kimkim_or's Xanga

每日一歌#10 30/1~3/2: Red Hot Chili Peppers + Gothic Metal

Sun, 05 Feb 2012 23:39:15 GMT

「每日一歌」昂然進入第10周～今個星期介紹我非常喜歡的Red Hot Chili Peppers，另外會講下Gothic Metal！Metal已經唔小野，再加上歌德的暗黑華麗，就好似著住一襲厚重的黑紗裙fing頭！

30/01/2012 MON
Red Hot Chili Peppers - Otherside

真心想推介Red Hot Chili Peppers，總覺得他們在香港的知名度太低，他們值得更多人識。RHCP隨著結他手John Frusciante的成長，佢地的歌愈來愈深刻內省，Californation一碟，首首都是傑作。揀左我既all time fav：Otherside。想講下首歌邊部分最突出，諗落每個位置都咁優美豐富，我完全被這種沉鬱的聲音打動了。尤其喜歡其中兩句：「I heard your voice through a photograph／Pour my life into a paper cup」，多麼詩意的歌詞。
歌詞：http://www.lyricsfreak.com/r/red+hot+chili+peppers/otherside_20114741.html
利益申報：去年每日一歌已經一口氣介紹了3首RHCP，我是他們的Big Fans。所以周國賢新出隻cover album玩Otherside，我聽到喊。周國賢版Otherside：http://youtu.be/leVMV9-iAuU

31/01/2012 TUE
Red Hot Chili Peppers - Look Around

今日再推RHCP的新歌Look Around，你會聽到截然不同的RHCP。一來結他手John Frusciante已經離隊，二來好玩既funk先係佢地正宗風格。上次講到John的成長令RHCP愈來愈內省，呢種風格亦令佢同隊band愈來愈唔夾。最後John走左，新人Josh加入。Josh手結他雖然無John的渾然天成，但一樣精緻，再加上佢識好多樂器，為RHCP帶來唔同的音色。呢首Look Around，好玩又好聽，絕對係令我對佢地重拾信心之作。

01/02/2012 WED
Nightwish - Escapist

黎個重口味既：Gothic Metal（嚴格黎講係Symphonic Metal）！Gothic Metal，除左死腔、咆哮、男女高低音對唱，更係風格上，有歌德的蒼涼深邃和重金屬的侵略，交織出戲劇化效果～Nighwish主腦Tuomas手keyboard crossover大小提琴、管樂，旋律悅耳又powerful，難怪Nighwish跑出，好容易就入左主流。呢首Escapist係後期作品，換左新主音Anette。佢把聲已經較流行易聽，聽日聽下佢地舊作，先係堅料！

02/02/2012 THU
Nightwish - Ever Dream

Nightwish第一代主音Tarja個把歌劇女聲，唔可以hea聽，一定要認真聽，好似薑汁撞奶咁，Metal同交響樂同聲樂都可以撞得咁正！三者都咁有力量，澎澎聲咁湧埋黎！所以我話「打風最好就係聽Nightwish！Nightwish簡直就係狂風暴雨中的清泉！」呢首Ever Dream，癡線嫁Tarja，Live都可以如履平地，面不改容，高音到～！（宜家新主音Anette係上唔到去嫁！）
BTW，「薑汁撞奶」咁既比喻都比我諗到，十足十黃興桂！

03/02/2012 FRI
Therion - Lemuria

再聽下用得交響樂更多既Therion。Death Metal出身的Therion，中後期已經完全成長為一隊Symphonic Metal。佢地直頭可以話係交響樂crossover Metal的先驅。唔用keyboard，直接動用古典管弦樂團、詠唱團，表現出既古典氣息比尋日既Nightwish強好多好多！今日首Lemuria，唔算好古典，但最後段長笛好好聽！其實Therion既快歌一樣好重Metal味，再加上歌劇唱腔，將佢地既「古典重金屬歌劇」特色表露無遺。

＝＝＝＝＝＝＝＝＝＝＝＝＝＝＝＝＝＝＝＝＝＝

輕輕介紹左兩隊Gothic Metal，都係Symphonic Metal，其實交響樂的應用係Gothic Metal之中唔係絕對。另外，大部分的Gothic Metal band都係來自北歐國家，我個人覺得同當地地理環境好有關係。日照短，氣氛深沉，Metal也朝暗黑系發展，除了Gothic Metal，Death Metal等暗黑Metal都係北歐大放異彩，相對美國，成功入到主流的應該只有Evanescence。其實我近兩年先開始聽Gothic Metal，仲有好多band排晒隊等聽，今次真係班門弄斧喇～

