அஞ்சறைப் பெட்டி

சிதறல்கள் -13

2012-01-02T22:16:00.001+05:30

பதினைந்தாயிரத்தில் ஒரு வீடு கட்டி குடி போகலாமா ? கிண்டலாக சிரிக்காதீர்கள். நடைமுறையில் வருவதற்கு சாத்தியங்கள் இருக்கின்றன. 300 டாலர் வீடு என்ர ஒரு கனவை இந்தியாவில் பிறந்து பின் Tuck school of businessஇல் மேலாண்மைத் துறை பேராசிரியராக இருக்கும் விஜய் கோவிந்தராஜன். ஏறக்குறைய ஒன்றரை வருடங்களுக்கு முன்னர் ஒரு கனவாக அவர் முன் வைத்த இந்த திட்டம் பின்னர் படிப்படியாக நனவாகும் முயற்சியை நோக்கி நகர்ந்திருக்கிறது.

முதலில் ஒரு போட்டி அறிவித்து 15000 ரூபாய்க்குள் கட்டப்படும் வீட்டின் வடிவத்தை பலரையும் முன்மொழியச் செய்தனர். பின்னர் அதிலிருந்து வெற்றியாளர்களைத் தேர்ந்தெடுத்து உள்ளர்கள். அப்படித் தேர்ந்தெடுக்கப்பட்டவர்கள் களப் பணியில் ஈடுபடுவார்கள். இந்தியாவில், இக்களப்பணிக்கு முன்னோட்டமாக கள ஆய்வில் ஈடுபட்டுள்ளார்கள். அவர்கள் திரட்டிய தகவல்கள் இந்த சுட்டியில் இருக்கின்றது. சமயம் கிடைக்கும் போது படித்துப் பாருங்கள். அதில் குடும்பம் முழுவதும் இரவானால் மது குடிப்பது சாதாரண விஷயம் என்று தெரிய வந்திருப்பது, மிகச் சாதாரண தகவலே. அதாவது, அதிகப் படிப்பறிவு இல்லாத, கழிப்பிட வசதி கூட இல்லாத, மிகக் குறைந்த குடும்ப வருமானமே கொண்ட குடும்பங்களின் வாழ்விடத் தேவையை எப்படி பூர்த்தி செய்வது என்ற கேள்விக்கு பதிலாகத் தோன்றிய சிந்தனையைத் தான் விஜய் முன் வைத்துள்ளார்.

பல வருடங்களுக்கு முன்னர், சி கே பிரஹலாத் முன்வைத்த, பொருளாதார தட்டில் கீழ் மட்டத்தில் இருக்கும் சமுகத்திற்கான தீர்வின் நீட்சியாகத் தான் நான் இந்த 300 டாலர் வீடு கனவைப் பார்க்கிறேன். எனக்குத் தெரிந்த வரை எதிர்கால சந்தை என்பது இந்த சமுகத்திற்கான தீர்வை உருவாக்குவதில் தான் இருக்கும். வீடு என்றில்லை, இந்த தட்டு மக்களுக்குத் தேவையான, உணவு, உடை மற்றும் அடிப்படை வசதிகளுள் ஒன்றாக மாறி வரும் தகவல் தொடர்புத் தேவைகள், விலை குறைந்த அதே சமயம் தரமான தீர்வுகளால் பூர்த்தி செய்யப்பட வேண்டியதற்கான சூழல் வெகு வேகமாக உருவாகிக் கொண்டிருக்கின்றது. இந்தத் தட்டு மக்களுக்கான சேவை மற்றும் பண்டங்களை தயாரிப்பதற்கான மிகச் சிறந்த சூழல் இந்தியாவில் இருக்கிறது.

சமயம் கிடைக்கும் போது, 300 டாலர் வீடு திட்டத்தைப் பாருங்கள்.சரி, மின்சாரமே இல்லாமல் வெளிச்சம் தயாரிக்கும் முறையைப் பற்றித் தெரியுமா உங்களுக்கு. இந்த வீடியோவைப் பாருங்கள். இந்தத் தீர்வு, 300 டாலர் வீட்டிற்குத் தேவையான வெளிச்ச தேவைகளைத் தீர்க்கும் சஞ்சிவி.

தொடர்புடைய வாசிப்பு:- சி கே பிரஹலாத் இறந்த போது அவருக்கு அஞ்சலியாக நான் சொல்வனத்தில் எழுதிய கட்டுரை.

-oOo-

சமிபத்தில் நான் பார்த்ததில் என்னை மிகவும் கவர்ந்த வலைதளம் ஒன்று இருக்கிறது. வெறும் 5 டாலருக்கு ஏதேனும் ஒரு சேவையை வழங்குவதற்கு மக்கள் தயாராக இருக்கிறார்கள். இந்த வலைத் தளத்தைப் பாருங்கள். ஐந்து டாலருக்கு கவிதை எழுதித் தருவதற்கு ஒருவர் தயார் (தமிழ் கூறும் நல்லுலகம் உஷார்). ஆனால், இந்த சேவைகளிலேயே எனக்கு மிகவும் பிடித்தது, ஒருவர் ஐந்து டாலர் கொடுத்தால் உங்களுக்கு ஆதரவாக பிரச்சாரம் செய்வாராம் (250 ரூபாய் செலவில், வெள்ளைக்காரன் பிரச்சாரம் செய்தால் மக்கள் வேண்டாம் என்று சொல்வார்களா என்ன ?) இன்னொருவர், ஐந்து டாலருக்கு கணக்கு வீட்டுப்பாடம் செய்து தருவாரம். என்னால் ஐந்து டாலருக்கு என்ன செய்ய முடியும் என்று யோசித்துப் பார்த்தேன் - பரவாயில்லை மூன்று நான்கு விஷயங்கள் தேருகின்றன. என்ன என்று கேட்கிறீர்களா ? ஐந்து டாலர் தந்தால் சொல்கிறேன் :-)

சிதறல்கள் - 12

2012-01-01T00:06:00.001+05:30

இந்த வருடத்தின் கடைசிப் பதிவு.

இந்த வருடம் எனக்கு நிறைவாகவே அமைந்தது. புதிய முயற்சிகள் திருப்தியாக முடிந்தன. எனக்கு நான் இட்டுக்கொண்ட் இலக்குகளை முடித்தேன். ஆனால் 2011 என்னை வலுவாகப் பிழிந்து எடுத்தது. மூச்சு விடக்கூட நேரமில்லை. திருப்தி. கடவுளுக்கு நன்றி.

இந்த வருடத்தில் நான் சிதறல்கள் எழுத ஆரம்பித்தேன் - ஆறு மாதத்தில் இது 12 வது சிதறல். நான் கொஞ்சம் கவனம் செலுத்த வேண்டும் என நினைப்பது இந்த எழுத்தில் தான். உண்மையில் நான் இதை நேரம் கிடைக்கும் போது செய்கிறேன். இதற்காக இதுவரை தனியாக நேரத்தை ஒதுக்கிச் செய்யவில்லை. யாராவது குரல் வளையை நெரித்தால் தனியாக நேரத்தை ஒதுக்குவேன் அவ்வளவே. இதை நான் வரும் வருடத்தில் மாற்ற நினைக்கிறேன். தினமும் 60 நிமிட படிப்பும் 30 நிமிட எழுத்தும் கட்டாயம் வேண்டும் என நேரத்தை ஒதுக்கிக் கொள்ள வேண்டும். பார்ப்போம் எவ்வளவு தூரம் செல்கிறதென்று. இதுவரை நான் எழுதிய வருடங்களில், அதிகமாக எழுதியது 2012இல் தான் என்று அமைந்தால் சந்தோஷம். (இப்படி முதலிலேயே சொல்லிவிட்டால், நாளை யாராவது கேலி செய்வார்களோ என்ற பயத்திலாவது கொஞ்சம் ஓடலாம்)

2011இல் நான் செய்ததில் உருப்படியான விஷயம் என்று நான் நினைப்பது, (with due respect to Twitter and its fans) ட்விட்டரில் வெறும் பார்வையாளனாக என்னை நான் மாற்றிக் கொண்டது. ட்விட்டர், செய்தியோடைகளைப் போல முக்கியமான விஷயங்களை அறிந்துக் கொள்ளவும், பகிரவும் அற்புதமான ஊடகம். ஆனால், அர்த்தமேயில்லாத அக்கப்போர்கள் கொஞ்சம் அதிகம். பல சமயங்களில் சம்பந்தமேயில்லாத விஷயங்கள் தான் என் டைம்லைனில் அதிகம் தென்பட்டன. இப்போதைக்கு நான் ட்விட்டரில் செலவிடும் நேரம் ஒரு நாளைக்கு அதிக பட்சம் 10 நிமிடம். அதிலேயே, எனக்குத் தேவையான விஷயங்களை பெரும்பாலும் அள்ளிவிட முடிகிறது.

-oOo-

அனைவருக்கும் இனிய புத்தாண்டு நல்வாழ்த்துகள் ! பிறக்கும் வருடம் பொலிவாக அமைய பிரார்த்தனை.

மனதிற்குக் கட்டளை
-----------------------------
பேயா யுழலுஞ் சிறுமனமே !
பேணா யென்சொல் இன்றுமுதல்
நீயா யொன்றும் நாடாதே
நினது தலைவன் யானேகாண்;
தாயாம் சக்தி தாளினிலும்
தரும மெனயான் குறிப்பதிலும்
ஓயா தேநின் றுழைத்திடுவாய்
உரைத்தேன் அடங்கி உய்யுதியால்

- மஹாகவி சுப்ரமணிய பாரதி

சிதறல்கள் - 11

2011-12-19T00:33:00.000+05:30

என்னுடைய கணிப்பொறியை தூசி தட்டிக் கொண்டிருந்த போது, பல வருடங்களுக்கு முன் நான் எழுதிய இரண்டு கவிதைகள் கண்ணில் பட்டன. இவற்றை எங்கும் பதிவு செய்ததாக நினைவில்லை (மரத்தடியில் எழுதியிருக்கலாம்)....எனவே இங்கு.

சதா இரைந்து
கொண்டிருக்கும் நிசப்தம்
பூச்சிகளற்ற சுவரில்
இலக்கின்றி அலையும் பல்லி
என் தனிமையில்
சிதைவின்றி நீளும் அமைதி
அறையை மெல்ல
நிறைக்கத் துவங்கும் வெறுமை
தடதடவென நீ கதவிடித்ததும்
பருத்து வரும் நீர்க்குமிழி
வெடித்தது போலிருந்ததெனக்கு
இப்போது வராமலிருந்துக்கலாம்
நீ !

_@@_

திசைகாட்டியை ஒட்டி
நீளமாக நால் புறமும் பிரிந்து
சென்ற சாலையின் இரு மருங்கிலும்
தேவதாரு மரங்கள்.
மண்வாசனை கவியும் பூமியுடன்
மேகம் நனைத்துப் போட்ட நாகலிங்க
பூக்களால் அழகுற்றிருந்தது சாலை.
அங்கொன்றும் இங்கொன்றுமாய்
எண்ணிக்கை இடப்பட்ட தெண்ணை.
புதிதாய் தோன்றிய குட்டையில்
காகிதக் கப்பல்கள் - கவிழ்ந்திருந்தன
மாலுமிகளில்லாததால்.
எதோ ஒரு மூளையில்
வானவில் தோன்றியிருக்கக் கூடும்
பளிச்சென்றோ மங்கலாகவோ
நிர்மலமான வானில் இரவின்
வருகையை வழி நெடுக
கூவிக்கொண்டே பறந்திருந்தது ஊர்குருவி
ஜன்னலோர பயணம் முடிந்தும் சலனமற்ற
அமைதியில் லயித்திருந்தது மனம்
இறுதிவரை பக்கத்து இருக்கைக்காரன்
முகத்தை கவனிக்கவில்லை என்று
தோன்றும் வரை

_@@_

வொய் திஸ் கொலவெறி பாட்டைப் பற்றி மக்கள் கொஞ்சம் அதிகமாகத் தான் அலட்டிக் கொள்கிறார்கள் என்று தோன்றுகிறது. அதாவது, இதெல்லாம் ஒரு பாட்டா என கொதிப்பவர்களைப் பற்றிச் சொல்கிறேன். இன்றைய இளைஞனுக்காகப் பாடப்பட்ட பாட்டு. இந்தப் பாடல் அவர்களின் மனநிலையை சொல்லும் ஒரு சாம்பிள் அவ்வளவே. என் அவதானிப்பின் படி, இன்றைய இளைஞர்கள் ஒரே ஒரு ஆளுமையாக மட்டுமே இருப்பதில்லை. பல வடிவ மாறுதலுக்குத் தன்னை அவர்கள் உட்படுத்திக் கொள்கிறார்கள். இன்றைய இளைஞனிடம், ஒரு முழுமையான கேப்பிடலிஸ்டோ, கம்யூனிஸ்டோ, நாத்திகனோ, ஆத்திகனோ, நல்லவனோ, கெட்டவனோ, காணக்கிடைப்பதில்லை. அவியலாக இருக்கிறார்கள். அவர்களின் மனதின் சிந்தனையோட்டமும் அப்படியே இருக்கிறது. சூழ்நிலைக்கு ஏற்றபடி தன்னை தயார் படுத்திக் கொள்வதற்கு அவர்கள் தயங்குவதில்லை. சர்வைவல் ஸ்ட்ராடஜி. 10 வருடத்துக்கு முந்தைய விஷயத்தைக் காட்டிலும் இன்றைய விஷயங்கள், மிகவும் மாறியிருக்கின்றன என்பது என் கருத்து.

80களில் இருந்த விஷயங்கள் 70களில் இருந்த விஷயத்தைக் காட்டிலும் முற்றிலுமாக மாறியிருக்காது. ஆனால் 90களுக்குப் பிறகு இந்த மாற்றம் அதிவேகமான பயணித்துக் கொண்டிருக்கின்றது. இன்றைய இளைஞர்கள், பல திசைகளிலிருந்து வரும் சிந்தனைகளை ஏற்று அதற்கு ஏற்றபடி தன்னை வெளிப்படுத்திக் கொள்கிறார்கள். அவர்களுக்கு கதவுகள், ஜன்னல்கள் எல்லாம் திறந்தே இருக்கின்றன. நகர்புறத்து இளைஞன் மேற்சொன்ன சிந்தனை அமைப்பில் இருந்தாலும், சமுகத்தின் ஒரு பகுதி இந்த வேகத்தில் மாறாமல் தேங்கியிருக்கின்றனர். அந்த தேக்கம் சரியா தவறா என்பது விவாதப் பொருளே அல்ல. அது தான் இயற்கை - அதை நாம் ஏற்றுக் கொள்ளவேண்டும்.

என் கவலையெல்லாம், இப்படித் தேங்கிப் போனவர்கள், சமுக ஓட்டத்தோடு ஒன்ற இயலாமல், சமுகத்தின் மாற்று சக்தியாகவும் இல்லாமல், திரிசங்கு சொர்கத்தில் விடப்பட்டுவிடுவார்களோ என்பது தான். அவர்களுடைய நிலைப்பாடு சமுகத்தால் புரிந்துக் கொள்ளப்படுகிறதா என்று எனக்கு நிச்சயமாகத் தெரியவில்லை - புரிந்து கொள்ளப்படுகிறது என்று நம்புகிறேன். அவர்களின் குரல், வறட்டு கூச்சலாக மட்டுமே பார்க்கப் படுமேயானால், அது சமுகத்திலிருந்து செவ்வியல் தன்மையை வேகமாக மறையச் செய்யும் செயலூக்கியாகிவிடும். ஒரு மாதிரியான ஹிப்பி அமைப்பை ஒத்த சூழல் சமுகத்திற்கு வந்துவிடும் (இன்றல்ல, இன்னும் 10 ஆண்டுகள் அதற்கான தீவிரமான சூழல் தோற்று விக்கப்படலாம்) ஆனால் இன்றும் டிசம்பரில் சபாக்கள் நிறைவதைப் பார்க்கிறோம். பல்வேறு வகையான செவ்வியல் சார்ந்த விஷயங்கள் முன்னிலைப் படுத்தப்படுவதைப் பார்க்கிறோம். இப்படியிருக்கும் இந்த சூழல் ஒரே ஒரு பாட்டால் குலைந்து விட்டது போன்ற பிம்பம் பலராலும் முன்வைக்கப் படுவது தனிமனித படைப்பு சுதந்திரத்திற்கும், கருத்து சுதந்திரத்திற்கும் எதிரானது என்பது என் திண்ணமான கருத்து. ஒரு வேளை அப்படிப் பட்ட சூழல் தோன்றினாலும், இந்த பாடல் சமுகத்தின் அவமாக சித்தரிக்கப்படுவதை நான் ஆதரிக்க மாட்டேன்.

இந்தப் பாடலிலிருக்கும் முக்கிய அம்சம் - எளிமை. யார் வேண்டுமானாலும் பாடலாம். பாடுவதே பேசுவது போன்றிருக்கும் திறமை வாய்த்த என்போன்றவர்களே இந்தப் பாட்டைப் ”பாடலாம்” என்பது தான் இதன் தனிச் சிறப்பு. பாடல் வரிகள் நீங்கள் தினமும் பேசும் அதே ஆங்கில வார்த்தைகள். உலகப் பொது மொழியான ஆங்கிலத்தை பாடலின் மொழியாகத் தேர்ந்தெடுத்தது, சமுக ஊடகங்களை திறமையாக ஆராய்ந்து, பின் தேர்ந்தெடுத்த உத்தி என்று நான் நிச்சயமாக நம்புகிறேன். தணுஷ் சொல்வது போல் இந்தப் பாடல் நிச்சயம் 10 நிமிட விஷயம் இல்லை. இதற்குப் பின் பெயர் வெளியிடப்படாத ஒரு குழு நிச்சயம் இருக்கிறது.

இந்த வகைப் பாட்டிற்கு முன்னோடி என்று நான் கருதுவது “பேட்டை ராப்” பாட்டை - அந்த பாடல் ஒய் திஸ் கொலவெறிக்கு தாத்தா முறை ஆகிறது. அதே போல, நாக்க முக்க பாட்டு சரியான வைரல் மெட்டிரியல். ஆனால் அது நான் எதிர்பார்த்த அளவு இணையத்தில் பரவவில்லை.

எது எப்படியோ, இந்தப் பாட்டு கொலவெறியை உலகம் முழுவதும் எடுத்துச் சென்று விட்டது. ஹிந்தியிலிருந்தும், ஆங்கிலத்திலிருந்தும் நீங்கள் தினமும் பயன்படுத்தும் வார்த்தைகள் பல இருக்கும் - ஆனால் வடக்கத்தியர்கள் சரளமாகப் பயன்படுத்தப்போகும் முதல் (?!) தமிழ் வார்த்தை கொலவெறி.

சிதறல்கள் 10

2011-12-16T22:29:00.000+05:30

சிதறல்கள் 9 இல் கேட்கப்பட்டிருந்த புதிருக்கு சரியான பதில் எழுதி அகிலா கலக்கி விட்டார். வாழ்த்துகள்.

-oOo-

ஸ்டீவ் ஜாப்ஸ் இறந்து பல நாட்கள் ஆகியும் அவர் பற்றி எழும் அலைகள் குறையவில்லை. சமிபத்தில் படித்ததில் மிகவும் பிடித்த கட்டுரை ஃபோர்ப்ஸில் வெளியான இந்தக் கட்டுரை. சமயம் கிடைக்கும் போது பொறுமையாக படியுங்கள்.

