ്ഞു.

ബാലസംഗമം ഫൈസല്‍ എളേറ്റില്‍ ഉദ്‌ഘാടനം ചെയ്‌തു. ജരീര്‍ പാലത്ത്‌, സാദിഖലി കക്കാട്‌, അബ്‌ദുല്‍ ജബ്ബാര്‍ വട്ടോളി, റമീസ്‌ മാലിക്ക്‌, കെ ഫായിസ്‌ എന്നിവര്‍ കുട്ടികളുമായി സംവദിച്ചു. പി കെ ജാസിര്‍ അധ്യക്ഷത വഹിച്ചു. നവോത്ഥാന സമ്മേളനം ഐ എസ്‌ എം സംസ്ഥാന പ്രസിഡണ്ട്‌ മൂജീബുറഹ്‌മാന്‍ കിനാലൂര്‍ ഉദ്‌ഘാടനം ചെയ്‌തു. മുര്‍ശിദ്‌ പാലത്ത്‌, ജഅ്‌ഫര്‍ വാണിമേല്‍, പി മൂസ സ്വലാഹി പ്രഭാഷണം നടത്തി. എം ടി അനീസ്‌ അദ്ധ്യക്ഷത വഹിച്ചു. കെ കെ ശറഫുദ്ദീന്‍ സ്വാഗതവും ഇ കെ സൈനുദ്ദീന്‍ നന്ദിയും പറഞ്ഞു.

മുടിപ്പള്ളി ഉണ്ടാക്കുന്നവര്‍ ഇസ്‌ലാം വിരുദ്ധരുടെ ചട്ടുകം: സി പി ഉമര്‍ സുല്ലമി

2012-01-30T17:40:00.000+05:30

കോഴിക്കോട്: പ്രവാചകന്റെ മുടിയുടെ പേരില്‍ വിശ്വാസികളെ ചൂഷണം ചെയ്യാന്‍ കോടികള്‍ മുടക്കി പള്ളി നിര്‍മിക്കുന്നവര്‍ ഇസ്‌ലാമിനെയും മുസ്‌ലിംകളെയും തകര്‍ക്കാന്‍ ഗൂഢതന്ത്രം മെനയുന്നവരുടെ ചട്ടുകമായി വര്‍ത്തിക്കുകയാണെന്ന് കെ എന്‍ എം സംസ്ഥാന ജനറല്‍സെക്രട്ടറി സി പി ഉമര്‍സുല്ലമി പറഞ്ഞു. അനിസ്‌ലാമിക ആചാരങ്ങളും വിശ്വാസങ്ങളും കടത്തിക്കൂട്ടി ആധുനിക ലോകത്ത് ഇസ്‌ലാമിനെ വികൃതമാക്കാന്‍ നേതൃത്വം നല്‍കിയ തുര്‍ക്കിയിലെ പുരോഹിതന്‍മാരുടെ അനന്തിരവന്‍മാര്‍ തന്നെയാണ് കാന്തപുരത്തിന്റെ മുടിപ്പള്ളിയുടെ ശിലാസ്ഥാപന ചടങ്ങുകള്‍ക്ക് നേതൃത്വം നല്‍കുന്നത് എന്നത് ദുരൂഹത വര്‍ധിപ്പിക്കുന്നതായും അദ്ദേഹം പ്രസ്താവനയില്‍ വ്യക്തമാക്കി.

ഏതെങ്കിലും അനാഥ അവശിഷ്ടങ്ങളെടുത്ത് പ്രവാചകന്റെ പേരില്‍ തിരുശേഷിപ്പുളവാക്കി മാറ്റി പുണ്യം വിറ്റ് കാശാക്കുന്ന ആത്മീയ തട്ടിപ്പിന് പള്ളിയുടെ മാതൃക ഉണ്ടാക്കുന്നത് കടുത്ത അപരാധമാണ്. അല്ലാഹുവിനെ ആരാധിക്കാനുള്ള ഭവനങ്ങളാണ് പള്ളികളെന്നിരിക്കെ തിരുശേഷിപ്പുകളുടെ പ്രതിഷ്ഠകളില്‍ പള്ളി നിര്‍മിക്കുന്നത് ഇസ്‌ലാമിനും മുസ്‌ലിംകള്‍ക്കും അംഗീകരിക്കുക സാധ്യമല്ല. പ്രവാചക കാലഘട്ടത്തിലോ അതിനടുത്ത നൂറ്റാണ്ടുകളിലേതിലെങ്കിലും ഒന്നിലേറെ ജീവിച്ചിരുന്ന പ്രവാചകന്റെ അനുചരന്‍മാര്‍ ആരും തന്നെ പ്രവാചകന്റെ അവശിഷ്ടങ്ങളൊന്നും സൂക്ഷിച്ചിട്ടില്ലെന്നിരിക്കെ ഏതെങ്കിലും അനാഥ മുടിയെടുത്ത് തിരുകേശമെന്ന് പറഞ്ഞ് ആത്മീയവാണിഭത്തിന് ഇറങ്ങിത്തിരിച്ചവര്‍ക്കെതിരെ വിശ്വാസികള്‍ ഒന്നടങ്കം ഐക്യപ്പെടണം. മുടിപ്പള്ളി ഉണ്ടാക്കി മുസ്‌ലിം സമുദായത്തെ ചൂഷണം ചെയ്യുന്നവര്‍ എത്ര വമ്പന്‍മാരായാലും സമുദായ നേതൃത്വവും പണ്ഡിതന്‍മാരും അതിനെ ശക്തമായി ചെറുക്കുക തന്നെ വേണമെന്ന് സി പി ഉമര്‍സുല്ലമി പ്രസ്താവനയില്‍ ആവശ്യപ്പെട്ടു.

