Lokarri.org

Bake-prozesuaren Behatoki Sozialaren ohiz kanpoko txostena ETAren su-etenaren adierazpenaren ondotik

Lokarri.org — 2011-01-31T09:00:00+01:00

- Gizarteak itxaropen errealistari eusten dio

- Gobernuak lagundu eta betekizun aktiboagoa izan behar du

- Nazioarteko egiaztapena ezinbestekoa da atzeraezintasuna bermatzeko

Orain dela hamabost egun eskas, Lokarri akordioaren eta kontsultaren aldeko herritarren Sareak 2010eko udazkeneko Txostena kaleratu zuen. Bakeranzko egoeraren azterketa jasotzen zuen Txostenak, iragan urtearen amaieran jazotako gertakariak oinarri hartuta. Orain, joan zen urtarrilaren 10ean ETAk jakitera emandako su-etenaren karira zabaldutako galdetegiaren bidez jaso ziren erantzunekin egindako ohiz kanpoko Txostena aurkezten dugu.

Agiriak, neurri handi batean, gizarteak hainbestetan aldarrikaturiko indarkeriaren amaiera eta bake eskaera eta nahiari erantzuten diela jakinik, herritarren erantzunak zuzenean jaso nahi izan ditu Lokarrik, politika eta erakundeetako eragile ezberdinen adierazpenetatik harago. Aste bateko epearen baitan, 1.382 lagunek bidali dituzte beren zuzenean su-eten adierazpenari buruz galdetetzen zen galdetegirako erantzun eta ekarpenak.

Gizarteak itxaropen errealistari eusten dio

Behatoki Sozialaren 2010eko udazkeneko Txostenaren ondorioetako bat zen zenbait arriskuk eta erronkak markaturiko itxaropena antzematen zela. ETAren indarkeriaren mehatxuaren iraunkortasuna zen arrisku horietako bat, eta arrisku horri aurre ez emanez gero bake-prozesu berri baterako kaltegarri zela ikusten zen. Arrisku horren aurrean, honako erronka planteatzen zen: ondorengo asteetan ETAk aldebakarreko su-eten iraunkor eta egiaztagarria iragartzea.

Azkenik, nazioarteko komunitateak egiazta dezakeen su-eten iraunkor eta orokorra iragarri du ETAk eta ohiz kanpoko galdetegia erantzun dutenen %89k positiboki baloratu du iragarpena. Agiriak -aurrekoekin alderatuz- eragin dituen sentimenduak itxaropena eta ilusioa dira. Itzultzerik izango ez duen indarkeriaren behin betiko amaierarako beharrezkoa den pausoa ekarriko duen ilusioa piztu du agiriak.

Gobernuak lagundu behar du eta betekizun aktiboagoa izan

Bakerako aukera une honetan eraginkorrago jarduteko eskatzen zaio Gobernuari. Hain zuzen ere, gizartearen eskakizun horrek bi proposamen zehatz ditu:

-lagun dezala presoak hurbilduz eta Ezker Abertzalearen legalizazioa erraztuz.

-lankidetza aktiboari ekin diezaiola su-etenaren egiaztapenean behin betikoa dela frogatzeko.

Nazioartearen egiaztatze lana ezinbestekoa da atzeraezintasuna bermatzeko

Indarkeriaren itzulezintasuna bermatzen lagun dezakeen osagai garrantzitsutzat hartzen da ETAren su-etenaren agirian jasotzen den nazioarteko egiaztapena, su-etena benetan gauzatzen ari dela bermatzen duen neurrian. Haatik, badira argitu beharreko zenbait gai egiaztapenaren egikaritzeari buruz. Bukatzeko, nazioarteko komunitateak lan garrantzitsua egin dezakeela ere jasotzen da Gobernuak giza eskubide guztiak berma ditzan bultzatzeko.

Bake-prozesu itzulezin batek elkarbizitzan oinarriturko etorkizuna ahalbidetuko duen sinismen sendoa dagoela uste du Lokarrik. Beste behin ere, indarkeriaren gabezia, legalizazioa eta gizartearen protagonismoa ezinbesteko baldintza dira eta behin eta berriz eskatuak. Lokarrik lanean jarraituko du gizartearen aldarrikapen horri laguntzeko.