சக்கை போடு போட்டுக் கொண்டிருக்கும் ஐசக்சன் எழுதிய ஸ்டீவ் ஜாப்ஸின் சரிதை தான் இந்தக் கட்டுரைக்குக் காரணம். அதில், ஆப்பிளின் முக்கியமான விளம்பர பிரச்சாரமான To the Crazy Ones என்ற விளம்பரத்தை ஜாப்ஸே உருவாக்கினார் என்ற தொணியில் எழுதப்பட்டிருக்கிறது போலிருக்கிறது (நான் இன்னும் அந்த புத்தகத்தைப் படிக்கவில்லை). இந்தக் கட்டுரையை எழுதியவர், அந்த விளம்பரத்திற்கான மூல ஸ்கிரிப்டை உண்மையிலேயே எழுதிய ராப் சில்டனன். அந்த விளம்பரமும், ஆப்பிளின் ஆதார விளம்பர வாக்கியமான Think Differentஉம் எப்படி உருவானது என்பது பற்றி 7 பக்கங்களில் விளக்கியுள்ளார் (நாளை யாராவது ஜாப்ஸ் தான் அந்த வாக்கியத்தை உருவாக்கினார் என்று புத்தகம் எழுதிவிட்டால் என்ன செய்வது) செம சுவாரஸ்யமாக இருக்கிறது. கட்டாயம் படியுங்கள்.

-oOo-

இந்து மதத்தின் புராணங்களில் காலத்தைப் பற்றிய தீர்கமான பல விஷயங்கள் இருக்கின்றன. விஷ்ணு புராணத்தின் படி காலத்தின் பகுப்புகளாவது இவை

1) நிமேஷம் 2) காஷ்டா 3) கலா 4) முகூர்த்தம் 5) பகல்/ இரவு 6) பக்ஷம் 7) மாஸம் 8) அயனம் 9) வருஷம்

1 நிமேஷம் - கண்ணிமைக்கும் பொழுது
1 க்‌ஷணம் = 3 நிமேஷம்
1 காஷ்டா = 10 நிமேஷம்
1 கலா = 35 காஷ்டா
1 முகூர்த்தம் = 20 கலா
1 நாள் (இரவு/ பகல்) = 30 முகூர்த்தம் (~ 24 hours in timescale that we currently adopt)
1 மாஸம் = 30 நாள்
1 அயனம் = 6 மாஸம்
1 வருஷம் = 2 அயனம்

இதோடு மட்டும் நிற்கவில்லை. 1 நிமேஷத்திற்கு கீழேயும் கணக்கிடப்பட்டிருக்கிறது - பாகவதத்தில் இந்த தகவல்கள் இருக்கின்றன.

1 நிமேஷம் = 3 லவ
1 லவ = 3 வேதா
1 வேதா = 100 த்ருதி
1 த்ருதி = 1/1687.5 of a second (currently adopted practice)

தேவ வருஷங்கள்
மேலே சொன்னவை அணைத்தும் மனிதனின் காலத்தை கணக்கிடும் முறைகள் - இவற்றையும் தாண்டி தேவ காலம் இன்னும் ஆச்சரியமானது
மனிதனின் 1 வருஷம் = தேவர்களுக்கு ஒரு நாள் (உத்திராயணம் பகல்; தஷிணாயனம் இரவு)
360 தேவ நாட்கள் (அல்லது 360 மனித வருஷம்) = 1 தேவ வருஷம்

12,000 தேவ வருஷங்கள் ஒரு சதுர்யுகம் எனப்படும். ஒரு சதுர் யுகம் என்பது நான்கு யுகங்களைக் கொண்டது, அவை

க்ருதயுகம்: 17,28,000 மனித வருடங்கள் அல்லது 4800 தேவ வருஷங்கள் (4000 யுக வருஷங்கள், 400 சந்தியா வருஷங்கள், 400 சந்தியான்ஸா வருஷங்கள்)

த்ரேதாயுகம்: 12,96,000 மனித வருடங்கள் அல்லது 3600 தேவ வருஷங்கள் (3000 யுக வருஷங்கள், 300 சந்தியா வருஷங்கள், 300 சந்தியான்ஸா வருஷங்கள்)

த்வாபரயுகம்: 8,64,000 மனித வருடங்கள் அல்லது 2400 தேவ வருஷங்கள் (2000 யுக வருஷங்கள், 200 சந்தியா வருஷங்கள், 200 சந்தியான்ஸா வருஷங்கள்)

கலியுகம்: 4,32,000 மனித வருடங்கள் அல்லது 1200 தேவ வருஷங்கள் (1000 யுக வருஷங்கள், 100 சந்தியா வருஷங்கள், 100 சந்தியான்ஸா வருஷங்கள்)

சந்தியா வருஷங்கள், சந்தியான்ஸா வருஷங்கள் என்பவை முறையே ஒரு யுகத்தின் முடிவிலும் துவக்கத்திலும் இருக்கும் இடைப்பட்ட காலங்கள்.

பிரம்ம வருஷங்கள்
தேவ வருஷங்களைத் தாண்டி பிரம்மாவின் வருஷங்கள் உண்டு அவை தேவ வருஷங்களைக் காட்டிலும் பெரியவை.

1000 சதுர்யுகங்கள் சேர்ந்தது பிரம்மாவின் ஒரு நாள் பகல். அதாவது 4.32 பில்லியன் ஆண்டுகள் பிரம்மாவின் ஒரு பகல். இது போல இரவு ஒரு 4.32 பில்லியன் ஆண்டுகள். இவற்றை ”கல்பா” என்று கூறுவார்கள். பிரம்மாவின் ஒரு நாளில் இரண்டு ”கல்பா”. இபோது நடக்கும் கல்பா ஸ்வேதவராஹ கல்பா. இது போல பிரம்மாவின் ஆயுள் 100 வருடங்கள் வரை போகும். அதன் பிறகு பிரம்மா மீண்டும் தோன்றுவார். இப்போது நாம் இருப்பது பிரம்மாவின் 51 ஆம் ஆண்டில் பிரம்மாவின் ஒரு பகலில் 14 “மன்வந்தரங்கள்” உண்டு. ”மன்வந்தரம்” என்பது ஒரு மனு தோன்றி மறையும் காலம். இந்த மன்வந்தரத்தை ”வைவஸ்வத மன்வந்தரம்” என்று அறிகிறோம். ஆக ஒரு மன்வந்தரத்தின் காலத்தில் 71 சதுர்யுகங்கள் உண்டு. இப்போது நடந்து கொண்டிருப்பது 28வது சதுர்யுகம் - அதிலும் கலியுகம் நடந்து கொண்டிருக்கிறது. கலியுகம் துவங்கி 2011ஆம் ஆண்டுடன் 5113 வருடங்கள் ஆகின்றன.

ஆக பிரம்மாவைப் பொருத்தவரை நீங்கள் அவரது 51அம் வருடத்தில், முதல் நாளில் 28வது சதுர்யுகத்தில் வாழ்ந்து கொண்டிருக்கிறீர்கள் - இன்னும் அவரது பகல் முடியவே 972 சதுர்யுகங்கள் போகவேண்டும். அதாவது இந்த பிரபஞ்சத்தை பிரம்மா படைத்து 155 ட்ரில்லியன் ஆண்டுகள் ஆகிவிட்டன.

தலை லேசாக சுற்றுகிறது, இல்லையா. இதையும் காட்டிலும் பல ஆச்சரியங்கள் நமது புராணங்களிலும், இதிகாசங்களிலும், அநாதியான வேதத்திலும் இருக்கின்றன. அவற்றைப் பற்றி தொடர்ந்து எழுதுகிறேன்.

சிதறல்கள் - 9

2011-12-09T23:15:00.001+05:30

பைத்தியக்காரத்தனமான மாதமிது. வீடு மாற்றி, பால்கார்டு முதல் ரேஷன் கார்டு வரை மாற்றுவதற்குள், தலையில் பாக்கி இருக்கும் சொச்ச முடியும் கொட்டிவிடும் போலிருக்கிறது. இன்னும் பாதி வேலை முடியவில்லை. இண்டர்நெட் கனெக்ஷன் மட்டும் இன்று வந்து விட்டது.

இவ்வளவு களேபரங்களுக்கு மத்தியிலும் ஒரு சிறிய பத்தி எழுத முக்கியமான காரணம் - கபில்சிபல். இணையத்தைக் கண்காணிக்க மனிதர்களை பயன்படுத்தும் படி கேட்டுக் கொண்டதிலிருந்து, இணையத் தகவல்களை நீக்கும் படி பன்னாட்டு நிறுவனங்களைக் கேட்டுக் கொண்டது வரை அவர் செய்த எல்லாவற்றையும் வர்ணிக்கத் தேவை ஒரே வார்த்தை - கோமாளித்தனம். உண்மையிலேயே அவர் சொன்னபடி பிறர் மனதைப் புண்படுத்தும் வகையிலான, மதக்கலவரங்களைத் தூண்டும் படியான செய்திகளை மட்டும் தான் அரசாங்கம் நீக்கச் சொல்கிறது என்பதை நம்புவது கஷ்டமாக இருக்கிறது. வேண்டுமானால், கூகிள் வெளியிட்டுள்ள transparancy reportஐ நீங்கள் எடுத்துப் பாருங்கள். அதில் அரசாங்கத்தை விமர்சித்து வந்த கருத்துகளை நீக்கச் சொல்லி கூகிளுக்கு வந்த கோரிக்கைகளை இந்த டேபிள் காட்டுகிறது. அதில் அதிகமாக வந்திருப்பவை இந்தியாவிலிருந்து தான்.

மேலே காட்டப்பட்ட எண்ணிக்கை, வேறு எந்த நாட்டைக் காட்டிலும் இந்தியா அரசுக்கு எதிரான கருத்துகள் வெளிவருவதை விரும்பவில்லை என்பதை அப்பட்டமாகக் காட்டுகின்றது. சீனாவின் தகவல்களை கூகிள் வெளியிடவில்லை. அப்படிப்பட்டத் தகவல்களை பொதுவில் வைக்க சீன அரசு அனுமதிக்கவில்லை. நாம் இன்னும் எட்ட வேண்டியது அந்த நிலையைத் தான்.

இந்த அரசாங்கத்துக்கு ஊழலைக் கட்டுப்படுத்தத் தெரியாது, விலைவாசியைக் குறைக்கத் தெரியாது, வளர்ச்சிக்குத் தேவையான திட்டங்கள் அமுல்படுத்தத் தெரியது. முதலீடு செய்வதற்கு ஏதுவான சூழ்நிலை இந்தியாவில் இல்லை என்று மைக்ரோசாஃப்ட் போன்ற பன்னாட்டு நிறுவனங்கள் சொல்லத்தக்க வகையில் தான் இந்த அரசாங்கம் இந்தியாவை வழிநடத்துகிறது. இப்படிப்பட்ட நிலையில் அரசாங்கத்தை விமர்சிக்கும் கருத்துகள் எப்படி வராமல் இருக்கக்கூடும் ? அப்படி வரும் கருத்துக்கள் வெளிவருவதை தடை செய்வது ஃபாசிச அரசாங்கமாகவே இருக்க முடியுமேத் தவிர, ஜனநாயக அரசாக எப்படி இருக்க முடியும் ?

இப்படி விமர்சிப்பவர்களின் வாயை மூடும் வகையில் இந்த அரசாங்கம் ஏதாவது சாதனை செய்திருக்கிறது என்றால் - அந்த விஷயத்தில் ஒரு பெரிய பூஜ்யம். மன்மோகன் சிங் “மௌன”மோகன் சிங்காக மாறி பல ஆண்டுகள் ஆகின்றன. அரசாங்கத்தின் வாயாக செயல்படுபவர்கள் எல்லாம் திக் விஜய் சிங், கபில் சிபல், மணிஷ் திவாரி போன்ற இரண்டாம் நிலை தலைவர்கள் தான். இந்த அரசாங்கம் இந்தியாவின் துரதிருஷ்டம்.

-oOo-

பல சின்னச் சின்ன துக்கடா செய்திகள், நான் படிக்கும் புத்தகங்களில் என் கருத்தைக் கவர்கின்றன. அவற்றைக் குறித்து வைத்துக் கொண்டு அவ்வப்போது எழுதுகிறேன். இனி வரும் சிதறல்களில் அப்படிப்பட்ட் துக்கடா எதாவது ஒன்றாவது எழுதப் பார்க்கிறேன். இப்போது அந்த புத்தகங்களை எடுக்க ஏழு மலைகளை (சாமான் மூட்டை) நான் கடக்க வேண்டும்.

-oOo-

ஒரு சிறிய கிரிக்கெட் புதிர்...

பத்தொன்பதாம் நூற்றாண்டின் இறுதியில், இங்கிலாந்து சார்பாக ஆஸ்திரேலியாவுக்கு எதிராக தனது முதல் கிரிக்கெட் டெஸ்ட் போட்டியை விளையாடிய இவர் ராஜ வம்சத்தைச் சேர்ந்தவர். முதல் டெஸ்ட் போட்டியிலேயே முதல் இன்னிங்க்ஸில் அம்பதுக்கும் மேற்பட்ட ஓட்டங்களையும், இரண்டாவது இன்னிங்க்ஸில் ஆட்டமிழக்காமல் 150 ஓட்டங்களையும் எடுத்த இவர் பெயரில் கிரிக்கெட் போட்டிக்கான புகழ் பெற்ற கோப்பை பிற்காலத்தில் நிறுவப்பட்டது. இவர் யார் ?

உங்கள் விடையை பின்னூட்டத்தில் தெரியப்படுத்துங்கள். சரியான விடையை அடுத்த சிதறல்களில் எழுதுகிறேன்.

கிரிக்கெட் சூதாட்டத் தீர்ப்பு – சில குறிப்புகள்

2011-11-11T23:56:00.001+05:30

சமிபத்தில் வழங்கப்பட்ட கிரிக்கெட் சூதாட்ட வழக்கின் தீர்ப்பு குறித்த சில குறிப்புகள் இந்த சுட்டியில்.

சிதறல்கள் - 8

2011-11-03T23:40:00.000+05:30

இந்த வாரம் சென்னையில் நடந்த இரண்டு விஷயங்கள் பற்றி பேசாதவர்கள் குறைவாகவே இருப்பார்கள்.

முதலாவது - நூலகத்தை, குழந்தைகள் நலனுக்கான உயர் சிறப்பு மருத்துவமனையாக மாற்ற ஜெயலலிதா அறிவித்திருப்பது. வழக்கம் போலவே அறிவு ஜீவிகள் கொதித்துவிட்டனர். வாழைப்பழத்தை விளக்கெண்னெயில் தடவி ஒரு கூட்டறிக்கையை மூத்த எழுத்தாளர்களும், பத்திரிக்கையளர்களும் வெளியிட்டிருக்கிறார்கள். நூலகத்தை முற்றிலுமாக அழித்து விடுவது போன்ற ஒரு பிம்பமும் பரப்பப்படுகிறது. அவர்களின் கோபம் எனக்கு சர்வ நிச்சயமாகப் புரியவில்லை. சில பதிப்பளர்களின் தார்மீக கோபம் அவர்கள் தொழில் சார்ந்ததாக இருக்கிறது - நியாயம் தான். இந்த நூலகம் இல்லாவிட்டால் தமிழகத்தின் அறிவு இயக்கமே முற்றிலும் அழிந்து விடுவது போலவும், மிகவும் அத்தியாவசிய தேவைகளில் ஒன்று குறைந்து விட்டது போலவும் பதட்டமான கருத்தை முன்வைக்கின்றனர். இது, பதட்டத்தை விளைவிப்பதன் மூலம், மக்களின் சிந்திக்கும் போக்கை அவர்களிடமிருந்து பறித்து, அவர்களைத் தன் குறிக்கோளுக்கு இசைவாக கோஷம் போடச் செய்ய, அரசியல்வாதிகள் பயன்படுத்தும் மலிவான உத்தி இது. இடது கையால புறந்தள்ள வேண்டிய கருத்துகள் அவை.

நான் இந்த மருத்துவமனை திட்டத்தை வரவேற்கிறேன். தமிழகத்தின் தற்போதைய அவசரத் தேவை என்று நான் கருதுவது, தரமான நியாயமான விலையிக் கிடைக்கும் மருத்துவ சேவை. சர்வ நிச்சயமாக, தனியார்களின் சுரண்டல் அதிகம் நடக்கும் துறைகளில் ஒன்றாக மருத்துவத் துறை மாறிவிட்டதை யாவரும் மறுக்க முடியாது. அதிலும் குழந்தைகளுக்குத் தேவையான பிரத்யேக மருத்துவ சேவை வழங்குவதில் இப்போது இருக்கும் இரண்டு மருத்துவமனைகள் அப்பலோவும், Child Trust Hospital-உம் தான். இந்நிலையில் அரசு மருத்துவத்துறையில் முழு முணைப்புடன் இறங்குவது நீண்ட காலத் தீர்வாக இருக்கும் என்று நான் கருதுகிறேன். அரசால், குறைந்த செலவில், அடித்தட்டு மக்களும் பயன்படுத்தும் வகையில் முன்னேறிய மருத்துவ வசதிகள் வழங்கும் நிலை எட்டப்படுமானால் அதுவே உன்னதமான நிலையாக இருக்கும்.

ஜெயலலிதா ஆட்சிக்கு வந்ததும் அறிவித்திருக்கும் இரண்டு மருத்துவமனை திட்டத்தையும் நான் ஆதரிக்கவே செய்கிறேன். அரசும் இயங்கும் ஒரு துறையில் தனியார்கள் முன்னோடிகளாக, மக்கள் விரும்பும் சேவை வழங்கும் நிறுவனங்களாகவும் இருப்பின், அது அரசின் மக்கள் சார்பற்ற போக்கையே காட்டுகிறது. இந்த நிலையைத் தான் நாம் இதுவரை மருத்துவத்துறையில் பார்த்து வருகிறோம். நடுத்தர தட்டு குடும்பங்கள், தங்கள் மருத்துவத் தேவைகளுக்காக அரசு மருத்துவமனையை அணுகும் நிலை இன்று வரை ஏற்படாதது துரதிருஷ்டம் என்று எடுத்துக் கொள்ள முடியாது - இது நாள் வரை அரசு மக்கள் நலனில் காட்டாத அக்கறை என்றே கொள்ள வேண்டும். இன்று வரை தமிழ்நாடு போன்ற அற்புதமான பஸ் சேவை உள்ள மாநிலத்தை இந்தியாவில் காட்ட முடியுமா ? மக்களுக்கான அடிப்படை சேவைகளான, உணவு விநியோகம், கல்வி, சுகாதாரம் (மருத்துவ வசதி) ஆகியவை என்றுமே அரசின் கையிலிருந்து முற்றிலும் தனியார் வசம் சென்று விடக்கூடாது. ஆனால், நாம் இன்று தமிழ்நாட்டில் பார்த்துக் கொண்டிருப்பது என்ன ? தனியார் பள்ளிகள், தனியார் மருத்துவமனைகள் தான் அதிக தரத்தை வழங்கவல்லவை என்ற பிம்பம் தான் மக்களிடம் இருக்கின்றது - அது உண்மையும் கூட. இந்நிலையில், அரசு இந்தத் துறைகளில் அதிக முணைப்போடு செயல்படுவதை தவறு என்று சொல்வதன் அர்த்தம் புரியவில்லை.