അന്ധവിശ്വാസങ്ങള്‍ വ്യാപകമാവുന്നതിനെ ചെറുക്കണം: ഡോ. ഹുസൈന്‍ മടവൂര്‍

2012-01-30T17:37:00.000+05:30

ബേപ്പൂര്‍: സമൂഹത്തില്‍ പുതുതായി കടന്നുവരുന്ന അന്ധവിശ്വാസങ്ങളെ കരുതിയിരിക്കണമെന്ന് ഇന്ത്യന്‍ ഇസ്‌ലാഹി മൂവ്‌മെന്റ് ദേശീയ ജനറല്‍ സെക്രട്ടറി ഡോ. ഹുസൈന്‍ മടവൂര്‍ പറഞ്ഞു. ഐ എസ് എം ബേപ്പൂര്‍ മണ്ഡലം നവോത്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വിശ്വാസ ചൂഷണങ്ങള്‍ക്കെതിരെ സമൂഹം ഒറ്റക്കെട്ടായി അണിനിരക്കേണ്ടത് അനിവാര്യമാണ്. ഖുര്‍ആനും സുന്നത്തും അനുസരിച്ച് ജീവിക്കുന്നതിലൂടെ മാത്രമേ സമാധാനം ലഭിക്കുകയുള്ളു എന്നും അദ്ദേഹം കൂട്ടിച്ചേര്‍ത്തു. കെ എന്‍ എം മണ്ഡലം പ്രസിഡന്റ് പി ഹംസ മൗലവി അധ്യക്ഷത വഹിച്ചു. കെ എന്‍ എം സംസ്ഥാന സെക്രട്ടറി കെ പി സകരിയ്യ, ജഅ്ഫര്‍ വാണിമേല്‍, ഷഫീഖ്, അസ്‌ലം മൗലവി, സി മരക്കാരുട്ടി, ഫൈസല്‍ നന്മണ്ട, ഷനൂബ് ഒളവണ്ണ, അബ്ദുസ്സലാം നല്ലളം എന്നിവര്‍ പ്രസംഗിച്ചു.

പ്രതിനിധി സമ്മേളനം ഐ എസ് എം സംസ്ഥാന പ്രസിഡന്റ് മുജീബുര്‍റഹ്മാന്‍ കിനാലൂര്‍ ഉദ്ഘാടനം ചെയ്തു. അബ്ദുല്‍ അസീസ് അരീക്കാട് അധ്യക്ഷത വഹിച്ചു. ലുഖ്മാന്‍ അരീക്കാട്, അലി മദനി മൊറയൂര്‍ ക്ലാസെടുത്തു. വനിതാസമ്മേളനം എം ജി എം സംസ്ഥാന ജനറല്‍ സെക്രട്ടറി ശമീമ ഇസ്‌ലാഹിയ ഉദ്ഘാടനം ചെയ്തു. നസീമ ഒളവണ്ണ അധ്യക്ഷത വഹിച്ചു. നുബിത കല്ലായ്, സഹീറ അരക്കിണര്‍, ബുഹറ പെരുമണ്ണ, സുലീന കൊളത്തറ, ബുഷ്‌റ നല്ലളം പ്രസംഗിച്ചു.

വിജയ മന്ത്രങ്ങളുമായി ഫോകസ് ജിദ്ദയുടെ 'ഗസ്റ്റ് ഓഫ് ദി മന്‍തില്‍' അബ്‌ദുല്‍ നാസര്‍ ഇത്താക്ക

