கணிவெளி

இன்டர்நெட் எக்ஸ்ப்ளோரர் மார்ச் 14 வெளியீடு

2011-03-10T02:04:00.001-08:00

இணைய உலாவிகளில் இன்டர்நெட் எக்ஸ்ப்லோரருக்குத்தான் (Internet Explorer) முதலிடம். விண்டோஸ் இயங்குதளத்துடன் வருவதால் பெரும்பாலும் மற்ற இணைய உலாவிகளைப் பற்றி அறியாதவர்கள் இன்னும் இன்டர்நெட் எக்ஸ்ப்லோரரை பயன்படுத்தி வருகிறார்கள்.

இன்டர்நெட் எக்ஸ்ப்ளோரர் 6 பிரபலமான ஒன்று. இன்னும் பலர் இதனை உபயோகித்து வருகின்றனர். பயர்பாக்ஸ், குரோம் உலாவிகள் வரவுக்கு பின்னர் இன்டர்நெட் எக்ஸ்ப்ளோரர் உலாவி சந்தையில் தனது இடத்தை சிறிது சிறிதாக இழந்து வருகிறது.

இன்டர்நெட் எக்ஸ்ப்ளோரர் ஏழு, எட்டு என்று புதிய பதிப்புகள் வெளியிட்டு இருந்தாலும், பயனர்களிடம் வரவேற்பை பெற இயலவில்லை.

அடுத்து இன்டர்நெட் எக்ஸ்ப்ளோரர் 9 ஐ பெரும் சிரத்தையுடன் உருவாக்கி வருகிறார்கள். இதன் பீட்டா, ஆர்சி பதிப்புகள் ஏற்கனவே வெளியாகி விட்டன. இதன் இறுதி வடிவம் மார்ச் 14 ம் தேதி வெளியாகும் என அறிவிக்கப்பட்டு உள்ளது.

இது குறித்து விண்டோஸ் பிளாக்கில் அறிவிப்புக்கான லிங்க்

உபுண்டு நெட்புக் பதிப்பு இனி வெளிவராது

2011-03-10T01:13:00.001-08:00

லினக்ஸ் இயங்குதள பதிப்புகளில் பிரபலமானது உபுண்டு. லினக்ஸ் என்றால் உபுண்டு என்ற பெயரும் நியாபகத்திற்கு வருவதை மறுப்பதற்கில்லை. அது லினக்ஸ் சர்வர், லினக்ஸ் டெஸ்க்டாப், லினக்ஸ் நெட்புக் என பல்வேறு பதிப்புகளாக வெளியாகி வந்தது.

டேப்லெட் கணினிகள் வருகைக்கு பிறகு நெட்புக் கணினிகளுக்கான மவுசு குறைந்து வருவது உண்மை. உபுண்டு தற்போது நெட்புக் கணினிகளுக்கென வெளியிட்டு வந்த உபுண்டு நெட்புக் பதிப்பை நிறுத்த போவதாக அறிவித்துள்ளது.

உபுண்டுவின் அடுத்த வெளியீடான 11.04 டெஸ்க்டாப் பதிப்பு, நெட்புக் பதிப்பு என தனித்தனியே இல்லாமல், உபுண்டு 11.04 என்றே வெளிவரும் என அறிவித்துள்ளனர். இது டெஸ்க்டாப், லேப்டாப், நெட்புக் அனைத்திலும் சிறப்பாக இயங்கும் என கூறி உள்ளனர். உபுண்டு சர்வர் பதிப்பில் எந்த மாற்றமும் இல்லை.

முன்பு கூகுல் குரோம் ஒஎஸ் நெட்புக் கணினிகளில்தான் முதலில் வெளியிடப்படும் என அறிவித்திருந்தார்கள். நெட்புக் கணினிகளுக்கு சரிவு முகமாக உள்ள இந்த நேரத்தில், இதில் ஏதும் மாற்றம் வருமா என பொறுத்திருந்து பார்ப்போம்.

பிளாகரில் பணிபுரிபவர்கள் சந்திப்பு

2011-03-09T23:44:00.000-08:00

வலைப்பதிவர்கள் சந்திப்பு என்று அடிக்கடி படித்திருப்பீர்கள். இந்த இடுகை பிளாகர் (Blogger.com) வலைப்பதிவு சேவையில் பணிபுரிபவர்கள் சந்தித்ததை பற்றியது.

இணைய பயனர்கள் தங்கள் எண்ணங்கள், படைப்புகளை இணையத்தில் பகிர எளிமையான முறையில் வாய்ப்பளிப்பவை வலைப்பதிவுகள். இந்த வலைப்பதிவு சேவையினை வழங்குவதில் முதலிடம் பிடிப்பது பிளாகர். இது கூகுள் நிறுவனத்தால் நடத்தப்பட்டு வருகிறது.

தமிழ் வலைப்பதிவுலகில் பெரும்பாலான வலைப்பதிவர்கள் பிளாகரில்தான் வலைப்பதிவு வைத்து உள்ளனர். இந்த சேவையை வழங்கும் பின்னணியில் பணிபுரிபவர்களை அறிந்து கொள்வதில் ஆர்வம் இருக்காதா?

பிளாக்கரில் பணிபுரிபவர்கள் அனைவரும் சிட்னியில் சந்தித்து உள்ளனர். இவர்கள் ஐந்து கண்டங்களில் வெவ்வேறு கூகுள் அலுவலகங்களில் பணிபுரிபவர்கள். பெரும்பாலானோருக்கு இதுதான் முதல் சந்திப்பு என்று பிளாகர், புகைப்படத்துடன் செய்தி வெளியிட்டு உள்ளது.

