கட்டுமானத்துறை

Water Level Alarm

2025-10-12T11:44:00.003+05:30

என்ன செய்வது, பொழுது போகவில்லை என்றால் இந்த மாதிரி ஏதாவது பண்ணி பார்க்க வேண்டி இருக்கு.
வீட்டில் RO plant இல் இருந்து வெளியேறும் தண்ணீரை கால் கழுவ மற்றும் குளிக்க என்று உபயோகப்படுத்துவோம். RO வில் இருந்து வரும் தண்ணீரை பாக்கெட் இல் பிடித்து குளியல் அறைக்கு கொண்டு போவோம். சில சமயங்களில் தண்ணீர் நிரம்பி வழிந்து பிரச்சனையை உருவாக்கும். திடீரென்று இன்று அதற்கு ஒரு யோசனை தோன்றியது, நிரம்பிய உடன் விளக்கு எரிய வேண்டும் அதே சமயத்தில் buzzer ஒலிக்க வேண்டும்.ஒரு transistor,9v battery and buzzer & ஒரு LED. அவ்வளவு தான். வீடியோ பாருங்கள்.

அமானுஷ்ய நிகழ்வுகள்.

2021-05-07T21:39:00.002+05:30

உலகில் பலருக்கு இதுபோல் விதம்விதமான நிகழ்வுகள் ஏற்பட்டிருக்கும் அதில் எது உண்மை எது பொய் என்று புரிந்துகொள்ளமுடியாத நிலையில் வாழ்க்கையின் அடுத்த நிலையை நோக்கி ஓடிக் கொண்டிருப்போம் . கொஞ்ச நாள் கழித்து அப்படியே அதுவும் மறந்திருக்கும் .காரணங்களை அலசினால் கிடைப்பது என்னவோ குழப்பம் தான் .

எனக்கு நடந்ததை சொல்கிறேன்.

என் நினைவுக்கு முதலில் வருவது என்னுடைய 20வது வயது காலத்தில் நடந்தது. மும்பை மாமா வீட்டுக்கு போயிருந்தேன் . புது இடம் . இரவு படுக்கும் போது "கழிவறை இங்கு இருக்கு,குடி தண்ணீர் இருக்கு" என்று சொல்லிவிட்டு யாரும் அழைப்புமணி அடித்தால் திறக்காதே என்று சொல்லிவிட்டு படுத்துக்கொண்டார். நல்ல தூக்கம்,எப்போது என்று நினைவில்லை ஆனால் அழைப்பு மணி அடித்தது போல் இருந்தது. எழுந்து பார்த்துவிட்டு தூங்கிவிட்டேன் . காலை சுமார் 5 மணி இருக்கும்,மாமா அலுவலகம் செல்வதற்காக எழுந்து குளித்துவிட்டு சாமிக்கு பூஜை செய்துகொண்டிருந்தார். மணி அடிக்கும் சத்தம் தூக்கத்தை கெடுக்க படுக்கையை விட்டு எழுந்து உட்கார்ந்துகொண்டிருந்தேன். நான் பார்த்துக்கொண்டிருக்கும் போதே உள் அறையில் இருந்து ஒரு வெளிச்சம் படு வேகத்தில் என்னை கடந்து பூட்டி இருக்கும் வாசற்கதவையும் கடந்து வெளியே போனது. நான் நிதானிப்பதற்குள் எல்லாம் நடந்து முடிந்துவிட்டது.

இந்த வெளிச்சம் என்ன?அது எப்படி வந்தது? .. புரியாத புதிர்.

ஒரு நிகழ்வு நடக்கப்போகும் தினத்துக்கு 2 மாதம் முன்பு , ஒரு மதிய வேளை சுமார் 2.30 இருக்கும் . பெற்றோர் இருக்கும் வீட்டுக்கு போகிறேன்.எல்லோரும் தூங்கிக்கொண்டு இருக்கும் நேரம்.கதவை தட்டியவுடன் அம்மா வந்து திறக்கிறார்.கதவுக்கு நேர் எதிரே ஒரு கழிவறை , கதவு திறந்திருக்கு ,ஏதோ ஒரு வெள்ளை உருவம் கையில் தாங்கு குச்சி வைத்துள்ளது அதே சமயத்தில் வேஷ்டியை சரி செய்துகொள்வது போல் தோன்றி மறைந்தது.அப்பா மற்றொரு அறையில் படுத்துக்கொண்டிருந்தார்.இருவர் மட்டுமே உள்ள வீட்டில் இது யார் புதியவர்? இது வரை யாரிடமும் சொன்னதில்லை, அப்படியே மறந்து போய்விட்டேன்.

நவம்பர் 2018 ,மருத்துவமனையில் அப்பா சிகிச்சை எடுத்துக்கொண்டிருக்கிறார். ICU வில் இருப்பதால் அவ்வப்போது தேவைப்படும் சமயத்தில் மட்டும் வீட்டுக்கு வந்து அம்மா செய்து வைத்திருக்கும் உணவை எடுத்துப்போய் கொடுப்பேன். அன்று Discharge செய்யலாம் என்று சொன்ன மருத்துவர் தன் மனைவி (இவரும் ஒரு மருத்துவர் )ஒரு முறை பார்த்த பிறகு முடிவு செய்யலாம் என்றார். அவர் வருகைக்காக காத்திருந்தோம் .இதற்கிடையில் அப்பாவை பார்க்க வந்த மச்சினரிடம் ஓரளவு அடையாளம் கண்டுகொண்டு சைகையில் பதில் சொன்னார். மருத்துவர் வர நேரமானதால் வீட்டுக்கு போய் இரவு சாப்பாட்டை எடுத்து வரலாம் என்று போனேன். வீடு முதல் மாடியில் . மேலே ஏறுவதற்கு முன்பு படிக்கு கீழே மறுபடியும் ஒரு உருவம் கையில் குச்சியுடன் ஏதோ குழப்பத்தில் சுற்றிக்கொண்டு இருந்தது. சரியான நிகழ்வாக இல்லையே என்று யோசித்துக்கொண்டே மேலே போய் அம்மாவிடம் கஞ்சி வாங்ககிக்கொண்டு மருத்துவ மனைக்கு போனேன் . போகும் போதே பல முறை தொலைப் பேசி அழைப்பு வந்தது , எடுக்காமல் மருத்துவமனை வாசலில் வண்டியை நிறுத்தினேன். என் அருகில் வந்த ஒருவர் என் அப்பா பெயரை சொல்லி அவருக்கு நீங்கள் உதவியாளரா? என்றார்.

"ஆமாம்" என்றேன்.

"வரவேற்பறையில் பல முறை கூப்பிட்டார்கள் " என்றார். சரி பார்க்கிறேன் என்று சொல்லிவிட்டு மேலே சென்றேன். காலையில் இருந்து காத்துக்கொண்டிருந்த மருத்துவர் அங்கு நின்றிருந்தார். என்னவென்று கேட்டேன். பக்கத்தில் இருந்த மருத்துவரும் , செவிலியரும் அப்பாவுக்கு CPR செய்துகொண்டிருந்தார்கள். Monitor ஐ பார்த்தேன். எல்லாம் முடிந்துவிட்டது என்று தெரிந்தது.நெற்றி,வயறு பக்கம் மட்டும் கொஞ்சம் சூடு இருந்தது. ECG எடுத்து உறுதிப்படுத்தினார்கள்.

இப்போது அந்த நிழல் உருவங்கள் என்ன? யார் அது?உயிர் முடிவதற்கு முன்பே உடம்பை விட்டு வெளியே வருகிறதா ? என்னிடம் பதில் இல்லை.

என் தந்தை

இதே சமயத்தில் என்னுடைய மனைவி கோயம்பேடுவில் சோபாவில் அமர்ந்து டிவி பார்த்துக்கொண்டு இருந்தார் . மாலை 6 மணியாகிவிட்டது கார்த்திகை மாதம் வீட்டு முகப்பில் விளக்கு ஏற்றவேண்டும் ஆனால் ஏதோ அசதியில் உட்கார்ந்துகொண்டு இருந்தார். TV வுக்கு அருகில் என்னுடைய பெற்றோர் மற்றும் மாமனார் & மாமியார் Photos தனித்தனியாக மாட்டி இருக்கும் . என்னுடைய பெற்றோர் படத்தில் இருந்து ஏதோ ஒன்று அப்படியே நகர்ந்து போவது போல் தோன்றி இருக்கு . அதை அவர் அப்போது பெரிதாக எடுத்துக்கொள்ளவில்லை ஆனால் நான் 7 மணிவாக்கில் தொலைபேசியில் விஷயத்தை சொன்னவுடன் தான் அதிர்ச்சியாக இருந்தது. இதற்கெல்லாம் காரண காரியம் நம்மால் புரிந்து கொள்ளமுடியவில்லை . சாவதற்கு முன்பே பல இடங்களில் பயணப்படுவது எப்படி ?

மீண்டும் ஒரு நிழல் உருவம் இம்முறை sofa வில் உட்கார்ந்து கொண்டிருக்கிறது . நான் காயவைத்த துணியை மடித்துக்கொண்டிருக்கேன். நன்றாக நிதானித்து பார்க்கிறேன். குனிந்த தலை, கொஞ்சம் நிறம் உள்ள மனிதர் . சுமார் 2 மாதம் கழித்து மற்றொரு மரணம்,நெருங்கிய சொந்தத்தில் இருந்து. வந்தது யார்?

ஒரு சில முறை யாரும் இருக்க மாட்டார்கள் ஆனால் என் மீது மெலிதாக மோதிய மாதிரி இருக்கும். மிக சமீபத்தில் ஒரு சிறிய தலையணையை மெத்தை மீது வீசுகிறேன் , அது நேரடியாக விழாமல் எதன் மீதோ பட்டு வேகம் குறைந்து விழுகிறது. இப்படி பல பல நிகழ்வுகள்.

அப்பா இறந்த மறு நாள்,சுடுகாட்டுக்கு கொண்டு போய் மந்திரம் சொல்லி நெஞ்சில் நெருப்பு வைத்து உள்ளே தள்ளிவிட்டார்கள். அவ்வப்போது கண்ணீர் முட்டினாலும் பெரிதாக தூக்கம் வெடிக்கவில்லை. உள்ளே எரிந்துகொண்டிருக்கிறார் வெளியே சுவாமிகள் மந்திரம் சொல்லி என்னையும் சொல்லச்சொல்கிறார் . ஒரு சில மந்திரங்களுக்கு பிறகு என்னால் சொல்ல முடியவில்லை. கண்ணீர் கொட்டுகிறது ,என் முகம் என்னுடைய அப்பா போல் மாறுகிறது அதை என்னாலேயே பார்க்க முடிகிறது. நான் எங்கப்பாவாக மாறுகிறேன். வாத்தியார் என் நெஞ்சை தடவிக்கொடுத்து விட்டு கொஞ்ச நேர ஆசுவாசத்திற்கு பிறகு தொடர்ந்தார். திரும்ப திரும்ப யோசிக்கிறேன்,இப்படிப்பட்ட உணர்வு இதுவரை எங்கும் படித்ததில்லை, யாரும் சொல்லி கேட்டதில்லை இருந்தாலும் எப்படி வந்தது?

புரியாத புதிர்.

LED Backlight Tester.

2020-12-22T20:54:00.002+05:30

# LED Tester

# Backlight Tester

# மின்னனுவியல்

எச்சரிக்கை : High Voltage. Don't try when you are not sure of . Shocking Hazard prevails.

இந்த மாதிரி ஒரு கருவியை நாமே செய்து பார்க்கவேண்டும் என்ற ஆவல் சுமார் 3 வாரங்களாக உள் மனதில் ஓடிக்கொண்டிருந்தது. தேவைப்படும் சாமான்கள் என்னவோ சில தான் என்றாலும் அது கை வசம் இல்லாததால் அதை வாங்குவதற்கான நேரத்தை எதிர்பார்த்துக்கொண்டிருந்தேன். இதற்கிடையில் YouTube யில் இருக்கும் பல வீடியோக்களை பார்த்து என்னுடைய புரிதலை மேம்படுத்திக்கொண்டிருந்தேன் .

இது எதற்கு என்றால் , முக்கியமாக LED Lights (Including LED back light) வேலை செய்கிறதா இல்லையா என்பதை இதன் மூலம் அறிந்துகொள்ளலாம் . இதற்கான Ready Made சாதனம் உள்ளது அது சுமார் ரூ 800 யில் இருந்து இருக்கிறது. பணம் கொடுத்து அப்படியே உபயோகிப்பது என்பது ஒருபுறம் இருந்தாலும் அதை நாமே செய்து அதை பரிசோதிக்கும் போது ஏற்படும் ஆனந்தம் ஒருபுறம் இருந்தாலும் அதன் வேலைத் தன்மை மேலும் பல புரிதலுக்கு வழிகளுக்கு வழிவிடக்கூடும் என்பதால் அதன் வழியே போனேன் .

தேவையான சாமான்களின் பட்டியலுடன் வடபழனி மெர்சிக்கு போனேன் . ஒரு சில சாமான்கள் கிடைக்கவில்லை. கிடைத்தவற்றை மட்டும் வாங்கிக்கொண்டு வந்தேன்.