2012-01-28T20:41:00.000+05:30

ജിദ്ദ: പ്രവാസി വരുമാനത്തിന്റെ സിംഹ ഭാഗവും ചിലവഴിക്കപ്പെടുക വഴി രാജ്യത്തെ ഏറ്റവും വലിയ ഉപഭോക്തൃ സംസ്ഥാനമായി മാറിയ കേരള വിപണിയെ ഫലപ്രദമായി ഉപയോഗപ്പെടുത്തുവാന്‍ പ്രവാസി കൂട്ടായ്‌മകള്‍ക്ക് സാധിക്കണമെന്ന് പ്രമുഖ വ്യവസായിയും ഇതാക മെന്‍സ് വെയര്‍ എംഡിയുമായ വി പി അബ്‌ദുല്‍ നാസര്‍ അഭിപ്രായപ്പെട്ടു. വ്യത്യസ്‌ത മേഖലകളില്‍ പ്രാഗല്‍ഭ്യം തെളിയിച്ചവരുമായി സംവദിക്കുവാന്‍ യുവാക്കള്‍ക്ക് അവസരമൊരുക്കുന്ന ഫോക്കസ് ജിദ്ദയുടെ ശ്രദ്ധേയമായ ‘ഗസ്‌റ്റ് ഓഫ് ദ മന്‍ത് ’ പരിപാടിയില്‍ അതിഥിയായി സംസാരിക്കുകയായിരുന്നു അദ്ദേഹം. പഠനത്തോട് സമാന്തരമായി വിവിധ വ്യവസായ ഗ്രൂപ്പുകളോടൊപ്പം ചേര്‍ന്ന് പ്രവര്‍ത്തിക്കുക വഴി ലഭിച്ച പരിചയവും ബന്ധങ്ങളും ഉപയോഗപ്പെടുത്തി യുവപ്രായത്തില്‍ തന്നെ വ്യാവസായിക രംഗത്ത് തന്റേതായ ഒരു മേഖല വളര്‍ത്തിയെടുക്കുവാന്‍ താന്‍ പിന്നിട്ട പാതകളിലെ അനുഭവങ്ങള്‍ അദ്ദേഹം പങ്കുവെച്ചു.

ആസൂത്രണങ്ങളിലെ പിഴവുകളും, അമിതമായ ലാഭേഛയും, ഇടപാടുകളിലെ പാളിച്ചകളുമാണ് മലയാളികളുടെ പരാജയ കാരണങ്ങളെന്ന് അദ്ദേഹം നിരീക്ഷിച്ചു. വ്യക്‌തി കേന്ദ്രീകൃതമായ വ്യവസായങ്ങളെക്കാള്‍ കൂട്ടായ സംരംഭങ്ങള്‍ക്കേ പുതിയ കാലഘട്ടത്തില്‍ അതിജയിക്കാനാവൂ. ലാഭമായി ലഭിക്കുന്ന പണമെല്ലാം വീണ്ടും മുതല്‍ മുടക്കുന്നവനല്ല മറിച്ച് ലാഭത്തിന്റെ ഒരു ഭാഗം സാമൂഹികപ്രവര്‍ത്തനങ്ങള്‍ക്ക് കൂടി ഉപയോഗപ്പെടുത്തുന്നവനാണ് ഒരു നല്ല വ്യവസായി എന്നും, കൊണ്ടോട്ടി സെന്റര്‍, കൊണ്ടോട്ടി ഇസ്‌ലാമിക് ബാങ്ക്, കെഎംസിസി കൊണ്ടോട്ടി ഏരിയ തുടങ്ങിയ സംഘടനകള്‍ വഴി സാമൂഹ്യപ്രവര്‍ത്തന മേഖലയില്‍ പ്രവര്‍ത്തന നിരതനായ അദ്ദേഹം ശ്രോദ്ധാക്കളുടെ ചോദ്യങ്ങള്‍ക്ക് മറുപടിയായി പറഞ്ഞു.

മലപ്പുറം ജില്ലയിലെ കൊണ്ടോട്ടിയിലെ പ്രാഥമിക പഠനവും ഇഎംഇഎ കോളേജിലെ ഉപരി പഠനവും പൂര്‍ത്തിയാക്കിയ ശേഷം മദ്രാസ് യൂണിവേഴ്‌സിറ്റിയില്‍ നിന്ന് ബിസിനസ് അഡ്‌മിനിസ്ട്രേഷനില്‍ മാസ്‌റ്റര്‍ ഡിഗ്രി എടുത്തു. വിവിധ വ്യവസായിക ഗ്രൂപ്പുകളോടൊപ്പം പ്രവര്‍ത്തിച്ച ശേഷം 2002 ല്‍ കോഴിക്കോട് കേന്ദ്രമാക്കി വസ്‌ത്ര വിപണന മേഖലയില്‍ ‘ഇതാക‘ എന്ന തന്റേതായ ബ്രാന്റ് വിപണിയിലിറക്കി. കേരളത്തിലെയും ബാംഗ്ലൂരിലെയും വിപണന രംഗത്ത് സ്ഥിരപ്രതിഷ്‌ടി നേടിയ ‘ഇതാക‘ 2005 ല്‍ തന്നെ ഗള്‍ഫ് രാജ്യങ്ങളിലേക്ക് കയറ്റുമതി ആരംഭിച്ചു. ഇപ്പോള്‍ ജിദ്ദയിലെ ശറഫിയ്യയിലും ബലദിലുമുള്ള ഇതാക ഷോറൂമുകള്‍ക്ക് പുറമെ യോക്‌സ്, മെലോ മെന്‍സ് വെയര്‍ എന്നീ ഷോറൂമുകള്‍ ആരംഭിച്ച അദ്ദേഹം താമസിയാതെ ശറഫിയ്യയിലെ ‘ഫാഷന്‍ വേള്‍ഡ് ഫാമിലി സെന്റര്‍’ ഉടമയായി. വസ്‌ത്ര വിപണന മേഖലക്ക് പുറമെ കോഴിക്കോട് കേന്ദ്രമാക്കി നാട്ടില്‍ നിന്നും ഗള്‍ഫിലേക്ക് പച്ചക്കറി, പഴ വര്‍ഗ്ഗങ്ങളുടെ കയറ്റുമതി നടന്ന് വരുന്നു. ഫാഷന്‍ വേള്‍ഡിന്റെ അടുത്ത ഷോറൂം ഉടനെ തന്നെ ഖത്തറില്‍ പ്രവര്‍ത്തനമാരംഭിക്കുന്നതോടൊപ്പം 2013 ഓടെ സൌദിയിലും പുറത്തുമായി അഞ്ച് ഫാമിലി ഷോപ്പിങ് സെന്ററുകള്‍ ആരംഭിക്കുവാനുള്ള തയ്യാറെടുപ്പിലാണ്. ഇലക്‌ട്രോണിക്‌സ് മേഖലയില്‍ തന്റേതായ ഒരു ബ്രാന്റ് ഇന്ത്യയില്‍ സ്ഥാപിക്കുകയാണ് അദ്ദേഹത്തിന്റെ അടുത്ത ലക്‌ഷ്യം.

