[..lensing Wild..]

பச்சைக்காலி ,சுட்டியானை

2024-05-11T22:52:00.002+05:30

PIED BUSHCHAT juvenile கல்லுக்குருவி - குஞ்சு

2024-05-08T21:48:00.001+05:30

Saxicola caprata, கருப்பு வெள்ளைப் புதர்ச்சிட்டு

வளர்ந்த கல்லுக்குருவிகள் (கருப்பு வெள்ளைப் புதர்ச்சிட்டு) ஆண் பெண் இவற்றின் படங்கள்: hhttps://lensingwild.blogspot.com/2018/02/pied-bushchat.html

Indian Silverbill வெள்ளிச்சில்லை

2024-05-02T20:56:00.001+05:30

வெள்ளிச் சில்லை அல்லது இந்திய வெண்தொண்டைச் சில்லை என்றழைக்கப்படும் இந்தப்பறவை தமிழ்நாட்டில் மிகவும் சாதரணமாகக் காணக்கூடிய பற்றியமரும் பறவை வகையைச் சேர்ந்தது. இவை தானியங்களை உண்ணக்கூடியவை.

சில வருடங்களுக்கு முன் திருவெறும்பூரில் வயற்பகுதியில் ஒரு நாட்டுக்கருவேல மரத்தில் நிறைய தூக்கணாங்குருவிகளின் கூடுகள் காணப்படும். அங்கு அக்குருவிகள் கூடுகட்டுவதைப் படமெடுத்துக்கொண்டிருக்கும் போது இந்த சுவரஸ்யமான காட்சியைக் காணவும் படமெடுக்கவும் நேர்ந்தது. வெள்ளிச் சில்லை இணைகள் சில இந்தத் தூக்கணாங்குருவிகளின் கூட்டை வந்து பார்வையிட்டது போலத் தெரிந்தது. அவை பெரும்பாலும் கட்டி முடிக்கப்படாமல், அல்லது கைவிடப்பட்ட கூடுகளைப் போய்ப்பார்த்து நுழைந்து அதை ஆராய்ந்து பார்த்தவண்ணம் இருந்தன. எனக்கு அது வியப்பாக இருந்தது. இப்படி மற்ற பறவைகளின் கூட்டை அதுவும் இப்படி மதிப்பிடும் வகையில் அவை சுற்றி வந்ததைப் படங்கள் எடுத்தேன். பிறகுதான் இந்த வெள்ளிச் சில்லைகள் இப்படியான பழைய தூக்கணாங்குருவிகளின் கூட்டை சில சமயங்களில் தங்கள் கூடாக ஆக்கிக் கொள்வதாகப் படித்தேன்.

பொன்முதுகு மரங்கொத்தி - சுட்டியானை

2024-04-22T19:27:00.006+05:30

SPOT-BILLED DUCK புள்ளிமூக்கு வாத்து

2024-04-03T21:17:00.002+05:30

Spot-Billed Duck in flight (Kollidam), Photographed at in 2019

Eurasian Collared Dove தவிட்டுப்புறா

2024-04-03T19:48:00.007+05:30

Photographed at Cape Calimere at Sept, 2013.

கோடியக்கரையில் 2013 செப்டம்பரில் எடுக்கப்பட்டது.

Brood Parasitism

2024-01-27T22:32:00.001+05:30

வழக்கமாக வரும் தவிட்டுக்குருவிகள் தோட்டத்துக்கு வந்தன. ஆனால் புதுமையாய் கீச்சொலி கேட்டு அங்கு நோக்கினேன். பறக்கச் சரியாகத் தெரியாத அக்காக் குயில் எனப்படும் குயில் இனக்குஞ்சு அப்படி கத்திக்கொண்டிருந்தது. ஒன்று மாற்றி ஒன்றாக தவிட்டுக்குருவிகள் அதற்கு உணவூட்டிக்கொண்டிருந்தன.

இந்த அக்காக்குயில் எனப்படும் Common hawk-cuckoo பறவை brood parasite முறையில் தன் குஞ்சுகளை வளர்ப்பது. அதாவது ஒட்டுண்ணியாய் தன் சொந்த முட்டைகளை வேறொரு இனப்பறவையின் கூட்டில் இட்டு விடும் அப்பறவையும் இதை அறியாமல் தன் குஞ்சென எண்ணி அடைகாத்து, பொறித்து, உணவூட்டி, வளர்த்து ஆளாக்கும்.

தவிட்டுக்குருவிகளின் கூட்டில் இந்த அக்காக்குயில் தன் முட்டையினை இட்டிருக்கிறது. தவிட்டுக்குருவிகளும் முட்டையை அடைகாத்து, பொறித்து, இதோ பறக்கக் கற்றுக்கொடுத்து உணவூட்டிக் கொண்டிருக்கின்றன.

நீலகிரி ஈப்பிடிப்பான் - சுட்டியானை (4வது இதழ்)

2022-10-31T17:26:00.005+05:30

இந்த சுட்டியானை இதழில் பறவைகளைப் பற்றிய என்னுடைய தொடரில் நீலகிரிஈப்பிடிப்பான் குறித்த பதிவும் படங்களும்!

சுட்டியானை சிறுவர் இதழ் குறித்து அறிய, சந்தாதாரர் ஆக கீழே உள்ள Facebook சுட்டியைக் கிளிக்கவும்.

https://t.co/LRv5MsQwc0

பச்சை நிறமே பச்சை நிறமே

2022-01-28T22:15:00.000+05:30

சிறிய, மிகவும் துடிப்பான பறவை இந்த தையல்க்காரக் குருவி. பாசிப்பச்சை நிற முதுகுப்புறம், மெலிந்த கால்களும் கொண்டது. சிறிய பூச்சிகளையும், புழுக்களையும் உணவாகக் கொள்ளூம். முன்று இலைகளை ஒன்றாகக் கூட்டித் தைத்து அதன் உட்புறம் நார் மற்றும் பஞ்சு போன்ற மெல்லிய பொருட்களால் கூடமைத்து அதில் முட்டையிடுகிறது.

அரசவால் ஈப்பிடிப்பான், Asian Paradise Flycatcher

2022-01-10T15:22:00.002+05:30

வேதிவால்க் குருவி, அரசவால் ஈப்பிடிப்பான் (Asian Paradise Flycatcher) என்றெல்லாம் அழைக்கப்படும் இந்தப்பறவை ஒன்றை நேற்று வீட்டின் மாமரத்தில் இருந்து பறந்து சென்றதைப் பார்த்தேன். அது ஒரு முதிரா இளம் பறவையா இருக்க வேண்டும். இன்னும் நீளாத செம்பழுப்பு நிற வால்.

இந்தப்பறவைய முதன் முதலில் 2013இல் கும்பகோணத்துக்கு அருகில் ஒரு சிறுகிராமத்துக்கு நாங்கள் குடும்பத்தோடு சென்ற போது கண்டேன். எல்லா முதல் காட்சியைப் போல வியப்பால் உள்ளம் பூரித்து உள்ளுள் பரவசத்தால் நடுங்க நேர்ந்தது. அதைப்பற்றிய பழைய பதிவு இங்கு. அதற்குப் பிறகு கேரளத்தில் நண்பரின் தோட்டத்தில்.

எத்தனை முறை பார்த்தாலும் முதிர்ந்த ஆண் பறவையின் அந்த அருவி போன்ற நீண்ட வாலையும், அழகிய அடர்நீலத் தலையையும் பார்க்கையில் வியப்பால் திகைக்காமல் இருக்கமுடியாது.

கோவிலடி என்கிற கொள்ளிடக்கரையோர கிராமத்துக்கு வெளியே அமைந்த சாலையில் நான் பல அழகிய பறவைகளைக் கண்டிருக்கிறேன். அப்படி ஒரு முறை அங்கிருக்கும் போது இந்த ஈப்பிடிப்பானைக் காண நேர்ந்தது. வியப்பின் துளிர் பரவசத்தால் நடுங்கிக்கொண்டிருக்கையில் இப்படங்களை எடுத்தேன். ஒளிரும் பட்டன் கண்களும், கொண்டையும் அதன் ஒய்யாரமான வாலசைவுகளுக்கும், சிறு பறத்தல்களுக்கும் கனகச்சிதமாகப் பொருந்திப்போயிருப்பதை எப்போதும் வியக்கிறது மனது.

இந்த ஆண் ஈப்பிடிப்பான்கள் பருவகாலத்தில் இரண்டு வகையான உருமாற்றங்களைக் கொள்கின்றன. செம்பழுப்பு நிற உருமாற்று அல்லது வெள்ளை நிற உருமாற்று. எப்படியிருப்பினும் நீண்ட வால் கொண்ட ஆண்களே பெண் ஈப்பிடிப்பான்களால் மிகவும் விரும்பப்படும் இணைகளாக இருக்கின்றனவாம். அவைகள் ஒப்பீட்டளவில் குட்டையான வால் கொண்டவைகளைவிட விரைவாகவும், அதிகமாவும் இணைகளாக தேர்ந்தெடுக்கப்படுகின்றனவாம். சோழியன் குடுமி சும்மா ஆடாதென்று ஒரு நம்மிடம் ஒரு பழமொழி இருக்கிறதல்லவா!

