கதைப்படி, ரோட்டோர டிபன் கடையில் வேலை பார்க்கும் அநாதை வேலுவுக்கு, அவன் கடையை ஒட்டி இருக்கும் அடுக்குமாடி குடியிருப்பில் வீட்டு வேலை பார்க்கும் ஜோதி மீது காதல். ஆனால் இந்த காதல் கசிந்துருவதற்குள், வேறு சில காரணங்களால் ‌வேலு மீது தப்பான அபிப்ராயம் கொண்டு வெறுப்பை உமிழ்கிறார் ஜோதி! இந்நிலையில் ஜோதி வீட்டு வேலை செய்யும் வசதியான வீட்டுப்பெண் ஆர்த்தி மீது அதே ப்ளாட்டில் வசிக்கும் அர்த்தியை விட வசதியான தினேஷூக்கு காதல் போர்வையில் காமம்! அந்த காமமும், காதலும் ஆர்த்தியை, ஆபாசமாக தனது செல்போனில் படமெடுத்து அதை நண்பர்களின் போனில் உலவ செய்து, பெருமை பட வேண்டும் எனும் நோக்கத்தில் தான் தினேஷூக்கு ஏற்படுகிறது. இது தெரியாமல் தினேஷின் வலையில் விழும் ஆர்த்தி ஒரு கட்டத்தில் சுதாரித்துக் கொண்டு தினேஷை விட்டு விலக, தன் நோக்கம் நிறைவேறாத வருத்தத்தில் தினேஷ், ஆர்த்திக்கு அடிக்கும் ஆசிட், குறிதவறி ஜோதியின் முகத்தையும், முக்கால்வாசி உடம்பையும் பதம்பார்க்கிறது.

ஜோதியின் அம்மா உள்ளிட்டவர்களின் கூற்றுபடி ஆசிட் அடித்தது வேலு தான் என விசாரணை கைதியாக பிடித்து வரும் ‌காவல்துறை, காசுக்கு ஆசைப்பட்டு தனது குள்ளநரித்தனத்தால் அவரையே குற்றவாளியாகவும் கோர்ட்டின் முன் நிறுத்துகிறது. இந்த வழக்கில் இருந்து வேலு தப்பித்தாரா…? உண்மை குற்றவாளிகள் தண்டிக்கப்பட்டார்களா…? ஜோதியின் மீதான வேலுவின் காதல் என்னாயிற்று…? என்பது உள்ளிட்ட இன்னும் பல எண்ணிலடங்கா வினாக்களுக்கு விடையளிக்கிறது வழக்கு எண் 18/9 படத்தின் வித்தியாசமும் விறுவிறுப்பான மீதிக்கதை!

வேலுவாக புதுமுகம் ஸ்ரீ, ரோட்டோர தள்ளுவண்டி டிபன் கடை வேலையாளாகாவே வாழ்ந்திருக்கிறார். அவரை மாதிரியே ஜோதியாக வரும் வீட்டு வேலைப்பெண்ணாக சட்டை, பாவாடையில் கையில் தூக்குவாளி கூடையுடன் வரும் ஊர்மிளாவும் காரமிளையாக கலக்கி எடுத்திருக்கிறார். இவர்களை மாதிரியே தினேஷாக வரும் மிதுன் முரளி, ஆர்த்தியாக வரும் மனிஷா யாதவ் உள்ளிட்ட புதுமுகங்களும் பாத்திரமறிந்து பளிச்சிட்டிருக்கின்றனர். பலே! பலே!

மேற்படி இந்த ஜோடிகளைக் காட்டிலும் ஒருபடி மேலாக ஸ்ரீயின் அப்பா-அம்மாவாக ஒரு சில காட்சிகளே வரும் வேடியப்பன் எனும் செந்தில், ராணி, தினேஷ் எனும் மிதுனின் தாயாக மினிஸ்டரின் கீப்பாக வரும் ராதிகா, ஆர்த்தி எனும் மனிஷாவின் தாய் தந்தையாக வரும் கவுதம், வித்யா-ஈஸ்வர், ஊர்மிளா எனும் ஜோதியின் தாயாக வரும் பார்வதி, ஸ்ரீக்கு வேலை வாங்கி தரும் “ஒரு மாதிரி” தோழியாக தேவி எனும் ரோஸி உள்ளிட்ட துணை, இணை நடிகர்கள் கூட பிரமாதம் போங்கள்… எனும் அளவு நடித்திருப்பது படத்தின் பெரியபலம்! இவர்கள் எல்லோரையும் தூக்கி சாப்பிடும் விதமாக இன்ஸ்பெக்டர் குமாரவேலாக நல்லவர் மாதிரி வாயாலேயே “வடை சுடும்” புதுமுகம் முத்துராமனும், ஸ்ரீயின் ரோட்டுகடை உதவியாளனாக காமெடி பண்ணும் சின்னசாமியும் சற்றே வறண்ட கதைக்களத்தை மறைத்து கலர்புல்லாக படத்தை பிரமாதமாக தூக்கி நிறுத்தி, வழக்கு எண் படத்திற்கு வெற்றி வாக்குளை சேர்க்கின்றனர். பேஷ்! பேஷ்!!

முதல்பாதி சற்று மெதுவாக நகர்வதும், படம்முழுக்க ஒருவித சோகம் பரவிக்கிடப்பதும் சற்றே டாக்குமெண்ட்ரி ‌எபெக்ட்டை கொடுத்தாலும் அறிமுக இசையமைப்பாளர் பிரசன்னாவின் அழகிய பின்னணி இசையும், அசத்தலான பாடல்களும், எஸ்.டி.விஜய் மில்டனின் வித்தியாசமான புதுவித ஒளிப்பதிவும், இயக்குநர் பாலாஜி சக்திவேலின் கருத்தாழமிக்க எழுத்தும்-இயக்கமும் மைனஸ் பாயண்டுகளை எல்லாம் புறந்தள்ளிவிட்டு பிளஸ் பாயிண்டுகளை ‌நோக்கியே படத்தை இழுத்து சென்றிருப்பது, வழக்கு எண்ணை நம் வாழ்க்கையாக பிரதிபலிக்க செய்திருக்கிறது.

ஆக மொத்தத்தில் “வழக்கு எண் 18/9″ , வாழ்க்கையை பிரதிபலிக்கும் தமிழ் திரைப்படங்களில் என்றென்றும் வாழும் “நம்பர்-ஒன்!”

தன் கல்லூரி தோழிகளை காதலித்து ஏமாற்றிய கார்த்திக் மீது கதாநாயகி மலருக்கு அப்படி ஒரு வெறுப்பு! கார்த்திக்கும் கருணை மலர் எனும் அட்வைஸ் மலரின் முழுப்பெயரை கேட்டாலே அப்படி ஒரு வெறுப்பு. ஆனால் ஒரு சில வருடங்கள் கழித்து தான் வேலை பார்க்கும் ஐ.டி., கம்பெனியிலேயே வேலை பார்க்கும் மலர் அப்படி ஒரு அழகு என தெரிந்ததும், கார்த்திக்கிற்கு மலர் மீது அப்படி ஒரு காதல் ஈர்ப்பு! தான் கார்த்திக் என தெரிந்தால் தன் காதல் மலர் ஆகவேண்டிய கருணைமலர், காட்டுமலர் ஆகி கசப்பை வீசுவாள்… என எண்ணும் கார்த்திக், அவளுக்காக சுந்தர் எனும் பெயரில் நாடகமாடுகிறான், நடமாடுகிறான். ஒருகட்டத்தில் கார்த்திக்காலேயே கார்த்திக்தான் சுந்தர், சுந்தர் தான் கார்த்திக் என தெரிய வரும்போது, கருணைமலர், அவனது காதல் மலராகவே இருந்தாரா…? இல்லை காட்டுமலராக கசந்தாரா…? என்பது க்ளைமாக்ஸ்!

கார்த்திக் மற்றும் சுந்தராக புதுமுகம் ஷிவ், நன்கு நடிக்கத் தெரிந்த முகமாக அறிமுகமாகியிருக்கிறார். அவரை மாதிரியே கருணை மலர் எனும் மலராக கதாநாயகி மான்சியும் நச் என்று நடித்திருக்கிறார். இருவருமே விறுவிறு கதைக்கேற்ற செம துருதுரு!

விக்கியா வரும் சந்தானம், விலா நோக சிரித்து விக்கலெடுக்க வைக்கிறார். சுஜாவாக ஹீரோவின் நல்ல தோழியாக வரும் சுஹாசினியும் பிரமாதம்!

ஆர்.வேல்ராஜின் ஒளிப்பதிவு – அழகுப்பதிவு! வாலி, பா.விஜய் இவர்களின் பாடல் வரிகளில், சதீஷ் சக்கரவர்த்தி இசை – சக்ரவர்த்தியாக மிளிர்ந்திருக்கிறார். அறிமுக இயக்குநர் ஆண்ட்ரு லூயிஸ், இயக்குநர் எஸ்.ஜே.சூர்யாவின் சிஷ்யராம். ஒரு சில இடங்களில் குருவையே மிஞ்சி நிற்கிறார் சிஷ்யர். பலே, பலே!

கதை மொத்தமும் ஐ.டி.கம்பெனி ஒன்றின் உள்ளேயே நடப்பது சற்றே போரடித்தாலும், அழகிய ஒளிப்பதிவும், அழகிய அயல்நாட்டு லொகேஷன்களில் படமாகியிருக்கும் பாடல் காட்சிகளும் லீலை-யை வெற்றி மாலை ஆக்கிவிடுகின்றன என்றால் மிகையல்ல!

மொத்தத்தில் “லீலை” – “கலை!”