நிற்க, நான் ஜெயலலிதா அரசு மக்கள் நலனுக்காக பாடுபடும் அரசு என்று பட்டம் கொடுக்க விரும்பவில்லை - அது என் நோக்கமும் இல்லை. நான் முன்வைப்பது ஒன்று தான் - எந்த காலத்திலும் தரமான மருத்துவ சேவைகள் வழங்க மேற்கொள்ளப்படும் முயற்சிகளை மக்கள் ஆதரிக்க வேண்டும் என்பதே. இந்த திட்டத்தை, ஜெயலலிதா கருணாநிதி மீது இருக்கும் காழ்ப்புணர்ச்சியால் கொண்டு வந்தாரா இல்லை என்பது என் பிரச்சணையில்லை. என்னுடைய தேவைக்கான திட்டமாக அது இருக்கிறதா இல்லையா என்பதே என் கவலையாக இருக்கும். அந்த விதத்தில், அனைவரும் எளிதாக வந்து போகும் வகையில், பல ஆயிரக்கணக்கான சதுர அடி பரப்பளவில் நகரின் மையத்தில் இருக்கும் ஒரு இடத்தில் மருத்துவமனையைக் கொண்டு வருவதையே நான் ஆதரிக்கிறேன்.

ஆனால், ஜெயலலிதாவிடம் கேட்க வேண்டிய இரண்டு முக்கியமான கேள்வி தொக்கி நிற்கின்றன.
1) மருத்துவமனை திட்டங்களாக வரிசைப்படுத்தும் நீங்கள், ஏன் அடிப்படை சுகாதாரத்திற்கு ஊறு விளைவிக்கும் குப்பைகள் நீக்குவதில் அக்கறை காட்டவில்லை. மாநகராட்சி மேயர் தேர்தல் முடிந்த பின்னரும், சென்னை மிகப்பெரிய குப்பைத் தொட்டியாகத்தானே காட்சியளிக்கிறது ?
2) மருத்துவமனைகளுக்கான உள்கட்டமைபு வசதி கொண்ட இடங்களைப் பற்றி பேசும் உங்கள் அரசு ஏன் மருத்துவ சேவைகள் பற்றி வாய் திறக்கவில்லை - அதற்கான வழிமுறைகளை இந்த அரசு ஆராயுமா ? அல்லது விமர்சகர்கள் மற்றும் சினிக்குகளின் சந்தேகத்தை ஊர்ஜிதப்படுத்தும் வகையில் வெறும் இடமாற்றத்தோடு உங்கள் மக்கள் நல நாடகத்தை நிறுத்திக் கொள்ளப்போகிறீர்களா ?

ஜெயலலிதாவின் ஐந்தண்டுகால இறுதியில், அரசு மயமான சிறப்பு மற்றும் உயர் சிறப்பு மருத்துவமனைகள் தமிழகம் முழுவதும் திறக்கப்பட்டு, சிறப்பாக செயல்பட்டால் - அது அவரது அரசியல் வாழ்க்கையின் மிகப்பெரிய சாதனையாக இருக்கும். காமராஜர், குழந்தைகள் கல்விக்காக நினைவில் கொள்ளப்படுவது போல, ஜெயலலிதா மக்கள் சுகாதாரத்திற்காக நினைவில் கொள்ளப்படுவார்.

இரண்டாவது விஷயம் - தி நகர் கடைகளுக்கு போடப்பட்ட பூட்டு. மிகவும் சந்தோஷமான விஷயம். ஊழியர்கள் மற்றும் வாடிக்கையாளர்களின் பாதுகாப்பு குறித்த எந்த விதமான விசனமும் இல்லாமல், லாப நோக்கோடு மட்டுமே கடை நடத்தி வந்த முதலாளிகளுக்கும் அவர்களுக்குத் துணை போன அரசு ஊழியர்களுக்கும் சரியான குட்டு வைத்திருக்கிறது நீதிமன்றம். ஆனால் இத்தோடு நிற்காமல், இடைக்கால தளர்வு தராமல் இந்த வழக்கிற்கு ஒரு முடிவு இந்த முறையாவது வர வேண்டும் - பத்து வருடங்களுக்கும் மேலாக இந்த கதை நீண்டு கொண்டிருக்கின்றது. இந்த முறையும் இதற்கு முடிவுக்கு வராவிட்டால் சட்டத்தின் மீதான நம்பிக்கை முற்றிலுமாக அற்றுப் போய்விடும்.

சிதறல்கள் - 7

2011-10-11T01:34:00.000+05:30

பதிவு எழுதி 2 மாதங்களுக்கு மேல் ஆகிவிட்டது - வேலை மாற்றம் கொஞ்சம் அதிகமாக நேரத்தை சாப்பிட்டாலும், நடுவில் கணிப்பொறி வேறு வேலை செய்யாமல் சதி செய்துவிட்டது. கடைசியாக அந்த பழைய கணிப்பொறியை பரண் மேல் ஏற்றிவிட்டு புதிதாக வாங்கினேன்.

நடுவில் நிறைய எழுத வேண்டிய விஷயங்கள் வந்தும், எதைப் பற்றியும் எழுத முடியவில்லை. இந்த சிதறல்கள் தொடர் எனக்கு முக்கியமாகப் படுகிறது. என்னுடைய கருத்துக்களை நானே பார்த்துக் கொள்ளும் ஒரு பெட்டகமாக இது மாறிப் போகிறது.

இன்றுடன் ஒரு வருடக்கணக்கு முடிந்தது - அப்பாவின் ஆப்திகம் இன்று முடிந்தது. இந்த ஒரு வருடத்தில் ஒரு மரணம், ஒரு ஜனனம். வாழ்க்கையைப் பற்றிய என் பார்வை கொஞ்சம் அதிகமாகவே இந்த ஒரு வருடத்தில் (கடந்த இரு வருடங்களில் என்பது மிகச்சரியாக இருக்கும்) மாறித்தான் போய் இருக்கிறது. அப்பா இல்லமல் ஒரு வருடம் கடத்தியிருக்கிறோம் என்ற நினைப்பே மிகவும் அச்சரியமாக இருக்கிறது.

குழந்தை வந்ததால் கொஞ்சம் ஆசுவாசம் வந்தது. அம்மா பழைய படி வாயைப் பொத்தி சிரிக்கிறாள். என் மகனைப் பார்க்கும் போதெல்லாம் எனக்குத் தோன்றுவதெல்லாம் ஒன்று தான் - இவனுக்குத் தருவதற்கு என்னிடம் என்ன இருக்கிறது என்ற கேள்வி. நிச்சயமாக அவன் வளரும் சூழலுக்கு ஈடாக என்னால் ஓட முடியுமா என்று தெரியவில்லை. அவனுக்குத் தேவையான அனைத்து வசதிகளையும் குறைவின்றி செய்து கொடுக்க முடியுமா என்ற கவலை இருக்கிறது - ஆனால், இவையெல்லாவற்றையும் விட அவனுக்கு எப்படிப்பட்ட அப்பாவாக நான் இருக்கப் போகிறேன் என்ற பிம்பம் பற்றிய சிந்தனை அதிகமாக பரவுகிறது.

என் அப்பா, எங்கள் அனைவரின் மனதிலும் விட்டுச் சென்ற பிம்பத்தை நான் என் மகனிடம் விட்டுச் சென்றாலே அது என் வாழ் நாள் சாதனையாகக் கருதுவேன். அப்பா பெரிய புத்திசாலி இல்லை - ஆனால் மிக நல்லவர். லக்ஷம் லக்ஷமாக சம்பாதிக்கத் தெரியாது - ஆனால் யாருக்கும் பணியாமல் வாழத்தெரியும். முன் கோபி. நிறைய அப்பாவி. காரியம் ஆவதற்காக கூழைக்கும்பிடு போடத் தெரியாது. எந்த விஷயத்திலும் வெட்டு ஒன்று துண்டு இரண்டு தான். மூன்று மணி நேரம் தினமும் பாராயணம் செய்வார் - வேலை இருந்தாலும், இல்லாவிட்டாலும். பிரேம்சந்த் பாஷையில் பேச்சாரா பலா ஆத்மி. அப்பா வாழ்க்கை முழுவதும் ஒரே மாதிரி தான் இருந்தார். வயது ஆக ஆக அவர் கோபம் கொஞ்சம் குறைந்தது. அவ்வளவே.

அவர் தீவிர இந்துத்வ ஆசாமி. சிறு வயதில் ஆர் எஸ் எஸ் இல் கூட சேர்ந்திருக்கிறார். சில சமயம் நெஞ்சுக்கு நேரே கையை வைத்துக் கொண்டு ”நமஸ்தே சதா வத்ஸலே...” என்று பாடிக் காட்டுவார். கொஞ்சம் மிதவாதியாக வாழ நினைக்கும் எனக்கும் அவருக்கும் கருத்து மோதல்கள் எக்கச்சக்கம். அனைத்து அரசியல் பார்வைகளும் கொஞ்சமேனும் மாறுபடும். இந்த வாதங்கள் சாப்பிடும் போது தான் வரும். அவர் உச்சக்கட்டத்திற்கே சில சமயம் சென்றுவிடுவார். தட்டு பறக்கும் பயத்தில் அம்மா எங்களை சேர்த்து வைத்து சாப்பாடு போடுவதைக் கூட தவிர்த்தாள்.

அப்பா பெரிய ஊமைக்குசும்பன் - யாரிடம் பேசினாலும் ஐந்தாவது நிமிடத்தில் அவருக்கு ஒரு பட்டப்பெயர் வைத்து விடுவார் - உருளைகிழங்கு, கொட்டைபாக்கு, கீச்சுமூச்சு - இப்படித்தான் இருக்கும் அவர் வைக்கும் பெயர்கள். எங்கள் குடும்பத்தில் அந்த ஆசாமி, பிற்பாடு அந்த பெயரிலேயே அழைக்கப்படுவார். “பாவம்டா கொட்டைபாக்குக்கு கேன்சராம்” என்று சீரியஸாக பேசும் இடங்களில் கூட சொல்லும் வகையில் அந்த பெயர்கள் அவருடைய இன்னொரு பெயராகக் கூட மாறி விடும். உண்மையில், கொட்டைப்பாக்கு மாமாவின் உண்மையான பெயர் எனக்கு இன்று வரை தெரியாது. அவர் எப்போதுமே கொட்டைப்பாக்கு தான்.

அவர் ஒரு டிபிக்கல் 60களின் இளைஞன் - ஜெமினி ரசிகன். தமிழ் சினிமாவில் 75 இறுதி வரை வந்த எந்த படத்தைப் பற்றிய தகவலும் அவர் விரல் நுணியில் இருக்கும். நான் அம்மா, அப்பா மூவரும் இரவு விடிய விடிய பழைய பாடல்கள் கேட்போம். எந்த படம், எப்போது ரிலிஸானது, யார் நடிகர் நடிகைகள், அந்த பாட்டை எழுதியது யார், அது ரிலிஸாகும் போது என்ன கிசு கிசு, தஞ்சாவூரில் எந்த தியேட்டரில் ரிலிஸானது என்பது வரை எல்லாவற்றையும் சொல்வார். கடைசியாக அவரை ஆஸ்பத்ரியிலிருந்து கொண்டு வரும் போது அவரது ஆல்டைம் ஃபேவரைட்டான “உன்னைக் கண்டு நான் ஆட” ரேடியோவில் ஒலித்துக் கொண்டிருந்தது.

நான் மாவட்ட அளவில் கிரிக்கெட் ஆட ஆரம்பித்த பின்னரே அவருக்கு கிரிக்கெட்டில் ஆர்வம் வந்து கற்றுக்கொண்டார். அம்மாவும் அப்படியே. கற்றுக் கொள்ள ஆரம்பித்த காலத்தில், “வைட் பாலில் கீப்பர் கேட்ச் பிடித்தால் அவுட்டா” என்று தூக்கி வாரிப்போட வைக்கும் கேள்விகளைக் கேட்பார். பிறகு அந்த கிரிக்கெட்டை அவர் விடவேயில்லை. ரஞ்சி டிராஃபி போட்டிகளாஇ தொடரும் அளவுக்கு வளர்ந்து விட்டது. இந்தியா உலகக்கோப்பை ஜெயித்த போது நானும் அம்மாவும் மட்டும் கை தட்டிக் கொண்டிருந்தோம். அவர் வழக்கமாக அமரும் நாற்காலி காலியாக இருந்தது.

உங்கள் பக்கம் நியாயம் இருந்தால், நீங்கள் எதிரியே ஆனாலும் உங்களை ஆதரிப்பார். தப்பு என்றால் தப்பு தான். எந்த விஷயத்தையும் மிகவும் உணர்ச்சிபூர்வமாகவே அணுகுவார், எந்த விஷயமும் அவருக்கு மறக்காது - இந்த விஷயமே அவர் உயிருக்கும் ஆபத்தாக அமைந்து விட்டது. சில கசப்பான அனுபவங்களை மறக்க அவர் கற்றுக் கொண்டிருக்கலாம். ஒருவேளை அப்படி நினைவுகளைத் தூக்கிப் போட்டுவிட்டு வாழும் வாழ்க்கை தேவையில்லை என்று நினைத்தாரோ என்னவோ.

வாழ்க்கையில் ஒரு மனிதன் யாரிடம் வேண்டுமானாலும் நன்றாக நடித்து விட முடியும். நல்லவன் பட்டமும் வாங்கி விடலாம். ஆனால், 24 மணி நேரமும் கூடவே இருக்கும் குடும்பத்தை ஏமாற்றுவது அவ்வளவு சுலபமான காரியமில்லை. ஒரு குடும்பம் ஒருவனை நல்லவன் என்று ஆத்மார்த்தமாக எந்தவிதமான மனச்சங்கடங்களும் இல்லாமல் சொன்னலே அந்த வாழ்க்கை மேன்மையானது தான். நான் இறக்கும் போது நான் நல்லவன் என்று என் குடும்பம் சொல்லும் படியான வாழ்க்கையை வாழ்ந்தாலே எனக்குப் போதும். எனக்கு என் அப்பாவின் மீது இருக்கும் பெருமையும், கர்வமும் என் மீது என் பையனுக்கு வரும் படி நான் வாழ்ந்தால் - அதுவே எனக்குப் பெரிய வாழ்க்கை.

ராகுல் டிராவிட்டின் ஒருநாள் போட்டி வாழ்க்கை குறித்து

2011-10-01T08:57:00.001+05:30

சமிபத்தில் ஒரு நள் போட்டிகள் வடிவத்திலிருந்து ஓய்வு பெற்ற டிராவிடின் ஒரு நாள் போட்டிகள் சாதனை குறித்து தமிழ்பேப்பரில் எழுதிய கட்டுரை - ராகுல் டிராவிட்டின் ஒருநாள் வாழ்க்கை.

சிதறல்கள் - 6

2011-07-05T22:38:00.001+05:30

இந்த வெள்ளிக்கிழமையோடு இப்போது பணிபுரியும் இந்த கம்பெனியிலிருந்து விலகுகிறேன் (இரண்டாவது கம்பெனி). ஒன்பது வருடம். ஓடியதே தெரியவில்லை. நிறைய கற்றுக் கொண்டேன். என்னை அடுத்தடுத்த நிலைக்குத் தள்ளிக் கொள்ள நிறைய வாய்ப்புகள் கிடைத்தன. சந்தோஷமாகவே இருந்தேன். நன்றி.

நான் கிளம்பும் விஷயம் தெரிந்து சில பல ஜூனியர்கள் பேசினார்கள். அதில் சிலர் முதல் முறையாக மனம் திறந்து பேசினார்கள். கடந்த ஐந்தாண்டுகளுக்குள் ஐ டி துறைக்குள் வந்தவர்கள். அவர்களிடம் நான் பார்க்கும் பொதுவான அம்சம் - குழப்பம். சற்று அதிகமாகவே இருக்கிறது. பத்து பைசா பெறாத விஷயத்திற்கு அதிகமாக அலட்டிக் கொள்கிறார்கள்.

ஸ்டாக் மார்க்கெட் கூட விழுகிறதே, அடுத்த ரிஸஷன் வருவதற்கு அறிகுறியா என்று கேட்கிறார்கள். L1 விசா இண்டர்வியூ ரிஜக்ட் ஆனதற்குப் பின் தன் கரியர் என்ன ஆகுமென்று கவலைப்படுகிறார்கள். கம்பெனியைப் பற்றி அவர்களுக்குத் தெரியாதா ஏதோ ஒரு விஷயம் எனக்குத் தெரிந்து நான் எஸ்ஸாகிறேனோ என்று நினைத்து, சாமர்த்தியமாக வாயைக் கிண்டுவதாக நினைத்துக் கொள்கிறார்கள். சிரிப்பதைத் தவிர வேறு வழியில்லை.

மனிதர்களின் வாழ்க்கையில் ஒவ்வொரு பத்து வருடங்களிலும் ஒரு தேக்கம் வரும். 20 வயது மாதிரி, 30 கிடையாது. 30 மாதிரி 40 இல்லை. அந்த தேக்கத்தை அனுபவத்தைக் கொண்டு மீண்டு வருகிறோம். ஆனால் பணியிடங்களில் ஒவ்வொரு 5 வருடங்களிலும் ஒரு தேக்கம் வரும். பொதுவாக IT Service கம்பெனிகளில் வேலை செய்பவர்களுக்கு முக்கியம் என நான் நினைப்பது மனம் சார்ந்த அறிவுரைகளும் வழிகாட்டல்களும் தான். தொழில்நுட்பத்தில் யாரும் குறைந்தவர்கள் இல்லை. சில அறிவுரைகள்...

1) உங்கள் கரியரை 5 வருடக் கணக்காக பிரித்துக் கொள்ளுங்கள். ஒவ்வொரு 5 வருடத்திற்கும் ஒரு இலக்கை நிர்ணயித்துக் கொள்ளுங்கள் - அந்த இலக்கை நோக்கி நகருங்கள் (ஒவ்வொரு முறையும் இந்த வேலை எனக்கு சரியானது தானா, நான் ஏதாவது புதிதாக கற்றுக் கொண்டேனா என்று கேட்டுக் கொண்டே இருங்கள்)

2) உங்களுக்கென்ற நம்பிக்கையான வட்டத்தை அலுவலகத்தில் உருவாக்கிக் கொள்ளுங்கள். அவர்களிடம் கம்பெனி பற்றியும் Industry பற்றியும் விவாதியுங்கள். பிஸினஸ் மெகஸின்கள் படியுங்கள். கம்பெனிக்குள் Mentorஐ தேர்ந்தெடுங்கள். நீங்கள் சிலரைத் தேர்ந்தெடுத்து mentor செய்யுங்கள்.