இந்த புகைப்படத்தில் நம்ம ஊர் ஆட்கள் எங்காவது இருக்கிறார்களா என்று தேடிப் பாருங்கள் :) . இது குறித்த பிளாக்கரின் செய்தி ஆங்கிலத்தில் இங்கே. அடுத்து பிளாக்கரில் புதிய வசதிகள் குறித்த அறிவிப்பு வெளியாகும் என்றும் கூறி உள்ளார்கள் .

சந்தோசம்தானே? :)

பயர்பாக்ஸ் 4 RC பதிப்பு வெளியீடு

2011-03-09T21:39:00.001-08:00

உலகளாவிய இணைய உலாவிகள் பயன்பாட்டின் பயர்பாக்ஸ் இரண்டாமிடம் பெறுகிறது. குரோம் உலாவி வெளியீட்டுக்கு முன்பு கூகுளும் பயர்பாக்சை ஆதரித்து பரப்பி வந்தது.

குரோம் வெளியீட்டுக்கு பிறகு இணைய உலாவிகள் சந்தையில் பெரும் போட்டி ஏற்பட்டது. கூகுள் குரோம் மிக வேகமாக வளர்ந்து வருகிறது. அதற்கு ஈடு கொடுக்க பயர்பாக்சும் தன்னை மேம்படுத்தும் முயற்சியில் இறங்கி உள்ளது.

பயர்பாக்சின் முந்தய பதிப்புகளை விட புதிய பயர்பாக்ஸ் பதிப்பு 4 அதிக மாற்றங்களுடன் வருகிறது. குரோமிடம் இருந்து பல விசயங்களை காப்பி செய்துள்ளார்கள். வேகமாகவும் உள்ளது.

பல்வேறு பீட்டா பதிப்புகளை அடுத்து பயர்பாக்ஸ் ஆர்சி (Release Candidate) பதிப்பு வெளியாகி உள்ளது. அறிவிப்பை இங்கே பார்க்க. தரவிறக்க இங்கே செல்லவும்.

பயர்பாக்ஸ் ரசிகர்கள் தரவிறக்கி நிறுவி கொள்ளுங்கள். பயன்படுத்த நன்றாக உள்ளது. இதன் இறுதி பதிப்பு இன்னும் சில தினங்களில் வெளியாகலாம். அப்போது எளிதாக அப்கிரேட் செய்து கொள்ளலாம்.

பிட்டிபென்டர் இன்டர்நெட் செக்யூரிட்டி 3 மாதம் இலவசம்

2011-03-09T11:19:00.001-08:00

இலவச ஆண்டிவைரஸ் தொகுப்புகள், இணைய பாதுகாப்பு மென்பொருள்கள் வந்தாலும் காசு கொடுத்து வாங்கும் பாதுகாப்பு மென்பொருள்களுக்கு இன்னும் மவுசு இருக்கிறது. அந்த நிறுவனங்கள் அடிக்கடி சலுகையாக சில மாதம் இலவச லைசென்ஸ் வழங்குவார்கள்.

Mcafee ஆண்டிவைரஸ் பிளஸ் பேஸ்புக் பயனர்களுக்கு 6 மாதம் இலவசம் என்று ஓர் இடுகை எழுதி இருந்தேன். இன்று பிட்டிபெண்டர் இன்டர்நெட் செக்யூரிட்டி (BitDefender Internet Security ) 2011 மூன்று மாத லைசென்ஸ் இலவசமாக வழங்குவதாக அறிய நேர்ந்தது.

வைரஸ், மால்வேர்களிடம் (Virus, Malware) இருந்து பாதுகாப்பு, பயர்வால் (Firewall) இருப்பதால் ஹேக்கர்களிடம் இருந்து பாதுகாப்பு, தவறான தளங்களை தடை செய்ய பேரண்டல் கண்ட்ரோல் (Parental Control) என்று இணைய இணைப்புள்ள கணினிக்கு முழுமையான பாதுகாப்பு வளையமாக இந்த மென்பொருள் திகழும்.

இந்த இன்டர்நெட் செக்யூரிட்டி மென்பொருள் பற்றி மேலும் அறிந்து கொள்ள பிட்டிபென்டர் தளத்திற்கு செல்லுங்கள். மூன்று மாத இலவச சலுகையை பெற மால்வேர் சிட்டி தளத்திற்கு செல்லுங்கள்.

டிராய் பெற்ற புகார்களில் ஏர்டெல் முதலிடம்

2011-03-09T08:17:00.001-08:00

டிராய் [Telecom Regulatory Authority of India (TRAI)] இந்திய தொலை தொடர்பு நிறுவனங்களை ஒழுங்குபடுத்தும் விதமாக வாடிக்கையாளர்களிடம் இருந்து சேவை, கட்டணம் தொடர்பாக புகார்களை பெற்று வருகிறது.

இந்தியாவில் அதிக வாடிக்கையாளர்களை பெற்றுள்ளதில் முதலிடம் வகிக்கும் நிறுவனம் பாரதி ஏர்டெல். அதே போல் வாடிக்கையாளர்கள் டிராயிடம் அதிகம் புகார் அழிப்பது ஏர்டெல் குறைபாடுகளை பற்றித்தானாம்.

கடந்த மூன்றாண்டுகளில், டிராயிடம் அளிக்கப்பட புகார்களில் 3571 புகார்கள் ஏர்டெல் நிறுவனத்தை பற்றியவை. 2151 புகார்கள் ரிலையன்ஸ் நிறுவனத்தை பற்றி. 1896 புகார்கள் வோடபோன் நிறுவனத்தை பற்றி. டாடா டோகோமா, ஐடியா நிறுவனங்கள் முறையே 1239, 925 புகார்களை பெற்றுள்ளன.

இந்த விபரங்களை மக்களவையில் அமைச்சர் சச்சின் பைலட் தெரிவித்தார். இந்த செய்தியை எகனாமிக் டைம்ஸில் படித்தேன்.