想重溫過往的「每日一歌」？按這個「1song1day」tag便OK了～請多多支持啊！

每日一歌#9 26/1~27/1: 賀年encore

Thu, 26 Jan 2012 21:16:12 GMT

初四開工大吉！恭祝大家荷包滿滿、心情靚靚！賀年歌聽得個兩首實在唔夠喉，而且好多人仲放緊假、拜緊年，好野唔好比佢停，繼續新春喜上加喜！

26/01/2012 THU
高潮樂隊 - 萬花紅

高潮樂隊你未必識，周國賢應該識喇～高潮樂隊的核心人物係本地漫畫家林祥焜，再加周國賢隊band的Joey同Goro組成（當然仲有其他成員，不過之後好多人出出入入）。呢首〈萬花紅〉featuring周國賢，佢個句「我有好多利是錢，我要買CD過年，買周國賢買周國賢正到你癡線～」雖然hardsell，但首歌本身就係好玩抵死格～無所謂喇，過年嘛～（咁岩周生真係12月出左碟！）
歌詞：http://mojim.com/twy104889x1x10.htm

27/01/2012 FRI
LMF - 大懶堂

初五喇，如果今日開工大吉，聽日又放兩日，今日心情一定就好似呢首歌咁：「想，我都好想好似中左頭獎，有野唔駛做，老世又吹我唔漲～」過年放咁多日假，今鋪真係先甜後苦，成個二月加三月，成９個禮拜先放復活節假呀！講開又講，〈大懶堂〉絕對係LMF的superhit，打入主流不特止，成功在唱出了絕大大大部分香港人的心聲。但唔好以為首歌只係唱出hea的一面，中間個句「搵出個意義做人唔容易」先係精髓。現實就係咁無奈，搵出人生意義真係一Ｄ都唔容易呀！－－開工喇，大家！努力！
歌詞：http://hk.music.yahoo.com/album-song.html?songid=74133

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

每日一歌#8 16/1~20/1: 動畫歌+賀年歌

Fri, 20 Jan 2012 15:51:54 GMT

下星期就過年了～第８周「每日一歌」選了兩首應節的過年歌來跟大家拜個早年！恭喜～恭喜～另外三首就係中文既動畫歌曲，無論你係老餅如我，或是年輕的九十後，至少都識一首吧！

16/01/2012 MON
《高智能方程式》草蜢 - 你讓我找到未來

上上星期草蜢係勁歌頒獎典禮唱左首勁old school既〈一起衝〉，令人諗地佢地唱既《高智能方程式》主題曲：原來首歌叫〈你讓我找到未來〉，我一直以為就係叫「高智能方程式」！呢ｄ真係童年回憶，唔駛音樂唔駛歌詞都識唱！搵唔到《高智能方程式》既中文opening，得草蜢的無線MV版，又係另一種風味！

17/01/2012 TUE
《數碼暴龍》鄭伊健 - 自動勝利Let's Fight

尋日的《高智能方程式》曲、詞都係本地原創，但90年代中開始，大部分動畫主題曲係用返原曲再填中文詞。好多動畫迷唔鍾意無線呢個做法，亦都嘈左多好年。在我自己，都有好聽的例外，例如第一輯《數碼暴龍》既主題曲，我會聽到眼濕濕！！「遇怪魔我即刻變大個～～」（想當年，我好鍾意扮亞古獸把聲的，宜家已經扮唔返喇～）

18/01/2012 WED
《百變小櫻magic卡》曾嘉莉 - 百變小櫻magic卡

二不離三，再聽多首女仔既動畫歌。《百變小櫻magic卡》呢首直情好聽，詞都填得唔錯，同個故事都match。（不個主唱的曾嘉莉已經消失左。）雖然好多人唔鍾意無線改動畫歌，其實我地細個聽既，不論係新曲新詞定原曲新詞，都係無線自己作的中文版，我地宜家聽返都覺得好正、好有童年回憶。我成日諗，或者宜家ｄ細路大個之後，都會鍾意無線個ｄ中文版動畫歌呢？Who knows?

