最佳服裝造型設計、最佳美術指導：《香港仔》
仲記唔記得套戲上之前，每個演員都有的角色poster？仲有紙紮屋紙紮車、灣仔模型、沖咗上岸隻鯨魚，成套戲的美術都有種「魔幻寫實」－－真係小說風格果種魔幻寫實呀，淨係呢幾下夠贏啦。霓虹燈的絢麗、紙紮的草根，邊個話佢唔係本土電影？

最佳攝影：《魔警》
太公分豬肉，搣開個橙都有幾kai肉。柑桔獎最佳攝影比《魔警》，純粹因為戲入面有一set鏡頭：個cam set死係吳彥祖大頭前面，佢就靈魂出竅咁行；個畫面係定嘅吳彥祖大頭，但後面四周啲嘢就不斷郁。當時覺得呢個拍法幾特別，港產片少見。不過，自拍神器普及之後，家下係人都拍得到呢個效果了～

最差動作設計：《竊聽風雲3》
唔好睇錯，係最「差」。無最佳，但要點名比最差。《竊聽風雲3》最後廢車場個一幕，想點？一班睇戲吹水朋友稱之為「踫踫車」！我撞你，你條女嚟撞我，我個frd又嚟撞你……抄埋一碟，完。劇本發得太大，明白埋尾要高潮畫面收結，但方中信殺咗人淆底獸咁著草，搞乜鬼返嚟「everything’s under control」一齊踫踫車？為咗個動作設計而同劇本、人物發展矛盾，錯晒。

【廣告時間】最佳新演員
我同你賭！一定係王菀之！黐線，5個提名佢有3個：《Delete愛人》、《分手100次》、《金雞SSS》！講緊香港電影金像獎呀！柑桔獎呢就從缺，揀唔到咪無囉。

最佳女配角：從缺
金像獎惠英紅《紅van》有提名，吳嘉麗《香港仔》無，又有無搞錯。惠英紅係《紅van》入面只係tvb咁既演繹咋。或者因為個角色係一舊煩膠，無乜發揮，仲衰過舊年佢攞女配的《殭屍》。返去睇下《神經俠侶》，果個先係「最佳惠英紅」。吳嘉麗係《香港仔》的演釋係好有說服力的，不過風塵女子係佢拿手角色，所以我覺得只值提名喇。

最佳女主角：從缺
又從缺？係呀。上半年睇完《香港仔》，覺得楊千嬅終於演得唔錯、自然，睇得好舒服得嚟，而唔係只不過演自己。當中對阿媽阿爸的牽絆，或要人開始大，長輩一個個咁走，先會明白個種「再無機會對佢好」的無奈。我一度覺得，楊千嬅會唔會又攞影后呢？！不過又咁講，楊千嬅始終未到收放自如；只係在於佢自己，《香港仔》係好大的進步。（今年的《五個小孩的校長》都不錯，不過我覺得佢係《香港仔》的演出稍勝。因為《香港仔》係淡淡的流露，難度高啲啲。）

最佳男配角：吳孟達《香港仔》
曾江《竊聽風雲3》、吳孟達《香港仔》，兩個父親，好難揀。前者外放，後者內斂；曾江係霸道惡父，但心底都係錫個女的，人在其位，太多原則，係祠堂鬧女一幕的愛怒交纏，好精彩。吳孟達果種無咩講嘢，好多感情都放晒係心入面，佢有佢自己生活，收收埋埋，張力自然無前者咁強。不過，我一向認為「收」難演過「放」，就係達叔無當面同楊千嬅講過一句「我為你好」、「我好錫你」都感動到人，呢一下，達叔贏咗。

最佳男主角：從缺
揀唔到之下，我仲特登拿拿臨去睇《暴瘋語》，睇下劉青雲演成點。其實《暴瘋語》主角係黃曉明（而佢既演技係差到我連望住佢個樣都覺得難受），劉青雲一向都係咁好，《暴瘋語》入面交出一貫上乘演出，無話好突破／特別。《暴瘋語》都無，更何況《竊聽風雲3》呢？我嫌劉青雲個角色的小動作就夠蝦蝦霸霸，但心底太善良，喺惡的時候根本唔夠惡。吳彥祖？《魔警》佢係好大進步，但同楊千嬅的情況好似，未到影帝級，未夠說服力。

最佳導演、最佳編劇：彭浩翔《香港仔》
最佳電影：《香港仔》
不停從缺……都仲揀到Best Picture既。《香港仔》絕對唔係彭浩翔的最好，但已經係2014我的最好。（好多時呢啲獎既嘢，睇對手架咋。）拍群戲，好講導演控唔控制到。一家人各有支節，該散時說各自故事，該合的時候要有主線將所有角色拉返埋一齊。主次分明，條條線好睇，係導演的工夫。當然，咁彭浩翔自己係編劇，佢一向好清楚自己要講一個咩故事、要拍咩同點樣拍。

特別獎項－－金柑桔大獎：《無涯：杜琪峯的電影世界》
港產片經歷完2013年《激戰》、《殭屍》、《狂舞派》的高潮之後，2014年又落返低潮。寄予厚望的《竊聽風雲3》、《魔警》、《紅van》全部唔掂，你睇上面勁多從缺就知。反而到12月底，睇咗呢套杜琪峯記錄片《無涯：杜琪峯的電影世界》，必須比個特別獎佢，唔係比杜琪峯呀！呢套係記錄片！係香港演藝學院碩士生林澤秋的畢業作品。套戲當然係以杜琪峯拍戲的段落為主，但側面帶出香港電影近十幾廿年的起跌，港產片同社會的扣連，我直頭覺得《無涯》為港產片寫咗一個重要注腳。我因呢套寫咗一篇長文：【無涯：杜琪峯的電影世界－－港產片係香港的明信片】，有興趣可以睇睇。

※　※　※

又係個句：點解《雛妓》、《黃金時代》、《黃飛鴻之英雄有夢》完全唔見影？話明一人意志，我都無睇，咪唔入圍囉～仲有《那夜凌晨，我坐上了旺角開往大埔的紅VAN》一個獎都無！因為真係好差，開咗個頭，乜都無嘗試過解或鋪排去下集就完，好不負責任。唔係不停講金句、淨係呼應社會就叫好睇，電影始終係電影，故事、主題，都係好緊要的。