கீழே உள்ள மாதிரி செய்து பரிசோதித்தேன் முதலில் 42 v கொடுத்தாலும் பிறகு ஏனோ வேலை செய்யவில்லை. பல முறை ஏதோ மாற்றி பார்த்தாலும் வெற்றி கிட்டவில்லை .

Input 230V (AC) அதுவே Output = input*1.414 (DC) கிடைக்கவேண்டும் ஆனால் கிடைக்கவில்லை . Input கொடுத்துவிட்டு Bridge Rectifier இல் கிடைக்கும் வோல்ட்ஜ் பார்த்தால் அங்கு பிரச்சனை இருப்பது தெரிந்தது. ஒரு IN4007 வேலை செய்யவில்லை. அதை மாற்றிய பிறகும் வெற்றி கிட்டவில்லை. Capacitor மாற்றி பார்த்தேன் , ஹுகும் .. எங்கோ தப்பு, என்னவென்று தெரியவில்லை .

பழைய மாடலை அப்படியே தூக்கி வைத்துவிட்டு புதிதாக செய்ய ஆரம்பித்தேன் .

Bridge Rectifier வரை செய்துவிட்டு Main Supply கொடுத்துவிட்டு வெளிவரும் வோல்ட் ஐ கண்காணித்தேன், இப்போது சரியாக 301 வோல்ட் DC கொடுத்தது . மீதி Circuit முடித்துவிட்டு பல வித எல்சிடி விளக்குகளை சோதனை செய்தேன் . எல்லாம் சரியாக வேலை செய்தது. இது எல்லாவற்றையும் ஒரு பெட்டியில் போட்டு அதற்கென்று வாங்கிய உபகரணங்ககளை இணைத்து முழுவதும் செய்துமுடித்துவிட்டேன். இனி 230 v AC மூலமாகவே எல்லாவித LCD களை பரிசோதித்துவிடலாம்.

இதன் தொடர்பில் பல காணொளிகள் youtube இல் உள்ளது.

Disclaimer: Don't Try this without adequate knowledge.

USB Light.

2020-08-15T11:17:00.001+05:30

என்னுடைய கணினியில் Keypad Lighting இல்லை. சில சமயங்களில் அதுவும் அறையில் வெளிச்சம் குறைவாக இருக்கும் போது இக்குறை பெரிதாக தெரிந்தது. சந்தையில் USB light நூறு ரூபாய்க்கு கிடைத்தாலும் அதை வாங்குவது தள்ளிக்கொண்டே போனது.

இரண்டு நாட்களுக்கு முன்பு தரையில் ஒரு டப்பாவை பார்த்ததும் பொறி தட்டியது. மனைவியிடம் கேட்ட போது , தூக்கி போடவேண்டியது தான் வேண்டுமென்றால் எடுத்துக்கொள்ளுங்கள் என்றார். அடுத்து Big Shopper உடைந்த கைப்பிடி ,இதுவும் குப்பைக்கு என்று கிடந்ததை எடுத்துக்கொண்டேன்.

எப்போதோ வாங்கிய 4 V LED, அதையும் எடுத்துக்கொண்டேன். மடிக்கணினி USB யில் இருந்து ஏறக்குறைய 5 V கிடைக்கும் , மீதி ஒரு வோல்ட்யை குறைக்க தகுந்த Resister போட்டால் முடிந்தது. ஆனால் இதன் பயன்பாடு சில வினாடிகள் என்பதால் Resister இல்லாமல் அப்படியே இணைத்தேன். வேலை முடிந்தது. தேவைக்கு ஏற்ற USB விளக்கு தயராகிவிட்டது.

ஒரு Slide Switch சும்மா கிடந்ததையும் உபயோகப் படுத்திக்கொண்டேன்.

அழகாக இல்லாவிட்டாலும் அதன் பணியை செய்கிறது.

Voltage Stabilizer.

2020-03-17T17:14:00.000+05:30

எச்சரிக்கை: அனுபவம் மற்றும் தொழிற்சார் அறிவு உள்ளவர்களுக்கு மட்டுமே.

இந்த ஸ்டிபிலைசேர் வாங்கி சுமார் 10~15 வருடம் இருக்கலாம்.மிகவும் நியாயமாகவே உழைத்து இருக்கிறது.அப்பொது வாங்கியபோது ரூ 600 என்று நினைவு.

கடந்த சில நாட்களாக அதில் இருந்து " கொர் கொர்" என்று சத்தம் வர ஆரம்பித்தது இருந்தது. நமக்கு தான் பிரித்து மேய்வது இஷ்டமான வேலை என்பதால் திறந்து பார்த்தேன், எரிந்த பாகங்கள் எதுவும் கண்ணில்படவில்லை . ரிப்பேர் என்று செய்யக்கூடிய எதுவும் இல்லாமல் இருந்தது. திறந்த மாதிரியே மூடி வைத்துவிட்டேன் . சரி, வோல்டேஜ் ஏற்ற இறக்கத்தில் தான் சத்தம் வருகிறதோ என்று விட்டுவிட்டேன்.இடையில் சத்தம் இல்லாமல் வேலை செய்து கொண்டிருந்தது.

இரண்டு நாட்களுக்கு முன்பு சுத்தமாக படுததுவிட்டது.இதற்கு மேலும் இதை உபயோகப்படுத்துவது உசிதமில்லை என்று முடிவெடுத்து புதிதாக வாங்க தேடிக்கொண்டிருந்தேன். YouTube இல் ஏதோ பார்த்துக்கொண்டிருக்கும் போது ஒரு வீடியோ கண்ணில் பட்டது . பல ஸ்டெபிலைசர்கள் வேலை செய்யாமல் போவதற்கு இந்த கேபிள் இணைப்புதான் காரணம் என்று சொல்லியிருந்தார்கள். நான் பிரித்து பார்த்தபோது அந்த கேபிளை வெளியே எடுக்க முடியும் என்றே தெரியாது.தெரிந்த போது எப்படி சும்மா இருப்பது ,திற மறுபடியும் , பார்த்தால் அந்த இணைப்பு சரியாக இருந்தது. படம் கீழே .

மறுபடியும் புதிதாக வாங்க தேடுதல் தொடங்கியது. இடையில் வார இறுதி நாட்களாகிவிட்டது .

உள் மண்டைக்குள் ஓடிக்கொண்டிருக்கும் எண்ணம் திரும்ப உந்த மறுபடியும் பிரித்தேன். எல்லாம் சரி ஆனால் வேலை செய்யவில்லை .. என்ன என்ன என்று பார்க்கும் போது இருக்கும் 3 Relay இல் ஒன்று மட்டும் வித்தியாசமாக இருந்தது. ஏற்கனவே கண்ணில் பட்டிருந்தாலும் அதன் மேல் எனக்கு சந்தேகம் வரவில்லை. இந்த முறை பார்க்கும் போது அது மட்டும் ஏன் வீங்கியிருக்கு என்று யோசித்த போது இவன் தான் கள்ளனாக இருக்க வேண்டும் என்று உள் மனது சொல்லியது.

அதை வெளியே எடுத்து மல்டி மீட்டரில் பரிசோதித்தபோது அது நிரூபணம் ஆனது. விலை என்னவென்று தேடியபோது ரூ 165 என்று ஒரு தளம் காட்டியது, இதுவே ஆக அதிகமானது. வாங்கி அது பிரச்சனை இல்லை என்றால் அது வேறு தெண்டம் . இப்படி பல கணக்குகள் போட்டு வாங்கி பார்த்துவிடலாம் என்று ரீச்சி தெருக்கு போய் விலை கேட்டால் ரூ 15 மட்டுமே .

சற்று முன் எல்லா வேலைகளையும் முடித்து மின் இணைப்பு கொடுத்தேன். எல்லாம் சரியாக வேலை செய்கிறது,இது எத்தனை நாள் என்று பார்ப்போம்.

பசு மஞ்சள் வைத்தியம்

2019-08-15T12:08:00.000+05:30

# பசு மஞ்சள்
# தூக்கம்

சுமார் 15 வருடங்களுக்கு முன்பு முழு உடல் சோதனை செய்த பொது தான் என்னுடைய கொலஸ்டிரால் அளவு கண்டுபிடிக்க முடியாத அளவுக்கு இருந்தது தெரிந்தது.அதன் பிறகு அதற்கு தேவையான மருந்துகள் விட்டு விட்டு எடுத்துக்கொண்டு இருந்தேன் ஆனால் அதை பற்றி பெரிய கவலை எதுவும் கொள்ளாமல்.

2013 யில் நியாண்டர் செல்வன் உடன் பேசிக்கொண்டிருக்கும் போது ஒரு முயற்சியில் இறங்கினேன்.நல்ல முன்னேற்றம் தெரிய அப்படியே உணவு வழக்கமும் மாறிவிட்டது.இதன் தொடர்சியில் வைட்டமின் டி குறைவாக இருந்தது, தெரிந்து அதற்கான முயற்சியில் இறங்கினேன் ஆனால் ஏறுவதுக்கு பதில் அளவுகள் இறங்கியது.அதன் காரணம் ஆராயப்பட்ட போது உடல் வைட்டமினை கிரகிக்கும் தன்மையை குறைவாக இருந்தால் இந்த பிரச்சனை ஏற்படும் என்றும் அதற்கு பசு மஞ்சள் தெரபி எடுத்தால் ஓரளவு முன்னேற்றம் தெரியலாம் என்று சொல்லப்பட்டது.பசு மஞ்சள் கிடைப்பதில் இருந்த கஷ்டத்தில் அது தள்ளிக்கொண்டே போனது.

கொஞ்ச நாட்களாகவே என் மனைவிக்கு திடிரென்று தூக்க பிரச்சனை .நான் நன்றாக தூங்கிக்கொண்டு இருக்கும் போது இவர் பால்கனியில் உட்கார்ந்து கொண்டு தூக்கம் வரும் வரை காத்திருப்பார்.என்னென்னவோ வைத்தியம் பார்த்தும் பலனில்லாமல் இருந்தது.என்னுடைய பேலியோவுக்கு தகுந்த மாதிரி சமைத்து கொடுத்திருந்தாலும் அவருக்கு அதில் ஆர்வம் இல்லை.

திரு திருமூர்த்தி சத்தியமங்கலத்தில் இயற்கை விவசாயம் செய்து வருபவர். முகநூலில் அதில் வரும் பிரச்சனைகள் மற்றும் பல மேம்பாடுகளை அழகாக சொல்லி வருகிறார்.சமீபகாலமாக சந்தைபடுத்துவதிலிலும் வெற்றி கண்டுவருகிறார்.அவரிடம் பசு மஞ்சள் விறபனைக்கு இருக்கிறது என்ற விபரம் தெரிந்தவுடன் பேசி ஒரு 2 கிலோ வாங்கினேன்.

முதலில் ஒரு வாரத்துக்கு தேவையான கிழங்கை மாத்திரம் எடுத்து தோல் உரித்து பேஸ்ட் செய்து சாப்பிட்டோம்.நான் மட்டுமே சாப்பிட என் மனைவியிடம் நீயும் சாப்பிட்டுப்பார் ஒரு வேளை தலைவலி / தூக்கம் போனாலும் போகும் என்றேன்.அதிசியமாக சாப்பிட்ட முதல் வாரத்திலேயே நல்ல ஆழ்நத தூக்கம் தூங்க ஆரம்பித்து இன்றுவரை தொடர்கிறது.ஆனால் தலைவலிக்கு இது மருந்தாகவில்லை.வாங்கிய 2 கிலோ கிழங்கை பிரிஜ்யில் வைத்து உபயோகப்படுத்தி வருகிறோம்.வேறு ஒரு இடத்தில் வாங்கிய பசு மஞ்சள் சிறிது நாளிலே தண்ணீர் சத்தை இழந்து வீணாகிவிட்டது ஆனால் திருமூர்த்தியிடம் வாங்கிய கிழங்கு சும்மா "கின்" என்று இருந்தது.

பசு மஞ்சள் தெரபி எப்படி செய்வது என்பதை இங்கு பார்க்கவும்.

தூக்க பிரச்சனை உள்ளவர்கள் முயலலாம்.

வாரிசு சான்றிதழ்.

2019-08-11T14:10:00.000+05:30

# வாரிசு சான்றிதழ்
# Legal-heir

இதெற்கெல்லாம் நமக்கு தேவைப்படாது என்று நினைத்துக்கொண்டிருந்தேன் ஆனால் காலம் போடும் கோலத்துக்கு யாரும் தப்பிக்க முடியாதே?

