Eins ótrúlega og það hljómar hefur ekki verið langur vegur frá því að ungur nemi við Harvard var að bjástra eitthvað í tölvunni og til fyrirtækis sem er mörg þúsund milljarða virði. Hér ræðir um Fésbókina en að öðru óbreyttu verður fyrirtækið skráð á markað innan tíðar. Hvað varðar starfsmannafjölda er fyrirtækið í raun smáfyrirtæki, en starfsmenn þess eru einungis um 3.000. Við skráningu mun fyrirtækið verða verðmætara en mörg fyrirtæki sem hafa jafnvel nokkur hundruð þúsund starfsmanna.

Upprunaleg grein á vef The Economist

Þau hafa farið mikinn á undanförnum árum, stórfyrirtækin þar sem ríkissjóður í viðkomandi landi á stóran eignarhlut. Hér má t.d. nefna kínversku fyrirtækin China Mobile og China Construction Bank, brasilísku fyrirtækin Petrobras og Vale, malasíska fyrirtækið Petronas og Singapore Airlines í Singapúr.

Í Bandaríkjunum og Evrópu er óalgengt að ríkið sé stór eignaraðili í fyrirtækjum sem eru skráð á markaði þó að opinberir aðilar hafi í kjölfar björgunaraðgerðir undanfarinna ára, einkum í bankageiranum, orðið stórir eigendur.  Hversu skynsamlegt er þetta „ríkiskapítalismamódel“ er spurt í eftirfarandi grein?

Upprunaleg grein á vef The Economist

Robert Aliber fyrrverandi prófessor við Háskólann í Chicago hefur töluverðan áhuga á eignaverðsbólum. Hann kom hingað til lands fyrir nokkrum árum og hafði sterkar skoðanir á þróuninni í efnahagslífinu og á eignamörkuðum.  Að undanförnu hefur kastljós Robert beinst að fasteignamarkaðinum í Kína sem hann telur að hafi þróast út í bólu. Hann telur einnig að menn þurfi að átta sig betur á þýðingu fasteignamarkaðarins fyrir hagvöxt í landinu, bæði í fortíð og framtíð.

Upprunaleg grein á vef CNN Money

Í árlegu yfirlit bandaríska viðskiptatímaritsins árið 1989 er Eastman Kodak í 18. sæti mælt á veltu. Fyrir ofan fyrirtækið á listanum eru engir aukvisar, hinir risastóru bílaframleiðendur með General Motors í broddi fylkingar og olíurisarnir. Einnig IBM „The Big Blue“ sem bar þá höfuð og herðar yfir önnur fyrirtæki í tæknigeiranum. Rétt fyrir aftan Kodak á listanum tyllir flugvélaframleiðandinn Boeing sér og í fjarska sést í Coca-Cola, Johnson & Johnson, Caterpillar og Wal-Mart. Í barnaafmælum í Búðardal og fermingaveislum á Fáskrúðsfirði var Kodak filma og flasskubbur staðalútbúnaður. Nú 23 árum síðar...eftir stafræna byltingu og nánast stökkbreytingu í símum virðist vera komið að leiðarlokum.

Upprunaleg grein á vef The Economist

Maður er nefndur Byron Wien. Hann starfaði í áratugi hjá fjárfestingarbankanum Morgan Stanley sem „strategisti“ en söðlaði svo um og hóf störf hjá bandaríska fjármálafyrirtækisinu Blackstone. Fyrir 25 árum hóf Byron að birta um hver áramót lista með tíu óvæntum atriðum á því ári sem færi í hönd. Hann skilgreinir „óvæntan“ atburð sem atburð sem hinn dæmigerði fjárfestir myndi aðeins telja þriðjungslíkur (1/3) á að gerist en Byron telur líklegt að um sé að ræða a.m.k. helmingslíkur (50%). Listinn vekur ávallt töluverða athygli þegar hann er birtur og verður umræðuefni, þó að færri sögum fari af því hversu sannspár Byron hafi verið í gegnum tíðina.

