Janta Parishad

मतदानाच्या दिवशी सार्वजनिक सुट्टी जाहीर - Holiday declared for the voting day

2025-11-29T16:36:00.000+05:30

मतदानाच्या दिवशी सार्वजनिक सुट्टी जाहीर

वाशिम, दि.२९ नोव्हेंबर (जिमाका) राज्य शासनाने नगर परिषदा व नगर पंचायतींच्या सार्वत्रिक निवडणुकांच्या अनुषंगाने मंगळवार, दि. २ डिसेंबर २०२५ रोजी सार्वजनिक सुट्टी जाहीर केली आहे. ही सुट्टी वाशिम जिल्ह्यातील वाशिम, रिसोड, कारंजा, मंगरूळपीर नगर परिषद व मालेगाव नगर पंचायत या स्थानिक स्वराज्य संस्थांच्या संबंधित मतदार संघात लागू राहील.

ही अधिसूचना दि. २६ नोव्हेंबर २०२५ रोजी जारी करण्यात आली आहे.

निर्वाचन प्रक्रिया सुरळीत पार पडावी, तसेच मतदारांनी मतदानाचा हक्क बजावण्यासाठी सोयीस्कर वातावरण निर्माण व्हावे, यासाठी शासनाने ही सुट्टी लागू केली आहे.

ही सार्वजनिक सुट्टी संबंधित मतदारसंघातील कामानिमित्त बाहेर असणाऱ्या मतदारांना देखील लागू राहील. तसेच या अधिसूचनेनुसार वरील नगर परिषद व नगर पंचायत क्षेत्रातील केंद्र शासनाची कार्यालये, राज्य शासनाची कार्यालये, निमशासकीय कार्यालये, सार्वजनिक उपक्रम, बँका, वित्तीय संस्था इत्यादींनाही ही सुट्टी लागू राहील, असे अधिसूचनेत नमूद आहे.

‘संचार साथी’ पोर्टल आणि अ‍ॅप - Sanchar Saathi Portal and App : Know Your Mobile Connections

2025-11-09T10:19:00.001+05:30

दूरसंचार क्षेत्रातील पारदर्शकता, सुरक्षितता व जनसहभागाकडे

‘संचार साथी’ पोर्टल आणि अ‍ॅप

Sanchar Saathi Portal and App

Know Your Mobile Connections

वाशिम, दि. ९ नोव्हेंबर (जिमाका / www.jantaparishad.com) - भारतातील १२० कोटींहून अधिक दूरध्वनी ग्राहकांच्या, विशेषतः मोबाइल वापरकर्त्यांच्या डिजिटल सुरक्षिततेसाठी दूरसंचार विभागाने (Department of Telecommunications – DoT) “संचार साथी” (Sanchar Saathi Portal and App) हा नागरिक-केंद्रित उपक्रम सुरू केला आहे. मे २०२३ मध्ये सुरू झालेल्या या डिजिटल प्लॅटफॉर्मद्वारे आता मोबाईल वापरकर्त्यांना त्यांच्या कनेक्शनवरील नियंत्रण, फसवणुकीपासून संरक्षण आणि सुरक्षा धोक्यांची नोंद करण्याची सुलभ व प्रभावी सुविधा उपलब्ध झाली आहे.

मुंबई एलएसएच्या दूरसंचार विभागाचे संचालक विनय जांभळी आणि उपमहासंचालक सुमनेश जोशी यांनी महाराष्ट्रातील नागरिकांना सायबर सुरक्षिततेबाबत सजग राहण्याचे आवाहन केले.

नागरिकांनी आपल्या मोबाईल डिव्हाइसवरील अनावश्यक अ‍ॅप्स तत्काळ काढून टाकावेत आणि फोन नेहमीच नवीनतम सुरक्षा ॲपसह अपडेट ठेवणे गरजेचे आहे. नागरिकांनी दूरसंचार विभागाचे नागरिक-केंद्रित ‘संचार साथी’ हे अ‍ॅप डाउनलोड करून त्यातील सर्व उपयुक्त वैशिष्ट्यांचा वापर करावा.

पोर्टल आणि अ‍ॅपवरील प्रमुख सुविधा

संचार साथी पोर्टलवर “Know Your Mobile Connections”, “Block Your Lost/Stolen Mobile” आणि “Verify IMEI” या महत्त्वपूर्ण सेवा उपलब्ध आहेत. या सेवांद्वारे नागरिकांना त्यांच्या मोबाईल क्रमांकांची माहिती तपासणे - म्हणजेच त्यांच्या नावावर एकाच ओळखीसह किती कनेक्शन आहेत हे पाहणे, हरवलेले किंवा चोरीस गेलेले मोबाइल डिव्हाइस आयएमईआय ब्लॉक करणे, तसेच आयएमईआय क्रमांक आणि डिव्हाइसची प्रामाणिकता पडताळणी करणे शक्य होते.

या सुविधांमुळे मोबाईल ओळख व्यवस्थापन आणि सुरक्षिततेस मोठा हातभार लागला आहे. याशिवाय “चक्षु” या विशेष सेवेच्या माध्यमातून संशयास्पद कॉल, एसएमएस किंवा व्हॉट्सअॅप संदेश यांची नोंद नागरिक करू शकतात. त्यामुळे फसवणूक, सायबर गुन्हे, बनावट ओळख निर्माण करणे तसेच अवांछित व्यावसायिक संदेशांवर नियंत्रण ठेवणे सोपे झाले आहे.

मोबाईल आयएमईआय माहिती सुरक्षित ठेवा

नागरिकांना सूचित करण्यात येते की त्यांनी त्यांच्या खरेदी केलेल्या मोबाईल उपकरणांचे मूळ चलन (इनव्हाईस) सुरक्षित ठेवावे, कारण त्या चलनावर संबंधित उपकरणाचा आयएमईआय क्रमांक नमूद केलेला असतो.

जर मोबाईल उपकरणात दोन सिमकार्ड स्लॉट असतील, तर त्या उपकरणास दोन वेगवेगळे आयएमईआय क्रमांक असतात. वापरकर्त्यांनी *#०६# हा कोड डायल करून आपले आयएमईआय क्रमांक तपासावेत आणि त्याचा स्क्रीनशॉट आपल्या ईमेल, जीमेल किंवा इतर सुरक्षित ठिकाणी जतन करून ठेवावा. यामुळे उपकरण हरवल्यास संबंधित माहिती सहज उपलब्ध होऊन आवश्यक कार्यवाही करता येईल.

‘संचार साथी’च्या माध्यमातून मोबाईल हरवल्यास त्याचा गैरवापर टाळता येतो, तसेच फसवणूक किंवा संशयास्पद कॉलची तक्रार नोंदवून नागरिक स्वतः सायबर सुरक्षिततेच्या साखळीत सक्रिय योगदान देऊ शकतात.

राष्ट्रीय सुरक्षेला बळकटी

संचार साथी पोर्टल (Sanchar Saathi Portal and App) द्वारे परदेशी क्रमांक भारतीय (+९१) क्रमांक म्हणून दाखवून होणाऱ्या फसवणुकीच्या घटनांवर प्रभावी कारवाई करण्यात येत आहे. अशा तक्रारींवर दूरसंचार विभाग आणि पोलिस यांच्यातील समन्वयातून तातडीने तपास व कारवाई करण्यात येते आणि संबंधित फसवणूक नेटवर्क निष्क्रिय केले जातात. यामुळे राष्ट्रीय सुरक्षेला बळकटी मिळते.

नागरिकांना विनंती आहे की त्यांच्या मोबाईलवर आंतरराष्ट्रीय कॉल भारतीय क्रमांकावरून येत असल्यास त्वरित टोल-फ्री क्रमांक १९६३ वर माहिती द्यावी.

इतर उपयुक्त सेवा

“Find Wire line Internet Service Providers” या सेवेच्या माध्यमातून नागरिकांना त्यांच्या परिसरातील परवाना धारक इंटरनेट सेवा प्रदात्यांची माहिती सहज उपलब्ध होते. तसेच “Trusted Contact Details” या वैशिष्ट्याचा वापर करून नागरिक संबंधित वेबसाइट, ईमेल किंवा संपर्क क्रमांकाची प्रामाणिकता पडताळू शकतात, ज्यामुळे ऑनलाइन फसवणुकीपासून बचाव करता येतो.

या उपक्रमांतर्गत २.३५ कोटी सिम-संबंधित प्रकरणांचे यशस्वी निराकरण करण्यात आले असून, ४० लाख मोबाइल हँडसेट ब्लॉक, त्यापैकी २५ लाख ट्रेस झाले आहेत. तसेच ३९ लाखांहून अधिक संशयास्पद दूरसंचार संसाधनांवर कारवाई करण्यात आली आहे.

संचार साथीचा वापर वाढविण्यासाठी दूरसंचार विभागामार्फत व्यापक जनजागृती आणि प्रसिद्धी मोहिमा राबविण्यात येत आहेत. आता या सेवा मोबाईल अ‍ॅपच्या स्वरूपातही उपलब्ध असल्यामुळे त्या अधिक सुलभ आणि सर्वसामान्य जनतेसाठी उपयुक्त ठरणार आहेत.

डिजिटल युगातील नागरिकांचा साथीदार

शासनाच्या या उपक्रमामुळे देशातील नागरिक डिजिटल युगात अधिक सुरक्षित, सजग आणि सशक्त बनत असून, “संचार साथी” हा उपक्रम नागरिकांच्या हिताचा खरा साथीदार ठरत आहे.

अधिक माहितीसाठी www.sancharsaathi.gov.in या संकेतस्थळाला भेट द्या.

१५ नोव्हेंबर पासून मुग, उडिद व सोयाबीन खरेदीला प्रारंभ होणार - Mung Udad Soyabean Kharedi from 15th November

2025-11-04T22:35:00.006+05:30

१५ नोव्हेंबर पासून मुग, उडिद व सोयाबीन खरेदीला प्रारंभ होणार

शेतकरी बांधवांनो.... नाफेडची नोंदणी प्रक्रिया सुरू झाली बरं का...!

आधारभूत दर निश्चित; योग्य भाव मिळविण्याची संधी

वाशिम, दि. ४ नोव्हेंबर (जिमाका / www.jantaparishad.com) महाराष्ट्र राज्य सहकारी पणन महासंघ, आणि नाफेड कार्यालयाच्या संयुक्त विद्यमानाने हंगाम २०२५-२६ मध्ये केंद्र शासनाने निश्चित केलेल्या आधारभूत दरानुसार मुग, उडिद व सोयाबीन खरेदी योजना राबविण्यात येत आहे.

या योजनेअंतर्गत शेतकरी नोंदणी प्रक्रिया ३० ऑक्टोबर २०२५ पासून, तर खरेदी प्रक्रिया १५ नोव्हेंबर २०२५ पासून सुरू होणार आहे.

केंद्र शासनाने मुग ८ हजार ७६८ रुपये प्रति क्विंटल,उडिद ७ हजार ८०० रूपये प्रति क्विंटल, सोयाबीन ५ हजार ३२८ रूपये प्रमाणे प्रति क्विंटल आधारभूत दर निश्चित केले आहेत.

राज्य शासनाने वाशिम जिल्ह्यासाठी नाफेड ही केंद्रिय नोडल एजन्सी नियुक्ती करून दिली आहे. शेतकऱ्यांनी आपल्या गावाजवळील नाफेडच्या (नॅशनल ॲग्रिकल्चरल कोऑपरेटिव्ह मार्केटिंग फेडरेशन ऑफ इंडिया लिमिटेड) नजिकच्या खरेदी केंद्रावर जाऊन नोंदणी करणे आवश्यक आहे. नोंदणी करताना आधारकार्ड,बँक पासबुक,चालू वर्षाचा ७/१२ उतारा,पीकपेरा इत्यादी आवश्यक कागदपत्रे सोबत आणावीत.

ऑनलाईन नोंदणी पीओएस मशिनद्वारे केली जाणार असून शेतकऱ्यांची प्रत्यक्ष उपस्थिती आवश्यक आहे. नोंदणी पूर्ण झाल्यानंतर खरेदीसाठी एसएमएस प्राप्त झाल्यावर शेतमाल विक्रीसाठी केंद्रावर आणावा.

या योजनेचा उद्देश शेतकऱ्यांच्या शेतमालाला योग्य भाव मिळवून देणे हा आहे. त्यामुळे जास्तीत जास्त शेतकऱ्यांनी या योजनेचा लाभ घ्यावा, असे आवाहन महाराष्ट्र राज्य सहकारी पणन महासंघाचे अध्यक्ष दत्तात्रय पानसरे, उपाध्यक्ष रोहित निकम, व्यवस्थापकीय संचालक श्रीधर डुबे-पाटील तसेच संचालक मंडळाने केले आहे.

सुक्ष्म नियोजनातून निवडणूक कामकाज यशस्वी पार पाडावे - जिल्हाधिकारी कुंभेजकर - Washim District Collector Kumbhejkar guided - Election work should be carried out successfully through meticulous planning

2025-11-04T22:29:00.000+05:30

सुक्ष्म नियोजनातून निवडणूक कामकाज यशस्वी पार पाडावे - जिल्हाधिकारी कुंभेजकर

कारंजा व मानोरा तालुक्यातील निवडणूक तयारीचा घेतला सविस्तर आढावा

Election work should be carried out successfully through meticulous planning - Washim District Collector Kumbhejkar

वाशिम, दि. ४ नोव्हेंबर (जिमाका / www.jantaparishad.com) स्थानिक स्वराज्य संस्थांच्या निवडणुकीत अधिकारी आणि कर्मचाऱ्यांनी जबाबदारीने तसेच गांभीर्याने काम करावे. विधानसभा आणि लोकसभा निवडणुकीपेक्षा या निवडणुकीचे स्वरूप अधिक व्यापक आहे. त्यामुळे निवडणूक आयोगाचे परिपत्रक आणि हँडबुक नीट वाचावे. आतापासूनच सुक्ष्म नियोजन करून निवडणूक यशस्वीपणे पार पाडावी, असे निर्देश जिल्हाधिकारी योगेश कुंभेजकर यांनी दिले.

आगामी जिल्हा परिषद, पंचायत समिती आणि नगरपालिका निवडणुकीच्या पार्श्वभूमीवर जिल्हाधिकारी कुंभेजकर यांनी आज कारंजा आणि मानोरा तालुक्यातील निवडणूक तयारीचा सविस्तर आज त्यांनी आढावा घेतला.यावेळी ते बोलत होते.

कारंजा येथे झालेल्या बैठकीस उपविभागीय अधिकारी कैलास देवरे, उपजिल्हाधिकारी विरेंद्र जाधव, उपविभागीय पोलिस अधिकारी प्रदीप पाडवी,नगर प्रशासन सह आयुक्त बी.डी. बिक्कड, तहसीलदार कुणाल झाल्टे, अपर मुख्य कार्यकारी अधिकारी किरण कोवे, मुख्याधिकारी महेंद्र वाघमोडे तसेच संबंधित नोडल आणि झोनल अधिकारी उपस्थित होते. मानोरा येथील बैठकीस उपविभागीय अधिकारी कैलास देवरे, उपजिल्हाधिकारी विरेंद्र जाधव, तहसीलदार डॉ. संतोष येवलीकर, गटविकास अधिकारी डॉ. प्रफुल्ल भोरकाडे उपस्थित होते.

