குமரன் குடில்

அமெரிக்கத் தேர்தல் களேபரம்

2020-11-22T08:02:00.001+05:30

எப்பொழுதுமே தேர்தல் செய்தி என்பது சினிமா ரிலீஸ், விளையாட்டு போட்டிகளின் இறுதிகட்டம் என்பது போல் ஒரு பரபரப்பான, மக்களைக் கவர்ந்து ஈர்க்கும் ஒரு செய்தியாக இருந்து வருகிறது. மக்களின் தலையெழுத்தை தீர்மானிக்கும் நிகழ்வு என்பதால், கண்டிப்பாக அதற்கான முக்கியத்துவத்தைக் கொடுத்தாக வேண்டும். ஆனால், மக்கள் தேர்தல் முடிவுகளைக் கவனிப்பது அதற்காக மட்டும் இல்லை.

ஏதோ வாக்குவாதத்தில், பேச்சில் நாம் ஒரு நிலைப்பாட்டை எடுத்திருப்போம். அந்த நிலைப்பாட்டைத் தாங்கி பேசிப் பேசியே அந்தக் கருத்தியலைத் தாங்கிப்பிடிக்கும் தூணாக நம்மை அறியாமலேயே மாறியிருப்போம். அரசியல் கொள்கை, அரசியல் தலைவர் போன்றவற்றிலும் நமது நிலைப்பாடு அப்படியே இருந்துவிடுகிறது. ஒரு கட்சிக்கு ஒருமுறை ஏதோ ஒரு காரணத்தால் ஓட்டுப்போட்டுவிட்டால், அதற்குப் பின்னால் வரும் தேர்தல்களில் எல்லாம் அதே கட்சிக்கு ஓட்டு போடுவது என்பது பாமரருக்கு மட்டும் உரித்தானது அல்ல. அரசியல் ஞானம் உள்ள அறிஞரும் செய்வதாகும். தான் ஆதரிக்கும் கட்சியின் தவறுகளைப் பேசாமல் தவிர்ப்பது, எதிரணியின் நல்ல விஷயங்களைத் தவிர்ப்பது என்பது தீவிர அரசியல்கட்சி தொண்டர்களின் பண்பு மட்டுமல்ல, இன்று சாதாரணர்களின் பண்பாகவும் மாறிவிட்டது. இதில் எந்த நாடும் விதிவிலக்கல்ல என்ற நிலையைத் தான் காண முடிகிறது.

அமெரிக்கத் தேர்தல் முடிவுகள் கடந்த வாரம் வெளியானது. வெளியாகிக்கொண்டே இருக்கிறது. வெளியாகும். இதில் போட்டியிட்டவர்கள், ஆதரவளித்தவர்கள், ஓட்டுப் போட்டவர்கள், ஓட்டே இல்லாதவர்கள், பக்கத்து நாட்டவர்கள், தூரத்தில் இருக்கும் நாட்டவர்கள் என உலகே இந்தத் தேர்தலை உற்று நோக்கி கவனித்தது. வாஷிங்டன் முதல் துளசேந்திரபுரம் வரை தேர்தல் முடிவுகளை உற்று கவனித்து ரியாக்ஷன் காட்டினார்கள். இந்த முடிவுகள் தங்கள் வாழ்வில் எந்த மாற்றத்தையும் கொண்டு வந்திடாத நிலை கொண்டவரும், இதைக் கவனமாகக் கவனித்துக் கருத்துக் கூறினார்கள்.

அமெரிக்கத் தொலைகாட்சி நிறுவனங்கள், செய்தி இணையத்தளங்கள், சமூக ஊடகங்கள், அவ்வளவு ஏன் தமிழ்நாட்டு செய்தி சானல்கள் கூட இந்தத் தேர்தல் முடிவுகளை நேரடி ஒளிபரப்பு செய்தனர். பலருடைய ஃபேஸ்புக் ஸ்டேடஸ், வாட்ஸ்அப் ஸ்டேடஸ், டிவிட்டர் டைம்லைன் எங்கும் தேர்தல் முடிவுகள் பற்றிய செய்திகள், கருத்துகள், கேலிகள், கிண்டல்கள் வழிந்தோடின.

போன தேர்தலில் ட்ரம்ப்பை எதிர்த்தவர்கள், கிண்டல் செய்தவர்களில் சிலர் இந்தத் தேர்தலில் அவருடைய தொண்டர்கள் ஆகியிருந்தனர். ஆதரித்திருந்தவர்கள் மேலும் வெறியர்கள் ஆகியிருந்தனர். அவரைக் காமெடியாகப் பார்த்தவர்கள் அவருக்குக் கிடைத்த வாக்குகள் பார்த்து வாயடைத்துப் போனார்கள். இவ்வளவு கோமாளித்தனம் செய்திருந்தாலும், பாதி அமெரிக்கா அவருக்கு ஓட்டளித்திருக்கிறதே என்று உலகின் பிற பகுதிகள் ஆச்சரியப்பட்டுப் போனது.

இன்னொரு பக்கம், ட்ரம்ப்பை வென்று வந்த பைடனைப் பார்த்தும் ஆச்சரியப்பட்டனர். மிகவும் வயதான வேட்பாளர், பலவீனமாகக் காட்சியளித்தவர் என்பதை மீறி பைடன் வெற்றிப் பெற்றது அவர்களுக்கு வியப்பை அளித்தது. பைடனின் பலமே கமலா ஹாரிஸ் தான் என்றார்கள். அடுத்த அமெரிக்க ஜனாதிபதி கமலா என்று ஜோசியம் கூறினார்கள். வருங்கால அமெரிக்க ஜனாதிபதி வாழ்க என்று முத்துகாளை போல் கோஷமிடாதது தான் குறை.

அமெரிக்காவில் விசா மூலம் வந்து இருக்கும் இந்தியர்களுக்கு அடுத்த அதிபராக ட்ரம்ப் வராமல் பைடன் வந்தால், தங்களின் இருப்புக்குப் பங்கம் வராமல் இருக்கும் என்ற நினைப்பு. அவரது ஆட்சிக் காலத்தில் அவ்வளவு தடை உத்தரவுகளைக் கொண்டு வந்திருந்தார் ட்ரம்ப். ஆனால் இப்படி நினைப்பு கொண்டவர்களுக்கு ஓட்டுக் கிடையாது. விசா மூலம் வந்து, க்ரீன் கார்டு பெற்று, குடியுரிமை பெற்றவர்களுக்கு ஓட்டுரிமை உண்டு. அப்படி ஓட்டுரிமை பெற்றவர்களுக்கு இனி விசா பிரச்சினை கிடையாதென்பதால், அவர்களின் அடுத்தடுத்த வாழ்வாதாரப் பிரச்சினைகளான பொருளாதார வளர்ச்சி, வரிக் குறைப்பு ஆகியவற்றை முன்வைத்து ட்ரம்ப்பை ஆதரித்தனர்.

இது தவிர, அமெரிக்கா வந்திருந்த மோடி வேறு ட்ரம்ப்பை ஆதரித்துப் பேசி சென்றிருந்தார். இதனால் அமெரிக்காவில் இருக்கும் பாரதிய ஜனதா ஆதரவாளர்கள், மோடி பக்தர்கள், சுருக்கமாகச் சங்கிகள் ட்ரம்ப் ஆதரவாளர்களாக மாறி போயிருந்தனர். எதிர்கட்சிகாரர்கள் இங்குப் பைடன் - கமலா ஆதரவாளர்களாக மாறி போனார்கள்.

இதில் கமலா ஹாரிஸ் அவர்களுக்குப் பலவகை ஆதரவாளர்கள். தமிழர் என்று ஒரு குரூப், இந்தியர் என்று ஒரு குரூப், கருப்பர் என்று ஒரு குரூப், பெண் என்று குரூப், மாமி என்று ஒரு குரூப், மாட்டுக்கறி சாப்பிடும் மாமி என்று ஒரு குரூப் என்று சுற்றி சுற்றி ஆதரவளிப்பதற்குப் பல குரூப்கள் இருந்தன. மாட்டுக்கறி மாமி என்ற சொல்லாடல் கொஞ்ச நாட்களாகக் கேட்காமல் இருந்தது. இப்ப திரும்பவும்.

இப்படி நவம்பர் மாத தேர்தல் களேபரம் சிறப்பாகத் தொடங்கியுள்ளது. அடுத்து எலக்டோரல் ஓட்டுப் பரபரப்பு ஒ இருக்கிறது. யாராவது கட்சி மாறி ஓட்டு போடுவார்களா என்று பார்ப்போம். ட்ரம்ப் இதுவரை வந்த முடிவுகளை ஒத்துக் கொள்வதாகத் தெரியவில்லை. நான் தான் வெற்றிப் பெற்றேன் என்று சம்பந்தம் இல்லாமல் ட்வீட் போட்டு இருக்கிறார். அவரிடம் எப்படி நடந்ததையெல்லாம் சொல்லி, விளக்கி, தோல்வியை ஒத்துக் கொள்ள வைத்து, வெள்ளை மாளிகை விட்டு வெளியே கொண்டு வரப் போகிறார்கள் என்று தெரியவில்லை. இது போன்ற அடுத்தக் கட்ட தேர்தல் களேபரங்களை டிசம்பரில் பார்ப்போம்.

நீங்கள் எட்டு மணி நேரம் தான் வேலை பார்க்கிறீர்களா?

2017-10-02T03:59:00.000+05:30

பனிப்பூக்களில் வெளிவந்த கட்டுரை.

உலகமெங்கும் மே ஒன்றாம் தேதி கொண்டாடப்படும் தொழிலாளர் தினம், அமெரிக்காவில் மட்டும் செப்டம்பர் முதல் திங்கள் அன்று கொண்டாடப்படும் காரணம் என்ன? அமெரிக்காவுக்குச் சைனீஸ் நூடுல்ஸும் டொமட்டோ சாஸும் பிடிக்கும் அளவுக்கு, சோஷலிசமும் போராட்டங்களும் பிடிப்பதில்லை. மே 1 முதல் எட்டு மணி நேரம் மட்டுமே வேலை என்ற கோரிக்கையை முன் வைத்து நடத்தப்பட்ட சிகாகோ தொழிலாளர் போராட்டத்தை உலகமே வருடம் தோறும் மே ஒன்றாம் தேதி அன்று நினைத்துப் பார்த்துக் கொண்டிருக்க, அமெரிக்காவில் மட்டும் தொழிலாளர் தினமான செப்டம்பர் முதல் திங்களில் "சம்மர் முடியுது, ஸ்கூல் தொறக்குது, வருடத்தின் கடைசி ட்ரிப்" என்று ப்ளான் செய்து சுற்றுலா சொகுசில் இருப்பார்கள் மக்கள்.

சரி, அது என்ன சிகாகோ போராட்டம், எட்டு மணி நேர வேலை? 1870களில் உலகமெங்கும் தொழிற்சாலைகள் பெருகிய காலக்கட்டத்தில், சிகாகோவிலும் அந்த வளர்ச்சி நன்கு காணப்பட்டது. தொழிலாளர்கள் சராசரியாக வாரத்திற்கு ஆறு நாட்கள் எனச் சுமார் அறுபது மணி நேரங்கள் மேலே உழைத்தார்கள். நூறு மணி நேரங்கள் உழைக்க வைக்கப்பட்டவர்களும் இருந்தனர். அவர்களது பணிநிலையைச் சீராக்க, தினசரி எட்டு மணி நேர வேலை என்ற கோரிக்கை, தொழிலாளர்களால் அதிகார வர்க்கத்திடம் வைக்கப்பட்டது. அமெரிக்கத் தொழிலாளர் சம்மேளனம், 1886 மே ஒன்றில் இருந்து தினசரி வேலை நேரம் 8 மணி நேரமாகத் தான் இருக்க வேண்டும் என்று தீர்மானத்தை முன்வைத்து, அதற்கான போராட்டங்களை முன்னெடுத்தனர். இதற்கான போராட்டங்கள், பேரணி பல இடங்களில் நடந்தன. சிகாகோவில் ஹேமார்க்கெட்டில் என்னும் இடத்தில் ஆயிரக்கணக்கானோர் கூடி கோஷங்களை எழுப்பினர். அங்கு வந்த காவல்துறை, கூட்டத்தைக் கட்டுப்படுத்த முயல, அந்தப் போராட்டக்களத்தில் தொழிலாளர் உரிமைக்கான முதல் குண்டு வீசப்பட்டது. அதைத் தொடர்ந்து அங்கு நடத்தப்பட்ட துப்பாக்கிச்சூட்டில் ஏழு போலீஸார் உள்படச் சுமார் பதினைந்து பேர் பலியானார்கள். அறுபதுக்கும் மேற்பட்டோர் காயம் அடைந்தனர். இது தொடர்பான பேச்சுவார்த்தைகள் தொடர்ந்து நடந்தன. 1940 இல் அமெரிக்கக் காங்கிரஸ் 40 மணி நேர வார வேலைக்கான சட்டம் இயற்றியது.

ஆனால், இந்த உலகில் தொழிலாளர்கள் எல்லாம் இன்னமுமா எட்டு நேரம் மட்டும் வேலை பார்த்துக் கொண்டிருக்கிறார்கள்? எனக்கு நன்கு தெரிந்த ஐடி துறையை எடுத்துக் கொண்டாலே, என்னால் தயக்கமின்றிக் கூற முடியும் - இல்லையென்று.

கம்பெனியின் பாலிசி, அப்பாயிண்மெண்ட் லெட்டர் எனப் பயன்பாட்டில் இல்லாதவற்றைக் கூறும் பேப்பரில் மட்டும் தான், எட்டு மணி நேர வேலை இருக்கும். அதற்கு முரணாக, அன்றாடப் பயன்பாட்டு நெறிமுறைகள் இருக்கும் பிற இடங்களில் எட்டு மணி நேர வேலைக்கான வாய்ப்பே இருக்காது. ப்ரொடக்ஷன் இஷ்யூ (Production Issue) என்றால் எந்நேரம் என்றாலும் பார்க்க வேண்டும், ப்ரொடக்ஷன் இன்ஸ்டாலை (Production install) நைட் தான் செய்ய வேண்டும், டிசாஸ்டர் ரிக்கவரி டெஸ்டிங் (Disaster Recovery Testing) வாரயிறுதியில் செய்ய வேண்டும், ஸ்ப்ரிண்டில் (Sprint) கம்மிட் செய்தவை, எந்த நிலையிலும் கண்டிப்பாக ஸ்ப்ரிண்ட் முடிவிற்குள் முடிக்கப்பட வேண்டும். இதற்கு ஈடுகட்ட தனியாக விடுமுறை ஏதும் இல்லை. பிறகு, எட்டு மணி நேர வேலை? அமெரிக்காவில் மே ஒன்றாம் தேதி உழைப்பாளர் தினம் பற்றிச் சிந்திக்காமல் இருப்பதில் காரணம் இருக்கிறதல்லவா!!

கணினி முன் உட்கார்ந்துப் பார்க்கும் வேலைகளில், பெரிய உடல் உழைப்பு இல்லையென்பதால், இப்படி நேரம் கடந்த வேலையை, ஒரு குறையாக யாரும் பெரிதாகச் சொல்வதில்லை. ஆனால், இப்படி வேலை பார்ப்பதால் ஏற்படும் பாதிப்புகளை, சம்பந்தப்பட்டவர்களே கவனிப்பதில்லை. உடல் ரீதியாகவும், மன ரீதியாகவும் பலர் பாதிக்கப்படுகின்றனர்.

இன்னொன்று, ஃபேக்டரி கதவை மூடிவிட்டு உள்ளூக்குள் கிடந்து வேலைப் பார்க்கும் சூழல் இதில் இல்லை. கையில் ஒரு லேப்டாப்பைக் கொடுத்து, எங்கு வேண்டுமென்றாலும், எப்போது வேண்டுமென்றாலும் வேலை பார்த்துக் கொள்ளலாம் என்பதால், ஆர்வக் கோளாறு காரணமாகவும், பெயருக்கும், பணியிடத்து முன்னேற்றங்களுக்காகவும் பலரும் தாமே பலருக்குத் தவறான முன்னுதாரணமாக இந்த விஷயத்தில் அமைந்து விடுகிறார்கள்.

இது போன்ற விஷயங்களில் சில பெண்கள் தான் கட்டுப்பாட்டுடன் 8 மணி நேர வேலையுடன் ஒருதினத்தை நிறுத்திக்கொள்கிறார்கள். இதற்கு அவர்கள் குடும்பச் சூழல், சார்புப் பொருளாதார நிலைமை போன்றவை காரணமாக இருக்கலாம். பெரும்பாலான ஆண்களை முழு நேரமும் அலுவலக வேலைக்கு நேர்ந்துவிட்டதால், அதிலேயே கதியாகக் கிடக்கிறார்கள். தனிப்பட்ட வேறு துறைச் சார்ந்த ஆர்வத்தை ஏற்படுத்திக்கொண்டால், இதிலிருந்து தப்பித்துக்கொள்ளும் வாய்ப்பை ஏற்படுத்துக்கொள்ளலாம்..

எட்டு மணி நேரத்தை அதிகாரவர்க்கத்திடம் பேசுவதை விட்டு, தனி ஒருவனாக ஒவ்வொரு தொழிலாளியும் தன்னுள் இருந்து சிந்திக்கும் காலக்கட்டம் இது.

ஃபெட்னா பேரவைத் தமிழ் விழா 2017

2017-10-02T03:54:00.002+05:30

பனிப்பூக்களில் வெளிவந்த கட்டுரை.

ஃபெட்னாவின் 2017 பேரவைத் தமிழ் விழா, மின்னியாபொலிஸில் எம்சிசி (MCC) என்றழைக்கப்படும் பிரமாண்ட கன்வென்ஷன் சென்டரில் (Minneapolis Convention Center) ஜூலை 1, 2 மற்றும் 3 ஆம் தினங்களில் வெகு விமரிசையாக நடத்தப்பட்டது. இவ்விழாவுக்கு அமெரிக்கா, இந்தியா, கனடா, சிங்கப்பூர் என உலகின் பல பகுதிகளில் இருந்தும் விருந்தினர்கள் வந்து கலந்துக் கொண்டனர்.

முன்னதாக, 31 ஆம் தேதியன்று வெள்ளி மாலைவில், வந்திருந்த விருந்தினர்களைச் சந்தித்து, அவர்களுடன் உணவருந்த ஏற்பாடு செய்யப்பட்டிருந்த ‘நட்சத்திர இரவு’ நிகழ்ச்சி செயிண்ட் பாலில் உள்ள வெல்ஸ்டோன் அரங்கத்தில் நடைபெற்றது. இதில் கயானா பிரதமர் மோசசு வீரசாமி நாகமுத்து, ஒரிசா பாலு, பொன்ராஜ், மிஷ்கின், கார்த்திகேய சிவசேனாதிபதி, சுகிர்தராணி உள்ளிட்டோர் கலந்துக்கொண்டனர். கேழ்வரகு அடை, பரோட்டா, தலப்பாகட்டி கோழிக்கறி, ஆம்பூர் பிரியாணி, தேங்காய் போளி, கருப்பட்டி மைசூர்பாகு எனத் தமிழ்நாட்டுச் சிறப்பு உணவுப் பதார்த்தங்கள் விருந்தினர்களுக்குப் பரிமாறப்பட்டது.

அடுத்த நாளான சனிக்கிழமை ஜூலை 1ஆம் தேதி, விழா நிகழ்ச்சிகள் காலை பத்து மணியில் இருந்து துவங்கியது. மின்னியாபொலிஸ் கன்வென்ஷன் சென்டரில் இருக்கும் மெயின் ஆடிட்டோரியம் இவ்விழாவிற்காகத் தயாராகி இருந்தது. தமிழர் மரபு என்ற கருப்பொருள் கொண்ட விழா என்பதால், நிகழ்ச்சி தயாரிப்புகள் அனைத்தும் அதைச் சார்ந்தே இருந்தன.

அரங்கின் நுழைவு வாயில் இரு பக்கமும் உருவாக்கபட்ட வாழை மரங்கள், அரங்கின் உள்ளே தமிழர் கலைகளைக் காட்சிப்படுத்தும் வண்ண ஒவியங்கள், மேடையின் பின்னணியில் டிஜிட்டல் திரையில் நிகழ்ச்சிக்குப் பொருத்தமாகக் காட்டப்பட்ட காட்சிகள், இவ்விழாவுக்கெனப் பிரத்யேகமாகத் தயாரிக்கப்பட்ட பிரமாண்ட முரசு, நாதஸ்வர, தவிலுடன் கூடிய மங்கல இசை, பறை முழக்கம், மக்களிசை, தமிழர் வரலாற்றைக் காட்டும் காலக்கோடு என எங்கும் தமிழர் மரபு முன்னிலைப்படுத்தப்பட்டிருந்தது.

கயானா பிரதமர் உள்ளிட்ட சிறப்பு விருந்தினர்களால் முரசு கொட்டி தொடங்கப்பட்ட இந்த விழாவில் இயல், இசை, நாடகம் என ஒவ்வொரு கலை பரிணாமத்திற்கும் இடமிருந்தது. இந்தியாவில் இருந்து வந்த நாதஸ்வர, தவில் கலைஞர்களான மாம்பலம் ராமசந்திரன் மற்றும் அடையார் சிலம்பரசனுடன், இங்கு அவர்களிடம் பயின்ற மாணவர்கள் இணைந்து மங்கல இசை நிகழ்ச்சியை இரு தினங்களின் முதல் நிகழ்ச்சியாகக் காலையில் நடத்தினர். திருக்குறள் மறை பின்பு இளம் தலைமுறையினரால் பாடப்பட்டது. பல்வேறு தமிழ் படைப்பாளிகளின் பங்களிப்புடன் உருவாக்கப்பட்ட விழா மலர் மேடையில் எழுத்தாளர் சுகுமாரனால் வெளியிடப்பட்டது. சுகிர்தராணி தலைமையில் கவியரங்கம், ரோகிணி தலைமையில் கருத்துக்களம் நடத்தப்பட்டன. சின்னி ஜெயந்த் நகைச்சுவையாகப் பல குரல்களில் பேசி, பாடல்களும் பாடினார். மினசோட்டா மற்றும் சிகாகோ, கேன்சஸ் ஆகிய தமிழ் சங்கங்களின் பங்களிப்புடன் நாடகங்கள், நாட்டியங்கள் அரங்கேற்றப்பட்டன. முதல்முறையாக அமெரிக்க தேசிய கீதம் தமிழில் இந்த மேடையில் பாடப்பட்டது. ராஜா கிருஷ்ணமூர்த்தி, கிளாரன்ஸ் ஜெய், பழனி குமணன் ஆகியோருக்கு அமெரிக்கத் தமிழ் முன்னோடி விருது வழங்கப்பட்டன. வந்திருந்த சிறப்பு விருந்தினர்களின் சிறப்புரைகள், சக்தியும் அவரது மாணவக்குழுவும் நடத்திய அதிரடியான அதிகாரப் பறை முழக்கம், தமிழ் தேனீ, குறள் தேனீ எனச் சிறுவர்களுக்கான போட்டிகள், இலக்கிய ஆர்வலர்களுக்கான வினாடி வினா, அனைத்துச் சங்கங்களும் பங்குபெற்ற சங்கங்களின் சங்கமம் என்ற விழா மேடையில் தொடர்ச்சியாக நிகழ்ச்சிகள் வழங்கப்பட்டு வந்தன.

அத்தனைக்கும் முத்தாய்ப்பாகப் பாடகர் ஜெயமூர்த்தியுடன் பிற இசை, நடனக்குழுக்கள் இணைந்து நடத்திய மக்களிசையும், பேராசிரியர் ராஜூவின் இயக்கத்தில் இந்தியாவில் இருந்து வந்த நாடக கலைஞர்களுடன் உள்ளுர் கலைஞர்களும் இணைந்து நடத்திய மருதநாயகம் நாடகமும் சனிக்கிழமை இரவு பொழுதை மேலும் இனிமையாக்கின. இது போல், ஞாயிறன்று மாலையில் கனடாவில் இருந்து வந்த அக்னி இசைக்குழுவினருடன் இணைந்து ஜெயமூர்த்தி, அருண்ராஜா காமராஜ், ராஜகணபதி, ஸ்ரதா, நிரஞ்சனா ஆகிய பாடகர்களும், பிற இசைக் கலைஞர்களும் கலந்து கொண்ட இசை கச்சேரியும் வந்திருந்தோரை ஆட்டம் போட செய்தது.

மக்களிசை நிகழ்ச்சியில் நேரடி தமிழ் பண்பாட்டு இசைக்கு ஜெயமூர்த்தி அவர்கள் பாட, கரகம், மயிலாட்டம், ஒயிலாட்டம், பொய்க்கால் குதிரை, காவடி ஆகிய தமிழகப் பாரம்பரிய நடனங்களை அந்தப் பாடலுக்கு ஏற்ப, மினசோட்டா தமிழ் சங்கத்தினரும் பிற தமிழ் சங்கத்தினரும் மேடையில் ஆடியது, பார்வையாளர்களைப் பிரமிக்க வைத்தது. மருதநாயகம் நாடகம் பெரும் தரத்துடன் தயாரிக்கப்பட்டிருந்தது. மரபார்ந்த நாடகக் கலைஞர்களுடன் உள்ளூர் கலைஞர்களின் நடிப்பு, நேரடி இசை, காட்சிக்கேற்ற ஒளியமைப்பு, ஒளியின் மூலம் கதைக் கூறல் என அனைவரையும் நாடகத்துடன் ஒன்றிவிடச் செய்தது.

இப்படிப் பார்வையாளர்களைக் கவர்ந்த மேடைக் கலை நிகழ்ச்சிகள் பல இருந்தன. அத்தனை நிகழ்ச்சிகளைப் பற்றியும் குறிப்பிட வேண்டுமென்றால் ஒரு புத்தகமோ, தொடரோ எழுத வேண்டி வரும். இவையெல்லாம் ஒரு மேடையில் நடைபெற்ற நிகழ்வுகள். இவை தவிர, பிற தளங்களிலும் வேறு பல நிகழ்வுகள் நடைபெற்று வந்தன.

முதல் தளத்தில் இருக்கும் மெயின் ஆடிட்டோரியத்தில், முதன்மையான நிகழ்ச்சிகள் நடைபெற, அந்த அரங்கின் வெளியே வரிசையாகக் கடைகள் அமைக்கப்பட்டு இருந்தன. ஆச்சி மசாலா, மணிமேகலை பிரசுரம், ஜீ தமிழ், லைகா மொபைல், ஐ-பாட்டி போன்ற நிறுவனங்கள் இங்குக் கடைகள் அமைத்திருந்தன. இதன் பக்கத்திலேயே தமிழர் சார்ந்த நிகழ்வுகளைப் பிற உலக நிகழ்வுகளுடன் இணைத்து காட்டும் தமிழர் காலக்கோடு காட்சிப்படுத்தப்பட்டிருந்தது.

முதல் நாளன்று, தரைத்தளத்தில் இருக்கும் அரங்கில் தமிழ் தொழில் முனைவோர் கலந்து கொண்ட TEFCON கலந்துரையாடல் நிகழ்ச்சி காலை முதல் மாலை வரை நடைபெற்றது. இந்த நிகழ்ச்சியில் மேரிலேண்ட் மாகாணப் போக்குவரத்து ஆணையர் ராஜன் நடராஜன், ஆச்சி நிறுவனத் தலைவர் பத்மசிங் ஐசக், கிட்டி என்றழைக்கப்படும் ராஜா கிருஷ்ணமூர்த்தி உள்ளிட்டோர் கலந்துக்கொண்டு உரையாற்றினர். சக தொழில் முனைவோருக்கும், தொழில் தொடங்க ஆர்வம் இருப்போருக்கு இந்த நிகழ்வு கண்டிப்பாகப் பயனளித்திருக்கும். அமெரிக்கக் காங்கிரஸ் பிரதிநிதி ராஜா கிருஷ்ணமூர்த்தி அவர்கள் இறுதியில் சிறப்புரை ஆற்றினார்.

இரண்டாம் தளத்தில் இருக்கும் அறைகளில் இணையரங்க நிகழ்வுகள் தொடர்ந்து சனிக்கிழமை அன்றும், ஞாயிற்றுக்கிழமை அன்றும் நடைபெற்றன. இந்த அறைகள் அனைத்தும் பக்கத்திலேயே இருந்ததால், ஒன்றன் பின் அடுத்து என்று சென்று வர சுலபமாக இருந்தது. கல்வி, மருத்துவம், ஆரோக்கியம், சினிமா, இசை, ஆராய்ச்சி, குடியுரிமை, பெரியார் - அம்பேத்கர் வாசகர் வட்டம், ஹார்வர்ட் தமிழ் இருக்கை எனப் பலதரப்பட்ட தலைப்புகளில் இந்த நிகழ்வுகள் அமைந்திருந்தன. பொன்ராஜ், சிவகார்த்திகேய சேனாதிபதி, ஒரிசா பாலு, நல்லசிவம், மிஷ்கின், நியாண்டர் செல்வன் ஆகியோரது கலந்துரையாடல் நிகழ்வுகளுக்கு நல்ல வரவேற்பு இருந்தது. எதில் கலந்து கொள்வது, எதை விடுவது என்று குழப்பம் வரும் அளவுக்கு அத்தனை நிகழ்வுகள். அத்தனையும் நல்ல பயனுள்ள நிகழ்வுகள்.

இரண்டாம் தளத்தில் மற்றொரு பக்கம் இருக்கும் ஒரு பெரிய அறையில் காலை, மதியம் மற்றும் இரவு மூன்று வேளைகளிலும் சிறப்பு உணவு பரிமாறப்பட்டது. பஃபே முறையில் பரிமாறப்பட்ட உணவு, வந்திருந்த விருந்தினர் அனைவராலும் பாராட்டப்பட்டது. பெரும் உற்சாகத்துடன் இளம் சிறார்களும் உணவு பரிமாறலில் ஈடுபட்டனர். நிகழ்ச்சிகளுக்கு நடுவே ஒரு மணி நேரம் உணவுக்கென ஒதுக்கப்பட்டது. அந்த நேரத்திற்குள் அனைவருக்கும் உணவு அளித்திடும் வகையில் நான்கு வரிசைகள் அமைக்கப்பட்டு இருந்தன. வந்திருந்த மொத்த ஜனத்தையும் ஒரே இடத்தில் பார்க்கக் கூடியதாக அமைந்தது, இந்த உணவு அறை தான். எந்தத் தடங்கலும் இல்லாமல், குழப்பமும் இல்லாமல், நல்ல திட்டமிடலுடன் உணவு பரிமாறப்பட்டது. கருப்பட்டி பொங்கல், தேங்காய் சோறு, அதிரசம், கீரை வடை, ஊத்தப்பம், ஆட்டுக்கறி சுக்கா வறுவல், நாட்டுக்கோழி வறுவல், செட்டிநாட்டு கோழிக்கறி எனப் பலதரப்பட்ட உணவு வகைகள் இவ்விருந்தில் இருந்தன.

இது தவிர, காபி, டீ, சமோசா, பஜ்ஜி, பப்ஸ், கேக் போன்ற சிற்றுண்டிகள் அனைத்தும் நேரங்களிலும் அங்கேயே கிடைப்பதற்கு ஏற்பாடு செய்யப்பட்டிருந்தது.

இந்த விழாவுக்கு வந்திருந்த பெரும்பாலோர் தமிழர் பாரம்பரிய உடைகளான வேட்டி, புடவைகளில் வந்திருந்தனர். மின்னியாபொலிஸ் கன்வென்ஷன் சென்டரிலும், வெளியே டவுண்டவுன் சாலைகளிலும் தமிழ் மக்கள் வேட்டி, சேலையுடன் நடமாடியதைக் காண கண்கொள்ளாக் காட்சியாக இருந்தது. இதே தினங்களில் இந்தக் கன்வென்ஷன் சென்டர் வளாகத்தில் அமெரிக்க தேசிய மகளிர் கைப்பந்துப் போட்டியும் நடைபெற்றதால், அந்தப் பகுதியே திருவிழா கோலத்தில் இருந்தது.

அடுத்த நாள் திங்கள் காலையில் இங்கிருக்கும் ஒரு அரங்கில் எழுத்தாளர் சுகுமாரன், கவிஞர் சுகிர்தராணி, இயக்குனர்-நடிகை ரோகிணி, பொன்ராஜ், மு.இளங்கோவன், கார்த்திகேய சிவசேனாதிபதி, நல்லசிவம், ஜெயமூர்த்தி, ராஜு ஆகியோர் கலந்துக்கொண்ட இலக்கியக் கருத்தரங்க நிகழ்ச்சி நடைபெற்றது. சுவையான, அர்த்தம் பொதிந்த பல அருமையான உரைகளை இந்த நிகழ்வில் கேட்க முடிந்தது. பேச்சாளர்களிடம் கேள்விகள் கேட்கப்பட்டு, பதில்களும் பெறபட்டன. வெளியூர்களில் இருந்து வந்திருந்த இலக்கிய ஆர்வலர்கள் இதிலும் கலந்துக்கொண்ட பிறகு ஊர் திரும்பினர்.

மின்னியாபொலிஸில் ஒரு மொழியைச் சார்ந்து நடத்தப்பட்ட முதல் விழா இது. அது தமிழ் மொழி சார்ந்து நடத்தப்பட்டிருப்பது, மினசோட்டா தமிழர்கள் அனைவரும் பெருமைக் கொள்ளத்தக்க அம்சம். இதில் கலந்து கொண்ட உள்ளூர் தமிழர்கள் அனைவருக்கும் இது மறக்க முடியாத நினைவுகளைக் கொடுத்திருக்கும். வந்திருந்த சிறப்பு விருந்தினர்களிடம் கலந்துரையாடக் கிடைத்த வாய்ப்பு மட்டுமின்றி, பிற ஊர்களில் இருந்து வந்த தமிழர்களிடம் அறிமுகம் கொண்டு அளாவளாகவும் சந்தர்ப்பம் கிடைத்தது. இனி ஒவ்வொரு முறையும் இது போன்ற விழாக்களில் கலந்து கொள்ளும் எண்ணத்தையும் இவ்விழா அளித்திருக்கும். தமிழர் மரபு மட்டுமே முன்னிலைப்படுத்தப்பட்ட விழா இதுதான் என மினசோட்டாத் தமிழர்கள் மார்தட்டிக் கொள்ள வகையில் இந்த விழா சிறப்பாக நடந்து முடிந்தது.

அடுத்த ஃபெட்னா தமிழ் விழா 2018இல் டெக்சாஸ் மாகாணத்தில் டாலஸ் நகரத்தில் நடைபெற உள்ளதாம். விழா குழு தயாரிப்புப் பணிகளைத் தொடங்கிவிட்டது. பங்குக்கொள்வோரும் திட்டமிடலைத் தொடங்கிவிடலாம்.

தவத்தில் எழுந்த தேவாலயம் – Grotto of redemption

2017-10-02T03:50:00.000+05:30

பனிப்பூக்களில் வெளிவந்த கட்டுரை.

ஜெர்மனியில் 1872 ஆம் ஆண்டுப் பிறந்த பால் டோபர்ஸ்டேன் (Paul Dobberstein) தனது இருபதாவது வயதில் கல்லூரி கல்விக்காக அமெரிக்கா வந்தார். மில்வாக்கியில் செயிண்ட் பிரான்சிஸ் தே செல்ஸ் (Saint Francis de Sales) கல்லூரியில் மதகுருக்களுக்காகப் படிப்பைப் படித்தார். படித்து முடித்துத் தனது பொறுப்பை ஏற்பதற்குச் சில நாட்களுக்கு முன்பு ஜன்னி காய்ச்சலில் படுத்தார். அச்சமயம் கன்னிமாதாவிடம், தான் உயிர் பிழைத்து வந்தால், அவருக்குத் தேவாலயம் கட்டுவதாக வேண்டினார். அவரது வேண்டுதல் பலித்தது. மீட்சிக்கான மண்டபத்தை (Grotto of Redemption) எழுப்புவதற்கான எண்ணம் அப்போது பிறந்தது.