ശറഫിയ്യയിലെ ഇസ്ലാഹി സെന്റര്‍ ജിദ്ദ ഓഡിറ്റോറിയത്തില്‍ നടന്ന പരിപാടിയില്‍ ഫോക്കസ് ചീഫ് ഓപ്പറേഷന്‍സ് ഓഫീസര്‍ ഷകീല്‍ ബാബു അദ്ധ്യക്ഷനായിരുന്നു. ഉപദേശക സമിതി അംഗം സലാഹ് കാരാടന്‍ അതിഥിക്ക് ഉപഹാരം സമര്‍പ്പിച്ചു. അന്‍വര്‍ സാദത്ത് സ്വാഗതവും ജംഷീദ് കുനിയില്‍ നന്ദിയും പറഞ്ഞു. ഫോക്കസ് ജിദ്ദയും അല്‍അബീര്‍ മെഡിക്കല്‍ ഗ്രൂപ്പും സംയുക്‌തമായി സംഘടിപ്പിച്ച് വരുന്ന ‘സൌജന്യ കിഡ്‌നി പരിശോധന‘യുടെ നാലാമത്തെ ക്യാമ്പ് വരുന്ന വെള്ളിയാഴ്‌ച രാവിലെ ഒമ്പത് മുതല്‍ ശറഫിയ അല്‍ അബീര്‍ മെഡിക്കല്‍ സെന്ററില്‍ വെച്ച് നടക്കുമെന്ന്‍ ഭാരവാഹികള്‍ അറിയിച്ചു.

യുവത സില്‍വര്‍ ജൂബിലി പരിപാടികള്‍ക്ക് ഇന്ന് വൈകിട്ട് തുടക്കം

2012-01-28T12:51:00.000+05:30

കോഴിക്കോട്: ഐ എസ് എമ്മിന്റെ പ്രസിദ്ധീകരണാലയമായ യുവത ബുക്ക് ഹൗസ് സില്‍വര്‍ ജൂബിലി പരിപാടികള്‍ക്ക് ഇന്ന് കോഴിക്കോട്ട് തുടക്കമാവും. 'അക്ഷര വെളിച്ചത്തിന്റെ കാല്‍ നൂറ്റാണ്ട് ' എന്ന സന്ദേശവുമായാണ് 'യുവത' സില്‍വര്‍ ജൂബിലി കൊണ്ടാടുന്നത്. ഉദ്ഘാടനം ഇന്ന് വൈകിട്ട് നാലിന് മാനാഞ്ചിറ സ്‌പോര്‍ട്‌സ് കൗണ്‍സില്‍ ഹാളില്‍ സാംസ്‌കാരിക-ടൂറിസം മന്ത്രി എ പി അനില്‍ കുമാര്‍ ഉദ്ഘാടനം ചെയ്യും. ഐ എസ് എം പ്രസിഡന്റ് മുജീബുര്‍റഹ്മാന്‍ കിനാലൂര്‍ അധ്യക്ഷത വഹിക്കും. കെ എന്‍ എം സെക്രട്ടറി കെ പി സകരിയ്യ, ഐ എസ് എം ജനറല്‍ സെക്രട്ടറി എന്‍ എം അബ്ദുല്‍ ജലീല്‍, എം എസ് എം ജന. സെക്രട്ടറി ജാസിര്‍ രണ്ടത്താണി പ്രസംഗിക്കും.

ജൂബിലിയോടനുബന്ധിച്ച് 'യുവത'യുടെ സില്‍വര്‍ സ്‌കീം പദ്ധതി കെ എന്‍ എം ജന.സെക്രട്ടറി സി പി ഉമര്‍ സുല്ലമി ഉദ്ഘാടനം ചെയ്യും. 'മലയാള സാഹിത്യവും മുസ്‌ലിം സാമൂഹിക പരിവര്‍ത്തനവും' എന്ന വിഷയത്തില്‍ നടക്കുന്ന സാഹിത്യ സംവാദത്തില്‍ കെ ഇ എന്‍, യു കെ കുമാരന്‍, ശിഹാബുദ്ദീന്‍ പൊയ്ത്തുംകടവ്, പി എം എ ഗഫൂര്‍ എന്നിവര്‍ പങ്കെടുക്കും. 6.30ന് 'ഇസ്‌ലാമിക സാഹിത്യം മലയാളത്തില്‍' എന്ന വിഷയത്തില്‍ സി എം മൗലവി ആലുവ പ്രഭാഷണം നടത്തും.

