மக்கள் செய்தி

மனஅகராதி

2019-12-02T21:50:00.000+05:30

dr. ஃபஜிலா ஆசாத், சர்வதேச வாழ்வியல் ஆலோசகர்

மனஅகராதி

நம்மை அதிகம் அறியாதவர்களை விட நமக்கு மிக வேண்டியவர்களின் செயல்கள் தானே நம்மை அதிகம் உணர்ச்சி வசப்பட செய்கிறது. அதிலும் நன்றாக பழகக் கூடியவர்கள் கொஞ்சம் பாராமுகமாக இருந்தால் கூட வருத்தம், அவமானம் என மனம் வேதனையில் தவிக்கிறதே இது பலரின் புலம்பல்.

உண்மையில் கோபம், வருத்தம், கவலை, பயம், அவமானம், குற்ற உணர்ச்சி என எந்த உணர்ச்சியும் வெளியிலிருந்து உங்களுக்கு வருவதில்லை. உண்மையில் இந்த உணர்ச்சிகள் எல்லாமே ஒன்றை தொட்டு உங்களுக்குள் ஓடும் எண்ண ஓட்டங்கள், சிந்தனைகள், மனத்திரையில் எழும் காட்சி அமைப்புகள், மனதுள் சுழன்று எழும் வார்த்தை பிரவாகங்கள், என உங்கள் கருத்துக்களுக்கு உங்கள் உடல் தரும் ஒரு “ஃபீட்பேக்”.

உங்களை சுற்றி எத்தனை விஷயம் நடந்தாலும் அது எந்த மாதிரியான உணர்ச்சியை உங்களுக்குள் ஏற்படுத்த வேண்டுமென்பதற்கு உங்களுடைய மனது உங்களிடம் இருக்கும் அதற்கான அர்த்தம் பிரிக்கும் பிரத்யேக அகராதியை வைத்தே உங்கள் ஹார்மோன்களை சுரக்க செய்து உங்களுக்குள் பல உணர்ச்சிகளை ஏற்படுத்துகிறது.

அதாவது நீங்கள் எது ஒன்றையும் உங்கள் மனதில் எதிர்மறையாக எடுக்கும் போது உங்கள் மூளைக்கு அந்த எதிர்மறை சிந்தனை செய்தி போக உடனே மூளையின் பகுதியில் இருக்கும் (hypothalamus)ஹைப்போதலமஸ் எனும் கெமிக்கல் ஃபேக்ட்ரி எதிர்மறை உணர்ச்சிகளை ஏற்படுத்தும் ஹார்மோன்களை சுரக்க செய்கிறது. அந்த சுரப்பிகளும் உங்களுக்குள் எதிர்மறை விளைவுகளை ஏற்படுத்துகிறது.

உதாராணமாக, நீங்கள் எதிர்பார்க்கும் ரெஸ்பான்ஸ் ஒருத்தரிடமிருந்து உங்களுக்கு கிடைக்காத போது நீங்கள் அதை அவமானமாகக் கருதினால் அதற்கான கெமிக்கல் ஹார்மோன்கள் உங்களிடம் சுரந்து அது உங்கள் இரத்த ஓட்டத்தில், உங்கள் உடம்பின் ஒவ்வொரு செல்களிலும் கலந்து உங்கள் உடம்பை வருத்தும் வகையில் உங்களை மனஅழுத்தத்திற்கு ஆளாக்கி விடும். உங்களின் எண்ணத்தின் திடத்தைப் பொறுத்து சுரப்பியின் அளவு இருக்க அதன் அளவைப் பொறுத்து உங்கள் உணர்ச்சியில் அழுத்தம் இருக்க அதைப் பொறுத்து உங்கள் மனதின், உடலின் ஆரோக்யம் பாதிக்கிறது.

இதுவே நீங்கள் எந்த சூழலிலும் எதையும் பெர்சனலாக எடுத்துக் கொள்ளாமல், உங்கள் மகிழ்ச்சியை இழக்காமல் இருந்தால் எதிர்மறை உணர்ச்சிக்கான சுரப்பிகள் உங்களிடம் சுரக்காமல் உங்கள் உடலும் மனதும் ஆரோக்யமாக இருக்கும்.

நீங்கள் கற்றதிலும் வாழ்க்கை பயணத்தில் பெற்றதிலும் ஒவ்வொன்றிற்கும் உங்களுக்கு பிடிபடும் வகையில் ஒரு அர்த்தத்தை கற்பித்துக் கொள்கிறது மனம். அது தான் உண்மையென அந்தந்த சூழல்களில் நம்பி அது ஏற்படுத்தும் உணர்ச்சிகளால் உற்சாகமாகவோ, உறுத்தலாகவோ, உதாசீனமாகவோ உணர்கிறீர்கள். உங்கள் மனஅகராதியே உங்கள் உணர்ச்சிகளையும் உங்கள் வாழ்க்கை தரத்தையும் மகிழ்ச்சியையும் நிர்ணயிக்கிறது, உதாரணமாக பிரச்னை என்று நீங்கள் கருதக் கூடிய ஒன்றை உங்களுக்கான சவால் என்று உங்கள் மனஅகராதியில் மாற்றிக் குறித்துப் பாருங்கள். இப்போது இந்த உணர்ச்சிக் கணக்கை முன்னிருந்து பின்னாக போட்டுப் பாருங்கள். உங்களுக்குள் என்ன உணர்ச்சி எழுகிறது, அது என்ன விளைவைத் தருகிறது என்பதை நீங்களே உணர்ந்து கொள்வீர்கள்.

பொதுவாக, உங்களுக்கு பிடித்தமான விஷயங்களை செய்யும் போது பிடித்தமானவர்களோடு பேசும்போது, உங்களுக்குள் மகிழ்ச்சிக்கான சுரப்பிகள் சுரக்க நீங்களும் மகிழ்ச்சியாக உணர்கிறீர்கள். அந்த நேரம் ஒருவரை எப்படி எடுத்துக் கொண்டீர்களோ அது உங்கள் மனஅகராதியில் பதிந்து விடுவதால் பின் அவர்கள் சந்தர்ப்ப சூழலால் அல்லது காலப் போக்கில், அல்லது பழகிப் போன ஒன்றை கடந்து போகும் அவசரத்தில், வேறு விதமான உணர்ச்சிகளை உங்களிடம் வெளிப்படுத்தும் போது அவர்களைப் பற்றி உங்களுக்குள் பதிந்து வைத்திருக்கும் அகராதிக்கு அது மாற்றமாக தெரிவதால், உங்களுக்குள் எதிர்மறை உணர்ச்சிகள் ஏற்படுகிறது. எப்போதும் கோபமாக பேசக் கூடியவரின் உணர்ச்சிகளைக் கூட அதிக உணர்ச்சி வசப்படாமல் கடந்து வரும் மனம் நம்மிடம் ஏற்கனவே நன்றாக பேசிய ஒருவரின் சிறு உதாசீனங்களைக் கூட தாங்க முடியாமல் துவண்டு போகிறது.

இப்படி மனதில் ஒன்றை பற்றி நீங்கள் பதிவு செய்து வைத்தவற்றிற்கும் இப்போது நடப்பவற்றிற்கும் முரண்பாடாக இருக்கும் போது உங்களால் எளிதில் அதை சாதாரணமாக எடுத்துக் கொள்ள முடியாமல் அந்த சுமூகமாக இல்லாத ஒன்றையே மனம் சுற்றி சுற்றி வர. ஒன்று அதைக் கடந்து வரமுடியாமல் அந்த சுழலில் மனம் சிக்கித் தவிக்கிறது அல்லது அதை சுமூகமாக்க நினைத்து அதற்கான வழியைத் தேடி, நடந்த நிகழ்வுகளையே சுற்றி வரும் மனம், தன் எண்ண சுழலில் சிக்கிக் கொள்கிறது.