Upprunaleg grein á vef Blackstone

Hagvöxtur í Kína hefur verið um 10% svo árum skiptir. Hinn kröftugi vöxtur hefur fyrst og fremst byggst á útflutningi og fjárfestingu. Hvað fjárfestinguna varðar hefur sumum fundist nóg um og hefur m.a. verið bent á „draugaborgir“ í því sambandi. Hinum miklu fjárfestingum hefur (eðlilega) fylgt mikil skuldaaukning og hafa kínverskir bankar heldur betur verið á skotskónum í þeim efnum. Er að styttast í skuldahöfuðverk í Kína?

Upprunaleg grein á vef The Economist

Síðustu ár hafa verið farsæl hjá danska fyrirtækinu LEGO en um miðjan síðasta áratug var fyrirtækið komið í rekstrarlegar ógöngur. Síðan þá hefur leiðin legið upp á við. Fyrirtækið er þriðji stærsti framleiðandi af leikföngum í heiminum og skv. einni rannsókn er LEGO dáðasta vörumerki í Evrópu og fimmta dáðasta vörumerki í heimi. Þó að margt gott megi segja um LEGO og hugmyndafræði fyrirtækisins hefur í gegnum tíðina verið nokkur slagsíða í vöruframboði fyrirtækisins. Margar vörur höfða fyrst og fremst til stráka. LEGO-kallarnir eru fyrst og fremst...kallar. Þessa dagana er LEGO að hefja sölu á „LEGO Friends“ en um ræðir LEGO“kalla“ sem eru stúlkur. Þetta eru vinkonurnar Olivia, Mia, Andrea, Stephanie og Emma.

Upprunaleg grein á vef Business Week

Hagfræðingurinn Nouriel Roubini, prófessor við Háskólann í New York, er ekki skoðanalaus frekar en fyrri daginn þegar um ræðir horfur í heimsbúskapnum. Boðskapur hans varðandi næsta ár kemur í sjálfu sér ekki á óvart og í takt við það sem virðist að sumu leyti blasa við eins og málum er háttað um þessar mundir. Erfiðleikar í efnahagslífi í Evrópu, frekar lítill hagvöxtur í Bandaríkjunum, m.a. vegna áhrifa á efnahagslægð í Evrópu og hægari vöxtur í Kína og öðrum nýmarkaðshagkerfum.

Upprunaleg grein á vef Project Syndicate

Undanfarin misseri hafa kínversk fyrirtæki fjárfest af nokkru kappi víða um heiminn. Einna mest hefur borið á fjárfestingum í starfsemi sem tengist hrávörum og vinnslu þeirra, t.d. í löndum í Afríku og S-Ameríku. Mjög lítið hefur verið fjárfest í Evrópu en aukningin er þó mikil á milli ára. Meðal fjárfestinga sem fóru hvað hæst voru kaup kínverskra fyrirtækja á sænsku bílaframleiðendunum Volvo og Saab, þó að tíminn muni einn leiða í ljós hversu skynsamleg kaupin muni reynast. Evrópsk fyrirtæki eins og lúxusvöruframleiðendurnir LVMH (Louis Vuitton, Donna Karan, TAG Heuer, Dior..) og Richemont (Cartier, Montblanc, Chloé..) og bílaframleiðendur eins og Daimler og BMW hafa notið góðs af auknum kaupmætti kínverskra neytenda. Hvað er með þessa kaupgleði?

Upprunaleg grein á vef Time.com

Hagsöguspekingurinn Niall Ferguson heldur því blákalt fram að ástæða fjármálakreppunnar hafi verið vanþekking á fjármálasögu. Og um þessar mundir þegar blikur eru víða á lofti varar hann við skorti á söguleg innsýn á meðal þeirra sem gagnrýna eða vilja ekki feta veg peningaprentunar eða aðgerða af svipuðum meiði. Það er þó nokkur huggun að bankastjórar nokkurra öflugustu seðlabanka í heimi hafa eitthvað blaðað í sömu skruddur og Ferguson.