下年再見！

重溫：第一屆香港電影柑桔獎2013

（以上所有圖片來自互聯網）

＊港版海報好核突。圖為原版海報，但又真係同Looper勁似。圖片來自互聯網。

《逆時空狙擊》！
呢個名真係好娘！「逆時空」都啱嘅，但「狙」乜Ｑ「擊」？媽呀，好TVB呀！我睇完套戲先留意到英文名係Predestination－－「Pre．destination」，「預前．目的地」，戲入面不停咁提「destination」；又或者一講「Predestination Paradox命定悖論」，就完全明白了（兼劇透了:0)）！

出到「命定悖論」，可想而知，《逆時空狙擊》係玩「時空梗」的戲，而且我都好相信要係對time travel有一定認識，起碼知道咩係命定悖論，先會體會到套戲最癲最好睇之處。

如果對time travel無咩認識，可能會覺得故事的時空好亂，但放低晒理論的包袱，欣賞角色設計之妙、女主角演技出色，亦覺不錯。尤其後半入局開始不停穿越，推進快到透唔到氣咁緊湊。（但唔好期待有好多打戲、特技、爆炸呯呯呯喇！幾乎全文戲黎架！）

※　※　※
劇透開始～～～
打算睇戲的千其唔好睇劇透，一係跳去文末，一係睇完套戲再返嚟。
※　※　※

個故事最癲的，當然係從頭到尾都係．同．一．個．人。主角毀容，變成另一個樣，先可以由兩個人去演同一個角色。再加上「炸彈犯」，男主Ethan Hawke、女主（未變性的Jane）、女主（已變性的John）、炸彈犯、唔爭在加埋Jane個女，五個人五個角色，fake晒觀眾。

１）一開始，男主角按任務去到1970年，扮成酒保。有個小帥哥入黎，酒保同佢吹水，吹吹下，小帥哥講佢自己的故事，爆出一句：「When I was a little GIRL…」當下我都嚇一嚇。小帥哥真係幾帥下，我心諗，咁似Dane DeHaan（新綠魔仔），我仲理所當然地以為係仔來的。到佢爆出呢句，突然又發現「咦，真係女演員黎喎。」

２）Ethan Hawke喺公園帶已變性的John去1985年總部前，Ethan Hawke講咗句：「我都好愛佢（1X歲未變性的Jane）。你好快會知道我係邊個。」其實呢度已經估到同佢地係同一個人。但導演無用好娘屎的playback加旁白講講講返你知佢點樣串連返係同一個人，而只係用畫面，一段段咁比你睇，完場我呆咗。我知道佢地係一個人，但條線具體細節係點穿連呢？我突然變左吳若希：佢點做到架？佢點做到架？……

3）搞咁耐先出post，因為諗左好耐。我唔詳解了，解說圖按此。由Jane變John唔難明，John變Ethan Hawke諗返佢毀容亦明晒；到Ethan Hawke殺炸彈犯，佢不段斷話「我唔會變成你」，但電影最後一個shot，佢話「I miss u dreadfully.」。【因為想見你，所以我要成為炸彈犯等你來殺我。】當我諗到呢度，「叮」一聲，穿返好成個故事－－好心寒，又悲哀。

因為Predestination Paradox命定悖論，歷史係唔會因為有時空旅行而可以改變到。簡單講，我時空穿梭回到過去諗住阻止一場火災，點知就係因為我返咗過去，唔覺意打爛盞火水燈，單火災先會出現。呢個Loop係整定，絕對整定，無可能打破的。

套戲主角一生，就係一個完美的Loop。佢出生因為自己，佢成為特工又因為自己，佢變成炸彈犯又係因為自己－－當你做所有野就係為咗要成就「既定」的悲劇，唔悲哀咩？

※　※　※
劇透完
※　※　※

《西遊記大結局之仙履奇緣》講的很似，至尊寶穿越時空奔走500年，只係為咗成為馬騮精，既唔係為搵返白晶晶，都唔係為咗紫霞仙子呀。

命定悖論下唔存在平行時空，雖然我地唔係主角咁一個Loop，係自己的主觀角度睇，都係線性向前，好似播放一套電影咁，由00:00開始，00:01、00:02咁向前，進行時我哋唔知下一秒會發生咩事，不過編劇已經寫好晒劇本，導演已經拍好晒。我哋睇未來的所謂的「向前」，只係為完成「冥冥之中」已定的「歷史」。歷史既是過去，也是未來。好灰。

※

有人話，《逆時空狙擊》再發展咗《Looper》個concept，我唔同意。《逆時空狙擊》係命定悖論，歷史不可改變；但《Looper》到最後係改變咗歷史，突破到個圈圈，留咗一線希望。《逆時空狙擊》係宿命，故事想講，悲劇係注定的。

不過同《Looper》比，《Looper》整體氣氛、鏡頭、動作、場面贏晒，仲有男神布斯韋利士，無得輸架《Looper》。

《逆時空狙擊》最癲最好睇的，係喺「整定」的圈圈入面，佢好精彩咁表演咗一次扭橋，絕對令人目瞪口呆。

（關於命定悖論係戲內的細緻應用，太geek太趕客了。而家已經咁長氣，我本來想講有無bug呢個問題就只好算了。）

2) Harrison Ford > Chris Pratt
其實都傳咗一段時間，Chris Pratt會接手做Indiana Jones。2008個集Indiana Jones原意係想交棒比沙拉保夫嘅，佢條死仔邊得丫，做來做去都只係死小孩。（Fury算有啲進步，係hehe角度上睇～）印象中見過Chris Pratt話演Guardians of the Galaxy的Star Lord時，已經係參考福伯的Indiana Jones / Han Solo；再睇返Chris Pratt黎緊套Jurassic World的劇照，真係好有Indiana Jones的氣質。

3) Bruce Willis > Josh Duhamel
我認，呢個純粹私心。12年布斯韋利士套Looper，係Joseph Gordon-Levitt做佢後生，真係辛苦佢了。好多fans話，要JGL夾硬化到個樣似布斯韋利士鬼咁心痛，我就無心痛嘅，不過真心唔係好似。布斯韋利士呢種粗中有細的硬漢型，我反而想起Josh Duhamel。中意Josh Duhamel係佢套美劇Las Vegas開始，飾演一個外剛內柔的賭場保安阿頭，更多人認識佢應該係Transformers入面個美軍軍官。佢大可以行布斯韋利士條硬漢路線，拿拿臨拍科幻動作大片，再唔係埋堆做superhero，咪鬼再拍愛情小品喇！上唔到一線架！（又，Bruce Willis同Josh Duhamel真係合作過，12年的Fire With Fire，不過香港直頭無上，唉。）