85 வயதை தாண்டிய தந்தை, 28 வருடங்களாக சர்கரை குறைபாடுடன் மற்றும் சில உபாதைகளுடன் நாட்களை தள்ளிக்கொண்டிருந்தார்.2013-14 காலகட்டத்தில் திரு செல்வன் எழுதிய பேலியோ புத்தகத்தை கொடுத்தேன் ஆனால் அவரை மாற்ற முயற்சிக்கவில்லை ஏனென்றால் அவரைப்பற்றி ஒரளவு தெரியும் என்பதால். படிப்பதில் ஆர்வம் என்பதால் முழு புத்தகத்தையும் படித்தபிறகு “ என்னடா! இவர் மேல்நாட்டு உணவு முறையை சார்ந்து எழுதியிருக்கார், இங்குள்ள நிலமைக்கு இது ஒத்துவராது” என்று ஒதுக்கிவிட்டார். இவ்வளவு வயதுக்கு பிறகு பெரிய முன்னேற்றம் இருக்காது என்பதால் அவரை கட்டாயப்படுத்தவில்லை .எந்த ஒரு விஷயமும் நாம் முழுவதுமாக ஏற்றுக்கொண்டு செய்யாவிட்டால் அதனுடன் ஒத்துபோக முடியாது.அதிலிருந்து தப்பிக்கவே மனது முயலும்.

இப்படியே போய்கொண்டிருந்த காலத்தில் போன வருடம் ஜூலை/ ஆகஸ்ட் மாதங்களில் உடல்நிலை ஒத்துழைக்காமல் அடிக்கடி மருத்துவமனைக்கு செல்வதும் வருவதுமாக இருந்தோம்.நெஞ்சு கிட்ட வலி என்பார், ECG எடுத்து பார்த்தால் ஒன்றும் இருக்காது, இப்படியே பல முறை ஆனால் கடைசி வரை எதனால் அந்த வலி என்பதே தெரியாமல் நவம்பர் மாதம் போய் சேர்ந்துவிட்டார்.போவதற்கு முன்பு வரை நான் பக்கத்திலே இருக்க வேண்டும் என்று அடம் பிடித்தவர் சிறிது சிறிதாக நினைவு தப்பி நான் கஞ்சி எடுக்க வீட்டுக்கு போன நேரத்தில் மாரடைப்பு வந்து உயிர் பிரிந்துவிட்டது. நான் மருத்துவமனைக்கு திரும்பும் போது மருத்துவரும்,அங்கிருந்த செவிலியரும் செயற்கை சுவாசத்துக்காக CPR செய்துகொண்டிருந்தார்கள் ஆனால் முடியவில்லை. நான் அங்கு போவதற்கு முன்பே உயிர் போயிருக்க கூடும்.

காரியங்கள் ஒவ்வொன்றாக முடிய, மிச்ச நேரத்தில் அவருடைய நிதிநிலையை ஆராய்ந்த போது அஞ்சல் அலுவலகம் மற்றும் வங்கி புத்தகங்களை ஆராய்ந்துகொண்டிருந்தேன். கொஞ்ச நாட்களாகவே இந்த வேலையெல்லாம் என்னிடம் ஒப்படைக்க வேண்டும் என்று சொல்லிக்கொண்டு இருந்தார்.

முதலில் அவருடைய ஓய்வூதிய ஊதியத்தை மனைவி பெயருக்கு மாற்றவேண்டும் அதற்கான வேலையை ஆரம்பிக்கும் போது தான் போது தான் ஒவ்வொன்றாக புரிந்தது.முதலில் இறப்பு சான்றிதழ், இதை நான் அவர் இறந்த மருத்துவமனையில் கேட்ட பொது தான் அவர்களே முழித்துகொண்டு தேவையான விவரங்களை கேட்டார்கள்.அது ஒரு 1 வாரத்தில் வந்துவிட்டது.

அஞ்சல் மற்றும் வங்கி கணக்கில் ஒரு கணக்கில் மட்டும் Nominee என்று யாருடைய பெயரும் போடாமல் இருப்பது தெரிந்தது.மற்ற கணக்கில் எல்லாம் nominee இருக்கும் பொது இது மட்டும் எப்படி இல்லாமல் போனது என்பது இதுவரை புரியாத புதிர்.இத்தனைக்கும் பலருக்கும் இது பற்றி ஆலோசனை சொன்னவர் தன் கணக்கில் எப்படி விட்டார் என்று தெரியவில்லை.சரி, அதை வாங்க என்ன செய்ய வேண்டும் என்ற விதிகளை கேட்ட போது முதலில் வாரிசு சான்றிதழ் வாங்க வேண்டும் என்றார்கள்.அதற்கு எப்படி எங்கு செல்ல வேண்டும் என்று கூகிளிடமும் மற்றும் பலரிடமும் கேட்டதில் , முகவர்கள் சுமார் 3௦௦௦ என்று ஆரம்பித்தார்கள்.முகநூலில் ஒரு குழுமத்தில் கேட்ட போதுஒரு சிறிய பொறி கிடைத்தது.ஆதாவது வேண்டிய அனைத்து Documents ஐ எடுத்துக்கொண்டு அரசாங்க E centre க்கு போய் ரூ 60 கொடுத்து அனைத்தையும் Scan செய்து apply செய்ய வேண்டும். இது தான் முதல் படி. அதற்கான எண் கொடுக்கப்படும் .இனி எல்லாமே இணையம் மூலம் என்று சொல்லப்பட்டாலும் நீங்கள் வருடிய அனைத்து documents ஐயும் உங்கள் பகுதி கிராம நிர்வாகியிடம் கொடுக்க வேண்டும்.அவர் ஒரு நாள் குறிப்பிட்டு அன்று வீட்டுக்கு வந்துபார்த்த பிறகு அடுத்த நிலைக்கு அனுப்புவார்.என் நிலையில் VAO Strike மற்றும் தேர்தல் வந்ததால் கிணற்றில் போட்ட கல் போல் இருந்தது.

சில மாதங்கள் கடந்த நிலையில் CM cell க்கு ஒரு விண்ணப்பம் மற்றும் தாசில்தாருக்கு ஒரு கடிதம் என்று காலம் ஓடிக்கொண்டிருந்தது.எவ்வித பதிலும் இல்லாத நிலையில் ஒரு நாள் அந்த VAO வே அலைபேசியில் கூப்பிட்டார். அனைத்து Documents ஐயும் எடுத்துக்கொண்டு அவர் அலுவலகத்துக்கு வரச்சொன்னார்.எல்லாம் பார்த்த பிறகு அடுத்த நிலைக்கு போனது.ஒரு 10 கழித்து அலைபேசிக்கு ஒரு விவரம் வந்தது ஆதாவது என்னுடைய வாரிசு சான்றிதழ் விண்ணப்பம் ஒரு குறிப்பிட்ட ஆவணம் இல்லாததால் நிராகரிக்கபடுவதாக.என்ன ஆவணம் என்று விசாரித்தால் இறந்த என் அப்பாவின் அம்மா இறப்பு சான்றிதழ் தான் ஆவணம்.முதலிலேயே அந்த ஆவணம் இல்லை என்று சொல்லிவிட்டோம் இருந்தாலும் இப்போது கேட்கிறார்கள்.இறந்தவரின் மனைவி ஒரு உறுதி சான்றிதழ் கொடுத்தால் போதும் என்றார்கள்.அதை கொடுத்து அதை மறுபடியும் அதே E centre க்கு போய் வருடி ஏற்றிவிட்டார்கள்.ஒரு வழியாக எல்லா காரியங்களும் முடிந்தது.

VAO-RI-Thasildhar மூலமாக ஒருவழியாக சான்றிதழ் கிடைத்தது. இந்த வழிமுறைக்காக அரசாங்கம் நிர்ணயம் செய்திருக்க கால அளவு என்னவோ பதினைத்து நாட்கள் தான் இருந்தாலும் பல தடைகளை தாண்டி கையில் கிடைக்க பல மாதங்களாகிவிடுகிறது.சில ஆவணங்கள் தேவையை முதலிலேயே கட்டாயப்படுத்திவிட்டால் அனாவசிய அலைச்சலை தவிர்க்கலாம்.

எல்லாம் சரி,அந்த CM Cell மற்றும் தாசில்தாருக்கு எழுதிய கடிதத்துக்கு பதில் வந்ததா? வந்தது. CM Cell : சார் உங்க complaint பல்லாவரம் பகுதிக்கு போய்விட்டது ,உங்களுக்கு வாரிசு சான்றிதழ் கிடைத்துவிட்டதா? என்றார்

நான் : கிடைத்துவிட்டது .

அடுத்து தாசில்தார் அலுவலகத்தில் இருந்து .சான்றிதழ் கிடைத்துவிட்ட விபரத்தை சொன்னேன்.

அரசாங்க நடை முறை வேலை செய்கிறது ஆனால் பல மாதங்கள் கடந்த பிறகு.

Amplify TV Speakers

2018-09-10T17:21:00.000+05:30

தற்போது சந்தையில் இப்படிப்பட்ட ஒலி பெருக்கி கிடைக்கிறது.இதன் அளவோ வெறும் கட்டை விரல் அளவில் தான் உள்ளது ஆனால் இது கொடுக்கும் ஒலி அளவை கேட்கும் பொது ஆச்சரியமாக உள்ளது.ஏற்கனவே பரிட்சார்த்த முறையில் ஒன்று வாங்கி அதை தூக்கி எரிய வேண்டிய நிலையில் இருந்த வானொலி ஒலிப்பானுடன் இணைத்து இன்றுவரை மடிக்கனினிக்காக உபயோகித்து வருகிறேன்.சின்ன சின்ன பிரச்சனைகள் இருந்தாலும் கவலைப்படும் அளவுக்கு இல்லாததால், ஓடிக்கொண்டு இருக்கிறது.

அந்த Audio Amplifier இது தான். PAM 8403. இதன் விலை ரூ 90.

மின்னணுவியல் தெரிந்தவர்களுக்கு இதில் கொடுக்க வேண்டிய இணைப்புகள் ஜுஜுபி வேலை.அதாவது கிழே வலது புறத்தில் 5 வோல்ட் மின்சாரம் கொடுக்க வேண்டும்.இடது புறம் ஆடியோ பிளஸ்,கிரவுண்ட் மற்றும் மைனஸ்.மேற்புறத்தில் ஸ்பீக்கருக்கான இணைப்புகள்.அதிகபட்சமாக 3W ஸ்பீக்கர் வரை வேலை செய்யுமாம்.

எங்க வீட்டு தொலைகாட்சிக்கு முன்னாடி ஒரு கண்ணாடி கதவு இருக்கு. இது கொஞ்சம் பழைய மாடல் என்றாலும் நிறைய தூசி உள்ளே போகாமல் இருக்கும் என்பதால் அதை கழற்றாமல் விட்டுவிட்டோம்.ஒரு பிரச்சனைக்கு தீர்வு கண்டால் வேறு பிரச்சனை வராமலா இருக்கும்? விட்டுக்கார அம்மணி, சில சேனல்களில் வரும் சத்தம் சரியாகவே இல்லை என்றும்,ஏதாவது வழி இருக்கா என்று பார்க்குமாறு சொல்லியிருந்தார்.ஒரே வழி, கண்ணாடி கதவை தூக்கவேண்டியது தான் என்று சொல்லிக்கொண்டு இருந்தேன்.அதற்கு அவர்களுக்கு விருப்பம் இல்லாததால் அப்படியே ஓடிக்கொண்டு இருந்தது.இதற்கிடையில் பல நாட்களாக உபயோகப்படுத்தாமல் இருந்த Hi-Fi கண்ணை உறுத்திக்கொண்டு இருந்தது.ஓரளவு மனதில் ஓடிய எண்ணங்களை வைத்து வேலையை ஆரம்பித்தேன்.

டிவி யில் இருந்து ஆடியோ வெளியேறும் வழியில் இருந்து ஆடியோ சமிக்கைகளை எடுக்க வேண்டியது அதை இந்த Module வழியாக பெருக்கி ஸ்பீக்கருக்கு கொடுக்கணும். ஸ்பீக்கரை வெளியில் வைத்துவிடவேண்டும், அவ்வளவு தான்.5 வோல்ட்க்கு ஏதாவது ஒரு கைப்பேசி அடாப்டரை உபயோகித்துக்கொள்ளவேண்டும். முடிந்தது.

முதலில் RCA port இல் இருந்து சமிக்கைகளை எடுத்து ஸ்பீக்கருக்கு கொடுத்து பார்த்தபோது வெறும் "டூர் " என்ற சப்தம் மட்டுமே வந்தது.ஒவ்வொன்றையும் சரி பார்த்த பொது கேபிள் இணைப்பில் ஏதோ பிரச்சனை என்பது புரிந்தது.சரி இதை இப்போது டிவியில் இணைக்கவேண்டாம், முதலில் கைப்பேசியில் இணைப்போம் என்று முடிவு செய்து அதற்கான மாற்று ஏற்பாடுகளை செய்தேன்.கைப்பேசியில் போட்ட பாட்டு அட்டகாசமாக ஓடியது.RCA கேபிளின் இணைப்புகளை இணையத்தில் தேடி படித்த பொது நான் செய்த தவறு தெரிந்தது.கிழே உள்ள படத்தில் இருக்கும் கேபிள் என்னிடம் இருந்ததால் வேலை சுலபமாக முடிந்தது.

இந்த பெட்டி சும்மாக கிடந்ததால் அதனுள் Module ஐ வைத்து மூடிவிட்டேன்.வெப்பம் வரக்கூடிய சாத்திய கூறுகள் இல்லாததால் பெட்டி ஒரு பிரச்சனையாக இருக்காது.