Ezagutzera eman

Lokarrik pozik hartu du Udalbiltza auziko auzipetuen errugabetzea

Lokarri.org — 2011-01-20T09:00:00+01:00

Lokarri akordioaren eta kontsultaren aldeko herritarren Sareak pozik hartu du Udalbiltzaren aurkako sumarioan auzipetutakoak erregugabetu izana.

Denbora luzea igaro da 2003an abian jarri zirenetik elkarte horren kontrako ekintzak. Auzipetu zenbait espetxeratuak izan dira eta Udalbiltzako jarduerak bertan behera geldiaraziak denbora horretan.

Auziaren ebazpenaren harira, honako gogoetak helarazi nahi ditugu:

- “Dena da ETA” dotrinaren ondorioa da sumario hau. Oinarrizko askatasunen urraketa eragin du dotrina hori praktikan jartzeak, hala nola elkartzeko, adierazteko edo manifestazeko eskubidearen urraketa, Zuzenbide Estatu batean legezkoak diren jarduera politikoak galaraziz.

- Beren bizitzan kalte eta asaldura konponezinak pairatu dituzte auzipetuek, erabaki bat hartzeko Justiziak hartu duen denbora luzeak areagoturik.

Haunarketa egitera eraman beharko luke ebazpenak Gobernua, izan ere, tematuta dago ilegalizazioetan eta debekuetan oinarrituriko iraganeko estrategiak mantetzen, eta ezinbestean gehiegikeria konponezinak dira horien ondorio.

Ezagutzera eman

Su-etena oso urrats garrantzitsua da

Lokarri.org — 2011-01-11T09:00:00+01:00

-Zaila da ETArentzat berriz indarkeriari heltzea

-Bake-prozesu itzulezin baterako baldintza lortzea da erronka

Atzo Lokarrik balorazio positiboa egin zuen ETAren agiriaz, zeinetan iragartzen duen su-eten iraunkorra, orokorra eta nazioarteko komunitateak egiaztatu ahalko duena. Aurreikustekoa zen bat ez etortzea beste iritzi batzuekin: agiria kritikatu dute batzuek berehala, erakundea ez delako deuseztatu eta ez dutelako barkamenik eskatu beren iraganarengatik; beste batzuek esan dute ez dela nahikoa. Lokarrik jada aditzera eman du bere desioa eta eskaera dela indarkeria behin betiko amaitzea, baina hori ez da oztopo agiri honek dakarren aurrerapauso garrantzitsua balioesteko.

Egoeraren azterketa objektiboa

Agiria ikuspegi zabalarekin baloratzen badugu, ikus dezakegu orain urte eta erdi eskasa ETAk indar handiko lehergailu bat eztandarazi zuela Burgosen eta bi guardia zibil hil zituela Mallorcan. Iragan urteko irailean eraso ekintza armatuak eteteko bere erabakia eman zuen jakitera. Atzo, su-eten iraunkor, orokor eta egiaztarria iragarri zuen. Indarkeriak dakarren mehatxuaren maila jaitsi dela da lehendabiziko gertaera objektiboa.

Bruselako Adierazpenaren eta Gernikako Akordioaren deiei kasu egin diela da bigarren gertaera objektiboa. Ekimena eta lidergoa herritarrengandik, alderdi politikoengandik eta nazioarteko hainbat izen esanguratsurengandik etorri dira. Horien guztien lanari esker, ETA igaro egin da indarkeriatik su-eten batera, eta egoera berriak konpromiso bat dakar borroka armatuaren amaierarekin.

Hirugarren gertaera objektiboa da ETA, agiri honen bidez, onartzen ari dela, halaber, indarkeriari tokirik ematen ez dioten Ezker Abertzalearen estrategia berria eta jarrera politikoak. Hasierako zalantzak eta gero, ETAk bere gain hartu du hartutako erabakia. Gertaera honek, berez, balorazio positiboa eskatzen du sortutako egoeraz.

Horregatik guztiarengatik, emandako urratsa oso garrantzitsua da eta inoiz ikusi gabeko aukera zabaltzen du bakea lortu eta elkarbizitza barneratzailea eraikitzeko.