படிக்கும் காலத்திலேயே, மாதாவிற்கு கிரட்டோ என்றழைக்கப்படும் வழிப்பாட்டு குகையைக் கல்லூரியில் அமைத்திருந்தார் பாதிரியார் பால். வழிப்பாட்டுக் குகைகள், ஐரோப்பியாவில் உருவான கட்டிட வடிவங்கள். அதை அமெரிக்காவிற்கு அறிமுகப்படுத்தியர் பால். அன்று அவருடன் படித்தவர்களில் பலர், அவர் எழுப்பிய அந்தச் சிறு வழிப்பாட்டு குகையால் ஈர்க்கப்பட்டு, வேறு பல இடங்களில் அது போன்று வழிப்பாட்டுக் குகைகளைக் கட்டினார்கள். அவ்வகையில் அமெரிக்காவில் இதற்கு முன்னோடி என்று பாதிரியார் பால் டோபர்ஸ்டேனைக் கூறலாம்.

படிப்பிற்குப் பிறகு, அவருக்கான பாதிரியார் பொறுப்பு ஐயோவா (Iowa) மாகாணத்தில் உள்ள வெஸ்ட் பெண்ட் (West Bend) என்னும் சிற்றூரில் கொடுக்கப்பட்டது. சுமார் 500 பேர் மக்கட்தொகை கொண்ட ஊர் அது. தனது வேண்டுதலின் படி, ஒரு பிரமாண்ட வழிப்பாட்டுத் தலத்தைத் தன் கையாலேயே முழுக்க அங்குக் கட்ட முடிவெடுத்தார். அவர் எடுத்த முடிவு தான், அவரது கனவு தலத்தை மேலும் சிறப்பாக்கியது. சாதாரணக் கற்கள் இல்லாமல், உலகின் சிறந்த, மதிப்பு வாய்ந்த கற்களால், அந்தக் குகையைக் கட்ட எண்ணினார்.

இதற்கெனப் பல ஊர்களுக்குப் பயணம் சென்று பலவித கற்களைச் சேகரித்தார். சுமார் 14 வருடங்கள் அவருடைய கற்களுக்கான தேடுதல் தொடர்ந்தது. படிகம், ஜகடம், புஷ்பராகம், சுண்ணாம்பு கல், மரத்திலான கல் எனப் பலவித கற்கள் சேர்ந்தது. அவரிருந்த ஐயோவாவில் இப்படிப் பல ரகக் கற்கள் கிடைப்பதில்லை. அதற்காகச் சவுத் டகோடா, அர்கான்சஸ் உள்ளிட்ட பல பகுதிகளுக்குச் சென்று வந்தார். 1912இல் தான் சேகரித்த கற்கள் கொண்டு கட்டுமானத்தைத் தொடங்கினார்.

இந்தப் பணியில் தன்னுடன் மேட் (Matt) என்பவரை மட்டும் இணைத்துக்கொண்டார். பெரிதாக எந்த ப்ளானும் இல்லை. கணக்கு வழக்குகள் இல்லை. இஞ்சினியர்கள் இல்லை. ஆர்கிடெக்ட் இல்லை. எல்லாம் பாதிரியார் பால் தான். பெரிய கருவிகள் ஏதும் இல்லை. மின்விளக்கு கூட இல்லை. அர்ப்பணிப்பும், விடாமுயற்சியும் மட்டுமே அவருக்குப் போதுமானதாக இருந்தது. 1954இல் அவர் இறக்கும் வரை, அவருடைய எண்ணம் எல்லாம் இதிலேயே இருந்தது. தனது வாழ்நாளின் பெரும் பகுதியை, இதன் உருவாக்கத்திலேயே செலவழித்தார். அவருக்குப் பின்னால் மேட்டும் பாதிரியார் க்ரெவிங் (Greving) இணைந்து, இந்தப் பணியை முடித்தார்கள். பாதிரியார் க்ரெவிங், அங்கேயே தங்கியிருந்து இந்த ஆலயத்தைப் பார்த்துக்கொண்டார். ஐம்பதாண்டுகளுக்கு மேலாக, பாதிரியார் பாலின் கனவு ஆலயத்தைக் கவனமாகப் பராமரித்தவர், இல் இவ்வுலகை விட்டு நீங்கினார்.

இங்குத் தற்சமயம் வருடத்திற்குப் பத்தாயிரத்திற்கு மேற்பட்டோர் வந்து செல்கின்றனர். இது மினசோட்டா தலைநகர் செயிண்ட் பாலில் இருந்து சுமார் 200 மைல்கள் தொலைவிலும், ஐயோவா தலைநகர் டெ மாயின்ஸில் இருந்து சுமார் 140 மைல்கள் தொலைவிலும் உள்ளது. செல்லும் வழியெங்கும் விவசாய நிலங்கள் தான். பொதுவாக, ஐயோவா மாநிலம் எங்கும் விவசாய நிலங்களைத் தான், சாலையில் செல்லும் போது காண முடிகிறது. பெரும்பாலும் சோளமும், பீன்ஸும். விவசாயம் என்றால் இது கார்ப்பரெட் விவசாயம். நிலத்தைச் சுற்றிலும், நிறுவனத்தின் பெயர் கொண்ட தட்டிகள். ராட்சத கருவிகள் ஆங்காங்கே நின்று கொண்டு இருக்கின்றன. ஹெலிகாப்டரில் மருந்து தெளிக்கிறார்கள். ஒரு எளிய மனிதனின் பெரிய கனவுலகத்தைக் தரிசித்த மயக்கத்தில் வெளியே வந்தால், நமக்கும் மருந்தடித்து நிகழ்வுலகத்திற்குப் பழையபடி கொண்டு வருகிறார்கள்.

ஒரு கட்டிடமாக, வடிவமைப்போ, கட்டுமானமோ தூரத்தில் இருந்து பார்ப்போரைக் கவருவதில்லை. இதன் வரலாறும், அந்த வரலாற்றுடனான நெருங்கிய பார்வையும் நம்மைக் கண்டிப்பாக நெகிழ வைக்கும். இங்கிருக்கும் விதவிதமான கற்களும், அவை காலத்தைக் கடந்து வந்த பாதையும் நம்மை ஆச்சரியப்படுத்தும். அங்கிருக்கும் பணியாளர் ஒருவர், ஒவ்வொரு மணி நேரமும் இது குறித்த தகவல்களை அளித்தவாறு டூர் அழைத்துச் செல்கிறார். பக்கத்தில் இருக்கும் மியூசியத்தில் பாதிரியாரின் உடமைகளும், அவர் குறித்த தகவல்களும் காண கிடைக்கின்றன். அருகே இருக்கும் ராக் ஸ்டூடியோவில், இங்குப் பயன்படுத்தியிருக்கும் கற்கள் குறித்த குறிப்புகளை வைத்திருக்கிறார்கள். தவிர, ஒரு டாக்குமெண்டரி படமும் ஒளிப்பரப்புகிறார்கள். இது எதற்கும் கட்டணம் இல்லை. விருப்பமிருந்தால், நன்கொடை அளிக்கலாம்.

வரலாற்றுச் சின்னங்களைக் காண ஆர்வமிருப்போரும், நிலவியலில் ஈடுபாடு இருப்போரும் இங்குக் கண்டிப்பாக ஒருமுறை சென்று வரலாம். ஆன்மிக அன்பர்களுக்கும் பிடிக்கும். பக்கத்திலேயே வழிபாட்டிற்கு செயிண்ட் பீட்டர் அண்ட் பால் என்னும் தேவாலயம் உள்ளது. அருகே ஒரே ஒரு உள்ளூர் உணவகம் உள்ளது. சாலட், பர்கர், மால்ட், ஸ்மூத்தி, ஐஸ்கீரிம் போன்றவை கிடைக்கின்றன. குழந்தைகள் விளையாடுவதற்கு, சறுக்கு, ஊஞ்சல் போன்றவை இந்த ஆலயத்திற்கு எதிரே இருக்கும் பூங்காவில் உள்ளன.

வெகு சில மனிதர்களின் கடும் உழைப்பில் மட்டுமே உருவான இந்தத் தேவாலயம், இயற்கை சீற்றங்களைத் தாண்டி, பாதிப்புகள் ஏதும் இன்றி இன்றும் நல்ல நிலையில் உள்ளது. இன்றைய தேதிக்கு இங்கு இருக்கும் கற்களின் மதிப்பு எக்கச்சக்கம். நூறாண்டுகளைக் கடந்து இருக்கும் இத்தலத்தை எந்நாளும் எந்நேரமும் சென்று கண்டு வரலாம். வருடத்தின் 365 நாட்களும், 24 மணி நேரமும் திறந்தே இருக்கும். மீட்சிக்கான ஆலயத்திற்குக் கதவெதற்கு, இல்லையா?

ஓவியா - தி பிக் பாஸ்

2017-10-02T03:47:00.000+05:30

பனிப்பூக்களில் (ஜூலை 2017) வெளிவந்த கட்டுரை.

சமூக வலைத்தளங்கள் அல்லோகலப்பட்டுக் கொண்டிருக்கின்றன. செய்தித் தளங்கள் தினமும் இது குறித்த செய்திகள் வாசித்துக் கொண்டிருக்கின்றன. ஆய்வுக்கட்டுரைகள் குவிகின்றன. ஒப்பிட்டுக்கவிதை பரவலாகப் பரவுகிறது. மீம்ஸ் கொட்டுகின்றன. எல்லாம் ஸ்கிரிப்ட் தான் என்று சொல்லிக் கொண்டே, தவறாமல் பார்க்கிறார்கள். டிஆர்பி எகிறுகிறது. தியேட்டரில் கூட்டம் குறைகிறது. போட்டி சேனல்களில் சூப்பர் ஹிட் திரைப்படங்களை இவ்வேளையில் தினமும் ஒளிபரப்புகிறார்கள். ஆனாலும், பிக் பாஸும் அதன் வெற்றியும் தவிர்க்க முடியாததாக ஆகிவிட்டது.

டிவியில் இருந்து சிவகார்த்திக்கேயனை சினிமாவுக்கு அனுப்பி வைத்துவிட்டு, சினிமாவில் இருந்த கமலஹாசனை டிவிக்குக் கொண்டு வந்த விஜய் டிவியின் பிக் பாஸ் நிகழ்ச்சி பற்றித் தான் எங்கும் பேச்சாக இருக்கிறது.

நாம் புரட்சிப் பெண்ணாகப் பார்த்த ஜுலி, லூசு பெண்ணாக மாறி விட்டார். ஜொள்ளு பார்ட்டியாக நமக்கு இருந்த நமிதாவை, லொல்லு தாங்கவில்லை என்கிறோம். எப்போதும் பார்த்துச் சிரித்துக் கொண்டிருந்த ஆர்த்தியை, இப்போது பார்த்துக் கடுப்பாகிறோம். சப்பை ஃபிகராகப் பார்க்கப்பட்ட ஓவியாவுக்கு, இப்போது சப்போர்ட் குவிகிறது. எல்லாம் பிக் பாஸுக்கு பிறகு.

அதிலும், ஓவியாவுக்குச் சமூக வலைத்தளங்கள் எங்கும் ரசிகர் பட்டாளங்கள். ஓவியாவின் கூறும் "நீங்க ஷட்டப் பண்ணுங்க” போன்ற வார்த்தைகளெல்லாம், பஞ்ச் டயலாக்ஸ் ஆக மாறுகின்றன. டி-சர்ட் வாக்கியங்களாக மாறுகின்றன. கூடிய விரைவில் இமான் இவற்றைப் பாடல்களாக மாற்றுவார். வாரா வாரம் அவருக்கு மக்களிடம் இருந்து குவிகிற வாக்குகளைப் பார்த்து, அவருடன் பிக் பாஸ் வீட்டில் இருக்கும் மற்ற போட்டியாளர்கள் மட்டுமின்றி, அன்புமணி போன்ற அரசியல்வாதிகளே பொறாமைபட்டு பெருமூச்சு விடுகிறார்கள்.

ஹெலன் நெல்சன் என்ற இயற்பெயரைக் கொண்ட ஓவியா, 2007 இல் தனது பதினாறாவது வயதில் சினிமாவில் நடிக்க வந்தார். மலையாளத்தில் ப்ரிதிவிராஜூக்கு ஜோடியாகக் கங்காரு என்ற படத்தில் அறிமுகமானவர், 2010இல் தமிழில் களவாணி படத்தில் அறிமுகமானார். மெரினா, கலகலப்பு, மூடர் கூடம், யாமிருக்கப் பயமேன் போன்ற சிறு பட்ஜெட் ஹிட் படங்களில் நடித்திருந்தாலும், அவர் சினிமாவில் கடந்த 10 வருடங்களில் பெறாத புகழை , பிக் பாஸில் பத்து நாட்களில் பெற்று விட்டார்.

அவரது நேர்மை, வெளிப்படையான பேச்சு, அன்புடன், பரிவுடன் பழகுவது, காலை எழுந்தவுடன் உற்சாகமாக ஆட்டம் போடுவது, மழை வந்து விட்டால் தயங்காமல் சென்று நனைந்து விட்டு வருவது, எரிச்சலடையும் சமயங்களில் அந்த இடத்தை நகர்ந்து விடுவது, கோபமான சந்தர்ப்பங்களில் "நீங்க ஷட்டப் பண்ணுங்க” என்று ‘மரியாதை'யுடன் எதிர்ப்பைத் தெரிவிப்பது, தனக்கெதிராக மொத்த குழுவும் இருக்கும் போது அவர்களைத் தைரியமாக எதிர்கொள்வது, தேவைப்பட்டால் தயங்காமல் மன்னிப்பு கேட்பது என ஓவியாவின் பண்புகள் அனைத்தும் பார்வையாளர்களைக் கவர்ந்து விட்டது. ஓவியா ஆர்மி, ஓவியான்ஸ், ஓவியா வெறியர்கள் என்று விதவிதமாகப் பெயர்களில் இவரது ரசிகர்கள் வலைத்தளங்களில் வலம் வருகிறார்கள்.

ஒரு நாள் சக்தியும் ஓவியாவும் ஒரு வாக்குவாதத்தில் இருக்கிறார்கள். ஓவியா மேஜையில் அமர்ந்து உணவருந்திக் கொண்டிருக்கிறார். நின்று கொண்டு பேசிக் கொண்டிருந்த சக்தி கோபத்தில் ‘அறை விடுவேன்’ என்றவாறு கையை ஓங்க, ‘எங்க அடி பார்க்கலாம்’ என்று எழுந்து வந்து அவரது முகத்திற்கு நேராக வந்து நின்றார் ஓவியா. சக்தி தான் இரண்டு அடி பின் செல்ல வேண்டி இருந்தது. தளபதியில் வரும் ‘தொட்றா பார்க்கலாம்’ சீன் போல இருந்தது. இன்னொரு முறை, அங்கிருந்த திரையில் ஜூலி சொல்லிக்கொண்டிருந்தது பொய் என்று நிரூபணம் ஆகிக்கொண்டிருந்த சமயம், எழுந்து ஜூலிக்கு ஒரு குத்து விடுவது போல் ஆக்ஷன் கொடுத்ததைக் கண்டு, அரங்கில் இருந்த பார்வையாளர்கள் மட்டுமின்றி, டிவியில் பார்த்துக்கொண்டிருந்தவர்களும் கைத்தட்டி ஆர்ப்பரித்தனர். அடுத்த நாள், தனது தனிமையை நினைத்துக் கண் கலங்கினால், பார்த்துக்கொண்டிருப்போரும் கலங்குகிறார்கள். இப்படி, ஒரு மாஸ் ஹீரோ இல்லாத குறையை ஓவியா தான் பிக் பாஸில் தீர்த்து வைத்துக்கொண்டிருக்கிறார்.

இது டிவி நிகழ்ச்சிக்கான நடிப்பல்ல. இது தான் அவரது இயல்பு என்று அவருடன் பழகியவர்கள் கூறுகிறார்கள். சென்ற வருடம் தனது தாயை கேன்சரில் இழந்தவர், அவரைக் காப்பாற்ற பலவாறு போராடி இருக்கிறார். தமிழ், கன்னடம், மலையாளம், தெலுங்கு, ஹிந்தி எனப் பல மொழி படங்களில் நடித்து, தாயைக் காப்பாற்ற முயன்றவரால் அது முடியாமல் போய்விட்டது. இந்த வயதில் தனியாகச் சினிமா போன்ற ஒரு துறையில் தாக்குப் பிடிப்பவரால், பத்து பேரையா ஒரு வீட்டில் தாக்குப் பிடிக்க முடியாமல் போகப் போகிறது? தவிர, இந்த ஆட்டத்தின் விதிமுறையைப் புரிந்து கொண்டு, தனது இயல்பையும் மாற்ற தேவையில்லாத நிலையுடன் விளையாடுவதால், வாரா வாரம் தனது போட்டியாளர்களால் நாமினேட் செய்யப்பட்டாலும், மக்களால் பெருத்த ஆதரவு ஓட்டுகளால் அடுத்தடுத்த வாரங்களைச் சிரித்தவாறே கடக்கிறார்.

போகிற போக்கைப் பார்த்தால், ரஜினி, கமலை விட்டுவிட்டு ஓவியாவை தான் அரசியலுக்கு அழைப்பார்கள் போல உள்ளது. அரசியல்வாதிக்கே உரிய ஒரு பக்கத் திமிர், மற்றொரு பக்க அரவணைப்பு போன்ற தகுதிகளுடன் இருக்கும் நிலையில் அதிலும் ஜொலிப்பார் என்றே கருத வேண்டி உள்ளது. விஜய் டிவியில் நகைச்சுவை நடிகர்களை ரெடி செய்திருக்கிறார்கள், கதாநாயகர்களை ரெடி செய்திருக்கிறார்கள், இயக்குனர்களை ரெடி செய்திருக்கிறார்கள். கிடைக்கும் வரவேற்பைப் பார்த்தால், ஒரு அரசியல்வாதியையும் ரெடி செய்து விடுவார்கள் போல் உள்ளது. ஓவியா தான், நமக்கு வாய்த்த அடுத்தப் புரட்சித் தலைவி என்றால், வேறென்ன செய்வது?

எது எப்படியோ, மனித மனங்களின் இயல்பான குணங்களை வைத்துக் கொண்டு, நமது வரவேற்பறையில் ஒரு புதுவித நாடகம் ஓடிக் கொண்டிருக்கிறது. இது வரையிலான காட்சிகளில் இதன் ரசிகர்களைக் கவர்ந்த ஓவியா, அதை இனியும் தொடர்வாரா அல்லது, பாஸின் திரைக்கதை பரமபத ஆட்ட மாற்றத்தில் கீழே விழுவாரா என்று தெரியாது. ஆனால், தற்போதைய சூழலில் தனது இயல்பான, நேர்மையான குணத்தால் மக்கள் மனதில் 'தி பிக் பாஸ்’ ஆக ஒரு நல்ல இடத்தைப் பிடித்து விட்டார் என்பது தான் உண்மை.

மின்னஹஹா நீர்வீழ்ச்சி (Minnehaha Falls)

2017-10-02T03:42:00.000+05:30

பனிப்பூக்களில் வெளிவந்த கட்டுரை.

மின்னியாபொலிஸில் வாரயிறுதியில் குடும்பத்துடன் எங்குச் செல்வது என்று ரொம்பவும் குழம்ப வேண்டியதில்லை. மதிய உணவு தயார் செய்து விட்டு எங்காவது ஒரு ஏரிக்கரையோரம் தஞ்சம் புகுந்து விடலாம். உட்கார்ந்து சாப்பிடுவதற்குத் தயார் நிலையில் மேஜை நாற்காலி, குழந்தைகள் விளையாடுவதற்கு விளையாட்டுக் கருவிகள், பெரியவர்கள் நடமாட நடை பாதை எனச் சகல அம்சங்களும் இருக்கும்.

மின்னஹஹா நீர்வீழ்ச்சி (Minnehaha falls) இருக்கும் பூங்காவும் அப்படியொரு நல்ல வாரயிறுதி புகலிடம். மின்னியாபொலிஸ் நகரின் உள்ளேயே இருக்கும் ஒரு சிறு நீர்வீழ்ச்சி இது. மின்னடொங்கா ஏரியில் (Lake Minnetonka) தொடங்கும் மின்னஹஹா சிற்றோடை, நகரில் இருக்கும் பிற ஏரிகளைக் கடந்து, இங்கு நீர்வீழ்ச்சியாக விழுந்து, பிறகு அருகில் இருக்கும் மிஸ்ஸிசிப்பி ஆற்றில் சேர்கிறது.

பிரமாண்டமான நயகரா நீர்வீழ்ச்சி இருப்பதும் அமெரிக்கா தான் என்றாலும், அமெரிக்காவில் நீர்வீழ்ச்சி என்றால் கொஞ்சம் எதிர்பார்பைக் குறைத்துக் கொண்டு தான் செல்ல வேண்டும். எப்படி நமது நாயகிகள் அனைவருமே நயன்தாராவாக இருப்பதில்லையோ, அதுபோல் இங்கிருக்கும் நீர்வீழ்ச்சிகள் அனைத்துமே நயகராவாக இருப்பதில்லை!!

தண்ணீர் சொட்டு சொட்டாக விழுந்தாலும் சரி, பெருக்கெடுத்துப் பொங்கி விழுந்தாலும் சரி, ஆங்கிலத்தில் அதன் பெயர் ஃபால்ஸ் (falls) தான். அதனால் எந்த நீர்வீழ்ச்சி என்றாலும் எதிர்பார்ப்பு இல்லாமல் செல்வது நன்மை பயக்கும் என்பது நம் அனுபவம்.

இவ்வளவு பீடிகை போடுவதால், மின்னஹஹா நீர்வீழ்ச்சி ரொம்பவும் சிறியதாக இருக்குமோ என்று எண்ணி விட வேண்டாம். இது ஒரு நடுத்தர வகை நீர்வீழ்ச்சி. புகைப்படங்கள் எடுப்பதற்கு அருமையான இடம். நிச்சயதார்த்தம், கல்யாணம் என்றால் விசேஷ உடைகளுடன் புகைப்படம் எடுக்க உள்ளூர்வாசிகள் கேமராவும் கையுமாக வந்து விடுவார்கள். அதன் பிறகு, பிள்ளை குட்டிகளோடு சில வருடங்களுக்கு வருவார்கள்.

இந்தப் பூங்காவின் இன்னொரு சிறப்பம்சம், இங்கு வாடகைக்குக் கிடைக்கும் சைக்கிள்கள். பேருதான் சைக்கிள். ஆனால், நம்மூர் ரிக்ஷா மாதிரி இருக்கும். ஒன்றிரண்டு குடும்பங்கள் சேர்ந்துச் செல்லலாம். அனைவரும் அழுத்துவதற்குப் பெடல்கள் இருக்கும். அனைவரும் அழுத்தினால், வண்டி வண்டிக்கான வேகத்தில் செல்லும். ஒருவர் அழுத்த, மற்றவர்கள் எல்லாம் அழுத்துவது போல் நடித்தால், பாதசாரிகளைக் கடந்து செல்வதே பெரும்பாடாகி விடும். எப்படி இருந்தாலும், உடற்பயிற்சியுடன் கூடிய நல்லதொரு வேடிக்கை விளையாட்டு.

இவை தவிர, லாங்ஃபெல்லோ பூங்கா (Longfellow park), பெர்கோலா பூங்கா (Pergola park) எனப் பிற பூங்காகளும் இந்த வளாகத்தில் உள்ளன. மின்னியாபொலிஸை சிகாக்கோவுடன் இணைக்கும் இருப்புப்பாதை தொடங்கப்பட்ட சமயத்தில் இருந்த ரயில் நிலையமும், வரலாற்றுச் சாட்சியாக இங்கு இன்னமும் பாதுகாக்கப்படுகிறது.

இது 1889 ஆண்டு உருவாக்கப்பட்ட ஸ்டேட் பார்க். அந்தச் சமயத்தில், நியூயார்க்கில் மட்டும் தான், ஸ்டேட் பார்க் இருந்தது. பாஸ்டன், சிகாகோ மற்றும் பல வட அமெரிக்க மாகாணங்களில், பல பூங்காகளை அமைத்துக் கொடுத்த, புகழ் பெற்ற நிலப்பரப்பு வடிவமைப்பு வல்லுனரான கிளெவ்லேண்ட்டிடம் (Cleveland), இந்தப் பூங்காவை உருவாக்கும் பணி கொடுக்கப்பட்டது. இயற்கை வளங்களைப் பாதுகாப்பதில் பெரும் அக்கறை கொண்ட கிளைவ்லேண்ட், இதன் இயற்கை அம்சம் குறையாமல் இந்தப் பூங்காவை அமைத்துக் கொடுத்தார். மின்னியாபொலிஸின் மத்திய பகுதியில், மிஸ்ஸிசிப்பி ஆற்றைச் சுற்றி அமைந்திருக்கும் ஏரிகளை இணைக்கும் பாதையைப் போட்டுக் கொடுத்தவரும் இவரே.

இதற்கான திட்டமிடல் நடக்கும் சமயத்தில், ஒரு திருவாளர் அருவியின் கீழ்புறத்தில் புகைப்படம் எடுக்க ஒரு மேடை அமைத்துக் கொடுக்கலாம் என்றாராம். மூச், தேவையில்லாமல் எந்தவிதக் கட்டுமானமும் தேவையில்லை என்று கட் அண்ட் ரைட்டாகச் சொல்லிவிட்டாராம்.

அப்படிப்பட்ட ஒரு நல்ல மனுஷன் உருவாக்கிக் கொடுத்த பூங்கா. பார்க்காதவர்கள், ஒரு எட்டுப் போய்ப் பார்த்துவிட்டு வாங்க!!

மால் ஆஃப் அமெரிக்கா

2017-10-02T03:36:00.000+05:30

பனிப்பூக்களில் வெளிவந்த கட்டுரை.

மினசோட்டாவின் பெருமைகளில் ஒன்றான மால் ஆஃப் அமெரிக்காவிற்கு இது வெள்ளி விழா ஆண்டு. அப்படியென்ன பெருமை என்றால், அமெரிக்காவின் மிகப் பெரிய அங்காடி வளாகம் என்ற பெயரை கடந்த இருபத்தைந்து ஆண்டுகளாகச் சூடிக் கொண்டு நிற்கிறதே.

மின்னியாபொலிஸ்வாசிகளுக்கு இந்த மால் மேல் எந்தளவு க்ரேஸ் இருக்கிறதோ தெரியாது, இங்கு வரும் வெளியூர் விருந்தினர்களுக்கு இதன் மேல் பெரும் ஆர்வம் இருக்கும். மின்னியாபொலிஸில் பார்க்க வேண்டிய இடங்கள் என்னும் லிஸ்டில் இது கண்டிப்பாக இருக்கும். இதன் முக்கியச் சிறப்பம்சம், இந்த மாலின் நடுவே இருக்கும் நிக்கலோடியன் யூனிவர்ஸ் (Nickelodeon Universe) உள்ளரங்குக் கேளிக்கை பூங்கா.

குழந்தைகளைக் கவரும் கேளிக்கை விளையாட்டுப் பூங்கா இது. உள்ளரங்கில் இருப்பதால், மழை, வெயில், பனி என்று எவ்வித தடங்கலும் இல்லாமல், வருடம் முழுக்கச் சென்று விளையாடுவதற்கு ஏற்ற இடம் இது. குளிர்காலத்தில் வெளியே எங்கே செல்வது என்று குழப்பமில்லாமல், ஒருநாள் முழுக்க நேரத்தைக் கழிப்பதற்கு, இவ்விடம் உதவும். இந்த மால் வளாகத்திற்குள்ளோ அல்லது இந்த விளையாட்டு திடலுக்கோ நுழைய எந்தக் கட்டணமும் இல்லை. விளையாடுவதற்குத் தனித்தனியாக டிக்கெட்டோ, அல்லது ஒருநாள் முழுக்க அனுமதி அளிக்கும் கை வளையமோ (Wristband) வாங்கிக்கொண்டு செல்லலாம். ஒருநாள் அனுமதி வாங்கினால், எதில் வேண்டுமானாலும், எவ்வளவு முறை வேண்டுமானாலும் விளையாடிக்கொள்ளலாம். அங்குச் சென்று வாங்குவதை விட, இணையத்தில் வாங்கினால் கொஞ்சம் சீப்பாகக் கிடைக்கும். அதைவிட மலிவாகக் காஸ்கோவில் (Costco) கிடைக்கும்.

இங்குக் குழந்தைகளைக் கவரும் மற்றொரு இடம் - சீ லைஃப் அக்வாரியம் (SeaLife Aquarium). இது ஒரு கடல்வாழ் உயிரினங்களின் அழகிய கண்காட்சி சாலை. நட்சத்திர மீன், கடல் குதிரை போன்ற காண்பதற்கு அரிய உயிரினங்களை இங்குக் காணலாம். நட்சத்திர மீன் போன்றவற்றைத் தொட்டு கூடப் பார்ப்பதற்கு வாய்ப்பு கொடுப்பார்கள். இங்குக் கடலுக்கு அடியில் மீன்களுடன் சேர்ந்து நடக்கும் உணர்வை அளிக்கும் கடல் சுரங்கப்பாதை (Ocean Tunnel) பார்வையாளர்களைக் கவரும். இந்த இடத்தில் இரவு முழுக்க விட்டத்தில் மீன்கள் அங்குமிங்கும் சென்று வருவதைப் பார்த்துக் கொண்டே, ஒரு குழுவாக உறங்குவதற்குத் திட்டம் வைத்திருக்கிறார்கள். கடலுக்கு அடியில் தூங்க முடியுமா என்று யோசிப்பவர்கள், இதை முயற்சித்துப் பார்க்கலாம்.

மால் ஆஃப் அமெரிக்காவில் இவை சிறார்களைக் கவரும் அம்சம் என்றால், பெண்களைக் கவரும் அம்சமாகப் பல கடைகள் உள்ளன. மொத்தம் ஐநூறுக்கும் மேற்பட்ட கடைகள். பரப்பளவில் மட்டுமல்ல, கடைகளின் எண்ணிக்கையிலும், அமெரிக்காவின் பெரிய மால் இது தான். மேசிஸ், சியர்ஸ், நார்ட்ஸ்ராம், மார்சல்ஸ், ஓல்ட் நேவி, ஃபாரெவர் 21 முதலிய பெரிய உடை அலங்கார மற்றும் வீட்டு உபயோகப் பொருட்களுக்குமான கடைகளும், ஆப்பிள், மைக்ரோசாப்ட், பெஸ்ட் பை போன்ற தொழில்நுட்பக் கடைகளும் இங்கே அமைந்துள்ளன. ஒரு பக்கம் பெண்களையும், மறுபக்கம் குழந்தைகளையும் அனுப்பிவிட்டுவிட்டு, ஆண்கள் இன்னொரு பக்கம் வருவோர் போவோரை பராக்குப் பார்க்கலாம்!!

திருமணம் செய்யும் திட்டம் உள்ளவர்கள், இங்கிருக்கும் காதல் தேவாலயத்தை (Chapel of Love) ஒரு முறை சென்று பார்க்கவும். இது வரை இங்கு 7500 க்கும் மேற்பட்ட திருமணங்கள் நடந்துள்ளன. திருமணத்திற்குத் தேவையான உடைகளும் பிற பொருட்களும் இங்கே கிடைக்கின்றன. திருமணம் ஆன பின்பு, எப்படியும் குழந்தை குட்டியோடு இங்கு அடிக்கடி வர வேண்டி இருக்கும். அப்படி வரும்போது, இந்த நிலைக்குக் காரணமான நிகழ்வு இங்குதான் நடந்தது என்பதை மகிழ்வாகவோ, அல்லது அவரவர் நிலைக்கு ஏற்ப நினைவுப்படுத்திக்கொள்ளலாம்!!

இன்று மால் ஆஃப் அமெரிக்கா இருக்கும் இடத்தில் தான், 1956 இல் இருந்து 1981 வரை மெட்ரோபாலிடன் ஸ்டேடியம் என்ற விளையாட்டு மைதானம் இருந்தது. 1986 இல் இந்த இடத்தை வாங்கிய கெர்மேசியன் (Germezian) என்ற நிறுவனம், 1989 இல் கட்டுமானப் பணியைத் தொடங்கியது. 1992 இல் கட்டுமானப் பணி நிறைவுற்று, இந்த மால் திறக்கப்பட்டது. திறந்த சமயத்தில் இருந்தே, இதுதான் அமெரிக்காவின் பெரிய ஷாப்பிங் மால். இன்றும் இதுவே அமெரிக்காவின் பெரிய ஷாப்பிங் மால். வட அமெரிக்கக் கண்டம் என்று எடுத்துக் கொண்டால், கனடாவில் இருக்கும் வெஸ்ட் எட்மான்டன் மால் (West Edmonton Mall) தான் பெரியது. அதன் உரிமையாளர்கள் தான், இதைக் கட்டியவர்களும் கூட. முன்பு இங்கு இருந்த ஸ்டேடியத்தின் ஞாபகமார்த்தமாக, அங்கிருந்த ஸ்டேடியத்தின் பெயர் பொறித்த சட்டகத்தினை இங்குத் தரையில் பதித்து வைத்திருக்கிறார்கள். அங்கிருந்த நாற்காலி ஒன்றையும் இங்குள்ள ஒரு சுவரில் மாட்டி வைத்திருக்கிறார்கள்.

மால் ஆஃப் அமெரிக்கா கட்டிடத்தில் மொத்தம் நான்கு தளங்கள் உள்ளன. முதல் தளமான தரைத்தளத்தில் ஏற்கனவே நாம் குறிப்பிட்ட நிக்கலோடியன் யூனிவர்ஸ் விளையாட்டு அரங்கமும், சுற்றிலும் நான்கு பக்கமும் கடைகளும் உள்ளன. இங்கிருக்கும் லெகோ (Lego) கடையில் சிறுவர்கள் உட்கார்ந்து லெகோ விளையாட்டுப் பொருட்கள் கொண்டு விளையாடுவதற்கு வசதி செய்து கொடுத்திருக்கிறார்கள். ஹார்ட் ராக், க்ரேவ் ஆகிய உணவகங்கள் தரைத்தளத்தில் உள்ளன.

இரண்டாம் தளத்தில், ஓக்லே ஸ்டோர், ஸ்கெட்சர்ஸ், அவேடா, சன்க்ளாஸ் ஹட் போன்ற ஆடை, அணிகலன்களுக்கான கடைகள் உள்ளன. மேசிஸ், சியர்ஸ் போன்ற பெரும் நிறுவனங்களின் பேரங்காடிகள் பல தளங்களுக்குப் பரந்து இருக்கின்றன.