जिल्हाधिकारी कुंभेजकर म्हणाले की, कार्यविभाजनाप्रमाणे प्रत्येक अधिकाऱ्याने आपापल्या जबाबदाऱ्या समजून घेतल्या पाहिजेत. झोननिहाय ईव्हीएम सिलींगचे कामकाज करावे लागणार असून वर्कलोड मोठा असणार आहे. त्यामुळे नोडल अधिकाऱ्यांनी अधिनस्त कर्मचाऱ्यांकडून जबाबदारीने आणि प्रामाणिकपणे काम करून घ्यावे. निवडणूक प्रक्रियेत पारदर्शकता, शिस्तबद्धता आणि अचूकता राखण्यासाठी नियोजनावर भर द्यावा, असे त्यांनी स्पष्ट केले.

मतदान केंद्रांवर पायाभूत सुविधा उपलब्ध असाव्यात, जेणेकरून मतदारांची गैरसोय होणार नाही. प्रशिक्षण अधिकारी यांनीच प्रशिक्षण घ्यावे. नोडल अधिकाऱ्यांकडून चोख कामगिरी अपेक्षित आहे. मतदान केंद्रांवर मोबाईल डिपॉझिटची सोय व सीसीटीव्ही कॅमेरे बसवावेत. वार्डनिहाय मतदार जनजागृती मोठ्या प्रमाणात करावी. मतदारांना बीयू व सीयू बाबत माहिती व्हावी यासाठी गणनिहाय जनजागृती करावी. दिव्यांग मतदारांसाठी आवश्यक सुविधा उपलब्ध करून द्याव्यात, असेही त्यांनी सांगितले.

आचारसंहिता कक्षाने अनुषंगिक अहवालांचे फॉरमॅट्स आधीच तयार ठेवावेत. खर्च निरीक्षण पथकांनी उमेदवारांच्या खर्चाची माहिती वेळेत गोळा करून वरिष्ठ कार्यालयास सादर करावी. ईव्हीएम मशिन हाताळणीबाबत प्रशिक्षण घ्यावे आणि आरओ हँडबुक मॅन्युअलचे वाचन करून उजळणी करावी, अशा सूचना जिल्हाधिकाऱ्यांनी दिल्या. निवडणूक निरीक्षकांसाठी निवासाची व्यवस्था सुस्थितीत करून ठेवावी, असेही त्यांनी नमूद केले.

जिल्हाधिकारी पुढे म्हणाले की, वाहतूक व्यवस्था आधीच आरक्षित करून ठेवावी. पोलिस विभागाने संवेदनशील मतदान केंद्रांची ओळख करून घ्यावी आणि प्रत्येक केंद्रावर चोख बंदोबस्त ठेवावा. मतदान केंद्रांवर गर्दी नियंत्रणासाठी प्रतिबंधात्मक आदेश लागू करावेत, याकरिता पोलिस विभागाने सजग राहावे, असेही त्यांनी निर्देश दिले.

बैठकी दरम्यान उपविभागीय अधिकारी कैलास देवरे आणि तहसीलदार कुणाल झाल्टे यांनी निवडणूक नियोजनाचे सादरीकरण केले. तहसीलदार झाल्टे यांनी सांगितले की, कारंजा तालुक्यात एकूण ११० इमारतींमध्ये १४५ मतदान केंद्रे असून १ लाख १९ हजार ४६४ मतदार आहेत. निवडणूक सुरळीत पार पाडण्यासाठी ३ एसएसटी, ४ एफएसटी, ३ व्हीएसटी आणि १ व्हीव्हीटी पथक स्थापन करण्यात येणार असून ६५६ मनुष्यबळ उपलब्ध करण्यात आले आहे.

उपविभागीय अधिकारी देवरे यांनी निवडणूक तयारीचा आढावा, साहित्य साठवण, मनुष्यबळ नियोजन आणि मतदान केंद्रांवरील उपाययोजनांची माहिती दिली. त्यांनी सांगितले की, या कामकाजासाठी नियुक्त प्रत्येक अधिकारी आणि कर्मचारी उत्कृष्टपणे कार्य करतील.

मानोरा येथील सादरीकरण तहसीलदार डॉ. येवलीकर यांनी केले. त्यांनी सांगितले की, तालुक्यात एकूण १४९ मतदान केंद्रे असून १ लाख २३ हजार ११५ मतदार आहेत. निवडणुकीच्या सुरळीत पार पाडण्यासाठी ४ एसएसटी, ३ एफएसटी, ३ व्हीएसटी आणि १ व्हीव्हीटी पथक स्थापन करण्यात आले असून ८२५ कर्मचाऱ्यांचे मनुष्यबळ नियोजित केले आहे.

ईव्हीएम नोडल अधिकारी विरेंद्र जाधव यांनी ईव्हीएम व्यवस्थापन, मतपत्रिका, टपाली मतदान आणि मतदान केंद्रनिहाय बीयू-सियू सुनिश्चित करणे याबाबत सविस्तर माहिती दिली.

बैठकीला जिल्हास्तरीय नोडल अधिकारी, विविध विभागांचे अधिकारी आणि कर्मचारी उपस्थित होते. जिल्हाधिकारी कुंभेजकर यांच्या सुक्ष्म नियोजनात्मक मार्गदर्शनामुळे निवडणूक कामकाज शिस्तबद्ध, पारदर्शक आणि यशस्वी पार पडेल, असा विश्वास अधिकाऱ्यांनी व्यक्त केला.

शेतकऱ्यांनी नाफेडच्या ई-समृद्धी ॲपवर नोंदणी करून किमान आधारभूत योजनेचा लाभ घ्यावा - register on NAFED's e-Samriddhi app and avail the benefits of the Minimum Basic Income Scheme

2025-11-04T22:24:00.000+05:30

शेतकऱ्यांनी नाफेडच्या ई-समृद्धी ॲपवर नोंदणी करून किमान आधारभूत योजनेचा लाभ घ्यावा

जिल्हाधिकारी कुंभेजकर यांचे आवाहन

वाशिम, दि. ४ नोव्हेंबर (जिमाका / www.jantaparishad.com) - महाराष्ट्र राज्य सहकारी पणन महासंघ, मुंबई व नाफेड कार्यालय, मुंबई यांच्या संयुक्त विद्यमानाने हंगाम २०२५-२६ मध्ये केंद्र शासनाने निश्चित केलेल्या आधारभूत किंमतीनुसार मुग, उडिद व सोयाबीन खरेदी प्रक्रियेस १५ नोव्हेंबर २०२५ सुरुवात होणार आहे.

केंद्र शासनाने निश्चित केलेले आधारभूत दर पुढीलप्रमाणे आहेत:

मुग – ८ हजार ७६८ प्रति क्विंटल,
उडिद – ७ हजार ८०० प्रति क्विंटल,
सोयाबीन – ५ हजार ३२८ प्रति क्विंटल

सद्यस्थितीत वाशिम जिल्ह्यात राज्य पणन महासंघाचे ३ व विदर्भ पणन महासंघाचे ४ केंद्रांवर शेतकरी नोंदणीची प्रक्रिया सुरू झाली आहे. तसेच महाराष्ट्र राज्य कृषि पणन मंडळ, पुणे यांच्या माध्यमातून ८ शेतकरी उत्पादक कंपनींचे प्रस्ताव नाफेडकडे मंजुरीसाठी पाठविण्यात आले आहेत.

ही योजना शेतकऱ्यांना त्यांच्या शेतमालाला योग्य भाव मिळावा या उद्देशाने राबविण्यात येत असून सर्व शेतकऱ्यांनी नाफेडच्या नजीकच्या खरेदी केंद्रावर जाऊन ७/१२ उतारा, आधारकार्ड व बँक पासबुकसह नोंदणी करणे आवश्यक आहे.

नोंदणी प्रक्रिया पीओएस मशीनद्वारे ऑनलाईन पद्धतीने केली जाणार असून नोंदणीसाठी प्रत्यक्ष उपस्थिती अनिवार्य आहे.

गर्दी टाळण्यासाठी नाफेडने विकसित केलेल्या “ई-समृद्धी” मोबाइल ॲप च्या माध्यमातूनही शेतकरी घरबसल्या नोंदणी करू शकतात. हे ॲप गुगल प्ले स्टोअरवर उपलब्ध असून मोबाईलद्वारे सोप्या पद्धतीने नोंदणी करता येईल.

शेतकऱ्यांनी ई-समृद्धी ॲपद्वारे स्व-नोंदणी करून केंद्र शासनाच्या किमान आधारभूत किंमत खरेदी योजनेचा लाभ घ्यावा.असे आवाहन जिल्हाधिकारी योगेश कुंभेजकर यांनी केले आहे.

नगर पालिका निवडणुका २०२५ घोषित ! - Nagar Parishad Election 2025 details

2025-11-04T22:17:00.002+05:30

नगर पालिका निवडणुका २०२५ घोषित !

२ डिसेंबर रोजी मतदान; ३ डिसेंबरला मतमोजणी

आजपासून आचारसंहिता लागू !

इत्यंभूत माहिती पुढील प्रमाणे

(News Source : https://mahasamvad.in/)

मुंबई, दि. ०४ (www.jantaparishad.com) : राज्यातील 246 नगरपरिषदा व 42 नगरपंचायतींच्या (एकूण 288) सदस्यपदासाठी आणि थेट अध्यक्षपदाच्या सार्वत्रिक निवडणुकांकरिता 2 डिसेंबर 2025 रोजी मतदान; तर 3 डिसेंबर 2025 रोजी मतमोजणी होणार आहेत. या सर्व नगरपरिषदा व नगरपंचायतींच्या कार्यक्षेत्रात आजपासून आचारसंहिता लागू झाल्याची घोषणा राज्य निवडणूक आयुक्त दिनेश वाघमारे यांनी पत्रकार परिषदेत केली. सचिवालय जिमखान्यात झालेल्या पत्रकार परिषदेत ते बोलत होते. यावेळी आयोगाचे सचिव सुरेश काकाणी यावेळी उपस्थित होते.

राज्य निवडणूक आयुक्त वाघमारे यांनी सांगितले की, या निवडणुकांसाठी नामनिर्देशनपत्र दाखल करण्यास 10 नोव्हेंबर 2025 पासून सुरुवात होईल. नामनिर्देशपत्र दाखल करण्याची अंतिम तारीख 17 नोव्हेंबर 2025 असेल. नामनिर्देशनपत्रांची छाननी 18 नोव्हेंबर 2025 रोजी होईल. निवडणूक निर्णय अधिकाऱ्यांच्या निर्णयाविरुद्ध अपील नसलेल्या ठिकाणी 21 नोव्हेंबर 2025 पर्यंत; तर अपील असलेल्या ठिकाणी 25 नोव्हेंबर 2025 पर्यंत नामनिर्देशनपत्रे मागे घेता येतील. 2 डिसेंबर 2025 रोजी सकाळी 7.30 ते सायंकाळी 5.30 पर्यंत मतदानाची वेळ असेल. मतमोजणी सर्व संबंधित ठिकाणी 3 डिसेंबर 2025 रोजी सकाळी 10 वाजल्यापासून सुरु होईल. निकाल जाहीर झाल्यानंतर नगरपरिषदा व नगरपंचायतींच्या क्षेत्रापुरती आचारसंहिता संपुष्टात येईल.

राज्यातील एकूण 247 पैकी 246 नगरपरिषदांसाठी ही निवडणूक होत आहे. निवडणूक होत असलेल्यांपैकी 10 नवनिर्मित नगरपरिषदा आहेत. उर्वरित सर्व 236 नगरपरिषदांची मुदत संपली आहे. न्यायालयीन प्रकरणामुळे पातूर (जि. अकोला) नगरपरिषदेची निवडणूक प्रक्रिया प्रलंबित आहे. त्याचबरोबर एकूण 147 पैकी 42 नगरपंचायतींसाठी निवडणूक होत आहे. निवडणूक होत असलेल्यांपैकी 15 नवनिर्मित; तर उर्वरित सर्व 27 नगरपंचायतींची मुदत यापूर्वीच संपली आहे. 105 नगरपंचायतींची मुदत अद्याप संपलेली नाही. निवडणुकांच्या तयारीच्या अनुषंगाने राजकीय पक्षांच्याही प्रतिनिधींशीही संवाद साधण्यात आला असल्याचे वाघमारे यांनी सांगितले.

एकापेक्षा अधिक मते देणे अपेक्षित

नगरपरिषदेच्या निवडणुकीत बहुसदस्यी पद्धती असून एका प्रभागात सर्वसाधारणपणे दोन जागा असतात. एकूण सदस्य संख्येचा विषम आकडा असलेल्या नगरपरिषदेत एका प्रभागात तीन जागा असतात. त्याचबरोबर थेट अध्यक्षपदासाठीदेखील मतदान होत असल्याने साधारणत: एका मतदाराने तीन ते चार जागांसाठी मत देणे अपेक्षित आहे. एका नगरपरिषदेची एकूण सदस्य संख्या कमीत कमी 20 ते 75 पर्यंत असते.

नगरपंचायतीची निवडणूक एकसदस्यीय पद्धतीने होत असली तरी नगरपंचायतीच्या मतदारानेदेखील दोन मते देणे अपेक्षित आहे. एक मत सदस्यपदासाठी; तर दुसरे मत थेट अध्यक्षपदासाठी द्यावे लागेल. सर्व नगरपंचायतीमध्ये सदस्यपदाच्या 17 जागा असतात.

जात वैधता प्रमाणपत्राचा पुरावा

राखीव प्रभागातून निवडणूक लढविणाऱ्या उमेदवारांना जात प्रमाणपत्र व जातवैधता प्रमाणपत्र सादर करणे आवश्यक आहे; परंतु, जातवैधता प्रमाणपत्र उपलब्ध नसल्यास त्यासाठी पडताळणी समितीकडे केलेल्या अर्जाची पोहोच पावती नामनिर्देशनपत्रासोबत सादर करण्याची मुभा देण्यासाठी शासनाने संबंधित अधिनियमात दुरुस्ती केली आहे. मात्र, असा उमेदवार निवडून आल्याचे घोषित झाल्याच्या दिनांकापासून त्याला सहा महिन्यांच्या आत जातवैधता प्रमाणपत्र सादर करणे बंधनकारक आहे, अन्यथा त्यांची निवड भूतलक्षी प्रभावाने रद्द करण्याची संबंधित अधिनियमात तरतूद करण्यात आली आहे, असेही वाघमारे यांनी सांगितले.

