ശിഥില ചിന്തകള്‍

എന്താണ് രക്തം?

noreply@blogger.com (K.P.Sukumaran) — Fri, 16 Jan 2026 13:11:00 +0000

ഇപ്പോൾ കൊളസ്ട്രോൾ അധികം എന്ന് പറഞ്ഞ് ഡോക്ടർമാർ ബ്ലഡ് തിന്നർ എന്ന് ഒരു ഗുളിക എഴുതി കൊടുക്കുന്നുണ്ട്. പ്രിസ്ക്രൈബ് ചെയ്യുന്ന പത്ത് പന്ത്രണ്ട് ഗുളികളിൽ ഒന്നാണ് ഈ ബ്ലഡ് തിന്നറും. കഴിക്കുന്നവർ വിചാരിക്കുന്നത് ഇത് എന്റെ രക്തം നേർപ്പിക്കാനാണ് എന്നാണ്. എന്നാൽ ആ ഗുളിക എന്താണെന്ന് വെച്ചാൽ ആസ്പിരിൻ ആണ്. ഇതിന് എന്തിനാണ് ബ്ലഡ് തിന്നർ എന്ന് പറയുന്നത് എന്ന് മനസ്സിലാകുന്നില്ല.

രക്തം കട്ടപിടിക്കുന്നത് ( Clotting or coagulation) തടയാൻ വേണ്ടിയാണ് ഇത് കൊടുക്കുന്നത്. എന്നാൽ രക്തം ക്ലോട്ടിങ്ങ് ആകുന്നത് ശരീരത്തിന്റെ ഒരു ഉപായമാണ്. അതായത് ആന്തരീകമായോ ബാഹ്യമായോ മുറിവ് ഉണ്ടായാൽ രക്തം ക്ലോട്ട് ആയി അമിതമായ രക്തസ്രാവം ഒഴിവാകും. രക്തത്തിലെ പ്ലേറ്റ്‌ലെറ്റുകൾ ഒട്ടിപ്പിടിക്കുമ്പോഴാണ് രക്തം ഇങ്ങനെ കട്ടയാകുന്നത്. പ്ലേറ്റ്‌ലെറ്റുകൾ ഒട്ടിപ്പിടിക്കാൻ ഒരു എൻസൈം വേണം. ആ എൻസൈം ഉണ്ടാകുന്നത് തടയുകയാണ് ആസ്പിരിൻ ചെയ്യുന്നത്. അപ്പോൾ എവിടെയെങ്കിലും മുറിവ് ഉണ്ടായാലോ? ചോര അങ്ങനെ വാർന്നുപോകും, അത്ര തന്നെ. കൊളസ്ട്രോൾ ബ്ലോക്ക് ഉണ്ടാക്കും എന്ന് പറഞ്ഞാണ് ഈ ആസ്പിരിൻ ഗുളിക ആളുകളെ കൊണ്ട് സ്ഥിരമായി വിഴുങ്ങിപ്പിക്കുന്നത്. എന്നിട്ട് രക്തം നേർപ്പിക്കാൻ എന്ന് തെറ്റിദ്ധരിപ്പിക്കലും. കൊളസ്ട്രോളിന്റെ ഈ പേരുദോഷം എന്ന് മാറുമോ ആവോ..

രക്തത്തെ പറ്റി ചില ബേസിക് വസ്തുതകൾ ചുരുക്കി പറയാം. പോസ്റ്റ് നീണ്ടുപോയാൽ ആരും വായിക്കാൻ മെനക്കെടില്ല എന്ന് അറിയാം.

നമ്മെ ജീവനോടെ നിലനിർത്തുന്ന ഒരു ജീവദ്രാവകമാണ് രക്തം. നമ്മുടെ ശരീരം എന്നത് അനേകം കോശങ്ങൾ ( Cell ) ചേർന്ന് ഉണ്ടായതാണ്. ഇഷ്ടികകൾ അടുക്കി വെച്ച് കെട്ടിടം നിർമ്മിക്കുന്നത് പോലെയാണത്. അതുകൊണ്ട് ഒരു കോശത്തെ ഒരു ഇഷ്ടികയോട് ഉപമിക്കാം. രക്തം നമ്മുടെ ഓരോ കോശത്തിലും ഓക്സിജനും മറ്റ് പോഷക ഘടകങ്ങളും എത്തിക്കുകയും, എല്ലാ കോശങ്ങളിലെയും മാലിന്യങ്ങൾ പുറന്തള്ളുകയും ചെയ്യുന്നു.

പ്രകൃതിചികിത്സക്കാർ പറയുന്നത് പോലെ ഒരു മാലിന്യവും വിഷവും ശരീരത്തിൽ കെട്ടിക്കിടക്കുകയില്ല. ഓരോ ഹൃദയസ്പന്ദനത്തിലും നമ്മുടെ ശരീരം ശുദ്ധീകരിക്കപ്പെടുന്നുണ്ട്. അതിനാണ് ഹൃദയവും കരളും കിഡ്‌നിയും സദാ പ്രവർത്തനനിരതമായിരിക്കുന്നത്.

കോശങ്ങളിലേക്ക് പോഷകങ്ങളും ഓക്സിജനും വഹിച്ചു കൊണ്ടുപോവുകയും കാർബൺ ഡൈ‌ഓക്സൈഡ് മുതലായ വേസ്റ്റ് പ്രോഡക്റ്റുകൾ നീക്കം ചെയ്യുകയും ചെയ്യുന്നത് കൊണ്ട് രക്തത്തെ ഒരു ഗുഡ്‌സ് വാഹനത്തോട് ഉപമിക്കാം. നമ്മുടെ ശരീരത്തിലെ ഇമ്മ്യുൺ സിസ്റ്റം പ്രവർത്തിക്കുന്നതിന്റെ പ്രധാന ഘടകം രക്തത്തിലെ വെളുത്ത രക്താണുക്കളാണ് (White Blood Cells)

പ്രായപൂർത്തിയായ ഒരാളിൽ 4 - 6 ലിറ്റർ രക്തം ഉണ്ടാകും. രക്തത്തിലെ ഘടകങ്ങൾ Red Blood Cells, White Blood Cells, Platelets , Plasma എന്നിവയാണ്. ഇതിൽ പ്ലാസ്മ 55 ശതമാനവും ചുവന്ന രക്താണുക്കൾ 44 ശതമാനവും ബാക്കി ഒരു ശതമാനം പ്ലേറ്റ്‌ലെറ്റുകളും വെളുത്ത രക്താണുക്കളും ആണ്. പ്ലാസ്മയിൽ 90 ശതമാനവും വെള്ളമാണ്. ബാക്കി 10 ശതമാനം വരുന്നത് ഗ്ലൂക്കോസ് (ബ്ലഡ് ഷുഗർ) , അമിനോ ആസിഡ്‌സ് (പ്രോട്ടീൻ), ലിപിഡ്‌സ് (കൊഴുപ്പ് , കൊളസ്ട്രോൾ), ഹോർമോൺസ്, എലക്ട്രോലൈറ്റ്സ് , വേസ്റ്റ് പ്രോഡക്ട്സ് എന്നിവയാണ്.

ചുവന്ന രക്താണുക്കളിലെ ഹീമോഗ്ലോബിൻ തന്മാത്രയാണ് നാം ശ്വസിക്കുന്ന വായുവിലെ ഓക്സിജനെ എല്ലാ കോശങ്ങളിലും എത്തിക്കുന്നത്. രക്തത്തിന് ചുവപ്പ് നിറം ഉണ്ടാകാൻ കാരണം ഹീമോഗ്ലോബിനാണ്. ഹീമോഗ്ലോബിന് ചുവപ്പ് നിറം ഉണ്ടാകുന്നതിന് കാരണം ആ തന്മാത്രയിൽ അടങ്ങിയിട്ടുള്ള ഇരുമ്പ് എന്ന മൂലകമാണ്. ഇവിടെ സാന്ദർഭികമായി ഇലകൾക്ക് പച്ചനിറം നൽകുന്ന ഹരിതകം അഥവാ ക്ലോറോഫിൽ എന്ന തന്മാത്രയെ പറ്റി പരാമർശിക്കേണ്ടതുണ്ട്. ഹീമോഗ്ലോബിനും ക്ലോറോഫിലും തമ്മിലുള്ള ഒരേയൊരു വ്യത്യാസം ഹീമോഗ്ലോബിൻ തന്മാത്രയിലെ ഇരുമ്പിന്റെ സ്ഥാനത്ത് ക്ലോറോഫിൽ തന്മാത്രയിൽ മെഗ്‌നീഷ്യം മൂലകം ആണുള്ളത് എന്നതാണ്.

രക്തത്തെ കുറിച്ച് എഴുതിയാൽ ഇനിയും എത്രയോ വിസ്തരിച്ച് എഴുതാം. എന്നാൽ ഞാനതിന് തുനിയുന്നില്ല. എന്തെന്നാൽ സയൻസ് വിഷയങ്ങൾ എഴുതിയാൽ വളരെ കുറച്ച് പേർ മാത്രമേ വായിക്കുന്നുള്ളൂ. സ്വന്തം ശരീരത്തെ പറ്റി ആയാൽ പോലും അതിന്റെയൊന്നും ശാസ്ത്രീയ (Scientific) വസ്തുതകൾ മനസ്സിലാക്കാൻ ആളുകൾക്ക് താല്പര്യം ഇല്ല. അതുകൊണ്ട് മനസ്സിലാക്കാൻ താല്പര്യം ഉള്ളവർക്ക് വേണ്ടി കുറച്ച് നോട്ടുകളുടെ ഇമേജ് ഇതോടൊപ്പം അപ്‌ലോഡ് ചെയ്യുന്നുണ്ട്.

നോട്ടുകൾക്ക് കടപ്പാട് : ഇന്റർനെറ്റ്

എന്താണ് യുറേനിയം സമ്പുഷ്ടീകരണം ?

noreply@blogger.com (K.P.Sukumaran) — Thu, 26 Jun 2025 09:27:00 +0000

ജൻ ഔഷധിയും ചാത്തൻ മരുന്നുകളും

noreply@blogger.com (K.P.Sukumaran) — Tue, 18 Feb 2025 06:07:00 +0000

ജൻ ഔഷധിയിലെ മരുന്നുകൾ ഒന്നിനും കൊള്ളില്ലെന്നും തീരെ നിലവാരം ഇല്ലാത്തതാണെന്നും ആരും വാങ്ങരുത് എന്ന് ഒരു പക്ഷവും , അതല്ല ജൻ ഔഷധിയിലെ എല്ലാ മരുന്നുകളും പരിശോധനയിൽ ഗുണനിലവാരം ഉറപ്പാക്കിയതാണ് എന്ന് മറുപക്ഷവും വാദിക്കുന്ന ചർച്ച എന്റെ ശ്രദ്ധയിലും പെട്ടിരുന്നു. ഒരു സുഹൃത്ത് ഇതിൽ എന്റെ അഭിപ്രായവും ആരാഞ്ഞിരുന്നു.

ജൻ ഔഷധിയിൽ നല്ല മരുന്നുകൾ ഉണ്ട്. പ്രശസ്ത കമ്പനികളുടെ മരുന്നുകളും അവിടെയുണ്ട്. ഉദാഹരണത്തിന് CIPLA. ഡോക്ടറുടെ കുറിപ്പ് ഇല്ലാതെ സ്വന്തം നിലയിൽ മരുന്ന് വാങ്ങുമ്പോൾ ഞാൻ CIPLA യുടെ മരുന്നുകൾ വാങ്ങാൻ ശ്രദ്ധിക്കാറുണ്ട്. ഡോക്ടർ നിർദ്ദേശിച്ച പ്രകാരം ഞാൻ ബി.പി.ക്ക് CILACAR 10mg എന്ന മരുന്ന് കഴിഞ്ഞ നാല് വർഷമായി കഴിച്ചു വരികയായിരുന്നു. ഒരു ടാബ്‌ലറ്റിന് 12 രൂപയാണ് വില. ആ മരുന്നിന്റെ കെമിക്കൽ അഥവാ ജനറിക് പേര് Cilnidipine എന്നാണ്. മുന്ന് മാസം മുൻപ് ഞാൻ നാട്ടിലെ ജൻ ഔഷധിയിൽ പോയി Cilnidipine (10mg) ഉണ്ടോ എന്ന് ചോദിച്ചു. അവർ എനിക്ക് CIPLA യുടെ CILOGARD 10mg എടുത്ത് തന്നു. വില 2 രൂപ മാത്രം. 10 രൂപ ലാഭം. രണ്ടിനും ഒരേ ഫലമാണ് എനിക്ക് കിട്ടുന്നത്. ബി.പി സ്റ്റേബിൾ ആയി മെയിന്റൈൻ ചെയ്യുന്നു.

J B CHEMICALS AND PHARM കമ്പനിയാണ് CILACAR നിർമ്മിക്കുന്നത്. അവരുടെ മരുന്നിന് 12 രൂപ വിലയുള്ളപ്പോൾ CIPLA യുടെ CILOGARD 10mg ന് രണ്ട് രൂപ നിരക്കിൽ ജൻ ഔഷധിയിൽ നിന്ന് ലഭിക്കുന്നു. രണ്ടിലും മരുന്ന് Cilnidipine തന്നെയാണ്. CILACAR എന്നതും CILOGARD എന്നതും ബ്രാൻഡ് പേരുകളാണ്. ഇനിയും പല കമ്പനികൾ നിർമ്മിച്ച് പല ബ്രാൻഡ് പേരുകളിൽ ഇതേ മരുന്ന് ലഭ്യമാണ്. എന്നാൽ എല്ലാറ്റിനും ഗുണനിലവാരവും ഫലപ്രാപ്തിയും ഉണ്ടാകും എന്ന് പറയാനും പറ്റില്ല. അതുകൊണ്ട് എനിക്ക് പറയാനുള്ളത് ജൻ ഔഷധിയിൽ ആയാലും മറ്റ് മെഡിക്കൽ സ്റ്റോറുകളിൽ ആയാലും ഡോക്ടർ കുറിച്ചു തരുന്നത് ആയാലും എല്ലാ മരുന്നുകളും ഗുണനിലവാരം ഉള്ളതോ ഇല്ലാത്തതോ അല്ല. രണ്ടും മിക്സ് ആണ്. അതുകൊണ്ടാണല്ലോ ഡോക്ടർക്ക് തന്നെ മരുന്ന് മാറ്റി കുറിച്ചു തരേണ്ടി വരുന്നത്. ജൻ ഔഷധിയിൽ നല്ല കമ്പനികളുടെ നല്ല മരുന്നുകളും ഉണ്ട്. പൊതുവേ മരുന്ന് വിപണിയിൽ ഉള്ളത് പോലെ ചാത്തൻ മരുന്നുകളും അവിടെയുണ്ട്.

നിലവിൽ ഇന്ത്യയിൽ കുടിൽ വ്യവസായം പോലെ മരുന്നുകൾ നിർമ്മിച്ച് മാർക്കറ്റ് ചെയ്യുന്ന അനേകം ചെറുകിട കമ്പനികൾ ഉണ്ട്. അത്തരം എല്ലാ കമ്പനികളുടെയും എല്ലാ ബാച്ച് മരുന്നുകളും ക്വാളിറ്റി പരിശോധിച്ച് ഗുണനിലവാരം ഉറപ്പാക്കുന്ന സംവിധാനം ഇന്ത്യയിൽ ഇല്ല. നമ്മുടേത് പോലത്തെ ഇത്രയും വിശാലമായ രാജ്യത്ത് അതും സ്വതന്ത്ര ജനാധിപത്യം ഒരു നിയന്ത്രണവും ഇല്ലാതെ പുലരുന്ന നമ്മുടെ നാട്ടിൽ അത്തരം സംവിധാനം അസാധ്യമാണ്. സർക്കാരിനെ കുറ്റം പറയുന്നതിൽ അർത്ഥമില്ല. ഇങ്ങനെയാണ് സ്വാതന്ത്ര്യം കിട്ടിയത് മുതൽ തുടർന്ന് വരുന്നത്. അതുകൊണ്ട് തന്നെ പൊതു മെഡിക്കൽ ഷോപ്പുകളിൽ എന്ന പോലെ ജൻ ഔഷധിയിലും ചാത്തൻ മരുന്നുകളും ഉണ്ടാകും. ചേരി തിരിഞ്ഞ് ന്യായീകരിക്കുന്നതിൽ രാഷ്ടീയവും ഉണ്ടാകും. ആളുകൾ വിലക്കുറവിന്റെ പേരിൽ ജൻ ഔഷധിയിൽ നിന്ന് മരുന്നുകൾ വാങ്ങുന്നു. അവർക്ക് ഫലം കിട്ടുന്നെങ്കിൽ തുടർന്ന് വാങ്ങും. ഇല്ലെങ്കിൽ ഡോക്ടറെ കണ്ട് വേറെ മരുന്ന് വേറെ ഷോപ്പിൽ നിന്ന് വാങ്ങും. അതാണ് നടന്ന് വരുന്നത്. അങ്ങനെ നടന്നോട്ടെ.

ഈ ചർച്ചയ്ക്ക് തുടക്കമിട്ട ബദരി നാരായണന്റെ മൂല പോസ്റ്റ് ഞാൻ വായിച്ചിരുന്നു. ഒരു ഉത്തരവാദിത്തവും ഇല്ലാതെ മിനിക്കഥ പോലെ മെനഞ്ഞ ഒരു പോസ്റ്റായിട്ടാണ് എനിക്ക് ആ എഴുത്തിനെ പറ്റി തോന്നിയത്. തന്റെ സുഹൃത്തിന്റെ അച്ഛന് ജൻ ഔഷധിയിലെ മരുന്ന് കഴിച്ച് ഫലം കിട്ടാത്തത് കൊണ്ട് രണ്ടാമത്തെ പ്രാവശ്യം വീണ്ടും സ്ട്രോക്ക് വന്ന് പരിയാരത്ത് രക്ഷ കിട്ടാതെ മംഗലാപുരത്ത് അഡ്‌മിറ്റായ സംഭവമാണ് പോസ്റ്റിൽ ഒരു ആധികാരികതയും ഇല്ലാതെ എഴുതിയിരിക്കുന്നത്. പോസ്റ്റിന്റെ കൂടെ മരുന്നുന്റെ ചിത്രവും കൊടുത്തിട്ടുണ്ട്. ആ മരുന്ന് Atorwal AS 10mg/75mg എന്ന് ബ്രാൻഡ് പേരുള്ള ഒരു കോമ്പിനേഷൻ മരുന്നാണ്. Wallace Pharmaceuticals Pvt Ltd കമ്പനിയാണ് അത് മാർക്കറ്റ് ചെയ്യുന്നത്. Atorvastatin (10mg) പിന്നെ Aspirin (75mg) എന്നീ രണ്ട് ജനറിക് മരുന്നുകൾ ആണ് അതിൽ ഉള്ളത്. ഇത് ജൻ ഔഷധിക്കായി മാത്രം നിർമ്മിച്ച മരുന്ന് അല്ല. പുറത്തും കിട്ടും അത് പോലെ ജൻ ഔഷധിയിലും കിട്ടുന്നു എന്ന് മാത്രമല്ലേയുള്ളൂ. അങ്ങനെയുള്ള ഒരു നിരുത്തരവാദ പോസ്റ്റിന്റെ പേരിൽ ജൻ ഔഷധിക്കെതിരെ പ്രചാരണം നടത്തുന്നത്, അവിടെ നിന്ന് മരുന്ന് വാങ്ങി ഫലം അനുഭവിക്കുന്ന നിരവധി പാവപ്പെട്ടവരുടെ വയറ്റത്തടിക്കുന്ന പരിപാടിയാണ്. അത് ചെയ്യരുത്.

പിന്നെ എനിക്ക് പറയാനുള്ളത് മരുന്നിന്റെ കാര്യത്തിൽ ഡോക്ടർമാരെയാണ് നമ്മൾ നൂറ് ശതമാനവും വിശ്വസിക്കേണ്ടത് എന്നാണ്. കാരണം ഏത് ഡോക്ടറെ സംബന്ധിച്ചും രോഗികൾക്ക് ഏറ്റവും ഫലം ചെയ്യുന്ന മരുന്ന് മാത്രമേ അനുഭവത്തിൽ കൂടി അവർ പ്രിസ്ക്രൈബ് ചെയ്യുകയുള്ളൂ. എങ്കിൽ മാത്രമേ അവർക്ക് പിടിച്ചു നിൽക്കാൻ പറ്റൂ. മരുന്ന് കമ്പനിയുടെ കമ്മീഷനും പാരിതോഷികവും കിട്ടാൻ വേണ്ടി ചാത്തൻ മരുന്ന് കുറിച്ചുകൊടുത്താൽ, അങ്ങനെ രോഗികൾക്ക് രോഗം മാറാതെ വന്നാൽ ആ ഡോക്ടർ ഫീൽഡിൽ നിന്ന് ഔട്ട് ആയിപ്പോകും. ആരും പിന്നെ ആ ഡോക്ടറെ സമീപിക്കില്ലല്ലോ. അത് ഏത് ഡോക്ടർക്കും അറിയാമല്ലോ? അതുകൊണ്ട് മരുന്ന് കമ്പനിയുടെ പ്രതിഫലത്തിന് വേണ്ടി ഒരു ഡോക്ടറും തന്റെ പേഷ്യന്റിനെ ഒറ്റിക്കൊടുക്കില്ല. അഥവാ ഒരു കമ്പനിയുടെ മരുന്ന് കൊണ്ട് രോഗിയുടെ രോഗവും മാറുന്നു അത് എഴുതിക്കൊടുത്തത് കൊണ്ട് ഡോക്ടർക്ക് കമ്പനി പാരിതോഷികവും നൽകുന്നു എങ്കിൽ അതിൽ നമുക്ക് എന്താണ് ചേതം. ഒരേ മരുന്ന് പല കമ്പനികൾ ഒരേ ഗുണനിലവാരത്തിൽ നിർമ്മിക്കുമ്പോൾ വിപണി മത്സരത്തിന്റെ പേരിൽ ഡോക്ടർക്ക് പാരിതോഷികം കൊടുക്കുന്നത് സ്വാഭാവികമാണ് എന്ന് കരുതിയാൽ മതി. നമുക്ക് രോഗം മാറിയാൽ പോരേ?

മറ്റൊരു കാര്യം, രോഗികൾക്ക് മരുന്നുകളുടെ ജനറിക് പേര് മാത്രം പ്രിസ്ക്രിപ്ഷനിൽ എഴുതി കൊടുക്കാൻ ഡോക്ടർമാരെ നിർബ്ബന്ധിക്കരുത്. അങ്ങനെ വന്നാൽ ചികിത്സ ഡോക്ടർമാരുടെ കൈയിൽ നിന്ന് വിട്ടുപോകും. മരുന്ന് ഷോപ്പിൽ മരുന്ന് എടുത്തു കൊടുക്കുന്ന ആളായിരിക്കും പിന്നെ ചികിത്സ തീരുമാനിക്കുക. ഡോക്ടർമാർ അപ്പോൾ വെറും നോക്കുകുത്തികൾ ആയിപ്പോകും. അത് നമ്മുടെ ആരോഗ്യരംഗം താറുമാറാക്കും. നിലവിൽ ഡോക്ടർക്ക് വിശ്വാസമുള്ള ബ്രാൻഡുകളുടെ മരുന്ന് കുറിച്ചു തരുന്ന രീതിയാണ് എല്ലാവർക്കും നല്ലത്.

വാൽക്കഷണം: ഇപ്പോൾ പക്ഷെ ഡോക്ടർമാർ അനാവശ്യമായി കുറെ മരുന്നുകൾ എഴുതിക്കൊടുത്ത് രോഗികൾക്കും രോഗം ഉണ്ടെന്ന് അനുമാനിക്കുന്നവർക്കും കടുത്ത സാമ്പത്തിക പ്രശ്നം ഉണ്ടാക്കുന്ന പ്രവണതയും ഉണ്ട്. അതിനെ പറ്റി അടുത്ത പോസ്റ്റിൽ എഴുതാം.

മുട്ടയും കൊളസ്ട്രോളും

noreply@blogger.com (K.P.Sukumaran) — Sat, 15 Feb 2025 07:42:00 +0000

ഒരാൾ ദിവസേന രണ്ടോ മൂന്നോ മുട്ട കഴിച്ചാൽ എന്താണ് കുഴപ്പം? കുഴപ്പം ഇത്രേള്ളൂ ശരീരത്തിന് ആവശ്യമുള്ള എല്ലാ പോഷകഘടകങ്ങളും മുട്ടയിൽ നിന്ന് ലഭിച്ചുപോകും. എന്നാൽ ഇപ്പോഴും കൊളസ്ട്രോൾ പേടിയിൽ ആളുകൾ പലരും മുട്ടയിലെ മഞ്ഞക്കരുവിനെ ഒഴിവാക്കുകയാണ്. കൊളസ്ട്രോൾ ഭീതി ഒരു ബാധ പോലെ ജനത്തെ വേട്ടയാടുന്നു. ഡോക്ടർമാർ ഈ ബാധയെ പ്രോത്സാഹിപ്പിക്കുന്നു. അത് ഡോക്ടർമാരുടെ ഈ വിഷയത്തിലുള്ള അജ്ഞത് കൊണ്ടാണ്. എല്ലാം പഠിച്ച സർവ്വജ്ഞരല്ല ഡോക്ടർമാർ. കൊളസ്ട്രോളിനെ സംബന്ധിച്ച് നിലവിലെ അന്ധവിശ്വാസം അവരും ഫോളോ ചെയ്യുകയാണ്. ചീത്തയും (LDL) നല്ലതും (HDL) എന്നിങ്ങനെ രണ്ട് വിധം കൊളസ്ട്രോൾ ഉണ്ട് എന്നത് 20-21 നൂറ്റാണ്ടുകളിലെ ഏറ്റവും വലിയ തട്ടിപ്പാണ്.

ഏതൊരു പദാർത്ഥത്തെയും അതിന്റെ തന്മാത്ര രൂപത്തിൽ അതിന്റെ ഫോർമ്യുല എഴുതാൻ കഴിയും. കൊളസ്ട്രോൾ തന്മാത്രയുടെ ഫോർമ്യുല C₂₇H₄₆O ആണ്. അതായത് കൊളസ്ട്രോളിന്റെ തന്മാത്രയിൽ കാർബൺ 27 ഉം ഹൈഡ്രജൻ 46 ഉം ഓക്സിജൻ ഒന്നും മൂലകങ്ങൾ ആണുള്ളത് എന്നർത്ഥം. ഈ ഒന്ന് മാത്രമാണ് കൊളസ്ട്രോൾ. LDL എന്നതും HDL എന്നതും കൊളസ്ട്രോൾ അല്ല. LDL എന്നത് ട്രൈഗ്ലിസറൈഡ്‌സും പ്രോട്ടീനും കൊളസ്ട്രോളും ചേർന്ന പായ്ക്കറ്റ് ആണ്. ഈ സത്യം മറച്ചു വെച്ചിട്ട് ചീത്ത കൊളസ്ട്രോൾ എന്ന് പറഞ്ഞ് ആളുകളെ ഭയപ്പെടുത്തി മരുന്ന് തീറ്റിക്കുകയാണ് ഡോക്ടർമാർ ചെയ്യുന്നത്. അത് മന:പൂർവ്വം അല്ല. വിവരക്കേട് കൊണ്ടാണ്. കൊളസ്ട്രോൾ ഒരിക്കലും അധികമാവില്ല. കരൾ ആണ് അത് നിർമ്മിക്കുന്നത്. ആഹാരത്തിൽ നിന്ന് അല്പം മാത്രമേ കിട്ടൂ. അത് പോര.

ഹാർട്ടിന്റെ രക്തക്കുഴലിൽ ബ്ലോക്ക് ഉണ്ടാകുന്നത് ക്രോണിക്ക് എന്ന് വെച്ചാൽ കുറെയായുള്ള ഇൻഫ്ലമേഷൻ അഥവാ വീക്കവും അത് മൂലം ഉണ്ടാകുന്ന ഡാമേജ് അഥവാ പരിക്ക് കൊണ്ടാണ്. അങ്ങനെ ഡാമേജ് ഉണ്ടാകാൻ കാരണം ഒന്നുകിൽ നിരന്തരമായ മനസ്സിന്റെ സ്ട്രസ്സ് അല്ലെങ്കിൽ ഹൈ ബി.പി. സ്മോക്കിങ്ങ് അങ്ങനെ ഏതെങ്കിലും ആകാം. കാരണം ഇതായിരിക്കേ കുറ്റം കൊളസ്ട്രോളിൽ ആരോപിക്കുമ്പോൾ യഥാർത്ഥ കാരണത്തെ അവഗണിക്കുകയും കൊളസ്ട്രോൾ കുറക്കാൻ മരുന്ന് കൊടുത്ത് പ്രശ്നം വഷളാക്കുകയാണ് ഡോക്ടർമാർ ചെയ്യുന്നത്.

മുട്ട എന്ന് പറയുന്നത് ഈ ഭൂമിയിൽ കിട്ടാവുന്നതിൽ വെച്ച് ഏറ്റവും മികച്ച സമ്പൂർണ്ണ പോഷക പായ്ക്കറ്റ് ആണ്. വേണമെങ്കിൽ അതിൽ വൈറ്റമിൻ C ഇല്ലല്ലോ എന്ന് മാത്രം പറയാം. ബാക്കി എല്ലാ വൈറ്റമിൻസും പ്രോട്ടീനിലെ എല്ലാ അമിനോ ആസിഡ്‌സും എല്ലാ ധാതുലവണങ്ങളും കുറച്ച് കൊളസ്ട്രോളും മുട്ടയിൽ ഉണ്ട്. എല്ലാ പോഷകങ്ങളും നമ്മൾ ദിവസവും കഴിക്കേണ്ടതാണ്. കാരണം അന്നന്നത്തെ ആവശ്യം കഴിഞ്ഞ് ബാക്കി എല്ലാം ശരീരം കിഡ്‌നി വഴി പുറന്തള്ളുകയാണ്. ഫാറ്റ്, അയേൺ, വൈറ്റമിൻ A എന്നിങ്ങനെ ചിലത് മാത്രം സ്റ്റോർ ചെയ്യുന്നു. അത്കൊണ്ട് എല്ലാ പോഷകങ്ങളും നിത്യേന ആഹാരത്തിൽ ഉൾപ്പെടുത്തണം. ജീവിതശൈലി രോഗം എന്ന് പറയുന്നത് തന്നെ ആവശ്യത്തിൽ കവിഞ്ഞ് കാർബോഹൈഡ്രേറ്റ് കഴിക്കുന്നതും ആവശ്യത്തിന് മറ്റ് പോഷകങ്ങൾ കഴിക്കാത്തതുമാണ്. ഭക്ഷണം പോഷണപരമായി ക്രമീകരിച്ചാൽ പ്രമേഹം എന്നല്ല ഒരു രോഗവും ബാധിക്കില്ല. കാരണം അപ്പോൾ ശരീരത്തിന്റെ പ്രതിരോധം അത്രയ്ക്ക് സജ്ജമായിരിക്കും.

ഏതെങ്കിലും ഒരു ഔഷധസസ്യമോ പദാർഥമോ കഴിച്ചാൽ എല്ലാം ആയി എന്ന പ്രചാരണത്തിൽ കുടുങ്ങരുത്. ഏതെങ്കിലും ഒന്ന് അകത്ത് പോയിട്ട് ഒന്നും ചെയ്യാനില്ല. എല്ലാ പോഷകഘടകങ്ങളും ഒരുമിച്ച് ചേരുമ്പോഴാണ് ശരീരം ആരോഗ്യമുള്ളതായിരിക്കുക. അധികമാകുന്നതും കുറയുന്നതും ആരോഗ്യത്തെ ബാധിക്കും. പ്രോട്ടീൻ നമുക്ക് നിത്യവും വേണം. ഒരാളുടെ ശരീരഭാരം കിലോയ്ക്ക് 0.8 ഗ്രാം വീതം പ്രോട്ടീൻ ദിവസവും വേണം. അതായത് 70 കിലോ ഭാരമുള്ള ഒരാൾ ദിവസവും 56 ഗ്രാം പ്രോട്ടീൻ കഴിക്കണം. ഒരു മുട്ടയിൽ 5 ഗ്രാം പ്രോട്ടീൻ മാത്രമേയുള്ളൂ. ആരോഗ്യം എന്നത് മരുന്നിൽ നിന്നല്ല ലഭിക്കുക ദിവസേന കഴിക്കുന്ന ആഹാരത്തിൽ നിന്നാണ്. അതുകൊണ്ട് നിങ്ങൾ എന്തെല്ലാം മനസ്സിലാക്കുന്നു ആ കൂട്ടത്തിൽ സ്വന്തം ശരീരത്തിന്റെ ആരോഗ്യത്തിന് ഉതകുന്ന ന്യൂട്രിയന്റ്സ് എന്തൊക്കെ എന്ന് മനസ്സിലാക്കാൻ ശ്രമിച്ചുകൂടേ? സോഷ്യൽ മീഡിയയിൽ പ്രചരിക്കുന്ന ഒറ്റമൂലി ഭഷണത്തിൽ വഞ്ചിതരാകാതിരിക്കുക. എല്ലാം ചേർന്ന് ബാലൻസ്‌ഡ് ആയിട്ടുള്ള ആഹാരമാണ് വേണ്ടത്. ഒന്നിൽ അല്ലെങ്കിൽ മറ്റേതിൽ ആവശ്യമുള്ള പോഷകം ഉണ്ടാകും.

ഞാൻ സോഡിയം കുറഞ്ഞതിന്റെ പേരിൽ ഒരാഴ്ചയിൽ അധികം കണ്ണൂർ ആസ്റ്റർ മിംസ് ആസ്പത്രിയിൽ അഡ്മിറ്റ് ആയിരുന്നു. ഡിസ്‌ചാർജ്ജ് ആകുന്ന ദിവസം രാവിലെ ഡയറ്റീഷ്യൻ വന്ന് ക്ലാസ്സ് എടുത്തു. അവർ പ്രത്യേകം പറഞ്ഞു മുട്ടയുടെ മഞ്ഞക്കരു കഴിക്കരുത്, അത് കളയണം വെള്ളയേ കഴിക്കാവൂ എന്ന്. മഞ്ഞയിലാണ് എല്ലാ മൈക്രോ ന്യൂട്രിയന്റ്സും ഉള്ളത്. അത് കളയാനാണ് ഡയറ്റീഷ്യൻ പറയുന്നത്. എല്ലാ ഡയറ്റീഷ്യന്മാരും ഇങ്ങനെയാണ് ഡയറ്റ് നിർദ്ദേശിക്കുന്നത് എന്ന് തോന്നുന്നു. എന്തൊരു കഷ്ടം ആണിത്. ഇത് പോലെ ഡയറ്റീഷ്യനെ കണ്ട് വന്ന് മുട്ടയുടെ മഞ്ഞക്കരു കളയുന്നവരെ എന്ന് വെച്ചാൽ അമൂല്യമായ പോഷകസമ്പത്തിനെ കളയുന്നവരെ ഞാൻ കണ്ടിട്ടുണ്ട്. എന്തൊക്കെ അന്ധവിശ്വാസങ്ങളാണ് ഇക്കാലത്ത് പ്രചരിപ്പിക്കപ്പെടുന്നത്. ആസ്പത്രികൾ പെരുകാൻ ഇതാണ് കാരണം. എന്നിട്ട് ആ ഒരു മത്സരത്തിൽ നട്ടം തിരിയുന്നത് സാധാരണക്കാരും. എനിക്ക് സോഡിയം കുറഞ്ഞത് എന്റെയൊരു ജാഗ്രതക്കുറവ് ആയിരുന്നു. ഇപ്പോൾ കഴിയുന്നതും ആഹാരം ബാലൻസ് ചെയ്യാൻ ശ്രമിക്കുന്നുണ്ട്. മറ്റുള്ളവരോട് ഒന്നും പറയാൻ പറ്റില്ല. എല്ലാവരും അയുക്തികമായ പൊതുബോധത്തിന്റെ ആകർഷണ വലയത്തിൽ തടവിലാണ്.

