kiss me before flight

東京 / 美少女戰士真人舞台劇 Pretty Guardian SailorMoon - Shining Theater Shinagawa

2026-05-27T15:58:22.485+08:00

前排係 IG 見到有人分享真人版 Sailor Uranus 好型，先知道原來依家東京有真人版美少女戰士舞台劇！本來對卡通片做真人版呢類製作無乜信心（睇睇迪士尼最近嘅製作⋯⋯），即使以前都有過真人版舞台劇但無乜衝動，唔知點解今次又好有期望。睇完嘅感受係 —— 「一定要睇！」

買咗 Premium Seat 坐第二排，俾前面個頭擋咗少少。如果有機會再睇要搶第一排！表演分兩 parts，part 1 係舞台劇，故事講由 AI 引起嘅愛情與友情故事，情節好緊湊無拖泥帶水，地場衛都係一貫地俾壞人捉咗去咁啦哈哈。人靚衫靚目不暇給，天王遙真係好型好正！演員們都好乎合角色氣質，服裝都唔會好 bulky 好假，係真人世界會出現嘅比例，一切都好自然。 Part 1 係唔可以影相錄影，大家都好投入欣賞，咁個故事我覺得都有心好睇唔係單單 sell 童年回憶。演員講日文，我一心諗住靠肢體語言估㗎啦，點知係有英文字幕，唔使估估下！

Part 2 係 live performance，一開場音樂嚮起大家都瘋狂了！表演都有少少故事性不過主要都係唱歌跳舞，演員會落台同大家揮手！呢一 part 係可以影相指片同用官方手燈應援物嘅，我都買咗支手燈 fing 吓不過返到屋企就唔知做乜好。俾咗呀女玩但同時又再三強調係媽咪㗎唔可以整爛！（所有 Sailormoon 嘅嘢都唔可以整爛！）

完場後，Premium Seat 嘅觀眾係有同演員合照環節。我當日係 Chibi Moon 同外部四戰士合照，兩張相可以選擇同演員合照／只影演員／各一張。離開時近門口會有送客環節，職員會提醒拎定電話出嚟影相拍片！送客就會係唔係影合照嘅其他戰士。我諗呢一部分係所有觀眾都有得體驗。可以近距離見到兒時偶像真人化真係好激動，佢哋真係好靚好可愛，緊張到我唔知講乜好，淨係識講 thank you 同 I love you~ 當日本合照同送客名單係官網會寫明，如果有特別角色想合照就要自己睇清楚揀日子。另外演員方面分 Team Gold Moon 同 Team Silver Moon，我見有人話要顏值睇 Gold，要演技睇 Silver。我當日睇嘅係 Team Silver Moon，不過好似咁啱 Sailormoon 轉咗做 Gold 嘅演員幾日。

會場當然有紀念品出售，部分舞台劇商品每人限購一件。舞台劇商品我覺得一半吸引，一半普通。立牌、file 係靚嘅，手燈可以，但毛氈同 tee 有啲頹買唔落手。現場仲有少少其他商品不過就唔及原宿店多。我建議可以先去原宿 Sailormoon Store 買咗嘢先再去品川睇舞台劇，live performace 時仲可以拎出黎。

我係出發前兩日先買飛，當時 Klook 同 KKDay 都已經買唔到咁近期嘅飛，但官網仲可以。官網本身都有中文英文版面，購票無難度，票價選擇都比較多，買飛時可以揀埋位。Premium 同 S 位包角色飲品，官網同 Klook 可以揀角色， KKDay 只跟 Moon 飲品。因為會送相應角色嘅杯墊，如果唔想要 Moon 就唔好係 KKDay 買啦。Premium Seat 包一杯飲品、手燈鎖匙扣同露娜蛋糕。杯飲品都都幾好飲，唔係太甜。

完場時仲係好激動，一來表演好睇，二來臨走時開始冷靜啲時又有送客儀式又激動一番。出到嚟係咁同朋友講一定一定要嚟睇！其實幾年前係麻布十番都有間 cafe 有表演，當時都好感動，但品川呢個真係 another level！

官網 - https://prettyguardiansailormoon-stst.com/zh-hant/

View this post on Instagram

A post shared by Lisa (@lisazsasa)

Canada 加拿大 / Niagara Falls 一日遊．近距離感受瀑布！

2024-04-04T20:11:00.003+08:00

話說習慣咗 COVID 期間飛到外地都唔可以出街，所以當無晒呢啲限制後第一次飛 Toronto 有 layover 都唔係好有意慾出去 sightseeing。不過幾個同事都推介去 Niagara Falls，去到 Toronto 我都真係的起心肝報名去行吓。是日天氣非常好，感恩我有踏出呢一步無宅係酒店！

網上有好多 Niagara Falls 一日團，不過我揀咗跟酒店樓下間旅行社去，去到再自己揀玩咩。其實係 Niagara Falls 個邊嘅賭場車，車費 CAD 50 不過全額 rebate credit 可以係賭場玩。去到係 lunch time，我係 food court 隨便食啲嘢就慢慢行過去。因為距離瀑布都真係有啲距離，我又慢慢行睇風景，行咗半個鐘。

去到個 cruise 售票處時大概12點半，當時售票處塊板寫要傍晚時分先有位，即刻上網睇都係一樣嘅 information。立即天人交戰，一場黎到無理由唔坐船，但傍晚先玩玩完返酒店會好晏應該會 jet lag 到崩潰。最後決定都係照排排到 counter 先算啦。可能因為我得一個人？買飛個下個售貨員直接出張 1:30pm 嘅飛俾我！當時係 12:45pm，我決定搏一搏去 boarding 個位睇下有無得早啲上船。結果，又真係俾我上到 1:00pm 嘅船，成件事即刻 smooth 晒！