नामनिर्देशनपत्रासाठी संकेतस्थळ

स्थानिक स्वराज्य संस्थाच्या निवडणुकांतील उमेदवारांना नामनिर्देशनपत्र व शपथपत्र दाखल करण्यासाठी राज्य निवडणूक आयोगाने https://mahasecelec.in हे संकेतस्थळ विकसित केले आहे. त्यावर नोंदणी करून नगरपरिषद व नगरपंचायतीच्या निवडणुकीसाठी उमेदवारांना नामनिर्देशनपत्र दाखल करता येईल. एका नोंदणीद्वारे संबंधित प्रभागात एका उमेदवारास चार नामनिर्देशनपत्र दाखल करता येऊ शकतील. संकेतस्थळावर संपूर्ण नामनिर्देशनपत्र व शपथपत्र भरल्यानंतर त्याची मुद्रित प्रत काढून त्यावर स्वाक्षरी करावी लागेल. त्यानंतर ती प्रत विहित मुदतीत संबंधित निवडणूक निर्णय अधिकाऱ्याकडे दाखल करणे आवश्यक राहील.

मतदान केंद्र आणि ईव्हीएम

नगरपरिषदा व नगरपंचायतींच्या निवडणुकांसाठी एकूण 1 कोटी 7 लाख 3 हजार 576 मतदार असून त्यासाठी सुमारे 13 हजार 355 मतदान केंद्रांची व्यवस्था करण्यात आली आहे. या निवडणुकांसाठी पुरेशा इलेक्ट्रॉनिक मतदान यंत्रांची व्यवस्था करण्यात आली आहे. त्यात 13 हजार 726 कंट्रोल युनिट आणि 27 हजार 452 बॅलेट युनिटची उपलब्धता केली आहे. अन्य निवडणुकांच्यादृष्टीनेदेखील पर्यायी व्यवस्था करण्यात आली आहे.

उमेदवारांसाठी खर्च मर्यादा

नगरपरिषदा व नगरपंचायतींच्या निवडणुकांतील थेट अध्यक्ष आणि सदस्यपदाच्या उमेदवारांसाठी राज्य निवडणूक आयोगाने निवडणूक खर्च मर्यादा वाढविली आहे. ती पुढीलप्रमाणे: ‘अ’ वर्ग नगरपरिषद: थेट अध्यक्ष- 15,00,000, सदस्य- 5,00,000. ‘ब’ वर्ग नगरपरिषद: थेट अध्यक्ष- 11,25,000, सदस्य- 3,50,000 आणि ‘क’ वर्ग नगरपरिषद: थेट अध्यक्ष- 7,50,000, सदस्य- 2,50,000. नगरपंचायत: थेट अध्यक्ष- 6,00,000, सदस्य- 2,25,000.

मतदारांसाठी संकेतस्थळ

नगरपरिषद व नगरपंचायतीच्या निवडणुकीसाठी मतदाराला मतदार यादीतील आपले नाव शोधण्याकरिता https://mahasecvoterlist.in हे संकेत स्थळ विकसित केले आहे.

प्रभागनिहाय मतदार यादी प्रसिद्ध झाल्यानंतरच नाव शोधता येईल. संकेतस्थळावरील सर्च नेम इन वोटर लिस्ट यावर क्लिक करून नाव किंवा मतदार ओळखपत्र क्रमांक नमूद करुन मतदार यादीतील आपले नाव शोधता येईल. मतदान केंद्रनिहाय मतदार यादी प्रसिध्द झाल्यानंतर मतदार यादीतील आपल्या नावासोबतच आपले मतदान केंद्रदेखील शोधता येईल.

मतदारांसाठी नवीन मोबाईल ॲप

मतदारांना मतदार यादीत नाव शोधणे अधिक सुलभ व्हावे, यासाठी नवीन मोबाईल ॲप विकसित केले आहे. मोबाईल ॲपच्या माध्यमातून मतदारांना आपल्या नावाबरोबरच आपले मतदान केंद्रदेखील शोधता येईल. उमेदवारांना नामनिर्देशनपत्रासोबत शपथपत्रेही दाखल करावी लागतात. त्यातून मतदारांना उमेदवारांची गुन्हेगारीविषयक पार्श्वभूमी, शैक्षणिक व आर्थिक परिस्थिक समजू शकते. ही माहितीसुद्धा या ॲपमधून मिळू शकेल.

मतदार जागृती

नगरपरिषदा व नगरपंचायतींच्या निवडणुकांमध्ये मतदानाचे प्रमाण वाढविण्यासाठी मोठ्या प्रमाणावर मतदार जागृती करण्याचे आदेश संबंधित सर्व जिल्हाधिकारी आणि नगरपरिषदा व नगरपंचायतींच्या मुख्यकार्यकारी अधिकाऱ्यांना दिले आहेत. पारंपरिक प्रसारमाध्यमांबरोबरच नवीन माध्यमांचा कौशल्यपूर्ण वापर करण्याबाबत आयोगाने 12 जून 2025 रोजी पत्राद्वारे सर्वांना निर्देश दिले आहेत. मतदार जागृतीसंदर्भातील सर्व सूचना व निर्देश मार्गदर्शक स्वरुपात असून, स्थानिक पातळीवर काही नावीन्यपूर्ण उपक्रम सुचल्यास तेही आपापल्या स्तरावर राबविण्याबाबत कळविले आहे.

संभाव्य दुबार नावांबाबत दक्षता

स्थानिक स्वराज्य संस्थांच्या मतदार यादीतील संभाव्य दुबार मतदाराच्या नावासमोर (**) असे चिन्ह नमूद करण्यात येत. असे मतदार कुठल्या मतदान केंद्रावर मतदान करणार आहेत, याबाबत त्यांना आवाहन करण्यात येईल. या आवाहनाला प्रतिसाद मिळाल्यानंतर अशा मतदारांकडून तो कोणत्या मतदान केंद्रावर मतदान करणार आहे, याबाबत विहित नमुन्यात अर्ज भरून घेतला जाईल. त्याने नमूद केलेले मतदान केंद्र वगळता त्यास उर्वरित कोणत्याही मतदान केंद्रावर मतदान करता येणार नाही; परंतु प्रतिसाद न मिळाल्यास संभाव्य दुबार नाव असलेला मतदार मतदान केंद्रावर मतदानासाठी आल्यास त्याच्याकडून त्याने इतर कोणत्याही मतदान केंद्रावर मतदान केले नसल्याबाबत किंवा करणार नसल्याचे विहित नमुन्यातील हमीपत्र लिहून घेण्यात येईल. त्याचबरोबर त्याची काटेकोरपणे ओळख पटल्यानंतरच त्याला संबंधित मतदान केंद्रावर मतदान करण्याची मुभा देण्यात येईल.

मतदान केंद्रावरील सुविधा

मतदान केंद्रावर दिव्यांग, तान्ह्या बाळासह असणाऱ्या महिला, गरोदर महिला, ज्येष्ठ नागरिक आदींना प्राधान्याने मतदान करून दिले जाईल. दिव्यांग आणि ज्येष्ठ नागरिकांसाठी मतदान केंद्रावर कायमस्वरुपी रॅम्पची व्यवस्था नसल्यास तात्पुरती सुविधा उभारली जाईल. व्हिलचेअरचीही व्यवस्था असेल. मतदान केंद्रावर विजेची व्यवस्था, पिण्याच्या पाण्याची, सावलीची सुविधा, शौचालयाची व्यवस्था उपलबद्ध करून दिली जाईल. संबंधित ठिकाणी कृष्ठरोग्यांसाठी वेगळे वसतिगृह/ आश्रम असल्यास त्यांच्यासाठी स्वतंत्र मतदान केंद्र उभारण्यास हरकत नसेल. तिथे उपलब्धतेनुसार डॉक्टरांची नेमणूक केली जाईल. सर्व मतदान केंद्रांमध्ये किमान सुविधा असणे आवश्यकच असेल; परंतु, शक्य असेल तिथे आदर्श मतदान केंद्र उभारण्याचा प्रयत्न असेल. महिला मतदारांची संख्या जास्त असलेल्या ठिकाणी सर्व निवडणूक अधिकारी- कर्मचारी आणि पोलीस कर्मचारी महिला असतील, असे मतदान केंद्र ‘पिंक मतदान केंद्र’ म्हणून ओळखले जाईल. मतदान केंद्राच्या आत मतदारांना मोबाईल नेण्यास बंदी असेल. मतदान केंद्राच्या इमारतीमध्ये; परंतु, मतदान केंद्राच्या बाहेर मतदारांना मोबाईल जमा करण्यासाठी शक्य तिथे कक्ष असेल.

मनुष्यबळाची व्यवस्था

नगरपरिषद व नगरपंचायतींच्या या निवडणुकांसाठी 288 निवडणूक निर्णय अधिकारी आणि 288 सहायक निवडणूक निर्णय अधिकाऱ्यांची आवश्यकता असून, त्याची पूर्तता करण्यात आली आहे. साधारणत: 66,775 इतक्या निवडणूक अधिकारी कर्मचाऱ्यांची गरज भासेल, ती देखील व्यवस्था झाली आहे. महसूल विभागीय आयुक्त आणि सर्व जिल्हाधिकाऱ्यांना आवश्यक मनुष्यबळाबाबत निर्देश देण्यात आले आहेत. राज्याच्या मुख्य सचिवांसोबतदेखील बैठका आयोजित करून मनुष्यबळाबाबत नियोजन केले आहे.

आचारसंहिता

निवडणूक कार्यक्रम जाहीर झाल्यापासून संबंधित नगरपरिषदा व नगरपंचायतींच्या क्षेत्रात आचारसंहिता लागू झाली आहे. नगरपरिषदा व नगरपंचायतींच्या कार्यक्षेत्रात ही आचारसंहिता लागू असली तरी अन्य ठिकाणीदेखील नगरपरिषदा व नगरपंचायतींच्या मतदारांवर प्रभाव पाडणारी घोषणा किंवा कृती करता येणार नाही. आचारसंहिता लागू झाल्यामुळे शासनाला नगरपरिषदा व नगरपंचायतींच्या कार्यक्षेत्राशी संबंधित धोरणात्मक निर्णय घेता येणार नाहीत.नैसर्गिक आपत्तीबाबत करावयाच्या उपाययोजना किंवा मदतीसंदर्भात आचारसंहितेची आडकाठी असणार नाही. आचारसंहिता आणि कायदा व सुव्यवस्थेसंदर्भात राज्य निवडणूक आयोगाने 4 नोव्हेंबर 2025 दोन स्वतंत्र आदेश निर्गमित केले आहेत.

जिल्हानिहाय नगरपरिषदा व नगरपंचायती (न.पं.)

पालघर- डहाणू, जव्हार, पालघर आणि वाडा (न.पं). रायगड- अलिबाग, कर्जत, खोपोली, महाड, माथेरान, मुरुड- जंजिरा, पेण, रोहा, श्रीवर्धन आणि उरण (न.प.). रत्नागिरी– चिपळूण, देवरुख (न.पं.), गुहागर, खेड, लांजा (न.पं.), राजापूर आणि रत्नागिरी. सिंधुदुर्ग- कणकवली (न.पं.), मालवण, सावंतवाडी आणि वेंगुर्ला. ठाणे- अंबरनाथ आणि कुळगाव- बदलापूर. अहिल्यानगर- देवळाली- प्रवरा, जामखेड, कोपरगाव, नेवासा (न.पं.) (न.पं.), पाथर्डी, राहाता, राहूरी, संगमनेर, शेवगाव, शिर्डी, श्रीगोंदा आणि श्रीरामपूर. धुळे- दोंडाईचा-वरवाडे, पिंपळनेर, सिंदखेडा (न.पं.) आणि शिरपूर- वरवाडे. जळगाव- जामनेर, अमळनेर, भडगाव, भुसावळ, चाळीसगाव, चोपडा, धरणगांव, एरंडोल, फैजपूर, मुक्ताईनगर (न.पं.), नशिराबाद, पाचोरा, पारोळा, रावेर, सावदा, शेंदूणी (न.पं.), वरणगाव आणि यावल. नंदूरबार- शहादा, नंदुरबार, नवापूर आणि तळोदा. नाशिक- भगुर, मनमाड, नांदगाव, सटाणा, सिन्नर, येवला, चांदवाड, इगतपूरी, ओझर, पिंपळगांव- बसवंत आणि त्र्यंबक. कोल्हापूर- आजरा (न.पं.), चंदगड (न.पं.), गडहिंग्लज, हातकणंगले, हुपरी, जयसिंगपूर, कागल, कुरुंदवाड, मलकापूर, मुरगूड, पन्हाळा, शिरोळ आणि वडगाव. पुणे- आळंदी, बारामती, भोर, चाकण, दौंड, फुरसुंगी- उरळी देवाची, इंदापूर, जेजूरी, जुन्नर, लोणावळा, मालेगाव बु. (न.पं.), मंचर (न.पं.), राजगुरुनगर, सासवड, शिरुर, तळेगाव- दाभाडे आणि वडगाव (न.पं.). सांगली- आष्टा, आटपाडी (न.पं.), इस्लामपूर, जत, पळूस, शिराळा (न.पं.), तासगाव आणि विटा. सातारा- कराड, महाबळेश्वर, मलकापूर, मेढा (न.पं.), म्हसवड, पाचगणी, फलटण, रहिमतपूर, सातारा आणि वाई. सोलापूर- अक्कलकोट, अकलूज, अनगर (न.पं.), बार्शी, दुधनी, करमाळा, कुर्डूवाडी, मैदर्गी, मंगळवेढा, मोहोळ, पंढरपूर आणि सांगोला. बीड- अंबेजोगाई, बीड, धारुर, गेवराई, माजलगाव आणि परळी- वैजनाथ. छत्रपती संभाजीनगर- फुलब्री (न.पं.), गंगापूर, कन्नड, खुलताबाद, पैठण, सिल्लोड आणि वैजापूर. धाराशिव- भूम, कळंब, मुरुम, नळदुर्ग, धाराशिव, परंडा, तुळजापूर आणि उमरगा. हिंगोली- बसमतनगर, हिंगोली आणि कळमनुरी. जालना- अंबड, भोकरदन आणि परतूर. लातूर- अहमदपूर, औसा, निलंगा, रेनापूर (न.पं.) आणि उदगीर. नांदेड- बिलोली, देगलूर, धर्माबाद, हदगाव, हिमायतनगर (न.पं.), कंधार, कुंडलवाडी, मुदखेड, मुखेड, उमरी, भोकर, किनवट आणि लोहा. परभणी- गंगाखेड, जिंतूर, मानवत, पाथरी, पूर्णा, सेलू आणि सोनपेठ. अकोला- अकोट, बाळापूर, बार्शी- टाकळी, हिवरखेडा, मूर्तिजापूर आणि तेल्हारा. अमरावती- अचलपूर, अंजनगाव सूर्जी, चांदूरबाजार, चांदूर रेल्वे, चिखलदरा, दर्यापूर, धामणगाव रेल्वे, धारणी (न.पं.), मोर्शी, नांदगाव खंडेश्वर (न.पं.), शेंदूरजनाघाट आणि वरुड. बुलढाणा- बुलढाणा, चिखली, देऊळगाव राजा, जळगाव जामोद, खामगाव, लोणार, मलकापूर, मेहकर, नांदूरा, शेंगाव आणि सिंदखेडराजा. वाशिम- कारंजा, मालेगाव (न.पं.), मंगरुळपीर, रिसोड आणि वशीम. यवतमाळ- आर्णी, दारव्हा, दिग्रस, घाटंजी, पुसद, उमरखेड, वणी, यवतमाळ, ढाणकी (न.पं.), नेर- नबाबपूर आणि पांढरकवडा. भंडारा- पवनी, साकोली शेंदूरवाफा, तुमसर आणि भंडारा. चंद्रपूर- बल्लारपूर, भद्रावती, भिसी (न.पं.), ब्रह्मपूरी, चिमूर, गडचांदूर, घुग्घुस, मूल, नागभीड, राजूरा आणि वरोरा. गडचिरोली- आरमोरी, देसाईगंज आणि गडचिरोली. गोंदिया- गोंदिया, गोरेगाव (न.पं.), सालेकसा (न.पं.) आणि तिरोडा. नागपूर- बहादुरा (न.पं.), बेसा पिपळा (न.पं.), भिवापूर (न.पं.), बुटिबोरी, डिगडोह, कळमेश्वर- ब्रह्मणी, कामठी, कांद्री- कन्हान (न.पं.), काटोल, खापा, कोंढाळी (न.पं.), महादुला (न.पं.), मोहपा, मौदा (न.पं.), नरखेड, निलडोह (न.पं.), पारशिवणी (न.पं.), रामटेक, सावनेर, उमरेड, वानाडोंगरी, बिडगाव- तरोडी (खू) पांढुर्णा (न.पं.), गोधणी रेल्वे (न.पं.), कन्हान- पिपरी, मोवाड, वाडी आणि येरखेडा (न.पं.). वर्धा- आर्वी, देवळी, हिंगणघाट, पुलगाव, सिंदी रेल्वे आणि वर्धा.