3) காதுகளையும் கண்களையும் திறந்து வைத்துக் கொள்ளுங்கள். எது புரளி எது நம்பத்தகுந்த செய்தி என்பதை இனம் காண கற்றுக் கொள்ளுங்கள். பொதுவாக இன்னிக்கு ஹாட் நியூஸ் தெரியுமா என்று அடிக்கடி ஹாட் நியூஸ் சொல்பவர்களை தவிர்த்து விடுங்கள்

4) ஓரிரு வருடம் ஏதேனும் ஒரு சாதாரண ப்ராஜெக்ட்டில் வேலை செய்வதால் உங்கள் கரியர் வீழ்ந்து விடாது. அதை சுவாரஸ்யமான சவாலாக ஏற்றுக் கொண்டு, உங்கள் அடுத்த நிலைக்குத் தேவையான ப்ராஜெக்ட்டுக்கோ, டெக்னாலஜிக்கோ ட்ராண்ஸ்ஃபர் வாங்க negotiate செய்யுங்கள் (தப்பில்லை, பொதுவாக எல்லா மேனேஜர்களும் தங்களுக்கு அவசியமான சமயத்தில் உதவியவர்களுக்கு பிரதியுதவி செய்ய தயங்க மாட்டார்கள்)

5) எந்த காரணம் கொண்டும், மனிதர்களோடு பிணக்குகளை ஏற்படுத்திக் கொள்ளாதீர்கள் People are more important than performances

6) உங்கள் ஒருவரால் மட்டுமே உங்கள் நிறுவனம் ஏற்றம் பெறுவதும் இல்லை வீழ்வதும் இல்லை. நீங்கள் ஆற்றுவது ஒரு பங்கு, அவ்வளவே

7) உங்களுக்கு என்ன தேவை/ எது சரி என்பதை நீங்கள் தான் முடிவு செய்ய வேண்டும். எந்த வழியில் நீங்கள் வளர விரும்புகிறீர்கள் என்பதை தீர்மாணம் செய்து அந்த வழியில் வளரும் வாய்ப்பு கம்பெனிக்குள் இருக்கிறதா என்று தேடுங்கள். இல்லாவிட்டால், வெளியே தேடுங்கள்

8) மேனேஜர் சரியில்லை, ப்ராஜெக்ட் சரியில்லை போன்ற காரணங்களுக்காக வேறு வேலை தேடாதீர்கள். அதே பிரச்சனை அடுத்த நிறுவனங்களிலும் வராது என்பதற்கு எந்த உத்திரவாதமும் இல்லை. முடிந்த வரை ஒரே கம்பனியில் கனிசமாக வளர முயற்சி செய்யுங்கள். அடுத்தடுத்து கம்பெனி மாறுவது உங்களுக்கு நீண்ட கால கரியருக்கு நல்லதில்லை

9) ப்ரமோஷனுக்காகவும், சம்பள உயர்வுக்காகவும் கொடி பிடிக்காதீர்கள். உங்கள் கோரிக்கையில் நியாயம் இருப்பதாக நினைத்தால், அதை தக்க தகவல்களோடு தொகுத்து case build செய்யுங்கள் (customer appreciation, manager appreciation, அனைத்தையும் சேமித்து வையுங்கள் - ஆண்டு இறுதியில் அப்ரைஸலில் பயன்படும்)

10) மிக முக்கியமான விஷயம். ரிலாக்ஸ்டாக இருங்கள். மனதுக்குப் பிடித்த ஏதாவது ஒரு பொழுது போக்கில் ஈடுபடுங்கள். சந்தோஷமாக இருப்பவர்கள் எல்லோருமே வெற்றி பெறுகிறார்கள். வெற்றி பெற்றவர்கள் எல்லோரும் சந்தோஷமாக இருப்பதில்லை.

_oO0Oo_

இந்த மாதம் துவக்கத்தில், TicTac மெம்பர்ஷிப்பிலிருந்து விலகினேன். சென்னை வாசியாக இருந்தால், TicTac பற்றித் தெரிந்திருக்கலாம். RA Puramஇல் இருக்கும் வீடியோ லைப்ரரி. உலகத் திரைப்படங்களுக்காகத் தான் அவர்களிடம் சேர்ந்தேன். அவர்களிடம் இருக்கும் பெரும்பாலான உலக திரைப்படங்களையும் ஏறக்குறைய பார்த்து விட்டேன். அவர்கள் தங்கள் கலெக்ஷனை அப்டேட் செய்வதாய் தெரியவில்லை. மெம்பர்ஷிப்பிலிருந்து விலகிவிட்டேன்.

அடுத்து என்ன செய்யலாம் என்று யோசித்துக் கொண்டிருக்கிறேன். Bharti Airtel மற்றும் BigFlix இருவரும் ஒரு பார்ட்னர்ஷிப் போட்டு ஒரு 229 ரூபாய்க்கு 500 படம் காட்டுகிறார்களாம். தேறுமா என்று பார்க்க வேண்டும். வேறு ஏதேனும் ஆப்ஷன் இருந்தால் தெரியப்படுத்துங்கள். ரேபிட்ஷேர், மெகாஷேர் விளையாட்டுக்கு நான் வரவில்லை.

சிதறல்கள் - 5

2011-07-03T01:25:00.000+05:30

பேஞ்ஜோ

இந்தப் பேரைக் கேட்டதும் எனக்கு என்னுடன் ஸ்கூலில் படித்த பாலா தான் நியாபகத்துக்கு வந்தான். பேஞ்ஜோ (என் நினைவு சரியென்றால்), 80களின் இறுதியில் தொலைக்காட்சியில் வந்த ஒரு நாடகத்தில் காத்தாடி ராமமூர்த்தி நடித்த கதாபாத்திரத்தின் பெயர். ஷாலினி குட்டிப் பெண்ணாக நடித்த நாடகம். நட்டு கழண்ட ரோபோ கதாபாத்திரம் என்று நினைக்கிறேன். கேஸ் சிலிண்டர் என்று நினைத்து போஸ்ட்பாக்ஸை தூக்கிக் கொண்டு வந்து விடும் அந்த ரோபோ. அது போல சில கெக்கெபெக்கே காரியங்கள் செய்து வாண்டுப் பசங்களை வயிறு குலுங்க சிரிக்க வைக்கும்.

ஆனால், அந்த கதாபாத்திரத்தின் பெயரை பாலாவுக்கு ஏன் வைத்தோம் என்று எனக்கு நினைவில்லை. சாதுவான பையன். சின்ன வயதில் ஸ்கூல் விட்டு, மாடிப்படியிலிருந்து இறங்கி வரும் போது கூட நடக்கும் மாணவன் கழுத்தைச் சுற்றி கையைப் போட்டு தடதடவென படியில் ஓடி வருவேன். இதை எதிர்பாராமல் உடம்பை லூசாக வைத்திருக்கும் மற்ற மாணவர்களும் என் வேகத்துக்கு ஓடி வரவேண்டும். இல்லாவிட்டால் படியில் விழுந்து விடுவார்கள். கடைசிப் படிக்கு வந்தவுடன் கெட்ட வார்த்தையால் திட்டுவார்கள். நான் சிரித்தபடியே ஓடிவிடுவேன். முரட்டு விளையாட்டு – இதில் பலர் முதல் அல்லது இரண்டாம் முறைக்குப் பின் சுதாரித்துக் கொண்டாலும், பாலா பல முறை மாட்டினான். சிலர் கரெக்டாக நான் கழுத்தைச் சுற்றி கைபோடும் போது குனிந்து என்னை தள்ளி விட்டு விடுவார்கள். சிலர் நான் படியிறங்கும் போதே படியை ஒட்டிய கைப்பிடியை கெட்டியாக பிடித்துக் கொள்வார்கள். பாலா இந்த சமயம் ஏதோ ஒரு கம்பெனியில் பெரிய பதவியில் இருக்கலாம். இதைப் படித்து மான நஷ்ட வழக்கு போட வேண்டாம் என்று பணிவன்புடன் கேட்டுக் கொள்கிறேன்.

இப்போது இது நினைவு வரக் காரணம் - http://ban.jo/. நீங்கள் ஏதேனும் ஒரு புதிய நகரத்திலிருந்தால், அந்த நகரத்தில், நீங்கள் இருக்குமிடத்திற்கு அருகில் என்ன என்ன நடக்கின்றன அல்லது இணையத்தில் ஆன்லைனில் இருக்கும் நன்பர்கள் அருகில் எங்கு இருக்கிறார்கள் என்பதை இந்த செயலியின் மூலம் தெரிந்துக் கொள்ளலாம். உங்களிடம் ஐஃபோன் அல்லது ஆண்ட்ராய்டில் இயங்கும் ஃபோன் இருந்தால், இந்த செயலி பயனுள்ளதாக இருக்கும். இதைப் பற்றிய மேலதிக தகவல்களை இதன் வலைதளத்தில் நீங்கள் பெறலாம்.

_oO0Oo_

http://creativecriminals.com/ என்று ஒரு வலைதளம் இருக்கிறது. உங்களில் பலர் அதைப் பார்த்தும் இருக்கலாம். பிரபலமானது. அறியாதவர்களுக்கு, அற்புதமான பல விளம்பரங்களைத் தொகுத்துக் கொண்டிருக்கிறார்கள். தினமும் பல புதிய சிந்தனைகள், விளம்பர யுக்திகளை அறிமுகப்படுத்துகிறார்கள். இந்த படத்தைப் பாருங்கள். Samsoniteஇன் விளம்பரம். Picture is worth Thousand words என்பதற்கு இந்த படம் உதாரணம்.

பொதுவாகவே விளம்பரங்கள் செய்வதற்கு கொஞ்சம் புத்திசாலித்தனம் தேவை. மிகக் குறைந்த நேரம், விற்பனை செய்யப்படும் பண்டம் அல்லது சேவையை வாசகர்கள் மத்தியில் எடுத்துச் செல்லவேண்டும், அவர்கள் நினைவில் தங்கும் வகையில். எந்த ஒரு பண்டம் அல்லது சேவைக்கும் இரண்டு விஷயங்கள் அவசியம் Value proposition மற்றும் Differentiator.

ஜார்கனாக பேசாமல் எளிதாக சொல்லவேண்டுமானால், எந்த காரணத்திற்காக அந்த பண்டத்தையோ சேவையையோ வாடிக்கையாளர் உங்களிடமிருந்து வாங்க வேண்டுமென்று நினைக்கிறீர்களோ அது தான் Value prop. அதே valueவை சந்தையிலிருக்கும் வேறு ஒருவராலும் கொடுக்க முடியும் தானே, ஏன் உங்களிடம் இருந்து மட்டும் வாங்க வேண்டும் ? அதைச் சொல்வது தான் differentiator. இந்த இரண்டும் எந்த ஒரு pitchக்கும் மிகவும் முக்கியம். பல சமய்ங்களில் price என்பது மட்டும் differentiator ஆக மாறி விடுகிறது.

Value propக்கு ஒரு நல்ல உதாரணம் கீழே இருக்கும் விளம்பரம். பல வருடங்களுக்கு முன்பு வந்த இந்த விளம்பரம் உங்களுக்கு நினைவிருக்கும் என்று நினைக்கிறேன். மிகவும் புத்திசாலித்தனமான விளம்பரம் – அழுத்தமாக எழுதும் கேம்லின் மார்க்கர்-க்கான விளம்பரம். விருது பெற்றது.

இன்னுமொன்று differentiatorக்கான உதாரணம் – கொஞ்சம் கசமுச விளம்பரம். காண்டம் விளம்பரம். இது தடை செய்யப்பட்ட விளம்பரம் – இதில் கெட்ட வார்த்தைகள், வன்முறை, நெருக்கமான பாலியல் காட்சி, எதுவும் இருக்காது – இந்தியாவில் இருக்கும் காண்டம் விளம்பரத்தில் இருக்கும் அளவு கூட நெளியவிடாது. இருப்பினும் அலுவலகத்தில்/ பொது இடத்தில் பார்ப்பதற்கு உகந்ததில்லை. பார்த்து விட்டு என்னைத் திட்ட வேண்டாம்.

காண்டம் - மிகவும் சவாலான ஏரியா. பல விஷயங்களைச் சொல்லவும் முடியாது சொல்லாமல் இருக்கவும் முடியாது, மிகவும் பூடகமாகச் சொல்லவேண்டும். தேவையில்லாத கர்பத்தை தவிர்க்க, பாலியல் நோய்களிடமிருந்து காக்க என்று அதன் value propஐ எடுத்துச் சொன்னாலும், differentiator ? அதைத் தான் இந்த விளம்பரம் சொல்கிறது.

ஒரு விஷயத்தை கவனித்தீர்களா, மேலே சொன்ன இரண்டிலும் பேச்சே கிடையாது. What an Idea Sirji போன்ற அபத்த வசங்கள் கிடையாது. இப்போது டீவியிலிருக்கும் விளம்பரங்களைப் பார்த்து அந்த பண்டம் அல்லது சேவையின் Value prop மற்றும் differentiator பிடிபடுகிறதா என்று பாருங்கள்.

_oO0Oo_

சமிபத்தில் பாரதிய வித்யா பவன் பப்ளிஷிங்களையும், இண்டோலாஜிஸ்ட் மற்றும் ப்ரும்ஹஸ்ரீக்களின் புத்தகங்களையும் கொஞ்சம் படித்து வருகிறேன். செம ஸ்வாரஸ்யமாக இருக்கின்றன. நம்புதல் அல்லது மறுத்தல் என்ற இரண்டு எல்லைகளில் நிற்காமல் நடுவிலிருந்துப் பார்த்தால் எவ்வளவு மெதாடிகலாக இந்து மத முன்னோர்கள் இருந்திருக்கிறார்கள் என்று ஆச்சர்யப் பட வைக்கின்றது. பல விஷயங்கள் சரியாக விளக்கப்படாததும், புரிந்து கொள்ளப்படாததும் இன்றைய குழப்பங்களுக்குக் காரணம் என்று தெளிவாகப் புரிகிறது.

இனி வரும் பகுதிகளில் அவ்வப்போது அவை பற்றி எழுதிகிறேன்.

_oO0Oo_

நான் மேலே சொன்னதை கொஞ்சம் நிறுத்தி – எதற்காக அவற்றை எழுத வேண்டும் என்பதற்கான காரணத்தை (நான் என்றில்லை, இணையத்தில் வேறு எவருமே) ஆராய்ந்தால், அந்த நோக்கம், ஒரு வரையரைக்கு உட்பட்டது என்கிறார் Ernest Dichter. இவரை Father of motivation research என்று அழைக்கிறோம்(றார்கள்). மனிதர்களை எது ஒரு விஷயத்தைப் பற்றி பேசவோ எழுதவோ செய்கிறது என்பதைப் பற்றி இவர் ஆராய்ந்து இருக்கிறார் - சுமார் 50 வருடங்களுக்கு முன்பே.

கீழ் காணும் நான்கு காரணத்திற்குள் ஏதேனும் ஒன்று தான் ஒரு விஷயத்தைப் பற்றி பேச/ எழுத motivate செய்கிறது என்கிறார்.

1) முதலாவது, விஷயத்தின் சிறப்பு. அந்த விஷயம் தரும் அனுபவம் அவ்வளவு புதுமையாக இருப்பதால், அதைப்பற்றிப் பேசுவது தவிர்க்க முடியாததாகிறது (33 % பேர் இப்படித்தானாம்)

2) எனக்கு எவ்வளவு தெரிந்திருக்கிறது பார்த்தாயா வகையறா – கொஞ்சம் சர்க்கரை தடவி சொல்ல வேண்டுமானால், அந்த விஷயத்தைப் பற்றி ஒரு முன்னோடியாக இருந்து எடுத்துச் சொல்ல வேண்டிய கடமை (24%)

3) பிறருக்கு உதவும் நோக்கம், எல்லோருக்கும் அந்த விஷயம் சென்று சேர்ந்து பயனளிக்க வேண்டுமென்ற எண்ணம். (20%)

4) அந்த விஷயத்தைப் பற்றி அவர் அறிந்துக் கொண்ட விதம். உதாரணத்திற்கு ஒரு விளம்பரம் படு காமெடியாக இருக்கிறதென்றால், அந்த விளம்பரத்தைப் பகிர்ந்து கொள்ளும் படியாகத் தூண்டுமாம். இதை மார்க்கெட்டிங் பரிபாஷையில் messaging என்று சொல்கிறார்கள் (30%)

இந்த தியரியைத் தான் இன்றைய தேதியில் பல சமுக ஊடகங்களும் பயன்படுத்திக் கொள்கின்றன. வாய் மொழியாக ஒரு பொருளுக்கு விளம்பரம் அதிகரிக்கும் இந்த காலத்தில், நிறுவனங்கள் தங்கள் மார்க்கெட்டிங் ஸ்ட்ராடஜிகளில் social mediaவுக்கான ஸ்ட்ராடஜியை வடிவமைக்க இந்த தியரியைப் பயன்படுத்துகிறார்கள். இதில் வெற்றி பெற்றவர்களின் பண்டங்கள், சேவைகள், இணையத்தில் twitter, facebook, மற்றும் பல செயலிகள் வழியாக பிரபலப்படுத்தப் படுகின்றன.

उर्ध्वतिर्यग्भ्याम (ஊர்த்வ த்ரியக்ப்யாம்) - பகுதி 2

2011-06-24T01:23:00.000+05:30

இனி நாம் நான்கு இலக்க எண்களை வைத்து விளையாடப்போகிறோம்.

உதாரணத்திற்கு ஒரு 6713 X 2798 என்ற பெருக்கலை எடுத்துக் கொள்ளலாம்

படி 1:
வழக்கம் போல ஒன்றன் கீழ் ஒன்றாக எழுதிக் கொள்ளவும்

6 7 1 3
2 7 9 8

படி 2:
இடது ஓரத்தில் இருக்கும் இலக்கத்தை பெருக்கவும்

படி 3:
மிக முக்கியமான படி. குறுக்கே பெருக்க வேண்டும். கீழே உள்ள பெருக்கல் வழி முறையை பார்க்கவும்

படி 4:
வலது ஓரத்தில் இருக்கும் இலக்கங்களை செங்குத்தாக பெருக்கவும்

இப்போது அதிக சிக்கல்கள் கொண்ட ஐந்து இலக்க பெருக்கலைப் பார்ப்போம். இந்த சூத்திரத்தை போதிய அளவு பார்த்துவிட்டதால் நாம் ஐந்து இலக்க பெருக்கலுக்கு மேல் செல்லப்போவதில்லை. வழக்கம் போல் ஒரு உதாரணத்துடன் இந்த பெருக்கல் விதியை நாம் அனுகலாம்.

உதாரணம்: 73952 X 83761

படி 1 மற்றும் படி 2 மிகவும் பழகிப்போன ஒரு படியாக இருப்பதால் நாம் மிகவும் முக்கியமான படியான மூன்றாம் படிக்கு தாவி குதிக்கலாம்

மேலே நீங்கள் கவனித்ததைப் போல நாம் மேல் வரிசையிலிருக்கும் அனைத்து இலக்கங்களையும் கீழ் வரிசையிலிருக்கும் அனைத்து இலக்கங்கங்களுடன் பெருக்கிவிட்டோம். இப்பொது மிக எளிதான அந்த கடைசி படி

இவ்வளவு பெரிய இலக்க கூட்டு அமைந்த பெருக்கலுக்கான விடையை எவ்வளவு சுலபமாக கண்டடைந்து விட்டோம் பார்த்தீர்களா ?

இந்த முறையிலான பெருக்கல் அல்ஜீப்ரிக் முறையிலான பெருக்கல் முறையுடன் முற்றிலும் பொருந்திப் போகின்றது.