Male @ Kollidam near Koviladi Village

At Sadayankaal (near Kumbakonam)

காட்டுக் கீச்சான் Common Woodshrike

2022-01-04T21:00:00.004+05:30

காட்டுக்கீச்சான் (Common Woodshrike) தெற்கு ஆசிய நாடுகளில் காணப்படும் கீச்சான். இணையாகக் காணப்படும். ஆணும் பெண்ணும் ஒரே தோற்றம் கொண்டிருக்கும். சோலைகள், குறுங்காடுகள், வேலிகளில் காணப்படும்.

கல்லணையில் இருந்து கொள்ளிடத்தை ஒட்டிச் செல்லும் சாலையில் கோவிலடி கிராமத்தை ஒட்டிய சோலைப்பகுதியில், 2020ல் இதைக் காண நேர்ந்தது.

New year Birdwatching

2022-01-03T14:15:00.000+05:30

This new year started with birdwatching! Yes, myself, Adhi and two more friends went birdwatching. Deepak Karthik was from TOI and Shyam was from Bharathidasan University. We all were at Koothaippar lake at 6:45 am on 1at January 2022! After this pandemic this was our second birdwatching trip to Koothaippar and Kiliyur lakes. My camera is yet to repaired.

This time the birds were not much. Few pelicans were sighted at Koothaippar lake along with other usual sightings. The list of birds were submitted to ebird

Deepak has written an incredible article in TOI that was published this morning.

Cauvery in full flow has Trichy birders a flutter

அச்சம் என்பது மடமை என்று உணர்த்திய பறவை!

2021-12-13T15:34:00.005+05:30

இந்து தமிழ்திசையில் (திங்கள் , டிசம்பர் 13 2021) வெளியான கட்டுரை!

அச்சம் என்பது மடமை என்று உணர்த்திய பறவை!

சுட்டியானை 7ஆவது இதழ் - மீசைக்கார ஆலா

2021-04-07T13:40:00.001+05:30

#சுட்டியானை (7வது இதழ், மார்ச் 2021) வந்துவிட்டது.

ஆலாவைப் பற்றிய எனது ஒரு பக்க உரையாடல் வழியான சிறு அறிமுகம் இது. உங்கள் அல்லது நீங்கள் அறிந்த குழந்தைக்கு தினம் 1 ரூபாய் செலவழித்து (சேமித்து) சுட்டியானை இதழுக்கு #சந்தாதாரர் ஆக்கலாம். #இயல்வாகை வெளியீடு

திங்கள் பறவை – மீசைக்கார ஆலா

அண்ணன் மாறன் ஒரு பறவை ஆர்வலன். அவன் அருமைத் தங்கை தமிழினி. ரெண்டு பேரும் பறவைகளைப் பத்தி அப்பப்ப பேசிக்குவாங்க. அதை உங்ககிட்ட சொல்றோம்!

தமிழினி வேகமாக ஓடி வந்து, ”அண்ணா, இன்று அப்பா என்னிடம் “இப்படி ஆலா பறக்காதே!” என்று சொன்னார். அதன் பொருள் என்ன அண்ணா?

மாறன்: அப்படியா சொன்னார்! (சிரிக்கிறான்) எதற்காகச் சொன்னார்?

தமிழினி: ஐஸ்கிரீம் வேண்டுமென்று காலையில் இருந்து பல முறை கேட்டுக்கொண்டே இருந்தேன் அண்ணா! அதற்காகத்தான் சொன்னார்!

மாறன்: அப்படியா! ஆலா என்றொரு பறவை இருக்கிறது தமிழ்.

தமிழினி: பறவையா?

மாறன்: ஆமாம் தமிழ், இது ஒரு கரையோரப் பறவை. அது நீர்நிலை மேல் ஒரு நொடியும் ஓயாது இங்கும் அங்கும் பறந்துகொண்டே இருக்கும்!

தமிழினி: எதற்காக அண்ணா?

மாறன்: ஆலாக்களுக்கு மீன்கள் தான் உணவு. பறந்தவாறே நீரில் இருக்கும் மீனைத் தேடி, குறிபார்த்து பாய்ந்து பிடித்து உண்ணும்.

தமிழினி: மீன்கொத்தியும் மீனைத்தானே உண்ணும் அண்ணா?

மாறன்: ஆமாம் தமிழ். ஆனால் மீன்கொத்தியை போல அல்லாது ஆலா ஓயாது குளத்தின் மேல் இங்கும் அங்கும் பறந்தவாறே மீனைத்தேடும்! அதனால் ஆலாவைப்போல ஒரு வேலையை முடிக்க ஒருவர் இங்கும் அங்கும் அலைந்து திரிந்தால் ‘ஆலாப் பறக்கிறான்’ என்று அதைக் குறிப்பிடுவது வழக்கம்!

தமிழினி: ஓ! நான் ஐஸ்கிரீம் தின்பதற்காக குளிர்சாதனப் பெட்டியையே சுற்றிவந்துகொண்டிருந்ததால் அப்பா அப்படிச் சொன்னாரா!

மாறன்: ஆமாம். உனக்கு ஆலாவைக் காட்டுகிறேன் தமிழ்! (கணினியில் ஆலாவின் படத்தைக் காட்டுகிறான்)

தமிழினி: ஆலா சிறிய பறவையா அண்ணா?

மாறன்: படத்தில் உள்ள மீசைக்கார ஆலா புறாவைப்போன்ற அளவில் இருக்கும்! ஆலாக்கள் ஒரு கூட்டமாக இங்கும் ஏரியின் மீது பறந்துகொண்டே இருக்கும்!

தமிழினி: எனக்கு ஆலாவைப் பார்க்கவேண்டும் போல இருக்கிறது அண்ணா!

மாறன்: வரும் சனிக்கிழமை காலை நான் பறவை பார்க்கப் போகும் போது உன்னையும் அழைத்துச் செல்கிறேன் தமிழ்.

தமிழினி: நன்றி அண்ணா!

கூத்தைப்பார் குளத்தில் கூழைக்கடாக் கூட்டம்

2020-10-24T23:36:00.001+05:30

ஒவ்வொரு ஆண்டும் கூழைக்கடா (Pelican) ஒன்றிரண்டை நான் கூத்தைப்பார் பெரிய குளத்தில் இந்த மாதங்களில் பார்ப்பதுண்டு. இந்த ஆண்டு, கிட்டத்தட்ட 10க்கும் மேற்பட்ட கூழைக்கடாக்களை அந்தக்குளத்தில் கண்டேன். மகிழ்ச்சியாக இருந்தது. இந்த ஆண்டும் குளத்தை மீன் வளர்ப்புக்காகக் குத்தகை எடுத்திருந்தார்கள். எடுத்தவர், பறவைகளும் கொஞ்சம் சாப்பிட்டுப்போகட்டும் என்று நினைப்பவர் போல. அதனால் போன ஆண்டைப்போல பறவைகளை வெருட்டும் பொம்மைகளை குளத்தில் வைக்கவில்லை. இந்த ஆண்டு குளத்தின் கரையை கொஞ்சம் அகலப்படுத்தி இருந்தார்கள். அதனால் கரையை ஒட்டி இருந்த மரங்கள் பலவும் இல்லை. அவற்றில் பல ஏற்கனவே புயலில் விழுந்துவிட்டன. இந்தக் கூழைக்கடாக்கள் குளத்தின் எளிதில் அணுகமுடியாத மறுபக்கத்தில் இருந்தன. இந்தக்ப் புள்ளிமூக்குக் கூழைக்கடாக்கள் தமிழ்நாட்டில் வசிப்பவைதான். சென்னையில் NIOT Campusக்குப் பக்கத்தில் பார்த்திருக்கிறேன். ஆனால் இவை இந்த மாதங்களில் இங்கு வருவதை வழமையாகக் கொண்டிருக்கின்றன. இதை வலசைபோதல் என்று கூறமுடியாதுதான்! +

இந்த கூழைக்கடா என்ற பறவையை முதன் முதலில் கிண்டி குழந்தைகள் பூங்காவில் (சென்னை) தான் கூண்டில் பார்த்ததாய் நினைவு. பிறகு கோடியக்கரையில், சென்னையில். இதன் அலகும் அதனோடிணைந்த அந்தப் பையும் அதிசயம் என்று கூறமுடியாது! ஏனெனில் இயற்கையில் அதிசயம் என்பதே சாதரணமாய் ஒவ்வொன்றிலும் காணக்கூடிய ஒன்றுதானே! கிட்டததட்ட சில மணிநேரங்கள் இந்தப் பறவைகளைப் கவனித்ததில் அவை சங்குவளை நாரைகளைப் போல அல்லது நத்தை கொத்தி நாரைகள், கொக்குகள் போன்று மீன்களைப் பிடிக்கவோ அல்லது தண்ணீரை அளைந்து கொண்டோ இருக்கவில்லை. ஓயாமல் தன் மூக்கை சகல கோணங்களிலும் திருப்பித்திருப்பி தன் சிறகுகளை பிரித்துப்பிரித்து உலர்த்துவது போன்று செய்துகொண்டிருந்தன. சில சமயங்களில் தங்கள் அலகோடிணைந்த பை-வாயை பிதுக்கிக்காட்டுவதும், வான் நோக்கி உயர்த்திப்பிடிப்பதுமாகவே இருந்தன. எப்போது சாப்பிடும் என்று தெரியவில்லை. ஒரு சமயம் இரண்டு கூழைக்கடாக்களுக்குள் கருத்து மாறுபாடு போல. இரண்டும் கொஞ்சம் முறைத்துக்கொண்டன என்று நினைக்கிறேன். இரண்டும் ஒன்றை ஒன்று நோக்கி அலகை ஒரு முக்கோணம் போல வைத்துக்கொண்டிருந்தன. சிறிது நேரம் கழித்து ஒன்று கொஞ்சம் அடங்கிப்போய் அலகைத் தாழ்த்திக்கொள்ள, மற்றதும் தாழ்த்திக்கொண்டது! ஒன்று வானை நோக்கி மழையை யாசிப்பது போல அலகைத் திறந்துகொண்டு நின்றது. பிறகு அதுவாக மூடிக்கொண்டது!

