Kamgar Nama - for All Types Labour, Worker, Employees

फिलिप्स इंडिया लिमिटेड (Philips India Limited) येथे वेतनवाढ करार संपन्न

2026-10-31T07:58:16.216+05:30

१९ महिन्यांच्या चर्चेनंतर २२,५०० रुपयांची भरीव वाढ, कामगारांमध्ये आनंदाचे वातावरण

चाकण : फिलिप्स इंडिया लिमिटेड, चाकण व शिवक्रांती कामगार संघटना यांच्यात सन २०२५ ते २०२८ या तीन वर्षांच्या कालावधीसाठी वेतनवाढ करार यशस्वीरीत्या संपन्न झाला आहे. तब्बल १९ महिन्यांच्या प्रदीर्घ चर्चेनंतर हा करार झाला असून चाकण एमआयडीसी परिसरातील उल्लेखनीय करारांपैकी एक म्हणून याकडे पाहिले जात आहे.

या कराराचे नेतृत्व शिवक्रांती कामगार संघटनेचे अध्यक्ष मा. ॲड. विजयजी पाळेकर यांच्या मार्गदर्शनाखाली करण्यात आले. अध्यक्ष संदीप शिंदे, सेक्रेटरी प्रशांत खोगरे, खजिनदार तोफिक नदाफ व संघटनेच्या सर्व पदाधिकाऱ्यांच्या प्रयत्नांमुळे कामगारांच्या हिताचा हा करार साकार झाला.

करारातील ठळक मुद्दे:

वेतनवाढ: दि. १ एप्रिल २०२५ ते ३१ मार्च २०२८ साठी एकूण रु. २२,५००/- वेतनवाढ मान्य.

दिवाळी बोनस व सानुग्रह अनुदान: बेसिकच्या २०% प्रमाणे अंदाजे रु. ३८,०००/- दिवाळी बोनस + रु. १५,०००/- सानुग्रह अनुदान असे एकूण अंदाजे रु. ५३,०००/- चा लाभ.

मेडिक्लेम वाढ: मेडिक्लेम विमा संरक्षण रु. ५ लाखांवरून रु. ७.५० लाख पर्यंत वाढ. आई-वडिलांचा समावेश, ते हयात नसल्यास सासू-सासऱ्यांचा समावेश मान्य.

लॉंग सर्व्हिस अवॉर्ड: १५ वर्षे सेवा पूर्ण करणाऱ्या कामगारांना रु. ३५,०००/- बक्षीस.

प्रोडक्शन इन्सेंटिव्ह वाढ: रु. १,५००/- वरून रु. २,५००/- करण्यात आला.

विद्यमान सुविधा कायम: कामगारांना मिळणाऱ्या सर्व सुविधा पुढेही सुरू राहणार.

रविवार कामाचा दुहेरी लाभ: रविवारी काम केल्यास दुप्पट पगार + एक भरपगारी सुट्टी मान्य.

विमा संरक्षणात मोठी वाढ: रु. १२ लाख पर्सनल ॲक्सिडेंट विमा व रु. २० लाख टर्म इन्शुरन्स कव्हर मंजूर.

या करारासाठी कंपनी व्यवस्थापनातील प्लांट हेड सचिन हुजरे, एचआर विभागातील जया दळवी, दिनेश दिघे, प्रोडक्शन हेड पुष्कर कुलकर्णी यांनी सकारात्मक भूमिका घेतली. तसेच युवा संघटक प्रथमेश पाळेकर, रवींद्र साठे व गुलाबराव मराठे यांचे विशेष सहकार्य लाभले.

कंपनी व्यवस्थापन व कामगार यांच्यातील परस्पर विश्वास आणि सकारात्मक संवादामुळे हा करार यशस्वी झाला असून या कराराबद्दल सर्व कामगार बांधवांनी समाधान व्यक्त केले आहे.

दत्तोपंत ठेंगडी राष्ट्रीय श्रमिक शिक्षा व विकास बोर्ड, पुणे विभागाची प्रादेशिक सल्लागार समितीची बैठक संपन्न

2026-10-25T15:23:12.965+05:30

बोर्डाचे कार्य कामगार वर्गांपर्यंत पोहोचविण्याचा सर्वातुमते निर्णय

पुणे : केंद्रिय श्रम व रोजगार मंत्रालयाच्या दत्तोपंत ठेंगडी राष्ट्रीय श्रमिक शिक्षा व विकास बोर्ड, श्रम व रोजगार मंत्रालय, भारत सरकार, प्रादेशिक संचालनालय पुणे यांच्यावतीने दिनांक 23 ऑक्टोबर 2026 रोजी, प्रादेशिक सल्लागार समितीची बैठक नूतन अध्यक्ष नितीन केंजळे व पुणे तसेच गोवा विभागाच्या प्रमुख अरुणा वाघ मॅडम यांच्या प्रमुख उपस्थितीत पार पडली.

यावेळी पुणे विभाग अंतर्गत आठ जिल्ह्यातील पात्र कामगारांना विविध योजनांद्वारे व उपक्रमांद्वारे लाभ मिळणेकामी केंद्र सरकारकडे पाठपुरावा करणेबाबत सकारात्मक चर्चा करणेत आल्या.

मुख्यत्वे करून या कार्यालयाच्या माध्यमातून सर्व क्षेत्रातील संघटित व असंघटित कामगार, शेतमजूर कामगार, अल्पभूधारक, साखर कारखाने तसेच महिला उपसा कामगार अशा विविध क्षेत्रातील कामगारांसाठी विविध उपक्रम तसेच प्रशिक्षण शिबिरांचे आयोजन करून, संबंधित घटकांना समाजाच्या मुख्य प्रवाहात आणण्याचे महत्त्वपूर्ण कार्य केले जाते.

यावेळी कोल्हापूर मधील बंद केलेले कार्यालय पुर्ववत सुरु करणेबाबत वरीष्ठ पातळीवर पत्रव्यवहार करणेचे निश्चीत करण्यात आले तसेच कोल्हापूर येथे कार्यालय सुरू करणेसाठी जिल्हा प्रशासनाने जागेसह शेंडा पार्क येथील नवीन इमारतीमध्ये कार्यालय होणेकामी सकारात्मकता दर्शविली असलेचे सुरेश केसरकर यांनी सांगितले.

त्याचबरोबर पुणे येथील कामगार विभागाच्या जागेबाबतही अर्जुन चव्हाण यांच्या माध्यमातून पाठपुरावा करणेचे ठरविणेत आले.

प्रशासनाच्यावतीने पुणे विभागाच्या प्रादेशिक संचालिका अरुणा वाघ यांनी आर्थिक वर्ष सन 2026 - 27 चे टार्गेट आणि अचिव्हमेंट सर्वांना अवगत करून या वर्षात झालेले कार्यक्रम, आयोजनासाठी आलेल्या अडचणी व समस्या यावर उपाययोजनां बाबत चर्चा झाली.

यापुढील काळात सर्वच कार्यकारीणीने तसेच श्रमिक मित्रांच्या सहकार्याने पुणे विभागात बोर्डाचे कामगारभिमुख कार्य वाढविण्यावर भर देणेबाबत चर्चा करणेत आली.

सदर बैठकीत बोर्डाच्या नवीन नियमावलीबाबत समाधान व्यक्त करीत, श्रमिक मित्रांच्या मानधनात वाढ करणे, यापूर्वी चालू असलेल्या पण सध्या बंद करणेत योजना पूर्ववत सुरू करणे, रिक्त जागांवर नवीन भरती अशा अनेक गोष्टींना अनुसरून वरीष्ठ कार्यालयास पत्रव्यवहार करणेचे ठरविणेत आले.

बैठकीच्या सुरुवातीला विभागीय अधिकारी अरुणा वाघ यांनी मान्यवरांचे पुष्पगुच्छ व रोपटे देऊन स्वागत केले.

सदर बैठकीला बोर्डाचे नूतन अध्यक्ष तथा पुणे महानगर पालिकेचे मुख्य कामगार अधिकारी - नितीन केंजळे, मनपाचे समाज विकास विभागाचे मुख्य समाज विकास अधिकारी - रामदास चव्हाण, भारतीय मजदूर संघाचे अध्यक्ष - अर्जुन चव्हाण, हिंद मजदूर सभेचे सचिव - प्रकाश शिंदे, राज्य गुणवंत कामगार संघटनेचे अध्यक्ष - सुरेश केसरकर, कोल्हापूर जिल्हा साखर कामगार संघटनेचे अध्यक्ष - सर्जेराव हळदकर, एम.ई.एस युनियनचे सचिव - सोमलिंग येळवंते, लघु उद्योग संघटना महासंघाचे कार्यकारी सदस्य - अरविंद शिराळकर, युनिकपाथ ॲग्रो टुरिझमचे संचालक - दत्तात्रय शेळके आदी. मान्यवर व कार्यालयाचे कर्मचारी उपस्थित होते.

बैठकीच्या शेवटच्या सत्रात अल्पोपहारानंतर श्रीमती अरुणा वाघ यांनी आभार मानले. त्यानंतर बैठकीचा समारोप करणेत आला.

इप्का लॅबोरेटरीजला अचानक टाळे! महाड एमआयडीसीतील कामगारांध्ये संताप; व्यवस्थापन नॉट रिचेबल

2026-10-21T07:55:11.293+05:30

महाड : महाड औद्योगिक वसाहतीतील इप्का लॅबोरेटरीज कंपनीला १४ ऑक्टोबरच्या मध्यरात्री कोणतीही पूर्वसूचना न देता अचानक टाळे ठोकण्यात आल्याने कामगारांध्ये संतापाची लाट उसळली आहे. कंपनीच्या स्थलांतराला कामगारांचा विरोध नसून, गेल्या ३० ते ३५ वर्षांपासून प्रामाणिकपणे सेवा बजावणार्‍या आणि निवृत्तीच्या उंबरठ्यावर असलेल्या कामगारांचा संपूर्ण हिशेब करून द्यावा, तसेच स्थलांतरित होणार्‍या कामगारांच्या वेतनात वाढ करावी, अशी मागणी करण्यात येत आहे.

मात्र, कंपनी बंद केल्यानंतर व्यवस्थापनातील एकही अधिकारी कामगारांच्या संपर्कात नसल्याचा आरोप कामगारांनी केला आहे. त्यामुळे त्यांच्या रोजगाराचा आणि भवितव्याचा प्रश्न ऐरणीवर आला आहे. असे वृत्त रायगड टाइम्स या वृत्तसंस्थेने दिले आहे.

महाड औद्योगिक वसाहतीतील इप्का लॅबोरेटरीज कंपनीच्या काम गारांची २ ऑक्टोबर २०२६ रोजी बैठक घेण्यात आली होती. या बैठकीत कंपनीचे वर्धा जिल्ह्यातील हिंगणी येथे स्थलांतर करण्यात येणार असून, सर्व कामगारांना तेथे सामावून घेतले जाईल, असे व्यवस्थापनाकडून सांगण्यात आले होते. या बैठकीला कंपनीचे एचआर प्रमुख साईदत्त नंदा, अभिषेक घोलप, अ‍ॅड. परांजपे, तसेच कामगार उत्कर्ष सभेचे अध्यक्ष जितेंद्र जोशी आणि कैलास मोरे उपस्थित होते. २०२१ मधील महापुरामुळे कंपनीचे मोठे नुकसान झाले होते.

त्यानंतर कंपनीची परिस्थिती सुधारण्यासाठी प्रयत्न करूनही अपेक्षित यश मिळाले नसल्याने स्थलांतराचा निर्णय घेण्यात आल्याचे बैठकीत सांगण्यात आले. कंपनीचे सर्व कामगार हिंगणी येथे स्थलांतरित केले जातील, तर स्थलांतरास तयार नसलेल्या कामगारांना त्यांच्या सेवेचा संपूर्ण हिशेब आणि ग्रॅच्युइटी देण्यात येईल, असेही व्यवस्थापनाने स्पष्ट केले होते. मात्र, १४ ऑक्टोबरच्या रात्री कंपनीला टाळे ठोकण्यात येणार असल्याची कोणतीही पूर्वकल्पना कामगारांना देण्यात आली नव्हती.