இது அறிவியல் பூர்வமாக இல்லாவிட்டாலும் பலருக்கும் அனுபவபூர்வமாக தெரிந்திருந்தாலும் நாம் ஒருவருக்கு கொடுக்கும் முக்கியத்துவத்தை நமக்கு நாமே பறைசாற்றிக் கொள்ளும் விதமாக பல நேரங்களில் விரும்பியே இந்த அழுத்தங்களை உங்கள் மனம் வரவேற்றுக் கொள்கிறது. உன்னால் நான் எவ்வளவு சிரமப் படுகிறேன் தெரியுமா என வேண்டியவர்களிடம் அவர்களுக்கு உங்கள் மனம் கொடுக்கும் முக்கியத்துவத்தை சொல்ல நினைக்கிறது. அவர்களிடம் நீ எப்படி என்னை உதாசீனப் படுத்தலாம் என உரிமையோடு போராடத் துடிக்கிறது.

உண்மையில் அவர்களுடைய செய்கைகள் உங்களை வருந்த வைக்கவில்லை. அதற்கு உங்கள் மனம் கொடுக்கும் அர்த்தமே இப்படி இருக்குமோ அல்லது அப்படி இருக்குமோ, என்ற அலசலும் சுமூகமாக வைத்துக் கொள்ள நினைக்கும் உறவுகள் விட்டுப் போய் விடுமோ என்ற பாதுகாப்பின்மையுமே பதற்றத்தை ஏற்படுத்துகிறது.

அந்த பதற்றமே பல உறவுகளை உடைக்கிறது. உங்கள் இயல்பை விட்டும் உங்களை தாண்டி வரச் செய்வதோடு அவர்கள் இயல்பை மீறச் செய்யும் இறுக்கத்தை அவர்களுக்குள் தூண்டி விடுகிறது. சற்றே மூடப்பட்ட ஒரு பாத்திரத்தை திறக்க முயலும் போது கொஞ்சம் இலாவகமாக கையாளாவிட்டால் அது இன்னும் இறுக்கிக் கொள்வது போல் உறவுகளை சரியான புரிதல் இல்லாமல் பதற்றத்திலும் இயலாமையிலும் இன்னும் இறுகிப் போகச் செய்கிறது.

நாம் எடுக்கும் நல்ல முடிவுகளே நம் வாழ்க்கையின் நல்ல தொடக்கமாக இருக்கும். உங்களை சரியாக புரிந்து கொள்ளாத ஒருவரோ அல்லது உங்கள் கண்ணுக்குத் தெரியாத ஏதோ ஒன்றோ, உங்களை வருத்துகிறது என்று சுற்றும் முற்றும் உற்று பார்த்து தேங்கிப் போகாமல், பிரச்னைக்கான தீர்வை எங்கோ தேடி ஏங்கிப் போகாமல், உங்களுக்குள் உற்று பார்த்து எதையும் பாஸிட்டிவாக எடுத்துக் கொள்ள வேண்டும் என்ற முடிவை உங்களுக்குள் எடுத்துப் பாருங்கள்.

இனி உங்களை சுற்றி என்ன நடந்தாலும் இப்போது நீங்கள் முடிவு செய்த வகையிலேயே பார்ப்பீர்கள். பிறர் எந்த அர்த்தத்தில் எது செய்தாலும் நீங்கள் எந்த அர்த்தத்தில் அதை எடுக்கிறீர்களோ அதற்கான உணர்ச்சிகள் தான் உங்களுக்குள் சுரக்கும்.

உண்மையில் நம்மை பற்றி நல்ல எண்ணம் நமக்கு இருந்தால் நம்மை போய் இப்படி இகழ்வாக நடத்துகிறார்களே என்று நினைத்து வருந்த மாட்டோம். நம்மை எப்படி இகழ்வாக நடத்துவார்கள் என்று மற்றவர்களையும் குற்றம் பிடிக்காமல் நீங்களும் குறைத்து மதிப்பிடாமல், எந்த எதிர்மறை உணர்ச்சிக்கும் ஆளாகாமல் இருப்பீர்கள். அது உங்களை சுற்றி இருப்பவர்களையும் நல்ல முறையில் பார்க்க செய்யும்.

நீங்கள் மகிழ்ச்சியாக அன்பாக இருக்க நினைத்தால் உங்களுக்குள் பாசிடிவான எனர்ஜி நிறையும். நீங்கள் மகிழ்ச்சியாகவும் ஆரோக்யமாகவும் உணர்வீர்கள். எல்லாவற்றிற்கும் மேலாக, காற்றில் இழுத்து செல்லப் படும் சிறு இறகாக நீங்கள் எதெதிலோ இழுத்து செல்லப் படாமல் உங்கள் உண்மையான இயல்போடு இருப்பீர்கள்.

உங்களை நீங்கள் கேர் பண்ண நினைத்தாலே நீங்கள் உறுத்தல் இல்லாத மகிழ்ச்சியான மனநிலையோடு எப்போதும் இருக்க வேண்டும் என்று நினைத்தாலே, அந்த மகிழ்ச்சியைத் தக்க வைத்துக் கொள்ளும் முயற்சியில் பிறரையும் அன்போடும் அனுசரனையோடும் புரிதலோடும் பார்க்கத் தொடங்கி விடுவீர்கள். இந்த உலகத்திற்கான நம்மை தயார் செய்யும் போது நமக்கான இந்த உலகம் தயாராகி நிற்கும்.

உங்களுக்குள் மகிழ்ச்சி சுரக்கும். அது உங்களை மட்டுமல்ல உங்கள் சுற்றத்தையும் நிறைக்கும்

தோல்வி என்பது பதற்றமா…? பரவசமா..?!!!

2019-12-02T21:33:00.000+05:30

dr. ஃபஜிலா ஆசாத், சர்வதேச வாழ்வியல் ஆலோசகர்

தோல்வி என்பது பதற்றமா…? பரவசமா..?!!!

நான் எது செய்தாலும் தோல்வியாகவே முடிகிறது. அடுத்தடுத்த தோல்வி தந்த பாதிப்பு இன்று என்னால் எதுவும் செய்ய முடிவதில்லை. ஏதாவது செய்யலாம் என்று எண்ணினாலே எனக்குள் நடுக்கமும், பதற்றமும், பயமும் ஏற்படுகிறது. வெற்றி என்பது இனி என் வாழ்க்கையில் சாத்தியமே இல்லையா?!

எத்தனை முறை தோற்றோம் என்று எண்ணாமல், ஏன் தோற்றோம் என்று எண்ணினால் அடுத்த முறை நிச்சயம் உங்களுக்கு வெற்றி தான்.

வெற்றிக்கும் தோல்விக்குமான இடைவெளி ‘இன்னும் ஒருமுறை முயல்வோம்’ என்பதில் தான் இருக்கிறது என்கிறார் பிரிடிஷ் எழுத்தாளர் “ஆலிவர் கோல்ட்ஸ்மித்”. அதாவது இந்த முறை ஏதோ ஒரு காரணத்தினால் கை நழுவிய வெற்றி இதோ இன்னும் ஒரு முறை கொஞ்சம் விழிப்புணச்சியோடு முயற்சித்தால் கிடைத்துவிடும் என்று கூறுகிறார்.