மேலே உள்ள படிகளில் நீங்கள் இந்த அல்ஜீப்ரிக் பெருக்கலை தான் மனக் கணக்காக செய்திருக்கிறீர்கள். இந்த முறையில் நீங்கள் செய்வதெல்லாம் தொடர்ச்சியான பெருக்கலும் கூட்டலும் - மனக்கணக்காக நீங்கள் இதைப் பழகும் போது காய்கறிக்காரனிடம் அவன் விலையை சொல்ல சொல்ல மனதில் கூட்டுத் தொகை உங்களையும் அறியாமல் வந்து விடும்.

பெருக்கல் என்பது இதோடு நின்று விட்டதா - இல்லையே ! இன்னும் சில விசேஷமான சூத்திரங்கள் இருக்கின்றன - வர்க்கம் கண்டுபிடிக்க, சில pattern-இல் இருக்கும் பெருக்கல்களை இன்னும் சுலபமாக செய்ய சூத்திரங்கள் நம்மிடையே இருக்கின்றன அவற்றை நாம் தொடர்ந்து பார்ப்போம்.

उर्ध्वतिर्यग्भ्याम (ஊர்த்வ த்ரியக்ப்யாம்) - பகுதி 1

2011-06-24T00:52:00.000+05:30

சுமார் 6 ஆண்டுகள் இருக்கும். அப்போது தான் வேதத்தில் சொல்லப்பட்டிருக்கும் கணித சூத்திரங்கள் பற்றிய ஆர்வம் எனக்கும் மேலிட்டது. அந்த ஆர்வம் வேதத்தின் மீது இருந்த ஞானம் என்று கதையளக்கத் துவங்கினால் எனக்கு போஜனம் கிடைக்காது. சுயநலத்தின் தேடலே அதற்கு காரணம். நான் அந்த சமயத்தில் என்னை GMAT என்ற மேலாண்மை படிப்புக்குத் தேவையான நுழைவுத்தேர்வுக்கு தயார் செய்து கொண்டிருந்தேன். அந்த சமயத்தில் அதில் இருக்கும் கணித கேள்விக்கு துரிதமாக விடையளிக்க எனக்கு சில சுருக்கு வழிகள் தேவைப்பட்டன. அந்த சுருக்கு வழிகள் வேதத்தில் இருக்கும் சூத்திரத்தில் கிடைக்குமா என்ற ஆர்வத்தில் படிக்கத்துவங்கினேன். ஆச்சரியம். கிடைத்தன.

அந்த சூத்திரங்களை நான் குழந்தைகளுக்கு சொல்லி கொடுக்கும் வகையில் ஆவணப்படுத்த விரும்பியதன் விளைவைதான் நீங்கள் இப்போது படித்துக் கொண்டிருக்கிறீர்கள். இப்போது நமக்கு வேதத்தில் இருப்பதாக நம் முன் இருப்பவை 16 சூத்திரங்கள். இவையனைத்தும் வேதத்தில் நேரடியாக சொல்லப்படவையல்ல. இவற்றை தனது ஆழ்ந்த தபஸின் மூலம் நமக்குப் பெற்றுத் தந்தவர் ஜகத்குரு ஸ்வாமி ஸ்ரீ பாரதி கிருஷ்ண தீர்த்தர் - இவர் பூரியின் கோவர்தன மடத்தின் சங்கராசார்யாராக இருந்தவர். பூர்வாசிரம பெயர் வெஙகடராமன். தமிழ்நாட்டில் பிறந்து பூர்வாசிரமத்தில் திருச்சி நேஷனல் கல்லூரியிலும், திருநெல்வேலியிலிருக்கும் சர்ச் மிஷனரி சொசைட்டி கல்லூரியிலும், ஹிந்து கல்லூரியிலும் கல்வி பயின்றவர். தமது 20வது வயதில் MA தேர்ச்சி பெற்றார். இளம்பிராயத்திலிருந்தே ஆழ்ந்த இறை நாட்டமும் கொண்ட இவர் 1919 ஆம் ஆண்டு முறையாக சந்நியாச வாழ்வை ஏற்றுக் கொண்டார். தனது துறவு வாழ்க்கையின் போது ஏறக்குறைய எட்டு ஆண்டுகள் தனிமையில் அவர் மேற்கொண்ட தபஸின் காரணமாக நமக்குக் கிடைத்தவை தான் 16 சூத்திரங்கள். அவை நேரடியாக சொல்லப்படாமல், அதர்வன வேதத்தில் பூடகமாக சொல்லப்பட்டிருக்கின்றன. அவற்றை பிரித்தெடுத்து நமக்கு சங்கராச்சாரியார் அருளியிருக்கிறார். ஒவ்வொரு சூத்திரத்திர்க்கும் ஒன்று என்ற கணக்கில் 16 நூல்களை அவர் இயற்றி இருக்கிறார். ஆனால் அவையனைத்தும் நம்மிடையே இல்லை. நம்மிடையே இருப்பவையெல்லாம் 16 சூத்திரங்களையும் உள்ளடக்கி அவர் எழுதியுள்ள ஒரே ஒரு நூல் தான்.

ஆனால் இந்த சூத்திரங்களை ஒருமித்த குரலோடு எல்லோருமே ஏற்றுக் கொள்ளவில்லை. காரணம் அவை வேத்திலிருந்து தான் வந்தவை என்பதற்கு எந்த் விதமான ஆதாரமும் கிடையாது. சங்காராச்சாரியரும் தன்னுடைய நூலில் இவற்றை அதவன வேததில் பூடகமாக சொல்லப்பட்டவைகளைக் கொண்டு மீள் உருவக்கம் செய்திருப்பதாகத்தான் சொல்கிறாரே அன்றி அவை அதர்வன வேத்தில் இந்த இந்த இடத்தில் இருந்து எடுக்கப்பட்டவை என்று கூறவில்லை. இந்து மதத்தில் வழங்கப்படும் தியானம், யோகம் போன்ற முறைகளில் மிகவும் உன்னதமான விஷயம் என்று நான் கருதுவது ஒன்றைத்தான் - அவை மனதின் அறியா வெளிகளை மனிதனுக்கு அறிமுகப்படுத்துகின்றன. இந்த சூத்திரங்கள் எல்லாம் அப்படிபட்ட உச்சகட்ட தியானத்தின் பயனாகவே நான் பார்க்கிறேன். இந்த சூத்திரங்களை சொல்லப்படும் வழி முறைகளுக்கு காரண காரியம் கிடையாது - அவை அனைத்தும் உள்ளுணர்வு வாயிலாக கண்டடையப்பட்டவை. It is a creative way of solving an existing problem. அந்த படைப்புத்திறமை தோன்றுவதற்கு காரணங்களும் clue-வும் ஸ்வாமிஜிக்கு அதர்வன வேதத்தை அத்யனம் செய்ததிலிருந்து கிடைத்து இருக்கக்கூடும். ஐந்து புலன்களுக்கு அப்பாற்பட்ட புலன்கள் திறக்கப்படும் போது கிடைக்கக்கூடிய தரிசனங்களின் பலன்கள் அவை. ஒருவேளை இவையணைத்தும் வேதத்தில் சொல்லப்படவில்லை என்று ஸ்தாபிக்கப்பட்டால் கூட அந்த வழிமுறைகளை கண்டடைந்த சங்கராச்சாரியாரின் மேதமையை நாம் மறுக்க முடியாது.

நடு நிலையிலிருந்து சொல்லவேண்டுமானால் இந்த சூத்திரங்களால் அதிகம் பயன் படுபவர்கள் பள்ளி குழந்தைகளே.
Advance Mathematics-இல் இந்த சூத்திரங்களின் பயன்பாடு எவ்வகையிலானது என்பது குறித்து இரு வேறு கருத்துகள் உள்ளன. ஏதேனும் ஒரு கருத்தை மட்டும் ஆதரிக்கும் அளவு எனக்கு கணிததில் முதிர்ச்சி கிடையாது என்பதால் நான் என்னையும் இந்த கட்டுரை தொடரையும் அந்த விவாதத்திலிருந்து விலக்கிக் கொள்கிறேன். தொழில் முறை கணித ஆராய்ச்சியாளர்கள் அந்த செம்பணியை மேற்கொள்ளட்டும்.

என்னுடைய பணி இனி வரும் பகுதிகளில் இந்த சூத்திரங்களை எளிமையாக குழந்தைகளும் புரிந்து கொள்ளும் வண்ணம் விளக்குதலே ஆகும். இந்த சூத்திரங்கள் வாயிலாக சிக்கலான கணித செயல்பாடுகளை மிகவும் எளிமையாக செய்ய முடியும் என்பதை நீங்கள் உங்கள் அனுபவத்தின் வாயிலாகவே உணரலாம். அவற்றை சிறு குழந்தைகளுக்கு எடுத்துச் சொல்லுதல் என்பது உங்களுக்கும் ஏதுவாக இருக்கும் வண்ணம் பின் வரும் பகுதிகளை நான் அமைக்க விரும்புகிறேன். ஒருவேளை உங்களுக்கு இதில் ஏதேனும் குழப்பம் தோன்றுமென்றால் அது என் எழுத்தின் பலவீனத்தையே காட்டுமேயன்றி, அவற்றை சூத்திரங்களின் குறைபாடாக கருதலாகாது.

उर्ध्वतिर्यग्भ्याम (ஊர்த்வ த்ரியக்ப்யாம்)

பகுதி 1

நாம் முதலாவதாக பார்க்கப்போவது ஊர்த்வ த்ரியக்ப்யாம் என்னும் சூத்திரம். இதனை அப்படியே பொருள் கொள்ள முயன்றால் “செங்குத்தாகவும் குறுக்காகவும்” என்ற அர்த்தம் வரும். இதன் பயன்பாடு மிகவும் அதிகம். எல்லாவிதமான பெருக்கல் முறைகளுக்கும் இதன் பயன்பாடு உண்டு. இதை பெருக்கலுக்கான பொதுவாத சூத்திரமாக கொள்ளலாம். மிகவும் எளிய வழிமுறைகளில் எந்த விதமான பெரிய இலக்கத்தையும் நாம் பெருக்கிவிட முடியும். உதாரணத்துடன் இதன் வழி முறையை நாம் புரிந்து கொள்ளலாம்.

நாம் தற்போது பயன்படுத்தும் முறைக்கும் இந்த முறைக்கும் இருக்கும் மிக முக்கியமான வேறுபாடு என்னவென்றால் எழுதுவது, படிப்பது போலவே பெருக்கலையும் இடமிருந்து வலமாகவே செய்வீர்கள்.

பயன்படுத்தும் வழிமுறை:

வழிமுறையை விளக்க நாம் பயன்படுத்தப் போகும் உதாரணம் 18 19

படி 1:
ஒவ்வொரு பெருக்கலிலும் Multiplicand (பெருக்கப்படுமெண்) மற்றும் multiplier (பெருக்கி) என்று இரண்டு நிச்சயம் எண்கள் உண்டு. அவற்றை ஒன்றின் கீழ் ஒன்றாக எழுதிக்கொள்ளவும். மேலே சொன்ன உதாரணத்தில்
Multiplicand (பெருக்கப்படுமெண்): 18
Multiplier (பெருக்கி): 19. இவற்றை ஒன்றன் பின் ஒன்றாக எழுதினால் இப்படி வரும். இனிமேல் நாம் நமது எல்லா உதாரணத்திலும் இப்படி தான் எழுதுவோம்.
18
19
படி 2:
முதலில் இடது ஓரத்தில் இருக்கும் இலக்கங்களை செங்குத்தாக ஒன்றோடு ஒன்று பெருக்கி அதன் பதிலை இடது ஓரத்தில் எழுதிக்கொள்ளவும்.

படி 3:
இப்போது குறுக்காக பெருக்கவும். அதாவது ஒன்றோடு ஒன்பதையும், ஒன்றோடு எட்டையும் பெருக்கவும். வரும் விடையை கூட்டவும். அதை கீழே சுட்டிக்காட்டியபடி எழுதவும். அதாவது (1X9) + (1X8) = 17. அதில் 7ஐ மட்டும் மேல் வரிசையில் எழுதிக் கொண்டு 1ஐ கீழ்வரிசையில் 1க்கு கீழ் எழுதிக் கொள்வோம்.

படி 4:
இப்போது 8 ஐயும் 9 ஐயும் செங்குத்தாக பெருக்கவும். வரும் விடையை பின் வருமாறு கூட்டவும்.

இதைப் பார்க்கும் போது உங்களுக்கு சாதாரணமாக எப்போதும் செய்யும் பெருக்கல் போலவே தோன்றினாலும் நாம் அடிப்படையில் கடைபிடித்திருக்கும் முறை வித்தியாசமானது. இந்த முறையின் பலன் நாம் இன்னும் அதிக இலக்கங்கள் கொண்ட எண்களை பெருக்கும் போது தான் தெரியும். அதிக இலக்கங்கள் கொண்ட எண்களை நாம் பார்க்கும் முன் இன்னும் சில இரட்டை இலக்க உதாரணங்களைப் பார்த்து விடலாம்.

எளிமையாக இருப்பது போல தோன்றுகிறதா ?

இன்னும் இலக்கங்களின் எண்ணிக்கை அதிகமாக அதிகமாக இந்த முறை இன்னும் அதிக பலனுள்ளதாகிவிடும். சரி, இப்போது நாம் மூன்று இலக்க பெருக்கலுக்கு இதே விதியை பொருத்திப் பார்ப்போம்.

உதாரணமாக 174 X 213 என்ற பெருக்கலை எடுத்துக் கொள்ளலாம்

படி 1:
Multiplicand (பெருக்கப்படுமெண்): 174
Multiplier (பெருக்கி): 213.
நமது படி 1இன் படி இதை நாம் ஒன்றன் கீழ் ஒன்றாக எழுதிக் கொள்வோம்.
174
213

படி 2:
ஏற்கனவே நாம் அறிந்தது போல இடது ஓரத்தில் இருக்கும் செங்குத்தாக இலக்கங்களை ஒன்றோடு ஒன்றை பெருக்கி விடையை எழுதிக் கொள்ளலாம்.

படி 3:
இதுவும் நாம் ஏற்கனவே பின்பற்றிய முறை தான். ஆனால் ஒரு முக்கியமான வித்தியாசம், நாம் குறுக்கே பெருக்குவதை ஒரு இலக்கத்தோடு மட்டும் நிறுத்தப்போவதில்லை. பின் வரும் பெருக்கல் முறையை கவனியுங்கள்.

இதில் நீங்கள் முக்கியமாக கவனிக்க வேண்டியது என்னவென்றால் 18 என்ற விடை நமக்கு எப்படி வந்தது என்று.

இதில் மேல் வரிசையில் இருக்கும் ஒவ்வொரு இலக்கமும் கீழ் வரிசையில் இருக்கும் ஒவ்வொரு இலக்கத்தோடும் செங்குத்தாகவும் குறுக்கேயும் பெருக்கப்படுவதை நீங்கள் கவனித்தீர்களா ? மேல் வரிசையில் இருக்கும் முதல் இலக்கமான 1 என்று என்ற இலக்கம் கீழ் வரிசையில் இருக்கும் அனைத்து எண்களுடனும் குறுக்கே பெருக்கப்பட்டவுடன் 7 என்ற இலக்கத்தின் பணி துவங்குகிறது - எப்படி ? 1 X 2 செய்தது போல 7 X 1 செய்கிறோம். ஆனால் ஒரே வித்தியாசம் அதை நாம் தனியான ஒரு படியாக செய்யவில்லை.

காரணம் செங்குத்தாக பெருக்கி விடை எழுதுவது என்பது ஓரத்தில் (இடது மற்றும் வலது) இருக்கும் இலக்கங்களுக்கு மட்டுமே. மற்ற இலக்கங்களுக்கு செங்குத்தாக பெருக்கும் விடை குறுக்கே பெருக்கும் விடையுடன் சேர்ந்து விடும்.

படி 4:
இப்போது கடைசி படி - இதை நீங்கள் நன்கு அறிவீர்கள் செங்குத்தாக பெருக்க வேண்டும்.

மிகவும் எளிதாக இருக்கிறது அல்லவா ? இப்போது இன்னும் சில மூன்று இலக்க பயிற்சிகளை செய்து பார்த்துவிட்டு நாம் நான்கு இலக்க எண்களுக்குச் செல்வோம் - ஐந்தாம் இலக்க எண்களின் பெருக்கலை நாம் செய்யும் போது இந்த முறையின் முழு ஆற்றலை நீங்கள் காண்பீர்கள்.

மேலே சுட்டிக்காட்டியுள்ள முதலாவது பயிற்சியில் அத்தனை பெரிய இலக்கங்களை எடுத்துக் கொண்டது ஒரு காரணமாகத்தான் - 123 என்ற விடையை யும், 153 என்ற விடையையும் எப்படி பிரித்து எழுதி இருக்கிறோம் என்று கவனித்தீர்களா ? பெருக்கலின் விடை இரண்டு இலக்கமாக வரும் போது முந்தைய இலக்கத்தின் விடைக்கு அடுத்த வரிசைக்கு எழுதுவது போல மூன்று இலக்க விடை வந்தால் அதை நாம் முந்தைய இலக்கதிற்கு முன்பு இருக்கும் விடையுடன் கூட்டுவோம்.

இரண்டாம் பயிற்சி எவ்வளவு எளிதாக விடையை கொண்டு வந்து விட்டது பார்த்தீர்களா ? நாம் அடுத்த பகுதியில் தொடர்ந்து அதிக இலக்கங்கள் கொண்ட பெருக்கலை இந்த சூத்திரம் கொண்டு எப்படி செய்வது என்று பார்ப்போம்.

சிதறல்கள் - 4

2011-06-22T00:02:00.003+05:30

இணையம் சார்ந்த இரண்டு முக்கிய நிகழ்வு இந்த வாரம் நிகழ்ந்திருக்கின்றன.

முதலாவது,

கூகிள் தமிழ் கற்றுக் கொண்டு விட்டது. Google Translate சேவையில் ஐந்து இந்திய மொழிகள் சேர்க்கப்பட்டுள்ளன. அதில் தமிழும் ஒன்று. நான் சில வாக்கியங்களைக் கொடுத்து சோதித்துப் பார்த்தேன். சில பல சேதாரத்தோடு கொஞ்சம் நெருங்கி வருகிறது. நாஞ்சில் நாடன், ஆனந்த விகடனைப் பற்றி சொல்ல ஆரம்பத்ததை கூகிள் மொழிமாற்றம் செய்திருப்பதைப் பாருங்கள். Gas flows backwardsக்காகவே ஆவி, மான நஷ்ட வழக்கு போடும்.

பரவாயில்லை போகப் போக தமிழ் நன்றாகக் கற்றுக் கொண்டு விடும். வெண்பா எழுதாத வரை சரி.

_oOo_

இரண்டாவது விஷயம். ICANN போர்ட், அதிக GTLDs தோன்றும் வகையில் வாக்களித்திருக்கிறது. GTLD என்றால் Generic top level domains. TLDகளில் (Top level domain) சில வகைகள் உள்ளன. தற்போது .com, .net, .org போன்ற GTLDs பழக்கத்திலிருக்கின்றன. .in, .uk போன்றவை country-code TLD. இவைத் தவிர sponsored TLDகள் சில இருக்கின்றன. TLDகளின் மொத்த பட்டியல் இந்த சுட்டியில் இருக்கின்றன.
இப்போது நிகழ்ந்திருக்கும் மாற்றம் என்னவென்றால், இந்த TLDகளை எந்த ஒரு நிறுவனமோ, தனிநபரோ TLD வாங்கிக் கொள்ள முடியும். $185,000 கட்டி TLD ரிஜிஸ்ட்ரியில் உங்களுக்குத் தேவையான TLDஐ சேர்த்துக் கொள்ள விண்ணப்பிக்கலாம். இதைத் தவிர வருடத்திற்கு $25,000 கட்ட வேண்டும். இந்த கட்டணம் நீங்கள் தனியாக ஒரு TLD வாங்கிக்கொள்ள விரும்பினால் மட்டுமே.