अचानक कंपनी बंद करून व्यवस्थापनाने कामगार उत्कर्ष सभेला १२ ऑक्टोबर रोजी दिलेले पत्र कंपनीच्या प्रवेशद्वारावर लावण्यात आले. या प्रकारामुळे कामगारांध्ये नाराजी पसरली आहे. व्यवस्थापनाने कामगारांच्या मागण्यांची तातडीने दखल घेऊन त्यांच्या रोजगाराबाबत स्पष्ट भूमिका मांडावी, तसेच सेवाकाळानुसार देय असलेली रक्कम आणि इतर लाभांचा प्रश्न मार्गी लावावा, अशी मागणी आंदोलनकर्त्यांनी केली आहे. कामगारांना न्याय मिळाला नाही, तर उपोषणाचा मार्ग स्वीकारावा लागला तरी मागे हटणार नाही, असा इशाराही त्यांनी दिला आहे.

बॅजेल प्रोजेक्ट्स लिमिटेड (Bajel Projects Limited) येथे वेतनवाढ करार संपन्न

2026-10-20T08:14:50.453+05:30

ऐतिहासिक पगारवाढ करार; कामगारांना ₹22,951 ची वाढ

पुणे : बॅजेल प्रोजेक्ट्स लिमिटेड, रांजणगाव MIDC येथे बॅजेल प्रोजेक्ट एम्प्लॉईज युनियन आणि व्यवस्थापन यांच्यात पगारवाढीचा ऐतिहासिक करार खेळीमेळीच्या वातावरणात संपन्न झाला. हा करार राष्ट्रीय श्रमिक एकता महासंघाचे अध्यक्ष मा. श्री. किशोरजी ढोकले यांच्या मार्गदर्शनाखाली पार पडला.

हा करार दिनांक 1 मार्च 2025 ते 30 सप्टेंबर 2028 अशा 3 वर्षे 7 महिन्यांच्या कालावधीसाठी करण्यात आला असून, यामध्ये कामगारांना एकूण ₹22,951/- इतकी घसघशीत पगारवाढ टप्प्यामध्ये देण्याचे ठरले. मागील सर्व फरक (Arrears) देण्याचे देखील व्यवस्थापनाने मान्य केले आहे.

या करारप्रसंगी व्यवस्थापनाकडून प्लांट हेड श्री. योगेश निलजीकर, एच.आर. हेड श्री. रणजीत जगताप, अकाऊंट हेड श्री. रघु कारेगावकर, प्रोडक्शन हेड श्री. राजेंद्र साकोरे, श्री. संतोष वाकडे व श्री. बापू बारहाते उपस्थित होते.

तर कामगार संघटनेकडून अध्यक्ष श्री. अंकुश इचके, जनरल सेक्रेटरी श्री. मंदार दाईंगडे, उपाध्यक्ष श्री. योगेश भोर, खजिनदार श्री. देविदास बेडसे, सह-सेक्रेटरी श्री. संतोष माळी, सदस्य श्री. प्रकाश पुंडे व श्री. रामदास आढाव उपस्थित होते.

करारातील कामगार हिताचे ठळक निर्णय:

1. बोनस मध्ये ₹9,940/- ची वाढ करून 39870/-रुपये बोनस देण्याचे ठरले

2. रजेमध्ये 1 रजा वाढ.

3. करार कालावधीत एक फॅमिली फंक्शनचे आयोजन.

4. 25 वर्षे सेवा पूर्ण करणाऱ्यास ₹12,000/- चे व्हाउचर.

5. मेडिक्लेम पॉलिसी - ₹3 लाख + ₹3 लाख बफर असे एकूण ₹6 लाख.

6. कामगाराच्या मृत्यू पश्चात वारसाला 5 पट CTC इतका टर्म इन्शुरन्स.

7. कॅन्टीनमध्ये चहा-नाश्ता व दूध-केळी मोफत.

8. रात्रपाळी भत्त्यात ₹50 वाढवून ₹100/-.

9. सेवानिवृत्ती वेळी ₹10,000/- व ₹2,000/- चे घड्याळ.

10. सेवानिवृत्त होणाऱ्या कामगारास ग्रॅच्युइटी 15 ऐवजी 18 दिवसांनी.

11. साप्ताहिक सुट्टीच्या दिवशी काम केल्यास एक C-off व ओव्हरटाईम.

करारानंतर सर्व कामगारांनी एकमेकांना पेढे वाटून जल्लोष साजरा केला.

'कामगार नामा' आज सातवा वर्धापनदिन, 'कामगार नामा' मॅगझीन स्वरूपात उपलब्ध बुकिंग सुरु तसेच विविध कामगार कायदे ऑनलाईन कार्यशाळा

2026-10-20T08:14:33.905+05:30

पुणे : आज दसरा याच शुभ मुहुर्तावरती 'कामगार नामा' ची सुरवात दि. 8 ऑक्टोबर 2019 रोजी करण्यात आली. आज 'कामगार नामा' चा सहावा वर्धापन दिन आहे. www.kamgarnama.com हे ऑनलाईन न्यूज पोर्टल द्वारे सर्व प्रकारच्या संघटित / असंघटित कामगार विषयी बातम्या, कामगार कायदे ओळख, विविध कंपनी मध्ये होणारे वेतनवाढ करार, विविध शासकीय योजना, PF, ESIC, महाराष्ट्र कामगार कल्याण मंडळ योजना व विविध माहिती रोज प्रसिद्ध करण्यात येते. या माध्यमातून राज्यातील लाखो कामगार यांच्यापर्यंत माहिती जाते आज रोजी या पोर्टलला 1 कोटी 10 लाखाहून अधिक views झाले आहेत.

सातवा वर्धापन दिन साजरा करताना व दसरा मुहूर्तावर 'कामगार नामा' मॅगझीन स्वरूपात द्विमासिक (दोन महिन्यातून एकदा) प्रसिद्ध करण्यात येत असून या मॅगझीन मध्ये सर्व प्रकारचे संघटीत, असंघटीत कामगार / कर्मचारी, एच. आर., कामगार क्षेत्रामध्ये कार्यरत संघटना, पदाधिकारी यांच्या करिता -

कामगार कायदे विषयक माहिती
कामगार विषयक विविध न्यायालय निकाल माहिती
विविध कंपनीचे वेतन करार
महागाई भत्ता विषयक माहिती, परिपत्रक
महाराष्ट्र शासनाचे कामगार विभाग, विविध कामगार मंडळ माहिती
कामगार विषयक शासन निर्णय, विविध परिपत्रके
कामगार क्षेत्रातील अनुभवी व्यक्तीचे मार्गदर्शनपर लेख
कर्मचारी भविष्य निर्वाह निधी (EPFO), कर्मचारी राज्य विमा योजना (ESIC), महा. कामगार कल्याण मंडळ (MLWB) विविध योजना, उपक्रम विषयक माहिती

"कामगार नामा" मॅगझीन प्राप्त करण्यासाठी वार्षिक वर्गणी रु. 700/- (पोस्टींग चार्ज सहित)

एका वर्षात 6 मॅगझीन मिळतील. (2 महिन्यातून 1 या प्रमाणे)

Phone Pe - 8983070380 करा किंवा वरील Image मधील कोड स्कॅन करा.

टीप : पेमेंट केल्यानंतर संपुर्ण नाव, पत्ता (पिन कोड सहीत), मोबाईल नंबर माहिती 8983070380 या नंबर वर कळविणे.

'कामगार नामा' एक घेतलेला आढावा

'कामगार नामा' चे संस्थापक संपादक व मुख्य समन्वयक श्री भूषण विजय कडेकर यांचे शिरूर,पुणे हे गाव. कामगार क्षेत्रामध्ये 15 वर्षे कामगार म्हणून विविध कंपनी मध्ये काम केले. यामध्ये टाटा मोटर्स पुणे, व्हील्स इंडिया, Whirlpool रांजणगाव, बॉम्बे डाईंग कंपनी रांजणगाव एमआयडीसी मध्ये 10 वर्ष काम करत असताना कामगार प्रतिनिधी म्हणून 6 वर्ष काम पाहिले.

कामगार क्षेत्रामध्ये काम करत असताना विविध कामगार कायदे, PF, ESIC, महाराष्ट्र कामगार कल्याण मंडळ यांचा अभ्यास केला. त्यांना एक खंत होती कि कामगार यांच्यासाठी परिपूर्ण माहिती देणारे वृत्तपत्र नाही म्हणून "दसरा" मुहूर्तावर दि. 8 ऑक्टोबर 2019 रोजी 'कामगार नामा' मासिक प्रथम चालू केले.

त्यानंतर कोरोना कालावधीमध्ये प्रिंटिंग बंद असल्यामुळे मासिक छापण्यास अडचणी आल्या यावरती मात करत दि. 16 नोव्हेंबर 2020 रोजी “दिवाळी पाडवा” मुहूर्तावर www.kamgarnama.com हे ऑनलाईन न्यूज पोर्टल चालू केले. या वेब पोर्टल वरती सर्व प्रकारच्या संघटित / असंघटित कामगार विषयी बातम्या, कामगार कायदे ओळख, विविध कंपनी मध्ये होणारे वेतनवाढ करार, विविध शासकीय योजना, PF, ESIC, महाराष्ट्र कामगार कल्याण मंडळ योजना व विविध माहिती रोज प्रसिद्ध करण्यात येते. या माध्यमातून राज्यातील लाखो कामगार यांच्यापर्यंत माहिती जाते आज रोजी या पोर्टलला 1 कोटी 10 लाखाहून अधिक views झाले आहेत.

'कामगार नामा' ची उपलब्धी (Achievement) :

कामगार नामा कृती समितीच्या माध्यमातून शासनाकडून कामगार क्षेत्रासाठी ऐतिहासिक कार्यवाही पार पाडण्यास भाग पाडले

1) शासनाकडून दर सहामहिन्याला प्रसिद्ध होणारे विशेष महागाई पत्रक बरोबर किमान वेतन पत्रक प्रसिद्ध करत जावे यासाठी सुमारे 2.5 (अडीच) वर्ष शासनदरबारी, मंत्री महोदय यांच्या कडे पाठपुरवठा केला व याला दि. 1 फेब्रुवारी 2022 रोजी यश आले व कामगार आयुक्त कार्यालय यांनी विशेष महागाई पत्रक बरोबर किमान वेतन पत्रक प्रसिद्ध केले. यामुळे राज्यातील लाखो कामगार यांना आपण ज्या उद्योगात काम करतो तेथे किती किमान वेतन मिळायला पाहिजे याची माहिती मिळाली हि एक ऐतिहासिक घटना कामगार विश्वामध्ये घडली.

2) महाराष्ट्र कामगार कल्याण मंडळ यांच्या द्वारे कामगार व त्यांच्या कुटुंबियांसाठी विविध योजना राबविल्या जातात आता यामध्ये 'शासकीय संगणक टंकलेखन बेसिक कोर्स प्रमाणपत्र परीक्षा (GCC-TBC) अर्थसहाय्य्य योजना' देखील लागू झाली, त्याबाबत कामगार कल्याण मंडळ यांचे परिपत्रक प्रसिद्ध केले असून याचा फायदा महाराष्ट्रातील लाखो कामगार व कुटुंबियांना होणार आहे.

कामगार नामा कृती समिती द्वारे महाराष्ट्र कामगार कल्याण मंडळ अंतर्गत राबविण्यात येणारे विविध योजनामध्ये 'शासकीय संगणक टंकलेखन बेसिक कोर्स प्रमाणपत्र परीक्षा (GCC-TBC) अर्थसहाय्य्य योजना' राबवावी अशी मागणी दि.१०/०६/२०२२ पासून सातत्याने करण्यात येत होती तसेच त्याबाबत पाठपुरवठा देखील करण्यात येत होता.

3) असंघटित कामगारांना ते ज्या उद्योगामध्ये काम करतात तेथे किमान वेतन मिळावे म्हणून मार्गदर्शन त्याचा लाभ हजारो कामगारांना झाला.