瀑布嘅威力真係好強大，當架船駛到好近時，啲風同水花似落雨不突止，仲要係橫風橫雨個隻，有一刻大風到呼吸都有困難。每位乘客都會有一件雨衣，不過著唔著其實都無咩分別，一樣全身濕晒，不過淋得好開心，個種感覺係… 感受緊大自然嘅威力？係會想放低電話，全心全意感受被瀑布水打係身上面嘅感受。

其實除咗搭船，仲可以行去瀑布附近近距離感受瀑布，不過趕住搭車就無行落去，留返下次再去玩啦。

臨走前入賭場用埋啲 credit，是但玩下老虎機，係見好收嘅原則下，成功回到本，等於有免費車坐。後來有位同事分享，佢玩賭大細，本身贏到 CAD 200，最後佢留返 50 其他 all in，輸晒。財散人安樂～好彩佢都有留返車錢個 Cost 叫做回到本。

是次 Sightseeing 經驗總結：

最理想係上網買定飛先，咁就無咁多 uncertainty
最緊要係部電話 / 相機要防水，貴重物件都要做好防水保護
如果跟 Day tour 係會比較貴同埋未必樣樣野啱玩，不過有導遊講解
小賭怡情中賭亂性，記得見好收

原來係滅火筒！

2023-04-24T21:05:00.040+08:00

係 Jakarta Soekarno-Hatta International Airport 閘口行去 Immigration 路程都好遠吓，本身覺得「行完未呀 😩」。不過行行吓發現原來呢個機場都幾有心思㗎！牆上嘅滅火筒都有壁畫裝飾，唔係好 dull 咁就咁掛上牆。我覺得好靚影咗好多張相，但睇其他旅客好似都係一心衝去 Immigration 無乜人望吓幅牆。

不過靚還靚，我又唔係好肯定真係緊急要用時，一般人留唔留意到原來呢啲係滅火筒 🧯

View this post on Instagram

A post shared by 機師小姐記事簿 (@misspilot.notebook)

Crew Meal

2023-03-13T21:06:00.001+08:00

話說機師返工時食飯大家要食唔同餐，以免食物中毒呀肚痛呀。咁平時大家都會各自揀下想食乜。如果 order 咗 special meal 嘅，即使人地個餐吸引好多，通常都會食返自己個 meal 嘅（個餐自己揀 🙃）

最近幾班機隊長都叫咗 special meal，咁我無 choice 都好正常。

BUT，除咗早餐，全部都係三文魚。

結果我食咗五日三文魚，有時係一日兩餐。有一次有位 crew 睇完個餐同我講：「唔好意思你下一餐都係三文魚😅」

好彩之後個星期唔係食三文魚啦 🥲

#聽聞最近好多人叫kosher餐

#聽聞其實雪咗好耐唔好食

#我諗都係三文魚啱我啲

#becarefulofwhatyouwishfor

超可愛國泰 BB 機師衫！仲有空姐空少造型

2023-02-28T16:04:00.017+08:00

嘩～係超可愛嘅小朋友 Crew 衫呀 😍 有機師、空姐、空少造型，我覺得baby onesie 就機師造型最得意，童裝就空姐最靚係裙仔嚟㗎！

一見到連價錢都唔問就已經話要一件 onesie 一套童裝 😂 盒身仲教埋 “How to be a pilot”，襯埋頂 kid size 機師帽（not included 要另外買嘅）好正 👩🏻‍✈️ 天氣快啲回暖啦 BB 要著新衫呀 👶🏻

與寶寶的第一次分離

2022-12-26T00:52:00.001+08:00

産假完畢重返工作崗位，需要時間温書，又連續幾日訓練同考試，爸爸又隔日就要飛，所以要將 BB 交托俾爺爺嫲嫲照顧一星期。係決定嗰一刻其實已經俏俏落淚咗一下，點知係臨送走前一晚我又崩潰地喊咗一次。自從 BB 出世三個幾月黎我哋日日都一齊，突然間要接受幾日 BB 唔係身邊真係好難受。

之後其實隔一兩日都有去睇 BB，但突然間 BB 唔太肯俾爸爸媽媽抱，喊到拆天，要熱身一陣先抱得到。到終於可以靜靜地抱到唔扭計，又差不多時間要走了。走嘅時候見到 BB 伸長條頸望住我哋，一閂埋門我就忍唔住喊咗，好掛住好掛住 BB。

好在聖誕節得閒帶佢出街影相，佢都肯乖乖地跟一個下午無扭計。

我知道將來其實只會有更多日子要分離，無論係我飛咗又好，係 BB 要返學好，甚至長大有自己嘅圈子。但呢一刻我未準備好放手啊。因為比預産期早生，其實我已經叫做同 BB stay 足左14個星期，但我真係好羨慕人哋可以放半年甚至一年産假育嬰假啊嗚～

Happy One Month!