Atzerabuelta zaila

Indarkeriaren behin betiko amaieraren aurre-urrats berehalakoa izan daiteke su-etenaren iragarpena. Bermatzea ezinezkoa izanik ere, badira atentatuetara eta mehatxura itzultzea eragozten duten hiru faktore gutxienez.

1- Nazioarteko egiaztapenari men egitea onartu du ETAk. Su-etenaren haustura gertatuz gero, areagotu egingo lirateke nazioartearen presioa ETArengan eta erakundearen baztekerketa.

2- Ezker Abertzaleak uko egin dio indarkeriari. Sektore politiko horren adierazpenak argiak izan dira. Bere proiektu politikoa soilik baliabide politikoak eta demokratikoak erabiliz garatu nahi du eta azaldu du erabaki hori errespetatzen ez duena bere esparru politikotik kanpo geratuko dela.

3- Euskal gizartearen ahobatezko borondatea, zeinak argi eta garbi erakusten duen indarkeria errefusatzeko jarrera. Itxaropen berri bat sortu delarik, oraindik mesfidantza batzuek tindatuta, su-etenaren haustura batek, 2006an gertatu zen bezala, gizarteak ETA areago gaitzestea ekarriko luke.

Etorkizuneko erronkak

Bake-prozesu itulezin baterako baldintzak lortzeko ahaleginetan amore ez ematea da garrantzitsuena. Zehazki, datozen hilabeteetan hauek izango dira erronkak:

1- Egiaztapena abian jartzea su-etena betetzen dela bermatzeko eta frogatzeko indarkeriaren behin betiko amaierara ari garela hurbiltzen. ETAk zorrotz bete behar du su-etena bere erabakiaren aldebakartasuna argitzeko eta uko egin behar dio prozesuaren bermatzaile izatera eraman dezakeen edozein tentaldiri.

2- Ezker Abertzaleak sustaturiko alderdi politiko berria legeztatzea. ETAk iragarritakoaz landa, soilik baliabide politikoak erabiltzeko erabakia erakutsi dute eta indarkeria errefusatu dute. Gainera, beren ekimena erabakigarria izan da ETAk pauso garrantzitsu hau emateko.

3- Gobernuak ETAren su-eten honi erantzun egokia eman diezaion lortzea. Bere estrategia aldatu behar du Gobernuak, bakerako bidea erraztuz, eragozpenak jartzeari utziz.

Azkenik, bukatu egin nahi dugu euskal herritar guztiak animatuz ahalegina, saiakera eta itxaropena mantentzera bakea lortzeko. Horri esker, badugu aukera berri bat. Bilaka dezagun aukera hori behin betikoa.

Ezagutzera eman

Lokarriren balorazioa ETAren agiriaz

Lokarri.org — 2011-01-10T09:00:00+01:00

Bihar Lokarrik prensaurrekoa eskainiko du ETAren su-etenaren iragarpenaren agiria sakonki azertuz. Dena den, gaur kaleratu den agiriaren edukiaz gure lehen iritzia helarazi nahi dugu.

Su-eten iraunkor, orokorra eta egiaztagarria iragarri ETAk argitaraturiko agiria urrats positiboa da Lokarriren iritzian. Irailean erakundeak ezagutzera eman zuen agiriarekin -zeinetan eraso ekintza armatuak eteteko erabakia jakinarazi zuen- zabaldutak indarkeriarik gabeko egoera sendotu eta zabaltzen du agiri berri honek.

Agiriaren bi osagai azpimarratu nahi ditu Lokarrik: batetik, ETAk onartu egiten du elkarrizketa eta negoziazioa direla konponbidea bilatzeko baliabideak eta, bestetik, onartu egiten du ere bai protagonismoa orain alderdi politikoei eta herritarrei dagokiela. Berrikuntza interesgarria eta itxaropentsua dira bi osagai horiek.