4) याच बरोबर अनुकंपा कृती समितीच्या माध्यमातून पुणे जिल्ह्यातील विविध नगरपालिका याची अनुकंपा नियुक्ती पात्र 36 उमेदवार याची यादी तयार करून त्यापैकी 28 उमेदवार यांना नेमणूक मिळाली.

5) कामगार नामा ट्रस्ट याच्या माध्यमातून विविध कामगार कायदे यांच्या वरती १० ऑनलाईन कार्यशाळा झाल्या असून याचा फायदा शेकडो कामगार, प्रतिनिधी, अधिकारी यांना झाला आहे.

सन्मान :

1) दि. 1 मे 2022 रोजी “कामगार दिन” रोजी राष्ट्रीय श्रमिक एकता महासंघ याच्या द्वारे ‘कै. भाई वैद्य स्मृती पुरस्कार 2022’

2) दि. 1 मे 2022 रोजी “कामगार दिन” रोजी श्रमिक एकता महासंघ याच्या द्वारे ‘विशेष कार्याबद्दल सन्मानचिन्ह’

3) दि. 3 जून 2023 रोजी पिंपरी-चिंचवड येथील आचार्य अत्रे सभागृहात कामगार क्षेत्रामध्ये करत असलेल्या कार्याबद्दल राष्ट्रीय श्रमिक आघाडी यांच्या कडून "विशेष सन्मान"

4) दि. 15 मार्च 2025 रोजी “एनआयपीएम पिंपरी, चिंचवड, चाकण चॅप्टरच्या वतीने एनआयपीएम (NIPM) चा 45 वा वर्धापन दिन” निमित्त कामगार क्षेत्रामध्ये करत असलेल्या कार्याबद्दल विशेष सन्मान

5) दि. 27 एप्रिल 2025 रोजी “आयटीसी कामगार संघटना यांच्या वतीने कामगार क्षेत्रामध्ये करत असलेल्या कार्याबद्दल विशेष सन्मान

कार्यरत व पुढील नियोजन :

१) महाराष्ट्र राज्यामध्ये विधानपरिषदेवर पदवीधर तसेच शिक्षक मतदारसंघ धर्तीवर कामगार मतदार संघ निर्माण करून त्यामधून विभागाप्रमाणे आमदार प्रतिनिधी निवडून देण्याची तरतूद समाविष्ठ करण्यासाठी प्रयत्न

2) 'कामगार नामा' च्या माध्यमातून राज्यातील प्रत्येक कामगार मध्ये विविध कामगार कायदे, विविध कामगार विषयक योजना, PF, ESIC, महाराष्ट्र कामगार कल्याण मंडळ याविषयी संघटित व असंघटित कामगार यांच्यामध्ये जागरूकता (Awareness) आणणे.

3) असंघटित कामगार यांना किमान वेतन कायद्याप्रमाणे पगार मिळावा यासाठी प्रयत्न.

कामगार नामा ट्रस्ट आयोजित "कामगार संघटना कायदा" ऑनलाईन कार्यशाळा उत्साहात संपन्न

2026-10-19T19:53:51.155+05:30

पुणे, दि. १८ ऑक्टोबर २०२६ - कामगार नामा ट्रस्ट, पुणे (F-0066327/PUN) आयोजित "कामगार संघटना कायदा (औद्योगिक संबंध संहिता २०२०)" या विषयावरील ऑनलाईन कार्यशाळा आज रविवार दि. १८ ऑक्टोबर २०२६ रोजी सकाळी १० ते १२ या वेळेत उत्साहात संपन्न झाली.

या कार्यशाळेसाठी मार्गदर्शक म्हणून डॉ. प्रकाश जोशी (माजी विभागीय संचालक, केंद्रीय कामगार शिक्षण मंडळ व संचालक, अभय ट्रेनिंग कन्सल्टन्सी) हे लाभले होते.

डॉ. जोशी यांनी कामगार संघटनेची व्याख्या, नोंदणी प्रक्रिया, नोंदणीकृत संघटनेचे अधिकार, नोंदणी रद्द होण्याची कारणे, रजिस्ट्रार यांची कार्ये, सभासदांचे अधिकार, संघटना मान्यता, एकत्रीकरण व विभक्तीकरणाचे नियम, रेकॉर्ड ठेवणे, वार्षिक सभा-अहवाल, तसेच दंड व शिक्षा या सर्व मुद्द्यांवर नवीन संहितेच्या अनुषंगाने सविस्तर मार्गदर्शन केले. सहभागींनी विचारलेल्या शंकांचेही त्यांनी निरसन केले.

या कार्यशाळेस महाराष्ट्रातील विविध जिल्ह्यांतून संघटित-असंघटित कामगार, एच.आर. अधिकारी, कामगार संघटनांचे पदाधिकारी व कामगार कायदे अभ्यासक मोठ्या संख्येने ऑनलाईन सहभागी झाले होते.

कामगार नामा ट्रस्टतर्फे कामगार कायदे विषयक कार्यशाळा व द्विमासिक मॅगझीनच्या माध्यमातून कामगारांना मार्गदर्शन केले जाते. पुढील कार्यशाळेची माहिती लवकरच जाहीर केली जाईल, असे ट्रस्टतर्फे कळविण्यात आले आहे.

संपर्क: 8983070380

ईएसआयसीचे लाभ आता क्यूआर कोडवर; मंत्री ॲड. आकाश फुंडकर यांच्या हस्ते प्रकाशन

2026-10-19T08:31:55.883+05:30

मुंबई : कर्मचारी राज्य विमा महामंडळाच्या (ईएसआयसी) लाभ व सेवांची माहिती विमाधारकांपर्यंत व्यापकपणे पोहोचविण्यासाठी डिजिटल सुविधा महत्त्वाच्या ठरणार आहेत, असे कामगार मंत्री ॲड आकाश फुंडकर यांनी सांगितले.

विकसित क्यूआर कोड आणि माहिती पुस्तिकेचे प्रकाशन त्यांच्या हस्ते करण्यात आले. यावेळी ते बोलत होते. क्यूआर कोडच्या माध्यमातून विमाधारकांना ईएसआयसीच्या विविध लाभांसह आरोग्य सुविधांची सर्वसमावेशक माहिती उपलब्ध होणार आहे.

मंत्री ॲड. आकाश फुंडकर यांच्या अध्यक्षतेखाली १२ ऑक्टोंबर रोजी झालेल्या बैठकीत क्यूआर कोड आणि एसएमएस सेवेद्वारे माहिती प्रसारित करण्याचे निर्देश देण्यात आले होते. त्यानुसार ईएसआयसीच्या मुंबई प्रादेशिक कार्यालयाने लाभ व सेवांची माहिती असलेल्या माहिती, शिक्षण व संवादविषयक पुस्तिका मुद्रित केल्या आहेत. या पुस्तिकांचे सर्व कर्मचारी राज्य विमा योजना रुग्णालयांमधून वितरण करण्यात येणार आहे.

मुंबई प्रादेशिक कार्यालयाने विकसित केलेल्या क्यूआर कोडमध्ये ईएसआयसीचे लाभ, नियोक्ता व कर्मचारी मार्गदर्शिका, शाखा कार्यालये, डीसीबीओ, दवाखाने, कर्मचारी राज्य विमा रुग्णालये, आयएमपी तसेच संलग्न रुग्णालयांची माहिती समाविष्ट आहे. व्यापक प्रसिद्धीसाठी हा क्यूआर कोड सर्व क्षेत्रीय कार्यालये, महाराष्ट्र ईएसआय सोसायटी तसेच नियोक्ता व कर्मचारी प्रतिनिधींना उपलब्ध करून देण्यात आला आहे. विमाधारकांशी एसएमएसद्वारे संपर्क साधण्याची कार्यवाही मंजूर राष्ट्रीय धोरण आणि निर्धारित वापरानुसार ईएसआयसी मुख्यालयाकडून केंद्रीय स्तरावर केली जात आहे.

डेटा सामायिकरण करारानंतर दि. १२ जुलै २०२६ रोजीची ४५ लाख ३४ हजार ७३७ विमाधारकांच्या निवासी पत्ते व मोबाईल क्रमांकांची मागविलेली माहिती ईएसआयसीच्या मुंबई प्रादेशिक कार्यालयाने १५ जुलै २०२६ रोजी महाराष्ट्र ईएसआय सोसायटीला उपलब्ध करून दिली आहे.

नवी मुंबई महापालिका कर्मचाऱ्यांना ४५,००० रुपये इतका बोनस जाहीर

2026-10-18T06:39:32.967+05:30

नवी मुंबई : नवी मुंबई महानगरपालिका (NMMC) कर्मचाऱ्यांना दिवाळी बोनस जाहीर झाला आहे. १६ ऑक्टोबर रोजी झालेल्या महापालिकेच्या महासभेत सर्व अधिकारी, कर्मचारी, शिक्षक आणि आशा स्वयंसेविकांना प्रत्येकी ४५,००० रुपये सानुग्रह अनुदान म्हणजेच दिवाळी बोनस देण्याच्या प्रस्तावाला सर्वानुमते मंजुरी देण्यात आली.

मिळालेल्या माहितीनुसार गेल्या वर्षी ही रक्कम ३४,५०० रुपये होती. यंदा वाढ करण्यात आली आहे. महापौर यांनी घोषणा केली. यंदाच्या दिवाळीसाठी नवी मुंबई महानगरपालिकेच्या (NMMC) कर्मचाऱ्यांना प्रत्येकी ४५,००० रुपये इतका सानुग्रह अनुदान दिवाळी बोनस जाहीर करण्यात आला आहे. पालिकेच्या महासभेत या प्रस्तावाला सर्वानुमते मंजुरी देण्यात आली असून, अधिकारी आणि कर्मचाऱ्यांमध्ये कोणताही भेदभाव न करता सर्वांना एकसमान बोनस देणारी नवी मुंबई महापालिका ही राज्यातील पहिलीच महानगरपालिका ठरली आहे. तसेच सुमारे ५,१२१ कर्मचारी म्हणजेच नियमित अधिकारी-कर्मचारी, प्राथमिक-माध्यमिक शिक्षक, कंत्राटी कामगार, आशा स्वयंसेविका इ. यांनाही सरसकट ४५,००० रुपये बोनस मिळणार आहे.

महापालिकेच्या या ऐतिहासिक निर्णयाचा थेट लाभ ५,१२१ कर्मचाऱ्यांना होणार आहे. यामध्ये नव्याने समाविष्ट झालेल्या १४ गावांमधील कर्मचाऱ्यांचाही समावेश करण्यात आला आहे. तसेच पालिकेतील कंत्राटी व रोजंदारी कामगारांना तांत्रिक आणि कायदेशीर अडचणी दूर करून ७,५०० रुपयांचे विशेष सानुग्रह आर्थिक सहाय्य (एक्स-ग्रेशिया) मंजूर करण्यात आले आहे. ज्यामुळे सर्व कर्मचाऱ्यांची यंदाची दिवाळी अत्यंत गोड होणार आहे.

जे एफ ई सोजी स्टील इंडिया प्रा. लि. (JFE Shoji Steel India Pvt Ltd) येथे वेतनवाढ करार संपन्न

2026-10-17T06:49:30.973+05:30

जे एफ ई सोजी स्टील इंडिया प्रा. लि. (JFE Shoji Steel India Pvt Ltd) कंपनी व्यवस्थापन आणि जे एफ ई शोजी स्टील इंडिया कर्मचारी संघटना यांच्यामध्ये चौथा वेतनवाढ करार यशस्वीरित्या, शांततेत आणि जल्लोषात संपन्न झाला.

कराराची ठळक वैशिष्टये खालील प्रमाणे :

कराराचा कालावधी : दि. 01/04/2026 ते 31/03/2029 (3 वर्षे)

एकूण थेट पगारवाढ: रु. 22,000/-

1. वेतन रचना (रु. 22,000 वाढ) :
- बेसिक + महागाई भत्ता = 60%
- स्पेशल भत्ता = 20%
- घरभाडे भत्ता (HRA) = उर्वरित रक्कम
- धुलाई भत्ता = रु. 1,000/-

2. इतर आर्थिक लाभ:
- बोनस = रु. 34,000 + इन्सेंटिव्ह (नफ्यावर आधारित)
- भविष्य निर्वाह निधी (PF) 1 एप्रिल 2026 पासून मूळ वेतनावर 12% लागू.
- दिवाळी भेटवस्तू (ऍमेझॉन कार्ड 2000/-)
- सुकामेवा डबल दिला जाईल.