ഉപ്പും ഹൈ ബിപി യും ..

noreply@blogger.com (K.P.Sukumaran) — Fri, 07 Feb 2025 08:04:00 +0000

അധിക ബി പി ഉള്ളവർ ഉപ്പ് കഴിക്കരുത് എന്ന് പലരും നിരുത്സാഹപ്പെടുത്തുന്നത് കാണാം. പ്രത്യേകിച്ചും അച്ചാറ്, പപ്പടം ഒക്കെ കഴിക്കുമ്പോൾ. എന്നാൽ ശരീരത്തിന്റെ സുഗമമായ പ്രവർത്തനത്തിന് ഒഴിച്ചു കൂടാൻ പറ്റാത്ത ഒരു ധാതു ആണ് സോഡിയം. ഈ സോഡിയം നമുക്ക് കിട്ടുന്നത് ഉപ്പിൽ നിന്നാണ്. ഒരു ദിവസം 2.3 ഗ്രാം സോഡിയം നമുക്ക് ലഭിച്ചിരിക്കണം. ഇത്രയും സോഡിയം ലഭിക്കണമെങ്കിൽ ഒരു ടീസ്പൂൺ ഉപ്പ് ചേർത്ത ആഹാരം നമ്മൾ ദിവസവും കഴിക്കണം എന്നാണ് മനസ്സിലാക്കേണ്ടത്.

ഒരു ടീസ്പൂൺ ഉപ്പ് എന്ന് പറഞ്ഞാൽ 5 ഗ്രാം ആണ് ഉണ്ടാവുക. ആ ഉപ്പ് എന്നത് സോഡിയം ക്ലോറൈഡ് ആണ്. ഇതിൽ 45 ശതമാനമാണ് സോഡിയം ഉണ്ടാവുക. ബാക്കി ക്ലോറിൻ ആണ്. അപ്പോൾ 5 ഗ്രാം ഉപ്പിൽ 2.3 ഗ്രാം സോഡിയം മാത്രമേ ഉണ്ടാകൂ. അതുകൊണ്ടാണ് ദിവസേന ഒരു സ്പൂൺ ഉപ്പ് ആഹാരത്തിൽ നിന്ന് ലഭിക്കണം എന്ന് പറയുന്നത്.

ഉപ്പ് രക്തസമ്മർദ്ധം അധികരിപ്പിക്കും എന്നാണല്ലോ പറയുന്നത്. എന്നാൽ രക്തസമ്മർദ്ദം നിലനിർത്തുന്നതിനും, ശരീരത്തിലെ ദ്രാവക സന്തുലിതാവസ്ഥ നിയന്ത്രിക്കുന്നതിനും, നാഡികളുടെയും പേശികളുടെയും പ്രവർത്തനത്തെ പിന്തുണയ്ക്കുന്നതിനും, ഗ്ലൂക്കോസ്, അമിനോ ആസിഡുകൾ തുടങ്ങിയ പോഷകങ്ങളുടെ ആഗിരണത്തിൽ ഒരു പങ്കു വഹിക്കുന്നതിനും സഹായിക്കുന്ന ഒരു അവശ്യ ധാതുവാണ് സോഡിയം എന്നതാണ് വസ്തുത.

ഉപ്പ് അധികമാകുന്നത് പോലെ തന്നെ അപകടമാണ് ഉപ്പ് കുറച്ചാൽ സോഡിയത്തിന്റെ കുറവ് മൂലം ഉണ്ടാകുന്നതും . ഈ ഉപ്പ് പേടി മൂലം ഇന്ന് എത്രയോ ആളുകൾ സോഡിയം കുറഞ്ഞതിന്റെ പേരിൽ ആസ്പത്രികളിൽ എത്തുന്നുണ്ട്. സോഡിയം കുറഞ്ഞ അവസ്ഥയിൽ എത്രയും പെട്ടെന്ന് ആസ്പത്രിയിൽ എത്തിയില്ലെങ്കിൽ പക്ഷാഘാതം വരെ സംഭവിക്കാം. ഭക്ഷണത്തിൽ ചേർക്കുന്ന ഉപ്പിൽ കൂടിയാണല്ലോ നമുക്ക് സോഡിയം കിട്ടുന്നത്. അതുകൊണ്ട് ഉപ്പ് ചേർന്ന ആഹാരം കഴിക്കുന്നതിൽ പേടിക്കണ്ട എന്ന് മാത്രമല്ല കഴിക്കണം എന്ന് പറയാനാണ് ഈ കുറിപ്പ് എഴുതുന്നത്. ഒരു ടീസ്പൂൺ ഉപ്പ് അല്ലേ ആകെക്കൂടി നമ്മൾ ഒരു ദിവസം കഴിക്കുകയുള്ളൂ അല്ലേ?

ചിലർ ഇന്ദുപ്പ് കഴിച്ചാൽ നല്ലതാണ് എന്ന് പ്രചരിപ്പിക്കാറുണ്ട്. ഇന്ദുപ്പ് എന്നാൽ പൊട്ടാസിയം ക്ലോറൈഡ് ആണ്. അതിൽ പൊട്ടാസിയവും ക്ലോറിനും ആണുള്ളത്. ഇതും നമുക്ക് ആവശ്യമാണ്. പക്ഷെ സോഡിയത്തിന് പകരമാവില്ലല്ലോ പൊട്ടാസിയം. വാഴപ്പഴങ്ങളിലും ഉരുളക്കിഴങ്ങിലും ഒക്കെ പൊട്ടാസിയം ഉണ്ട്. ആരോഗ്യം കീപ്പ് ചെയ്യാൻ നമ്മൾ സമീകൃത ആഹാരം കഴിക്കണം എന്ന് പറയുമ്പോൾ ഇത് പോലത്തെ എല്ലാ ധാതുക്കളും ലവണങ്ങളും വൈറ്റമിൻസും പ്രോട്ടീനും ഒക്കെ ആവശ്യത്തിന് ഒരോ ദിവസത്തെയും ഭക്ഷണത്തിൽ ഉൾപ്പെടുത്തണം എന്നാണ് ഉദ്ദേശിക്കുന്നത്. അളവിൽ കൂടുന്നത് പോലെ തന്നെ ദോഷമാണ് അളവിൽ കുറയുന്നതും. അതുകൊണ്ടാണ് ബാലൻസ്‌ഡ് ഡയറ്റ് എന്ന് പറയുന്നത്.

നമ്മുടെ ശരീരം ഓരോ ദിവസവും പുതുപ്പിക്കപ്പെടുന്നുണ്ട്. അതായത് ആകെയുള്ള ശരീരകോശങ്ങളിൽ ഒരു ശതമാനം കോശങ്ങൾ ഓരോ ദിവസവും മരിക്കുകയും പകരം അത്രയും പുതിയ കോശങ്ങൾ നിർമ്മിക്കപ്പെടുകയും ചെയ്യുന്നുണ്ട്. അങ്ങനെ പുതിയ കോശങ്ങൾ നിർമ്മിക്കാനുള്ള സാമഗ്രികൾ ലഭിക്കാനാണ് എല്ലാ പോഷക ഘടകങ്ങളും ഉൾക്കൊള്ളുന്ന ആഹാരം കഴിക്കേണ്ടത്. അതാണ് സമീകൃതാഹാരം. ആരോഗ്യം ആഹാരത്തിലാണ്, എന്നാൽ അത് ബാലൻസ്‌ഡ് ആയിരിക്കണം. എല്ലാം ചേരണം, ഒന്നും കുറയാനോ കൂടുതലാ‍കാനോ പാടില്ല എന്നർത്ഥം.

ഷുഗറും കൊളസ്ട്രോളും പിന്നെ ബിരിയാണിയും

noreply@blogger.com (K.P.Sukumaran) — Wed, 05 Feb 2025 15:06:00 +0000

ഞാനൊരു ബിരിയാണിപ്രിയനാണ്. ഇന്നത്തെ ഉച്ചഭക്ഷണത്തിന് ബിരിയാണിയാണ് ഉണ്ടാക്കിയത്. അല്പം കൂടുതൽ കഴിച്ചുപോയി. പ്രി-ഡയബറ്റിക് ആണ്. ശ്രദ്ധിച്ച് മാത്രമേ ആഹാരം കഴിക്കാറുള്ളൂ. ഉച്ചക്ക് ശേഷം ഒന്ന് കറങ്ങാൻ പോയി. അതുകൊണ്ടാണ് ഈ ബിരിയാണി വിശേഷം എഴുതാൻ വൈകിയത്. ഇവിടെ ബാംഗ്ലൂരിൽ പലവിധ ബിരിയാണികൾ ഉണ്ട്. ആമ്പൂർ ബിരിയാണി, തലപ്പാക്കട്ടി ബിരിയാണി, ഡിണ്ടിഗൽ ബിരിയാണി, അഞ്ചപ്പാർ ബിരിയാണി എന്നിങ്ങനെ.

ഞങ്ങളുടെ നാട്ടിൽ പക്ഷെ ഒരേയൊരു തരം ബിരിയാണിയാണ് പ്രചാരത്തിലുള്ളത്. ധം ബിരിയാണി എന്ന് പറയുന്നു. പച്ചരി ചോറിന്റെ നടുക്ക് രണ്ട് കഷണം പൊരിച്ച ചിക്കൻ കഷണവും അല്പം മസാലയും ചേർത്ത് ഇങ്ങ് തരും. കൂടെ സവാളയും തൈരും കൊണ്ടൊരു സാലഡും. ആ സാലഡ് പെരക്കിയിട്ട് വേണം ആ പച്ചരിച്ചോറ് തിന്നാൻ. നാട്ടുകാർക്ക് ഈ ബിരിയാണിയാണ് പ്രിയം. രണ്ട് മൂന്ന് കല്യാണത്തിന് പോയി ഈ ബിരിയാണി കിട്ടി ഞാൻ പെട്ടുപോയി. ഒന്നാമത് വേവാത്ത ചോറ്, പിന്നെ വറുത്ത് പൊരിച്ച് കൊള്ളിക്കഷണം പോലെയായ ചിക്കൻ കഷണവും. വെറുത്തുപോയി ഞാൻ.

ബിരിയാണിക്ക് അങ്ങനെ പ്രത്യേകിച്ച് ഒരു റെസിപ്പിയും ഇല്ല. പക്ഷെ ബിരിയാണിക്കായിട്ടുള്ള ജീരകശാല അരിയും മസാലക്കൂട്ടും ചിക്കനും ഒന്നിച്ച് കുഴഞ്ഞ് വേവണം. അതാണ് ബിരിയാണിയുടെ ടേസ്റ്റ്. നാട്ടിൽ ചോറിന്റെ നടുക്ക് വറുത്ത് പൊരിച്ച ചിക്കൻ കഷണം പൂഴ്ത്തി വെച്ച് വിളമ്പുന്ന ബിരിയാണി ആരുടെ കണ്ടുപിടുത്തം ആണെന്ന് അറിയില്ല. എല്ലാം ഒരുമിച്ച് വേവിക്കുന്ന കുഴഞ്ഞ ബിരിയാണി നാട്ടിൽ ആർക്കും ഇഷ്ടം അല്ല പോലും. അല്ലെങ്കിലും എല്ലാറ്റിലും ഡ്യൂപ്പിനാണല്ലോ നാട്ടിൽ മാർക്കറ്റ്.

ഇപ്പോൾ പൊതുവെ ഭക്ഷണക്കാര്യം പറയുമ്പോൾ ആളുകൾ ഷുഗറിന്റെ കാര്യം പറഞ്ഞ് പേടിപ്പിക്കുകയാണ്. എന്നാലോ എന്താണ് ഷുഗർ എന്നതിനെ പറ്റി പൊതുവെ ഒരു ധാരണയും ഇല്ല താനും. നമ്മൾ കഴിക്കുന്ന ആഹാരങ്ങളിൽ അഞ്ച് തരം ഘടകങ്ങളാണുള്ളത്. കാർബോഹൈഡ്രേറ്റ്, പ്രോട്ടീൻ, കൊഴുപ്പ്, വൈറ്റമിൻസ് പിന്നെ ധാതുലവണങ്ങൾ. വെള്ളത്തിന്റെ കാര്യം ഇതിൽ കൂട്ടിയിട്ടില്ല. ഇതിൽ കാർബോഹൈഡ്രേറ്റും പ്രോട്ടീനും കൊഴുപ്പും യഥാക്രമം ഗ്ലൂക്കോസ് ആയും അമിനോആസിഡ്‌സ് ആയും ഫാറ്റി ആസിഡ് ആയും ചെറുകുടലിൽ വെച്ച് വിഘടിക്കപ്പെട്ടതിന് ശേഷമാണ് രക്തത്തിൽ കലരുന്നത്. ഇപ്രകാരം വലിയ തന്മാത്രകൾ ലഘു തന്മാത്രകളായി വിഘടിക്കുന്നതിനെയാണ് ദഹനം എന്ന് പറയുന്നത്. എന്താണ് ദഹനം എന്ന് ആളുകൾ മനസ്സിലാക്കാൻ ശ്രമിക്കുന്നില്ല. ഓരോ ആഹാരഘടകം വിഘടിക്കുന്നതും ഓരോ തരം എൻസൈമിന്റെ സമ്പർക്കത്തിലാണ്.

കാർബോഹൈഡ്രേറ്റ് എന്ന വലിയ തന്മാത്ര വിഘടിച്ച് ഗ്ലൂക്കോസ് തന്മാത്രയായി രക്തത്തിൽ കലരുന്നതിനെയാണ് ഷുഗർ എന്ന് പറയുന്നത്. കാർബണും ഹൈഡ്രജനും ഓക്സിജനും എന്നീ മുന്ന് മൂലകങ്ങൾ ചേർന്ന് ഉണ്ടാകുന്നത് കൊണ്ടാണ് കാർബോഹൈഡ്രേറ്റ് എന്ന് പറയുന്നത്. ചെടികളാണ് ഇത് ഉണ്ടാക്കുന്നത്. ചെടികൾക്ക് മാത്രമേ ഇത് ഉണ്ടാക്കാൻ കഴിയൂ. ഭൂമിയിലെ എല്ലാ ജീവജാലങ്ങളുടെയും ഊർജ്ജസ്രോതസ്സ് കാർബോഹൈഡ്രേറ്റും കാർബോഹൈഡ്രേറ്റിന്റെ വകഭേദാമായ സെല്ലുലോസും ആണ്. സെല്ലുലോസ് എന്ന തന്മാത്രയെയാണ് നമ്മൾ ഫൈബർ എന്ന് പറയുന്നത്.

കാർബോഹൈഡ്രേറ്റിന്റെ അടിസ്ഥാന യൂനിറ്റാണ് ഗ്ലൂക്കോസ് എന്ന തന്മാത്ര. നമ്മൾ രക്തത്തിലെ ഷുഗർ എന്ന് പറയുന്നത്. അനേകം ഗ്ലൂക്കോസ് തന്മാത്രകൾ ചേർന്നാണ് കാർബോഹൈഡ്രേറ്റ് എന്നും സെല്ലുലോസ് എന്നും പറയുന്ന കൂറ്റൻ തന്മാത്രകൾ ഉണ്ടാകുന്നത്. ഗ്ലൂക്കോസ് പോലെ വേറെ മൂന്ന് തരം ഷുഗർ തന്മാത്രകൾ കൂടിയുണ്ട്. അവ ഫ്രക്ടോസ്, ലാക്ടോസ്, മാൾട്ടോസ് എന്നിവയാണ്. പക്ഷെ എന്ത് കഴിച്ചാലും രക്തത്തിൽ കലരുന്നത് ഗ്ലൂക്കോസ് ആയിട്ടാണ്. അതുകൊണ്ട് രക്തത്തിൽ ഗ്ലൂക്കോസ് എന്ന ഷുഗർ മാത്രമേയുള്ളൂ. നമ്മൾ ചായയിൽ ഇടുന്ന പഞ്ചസാര ഈ ഷുഗർ അല്ല. അത് സൂക്രോസ് എന്ന ഡൈസാക്കറൈഡ് തന്മാത്രയാണ്. ടേബിൾ ഷുഗർ എന്നാണ് ശരിക്കും ഇതിന്റെ പേര്. ഈ ടേബിൾ ഷുഗറും ഗ്ലൂക്കോസ് ആയിട്ട് മാത്രമേ രക്തത്തിൽ കടക്കൂ. അതുകൊണ്ട് വിത്തൗട്ട് ചായ മാത്രമേ കഴിക്കൂ എന്ന് ശഠിക്കുന്നത് പൊട്ടത്തരമാണ്. രക്തത്തിൽ എത്തുന്ന ഗ്ലൂക്കോസ് ഏതിൽ നിന്ന് വന്നു എന്നത് രക്തത്തിന് വിഷയമല്ല.

രക്തത്തിൽ എത്തുന്ന ഗ്ലൂക്കോസ് തന്മാത്രയും ശ്വസിക്കുന്ന വായുവിലെ ഓക്സിജൻ തന്മാത്രയും ചേർന്ന് ശരീര കോശങ്ങളിൽ വെച്ച് നടക്കുന്ന രാസപ്രവർത്തനത്തിൽ റിലീസ് ആകുന്ന ഊർജ്ജം ആണ് നമ്മുടെ ജീവൻ നിലനിർത്താനും എല്ലാ ശാരീരിക പ്രവർത്തനങ്ങൾക്കും നിദാനമാകുന്നത്. അതുകൊണ്ട് രക്തത്തിൽ ഒരളവ് ഷുഗർ അഥവാ ഗ്ലൂക്കോസ് എപ്പോഴും ഉണ്ടായിരിക്കേണ്ടതാണ്. ഈ അളവ് ബാലൻസ് ചെയ്യുന്നത് ഇൻസുലിൻ എന്ന ഹോർമോൺ ആണ്. ഇൻസുലിൻ ഹോർമോണിന്റെ പ്രവർത്തന ക്ഷമതയോ ക്വാളിറ്റിയോ കുറയുന്നതാണ് നമ്മളെയെല്ലാം ബാധിക്കുന്ന ടൈപ്പ് 2 പ്രമേഹത്തിന് കാരണം, ഡോക്ടർമാർ ഇതിന് പറയുന്നത് ഇൻസുലിൻ റെസിസ്റ്റൻസ് എന്നാണ്. അതുകൊണ്ടാണ് രക്തത്തിൽ ഷുഗർ കൂടുന്നത്. അപ്പോൾ നമ്മൾ ചെയ്യേണ്ടത് ഷുഗറിനെ പേടിക്കുകയോ ഒഴിവാക്കുകയോ അല്ല. ദിവസവും മുന്ന് നേരം കഴിക്കുന്ന കാർബോഹൈഡ്രേറ്റ് ആഹാരങ്ങൾ കുറേശ്ശെയായി അഞ്ചോ ആറോ നേരം കഴിക്കുക. അപ്പോൾ രക്തത്തിൽ ഗ്ലൂക്കോസ് ഒരു സമയം കുറേ അളവിൽ എത്തുന്നത് ഒഴിവാ‍ക്കാനാകും. ഒരുമിച്ച് കുറേ ഗ്ലൂക്കോസ് രക്തത്തിൽ എത്തുന്നതാണ് പ്രശ്നം.

രക്തത്തിൽ അഥവാ അല്പം അധികം ഗ്ലൂക്കോസ് എത്തിയാലും ശരീരം അത് കിഡ്‌നി വഴി പുറന്തള്ളും. അതിന് രക്തത്തിൽ ആവശ്യത്തിന് ജലം ഉണ്ടായിരിക്കണം. അതുകൊണ്ട് ആവശ്യത്തിന് വെള്ളവും കുടിക്കണം. ഇതൊന്നും അറിയാത്തത് കൊണ്ടും ഒന്നും ശ്രദ്ധിക്കാത്തത് കൊണ്ടും ആണ് പ്രമേഹത്തിന് ഇരയാകുന്നത്. പ്രമേഹം നമ്മുടെ കിഡ്‌നിയെയും നേരിയ രക്തക്കുഴലുകളെയും അങ്ങനെ കണ്ണിനെയും എല്ലാം ബാധിക്കുന്നു. ശരിയായ ഭക്ഷണക്രമവും ഭക്ഷണഘടകങ്ങളെ കുറിച്ചുള്ള ആധുനിക അറിവും ഉണ്ടെങ്കിൽ പ്രമേഹം എന്നല്ല ഒരു ജീവിതശൈലി രോഗവും ബാധിക്കില്ല. എല്ലാ പോഷകഘടകങ്ങളും അടങ്ങിയ സമീകൃത ആഹാരവും മിതമായ വ്യായാമവും ആയാൽ ഒരു രോഗവും ബാധിക്കില്ല. നമ്മുടെ ശരീരത്തിന്റെ ഇമ്മ്യൂണിറ്റി എന്ന് പറയുന്നത് സമീകൃത ആഹാരം കൊണ്ട് മാത്രം കിട്ടുന്നതാണ്. നിലവിൽ ഇൻസുലിൻ റസിസ്റ്റൻസ് കൊണ്ട് പ്രമേഹത്തിന്റെ ബോർഡറിൽ ആണെങ്കിൽ സമീകൃത ആഹാരവും വ്യായാമവും കൊണ്ട് ഇൻസുലിന്റെ ക്വാളിറ്റി മെച്ചപ്പെടുത്താനും പ്രമേഹമായി മാറുന്നത് തടയാനും പറ്റും.

ഒരു അടിക്കുറിപ്പ് കൂടി.

കൊളസ്ട്രോൾ ഒരു രോഗം അല്ല. നമുക്ക് മാംസാഹാരങ്ങളിൽ നിന്ന് മാത്രമാണ് കൊളസ്ട്രോൾ കിട്ടുന്നത്. അത് വിഘടിക്കാനൊന്നുമില്ല. എന്തെന്നാൽ കൊളസ്ട്രോൾ കൊഴുപ്പ് അല്ല. കൊഴുപ്പ് പോലത്തെ സ്വഭാവം ഉണ്ട് എന്നേയുള്ളൂ. കൊളസ്ട്രോൾ ഒരു ലഘു തന്മാത്രയാണ്. അതുകൊണ്ട് മാംസാഹാരത്തിലെ കൊളസ്ട്രോൾ ചെറുകുടലിൽ വെച്ച് നേരിട്ട് രക്തത്തിൽ കലരുകയാണ്. കൊളസ്ട്രോൾ ഓരോ സെക്കന്റിലും ശരീരത്തിനാവശ്യമാണ്. കാരണം ഓരോ സെക്കന്റിലും ശരീരത്തിൽ പുതിയ കോശങ്ങൾ നിർമ്മിക്കപ്പെടുന്നുണ്ട്. അങ്ങനെ പുതിയ കോശങ്ങൾ ഉണ്ടാകാൻ കൊളസ്ട്രോൾ കൂടിയേ തീരൂ. അതുകൊണ്ട് ശരീരത്തിന് ആവശ്യമായ കൊളസ്ട്രോൾ ലിവർ ആണ് നിർമ്മിച്ചുകൊണ്ടേയിരിക്കുന്നത്. മാംസാഹാരത്തിൽ നിന്ന് കിട്ടുന്ന കൊളസ്ട്രോൾ തുച്ഛമാണ്. അത് പോര, അതുകൊണ്ട് ആവശ്യാനുസരണം നിർമ്മിച്ചുകൊണ്ട് ലിവർ കൊളസ്ട്രോളിന്റെ അളവ് സദാ ബാലൻസ് ചെയ്യുന്നു.

കുട്ടി ആണോ പെണ്ണോ?

noreply@blogger.com (K.P.Sukumaran) — Sun, 26 Jan 2025 06:33:00 +0000

എല്ലാ പുരുഷന്മാരും ആദ്യം പെണ്ണായാണ് ഗർഭപാത്രത്തിൽ ജന്മം കൊള്ളുന്നത് എന്നും പിന്നെയാണ് ആണായി മാറുന്നത് (All babies are female at first) എന്നുമുള്ള ഒരു പ്രസ്താവന നിങ്ങൾ കേട്ടിരിക്കും. ഇതിൽ ചെറിയൊരു വാസ്തവം ഉണ്ടെങ്കിലും സാങ്കേതികമായി തികച്ചും തെറ്റാണ്. കാരണം മാതാപിതാക്കളുടെ അണ്ഡവും ബീജവും സംയോജിച്ച് ഒരു ഏകകോശ ഭ്രൂണം ഉണ്ടാകുമ്പോൾ തന്നെ കുട്ടി ആണോ പെണ്ണോ എന്ന് നിർണ്ണയിക്കപ്പെടുന്നുണ്ട്. കോശങ്ങളാണ് നമ്മുടെ ശരീരത്തിന്റെ ബിൽഡിങ്ങ് ബ്ലോക്കുകൾ എന്നും കോശവിഭനത്തിലൂടെയാണ് ഗർഭപാത്രത്തിൽ വെച്ച് ഒരു ഏകകോശ ഭ്രൂണം വളർന്ന് കുഞ്ഞായി ജനിക്കുന്നത് എന്നും അറിയാമല്ലോ.

നമ്മുടെ കോശങ്ങളുടെ ന്യൂക്ലിയസ്സിൽ 23 ജോഡി ക്രോമോസോമുകൾ ഉണ്ട്. ഇതിൽ 23 ആമത്തെ ജോഡി ക്രോമോസോം സെക്സ് ക്രോമോസോം ആണ്. X എന്നും Y എന്നും ആണ് ഈ ജോഡിയിലെ ഓരോ ക്രോസോമിനും പേരിട്ടിരിക്കുന്നത്. സ്ത്രീകളിലെ കോശങ്ങളിൽ X X എന്ന ജോഡിയാണുള്ളത്. പുരുഷന്മാരിൽ X Y എന്ന ജോഡിയും. അതുകൊണ്ട് മാതാവിന്റെ അണ്ഡത്തിൽ X എന്ന ഒറ്റ ക്രോമോസോമും പിതാവിന്റെ ബീജത്തിൽ X Y ഇവയിൽ ഏതെങ്കിലും ഒരു ക്രോസോം ആണുണ്ടാവുക. അപ്പോൾ പിതാവിന്റെ X ക്രോമോസോം ആണ് അണ്ഡവുമായി സംയോജിക്കുന്നെങ്കിൽ കുഞ്ഞ് പെണ്ണ് , Y ക്രോസോം ആണെങ്കിൽ കുഞ്ഞ് ആണ്. അപ്പോൾ കുഞ്ഞ് ആണോ പെണ്ണോ എന്ന് നിർണ്ണയമാകുന്നത് പിതാവിൽ നിന്ന് ലഭിക്കുന്ന ക്രോമോസോം X ആണോ Y ആണോ എന്നതിനെ ആശ്രയിച്ചാണ്. അതുകൊണ്ട് ബീജ-അണ്ഡ സംയോജന സമയത്ത് തന്നെ കുഞ്ഞ് ആണോ പെണ്ണോ എന്ന് തീരുമാനമാകുന്നുണ്ട്.

പിന്നെ എന്താണ് ആദ്യം എല്ലാ ആണും പെൺകുഞ്ഞ് പിന്നെ അത് ആൺകുഞ്ഞായി മാറുന്നു എന്ന പ്രസ്താവനക്ക് കാരണം എന്നല്ലേ? എല്ലാ മനുഷ്യ ഭ്രൂണങ്ങളും വികാസത്തിന്റെ പ്രാരംഭ ഘട്ടത്തിൽ സ്ത്രീ സ്വഭാവ സവിശേഷതകളോടെയാണ് വികസിക്കുന്നത് എന്നതാണതിന് കാരണം. അതിന്റെ കാരണം ഗർഭാവസ്ഥയുടെ ഏകദേശം 7 മുതൽ 8 ആഴ്ച വരെ, രണ്ട് ലിംഗക്കാർക്കും പുരുഷ ലൈംഗികാവയവങ്ങളോ സ്ത്രീ ലൈംഗികാവയവങ്ങളോ ആയി വ്യത്യാസപ്പെടാവുന്ന സമാനമായ പ്രാഥമിക ജനനേന്ദ്രിയങ്ങളായ ലൈംഗികാവയവ സെറ്റ് ആണുള്ളത്. അതായത് നമ്മുടെ ലൈംഗികാവയവങ്ങൾ ഒരേ അടിത്തറയിൽ നിന്നാണ് ഉണ്ടായി വരുന്നത്. ഇതോടൊപ്പമുള്ള ചിത്രത്തിൽ വൃത്തത്തിൽ അടയാളപ്പെടുത്തിയിട്ടുള്ളത് നോക്കുക.

ചുരുക്കി പറഞ്ഞാൽ കുഞ്ഞ് ആണാണെങ്കിലും ആണിന്റേതായ ലൈംഗികാവയവങ്ങൾ വളർന്ന് വികസിക്കുന്നത് ഗർഭാവസ്ഥയുടെ എട്ടാമത്തെ ആഴ്ച മുതലാണ്. അപ്പോൾ മുതൽ ആ പൊതു ലൈംഗിക അവയവ സെറ്റിൽ എന്ന് ആണിന്റെ ലൈംഗിക അവയങ്ങൾ വളരുകയും പെണ്ണായി മാറാവുന്ന അവയങ്ങളുടെ വളർച്ച തടയപ്പെടുകയും ചെയ്യുന്നു. ഇതിന്റെ അർത്ഥം ഭ്രൂണം ആണിന്റെ ആണെങ്കിലും ശരിക്കും ആൺകുഞ്ഞായി മാറുന്നത് എട്ടാമത്തെ ആഴ്ച മുതലാണെന്നതാണ്. അതേ സമയം ഭ്രൂണം പെണ്ണിന്റെ ആണെങ്കിൽ തുടക്കം മുതൽ പെൺകുഞ്ഞായി തന്നെ വളരുകയും ചെയ്യുന്നു. എന്തുകൊണ്ടാണ് ആൺ ഭ്രൂണം ആണായി മാറാൻ എട്ടാമത്തെ ആഴ്ച വരെ താമസം എന്ന് ചോദിച്ചാൽ അൺകുഞ്ഞിന്റെ കോശത്തിലെ Y ക്രോമോസോമിലെ സെക്സ് ജീൻ (SRY) അത് വരെ ആക്റ്റിവേറ്റ് ആകുന്നില്ല എന്നതാണ്. എട്ടാമത്തെ ആഴ്ച മുതൽ ആ ജീൻ ആക്റ്റിവേറ്റ് ആവുകയും കുഞ്ഞ് ആണായി വളരുകയും ചെയ്യുന്നു.

നമ്മുടെ ലൈംഗികാവയവങ്ങൾ ആണിന്റെയും പെണ്ണിന്റെയും ഒരേ അടിത്തറയിൽ നിന്നാണ് വരുന്നത് എന്ന പറഞ്ഞല്ലോ. അതുകൊണ്ട് പുരുഷന്മാരിലെ വൃഷണം സ്ത്രീകളിലെ അണ്ഡാശയത്തിന് തുല്യമാണ്, പുരുഷ ലിംഗം സ്ത്രീകളുടെ ക്ലിറ്റോറിസിനും തുല്യമാണ്. പുരുഷന്റേത് ശരീരത്തിന്റെ പുറത്തേക്കും സ്ത്രീയുടെത് അകത്തേക്കും വളരുന്നു. (രതിക്രിയയിൽ സ്ത്രീയുടെ ക്ലിറ്റോറിസ് 4-5 ഇഞ്ച് വലിപ്പത്തിൽ അകത്തോട്ട് ഉദ്ധരിക്കുന്നുണ്ട് എന്നത് അധികം പേർക്കും പുതിയ അറിവായിരിക്കും) വൃഷണത്തിൽ ബീജങ്ങൾ ഉല്പാദിപ്പിക്കപ്പെടുന്നു അണ്ഡാശയത്തിൽ അണ്ഡവും. വൃഷണങ്ങൾ അകത്തായിരുന്നെങ്കിൽ ശരീരത്തിന്റെ ഊഷ്മാവിൽ ബീജങ്ങൾ നശിച്ചു പോയേനേ. പുറത്തായത് കൊണ്ടാണ് ബീജങ്ങൾ ജീവനോടെ നിൽക്കുന്നത്.

ഭൂമിയിലെ എല്ലാ ബയോളജിക്കൽ പ്രതിഭാസങ്ങളും നമുക്ക് മനസ്സിലാക്കാനും വിശദീകരിക്കാനും സാധിക്കുന്നത് പരിണാമ സിദ്ധാന്തത്തിന്റെ വെളിച്ചത്തിലാണ്. നേച്വറൽ സെലക്‌ഷൻ എന്ന പ്രക്രിയയിലൂടെയാണ് ജീവജാലങ്ങൾ ഒരു തുടർച്ചയായി നിലനിന്ന് വന്നത്. ഇതൊക്കെ അസന്നിഗ്ദ്ധമായി തെളിയിക്കപ്പെട്ടതാണ്. ചില വിശ്വാസികൾ പരിണാമ സിദ്ധാത്തെയും നേച്വറൽ സെലക്‌ഷൻ തീയറിയെയും എതിർക്കുന്നത് തങ്ങളുടെ പടച്ചോന് എന്തെങ്കിലും കോട്ടം പറ്റിപ്പോകുമോ എന്ന ഭയത്തിലാണ്. അങ്ങനെ എതിർക്കുന്നതിലൂടെ അവർ തങ്ങളെ തന്നെ വിഡ്ഡികളാക്കുകയാണ് ചെയ്യുന്നത്.

എന്താണ് ആകാശം?

noreply@blogger.com (K.P.Sukumaran) — Mon, 20 Jan 2025 06:29:00 +0000

ആകാശം, ഭൂമി, ജലം, വായു, അഗ്നി എന്നിവയാണ് പഞ്ചഭൂതങ്ങൾ എന്ന് അറിയപ്പെടുന്നത്. പണ്ട് പണ്ട് വളരെ പണ്ട് ഈ പഞ്ചഭൂതങ്ങളാണ് പ്രകൃതിയിലുള്ള സർവ്വചരാചരങ്ങളും നിർമ്മിതമായിരിക്കുന്നതിന്റെ അടിസ്ഥാനഘടകങ്ങൾ എന്ന് വിശ്വസിച്ചിരുന്നു. അങ്ങനെയാണ് പഠിപ്പിക്കപ്പെട്ടത്. എന്തുകൊണ്ടാണ് മണ്ണിനൊപ്പം ആകാശവും പഞ്ചഭൂതങ്ങളിൽ ഒന്നായി കരുതപ്പെട്ടത് എന്ന് ചെറുപ്പത്തിൽ ഞാൻ ആലോചിച്ചിരുന്നു. മണ്ണ് നമുക്ക് ടാൻജിബിൾ ആയിട്ടുള്ള എന്ന് വെച്ചാൽ കൈയിൽ വാരിയെടുക്കാവുന്ന ഒരു പദാർത്ഥമാണ്. എന്നാൽ ആകാശം എന്നത് അമൂർത്തമായ ഒന്നാണ്.