महत्वाच्या तारखा

नामनिर्देशनपत्र दाखल करण्यास सुरुवात- 10 नोव्हेंबर 2025
नामनिर्देशनपत्रची दाखल करण्याची अंतिम मुदत- 17 नोव्हेंबर 2025
नामनिर्देशनपत्रांची छाननी- 18 नोव्हेंबर 2025
अपील नसलेल्या ठिकाणी नामनिदेशनपत्र माघारीची अंतिम मदुत- 21 नोव्हेंबर 2025
अपील असलेल्या ठिकाणी नामनिदेशनपत्र माघारीची अंतिम मुदत- 25 नोव्हेंबर 2025
मतदानाचा दिवस- 02 डिसेंबर 2025
मतमोजणीचा दिवस- 03 डिसेंबर 2025

एकूण मतदार व मतदान केंद्र

पुरुष मतदार- 53,79,931
महिला मतदार- 53,22,870
इतर मतदार- 775
एकूण मतदार- 1,07,03,576
एकूण मतदान केंद्र- सुमारे 13,355

एकूण जागा आणि आरक्षित जागा

निवडणूक होत असलेल्या नगरपरिषदा- 246
निवडणूक होत असलेल्या नगरपंचायती- 42
एकूण प्रभाग- 3,820
एकूण जागा- 6,859
महिलांसाठी जागा- 3,492
अनुसूचित जातींसाठी जागा- 895
अनुसूचित जमातींसाठी जागा- 338
नागरिकांचा मागासवर्ग प्रवर्गासाठी जागा- 1,821

नगरपरिषद/ नगरपंचायतींची जिल्हा व विभागनिहाय संख्या

कोकण विभाग एकूण– 27

पालघर- 4
रायगड- 10
रत्नागिरी- 7
सिंधुदूर्ग- 4
ठाणे- 2

नाशिक विभाग एकूण– 49

अहिल्यानगर- 12
धुळे- 4
जळगाव- 18
नंदूरबार- 4
नाशिक- 11

पुणे विभाग एकूण– 60

कोल्हापूर- 13
पुणे- 17
सांगली- 8
सातारा- 10
सोलापूर- 12

छत्रपती संभाजीनगर एकूण- 52

छत्रपती संभाजीनगर- 7
बीड- 6
धाराशिव- 8
हिंगोली- 3
जालना- 3
लातूर- 5
नांदेड- 13
परभणी- 7

अमरावती विभाग एकूण– 45

अमरावती- 12
अकोला- 6
बुलढाणा- 11
वाशीम- 5
यवतमाळ- 11

नागपूर विभाग एकूण– 55

भंडारा- 4
चंद्रपूर- 11
गडचिरोली- 3
गोंदिया- 4
नागपूर- 27
वर्धा- 6

प्री-मॅट्रिक शिष्यवृत्तीसाठी मुदतवाढ - Extension for pre-matric scholarship

2025-10-30T18:30:00.005+05:30

प्री-मॅट्रिक शिष्यवृत्तीसाठी मुदतवाढ

वाशिम, दि. 30 ऑक्टोबर (जिमाका) - नॅशनल स्कॉलरशिप पोर्टल (National Scholarship Portal) वरील केंद्र पुरस्कृत प्री-मॅट्रिक शिष्यवृत्ती योजनां (Pre-Matric scholarship) च्या विविध प्रक्रियांमध्ये मुदतवाढ देण्यात आली आहे.

सुधारित वेळापत्रक पुढीलप्रमाणे

अर्ज सादर करण्याची अंतिम तारीख: १५ नोव्हेंबर २०२५
आयएनओ स्तर (एल१) तपासणीची अंतिम तारीख: २५ नोव्हेंबर २०२५
डीएनओ/एसएनओ स्तर (एल२) तपासणीची अंतिम तारीख: ५ डिसेंबर २०२५

ही मुदतवाढ विद्यार्थ्यांना शिष्यवृत्ती योजनांचा लाभ घेण्यासाठी अधिक वेळ उपलब्ध व्हावा या उद्देशाने करण्यात आली आहे. वाशिम जिल्ह्यातील निवड झालेल्या टॉप क्लास शाळा/महाविद्यालयांनी, शैक्षणिक संस्था, विद्यार्थी आणि पालकांनी वरील वेळापत्रकानुसार अर्ज व आवश्यक तपासणी प्रक्रिया वेळेत पूर्ण करावी. यामुळे कोणताही विद्यार्थी शिष्यवृत्तीच्या लाभापासून वंचित राहणार नाही, असे आवाहन दीपा हेरोळे, सहाय्यक संचालक, इतर मागास बहुजन कल्याण विभाग, वाशिम यांनी केले आहे.

साप्ताहिक जनता परिषद अंक - ४० वर्ष - ४७ दिनांक - ३० ऑक्टोबर २०२५ Weekly Janta Parishad 40-47-30-10-2025

2025-10-30T15:56:00.002+05:30

साप्ताहिक जनता परिषद

अंक - ४० वर्ष - ४७ दिनांक - ३० ऑक्टोबर २०२५

Weekly Janta Parishad

Edition : 40 Year : 47 Date : 30-10-2025

राणी दुर्गावती आदिवासी महिला सक्षमीकरण योजना Rani Duragawati Adivasi Mahila Sakshamikaran Yojana

2025-09-29T19:06:00.000+05:30

राणी दुर्गावती आदिवासी महिला सक्षमीकरण योजना

Rani Duragawati Adivasi Mahila Sakshamikaran Yojana

महिला सक्षमीकरणासाठी आणखी एक पाऊल

(Source - https://mahasamvad.in/)

राज्य शासन महिला सक्षमीकरणाला प्राधान्य देत विविध सामाजिक व आर्थिक योजनांची अंमलबजावणी करत आहे. याच पार्श्वभूमीवर आदिवासी विकास विभागाने आदिवासी महिलांच्या सशक्तीकरणासाठी ‘राणी दुर्गावती आदिवासी महिला सक्षमीकरण’ योजना (Rani Duragawati Adivasi Mahila Sakshamikaran Yojana) सुरू केली आहे.

राणी दुर्गावती नाव हे भारतीय इतिहासात शौर्य, पराक्रम व दूरदृष्टीच्या प्रशासनासाठी आदराने घेण्यात येते. राणी दुर्गावती या आदिवासी समाजातील गोंड वंशाच्या अत्यंत पराक्रमी राणी होत्या, मोगलांशी करण्यात आलेल्या संघर्षात स्त्रीशक्तीचे प्रतिक म्हणून आजही त्यांच्या कार्यासाठी त्यांना स्मरणात ठेवले जाते. त्यांच्या गौरवशाली इतिहासाला स्मरण करत आपल्या देशातील अनेक राज्यांनी त्यांच्या नावाने कल्याणकारी योजना सुरु केल्या आहेत.

‘राणी दुर्गावती आदिवासी महिला सक्षमीकरण’ योजनेंतर्गत वैयक्तिक महिलांना व्यवसाय सुरु करण्यासाठी ५० हजार रुपयापर्यंतचे अनुदान दिले जाते. त्याचबरोबर सामूहिकरित्या व्यवसाय सुरु करण्यासाठी म्हणजेच, महिला बचत गट किंवा सामूहिक गटांना व्यवसाय सुरु करण्यासाठी ७.५ लाख पर्यंतचे अनुदान या योजनेद्वारे दिले जाते.

महिलांना स्वावलंबी बनविणे, त्यांना व्यवसाय सुरू करण्याची संधी उपलब्ध करून देणे आणि समाजातील आर्थिक-सामाजिक प्रगतीत त्यांचा सहभाग सुनिश्चित करणे हा योजनेचा मुख्य उद्देश आहे. या योजनेंतर्गत पात्र महिलांना स्वतःचा उद्योग, व्यवसाय किंवा उपक्रम सुरू करण्यासाठी आर्थिक साहाय्य मिळणार आहे.

शासनाच्या विविध विभागांमार्फत समाजाच्या विकासासाठी वैयक्तिक तसेच सामूहिक लाभाच्या अनेक योजना राबविण्यात येतात. या योजनांचा लाभ आदिवासी समाजालाही दिला जातो. त्याचबरोबर, आदिवासी घटक कार्यक्रमाखाली आदिवासी विकास विभाग विविध योजना राबवितो. केंद्र, राज्य , जिल्हा पातळीवरील योजनांसाठी इतर प्रशासकीय विभागांना आदिवासी विकास विभागाकडून पूरक निधी वितरित केला जातो. केंद्रवर्ती अर्थसंकल्प योजनेंतर्गत आदिवासी लाभार्थ्यांना वैयक्तिक तसेच सामुहिक योजनांसाठी आर्थिक साहाय्य प्रदान केले जाते. उत्पन्न, उत्पन्न वाढीच्या योजना, साधनसंपत्ती विकासाच्या योजना, आदिवासी कल्याणाच्या योजना यासाठी सर्वसाधारण आदिवासी लाभार्थ्यांना ८५ टक्के अर्थसहाय्य तर आदिम जमातीसाठी १०० टक्के अर्थसाहाय्य दिले जाते. शासकीय योजनांमधील अनुदानाव्यतिरिक्त लाभार्थी हिस्सा भरणे शक्य नसल्यामुळे अनेक आदिवासी महिला उत्पन्न वाढीच्या शासकीय योजनांचा लाभ घेऊ शकत नाहीत. ही बाब लक्षात घेता, केंद्रवर्ती अर्थसंकल्प योजनेंतर्गत आदिम जमातीच्या तरतुदीच्या अधीन तयार केलेल्या ‘राणी दुर्गावती आदिवासी महिला सक्षमीकरण’ योजनेत केंद्रवर्ती अर्थसंकल्प योजनेसाठी आदिवासी महिलांना आर्थिक साहाय्य देताना अनुदानाची रक्कम १०० टक्के ठेवण्यात येईल.

वैयक्तिक योजनेमध्ये कृषी आणि पशुपालन: शेळी-म्हैस वाटप, गाय-म्हैस खरेदी, कुक्कुटपालन साहित्य आणि कृषी पंप खरेदी, लहान व्यवसायाकरिता शिलाई मशीन, चहा स्टॉल, भाजीपाला स्टॉल, फुलांचा आणि गुच्छांचा स्टॉल, पत्रावळी बनवण्याचे यंत्र, मासेमारी साधनावर अर्थसाहाय्य देण्यात येणार आहे. महिला बचतगट म्हणून तुम्ही एकत्रितपणे व्यवसाय सुरू करू शकतात. यासाठी ७.५ लाख अनुदान देण्यात येते. मसाला कांडप यंत्र किंवा आटा चक्की,शुद्ध पेयजल युनिट,बेकरी उत्पादनासाठी साहित्य, दूध संकलन आणि दुग्धजन्य पदार्थ विक्री केंद्र हे सर्व व्यवसाय सुरू करण्यासाठी अनुदान देण्यात येणार आहे.

‘राणी दुर्गावती आदिवासी महिला सक्षमीकरण’ योजना (Rani Duragawati Adivasi Mahila Sakshamikaran Yojana) ही योजना इतर विभागांच्या अनेक योजनांसाठी लाभार्थी हिस्सा भरण्यास मदत करते. याची काही उदाहरणे -

पिंक (गुलाबी) ई-रिक्षा योजना (Pink E Riksha Yojana)

या योजनेसाठी आवश्यक असलेला ४० हजार लाभार्थी हिस्सा या योजनेतून मिळेल.

शेळी/मेंढी गट वाटप योजना (Sheli Mendhi Gat Watap Yojana)

लाभार्थी हिस्सा तसेच वाहतूक आणि ५०टक्के विमा खर्च ही ५० हजार च्या मर्यादेत दिला जाईल.

एकात्मिक कुक्कुट विकास योजना (Ekatmik Kukkut Vikas Yojana)

यात तलंग गट किंवा १०० दिवसीय कुक्कुट पक्षांच्या गटासाठी लागणारा ५० टक्के लाभार्थी हिस्सा दिला जातो.

बिरसा मुंडा कृषी क्रांती योजना (Birsa Munda Krishi Kranti Yojana)

या योजनेत शेततळ्यांचे प्लास्टिक अस्तरीकरण, ठिबक सिंचन, तुषार सिंचन संच, आणि सौर पंप यांसारख्या विविध कृषी कामांसाठीचा लाभार्थी हिस्सा ५० हजार च्या मर्यादेत उपलब्ध करून दिला जाईल.

मत्स्यव्यवसाय साधने (Matsya Vyavsay Sadhan)

यात मासेमारी जाळी आणि बिगर-यांत्रिक नौका खरेदीसाठी आवश्यक लाभार्थी हिस्सा दिला जातो.

या व्यतिरिक्त, केंद्रवर्ती अर्थसंकल्प योजनेंतर्गत, स्थानिक गरजा आणि मागणीनुसार नाविन्यपूर्ण व्यवसाय सुरू करण्यासाठी वैयक्तिक किंवा सामूहिक योजनांनाही मंजुरी दिली जाते.