2022-09-26T23:21:00.002+08:00

眨下眼 BB 就滿月，我就做咗媽媽一個月。成件事好夢幻，有時望住BB 會諗我係咪發緊夢？我真係生咗呢個咁可愛眼仔碌碌嘅小 BB？我個肚曾經裝住呢個人仔？

第一次聽到心跳驚嘆「原來咁快㗎！」

照超聲波見到你手腳 Fing Fing 左勾拳右勾拳，感覺好神奇！

以前成日都覺得自己嘅育兒底線好低。但有咗之後，開始明白到做人呀媽唔係講得咁輕鬆。由驗到兩條線開始，就開始擔心呢樣個樣。每一次見醫生照超聲波，見到手腳郁郁聽到心跳就會放下心頭大石，但返到屋企又開始擔心到下一次覆診。

身邊嘅媽媽都話會感受到明顯腳踢感覺，但我好長時間都只係感受到魚仔游過、手指輕撩嘅感覺。一路都有啲擔心，直到22週突然就感覺到被踢嘅感覺，當下好唔真實，原來胎動感覺係咁嘅！雖然你有時會突然其來踢到我「呀！」一聲，但 in general 你都係一個斯文 B。多謝你無令我成個孕期太辛苦，最多都係眼瞓到傻肚餓到喊咗。

期歷咗既期待又擔心嘅九個月，驚早產驚高血糖驚你太細粒，每個星期出入醫院拮到兩隻手都係針孔，忍口散步行到腳都跛，終於佗到 37 週足月。係手術室由醫生抱你俾我哋望，再聽到你呀呀嘅喊聲，原來真係會感動到眼泛淚光，再辛苦都值得。我個女出世啦！Hello baby, welcome to this world!

你嘅人生啱啱開始，未來未必事事如意，但爸爸媽媽都會陪你支持你。見到你嘅笑容，我個心就溶咗啦。媽媽只願你平安快樂，無悔一生，做個開心果。

滿月快樂 :)

對於《940920》

2022-03-19T16:40:00.003+08:00

一口氣煲完《二月廿九》，再成功係大結局前跟上《940920》進度。我係比較鍾意《二月廿九》，氛圍畫面浪漫唯美啲，劇情又比較簡單容易入口。但《940920》我覺得都唔錯呀，好似好多人覺得舖排唔夠，但我又覺得有好多野唔需要講到明明白白畫公仔畫出腸，自己諗下腦補下先燒腦。

本來覺得呀月黑化得咁突然，係咪應該多啲可能老婆唔係度呀月就控制唔到自己嘅情節呢？我本身有諗點解佢老婆寧願屈到自己抑鬱都唔同呀月講有病。但我腦補左佢老婆知道老公嘅性格會接受唔到佢死，唔知點開口而屈住左，所以本身都心事重重咁嘅樣。咁我又好自然接受到呀月突然黑化。呀月老婆出事前楚凝咁啱影咗相，我會接受係整定嘅。成個《940920》故事其實就係選擇左命運係整定嘅呢個設定，發生左嘅事一定會發生。

穿越未來有一日時間，入相回到過去只有15分鐘。穿越時空嘅長短設定，我覺得係分別在未來嘅不確定性同過去嘅必然性。

穿越到未來，所有事情都「未發生」。對於 present 嘅我哋，未來有無限個。Yeesa 去咗未來，佢每一步都可以係 lead 緊去一個唔同嘅 future（家聰 / Ryan / Yeesa 死，無人知），但都可以係由頭到尾每一次穿越都係 Ryan 死。但觀眾唔知，因為一直我哋都無去到嗰個時間點嗰個地方。唯一突破到呢樣野嘅係犧牲（故事嘅設定），先可以改變已發生嘅結局唔係 Ryan 死。但同時個代價係 mess up 左時間線，Yeesa 去咗作家聰嘅時空。Fiona 無死，我覺得係因為 Yeesa 係屬於 present 嘅時間點。對於佢黎講， Fiona 死同唔死未發生係不確定，兩個情況都可以發生，佢只係獲得左咗 Fiona 可能會死呢個資訊。時空行邊個方向取決於 Fiona 嘅決定，並唔係 Yeesa 知唔知 / 有無講俾 Fiona 知佢有病嘅事（係未來嘅電話中知道其實最終 Fiona 都知自己有 Cancer，但佢選擇留 BB）。係 Fiona 作出決定時，原本嘅 Yeesa 屬於係留 BB 嘅線。Fiona 無死嘅 Yeesa 其實已經唔再係之前嘅 Yeesa。

入相穿越到過去，其實對於 present 嘅人，呢一個過去已經發生，你做乜講乜都無用。如果你做一樣野就改變到過去，present 嘅你根本就不存在，回到過去呢件事就唔會發生。俾幾多時間你其實都無分別。唯一有可能改變嘅條件都係犧牲（故事嘅設定）。所以俾一日又好，15分鐘又好，其實無分別，你係改變唔到過去。故事就設定15分鐘俾你去窺探個過去，但你改變唔到任何事。俾楚凝同爺爺講到電話都無用，佢只能聽到爺爺嘅遺言。入相嘅行為其實都已經係整定左。你以為回到過去改變過去，但其實都只係一步步走向預設嘅未來。呀月以為佢要令將來嘅楚凝同家聰痛苦而殺楚凝父母同引導家聰媽媽自殺，但其實對楚凝同家聰黎講已經係發生咗嘅事。呀月並不知情，佢仲以為自己做左神。只有楚凝犧牲大家對佢嘅記憶，佢改變到家聰媽媽已經踏出嗰一步嘅時空，而分裂出作家聰嘅時空。但楚凝嘅犧牲都 mess up 左時間線，佢嘅家聰有啲 merge 左楚凝。雖然大家都唔記得咗楚凝，但我覺得家聰係改變咗。楚凝穿越嘅時間點嘅家聰雖然已經會食煙，但佢本來都唔係主動食，楚凝俾佢先食。楚凝被忘記之後佢就變咗煙剷食得好純熟，甚至之後個心疑似有事隻 Watch 成日響，會唔會係時空被 mess up 嘅後果呢？