இவ்வளவு புகார்கள் பெற்று என்ன? இன்னும் இந்த நிறுவனங்கள் அப்பாவிகளிடம் மறைமுகமாக ஏமாற்றுவதை நிறுத்துவதாக தெரியவில்லை. வாடிக்கையாளர்களின் அனுமதி இல்லாமலேயே கிரிக்கெட் ஸ்கோர் அலெர்ட் க்கு ரூ. 30, மொபைல் ரேடியோவுக்கு ரூ. 25 என்று காசை பிடுங்குவது தொடர்கிறது.

நீங்கள் ஏர்டெல் வாடிக்கையாளராக இருந்தால் சில நாட்களுக்கொருமுறை "STOP" என்று 121 எண்ணுக்கு SMS அனுப்பி நீங்கள் ஏதும் கட்டண சேவைகளுக்கு சந்தாதாரராக உள்ளீர்களா என்று சோதித்து கொள்ளுங்கள். அப்படி ஏதும் இருந்தால் அதை நீக்க நீங்கள் பதில் SMS பெறுவீர்கள். அதன் வழிமுறைப்படி விலகி விடுங்கள். நீங்கள் அறியாமலேயே இது போன்ற கட்டண சேவைகள் உங்கள் மேல் திணிக்கப்பட்டு இருக்கலாம்.

இதைப் பற்றிய விபரங்கள் இங்கே உள்ளன.

ஒரே நேரத்தில் பல எழுத்துருக்கள் ப்ரிவியு பார்க்க

2011-03-09T00:39:00.000-08:00

இணைய பக்கமோ, கோப்புகளோ அவற்றை மெருகூட்ட ஆயிரக்கணக்கில் எழுத்துருக்கள் (Fonts) இலவசமாக கிடக்கின்றன. நாம் கணினியில் நமக்கு பிடித்த எழுத்துருக்களை நிறுவி வைத்திருப்போம்.

ஒரு வார்த்தைக்கு எழுத்துரு தேர்ந்தெடுக்கும் போது அந்த வார்த்தையை செலக்ட் செய்து ஒவ்வொன்றாக சோதித்து பார்ப்போம். எழுத்துருக்களின் பட்டியலை ஸ்க்ரோல்(Scroll) செய்து ஒவ்வொன்றாக சோதித்து பார்ப்பது சலிப்பூட்டும் விஷயம்.

இதனை எளிமையாக செய்ய தீர்வினை தருகிறது வோர்ட்மார்க் (wordmark.it) எனும் இணையதளம். இந்த இணையதளத்திற்கு சென்று நடுவில் உள்ள wordmark என்பதனை கிளிக் செய்து நீங்கள் சோதிக்க விரும்பும் வார்த்தையை டைப் செய்து கொள்ளுங்கள்.

அடுத்து கீழே உள்ள Load Fonts என்பதனை கிளிக் செய்யவும். இப்போது உங்கள் கணினியில் உள்ள எல்லா எழுத்துருக்களிலும் நீங்கள் டைப் செய்த வார்த்தை எப்படி இருக்கும் என்று பட்டியலிட்டு காட்டும்.

வார்த்தையை பெரிதாக்கி / சிறிதாக்கி பார்த்து கொள்ளலாம். நீங்கள் பயனராக அங்கே பதிவு செய்து கொண்டால், எழுத்துரு அளவுகளை மாற்றி பார்த்து கொள்ளலாம். சேமித்து வைத்து கொள்ளலாம். வார்த்தைகளை Lowercase / Uppercase மாற்றி கொள்ளலாம்.

இதன் மூலம் சரியான எழுத்துருவை எளிமையாக கண்டறிந்து நமது வேளைகளில் பயன்படுத்தி கொள்ளலாம். எழுத்துருக்களுடன் அதிகம் பணிபுரிபவர்களுக்கு இந்த இணையதளம் மிகவும் பயனுள்ளதாக இருக்கும்.

கூகிள் தேடலை மெருகூட்டும் இன்ஸ்டன்ட் ப்ரிவ்யு

2011-03-08T23:12:00.000-08:00

நமக்கு இணையத்தில் தேவையானவற்றை பெற பெரும்பாலும் கூகிளை நாடி உள்ளோம். சரியான முடிவுகளை தந்தாலும் சில நேரம் நம் தேடலுக்கு சம்பந்தமில்லாத முடிவுகளும் வரும்.

அதற்கு காரணம் அதிகம் தேடப்படும் சூடான தலைப்புகளை கொடுத்து இணைய உரிமையாளர்கள் தங்கள் பக்கங்களை உருவாக்குவதுதான். உதாரணத்திற்கு "Endiran movie video songs" என்று தேடும் போது முதலில் சில பக்கங்கள் வந்து நிற்கும். ஆனால் எந்திரன் வீடியோ பாடல்கள் பற்றி குப்பை கதை அளந்து விட்டு உண்மையான வீடியோக்கள் எதுவும் இருக்காது.

அந்த பக்கத்தின் தலைப்பில் மட்டும் "Endiran movie video songs" என்று கொடுத்து விட்டு நம்மையும் கூகிளையும் ஏமாற்றி இருப்பார் அந்த இணைய தளத்தவர். அவரின் நோக்கம் தில்லாலங்கடி வேலைகள் செய்து இணைய பயனர்களை தங்கள் தளத்துக்குள் வரவைத்து விட்டு போட்டுள்ள விளம்பரங்கள் மூலம் காசு பார்ப்பது.