ആകാശം എന്നും നമ്മെ വിസ്മയിപ്പിക്കുന്ന ഒരു കാഴ്ചയാണ്. എന്നാൽ ആകാശം എന്ന ഒന്ന് ശരിക്കും അവിടെയുണ്ടോ? അതോ മിഥ്യയായ ഒരു മായക്കാഴ്ചയോ? ഭൂമിയിൽ അല്ലാതെ വേറെ ഏതെങ്കിലും ഗ്രഹത്തിൽ ആകാശം ഉണ്ടോ? ചന്ദ്രനിൽ എന്തായാലും ആകാശം ഇല്ല. ചൊവ്വയിൽ നേരിയ തോതിൽ ഒരാകാശം പേരിനുണ്ട്. അതെന്താണ് അങ്ങനെ? ചന്ദ്രനിൽ അന്തരീക്ഷം എന്നൊന്ന് ഇല്ല. അതുകൊണ്ട് അവിടെ ആകാശം ഇല്ല. ചൊവ്വയിലെ അന്തരീക്ഷത്തിൽ കാർബൺ ഡൈ‌ഓക്സൈഡ് തന്മാത്രകളും വളരെ നേർത്ത പൊടിപടലങ്ങളുമാണുള്ളത്. അതുകൊണ്ട് നേരിയ ഒരാകാശവും.

അപ്പോൾ അന്തരീക്ഷം ഉണ്ടെങ്കിലേ ആകാശവും ഉണ്ടാകൂ. എന്താണ് അന്തരീക്ഷം എന്നത്? ഒരു ഗ്രഹം അതിന്റെ ആകർഷണബലം കൊണ്ട് പിടിച്ചു വയ്ക്കുന്ന ലഘുതന്മാത്രകളുടെയും പൊടിപടലങ്ങളുടെയും ആവരണമാണ് അന്തരീക്ഷം എന്നത്. ചന്ദ്രന്റെ ആകർഷണബലം എന്നത് ഭൂമിയുടേതിനേക്കാളും ആറിൽ ഒന്ന് മാത്രമാണ്. അതുകൊണ്ട് ചന്ദ്രനിൽ അന്തരീക്ഷവും ഇല്ല ആകാശവും ഇല്ല. നൈട്രജൻ, ഓക്സിജൻ, കാർബൺഡൈഓക്സൈഡ് മുതലായ തന്മാത്രകളെയും പൊടിപടലങ്ങളെയും ജലകണികകളെയും ഭൂമി അതിന്റെ ആകർഷണബലത്താൽ പിടിച്ചു വയ്ക്കുന്നു. അതാണ് ഭൂമിയുടെ അന്തരീക്ഷം. അങ്ങനെ ഒരന്തരീക്ഷം ഉള്ളത് കൊണ്ടാണ് സമ്പൂർണ്ണമായ ഒരാകാശം നമുക്ക് കാണാൻ കഴിയുന്നത്. അതെ, ആകാശം ഒരു കാഴ്ച മാത്രമാണ്. അല്ലാതെ മണ്ണ് പോലെ ഒരു പദാർഥം അല്ല.

ആകാശത്തെ നീല പശ്ചാത്തലത്തിലാണ് നമ്മൾ കാണുന്നത്. അത് തന്നെയാണ് നമ്മളെ പ്രലോഭിപ്പിക്കുന്ന മാസ്മരികതയും. സൂര്യപകാശത്തിൽ ഏഴ് വർണ്ണരാജികൾ ആണല്ലോ ഉള്ളത്. പ്രകാശത്തിൽ വിവിധ തരംഗദൈർഘ്യമുള്ള കിരണങ്ങളാണുള്ളത് എന്ന് നമുക്ക് അറിയാം. അതിൽ ദൈർഘ്യം കുറഞ്ഞ നീല തരംഗം വേഗത്തിൽ സഞ്ചരിക്കുന്നു. അന്തരീക്ഷത്തിലെ പൊടിപടലങ്ങളിലും തന്മാത്രകളിലും സൂര്യപ്രകാശം പതിക്കുമ്പോൾ അത് വിവിധ തരംഗങ്ങളായി ചിതറുകയും വേഗത്തിൽ സഞ്ചരിക്കുന്ന നീല തരംഗം നമ്മുടെ കണ്ണുകളിൽ എത്തുകയും ചെയ്യുന്നു. അങനെയാണ് ആകാശം നീലയായി നമ്മൾ കാണുന്നത്. ചുരുക്കി പറഞ്ഞാൽ അന്തരീക്ഷത്തിലെ തന്മാത്രകളും പ്രകാശരശ്മികളുടെ ചിതറലും എല്ലാം ചേർന്ന് സംഭവിക്കുന്ന ഒരു ദൃശ്യപ്രതിഭാസം മാത്രമാണ് ആകാശം എന്നത്.

എല്ലാ വസ്തുക്കളും പ്രകാശരശ്മികളെ പ്രതിഫലിപ്പിക്കുന്നു. അങ്ങനെ പ്രതിഫലിക്കുന്ന രശ്മികൾ കണ്ണിലെ റെറ്റിനയിൽ കൂടി കടന്ന് തലച്ചോറിൽ എത്തുമ്പോഴാണ് നമ്മൾ ആ വസ്തുവിനെ കാണുന്നത്. ഉദാഹരണത്തിന് പച്ചിലകൾ പച്ചനിറം തരുന്ന രശ്മിയെ പ്രതിഫലിപ്പിക്കുകയും മറ്റെല്ലാ രശ്മികളെയും ആഗിരണം ചെയ്യുകയും ചെയ്യുമ്പോൾ നമ്മൾ പച്ചിലകളെ കാണുന്നു. രണ്ട് കണ്ണുകളും രണ്ട് ദൃശ്യങ്ങളാണ് തലച്ചോറിലേക്ക് കടത്തി വിടുന്നത്. തലച്ചോർ അവയെ ഒറ്റക്കാഴ്ചയായി സമന്വയിപ്പിക്കുന്നത് കൊണ്ടാണ് നമ്മൾ ചുറ്റുപാടുകളെയും വസ്തുക്കളെയും നീളം വീതി ഘനം എന്നീ മൂന്ന് പരിമാണത്തിൽ കാണുന്നത്. മനുഷൻ ഒഴികെ മറ്റൊരു ജീവിയ്ക്കും ഇത്ര സമ്പൂർണ്ണമായ കാഴ്ചാനുഭവം ഇല്ല. മനുഷ്യനെ പോലെ എല്ലാ വർണ്ണങ്ങളും മറ്റ് ജീവികൾ കാണുന്നുമില്ല.

എത്രയോ കാലം ഭൂമി പരന്നതാണ് എന്ന് വിശ്വസിച്ചിരുന്നു. എന്നാൽ വസ്തുതാപരമായി തെളിയിക്കപ്പെട്ടപ്പോൾ ആ വിശ്വാസം തിരുത്തി. അതുപോലെ ഹൈഡ്രജൻ മുതൽ യുറേനിയം വരെ 92 അടിസ്ഥാന മൂലകങ്ങളാണ് ഭൂമിയിലെ സർവ്വ ചരാചര വസ്തുക്കളുടെയും ഘടകപദാർത്ഥങ്ങൾ എന്ന് തെളിയിക്കപ്പെട്ടതാണ്. എന്നിട്ടും ചിലർ ഇപ്പോഴും പഞ്ചഭൂത സിദ്ധാന്തത്തെ മുറുകെ പിടിക്കുന്നുണ്ട്. അത് തെറ്റാണ് എന്ന് പറഞ്ഞാൽ പറയുന്നവർ ഭാരത വിരുദ്ധരാണ് എന്ന് പറയുന്നവരും നമ്മുടെ കൂട്ടത്തിൽ ഉണ്ട്.

പണ്ട് പണ്ടത്തെ പുരാതന വിശ്വാസങ്ങൾ മുറുകെ പിടിച്ചാലേ ഭാരതീയൻ ആകൂ എന്ന് ശഠിച്ചാൽ ഇന്ത്യയിലെ എല്ലാ സർവ്വകലാശാലകളും പൂട്ടിക്കെട്ടേണ്ടി വരും. കാരണം എല്ലാ യൂനിവേഴ്‌സിറ്റികളും പഠിപ്പിക്കുന്നത് ആധുനികശാസ്തമാണ്. അല്ലാതെ വിശ്വാസ ശാസ്ത്രങ്ങളല്ല. നമ്മൾ ജീവിയ്ക്കുന്നത് ആധുനിക ശാസ്തത്തിന്റെ കണ്ടുപിടുത്തങ്ങൾ പ്രയോജനപ്പെടുത്തിയിട്ടാണ്. അതൊക്കെ കണ്ടുപിടിച്ചത് പാശ്ചാത്യ ശാസ്ത്രജ്ഞരാണ് താനും. പുരാതന വിശ്വാസങ്ങളും ഭാരതത്തിലെ ഋഷിമാർ കണ്ടുപിടിച്ചതും മാത്രം മതിയെങ്കിൽ നമ്മൾ പണ്ടത്തെ കാനന ജീവിതത്തിലേക്ക് മടങ്ങി പോകേണ്ടി വരും.

ബോച്ചേക്ക് ജാമ്യം; എന്റെ നിരീക്ഷണങ്ങൾ

noreply@blogger.com (K.P.Sukumaran) — Tue, 14 Jan 2025 15:31:00 +0000

ബോബി ചെമ്മണ്ണൂരിന് ഒരു ചികിത്സ അത്യാവശ്യമായിരുന്നു, അത് കിട്ടിക്കഴിഞ്ഞു എന്നാണ് വിചാരിക്കുന്നത്. അദ്ദേഹത്തിന് ജാമ്യം കിട്ടിയതിൽ ആശ്വാസം തോന്നുന്നു. ആറ് ദിവസം ജയിലിൽ കിടന്നത് നല്ലൊരു അനുഭവമായിട്ടാണ് അദ്ദേഹം കാണേണ്ടത്. ഞാൻ മദ്രാസിൽ അവിടത്തെ പഴയ സെൻട്രൽ ജയിലിൽ ഒരാഴ്ച കിടന്നിട്ടുണ്ട്. ടിക്കറ്റ് എടുക്കാതെ ഇലക്ട്രിക് ട്രെയിനിൽ കോടമ്പാക്കത്ത് നിന്ന് അടുത്ത സ്റ്റേഷനായ ചേറ്റ്‌പെട്ട് വരെ സഞ്ചരിച്ചപ്പോൾ സ്കോഡ് പിടുത്തമിടുകയായിരുന്നു. ജയകാന്തന്റെ കാവൽ ദൈവം എന്ന തമിഴ് നോവൽ വായിച്ചു തീർത്ത സമയം ആയിരുന്നു അത്. എനിക്ക് ജയിലിനെ പറ്റി മനസ്സിലാക്കണമായിരുന്നു. യാദൃച്ഛികമായി അതിനൊരു അവസരം ഒത്ത് വന്നു. ജീവിതത്തിൽ കുറച്ച് കഷ്ടപ്പാടുകൾ ഏതൊരാളും അനുഭവിക്കുന്നത് നല്ലതാണ്. ജീവിതം പഠിക്കും, പഠിക്കണം.

ബോച്ചേക്ക് അശ്ലീലച്ചുവയുള്ള ദ്വയാർത്ഥ പ്രയോഗങ്ങളുടെ രാജാവ് എന്ന കുപസിദ്ധി ആവശ്യമില്ല. ചെയ്യുന്ന ജീവകാരുണ്യ പ്രവർത്തനങ്ങളുടെ പേരിൽ സുപ്രസിദ്ധിയാണ് അദേഹം അർഹിക്കുന്നത്. അതിന് ഇനി അദ്ദേഹം ആ ആഭാസത്തരം ഒഴിവാക്കും എന്ന് പ്രതീക്ഷിക്കാം. മറ്റൊരാൾക്ക് അഹിതമായതോ ഫീലിംഗ്‌സ് വൃണപ്പെടുത്തുന്നതോ ആയ വാക്കുകൾ ഉപയോഗിക്കാതിരിക്കുന്നതാണ് മാന്യത. തന്നെ പോലെ വികാരവും ആത്മാഭിമാനവും ഉള്ള മനസ്സാണ് എല്ലാവർക്കും ഉള്ളത് എന്ന് എല്ലാവരും ചിന്തിക്കണം. എങ്കിലും പലപ്പോഴും നമുക്ക് കൺട്രോൾ നഷ്ടപ്പെട്ട് പോകും. ആരും ഹൺഡ്രഡ് പെർസെന്റ് പെർഫക്ട് അല്ലല്ലോ. അത്തരം സന്ദർഭങ്ങളിൽ മനസ്സിന്റെ സമനില വീണ്ടെടുത്ത് പശ്ചാത്തപിക്കുകയാണ് വേണ്ടത്. അങ്ങനെ ആർക്കും നല്ല മനുഷ്യരാകാൻ കഴിയും.

ഒരാൾ വസ്ത്രം ധരിക്കുന്നത് അയാളുടെ സ്വാതന്ത്ര്യമാണ്. അതിൽ കുറ്റം പറയാനോ വിമർശിക്കാനോ ആർക്കും അവകാശമില്ല. ഇങ്ങനെയേ വസ്ത്രം ധരിക്കാവൂ, അങ്ങനെ ധരിക്കരുത് എന്നൊക്കെ പറയാനോ ആജ്ഞാപിക്കാനോ ആർക്കും അധികാരവുമില്ല. വസ്ത്രധാരണം തികച്ചും പേഴ്‌സണൽ ആണ്. അവരവരുടെ ആത്മവിശ്വാസം വർദ്ധിപ്പിക്കാനാണ് ഒരു വ്യക്തി പൊതുവിടങ്ങളിൽ സഞ്ചരിക്കുമ്പോൾ വസ്ത്രം ധരിക്കുന്നത്. വസ്ത്രധാരണത്തിന്റെ പ്രഥമവും പ്രധാനവുമായ ഉദ്ദേശ്യം ശരീരത്തിന്റെ സൗന്ദര്യവൽക്കരണം തന്നെയാണ്. വസ്ത്രം ധരിക്കുന്നത് കൊണ്ടാണ് സുന്ദരന്മാരെയും സുന്ദരികളെയും നമുക്ക് കാണാൻ കഴിയുന്നത്. നമ്മൾ മറ്റുള്ളവരുടെ മുന്നിൽ സൗന്ദര്യമുള്ളവരായി കാഴ്ച നൽകാൻ ആഗ്രഹിക്കുന്നു. അത് പോലെ മറ്റുള്ളവരുടെ സൗന്ദര്യം നമ്മൾ രസിക്കുകയും ചെയ്യുന്നു. ഇത് മനുഷ്യസഹജമാണ്.

മറ്റുള്ളവർ വസ്ത്രം ധരിച്ചതിൽ ശരീരഭാഗങ്ങൾ കാണുന്നെങ്കിൽ അതിൽ അമർഷം കൊള്ളുന്നവരും രോഷം പ്രകടിപ്പിക്കുന്നവരും സ്വന്തം മനസ്സിലെ വൃത്തികേട് കൊണ്ടാണ് അങ്ങനെ ചെയ്യുന്നത്. അത് കാണുന്നത് തങ്ങൾക്ക് അരോചകമായി തോന്നുന്നെങ്കിൽ നോക്കാതിരിക്കണം. അത്രയേ ചെയ്യാവൂ. അല്ലാതെ ശരീരം പ്രദർശിപ്പിച്ചു പോകുന്നേ എന്ന് കമന്റ് പാസ്സാക്കരുത്. അത് അവരുടെ സൗകര്യം എന്ന് വിട്ടേക്കണം. മറ്റുള്ളവർക്ക് അസൗകര്യം ഇല്ലാത്ത തരത്തിൽ ജീവിച്ചു പോകാനുള്ള അവകാശവും അധികാരവും ഏതൊരു പൗരനും ലഭിക്കുന്നതിനെയാണ് നമ്മൾ ജനാധിപത്യവ്യവസ്ഥിതി എന്ന് പറയുന്നത്. ജനാധിപത്യത്തിൽ ഒരാളുടെ യജമാനൻ അയാൾ തന്നെയാണ്, അത് സ്ത്രീ ആയാലും പുരുഷൻ ആയാലും.

എങ്കിലും വിമർശിക്കാനുള്ള സ്വാതന്ത്ര്യവും ജനാധിപത്യത്തിൽ ജന്മസിദ്ധമാണ്. ആരും വിമർശനത്തിന് അതീതരല്ല. വിമർശനം സദുദ്ദേശ്യപരമായിരിക്കണം എന്ന് മാത്രം. സ്വന്തം ശരീരം കെട്ടുകാഴ്ചയായി മാർക്കറ്റ് ചെയ്ത് ആൾക്കൂട്ടത്തെ ആകർഷിക്കുന്നെങ്കിൽ അത് വിമർശിക്കപ്പെടും. എന്തിലും ഏതിലും മര്യാദ എന്നൊരു ലക്ഷ്മണരേഖയുണ്ട്. അത് ലംഘിച്ചാൽ വിമർശനം നേരിടേണ്ടി വരും. ബോച്ചേക്ക് , അദ്ദേഹത്തിന്റെ നല്ല സാമൂഹ്യ പ്രവർത്തനങ്ങൾക്ക് നന്മകൾ നേരുന്നു !

ജീവിതം എത്ര സുന്ദരം !

noreply@blogger.com (K.P.Sukumaran) — Sun, 12 Jan 2025 10:53:00 +0000

ഓരോ ദിവസവും ഞാൻ കമ്പ്യൂട്ടറിന്റെ മുന്നിൽ ഇരിക്കുന്നത് ഒരു വിദ്യാർഥിയായിട്ടാണ്. എന്തെന്തെന്ന് വിവരങ്ങളാണ് ഇനിയും മനസ്സിലാക്കാനും പഠിക്കാനുമുള്ളത്. എല്ലാം പഠിക്കാൻ എത്രയോ ആയുസ്സ് വേണ്ടി വരും. ഇന്റർനെറ്റ് എന്നത് വിവരങ്ങളുടെ അതിബൃഹത്തായ ഒരു വെർച്വൽ കലവറയാണ്. ഈ ഒരു ഇന്റർനെറ്റ് കാലത്ത് ജീവിക്കാൻ കഴിഞ്ഞത് എന്തൊരു ഭാഗ്യമാണ്. ഓരോ വിവരവും എന്നെ അത്ഭുതപ്പെടുത്തുന്നതാണ്. അത് ഒരു ആറ്റത്തിന്റെയാകാം, അല്ലെങ്കിൽ ഒരു കോശത്തിന്റെയാകാം , ഒരു മഴത്തുള്ളിയുടെയോ, മൺതരിയുടെയോ ആകാം.

പ്രകൃതിയിൽ നടക്കുന്ന ഈ വക ഒരോന്നും മനസ്സിലാക്കുമ്പോൾ ഈ അത്ഭുതങ്ങളൊന്നും അടുത്തുള്ളവരുമായി പങ്ക് വെക്കാൻ കഴിയുന്നില്ലല്ലോ എന്ന നിരാശയാണ് എനിക്ക്. ഫേസ്ബുക്കിൽ എഴുതിയാൽ ഉടനെ കമന്റ് വരും ഇതൊക്കെ ആ ഡിസൈനർ ഡിസൈൻ ചെയ്യുന്നതല്ലേ എന്ന്. അങ്ങനെ വിശ്വസിക്കുന്നവർക്ക് എന്ത് അത്ഭുതം.

ആരാണ് ആ ഡിസൈനർ എന്ന് ചോദിച്ചാൽ ഉത്തരം ഉണ്ടാവില്ല. അതിഭയങ്കര കഴിവുള്ള ഒരു സൂപ്പർമാൻ ആയിരിക്കും അവരുടെ മനസ്സിൽ ഉണ്ടാവുക. കാരണം ചിന്തിക്കാനും ഡിസൈൻ ചെയ്യാനും ഒരു തലച്ചോർ വേണമല്ലോ. അപ്പോൾ വിശ്വാസികളുടെ മനസ്സിൽ ഉള്ള ഡിസൈനർ സൂപ്പർ തലച്ചോറുള്ള ഒരു അൾട്രാ സൂപ്പർമാൻ ആയിരിക്കും. വിശ്വാസിക്ക് വിശ്വാസം മതി. വിശ്വാസം ഒരു തടവറയാണ്. വിവരങ്ങൾ അതിന്റെ പടിക്ക് പുറത്താണ്.

ജീവിതം എനിക്കൊരു പരീക്ഷണം ആയിരുന്നു. അതുകൊണ്ടാണ് പതിനാലാം വയസ്സിൽ കള്ളവണ്ടി കയറി നാട് ചുറ്റിയത്. ലൈബ്രറികളാണ് എവിടെ പോയാലും തേടി നടന്നത്. പത്ത് കൊല്ലത്തോളം മദ്രാസിൽ ജീവിച്ചപ്പോൾ അധിക സമയവും ചെലവഴിച്ചത് എഗ്‌മോറിലെ കന്നിമാറ ലൈബ്രറിയിലും പിന്നെ മൗണ്ട് റോഡിലെ LLB ലൈബ്രറി ആസ്ഥാനത്തും ആയിരുന്നു. വിവരങ്ങൾ സമ്പാദിക്കുക എന്നല്ലാതെ കാശ് ഉണ്ടാക്കുക എന്റെ അജണ്ടയിൽ ഇല്ലായിരുന്നു. രണ്ട് മൂന്ന് ദിവസം പട്ടിണിയിൽ കഴിഞ്ഞ് വിശപ്പ് അസഹ്യമാകുമ്പോഴാണ് ഏതെങ്കിലും ഹോട്ടലിൽ ചെന്ന് സപ്ലൈയറുടെ ഒഴിവുണ്ടോ എന്ന് ചോദിക്കുക. ചോദിച്ചിടത്തൊക്കെ ജോലി കിട്ടും. പക്ഷെ ഒരാഴ്ചയിൽ കൂടുതൽ എവിടെയും ജോലി ചെയ്തിട്ടില്ല. ഞായറാഴ്ചകളിൽ സ്റ്റാർ ഹോട്ടലുകളിൽ എക്സ്ട്രാ ഡ്യൂട്ടി ചെയ്യും. നല്ല ടിപ്പും കിട്ടും.

അങ്ങനെയൊരു ഹോട്ടലിന്റെ ചിത്രമാണ് ഈ പോസ്റ്റിന്റെ കൂടെയുള്ളത്. മൗണ്ട് റോഡിൽ ജെമിനി സ്റ്റുഡിയോയുടെ എതിർവശം കത്തീഡ്രൽ റോഡിൽ ഏക്കറ് കണക്കിന് പരന്നു കിടക്കുന്ന സ്ഥലത്ത് ഉണ്ടായിരുന്ന വുഡ്‌ലാന്റ്സ് ഡ്രൈവ് ഇൻ റസ്റ്റാറന്റ്. തെന്നിന്ത്യയിലെ ആദ്യത്തെ ഡ്രൈവ് ഇൻ റസ്റ്റാറന്റ് ആയിരുന്നു അത്. ആളുകൾ കാറുകളിൽ വരും. സപ്ലൈയേർസ് കാറിന്റെ അടുത്ത് പോയി ചില്ല് താഴ്ത്തിയ ഡോറിൽ സ്റ്റീലിന്റെ ട്രേ ഘടിപ്പിക്കും. ഓർഡർ ചെയ്യുന്ന പലഹാരങ്ങൾ കൗണ്ടറിൽ നിന്ന് വാങ്ങി ട്രേയിൽ വെക്കും. ഇംഗ്ലീഷിൽ സംസാരിച്ച് വിനയപൂർവ്വം സേർവ് ചെയ്യുന്ന എനിക്ക് ആരും ടിപ്പ് തരാതെ പോയിട്ടില്ല. ആ പൈസ എനിക്ക് ഒരാഴ്ചത്തേക്കുള്ള ചെലവിന് മതിയായിരുന്നു. രാവിലെ കയറിയാൽ വൈകുന്നേരമാണ് ലൈബ്രറിയിൽ നിന്ന് ഇറങ്ങുക.

ഇന്ന് ഇതൊക്കെ ഓർമ്മിക്കാൻ കാരണം ഇന്നത്തെ മാതൃഭൂമിയിൽ രവിമേനോൻ എഴുതിയ ജയചന്ദ്രൻ അനുസ്മരണത്തിൽ അയാളും ജയചന്ദ്രനും വുഡ്‌ലാന്റ്സ് ഡ്രൈവ് ഇൻ റസ്റ്റാറന്റിൽ പോയതും പി.ബി.ശ്രീനിവാസനുമായി സംസാരിച്ചിരുന്നതും സ്റ്റീൽ ടംബ്ലറിൽ ഫിൽട്ടർ കാപ്പി കുടിച്ചതും ഒക്കെ വായിച്ചപ്പോഴാണ്. ഇപ്പോൾ ആ റസ്റ്റാറന്റ് അവിടെയില്ല. 2008 ൽ അത് പൂട്ടിയിരുന്നു. ഇപ്പോൾ അതേ പേരിൽ അതിന്റെ ഉടമയുടെ പിൻതലമുറക്കാർ അരുമ്പാക്കത്ത് പുതുതായി റസ്റ്റാറന്റ് തുടങ്ങിയിട്ടുണ്ട് എന്ന് അറിയാൻ കഴിഞ്ഞു. അങ്ങനെ പഴയ 1964-1976 കാലത്തെ മദാസിലെ കാര്യങ്ങൾ എന്ത് പറഞ്ഞാലും അതൊക്കെ ഏതെങ്കിലും വിധത്തിൽ എന്നോട് കണക്റ്റ് ചെയ്യുന്നതായിരിക്കും. ഞാൻ പക്ഷെ അന്ന് ജീവിതത്തിന്റെ പുറമ്പോക്കിൽ വെറും കാഴ്ചക്കാരൻ ആയിരുന്നു എന്ന് മാത്രം.

ഇത്രയൊക്കെ അനുഭവങ്ങൾ ഉണ്ടെങ്കിലും എന്റെ കൈയിൽ ഭാഷയിലെ വാക്കുകൾ വളരെ കുറവായിരുന്നു. ഉള്ള വാക്കുകൾ കൊണ്ട് എന്തെങ്കിലും എഴുതി മുഴുമിക്കാനുള്ള കഴിവും എനിക്കില്ലായിരുന്നു. അതുകൊണ്ട് എനിക്ക് എവിടെയും എത്താൻ കഴിഞ്ഞില്ല. എത്ര പേർ വാക്കുകൾ ഉപയോഗിക്കാനുള്ള വൈഭവം കൊണ്ട് അതിപ്രശസ്തരും ആരാധനാപാത്രങ്ങളും ആയിട്ടുണ്ട്. കഴിവുകൾ ജന്മസിദ്ധമാണ്. ഓരോരുത്തരുടെ കഴിവും വ്യത്യസ്തമാണ്. എല്ലാവരുടെ കഴിവുകളും ചേരുമ്പോഴാണ് എല്ലാവർക്കും ജീവിയ്ക്കാൻ കഴിയുന്നതും സമൂഹം മുന്നോട്ട് പോകുന്നതും. ആരുടെ കഴിവും കുറച്ച് കാണരുത്.

എവിടെയും എത്തിയില്ല എന്ന പരിഭവം ഒന്നും എനിക്കില്ല. ഓർക്കുമ്പോൾ ഇത്രയും കാലം ജീവിച്ചല്ലോ ഇന്നും ജീവിക്കുന്നല്ലോ എന്ന ആശ്ചര്യമാണെനിക്ക്. കൊച്ചു കൊച്ചു ആഗ്രഹങ്ങൾ മാത്രമേ ഉണ്ടായിരുന്നുള്ളൂ എന്നത് കൊണ്ട് കിട്ടിയതിൽ ഞാൻ പൂർണ്ണ സംതൃപ്തനാണ്. പ്രത്യേകിച്ചും എന്റെ രണ്ട് മക്കളും നൽകുന്ന സംരക്ഷണവും കരുതലും. എന്തൊക്കെയായാലും ഈ ജീവിതം മനോഹരവും സുന്ദരവും ആണ്. ഇത് വിട്ടുപോയേ തീരൂ എന്നത് കൊണ്ട് ആ റിയാലിറ്റി അംഗീകരിച്ചേ പറ്റൂ. എനിക്ക് മുൻപും എനിക്ക് ശേഷവും ഞാൻ എന്ന എന്റെ ഈ അസ്തിത്വം ഇല്ലായിരുന്നു, ഉണ്ടാവുകയും ചെയ്യില്ല എന്നതാണ് യാഥാർഥ്യം എന്നും ഞാൻ കരുതുന്നു.

ഒരു എഫ് ബി പോസ്റ്റ് അപാരത

noreply@blogger.com (K.P.Sukumaran) — Sat, 11 Jan 2025 04:48:00 +0000

ചേമ്പിനെ കുറിച്ച് പറഞ്ഞ് കൃഷിയിൽ രാസവളത്തിന്റെ ആവശ്യകതയെ പറ്റി എഴുതിയ എന്റെ കഴിഞ്ഞ പോസ്റ്റ് മൂന്ന് ലക്ഷത്തിലധികം പേർ കണ്ടതായും രണ്ടര ലക്ഷത്തിലധികം പേർ വായിച്ചതായും പറഞ്ഞാൽ നിങ്ങൾ വിശ്വസിക്കുമോ? എനിക്ക് തന്നെ വിശ്വാസം വരുന്നില്ല, പിന്നെയല്ലേ നിങ്ങൾക്ക്. എന്നാൽ ഫേസ്ബുക്കിന്റെ insights കാണിക്കുന്നത് അങ്ങനെയാണ്. എന്റെ ആ പോസ്റ്റ് അക്ഷരാർത്ഥത്തിൽ വൈറൽ ആയിരിക്കുന്നു. ആളുകൾക്ക് ജൈവകൃഷിയുടെ നിഷ്പ്രയോജനം മനസ്സിലായി വരുന്നതിന്റെയും രാസവളം ഉപയോഗിക്കാൻ താല്പര്യം കൂടി വരുന്നതിന്റെയും സൂചനയായിട്ടാണ് ആ പോസ്റ്റിന്റെ റീച്ചിനെ ഞാൻ കാണുന്നത്.

നാട്ടിൽ ഇപ്പോൾ പച്ചക്കറികൃഷി തീർത്തും അപ്രത്യക്ഷമായി എന്ന് തന്നെ പറയാം. കാരണം രണ്ട് വട്ടം ജൈവരീതിയിൽ കൃഷി ചെയ്താൽ പിന്നെയാരും അതിന് മെനക്കെടില്ല. ജൈവകൃഷിയിൽ ചെടികൾക്ക് ആവശ്യമുള്ള പോഷണം കിട്ടാതെ അരണ്ട് വളരുകയും കായ്‌ഫലം ശുഷ്ക്കമായതും കൊണ്ടാണ് ആളുകൾ പച്ചക്കറികൃഷി തന്നെ ഉപേക്ഷിച്ചത്. ജൈവകൃഷി പ്രോത്സാഹിപ്പിച്ച് കൃഷിയെ തന്നെ ഇങ്ങനെ നശിപ്പിച്ചതിൽ മാധ്യമങ്ങളും കഴിഞ്ഞ മന്ത്രിസഭയിലെ കൃഷിമന്ത്രി സുനിൽ കുമാറും നിർവഹിച്ച പങ്ക് വളരെ വലുതാണ്. ഇപ്പോൾ കൃഷി നാട്ടിൽ നിന്ന് അപ്രത്യക്ഷമായപ്പോൾ ആർക്കും മിണ്ടാട്ടമില്ല.

പച്ചക്കറികൾ അവനവന്റെ വീട്ടുമുറ്റത്തോ ടെറസ്സിലോ കൃഷി ചെയ്ത് അവരവരുടെ വീട്ടാവശ്യത്തിന് ആ‍ാവശ്യമായത് സമൃദ്ധമായി ഉണ്ടാക്കാനുള്ള അവസരം ഇപ്പോഴുമുണ്ട്. ഈ സമയം അതിന് പറ്റിയതാണ് താനും. ചെടികൾക്ക് വേണ്ടത് ആവശ്യത്തിന് പോഷണവും വെള്ളവും സൂര്യപ്രകാശവും ആണ്. ഇതിൽ ഏതെങ്കിലും ഒന്ന് കുറഞ്ഞാൽ ചെടികൾ ആരോഗ്യത്തോടെ വളരില്ല.

മുറ്റത്തും ടെറസ്സിലും ഗ്രോബാഗിൽ ചെടികൾ വളർത്താവുന്നതാണ്. ഗ്രോബാഗിൽ നിറക്കാൻ ഉപയോഗിക്കുന്ന മേൽമണ്ണിൽ ആവശ്യമുള്ള പോഷണങ്ങൾ ഒരിക്കലും ഉണ്ടാവില്ല. എവിടെയെങ്കിലും ഉണ്ടാകാം പക്ഷെ അങ്ങനെയുള്ള മണ്ണ് എല്ലാവർക്കും കിട്ടില്ല. ആ കുറവ് പരിഹരിക്കേണ്ടത് രാസവളം വാങ്ങി വെള്ളത്തിൽ കലക്കി അപ്പപ്പോൾ കുറേശ്ശേ ഒഴിച്ചു കൊടുത്തോ ഇലകളിൽ സ്പ്രേ ചെയ്തോ ആണ്. ഇലകളിൽ സ്പ്രേ ചെയ്താൽ ഗ്രോ ബാഗിലെ മണ്ണിൽ പതിക്കുമല്ലോ.

ടെറസ്സിൽ ഗ്രോബാഗിൽ നിറക്കാൻ മണ്ണ് എടുക്കുമ്പോൾ ആ മണ്ണ് വെയിലിൽ ഉണക്കുന്നത് നല്ലതാണ്. അപ്പോൾ മണ്ണിലുള്ള വൈറസ്സുകളും ബാക്റ്റീരിയകളും നശിച്ചു പോകും. ചെടികളെ ബാധിക്കുന്ന സൂക്ഷ്മജീവികൾ മണ്ണിൽ നിന്നാണ് ചെടികളിലേക്ക് പടരുന്നത്. ടെറസ്സിൽ ആകുമ്പോൾ പിന്നീട് ആ മണ്ണിൽ സൂക്ഷ്മജീവികൾ കടന്ന് വരില്ല. വല്ല കീടങ്ങളോ പ്രാണികളോ ചുറ്റുപാടിൽ നിന്ന് വന്ന് ചെടികളെ ആക്രമിക്കുന്നെങ്കിൽ അപ്പോൾ രാസകീടനാശിനികൾ സ്പ്രേ ചെയ്ത് കൊടുക്കണം. ഒരു ലിറ്റർ വെള്ളത്തിൽ 5ml രാസകീടനാശിനി ഏതാണോ അത് ചേർത്ത് നേർപ്പിച്ചിട്ടാണ് സ്പ്രേ ചെയ്യേണ്ടത്. അങ്ങനെ ചെയ്താൽ കീടങ്ങൾ നശിക്കും. അവശേഷിക്കുന്ന കീടനാശിനി അവശിഷ്ടങ്ങൾ വെയിലിൽ വിഘടിച്ചു പോകും. ഇങ്ങനെയൊക്കെ ചെയ്താൽ ചെടികളും ഹാപ്പി നമ്മളും ഹാപ്പിയാകും.

