கடம்பவன பூங்கா

ராதிகாவும் என் புதுக்காரும்-கலா!! கலா.!!...கலக்கலா...!!

noreply@blogger.com (கடம்பவன குயில்) — Wed, 10 Oct 2012 07:31:00 +0000

சிலு சிலுவென்று வீசும் காற்றில் தோள்மேல் கைபோட்டபடி தோழமையுடன் கதைகள் பேசி களித்தவாறு காரோட்டுவது ஒரு சுகமான அனுபவம். அதுவும் இனிய பழங்கதைகளை அசைபோட்டபடி அசால்ட்டாய் காரோட்டி நம்முடன் இருப்பவரை உயிருக்கு பயந்து நடுங்கச் செய்வதில் ஏனோ எனக்கு ஆனந்தமோ ஆனந்தம் பரமானந்தம்.

அன்றும் ராதிகாவை அருகே அமர்த்தி கதைத்துக்கொண்டே வண்டி ஓட்டினேன். " என்னதான் சொல்லு இது அருமையான ரோடு. ஒரு வாரமாய் நானும் காரோட்ட கற்றுக்கொண்டேன் . சூப்பராய் ஓட்டுவேண்டி" , இது ராதிகா. நான் அதை கவனியாதது பேல் பாவனையில் "கலாவதி வோல்ஸ்வேகன் செகண்ட்ஸில் வாங்கியிருக்கிறாளாம்" என்றேன்.

"லேடீஸ்கு டூவீலரைவிட 4 வீலர்தான் பாதுகாப்பு. நான் ஒரே வாரத்தில் சூப்பராய் ஓட்டக் கற்றுக்கொண்டேன். இந்த வண்டியை கொஞ்சதூரம் நான் ஓட்டரேன் பாருடி. அருமையான ரோடுடி இது. எவ்வளவு ஃப்ரீயா இருக்கு பாரு " இது ராதிகா.

என்னவரிடம் ஒரு மாதம் சாம , பேத, தான, தண்டம் எல்லாவற்றையும் பிரயோகித்து வாங்கியதாயிற்றே இந்த வண்டி. அவ்வளவு சுலபத்தில் யாரையும் தொடவிடுவேனா என்ன!!

தமிழ்நாட்டையோ தமிழ்நாடுவாழ் மக்களின் நலனையோ பற்றி சிறிதும் கவலைகொள்ளாத அக்கறையில்லாத மத்திய அரசைப்போல, ராதிகா என்னைப்பற்றியோ என் புத்தம் புது காரைப்பற்றியோ சிறிதும் கவலைப்படாமல் தான் ஓட்டியே தீரவேண்டுமென்ற தீர்மானத்தில் இருந்தாள்.

" ரொம்ப எக்ஸ்பீரியன்ஸ் வேண்டும்டி. இது புது வண்டி. கலாவதியுடையது போல செகண்ட்ஸ் இல்லை என்றபடி எதிர்வரும் வாகனத்திற்கு வழிவிட்டபடி பிரேக்கில் கால்வைத்தால் கர்.....புர்.....கட....புட...கிறீச்...என ஒரே சப்தம். ”அம்மாடியோவ் இதென்ன கலாட்டா” என்றபடி ஒருவித கவலையான முகத்தோடு காரை ஓரம்கட்டி இறங்கினேன்.

" என்னடியம்மா ஆச்சு உன் வண்டிக்கு? வண்டி ஓட்ட கத்துக்கும்போதே சில ஈஸியான பிராப்ளம்க்கு சால்வ் பண்ண சொல்லிகுடுத்திருப்பாங்களே....கொஞ்சம் பாருடி. சரியாச்சுன்னா நானே ஓட்டுவேன்." ராதிகா புலம்பல்.

நான் அம்மாவைச்சுற்றிவரும் மந்திரிகள் போல் இரண்டொரு சுற்று காரைசுற்றிவந்து உதடுபிரித்து தோள் குலுக்கினேன்..

தூரத்தில் கலாவதி காரோட்டிவருவதைப்பார்த்து நிம்மதி பெருமூச்சுவிட்டடேன். ”குயிலுக்கு என்ன பிரச்சினையோ” என்றபடி காரைவிட்டு இறங்கினாள். கவலையோடு காரை சுற்றி சுற்றி வந்தவளை பார்வையால் ஒரு வெட்டு வெட்டியபடி " இது புத்தம் புதிய கார். ஆத்ரைஸடு சர்வீஸ் வந்து பார்த்துப்பான். வேறு யாரும் தொடவேண்டாம்" என்றேன் நறுக்குத் தெரித்தபடி.

ராதிகா, கலாவதிகாரையும் என்னையும் கலாவையும் மாறி மாறிப் பார்த்தவள், "இவள் அதுக்கு சரிப்பட்டுவரமாட்டா" என்று வடிவேலு சிங்கமுத்து பாணியில் முடிவெடுத்து டக்கென்று ஓடிப்போய் கலாவதியின் காரில் டிரைவிங் சீட்டில் உட்கார்ந்துவிட்டாள்.

என்னைப் பரிதாபமாக பார்த்தபடி, " ஏய்........ஏய்....நில்லுடி ஸ்டார்ட் பண்ணாதே...." என்றபடி கலா ஓடிப்போனதையும் , போனால் போகிறதென்று கலாவை காரில் ஏற்றிக்கொண்ட ராதிகாவையும் பார்த்தால் சற்று வேடிக்கையாகத்தானிருந்தது எனக்கு

க்ரீச்........கர்......கட....கட....க்ரீச்....என்ற சப்தங்கள் என் காதைப்பிளந்தன, கூடவே கலாவின் அலறலும்.....

நான் சாவதானமாய் போய் காரின் டாஷ்போட்அருகில் மறைவாய் இருந்த ஸ்டார்ட் கீயை ஆன் செய்து காரைத்திருப்பி வந்தவழியே அதிவேகமாய் ஓட்டிவந்துவிட்டேன்.

பின்ன என்ன நான் ஓட்டுவேன் என்று அடம்பிடிக்கும் கத்துக்குட்டிகளுக்கு என் புத்தம்புது வண்டியைக் கொடுத்து பரிட்சை செய்ய நான் என்ன பைத்தியக்காரியா??

பாவம் கலா நிலையையும் அவள் வண்டியின் நிலையையும் நினைத்து ஒரு நிமிடம் இறைவனிடம் பிரார்த்தனைதான் செய்ய முடிந்தது என்னால்.

நாளை எந்த ஹாஸ்பிடலில் போய் கலாவைப் பார்க்கவேண்டுமோ என்ற கவலையுடன் காரோட்டி வந்தேன்.

அன்றிலிருந்து டூவீலர் ஓட்டத்தெரிந்த தோழியைக்கூட என்னுடன் காரில் அழைத்துப்போவதில்லை .......... நீங்க எப்படி??

நான் ஈ - உயரப்பறந்து நம்மை ஈர்க்கிறது!!

noreply@blogger.com (கடம்பவன குயில்) — Sun, 08 Jul 2012 07:26:00 +0000

நான் ஈ - உயரப்பறந்து நம்மை ஈர்க்கிறது!!

எஸ்.எஸ். ராஜமவுலியின் கதை, திரைக்கதை, ,இயக்கத்தில் வெளிவந்து 3 மொழிகளிலும் பறந்து நம்மை ஈர்க்கிறது ஈ.

நானி, சமந்தா, சந்திப் மற்றும் மார்க்ட்டிங்கிற்காக சந்தானம் என்று கலைகட்டுகிறது ஈ. கதை என்னவோ ஒன்லைன்தான். நானி சமந்தாவை விரும்புகிறார். சுதீப் சமந்தாவை அடையவிரும்பி நானியை கொல்கிறார். இறந்த நானி எப்படி ”நான் ஈ” ஆக மாறி சுதீப்பை பழிவாங்குகிறார் என்பதே கதை.

லாஜிக் இல்லா மேஜிக் தான் நான் ஈ. லாஜிக் பார்க்காமல் ரசித்தால் மிகமிக சுவாரஸ்யமாய் காட்சிகளை நகர்த்தி நம்மை சீட்டின் நுனிக்கே கொண்டுவருவதிலிருந்தே ராஜமௌலியின் திறமை புரிகிறது.

இந்தப்படத்தில் உண்மையான கதாநாயகர்கள் என்றால் அது கம்யூட்டர் கிராபிக்ஸ்ஸில் கலக்கியிருக்கும் மேக்ஸிமா டீமும், ஒளிப்பதிவாளர் K.K. செந்தில் குமாரும் மற்றும் அளவான திகட்டாத இசையமைத்த மரகதமணியையும் சொல்லலாம். இவர்களின் கூட்டு உழைப்பினால் நம்மையும் உற்சாகத்தின் உயரத்தில் பறக்கவைக்கிறது ஈ.

நானி கதாபாத்திரம் தன் காதலை வெளிப்படுத்துமிடங்கள் மற்றும் நடிப்பு வெகு சிறப்பு மட்டுமல்ல சிறிது வித்தியாசமான காட்சியமைப்பும் கூட.

அழகு பதுமை சமந்தா அலட்டலில்லாமல் இயல்பாய் நடித்துள்ளார். நானி தன் கவனத்தைக் கவர செய்யும் செயல்களை தான் வேண்டுமென்றே அலட்சியப்படுத்தினாலும் அதை நானி பாஸிடிவ்வான காரணங்கள் சொல்லி சமாளிப்பதை ரசித்து சிரிக்குமிடங்கள் கொள்ளை அழகு.

சுதீப் படம் முழுக்கு ஈயுடன் போராடும் வில்லத்தனமான கேரக்டர். கம்யூட்டர் கிராபிக்ஸில் வரும் ஈயை கற்பனை செய்து இவர் நடிக்கும் நடிப்பும் முகபாவனைகளும் பாராட்ட வார்த்தைகளில்லை. நிச்சயம் தமிழ் சினிமா இவரை வரவேற்கும் என்பதில் ஐயமில்லை.

ஈ காரை ஆக்ஸிடென் ஆக்குவது, சுதீப்பை தூங்கவிடாமல் செய்வது, சமந்தாவுடன் உடல் அசைவிலேயே எண்ணங்களை வெளிப்படுத்துவது, சந்தீப்புக்கு கொடுத்த தொல்லைகளை சமந்தாவிடம் செய்துகாட்டி விளக்குவது போன்ற காட்சிகளில் மிகைப்படுத்தப்படாத கம்யூட்டர் கிராபிக்ஸ் உபயோகித்திருப்பதே படத்தின் மிகப்பெரிய பலம்.

ஈ பழிவாங்க கிளம்பும் ஒவ்வொரு காட்சியிலும் தியேட்டரில் விசில் சப்தம் காதைப் பிளக்கிறது. சந்தானம் என்ட்ரியிலும் அதே கதைதான். ஆனால் வசனங்களில் கிரேஸி டச் ரொம்ப கம்மி. வழக்கமான பாணியிலிருந்து முற்றிலும் மாறுபட்ட கிரேஸி வசனங்கள்.

பாடல்கள் மனம் மயக்கும் மெலடி மலர்கள். ஈ பழிவாங்குமிடங்களில் பாடல்களின் சில வரிகளை உபயோகித்திருப்பது நல்ல இனிமை.

படத்தில் கிராபிக்ஸ் இருப்பதே பெரிதாய் தெரியாதளவுக்கு படத்துடன் இயல்பாய் கலந்துகொடுத்து நம்மை படத்துடன் ஒன்றச்செய்து மிகமிக சுவாரஸ்யத்துடன் ஈ யைப் பறக்கச்செய்த டைரக்டர் ராஜமவுலிக்கு ஒரு சபாஷ்!!

ஈ - குழந்தைகள் முதல் அனைத்து வயதினரையும் அனைத்து தரப்பினரையும் ஈர்க்கும் என்பதில் ஐயமில்லை.

குடும்பத்துடன் பார்க்கலாம்!. ஈ உயரப்பறக்கிறது!!