Upprunaleg grein á vef The Daily Beast

Bill Miller gerði garðinn frægan sem sjóðsstjóri Legg Mason Value Trust hlutabréfasjóðsins. Hæst reis stjarna hans fyrir nokkrum árum þegar sjóðurinn hafði skilað hærri ávöxtun en S&P 500 hlutabréfavísitalan 15 ár í röð. Þ.e. á tímabilinu frá 1991 til 2005 var ávöxtunin hærri hvert einasta ár, sem stappar nærri að vera ótrúlegt í ljósi þess að í gegnum tíðina hafa árangursríkustu sjóðsstjórarnir nánast undantekningarlaust átt slæm ár. Bill sagði reyndar sjálfur á sínum tíma þegar hann setti 15 ára metið að það væri einungis almanaksárinu að þakka. Ef menn veldu eitthvað annað 12 mánaða tímabil en janúar til janúar væri útkoman önnur. Bill var í hópi svokallaðra mótstraumsfjárfesta og batt bagga sína ekki sömu böndum og margir aðrir. Hann var tilbúinn að kaupa hlutabréf þegar fáir höfðu áhuga á þeim og bíða þolinmóður eftir að birti til. Þegar uppnámið varð á fjármálamörkuðum árið 2008 fór að syrta í álinn hjá Bill. Og fyrir nokkrum dögum tilkynnti hann að tími væri komin til að leggja skóna á hilluna.

Upprunaleg grein á vef Time.com

Það hefur verið á brattann að sækja fyrir japanskra stórfyrirtækið Sony á undanförnum árum. Fyrirtækið var stofnað fyrir 65 árum og var latneska heitinu SONUS (hljóð) slegið saman við SONNY, og úr varð nafn/vörumerki sem var ætlað að vera auðvelt í framburði. Í gegnum tíðina hefur SONY verið á margra vörum og fyrirtækið verið í fararbroddi í þróun og hönnun ýmissa raftækja fyrir neytendavörumarkað. Sá þáttur vegur þyngst í veltu fyrirtækisins en það hefur einnig töluverð umsvif á tónlistar-og kvikmyndamarkaði. 1979 setti fyrirtækið á markað fyrstu kynslóð Walkman, sem jafnan var kallaður „vasadiskó“, en tækið varð gríðarlega vinsælt og var bylting í anda seinni tíma iPod. Í dag spyrja menn sig af hverju það hafi verið Apple en ekki Sony sem kom með tæki í anda iPod á markað. Sterkir samkeppnisaðilar hafa skotið Sony skelk í bringu og meðal þeirra fyrirtækja sem hafa gert sig breið eru Samsung, Apple og LG. Fyrir nokkrum árum var veilsverjinn Howard Stringer ráðinn sem forstjóri hjá Sony og þóttu það tíðindi að útlendingur væri ráðinn til að stýra svo stóru japönsku fyrirtæki. Vindurinn hefur heldur verið í fangið á Howard og félögum að undanförnu...

Upprunaleg grein á vef Business Week

Stundum er sagt að 18. öldin hafi verið öld Frakklands, 19. öldin öld Bretlands og 20. öldin öld Bandaríkjanna. Spyrja má hvort að 21. öldin verði öld Kína...eða Indlands. Eða e.t.v Kíndlands?

Upprunaleg grein á vef Time.com

Það stappar nærri að evran sé orðin eins og fræg kvikmyndastjarna. Það hafa nánast allir skoðanir á henni. Í meðfylgjandi grein er því sjónarmiði haldið á lofti að evrópskir leiðtogar séu að að heyja rangt stríð, ef svo má að orði komast. Í stað þess að standa þéttir í vörninni fyrir evruna þá eigi þeir að búa sig undir að evran gefi upp öndina í núverandi mynd. Evrópusambandið og stoðir þess, þar með talinn innri markaðurinn, muni standa slíkt af sér.