3. रजा व सुट्ट्या:
- साप्ताहिक सुट्टी - रविवारी
- साप्ताहिक सुट्टीच्या दिवशी काम केल्यास 1 C-Off + Overtime
- सण/उत्सव व कंपनीने जाहीर केलेल्या सुट्टीच्या दिवशी काम केल्यास 1 C-Off + Overtime
- वार्षिक रजा (AL) - 18 + 2 ने वाढ, एकूण 30 दिवस पुढील वर्षी Carry Forward करता येईल
- प्रसंगिक रजा (CL) - 10 दिवस
- शोक रजा - 5 दिवस
- आजारपणासाठी अतिरिक्त 5 दिवसांची विशेष तरतूद (AL/CL संपल्यानंतर)
- सार्वजनिक सुट्टी - 13 दिवस

4. सुविधा व कल्याणकारी योजना:
- गुढीपाडवा, दसरा, दिवाळी - वर्षातून 3 वेळा विशेष जेवण
- दरवर्षी 4 गणवेश सेट व 1 जोडी सेफ्टी शूज
- वर्षातून एकदा शारीरिक तपासणी
- ग्रुप मेडिक्लेम पॉलिसी - रु. 5 लाख
- अ‍ॅक्सिडेंट इन्शुरन्स पॉलिसी - रु. 20 लाख
- टर्म लाईफ इन्शुरन्स पॉलिसी - रु. 25 लाख
- दरवर्षी क्रीडा दिनाचे आयोजन
- दरवर्षी फॅमिली डे - कर्मचारी आपल्या आई-वडिलांसह (पालकांसह) सहभागी होऊ शकतात.

5. दीर्घकालीन सेवा पुरस्कार:
- 10 वर्षे पूर्ण - रु. 10,000/-
- 15 वर्षे पूर्ण - रु. 15,000/-
- 20 वर्षे पूर्ण - रु. 20,000/-
- 25 वर्षे पूर्ण - रु. 25,000/-

करार करण्यासाठी व्यवस्थापन प्रतिनिधी तर्फे व्यवस्थापकीय संचालक - श्री. ताकेशी ताकाझावा, सल्लागार GM - श्री. कोहेई फुजीकी, DGM HR & GA - श्री. संजयकुमार सूर्यवंशी, सल्लागार GM - सौ. शितल चौधरी तसेच संघटनेतर्फे अध्यक्ष - श्री. गोवर्धन मावळे, उपाध्यक्ष - श्री. विशाल जगदाळे, जनरल सेक्रेटरी - श्री. शरद बनकर, सह. सेक्रेटरी - श्री. जहीर शेख, खजिनदार - श्री. दीपक देशमुख, सदस्य - श्री. योगेश राजगुरू, श्री. विलास शेरकर हे उपस्थित होते.

करार करण्यासाठी विशेष मार्गदर्शन श्रमिक एकता महासंघाचे श्री.मारुती जगदाळे (प्रमुख सल्लागार ), श्री.किशोर सोमवंशी (अध्यक्ष), श्री.रोहित पवार (जनरल सेक्रेटरी), श्री.अरुण घुले (MEPL जनरल सेक्रेटरी) यांचे मिळाले.

हा करार यशस्वी होण्यासाठी कंपनीमधील सर्व कामगारांनी दाखवलेले सकारात्मक काम, राखलेला संयम, केलेले सहकार्य आणि सर्वात महत्त्वाचे म्हणजे युनियन कमिटीवर ठेवलेला विश्वास, यामुळेच हा करार शक्य झाला.

कामगारांच्या न्याय्य हक्कांसाठी विश्वकल्याण कामगार संघटनेच्या वतीने कॅन्डल मार्च !

2026-10-16T08:25:17.742+05:30

पुणे : बजाज ऑटो लिमिटेड, चाकण येथील विश्वकल्याण कामगार संघटनेच्या (VKKS) वतीने आज गुरुवार, दिनांक १५ ऑक्टोबर २०२६ रोजी सायंकाळी कमलनयन बजाज पुतळा, शिवाजीनगर, पुणे येथे कामगारांच्या न्याय्य हक्कांसाठी कॅन्डल मार्च आयोजित करण्यात आला.

या वेळी विश्वकल्याण कामगार संघटनेचे अध्यक्ष श्री. दिलीप पवार यांनी कमलनयन बजाज यांच्या पुतळ्याला पुष्पहार अर्पण करून अभिवादन केले. तसेच उपस्थित कामगारांना मार्गदर्शन केले. कामगारांच्या न्याय्य मागण्यांकडे व्यवस्थापनाचे लक्ष वेधणे आणि कामगारांच्या हक्कांसाठी एकजुटीने, शांततापूर्ण व लोकशाही मार्गाने संघर्ष करण्याचा निर्धार व्यक्त करणे, हा या कार्यक्रमाचा मुख्य उद्देश होता.

कामगारांच्या प्रमुख मागण्या : या कॅन्डल मार्चच्या माध्यमातून संघटनेने पुढील मागण्या ठामपणे मांडल्या

प्रलंबित वेतन करार : १ जुलै २०२६ पासून लागू होणारा वेतन करार तातडीने पूर्ण करून कामगारांना न्याय द्यावा.

समान रजा, समान न्याय : व्यवस्थापनाप्रमाणे कामगारांनाही वर्षाला ४२ दिवसांची रजा देण्यात यावी.

VDA बंद करण्यास विरोध : कामगारांच्या वेतनाचा महत्त्वाचा भाग असलेला VDA बंद करण्याचा प्रस्ताव मागे घेण्यात यावा.

बोनस फ्रीज करण्यास विरोध : कामगारांच्या हक्काच्या बोनसवर निर्बंध आणणारा बोनस फ्रीज करण्याचा प्रस्ताव मागे घेण्यात यावा.

संघटनेच्या मते, कंपनीच्या प्रगतीमध्ये कामगारांचे योगदान अत्यंत महत्त्वाचे आहे. कंपनीच्या यशामागे कामगारांची मेहनत, कौशल्य आणि समर्पण आहे. त्यामुळे कामगारांना न्याय्य वेतन, समान सुविधा, सन्मानजनक कामाचे वातावरण आणि त्यांच्या हक्कांनुसार लाभ मिळणे आवश्यक आह

"कामगारांचे हक्क कमी करणारे प्रस्ताव मान्य नाहीत! न्याय्य वेतन, समान सुविधा आणि कामगारांचा सन्मान मिळालाच पाहिजे!" ही ठाम भूमिका या आंदोलनातून मांडण्यात आली.

कॅन्डल मार्चच्या माध्यमातून कामगारांनी आपल्या मागण्यांसाठी शांततापूर्ण मार्गाने आवाज उठवत कामगार एकजुटीचा संदेश दिला. प्रलंबित वेतन करार लवकरात लवकर मार्गी लावून कामगारांच्या न्याय्य मागण्यांचा सकारात्मक विचार करावा, असे आवाहन संघटनेच्या वतीने करण्यात आले.

डाऊ केमिकल कंपनी मधील स्थानिक कामगारांना सेवेत कायम करण्याबाबत अहवाल सादर करावा – उपाध्यक्ष अण्णा बनसोडे

2026-10-16T08:16:00.965+05:30

मुंबई : तळोजा येथील डाऊ केमिकल कंपनीमध्ये गेल्या १५ वर्षांहून अधिक काळ कार्यरत असलेल्या ४० स्थानिक भूमिपुत्र कामगारांना सेवेत कायम करण्याबाबत कार्यवाही करावी. सकारात्मक दृष्टिकोनातून तसेच, या कामगारांना न्याय देण्यासाठी करावयाच्या उपाययोजनांबाबतचा सविस्तर अहवाल येत्या १५ दिवसांत सादर करावा, असे निर्देश विधानसभा उपाध्यक्ष अण्णा बनसोडे यांनी दिले.

विधानभवन येथे विधानसभा उपाध्यक्ष अण्णा बनसोडे यांच्या अध्यक्षतेखाली आढावा बैठक (दि. १५) झाली. बैठकीत संबंधित कामगारांना सेवेत नियमित करण्याच्या प्रश्नावर चर्चा करण्यात आली. बैठकीस संबंधित अधिकारी, डाऊ केमिकल तळोजा कंपनीचे प्रतिनिधी तसेच संबंधित कामगार उपस्थित होते.

पुणे येथे ESIC वैद्यकीय महाविद्यालयाला मान्यता; ५० एमबीबीएस जागा उपलब्ध होणार, मुख्यमंत्र्यांची माहिती

2026-10-15T08:07:28.517+05:30

पुणे : पुण्यात आणखी एका नव्या मेडिकल कॉलेजला केंद्र सरकारने परवानगी दिली आहे. त्यामुळे पुणे शहरासाठी एमबीबीएसच्या आणखी जागा वाढणार आहेत. बिबवेवाडी येथील ईएसआयसी रुग्णालयात एमबीबीएसच्या ५० विद्यार्थी क्षमतेच्या वैद्यकीय महाविद्यालयाला मान्यता मिळाली आहे. २०२७-२८ पासून विद्यार्थ्यांना प्रवेश सुरू होणार आहेत. यापूर्वी दोन वेळा प्रस्ताव नाकारण्यात आल्यानंतर अपील प्रक्रियेतून मान्यता मिळाल्याचे मुख्यमंत्री देवेंद्र फडणवीस यांनी सांगितले.

विधान परिषदेच्या पुणे विभाग पदवीधर आणि शिक्षक मतदारसंघाच्या निवडणुकीच्या पार्श्वभूमीवर भाजपच्या नगरसेवकांच्या बैठकीनंतर ते पत्रकारांशी बोलत होते. मुख्यमंत्री देवेंद्र फडणवीस म्हणाले, महाराष्ट्र आणि पुण्यासाठी एक आनंदाची बातमी आहे. कारण पुण्याला एक नवं मेडिकल कॉलेज मिळालं आहे. केंद्रीय आरोग्य आणि कुटुंब कल्याण मंत्रालयाने पुण्यासाठी ५० एमबीबीएसच्या जागा असणाऱ्या मेडिकल कॉलेजसाठी मंजुरी दिली आहे. हे नवं कॉलेज बिबवेवाडी येथील ईएसआयसी हॉस्पिटलमध्ये उभारलं जाणार आहे. त्यामुळे आता २०२७-२८ पासून पुण्यातील हे नवं मेडिकल कॉलेज कार्यरत होणार आहे.

अंगणवाडी सेविका व मदतनीस यांना दिवाळीपूर्वीच भाऊबीज – मंत्री आदिती तटकरे

2026-10-15T07:53:16.734+05:30

मुंबई : राज्यातील एकात्मिक बालविकास सेवा योजनेअंतर्गत कार्यरत अंगणवाडी सेविका व मदतनीस यांना दिवाळीपूर्वीच शासनाकडून भाऊबीज भेट म्हणून प्रत्येकी दोन हजार रुपये देण्यात येणार असल्याची माहिती महिला व बालविकास मंत्री आदिती तटकरे यांनी दिली.

राज्यात अंगणवाडी सेविका 1,08,627 आणि मदतनीस 1,05,470 आहेत. अशी एकूण २,१४,०९७ पदे कार्यरत आहेत. या सर्व कार्यरत अंगणवाडी सेविका व मदतनीस यांना प्रत्येकी दोन हजार रुपये भाऊबीज भेट देण्यात येणार आहे. यासाठी ४२ कोटी ८१ लाख ९४ हजार रुपयांचा निधी उपलब्ध करून देण्यात आला आहे.

मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांच्या मार्गदर्शनाखाली हा निर्णय घेण्यात आला आहे. राज्यातील गर्भवती महिला, स्तनदा माता आणि बालकांच्या पोषणाची काळजी घेणाऱ्या अंगणवाडी सेविका व मदतनीस यांची दिवाळी गोड व्हावी, हा या निर्णयामागील उद्देश असल्याचे मंत्री आदिती तटकरे यांनी सांगितले.