Bukatzeko, Lokarritik adierazi nahi dugu gure desioa dela ETAk indarkeriaren behin betiko amaiera iragarriko duen unea iristea. Dena den, agiri hau kaleratuta, bakea lortzeko aukera hurbilago dago. Euskal gizartearen errefusa indarkeriari, Ezker Abertzalearen apustua baliabide baketsu eta demokratikoen alde, Gernikako Akordioa eta nazioarteko komunitatearen sostengua giltzarri dira aukera berri bat edukitzeko. Orain, lanean eta ekin eta ekin jarraitzea dagokigu orain indarkeriaren amaiera itzulezina izan dadin.

Ezagutzera eman

Zigor arina delitu larri baterako

Lokarri.org — 2011-01-03T09:00:00+01:00

Torturak prebenitzeko mekanismoak berraztertu behar ditu Gobernuak, inplikatu guztien identifikazioan lagundu eta Kode Penalaren erreforma bultzatu.

Atzo eman zen ezagutzera ETAko bi kide torturatzeagatik lau guardia zibil zigorra jarri dien ebazpena. Perez Rubalcaba ministroaren bertsioarekin kontraesanean eman da epaia -torturak izan zirela erabat ezeztatu zuen- eta ikerketak iraun bitartean Barne Ministerioak eragozpenak jarri zituen arren -ez zuen erraztu inplikaturiko Guardia Zibil guztien identifikazioa-.

"Sistemak ez duela funtzionatzen erakusten du ebazpen honek" esatera aurreratu da Eusko Jaurlaritza. Errealitatean, zigor izaten bukatu duen tortura kasu bat da "eskua joan" zitzaielako eta eragindako zauri larriak zirela-eta atxilotuetako bat erietxera eraman behar izan zutelako. Beste kasu batzuetan, froga hain nabariak erakusteko ezintasuna eta terrorismoaren aurkako legeek baimentzen duten opakutasuna lagungarri dira zigorrik ez egoteko.

Emandako ebazpenaren edukiari dagokionez, lau urteko espetxe zigorra eta zortzi urteko inhabilitazioa agintzea oso zigor arina da. Kontuan hartu behar da torturak egin dituzten pertsonak herritar guztien izenean jarduten direla eta beren eginbeharra dela delituak jarraitzea legeak agintzen dituen esparruetan. Zigortutakoek botere hau baliatu dute delitu larrienetako bat egiteko. Ez dituzte urratu soilik pertsona guztien Giza Eskubideak, herritarrek erakundeengan jarritako konfiantza ere higatu dute.

Argudio hauek kontuan harturik, Lokarrik honakoa eskatu nahi du:

1- Alfredo Perez Rubalcaba barne ministroak publikoki zuzendu behar ditu 2008ko urtarrilean egindako adierazpenak, zeintzuetan torturak egon zirela ukatu zuen.

2- Gertaerak argitzen lagundu behar du Barne ministroak eta tribunalei erraztu beharko lieke atxiloketan eta tortura-delituan parte hartu zuten guardia zibil guztien identifikazioa. Bai ministroa bai eta Guardia Zibilaren arduradunak ere delitu bat gauzatu duten pertsonak estaltzen ariko liratekeela esan nahiko luke aurkakoak.

3- Gobernu Zentralak zehatz-mehatz berraztertu behar ditu prebentzio eta ikerkerta mekanismoak tortura kasuetan. Eraginkorrak ez direla erakusten du ebazpen honek Gobernuak ez duelako kolaboratzen eta sistematikoki ukartzen duelako torturak gauzatu direla.

4- Kode penalaren erreforma bultzatu behar du Gobernu Zentralak zigorrak gogortzeko tratu txarrengatik eta torturengatik, larritasun bereko beste delitu batzuekin proportzionaltasuna mantentzeko.

Azkenik, Lokarrik nabarmendu du elkarbizitza barneratzaile bat eraikitzeko ezinbestekoa dela pertsona guztien Giza Eskubide guztiekiko errespetua. Betebehar hau hedagarria da guztientzat, baina bereziki garrantzitsua da eta exijitu beharra dago Estatuaren kasuan, herritar guztiak babestearen ardura haren eskuetan dagoelako.

Ezagutzera eman

Segiko kideen aurkako operazioa gaitzetsi du Lokarrik

Lokarri.org — 2010-12-20T12:00:00+01:00

Operazio honek ez ditu errespetatzen Zuzenbide Estatu baten oinarrizko bermeak. Atxilotuen erruduntasuna aurresuposatzen da soilik Segi-ko ekintzetan parte hartzeagatik. Horregatik, aske jar ditzatela eskatu nahi du Lokarrik.