4) Jeff Bridges > Ewan McGregor
如果你有睇Remake個套Tron，就知我想講咩……Jeff Bridges個角色（老年版）根本就係一個Jedi！仲要係Obi-Wan黎－－樣就真係唔太似嘅，感覺下啦大家～

5) Michael Caine > Jude Law
核彈－－我孤陋寡聞，我淨係識管家阿福，我無睇過Michael Caine後生的戲，唔知佢係咁風流倜儻、咁靚仔有型！同（未Ｍ額）的Jude Law一模一樣！！左定右，邊個係Michael Caine邊個係Jude Law？傻傻分不清呀～

6) Robert DeNiro、Al Pacino > ???
上一輩男影星，點可以無Robert DeNiro同Al Pacino？但我一野就諗到黃秋生同萬梓良……如果要拍港版Taxi Driver，只有黃秋生可以；諗起萬梓良，係因為佢都做過Al Pacino喺The Devil’s Advocate個撒旦（舞台劇版）。其實Robert Downey Jr都有啲似後生的Robert DeNiro嘅，咁係唔係要拉埋Eric Kwok落水？哈哈哈哈哈……

（所有圖片來自互聯網）

＊我係癡漢，死盯住Deunan對波（左）。喂，唔得喎，硬成咁既？ （圖片來自互聯網）

《Appleseed Alpha》

利申：荒牧伸志黎講，我無睇Appleseed，反而有睇《吹波糖危機》（荒牧伸志負責機體設計），同埋前排先出的《Evangelion: Another Impact》。

從不懷疑荒牧伸志的機械處理，今次睇Appleseed Alpha都係一心想睇下日本CG去到一個咩程度。（因為網上已有好多對故事的劣評~_~而個故仔真係好悶。你估到晒劇情發展的前傳咁。）

CG黎講，場景已經做到真既一樣。基本上我地而家睇真人科幻電影，好多場景都係後期CG。例如《悍戰太平洋》成個香港景都係畫出黎；不過Christopher Nolan講到明《Interstellar》基本上係無用過CG。

講遠左，返黎。Appleseed Alpha入面的場景做得好真。但因為已經有好多電影做緊，我一啲都唔驚訝，呢個只係基本要求。（但同場我隔離位的小毒毒好似發現新大陸咁不停自言自語：「嘩！」「真既一樣！」「好勁！」）

反而一直以來CG動畫做得唔好的係人物，表情、動作，呢個先係今次睇的重點。

Appleseed Alpha的人物表情、神態係有進步，尤其係生化人「雙角」，由於佢個樣唔係人咁肉色，性格又浮誇，容易啲表現。真人的面相都有進步，我觀影時係覺得女主角Deunan的表情幾唔錯，但事後諗深入啲，其實Metal Gear Solid的宣傳相，蛇叔已經真人一樣，佢塊面的texture表現到男人粗糙的鬚根同皮膚，lighting自然更突顯到texture的細緻。如果Metal Gear Solid的Still已經做到，咁睇，Appleseed Alpha係Animated，兩者相比大概只係同等水平，其實未算突破。

而我唔滿意Appleseed Alpha的，係人或物飛開、被擊飛，應該係墜住咁飛出去，呢種下墜力始終表現得唔好。仍然係硬生生好「虛」咁「移」過去。即係Deunan跑黎跑去，佢心口應該要「拋下拋下」咁先好睇嘛！唔係囉！戲入面硬掘掘兩團肉，咁你個人設開咁大個窿擠對波出黎為乜？嘥晒呀！

※　※　※

【講多兩句：CG Animation只求像真係死路一條】

睇動畫咁多年，睇住CG技術一日千里，我一直思考：究竟動畫的終極追求係唔係「像真」？

坦白講，我唔同意。追求「像真」，係一個過程，唔可以係終極。一路以來，發展CG Animation的歷程上，係朝住像真的方向。應用到喺game play、真人電影上，CG係幫到好多。但回到動畫本位，你要像真，咁點解唔拍真人電影？我反對盲目咁要求動畫追求「似真實」、「同真既一樣」，咁係忘記左動畫本身係咩，佢特質係咩。

動畫吸引我之處，在於佢能夠天馬行空，畫面上超乎常規、克服物理限制。你中意扭到點就點，換句話說，呢一種係「仿真」，佢只係一部分模擬真實，更多更多係想像、幻化，甚至係轉化（例如stop-motion用不同材料去扮返佢想表現既野）。果種「不像真」或「仿真」的趣味，始終係動畫「本色」，先至係動畫之所以有別於真人，佢最獨特之處。（所以我其實一向唔太中意睇CG animation，我中意手繪、Stop-motion。）

既然真人、動畫兩者係完全唔同類型、追求的質感係咁唔同，咁點解我要拍動畫去追求真人電影既野？咁唔單只係捨易行難，直頭係錯配。

係，兩者可以互滲，真真假假、虛實相承咁先好睇。如上例《悍戰太平洋》賣的，就係將機械人動畫的精神抽出來拍成真人電影，像真係佢的追求，CG只係輔助。

而落返去Appleseed呢一種CG Animation，係像真之外，係唔係應該要有更高層次的追求呢？係。不過就Appleseed Alpha黎講，睇唔到。佢而家只係像真條路上努力緊，條路行到一半咋。

單純只係追求像真，咁CG Animation好難去到更高的藝術層次，只能係作為一種技術地為真人電影或者game play貼金抬轎。咁CG Animation點突破？我暫時未有明確答案，大概可能係機械或者場景上的「像真」，而人物、動作上有「不像真」的幻想元素。尤其係機械設計上，可能係cyber punk果種機械同人的完美結合（Ghost in the Shell？），又或者類似庵野版Cutie Honey的特攝式超誇張動作。希望發展落去，業界會摸出明確的路向。