மூன்றாவது தளம், உணவுக்கான தளம். பலவித சாப்பாட்டுக் கடைகள் இருக்கின்றன. பஃபலோ வைல்ட் விங்க்ஸ், கிரேவ், ரெயின் பாரஸ்ட் கபே போன்ற சாவகாச உணவகங்களும், சிப்போட்லே, பர்கர் கிங், நூடுல்ஸ் & கம்பெனி உள்ளிட்ட துரித உணவகங்களும் பல இங்குக் கடை விரித்திருக்கிறார்கள். முன்பே சொன்னது போல், ஒருநாள் முழுக்க இருந்து, விதவிதமாகச் சாப்பிட்டு விட்டுச் செல்லலாம். மற்றபடி, நடக்கும் வழியெங்கும் அனைத்து தளங்களிலுமே, கரிபோ, ஸ்டார் பக்ஸ் போன்ற காபிக்கடைகள் இருக்கின்றன.

நான்காவது, ஸ்மாஷ் என்ற விர்சுவல் ரியாலிட்டி விளையாட்டு அரங்கம். இந்திய பூர்வீகத்தைக் கொண்ட நிறுவனம். மற்ற தளங்களை ஒப்பிடுகையில், இங்கு நான்காவது தளம் கொஞ்சம் குறைந்த ஜன நடமாட்டத்துடன் தான் இருக்கும். முன்பு, சில தியேட்டர்கள் இருந்தன. இப்போது அவை மூடப்பட்டு, விளையாட்டுத் தளமும், சில உணவகங்கள் மட்டுமே உள்ளன. மக்கள் அதிகம் சுற்றிக் கொண்டு இருப்பது, முதல் தளத்திலும், மூன்றாம் தளத்திலும் தான். பறக்கும் அனுபவம் (Flyover America), வண்ண அனுபவம் (Crayalo Experience), ஒளி அனுபவம் (Universe of Light) என இன்னும் பார்க்க இங்கு இருக்கின்றன. விருப்பத்திற்கேற்ப ஒரு ரவுண்ட் சென்று வரலாம்.

இந்த மால் ஊரில் சரியான இடத்தில் அமைந்திருக்கிறது எனக் கூறலாம். மின்னியாபொலிஸிற்குத் தெற்கே இருக்கும் ப்ளுமிங்டன் பகுதியில் இந்த மால் இருக்கிறது. மின்னியாபொலிஸ் டவுண்டவுன், செயின்ட் பால் டவுண்டவுன் இரண்டுக்குமே சமத்தொலைவில் அமைந்துள்ளது. இதற்கெனத் தனியாகவே பகுதி இலக்க எண் (Zip Code) தபால் துறையால் அளிக்கப்பட்டிருப்பதாகக் கூறுவர்கள். ஆனால், அது அப்படியல்ல. இந்த எண்ணில் அருகே இருக்கும் பிற பகுதிகளும் அடக்கம். நகருக்குள்ளேயே இந்த மால் இருப்பதால், சென்று வருவது சுலபம். பஸ் வசதி, ரயில் வசதி இரண்டும் உள்ளது. பக்கத்தில் தான் ஏர்போர்ட் என்பதால், ப்ளைட்டில் வந்து கூட இறங்கலாம். டவுன்டவுணில் இருந்தும், ஏர்போர்ட்டில் இருந்தும், மாலுக்கு நேரடியாகச் செல்ல ரயில் இருக்கிறது. இவையனைத்திற்கும் மேல், காரில் சென்றால் பார்க் செய்வதற்கு 12000+ இடங்கள் உள்ளன. பார்க் செய்த தளம் மறந்து விடக் கூடாது என்பதற்காக, ஒவ்வொரு தளத்திற்கு ஒவ்வொரு அமெரிக்க மாகாணத்தின் பெயரைச் சூட்டியுள்ளார்கள்.

மால் ஆஃப் அமெரிக்காவிற்குப் பக்கத்தில் தான் ஐக்கியாயும் (IKEA), வாட்டர் பார்க் ஆஃப் அமெரிக்காவும் (Water Park of America) அமைந்துள்ளன. தற்சமயம், வாட்டர் பார்க் ஆஃப் அமெரிக்கா சீரமைப்பு வேலைகளுக்காக மூடப்பட்டுள்ளது. ஒரே மாதிரி பெயர் இருந்தாலும், இதற்கும் மால் ஆஃப் அமெரிக்காவிற்கும் எந்தச் சம்பந்தமுமில்லை.

ஒவ்வொரு ஊரிலும் ஆங்கிலப் புத்தாண்டுக்கு மக்கள் ஏதேனும் இடத்தில் ஒன்று சேர்ந்துக் கொண்டாடுவது உலக மரபாகிவிட்டது. புத்தாண்டு சமயம் குளிர் உச்சத்தில் இருப்பதால், மின்னசொட்டாவாசிகளுக்குத் திறந்த வெளியில் புத்தாண்டு கொண்டாடுவது சிரமமான விஷயம். வருடத்தின் முதல் நாளிலேயே அவ்வளவு சிரமத்தை அனுபவிக்கக் கூடாதல்லவா? அதனால் மக்கள் பெரும் திரளாக இந்த மாலுக்குப் படையெடுத்துவிடுவார்கள். வருட இறுதி நாளின் மாலையில் இருந்தே சேரத் தொடங்கும் கூட்டம், நடுராத்திரி வரை இங்கேயே உலாவுவார்கள். விளையாடுவார்கள். உண்பார்கள். பனிரெண்டு மணிக்கு முன்பாக மாலின் மத்திய பகுதி ஒன்றில் கவுண்ட் டவுன் தொடங்கப்பட்டு மின்னணுப் பலகையில் ஒளிரத் தொடங்க, மக்கள் அனைவரும் இங்குச் சங்கமிக்கத் தொடங்குவார்கள். பனிரெண்டு மணிக்குக் கவுண்ட் டவுன் இறுதியில் பலமாக இசைச் சத்தத்துடன் மக்கள் ஆரவாரத்துடன் ஆடத் தொடங்குவார்கள். அப்படியே அரை மணி நேரம் கூட்ட நெரிசலில் ஆடிக் களைத்து, உறங்க வீட்டிற்குக் கலைந்துச் செல்வார்கள்.

இப்படி மின்னசொட்டாவாசிகள் பலரின் வருடப் பிறப்பு இங்குத் தான் தொடங்கும். வருடப்பிறப்பில் முதலில் இந்த மால் தரிசனம். பிறகு தான், மற்ற ஆலயத் தரிசனமெல்லாம். வருடத்திற்கு வருகை தரும் 40 மில்லியன் விருந்தினர்களில், 40 சதவிகிதம் வெளியூர்களில் இருந்தும், வெளிநாடுகளில் இருந்தும் தான் இங்கு வருகிறார்கள். இது மின்னசொட்டாவின் "டோண்ட் மிஸ்” இடமாக இருப்பதில் ஆச்சரியமேதுமில்லை.

ஃபெட்னா பேரவை விழா - தயாராகும் மின்னசோட்டா

2017-10-02T03:30:00.000+05:30

பனிப்பூக்களில் வெளிவந்த கட்டுரை.

வட அமெரிக்கத் தமிழ் சங்கங்களின் கூட்டமைப்பான ஃபெட்னாவின் (FETNA) பேரவை விழா, இந்தாண்டு மின்னசொட்டாவில் மின்னியாபொலிஸ் கன்வென்சன் சென்டரில் (Minneapolis Convention Center) நடைபெறவுள்ளது. இதற்காக அமெரிக்கா மட்டுமில்லாமல் உலகின் பல பகுதிகளிலிருந்தும் விருந்தினர்கள் ட்வின் சிட்டீஸிற்கு ஜூலை முதல் வாரம் (July 1st and 2nd) வருகை தர உள்ளனர்.

இவ்விழாவிற்குச் சிறப்பு விருந்தினர்களாகக் கயானா பிரதமர் மோசசு வீரசாமி நாகமுத்து, இலினொய் மாநிலத்தின் கீழவை உறுப்பினர் ராஜா கிருஷ்ணமூர்த்தி, இந்திய பாராளுமன்ற உறுப்பினர் டி. ராஜா, நடிகரும் இயக்குனருமான பார்த்திபன், ரோகிணி, கிட்டி, மிஷ்கின், எழுத்தாளர்கள் சுகிர்தராணி, சுகுமாரன், மரபிசை பாடகர்கள் நல்லசிவம், ஜெயமூர்த்தி, நடிகர் சின்னி ஜெயந்த், திரைத்துறை பாடகர் அருண்ராஜா ஆகியோர் கலந்துக்கொள்ள இருக்கிறார்கள்.

இவர்கள் இவ்விழாவின் பல்வேறு நிகழ்ச்சிகளில் பங்குக்கொள்ள இருக்கிறார்கள். “தமிழர் கலையைப் போற்றிடுவோம்!! தமிழர் மரபை மீட்டெடுப்போம்!!” என்னும் கருப்பொருளைக் கொண்டு இவ்விழா நடைபெற இருப்பதால், அது சார்ந்த தலைப்புகளில் நிகழ்ச்சிகள் அமைக்கப்பட்டு வருகின்றன.

ரோகிணி அவர்கள் “தமிழ் மரபுகள் மீட்கப்படுகின்றனவா? அழிக்கப்படுகின்றனவா?” என்னும் தலைப்பில் கருத்துக்களம் நிகழ்ச்சி நடத்த இருக்கிறார். கவிஞர் சுகிர்தராணி அவர்கள் “தமிழ் போற்றும் தலைமுறையும் தழைக்காதோ?” என்னும் தலைப்பில் கவியரங்கம் நடத்துகிறார். இந்த நிகழ்ச்சிகளில் கலந்துக்கொள்ள ஆர்வமுள்ளவர்களிடம் இருந்து விண்ணப்பம் பெறப்பட்டு வருகிறது.

தமிழறிஞர் வானமாமலை அவர்களின் நூற்றாண்டு விழாவைப் போற்றிடும் வகையில், அவருடைய மூலக்கதையில் உருவான “மருதநாயகம்” நாடகம் பேராசிரியர் ராஜூ அவர்களின் குழுவினரால் ஃபெட்னா பேரவை விழாவில் மேடையேற்றப்படுகிறது. தமிழர்களின் பலநாள் வெள்ளித்திரை எதிர்பார்ப்பான “மருதநாயகம்”, மின்னசோட்டாவில் அரங்கேறப்போவது இந்த நிகழ்வின் சிறப்பு. இதற்கெனப் பேராசிரியர் ராஜுவுடன், இசை ஆய்வாளர் முருகவேல், ஆய்வாளர் சமணராஜா, ஆராய்ச்சியாளர் சந்தோஷ், முனைவர் பினுகுமார் ஆகியோர் இந்தியாவில் இருந்து சில வாரங்களுக்கு முன்பு மின்னசோட்டா வந்தனர். அவர்களுடன் தேர்ந்தெடுக்க உள்ளூர்வாசிகள் இணைந்து இதற்கான நாடகப்பயிற்சியில் ஈடுபட்டு வருகின்றனர். இதைப்போல், தமிழ் நாடகக்கலையின் தந்தை எனப் போற்றப்படும் சங்கரதாஸ் சுவாமிகளின் நூற்றியைம்பதாவது ஆண்டு விழாவை முன்னிட்டு, அவருடைய “சாரங்கதாரா” நாடகமும் இவ்விழாவில் இடம்பெறுகிறது.

விழாவின் கருப்பொருள் (Theme), சின்னம் (Logo) உருவாக்கத்தில் தொடங்கி, இந்த நிகழ்ச்சிகளுக்கான முன்னேற்பாடுகளை, கடந்த ஒரு ஆண்டுக்கும் மேலாக மின்னசொட்டா தமிழ் சங்கத்தினர், ஃபெட்னா அமைப்பினருடனும், பிற தமிழ் சங்க உறுப்பினர்கள், ஆர்வலர்களுடன் இணைந்து செய்துக்கொண்டு வருகின்றனர்.

மின்னசொட்டா மாநில அரசின் நிதி உதவியுடன், இங்கிருப்போருக்குத் தமிழ் பண்பாட்டு இசைக் கருவிகளான பறை, தவில், நாகசுரம் ஆகியவற்றைப் பயிற்றுவிக்க, நாகசுர வித்வான் மாம்பலம் ராமசந்திரன், தவில் வித்வான் அடையார் சிலம்பரசன், பறை கலைஞர் சக்தி ஆகியோர் ஏற்கனவே மின்னியாபொலிஸ் வந்திருந்து இங்கிருக்கும் ஆர்வமிக்க மாணவர்களுக்குக் கடந்த சில வாரங்களாகப் பயிற்சி கொடுத்து வருகின்றனர். ஹாப்கின்ஸ் பள்ளிகளுக்கு, இவர்கள் பயிற்சியளிக்கும் சமயம் ஒருநாள் சென்று வந்தால், நாமிருப்பது அமெரிக்காவா என்ற சந்தேகம் வந்து விடும்.

இந்த இசை கலைஞர்கள், இவர்களிடம் பயின்ற மாணவர்களும் இணைந்து, ஃபெட்னா பேரவை விழாவில் இசைக்கப் போகிறார்கள். விருந்தினராக வருகை தரும் மற்ற இசை கலைஞர்களுடன் இணைந்தும், இசை நிகழ்ச்சி வழங்கப் போகிறார்கள்.

தமிழ்நாட்டுக்கு அடுத்தப்படியாகப் பறைக்குழுக்கள் அதிகம் உள்ள அமெரிக்காவில், முதல்முறையாக இவ்விழாவில் 133 அதிகாரப் பறை முழக்க நிகழ்ச்சி நடைபெற உள்ளது. இதில் 133 பறை இசைகலைஞர்கள் மேடையில் தோன்றி பறை இசையில் அதிர வைக்கப் போகிறார்கள். பண்ணிசை பாடகரும், பேராசிரியருமான நல்லசிவம் அவர்கள் பண்ணிசை நிகழ்ச்சி நடத்த இருக்கிறார். 'நெருப்புடா’ புகழ் அருண்ராஜா காமராஜ், மக்களிசை கலைஞர் ஜெயமூர்த்தி, சின்னதிரை பாடகர்கள் நிரஞ்சனா, ஸ்ரதா, ராஜகணபதி ஆகியோர் இணைந்து மெல்லிசை நிகழ்ச்சி நடத்த உள்ளார்கள்.

மக்களிசையுடன் கரகம், காவடி, பொய்க்கால் குதிரை, மயிலாட்டம், புலியாட்டம் போன்ற மரபு ஆட்டமும் இடம்பெற இருக்கின்றன. இவற்றுடன் குறிஞ்சி, முல்லை, மருதம், பாலை, நெய்தல் என்று தமிழர் நில ஐந்திணைகளையும் கருப்பொருளாகக் கொண்டு ஒரு பரத நிகழ்ச்சியும் நடைபெற உள்ளது. இசையுடன் கூடிய சிலம்ப நிகழ்ச்சியும் பார்வையாளர்களைக் கவரும் வகையில் ஏற்பாடு செய்யப்பட்டுள்ளது. இந்த நிகழ்ச்சிகள் அனைத்தும் தமிழர் மரபு கலைகளை, அமெரிக்காவில் உள்ள அடுத்தத் தலைமுறையினரிடம் எடுத்துச் செல்லும் நோக்கத்தில் அமைக்கப்பட்டுள்ளன.

இலக்கிய ஆர்வலர்களைக் கவரும் இலக்கிய வினாடி வினா, குழந்தைகளுக்கான பேச்சுப்போட்டி, எழுத்துப்போட்டி, வினாடி வினா ஆகியவை கொண்ட தமிழ்த் தேனீ, திருக்குறளைக் கூறும் குறள் தேனீ ஆகிய போட்டிகளும் இந்த விழாவில் நடைபெற உள்ளது. இதில் கலந்துகொள்ளும் போட்டியாளர்கள், இதற்கான பயிற்சிகளில் கடந்த சில வாரங்களாகவே ஈடுபட்டு வருகின்றனர்.

முதன்மை மேடையில் இந்த நிகழ்ச்சிகள் நடைபெற, இணையரங்க நிகழ்வுகளாகப் பல நிகழ்ச்சிகள் ஏற்பாடு செய்யப்பட்டுள்ளன. தமிழ் தொழில் முனைவோர்களுக்கான கருத்தரங்கம், திரைப்பட, குறும்படப் பயிற்சி பட்டறை, பேலியோ டயட் கருத்தரங்கம், குடியேற்ற சட்ட மாற்றங்கள் குறித்த கருத்தரங்கம், பண்ணிசை பயிற்சி பட்டறை எனப் பல்வேறு இணையரங்க நிகழ்ச்சிகள் ஏற்பாடு செய்யப்பட்டு உள்ளன. முழு நாள் நிகழ்வாக நடைபெற உள்ள தொழில்முனைவோர் கருத்தரங்கில், அமெரிக்க அவை உறுப்பினர் ராஜா கிருஷ்ணமூர்த்தி, ஆச்சி குழும தலைவர் பத்மசிங், வேல்ஸ் பல்கலைகழகத் தலைவர் ஐசரி கணேஷ் உள்ளிட்ட பலர் கலந்துக்கொண்டு பேச இருக்கின்றனர். அமெரிக்காவில் தொழில் தொடங்கும் ஆர்வம் கொண்டவர்களுக்கு, இந்த நிகழ்ச்சி பெரும் உதவிகரமாக இருக்கும் என நம்பலாம். திரைப்படப் பட்டறையை இயக்குனர் மிஷ்கினும், பேராசிரியர் சுவர்ணவேலும் நடத்த இருக்கிறார்கள். பேலியோ டயட் கருத்தரங்கில், சமூக வலைத்தளங்களிலும், தமிழகத்திலும் பேலியோ டயட்டைப் பெருமளவு கொண்டு சேர்த்த நியாண்டர் செல்வன் அவர்கள் பேச இருக்கிறார்.

இவ்விழா நடக்கும் சனி, ஞாயிறு இரண்டு தினமும் மதிய உணவும், இரவு உணவும் விழா நடைபெறும் மின்னியாபொலிஸ் கன்வென்ஷன் செண்டரில் பரிமாறப்படுகிறது. வெள்ளி இரவு நடக்கும் நட்சத்திர இரவு நிகழ்ச்சியில் இருந்து ஞாயிறு இரவு வரையான விருந்துகளில் பல தமிழ் மரபு உணவுவகைகளும் பல்வேறு பிற வகை உணவு பதார்த்தங்கள் பரிமாறப்பட உள்ளன. கருப்பட்டி மைசூர்பாகு, கருப்பட்டி பொங்கல், அதிரசம், கேழ்வரகு அடை, பச்சைபயிறு பாயாசம், பனங்கற்கண்டு பால் போன்ற சிறப்பு உணவுவகைகளுடன், தலப்பாகட்டி கோழிக்கறி, ஆட்டுக்கறி சுக்கா வறுவல், செட்டி நாட்டுக்கோழிக்கறி போன்ற அசைவ உணவுவிரும்பிகளைக் கவரும் பலவகை உணவுவகைகளும் உண்டு.

இந்த நிகழ்ச்சிகளுக்கு வருபவர்களுக்கான விழா முன்பதிவு, பயண ஏற்பாடுகள், தங்கும் வசதிகள், விழா மலர் தயாரிப்பு, விழா அரங்க அலங்காரம், பரிசுப் பொருட்கள் ஏற்பாடு, போக்குவரத்துத் திட்டங்கள், நிகழ்ச்சி நிரல், பயிற்சி, ஒத்திகை என இந்த நிகழ்வில் பங்குபெறும் ஒவ்வொருவரும் கடந்த சில வாரங்களாகக் கடும் உழைப்பைப் கொட்டி வருகின்றனர். மின்னசோட்டாவில் நடைபெறும் மிகப்பெரும் தமிழர் சார்ந்த விழா என்பதால், இதில் கலந்து மின்னசோட்டாவாசிகள் மட்டுமின்றிப் பிற மாகாணத்தினரும் பெரும் ஆவலுடன் இருக்கிறார்கள். இந்த நிகழ்ச்சிக்கு மின்னசோட்டா வருவது மூலம், அவர்களுக்கு மின்னசோட்டாவைச் சுற்றிப்பார்க்கும் வாய்ப்பும் சேர்ந்து கிடைக்கிறது.

ஆக, மின்னசோட்டா தமிழர் வரலாற்றில் ஒரு முக்கியத் தருணமாக, ஜூலை 1ஆம், 2ஆம் தேதிகளில் நடைபெறும் இந்தப் பேரவை விழா இருக்கப்போகிறது. இதில் கலந்துக்கொள்ள வாய்ப்புடைய அனைவரும் இந்த விழாவில் கலந்துக்கொண்டு, இந்த வரலாற்றுத் தருணத்தில் பங்குக்கொள்வது, இவ்விழாவின் வெற்றிக்குச் சாட்சியாக அமையும். இவ்விழாவில் பங்குக்கொள்ளும் ஒவ்வொருவருக்கும் எமது வாழ்த்துகள்.

.

விஸ்கான்சின் ஸ்டேட் கேப்பிடல் - தெரிந்துக்கொள்ள வேண்டிய 10 விஷயங்கள்

2017-10-02T03:21:00.000+05:30

பனிப்பூக்களில் வெளிவந்த கட்டுரை.

நாட்டில் இருக்கும் அனைத்து மாநிலங்களிலும் சட்டப்பேரவை கட்டிடம் இருந்தாலும், கட்டுமான அழகு அனைத்திலும் இருப்பதில்லை. குறிப்பிட்ட சில பேரவை மாமன்றங்களே, பார்வைக்கு அழகாக இருக்கின்றன. அதில், விஸ்கான்சின் (Wisconsin) மேடிசனில் (Madison) இருக்கும் பேரவை கட்டிடம், முன்னணியில் இருக்கும் ஒன்றாகும்.
பூசந்தி (Isthmas) எனப்படும் இரு நீர்பரப்புக்கு இடையேயான நிலப்பரப்பில் இருக்கும் ஒரே பேரவை இது தான்.
விஸ்கான்சின் மாநிலத்தின் தலைநகரான மேடிசனின் மத்திய புள்ளியில் இக்கட்டிடம் கட்டப்பட்டுள்ளது.
இக்கட்டிடத்தின் குவிமாடம் (Dome) தான், அமெரிக்காவில் இருக்கும் பேரவை கட்டிடங்களில் இருப்பதில் பெரியது.
பளிங்குக் கற்களில் தொல்லுயிர் எச்சங்களாகி (Fossil) போன நட்சத்திர மீன் போன்ற நீர்வாழ் உயிரினங்களை, இக்கட்டிடச் சுவர்களெங்கும் காணலாம். இவற்றைத் தேடிப் பிடிப்பதையே ஒரு விளையாட்டாக இங்கு விளையாடலாம்.
வாஷிங்டன் டிசியில் (Washington DC) இருக்கும் ஆப்ரகாம் லிங்கனின் சிலையை வடிவமைத்த டேனியல் ப்ரஞ்ச் (Daniel French) என்ற சிற்பி தான், இந்தப் பேரவைக் கட்டிடத்தின் மேலிருக்கும் விஸ்கான்சின் தேவியின் சிலையை வடிவமைத்தார்.
பேரவை மன்றத்தில் இருக்கும் நாற்காலி எண்ணிக்கை, அங்கு இருக்கும் உறுப்பினர்களின் எண்ணிக்கையை விட ஒன்று அதிகமாக இருக்கும். யாரும் உட்காராத அந்த நாற்காலியைப் பற்றி, அங்கிருக்கும் உறுப்பினர்களிடையே ஒரு அமானுஷ்யக் கதை பேசப்படுகிறது.
மேடிசனில் இருக்கும் உயரமான கட்டிடம், இந்தப் பேரவை மன்றக் கட்டிடம் தான். இதை விட உயரமான கட்டிடம் கட்ட மேடிசனில் தடைச் சட்டம் உள்ளது.
இந்தக் கட்டிடத்தில் இருக்கும் எந்தப் பகுதியையும் சுற்றிப்பார்க்க பொதுமக்களுக்கு எந்தத் தடையும் இல்லை. “கதவைத் தள்ளிப் பாருங்க. திறந்தா உள்ளே போய்ப் பாருங்க” என்ற அளவில் சொல்லி அனுப்புவார்கள்.
இக்கட்டிடம் இவ்வருடத்துடன் நூற்றாண்டுக் கண்ட கட்டிடம் என்ற பெருமையைப் பெறுகிறது.

எஸ்பிபி 50 - சிகாகோ இசைக் கச்சேரி

2017-10-02T03:15:00.000+05:30

பனிப்பூக்களில் வெளிவந்த கட்டுரை.

“பாடும் நிலா” என்று இசை ரசிகர்களால் அன்புடன் அழைக்கப்படும், பின்னணி பாடகர் எஸ்.பி.பாலசுப்ரமணியத்தின் ஐம்பது ஆண்டுத் திரையுலகப் பயணத்தைக் கவுரவிக்கும் விதமாக, எஸ்பிபி 50 என்ற பெயரில் உலகமெங்கும் இசை நிகழ்ச்சி நடத்தி வருகிறார் அவருடைய புதல்வரான எஸ்.பி.பி.சரண்.

இந்தத் தொடர் இசை கச்சேரிகளின் ஒரு நிகழ்ச்சி, சிகாகோ நகர் ஓடியம் அரங்கில் ஏப்ரல் 15 ஆம் தேதியன்று நடந்தது. இந்த இசை நிகழ்ச்சிக்குத் திரையிசை ரசிகர்கள் குடும்பத்துடன் அக்கம் பக்கத்து மாநிலங்களில் இருந்தும் வந்திருந்தனர். தமிழ், தெலுங்கு ரசிகர்களால் அரங்கு நிறைந்து காணப்பட்டது.

இந்த இசை கச்சேரியில் எஸ்.எஸ்.பி.யுடன்

சித்ரா, சைலஜா, ஹரிஸ் ராகவேந்தர் எனப் பிற பிரபல பாடகர்களும் கலந்துக்கொண்டு எஸ்.பி.பி.யின் பாடல்களைப் பாடி, வந்திருந்த ரசிகர்களை இசை வெள்ளத்தில் மூழ்கடித்தனர். நிகழ்ச்சியின் தயாரிப்பாளரான எஸ்.பி.பி.சரணும் சில பாடல்களைப் பாடினார்.

இந்நிகழ்ச்சியை 8K மீடியா நிறுவனம், சிகாகோ தமிழ்ச் சங்கம் மற்றும் தெலுங்குச் சங்கம் ஆகியவற்றின் துணையுடன் நடத்தினர். நிகழ்ச்சிக்கு கடந்த அமெரிக்கத் தேர்தலில் தேர்ந்தெடுக்கப்பட்ட அரசு பிரதிநிதியான ராஜா கிருஷ்ணமூர்த்தி வந்திருந்து எஸ்.பி.பி.யை வாழ்த்தி விட்டு சென்றார்.

நிகழ்ச்சியின் முதல் பாடலை ஹரிஸ் ராகவேந்தர் பாடினார். அது எஸ்.பி.பி. இசையமைத்த சிகரம் படத்தில் வந்த 'அகரம் இப்ப சிகரம் ஆச்சு' என்ற பாடல். அதற்குப் பிறகு, சாம்சரண் ஒரு தெலுங்கு பாடலையும், எஸ்.பி.பி. சரண் 'தங்கத் தாமரை மகளே' பாடலையும் பாடி கச்சேரியைத் தொடங்கி வைத்தனர். எஸ்.பி.பி.க்கு தேசிய விருது வாங்கிக் கொடுத்த இந்தப் பாடலை மேடையிலும் அவரே பாடியிருந்தால் நன்றாக இருந்திருக்கும்.

அதற்குப் பிறகு, மேடையில் பலத்த கரகோஷத்திற்குப் பிறகு தோன்றிய எஸ்.பி.பி. சித்ராவுடனும், சைலஜாவுடன் இணைந்து பல பாடல்களைப் பாடி ரசிகர்களை மகிழ்ச்சியில் ஆழ்த்தினார். தமிழ், தெலுங்கு, கன்னடம், ஹிந்தி பாடல்கள் என இந்தியாவின் பன்முகச் சிறப்பைக் காட்டும் கச்சேரியாக இருந்தது. முதலிலேயே, ஏ.ஆர்.ரஹ்மான் இசையமைத்த முத்துப் படத்தில் இருந்து "ஒருவன் ஒருவன் முதலாளி” பாடலைத் தனக்கே உரிய கம்பீரக் குரலில் பாடினார். ரசிகர்களின் கரகோஷத்தைப் பற்றிச் சொல்லவும் வேண்டுமா?

இளையராஜா பாடல் இல்லாத கச்சேரியா என்று யாருக்குமே முதலில் தோன்றினாலும், எஸ்.பி.பி. போன்ற திரையுலகில் ஐம்பதாண்டைக் கடந்த ஒரு ஆளுமைக்கு அது எந்த வித சிரமத்தையும் ஏற்படுத்தப் போவதில்லை. எம்.எஸ்.வி.யில் இருந்து தற்போது ஜி.வி.பி. வரை பாடிக் கொண்டிருப்பவருக்கு, ஒரு கச்சேரியில் ஒரு இசையமைப்பாளர் இசையமைத்த பாடல்களை மட்டும் பாடாமல் இருப்பது சிரமமேயில்லை. 80,90களில் வந்த நல்ல பாடல்களை எல்லாம் இளையராஜாவின் கணக்கிலேயே சேர்த்து வந்தவர்களுக்கு, "ஓ! இதுவெல்லாம் இளையராஜா இசையமைத்தது இல்லையா” என்று தெரிந்துக் கொள்ளும் நல்வாய்ப்பை மக்களுக்கு இளையராஜா அளித்திருக்கிறார் என்று நினைத்துக் கொள்ள வேண்டியது தான்.

ஏ.ஆர்.ரஹ்மானின் வருகைக்குப் பிறகு தான், படங்களில் எஸ்.பி.பி.யின் பாடல் எண்ணிக்கை குறைந்தது. எஸ்.பி.பி. இல்லாத திரைப்பட ஆல்பமா என்ற நிலையில் இருந்து, ஏராளமான பாடகர்கள் அறிமுகமாகி, எல்.பி.பி. இல்லாத ஆல்பம்கள் சாதாரணமாக நிகழ்வாயின. ஆனால், இந்த இசை கச்சேரிகளில் இப்போது ஏராளமான ஏ.ஆர்.ரஹ்மான் பாடல்களே பாடப்பட்டது. காப்பிரைட் விதிமுறைகளைக் கறாராகக் கடைப்பிடிக்கும் ரஹ்மானுடைய பாடல்கள் எப்படி இசையமைக்கப்பட்டது? ஒன்று, அதற்காக முறையாகக் கட்டணம் செலுத்தி அனுமதி வாங்கப்பட்டிருக்கும். அல்லது, தனிப்பட்ட முறையிலாவது பேசியிருப்பார்கள். இளையராஜா விஷயத்தில் ஏன் இரண்டுமே சாத்தியம் இல்லாமல் போனது என்று தெரியவில்லை. தனிப்பட்ட காரணங்களில்லாமல் வேறெதுமாக இருக்கப் போவதில்லை.

இது எஸ்.பி.பி.யை முன்னிலைப்படுத்தி நடக்கும் நிகழ்ச்சி என்பதால், அவர் பாடிய பாடல்களை மற்ற பாடகர்கள் பாடினார்கள். அவருடன் இணைந்து ஜானகி போன்ற பிற பாடகர்கள் பாடிய பாடல்களை, சித்ரா, சைலஜா போன்றோர் பாடினர். ரஜினி, சிரஞ்சிவி போன்றவர்களின் ஸ்டார் வேல்யூ பாடல்களுடன், எஸ்.பி.பி. மனதிற்கு நெருக்கமான பாடல்கள் சேர்ந்து, ஒன்றன்பின் ஒன்றாகப் பாடப்பட்டது. ரஜினி பாடல்களைப் பாடிய போது, அவரைப் போலவே ஸ்டைல் செய்து காட்டி மேலும் கைத்தட்டல் பெற்றார்.

நிகழ்ச்சியின் நடுவே அவ்வப்போது, அங்கிருந்த திரையில் இந்தக் கச்சேரிக்காக, தெலுங்கு நடிகர் கிருஷ்ணா, இயக்குனர் ராம் கோபால் வர்மா, கமலஹாசன் போன்ற பிரபலங்கள் கூறிய வாழ்த்துகள் ஒளிப்பரப்பப்பட்டன.

சங்கரா (சங்கராபரணம்), சிப்பி இருக்குது முத்தும் இருக்குது (வறுமையின் நிறம் சிகப்பு), கொண்டையில் தாழம்பூ (அண்ணாமலை), அஞ்சலி அஞ்சலி (டூயட்) போன்ற பாடல்களுக்குப் பெரும் வரவேற்பு இருந்தது. சும்மா பாடிவிட்டுப் போவோம் என்றில்லாமல் பாடல்களைப் பற்றி, பாடலாசிரியர் பற்றி, இசையமைப்பாளர் பற்றியும் பேசினார். எஸ்.எஸ்.பி.யிடம் அனைவருக்கும் பிடிக்கும் குணமே, அவரின் கடிந்திராத மென் பேச்சே. இந்த மேடையிலும் அது தொடர்ந்தது. இது போன்ற குணங்களை ஏன் பெரிதாகச் சொல்ல வேண்டியிருக்கிறதென்றால், அவரைச் சார்ந்தவர்களுக்கே அக்குணம் இருப்பதில்லை. அதையும் இந்த மேடையில் காண முடிந்தது.

இந்த நிகழ்ச்சி நடைபெற்ற ஓடியம் அரங்கம், இது போன்ற இசைக்கச்சேரி நடத்த சிறந்த இடம் என்று சொல்ல முடியாது. முதலில் பாடிய ஹரிஸ், உடனே அரங்கில் எழும்பும் எதிரொலியைக் கவனித்துக் குறிப்பிட்டார். விளையாட்டுப் போட்டிகளும், கண்காட்சிகளும் நடத்தும் இடத்தில் இசைக்கச்சேரிகளுக்கான நேர்த்தியை எதிர்பார்க்க முடியாது. அதே சமயம், பள்ளி அரங்கங்களில், இவ்வளவு கூட்டத்தை அடைக்கவும் முடியாது. சிகாகோவில் இருக்கும் இசைக்கச்சேரிக்களுக்கான பிரத்யேக அரங்கங்களில் இது போன்ற கட்டணத்தில் கச்சேரி நடத்த முடியாது என்று நினைக்கிறேன்.

இது தவிர, இருக்கை அமைப்புகளும் பிரமாதமாக இருக்கவில்லை. சாதாரண வகை இருக்கை என்பதைக் குறையாகச் சொல்லவில்லை. அதை எங்கு வேண்டுமானாலும் போடலாம் என்பதற்காக, ஒரு கட்டுப்பாடே இல்லாமல் கிடைத்த இடங்களில் எல்லாம் போட்டு நிரம்பி விட்டார்கள்.

மற்றபடி, இந்தியத் திரையுலகச் சரித்திரத்தில் மறுக்கவியலா ஒரு இடத்தைக் கொண்டிருக்கும் மக்களுக்கான இசைக் கலைஞனை, மக்களிடம் நேரடியாகத் தொடர்ந்து கொண்டு சேர்த்துக் கொண்டிருக்கும் அனைத்து நிறுவனங்களுக்கும், அமைப்புகளுக்கும் நன்றிகள். நாம் பல ஆண்டுக்காலமாக ரசித்துக் கொண்டிருக்கும் பாடல்களை, மீண்டும் நம் கண் முன்னே இசைத்து, பாடி காட்டிய எஸ்.பி.பி.யின் குழுவிற்கும், அவர்களது உலக இசைப் பயணம் வெற்றிகரமாகத் தொடர வாழ்த்துகள்.

இது நாள் வரை, ஒவ்வொருவருக்கும் எவ்வளவோ நினைவுகள் இந்தப் பாடல்களுடன் பின்னிப் பிணைந்திருக்கும். இனி அந்த நினைவுகளுடன் சேர்ந்து, இந்தச் சிகாகோ நிகழ்வும் இணையும்.