以上為煲完劇同朋友討論嘅不專業見解。Anyway，我係幾鍾意《二月廿九》同《940920》嘅。煲完要煲嘅劇，又空虛了。

_______________

* 一路睇一路錯重點覺得楚凝啲衫好靚

* 朋友表示 Yeesa 個頭點穿越都好完美

撩鼻檢測小貼士

2022-02-10T14:19:00.006+08:00

最近確診人數上升，愈來愈多人逃不過接受強檢或者公司要求檢測嘅命運。作為撩咗年幾兩年兼且每日都有同事朋友回報各區情況嘅過來人，希望以下嘅小貼士可以幫到大家。

關於撩鼻

痛唔痛？一般來講職員都温柔唔痛嘅，有時仲好痕，可以拎定張紙巾以防未戴得切口罩就打噴嚏。如果不幸遇上手法比較粗暴嘅，合埋眼好快就過，加油。
通常會撩鼻先，再用另一支棒撩口（係 Sydney 做過係用同一支棒⋯⋯）職員應該會同你講先後次序。
岳高頭放鬆，撩鼻時張開鼻孔，撩口時輕聲發出「啊」聲直至完成。經驗係主動配合得好通常都會舒服少少同快少少。
撩完戴返口罩走得，早走早著無野要等。

關於短訊

登記完資料，留意電話有無收到短訊。
準備出示完成登記短訊，核對埋樣本瓶號碼先俾你埋位撩鼻。
依家多人做檢測，測試結果個短訊可能要30-40小時先收到，唔好太擔心好耐都未收到係咪中招。
有機會結果已出但出唔切短訊，心急嘅可以自行上 www.evt.gov.hk 查詢。

關於預約/排隊

社區檢測中心可以預約可以 walkin，不過預約短時間內都 full 晒。
等候時間睇彩數，有人等七個鐘，有人等一個鐘。去定洗手間，著多件衫，自備小食同櫈仔（細櫈有轆更好）。
可以俾 $240 自費檢測，條隊應該短啲。但都視乎當日當區人數，有地方俾錢都要排三個鐘，有地方十分鐘搞掂。
衡量下會唔會去第二個中心，可能搏到人少啲，都可能會係更多人。
除咗社區檢測中心，仲有流動採樣站，無得預約全 walkin。
見到人龍問清楚係排緊預約、Walkin 定自費隊。
聽聞人多可能會提早截龍。
記得帶身分證，排到先發現無帶只能深表遺憾。

祝各位身體健康，龍精虎猛！

_______________

有人整咗個檢測站排隊狀況

https://queuemate.eggwaffle.io/

2021 最後一飛

2021-12-31T23:59:00.004+08:00

2021 最後一飛以終於坐上前面右手邊個位作結，個感覺真係同坐jumpsest 食三文治嘅感覺好唔同。

所有野都比起坐喺後面 connect 好多。高咗低咗歪咗少少嘅 attitude change 都好易睇到，感受得更快更直接。Takeoff Landing 嘅時候真心有🤏🏻少少感動。

係 2021 年完成個 Course，都算係今年最大嘅 Achievement 啦！

#仲未升職住

#下年繼續食三文治嘅工作

#等住檢疫結果倒數2021

機組人員的防疫生活

2021-11-18T00:32:00.034+08:00

近日對機組人員的防疫措施進一步收緊，為各位已經心很累的機組人員又再添上一重壓力。甚至傳出有機師穿著制服等巴士前往上班時被人吐口水！

戴定頭盔先，此文並非要抱怨防疫措施，只係想分享機組人員近兩年嘅真實生活，希望大家可以對 crew 多一份體諒尊重。

到酒店 Lock and Seal 是必然的。入房第一件事先用消紙巾抹枱抹櫈抹電話抹水龍頭通通抹。不管窗外有幾天清氣朗風光明媚，最多只可以在窗邊曬太陽。其實一、兩天自閉房內 OK 的，但如果是長 layover 四、五天被困就會開始懷疑人生。Closed Loop 的同事更係外地被困香港被困廿一日，最後再隔離十四天。聽過有人日日係酒店房行一萬步活動筋骨，我嘗試過行半個鐘行到頭都暈都未行到一萬步。Respect。

食個外賣又要擔心染病，左抹右抹，或者索性食杯麵食罐頭食 Prepackaged food。（無印咖哩好食，熱水浸熱即可，真心推介）

飛完十幾個鐘通完頂要繼續捱眼瞓最少兩小時機場檢測等候時間，等候區晝夜一樣燈火通明伴隨吹到頭痛的冷風。加上來回客運大樓，再等人手不足的專用的士歸家，落機四小時後回家已經身心俱疲。又或者連續幾日做即日來回機的話即是每日輪迴檢測地獄，分分鐘等 result 等車仲耐過來回航程。

每日量度體溫已成為習慣，每三、四日被撩鼻亦是家常便飯但求工作人員手勢溫柔。不過目前改成每日一撩甚至二撩。同事們請準備好紙巾。

View this post on Instagram

A post shared by HK Pilot Memes (@hkpilotmemes)

撇開返工的辛酸，有人兩年無見過身處外地的家人；有人擔心意外成為密切接觸者會連累妻兒要入營隔離，考慮自己搬離家；求醫拒收症或勸退、做每年一度嘅 medical renewal body check 被拒絕等時有聽聞甚至親身經歷。