இதில் நாம் கவனிக்க வேண்டிய இன்னும் ஒரு மிக முக்கியமான கருத்தும் இருக்கிறது. அது என்னவென்றால்… எந்த ஒரு முயற்சியும் வெற்றி அடையாமல் முடிவடைவது இல்லை என்பதுதான். இன்னும் தெளிவாக சொல்வதென்றால் நாம் செய்ய ஆரம்பிக்கும் எந்த ஒரு செயலும் வெற்றி அடைந்தால்தான் முடிவுறுகிறது, அந்த இறுதி முயற்சி உங்கள் விழிப்புணர்ச்சியை சார்ந்து இருக்கிறது என்று அறிவுறுத்துகிறார்.

நீங்கள் நினைத்த நேரத்தில், முயற்சித்த தருணத்தில் கிடைக்காத வெற்றியை, தோல்வியாகவோ அல்லது வெற்றிக்கான படிக்கல்லாகவோ உருமாற்றுவது உங்கள் கையில்தான் இருக்கிறது.

நீங்கள் தோற்ற விஷயங்களை குற்ற உணர்ச்சி இல்லாமல் அலசிப் பார்த்தால், மீண்டும் மீண்டும் முயன்றதில் அந்த குறிப்பிட்ட விஷயத்தில் நீங்கள் எத்துனை வல்லுனராகி இருக்கிறீர்கள் என்பது உங்களுக்கே புரியும்.

தோல்வி என்பது உங்களுடைய அடுத்த வெற்றிக்கான ஒரு அஸ்திவாரம். அஸ்திவாரம் என்பது எப்படி மண்ணுக்கு கீழே போடப்படுமோ அது மாதிரி உங்களது வெற்றி பெறாத முந்தைய முயற்சிகள் உங்கள் உழைப்பிற்கான அஸ்திவாரமாக வெளியில் தெரியாமல் உங்களை உறுதியாக்கி இருக்கும். இதை உணர்ந்து கொண்டீர்கள் என்றால், பின்னிழுக்குற இந்தத் தோல்வி, எப்படி வில்லின் நாணை பின்னிழுத்து விட்டால்.., அம்பு சீறிப் பாயுமோ அது போல் உங்களை அதிவேகமாக வெற்றிப் படிகளில் ஏற்றி விடும்.

ஆனால், பொதுவாக கீழே விழுந்து விடாதீர்கள், விழுந்து விடாதீர்கள் என்று சொல்லி சொல்லி வளர்க்கப் படுவதால், விழுவதே பெரும் தவறு என்று பதறுகிறோம். ஏதோ ஒரு சந்தர்ப்பத்தில் கீழே விழுந்து விட்டால் அப்படியே அவமானத்தில் நாம் வெட்கித்துப் போகிறோம். ஏதோ மாற்ற முடியாத பெரும் தவறு செய்து விட்டது போல் மிகப் பெரும் குற்ற உணர்விற்கு உள்ளாகி, எங்காவது நம் முகத்தை ஒளித்துக் கொள்ள முயற்சிக்கிறோம்.

பல சமயங்களில் முதல் முறை தோல்வியில் படும் அவமானமும் பதற்றமும் பயமுமே அடுத்தடுத்த தோல்விகளை விதைத்து விட்டுச் சென்று விடுகிறது என்கிறது வாழ்வியல்.

விழுந்துவிடக் கூடாது என்ற கவனத்துடன் இருப்பது சரிதான், அப்படி ஆசைப் படுவதிலும் தவறு இல்லை, ஆனால் விழவே கூடாது என்று நினைப்பது பேராசை மட்டுமல்ல அது யாருக்குமே சாத்தியமில்லாத நிராசை. அது மனித சக்திக்கு அப்பாற்பட்டது. முதலில் உங்களுக்கு நீங்களே சொல்லிக் கொள்ளுங்கள், விழுவது தவறல்ல, அதில் எந்த அவமானமும் இல்லை என்று. அதே சமயம் எத்தனை சீக்கிரம் எழுந்திருக்கிறோம் என்பதில் தான் வெற்றி இருக்கிறது.

சிறு குழந்தை நடை பழகுவதை பார்த்திருக்கிறீர்களா… தானே சீராக நடக்கும் முன் அது எத்தனை முறை கீழே விழுகிறது. ஆனால் அவ்வாறு விழும்போது குழந்தை என்ன செய்கிறது என்று கவனித்திருக்கிறீர்களா… ஒரு குழந்தை கீழே விழுந்தால், நீங்கள் பதறாத வரை அது அழுவது இல்லை. அழகாய் நிமிர்ந்து அருகில் உள்ளவர்களைப் பார்த்து சிரிக்கும். அதாவது நான் புதிதாக ஒன்றை முயற்சித்துக் கொண்டிருக்கிறேன் அதில் முன்னேற்றம் தெரிகிறது என்று சொல்லாமல் சொல்வது போல. அதோடு நிற்காமல் உடனே எழுந்து மறுபடி நடக்க முயற்சிக்கும். இது அந்த குழந்தையின் தாயோ அல்லது வேறு யாரோ இன்றைக்கு இவ்வளவு போதும் என்று அந்த குழந்தையை தூக்கிக் கொள்ளும் வரை நடக்கும். குழந்தை தானாக நடை பழகும் தன் முயற்சியை நிறுத்தாது. இதில் ஒரு பெரிய வாழ்வியல் தத்துவத்தையே இயற்கை குழந்தைக்கு போதித்திருப்பதையும் அந்த குழந்தை நமக்கு போதிப்பதையும் என்றாவது உணர்ந்திருக்கிறீர்களா…

எடிசன் பல்பை கண்டு பிடிப்பதற்கு முன் ஆயிரம் முறை தோற்றார் என்கிறோம். ஆனால் அந்த சாதனையாளர் நான் ஆயிரம் சோதனை செய்து பல்பை கண்டு பிடித்தேன் என்கிறார். இதுதான் அவர் சாதனையின் இரகசியம். இப்படி தோல்வியை நாம் பாடமாக எடுத்துக் கொள்ளும்போது அது வெற்றியில் முடிகிறது. தோல்வியைக் கண்டு துவண்டு ஓடும்போது, பயம், பதற்றத்தில் வந்து விடுகிறது. இதை மனோத்துவம் “பர்பஸ் ட்ரெமர்”(purpose tremor) என்கிறது.

அதாவது தோல்வியிலிருந்து நாம் கற்றுக் கொள்ள முயலாமல் பதற்றம் தொற்றிக் கொள்ள விடும்போது, முதலில் நாம் ஏதோ தவறு செய்து விட்டதாகத் தோன்றும். பின் நமக்கு எதுவும் சரியாக செய்யத் தெரியாது என்று மனம் நம்பத் தொடங்கும். இது, நாம் சுதாரிப்பதற்குள் ஒட்டகத்திற்கு இடம் கொடுத்த கதையாய் ஆழ் மனமெங்கும் வியாபித்து நம்மை செயலாற்ற விடாமல், பயமும் பதட்டமுமான மன அழுத்தத்தில் விட்டு விடும். இதுவே தோல்வியை இயல்பாய் ஒரு பாடமாய் எடுத்துக் கொள்ளும்போது அது நம் மனதிற்குள் முன்னிலும் சிறந்த வெற்றிக்கான வீரிய விதையாகி விடுகிறது.