Lokarri akordioaren eta kontsultaren aldeko herritarren Sareak honako gogoetak eman nahi ditu ezagutzera Segiko kide izatea leporatuta hainbat pertsonaren atxiloketen ingruruan:

1- Kontaminazioaren praktika

Segi, Jarrai eta Haika bezala, legez kanporatuak eta debekatuak izan ziren eta beren buruak espetxeratuak ETAko kide izatea leporatuta. Lokarrik uste du ekintza politiko bat garatzeagatik zigortu zituztela, eta ez delitu ekintzak gauzatzeagatik. Maltzurra da auzitegien erabaki hori, izan ere, ebazpen horretatik abiatuta, Jarrai, Haika edo Segik proposaturiko planteamendu berberekin antolatzen den edozein pertsonari zuzenean ETAkoa izatea egotziko zaio. Auzitegi Nazionalak oinarri bezala erabili duen froga bakarra da hori aurten abian jarri diren bi operazioei gehitzen zaizkien atxiloketa gehiago gauzatzeko.

2- Erruduntasun presuntzioa

Errugabetasun-presuntzia da Zuzenbide Estatu ororen oinarrietako bat. Delitu bat egin izanaren zantzu frogagarrietan egon behar du oinarriturik herritar bat atxilotzeko erabakiak. Kontaminazioren ondorio nagusi eta larriena hau da: Segikoa izateak erruduntasuna aurresuposatzen du, eta akusatuari egokitzen zaio bere errugabetasuna frogatzu behar izatea.

3- Justiziaren funtzionamendu ez bermatzailea

"Egunkaria" auziagatik edo Anoetako proposamenaren aurkezpenagatik absoluzio-epaiak eman eta gero, epaiak Justiziaren funtzionamendu egokiaren adierazgarri direla esan dute berehala zenbait alderdi politikok. Ez da horrela. Hasierako unetik funtzionatu behar du ongi justiziak, ikerketa bat abiatzen den unetik. Herritar batzuk atxilotu izanak froga bakar bezala jarriz antolakunde politiko batean parte hartu dutela eta herritar horiek hainbat urtez luza daitekeen prozesu judizial batera (zeinetan, beren errugabetasuna frogatu beharko duten) eramanarazteak ez du erakusten Justiziaren funtzionamendua ona denik, azkenik absolbituak izateko aukera egonik ere. Hala eta guztiz ere, pertsona hauen bizitzan egindako kalteak konponezinak dira.

Errugabetasun-presuntzioari errespetuagatik, politikan parte hartzea ez delako delitu bat eta atxilotutako pertsona hauentzat operazio honek izan ditzakeen ondorio larriengatik, berehala aska ditzatela eskatu nahi du Lokarrik.

Aukera-une honetan beharrezkoa den hausnarketa bat helarazi nahi du Lokarrik. Bakea lortzeko beharrezkoa da Giza Eskubide guztiak errespetatzeko, bizitza politiko eta sozialean era ziurrean parte-hartzesko askatasuna barne. Ekintza judizial hauek oztopo bat dira helburu hori lortzeko.

Ezagutzera eman

Ezker Abertzaleak bultzaturiko antolakunde politiko berriaren berehalako legalizazioa

Lokarri.org — 2010-11-29T12:00:00+01:00

Ezker Abertzaleak bultzaturiko antolakunde politiko berriaren jarduera politikoaren oinarrien aurkezpena gauzatu delarik, Ezker Abertzalearen berehalako legalizazioa eskatu nahi du Lokarrik honako arrazoiengatik:

-Soilik bide demokratikoen aldeko antolakunde politiko berriaren konpromisoa argi geratu da. Indarkeriaren erabilpenaren eta indarkeriazko mehatxuaren errefusa oinarrizko printzipio bezala finkatu duelako helburu politikoak lortzeko. Are gehiago, bortxaketa-indarkeriak tokirik ez duen estrategia garatzeko bere borondatea erakutsi du.