承受呢一切嘅精神壓力都係為左返工，除左載客更為香港運送各種「空運直送」嘅食物、貨物、藥物。龍蝦不會自己遊水過嚟，疫苗藥物都不是石頭爆出嚟的。

「喂，你真係飛過出去喎。」係嘅，明白會有人怕怕有 concern。但可以給予少少尊重嗎？我哋都係人，遭人白眼係會心酸，被人嫌棄彈開九丈遠心會受傷，被人吐口水都係會憤怒的。

可以不愛，不要傷害。

跟你身邊的機組人員朋友打打氣吧！

飛機都要戴口罩 Not Without My Mask

2021-11-08T13:17:00.004+08:00

戴口罩已經係香港人嘅日常，但戴口罩嘅飛機又有無見過呢？Cargolux 有一架特別塗裝的 747 貨機，機頭畫上大大個口罩！仲寫上 NOT WITHOUT MY MASK，完美表達呢兩年嘅日子。口罩塗裝係 2020 年嘅作品，不過我都係第一次親眼見到，仲要係香港機場！

2021 都就快完，2022 有無機會唔使戴口罩呢？

LX-VCF has received its very own mask on its iconic nose-door, reflecting the airline’s commitment to the fight against COVID-19. #notwithoutmymask #LXVCFacemask pic.twitter.com/N2dXLfKbyK
— Cargolux Airlines (@Cargolux_Intl) August 23, 2020

怪事發生了！

2021-08-17T14:48:00.009+08:00

最近又飛 Sydney，海外機組人員依然要入住由政府安排的隔離酒店。因為要由警察 Escort 去房兼開門，所以無敲門就入房了，當晚怪事就發生了！

凌晨兩點半係床上典左一陣放低手機熄燈準備瞓覺，我再三確認已熄機的電視機突然自己開機，畫面出現酒店的「歡迎辭」。以前都遇過同樣情況酒店職員表示為 System Reboot 深感抱歉，於是只係覺得凌晨兩點半阻住我瞓覺！嬲嬲地影張相發洩下就起身熄機。返上床準備再瞓，突然聽到浴室有疑似水滴聲，滴答…滴答…滴答。正考慮起身去檢查水龍頭，聲音突然轉到近電視機方向，變成類似有蚊飛入捕蚊器的撻撻聲，而且愈來愈大聲愈來愈密，仲感覺到聲音方位有移動……

我認我淆底了唔敢去搵聲音源頭。今次房間係 Twin bed 而另一張床我無放物件上去，以往都會將雜物隨意放偏偏今次無。好怕轉身會見到床上有 Whatever 唔應該見到嘅野，於是只好攬住個枕頭阻擋視線。有諗過好唔好要求轉房，但考慮到又要執行李，而且隔離中要轉房大概仲要驚動埋警察安排會好麻煩，於是就算了。朋友知道我驚，叫我播 Om Mani Padme Hum，播咗一陣個心定啲就諗住繼續瞓。但一直瞓下醒下，因為不斷俾「撻撻」聲嚇醒。直到朝早六點左右天開始光了，「撻撻」聲依然仲密左，我終於都忍唔住起身去拎個耳塞用。然後就瞓到十點幾起身，起身時就再無「撻撻」聲了。

朋友們叫我下次再遇到就用粗口鬧！我唔係無諗過但萬一鬧完聲音就係我耳邊出現我咪仲驚！不過可能會講句 “Please let me sleep…”

飛下一轉機時同 Captain 講起呢件事，佢俾一個一笑置之嘅反應。然後我問佢你有無遇過奇怪事？佢答：「我無見過，不過有聽過怪聲同覺得唔舒服。」明明就你都有遇過！定係個「一笑置之」係「你慢慢就慣㗎啦」？！

邊度返黎呀？

2021-07-12T10:19:00.002+08:00

拖住喼搭𨋢遇上清潔姐姐，八卦問我邊度返黎。

「返工呀？邊度返黎呀？」

「係呀，德國返黎。」姐姐秒彈走做角落生物。

「嘩，德國咁危險呀。」
「我做左檢測，陰性呀 😅」（坐咗喺度等左個半鐘呀）
「哦～無事～咁要隔離幾多日呀？」
「我唔使隔離呀因為只係載貨無載客呀。」
「唔使隔離呀？！去德國做咩呀咁危險？」
「返工呀 😅」

「咁要隔離幾多日呀？」
「我唔使隔離呀因為只係載貨無載客呀😅」

我感到姐姐一臉茫然繼續緊貼角落。

但𨋢到了無時間解釋。

「辛苦晒，拜拜～」

挪亞方舟的最終停泊地 Mount Ararat

2021-07-11T02:14:00.004+08:00

在萬尺高空飛行其中一個樂趣就是看不一樣的風景，有時候飛過身旁同事的家鄉，同事通常都會興致勃勃地介紹「景點」，例如歐洲最大的湖、澳洲的礦場。某日飛過土耳其，副機長指向附近的雲海中的兩個山峰，「這是挪亞方舟的最終停泊地 Mount Ararat 啊！」

細細個就已經聽過挪亞方舟的故事，但係我心目中一直就只係一個聖經故事，從來未想過故事的發生地點，竟然無意中就經過了。這天雲層厚厚的看不見地面，不然可以幻想一下當日的挪亞視角。