ചെടികൾക്ക് വേണ്ടത് 13 മൂലകങ്ങൾ ആണെന്നും അതിൽ പ്രധാനം N.P.K എന്ന മൂന്ന് മൂലകങ്ങൾ ആണെന്നും ഇന്നലത്തെ പോസ്റ്റിൽ പറഞ്ഞിരുന്നല്ലോ. ആ വളം ആണ് വാങ്ങി ഉപയോഗിക്കേണ്ടത്. ചിലപ്പോൾ മെഗ്‌നീഷ്യം, കാൽസിയം , ബോറോൺ , മൊളിബ്‌ഡിനം എന്നീ മൂലകങ്ങളുടെ കുറവ് അപൂർവ്വമായി ഉണ്ടാകാം. ഇലകൾക്ക് നല്ല കരിം‌പച്ച ഇല്ലാതിരിക്കലാണ് ഇതിന്റെ ലക്ഷണങ്ങൾ. അങ്ങനെയുണ്ടെങ്കിൽ മേല്പറഞ്ഞ മൂലകങ്ങൾ അടങ്ങിയ വളം വാങ്ങി അല്പ, മാത്രം സ്പ്രേ ചെയ്യേണ്ടി വരും. എല്ലാ വളങ്ങളും ഓൺലൈനിൽ ലഭിക്കും. NPK18:18:18, Urea, DAP (Diammonium phosphate), Factomphos ഇവയിൽ ഏതെങ്കിലും വാങ്ങി ഉപയോഗിച്ചിട്ട് ചെടിക്ക് നല്ല ആരോഗ്യവും ഇലകൾക്ക് നല്ല പച്ച നിറവും കാണുന്നെങ്കിൽ മറ്റൊന്നും ആലോചിക്കേണ്ട.

ജലത്തിന്റെ സമ്പർക്കം കൊണ്ട് ചെടികൾക്ക് പെട്ടെന്ന് ആഗിരണം ചെയ്യാൻ കഴിയും വിധമാണ് രാസവളത്തിന്റെ മോളിക്യൂൾ ഘടന. അതുകൊണ്ട് വളം കൊടുത്തതിന്റെ റിസൾട്ട് രണ്ടോ മൂന്നോ ദിവസം കൊണ്ട് കാണാൻ കഴിയും. അല്പം മാത്രം എടുത്ത് വെള്ളത്തിൽ കലക്കി ഒഴിക്കുമ്പോൾ വേരിന് തട്ടുമോ എന്ന് പേടിക്കേണ്ട. എന്നാലും കഴിയുന്നതും ചെടിയുടെ മുരട് ഒഴിവാക്കി ചുറ്റും ഒഴിക്കുന്നതാണ് സേഫ്റ്റി.

ശരിക്ക് പറഞ്ഞാൽ ചെടികൾക്ക് പുഷ്ടിയോടെ വളരാനും നൂറ് ശതമാനം പോഷകഗുണമുള്ള കായ്‌ഫലങ്ങൾ വിളയാനും നമ്മൾ 13 മൂലകങ്ങൾ അവയ്ക്ക് നൽകിയാൽ മതി. മണ്ണ് വേണമെന്നില്ല. അങ്ങനത്തെ കൃഷിരീതിക്ക് ലോകത്ത് ഇന്ന് നല്ല പ്രചാരം ഉണ്ട്. ഹൈഡ്രോപോണിക് എന്നാണ് ആ രീതിയുടെ പേര്. അതിന് നമ്മൾ 13 മൂലകങ്ങളും കൃത്യമായ അനുപാതത്തിൽ അടങ്ങിയ ലായനി സ്വയം തയ്യാറാക്കുകയോ ഓൺലൈൻ മാർക്കറ്റിൽ നിന്ന് വാങ്ങുകയോ വേണം. ഹൈഡ്രോപോണിക്കിൽ വിവിധ സിസ്റ്റം രീതികൾ ഉണ്ട്. അതിൽ ഏറ്റവും എളുപ്പം തിരി സിസ്റ്റം ആണ്. താഴെയുള്ള ഇമേജ് കാണുക. അത് ഏത് സാധാരണക്കാർക്കും പ്ലാസ്റ്റിക്ക് ബോട്ടിൽ കൊണ്ട് പോലും ചെയ്യാം.

ഞാൻ നാട്ടിൽ വന്ന് ഹൈഡ്രോപോണിക്കിന്റെ സിസ്റ്റം സ്ഥാപിച്ച് കൃഷി ചെയ്യാനും ആളുകൾക്ക് പരിശീലനം നൽകാനും ന്യൂട്രിയന്റ് ലായനി തയ്യാറാക്കാനും ഒക്കെ പ്ലാൻ ചെയ്തിരുന്നു. പക്ഷെ നാട്ടിൽ എനിക്ക് ഇനിയും സ്ഥിരതാമസമാക്കാൻ പറ്റിയില്ല. ഇതിനിടയിൽ പ്രായം കടന്നു പോവുകയും ചെയ്യുന്നു. മറ്റാരെങ്കിലും ഇതിന് തയ്യാറാവുകയാണെങ്കിൽ അതൊരു നല്ല സാമൂഹ്യപ്രവർത്തനം ആകുമായിരുന്നു. ആഹാരത്തിൽ നിറയെ പച്ചക്കറികൾ ഉൾപ്പെടുത്തിയാൽ ജീവിതശൈലി രോഗങ്ങളിൽ നിന്ന് രക്ഷപ്പെടാം. അധികം കഴിക്കുന്ന കാർബോഹൈഡ്രേറ്റ് ആണ് നമ്മുടെ ആരോഗ്യം കവരുന്ന വില്ലൻ. അല്ലാതെ കൊളസ്ട്രോൾ അല്ല. രാസം എന്നാൽ വിഷം എന്ന ഭീതിയും മൂഢത്വവും ഉപേക്ഷിക്കാൻ എല്ലാവർക്കും കഴിയട്ടെ. കീടങ്ങൾക്കും സൂക്ഷ്മജീവികൾക്കും വിഷം ആയത് അവയേക്കാൾ എത്രയോ മടങ്ങ് വലിയ ശരീരവും ബോഡി പ്രൊട്ടക്‌ഷനും ഉള്ള നമുക്ക് വിഷമാവില്ല എന്ന സാമാന്യബോധവും നമുക്ക് ഉണ്ടാകേണ്ടതാണ്.

രാസവളം വിഷം അല്ല

noreply@blogger.com (K.P.Sukumaran) — Sat, 11 Jan 2025 04:45:00 +0000

വെറുതെ ഇരിക്കുമ്പോൾ ഇട്ടമ്മില് രണ്ട് മൂട് വാഴച്ചേമ്പിന്റെ വിത്ത് നട്ടതാണ്. അതിന് അല്പം N.P.K വളം ഇട്ടുകൊടുത്തിരുന്നു. അതുകൊണ്ട് നന്നായി പോഷിച്ചു വളർന്നു. കിളച്ചു നോക്കിയപ്പോൾ തോന വിത്തുകൾ കിട്ടി. ഇന്നലെ പകുതി എടുത്ത് പുഴുങ്ങി. എന്താ ഒരു ടേസ്റ്റ്. എനിക്ക് വാഴച്ചേമ്പ് പുഴുങ്ങിയത് വളരെ ഇഷ്ടമാണ്. ചുമ്മാ ഉപ്പ് മാത്രം ഇട്ട് പുഴുങ്ങിയാൽ മതി. അല്പം വെളിച്ചെണ്ണ ഒഴിച്ചു കൊടുക്കണം. വേറെ ഒന്നും വേണ്ട. നല്ലത് പോലെ വെന്താൽ വെണ്ണ പരുവത്തിലാകും. അതാണ് ടേസ്റ്റ്.

ഇത്രയും വിത്തുകൾ കിട്ടിയത് N.P.K എന്ന വളം ഇട്ടുകൊടുത്തത് കൊണ്ടാണ്. എന്തുകൊണ്ട് N.P.K ? അത് പറയാനാണ് ഈ കുറിപ്പ്. നാട്ടിൽ രാസവളം എന്നാൽ വിഷം ആണ്. വീട്ടിലെ ജൈവമാലിന്യം കൊണ്ട് ഉണ്ടാക്കുന്ന കമ്പോസ്റ്റ് പിന്നെ ചാണകം ഒക്കെയാണ് വളം. രാസവളം ഇട്ടാൽ ലഭിക്കുന്ന വിളവുകളും വിഷം ആയിരിക്കും എന്നാണ് പൊതുബോധം. പൊതുബോധത്തോട് ഒരു രക്ഷയും ഇല്ല. അങ്ങോട്ട് ഒന്നും പറയാൻ പറ്റില്ല. അത്യാവശ്യം പച്ചക്കറി നടുന്ന അയൽക്കാരനോട് ഞാൻ പറഞ്ഞു, ലേശം N.P.K ഇട്ടുകൊടുത്തുകൂടേ? അവജ്ഞയോടെ അവൻ പറഞ്ഞു, അതൊന്നും ഞങ്ങൾ ഉപയോഗിക്കാറില്ല. എന്റെ അഭിപ്രായത്തെ വിഷം തീറ്റിക്കാനുള്ള ദുരുപദേശം ആയിട്ടായിരിക്കും അവൻ എടുത്തിരിക്കുക.

ജൈവകൃഷി എന്നത് ഏറ്റവും വലിയ മൂഢവിശ്വാസം ആണ്. നമ്മൾ ഭക്ഷണം കഴിക്കുന്നില്ലേ. അതൊക്കെ അതിന്റെ ഏറ്റവും ചെറിയ രൂപത്തിൽ തന്മാത്രകളും തന്മാത്രകൾ മൂലകങ്ങൾ ചേർന്നതും ആണ്. ചുരുക്കി പറഞ്ഞാൽ ഇക്കാണുന്ന ജീവൻ ഉള്ളതും ഇല്ലാത്തതും എല്ലാം തന്നെ മൂലകങ്ങൾ കൊണ്ട് ഉണ്ടായതാണ്. ആഹാരത്തിലെ കാർബോഹൈഡ്രേറ്റ് കാർബൺ, ഹൈഡ്രജൻ, ഓക്സിജൻ എന്നീ മൂന്ന് മൂലകങ്ങൾ ചേർന്നതാണ്. അതുകൊണ്ടാണ് കാർബോഹൈഡ്രേറ്റ് എന്ന് പറയുന്നത്. അവ മൂന്നിന്റെയും കൂടെ നൈട്രജൻ എന്ന നാലാമതൊരു മൂലകം കൂടി ചേർന്നാൽ അത് പ്രോട്ടീൻ തന്മാത്രയായി. വെള്ളം രണ്ട് ഹൈഡ്രജനും ഒരു ഓക്സിജനും മൂലകങ്ങൾ ചേർന്ന് ഉണ്ടായ തന്മാത്രകളാണ്. വായുവിലെ ഓക്സിജൻ എന്ന് നമ്മൾ പറയുന്നത് രണ്ട് ഓക്സിജൻ മൂലകങ്ങൾ ചേർന്ന തന്മാത്രയാണ്.

ഒരു മൂലകവും കൃത്രിമമായി ഉണ്ടാക്കാൻ സാധ്യമല്ല. രാസവളം നിർമ്മിക്കുന്നത് പ്രകൃതിയിലെ തന്മാത്രകൾ ശേഖരിച്ച് അവയെ മൂലകങ്ങളായി പിരിച്ചും തന്മാത്രകളായി കൂട്ടിച്ചേർത്തും ആണ്. യൂറിയയിൽ ഉള്ള നൈട്രജൻ വായുവിൽ ഉള്ള നൈട്രജൻ തന്നെയാണ്. വായുവിൽ 79 ശതമാനവും നൈട്രജൻ മൂലകം ആണുള്ളത് എന്ന് ഓർക്കുക. ആ നൈട്രജൻ തന്നെയാണ് ശേഖരിച്ച് ഒരു കൃത്രിമത്വവും ഇല്ലാതെ ഡാപ്, യൂറിയ, ഫേക്ടംഫോസ്, മുതലായ രാസവളങ്ങൾ ആക്കി മാറ്റിയിട്ടുള്ളത്. എളുപ്പത്തിൽ ചെടികൾക്ക് ആഗിരണം ചെയ്യാൻ കഴിയും വിധം ആണ് അതിന്റെ നിർമ്മാണം. എന്നിട്ടാണ് ഇതിനെ ആളുകൾ വിഷം എന്ന് വിശ്വസിച്ച് പേടിക്കുന്നതും പേടിപ്പെടുത്തുന്നതും. ജൈവകൃഷി എന്ന മൂഢപ്രചാരണമാണ് കേരളത്തിൽ കൃഷി നശിക്കാൻ കാരണം.

അല്പം ഡാപ്പ് അല്ലെങ്കിൽ യൂറിയയോ ഫേക്ടംഫോസോ പിന്നെ ലേശം പൊട്ടാസ്യവും ഇട്ടുകൊടുത്ത് ചെടികൾ പോഷിച്ചു വളരുകയും നല്ല വിളവ് കിട്ടുകയും ചെയ്യുമ്പോൾ ആളുകൾ ഉത്സാഹത്തോടെ അവരവർക്ക് വേണ്ടുന്ന പച്ചക്കറികൾ നട്ടു വളർത്തുമായിരുന്നു. ജൈവം എന്ന് പറയുന്നതിൽ 99.9 ശതമാനവും കാർബൺ മൂലകം ആണുള്ളത്. കാർബൺ മൂലകം ചെടികൾക്ക് മണ്ണിൽ നിന്ന് ആവശ്യമില്ല. അതുകൊണ്ടാണ് ജൈവം ഇട്ടുകൊടുത്ത ചെടികൾ മഞ്ഞളിച്ച് ശോഷിച്ച് അങ്ങനെ മുരടിച്ച് വളരുന്നത്.

നമുക്ക് ആഹാരത്തിൽ കൂടി നിശ്ചിത എണ്ണം മൂലകങ്ങളാണ് കിട്ടേണ്ടത് എന്ന പോലെ ചെടികൾക്ക് മണ്ണിൽ നിന്നും അന്തരീക്ഷത്തിൽ നിന്നും കൂടി കിട്ടേണ്ടത് ആകെ 16 മൂലങ്ങളാണ്. അവ താഴെ കൊടുക്കുന്നു :

Carbon (C), Oxygen (O), Hydrogen (H), Nitrogen , Phosphorus (P), Potassium (K), Calcium (Ca), Magnesium (Mg), Sulfur (S), Iron (Fe), Manganese (Mn), Zinc (Zn), Copper (Cu), Boron (B), Molybdenum (Mo), and Chlorine (Cl).

ഇവയിൽ ആദ്യത്തെ മൂന്ന് എണ്ണം Carbon (C), Oxygen (O), Hydrogen (H) എന്നിവ അന്തരീക്ഷത്തിൽ നിന്നും ജലത്തിൽ നിന്നും കിട്ടുന്നു. അന്തരീക്ഷത്തിലെ കാർബൺ ഡൈ‌ഓക്സൈഡിൽ നിന്നാണ് കാർബൺ കിട്ടുന്നത്. മണ്ണിൽ നിന്ന് ചെടികൾ കാർബൺ എടുക്കുന്നില്ല. അതുകൊണ്ടാണ് 99.9 ശതമാനവും അടങ്ങിയ ജൈവം ചെടികൾക്ക് പ്രയോജനം ഇല്ല എന്ന് പറയാൻ കാരണം. ബാക്കി 0.01 ശതമാനം മൂലകങ്ങൾക്ക് വേണ്ടി കൊട്ടക്കണക്കിന് ജൈവം ഇടേണ്ട കാര്യം ഇല്ലല്ലോ. അതേ സമയം ചാരത്തിൽ ആവശ്യമുള്ള മൂലകങ്ങൾ ഉണ്ട്. ചാരം എന്നത് കാർബൺ കത്തി കാർബൺ ഡൈഓക്സൈഡായി പോയി ശേഷിക്കുന്ന മൂലകങ്ങളാണ്. അത് ചെടികൾക്ക് ഗുണം ചെയ്യും. എന്നാൽ ചാരം ഇപ്പോൾ എവിടെ കിട്ടാനാണ്. ആ കുറവ് നികത്താനാണ് ഏറ്റവും ഫലപ്രദവും സയന്റിഫിക്കും ആയ രാസവളങ്ങൾ ഉപയോഗിക്കേണ്ടത്.

ചെടികൾക്ക് മണ്ണിൽ നിന്ന് കിട്ടേണ്ടത് മേലെ കൊടുത്തവയിൽ Carbon (C), Oxygen (O), Hydrogen (H) ഒഴികെ 13 മൂലകങ്ങളാണ്. ഇവയിൽ Nitrogen , Phosphorus , Potassium ഈ മൂന്നെണ്ണമാണ് അധികം കിട്ടേണ്ടത്. അതാണ് N.P.K എന്ന വളത്തിന്റെ പ്രസക്തി. മേല്പറഞ്ഞ 13 മൂലകങ്ങളും മണ്ണിൽ ഉള്ളതാണ്. മണ്ണ് എന്ന് പറയുന്നത് തന്നെ ഇത് പോലത്തെ കുറേ മൂലകങ്ങൾ ചേർന്ന മിശ്രിതം അല്ലാതെ മറ്റൊന്നല്ല. ചെടികളും വൃക്ഷങ്ങളും ഒക്കെ മണ്ണിൽ നിന്ന് ഇപ്പറഞ്ഞ 13 മൂലകങ്ങൾ വലിച്ചെടുത്തുകൊണ്ടാണ് വളരുന്നത്. എന്നാൽ തുടർന്ന് ഒരു സ്ഥലത്ത് കൃഷി ചെയ്യുമ്പോൾ ചെടികൾക്ക് അധികം ആവശ്യമായ Nitrogen , Phosphorus , Potassium എന്നീ മൂലകങ്ങൾ മേൽമണ്ണിൽ ശോഷിച്ചു പോകും അല്ലെങ്കിൽ തീരെ കുറഞ്ഞു പോകും. ആ കുറവ് നികത്താനാണ് നമ്മൾ N.P.K എന്ന കോം‌പ്ലക്സ് വളം ഇട്ടുകൊടുക്കേണ്ടത്. ചെടികൾ തഴച്ചു വളരും. ആ കാഴ്ച തന്നെ എത്ര നയനമനോഹരമാണ്.

പ്രകൃതിയിലെ പ്രതിഭാസങ്ങളുടെ പ്രവർത്തന രീതികൾ മനസ്സിലാക്കുന്നത് നമ്മെ അത്ഭുതപ്പെടുത്തും. എല്ലാവരും അതൊക്കെ മനസ്സിലാക്കാൻ ശ്രമിച്ചെങ്കിൽ എത്ര നന്നായിരുന്നു എന്ന് ഞാൻ വെറുതെ ആശിക്കാറുണ്ട് .....

കൊളസ്ട്രോൾ ടെസ്റ്റിന്റെ പൊട്ടക്കണക്കും തട്ടിപ്പും

noreply@blogger.com (K.P.Sukumaran) — Sat, 04 Jan 2025 08:28:00 +0000

ഇപ്പോഴൊക്കെ രോഗത്തെ പറ്റിയും ആരോഗ്യത്തെ പറ്റിയും ഏത് ഡോക്ടർ പറയുമ്പോഴും കൊളസ്ട്രോളിനെ പറ്റി പരാമർശിക്കാതിരിക്കില്ല. കൊളസ്ട്രോൾ അധികമായാൽ അതൊരു ഗുരുതര ആരോഗ്യപ്രശ്നം ആണ് എന്നാണ് സകല ഡോക്ടർമാരും നിരന്തരം ജനങ്ങളെ ഓർമ്മപ്പെടുത്തിക്കൊണ്ടിരിക്കുന്നത്. അതുകൊണ്ട് സമൂഹം ഒന്നാകെ കൊളസ്ട്രോൾ പേടിയിലാണ്. കൊളസ്ട്രോൾ ആർക്കും ഒരിക്കലും അധികമാവില്ല എന്ന് കാര്യകാരണ സഹിതം കുറേ പോസ്റ്റുകൾ ഞാൻ എഴുതിയിട്ടുണ്ട്.. ഞാൻ ഇപ്പറയുന്ന കാര്യങ്ങളൊക്കെ ആധികാരികമാണ്. സയൻസ് അറിയുന്ന ആർക്കും ഇതൊന്നും നിഷേധിക്കാൻ കഴിയുന്നില്ല.

ഇപ്പോൾ പറയാൻ പോകുന്നത് ലിപിഡ് പ്രൊഫൈൽ ടെസ്റ്റ് എന്ന പൊട്ടത്തരത്തെ പറ്റിയാണ്.

കൊളസ്ട്രോളിനെ പറ്റി ഒരു സ്റ്റാൻഡേർഡ് സെറ്റ് ചെയ്ത് വെച്ചിട്ടുണ്ട്. അത് ഇങ്ങനെയാണ് :

A normal total cholesterol level is less than 200 milligrams per deciliter (mg/dL). A level of 200–239 mg/dL is considered borderline high, and a level of 240 mg/dL or higher is considered high.

അതായത് ടെസ്റ്റ് ചെയ്താൽ നിങ്ങളുടെ ടോട്ടൽ കൊളസ്ട്രോൾ 200 mg/dL ൽ താഴെ ആയാലാണ് നോർമൽ എന്ന്. 200 ൽ കൂടിയാൽ അപകടമാണ് എന്നാണ് പൊതുബോധം. നിങ്ങൾ ടെസ്റ്റ് ചെയ്ത് അതിന്റെ റിപ്പോർട്ട് ഡോക്ടറെ കാണിച്ചാൽ അതിൽ ടോട്ടൽ കൊളസ്ട്രോൾ 200 ന് മേൽപ്പോട്ട് 240 ഒക്കെ ആണെങ്കിൽ ഡോക്ടർ ഒന്നും ചിന്തിക്കാതെ ഉടനെ സ്റ്റാറ്റിൻ ഗുളിക കുറിച്ച് തരും. നിങ്ങൾ അത് വാങ്ങി കഴിക്കുകയും ചെയ്യും. ഇപ്രകാരം സ്റ്റാറ്റിൻ ഗുളിക നാട്ടിൽ നിരവധി ആളുകൾ കഴിക്കുന്നുണ്ട്. ഇന്ന് ഏറ്റവും കൂടുതൽ വിറ്റഴിക്കപ്പെടുന്നത് മരുന്ന് എന്ന പേരിൽ സ്റ്റാറ്റിൻ ഗുളികകൾ ആണ്. പല പേരുകളിലാണ് ഇത് വിൽക്കപ്പെടുന്നത്. കുറെക്കാലം തുടർന്ന് സ്റ്റാറ്റിൻ ഗുളിക കഴിച്ചാൽ അപകടമാണ് എന്ന് ഡോക്ടർമാർ പറയാറില്ല, ഗുളിക കഴിക്കുന്നവർക്കും അറിയില്ല.

എന്താണ് ഈ ടെസ്റ്റിലെ പൊട്ടക്കണക്കും തട്ടിപ്പും എന്നല്ലേ? ടെസ്റ്റ് റിപ്പോർട്ടിൽ ടോട്ടൽ കൊളസ്ട്രോൾ എന്നാണ് കാണിക്കുക. എന്നിട്ട് 200 ൽ അധികമായാൽ കൊളസ്ട്രോൾ അധികം എന്ന് പറയും. എന്നിട്ട് കൊളസ്ട്രോൾ കുറക്കാൻ ഗുളികയും എഴുതിത്തരും. ടോട്ടൽ കൊളസ്ട്രോൾ അധികമായാൽ എങ്ങനെയാണ് കൊളസ്ട്രോൾ അധികമെന്ന് പറയാൻ കഴിയുക? അത് മനസ്സിലാകണമെങ്കിൽ നിങ്ങൾ ആ ടെസ്റ്റ് റിപ്പോർട്ട് ഒന്ന് നോക്കണം. ഒരു സാമ്പിൾ താഴെ കൊടുക്കുന്നുണ്ട്. ടോട്ടൽ കൊളസ്ട്രോൾ കണക്കാക്കുന്ന ഫോർമ്യുല ഇങ്ങനെയാണ് :

LDL + HDL + 1/5 of Triglyceride = Total cholesterol .

അതായത് LDL ഉം HDL ഉം ട്രൈഗ്ലിസറൈഡിന്റെ അഞ്ചിൽ ഒരു ഭാഗവും കൂട്ടി കിട്ടുന്നതാണ് ടോട്ടൽ കൊളസ്ട്രോൾ. ഈ കണക്കിൽ ഒറിജിനൽ കൊളസ്ട്രോളിന്റെ കണക്ക് എവിടെയാണുള്ളത്? കൊളസ്ട്രോളുമായി ഒരു ബന്ധവും ഇല്ലാത്ത ട്രൈഗ്ലിസറൈഡിനെ എന്തിനാണ് ഇതിൽ കൂട്ടിക്കെട്ടുന്നത്? കൊളസ്ട്രോളും ട്രൈഗ്ലിസറൈഡും രണ്ടും രണ്ട് പദാർത്ഥങ്ങളാണ്, രണ്ട് വിധം തന്മാത്രകളാണ്. അത് പോലെ LDL ഉം HDL ഉം രണ്ട് തരം കൊളസ്ട്രോൾ അല്ല. കൊളസ്ട്രോൾ തന്മാത്ര ഒരു തരം മാത്രമേയുള്ളൂ, രണ്ട് തരം ഇല്ല. എന്നിട്ട് മേല്പറഞ്ഞ മൂന്നും കൂട്ടി ടോട്ടൽ കൊളസ്ട്രോൾ എന്നും പറഞ്ഞ് ഒരു കണക്ക് തട്ടിക്കൂട്ടി കൊളസ്ട്രോൾ അധികം എന്ന് പറഞ്ഞ് സ്റ്റാറ്റിൻ ഗുളിക തീറ്റിക്കുകയാണ്. ആ ഗുളിക നിർമ്മിക്കുന്ന കമ്പനിക്ക് വേണ്ടിയാണ് ഇങ്ങനെയൊരു ടെസ്റ്റും ഫോർമ്യുലയും തട്ടിക്കൂട്ടിയത് എന്ന് തീർച്ചയായും പറയാവുന്നതാണ്. ഡോക്ടർ സമൂഹം ഇതിനെ പറ്റി ചിന്തിക്കുകയോ പരിശോധിക്കുകയോ ചെയ്യുന്നില്ല. ഒരു തെറ്റായ കീഴ്വഴക്കം അവർ ഫോളോ ചെയ്യുകയാണ്.

മേൽപ്പറഞ്ഞതിൽ നിന്ന് ഒറിജിനൽ കൊളസ്ട്രോളിന്റെ അളവ് ടെസ്റ്റിൽ കണക്കാക്കുന്നില്ല എന്ന് നിങ്ങൾക്ക് മനസ്സിലാകേണ്ടതാണ്. താഴെ കാണുന്ന സാമ്പിൾ റിപ്പോർട്ടിൽ ടോട്ടൽ കൊളസ്ട്രോൾ കണക്കാക്കിയത് എങ്ങനെ എന്ന് നോക്കാം;-

1) LDL = 135.06

2) HDL = 42.30

3) Triglyceride = 220.70 - 1/5 0f 220.70 = 44.14

1+2+3 = 221.50 ഇതാണ് അതിൽ കാണിച്ചിരിക്കുന്ന ടോട്ടൽ കൊളസ്ട്രോൾ. ഈ ടോട്ടൽ കണ്ട ഉടനെ ഡോക്ടർ കൊളസ്ട്രോൾ കുറക്കാൻ സ്റ്റാറ്റിൻ ഗുളിക കുറിച്ചു കൊടുത്തിട്ടുണ്ടാകും. എന്നാൽ ഈ കണക്കിൽ ഒറിജിനൽ കൊളസ്ട്രോൾ അധികം എന്ന് എവിടെയാണുള്ളത്. ചുരുക്കി പറഞ്ഞാൽ ലാബുകാർ കൊളസ്ട്രോളിന്റെ അളവ് കണക്കാക്കുന്നേയില്ല.

വാസ്തവം എന്തെന്നല്ലേ? കൊളസ്ട്രോൾ നമ്മുടെ ലിവർ നിർമ്മിക്കുന്നതാണ്. ആഹാരത്തിൽ നിന്ന് പരമാവധി 20 ശതമാനം കൊളസ്ട്രോൾ മാത്രമേ നമുക്ക് ലഭിക്കൂ; ബാക്കി 80 ശതമാനം കൊളസ്ട്രോളും ലിവർ ദിവസവും നിർമ്മിക്കുകയാണ്. ലിവർ ഒരിക്കലും ആവശ്യത്തിൽ അധികം കൊളസ്ട്രോൾ നിർമ്മിക്കുകയില്ല. അതുകൊണ്ട് ആർക്കും ഒരിക്കലും കൊളസ്ട്രോൾ അധികം എന്ന രോഗം ഉണ്ടാവില്ല.

ഇനി ഈ LDL എന്നതും HDL എന്നതും രണ്ട് തരം കൊളസ്ട്രോൾ അല്ല.

LDL ന്റെ ഫുൾ ഫോം ലോ ഡെൻസിറ്റി ലിപോപ്രോട്ടീൻ എന്നാണ്. കൊളസ്ട്രോളും ട്രൈഗ്ലിസറൈഡ്‌സും ഒരു മാതിരി പ്രോട്ടീൻ ആവരണം കൊണ്ട് പൊതിഞ്ഞ പായ്ക്കറ്റ് ആണ് LDL എന്നത്. ഇതും ലിവർ ആണ് പായ്ക്ക് ചെയ്ത് ബ്ലഡ്ഡിലേക്ക് കടത്തി വിടുന്നത്. കൊളസ്ട്രോളും ട്രൈഗ്ലിസറൈഡ്‌സും ശരീരകോശങ്ങളിൽ ഇറക്കി വെച്ചിട്ട് മിച്ചം കൊളസ്ട്രോളുമായി ലിവറിലേക്ക് ബ്ലഡ്ഡിലുടെ തിരിച്ചു വരൂന്ന പായ്ക്കറ്റ് ആണ് HDL എന്നത്. അങ്ങനെ തിരിച്ചു വരുന്ന കൊളസ്ട്രോളിനെ ലിവർ വീണ്ടും ഉപയോഗിക്കുന്നു. ഇതാണ് ബയോളജിക്കലായ ഉണ്മ. ഈ വസ്തുത എത്ര പറഞ്ഞിട്ടും ആർക്കും മനസ്സിലാകുന്നില്ല. 60 വർഷമായി ഈ തട്ടിപ്പ് നടന്ന് വരുന്നു. സ്റ്റാറ്റിൻ ഗുളിക കഴിക്കുന്നവരോട് എനിക്ക് സഹതാപം തോന്നുന്നു. സ്ഥിരമായി കഴിക്കുന്നവർക്ക് ഓർമ്മക്കുറവും മറ്റ് ശാരീരിക അവശതകളും വരാം.

അധിക വായനക്ക് ഈ പോസ്റ്റുകൾ നോക്കുക.

കൊളസ്ട്രോളും വൈറ്റമിൻ ഡി യും പിന്നെ സൂര്യപ്രകാശവും

noreply@blogger.com (K.P.Sukumaran) — Thu, 28 Nov 2024 07:50:00 +0000

ഞാൻ ദിവസവും ഒരു 15 മിനിറ്റ് വെയിൽ കൊള്ളുന്നുണ്ട്. പതിനൊന്ന് മണി മുതൽ 11.15 വരെ വെയിൽ കൊള്ളാൻ പാകത്തിൽ ഇരിക്കുകയാണ് ചെയ്യുന്നത്. അപ്പോൾ ശരീരത്തിൽ അനാവൃതമായ ഭാഗത്ത് സൂര്യപ്രകാശത്തിലെ അൾട്രാ വയലറ്റ് രശ്മി പതിക്കുകയും ആ ഭാഗത്തെ ചർമ്മകോശങ്ങൾ വൈറ്റമിൻ D ഉല്പാദിപ്പിക്കുകയും ചെയ്യുന്നു. ഇതിന് രാവിലത്തെ ഇളം വെയിൽ കൊണ്ടാൽ പോര. കാരണം അപ്പോൾ വെയിലിൽ അൾട്രാ വയലറ്റ് രശ്മി ഉണ്ടാവില്ല. അധിക സമയം അൾട്രാ വയലറ്റ് രശ്മി ദേഹത്ത് പതിച്ചാൽ അതും അപകടമാണ്. അതുകൊണ്ട് 11 AM to 4 PM ഈ സമയത്ത് ഒരു 15 ടു 20 മിനിറ്റ് വെയിൽ കൊള്ളുന്നതാണ് അഭികാമ്യം.

ശരീരത്തിലെ പല പ്രവർത്തനങ്ങൾക്കും വൈറ്റമിൻ ഡി അനിവാര്യമാണ്. ഇന്ന് പലർക്കും വൈറ്റമിൻ ഡി യുടെ കുറവ് ഉണ്ട്. അത് പല രോഗങ്ങൾക്കും കാരണമാകുന്നു. ദിവസവും രണ്ട് മുട്ട കഴിച്ചാൽ ആവശ്യത്തിന് മറ്റ് പോഷകങ്ങളോടൊപ്പം വൈറ്റമിനുകളും ലഭിക്കും. മുട്ടയും കഴിക്കില്ല വെയിലും കൊള്ളില്ല എന്ന നിലപാട് ഉള്ളവരുടെ കാര്യം കഷ്ടമാണ്. വെറുതെ ആസ്പത്രികളിൽ പോയി പൈസ കൊടുക്കണം. അതും ചില്ലറ ഒന്നുമല്ല ആയിരങ്ങൾ മുതൽ ലക്ഷങ്ങൾ വരെയാണ്.

നിലവിൽ ആളുകൾ നിരവധി അന്ധവിശ്വാസങ്ങൾക്ക് അടിമകളാണ്. അതിൽ ഒന്നാണ് കൊളസ്ടോളിനെ പറ്റിയുള്ള അന്ധവിശ്വാസം. ഇതൊരു മെഡിക്കൽ അന്ധവിശ്വാസം കൂടിയാണ്. നല്ലതും ചീത്തയും ആയി രണ്ട് വിധം കൊളസ്ട്രോൾ (LDL and HDL) ഉണ്ട് എന്നതാണ് പൊട്ടത്തരം എന്ന് വിശേഷിപ്പിക്കാവുന്ന ഒരു അന്ധവിശ്വാസം. കൊളസ്ട്രോൾ ഒന്നേയുള്ളൂ, അത് നമ്മുടെ ലിവർ ഉല്പാദിപ്പിക്കുന്നതാണ്. ഭക്ഷണത്തിൽ നിന്ന് (മാംസാഹാരം) കൊളസ്ട്രോൾ കിട്ടിയില്ലെങ്കിലും ലിവർ ആവശ്യാനുസരണം കൊളസ്ട്രോൾ ഉല്പാദിപ്പിക്കും. രക്തത്തിലെ ബ്ലഡ് ഷുഗർ ആണ് ഇത്തരത്തിൽ കൊളസ്ട്രോൾ ആയി മാറുന്നത്. കൊളസ്ട്രോൾ ഇല്ലെങ്കിൽ നമുക്ക് ജീവനോടെ ഇരിക്കാൻ കഴിയില്ല. ഓക്സിസൻ പോലെ പ്രധാനമാണ് കൊളസ്ട്രോളും. ആവശ്യത്തിന് കൊളസ്ട്രോൾ ഉല്പാദിപ്പിച്ച് ലിവർ ഇത് ബാലൻസ് ചെയ്യുന്നു.