நாம் பஸ்ஸிலும், ரயிலிலும் அலைவது போல, போனை சதா பார்த்து நமக்கு நாமே சிரித்துக்கொள்வது போல இந்தச் செய்கைகளுக்குப் பிறகு ஏதேனும் பொருள் இருக்கலாம்! ஆனால் நமக்குத்தான் இன்னும் புரிபடவில்லை. இந்த கூழைக்கடாக்கள் இப்படி இறக்கைகளை கோதிக்கொண்டும், பிரித்து மேய்ந்துகொண்டும், தங்கள் அலகுகளை வைத்து அட்டகாசம் பண்ணிக்கொண்டிருந்த அத்தனை நேரமும், பின்னணியில் ஒரு 20 கரண்டிவாயன்கள் ஓவியக் காட்சிபோல கழுத்தை வளைத்து அசையாமல் நின்று கொண்டிருந்தன. இந்த கூழைக்கடாக்களின் அருகே நாம் சம்புக்கோழிகள் மூழ்கி எழுந்து மீனையோ பூச்சிகளையோ பிடித்துக்கொண்டிருந்தன. ஒரு 20 அல்லது 30 மீசை ஆலாக்கள் ஓயாது ஆலாய்ப் பறந்துகொண்டிருந்தன. சின்னச்சின்ன மீன்களை பிடித்துக்கொண்டு அவை மேலேறுவது ஒரு காட்சி! இந்த கூழைக்கடாக்களுக்குச் சற்று தள்ளி நெடுங்கால் உள்ளான்கள் 60, 70 என்ற எண்ணிக்கையில் ஓய்வு எடுப்பதும் கூட்டாய் எழுந்து சுழன்று பறந்து பின் அடங்கி நீரில் நிற்பதுமாய் இருந்தன. ஒரு இளம் ஆலா நீரில் நிறுத்தப்பட்டிருந்த கழியை தன் ஆஸ்த்தான இருக்கையாக வரித்துக்கோண்டது போல. அந்தப்பக்கம் வரும் எல்லாம் ஆலாக்களையும் வீரீட்டு, கடிந்துகொண்டு துரத்திவிட்டவாறிருந்தது.

அது ஒன்றுதான் ஆலாக்கள் இவ்வளவு நேரம் உட்க்காரும் என்பதை அறிந்துகொள்ள உதவுவது போல உட்கார்ந்திருந்தது.

எது எளிது? எது உலகுக்கு இனிது? - கொசு உள்ளான்

2019-08-21T14:55:00.000+05:30

நினைச்சுப்பார்க்கும் போதெல்லாம் மனசு வியப்பால் திகைச்சுப் போற எத்தனையோ விசயங்கள் ஒவ்வொருத்தருக்கும் இருக்கும். எனக்கு அப்படி ஒன்னு இந்த கொசு உள்ளான் (Little Stint) என்கிற இந்தப்பறவை. ஒரு 1/2 அடி ஸ்கேலை விட சின்னதுதான். கரையோரப்பறவை. அலைகள மிதிக்க ஓடி விளையாடுகிற குழந்தைகள்போல குறுக்கும் நெடுக்கும் ஒவ்வொரு அலைக்கும் பின்னும் ஓடி அதில் ஒதுங்கும் பூச்சிகள், சின்ன கடல் உயிரிகள் போன்றவற்றைத் தேடித்தேடி உண்ணும். கால்களும் அலகும் நனைந்து மின்னும் அழகுக்கறுப்பு நிறம். இந்த இனப்பெருக்கமல்லாத காலத்தில் அதன் உடலில் வெண்மையும், சாம்பலும் தூக்கலாக இருக்கும். பப்பாளி விதை போன்ற ஈரத்தில் மினுக்கும் கண்கள். எடை ஒரு 20 கிராம் இருக்கும். நம் இதயத்தின் எடையில் 5ல் ஒரு பங்குதான் இதன் எடை. அதனால் தான் அத்தனை வேகமாக ஓடுகிறோ என்று எண்ணத்தோன்றும். இப்படி இங்க வந்து கோடியக்கரையிலையும், பழவேற்காட்டுலையும் அலைகளுக்குப் பின்னாடி ஓடிகிட்டு இருக்கேன்னு பார்க்கும் போதுதான் தெரியும் இது ரொம்பதூரம் வடக்க இருந்து வந்ததுன்னு.

சிவப்பு- இனப்பெருக்கம் செய்யும் இடங்கள்; இளம்பச்சை- கடந்து வந்த பாதை; நீலம்-இனப்பெருக்கமல்லாத காலங்களில் காணப்படும் இடங்கள் | படம்:Xeno-canto

வடக்கன்னா ஜம்மு-கஷ்மீரில்ல அதுக்கும் வடக்க, சீனா, மங்கோலியா, ரஷ்யாவுக்கும் வடக்க. இங்க வரைபடத்துல சிவப்பு நிறத்துல வடகோடியில வடதுருவத்துக்கு முன்னால கடைசி நிலங்கள் இருக்கு பாருங்க, அங்க. சின்ன வயசுல சோவியத் புதினங்களில் ஆவியும், மனமும் அலைந்து திரிந்த பனிப்பாலைகள். விவசாயிகளும், கொல்லர்களும் வசிக்கிற சின்ன கிராமங்களத் தாண்டி, பல ஆயிரம் மைல்களுக்கு மனிதர்கள் கூட இல்லாத உயர்ந்த புற்கள் ஆங்காங்கே எழுந்த கரையோரங்கள், காரா கடல், லெப்டிவ் கடல் அலைகளுக்கு பின்னாடியும் இவை தன் குஞ்சுகளோடு இப்படித்தான் ஓடிக்கொண்டிருந்திருக்கும். அப்போது அவை அதே சின்னக் கண்களும் கறுத்த கால்களும் அலகும் கொண்ட கொசு உள்ளான் தான். என்னோட தனிமையான ஆன்மாவைப்போல சோவியத்தின் கனவுகள் அலையடிக்கிற, ஆளே இல்லாத, தனிமையின் பாடல் ஒரு குழலாகவோ, ஒற்றைப் பாடலாகவோ காற்றால் எடுத்துச்செல்லப்படுகிற பெருவெளிகளில் அது தன் குஞ்சுகளை முட்டையிட்டு அடைகாத்து வளர்த்தெடுத்தெடுத்திருக்கிறது. அதன் சின்னக் கால்கள் எனக்குத் தரும் கிளர்ச்சியை உங்களுக்குச் சொல்ல முடியாதது எனக்கு வருத்தமே. அந்தக்கால்கள் என் ஆன்மா மட்டுமே சென்றலைந்த அந்த பனிக்காடுகள், அலைகடலோரங்களில் திரிந்தவை, அவற்றில் இன்னும் அந்த மண்ணின் துகள்கள் ஒன்றேனும் இருக்கலாம். அந்த கள்ளமில்லா இளம் பெண்களும், சண்டையிடும் குடும்பத்தலைவிகளும் மீசைவைத்த குடிகார ஆண்களும், சலித்த மூதாட்டிகளும், அனுபம் கனிந்த முதியவர்களும் இருக்கிற கிராமங்களைத் தாண்டி அவர்கள் காலடிகள் கூட அரிதினும் அரிதாகப் பதிந்திருக்கூடிய மணற்பரப்புகளில் அலைந்து திரிந்தவை அந்தப் பாதங்கள். அந்தப்பப்பாளி விதைக் கண்கள் வடதுருவத்தின் மேலெழுந்து வந்த இளம் பொன்னிற ஒளியில் நனைந்து குளிர்ந்தவை. அது தெற்கே இன்னும் இன்னும் என்று பறந்து வந்து இந்தக் கரையோரங்களில் என் முன்னே ஓடிக்கொண்டிருப்பது எதற்காக? தனது சின்னஞ்சிறிதான வயிற்றை நிரப்பிக்கொள்ளவா? ரஷ்யாவின் உள்நாட்டுப்பகுதிகளையும், மங்கோலியாவையும் சீனத்தையும் முற்றாகத் தவிர்த்து கஜகஸ்தானின் வழியாக ஆப்கானிஸ்த்தான், பாகிஸ்த்தான் வழியாக ஒவ்வொரு வருடமும் ஆயிரக்கணக்கான மைல்கள் பறந்து இந்தியாவுக்குள் வந்து இங்கே தென்கோடியில் அலைகளுக்குப் பின்னே ஓடிக்கொண்டிருக்கத் தெரிந்தவைகளுக்கு முயன்றால் விவசாயமும், நகரங்களும், வானூர்திகளும் வசப்பட்டிருக்காதா? எது எளிது? எது உலகுக்கு இனிது? எனக்கு மூச்சடைக்கிறது!