事後查找 Mount Ararat 的資料，原來除了是聖經《創世紀》記載的挪亞方舟的停泊地，亦是亞美尼亞人的國家象徵和聖山，亞美尼亞國徽正中央的圖案就是 Mount Ararat。較高的山峰是 Greater Ararat，海拔 16854 尺。較低的是 Little Ararat，海拔 12782 尺。Mount Ararat 是一座錐狀火山，由熔岩和火山灰等火山噴出物堆積而成，最後一次的蒸氣噴發在1840 年。

一不小心就研究了聖經故事歷史文化地理，返工長知識了。

如果有興趣，睇英文版的 Wikipedia 資料詳盡好多，中文版有點廢。

機師與椅墊

2021-06-16T21:35:00.006+08:00

逛 IKEA 見到一棟棟椅墊，回憶返晒嚟。飛小型飛機訓練嘅時候，張 Seat 係無法調校嘅。為咗有一個正常視野，唯有加椅墊去墊前/墊高。一般同學仔都係用一至兩個椅墊就夠。

作為一個一般亞洲女子，比一般西方男子矮是正常不過嘅事。於是我係需要用三個椅墊先夠，而我幾位高大嘅教練係一個都唔使嘅。所以經常都會出現泊好機後，教練拎個 Headset 瀟瀟灑灑地先行返 Office，而我就係綁好機執好野後，揹住個滿滿嘅 Flight Bag，一手拎 Tech Log，一手好唔型地抽住三個椅墊離開停機坪。

雖然如此，多謝你哋陪咗我整整一年。

美少女戰士 Eternal X JINS 眼鏡系列｜改造眼鏡吊鍊成為口罩鍊！

2021-06-14T00:57:00.010+08:00

當初日本推出美少女戰士 Eternal X JINS 眼鏡非常心動，但眼鏡選擇始終要配合面型，實在不敢未試過就買所以放棄了。知道 JINS 香港有美戰系列發售就立即去門市買啦！

系列有月野兔、豆釘兔及四位外部戰士設計，商品包括眼鏡、眼鏡盒、迷你收納包同眼鏡吊鍊。除眼鏡外，其他商品為東港城店及 K11 MUSEA 店限定商品啊。

六款眼鏡形狀材質不同，有膠框有金屬框，有粗有幼。鏡腿內側有專屬圖案，外側有守護星符號配水鑽裝飾。

試過六款我最鍾意係月野兔同土萌瑩款，最後揀月野月款眼鏡，再入手眼鏡盒同眼鏡吊鍊。迷你收納包我真心用不著就無買。眼鏡吊鍊我成功改為口罩鍊，實用率大大提升！

官方網站

https://www.jins.com.hk/zh-hant/sailormoon/

分店位置

https://www.jins.com.hk/zh-han t/findastore/

Digital Declutter: 清理 Email

2021-04-27T03:37:00.004+08:00

自從 Gmail 好智能地幫用戶分類郵件，將重要郵件放 Primary，其他不太重要嘅郵件自行分發到 Promotion、Update 類，的確重要郵件無咁容易被大量郵件淹沒，但同時我都失去動力去睇「其他郵件」有無有價值嘅內容。結果儲儲埋埋有過萬封 unread email，見到啲數字就好想處理但又頭痛逃避。

終於都下定決心要做 digital declutter，因為 email 就爆 storage 就由 email 入手。

為自己訂幾項 Rules：

重要電郵需要留底，就好好分類入一個有意義嘅 Label
無關痛癢嘅內容例如商場優惠、Online Banking 登入通知、過時資訊等等一律刪除
不再感興趣嘅 newsletter / email list 避免定期接收垃圾

諗住打鐵趁熱一晚完成，但唔知係咪操作得太快太密，結果係處理完大約六千封 email 時出現 temporary error，短時間內無法登入。今晚只好暫停明天再續。

滋潤保濕剛剛好 NATURALSOPHY Organic Beauty Cream & Organic Wonder Oil

2021-04-18T03:34:00.013+08:00

最近試用黎自德國嘅 NATURALSOPHY Organic Beauty Cream 同 Organic Wonder Oil，認真用咗一個月可以分享用後感啦!

NATURALSOPHY Organic Beauty Cream

話說本身用緊 Jurlique 嘅 Pure Rose Cream，鍾意佢嘅少潤清爽同玫瑰香味。唯獨額頭位唔夠保濕好易甩皮，要拎返覺得太潤太笠而打入冷宮嘅 AESOP Camellia Nut Facial Hydrating Cream 專搽額頭。正當覺得次次都要用兩罐 Cream 好煩，就收到 Organic Beauty Cream 拯救咗我！

Organic Beauty Cream 對我黎講滋潤保濕剛剛好，天氣乾夠潤，天氣熱又唔會笠，額頭臉頰都啱用。第二朝都仲有滋潤 Soft 感。Cream嘅香味好天然 Soothing ，令人好放鬆，每晚都好期待。份量係額頭同臉頰各點一下就夠，易推又快吸收好好用。目前係我嘅 Face Cream 第一名晚晚用，非常推薦。

成份天然，由有機蘆薈汁、天然油、芒果同乳木果製成，不含礦物油、石蠟同合成香料，追求天然護膚品嘅人值得一試。

NATURALSOPHY Organic Wonder Oil

我會係沖完涼趁皮膚濕濕地就搽 Wonder Oil，雖然係油但好快就吸收晒唔會油淋淋，仲有薰衣草香味。面同身都可以用，搽完超過12個鐘，皮膚摸落都仲有 baby soft 嘅感覺，滋潤效果非常持久！