Trailer: https://youtu.be/VrgT8u5F4-4
‪#‎蘋果核戰Alpha‬ ‪#‎AppleseedAlpha‬

＊第五集，A Good Day to Die Hard劇照。圖片來自互聯網

天下間只有這個大叔可以光頭得咁sexy。
2009年的Surrogates，戲裏有另一個「完美」的Bruce Willis「替身」。所謂完美，係外貌上的完美，咁理所當然是有頭髮啦。呢個頂住一頭金髮，三七分界，pat蔭fing fing下的Bruce Willis……實在是好女人形。女人形到不堪入目，不堪入目到我連套戲都無睇。咁多年以來，除左早年成名時，大部分時間佢都keep住好短的毛毛skin head頭。突然之間要佢有好多頭髮好長頭髮，簡直係將Bruce Willis（係我心中）的形象破壞晒。

「地表最強老爸」的稱號，本來是Bruce Willis的，係近年先拱手相讓畀Liam伯伯。
Bruce Willis的成名作Die Hard，第一、二集救老婆，第四集救女，第五集救仔（掉底Jack一個佢死硬），唔好忘記，仲有成套戲都係唔想個女中意賓艾佛力條死仔的《絕世天劫》！！呢套Bruce Willis唔用打生打死的方法去救個女，而係去炸咗舊殞石！你估Bruce Willis真係好想救地球，其實佢只係想救阿女咋！到最後仲要出埋啲老套劇情（唔係點叫出自米高悲）：為左阿女，賓艾佛力你條死仔唔可以死呀，你應承我一定要娶佢一定要對佢好，仲有話佢知我愛佢！（以上唔係真實對白，係我根據劇情的自己腦補。）跟住推走賓艾佛力，一個人完成任務犧牲自己～～強大到上太空唔要自己條命都要救女……鳴呀！翻睇最後佢同阿女視像通話個段我又喊到死！Coz I’d miss you baby, And I don’t wanna miss a thing~~

每次望住Bruce Willis，尤其係佢做John McClane時，就覺得個心畀啲小鹿狂撞。
第一次睇Die Hard，十歲都唔夠，腦筍都未生埋。戲入面Bruce Willis飾演的John McClane，喺我個條未生埋的腦筍入面，好好打、好爆、好man、好型、好勁！（十歲都唔夠係詞彙貧乏啲架喇）。一直到1999年的《鬼眼》，套戲唔單只係Bruce Willis開到新戲路兼切也馬蘭一炮而紅（不過兩個都係只此一次），更重要係因此勾返起我果條已經生埋左既腦筍深處的記憶－－Die Hard入面果個打不死的「牛仔」John McClane，咪就係呢個咁好戲的大叔！
即刻翻睇Die Hard，大咗詞彙豐富返啲，先講得出John McClane的膽大心細，用情專一。第一集佢係天台用消防喉綁住自己就跳落樓、第二集炸左架飛機同上面的壞人，綁自己係個駕駛位度彈自己出去，佢既魯莽其實係佢既勇氣。支撐住佢每次做大鑊的，唔單只因為佢係紐約警察，更大的力量係因為要救老婆仔女，即使佢老婆基本上已經離意已決，佢仍然好似傻佬咁去老婆公司留下等佢，去機場接佢。裡裡外外，John McClane好似一個role model咁，如果我係男人，我會想學佢；因為我係女，自然睇到雙眼發光，心如鹿撞。

Superhero成行成市前，John McClane已經係Hero。
John McClane唔需要好似美國隊長咁係強化人，或者Iron Man咁有超強裝甲，佢每次都係被壞人整到爛身爛世，第一集仲要慘到無鞋著踩到一腳都係玻璃（諗起就覺得痛）。去到第四集無啦啦變左superhero，一個地球人都可以拉跌架轟炸機，癡線，就算係「地表最強老爸」都無理由做到啦，呢一集最唔好睇。第五集黎講，今次用架貨車幫拖先扯得跌人地架直升機，好似合理返啲。John McClane係Hero，唔係Superhero，第六集希望佢地記住呢點（係呀Bruce Willis 親口講話自己仲跑得仲打得，會拍第六集）。而家有Avengers，唔使John McClane去做superhero架喇。

我唔係無啦啦寫Bruce Willis的。尋日3月19號，係我男神的60大壽。60歲都仲要拍Die Hard 6，你真係好堅。
Happy Birthday Bruce Willis!!
你永遠係我唯一一個男神。

＊圖片來自互聯網

Chappie.
《超人類：卓比》。

Trailer話咩「His Mission is to Save Mankind」，錯呀錯呀！套戲要講的唔係Transformer機械人救地球，無典型大奸大惡的大壞蛋，主角群更係一班賊；套戲要講的，真係機械人、人工智能可以去到一個咩地步的故事。用標題黨的講法，就係「給機械人（及機械人愛好者）的情書」。

※

我地先溫一溫書，咩係「機械人三定律」？
科幻小說大師艾西莫夫（Isaac Asimov）係佢既作品入面，提出機械人必須遵從的三大法則：
一、機械人不得傷害人類，或因乜都唔做而使人類受到傷害；
二、除非違背第一定律，機械人必須服從人類的命令；
三、在不違背第一及第二定律下，機械人必須保護自己。
呢個定律係設計人工智能時的天條，以避免機械人獨立思考到一個的地步，甚至會傷害人類。當然，係某啲情況呢三條法則係會有矛盾的－－呢個就係可以講故事的地方了。

戲入面無對白上咁提過「機械人三定律」，但已經暗藏咗係故事入面。Chappie來到呢個世界，真係好似一個BB咁乜都唔識。創造佢的迪安就教佢唔可以做壞事，唔可以犯法，唔可以殺人，亦即第一法則。第二法則，Chappie純真如一個小朋友，Yolandi、Amerika、Ninja教佢做乜就做乜，學晒Amerika的壞習慣之後，迪安好堅持話「我係你maker！你一定要聽我講！」佢又聽聽話話。第三法則，Chappie求生的意志好大：「I don’t want to die, I want to live.」呢個亦係後段故事的一大主線。而喺求生同救人之間，當第一、二法則同第三法則矛盾，Chappie堅持第一法則，救人重要過救自己。

Chappie呢一個決定，係迪安寫的程式入面已經set好左，三大法則矛盾時必須以第一法則為先；定係程式只賦予Chappie產生情感的能力，Chappie係基於佢自己身為一個「意識」而去捨生取義？見到一個機械人「有血有肉」至此，我相信係後者。連程式都做到「就義」、故事高潮暗中呼應「機械人三定律」，果種感動同迪安成功寫到Chappie個Program一樣咁大。（我對機械人題材的愛大到咁～）