படங்கள் உதவி - தினமலர்.

நாம் தொலைத்து வரும் நம் பொக்கிஷங்கள்...!! (Missing-Traditional-Treasures)

noreply@blogger.com (கடம்பவன குயில்) — Wed, 14 Mar 2012 04:30:00 +0000

வணக்கம் நட்புகளே..! நீண்ட இடைவெளிக்குப் பிறகு உங்கள் அனைவரையும் இப்பதிவின் மூலமாக சந்திப்பதில் அளவற்ற மகிழ்ச்சியடைகிறேன்.

இந்த புண்ணிய பாரத்தில் பிறந்ததற்கு நாம் அனைவரும் பெருமையடைகிறோம் என்பதில் சிறிதும் ஐயமில்லை. ஆனால் நம் இந்திய மண்ணின் பெருமைகளான சித்த மருத்துவம், புராண காலத்திய தொழில் நுட்பங்களான விமானத்தின் முன்னோடி விசைகள், தர்ம சிந்தனைகள், தனி மனித ஒழுக்கம், வேதாந்த சாரம், நவ கோள்களின் கோலாட்டங்கள், சாரங்கள், அண்டவெளியின் சலனங்கள் பற்றிய நுட்பங்கள் மற்றும் முனிவர்கள் கண்டறிந்த மந்திரங்கள் அவற்றினால் மனித வாழ்வில் ஏற்படும் மாற்றங்கள் போன்ற அரிய பொக்கிஷங்கள் அனைத்தையும் நம் ஏமாளித்தனத்தினாலும் அறியாமையாலும் அன்னிய நாட்டினருக்கு தாரைவார்த்து விட்டு நிற்கிறோம்.

தாரை வார்த்த விஷயங்களையே திரும்ப ஏதோ ஒரு பெரிய அதிசயமான அதி அற்புதமான ஒன்றாக நினைத்து அவர்களிடமிருந்து வந்ததாய் எண்ணி நாம் அவற்றை கடைபிடித்து உபயோகித்து பெருமைபடுகிறோம். நம் சொந்த தாய்நாட்டில் நமக்கு சொந்தமான பொக்கஷங்கள்தான் அது என்பதையே அறியமுடியாத அப்பாவிகளாயிருப்பதை நினைத்தால் நெஞ்சு பொறுக்குதில்லை..!

நம் பாரத நாட்டின் மூலிகைகளும், அஷ்டாங்க யோகங்களும், நவ யாகங்களும் அந்நிய நாட்டிலிருந்து குப்பிகளில் அடைக்கப்பட்ட மருந்துகளாகவும் அக்குபஞ்சர் போன்ற மருத்துவ சிகிச்சைகளாகவும் அயல்நாட்டு காப்புரிமையோடு திரும்பி வருவதை பார்க்கும்போது மனம் வேதனையால் தவிக்கிறது.

இந்த நிலை மாற என்ன செய்யப் போகிறோம் நாம்???

இனியும் இந்த நிலை தொடராமல் இருக்க வேண்டுமானால் நம் நாட்டின் பாரம்பரிய பெருமைகளை நாம் முதலில் உணர்வதோடு நம் இளைய சமுதாயத்தினர்களுக்கும் உணர்த்த வேண்டும். அரிய கலைகளையும் சக்திகளையும் அடைந்தவர்கள் மூடிமூடி தங்களுக்குள் அவற்றை வைத்திடாமல் நான்கு பேர் அறியும்படி அனைத்தையும் அனைவருக்கும் கற்றுககொடுக்கவேண்டும்.

பணம் சம்பாதிப்பது மட்டுமே நம் குறிக்கோளாயிருக்காமல் அதனோடு நாம் பிறந்த இந்த புண்ணிய தேசத்திற்கும் நம்மாள் இயன்ற கைமாறாக இந்திய திருநாட்டின் சிறப்புகளையும் பாரம்பரியத்தையும் போற்றி உலக மக்கள் அனைவரும் அறியும்படி பாரதத்தின் பெருமையை உயர்த்த பாடுபடவேண்டும். இல்லையேல் பாரதத்தாய் நம்மை மன்னிக்கவே மாட்டாள்.

(படங்கள்.- கூகுள் தேடுபொறிக்கு நன்றி)

நம் இந்திய திருநாட்டை உலகளவில் மிகமிக உன்னதமான நாடாக திகழச்செய்ய வேண்டியது நம் கடமை. அதற்கு ஆவன செய்ய ஒவ்வொருவரும் எடுத்துவைக்கும் முதல் அடியை நம் குடும்பத்திலிருந்து தொடங்க வேண்டும். அழிந்து வரும் நம் அரிய பண்டைய நுண்கலைகளை மருத்துவத்தை , நம் முனிவர்கள் மற்றும் முன்னோர்கள் புராணங்கள் வழியே நம்மிடம் விட்டுச்சென்ற நுட்பங்களை அணுவிஞ்ஞானம் முதல் ஆதவன் கதிர் விஞ்ஞானம் வரை உணர்ந்து இளைய தலைமுறைகளுக்கு்ம் அவற்றின் அருமைகளை விளக்கி பயன்படுத்தி காப்பாற்றச் செய்யவேண்டும்.

வாழ்க பாரதம்...! வளர்க பாரத பண்பாடு..!!

* * * * * * *

விருது எனும் அட்சயப்பாத்திரம் - யான் பெற்ற விருது பெறுக இப்பதிவுலகம்

noreply@blogger.com (கடம்பவன குயில்) — Mon, 20 Feb 2012 05:09:00 +0000

அன்பு உள்ளங்களுக்கும் அருமை உறவுகளுக்கும் என் இனிய வணக்கங்கள். என் அரிதான வருகைக்கு உண்மையான காரணம் என் இணைய இணைப்பும் , மின்சாரமும் மற்றும் குடும்ப சூழ்நிலையும் தான். ஆனாலும் என் மௌனத்தை கலைத்து பதிவுப்பக்கம் வரத்தூண்டிய முக்கிய காரணி ”VERSATILE BLOGGER AWARD" . (THANKS TO SISTER YUVARANI TAMILARASAN, KIRUKALKAL BLOG) .

சகோதரி கிறுக்கல்கள் யுவராணி தமிழரசன் எனக்கு வழங்கிய இந்த விருதினை , என் பதிவுகளும் பிடித்துப்போய் (!) எனக்கு ஃபாலோயராக இணைந்து என்னை ஊக்கப்படுத்திய அன்பு தோழமைகளுக்கு சமர்பிக்கிறேன்.

மொய்க்கு மொய் கலாச்சாரத்துக்கு நடுவே, நான் தவிர்க்க இயலாத சூழ்நிலை காரணமாக உங்களையும் உங்கள் பதிவுகளையும் தொடரமுடியவில்லை என்றாலும் மொய் எதிர்பார்க்காமல் தொடர்ந்து எனக்கு உற்சாகத்தையும் ஊக்கத்தையும் கொடுத்து என்னுடன் கைகோர்த்துள்ள என் பதிவுலக நட்புகளை நினைத்து பெருமைகொள்கிறேன். தலைவணங்குகிறேன்.

பிடித்த சில விஷயங்களை பகிர்ந்துகொண்டு இந்த விருதையும் 5 நண்பர்களுக்கு பகிர்ந்தளிக்க வேண்டும்.

எனக்குப் பிடித்தவை:

1. மழை எனக்குப்பிடித்ததில் முதலிடம் வகிப்பது. மழையில நனைவது மிகவும் பிடிக்கும்.

2. வாசித்தல் சுவாசிக்காமல் கூட இருப்பேன். வாசிக்காமல் என்னால் இருக்க முடியாது. பதிவு எழுதுவதைவிட நண்பர்கள் பதிவை வாசிப்பது பிடிக்கும். தெரியாத நிறைய விஷயங்களை தெரிந்துகொள்ள இது உதவும்.

3. ஆலயம் எனக்கு மிகவும் பிடித்த இடம். அமைதியான பழமையான ஆலயங்களில் அமர்ந்து தியானம் செய்வதும் ஆலயத்தின் கலைநயத்தை ரசிப்பதும் மிகவும் பிடிக்கும்

4. மலைவாசஸ்தலம். மலையும் மலைசார்ந்த இடமும் என்னைக் கவர்ந்தவை.

5. மெலடி பாடல்கள் மெல்லிய மெலடி பாடல்கள் கேட்கப் பிடிக்கும்.

6. மழலைகள் மழலைகள் குறும்புக்கு நான் அடிமை. மழலைகளுடன் நேரம் செலவிட பிடிக்கும.

இது எல்லாவற்றிற்கும் மேலாக உங்கள் எல்லோரையும் எனக்கு ரொம்பப்பிடிக்குங்க........நம்புங்க ப்ளீஸ்......

பொதுவாக எனக்கு யாரையும் வெறுக்கத்தெரியாது. ஒருவரிடம் இருக்கும் தீய பழக்கங்களையும் மோசமான குணத்தையும் மட்டுமே வெறுக்கலாமே தவிர மனிதர்களை அல்ல.

இந்த விருதை நான் ஐந்து நண்பர்களுக்கு பகிர்ந்தளிப்பதில் பெருமையடைகிறேன்.

நான் விருதளிக்க ஆசைப்படும் வலைப்பூக்கள்:

1. கோகுல் மனதில் - கோகுல் மகாலிங்கம்

http://gokulmanathil.blogspot.in/2011/12/blog-post.html இவரது வலைப்பூவில்
விழிப்புணர்வூட்டும் கட்டுரைகளோடு காதல் கவிதைகள் , பாதித்த நிகழ்வுகள் என்று கலந்துகட்டி அடிப்பார். இந்த சிறிய வயதிலேயே இவரிடம் இருக்கும் சமுதாய அக்கறை என்னை வியக்கவைக்கிறது.

2. விழுதுகள் - மதுரை சரவணன் ஆசிரியர்

http://veeluthukal.blogspot.in/2012/01/blog-post_24.html மாணவர்களுக்கு கல்வி கற்றுக்கொடுத்தலோடு ஆசிரியர் பணி முடிவடையாது. அவர்களின் மனவளத்திற்கும் ஆசிரியர்களே பொறுப்பு என்பதை ஆணித்தரமாக தன் பதிவுகளில் கூறும் இந்த ஆசிரியர் மிகமிக அபூர்வமான ஆசிரியர் என்பதில் பெருமைப்படுகிறேன்.

3. மாதவிப்பந்தல் - கண்ணபிரான் , ரவிசங்கர். (KRS)

http://madhavipanthal.blogspot.in/2012/02/blog-post.html தமிழின் பெருமையையும் ஆன்மிகத்தையும் இணைத்து அதிகம் விளையாடுமிடம் மாதவிப்பந்தல் .

4. வாங்க ப்ளாக்கலாம் - ஆனந்த் நாராயணன். ( அனந்து)

http://pesalamblogalam.blogspot.in/ இவருடைய கதைகள் , கவிதை, சினிமா விமர்சனம் போன்றவற்றிற்கு நான் ரசிகை.

5. வேர்களைத்தேடி - முனைவர் இரா. குணசீலன்

http://gunathamizh.blogspot.in/p/blog-page.html இவர் தன்னுடைய மாணவர்களின் படைப்புகளையும் திறமைகளையும் தன் பதிவின்மூலம் வெளிக்காட்டுபவர்.

பொங்கலோ பொங்கல் சிறுவீட்டுப் பொங்கல்..!!

noreply@blogger.com (கடம்பவன குயில்) — Wed, 11 Jan 2012 01:17:00 +0000

அன்பான உறவுகளே..!

புத்தாண்டு மற்றும் (முன்கூட்டிய) தைத்திருநாள் நல்வாழ்த்துக்களுடன் மீண்டும் உங்களை சந்திப்பதில் நான் மிகவும் மகிழ்ச்சியடைகிறேன். (ஹய்யோ.....எங்க நிம்மதி போச்சேன்னு யார் புலம்பறது அங்க......) குயில் ரிட்டர்ன்ஸ்!!...... ஏதோ BSNL BROADBAND தயவால நீங்க இத்தனை நாட்களாக என்னோட கமெண்ட்ல இருந்து தப்பிச்சுருப்பீங்க. இனி முடியாது.