எல்லாம் முடிந்து இணைப்புகளை கொடுத்து டிவி செட்டிங்கில் ஆடியோவை வெளி கனெக்ஷனுக்கு மாற்றிவிட்டால் முடிந்தது வேலை.

ஆடியோ இப்போது சும்மா "கும்" என்று இருக்கு.

அஜந்தா கடிகாரம்.

2018-08-25T15:06:00.000+05:30

ஏற்கனவே, மின்னணு துறையில் ஏற்பட்ட விருப்பத்தால் சில பல முயற்சிகளும் அதனால் கிடைத்த வெற்றி தோல்விகளை சொல்லியிருந்தேன். அந்த வரிசையில் இந்த அஜந்தா கடிகாரமும் ஒன்று.என்னிடம் வந்த போது அதில் நேரம் காண்பித்தாலும் அதை சரியான நேரத்துக்கு மாற்ற முடியவில்லை.பிரச்சனை அது மட்டுமே. சரியான நேரத்துக்கு மாற்ற முடியாவிட்டால் கடிகாரம் இருந்து என்ன பிரயோஜனம்?உரிமையாளர் என் மீது நம்பிக்கை வைத்து பார்க்கச்சொன்னார்.

ஏற்கனவே இதே மாதிரி ஒரு கடிகாரத்தில் கையை வைத்திருந்த அனுபவம் இருந்ததால் இதை பிரிப்பதில் பிரச்சனை ஒன்றும் இல்லாதிருந்தது.மேம்போக்காக PCB ஐ நோட்டமிட்டபோது பெரிதாக எதுவும் கண்ணில் படவில்லை.வரக்கூடிய மின்சாரம் அதன் அளவில் வந்துகொண்டிருந்தது.வேறு ஏதாவது தெரிகிறதா என்று பார்த்த போது முன்று கரும்புகை வீச்சு தெரிந்தது.படம் கிழே.

கரும்புகை பிரச்சனையின் விளிம்பை காண்பித்தது ஆனால் இது தான் காரணமா என்பது முழுவதுமாக சொல்லமுடியாது என்பதால் உரிமையாளருக்கு பொதுத் துறப்பு ஒன்று போட்டேன். இதை மாற்றினால் ஒருவேளை கடிகாரம் உயிர்த்தெழ்லாம் என்றேன்.

வெறும் 1500 ரூ கடிகாரத்தை சந்தையில் ரிப்பேருக்கு கொடுத்தால் பெரிதாக எதுவும் பார்த்துவிட முடியாது, அதனாலேயே பலரும் இதை செய்ய மாட்டார்கள்.

"சும்மா தானே கிடக்குது முயலுங்கள் வந்தால் வரட்டும்" என்று அனுமதி கிடைத்தது.வடபழனி மெர்சி கடை தான் எங்களுகெல்லாம் அடைக்கலம். நல்ல வேளை கேட்ட Voltage Regulator 78L05 கிடைத்தது. எனக்கு வேண்டியது என்னவோ 3 தான் ஆனால் 5 ஆக வாங்கினேன். ரூ 5 / ஒன்று.

இது பழையது.

PCB யில் இருந்து பழையதை எடுத்து போட்டுவிட்டு புதியதை நிறுவினேன். மின்சாரம் கொடுக்கும் வரை பதபதைப்பு தான்.சரியாக வேலை செய்யுமா அல்லது புஸ் என்று புகை காக்குமா என்று தெரியாது அல்லவா?

வேலை முடிந்ததும் கரும்புகையை அகற்றிவிட்டு..

மின்சாரத்தை கொடுத்தேன்.நல்ல வேளை வேறு எதுவும் பிரச்சனை கொடுக்காமல் நேரத்தை சரி செய்ய முடிந்தது.உரிமையாளருக்கும் சந்தோஷம்.

பிரித்து மேய்வது - கெட்டில்

2018-01-03T21:12:00.001+05:30

வேலை செய்யாத ஒன்றை அப்படியே தூக்கி போடுவது சுலபம் என்றாலும் அது என் பழக்கம் அல்ல. உடைச்சி சுக்கு நூறாக்கி அது எப்படி வேலை செய்கிறது என்று தெரிந்துகொண்டு அதற்கு பிறகு குப்பையில் போடுவேன்.

இது குப்பைக்குத் தான் போகப்போகிறது என்று முதல் முறையாக வந்தபோது நினைத்தேன்.

இதற்கு முன்பு இதை பிரித்ததில்லை அதனால் அதன் வேலைப்பாடு தெரியாமல் இருந்தது.இதை கொடுத்தவர்கள் வேலை செய்கிறது ஆனால் சுவிச்சு தானாக off ஆகமாட்டேன் என்கிறது என்கிறார்கள்.ஒவ்வொரு பாகமாக பிரித்து போட்டு சுவிட்சு பக்கம் வந்தேன்.வேலைப்பாடு புரிந்தவுடன் அதன் பிரச்னை என்னவென்று கண்டுபிடிக்க கொஞ்சம் நேரமானது .ஆதாவது தண்ணீர் கொதிநிலையில் வரும் ஆவி மேலெழும்பி சுவிச்சுவில் உள்ள trigger மூலம் off ஆகிறது .இதில் சுவிட்சும் அதன் மேல் இருக்கும் நெகிழி குப்பியும் சரியாக இணையவில்லை அதோடு வெகு நாள் பயன்பாட்டால் தேய்ந்து இனி ஒன்றும் செய்யமுடியாத நிலையில் இருந்தது .திரும்ப கொடுத்துவிட்டேன்.

இரண்டு வாரம் கழித்து ஏதோ தோன்றியது மறுபடியும் கேட்டு வாங்கி வந்தேன்.குறுக்கு வழியில் அந்த சுவிச்சையும் அதன் மேல் உள்ள நெகிழி யையும் இணைத்துவிட்டால் வேலை முடிந்துவிடும் என்று நினைத்து சுவிட்சு இணையும் இடத்தில் ஓட்டை போட்டு ஒரு சிறிய நெகிழியை இணைக்க முயற்சித்தேன் .Quick Fix போடும் போது அது சுவிச்சுக்கு உள்ளே இறங்கி பாழாக்கிவிட்டது .சரி, வேறு சுவிட்சு கிடைக்குமா என்று அலைந்ததில் அலைச்சல் தான் மிஞ்சியது .எங்கெங்கோ தேடிய பிறகு கடைசியாக Parrys இல் கேட்டுப்பார்க்கலாம் என்று போனேன்.இங்கு ஏதாவது ஒரு கடையில் ஒரு விவரம் வேண்டுமென்றால் அங்கு கிடைக்கும் என்ற விவரம் சொல்லமாட்டார்கள்.(தெரிந்தாலும்).நான் போன கடையில் இதை பார்த்தவுடன், இப்படியே ஒரு 15 கடை தள்ளி போய் கேட்டுப்பாருங்கள் என்றார் .அப்படியே போய் கடையை கண்டுபிடித்து கேட்டேன் ,சிறிது நேரத்திலேயே எடுத்து கொடுத்தார் .ரூ 150 எனவும், உத்திரவாதம் எதுவும் கிடையாது ,திரும்ப பெற்றுக்கொள்ளப்படாது என்று சொல்லிக்கொடுத்தார்.

எல்லாம் சரியாக அமைந்து குப்பை தொட்டிக்கு போக வேண்டிய கெட்டில் இப்போது உயிர்பிழைத்துள்ளது.

ACT connection with Mi -3C

2017-07-24T10:55:00.000+05:30

ரொம்ப நாளாகவே இணைய வேகம் ACT சொல்லிய படி 75 Mbbs இல்லையே என்ற குறை இருந்தது. அதற்கான காரணம் நான் உபயோகித்த Belkin Router தான், பழைய மாடல் என்பதால் மிக அதிகமாக 30 - 40 Mbbs கிடைக்கும் என்றார்கள்.

சரி, அடுத்த வருடாந்தர சந்தா கட்டும் போது இலவச ரவுட்டர் கேட்கலாம் என்று நினைத்துக்கொண்டிருந்தேன். சந்தா கட்டும் நேரம் வந்த போது அதே மாதிரி “எனக்கு இலவச ரவுட்டர் கொடுத்தால் தொடர்கிறேன் இல்லாவிட்டால் வேறு இடம் பார்க்கிறேன்” என்றேன்.

வாடிக்கையாளர் தொடர்பு அதிகாரி சிறிது நேரம் எடுத்துக்கொண்டு “சார், அந்த மாதிரி இப்போது கொடுப்பதில்லை இருந்தாலும் நீங்கள் பழைய வாடிக்கையாளர் என்பதால் 1 வருடத்துக்கு சந்தா கட்டினால் 2 மாதத்துக்கு பதிலாக 3 மாதம் இலவசமாக கொடுக்கிறேன்” என்றார்.எப்படியோ ஒரு மாதம், கிட்டத்தட்ட ரூ 1000 இலவசமாக கிடைத்தது.

அந்த இலவச ஆயிரம் ரூபாயை வைத்து ஏதாவது ஆஃபர் வரும் போது புது ரவுட்டர் வாங்கலாம் என்றிருந்த போது தான் இந்த Mi Router 3C மாடல் ரூ 1199 க்கு போட்டிருந்தார்கள். மிகுந்த யோஜனைக்கு பிறகு போன வெள்ளி க்கிழமை அமேசானில் வாங்கினேன். வாங்கும் போது 5 நாட்கள் கழித்து தான் வரும் என்று சொன்னவர்கள் நேற்றே கொண்டு வந்து கொடுத்துவிட்டார்கள்.

உடனே பிரித்து இணைத்து முயலும் போது ஏதோ ஒன்று சரியாக வரவில்லை அதனால் இணைப்பு ஏற்படுத்துவதில் பிரச்சனை வந்தது. இரவு நேரமானதால் அப்படியே மூடிவிட்டு தூங்கிவிட்டேன்.

முடியாத வேலை என்றால் மண்டைக்குள் அரிப்பு இருந்துகொண்டே இருக்கும். Mi - Wifi App ஐ கைப்பேசியில் தரவிறக்கி நிறுவிய பிறகு ரவுட்டரை கண்டு கொண்டது ஆனால் அது ppp_ope என்று ஏதோ சொல்லி அதற்கான User name & Password கேட்டது. அதெல்லாம் கைவசம் இல்லை, இணையம் இல்லாததால் மெயிலில் இருந்தும் எடுக்க முடியவில்லை.ACT வாடிக்கையாளர் மையத்தை கூப்பிட்டிருக்கலாம் அதை விட முடிந்த வரை முயலுவோம் அதன் பிறகு தேவைப்பட்டால் கூப்பிடுவோம் என்று நினைத்துக்கொண்டிருந்தேன்.

கைப்பேசி App மூலம் நிறுவும் போது இந்த மாதிரி நிலை ஏற்படும் என்றால் அதற்காக ஒரு எளிய வழியையும் சொல்லியிருந்தார்கள் ஆதாவது பழைய ரவிட்டரில் உள்ள Wan ஐயும் புது ரவுட்டரில் உள்ள Lan ஐயும் Network Cable மூலம் இணைத்து எல்லா செட்டிங்கையும் பழைய ரவுட்டரில் இருந்து புதிய ரவுட்டருக்கு Import செய்துவிடலாம். Import செய்தவுடன் அந்த விவரங்களையும் தொலைபேசியில் காண்பித்துவிடுகிறது. எல்லாம் முடிந்துவிட்டது.

இந்த புது ரவுட்டர் தாராளமாக 75 Mbbs வேகம் காண்பிக்கிறது.

தீர்வு

2016-10-26T17:42:00.000+05:30

என்ன செய்வது ? என் மூளை இப்படியெல்லாம் யோசிப்பது இன்று நேற்று அல்ல. பல முறை பல்பு வாங்கினாலும் விக்கிரமாதித்யன் போல் மேலே ஏறிக்கொண்டே இருக்கிறது.

புதிய வீடு. ஒவ்வொன்றாக சரி செய்துகொண்டிருக்கும் போது பல Tap கள் பூஞ்சானம் பிடித்து விகாரமாக தெரிந்தது. தண்ணீரில் உள்ள கடினத்தன்மையோ அல்லது அமிலத்தன்மையோ இந்த வேலையை செய்கிறது என்று தெரிந்தவுடன் அதற்கான முன்னேற்பாடுகளை செய்தேன் ஆனால் பலனில்லை. வன்பொருள் கடையில் கேட்ட போது ரூ 80 கொடுத்து ஒரு சொலுசனை வாங்கினேன் ஆனால் அதுவும் திருப்திகரமாக இல்லை.இந்த பிரச்சனை புது மாதிரியாக குளியறையில் உள்ள சூடு/குளிர் நீர் கலப்பானிலும் வந்தது. என்ன காரணம் என்று பார்த்த போது அதற்கு மேலுள்ள ஷவரில் இருந்து அதிக அழுததம் காரணமாக தண்ணீர் சொட்டு சொட்டாக அதன் மேல் விழுந்துகொண்டிருந்தது.

ஷவரில் இருக்கும் நெடுக்கு பைப்பின் நீளம் 6”, அதை 8” ஆக மாற்றிவிட்டால் தண்ணீர் அதன் மேல் விழாதல்லவா? இதை மனதில் வைத்துக்கொண்டு வேறு வேலையாக சென்ற போது கடையில் கேட்டேன்.