19/01/2012 THU
TWINS & BOYZ - 四囍臨門喜迎春

今日已經係年廿六！大家執左屋未？買左新衫過年未？差唔多時間要準備一下喇！我嫌今年無乜過年氣氛，拿拿臨聽返首賀年medley，炒熱一下！英皇宜家每年都會出群星翻唱賀年歌（其實宜家個ｄ唔可以叫星），04年Twins + Boyz呢首好似係第一年。可能個期唱K成日唱，竟然覺得呢首OK好玩，尤其係第一句「齊齊來～」，我會特登走音，唱「齊4齊2來6」，好好笑！

20/01/2012 FRI
《東成西就》張國榮、梁家輝 - 雙飛燕

貼埋今日，「每日一歌」收爐了～唔想揀聽到厭既賀年歌，不如就睇下經典賀歲片！「菩提老祖」劉鎮偉既《東成西就》，夢幻卡士：張國榮、林青霞、梁家輝、張學友、梁朝偉、王祖賢……無周星馳一樣咁瘋狂抵死無厘頭！！（宜家ｄ賀歲片同以前無得揮！）呢一段梁家輝為左令張國榮講出「我愛你」，就假扮三公主……請留意佢個頭，個一支支既髻不斷轉款！愈轉愈瘋狂！～（又，劉鎮偉套《西遊記》入面既「菩提老祖」，咪就係劉鎮偉本人囉～）

好喇，在此向大家拜個早年，祝大家龍年如魚得水，心想事成！年初四「每日一歌」啟市呀～到時見！

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

每日一歌#7 9/1~13/1: Punk的形式

Sun, 15 Jan 2012 16:27:11 GMT

今個星期「每日一歌」談談不同形式的Punk！有美國的Punk、英國的Punk、憤怒的、絕望的、好玩的、情緒化的……Punk的變化和形式可真多著！

09/01/2012 MON
Sex Pistols - Problem

放浪形駭是有原因的這是出於對現實社會和政府的憤怒。要數反政府反建制，怎能不聽Sex Pistols？理念上，Sex Pistols的朋克極高姿態，God Save The Queen、Anarchy in the U.K.，把英國政府噴得一面屁。憤怒的力量訴諸形式，便成了破壞力，如他們的形象，也如音樂上的簡短急速和章節重複。Sex Pistols除了上面兩首經典，今天選的Problem，也是憤怒地把一無是處的人數罵一番。請知道，Punk不是把頭髮Gel到一支支、穿環、窩釘、皮褲而已。（要說Punk Fashion Scene也不是不可，當然，那自然是另一篇長文。然後，又必須由Vivienne Westwood說起。）

10/01/2012 TUE
Joy Division - She's Lost Control

Sex Pistols是Punk的憤怒，Joy Division的Post-punk就是絕對的失望，連憤怒的力氣都沒有。Punk的分支和變化極多， Post-punk就變得內向和實驗。Joy Division的壓抑風格，與主音Ian Curtis的抑鬱和癲癇病有很大的關係。據聞Ian Curtis看到一女子癲癇發作而寫了這首She's Lost Control，諷刺的是，然後他本人確診患上同一個病。最後抵不過疾病和抑鬱，上吊自盡，只有23歲。

11/01/2012 WED
Ramones - Havana Affair

美國最早的Punk大宗，非Ramones莫屬（比Sex Pistols還要早）。回說音樂風格，有話「只要懂得三個和弦便是Punk」，雖然誇張，但錯唔晒。Ramones簡明快速、直接明亮，爽快又率直。Ramones不像Sex Pistols的爆炸式憤怒，他們是好玩和快樂的。即使有關政治事件的歌，一樣輕快搶耳，例如今日的Havana Affair。Ramones的影響足足二十年有多，後來的Punk Band、Metal Band，許多都直認是受到Ramones啟發。明天舉例再說。

12/01/2012 THU
Green Day - Minority

時間一跳，聽聽今日的Punk Band。早年的Green Day一樣簡短輕快（甚或更快，大抵是因為主音Billie Joe有點過度活躍）。簡明的三和弦，可謂從Ramones一脈相承。說Green Day，許多人只識Wake Me Up When September Ends和21 Guns，其實在他們第二次大紅之前，即是最低潮時期，就有這樣的一首Minority大叫著反主流：「I want to be the minority, I don't need your authority」。請留意歌詞。（選這個Live version，不是這個版本特別精彩，而是YouTube上的MV版大部分都把歌詞中的「Fuck」全都mute走！無晒神髓！我至憎！！）
中英歌詞：http://tw.knowledge.yahoo.com/question/question?qid=1608050711627