※

戲中Chappie要救自己，帶出一連串的思考，呢一個先係套戲的題旨。
＞意識是甚麼？
迪安話，我地唔知意識係咩，所以意識轉移唔到。點知就喺Chappie尋求解決方法的時候，誤打誤撞搵到自己的意識。（不過我有樣唔滿意，Chappie係機械人，應該係插線落個CPU，而唔係好似人咁戴頭盔囉。）

＞知道意識係咩、可以拎得出黎了，是否等於控制到生命？
故事去到最後，佢係做咗比你睇，佢係得既，控制到既。呢度導演編劇無再發展落去，無落道德批判。呢套戲就好似一個實驗咁，話比觀眾知，如果人工智能可以有自己的思想、感情、記憶，佢會點。係唔係一定要有批判呢？我覺得唔一定，導演決定咗最後用「情」去感動人，呢個先係導演更想講的野：機械人都可以有感情，佢有自己的意識，我地應該尊重佢as一個人。（其實咁已經係具批判意味的價值觀。）

＞承上題，生命都控制到，咁究竟「生命」是甚麼一回事？
當人類呢個肉身再hold唔住意識的時候，身體衰壞，Chappie、Yolandi相信意識只係去咗「下一個地方」，呢個就係我地本來相信生命的形態。但如故事發展，意識好似file咁可以存係USB，可以再安裝係另一個身體，咪即係話人可以長生不老？呢個就係上題講到的道德問題：如果人可以長生不死，唔講環境問題、資源問題住，係人類群體危機－－邊個可以決定咩人唔使死？點解佢唔使死？咁會引起階級戰爭、違反自然、衝擊宗教信仰，雖然我係無神論者，但人類唔可以當自己係神咁凌駕係生命上面。我唔係Chappie，無佢咁聰明，我只知道萬萬唔可以比人類擁有控制生命要幾長就幾長既能力，太危險。

當意識可以經程式計算而產生，亦可以數據化同轉移，我為前者而感動，那是機械人科技的突破；但同時很怕，萬惡的人類一定會利用黎做壞事。導演話，佢打算將Chappie寫成三部曲，或者下一集就係講意識轉移的禍害。咁今集係機械人的「情書」，下集就係機械人的「惡夢」。

※
小趣聞可以講多兩句：
Yolandi同Ninja係真名，戲中唔少衫係私伙，佢地屋企的畫呀道具呀紋身呀logo呀，美指上好多野都源於佢地。其實佢地係南非rap組合Die Antwoord，套戲仲用左好多首佢地的歌（Yolandi把聲咁易認，勁細路女）。Yolandi同Ninja亦真係兩公婆，有一個九歲的女。不過有話佢地已經分開咗。

我唔係杜SIR粉絲，佢嘅戲其實睇唔足，而且唔中意《放．逐》個種好多空鏡，玩風格多過講故事的戲。本來真的沒打算看這套關於杜琪峯的記錄片。但比我更熱愛電影的小尾點名叫到－－即係無死錯人－－即刻去睇！

【杜琪峯電影幕後花絮】
這套長95分鐘的記錄片，感覺像看了兩個半鐘，因為內容太豐富了。導演林澤秋跟著杜SIR到雲南拍《高海拔之戀II》、在珠海拍《毒戰》、在官塘拍《盲探》，訪問杜SIR、銀河映像團隊、劉青雲、任達華、劉德華、林雪等等；還有杜SIR其他電影的片場花絮。

記錄片就由拍戲的花絮講起，《十萬火急》怎樣在有限預算下拍真火；《大事件》近7分鐘的長鏡頭，原本打算拍10多分鐘；《鎗火》人物走進商場，走位與場景配合，以及大銀幕的關係；《孤男寡女》發掘sammi的喜劇細胞；《PTU》一場完全無對白的劇本：「電筒燈、上樓梯」，怎樣變成任達華上樓，樓下黃浩然一班人你眼望我眼……單是一次過看這麼多套戲的making-of，已經夠好看。

【港產片=黑道故事】
然後杜SIR回說在《高海拔之戀II》片場，對大陸工作人員的憤怒：「拍戲就係要簡潔，片場每個人都有自己崗位自己要做既野，我地喺香港好簡單，係咁就係咁；大陸拍戲一大班人幾十架車，都唔知做乜？」（大意）由這些拍攝片場的小事，講到北上拍戲。

說到合拍片，話題一轉，回到近幾年人人在問的問題：香港電影還可以怎樣拍下去？有人全面北上，戲都不再是拍給香港觀眾了，我戇鳩鳩入場係我蠢。（《特殊身份》的陰影好大！）

杜SIR和游乃海（《大隻佬》、《黑社會》編劇，杜SIR話到明佢係銀河映像接班人）很堅持：「每一個城市總要有佢嘅電影。」這些話，我這些「本土派」常常講，也聽很多，但怎樣實行，仍有很多未知。杜SIR在片中說，他不喜歡低俗路線（《3D肉蒲團》、《低俗喜劇》模式）。他的風格，正正是香港電影最光輝時代至今，仍然是最拿手的類型：黑社會、警匪、鬥智、動作場面、鎗戰、陽剛味。

吳宇森的《英雄本色》為典型，到杜SIR不斷扭，《暗花》、《暗戰》、《鎗火》、《全職殺手》、《PTU》、《大事件》、《黑社會》、《放．逐》、《神探》、《毒戰》、《盲探》，都是循這類型變化；還有不可不提劉偉強、麥兆輝的《無間道》，港產片一路走來，經歷過高峰低潮，始終一脈相承。

我不是說港產片死守，反而覺得這是香港電影最大特色，也是我們做得最好最優秀的。為甚麼不演看家本領，而去做吃力不討好的類型？面對全球化來勢兇兇，我很相信唯有用本土化才能與之抗衡。拍超級大場面，人家荷里活好我們幾百倍；拍情慾片，韓片早我們十幾年走在最前喇，香港人咁鬼保守收檔啦。歌舞片？香港有幾多人又唱得又演得？睇下寶萊活先啦。文青小品呢？台灣才有孕育文青的社會氛圍囉。