“ரூ 146 என்றார்”

சரி பிறகு வாங்கிக்கொள்கிறேன் என்று சொல்லிவிட்டு வந்தேன்.

ஒரு நாள் ஏதோ ஞாபமாக இருக்கும் போது கையில் இருந்த ஒரு லிட்டர் நெகிழி பாட்டில் எடுத்தேன் 2 பாகமாக வெட்டினேன்.தலைப்பகுதியையும் அடிப்பகுதியையும் தூக்கிப்போட்டேன். அதன் விட்டத்தையும் ஷவரின் விட்டத்தையும் அளந்தேன். பாட்டிலின் விட்டம் அதிகமாக இருந்தது. அதிகமாக இருக்கும் காரணத்தால் அதை இரண்டாக வெட்டி ஷவரின் உள்ளே நுழைத்து நன்றாக இறுக்கிப்பிடித்து இரண்டு முனையிலும் ஸ்டேப்ளர் பின் அடித்தேன்.

இப்போது தண்ணீர் அந்த Mixer மீது தண்ணீர் விழவில்லை.

சரி ஒரு பிரச்சனை தீர்ந்தது.

பூசானத்துக்கு இந்த பகுதியில் உள்ள வன் பொருள் கடையில் கேட்டேன். இம்முறை வேறு ஒரு சொலூஷனை கொடுத்து தண்ணீரில் கலந்து உபயோகப்படுத்த சொன்னார். அதை உபயோகித்த போது ரிசல்ட் அருமையாக இருந்தது.

அந்த திரவம் இது தான்.

முன்பு

பிறகு.

இதுவும் புலம்பல் தான்.

2016-05-02T17:33:00.001+05:30

சமீப காலத்தில் ஒரு சின்ன நிறுவனத்தில் வேலை செய்யும் வாய்ப்பு கிடைத்தது அதுவும் நண்பனின் ரெபரன்ஸ் மூலமாக. நுழையும் போதே தெரியும் இங்கு பெரிதாக எதுவும் எதிர்பார்க்க முடியாது அதே சமயத்தில் வாங்கிற காசுக்கு ஏதாவது உருப்படியாக செய்யவேண்டும் என்ற முடிவுடன் தான் உள்ளே நுழைந்தேன்.ஏனென்றால் தல கட்டுமானத்துறையை படித்தவர் அல்ல பணத்தை முதலீடு செய்தவர்.

முதல் நாள் நிறுவனத்தில் நுழைந்தும் அறிமுகம் செய்துவைக்க யாரும் இல்லை பிறகு நானாகவே செய்துகொண்டேன்.எதிர்பார்த்தது தான் என்பதால் இழப்பு ஒன்றும் இல்லை.

எனக்கு என்று ஒரு வேலை கொடுக்கப்பட்டது, நீ தான் சகலத்தையும் செய்ய வேண்டும் என்று சொல்லப்பட்டது.உனது ஆணை தான் இந்த பிராஜக்டை எடுத்துச்செல்ல வேண்டும் எனப்பட்டது.

இந்த பிராஜக்ட் பற்றி சின்ன அறிமுகம்; வயதானவர்களுக்கான சாப்பாடு மற்றும் மருத்துவ வசதியுடன் கூடிய வீடு. எல்லா இடங்களில் உள்ள மாதிரி அஸ்திவாரம்,பிளிந்த் பீம்,கட்டுவேலை அதன் மீது சிலாப்(கூரை) இவ்வளவு தான். இதற்கான வரைப்படம் மற்றும் டிசைன் எல்லாம் பொத்தாம் பொதுவாக போட்டு வேலை நடந்துகொண்டிருந்தது.60 மற்றும் 70 களில் வீட்டு கட்டுமான வரைப்படத்தில் பார்த்தால் அஸ்திவாரத்துக்கு மண் தோண்டி முதலில் ஆற்று மணல் ஒரு 4’ - 6” வரை போட்டு அதன் மீது Lean Concrete போடுவார்கள். இந்த ஆற்று மணல் எதற்கு என்றால் அஸ்திவாரம் தோண்டும் போது சேறும் சகதியாக இருக்கும் என்பதால் ஒரு மணல் லேயர் போட்டு அதன் மீது கான்கிரீட் போட்டார்கள். இப்படிப்பட்ட ஒரு நிலை அஸ்திவாரம் இருக்கும் இடத்தில் நீர் இருந்தால் மட்டுமே. இதை அப்படியே காப்பி / பேஸ்ட் பண்ண ஒரு மேஸ்திரி அப்படியே எல்லா இஞ்ஜினியரும் செய்ய ஆரம்பித்துவிட்டார்கள்.அதுவே சரியான நிலைப்பாடு என்று நினைத்து பல கன்சல்டிங் பொறியாளர்களும் வரை படத்தில் போட்டுவிட்டார்கள். மேலே வருகிற எடையை தாங்கக்கூடிய மண் வரை அஸ்திவாரம் இருக்க வேண்டும் என்பது தான் நியதி. Lean Concrete மற்றும் மண் இடையே ஒரு Soft Layer என்பது தேவையில்லாத அம்சம் -பல இடங்களில் பல நேரங்களில்.

சின்னச்சின்ன வீடு கட்டுமானத்தில் இது ஒரு பெரிய செலவு வைக்கும் ஐட்டம் இல்லை ஆனால் அதுவே பெரிய கட்டுமானம் என்றால் அதுவும் நல்ல மண் அஸ்திவாரம் இருக்கும் போது இந்த மாதிரி Cushion Layer என்பது தேவையில்லாத செலவையும் நேர விரயத்தையும் கொண்டு வரும்.இந்த மாதிரி வேலை தான் அந்த பிராஜக்ட்டில் நான் போவதற்கு முன்பு செய்துவந்திருக்கிகார்கள். இதை மாற்ற எண்ணி Consulting Engineer ஐ வேலை இடத்துக்கு கூட்டி வந்து என்னுடைய ஐயத்தை எழுப்பினேன்.நல்ல பண்பாளரான அந்த பொறியாளர் நான் கேட்டத்தின் உள் அர்த்ததை புரிந்துகொண்டு அதை நீக்கிவிட்டு கிட்டத்தட்ட சுமார் 16 லட்சம் கம்பெனிக்கு மிச்சப்படுத்தினார்.

இப்படி செய்த எனக்கு 4 மாதத்திலேயே வெளியே போகும் வழியை காட்டினார்கள்.நல்ல வேளை எனக்கு.

இதை இப்போது எதற்கு சொல்கிறேன் என்றால் நான் இருக்கும்(பொறியாளர்/கட்டுனர்கள்) ஒரு குழுமத்தில் இதே மேட்டர் வந்த போது நான் எழுப்பிய கேள்விக்கு பதில் கொடுக்காமல் 4” 6” என்று சொல்லும் போது மனது வலிக்கிறது.

கேரம்

2015-09-01T11:35:00.001+05:30

பள்ளி நாட்களில் குடும்பத்துடன் விளையாடிய ஒரே விளையாட்டு இந்த கேரம் தான்.முகத்துக்கு போடும் பவுடர் தான் இந்த போர்டுக்கும் அதன் பிறகு தான் போரிக் பவுடர் எல்லாம் இருக்கு என்று தெரிந்தது.

இதிலும் பல வகையான விளையாட்டுக்கள் இருந்தாலும் கை கண்ட்ரோல் கிடைப்பதற்காக எங்களுக்கு அந்த காலத்தில் சொல்லிக்கொடுக்கப் பட்ட விளையாட்டு (படம் பார்க்க) இது.இதில் ஸ்டிரைக்கர் ஒரு காயின் மேல் மட்டுமே படலாம் அதற்கு தகுந்த மாதிரி எல்லா காயினையும் போடனும். நடுவில் இரண்டு காயின் மேல் பட்டுவிட்டால் மறுபடியும் முதலில் இருந்து ஆட வேண்டும்.

இப்படிப்பட்ட விளையாட்டை இன்றைய இளைய சமுதாயத்துக்கு சமீபத்தில் சொல்லிக்கொடுத்து கொண்டிருந்தேன், இரண்டு காயினுக்கு மேல் தாக்குப்பிடிக்க முடியாமல் எழுந்து போய்விட்டான். அவ்வளவு ~~பொருமை~~ பொறுமை.

மென்பொருள் எப்படி இருக்க வேண்டும்?

2015-08-29T21:10:00.000+05:30

இத்தனை நாட்கள் கணினியில் பெரிய குப்பை கொட்டாவிட்டாலும், மென்பொருளைப் பற்றிய ஆரம்ப அறிவை கொண்டு பார்க்கும் போது இந்த இந்திய வரி செலுத்தும் மென்பொருள் கூட பரவாயில்லை எனலாம். XML/Java என்ற இரு முகப்பு பக்கங்களை கொடுத்து அதன் மூலம் எளிதாகி இருக்கிறார்கள்.நம்மில் பெரும்பாலும் சம்பளம் மற்றும் அதற்கான Form 16 மூலம் செய்வோம்.இம்முறை வங்கி கணக்கெல்லாம் கேட்டு வாங்கிக்கொள்கிறார்கள்.சரி, மறைக்க ஒன்றும் இல்லாதபட்சத்தில் கொடுப்பதில் பெரிதாக குழப்பம் ஏற்படவில்லை.

இந்த வருடத்துக்கான சமர்பித்தலை செய்து முடித்த இரண்டு வாரங்களில் ஈமெயில் ஒரு காரணத்தை காட்டி அந்த தவறை சரி செய்யுவும் என்று சொல்லியிருந்தார்கள்.சரி என்று அவர்கள் சொன்ன தவறை சரி செய்து மறுபடியும் ஜாவா மூலம் அனைத்து விவரங்களையும் மறுபடியும் உள்ளிட்டு புதிய xml கோபை தயார் செய்துவைத்துக்கொண்டேன்.

தேவையான விபரங்களை கொடுத்துவிட்டு வருமான வரி இணையபக்கத்தில் நுழைந்த உடனே எச்சரிக்கை வரி பிளிங் ஆகிக்கொண்டிருந்தது. வரிசைக்கிரமாக தேவையான உள்ளீடுகளை கொடுத்தவுடன் அடுத்த பக்கம் போனது அதில் நோட்டீஸ் வந்த விவரங்களை கொடுக்க வேண்டும்.இதில் தான் எனக்கு சந்தேகம். என்னுடைய Pan card , Capcha மற்றும் பிறந்த நாள் மூலம் நுழைய அனுமதித்தவுடன் எதற்காக அந்த நோட்டீஸ் தேதி மற்றும் பெற்றுக்கொண்ட தேதியை கட்டாயமாக்குகிறார்கள்? சரி கட்டாயமாக்கிவிட்டார்கள் அதாவது வேலை செய்கிறதா என்று பார்த்தால் ஒவ்வொரு முறையும் பிழை செய்தியோடு நின்றுவிடுகிறது.இதை அவர்களுடன் தொலைபேசியில் கேட்ட போது சொன்ன கும்சா முறையும் ஒத்துழைக்கவில்லை.

படம் பார்க்க.

இந்த Communication Date & Receipt Date, இதை கட்டாயமாக்கி என்ன சாதிக்கப்போகிறார்கள்? இவை இரண்டும் இல்லாவிட்டால் குடியா முழுகிப்போகிவிடும்.என்னுடைய கோப்பு தான் என்பதற்கான ஆதாரங்களை கொடுத்த பின்னும் தேதிகளின் மூலம் செக் செய்வது என்ன முறையோ?

மென்பொருள் தயாரிப்பில் இருக்கும் நண்பர்கள் விளக்கினால் இன்னும் புரிந்துகொள்வேன்.

ஒழுங்கீனங்கள்.

2015-08-09T21:31:00.000+05:30

எல்லா துறையில் இருக்கிற மாதிரி கட்டுமானத்துறையிலும் ஒழுங்கீனங்கள் ஒரு பகுதியாகவே இருந்துகொண்டு வருகிறது. இதற்கான காரணங்கள் கல்லூரியில் சரியாக சொல்லிக்கொடுக்கவில்லையா அல்லது படிக்க ஆர்வம் இல்லாமல் ஏதோ ஒரு டிகிரி வாங்கிட துடிக்கும் மாணவர்களா அல்லது வேலையிடத்தில் சரியான தலைமையில்லையோ என்னவோ!ஆண்டவனுக்கே வெளிச்சம்.