13/01/2012 FRI
My Chemical Romance - Famous Last Words

星期五，以Emo-punk收結。Emo一語來自Emotion，情緒化的Hardcore Punk。雖然My Chemical Romance一直否認，但外界一致地將他們歸類為Emo。我覺得MCR Emo與否，佢地都有Punk的特質（強勁的結他和節拍感）。今日係黑色星期五，就係佢地前張大碟The Black Parade揀歌：呢個Famous Last Words既Live好精彩，主音Gerard Way狂放演出（次次睇佢Live都有ｄ驚佢唱到氣絕），Ray Toro同Frank Iero兩支結他齊齊爆發，睇到流左一身汗咁淋漓盡致！

＝＝＝＝＝＝＝＝＝＝＝＝＝＝＝＝＝＝＝＝＝＝

上面只選５首，當然是鳳毛麟角，是Punk的某些角度的反映。然而，不論風格變化，Punk的核心精神大抵不離其宗：顛覆、叛逆、反抗建制、強調自我。Sex Pistols的無政府主義和Green Day（尤其是American Idiot）對政府的不滿是顯而見的。至於Joy Division和My Chemical Romance，就較為個人，Joy Division的內向更是沉重得叫人不安。表面上，Ramones看似沒有這些樂隊的深刻內容或「主義式」的前提，但Ramones的出現，本身已是一場革命式的改變。他們簡單快速直接，正正是對70年代那些冗長的流行音樂的顛覆。說Ramones是Punk的始祖，一定錯不了（特別是美式Punk）。

最近在聽一張Ramones的Tribute大碟：We're a Happy Family: A Tribute to the Ramones。參與單位星光熠熠：Red Hot Chili Peppers、Eddie Vedder (Pearl Jam)、Metallica、U2、Kiss、Marilyn Manson、Garbage、Green Day、The Pretenders、The Offspring……各樂隊出盡渾身解數，用自家特色重新演繹舊歌，各自精彩而互不搶鏡，百花齊放，大力推介！

（想重溫過往的「每日一歌」？按這個「1song1day」tag便OK了～請多多支持啊！）

My Movie of the Year 2011

Wed, 11 Jan 2012 18:03:56 GMT

上次講了音樂，今次談談電影。這篇就是2011年個人電影回顧了。

Statistics
先來一些數字。2011年看電影也不少，全年進戲院看戲66場，其中39場是電影節，另外27場是普通正場電影。

66套入面，多過一半，31套係動畫！一年入面點會有咁多動畫？大部分都是電影節看的！一年十二個月，除左一月、二月，其餘時間每個月都有大大小小的電影節！

最有趣的記錄係連續13個星期（三月頭至五月中），每個星期都會至少入戲院睇一套戲！好勁！

全年看過的港產片只有10套。2011年本地電影票房十大當中，看了《我愛香港開心萬歲》、《竊聽風雲2》、《新少林寺》、《最強囍事》、《關雲長》。

2011年非本地電影票房十大中，看了6套：《變形金剛：黑月降臨》、《那些年，我們一起追的女孩》、《變種特攻：異能第一戰》、《特務戇 J之救國大業》、《猿人爭霸戰：猩凶革命》、《神探福爾摩斯：詭影遊戲》。

本來想說自己有幾支持港片，但對比往年，本地電影票房十大我係會睇八、九套的。希望明年可以看多些港產片，支持一下。

2011年終於的起心肝，每次看完電影節都寫筆記，一年最終完成目標，39場節目，共寫了24篇電影節筆記。（我要讚下自己！今次好有恆心！）始終，電影看完了，又怎樣？普通正場電影當娛樂，看完水過鴨背還可；但這麼堅持要追看電影節，在電影院花了個多小時，一切的感動和驚訝，最後也化為虛空，也太可惜了。所以我才決定要一一記下來，時間和金錢，才花得有意思。2012繼續努力，好習慣要繼續！（不論有沒有人看喇。）

2011年電影票房十大資料來源：
[講。鏟。片] 影協公佈全年票房十大

My Movie of the Year 2011
X-Men: First Class 變種特攻：異能第一戰

今年最興奮的觀影經驗，一定一定是X-Men: First Class。一來鍾意Superhero、二來鍾意動作片、三來個人喜歡Superhero crossover WWII的設定（像《Watchmen保衛奇俠》是我09年的Movie of Year，《美國隊長：復仇者先鋒》我也覺得很好看！）、四來自《Wanted殺神特工》，對James McAvoy好有好感，今次由佢擔正演年輕的Professor X，未入場睇劇照已經把我迷到一陣陣！