ராஜமெளலி - இந்தியாவின் நம்பர் 1 இயக்குனரா?

2017-10-02T03:11:00.000+05:30

பனிப்பூக்களில் வெளிவந்த கட்டுரை.

எந்தவொரு மனிதனும் அவன் சார்ந்த பிராந்தியத்தில், மக்களின் மனங்கவர்ந்து வெற்றிகளைப் பெற்ற பின், தனது அடுத்த இலக்காகத் தனக்கான எல்லைகளை விரிவாக்க எண்ணுவான். அரசியலோ, சினிமாவோ அல்லது அது எந்தவொரு துறையாக இருந்தாலும் வளர்ச்சி என்பது இப்படியே அடையப்படும்.

சினிமாவிலும் இப்படி ஒரு மாநிலத்தில் பெயர் பெற்ற கலைஞர்கள், புகழ் ஏணியில் மேலும் ஏற, தங்கள் மாநில எல்லையைக் கடப்பார்கள். அதனால் தான், ஒரு மொழியில் நன்கு வெற்றியடைந்த ஹீரோக்கள், அடுத்துப் பக்கத்து மாநிலத்தைக் குறி வைப்பார்கள். தற்சமயம், ரஜினி படங்கள் தமிழ் ஆடியன்ஸ்களுக்காக மட்டும் எடுக்கப்படுவதில்லை. குறைந்தபட்சம், தெலுங்கு மக்களை மனதில் வைத்து அம்மாநிலத்தில் அறிமுகம் உள்ள நாயகிகள், வில்லன்கள் என அவர்களையும் படத்தில் சேர்த்து எடுக்கப்படுகிறது. ஷாருக்கான் போன்ற ஹிந்தி நடிகர்கள், தங்கள் படங்களின் வர்த்தகத்தைக் கூட்ட, தென்னிந்தியாவில் கடை விரிக்க ஒவ்வொரு பட வெளியீட்டின் போதும் வந்து விடுகிறார்கள்.

இது நடிகர்களுக்கு உரித்தானது மட்டுமல்ல. படத்தின் முக்கியப் பணியான இயக்கத்தை ஏற்றிருக்கும் இயக்குனர்களுக்கும் பொருந்தும். தமிழில் தொடர் வெற்றிகளைப் பெற்ற பாலசந்தர், அடுத்துத் தெலுங்கு, ஹிந்திப் படங்களை எடுத்து, அங்கும் வெற்றிப் பெற்றார். மணிரத்னமும் தமிழ், தெலுங்கு வெற்றிகளைத் தொடர்ந்து மொத்த இந்தியாவுக்கான படங்களை எடுத்தார். அடுத்து வந்த ஷங்கர், முருகதாஸ் போன்றோரும் இப்படி மொத்த இந்திய மார்க்கெட்டையும் குறிவைத்து தான் தற்போது படங்களை எடுத்து வருகிறார்கள்.

இப்படி இந்திய அளவில் வெற்றியைக் கொடுக்கும் இயக்குனர்களைத் தான் இந்தியாவின் நம்பர் 1 டைரக்டர் என்று கமர்ஷியலாகக் குறிப்பிடுவார்கள். நடிகர், நடிகைகளைத் தாண்டி ஒரு இயக்குனருக்கான எதிர்பார்ப்பு இப்படி இந்திய அளவில் ஏற்படும் போது அவர்களை இந்தியாவின் நம்பர் 1 இயக்குனர் என்றழைப்பதில் ஏதும் தவறில்லை.

இந்த விஷயத்தில் தமிழக இயக்குனர்கள் சிறப்பாகச் செயல்பட்டு வந்தார்கள். ரோஜா, பம்பாய் போன்ற படங்கள் வெற்றிப் பெற்ற போது, மணிரத்னம் நம்பர் 1 ஆக இருந்தார். முதல் ஐந்துப்படங்களின் மாநிலம் கடந்த வெற்றிக்குப் பிறகு, முதல்வன் படத்திற்குப் பிறகு, அப்படத்தை ஷங்கர் இந்தியில் நாயக் என்ற பெயரில் இயக்கினார். அந்தப் படத்தில் டைட்டில் கார்டில் இயக்குனர் பெயர் வரும் போது, ஒரு இயக்குனர் நாற்காலியின் பின்னணியில் 3 , 2 , 1 என்று ஒளிர்ந்து ஷங்கர் என்று பெயர் வரும்.

அந்தப் படம் தோல்வியடைந்தாலும், அக்காலக்கட்டத்தில் அவர் தான் நம்பர் ஒன் இயக்குனர். இன்னமும் அந்த ரேஸ்சில் அவர் இருக்கிறார் என்றாலும், 2000க்கு முன்பு போல் ஸ்ட்ராங்காக இல்லை என்பதை ஒத்துக் கொள்ளத்தான் வேண்டும். 2.0 வரட்டும், பார்க்கலாம். முருகதாஸ் வெற்றிப்படங்களைக் கொடுத்தாலும் ஹிந்தி கஜினி போன்ற இந்திய அளவிலான ஹிட்டை அதற்குப் பிறகு கொடுக்கவில்லை. தமிழ் ரசிகர்களால் விலங்குப் பட இயக்குனர் என்று கிண்டல் அடிக்கப்படும் மறைந்த இயக்குனர், தயாரிப்பாளர் ராமநாரயணன் அவர்கள் கூட இந்தியாவில் பல்வேறு மொழிகளில் படம் இயக்கியிருக்கிறார். அவை வெற்றிப் பெற்றாலும், அவை மாநிலம் கடந்து பேசப்படவில்லை. தவிர, அவை சிறு பட்ஜெட் தயாரிப்புகள் என்பதால், பெரிதாகக் கவனிக்கப்படவும் இல்லை.

இப்போது தெலுங்கு இயக்குனர் ராஜமெளலியின் வெற்றிக் காலம். இரண்டாயிரம் ஆண்டு ஸ்டுடண்ட் நம்பர் ஒன் என்ற படத்தின் மூலம் தெலுங்குப் படவுலகில் அறிமுகமானார். ஜூனியர் என்.டி.ஆருக்குத் திருப்புமுனையாக அப்படம் அமைந்தது. அதன் பின்னர், சிம்மாத்ரி என்ற படத்தை மீண்டும் ஜூனியர் என்.டி.ஆரை வைத்து எடுத்து அடுத்த வெற்றியைக் கொடுத்தார். அதன் பிறகு, அவர் எடுத்த சை, சத்ரபதி, விக்கிரமார்க்குடு, எமதொங்கா என அனைத்தும் வெற்றிப் பெற்றன. இப்படங்களில் நிறைய மற்ற மொழிகளில் ரீமேக் செய்யப்பட்டன.

இதுவரை சராசரி கமர்ஷியல் படங்களை எடுத்து வந்தவர், மகதீரா என்ற சரித்திரம் கலந்த ஆக்ஷன் படத்தை 2009இல் சீரஞ்சிவியின் மகன் ராம்சரணை வைத்து இயக்கினார். இதற்கு முந்தைய படங்கள் அக்கம்பக்கம் மொழிகளில் ரீமேக் செய்யப்பட்டிருந்த வகையில் ராஜமௌலி மற்ற மாநிலத் திரைப்படத்துறையினருக்கு அறிமுகமாகியிருந்தார். மகதீராவிற்குப் பிறகு மொத்த இந்தியத் திரையுலகத்தையும் தன் பக்கம் பார்க்க வைத்தார் ராஜமௌலி.

ராஜமௌலியின் வெற்றிக்குப் பின்புலமாக அவரது தந்தை விஜேயந்திர பிரசாத். அவரது கதையைத்தான் ராஜமௌலி தொடர்ந்து கதையாக்கி வருகிறார். அப்பா - மகனும் மிகச் சிறந்த கதைச் சொல்லிகள். தந்தையின் பலமான கதையை, மிகச் சுவாரஸ்யமாகத் திரையில் காட்டுவது மகனுக்குக் கை வந்த வித்தை. மகதீராவில் ராஜாக்கள் காலத்தைத் திரையில் அவர் காட்டிய விதம், பார்ப்போரை வாய் பிளக்க வைத்தது. இச்சமயம், கிராபிக்ஷை எப்படிக் கையாளுவது என்பதிலும் ராஜமௌலி கில்லாடியாக உருவெடுத்தார்.

மகதீரா மிகப்பெரிய வெற்றிப்பெற்று, பெரும் புகழைக்கொடுத்தாலும், ராஜமௌலியை சீரஞ்சிவியின் குடும்பம் நடத்திய விதம், மகிழ்வைக் கொடுக்கவில்லை. படத்தை அவர்கள் குடும்பம் தயாரித்திருந்ததால், மொத்த வெற்றியையும் அவர்கள் குத்தகைக்கு எடுத்துச் சென்றனர். இதனால், ராஜமௌலி ஒரு முடிவுக்கு வந்தார். தனது அடுத்தப் படத்தில் முன்னணி கதாநாயகன் வேண்டாம். ஒரு காமெடியனை ஹீரோவாக நடிக்க வைத்து ஹிட் கொடுக்கிறேன் என்று சுனிலை ஹீரோவாக்கி ‘மரியாதை ராமண்ணா’ படத்தை இயக்கினார். மகதீரா போன்ற ஒரு படத்தை எடுத்துவிட்டு, சுனிலா என்று மொத்தச் சினிமா உலகமும் அவரை ஆச்சரியத்தோடு பார்த்தது. படம் வந்த பிறகு, வழக்கம் போல் ராஜமௌலியைத் தூக்கி வைத்துக் கொண்டாடியது.

காமெடியனை ஹீரோவாக்கி ஹிட் கொடுத்தாயிற்று. அடுத்து, ஒரு ஈயை ஹீரோவாக்கி ஹிட் கொடுப்போம் என்று ஈகா படத்தைத் தொடங்கினார். 2012இல் தெலுங்கிலும், தமிழிலும் வெளியான இந்தப் படம், போட்ட தியேட்டரெங்கும் பட்டையைக் கிளப்பியது. இந்தப் படத்தின் மூலம் ராஜமௌலிக்கு தமிழிலும் ரசிகர்கள் உண்டானார்கள். வி.ஃஎப்.எக்ஸ்.இல் புதுப் பரிமாணம் காட்டினார், ராஜமௌலி. தனது படத்திற்கு எந்தப் பெரிய ஹீரோவும் வேண்டாம், கம்ப்யூட்டரில் ஒரு ஈயை உருவாக்கி, அதையும் ஹிட்டாக்கி காட்டுவேன் என்று நிருபித்தார். இப்போது இந்தியாவின் நம்பர் ஒன் இயக்குனர் நாற்காலி இவருக்குத் தயாரானது.

அடுத்து, எடுத்து வைத்த அடி தான் - பாகுபலி. 2015 இல் வெளிவந்த பாகுபலி முதல் பாகம், பிரமாண்ட வெற்றிப் பெற்றது. நவீன இந்தியாவின் அடையாளம் என்று இப்படம் புகழப்பட்டது. பெரும் நடிகர் பட்டாளம் இருந்தாலும், இது ஒரு ராஜமௌலி படம் என்று தான் பெருமை பேசப்பட்டது. இதற்குத் தானே ஆசைப்பட்டாய், ராஜமௌலி!!

இந்தாண்டு 2017 ஏப்ரல் 28ஆம் தேதி, பெரிதும் எதிர்பார்க்கப்பட்ட பாகுபலியின் இரண்டாம் பாகம் வெளியானது. படம் பார்த்த அத்தனை பேரும், தங்களது பெரும் எதிர்பார்ப்பைப் பல மடங்கு இப்படம் பூர்த்திச் செய்ததாகக் கூறி மகிழ்கிறார்கள். இந்தியச் சினிமாக்களின் அனைத்துச் சாதனைகளையும் இப்படம் அடித்து நொறுக்கும் என உறுதியாகக் கூறுகிறார்கள். பிரமாண்டம் என்றால் இதுவரை ஷங்கரைத் தான் கைக்காட்டுவார்கள். இப்போது, ராஜமௌலி.

ரஜினி, ஷாருக்கான், சல்மான்கான், அமீர்கான் போன்ற டாப் ஹீரோக்களின் பட வசூலைச் சர்வசாதாரணமாக முறியடிக்கிறார் ராஜமௌலி. இன்றைய தேதியில், இந்தியச் சினிமாவின் நம்பர் ஒன் இயக்குனர் யார் என்ற கேள்விக்குச் சந்தேகமில்லாமல் பதில் சொல்லிவிடலாம் - ராஜமௌலி என்று.

வெல்டன் ராஜமௌலி. வாழ்த்துகள்!!

.

ட்வின் சிட்டீஸ் உழவர் சந்தைகள்

2017-10-02T03:07:00.001+05:30

பனிப்பூக்களில் வெளிவந்த கட்டுரை.

உலகில் இருக்கும் பனிரெண்டு மண் வகைகளில், ஒன்பது வகை மண்ணைக் கொண்ட மினசோட்டா ஒரு விவசாயப் பூமியாக இருப்பதால், மினசோட்டாவாசிகளுக்கு ஒரு அனுகூலம் உள்ளது. ஃப்ரெஷ்ஷாக உணவு உண்ணலாம். அதுவும், உணவுக் குறித்த விழிப்புணர்வு பெருகியுள்ள இக்காலத்தில், இது போன்ற வாய்ப்பு மிகவும் முக்கியத்துவம் பெறுகிறது. புத்தம் புதியதாக விவசாய நிலத்தில் இருந்து வரும் விளைப் பொருட்கள், மக்களை உடனடியாகச் சென்றடைய உதவுபவை, உழவர் சந்தைகள். அந்த வகையில், மினசோட்டா எங்கும் நடக்கும் உழவர் சந்தைகள் (Farmer's markets), மினசோட்டாவாசிகளை அதிர்ஷ்டம் கொண்டவர்களாக உணரச் செய்பவை.

விவசாய உற்பத்தியில் அமெரிக்காவில் ஐந்தாவது இடத்தில் இருக்கும் மினசோட்டாவில், அதன் விவசாயத் துறையின் ஒருங்கிணைப்பில், மேற்பார்வையில் இங்குள்ள உழவர் சந்தைகள் நடைபெற்று வருகிறது. இதன் முக்கிய நோக்கம், உள்ளூரில் விளைவிக்கப்படும் உணவுப் பொருட்கள், பெரிய இடைவெளி இல்லாமல், வாடிக்கையாளர்களை உடன் சென்றடைவது மற்றும் இரு தரப்பினருக்கும் எவ்வித இடைத் தரகும் இல்லாமல் நல்ல விலையில் கிடைப்பது. முக்கியமாக, சிறு விவசாயிகளுக்கான களம் இது. பெரிய பன்னாட்டு விவசாய நிறுவனங்களுக்கு நேரடியாக இங்கு இடமில்லை.

மின்னியாபோலிஸ், செயிண்ட் பால் போன்ற சில உழவர் சந்தைகள் அனைத்து நாட்களிலும் நடைபெற்றாலும், மற்ற நகரங்களில் நடைபெறும் பெரும்பாலான உழவர் சந்தைகள் வாரத்தில் ஏதேனும் ஒருநாள் நடைபெறுபவையாக இருக்கின்றன. எப்படி இருந்தாலும், வாரத்தில் ஒரு நாள் தான் கடைக்குச் சென்று காய்கறி வாங்க போகிறோம். மின்னியாபோலிஸ், செயிண்ட் பால் டவுண்டவுனை விட்டுத் தள்ளி இருப்பவர்களுக்கு, அவ்வளவு தூரம் போகணுமா என்று நினைப்பவர்களுக்குப் பக்கத்தில் இருக்கும் வாராந்திரச் சந்தைதான் வசதி. எப்படி இருந்தாலும் டவுண்டவுனில் வாரயிறுதியில் நடைபெறும் சந்தை தான், பெருமளவு மினசோட்டாவாசிகளை வாடிக்கையாளர்களாகக் கொண்டது. அதிகமான வியாபாரிகளின் எண்ணிக்கையும் , காய்கறி வகைகளின் எண்ணிக்கையும் அதற்குக் காரணம் எனலாம்.

மின்னியாபோலிஸ் உழவர் சந்தையில் காய்கறிகள், பழங்கள் மட்டுமில்லாமல் சீஸ், முட்டை, கறி வகைகளும் கிடைக்கும். அது மட்டுமில்லாமல், கையால் நெய்யப்பட்ட துணிமணிகள், அழகழகான பூக்கள், பீங்கான் சாமான்கள் என்று உணவைத் தாண்டி மற்ற பொருட்களும் கிடைக்கும். இது தவிர, உணவகங்கள், காபி கடைகள், பாப்கார்ன், ஜூஸ் கடைகளும் இருப்பதால், எதையாவது கொறித்துக் கொண்டே ஷாப்பிங் செய்யலாம். ஆங்காங்கே, யாராவது ஏதேனும் இசைக்கருவியை வேறு அருமையாக இசையமைத்துக் கொண்டிருப்பார்கள். காய்கறி வாங்குகிறோம் என்பதற்கு மேலான ஒரு சந்தோஷ அனுபவத்தை அளிப்பதால் தான் இந்த உழவர் சந்தைகள் வெற்றிகரமாக நடந்து வருகின்றன.

சூப்பர் மார்க்கெட்டில் கிடைக்காத பல காய்கறிகள், இங்கு நல்ல தரத்துடன் கிடைக்கும். சீசனுக்கு ஏற்றாற்போல், சில வகைக் காய்கறிகள் அவ்வப்போது கிடைக்கும். தமிழ்நாட்டில் சில இடங்களில் பட்டர்பீன்ஸ் என்றொரு வகைப் பீன்ஸ் கிடைக்கும். தேங்காயுடன் சேர்த்து அரைத்த மசாலாவில் செய்த பட்டர்பீன்ஸைச் சாப்பிடுபவர்கள், அதற்கு ரசிகர்களாகிப் போவார்கள். பெங்களூரில் இருந்த போது, அங்கு இந்தப் பீன்ஸ் கிடைக்காததால், ஊரில் இருந்து எடுத்துச் செல்வோம். வீட்டில் இருந்து யாரேனும் விஜயம் புரிந்தாலும், அவர்களது பையில் பட்டர் பீன்ஸிற்கு இடமிருக்கும். அப்படி எங்களது மனதிலும் இடம் பிடித்த பட்டர் பீன்ஸை அமெரிக்கா வந்த பின்பு மறந்தே போயிருந்தோம். இங்கு மினசோட்டா வந்த பின்பு, ஒரு நாள் மின்னியாபோலிஸ் உழவர் சந்தையில் அதைக் கண்டப் பொழுது, நாங்கள் ஆனந்த அதிர்ச்சி அடைந்தோம். இப்படிச் சர்ப்ரைஸ் ஷாக் அளிக்கக்கூடியவை, உழவர் சந்தை விசிட்ஸ்.

தொடர்ந்து வாராவாரம் செல்ல, கடைகள், காய்கறிகள், கடை உரிமையாளர்கள் என நல்ல பழக்கம் ஏற்பட்டு விடும். எந்தப் பக்கம் சென்றால், என்ன வாங்கலாம் என்று தெரிந்துவிடும். சில காய்கறிகள் சில காலங்களில் தான் கிடைக்கும் என்பதால், அச்சமயங்களில் அந்தக் காய்கறிகள் பெரும்பாலான கடைகளில் வைத்திருப்பார்கள். ஒரு வாரம் கிடைக்கும் காய்கறி, அடுத்த வாரம் கிடைக்கும் என்றும் சொல்ல முடியாது. அதனால், புதிதாகக் கிடைக்காத காய்கறிகளைப் பார்த்தால், உடனே வாங்கிக் கொள்ளவும். முதலில், ஒரு ரவுண்ட் அனைத்துக் கடைகளையும் பார்த்து விட்டால், அடுத்த ரவுண்டில் தேவையான காய்கறிகளைச் சரியான கடைகளில் வாங்கிக் கொள்ளலாம்.

குளிர்காலத்தில் மூடப்படும் வெளிப்புற உழவர் சந்தைகள், கோடைக்காலத்தில் மீண்டும் முழுவீச்சில் செயல்படத்தொடங்கும். இந்தாண்டு இதோ மே முதல் வாரத்தில் இருந்து மின்னியாபொலீஸ் - செயிண்ட் பால் உழவர் சந்தைகள் ஆரம்பிக்கப்படப்போகின்றன.

உழவர் சந்தைக்காகக் காத்துக்கொண்டிருந்தவர்கள் ரெடி ஸ்டார்ட், வீக் எண்ட் சூப்பர் ஷாப்பிங் ஆரம்பம்!!

.

வசந்தத்தின் தொடக்கம் - Spring Equinox

2017-10-02T03:00:00.000+05:30

பனிப்பூக்களில் வெளிவந்த கட்டுரை.

இந்தாண்டு 2017 இல் மார்ச் 20ஆம் தேதியன்று வசந்தக் காலத்தின் தொடக்கமான சமப் பகலிரவு தினம் (Equinox) நிகழவிருக்கிறது. Equinox என்பது சமமான இரவு என்ற பொருளளிக்கும் லத்தீன் வார்த்தையில் இருந்து வந்த சொல். ஒரு வருடத்தின் இரு நாட்களில் மட்டுமே இரவும் பகலும் சமமான நேரம் கொண்டவையாக இருக்கும். ஒன்று, வசந்தச் சமப் பகலிரவு நாள் (Spring Equinox). மற்றொன்று, இலையுதிர் சமப் பகலிரவு நாள் (Autumn Equinox).

ஏன் அனைத்து நாட்களிலும் இரவும், பகலும் சம நேரத்தைக் கொண்டிருக்கவில்லை? எதனால் இரு தினங்களில் மட்டும் சமமான பகல் இரவு நேரம் அமைகிறது? போன்ற கேள்விகளுக்குப் பதிலளிக்கும் முன், சூரியனுக்கும் பூமிக்கும் இடையே நடக்கும் ரொமான்ஸ்ஸைப் பார்த்து விடலாம்.

சூரியன் ஒரு பேரழகும், பெரும் திமிரும் கொண்ட பிரபஞ்ச ஃபிகர். இதைச் சுற்றி வரும் பல கோள்களில், நாமிருக்கும் உலகப் பந்தும் ஒன்று. உலக உருண்டை, தன்னைத் தானே சுற்றிக் கொண்டு, அதாவது சுழன்றுக் கொண்டு, சூரியனையும் சுற்றி வரும் ஒரு விநோத கேரக்டர். இது ஒரு தடவை முழுமையாகச் சுழல ஒரு நாளும், சூரியனைச் சுற்றி ஒரு ரவுண்ட் வர ஒரு வருடமும் எடுத்துக் கொள்ளும். பல ஆயிரம் ஆண்டுகளாக இப்படித் தான் சுற்றி வந்து டாவடித்துக் கொண்டிருக்கிறது. இப்படிப் பக்கம் வராமல், ஒரு குறிப்பிட்ட தூரத்தில் சுற்றி வந்துக் கொண்டே இருப்பது தான், அதற்கும் நல்லது. நமக்கும் நல்லது.

பூமி சூரியனைச் சுற்றி வரும் பாதை, ஒரு முழு வட்டப் பாதை இல்லை. நீள் வட்டப் பாதை. சாதாரணமாக இல்லாமல், இறைவன் அழகியலோடு படைத்த பாதை என்று சொல்லிக் கொள்ளலாம். இதனால் சுற்றி வரும் போது, சில இடங்களில் சூரியனுக்குப் பக்கமாகவும், சில இடங்களில் தூரமாகவும் இருக்கும். பக்கம் இருக்கும் போது, சூரியனின் தாக்கம் அதிகமாக இருக்கும். அதுவே, கோடைக்காலம். இது போல் தான், சூரியனின் சுற்று வட்டத்தில் பூமி இருக்கும் இடத்தைப் பொறுத்துப் பூமியில் இருக்கும் காலங்கள் வசந்தம், கோடை, இலையுதிர், குளிர் காலம் என மாறுகிறது.

இப்படிப் பூமி சுற்றும் போது, அச்சுக்கோட்டுக்கு நேராக இல்லாமல், 23 டிகிரியில் சாய்ந்துக் கொண்டு சுற்றுகிறது. இதனால், பூமிப்பந்தின் மேல் அரைக்கோளத்திற்குக் (North Hemisphere) கிடைக்கும் சூரிய ஒளியும், கீழ் அரைக்கோளத்திற்குக் (South Hemisphere) கிடைக்கும் சூரிய ஒளியும் ஒரே அளவில் இருப்பதில்லை. இதன் காரணமாகவே, பூமியில் இருக்கும் வெவ்வேறு இடங்களில் தட்பவெட்பம் வித்தியாசமாக இருக்கிறது. அமெரிக்காவில் குளிர்காலமாக இருக்கும் டிசம்பரில், ஆஸ்திரேலியாவில் கோடைக்காலமாக இருப்பதற்கான காரணம் இதுதான்.

சூரிய ஒளி எவ்வாறு பூமியின் மீது படுகிறதோ, அதற்கேற்ப பகலின் நீளமும் இரவின் நீளமும் மாறுபடுகிறது. மார்ச் 20 ஆம் தேதி அன்று, சூரிய ஒளி பூமியின் மீது படும் போது, அது பூமியின் மத்திய கோட்டின் (Equator) மீது செங்குத்தாக விழும். அச்சமயம், பூமியெங்கும் பகலும் இரவும் சம அளவில், அதாவது 12 - 12 மணி நேரம் எனச் சரிச்சமமாக இருக்கும். இதுவே, சமப் பகலிரவு தினம் (Equinox) என்று அழைக்கப்படுகிறது. அச்சமயத்தில், அதாவது மத்திய நேரத்தில் (CST) அதிகாலை 5:28 மணிக்கு, வட அரைக்கோளத்தில் வசந்தக்காலம் அதிகாரப்பூர்வமாகத் தொடங்குகிறது எனலாம். இதுவே, தென் அரைக்கோளத்தில் இலையுதிர் காலத்தின் தொடக்கம் என்றாகும்.

இதற்குப் பிறகு, ஒவ்வொரு நாளும் பகலின் நீளம் அதிகரிக்கும். இரவின் நீளம் சுருங்கும். உலகம் மேலும் அதிகமாக உழைக்கத் தொடங்கும்.

அன்றைய தினம் பூமி இருக்கும் நிலையின் காரணமாக, சிலர் முட்டையை நேராக நிற்க வைக்கப் போகிறேன் என்று கிளம்புவார்கள். அதை நம்ப வேண்டாம். அப்படி முட்டையை நிற்க வைப்பவர்களால், எந்தத் தினத்திலும் நிற்க வைக்க முடியும். இதற்கும் அன்றைய தினத்திற்கும் எந்தச் சம்பந்தமும் இல்லை. ஆனால் முட்டைக்கும் இந்தத் தினத்திற்கும் சம்பந்தம் உண்டு. இந்தச் சமயம் உலகில் இருக்கும் பல உயிர்களுக்கு மறுபிறப்பு என்பதால், பிறப்பைக் குறிப்பிடும் வகையில் முட்டை சிறப்பிக்கப்படும். கிருஸ்துவர்கள் அந்தச் சமயம் வரும் ஞாயிறன்று ஈஸ்டர் பண்டிகை கொண்டாடுவார்கள். இயேசு கிருஸ்து உயிர்த்தெழுந்த தினம் அது என்பது குறிப்பிடத்தக்கது.

ஈரான் போன்ற நாடுகளில், இந்தத் தினத்தில் தான் புதிய காலத்தின் தொடக்கம் என்னும் நம்பிக்கையில் புத்தாண்டு கொண்டாடப்படுகிறது. இந்தியாவில் இந்தக் காலக்கட்டத்தில் தான் வண்ணங்களைப் பூசிக்க்கொண்டு விளையாடும் ஹோலி பண்டிகை நடைபெறுகிறது. இதுவும் வசந்தத்தின் தொடக்கத்தைக் கொண்டாடும் ஒரு விழாவாகவே பார்க்கப்படுகிறது.

சமப் பகலிரவு தினத்திற்குப் பிறகு, அதுவரை நடுங்க வைத்துக்கொண்டிருக்கும் குளிர் கொஞ்சம் கொஞ்சமாகக் குறையும். அதனால், கனமான ஜாக்கெட்டுக்கு அதற்குப்பிறகு விடைக்கொடுத்து விடலாம். சில காலச் சன்னியாசத்திற்குப் பிறகு, மரங்களில் இலைகளும், பூக்களும் துளிர்விடும். தெற்கே சென்ற பறவைகள், வடக்கிற்கு வீடு திரும்பும். நிலத்திற்கு அடியே நெடும் தூக்கத்திற்குச் சென்ற சில விலங்குகள், சகஜ வாழ்வு நிலைக்குத் திரும்பும். மீன்கள் ஏரியின் மேற்பரப்பிற்கு வரும்.

வசந்தம் என்றாலே வளம் தான். நம்முடைய வாழ்வின் நல்ல காலத்தை வசந்தக் காலம் என்போம். அப்படி, வசந்தமும், வளமும் நெருங்கிய தொடர்பு கொண்டது. அதனால், இந்த வசந்தக்காலமும் நம் வாழ்வில் சிறந்த தருணங்களை அமைத்துக்கொடுக்கும் என்னும் நம்பிக்கையில் வரும் வசந்தத்தை மகிழ்வுடன் வரவேற்போம்.

உலகின் வாட்டர் பார்க் தலைநகரம் - விஸ்கான்சின் டெல்ஸ்

2017-10-02T02:56:00.000+05:30

பனிப்பூக்களில் வெளிவந்த கட்டுரை.

உலகின் வாட்டர் பார்க் தலைநகரம் என்று தங்களைப் பிரகடனப்படுத்திக் கொண்ட விஸ்கான்சின் டெல்ஸ், மினசோட்டாவில் இருந்து மூன்றரை மணி நேரப் பயணத் தூரத்தில் அமைந்துள்ளது. உள்ளூர் கேளிக்கை மையங்கள் போராடித்து விட்டால், வாரயிறுதிக்கு வண்டியெடுத்துக் கொண்டு கிளம்பி விடலாம். கோடையாக இருந்தாலும் சரி, குளிர் காலமாக இருந்தாலும், குடும்பத்துடன் குதூகலிக்கப் பல பொழுதுபோக்கு அம்சங்கள் நிறைந்த ஊர் - விஸ்கான்சின் டெல்ஸ்.

இவ்வூருக்கு இப்பெயர் வந்தது 1931இல். அதற்கு முன்பு வரை, இது கில்போர்ன் சிட்டி (Kilbourn City) என்று அழைக்கப்பட்டு வந்தது. கில்போர்ன் சிட்டி வரை தெரிந்தக் கொண்ட நாம், கில்போர்ன் என்ற நபரைப் பற்றியும் தெரிந்துக் கொள்வோம்.

தற்காலத்தில் நம்மூர் எம்.எல்.ஏ.க்கள் செய்யும் தகிடுதத்தங்களுக்கு முன்னோடி இவர். நம்மூரில் அதிகாரத்தில் இருப்பவர், அவருக்குச் சொந்தமான இடத்தில் அரசு திட்டங்களை வலுகட்டாயமாகக் கொண்டு வந்து, தனிபட்ட ஆதாயம் காணும் செய்திகளைக் கடந்து வருகிறோம் இல்லையா? அது போன்ற நபர் இவர்.

பத்தொன்பதாம் நூற்றாண்டில், நில அளவாயராக இருந்த இவர், கூடவே அரசியல் செல்வாக்குக் கொண்ட பணக்காரர். இன்று விஸ்கான்சின் டெல்ஸ் இருக்கும் இடத்திற்குக் கிழக்கே சில மைல் தொலைவில் இருக்கும் நியூபோர்ட் எனும் இடத்தில் ரயில் இருப்புப்பாதை, விஸ்கான்சின் ஆற்றைக் கடக்கும் வகையில் திட்டம் இருந்தது. ஆனால், கில்போர்ன், தான் மலிவாக இடத்தை வாங்கி வைத்திருக்கும் இடத்திற்கு அந்தத் திட்டத்தைக் கொண்டு வந்தார். அந்த இடத்தைக் கில்போர்ன் சிட்டி என்று நகரமாக உருவாக்கினார். இவரே, மில்வாக்கி நகரை உருவாக்கியவரும். பின்னாட்களில், நிர்வாகச் சீர்கேடு குற்றச்சாட்டுகளில் சிக்கி, தனது பெயரை இழந்து, நோயுற்று இறந்தார்.

இப்படி இவர் உருவாக்கிய இந்த ஊர், பொழுதுபோக்குக் கேந்திரமாக, பின்னாளில் உருவாகியது. மரங்களால் சூழ்ந்தச் சிறு பள்ளத்தாக்கை, ஆங்கிலத்தில் டெல்ஸ் (dells) என்றழைப்பார்கள். இது அது போன்ற இடம் என்பதால், இது விஸ்கான்சின் டெல்ஸ் ஆனது. இங்கிருக்கும் ஆற்றில் படகுச் சவாரி, ஆற்றில் நடக்கும் சாகச விளையாட்டுக் காட்சிகள் என மகிழ்வுக்கு அக்கம்பக்கத்தினர் இந்த ஊர் வந்தனர். வாட்டர் பார்க் என்றழைக்கப்படும் தண்ணீர் சார்ந்த விளையாட்டுகள் அமைந்த தீம் பார்க்குகள் நிறையத் தொடக்கப்பட்டன. தற்சமயம், இவை இவ்வூரின் அடையாளமாகிப் போயின.

இந்தத் தீம் பார்க்குகள், ஏராளமான அறைகளுடன் இங்கேயே தங்கும் வசதியுடன் அமைந்துள்ளன. தங்கும் விடுதியில் அறை எடுப்பவர்கள், இலவசமாக அங்கிருக்கும் தீம் பார்க்கில் விளையாடிக் கொள்ளலாம். இது பெரும் வர்த்தகமாக இவ்வூருக்கு அமைந்து விட்டது. அக்கம் பக்கத்து மாநிலங்கள் மட்டுமில்லாமல், தொலைத்தூர மாநிலங்களில் இருந்தும் இங்கே மக்கள் வந்து குவிகின்றனர்.

ஆனாலும், உள்ளூர் மக்கள் தொகையைப் பார்த்தோமானால், இது இன்னமும் சிறு ஊர்தான். போன நூற்றாண்டில் ஆயிரமாக இருந்த மக்கள்தொகை, இந்த நூற்றாண்டில் இரண்டாயிரமாகக் கூடியுள்ளது. அவ்வளவே.

கோடைக்காலத்தில் செல்வதற்குப் படகுச் சவாரி, குதிரைச் சவாரி, சாகச விளையாட்டுக்கள், தண்ணீர் விளையாட்டுகள் என வெளிப்புறப் பொழுதுப்போக்கு அம்சங்களும், குளிர்காலத்தில் அனுபவிப்பதற்கு உள்புற விளையாட்டு அரங்கங்களும், மியூசியம் போன்ற காட்சிச்சாலைகளும் ஏராளமாக உள்ளன. அதனால், எந்தக் காலத்தில் செல்வது என்ற குழப்பம் தேவையில்லை. குளிர்காலத்தில் எங்கே போவது என்று தவிக்கும் மத்திய மேற்கு மாகாணச் சுற்றுலா விரும்பிகள், யோசிக்காமல் இங்கே ஒரு விசிட் அடிக்கலாம்.