தோல்வி என்பது இன்னும் சிறப்பாக நாம் ஆரம்பிப்பதற்கான ஒரு சந்தர்ப்பமே எனும் ஹென்றி ஃபோர்ட் ன் வெற்றி வரலாற்றை பார்ப்போம்.

ஃபோர்ட் காரையும் ஹென்றி ஃபோர்ட்ன் சாதனைகளையும் அறியாதவர்கள் இருக்க முடியாது. 1863 இல் ஒரு விவசாயக் குடும்பத்தில் பிறந்து, இன்று சாதனையாளராக சரித்திரத்தில் இடம் பிடித்த ஃபோர்ட் க்கு தொட்டதெல்லாம் துலங்கி விடவில்லை.

பதினைந்து வயதில் தந்தையார் அன்பளிப்பாக அளித்த கைக்கடிகாரத்தை அக்குவேறு ஆணி வேறாக பிரித்து, உறவுகளும், நண்பர்களும் திகைத்து நிற்கும் போதே அதை மீண்டும் சரியாக மாட்டி அசத்திய ஃபோர்ட், 1889 இல் தன்னுடைய 26 வயதிலேயே தன்னுடைய கனவான தன் முதல் கார் கம்பெனியை திறக்கிறார். இரண்டு சிலிண்டர் இன்ஜினில் 4 சைக்கிள் டயர்களுடன் மிக மிக நம்பிக்கையோடு தாயாரிக்கப் பட்ட அந்தக் கார் முழு தோல்வியில் முடிய, அவர் கம்பெனியும் ஒரே வருடத்தில் இழுத்து மூடப்படுகிறது. ஃபோர்ட் சோர்ந்து விடவில்லை. எங்கே தவறு எழுகிறது, அதை எப்படி சரி பண்ணுவது என்று மட்டுமே சிந்தித்து அதற்கான முயற்சிகளை எடுத்து,1991ல் மீண்டும் ஒரு பதிய கார் கம்பெனியை நிறுவுகிறார். ஆனால், ‘ஆபரேஷன் சக்ஸஸ் பேஷன்ட் டெட்’ ன்னு சொல்வதுபோல், இந்த முறை அவர் முயற்சியின் பலனாக அவர் கார் மாடல் வெற்றி அடைகிறது. ஆனால் சரியான முறையில் மார்க்கெட்டிங் பண்ண முடியாமல், நஷ்டத்திற்கு ஆளாகி மீண்டும் தோல்வியைத் தழுவுகிறார்.

இந்தத் தோல்வி மார்க்கெட்டில் அவர் மதிப்பை பெருமளவில் குறைக்கிறது. இந்த இடத்தில் வேறு யாராக இருந்தாலும் ஆடிப் போய் இருப்பார்கள். ஆனால், அவர் இந்த தோல்விகளை, தன் தவறுகளை அறிந்து சரி செய்வதற்கான, மீண்டும் ஒரு வாய்ப்பாக மட்டுமே பார்த்து, நல்ல முறையில் முயற்சி செய்து 1903 இல் ford motor company என்று அடுத்த கம்பெனியை நிறுவுகிறார். முந்தைய தோல்விகள் தந்த பாடம், இப்பொழுது கார் மாடல் வெற்றி, மார்க்கெட்டிங் வெற்றி. ஆனால்…,

அப்பாடா! என்று பெருமூச்சு விடுவதற்குள் வாடிக்கையாளர்களிடலிருந்து, காரில் இது சரியில்லை, அது சரியில்லை என்று கம்ப்ளெயின் வந்து குவிகிறது. ஃபோர்ட் சிறிதும் தளரவில்லை. மிகுந்த பொறுமையோடு, உறுதியான தன்னபிக்கையோடு, தன்னுடைய இஞ்சினியர்களை அனுப்பி தவறுகளை சரி செய்வது மட்டுமின்றி வாடிக்கையாளர்களின் மற்ற கருத்துக்களையும் கேட்டு வரச் சொல்கிறார். ரிப்பேர் செய்ய சென்ற இஞ்சினியர்கள் திரும்பி வரும்போது கொண்டுவரும் தகவல்களை ஆராய்ந்து அதில் வாடிக்கையாளர்கள் குறிப்பிட்டிருக்கும் குறைகள் அனைத்தையும் ஒவ்வொன்றாக நிவர்த்தி செய்கிறார்.அவ்வாறு சரிசெய்யப்பட்ட புதிய (model-T) மாடல் கார்கள் தான் இன்றைய ஃபோர்ட் கம்பெனியை சரித்திரத்தில் இடம் பெற செய்தன.

உங்களுடைய எண்ணங்கள் சரியாக இருந்தால் ,உங்கள் மன நிலையில் உறுதி இருந்தால் எந்த தோல்வியையும் வெற்றியாக மாற்றி விடலாம் எனும் ஹென்றி ஃபோர்டின் இந்த ஹிமாலய வெற்றி, என்றோ யாருக்கோ நடந்த சரித்திரம் மட்டும் இல்லை. சரித்திரம் படைக்க விரும்பும் ஒவ்வொருவருக்கும் சாத்தியமானது என்கிறது உளவியல்.

மேலும் ஃபோர்ட் சொல்வது போல் தோல்வி என்பது நீங்கள் நினைத்ததை விட இன்னும் சிறந்த வெற்றியைக் கொண்டு வரும் ஒரு சந்தர்ப்பம் மட்டுமில்லை, தோல்விகளை புறந்தள்ளி விடாமுயற்சியோடு வெற்றி கொண்டான் என்று உங்களுடைய வெற்றிக்கு அது ஒரு கிரீடமாகவும் அமைகிறது.. என்கிறது வாழ்வியல்.

அவ்வளவு ஏன்,,, இன்றைய ‘போஸ்ட் ரிஸெஷன் இகானமி’ கால கட்டத்தில் தோல்வியை ஏற்றுக் கொண்ட தொழிலதிபர்கள் நிலைத்து நிற்பதோடு மட்டுமல்லாமல், தோற்றவர்களை அவர்களுடைய அனுபவம் கருதி தேடித் தேடி வேலைக்கு அமர்த்திக் கொள்கிறார்கள் என்கிறது “பிஸினஸ் வீக்” இதழ்.

இப்பொழுது சொல்லுங்கள் தோல்வி என்றவுடன் உங்களுக்குள் பதற்றம் வருகிறதா..?! பரவசம் பரவுகிறதா..?!!!

(16) பம்பலப்பிட்டி ஜூம்ஆப் பள்ளிவாசலின் ஜூம்ஆ தொழுகையடுத்து அமைதியாகச் ஊர்வலம்

2018-03-17T10:03:00.001+05:30

(அஷ்ரப் ஏ சமத்)

முஸ்லீம்களது உரிமைகளுக்கான அமைப்பிணா் இன்று (16) பம்பலப்பிட்டி ஜூம்ஆப் பள்ளிவாசலின் ஜூம்ஆ தொழுகையடுத்து அமைதியாகச் ஊர்வலமாகச் சென்று கொழும்பில் உள்ள ஜக்கியநாடுகள் அமைப்பின் அலுவலகத்தின் முன்பாக எதிா்ப்பைப் தெரிவித்தனா். அத்துடன் அங்கு கடமையில் இருந்த ஜக்கிய நாடுகள் கொழும்புக் காரியாலயத்தின் அலுவலகரிடம் இலங்கையில் அண்மைக்காலமாக முஸ்லீம்களுக்கு இனைக்கப்படும் அநீதிகள் சம்பந்தமான அறிக்கையை கையளித்து அதனை ஜக்கிய நாடுகள் மணித உரிமை அமைப்புக்கு அனுப்பும்படியும் உரிய நடவடிக்கை எடுக்கும்படியும் கோரிக்கை விடுத்தனா்.