கட்சிக்கூட்டம் இருக்கிற நாட்கள்ல பணத்துக்கு பஞ்சமில்லாம சுத்தற சுப்பு, மந்தநாட்கள்ல, திருட்டு வேட்டைக்கு கிளம்பிடுவாரு. அப்படி ஒரு நல்ல மனுஷன். இந்த சுப்புவுக்கு ஒரு சூப்பர் ப்ளாஷ் பேக்! சின்னவயசுல மக்காச்சோளத்துக்காக எதையும் துணிஞ்சு செய்ற சுப்பு… தன் தோழியான எட்டு வயசு பானுமதிக்கும் தனக்கும் இருந்த நட்பை நண்பர்கள்கிட்ட அசிங்கப்படுத்த, பானுமதி சண்டை போட்டு கா விட்டுட்டு பிரிஞ்சுடுறாங்க. ஆனாலும் பானுமதி அப்பாகூட தொடர்புலேயே இருக்கற சுப்பு, 20 வருஷத்துக்கு அப்புறம் பானுமதியோட மனசை மாத்துறாரு. சுப்புவை திருத்தி நல்ல வழிக்கு கொண்டு வரணும்!னு நினைக்கிற பானுமதி, பிணம் கூட எரியுறப்போ எழுந்து நிக்குது! நீ உயிருள்ள மனுஷன், எழுந்து நிற்கணுமா? இல்ல… எரிஞ்சு சாம்பலாகணுமா?ன்னு முடிவு பண்ணிக்கோ!ன்னு சொல்ல… இடைவேளை.

நாம பாரத்தை இறக்கிட்டு வர்றதுக்குள்ள, சுப்பு மனசுல அப்படி ஒரு மாற்றம். தீவிர அரசியல்ல இறங்கிடலாம்!ன்னு முடிவெடுத்து தன்னை மேடையேத்தி தனக்கு மைக் கொடுத்த கட்சி தலைவன்கிட்டேயே போய் கவுன்சிலர் வாய்ப்பு கேட்க, தலைவன் அவமானப்படுத்தி அனுப்புறான். கோபப்பட்ட சுப்பு சுயேச்சையா நின்னு ஜெயிக்க, பானுமதியை கல்யாணம் பண்ணிக்கிட்டு ஊருக்கு நல்லது பண்றாரு. இதனால கோபப்படற ஊருக்கு நல்லது பண்றாரு. இதனால கோபப்படற தலைவனை புத்திசாலித்தனமா(!) காலி பண்றாரு. இப்படி மக்கள்கிட்ட ஓட்டு வாங்கி ஹீரோ தீவிரமா அரசியல் பண்றதால… படத்துக்கு பேர் மை.

பழைய கதை. பலவீனமான திரைக்கதை. ஆனாலும், இது மோசம்ன்னு சொல்ல முடியாத அளவுக்கு படத்துல எல்லாக் காட்சிகளும் நல்லாவே இருக்கு. நடிகர்கள்ல தொடங்கி ஒளிப்பதிவாளர், இசையமைப்பாளர்ன்னு அத்தனைபேரும் தங்களோட வேலையை சரியா பண்ணியிருக்காங்க. ஆனாலும் படம் பார்த்த திருப்தி இல்லை.

மொத்தத்தில் “மை” – “மனதிலும் ஒட்டாத மை”

ரசிகன் குரல் – எல்லா சீனும் எங்கேயோ பார்த்தமாதிரியே இருக்குதே!

ஆள் இல்லாத தீவுல இருக்கற ஒரு பங்களாவுல தனியா(?) 10 நாள் தங்கியிருந்தா 10 கோடி ரூபாய் ஜெயிக்கலாம்!ன்னு ஒரு டி.வி.யில போட்டி நடத்துறாங்க. அதுல கலந்துக்க சமையல்காரன் (வையாபுரி), டாக்டர் (இளவரசு), வக்கீல் (மீனாள்), லோக்கல் ஏரியா பெண் (ஆர்த்தி), கடத்தல்காரன் (ஸ்ரீமன்)… இப்படி 10 பேர் தேர்வாகுறாங்க. டி.வி. நிகழ்ச்சியை காரணமா வைச்சு இங்க கூட்டிட்டு வந்து கொலை பண்றாங்க!ங்கறது தீவுக்கு வந்து அடுத்தடுத்து ரெண்டு கொலைகள் விழுந்ததும் தான் இவங்களுக்கு தெரிய வருது. தப்பிச்சு போக வழியில்லாத நிலைமையில் ஒவ்வொருத்தரா சாகறாங்க. இதுக்கிடையில இவங்களை சாகடிக்கிறதுக்கான காரணத்தை திரைபோட்டு காட்டுகிறார் கொலைகாரர்(நாசர்). எத்தனை பேர் தப்பிச்சாங்க?ங்கறது மீதி கதை.

ஜென்ம நட்சத்திரம், நாளைய மனிதன் மாதிரி பெரிய த்ரில்லர் படங்களை எடுத்த இயக்குனரோட படமா இது! நல்லா இருக்குன்னு சொல்ல படத்துல ஒரு விஷயம்கூட இல்லை. நாடகத்தன்மையான நடிப்பு, சுவாரஸ்யமே இல்லாத திரைக்கதைன்னு படம் முழுக்க குறைகள் அதிகமா தெரியுது. பெயரளவுக்கு கூட படத்துல லாஜிக் இல்லை. கேமராவும், பின்னணி இசையும் தான் த்ரில்லர் படத்துக்கு பலமே! இங்கே இரண்டுமே பெரிய சொதப்பல். குறிப்பா கேமரா… 3டி படத்தை கண்ணாடியை கழட்டிட்டு அவுட் ஆப் போகஸ்! நாசர், இளவரசு, வையாபுரின்னு நல்ல நடிகர்கள் இருந்தும் யாருக்கும் நடிக்கறதுக்கு படத்துல வாய்ப்பு இல்லை.

மொத்தத்தில் அடுத்தது, பயங்கரமான படம் ஜாக்கிரதை

ரசிகன் குரல் – கொலை பண்றாங்க… கொலை பண்றாங்க!

கதைப்படி தன்னை பார்க்கும் போதெல்லாம் கடுப்படிக்கும் அப்பா, அடுப்படியே கதி என கிடந்தாலும் தன் மீதும் குடும்பத்தின் மீது பாசங்காட்டும் அம்மா, ரெண்டாங்கெட்டான் வயதில் ஒரு தம்பி, எங்க கூப்பிட்டாலும் ஏன்? எதற்கு.? எனக் கேட்காமல் பைக் பில்லியனில் ஏறிக் கொள்ளும் நட்பு, பார்க்கும் பெண்கள் எல்லாம் தன்னுடன் பழக மாட்டார்களா…? என ஏங்கும் மனசை உடைய வயசு! இதுதான் சூர்யா எனும் ஹீரோ ஜோதி கிருஷ்ணா! இவருக்கு பாராமுகங்காட்டும் இளம் பெண்களில் ஒருத்தியை‌யாவது பிடித்து நட்பாக்கி, லவ்வாக்கி, அவர் மூலம் ஊரில் உள்ள பெண்களை எல்லாம் உரசி பார்த்துவிட வேண்டுமென்பது நப்பாசை அல்ல…! லவ் ஆசை…! அப்படிப்பட்ட சூர்யா-ஜோதி கிருஷ்ணாவிடம் பிரீத்தி எனும் திவ்யா பண்டாரி வகையாக சிக்குகிறார். காதல் கூடாது, நட்பு கிடையாது என கட் அண்ட் ரைட்டாக இருக்கும் திவ்யாவை, மெல்ல மெல்ல கவிழ்த்து நட்பாக்கும் ஜோதி கிருஷ்ணா, அந்த நட்பை தப்பாக பயன்படுத்தி பல பெண்களை மடக்கி அவர்களுடன் சுற்றுகிறார். ப்ரீத்தி எனும் திவ்யா பண்டாரிக்கோ ஜோதி மீதுள்ள நட்பு, மெல்ல மெல்ல காதலாக கசிந்துருகிறது. ஆனால், அதை சட்டை செய்யாத ஜோதி கிருஷ்ணா, பல பெண்களை வட்டமடித்து கொட்டமடிக்கிறார். ஜோதி கிருஷ்ணா திருந்தினாரா…? திவ்யா பண்டாரி வருந்தினாரா…? என்பது ஊ ல ல லாவின் மீதிக்கதை!

அப்பாவிற்கு அடங்காத பிள்ளையாக, அம்மாவின் பாசத்திற்கு மயங்கும் வாலிபராக, காதலிகளுக்காக ஏங்கும் இளைஞராக, நட்புக்கு நயவஞ்சகம் செய்யாதவராக ஜோதி கிருஷ்ணா சூர்யா எனும் பாத்திரத்தில் வாழ்ந்திருக்கிறார் என சொல்லும் அளவிற்கு வாழ முயற்சித்திருக்கிறார்! நடிப்பு வருகிறது என்றாலும் உப்பலான முகமும், உடம்பும் அதை தெரியவிடாமல் தடுக்கிறது. சற்றே சதை போட்டிருப்பதை தவிர்த்திருந்தால் ஜோதி இந்த தடையை தடுத்திருக்கலாம். தம்பி ரவிக்கிருஷ்ணாவிடம் இன்னும் நிறைய ஆக்டிங் டிப்ஸூம் வாங்கி வந்து அடுத்து படத்தில் ஜோதி நடிக்க வேண்டும் என்பது நம் அவா!

நாயகர் திவ்யா பண்டாரி வருகிறார் போகிறார், சிரிக்கிறார், பைக்கில் பறக்கிறார்… தட்ஸ் ஆல்! ஜோதியின் அப்பாவாக தலைவாசல் விஜய், அம்மா ராணி, திவ்யா பண்டாரியின் அப்பாவாக பட்டிமன்றம் ராஜா, கஞ்சா கருப்பு, சேகர் பிரசாத், சிட்டி பாபு, பக்கோடா பாண்டி, சாய் சுந்தர், கவுரவ் என ஏகப்பட்ட நட்சத்திரங்கள் இருக்கிறார்கள். சேகர் சந்திராவின் இசை இனிமையாக இருக்கிறது. ஆர்.ஜி.சேகரின் ஒளிப்பதிவு அசரடிக்கிறது. எல்லாமே ஏ.எம்.ஜோதி கிருஷ்ணா நடிக்க போகாமல் திரைக்கதை, இயக்கத்தில் இன்னும் முழுமூச்சாக இறங்கி இருந்தார் என்றால், “ஓஹோ ல ல லா” என்றில்லாமல் இருந்திருந்தாலும், உண்மையாகவே “ஊ ல ல லா” என்றிருக்கும்.