உங்க பதிவுகளில் பெரும்பான்மையானதை படிச்சுருவேன். ஆனால் கமெண்டு போடும்போது சரியாக இணைய இணைப்பு கட் ஆகிடும். திரும்ப அரைமணிநேரம் போராடினாலும் சரியாகாது. அதற்குள் மின்சாரம் கட் ஆகிடும். 3 மாதமாக போராடி பூமிக்கடியிலுள்ள இணையக் கேபிள் எல்லாம் சரிபண்ணியிருக்கிறேன். இனி எல்லாம் சரியாகிடும் என்று நம்புகிறேன். நம்பிக்கைதானே வாழ்க்கை... ஓகே... ஓகே... நொந்த மேட்டரை விட்டுட்டு வந்த மேட்டர சொல்லிடறேன்.

ஆனாலும் உங்க எல்லோரையும் நான் ரொம்ப மிஸ் பண்ணினேன். இனி தொடர்ந்து உங்கள் அனைவர் பதிவுகளுக்கும் மிஸ்பண்ணாமல் வந்து தொல்லை கொடுப்பேன் என்றும், அவ்வப்போது பதிவுகளும் போட்டு கொல்லுவேன் என்றும் பயமுறுத்திக் கொ(ல்)ள்கிறேன்.

பொங்கல் சமயம் ரீஎன்ட்ரி கொடுத்ததால் பொங்கல் கதையோடுதான் பதிவு எழுதணும்னு ஒரு சொல்லப்படாத விதியின்படி அதிகம்பேர் அறியாத ஒரு பொங்கல் விழாவான சிறுவீட்டுப்பொங்கல் பற்றி சொல்றேன். ஓடிடாதீங்க... தயவுசெய்து கொஞ்சம் பொங்கல் சாப்பிட்டு போங்க.

பொங்கல் என்றாலே வீட்டில் பெண்களுக்கு மகிழ்ச்சியோடு வேலைப்பளுவும் சற்று அதிகம் தான். வீட்டை ஒதுங்கவைத்து (தீபாவளி பொங்கலுக்கு மட்டும்தானே அதை செய்வோம்) பழையதை கழித்து புதியது (நகைகளாக மட்டும்) வாங்கி...... வீட்டிற்கு வெள்ளையடித்து திரும்ப தட்டுமுட்டு சாமான்களை சரியாக வைத்து..... ஷ்ஷ்ஷ்....... ஹப்பா.... எவ்வளவு வேலைகள் பெண்களுக்கு இடுப்பு எலும்பு முறிஞ்சுடறளவு இருக்கும் தெரியுமா....??

எல்லோர் வீடுகளிலும் குடும்பத்தலைவிதான் புதுப்பானையில் பொங்கலிடுவார்கள். ஆனால் குழந்தைகளுக்காக கொண்டாடப்படும் பொங்கல் பற்றி தெரியுமா??

நெல்லைப் பகுதிகளில் குழந்தைகளுக்காக குழந்தைகள் சேர்ந்து கொண்டாடும் பொங்கல்தான் சிறுவீட்டுப் பொங்கல்.

குறிப்பாக பெண்குழந்தைகள் இருக்கும் வீடுகளில் இதை கண்டிப்பாய் கொண்டாடுவார்கள். மார்கழி மாதம் முழுதும் வீட்டின் முற்றத்தில் கோலத்தில் சாணத்தில் பூசணிப் பூ வைப்பார்கள். அந்த சாணத்தை வீட்டின் வெளியில் ஒரு மூலையில் வறட்டியாக காயவைத்திருப்பார்கள். மார்கழிமாதம் முடிந்துவரும் தைமாத வளர்பிறையில் சிறுவீட்டுப் பொங்கல் வைப்பார்கள்.

சுண்ணாம்பு அல்லது களிமண்ணால் சிறு வீடுபோன்ற படம் வரைந்து (கவனிக்க களிமண் கொண்டு கோடு போட்டு சிறு வீடு வரைவார்கள்) அந்த வீட்டுமுன் கலர்பொடியால் கோலங்கள் போடுவார்கள். வரைந்த வீட்டின் நடுவே பொங்கல் பானை வைத்து பொங்கலிடுவார்கள். அந்தப் பொங்கலை செய்ய குட்டீஸ் ஓடி, ஓடி ஆசை ஆசையாகச் செய்யும் உதவிகள் இருக்கே.... ஆஹா...சில குழந்தைகள் தானே செய்வேன் என்று அடம்பிடித்து அரிசியை பானையில் போடுவதிலிருந்து வெல்லம் போடுவதுவரை தன்கையால் செய்யணும்னு ரொம்ப அக்கறையோட கவனமா செய்வார்கள் தெரியுமா? அதில் அவ்வளவு சந்தோசம் மற்றும் பெருமிதம் அவர்களுக்கு.

மார்கழி முழுதும் சேர்த்துவைத்த வறட்டியில் சூடம் ஏற்றி வெற்றிலை பாக்கு ஒன்றிலும் மற்றொன்றில் இலையில் பொங்கலும் வைத்து ஆற்றில் அல்லது அருகில் நீர்நிலைகளில் விடுவார்கள். சிலர் முறத்தில் பொங்கல், வெற்றிலைபாக்கு, வாழைப்பழம் வைத்தும் ஆற்றில் விடுவார்கள்.

நீர் நிலைகளில் உள்ள சிறிய உயிர்களுக்கு்ம் உணவளிக்க வேண்டுமென்றும், நீர் நிலைகள் வணக்கத்திற்குரியவை அவைகளை மாசுபடுத்தாமல் வளம் குறையாமல் பாதுகாக்க வேண்டுமென்பதையும் குழந்தைகளுக்கு உணரச்செய்ய நடத்தப்படுவதே சிறுவீட்டுப் பொங்கல்.

தற்போது தைமாதம் ஏதாவது ஒரு ஞாயிற்றுக்கிழமையில் குழந்தைகளின் விடுமுறை வசதிக்காக மாற்றிக் கொண்டாடப்படுகிறது.

சூரியன், மழை, காற்று, ஆகாயம், மண் போன்ற பஞ்ச பூதங்களின் சிறப்பையும் முக்கியத்துவத்தையும் விளக்கும் வண்ணம் பண்டைக் காலத்திலிருந்தே இயற்கைக்கு நன்றிசெலுத்தும் விதமாக தனித்தனியே திருவிழாவாக கொண்டாடி மகிழ்ந்தார்கள் நம் முன்னோர்கள். தற்கால இயந்திர வாழ்க்கையில் அனைத்தின் அருமையும் தெரியாமல் தவறவிட்டு நம் சந்தததிகளுக்கும் இயற்கையின் பெருமைகளையும் முக்கியத்துவத்தையும் கற்றுக்கொடுக்காமல் அனைத்தையும் மாசுபடுத்தி அவர்களின் எதிர்காலத்திற்கு எதிரிகளாகிவிட்டோம் நாம்.

நம் இளைய தலைமுறைகளுக்கு இயற்கையை நேசிக்க மட்டுமின்றி இயற்கை வளங்களை போற்றி பாதுகாத்து விழாக்கள் மூலம் நன்றி செலுத்தவும் கற்றுக்கொடுத்தால் மட்டுமே இயற்கை சீற்றங்களிலிருந்து எதிர்கால சந்ததியினரை காப்பாற்ற முடியும்.

இனியாவது விழிப்புடனிருந்து இயற்கை வளங்களின் அவசியத்தையும் அதன் தூய்மை எவ்வளவு முக்கியத்துவம் வாய்ந்தது என்பதையும் நம் வருங்கால சந்ததியினருக்கு விழிப்புணர்வூட்ட வேண்டியது நம் கடமை.

அனைவருக்கும் மீண்டும் ஒரு முறை (முன்கூட்டிய) தைத்திருநாள் நல்வாழ்த்துகள்.

* * * * * * *

எங்கெங்கு காணினும் சக்தியடா!! (Devotional-Navarathri Spl-Shakthi) - 2

noreply@blogger.com (கடம்பவன குயில்) — Wed, 05 Oct 2011 04:40:00 +0000

சென்ற பதிவின் தொடர்.......

இடைவேளை நீண்டதானாலும் என்னை மறக்காமல் என் பதிவை எட்டிப்பார்த்து கமெண்ட் போட்டு என்னை ஊக்குவித்த அனைவருக்கும் நன்றிகள். என்னை தன் பதிவில் அறிமுகப்படுத்தி பெருமைப்படுத்திய சகோதர சகோதரிகளுக்கு நன்றி என்கிற 3 எழுத்துக்களில் சொல்லி முடித்துவிட முடியாது. ஆனாலும் நீங்கள் அனைவரும் எனக்கு கொடுக்கும் உற்சாகமே என்னை இன்னும் பதிவுலகில் வலம் வர வைத்திருக்கிறது.

சென்ற தொடரில் சக்தி வழிபாடுபற்றியும் எந்தெந்த தேசங்களில் எந்தெந்த பெயர்களில் வழிபாடு நடைபெற்றது என்பதையும் பார்த்தோம். இப்பொழுது நவராத்திரியில் வழிபடப்படும் அன்னையின் பிற வடிவங்களின் பெயர்களையும் தாத்பர்யங்களையும் காண்போம்...

துர்க்கை

நவராத்ரியில் முதல் 3 நாட்கள் துர்க்கைக்கு உரியவையே.

நல்ல செயல்களாக இருந்தாலும் தீய செயல்களாக இருந்தாலும் இரண்டுமே ஆத்ம சாதகனை உயர்நிலையை அடையவிடாமல் செய்யும் மாயைகளே. தீமையை விலக்குவதோடு நன்மையையும் விலக்கி அனைத்தையும் பிரம்மமாக உணர்வதே மனித வாழ்க்கையின் உன்னத இலட்சியமாகும்.

துர்க்கை மகிஷாசுரமர்தினியாகக் காட்சி தருகிறாள். சிங்கத்தின் மீது நின்றுகொண்டு அவள் அசுரனை பயங்கரமாகத் தாக்குகிறாள். கருமைநிறமுடைய அந்த அசுரன் ஆணவம், அறியாமை, மயக்கம், கோபம்ஆகிய தமோ குணத்தின் உருவமாக விளங்குகிறாள். பச்சை நிறம் கொண்ட துர்க்காதேவி சிவப்பு நிற சேலை அணிந்திருக்கிறாள். அவள் எட்டு கைகளிலும் பலவித ஆயுதங்கள் ஏந்தி குணமயி என்று அழைக்கப்படுகிறாள். துர்க்கா தன் தொழிலுக்கு ஏற்ப ரஜோ குணம் கொண்ட உருவமாகத் திகழ்கிறாள்.

மகிஷாசுரமர்த்தினி

துர்க்கை ரஜோ குணத்தின் வடிவமாகத் திகழ்கிறாள். அரக்கன் தமோகுணத்தின் வடிவமாக விளங்குகிறாள். போரின் முடிவில் அரக்கனின் தீய குணங்கள் இயல்புகள் எல்லாம் அடியோடு அழிந்து அருளும் ,ஞானமும், கலையும், அருட்செயலும் , பேராற்றலும் தோன்றுகின்றன. இந்த உண்மையை துர்க்கையின் இரண்டு பக்கங்களிலும் இரு்க்கும் சரஸ்வதி, லட்சுமி வினாயகர் சுப்பிரமணியர் ஆகிய தேவதேவியரின் திருவுருவங்கள் விளக்குகின்றன. பிறகு குணங்களை கடந்து விளங்கும் அதி உயர்ந்த நிலையாகிய பரம்பொருள் அடையப்பெருகிறது. இந்தக் கருத்தையே சிவபெருமானின் புறத்தோற்றமாகிய வெண்ணிறமும் அவருடைய உள்ளார்ந்த ஆழ்ந்த நிஷ்டையும் குறிப்பிடுகின்றன.