娛樂片而言，各方面都很平均地高水平：年輕演員們十分落力，演出了角色之間的活力與互動；故事既有輕鬆搞笑場口，情節同樣緊湊，特技未算頂級但也不錯。不過這都不足以讓我選為My Movie of Year。最後選了First Class，是因為看到中段，我已經完完全全投入電影當中，咬牙切齒；到最後沙灘決戰一場，我肉緊得握住拳頭在心裡大叫！好似真係有一下叫左「哎呀」出聲！

噢！Professor X，你真係好型！（雖然最後你大叫：「I can't feel my legs! (x3)」時我諗起《Scary Movie2》而笑左！解說：《Scary Movie2》條友明明本身係跛，其他人問佢有無事佢竟然大叫：「I can't feel my legs!」哈哈哈！！！）

另一套驚喜之作是《Real Steel鐵甲鋼拳》。本來完全無諗過入場，但某次看過Trailer之後，覺得挺熱血的，加上是機械人打鬥，也是我喜歡的類型，還有同事大力推介，決定入場一看。果然熱血感人，童星Dakota Goyo演出極之討喜，Hugh Jackman也沒有半點狼人的影子和包袱，還有我喜歡的Foo Fighters的新歌Miss The Misery作插曲！最終沒選上Real Steel，只因為我更喜歡James McAvoy！Real Steel差個馬鼻！

然後，《那些年》當然有個人的感動在其中，不過未到My Movie of Year的高度。《3 Idiots作死不離3兄弟》是好戲一早就知（三月電影節時已口碑載道），但片種問題，我還是很膚淺的喜歡動作打鬥漂亮畫面，看得愈興奮就愈喜歡。（所以難怪X-Men: First Class成了My Movie of Year。）

延伸：
[YouTube] X-Men: First Class 變種特攻：異能第一戰Trailer
[YouTube] Real Steel鐵甲鋼拳Trailer

每日一歌#6 3/1~6/1: 未日論

Fri, 06 Jan 2012 16:12:50 GMT

「每日一歌」第６周～～～今個星期開始，如果該周「每日一歌」有特定主題，我會順道在文章標題點明，一目了然。2012年第一個星期的「每日一歌」，也響應一下今年的大熱主題：「未日論」！選了３首未日歌曲，氣氛、感情不一，咸魚青菜，各有所好喇～另加一首話題電影歌曲，看下去就知！

03/01/2012 TUE
Ping Pung - 二十世紀少年

2012，世界末日。我信，我仲想佢快ｄ到。確實，This city is dying，仲有咩值得留戀。我只求世界末日前有志氣地活下去。還是那句：無論信不信12月21日世界末日，做人也應該好好珍惜愛你的、你愛的人和事和物。請留意歌詞。
歌詞：http://ent.fightclub.com.pk/text/t-126012-p-1.html

04/01/2012 WED
許志安 - 愛你

繼續講末日。歌詞第一句：「世界末日到了麼，問我終結會如何」，經典得讓我選歌時完全忘了這首歌後半「死人冧樓都要同你一齊」的sweet得過分。以前會覺得，〈愛你〉有末日感：放大而安靜，副歌推向高潮。但今日再聽就覺得稍有所欠，氣場未夠廣闊宏偉，似係滿天星河多過世界末日。明天貼多首未日歌，再談。

05/01/2012 THU
EVA - Komm, süsser Tod（來吧，甜蜜的死亡）

Komm, süsser Tod，即「來吧，甜蜜的死亡」。首歌來自《新世紀福音戰士》舊劇場版，最後所有人消失，是為世界末日。這就是我想要的世界末日。不要經濟的世界末日，不是政治的世界末日，不要死得一半死唔晒的世界未日。像這首歌的氣氛，歡樂之至，歌詞卻消極到底。也像故事劇情，所有事物回歸虛無，華麗地、興奮地、快樂地終結，然後全新開始。不推倒現在腐朽的一切，世界不會有希望。（又，庵野秀明你條友，世界末日真係黎啦，仲有２集新劇場版你捨得出未？我唔想世界末日都未睇到大結局！！）
中英歌詞：http://blog.yam.com/sibasin/article/755347

06/01/2012 FRI
Led Zeppelin - Immigrant Song

Led Zeppelin的首本名曲應該是Stairway to Heaven，但我還是喜歡Immigrant Song的暴烈與張狂。主音Robert Plant一開口的尖聲「A~AH~A!!!」，配上壓抑的結他，有一種向內爆發的感覺。岩岩上既大衛芬查版《龍紋身的女孩》，trailer正係用左cover的Immigrant Song。（這個cover由Yeah Yeah Yeahs的主音Karen O同Nine Inch Nails的Trent Reznor主理。）