பூமி மாதிரியே இருக்கிற ஒரு கிரகத்தை நாசா கண்டுபிடிச்சு அதுக்கு ப்ளானெட் ஜினு பேர் வைச்சு பூமியில இருந்து சிக்னல் அனுப்புறாங்க. ஒருநாள் அந்த கிரகத்துல இருந்து 5 விண்வெளிக் கப்பல்கள்ல வேற்றுக் கிரகவாசிகள், ஹூப்பர் கோஷ்டி பயிற்சி செய்ற அதே பசிபிக் பெருங்கடல்ல வந்து இறங்குறாங்க. வந்த கையோட, கடலுக்குள்ளே அவங்களை சுத்தி பாதுகாப்பு வளையத்தை உருவாக்கி வைக்கிறாங்க. இந்த வளையத்துக்குள்ளே பயிற்சியில் இருந்த ஹூப்பர் அவர் அண்ணன் உட்பட ஏகப்பட்ட வீரர்கள் போர் கப்பல்களோட மாட்டிக்கிறாங்க. அதிநவீன தொழில்நுட்ப வசதியோட இருக்கற எதிரிகள்கிட்ட சிக்கி ஹூப்பரோட அண்ணன் இறந்து போக, மத்தவங்க கதி என்ன? ஹூப்பரும், பூமியும் பிழைச்சாங்களா…?ங்கறது மீதி கதை.

பேட்டில்ஷிப் ஒரு பிரபலமான வீடியோ கேமோட கதைங்கறதால, மேலே‌ சொல்லியிருக்கிற மொத்த கதையும் ரெண்டு மூணு காட்சியில் முடிஞ்சுபோயிரும். அப்புறம் படம் முழுக்க சண்டைதான். என்ன… விளையாட்டுல ஒவ்வொரு ஏலியனையும் நாம சுடுவோம். இங்கே நமக்கு பதிலா ஹீரோ ஹூப்பரும், மத்தவங்களும் சாகடிக்கிறாங்க. பிரம்மாண்டமான போர் கப்பல்கள், ஏவுகணைகள், வேற்றுக்கிரகவாசிகளோட ராட்சத இயந்திரங்கள், சக்கர உலோக உருளைகள்னு படம் முழுக்க வர்ற போர் இயந்திரங்களை பார்த்து ஆச்சரியத்துல திறந்த நம்ம வாயை கடைசிவரை மூட முடியலை!  இந்த பரபரப்பான ச‌ண்டைக்கு நடுவுலேயும், காதல், சென்டிமென்ட், காமெடின்னு சுவாரஸ்யம் சேர்ந்து கலந்து கட்டி அடிச்சு நம்மளை சீட்டோ கட்டிப்போடுறாங்க.

பேட்டில்ஷிப்(கடல்யுத்தம்) – விறுவிறுப்பான விளையாட்டு

ரசிகன் குரல் – ஆயிரம் சொல்லு! ஹாலிவுட்… ஹாலிவுட்தான்.

தேனி மாவட்டம் செட்டிக்குளம் தான் கதைக்களம். வேலைக்கு போறது குலதெய்வத்துக்கு ஆகாது ன்னு சொல்லி, வெட்டித்தனமா ஊருக்குள்ள சுத்திட்டு இருக்கிற இளவட்டம் பச்சைக்கு(வாசகர்), பூ விற்கிற செல்வி(சரண்யா) மேல காதல். காதலி முன்னாடி அடிக்கடி சீன் போட்டுக்கிட்டே சுத்தற பச்சை ஒருநாள் ஒரு அரசியல் கட்சி தலைவனை செருப்பால அடிக்கிறான். டென்ஷன் ஆன தலைவர் உன்னை தீர்க்கறேன்டா!ன்னு சவால் விட்டுட்டு கிளம்புறான். ஆனா எதைப்பத்தியும் கவலைப்படாத பச்சைக்கு இன்னொரு கட்சி ஆதரவுக்கரம் நீட்ட… கட்சியில சும்மா காத்து மாதிரி நுழைஞ்சு கலக்குறான். கட்சி மூலமா காத்துங்கற பேர் கிடைக்குது. கட்சிக்கிட்ட பேர் வாங்கின பச்சை அவனோட காதல்ல ஜெயிச்சானா…? சவால்விட்ட தலைவன் கிட்ட இருந்து பொழைச்சானா…?ங்கறது மீதி கதை.

படம் எப்படி இருந்தா என்ன? அடிக்கிற வெயிலுக்கு இரண்டரை மணிநேரம் ஏசி-யில உட்கார்ந்துட்டு போகலாம்!ங்கற உயர்ந்த லட்சியத்தோடு வர்ற தமிழ் ரசிகர்களை இடைவேளை வரை சிரிக்க வைக்குது பச்சையோட பளிச் நடிப்பும், நகைச்சுவையான பேச்சும். சைட் அடிக்கிறதுக்கு முன்னாடியும், தண்ணி அடிக்கிறதுக்கு முன்னாடியும், தகப்பனை அடிக்கிறதுக்கு முன்னாடியும் மனிதன் வாழ்க்கையில் ஜாலியாக இருக்க வேண்டும் அதைத்தானே நான் செய்து கொண்டிருக்கிறேன்! ன்னு பஞ்ச் வைச்சு தன் ஸ்கோரை ஆரம்பிக்கிற பச்சை அதுக்கப்புறம் சிக்குன பந்தையெல்லாம் சிக்ஸருக்கு விரட்டுறாரு. உதாரணத்துக்கு தன் காதலி படிக்கிற கிறித்துவ பள்ளிக்கூடத்துக்குள்ள அத்துமீறிப் போய் கர்த்தர் அழைத்தார்… காற்றாய் வந்தேன்!ன்னு கலாய்க்கிற போதும், தமிழ் பரிட்சை எழுதிட்டு இருக்கற தன் காதலிக்கு மைக் செட் போட்டு கோனார் நோட்ஸ் வாசிச்சு உதவி செய்றபோதும் பச்சையோட நடிப்புல அப்படி ஒரு வசீகரம். படம் நல்லாத்தான்யா இருக்கு! ரசித்து மகிழ்கிறது திரை அரங்கம். ஆனா… எல்லாமே இடைவேளை வரைக்கும்தான்.

இடைவேளைக்கு அப்புறம்… படத்தை பத்தி அதுவரைக்கும் நாம நினைச்சதை மறுபரிசீலனை பண்ண வைக்கிறாரு டைரக்டர் கீரா. க்ளைமாக்ஸ்… அப்படி ஒரு வறட்சி! ஆனாலும்… இசையமைப்பாளர் ஹரிபாபுவின் மீசை இல்லாத சூரப்புலி… நான் உன்னை பார்த்தேன்… பாடல்களில் உள்ள குளுமையிலும், தென்பகுதி மக்களின் நக்கல், நையாண்டி கலந்த வாழ்க்கை முறையை சொன்ன அழகிலும் மனம் நிறைகிறது.

இந்தக்கதையை எத்தனைக்கு எத்தனை காமெடியாகவும், கலர்ஃபுல்லாகவும் சொல்ல முடியுமோ அத்தனைக்கு அத்தனை வித்தியாசமாகவும், விறுவிறுப்பாகவும் படமாக்கியிருக்கும் இயக்குநர் ராஜேஷ்.எம்-மிற்கு ஒரு ஹேட்ஸ் ஆப் சொல்லியே தீர வேண்டும்! மனிதர் தனது முந்தைய வெற்றிப்படங்களான “சிவா மனசுல சக்தி”, “பாஸ் என்கிற பாஸ்கரன்” படங்களைக் காட்டிலும் காமெடியில் புகுந்து விளையாடியிருப்பது பேஷ், பேஷ்… சொல்லுமளவிற்கு பிரமாதமாய் இருக்கிறது!

இயக்குநர் எதிர்பார்த்ததை எள் அளவும் பிசாகமல், பிரமாதமாக செய்து இருக்கிறார் ஹீரோ சரவணன் பாத்திரத்தில் வரும் உதயநிதி ஸ்டாலின்! சத்யம் சினிமாஸில் டிக்கெட் கிழித்து கொடுக்கும் கேரக்டரில் வெல்கம் டூ சத்யம் சினிமாஸ் என்றபடியே டிக்கெட் கிழித்து கொடுப்பதில் தொடங்கி, போலீஸ் உயரதிகாரி ஷியாஜி ஷிண்டேயின் மகள் ஹன்சிகாவை தைரியமாக டாவு அடிப்பது வரை சீன் பை சீன் காமெடியாகவும், கலர்புல்லாகவும் “யூத்”துகளை கவரும் வகையில் “நச்” என்று நடித்திருக்கும் உதயநிதிக்கு நடனம் வரவில்லை என்றாலும், அதையும் காட்டிக்  கொள்ளாமல் பாடல் காட்சிகளிலும் பட்டையை கிளப்பி இருப்பது பலே, பலே சொல்ல வைத்து விடுகிறது! அப்பா ஸ்டாலினால் கலைத்துறையில் முடியாததை மகன் உதயநிதி நிச்சயம் நிறைவேற்றி காட்டுவார் என்பது நிதர்சனம்!

இரண்டாவது நாயகர், இரண்டு நாயகர்களில் ஒருவர்… எனும் அளவிற்கு சந்தானம் வாயை திறந்தாலே, அவ்வளவு ஏன் சந்தானம் வந்தாலே… தியேட்டரே சிரிப்பால் அதிர்கிறது! அவரும் சளைக்காமல், தத்துவமாகட்டும், காமெடியாகட்டும், காமநெடியாகட்டும் அத்தனையிலும் அடித்து தூள் பறத்தியிருப்பது ஓ.கே. ஓ.கே. படத்திற்கு டபுள் ஓ.கே. சொல்ல வைக்கிறது! ஒரு சீனில் மேஜை மீது ஒரு கிளாஸை வைத்து அதில் சரக்கை ஊற்றி, இது நீ, இதில் ஊற்றும் தண்ணீர் உன் காதலி, இந்த க்ளாஸ் தான் என்ன மாதிரி நண்பர்கள்… என அவர் அடிக்கும் தத்துவ டயலாக் ஆகட்டும், பேட், பேட், பேட் என்றபடி குதிக்கும் இடங்கள் ஆகட்டும் எல்லாமே சூப்பர்!

கதாநாயகி ஹன்சிகா, ஒரு சீனில் உதயநிதி சொல்வது மாதிரி ஒவ்வொரு சீனிலும் “சின்னத்தம்பி” குஷ்பு மாதிரியே அழகாக இருக்கிறார், வருகிறார், சிரிக்கிறார், போகிறார்! உதயநிதியின் அப்பா-அம்மாவாக வரும் அழகம்பெருமாள்-சரண்யா இருவருக்கும் இடையேயான 20 வருட ஊடல் ஒரு மாதிரி சென்டிமெண்ட் டச்!