2. காளி

காலம் என்ற தத்துவத்தின் சிறந்த விளக்கமாக காளி விளங்குகிறாள். காலத்தை தன்னுள் ஒடுக்கி வைத்திருக்கும் மாபெரும் சக்தியே காளி.

திகம்பரி, முண்டமாலினி, கர்மருபிணி, பயங்கரி போன்ற பலநாமங்கள் காளியையே குறிக்கும்.

திகம்பரி

எல்லாத்திசைகளிலும் நீக்கமற நிறைந்திருப்பதனால் காளிக்குத் திகம்பரி என்ற பெயர் உண்டு.

முண்டமாலினி

காளிதேவியின் மற்றொரு திருநாமம் முண்டமாலினி. தலைகளால் கோர்க்கப்பட்ட மாலையை அணிந்தவள் என்பது அதற்குப் பொருள். குழந்தைப் பருவத்திலிருந்து வயோதிகபருவம் வரையிலுள்ள தலைகளைக் கொண்டு அந்த மாலை கட்டப்பட்டிருக்கும். மரணம் ஐந்திலும் வரலாம் ஐம்பதிலும் வரலாம் என்ற நிலையற்ற தன்மையை குறிப்பது இந்த மாலைகள். எல்லா உயிர்களிலும் ஆதிசக்தியிடமிருந்து தோன்றி மீண்டும் அவளிடமே ஐக்கியமாகின்றது. மரண்திலிருந்து யாரும் தப்பிவிட முடியாது. இந்த உலகம் அவளது விளையாட்டு மைதானம். கொடுத்த உயிரை மீண்டும் எப்பொழுதும எடுத்துக்கொள்வாள் என்பதை பல வயதுடைய தலைகள் குறிப்பிடுகின்றன.

கர்மருபிணி

செயல்கள் அனைத்திற்கும் சக்தியாக இருப்பவள் காளிதேவி. இதை அவள் அணிந்திருக்கும் துண்டிக்கப்பட்ட கைகளால் ஆகிய ஓட்டியாணம் விளக்குகிறது. உலகில் எங்கெல்லாம் பெரும் சக்தியின் வெளிப்பாடு உள்ளதோ அங்கெல்லாம் தேவியின் வீரக் கரங்கள் எங்கும் எதிலும் நீண்டு பரந்திருக்கின்றன.

பயங்கரி

ஒரு கையில் வாளையும் மற்றொரு கையில் துண்டிக்கப்பட்ட ஒரு தலையையும் தேவி தாங்கி நிற்கிறாள்.வெட்டிய தலையும் இரத்தக்கறை படித்த வாளும் துன்பத்தின் அறிகுறியாகும் பேராசை, ஆணவம், சுயநலம், அநீதி, அதிகார வெறி எங்கெல்லாம் ஆட்சி புரிகின்றதோ அங்கெல்லாம் காளிதேவியின் கோரவாளும் ஆட்சி செய்யும். தர்மத்துக்கு மாறாக எது நடந்தாலும் அதனுடைய முடிவு அழிவாகத்தான் இருக்கும் என்பதை துண்டிக்கபட்ட தலை விளக்குகிறது.

காளிதேவி சுடுகாட்டில் ஊழிக்கூத்து ஆடுபவளாக, சிவனே அதற்கு ஆதாரமான மேடையாக தம் உடலையே கொடுப்பவராக சிவன் மேல் காளி ஆடும் நிலையில் திருஉருவம் அமைந்திருக்கிறது.

காளியை தள்ளி இருந்து பார்ப்பவர்களுக்கு , பக்தியால் அவளைஉணராதவர்களுக்கு அவள் கருமை நிறத்தவளாக, பயங்கரியாகவும் தோன்றுகிறாள். ஆனால் அவளுடைய குழந்தையாகிவிட்டவர்களுக்கு பால் நினைந்துட்டும் உலகத்தாயினும் மேலான தயாபரியாகவே அவள் திகழ்கிறாள்.

லட்சுமி தேவி எத்தனை விதங்களில் , எத்தனை பெயர்களில் நவராத்திரியில் வழிபடப்படுகிறாள் என்பதையும் சரஸ்வதியின் வழிபாட்டையும் அடுத்த தொடரில் காண்போம் , ஆதிசக்தியின் சித்தமிருந்தால்....

அனைவருக்கும் சரஸ்வதி பூஜா வாழ்த்துக்கள்..........

முந்தைய பதிவைப்பார்க்க இங்கே கிளிக் செய்யவும்.

எங்கெங்கு காணினும் சக்தியடா.!! பாகம் - 1

எங்கெங்கு காணினும் சக்தியடா..!! (Devotional - Navarathri Special - Shakthi)

noreply@blogger.com (கடம்பவன குயில்) — Fri, 30 Sep 2011 03:49:00 +0000

அன்பான உறவுகளுக்கு வணக்கம். மிக மிக நீண்............ட இடைவெளிக்குப்பிறகு உங்களை நவராத்ரி சிறப்பு ஆன்மீகப் பதிவின் மூலம் சந்திப்பதில் பெருமிதப்படுகிறேன். நான் கமெண்ட் வழியாக உங்கள் அனைவரையும் அனுதினமும் அன்பாய் விசாரித்துதான் வருகிறேன்.

என் பதிவையும் எதிர்நோக்கி, அக்காச்சி பதிவெங்கே என்று அன்பாய் மிரட்டிய சகோதரர்களுக்கும் என் சோகம் அறிந்து அதில் பங்குகொண்ட என் நண்பர்களுக்கும் என் நன்றியை தெரிவித்துக்கொள்கிறேன். என் வருகை இனி சீரான இடைவெளியில் இருக்குமென்று நம்புகிறேன்.

நவராத்திரி ஆரம்பித்தாகி விட்டது. நான் பயங்கர பிஸிதான் பூஜை, சுண்டல் பொங்கல் என்று எக்கச்சக்க ஐட்டம் இருக்கே.. சரி அதிகநாள் கழித்து எழுதும் பதிவு தேவி வழிபாடு பற்றி நவராத்திரி நேரத்தில் எழுதலாமே என்றுதான் ஆரம்பித்தேன்..... இது ஒரு தொடர் பதிவுதான். என்னை ஊக்குவிக்கும் அன்பு உள்ளங்களுக்கு மறுபடியும் என் நன்றிகளை நவில்கிறேன். சரி விஷயத்துக்கு வர்றேன்.

எத்தனை விதங்களில் எத்தனை தேசங்களில் இந்த சக்தி வழிபாடு எந்தெந்த பெயர்களில் நடந்திருக்கிறது, இப்பொழுதும் நடக்கிறது என்பதை அறிந்தால் ஆச்சர்யத்தில் மயக்கமே வருகிறது...

இந்தியாவில் பலஆயிரம் ஆண்டுகளுக்கு முன்பிருந்தே தேவி வழிபாடு நடந்திருக்கிறது என்பதை மொகஞ்சதாரோ. ஹரப்பா போன்ற இடங்களில் தொல்பொருள் ஆராய்ச்சியில் கிடைத்த தேவி மண் சிலைகள் கூறுகின்றன. சிந்து சமவெளி பகுதிகளில் கிடைத்த சக்தி தெய்வத்தின் சிலைகள் போலவே பாரசீகம், மொசடோமியா, பாலஸ்தீனம், சைப்ரஸ், கிரேக்கம், எகிப்து, துருக்கி முதலிய இடங்களிலும் கிடைத்திருப்பதாக ஆராய்சியாளர் சர் ஜான் மார்ஷல் கூறுகிறார்.

ரிக் வேதத்தில் தேவி ஸூக்தம் என்னும் பகுதியில் அன்னையை உஷஸ், ராத்திரி, அதிதி, வாக், பரந்தி, திஷணா, இடா, வாருணி என்ற நாமங்களில் குறிப்பிடப்பட்டுள்ளது. பேரானந்தத்ததை அருளும் பரசிவத்தின் அருள்சக்திதான் பராசக்தி என்று சைவசித்தாந்தம் கூறுகிறது. தந்திர சாஸ்திரங்களில் அம்பிகையை பத்து வடிவங்களில் ”தச மகாவித்யா” என்றே அழைக்கிறது.

தேவி உபாசகர்கள் அன்னையை ஆறுவிதங்களில் கூறுகிறார்கள். அவை பராசக்தி, ஞானசக்தி, இச்சாசக்தி, கிரியா சக்தி, குண்டலினிசக்தி, மாத்ருகா சக்தி என்பதே அந்த ஆறு சக்திகள். நம் பாரத நாட்டில் பூமி கடல் ஆறு நாடு முதலியனவும் அன்னை தேவியின் வடிவமாகவே நாம் பார்க்கிறோம்.

சக்தி வழிபாடு குறித்து சுவாமி விவேகானந்தர் தம் "கீழைநாடும் மேலைநாடும்" என்ற கட்டுரையில் ”இந்த சக்தி வழிபாடு வெளிப்படையாகவே எங்கும் இருந்து வருகிறது. ரோமன் கத்தோலிக்க மதம் மட்டுமே ஐரோப்பாவில் உள்ளது. அந்த மதத்தில் ஜெஹோவாவோ அல்லது ஏசுவோ அல்லது திரிமூர்த்தியோ இரண்டாவது ஸ்தானம் பெற்றிருக்கின்றனர். அங்கே தாய்க்குத்தான் வழிபாடு. குழந்தை ஏசுவைக் கையில் ஏந்திய தாய்தான் பூஜிக்கப்படுகிறாள். எங்கும் எல்லா இடங்களிலிருந்தும் இரவு பகலாக ”ஆவே மரியா! ஆவே மரியா!” என்ற ஒலிதான் கேட்கிறது” என்கிறார்.

பிரம்மா முதலிய தேவர்களாலும் அறிந்து கொள்ள இயலாதவள் அஜ்ஞேயா, அந்தம் அல்லது முடிவு இல்லாதவள் அனந்தா. எவராலும் கிரகிக்க முடியாதவள் அலஷ்யா. ஆரம்பம் இல்லாதவள் அஜா. எங்கும் ஒருத்தியாக இருப்பவள் ஏகா. ஒருத்தியே பல ரூபமாக இருப்பவள் நைகா என்று தேவி உபநிஷத் கூறுகிறது.

எங்கும் பரந்து விரிந்துள்ள அவளது நிலையை பூரணி, பராசக்தி, இராஜராஜேஸ்வரி, மூலப்பிரகிருதி ஆகிய திருநாமங்கள் உணர்த்துகின்றன. படைத்தலை செய்யும்போது அவள் பிரம்மணி. காத்தலை செய்யும்போது அவளே வைஷ்ணவி. அழித்தலை செய்யும்போது ருத்ராணி எனப்படுகிறாள்.

நவராத்திரியில் வழிபடப்படும் அன்னையின் பல வடிவங்களை இனி வரும் நாட்களில் பார்ப்போம்.....

* * * * * * *

என்னை ரசிக்கும் என் கவிதையே! உன்னை ரசிக்கும் என் கவிமலர்களே!!.

noreply@blogger.com (கடம்பவன குயில்) — Fri, 26 Aug 2011 02:31:00 +0000

நீ என் மனதை ரசிப்பதாக

கூறியபிறகு.....

என் கவிதைகளெல்லாம்

உன்னை மட்டுமே

ரசிக்கத் தொடங்கிவிட்டன!!

படித்ததும் திரும்ப ஒப்படைக்க

நூலக புத்தகமல்ல

இதயம்!!

கைநழுவி உடைந்தாலும்

திரும்ப ஒட்டிக்கொள்ள

பிளாஸ்டிக் அல்ல

மனது!!

இந்த பூமியின்மீது

ஒரு

புதிய கோள் விழுந்தாலும்

பூமியின் உடம்பு

புண்ணாகிவிடாது!!