Kalahari, Mt. Olympus, Chula Vista, Noah’s Ark, Wilderness Territory, Wildwest எனப் பல தீம் பார்க்குகள் ஒரே ஊரில் அமைந்திருப்பதால், எது பிடித்திருக்கிறதோ அங்குச் சென்று பொழுதைக் கழிக்கலாம். குழந்தைகள் முதல் பெரியோர்கள் வரை அனைத்து வயதினரும் விளையாடுவதற்கான விளையாட்டுகள் இருப்பதால், குடும்பமாகவோ, நண்பர்கள் குழுவாகவோ எப்படிச் சென்றாலும் திருப்தி அளிக்கும். இது தவிர, திம்பவடி வனஉயிர் பூங்கா, விஸ்கான்சின் மான் பூங்கா ஆகிய வெளிப்புற இயற்கை சுற்றுலா தளங்களும் இங்கு இருக்கின்றன. Bennett studio, Tommy Bartlett Exploratory, Ripley’s Believe it or not போன்ற காட்சிச்சாலைகள் மியூசியம்விரும்பிகளைக் கவரும்.

உணவு ரசிகர்கள் சுவைப்பதற்கு இவ்வூருக்குப் புகழ்பெற்றுக் கொடுத்த விஸ்கான்சின் சீஸ் மற்றும் ஃபட்ஜ் எனப்படும் சாக்லேட் கூழ், இங்குப் பல இடங்களில் கிடைக்கின்றன. திருநெல்வேலியில் எப்படி எந்தப் பக்கம் பார்த்தாலும், இங்கு ஒரிஜினல் அல்வா கிடைக்கும் என்று எழுதி வைத்திருப்பார்களோ, அது போல் இங்கும் ஒரிஜினல் விஸ்கான்சின் சீஸ், ஃபட்ஜ் போர்டுகளைப் பல இடங்களில் காணலாம். எது உண்மையான ஒரிஜினல் என்று கண்டுபிடிப்பது உங்கள் திறமை.

ஆக, ஒரு வாரயிறுதிக்குச் சுற்றி வருவதற்கு ஏகப்பட்ட சங்கதிகள் இருக்கும் ஊர், விஸ்கான்சின் டெல்ஸ்.

வபஷா தேசிய கழுகு மையம்

2017-10-02T02:47:00.001+05:30

பனிப்பூக்களில் வெளிவந்த கட்டுரை.

அமெரிக்காவின் தேசியச் சின்னமாக கழுகு இருப்பது, நாம் அனைவரும் அறிந்ததே. என்ன விதமான ஒரு டெரர் பறவையைத் தேசியச் சின்னமாக வைத்து இருக்கிறார்கள் என்று எண்ணுவது உண்டு. ஒருவேளை, அமெரிக்காவில் அதிகமாக கழுகு இருக்கிறதோ என்னமோ என்று நினைத்தால் அதுவும் இல்லை. சமீபகாலம் வரை இது அழிந்து வரும் உயிரினங்கள் பட்டியலில் தான் இருந்தது. இப்போது 2007இல் தான், கழுகுகளின் எண்ணிக்கை அதிகமாகியிருக்கும் காரணத்தால், அந்தப் பட்டியலில் இருந்து கழுகு நீக்கப்பட்டுள்ளது.

எண்ணிக்கை பார்த்துச் சின்னம் அமைப்பது என்பது எந்த ஊரிலும் எடுபடாது. ஒரு பறவையோ ஒரு விலங்கோ, அதன் குணம் தான் அதற்குப் பெருமை அளிக்குமே தவிர, எண்ணிக்கை அல்ல. மனிதனும் ஒரு விலங்கு தான் என்பதை இங்கு நினைவுப்படுத்திக் கொள்ளலாம்.

நேரு காலத்தில், இந்தியைத் தேசிய மொழியாக அறிவிக்க மத்திய அரசு யோசித்தபோது, அண்ணாதுரை போன்றோர் அதற்குக் கடும் எதிர்ப்பு தெரிவித்தனர். அது குறித்த நாடாளுமன்ற விவாதத்தில் நேரு, இந்தியாவில் பெரும்பாலோர் பேசும் மொழியாக இந்தி இருப்பதால், அதைத் தேசிய மொழியாக அறிவிக்கலாம் என்றதற்கு, அண்ணா அப்படிப் பார்த்தால் இந்தியாவின் தேசியப் பறவையாகக் காகத்தைத் தான் அறிவிக்க வேண்டி இருக்கும் என்று எதிர்வாதம் புரிந்ததாகச் சொல்லுவார்கள்.

அது போல், அமெரிக்காவின் தேசியச் சின்னமாகக் கழுகு இருப்பதற்கும் அதன் பலம், கம்பீரம், சுதந்திரம், நெடிய ஆயுள் போன்ற குணங்கள் தான் காரணமாக இருந்திருக்கும். அந்தப் பார்வையே கிலிவூட்டக் கூடியதாக இருக்கும்.

சிறு வயதில், வெளியே சென்றால் கழுகு தூக்கிச் சென்று விடும் என்று யாரோ சொல்லப் போக, வானத்தில் கழுகைப் பார்த்தாலே, அது நம்மைத் தூக்கிச் சென்று விடுமோ என உள்ளூக்குள் பயந்துக் கொண்டே கழுகைப் பார்த்த காலம் ஒன்றுண்டு. கழுகால் நம்மைச் சுமந்துக் கொண்டு பறக்க முடியாது என்ற அளவுக்கு வெயிட் கூடும் வரை இந்தப் பயம் இருந்தது!! கழுகு குறித்த இவ்வாறான பிம்பத்தைச் சமூகம் பல விதங்களில் நம்மிடம் பதித்துக் கொண்டே தான் இருக்கிறது. சமீபத்தில் கூட, ஒரு குழந்தையைக் கழுகு ஒன்று தூக்கி செல்ல முற்பட்டது என வாட்ஸ் - ஆப்பில் வீடியோ ஒன்று பரவியது.

இப்படி கழுகு, பறவைகளில் ஒரு தனி வகை. கழுகு பற்றிய ஆர்வமூட்டும் கேள்விகள் பல, நம்முள் இருக்கும். கழுகு பற்றிய நமது சந்தேகங்களைக் களைவதற்கும், அவற்றைப் பற்றி மேலும் தெரிந்துகொள்வதற்கும் மினசோட்டாவில் வபஷா (Wabasha) என்னும் சிறுநகரில் உள்ள தேசிய கழுகு மையம் (National Eagle Center) பெரிதும் உதவும்.

வபஷா என்னும் இந்த அழகிய சிற்றூர், ட்வின் சிட்டீஸில் இருந்து சுமார் 80 மைல்கள் தொலைவில், மிஸ்ஸிசிப்பி ஆற்றின் ஓரத்தில் அமைந்துள்ளது. ட்வின்சிட்டீஸில் இருந்து செல்லும் போது, 20 மைல் தொலைவுக்கு, இந்தச் சாலை மிஸ்ஸிசிப்பி ஆற்றுடன் சேர்ந்தவாறு செல்லும் அருமையான சூழல் உண்டு. மார்ச் மாதத்தில் பயணிக்கும் பொழுது, ஆறு தனது பனி உடையைக் களைந்து, தண்ணீர் ஆடையை அணிந்துக்கொண்டிருப்பதைக் காணலாம். ஊருக்குள் நுழையும் போது, இவ்வூரின் நெடிய பாரம்பரியத்தை அடையாளமாக்கிக்கொண்டு நிற்கும் பழமையான சிறு சிறு கட்டிடங்கள் நம்மை வரவேற்கும். கழுகு மையம் பார்த்துவிட்டு வரலாம் என்று சென்றால், இவ்வூரின் அமைதியான ரம்மியத்தில் மேலும் சில மணி நேரங்கள் இருந்துவிட்டு வரலாம் எனத் தோன்ற வைக்கும் அழகுச் சிற்றூர் இது.

வரும் வழியிலேயே நம்மால் நிறையக் கழுகுகளைக் காண முடியும். ஆற்றில், பனியின் மேல், கூட்டமாக நின்றுக்கொண்டு மீன் பிடித்து உண்பதைக் காணலாம். கழுகுகள் பெருமளவில் இங்கே இருப்பதால், கழுகு பற்றிய ஆய்வுக்கும், பார்வையிடுவதற்கும், புகைப்படங்கள் எடுப்பதற்கும் ஏற்ற இடமாக இந்த மையம் அமைந்துள்ளது.

ஏஞ்சல், டொனால்ட் உள்பட இங்கு ஐந்து கழுகுகள் பராமரிக்கப்படுகின்றன. இந்தக் கழுகுகளுக்கு ஏற்பட்ட காயங்களால், இவை இங்கு அடைக்கலம் ஆகியுள்ளன. தற்சமயம் இவை இம்மையத்தின் கல்வி மற்றும் ஆய்வு சார்ந்த பணிகளுக்கு உதவுகின்றன.

இந்த மையத்தில் தினமும் மூன்று முறை கழுகுகள் நேரடியாக பங்குக்கொள்ளும் நிகழ்ச்சிகள் நடத்தப்படுகின்றன. இந்த நிகழ்ச்சியில் ஒருங்கிணைப்பாளர், ஒரு கழுகுடன் பார்வையாளர்களுக்குக் கழுகுகள் குறித்த தகவல்களை அளித்து, பார்வையாளர்களின் கேள்விகளுக்குப் பதிலளிக்கிறார். இது ஒரு கலந்துரையாடல் போல், பார்வையாளர்களின் பங்களிப்புடன் நடைபெறுகிறது. கழுகுகளில் இருக்கும் பல வகைகளைப் பற்றி இதில் நாம் அறிந்துக் கொள்ளலாம்.

எந்தத் தடுப்பும் இல்லாமல், சில அடித் தொலைவில் ஒரு கழுகைப் பார்ப்பது, உள்ளூக்குள் ஒருவித எழுச்சி அளிக்கும் உணர்வைக்கொடுக்கிறது. அடிப்பட்ட கழுகுகள் என்று சொல்லப்பட்டாலும், கழுகுகளின் கம்பீரம் என்றும் குறைவதில்லை. பார்வையாளர்களின் முன்பு, அதற்கு உணவு அளிக்கப்படுகிறது. பெரும்பாலும், மீன் இங்கு உணவாக அளிக்கப்படுகிறது. மீனைத் தனது அலகினால் கொத்திப் பிய்த்து மிச்சம் வைக்காமல் சாப்பிடுகிறது. கழுகின் கால்கள், ஒரு பறவைக்குரியதாக இல்லை. ஒரு விலங்கின் கால்களைப் போல் அமைந்துள்ளது. சுமார் 45 நிமிடங்களுக்கு நீளும் இந்த நிகழ்ச்சியில், அவ்வப்போது கழுகு தனது சிறகை விரித்து அடிக்கும் போது, அதன் பிரமாண்ட உருவம் புலப்படுகிறது.

இந்த நிகழ்ச்சி தவிர, இங்கிருக்கும் ஒரு திறந்தவெளியில், கூண்டுகள் அற்ற அறையில் கழுகுகளை எந்தத் தடுப்பும் இல்லாமல் நேரடியாகக் காண முடியும். இங்கிருக்கும் தன்னார்வலர்கள், கழுகு குறித்த எவ்விதக் கேள்விகளுக்கும் பதிலளிக்கிறார்கள்.

கழுகு குறித்த காணொளிக் காட்சிகள், புத்தகங்கள், காட்சிப்பொருட்கள், வெளியில் ஆற்றோரம் மரத்தில் இருக்கும் கழுகுகளைக் காண டெலஸ்கோப் என இந்தக் கட்டிடத்தில் முழுக்கக் கழுகுகள் சார்ந்த தகவல்கள் கொட்டிக்கிடக்கின்றன. இங்கிருக்கும் தன்னார்வலர்கள் அனைவரும் நட்புடன் பழகுகிறார்கள். தகவல்களைப் பகிர்கிறார்கள். பழங்குடிக் குழுவைச் சேர்ந்த ஒரு அன்பர், வாரத்தில் சில நாட்கள் இங்கு வந்து, அவர்கள் செய்த கைவினைப் பொருட்களை, இங்குக் காட்சிக்கும் விற்பனைக்கும் வைத்துவிட்டுச் செல்கிறார்.

இங்கு வருகை புரிந்தால், அது குழந்தைகளுக்குக் கழுகு போன்ற பறவைகள் குறித்த புதுப் புரிதல்களை அளிக்கும் என்பது உறுதி. பெரியவர்களுக்குப் பெரும்நகரின் கூட்டமும், வேகமும் இல்லாத சில அமைதியான மணி நேரங்களை, இந்த அழகிய சிற்றூரும், மிஸ்ஸிசிப்பி ஆற்றுக் கரையோரமும் நிச்சயம் அளிக்கும்.

மேலும் தகவல்களுக்கு,

https://www.nationaleaglecenter.org

ஃபேஸ்புக் புர்ச்சியாளர்கள்

2017-10-02T02:33:00.001+05:30

பனிப்பூக்களில் வெளிவந்த கட்டுரை.

அதென்ன புர்ச்சி? எந்நேரமும் களத்தில் நின்று போராடினால், அது புரட்சி. டைம்பாஸுக்காக, இணையத்தில் உட்கார்ந்து அன்றைய தினத்தின் ஹாட் டாபிக்கிற்குச் சவுண்ட் விட்டுக் கொண்டிருந்தால், அது புர்ச்சி. :-)

சமீப ஆண்டுகளில், இத்தகைய புர்ச்சியாளர்களின் புகலிடமாக, ஃபேஸ்புக் இருந்து வருகிறது. சமயங்களில், நம்ம சுற்று வட்டாரத்திலேயே இவ்வளவு புர்ச்சியாளர்களா என்று மலைக்க வேண்டியிருக்கிறது.

இவர்களை அடையாளம் காண்பது எப்படி?

கண்டிப்பாக, டெய்லி போஸ்ட் போடுவார்கள். போடாட்டி? ஆபீஸ்ல புழிஞ்சு எடுத்துட்டு இருக்காங்க'ன்னு புரிஞ்சுக்கோங்க!!
சொந்த கதை, வீட்டு நிகழ்வுகள், வேலை, கல்வி பற்றியெல்லாம் எழுத மாட்டார்கள். ஒன்லி, நாட்டுப் பிரச்சினை. அதிலும், முக்கியமாகப் பிரச்சினை இருக்க வேண்டும்.
அப்படியே என்றேனும் எந்தப் பிரச்சினையும் இல்லாத நாளில், சொந்த கதையை எழுதினாலும், அதில் கொஞ்சம் காரம் சேர்த்து, சமூகத்துக்கான கருத்து இல்லாம முடிக்க மாட்டார்கள்.
அமெரிக்க அதிபரோ, ஆர்பிஐ கவர்னரோ, யார இருந்தாலும் சரி, கூச்சமே படாம அறிவுரை சொல்வார்கள்.
என்னமோ, எல்லா நாட்டு பிரதமர்களும் இவர்களது போஸ்ட்டை படித்து விட்டு தான் தூங்க போவது போல், அவர்களுக்குக் கடிதம் எழுதிக் கேள்வி கேட்டுக் கொண்டு இருப்பார்கள்.
'ஏ! தாழ்ந்த தமிழகமே‘ என்று தமிழ்நாட்டுக்கு 100 அடி மேல் நிற்பது போல் கூவுவார்கள்.
பிற ரசிகர்களை விசிலடிச்சான் குஞ்சுகள் என்று சொல்லிவிட்டு, முதல் நாளே சட்டை கிழிய, சாரி, இப்பல்லாம் எங்க சட்டை கிழியுது? பர்ஸ் கிழிய, படம் பார்த்து விட்டு, ஹீரோவின் முகத்திரையைக் கிழிக்கிறேன் என்று ஏதாவது கிறுக்குவார்கள். இவர்கள் இணையத்தை விட்டுக் களம் இறங்கும் ஒரே இடம் திரையரங்காகத் தான் இருக்கும்.
'தோழர்’ என்ற நல்ல வார்த்தையை, காமெடியாக்குபவர்கள். மொக்கை போடும் போது கூட, தோழர் என்று அழைத்துக் கொண்டு அன்பே சிவம் நல்லசிவமாக நினைத்துக் கொண்டு ஃபேஸ்புக்கில் வாழ்வார்கள்.
இன்னொரு வகைப் பார்ட் டைம் புர்ச்சியாளர்கள் இருக்கிறார்கள். இவர்களுக்கு வீடு, வேலை, தோப்பு, தொறவு என்று பல முக்கியப் பணிகளுக்கிடையே திடீரென்று ஏதேனும் விஷயத்தில் சமூகப் பார்வை தட்டுப்பட்டு விட்டால், உடனே பார்ட் டைம் புர்ச்சியாளர்களாய் உருவெடுத்து விடுவார்கள். வாட்ஸ் - ஆப் ஃபார்வர்ட், ஃபேஸ்புக் ஷேரிங், டிவிட்டர் ரீவிட் என்று நேரம் கிடைக்கும் போது மட்டும் பொங்கி விட்டு, மற்ற நேரம் கடமையை ஆற்ற சென்று விடுவார்கள். சம்பந்தபட்ட இணையத்தளத்திற்கு இவர்களால் கூடும் பேஜ் வியூஸ் தவிர வேறெந்த பிரயோஜனமும் இல்லையென்றாலும், அதையெல்லாம் நம் புர்ச்சியாளர்கள் கண்டுக்கொள்ள மாட்டார்கள்.
பல புர்ச்சியாளர்களோட புரட்சி, அம்பானியை நம்பி தான் இருக்கிறது. அதாவது, அவரோட ஜியோ மற்றும் அது போன்ற இலவச இணையச் சேவையை நம்பியிருக்கின்றன. ஃப்ரீ வை- ஃபையில் மட்டும் வரும் சமூக அக்கறையா? அப்ப , அது புர்ச்சியே தான்.

பெரும்பாலான புர்ச்சியாளர்கள், தங்கள் எழுத்தில் இருக்கும் பிழையைக் கூடத் திருத்த முன்வர மாட்டார்கள். இவர்கள் தான் ஊருக்கே பிழை திருத்த பாடம் எடுத்துக் கொண்டிருப்பார்கள்.

கண்டுப்பிடிச்சிட்டீகளா, உங்களைச் சுற்றி இருக்கும் புர்ச்சியாளர்களை? என்னது, உங்களுக்கும் இந்தத் தகுதிகள் எல்லாம் இருக்கிறதா? அப்படியென்றால். பிடியுங்கள் புர்ச்சியாளர் பட்டத்தை.

முன்பெல்லாம் ஏதேனும் பிரச்சினை நடக்கும் போது, முதலில் அந்தப் பிரச்சினையால் பாதிக்கப்படுபவரை நினைத்து கவலை வரும். இப்போது அந்தப் பிரச்சினையை வைத்து, நம் புர்ச்சியாளர்கள் செய்யப் போகும் ஸ்டேடஸ் கூத்தில் இருந்து எப்படித் தப்பிப்போமோ என்ற கவலை தான் வருகிறது. அது நியாயமான சமூகக் கோபமோ அல்லது அசட்டு ஆசட்டு கோளாறோ, வேறு வழி தெரியாமல் இணையத்தில் சரணடையும் இவர்கள், சிறிது காலத்தில் களைத்தோ அல்லது புரிந்தோ இந்த மெய்நிகர் போராட்ட உணர்வில் இருந்து வெளிவந்துவிடுவார்கள்.

பின் குறிப்பு - இந்தப் புர்ச்சியாளர்களுக்கு மத்தியிலும், சில நல்லுள்ளங்கள் தொடர்ச்சியாகத் தாம் கற்றவற்றை மற்றவருக்குப் பெரும்பாலான நேரங்களில் பகிர்ந்து கொண்டு, அவ்வப்போது தேவையான சமயம் மட்டும் தங்கள் கருத்துகளை நேர்மையாகப் பகிர்ந்து வருகின்றனர். அவர்கள் பாராட்டுக்குரியவர்கள். நாம் இதில் அடையாளம் காண முயற்சி செய்திருப்பது, போலி ஃபேஸ்புக் போராளிகளை மட்டும்.

.

ஒரு ராக்கெட்டும் 104 சேட்டிலைட்களும்

2017-10-02T02:22:00.000+05:30

பனிப்பூக்களில் வெளிவந்த கட்டுரை.

அரசியல்வாதிகள் நமது மானத்தை வாங்கிக் கொண்டிருக்கும் போது, நம் காலரைத் தூக்கி விட வைப்பது இஸ்ரோ (ISRO) வின் வழக்கம். பிப்ரவரி 15ஆம் தேதி அன்றும் இந்தியர்களுக்கு அப்படி ஒரு வாய்ப்பு வழங்கியிருக்கிறார்கள் இஸ்ரோவின் இந்திய விஞ்ஞானிகள்.

அன்றைய தினம் இந்திய நேரப்படி காலை 9.28 க்கு, ஸ்ரீஹரிகோட்டாவில் இருக்கும் சதீஷ் தவான் விண்வெளி மையத்தில் இருந்து கிளம்பிய பிஎஸ்எல்வி விண்கலம், அடுத்த அரை மணி நேரத்திற்குள், ஏற்றிச் சென்ற 104 செயற்கைக்கோள்கள் அனைத்தையும் ஒன்றன் பின் ஒன்றாக, திட்டமிட்ட விண்வெளிச் சுற்றுப்பாதையில் இறக்கி, தன் வேலையைச் சிறப்பாகச் செய்து முடித்துள்ளது. ஆம், நீங்கள் வாசித்தது சரிதான். 104 செயற்கைக்கோள்கள்.

2014 இல் மற்ற நாடுகளை ஒப்பிடுகையில், பத்தில் ஒரு பங்கு எனக் குறைந்த செலவில் செவ்வாய்க்கு மங்கல்யான் அனுப்பிய இஸ்ரோ, இம்முறை அதே போல் குறைந்த செலவில் 104 சேட்டிலைட்களை ஒரு விண்கலம் மூலம் விண்வெளியில் கொண்டு நிறுத்தியிருக்கிறார்கள்.

இதற்கு முன்பு, ரஷ்யா 37 சேட்டிலைட்களையும், அமெரிக்கா 29 சேட்டிலைட்களையும் ஒரு ராக்கெட்டில் அனுப்பியதே அதிகபட்சமாக இருந்தது. அதையெல்லாம் ஒன்றுமில்லாமல் செய்வது போல், ஒரே ராக்கெட்டில் 104 சேட்டிலைட்களை எடுத்துச் சென்று, அவை அனைத்தையும் பிசிறில்லாமல் விண்வெளிச் சுற்றுப்பாதையில் நிறுவி உலக, இல்லை பிரபஞ்ச சாதனை படைத்திருக்கிறார்கள் இந்திய நாட்டு விஞ்ஞானிகள்.

பிஎஸ்எல்வி ஏவுகலம், இதுவரை மொத்தம் 122 செயற்கைக்கோள்களை விண்ணில் நிறுவி இருக்கிறது. அதில் 79 செயற்கைக்கோள்கள், வெளிநாடுகளைச் சேர்ந்தது. இதோ, இந்த முறை ஒரே பாய்ச்சலில் 104 செயற்கைக்கோள்களைச் சுமந்துச் சென்று விண்வெளி செஞ்சுரி அடித்திருக்கிறது இஸ்ரோ. இதில் அமெரிக்கா, ஸ்வீஸ், நெதர்லாந்து, கஜகஸ்தான், ஐக்கிய அரபு எமிரேட்ஸ் ஆகிய நாடுகளின் செயற்கைக்கோள்களும் அடக்கம்.

இஸ்ரோவிற்கு விண்வெளியில் செஞ்சூரி போட வேண்டுமென்று எந்த முன்திட்டமும் கிடையாது. இந்தியாவின் மூன்று சேட்டிலைட்களைத் தவிர, மேலும் பிற நாடுகளின் 101 சேட்டிலைட்களை எடுத்துச் செல்லும் திறன் இருந்ததால், அவையும் சேர்க்கப்பட்டுள்ளன. இதன் மூலம், இந்தத் திட்டத்தின் செலவில் பாதிப் பங்கு, இஸ்ரோவிற்கு மிச்சமாகி உள்ளது.

இந்திய விண்வெளிப் பயணத்தின் ஆரம்ப வருடங்களில் ரஷ்யாவின் உதவியைப் பெற்று வந்த இந்தியா, இன்று பிற நாடுகளின் செயற்கைக்கோள்களை விண்ணில் நிறுவ உதவுகிறது. அமெரிக்கா, ரஷ்யா போன்ற நாடுகளை விட அதிகச் செயற்கைக்கோள்களை ஒரே தடவையில் குறைந்த செலவில் அனுப்பிச் சாதனை புரிய முடிகிறது.

இந்தியாவின் விண்வெளி விஞ்ஞானம், மற்ற நாடுகளை ஒப்பிடுகையில் அவ்வளவு செலவு பிடித்ததில்லை. ஹாலிவுட் படப் பட்ஜெட்டினைக் காட்டிலும், குறைந்த செலவில் தான் விண்வெளித் திட்டங்கள் செயல்படுத்தப்படுகின்றன. இதற்குக் குறைந்த செலவிலான மனித வளம் மட்டும் காரணமல்ல, செலவுகளைக் குறைக்கும் திட்டமிடலும் தான் காரணம். சாதனங்களின் எடையைக் குறைத்து, அதே சமயம் அவற்றின் திறனில் எந்தச் சமரசமும் செய்துக்கொள்ளாமல் தங்களது தேவையை அடைவது மூலமும் செலவு குறைகிறது. அதிலும் இம்மாதிரி மற்ற நாடுகளின் விண்வெளித் தேவையைப் பூர்த்திச் செய்வதன் மூலம் இஸ்ரோவின் செலவுகளின் ஒரு பகுதியை அதுவே ஈட்டி கொள்கிறது.

இம்முறை எடுத்துச் சென்ற செயற்கைக்கோள்களில் முதன்மையானது, இந்திய விஞ்ஞானிகள் உருவாக்கிய CartoSat-2D. இது பூமியைக் கண்காணிக்க உதவும் செயற்கைக்கோள். இதில் இருக்கும் இருக்கும் புகைப்படச் சென்சார்கள், பூமியில் இருக்கும் நிலப்பரப்பு, கடற்பரப்பு, நீர் வினியோகம், சாலை இணைப்புகள் ஆகியவை பற்றி ஆராய உதவும்.

அடுத்து INS - 1A என்ற நேனோ வகைச் சேட்டிலைட். இது நிலப்பரப்பில் இருந்து பிரதிபலிக்கும் சூரிய ஓளியை ஆராய உதவும் செயற்கைக்கோள். இது எதிர்கால மாணவ ஆராய்ச்சிகளுக்கும் உதவும்.

இதற்கு அடுத்துச் சுற்றுப்பாதையில் இறக்கிவிடப்பட்ட அடுத்தச் செயற்கைக்கோள், INS - 1B. இது ஒரு சோதனைக்கட்ட புகைப்படக் கருவி கொண்ட செயற்கைக்கோள். சிறிய கட்டமைப்பில் அதிக உயர்தரப் புகைப்படங்கள் எடுக்க உதவும் கருவிகள் இதில் உள்ளன.

இந்த இந்தியச் செயற்கைக்கோள்களுக்கு அடுத்ததாக, அமெரிக்காவின் கலிபோர்னியாவைச் சேர்ந்த ப்ளானெட் (Planet) என்ற நிறுவனத்தின் 88 செயற்கைக்கோள்கள் சுற்றுப்பாதையில் இறக்கப்பட்டது. இந்தச் செயற்கைக்கோள் அனைத்தும் பூமியைத் தொடர்ச்சியாகத் தினமும் புகைப்படங்கள் எடுக்கும். இவை வணிக ரீதியிலும், இயற்கைப் பேரிடர்களிலும் நிறுவனங்களுக்கு உதவும்.

இதற்கு அடுத்ததாக, ஸ்பையர் க்ளோபல் (Spire Global) என்னும் அமெரிக்க நிறுவனத்தின் 8 Lemur-2 சேட்டிலைட்கள் விண்வெளியில் நிறுவப்பட்டது. இந்தச் செயற்கைக்கோள்களின் மூலம் கடல்வெளியில் இருக்கும் கப்பல்களைக் கண்காணிக்க முடியும். கடல் சார் காப்பீட்டு நிறுவனங்களுக்கு, இது அளிக்கும் தகவல்கள் மிகவும் முக்கிய முடிவுகளை எடுக்க உதவும். இது தவிர, தட்பவெப்ப நிலை குறித்த தகவல்களையும் இவை அளிக்கும்.

அமெரிக்க நிறுவனங்களின் இந்த வணிகச் செயற்கைக்கோள்களுக்கு அடுத்து, நெதர்லாந்தின் PEASSS, ஸ்விட்சர்லாந்தின் DIDO-2, இஸ்ரேலின் BGUSat, கஜகஸ்தானின் Al-Farabi 1, அரபு நாட்டின் Nayif-1 ஆகிய செயற்கைக்கோள்களும் இந்திய பிஎஸ்எல்வி மூலம் விண்ணில் செலுத்தப்பட்டது. இதில் சில செயற்கைக்கோள்கள், அந்நாட்டு மாணவர்களால் உருவாக்கப்பட்டவை என்பது குறிப்பிடத்தக்கது. இவை பல்வேறு வகை ஆராய்ச்சிகளுக்குப் பயன்படும்.

இது போன்ற திட்டங்கள், எதிர்காலத்தில் இந்திய விண்வெளித்துறைக்கு இருக்கும் பிரகாசமான வணிக வாய்ப்புகளுக்கு ஊக்கம் அளிப்பதாக உள்ளன. இஸ்ரோ, பிற வணிக நிறுவனங்களுடன் இணைந்து இது போன்ற முயற்சிகளில் ஈடுபடும் திட்டங்களும் உள்ளன. இதன் மூலம் இந்தியா வணிகரீதியில் விண்வெளித்துறையில் முதன்மையான இடத்தை அடையும்.

உலகமெங்கும் பாராட்டுக்களைப் பெற்றுக்கொண்டிருக்கும் இஸ்ரோவிற்கும் அதன் கிளை வணிக நிறுவனமான ஆண்ட்ரிக்ஸிக்கும் (Antrix) எதிர்ப்புகளும் விமர்சனங்களும் இல்லாமல் இல்லை. 104இல் பெரும்பாலானவை நேனோ வகைதானே?, இந்திய அரசு அளிக்கும் சலுகைகள் ஏன்?, இவற்றால் விண்வெளியில் கழிவு எதிர்காலத்தில் இன்னும் அதிகரிக்கும் தானே? என்பது போன்ற கேள்விகளை இவர்கள் எழுப்புகிறார்கள். இவை இஸ்ரோ, பிற நாட்டின் நிறுவனங்களுக்குப் பலத்த போட்டியைக் கொடுப்பதால் வரும் எரிச்சலாலும் இருக்கலாம்.

எப்படி இருப்பினும், உலகத் தொழில்நுட்ப மேடையில் இந்திய விஞ்ஞானிகளுக்கு இருக்கும் இடம் கேள்விகளுக்கு அப்பாற்பட்டது. உலக எலைட் கிளப்பில் இந்தியாவிற்குக் கிடைக்கும் மதிப்பிற்கு, அவர்கள் காரணகர்த்தாவாக என்றென்றும் இருக்கிறார்கள். அவர்களுக்கு இந்திய மக்களின் ஆதரவு என்றும் தேவை. என்றும் இருக்கும்.

மேலும் தகவலுக்கு - http://www.isro.gov.in/

.

வீட்டுக்கொரு ஜீனோ

2017-10-02T01:42:00.000+05:30

பனிப்பூக்களில் வெளிவந்த கட்டுரை.

எழுத்தாளர் சுஜாதாவின் 'என் இனிய இயந்திரா', 'மீண்டும் ஜீனோ' ஆகிய கதைகளின் ரசிகர் என்றால், இன்னமும் ஜீனோ என்ற பொம்மை நாய்க்குட்டியை மறந்திருக்க மாட்டீர்கள். நாயகியுடன் எப்போதும் இருக்கும் நாய்க்குட்டி, புத்தகங்களை வாசித்துக் கொண்டு நாயகிக்கு பல தகவல்களையும், அறிவுரைகளையும் அள்ளிக் கொடுத்துக் கொண்டு வரும்.

வரும் நாட்களில், நம் வீட்டிலும் இது போன்ற ஒரு ஜீனோ வரலாம்.

முன்பெல்லாம் ராஜா, ரவி, ரமேஷ் என்ற பெயரில் வீட்டுக்கு ஒருவர் இருப்பார். வருங்காலத்தில், இதே போல் வீட்டுக்கு ஒரு அலெக்ஸா, ஜார்விஸ் இருப்பார்கள். இதெல்லாம் யார் என்று கேட்டீர்களானால், உங்களுக்கான கட்டுரை தான் இது.

இவர்களெல்லாம் ஆர்டிபிஷியல் இன்டெலிஜன்ஸ் எனப்படும் ஏ.ஐ. டெக்னாலஜியின் குழந்தைகள். மேலும், தொடர்வதற்கு முன்பு ஏ.ஐ. பற்றிப் பார்த்து விடலாம்.

செயற்கை நுண்ணறிவு என்றழைக்கப்படும் இந்தத் தொழில்நுட்பம் ஒன்றும் சமீபத்திய வரவல்ல. இது பல ஆண்டுகளாக உள்ளது தான். ஏற்கனவே, இதன் வளர்ச்சியின் பலன்களை நாம் அனுபவித்துக் கொண்டு தான் இருக்கிறோம். இதைப் பின்புலமாகக் கொண்டு சமீப காலமாக, மார்க்கெட்டில் களமிறக்கி விடப்பட்டுள்ள மற்றும் வர போகும் சாதனங்களைப் பற்றியதே இக்கட்டுரை.

செயற்கை நுண்ணறிவு என்பது மனிதனைப் போல், ஒரு சாதனத்தைச் சிந்திக்க வைப்பது. மனிதன் எப்படிச் சிந்திக்கிறான்? தன்னிடம் உள்ள தகவல்களைக் கொண்டு. தான் பெற்ற அனுபவங்கள் கொண்டு. அது போலவே, ஒரு சாதனத்தையும் தகவல்களைத் திரட்டி, அதை முன்மாதிரியாகக் கொண்டு முடிவெடுக்க வைப்பதே செயற்கை நுண்ணறிவு விஞ்ஞானிகளின் தொடர் வேலையாக உள்ளது.

இதோ, இந்தக் கட்டுரையை அலைப்பேசியில் உள்ள தமிழ் விசைப்பலகை மூலமாக எழுதிக் கொண்டிருக்கிறேன். நான் தமிழை எப்படிக் கோணல்மாணலாக எழுதினாலும், அதற்குரிய தமிழ் எழுத்துகளை எடுத்துக் கொண்டு கட்டுரையை உருவாக்கி விடுகிறது. முதலில் அதற்குச் சரியாகப் புரியாத எழுத்துகளை, போகப் போக நான் சரி செய்வதை வைத்து, நாளடைவில் அதுவே சரி செய்து விடுகிறது. நான் தவறுகளைத் திருத்துவதைக் கொண்டு, அதற்கு எது சரி, எது தவறு என்று தெரிய போய், பிறகு அதுவே என் எழுத்துகளைத் திருத்தி விடும். இதைத் தான் செயற்கை நுண்ணறிவு என்கிறார்கள்.

நமது அலைபேசியில் இருக்கும் பாடல் கேட்க உதவும் செயலியில், நீங்கள் இதைக் கவனித்திருக்கிறீர்களா? பாடல்களை உணர்வுகளின் வழியே, வகைப் பிரிக்கும் நிரல் இருக்கும். Happy தேர்வு செய்தோமானால், சந்தோஷமான குத்துப் பாடல்களும், Sad என்றால் சோக கீதங்களும் இசைக்கும். இனி அடுத்தக் கட்டமாக, நாம் தேர்வு செய்யத் தேவையில்லாமல், அதுவே நமது உணர்வுகளைப் புரிந்து கொண்டு பாடும்.