या योजनेच्या अंमलबजावणीसाठी राज्य आणि जिल्हा स्तरावर समित्या स्थापन

राज्यस्तर समिती ही आदिवासी महिलांना सर्व शासकीय योजनांचा लाभ जास्तीत जास्त मिळण्याकरिता कायमस्वरुपी काम करणार आहे. वैयक्तिक लाभाच्या योजनांमध्ये आदिवासी महिला लाभार्थ्यांची निवड होत आहे किंवा कसे हे सुनिश्चित करणे, योजनानिहाय निर्देशित केलेल्या महिला आरक्षणाच्या किमान मर्यादेत महिलांना लाभ मिळत आहेत किंवा कसे याबाबत आढावा घेणे व पाठपुरावा करणे. त्याहीपेक्षा जास्त लाभार्थी महिला असाव्यात यासाठी वेळोवेळी संबंधित यंत्रणांना सूचना देऊन सदर बाब सुनिश्चित करणे. ज्या आदिवासी महिलांकडे लाभ घेण्यासाठी अनुषंगिक कागदपत्रे नाहीत त्यांना कागदपत्रे काढून देण्यासाठी प्रकल्प कार्यालयासोबत पाठपुरावा करणे व मार्गदर्शनाची भूमिका बजावणे.

योजनांचे लाभ जास्तीत जास्त आदिवासी महिलांना मिळावेत यासाठी प्रचार व प्रसिद्धी होत आहे किंवा कसे याची खातरजमा दर बैठकीच्या वेळी करणे तसेच योजनेचा लाभ घेण्याबाबत आदिवासी महिलांना ज्या समस्या येतील त्याबाबत वेळोवेळी मार्गदर्शन करणे. प्रकल्प कार्यालयांतर्गत ज्या योजनांचे अर्ज मागविण्यात येत आहेत त्यामध्ये प्रकरणपरत्वे महिलांना प्राध्यान्याने लाभ देण्यात येत आहे किंवा कसे याबाबत आढावा घेणे.

या योजनेच्या अंमलबजावणीच्या अनुषंगाने एकात्मिक आदिवासी विकास प्रकल्प स्तरावरील कर्तव्य व जबाबदाऱ्या या प्रकल्प कार्यालय स्तरावर सर्व शासकीय योजनांची माहिती आदिवासी महिलांना देण्यासाठी अस्तित्वातील माहिती कक्षामार्फत देण्यात येणार आहे.

या माहिती कक्षामार्फत आदिवासी विकास विभाग व इतर सर्व प्रशासकीय विभागांद्वारा राबविण्यात येणाऱ्या योजनांची प्रचार व प्रसिद्धी करणे तसेच योजनांचा लाभ घेण्याबाबत महिलांना मार्गदर्शन करणे, त्यांना योजनांचा लाभ घेतांना येणाऱ्या समस्यांचे निराकरण करणे व त्यासाठी आवश्यक ते सर्वतोपरी सहकार्य करणे.

लाभार्थी अर्ज मागविण्यासाठी संबधित विभागामार्फत योजनांची जाहिरात प्रसिद्ध झाल्यानंतर या योजनांमध्ये आदिवासी महिलांचे जास्तीत जास्त अर्ज उपलब्ध होतील याबाबत प्रयत्न करणे. प्रकल्पस्तरीय मंजूर योजनांमध्ये महिलांना लाभ देत असतांना विधवा, परित्यक्त्या, दिव्यांग, एकल महिलांना प्राधान्याने लाभ मिळेल याची खातरजमा करणे. ज्या आदिवासी महिलांकडे लाभ घेण्यासाठी अनुषंगिक कागदपत्रे नाहीत त्यांना कागदपत्रे मिळवून देण्यासाठी प्रकल्प कार्यालयामार्फत शिबिरे आयोजित करणे आणि जास्तीत जास्त महिलांना यामधून योजनांची माहिती मिळेल, तसेच आवश्यक कागदपत्रे महाराजस्व अभियानांतर्गत लवकरात लवकर मिळतील हे सुनिश्चित करणे.

केंद्रवर्ती अर्थसंकल्प योजनांचे आराखडे तयार करतांना शक्य तेथे महिला लाभार्थ्यांना लाभ देण्यायोग्य योजना प्रस्तावित करण्यात येतील याची खात्री करणे. आदिवासी महिलांच्या अधिकाधिक स्वयंसहाय्यता बचत गटांची निर्मिती होण्यासाठी आवश्यक इतक्या महिलांचे एकत्रित बँक खाते उघडून त्याची व अनुषांगिक माहिती महिला आर्थिक विकास महामंडळाकडे देण्यास सहकार्य करणे, जेणे करून अशा महिला स्वयंसहाय्यता बचत गटांना अनुज्ञेय योजनांचा लाभ मिळण्यास मदत होईल.

या योजनेंतर्गत महिलांना मिळणाऱ्या अनुदानाचा थेट फायदा त्यांच्या आर्थिक आणि सामाजिक सक्षमीकरणासाठी होणार आहे. आदिवासी व ग्रामीण भागातील महिला, रोजगार व व्यवसायाच्या संधींच्या अभावामुळे कौशल्य असूनही आर्थिकदृष्ट्या मागे राहतात. या योजनेमुळे त्यांना व्यवसाय उभारणीसाठी आवश्यक ते भांडवल उपलब्ध होणार आहे. स्वयंपूर्णतेकडे वाटचाल करण्यासाठी ही योजना महिलांना सुवर्णसंधी ठरणार आहे. महिला, रोजगारासाठी इतरांवर अवलंबून राहण्याऐवजी स्वतः रोजगार निर्माण करतील आणि इतरांनाही रोजगाराच्या संधी उपलब्ध करून देतील. आदिवासी भागातील आर्थिक प्रगतीसाठी ही योजना एक महत्त्वाचा टप्पा ठरणार आहे.

००००

✒️शैलजा पाटील, विभागीय संपर्क अधिकारी

माहिती व जनसंपर्क महासंचालनालय, मंत्रालय, मुंबई

मोदीजींच्या वाढदिवसानिमित्त वाशिममध्ये रक्तदान शिबिर, कार्यप्रदर्शनी व ७५ क्रमांकाची मानवसाखळी - Blood donation camp, human chain 75 number on the occasion of Modiji's birthday in Washim

2025-09-17T18:34:00.002+05:30

मोदीजींच्या वाढदिवसानिमित्त वाशिममध्ये रक्तदान शिबिर, कार्यप्रदर्शनी व 75 क्रमांकाची मानवसाखळी

वाशिम दि.१७ (www.jantaparishad.com) - देशाचे लोकप्रिय व लाडके पंतप्रधान आदरणीय श्री नरेंद्रजी मोदी साहेब यांच्या 75 व्या वाढदिवसानिमित्त भारतीय जनता पार्टीतर्फे देशभरात सेवा पंधरवाडा उपक्रम राबविला जात आहे. त्याचा भाग म्हणून वाशिम शहरात जिल्हा व शहराच्या वतीने रक्तदान शिबिर तसेच मोदीजींच्या जीवनकार्यावर आधारित कार्यप्रदर्शनीचे आयोजन करण्यात आले.

या कार्यक्रमाला सकाळपासूनच नागरिक, पदाधिकारी व कार्यकर्त्यांचा उत्स्फूर्त प्रतिसाद मिळाला. शिबिरात तरुण, महिला, ज्येष्ठ नागरिक सहभागी झाले. मोदीजींच्या सेवाभावी कार्याने प्रेरित होऊन “सेवा हीच खरी शुभेच्छा” या भावनेतून अनेकांनी रक्तदान केले.

विशेष आकर्षण म्हणून भाजपाच्या कार्यकर्त्यांनी ‘75’ क्रमांकाची मानवसाखळी उभी केली. भगवा टोपी परिधान करून महिला व पुरुष कार्यकर्त्यांनी केलेली ही साखळी वरून पाहताना अप्रतिम दिसत होती. घोषणाबाजी आणि देशभक्तीच्या जयघोषाने परिसर दुमदुमून गेला. या अनोख्या उपक्रमातून मोदीजींप्रती प्रेम, आदर आणि शुभेच्छांचा भाव व्यक्त झाला.

या कार्यक्रमाला भाजपा जिल्हाध्यक्ष पुरुषोत्तम चितलांगे, माजी आमदार विजयराव जाधव, माजी आमदार पुरुषोत्तम राजगुरू, भाजपा नेते राजू राजे पाटील यांच्यासह जिल्ह्यातील सर्व मंडळ अध्यक्ष, मोर्चा अध्यक्ष, प्रकोष्ठ अध्यक्ष, तसेच जिल्हा व शहरातील पदाधिकारी व कार्यकर्ते मोठ्या संख्येने उपस्थित होते. त्यांच्या उपस्थितीमुळे कार्यक्रमाला भव्यता लाभली.

कार्यक्रमाचे नियोजन भाजपा वाशिम शहराध्यक्ष मनिष मंत्री यांनी व्यवस्थित पार पाडली. जिल्हाध्यक्ष पुरुषोत्तम चित्तांगे यांच्या नेतृत्वाखाली कार्यकर्त्यांनी शिस्तबद्धतेने सर्व उपक्रम पार पाडले, ज्यामुळे कार्यक्रम यशस्वीरीत्या संपन्न झाला.

यावेळी अनेक कार्यकर्त्यांनी स्वतः रक्तदान करून मोदीजींना वाढदिवसानिमित्त शुभेच्छा दिल्या. “मोदीजींच्या प्रेरणेने समाजासाठी काहीतरी करण्याची संधी मिळाली, हेच आमच्यासाठी आनंदाचे आहे” असे मत रक्तदात्यांनी व्यक्त केले.

शहरात रक्तदान शिबिर व कार्यप्रदर्शनी आयोजित झाल्याने नागरिकांकडून समाधान व्यक्त करण्यात आले. कार्यप्रदर्शनीत मोदीजींच्या बालपणापासून आजवरच्या कार्याचा आढावा मांडण्यात आला होता. विद्यार्थ्यांनी व नागरिकांनीही मोठ्या संख्येने प्रदर्शनीला भेट दिली.

या उपक्रमातून मोदीजींच्या जीवनकार्याची प्रेरणा घेऊन समाजसेवा, राष्ट्रसेवा आणि जनकल्याणाचा संकल्प सर्व कार्यकर्त्यांनी अधिक दृढ केला. आगामी दिवसांत सेवा पंधरवाडा उपक्रमांतर्गत आणखी विविध उपक्रम राबविण्याचा निर्धार यावेळी व्यक्त करण्यात आला.

जिल्ह्यात १५ ऑक्टोबर पासून कापूस खरेदी केंद्र सुरू होणार - Cotton procurement center to open in the district from October 15

2025-09-17T18:11:00.001+05:30

जिल्ह्यात १५ ऑक्टोबर पासून कापूस खरेदी केंद्र सुरू होणार

३० सप्टेंबरपर्यंत ‘कपास किसान’ अॅपद्वारे शेतकऱ्यांची नोंदणी बंधनकारक

वाशिम,दि.17 सप्टेंबर (जिमाका) हंगाम सन २०२५-२६ मध्ये भारतीय कपास महामंडळ (सी.सी.आय.) मार्फत किमान आधारभूत किंमतीवर (एमएसपी) कापूस खरेदीस प्रारंभ होणार असून यासाठी शेतकऱ्यांची ऑनलाईन नोंदणी आवश्यक आहे.

जिल्ह्यात अनसिंग (ता. वाशिम), मंगरुळपीर, कारंजा लाड व मानोरा या चार खरेदी केंद्रांवर १५ ऑक्टोबर २०२५ पासून खरेदी सुरू होईल. यासाठी शेतकऱ्यांनी ‘कपास किसान’ मोबाईल अॅप द्वारे नोंदणी करणे बंधनकारक असून नोंदणीची अंतिम मुदत ३० सप्टेंबर २०२५ आहे.

नोंदणी कालावधी १ सप्टेंबर ते ३० सप्टेंबर २०२५ असून प्रक्रिया अगदी सोपी ठेवण्यात आली आहे :

1. ‘कपास किसान’ अॅप डाउनलोड करणे.

2. आवश्यक कागदपत्रे तयार ठेवणे –

जमीन नोंदणी (२०२५-२६ चे ऑनलाईन अद्ययावत),
महसूल प्राधिकरणाची प्रमाणित पिक लागवड नोंद (२०२५-२६ अद्ययावत),
वैध आधार कार्ड,
पासपोर्ट साईज फोटो.

शेतकऱ्यांनी दिलेल्या कालावधीत स्व-नोंदणी पूर्ण करून एमएसपी योजनेचा लाभ घ्यावा, असे भारतीय कपास महामंडळ (सीसीआय) व जिल्हा उपनिबंधक, सहकारी संस्था, वाशिम यांच्या वतीने आवाहन करण्यात आले आहे.

जिल्ह्यात ‘स्वस्थ नारी, सशक्त परिवार’ अभियानाचा शुभारंभ - Swasth Nari Sashakt Pariwar Abhiyan started in Washim District

2025-09-17T18:06:00.000+05:30

जिल्ह्यात ‘स्वस्थ नारी, सशक्त परिवार’ अभियानाचा शुभारंभ

Swasth Nari Sashakt Pariwar Abhiyan

अभियान कालावधीत महिलांसाठी विविध तपासण्या व सेवा उपलब्ध राहणार

वाशिम, दि.17, सप्टेंबर (जिमाका) - विश्वकर्मा जयंती व हैद्राबाद मुक्ती दिनाच्या औचित्यावर मध्यप्रदेशातील धार येथून पंतप्रधान नरेंद्र मोदी यांच्या हस्ते ‘स्वस्थ नारी, सशक्त परिवार’ अभियान (Swasth Nari Sashakt Pariwar Abhiyan) चा शुभारंभ केला. यावेळी ‘आदी कर्मयोगी’ (Adi Karmyogi), ‘सुमन चॅटबॉट’ (Suman ChatBot) आणि प्रधानमंत्री मातृ वंदना योजने चे लाभ वितरण करण्यात आले. याचे ऑनलाईन पद्धतीने प्रसारण करण्यात आले.

या अभियानाचा लाभ सर्व महिलांनी घ्यावा, मोफत तपासणी व उपचार सेवांचा लाभ घेऊन स्वतःचे आरोग्य सशक्त करावे, असे मागणे मागत पंतप्रधान यांनी महिलांना भावनिक आवाहन केले.

यावेळी नरेंद्र मोदी यांनी ‘5F मंत्र’ (5F Mantra - Form, Fiber, Factory, Fashion, Foreign) यावर भर देत स्वदेशीला प्राधान्य देण्याचे आवाहन केले. “जे काही खरेदी कराल ते भारतीयांनी बनविलेलेच असले पाहिजे” असे सांगत त्यांनी ‘गर्व से कहो, ये स्वदेसी है’ हा नारा दिला व आपले भाषण समाप्त केले.