ஆனால் உன்

கண்ணீர் பூவிலிருந்து

ஒரு காம்பு

கழன்றுவிழுந்தாலும்.....

என்

கவிதையின் உடலில்

காயம் பட்டுவிடும்!!!

குயிலின் மறுக்கப்பட்ட கீதங்கள்!! மலரின்உணரப்படாத மௌனங்கள்!!

noreply@blogger.com (கடம்பவன குயில்) — Wed, 27 Jul 2011 03:42:00 +0000

என் வீதியில் உலாவரும்

எல்லா வாகனங்களையும்

கேட்கவில்லை இடம்.

என் மன்னவனின்

மன வாகனத்தில்

கடுகளவு

எனக்கிடமிருந்தால்

போதும்!

கல்யாணி ராகத்தைக்

காணாமலேயே

முகாரியிலேயே என்பாடல்

முடிந்து விடுமா???

* * * * *

ஓ...பரிதாபத்துக்குரியவளே!!

அடுப்படியில் அழுக்கோடு

அனுதினமும் ஆடிஓயும்

அதிர்ஷ்டமில்லா நீ!!

அடுப்பில் உணவு சமைத்தபோது

அடுப்புக்கே உணவானதேன்??

அரக்ககுண மாமியாரின்

அளவில்லா கொடுமையினாலோ??

* * * * * * *

இருண்ட இரவுகளில்

துயர மனதுடன்

தூங்காமல்,

விழி ஒளியையே

விளக்காகக் கொண்டு

நானெழுதும் இந்தக் கவிதைகளை

பகலின் வெளிச்சத்தில்

படித்துப்பார்ப்பவர்களால்

புரிந்துகொள்ள முடியாது!!

* * * * * *

நான் ரசித்த விளம்பரம் !! யாரோ மாத்தி யோசிச்சுட்டாங்க!!!!

noreply@blogger.com (கடம்பவன குயில்) — Wed, 13 Jul 2011 05:01:00 +0000

வோடஃபோன் விளம்பரத்தில் வந்த நாய் உண்மையில் நினைத்தது இதுவாகக்கூட இருக்கலாம்... smile please..
வாய்விட்டு சிரிங்க......நோய் விட்டு போகுமுங்க!

நாய் உண்மையில் என்ன நினைக்கிறது???????

ம்ம்...!! இன்னிக்குள்ளே முடிக்க மாட்டான் போல!!

டேய் கொஞ்சம் மெதுவா நடடா லூசு பையலே .

இதை யாரு உங்க அப்பாவா எடுத்துட்டு வருவாரு

ஹய்யோ அப்படியே கொள்ளைக்காரன் மாதிரியே இருக்கேடா.

டெய்லி குளின்னு சொன்னா கேக்குறியா என்ன ஒரு கப்பு

நீ சைலண்ட்டா நில்லு நான் எல்லாத்தையும் பார்த்துக்குறேன்.

ஒழுங்க கட்டுடா எருமை.

என்னம்மா வீட்டுல சொல்லிட்டு வந்துட்டியா..!?

இந்த வெத்து சீனுக்கு ஒண்ணும் குறைச்சல் இல்லே.

சீக்கிரமா முடிமா தண்ணி அடிக்கணும்ல.

தேடு தேடு நல்லா தேடு

இதெல்லாம் அவங்ககிட்டே சொல்லிடாதீங்க. அடிச்சும் கேட்பாய்க அப்பயயும் சொல்லிடாதீங்க.... பாஸ்...! ப்ளீஸ்...!

* * * * * * *

தானத்தில் சிறந்த தானம் ????

noreply@blogger.com (கடம்பவன குயில்) — Mon, 11 Jul 2011 02:51:00 +0000

"எட்டி பழுத்தென்ன ஈயாதார் வாழ்ந்தென்ன” ஈயாதாரிடம் செல்வம் இருந்தென்ன பயன்? நான் இதைச்சொல்லவில்லைங்க. நம்ம பாட்டி ஓளவையார்தான் நச்சுன்னு சொல்லியிருக்காங்க.

தர்மம், தானம் என்கிற பெயரில் செய்திதாள்களில் புகைப்படங்களோடு நம் மக்கள் போட்டோ எடுத்து விளம்பரம் தேடிச் செய்கிற தானத்தை பற்றியோ தன் கருப்பு பணம் வெள்ளையாக மாற்றச் செய்யும் அரசியல்வாதிகள், தொழிலதிபர்களின் தானத்தைப்பற்றியோ சொல்லப்போவதில்லை. உண்மையான தானம் என்றால் எப்படி இருக்கவேண்டும்? தானம் என்பதன் உண்மையான பொருள் என்ன என்பதைப் பற்றித்தான் இந்த பதிவு.

”ச்ரத்தயா தேயம்! அச்ரத்தயா தேயம்! ச்ரியா தேயம்! ஹ்ரியா தேயம்!

பியா தேயம்! ஸம்விதா தேயம்!”

-தைத்திரிய உபநிஷதம்(6)

இதோட அர்த்தம் என்னன்னா.....”நம்பிக்கை மிக்க ஈடுபாட்டுடன் தானம் செய்ய வேண்டும். ஏனோ தானோ என்று தானம் செய்யக் கூடாது. வருமானத்திற்கு ஏற்ப தானம் செய்ய வேண்டும். பணிவுடனும், மரியாதையுடனும், தகுந்த அறிவுடனும் தானம் செய்ய வேண்டும்.”

நல்லா கவனிங்க. இந்த மந்திரம் சொல்கிற இந்த 4 விஷயங்ளோட செய்கிற தானம் மட்டும் தான் தானம் என்கிற கேட்டகரியில் வரும். மற்றதெல்லாம் சும்மா..............பெருமைக்கும் விளம்பரம் தேடவும் செய்கிற பப்ளிசிட்டிதான்.

1. முதல்ல ஏனோதானோனு கொடுக்கக்கூடாது. ஈடுபாடு வேண்டும். உண்மையில் நற்பணியில் ஈடுபடுபவனுக்கு இறைவனே மனித உருவில் வந்து உதவுவார் என்ற ஆழ்ந்த நம்பிக்கை வேண்டும.

2.வருமானத்தில் இயன்ற அளவு ஒரு பகுதியைக் கட்டாயம் தானம் செய்ய வேண்டும். அதே சமயம் வருமானத்தை மீறி தானம் செய்துவிட்டு தான் மற்றவர்களிடம் தானம் பெறுகிற நிலைக்கும் செல்லக்கூடாது.

3. வீட்டு பால்கனியில் நின்றுகொண்டு ருபாய் நோட்டுகளை விட்டெறிந்து பொருக்கிக்கொள்ளுங்கள் பிச்சைக்காரர்களே என்றும் தானம் செய்யாதீர்கள். ஒருவருக்கு தானம் செய்ததால்தானே உங்களுக்கு நீங்களே தானம் செய்ததன் பலனை அடையமுடிந்ததென்று அவரிடம் நன்றியுடன் இருங்கள். பெற்றுக்கொள்பவனல்ல. கொடுப்பவனே, பேறுபெற்றவன். தானம் செய்வதன் முலம் நீங்கள் இந்த உலகத்தில் தூய்மையையும் நன்னிலையையும் அடைய ஒரு வாய்ப்பு கிடைத்ததற்காக நீங்கள் நன்றி உடையவர்களாக இருங்கள்.

என்ன ரொம்ப கஷ்டமான விஷயமா இருக்கா? என் பணத்ததையும் பொருளையும் நான் கொடுத்துவிட்டு நானே பெருமைப்பட்டுக் கொள்ளக் கூடாதென்றால் எப்படி என்கிறீர்களா?

ஒன்றுமட்டும் நல்லா புரிந்துகொள்ளுங்கள். நம்மை எதிர்பார்த்து சிலர் வாழ்கிறார்கள். நம்மால் மட்டுமே மற்றவர்களுக்கு நன்மை செய்ய முடியும் என்று மனதுக்குள் கர்வமாய் நினைப்பதே உங்கள் பலவீனம். இந்த பெருமையும் கர்வமுமே அனைத்து துன்பத்திற்கும் காரணம்.

உண்மை என்னன்னா....இந்த உலகத்தில் ஒருவர்கூட நம்மை எதிர்பார்த்து வாழ்வதில்லை. ஒரு பிச்சைக்காரன் கூட நம் கையை எதிர்பார்த்து இந்த உலகத்தில் உயிர்வாழவில்லை என்பதே நூறு சதவீதம் அக்மார்க் உண்மை.

இயற்கையே கடவுள். அனைவருக்கும் இயற்கையே உதவி செய்கிறது. நம்மை மாதிரி தானம் பண்றவங்க இல்லாவிட்டாலும் இயற்கை தேவைப்படுபவர்களுக்கு உதவிக் கொண்டுதான் இருக்கும். உங்களுக்காகவும் எனக்காகவும் என்றும் இயற்கை தன் செயலை நிறுத்தாது. உதவிக்கொண்டேதான் இருக்கும்.

பிறருக்கு உதவுவது என்பது நம்மை நாமே பண்படத்திக் கொள்வதற்காக இறைவனால் நமக்கு கொடுக்கப்பட்ட மிகப்பெரிய வாய்ப்பு. பெரும் பேறு என்று மனதார நினைக்க வேண்டும்.

இதில் இருக்கிற இன்னொரு முக்கிய விஷயம் என்னவென்றால். ”பாத்திரம் அறிந்து பிச்சையிடு” என்பது பெரியோர் வாக்கு. நாம் ஒருவருக்கு ஒன்றை கொடுக்கும் முன் அது அவருக்கு தேவையிருக்கிறதா அந்த தானத்தால் அவர் பயன்பெறுவாரா என்பதையும் அறிந்த பின்னரே ஒன்றைக் கொடுக்க வேண்டும். ” பத்தோடு பதினொன்னு அத்தோடு இதுவொன்னு” என்று உபயோகபடுத்தாமல் முலையில், ஷோகேஸில் போட்டு வைக்கிறவர்களுக்கோ அல்லது ஏற்கனவே அதிகம் வைத்திருக்கிறவர்களிடம் மேலும் மேலும் கொண்டு சேர்ப்பதைவிட உண்மையிலேயே இல்லாதவர்களிடம் தேடிப்போய் உதவுவதே உயர்ந்த செயல்.

தற்காலத்தில் மிக மிக முக்கியமாய் நாம் செய்யவேண்டிய தானம் உயிரோடிருக்கும்போது இரத்ததானம். இறந்தபின் கண்தானம். இறந்தும் இறவாமலிருக்கும்போது உடல்உறுப்புதானம். ரொம்ப ரொம்ப அவசியம்ங்க. ஒவ்வொருவரும் ஒரு புதுவருடத்தில் அல்லது விஷேஷங்களில் குடும்பத்தினர் அனைவரும் சேர்ந்து ஒன்றுகூடி ரெஜிஸ்டர் செய்ய வேண்டிய முக்கிய ஆவணமே உடல்உறுப்பு தானம்தாங்க. மண்ணும் நெருப்பும் தின்றுவீணாய்ப்போகிற இந்த உடல் உறுப்புகள் தேவைஇருப்பவர்களுக்கு பயன்பட்டால் இறந்தபின்பும் நாம் அனைவர் உள்ளத்திலும் நீங்காது வாழ்வோமே!. நண்பர்களே யோசியுங்கள்.! செயல்படுங்கள்! பதிவுசெய்யுங்கள் உங்கள் உடல் உறுப்புகளை என்றும சிரஞ்சீவியாய் வாழ்வதற்காக!

இப்படியும் பேசியிருப்பார்களோ??- நான் ரசித்த கோட்டுச் சித்திரங்கள்

noreply@blogger.com (கடம்பவன குயில்) — Wed, 29 Jun 2011 05:09:00 +0000

இந்த அரசியல்வாதிகளை நம்பமுடியாதப்பா. இப்படியும் பேசியிருப்பார்கள். சும்மாக்காச்சுக்கும்.....ஒரு காமெடிதாங்க. நான் ரசித்ததை நீங்க முடிந்தால் ரசிங்க. இல்லைனா விடுங்க ஜூட்...