கடந்தகால அரசாங்கம் தற்போதைய நல்லாட்சி அரசாங்கமும் இந்த நாட்டில் வாழும் சிறுபான்மைச் சமுகத்திற்கு தொடா்ந்தும் அநீதிகளை இழைத்து வருவதாகவும் சம்பந்தப்பட்டவா்களை சட்டத்தின் முன் நிறுத்துமாறும் சட்டம் ஒழுங்குகளை முறையாக பாதுகாக்குமாறு அங்கு ஊடககங்களுக்கு அவ் அமைப்பின் சாா்பாக எம். மிப்லாா், சட்டத்தரணி எம். மர்சூர்க்கும் கருத்து தெரிவித்தனா்.

விவசாயி சடலமாக மீட்பு

2018-03-17T10:01:00.003+05:30

(க.கிஷாந்தன்)

ஊவா பரணகம பொலிஸ் பிரிவிற்குட்பட்ட கட்டுகல்ல மெதகம பிரதேசத்திலுள்ள விவசாய நிலமொன்றில் அமைக்கப்பட்டுள்ள குடியிருப்பு ஒன்றிலிருந்து மர்மமான முறையில் உயிரிழந்த விவசாயி ஒருவரின் சடலமொன்றினை 16.03.2018 அன்று காலை 10 மணியளவில் பொலிஸார் மீட்டுள்ளனர்.

இவ்வாறு உயிரிழந்தவர் 71 வயதுடைய கே.பீ.டிம். டிக்கிரி பண்டா என அடையாளம் காணப்பட்டுள்ளார்.

இவர் தாம் விவசாயம் செய்யும் விவசாய நிலத்தில் உள்ள குடியிருப்பில் உறங்கியவாறு இவ்வாறு சடலமாக மீட்கப்பட்டுள்ளார்.

ஊவா பரணகம - வெவேகம பகுதியை சேர்ந்த குறித்த விவசாயி கொலை குற்றவாளியாக 08 வருட காலம் சிறைவாசல் இருந்துள்ளதாகவும், பொலிஸாரின் ஆரம்பகட்ட விசாரணைகளிலிருந்து தெரியவந்துள்ளது.

சடலம் பிரேத பரிசோதனைக்காக வெலிமடை வைத்தியசாலையின் பிரேத அறையில் வைக்கப்பட்டுள்ளதோடு, மரண விசாரணையும், பிரேத பரிசோதனையும் முடிந்தபின் சடலம் உறவினர்களிடம் ஒப்படைக்கப்படும் என தெரிவிக்கப்படுகின்றது.

இச்சம்பவம் குறித்து மேலதிக விசாரணைகளை ஊவா பரணகம பொலிஸார் மேற்கொண்டு வருகின்றனர்.

அட்டாளைச்சேனை மத்திய கல்லூரி கிரிக்கெட் பாடசாலையாக தெரிவு செய்யப்பட்டு கடின பந்து விளையாட்டு உபகரணங்கள் வழங்கி வைப்பு

2018-03-17T10:00:00.002+05:30

அட்டாளைச்சேனை மத்திய கல்லூரி கிரிக்கெட் பாடசாலையாக தெரிவு செய்யப்பட்டு கடின பந்து விளையாட்டு உபகரணங்கள் வழங்கி வைப்பு

(அகமட் எஸ். முகைடீன்)

விளையாட்டுத்துறை பிரதி அமைச்சர் ஹரீஸின் முயற்சியினால் அட்டாளைச்சேனை மத்திய கல்லூரி கிரிக்கெட் பாடசாலையாக விளையாட்டுத்துறை அமைச்சினால் தெரிவு செய்யப்பட்டு அதற்கான கடின பந்து விளையாட்டு உபகரணங்கள் வழங்கி வைக்கும் நிகழ்வு கல்லூரி அதிபர் ஏ.எல். கமருடீன் தலைமையில் இன்று (16) வெள்ளிக்கிழமை கல்லூரி மண்டபத்தில் நடைபெற்றது.

ஸ்ரீலங்கா முஸ்லிம் காங்கிரஸ் பிரதித் தலைவரும் விளையாட்டுத்துறை பிரதி அமைச்சருமான சட்டத்தரணி அல்ஹாஜ் எச்.எம்.எம். ஹரீஸ் பிரதம அதிதியாக கலந்து சிறப்பித்த இந்நிகழ்வில் பாராளுமன்ற உறுப்பினர் ஏ.ஏல்.எம். நசீர், அட்டாளைச்சேனை பிரதேச சபை உறுப்பினர்களான ஏ.எஸ்.எம். உவைஸ், தமீம் ஆப்தீன், பிரதி அமைச்சரின் இணைப்புச் செயலாளர் நௌபர் ஏ. பாவா, கல்லூரியின் பிரதி அதிபர்கள், ஆசிரியர்கள், மற்றும் மாணவர்கள் கலந்துகொண்டனர்.

விளையாட்டுத்துறை அமைச்சினால் 200 பாடசாலைகள் கிரிக்கெட் பாடசாலைகளாக தெரிவு செய்யப்பட்டுள்ளன. அவற்றுள் அட்டாளைச்சேனை மத்திய கல்லூரியும் பிரதி அமைச்சர் ஹரீஸினால் உள்வாங்கப்பட்டு பாடசாலை மாணவர்கள் கடின பந்து கிறிக்கெட் பயிற்சியினை மேற்கொள்வதற்கு ஏதுவாக சிரேஸ்ட மற்றும் கனிஷ்ட பிரிவு விளையாட்டு கழகங்களுக்கான கடின பந்து விளையாட்டு உபகரணங்கள் வழங்கிவைக்கப்பட்டன.

காரைதீவு விபுலானந்த மத்திய கல்லூரி கிரிக்கெட் பாடசாலையாக தெரிவு செய்யப்பட்டு கடின பந்து விளையாட்டு உபகரணங்கள் வழங்கி வைப்பு

2018-03-17T09:58:00.001+05:30

காரைதீவு விபுலானந்த மத்திய கல்லூரி கிரிக்கெட் பாடசாலையாக தெரிவு செய்யப்பட்டு கடின பந்து விளையாட்டு உபகரணங்கள் வழங்கி வைப்பு

(அகமட் எஸ். முகைடீன்)

விளையாட்டுத்துறை பிரதி அமைச்சர் ஹரீஸின் முயற்சியினால் காரைதீவு விபுலானந்த மத்திய கல்லூரி கிரிக்கெட் பாடசாலையாக விளையாட்டுத்துறை அமைச்சினால் தெரிவு செய்யப்பட்டு அதற்கான கடின பந்து விளையாட்டு உபகரணங்கள் வழங்கி வைக்கும் நிகழ்வு கல்லூரி அதிபர் ரி. வித்தியராஜன் தலைமையில் இன்று (16) வெள்ளிக்கிழமை கல்லூரி மண்டபத்தில் நடைபெற்றது.

ஸ்ரீலங்கா முஸ்லிம் காங்கிரஸ் பிரதித் தலைவரும் விளையாட்டுத்துறை பிரதி அமைச்சருமான சட்டத்தரணி அல்ஹாஜ் எச்.எம்.எம். ஹரீஸ் பிரதம அதிதியாக கலந்து சிறப்பித்த இந்நிகழ்வில் பிரதி அமைச்சரின் இணைப்புச் செயலாளர் நௌபர் ஏ. பாவா, கல்லூரியின் பிரதி அதிபர்கள், ஆசிரியர்கள், மற்றும் மாணவர்கள் கலந்துகொண்டனர்.