-Giza eskubideak errespetatuz eta soilik bide baketsu eta demokratikoen bitartez ariko da antolakunde politiko berria.

-Antolakunde berriaren aurkezpenak berresten du Ezker Abertzalearen aldebakartasuna bere erabakiak hartzeko orduan, etorkizunean ETAk har ditzakeen erabakietatik landa.

-El Gobierno sitúo a Ezker Abertzalea en el dilema de elegir entre "edo lehergailuen, edo bozken" artean hautatzeko ezbaian jarri zuen Gobernuak Ezker Abertzalea. Hautua argi geratu da: bozkak eta jardun politiko baketsua eta demokratikoa.

Horregatik guztiarengatik, Alderdien Legeak finkaturiko baldintza guztiak bete ahalko ditu antolakunde politiko berriak. Gobernuak bere legalizazioa erraztu beharko du. Aurrerapauso erabakigarria litzateke askatasun demokratikoekiko, aniztasunarekiko eta aukera berdintasunarekiko errespetua bultzatzeko. Aurrekaririk gabeko abagune honetan bere ekarpena egiteko erantzunbeharra du Gobernuak elkarbizitza baketsua eta barneratzailea lortzeko.

Ezagutzera eman

Bake-prozesu itzulezin baterako baldintzak

Lokarri.org — 2010-11-15T12:00:00+01:00

Indarkeriaren amaiera, Ezker Abertzalearen legeztatzea eta herritarren partaidetza

-Errepikatu behar ez diren akatsak egin ziren 2006ko bake-prozesuan
-Elkarbizitza barneratzailea da bake-prozesu baten helburua

Hurrengo bake-porzesu bat itzulezina izateko beharrezko hiru baldintza nagusiak proposatzen dituen argitalpena aurkeztu du Lokarrik. Aurreko prozesuan oinarriak ez ziren izan nahikoa egonkorrak. Bake-prozesu berri bat hasteko aukeraren aurrean, garrantzitsua da aurreko prozesuko akatsak ez errepikatzea.

2006an egindako akatsak

2006ko bake-prozesu baten azterketak egin ziren akats zenbait identifikatzen laguntzen du. ETAk su-etena iragarri zuen, baina indarkeriara itzultzeko aukerak prozesua tirabira giro batera eraman zuen, ETAk elkarrziketa politikoaren tutelaje betekizuna hartzen saiatu baitzen. Indar politiko guztiek ezin izan zute parte-hartu aukera berdintasunean, mehatxurik eta inongo mugaketarik gabe. Batasuna legez kanporatua zegoen eta, horren ondorioz, elkarrizketak isilpean garatu ziren eta, horrenbestez: 1) elkarrizketa uzteak ez zuen inongo kosterik izan, 2) gizarteak ez zuen izan partaidetza zuzenerako esparrurik eta 3) prozesuaren aurkako sektoreen zitalkeria areagotu zuen gai negoziaezinei buruzko elkarrizketak garatzen ari ziren mehatxuaren aurrean.

Bake-prozesu itzulezin baterako baldintzak

1) Indarkeriari amaiera jarri behar dio ETAk, Giza Eskubideekiko errespetuagatik eta denek parte hartu ahal dezaten bake-prozesu batean indarkeriak dakarren mehatxurik gabe.

Indarkeriaren amaiera lehenbailehen gertatzea nahi du Lokarrik, ETAren aldebakarreko su-eten iraunkor eta egiaztagarri batetik hasita, Bruselako Adierazpenak eta Gernikako Akordioak eskatzen duten moduan.

2) Ezker Abertzaleak legearen baitan egon behar du, bake-prozesuan eta jarduera politikoan gainerako alderdi politikoek dituzten aukera berberekin parte-hartzeko eskubidea baitu. Gainera, legeztatua izanez gero, elkarrizketa prozesu bat ofiziala izatea ahalbidetuko du, sekretismoa eragotziz.

Lokarri hasiera-hasieratik agertu da Alderdien Legearen eta Batasunaren ilegalizazioaren aurka. Baina Ezker Abertzaleak indarkeria argi eta garbi errefuxatuko balu, emaitza oso positiboak izango lituzke: zalantzak argituko lituzke indarkeria-ezarekiko bere konpromisoaz eta zaildu egingo luke Gobernuak edozein aitzakia bilatzea eragotzi ahal izateko Ezker Abertzalea legezkotasunera itzultzea.