இவைத் தவிர தற்போது இருக்கும் GTLDக்கள் அப்படியே இருக்கும். இந்த ஏற்பாட்டினால் 2 முக்கிய நன்மைகள் இருக்கின்றன.
- நீங்கள் ஏதேனும் ஒரு புதிய பிராண்ட் துவக்க விரும்புகிறீர்கள் என்றால், அந்த பிராண்டிற்குத் தேவையான வெப்சைட்டை உருவாக்க விரும்பலாம். ஆனால் அந்த பிராண்டில் ஏற்கனவே அதிக டிராண்சாக்ஷன் இல்லாத வெப்சைட் ஒரு இயங்கிக் கொண்டிருக்கும் (இருக்கலாம்). வேறு வழி இல்லாமல் அதிக விலை கொடுத்து வாங்க வேண்டியிருக்கும். இல்லாவிட்டால், பிராண்ட் பெயர் வருவது போன்ற வேறு ஏதாவது பெயரை தேர்ந்தெடுக்க வேண்டியிருக்கும். இந்த நிலை இந்த ஏற்பாட்டின் மூலம் மாறலாம்.

- இரண்டாவது மற்றும் முக்கியமான நன்மை, முக்கிய சேவைகள் அல்லது கிரடிட் கார்ட் மூலம் பணபட்டுவாடா நடக்கும் தளங்களில் நம்பிக்கை சாந்த வாடிக்கையாளர்களின் கவலை குறையும்.

உதாரணத்திற்கு http://www.satyamcinemas.com/ என்ற வலைதள முகவரி சத்யம் சினிமாவிற்கு சொந்தமானதல்ல. http://sathyamcinemas.com - வித்தியாசம் ஸ்பெல்லிங்கில் இருக்கிறது.
இதே போல licofindia.com என்று தட்டச்சினால் LIC வெப்சைட் திறக்காது. ஏற்கனவே யாரோ பார்க் செய்து வைத்திருக்கும் இந்த வெப்சைட் முகவரிகள் தவறான தேவைக்குப் பயன்படுத்தப்படாத வரை எல்லாமே சரி.

இந்த பிரச்சனைக்கு ஒரு வழி, அவர்கள் பிஸினஸுக்கு ஏற்றபடியான TLD உருவாக்கிக் கொள்வது. .LIC போன்ற ஒரு TLD, ஏற்படுத்திக் கொண்டால், போட்டிக்காக வைப்சைட் உருவாக்கிக் கொள்வதால் வரும் குழப்பம் குறைவதோடு, வங்கிகள் போன்ற முக்கிய சேவைகள் வழங்கும் நிறுவனங்களின் நம்பகத்தன்மையும் பாதுகாக்கப்படும். வாடிக்கையாளர்களும் சரியான முகவரியில் தான் இருக்கிறோம் என்று நிம்மதியாக செயல்படலாம்.

அடுத்த வருடத்தில் பெரிய நிறுவனங்களின் மாட்க்கெட்டிங் பட்ஜெட்டில் $200 K கூடலாம். அடிவாங்கப்போவது, கண்ட மேனிக்கு டொமைன் வாங்கிப் போட்டு குறுக்கு வழியில் காசு பார்க்க விரும்பும் ஒரு சிலர்.

_oOo_

சென்ற வாரம் ஹிண்டுவில் தனஞ்ஜெயன், மற்றும் சாந்தா தனஞ்ஜெயன் அவர்கள் சினிமா முயற்சிகளைப் பற்றி சொல்லியிருந்தார்கள். இந்த சுட்டியில் அது இருக்கிறது. அதை முழுமையாகப் படித்து விட்டு, கீழே இருக்கும் வீடியோவைப் பாருங்கள்.

கமலின் மீசையால், நாம் எவ்வளவு பெரிய விஷயத்திலிருந்து தப்பித்து இருக்கிறோம் என்று உங்களுக்குப் புரியும். இன்னுமொரு தோடி ராகம் உருவாகாமல் கமல் காப்பாற்றியிருக்கிறார். இன்னொரு விஷயம் மோகன்லால் இடத்தில் தனஞ்ஜெயன். இரண்டு Larger than life characterகளில் என்னால் சத்தியமாக தனஞ்ஜெயனை நினைத்து கூடப் பார்க்க முடியவில்லை.

சிதறல்கள் - 3

2011-06-16T23:13:00.001+05:30

கதவுகள் இல்லாத வீடுகளைப் பற்றி என்ன நினைக்கிறீர்கள் ? இந்தியாவில் இது போன்ற வீடுகளைக் கொண்ட சிறு கிராமம் ஒன்று இன்றும் இருக்கின்றது – கர்நாடகத்தில் கடக் என்ற மாவட்டத்தில் தாவல் மாலிக் என்ற ஒரு சிறு கிராமம். அதில் இன்றும் வீடுகளுக்கு கதவுகள் கிடையாது. அதே போன்ற இன்னொரு ஊர், பஜாஜ் டி டி எஸ் ஐ விளம்பரம் அறிமுகப்படுத்திய ஊர். சிங்க்னாபூர் (மஹாராஷ்ட்ரா).

திருடுபவர்களை கடவுள் தண்டிப்பார் என்ற ஆன்மிக அஸ்திவாரத்தில் கட்டமைக்கப்பட்ட அடையாளங்கள் அவை. சனிஸ்வரன் சிங்க்னாபூரைக் காப்பாற்றுவதைப் போல, தாவல் மாலிக்கை, அதே பேர் கொண்ட சூஃபி , அவரது தர்காவிலிருந்து பார்த்துக் கொள்வார் என்பது நம்பிக்கை. சரி, சனீஸ்வரனைப் போல ஏன் கேதுஸ்வரன், ராகுஸ்வரன் இல்லை ? சனீஸ்வரனே இல்லை என்பது தான் சரி. அவர் சனைச்சரன். ஹேமில்டன் பாலம் அம்பட்டன் பாலம் ஆனது போல சனைச்சரன் மெதுவாக நகர்ந்து சனீஸ்வரன் ஆகிவிட்டார்.

ஆரம்பித்த விஷயத்திற்கு வருவோம். கதவுகள் ! இவற்றை மட்டுமே ஓவியத்தின் கருப்பொருளாகக் கொண்டு ஒருத்தர் படம் வரைந்து கொண்டு இருக்கிறார். சந்தான கிருஷ்ணன் என்று பெயர். கும்பகோணம். இப்போது வசிப்பது சென்னையில். அக்ரஹாரத்து வீடுகளில் இருக்கும், புராதன மதிப்பை ஓவியத்தில் கொண்டு வருகிறார். பெரும்பாலும் ஒரு பக்கம் மூடியிருக்கும் கதவுகள். திறந்திருக்கும் பகுதியிலிருந்து வீட்டின் உள் பகுதியைக் காட்டுகிறார். அதன் வழியாக நாம் நமது பழைய நினைவுகளுக்குள் நுழைகிறோம்.

இன்றும் எனக்கு பசுமையாக நினைவிலிருப்பது திருவாணைக்காவல் வடக்குத் தெருவில் எங்கள் தாத்தா இருந்த வீடு. உயரமான சீலிங். ஒரே சமயத்தில் ஒரு வரிசையில் 30-40 பேர் உட்கார்ந்து சாப்பிடக்கூடிய அளவு நீளமான கூடம். நீளமான வராண்டா, கூடம், புழக்கடை, கொல்லைபுற வாயில், கொல்லைப்புறம் என்று அடுக்குகளைக் கொண்ட வீடு. வாசலிலிருந்துப் பார்த்தால் கொல்லைப்புறத்தில் நிற்கும் மனிதர்கள் சின்னதாகத் தெரிவார்கள். அவ்வளவு நீளமான வீடு.

அந்த வீட்டிலிருந்து துவங்கி எனது எட்டு வயது முதலான நினைவுகள் ஒரு முறை அசைப்போட்டுக் கொண்டிருந்த போது பாழாய்ப் போன மொபைல் அடித்தது. சரி, சந்தானகிருஷ்ணனின் படைப்புகளை ஆன்லைனில் (http://www.doorpaintings.com/) பாருங்கள்.

எனக்கு சந்தானகிருஷ்ணனின் படைப்புகள், மிக முக்கியமானவை ! ஒரு கலைப்படைப்பு எவ்வளவு தூரம் உங்களை தன்வயப்படுத்த முடியும் என்பதற்கு இது சிறந்த உதாரணம். ஓவியமோ, கவிதையோ பார்ப்பவர்களை/ படிப்பவர்களின் உணர்வு நிலையை உயர்த்தும் போதே அது படைக்கப்பட்டதன் நோக்கத்தைப் அடைந்து விடுகிறது.

_ooOoo_

desispark.com என்று ஒரு வலைதளம். லோகத்தில் சம்சாரிகளை உண்டாக்கும் பணியில் ஈடுபட்டிருக்கிறது. தமிழ்மேட்ரிமோனி வகையறா. இதில் டேட்டிங்கும் உண்டு. வித்தியாசம் என்னவென்றால், ஜோடிகளைத் தேர்வு செய்து கொள்வதற்கெல்லாம் இவர்கள் பணம் வாங்கப்போவதில்லையாம். திருமண சந்தையில் ஒரு மாற்றத்தைக் கொண்டுவந்து சந்தையைக் கைப்பற்றுவது தான் இதன் நோக்கம் என்று சொல்கிறார்கள்.

எனது அனுமானத்தின் படி இது தேறாது. இந்த வலைதளம் ஒரு டேட்டிங் தளமாக வேண்டுமானால் கொஞ்ச தூரம் செல்லலாம். மேட்ரிமோனியைப் பொருத்தவரை இவர்கள் அந்த சந்தையை சரியாக புரிந்துகொள்ளவில்லை என்று தான் சொல்ல வேண்டும். Credibility என்ற ஒரு அம்சம் இருக்கிறது. அது மேட்ரிமோனி சந்தையில் மிகவும் முக்கியம். சில நூறு ரூபாய்கள் சேமிக்க இந்தியா போன்ற ஒரு தேசத்தில் தீவிரமாக துணை தேடுபவவர்கள் இது போன்ற ஒரு தளத்திற்கு வரமாட்டார்கள்.

_ooOoo_

சென்னை, இன்னுமொரு வெயில் காலத்தை வெற்றிகரகமாக கடந்து விட்டு மெள்ள வசந்தத்தை நோக்கி நகர்ந்துக் கொண்டிருக்கிறது. சில இடங்களில் சிவப்பு சிவப்பாக butea frondosa பூத்து இருக்கிறது. இந்த பூவுக்குப் தமிழில் பூவரசம்பூ என்று ஆறேழு வருடங்களுக்கு முன்பு தான் தெரியும். பின்னர் அது பூவரசம்பூ இல்லை இன்று நேற்று தெரிந்துக் கொண்டேன். அதற்கு தமிழில் பலாச பூ என்று பாட்டனியை மேஜர் சம்ஜெக்டாக எடுத்துப் படித்த தேவிபாலா சொன்னார். ஆங்கில வழிக் கல்வியில் படிப்பதில் இருக்கும் பிரச்சனை இது. சில விஷயங்களில் இயல்பாகப் பயன்படுத்தப்படும் பெயர்கள் தெரியாது.

எங்களுக்கு ஒரு zoology மேடம் இருந்தார். அவர் விலங்குகளின் zoological பெயர்களை நாங்கள் நினைவில் கொள்ள வேண்டும் என்பதற்காக விளையாட்டாக பல கதைகள் சொல்வார் - அத்தனையும் அபத்தமாக இருக்கும். நாங்கள் அதை வகுப்பு முடிந்தவுடன் சொல்லி சொல்லி சிரிப்போம். விளைவு இப்போதும் அந்த விலங்குகளின் பெயர் அத்துப்படி.

- நாகப்பாம்புன்னா நாக ராஜன், அதான் அதோட பேர் நாஜா நாஜான்னு வைச்சுருக்காங்க (Indian Cobraவுக்கு zoological name Naja Naja)
- பூனை அடிபட்டா எப்படி கத்தும் Felis, Felisனு கத்தும் - சரியா கேட்டுப்பாருங்க அப்படித் தான் கத்தும் (பூனையின் zoological பெயர் felis catus)
- மயில் தோகை விரிச்சு ஆடும் போது பார்த்திருக்கியா. பேய் மாதிரி இருக்கும். பேயோன்னு எல்லாரும் பயப்படறதால தான் அதுக்கு Pavo cristatusனு பேர்

இப்படி பல கதைகள் சொல்வார் - எங்களுக்கும் பொழுது போனது. அவரது நோக்கமும் நிறைவேறியது. அவர் நோக்கம் எங்களுக்கு புத்திசாலித்தனமான கதைகள் சொல்வதல்ல. இல்லையெனில் இன்னும் அவை என் நினைவில் இருக்காது.

இன்னொரு கதை இருக்கிறது. கழுதை + குதிரை ஹோல் ஸ்கொயர் இசிகொல்டு கழுதை ஸ்கொயர் + குதிரை ஸ்கொயர் + 2 கழுதை குதிரை என்று கணக்கு படித்த கதை. பிறகு சொல்கிறேன்.

பிகு: இந்த பதிவு 18 ஜூன் அன்று மாற்றப்பட்டது. நன்றி தேவிபாலா.

சிதறல்கள் - 2

2011-06-14T00:36:00.001+05:30

இப்போது நடக்கும் இந்தியா வெஸ்ட் இண்டீஸ் தொடரை ஒரு பைசாவுக்கு மதிக்க முடியாது. ஆனால் கமெண்ட்ரி கேட்க ஜாலியாகத் தான் இருக்கிறது. ஆல் இந்தியா ரேடியோவின் எஃப் எம் கோல்ட் 102.3இல் இந்தியா ஆடும் எல்லா கிரிக்கெட் போட்டிகளுக்கும் கமெண்ட்ரி சொல்வார்கள் (ஹிந்தி மற்றும் ஆங்கிலம் மாறி மாறி வரும்). இந்த முறை ஒரு சின்ன மாறுதல் முதல் ஆட்டத்தில் கவாஸ்கர் கொஞ்ச நேரம், லண்டனிலிருந்து பேசுகிறேன் என்று சொல்லிவிட்டுப் பேசினார். பின்னர் அடுத்த ஆட்டங்களில் லெப்டிணெண்ட் கர்னல் கபில் தேவ் பேசுகிறார். அவரை அடிக்கடி லெப்டிணெண்ட் கர்னல் என்று அழைக்கும் போது கேட்க ஜாலியாக இருக்கிறது.

கபில் தேவ், கொஞ்சம் எமோஷனல் பேர்வழி. ராணுவ உடை அணிவது எவ்வளவு பெருமைக்குரியது என்பதை கொஞ்சம் எமோஷனலாகவே இன்று சொன்னார். பொதுவாக, நான் கவனித்தவரை அவர், டிவி கமெண்டேட்டர்கள் செய்யும் கோமாளித்தனங்கள் இல்லாமல் சப்ஜெக்ட்டைப் பற்றி மட்டும் (அல்லது அதிகமாக) பேசுகிறார். சொன்னதையே திரும்ப திரும்ப சொல்லவில்லை. என்ன, அவ்வப்போது மலரும் நினைவுகளுக்குச் சென்று விடுகிறார். அவரது மலரும் நினைவுகளின் போது எனக்கு ஒரு மலரும் நினைவு வந்தது. ஒரு ஜோக், நாங்கள் ஸ்கூல் படிக்கும் போது, கிரிக்கெட் ஆடும் போது அடிக்கும் ஜோக்.

83 வேர்ல்ட் கப் ஜெயிச்சதுக்கப்புறம், இந்தியா டீம், வெஸ்ட் இண்டீஸ் டீம் அப்புறம் இங்ஜிலாந்து டீம் எல்லோரும் அமாவாசை இருட்டில் போய்க்கொண்டிருந்தார்களாம். அப்போது ஒரு பாலம் வந்ததாம். அந்த கும்மிருட்டில் அந்த பாலத்தை கடக்க முடியாமல் மற்ற இரண்டு டீமும் திரும்பிப் போய்விட்டார்களாம். இந்தியா டீம் மட்டும் அந்த பாலத்தைக் கடந்து அக்கரைக்கு வந்தார்களாம் - எப்படி ? விடை இந்த பதிவின் இறுதியில் சொல்கிறேன்.

சில விஷயங்கள் சுவாரஸ்யமாக இருந்தது. அவர்கள் விளையாடும் காலத்தில் ஃபீல்டிங்க் செய்வதற்கெல்லாம் அதிக முக்கியத்துவம் கொடுக்க மாட்டார்களாம். நமது வேளை பேட்டிங் மற்றும் பௌலிங் என்று சொல்வார்களாம். ஃபீல்டிங் ப்ராக்டீஸ் என்ற விஷயமே கிடையாதாம். முதன் முதலில் ஃபீல்டிங்கின் முக்கியத்துவத்தை டீமுக்கு எடுத்துச் சொன்னவர் கவாஸ்கர் தானாம்.

அதன் பின்னர், ஃபீல்டிங் விஷயத்தில் அதிக அக்கறை எடுத்துக் கொண்டவர் அமர்நாத் தானாம். அவர் தான் அணியில் பலருக்கும் முன்னோடியாக இருந்திருக்கிறார். ஆனால், இன்றளவும் என் நினைவில் இருப்பது கபில் தேவின் கேட்ச் தான் - அமர்நாத்தின் கேட்ச் இல்லை. ஏனென்றால் எனக்கு கிரிக்கெட் மீது ஈர்ப்பு ஏற்பட்டதற்கு காரணம் கபில்தேவ் தான்.

எனக்குச் சின்ன வயதிலிருந்தே கபில்தேவ் என்ற வீரர் மீது தனிப்பட்ட மரியாதை. அப்படிக்கூட சொல்ல முடியாது - ஒரு ஐகான் பிம்பம். என் அறையில் கபில்தேவ் ஒற்றைக் காலைத் தூக்கி ஹுக் அடிக்கும் போஸ்டர் ரொம்ப நாளைக்கு ஒட்டி இருந்தேன். கபில்தேவ் ஆடிய ஆட்டங்களின் கட்டிங்க் நிறைய இருக்கும். கபில்தேவ் இருந்தும் இந்தியா தோற்றுப் போனதை நினைத்து அழுதிருக்கிறேன். அதன் பின் கபில்தேவின் மீது இருந்த கடவுள் பிம்பம் கொஞ்சம் கொஞ்சமாக குறைந்தது. நான் குழந்தை தனத்தை வேகமாக இழந்துக் கொண்டிருந்தேன்.