唯獨是黑社會警匪片，表面看好像是揸揸鎗，擺擺型pose，但我們與電影呼吸著同樣的空氣，看到的是自己有份的生活。《PTU》的官塘鴻圖道，《文雀》的電車風景，《黑社會》的棺材鋪，是我們熟悉的生活其中的。港式黑道風格只此一家，《無間道》去到荷里活變了《無間道風雲》已不是那回事；《變形金剛4》拍香港景也拍不出電車路的味道。本土黑道故事，在這裡發生，在這裡上演，那種在地、深入社區裡面、深入香港血液裡面的氣息，黑社會警匪片才是港產片的「本色」；好比婉約派之於宋詞，「友情、努力、勝利」JUMP三本柱之於日本漫畫。

（已經未講製作上港產片是如何的突破框架，如何匪夷所思的快、抵、靚、正。也就是記錄片一開始，杜SIR唔明大陸工作人員成班人戇鳩鳩做乜撚而爆粗怒鬧。）

【懷念百花齊放，求生存之道】
我覺得彭浩翔的小聰明、小品式趣味，是另闢蹊徑。從本土票房上看，他是成功的。（利申：我都幾中意佢啲戲。）而且，百花齊放不是更好嗎？有「本色」的黑社會警匪片，也有其他類型創作，種類夠多，在觀眾，有不同選擇，賞心樂事；在業界，有競爭才有進步，有製作才有機會磨練、去試。聽過一個說法，張家輝和古天樂，是最後趕得上港產片大量出品時期的本地演員。他們就是在那個咩戲都有，咩戲都接的年代中，不停磨練演技，才有今日成績。

我常常很羨慕70後，大我五至十年的朋友，他們十幾歲，開始獨立思考的年代，是80、90年代文化、出版、電視、電影百花齊放的時代。我看過《監獄風雲》、《跛豪》、《我在黑社會的日子》、《大時代》，但記憶很模糊；影響我最深的，已經是「明珠930」（《異形》、《Die Hard》）。我的年代是《家有囍事》、《九品芝麻官》、《東方三俠》、《東成西就》、《旺角卡門》，到《西遊記：月光寶盒／仙履奇緣》已經是90年代中期；再之後港產片經歷很長時間的低潮，那陣子人人以看港產片為恥了。

時至今日，合拍片的好與壞，毋須我多費唇舌，明眼人一睇就知。與其說要對衡全球化的電影市場，不如說如何不單純為賺錢而向大陸惡劣品味低頭，如何保住我們的文化特色，才是最困難的路。畢竟電影業內，太多太多人只向北／錢看：文化界功能組別議員馬逢國出到聲，叫你哋香港電影好應該北上合拍、成龍的《警察故事2013》根本就要改叫《公安故事》、王晶同黃秋生、杜汶澤、何韻詩絕交……所以當我們看到很本土、很本地的作品會非常欣喜，《狂舞派》、《打擂台》、《春嬌與志明》、《香港仔》、《歲月神偷》、《桃姐》……這類電影已成為港產片的一種走向，既講香港情懷，又可以入到大陸賺人仔，從中拿個平衡，是暫時所見的方向。

【有風骨才是電影作者】
《無涯：杜琪峯的電影世界》這記錄片由2011年開始拍攝，也拍到了2012年七一遊行。一般人覺得近一兩年社會氣氛突然轉變；杜SIR在2005年，即九年前的《黑社會》已經在說選舉。2006年，《黑社會2以和為貴》更像是預言。記錄片中杜SIR說：「而家香港啲有錢人，個個咪好似《黑社會2》嘅Jimmy仔咁囉！」Jimmy仔（古天樂）只想做生意，為了做生意就北望神州，上到大陸，結果被上面的人揸頸就命，人哋要你做古惑仔，你就要一世做古惑仔，連你個仔，你個孫都要做古惑仔！明明個制度係兩年選一次，佢要你世襲，你就要世襲，完全漠視制度，佢想點就點，因為咁樣係「為你好」、「為香港安定繁榮」乜乜乜……

據講，本片導演林澤秋擔心影響到杜SIR，所以剪掉許多杜SIR對時局、政治的看法。雖然片中就敏感話題的著墨不多，但就這一句：「我只是電影人，我的專業就是拍戲，就在自己專業內說該說的話。……民主，是一定要追求的。我就用我擅長的方法去講。」（大意）所謂的文人風骨、義氣仔女，我們在黑道電影中看到的骨氣、道義、人性，在杜琪峯這位電影作者身上，完完全全體現出來。

我自己也是出版、新聞界中人，在自己崗位能夠謹守的，就是這樣。風骨絕對不能當飯食，但起碼對得住讀者，對得住自己。違背良心出版，我不如去死。擦邊球也要講真相、堅決守衛廣東話同廣東粗口，就是我能夠做的，仆心仆命瞓身落去都要做到底。文化不能打倒共產黨，但文化抗共的真正意義，起碼都要守得住香港獨特的文化特色。

【香港的明信片】
記錄片中段，杜SIR在「鮮浪潮」的頒獎禮現場。現場司儀說了一句話：「香港電影，就係香港的明信片。」如果有外國朋友要我介紹香港，我一定會叫他看看港產片。這流動的影像就是香港文化的精髓所在──他性格多樣豐富，有文化、有內涵；時而風趣，時而沉鬱；既文藝又好動，聰明、醒目，討人歡喜。

愛正宗的香港電影，就是我愛香港這個地方的方式。我跟好幾個朋友說過，我覺得愛人好攰。我寧願將我的愛全部貫注畀呢一個孕育我成長的地方。

＊圖片來自互聯網

《Interstellar 星際啟示錄》，IMAX。
這篇電影筆記，注定是偏頗的。（放心，雖然我對那些黑洞、蟲洞略有心得，但這篇不是技術文，沒有理論，只有觀後感。）

你問一個科幻片迷，Nolan最新那套太空戲好看嗎？你只會得到一個答案，沒有例外：好看！－－請讓我細細道來。

宇宙是甚麼？夜裡抬頭望天，那就是宇宙。無邊無際、無法點算的星體、跨越時空、超越人類物理限制。我眼見這顆星與那顆星只有幾厘米距離，實際上它們相距幾千萬光年；那顆閃爍璀璨的明星，它的光芒來到地球給我看見時，其實早於幾憶光年前已爆炸消失。宇宙不只是我們眼見的模樣，許多理論、假設，只要有「想像力」，即使文科人如我，我心裡都有一個宇宙。一個永恆，而不斷死亡更新的宇宙。