3) Herritarrak izan behar dira protagonista, bake-prozesu baten hartzailea herritarrak baitira. Hurrengo prozesu batek gardena izan behar du, herritarren partaidetzara zabalik eta emaitzak herritarren nahiaren menpe egon behar du.

Bake-porzesu baten helburua

Helmuga argia eta partekatua izateak berau lortzeko ibili beharreko bidea zehazten laguntzen du. Helmuga zehatza proposatzen du Lokarrik bake-prozesu baterako, lau baldintza nagusi hauetan oinarrituriko elkarbizitza barneratzailea: 1) inongo indarkeriarik ez egotea eta erabateko konpromisoa pertsona guztien Giza Eskubideeko errespetuarekin, 3) desadostasunen kudeaketa demokratikoa elkarrizketa eta akordioaren bidez eta 4) biktima guztiak aintzatetsi, babestu eta beren kaltea konpondu eta konpromiso bat indarkeria eta giza eskubideen urraketa ez errepikatzearekin.

Elkarrizketa sustatzearen garrantzia azpimarratu nahi du Lokarrik. ETAren indarkeria amaituta eta Ezker Abertzalea legeztatuta, ilusio eta itxaropen handia egongo dira. Elkarrizketa politikoa sustatzeko ordua izango da. Eszenatoki berri horretan, orain arte konpondu ez diren desadostasunei eutsi ahal izango zaie, besteak beste gai hauei: identitatea, proiektu politiko guztien garapena edo memoria. Bide bakarra dago hori lortzeko: elkarrizketa.

Horregatik, oso positibotzat jotzen du Lokarrik atzo Brian Currinek aurkezturiko Harremanetarako Nazioarteko Taldearen eraketa. Egia da alderdi politikoak eta euskal herritarrak direla elkarrizketaren protagonistak, egia da elkarrizketak bere isla izan behar duela erakundeetan, baina egia da ere bai elkarrizketa bultzatzeko orduan nazioartearen partaidetza egotea elkarrizketa errazteko ekarpen garrantzitsua dela. ETAren indarkeriaren amaiera eta Ezker Abertzalearen legeztatzea urrats erabakigarriak dira, baina bizitza barneratzaile batera abiatzeko euskal gizarteak ibili beharko duen bide zabalago baten hasiera baino ez dira.

Zabaldu

Harremanetarako Nazioarteko Taldearen eginkizuna eta funtzioa

Lokarri.org — 2010-11-11T12:00:00+01:00

Bruselako Adierazpenaren bultzatzaile Brian Currin Euskal Herriko eragile politiko gehienen artean galdeketak egiten saiatu da Harremanetarako Nazioarteko Taldearen (NHT) eginkizuna zehaztea xede. Arrakasta izan du, eragile gehienekin hartu-eman eraikitzaileak izan ditu. Harreman horien ondorioz, honako eginkizun nagusia zehaztu da HNTrentzat:

Euskal Herrian normalizazio politikoa arindu, erraztu eta ahalbidetzea

HNTrentzat normalizazio politikoak honako ezaugarriak izan beharko lituzke: eszenatoki politiko barneratzaile eta garden bat, soilik baliabide demokratikoetan oinarritua eta indarkeriarik edo edozein jatorritako indarkeria-mehatxuarik gabe. Eredu horrek bere baitan hartuko luke gehiengo zabalak hitzarturiko marku juridiko eta politikoa, zeinetan bermatuta egongo litzatekeen proiektu demokratiko guztiak defenditu eta gauzatu ahal izateko beharrezkoa den eszenatoki egonkor bat.

Hori guztia, euskal gizartearen borondate demokratikoarekiko, aniztasun politikoarekiko, printzipio demokratikoekiko eta indarrean diren prozedura eta arauekiko errespetu printzipio batetik abiatuta.

Bruselako Adierazpenaren sinatzaileek argi eta garbi zuzendu dute Adierazpen horrek ordezkatzen duen nazioarteko komunitatearen eskaera.