விளையாட்டுத்துறை அமைச்சினால் 200 பாடசாலைகள் கிரிக்கெட் பாடசாலைகளாக தெரிவு செய்யப்பட்டுள்ளன. அவற்றுள் காரைதீவு விபுலானந்த மத்திய கல்லூரியும் பிரதி அமைச்சர் ஹரீஸினால் உள்வாங்கப்பட்டு பாடசாலை மாணவர்கள் கடின பந்து கிறிக்கெட் பயிற்சியினை மேற்கொள்வதற்கு ஏதுவாக சிரேஸ்ட மற்றும் கனிஷ்ட பிரிவு விளையாட்டு கழகங்களுக்கான கடின பந்து விளையாட்டு உபகரணங்கள் வழங்கிவைக்கப்பட்டன.

கல்முனை பிரதேச செயலக பிரிவிற்குட்பட்ட விளையாட்டு கழகங்களுக்கு விளையாட்டு உபகரணங்கள் வழங்கி வைப்பு

2018-03-17T09:55:00.000+05:30

கல்முனை பிரதேச செயலக பிரிவிற்குட்பட்ட விளையாட்டு கழகங்களுக்கு விளையாட்டு உபகரணங்கள் வழங்கி வைப்பு

(அகமட் எஸ். முகைடீன்)

கல்முனை பிரதேச செயலக பிரிவிற்குட்பட்ட விளையாட்டு கழகங்களுக்கு விளையாட்டு உபகரணங்கள் வழங்கி வைக்கும் நிகழ்வு பிரதேச செயலாளர் கே. லவநாதன் தலைமையில் இன்று (16) வெள்ளிக்கிழமை கல்முனை பிரதேச செயலகத்தில் நடைபெற்றது.

இந்நிகழ்வில் ஸ்ரீலங்கா முஸ்லிம் காங்கிரஸ் பிரதித் தலைவரும் விளையாட்டுத்துறை பிரதி அமைச்சருமான சட்டத்தரணி அல்ஹாஜ் எச்.எம்.எம். ஹரீஸ் பிரதம அதிதியாக கலந்து சிறப்பித்து விளையாட்டுக் கழகங்களுக்கு விளையாட்டு உபகரணங்களை வழங்கிவைத்தார்.

மேலும் இந்நிகழ்வில் பிரதேச செயலக விளையாட்டு உத்தியோகத்தர் சுலக்சன், பிரதி அமைச்சரின் இணைப்புச் செயலாளர் நௌபர் ஏ. பாவா, விளையாட்டுக் கழகங்களின் பிரதிநிதிகள் எனப் பலரும் கலந்துகொண்டனர்.

இதன்போது கல்முனை பிரதேச செயலகத்தில் பதிவு செய்த விளையாட்டுக் கழகங்கள் அனைத்திற்கும் விளையாட்டு உபகரணங்கள் வழங்கிவைக்கப்பட்டன.

கிழக்கின் முதலாவது அரச அங்கீகாரம் பெற்ற தாதி உதவியாளர் தேசிய தொழில் தகைமைச் சான்றிதழ் வழங்கும் நிகழ்வு....

2017-08-27T14:58:00.002+05:30

-முஹம்மட் அப்லால் அபுல்லைஸ்-

கிழக்கின் முதலாவது அரச அங்கீகாரம் பெற்ற தாதி உதவியாளர் தேசிய தொழில் தகைமைச் சான்றிதழ் வழங்கும் நிகழ்வு 2017/08/25ம் திகதி வெள்ளிக்கிழமை பிற்பகல் 2:30 மணியளவில் சென் ஜூடி தாதியர் பயிற்சிப் பாடசாலையின் கேட்போர் கூடத்தில் தாதியர் பாடசாலையின் பதிவாளர் ஜனாப் N.T.ஆதம்லெவ்வை அவர்களின் தலைமையில் இடம்பெற்றிருந்தது...

இன் நிகழ்வின் பிரதம அதிதியாக கலந்து சிறப்பித்திருந்தார்கள் சென் ஜூடி தாதியர் பயிற்சிப் பாடசாலையின் தலைமை நிர்வாக உத்தியோகத்தரும் உதவிக்கல்விப் பணிப்பாளருமான ஜனாப் M.A.A. வாஹிட் அவர்களும் மற்றும் சென் ஜூடி தாதியர் பயிற்சிப் பாடசாலையின் பொது முகாமையாளர் ஜனாப் M.M.சப்ராஸ் மன்சூர் ஆகியோர் கலந்து சிறப்பித்திருந்தார்கள்...

விஷேட அதிதியாக தாதியர் பயிற்சிப் பாடசாலையின் தலைமை பயிற்சி உத்தியோகத்தர் வைத்தியர் M.A.C.கலாமுத்தீன் அவர்களும் மற்றுமொரு விஷேட அதிதியாக கலந்து சிறப்பித்திருந்தார் கல்முனை அஷ்ஃரப் ஞாபகார்த்த வைத்தியசாலையின் சிரேஷ்ட தாதி உத்தியோகத்தரும் தாதியர் மேற்பார்வையாளருமான ஜனாப் M.நபருல்லாஹ் அவர்களும்

கெளரவ அதிதியாக கலந்து சிறப்பித்திருந்தார்கள் ஆசிரிய ஆலோசகர் ஆசிரியர் திரு லக்குனம் அவர்களும் , ஆசிரியர் M.ஜீவரோத்தினம் அவர்களும் , சிரேஷ்ட ஊடகவியலாளரும் அம்பாரை மாவட்ட ஊடகவியலாளர் ஒன்றியத்தின் ஆலோசகருமான ஜனாப்.A.L.M.சலீம் அவர்களும், பிரபல சமூக சேவையாளரும் ஜமால்தீன் அரிசியாலை உரிமையாளருமான ஜனாப் M.M.ஜமால்தீன் அவர்களும், பிரபல சமூக சேவையாளரும் தாதியர் பயிற்சிப் பாடசாலையின் நிருவாக உறுப்பினறுமான ஜனாப் M.M.நிப்ராஸ் மன்சூர் அவர்களும், மற்றும் தாதியர் பயிற்சிப் பாடசாலையின் விரிவுரையாளர்கள் மற்றும் காரியாலய உத்தியோகத்தர்கள் பயிற்சியை நிறைவு செய்த மாணவர்களின் பெற்றோர்கள் மற்றும் பயிற்சியை நிறைவு செய்த மாணவர்கள் என பலரும் கலந்து சிறப்பித்திருந்தனர்....

இன் நிகழ்வின் போது அரச தாதி உதவியாளர் பயிற்சியை நிறைவு செய்த மாணவர்களுக்கு சான்றிதழ்கள் வழங்கி கெளரவிக்கப்பட்டது...

சென் ஜூடி ஹோம் நேர்சிங் சேவையின் அம்பாறை மாவட்டக் காரியாலயம் இன்று கல்முனையில் உத்தியோகவூர்வமாக திறந்து வைக்கப்பட்டது.....

2017-08-27T14:53:00.000+05:30

-முஹம்மட் அப்லால் அபுல்லைஸ் -

சென் ஜூடி ஹோம் நேர்சிங் சேவை நிறுவனத்தின் முகாமைத்துவப் பணிப்பாளர் MIM.றயீஸ் அவர்களின் தலைமையில் இன்று பிற்பகல் 4:30மணியளவில் மிகவும் கோலாகலமான முறையில் ஆரம்பித்து வைக்கப்பட்டது..