ஹாரிஸ் ஜெயராஜின் இசை, பாலசுப்ரமணியெத்தின் ஒளிப்பதிவு எல்லாமே பாடல் காட்சிகளுக்கும், படக்காட்சிகளுக்கும் பெரிய பலம்!

ஆசிரியர் வேலை பார்க்கும் அழகம் பெருமாளை உதயநிதி, வாத்தி வாத்தி… என அடிக்கடி விளிப்பது, கோயில் குளத்து படித்துறையில் அமர்ந்தபடி சூரத் தேங்காய் சில்களை பொறுக்கி தின்று அவற்றை குளத்திற்குள் வீசுவது உள்ளிட்ட ஒரு சில குறைகள் இருந்தாலும், ஆர்யா, சினேகா, ஆன்ட்ரியா உள்ளிட்ட கெஸ்ட் ரோலில் வரும் நட்சத்திரங்களையும் கூட, பெஸ்ட் ரோலாக ரசிகர்கள் மனதில் நிற்க வைக்கும் அளவிற்கு காமெடி வித்தை தெரிந்த ரா‌ஜேஷ்.எம்-மின் எழுத்து-இயக்கத்தில், “ஓ.கே. ஓ.கே. – ஓ.கே. ஓ.கே அல்ல…!” “சூப்பரோ சூப்பர்!!”

கதைப்படி பள்ளிப்பருவ காதல், பருவ வயதிலும் தொடர்ந்து ‌பெரிதாக, எந்த எதிர்ப்பும் இல்லாமல் திருமணத்தில் இணைகிறது தனுஷ் – ஸ்ருதிஹாசன் ஜோடி! பிஸினஸில் பல கோடிகள் நஷ்டமாகும் தனுஷ், “பை போலா டிஸ்ஆர்டர்” எனும் ஒரு வித வாயில் பெயர் நுழையாத மனநோயால் பாதிக்கப்பட்டு, ஆட்டை கடித்து, மாட்டை கடித்து, மனிதரையம் கடித்த கதையாக, பேயைப்பார்த்து, நாயை அடித்து (கொன்று), நண்பனையும் கடித்து, காதல் மனைவியையும் கொல்லத் துடிக்கிறார். மனநோய் முற்றி தனுஷ், மனைவி ஸ்ருதியை கொன்றாரா…? தன்னை தானே மாய்த்துக் கொண்டாரா…? என்பது தான் “3″ படத்தின் திருப்பங்களும்(?) குழப்பங்களும்(!) நிறைந்த மீதிக்கதை!

தனுஷ், ராம் என்ற பாத்திரத்தில் மாணவராகவும், மணாளனா(நாயகி ஸ்ருதியின் மனம் கவர்ந்த)கவும், மனநோயாகளியாகவும் வெவ்வேறு பரிமாணங்களில் வித்தியாசமான கதாபாத்திரமாக வாழ்ந்திருக்கிறார்! பள்ளி மாணவராக சக மாணவி ஸ்ருதியின் பின்னால் அலைந்து, அவரது அப்பாவிடம் ப்ளார் என அறை வாங்கிய பின்பும், மறுநாளே அவர் வீட்டு வாசலில் போய் துணிச்சலாக நின்று “ஐ லவ் யூ” சொல்லு என அடம் பிடிப்பதில் தொடங்கி… மனநோய் முற்றி நாயகியின் “பெட்”டான நாயைக் கொன்று நாடகமாடி, நண்பனின் ம‌ண்டையை உடைத்து, நாயகியையும் கொல்லத் துணிவது வரை…பிரமாதமாக ராம் பாத்திரத்தில் பொருந்தி நடித்திருக்கும் தனுஷ், தன்னை தானே மாய்த்துக் கொள்வது, என்னதான் வாயில் பெயர் நுழையாத வியாதி என்றாலும் சற்றே ஓவர் ஆக்டிங்காக தெரிவது பலவீனம்.

ஸ்ருதிஹாசன், ஜனனி பாத்திரத்தில் மாணவி, காதலி, மனைவி என வெவ்‌வேறு காலகட்டத்தில் வெவ்வேறு விதமான நடிப்பைக் காட்டி வெளுத்து வாங்கியிருக்கிறார். கமலின் மகளா கொக்கா…? எனும் அளவிற்கு முத்தக்காட்சிகளிலும் புகுந்து விளையாடியிருப்பது புரட்சி! க்ளைமாக்ஸில் தனுஷ் தன்னைத் தானே தீர்த்துக் கொண்ட விதம் குறித்து அவரது நண்பர் செந்தில் சொல்ல கேட்டு கதறும், அதிரும் காட்சிகளில் ஸ்ருதியின் நடிப்பு திரையரங்கில் பச்சாயத்தை ஏற்படுத்துவதற்கு பதில் சிரிப்பலைகளை ஏற்படுத்துவது “3″ படத்தின் மற்றுமொரு பெரிய பலவீனம்!

மற்றபடி தனுஷ், ஸ்ருதி மாதிரியே அவர்களது நண்பர்களாக வரும் செந்தில் மற்றும் குமார் எனும் சிவகார்த்திகேயன், டியூசன் மாஸ்டர், தனுஷின் அப்பா பிரபு, அம்மா பானுப்ரியா, ஸ்ருதியின் அம்மாவாக வரும் ரோஹினி, ஸ்ருதியின் தங்கையாக வாய்பேச முடியாத பள்ளி சிறுமியாக வரும் பேபி நட்சத்திரம் உள்ளிட்ட எல்லோரும் நச் என்று நடித்து நம்மை டச் பண்ணி விடுகிறார்கள் பலே பலே! அதிலும் அப்பா நடிகர் ஆகிவிட்ட பிரபு பிரமாதம்! லைப் மேட்டர் பேசணும்பா… என அடிக்கடி அப்பா பிரபுவின் முன் தனுஷ் நிற்பதும், பிரபு முதலில் மகனை சிரிப்பாக்குவதும், பின் தனுஷ் சொல்லும் விஷயத்தை சீரியஸாக அணுவதும் பிரமாதம். தனுஷ் தான் சாவதற்கு முன் அப்படி ஒரு லைப் மேட்டரை பிரபுவிடம் பேசப்போய், அதற்கு ஓ.கே. சொல்லும் பிரபு, இனி அப்படி பேசவரக்கூடாது என தனுஷை எச்சரிப்பதும் சென்டிமெண்ட் டச்!

ஆர்.வேல்ராஜின் குதுகலமான ஒளிப்பதிவு, அறிமுக இசையமைப்பாளர் அனிருத்தின் கொலவெறி இசை( எதிர்பார்த்த அளவுக்கு விஷூவலாக கொலவெறி ஒன்னும் பெரிதாக இல்லை) உள்ளிட்ட ப்ளஸ் பாயிண்ட்டுகளுடன் 3-யை முன்பாதியில் சரியாகவும், பின்பாதியில் சரியும்படியும் இயக்கி இருக்கும் ஐஸ்வர்யா ஆர்.தனுஷ் மிகவும் துணிச்சல்காரர்தான்! இல்லையென்றால் தன் கணவர் தனுஷை, என்னதான் கதைக்காக என்றாலும் கதாநாயகி ஸ்ருதியுடன் அத்தனை நெருக்கமாக நடிக்க வைத்து, அதை வெறும் காமிரா கண்களோடு மட்டும் பார்த்து ரசித்திருக்க முடியுமா…? அந்த தைரியத்திற்காகவே ஐஸ்வர்யாவை பாராட்டலாம்! மேலும் சின்ன வயது முதல் தான் மிகவும் நெருக்கமாக பார்த்து, பயந்த, தெளிந்த யாரோ ஒருவருடைய கதையில் தன் கண்வர் தனுஷை நடிக்க வைத்து, தன் மனதில் இதுநாள் வரை சிறைபட்டுக்கிடந்த சிக்கலான விஷயங்களை எல்லாம் சீனாக்கி “3″ படத்தை செதுக்கி இருக்கறாரோ இயக்குநர்…? எனும் அளவிற்கு அறிமுக படத்திலேயே அத்தனை விஷயங்களையும், அவசரம் அவசரமாக திணித்திருக்கும் ஐஸ்வர்யா அடுத்தடுத்த படங்களில் என்ன செய்யப் போகிறார்…? என்பதை பொறுத்திருந்து பார்ப்போம்!

படத்தின் முன்பாதி காமெடி தூணாக விளங்கும் சிவகார்த்திகேயன், சிங்கப்பூர் போய்விட்டதாக திடீரென தனுஷூம், செந்திலும் டயலாக்கிலேயே அவர் எஸ்கேப் ஆன சீனை முடிப்பது ஏன்…? மனைவியிடம் தனக்கு மனநோய் என்பதை காட்டிக் கொண்டு ட்ரீட்மெண்ட் எடுத்து கொள்ள விரும்பாத தனுஷ், நிரந்தரமாக தன்னை மாய்த்துக் கொண்டு மனைவியை அம்போ என விடத்துணிவது எதற்கு…? தனுஷ் படம் என்றாலே உடன் இருக்கும் உயிர் நண்பனின் மண்டையை பீர் பாட்டிலால் தனுஷ் பிளந்தே ஆகவேண்டும் என்பதை ஐஸ்வர்யாவின் படத்திலும் காட்சிபடுத்தியிருப்பது எப்படி…? என்பது உள்ளிட்ட இன்னும் பல விவாத வினாக்கள் “3″ படத்தை பார்த்ததும் எழுவது, சகஜமென்றாலும், தன் அக்கா ஸ்ருதி அவரது காதலுக்காக அப்பா, அம்மாவிடம் அடிவாங்கும் காட்சியில் வாய்பேச முடியாத தங்கை தயங்கி, தயங்கி போட்டும் விடுப்பா… என ஆச்சர்யப்படுத்தும் வகையில் பேசி அக்காவின் காதலுக்கு பெற்றோரை அரை மனது குறைமனதாக பச்சைகொடி காட்ட வைக்கும் ஒரு காட்சி போதும் அறிமுக இயக்குநர் ஐஸ்வர்யா ஆர்.தனுஷின் நெறியாள்கை ‌நேர்மைக்கு கட்டியம் கூற! வாவ் கீப் இட் அப் மிஸஸ் தனுஷ்!!