CIER മദ്രസാ വിജ്ഞാനോല്‍സവം വിജ്ഞാനോത്സവം: സ്വാഗതസംഘ രൂപീകരണം നാളെ

2012-01-26T10:06:00.000+05:30

കോഴിക്കോട്: സി ഐ ഇ ആര്‍ സംസ്ഥാന മദ്‌റസാ വിജ്ഞാനോത്സവം ഫെബ്രുവരി 20, 26 തിയ്യതികളില്‍ നടക്കും. ചില്‍ഡ്രണ്‍, സബ്ജൂനിയര്‍, ജൂനിയര്‍ എന്നീ വിഭാഗങ്ങളിലായി ആയിരത്തഞ്ഞൂറോളം പ്രതിഭകള്‍ മാറ്റുരയ്ക്കുന്ന പരിപാടിയുടെ വിജയകരമായ നടത്തിപ്പിനായി 27ന് വൈകിട്ട് 6.30ന് വള്ളുവമ്പ്രം അബൂബക്കര്‍ സിദ്ദീഖ് മദ്‌റസയില്‍ വിപുലമായ സ്വാഗതസംഘം രൂപീകരണ യോഗം നടക്കും. ജില്ലാ, മണ്ഡലം ഭാരവാഹികള്‍, വിദ്യാഭ്യാസ സെക്രട്ടറിമാര്‍, സി ഐ ഇ ആര്‍ പ്രവര്‍ത്തക സമിതി അംഗങ്ങള്‍, വിജ്ഞാനോത്സവം ഭാരവാഹികള്‍ പങ്കെടുക്കണം.

കുഞ്ഞുങ്ങളിലെ പോഷകാഹാരക്കുറവ് ഗൗരവമായി കാണണം- ISM

2012-01-26T09:57:00.000+05:30

കോഴിക്കോട്: സാമ്പത്തിക വളര്‍ച്ചയുടെയും ആഭ്യന്തര ഉത്പാദനത്തിന്റെയും പേരില്‍ പെരുമ നടിക്കുന്ന രാജ്യത്ത് പോഷകാഹാരക്കുറവ് മൂലം ലക്ഷക്കണക്കിന് കുഞ്ഞുങ്ങള്‍ പ്രയാസം അനുഭവിക്കുന്നുണ്ടെന്ന പ്രധാനമന്ത്രിയുടെ ഏറ്റുപറച്ചില്‍ ഗൗരവമായി കാണണമെന്ന് ഐ എസ് എം സംസ്ഥാന നേതൃക്യാംപ് അഭിപ്രായപ്പെട്ടു. ശാസ്ത്ര, സാങ്കേതിക രംഗത്തെ നേട്ടങ്ങള്‍ മാത്രം വികസനമായി കാണാതെ പോഷകാഹാര ലഭ്യത, ശുചിത്വം, കുടിവെള്ളം തുടങ്ങിയ സാമൂഹിക സൂചികകള്‍ കൂടി പരിഗണിക്കപ്പെടേണ്ടതുണ്ട്. ആസൂത്രണത്തിന്റെയും വികസനത്തിന്റെയും ഗുണഫലങ്ങള്‍ സമൂഹത്തിന്റെ എല്ലാ തട്ടുകളിലേക്കും യഥോചിതം എത്തണം. ഒരു ഭാഗത്ത് ടണ്‍ കണക്കിന് ഭക്ഷ്യധാന്യങ്ങള്‍ കടലില്‍ തള്ളുകയും മറുഭാഗത്ത് ലക്ഷക്കണക്കിന് ആളുകള്‍ പോഷകാഹാരക്കുറവുകൊണ്ട് ദുരിതമനുഭവിക്കുകയും ചെയ്യുന്ന വിരോധാഭാസത്തെ നാം തിരിച്ചറിയണം. തദ്ദേശ സ്ഥാപനങ്ങള്‍ക്ക് മദ്യനിരോധനാധികാരം തിരിച്ചുനല്‍കിക്കൊണ്ടുള്ള ഉത്തരവ് ഉടന്‍ നടപ്പില്‍ വരുത്താന്‍ തയ്യാറാവണമെന്നും ഐ എസ് എം ആവശ്യപ്പെട്ടു.