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

My Album / Song of the Year 2011

Wed, 04 Jan 2012 14:24:28 GMT

一年終結，是時候回顧一下。決定用Album、Song、Movie，這三樣東西來總結，畢竟這三件事是我返工、放工、食飯、訓覺、去廁所之外，生活上最重要的東西了。今次先談音樂，下次再講電影。

My Album of the Year 2011
My Chemical Romance - Danger Days: The True Lives of the Fabulous Killjoys

當My Chemical Romance大紅大紫的The Black Parade時，我還在聽Green Day的American Idiot。事隔四年，MCR再出新碟，放下上一張大碟的黑暗氣氛，今次以美漫為題，色彩繽紛，電影感強烈。好玩之餘風格也多，像Na Na Na、Planetary (Go!)的幾首POP-PUNK主打，抒情的Sing和The Kids from Yesterday、暴烈的DESTROYA等。雖然有人覺得MCR不再emo，但我覺得POP-PUNK的他們也不錯，而經過數個月的沉澱，我認為他們依然emo，像我最喜歡的一首：Save Yourself, I'll Hold Them Back，Gerard Way仍然唱得聲嘶力竭，七情上面。

四年前錯過了的MCR，今年發現更對口味，這張Danger Days: The True Lives of the Fabulous Killjoys成為今年最驚喜的Album。（有一點要補充，這張Album是2010年11推出的，不過我要2011年3月才開始聽。）

[個人碟評] 美漫 X pop-punk：My Chemical Romance新碟Danger Days...

My Song of the Year 2011
Foo Fighters - Best of You
選來舊歌的Best of You，純粹個人原因。我總不相信這是一首失戀情歌（表面上看歌詞的確似是），如此成熟大器的氣場，放盡懷抱的叫喊，沒有怨恨。或者有的，是連連可惜。

這一廂情願的想法，沒有任何一句歌詞作為證據。那只是我不斷不斷地聽著Dave Grohl的叫喊，腦海中自然就想起Kurt Cobain。那句「You gave me something that I didn't have, but had no use.」令我久久不能釋懷。Kurt的離開，留下什麼給Dave，但毫無用處？為什麼毫無用處？是Kurt的名氣、是Kurt的精神，抑或什麼？那一定是Kurt最好的東西，這首歌才會叫「Best of You」啊。為什麼，為什麼得到最好的，但一無所用？（因為這世間已不值得去「用」了。）2011年12月，我幾乎無間斷地不停重聽Best of You，完全是一趟自虐的過程，到最後，2011年12月30日凌晨，我想我崩潰了。

好喜歡這個MV。大自然生生不息，環環相扣，再多的痛苦，死亡過後又再生。MV中，一個個生與死，痛苦和憤怒，快樂及昇華，我又覺得，Dave的叫喊，有一種克服的力量，同心圓那般，層層遞進，往我的心臟大力推去。

Kurt Cobain不在這裡，在我心裡。多謝Dave寫了這首歌。

[YouTube] Foo Fighters - Best of You
Foo Fighters - Best of You 中英歌詞

每日一歌#5 28/12~30/12

Fri, 30 Dec 2011 18:30:08 GMT

「每日一歌」第５周。今個星期得３日，而且係2011年最後３首，１２月３０號那首就作為2011年的總結。

28/12/2011 WED
Wham! - Last Christmas

YO！放完假回來了～本來過左聖誕無理由又聽Last Christmas，但我的Last Christmas就係去左一個好似Last Christmas個MV入面既雪山過白色聖誕！意猶未盡之下今日決定再聽Last Christmas回味一下～真係好似個MV咁，成個山白雪雪、坐纜車、小屋、松樹、滑雪、堆雪人～

29/12/2011 THU
RubberBand - 細街盃

１２月２８號晚省港盃首回合香港主場和波２：２，入第２球的時候真的很興奮，打從心底開心，仲諗住贏硬。雖然和左，但仲有第２回合追（不過作客好危險）。RubberBand的〈細街盃〉係舊年世界盃期間既歌，但要支持本地波，梗係揀返首本地band既歌啦！隻MV仲有入左籍香港既本地甲組球員卓卓客串。歌詞第一句：「大力交波啦喂，全場靠我地！」come on，支持本地band！支持本地波！