वाशिम जिल्ह्यातील जिल्हा रुग्णालय वाशिम, उपजिल्हा रुग्णालय कारंजा व प्राथमिक आरोग्य केंद्र आसेगाव येथे या अभियानाचा प्रारंभ झाला असून जिल्ह्यातील सर्व आरोग्य संस्थांत १७ सप्टेंबर ते २ ऑक्टोबर दरम्यान महिलांसाठी मोफत तपासणी व उपचार सेवा उपलब्ध राहणार आहेत.

जिल्हास्तरावर अभियानाचा शुभारंभ या अभियानाचे नोडल अधिकारी डॉ. राजश्री देशमुख व महिला मान्यवरांच्या हस्ते दीपप्रज्वलन करून करण्यात आला. यावेळी वैद्यकीय महाविद्यालयाचे अधिष्ठाता डॉ. सतिन मेश्राम, जिल्हा आरोग्य अधिकारी डॉ.पी.एस.ठोंबरे, प्रभारी जिल्हा शल्यचिकित्सक डॉ. लोणकर, डॉ. अविनाश पुरी, डॉ. अविनाश झरे, डॉ. पराग राठोड, डॉ. विजय काळे, डॉ. महेशचंद्र चापे, डॉ.मोबीन खान आदी मान्यवर उपस्थित होते.

जिल्हास्तरीय शिबिरात क्षयरुग्णांना निक्षय मित्रांच्या माध्यमातून पोषण किट वाटप, सिकलसेल रुग्णांना ओळखपत्र वितरण करण्यात आले. महिलांना हिमोग्लोबिन, नेत्र, सिकलसेल व एनसीडी तपासणीसह एचआयव्ही मार्गदर्शन देण्यात आले. तसेच रक्तदान, नेत्रदान व अवयवदानाचे महत्त्व अधोरेखित करण्यात आले.

अभियान कालावधीत महिलांसाठी खालील तपासण्या व सेवा उपलब्ध राहणार आहेत :

रक्तदाब, मधुमेह, नेत्र, दंत तपासणी
स्तन व गर्भाशय मुखाचा कर्करोग तपासणी
गर्भवती महिलांची प्रसूतीपूर्व तपासणी
हिमोग्लोबिन तपासणी, क्षयरोग तपासणी
सिकलसेल, कुपोषण व रक्तक्षय तपासणी
निरोगी जीवनशैलीबाबत मार्गदर्शन

उद्या कारंजा येथे सायकल मॅरेथॉन रॅलीचे आयोजन - cycle marathon rally in Karanja by Karanja Police

2025-08-22T21:49:00.003+05:30

कारंजा शहर पोलीस स्टेशन चे वतीने

उद्या सायकल मॅरेथॉन रॅलीचे आयोजन

कारंजा दि.२२ (www.jantaparishad.com) - पोलीस स्टेशन कारंजा शहर अंतर्गत उद्या दिनांक 23/08/2025 रोजी मा पोलीस अधिक्षक साहेब वाशिम यांचे संकल्पणेतुन फिट इंडीया मिशन अर्तगत सायकल मॅरेथॉन रॅलीचे (cycle marathon rally in Karanja) आयोजन करण्यात आलेले आहे.

तरी कारंजा शहर येथील इच्छुक महिला, पुरुष, विद्यार्थी, विद्यार्थिनी यांनी जास्तीत जास्त संख्येने आप आपले सायकलीसह ट्रकसुट/पीटी ड्रेस सह झांसी राणी चौक क्रिडा संकुल कारंजा येथे दिनांक 23/08/2025 चे सकाळी 06/30 वाजता हजर रहावे असे आवाहन मा उपविभागीय पोलीस अधिकारी श्री पाडवी साहेब कारंजा तसेच पोलीस निरीक्षक श्री शुक्ला साहेब पो स्टे कारंजा शहर यांनी केली आहे. तरी सहभागी सायकल स्वार यांना पोलीस स्टेशन तर्फे टी-शर्ट व कॅप वाटप करण्यात येणार आहे.

योगेश कुंभेजकर यांनी जिल्हाधिकारी पदाची सूत्रे स्वीकारली - Yogesh Kumbhejkar Washim District Collector took the charge

2025-08-21T21:55:00.007+05:30

योगेश कुंभेजकर यांनी जिल्हाधिकारी पदाची सूत्रे स्वीकारली

Yogesh Kumbhejkar Washim District Collector took the charge

वाशिम, दि. २१ ऑगस्ट (जिमाका/www.jantaparishad.com) - जिल्ह्याचे नवीन जिल्हाधिकारी म्हणून योगेश कुंभेजकर (Yogesh Kumbhejkar Washim District Collector took the charge) यांनी आज २१ ऑगस्ट रोजी पदाची सूत्रे स्वीकारली. यावेळी अपर जिल्हाधिकारी ब्रिजेश पाटील आणि निवासी उपजिल्हाधिकारी विश्वनाथ घुगे यांनी त्यांचे स्वागत केले.

श्रीमती बुवनेश्वरी एस. यांची राज्य शासनाने अकोला येथे महाबीजच्या व्यवस्थापकीय संचालकपदी बदली केली आहे. त्यांच्या जागी वाशिम जिल्ह्याचे नवे जिल्हाधिकारी म्हणून योगेश कुंभेजकर यांची नियुक्ती करण्यात आली. यासंदर्भातील आदेश सामान्य प्रशासन विभागाने २० ऑगस्ट रोजी जारी केले होते.

नुतन जिल्हाधिकारी योगेश कुंभेजकर हे २०१६ बॅचचे आयएएस अधिकारी असून, त्यांनी यापूर्वी भंडारा जिल्ह्याचे जिल्हाधिकारी तसेच नागपूर जिल्हा परिषदेचे मुख्य कार्यकारी अधिकारी म्हणून यशस्वी कामकाज पाहिले आहे. वाशिम येथे रुजू होण्यापूर्वी ते महाबीजचे व्यवस्थापकीय संचालक म्हणून कार्यरत होते.

साप्ताहिक जनता परिषद अंक - ३१ वर्ष - ४७ दिनांक - २१ ऑगस्ट २०२५ Weekly Janta Parishad 31-47-21-08-2025

2025-08-21T21:28:00.000+05:30

साप्ताहिक जनता परिषद

अंक - ३१ वर्ष - ४७ दिनांक - २१ ऑगस्ट २०२५

Weekly Janta Parishad

Edition : 31 Year : 47 Date : 21-08-2025

पात्र शेतकऱ्यांनी ‘जन समर्थ’चा लाभ घ्यावा - जिल्हाधिकारी बुवनेश्वरी एस jan samarth web portal - eligible farmers should take advantage

2025-08-12T21:20:00.002+05:30

पात्र शेतकऱ्यांनी ‘जन समर्थ’चा लाभ घ्यावा - जिल्हाधिकारी बुवनेश्वरी एस

शेतकऱ्यांना किसान क्रेडिट कार्ड पीक कर्ज मंजुरीसाठी विशेष मोहीम

जिल्हा समन्वय सल्लागार समितीची विशेष बैठक

वाशिम,दि.१२ ऑगस्ट (जिमाका / www.jantaparishad.com) - शेतकऱ्यांना पिककर्जाची मंजुरी जलद, पारदर्शक आणि कागदविरहित पद्धतीने मिळावी, यासाठी जन समर्थ पोर्टल (jan samarth web portal) चा वापर सुरू झाला आहे. जिल्ह्यातील पात्र शेतकऱ्यांनी या सुविधेचा लाभ (eligible farmers should take advantage) घ्यावा, असे आवाहन जिल्हाधिकारी बुवनेश्वरी एस यांनी केले. या उपक्रमामुळे बँकांच्या फेर्‍या टाळून घरबसल्या कर्जमंजुरीची सोय होणार आहे.

शेतकऱ्यांना तात्काळ पीक कर्ज मिळावे यासाठी महाराष्ट्र सरकारने कृषी व शेतकरी कल्याण मंत्रालय (भारत सरकार) आणि पीएसबी अलायन्स यांच्यासोबत सामंजस्य करार केला आहे. या उपक्रमाअंतर्गत अॅग्रीस्टॅक डेटा थेट जन समर्थ पोर्टलशी जोडण्यात आले आहे, ज्यामुळे कर्ज मंजुरीची प्रक्रिया पूर्णपणे पारदर्शक, सुलभ आणि कागदविरहित होणार आहे. असे प्रतिपादन जिल्हाधिकारी बुवनेश्वरी एस यांनी केले.

आज १२ ऑगस्ट रोजी जिल्हा समन्वय समितीची विशेष बैठक जिल्हाधिकारी कार्यालयातील राजे वाकाटक सभागृहात आयोजित करण्यात आली होती.त्यावेळी जिल्हाधिकारी बुवनेश्वरी बोलत होत्या.

जिल्हाधिकारी बुवनेश्वरी एस यांनी सांगितले की, जन समर्थ पोर्टलच्या माध्यमातून शेतकऱ्यांना जलद, पारदर्शक आणि त्रासमुक्त पद्धतीने पीककर्ज मिळू शकणार आहे. राज्य शासनाने कृषी व शेतकरी कल्याण मंत्रालय तसेच पीएसबी अलायन्ससोबत केलेला हा उपक्रम ग्रामीण अर्थव्यवस्था बळकट करण्यास आणि शेतकऱ्यांचा आर्थिक भार हलका करण्यास हातभार लावेल. जिल्ह्यातील सर्व पात्र शेतकऱ्यांनी आवश्यक कागदपत्रांसह वरील प्रक्रियेनुसार अर्ज करावा, असेही त्यांनी आवाहन केले.

यावेळी निवासी उपजिल्हाधिकारी विश्वनाथ घुगे, अग्रणी बँक व्यवस्थापक यशवीर कुमार, जिल्हा उपनिबंधक जी.पी. साबळे तसेच विविध बँकांचे प्रतिनिधी उपस्थित होते.

श्री.यशवीर यासंदर्भात माहिती देतांना म्हणाले , पात्र शेतकऱ्यांचा आधार क्रमांक मोबाईल क्रमांकाशी जोडलेला असावा.अॅग्रीस्टॅक रजिस्ट्रीमध्ये नोंदणी असावी आणि मान्यता मिळालेली असावी.

सध्या ही सुविधा वैयक्तिकरित्या जमीन असलेल्या शेतकऱ्यांसाठीच उपलब्ध आहे.

पुढे बोलतांना त्यांनी अर्ज प्रक्रियेची माहिती दिली.

शेती नोंदणी तपासा — आधार क्रमांक किंवा नोंदणी आयडी आवश्यक.www.jansamarth.in वर जा आणि मोबाईल नंबर वापरून केसीसीसाठी अर्ज करा.

कृषी कर्ज - किसान क्रेडिट कार्ड निवडा व पात्रता तपासा.राज्य आणि जिल्हा निवडा. संमती फॉर्म वाचा आणि पुढे जा.आधार क्रमांक प्रविष्ट करून ई-केवायसी पूर्ण करून यानंतर अर्जदाराने बँक खात्याची माहिती,वैयक्तिक माहिती,आर्थिक माहिती,जमीन व इतर तपशील प्रविष्ट करावेत, अर्ज पुनरावलोकन करून बँक निवडावी.

या प्रणालीमुळे शेतकऱ्यांना बँकेत वारंवार फेऱ्या न मारता, घरबसल्या आणि वेळेत पिककर्जाची सुविधा मिळणार आहे. तसेच जिल्ह्यात कृषी विभागाच्या संयुक्त वतीने १६० विशेष केसीसी शिबीराचे आयोजन करण्यात येणार आहे. १४ ऑगस्ट पर्यंत जवळपास १ हजार प्रकरणे निकाली काढण्यात येणार आहे.

महाराष्ट्र पोलीस दलात १५ हजार पदभरती - Police Bharti Maharashtra, to recruit 15,000

2025-08-12T20:44:00.001+05:30

महाराष्ट्र पोलीस दलात १५ हजार पदभरती

लेखी परीक्षेसाठी OMR प्रणालीचा वापर

मंत्रिमंडळ बैठकीत मान्यता

(News Source : https://mahasamvad.in/)

मुंबई दि १२ - महाराष्ट्र पोलीस दलातील शिपायांची सुमारे १५ हजार पदे (Police Bharti Maharashtra, to recruit 15,000) भरण्यात येणार आहेत. त्याकरिता आज सन २०२४-२५ च्या पोलीस शिपाई भरती प्रक्रियेस आज झालेल्या मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री देवेंद्र फडणवीस होते. या भरतीमध्ये सन २०२२ व सन २०२३ मध्ये संबंधित पदाची विहित वयोमर्यादा ओलांडलेल्या उमेदवारांनाही एक वेळची विशेष बाब म्हणून अर्ज करता येणार आहे व भरती प्रक्रियेत सहभागी होता येणार आहे.

राज्याच्या पोलीस दलात सन २०२४ दरम्यान रिक्त असलेली व २०२५ मध्ये रिक्त होणाऱ्या पदांचा आढावा घेऊन, ही भरती करण्यात येणार आहेत. भरण्यात येणारी पदांची संख्या अशी, पोलीस शिपाई – १२ हजार ३९९, पोलीस शिपाई चालक – २३४, बॅण्डस् मॅन – २५, सशस्त्र पोलीस शिपाई – २ हजार ३९३, कारागृह शिपाई – ५८०. एकूण १५ हजार, ६३१. पोलीस शिपाई व कारागृह शिपाई ही पदे गट – क संवर्गातील आहेत. पोलीस शिपाई भरती प्रक्रिया त्या-त्या जिल्हा स्तरावरून राबविण्यात येते. त्यासाठी ओएमआर (OMR) आधारित लेखी परीक्षा घेण्यात येईल.

भरतीसाठी अर्ज मागवणे, अर्जाची छाननी, त्यावर प्रक्रिया तसेच उमेदवारांची शारिरीक परीक्षा, त्यातून पात्र उमेदवारांची लेखी परीक्षा यासाठी अनुषांगिक प्रक्रिया राबविण्याचे अधिकार प्रशिक्षण व खास पथके विभागाचे अतिरिक्त पोलीस महासंचालकांना देण्यासही बैठकीत मान्यता देण्यात आली.

राज्यातील कायदा व सुव्यवस्था राखण्यासाठी पोलीस दलातील शिपाई संवर्गाची पदे अत्यंत महत्त्वाची आहेत. पदे रिक्त राहिल्यास, पोलिसांवरील कामाचा ताण वाढतो. पोलीस दल व कारागृहातील स्थिती सुधारण्यासाठी उच्च न्यायालय, सर्वोच्च न्यायालयानेही वेळोवेळी ही पदे वेळेत भरली जावीत असे निर्देश दिले आहेत. लोकप्रतिनिधी, तसेच विधिमंडळातील चर्चेतही लोकप्रतिनिधींकडून ही पदे तातडीने भरण्याची मागणी करण्यात आली आहे.