ഇത് സംബന്ധിച്ച സര്‍ക്കാര്‍ ഉത്തരവ് ഇറങ്ങാത്തതിനാല്‍ ഈ വിഷയത്തിലുള്ള പ്രശ്‌നങ്ങള്‍ക്ക് പരിഹാരമായിട്ടില്ല. യു പി ഉള്‍പ്പെടെയുള്ള അഞ്ച് സംസ്ഥാനങ്ങളില്‍ വരാന്‍പോകുന്ന നിയമസഭാ തെരഞ്ഞെടുപ്പില്‍ ന്യൂനപക്ഷങ്ങള്‍ക്ക് നല്‍കിയ വാഗ്ദാനങ്ങള്‍ സമയബന്ധിതമായി പാലിക്കാന്‍ രാഷ്ട്രീയകക്ഷികള്‍ തയ്യാറാവണം. യു പി മുസ്‌ലിംകള്‍ക്ക് പ്രത്യേക സംവരണമേര്‍പ്പെടുത്തുമെന്ന കോണ്‍ഗ്രസ് പ്രഖ്യാപനം ആത്മാര്‍ഥമാണെങ്കില്‍ അവസരം ലഭിച്ചാല്‍ അത് നടപ്പാക്കണമെന്നും യോഗം ആവശ്യപ്പെട്ടു. കെ എന്‍ എം സംസ്ഥാന സെക്രട്ടറി എ അസ്ഗറലി ഉദ്ഘാടനം ചെയ്തു. ഐ എസ് എം സംസ്ഥാന പ്രസിഡന്റ് മുജീബുര്‍ റഹ്മാന്‍ കിനാലൂര്‍ അധ്യക്ഷത വഹിച്ചു. ജനറല്‍ സെക്രട്ടറി എന്‍ എം അബ്ദുല്‍ജലീല്‍, ദമാം ഇസ്‌ലാഹീ സെന്റര്‍ സെക്രട്ടറി സലാം കരുനാഗപ്പള്ളി പ്രസംഗിച്ചു. അബ്ദുല്‍ ജലീല്‍ ഒതായി, ടി വി മുഹമ്മദ് നജീബ്, ഫിറോസ് നിലമ്പൂര്‍, അബ്ദുല്‍ഗഫൂര്‍ സ്വലാഹി, കുഞ്ഞുമോന്‍ കരുനാഗപ്പള്ളി, എസ് ഇര്‍ശാദ് സ്വലാഹി, ലബീദ് അരീക്കോട്, അബ്ദുസ്സത്താര്‍, ശമീര്‍ കായംകുളം എന്നിവര്‍ ചര്‍ച്ചയില്‍ പങ്കെടുത്തു.

അഫ്‌സല്‍ ഉല്‍ ഉലമ പരീക്ഷ; കെടുകാര്യസ്ഥത അപലപനീയം - MSM

2012-01-24T06:49:00.000+05:30

കോഴിക്കോട്‌: ഇക്കഴിഞ്ഞ കാലിക്കറ്റ്‌ യൂനിവേഴ്‌സിറ്റി അഫ്‌സല്‍ ഉല്‍ ഉലമ പരീക്ഷയില്‍ കഴിഞ്ഞ വര്‍ഷത്തെ ചോദ്യ പേപ്പര്‍ തന്നെ നല്‍കി യൂനിവേഴ്‌സിറ്റി കാണിച്ച പിടിപ്പുക്കേട്‌ അപലപനീയമെന്ന്‌ എം എസ്‌ എം സംസ്ഥാന സെക്രട്ടറിയേറ്റ്‌. പരീക്ഷാതിയ്യതി പ്രഖ്യാപനത്തിലും ചോദ്യ പേപ്പറിലും യൂനിവേഴ്‌സിറ്റിയുടെ കെടുകാര്യസ്ഥത ആശയçഴപ്പം സ്യഷ്ടിച്ചിരിçകയാണ്‌. കോഡ്‌ നമ്പറും ചോദ്യ നമ്പറും മാറി എന്നതിലപ്പുറം യാതൊരു മാറ്റവും കൂടാതെയാണ്‌ ചോദ്യ പേപ്പര്‍ അച്ചടിച്ചത്‌. യൂനിവേഴ്‌സിറ്റിയുടെ ഭാഗത്ത്‌ നിന്ന്‌ അറബിക്‌ പഠനത്തോടും പരീക്ഷ നടത്തിപ്പിനോടും കാണിçന്ന ആവര്‍ത്തിച്ചുള്ള അനാസ്ഥ അവസാനിപ്പിക്കാന്‍ അധികൃതര്‍ തയ്യാറാവണം.

പ്രതിഷേധങ്ങളും പ്രതികരണങ്ങളും ഉണ്ടാവുമ്പോള്‍ മാത്രം പുതിയ ചോദ്യപേപ്പര്‍ തയ്യാറാçകയും ഫലം പ്രഖ്യാപ്പിçകയും ചെയ്യുന്ന അവസ്ഥക്ക്‌ മാറ്റമുണ്ടാവണമെìം എം എസ്‌ എം സംസ്ഥാന സെക്രട്ടറിയേറ്റ്‌ ആവശ്യപ്പെട്ടു. കോഴിക്കോട്‌ മര്‍ക്കസ്‌ ദഅ്‌വയില്‍ ചേര്‍ന്ന യോഗത്തില്‍ എം എസ്‌ എം സംസ്ഥാന പ്രസിഡണ്ട്‌ ഡോ. മുബഷിര്‍ അധ്യക്ഷത വഹിച്ചു, എം എസ്‌ എം സംസ്ഥാന സെക്രട്ടറി ജാസിര്‍ രണ്ടത്താണി, ആഷിദ്‌ ഷാ, കമറുദീന്‍ എളേറ്റില്‍, സൈദുമുഹമ്മദ്‌ തുടങ്ങിയവര്‍ സംസാരിച്ചു.