電影為甚麼而存在？其中一個原因是「想像力」。偉大的電影有很多種，有的刻劃人性的善與惡；有的把人類幻想的事物「成真」，帶領觀眾去到現實去不到的地方，用「想像力」開拓人的「想像」。

Interstellar既是前者，描繪了兩（三？）對父女的感情，催淚至極；但在我，最感動我的，是後者。

Nolan將宇宙的宏大化成電影，將那些理論寫成故事、拍成畫面，在IMAX的巨幕上呈現給觀眾。當我親眼目睹黑洞的偉大，我像看見了「神」、看見了這宇宙一切的「創造者／毀滅者」、看見了「神蹟」－－黑洞的力量，強大得不容置疑；人類渺少得，我只是一粒沙、一粒塵埃。宇宙如宗教，令我崇敬得跪下，流着淚，像個卑微的信徒。

電影完結，燈開始亮，我心還在宇宙的感動當中，（這感動比中段Matthew McConaughey的催淚戲還要多好幾倍！）好想痛快大哭一場，但也太怪異了，當其他人開始議論紛紛起身離場的時候。我只能忍下去，把那個敬虔留給文字。

※　※　※

我說科幻片迷一定喜歡《星際啟示錄》，它一次過討論了許多和宇宙有關的思考。別的電影只能針對一點造文章，Nolan卻能夠集大成。以下含劇透。

Anne Hathaway在星球C，像《新世紀福音戰士》舊劇場版最後，真嗣阿媽那句VO（大意）：「當有一日，地球消失，我只係想有生物知道，曾經有人類存在過。」我記得很清楚，那個分鏡，初號機大字形躺著，在宇宙飄浮，背後有一道強光，似是某個發亮的星體。人類對於宇宙，或者毫無存在的意義。但既然我們在這裡存在過，不該如此滅絕。Interstellar向宇宙尋求答案，真嗣阿媽叫真嗣「生存下去，就有希望。」

Matthew McConaughey和Anne Hathaway在星球A浪費了幾小時，黑人隊員和地球已過去廿三年。新海誠早期有一短篇《星之聲》，也是說時間的差距。《星之聲》裡的女主角要去宇宙邊緣執行任務，她的時間和地球上男友的時間漸漸不再同步：女主角send一個message給地球所需的時間，愈來愈長，到後來她只花幾分鐘發出去到訊息，來到地球竟花掉十幾年－－思念的距離，不再相等。思念被宇宙拉長了，拉得太長太長了。當他們回到太空船見到黑人同伴，唏噓無言；再看到兒女的message，只能夠痛哭。

（劇透完）

備受批評的《太陽倒數》，我其實很喜歡的。太陽在戲裡是宗教一樣的存在。戲中的第一代、第二代船長都因太陽的偉大而「瘋了」。角色們「擁抱」太陽的力量而死，那都是出於對宇宙、太空的力量的崇拜。《太陽倒數》的劇情推進不夠好，Interstellar就是完美版本。

去年科幻大片《引力邊緣》，完全比下去了。《引力邊緣》九成的畫面是後期CG，甚至是只要Sandra Bullock和George Clooney的臉部表情，再Key落電腦畫面。Interstellar剛剛相反，絕大部畫面都是真實拍攝。Nolan討厭綠幕、討厭3D，追求菲林的真實感。在太空船望出去的宇宙景色，他用投影方法拍攝、星球A、B、C就在地球的極地取景。我留意到，主角們火箭發射、太空船起飛降落的內部鏡頭，有種粗糙感。我不肯定是我多心還是甚麼，這令我想到60年代登月的畫面。我不是說CG不厲害，只是Nolan那種排除萬難都要把「想像」變成「真實」畫面的決心，勝過了電腦。

※　※　※

Interstellar談感情，極之感人。所以我初時說非科幻迷都會覺得好看。但沉澱過後，我不這麼想了。非科幻迷可能會覺得結局「你講晒啦」。但我卻認為，黑洞裡面就是不可觀不可測，Nolan將他拿手的想像賦予理論支持，給了科幻片迷一個可能－－就是我上面說的「偉大電影用想像力開拓人的想像」。

寫完這篇筆記，我終於明白，為何朋友說要看三次。時間不能逆轉，唯有再次走進那個黑漆漆的地方，在銀幕再一次觀測黑洞－－唯有親身飛進黑洞中心，才能看清「奇點」和「奇蹟」。

＊圖片來自互聯網

《轟天猛將3》，就是看老餅們一把年紀仲可以貨真價實的呯呯呯呯呯。

系列來到第三集，觀影前，一心期待有甚麼突破。觀影後，我才明白，《轟天猛將》根本就不是要突破甚麼。這就像舊生會N年後重組，我不會期待舊友們還上台來那些跟本唔係天才既天才表演，只係想同大家話下當年，講下你當年點點點，佢當年又點點點。

於是，我地睇到老餅們或赤手空拳，或拿起刀槍，做返佢地的看家本領。電影結構亦是很穩陣的公式：起；一開場來個大場面；承，第二個大場面交代今集Boss；轉，後生新人加入，第三場大場面，唔夠打；合，都係要老嘢出馬，全部人出晒黎打大佬啦喂！party mode火力全開～呯呯呯呯呯！主角VS終極Boss打拳腳交！打贏！完～～～～（公式結構某程度上都係一種懷舊啊。）

看到一些評論說電影埋了超多彩蛋，我的電影資歷其實不夠廣，除史泰龍和州長（李連杰是大茄唔計啦），其他人，甚至係福伯同Mel Gibson，我都記唔到咁多。我留意到的，有兩個，都係史泰龍的：
１）史泰龍去搵後生仔埋班，第一個係爬緊山，史泰龍話：「沒咩嘢啫，我都得啦～」佢當年套《絕嶺雄風》，就係講史泰龍係攀山拯救隊高高手。套戲我睇過好多次，佢第一場我連分鏡都仲記得。
２）班後生被人捉晒，史泰龍一條友傷痕纍纍返去飛機倉，meet返州長前，係啲長長草叢中舉槍（圖），呢幕的野外感突然令我諗起《第一滴血》。（哈哈，呢個我認我係諗多左啲既～）
這些自嘲式彩蛋，呼應演員自身的代表作，也是「話當年」的方法啊。