साप्ताहिक जनता परिषद अंक - २९ वर्ष - ४७ दिनांक - ०७ ऑगस्ट २०२५ Weekly Janta Parishad 29-47-07-08-2025

2025-08-07T14:20:00.003+05:30

साप्ताहिक जनता परिषद

अंक - २९ वर्ष - ४७ दिनांक - ०७ ऑगस्ट २०२५

Weekly Janta Parishad

Edition : 29 Year : 47 Date : 07-08-2025

प्रधानमंत्री किसान सन्मान निधी योजनेचा २० वा हप्ता २ ऑगस्टला वितरित होणार - PM Kisan 20th Installment on 2nd August

2025-07-31T22:40:00.000+05:30

प्रधानमंत्री किसान सन्मान निधी योजनेचा २० वा हप्ता २ ऑगस्टला वितरित होणार

(NEWS Source : https://mahasamvad.in)

नवी दिल्ली, 31 : प्रधानमंत्री किसान सन्मान निधी योजनेचा २० वा हप्ता (PM Kisan 20th Installment) येत्या २ ऑगस्ट २०२५ रोजी वितरित केला जाणार आहे. यासंदर्भात केंद्रीय कृषी व शेतकरी कल्याण मंत्री शिवराज सिंह चौहान यांच्या अध्यक्षतेखाली उच्चस्तरीय बैठक पार पडली. या बैठकीत २ ऑगस्ट रोजी वाराणसी येथे पंतप्रधान नरेंद्र मोदी यांच्या नेतृत्वाखाली आयोजित होणाऱ्या कार्यक्रमाच्या तयारीबाबत आणि अधिकाधिक शेतकऱ्यांपर्यंत लाभ पोहोचवण्यासाठी सविस्तर चर्चा झाली. देशभरातील ७३१ कृषी विज्ञान केंद्रे (केव्हीके), भारतीय कृषी संशोधन परिषद (आयसीएआर) आणि कृषी विद्यापीठांचे संचालक, कुलगुरू आणि प्रमुख दूरद्श्य प्रणालीद्वारे या बैठकीत सहभागी झाले.

केंद्रीय मंत्री श्री.चौहान यांनी राष्ट्रीय, राज्य, जिल्हा आणि ग्रामीण स्तरावर शेतकऱ्यांना या कार्यक्रमाशी जोडण्यासाठी अधिकाऱ्यांना आवश्यक सूचना दिल्या आणि देशव्यापी स्तरावर मोहिमेच्या स्वरूपात कार्यक्रम आयोजित करण्यासाठी रूपरेषा तयार करण्याचे निर्देश दिले. कृषी विज्ञान केंद्रांना तयारीबाबत मार्गदर्शन करताना केंद्रीय कृषी मंत्री श्री.चौहान यांनी सांगितले की, पंतप्रधानांच्या नेतृत्वाखाली ६००० रुपयांची रक्कम तीन हप्त्यांमध्ये दिली जाते. प्रत्येक चार महिन्यांनी एक हप्ता वितरित केला जातो. यामुळे शेतकऱ्यांपर्यंत थेट लाभ पोहोचवण्याची संधी मिळते. यात केव्हीके यांची महत्त्वाची भूमिका आहे. यंदाही केव्हीके यांनी सक्रिय सहभाग नोंदवावा, यासाठी तयारीला सुरुवात करावी. हा कार्यक्रम शेतकऱ्यांपर्यंत थेट लाभ पोहोचवण्याबरोबरच जनजागृती मोहिमेचे माध्यम आहे, त्यामुळे हा कार्यक्रम उत्सव आणि मिशनच्या स्वरूपात आयोजित व्हावा, असे त्यांनी यावेळी सांगितले.

2 ऑगस्ट रोजी प्रधानमंत्री किसान सन्मान योजनेचा हप्ता वितरणाच्या कार्यक्रमात शेतकरी बंधू भगिनींनी मोठ्या संख्येने सहभागी व्हावे. हा कार्यक्रम शेतकऱ्यांना लाभ आणि कृषी क्षेत्रातील विकास योजनांशी जोडण्याची संधी आहे. कृषी सखी, ड्रोन दीदी, बँक सखी, पशु सखी, विमा सखी आणि ग्रामपंचायत स्तरावर सरपंचांच्या माध्यमातून कार्यक्रमाची माहिती द्यावी. खरीप हंगामाशी संबंधित विषयांवर शेतकऱ्यांशी संवाद साधला जाऊ शकतो. पंतप्रधानांच्या मार्गदर्शनाखाली सर्वांच्या सहभागाने हा कार्यक्रम यशस्वी करून मोठ्या संख्येने शेतकऱ्यांपर्यंत लाभ पोहोचवण्यासाठी कटिबद्धतेने काम करावे, असेही त्यांनी नमूद केले.

2019 मध्ये सुरू झालेल्या या योजनेअंतर्गत आतापर्यंत 19 हप्त्यांमध्ये शेतकऱ्यांच्या खात्यात 3.69 लाख कोटी रुपये हस्तांतरित झाले आहेत. (PM Kisan 20th Installment) 20व्या हप्त्यात 9.7 कोटी शेतकऱ्यांना सुमारे 20,500 कोटी रुपये वितरित केले जाणार आहेत.

या बैठकीत कृषी सचिव देवेश चतुर्वेदी, भारतीय कृषी संशोधन परिषदेचे महासंचालक डॉ. एम. एल. जाट आणि कृषी मंत्रालयाचे वरिष्ठ अधिकारी उपस्थित होते.

‘भटके विमुक्त दिवस’ ३१ ऑगस्ट रोजी साजरा करण्याचा निर्णय Bhatke Vimukt Diwas will be celebrated on 31st August

2025-07-31T22:29:00.000+05:30

‘भटके विमुक्त दिवस’ ३१ ऑगस्ट रोजी साजरा करण्याचा निर्णय

Bhatke Vimukt Diwas will be celebrated on 31st August

इतर मागास बहुजन कल्याण मंत्री अतुल सावे

मुंबई, दि. ३१ : राज्य व जिल्हास्तरावर ३१ ऑगस्ट रोजी ‘भटके विमुक्त दिवस’ म्हणून साजरा करण्यात येणार आहे. (Bhatke Vimukt Diwas will be celebrated on 31st August) याबाबतचा इतर मागास बहुजन कल्याण विभागाचा शासन निर्णय निर्गमित करण्यात आला असल्याची माहिती इतर मागास बहुजन कल्याण मंत्री अतुल सावे यांनी दिली.

मंत्री श्री. सावे म्हणाले, राज्य शासनाचा हा निर्णय केवळ प्रतीकात्मक नसून भटके विमुक्त समाजाच्या सामाजिक न्याय, आत्मसन्मान आणि प्रतिष्ठेसाठी एक निर्णायक टप्पा आहे. या दिवशी होणाऱ्या कार्यक्रमातून या समुदायाचा संघर्ष, योगदान आणि सामाजिक हक्क समाजातील अन्य घटकांपर्यंत पोहोचेल.

या दिवशी भटक्या व विमुक्त समाजाच्या संस्कृतीतील जीवनमूल्ये, परंपरा यांचे दर्शन घडविणारे सांस्कृतिक, शैक्षणिक व माहितीपर उपक्रम राबविण्यात येणार आहेत.

तसेच शासकीय व अनुदानित आश्रमशाळा तसेच शासकीय वसतिगृहांमध्ये विद्यार्थी आरोग्य तपासणी, आधारकार्ड नोंदणी, जातीचा दाखला आणि जात वैधता प्रमाणपत्रासाठी आवश्यक दस्तऐवजांची माहिती देणाऱ्या शिबिरांचे आयोजन करण्यात येणार आहे. विभागीय आयुक्त व जिल्हाधिकारी यांनी त्यांच्या विभागातील व जिल्ह्यातील सर्व शासकीय व निमशासकीय कार्यालयांमध्ये हा कार्यक्रम प्रभावीपणे राबविण्याबाबत आवश्यक त्या सूचना निर्गमित कराव्यात व अंमलबजावणीची कार्यवाही सुनिश्चित करावी. ३१ ऑगस्ट रोजी सार्वजनिक, साप्ताहिक किंवा स्थानिक सुट्टी असली तरीही ‘भटके विमुक्त दिवस’ (Bhatke Vimukt Diwas) याच दिवशी साजरा करण्यात येणार असल्याचे शासन निर्णयात स्पष्ट करण्यात आले आहे.

निवडणूक आयोगाची नवी डिजिटल प्रणाली - New digital system by election commission

2025-06-05T19:31:00.003+05:30

निवडणूक आयोगाची नवी डिजिटल प्रणाली

इंडेक्स कार्ड व आकडेवारी अहवालांची जलद निर्मिती

New digital system by election commission

(News Source - Team DGIPR -जून 5, 2025)

मुंबई, दि. ५ : मुख्य निवडणूक आयुक्त ज्ञानेश कुमार, निवडणूक आयुक्त डॉ. सुखबीर सिंह संधू आणि डॉ. विवेक जोशी यांच्या अध्यक्षतेखालील निवडणूक आयोगाने निवडणुका संपल्यानंतर तयार होणाऱ्या इंडेक्स कार्ड (Index Card) आणि विविध आकडेवारी अहवाल तयार करण्यासाठी नवीन तंत्रज्ञानाधारित यंत्रणा (New digital system by election commission) सुरु केली आहे. यामुळे पारंपरिक, वेळखाऊ आणि त्रुटीक्षम पद्धतींची जागा आता जलद, अचूक आणि एकसंध डिजिटल प्रक्रियेने घेतली आहे.

इंडेक्स कार्ड ही निवडणूक आयोगाची स्वतःहून सुरू केलेली एक गैर-वैधानिक आकडेवारी स्वरूपातील प्रणाली आहे. तिचा उपयोग निवडणुकांनंतरच्या टप्प्यात सर्व संबंधित घटक जसे संशोधक, शैक्षणिक क्षेत्र, धोरणकर्ते, पत्रकार आणि सामान्य नागरिक यांना मतदारसंघ स्तरावरची माहिती सहज मिळवता यावी यासाठी होतो.

या कार्डामध्ये उमेदवार, मतदार, मतदानाची टक्केवारी, मतमोजणीचा तपशील, पक्षनिहाय आणि उमेदवारनिहाय मते, लिंगानुसार मतदान पद्धती, प्रादेशिक फरक, राजकीय पक्षांची कामगिरी आदी बाबी समाविष्ट असतात. या माहितीच्या आधारावर लोकसभा निवडणुकीसाठी ३५ आणि विधानसभा निवडणुकीसाठी १४ आकडेवारी अहवाल तयार केले जातात.

या नव्या यंत्रणेमुळे आता निवडणुकांनंतरचे अहवाल जलद आणि अचूक स्वरूपात उपलब्ध होतील. यामध्ये समाविष्ट अहवालांमध्ये राज्य/मतदारसंघनिहाय मतदार तपशील, मतदान केंद्रांची संख्या, महिला मतदारांचे सहभाग, राष्ट्रीय/राज्य पक्ष व नोंदणीकृत पण अप्रसिद्ध पक्षांची कामगिरी, विजयी उमेदवारांचे सविस्तर विश्लेषण, मतदारसंघनिहाय निकाल आणि एकत्रित सारांश अहवाल यांचा समावेश होतो.

ही सर्व आकडेवारी इंडेक्स कार्डांवर आधारित असून शैक्षणिक आणि संशोधन उपयोगासाठीच मर्यादित आहे. मूळ व अंतिम आकडेवारी मात्र संबंधित मतमोजणी अधिकारी (Returning Officer) यांच्याकडे असलेल्या वैधानिक फॉर्ममध्येच ग्राह्य धरली जाते.

पूर्वी या माहितीचे संकलन निवडणूक क्षेत्रांमध्ये हाताने विविध वैधानिक फॉर्ममध्ये भरून केले जात असे. त्यानंतर त्या माहितीचे ऑनलाईन प्रणालीत डेटा एंट्री करून अहवाल तयार होत असत. ही प्रक्रिया वेळखाऊ, अनेक स्तरांची आणि विलंब निर्माण करणारी होती. नव्या प्रणालीमुळे ही त्रुटी दूर होणार आहे, असे भारत निवडणूक आयोगाने एका प्रसिद्धीपत्रकाद्वारे कळविले आहे.

साप्ताहिक जनता परिषद अंक - २१ वर्ष - ४७ दिनांक - ०५ जून २०२५ Weekly Janta Parishad 21-47-05-06-2025

2025-06-05T19:21:00.000+05:30

साप्ताहिक जनता परिषद

अंक - २१ वर्ष - ४७ दिनांक - ०५ जून २०२५

Weekly Janta Parishad

Edition : 21 Year : 47 Date : 05-06-2025

शेतकऱ्यांनी पेरणीची घाई करू नये - Farmers should not rush sowing

2025-06-01T20:13:00.007+05:30

किमान 10 जूनपर्यंत पावसात घट

शेतकऱ्यांनी पेरणीची घाई करू नये

मुंबई, दि 1 (जिमाका / www.jantaparishad.com : बदलेलेल्या वातावरणामुळे मान्सूनच्या प्रवासाची गती कमी होण्यास सुरुवात झाली, आणि आता तर मान्सूनचा प्रवास पूर्णपणे रखडला आहे. किमान 10 जूनपर्यंत तरी मान्सूनचा प्रवास थांबणार असल्याचा अंदाज आहे, ज्यामुळे या दरम्यान केवळ पश्चिम किनारपट्टी आणि राज्यातील काही इतर किरकोळ भागात प्रामुख्याने हलका पाऊस पडण्याचा अंदाज आहे. राज्यातील बहुतांश भागात मात्र कोरडे हवामान अपेक्षित आहे, ज्यामुळे कमाल तापमानात वाढ होईल. विदर्भात 40 अंशापर्यंत कमाल तापमान राहण्याची शक्यता आहे तर मराठवाडा आणि खानदेशात कमाल तापमान 35 ते 40 अंशामध्ये राहील. या कोरड्या हवामानाचा वाईट परिणाम पेरणी आणि लागवडीवर पडण्याची शक्यता आहे.

कोणत्याही खोट्या बातम्यांवर विश्वास ठेवून शेतकऱ्यांनी (प्रामुख्याने कोरडवाहू) पेरणी आणि लागवडीची घाई करू नये, असे आवाहन कृषी विभागाकडून परत एकदा करण्यात येत आहे.

राष्ट्रपतींच्या हस्ते जळगावच्या सुजाता बागुल यांचा राष्ट्रीय फ्लोरेन्स नाइटिंगेल पुरस्काराने सन्मान - Sujata Bagul honoured with National Florence Nightingale Award by President

2025-05-31T15:55:00.002+05:30

राष्ट्रपतींच्या हस्ते जळगावच्या सुजाता बागुल यांचा राष्ट्रीय फ्लोरेन्स नाइटिंगेल पुरस्काराने सन्मान

Sujata Bagul honoured with National Florence Nightingale Award by President

(News sourceTeam DGIPR -मे 30, 2025)

नवी दिल्ली, दि. ३० : जळगाव जिल्ह्यातील कठोरा येथील प्राथमिक आरोग्य केंद्रात कार्यरत असलेल्या सहायक परिचारिका सुजाता अशोक बागुल यांना राष्ट्रीय फ्लोरेन्स नाइटिंगेल पुरस्काराने सन्मानित करण्यात आले. (Sujata Bagul honoured with National Florence Nightingale Award by President) राष्ट्रपती द्रौपदी मुर्मू यांच्या हस्ते झालेल्या समारंभात राष्ट्रीय फ्लोरेन्स नाइटिंगेल पुरस्काराने आरोग्य क्षेत्रात निस्वार्थ वृत्तीने सेवा देणाऱ्या 15 परिचारिका आणि परिचारकांचा गौरव करण्यात आला. या सोहळ्यात केंद्रीय आरोग्य व कुटुंब कल्याण मंत्री जे.पी. नड्डा, केंद्रीय आरोग्य व कुटुंब कल्याण राज्यमंत्री प्रतापराव जाधव, अनुप्रिया पटेल आणि आरोग्य सचिव अपूर्व चंद्रा उपस्थित होते.