படங்கள் 2018 திசம்பரில் பழவேற்காட்டில் எடுக்கப்பட்டவை.

டிக்கல் மலர்க்கொத்தி

2019-08-19T18:11:00.000+05:30

நேற்று (ஆக. 18) புனித வளனார் கல்லூரி வளாகத்தில் சில மணிநேரங்கள் இருக்க நேர்ந்தது. அங்கு இந்த டிக்கல் மலர்க்கொத்தியைக் கண்டேன். அது ஒரு கூடு கட்டியிருந்தது. இலைச்சறுகுகள், நார்கள், பஞ்சு இவற்றைக்கொண்டு ஒரு தொங்கும் கூடு. முதல்பார்வைக்கு அப்படி ஒரு கூடு இருப்பது எளிதில் தெரியாதவாறிருந்தது. அக்கூட்டில் இரண்டு குஞ்சுகள் இருந்தன. தாய்க்குருவி சில நிமிடங்களுக்கு ஒருமுறை வந்து உண்வூட்டிச் சென்றது. குஞ்சுகள் தாயின் அண்மையில் தலையை வெளியே நீட்டி வாயைப்பிளந்து கீச்சிட்டுக்கொண்டிருந்தன. தாய் சகல முன்னேச்செரிக்கையுடன் கூட்டை அணுகி குஞ்சுகளுக்கு உணவூட்டிக்கொண்டிருந்தது.

இந்த டிக்கல் மலர்க்கொத்தியின் அலகு வெளிறிய இளஞ்சிகப்பு நிறமுடையதாகையால் ஆங்கிலத்தில் வெளிறிய அலகுடைய மலர்க்கொத்தி என்றழைக்கப்படுகிறது. தடித்த அலகுடைய மலர்க்கொத்தியில் இருந்து இவ்வலகின் காரணமாக வேறுபடுத்திக் காட்டப்படுகிறது. இம்மலர்க்கொத்திகள் பொதுவாக மிகச்சிறியன. சுமார் 8 செமி நீளமிருக்கலாம். கட்டையான வாலையும் சிறிய உடலையும் கொண்டவை. இலைப்பரப்பினுள் மிக எளிதாக பறந்தும் தாவியும் நிலைகொள்ளாது செல்வதால் படமெடுக்க சற்றே கடினமானவை. இவை சிறிய பழங்கள், சிலந்திப்பூச்சிகள், மலர்த்தேன் இவற்றை உணவாக்கொள்கின்றன. இந்தக்குஞ்சுகளுக்கு இவைகளை கொண்டுவந்து அவற்றின் விரிந்து பிளந்த செம்மஞ்சள் நிற முதிரா அலகுக்குள் நன்கு நுழைத்து ஊட்டி விடுவது காட்சியின்பம் பயப்பது. அக்குஞ்சுகள் தமக்குள் போட்டி போட்டுக்கொண்டு ஒவ்வொரு வாயுணவுக்கும் முன்னே வருவதும், தாய் அவற்றுக்கு மாற்றி மாற்றி உணவிடுவதும் தொடர்ந்து நடக்கும் நாடகம். குஞ்சுகளின் கண்களும், வாயும் நன்கு வளர்ந்திருப்பனவாகத் தெரிந்தது.

இந்த மலர்க்கொத்திகள்: ஜூன் முதல் செப்டம்பர் மாதங்களில் தென்னிந்தியாவில் கூடுகட்டி குஞ்சுபொறித்து 2 முதல் 4 குஞ்சுகளை வளர்க்கின்றன. வட இந்தியாவில் சற்றே முன்னேயே இனப்பெருக்கத்தில் ஈடுபடுகின்றன.

இப்பறவையை நான் இதற்கு முன் பல இடங்களில் கண்டுள்ளேன். படமெடுத்துள்ளேன். என் வீட்டில் கொய்யாக்கனியை சுவைக்க வருகிற ஒன்றை இங்கு பதிவுசெய்துள்ளேன். நேற்று நான் கண்டதில் எனக்குப் புதியது ஒன்று இருந்தது. பொதுவாக பற்றியுட்காரும் (passerine) பறவையினத்தில் பல பறவைகள் தங்கள் குஞ்சுகளாக இருக்கும் போது தங்களது கழிவை ஒரு நெகிழக்கூடிய உறுதியான பையோடு வெளியேற்றுகின்றன. இதை மலப்பை (fecal sac) என்று அழைக்கலாம். இப்பையை உடனுக்குடன் தாய்ப்பறவை அகற்றுவதன் மூலம் கூடனாது தூய்மையாகப் பேணப்படுகிறது. நமது குழந்தைகளின் டயப்பரோடு தொடர்புறுத்தத் தோன்றுகிறது. ஆனால் டயப்பரைப் போல இது சூழலைச் சீரழிப்பதில்லை; மட்கக்கூடியதும், சில சமயங்களின் தாய்ப்பறவையால் உண்ணப்படக்கூடியதுமான வகையில் உள்ளது.

மலப்பையானது குஞ்சின் பின்துளையின் வழியாக வெளியே வரும்போது

மலப்பையை பிடித்துக்கொண்ட தாய்க்குருவி

நேற்று இப்பறவையானது தன் கூட்டில் இருந்து சில நிமிட இடவெளியில் இரண்டு மலப்பைகளை வெளியேற்றியது. ஒன்று அதன் குஞ்சின் பின்புறமுள்ள துளையின் (Cloaca) துளையின் வழியே வெளியேவரும் போதே அலகால் பிடித்திழுத்து வெளியே கொண்டுபோனது. பறவைகள் இந்த ஒரே துளையின் மூலமே கழிவையும், சிறுநீரையும், முட்டைகளையும் வெளியேற்றுகின்றன. சிறிது நேரத்தில் மற்றொன்றை கூண்டுக்குள் நன்கு தலையை விட்டு எடுத்துக்கொண்டு போனது. இவை இரண்டும் இரண்டு குஞ்சுகளின் மலப்பைகளாக இருக்கலாம். ஏனெனில் அவை சற்றொப்ப ஒரே நேரத்தில் வர சாத்தியமிருக்கிறதல்லவா! இந்த மலப்பைகளை தாய் தொலைவுக்கு கொண்டு செல்லுகிறது. தங்கள் குஞ்சை தேடி வருகிற பிற பறவைகள்/ பாம்புகளிடமிருந்து பாதுகாக்கவும் இப்படிச் செய்யலாம் அல்லது பெரும்பாலான தாய்ப்பறவைகள் அதை உணவாகவும் உட்கொள்கின்றனவாம். இதை அறிந்த போது ‘புள்ளைக்காகப் பீயைத்தின்னு’ என்ற சொலவடை நினைவுக்கு வந்தது. அதன் நடைமுறை பொருள் சற்றே மாறி இருந்தாலும், இப்பறவைகளின் இச்செயலைக் கண்ணுற்ற தமிழர்கள் இப்படியான சொலவடையை உருவாக்கியிருக்கலாம்.

மொழியின் கால்களில் இழுபடும் நிலக்காட்சிகள்

2018-12-20T16:56:00.000+05:30

அன்றைக்கு கல்லணை பாலத்தில் இருந்து நீர்க்காகங்களை கொள்ளிடத்தில் பார்த்துக்கொண்டிருந்தேன். நீர்க்காகங்கள் கரையில் நின்றிருக்க ஒற்றைக் கொக்கு ஓடும் நீரில் நின்றிருந்தது. பார்க்கும் போது அப்போது டாவோயிசத்தின் யின்-யாங் என்ற சொற்றொடர் தோன்றி மறைந்தது. வீட்டில் அப்படத்தைப் (படம் 1) பார்க்கையில் ‘குளித்துக் கரையேராத கோபியர்கள் என்ற தேவதேவனின் கவிதைத் தலைப்பு நினைவுக்கு வந்ததை எப்படிப் பொருத்துவது? இப்படிப் பலமுறை மனதில் மொழியின் பாய்ச்சல் நிகழ நிலக்காட்சிகளும், பறவைகளின் படங்களும் ஏதுவாய் இருந்திருக்கின்றன. இரயிலில் போகும் பொழுதெல்லாம் ‘கொக்கு பூத்த வயல்கள்’ என்ற சொல்லாட்சி தோன்றாமல் கொக்குகள் நிற்கின்ற வயல்களைக் கடந்ததில்லை. அதுவும் தேவதேவன்தான்! மனம் சொற்களால் இருக்கிறது. ஆனால் சொல், வேலி கட்டுகிற ஒன்றில் வந்து நிரம்புகிற ஒன்றை நிலக்காட்சிகள் வெளியே பிரதிபலிக்கும் போது மனம் புதிய பதச்சேர்க்கைகள், தாவல்கள், பாய்ச்சல்களை மொழியின் துணைகொண்டு நிகழ்த்திப்பார்க்கிறது. ஆனால் மனம் ஒரு போதும் நிரம்புகிற ஒன்றாய் இருக்கமுடிவதில்லை; அது விளிம்பு கட்டுகிற, வரையறுக்கிற ஒன்றாய்த்தான் இருக்கமுடியும்; அதில் வந்து நிரம்புகிற ஒன்று நிச்சயம் மனமில்லை. மனம் ‘கரையேராத கோபியர்கள்’ என்கிற சொற்ச்சேர்க்கையை உடைத்து அர்த்தப்படுத்தமுடியும். ஒற்றையாய் நீரில் இருக்கிற கொக்கு கண்ணனாகவும், கரையில் நிற்கிற நீர்க்காகங்கள் கோபியர்களாகவும் கொண்டால் நிறம், நிற்கிற இடம் எல்லாம் அப்படியே தலைகீழான ஒரு காட்சிப்பிம்பம் இந்தப்படம். ஆனால் இந்தப் பொருளுரையெல்லாம் உண்மையில் ஒன்றுமில்லை; நிலக்காட்சியோ, பறவையோ தருகிற மொழியின் பாய்ச்சல் எப்போதோ முடிந்துவிட்டது. அது ஒரு மின்னல். அது அப்போதே ஒளிர்ந்துவிட்டது. பிறகு அம்மின்னலில் கண்ட காட்சிகளை மனம் கட்டமைக்கிறது.