Bruselako Adierazpenaren sinatzaileek eskatu bezala, ETAk aldebakarreko su-eten iraunkor eta egiaztagarria iragartzen duenean, HNTk bere lanari ekingo dio.

Aurreko guztiaren arabera, HNTren eginkizun zehatza hau izango da:

Ezker Abertzalearen legalizazioa bultzatu, erraztu eta ahalbidetzea;

Konfiantza eragiten duten neurriak bultzatzea, hala nola:

-bere jarduera politikoa murrizten dituen neurri bereziak gainditzea eta

-espetxe-politika egungo politika eraldatu eta berrira egokitzea;

Alderdiak animatu eta zerbitzatu, hala eskatzen den neurrian, elkarrizketa politikorako egutegi bat prestatuz eta garatuz;

Indar politikoek eskatzen duten neurrian, elkarrizketa eta negoziazio alderdianitza bultzatu, erraztu eta ahalbidetzea, inongo baldintzarik gabe eta emaitza aurretik zehaztu gabe, Mitchell Printzipioen menpe. Gatazka politikoa gainditzeko akordio barneratzaile bat lortzea litzateke elkarrizketa eta negoziazio alderdianitzaren helburua;

Aldeek eskatuta, bitartekari jardutea blokeoa gertatuz gero;

Bake-prozesu arrakastatsu bat egiazki posible dela helaraztea gizarteari, hori sinesteko konfiantza sortzea.

Partekatu

�Torturarik ez!� lemapean urriaren 30ean, larunbatean, Donostian egingo den manifestazioan parte hartzera deitu nahi du Lokarrik

Lokarri.org — 2010-10-28T12:00:00+01:00

Lokarri akordioaren eta kontsultaren aldeko herritarren Sareak bere kezka agertu nahi du azkenaldian izan diren tortura salaketen aurrean, honako gogotetan oinarriturik:

1. Torturaren aurkako Nazio Batuetako Batzordeak eta Torturaren Prebentziorako Europako Batzordeak askotan ohartarazi dute Espainiako torturaren praktikaz eta bere kezka sakona adierazi dute atxilotutakoen bermeen gabeziek bere horretan darraitelako eta gertaera horien ikerketaren gabeziengatik eta atzerapenarengatik. Alde honetatik, Gipuzkoako Entzutegiko fiskalaren adierazpenak azpimarratu nahi ditu Lokarrik, zeintzuetan frogatutzat eman duen Igor Portu eta Mattin Sarasolak tortura larriak jaso zituztela haien atxiloketak gauzatu zituzten eta zaintzaile egotea egokitu zitzaien guardia zibilengandik, eta tortura salaketa mantendu du horietako lauren aurka eta lesio salaketa hamarren aurka.

2. Torturaren aurkako Hitzarmenak sinatu eta berretsi ditu Estatu espainiarrak eta aipatu ikerlanak testuinguru horretan garatu dira. Lokarriren iritzian, Estatu espainiarrak aintzat hartu beharko luke atxilotutako pertsonen oinarrizko giza eskubideekiko errespetua bermatzeko beharrezkoak diren baldintzak jartzeko eskaera, bai eta inkomunikazio erregimena indargabetzeko eskaera ere. Inkomunikazioak dirauen bitartean atxilotutako pertsonak ezinezko du bere konfiantzazko abokatu batekin ez eta mediku batekin harremanetan jartzea eta bere senideei ezin die jakinarazi atxilotuta dagoela. Erregimen hori, beraz, mesedegarri da tratu txarrak jazotzeko.

Lokarritik, giza eskubideak osotasun etiko bat bezala ulertzen ditugu, salbuespenik gabe. Gauden unean gaudela ere, bakerako aukerak egon edo ez, inork ez du pairatu behar giza duintasunari zuzenki eraso egiten dion tratu iraingarririk.

Horrela bada, datorren urriaren 30ean, larunbatean, 17.30ean Donostiako Antiguoko tuneletik "Torturarik ez!" lemapean abiatuko den manifestazioan parte hartzeko deia egin nahi du Lokarrik, eta herritarrak oinarrizko giza eskubide baten aldeko mobilizazio honetan parte hartzera animatu nahi ditu.

Partekatu