ഇനി എങ്ങനെയാണ് വെയിൽ കൊള്ളുമ്പോൾ വൈറ്റമിൻ ഡി ഉണ്ടാകുന്നത് എന്ന് നോക്കാം. ചർമ്മകോശങ്ങളിലെ കൊളസ്ട്രോൾ തന്മാത്രയാണ് സുര്യപ്രകാശത്തിലെ അൾട്രാ വയലറ്റ് രശ്മിയുടെ ഊർജ്ജം കൊണ്ട് വൈറ്റമിൻ ഡി തന്മാത്രകളായി ആയി മാറുന്നത്. ലിവർ ബ്ലഡ് ഷുഗറിനെ കൊളസ്ട്രോൾ ആക്കി മാറ്റുന്നു, അതേ കൊളസ്ട്രോൾ ചർമ്മകോശങ്ങളിൽ വെച്ച് വൈറ്റമിൻ ഡി ആയി മാറുന്നു. ഈ പ്രവർത്തനങ്ങളെയൊക്കെ രാസപ്രവർത്തനങ്ങൾ എന്നേ പറയാൻ പറ്റൂ. രാസം എന്നത് ഒരു സയൻസ് പദമാണ്. ആ പദം ഇല്ലാതെ നമുക്ക് ഒന്നും വിശദീകരിക്കാൻ കഴിയില്ല. രാസം എന്നാൽ വിഷം എന്നാണ് സമൂഹത്തിലെ പൊതുവായ അന്ധവിശ്വാസം. അന്ധവിശ്വാസങ്ങൾ എത്ര വേഗത്തിലാണ് പ്രചരിക്കുന്നതും ആളുകൾക്ക് സ്വീകാര്യമാകുന്നതും എന്നോ! എന്നാൽ യഥാർത്ഥ വസ്തുതകൾ സയൻസായി പറയുമ്പോൾ ആളുകൾ തള്ളിക്കളയുകയാണ്. ഇതിന്റെ തിക്തഫലം പല ജീവിതശൈലി രോഗങ്ങളായി ആളുകൾ കഷ്ടപ്പെടുകയും ചെയ്യുന്നു. എന്നിട്ട് ആസ്പത്രികൾക്ക് ലക്ഷങ്ങൾ മുതൽ കൂട്ടുന്നു.

ബ്ലഡ് ഷുഗറും കൊളസ്ട്രോളും വൈറ്റമിൻ ഡി യും തമ്മിലുള്ള ബന്ധം രാസസമവാക്യത്തിലൂടെ മാത്രമേ വിശദീകരിക്കാൻ കഴിയൂ. നാം കഴിക്കുന്ന ധാന്യാഹാരങ്ങൾ തന്നെയാണ് രക്തത്തിൽ ബ്ലഡ് ഷുഗർ ആയി എത്തുന്നത്. ആഹാരത്തിലെ സ്റ്റാർച്ച് എന്ന കൂറ്റൻ തന്മാത്ര ചെറുകുടലിൽ വെച്ച് ദഹിക്കപ്പെട്ട് ഗ്ലൂക്കോസ് എന്ന ലഘു തന്മാത്രയായി ബ്ലഡ്ഡിൽ എത്തുന്നു. ഇതിനെയാണ് ബ്ലഡ് ഷുഗർ എന്ന് പറയുന്നത്.

ഗ്ലൂക്കോസിന്റെ അഥവാ ബ്ലഡ് ഷുഗറിന്റെ കെമിക്കൽ ഫോർമ്യുല C₆H₁₂O₆ എന്നാണ്. അതായത് ഒരു ഗ്ലൂക്കോസ് തന്മാത്രയിൽ 6 കാർബൺ മൂലകവും 12 ഹൈഡ്രജൻ മൂലകവും 6 ഓക്സിജൻ മൂലകവും ആണുള്ളത്.

കൊളസ്ട്രോളിന്റെ ഫോർമ്യുല C₂₇H₄₆O എന്നാണ്. അതായത് ഒരു കൊളസ്ട്രോൾ തന്മാത്രയിൽ 27 കാർബൺ മൂലകവും 46 ഹൈഡ്രജൻ മൂലകവും ഒരു ഓക്സിജൻ മൂലകവും ആണുള്ളത്. (ഇതല്ലാതെ വേറെ കൊളസ്ട്രോൾ തന്മാത്രയില്ല എന്നത് പ്രത്യേകം ശ്രദ്ധിക്കുക)

വൈറ്റമിൻ ഡി തന്മാത്രയുടെ ഫോർമ്യുല C₂₇H₄₄O എന്നാണ്. അതായത് ഒരു വൈറ്റമിൻ ഡി തന്മാത്രയിൽ 27 കാർബൺ മൂലകവും 44 ഹൈഡ്രജൻ മൂലകവും ഒരു ഓക്സിജൻ മൂലകവും ഉണ്ട്.

എന്ന് വെച്ചാൽ മേൽപ്പറഞ്ഞ മൂന്ന് തന്മാത്രകളും കാർബൺ, ഹൈഡ്രജൻ, ഓക്സിജൻ എന്നീ മൂന്ന് മൂലകങ്ങൾ വ്യത്യസ്ത അനുപാതത്തിൽ ചേർന്നിട്ടാണ് ഉണ്ടാകുന്നത്. ഇങ്ങനെയുണ്ടാകുന്ന രാസപ്രവർത്തനങ്ങൾ പ്രകൃതിയിലും നമ്മുടെ ശരീരത്തിലും സദാ നടന്നുകൊണ്ടിരിക്കുന്നു.

എന്താണ് ഷുഗർ?

noreply@blogger.com (K.P.Sukumaran) — Wed, 26 Jun 2024 07:18:00 +0000

ഷുഗർ എന്ന വാക്ക് എല്ലാവർക്കും പരിചിതമാണ് എന്ന് മാത്രമല്ല ഷുഗർ എന്ന് നിത്യജീവിതത്തിൽ പറയാത്തവരും കുറവാണ്. എന്നാൽ എന്താണ് ഷുഗർ എന്ന് ആളുകൾക്ക് ഒരു ധാരണയും ഇല്ല. ഷുഗറിനെ പറ്റി വിശദീകരിക്കുന്നതിന് മുൻപ് ആദ്യമേ ഒരു കാര്യം പറയട്ടെ, പ്രമേഹവുമായി ബന്ധപ്പെട്ട ഷുഗറും ചായയിൽ ഇടുന്ന ഷുഗറും രണ്ടും രണ്ടാണ്. അതുകൊണ്ട് പ്രമേഹം ഉള്ളവരും അത് വരാൻ സാധ്യത ഉള്ളവരും ചായയിലോ കാഫിയിലോ പഞ്ചസാര ഇടാതെ കുടിക്കുന്നതിൽ കാര്യമില്ല. ആകെ മൊത്തം കഴിക്കുന്ന കാർബ്‌സ് അല്ലെങ്കിൽ കാർബോഹൈഡ്രേറ്റ് കുറക്കുകയാണ് വേണ്ടത്.

എന്താണ് ഷുഗർ എന്ന് പറയുമ്പോൾ ആദ്യം ഗ്ലൂക്കോസിനെ പറ്റി പറയേണ്ടി വരും. നമ്മുടെ രക്തത്തിൽ ഉള്ളതാണ് ഈ ഗ്ലൂക്കോസ്. ബ്ലഡ് ഗ്ലൂക്കോസ് എന്ന് പറയും. രക്തത്തിൽ ഇത് അധികമാകുന്ന അവസ്ഥയാണ് പ്രമേഹം. പഞ്ചസാരയിൽ ഉള്ളത് സൂക്രോസ് ആണ്. ടേബിൾ ഷുഗർ എന്ന് പറയും.

ഗ്ലൂക്കോസിനെ പരിചയപ്പെടാം. ഗ്ലൂക്കോസിന്റെ രാസസൂത്രം അഥവാ കെമിക്കൽ ഫോർമ്യുല C₆H₁₂O₆ ആണ്. ഒന്ന് മനസ്സിലാക്കുക രാസം എന്നും കെമിക്കൽ എന്നും പറയുന്നത് പദാർത്ഥങ്ങളെ സയൻസിൽ വിശദീകരിക്കാൻ വേണ്ടിയാണ്. അല്ലാതെ രാസം എന്നും ജൈവം എന്നും രണ്ട് തരം പദാർത്ഥങ്ങൾ ഇല്ല. സസ്യങ്ങൾ അടക്കമുള്ള ജീവികളുടെ ശരീരത്തിൽ ഉള്ളതിനെ ജൈവപദാർത്ഥം എന്ന് പറയുന്നു. എന്നാൽ രാസപദാർത്ഥങ്ങൾ തന്നെയാണ് ശരീരത്തിൽ ജൈവപദാർത്ഥങ്ങളായി മാറുന്നത്.

പദാർത്ഥങ്ങൾ ഒന്നേയുള്ളൂ ജൈവം എന്നും രാസം എന്നും രണ്ട് തരം ഇല്ല. കാർബണും ഹൈഡ്രജനും ഓക്സിജനും രാസപദാർത്ഥങ്ങളാണ്. എന്നാൽ ആ മുന്ന് രാസമൂലകങ്ങളും ചേർന്ന് ഗ്ലൂക്കോസ് ആയി ശരീരത്തിൽ എത്തുമ്പോൾ അത് ഗ്ലൂക്കോസ് എന്ന ജൈവ തന്മാത്രയാണ്. ഈ മൂന്ന് രാസമൂലകങ്ങളോടൊപ്പം നൈട്രജൻ എന്ന രാസമൂലകവും കൂടി ചേരുമ്പോൾ അത് പ്രോട്ടീൻ എന്ന ജൈവതന്മാത്രയായി. ഇങ്ങനെ രാസമൂലകങ്ങൾ ചേർന്ന് ജൈവതന്മാത്രകളായി മാറുന്ന പ്രവർത്തനത്തെ രാസപ്രവർത്തനം എന്ന് പറയും. രാസം എന്ന് കേട്ടാൽ പേടിക്കരുത് എന്ന് പറയാനാണ് ഇത്രയും എഴുതിയത്.

ഗ്ലൂക്കോസ് ഒരു അത്ഭുത പദാർത്ഥമാണ്. അന്തരീക്ഷത്തിലെ കാർബൺ ഡൈഓക്സൈഡും മണ്ണിൽ നിന്ന് വലിച്ചെടുക്കുന്ന ജലതന്മാത്രകളും സൂര്യപ്രകാശത്തിലെ ഊർജ്ജവും (സോളാർ എനർജി) ഉപയോഗിച്ച് സസ്യങ്ങളുടെയും ചെടികളുടെയും മരങ്ങളുടെയും ഒക്കെ ഇലകളാണ് ഗ്ലൂക്കോസ് തന്മാത്രകൾ നിർമ്മിക്കുന്നത്. ഈ തന്മാത്രയിൽ 6 കാർബൺ മൂലകങ്ങളും 12 ഹൈഡ്രജൻ മൂലകങ്ങളും 6 ഓക്സിജൻ മൂലകങ്ങളും ഉണ്ടാകും. അതുകൊണ്ടാണ് രസതന്ത്രത്തിൽ (കെമിസ്ട്രി) ഇതിന്റെ ഫോർമ്യുല C₆H₁₂O₆ എന്ന് എഴുതുന്നത്.

ഇപ്രകാരം ആറ് വീതം കാർബണും ഓക്സിജനും പന്ത്രണ്ട് ഹൈഡ്രജനും മുലകങ്ങൾ ഒരുമിച്ച് ഒരു തന്മാത്രയായി കെമിക്കൽ ബോണ്ടിൽ (രാസബന്ധനം) ഏർപ്പെടാൻ സൗരോർജ്ജത്തെ ഉപയോഗപ്പെടുത്തുന്നു എന്ന് പറഞ്ഞല്ലോ. അതിന്റെ അർത്ഥം ഗ്ലൂക്കോസ് തന്മാത്രകളിൽ സൗരോർജ്ജം തടവിലാക്കപ്പെട്ടിരിക്കുന്നു എന്നാണ്. ഈ ഊർജ്ജം തന്നെയാണ് നമ്മളടക്കം ഭൂമിയിലെ എല്ലാ ജീവജാലങ്ങൾക്കും ജീവിയ്ക്കാനും നിലനിൽക്കാനും പ്രവർത്തിക്കാനും കിട്ടുന്ന ഊർജ്ജവും. അതായത് സസ്യങ്ങൾ നിർമ്മിച്ച ഗ്ലൂക്കോസ് നമ്മുടെ കോശങ്ങളിൽ വെച്ച് ശ്വസിക്കുന്ന ഓക്സിജനുമായി ചേർന്ന് കത്തുകയും ബൈ പ്രോഡക്ടായി കാർബൺ ഡൈഓക്സൈഡും ജലതന്മാത്രകളും ഊർജ്ജവും ഉണ്ടാകുന്നു, അതായത് സസ്യങ്ങളുടെ ഇലകൾ ഗ്ലൂക്കോസ് തന്മാതയിൽ തടവിലാക്കിയ സോളാർ എനർജി നമ്മുടെ കോശങ്ങളിൽ റിലീസ് ആകുന്നു, ആ ഊർജ്ജത്തിലാണ് നമ്മൾ ജീവിയ്ക്കുന്നത്. നമ്മൾ ജീവനോടെ ഇരിക്കാൻ ഇപ്രകാരം ഊർജ്ജോല്പാദനം കോശങ്ങളിൽ വെച്ച് നിരന്തരം നടക്കണം. ശ്വാസോച്ഛ്വാസം മൂലമാണ് ഈ പ്രക്രിയ നടക്കുന്നത്.

ചെടികൾ നിർമ്മിക്കുന്ന ഗ്ലൂക്കോസിന്റെ അനേകം തന്മാത്രകൾ ചെയിൻ പോലെ ഒന്നിച്ച് ചേർന്ന് കാർബോഹൈഡ്രേറ്റും സെല്ലുലോസും ആയി ചെടികളിൽ ശേഖരിക്കപ്പെടുന്നു. അങ്ങനെ നെൽച്ചെടിയിൽ ശേഖരിക്കപ്പെടുന്ന കാർബോഹൈഡ്രേറ്റ് (സ്റ്റാർച്ച്) ആണ് നാം കഴിക്കുന്ന ചോറിൽ ഉള്ളത്. സെല്ലുലോസിനെയാണ് ഫൈബർ എന്ന് നാം പറയുന്നത്. സെല്ലുലോസ് കൊണ്ടാണ് സസ്യകോശങ്ങളുടെ പുറം ഭിത്തി നിർമ്മിതമായിരിക്കുന്നത്.

അപ്പോൾ ഗ്ലൂക്കോസിനെ കാർബോഹൈഡ്രേറ്റ്സിന്റെ അടിസ്ഥാന യൂനിറ്റ് എന്ന് പറയാം. എന്നാൽ ഗ്ലൂക്കോസ് പോലെ വേറെയും രണ്ട് അടിസ്ഥാന യൂനിറ്റ് ഉണ്ട്. അവ ഫ്രക്ടോസും (ഫ്രൂട്ട്സ് ഷുഗർ) ഗ്യാലക്ടോസും (മിൽക്ക് ഷുഗർ) ആണ്. മൂന്നിന്റെയും ഫോർമുല C₆H₁₂O₆ എന്ന് തന്നെയാണ്. മൂന്നിലും കാർബൺ, ഓക്സിജൻ, ഹൈഡ്രജൻ മൂലകങ്ങൾ വ്യത്യസ്ത രീതിയിൽ വിന്യസിച്ചത് കൊണ്ടാണ് മൂന്ന് വ്യത്യസ്ത തന്മാത്രകൾ ആയത്.

ഒരു ഗ്ലൂക്കോസ് തന്മാത്രയും ഒരു ഫ്രക്ടോസ് തന്മാത്രയും ഒരുമിച്ച് ചേർന്ന തന്മാത്രയാണ് സൂക്രോസ്. ടേബിൾ ഷുഗർ എന്ന പഞ്ചസാരയിൽ ഉള്ളത് ഈ സൂക്രോസ് ആണ്. ഗ്ലൂക്കോസ്, ഫ്രക്ടോസ്,ഗ്യാലക്ടോസ് എന്നീ അടിസ്ഥാന യൂനിറ്റ് ആയ ഷുഗറിനെ മോണോസാക്കറൈഡ് എന്ന് പറയുന്നു. രണ്ട് യൂനിറ്റ് ചേർന്നാൽ ഡൈസാക്കറൈഡ് എന്നും അനേകം യൂനിറ്റുകൾ ഒരുമിച്ചാൽ പോളിസാക്കറൈഡ് എന്നും പറയുന്നു. പഞ്ചസാര എന്ന് പറയുന്ന സൂക്രോസ് ഡൈസാക്കറൈഡ് ആണ്. പാലിൽ ഉള്ളത് ഗ്ലൂക്കോസും ഗ്യാലക്ടോസും ചേർന്ന ലാക്ടോസ് എന്ന ഡൈസാക്കറൈഡ് ആണ്. രണ്ട് ഗ്ലൂക്കോസ് തന്മാത്രകൾ ചേന്ന ഡൈസാക്കറൈഡ് മാൾട്ടോസ്.

സ്റ്റാർച്ച് എന്നത് അനേകം ഗ്ലൂക്കോസ് തന്മാത്രകൾ ചേർന്ന പോളിസാക്കറൈഡ് ആണെന്ന് പറഞ്ഞല്ലോ. ഫൈബർ എന്ന സെല്ലുലോസും അങ്ങനെ തന്നെ. എല്ലാറ്റിനും പൊതുവെ പറയുന്ന പേരാണ് കാർബോഹൈഡ്രേറ്റ് എന്നത് കാർബണും ജലതന്മാത്രയും ഒരുമിച്ചത് എന്ന അർത്ഥത്തിലാണ് കാർബോഹൈഡ്രേറ്റ് എന്ന പേര് ഉണ്ടായത്. ഇതിൽ നമ്മൾ മനസ്സിലാക്കേണ്ടത് ഏത് കാർബ്‌സ് കഴിച്ചാലും അതൊക്കെ ചെറുകുടലിൽ വെച്ച് ദഹിച്ച് ഗ്ലൂക്കോസ് ആയി മാറിയതിന് ശേഷം മാത്രമേ രക്തത്തിൽ കലർന്ന് ശരീരകോശങ്ങളിൽ എത്തുകയുള്ളൂ എന്നതാണ്. അതായത് ഏത് ധാന്യമോ കിഴങ്ങോ പഴമോ പഞ്ചസാരയോ കഴിച്ചാലും അതൊക്കെ ഗ്ലൂക്കോസ് ആയി മാറിയാൽ മാത്രമേ രക്തത്തിൽ പ്രവേശനമുള്ളൂ. ചെറുകുടലിലെ നേരിയ സുഷിരങ്ങളിൽ കൂടിയാണ് ഇത് രക്തത്തിൽ കലരുന്നത്.

അത് പോലെ ആഹാരത്തിലെ കൊഴുപ്പ് ഫാറ്റി ആസിഡായും പ്രോട്ടീൻ അമിനോആസിഡ്‌സ് ആയും വിഘടിക്കപ്പെട്ടതിന് ശേഷമേ രക്തത്തിൽ കലരൂ. എന്നാൽ കൊളസ്ട്രോൾ നേരിട്ട് കടക്കും കേട്ടോ. കൊളസ്ട്രോൾ ദഹിക്കാനോ വിഘടിക്കാനോ ഒന്നുമില്ല. കാരണം കൊളസ്റ്റ്രോൾ കൊഴുപ്പല്ല. കൊഴുപ്പിന്റെ സ്വഭാവം ഉണ്ട് എന്ന് മാത്രം. മാംസാഹാരങ്ങളിൽ മാത്രമേ കൊളസ്ട്രോൾ ഉള്ളൂ. ദിവസവും ആവശ്യത്തിന് കൊളസ്ട്രോൾ നമുക്ക് ആഹാരത്തിൽ നിന്ന് ലഭിക്കില്ല. അതുകൊണ്ട് ഗ്ലൂക്കോസിന്റെ തന്മാത്രകൾ ഉപയോഗിച്ച് ലിവർ ആവശ്യാനുസരണം കൊളസ്ട്രോൾ ദിവസവും നിർമ്മിക്കുന്നു.

എതൊന്നിന്റെയും ഏറ്റവും ചെറിയ കണത്തെ നമ്മൾ അണു അഥവാ അറ്റം എന്ന് പറയുന്നു. അണുക്കൾ ചേർന്നാണ് എല്ലാം ഉണ്ടായിരിക്കുന്നത്. എന്നാൽ അണു എന്നത് പൊതുവായി എല്ലാ കണങ്ങളെയും സൂചിപ്പിക്കുന്നതാണല്ലോ. പക്ഷെ വ്യത്യസ്ത അണുക്കൾ ഉണ്ടല്ലോ. ഉദാഹരണത്തിന് ഹൈഡ്രജൻ, കാർബൺ നൈട്രജൻ ഇങ്ങനെ. അതുകൊണ്ട് ഇവയെ മൂലകങ്ങൾ എന്ന് പറയുന്നു. ആറ്റത്തിലെ ന്യൂക്ലിയസ്സിലെ പ്രോട്ടോണിന്റെ എണ്ണം ആണ് മൂലകങ്ങളെ നിർണ്ണയിക്കുന്നത്, ഹൈഡ്രജൻ മൂലകത്തിൽ ഒരു പ്രോട്ടോണും യുറേനിയം മൂലകത്തിൽ 92 പ്രോട്ടോനുകളും ഉണ്ട്. മൂലകങ്ങൾ ചേർന്നാണ് തന്മാത്രകൾ ഉണ്ടാകുന്നത്. ഉദാഹരണം രണ്ട് ഓക്സിജൻ മൂലകങ്ങൾ ചേർന്ന ഓക്സിജൻ തന്മാത്രയാണ് നമ്മൾ ശ്വസിക്കുന്നത്. രണ്ട് ഹൈഡ്രജനും ഒരു ഓക്സിജനും ചേർന്ന തന്മാത്രയാണ് ജലത്തിന്റെ ഒരു കണിക എന്നത്.

ആറ്റങ്ങൾ ഇപ്രകാരം കൂടിച്ചേരാൻ ഒരു നിയമം പ്രവർത്തിക്കുന്നുണ്ട്, നിങ്ങൾ പഠിച്ചതാണ്. ഓർത്തു നോക്കൂ. അതിനെ പറ്റി പിന്നെ എഴുതാം.

കൊളസ്ട്രോളിനെ മനസ്സിലാക്കൂ , പ്ലീസ്..

noreply@blogger.com (K.P.Sukumaran) — Tue, 18 Jun 2024 10:16:00 +0000

ഞാൻ വളരെ സങ്കടത്തോടെയാണ് ഈ പോസ്റ്റ് കുറിക്കുന്നത്. കാരണം നാട്ടിൽ ഇപ്പോൾ അനാവശ്യമായി ആഞ്ജിയോപ്ലാസ്റ്റി ചെയ്യിക്കുക എന്നത് ഒരു ട്രെൻഡ് ആയിരിക്കുകയാണ്. ഒരു ബന്ധുവിന്റെ ആഞ്ജിയോപ്ലാസ്റ്റി കഴിഞ്ഞു, മറ്റൊരു ബന്ധു ഡോക്ടർ കുറിച്ചു കൊടുത്ത 12 തരം ഗുളികകൾ കഴിച്ച് ഭക്ഷണം ഒന്നും കഴിക്കാൻ രുചിയില്ലാതായി അവശനായി ആഞ്ജിയോപ്ലാസ്റ്റി ചെയ്യാൻ കാത്തിരിക്കുകയാണ്. ശരീരം കുറച്ച് ഉഷാറാക്കിയിട്ട് വാ എന്നാണത്രെ ഡോക്ടർ അവനോട് നിർദ്ദേശിച്ചിരിക്കുന്നത്. അവനാണെങ്കിൽ ഇത്രയും ഗുളികകൾ കഴിച്ച് ഭക്ഷണത്തോട് ആസക്തിയില്ലാതെ അവശതയിൽ തുടരുകയും ചെയ്യുന്നു.

കലശലായ നെഞ്ചുവേദനയുള്ളപ്പോൾ ആഞ്ജിയോപ്ലാസ്റ്റി ചെയ്താൽ വേദനയിൽ നിന്ന് റിലാക്സ് കിട്ടും എന്നല്ലാതെ വേദന ഒന്നും ഇല്ലാതെ സ്റ്റേബിൾ ആയ അവസ്ഥയിൽ ആഞ്ജിയോപ്ലാസ്റ്റി ചെയ്യുന്നത് വെറും വെറുതെയാണ്. വേസ്റ്റ് എന്ന് പറയാം. ഇന്നത്തെ കമ്പോള മത്സരത്തിൽ ആസ്പത്രിക്ക് വരുമാനം ഉണ്ടാക്കിക്കൊടുക്കാം എന്ന പ്രയോജനം മാത്രമേ ഇതുകൊണ്ട് ഉള്ളൂ. നെഞ്ചുവേദനയുള്ളപ്പോൾ ആഞ്ജിയോഗ്രാമും ആവശ്യമാണെങ്കിൽ ആഞ്ജിയോപ്ലാസ്റ്റിയും ഒരുമിച്ച് ചെയ്യുകയാണ് ചെയ്യുക. നെഞ്ചുവേദന ഇല്ലാത്ത അവസ്ഥയിൽ ഇത് രണ്ടും ചെയ്യേണ്ട ആവശ്യം ഇല്ല.

നടക്കുമ്പോൾ കിതപ്പ് അനുഭവപ്പെട്ടതിന്റെ പേരിൽ ഡോക്ടറെ കാണിച്ചാൽ ECG അടക്കം എല്ലാ ടെസ്റ്റുകളും ചെയ്തിട്ട് അവസാനം ആഞ്ജിയോഗ്രാം കൂടി ഒന്ന് ചെയ്തുനോക്കാം എന്ന് പറയും. ആഞ്ജിയോഗ്രാം ചെയ്താൽ നാലോ അതിൽ കൂടുതലോ ബ്ലോക്ക് ഉണ്ട് ഉടനെ ആഞ്ജിയോപ്ലാസ്റ്റി ചെയ്യണം എന്നും രണ്ട് ലക്ഷം മുതൽ അങ്ങോട്ട് ഇത്ര ചെലവാകും എന്നും പറയും. ഹാർട്ടിൽ ബ്ലോക്ക് എന്ന് കേട്ട ഉടനെ ടെസ്റ്റിന് പോയ ആളിന് മരണഭയം ബാധിക്കും. എങ്ങനെയെങ്കിലും കാശ് ഉണ്ടാക്കി ആഞ്ജിയോപാസ്റ്റിക്ക് വിധേയനാകും. ഇതാണ് നാട്ടിൽ നടക്കുന്നത്. ബാംഗ്ലൂരിലെ നാരായണ ഹൃദയാലയായിൽ ഇമ്മാതിരി കേസൊന്നും എടുക്കില്ല. നെഞ്ച് വേദന ഇല്ലാത്ത ഒരാൾ വെറുതെ ടെസ്റ്റിന് ചെന്നാൽ വീട്ടിൽ പോക്കോളാൻ പറയും. അവർക്ക് ഇങ്ങനെ പിഴിഞ്ഞ് പണം ഉണ്ടാക്കേണ്ട ആവശ്യം ഇല്ലല്ലോ.

അനാവശ്യമായ ആഞ്ജിയോപ്ലാസ്റ്റിക്ക് മുൻപും ശേഷവും അഞ്ചെട്ട് തരം മരുന്നുകൾ സ്ഥിരമായി കഴിക്കാൻ നിർദ്ദേശിക്കുന്നു എന്നതാണ് ഇതിലെ മറ്റൊരു ആരോഗ്യപ്രശ്നം. കൊളസ്ട്രോൾ കുറയ്ക്കാൻ എന്നും പറഞ്ഞ് എഴുതുന്ന സ്റ്റാറ്റിൻ മരുന്നുകൾ കുറെക്കാലം കഴിച്ചാൽ ഗുരുതരമായ ഭവിഷ്യത്തുകൾ ഉണ്ടാകും. കൊളസ്ട്രോളിനെ ശത്രുവായി കരുതുന്ന ഡോക്ടർമാരുടെ മെഡിക്കൽ അന്ധവിശ്വാസം വളരെ ദൗർഭാഗ്യകരമാണ്.

കൊളസ്ട്രോൾ എന്നത് ഫാറ്റ് അഥവാ കൊഴുപ്പ് അല്ല. കൊഴുപ്പ് പോലത്തെ ഭൗതികഗുണം ഉള്ള യുനീക് ആയ ഒരു ജൈവപദാർത്ഥം ആണ്. നമ്മുടെ ലിവർ ആണ് ആവശ്യാനുസരണം ഈ കൊളസ്ട്രോൾ നിർമ്മിക്കുന്നത്. ഭക്ഷണത്തിൽ നിന്ന് അതും മാംസാഹാരത്തിൽ നിന്ന് മാത്രം ആവശ്യമുള്ളതിന്റെ 15-25 ശതമാനം വരെ മാത്രമേ കൊളസ്ട്രോൾ ലഭിക്കൂ. ബാക്കി 75-85 ശതമാനം വരെ കൊളസ്ട്രോൾ ലിവർ ദിവസവും ഉണ്ടാക്കുന്നു. ഇനി അഥവാ ആഹാരത്തിൽ നിന്ന് കിട്ടിയില്ലെങ്കിൽ ആവശ്യമുള്ള മുഴുവൻ കൊളസ്ട്രോളും ലിവർ ഉണ്ടാക്കും. നാം കഴിക്കുന്ന കാർബോഹൈഡ്രേറ്റ് ദഹിച്ച് ഗ്ലൂക്കോസ് ആയി വിഘടിക്കപ്പെടുകയും അത് രക്തത്തിൽ ആഗിരണം ചെയ്യപ്പെട്ട് ആ ഗ്ലൂക്കോസ് തന്നെയാണ് ലിവറിൽ വെച്ച് ദിവസവും കൊളസ്ട്രോൾ ആയി മാറ്റപ്പെടുന്നത്.

LDL എന്നാൽ ലിവറിൽ നിന്ന് ഓരോ കോശങ്ങളിലേക്കും രക്തത്തിലൂടെ പോകുന്ന പായ്ക്കറ്റുകൾ ആണ്. ഒരു പ്രത്യേക തരം പ്രോട്ടീനിൽ പൊതിഞ്ഞ ആ പായ്ക്കറ്റിൽ കൊളസ്ട്രോളും ട്രൈഗ്ലിസറൈഡ്‌സും ആണുള്ളത്. കൊഴുപ്പും കൊഴുപ്പ് പോലത്തെ പദാർത്ഥങ്ങളും രക്തതിൽ സഞ്ചരിക്കാത്തത് കൊണ്ടാണ് പ്രോട്ടീനിൽ പൊതിയുന്നത്. ഇതും ലിവർ ആണ് ചെയ്യുന്നത്. എല്ലാ കോശങ്ങളിലും കൊളസ്ട്രോൾ എത്തിക്കാനും അധികമുള്ള ഗ്ലൂക്കോസിനെ ട്രൈഗ്ലിസറൈഡ്‌സാക്കി മാറ്റി അതിനായുള്ള കോശങ്ങളിൽ സംഭരിക്കാനുമാണ് ലിവർ ഈ പായ്ക്കറ്റ് ഉണ്ടാക്കി രക്തത്തിൽ കടത്തി വിടുന്നത്. ഇതിനെ ചീത്ത കൊളസ്ട്രോൾ എന്ന് പറയുന്നതും പ്രചരിപ്പിക്കുന്നതും എന്തൊരു കഷ്ടമാണ്.

ഇതേ പായ്ക്കറ്റ് തന്നെയാണ് മിച്ചമുള്ള കോളസ്ട്രോളുമായി തിരിച്ച് ലിവറിലേക്ക് വരുന്നത്. അപ്പോൾ അതിനെ HDL എന്ന് പറയുന്നത്. പോകുമ്പോൾ ആ പായ്ക്കറ്റിൽ പ്രോട്ടീൻ താരതമ്യേന കുറവ് തിരിച്ചു വരുമ്പോൾ പ്രോട്ടീൻ അധികം എന്ന വ്യത്യാസമേയുള്ളൂ. ട്രൈഗ്ലിസറൈഡ്‌സും കൊളസ്ട്രോളും കോശങ്ങളിൽ ഇറക്കി വെച്ചല്ലോ. പ്രോട്ടീൻ അതേപടി നിൽക്കുകയും ചെയ്യുന്നു. അതുകൊണ്ടാണ് തിരിച്ചു വരുന്ന പായ്ക്കറ്റിൽ പ്രോട്ടീൻ അധികമാകുന്നതും HDL അഥവാ ഹൈഡെൻസിറ്റി ലിപോപോട്ടീൻ എന്ന് പറയുന്നതും. സംഗതി LDL ഉം HDL ഉം ഒരേ പായ്ക്കറ്റ് ആണ്. പ്രോട്ടീന്റെ അളവിൽ വരുന്ന താരതമ്യമാറ്റം മാത്രമാണ് രണ്ട് പേരിന് കാരണം.

തിരിച്ചു വരുന്ന HDL പായ്ക്കറ്റിൽ ശേഷിക്കുന്ന കൊളസ്ട്രോളിനെ ലിവർ വീണ്ടും ഉപയോഗിക്കുന്നു. അത് റിമൂവ് ചെയ്യപ്പെടുകയല്ല ചെയ്യുന്നത്. റിമൂവ് ചെയ്യപ്പെടുന്നു എന്ന അന്ധവിശ്വാസത്തിലാണ് അത് HDL നല്ലത് എന്ന് പറയുന്നത്. കൊളസ്ട്രോൾ ലിവറിൽ വെച്ച് ഉല്പാദിപ്പിക്കപ്പെടുന്നേയുള്ളൂ, ഒരിക്കലും റിമുവ് ചെയ്യപ്പെടുന്നില്ല. ഈ ഒരേയൊരു സംഗതിയെ അതായത് ലോ അല്ലെങ്കിൽ ഹൈ പ്രോട്ടീൻ ഡെൻസിറ്റിയുള്ള ഒരേ പായ്ക്കറ്റിനെയാണ് നല്ലത് എന്നും ചീത്ത എന്നും പറഞ്ഞ് വിശ്വസിച്ച് ആളുകളെ കൊണ്ട് സ്റ്റാറ്റിൻ ഗുളികകൾ തീറ്റിക്കുന്നത്. കൊളസ്ട്രോളിന്റെ അളവ് മോണിട്ടർ ചെയ്യപ്പെടുന്നുണ്ട്. അത് ഒരിക്കലും കുറവോ അധികമോ ആവില്ല. സ്വന്തം ലിവറിനെ വിശ്വസിക്കണം. ലിവറിന്റെ കൊളസ്ട്രോൾ ഉല്പാദനം തടസ്സപ്പെടുത്താനുള്ള സ്റ്റാറ്റിൻ മരുന്ന് കുറെക്കാലം കഴിച്ചാൽ അത് തലച്ചോറിനെയും ശരീരത്തെയും ബാധിക്കും. അപ്പോൾ അതിന് ചികിത്സ ഉണ്ടാവില്ല.