எல்லாதரப்பினரையும் சற்றே மனச்சிதைவு நோய்க்கு உள்ளாக்கி வரும் இன்றைய பரபரப்பான வாழ்வியல் சூழலில், மனநோயாளி சைக்கோ, எக்ஸ்ட்ரா, எக்ஸ்ட்ரா… கேரக்டர்களை ஹீரோவாக்கி அவர்களின் மனம் மேலும் சிதையக் காரணமாகும் இதுபோன்ற கதைகளால் என்ன லாபம் இருக்க முடியும்…?! என இயக்குநரை பார்த்து கேட்கத் தோன்றினாலும், ஐஸ்வர்யா தனுஷ் தான் எடுத்துக் கொண்ட கதைக்கு நூறு சதவிகிதம் உண்மையாக உழைத்திருக்கிறார் என்பதை ஒவ்வொரு பிரேமும் சொல்கிறது! அதுவே “3″க்கு கிடைத்த “நம்பர்-1″.

ஆக மொத்தத்தில் “த்ரி(3)” – புதிர் “தீ”

கதைப்படி, கதாநாயகர் கிருஷ்ணா ரொம்ப நல்லவர்…. புல் மப்பில் இருக்கும் கிருஷ்ணாவை நண்பர்கள் விபச்சார பெண் ஒருவருடன் உல்லாசமாக இருக்க ஒரே ரூமில் பூட்டி வைத்தாலும், உள்ளே போகும் கிருஷ்ணா, அந்த பொண்ணுக்கு யோகா, தியானம் எல்லாம் கற்றுக்‌ கொடுக்கும் அளவிற்கு நல்லவர்! ஆனால் ஆசை ஆசையாய் உடன் வாழும் மனைவியை மட்டும் சந்தேகப்பட்டு தாறு மாறாக சிந்திப்பார். அவர் அவ்வாறு சிந்திக்க காரணம், அவருக்கு குரு மாதிரியான ஒருத்தரின் அழகான மனைவி செய்த துரோகம் தான் காரணம் என்று ‌போகிறது மீராவுடன் கிருஷ்ணா படத்தின் மீதிக்கதை!

இப்படத்தின் எண்ணத்திற்கும், எழுத்திற்கும், இயக்கத்திற்கும் சொந்தக்காரரான கிருஷ்ணா தான் படத்தின் கதாநாயகர் கிருஷ்ணாவும் கூட! கதைக்கருவில் இருக்கும் விறுவிறு இவரது இயக்கத்திலும், நடிப்பிலும் இருந்திருந்தால் இன்னும் நன்றாக இருந்திருக்கும்!

கதாநாயகி ஸ்வேதா டாக்டர் மீராவாக நச் சென்று இருக்கிறார். நடிக்கிறார்…! பேஷ் பேஷ்!! புதியவர்களின் ஒளிப்பதிவு, இசை எல்லாம் ஓஹோ என்றிருந்தும், ஆ.கிருஷ்ணாவின் எழுத்தும், இயக்கமும்(நடிப்பும் கூட…) ஓ.கே. எனும் அளவிலேயே இருப்பது, “மீராவுடன் கிருஷ்ணா”வை, “மிரட்சியான கிருஷ்ணா” ஆக்கி விடுகிறது பாவம்!

கெட்ட சக்திக்கு எதிராக நடந்த சண்டையோட முடிவுல, கேட்ட சக்தியோட தலைவனான நெருப்பு மனுஷனை பாதாள உலகத்துல கொண்டு போய் அடைச்சு வைச்சுட்டு அதுக்கு தன்னோட தம்பியை காவலுக்கு வைக்கிறார் சீயஸ். இவருக்கு ப்ரிசியஸ், ஏரிஸ்ன்னு ரெண்டு பசங்க. இந்த சண்டையில ப்ரிசியஸோட மனைவியும், அம்மாவும் இறந்து போயிடுறாங்க. இதெல்லாம் பழைய கதை.

பாதாள உலகத்துல அடைச்சு வைச்சிருக்கிற நெருப்பு மனுஷனை வெளியே கொண்டு வந்தா ரெண்டு பேருக்கு சாகாவரமும், நிறைய விசேஷ சக்திகளும் கிடைக்கும்ன்னு தெரியவர, சீ‌யஸோட மகன்ல ஒருத்தனான ஏரிஸ், நெருப்பு மனுஷனுக்கு காவலுக்கு இருக்கிற தன் சித்தப்பாவோட சேர்ந்து அவனை வெளியே கொண்டு வர திட்டம் தீட்டுறான். அதுக்கு தன் அப்பாவையே பலி கொடுக்கலாம்ன்னு முடிவு பண்றான் ஏரிஸ். ஏன் இந்த கொலவெறி!ன்னா… அவர் தன்னோட சக்திகளை ஏரிஸ்க்கு கொடுக்காம, இன்னொரு பையனான ப்ரிசியஸ்க்கு கொடுத்துட்டார். அதனால அப்பாவையும், ப்ரிசியஸோட பை‌யனையும் பாதாள உலகத்துக்கு தூக்கிட்டு போய் அடைச்சு வைச்சிடுறான். இதை தெரிஞ்சுக்கிட்ட ப்ரிசியஸ், தன்னோட சகோதரனுக்கு எதிரா சண்டை போடுறான். அப்பாவும், பையனும் பிழைச்சாங்களா…? என்பது 3டியில் நெருப்பு பறக்கிற அதிரடி க்ளைமாக்ஸ்.

படத்துல பேருக்குத்தான் கதை. மத்தபடி படம் முழுக்க பிரம்மாண்டம் தான் படத்தோட களம்…! விசித்திர உலகம் என்பதால இயக்குநரோட கற்பனை மிருகம் கண்டபடி ஓடியிருக்கு. பாதாள உலகத்தோட வடிவமைப்பு, ரெண்டு உடம்பு அரக்கர்கள், பெரிய பெரிய கண் மனுஷர்கள், பறக்கிற குதிரை, மலையை விட பெரிய நெருப்பு மனுஷன், நெருப்பை கக்கிட்டே பறந்து, பறந்து தாக்குற ரெண்டு தலை டிராகன்… இப்படி வித்தியாசமான ஜந்துக்களோட படையெடுப்புகள் படம் முழுக்க ரசிகர்களை வாய் பிளக்க வைக்குது. படத்தோட பிரம்மாண்டத்தை மொத்த குத்தகைக்கு எடுத்திருக்கிறது ஸ்பெஷல் எபெக்டும், கேமராவும்தான். ஆஸ்கர் கிடைச்சாலும் ஆச்சரியப்படுறதுக்கில்ல! பிரம்மாண்டத்தை விரும்புறவங்க தவறாம பார்க் வேண்டியா படம் மர்மதேசம் 2.

நாயகர் நந்தாவை, நாயகி நந்திதா நல்லவர் என்று நம்பிக்கொண்டு லவ்-விக் கொண்டிருக்க, ஒருநாள் நந்தா இடைத்தேர்தல் வேட்பாளர் சண்முகராஜனை, காசுக்காக வெட்டி வீழ்த்துவதை கண்கூடாக பார்க்கிறார். அப்புறம்…? அப்புறமென்ன தப்பிபிழைக்கும் சண்முகராஜனிடமிருந்து நந்தா தப்பி பிழைத்தாரா…? நந்தா – நந்திதாவின் காதல் கை கூடியதா…? நாசர் ஒருபக்கம் நந்தாவை தேடக் காரணம் என்ன…? என்பது உள்ளிட்ட இன்னும் பல வினாக்களுக்கு வித்தியாசமாக விடையளிக்க முயற்சிக்கிறது நந்தா – நந்திதாவின் மீதிக்கதை!

நந்தாவாக ஹேமச்சந்திரன், நந்திதாவாக மேக்னாராஜ், அரசியல்வாதியாக சண்முகராஜன் அவரைப்போட்டுத்தள்ளும் கூலிப்படைத் தலைவராக நாசர் உள்ளிட்ட சகலரும் தங்கள் பங்கை சரியாக செய்திருக்கின்றனர். ஸ்ரீ ஸ்ரீனிவாச ரெட்டியின் ஒளிப்பதிவும், எமிலின் இசையும், ராம்ஷிவாவின் இயக்கமும் “நச்” என்று இல்லை என்றாலும் “பச்” என்னும் அளவிலும் இல்லாதது ஆறுதல்!

ஆக மொத்தத்தில் “நந்தா நந்திதா” – “நன்றா நன்றில்லையா” என்பது ரசிகர்களுக்கே வெளிச்சம்…!

செரிபரல் பேல்சி எனும் வாயில் பெயர் நுழையாத ஒரு நோயினால் பிறக்கும்போதே பாதிக்கப்படும் ஒரு குழந்தை, வளர்ந்து பெரியவன் ஆனதும் இந்த உலகத்தில் சந்திக்கும் சந்தோஷங்களும் பிரச்னைகளும் தான் “விண்மீன்கள்” படத்தின் மொத்த கதையும்!

காதல் தம்பதிகளான விஷ்வா, ஷிகா ஜோடிகளின் ஆசை குழந்தை ஜீவா. பெரிபரல் பேல்சி எனும் ஒருவித மூளை மற்றும் உடல் வளர்ச்சி குறைபாட்டுடன் பிறக்கிறது! அதை காப்பகத்தில் விட்டு வளர்க்காமல் தன்னம்பிக்கையுடன் தாங்களே வளர்க்கின்றனர் விஷ்வா-ஷிகா ஜோடி. பெற்றோரின் ஆதரவு அரவணைப்பில் வளரும் ஜீவாவும், மருத்துவதுறை வியக்கும் வண்ணம் வளர்ந்து ஆளாகிறார். உடல் ஊனம், வீல் சேர் பயணம்… என்றாலும் பருவ வயதில் ஜீவாவிற்குள்ளும் காதல் எட்டிப்பார்க்கிறது. அனுஜா ஐயர் மீதான அந்த காதல் கை கூடியதா…? இல்லை வீல்சேர் வாசம், விதி வசம்… இத்யாதி, இத்யாதிகளால் கை மீறிப் போனதா…? என்பது உருக்கமான க்ளைமாக்ஸில் ரசிகர்களின் சீட்டின் நுனிக்கு கொண்டு வரும் உத்தியுடன் வித்தியாசமாக படமாக்கப்பட்டிருப்பது “விண்மீன்கள்” படத்தின் பெரியபலம்!