இது போன்ற கில்லாடி வேலைகளையும் தடை செய்து நல்ல முடிவுகளை தருவதால்தான் கூகிள் முன்னணியில் இருக்கிறது. கூகுளில் தேடல் முடிவுகளில் வரும் பக்கங்களை கிளிக் செய்து அந்த பக்கங்களுக்கு செல்லாமலேயே அந்த பக்கத்தின் படத்தை ப்ரிவ்யுவாக பார்க்கும் வசதி அளிப்பதே கூகிள் இன்ஸ்டன்ட் ப்ரிவ்யு.

இதனை பயன்படுத்துவது குறித்து கீழே உள்ள வீடியோவை பாருங்கள்.

இதன் மூலம் அந்த பக்கங்களுக்கு சென்று பாப்அப் (Popup), விளம்பரங்கள் என்று அல்லல் படுவதை தவிர்க்க, அந்த பக்கங்களில் நாம் தேடும் விஷயம் இருக்கிறதா என்பதை தோராயமாக கண்டு கொள்ள முடியும். இருந்தால் செல்லலாம். இல்லையெனில் அடுத்த தேடல் முடிவிற்கு தாவி விடலாம்.

இன்ஸ்டன்ட் ப்ரிவ்யு பார்க்க ஒவ்வொரு தேடல் முடிவின் தலைப்புக்கு அருகில் லென்ஸ் படம் இருக்கும் அதை கிளிக் செய்து பார்த்தால் அந்த பக்கத்தின் ப்ரிவ்யு பார்க்கலாம்.

இப்போது இந்த வசதி மொபைலில் கூகிள் தேடல் முடிவுகளுக்கும் விரிவு படுத்தப்பட்டு உள்ளது. மொபைல் பயனர்களுக்கு இது தேடல் வேலையை மிகவும் எளிதாக்குகிறது. இது தொடர்பான மேலே உள்ள வீடியோவை பாருங்கள்.

இது போன்ற எளிமையான புதுமைகள்தான் கூகிளை இணைய உலகின் கடவுளாக வைத்துள்ளது.

பயர்பாக்ஸ், குரோமில் எளிதாக கிரிக்கெட் ஸ்கோர் அறிய

2011-03-08T08:56:00.001-08:00

கிரிக்கெட் உலக கோப்பை நடைபெற்று வருகிறது. அலுவலகத்தில் வேலையில் இருந்தாலும் நமது மனது கிரிக்கெட் மாட்சை சுற்றியே இருக்கும். ஒரு டேப்பில் கிரிக்கெட் தளங்களை திறந்து வைத்து கொண்டு அடிக்கடி ரெப்ரஷ் செய்து கொண்டு இருப்போம்.

பயர்பாக்ஸ், குரோம் உலாவிகளில் கிரிக்கெட் ஸ்கோர்களை எளிதாக தெரிந்து கொள்ள ஈஎஸ்பிஎன் தளம் வகை செய்கிறது. கீழ்க்கண்ட நீட்சிகளை உங்கள் இணைய உலாவியில் நிறுவுவதன் மூலம் இதன் பயனை பெறலாம்.

பயர்பாக்ஸ் உலாவிக்கான நீட்சி

குரோம் உலாவிக்கான நீட்சி

இதனை நிறுவியவுடன் இணைய உலாவியில் தோன்றும் பட்டனை கிளிக் செய்தால் லேட்டஸ்ட் ஸ்கோர் விபரம், கிரிக்கெட் செய்திகள் தலைப்புகளாக தெரிய வரும். விக்கெட்டுகள் விழுந்தால் உடனே அறிவிப்பு தோன்றும்.

உலகக் கோப்பைகள் நடைபெறும்வரை வைத்திருந்து விட்டு, பிறகு நீக்கி விடுங்கள். அதிகப்படியான நீட்சிகளை நிறுவுவது உங்கள் உலாவி திறப்பதை தாமதமாக்கும்.

அப்பாவிகளை குறிவைக்கும் போலி மென்பொருள்கள்

2011-03-08T07:08:00.000-08:00

இது உங்களுக்கும் நேர்ந்திருக்கலாம். இணையத்தில் உலவி இருப்பீர்கள். திடீரென்று உங்கள் கணினி abcd (விளங்காத பெயர் உள்ள) வைரசால் பாதிக்கப்பட்டு உள்ளதாக செய்தி தோன்றும். வைரசை நீக்க இலவச ஆண்டிவைரஸ் ஒன்றை தரவிறக்கவும் அறிவுரையுடன் லின்க்கும் தரப்படும்.

அதனை தரவிறக்கி நிறுவி விட்டால் தொலைந்தீர்கள். அந்த மென்பொருள் உங்கள் கணினியில் அமர்ந்து கொள்ளும். ஸ்கேன் செய்வதற்கு மட்டும்தான் இலவசம். வைரசை நீக்குவதற்கு காசு கொடுக்க வேண்டும் என்று மிரட்ட ஆரம்பிக்கும். அடிக்கடி எச்சரிக்கை செய்தி தந்து உங்களை எரிச்சலூட்டும்.

இது போன்ற போலி ஆண்டிவைரஸ் மென்பொருள்களின் எண்ணிக்கை அதிகம். அடிக்கடி இது போன்று போலி மென்பொருள்களை வெளியிட்டு காசு பார்த்து வருகிறார்கள். இந்த போலிகளின் பட்டியலையும் அதை நீக்குவது தொடர்பாக இந்த பதிவை பாருங்கள்.

இதை போன்றதொரு இன்னொரு கூட்டம்தான், உங்கள் கணினியை வேகமாக்குகிறேன் என்று வரும் போலி மென்பொருள்கள். மாட்டு வண்டி போல் செயல்படும் உங்கள் கணினியை ராக்கெட் போல மாற்றி காட்டுகிறேன் என்று சாத்தியமில்லாத சத்தியம் அளிப்பார்கள். இலவசம் என்பார்கள்.