Upprunaleg grein á vef Financial Times

Hin alþjóðlega efnahagsmynd hefur breyst mikið á undanförnum árum. Nú er svo komið að hagkerfi hinna svokölluðu nýmarkaða (e. emerging markets) standa þróuðum hagkerfum fyllilega á sporði þegar kemur að stærð. Eins og nærri má geta hafa viðskipti milli nýmarkaðshagkerfa vaxið mikið en það er ekki víst að allir geri sér grein fyrir hve aukningin hefur verið hröð né hve umfangið er orðið mikið. Fram á allra síðustu ár hefur eftirspurn í vestrænum hagkerfum verið prímusmótor viðskipta margra nýmarkaðshagkerfa en þar er að verða breyting á. Kína, ekki Bandaríkin, er nú mikilvægasta viðskiptaland Indverja og landið er sömuleiðis stærsti útflutningsmarkaður Brassanna. Viðskipti milli Indlands og landa Afríku voru einungis 1 milljarður dollara árið 2001 en voru 50 milljarðar dollara í fyrra. Í árhundruðir tengdi „Silkivegurinn“ stóran hluta Asíu og hluta Afríku við sunnanverða Evrópu. Nú virðast silkivegir liggja til allra átta.

Upprunaleg grein á vef Time.com

Það kann að vera erfitt að ímynda sér að velta Amazon.com hafi numið um 60 milljónum íslenskra króna fyrir fimmtán árum, en í ár stefnir veltan í hátt í 5.000 milljarða íslenskra króna. Í bréfi sem hluthöfum var sent árið 1998 sagði....."En þetta er Dagur 1 fyrir Internetið."
Þarna virðist mönnum hafa ratast satt orð á munn. Og fyrirtækið ætlar að láta til sín taka á spjaldtölvumarkaðinum en í næsta mánuði byrjar sala á Kindle Fire. Ekki er heldur látið staðar numið við að selja bækur heldur er fyrirtækið farið að feta sig út á bókaútgáfubrautina. Hvað myndi Peter Drucker, sem kallaður hefur verið faðir stjórnunar, segja?

Upprunaleg grein á vef Business Week

Eins og í mörgum öðrum löndum spyrja menn í Bandaríkjunum hvernig hleypa megi megi meiri krafti í efnahagslífið, vinna bug á atvinnuleysi og minnka hallarekstur ríkisins. Á stjórnarárum Clinton (1992-2000) var uppgangur í bandarísku efnahagslífi og margir álíta að hann hafi verið farsæll í því tilliti þó að hagstæðar aðstæður hafi einnig spilað sína rullu. Hvað er Bill að pæla?

Upprunaleg grein á vef Fortune

Kínverska hagkerfið er næststærsta hagkerfi í heimi á eftir því bandaríska. Ef fer fram sem horfir munu þeir ná toppsætinu eftir nokkur ár. Þá hefur Kína endurheimt fyrrum forystu en 1820 var kínverska hagkerfið það stærsta í heimi, eða um 1/3 af heimsframleiðslunni. Að undanförnu hafa verið skiptar skoðanir um hvort að eignabóla sé á fasteignamarkaði í Kína. Gríðarlega mikið hefur verið byggt á undanförnum árum í landinu og hlutfall fjárfestingar af landsframleiðslu farið hratt vaxandi. Þessu hefur séð stað í gríðarlega mikilli spurn eftir hrávörum af ýmsum toga þar sem landið er í mörgum tilfellum langstærsti notandi í heimi. Fáir andmæla þeirri skoðun að einkaneysla þurfi að aukast í Kína á kostnað fjárfestingar og útflutnings, og er í því sambandi t.d. horft til þjónustugeirans sem er veikburða í Kína. Sem dæmi má nefna að neysla er um 1/3 af VLF (verg landsframleiðsla) en til samanburðar er hlutfallið 70% í Bandaríkjunum, þó að sumum þyki nóg um.

Upprunaleg grein á vef Time.com

Forstjóri Google, Eric Schmidt, - fór nýlega í smiðju Opinberunarbókarinnar og kallaði Google, Amazon, Apple og Facebook hina „Fjóru hestamenn“. Í meðfylgjandi grein veltir hagsöguspekingurinn Niall Ferguson fyrir sér hvort að þessir „veflávarðar“ séu ein meginskýring sífellt meiri sveiflna á sumum sviðum.