माझगाव डॉकमधील फिक्स्ड टर्म कामगारांच्या रोजगाराचे संरक्षण करा – कामगार मंत्री ॲड. आकाश फुंडकर

2026-10-14T08:29:30.382+05:30

माझगाव डॉक कामगारांच्या प्रश्नांबाबत मंत्रालयात बैठक

मुंबई : माझगाव डॉकमधील सुमारे तीन हजार फिक्स्ड टर्म कामगारांच्या रोजगाराचे व भविष्याचे संरक्षण करून त्यांना कायमस्वरूपी रोजगाराच्या संधी उपलब्ध करून देण्यासाठी कार्यवाही करावी. तसेच माझगाव डॉकसाठी प्रस्तावित पी-७५१ प्रकल्प मिळविण्यासाठी केंद्र शासनाकडे प्रभावी पाठपुरावा करावा, असे निर्देश कामगार मंत्री ॲड. आकाश फुंडकर यांनी दिले.

माझगाव डॉकमधील फिक्स्ड टर्म कामगारांच्या रोजगारासह प्रस्तावित पी-७५१ प्रकल्पाबाबत मंत्री ॲड. फुंडकर यांच्या अध्यक्षतेखाली मंत्रालयात (दि. १३) बैठक झाली.

कामगार मंत्री ॲड. आकाश फुंडकर म्हणाले, माझगाव डॉक ही आस्थापना राज्य कामगार आयुक्तालयाच्या कार्यकक्षेत येत नसून केंद्र शासनाशी सबंधित आस्थापना आहे. तथापी, कामगारांच्या मागण्यांच्या अनुषंगाने राज्य कामगार आयुक्तालयाने केंद्रीय कामगार विभागाशी संपर्क साधला आहे.माझगाव डॉक व्यवस्थापनाने केंद्रीय कामगार विभागाला दिलेल्या माहितीनुसार, कंपनीला मिळणारे कार्यादेश आणि त्यानुसार उपलब्ध कामाचा व्याप यांच्याशी फिक्स्ड टर्म कामगारांची नियुक्ती जोडलेली आहे.

कंपनीच्या कामकाजाच्या आवश्यकतेनुसार या कामगारांची नियुक्ती केली जाते, त्यानुसार कामगारांच्या नियुक्तीसाठी पाठपुरावा करण्यात येणार असल्याचे सांगत कामगार मंत्री फुंडकर म्हणाले, कंपनीला सध्या नवीन कार्यादेश प्राप्त झालेले नसल्यामुळे फिक्स्ड टर्म कामगारांची नवीन भरती प्रस्तावित नसल्याचे निदर्शनास येत आहे. भविष्यात नवीन कार्यादेश मिळाल्यास कंपनीची आवश्यकता आणि कामाचा व्याप विचारात घेऊन भरती केली जाऊ शकते. लागू भरती निकषांनुसार उमेदवारांचा विचार करताना जहाजबांधणी क्षेत्रातील संबंधित अनुभवाला योग्य महत्व दिले जाईल, यासाठी विभागाच्या माध्यमातून प्रयत्न करण्यात येतील.

फिक्स्ड टर्म कामगारांनी केंद्रीय कामगार व रोजगार मंत्रालयाच्या ‘समाधान’ पोर्टलवर औद्योगिक वाद दाखल केल्यास त्याची तपासणी करून औद्योगिक संबंध संहिता, २०२० आणि त्याअंतर्गत लागू नियमांनुसार योग्य कार्यवाही करण्यात येईल, असेही कामगार मंत्री ॲड. आकाश फुंडकर म्हणाले.

यावेळी कामगार विभागाच्या अपर मुख्य सचिव आय. ए. कुंदन, कामगार आयुक्त एच. पी. तुम्मोड आणि माझगाव डॉक कामगार संघटनेचे पदाधिकारी उपस्थित होते.

उद्योगांच्या गुंतवणूक परिसंस्था निर्मितीत महाराष्ट्र सर्वात आघाडीवर – मुख्यमंत्री देवेंद्र फडणवीस

2026-10-13T17:19:31.763+05:30

महाराष्ट्र-यूके भागीदारी शुभारंभ कार्यक्रमात महाराष्ट्रात गुंतवणुक करण्याचे मुख्यमंत्र्यांचे आवाहन

मुंबई : कौशल्य, भांडवल आणि तंत्रज्ञानाची सांगड घालणाऱ्या ठोस गुंतवणुकीसाठी महाराष्ट्रात उत्कृष्ट परिसंस्था कार्यरत आहे. सर्वच क्षेत्रातील उद्योगांच्या गुंतवणुकीसाठी असलेल्या परिसंस्थेच्या निर्मितीत महाराष्ट्र हा सर्वात आघाडीवर आहे, या शब्दात महाराष्ट्राचे महत्व अधोरेखित करीत मुख्यमंत्री देवेंद्र फडणवीस यांनी युनायटेड किंगडममधील संस्था आणि उद्योजकांनी महाराष्ट्रात गुंतवणूक करण्याचे आवाहन केले.

गुंतवणूकदारांचे प्रकल्प वेगाने पुढे नेण्यासाठी ‘इन्व्हेस्ट महाराष्ट्र’ व्यासपीठाच्या माध्यमातून सर्व संबंधित यंत्रणांशी तातडीने समन्वय साधला जाईल. यूके मधील सचिव, महापौर व अधिकारी यांचा हा दौरा केवळ औपचारिक भेट नसून दोन्ही देशांमधील महत्वाकांक्षेचे प्रत्यक्ष व्यवसाय आणि करारांमध्ये रूपांतर करण्याचा प्रयत्न असल्याचे मुख्यमंत्री फडणवीस म्हणाले.

हॉटेल ताज पॅलेस येथे आयोजित महाराष्ट्र-यूके भागीदारी शुभारंभ कार्यक्रमात (दि. १३) मुख्यमंत्री फडणवीस बोलत होते. यावेळी राजशिष्टाचार मंत्री जयकुमार रावल, उद्योग विभागाचे प्रधान सचिव पी. अनबळगण, मुख्य राजशिष्टाचार अधिकारी राजेश गवांदे, मुख्यमंत्री यांचे गुंतवणूक सल्लागार कौस्तुभ धवसे, युनायटेड किंगडमचे व्यवसाय, नवोन्मेष, विज्ञान आणि व्यापार राज्य सचिव जोनाथन रेनॉल्ड्स उपस्थित होते.

यूकेच्या उच्चस्तरीय शिष्टमंडळासोबत झालेल्या द्विपक्षीय चर्चांनंतर विविध महत्वाच्या क्षेत्रांतील सहकार्य वाढविण्यासाठी महाराष्ट्र आणि यूके दरम्यान झालेल्या सामंजस्य कराराचे आदान प्रदान करण्यात आले.

मुख्यमंत्री फडणवीस म्हणाले, मुंबई आंतरराष्ट्रीय वित्त, व्यापार आणि उद्योजकतेला जागतिक बाजारपेठांशी थेट जोडते. पुणे हे अभियांत्रिकी, वाहन उद्योग, उत्पादन आणि माहिती तंत्रज्ञानाचे प्रमुख केंद्र बनले आहे. राज्यभरातील कुशल मनुष्यबळ, सक्षम औद्योगिक समूह आणि जागतिक ग्राहकांना सेवा देणाऱ्या अनुभवी भागीदारांचे मजबूत जाळे ही महाराष्ट्राची ताकद आहे. नव्या राष्ट्रीय शैक्षणिक धोरणामुळे परदेशी विद्यापीठांना महाराष्ट्रात कॅम्पस सुरू करण्याची परवानगी मिळाली आहे. ‘युनिव्हर्सिटी ऑफ ब्रिस्टल’, ‘युनिव्हर्सिटी ऑफ यॉर्क’ आणि ‘युनिव्हर्सिटी ऑफ ॲबर्डिन’ यासारखी जागतिक विद्यापीठे महाराष्ट्रात येत आहेत. राज्यात उभारण्यात येणाऱ्या एज्युसिटी, मेडिसिटी आणि एआय इनोव्हेशन सिटीमुळे जागतिक दर्जाचे संशोधन, संस्था आणि प्रतिभा एकत्र येतील.

महाराष्ट्रात औद्योगिक कार्बन उत्सर्जन कमी करणे, ऊर्जा कार्यक्षमता, पाणी व्यवस्थापन, वाहतूक आणि साधनसंपत्तीचे पुनर्नवीकरण यासारख्या स्वच्छ ऊर्जा प्रकल्पांना मोठा वाव आहे. जागतिक कंपन्यांना त्यांची ‘ग्लोबल कॅपॅबिलिटी सेंटर्स’ आणि तंत्रज्ञान संशोधन केंद्रे महाराष्ट्रात उभारण्यासाठी राज्य शासन पूर्ण सहकार्य करेल, अशी ग्वाहीही मुख्यमंत्र्यांनी यावेळी दिली.

या भागीदारीमुळे महाराष्ट्रातील स्थानिक उत्पादक, अन्नप्रक्रिया उद्योग, तंत्रज्ञान कंपन्या आणि लघुउद्योजकांना ब्रिटनमध्ये नव्या बाजारपेठा व ग्राहक मिळविण्याची संधी उपलब्ध होईल. येत्या काळात महाराष्ट्र आणि ब्रिटनमधील संबंध करारांपुरते मर्यादित न राहता प्रत्यक्ष उद्योग, व्यवसाय आणि रोजगारनिर्मितीतून अधिक दृढ होतील, असा विश्वासही मुख्यमंत्र्यांनी व्यक्त केला.

राज्य सचिव जोनाथन रेनॉल्ड्स म्हणाले, यूकेच्या ज्या कंपन्या भारतीय बाजारपेठेत प्रवेश करू इच्छितात, त्यांच्यासाठी महाराष्ट्र हे सर्वात नैसर्गिक आणि योग्य ठिकाण आहे. या राज्याची निवड त्याच्या स्पष्ट आर्थिक ताकदीमुळे, राजकीय स्थैर्य आणि नेतृत्वामुळे केली आहे. राज्याची अर्थव्यवस्था ही युरोपमधील नॉर्वे देशापेक्षाही मोठी आहे. महाराष्ट्रात केवळ एका कागदावर स्वाक्षरी करण्यासाठी आलेलो नाही, तर आम्हाला प्रत्यक्ष परिणाम आणि यश हवे आहे. दोन्ही बाजूंच्या लोकांनी एकत्र येऊन हे काम पुढे न्यावे आणि दोन्ही देशांच्या प्रगतीला गती द्यावी, अशी अपेक्षाही त्यांनी व्यक्त केली.

यावेळी यूकेमधील स्कॉटलंडचे पर्यावरण, अन्न आणि ग्रामीण व्यवहार सचिव डेम अँज्युला ईगल, राज्य सचिव डग्लस अलेक्झांडर, ईयू आणि आंतरराष्ट्रीय व्यापारचे संचालक सोफी ब्राईस, दक्षिण आशियासाठी यूकेचे उप-व्यापार आयुक्त हरशबीर संघा, इंग्लंडचे दक्षिण आशियासाठी व्यापार आयुक्त आणि पश्चिम भारतासाठी ब्रिटनचे उप-उच्चायुक्त हरजिंदर कांग, महापौर आदी उपस्थित होते.

नॅचरल शुगरकडून कामगारांना १० टक्के पगारवाढीसह २५ टक्के बोनस जाहीर

2026-10-13T10:04:17.466+05:30

धाराशिव : रांजणी (ता. कळंब) येथील नॅचरल शुगर अॅण्ड अलाईड इंडस्ट्रीज लिमिटेडच्या २५ व्या गाळप हंगामाच्या प्रारंभप्रसंगी समूहाचे संस्थापक अध्यक्ष, कृषिरत्न बी. बी. ठोंबरे यांनी कारखान्यातील कर्मचाऱ्यांना दहा टक्के पगारवाढ आणि आगामी दिवाळी सणासाठी २५ टक्के बोनस जाहीर केला आहे.