தரவிறக்கி நிறுவி விட்டால் பழைய கதைதான். ஸ்கேன் பண்ண இலவசம் ராக்கெட் வேகம் வேண்டும் என்றால் பத்து டாலர் காட்டுங்கள் என்று ஆசை காட்டுவார்கள். அந்த மென்பொருளை உங்கள் கணினியில் இருந்து நீக்குவதும் உங்களுக்கு தலைவலி ஆகி விடும். இது போன்ற மென்பொருள்களை பற்றி இங்கே படியுங்கள்.

இது போன்று போலி மென்பொருள்கள் ஆயிரக்கணக்கில் உலவி வருகின்றன. அவர்களின் குறி அப்பாவிகளை ஆசை வார்த்தை காட்டி காசு பறிப்பது.

இது போன்ற போலிகளை அப்பாவிகளை தரவிறக்க வைத்து பரவ செய்வதற்காக ஈமெயில் மூலம், வலைப்பதிவுகள் மூலம் இந்த போலி மென்பொருள்களை பற்றி பெருமையாக எழுதுபவர்களுக்கு ஒரு தரவிறக்கத்திற்கு இவ்வளவு என்று கமிசன் கொடுத்து இணையத்தில் பரப்பி வருகிறார்கள். இதனால் பாதிக்கப்படுவது அப்பாவிகளே.

சொல்ல வருவது என்னவெனில் இலவசம் என்று எதை கண்டாலும் உங்கள் கணினியில் நிறுவி தொல்லைக்கு உள்ளாகாதீர்கள். யார் எந்த மென்பொருளை பற்றி எழுதினாலும் கூகுளில் அதை பற்றி செய்தி உள்ளதா என்று தேடி பாருங்கள். நல்லவிதமாக எழுதி உள்ளார்களா என்று பார்க்கவும். நம்பிக்கை வந்தால் மட்டும் தரவிறக்கி பயன்படுத்தவும். இல்லையெனில் விலகி ஓடி விடுங்கள்.

மொபைல் சந்தையில் மைக்ரோசாப்ட் + நோக்கியா கைகோர்ப்பு

2011-03-08T00:45:00.000-08:00

மைக்ரோசாப்ட் நிறுவனம் நோக்கியாவுடன் ஒரு பில்லியன் டாலர் ஒப்பந்தம் போட்டுள்ளதாக செய்திகள் வருகின்றன. இது குறித்த அலசல்.

மாற்றங்களுக்கு உள்ளடங்கியதே காலம் என்பதற்கு தகவல் தொழில் நுட்ப துறையும் விலக்கல்ல. சில வருடங்களுக்கு முன்பு தகவல் பரிமாற்ற கணினி துறையில் முன்னணியில் இருந்தது மைக்ரோசொப்ட் தயாரிப்புகள். விண்டோஸ் கணினி இயங்குதளங்கள், விண்டோஸ் மொபைல் இயங்குதளங்கள் என்று மைக்ரோசொப்ட்டின் ஆளுமை அதிகம். அதே போல் மொபைல் தயாரிப்பு துறையில் நம்பர்.1 நோக்கியா. அடித்து கொள்ள ஆள் இல்லை என்று வீறு நடை போட்டன.

ஆனால் இது எல்லாம் ஆப்பிள் நிறுவனம் ஐபோன் வெளியிடும் வரை மட்டும்தான். ஐபோனின் மிகப்பெரிய வளர்ச்சி, ஐபேட் வரவு என்று இல்லங்களில் டெஸ்க்டாப் கணினிகள், லேப்டாப் கணினிகள் சந்தைக்கு வேட்டு வைத்து வருகின்றன. ஈமெயில் பார்ப்பது, இணையதளங்கள் வாசிப்பது, வீடியோ பார்ப்பது, பாடல் கேட்பது என்று சராசரி பயனரின் அனைத்து தேவைகளையும் கொண்டு செல்லும் இடமெல்லாம் நிவர்த்தி செய்து விடுகின்றன ஐபோன் போன்ற ஸ்மார்ட் போன் வகையறாக்கள்.

எங்கேயும் எப்போதும் சங்கீதம், சந்தோசம், தகவல் பரிமாற்றம் என்று ஸ்மார்ட் போன்கள் பயனர்களின் அடிப்படை தேவையை தீர்த்து விடுவதால் டெஸ்க்டாப் / லேப்டாப் கணினிகள் இல்லங்களில் காட்சி பொருளாக மாறி வருகின்றன. இந்த நிலை வளர்ந்தால் மைக்ரோசாப்ட்டின் விண்டோஸ் இயங்குதளங்களின் எதிர்காலம்? மைக்ரோசாப்ட்டின் மிகப்பெரிய வருமானம் அதன் விண்டோஸ் இயங்குதளங்களின் மூலமே கிடைக்கிறது.

ஸ்மார்ட் போன்கள், டேப்லெட் பிசிக்கள் என்று மொபைல் சாதனங்களின் வளர்ச்சி கணினிகளின் தேவைகளை குறைத்து வருவது உண்மை. இந்நிலையில் ஆப்பிள் நிறுவனத்திற்கு அடுத்து கூகிள் தனது ஆண்டிராயிட் மொபைல் இயங்குதளம் மூலம் மொபைல் துறையில் குறிப்பிட்ட சந்தையை பெற்று உள்ளது. ஆண்டிராயிட் இயங்குதளத்தில் இயங்கக் கூடிய மொபைல் சாதனங்கள் அதிகமான அளவில், குறைந்த விலையில் வரத்துவங்கி உள்ளன.

மைக்ரோசாப்ட்டின் விண்டோஸ் மொபைல் இயங்குதளம் சரியான வரவேற்பை பெறவில்லை. தோல்வி முகமாகவே உள்ளது. இவ்வாறாக தகவல் தொழில்நுட்ப துறையில் மைக்ரோசாப்ட் தனது பிடியை மெல்ல மெல்ல இழந்து வருகிறது.