இன்நிகழ்வுக்கு பிரதம அதிதியாக கலந்து சிறப்பித்திருந்தார் ஆசிய மன்றத்துக்கான நிபுணத்துவரும் உயிரியல் பாட விரிவுரையாளரும் ஹார் ஹோட்ஸ் பாமசியினுடைய கல்முனைக்கிளை பணிப்பாளருமான கெளரவ றிசாட் செரீப் அவர்களும்.

கெளரவ அதிதியாக சென் ஜூடி ஹோம் நௌர்சிங் நிறுவனத்தின் பணிப்பாளரும் துனை மருத்துவவியலாளருமான கெளரவ MM.சப்ராஸ் மன்சூர் அவர்களும்

விஷேட அதிதியாக மெடிலேன்ட் வைத்தியசாலையின் முகாமைத்துவப் பணிப்பாளர் கெளரவ வைத்தியர் SMA.அஸீஸ் அவர்களும்.

மற்றுமோறு விஷேட அதிதி கெளரவ M.ஜீவரத்னம் ஆசிரியர் அவர்களும்.

அன் நிறுவனத்தின் தாதியப் பொருப்பாளர் Mrs.அன்ட்டனி மற்றும் தாதியர்கள்,பராமரிப்பாளர்கள் சமூக நலன்விரும்பிகள் என பலரும் கலந்து சிறப்பித்திருந்தனர்...

கிழக்கில் முதன்முறையாக சதுரங்க போட்டி!

2017-08-22T14:09:00.002+05:30

(ஏ.எம்.றொஸான்)

Zahirian Knights சதுரங்கக் கழகத்தினால் கல்முனை சாஹிரா தேசிய பாடசாலையில் 20-08-2017 (ஞாயிறு) அன்று தங்களது கழகத்தின் முதலாம் வருட நிறைவை முன்னிட்டு "Zahirian Knights chess championship" சுற்றுப்போட்டி கழகத்தின் தலைவர் A.A.M.அஷ்ஜத் அவர்களின் தலைமையில் மிக சிறப்பாக நடைபெற்றது.

5 சுற்றுக்களை கொண்ட இப்போட்டியானது காலை 9 மணி தொடக்கம் மாலை 5 மணி வரை மிகவும் சிறப்பாக நடைபெற்றதுடன் இப்போட்டியில் சுமார் 50க்கு மேற்பட்ட போட்டியாளர்கள் கலந்து கொண்டனர்.

கிழக்கு மாகாணத்திலேயே சதுரங்கத்திற்கான முதலாவது கழகம் Zahirian Knights என்பதும் இவ்வாறான ஒரு போட்டி நடைபெறுவது இதுவே முதன் முறை என்பதும் பெருமைக்குறிய விடயமாகும் இந்நிகழ்வில் கல்முனை ஸாஹிராவின் பழைய மாணவரும் கல்முனை வடக்கு ஆதார வைத்திய சாலையின் சிரேஸ்ட வைத்திய அதிகாரியுமான DR.A.A.M.அஷாட் பிரதம அதிதியாக கலந்து கொண்டார். இவர் ரஜரட்டை பல்கழைகலகத்தின் முன்னாள் சதுரங்க அணி வீரர் என்பதும் குறிப்பிடத்தக்கது. இந்நிகழ்வில் கல்முனை ஸாஹிராவின் அதிபர் M.S.முஹம்மட் சிறப்பு அதிதியாகவும் அல்-அஷ்ஹர் பாடசாலையின் பிரதி அதிபர் M.A.சலாம் கௌரவ அத்தியாகவும் கலந்து கொண்டு சிறப்பித்தனர்.

இப்போட்டியானது இரு பிரிவுகளில் நடைபெற்றதுடன் அதில் 13 வயதுக்கு உட்பட்டோர் பிரிவில் A.S.A.முஜுவத்,19 வயதுக்கு உட்பட்டோர் பிரிவில் F.M.பமிஹாத் ஆகியோர் சம்பியனாக தெரிவு செய்யப்பட்டனர். அவர்களுக்கு வெற்றிக்கிண்ணம், தங்கப் பதக்கம் வழங்கி கௌரவிக்கப் பட்டதுடன் பிரதம அதிதி தனது அன்பளிப்புக்களையும் வழங்கினார்.

மேலும் 2,3ம் இடங்களை பெற்ற வெற்றியாளர்களுக்கு வெற்றிபதக்கங்கள் வழங்கப்பட்டதுடன் கலந்து கொண்ட அனைத்து போட்டியாளர்களுக்கும் சான்றிதழும் வழங்கி கௌரவிக்கப்பட்டனர்.

அகில இலங்கை மக்கள் காங்கிரஸ் கட்சி அம்பாரை மாவட்ட மக்கள் மனங்களிலிருந்து துாரப் போகின்ற நிலை காணப்படுவாக நாபீர் பௌண்டேசன் அமைப்பின் தலைவரும் பொறியியலாளருமான யூ.கே. நாபீர் தெரிவித்துள்ளார்.

2017-08-22T14:06:00.005+05:30

(எஸ்.அஷ்ரப்கான்)

அகில இலங்கை மக்கள் காங்கிரஸ் கட்சியின் செயலாளர் நாயகம் தொடர்பான விடயம் மற்றும் பிழையான நேரங்களில் பிழையான முடிவுகளை எடுப்பதன் மூலம் அகில இலங்கை மக்கள் காங்கிரஸ் கட்சி அம்பாரை மாவட்ட மக்கள் மனங்களிலிருந்து துாரப் போகின்ற நிலை காணப்படுவாக நாபீர் பௌண்டேசன் அமைப்பின் தலைவரும் பொறியியலாளருமான யூ.கே. நாபீர் தெரிவித்துள்ளார்.

அகில் இலங்கை மக்கள் காங்கிரஸ் கட்சி தனது அரசியல் நகர்வுகள் தொடர்பாக அம்பாரை மாவட்ட மக்களிடம் கொடுக்கின்ற வாக்குறுதிகள் மற்றும் அரசியல் காய் நகர்த்தல்கள் தொடர்பாக கருத்து வெளியிடும்போது மேலும் அவர் தெரிவித்துள்ளதாவது,

அ.இ.ம.கா. கட்சியின் செயலாளராக செயற்பட்ட வை.எல்.எஸ். ஹமீட் ஒரு மாநாட்டின் மூலம் பதவி நீக்கப்பட்டதாக அறிவித்த நிலையில் புதிய செயலாளராக சுபைர்தீன் என்பவரை நியமித்து அக்கட்சி செயற்பாட்டில் இறங்கியது. ஆனால் வை.எல்.எஸ். இந்த செயலாளர் நாயகம் நியமனம் சட்ட விரோதமானது என்றும் இதற்கான தடையுத்தரவை வேண்டியும் நீதிமன்றம் சென்றார்.

இந்நிலையில் கடந்த 24 ஆம் திகதி இத்தடை உத்தரவுக் கோரிக்கை மாவட்ட நீதிமன்றத்தினால் வழங்கப்படுவதை மறுத்து வழக்கை தொடர்ந்து நடாத்த நீதிமன்றம் உத்தரவிட்டிருந்தது. அதேநேரம் இவ்வுத்தரவில் செயலாளராக யார் செயற்பட வேண்டும் என்று நீதிமன்றம் எதனையும் குறிப்பிடவில்லை. அது வழக்கு விசாரணை முடிவிலேயே தீர்மானிக்கப்படும்.