Wonder Oil 由不同天然油混合而成，成份有有機芝麻油、有機牛油果油、有機杏仁油等等，可以保濕滋潤同舒緩濕疹。嬰兒都用得，除咗沖涼後搽滋潤皮膚之外，仲可以當作按摩油幫寶寶按摩肚仔同手手腳腳。準媽媽都可以用嚟滋潤肚皮㗎。

如果身邊有朋友剛生完 BB 要買賀禮，呢支 Wonder Oil 係一個好選擇，BB 同媽媽都啱用非常實用。

有興趣嘅朋友可以係 Sevila Baby Product 買到 NATURALSOPHY 嘅產品：

NATURALSOPHY Organic Beauty Cream

https://www.sevilababyproduct.com/product-page/organic-beauty-cream-50ml

NATURALSOPHY Organic Wonder Oil

https://www.sevilababyproduct.com/product-page/organic-wonder-oil-50ml

Sevila Baby Product 由一位香港媽媽創立，搜羅各種安全、高品質，價錢親民嘅母嬰産品帶俾各位新手媽媽，為寶寶提供一個安全嘅成長環境。

除咗新手爸媽買野俾BB，身邊有朋友生完 BB 都可以係度揀禮物做賀禮呀！

絕版官方港龍航空 A321neo 1:200 模型 B-HPB

2021-04-01T00:45:00.006+08:00

國泰港龍航空因疫情影響，於2020年10月21日起即日停止營運。好可惜機身髹上港龍 Livery 的新成員Airbus A321neo B-HPB 未及正式投入運作載客，慶幸仲有飛機模型留低你存在過嘅痕跡。

助六の日常 • 首個海外原畫作品展覽

2021-03-30T00:34:00.003+08:00

養左 Yogurt 後認識日本嘅人氣倉鼠助六好鍾意，助六嘅畫除左可愛，仲好有溫度好治癒。好 Surprise 助六第一個海外畫展係黎香港開，開幕第二日就趕去睇！

《助六の日常》首個海外原畫作品展覽係海港城嘅 Gallery by the Harbour 舉行，免費入場，亦都唔需要排隊。場內有幾十幅原創畫作，特別仲有香港主題嘅畫作！似乎可以購買，不過價錢用貼紙遮住左，估計大約四千至五千一張。現場有紀念畫卡出售，$200 一張，好靚好想要但屋企真係無位 Display。香港主題作品我最鍾意山頂 Selfie，場內購物滿 $300 會送一張助六山頂 Selfie 卡，片尾有實物，好靚值得收藏！

場內亦有出售助六嘅周邊產品，不過我第二日去時已經有部分 sold out，第四日有人報告已經全部 sold out。5/4 會有新一批紀念畫卡，唔知到時會唔會補貨。不過其實就算只係去睇畫都好值得，因為睇原畫係比起 Facebook 睇 digital 版更有溫度！而且會場佈置好靚，有幾個打卡位好值得影相！有倉鼠主人帶埋倉鼠去影相，效果好可愛 :)

助六の日常 • 首個海外原畫作品展覽

日期：2021年3月25日至4月18日

地點：海港城・美術館

【開箱 Unboxing】微影Tiny《衝上雲霄》機師 Tiny Block

2021-02-21T03:29:00.007+08:00

某日行街係 MegaBox 的微影 Tiny，發現有以《衝上雲霄》主角唐亦琛 Captain Tong 為藍本的機師 Tiny Block！

面貌髮型等等基本上同 Sam 哥毫無關係，不過制服造型等細節都齊全，有隊長的四條柴 Gold bars、 Wing 襟章、機師帽，仲要著孖襟啊！盒內仲附送道具行李一件，就權充機師的 Flight Bag 吧。始終就算飛 Turnaround 不帶行李都要帶 Flight Bag 呀。

購買地點：九龍灣 MegaBox 的微影 Tiny

Q for Quarantine，Sydney 的酒店隔離生活

2021-02-11T01:34:00.001+08:00

目前 NSW 對海外機組人員採取比以往嚴格的隔離措施。落機後由醫護人員解釋檢疫安排、過關、拎行李，再排隊做痛毒檢測。完成檢測後會貼上大大張紅底白字「Q」字貼紙，由警員帶領行特別通道去搭 Crew Bus 送往指定機組人員隔離酒店。搭上Crew Bus 前大家並不知道酒店安排，連航空公司地勤職員都不知，好有「賣豬仔」的感覺。

到達酒店門外不可落車，原來大堂有另一間航空公司機組人員未完成入住手續。只可以繼續坐在巴士上等，當時距離 landing 時間已過兩小時有多。頂了一個通宵實在太攰要在位上閉目養神。

警察終於放行，落車拎行李入酒店準備 check in，望錶原來已經 after landing 兩個半小時。

Check in 手續比平時繁複，酒店職員更要額外登記三餐送飯時間。酒店一日三餐由政府資助酒店提供，無選擇，不過如果有食物敏感等特別要求可以提出，亦可於饍食供應時間內要求指定時間。

完成酒店 check in 不會獲發房卡，要過旁邊 counter 同警察 check in。完成第二個 check in 後由警員帶往電梯選擇樓層，到達目的樓層後，由另一位警員 escort 到房門，用警員手持的房卡開門送入房，直至回程返港前都不可以離開房間。平時開門入房前必定先敲門，不過今次無辦法只好默念「打搞晒～」

咔嚓一聲房門鎖上，隔離生活正式開始。當時已是 after landing 三小時，眼瞓狀態尤如一隻樹熊。當時好肚餓但又過了午餐供應時間，打算沖涼後捱一捱餓等晚餐。沖涼後在床上輾轉之間竟然有敲門聲。打開門，地上是一份午餐！填飽肚後，就忍不住昏迷沉睡到晚餐時間⋯⋯