ഫോറം ഫോര്‍ ഇസ്‌ലാഹി ബ്രദേഴ്‌സിന്റെ ഇസ്‌ലാഹി ക്ലാസ്‌ റൂം ഉദ്‌ഘാടനം ചെയ്‌തു

2012-01-24T06:45:00.000+05:30

കൊച്ചി: ഫോറം ഫോര്‍ ഇസ്‌ലാഹി ബ്രദേഴ്‌സിന്റെ ആഭിമുഖ്യത്തില്‍ എറണാകുളം ഇസ്‌ലാഹി സെന്ററില്‍ നടന്ന ഇസ്‌ലാഹി ക്ലാസ്‌ റൂം ഐ എസ്‌ എം സംസ്ഥാന സെക്രട്ടറി യു പി യഹ്‌യാഖാന്‍ ഉദ്‌ഘാടനം ചെയ്‌തു. പ്രൊഫ. മുസ്‌തഫ സുല്ലമി, ഹിലാല്‍ അയിരൂര്‍, കെ എം ജാബിര്‍ ശ്രീമൂലനഗരം, റജുല്‍ ഷാനിയാസ്‌, ഇബ്‌റാഹീം എടവണ്ണ, ഇബ്‌റാഹീം മദനി എടവനക്കാട്‌, സുബൈര്‍ ഈരാറ്റുപേട്ട, എം എം ബുറാശിന്‍ ചര്‍ച്ചയില്‍ പങ്കെടുത്തു. വിവിധ ഭാഗങ്ങളില്‍ നിന്ന്‌ വന്ന്‌ എറണാകുളത്ത്‌ താമസിക്കുന്ന ഇസ്‌ലാഹി പ്രവര്‍ത്തകരുടെ കൂട്ടായ്‌മയാണ്‌ ഫോറം ഫോര്‍ ഇസ്‌ലാഹി ബ്രദേഴ്‌സ്‌. സോണ്‍.

ISM കാമ്പയിന്‍: വിവിധ പ്രഭാഷണങ്ങള്‍ സംഘടിപ്പിച്ചു

2012-01-24T06:42:00.000+05:30

ചങ്ങരംകുളം: മതം, ധാര്‍മികത, നവോത്ഥാനം എന്നീ വിഷയത്തില്‍ എറവറാംകുന്ന്‌ സലഫിനഗറില്‍ നടത്തിയ പൊതുപ്രഭാഷണത്തില്‍ സാബിക്ക്‌ പുല്ലൂര്‍ പ്രഭാഷണം നടത്തി. എന്‍ എം അബ്ബാസ്‌, ഇ എച്ച്‌ ഫഹദ്‌ പ്രസംഗിച്ചു. ചിയ്യാന്നൂര്‍ ഞാറക്കുന്നില്‍ സംഘടിപ്പിച്ച പ്രഭാഷണത്തില്‍ കെ പി ഇബ്‌റാഹീം ബുസ്‌താനി പ്രഭാഷണം നടത്തി. പി പി ഖാലിദ്‌, അശ്‌റഫ്‌ നരണിപ്പുഴ പ്രസംഗിച്ചു. നരണിപ്പുഴ ശാഖയില്‍ സംഘടിപ്പിച്ച പ്രഭാഷണത്തില്‍ അബൂബക്കര്‍ മൗലവി മരുത പ്രഭാഷണം നടത്തി. എം അശ്‌റഫ്‌, പി എം സമീര്‍ പ്രസംഗിച്ചു. വളയംകുളം ശാഖാ കെ എന്‍ എം സംഘടിപ്പിച്ച കുടുംബസംഗമത്തില്‍ റഫീഖ്‌ ഹുദവി ക്ലാസ്സെടുത്തു. കെ വി ഇബ്‌റാഹീംകുട്ടി, കെ വി മുഹമ്മദ്‌ പ്രസംഗിച്ചു.

ആത്മീയ ചൂഷണത്തെ പ്രതിരോധിക്കുക : ISM

2012-01-24T06:38:00.000+05:30

പെരുമണ്ണ: മതപ്രമാണങ്ങളെ ദുര്‍വ്യാഖ്യാനിച്ച്‌ ആത്മീയ തട്ടിപ്പ്‌ നടത്തുന്ന പൗരോഹിത്യത്തിനെതിരെ പ്രതിരോധം തീര്‍ക്കണമെന്ന്‌ ഐ എസ്‌ എം പെരുമണ്ണ പഞ്ചായത്ത്‌ കമ്മിറ്റി സംഘടിപ്പിച്ച ബഹുജനസംഗമം അഭിപ്രായപ്പെട്ടു. കെ എന്‍ എം ജില്ലാ പ്രസിഡന്റ്‌ അബൂബക്കര്‍ നന്മണ്ട ഉദ്‌ഘാടനം ചെയ്‌തു. അലി മദനി മൊറയൂര്‍ പ്രഭാഷണം നടത്തി. എ സി അലി അധ്യക്ഷം വഹിച്ചു. കെ ഇ ശാഹുല്‍ഹമീദ്‌, എം എം താജുദ്ദീന്‍ പ്രസംഗിച്ചു.