நான் வசிக்கும் குடியிருப்புப் பகுதியில் ஒரு கொடி மரம் நிறுத்த ஒரு சின்ன அஸ்திவாரம் போட நேற்று தோன்றினார்கள், இன்று காலை தேவையான முட்டு எல்லாம் கொடுத்து மாலை 2 மணி போல் கான்கிரீட் போட்டார்கள்.இதுவரை அவ்வளவாக பிரச்சனையில்லை

முட்டுக்கு தேவையான சமாச்சாரங்களை பாருங்கள்.இரண்டு பக்கம் பிளைவுட்,ஒரு பக்கம் செங்கல்.அவ்வளவு தான். கான்கிரீட் போட ஒரு அரை மணி நேரம் ஆனது. மாலை 5 மணிக்கு ஏதேச்சையாக பார்த்த போது முட்டு எல்லாம் எடுத்துவிட்டு கான்கிரீட் அம்மணமாக நின்றது. கான்கிரீட் போட்ட பிறகு இந்த முட்டெல்லாம் 24 மணி நேரத்துக்கு கை வைக்கக்கூடாது என்பது பொதுவாக கடைபிடிக்கப்படும் விதி. ஆமாம் அப்படி என்ன அவசரம், கான்கிரீட் போட்ட 3 அல்லது 4 மணி நேரத்துக்குள் முட்டு எடுப்பதில்?
காசு தான்.

ஆதாவது ஒரு செங்கல் விலை 5 ~ 6 ரூபாய்.கான்கிரீட் இறுகிவிட்டால் அதன் பிறகு அந்த செங்கல்லை வைத்து ஒன்றும் செய்ய முடியாது. கான்கிரீட் இறுகுவதற்குள் எடுத்துவிட்டால் அதை வேறு எங்காவது உபயோகப்படுத்துவிடலாம். இது ஒரு சின்ன வேலை தானே அதனால் இது ஒன்றும் பெரிய விபத்தையோ தரத்தை பாதிக்காது என்று சொல்லலாம்.சின்ன சின்னத் துளி தான் பெருவெள்ளம்.இந்நிருவனத்தின் பொறியாளர் இதை தடுத்திருந்தால் வேலை செய்யும் தொழிலாளிக்கும் அதன் காரண காரியம் புரிந்திருக்கும் ஒரு சரியான அனுகு முறை அடுத்த நிலைக்கு கடத்தப்பட்டிருக்கும் but Gone.

சரி இது சின்ன வேலை தானே என்று மனதை சமாதப்படுத்திக்கொண்டிருக்கும் போதே சில வாரங்களுக்கு முன்பு குரோம்பேட்டை போக வேண்டியிருந்தது அப்போது ஒரு வீட்டு வேலை நடந்துகொண்டிருந்தது. சாலையின் ஒரு பக்கத்தில் ஜல்லி,மணல் மற்றும் சிமிண்டை போட்டு கலக்கி பரப்பி வைத்து கொஞ்சம் கொஞ்சமாக தண்ணீர் விட்டு கலக்கி போட்டுக்கொண்டிருந்தார்கள். இப்படி போடுவது ஒரு கும்சா அளவுடன் போடப்படுவது (படம் கீழே.)

இப்படி போடுவது தான் பலங்காலமாக நம் நாட்டில் அனைத்து பகுதிகளிலும் நடந்து வருகிறது. இது ஒரு சரியான முறையே அல்ல இப்படி போடும் கான்கிரீட் ஸ்ரெண்த் நிர்ணயிக்க முடியாதது. ஆண்டாண்டு காலம் வாழ உள்ள வீட்டை இப்படித்தான் சிறு நிலை ஒப்பந்தக்காரர்கள் கட்டுகிறார்கள் அதற்கு நாமும் கொட்டிக்கொடுக்கிறோம். மேலே உள்ள படத்தில் உள்ள தூண் கான்கிரீட் எப்படியுள்ளது என்று பாருங்கள்.இந்த வீட்டின் உரிமையாளர் “பாவம்”.

சிறிய நிலை ஒப்பந்தக்காரர்கள் தான் இப்படி செய்கிறார்கள் என்றார் ஓரளவு நல்ல நிலையில் உள்ள நிறுவனங்களில் உள்ள பொறியாளர்களின் செயல்பாடுகள் மிகவும் வருத்தத்தையே வரவழைக்கும் முறையில் இருப்பதை சில மாதங்களுக்கு முன்பு கண்டேன்.தவறு தெரிய வந்தவுடன் உடனடியாக தேவையான ஏற்பாடுகளை செய்து சரி செய்ய உத்தரவிட்டேன்.

Column & Beam இரண்டும் சேரும் இடம் மிகவும் முக்கியமானது. வரை படத்தில் கொடுத்திருக்கிற மாதிரி செய்யாவிட்டால் பின்னாளில் பிரச்சனை உண்டாகக்கூடும்.

ஓரிடத்தில் தொடர் வீடுகளுக்காக அஸ்திவாரம், தூண் மற்றும் அதன் மீது உட்காரும் Beam என்ற முறையில் ஏற்பாடு. தூணின் கம்பி (4) அதன் மேல் உட்காரும் Beam யின் உள்ளே தேவையான அளவு இருக்கவேண்டும். ஆனால் அங்குள்ள பொறியாளர் வெறும் இரண்டு கம்பி மட்டுமே இருக்கிற மாதிரி வைத்து கான்கிரீட் போட்டுவிட்டார்கள்.இது ஒரு மோசமான முடிவு, பிறகு தேவையான அளவு தூணை உடைத்து,கம்பி கட்டி சரி செய்யச்சொல்லிவிட்டு வந்தேன். செய்திருப்பார்கள் என்று நம்புகிறேன்.

இது ஏதோ ஓரிடம் ஏரிடம் என்று இல்லை பரவலாக காணப்படுவதே மிகவும் கவலை அளிக்கக்கூடியதாக இருக்கு.

ஊஞ்சல்

2015-05-29T22:57:00.000+05:30

வீட்டுக்கார அம்மணிக்கு இரண்டு ஆசை, அதில் ஒன்று தான் வீட்டுக்கு ஒரு ஊஞ்சல் மாட்டனும் என்று.முதல் வீடு 19 வருடத்துக்கு முன்பு கட்டியது என்பதால் கொக்கியெல்லாம் வைக்காமல் கட்டிவிட்டார்கள். அப்படியே கொக்கி இருந்தாலும் ஊஞ்சல் போட்டா அவ்வளவு தான் வீட்டை அடைத்துவிடும்.

சரி இப்போது இருக்கும் வீட்டுக்காவது போடலாம் என்று பார்த்தால் எல்லாம் முடிவு எடுக்கும் முன்பே கூரை கான்கிரீட் முடிந்துவிட்டிருந்தது.கான்கிரீட் முடிந்தால் என்ன கட்டுமானத்துறையில் இருப்பவர்களுக்கு வேறு வழி தெரியாதா என்ன. இந்த மாதிரி சமயங்களில் ஓரிரு தொழிற்நுட்பங்கள் உள்ளன.எல்லாம் காசுக்கேற்ற பணியாரம் தான்.Parrys இல் போனல் ரூ 3500 - 4000 க்குள் கொக்கி போட்டு கொடுப்பார்கள்.சிறிய ஊஞ்சலுக்கு அந்த அளவுக்கு தேவையில்லை ஏனென்றால் மிஞ்சிப்போனால் 3 பேர் உட்காரக்கூடியது. 3x100 கிலோ அவ்வளவு தான்.

இதைப்பற்றி மச்சினரிடம் பேசிக்கொண்டிருந்த போது,அதெல்லாம் ஒன்றும் தேவையில்லை நானே ஆள் அனுப்பி போடச்சொல்கிறேன் என்றார்.நாள் குறித்து அன்று வந்தார்கள்.தேவையான உபகரணத்தோடு இரண்டு ஓட்டை போட்டு Anchor Bolt என்று சொல்லக்கூடிய போல்டை அடித்து ஏற்றி மறையை முடிக்கினார்கள்.

டிரில்லிங் செய்யும் முன்பு கூரையின் உள்ளே போட்டிருக்கும் கரண்ட் பைப்பை பாதிக்காமல் பார்த்துக்கொள்ள வேண்டும்.

ஊஞ்சலுக்கு பூண் ஏற்றுகிறார்கள்.

சுமார் 2 மணி நேரத்தில் ரெடி.

செங்கல் ”கை வண்ணம்”.

2015-02-08T12:33:00.000+05:30

ஜாக்கிரதை! இது கொஞ்சம் கட்டுமான தொழிற்நுட்ப பதிவு. :-)

சமீபத்தில் ஒரு கட்டுமான குடியிருப்பு பகுதிக்கு சென்றேன்.கடைசிக் கட்ட பணிகள் நடந்து வந்துகொண்டிருந்தது அதில் இந்த செங்கல் மாதிரியே பெயிண்ட் அடித்து கட்டிடத்துக்கு ஒரு அழகை கொடுத்திருந்தார்கள்.பல இடங்களில் பார்த்திருந்தாலும் அதை எப்படி செய்கிறார்கள் என்பதை அறிந்ததில்லை.

எந்த முகப்புக்கு இந்த மாதிரி ஒரு அமைப்பு கொடுக்கவேண்டுமோ அதில் தேவையான இடைவெளியில் குறுக்கும் நெருக்குமாக பேப்பர் டேப்பை ஒட்டிவிடுகிறார்கள் அதன் பிறகு சுவர் முழுவதுக்குமாக Wall Putty ஐ அடிக்கிறார்கள்.தேவையான வண்ணத்தை கொடுத்தவுடன் அந்த பேப்பர் டேப்பை எடுத்துவிட்டு அதற்குரிய வண்ணத்தை கொடுத்துவிடுகிறார்கள்.

கீழே உள்ள படங்களை பாருங்கள் தன்னால் புரியும்.

மைசூர் சுற்றுலா

2015-02-08T12:14:00.000+05:30

மடிக்கேரி யில் இருந்து சரியாக காலை 7 மணிக்கு கிளம்பி காலை 10 மணிக்கு மைசூர் வந்து சேர்ந்தோம்.மைசூர் KSRTC க்கு சொந்தமான யாத்ரா நிவாஸில் ரூம் போட்டதால் அதற்கு ஏற்ப சரியான இடத்தில் இறங்கலாம் என்றால் பேருந்து ஓட்டுனர்/நடத்துனருக்கும் கேட்டதற்கு சரியாக தெரியவில்லை.பதில் சொல்லவே யோசிக்கிறார்கள்.சரி விடு நம்ம நேரம் என்று நினைத்து KSRTC முனையத்திலேயே இறங்கினோம்.ஆட்டோ மூலம் விடுதிக்கு வந்த போது காலை மணி 10.15. அறை காலியாக இருந்ததால் அப்போதே திறந்துவிட்டு விட்டார்கள். ரயில் நிலையத்துக்கு வெகு அருகில் உள்ளது ஆனால் மட்டமான பராமரிப்பு.அடுத்த தடவை இங்கு போகக்கூடாது என்று முடிவெடுத்துவிட்டேன்.

காலையே வந்துவிட்டோம் இரவு வரை நேரத்தை வீணடிக்க மனமில்லாமல் அங்கே இருந்த Tourist Centre இல் மதியம் மட்டும் பார்க்க ஏதாவது சுர்றுலா இடம் இருக்கா என்று கேட்டேன்.மைசூர் சிட்டி சுற்றுலா காலையில் தான் இருக்கு ஆனால் நீங்களாக வண்டி அமர்த்திக்கொண்டு செல்லலாம் என்றார் ஆனால் கேட்ட கூலி அதிகமாக இருந்ததால் அந்த எண்ணத்தை கைவிட்டுவிட்டு மாற்று யோஜனையை கேட்டோம்.அவர் கொடுத்த ஆலோசனைப்படி இன்று மதியம் மேல்கோட் என்னும் இடத்துக்கு சென்று கோவில் தரிசனம் செய்வது மறு நாள் மைசூரை சுற்றிப்பார்பது என்பதை முடிவு செய்தோம்.

மதிய உணவை முடித்துக்கொண்டு பேருந்து நிலையத்துக்கு சென்று “மேல்கோட்” செல்ல வேண்டிய பேருந்தில் ஏறினோம். நேரடியாக செல்ல சில பேருந்து மட்டுமே இருப்பதால் ஓரிடத்தில் இறங்கி அங்கிருந்து ஷேர் ஆட்டோ மூலம் சென்றோம்.

இங்கு இரண்டு கோவில்களை மட்டுமே பார்க்க முடிந்தது. முதல் கோவில் மாலை 4 மணிக்கு திறக்கிறார்கள் அது முடிந்ததும் குன்றில் மேல் இருக்கும் நரசிம்மர் கோவில் 5.30 மணிக்கு திறந்ததும் அங்கும் சேவையை முடித்தோம்.திரும்ப மைசூர் வர பேருந்து கிடைப்பதில் சிரமம் இருக்கிறது வயதானவர்கள்/குழந்தைகள் ஜாக்கிரதையாக இருக்கவேண்டும்.படங்கள் கீழே.

நரசிம்மர் கோவில் குன்றின் மேல்

குன்றின் மேல் இருந்து மேல்கோட்

மறுநாள் முழுவதும் மைசூர் சிட்டி சுற்றுலா.

பார்த்த இடங்கள் விவரம் கீழே.
Chamundi Hills - Mysore Zoo - Mysore Palace Museum - Jaganmohana Palace - St.Philomena's Church - Sri Ranganatha Swamy Temple - Tippu's Summer Palace - Brindavan Gardens.

சொல்வது என்னவோ ஒருவருக்கு ரூ 210 ஆனால் நுழைவுக்கட்டணம் அது இது என்று மேலும் ஒரு 170 ரூபாய் கறந்துவிடுகிறார்கள்.