30/12/2011 FRI
吳浩康 - 兒戲

想搵一首歌，總結一下2011。揀左05年既〈兒戲〉，雖然歌詞講緊早幾年既事：「維園亮過燈／幾多位偶像過身／幾多種怪病結束」，但六年過去，仍然「這城市轉得很快／感覺像遊戲」：無論係選舉、政府決策、人命、教育、傳媒……整個城市各樣事物無不令人泄氣。雖然如此，首歌最後都抱住樂觀精神，係呢個崩壞的城市之中，大家都仲可以捉緊身邊人。但願如此。（BTW，其實我幾鍾意吳浩康，但唱唔起，又唔生性，可惜！）

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

每日一歌#4 19/12~23/12

Thu, 29 Dec 2011 18:04:21 GMT

「每日一歌」第４周正值聖誕前夕……先貼兩首日文歌，然後一連三首經典聖誕歌，Merry Christmas！

19/12/2011 MON
The Yellow Monkey - Tactics

上星期得知明年會有《浪客劍心》的新劇場版同真人版，呢個消息確令人興奮！劍心的OP同EN黎講，首首都咁好聽，今日介紹Tactics，算係紅歌唔紅人，The Yellow Monkey紅唔起，或者話只係紅左一段時間，隊band最終亦係04年解散左。曾經有朋友同我講過，話睇過佢地既LIVE錄影，話佢地用牙彈結他，J-ROCK都要玩到咁，會唔會重口味左ｄ？聽歌，又唔覺得佢地似會咁玩，呢個謎，係我心中好多年。

20/12/2011 TUE
Bump of Chicken - 天體觀測

講紅歌唔紅人〈天體觀測〉真係好紅好紅！尤其係街機界！鼓機、結他機、到pop'n music ，係我果個未有jubeat的年代，落得機鋪玩得音樂game點會唔識？Bump of Chicken紅之前，我曾經以為佢地係音樂game個ｄ不知名樂團……相反，〈天體觀測〉紅左好耐，01年係鼓機一出，就一直不斷移植到其他game。過左差唔多10年，宜家Bump of Chicken係日本超紅，代表作又點只得一首〈天體觀測〉。

21/12/2011 WED
Away in a Manger (馬槽歌)

Click Play之前，請先答問題：你識唱馬槽歌嗎？比埋歌詞你：「Away in a manger, no crib for a bed, The little Lord Jesus laid down his sweet head」。好喇，宜家聽下我呢個版本同你果個一唔一樣……我一早就話有第個版本既馬槽歌啦！證據就在這裡！就連中文歌詞都唱到嫁：「遠遠在馬糟裡，無枕也無床，小小的主耶穌睡在乾草上～」（雖然都係唔岩音，但原本果個版本都係唔岩嫁啦～）
好快就聖誕，我會連續３日貼聖誕歌～HOHOHO！

22/12/2011 THU
God rest you merry, gentlemen (from Mr. Bean)

聖誕節一定要睇Mr. Bean整火雞，就好似過年一定要睇舊版《家有囍事》一樣。除左整火雞，聖誕Mr. Bean仲有呢一節街頭報佳音。片段中果首係英格蘭聖誕民謠God rest you merry, gentlemen。張韶涵〈寓言〉既副歌正係取自此曲。

23/12/2011 FRI
Joy to the World (from Muji)

唔係有心賣廣告，只想取其意思：請細心聽聽身邊的聲音，日常事物都可以是X'mas Carol。當節日愈來愈公式，希望大家唔好忘記，過節，都係想同朋友、屋企人聚下、開心下。聖誕禮物、聖誕大餐、各樣各樣都係其次，最重要係我地有無關心身邊人。我的聖誕願望是：減少浪費、身體健康、大家都開開心心。Dreams come true, Merry X'mas!

＝＝＝＝＝＝＝＝＝＝＝＝＝＝＝＝＝＝＝＝＝＝

紅日假期「每日一歌」休息放假，28/12星期三放完假返來繼續～！
（想重溫過往的「每日一歌」？按這個「1song1day」tag便OK了～請多多支持啊！）

每日一歌#3 12/12~16/12

Sun, 18 Dec 2011 17:41:42 GMT

「每日一歌」第３周了～～今個星期來點重口味的……哇哈哈哈！！「Hard Rock / Metal」大集合！用猛烈的音樂來抵抗寒冬吧！

12/12/2011 MON
Kiss - Detroit Rock City

想寫好很耐既Hard Rock/Metal大集合，就由KISS開始！大叔們的花面實在太有代表性，除此之外佢地既舞台效果都可以話係數一數二：噴火、吐血、爆炸、會飛既結他……係7X年佢地已經咁玩！比《爆粗Band友》既Krauser早成40年！Krauser隊Band個名DMC，都係向呢首歌致敬嫁！不過，唔好比佢地既花面同造型嚇親，其實KISS既音樂都唔算重口味，節奏感強、結他夠響，都幾易聽，有部分仲溝埋Disco元素，例如佢地另一首經典I was made for loving you！（當然前提係唔怕嘈啦。）