எதுவும் என் சொந்த கற்பனையல்ல. எனக்கு மெயிலில் வந்ததை நான் உங்களுடன் பகிர்ந்து ரசித்தேன்.

என்ன தகுதியில்லை நம் பதிவர்களிடம்?

noreply@blogger.com (கடம்பவன குயில்) — Thu, 23 Jun 2011 04:51:00 +0000

என்ன தகுதியிருக்கிறது??

தற்போது வெளியாகியுள்ள அவன் இவன் திரைப்படம் வெளிவந்தவுடன் நம் பதிவுலகில் தொடர்ந்து உலாவரும் ஒரு கேள்வியே மேலே நான் குறிப்பிட்டது.

”என்ன தகுதியிருக்கிறது எங்கள் பாலாவை விமர்சிக்க?” என்ன ஒரு கொலைவெறியோட கேள்வி பாருங்க!

பாலா மிகப்பெரிய திறமையான படைப்பாளி என்பதில் யாருக்கும் எள்ளளவும் சந்தேகம் இல்லை. ஆனால் அவர் என்ன விமர்சனத்திற்கு அப்பாற்பட்ட ஜீவாத்மாவா?... இல்லை பரமாத்மாவா?. அன்னை சீதாதேவியை தீக்குளிக்க வைத்தது சரியா தவறா என்று கடவுள் ஸ்ரீராமரையே விமர்சனம் செய்து பட்டிமன்றம் வைப்பவர்கள் நாம். நமக்கா பாலாவின் படத்தையும் அவரின் இயக்கத்தையும் விமர்சிக்கும் தகுதியில்லை??

திரைப்படக் கல்லூரி போய் DFD படித்தவர்கள் மட்டும் தான் படம்பார்க்கவும் விமர்சிக்கவும் தகுதியிருக்கிறது என்கிறார்களா? இல்லை 4,5 படம் இயக்கி ஹிட்ஸ் கொடுக்கிற தகுதிவேண்டுமென்கிறார்களா? என்ன தகுதியை எதிர்பார்க்கிறார்கள் என்று எனக்கு சத்தியமா தெரியலைங்க...

ஐயா புண்ணியவான்களே, புண்ணியவதிகளே ஹோட்டலில் காசுகொடுத்து சாப்பிடுபவர்கள் சாம்பாரில் உப்பில்லை என்றாலோ, கூட்டில் காரம் இல்லை என்றாலோ சொல்லக்கூடாதா?? இதற்கு சமையல்கலை தெரிந்திருக்கவேண்டிய அவசியமே இல்லை. நன்றாய் ருசியறிந்து ரசனையோடு (வக்கணையாய்!!?) சாப்பிடத் தெரிந்திருந்தாலே போதுமானது.

அதுபோல்தான் ஒரு இயக்குனரின் இயக்கம், கதை இன்னபிறவற்றை விமர்சிக்க ஒரு இயக்குனராகவோ, கதைவசனகர்தாவாகவோ இருக்க வேண்டிய அவசியம் இல்லை.

காசுகொடுத்து படம் பார்க்கும் யாருக்கும் அந்தப்படத்தையும் இயக்குனரையும் விமர்சிக்கும் உரிமையிருக்கிறது. தன் கை பணத்தை செலவழித்து, நேரத்தையும் செலவழித்து படம் பார்கிற ஒரு தகுதி போதாதா விமர்சனம் செய்ய??

பாலா தன் எல்லா படங்களிலு்ம் விளிம்பு மனிதர்களையே முன்னிலைப்படுத்தி படம் எடுக்கிறாரே. மற்ற கதைக்களத்துக்கும் வாருங்கள். வேறுபட்ட மனிதர்களின் வாழ்க்கையையும் படமெடுங்கள் என்று விமர்சனம் எழுதுவது மாபெறும் கொலைக்கு்ற்றமாம். இப்படி சொல்ல உங்களுக்கு என்ன உரிமையிருக்கிறது. இப்படித்தான், இவர்கள் கதையைத்தான் படமெடுக்க வேண்டுமென்று பாலாக்கு அறிவுரை சொல்ல நீங்கள் யார் ? உங்களிடம் கேட்டுத்தான் படமெடுக்க வேண்டுமென்ற தலையெழுத்து பாலாவுக்கு இல்லை.....இன்னும் என்னென்னவோ வசவுகள் அவன்இவன் திரைப்படத்தை நடுநிலையோடு விமர்சித்த நம் பதிவர்களுக்கு.

நாங்கள் ஒன்றும் பாலாக்கு எதிரி இல்லையே. இன்னும் சொல்லப்போனால் அவரின் தீவிர ரசிகர்கள்தான். அபிமானிகள்தான். ஆனாலும் நம் அபிமான இயக்குனர் ஒரே டைப்பான கதைகளை திரும்ப திரும்ப எடுத்தால் எப்படி? ”பாலா உங்கள் அபரிதமான திறமையை வேறு வேறு கதைகளத்தில் காண்பித்து உங்களின் அடுத்த கட்ட வளர்சிக்கு, அடுத்த உயர்ந்த படிக்கு செல்லுங்கள் என்றுதான் சொல்கிறோம். ஒரே .ஃபிளேவரில் ஐஸ்கீரிம் வேண்டாமே. விதவிதமான ஃபிளேவரில் ரெடிபண்ணி எங்களுக்கு விருந்தளியுங்கள் என்றுதான் கேட்கிறோம். இப்படி கேட்பது ஒரு கொலைக்குற்றமா??

சத்தியஜித்ரே இந்தியாவின் வறுமையைமட்டுமே தன் படங்களில் காண்பி்க்கவில்லையா? சத்யஜித்ரே செய்யலாம் நம் பாலா செய்யக்கூடாதா என்கிறார்கள்.

ஐயா அதத்தானுங்க நானும் சொல்றேன். இந்தியாவுக்கு ஒரு சத்யஜித்ரே போதும். நம்ம பாலா பாலாவாகவே வெவ்வேறு கதைக்களத்துக்கு வரட்டும் என்கிறேன். எவராலும் வெல்லமுடியாத சிகரத்தை பாலா தொடவேண்டுமென்று ஆசைப்படுகிறோம். ஏனென்றால் நாங்களும் பாலாவின் தீவிர ரசிகர்கள்தான். எங்கள் அபிமான இயக்குனரின் இயக்கத்தை விமர்சிக்கும் தகுதியும் உரிமையும் எங்களுக்கில்லாமல் வேறு யாருக்கிருக்கிறது??

பெரிய இயக்குனர்கிட்ட அதிகப்படியாக எதிர்பார்த்து ஒரு ரசிகன் போவதில் தப்பொன்றுமில்லையே?. சேது, பிதாமகன், நந்தா எடுத்தவர்கிட்ட இன்னும் அதிகமாக ஒரு ரசிகனாக எதிர்பார்ப்பதில் என்ன தவறிருக்கிறது?

சாதாரண சொதப்பல் படமோ, மசாலாப்படமோ எடுக்க பாலா என்கிற வித்யாசமான முயற்சியுள்ள அதிதிறமைசாலியான இயக்குனர் எதற்கு? இன்னும், இன்னும் நிறைய எதிர்பார்க்கிறோம் அவரிடம். அதற்கான தகுதி பாலாவிடம் உள்ளது. அவர் படத்தை விமர்சிக்கும் தகுதி, அவர் வளர்சியில் அக்கறைகொண்ட அவரது தீவிர அபிமானிகளான எங்களிடமும் உள்ளது.

எல்லாவற்றுக்கும் மேலாக, காசுகொடுத்து படம் பார்க்கிற தீவிரமான ரசிகர்கள் என்ற தகுதியைவிட வேறென்ன பெரி.........ய தகுதிவேண்டுமென்று சத்தியமாய் எனக்குத் தெரியல.... உங்களுக்குத் தெரிந்தால் எனக்கும் சொல்லுங்கள் நண்பர்களே!!

பிரியமானத் தோழியே...!

noreply@blogger.com (கடம்பவன குயில்) — Wed, 08 Jun 2011 13:11:00 +0000

நடனத்தில் வல்ல நகைமுக மாது

நளினத்தின் அழகோ மன்மதன் தூது.!

இடையின் அழகோ சிறு கொடியழகு

இதைவிட அழகு உலகத்தில் ஏது..!!??

சின்னஞ்சிறு சங்கதனில்

கருந்திராட்சை கோர்த்தாற்போல்

மின்னி மின்னி எழில் காட்டும்

கண்கள் வான தாரகையோ..!??

சித்திரையின் நிலவதுவோ

மின்னிடும் வதனமோ..??

பிரியமானவரை பிரிப்பதுதான்

பரமனின் விளையாட்டோ..?

நாமிருவர்தான் இதற்கு ஆதாரமோ..!?....

வான வெளியிலே நிலவது ஆடையிலே

நம்மிருவர் மனம் மட்டும்

சோகத்தில் மூழ்குவதேன்..?

உயிர்பிரியும் நிலையிலும்

உறவு பிரிவதிலே கொடுமையதிகம்

அதை அனுபவத்தில் உணர்ந்தபின்னும்

இன்னும் ஏனோ தயக்கம்..?

பிரிவைத் தவிர வழியில்லா நிலையில்

கண்ணீர்தான் நட்புக்குப் பரிசோ..??...
* * * * * * *

துயிலாத கண்கள்..!!

noreply@blogger.com (கடம்பவன குயில்) — Fri, 03 Jun 2011 04:12:00 +0000

அவள் நிலவென்னும் வதனத்தில்

கண்களைக் காணவில்லை நான்....

கருவண்டுகளைத்தான் கண்டேன்..!!

அவள் இதழில்....

கோவைப்பழச் சிவப்பையே கண்டேன்!!

அன்னமே இவளிடம்தான்

நடைபயின்றதோ??

மானும் இவளைக் கண்டுதான்

மருண்டோடியதோ..??

மயிலும் நாட்டியத்தில்

தோல்விகண்டது இவளிடம்!!

குயிலின் குரல்கொண்டவள்

குன்றாத ஒளியை மேனியாக்கி,

எனக்கு துயிலாத கண்களைக்

கொடுத்துவிட்டாள்..!!
* * * * * * *

நிலவும் வானும், கதிரும் நானும்..!

noreply@blogger.com (கடம்பவன குயில்) — Wed, 01 Jun 2011 05:03:00 +0000

இரவு வானம்

வான வீதியில்

மேகங்களை குடையாக்கி

நட்சத்திர குழந்தைகளு்டன்

நிலவுப் பெண்ணவள்

தன் காதலன் கதிரவனைத்

தேடித் திரிகிறாள்!!

* * * * *

நீலவான நீச்சல் தடாகத்தில்

தன் நட்சத்திர தோழிகளுடன்

நிலா இளவரசி

இரவில்

நீச்சல் பயில்கிறாள்...

* * * * *

செங்கதிரவன் வரவு

உடல் எங்கும் நீலநிற உடையில்

நளினமாய் சிரித்திடும் பெண்ணவள்

தன் காதலனை கண்டதனால்

சிவந்த தன் முகத்தை

சிறிதுசிறிதாய் நாணத்தால்

உயர்த்துதல் போலே........

நீல சேலை கட்டிய மலைமகளின்

மெல்லிய உடலிலிருந்து

சிறிதுசிறிதெனவே தன்

முகத்தை உயர்த்தினான்

சிவந்த செங்கதிரோன்...!!

* * * * * * *

அழிக்க இயலாத கல்வெட்டுகள்..!!

noreply@blogger.com (கடம்பவன குயில்) — Tue, 24 May 2011 05:33:00 +0000

நெஞ்சே இல்லா தந்தையின்

நெஞ்சுவலி நாடகத்தை நம்பி.......

அத்தை மகளை கரம்பிடித்து

ஆருயிரே உனைத் தொலைத்தேன்!

ஆனாலும்.......