നിലനില്‌പിന്നാവശ്യമായ നിയമങ്ങള്‍ ലംഘിക്കരുത്‌ -ഹുസൈന്‍ മടവൂര്‍

2012-01-24T06:36:00.000+05:30

കീഴരിയൂര്‍: മാനവരാശി നേരിടുന്ന സകല പ്രശ്‌നങ്ങള്‍ക്കും അടിസ്ഥാന കാരണം മനുഷ്യന്റെ നിലനില്‌പിന്നാവശ്യായ നിയമങ്ങള്‍ ലംഘിക്കപ്പെടുന്നതാണെന്ന്‌ ഇന്ത്യന്‍ ഇസ്വ്‌ലാഹീ മൂവ്‌മെന്റ്‌ ജന. സെക്രട്ടറി ഡോ. ഹുസൈന്‍ മടവൂര്‍ അഭിപ്രായപ്പെട്ടു. ധാര്‍മിക മൂല്യങ്ങള്‍ എല്ലാം മനുഷ്യന്റെ നിലനില്‌പിനുള്ള അടിസ്ഥാന തത്വങ്ങളാണ്‌. ആധുനിക സങ്കേതികവിദ്യകളെ ക്രിയാത്മകമായി ഉപയോഗപ്പെടുത്തേണ്ടതിന്‌ പകരം സ്വയം നാശത്തിന്‌ വിനിയോഗിക്കപ്പെടുന്നുവെന്നും മാനവ ഐക്യം ഏകദൈവ വിശ്വാസത്തിലൂടെ സാധ്യമാക്കണമെന്നും അദ്ദേഹം കൂട്ടിച്ചേര്‍ത്തു.

കെ എന്‍ എം കീഴരിയൂര്‍ പഞ്ചായത്ത്‌ കമ്മിറ്റി മതം-ധാര്‍മികത-നവോത്ഥാനം എന്ന പ്രമേയത്തില്‍ സംഘടിപ്പിക്കുന്ന പഞ്ചമാസ കാമ്പയിന്‍ ഉദ്‌ഘാടനം ചെയ്‌ത്‌ സംസാരിക്കുകയായിരുന്നു അദ്ദേഹം. മണ്ഡലം പ്രസിഡന്റ്‌ എ വി അബ്‌ദുല്ല അധ്യക്ഷത വഹിച്ചു. ഐ എസ്‌ എം വൈ.പ്രസിഡന്റ്‌ ജഅ്‌ഫര്‍ വാണിമേല്‍ പ്രഭാഷണം നടത്തി. എന്‍ കെ എം സകരിയ്യ, നൂറുദ്ദീന്‍ കൊയിലാണ്ടി പ്രസംഗിച്ചു. മിസ്‌ഹബ്‌ കീഴരിയൂര്‍ സ്വാഗതവും ടി പി ബഷീര്‍ നന്ദിയും പറഞ്ഞു.

ദൈവത്തിന്‍റെ പേരില്‍ കലഹമുണ്ടാക്കുമ്പോള്‍ അവഗണിക്കപ്പെടുന്നത് ദൈവവും നഷ്ടം വരുന്നത് മതത്തിനും : ഹുസൈന്‍ മടവൂര്‍

2012-01-23T11:31:00.000+05:30

പാലക്കാട് : ദൈവത്തിന്‍റെ പേരില്‍ കലഹമുണ്ടാക്കുമ്പോള്‍ അവഗണിക്കപ്പെടുന്നത് ദൈവവും നഷ്ടം വരുന്നത് മതത്തിനുമാണെന്ന് ഡോ: ഹുസൈന്‍ മടവൂര്‍ അഭിപ്രായപ്പെട്ടു. കല്‍മണ്ടപത്ത് നടന്ന KNM ആദര്‍ശ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

വൈവിധ്യം ദൈവത്തിന്‍റെ തീരുമാനമാണ്. അതിന്‍റെ പേരില്‍ വെറുപ്പും വിദ്വേഷവും വളര്‍ത്തുന്നത് മതവിരുദ്ധമാണ്. ചൂഷണത്തിനുവേണ്ടി മതത്തെ വാണിജ്യവല്‍ക്കരിക്കുന്ന ആത്മീയ നേതാക്കളെ സൂക്ഷിക്കണം. ആധുനിക മനുഷ്യന്‍ മതത്തെ ഭയപ്പെടുന്നത് മത തത്വങ്ങളെ വികലമായി പ്രചരിപ്പിക്കുന്നതു കൊണ്ടാണെന്നും അദ്ദേഹം പറഞ്ഞു. ബഷീര്‍ പട്ടേല്‍ത്താഴം, സുലൈമാന്‍ സബാഹി, കെ വി അബ്ദുല്‍ അസീസ്‌, എം യൂനുസ്, ആഷിക് റഹ്മാന്‍ എന്നിവര്‍ പ്രസംഗിച്ചു.