രക്തക്കുഴലിലൂടെ സഞ്ചരിക്കുന്ന LDL എന്ന പായ്ക്കറ്റ് എവിടെയും തങ്ങി നിൽക്കുകയോ അടിഞ്ഞു കൂടുകയോ ബ്ലോക്ക് ഉണ്ടാക്കുകയോ ചെയ്യില്ല. ബ്ലോക്ക് ഉണ്ടാകുന്നെങ്കിൽ അതിന് കാരണം രക്തക്കുഴലിൽ ഉണ്ടാകുന്ന ഡാമേജും അത് മൂലം ഉണ്ടാകുന്ന ഇൻഫ്ലമേഷനും ആ ഇൻഫ്ലമേഷൻ സ്ഥിരമായി തുടരുന്നതും അപ്പോൾ ഡാമേജ് ഉണ്ടായ ഭാഗം റിപ്പയർ ചെയ്യാൻ ആ സ്ഥലത്ത് എത്തുന്ന കോശനിർമ്മിതിക്കാവശ്യമുള്ള കോളസ്ട്രോൾ അടക്കമുള്ള പദാർത്ഥങ്ങൾ ചേർന്ന് ഒരു പൊറ്റ അല്ലെങ്കിൽ പ്ലാക്ക് രൂപപ്പെടുന്നതാണ്. ഇവിടെ കൊളസ്ട്രോളിന്റെ റോൾ പുതിയ കോശനിർമ്മിതിയാണ്. ഡാമേജും അത് മൂലം ഇൻഫ്ലമേഷനും കോശങ്ങൾ നശിക്കലും ഒന്നും സംഭവസ്ഥലത്ത് സംഭവിച്ചില്ലെങ്കിൽ അവിടെ കൊളസ്ട്രോൾ എത്തേണ്ട ആവശ്യം ഇല്ലല്ലോ.

അപ്പോൾ ബ്ലോക്കിന് കാരണം രക്തക്കുഴലിൽ പറ്റുന്ന ഡാമേജ് ആണ്. പ്രമേഹം, ബി.പി. മനസ്സിന്റെ പിരിമുറുക്കം അഥവാ സ്ട്രെസ്സ് ഒക്കെ ഇപ്പറഞ്ഞ ഡാമേജിന് കാരണമാകാം. സ്ഥിരമായ സ്ട്രെസ്സ് ശരീരത്തെ പലതരത്തിൽ പ്രതികൂലമായി ബാധിക്കും. അതിൽ ഒന്നാണ് ഇപ്പറഞ്ഞ രക്തക്കുഴലുകളിലെ ഡാമേജ്. കാരണത്തിനാണ് ചികിത്സ വേണ്ടത്, അല്ലാതെ ഓക്സിജൻ പോലെ ശരീരത്തിന് അത്യാവശ്യമായ കൊളസ്ട്രോളിന്റെ ഉല്പാദനം തടസ്സപ്പെടുത്തുകയല്ല വേണ്ടത്,

ഇത്രയും പറഞ്ഞത് ഒരു അഞ്ച് പേർക്കെങ്കിലും മനസ്സിലായാൽ ഞാൻ ധന്യനായി. ഇത്രയേ എനിക്ക് കഴിയൂ....

വിശ്വാസവും അറിവും

noreply@blogger.com (K.P.Sukumaran) — Fri, 14 Jul 2023 03:30:00 +0000

വിശ്വാസവും അറിവും രണ്ടും രണ്ടാണ്. വിശ്വാസം അറിവല്ല അത് വെറും വിശ്വാസം മാത്രമാണ്. അത് പോലെ അറിവ് വിശ്വാസമല്ല അത് അറിവ് തന്നെയാണ്. വിശ്വസിക്കാൻ ഒരു തെളിവും ഒരു ലോജിക്കും വേണ്ട. പക്ഷെ അറിവിന് തെളിവ് വേണം ലോജിക്ക് വേണം. ലോകത്ത് ജനങ്ങളിൽ മഹാഭൂരിപക്ഷവും വിശ്വാസികളാണ്. പല വിധ വിശ്വാസികൾ ആണെന്ന് മാത്രം. വിശ്വാസികളെ പൊതുവെ ബന്ധിപ്പിക്കുന്ന ഘടകം അവർക്ക് വിശ്വസിക്കാൻ ഒരു തെളിവും ലോജിക്കും വേണ്ട എന്നതാണ്. പറഞ്ഞ് പഠിപ്പിച്ചത് അങ്ങ് വിശ്വസിച്ചോളും. എന്നിട്ട് വിശ്വാസം തന്നെയാണ് അറിവ് എന്നും വിശ്വസിക്കും. അതുകൊണ്ട് യഥാർത്ഥ അറിവ് അവരെ ധരിപ്പിക്കാൻ കഴിയില്ല.

വിശ്വാസങ്ങളെ തിരസ്ക്കരിച്ച് അറിവിനെ ആശ്രയിക്കുന്നവർ ന്യൂനപക്ഷമാണ്. ഞാൻ ഇങ്ങനെ രണ്ട് വിധം ആൾക്കാരെയേ കാണുന്നുള്ളൂ. ഞാൻ വളരെ മുൻപേ വിശ്വാസങ്ങളെ തിരസ്ക്കരിച്ച് അറിവിനെ തേടിപ്പോയ ആളാണ്. അതുകൊണ്ട് ഇന്നും ഓരോ ദിവസവും ഓരോ അറിവിനെ മനസ്സിലാക്കുകയാണ്. ഇനിയും എത്രയോ അറിവുകൾ മനസ്സിലാക്കാനുണ്ട്. ഈ ആയുസ്സിൽ വളരെ കുറവ് അറിവുകൾ മാത്രമേ മനസ്സിലാക്കാൻ കഴിയൂ. ഇത് ഹിന്ദുക്കളോട് പറഞ്ഞാൽ അവർ പറയും നിങ്ങൾ വേദങ്ങൾ പഠിക്കൂ, ഭഗവദ്ഗീത പഠിക്കൂ നമ്മുടെ ഋഷിമാർ സർവ്വവും പഠിച്ച് പ്രപഞ്ചത്തെ കലക്കി കുടിച്ചവരാണ് എന്നൊക്കെ. എല്ലാം താളിയോലകളിൽ രേഖപ്പെടുത്തപ്പെട്ടിട്ടുണ്ട് എന്ന് പറയും. അവരോട് ഞാൻ എന്ത് പറയാനാണ്. എന്നാൽ പിന്നെ എന്തുകൊണ്ട് ഋഷിമാർ പേപ്പറും പെന്നും അച്ചടിയും കണ്ടുപിടിച്ചില്ല എന്ന് ചോദിക്കാൻ പറ്റുമോ?

മുസ്ലീങ്ങൾ പറയും എല്ലാം ഞമ്മളുടെ കിത്താബിൽ ഉണ്ട് എന്ന്. എന്ന് പറഞ്ഞാൽ ഇത് വരെ കണ്ടുപിടിച്ചതും ഇനി കണ്ടുപിടിക്കാൻ ഉള്ളതിൻ്റെയും ഒക്കെ സൂചനകൾ കിത്താബിൽ ഉണ്ട് എന്ന്. കൃസ്ത്യാനികൾക്കും അങ്ങനെ തന്നെ. ചുരുക്കി പറഞ്ഞാൽ വിശ്വാസികളാണ് ഈ ലോകം നിയന്ത്രിക്കുന്നത്. വിശ്വസിക്കാനുള്ള മനുഷ്യൻ്റെ കഴിവിൻ്റെ പുറത്താണ് എല്ലാ എസ്റ്റാബ്ലിഷ്മെൻ്റുകളും നിലനിൽക്കുന്നത്. പക്ഷെ ലോകത്തെ പുരോഗതിയിലേക്ക് എടുത്ത് ചെല്ലുന്നത് അറിവാണ്, വിശ്വാസമല്ല. വിശ്വാസങ്ങൾ എന്തെങ്കിലും ചെയ്യുന്നെങ്കിൽ അത് ദ്രോഹം മാത്രമാണ്. മനുഷ്യരെ ശത്രുക്കളാക്കുന്നത് വിശ്വാസങ്ങളാണ്. വിശ്വാസം മാറ്റി അറിവിൻ്റെ ലോകത്ത് വന്നാൽ അവിടെ മാനവികത മാത്രമേയുണ്ടാകൂ. ജോസഫ് മാഷ് പറഞ്ഞതും ഇതാണ്. പക്ഷെ അങ്ങനെയൊരു മാനവികലോകം വിദൂരമായ ഒരു സ്വപ്നം മാത്രമാണ്. ഒരിക്കലും യാഥാർഥ്യം ആകണമെന്നില്ല.

ഞാൻ ഹൈന്ദവതയെ പുകഴ്ത്തുന്നത് ഈ മതവിശ്വാസ ലോകത്ത് എനിക്ക് അപരിമിതമായ സ്വാതന്ത്ര്യം ലഭിക്കുന്നത് ഈ ഹൈന്ദവത ഇവിടെ നിലനിൽക്കുന്നത് കൊണ്ടാണ് എന്നതിനാലാണ്. ഹിന്ദുക്കൾ ഇവിടെ ഭൂരിപക്ഷമായി ഇല്ലായിരുന്നെങ്കിൽ ഞാൻ സ്വതന്ത്രൻ ആകില്ലായിരുന്നു. ഇത് പോലെ എനിക്ക് എഴുതാനും കഴിയില്ലായിരുന്നു. ബി.ജെ.പി.യെ സപ്പോർട്ട് ചെയ്യാൻ കാരണം അവർ ഭരിക്കുന്നത് കൊണ്ട് രാജ്യത്തെ പുരോഗതിയിലേക്ക് നയിക്കുന്നു, ആർക്കും ഒരു ദോഷവും ചെയ്യുന്നില്ല, പിന്നെ കേന്ദ്രത്തിൽ മന്ത്രിമാരൊന്നും ഒന്നിലും കൈയ്യിട്ട് വാരുന്നില്ല എന്നതൊക്കെയാണ്. ഇത്രയും പ്രൊഫഷണലായ കേന്ദ്രമന്ത്രിമാരെ മോദി മന്ത്രിസഭയിൽ അല്ലാതെ കണ്ടിട്ടും ഇല്ല. അതൊക്കെ നോക്കുമ്പോൾ മന്മോഹൻ സിങ്ങിൻ്റെ രണ്ട് ടേം മന്ത്രിസഭയിലും അദ്ദേഹം ഒഴികെ ബാക്കിയെല്ലാം ഒന്നിനും കൊള്ളാത്ത അലവലാതികളായിരുന്നു.

പിന്നെ വിശ്വാസത്തിൻ്റെ കാര്യം എടുത്താൽ ബി.ജെ.പി.ക്കാരും കോൺഗ്രസ്സുകാരും മാർക്സിസ്റ്റുകാരും എല്ലാം തുല്യരാണ്. ഒന്നല്ലെങ്കിൽ ഒന്ന് വിശ്വസിക്കുന്നവരാണ് എല്ലാ പാർട്ടിക്കാരും. അതേ സമയം വെറുതെ വിശ്വസിക്കാതെ അറിവിനെ ആശ്രയിക്കുന്നവർ, ലോജിക്കലായി ചിന്തിക്കുന്നവർ എല്ലാ പാർട്ടികളിലും ഉണ്ട് താനും. ബി.ജെ.പി.യിലും ഉണ്ട്. അതുകൊണ്ട് ബി.ജെ.പി.യെ പിന്തുണയ്ക്കാൻ എനിക്ക് ഒരു തടസ്സവും ഇല്ല. എന്നെ ബി.ജെ.പി.യോട് ഏറ്റവും അടുപ്പിക്കുന്ന ഘടകം കപട മതേതരരും ഒരു പ്രത്യേക വിശ്വാസികളും ബി.ജെ.പി.യോട് കാണിക്കുന്ന പകയും വിദ്വേഷവുമാണ്. എനിക്ക് അത്തരം മനോഭാവക്കാരോട് അറപ്പും പുച്ഛവും ആണ്. കാരണം ബി.ജെ.പി. ഇന്ത്യയിൽ അധികാരം പിടിച്ചെടുത്തതല്ല, ജനാധിപത്യപരമായി ജനങ്ങളാൽ തെരഞ്ഞെടുക്കപ്പെട്ടത് കൊണ്ടാണ് ബി.ജെ.പി. ഇന്ത്യ ഭരിക്കുന്നത്. ജനങ്ങളുടെ പിന്തുണ വേണ്ടത്ര ഇല്ലാത്ത അല്പന്മാരാണ് ബി.ജെ.പി.യെ പഴിക്കുന്നത്. അപ്പോഴും മാന്യത പുലർത്തുന്നത് കൊണ്ടാണ് ബി.ജെ.പി. എനിക്ക് പിന്നെയും സ്വീകാര്യമാകുന്നത്.

ഏറ്റവും വെറുക്കുന്ന പാർട്ടിയും നേതാക്കളും ഭരണവും ഏതാണെന്ന് തെളിച്ച് പറയേണ്ടതില്ലല്ലൊ. മാർക്സിസം മറ്റൊരു അന്ധവിശ്വാസമാണ്. സമത്വസുന്ദരമായ ലോകം എന്നത് കാൾ മാർക്സിൻ്റെ മനോഹരമായ ഒരു സ്വപ്നം ആയിരുന്നു. ആ സ്വപ്നം ആരെയാണ് വശീകരിക്കാത്തത്. എന്നെയും വശീകരിച്ചിരുന്നു. അങ്ങനെ സ്വപ്നം കാണാനും ആ സ്വപ്നം ലോകത്തോട് പറയാനും കാൾ മാർക്സിന് അവകാശം ഉണ്ടായിരുന്നു. പക്ഷെ അതൊരു സ്വപ്നം മാത്രമാണ്. യാഥാർഥ്യവുമായി ഒരിക്കലും പൊരുത്തപ്പെടാത്തത്. ആ സ്വപ്നത്തെ യാഥാർഥ്യമാക്കാം എന്ന് പറഞ്ഞ, വിശ്വസിച്ച കമ്മ്യൂണിസ്റ്റുകൾ ലോകത്ത് കാട്ടിക്കൂട്ടിയതും ഇപ്പോൾ കാട്ടിക്കൂട്ടുന്നതും എല്ലാവർക്കും അറിയാം. മനുഷ്യൻ്റെ സ്വാതന്ത്ര്യത്തിലും ജനാധിപത്യ സംസ്ക്കാരത്തിലും യോജിക്കുന്ന ഒരാൾക്കും ഈ ഒരു അന്ധവിശ്വാസത്തെ എതിർത്ത് തോല്പിക്കാതിരിക്കാൻ കഴിയില്ല. ഹിന്ദുക്കളുടെ വിശ്വാസങ്ങൾ നിർദ്ദോഷമാണ്. പക്ഷെ കമ്മ്യൂണിസ്റ്റിൻ്റെയും ഇസ്ലാമിസ്റ്റിൻ്റെയും വിശ്വാസങ്ങൾ മാനവികതയ്ക്ക് എതിരാണ് ആപത്താണ്. അത് തിരിച്ചറിഞ്ഞില്ലെങ്കിൽ അപകടമാണ്.

ഹിന്ദുക്കൾക്ക് ഒരു പാർട്ടി വേണം

noreply@blogger.com (K.P.Sukumaran) — Sat, 01 Jul 2023 07:24:00 +0000

ഹിന്ദുക്കൾക്ക് ഒരു പാർട്ടി വേണം എന്നത് ഞാൻ വീണ്ടും ആവർത്തിക്കുകയാണ്. അത് ആർക്കും എതിരായിട്ടോ ആരെയെങ്കിലും പുറത്താക്കാനോ ദ്രോഹിക്കാനോ അല്ല. ഇരവാദം മുഴക്കി ഹിന്ദുക്കളുടെ സർവ്വ അവകാശങ്ങളെയും കവർന്നെടുക്കുന്നത് പ്രതിരോധിക്കാനാണ്. ജനാധിപത്യം വളരെ പഴുതുകൾ ഉള്ളതാണ്. അത് മുതലെടുക്കുന്നത് മതതീവ്രവാദികളും ദേശവിരുദ്ധരുമാണ്. ജനാധിപത്യവിശ്വാസികളായ ഹിന്ദുക്കൾക്ക് അതൊക്കെ നിസ്സഹായതയോടെ നോക്കി നിൽക്കാനേ കഴിയുന്നുള്ളൂ.

ആർ.എസ്.എസ്സിൽ തീവ്രത പോര എന്ന് പറഞ്ഞാണ് ചിലർ ഹിന്ദുമഹാസഭയിൽ പോയത് എന്ന് കേട്ടിട്ടുണ്ട് ശരിയാണോ എന്നറിയില്ല. എന്തായാലും അതിൻ്റെ പ്രവർത്തകനാണ് ഗാന്ധിജിയെ വധിച്ചത്. എന്തായാലും ഹിന്ദുമഹാസഭ പോലത്തെ തീവ്രഹിന്ദു പാർട്ടിയോ സംഘടനയോ അല്ല നമുക്ക് വേണ്ടത്. എല്ലാവർക്കും ജാതി-മത-പാർട്ടി ഭേദമെന്യേ സ്വൈര്യമായും സ്വതന്ത്രരായും സമാധാനത്തോടെയും ജീവിയ്ക്കാൻ കഴിയണം. ഒരു സംഘടിതമതം അല്ലാത്തത് കൊണ്ട് ഇത് തന്നെയാണ് എല്ലാ ഹിന്ദുക്കളുടെയും ചിന്താഗതിയും ആശയവും. എന്നാൽ സംഘടിത മതങ്ങൾക്ക് നിഗൂഢ അജണ്ടകളുണ്ട്. അവർക്ക് മതത്തിൽ ആള് കൂടണം. അത് എന്തിനാണ് എന്നറിയില്ല.

ഭൂമിയിൽ എല്ലാവരും മനുഷ്യരായി ജീവിച്ചാൽ മതി. പക്ഷെ മതങ്ങൾക്ക് അവരുടെ മതവിശ്വാസികളുടെ എണ്ണം കൂട്ടണം. അതിനാണ് മതപരിവർത്തനം. ഇത് സത്യം പറഞ്ഞാൽ മെയ്യനങ്ങാതെ തിന്നു കൊഴുക്കുന്ന പൗരോഹുത്യവർഗ്ഗത്തിൻ്റെ ആവശ്യമാണ്. മസ്തിഷ്ക്കം പൗരോഹിത്യത്തിന് പണയം വെച്ച, തെറ്റിദ്ധരിപ്പിക്കപ്പെട്ട വിശ്വാസികൾ മതമേലാളന്മാർക്ക് പാദസേവ ചെയ്യുന്നു. മതവിശ്വാസങ്ങൾ നുണകളും കെട്ടുകഥകളുമാണ്. പ്രകൃതിയിൽ ഒരു അത്ഭുതവും നടക്കുന്നില്ല. പക്ഷെ അത്ഭുതങ്ങൾ കാട്ടിയാണ് പുരോഹിതന്മാർ വിശ്വാസികളെ കൈയ്യിലെടുക്കുന്നത്. ഇന്ന് ലോകസമാധാനത്തിന് ഭീഷണി മതങ്ങളാണ്, മതത്തിൽ ആളെ കൂട്ടാനുള്ള നികൃഷ്ട പ്രവൃത്തികളാണ്.

ഹിന്ദുക്കൾക്ക് പുതിയ ഒരു പാർട്ടി ഉണ്ടാക്കുന്നത് പ്രായോഗികമല്ല. ആൾറെഡി എസ്റ്റാബ്ലിഷ്ഡ് ആയിട്ടുള്ള ബി.ജെ.പി. ഹിന്ദു പാർട്ടി ആകുന്നതാണ് ഉത്തമം. അതിന് തങ്ങൾ ഹിന്ദു പാർട്ടി ആണെന്ന് പ്രഖ്യാപിക്കുകയോ പരസ്യപ്പെടുത്തുകയോ ഒന്നും വേണ്ട. പ്രവർത്തിയിൽ ഹിന്ദു പാർട്ടി ആയാൽ മതി. പക്ഷെ ബി.ജെ.പി.ക്കും ആർ.എസ്.എസ്സിനും ഗുരുതരമായ മതേതരരോഗം ബാധിച്ചിരിക്കുകയാണ് എന്ന് പറയാതെ വയ്യ. അതുകൊണ്ട് ബി.ജെ.പി.യും ക്രമേണ മറ്റൊരു കോൺഗ്രസ്സ് ആവുകയാണ് ചെയ്യുക. പക്ഷെ ബി.ജെ.പി.യിൽ ഒരു ഹിന്ദു സ്വാധീനം ഉണ്ട്. അല്ലായിരുന്നെങ്കിൽ ഇത്ര വളരുമായിരുന്നില്ലല്ലോ. ന്യൂനപക്ഷ ഇരവാദക്കാർ വ്യാജ മതേതരരുടെ പിന്തുണയോടെ കൂടുതൽ അഗ്രസ്സീവായി വിധ്വംസക പ്രവർത്തനങ്ങളിൽ ഏർപ്പെടുമ്പോൾ പുതിയ നേതൃത്വത്തിൻ കീഴിൽ ബി.ജെ.പി. ശരിക്കും ഒരു ഹിന്ദു പാർട്ടി ആകേണ്ടി വരും എന്നാണ് ഞാൻ കരുതുന്നത്.

ശരിക്ക് പറഞ്ഞാൽ വലത് പക്ഷം ആണ് എല്ലാ കാര്യത്തിലും ശരി. ഇടത് പക്ഷം എന്നത് എന്തൊക്കെയോ കപട ആദർശവും കബളിപ്പിക്കലും ആണ്. പെട്ടെന്ന് ആളുകളെ ആകർഷിക്കാൻ ഒരു കഴിവ് ഇടത് പക്ഷത്തിനുണ്ട്. ഇടത് പക്ഷം നല്ലതും പുരോഗമനവും എന്നും വലത് പക്ഷം മോശവും പിന്തിരിപ്പനും എന്നൊരു പൊതുബോധം സൃഷ്ടിക്കപ്പെട്ടിട്ടുണ്ട്. എനിക്ക് ഈ ക്ലാസ്സിഫിക്കേഷനിൽ എന്തെങ്കിലും കാര്യം ഉണ്ട് എന്ന് തോന്നിയിട്ടില്ല. പക്ഷെ ഈ വർഗീകരണം സമൂഹത്തിൽ വേരൂന്നിയത് കൊണ്ട് ഞാൻ പറയുന്നു വലത്പക്ഷമാണ് ശരിയെന്ന്, നമ്മൾ വലത് പക്ഷക്കാരാകണമെന്ന്.

അമേരിക്കയിൽ ട്രംപ് വിജയിച്ചപ്പോൾ ഒരു വലത് പക്ഷ മുന്നേറ്റം ലോകമാകെ ഉണ്ടായിരുന്നു. മോദിയുടെ വിജയവും വലത് പക്ഷ വിജയമായാണ് കൊണ്ടാടപ്പെട്ടത്. പക്ഷെ മോദിയും ബി.ജെ.പി.യും വ്യാജമതേതരക്കെണിയിൽ പെട്ട പോലെയാണ് തോന്നുന്നത്. ശരിക്ക് പറഞ്ഞാൽ വലത് പക്ഷത്തിന് മാത്രമേ യഥാർത്ഥ മതേതരരാകാൻ കഴിയൂ. മറ്റേ പക്ഷത്തിൻ്റെ മതേതരം ന്യൂനപക്ഷ പ്രീണനമാണ്. അങ്ങനെയാണ് അത് വ്യാജമതേതരം ആകുന്നത്. ശരിക്കുള്ള മതേതരർ മതത്തെ തിരസ്ക്കരിക്കുന്നവരാണ്. എല്ലാ മതവും നിന്നോട്ടെ എന്ന് പറയുന്നവർ ന്യൂനപക്ഷ ഇരവാദത്തിൻ്റെ വക്താക്കളാണ്. ഈ ആധുനിക കാലത്ത് മനുഷ്യർക്ക് മതം ഒരധികപ്പറ്റാണ്. ജന്മനാ ജനിച്ചത് പോലെ ഒരു മതത്തിലും ചേരാതെ ജീവിയ്ക്കുന്ന ഹിന്ദുക്കൾക്ക് ഇത് മനസ്സിലാകേണ്ടതാണ്.

അമേരിക്കയിൽ ട്രംപ് തോറ്റ് ബൈഡൻ ജയിച്ചപ്പോൾ അതൊരു ഇടത്പക്ഷ ഇരവാദ മുന്നേറ്റമായി വീണ്ടു മാറി. ഈ മുന്നേറ്റം ലോകത്ത് വീണ്ടും സംഘർഷവും അശാന്തിയും സൃഷ്ടിക്കുകയാണ്. മതങ്ങൾ മാത്രമാണ് ഇതിൻ്റെ കാരണം എന്ന് മനസ്സിലാക്കണം. മതത്തിന് ഇക്കാലത്ത് ഒരു നന്മയും ചെയ്യാനില്ല. പണ്ട് ചെയ്തെങ്കിൽ ഇന്ന് ചെയ്യുന്നത് ദ്രോഹമാണ്. മതം ഉപേക്ഷിച്ച് മാനവികതയിൽ ഒന്നിക്കുകയാണ് ചെയ്യേണ്ടത്. ഹിന്ദുക്കൾ മതവാദികളോ മതവിശ്വാസികളോ അല്ല. അതുകൊണ്ട് ഹിന്ദുത്വം എന്നത് മാനവികവാദമാണ്.

ജൂണിൽ കാലവർഷം തുടങ്ങുന്നത് എങ്ങനെ?

noreply@blogger.com (K.P.Sukumaran) — Wed, 21 Jun 2023 04:40:00 +0000

എന്താണു മേഘം?

ഭൂമിയിലെ സമുദ്രങ്ങൾ, പുഴകൾ,ജലാശയങ്ങൾ, കുളങ്ങൾ, മണ്ണ് അങ്ങനെ എവിടെ ജലാംശമുണ്ടോ അതിൽ നിന്നെല്ലാം ജലം സൂര്യതാപത്താൽ ബാഷ്പീകരിച്ച് നീരാവിയായി മേലോട്ട് പോകുന്നു. ഇങ്ങനെ മേലോട്ട് പോകുന്ന നീരാവി തണുത്ത് ജലകണികകളായി മാറുന്നു. ഈ ജലകണികകൾ അന്തരീക്ഷത്തിൽ പാറിക്കളിക്കുന്ന പൊടിപടലങ്ങളുമായി ഒട്ടിച്ചേർന്ന് മേഘം ഉണ്ടാകുന്നു. അതായത് പൊടിപടലത്തിന്റെ കണികകൾക്ക് ചുറ്റും ജലകണികകൾ ഒട്ടിപ്പിടിക്കുന്നു. ഇങ്ങനെ ഒട്ടിപ്പിടിച്ച ജലകണികകൾ ചേർന്നാണു മേഘം ഉണ്ടാകുന്നത്. അന്തരീക്ഷത്തിൽ പൊടിപടലങ്ങൾ ഉണ്ടായിരുന്നില്ലെങ്കിൽ വെറും നീരാവി മാത്രം കൊണ്ട് മേഘങ്ങൾ ഉണ്ടാകുമായിരുന്നില്ല എന്നത് പ്രത്യേകം ശ്രദ്ധിക്കണം.

മേഘങ്ങൾ പല തരത്തിലുണ്ടെങ്കിലും ക്യുമുലോനിംബസ് (Cumulonimbus clouds) എന്ന കാർമേഘമാണു മഴ പെയ്യിക്കുന്നത്. കാർമേഘത്തിനു കറുത്ത നിറം തോന്നാൻ കാരണം അത് സൂര്യപ്രകാശം തീരെ കടത്തി വിടാത്തത് കൊണ്ടാണ് .ഭൂമിയിൽ നിന്ന് നോക്കുമ്പോഴാണു കാർമേഘത്തിനു കറുപ്പ് നിറം. എന്നാൽ വിമാനത്തിൽ നിന്ന് താഴോട്ട് നോക്കിയാൽ അതേ മേഘം വെളുപ്പായി തോന്നും. കാരണം അപ്പോൾ ആ മേഘം സൂര്യപ്രകാശം പ്രതിഫലിപ്പിക്കുന്നതാണ് വിമാനത്തിൽ നിന്ന് കാണുന്നത്.

എന്താണ് കാറ്റ്?

സൂര്യന്റെ ചൂട് കൊണ്ട് കര വേഗം ചൂടു പിടിക്കുന്നു. എന്നാൽ സമുദ്രം വളരെ സാവധാനം മാത്രമേ ചൂട് പിടിക്കുന്നുള്ളൂ. അതിനു കാരണം കടൽ അതിന്റെ 200 മീറ്ററോളം ആഴത്തിലേക്ക് സൂര്യപ്രകാശത്തെ കടത്തി വിടുന്നു എന്നതാണ്. ചൂടു പിടിച്ച കരയുടെ ഉപരിതലത്തിലുള്ള വായു വേഗത്തിൽ ചൂടാവുന്നു. കടലിന്റെ ഉപരിതലത്തിലുള്ള വായു അത്ര വേഗത്തിൽ ചൂടാകുന്നുമില്ല.അങ്ങനെ കരയുടെയും കടലിന്റെയും ഉപരിതലങ്ങളിൽ ഉള്ള വായുവിന്റെ ഊഷ്മാവിൽ അഞ്ച് മുതൽ പത്ത് വരെ സെൽഷ്യസ് ഡിഗി താപവ്യത്യാസം ഉണ്ടാകാം. ചൂട് പിടിക്കുന്ന വായു മേൽപ്പോട്ടേക്ക് പോകും. ആ വിടവിൽ തണുത്ത വായു കടന്നുവരും. അതായത് കരയിലെ ചൂട് പിടിച്ച വായു മേൽപ്പോട്ട് പോകുമ്പോൾ കടലിലെ തണുത്ത വായു കരയിലേക്ക് പ്രവഹിക്കും. കാറ്റ് ഉണ്ടാകുന്നത് ഇങ്ങനെയാണു. ചലിക്കുന്ന വായുവിനെയാണ് കാറ്റ് എന്ന് പറയുന്നത്.

എന്താണ് കാലവർഷം?

തെക്ക് പടിഞ്ഞാറൻ കാറ്റ് (മൺസൂൺ) മൂലം ജൂൺ മാസം മുതൽ മഴ പെയ്യുന്ന പ്രതിഭാസത്തെയാണല്ലോ നമ്മൾ കാലവർഷം എന്ന് പറയുന്നത്. അപ്പോൾ എങ്ങനെയാണ് മൺസൂൺ ഉണ്ടാകുന്നത് എന്ന് നോക്കാം.

വേനൽക്കാലത്ത് രാജസ്ഥാനിലെ താർ മരുഭൂമിയും അതിനു ചുറ്റുമുള്ള പ്രദേശങ്ങളും കഠിനമായി ചൂടാകും. അപ്പോൾ ആ പ്രദേശങ്ങളിലെ വായു ചൂട് കൊണ്ട് മേൽപ്പോട്ടേക്ക് ഉയരും. അങ്ങിനെ അവിടത്തെ വായു ചൂടായി മേൽപ്പോട്ട് പോകുമ്പോൾ ഉണ്ടാകുന്ന ശൂന്യത നികത്താൻ ഇന്ത്യൻ മഹാസമുദ്രത്തിൽ നിന്ന് തണുത്ത വായു കാറ്റായി തെക്ക് പടിഞ്ഞാറു ദിക്ക് നോക്കി വീശും.അങ്ങനെ വീശുന്ന തണുത്ത കാറ്റ് ഹിമാലയ പർവ്വതത്തിലേക്ക് നീങ്ങുകയും ഹിമാലയം ആ കാറ്റിനെ ഒരു വൻമതിൽ പോലെ തടുത്ത് നിർത്തുകയും ചെയ്യും. അങ്ങനെ തടുത്ത് നിർത്തപ്പെടുന്ന തണുത്ത കാറ്റ് മേഘങ്ങളെ തണുപ്പിക്കുകയും , തണുക്കുന്ന മേഘം കൂടുതൽ ഘനീഭവിച്ച് കനം മൂലം ഭൂമിയുടെ ആകർഷണത്താൽ താഴേക്ക് പതിക്കുന്നതാണു മഴയായി പെയ്യുന്നത്. ഇപ്രകാരം തെക്ക് പടിഞ്ഞാറൻ കാറ്റ് ഹിമാലയം നോക്കി സഞ്ചരിക്കുമ്പോൾ അതിനെ പശ്ചിമഘട്ട മലനിരകളും തടഞ്ഞു നിർത്തുന്നത് കൊണ്ടാണ് കേരളത്തിൽ കൂടുതൽ മഴ കിട്ടുന്നത്. പശ്ചിമഘട്ടവും കടന്ന് പോകുന്ന കാറ്റിനെ ഹിമാലയം തടഞ്ഞു നിർത്തുന്നത് കൊണ്ട് ഇന്ത്യയുടെ മറ്റ് ഭാഗങ്ങളിലും മഴ പെയ്യുന്നു.

നമ്മുടെ പശ്ചിമഘട്ട മലനിരകളും ഹിമാലയപർവ്വതവും ഇല്ലായിരുന്നെങ്കിൽ തെക്ക് പടിഞ്ഞാറൻ കാലവർഷക്കാറ്റ് ഇന്ത്യയിൽ ഒരു തുള്ളി മഴ പെയ്യിക്കാതെ തിബത്ത് , പാക്കിസ്ഥാൻ, അഫ്‌ഗാനിസ്ഥാൻ എന്നിവിടങ്ങളിലേക്ക് നേരെ ടൂർ പോയിരിക്കും എന്ന് പറയേണ്ടതില്ലല്ലോ.

NB: ശരി, ചലിക്കുന്ന വായു ആണ് കാറ്റ് എന്ന് പറഞ്ഞല്ലോ അപ്പോൾ വായു എന്താണ്? അന്തരീക്ഷത്തിലെ ഓക്സിജൻ, നൈട്രജൻ,കാർബൺ ഡൈഓക്സൈഡ് മുതലായ വാതക തന്മാത്രകളുടെ ആകെത്തുകയെ ആണ് വായു എന്ന് പറയുന്നത്. ഭൂമി അതിൻ്റെ ആകർഷണബലം കൊണ്ട് ഇപ്പറഞ്ഞ വാതകതന്മാത്രകളെ ഭൂമിക്ക് ചുറ്റും പിടിച്ചു വയ്ക്കുന്ന പരിധിയെ ആണ് അന്തരീക്ഷം എന്ന് പറയുന്നത്. ചന്ദ്രന് ഭൂമിയുടെ ആറിലൊന്ന് ആകർഷണബലം മാത്രമേയുള്ളൂ. അതുകൊണ്ട് ചന്ദ്രന് വാതകങ്ങളെ പിടിച്ചു വെക്കാൻ കഴിയുന്നില്ല. അതിനാലാണ് ചന്ദ്രനിൽ വായുവും അന്തരീക്ഷവും ഇല്ലാത്തത്.

ആണുങ്ങൾക്ക് എന്തിനാണ് മുലക്കണ്ണുകൾ?

noreply@blogger.com (K.P.Sukumaran) — Mon, 19 Jun 2023 05:32:00 +0000

മുലക്കണ്ണുകൾ കൊണ്ട് പുരുഷശരീരത്തിൽ ഒരു ധർമ്മവും ചെയ്യാനില്ല. പിന്നെ എന്തുകൊണ്ട് ആണുങ്ങൾക്ക് മുലക്കണ്ണുകൾ (nipples ) ഉണ്ടാകുന്നു എന്നത് ഒരുപക്ഷെ നിങ്ങൾ ചിന്തിച്ചിരിക്കാനിടയില്ല. അക്കാര്യം വിശദമായി തന്നെ പരിശോധിക്കാം. അതിന് മുൻപ് ഒറ്റവാക്കിൽ അതിനുള്ള ഉത്തരവും പറയാം. ഗർഭപാത്രത്തിൽ ഏത് കുഞ്ഞും പെൺകുഞ്ഞായിട്ടാണ് ആദ്യം വളരുന്നത്. അതായത് പെൺകുഞ്ഞാണ് പിന്നീട് ആൺകുഞ്ഞായി പരിണമിക്കുന്നത്. ഇനി നമുക്ക് വിശദമായി മനസ്സിലാക്കാം.