மேஜிக் நிபுணராக வரும் விஷ்வாவும், அவரது காதல் மனைவியாக வரும் ஷிகாவும் படத்தில் நிஜமான கணவன்-மனைவி மாதிரி வாழ்ந்திருப்பது விண்மீன்கள் படத்தின் ப்ளஸ் பாயிண்ட்களில் ஒன்று! அவர்களது குழந்தையின் குறைபாடு படம் பார்க்கும் ரசிகர்களையும் தொற்றிக் கொள்ளும் படி நடித்திருக்கும் இடங்களில் ரசிகர்களின் கண்களில் இருந்து கண்ணீர் வழிவது தவிர்க்க முடியாததாகிவிடுகிறது!

சிறுவன் ஜீவாவாக வரும் கிருஷ்ணாவும் சரி, வாலிப ஜீவாவாக வரும் ராகுல் ரவீந்தரும் சரி, அந்தப்பாத்திரமாகவே வாழ்ந்திருக்கின்றனர். பலே பலே! அப்பா விஷ்வா துணையுடனான கிருஷ்ணாவின் வீல்சேர் ஓட்டப்பந்தயமும் சரி, அனுஜா ஐயர் உடனான ராகுல் ரவீந்தரின் காதல் வசப்படுதலும் சரி இயல்பாக இருப்பது பிரமாதம்! ஜீவாவின் காதலியாக வரும் அனுஜா ஐயர், மாமா பாண்டியராஜன் உள்ளிட்டவர்களும் விண்மீன்கள் படத்தின் பலமான நட்சத்திரங்கள்!

ஜூபினின் பாடல்கள் இசையும், பின்னணி இசையும் தேனும் பாலும் கலந்த திகட்டாத சுவை என்றால், ஆனந்த் ஜெவின் ஒளிப்பதிவு திணை மாவு எனும் அளவிற்கு பிரமாதம்!

ஜீவா ஊட்டி வந்து, மாமா பாண்டியராஜனுடன் வாழும்போது அவரது தாய், தந்தை, விஷ்வா, ஷிகா என்ன செய்து கொண்டிருந்தார்கள் என்பது உள்பட இன்னும் சில வினாக்களுக்கும் டைரக்டர் விக்னேஷ் மேனன் அழகாக விடையளித்து இருந்தால் விண்மீன்கள் மேலும் உயரத்தில் ஜொலித்திருக்கும்!

உடல் வளர்ச்சி இருந்தும், கை, கால் தளர்ந்த ஒரு கதை நாயகனுக்கு தாயும், தந்தையும், காதலியும் தரும் ஆதரவை ரசிகர்களும் தந்தால் சரி! ஆக மொத்தத்தில் கமர்ஷியல் தனம் இல்லாத “விண்மீன்கள்”, அதன் இயக்குநர் விக்னேஷ் மேனனின் கண்கொண்டு பார்க்கும் ரசிகர்களுக்கு சிறந்த “நல் நட்சத்திரங்கள்”!

ஹீரோ கிருஷ்ணாவின் நடிப்பில் முந்தைய படங்களைக்காட்டிலும் நல்ல முன்னேற்றம்! நண்பர்கள் கருணாஸ், தம்பி ராமையா உள்ளிட்டவர்களுடன் தற்கொலைப் பள்ளத்தாக்கில் உயிரை விடும் பிணங்களைத் தூக்கி வரும் வாலிபராகவே வாழ்ந்திருக்கிறார். பிந்து மாதவியுடனான காதல் காட்சிகளிலும் நண்பர்களை நயவஞ்சகமாக கொன்ற வில்லன் ஜெயப்பிரகாஷ் அண்ட் கோவினருடன் மோதும் ஆக்ஷ்ன் காட்சிகளிலும் பட்டையைக் கிளப்பியிருக்கிறார் கிருஷ்ணா! கீப் கிட் அப் கிருஷ்ணா.

பிந்து மாதவி டீ – பேக்டரி தொழிலாளியாக டல் மேக்-அப்பிலும் டாலடிக்கிறார். பலே பலே! பிந்து மாதவியின் கவர்ச்சிகரமான கண்கள் சில்க் ஸ்மிதாவை ஞாபகப்படுத்துவதும் கழுகு படத்திற்கு கூடுதல் பலம் சேர்க்கும். தன் காதல் தோல்வி அக்காவின் பிணத்தை தூக்கி வரும் கிருஷ்ணாவுடன் இருவருக்கு ஏற்படும் காதலும் காட்சிகளும் அழகாக உயிரோட்டமாக படம் பிடிக்கப்பட்டிருக்கின்றன. இவரது தோழியாக வரும் சுஜிபாலாவும் நச் என்றே தேர்வு!

சுஜிபாலாவின் கணவராகவும், கிருஷ்ணாவின் நண்பராகவும் வரும் கருணாஸ், தம்பி ராமையா, கிருஷ்ணா அண்ட் கோவினரின் காமெடிகள் சிரிக்க மட்டுமல்ல சிந்திக்கவும் சொல்லும் தத்துவ விநாடிகள்! ஆனால் அடிக்கடி அவர்கள் பிணங்களை பீஸ், பீஸ் என்பது வெறுப்பேற்றுகிறது.

யுவன் சங்கர் ராஜாவின் பின்னணி இசையும், “ஆம்பளைக்கும் பொம்பளைக்கும் அவசரம்…!” தத்துவப்பாடலும் கழுகு படத்திற்கு பெரும் பலம்! சத்ய சிவாவின் இயக்கத்தில் வாழ்க்கை தத்துவத்தை சொல்லும் கழுகு, ஒருசில காட்சிகளில் தாழப்பறந்தாலும், ஒரு சில காட்சிகளில் உயர உயர பறந்து கழுகு எனம் பெயரை அழகாக காப்பாற்றியிருக்கிறது!

ஆக மொத்தத்தில் “கழுகு” தமிழ் ரசிகர்களின் மனதை கரைக்கும் “மெழுகு!”

ஒரு கட்டத்தில் அவரது நேர்மையே அவரது காக்கிசட்டை யூனிபார்முக்கும் உலை வைக்க, அதில் கொதித்தெலும் அர்ஜூன், இண்டர்‌நேஷனல் தாதா நாகா எனும் பிரதிப் ராவத்தின் போலீஸ் கையாள் போன்று நடித்துக் கொண்டே பாலாசிங், “தூள்” சகுந்தலா, பொன்னம்பலம், சந்தானபாரதி, கோட்டா சீனிவாசராவ், பிரதிப்ராவத் என அரை டஜனுக்கும் மேற்பட்ட போலீஸீலும், வெளியிலும் உள்ள வில்லன்களை போட்டுத்தள்ளுவதுடன் ஹேமா, அர்ச்சனா எனும் இரண்டு நாயகிகளுடன் டூயட் பாடுவதும் தான் மாசி படத்தின் கரு, கதை, களம் எல்லாம்!

வழக்கமான அர்ஜூன் பட பார்முலா கதைதான் என்றாலும், அதை கலக்கலாக எழுதி, இயக்கி இருக்கும் விதத்தில் கவருகிறார் இயக்குநர் ஜி.கிச்சா!

அர்ஜூன் வழக்கம் போலவே, போலீஸ் அதிகாரியாக நம்பமுடியாத அளவிற்கு புகுந்து விளையாடியிருக்கிறார். நாயகிகள் ஹேமா, அர்ச்சனா தலா இரண்டு டூயட் பாடிப்போவதோடு சரி! ஆக்ஷ்ன் படத்தில் அவர்களுக்கு வேறென்ன வேலை…?!

இண்டர்நேஷனல் வில்லன் தாதவாக பிரதிப்ராவத், பொன்னம்பலம், கோட்டா சீனிவாஸராவ், சந்தானபாரதி, கவுதம், பாலாசிங், “தூள்” சகுந்தலா, மயில்சாமி உள்ளிட்டவர்கள் தங்களை பங்கை சரியாக செய்துள்ளனர்! அதிலும் மயில்சாமி – அர்ஜூன் சம்பந்தப்பட்ட காமெடி காட்சிகள் ஹைலைட்! எஸ்.கே.பூபதியின் ஒளிப்பதிவு,  தினாவின் இசை இரண்டும் நச்!

மொத்தத்தில் ஜி.கிச்சாவின் இயக்கத்தில், “மாசி” – “மாஸ்-சி(னிமா)!”

கதைப்படி மீன் ஏற்றிச்செல்லும் மினிலாரி டிரைவரான காளி-பவன் தன் தங்கையை அந்த வண்டிக்கும்-மீன் மண்டிக்கும் முதலாளியான சூசை – மணிமாறனுக்கு அவரது விருப்பப்படியே இரண்டாம் தாரமாக கொடுத்து, அந்த மினி லாரியை சொந்தமாக்கி கொள்ள பார்க்கிறார். இத்தருணத்தில் பவனின் தங்கை அவரது காதலருடன் ஓடிப்போக, அவரது சொந்த லாரி ஆசை நிராசை ஆகிறது. தன் தங்கை ஓடவும், தன் ஆசை நிராசையாகவும் காரணம் அதேஊரில் பேன்சி ஸ்டோர் வைத்திருக்கும் ஹீரோ பால எனும் அருண்பாலாஜிதான் எனத் தவறாக கருதும் பவன், அருணின் அம்மாவை லாரி ஏற்றிக்‌ கொன்றுவிட்டு, அதை சவுடாலாக அவரிடமே சொல்கிறார். இதனால் வெகுண்டெழும் அருண் பாலாஜி, பவனை அடித்து துவைத்து நிர்வாணமாக்க, அதில் மானமும்-மரியாதையும் ஒரு சேர போகும் பவன், அருண்பாலாஜியை தீர்த்து கட்ட முடிவெடுத்து தொடர்ந்து தோல்வியை தழுவுகிறார். ஆனாலும் விடாமுயற்சியுடன் வில்லன் பவன், தன் பழிவாங்கும் படலத்தை தொடர, இறுதியில் நீதி வென்றதா? தர்மம் தழைத்ததா…? ஹீரோ உயிர் பிழைத்தாரா…? என்பது க்ளைமாக்ஸ்! இப்படி ஒருபக்கம் ஆக்ஷ்னும், ரியாக்ஷ்னுமாக நகரும் கதையில், மற்றொருபக்கம், ஹீரோவின் லவ்வும், சென்டிமெண்ட்டுமாக படத்தை ஜனரஞ்சமாக நகர்த்தி, ஒரு காதல் கமர்ஷியல் படத்தை கலக்கலாக தந்திருக்கிறார் இயக்குநர் இரா.சுப்பிரமணியன். அதற்காகவே அவரைப் பாராட்டலாம்!