படம் 1

இன்னொரு சொற்ச்சேர்க்கை ‘எதனுடைய நடமாடும் நிழல்கள் நாம்’. மெளனியுடைய சேர்க்கை இது. இதுவும் ஏதோ ஒன்றை நிரப்பிவிட்ட மாதிரிச் செல்கிறது. இதற்கான விளக்கமெதுவும்வேண்டாம்.

சங்க இலக்கியம் தினைகளாக பிரிக்கப்பட்டிருக்கிறது. உண்மையில் மனதின் நிலக்காட்சிதான் புறத்தில் பிரதிபலிக்கிறது என்று கவிஞனுக்கு தெரிந்திருக்கிறதென்றால் அவன் கவிதை மரபு எப்படிப்பட்டதாக இருக்கும்! மனதின் நிலக்காட்சி என்றா சொன்னேன்? தவறு. இல்லை. மனம் சொற்களைக் கொண்டு விளிம்பல்லவா சமைக்கிறது! உண்மையில் அது அகத்தின் காட்சி. சங்க இலக்கியம் உண்மையில் சரியாகத்தான் ‘அகம்’ ‘புறம்’ என்று பிரிக்கிறது. அகமென்பது உண்மையில் மனமல்ல என்றுதானே சொல்லிக்கொண்டிருந்தேன்!. ஏ.கே.இராமானுஜன் ‘Interior Landscape' என்றுதானே பெயரிட்டார்.

Mighty migratory birds and a local crow: A drama in Kiliyur tank

2018-12-20T09:49:00.000+05:30

We were there at Kiliyur tank by 8:30am after Sarah has gone to work. Though the morning was heralding a sunny day, the light was not that harsh; as usual the most of the ducks were still roosting. We started observing the ducks and some Northern shovelers were active and they were unusually closer to the shore. They are closer enough to make out their sexes with naked eyes. Roughly 200 shovelers were at that part of the tank. Our friend Mr. Balabharathi were already there watching the birds. When we were observing the birds, I saw a bird of prey was landing on the plant growth in one side of the tank and I started taking photos. The bird was an Eurasian Marsh-Harrier and probably it should be a female or immature one with the remaining of a shore bird in its talons. Euresian Marsh-Harrier is a winter visitor from central and northern Europe and stays closer to the wetlands and feeds on small birds, fishes, frogs and small animals. Now I could understand why the stilts and other small shore birds of this tank are always under the thorny acacia trees. This species is the largest of the harriers and has broad, rounded wings. Harriers posses very large ear openings which is disguised by the facial feathers (like owls) and hence they could detect prey species by the noises they produce.

Picture 1. Eurasian Marsh-Harrier with the remaining of a shore bird in its talons.

Suddenly, the harrier started to fly again and in fact it was chased by a bigger bird of prey. The one that was chasing the Harrier was Greater Spotted Eagle, a migratory bird that leaves the breeding grounds in Finland, Latvia, Lithuania, Estonia, Poland, Belarus, Moldova, Russia, Ukraine, Kazakhstan, mainland China and Mongolia, for the winter and may be found in central and eastern European, north and east Africa, the Middle East, the Arabian peninsula, the Indian subcontinent and east and Southeast Asia over winter. A mature Greater Spotted Eagle weighs approximately three times of the Harrier and had a bigger wingspan. The greater spotted eagle only has white spots as a juvenile, when they extend in bands across the upperwing. By adulthood, the spots have faded leaving dark brown feathers across the head, body and wings, with slightly paler flight feathers on the upper side. Since this had the white spots at the wings, it should be a juvenile one. The greater spotted eagle is classified as Vulnerable (VU) on the IUCN Red List 2007.

The harrier was fleeing from the chasing eagle with its kill and the eagle was determined to grab this piece of food. They both were manoeuvring very skilfully and swiftly and the sky was filled with action like chasing, diving, head on collision and narrow escape. Then came the unexpected entry of a disturbed local, a crow. The crow first chased away the harrier and then the eagle that was perched in a tree to restore the peace in that region. It was a surprise to see how a small crow that could chase away two birds of prey that are bigger and mightier then it.

Picture 2. The harrier was fleeing from the chasing eagle with its kill

Picture 3. Determined to grab this piece of food

Picture 4. I won't leave you.

Picture 5. Head-on?

Picture 6. A tactical block to the fleeing Harrier

Picture 7. Entry of the crow

Picture 8. Get rid of the Harrier from the scene

Picture 9. Now, YOU get lost!

இரண்டு இழப்புகள்

2018-12-13T23:05:00.001+05:30

2018 தமிழ்நாட்டுக்கு பெரிய இழப்புகளை சுமத்தி விட்டு விடைபெறப் போகிறது. ’கஜா’ புயலின் சீற்றத்தால் டெல்டா பகுதிகள் 20 வருடங்கள் பின்னோக்கிப் பயணப்பட்டதைப் போல சிதைந்து கிடக்கின்றன. மக்கள் நம்பமுடியாதவாறு கைவிடப்பட்டுள்ளார்கள். அது புயலின் கொடுமையைக் காட்டிலும் கொடுமையானது. முகத்தில் அறைவது. புயல் ஒரு துரதிர்ஷ்டம்; ஆனால் இப்படிக் கைவிடப்படுதல் என்பது துரோகம்.

ஆனால் இந்தப்புயலின் சேதங்களை சிறிதென ஆக்கும் இழப்புகள் இன்னும் இரண்டு அண்மையில் நிகழ்துள்ளன. ஒன்று ஐராவதம் மகாதேவன் அவர்களின் மறைவு. இரண்டாவது ‘நெல்’ ஜெயராமன் அவர்களின் மறைவு.

தமிழின் தொன்மையைத் தனது கடும் உழைப்பால், ஆய்வுத் திறத்தால் உலக அரங்குக்கு எடுத்துச்சென்றவர் ஐராவதம் மகாதேவன். 38 ஆண்டு காலம் உழைத்து அவர் உருவாக்கிய பழந்தமிழ்க் கல்வெட்டுகள் குறித்த ஆய்வு நூல் (Early Tamil Epigraphy, Harward University press and CreA, 2003) இந்திய வரலாறு என்றாலே, அது வட இந்திய வரலாறுதான் என்றிருந்த நிலையை மாற்றுவதற்கு உதவியது. தமிழ் பிராமி என அவரால் அழைக்கப்படும் பழந்தமிழ் எழுத்துகளையும் ஆரம்ப கால வட்டெழுத்துகளையும் புரிந்துகொள்ள முழுமையானதொரு வழிகாட்டியாக அது விளங்குகிறது. கிமு இரண்டாம் நூற்றாண்டளவில் தமிழகத்திலிருந்த கல்வி நிலையையும் அந்நூல் எடுத்துக்காட்டுகிறது. அரசவையிலும், சமூகத்தின் மேல் மட்டத்திலும், வழிபாட்டிடங்களில் மட்டுமே எழுத்தறிவு மற்ற பகுதிகளில் காணப்பட்ட இந்தக் காலப்பகுதியில் தமிழகத்தில் கல்விநிலை பரவலாக எல்லாத் தரப்பினரிடையேயும் காணப்பட்டது என்று நிரூபித்தார். அவரது ஆய்வின் மற்றொரு மிகமுக்கியமான முடிவு, இந்திய வரலாற்றினை முற்றிலும் புதிய திசையில் திருப்பியது. அது சிந்துசமவெளி தொடர்பான ஆய்வு. சிந்துவெளி நாகரீகம் ஒரு ஆரியக்கலப்பில்லாத அதற்கு முந்தைய நாகரீகம் என்று நிறுவியதோடு மட்டுமின்றி அது ஒரு திராவிட நாகரீகம் என்பதையும் நிறுவினார். தவிர சிந்துவெளிக் குறியீடுகளைப் படிப்பதற்கு நம்பகமான ஒரு முறையை ஐராவதம் மகாதேவன் ஏற்படுத்தவும் செய்தார்.