പിതാവിൻ്റെ ഒരു ബീജവും മാതാവിൻ്റെ അണ്ഡവും ചേർന്നാണല്ലോ ഒരു ഭ്രൂണം ഉണ്ടാകുന്നത്. ഭ്രൂണം എന്നാൽ ഒരൊറ്റ കോശമാണ് (Cell). അപ്പോൾ ബീജവും അണ്ഡവും അർദ്ധകോശങ്ങൾ ആണെന്ന് കണക്കാക്കാം. ആ അർദ്ധകോശങ്ങൾ ചേർന്ന് ഒരു കോശമുള്ള ഭ്രൂണം ആവുകയും ആ ഭ്രൂണം പിന്നീട് വിഭജിച്ച് രണ്ട് കോശങ്ങളായി, നാല് കോശങ്ങളായി അങ്ങനെ വിഭജിച്ച് വിഭജിച്ച് പുതിയ കോശങ്ങൾ ഉണ്ടാകുമ്പോഴാണ് ഗർഭസ്ഥശിശു വളരുന്നത്. നമ്മുടെ ശരീരം അനേകം കോശങ്ങൾ ചേർത്തു വെച്ചതാണ്. ഇഷ്ടികകൾ ചേർന്ന് ബിൽഡിങ്ങ് ഉണ്ടായത് പോലെ.

ഓരോ കോശത്തിൻ്റെയും മധ്യത്തിൽ (nucleus) ക്രോസോസോമുകൾ ഉണ്ട്. മനുഷ്യകോശത്തിൽ 23 ജോഡി ക്രോമോസോമുകൾ ആണുള്ളത്. എന്ന് വെച്ചാൽ 46 ക്രോസോമുകൾ. ക്രോമോസോം എന്നാൽ ഡി എൻ ഏ (DNA) തന്നെയാണ്. പക്ഷെ DNA നൂൽ പോലെ നീണ്ട തന്മാത്രയാണ്. നിവർത്തിയാൽ ഒരു ആളോളം നീളം വരും. അതിനെ ഒരു മാതിരി പ്രോട്ടീനിൽ പൊതിഞ്ഞ പായ്ക്കറ്റിനെയാണ് ക്രോമോസോം എന്ന് പറയുന്നത്. അതുകൊണ്ടാണ് ഇത്രയും നീളമുള്ള DNA കോശത്തിൻ്റെ ന്യൂക്ലിയസ്സിൽ ചുരുങ്ങി നിൽക്കുന്നത്. DNA യുടെ ഒരു ഭാഗമാണ് ജീൻ എന്നത്. ജീനുകളാണ് നമ്മെ നാമാക്കുന്ന പാരമ്പര്യഘടകങ്ങൾ.

ബീജവും അണ്ഡവും ചേർന്ന ഭ്രൂണകോശത്തിൽ 23 ജോഡി ക്രോമോസോമുകൾ ആണുണ്ടാവുക എന്ന് മനസ്സിലായല്ലോ. ഇതിൽ 23 ക്രോസോമുകൾ വീതം പിതാവിൻ്റെ ബീജത്തിൽ നിന്നും മാതാവിൻ്റെ അണ്ഡത്തിൽ നിന്നും ലഭിക്കുന്നതാണ്. അങ്ങനെയാണ് 23 ജോഡി ആകുന്നത്. ഇതിൽ 23 ആമത്തെ ജോഡി ആണ് ആണോ പെണ്ണോ എന്ന് നിർണ്ണയിക്കുന്നത്. X X ജോഡി ആയാൽ പെൺകുഞ്ഞ്, X Y ജോഡി ആയാൽ ആൺകുഞ്ഞ്. അതുകൊണ്ട് സ്ത്രീയുടെ അണ്ഡത്തിൽ X ക്രോമോസോം മാത്രമേ ഉണ്ടാകൂ. പുരുഷൻ്റെ ബീജത്തിൽ X അല്ലെങ്കിൽ Y അങ്ങനെ ക്രോമോസോം ഉണ്ടാകാം. X ക്രോമോസോം ആണ് അണ്ഡവുമായി ചേരുന്നതെങ്കിൽ പെൺകുഞ്ഞ്, Y ക്രോമോസോം ആണെങ്കിൽ ആൺകുഞ്ഞ്. അതുകൊണ്ട് കുഞ്ഞ് ആണോ പെണ്ണോ ആകുന്നതിൽ പുരുഷൻ്റെ ബീജമാണ് കാരണം.

ശരി, പുരുഷൻ്റെ Y ക്രോമോസോമും സ്ത്രീയുടെ X ക്രോമോസോമും ചേർന്ന് ആൺകുഞ്ഞ് ആകാവുന്ന ഭ്രൂണം മാതാവിൻ്റെ ഗർഭപാത്രത്തിൽ രൂപപ്പെട്ടു എന്ന് വിചാരിക്കാം, പക്ഷെ ആ ഭ്രൂണം അഞ്ചോ ആറോ ആഴ്ച വരെ പെൺകുഞ്ഞ് ആയി തന്നെയാണ് വളരുന്നത്. ലിംഗവ്യത്യാസം ആണല്ലോ ആണിനെ ആണായും പെണ്ണിനെ പെണ്ണായുമാക്കുന്നത്. ആറാഴ്ച വരെ പെൺകുഞ്ഞായിട്ടാണ് ഗർഭസ്ഥശിശു വളരുന്നത് എന്നതിൻ്റെ അർത്ഥം ആ കുഞ്ഞിൽ പെൺ സെക്സ് ഓർഗൻസ് ആണ് രൂപപ്പെടുന്നത് എന്നാണ്. അതിന് കാരണം കുഞ്ഞിൻ്റെ Y ക്രോമോസോമിലെ SRY എന്ന ജീൻ അഞ്ച് മുതൽ ആറ് ആഴ്ച വരെ പ്രവർത്തന നിരതമാകുന്നില്ല എന്നതാണ്. SRY യുടെ ഫുൾഫോം sex-determining region Y gene എന്നാണ്.

ആറാമത്തെ ആഴ്ച SRY ജീൻ പ്രവർത്തിക്കാൻ തുടങ്ങുമ്പോഴാണ് ഗർഭസ്ഥശിശു പെണ്ണിൽ നിന്ന് ആണായി രൂപാന്തരപ്പെടുന്നത്. അതിൻ്റെ അർത്ഥം പെൺ സെക്സ് ഓർഗൻസ് ആണിൻ്റേതായി രൂപമാറ്റം വരുന്നു എന്നാണ്. അങ്ങനെ അണ്ഡാശയങ്ങൾ (ovaries) വൃഷണങ്ങൾ (testes) ആയും , clitoris എന്ന അവയവം penis ആയും രൂപാന്തരം പ്രാപിക്കുന്നു. നിപ്പിൾസ് യാതൊരു മാറ്റവും ഇല്ലാതെ നിലനിൽക്കുന്നു. ചുരുക്കി പറഞ്ഞാൽ എല്ലാ ആണുങ്ങളും ഗർഭാവസ്ഥയിൽ ആറാഴ്ച വരെ പെൺകുഞ്ഞ് ആയിരുന്നു. അതുകൊണ്ടാണ് ആണുങ്ങൾക്ക് മുലക്കണ്ണുകൾ ഉള്ളത്.

അനുഭവങ്ങൾ പാളിച്ചകൾ - 4

noreply@blogger.com (K.P.Sukumaran) — Sun, 18 Jun 2023 09:03:00 +0000

ഒരു മാഷ് ആകാൻ എനിക്ക് ഏറെ കൊതിയുണ്ടായിരുന്നു. എന്നും പഠിക്കുക , പഠിപ്പിക്കുക അതെന്തൊരു രസമുള്ള സംഗതിയാണ്. എന്തെല്ലാം പഠിക്കാനുണ്ട്, അതിൽ കുറേ കാര്യങ്ങൾ പഠിച്ച് അത് മറ്റുള്ളവർക്ക് സരളമായി പറഞ്ഞുകൊടുക്കുമ്പോൾ കിട്ടുന്ന നിർവൃതി ഏറ്റവും വലുതാണ് എന്നെനിക്ക് തോന്നിയിട്ടുണ്ട്. പഠിത്തം ഒരിക്കലും തീരുന്നില്ല, എന്തെന്നാൽ എത്ര ആയുസ്സ് പഠിച്ചാലും തീരാത്തത്ര ബൃഹത്തായ വിജ്ഞാനശേഖരം ആണ് നമ്മുടെ മുന്നിലുള്ളത്. ഒരു അദ്ധ്യാപകൻ എന്നും ഒരു വിദ്ധ്യാർത്ഥി കൂടി ആയിരിക്കണം. എനിക്കത് കഴിയുമായിരുന്നു. പക്ഷെ അച്ഛൻ എന്നെ ഹൈസ്കൂളിലേക്ക് അയച്ചില്ല. ചെറുപ്പം മുതലുള്ള വിക്ക് കാരണം കലശലായ അപകർഷതാ ബോധം എന്നെ വേട്ടയാടിയിരുന്നു. യു.പി.സ്കൂളിൽ അവസാനവർഷം ഞാനായിരുന്നു സാഹിത്യസമാജം സെക്രട്ടരി. വെള്ളിയാഴ്ച ചേരുന്ന സാഹിത്യസമാജത്തിൽ ബ ബ ബ ബഹുമാനപ്പെട്ട അ് അ് അദ്ധ്യക്ഷനും എന്ന് ഞാൻ റിപ്പോർട്ട് വായന തുടങ്ങുമ്പോഴേക്കും പെൺകുട്ടികൾ അടക്കി ചിരിക്കും. എനിക്കത് വല്ലാത്ത നാണക്കേടായിരുന്നു. അതുകാരണം ഹൈസ്കൂളിൽ ചേരാൻ ഞാൻ ശാഠ്യം പിടിച്ചില്ല. പിന്നെ ഒരു വർഷം കഴിഞ്ഞപ്പോൾ അച്ഛൻ മരണപ്പെടുകയും ചെയ്തു.

ഹൈസ്കൂളിൽ ചേർന്നില്ലെങ്കിലും പഠിക്കാനുള്ള ത്വരയും അറിവുകൾ നേടാനുള്ള അടങ്ങാത്ത ജിജ്ഞാസയും അച്ഛൻ്റെ മരണവും ദാരിദ്ര്യവും എല്ലാം കൊണ്ടാണ് ഞാൻ നാട് വിടുന്നത്. അങ്ങനെ മദ്രാസ് കോടമ്പാക്കത്ത് എത്തി. കോടമ്പാക്കത്ത് ആർക്കാട് റോഡ് തുടങ്ങുന്ന മേൽപ്പാലത്തിൻ്റെ അടിയിൽ വെസ്റ്റ് അവന്യു റോഡിലെ 13 ആം നമ്പർ വീടിൻ്റെ ഔട്ട് ഹൗസ് എനിക്ക് താമസിക്കാനായി വെറുതെ കിട്ടി. ആ കൊച്ചു മുറിയിലാണ് ഞാൻ ഒൻപത് വർഷത്തോളം (1967-1976) താമസിച്ചത്. കോടമ്പാക്കം, ആരും കൊതിക്കുന്ന കോളിവുഡ് അന്ന് ദക്ഷിണേന്ത്യൻ സിനിമയുടെ തലസ്ഥാനം ആയിരുന്നു. ആർക്കാട് റോഡിലൂടെ നേരെ പോയാൽ കോടമ്പാക്കം കഴിഞ്ഞ് വടപളനി എത്തിയാൽ റോഡിനിരുവശവും സിനിമ സ്റ്റുഡിയോകളാണ്. വിജയവാഹിനി, ഏ.വി.എം. തൊട്ട് കർപ്പകം ഭരണി അങ്ങനെ എത്രയോ സ്റ്റുഡിയോകൾ. വടപഴനി കഴിഞ്ഞാൽ സാലിഗ്രാമം അന്നൊരു ചേരി പ്രദേശം ആയിരുന്നു. അവിടെയുള്ള ചേരികളിലായിരുന്നു എക്സ്ട്രാ നടന്മാരുടെയും നഭികളുടെയും താവളം.

മദ്രാസിൽ വിശപ്പ് നന്നെ സഹിക്കാൻ കഴിയാത്തപ്പോൾ എനിക്ക് അഭയം ഇടത്തരം ഹോട്ടലുകൾ ആയിരുന്നു. ഹോട്ടലിൽ പോയി മാനേജരോട് സപ്ലൈയർ വേണോ എന്ന് ചോദിക്കും. വേണമല്ലോ പോയി നാസ്ത കഴിച്ചിട്ട് വാ എന്ന് പറയും. ഞാൻ കിച്ചണിൽ പോയി പൊങ്കൽ , ഇഡ്ഡലി, പൂരി മസാല അങ്ങനെ വയറ് നിറയെ കഴിച്ചിട്ട് ഡ്യൂട്ടിക്ക് ഹാജരാകും. ആ എട്ട് സീറ്റ് നോക്കിക്കോ എന്ന് മാനേജർ പറയും. എട്ട് മണിക്കൂർ ജോലി. ഇടയിൽ നാല് മണിക്കൂർ കഴിഞ്ഞാൽ രണ്ട് മണിക്കൂർ റെസ്റ്റ്. വയറ് നിറയെ ഇഷ്ടമുള്ള ആഹാരം, സ്വീറ്റ്സ് കൂൾ ഡ്രിങ്ക്സ് അങ്ങനെ എന്തും എടുത്ത് കഴിക്കാം. സപ്ലൈയർക്ക് മാത്രമേ ഇങ്ങനെ എടുത്തു കഴിക്കാനുള്ള അവകാശം ഉണ്ടായിരുന്നുള്ളൂ. എട്ട് സീറ്റിലും കസ്റ്റമർ വന്ന് ഇരുന്നാൽ മാത്രമേ ഓർഡർ എടുക്കാൻ ഞാൻ അടുത്ത് പോകൂ. പിന്നെ ഇടത്തേ കൈയിൽ എട്ട് പ്ലേറ്റുകളിൽ പലാഹരങ്ങളും വലത്തേ കൈയിൽ ആറ് ടംബ്ലർ വെള്ളവുമായി ഞാനൊരു വരവാണ്. സർവർ സുന്ദരം എന്ന സിനിമയിൽ നാഗേഷ് ഇതൊക്കെ കാണിക്കുന്നുണ്ട്. കസ്റ്റമർ എനിക്ക് ടിപ്സ് തരും. ഒരിക്കൽ പാരീസ് കോർണറിലെ ഹരി നിവാസ് ഹോട്ടലിൽ വന്ന നടൻ ജോസ് പ്രകാശ് എനിക്ക് രണ്ട് രൂപ ടിപ്സ് തന്നിരുന്നു. രണ്ട് രൂപ അന്ന് വലിയ തുകയാണ്.

ഞാൻ പക്ഷെ ഏത് ഹോട്ടലിലും ഏറിയാൽ രണ്ടാഴ്ച മാത്രമേ ജോലി ചെയ്യൂ. പിന്നത്തെ രണ്ടാഴ്ച എഗ് മോറിലെ കന്നിമാറ ലൈബ്രറിയിലാണ്. വിശാലമായ ഹാൾ, അലമാരകളിൽ തമിഴ്, മലയാളം, ഇംഗ്ലീഷ് പുസ്തകങ്ങൾ. ഇരിക്കാൻ നല്ല ചാരുബെഞ്ചുകൾ, മുകളിൽ ഫാൻ. ഇരുന്ന് വായിച്ചാൽ സമയം പോകുന്നത് അറിയില്ല. കെമിസ്ട്രി, ഫിസിക്സ്, ബയോളജി, ചരിത്രം, ഫിലോസഫി, സാഹിത്യം അങ്ങനെ വായിച്ചാൽ തീരാത്തത്ര പുസ്തകങ്ങൾ പിന്നെ എല്ലാ പത്രങ്ങളും വാരികകളും മാസികകളും. രാവിലെ പോയി ഇരുന്നാൽ സന്ധ്യയോടെ മടക്കം. അങ്ങനെ കൈയിലുള്ള കാശും തീർന്ന് പിന്നെയും രണ്ട് നാൾ പട്ടിണി കിടന്ന് വിശപ്പ് സഹിക്കാതാവുമ്പോഴാണ് മറ്റൊരു ഹോട്ടൽ തേടി പോകുന്നത്. ഡീസൻ്റ് കസ്റ്റമേഴ്സ് വരുന്ന ഹോട്ടലിൽ മാത്രമേ ജോലി ചെയ്യൂ. ഇതിനിടയിൽ വണ്ണാർപ്പേട്ടയിൽ ഒരു പെട്ടിക്കട വെച്ചു. സിഗരറ്റും മുറുക്കാനും മിട്ടായികളും വാഴപ്പഴവും ആയിരുന്നു സാധനങ്ങൾ. രാവിലെ അഞ്ച് മണിക്ക് എഴുന്നേറ്റ് കൊത്തവാൽ ചാവടിയിൽ പോയി പഴക്കൂലയും വെറ്റിലയും പാക്കും പുകയിലയും മറ്റും വാങ്ങണം. അന്ന് നഗരത്തിലെ ഏറ്റവും വലിയ മാർക്കറ്റ് ആയിരുന്നു സായിപ്പ് സ്ഥാപിച്ച കൊത്തവാൽ ചാവടി. ആ മാർക്കറ്റാണ് ജയലളിത മുഖ്യമന്ത്രി ആയപ്പോൾ കോയമ്പേടിലേക്ക് മാറ്റിയത്.

ഒടുവിൽ ഞാനൊരു മലയാളം സർക്യുലേറ്റിങ്ങ് ലൈബ്രറി നടത്തി. പുസ്തകങ്ങൾ വീടുകളിൽ എത്തിച്ചുകൊടുക്കുക. അന്ന് വീട്ടമ്മമാർക്ക് റേഡിയോ അല്ലാതെ മറ്റൊരു വിനോദോപാധിയും ഇല്ലായിരുന്നു. മാത്രമല്ല എല്ലാവരും പുസ്തകപ്രേമികളുമായിരുന്നു. മാസം രണ്ട് രൂപ വരിസംഖ്യ മേടിച്ച് ആഴ്ചയിൽ രണ്ട് പുസ്തകം ഞാൻ വീടുകളിൽ എത്തിക്കും. അതെൻ്റെ ജീവിതത്തിലെ ഒരു സുവർണ്ണകാലമായിരുന്നു. മറക്കാൻ കഴിയാത്ത അനുഭവങ്ങൾ. അതിൽ ഇന്നും ഓർക്കുന്നത്, നടി വിജയശ്രീ ആത്മഹത്യ ചെയ്തിട്ട് രണ്ടാഴ്ച കഴിഞ്ഞപ്പോൾ അവരുടെ അമ്മയായ വിജയമ്മ എന്ന സ്ത്രീയുടെ അഡയാറിലുള്ള വീട്ടിൽ വരിസംഖ്യ ചേർക്കാൻ പോയതാണ്. അവർ വിജയശ്രീയുടെ അമ്മയാണ് എന്നൊന്നും എനിക്ക് അറിയില്ലായിരുന്നു. എല്ലാ സിനിമ പ്രേമികളെയും ദു:ഖത്തിലാഴ്ത്തിയ സംഭവം ആയിരുന്നു വിജയശ്രീയുടെ ആത്മഹത്യ. സംഭാഷണ മധ്യേ അവരാണ് പറഞ്ഞത് എൻ്റെ മകളാണ് വിജയശ്രീ എന്ന്. കുറച്ച് നേരം അവരുമായി സംസാരിച്ചിരുന്നു. അവർക്ക് രണ്ട് പുസ്തകങ്ങൾ കൊടുത്ത് ഇറങ്ങാൻ നോക്കുമ്പോൾ അവർ പറഞ്ഞു എൻ്റെ കൈയിലുള്ള കുറച്ച് പുസ്തകങ്ങൾ എടുത്തോളൂ എന്ന്. അതിൽ ഒന്ന് യു.എ.ഖാദർ എഴുതിയ, സ്വന്തം കൈപ്പടയിൽ സ്നേഹപൂർവ്വം എന്നെഴുതി ഒപ്പിട്ട് വിജയശ്രീക്ക് കൊടുത്ത ഖുറൈശ്ശിക്കൂട്ടം എന്ന നോവൽ ആയിരുന്നു.

ഇതിനിടയിൽ ഞാൻ എൻ്റെ വിക്ക് ഏകദേശം മാറ്റിയെടുത്ത് സ്വാഭാവികമായി സംസാരിക്കാൻ ശീലിച്ചിരുന്നു. മുറിയിൽ വെച്ച് ശിവാജി ഗണേശൻ അഭിനയിച്ച പരാശക്തി, വീരപാണ്ഡ്യ കട്ടബൊമ്മൻ എന്നീ സിനിമകളുടെ തിരക്കഥാ പുസ്തകങ്ങളിലെ ഡയലോഗുകൾ കണ്ണാടിക്ക് മുൻപിൽ നിന്ന് ശിവാജിയെ അനുകരിച്ച് കുറേ നാൾ പറഞ്ഞപ്പോൾ എനിക്ക് ആത്മവിശ്വാസം വർദ്ധിച്ചു. രണ്ട് വർഷത്തോളം ലൈബ്രറി നടത്തി പിന്നെയത് നടത്തിക്കൊണ്ട് പോകാൻ കഴിയാത്തപ്പോൾ അടിയന്തിരാവസ്ഥയുടെ മൂർദ്ധന്യത്തിൽ 1976 മാർച്ചിൽ, ഒരുപാട് അനുഭവങ്ങളും എനിക്ക് ഒരു പോറ്റമ്മയെ പോലെ അഭയം നൽകിയ മദ്രാസ് നഗരവും പുസ്തകങ്ങളും എൻ്റെ മുറിയും ചങ്ങാതിമാരെയും ഒക്കെ ഉപേക്ഷിച്ച് ഒരു തകരപ്പെട്ടിയിൽ രണ്ട് ജോഡി പാൻ്റും കുപ്പായവുമായി നാട്ടിലേക്ക് പോന്നു.

നാട്ടിൽ എനിക്ക് ഒരു ജോലിയും അറിയില്ലായിരുന്നു. വന്ന ഏതാനും ദിവസങ്ങളിൽ ഞാൻ രാഷ്ട്രീയ-സാംസ്കാരിക രംഗങ്ങളിൽ സജീവമായി. സുഹൃത്തുക്കൾ ഇല്ലാതെയും ആരെങ്കിലുമായി സംസാരിക്കാതെയും എനിക്ക് ജീവിയ്ക്കാൻ കഴിയില്ലായിരുന്നു. അടിയന്തിരാവസ്ഥയാണ് , ജന്മം കൊണ്ട് കോൺഗ്രസ്സുകാരൻ ആയിരുന്ന ഞാൻ മദ്രാസിലെ വായനയിൽ കമ്മ്യൂണിസ്റ്റ് ആശയത്തിൽ ആകൃഷ്ടനായിരുന്നു. അങ്ങനെ സി.പി.ഐ.യുടെ അനുഭാവിയായി, നാട്ടിൽ യുവകലാസാഹിതി യൂനിറ്റ് രൂപീകരിച്ചു എന്നെ സെക്രട്ടരിയാക്കി. ഇതിനിടയിൽ വീടിനടുത്ത വായനശാലയുടെ പത്താം വാർഷികോത്സവത്തിൽ എന്നെ കൺ വീനർ ആക്കുകയും ആദ്യമായി മൈക്കിലൂടെ സ്വാഗത പ്രസംഗം വിക്ക് ഇല്ലാതെ നടത്തുകയും ചെയ്തു. കേരള യുക്തിവാദി സംഘത്തിൻ്റെ കണ്ണൂർ ജില്ലാക്കമ്മറ്റിയിൽ അംഗമായി കാസർക്കോട് മുതൽ തലശ്ശേരി വരെ പദയാത്ര നടത്തി വഴിവക്കുകളിൽ നൽകപ്പെട്ട സ്വീകരണ യോഗങ്ങളിൽ ഗംഗൻ അഴീക്കോട്, എം.ബി.കെ എന്നിവരോടൊപ്പം ഞാനും പ്രസംഗിച്ചു.

അടിയന്തിരാവസ്ഥ പിൻ വലിച്ച് 1977 ലെ തെരഞ്ഞെടുപ്പിൽ തലേന്ന് സി.പി.ഐ.ക്കാരനായ ഞാൻ കോൺഗ്രസ്സ് സ്ഥാനാർത്ഥിക്ക് വേണ്ടി ചുവരെഴുത്ത് എഴുതി പിറ്റേന്ന് നാട്ടുകാരെ ഞെട്ടിച്ചുകൊണ്ട് മാർക്സിസ്റ്റ് പാർട്ടിയിൽ ചേർന്ന് അന്ന് തന്നെ മൈക്ക് പ്രചരണത്തിൽ പങ്കെടുത്ത് നാട്ടിലെ മുക്കിലും മൂലയിലും പ്രസംഗിച്ചു. പ്രിയ നാട്ടുകാരേ കുറച്ച് നേരത്തേക്ക് നിങ്ങളുടെ കാതുകൾ എനിക്ക് കടം തരൂ എന്ന് തുടങ്ങുന്ന എൻ്റെ പ്രസംഗങ്ങൾ എല്ലാവരെയും ആകർഷിച്ചു. എനിക്ക് ധാരാളം ശ്രോതാക്കളെ കിട്ടി. ഞാൻ പെട്ടെന്ന് എല്ലാവർക്കും പരിചിതനായി. തെരഞ്ഞെടുപ്പ് കഴിഞ്ഞു, കോൺഗ്രസ്സ് തകർന്നടിഞ്ഞു. ഫലം വരുന്നതിന് മുൻപേ ഏ.കെ.ജി. മരണപ്പെട്ടത് നാട്ടിൽ മ്ലാനത പരത്തി. ഇതിനിടയിൽ ഒരു വരുമാനത്തിന് വേണ്ടി ഞാൻ ബീഡി തെറുപ്പ് ശീലിച്ചു. 1977 ഒക്ടോബർ 31ന് പിണറായിയിലെ മാർക്സിസ്റ്റ് പാർട്ടിയുടെ ലോക്കൽ കമ്മിറ്റി ഓഫീസിൽ വെച്ച് വിവാഹം നടന്നു. പാണ്ട്യാല ഗോപാലൻ മാഷ് ആയിരുന്നു മാല എടുത്ത് തന്നത്. താലിയൊന്നും ഇല്ല. ഒരുപാട് പേർ ആശംസാപ്രസംഗം നടത്തി. കാസർക്കോട് മുതൽ തലശ്ശേരി വരെയുള്ള എൻ്റെ സുഹൃത്തുക്കൾ പങ്കെടുത്തു.

അങ്ങനെ ഞാൻ കുടുംബജീവിതം ആരംഭിക്കുകയായിരുന്നു. മദ്രാസിലെ പഠനം മക്കളെ പഠിപ്പിക്കുന്നതിന് സഹായിച്ചു. പ്രാസംഗികൻ ആകാൻ ആഗ്രഹിച്ചെങ്കിലും മൈക്കിന് പിന്നാലെ തിക്കിത്തിരക്കി പോയില്ല. ഏത് സംഘടനയിലും മൈക്കിന് പിടിവലിയാണ്. മാർക്സിസ്റ്റ് പാർട്ടിയുടെ അകത്തെ സംഘടനാസംവിധാനവും അവരുടെ ആക്രമണപരതയും കുതന്ത്രങ്ങളും കുരുട്ട് വാദങ്ങളും ലോക്കൽ നേതാക്കളുടെ തലക്കനവും എതിരാളികളെ കൊല്ലലും ഒന്നും എനിക്ക് ദഹിക്കുന്നത് ആയിരുന്നില്ല. അതൊന്നുമല്ല ഞാൻ കമ്മ്യൂണിസ്റ്റ് കൃതികളിൽ വായിച്ചിരുന്നത്. അതുകൊണ്ട് സി.പി.എമ്മിനോടുള്ള അനുഭാവം ഉപേക്ഷിച്ച് ആ കറ മായ്ക്കാൻ വേണ്ടി ജനതാപാർട്ടിയിൽ ചേർന്നിരുന്നു. അത് വിട്ട് വീണ്ടും കോൺഗ്രസ്സ് ആയതൊക്കെ ഒരു കഥയാണ്. ഇപ്പോൾ ബി.ജെ.പി.അനുഭാവി ആയത് ചിന്താപരമായ പരിണാമത്തിൻ്റെ മറ്റൊരു കഥ.

ബാംഗ്ലൂരിൽ താമസം തുടങ്ങി ഇൻ്റർനെറ്റ് മുഖാന്തിരം ഓർക്കുട്ടിലും ബ്ലോഗിലും എഴുത്ത് തുടങ്ങിയപ്പോൾ എനിക്ക് ധാരാളം ഓൺലൈൻ സുഹൃത്തുക്കളെ കിട്ടി. ബ്ലോഗിൽ നിന്ന് ഫേസ്ബുക്കിൽ എത്തിയപ്പോൾ നിരവധി വായനക്കാരും ഫോളോവേഴ്സുമായി. ആ ഒരു ഐഡി ബ്ലോക്ക് ആയിപ്പോയെങ്കിലും ഇന്നും ദിവസേന ഫ്രണ്ട് റിക്വസ്റ്റുകൾ വന്നുകൊണ്ടിരിക്കുന്നു. ഇതിനിടയിൽ കൈരളി ടിവിയുടെ ഒരു ചർച്ചയിൽ പങ്കെടുത്തു. മൈദ വിഷം ആണോ എന്നതായിരുന്നു വിഷയം. വിഷം ആണെന്ന് വാദിക്കാൻ മോഹനൻ വൈദ്യർ, വിഷം അല്ല എന്ന് വാദിച്ചുകൊണ്ട് മൈദയുടെ സയൻസ് ഞാൻ വിശദീകരിച്ചു. ചർച്ചയുടെ മോഡറേറ്റർ അരുൺ കുമാർ ആയിരുന്നു. സി. രവിചന്ദ്രൻ ക്ഷണിച്ചത് അനുസരിച്ച് തിരുവന്തപുരം പ്രസ്സ് ക്ലബ്ബിൽ വെച്ച് ആർ.വി.ജി.മേനോനുമായി ഏറ്റുമുട്ടി. കൂടംകുളം ആണവോർജ്ജനിലയം വേണമോ എന്നതായിരുന്നു വിഷയം. മേനോൻ സാർ കൂടംകുളം പാടില്ല എന്ന് വാദിച്ചു. കൂടംകുളം പദ്ധതി കൂടിയേ തീരൂ എന്ന് ഞാൻ വാദിച്ചു. ഈ രണ്ട് പരിപാടിയുടെയും വീഡിയോകൾ യൂട്യൂബിൽ ഉണ്ട്. ലിങ്കുകൾ എൻ്റെ ബ്ലോഗിലും.

ഈ പോസ്റ്റ് നീണ്ടുപോയോ, തൽക്കാലം ഇവിടെ നിർത്താം അല്ലേ.. വിക്ക് മൂലമുള്ള അപകർഷതാബോധത്തെ മറികടക്കാനുള്ള പോരാട്ടം ആയിരുന്നു സംസാരിക്കാനും പ്രസംഗിക്കാനുമുള്ള എൻ്റെ ശ്രമങ്ങൾ. ജന്മനായുള്ള ക്യൂരിയോസിറ്റി കൊണ്ടാണ് ഇപ്പോഴും ദിവസേന ഒരോ പുതിയ കാര്യങ്ങൾ പഠിച്ചുകൊണ്ടിരിക്കുന്നത്. ഇംഗ്ലീഷ് ഭാഷയിൽ വായിച്ചാൽ മനസ്സിലാകുന്നത് ഒരനുഗ്രഹം ആയി. ഇപ്പോൾ പഠിക്കാൻ എന്തെളുപ്പമാണ്. ചാറ്റ് ജി.പി.ടി.യിൽ എന്തും ചോദിക്കാം. ഉത്തരം ലളിതമായ ഇംഗ്ലീഷിൽ അപ്പോൾ തന്നെ കിട്ടും. അറിവുകൾ നമ്മുടെ മുന്നിൽ വിശാലമായ ഒരു ലോകമാണ് തുറന്ന് തരുന്നത്. ആ ലോകത്തേക്ക് തലമുറകളെ നയിക്കുന്നവരാകണം അദ്ധ്യാപകർ. എന്നോട് ചിലർ ചോദിക്കാറുണ്ട് താങ്കൾ മാഷ് ആയിരുന്നോ എന്ന്. അല്ല എന്ന് പറയുമ്പോൾ എനിക്ക് വല്ലാത്ത നിരാശയാണ്....

അനുഭവങ്ങൾ പാളിച്ചകൾ - 2

noreply@blogger.com (K.P.Sukumaran) — Sun, 18 Jun 2023 05:55:00 +0000

നമുക്ക് മറ്റുള്ളവരുടെ കഥ കേൾക്കാൻ ഇഷ്ടമാണ്. നമ്മുടെ സംസാരം ഉണ്ടാകുന്നത് അതുകൊണ്ടാണ്. നമ്മൾ സാഹിത്യം വായിക്കുന്നതും സിനിമകൾ കാണുന്നതും ഒക്കെ ഈ ഇഷ്ടം കൊണ്ടാണ്. യഥാർത്ഥ ജീവിതം പറയുന്ന സാഹിത്യവും സിനിമയും ആണല്ലോ എല്ലാവരും ഇഷ്ടപ്പെടുന്നതും കാലത്തെ അതിജീവിക്കുന്നതും. മനുഷ്യർക്ക് മൂന്ന് തരം വിശപ്പ് ഉണ്ട്. ഒന്നാമത്തെ വിശപ്പ് ഭക്ഷണത്തിനാണ്. രണ്ടാമത്തെ വിശപ്പ് നിങ്ങൾ എല്ലാവർക്കും അറിയാം. തീഷ്ണമായ ഈ രണ്ട് വിശപ്പും മനുഷ്യനും മറ്റെല്ലാ ജന്തുക്കൾക്കും ഉള്ളതാണ്. എന്നാൽ മൂന്നാമത്തെ വിശപ്പ് മനുഷ്യർക്ക് മാത്രമേയുള്ളൂ. അത് അംഗീകാരത്തിന് വേണ്ടിയുള്ള വിശപ്പാണ്. ഏറ്റക്കുറച്ചിലോടെ ഈ വിശപ്പ് ഇല്ലാത്തവർ ആരുമില്ല. ചെറിയൊരു അംഗീകാരം പോലും നമ്മെ സന്തോഷിപ്പിക്കുന്നത് ഇതുകൊണ്ടാണ്.