இது இப்படியிருக்க மொபைல் சாதனங்கள் தயாரிப்பில் ராஜாவாக இருந்த நோக்கியா ஆப்பிள் ஐபோன், கூகிள் ஆண்டிராயிட் வருகைக்கு பிறகு மாபெரும் சரிவை சந்தித்து உள்ளது. ஐபோன் ஓஎஸ், கூகிள் ஆண்டிராயிட், விண்டோஸ் மொபைல் போன்ற இயங்குதளங்களைப் போல் மொபைல் போன்கள் தயாரிக்கும் நிறுவனங்களும் தனது தயாரிப்புகளுக்கு தனியான இயங்குதளங்களை உருவாக்கும் முயற்சியில் உள்ளன.

நோக்கியா மெமோ (Maemo) , சாம்சங் படா (Bada), இன்டெல் மொப்ளின் (Moblin) என்று இயங்குதளங்கள் வெளியிடப்பட்டன. ஆனால் வரவேற்பு குழப்ப நிலையிலேயே உள்ளன. நோக்கியா தனது மெமோ இயங்குதள தயாரிப்பை இன்டெல் மொப்ளினுடன் இணைத்து இரண்டு நிறுவனங்களும் தற்போது மீகோ (Meego) என்ற பெயரில் புதிய மொபைல் இயங்குதளத்தை உருவாக்கி வருகின்றன.

உயர்தர ஸ்மார்ட் மொபைல் போன்கள் தயாரிப்பில் ஆப்பிள் ஐபோன் முன்னணி வகிக்கிறது. கூகிள் ஆண்டிராயிட் இயங்குதளத்தில் இயங்கும் ஸ்மார்ட் மொபைல் போன்களை எச்டிசி (HTC), சாம்சங் (Samsung), சோனி எரிக்சன் (Sony Ericsson) போன்ற பிரபல மொபைல் தயாரிப்பு நிறுவனங்கள் வெளியிட்டு வருகின்றன. பல சீன நிறுவனங்களும் குறைந்த விலையில் ஆண்டிராயிட் மூலம் இயங்கும் மொபைல் போன்களை வெளியிட்டு வருகின்றன. விண்டோஸ் மொபைல் இயங்குதளத்தில் இயங்கும் ஸ்மார்ட் மொபைல் போன்களை எச்டிசி (HTC), சாம்சங் (Samsung), சோனி எரிக்சன் (Sony Ericsson) உள்ளிட்ட பிரபல நிறுவனங்கள் வெளியிட்டு வருகின்றன. ஆனால் அதிக வரவேற்பை பெற்றது ஆப்பில் ஐபோன் , கூகிள் ஆண்டிராயிட்.

ஸ்மார்ட் போன்கள் நிலை இப்படியிருக்க டேப்லெட்(Tablet) பிசிக்களின் புரட்சி நெட்புக் (Netbook) எனப்படும் சிறிய அளவிலான லேட்டாப் கணினிகளின் சந்தையை விழுங்கி விட்டன. ஆப்பிள் ஐபேட் டேப்லெட் பிசி வெளியிட்ட பின், கூகிள் ஆண்டிராயிட் இயங்குதளத்தை அடிப்படையாக கொண்டு சாம்சங் உள்ளிட்ட பல நிறுவனங்கள் டேப்லெட் பிசிக்களை வெளியிட்டு வருகின்றன. இவற்றில் சாம்சங் கேலக்சி டேப் (Samsung Galaxy Tab), டெல் ஸ்ட்ரிக் (Dell Streak), ஆலிவ் பேட் (Olive Pad) போன்றவை குறிப்பிடத்தக்கவை.

உயர்தர மொபைல் போன்கள் சந்தையை ஆப்பிள், கூகிள் நிறுவனத்திடம் இழந்த நோக்கியா, குறைந்த விலை மொபைல் போன்கள் சந்தையை மலிவான விலையில் வரும் சீன தயாரிப்புகளில் இழந்து தடுமாறி வருகிறது. நோக்கியா நிறுவனத்திற்கு இப்படியொரு நிலை வரும் என்பதை எவரும் கணித்திருக்கவில்லை.

இந்நிலையிலிருந்து மீண்டெழ நோக்கியா நிறுவனமும், மைக்ரோசாப்ட் நிறுவனமும் கைகோர்த்து கொள்வது என்று முடிவு செய்து உள்ளன. நோக்கிய நிறுவன ஸ்மார்ட் போன் தயாரிப்புகளில் விண்டோஸ் மொபைல் இயங்குதளத்தை பயன்படுத்த மைக்ரோசாப்ட் நோக்கியாவுடன் ஒப்பந்தம் போட்டுள்ளதாக தெரிகிறது. இதற்காக மைக்ரோசாப்ட் நோக்கியாவிடம் ஒரு பில்லியன் டாலர் அளித்துள்ளதாக செய்திகள் உலவுகின்றன.

இதன் மூலம் விண்டோஸ் மொபைல் இயங்குதளத்தை அதிக பயனர்களிடம் கொண்டு செல்ல முடியும் என்று மைக்ரோசாப்ட் கணக்கு போடுகிறது. ஆப்பிள் ஐபோன், கூகிள் ஆண்டிராயிட் போன்றவற்றின் வளர்ச்சிக்கு ஈடு கொடுக்கலாம் என்று நோக்கியா கணிக்கிறது. இந்த ஒப்பந்தம் இரு நிறுவனங்களுக்கும் மொபைல் சந்தையில் புத்துணர்ச்சி அளிக்குமா என்பதை பொறுத்திருந்து பார்ப்போம்.