கல்வெட்டுக்கள் தென் இந்தியாவில் தான் அதிகமும் கிடைத்துள்ளன. கல்வெட்டுக்கள், நடுகற்கற்கள், பானை போன்றவற்றில் காணப்படும் பொறிப்புகள், இலக்கிய ஆதாரங்கள், வேர்ச்சொல் ஆராய்ச்சி, சமூக ஆய்வுகள் போன்றவற்றின் மூலம் உண்மையான வரலாறு எழுதப்பட முடியும். ஆனால் வரலாறு எப்போது அரசியலின் வழியே பார்க்கப்படுகிறது. அதனால் இந்திய வரலாறு பெரிதும் எழுதப்படாமல் சில வசதியான சமூக சித்திரங்களைக் கொண்டு தொடுக்கப்பட்டதாகவே உள்ளது. இச்சூழலில் ஐராவதம் மகாதேவன் போன்றோரின் உண்மையான ஆய்வு முயற்சிகள் மிகவும் போற்றத்தக்கனவாய் உள்ளன. அவருக்கு தமிழ்ச்சமூகம் மிகவும் கடன்பட்டுள்ளது. அவருக்கு அஞ்சலி.

“சிந்துவெளி குறியீடுகள் திராவிட மொழிக்குறியீடுகளே”

An Interview with Iravatham Mahadevan

http://www.varalaaru.com

***

‘நெல்’ ஜெயராமன் என்று பரவலாக அறியப்படுகிற ஜெயராமன் தஞ்சைப் பகுதியில் இருந்து தமிழ்நாட்டின் பாரம்பரிய நெல்வகைகளில் 174 வகைகளை மீட்டெடுத்து அவற்றை விவசாயிகளிடமும், மக்களிடம் கொண்டு சேர்ப்பதில் அரும்பணியாற்றினார். நெல் திருவிழா என்ற அவரது ஆண்டு தோறும் நடக்கும் பரம்பரிய நெல் வகைகளை மீட்டெடுத்து பரப்பும் விழா பல விவசாயிகளை பாரம்பரிய விதைகளின் பக்கம் திருப்பி உள்ளது.

பாரம்பரிய விதைகள், வகைகள் எந்த வகையில் முக்கியமானவை என்ற கேள்வி எழலாம். உலகமயமாக்கல் எல்லா பன்மைக்கூறுகளையும் அழித்து, எல்லாவற்றையும் தொழிற்சாலை உற்பத்திப்பொருட்களாகக் குறுக்குகிறது. உணவு, உடை, வாழிடம் போன்றவை வாழும் இடத்தால், விளைபொருட்களால், இயற்கைச்சூழலால் தீர்மானிக்கப்பட்டு வந்தது. இயற்கையால் தீர்மானிக்கப்படுகிறது என்பது உண்மையில் மனிதனுக்கும் இயற்கைக்கும் இடையில் நடக்கும் உரையாடலின் வழி கிடைத்த விளைவே. எனவே உணவு அங்குள்ள நீர், நில வளம், தட்பவெப்ப நிலை, உடல்கூறுகள் இப்படி பலவற்றைச் சார்ந்தது. ஆனால் அமெரிக்காவிலும் சீனாவிலும், தயாரித்து, ஜப்பான் வழியாக உலகமெங்கும் வந்து கொட்ட இப்படியான பன்மைக்க்கூறுகள் கொண்ட வாழ்க்கை முறை அனுமதிக்காது. அது மட்டுமல்லாது, பயிர்களின் நோய்களும் அதற்கான மருந்தும், பூச்சிக்கொல்லியும் உலகளாவிய சந்தையாக இருப்பது எத்தனை இலாபகரமானது! எனவே பன்மைத்தன்மை எல்லா வகையிலும் ஆதிக்க, சுரண்டல் சக்திகளால் வெறுக்கப்படுகிறது. தமிழ்நாட்டில் மட்டும் பல நூறு வகையான நெல் வகைகள் சென்ற நூற்றாண்டில் விளைவிக்கப்பட்டு வந்தன. ஆனால் இப்பொழுது உரத்தையும் பூச்சிக்கொல்லியையும் நம்பி சில வகை நெற்பயிர்கள் விளைச்சலையும் இலாபத்தையும் மட்டும் கருத்தில் கொண்டு உருவாக்கப்பட்டு விளைவிக்கப்படுகின்றன. இது விவசாயிகளின் பொருளாதாரத்தையும் தற்சார்பையும் அழிக்கிறது; உணவை ஒரு உற்பத்திப்பொருளாக்குகிறது.

இந்தச்சுழலில் ‘நெல்’ ஜெயராமனின் பங்களிப்பு மிகவும் பெறுமதி வாய்ந்தது. தமிழகத் தற்சார்பையும் மீளக்கொண்டுவர நிகழ்த்தப்படுகின்ற இப்போரில் அவர் மிகமுதன்மையானவராக செயல்பட்டார். சர்வதேச அளவில் செயல்படும் வியாபார அரசியலில் இத்தகைய முயற்சிகள் பெரிய தாக்குதல்கள். புற்று நோய் கண்டு சடுதியில் முடிந்திருக்கிறது அவரது பெருவாழ்வு. அவருக்கு என் அஞ்சலி.

ஜெர்டன் பச்சைச் சிட்டு

2018-11-25T23:02:00.001+05:30

இலையொன்று சட்டென்று ஒரு மரத்தில் இருந்து இன்னொரு மரத்துக்குப் பறந்து சென்றது. நான் இன்னொரு முறை அந்த இலை போய்ச் சேர்ந்த இடத்தைப் பார்த்தேன். அந்த இலை அங்கிருந்து துள்ளி இன்னொரு கிளையில் அமர்ந்தது. ஆ! அது இலையில்லை. இலையெனத் தோன்றிய ஒரு பறவை. வனத்தின் துளிபோல அது இருந்தது. ஆனால் அது மண் நோக்கி விழவில்லை. விண் நோக்கி மரங்கள் செலுத்துவதற்காக மரமொன்று எழுதிய கடிதம் போல இருந்தது. விண்ணின் முகவரி போல சின்ன நீல நிறத் தீற்றல் ஒன்று அலகின் அடிப்புறமாகக் காணப்பட்டது. பசும்பச்சையில் கண்ணாடிக் கோளமாக உருண்ட கண்களின் அடியில் நீலக் கடலொன்று அலையடித்தவாறிருந்தது. சிறிய பறவை அது. மைனாவை விடச் சிறியது. ஜெர்டன் பச்சைச்சிட்டு அல்லது இலைக்கிளி என்றறியப்படுகிறது. பெண்பறவையின் கழுத்தில் இன்னும் அற்புதமான பசும்நீலத் தீற்றல் காணப்பட்டது.

ஜெர்டன் பச்சைச் சிட்டு (ஆண்)

***
இன்று கால்வினுக்குப் பிறந்தநாள் என்று இப்போதுதான் தெரியவந்தது. கால்வின் அருமையான சிறுவன். அவன் நிறைய வாசிக்கிறான். ஒரு குழந்தை, அவனுக்கு 12 வயதே ஆகட்டுமே, உங்கள் வீட்டின் படிப்பறையில் கால்களை மடக்கி நாற்காலியில் வைத்துக்கொண்டு புத்தகங்களுக்குள் மூழ்கிப்போய்விட்டதைக் காணும் போது நீங்கள் உன்னதமான ஒரு காட்சியைக் காணுகிறீர்கள். இந்தப்பறவை அப்படியொரு காட்சிதான். அதனால்தான் நான் இந்தப்படத்தை இன்று பதிப்பிக்கிறேன்.

கால்வின், வாசிப்பின் நீலம் படிந்த ஒரு பசும்பச்சைப் பறவை! வாழ்க கால்வின்!!

கஜா புயலுக்கு மறுநாள்

2018-11-23T14:19:00.001+05:30

நவம்பர் 16ஆம் நாள் அதிகாலை 3:30 மணி அளவில் கஜா புயல் கரையைக் கடந்தது. காவிரியின் டெல்டா மாவட்டங்களில் பலத்த சேதங்களையும், அழிவையும் ஏற்படுத்திவிட்டு இப்புயல் சென்றிருந்தது. தென்னந்தோப்புகளும், வாழைத்தோப்புகளும் மட்டுமல்லாமல் ஏராளமான சிறிய கிராமங்களையும், இப்பகுதியின் மின்சாரக் கட்டமைப்பையும் முழுவதுமாக அழித்துவிட்டது இப்புயல். பல கிராமங்களுக்கு இன்றுகூட மின்சாரம் வரவில்லை; உணவும் குடிநீரும் இல்லை.

நீலவால் பஞ்சுருட்டான்

திருச்சியில் இப்புயலின் பாதிப்புகள் ஒப்பீட்டளவில் குறைவே. திருவெறும்பூரில் புயலின் சீற்றமெதையும் உணரமுடியவில்லை. ஆனால் திருச்சியைச் சூழ்ந்த சிலபகுதிகளில் வாழைத்தோப்புகளுக்கு சேதமுண்டாக்கி உள்ளது இப்புயல்.