कारखान्याच्या गाळप हंगाम प्रारंभ कार्यक्रमात कर्मचाऱ्यांना १० टक्के पगारवाढ व २५ टक्के बोनस दिल्याबद्दल कामगार संघटनेच्या वतीने ठोंबरे यांचा सत्कार करून आभार मानण्यात आले. अध्यक्षांनी घेतलेल्या या निर्णयाचे कामगार वर्गात आणि परिसरात जोरदार स्वागत करण्यात आले. या निर्णयामुळे कर्मचाऱ्यांची दिवाळी गोड होणार आहे.

शुक्रवारी झालेल्या कार्यक्रमात संस्थापक अध्यक्ष ठोंबरे यांनी राज्य शासनाच्या त्रिपक्षीय समितीच्या शिफारशीनुसार कारखान्यातील सर्व पात्र कर्मचाऱ्यांना चालू वर्षातील १ ऑक्टोबरपासून १० टक्के पगारवाढ लागू करण्यात येत असल्याची घोषणाही केली. ते म्हणाले की, नॅचरल उद्योगाने नेहमीच शेतकरी आणि कर्मचारी या दोन्ही घटकांच्या हिताला प्राधान्य दिले आहे. साखर उद्योगात सर्वाधिक बोनस देण्याची आपली परंपरा यावर्षीही कायम राखण्यात आली आहे. कर्मचाऱ्यांना आपली दिवाळी अत्यंत आनंदात आणि उत्साहात साजरी करता यावी, यासाठी यंदाही विक्रमी २५ टक्के बोनस देण्यात येत आहे.

ओबेरॉय, ट्रायडेंटच्या कर्मचाऱ्यांना भरघोस पगारवाढ

2026-10-12T08:46:49.616+05:30

भारतीय कामगार सेनेच्या प्रयत्नामुळे हॉटेल ओबेरॉय व हॉटेल ट्रायडेंट, नरिमन पॉइंटमधील कामगारांच्या पगारामध्ये 24,100 रुपयांची वाढ करण्याचा ऐतिहासिक करार केला. त्यामुळे कर्मचाऱ्यांनी भारतीय कामगार सेनेचे आभार मानले आहेत असे वृत्त सामना वृत्तसंस्थेने दिले आहे.

शिवसेना पक्षप्रमुख उद्धव ठाकरे यांच्या नेतृत्वाखाली भारतीय कामगार सेनेचे अध्यक्ष, शिवसेना नेते – खासदार अरविंद सावंत आणि कार्याध्यक्ष अजित साळवी यांच्या मार्गदर्शनाने दोन्ही हॉटेलमधील कामगारांच्या वेतनामध्ये वाढ करण्याचा ऐतिहासिक करार संपन्न झाला. यावेळी हॉटेल ओबेरॉयच्या व्यवस्थापनाकडून धीरज मेहता, हॉटेल ट्रायडेंटचे वरिष्ठ उपाध्यक्ष आणि महाव्यवस्थापक अमित कौल, हॉटेल ओबेरॉयचे उपाध्यक्ष आणि महाव्यवस्थापक गौरव कुमार, हॉटेल ट्रायडेंटचे उपाध्यक्ष आणि एचआर हेड डेव्हिड नायडू, अनुज अगरवाल तसेच भारतीय कामगार सेनेचे संयुक्त सरचिटणीस दिलीप जाधव, चिटणीस गिरीश सावंत, युनिट अध्यक्ष कुणाल ढापरे, सरचिटणीस सतीश हरवणकर, खजिनदार रूपेश धोंगडे, संजय गायकर, प्रशांत पाटील, महेश कंटोललू, शैलेंद्र खामकर, सुनील आम्रे, परशुराम कांबळे, राजेंद्र सकपाळ, राजेश गोळे, शिवकुमार गणेशन, रामदास सूर्यवंशी, मीनाक्षी वेंगुर्लेकर, मनप्रीत शिकार, डॅनी कारवालो, मनोज पवार, अभिजित भावसार, रामचंद्र ठाकूर, सदानंद पागडे उपस्थित होते.

25 वर्षे सेवा पूर्ण झालेल्यांना 24,100 तर 5 वर्षे सेवा पूर्ण झालेल्या कामगारांना 4600 पगारवाढ देण्यात आली. डीए 6.5 करण्यात आला. गणेशोत्सव बक्षीस म्हणून 20,900 रुपये देण्यात येईल. निवृत्त कामगाराला ग्रॅच्युइटीव्यतिरिक्त अडीच लाख देण्यात येणार आहेत. करारनाम्यादरम्यान निवृत्त होणाऱया कामगारांनासुद्धा या करारनाम्याचा पूर्ण लाभ देण्यात आला. मासिक सहा साप्ताहिक सुट्टय़ा करण्यात आल्या असून कामगार कार्यरत असताना मृत्युमुखी पडल्यास त्याच्या कुटुंबीयांना वीस लाखांची एकरकमी विनापरतावा आर्थिक मदत करण्यात येईल. हा करारनामा चार वर्षांकरिता आहे.

कामगार संघटना कायदा (औद्योगिक संबंध संहिता २०२०) ऑनलाईन कार्यशाळेचे आयोजन, नाव नोंदणी सुरु

2026-10-11T12:29:05.409+05:30

पुणे, दि. ११ ऑक्टोबर २०२६ - कामगार नामा ट्रस्ट, पुणे (F-0066327/PUN) यांच्या वतीने कामगार कायदे विषयक ऑनलाईन कार्यशाळेचे आयोजन करण्यात आले आहे.

कार्यशाळेचा विषय - कामगार संघटना कायदा (औद्योगिक संबंध संहिता २०२०) हा असून मार्गदर्शक म्हणून डॉ. प्रकाश जोशी (माजी विभागीय संचालक, केंद्रीय कामगार शिक्षण मंडळ व संचालक, अभय ट्रेनिंग कन्सल्टन्सी) हे मार्गदर्शन करणार आहेत.

या कार्यशाळेत खालील विषयांवर सविस्तर मार्गदर्शन केले जाणार आहे :
व्याख्या, कामगार संघटनेची नोंदणी, नोंदणीकृत संघटनेचे अधिकार, नोंदणी रद्द होण्याची कारणे, रजिस्ट्रार कामगार संघटना यांची कार्ये, नोंदणी केलेल्या संघटनेच्या सभासदांचे अधिकार, कामगार संघटना मान्यता, कामगार संघटना एकत्र येणे किंवा विभक्त होण्यासाठीचे नियम, कामगार संघटनेचे रेकॉर्ड, वार्षिक सभा व अहवाल, दंड व शिक्षा.

कार्यशाळा कधी? :
रविवार, दि. १८ ऑक्टोबर २०२६ रोजी सकाळी १०.०० ते १२.०० वाजेपर्यंत ऑनलाईन पद्धतीने होणार आहे.

सहभाग नोंदणीचे पर्याय :

पर्याय क्र. १ : कामगार नामा मॅगझीन मेंबरशिप रु. ७००/- भरल्यास सेमिनारची Joining ID मोफत मिळेल व दोन महिन्याला १ याप्रमाणे वर्षात ६ अंक घरपोच मिळतील. तसेच एक वर्ष जे ऑनलाईन सेमिनार त्यामध्ये ५०% सूट.

पर्याय क्र. २ : केवळ सेमिनारमध्ये सहभागी होण्यासाठी प्रवेश फी रु. २००/-

पर्याय क्र. ३ : कामगार नामा मॅगझीनचे सभासद असलेल्यांसाठी रु. १००/-

इच्छुकांनी PhonePe - ८९८३०७०३८० या नंबरवर पेमेंट करून संपूर्ण नाव, पत्ता व मोबाईल नंबर याच नंबरवर व्हॉट्सअप करावा. QR कोड स्कॅन करूनही पेमेंट करता येईल.

अधिक माहितीसाठी संपर्क : ८९८३०७०३८०

कामगार क्षेत्राच्या आस्तित्वासाठी एकत्र यावे यासाठी कामगार नेते बाळासाहेब डेरे यांच्याकडून गोपी गिलबिले यांच्या मार्गदर्शनाचे आयोजन, बारामती मध्ये कर्मचारी प्रतिनिधी साठी 'नेतृत्वगुण विकास' मार्गदर्शन संपन्न

2026-10-10T10:05:11.107+05:30

बारामती : कामगाराचा शत्रू हा कामगारांच्या आप आपसातील मतभेद असतात अधिकारी किंवा प्रशासन नसते. कामगाराच्या उन्नतीसाठी व उज्वल भविष्यासाठी व अस्तित्वासाठी मतभेद बाजूला ठेवून सर्व कर्मचारी संघटना व कामगारांनी एकत्र येणं ही काळाची गरज असल्याचे प्रतिपादन कार्पोरेट ट्रेनर गोपी गिलबिले यांनी प्रतिपादन केले.

बारामती एमआयडीसी येथील फेरेरो कामगार संघटना यांच्या वतीने बारामती, पुरंदर, दौंड, इंदापूर, फलटण तालुक्यातील कामगार संघटना प्रतिनिधी यांच्यासाठी 'नेतृत्वगुण विकास' या कार्यशाळेचे आयोजन करण्यात आले होते या प्रसंगी गोपी गिलबिले यांनी उपस्थितीत कर्मचारी यांना मार्गदर्शन केले.

या प्रसंगी राष्ट्रवादी काँग्रेस पार्टी कामगार सेलचे प्रदेश अध्यक्ष शिवाजी खटकाळे, पुणे जिल्हा साखर कामगार समन्वय समिती अध्यक्ष राजेंद्र तावरे,श्रायबर डायनामिक्स डेअरी एम्प्लॉईज युनियन संस्थापक अध्यक्ष पांडुरंग कचरे, सुयश ऑटो कामगार सेना अध्यक्ष भारत जाधव ,किर्लोस्कर फ़ेरर्स कामगार संघटना अध्यक्ष कल्याण कदम व एमआयडीसी मधील कामगार संघटना व त्यांचे प्रतिनिधी उपस्तीत होते.

संघटना वेगवेगळ्या असतील पण कामगारांचा विचार एक असला पाहिजे व कामगारांच्या हिताचे ध्येय समान असले पाहिजे या सामुहिक विचारातून सक्षम जागरूक आणि एकजुटीची कामगार चळवळ उभी करण्यासाठी हे पहिले पाऊल असल्याचे प्रास्तविक मध्ये फेरेरो कामगार संघटनेचे संस्थापक अध्यक्ष बाळासाहेब डेरे यांनी सांगितले.

साखर कारखाना क्षेत्रात कामगारांची आर्थिक पिळवणूक मोठ्या प्रमानात होत असताना राजकीय बळ वापरून संघटना मोडीत काढण्याचे काम साखर महर्षी करत असल्याचा आरोप साखर कारखाना कामगार नेते राजेंद्र तावरे यांनी सांगितले

कामगार एक झाला नाही पाहिजे व भांडवलदाराचा विजय झाला पाहिजे यासाठी राजकीय व उद्योजक एकत्र येऊन कामगार संघटना मोडीत काढत आहेत तरी कामगारांनी एकजुटीने राहावे असे आवाहन श्रायबर डायनॅमिक्स डेअरी चे कामगार नेते पांडुरंग कचरे यांनी केले.

आपापसातील मतभेद बाजूला ठेवून केवळ कामगार जात म्हणून एकत्र या व जातीपातीचे राजकारण सोडून कामगारांच्या भल्यासाठी कार्य केले तरच येणाऱ्या काळात कामगार जात जिवंत राहणार असल्याचे राष्ट्रवादी कामगार सेलचे प्रदेशाध्यक्ष शिवाजी खटकाळे यांनी सांगितले.

बारामती मध्ये भव्य कामगार परिषद व कार्यशाळा आयोजन करण्याचे सर्वांमध्ये ठरवण्यात आले. राज्य व केंद्र शासनाचे कामगार विषयक बदलते धोरण व त्याचे परिणाम या विषयी मनोगत व्यक्त करण्यात आली. याप्रसंगी सूत्रसंचालन व आभार प्रदर्शन सावळेपाटील यांनी केले.