இப்போது, செயற்கை நுண்ணறிவு புரிந்திருக்கும் என நினைக்கிறேன். இயற்கையாக அமைந்திருக்கும் மனிதனின் சிந்திக்கும் திறனை, எந்நாளும்

செயற்கை நுண்ணறிவால் மிஞ்சவோ, தொடவோ முடியாது என்பது என் எண்ணம். எந்தளவுக்கு அதை நெருங்குகிறோம் என்பதில் தான் இதன் வளர்ச்சி இருக்கப் போகிறது. மனிதனின் சிந்தனைப் போக்கு எண்ணிலடங்கா வழிகளில் இருப்பதால், செயற்கை நுண்ணறிவின் வளர்ச்சியும் தொடர்ந்து இருக்க வேண்டிய கட்டாயம் இருக்கிறது.

சரி, இப்போது நாம் எங்கு இருக்கிறோம்? சென்ஸர் (sensor), கேமரா (camera), வாய்ஸ் ரெகனைசேஷன் (voice recognition) போன்றவற்றில் இருக்கும் வளர்ச்சி, செயற்கை நுண்ணறிவுக்கு மேலும் உதவுகிறது. எப்படி நமது கண், காது போன்ற உறுப்புகள், நமது சிந்தனைக்கு உதவுகிறதோ, அது போல் இந்த நுண் வன்பொருட்கள், செயற்கை சிந்தனைக்கு உதவுகின்றன.

கடந்த சில வருடங்களாக, நிறைய மின்னணு உதவியாளர்கள், மனிதனுக்கு உதவியாகச் சில வேலைகளைச் செய்ய உருவாகி வருகிறார்கள். ஒவ்வொருவராய் பார்க்கலாம்.

அலெக்ஸா என்பது அமேசானின் கணினி குரல் சேவை. இந்தச் சேவையை எந்தச் சாதனத்துடனும் இணைத்துக் கொள்ளும் வகையில் உருவாக்கியுள்ளனர். இதைப் பற்றி மேலும் தெரிந்து கொள்வதற்கு, அமேசான் எக்கோ ஸ்பீக்கர் பற்றித் தெரிந்துக் கொள்ளலாம். இந்த ஸ்பீக்கர், ஒரு அசிஸ்டென்ட் போல, நாம் கேட்கும் தகவலைக் கொடுக்கும். நமது ஆணைக்காக எப்போதும் இதிலிருக்கும் மைக் காத்திருக்கும். உதாரணத்திற்கு, நேரம் கேட்டால் சொல்லும். தட்பவெப்பம் கேட்டால் சொல்லும். ஏதாவது பாட்டைக் கேட்டால் பாடும். காலையில் எழுப்பி விடச் சொன்னால், எழுப்பி விடும். ஆனால், இதற்கு எப்போதும் இணையம் இருக்க வேண்டும். இந்தக் குரல் சேவை, அதற்கான தகவல்கள் அனைத்தும் இணையத்தில் இருந்து தருவிக்கப்பட்டு, ஸ்பீக்கர் மூலமாகப் பேசப்படுகிறது.

இப்போதைக்கு ஸ்பீக்கர் போல் தான் வடிவமைக்கப்பட்டுள்ளது. போகப் போக, பல்வேறு டிசைன்கள் வரலாம். ஜீனோ வடிவில், ஒரு நாள் தமிழிலும் பேசும். அமேசான் ஆரம்பித்து வைத்த இந்த விளையாட்டில், தற்சமயம் கூகிளும் சேர்ந்துள்ளது. ஹோம் என்ற பெயரில் கூகிள் வெளியிட்டுள்ள ஒலிப்பானுக்குக் கூகிளாண்டவரின் நேரடி அருள் இருப்பதால், இது மேலும் ஃபிலிம் காட்டும்.

இணையத்தில் டைப் செய்து தேடுவதற்குப் பதில், குரல் வழியே கேள்விகளை அனுப்புகிறோம், அவ்வளவுதானே? என்று கேட்கலாம். இது வெறும் குரல் வழி தேடல் மட்டும் அல்ல. அடுத்தடுத்து நாம் கேட்கும் கேள்விகளைப் புரிந்துக் கொண்டு, அதனிடையே இருக்கும் தொடர்பைப் புரிந்துக் கொண்டு பதிலளிக்கும். எளிய உதாரணத்திற்கு, "இன்னைக்கு எவ்ளோ வெயிலடிக்கும்?” என்று கேட்டால், அன்றைய தினத்தின் தட்பவெப்பத்தைச் சொல்லும். "நாளைக்கு?” என்று கேட்டால் போதும். அடுத்தத் தினத்தின் நிலவரத்தைக் கூறும் . "நாளைக்கு எவ்ளோ வெயிலடிக்கும்?” என்று நீட்டி முழக்க தேவையில்லை. கேள்விக்கு முன்பு, 'அலெக்ஸா’ என்றோ, ‘ ஹாய் கூகிள்' என்றோ மட்டும் கூறிப்பிட வேண்டும். அப்போது தான் அதற்குக் கேள்வி கேட்பது தம்மிடம் என்று புரியும்.

இதை ஒரு உதவியாளர் போலப் பயன்படுத்தலாம். நம்முடைய தினசரி அப்பாயிண்மெண்ட் என்ன, அலுவலகத்திற்குச் செல்ல எவ்வளவு நேரம் எடுக்கும், ஒரு பாட்டு பாடுறீ என்று தகவலும் கேட்கலாம், பொழுது போகாமல் மொக்கையும் போடலாம். இதற்கு மேல், இவற்றை நம் வீட்டில் இருக்கும் மற்ற சாதனங்களை இயக்கவும் பயன்படுத்தலாம். கேட்க மேஜிக் போல இருக்கிறதல்லவா? அதுவும் சாத்தியம். ஸ்மார்ட் ஹோம் டெக்னாலஜி பற்றி இன்னொரு கட்டுரையில் காணலாம்.

இப்படி அமேசானும், கூகிளும் ஹோம் அசிஸ்டெண்ட் டெக்னாலஜியில் கலக்கிக் கொண்டிருக்க, ஃபேஸ்புக்கும் ஜார்விஸ் என்ற பெயரில் களம் இறங்க போகிறது. ஃபேஸ்புக் நிறுவனர் மார்க், தனது 2016 ஆண்டின் குறிக்கோள் என்று ஜார்விஸ் என்னும் ஏ.ஐ. உதவியாளனை உருவாக்கியிருப்பதாக அறிவித்திருக்கிறார். இது மார்கன் ஃப்ரீமேன் குரலில் நமது கட்டளைக்குக் கட்டுப்படுமாம். வந்திருப்பவர் முகத்தைப் பார்த்தே கதவைத் திறந்து விடுவது, குழந்தைக்குப் பாட்டு பாடியே தூங்க வைப்பது, பசிக்கிறது என்றால் ப்ரெட் சுட்டு தருவது, டி-சர்ட் தேர்ந்தெடுத்துக் கொடுப்பது (இது எதுக்கு மார்க்குக்கு? எப்படியும் ஒரே கலர்ல தான் டி.சர்ட் போடுவாரு!!) எனப் பல வேலைகளைச் செய்யும் என்று மார்க் சொல்லுகிறார். நமது சுற்றம் அனைத்தும் ஃபேஸ்புக்கில் கிடப்பதால், அவர்கள் வீட்டு லைட்டையும் நாமே அணைக்கும் நிலை வருவதற்கு அதிக நாட்கள் எடுக்காது.

இவை அனைத்தும் பில் கேட்ஸ்க்கும், அம்பானிக்குமான டெக்னாலஜியாக மட்டும் இருக்கப் போவதில்லை. சாமானியருக்கும் இவ்வசதிகள் கிடைக்கும் என நம்பலாம். சாமானியர்க்கும் பயன்படும் விதத்தில் இருக்கும் போது தான், விஞ்ஞானத்தின் பலன், மானுட குலத்திற்குப் பயன்படுகிறது என்று எடுத்துக் கொள்ள முடியும். இது போன்ற சாதனங்கள், மாற்று திறனாளிகளுக்கும், வயதானவர்களுக்கும் அளிக்கக்கூடும் பலன்களை நினைத்துப் பாருங்கள்.

அதே சமயம், இவை வெறும் கேளிக்கை சாதனங்களாகவும், சோம்பேறித்தனத்தை ஊக்குவிக்கும் இடியட் இயந்திரங்களாகவும் மட்டும் நின்று விடக் கூடாது. மனிதனின் அன்றாட வேலைகளைச் சுலபமாக்கி, அவன் தனது கவனத்தை மேலும் பல முக்கியச் சமூகத்திற்குத் தேவையான சிந்தனைகளில், செயல்களில் ஈடுபடுத்திக் கொள்ள உதவ வேண்டும். அவ்வாறு உதவுமானால், இச்சாதனங்களை இரு கை கூப்பி வரவேற்பதில் தவறேதும் இல்லை.

மினசோட்டா குளிர்

2017-10-02T01:38:00.000+05:30

பனிப்பூக்களில் வெளிவந்த கட்டுரை.

மினசோட்டாவின் ஒரு சிறப்பம்சம், அதன் குளிர். என்னது, குளிரா? அதான், இங்கே கடியான விஷயம், பாஸ்!! என்பவரா? 13000 ஆண்டுகளுக்கு முன்பு, பனியுகம் (Ice Age) முடிவுற்ற சமயத்தில், இங்குச் சராசரி தட்பவெட்ப நிலை -16 டிகிரிக்கும் கீழே இருந்தது. இது ஆர்டிக் பனிப்பிரதேசத்தில் இருக்கும் தட்ப நிலை. கால ஓட்டத்தில், நல்லதோ, கெட்டதோ இந்த நிலை மாறி, தற்போது மனிதர்கள் வாழும் நிலைக்கு வந்திருக்கிறது.

இந்தாண்டு டிசம்பர் 18ஆம் தேதியன்று, மினசோட்டாவின் குளிர் -20 டிகிரி ஃபரன்ஹீட்டுக்குச் சென்றது. அதாவது, செல்சியஸில் -30 டிகிரிகள். ஊரே சிறிது நேரத்திற்கு வீட்டுக்குள் முடங்கியது. அடுத்த நாளே, அதாவது 48 மணி நேரத்திற்குள், +26 டிகிரிக்கு என்றது. அதளப் பாதாளத்திற்கு இறங்கி தட்பவெப்பம், உடனே பரமபதம் ஆடி, மேலெழும்பி வந்தது.

இதுவரை மினசோட்டாவில் பதிவான தட்பவெப்பங்களில் குறைவானது, மின்னியாபொலிஸில் இருந்து 220 மைல்கள் தொலைவில் உள்ள டவர் (Tower) என்ற ஊரில், 1996 ஆம் ஆண்டுப் பிப்ரவரி இரண்டாம் தேதி பதிவான -60 டிகிரி ஃபரன்ஹீட் தான். குறைந்த தட்பவெப்பம் நிலவி, அதில் மக்கள் வாழும் இடங்களில் உலகில் இதுவும் ஒன்று.

இப்படிப்பட்ட குளிர் நிலைகளில் நமது உடல் என்னவாகும்? இம்மாதிரி குளிர் நிலைகளைத் தாங்குவதற்கு ஏற்ப, நமது உடல் வடிவமைக்கப்பட்டதல்ல. அதனால், நாம் தான் சில பாதுகாப்பு முயற்சிகளை மேற்கொள்ள வேண்டும்.

பொதுவாக, குளிர் காலத்தில் நமது உடலே சில பாதுகாப்பு முயற்சிகளை எடுக்கும். உடல் தொடர்ந்து அப்படிப்பட்ட குளிர் நிலையில் இருக்கும்பட்சத்தில், அவை பலனளிக்காமல் உடலின் சில பகுதிகள் கடுமையாகப் பாதிக்கப்படும் நிலையோ அல்லது உயிரே பிரியும் ஏற்படும் நிலையோ உண்டாகும்.

காற்றியக்கக் குளிர்வு (Wind Chill) என்பது காற்றில் குளிர் அதிகரிக்கும் போது, நமது உடல் நேரடியாக அதை எதிர்க்கொள்ளும் சமயம் உணரப்படும் குளிர். இச்சமயத்தில் காற்றில் இருக்கும் குளிருக்கு ஏற்ப, அதில் உடல் எவ்வளவு நேரம் நேரடியாக இருக்குமோ, அதைப் பொறுத்து உடலில் பனிப்புண்கள் (Frost bite) உண்டாகும். -28 டிகிரி ஃபரன்ஹீட் வரை பனிப்புண் அபாயம் குறைவு. அதற்கு மேலும் டிகிரிகள் குறையும் போது, ஆபத்து நிச்சயம். -28 முதல் -39 காற்றியக்கக் குளிர்வு நிலையில், உடலின் பாகங்கள் பத்தில் இருந்து முப்பது நிமிடங்கள் திறந்த நிலையில் இருக்கும் போது, உறை நிலை தொடங்கிப் பனிப்புண் ஏற்படத் தொடங்கும். -40 இல் இருந்து -47 செல்லும் போது, இந்தப் பாதிப்பு ஏற்பட ஐந்தில் இருந்து பத்து நிமிடங்களே போதும். அதற்கும் கீழே, -48 இல் இருந்து -54 செல்லும் போது, இரண்டில் இருந்து ஐந்து நிமிடங்களும், மேலும் குறைந்தால், இரண்டு நிமிடங்களில் ஆபத்து நெருங்கும்.

பனிப்புண் அல்லது ப்ராஸ்ட் பைட்டின் போது, உடலின் தோல் மட்டும் இல்லாமல், அதற்குக் கீழே இருக்கும் தசை, திசு, கொழுப்பு இவை அனைத்தும் உறைந்துப்போகும். அதிக நேரம் இக்குளிரில் இருக்க நேர்ந்தால், மேலும் பாதிப்பைத் தடுக்க, பாதிக்கப்படும் உடல் பாகங்களை வெட்டி எடுக்கவும் நேரும்.

குளிர்காலத்தில் வெளியிடங்களில் பணிபுரியும் அவசியம் இருப்பவர்கள், கண்ணாடி அணிவது முக்கியம். குளிர் கூடும் போது, கண்ணை மூடி முடி திறக்கும் போது, கண்ணில் அப்போது உருவாகும் திரவத்தால், கண்ணில் விழித்திரை பாதுகாக்கப்படும். இது குறைந்த நேர குளிர் உட்படுதலுக்கே. நீண்ட நேரம், குளிர் காற்றும் சேர்ந்து வீசும் போது, கண்ணாடி இல்லையென்றால், கண் விழித்திரை உறையத் தொடங்கும். கான்டக்ட் லென்ஸ் அணிபவர்கள், இன்னும் கவனமாக இருக்க வேண்டும். லென்ஸ், கண் திரையுடன் ஒட்டிக்கொள்ளும் நிலை ஏற்படலாம்.

நமது உடலின் வெப்ப நிலை, பொதுவாகச் சராசரியாக 37 டிகிரியில் இருக்கும். எப்போதும் அவ்வாறு இருக்கவே முயலும். தொடர்ந்து குளிரில் இருக்க நேர்ந்தால், உடலின் இந்த வெப்பமும் குறையும். அச்சமயம், உடல் நடுக்கம், சோர்வு, வேகமாக மூச்சுவிடுவது போன்றவற்றை உடலில் உணருவோம். 28 டிகிரிக்கு கீழே செல்லும் போது, தீவிரத்தின் உச்ச நிலை அடைந்து, உடல் அதன் இயக்கத்தை நிறுத்திக்கொள்ளும். இதை ஹைப்போதெர்மிக் நிலை (Hypothermia) என்பார்கள்.

ஆகவே, தனிநபர் குளிர்காலப் பாதுகாப்பு நடவடிக்கைகள் எவ்வளவு முக்கியம் என்பதைப் புரிந்துக்கொள்ளலாம்.

இது போன்ற காலக்கட்டத்தில், முடிந்தளவு பயணங்களைத் தவிர்க்க வேண்டும். பனிக்காலத்தில் வாகனங்கள் ஓட்டுவதும் சிரமம், ஒடுவதும் சிரமம். பனிக்குளிர், மனிதர்களை மட்டுமில்லாமல், வாகனங்களையும் பாதிக்கும். கார் டயர் உறையலாம். கார் பேட்டரி செயலிழக்கலாம். கார் இஞ்சினில் இருக்கும் ஆயில் கெட்டியாகலாம். பனிக்காலத்தில் வாகனங்கள் எங்காவது நின்று விட்டால், அப்போது என்ன செய்ய வேண்டும் என்று தெரிந்திருக்க வேண்டும். இல்லாவிட்டால், இவை பேராபத்தை விளைவிக்கும். முக்கியமாக, காரை விட்டு இறங்காமல் இருக்க வேண்டும். அப்போது தேவைப்படும் தீப்பெட்டி, மெழுகுவர்த்தி, போன் சார்ஜர், பேப்பர், பென்சில், விசில், உணவுப்பொருட்கள் போன்றவற்றை முன்னெச்சரிக்கையாக மறவாமல் எடுத்துச் செல்ல வேண்டும்.

சாலை பாதுகாப்புத் தகவல்களை, 511 என்ற எண்ணுக்கு அழைத்துக் கேட்டுக் கொள்ளலாம். இது தவிர, http://www.511mn.org என்ற தளத்திற்குச் சென்றோ, அல்லது அவர்களது பொபைல் செயலியை நிறுவியோ இத்தகவல்களை அறிந்துக்கொள்ளலாம். பனிக்குளிரில் மாட்டிக்கொள்ளும், இக்கட்டான சூழ்நிலையில் தாமதிக்காமல், 911 அழைத்துவிட வேண்டும்.

முன்னெச்சரிக்கைகளைக் கண்டோம். இது போல், முன்னெரிக்கையாக இருந்தோமானால், இந்தக் குளிரில் ரசித்து, ஆராய்ந்து செய்வதற்குப் பல விஷயங்கள் மினசோட்டாவில் உள்ளன. உடலை முழுமையாக மூடும் ஆடைகளை அணிந்துக்கொண்டு, வீட்டுக்கு வெளியே சென்று பனி மனிதன் செய்யலாம். பனிக்கோட்டைகள் உருவாக்கலாம். பனிப்பந்து செய்து வீசியெரிந்து விளையாடலாம். ஸ்கேட்டிங், ட்யூபிங் எனப் பனி சறுக்கு முயலலாம். ஸ்னோ ஷூயிங் (Snowshoeing) எனப்படும் பனி நடை பயலலாம். பனியில் மூடியிருக்கும் ஏரிகளுக்குச் சென்று அதன் அழகை ரசிக்கலாம். அங்கு உறைபனியில் மீன் பிடித்துக்கொண்டிருப்பவர்களிடம் பேச்சுக் கொடுக்கலாம். ஆர்வமும், பொறுமையும் இருந்தால் கூடச் சேர்ந்து மீன் பிடிக்கலாம்.

குளிர், பனி சார்ந்த இயற்பியல் பரிசோதனைகளைக் குழந்தைகளுடன் இணைந்து செய்து பார்க்கலாம். கடும் குளிரில் வெந்நீரை மேலே வீசினால் என்னவாகும் எனக் காணலாம். குளிரில் சென்று சோப்பு நுரை குமிழ்கள் (Bubbles) விட்டால், அவை என்னவாகும் என்பதைப் பார்த்துத் தெரிந்துக் கொள்ளலாம். வெள்ளைப்பனிக்கு வண்ணங்கள் சேர்த்து, பனியில் கலை வண்ணம் காணலாம். பனியின் அழகைப் புகைப்படங்களாகப் பதிவு செய்து சேர்க்கலாம். இப்படிக் குழந்தைகளோடு குழந்தையாக மாறி விளையாடுவதற்குப் பனிக்காலத்தில் நிறைய விஷயங்கள் உள்ளன.

முக்கியமாக, இவை எதிலும் இறங்குவதற்கு முன்பு, குளிரின் பாதிப்புகளைப் பற்றி அறிந்துக்கொண்டு இறங்குவது அவசியம். அதுவே இக்கட்டுரையின் நோக்கம். மினசோட்டாவின் குளிரை, பனியை இடைஞ்சலாக நினைக்காமல், இயற்கையின் நியாயத்தைப் புரிந்து, அதன் வழியே நாமும் நம் வாழ்வை இணைத்து, ரசித்து வாழ்வோம்.

உங்களது குளிர்கால நாட்கள் ரம்மியமாகச் செல்லுவதற்கு வாழ்த்துகள்!!

மேலும் தகவலுக்கு,

http://www.511mn.org/

https://dps.mn.gov/divisions/hsem/weather-awareness-preparedness/Pages/winter-weather.aspx

2016 - டாப் டென் பாடல்கள்

2017-05-21T10:42:00.000+05:30

பனிப்பூக்களில் வெளிவந்த எனது கட்டுரை.

பாடல்கள் பல தரப்புச் சமூகங்களிடம் எப்படி ஒருமித்த ரசனையை ஏற்படுத்துகிறதோ, அதுபோல் அவை ஒவ்வொருவருக்குமான தனி ரகசிய மொழியும் அழகும் கொண்டிருப்பவை. ஒருவர் கேட்டு ரசித்திராத ஒரு பாடல், இன்னொருவருக்கு மிகவும் நெருக்கமான உணர்வைக் கொடுக்கும்.

இங்கு உள்ளவை, எனது தனிப்பட்ட அனுபவத்தைக் கொண்டு, ரசனையின் அடிப்படையில் தொகுக்கப்பட்ட பத்துப் பாடல்கள். பிடித்த பாடல், நல்ல பாடல் என்றால் எழுதிக்கொண்டே போகலாம். அதனால், ஒரு சில விதிமுறைகளைக் கடைப்பிடித்திருக்கிறேன். எண்ணிக்கை, பத்து மட்டுமே. ஒரு படத்திற்கு ஒரு பாடல் மட்டுமே. மற்றபடி, வேறு எந்தக் கோட்டாவும் இல்லை. எந்த வரிசைக்கிரமமும் இல்லை.

உங்களுக்குப் பிடித்த ஏதேனுமொரு பாடல், இதில் இல்லையென்றால் மன்னிக்கவும். கீழே, கமெண்ட் பகுதியில் நீங்களும் பட்டியலிடுங்கள். நல்ல பாடல்களை, மற்றவரும் தெரிந்துக் கொள்ளலாம், அல்லவா?

ரஜினி முருகன் - உன் மேல ஒரு கண்ணு

இந்தாண்டு மட்டும் பத்துப் படங்களுக்கு மேல் இசையமைத்திருக்கிறார் இமான். அவர் வேலையைச் சரியாகச் செய்தும், காலை வாரிய படங்கள் ஏராளம். ரஜினி முருகன், ஆல்பமாக, படமாக வெற்றியைக் கொடுத்த படம். உறவினரிடையே நடக்கும் சிறு நகரத்து வீட்டு விசேஷத்தின் பின்னணியில் அமைந்த காதல் பாடல். இமானின் ஆஸ்தான கவிஞர் யுகபாரதி எழுதிய பாடல். சிவகார்த்திக்கேயனும், கீர்த்திச் சுரேஷும் இப்பாடலில் ஆங்காங்கே கொடுத்திருக்கும் எக்ஸ்ப்ரேஷனால், எத்தனை முறை பார்த்தாலும் சலிப்பைக் கொடுக்காத பாடல்.

“சொல்லாம கொள்ளாம மூடி வச்சு

என்ன அங்கேயும் இங்கேயும் அலைய விட்ட

அள்ளாம கிள்ளாம நோக வச்சு என்ன

முன்னாலும் பின்னாலும் முணங்க விட்ட”

https://www.youtube.com/watch?v=nngwP1WWva4

சேதுபதி - கொஞ்சி பேசிட வேணாம்

சேதுபதி படத்தில் இடம்பெற்றிருந்த இந்தப் பாடல், மணமான, குழந்தைகள் உடைய தம்பதிகளிடையே இருக்கும் மெல்லிய ஊடல் கலந்த காதலை, பிரிவைச் சொல்லிய பாடல். பாடலுக்கு இசையமைத்தவர், நிவாஸ் கே. பிரசன்னா. பாடியவர்கள், சித்ராவும், ஸ்ரீராம் பார்த்தசாரதியும். மறைந்த கவிஞர் .முத்துக்குமார் எழுதிய பாடல் இது. கேட்க மட்டுமில்லாமல், விஜய் சேதுபதி, ரம்யா நம்பீசன் நடிப்பில் காணவும் நன்றாக இருக்கும் பாடல்.

“தனிமை உன்னைச் சுடுதா

நினைவில் அனல் தருதா

தலையணைப் பூக்களில் எல்லாம்

கூந்தல் மணம் வருதா ?”

https://www.youtube.com/watch?v=foi_2Id7uaw

கபாலி - மாய நதி

ரஜினி படத்திற்குச் சந்தோஷ் நாராயணன் இசை என்றதும் எதிர்பார்ப்பு அதிகமாகவே இருந்தது. முதலில் வெளிவந்த 'நெருப்புடா', அந்த எதிர்பார்ப்பைப் பூர்த்திச் செய்து படத்தின் மீதான எதிர்பார்ப்பை இன்னமும் அதிகம் கூட்ட உதவியது. ஆனால், படத்தில் இருந்த மற்ற பாடல்களால் ரஜினி ரசிகர்களை, அந்த அளவுக்குக் கவர்ந்திழுக்க முடியவில்லை என்றே சொல்லலாம். பொதுவான இசை ரசிகர்களுக்கு 'மாயநதி' பிடித்த மெலடியானது. ரஜினி என்பதற்காகத் தனது பாணியை மாற்றாமல், அவரது ஸ்டைலிலேயே இசையமைத்தது, சந்தோஷிற்குப் பாராட்டையும், கூடவே கொஞ்சம் திட்டையும் கொடுத்தது.

“ஆயிரம் கோடி முறை நான் தினம் இருந்தேன்

நான் என்னை உயிர்த்தேன் பிரிவில் பிரிவில்”

https://www.youtube.com/watch?v=9cHXA6l4e4Q

ஒருநாள் கூத்து - அடியே அழகே

'ஒருநாள் கூத்து'ப் படத்தில் இடம்பெற்ற இந்தப் பாடல், படத்தைப் போலவே ஆரவாரமில்லாமல் மனதைக் கவர்ந்தது. ஜஸ்டின் பிரபாகரன் இசையில், விவேக் எழுதிய பாடல் வரிகளைப் பாடியவர்கள், ஷான் ரோல்டனும், பத்மலதாவும். காதலர்களிடையே இருக்கும் தயக்கம், குழப்பம், கோபம், வலி போன்றவற்றை அழகாகப் பதிவு செய்தப் பாடல்.

“போனாப் போறா தானா வருவா மெதப்புல திரிஞ்சேன்

வீராப்பெல்லாம் வீணாப்போச்சு பொசுக்குனு ஒடஞ்சேன்”

https://www.youtube.com/watch?v=SDAMyv1hbCo

இறுதி சுற்று - ஏய், சண்டக்காரா

இயக்குனர் மணிரத்னத்தின் உதவியாளராக இருந்த சுதா அவர்கள் இயக்கி தமிழிலும், இந்தியிலும் வெளியாகிய 'இறுதி சுற்று'ப் படத்தில் இடம்பெற்றிருந்த இந்தப் பாடலின் வரிகள், ரொம்பவும் எளிமையானது. அது போலவே, இசையும் பாடிய குரலும். ஆனாலும், ஒரு எளிய பெண்ணின் காதலுக்குப் பொருத்தமாக அமைந்தது. சந்தோஷ் நாராயணனால் ஒரு படத்தின் வண்ணத்தை மாற்ற முடிகிறது. ஆயிரம் முறை பார்த்த சிச்சுவேஷனுக்கும், தனது தனித்துவ இசையால் புதுமையைப் புகுத்த முடிகிறது. இன்னொரு எளிய ட்யூனான 'வா மச்சான்' பாடலும், இப்படத்தில் வெகுஜன ஹிட் ஆனது.

“சிறு ஓடையில் ஒரு ஓரமா

மனசோட ஒரு காதல் மிதந்தோடுதடா

உனைப் பாத்ததும் வழியோரமா

உயிரோட ஒருபாதி கழண்டோடுதடா”

https://www.youtube.com/watch?v=ywaT2bNkDcg

தெறி - ராங்கு

நடிக்கச் சென்ற பிறகு, ஜி.வி. பிரகாஷ் முத்திரை பதித்த பாடல்கள் என்று சொல்லுவதற்கு அதிகம் இல்லாமல் போனது. இந்த வருடத்தில் அவருடைய பெரிய ஹிட் என்றால் தெறி தான். அதற்கு அவரை மட்டும் காரணம் சொல்ல முடியாது. பாடலாசிரியர், பாடகர் தவிர்த்து, இயக்குனர், ஒளிப்பதிவாளர், கலை இயக்குனர், நடிகர்கள், நடன ஆசிரியர் என்று பலரது கைவண்ணத்தில் இப்படப் பாடல்கள் வெற்றியடைந்தன. இப்படத்தின் அனைத்துப் பாடல்களும் ஹிட் என்றாலும், என்னைக் கவர்ந்தவை ஈனா மீனா டீகாவும், ராங்கு பாடலும் தான். லிஸ்டில் ஒரு குத்துப்பாட்டிற்கு இடம் கொடுக்கலாம் என்று நம்ம தல டி.ராஜேந்தர் பாடிய 'ராங்கு' பாடலைச் சேர்த்திருக்கிறேன். மனிதர் பேசினாலும், பாடினாலும் கலகலப்பிற்குப் பஞ்சமிருக்காது.

“கண்ண குழி

பொண்ணு நான்தானே.

பல்லாங்குழி

ஆடு நீதானே”

https://www.youtube.com/watch?v=AwMSJlNkOUg

பிச்சைக்காரன் - நெஞ்சோரத்தில்

ஒரு துறையில் நன்றாகப் பேரெடுத்துக் கொண்டிருக்கும் ஒருவர், ஏதோ ஒரு காரணத்தால் இன்னொரு துறைக்கு மாறிச் சென்றால், பெரும்பாலும் அவருக்கும் அவரது ரசிகர்களுக்கும் ஏமாற்றமே மிஞ்சும். விஜய் ஆண்டனி விதிவிலக்கு. தனக்கேற்ற நல்ல கதைகளைத் தேர்ந்தெடுத்து நடிக்கிறார். இசையிலும் குறை வைப்பதில்லை. ஒரே குறை, இசையமைப்பதைக் குறைத்துக் கொண்டது தான். இந்த வருடம் அவர் கொடுத்த ஹிட் படமான பிச்சைக்காரனில் சுப்பிரியா பாடிய "நெஞ்சோரத்தில்", இசையமைப்பாளராக அவர் வெற்றிக் கொண்ட பாடல். ஆனால், இதை விடத் தயாரிப்பாளராக அவர் பெற்ற வெற்றியே பெரிது. இப்பாடலை எழுதிய கவிஞர் அண்ணாமலை இந்தாண்டு மறைந்தது, விஜய் ஆண்டனிக்கும் அவரது ரசிகர்களுக்கும் பெரும் இழப்பு.

“உன் கைகள் தொட்ட இடம் பார்த்து

நான் ஆயிரம் முத்தம் கொடுக்கிறேன்

சிறு காகிதம் கையில் கிடைத்தாலும்

உன் பெயரை எழுதி ரசிக்கிறேன் “

https://www.youtube.com/watch?v=guaGqSR4QE4

தர்மதுரை - மக்கா கலங்குதப்பா

யுவன், "ரீ என்டரி'ன்னு சொல்லாதீங்க, நான் இங்க தான் இருக்கேன்" என்று சொன்னாலும், உண்மையில் இந்தாண்டு வெளிவந்த தர்மதுரையை அவரது ரீ-என்ட்ரியாகக் கருதலாம். இந்தத் தலைமுறை இசையமைப்பாளர்களிலே கிராமத்து இசையை, அதன் அசல் தன்மையின் நெருக்கத்துடன் ரசிக்கும் படி தருவது யுவன் தான் என்று உறுதியாகச் சொல்ல முடியும். "மக்கா கலங்குதப்பா" அதற்கு நல்ல ஒரு உதாரணம். வைரமுத்து எழுதி, மதுரையைச் சேர்ந்த கும்மிப்பாட்டுக் கலைஞர் மதிச்சியம் பாலா பாடிய இப்பாடல், இந்த வருடம் பட்டித்தொட்டியெங்கும் பட்டையைக் கிளப்பியது. படத்தின் மற்ற பாடல்களும் சிறப்பாகவே வந்திருந்தன.

https://www.youtube.com/watch?v=OxDKZ6WfD7M

ரெமோ - தமிழ்செல்வி

இந்த வருடம் அனிருத்திற்குச் சுமாரான வருடம் தான். பெரிய ஹிட் ஆல்பம் என்று எதையும் சொல்ல முடியாது. ரெமோ தான் அவருக்கு ஆறுதலாக அமைந்த படம். இந்தப் பாடலின் படமாக்கம், பாடலிற்குப் பலமாக அமைந்தது என்று சொல்லலாம். பி.சி.ஸ்ரீராம் ஒளிப்பதிவு, ராஜு சுந்தரம் நடனம் என்று சீனியர்ஸ் பங்களிப்பு, பாடலின் தரத்தை மேலும் உயர்த்தியது. சிவகார்த்திக்கேயன் - கீர்த்திச் சுரேஷ் ஜோடிக்கு இது வருடத்தின் இரண்டாவது ஹிட்.

“ஒரு வாட்டி நீ சொல்லிப் பாரு

உசுர உனக்கே எழுதி தரேன்

மடங்காத நீயும் அடங்காத நானும்

மனசோடு மனசு சிங் ஆனா போதும்”

https://www.youtube.com/watch?v=PAhTLB1LBR0

அச்சம் என்பது மடமையடா - அவளும் நானும்

பாரதிதாசன் பாடல்கள் இசை நயம் கூடியது என்று சொல்லுவார்கள். இந்தப் பாடலைக் கேட்டால், அது புரியும். எத்தனை வருடங்கள் ஆனாலும், அதில் இருக்கும் நவீனம் தெரியும். 'அச்சம் என்பது மடமையடா' படத்தில் ஏ.ஆர்.ரஹ்மான் இசையமைத்து, விஜய் ஜேசுதாஸ் பாடிய இப்பாடல், மெல்லிய மெலடி என்றால், சித் ஸ்ரீராமின் 'தள்ளிப் போகாதே' ஒரு அதிரடி மெலடி . அது என்ன டைப் என்கிறீர்களா? அது தான் ரஹ்மான்.

“நானும் அவளும்.. உயிரும் உடம்பும்

நரம்பும் யாழும்.. பூவும் மணமும்”

https://www.youtube.com/watch?v=LKelAJrI3e0

இவை தவிர, உன்னைப் பார்த்தா போதும் (அழகு குட்டி செல்லம்), அழகே நீ அசைந்தால் (கதகளி), குச்சி மிட்டாய் (அரண்மனை 2), அவள் குழல் (மனிதன்), அடடா (தொடரி), சல்மார் (தேவி), கண்ண காட்டு போதும், கண்ணம்மா (றெக்க), இளந்தாரி (மாவீரன் கிட்டு), மெய் நிகர, நான் உன் (24), நீ கிடைத்தாய், சொப்பனச் சுந்தரி (சென்னை 600028 - 2) போன்ற பாடல்களையும் குறிப்பிட்டுச் சொல்லலாம்.