புயலுக்கு அடுத்த நாள் 17ஆம் தேதி முற்பகல் திருவெறும்பூர், கூத்தபார்-பெரியகுளத்தில் பறவைகளைக் காண நானும் அதியும் சென்றோம். புயலின் காரணமாக அதிக்கு பள்ளி இல்லை. அப்போது மழை இல்லை; நல்ல வெயில் அடித்துக்கொண்டிருந்தது. வழக்கம் போல கூத்தப்பார் செல்லும் குளத்தின் கரையாக அமைந்த சாலையில் காரில் சிறிது தூரமும் பிறகு நடந்தும் பறவைகளை அவதானித்தோம். இந்த ஆண்டு அக்குளத்தில் மீன் குத்தகைக்கு எடுத்திருப்பவர்கள் பறவைகளை அச்சுறுத்துவதற்காக வைக்கோல் பொம்மைகளை குளத்தின் பல பகுதிகளில் நிறுத்தியிருந்தார்கள். அவைகள் இப்புயலால் சிதைந்திருந்ததாலோ என்னவோ புயலுக்கு முன்னைவிட பல மடங்கு வாத்துகளும், நீர்க்காகங்களும் அன்று அக்குளத்தில் காணப்பட்டன. இந்த ஆண்டு மிக அதிக அளவில் ஆகாயத் தாமரை குளத்தை ஆக்கிரமித்திருந்தது. வாத்துக்களை படமெடுத்ததில், தொலைவில் இருந்தமையால் பதிப்பிக்கத்தக்க அளவிலான தகுதியில் அமைந்த படங்கள் கிடைக்கவில்லை. வழக்கத்துக்கு அதிகமான அளவில் சுடலைக்குயில் காணப்பட்டது குறிப்பிடத்தக்கது. மழையின் காரணமாக பஞ்சுருட்டான்கள் பூச்சிகளைப் படிப்பதில் முனைந்து காணப்பட்டன. அதேபோல ஆலாக்களும் பறந்து திரிந்தன. மீன்களுக்கு உணவாக சில இடங்களில் சாணக்கரைசல் குளத்தில் கொட்டப்பட்டிருந்ததைக் காணமுடிந்தது.

சுடலைக்குயில்

அன்று காணப்பட்ட பறவைகளின் பட்டியல். e-Bird தளத்தில் பதியப்பட்டது.

சீழ்கைச் சிறகி Lesser Whistling-Duck 150
குள்ளத்தாரா Cotton Pygmy-Goose 50
நீலச்சிறகி Garganey 50
ஆண்டி வாத்து Northern Shoveler 100
முக்குளிப்பான் Little Grebe 100
சிறிய தவிட்டுப்புறா Laughing Dove 4
செம்போத்து Greater Coucal 2
பச்சைவாயன் Blue-faced Malkoha 1
சுடலைக் குயில் Pied Cuckoo 8
கோகிலம் Asian Koel 1
நெடுங்கால் உள்ளான் Black-winged Stilt 200
சிவப்பு மூக்கு ஆள்காட்டி Red-wattled Lapwing 1
மீசை ஆலா Whiskered Tern 50
நத்தை குத்தி நாரை Asian Openbill 10
மஞ்சள் மூக்கு நாரை (அ) சங்குவளை நாரை Painted Stork 5
நீர்க்காகம் Cormorant sp. 200
சாம்பல் நாரை Gray Heron 4
செந்நாரை Purple Heron 4
பெரிய கொக்கு Great Egret 20
கொக்கு Intermediate Egret 20
சிறிய கொக்குLittle Egret 50
உண்ணிக்கொக்கு Cattle Egret 100
குருட்டுக் கொக்கு Indian Pond-Heron 20
வெள்ளை அரிவாள் மூக்கன் Black-headed Ibis 100
கறுப்பு அரிவாள் மூக்கன்Red-naped Ibis 10
சிறிய கரும்பருந்து Black-winged Kite 1
செம்பருந்து Brahminy Kite 1
சிரால் மீன்கொத்தி Common Kingfisher 2
வெண்மார்பு மீன்கொத்தி White-throated Kingfisher 1
கறுபு வெள்ளை மீன்கொத்தி Pied Kingfisher 1
பச்சைப் பஞ்சுருட்டான் Green Bee-eater 2
நீலவால் பஞ்சுருட்டான் Blue-tailed Bee-eater 6
பனங்காடை Indian Roller 2
தட்டாரக்குருவி Coppersmith Barbet 10
பொன்முதுகு மரங்கொத்தி Black-rumped Flameback 2
கரிச்சான் Black Drongo 30
வால்காக்கை Rufous Treepie 10
காக்கை House Crow 50
தகைவிலான் swallow sp. 50
செங்குதச் சின்னான் Red-vented Bulbul 10
பிளைத் நாணல் கதிர்க்குருவி Blyth's Reed Warbler 2
கதிர்க்குருவி Plain Prinia 1
சாம்பல் தவிட்டுக்குருவி Large Gray Babbler 20
நாகணவாய் Common Myna 50
தேன்சிட்டு sunbird sp. 1

பொன் முதுகு மரங்கொத்தி

பிளைத் நாணல் கதிர்க்குருவி

மழைக்குருவி

2018-11-01T11:17:00.001+05:30

வடகிழக்கு பருவமழை இந்தமுறை தாமதமாகி விட்டதென நாளிதழ்களில் வாசித்துக்கொண்டிருக்கிறேன். சின்னவயதில் விவசாயிகள் மழையைப் பற்றி ஓரிரு வார்த்தைகளில் வானத்தைப் பார்த்தோ மண்ணைப் பார்த்தோ பேசிக்கொள்வார்கள். ஓரிரு வார்த்தைகள்தான்! “பெய்வனாங்குதே” என்பார் ஒருவர். மற்றவர் உதடு பிதுக்குவார். அவ்வளவுதான். இன்னொருநாள் சாக்கு படுதா தொங்கும் டீக்கடையில் நடுங்கியபடி நுழையும் ஒருவர் “காத்து கொண்டு போய்டுச்சி” என்பார், கீற்றுக்கூரையில் இருந்து மழைநீர் விழுந்து குழிகளில் விளிம்பெழத் தெறித்துக்கொண்டிருப்பதைப் பார்த்துக்கொண்டிருப்பவர், “ஆமா” என்றபடி டீக்கிளாசை வைத்துவிட்டு துண்டைத் தலையில் போர்த்திக்கொண்டு, ஒருமுனையை பல்லால் சற்றே கடித்தவாறு மம்பட்டியை எடுத்துக்கொண்டு வேகமாய் வயலுக்கோ, வீட்டுக்கோ விரைவார். நாம் இப்போது இங்கிலீஸ்கார்கள் மாதிரி மழையை பேப்பரில் படித்துக்கொண்டிருக்கிறோம். நான் மட்டும் அப்படிச் செய்யவில்லை. மொத்த ஊரே அப்படிப் படித்துக்கொண்டு இருக்கிற ஒரு நாளில்தான் நமது வீடுகளுக்குள் தண்ணீர் வந்தது. நமது புத்தக அலமாரிகள் நீரில் மிதந்தன. சாலைகளில் படகுகள் வந்தன.

இன்று காலை ராக்-குக்கு உணவிட்டுக்கொண்டு நின்றபோது எதிரே இருந்த வேப்பமரத்துக்கு ஒரு பறவை பறந்து வந்து இலைச் சதுப்பில் புதைந்துபோனது. அதைத்தொடந்து வந்த மற்றொரு பறவை நான் காணுமாறு அதே மரத்தில் அமர்ந்தது. அவை சுடலைக்குயில் (Pied or Jacobin Cuckoo) எனப்படும் குயிலினத்தைச் சேர்ந்த பறவைகள். சென்ற வருடங்களிலும் மழைவருவதற்கு சில நாட்களுக்கு முன் இதை நான் பார்த்திருக்கிறேன். இந்த இணை இன்று வந்தஉடன் இது தோன்றி சூழலைக் கவனிக்கிறேன். மந்தாரமாகத்தான் இருக்கிறது. வீட்டுக்குள் நுழையும்போது பக்கத்துவீட்டு தொலைக்காட்சி சில ஊர்களில் மழை பெய்திருப்பதைச் சொல்லிக்கொண்டிருக்கிறது. திருச்சிக்கும் இன்று மழை வருமோ?

இதை முடிக்கிற பொழுதில் மின்சாரம் போய்விட்டது. திரும்பிப் பார்த்தேன் முற்றத்தில் மழை!

முந்தைய பதிவுகள்:

சுடலைக்குயிலும் செவ்விறகுக் கொண்டைக்குயிலும்

குயில்களும் சிலம்பன்களும்

தாயினும் சாலப் பரிந்து

2018-10-30T18:49:00.000+05:30

”பால் நினைந்தூட்டும் தாயினும்

சாலப்பரிந்து நீ பாவியேனுடைய

ஊனினை உருக்கி உள்ளொளி பெருக்கி

உலப்பிலா ஆனந்தமாய

தேனினைச் சொரிந்து புறம்புறம் திரிந்த

செல்வமே சிவபெருமானே

யானுனைத் தொடர்ந்து சிக்கெனப் பிடித்தேன்

எங்கெழுந் தருளுவதினியே ”

என்கிறார் மாணிக்கவாசகர். கன்றுக்கு பாலை கன்றின் தேவை, அளவு நினைந்து தானே ஊட்டும் பசுவினும் சாலப்பரிந்து அவருக்கு இறைவன் அருளியதாக மாணிக்கவாசகர் குறிப்பிடும் போது தாய் தன் பிள்ளைக்கு நினைந்து உணவளிப்பதை காணுகிறோம். தாயும் தந்தையும் சேர்ந்து சில உயிர்களில் குழந்தையை வளர்க்கின்றன. குறிப்பாக பறவைகளில் பல பறவைகள் இப்படி வளர்ப்பதைக் காணலாம். அப்படி இருவரது அக்கறையையும், அன்பையும் பெறும் சூழலில் கூட தாயின் அணுகுமுறை, உணவூட்டும் பாங்கு போன்றவை வேறுபட்டதாக இருக்குமா என்ற ஐயம் எனக்கு நேற்று நீங்கியது.