பாலாவாக அருண்பாலாஜி புதுமுக ஹீரோ என்று சொல்ல முடியாத அளவிற்கு பிரமாதமாக நடித்திருக்கிறார். நிஜத்தில் நீச்சல் வீரரான இவர், கலைத்துறையிலும், எதிர்நீச்சல் போட்டு முன்னேறுவார்… என்பதற்கு சேவற்கொடியில் இவரது நடிப்பே சான்று!

கதாநாயகி வள்ளியாக கேரள இறக்குமதி பாமா, ரொம்ப பாந்தம்! நாயகர் நாயகியை விட அதிக முக்கியத்துவம் வாய்ந்த பாத்திரம் பவனுக்கு! வில்லன் காளியாக எத்தனை சொன்னாலும் விளங்காத கேரக்டரில் வெளுத்து வாங்கி, ஹீரோவே காப்பாற்ற நினைத்து, விதி வசத்தால் இறுதியில் இறந்தும் போவது சேவற்கொடிக்கு சிறப்பு சேர்க்கிறது! இவர்கள் தவிர கதாநாயகனின் தந்தையாக “பிதாமகன்” மகாதேவன், தாய் ஸ்ரீரஞ்சனி, நாயகியின் தந்தையாக தவசி, தாயாக பேபி, நாயகரின் போலீஸ் அத்தானாக தயாள், இரண்டாம் கல்யாணத்திற்கு ஆசைப்படும் காளியின் முதலாளியாக வரும் சூசை, பவனின் மினிலாரி கிளினராக சாய் ஜெகன், பவனின் தங்கையாக வரும் ஜானகி என எல்லோரும் பாத்திரமறிந்து பளிச்சிட்டிருப்பது சேவற்கொடிக்கு மேலும் ‌மகுடம் சேர்க்கிறது.

எங்கேயும் எப்போதும் சி.சத்யாவின் “வேலா வேலா…” பாடலும், “வேட்டையை நடத்திவிடு…” பாடலும் வித்தியாசம். சத்யனின் இதமான இசை மாதிரி, பி.செல்லத்துரையின் அழகிய ஒளிப்பதிவும் படத்திற்கு பெரிய பலம்!

சேவற்கொடியின் முதலிலும், முடிவிலும் வரும் சூரசம்ஹார காட்சிகள் தமிழ் சினிமாவில் இதுவரை பாத்திராதது! இதுமாதிரி ஆன்மீக களத்தில் ஆக்ஷ்ன், காமெடி, லவ், சென்டிமெண்ட், சேஸிங் உள்ளிட்டவைகளை ‌கலந்து, வினை விதைத்தவன் வினை அறுப்பான்! எனும் மெஸேஜையும் அழகாக சொல்லியிருக்கும் இயக்குநர் இரா.சுப்ரமணியன், மகா துணிச்சல்காரர் தான்! அவரது துணிச்சலுக்கு தாரளமாக ஒரு ஹேட்ஸ் ஆப் சொல்லலாம்!

ஆக மொத்தத்தில் இரா.சுப்ரமணியனின் எழுத்து, இயக்கத்தில் ஒருசில குறைகள் ஒட்டிக்கொண்டிருந்தாலும், மேற்படி நல்ல விஷயங்களுக்காக அவற்றை தட்டி விட்டு பார்த்தோமேயானால் “சேவற்கொடி” உயரே உயரே பறப்பது உறுதி!

கதைப்படி திருடுவதையே தொழிலாக கொண்ட மக்களை உடைய கொம்பூதி – பசுபதியின் ஊர் பெயரைச் சொல்லி புதிதாக ஒரு கள்வன் அங்கே இங்கே என நிறைய இடங்களில் தன் கைவரிசையை காண்பிக்கிறான். இதனால் இன்னல்களுக்கு உள்ளாகும் பசுபதியும், அவரது ஊர்மக்களும், அவன் யார்? எவர்…? என்று ஒரு பக்கம் தேடிக் கொண்டே மற்றொருபக்கம் குலத்தொழிலான களவையும் செய்து வருகின்றனர். அப்படி ஒரு களவில் கொம்பூதி-பசுபதியிடம் கையும் களவுமாக மாட்டுகிறான் அந்த பலே திருடன். அவன் தான் வரிப்புலி எனும் ஹீரோ ஆதி! ஆதியின் கைவரிசையையும், களவாடும் திறனையும் பார்த்து மிரளும் பசுபதி, தான் ஒரு அநாதை எனும் ஆதியை தனது ஊருக்கு அழைத்து வந்து, தனது களவாடும் குரூப்பில் ஒருவர் ஆக்குகிறார். இந்நிலையில் கைதேர்ந்த களவுக்காரனும் கொள்ளையடிக்க முடியாத து‌ணியாத காவலும், கட்டுப்பாடுகளும் நிறைந்த ஓர் ஊருக்கு ஒரு சவாலாக ஆதியும்-பசுபதியும் தங்களது களவு கூட்டத்துடன் களவாட போகின்றனர். அங்கு திருடி திரும்பும் வழியில் காவல்காரர்களின் கண்ணில் மாட்டிவிடும் இவர்கள் தப்பித்தோம், பிழைத்தோம் என ஓடி வரும்போது தவறி விழும் பசுபதி மட்டும் அவர்கள் கையில் சிக்கி கொள்கிறார்.

அப்புறம்? அப்புறமென்ன…? பசுபதியை அத்தனை பேர் கண்ணிலும் மண்ணை தூவி விட்டு குற்றுயிரும், கொலை உயிருமாக துணிச்சலாக போய், மறுநாள் காலை மீட்டு வருகிறார் ஆதி! அப்படி ஆதி, பசுபதியை தூக்கி வரும் போது அவரை துரத்தி வரும் காவல்காரர் கரிகாலன், ஆதியை பார்த்து டேய் சின்னான் உன்னை விடமாட்டேன்டா என கூவுவது அரைமயக்கத்தில் இருக்கும் பசுபதியின் காதுகளில் விழுகிறது. அதன்பிறகு படுத்த படு‌க்கையாகிவிடும் பசுபதி மீண்டும் எழுந்ததும், அவரது தங்கை சிமிட்டி, ஆதியை காதலிப்பதாக தெரியவருகிறது. அதனால் அரைமனதுடன் ஆதியின் பூர்வீகம் என்ன…? திருடபோய் திரும்பிவந்தபோது துரத்தி வந்த காவல்காரன் கரிகாலன், வரிப்புலி ஆதியை சின்னான் என அழைக்க காரணம் என்ன? தன் தங்கையின் காதலுக்கு பதில் என்ன…? என ஆதியிடம் கேட்கிறார். அதற்கு ஆதி, எனக்கு திருமணமாகிவிட்டது, அதற்குமேல் வேறு எதையும் கேட்காதீர்கள்… என்கிறார். அப்புறம் ஆதி அரவானாக, பலிஆளாகி தப்பி பிழைத்து ஊருக்கு தெரியாமல் வாழ்வதும், உண்மை குற்றவாளியை ஊர் முன் நிறுத்த முடியாமல், போவதும், இறுதிவரை உயிரோடு வாழ்ந்தாரா, இல்லையா என்பதும் தான் அரவான் படத்தின் வித்தியாசமும் விறுவிறுப்புமான மீதிக்கதை!

புகை கூண்டின் வழியாக ஏறி இறங்கி பொத்தினார் போல் மணியக்காரர் வீட்டிற்குள் கொள்ளையடிக்க போகும் காட்சிகளில் தொடங்கி, ஒவ்வொரு சீனிலும் தனது அஜானுபாகுவான உடம்பை வைத்து கொண்டு அசால்ட்டாக நடித்திருக்கும் ஆதிக்கு வைக்கலாம் ஒரு ராயல் சல்யூட்! களவிற்குபோன இடத்தில் காவல்காரர்களிடம் மாட்டிக்‌கொள்ளும் பசுபதியை காபந்து செய்ய போகும் காட்சியில், மாட்டு மந்தையில் மாடுகளுடன் மாடுகளாக போய், பசுபதியை மீட்டு, மாட்டின் மேலேயே அவரை படுக்க வைத்தபடி தானும் அமர்ந்து கொண்டு தைரியமாக துரத்தும் குதிரை வீரர்களை தாக்கியபடி திரும்பும் ஒரு காட்சி போதும் ஆதி, அரவானுக்காக எத்தனை உழைத்திருக்கிறார், எத்தனை ரிஸ்க் எடுத்திருக்கிறார் என்பதற்கு கட்டியம் கூற! வாவ், ஹேட்ஸ் ஆஃப் ஆதி!

பசுபதி களவாணி-கொம்பூதியாகவே வெற்றிலை காவிபடிந்த பற்களும், மீனாட்சி கொண்டையுமாக வாழ்ந்திருக்கிறார். இவருக்கும் ஆதிக்கு இணையான பாத்திரம். அதை ஆதியை விட அழகாகவே செய்திருக்கிறார் மனிதர். ஜல்லிக்கட்டில் தன் ஊர் மானத்தை காக்க ஒற்றை ஆளாக காளையுடன் முட்டி மோதும் காட்சி ஒன்றும் போதும் பசுபதியின் நடிப்பு திறமையை பறைசாற்ற! இனி, இவர் பசுபதி இல்லை… பலேபதி!!

வனப்பேச்சியாக சின்னான்-ஆதியின் காதல் மனைவியாக ப்ளாஷ்‌பேக்கில் வரும் தன்ஷிகாவிற்கு விருதுகள் நிச்சயம்! சிமிட்டி-அர்ச்சனா கவி, ஆதியின் அம்மா ஒச்சாயி டி.கே.கலா, மாத்தூரன்-கரிகாலன், மொசக் காதன், சிங்கம்புலி, வீரணனாக ஆதியின் நண்பராக வரும் திருமுருகன், பாளையக்காரராக வரும் விஜய் சந்தர் உள்ளிட்டவர்களும், சிறப்பு தோற்றத்தில் வந்துபோகும் பரத், அஞ்சலி, ஸ்வேதாமேனன், ஸ்ருதிபிரகாஷ் உள்ளிட்டவர்களும் கூட பாத்திரமறிந்து பளிச் என்று நடித்திருப்பதால் படம் முடிந்து வெகுநேரமாகியும் மனதை விட்டு அகல மறுக்கின்றனர். ஆனாலும் அரவான் படத்தின் அத்தனை முகங்களையும் கரிசல் மண்ணில் போட்டு புரட்டியெடுத்த மாதிரி காட்டியிருப்பது சுத்த போர்.