ஸ்போர்ட்ஸ்டாரின் நடுபக்கம் என்று நினைக்கிறேன் அதில் பெரிய கிரிக்கெட் பந்தின் மீது கபில் சாய்ந்திருப்பது போன்ற ஒரு போஸ்டர் இருக்கும் அதை நான் பொக்கிஷமாக வைத்திருந்தேன். எங்கு போனது என்றே தெரியவில்லை. சமிபத்தில் ஒரு கத்தை பொங்கல் வாழ்த்து இடைத்தது - இவை எல்லாம் நான் ஆறாம் வகுப்புக்கு முன்னால் எனக்கு வந்தவை. அதில் 70% கபில்தேவ் படங்கள் தான்.

இப்போதும் பலவருடங்கள் கழித்து கிரிக்கெட் ஆட்டத்தை தலைவருக்காக கேட்கிறேன்.

சரி, இப்போது விடை: இந்தியா டீமிடம் தான் அரியாணா ”அரிக்கேன்” இருக்கிறதே. அதை வைத்துக் கொண்டு தான் அப்பாலத்தை அவர்கள் கடந்தார்கள்.
இந்த விடையைப் படித்தபின்னர் இந்த பின் வரும் வகைகளுள் ஏதேனும் ஒன்றில் தான் நீங்கள் இருப்பீர்கள்.
1) புரியாதவர்கள்: புரியவில்லை என்றால் விடுங்கள். ஒன்றும் குடிமுழுகி போய்விடாது
2) மொக்கை என்று திட்டுபவர்கள்: பின்னே, ஸ்கூல் பசங்க ஜோக் வேற எப்படி இருக்கும் ?
3) சிரிப்பவர்கள்: ஹி ஹி, நீங்க இன்னும் வளரனும் :-)

சிதறல்கள் 1

2011-06-05T00:25:00.002+05:30

பெரும்பாலும் ஒழுங்கற்றதாகவும் சிதறல்களாகவும் தான் என் எண்ணங்கள் எனக்குத் தோன்றுகின்றன. அவை ஒரு எழுத்து வடிவம் பிடிப்பதற்கு எனக்குப் பல மணி நேரம் பிடிக்கிறது. முன்பெல்லாம் இந்த மணி நேர கணக்கு சில நாட்களுக்கான கணக்காக இருந்ததுண்டு. இப்போது பரவாயில்லை. எனது இயல்பான சிந்தனைப் போக்கே அப்படித்தான் இருக்கின்றது. ஒரே நேரத்தில் பல விஷயங்கள் என மனதில் வந்து போகின்றன.

பின்பு, மனம் மிகவும் அமைதியாய் போன ஒரு சமயத்தில் தான் கவனித்தேன். அந்த சிதறல்களில் சில எண்ணங்கள் மிகவும் தொடர்புடையவையாக இருக்கின்றன. ட்விட்டர் நிச்சயம் வசதியாக இல்லை. இந்த சிதறல்களை அப்படியே இங்கு எழுதுவது என்று முடிவு செய்து விட்டேன்.

மனதை எப்படி ஒருமுகப்படுத்துவது என்று யாரேனும் அறிவுரை தந்தால் மனதை எப்படி சிதற விடுவது என்று பதில் வகுப்பெடுப்பேன் என்ற எச்சரிக்கையோடு, மேலே...

oO-0-Oo

http://usehipster.com/ என்று ஒரு வலை தளம் பற்றி கேள்விப்பட்டிருக்கிறீர்களா ? அந்த முகவரியைத் தட்டினால் அது jobs.usehispster.com என்ற முகவரிக்குத் தான் எடுத்துச் செல்லும். அதில் உங்கள் நண்பர் யாரையாவது வேலைக்கு சிபாரிசு செய்யவோ அல்லது நீங்கள் வேலைக்கு சேர்வதற்கு விண்ணப்பம் செய்யவோ படிவங்கள் கொடுக்கப்பட்டிருக்கும். வேறு எதுவும் அந்த நிறுவனத்தைப் பற்றியோ அல்லது அந்த வலைதளத்தைப் பற்றியோ இருக்காது.

உலகத்தில் இருக்கும் தகவல்களை ஒன்றிணைக்கும் வலைதளம் என்று அதன் ஒரு வரி அறிமுகம் கொடுக்கப்பட்டிருக்கிறது. இந்த ஒரு வரி அறிமுகமே இவர்கள் ரேஞ்சுக்கு ரொம்ப அதிகம். இதை விட பெரிய காமெடி, இந்த வலைதளம் ஆரம்பித்த விதம். எந்த விதமான தகவலும் கிடையாது. இதை ஆரம்பித்தவர்களில் ஒருவரான Ludlow, ஒரு forumஇல் இந்த மாதிரி ஒரு செய்தியைத் தந்தார். இவர்கள் ஆரம்பித்த முதல் இரண்டு நாட்களில் மட்டும் 10 ஆயிரம் பேர் இதில் பதிந்து கொண்டிருக்கிறார்களாம். சமுக உளவியல் ஆய்வாளர்களுக்கு இதில் மிகப்பெரிய செய்தி இருக்கிறது.

hipster என்றில்லை, தகவல்களை ஒருங்கிணைக்கப் போகும் தளங்கள், இணையத்தின் அடுத்தக் கட்ட வளர்ச்சியை முன்னெடுத்துச் செல்லப்போகின்றன. Real time data (நிகழ்கால தகவல்கள்) - இவற்றின் மதிப்பு மிக அதிகமாக இருக்கப்போகின்றன. கேட்கும் போது, துல்லியமான, பயனுள்ள, சமகால தகவல்கள் வழங்கப்போகும் செயலிகள் தான் அடுத்த ராஜாக்கள். இதன் அடிப்படையிலேயே Groupon IPO எனக்கு முக்கியத்துவம் வாய்ந்ததாக படுகிறது.

oO-0-Oo

சமிபத்தில் மீள்வாசிப்பில், லயிக்க வைத்த இரண்டு கவிதைகள்.

தேவதச்சனின் கவிதை 1:

சாவாமையின் வரைபடம் கிடைத்துவிட்டது

மேஜையில் விரித்து கையூன்றிப் பார்க்கிறேன்

அருகில்

இரும்பின் பாடலை

பாடிக் கொண்டிருக்கும்

சாவியை

உலோகக்கால மனிதன்

முணுமுணுத்துக் கொண்டிருக்கிறான்.

மூடியிருக்கும் தம்ளரில்

பிரளயத் தண்ணீர்

திறந்து வைத்திருக்கிறது, தன்

கடுமையை,

வரைபடத்தின் கோடுகள்

ஊர்ந்து கொண்டும்

ஓடிக் கொண்டுமிருக்கின்றன

எப்படித்தான்

பயணத்தைத் தொடங்குவது

எரிச்சலில்

படத்தைத் தூக்கி

எறிகிறேன்.

தாள்

வெளியிலும்

கோடுகள், என்

தலையிலும் விழுந்து கொண்டிருக்கின்றன.

தேவதச்சன் கவிதை 2:

அவரவர் கைமணலைத் துழாவிக் கொண்டிருந்தோம்

எவரெவர் கை மணலோ இவை என்றேன்

ஆம் எவரெவர் கைமணலோ இவை என்றான்

பிறகு

மணலறக் கைகழுவிவிட்டு

எங்கோ சென்றோம்

எவரெவர் கைமணலிலோ அவரவர் பெயரை செதுக்கத் தான் ஆளாய் பறக்கிறோம்.

oO-0-Oo

கூகிளின் +1 பட்டன் எனக்கு மிகவும் பிடித்திருக்கிறது. உங்கள் வலைதளத்திலோ, பதிவிலோ சேர்க்க விரும்பினால், இந்த சுட்டி உயயோகமாக இருக்கலாம்.

Shutter Island

2011-05-31T00:58:00.000+05:30

பாதி தூக்கம் கண்களை சுழற்றிக் கொண்டிருந்த ஒரு வெள்ளிக்கிழமை இரவில் தூங்குவதற்கு முன் டீவியில் என்ன படம் போடப்போகிறார்கள் என்று பார்த்துக் கொண்டிருந்த போது தான் தெரியவந்தது - Shutter Island இன்னும் 10 நிமிடத்தில் துவங்கப்போகிறதென்று. 10 நிமிடம் உட்காரலாம் என்று நினைத்த நான் பின்னர் தூங்கிய போது அதிகாலை 3 30 இருக்கும். படம் முடிந்த பின் படுத்திருக்கும் போதும் இந்த படத்தின் காட்சிகள் மீண்டும் மீண்டும் மனதில் ஓடிக்கொண்டிருந்தன - விழித்திருக்கும் போது தோன்றும் ஒரு கனவைப் போல.

மார்ட்டின் ஸ்கார்ஸேஸிக்காக இந்த படத்தை பார்க்க ஆரம்பித்தேன். டி காப்ரியோ தான் கதா நாயகன் என்பது கூட எனக்கு இந்த படம் துவங்கும் முன்பு வரை தெரியாது. இத்திரைப்படத்தைப் பற்றி துளி கூட தகவல்கள் தெரியாத நிலையில் இந்த படத்தைப்பார்த்தது தான் என்னைத் தூங்க விடாமல் செய்தது என்பதை பின்னர் உணர்ந்தேன்.

நான் இது வரை பார்த்த படங்களில் முதல் பத்து சிறந்த திரைப்படங்களுக்கான பட்டியல் தயாரித்தால், சர்வ நிச்சயமாகஇதற்கு ஒரு இடம் உண்டு.

இந்த திரைப்படத்தின் இயக்குனர் என்னுடன் உரையாடிக்கொண்டே இருந்தார். படம் முழுவதும் எனக்கும் அவருக்குமான உரையாடல் நீண்டது. மன நோய் காப்பகத்தில் இருந்து தப்பித்த ஒரு பெண்ணைத் தேடுவதற்காக வருகிறான் பார் என்று ஒரு மார்ஷலைக் காண்பித்தார். பின்னர் கடகடவென சில முடிச்சுகளைப் போட்டார்.

ஒரு கோட்டைப் போட்டு இதில் தான் பயணம் என்று சொல்லி என்னை கவனமாக பின் தொடரச் சொன்னார். அந்தப் பயணத்தில் மிகச்சில இடங்களில் லாஜிக் பிழைகள் இருப்பதாக நான் சொன்னேன். அவர் நான் சொன்ன எதையுமே காது கொடுத்துக் கேட்க வில்லை. மேலே கேள் என்று அதட்டிக் கொண்டே இருந்தார். நான் மிக கவனமாக கேட்டேன். உண்மையில் அவர் சொன்னதை அரைகுறை கவனத்தோடு பின் தொடர முடியாது.

அதனால், வாயை மூடிக்கொண்டு கேட்டுக் கொண்டே இருந்தேன். எல்லாம் சரியாக இருக்கிறதா என்று என்னிடம் அவ்வப்போது கேட்டார். சில இடங்களைத் தவிர மற்றெல்லாம் மிகச் சரி என்று சொன்னேன். கன ஜோர் என்று கை வேறு தட்டினேன். கதையின் முடிவை நெருங்கி விட்டோம் - இப்போது நீ இன்னும் கவனமாக இருக்க வேண்டுமென்றார். நான் ஆமாம் போட்டு பயபக்திக் காட்டினேன்.

அப்போது சொன்னார், ”நான் இது வரை சொன்னவற்றிற்கு தலைகீழானது தான் உண்மை”. இதைச் சொன்ன போது எனக்கு கோபம் வந்தது. என்ன உளறல், அப்படி இருக்கவே முடியாது. நீங்கள் சொன்ன கட்டமைப்பின் படி நீங்கள் சொன்னதெல்லாம் சரியாகத் தான் இருக்க வேண்டும் என்று சொன்னேன். வேண்டுமானால் நாம் நடந்து வந்த பாதையை நீயே திரும்பிப் பார் என்றார். திரும்பிப் பார்த்தேன். நேரான பாதை என்று நான் வர்ணித்த பாதை மிகவும் அதிகமான வளைவு நெளிவுகளுடன் கூடியதாக சுருண்டு படுத்திருக்கும் ஒரு நீளமான கருநாகப் பாம்பைப் போல காட்சியளித்தது. என் கண்ணையே என்னால் நம்ப முடியவில்லை.

எவ்வளவு பெரிய கண்கட்டி வித்தைக்கு நாம் ஆளாக்கப்பட்டிருக்கிறோம் என்று நான் நினைத்தபடியே நிமிர்ந்தேன். கையில் ஒரு மந்திரக்கோலுடன் ஒரு மந்திரவாதி நின்று கொண்டிருந்தார். யார் நீங்கள் என்று கேட்டேன். நான் தான் உன்னிடம் இது வரை கதை சொல்லிக்கொண்டிருந்த இயக்குனர் என்றார்.

எனக்குத் தலை சுற்றியது. கையிலிருந்த கோலைக் கீழே போட்டு, அந்த பாம்பிடம் ஜாக்கிரதையாக இரு என்றார். ஒரு வேளை அது ஆடாக இருக்கூடிய சாத்தியம் முற்றிலும் நிராகரிக்ககூடிய்தில்லை என்பதால் புல்கட்டை அந்த கோலின் பக்கத்தில் வைத்தேன். எதற்கு வம்பு !

இத்திரைப்படம் என்னை கேலி பேசியதைப் போல் உணர்ந்தேன். ஒரு பார்வையாளனாக, ஒரு திரைப்படத்தை அணுகும் சராசரி மனப்போக்கு மற்றும் பொதுபுத்தி சார்ந்த அனுமானங்கள் அனைத்தையும் கழற்றி வைத்து விட்டு இந்த திரைப்படத்தை அணுக வேண்டிய தேவை எனக்கு ஏற்பட்டது.

திரைப்படத்தின் பலம் திரைக்கதை தான். இதைபோல அல்ல - இதில் ஒரு 20% அளவு புத்திசாலித்தனம் இருக்கும் திரைப்படம் தமிழில் வந்தால் கூட போதும். நமக்கு மிகச்சிறந்த பொழுது போக்காக அது அமையும்.

மிகச்சிறிய ஒரு டயலாக். Why are you so wet, Baby. இந்த டயலாக் இரண்டு முறை வருகிறது. இரண்டு முறையும் பேசப்படும் போது அது கதையில் போக்கை எப்படி பார்வையாளருக்கு உணர்த்துகிறது என்பதை நினைத்தால் ஆச்சரியமாக இருக்கிறது. அதுவும் இறுதியில் பென் கிங்க்ஸ்லி இந்த டயலாக்கை சொல்லும் போது, தூக்கி வாரிப் போடுகிறது. ஏனெனில் உண்மை இந்த இடத்தில் தான் வெளிவரத்துவங்குகிறது.

இந்தப்படத்தை நான் இரண்டாவது முறையும் பார்த்தேன். இறுதியில் உண்மை தெரிந்த பின்னர் மீண்டும் ஒவ்வொரு காட்சியையும் பார்க்கும் போதும், இயக்குனர் சொன்னது சரி என்று தோன்றியது.

பென் கிங்க்ஸ்லீயைப் பார்த்து நான் ஆச்சரியப்பட்டுக் கொண்டிருக்கும் போது மேக்ஸ் சிடோ வருகிறார். இவரைப் பற்றி செவன்த் சீல் பற்றிய பதிவில் குறிப்பிட்டிருக்கிறேன். இது போன்ற dark plotsகளுக்கு மார்ட்டின் ஸ்கார்சேசியை அடித்துக் கொள்ள ஆளில்லை என்பது என் திண்ணமான நம்பிக்கை.

கீழே இருக்கும் வீடியோவில் கையிலிருக்கும் டோலொரெஸ் கையிலிருக்கும் மதுபானப்புட்டி திடிரெண்று மறைந்தது இயக்குனரின் தவறில்லை என்பதை புரிந்து கொள்ளுங்கள். அது தான் கதையின் ஆதார முடிச்சுகளுள் ஒன்று. முதல் முறை நான் பார்க்கும் போது இதையெல்லாம் தவறு என்று பைத்தியக்காரத்தனமாக நான் நினைத்துக் கொண்டிருந்தேன்.

இந்த படம் எந்த ஆஸ்கர் விருதும் வாங்கவில்லை. சென்ற வருடத்தின் போட்டி அந்த மாதிரி. சென்ற வருடம் ஆஸ்கர் வாங்கிய ஹர்ட் லாக்கர் கூட என்னை இந்த அளவு பாதிக்கவில்லை. அற்புதமான படம். இன்னும் நான் இன்ஸெப்ஷன் பார்க்க வில்லை.

இந்த படத்தின் காட்சி விவரிப்பிற்கோ, கதை போக்கையோ பற்றிச் சொல்வது போன்ற மகா பாவம் உலகத்தில் வேறு எதுவும் இருக்க முடியாது. ஒரு வேளை நீங்கள் இதை இன்னும் பார்க்கவில்லையென்றால் இதை அவசியம் பார்க்க வேண்டும் என சிபாரிசு செய்கிறேன்.

மணி பஞ்சர் கடை

2011-05-21T18:29:00.000+05:30

செல்வம் முடிதிருத்தகத்தில் முடி திருத்தும் பணியில் ஈடுபடும் எல்லோரையும் செல்வம் என்று எப்படி நினைக்கலாமோ அதேபோல மணி பஞ்சர் கடையில் பஞ்சர் ஒட்டும் 76 வயது காரருக்கு மணி என்ற பெயர் தான் இருக்கும் என்று அனுமானிக்கலாம்.

”சார், காத்து புடிக்கனும்”
”சாப்ட வாணாம், போய்ட்டு அப்றம் வா”
முதன் முதலில் அவரிடம் சைக்கிளில் காத்து பிடிக்க சென்ற போது அடித்து துரத்தாத குறையாக விரட்டி விட்டார்.

இரண்டாவது முறை சென்ற போது, இன்னும் கொஞ்சம் பவ்யம் கூட்டினேன்.

”சார், காத்து புடிக்க முடியுமா”
“காத்து புடிக்க முடியலைனா, பம்பு எதுக்கு வைச்சிருக்கேன்”
என்ன பதில் சொல்வது என்று தெரியவில்லை. பவ்யமாக நின்று கொண்டு சரியாக 3 ரூபாய் சில்லறையாக கொடுத்து விட்டு நகர்ந்து விட்டேன்.

ஒரு முறை இரண்டு முறை அல்ல, எப்போது போனாலும் சிடுசிடுப்பு அவரிடம் குடியிருக்கும் - எந்த வேளை சென்றாலும். அவர் யாரிடமாவது சிரித்து பேசுவாறா என்று யோசித்ததுண்டு.

சில சமயம் 2-3 மணியளவில், கட்டம் கட்டி கடை வாசலில், ஆடுபுலி ஆட்டம் ஆடிக் கொண்டிருக்கும் போது கை கொட்டி கொக்கறிப்பதை நான் பார்த்திருக்கிறேன்.

இரவு மணி 7 30க்கு ஒரு முறை போன போது கொஞ்சமே பேசினார்.
” என்ன, கடை அடைக்கற நேரத்தில் வந்திருக்க. ஒனக்கா ராப்பூரம் கடை தொறந்து வெச்சிருப்பேனா. அவனவன் 9 டு 5 தான் வேலை செய்யறான். எப்படி வாலறான் தெரியுமா. 60 வருஷமா இதே தேவ்டியா பொயப்பு - நாய் மாரி வேலை செஞ்சும் சொந்தமா எதுவும் கெட்யாது - தோ சந்துரு, மெஷின் போட்டு காத்து புடிக்கறான். ரெண்டு கடை போட்டுட்டான்”

அப்போது தான் கொஞ்சமே பிடிபட்டார், மனிதர். பெரிய சேமிப்பு இருக்கும் என்று தோன்றவில்லை. காக்கி அரைடிராயரும், மஞ்சள் நிற பனியனும் தவிர வேறு எதுவும் அணிந்து பார்த்ததில்லை. எல்லோரும் மோட்டார் போட்டு எளிதாக காத்து பிடிக்கும் போது, தான் மட்டும் இன்னும் பம்ப் வைத்து காத்து பிடிக்கிறோம் என்ற கையாலாகதத்தனம். இப்படிப்பட்ட ஆளுமையிடம் உலகத்தின் மீதும் அதன் மனிதர்கள் மீதான வெறுப்பைத் தவிர வேறு எதை எதிர்பார்க்க முடியும்.