என் ஆழ்மனதில்

உன் நினைவுகள்.......

ஆற்றுமணலின்

வண்டலென

மென்மையாய்.......

அழிக்க இயலாத

அழகான ஓவியமாய்..!

தலைமுறை இடைவெளியில்

தமையனுக்கும் தந்தைக்குமிடையில்

ஏச்சாலும் பேச்சாலும்........

மனமுடைந்து மரணம் யோசித்த தருணம்!

அன்பு வார்த்தைகளால் எனக்கு

புது உலகம் காட்டி

மறுவாழ்வு அளித்த

அன்பு தேவதையே......

என் மகளுடன்

நான் கொஞ்சும்

இந்தத் தருணம்......

நீயிட்ட உயிர்ப்பிச்சை!!

என் பெயரின்பின்
நானெழுதும் பட்டம்.....

அதற்கான உன் உழைப்பின்

ஞாபகங்களை கிள்ளிவிட்டுச்

செல்கிறது..!

என்னையும் உன்னையும்

பிரித்ததாய் எள்ளிநகையாடும்

இவர்களுக்குத் தெரியுமா..........

வானுக்கும் நிலவுக்கும்

பந்தம் பிரிக்க முடியாததென்பது........!

* * * * *

அடுத்த தமிழக ஆட்சி எப்படி இருக்கனும்..?? - (Next-TN-Government)

noreply@blogger.com (கடம்பவன குயில்) — Sat, 14 May 2011 07:44:00 +0000

என்ன நண்பர்களே..!??! எலக்சன் ரிசல்ட் பரபரப்புக் காட்சி ஓய்ந்ததா? சங்கர் பட கிளைமாக்ஸை விட பரபரப்பாய் கழிந்தது ஓட்டு எண்ணிக்கை காட்சிகள். இந்திய கிரிக்கெட் டீம் கலந்து கொண்ட பைனல்ஸ் பார்க்கிற மனநிலையோடு டீவி பெட்டி, கணிணி முன் தவமாய் தவமிருந்த மக்கள் அனைவருக்கும் இப்போ யார் கோப்பையை மன்னிக்கவும் யார் ஆட்சியை கைப்பற்றியது என்று தெரிந்துவிட்டதல்லவா..?

இந்த மாற்றம் மக்கள் தந்தது என்பதில் எள்ளளவும் யாருக்குமே சந்தேமில்லை. யார் நல்லாட்சி தருவார்கள் என்ற எண்ணத்தில் யாரும் ஓட்டுப் போட்டிருக்க மாட்டார்கள். யாருக்கும் அம்மா மேலயோ, அ.தி.மு.க.மேலேயோ பெரிய அபிப்ராயம் ஏதும் இல்லை. ஏற்கனவே இருந்த ஆட்சியில் மாற்றம் வேண்டுமென்று விரும்பியதால் அ.தி.மு.க. வை விட்டால் இல்லையென்ற நிலையில் எடுத்த முடிவுதான் இது. ஆலையில்லாத ஊருக்கு இலுப்பைப்பூ சர்க்கரை என்ற நிலைதான் இது.

இந்த 5 வருடத்தில் மக்கள் படாதபாடுபட்டு இன்னொரு மாற்றத்தை எதிர்பார்க்க வைக்காமல் அம்மா ஆட்சி அமைய நாமெல்லோரும் ஆண்டவனையும், அம்மாவையும் வேண்டிக்குவோம்.

இந்த மாற்றத்ததை எதற்காக எதிர்பார்த்தோம் என்பதை அம்மா புரிஞ்சுட்டு நடந்தால் நமக்கும் நல்லது. அம்மாக்கும் நல்லது. அம்மா செய்யவேண்டியதும் செய்யக்கூடாததையும் எனக்கு தெரிஞ்சவரையிலும் கொஞ்சம் கடிதமாய் எழுதிவைப்போம். நம்ம பதிவர்கள் யாராவது என் கடிதத்தை அம்மாவிடம் சேர்ப்பீர்கள் என்ற நம்பிக்கைதான். ஊதுகிற சங்கை ஊதிவைப்போம். காதில் விழுவதும் விழாததும் அவங்க அவங்க அதிர்ஷ்டம். (நம்ம அதிர்ஷ்டம்???)

1.விலைவாசி்: அப்பப்பா....... கடந்த 5 வருடங்களாய் மக்களை பாடாய் படுத்துவதில் முதலிடம் இந்த விலைவாசிக்குதான். முதல்வேலையே இதை கட்டுப்படுத்த நடவடிக்கை எடுப்பதுதான். செய்வீங்களா?

2.மின்வெட்டு: ஆற்காட்டார் எங்களை வேக்காட்டில் நிற்கவைத்திருந்தார். சின்ன சின்ன தொழிற்சாலைகள், சிறு தொழில்நிறுவனங்கள் எல்லாம் சுத்தமாய் லாபம் பார்க்க முடியாமல் இழுத்துமுடிட்டு ஓடிபோக வைத்த பெருமை முழுதும் ஆற்காட்டாரையே சாரும். இது உடனே கவனித்து சரிசெய்யவேண்டிய மிக மிக முக்கிய அவசர வேலை.

3.குடும்ப அரசியல்: இதில் நொந்து நூடுல்ஸ் ஆனவங்க தான் நாங்க..நீங்களும் சசி ஆன்டிய பி்ன்னாடி வச்சுட்டு இதை தொடர வேண்டாம் என்று வேண்டி கேட்டுக்கறேன்.

4.அணுகுமுறை: நிச்சயமாய் நீங்க இதில் மாறியே ஆகணும். பழைய காலத்தை மறந்திருக்க மாட்டீங்கனு நம்பறேன். இந்த அணுகுமுறையால் தான் ஆட்சிகட்டிலில் இருந்து தலைகுப்புற போன முறை நீங்க விழுந்தது. எளிதில் யாரும் சுலபமாய் சந்திக்கும் மக்கள் தலைவராய் நீங்க இருக்கணுமே தவிர பால்கனி லேடியாய் கைகாட்டிட்டு போகக்கூடாது. அணுகுமுறையிலும் எளிமையானவராய் இருக்கணும்.

5.டிராபிக் ஜாம்: நீங்க போயஸ் கார்டனில் குளிச்சுட்டுஇருக்கும்போதே இங்க சென்னை முழுக்க டிராபிக்கை நிப்பாட்டி வச்சு சட்டசபைக்கு போற உங்க காரை அத்தனை பேரும் மனசால சபிக்கவச்சாங்க. அய்யா ஆட்சியில் நிஜமாகவே இந்த கண்றாவியெல்லாம் இல்லை. 10 நிமிடம் முன்தான் டிராபிக் கன்ட்ரோல் பண்ணுவாங்க. டிராபிக் ஜாம் ஏற்படுத்தி மக்களை டிராஜடி பண்ணாதீங்க. நீங்க வருவதும் போவதும் உங்களை தேர்ந்தெடுத்த எங்களுக்கு டிஸ்டர்ப் ஆக இல்லாமல் பார்த்துக்கங்க.

6.சட்டசபை நடவடிக்கை: சட்டசபை நடவடிக்கை ரொம்ப ரொம்ப டீசண்ட் ஆக இருக்கும்படி பார்த்துக்கங்க. யாரும் யாருக்கும் விரோதினு நினைக்காமல் எதிர் கட்சிகாரர்களாய் இருந்தாலும் யாரைப் பார்த்தாலும் இயல்பாய் பேசி குசலம் விசாரிக்கற அளவுக்கு உங்க மனசை விலாசமாய் வச்சுக்கங்க.

இன்னும் நிறைய சொல்லிட்டே போகலாம். நீங்க ஆட்சிக்கு வரப்போறீங்க. இனிமேலாவது வீட்டுச் செலவில் ஏதோ இரண்டு ரூபா காசாவது மிஞ்சும்கற நம்பிக்கையில் பேங்க்கில் அக்கவுண்ட் ஆரம்பிக்க கிளம்பறேன். (கான்பிடன்ஸ் மேடம் கான்பிடன்ஸ்) ஓவர் ஆக உங்க ஆளுங்க ஆடாமல் நாலுகாசோட மக்கள் மனசையும் சேர்த்து சம்பாதிக்கச் சொல்லுங்க. நீங்களும் சுயமா முடிவெடுத்து ஏதோ எங்களை மாதிரி ஏழைபாளைகளுக்கு நல்லது செய்ங்கம்மா.

* * * * * * *

தேவதையைத் தேடினேன்

noreply@blogger.com (கடம்பவன குயில்) — Thu, 05 May 2011 03:29:00 +0000

எப்படி மறப்பேனுனை நான்????

இவ்வுலகம் காணவந்த என்னை

இன்முகம் காட்டி வரவேற்று

உச்சிமுகந்த உனை........

எப்படி மற்பபேனுனை நான்!!

தன்முதலில் என் பிஞ்சுதேகம்

ஏந்தியதுன் கரங்களே........

முதலில் நான் ருசித்தது

தேனில் நனைத்த தாலிஉரசி

நீ தந்த செவ்வனையே.......

எப்படி மறப்பேனுனை நான்!!

தாயின் தர்மஅடியிலிருந்து

அவ்வப்போது காப்பாற்றி

இழுத்தோடும் உன்.....

அன்பு உள்ளம்தனை

எப்படி மறப்பேனுனை நான்!!!

ஊரார் கண்ணுபடுமென்று
ஊரடி மண்ணுடனே எப்போதும்

உலா வரும் உள்ளன்புமிக்க தேவதையே.....

எப்படி மறப்பேனுனை நான்!!!!

வீட்டு விஷேசங்களில்
கையில் கம்புடன்
இனிக்கப்பேசி வேலைவாங்கும்
எங்கள் இல்ல இனிய குயிலே.....
எப்படி மறப்பேனுனை நான்!!!
சொந்த பந்தங்கள்
பிளவுபட்டு சிதறாமல்.....
தன் அன்பான அரவணைப்பால்
கட்டிக் காத்த கங்காருவே........
எப்படி மறப்பேனுனை நான்

பாட்டி வைத்தியம் முதல்

வாழ்க்கை வெற்றியின்

ரகசியம் வரை.........

சொல்லிக்கொடுத்துச் சென்றவளே!!

எமன் அழைத்தபோது மட்டும்

சொல்லாமல் சென்றதேன்??!!

எப்படி மறப்பேனுனை நான்!!.

* * * * *

எதிரெதிரே இரு வீடுகள்..!!

noreply@blogger.com (கடம்பவன குயில்) — Fri, 29 Apr 2011 04:58:00 +0000

எதிரெதிரே இரு வீடுகள்
எக்குத்தப்பாய் ஏற்றத்தாழ்வுகள்

வருடத்திற்கொன்றெனவே
தவறாமல் ஈன்றிடுவாள் ஒருத்தி...........

வாரம், நாள் தவறாமல்
பிள்ளைவரம் வேண்டி
கோயில்குளம்
சுற்றிடுவாள் மற்றொருத்தி..........

எதிரெதிரே இரு வீடுகள்
எக்குத்தப்பாய் ஏற்றத்தாழ்வுகள்!

குடிக்க கூழ் இல்லாமல்,
விளையாட சொப்புசாமானில்லாமல்...........
வயிறு ஒட்டி
வறுமை கொடிகட்டி
வாழ்ந்தது ஒரு வீட்டில்..........

அள்ளிப்புசித்திட ஆளில்லாமல்
ஆறிக்கிடக்கும் அறுசுவையுணவுடன்........
வறுக்கே வறுமைவந்து
வளமுடன் நிற்குது
மற்றொரு வீட்டில்..........

எதிரெதிரே இரு வீடுகள்
எக்குத்தப்பாய் ஏற்றத்தாழ்வுகள்!

எந்தையின் திருவுளம்
எவரொருவர் அறியவல்லார்???