இந்த வரு,டம் வந்த பாடல்களைக் கவனித்துப் பாருங்கள். நிறைய இளம் இசையமைப்பாளர்கள் நல்ல பாடல்களை அளித்திருக்கிறார்கள். பரவலாகத் திறமை, திறமைக்கேற்ற வாய்ப்பு, கிடைத்த வாய்ப்பில் முத்திரை என ஆரோக்கியமான சூழல் 2016ல் இருந்திருக்கிறது. இது போல், இளம் கலைஞர்களும், மூத்த கலைஞர்களும், தொடர்ந்து நம் தமிழ் திரையிசை ரசிகர்களின் ரசனைக்குத் தீனி போடும் சூழலே, நமது அடுத்தடுத்த ஆண்டுக்களுக்கான எதிர்பார்ப்பு.

2016 - ஒரு பார்வை

2017-05-21T10:37:00.000+05:30

பனிப்பூக்களில் வெளிவந்த எனது கட்டுரை.

எல்லா வருடங்களைப் போலவே, இந்த ஆண்டிலும் உலகம் பல ஏற்றத்தாழ்வுகளைக் கண்டிருக்கிறது. பல நல்லது கெட்டதுகளைச் சந்தித்திருக்கிறது. தூக்கி வாரிப்போடும் சம்பவங்களைச் சகஜமாகக் கடந்திருக்கிறோம். சிலது வெறும் சம்பவங்கள், சிலது மைல்கல்கள், சிலது திருப்புமுனைகள். ஒவ்வொருவர் வாழ்விலும் ஏதேனும் வகையில் முத்திரை பதித்திருக்கும் 2016ஆம் ஆண்டின் டைரிக்குறிப்புகளில் எழுதப்பட்ட முக்கிய உலக நிகழ்வுகளைத் திரும்பிப் பார்க்கலாமா?

கனடா தமிழர் பாரம்பரிய மாதம்

அக்டோபர் மாதம் ஐந்தாம் தேதியன்று, கனடா பாராளுமன்றத்தில் ஜனவரி மாதத்தைத் தமிழர் பாரம்பரிய மாதமாக அங்கீகரிக்கும் சட்டம் ஒருமனதாக நிறைவேற்றப்பட்டது. தமிழ் மொழியின் சிறப்பு, கனடிய தமிழர்கள் கனடா நாட்டிற்கு ஆற்றிய சேவை ஆகியவற்றைக் கருத்தில் கொண்டு இச்சட்டம் கனடா நாட்டுப் பாராளுமன்றத்தில் ஏற்கப்பட்டது. ஜனவரி மாதத்தில் தமிழர்கள் கொண்டாடும் பொங்கல் பண்டிகை வருவதால், இம்மாதம் தமிழர் பாரம்பரிய மாதமாகக் கொண்டாடப்படப்போகிறது. இதில் அரசியல் நோக்கம் இருக்கிறது என்று குரல்கள் கேட்கப்பட்டாலும், தமிழர்களுக்கு இது ஒரு இனிமையான செய்தி. இது போன்ற சட்டங்களும், நடைமுறைகளும் அனைத்து நாடுகளிலும் வரப் போகும் நாள் தொலைவில் இல்லை.

தமிழகச் சட்டசபை தேர்தல்

தமிழ்நாட்டின் பதினைந்தாம் சட்டசபைக்கான தேர்தல் இந்தாண்டு மே மாதம் நடைபெற்றது. பொதுவாக, கடந்த சில ஆண்டுகளாக, திமுக-அதிமுக என இரு அணிகளாகப் பிரிந்து, பெரும்பாலான முக்கியக் கட்சிகள் அனைத்தும் தமிழகத் தேர்தலில் போட்டியிடும். இந்தாண்டு வித்தியாசமாக, பல அணிகள் மற்றும் பல கட்சிகள் தனித்துப் போட்டியிட்டன. தேர்தலுக்கு முன்பு வரை, பல அணி போட்டியாகத் தெரிந்த தேர்தல் களம், தேர்தல் முடிவுக்குப் பிறகு, பழையபடி, இருமுனை போட்டியாகவே அறியப்பட்டது. இந்தத் தேர்தலில் கட்சிகள் கற்ற பாடம், அவர்களது அடுத்தடுத்த தேர்தல் போட்டி முடிவுகளுக்கு உதவும் என்ற வகையில் 2016 தேர்தல், தமிழக அரசியல் கட்சிகளுக்கு முக்கியமான தேர்தல் எனலாம். 1982 ஆம் ஆண்டுக்கு பிறகு, ஆளும்கட்சியே ஆட்சியைத் தக்க வைத்துக்கொண்ட தேர்தலும் இதுவே.

ஒலிம்பிக்

நான்கு வருடங்களுக்கு ஒருமுறை நடக்கும் உலகின் மிகப்பெரிய விளையாட்டு நிகழ்வான ஒலிம்பிக் விளையாட்டு போட்டி, இந்தாண்டு ஆகஸ்ட் மாதம் ப்ரேசில் நாட்டின் ரியோ நகரில் நடைபெற்றது. இருநூறுக்கும் மேற்பட்ட நாடுகளில் இருந்து சுமார் பத்தாயிரம் போட்டியாளர்கள் கலந்து கொண்ட இந்த ஒலிம்பிக்கில் முதல் இடத்தை அமெரிக்காவும், இரண்டாம் இடத்தைப் பிரிட்டனும், மூன்றாம் இடத்தைச் சைனாவும் பிடித்தன. இந்தியாவிற்கு ஒரு வெள்ளியும், ஒரு வெண்கலமும் கிடைத்தன. இரண்டுமே சிந்து, சாக் ஷி என்ற பெண் வீரர்களால் கிடைத்தவை என்பது இங்கு குறிப்பிடத்தக்கது. பாகிஸ்தானுக்கு ஒன்று கூடக் கிடைக்கவில்லை என்பது இந்திய தேசப்பக்தி விளையாட்டு ரசிகர்களுக்குப் போதுமான செய்தியாக இருந்தது.

ப்ரெக்ஸிட்

ஐரோப்பிய யூனியனில் இருந்து பிரிட்டன் வெளியேறுவது என்னும் முடிவுக்கு இவ்வருடம் ஜூன் மாதம் நடைபெற்ற வாக்குப்பதிவில் பிரிட்டன் மக்கள் வாக்களித்தனர். இதன் தாக்கம், உலகமெங்கும் எதிரொலித்தது. உலகமெங்கும் உலகமயமாக்கலுக்கு எதிரான மனநிலையில் மக்கள் இருப்பதாகக் கருதுவதற்கு ஏதுவாக அமைந்த முடிவு இது. இந்த முடிவிற்குப் பிறகு, பிரதமர் பதவியில் இருந்து டேவிட் கேமரூன் விலகி, தெரெசா மே அவர்கள் பதவிக்கு வந்தார்கள். இதன் பாதிப்பு என்னவாக இருக்கும் எனப் பல கணிப்புகள் வந்தாலும், உண்மை நிலை, வரும் நாட்களில், நாடுகளின், அமைப்புகளின், நிறுவனங்களின் செயல்திட்டங்கள் மூலம் தெரிய வரும்.

ஜிகா வைரஸ்

கடந்த காலங்களில், தென் அமெரிக்க நாட்டு மக்களை, குறிப்பாகக் கர்ப்பிணி பெண்களைப் பதற வைத்துக்கொண்டு இருந்த ஜிகா வைரஸ், 2016 இல் உலகளவில் தனது ஆதிக்கத்தைக் காட்டத் தொடங்கியது. ஜிகா வைரஸால் பாதிக்கப்பட்ட பெண்களுக்குப் பிறக்கும் குழந்தைகள் உடல் நல குறைவுடனும், சிறிய தலையுடனும் பிறப்பதாலும், அதைக் குணப்படுத்தக்கூடிய மருந்து இன்னமும் கண்டுப்பிடிக்க இயலாத நிலையில், அந்த வைரஸால் பாதிக்கப்பட்ட நாட்டின் அரசுகள், அதன் மக்களைக் குழந்தை பெறுவதைத் தவிர்க்குமாறு அறிவுறுத்தும் நிலை ஏற்பட்டது. ஜனவரி 2016ல் உலகச் சுகாதார மையம், இந்த வைரஸ் அமெரிக்காவெங்கும் பரவும் நிலை இந்தாண்டு இறுதிக்குள் ஏற்படும் என்று எச்சரிக்கை மணி அடித்தது. ஜிகா வைரஸ் பாதிக்கப்பட்ட ப்ரேசில் நாட்டில் இந்தாண்டு ஒலிம்பிக்ஸ் நடக்க, இது மேலும் பரவும் என்று உலகளவில் அச்சம் ஏற்பட்டது. நவம்பர் 2016இல் உலகச் சுகாதார மையம் தனது எச்சரிக்கை அளவைக் குறைத்துக்கொண்டது, இவ்வருடத்தின் நிம்மதி எனலாம்.

சிரியா போர் அகதிகள்

2011 இல் ஆரம்பித்த உள்நாட்டு போர், உலக நாடுகளின் பங்களிப்புடன் இன்னமும் தொடர்ந்து வருகிறது. உலகில் அதிகளவில் அகதிகளை உருவாக்கிய போர் இது என்று வர்ணிக்கப்படுகிறது. சிரியா அகதிகளின் பிரச்சினை உலகளவில் விவாதிக்கப்படும் நிலை 2016 இல் உருவானது. இது ஐரோப்பிய நாடுகளிடையே அகதிகளாகக் குடியேறும் மக்களை ஏற்பதில் முரண்பாட்டை ஏற்படுத்தியது. அமெரிக்க அதிபர் தேர்தலிலும் விவாதப்பொருளாக இருந்தது. ஒம்ரான் என்னும் போரில் பாதிக்கப்பட்ட சிறுவன், ஆம்புலன்ஸில் ஆரஞ்சு நிற சீட்டில் அழாமல் தனது கூரியத் துக்கத்தை வெளிப்படுத்திய புகைப்படம், உலகளவில் சமூக வலைத்தளங்களில் அதிர்வலைகளை உண்டாக்கியது.

தமிழ் சினிமா

இந்தாண்டு இதுவரை 180க்கு மேலான திரைப்படங்கள் வெளியாகி உள்ள தமிழ் திரையுலகில், வழக்கம் போல் வெற்றி விகிதம் குறைவே. ரஜினி முருகன், பிச்சைக்காரன், தெறி, கபாலி, ரெமோ போன்ற படங்கள் வசூலில் வெற்றிபெற, இறுதிச்சுற்று, விசாரணை, ஜோக்கர், மனிதன், அப்பா, குற்றமே தண்டனை போன்றவை விமர்சகர்களால் பாராட்டப்பட்ட படங்களாக வந்தன. இதில் விசாரணை ஆஸ்கருக்கு இந்தியாவின் சார்பில் அனுப்பப்பட்டது மகிழ்வைக் கொடுத்தாலும், அது இறுதிசுற்றுக்குத் தேர்வுபெறாமல் போனது படக்குழுவினருக்கும் ரசிகர்களுக்கும் ஏமாற்றத்தை அளித்தது. அதே சமயம், இசையமைப்பாளர் ஏ.ஆர்.ரஹ்மான் பீலே படத்திற்காக இன்னமும் ஆஸ்கர் போட்டியில் இருப்பது, நம்மவர்களுக்கு உற்சாகம் அளிக்கும் செய்தி. 2016 இல் நிகழ்ந்த கதாசிரியர், தயாரிப்பாளர் பஞ்சு அருணாச்சலம், கவிஞர் நா. முத்துக்குமார், கவிஞர் அண்ணாமலை போன்றோரின் மரணங்கள், திரையுலகினர் மட்டுமில்லாமல், ரசிகர்களையும் பெரும் சோகத்தில் ஆழ்த்தியது.

ஜியோ மொபைல்

ரிலையன்ஸ் நிறுவனத்தால், செப்டம்பர் மாதம் இந்திய மார்க்கெட்டில் இறக்கிவிடப்பட்ட ஜியோ மொபைல் சேவை, பயனாளிகளுக்கு இலவசத்தை அள்ளிவிட, இந்திய அலைபேசி சேவை தனது அடுத்தக்கட்டத்திற்குத் தாவியது. இலவச உள்நாட்டு அழைப்புகள், சல்லிசான விலையில் 4ஜி இணையச்சேவை போன்றவை, பிற இந்திய அலைபேசி சேவை நிறுவனங்களுக்குக் கலக்கத்தை ஏற்படுத்தியது. சேவை அறிமுகமான ஒரே மாதத்தில் 16 மில்லியன் வாடிக்கையாளர்களைப் பிடித்தார்கள். 83 நாட்களில் 50 மில்லியன் வாடிக்கையாளர்கள் என்ற பொழுது, இது எந்த நாட்டிலிலும் இல்லாத ரெக்கார்ட் ஆனது. இதற்கு முன்பு, ஏர்டெல் 50 மில்லியன் வாடிக்கையாளர்களைச் சேர்க்க 12 வருடங்கள் ஆனது என்பது குறிப்பிடத்தக்கது. வருங்காலப் பரிமாற்றங்கள் அனைத்தும் அலைபேசி வழியே என்னும் நிலை இந்தியாவில் வருவதற்கு, ரிலையன்ஸ் நிறுவனம் மேற்கொண்ட அதிரடி தொடக்கம் இது எனலாம். உண்மையான பயன் யாருக்கு என்பது போகப் போகத் தான் தெரியும்.

அமெரிக்கத் தேர்தல்

உலகமே ஆர்வத்துடன் எதிர்பார்த்திருந்த 58வது அமெரிக்கத் தேர்தலில் பாப்புலர் வாக்குகளின் முடிவுகள், நவம்பர் 9 ஆம் தேதியன்று வெளியானது. பெரும்பாலான கணிப்புகளுக்கு நேரெதிராக இத்தேர்தலில் அமெரிக்கத் தொழிலதிபர் ட்ரம்ப் அவர்கள் வெற்றிப்பெற்றது, அனைவருக்குமே வியப்பை அளிப்பதாக இருந்தது. பிரமிளா ஜெயபால், கமலா ஹாரிஸ், ரோ கன்னா, ராஜா கிருஷ்ணமூர்த்தி, அமி பேரா ஆகிய இந்திய வம்சாவழி வேட்பாளர்கள் இத்தேர்தலில் வெற்றி பெற்றார்கள். அமெரிக்காவின் முதல் பெண் அதிபராக வருவார் என்று எதிர்பார்க்கப்பட்ட ஹிலாரி இத்தேர்தலில் தோல்வியடைய, பிரச்சாரத்தின் போது சர்ச்சைகள் பல கிளப்பிய ட்ரம்ப் வெற்றிப்பெற்றதால், நாட்டின் பல பகுதிகளில் எதிர்ப்புப் பேரணிகள் சில நாட்கள் நடைபெற்றன. இந்தத் தேர்தல் முடிவில் ரஷ்யாவின் பங்கு இருக்கிறது என அடுத்தச் சர்ச்சை கிளம்ப, தேர்தல் சூடு இன்னமும் அணையாமல் இருக்கிறது. ட்ரம்ப் அவர்கள் அமெரிக்க அதிபராக 2017 ஜனவரியில் பதவியேற்க உள்ளார். தற்சமயம், தன்னுடன் அமைச்சர்களாகப் பணிபுரிய உள்ள சகாக்களைத் தேர்ந்தெடுப்பதில் பிசியாக உள்ளார்.

ரூபாய் 500 & 1000 பண மதிப்பிழப்பு

கருப்புப்பணத்தை ஒழிப்பேன் என்று ஆட்சிக்கு வந்த பிரதமர் மோடியினால், நவம்பர் 9ஆம் தேதியன்று ஐநூறு, ஆயிரம் ரூபாய் தாள்கள் மதிப்பிழக்கப்பட்டதாக அறிவிக்கப்பட்டது. ஒருபக்கம் கருப்புப்பணத்தை அழிக்கும், கள்ளப்பணத்தை ஒழிக்கும், தீவிரவாதத்தைக் குறைக்கும், மின்னணுப் பணப்பரிமாற்றத்தை ஊக்குவிக்கும் என்று ஆதரவு குரல்கள் கேட்டாலும், மறுபக்கம் ஏடிஎம் வாசலில் பணத்திற்காகக் காத்திருக்கும் மக்களிடம் இருந்து எழுந்த கோபக்குரல்கள் குறைந்த பாடில்லை. இந்தியாவின் எதிர்காலப் பொருளாதார மேம்பாட்டுக்கு இது கண்டிப்பாக உதவும் என்று நம்பிக்கை கூறப்படும் இந்த நடவடிக்கை, இந்த ஆண்டின் முக்கியமான இந்தியப் பொருளாதார நிகழ்வு என்றால் அது மிகையில்லை. முடிவு எப்படி இருக்கும் என்பது வரும் ஆண்டுகளில் தான் தெரியும்.

முதல்வர் ஜெயலலிதாவின் மரணம்

ஜெயலலிதாவிற்கு அரசியல் உச்சத்தையும், வாழ்வின் மறைவையும் ஒருங்கே பதிவுச் செய்த வருடம் இது. மே மாதம் நடந்த தேர்தலில் வெற்றிப்பெற்று, தமிழக அரசியலில் எம்.ஜி.ஆருக்கு பிறகு, தொடர்ச்சியாக ஆட்சியைத் தன் பக்கம் தக்க வைத்துக் கொண்டார். செப்டம்பர் மாதம், உடல் நலக் குறைவால் சென்னை அப்பல்லோ மருத்துவமனையில் அனுமதிக்கப்பட்டவர், டிசம்பர் மாதம் ஐந்தாம் தேதியன்று மரணித்தார். ஜெயலலிதா அவர்களின் மரணம், அவருடைய கட்சியான அதிமுகவிலும், தமிழக அரசியலிலும் ஒரு வெற்றிடத்தை உருவாக்கி இருப்பதால், இது ஒரு புதுத் தலைமையை உருவாக்கும் சூழலைக் கொண்டு வந்து தமிழக அரசியலில் திருப்புமுனையை ஏற்படுத்தும் என்று நம்பப்படுகிறது.

சென்னை வர்தா புயல்

2004 ல் சுனாமி, 2015 ல் வெள்ளம் என்று இயற்கை பேரிடர்களைச் சந்தித்த சென்னை மக்கள், இந்தாண்டு எதிர்க்கொண்டது, வர்தா புயலை. பாகிஸ்தானால் வர்தா என்று பெயர் வைக்கப்பட்ட இந்தப் புயல், டிசம்பர் 12 ஆம் தேதியன்று சென்னையைக் கடக்க, மணிக்கு 100 கிலோமீட்டர் வேகத்திற்கு மேல் அடித்த புயல் காற்றின் வீரியத்தை, இந்தத் தலைமுறை மக்களால் நேரடியாகக் காண முடிந்தது.. மரங்கள், மின் கம்பங்கள், வாகனங்கள் எனப் புயலில் அடித்துக் கவிழ்க்கப்பட்ட சேதாரங்கள் ஏராளம். இதுவும் கடந்து போகும் என்று சென்னை மக்கள் சில நாட்களில் சகஜ வாழ்வுக்குத் திரும்பினர்.

பிரபலங்களின் மரணங்கள்

2016 இல் உலகின் பல பிரபலங்களின் மரணங்களைக் காண வேண்டியதாகப் போனது. கியூபப் புரட்சியாளரும், முன்னாள் அதிபருமான பிடல் காஸ்ட்ரோ அவர்கள் நவம்பர் 25ஆம் தேதியன்று மறைந்தார். இது கியூபா மட்டுமின்றி உலகமெங்கும் அவரைப் பின் தொடர்ந்து வந்தவர்களைக் கவலையுறச் செய்தது.

மினசோட்டாவைச் சார்ந்த அமெரிக்காவின் புகழ்பெற்ற இசைக்கலைஞரான ப்ரின்ஸின் மரணம், மினசோட்டாவில் அவரைப் பற்றியே சில நாட்கள் அனைவரையும் பேச வைத்தது. ஏப்ரல் 21க்குப் பிறகான நாட்களில், எங்கும் செவ்வூதாவாக இருந்தது. அவர் மரணம் மினசோட்டா மக்களிடையே ஏற்படுத்திய தாக்கத்தை அந்நாட்களில் நேரடியாகக் காண முடிந்தது,

தமிழ்நாட்டின் மூத்த கர்னாடக இசைக்கலைஞரான பாலமுரளிகிருஷ்ணா அவர்கள் நவம்பர் 22ஆம் தேதி அன்று மறைந்தார். பாடல்கள் மட்டுமின்றித் தமிழ்த் திரைப்படங்களுக்கு இசையும் அமைத்திருக்கிறார். பலருக்கு இசை ஆசிரியராகவும் இருந்திருக்கிறார். அவர் பெறாத விருதில்லை எனலாம். அவரின் மரணம், கண்டிப்பாக இசையுலகிற்குப் பெரும் இழப்பே.

மூத்த பத்திரிக்கையாளரும், அரசியல் யுக்தியாளருமான சோ ராமஸ்வாமி, டிசம்பர் 7ஆம் தேதியன்று மறைந்தார். பத்திரிக்கையாளர், அரசியல் ஆலோசகர் என்பதெல்லாம் அவருடைய சுருக்கமான அடையாளங்கள். மேடை நாடக, சினிமா மற்றும் டிவி நாடக நடிகர், இயக்குனர், வக்கீல், எம்பி, எம்டி என்று அவர் பார்த்த வேலைகள் ஏராளம். பழகிய ஆளுமைகள் பலர். கொண்ட அனுபவங்கள் எக்கச்சக்கம். ஹாஸ்ய உணர்வு மிக்கவர். எவ்வளவு பேருக்கு அவரைப் பிடிக்குமோ, அதே போல் அவர் மேல் வெறுப்புக்கொண்டவர்களும் ஏராளம். ஆனால், அது எதையும் கண்டுக்கொள்ளாமல், தன் கருத்தைப் பயப்படாமல், எந்தத் தயக்கமுமின்றி வெளிப்படுத்துவதில் அவருக்கு நிகர் அவரே.

இப்படி மரணித்த பிரபலங்கள் மட்டுமின்றி உதித்த பிரபலங்கள் பலர் இந்த ஆண்டில் உள்ளனர். அவர்களெல்லாம் யார் என்பதை வருங்காலம் அடையாளம் காட்டும்!!

2016 உங்கள் வாழ்வில் எத்தகைய மாற்றங்களை ஏற்படுத்தியிருந்தாலும், அது வரும் ஆண்டில் நல்ல பலன்களைக் கொண்டு வர, அனைவருக்கும் எங்களது ஆங்கிலப் புத்தாண்டு நல்வாழ்த்துக்கள்.

நன்றி நவிலலும், நுகர்வோர் கூத்தும்

2017-05-21T10:32:00.000+05:30

பனிப்பூக்களில் வெளிவந்த எனது கட்டுரை.

நவம்பர் மாதம் வந்து விட்டால், தேங்க்ஸ் கிவிங்கிற்கு (Thanksgiving) என்ன செய்யலாம் என்று அமெரிக்கர்கள் யோசிப்பார்களோ, இல்லையோ, என்ன வாங்கலாம் என்று அமெரிக்காவில் இந்தியர்கள் யோசிக்க ஆரம்பித்து விடுவார்கள். ஒரு பொருள் தேவையோ, இல்லையோ, டிஸ்கவுண்ட் என்ற சொல் மீது அலாதி ப்ரியம் நம்மவர்களுக்கு.

டிஸ்கவுண்ட் என்று வந்து விட்டால் அர்த்த ராத்திரியிலும் குடை பிடிப்போம், டீல் இல்லையென்றால் இந்த ஜெகத்தினை அழித்திடுவோம் என்பது போல் சுற்றிக் கொண்டிருப்பார்கள். அமெரிக்கத் தேங்க்ஸ் கிவிங் வரலாறு பதினாறாம் நூற்றாண்டில் தொடங்குகிறது. விவசாயப் பெருங்குடி மக்கள், விளைச்சல் காலத்திற்குப் பிறகு நன்றி தெரிவிக்கும் காலமாக இது ஆரம்பித்தது. பிறகு, மத ரீதியான நன்றி நவிலல் வழிபாடுகள் ஆரம்பித்தன. தற்சமயம், நவம்பர் மாதத்தின் நாலாம் வியாழன் அன்று அதிகாரபூர்வமாக விடுமுறை விடப்பட்டு, அமெரிக்கா எங்கும் தேங்க்ஸ் கிவிங் டே (Thanksgiving Day) கொண்டாடப்பட்டு வருகிறது.

வருமானம் அளிக்கும் வாடிக்கையாளர்களுக்கு நன்றி தெரிவிக்கும் வண்ணம், அவர்களுக்கு இந்த நாளில் குறைந்த விலையில் பொருட்கள் விற்கிறார்கள் என்று நம்பப்படும் கன்ஸ்யூமர் ஐதீகம் இது. "அவ்வளவு நல்லவங்களாடா நீங்க?" என்று எந்தக் கேள்வி கேட்காமல், கார்ப்பரேட் நிறுவனங்களை நம்பி, அடிக்கிற கார்த்திகை மாசக் குளிரில், தெருத் தெருவாக, கடை கடையாக நம்ம ஜனங்கள் ஓடிக்கொண்டிருப்பார்கள். நாமதான் ஓ.பி.கொ.கு ரகமாச்சே!!!

இந்த நுகர்வோர் சடங்கு நம்மவர்களுக்கு ஒன்றிரண்டு வாரங்களுக்கு முன்பு தொடங்குகிறது என்றால், கார்ப்பரேட் நிறுவனங்களுக்குப் பல மாதங்களுக்கு முன்பே தொடங்கி விடுகிறது. மலிவாகத் தோன்றும் வகையில், ஒரு பொருளின் விற்பனை விலையை நிர்ணயித்துவிட்டு, அதற்கேற்றாற் போல் வடிவமைத்து, கண்டிப்பாக லாபம் இருக்கும் வகையில் ஆசியத் தொழிற்சாலைகளில் உற்பத்தி செய்து, நவம்பர் நாலாம் வியாழன் கிழமை கடையில் பண்டல் இருக்குமாறு பார்த்துக் கொள்வார்கள். நம்மவர்களும் பிற்பகலிலேயே கிளம்பி, இந்தப் பண்டலின் மீது கையை வைத்துக் கொண்டு, விஜிபி கோல்டன் பீச் சிப்பாய் போல் நிற்க ஆரம்பித்து விடுவார்கள். அந்தப் பண்டல் 6 மணிக்கோ, 8 மணிக்கோ அல்லது 10 மணிக்கோ திறக்கப்படும். அதுவரை, தீபாவளிக்குத் தட்கலில் ட்ரெயின் டிக்கெட் எடுக்கக் காத்துக் கிடப்பவர்கள் போல், நம்மவர்கள் இங்கு நிற்பார்கள். குறிப்பிட்ட நேரம் வந்தவுடன், பிள்ளையார் கோவில் முன்பு உடைக்கப்பட்ட சிதறு தேங்காயைப் பொறுக்கிக் கொண்டு ஓடுவதுபோல் இங்கு பொருட்களை அள்ளிக்கொண்டு ஓடுவார்கள்.

இப்படிக் கொரில்லாத் தாக்குதல் ஒரு பக்கம் என்றால், இன்னொரு பக்கம் கடைக்குள் நீண்ட நீண்ட க்யூக்கள் ஆங்காங்கே நிற்கும். எங்கு ஆரம்பிக்கிறது, எங்கு முடிகிறது, என்ன கொடுப்பார்கள், அது நமக்குக் கிடைக்குமா என்பது எல்லாம் புரிந்தும், புரியாமலும் பேங்கில் செல்லாத 500-1000 ரூபாயை மாற்ற வந்தவர்கள் போல் நிற்பார்கள். இதிலேயே பக்காவாக ப்ளான் செய்து, குடும்ப உறுப்பினர்களையோ, அல்லது நண்பர்களையோ ஆங்காங்கே அனுப்பி விட்டு, பொருட்களை வாங்கி வர, சர்ஜிக்கல் ஸ்ட்ரைக் முறையில் ஷாப்பிங் செய்பவர்களும் உண்டு.

இப்படி எதுவும் இல்லாமல் வேடிக்கை பார்க்க மட்டுமே ஒரு கூட்டம் வரும். என்ன விற்கிறார்கள், என்ன வாங்க வந்தோம் என்று தெரியாமல், எல்லாக் களேபரமும் முடிந்த பின்னர், அப்பல்லோ வாசல் அப்பாவித் தொண்டர்கள் போல் கலைந்து, களைத்துச் செல்வார்கள்.

இவர்கள் எல்லோரையும் விடப் போற்றிப் புகழ வேண்டிய பாகுபலிகள், கடைக்கு வெளியே அடிக்கிற சில்லென்ற குளிரில், போர்வை போர்த்திக் கொண்டு நிற்கும் நமது ஷாப்பிங் ஜவான்ஸ். நடுஇரவு பனிரெண்டு மணிக்குத் திறக்கும் கடைக்கு, இரவு எட்டு மணிக்கே டின்னர் முடித்துப் பங்ச்சுவலாக வந்து நிற்பார்கள். நேரமாக நேரமாக க்யூ வளைந்து அங்கிங்கு செல்லும். பனிரெண்டு மணிக்குக் கடை திறந்த பின்பு, உள்ளே ஓடும் கூட்டத்தில் முதல் பத்து - பதினைந்து பேருக்குத் தான் சொல்லிக் கொள்ளும்படி ஏதேனும் கிடைக்கும். மற்றவர்கள், அந்தப் பத்து - பதினைந்து பொருட்களைத் தூக்கிக் கொண்டு பில்லிங் முடித்துச் செல்லும் அழகைத் தான் காண முடியும்.

இந்த நாளுக்காக இவர்கள் ஆயத்தமாவதையும் குறிப்பிட வேண்டும். ஒரு மாதத்திற்கு முன்பு இருந்தே, இந்த வருடம் என்ன சீப்பாகக் கிடைக்கும் என்று தங்கள் எஃப்.பி.ஐ. மூளையை முடுக்கிவிட்டு, இணையத்தில் தேட ஆரம்பிப்பார்கள். இவர்களுக்கு ஏற்றாற்போல் தகவல் கொடுக்கவும் இணைய தளங்கள் நிறைய இருக்கின்றன. இருக்குற தளங்களை எல்லாம் க்ரால் செய்து, டேட்டா மைனிங், ஆனலிட்டிக்ஸ் எல்லாம் புரிந்து, எக்ஸல் ரிப்போர்ட் தயார் செய்வார்கள். எந்தக் கடைக்கு, எப்ப போனா, என்ன கிடைக்கும் என்பதைப் பாய்ஸ் படத்தில் வரும் செந்தில் போல் ரெடி செய்து (இன்பர்மேஷன் இஸ் வெல்த்!!), தாங்கள் கொண்ட செல்வம், பெறுக இவ்வையகம் என்ற பொதுவுடமைத் தத்துவத்தின்படி, வாட்ஸ் அப், மெஸ்ஸஞ்சர், ஃபேஸ்புக், ட்வீட்டர், ப்ளஸ் என்று சமூக ஊடகத்தின் சகல சாத்தியங்களையும் பயன்படுத்தி நம்மை நெருக்குவார்கள்.

மெய்யுலக ஷாப்பிங் மட்டுமில்லாமல், மெய்நிகர் உலக ஷாப்பிங்கும் குறைவில்லாமல் நடக்கும். இதற்காக ப்ளாக் ஃப்ரைடே, சைபர் மண்டே, காதல் செவ்வாய், காவிய புதன் என்று வகைவகையான பெயரில், நமது மெயில்பாக்ஸிற்கு அழைப்பிதழ் அனுப்புவார்கள். நாமும் சும்மா இல்லாமல், இங்கே இந்த ரேட், அங்க என்ன ரேட் என்று ரியல் எஸ்டேட் ப்ரோக்கர் போல் சுற்றியலைந்து கொண்டிருப்போம்.

அடுத்தக்கட்டமாக, இந்த ஜூரம் கண்டம் கடந்து இந்தியா வரை சென்றுவிட்டது. ஆடிக் கழிவுப் பாரம்பரியத்தில் இருந்து பிக் பில்லியன் டே கலாச்சாரத்திற்கு அடியெடுத்து வைத்திருக்கோம். அது போதாது என்று, அமெரிக்க நண்பர்களுக்கும், உறவினர்களுக்கும் ஃபோன் போட்டுத் தேங்க்ஸ் கிவிங் வாழ்த்துச் சொல்லிவிட்டு, ஷாப்பிங் ஆர்டர் கொடுக்கவும் தயாராகிவிட்டார்கள். 'எப்படி அனுப்புவது?' என்று கேட்டால், அதற்கும் ஃபோன் போட்டு யாரையாவது தயார் செய்து வைத்திருக்கிறார்கள். நமது நேரம் எப்படியோ, சமயங்களில் நாமும் குருவி வேலை பார்க்க வேண்டி வரும்.

இத்தனை கலாட்டாவில், இந்தத் தினத்தின் முக்கிய அம்சமான நன்றி நவிலலை மறந்து விட்டு, மற்றவரை இடித்துக்கொண்டு, காலை மிதித்தாலும் மன்னிப்புக் கேட்க நேரம் இல்லாமல் ஓடும் நுகர்வோர் வெறியை உருவாக்கியிருக்கும் கார்ப்பரேட் உலகிற்கு நம்மால் எப்படி நன்றி கூற முடியும் என்று தெரியவில்லை.

இச்சந்தர்ப்பத்தில் ஜப்பானில் பிரபலமாகிவரும் மினிமலிஸம் (Minimalism) போன்ற வாழ்க்கைமுறை அறிதல் தான் அவசியமாகிறது. பழகிவிட்ட இந்த யுகத்தில், எல்லோராலும் மினிமலிஸத்தை எந்த அளவிற்குக் கடைப்பிடிக்க முடியுமோ, தெரியாது. ஆனால், அது போன்ற வாழ்வு முறையைத் தெரிந்து கொண்டு, நமது அடுத்த தலைமுறைக்குக் கற்றுக்கொடுப்பது, அவர்களது நன்றியை நாம் பெறுவதற்குத் தகுதியை ஏற்படுத்திக்கொடுக்கும்.

அனைவருக்கும் நன்றி நவிலல் வாழ்த்துகள்.

மினசோட்டாவில் கார் ட்ரைவிங் லைசன்ஸ் வாங்குவது எப்படி?

2017-05-21T10:28:00.001+05:30

பனிப்பூக்களில் வெளிவந்த எனது கட்டுரை.

பொறுப்புத் துறப்பு - இது தனிப்பட்ட, சொந்த அனுபவம் சார்ந்து எழுதபட்டது. ஆளாளுக்கு வேறுபடலாம்.

ஓட்டுனர் உரிமம் வாங்க, கார் ஓட்ட தெரிந்தால் மட்டும் போதாது. அது ஓரளவுக்குச் சுலபம். வாகனத்துறை தேர்வாளரைத் திருப்திபடுத்துமளவுக்கு, கார் ஓட்டத் தெரிந்திருக்க வேண்டும். அது தான் சிரமம். தேர்வாளர் மனதிற்குள் வைத்திருக்கும் அளவுகோல்கள் ஊருக்கு ஊர் மாறுபடும். ஆளாளுக்கு மாறுபடும். அது புரிபட்டு விட்டால், உங்களுக்கான லைசன்ஸ் தயார்.