നമ്മെ ജീവിതത്തിൻ്റെ പോരാട്ടക്കളത്തിലേക്ക് ഉന്തിവിടൂന്നത് ഈ മൂന്ന് വിശപ്പുകളാണ്. അല്ലായിരുന്നെങ്കിൽ നമ്മളാരും ഇരുന്നിടത്ത് നിന്ന് അനങ്ങില്ലായിരുന്നു. സാഹിത്യവും കലയും രചിക്കുന്നതും നാടകം സിനിമ അഭിനയിക്കുന്നതും ഒക്കെ അംഗീകാരത്തിന് വേണ്ടിയുള്ള വിശപ്പിനെ തൃപ്തിപ്പെടുത്താനാണ്. രാഷ്ട്രീയത്തിൽ പ്രവർത്തിക്കാനുള്ള പ്രചോദനവും അംഗീകാരമാണ്. ഫേസ്ബുക്കിൽ എഴുതുന്നത് പോലും അംഗീകാരത്തിനാണ്. പുറത്തിറങ്ങുമ്പോൾ അണിഞ്ഞൊരുങ്ങുന്നതും മറ്റുള്ളവരുടെ അംഗീകാരം കിട്ടാൻ വേണ്ടിയാണ്. ചുരുക്കി പറഞ്ഞാൽ നമ്മുടെ അസ്തിത്വം പോലും മറ്റുള്ളവർ നമ്മെ അംഗീകരിക്കുമ്പോഴാണ്. ആരും അംഗീകരിക്കുന്നില്ലെങ്കിൽ നമ്മൾ ആരും അല്ലാതായിപ്പോകും. ഇതൊന്നും അങ്ങനെ ആരും ആഴത്തിൽ ചിന്തിക്കുന്നില്ലെങ്കിലും അംഗീകാരത്തിന് വേണ്ടിയുള്ള ത്വര എല്ലാവരിലും എപ്പോഴും പ്രവർത്തിക്കുന്നുണ്ട് എന്നതാണ് യാഥാർഥ്യം.

മദ്രാസിൽ കോടംബാക്കാത്ത് ജീവിയ്ക്കുമ്പോൾ സിനിമയിൽ അഭിനയിക്കാൻ ആഗ്രഹിച്ചിരുന്നു. അതുകൊണ്ട് കണ്ണാടിക്ക് മുൻപിൽ നിന്നുകൊണ്ട് എന്തെങ്കിലും അഭിനയിക്കുക, ഡയലോഗുകൾ പറയുക എൻ്റെ ശീലമായിരുന്നു. പക്ഷെ അവിടെയും ഒരപകർഷതാ ബോധം എന്നെ വേട്ടയാടിയിരുന്നു. മെലിഞ്ഞ ശരീരപ്രകൃതമായിരുന്നു എൻ്റേത്. സിനിമയിൽ അഭിനയിക്കാൻ നല്ല തടി വേണം എന്ന് ചിന്തിക്കാൻ ഒരു കാരണമുണ്ടായി. ഒരു സ്റ്റിൽ ഫോട്ടോഗ്രാഫറുടെ സഹായി എൻ്റെ ഫ്രണ്ട് ആയിരുന്നു. അത്കൊണ്ട് എനിക്ക് ഏത് സ്റ്റുഡിയോയിലും ഏത് ഷൂട്ടിങ്ങ് ഫ്ലോറിലും പോകാമായിരുന്നു. അന്നൊക്കെ ഔട്ട് ഡോർ ഷൂട്ടിങ്ങ് അപൂർവ്വമായിരുന്നു, സ്റ്റുഡിയോ ഫ്ലോറുകളിൽ ഇൻഡോർ ഷൂട്ടിങ്ങ് ആയിരുന്നു സാധാരണം. സ്റ്റുഡിയോ ഫ്ലോറിൽ സെറ്റ് ഇട്ടിട്ടാണ് ഷൂട്ടിങ്ങ്.

ഒരിക്കൽ ഉമ്മാച്ചു എന്ന സിനിമയുടെ ഷൂൂട്ടിങ്ങ് സെറ്റിൽ പോയി. മധുവും ബഹദൂറും ഒക്കെ അഭിനയിക്കുന്നു. സംവിധാനം പി.ഭാസ്കരനാണ്. ഷൂട്ടിങ്ങിൻ്റെ ഇടവേളയിൽ മധുവിൻ്റെ അടുത്ത് എന്നെ നിർത്തി സ്റ്റിൽ ഫോട്ടോ ഗ്രാഫർ ഒരു ഫോട്ടോ എടുത്തു. എന്നിട്ട് അവൻ്റെ ഫോട്ടോ സ്റ്റുഡിയോയുടെ ഡാർക്ക് റൂമിൽ വെച്ച് അതിൻ്റെ പോസിറ്റീവ് പ്രിൻ്റ് എടുക്കുന്നത് ഞാനും നോക്കി നിന്നു. ഫോട്ടോ നോക്കുമ്പോൾ മധുവിൻ്റെ അടുത്ത് ഞാൻ ആനയും അണ്ണാനും പോലെ. ആ ഫോട്ടോ ഞാൻ നാട്ടിലേക്ക് അയച്ച് അത് ജ്യേഷ്ടൻ ഫ്രെയിം ചെയ്ത് ചുവരിൽ തൂക്കി അയൽപ്പക്കക്കാരെ കാണിച്ച് അവൻ സിനിമയിലൊക്കെയാ എന്ന് പൊങ്ങച്ചം പറഞ്ഞിരുന്നു. എന്തായാലും മെലിഞ്ഞ ഞാൻ സിനിമക്ക് പറ്റില്ല എന്ന അപകർഷത മനസ്സിൽ പേറി നടന്ന എന്നെ അത്ഭുതപ്പെടുത്തിയത് ഇന്നത്തെ കുഞ്ചൻ എന്ന നടനെ അന്ന് ആദ്യമായി സ്ക്രീനിൽ കണ്ടപ്പോഴാണ്. കെ.പി.കൊട്ടാരക്കരയുടെ സിനിമ ആയിരുന്നു അത്. പേര് ഓർക്കുന്നില്ല.

ഞാൻ താമസിക്കുന്ന വെസ്റ്റ് അവന്യു റോഡിൽ നിന്ന് കോടംബാക്കം സ്റ്റേഷനിലേക്ക് തിരിയുന്ന കോർണറിൽ ഒരു മലയാളിയുടെ വീട് ഉണ്ടായിരുന്നു. ഗേറ്റിലെ നെയിം ബോർഡിൽ പ്രഫ: വിദ്യാധരൻ എന്ന് എഴുതിയിരുന്നു എന്ന് നേരിയ ഓർമ്മ. ആ വീടീൻ്റെ ഉമ്മറത്ത് ഒരു പയ്യൻ ഇരിക്കുന്നത് കാണാം. മെലിഞ്ഞ ശരീരം. മുഖത്തിന് ഒരു ഷെയിപ്പും ഇല്ലായിരുന്നു. അവനെയാണ് ഞാൻ ഏതോ തിയേറ്ററിൽ വെച്ച് വെള്ളിത്തിരയിൽ കാണുന്നത്. മോഹൻ എന്നായിരുന്നു അവൻ്റെ പേര്. പിന്നെയും ഒന്ന് രണ്ട് സിനിമയിൽ മോഹൻ എന്ന പേരിൽ കൊമേഡിയൻ ആയി അഭിനയിച്ച അവൻ്റെ പേര് കുഞ്ചൻ എന്നാക്കിയത് തിക്കുറിശ്ശി ആണെന്ന് വായിച്ചിട്ടുണ്ട്. കാരണം മറ്റൊരു മോഹൻ അന്ന് നായകനായി തിളങ്ങി നിൽക്കുന്നുണ്ടായിരുന്നു. ആ മോഹൻ എന്ന നടനെ എനിക്ക് വളരെ ഇഷ്ടം ആയിരുന്നു. ചട്ടക്കാരി, ജീവിയ്ക്കാൻ മറന്നു പോയ സ്ത്രീയിൽ ഒക്കെ എന്തൊരു മനോഹരമായ അഭിനയമായിരുന്നു. ഈ കുഞ്ചൻ താമസിച്ച ആ വീട്ടിൽ സുന്ദരനായ ഒരു നടൻ ഇടക്കിടെ വന്ന് പോകുന്നത് കണ്ടിരുന്നു, അത് സുധീർ ആയിരുന്നു, ചിലപ്പോൾ ഖദീജ എന്ന നടിയെ പിന്നിൽ ഇരുത്തി സുധീർ കോടംബാക്കത്ത് കറങ്ങുന്നതും ശ്രദ്ധിച്ചിരുന്നു.

അന്നത്തെ ടെലിഫോൺ ഡയരക്ടറി നോക്കി വിലാസം കണ്ടുപിടിച്ച് സിനിമ നടന്മാരുടെയും സംവിധായകരുടെയും നിർമ്മാതാക്കളുടെയും ഒക്കെ വീടുകളിൽ ഞാൻ നടന്ന് പോകുമായിരുന്നു. അങ്ങനെ മദ്രാസിലെ അധിക തെരുവുകളിലൂടെയും ഞാൻ നടന്നിട്ടുണ്ട്. എനിക്ക് അറിയാത്ത റോഡുകൾ അന്ന് മദ്രാസിൽ ഇല്ലായിരുന്നു. മൗണ്ട് റോഡിൽ നിന്ന് തിരിയുന്ന വുഡ്സ് റോഡിലെ സ്വാമീസ് ലോഡ്ജിൽ ആയിരുന്നു സത്യൻ താമസിച്ചിരുന്നത്. അതേ റോഡിൽ അവരുടെ തന്നെ സ്വാമീസ് കഫേയിൽ ഞാൻ സപ്ലൈയറായി ജോലി ചെയ്തിരുന്നു. അപകർഷതാ ബോധം നിമിത്തം ആ ലോഡ്ജിൽ പോയി സത്യനെ നേരിൽ കാണാതിരുന്നതിൽ ഞാൻ പിന്നീട് വളരെ ഖേദിച്ചിരുന്നു. മിക്ക നടീനടന്മാരെയും നേരിൽ കണ്ട എനിക്ക് ഞാൻ ആരാധിച്ചിരുന്ന സത്യനെ മാത്രം നേരിൽ കണ്ടിട്ടില്ല.

ഒരു ദിവസം രാവിലെ ഫോൺ ഡയരക്ടറി നോക്കി വിലാസം കണ്ടുപിടിച്ച് കോടംബാക്കത്തെ റൂമിൽ നിന്ന് റോയപ്പേട്ട വരെ നടന്നു. പ്രേം നസീറിൻ്റെ വീട് ആയിരുന്നു ലക്ഷ്യം, വീട്ട് നമ്പർ മനസ്സിൽ കുറിച്ചിരുന്നു, പ്രേം നസീറും മുത്തയ്യയും ഒന്നിച്ച് താമസിച്ചിരുന്ന വാടക വീട് ആയിരുന്നു അത്. ചെല്ലുമ്പോൾ ഗേറ്റിൽ സെക്യൂരിറ്റി ആരുമില്ല. ഞാൻ ഉമ്മറത്ത് പോയിരുന്നു. ആരൊക്കെയോ അങ്ങോട്ടും ഇങ്ങോട്ടും നടക്കുന്നുണ്ട്. ആരും എന്നെ ശ്രദ്ധിക്കുന്നില്ല. കുറച്ച് കഴിഞ്ഞപ്പോൾ നസീർ അകത്ത് നിന്ന് ഉമ്മറത്തേക്ക് വന്നു. കുറ്റി മുടിയുള്ള മേക്കപ്പ് ഇല്ലാത്ത മുഖം. ഞാൻ അദ്ദേഹത്തെ നോക്കി, അദ്ദേഹം എന്നെയും. എന്താ എന്നൊരു ചോദ്യം. എൻ്റെ മനസ്സ് ശൂന്യമായിരുന്നു. സാർ ഒരു ജോലി എന്ന് ഞാൻ വിക്കി വിക്കി പറഞ്ഞു. ശരി ശരി ഇപ്പോൾ തന്നെ ഷൂട്ടിങ്ങിന് വൈകി പിന്നെ വരൂ എന്ന് പറഞ്ഞുകൊണ്ട് അദ്ദേഹം കാറിനടുത്തേക്ക് നടന്നു.

അപ്പോൾ ഗേറ്റ് കടന്ന് ഒരു സ്ത്രീ കുഞ്ഞിനെ ഒക്കത്തെടുത്ത് കൊണ്ട് അകത്തേക്ക് നടന്നു വരുന്നു. ആ സ്ത്രീയെ കണ്ട നസീർ അവരോട് പറയുന്നു നിങ്ങൾ ഇങ്ങനെ കൂടെക്കൂടെ വന്നാൽ എങ്ങനാ.. എന്നിട്ട് തിരിഞ്ഞ് വീടിൻ്റെ അകത്തേക്ക് നോക്കി പറഞ്ഞു കുറുപ്പേ ഒരു നൂറ് രൂപ ഇവർക്ക് കൊടുക്കൂ. നൂറ് രൂപ അന്ന് വലിയൊരു തൂകയായിരുന്നു, ഡ്രൈവർ കാർ സ്റ്റാർട്ട് ചെയ്ത് നസീർ പോയി. ഞാനും ഇറങ്ങി നടന്നു. ആര് വീട്ടിൽ വന്ന് പൈസ ചോദിച്ചാലും നസീർ വെറും കൈയ്യോടെ മടക്കി അയക്കാറില്ല എന്ന് ഞാൻ കേട്ടിരുന്നു. എനിക്ക് അന്ന് ഒരു രൂപ കിട്ടിയിരുന്നെങ്കിൽ അന്നത്തെ പ്രാതലും ഉച്ചഭക്ഷണവും രാത്രി അത്താഴവും കഴിക്കാമായിരുന്നു. പക്ഷെ എനിക്ക് ആരോടും പൈസ ചോദിക്കാൻ കഴിയില്ലായിരുന്നു. നടന്നു പോകുന്ന ഇടവഴിയിൽ കശുവണ്ടി കണ്ടാൽ അതെടുത്ത് ഉടമസ്ഥൻ്റെ പറമ്പിലേക്ക് ഇടുന്നതാണ് ശീലം. അങ്ങനെയാണ് അച്ഛൻ പഠിപ്പിച്ചിരുന്നത്.

ഒരിക്കൽ രാജശ്രീ പിക്ചേഴ്സ് ഉടമ ആർ.കെ.നായരുടെ വീട്ടിൽ രാവിലെ പോയി കോളിങ്ങ് ബെൽ അമർത്തി. അദ്ദേഹത്തിൻ്റെ ഫോട്ടോ സിനിമ മാസികയിൽ കണ്ട് പരിചയം ഉണ്ടായിരുന്നു. അദ്ദേഹം തന്നെയാണ് വാതിൽ തുറന്നത്. ങും എന്താ? സർ ഒരു ജോലി... ജോലി ചോദിച്ച് വീട്ടിലാണോ വരുന്നത് എന്ന് ക്ഷുഭിതനായ അദ്ദേഹം എന്നോട് പൊട്ടിത്തെറിച്ചുകൊണ്ട് വാതിൽ കൊട്ടിയടച്ചു. ഞാൻ ആകെയങ്ങ് ഇല്ലാണ്ടായി പോയി. കോടംബാക്കത്തേക്ക് തിരിച്ചു പോയി പരിചയമുള്ള സൈക്കിൾ കടയിൽ നിന്ന് ഒരു സൈക്കിൾ വാടകക്കെടുത്ത് ഒരൊറ്റ യാത്രയാണ്. ഇന്ത്യയുടെ ഒരു റോഡ് മാപ്പ് കൈയിൽ കരുതിയിരുന്നു. കോടംബാക്കം മുതൽ ഹിമാലയം വരെ സൈക്കിളിൽ ഒരു സാഹസിക യാത്ര. അപ്പോൾ അത് മാത്രമേ മനസ്സിൽ ഉണ്ടായിരുന്നുള്ളൂ. വഴിയിൽ ആരൊക്കെയോ പൈസ തന്നു, ആഹാരം തന്നു, രാത്രിയിൽ ഉറങ്ങാൻ കിടക്കയും വിരിപ്പും തന്നു. പക്ഷെ ഹൈദരാബാദ് വഴി പോകാൻ ഉദ്ദേശിച്ച ഞാൻ ആന്ധ്രയിലെ കടപ്പയിലാണ് എത്തിയത്. ഉഷ്ണകാലമായിരുന്നു. കടപ്പ എത്തിയപ്പോൾ ചൂട് താങ്ങാൻ കഴിഞ്ഞില്ല. ഒരടി മുന്നോട്ട് സൈക്കിൾ ചവിട്ടാൻ കഴിയാത്ത അവസ്ഥ. അവിടെയും ഞാൻ പരാജയപ്പെടുകയായിരുന്നു. വാടക സൈക്കിൾ കടപ്പ റെയിൽവേ സ്റ്റേഷനിൽ ഉപേക്ഷിച്ച് അടുത്ത വണ്ടിക്ക് മദ്രാസിലേക്ക് മടങ്ങി.

അനുഭവങ്ങൾ പാളിച്ചകൾ - 1

noreply@blogger.com (K.P.Sukumaran) — Thu, 15 Jun 2023 09:21:00 +0000

അനുഭവങ്ങൾ പാളിച്ചകൾ - 3

noreply@blogger.com (K.P.Sukumaran) — Tue, 06 Jun 2023 06:01:00 +0000

ഈ ഭൂമി എത്ര മനോഹരമാണെന്നോ, അതിനേക്കാൾ മനോഹരമാണ് ജീവിതവും. എൻ്റെ സമയം തീരുകയാണ് എന്ന് അറിയുമ്പോഴും ജീവിതം ഇപ്പോഴും എന്നെ കൊതിപ്പിക്കുകയാണ്. ജീവിതത്തിൻ്റെ മനോഹാരിത അനുഭവിക്കണമെങ്കിൽ നാം നമ്മുടെ മനസ്സിനെ അതിനായി ട്രെയിൻ ചെയ്യിപ്പിക്കണം. പലർക്കും ആ കല അറിയില്ല. കഴിഞ്ഞ ഏതാനും ദിവസം ഞാൻ നാട്ടിൽ ഉണ്ടായിരുന്നു. വാടകക്കാർ ഒഴിഞ്ഞു പോയ സ്വന്തം വീട്ടിൽ കുടുംബസമേതം താമസിച്ചു. ആദ്യത്തെ രണ്ട് മൂന്ന് ദിവസം വീട് വൃത്തിയാക്കലായിരുന്നു ജോലി. അതെനിക്കൊരു ഹരമുള്ള പണിയാണ്. എല്ലാം ഒന്ന് വൃത്തിയാക്കുക എന്നിട്ട് അതിൻ്റെ ഭംഗി കുറച്ച് നേരം ആസ്വദിക്കുക. അതൊരു ലഹരി കൂടിയാണെനിക്ക്. വീട് ചെറുതോ വലുതോ എന്നതല്ല, നമ്മുടെ വീടല്ലേ അതൊന്ന് വൃത്തിയാക്കി എല്ലാം അടുക്കി വെച്ച് അനാവശ്യമായതെല്ലാം കളഞ്ഞ് ഉള്ള സ്പെയിസ് ഫ്രീ ആക്കിയാൽ വീട് തന്നെയാണ് ശരിക്കുള്ള സ്വർഗ്ഗം.

കുറെയേറെ പഴയ സുഹൃത്തുക്കളെ കണ്ട് ബന്ധം പുതുക്കി. അവർ പറയുന്നത് കേട്ടു. നമ്മൾ മറ്റുള്ളവരെ കേൾക്കുകയാണ് വേണ്ടത്. അതൊരു സംഭാഷണകലയാണ്. നമുക്ക് പറയാനുള്ളത് മറ്റുള്ളവരിൽ അടിച്ചേൽപ്പിച്ച് അവരെ കേൾക്കാൻ നിർബ്ബന്ധിക്കരുത്. അവരെ കേൾക്കുക പിന്നെ അവർ തയ്യാറെണെങ്കിൽ നമുക്ക് പറയാനുള്ളത് പറയുക എന്നതാണ് നല്ല സംഭാഷണ മര്യാദ. നമ്മൾ നമ്മുടെ പരിഭവവും പരാതിയും ആരോടും പറയരുത്. അത് പോലെ ബന്ധുക്കളെയും സുഹൃത്തുക്കളെയും അങ്ങോട്ട് പോയി കാണുകയാണ് വേണ്ടത്. എൻ്റെ അടുത്തേക്ക് ആരും വരുന്നില്ലല്ലോ, എന്നെ കാണാൻ ആരും വരുന്നില്ലല്ലോ എന്ന പരിഭവം മനസ്സിൽ സൂക്ഷിക്കുകയോ അത് ബന്ധുക്കളോടോ സുഹൃത്തുക്കളോടോ പറയുന്നതോ നല്ല സംസ്ക്കാരം അല്ല. നമ്മൾ അങ്ങോട്ട് പോയി കാണുന്നതും അവരുടെ ആതിഥ്യം സ്വീകരിക്കുന്നതും നമുക്കും അവർക്കും ആനന്ദവും സന്തോഷവും തരുന്ന കാര്യമാണ്. ഈ ഒരു സന്തോഷം അനുഭവിക്കുന്നതിന് പകരം അവനവൻ്റെ വീട്ടിൽ അലസമായി ഇരുന്നിട്ട് ഒരുത്തനും ഒരുത്തിയും ഇങ്ങോട്ട് വരുന്നില്ലല്ലോ എന്ന് പരിഭവിക്കുന്നതിൽ ഒരർത്ഥവും ഇല്ല. ജീവിതത്തിൻ്റെ സൗഭാഗ്യങ്ങൾ അനുഭവിക്കാൻ നാം നമ്മുടെ പല ശീലങ്ങളും മാറ്റിയാൽ നന്നായിരിക്കും.

പിണറായിയിലും അണ്ടലൂരും ഒക്കെയുള്ള ബന്ധുവീടുകൾ സന്ദർശിച്ചു. അവർക്കൊക്കെ എന്ത് സന്തോഷം ആയെന്നോ. അവരത് പറയുകയും ചെയ്തു വന്നതിൽ സന്തോഷം എന്ന്. അത് കേൾക്കുമ്പോൾ നമുക്കും സന്തോഷം. പിണറായിയിലെ ബന്ധുവീട്ടിൽ പോയപ്പോൾ രാവിലത്തെ ബ്രേക്ക് ഫാസ്റ്റും ഉച്ചക്ക് പ്രഥമൻ (പായസം) അടക്കമുള്ള വിഭവസമൃദ്ധമായ ലഞ്ചും കഴിപ്പിച്ചിട്ടേ അവർ വിട്ടുള്ളൂ. പണ്ടൊക്കെ ഈ സംസ്കാരം നാട്ടിൽ ഉണ്ടായിരുന്നു. ഇടക്കിടെ ബന്ധുവീടുകളിൽ പോവുക, അവിടെ താമസിക്കുക.അതൊക്കെ ഒരു കാലം, എന്തൊരു രസം ആയിരുന്നെന്നോ. ഇന്ന് ആളുകൾ ജീവിയ്ക്കുന്നത് മൊബൈലിലാണ്. ഒരുമാതിരി വെർച്വൽ ജീവിതം. റീയൽ ലൈഫ് ആളുകൾക്ക് അന്യമാവുകയാണ്. യഥാർത്ഥ ജീവിതത്തിൻ്റെ സൗകുമാര്യവും നിർവൃതിയും നഷ്ടപ്പെടുത്തുന്ന തലമുറ എന്തൊരു കഷ്ടമാണ്.

നമ്മൾ മൊബൈലിലോ സോഷ്യൽ മീഡിയയിലോ അഡിക്റ്റ് ആകരുത്. അങ്ങനെ ജീവിച്ചിട്ട് എന്ത് കാര്യം. ജീവിതത്തിന് ശരിക്ക് പറഞ്ഞാൽ പ്രത്യേകിച്ച് അർത്ഥമോ ഉദ്ദേശമോ ഒന്നും ഇല്ല. പക്ഷെ നമ്മൾ ഈ ജീവിതത്തെ അനുഭവിച്ചും ആസ്വദിച്ചും സുഖിച്ചും സന്തോഷിച്ചും തീർക്കുകയാണ് വേണ്ടത്. അതൊക്കെ മൊബൈലിൽ കിട്ടില്ല. യഥാർത്ഥ ജീവിതത്തിൽ നീന്തിത്തുടിക്കണം. വീട്, കുടുംബം, ബന്ധുക്കൾ, സുഹൃത്തുക്കൾ, സമൂഹം ഇതൊക്കെ നമുക്ക് ആനന്ദവും നിർവൃതിയും നൽകുന്ന ഘടകങ്ങളാണ്. പക്ഷെ ഒരു കണ്ടീഷൻ ഉണ്ട്. പോസിറ്റീവ് മാത്രമേ കാണാവൂ, നമ്മളും പോസിറ്റീവ് മാത്രമേ പ്രസരിപ്പിക്കാവൂ. നെഗറ്റീവ് കാണരുത്, നെഗറ്റീവ് പ്രസരിപ്പിക്കരുത്. അപ്പോൾ നിങ്ങൾക്ക് ഈ ജീവിതവും മനുഷ്യരും ഇത്രമേൽ സുന്ദരമായിരുന്നോ എന്ന് തോന്നും. ജീവിതം നിങ്ങളെ കൊതിപ്പിക്കും. മനസ്സിനെ പോസിറ്റീവായി നിലനിർത്തുന്നത് എളുപ്പമല്ല, നന്നായി മാനസികവ്യായാമം ചെയ്യേണ്ടി വരും.

നാട്ടിലെ വീട്ടിൽ ഞാൻ കമ്പ്യൂട്ടറും കേരള വിഷൻ്റെ ബ്രോഡ്ബാൻഡ് ഇൻ്റർനെറ്റും സെറ്റ് ചെയ്ത് വെച്ചു, എനിക്ക് ഇവിടെ ബാംഗ്ലൂരിലും കമ്പ്യൂട്ടറും രണ്ട് സ്മാർട്ട് ഫോണും എപ്പോഴും കൈവശം ഉണ്ട്. ഈ ഒരു ഉപകരണവും ഇൻ്റർനെറ്റും അതിൻ്റെ സാധ്യതകളും ഉപയോഗപ്പെടുത്താനും അനുഭവിക്കാനും കഴിയും എന്ന് സ്വപ്നം പോലും കണ്ടതല്ലല്ലൊ. ചെറുപ്പത്തിൽ അനുഭവിച്ച ദാരിദ്ര്യവും വിശപ്പും എന്നും ഓർക്കാറുണ്ട്. മദ്രാസ് തെരുവുകളിൽ അലഞ്ഞ് നടന്നപ്പോൾ ഏതോ ഒരു പീടികത്തിണ്ണയിൽ വിശന്ന് ബോധം കെട്ട് മയങ്ങി വീണപ്പോൾ ആരോ വായയിൽ വെച്ച് തന്ന ബന്നിലും വാഴപ്പഴത്തിലും ജീവിതത്തിലേക്ക് ഉണർന്നെഴുന്നേറ്റ കൗമാരകാലവും എന്നും ഓർക്കുന്നു. ഇന്ന് വലുതായിട്ടൊന്നും നേടിയിട്ടില്ലെങ്കിലും ജീവിതത്തിൽ തൃപ്തിയാണ്. ഇത്രയെങ്കിലും അനുഭവിക്കാൻ കഴിഞ്ഞല്ലോ.

(തുടരും)

എന്താണ് മതം?

noreply@blogger.com (K.P.Sukumaran) — Mon, 05 Jun 2023 04:18:00 +0000

സെമിറ്റിക് മതങ്ങൾ എന്ന് പറഞ്ഞ് പ്രത്യേക മതങ്ങൾ ഇല്ല. അങ്ങനെ പറയുമ്പോൾ സെമിറ്റിക്കും അല്ലാത്തതുമായ മതങ്ങൾ ഉണ്ട് എന്ന തെറ്റിദ്ധാരണ ഉണ്ടാകും. സെമിറ്റിക് എന്ന് പറഞ്ഞാൽ ഹീബ്രു, അറബിക് , അറാമിക് മുതലായ ഭാഷകളെ പരാമർശിക്കാൻ ഉപയോഗിക്കുന്ന പദമാണ്. ഈ ഭാഷകൾ സംസാരിക്കുന്ന പ്രദേശങ്ങളിൽ രൂപം കൊണ്ട മതങ്ങളെ സെമിറ്റിക് മതങ്ങൾ എന്ന് പറയുന്നു എന്നല്ലാതെ ആ മതങ്ങൾക്ക് വേറെ പ്രത്യേകത ഒന്നുമില്ല. പലരും ഹിന്ദുവും ഒരു മതം ആണ് എന്ന് വരുത്തിത്തീർക്കാനാണ് സെമിറ്റിക് മതങ്ങൾ എന്ന വിശേഷണം ഉപയോഗിക്കുന്നത്.

ഏത് മതവും മതം തന്നെയാണ്. സെമിറ്റിക് ഭാഷകൾ സംസാരിക്കുന്ന ആഫ്രോ ഏഷ്യൻ രാജ്യങ്ങളിൽ രൂപം കൊണ്ട ജൂത-ക്രിസ്ത്യൻ-മുസ്ലീം മതങ്ങൾ ആയാലും ഇന്ത്യയിൽ രൂപം കൊണ്ട സിഖ്-ബൗദ്ധ-ജൈന മതങ്ങൾ ആയാലും എല്ലാം മതങ്ങൾ തന്നെയാണ്. ഒരു മതം ഉണ്ടാകണമെങ്കിൽ ഒരു സിദ്ധനെയും ഒരു ഗ്രന്ഥത്തെയും മുൻ നിർത്തി ഒരു കൂട്ടം ആൾക്കാരെ ചേർത്ത് രൂപീകരിക്കപ്പെടണം. അല്ലാതെ തനിയെ മതം ഉണ്ടാകില്ല. സിദ്ധൻ എന്ന് പറഞ്ഞാൽ ദൂതൻ എന്നോ പ്രവാചകൻ എന്നോ ഒക്കെ വിശേഷിപ്പിക്കപ്പെടാം. ഏത് മതത്തിനും ഇപ്രകാരം ഒരേയൊരു സിദ്ധൻ അല്ലെങ്കിൽ ഗുരു അതുമല്ലെങ്കിൽ ഒരു ദൂതനോ പ്രവാചകനോ ഉണ്ടാകും. അത് പോലെ ഒരേയൊരു വിശുദ്ധ ഗ്രന്ഥവും ഉണ്ടാകും. വിശ്വാസികൾക്ക് ആ ഒരൊറ്റ ദൂതനും ആ ഒരൊറ്റ ഗ്രന്ഥവും പാവനവും അലംഘനീയവും  ആയിരിക്കും. ഇതൊക്കെ ഉള്ള ഒരു വിശ്വാസി സമൂഹത്തെയാണ് മതം എന്ന് പറയുന്നത്.

ഹിന്ദു എന്നൊരു മതം ആരെങ്കിലും രൂപീകരിച്ചിരുന്നോ? ഹിന്ദുക്കൾക്ക് ഒരേയൊരു സിദ്ധനോ ഗുരുവോ ദൂതനോ പ്രവാചകനോ ഉണ്ടോ? ഹിന്ദുക്കൾക്ക് ഒരേയൊരു വിശുദ്ധഗ്രന്ഥം ഉണ്ടോ? ഇല്ല. ഇല്ലേയില്ല. ഹിന്ദുക്കൾ എന്നാൽ ഒരു പൊതുവായ പേരാണ്. ആദിവാസികൾ തൊട്ട് അനേകം ജാതി ഉപജാതി വിഭാഗങ്ങളെ മൊത്തത്തിൽ പറയുന്ന പേരാണ് ഹിന്ദുക്കൾ എന്നത്. അതൊരു മതം ആണെന്ന് ഒരു തരത്തിലും പറയാൻ കഴിയില്ല. ലോകത്ത് പല മതങ്ങൾ രൂപീകരിക്കപ്പെട്ടു. ഇന്ത്യയിലും മതങ്ങൾ ഉണ്ടാക്കപ്പെട്ടു. അത്തരം മതങ്ങളിൽ കുറേ ഹിന്ദുക്കൾ ചേർന്നു. മഹാഭൂരിപക്ഷം ഹിന്ദുക്കളും ഒരു മതത്തിലും ചേരാതെ അവരവരുടെ ജാതികളിൽ ഉറച്ചു നിന്നു. ആ ജാതി സമൂഹങ്ങളിൽ പെടുന്ന മൊത്തം ജനങ്ങളെയാണ് ഹിന്ദുക്കൾ എന്ന് പറയുന്നത്. 

ഇനി മതങ്ങളുടെ സിദ്ധന്മാരെയും ദൂതന്മാരെയും പ്രവാചകന്മാരെയും നോക്കാം. അതൊക്കെ വെറും അവകാശവാദങ്ങൾ മാത്രമാണ്. അത്ഭുത സിദ്ധിയുള്ള ഒരു മനുഷ്യക്കുഞ്ഞിനെയും ഒരു സ്ത്രീയും പ്രസവിച്ചിട്ടില്ല. സ്ത്രീയും പുരുഷനും ഇണചേർന്ന് ഉണ്ടാകുന്ന ഭ്രൂണം വളർന്നാണ് ഒരു ശിശു ജനിക്കുന്നത്, ആ ശിശു ആണ് ഒരു മനുഷ്യവ്യക്തിയായി വളരുന്നത്. അങ്ങനെയുള്ള ഒരു വ്യക്തിയിലും സിദ്ധത്വമോ ദിവ്യത്വമോ ഉണ്ടാകില്ല. ഒരു അത്ഭുത മനുഷ്യനും ഭൂമിയിൽ ജനിച്ചിട്ടില്ല ജനിക്കാനും പോകുന്നില്ല. അതുകൊണ്ട് മതങ്ങളുടെ അവകാശവാദങ്ങൾ മുഴുവനും പൊള്ളയാണ് നുണകളാണ്. 

ഇന്നത്തെ കാലത്ത് ആളുകളുടെ കൂട്ടായ്മകളിൽ രാഷ്ട്രീയപാർട്ടികൾ ഉണ്ടാക്കുന്നത് പോലെ പണ്ട് കാലത്ത് മതങ്ങൾ ഉണ്ടാക്കി എന്നല്ലാതെ മതങ്ങൾക്കോ മതവിശ്വാസങ്ങൾക്കോ ഒരു പാവനത്വവും ഇല്ല. മതം ഉണ്ടാക്കുന്ന പണിയും മതങ്ങൾ തന്നെയും കാലഹരണപ്പെട്ടു കഴിഞ്ഞതാണ്. ഇനി ആരും മതം ഉണ്ടാക്കില്ല. ഇന്നത്തെ ജനാധിപത്യ യുഗത്തിൽ മനുഷ്യർക്ക് മതം എന്ന നുണക്കൂട്ടായ്മകൾ ആവശ്യവും ഇല്ല. മനുഷ്യർ മനുഷ്യർ എന്ന വിശാല കൂട്ടായ്മയുടെ ഭാഗമായാൽ മതി.

നമ്മൾ സഞ്ചരിക്കുന്നത് ഭാവിയെ നോക്കിയിട്ടാണ്. അതുകൊണ്ട് ഭാവിയിൽ പ്രസക്തമാകുന്ന ചിന്തകളും കാഴ്ചപ്പാടുകളും ദർശനങ്ങളുമാണ് നമുക്ക് വേണ്ടത്. ആർട്ടിഫിഷ്യൽ ഇൻ്റലിജൻസിൻ്റെ കാലത്തിൽ ജീവിച്ചുകൊണ്ട് അമ്പിൻ്റെയും വില്ലിൻ്റെയും ഭൂതകാലത്തിലേക്ക് തിരിഞ്ഞു നടന്നത് കൊണ്ട് ഒരു നേട്ടവും ഇല്ല. വർത്തമാന കാലത്തെ സത്യങ്ങളെ മനസ്സിലാക്കി ഭാവിയുടെ വെല്ലുവിളികളെ ഏറ്റെടുക്കാൻ ബുദ്ധിയെയും വിവേകത്തെയും സജ്ജമാക്കുകയാണ് വേണ്ടത്.