* * * * * **

சின்னச் சின்னக் கவிதை அரும்புகள்..!

noreply@blogger.com (கடம்பவன குயில்) — Wed, 27 Apr 2011 13:00:00 +0000

காத்திருப்புகள்

மனைவி காத்திருக்கிறாள்...........
குழாயடியிலே..!!
கணவன் காத்திருக்கிறான்..........
டாஸ்மார்க் கடையிலே..!!

இருவரும் காத்திருப்பது...........

தண்ணீ(ரு)க்காக..!!!

* * * *

காத்திருத்தல் சுகமாயிருந்தது....
நீ காதலனாயிருந்த வரை..!
காத்திருப்பது கடுப்படிக்கிறது.......
நீ கணவனான பின்..!!
* * * *

அன்னையர் தினம்

அன்னையர் தினம் கொண்டாடும்
அரங்கின் அவைத்தலைவரின்
அன்னை மட்டும்

அனாதை ஆசிரமத்தில்......!!

அன்னையர் தினம்

கொண்டாடுவதைவிட்டுவிட்டு

அன்னையை எப்போது

கொண்டாடப்போகிறோம் நாம்..????
* * * *

நிம்மதியான வாழ்க்கை வேண்டுமா?

noreply@blogger.com (கடம்பவன குயில்) — Mon, 25 Apr 2011 03:53:00 +0000

ஒரு பூங்காவில் குழந்தைகள் சிலர் விளையாடுகிறார்கள். அங்குள்ள இரும்புக் கம்பியைப் பிடித்தபடி சில குழந்தைகள் சுற்றி விளையாடுகிறார்கள். அங்கு என்னைப் போலவே ஒரு அப்பிராணி குழந்தையும் வருகிறது. அதற்கு விளையாட கம்பியில் இடமில்லை. உடனே அது கைகள் இரண்டையும் விரித்தபடி தனியே சுற்றி விளையாடுகிறது. வேகமாக சுற்ற சுற்ற மற்ற குழந்தைகள் கைபிடியை விட்டு விலகினாலும் திரும்ப உடனே இறுக்கி கம்பியைப் பிடித்துவிடுகிறது. ஆனால் தனியே கம்பியில்லாமல் சுற்றும் குழந்தை மட்டும் வேகமாக சுற்ற சுற்ற மயங்கி பிடிமானம் இல்லாததால் தலைசுற்றி கீழே விழுந்து விடுகிறது. காயம் பட்டு விடுகிறது.

இதே போன்றுதான் நாம் அனைவரும் உறுதியான என்றும் நம்மை கைவிடாத இறைவன் என்ற கம்பை பற்றாமல் நான் என்ற அகங்காரம் கொண்டு தனியே இந்த உலகில் மாயையில் சிக்குண்டு அடிபடுகிறோம்.

கம்பன் என்ற நாமம் இறைவனுக்குண்டு. நம் காஞ்சிபுரத்தில் இறைவன் பெயர் ஏகம்பன் என்பதே. கம்பன் போன்ற இறைவனை இறுக்கிப்பிடித்திடில், உலகச்சுனாமியிலிருந்து (சுழல், சூறாவளி எல்லாம் பழைய உவமை) உலக மாயை, மயக்கங்களிலிருந்து ரொம்ப சுலபமாக விடுபடலாம்.

”பற்றுக பற்றற்றான் பற்றினை அப்பற்றைப்

பற்றுக பற்று விடற்கு”

என்னமாவது பிரச்சினைனு வந்துச்சாக்கும் ஓடிப்போய் ”சிக்கெனப்பிடித்தேன் சிவபெருமானே” என்று அவன் தாள் வணங்கி அங்க இங்க அசைய விடாமல் இறுக்கி பிடிச்சுடுங்க. அப்புறம் பாருங்க நடக்கிறதை. .........

நிச்சயமாய் சரண்டர் அதாங்க சரணாகதி ஆனப்புறம் எத்தனை பிரச்சனை ஓடிருக்கும் உங்களுக்கே நிறைய அனுபவம் இருக்குமே.... கொஞ்சம் யோசித்துப்பாருங்க.

அருளுடைய சுடரே, ஜோதி மயமானவனே என இறைவனை வணங்குகிறோம். சுடர் என்றால் ஒளி. அப்போ சுடர் சுடுமோ என்று ஐயம் வருவது இயல்புதான் . அதனாலேயே அருளுடைய சுடர், ”அருட்பெரும் ஜோதி தனிப் பெரும் கருணை” என்கிறார் இராமலிங்க அடிகள்.

நாங்கள் அவனைப் சிக்கெனப் பிடித்தால், எங்கள் பசித்துன்பம் போகுமோ என்று நீங்கள் கேட்பது புரிகிறது. வயிற்றுப்பசி மட்டுமல்ல, உயிற்பசியும் சோ்ந்தே போகும். இறைவன் இனிப்பான, நன்கு பழுத்த கனி போன்றவன்.

”வேர்த்தாவி மயங்காது கனிந்த நறுங்கனியே” என்கிறார் இராமலிங்கர்.

இந்த இறைவனை எங்கதான் கண்டுபிடிக்கிறது என்று கேட்கிறீர்களா?

”தெருளிடத்து அடியார் சிநதையுள் புகுந்த செல்வமே, சிவபெருமானே!”

அதாவது மனம் தெளிவான சிவஞானிகளின் உள்ளக் கோவிலில் இருக்கிறார். நல்லா கவனிங்க.......... உங்க மனச தெளிவா வச்சுக்கிட்டா உங்க மனசுக்குள்ளதான்ங்க இறைவன் இருக்கார். புரிஞ்சுச்சா இப்போ....

வெளியே எங்கும் போய் போலிசாமியார்களிடத்தில் ஏமாறாமல், உங்களுக்குள்ளேயே இருக்கிறவரை கெட்டியா பிடிச்சுக்கங்க.... வாழ்க்கையில் மலைபோல் வரும் துன்பம் கூட பனி போல ஓடிடும்ங்க....சரண்டர் ஆகித்தான் பாருங்களேன். சும்மா ஜிவ்வுனு பறக்கற மாதிரி இருக்கா?...... அப்புறமென்ன சும்மா நடத்துங்க உங்க ராஜ்ஜியத்தை!....

யாதுமாகி நின்றாய்!

noreply@blogger.com (கடம்பவன குயில்) — Fri, 15 Apr 2011 14:19:00 +0000

கரம்பிடித்த நாள் முதலாய்

கண்கலங்க விட்டதில்லை நீ.....

கோபமே கோபிக்குமளவு

வதைத்திருக்கிறேன் நானுனை.......

புன்னகையை தவழவிட்டு

பாடம் சொன்னாய் நீயெனக்கு!

வலிகள்தவிர வேறெதுவும்

தந்ததில்லை நானுனக்கு........

மகிழ்ச்சி மலரை மட்டுமே

சமர்பித்தாய் நீயெனக்கு!

தவறுகள் பல புரிந்து

தடுமாறி விழுந்தேன் பலசமயம்....

தந்தையாய் நீயிருந்து

தக்கவழி காட்டினாய்!

மௌனத்தை மொழியாக்கி

பேசாதிருந்தேன் பலகாலம்......

அன்னையாய் அரவணைத்து

அன்பை ஊட்டி ஆளாக்கினாய்!

குற்றங்களையும் குறைகளையும்

உன்னிடம் தேடியிருக்கிறேன் சண்டையிட.....

அன்பையும் நேசத்தையும் மட்டுமே

என்னில் நீ கண்டாய்!

களங்கமற்ற அன்பால் எனை

கட்டிப்போட்ட கணவனே!

கடல்கடந்து நீயும் கரைமேல் நானும்

கலங்கியே நிற்கிறோம் காதலுடன் ஓருயிராய்.........

மழையும் நானும்

noreply@blogger.com (கடம்பவன குயில்) — Fri, 01 Apr 2011 07:28:00 +0000

மழையை ரசிக்காதவர் யாராவது உண்டா? மழைக்கு மயங்காதவர் மாநிலத்தில் யாருமில்லை என்பதே உண்மை. உடலோடு மனதையும், உயிரையும் சேர்த்து சிலிர்க்கவைக்கும் பொல்லாத போக்கிரிப்பயல்.

பால வயதில் காகிதக்கப்பல் விட்டு மகிழ்ந்த வ.உ.சி.கள் நம்மில் நிறையபேர் உண்டு. இப்போ நம் சிறார்களுக்கு சிட்டியில் அந்த வாய்ப்பு ஏது? அடைமழையில் அம்மா அப்பாக்கு தெரியாமல் நனைந்து மகிழ்ந்த கொண்டாட்டங்கள் எத்தனை எத்தனையோ.? ...இப்போகூட கணவருக்கு தெரியாமல் கொட்டுகிற மழையில் நனைவது தனி சுகம்தான். (யாரும் போட்டுகொடுதுடாதீங்கப்பா......) மழைக்கும் எனக்குமுள்ள m-seal பந்தம்தான் கீழே உள்ள பதிவு.

பள்ளிப் பருவத்தில்

பதின்ம வயதினில்

எனக்கே தெரியாமல்

எனைதிருடி தோழியாக்கிகொண்ட

தூறல் மழையே

ஒவ்வொரு முறையும் நீ வருகையிலே

சொட்ட சொட்ட நனைந்தபடி

தட்டாமாலை ஆடிய ஆனந்தம்

எத்தனை எத்தனையோ...............

இன்று ஏக்கப் பெருமூச்சுகளாய்

நினைவலைகள் மட்டுமே என்னுடன்.

என் வாழ்க்கை தாளின்

ஒவ்வொரு வரிகளிலும்

என் வளர்ச்சி கண்டு

களிப்புற்ற தோழனே

வாழ்வின் முக்கிய நிகழ்வுகளில் எல்லாம்

வருகை தந்தென்னை வாழ்த்திச்செல்லும்

வானுலக தேவனே!

நினைவிருக்கிறதா உனக்கு !

பெண்பார்க்க என்னவர்

(பெருங்கூட்டமாய் ?!!!!!!) வந்தபோது

பூமழையாய் பெய்து எனைசீண்டி

பூரிப்படைந்தாய்!

மணமகளாய் மணமேடையில் எனக்கு

மங்கள நாண் பூட்டும் வேளையில்

கனமழையாய் வந்தென்னை

களிப்புறவே ரசித்துநின்றாய் !

வளைகாப்பு நேரத்தில்

தப்பாமல் வருகைதந்து

அன்னையாய் அரவணைத்து

ஆசிகூறி வாழ்த்திபோனாய்!

பிரசவ சமயத்தில்

பிறழாமல் நீவந்து

ஆறுதல் கூறி வேதனைபோக்கி

ஆதரவாய் நீ நின்றாய்.

உன் ஒவ்வொரு வருகையிலும்

வரவேற்று உன் ஸ்பரிச தழுவலில்

உன்னில் கரைந்து

என்னை மறந்திருந்த

இன்பமான தருணங்கள்

எத்தனை எத்தனையோ!

மற்றொரு பிறவி வந்திட்டால்

உன்னை பிரசவிக்கும்

முகிலாய் நான் மாறி

உன்கடன் தீர்க்க விழைகின்றேன்.

* * * * * *
எடிட்டிங் உதவி : நண்பர் பிரவீன்குமார்

நீங்காத நினைவுகள்

noreply@blogger.com (கடம்பவன குயில்) — Wed, 09 Mar 2011 18:50:00 +0000

தொட்டால்தான் உடையுமென்பதற்கு

கண்ணாடியல்ல இதயம் .

உன் பார்வையம்புகள் பட்டமாத்திரத்தில்

பற்றிஎரிந்ததடி என் மனது.

பாவி உன்பின் ஓடி இணைந்ததடி

உன் உரிமையான என் இதயம்.

எத்தனை இரவுகள்

தூங்காதிருப்பினும் சரியே

தூங்குவதானால் இருவரும்

ஒருசேர தூங்கவேண்டும் என்றவளே,

என் இனியவளே ,

நீ மட்டும் இன்று.....

நீங்கா துயிலில் கல்லறையில்......

நானோ மீளாத் துயரில்

உன் நினைவில்.............