மேலோட்டமாகச் சொல்லுவது என்றால், கார் லைசன்ஸ் என்னும் மாயக் கிளியை நெருங்க, இரு மலைகளைத் தாண்ட வேண்டும். முதல் மலை, இன்ஸ்ட்ரக்ஷன் பெர்மிட் (Instruction Permit) எனப்படும் பயிலுவதற்கான உரிமச் சான்றிதழ் வாங்குவதற்கு நடத்தப்படும் கணினி தேர்வு. கணினி தேர்வு தானே என்று குறைத்து மதிப்பிட்டு விடக் கூடாது.

புதிதாக ஓட்டுனர் உரிமம் வாங்க வேண்டும் என்றாலும் சரி, வேறு ஊரில் உரிமம் வைத்திருந்து மினசோட்டா உரிமம் வாங்க வேண்டுமென்றாலும் சரி, கணினி தேர்வு கட்டாயம் உண்டு. நான் மினசோட்டா வந்த சமயம், டென்வர் மாநில ஓட்டுனர் உரிமம் வைத்திருந்தேன். அதை மினசோட்டா மாநில உரிமமாக மாற்ற பரீட்சை எடுக்க வேண்டி இருந்தது. நமக்குத் தான் கார் ஓட்ட தெரியுமே என்று படிக்காமல் சென்று விட்டேன். முதலில், ஒரு உதாரணக் கேள்வி காட்டினார்கள். மினசோட்டாவின் தலைநகரம் எது? ரொம்ப மப்பாக, மினியாபோலிஸ் என்று பதிலளித்துப் பல்ப் வாங்கினேன். அந்த உதாரணக் கேள்வியே எனது அன்றைய ரிசல்ட்டைக் காட்டிவிட்டது.

அடுத்த முறை, ஒழுங்காகப் படித்துச் சென்று பயிலுனர் உரிமம் வாங்கி வந்தேன். அதனால், இந்தத் தேர்வுக்குப் போக்குவரத்து விதிகளை வாசித்தல் அவசியமாகிறது. இதற்கான மினசோட்டாவின் போக்குவரத்து விதிகள் கையேடு, வாகனத்துறை இணையத்தளத்தில் பிடிஎப் வடிவிலும், ஒலிவடிவிலும், வாகனத்துறை அலுவலகங்களில் காகிதப்புத்தக வடிவிலும் கிடைக்கின்றன. அவரவர் வசதிக்கேற்ப, இதை வாங்கிப் படிக்கலாம். கேட்கலாம்.

https://dps.mn.gov/divisions/dvs/forms-documents/Pages/default.aspx

அடுத்து, படித்தது ஒழுங்காக மண்டையில் ஏறியிருக்கிறதா என அறிந்து கொள்ள, மாதிரி தேர்வுகளை எடுக்கலாம். மாதிரி தேர்வுகள், பல இணையத்தளங்களில் கிடைக்கின்றன. அவுட்டான கேள்வித் தாள் கிடைக்குமா என்று தேடுவதில் எந்த பிரயோஜனமும் இல்லை. ஓரிரு முறை இந்த மாதிரி தேர்வுகளில் பாஸ் செய்து விட்டீர்கள் எனில் நேரடியாகத் தேர்வுக்குச் சென்று விடலாம்.

நகரைச் சுற்றி பல இடங்களில் தேர்வு மையங்கள் உள்ளன. போவதற்கு முன், அங்குக் கணினி தேர்வு எடுக்க முடியுமா என்று இணையத்தில் பார்த்து விட்டு செல்லவும். சில வாகனத்துறை அலுவலகங்களில் தேர்வு எடுக்க முடியாது. எந்த அலுவலகத்தில் என்னென்ன வசதிகள் உள்ளன என்று இந்த இணைப்பில் சென்று பார்க்கவும்.

https://dps.mn.gov/divisions/dvs/locations/Pages/find-office-locations.aspx

மறக்காமல், தேவைப்படும் டாகுமெண்ட்ஸை எடுத்து செல்லவும். அடையாள அட்டைகள், முகவரி சான்றிதழ் போன்றவை இதற்குத் தேவை. மேலும் தகவலுக்கு, இந்த லிங்கைக் காணவும்.

https://dps.mn.gov/divisions/dvs/forms-documents/Documents/IdentificationRequirements_English.pdf

தேர்வு நிலையத்தில் கணினியும், ஹெட் போனும் இருக்கும். ஒவ்வொரு கேள்வியையும் ஒலிவடிவத்தில் கேட்கவும் செய்யலாம். நன்கு நிதானமாகப் பார்த்து, கேட்டு எழுத அவகாசம் இருக்கும். மொத்தம் 40 கேள்விகள். 32 கேள்விகளுக்காவது சரியான பதில்களை அளித்திருக்க வேண்டும். பாஸா, ஃபெயிலா என்பதைப் பரீட்சை முடிந்தவுடன் உடனே தெரிந்துக் கொள்ளலாம். சிலருக்குப் பரீட்சை நடக்கும் போதே தெரிந்து விடும். தேர்ச்சி பெறாவிட்டால், இன்னொரு முறை இலவச தேர்வு எடுக்கலாம். மூன்றாவது முறையில் இருந்து பத்து டாலர் கட்டணம் உண்டு.

பாஸானால், விண்ணப்பம் பூர்த்திச் செய்து, கட்டணம் செலுத்தி, ஃபோட்டோ எடுத்து, பயிலுனர் உரிமச் சான்றிதழை உடனே வாங்கிக் கொள்ளலாம். அட்டை வீட்டிற்குச் சில வாரங்கள் ஆகும். அது வரும் வரை கார் ஓட்டிப் பழகக் காத்திருக்கத் தேவையில்லை. பயிற்சியைத் தொடங்கிவிடலாம்.

இனி அடுத்தக் கட்டம். பயிற்சி மற்றும் சாலை தேர்வு. இந்தியாவில் கார் ஓட்ட தெரிந்திருந்தால், இங்குக் கார் ஓட்ட சிரமம் இருக்காது. அங்குச் சாலை விதிகளைக் கண்டு கொள்ளாமல் ஓட்டி விட்டு, அவற்றை இங்குக் கடைபிடிப்பது தான் முதலில் சிரமமாக இருக்கும். இன்னொன்று, ஹைவேயில் வேகமாகக் கார் ஓட்டுவது மற்றும் அதே வேகத்தில் லேன் மாறுவது. இதுவும், சிலருக்குச் சிரமமாக இருக்கும். இந்திய லைசன்ஸ் வைத்திருந்து, சாலை தேர்வுக்கு இடமிருந்து, உங்களுக்கு ரொம்பவும் தன்னம்பிக்கை இருந்தால், கணினி தேர்வை முடித்த கையோடு, சாலை தேர்வையும் ஒரு கை பார்த்துவிடலாம். அப்படி இல்லையெனில், பயிற்சி எடுத்துக்கொண்டு, சாலை தேர்வுக்கு முன்பதிவு செய்துவிட்டு செல்லவும்.

இங்குள்ள கார்களில் கியர், கிளட்ச் இருப்பதில்லை என்பதால், கார் ஓட்ட பயில்வது சுலபமே. தொடர் பயிற்சி இருந்தால், உள்ளூர இருக்கும் சாலைகளில் ஓட்டி, ஓரிரு வாரங்களில் ஓட்டப் பழகிவிடலாம். அதிக வாகனங்கள் இல்லாத தொலைத்தூர பயணங்களில் ஓட்டுவதும் ஓகே தான். உடன் வருபவரின் கண்காணிப்புச் சரியாக இருக்க வேண்டும். நகருக்குள் இருக்கும் நெடுஞ்சாலைகளில், வாகனகங்களுக்கிடையே ஓட்ட, திறமையைக் காட்ட வேண்டியிருக்கும். சாலை தேர்வில், அனைத்துவகைப் பார்க்கிங் (Parallel parking, 90 degree parking, Uphill parking & downhill parking) பற்றியும் கேட்டு, காரை நிறுத்த சொல்லி சோதிப்பார்கள். அதனால், இவை அனைத்தையும் முறையாகப் பயிற்சி செய்து, இவற்றில் தேர்ச்சிப் பெறுவது அவசியமாகிறது. இதற்காக, கோன்களுடன் (cones) கூடிய மாதிரி பார்க்கிங் இடங்கள் சில பள்ளி கார் நிறுத்துமிடங்களில் இருக்கும். பக்கத்தில் இருக்கும் பள்ளிகளில் சென்று, இந்தப் பயிற்சியைப் பெறலாம். பார்க்கிங் சரியாக வராதவரை, லைசன்ஸ் கிடைக்காது என்று நினைத்துக்கொண்டு பயிற்சி பெறவேண்டும். இணைவான கார் நிறுத்தல், செங்குத்தான கார் நிறுத்தல் - இவை இரண்டிற்கும் சில சுலப வழிமுறைகள் உள்ளன. அவற்றை யூ-ட்யூபில் பார்த்துக் கற்றுக்கொள்ளலாம். இது பற்றி தெரிந்தவர்கள் நேரடியாகச் சொல்லிக்கொடுத்தால் இன்னும் உசிதம். ஏற்றமான இடங்களில் காரை நிறுத்துவதற்கும், இறக்கமான இடங்களில் காரை நிறுத்துவதற்கும், கார் டயரை எந்தப் பக்கமாகத் திருப்பி வைக்க வேண்டும் என்று தெரிந்திருக்க வேண்டும்.

கற்றுக்கொள்வதற்கு, அடுத்த முக்கியமான விஷயம் - லேன் எனப்படும் சாலைகளில் இருக்கும் கோடுகளைப் பற்றி அறிந்துக்கொள்வதும், எங்கு எப்போது எப்படி மாறுவது என்று தெரிந்துக்கொள்வது. தேர்வின் போது, திருப்பங்களில் எந்த லேனில் இருந்து எந்த லேனிற்கு மாற வேண்டும் என்பதைத் தெரிந்து மாற வேண்டும். நாம் சாலையில் ஓட்டிக் கற்றுக்கொள்ளும் போது, இவற்றைப் பெரிதாகக் கவனிக்க மாட்டோம். தேர்வின் போது, இவற்றை நுணுக்கமாகக் கவனிப்பார்கள். நிறையப் பேரின் முதல் தோல்விகளுக்கு, இவையே காரணமாக இருக்கும். தேர்வு நடைபெறும் மையங்களில் இருக்கும் சில சாலைகளில், இந்தக் கோடுகளே இருக்காது. இது மேலும் குழப்பத்தைக் கொடுக்கும். அதனால், கோடுகள் இல்லாவிட்டாலும், கோடுகள் இருப்பதாக நினைத்து ஓட்டுவது எப்படி என்று தெரிந்திருக்க வேண்டும். இதற்கு ஒரு சுலப வழி - கூகிள் மேப்ஸ் போன்று ஏதேனும் ஒரு மேப்ஸ் இணையத்தளத்திற்குச் செல்லவும். நாம் தேர்வு எடுக்கப்போகும் தேர்வு மையத்தை வரைப்படமாகப் பார்க்கவும். எந்தச் சாலைகள் எப்படிச் செல்கிறது என்று தெரியும். எது ஓர் வழி சாலை, எது இருவழி சாலை என்று தெரியும். எங்குக் கோடுகள் உள்ளன, எங்கு இல்லை என்று தெரியும். நமது சாலைத் தேர்வை, வீட்டிலேயே பேப்பரில் ஹோம் வொர்க் செய்துக்கொள்ள இது உதவும்.

கார் ஓட்டுவதைத் தவிர, இன்னும் சிலவற்றை அறிந்துக்கொள்ள வேண்டும். சில பரிசோதகர்கள், நாம் காலணி அணிந்து கார் ஓட்ட வேண்டும் என்று எதிர்பார்ப்பார்கள். அதனால், காலணி அணிந்து கார் ஓட்டவும். சிலர் நாம் எப்படிக் கார் ஸ்ட்டியரீங்கை பிடிக்கிறோம், எப்படி ப்ரேக் பிடிக்கிறோம் என்பதைக் கவனிப்பார்கள். என்ன வேகத்தில் ஓட்டுகிறோம் என்று கவனிப்பார்கள். பதட்டமாக இருக்கிறோமா என்று பார்ப்பார்கள். அதனால், சகஜமாக இருப்பது அவசியம். சில சந்தேகங்கள் இருந்தால், தேர்வாளரிடம் தேர்வு தொடங்குவதற்கு முன்பு கேட்டுக்கொள்ளலாம். சந்தேகத்தில், பயத்தில் கார் ஓட்டுவதைத் தவிர்க்க வேண்டும்.

தேர்வின் போது, காரில் ஏறி உட்கார்ந்தவுடன், காரில் இருக்கும் கருவிகளைப் பற்றிக் கேட்பார்கள். உதாரணத்திற்கு, எமர்ஜென்ஸி விளக்குப் பொத்தான்கள், ஹாண்ட் ப்ரெக் போன்றவை எங்கு இருக்கும் என்று கேட்பார்கள். அதனால், அது பற்றித் தெரிந்திருக்க வேண்டும். தேர்வு முடிந்தவுடன், நாம் கார் ஓட்டியதைப் பற்றிய அவர்களது கருத்தைக் கேட்டுக் கொள்வது நல்லது. தேர்வில் தேர்ச்சி அடையாவிட்டால், இது அடுத்தத் தேர்வுக்கு உதவும். மூன்றாவது தேர்வில் இருந்து இருபது டாலர்கள் கட்டணம் உண்டு. தேர்ச்சி அடைந்துவிட்டால், அடுத்து அலுவலகத்திற்குள் சென்று விண்ணப்பம் பூர்த்திச் செய்து, புகைப்படம் எடுத்துவிட்டு மகிழ்வுடன் வீடு திரும்பலாம். ஓட்டுனர் உரிம அட்டை வீடு வந்து சேர, சில வாரங்கள் எடுக்கும். அதுவரை, அவர்கள் கொடுக்கும் சான்றிதழ் கொண்டு கார் ஓட்டலாம்.

மினசோட்டாவில் சாலை தேர்வுக்கு அப்பாயின்மெண்ட் எடுக்க வேண்டும். இந்த அப்பாயின்மெண்ட் கிடைப்பது அவ்வளவு சுலபமில்லை. அப்பாயின்மெண்ட் இல்லாமல், அங்குச் சென்று காத்திருந்து தேர்வு எடுக்கவும் வழியுண்டு. ஆனால், தேர்வு எடுப்பது உறுதி கிடையாது. வேறு ஏதும் வேலை இல்லை எனில், இப்படிக் காத்திருக்கலாம். இல்லாவிட்டால், முன்பதிவு உதவும். நமக்குப் பக்கத்தில் இருக்கும் மையத்தில் முன்பதிவு இல்லை என்றால், அடுத்துத் தொலைவில் இருப்பதில் முயற்சி செய்யலாம். சிலர் ஒரு மையத்தில் எடுப்பது சுலபம், மற்றதில் கடினம் என்பார்கள். அதை நம்பாதீர்கள். உங்களது பயிற்சி சரியாக இருந்தால் எங்கு வேண்டுமென்றாலும் உங்களால் தேர்ச்சி பெற முடியும்.

தனியார் பயிற்சி மையங்களில் ஒரு மணி நேர பயிற்சிக்கு 40-50 டாலர்கள் கட்டணம் பெற்றுக்கொண்டு பயிற்சி அளிப்பார்கள். அங்குச் சென்று பயிற்சி எடுக்க வேண்டுமா என்றால் அது கட்டாயம் தேவையில்லை. உங்களுடன் நேரம் செலவிட்டு, கார் ஓட்ட கற்றுக்கொடுக்க ஒரு ஜீவன் இருக்கிறதென்றால் அதுவே போதும். சில டெக்னிக்ஸ் தெரிந்து கொள்ள, இது போன்ற தனியார் பயிற்சியாளர்கள் உதவுவார்கள். மற்றபடி, தொடர் பயிற்சி கண்டிப்பாகத் தேர்ச்சியினைக் கொடுக்கும். விரைவில் தேர்ச்சி பெற்று உரிமம் பெறவும், பாதுகாப்பாகக் கார் ஓட்டவும் எங்களது வாழ்த்துகள்.

மேலும் தகவலுக்கு,

https://dps.mn.gov

.

அனோகா ஹாலோவீன் அணி வகுப்பு

2017-05-21T10:16:00.000+05:30

பனிப்பூக்களில் வெளிவந்த எனது கட்டுரை.

96 ஆண்டுகால பாரம்பரியம் கொண்டது, மினசோட்டாவின் அனோகாவில் (Anoka) நடக்கும் ஹலோவீன் கொண்டாட்டங்கள். 1920 ஆம் ஆண்டில், அனோகாவின் இளைஞர் பட்டாளம், ஹலோவீனின் போது நடத்தும் வேடிக்கை விளையாட்டுகள், மக்களிடையே திண்டாட்டத்தை ஏற்படுத்த, அனோகா நிர்வாகத்தினர் கூடி, எவ்விதப் பிரச்சினைகளுக்கும் இடமில்லாமல், ஒருமித்த திட்டத்துடன் நடத்தத் தொடங்கியவை, இக்கொண்டாட்ட நிகழ்வுகள்.

இங்கு அக்டோபர் மத்தியில் இருந்தே ஹாலோவீன் நிகழ்வுகள் தொடங்கிவிடுகின்றன. குழந்தைகள், பெரியோர்களுக்கான விளையாட்டுகள், வேடிக்கையாக திகில் ஏற்படுத்தும் வீடுகள், ஒப்பனை நிகழ்வுகள், திரைப்பட ஒளிபரப்பு என ஒரு பெரிய ஊர்த் திருவிழாவாக அக்டோபர் மாத இறுதிவரை நடைபெறுகிறது. அனோகாவில் மட்டுமின்றி, மினசோட்டாவின் மற்ற ஊர்களில் இருந்தும் மக்கள், இங்கு இந்த விழாவின் போது குவிகிறார்கள். பக்கத்தில் இருக்கும் மற்ற மாநிலங்களில் இருந்தும் பங்களிப்பு இருக்கிறது.

அமெரிக்காவில் இது போன்ற ஒரு கொண்டாட்டம், அனோகாவில் தான் முதன்முதலில் தொடங்கியது என்பதால், அனோகாவை உலகின் ஹலோவீன் தலைநகர் (The Halloween Capital of the World) என்று குறிப்பிடுகிறார்கள்.

இக்கொண்டாட்டங்களின் முக்கிய அம்சமாக இங்கு நடக்கும் பெருதின அணிவகுப்பைச் (Grand Day Parade) சொல்லலாம். விதவிதமான உடைகள், இசை வாத்தியங்கள், நடனங்கள், விளையாட்டுகள், இனிப்பு வகைகளை, இந்த அணிவகுப்பில் காணலாம். அக்டோபர் 29ஆம் தேதி நடந்த அணிவகுப்பில் எடுத்த புகைப்படங்களை இங்கு காணலாம்.

கல்வி நிறுவனங்கள், விளையாட்டு அமைப்புகள், வணிக நிறுவனங்கள், அரசு நிர்வாகங்கள் என பலதரப்பட்ட அமைப்புகளின் கூட்டு ஒருங்கிணைப்பில் அழகாக இந்த அணிவகுப்பு நடத்தப்பட்டது. மெல்லிய சாரலும், குளிரும் இருந்தாலும், மக்கள் பெரும் திரளாக இந்த நிகழ்வில் கலந்து கொண்டு, அணிவகுப்பில் கலந்து கொண்டவர்களை உற்சாகத்துடன் ஊக்கப்படுத்தினர்.

ரெமோ

2017-05-21T10:09:00.000+05:30

பனிப்பூக்களில் வெளிவந்த எனது கட்டுரை.

வளரும் இளம் கதாநாயகன் என்பதில் இருந்து முன்னணி இளம் கதாநாயகன் நிலைக்குச் சென்று விட்டார் சிவகார்த்திகேயன் எனலாம். காமெடி, நடனம் போன்றவற்றில் மட்டும் திறமை காட்டிக் கொண்டிருந்த சிகா, அவரின் ஒன்பதாவது படமான ரெமோவில் மேக்கப், நடிப்பு, டப்பிங் போன்றவற்றிலும் தனது திறமையைக் காட்டியிருக்கிறார். அவருக்கான ரசிகர் கூட்டம் கூடிக்கொண்டே செல்கிறது. கூடவே, கடுப்பில் பிற முன்னணி நடிகர்களது ரசிகர்கள் எண்ணிக்கை அதிகரிப்பதும் சமூக ஊடகங்களைச் சுற்றி வரும் போது தெரிகிறது.

தமிழர்களுக்கு ஒரு நடிகர் பிடிக்க வேண்டுமென்றால், அவர் நன்றாக நடித்தால் மட்டும் போதாது. அவரைப் பற்றி நேர்மறையான செய்திகளைக் கேட்டுக்கொண்டே இருக்க வேண்டும். சாதாரண நிலையில் இருந்து உயர்ந்து முன்னணிக்குச் செல்கிற பிரபலம் என்றால் ரொம்பவே பிடித்துவிடும். அப்பிரபலங்களைத் தங்கள் வீட்டுச் சொந்தங்களாகவே எடுத்துக் கொள்வார்கள். அப்படிப்பட்ட நடிகர்களுக்குத் தங்கள் முழு ஆதரவைக் கொடுப்பது வரை, நடிகர்களுக்குச் சந்தோஷம். இந்த ஆதரவு முற்றிப்போய், அடுத்த கட்டமாக ஒரு உரிமையுடன் "ஏன் வெள்ள நிவாரணத்திற்குக் காசு கொடுக்கவில்லை?", "ஏன் அவர் வீட்டு விசேஷத்திற்குக் கூப்பிட்டு விருந்து கொடுக்கவில்லை?" என்று கேள்வி கேட்கும் நிலைக்குச் சென்று விடுவார்கள். இந்த நிலை வரும்வரை ஜாலி தான். சிகாவுக்கு, இப்ப ஜாலி காலம்.

அதென்ன சிகா? ரெமோவில் அவருக்கு டைட்டில் கார்டில் 'SK' என்று பில்டப் டைட்டில் போடுகிறார்கள். சிவகார்த்திகேயனின் சுருக்கமாம். படத்தில் அவரின் கதாபாத்திரத்தின் பெயரும் SK. அதனால், நாம் சிகா என்றழைக்கலாம் என்று முடிவு செய்தோம். கவனிக்க, சிகாவுக்குத் தனி டைட்டில் ஆரம்பித்துவிட்டார்கள். வளர்ச்சி!! வளர்ச்சி!!

படத்தில் சிகா ஒரு பெரிய கதாநாயகன் ஆக வேண்டும் என்னும் லட்சியத்தில், சத்யம் திரையரங்கு முன்னால் ரஜினிக்கு இருக்கும் 'கபாலி' பேனர் போல் தனக்கும் வைக்க வேண்டும் என்ற ஆசையில், நாடகங்களில் நடித்துக்கொண்டு, சினிமா வாய்ப்பு தேடுகிறார். அச்சமயம், இயக்குனர் கே.எஸ்.ரவிக்குமார், நர்ஸ் வேடத்தில் நடிக்க ஒரு புதுமுகத்தைத் தேடுகிறார். (நம்புற மாதிரி இல்லைல? அந்தளவுக்கு இது லாஜிக் தேடுற படம் இல்லை!!) அங்கு, கமலைப் போல், வெளிநாட்டு ஒப்பனைக்காரரின் உதவியுடன் ஹைடெக் மேக்கப் போட்டுக்கொண்டு செல்கிறார். (புதுமுகம், வெளிநாட்டு மேக்கப்பா? ப்ளீஸ், நோ லாஜிக்). காதல் காட்சியில் சரியாக நடிப்பு வரவில்லை என்று விரட்டிவிடப்படுகிறார். அதே மேக்கப்பில், கீர்த்தி சுரேஷைச் சந்திக்க நேர, முன்பொரு முறை பார்த்தவுடன் காதல் வயப்பட்டவர், இப்போது அவருடன் நெருங்கிப் பழகும் வாய்ப்பை ரெமோ (ரெஜினா மோத்வானி) என்ற பெயரில் பயன்படுத்திக்கொள்ள நினைக்கிறார். கீர்த்தி சுரேஷ், ஏற்கனவே திருமணம் நிச்சயமானவர் என்று தெரிந்து, அதன் பிறகும் அவரைக் குழப்பி, ("பொண்ணுங்கள கண்ட்ரோல் பண்ணுறது தான் கஷ்டம், கன்ஃப்யூஸ் பண்றது ஈஸி" என்று ஒரு மீம்ஸ் ரகப் பஞ்ச் வேறு பேசி) எப்படித் திருமணம் வரை கொண்டு செல்கிறார் என்பது மிச்சக்கதை. அதை ஜாலியாகத் திரையில் காட்டியிருக்கிறார்கள். முடிவில், ரஜினி பேனர் இருந்த இடத்தில் அவர் பேனர் வருகிறது. (அதுவரை ஓகே, அந்தப் பேனருக்கு கீழே கபாலி பேனர் இருப்பதைக் காணும்போது தான், கொஞ்சம் நறநறவாகிறது!!)

சும்மா டைமிங் காமெடி, மிமிக்ரி பாட்டு, டான்ஸ் என்று ஒரு ஃபார்முலாவில் சென்று கொண்டிருந்தவர், தைரியமாக நர்ஸ் மேக்கப், பெர்ஃபார்மன்ஸ் என்று அடுத்த கட்டம் சென்றிருக்கிறார். அதைச் சிறப்பாகச் செய்திருக்கிறார் என்பது பாராட்டுக்குரிய விஷயம். மிமிக்ரி நன்றாகச் செய்வார் என்றாலும், இதில் பெரும்பாலும் பெண் குரலில் பேசி இருப்பது, அவரது மாற்றுக் குரல் திறமையை இன்னமும் எடுத்துக்காட்டுகிறது. சரியான டைமிங்கில் வரும் இரு சண்டைக்காட்சிகளும் உறுத்தாமல் இருக்கின்றன. எப்போதும் கை கொடுக்கும் பாடல்கள், இந்த முறை சிகாவை ஏமாற்றிவிட்டது எனலாம். ரஜினி ரசிகர்கள், அஜித் ரசிகர்கள், விஜய் ரசிகர்கள், குழந்தை ரசிகர்கள், பெண் ரசிகைகள் எனச் சாமர்த்தியமாக அனைவரையும் கவரும் வகையில் காட்சிகள் அமைக்கப்பட்டு நடித்திருக்கிறார்.

இவரது வழுவழு மேக்கப் முன்பு, கீர்த்தி சுரேஷ் கொஞ்சம் டல்லாகத் தான் தெரிகிறார். ஆனால், அவரது சிம்பிள் மேக்கப் + அழகான உடைகள், ரசிகர்களைக் கவருவதாக உள்ளன. அந்த பிங்க் பட்டுப் புடவை, பெண்களை மட்டுமல்ல, ஆண்களையும் கவர்ந்து ஜொள்ளுவிடச் செய்யும். ஒப்பனைக் குழுவிற்கும், உடையலங்காரம் செய்த அனுவிற்கும் பாராட்டுகள்.

சிகா, கீர்த்தி இருவருமே ஒளிப்பதிவாளர் பி.சி.ஸ்ரீராமுக்கு நன்றிக் கடன் பட்டவர்கள். தான் ஏன் ஜீனியஸ் என ஃப்ரேமுக்கு ஃப்ரேம் காட்டியிருக்கிறார். ஒரு சாதா படத்தையும், பெரிய படமாகக் காட்ட பி.சி.யின் கேமரா போதும். ஒரு படம் அனிருத், அடுத்த படம் இமான் என்று தொடர் ஹிட்டுகளுடன் சென்று கொண்டிருக்கும் சிகாவுக்கு, இதில் அனிருத் ஏமாற்றத்தை அளித்து விட்டாரோ என எண்ணத்தோன்றும் வகையிலான பாடல்கள். ஆனால், பாடலில் விட்டதை, பின்னணி இசையில் பிடித்து விட்டார் எனலாம். ரொம்பவும் பொருத்தமான, படத்துடன் ஒன்ற வைக்கும் பின்னணி இசை. இந்தப் படத்திற்கு எதற்கு ஆஸ்கர் விருது பெற்ற ரசூல் பூக்குட்டி என்பதைத் தான் எவ்வளவு யோசித்தும் புரிந்து கொள்ள முடியவில்லை. ஒருவேளை, இந்தப் பின்னணி இசை நன்றாகக் கேட்டதற்கு அவர் தான் காரணமோ?

ஏற்கனவே நிச்சயம் ஆன பெண்ணைக் காதலித்துத் திருமணம் என்ற கதையையும் பார்த்திருக்கிறோம். பெண் வேடம் போட்டு ஹீரோயினை ஏமாற்றுதல் என்ற கதையையும் பார்த்திருக்கிறோம். இந்த இரண்டு தெரிந்த கதைகளையும் இணைத்து, ஒரு புதுக் கதையாக, தனது சாமர்த்திய காட்சியமைப்புகள் மூலம் கொடுத்திருக்கிறார் அறிமுக இயக்குனர், பாக்யராஜ் கண்ணன். தான் ஒரு சரக்குள்ள இயக்குனர் என்பதைப் பல காட்சிகளில் காட்டியிருக்கிறார். படத்தின் கதையை முதலிலேயே சொல்லிவிட்டு, அதுவும் அப்படி ஏற்கனவே சொல்லி படமெடுத்த எஸ்.ஏ.சூர்யா வாய்ஸிலேயே சொல்லி படத்தை ஆரம்பித்து, சலிப்பேதும் இல்லாமல் படத்தைக் கொண்டு சென்றதில் வெற்றி பெற்றிருக்கிறார் என்றே சொல்லலாம். இறுதியில் தான் கொஞ்சம் இழுவை ஃபீலிங். மற்றபடி, குடும்பத்துடன் பார்க்கும் வகையில் ஒரு ஜாலி காமெடி படம் இது என்று தாராளமாகச் சொல்லலாம். குழந்தைகளைக் கவர் பண்ணும் வகையிலும் ஒரு சில காட்சிகளை அமைத்து, அதையே இறுதியில் செண்டிமெண்டாகப் பயன்படுத்தியிருப்பது, இயக்குனரின் புத்திசாலித்தனம்.

நோ லாஜிக், ஒன்லி மேஜிக் என்று அவர்கள் படமெடுத்துவிட்டாலும், திரைப்படங்கள் சில கருத்துகளை நேரடியாகவோ, மறைமுகமாகவோ பார்வையாளர்களிடம் பதியச் செய்யும் வல்லமை கொண்டவை என்பதில் நமக்கு நம்பிக்கை உண்டு என்பதால், இப்படம் குறித்த சில பார்வைகளைப் பகிரத் தேவையாக இருக்கிறது. வருத்தபடாத வாலிபர் சங்கம் படத்தில் வெட்டியாக ஊர் சுற்றிக் கொண்டிருப்பவர், ஊர்ப் பெரிய மனிதர் பெண்ணை விரட்டிக் காதலித்துத் திருமணம் செய்து கொள்வார். தாழ்த்தப்பட்ட சாதி இளைஞர்கள், கூலிங் கிளாஸ், ஜீன்ஸ் போட்டுக் கொண்டு உயர்சாதி பெண்களைத் தொடர்ந்து பின்னால் சென்று காதலித்துத் திருமணம் செய்து ஏமாற்றுகிறார்கள் என்று சில சாதியக் குரல்கள் எழும்பிய நேரம் அது. அந்த வாதம் உண்மை தான் என்பது போல் எடுக்கப்பட்ட படமாக அது இருந்தது. காமெடிப் படம் என்னும் போர்வை போர்த்திக் கொண்டால், யாரும் எதையும் யோசிக்கவில்லை. முதல் படமான மெரினாவில் இருந்து முந்தைய படமான ரஜினிமுருகன் வரை சிகாவின் படங்களைத் தொடர்ந்து கவனித்தால், இளைஞர்களின் பெண் குறித்த பார்வையில், தவறாக முன்னுதாரணங்களைக் காட்டும் பாத்திரங்களாகவே இருக்கின்றன. அதை ஜாலியாகக் காட்டுவதால், பார்ப்பவர்களும் லைட்டாக எடுத்துக் கொண்டு செல்கிறார்கள். இப்போது, ரெமோவில் சிட்டி காதல் என்ற வகையில் நிச்சயமான டாக்டர் பெண்ணைக் குழப்பிக் காதலிக்கச் செய்வதும் நல்ல லட்சியமே என்று படமெடுத்திருக்கிறார்கள். அவர்களுக்குத் தோதாக, திரைக்கதை விதியின்படி நிச்சயம் செய்த மாப்பிள்ளையை வில்லனாக ஆக்கிவிட்டார்கள். இல்லாவிட்டால், காமெடியனாகக் காட்டியிருப்பார்கள். ஏற்கனவே, ஹீரோ காமெடி செய்து கொண்டிருப்பதால், அதுவே போதும் என்று நினைத்திருக்கலாம். இப்படியான படங்கள் தொடர்ச்சியாக வெற்றி பெறுவதால், அவருடைய பாதையும் அதே வழியில் செல்கிறது. இந்தக் கண்ணோட்டத்தில் வரும் கதைகளுக்கும், வசனங்களுக்கும் பெண்கள் உட்பட மக்கள் கொடுக்கும் ஆதரவு குறித்துத் தான் நாம் கவலைக்கொள்ள வேண்டியதாக உள்ளது. குடும்பத்துடன் காணும் வகையில் ஆபாசம் இல்லாத, வன்முறை இல்லாத படங்களில் நடித்தாலும் (புகை இல்லை, ஆனால் மது உள்ளது), இது மாதிரி கதையம்சங்களையும் சிகா கருத்தில் கொள்ள வேண்டும்.

மற்றபடி, அவ்வளவு யோசிக்க வேண்டாம் பாஸ், ஊர்ல நடக்காததையா காட்டுறாங்க? என்பவர் எனில், ஒரு நல்ல டைம்பாஸ் என்று சொல்லி, ரெமோவை ஒருமுறை ஜாலியாகப் பார்த்து விட்டு வரலாம்.

டெயில்பீஸ்

இந்தப் படத்தை ஆப்பிள்வேலி கார்மைக் (Applevalley Carmike Cinemas) திரையரங்கில் கண்டோம். நாம் இருந்த வரிசைக்கு முன் வரிசையில், ஒரு அமெரிக்க மத்திய வயதுத் தம்பதியினர் வந்து அமர்ந்தனர். வேறு அரங்கிற்குச் செல்ல நினைத்து, தவறி இங்கு வந்துவிட்டனரோ என்று முதலில் எண்ணினோம். ஆனால், திரையில் படம் தொடங்கியும், எவ்வித ஜெர்க்கும் இல்லாமல் படத்தைப் பார்க்க, அவர்கள் சரியாகத் தான் வந்திருக்கிறார்கள் என்று தெரிந்தது. படம் முழுவதையும் ரசித்து, சிரித்துப் பார்த்தார்கள். படத்தின் சப்-டைட்டில் வசனத்தைப் புரிந்து கொள்ள உதவியிருக்கும். அது இல்லாமலும், படத்தை ரசித்திருப்பார்கள் எனத் தோன்றியது. சில இந்திய, தமிழ்நாடு சார்ந்த நடைமுறைகளை விநோதமாகக் கவனித்தனர். தமிழ் ரசிகர்கள் கைத்தட்டி சிரித்த வெகு சில வசனங்களை மட்டும் புரிந்து கொள்ள முடியா விட்டாலும், முழுப்படத்தையும் உட்கார்ந்து ரசித்துப் பார்த்து விட்டுச் சென்றனர். படம் முடிந்து வெளியே வரும் போது நாம் கேட்டதற்கு, தங்களுக்குப் படம் மிகவும் பிடித்திருப்பதாகக் கூறினர். அட, ரெமோவிற்கு இண்டர்நேஷனல் ஆடியன்ஸும் இருக்காங்கப்பா!!!