每日都在等送飯，其實真的有點坐監的感覺，尤其食物無選擇。

早餐：穀物類早餐＋牛奶＋Yogurt＋牛角包＋鬆餅/蛋糕＋蘋果＋紙包果汁，三餐中最合口味配搭

午餐：Wrap 類凍食＋沙律＋cut fruit，味道不差，最不習慣全凍食

晚餐：熱食主食配澱粉質 side＋甜品，甜品最好食

最後一日趕住 Prep Flight 忘了影早餐

幸好酒店接受外賣送貨，由酒店職員代收再送到房門。最終 order 了超市送貨加餸，又叫了一餐 Nando’s 食雞。最後一日再 order 一盒 Krispy Kreme 帶返香港食！

隔離生活除了等飯食，就是睇 Netflix 打發時間同製作 YouTube video。今個 layover stay 成功發佈《機師日常 123 - Phonetic Numbers》，總算無太浪費人生。

話説 Sydney 的檢測結果需要自行上網查詢。未查詢前不斷收到電郵表示「明白你一定後心急想知檢測結果，請登入獲得結果」。實情是我心諗結果陽性的話我大概已經被醫護人員接走去醫院吧。

回程返港當日要向警察 check out ，完成手續後警員又 escort 上車。在車上等齊人時，見到警員攔截行人路上途人要求轉行對面行人路。原來係因為隊長在行人路上準備上車，我們笑説機組人員即使 test negative 都依然「生人勿近」。

去到機場有「機組人員專線」處理行李、安檢、出境檢查，直接避開各大 Duty Free 店舖直達登機閘口。

返到香港又要再做病毒測試，幾日後因為機場島員工需要強制檢測，給果一星期內做了三次檢測。我決定要統計 2021 不論香港海外合共要做幾多次檢測。

試飛 Trial Introdutory Flight

2021-01-18T23:55:00.003+08:00

報考見習機師計劃前，除了熟讀書本外，我覺得應該至少要去試飛。試飛可以打破幻想親身體驗駕駛飛機的感覺，了解自己是否真的對飛行有興趣，說出 "I love flying" 時都比較有信服力吧。

年假珍貴，學飛亦所費不菲。可以趁旅行花半天去試飛，時間和價錢比起直接學飛兩星期容易接受和負擔，而且可以從高空欣賞當地風景。我的定翼機初體驗就是去關島旅行時飛 Trial Introductory Flight 啊！

如果有旅伴，嘗試說服他們一起去試飛吧，無論如何都是一個特別的體驗。說不定試飛後，旅伴都會對飛行產生興趣呢！

* 視乎飛行學校、飛行時間長短同機種，Trial Introductory Flight 每次收費大約 $1000 - $3000。

** Trial Introductory Flight 通常都是被認可為飛行訓練，可以填寫 Logbook。詳情請務必向飛行學校查詢和確認。

那些年坐在 Jumpseat 的我們

2021-01-09T01:08:00.006+08:00

飛機的駕駛艙內，除了機長與副機長的座位，另有一般稱為 Jumpseat 的 Observer 座位，係駕駛艙內的第一排（唯一一排）觀眾席。某日同隊長講起年少時有幸坐 Jumpseat 飛了一趟即日來回，當時我對民航機師的認識只限於電影電視劇呈現的畫面。坐在 Jumpseat 的我近距離認識到專業機師的真實工作流程、看到令人內心滾動的駕駛艙三萬尺高空風景，當時我就更加堅定將來要成為一位機師。

原來隊長的父親都是一位民航機師，年少時用員工家屬身份坐 Jumpseat 時看著機師飛行時的工作，就覺得「其實我都可以啊！」於是就立志成為民航機師。那些年坐在 Jumpseat 的我們此刻就坐在前座笑著說 Jumpseat flight is a magical experience!

有聽過不少打算投考機師的空姐空少，因為工作時有機會坐 Jumpseat 漸漸對飛行產生興趣。到底 Jumpseat 造就了世上幾多個機師呢？

kiss me before flight

東京 / 美少女戰士真人舞台劇 Pretty Guardian SailorMoon - Shining Theater Shinagawa

Canada 加拿大 / Niagara Falls 一日遊．近距離感受瀑布！

原來係滅火筒！

Crew Meal

超可愛國泰 BB 機師衫！仲有空姐空少造型

與寶寶的第一次分離

Happy One Month!

對於《940920》

撩鼻檢測小貼士

關於撩鼻

關於短訊

關於預約/排隊

2021 最後一飛

機組人員的防疫生活

飛機都要戴口罩 Not Without My Mask

怪事發生了！

邊度返黎呀？

挪亞方舟的最終停泊地 Mount Ararat

機師與椅墊

美少女戰士 Eternal X JINS 眼鏡系列 ｜改造眼鏡吊鍊成為口罩鍊！

Digital Declutter: 清理 Email

滋潤保濕剛剛好 NATURALSOPHY Organic Beauty Cream & Organic Wonder Oil

絕版官方港龍航空 A321neo 1:200 模型 B-HPB

助六の日常 • 首個海外原畫作品展覽

【開箱 Unboxing】微影Tiny《衝上雲霄》機師 Tiny Block

Q for Quarantine，Sydney 的酒店隔離生活

試飛 Trial Introdutory Flight

那些年坐在 Jumpseat 的我們

美少女戰士 Eternal X JINS 眼鏡系列｜改造眼鏡吊鍊成為口罩鍊！