புதிய வசதிகளுடன் ஆப்பிள் ஐபேட் 2 அறிமுகம்

2011-03-03T05:10:00.000-08:00

தகவல் தொழில்நுட்ப துறையில் புரட்சிகரமான தயாரிப்புகளை வெளியிடுவதில் ஆப்பிள் நிறுவனத்திற்கு நிகரில்லை. ஐபோனுக்கு அடுத்து அவர்களது தயாரிப்பில் மிக வரவேற்பை பெற்றவை ஐபேட் (IPad) எனும் டேப்லெட் பிசி (Tablet PC) வகைகள்.

ஐபேட் வெளியிட்டதற்கு பின்புதான் பல்வேறு நிறுவனங்களும் அதனை காப்பி செய்து தங்களது தயாரிப்புகளை வெளியிட்டு உள்ளனர். அவற்றில் குறிப்பிட தக்கவை Dell Streak, Samsung Galaxy Tab. நெட்புக் கணினிகளுக்கு இருந்த மார்கெட்டை சின்னா பின்னமாக்கிய பெருமை ஐபேடை சாரும்.

15 மில்லியனுக்கும் அதிகமான ஐபேட்களை இதுவரை விற்றுள்ளார்கள். ஐபேட்டின் அடுத்த வடிவம் ஐபேட் 2 நேற்று வெளியிடப்பட்டு உள்ளது. அதன் சிறப்பம்சங்களை கீழே உள்ள வீடியோவில் பாருங்கள்.

1. ஐபோன் 4 ஐ விட அதி வேகமான பிராசசர் Dual Core A5 Processor . ஐபேட் 1 ஐ விட இரண்டு மடங்கு வேகமானது.

2. ஐபேட் 1 ஐ விட தடிமனில் 33% குறைவு. ஐபேட் 1 தடிமன் 13.4 mm. ஐபேட் தடிமன் 8.8mm.

3. ஐபேட் 1 -ல் பின்பக்க கேமரா மட்டுமே உண்டு. இதில் இரண்டு காமெராக்கள் உண்டு. ஐபேட் 2 இல் வீடியோ சாட்டிங்குக்கு முன்பக்க கேமரா வசதியும் உண்டு.

4. இது பத்து மணி நேர பாட்டரி பேக்அப் உள்ளது.

5. கிராபிக்சுகளை கையாளுவதில் இது ஐபேட் 1 ஐ விட ஒன்பது மடங்கு வேகமானது.

6. இதன் மூலம் மற்றொரு ஐபேட் 2 உடனோ, ஐபோன் , மாக் ஓஎஸ் உடனோ வீடியோ கான்பரென்ஸ் வசதி ஏற்படுத்தி கொள்ளலாம்.

7. ஐபேட் 2 இன் எடை 1.3 பவுண்டுகள். ஐபேட் 1 இன் எடை 1.5 பவுண்டுகள்.

8. மார்ச் 11 இல் இருந்து விற்பனைக்கு கிடைக்கும். விலை 499 டாலரில் இருந்து ஆரம்பிக்கிறது. வெள்ளை நிறத்திலும் கிடைக்கிறது.

விலை விபரம்

   * iPad 2, 16 GB with Wi-Fi Only is for $499
   * iPad 2, 32 GB with Wi-Fi Only is for $599
   * iPad 2, 64 GB with Wi-Fi Only is for $699
   * iPad 2, 16 GB with Wi-Fi+3G is for $629
   * iPad 2, 32 GB with Wi-Fi+3G is for $729
   * iPad 2, 64 GB with Wi-Fi+3G is for $829

இதில் 16 GB, 32 GB, 64 GB என்பது அவற்றின் சேமிப்பு அளவை (Memory Card) குறிக்கும். Wi-Fi Only வெளியீடுகள் Wi-Fi மூலமாக மட்டுமே இணைய இணைப்பை பயன்படுத்தும்படி இருக்கும். Wi-Fi+3G வெளியீடுகளில் 3G வசதி மூலமும் இணைய இணைப்பை பயன்படுத்தி கொள்ளலாம்.

Mcafee ஆண்டிவைரஸ் பிளஸ் 6 மாதம் இலவசம் - பேஸ்புக் பயனர்களுக்கு

2011-03-01T12:01:00.000-08:00

கணினியை வைரஸ்களிடம் இருந்து பாதுகாக்க எத்தனையோ இலவச ஆண்டிவைரஸ்கள் வந்து விட்டாலும் வணிக ரீதியிலான ஆண்டிவைரஸ் மென்பொருள்களுக்கு இன்னும் மவுசு குறையவில்லை.

அவை இலவசமாக கிடைக்காதா என்று தேடுவோரும் உண்டு. அவற்றை தவறான முறையில் கிராக் செய்து பயன்படுத்தி தொல்லைகளுக்கு உள்ளாவோர் ஏராளம். பிரபல ஆண்டிவைரஸ் நிறுவனங்கள் சலுகையாக தனது மென்பொருள்களை சிலமாதங்கள் இலவசமாக வழங்கி வருகின்றனர்.

ஆண்டிவைரஸ்களில் மேகபே (Mcafee) பிரசத்தி பெற்றது. இதன் ஆண்டிவைரஸ் பிளஸ் மென்பொருளின் விலை $27.99. பேஸ்புக் பாவனையாளர்களுக்கு தனது ஆண்டிவைரஸ் பிளஸ் மென்பொருளை ஆறு மாதங்களுக்கு இலவசமாக வழங்குகிறது Mcafee.

இந்த சலுகையை பெற அவர்களுடைய பேஸ்புக் பக்கத்திற்கு செல்லுங்கள். உங்களுக்கு பேஸ்புக் கணக்கு இருக்க வேண்டியது அவசியம்.

1. அங்கே லைக் (Like) பட்டனை கிளிக் செய்து ரசிகராகுங்கள்.