சாமுண்டேஸ்வரி கோவில் படங்கள் கீழே.

பிருந்தாவன் மிக மோசமான பராமரிப்புடன்.வெளிநாட்டில் இருக்கும் மீயூசிகள் பவுண்டைன் பார்த்த பிறகு இதெல்லாம் ஒன்றும் இல்லை.இசைக்கும் தண்ணீர்க்கும் ஒருங்கிணைப்பு சுத்தமாக இல்லை.

மைசூர் முடித்தவுடன் மறுநாள் காலை கிளம்பி பெங்களூர் வந்து உறவினர் ஒருவரை பார்த்துவிட்டு விமானம் பிடித்து சென்னை வந்து சேர்ந்தோம்.

ஆமாம் எல்லாம் சொல்லியாகிவிட்டது ஆனால் செலவு எவ்வளவு என்று சொல்லவில்லையே என்று பார்க்கிறீர்களா? அது கீழே. ஒருவருக்கு எவ்வளவு எனபதை கீழே உள்ள பணத்தை மூன்றால் வகுத்துக்கொள்ளவும்.தேவையில்லாதது என்னது என்றால் விமானப்பயணம் காசு தான்.

நிசகர்தாமா-திபெத் மோனாஸ்டரி

2015-01-09T12:14:00.001+05:30

மடிக்கேரின் இரண்டாவது நாளில் முதல் பாதி தலைக்காவிரி பக்கம் சுற்றிய பிறகு மைசூர் பக்கம் இருக்கும் சில சுற்றுலா தளங்களை பார்க்க அப்படியே கிளம்பினோம்.

முதலில் போனது திபெத் மோன்ஸ்டரி,கிட்டத்தட்ட திபெத்க்கே வந்த மாதிரி இருக்கு.பெரிய ஹால் ஒன்றில் புத்தருடன் இன்னும் இருவர் அவர் பக்கம் உட்கார்ந்திருக்கார்கள்.வேறு சில அறைகளில் மந்திரானம் நடந்துகொண்டிருந்தது.நல்ல பராமரிப்புடன் சுத்தமாக வைத்திருக்கார்கள்.

இங்கு சுமார் 1 மணி நேரம் சுற்றிய பிறகு அங்கிருந்து கிளம்பி நிசகர்தாமா என்ற இடத்துக்கு போனோம்.சாலையில் இருந்து ஒரு தொங்கு பாலம் வழியாக காவிரியை தாண்டி ஒரு மணல் மேடு பகுதிக்கு போனோம்.படகு சவாரி,யானை சவாரி,கயிற்றில் தொங்கிக்கொண்டு பரணில் இருந்து கீழே வருவது போன்றவை இருந்தது.சிறுவர்கள் பொழுது போக்க சுமாரான இடம்.

இங்கிருந்து வெளியே வரவே மாலை 5 மணிக்கு மேல் ஆகிவிட்டதால் விடுதிக்கு செல்ல 6 மணியாகிவிடும் என்பதாலும் ஊர் சுற்றலை இத்தோடு முடித்துக்கொண்டோம்.வரும் வழியில் டிரைவருக்கு தெரிந்த கடை,விலை மலிவு என்று சொல்லி இறக்கிவிட்டார்,பல ஐட்டங்கள் சென்னையிலேயே சல்லிசாக கிடைப்பதால் வந்த வேளைக்காக ஒரு காப்பிப்பொடி பாக்கேட் மட்டும் வாங்கிக்கொண்டார் மனைவி.
மறுநாள் விடியற்காலை இங்கிருந்து மைசூருக்கு பஸ்ஸில் முன்பதிவு செய்திருந்ததால் வேறு எந்த வேலையையும் வைத்துக்கொள்ளமால் ரெஸ்ட் எடுத்துக்கொண்டோம்.

அடுத்த இடம் மைசூர்.

மடிக்கேரி -தலைக்காவேரி

2015-01-06T22:09:00.002+05:30

மடிக்கேரியில் இரண்டாவது நாள். முதலிலேயே சொல்லியபடி ஓட்டுனர் காலை 8.30 மணிக்கு விடுதிக்கு வந்தார்.சிற்றுண்டிக்கு பக்கத்தில் உள்ள உணவகத்தில் முதல் நபராக முடித்தோம்.

மடிக்கேரியில் இருந்து சுமார் 1.30 மணி நேர பயணத்தில் மூன்று நதிகள் கலக்கும் சங்கமம் என்று கருதப்படும் திரிவேணி சங்கமம் சென்றடைந்தோம்.இரண்டு வாய்கால்கள் சேர்வதை மட்டுமே பார்க்கமுடியும்.மூன்றாவதாக உள்ளது நிலத்துக்கு அடியில் ஓடுவதாக ஐதீகம்.வடக்கில் உள்ள அதே ஐதீகத்தை இங்கு போட்டு அதை ஒரு சுற்றுலா இடமாக மாற்றிவிட்டார்கள் என்றே தோன்றுகிறது.இங்கும் ஒரு கோவில் உள்ளது அதுவும் கேரள பாணியில் இருந்தது.

திரிவேணி சங்கமம்.

கேரள பாணியில் அமைந்துள்ள கோவில்.

இங்கு ஒரு 40 நிமிடம் செலவு செய்த பிறகு அங்கிருந்து ஒரு 30 நிமிடத்தில் தலைக்காவிரி சென்றடைந்தோம்.இரண்டு குளங்கள் உள்ளது.இதுவும் ஒரு ஐதீகம் தான்.நதி மூலம் பார்க்ககூடாது என்ற சொல்லாடல் பழைய கால பாடல்களில் வரும் அதனால் பலரும் நம்புவதை நாமும் ஏற்றுக்கொண்டு மேலே போவோம். இதற்கு அருகிலேயே சுமார் 300 படிகள் ஒரு மலை மீது போய்கொண்டிருக்கும்.முதலில் சுமார் 25 படி ஏறும் முன்பே மேல் மூச்சு கீழ் மூச்சு வாங்க ஆரம்பிக்கும் அதையெல்லாம் கடந்தால்,மலை உச்சியில் அழகான காட்சிகள் காண கிடைக்கும்.நாங்கள் போன சமயம் சும்மா அட்டகாசமாக குளிர்ந்த காற்று வீசிக்கொண்டிருந்தது.அங்கு எடுத்த சில படங்கள் கீழே.

தலைக்காவேரி.

ஏறி இறங்க மற்றும் சுற்றிப்பார்க்க 1.30 மணி நேரம் ஆனது.இங்கிருந்து திரும்பும் வழியில் ஒரு கடையில் நிறுத்தி டீ /காபி குடித்தோம்.அந்த கடைக்கு பின்புறம் சின்ன தோட்டம் வைத்துள்ளார்கள் அதில் காபி/அன்னாசி/சப்போட்டா/மிளகு என்று பல செடிகள் பயிரிட்டிருந்தார்கள். காபியில் இருவகை ரோபஸ்டா மற்றும் அரபி என்றும் மிளகு பயிரியில் இருந்து வரும் பணம் எஸ்டேடில் வேலை மற்றும் நிர்வாக செலவுக்கு சரியாகிவிடும் என்றும் காபி விற்பனை முழுவதும் லாபம் என்று ஓட்டுனர் சொன்னார்.

காபி பழம்

கொடி மிளகு.

காபிச்செடி

இது அனைத்தும் தலைக்காவிரி பக்கம் என்பதால் மதியம் வரை சுற்றிவிட்டு மதிய சாப்பாட்டுக்கு மடிக்கரி வந்து சேர்ந்தோம்.இதன் தொடர்ச்சி அடுத்த பதிவில்.

மடிக்கேரி (2) - சுற்றுலா

2014-12-30T15:54:00.000+05:30

21 ம் தேதி டிசம்பர் Hilltown விடுதியில் தங்க ஏற்பாடு ஆகியிருந்தது.உள்ளே நுழைந்ததுமே ஏதோ ஒரு வாடை மூக்கை துளைத்தது.தேவையான விபரங்களை கொடுத்ததும் அறை முடிவானது.நல்ல வேளை அந்த அறையில் அந்த வாசம் இல்லை.சுமாராக பராமரிக்கப்படுகிறது. பெரிய அளவு எதிர்பார்ப்பு இல்லாததால் அந்த அறையே போதும் என்று முடிவு செய்தோம்.மதிய நேரம் மட்டுமே இருப்பதால் அதற்குள் என்னென்ன இடங்கள் செல்ல முடியும் என்று விடுதி முகவரிடம் கேட்டதற்கு அவர் ஒரு எண் கொடுத்து அவரிடம் பேசிக்கொள்ளுமாறு சொன்னர். பேசிய நபருக்கு குறைவான தமிழ்/ஆங்கிலம் தெரிவதால் அவர் ஆலோசனையின் படி இன்று மதியம் உள்ளூரை சுற்றிவிடுவோம் மறுநாள் வெளியில் உள்ள இடங்களை பார்க்கலாம் என்றார். அரை நாளுக்கு டாடா இண்டிகா ரூ 600 என்று பேசி முடித்தோம்.

முதலில் அப்பி நீர் வீழ்ச்சி.

குற்றாலத்தின் பாதி உயரம் மட்டுமே.பேருந்துவில் போனால் கொஞ்சம் தூரம் நடக்கவேண்டும்.காரில் போனால் அவ்வளவு தூரம் நடக்கவேண்டியது இல்லை.

இந்த நீர்வீழ்ச்சியை பார்வையிட ஒரு தொங்குபாலமும் இருக்கு.மழைக்காலத்தில் இன்னும் நிறைய நீர் கொட்டும் என்று நினைக்கிறேன்,

இங்கு சுமார் 1 மணி நேரம் கழித்த பிறகு Raja Tomb என்ற இடத்துக்கு சென்றோம்.உச்சியில் தாஜ்மஹால் மாதிரி அமைப்பு இருந்தாலும் முகப்பில் இந்து கோவிலுக்கு உரிய சின்னங்கள் இருந்தன.இங்கு பெரிதாக பார்க்க ஏதும் இல்லை,

அடுத்ததாக போன இடம் கோட்டையும் அதனருகே இருக்கும் கலை பொருட்காட்சியகமும்.பெரியதாக ஈர்கக்கூடிய சமாச்சாரங்கள் எதுவும் கண்ணில் படவில்லை.

இது முடிந்த பிறகு இருக்கும் ஒரே கோவிலுக்கு போனோம்.வித்தியாசமான அமைப்பில் உள்ள கோவில் இது.

கடைசியாக ராஜா சீட் - சூரிய அஸ்தமனத்தையும் மடிகேரியின் ஒரு பகுதி அழகையும் மேலிருந்து பார்க்கும் வண்ணம் அமைந்துள்ளது இந்த இடம்.

பள்ளிக்குழந்தைகள்

மாலையானதுமே நல்ல குளீர் எடுக்க ஆரம்பித்துவிடுகிறது.மரக்கறி உணவகங்கள் நிறைய இருப்பதால் சாப்பாட்டுக்கு அவ்வளவு பிரச்சனை வரவில்லை.

அடுத்தது தலைக்காவிரி...

மடிகரி (1) - சுற்றுலா

2014-12-27T20:59:00.000+05:30

இரண்டரை மாதத்துக்கு முன்பே “எனக்கு 60 கல்யாணம்,நீங்களெல்லாம் நிச்சயமாக வரனும்” என்று வேண்டுகோள் விடுத்த மும்பாய் உறவினர் தவறாமல் டிக்கெட் போடுவதென்றால் முன்னமே செய்துவிடவும் என்று சொல்லியிருந்தார்.அதை ஞாபகம் வைத்துக்கொண்டு IRCTC இணைய பக்கத்தில் சரியாக இரண்டு மாதம் வந்தவுடன் முயற்சித்தேன்.இரவு 12 மணி தாண்டியவுடன் தான் செய்யமுடியும் என்பதை மறுநாள் தான் தெரிந்துகொண்டேன் ஏனென்றால் காலை முயற்சிக்கும் போதே காத்திருப்பு பட்டியலில் இருந்தது.ஆவது ஆகட்டும் என்று 2AC யில் காத்திருக்கும் பட்டியலில் போட்டுவைத்தேன்.கிருஸ்துமஸ் மற்றும் பள்ளி விடுமுறை என்பதால் காத்திருப்பு பட்டியலில் முன்னேற்றமே இல்லாததால் கிளம்புவதற்கு சில நாட்கள் முன்பு கேன்சல் செய்துவிட்டோம்.

போட்ட லீவு வீணாக போகாமல் இருக்க வேறு எங்காவது போகலாம் என்ற போது கூர்க் போகலாம் என்று முடிவு செய்து தேவையான விபரங்களை இணையத்தில் இருந்து பெற்று சென்னை - மைசூர் - மடிகரி என்று முடிவு செய்தோம். மைசூர் வரை இரயிலில் அங்கிருந்து பஸ்ஸில் மடிகரி போவது என்று முடிவு செய்து காவேரி விரைவு ரயிலில் இரவு 9 மணிக்கு சென்னையில் கிளம்பி காலை 7 மணிக்கு மைசூர் சென்று சேர்ந்தோம்.KSRTC பேருந்துவில் முன்பதிவு செய்திருந்தோம்.காலை 10.15 மணிக்கு உள்ள பேருந்துவில் முன் பதிவு செய்திருந்தோம் ஆனால் அதற்கு முன்பே பல பேருந்துகள் இருப்பது அங்கு போனதும் தெரிந்தது. மடிகரிக்கு இல்லாவிட்டால் குஷால் நகர் (86 கி.மீ) வரை சென்று அங்கிருந்தும் செல்லமுடியும்.