आरोग्य क्षेत्रात गेली 18 वर्षे अत्यंत निष्ठा, कष्ट व समर्पित भावनेने सेवा बजावणाऱ्या सुजाता बागुल यांनी राष्ट्रीय आरोग्य कार्यक्रमांची प्रभावी अंमलबजावणी करत उल्लेखनीय कामगिरी केली आहे. संस्थात्मक प्रसवासाठी गरोदर महिलांना प्रोत्साहन देणे, लसीकरणाचे शंभर टक्के उद्दिष्ट साध्य करणे, आरोग्य शिबिरे, जनजागृती रॅली आणि स्वच्छता मोहिमांमध्ये प्रभावी सहभाग यांसारखे उपक्रम त्यांच्या नेतृत्वाखाली राबविण्यात आले आहे.

कोरोना काळातील त्यांच्या उत्कृष्ट सेवेसाठी त्यांना जिल्हास्तरीय ‘फ्लोरेन्स नाइटिंगेल’सह विविध पुरस्कारांनी ही सन्मानित करण्यात आले आहे. या पुरस्काराचे स्वरुप एक लाख रुपये रोख आणि प्रशस्तीपत्र आहे.

आदर्श राजमाता : पुण्यश्र्लोक अहिल्यादेवी होळकर : Punyashrok Ahilyadevi Holkar - Ideal Rajmata

2025-05-31T15:50:00.007+05:30

आदर्श राजमाता : पुण्यश्र्लोक अहिल्यादेवी होळकर

Punyashrok Ahilyadevi Holkar - Ideal Rajmata

By Team DGIPR -मे 30, 2025

आदर्श राजा म्हटलं की छत्रपती शिवाजी महाराजांचं रूप डोळ्यासमोर येतं, तर आदर्श राज्यकर्त्या म्हटलं की, पुण्यश्र्लोक अहिल्यादेवी होळकर (Punyashrok Ahilyadevi Holkar) यांचं नाव पुढं येतं. आदर्श कन्या, सुशील भार्या, सर्वगुणसंपन्न माता अन् प्रजाहितदक्ष शासक अशा वैविध्यपूर्ण भूमिकेतून त्यांनी आजीवन जनसेवा केली. इतकेच नव्हे तर, सर्वधर्मियांना विश्वासात घेऊन उत्तम राज्यकारभार केला. महत्वाचे म्हणजे हिंदू-मुस्लिम हे अहिल्यादेवी यांच्या कारकिर्दीत गुण्यागोविंदाने नांदलेत. राजकारणातून समाजकारण करून धर्मपरायणात सर्वोच्च शिखर गाठणाऱ्या अहिल्यादेवींना हिंदू संस्कृतीतील पुण्यश्र्लोक ही उपाधी बहाल करण्यात आली. ही गोष्ट मराठी जनमानसाच्या दृष्टीने मोठ्या अभिमानाची आहे.

अहिल्यादेवी होळकर ह्या अहमदनगर जिल्ह्यामधील चौंडी गावातल्या धनगर समाजाचे माणकोजी शिंदे-पाटील यांच्या कन्या. वयाच्या बाराव्या वर्षी अहिल्यादेवी यांचा विवाह पेशव्यांचे सुभेदार मल्हारराव होळकर यांचे सुपुत्र खंडेराव होळकर यांच्याशी झाला. परंतू काळाने घात केला अन् दुर्दैवाने 1766 साली खंडेरावांचे आकस्मिक निधन झाले. तथापि स्वतःला मोठ्या धैर्याने सावरून, मल्हारराव होळकर या पित्यासमान सासऱ्यांची आज्ञा शिरसावंद्य मानत अहिल्यादेवींनी आपले उर्वरित आयुष्य लोकसेवेत व्यतित केले.

स्वकर्तृत्वाच्या बळावर या राजमातेने होळकरांच्या राज्याची धुरा समर्थपणे सांभाळून सर्व जाती-धर्मातील लोकांना समान न्याय दिला. वैधव्याच्या दुःखानं अन् पुत्रशोकानं व्यथित झालेल्या या कर्तृत्ववान व धाडसी मातेनं धिरोदत्तपणे पुनश्च खंबीरपणे उभं राहून होळकर साम्राज्याचा क्रांतीसूर्य तळपत ठेवला. अहिल्यादेवींनी “मरावे परी कीर्तीरूपे उरावे” ही उक्ती आदर्श राज्यकारभार करून खरी करून दाखविली.

अहिल्यादेवींनी आपल्या कारकीर्दीत हिंदू देवळांच्या व तीर्थक्षेत्रांच्या जीर्णोद्धाररासाठी ठोस उपाययोजना करताना मशिदी, दर्गे यांचा विसर पडू दिला नाही. त्यांच्यासाठी देखील राजकोषात आर्थिक तरतूद केली. बारा ज्योतिर्लिंगांचा जीर्णोद्धार तसेच बद्रीकेश्वरपासून रामेश्वरपर्यंत आणि जगन्नाथपुरीपासून सोमनाथपर्यंत अनेक मंदिरे, उद्याने, विश्रामगृहे, अन्नछत्रे, विहिरी, धर्मशाळा, रस्ते, पाणपोया असे विविध लोकोपयोगी उपक्रम राबवून त्यांनी खऱ्या अर्थानं दातृत्वाची भूमिका बजावली. नर्मदा, गंगा, गोदावरी या नद्यांवर घाट बांधल्याने, त्या कालखंडापासून पुढच्या काळातही नद्यांवर घाट बांधण्याचा पायंडा अखंडपणे चालत राहिला आहे. राज्यातल्या गोरगरीब लोकांना राजमाता ह्या नित्यनेमाने अन्नदान, वस्त्रदान अन् सणासुदीला दानधर्मही करीत असत. चारित्र्यसंपन्नता अन् स्त्रीत्वाचे वैभव जतन करून प्रपंच व परमार्थाची सांगड घालत या महान मातेनं गतकाळातील दुःखद घटनांना पाठीमागे टाकत, आपल्या जीवनाची सुव्यवस्थित घडी बसवली. या पार्श्वभूमीवरच अहिल्यादेवी होळकर यांचा रयतेत आदर्श राजमाता म्हणून नावलौकिक होता अन् आजही आहे.

पुरोगामी विचारसरणी असलेल्या अहिल्यादेवींनी कालबाह्य झालेल्या पूर्वीच्या कायद्यांमध्ये काळानुरूप सुधारणा केल्या. करपद्धती सौम्य केली. विधवांचे धन जप्त करून ते राजकोषात जमा करण्याची जुलमी प्रथा त्यांनी बंद केली. विधवेला मुल दत्तक घेण्याची इच्छा असल्यास तिला तशी कायद्याने मुभा देण्यात आली. न्यायप्रक्रियेत आडकाठी आणणाऱ्या अधिकाऱ्यांना शिक्षा देण्याचे अहिल्यादेवींनी फर्मान काढले होते. त्या उत्तम लढवय्या होत्या. त्या राजकारणाबरोबर अर्थकारणातही पारंगत होत्या. गावोगावी लोकांसाठी जागीच न्यायनिवाडा व्हावा, यासाठी त्यांनी पंचाधिकारी नेमले होते. भिल, गोंड जमातीतील लोकांकडून पडीक जमिनीवर लागवड करून घेतली. त्याद्वारे अहिल्यादेवींनी मल्हाररावांच्या काळापेक्षा अनेक पटीने राजकोषात वृद्धी केली. प्रजेकडून कररूपात प्राप्त झालेल्या धनराशीतून जनहिताचे विविध उपक्रम राबवून प्रजेला सुखी व आनंदी ठेवण्यासाठी त्यांनी आपलं सारं आयुष्य पणाला लावलं. जनसामान्यांबद्दल त्यांच्या अंत:करणात अपार करुणा होती.

उल्लेखनीय बाब म्हणजे अहिल्यादेवींनी आपल्या राज्यात शिक्षणावर अधिक भर दिला. होळकरांची राजधानी महेश्वर हे शिक्षणाचे प्रमुख केंद्र होते. मराठी, हिंदी पाठशाळेतून संस्कृत भाषेचेही शिक्षण दिले जायचे. याशिवाय वेद-पुराण, शास्त्रे, वेदांत, व्याकरणाचे शिक्षण हे विद्वान-पंडितांमार्फत देण्याची व्यवस्था अहिल्यादेवींच्या कारकीर्दीत करण्यात आली होती. त्यांच्या राजदरबारात शिल्पकार, साहित्यिक, कलाकार, विद्वान-पंडित यांना विशेष मानसन्मान मिळत असे. कवी मोरोपंत, शाहीर अनंत फंदी यांना सरकार दरबारी मानाचे स्थान होते. अहिल्यादेवींनी सैनिकी शिक्षणही घेतले होते. त्या जाबांज लढवय्या होत्या. आपल्या सैनिकांचे मनोधैर्य टिकवून त्यांचा आत्मविश्वास वाढावा, या उद्देशाने त्या आपल्या सैन्यदलाला वेळोवेळी भेटी देत असत. विशेष म्हणजे अहिल्यादेवींनी आपल्या सैन्यदलात महिलांची विशेष तुकडी तयार केली होती.

अभिमानाची गोष्ट म्हणजे मोगल, टिपू, निजाम, पेशवे यांच्यावर अहिल्यादेवीच्या कर्तबगारीची मोठी छाप होती. परधर्माविषयी त्यांच्या मनात नितांत आदर व सहिष्णुता होती. “राजा हा विश्वस्तासारखा असावा अन् प्रजेचे कल्याण चिंतणारा असावा”, हा आदर्श त्यांनी आपल्या राज्यकारभारात घालून दिला होता. त्यामुळेच त्यांना एक आदर्श शासनकर्त्या म्हणून रयतेकडून सन्मान मिळायचा. अहिल्यादेवी ह्या प्रजाहितदक्ष राजमाता म्हणून साऱ्या राज्यात किर्तीमान होत्या.

आदर्श राजमाता पुण्यश्र्लोक अहिल्यादेवी होळकरां (Punyashrok Ahilyadevi Holkar) च्या पावलावर पाऊल टाकत, त्यांचासारखा राज्यकारभार या पार्श्वभूमीवर शासन जनसामन्यांसाठी लोकहिताचे निर्णय घेत आहे. पुण्यश्र्लोक अहिल्यादेवी होळकर यांच्या स्मरणार्थ सर्वसमावेशक धोरण जाहीर करण्याचा राज्य सरकारचा मानस असून त्याचाच एक भाग म्हणून महिलांना एस.टी. प्रवासात सरसकट 50 टक्के सूट देण्यात आली आहे. मुख्यमंत्री-माझी लाडकी बहीण योजनेंतर्गत गोरगरीब महिलांना माहे 1500 रुपये आर्थिक मदत राज्य शासनातर्फे देण्यात येत आहे. राज्यातील कोट्यवधी माता-भगिनींना या योजनेमुळे आर्थिक आधार मिळून त्याद्वारे त्या छोटेखानी उद्योग करून कुटुंबाला हातभार लावत आहेत. विशेष म्हणजे त्या स्वतःच्या पायावर उभ्या राहताहेत. याशिवाय वयोश्री योजनेंतर्गत वयोवृद्ध महिला-पुरुषांना मोफत वैद्यकीय सुविधा व उपकरणे उपलब्ध करून देण्यात येत आहेत. माता सुरक्षित तर घर सुरक्षित या विशेष मोहिमेत महिलांना आरोग्य तपासणी, हॉस्पिटलमध्ये नेण्यासाठी रुग्णवाहिका, औषधं उपलब्ध करून देणे, यासाठी दोन कोटींचा निधी निर्धारित केला आहे.

पुण्यश्र्लोक अहिल्यादेवी होळकर यांच्या स्मरणार्थ महाराष्ट्र शासनाने अहिल्यानगर जिल्ह्यातील चौंडी येथील त्यांच्या जन्मस्थळी मंत्रिमंडळाची बैठक आयोजित करण्यात आली होती. अशी ही बैठक महाराष्ट्र राज्याच्या स्थापनेपासूनची पहिलीच बैठक होय. या बैठकीत चौंडीच्या सर्वंकष विकासाचा आराखडा तयार करून त्यासाठी 681 कोटी 32 लाखाची तरतूद करून तिला प्रशासकीय मंजूरी देण्यात आली. राजमाता अहिल्यादेवी होळकर यांच्या जीवनातील महत्वपूर्ण गोष्टींचे येथे जाणाऱ्या नागरिकांना दर्शन होईल. इतकेच नव्हे तर गत होळकर साम्राज्याची अन् अहिल्यादेवींच्या आदर्श राज्यकारभाराची जाणीव होईल. अन् त्यांच्या आठवणींना उजाळा मिळेल. खरंतर महायुती सरकारने पुण्यश्र्लोक अहिल्यादेवी होळकर यांच्या त्रिशताब्दी जयंतीनिमित्त अर्पण केलेली हीच खरी आदरांजली होय.

बंधू भगिनींनो, अल्पवयात विधवा झालेल्या एका स्त्रीनं सर्वधर्मसमभावाची कास धरून सन 1765 ते 1795 अशी तब्बल 30 वर्षे इंदूर संस्थानावर अधिराज्य करून भारतीय इतिहासात जणू एक विक्रमच नोंदविला. राजमातेचा मानवतावादी दृष्टिकोन सर्वधर्मीयांना प्रिय होता. मुस्लिम समाजाचे लोक तर अहिल्यादेवींच्या इंदूर संस्थानच्या उज्ज्वल भवितव्यासाठी मशिदीत नमाज अदा करून दुवा मागत असत. म्हणूनच सकल जनमानसात पुण्यश्र्लोक अहिल्यादेवी असे सन्मानाने म्हटले जात असे. अहिल्यादेवी म्हणजे मानवी जीवनातला अज्ञान, अध:कार, दुःख दूर करून त्यास प्रकाशमान करणारी दिव्यज्योत होती. राज्यातील सर्वधर्मीय जनतेच्या वतीने पुण्यश्र्लोक अहिल्यादेवी होळकरांना आदरांजली अन् त्रिवार वंदन!

00000

- लेखक: रणवीर राजपूत, ठाणे

निवृत्त जिल्हा माहिती अधिकारी