*फेरेरो कामगार संघटना यांनी पुढाकार घेऊन सर्व विचारांच्या संघटनांना एका व्यासपीठावर आणल्याबद्दल उपस्तीत सर्वांनी कौतुक केले.*

बांधकाम कामगारांची नोंदणी, नूतनीकरण प्रक्रिया गतिमान करून प्रलंबित अर्ज निकाली काढा – मंत्री ॲड. आकाश फुंडकर

2026-10-08T08:49:06.398+05:30

बांधकाम कामगारांच्या प्रलंबित प्रकरणांचा आढावा

मुंबई : बांधकाम कामगारांची नोंदणी व नूतनीकरण प्रक्रिया गतिमान करून प्रलंबित अर्जांचा निपटारा करावा, असे निर्देश कामगार मंत्री ॲड. आकाश फुंडकर यांनी दिले. कामगार आयुक्त कार्यालयात आयोजित बैठकीत कामगार मंत्री ॲड. फुंडकर यांनी बांधकाम कामगारांची प्रलंबित नोंदणी, नूतनीकरण व लाभविषयक प्रकरणांचा तसेच जुने दिव्यांग लाभ, मयत लाभ वाटप आणि त्यासंबंधीच्या चौकशी अहवालाबाबत आढावा घेतला.

यावेळी अपर मुख्य सचिव आय. ए. कुंदन, महाराष्ट्र बांधकाम व इतर कामगार कल्याणकारी मंडळाचे मुख्य कार्यकारी अधिकारी विवेक कुंभार, उपसचिव दीपक पोकळे उपस्थित होते.

औद्योगिक क्रीडा संघटनेची ६३ वी कॅरम स्पर्धा

2026-10-07T07:14:25.702+05:30

पिंपरी - दिनांक ०४–१०–२०२६, रविवार रोजी औद्योगिक क्रीडा संघटनेच्या ६३वी कॅरम स्पर्धा एसकेएफ बेअरिंग इंडिया एम्प्लॉइज युनियन हॉल ,चिंचवड येथे संपन्न झाली. सदर स्पर्धा एसकेएफ इंडिया,चिंचवड यांनी आयोजित केली या स्पर्धेमध्ये एसकेएफ, पीसीएमसी,बजाज ऑटो आकुर्डी,बजाज ऑटो चाकण,जेसीबी इंडिया,महिंद्रा सीआयई,डीआरडीओ,अम्युनिशन फॅक्टरी,ओएफडीआर,५१२आर्मी,भारत फोर्ज,इन्फोसिस,इटॉन इंडिया,टेट्रापॅक,टीकेआईएल,महिंद्रा अँड महिंद्रा चाकण,टाटा मोटर्स,इएसव्हीइइ,थरमॅक्स,टेक महिंद्रा,मर्सिडीज,सँडविक एशिया,एनप्रो,किर्लोस्कर ब्रदर्स लिमिटेड, फ्लॅश इलेक्ट्रॉनिक्स,टी सिस्टीम,भारत फोर्ज,तुषार इंटरप्राईजेस ,प्राज इंडस्ट्रीज, विलो माथेर अँड प्लॅट पंप्स,फिलिप्स,टीसीएस, टेक महिंद्रा,ऑरपॅक,एन्प्रो,फ्लीटगार्ड फिल्टर्स,अम्फेनॉल,अस्टेमो एफआयइ,अक्सेंचर,सायरिनो वगैरे ४७ कंपन्यांच्या,पुरुष व महिला २२९ खेळाडूंनी यांत भाग घेतला. स्पर्धा ४(एकेरी व दुहेरी पुरुष,एकेरी व दुहेरी महिला)गटामध्ये झाली. औद्योगिक क्रीडा संघटनेतर्फे यावर्षी प्रथमच कामगार क्षेत्रातून निवृत्त झालेल्या कामगार व कर्मचाऱ्यांसाठीही (पुरुष व महिला)स्पर्धा घेण्यात आली.

पारितोषिक वितरणच्या सुरुवातीला प्रास्ताविक प्रदीप वाघ यांनी तर संस्थेच्या वाटचालीविषयी नरेंद्र कदम यांनी माहिती दिली.स्पर्धेचे पारितोषिक वितरण वसंत ठोंबरे,नरेंद्र कदम,संतोष शिंदे,विजय हिंगे,मंदार कुलकर्णी,अंकित दौंड,नितीन कदम यांच्या हस्ते झाले; याप्रसंगी स्पर्धेविषयी खेळाडूंना मार्गदर्शन सचिव वसंत ठोंबरे यांनी केले.पारितोषिक वितरण समारंभाचे सूत्रसंचालन प्रदीप वाघ यांनी केले.याप्रसंगी संतोष सोनटक्के (माजी मार्केटिंग हेड साउथ इंडिया(टेट्रापॅक),औद्योगिक क्रीडा संघटनेचे सचिव वसंत ठोंबरे,उपाध्यक्ष नरेंद्र कदम,स्पर्धाप्रमुख हरी देशपांडे,विजय हिंगे,मंदार कुलकर्णी,अमित कदम,अतुल काळोखे(बजाज ऑटो आकुर्डी,ॲडमिन मॅनेजर),नितीन कदम(टाटा मोटर्स स्पोर्ट्स कमिटी),दयानंद नरवडे(जेसीबी एचआर मॅनेजर),दत्ता गायकवाड(सिनीयर एचआर मॅनेजर,महिंद्रा अँड महिंद्रा), मिनार गजने,सचिन कांबळे(जेसीबी स्पोर्ट्स कमिटी),किरण कंक,संतोष शिंदे,मेनिनो कार्डोझ(एसकेएफ स्पोर्ट्स कमिटी)दुष्यंत गायकवाड(सँडविक एशिया स्पोर्ट्स कमिटी)हेही उपस्थित होते.पारितोषिक वितरणाशेवटी हरी देशपांडे यांनी आभार मानले.या स्पर्धेसाठी YouTube प्रक्षेपण मंदार कुलकर्णी यांनी केले.स्पर्धेसाठी प्रदीप बारटके,रोहित कदम(चीफ रेफ्री)यांचे साह्य लाभले.

स्पर्धेचे उपउपांत्य, उपांत्य व अंतिम फेरीचे निकाल खालील प्रमाणे आहेत.

I. निवृत्त कर्मचारी गट:-

फेरी उपउपांत्य(एकेरी):- (सूर्यकांत केसरकर यांनी विजेतेपद तर गिरीश जोशी यांना उपविजेतेपद मिळाले)

१) विष्णू भुते विजयी विरुद्ध अरुण झेंडे(२०-३)(२३-०)

२)अशोक जाधव पराभूत विरुद्ध सूर्यकांत केसरकर(०-१६)(०–२२)

३) सुरेश पाटील विजयी विरुद्ध सुधाकर चव्हाण(८–५)(९–११)(२५–०)

४)गिरीश जोशी विजयी विरुद्ध विजय कोठेकर(१२–६)(११–१०)

उपांत्य फेरी

१) विष्णू भुते पराभूत विरुद्ध सूर्यकांत केसरकर(५-१०)(०–१२) २)गिरीश जोशी विजयी विरुद्ध सुरेश पाटील(१०–८)(५-१०)(७–१२)

अंतिम फेरी

सूर्यकांत केसरकर विजयी विरुद्ध गिरीश जोशी(४-११)(१३–११)(१६–३)

II. महिला गट उपांत्य फेरी (एकेरी):- (निशा पाटील यांना विजेतेपद तर स्मिता घाग यांना उपविजेतेपद मिळाले)

१) स्मिता घाग (सँडविक एशिया) विजयी विरुद्ध निशा राठी (टेट्रापॅक) (१९-०)(२५–०)

२) प्रणिता पवार (एसकेएफ) पराभूत विरुद्ध निशा पाटील(टेट्रापॅक) (०–२५)(०–२५)

अंतिम फेरी

स्मिता घाग(सँडविक एशिया) विरुद्ध विजयी निशा पाटील(टेट्रापॅक) (८–२५) (०–२५)

III. महिला गट उपांत्य फेरी (दुहेरी):-

(निशा पाटील निशा राठी यांना विजेतेपद तर सुकन्या भावसार श्रुतिका जाधव यांना उपविजेतेपद मिळाले)

उपांत्य फेरी

१) सुकन्या भावसार,श्रुतिका जाधव(प्राज इंडस्ट्रीज) विजयी विरुद्ध नीता पडनाड,कल्याणी सावंत(प्राज इंडस्ट्रीज) (२५–०) (२५–०)

२) साहिली निनावे, पुनम गोविंदवार (एनप्रो) पराभूत विरुद्ध निशा पाटील, निशा राठी(टेट्रापॅक)(४–२५) (०–२५)

अंतिम फेरी

निशा पाटील, निशा राठी(टेट्रापॅक) विजयी विरुद्ध सुकन्या भावसार, श्रुतिका जाधव (प्राज इंडस्ट्रीज)(२५–१) (२५–०)

IV. पुरुष गट उपांत्य फेरी (एकेरी):- (नौशाद शहा यांना विजेतेपद तर मनोज भोसले यांना उपविजेतेपद मिळाले)

१)नौशाद शहा (टिसीएस) विजयी विरुद्ध सचिन बांदल (टाटा मोटर्स) (३-१७)(१४-१३)(१८–१४)

२)मनोज भोसले(टाटा मोटर्स) विजयी विरुद्ध प्रीतम कटके (अम्युनिशन फॅक्टरी) (१६–८)(०–२५)(१४–१२)

अंतिम फेरी पुरुष गट एकेरी

नौशाद शहा(टिसीएस)विजयी विरुद्ध मनोज भोसले(टाटा मोटर्स) (२१–११)( २५–०)

V. पुरुष गट उपांत्य फेरी (दुहेरी):- शशी गायकवाड मनोज भोसले यांना विजेतेपद तर सचिन बांदल संजय थिटे यांना उपविजेतेपद मिळाले

शशी गायकवाड मनोज भोसले(टाटा मोटर्स)विजयी विरुद्ध सुजित कुमार उके भारत कुंभार(डीआरडीओ)(१५–८)(९–१५)(२०–४)

प्रीतम कटके शैलेश ढवळे (अम्युनिशन फॅक्टरी) विरुद्ध सचिन बांदल संजय थिटे(टाटा मोटर्स)(०–२५) )(४–२५)

अंतिम फेरी

शशी गायकवाड मनोज भोसले(टाटा मोटर्स) विजयी विरुद्ध सचिन बांदल संजय थिटे(टाटा मोटर्स) (२५–०) (२५–०)

एनआयपीएम (NIPM) पश्चिम प्रादेशिक परिषद २०२६ चे आयोजन; पालकमंत्री श्री शंभूराज देसाई यांना विशेष निमंत्रण

2026-10-05T09:03:40.034+05:30

सातारा : नॅशनल इन्स्टिट्यूट ऑफ पर्सनले मॅनेजमेंट (NIPM) च्या उच्चस्तरीय आयोजन समितीच्या शिष्टमंडळाने सातारा जिल्ह्याचे पालकमंत्री मा. श्री. शंभूराज देसाई यांची अधिकृत भेट घेतली. आगामी 'एनआयपीएम पश्चिम प्रादेशिक परिषद २०२६' (NIPM Western Regional Conference 2026) साठी त्यांना प्रमुख अतिथी म्हणून उपस्थित राहण्याचे औपचारिक निमंत्रण या वेळी देण्यात आले.

साताऱ्याचे पालकमंत्री तसेच राज्याचे पर्यटन, बंदरे, खनिकर्म आणि माजी सैनिक कल्याण मंत्री असलेल्या श्री. शंभूराज देसाई यांनी या शिष्टमंडळाचे मनापासून स्वागत केले आणि या परिषदेच्या आयोजनाबद्दल कौतुक करत आपला पूर्ण पाठिंबा दर्शवला.