今次故事結構同第二集分別不大，又一次的續集，就在各方面加強火力。大場面更爆，笑料更豐富，找更大牌的明星加入（福伯同Mel Gibson）。這樣各方面加重調味，就是第三集了～

即使提到加入後生仔呢個元素，上一集就有雷神細佬Liam Hemsworth（親細佬呀！唔係Loki囉～），不過佢係負責做死左然後激起其他人決心果個；而今集呢個「激起其他人決心」角色就由黑人Terry Crews負責之嘛。

硬要比較的話，我始終最喜歡第一集。米奇洛基在第一集跟史泰龍講起舊事，提到係波斯尼亞救不到那個女孩的事，就係呢一幕，只係呢一幕，提升左成套戲的層次，令到《轟天猛將》唔只係老餅們重振雄風，唔係單純的好人主角必勝壞人必死－－呢一班好人主角，都有失敗、年老、無能為力、內疚、逃避，非常之人性同真實的一面。米奇洛基就係選擇逃避、離開果一個。片段重溫：

完場時，我跟大家說我喜歡第三集多過第二，但回來再想，其實二、三分別不大，是場面大了，人多了，熱鬧了。（但無我男神布斯韋利士囉！）電影依舊是好看的，對我這些80後來說，《轟天猛將》不是超級英雄，不用賣後期特技，不用賣科幻，甚至劇情都不用賣了（唔使扭橋）。我入場，就是看你打！看你槍戰！看你大爆炸！！

一些碎碎念：
※電影中福伯話布斯韋利士「唔係度喇！」嚇到我個心離一離：「下？Mr. Church死左？！」好在福伯解釋返，Mr. Church只係「out of picture」－－即係仲有機會回窩。（跳起yeah！）

※朋友S覺得Antonio Banderas好慘，因為佢係《殺人三步曲》入面係陰沉殺手，接受唔到佢變左插科打諢的Mr. Bean。佢係戲入面真係好似Mr. Bean！！連啲動靜都似埋，點解會咁架？－－但我好中意呀！太好笑啦～～

※睇到第三集，我對龍格爾唔知點解有啲愛了。或者係對呢一個班底有了親切感。阿Christmas都係，等佢出場時我心裡唔知點解不停地數：「Christmas，Christmas，Christmas……」（佢個姓真係好奇怪，所以喺系列入面都被人玩過幾次～）

＊圖片來自互聯網

「我們在同一間屋裏，卻相隔萬里。」

《The Disappearance of Eleanor Rigby: Him & Her》。
一個故事，寫成兩個劇本，拍了兩套電影：一套叫Him，丈夫的角度；一套叫Her，妻子的角度。中文片名譯成《她消失以後》和《離開他以後》，故事就是由妻子離家出走開始。

她突然離家出走，並非無緣無故。

在Him的眼中，他不能理解她的行為舉動。他不愛她嗎？他當然愛她，妻子突然消失，他切切地找尋她的下落。過程中，才借對話輕輕帶出原來這對夫婦經歷過一件重大的悲劇。

到Her的角度，悲傷早就由電影第一分鐘開始。自殺不遂，離家出走，回到娘家。家人的過份小心奕奕，生怕勾起她的傷心事，反而令她更介懷。

Him和Her敘事的次序不同、同一場景中的對白不一、人物反應不一，突顯了二人處理婚姻危機的落差。Him相對冷靜，電影的推進就是他怎樣處理問題：妻子消失，去找她；獨力經營的餐廳撐不下去，無可奈何結業吧；找到妻子了，問她發生甚麼事，可以做甚麼去補救。Her卻困在悲傷之中，無法理清這些哀傷從何而來，該放哪去。

導演沒有很強調他們遇到的那件「重大的悲劇」，一來，在Him，他狠狠地將悲傷收起（這也是很男人的處理手法）；二來，Her那邊，她不能面對這件悲劇，只能極力逃避，離開令她難過的地方。

他們用著完全不同的方法面對苦痛，就像各自說著兩種語言，無法溝通造成二人之間的鴻溝。這心與心的距離，如兩度力把曾經纏繞的感情線各向相反方向拉開。毛線交織的纖維愈來愈疏，終至一個斷點，分開成兩條毛線。

她說：「我們在同一間屋裏，卻相隔萬里。」我不能理解你處理事情的方法，我在悲傷之中活不過來你從來不知。我一個人獨自面對悲哀，真的很悲哀。這不單叫難過，這叫孤獨。我不知道孤獨的感覺應該怎樣描繪說明，相顧無言，唯有淚千行。

英文片名中的「Eleanor Rigby」，來自The Beatles一首講孤獨的歌。電影裏的Her，正是叫Eleanor Rigby，一個孤獨的人。

所以我和她才會說：「我們在同一間屋裏，卻相隔萬里。」

溫馨提示：
※Him和Her的結局不一，我認為先看Him後看Her，心理上會好一點。從電影結構看，也是先看Him比較好，故事會順暢些。（但千萬不可只看一套，故事會變得一忽忽。）

※留意夫妻二人同場的幾幕。當中的差異，正是電影之所以要分為Him和Her的意義。差距造就不了解，不了解成了隔膜，隔膜變成孤獨，孤獨的她堅決離去。

※這套有Before系列那種真實淡然，也同樣把許多小細節收藏在對白之中。但就不及Before系列的對白往還精警。畢竟，她已經不想說話，也不太知道還可以跟他說甚麼話。

※論孤獨的命題，《觸不到的她》要好一級，角色的發展在在訴說了導演所思所想。不過，《她消失以後》和《離開他以後》用對比方式突出命題，大膽地分成兩部電影，手法新穎，就連觀影先後都會直接影響後感。此外，婚姻危機比科幻愛人在地得多，我想，許多人看Him & Her會有共鳴。（Him & Her的配樂也很好，拍得住《觸不到的她》。）

※10月2日，Him & Her同步上映，多謝「高登先」。送上電影Trailer:

※電影還有一個Them的版本，據說是全知的角度，導演把一些Him和Her剪走的片段加回。我好希望會有一個「最終」、「真實」的結局。但看來香港唔會有Them的正場了。