2. அடுத்து உங்கள் நாட்டினை உள்ளீடு செய்து “Get Yours Now” பட்டனை கிளிக் செய்யுங்கள்.

3. வருகின்ற விண்டோவில் "Allow" கிளிக் செய்யுங்கள். உங்கள் Mcafee கணக்கு உருவாக்கப்பட்டு விடும்.

4. உங்கள் Mcafee கணக்கிற்கான பாஸ்வோர்ட் உருவாக்கி கொள்ளுங்கள்.

5. வருகின்ற விண்டோவில் "Download" பட்டனை கிளிக் செய்தால் புதிய பக்கம் திறக்கும் அங்கே இலவச ஆண்டிவைரஸ் தொகுப்பை தரவிறக்கி கொள்ளுங்கள்.

ஆறுமாதம் மட்டுமே இலவசம். அதன் பிறகு கட்டணம் செலுத்த வேண்டி வரும் என்பதை கவனத்தில் கொள்க.

வோடாபோன் Mi-Fi - இணைய இணைப்பை பகிர

2011-03-01T11:18:00.000-08:00

வீட்டுல ஒரு இணைய இணைப்பு + அலுவலகத்தில் ஒரு இணைய இணைப்பு + வெளியூர் சென்றால் அதற்கென்று தனியாக இணைய இணைப்பு.

ஒரே இணைய இணைப்பை டெஸ்க்டாப் , லேப்டாப், மொபைல் என்று பகிர்த்து கொள்வதில் உள்ள அசௌகரியங்கள். இவற்றை எளிமையாக்க வந்துள்ளது வோடாபோன் Mi-Fi .

இது Wi-Fi ஹாட் ஸ்பாட்டாக செயல்படுகிறது. இதனை நீங்கள் எங்கு வேண்டுமானாலும் எடுத்து செல்லலாம். இதன் மூலம் உங்களிடம் உள்ள ஒரே 3G இணைய இணைப்பை ஐந்து வெவ்வேறு கணினிகள், மொபைல்கள், லேப்டாப்கள் உள்ளிட்ட Wi-Fi வசதி உள்ள உபகரணங்களில் பகிர்ந்து கொள்ள முடியும். எந்த மென்பொருளும் இன்ஸ்டால் செய்ய வேண்டிய தொந்தரவு இல்லை.

கையடக்கமானது. வீட்டில் ஒன்றிற்கும் மேற்பட்டோர் ஒரே நேரத்தில் இணையத்தை பயன்படுத்தி கொள்ள முடியும். தாராள மனப்பான்மை உள்ளவர்களாக இருந்தால் உங்கள் நண்பர்களுக்கும் இந்த இணைய இணைப்பை பகிர்ந்து கொடுக்கலாம்.

இதனை சுவிட்ச் ஆன் செய்த உடன் உங்கள் கணினியில் Wi-Fi தொடர்பு இணைப்பு பெற்று விடும். நான்கு முதல் ஐந்து மணி நேரம் பேக்கப் நிற்கும் என்கின்றனர்.

பல்வேறு தேவைகளுக்காக பல இணைய இணைப்புகளை வைத்து பில் தொகை எகிறி அவதிப்படுபவர்களுக்கு இது ஒரு வரப்பிரசாதம். இதன் விலை ரூ. 5500.

மேலும் விபரங்களுக்கு இங்கே சென்று பாருங்கள். http://www.vodafone.in/3gworld/pages/3g_serivces.aspx?cid=mum

மக்களே இது ஒரு செய்தியாகவே உங்களுக்கு தந்துள்ளேன். உங்கள் ஏரியாவில் வோடாபோன் இணைய வேகம் எப்படி உள்ளது, சேவை எப்படி உள்ளது என்பதை அறிந்து கொண்டு இதனை வாங்குங்கள். விசாரிக்காமல் வாங்கி விட்டு சரி இல்லை என்று என்னை சபித்து விடாதீர்கள் :)

குறைந்த விலையில் ஆப்பிள் ஐபோன் மினி?

2011-03-01T10:39:00.000-08:00

ஐபோன்! இன்று வரை காசு படைத்தவர்களின் மொபைலாகவே இருந்து வருகிறது. நோக்கியா பல வித புது மொபைல் மாடல்களை போட்டு பார்த்தாலும், கூகுள் தனது ஆன்டிராயிட் மொபைல் தளம் மூலம் புதுமைகளை புகுத்தி வந்தாலும் ஐபோனை நெருங்க முடியவில்லை.

அனைவரும் பயன்பெறும் வண்ணம் குறைந்த விலையில் ஆப்பிள் ஐபோன் புதிய மாடல் வெளியிடப்படலாம் என்று தெரிகிறது. இதனை ஆப்பிளின் சீஒஒ (Chief Operating Officer ) டிம் குக் ஒரு பேட்டியில் தெரிவித்து உள்ளார். ஆப்பிள் வசதி படைத்தவர்களுக்கு மட்டுமல்லாது அனைவருக்குமான விலை மலிவான புதிய ஐபோனை உருவாக்கி வருவதாக தெரிவித்து உள்ளார்.

பொருளின் விலையை கருத்தில் கொள்ளும் சீனா போன்ற நாட்டு சந்தைகளை குறிவைத்து இந்த தயாரிப்பு இருக்கும் என்று அவர் கூறி உள்ளார். இது இந்தியாவிற்கும் பொருந்தும்.

விலை குறைவு சரி. தரம் எப்படி இருக்கும் என்ற குறிப்புகள் தெரிவிக்கப்படவில்லை. ஆப்பிள் என்றாலே தரமானது என்ற பெயரை அந்நிறுவனம் பெற்றுள்ளது. எனவே இதுவும் கண்டிப்பாக தரமாக இருக்கும் என்று நம்புவோம்.