या बैठकीत एनआयपीएम आयोजन समितीच्या मुख्य नेतृत्वाची उपस्थिती होती, ज्यामध्ये खालील पदाधिकाऱ्यांचा समावेश होता:
• डॉ. नितीन देशपांडे (परिषद संयोजक)
• डॉ. उदय भोसले (चॅप्टर चेअरमन)
• श्री. धैर्यशील देसाई (परिषद सह-संयोजक)
• श्री. अभय खुरसाळे (नॅशनल को-ऑर्डिनेटर)
• डॉ. नरेंद्र पाटील (आरव्हीपी)

ही महत्त्वपूर्ण पश्चिम प्रादेशिक परिषद ऐतिहासिक सातारा शहरात १० ऑक्टोबर २०२६ रोजी आयोजित करण्यात आली आहे. या परिषदेमध्ये उद्योग जगतातील आघाडीचे कॉर्पोरेट लीडर्स, एचआर (HR) प्रोफेशनल्स, औद्योगिक तज्ज्ञ आणि धोरणकर्ते एकत्र येणार आहेत. बदलत्या औद्योगिक प्रवाह, मनुष्यबळ विकास आणि प्रादेशिक आर्थिक वाढ यांसारख्या महत्त्वाच्या विषयांवर या परिषदेत सखोल चर्चा होणार आहे.

भेटीदरम्यान, आयोजन समितीने पालकमंत्र्यांना परिषदेच्या मुख्य उद्दिष्टांबद्दल आणि या परिषदेमुळे क्षेत्रातील व्यावसायिक विकास व औद्योगिक समन्वयाला कशी चालना मिळेल, याबाबत सविस्तर माहिती दिली.

कामगारांसाठी महत्वाचे - ईएसआयसी ESIC योजना

2026-10-05T07:49:27.731+05:30

कर्मचारी राज्य विमा योजना (ESIC- Employees’ State Insurance Corporation) ही सरकारी आणि खासगी क्षेत्रातील कर्मचाऱ्यांसाठी ही आरोग्य विमा योजना आहे. केंद्रीय कामगार व रोजगार मंत्रालयाच्या अंतर्गत ही योजना चालविली जाते.

या योजनेअंतर्गत विमा उतरवलेल्या कर्मचार्‍यांना तसेच त्यांच्यावर अवलंबून असणार्‍यांना आजारपणासाठी तसेच इतर अनेक फायदे मिळतात.

योजना कोणाला लागू :

दुकाने अथवा संस्था इ. ज्या ठिकाणी दहा पेक्षा जास्त कर्मचारी कामासाठी आहेत अशा प्रत्येक ठिकाणी ESIC योजना लागू होते.

यासाठी कर्मचार्‍याचे मासिक वेतन हे रुपये एकवीस हजार (२१,०००) पेक्षा कमी असणे अनिवार्य आहे. मात्र अपंगत्व असणार्‍या कर्मचार्‍यांसाठी हीच मर्यादा रुपये पंचवीस हजार (२५,०००) असेल.

या योजनेसाठी कर्मचार्‍याच्या वेतनाच्या ०.७५% कर्मचार्‍याकडून तर ३.२५% कंपनीकडून योगदान घेतले जाते ही टक्केवारी वेळो-वेळी बदलत असते.

नोंदणी :

कर्मचारी सर्व प्रथम कामावर रुजू झाल्यानंतर त्यांची ESIC अंतर्गत नोंदणी केली जाते व नोंदणी झाल्यानंतर त्यांना योजनेचा लाभ घेण्यासाठी कार्ड दिले जाते.
आपण नोकरी बदलली तरी आपला ESIC क्रमांक हा तोच राहतो. आपल्याला फक्त तो क्रमांक नव्या कंपनीत द्यावा लागतो.

फायदे :

ESIC योजनेंतर्गत कर्मचारी आणि त्याच्या कुटुंबाला वैद्यकिय सुविधा पुरवल्या जातात. ESIC च्या रुग्णालयात कर्मचाऱ्यांना मोफत इलाज केला जातो. गंभीर आजार असल्यास खासगी रुग्णालयात पाठविल्यास इलाजाचा संपूर्ण खर्च ESICद्वारा केला जातो.

कर्मचारी एखाद्या गंभीर आजाराने नोकरी करण्यास असमर्थ असल्यास ESIC कडून कर्मचाऱ्याला पगाराच्या ७० टक्के रक्कम देण्यात येईल. जर कर्मचारी काही कारणामुळे अपंग झाल्यास, त्याला पगाराच्या ९० टक्के रक्कम दिली जाईल. कायमस्वरुपी अपंगत्वावर आजीवन पगाराच्या ९० टक्के वेतन दिले जाते.

ESIC मध्ये महिलांना प्रसूती रजा दिली जाते. प्रसूती रजेसह ६ महिन्यांचं वेतनही दिलं जातं. ६ महिन्यांचं वेतन ESIC कडून देण्यात येतं. काही कारणास्तव गर्भपात झाल्यास, ६ आठवड्यांची वेगळी सुट्टीही देण्यात येते.

कर्मचाऱ्यांच्या मृत्यूनंतरही ESIC चा फायदा मिळतो. कर्मचाऱ्याच्या मृत्यूनंतर कुटुंबातील सदस्यांना पेन्शन सुविधा लागू होते.

टेनेको क्लीन एअर इंडिया लिमिटेड (Tenneco Clean Air India Ltd) येथे वेतनवाढ करार संपन्न

2026-10-02T07:47:58.580+05:30

चाकण : येथील औद्योगिक नगरीतील टेनेको क्लीन एअर इंडिया लिमिटेड (Tenneco Clean Air India Ltd) कंपनी व्यवस्थापन आणि टेनेको एम्प्लॉईज युनियन चाकण यांच्यामध्ये वेतनवाढीचा करार, शांततामय उत्साहवर्धक आणि खेळीमेळीच्या वातावरणामध्ये मंगळवार, दिनांक 22.09.2026 रोजी वेतन करार संपन्न झाला आहे.

कराराची ठळक वैशिष्टये खालील प्रमाणे :

पगारवाढ : एकूण ₹20,800/-

कालावधी : 1 जानेवारी 2026 ते 31 डिसेंबर 2028 तीन वर्ष

2026 – ₹6,240/- (Basic ₹3,140/-)
2027 – ₹8,320/- (Basic ₹4,160/-)
2028 – ₹6,240/- (Basic ₹3,140/-)
यामध्ये Employer PF चा समावेश आहे.

फरकाची रक्कम : जानेवारी ते ऑगस्ट २०२६ या ८ महिन्यांची १००% फरकाची रक्कम सप्टेंबर २०२६ च्या पगारात देण्यात येईल.

बोनस :
2025-26 : ₹44,500/-
2026-27 : ₹47,000/-
2027-28 : ₹48,000/-

पूजा गिफ्ट : ₹2,000/- वाढ करून ₹24,000/- करण्यात आले.

आरोग्य व सामाजिक सुरक्षा :

मेडिक्लेम :
Sum Assured – ₹2.50 लाख
Buffer – ₹20 लाख
Room Rent Limit – ₹3,500/-

लोकहितैषी निधी / कायमचे संपूर्ण अपंगत्व :
व्यवस्थापन योगदान – ₹16 लाख
कामगार योगदान – दोन दिवसांचा पगार
GPA – ₹5 लाख
GTL – ₹10 लाख

SSPL रजा : Critical Illness साठी SSPL रजा ३० दिवसांवरून ५० दिवस.

वेतन व सेवा-सुविधांमधील महत्त्वाच्या तरतुदी

Gratuity Calculation : Basic + DA सोबत LTA व Special Allowance यांचाही समावेश.

Salary Restructure :
Basic – Gross च्या 50%
HRA – Basic च्या 70%
Conveyance – Basic च्या 12.5%
LTA – Basic च्या 4.7%
उर्वरित – Special Allowance

Over Time Calculation : नवीन Labour Code लागू झाल्यानंतरही OT Calculation साठी संपूर्ण Gross Salary विचारात घेतली जाईल.

Sick Leave Capping : डिसेंबर २०२८ पर्यंत Sick Leave साठवणुकीची मर्यादा ६० दिवसांपर्यंत.

सेवानिवृत्ती भेट : कुटुंबीयांसमवेत निरोप समारंभ तसेच ₹15,000/- ची भेटवस्तू / Gift Voucher.

क्रीडा Sponsorship : कामगाराच्या पाल्याची राज्य किंवा राष्ट्रीय स्तरावरील क्रीडा स्पर्धेसाठी निवड झाल्यास CSR अंतर्गत आर्थिक मदतीची तरतूद.

रात्रपाळी भत्ता : तिसऱ्या पाळीसाठी Night Shift Allowance मध्ये ₹25/- ची वाढ करून तो ₹125/- प्रतिदिन करण्यात आला आहे.

करार करिता व्यवस्थापनाच्या वतीने श्री. हरि कृष्णा बुद्ध – Operations Director, श्री. मारीमुथू एम. – HR Director, श्री. संजय आव्हाळे – Plant Manager, श्री. दिगंबर वाहतुळे – Plant HR मॅनेजर तसेच कामगारांच्या वतीने श्री. तात्यासो भोसले – अध्यक्ष, श्री. सत्यवान पानसरे – जनरल सेक्रेटरी, श्री. संदीप दरेकर – उपाध्यक्ष, श्री. गणेश खैरे – उपाध्यक्ष, श्री. सुनील मदुगडे – सहाय्यक सचिव, श्री. संपत जाधव – सहाय्यक सचिव, श्री. गणेश गुंजाळ – खजिनदार यांनी काम पहिले.

सदर वाटाघाटी प्रक्रियेत श्रमिक एकता महासंघाचे सल्लागार श्री. मारुती जगदाळे सर, श्री. दिलीप पवार सर, अध्यक्ष श्री. किशोर सोमवंशी व जनरल सेक्रेटरी श्री. रोहित पवार यांचे मोलाचे मार्गदर्शन व सहकार्य लाभले अशी माहिती संघटनेच्या वतीने देण्यात आली.

NIPM WRC-26 च्या आयोजनाला उपमुख्यमंत्री एकनाथ शिंदे यांचा पाठिंबा

2026-10-02T07:44:41.827+05:30

NIPM WRC-26 च्या आयोजनाच्या पार्श्वभूमीवर एक महत्त्वपूर्ण टप्पा पार पडला आहे.

NIPM WRC-26 च्या आयोजन समितीच्या वतीने महाराष्ट्राचे माननीय उपमुख्यमंत्री श्री. एकनाथजी शिंदे यांची भेट घेऊन त्यांना परिषदेसाठी मुख्य अतिथी म्हणून उपस्थित राहण्याचे औपचारिक निमंत्रण दिले. यावेळी पालकमंत्री सातारा श्री.शंभूराजे देसाई, धैर्यशील देसाई Co-Convener Western Regional Conference 2026 आणि डॉ. उदय भोसले, अध्यक्ष - NIPM सह्याद्री सातारा चॅप्टर हे उपस्थित होते.

यावेळी उपमुख्यमंत्री श्री. एकनाथ शिंदे यांनी NIPMच्या उपक्रमांना सकारात्मक प्रतिसाद देत कर्मचारी धोरणे, कौशल्य विकास आणि शाश्वत HR इकोसिस्टम या विषयांवर अशा प्रकारच्या व्यासपीठांची महत्त्वपूर्ण भूमिका असल्याचे नमूद केले.

NIPM WRC-26 ही परिषद उद्योग क्षेत्रातील वरिष्ठ HR व्यावसायिक, विचारवंत, धोरणकर्ते आणि संस्थात्मक नेतृत्वाला एकत्र आणणारे महत्त्वाचे व्यासपीठ ठरणार आहे. बदलत्या कार्यसंस्कृती, मनुष्यबळ विकास, कौशल्यविकास आणि भविष्यातील HR नेतृत्व या विषयांवर परिषदेत व्यापक विचारमंथन होणार आहे.

उपमुख्यमंत्री स्तरावरून मिळालेल्या या सकारात्मक प्रतिसादामुळे NIPM WRC-26 च्या आयोजनाला अधिक व्यापक व्यासपीठ मिळण्यास मदत होणार असून, उद्योग आणि शासन यांच्यातील संवादाला नवी दिशा मिळण्याची अपेक्षा आहे.

तरी आपण सर्वांनी या सुवर्णसंधीचा लाभ घ्यावा आणि NIPM WRC-26 मध्ये सहभागी होण्यासाठी आजच नोंदणी करावी ही नम्र विनंती. नोंदणी करण्यासाठी खालील वेबसाईटचा वापर करावा.

🌐 www.nipmsatara.in

📞 संपर्क : 9145666688