Upprunaleg grein á vef The Daily Beast

Hvað þarf að gera til að koma í veg fyrir alvarlega efnahagslægð spyr Nouriel Roubini, prófessor í hagfræði við Háskólann í New York, og svarar þeirri spurningu sjálfur. Þar kennir ýmissa grasa; Seðlabankar lækki vexti, endurskipulagning og/eða afskriftir skulda aðila sem munu ekki vera greiðslufærir, styrking fjárhagsstöðu evrópskra banka með veika fjárhagsstöðu, lausari taumur í ríkisfjármálum einstakra ríkja...

Upprunaleg grein á vef Project Syndicate

Fyrir fjöldamörgum árum hljómaði í auglýsingu frá banka...“í kolli mínum geymi ég gullið“. Textinn var líkingamál enda fá menn ekki „vexti og vaxtavexti...“af alvörugulli. Frá sjónarhóli fjárfestis er þetta einmitt eitt af höfuðeinkennum gulls, þ.e. það gefur ekkert af sér. Í vissum skilningi er fjárfesting í gulli í Meistaradeildinni hvað varðar spákaupmennsku. Ábatinn fer eftir því hvað næsti maður er tilbúinn til að borga. Nú þegar gull virðist glóa sem aldrei fyrr er rífandi gangur hjá fyrirtækjum sem sérhæfa sig í að geyma gull. Spurn fjárfesta, þ.e. aðila sem ætla sér ekki beinlínis að hagnýta sér málminn, eftir gulli hefur aukist gríðarlega. Hér ræðir t.d. um kauphallarsjóði (ETF´s) sem fjárfesta í gulli en þótti tíðindum sæta fyrir nokkrum vikum þegar sjóður af þeirri tegund varð stærsti kauphallarsjóður í heimi.

Upprunaleg grein á vef Business Week

Þegar talið berst að eignabólum þykir Robert J. Shiller prófessor við Yale vera maður sem mark geti verið takandi á. Bók hans „Irrational Exuberance“ sem kom fyrst úr í upphafi árs 2000 er nánast skyldulesning fyrir þá sem hafa áhuga á viðfangsefninu. Eins og Shiller segir sjálfur þá veit hann ekki, í bókstaflegri merkingu, hvar næsta eignabóla verður en hann er þó ekki skoðanalaus í því sambandi. Ræktað land?

Upprunaleg grein á vef International Economy

Engum blöðum er um að fletta að undanfarin ár hafa verið „Appleár“ ef svo má að orði komast. Viðgangur fyrirtækisins er nánast fordæmalaus og ef fer fram sem horfir þá mun Apple skáka fyrirtækjum eins og Proctor & Gamble, BMW, Johnson & Johnson, Boeing og Siemens í veltu. Eins og kunnugt er þá lét Steve Jobs af störfum sem forstjóri fyrirtæksins fyrir nokkrum dögum og hefur tekið við starfi stjórnarformanns. Hver er saga þessa manns?

Upprunaleg grein á vef The Daily Beast

Bandaríkin bera enn höfuð og herðar yfir önnur hagkerfi í alþjóðlegu efnahagslífi. Einkaneysla er stór hluti af bandarísku efnahagskökunni en neytendur þar í landi hafa verið með nokkrum böggum hildar á undanförnum misserum. Stephen S. Roach prófessor við Yale háskóla hefur um langt skeið verið þeirrar skoðunar að þrátt fyrir hraðan vöxt hagkerfa víða um heim þá sé bandaríski neytandinn enn þungamiðjan í alþjóðlegu efnahagslífi.

Upprunaleg grein á vef Project Syndicate

Það hefur mikið vatn runnið til sjávar frá því að bræðurnir Dick og Mac Mcdonald ráku einn veitingastað í San Bernardino Í Kaliforníu. Umsvif McDonald‘s veitingahúsakeðjunnar eru
nú slík að fjöldi veitingastaða er 33.000 í 118 löndum. Starfsmenn fyrirtækisins eru 1.7 milljónir en á alþjóðagrunni er það aðeins bandaríska matvörukeðjan Wal-Mart sem skákar Mcdonald‘s í þeim efnum.