13/12/2011 TUE
AC/DC - Shoot to Trill

上次寫稿眼訓到要聽AC/DC，朋友K即刻留言話：「聽AC/DC仲寫到稿？」哈哈，確係－－太熱血喇！睇下佢地Live，fans high到！宜家天寒地凍，真係會聽到個人暖返！主音Brian Johnson既高亢假音，都係硬淨既Metal（呢位大叔成65歲嫁喇！）；另外結他手Angus Young，我真係好鍾意佢56歲都仲keep住個school boy look fing頭彈結他！（Angus Young後生時的經典造型）

14/12/2011 WED
Metallica - Nothing Else Matters

Metal裡最優美的結他Ballad。Metallica一貫既低沉用力既節拍、時而大叫又沙啞既vocal，聽足一日，我就會有少少喉嚨痛的感覺。呢個時候即刻跳到Nothing Else Matters，即刻唔同晒。Metallica既歌不時都會穿插一兩節好優美的結他，Nothing Else Matters係全。首。都。咁。優。美！再加上主音既沙啞聲線，完美演繹。

15/12/2011 THU
Guns N' Roses - Sweet Child O' Mine

還返後生的Axl Rose比我呀！！1:51，你睇下佢個PAT！緊身皮褲仲要扭下扭下，it's fucking sexy and hot！點解宜家老左會變成第２個人咁樣……愛情既傷害真係好大：Axl Rose公開過三個女友，兩個不歡而散，仲鬧上法庭。MV1:48出現的，就係佢唯一娶過的Erin Everly，呢首歌都係寫比佢的。第２個亮點係Slash，佢手結他已經數一數二，Sweet Child O' Mine再被著名結他雜誌列為The 100 Greatest Riffs既NO.1！

16/12/2011 FRI
Bon Jovi - It's My Life

說好了的Bon Jovi。選It's My Life唔單只因為呢首歌幫Bon Jovi打開年輕市場，我更想講係佢地標誌性既Talk Box。Talk Box是什麼？就是一種音效器，It's My Life開頭的「wowoo...wowoo...」是嘴巴控制的效果音！簡單而言，結他的聲音不直接去喇叭，而是通過一條膠筒去到嘴裡，藉嘴巴的開合動作而將結他聲變成「wowoo」聲，再由旁邊的咪直接收音，是很有趣的東西！直接看片更容易明白～留意2:16！

＝＝＝＝＝＝＝＝＝＝＝＝＝＝＝＝＝＝＝＝＝＝

聽完五首不同類型的Metal，有沒有「興合合」的感覺？哈哈哈哈！其實上面５首，KISS係華麗、多花臣的Glam Metal，注重舞台效果。Bon Jovi早年都係Glam Metal，但隨著團員年紀漸長，漸漸轉向Hard Rock風格，流行感強烈；像It's My Life，正面、有力、感染力又高，很適合打榜。

AC/DC其實更靠近Hard Rock，不過沉實的鼓點也帶有Metal特色，所以不少人說他們是Metal的先鋒。個人而言，Metallica這類快速的結他、低沉的主音和鼓，才是Metal的「嫡系」；嚴格細分的話，這是Thrash Metal，Metallica便是Thrash Metal「四巨頭」之一。

差點漏了Guns N' Roses，有人說是Heavy Metal，有人說是Glam Metal，也有人說Hard Rock。的確有點難以歸類，他們大紅大紫的年代，是隊隊Band都留勁長毛毛頭的年代，所以又有Hair Metal一語。以今日的目光去看當時的風格，很容易便會因為這些毛毛頭而歸為Glam Metal。講金屬氣息，GNR一定不及Metallica，如果以此為參照，似乎更是Hard Rock。不過，說到底，所謂的音樂分類，或者只是方便推銷的一些keyword，音樂如何，還是要自己親耳去聽。

（想重溫過往的「每日一歌」？按這個「1song1day」tag便OK了～請多多支持啊！）