மடிகரியில் தங்குவதற்கு விடுதி முன்பதிவு செய்யலாம் என்று இணையத்தில் தேடிய பல விடுதிகளில் என்னுடைய பட்ஜெட்டுக்கு ஏற்ற மாதிரி ஒரு இடத்தை “Travelguru" மூலம் புக் செய்தேன்.கிளம்பும் நாளான்று இந்த ஹோட்டலுக்கு ஒரு முறை கூப்பிட்டு சரி செய்துகொள்ளலாம் என்று கேட்டால்,அப்படி ஒரு புக்கிங்கே இல்லை என்று சத்தியம் செய்தார்கள்.இதென்னடா கொடுமை என்று நினைத்து டிராவல் குருவுக்கு மும்பைக்கு போன் போட்டா அங்கு இங்கு என்று இழுத்து கடைசியில் வேறு ஒரு விடுதிக்கு மாற்றிக் கொடுத்தார்கள்.இனிமேல் இந்த இணைய முகவரை அனுகக்கூடாது என்று முடிவு செய்தேன்.

மைசூருக்கு சென்று சேர வேண்டிய ரயில் சரியாக செல்ல, Pre-Paid ஆட்டோவுக்கு ஒரு ரூபாய் கொடுத்து முன் பதிவு செய்துகொண்டால் சேர வேண்டிய இடத்தை கேட்டு அதற்கான தொகையையும் அதிலேயே பிரிண்ட் செய்து கொடுத்துவிடுகிறார்கள்.நன்றாக இருக்கு. 25 ரூபாய் கொடுத்து இரண்டு கி.மீ தூரத்தில் உள்ள KSRTC முனையத்துக்கு சென்றோம்.மைசூரில் உள்ளூர் பேருந்துகளுக்கு தனி முனையம் உள்ளது அதனால் சரியாக சொல்லி முன்பதிவு செய்துகொள்ள வேண்டும்.

KSRTC முனையத்துக்கு ஸ்டேஷனில் இருந்து 15 நிமிடம் தான் ஆனது.நான் முன்பதிவு செய்திருந்த வண்டி வர இன்னும் இரண்டு மணி நேரம் காத்திருவேண்டும் என்பதால் முணையத்தில் உள்ள உணவகத்திலேயே காலை சிற்றுண்டியை முடித்தோம்.10.15 மணி வண்டிக்கு சுமார் 9.45 க்கு பேருந்துவின் நடத்துனரிடம் இருந்து அழைப்பு வந்தது.வண்டியின் எண் , இருக்கும் இடம் எல்லாம் சொல்லி அங்கு வருமாறு அழைத்தார்.முடிந்தவரை ஆங்கிலத்தில் பேசினார்.

சரியாக 3 மணி நேர பயணம். 126 கி.மீ தூரம். மடிகரி வந்து சேர்ந்தோம். மற்றவரை அடுத்த பதிவில்.

திரைச்சீலை (DIY)

2014-12-14T17:22:00.003+05:30

வீட்டு ஜன்னல்களுக்கு திரைச்சீலை போடலாம் என்ற எண்ணம் வந்த போது அது கிடைக்கும் இடம்,தற்போது கிடைக்கும் விலை விபரங்களை நோண்டிக்கொண்டிருந்தேன்.கூகிளில் தேடிய போது பெரும்பாலும் வெளிநாடுகளில் கிடைக்கும் உபகரணங்களும் விலைகளுமே கண்ணில் பட்டது.உள்ளூரில் ரெடிமேடாக கிடைப்பவையே கண்ணில் பட்டது.

எப்போதோ வாங்கிப்போட்ட திரைச்சீலை வீட்டில்சும்மா இருப்பதை பார்த்தவுடன் அதையே உபயோகிக்கலாம் என்று முடிவு செய்து அதற்கான வழிமுறைகளை பார்த்த போது நான் முயற்சித்த வழிகள் அவ்வளவாக திருப்தியாக இல்லாத்தால் அதை பைப் போட்டு Eyelet போட்டு உபயோகிக்கலாம் என்று முடிவு செய்தேன். பக்கத்தில் உள்ள திரைச்சீலை /மெத்தை விற்கும்கடைகளை கேட்டபோது 4’ அடிக்கு முறையே ரூபாய் 200/100 கேட்டார்கள்.

சரி நாமாகவே செய்தால் எவ்வளவு ஆகும் என்று மனது அசைப்போட ஆரம்பித்தது.முதலில் இந்த Eyelet எங்கு கிடைக்கிறது என்று இணையத்தில் தேடியதில் அவ்வளவு விபரம் கிடைக்கவில்லை.Parrys இல்லாத சாமான் இருக்குமா என்று தேடியதில் கோவிந்த நாயக்கன் தெருவில் இதை விற்கும் பல கடைகள் கண்ணில் பட்டது.

ஒரு நாள் வேறு வேலையாக தி.நகர் சரவணா ஸ்டோர் போன போது அங்கும் திரைச்சீலை இருப்பதை பார்த்தேன்,விலை 275-650 வரை இருந்தது.இது அனைத்தும் 4’ அகலம் 7’ உயரம் கொண்டவை.4’ ஜன்னலுக்கு இது மாதிரி 2 வாங்கினால் தான் நன்றாக இருக்கும்.விலைகளை மனதில் நிறுத்திக்கொண்டேன்.

நானே செய்வது என்று முடிவெடுத்த பிறகு 2 நாட்களுக்கு முன்பு Parrys சென்று இதற்கு தேவையான சாமான்களை கடையில் கேட்டுக்கொண்டிருக்கும் போது வேறு இருவர் என்னை மாதிரியே வந்து விபரம் கேட்டுக்கொண்டிருந்தார்கள்.அங்கு இருந்த சாமான்களை வைத்தே இதை எப்படி உருவாக்கவேண்டும் என்ற யோஜனை பிறந்தது.

தேவையான சாமான்கள்:

Eyelet
Locking Cap
Template Cloth
Curtain

கீழே உள்ள படத்தில் Eyelet ம் Locking Cap. இதன் விலை ரூபாய் 5 +1 (ஒன்றுக்கு)

Template Cloth ம் Curtain ம். இந்த டெம்பிளேட் துணியை வைத்து Curtain மேல் வைத்து தேவையான துளை துவாரங்களை வரைந்து வெட்டிக்கொள்ள வேண்டும்.இந்த துணியின் விலை மீட்டருக்கு 15 ரூபாய்.

Eyelet மற்றும் Locking Cap ம் இணைந்த நிலையில்.

Curtain உடன் இணைந்த நிலையில்.

மிக முக்கியமாக இந்த Eyelet எண்ணிக்கை இரட்டைபடையில் இருக்க வேண்டும் அப்போது இரு முனைகளும் சுவர் பக்கம் திரும்பிய நிலையில் இருக்கும். 4’ ஜன்னலுக்கு திரைச்சீலை சுமார் 86” அகலம் இருக்கவேண்டும்.

திரைச்சீலை போட்ட நிலையில்.

Eyelet Fixed, Template கிளாத்தும் கிடைக்கிறது அது மீட்டர் ரூபாய் 35.

Parrys கடைகளில் கடைகளுக்கிடையே விலை வித்தியாசம் இருக்கு அதனால் சில கடைகள் ஏறி இறங்கினால் நியாமான விலையில் பொருட்களை வாங்கலாம்.

மின் இணைப்பு- சும்மா தெரிந்து வைத்துக்கொள்ளுங்கள்.

2014-10-18T14:57:00.000+05:30

நமக்கு தொழில் என்னவோ கட்டுமானம் என்றாலும் கைத்தொழில் அதுவும் வீட்டுக்கு வேண்டிய சின்னச்சின்ன வேலைகளை நானே செய்து அதில் வெற்றி அடைந்தால் அதைப்போல் மகிழ்வான நேரம் எதுவும் இல்லை.இப்படிப்பட்ட வேலைகளை பல இங்கு எழுதியுள்ளேன் அதன் தொடர்சியில் இது மற்றொன்று.
எச்சரிக்கை: இது என் அனுபவம் இதை பார்த்து நீங்கள் முயற்சிப்பது உங்கள் இஷ்டம் அதற்கு நான் பொருப்பல்ல.

பெற்றோர் வீட்டில் சுமார் 15 வருடத்துக்கு முன்பு வாங்கிய வோல்டேஜ் ஸ்டெபிலைசர் சும்மாகவே கிடந்தது.AC வாங்கிய போது வாங்கியது.இப்போது பூஸ்டர் நிறுவிய பிறகு ஸ்டெபிலைசருக்கு வேலை இல்லாமல் போனது.இப்போதெல்லாம் அதை யாரும் உபயோகிப்பதில்லை என்பதால் அதை வாங்க போட்டி இருப்பதில்லை.அதனுள் இருக்கும் காயிலுக்கு தான் மதிப்பு.சரி தூக்கிப்போடுவிடலாம் அல்லது பேப்பர் எடுப்பவர் கேட்டால் கொடுத்துவிடலாம் என்று எண்ணியிருந்தேன்.நல்ல நிலையில் இருக்கும் ஒரு பொருளை தூக்கிப்போடுவதென்றால் கஷ்டமாகத்தான் இருக்கிறது.எப்படியாவது எங்காவது உபயோகிக்க முடியுமா என்று யோசித்துக்கொண்டிருக்கும் போது சட்டென்று ஒரு யோஜனை தோன்றியது.வோல்டேஜ் பிரச்சனையில் அடிக்கடி பழுதாவது இந்த டிவியும் ஒன்று.அதற்கு கொடுக்கும் மின் இணைப்பை இதன் மூலம் கொடுத்தால் கொஞ்சம் பத்திரமாக இருக்குமே என்று நினைத்தேன்.

ஸ்டெபிலைசர் இணைப்பை பார்த்த போது ஒரு inlet ஒரு outlet அவ்வளவு தான்.மின் இணைப்பு வழங்கியில் பிரச்சனையில்லை.கரண்ட் வெளியில் வரும் இடத்தில் ஒரு Extension Point இருந்தால் அதிலிருந்து டிவி/டிவிடி க்கு இணைப்பு கொடுக்கலாம்.இந்த எண்ணத்துடன் கடைக்கு சென்றேன். நான் சென்ற கடையில் உதவியாளர் மட்டுமே இருந்ததால் நான் சொல்வதை அவரல் புரிந்துகொள்ள முடியவில்லை என்பதால் அடுத்த கடைக்கு சென்றேன்.இரண்டு பிளக் பாயிண்ட் உள்ள Extension Cable இருக்கா என்றேன்.நான்கு உள்ளது தான் இருக்கு என்றார் .அதிகமாக இருந்தாலும் அதன் பிளக் மோல்ட் செய்யப்பட்டிருந்தது அதோடு விலையும் அதிகமாக இருந்தது.வேண்டியது இரண்டு ஆனால் இருப்பதோ நான்கு அதுவும் அதிக விலையில்!! சரி இது வேலைக்கு ஆகாது என்று அவரிடமே தனியாக பாக்ஸ் உள்ளதா என்றேன். அட்டகாசமாக இரு பிளக் உள்ள பெட்டி மற்றும் அதற்கு தேவையான பிளக் மற்றும் சுவிச்சுகளையும் கொடுத்தார்.3 Phase கேபிள் ஒரு 2 மீட்டர் வாங்கினேன்.இதையெல்லாம் எப்படி இணைப்பது? எனக்கு முன் அனுபவம் இல்லாத்தால் கடைக்காரரிடமே செய்துகொடுக்க முடியுமா என்றேன். முடியும் ஆனால் எலக்ரீஷியன் வரணும் அதற்கு நேரமாகும் என்றார் கூடவே அவருக்கு ஒரு 50 ரூபாய் ஆகும் என்றார்.வேண்டாம் என்று சொல்லிவிட்டு வீட்டுக்கு வந்து இணையத்தில் தேடினால் ஒரு அழகான வீடியோ கிடைத்தது அதில் எப்படி செய்ய வேண்டும் என்று விளக்கியிருந்தார்கள்.

அதை உள்வாங்கி நான் செய்தது கீழே...

எனக்கு தேவைப்பட்ட எக்ஸ்டென்ஷன்.

Standard Connection. Red Color: Phase, Green : Neutral

மெயின் கேபிள் மற்றும் எர்த் இணைக்கப்பட்டுள்ள படம் கீழே.

எல்லாம் முடிந்து மெயின் பவர் சப்ளையில் இணைத்து செக் பண்ணி பார்த்தேன் எல்லாம் சரியாக இருந்தது.

இந்த பால பாடம் இனி எப்போதும் மறக்காது ஏனென்றால் என் கையால் செய்தது அல்லவா?