பிரபலபாடகர் கார்த்திக் இசையமைப்பாளராக முதல் படத்திலேயே முத்திரை பதித்துவிட்டார். பேஷ், பேஷ், சபாஷ்! கார்த்திக்கின் இசை மாதிரியே, சித்தார்த்தின் ஒளிப்பதிவும், விஜய் முருகனின் கலை இயக்கமும் படத்தின் பெரும்பலம்!

சு.வெங்கடேசனின், “களவு இருந்தால் தான் காவலுக்கு வேலை…” உள்ளிட்ட நறுக் – சுறுக் வசனங்களும், வசந்தபாலனின் திரைக்கதை-இயக்கமும் அரவானை தமிழ்சினிமாவுக்கு புதியவனாக காண்பித்திருக்கிறது சில பல ஆங்கிலப் படங்களின் சாயலுடன் (உதாரணம் – மெல் கிப்ஸனின், அபோகலிப்டா) பல நூறு ஆண்டுகளுக்கு முன் வாழ்ந்த திருடர்களின் வாழ்க்கையை திகட்ட திகட்ட தந்திருப்பதின் அவசியத்தையும் வசந்தபாலன் காட்டியிருந்தால், அரவான் மேலும் மெச்சும்படி இருந்திருக்கும். ஆனாலும், மரண தண்‌டனைக்கு எதிராக ஓங்கி குரல் கொடுத்திருக்கும் வசந்தபாலனின் அரவான், வித்தியாசமான தமிழ் சினிமாவில் ஒருவன்.

சின்ன வயதில் தானும் – தன் தாயும், தந்தையை இழந்து தன் தாத்தாவின் குடும்பத்தை விட்டு பிரியக்காரணமான சொந்தங்களை பழிவாங்க துடிக்கும் வில்லன், அவரையும் அறியாமல் மொத்த குடும்பத்தையும் ஒரு காதலின் மூலம் ஒன்று சேர்ப்பது தான் இதுவரை நாம் பார்த்திராத பத்திரமா பாத்துக்குங்க படத்தின் வித்தியாசமும், விறுவிறுப்புமான கதைக்களம். பொதுவாக இதுமாதிரி நல்ல காரியங்களை நம் தமிழ் படங்களில் ஹீரோக்கள் தான் செய்வார்கள். ஆனால் இந்தப்படத்தில் அதுதான் வித்தியாசம். இந்த வித்தியாசத்திற்காகவே இயக்குநர் வி.சி.சோமசுந்தரத்தைப் பாராட்டலாம்.

ஷரண் குமார், ஸ்மிதா ஸ்ரீ, சம்பத்ராம், வையாபுரி, செந்தில் குமார், தினேஷ், சத்யா, பீர்பால், ஹரிஷ் ஜோஸ்வான், ராஜ்குமார், சாந்தி, ஜோதி, ராஜா, ராஜேஷ், ஷோபாராணி என இப்படத்தில் நடித்திருக்கும் நட்சத்திரங்கள் ஒவ்வொருவரும் தங்கள் பாத்திரமறிந்து பளிச்சிட்டிருக்கின்றனர்.

ஜித்துவின் ஒளிப்பதிவும், சிவாஜி ராஜாவின் இசையும், படத்திற்கு பெரிய பலம்! எல்லோரும் பெற்றத்தாயை பாத்திரமா பாத்துக்குங்க சொல்லும் க்ளைமாக்ஸ் மெசேஜ் எதிர்பாராதது. அதுவே புதிரானது – புதியது! – ஆகமொத்தத்தில் “பத்திரமா பாத்துக்குங்க” பார்க்கலாம்!!

ஐந்தாறு தலை முறைகளாக கொண்டான் கொடுத்தான் குடும்பங்களாக வாழ்ந்து வருகிறது இளவரசு-சுலோச்சனாவின் குடும்பமும், இளவரசு தங்கை மீரா கிருஷ்ணன் – எல்.ராஜாவின் குடும்பமும். ஐந்தாறு தலைமுறைகளாக பாசப்பிணைப்புடன் கொண்டான் கொடுத்தான் குடும்பமாக வாழ்ந்து வரும் தங்கள் இரு குடும்பங்களும் பிரிந்து விடாமல் இந்த தலைமுறையிலும் பெண் கொடுத்து, பெண் எடுத்துக் கொள்ள வேண்டும் என்பதற்காக இளவரசுவின் மகள் அத்வைதாவை, மீரா கிருஷ்ணனின் மகன் கதிர்காமனுக்கும், மீராவின் மகளை, இளவரசுவின் மகனுக்கும் பேசி முடிக்கிறார்கள். ஆனால் விதி விளையாடுகிறது. அந்த கொண்டான் கொடுத்தான் குடும்பம் இரண்டும் விதிவசத்தால் பிரிகிறது. பிரிந்த குடும்பம் இரண்டும் மீண்டும் சேர்ந்த‌தா…? பேசி வைத்த திருமணங்கள் நடந்ததா…? என்பதற்கு வித்தியாசமாகவும், விறுவிறுப்பாகவும் விடை சொல்கிறது “கொண்டான் கொடுத்தான்” படத்தின் மீதிக்கதை!

ராசு எனும் கிராமத்து கபடி வீரர் பாத்திரத்தில் கதாநாயகராக கதிர்காமன், தனது முந்தைய படமான வெளுத்து கட்டுவில் நடித்திருந்ததைவிட வித்தியாசமாக நடித்திருக்கிறார். நாயகரைப்போன்றே நாயகி அத்வைதாவும், செவ்வந்தி பாத்திரத்தில் பக்காவாக பளிச்சிட்டிருக்கிறார். கஞ்சா கருப்புவின் காமெடியில் சற்றே காமநெடி தூக்கலாக இருந்தாலும் வழக்கத்திற்குமாறாக ரசிக்கும்படி இருப்பது ஆச்சர்யம்! இதுவே படத்தின் பெரும்பலம். இவர்களைத்தவிர இளவரசு, எல்.ராஜா, சுலோச்சனா, மீரா கிருஷ்ணன், ராஜ்கபூர், அஸ்வின், சீனி உள்ளிட்டவர்களின் பங்கும் பாத்திரங்களும் பெரிய பலம்! அதிலும் இளவரசு, மாமன், மச்சானாகவே வாழ்ந்திருக்கிறார் பலே பலே!

அழிந்துவரும் கொண்டான் கொடுத்தான் குடும்ப உறவுகளுடன், தமிழர்களின் வீர விளையாட்டான கபடிக்கும் கதையில் முக்கியத்துவம் அளித்து இப்படத்தை எழுதி, இயக்கி, ஒளிப்பதிவும் செய்திருக்கும் ஜி.ராஜேந்திரனை இந்த விஷயங்களுக்காகவே பாராட்டலாம்! சற்று பெரிய இடைவெளிக்குபின் தேவாவின் இசையில் வெளிவந்திருக்கும் இப்பட பாடல்களும் பலம்!

ஆரம்ப காட்சிகளில் கோவணம், மூத்திரம் என அடிக்கடி வரும் டயலாக்குள்… ஊர், உறவு, கபடி என ஒரே இடத்திலேயே சுற்றி வரும் கதை எனும் ஒருசில பலவீனங்களைத் தவிர்த்து விட்டுப் பார்த்தால் கொண்டான் கொடுத்தான திரைப்படத்தை கொண்டாடலாம்!

கதைப்படி கல்லூரி காதலர்கள் சித்தார்த்தும், அமலாபாலும் ஈகோவால் பிரிந்திருக்கின்றனர். இதே மாதிரி அமலாபாலின் அப்பா-அம்மாக்களான சுரேஷூம் (மாஜி ஹீரோவேதான்) அம்மா சுரேகா வாணியும் விவாகரத்திற்கு விண்ணப்பித்துவிட்டு காத்திருக்கும் கல்யாண ஜோடிகள். ஈகோவால் பிரிந்திருக்கும் இந்த இரண்டு ஜோடிகளுமே தங்களது ஈகோவை மறந்து இணைந்ததா…? இல்லையா…? என்பது தான் காதலில் சொதப்புவது எப்படி கரு, களம், கதை எல்லாமும்!

பாசத்தையும் சரி, வெறுப்பையும் சரி… பொண்ணுங்க மாதிரி ஆண்களால் காட்டவே முடியாது…. என அடிக்கடி பஞ்ச் டயலாக் பேசியபடி துறுதுறு கல்லூரி மாணவனாகவே வாழ்ந்திருக்கிறார் சித்தார்த். ரசிகர்களுக்கு தன் காதல் புட்டுகிட்ட கதையை போரடிக்காமல் சொல்லுவதிலாகட்டும், அமலாவிடம் ஆரம்பத்தில் வழிந்து பின் எரிச்சலடைவதிலாகட்டும் எல்லாவற்றிலுமே ஸ்கோர் செய்திருக்கிறார். அமலாபாலும் ஈகோ பிடித்த காதலியாக, தானும் சளைத்தவர் இல்லை என்று ப்ரேம் டூ ப்ரேம் நிரூபணம் செய்திருக்கிறார் வாவ்!

மாஜி ஹீரோ சுரேஷ், சுரேகாவாணி, சித்தார்த்தின் அப்பா ரவி ராகவேந்தர், அம்மா சிவரஞ்சினி எல்லோருமே பாத்திரமறிந்து பளிச்சிட்டிருக்கின்றனர்! நண்பர்களாக வரும் யுவன், யுவதிகளும் பிரமாதம்!

நிரவ்ஷாவின் அழகிய ஒளிப்பதிவும், தமனின் இதமான இசை எல்லாமும் சேர்ந்து பாலாஜி மோகனின் எழுத்து இயக்கத்தில் திரையில், காதலில் சொதப்பவில்லை,  ஜெயித்திருக்கிறது! வாவ்!!