சமுக ஓட்டத்தில் விரைவாக நீந்த முடியாதவர்கள், சாமர்த்தியம் இல்லதவர்கள், திறன் குறைந்தவர்கள் இப்படி தேங்கி விடுவது துரதிருஷ்டவசமானது தான். அவர்களது வயதோதிகம் இன்னும் மோசம். இந்தியா மட்டுமல்ல. உலகளாவிய பிரச்சனை. பகவத் கீதையில் ஆரம்பித்து, எய்ன் ராண்ட் வழியாக ஆயிரம் மேற்கோள்கள் காட்டலாம். ஆனால் இந்த பிரச்சனையை அவை எதுவும் தீர்க்காது.

இது போன்ற சிறு/ குறு தொழில்கள் செய்வர்களுக்கான காப்பீடு/ ஓய்வூதியம் போன்ற விஷயங்கள் மூலம் ஏதேனும் சிறிய அளவில் தீர்வு ஏற்படலாம். ஆனால் அவை குறித்து அரசின் அணுகுமுறை எப்படி இருக்கிறது/ இருக்கும் என்று சரியாக தெரியவில்லை.

இப்போதைக்கு, என்னால் செய்ய முடிந்த ஒரே உதவி, அவரிடமே தொடர்ந்து காத்து பிடிப்பது.

இந்தியா ஜெயிக்க என்னவெல்லாம் பண்ண வேண்டியிருக்கு

2011-03-31T12:06:00.000+05:30

இந்த படத்தைப் பார்த்து விட்டு சச்சின் செண்ட்சுரி அடித்தால் இந்தியா தோற்கும் என்பது மூட நம்பிக்கை என்று சீரியஸாக விளக்கம் அளிக்க முற்படுபவர்களுக்கு என் நன்றியை முன்கூட்டியே தெரிவித்தக் கொள்கிறேன்.

சென்னையில் ஒரு ஷாக் ட்ரீட்மெண்ட்

2011-03-24T20:56:00.002+05:30

இந்தியாவில் 2001ஆம் ஆண்டு நடந்த பார்டர் கவாஸ்கர் தொடர் நடந்து பத்தாண்டுகள் நிறைவு அடைந்ததை ஒட்டி சொல்வனத்தில் எழுத்திய கட்டுரை இந்த சுட்டியில் வாசிக்க கிடைக்கும்.

இந்த கட்டுரை, இன்று நடந்த ஆட்டத்தில் இந்தியா பெற்ற வெற்றிக்கு சமர்ப்பணம்.

யோஷிகி

2011-03-13T11:49:00.002+05:30

கூகிள் பஸ்ஸில் தி ஜா எழுதிய யோஷிகி சிறுகதை ஸ்கான் செய்து அப்லோட் செய்யப்பட்ட முகவரியை, ராம்ஜி யாஹூ தந்தார். மாமல்லனுக்கு நன்றி.

சில சிறுகதைகள், சில கட்டுரைகள், ஒரு முறை படித்தாலே நீண்ட நாட்களுக்கு மனதில் இருக்கும் படியான தாக்கத்தை தந்து விடும். அந்த மாதிரியான சிறுகதை இது.

“அழுகிற பைத்தியத்தைக் காட்டிலும் சிரிக்கிற பைத்தியம் பார்க்க அழகாகத்தானே இருக்கும் ?” என்று யோஷிகி சிரித்தார்.

சிறுகதையின் சாராம்சமும் இதுதான். ஒற்றை வரியில், சிறுகதையின் சாரத்தை அடக்கி விட்டு சில பக்கங்களுக்கு சிறுகதையை விவரிக்கிறார் தி ஜா. கடந்த சில மாதங்களில் படித்ததில், இது போல பாதித்த மற்றொரு சிறுகதை அறம் (ஜெயமோஹன்). யோஷிகி கதையை முழுவதும் படிக்க இந்த சுட்டியை க்ளிக் செய்யுங்கள்.

ஆடுகளம் - விவரிப்பின் அழகில் மறைந்து போகும் ஆட்டம்

2011-02-12T23:31:00.000+05:30

முன்பை விட இப்போதெல்லாம் தமிழ் சினிமா பார்ப்பது மிகவும் குறைந்து போய்விட்டது. இப்போது வரும் கதாநாயகிகள் யாரென்று தெரியவில்லை என்ற உண்மையைச் சொன்னால், வயதாகி விட்டதை கண்டுபிடித்து விடுகிறார்கள் :) அவசரமாக தமிழ் சினிமா பற்றிய ஒரு பதிவு எழுதிவிடுதாக கைகளை மடித்துக் கொண்டு செயலில் இறங்கி விட்டேன்.

அமெரிக்காவிலிருந்து வந்த நண்பன் புண்ணியத்தில் சமிபத்தில் பார்த்த ஒரே படம் ஆடுகளம். எந்த விதமான எதிர்பார்ப்பும் இல்லை. தியேட்டருக்குப் போகும் முன் “ஹையய்யோ” பாட்டு தான் ஒரே விலாசமாக இருந்தது. இந்த பாட்டை லூப்பில் போட்டு கேட்டுக் கொண்டு இருக்கின்றேன், இன்னமும்.

இன்னுமொரு மதுரைப் படம் - அக்குளை சொறிந்து கொண்டு வரும் பரட்டைத் தலையர்கள் எண்ணெய் வடிவும் முகத்தோடு வந்து சண்டித் தணம் செய்து விட்டு அரிவாள் வீசுவார்கள் என்று எதிர்பார்த்து தான் திரைப்படத்திற்குச் சென்றேன். சுவாரஸ்யமான ஆச்சர்யம் காத்திருந்தது.

சேவல் சண்டையை மையமாக வைத்து விரிக்கப்படுகிறது ஒரு களம். அந்த களத்தில் ஆடுவது சேவல்களல்ல, ஆடுபவை மனித மனங்களின் விகாரங்கள். மனிதர்களின் கௌரவத்தின் பிரதிநிதியாக, அனுபவத்தின் பிம்பமாக, வாழ்வின் அர்த்தமாக, கனவுகளின் வடிவமாக பல பரிமாணங்களில் களத்தில் இறக்கபடுகின்றன சேவல்கள். விசித்திரமான போட்டி. வெற்றியும் தோல்வியும் ஆட்டக்காரர்களுக்கள்ள, ஆட்டத்தை இயக்குபவர்களுக்கு. உருட்டி விடப்பட்ட உயிருள்ள பகடைக் காய்கள், அந்த சேவல்கள். வெற்றியில் கொக்கரிப்பதும், தோல்வியில் புழுங்குவதும் பகடையை உருட்டுபவர்களே, சேவல்களல்ல.

முதல் பாதி முழுவதும் கள விவரிப்பு தான். அந்த விவரிப்பின் ஊடாக படத்தின் மைய ஓட்டமாக நிகழும் ஆட்டத்தைக் காட்ட விரும்பியிருக்கிறார் இயக்குனர். திரைப்படத்தின் முக்கியமான பகுதி இடைவேளைக்கு பின்பான, இரண்டாவது பகுதி தான். ஆனால், துரதிருஷ்டவசமாக முதல் பாதியில் இருக்கும் கள விவரிப்பில் இரண்டாம் பாதியின் அழகு மறைந்து போகிறது.

இரண்டாம் பாதியை அணுக மிகவும் உதவியாக இருப்பது, முதல் பாதியில் வழங்கப்படும் இந்த கள விவரிப்பு தான் என்பது மறுக்க முடியாத உண்மை. சேவல் சண்டைகளின் தன்மைகளை விவரித்தபின், மனிதர்கள் ஆடும் ஆட்டத்தை காட்டியிருப்பது கனத்தை அதிகரிக்கிறது. முதல் பாதியின் விவரிப்பு இல்லாவிடில், இது இன்னுமொரு குரோதத்தைப் பற்றிய கதையாக மாறியிருக்கும். இரண்டாவது பகுதி, சேவல்களைத் தாண்டி செல்லாவிடில் இந்த திரைப்படம் இன்னுமொரு விளையாட்டைப் பற்றிய திரைப்படமாகி நீர்த்துப் போயிருக்கும். இரண்டையும் ஒரு மையப்புள்ளியில் சந்திக்க வைத்தது தான், இயக்குனரின் முதிர்ச்சி. ஒரு தேர்ந்த கதை சொல்லி, சொல்ல வேண்டிய விஷயங்களை விட புரிய வேண்டிய விஷயங்களிலே கவனம் செலுத்துவான். இந்த திரைப்படத்திலும் அதுவே நடந்திருக்கிறது.

முதல் பாதியில் களத்தை இயக்கியவர்கள், இரண்டாம் பாதியில் சேவல்களாக மாறிப்போகின்றனர். மனிதர்களாலான அந்த புதிய களத்தை இயக்குபவர், பேட்டைக்காரன். ஒரு கட்டத்தில் இயக்குபவனும் சேவலாகிப் போகிறான் (தோற்ற சேவலுக்கு நேருவதையே தனக்கும் தண்டனையாக கொடுத்துக் கொள்கிறான் - கழுத்தை அறுத்துக் கொண்டு இறக்கிறான்). அந்த கட்டம், இயக்கப்பட்ட சேவல் ஆட்டத்தின் சூட்சுமத்தைப் புரிந்துக் கொண்டு இயக்கியவனின் மீது பாயும் தருணம். இயக்குபவன்/ சேவல் என்ற வரையறைகள் அறுந்து, சேவல்களால் ஆன களத்திற்கு நாம் அழைத்துச் செல்லப்படுகிறோம்.

இக்குறியீடுகளாலும், படிமங்களாலும் நிறைந்திருக்கிறது இப்படம்.ஆனால் கவனச்சிதறல்களும் அதிகம். ஐரின் கதாப்பாத்திரம் இந்த படத்திற்கு எதற்கு ? பேட்டைக்காரனின் இளம் மனைவி எதற்கு? ஏறக்குறைய 20-30 நிமிடங்கள் இக்கவன சிதறல்களில் கழிந்து விடுகிறது. அதனாலோ என்னவோ, நிறைவாகத் தோன்ற வேண்டிய சில தருணங்கள் சொல்லப்படாமலே விட்டுவிட்டது போல தோன்றுகிறது. உதாரணத்திற்கு பேட்டைக்காரன் இறந்தபின்னர், கொலைப்பழியுடன் கருப்பு -ஐரின் ஜோடி ஊரைவிட்டுப் போகும் சம்பவம் சினிமாத்தனமான முடிவு. ஒரே வார்த்தையில் காயப்பட்டு பேட்டைக்காரனின் மனைவி ரோஷத்தோடு சென்று விடுகிறாள் - பேட்டைக்காரன் அதன் பிறகு எதுவுமே செய்யவில்லை. பேட்டைக்காரனின் வன்மம், மிகவும் மேலோட்டமாக சொல்லப்பட்டிருக்கிறது - அவ்வளவு உக்கிரமான வன்மம் கொண்டவனுக்கு இன்னும் கொஞ்சம் காட்சிகள் இருந்திருக்க வேண்டும். இந்த படத்தின் protagonist என்றால் அது பேட்டைக்காரன் தான். மிகவும் நிறைவாக செதுக்கப்பட்ட பாத்திரம் அது. ஆனால் போதுமான அளவு, காட்சிகள் ஒதுக்கப்படாத கதாபாத்திரமும் அது தான்.

மற்ற படங்களிலிருந்து இந்த படம் வித்தியாசப்படுவதற்கு காரணம் என்று நான் நினைப்பது இரண்டு விஷயங்கள்
1) இரண்டு திரைக் கருக்களை எடுத்துக் கொண்டு அவற்றை பின்னிய விதம். முதல் பாதி மற்றும் இரண்டாம் பாதி இரண்டுமே ஒரு தனி திரைப்படமாக எடுக்கக்கூடிய அளவு சரக்குடையவை. ஆனால் அவை பின்னப்பட்டிருப்பதால், பார்வையாளன், திரைப்படம் இயங்கும் வெளியை மிகவும் அற்புதமாக உணர்ந்து கொள்ள முடிகிறது
2) யாரும் தொடாத சேவல் சண்டையை இந்த அளவிற்கு நுணுக்கமான தகவல்களோடு அறிமுகப்படுத்தியிருப்பது.

மிகவும் எதார்த்தமான, வெள்ளந்தியான கதாபாத்திரம் தணுஷுக்கு. மிக மிக இயல்பாக இருக்கிறார் மனிதர். கவிஞர் ஜெயபாலன் மிரட்டுகிறார். நிச்சயம் வேறு யாரும் இந்த அளவிற்கு இக்கதாபாத்திரத்திற்கு நியாயம் சேர்த்திருக்க முடியாதென்று நான் நம்புகிறேன். காட்சிகள் செல்லச் செல்ல தணுஷும், ஜெயபாலனையும் தவிர வேறு யாரையும் அந்தந்த கதாபாத்திரங்களில் நினைத்துக் கூட பார்க்க முடியவில்லை. இருவருக்கும் ஏதேனும் விருது கிடைக்க வேண்டும் என நான் விரும்புகிறேன். அந்த கரகர குரல் கனகச்சிதம்.

எப்போதும் சொல்வதையே தான் மீண்டும் சொல்ல வேண்டியிருக்கிறது - Almost there, yet so far.

ஆருத்ரா தரிசனம்

2010-12-23T00:28:00.001+05:30

போன தடவை ஆருத்ரா தரிசனம் வந்த போது அப்பா இருந்தார். ஜனவரி 1ஆம் தேதி ஆருத்ரா தரிசனம் வந்தது. கோயிலுக்குப் போய் அர்ச்சனை செய்து பின் களி சாப்பிட்டு விட்டு புத்தக கண்காட்சி போனேன்.

ஒரு நாள் தள்ளியோ முன்போ பிறந்திருந்தால் ஸ்ரீராம் என பெயரிடப்பட்டிருக்க வேண்டியவன். சந்திரசேகரன் ஆனதற்கு இந்த ஆருத்ரா தரிசனமே காரணம். என் பெயரை சேகரன் என்று எழுதுவது கூட தப்பு. ஷேகரன் என்று தான் எழுத வேண்டும். சந்திரஷேகரன் என்றால் சந்திரனை சூடியவன் என்று பொருள். ஷேகர: என்ற சமஸ்கிருத வார்த்தைக்கு சிகரம், உச்சி, கொண்டை போன்ற பொருள்கள் உண்டு. சிறு வயது பழக்கம் காரணமாக நானே என்னை சந்திரசேகரன் என்று தான் எழுதிக் கொண்டிருக்கிறேன். (பிறைசூடன் என்று ஒரு பாடலாசிரியர் இருக்கிறார் - அவர் இயற்பெயர் சந்திரசேகரனா என்று கண்டுபிடிக்க வேண்டும் என்று நான் நினைத்ததுண்டு)

பொற்பாதம் எடுத்து ஆடும் நடராஜர் உத்சவராக வலம் வருவதைப் பார்க்காமல் பள்ளி கல்லூரி நாட்களில் ஆருத்ரா தரிசனம் கழிந்ததில்லை. பின்னர், ஆஃபீஸ் செல்ல ஆரம்பித்தவுடன் ஆருத்ரா தரிசனம் வந்தால் நான் எழும் முன்பே என் பெயருக்கு அர்ச்சனை (கோயிலில்) நடந்து விடும். எழுந்து ஆஃபீஸ் கிளம்பும் முன் தயாராக இருக்கும் பிரசாதம் மட்டும் இட்டுக்கொண்டு கிளம்பிவிடுவேன்.

ஏழு தான் குழம்பும் நெய் சொட்டும் களியாயுமாக ஊரே என்னைக் கொண்டாடுவதாகக் கொண்ட சிறு வயது மயக்கங்கள் என் நினைவிலிருக்கின்றன. ஆயிரம் சந்திரசேகரன்கள் இருந்தாலும் அந்த பெயர் வைத்துக் கொள்ள எனக்கு மட்டுமே தகுதி உண்டு என்று நினைத்த குழந்தைத் தனங்கள் நிறைந்த பொழுதுகள் அவை. ஊரில் இருக்கும் போது காலையில் கொங்கனேஸ்வரனுக்கும் மாலை பிரஹதீஸ்வரனுக்கு அர்ச்சனை நிச்சயம்.

ஒரு முறை கிரிக்கெட் விளையாட மதுரை செல்ல வேண்டியிருந்த போது, ஆருத்ரா தரிசனம் வந்தது. அப்போது மதுரையில் இருக்கும் ஒரு சிவன் கோயிலுக்கு என்னை ஆருத்ரா தரிசனத்திற்கு கூட்டிச் செல்வதாக இருந்தால் மட்டுமே மகனை விளையாட அனுப்புவேன் என அம்மா ஏறக்குறைய சத்யாகிரகமே செய்தாள். எந்த கோயிலுக்குப் போனோம் (போனோமா) என்று எனக்கு சரியாக நினைவிலில்லை.

சில சமயம் ஒரே வருடத்தில் இரண்டு ஆருத்ரா தரிசனம் வரும் (இந்த வருஷத்தைப் போல). இங்க்லீஷ் பிறந்த நாளை ஒரு பொருட்டாக எடுத்துக் கொள்ளாத குடும்பத்தில் பிறந்ததால் சிறு வயதில் ஒரே வருஷத்தில் ஒருவன் எப்படி இரண்டு முறை பிறப்பான் என்ற குழப்பமெல்லாம் எனக்கு ஏற்பட்டதுண்டு.

கொஞ்சம் விபரம் தெரிந்த பின் என் சார்ந்த விஷயங்கள் மறைந்து சைவ பண்டிகையாக மட்டுமே தோன்றத் துவங்கிவிட்டது. பிறந்தது முதல் என் பெயரில் அர்ச்சனை செய்யப்படாமல் கழிந்த முதல் ஆருத்ரா தரிசனம் இன்று.

கடந்த சனிக்கிழமை சந்திப்பு

2010-12-15T10:00:00.000+05:30

கடந்த சனிக்கிழமை Unturnedpagesஇன் இரண்டாம் சந்திப்பு நிகழ்ந்தது. இதில் சாரு நிவேதிதாவின் படைப்புகள் பற்றி அவரது வாசகர் பாஸ்கர் சில கருத்துகளை பகிர்ந்து கொண்டார். அந்த பதிவின் ஒலிப்பதிவு இங்கே.

பகுதி 1

பகுதி 2

பகுதி 3

பகுதி 4

பி கு: இந்த ஒலிப்பதிவில் சொல்லப்பட்டிருப்பவை அனைத்தும் பாஸ்கரின் அனுபவங்களின் மூலம் அவர் தேற்றிக் கொண்ட கருத்துகள் மட்டுமே. Unturnedpagesஇன் கருத்து அல்ல.