கல்லணைச் சாலையை ஒட்டி இருந்த மரச்செறிவுக்குள் ஒரு லோட்டன் தேன் சிட்டுகளின் கூட்டை நேற்று கண்டேன். உண்மையில் நான் ஆண் தேன் சிட்டை அவதானித்துக்கொண்டிருந்த போது, அது அலகில் கவ்விய பூச்சியை உண்ணாமல் அங்கும் இங்கும் பறந்து நான் இருந்த இடத்தைச் சுற்றி வந்தபோது அங்கு ஒரு கூடு இருக்கலாம் என்று கவனித்தேன். உண்மையில் என்னால் அதைக் கண்டுபிடிக்க முடியவில்லை. சற்றே விலகி இருந்து கவனித்தபோது அப்பறவையே அக்கூட்டுக்குச் சென்றபோதுதான் அந்தக்கூடு அங்கிருப்பதையே கண்டுகொள்ள முடிந்தது. அந்த அளவுக்கு ஒரு முட்புதருக்குள் குப்பைகள் சிலந்திவலை போன்ற ஒன்றில் தொங்கிக்கிடப்பது போல தோற்றம் தரும் வகையில் அமைந்திருந்தது அக்கூடு.

புதருக்குள் தேன்சிட்டின் கூடு

ஏறக்குறைய ஒரு 15 செமி உயரமும், கூட்டின் மையப்பகுதியில் 5 செமி அகலமும் இருக்கும் வகையில் இருந்தது அக்கூடு. காய்ந்த இலைச்சருகுகள், மரப்பட்டைகள் ஒரு சிலந்தி வலைபோன்ற மெல்லிய பஞ்சு போன்ற பொருளால் கட்டப்பட்டிருந்தன. அது இலம் அல்லது எருக்கம் பஞ்சின் இழைகளாக இருக்கலாம்.

தேன்சிட்டின் கூடு

இழைகளால் கட்டப்பட்ட கூடு

பச்சை இலைகள் அக்கூடு கட்டப்பட்டிருந்த மெல்லிய கிளையின் இலைகள். கூட்டின் மேல்பகுதியில் அதன் வாயில் இருந்தது. அப்பறவைகள் உணவை கொண்டு வந்ததான் மூலம் உள்ளே குஞ்சுகள் இருந்ததை ஊகிக்க முடிந்தது. ஆனால் அதைக் காணமுடியவில்லை.

இந்த இடத்தில்தான் தாய்ப்பறவை உணவூட்டுவதில் இருந்த வேறுபாட்டைக் காணமுடிந்தது. ஆண் பறவை மிகுந்த எச்சரிக்கை உணர்வுடன் அடிக்கடி வந்து அப்பகுதியை தொடர்ந்து கண்காணித்து வந்தது. பூச்சிகளைப் பிடிக்காமல் அவ்வப்போது வந்து அப்பகுதியை ஆராய்ந்து சென்றது. பூச்சியைப் பிடித்தபின்னும் கூட உடனே கூட்டுக்கு வரமால் அங்குமிங்கும் அமர்ந்து சூழலைக் கண்காணித்தது. நான் சற்று தொலைவில் இருந்தே கூட்டை அவதானித்து வந்தபொழுதும் ஆண் பறவை மிகுந்த எச்சரிக்கை உணர்வுடன் நடந்துகொண்டது. மாறாக பெண் பறவை உணவை வழக்கமான நேர இடைவெளிகளிலேயே கொண்டு வந்ததோடு மட்டுமின்றி பெரிய எச்சரிக்கை உணர்வற்று வழக்கமான பாதுகாப்பான அணுகுவழிகளையே கையாண்டதைக் கண்டபோது தாய்ப் பறவை உணவை ஊட்டுவதற்கு அதிக அக்கறையும், கருத்தும் கொண்டிருந்ததாக உணர்ந்தேன். தந்தையோ பாதுகாப்புக்கும், எச்சரிக்கைக்கும் அதிக இடமளித்ததாக நினைத்தேன்.

தாய்ப்பறவை

பூச்சி உணவுடன் தந்தைப் பறவை

தந்தைப் பறவை

தந்தையின் இருப்பு பாதுகாப்பு விசயத்தில் அத்தாய்க்கு உதவியாக இருக்கும் என்றாலும் ’நினைந்து ஊட்டும் தாய்’ என்பது ஊட்டுவதை மட்டுமே பெரிதும் தாய் நினைக்கும் என்று நேற்று கண்டுகொண்டேன்.

சிறகை உணரும் பொழுதில்

2018-10-28T22:40:00.000+05:30

சில படங்கள் காணுந்தோறும் நம்மை மனநிறைவும், மகிழ்வும் கொள்ளச் செய்யும். அப்படியான என்னுடைய படங்களில் ஒன்றுதான் இந்த சிரால் மீன்கொத்தியின் (Common Kingfisher) படமும். இது காண்பதற்கரிய பறவை ஒன்றுமில்லை. தமிழ்நாடெங்கிலும் நீர்நிலைகளை ஒட்டி இதைக்காணலாம். பளீரென்ற நீல நிற முதுகும், துருநிற மார்பும், செக்கச்சிவந்த கால்களும் கருத்த அலகும், கண்டத்திலும் காது மடலென வெண் தீற்றல்களும் கொண்ட வண்ணப்பறவை. இரண்டு வருடங்களுக்கு முன் (2016) கிளியூர் குளத்துக்கு வந்திருக்கும் வலசைப் பறவைகளைப் பார்க்கப்போன ஒரு மழைக்காலத்தில் தான் ஒரு குளத்தருகில் இது இப்படி ஒரு அழகான அமரத்தில் அமர்ந்திருக்கக் கண்டேன். அது மீனைக் கண்காணித்துக்கொண்டிருக்கையில் நான் அதை படமெடுத்துக்கொண்டிருந்தேன்.

***

பறவை என்பது விடுதலையின் குறியீடாக அறியப்படுவது. ’விட்டு விலகி நிற்பாயிந்தச் சிட்டுக்குருவியைப் போலே’ என்றான் மகாகவி. அதன் சிறகுகள் மனிதனின் புறத்தே மறைந்துபோன ஆனால் அகத்தில் எப்போதும் படபடத்து விரியும் விடுதலையை குறிப்பதாகவே அறியப்படுகின்றன. மனிதன் அவனது மரண பரியந்தம் தளைப்படுத்தப்பட்டிருக்கும் ஒரே விலங்கு. எங்கள் தெருவில் ஒரு வீட்டில் ஒரு நாயொன்று வாசலில் நிற்கும் புங்க மரத்தில் சங்கிலியால் கட்டப்பட்டிருக்கும். அதனருகிலேயே அதன் உணவுப் பாத்திரமும் கிடக்கும். நாய் கிடந்து கிடந்து சற்றே மணலாகவும் குழியாகவும் ஆகிப்போன இடத்தில் இருந்து அதை வேறெங்கும் எப்போதும் நான் பார்த்ததில்லை. குளித்தலையோ, விளையாட்டையோ, சிறு நடையினையோ அந்நாய் அவ்வீட்டுக்கு வந்தபின் அறிந்திருக்குமா என்பதே ஐயமே! எனக்கு எப்போதும் தோன்றுவது மனிதர்கள் அதிலிருந்து பெரிதாய் வேறுபட்டிருக்கவில்லை என்பதுதான். கண்ணுக்குத் தெரியாத சங்கிலி என்று சொல்வதுகூட உண்மையில்லை. நன்றாய் எல்லோருக்கும் கண்ணுக்குத் தெரிகிறது. முயன்றால் அதை தொட்டு உணரக்கூட முடியும். ”தானே தளைப்பட்டு -- மிகச் சஞ்சலப்படும் மனிதா” என்கிறது மகாகவியின் இன்னொரு குருவிப்பாட்டில் ஒரு குருவி. ஆனால் அந்தத் தளை மனிதனின் விழிப்புணர்வினால் கட்டவிழக்கூடியதுதான் என்கிறார்கள். சிலர் அப்படியான ஒரு தளைப்படுதலே ஒரு மாயைஎன்பதுமுண்டு. அப்படித்தான் இந்தப்பறவையின் கட்டும் என்று கண்டுகொண்டபோது மகிழ்ந்தேன்..

சிறகை

உணரும்

பொழுதில்

தன்னைப்

பிணைக்கும்

கட்டுகளேதும்

இல்லையெனக்

காண்கிறதிப்

பறவை