Upprunaleg grein á vef CNN Money

Hvaða ráð hefur hinn ungverskættaði ofurfjárfestir George Soros vegna hinnar svokölluðu evrukrísu?

Í fyrsta lagi, endurskipulagning og endurfjármögnun bankakerfisins.
Í öðru lagi sameiginleg útgáfa skuldabréfa af hálfu evruríkjanna.
Í þriðja lagi, útgönguleið.

Upprunaleg grein á vef Project Syndicate

Nouriel Roubini prófessor við Háskólann í New York hefur oft þurft að synda á móti straumnum þegar hann hefur viðrað skoðanir sínar. Sú var raunin á haustmánuðum 2006 þegar hann varaði við því að mikil vandamál væru í uppsiglingu á bandarískum húsnæðislánamarkaði. Hann hefur einnig í langan tíma sagt að óhjákvæmilega myndi draga til tíðinda í skuldamálum skuldsettustu ríkjanna í Evrópu. Ekki verður annað sagt en að hann hafi hitt naglann sæmilega á höfuðið í þeim efnum. Hvaða meðul býður Roubini upp á?

Upprunaleg grein á vef Financial Times

Í gegnum tíðina hafa fáir fjárfestar vakið jafnmikla athygli og hinn ungverski George Soros. Sumar aðgerða hans í gegnum tíðina eru umdeildar,t.d. þegar hann veðjaði á lækkun breska sterlingspundsins. Í kjölfarið fékk hann nafnbótina „The Man that broke the Bank of England“. Hann hefur skrifað nokkrar bækur og um hann hafa verið skrifaðar bækur. Nú er komið að kaflaskilum en Quantum sjóður Soros mun ekki lengur hafa fé til umsýslu frá öðrum fjárfestum heldur fjárfesta hans eigið fé og skyldra aðila. 40 ára kafla sem hefur að meðaltali skilað 20% árlegri ávöxtun er lokið.

Upprunaleg grein á vef Businessweek

Þegar flugvélaframleiðendurnir Airbus og Boeing berast í tal má bregða fyrir sig íþróttamáli og tala um erkifjendur. Fyrirtækin hafa algera yfirburði í smíði flugvéla til farþegaflutninga og eru ein um hitunina þegar kemur að stærri flugvélum. Á tveimur stærstu flugvélasýningunum sem haldnar eru í Le Bourget í Frakklandi og í Farnborough í Englandi (sitthvort árið) nota fyrirtækin iðulega tækifærið og tilkynna um nýja sölusamninga. Á sýningunni í júní, sem haldin var í Le Bourget, skreytti Airbus sig með íburðarmeiri fjöðrum en Boeing en endurbætt gerð af A-320 vél fyrirtækisins, A-320neo, hefur selst hraðar en nokkur önnur farþegaflugvél fram til þessa. Í síðustu viku tilkynnti svo einn af traustustu viðskiptavinum Boeing, bandaríska flugfélagið American Airlines, um stærstu pöntun í sögu flugsins. Um ræðir 460 vélar sem skipt er á milli Airbus og Boeing, og er A-320neo þar á meðal, auk þess sem um ræðir afbrigði af Boeing 737 sem fyrirtækið mun þróa.

Upprunaleg grein á vef CNN Money

Alþjóðahagkerfið hefur heldur mæðst að undanförnu. Það er að ýmsu að hyggja. Uppsveiflan í Bandaríkjunum er hæg og a.m.k. ekki nógu og snörp til að minnka atvinnuleysið. Óþarfi er að fjölyrða um skuldavanda nokkurra evrópskra ríkja þar sem Grikkland hafði verið í broddi fylkingar áður en Ítalía hljóp inn á völlinn. Á nýmörkuðum þar sem vöxturinn hefur verið mestur er verið að reyna að stíga á bremsur til að forðast ofhitnun. Fyrr í mánuðinum settust greiningarmenn hjá Economist Intelligence Unit, á rökstóla...

Upprunaleg grein á vef The Economist