இந்நிலையில் வை.எல்.எஸ். ஹமீடினால் மேன்முறையீடு செய்துள்ளதாகவும், இந் நிலையில் சடுதியாக அ.இ.ம.கா. கட்சி சுபைர்தீனை செயலாளராக செயற்பட நீதிமன்றம் அனுமதி என்ற விடயம் பொய் என வை.எல்.எஸ். ஹமீட் மறுத்திருந்தார்.

இவ்வாறு அக்கட்சி செயற்படுவதனால் மக்கள் மத்தியில் செல்வாக்கினை இழந்து கொண்டுவருகின்றது. நாபீர் பௌண்டேசன் போன்று நேர்மையான அடிப்படையில் தமது சேவைகளை செய்து வருகின்ற அதே வேளை மக்கள் ஆதரவினை மிகச் சிறப்பாக நாளுக்கு நாள் தன்னகத்தே அதிகரித்துக்கொண்டே வருகின்றது.

எனவே மக்கள் மனங்களில் பொய் அரசியல் வாக்குறுதிகளையும், பொய் மூட்டைகளையும் அவிழ்த்துவிட்டு மக்களைக் குழப்பாமல் துாய்மையான அரசியல் சித்தாந்தத்தை ஏற்படுத்த நாபீர் பௌண்டேசன் அழைப்பு விடுக்கின்றது என்றும் குறிப்பிட்டுள்ளார்.

ஹிஸ்புல்லாஹ்வின் நிதி ஒதுக்கீட்டில் விளையாட்டுப் பொருட்கள் கையளிப்பு

2017-08-22T14:03:00.002+05:30

(ஆர்.ஹஸன்)

புனர்வாழ்வு மற்றும் மீள்குடியேற்ற இராஜாங்க அமைச்சரும், மட்டக்களப்பு மாவட்ட அபிவிருத்திக் குழு இணைத்தலைவருமான எம்.எல்.ஏ.எம்.ஹிஸ்புல்லாஹ்வின் பன்முகப்படுத்தப்பட்ட வரவு – செலவு திட்ட நிதியொதுக்கீட்டில் இருந்து, மட்டக்களப்பு மாவட்டத்தில் உள்ள பத்து முன்னணி கழகங்களுக்கு விளையாட்டு உபகரணங்கள் வழங்கி வைக்கப்பட்டன.
மட்டக்களப்பு, இருதயபுரம் கிழக்கு சன்னி விளையாட்டுக் கழகம், ஜெயந்திபுரம் விபுலானந்தா விளையாட்டுக் கழகம், மஞ்சத்தொடுவாய் தெற்கு சௌண்டர்ஸ் விளையாட்டுக் கழகம், காத்தான்குடி சன்ரைஸ் விளையாட்டுக் கழகம், காத்தான்குடி குபா விளையாட்டுக் கழகம் உள்ளிட்ட 10 கழகங்களுக்கே மேற்படி விளையாட்டுப் பொருட்கள் வழங்கி வைக்கப்பட்டது.

மட்டக்களப்பு, மண்முனை வடக்கு பிரதேச செயலகம் மற்றும் காத்தான்குடி பிரதேச செயலகம் என்பவற்றில் வைத்து மேற்படி கழகங்களுக்கான விளையாட்டு உபகரணங்களை இராஜாங்க அமைச்சர் ஹிஸ்புல்லாஹ் வழங்கி வைத்தார்.

இருதயபுரம் சன்னி விளையாட்டுக் கழகத்துக்கு ஜேர்ஸி உள்ளிட்ட பொருட்களும், மஞ்சத்தொடுவாய் தெற்கு சௌண்டர்ஸ் விளையாட்டுக் கழகத்துக்கு கால்பந்து விளையாட்டுக்குத் தேவையான பூட்ஸ் மற்றும் கால்பந்துகளும், விபுலானந்தா விளையாட்டுக் கழகம், காத்தான்குடி குபா கழகம், சன்ரைஸ் கழகம் என்பவற்றுக்கு விளையாட்டு உபகரணங்களும் வழங்கி வைக்கப்பட்டன.

இதன்போது கருத்துத் தெரிவித்த இராஜாங்க அமைச்சர் ஹிஸ்புல்லாஹ், “நாட்டில் தலைதூக்கியுள்ள இனவாதத்தை விளையாட்டுத்துறை மூலம் தோற்கடிக்க முடியும் என்றும், விளையாட்டுக்களை சரியான முறையில் கையாண்டால் சமூக ஒற்றுமை – நல்லிணக்கத்தை ஏற்படுத்த முடியும்” என்றும் குறிப்பிட்டார்.

"ஊழியரை தாக்கிய IGB மீது பாயாத சட்டம் என் மீது பாய்கிறது!"

2017-08-20T14:18:00.002+05:30

ஊழியரை தாக்கிய IGB மீது பாயாத சட்டம் ஏன் மீது பாய்கிறது!

ஊழியர்கள் இருவரை தாக்கும் பொலிஸ் மா அதிபர் தொடர்பில் எதுவித நடவடிக்கையும் எடுக்காத சட்டம், நான் பொலிஸ் உத்தியோகத்தர்களை மிரட்டியதாக, என் மீது நடவடிக்கை எடுக்க துடிப்பது வேடிக்கையானது என ஹம்பாந்தோட்டை பாராளுமன்ற உறுப்பினர் நாமல் ராஜபக்ஸ தெரிவித்தார்.

கம்புறுப்பிட்டியவில் இடம்பெற்ற மக்கள் சந்திப்பில் உரையாற்றி பாராளுமன்ற உறுப்பினர் நாமல் ராஜபக்ஸவே மேற்கண்டவாறு தெரிவித்தார். அவர் மேலும் கருத்து தெரிவிக்கையில்..

எங்களை எதிலாவது மாட்டிவிடுவதற்கு இவ்வாட்சியாளர்கள் மிகவும் சிரத்தை எடுத்து கொண்டிருக்கின்றனர். எங்கள் மீது மலையளவு குற்றச் சாட்டுக்களை முன் வைத்தவர்களுக்கு எங்களை கைது செய்ய துரும்பளவான விடயம் கூட கிடைக்கவில்லை. தற்போது நான் பொலிஸ் அதிகாரியை மிரட்டியதாக கூறி என்னை கைது செய்யும் நிலைக்கு தள்ளப்பட்டுள்ளார்கள். இதனை வைத்தாவது எங்களை அடிபணியச் செய்துவிடலாம் என இவ்வாட்சியாளர்கள் பகற் கனவு கண்டு கொண்டிருக்கின்றனர்.

அண்மையில் ஊழியர்கள் இருவரை தாக்கிய பொலிஸ் மா அதிபர் மீது எதுவித சட்ட நடவடிக்கையும் எடுக்கப்படவில்லை. இதற்கு ஆதரமாக தெளிவான காணொளி சாதாரணமாகவே சமூக வலைத் தளங்களில் பரவியுள்ளது. இது குறித்து கருத்துரைத்துள்ள பொலிஸ் பேச்சாளர் ருவன் குணசேகர இதனை ஒரு சாதாரண சம்பவமாக கூறியுள்ளார். எனினும், நான் ஒரு பொலிஸ் அதிகாரியை மிரட்டியதான குற்றச் சாட்டை முன் வைத்து, அதனை பாரிய குற்றமாக வர்ணித்து என்னை கைது செய்ய முயற்சிக்கின்றார்கள்.

தங்களது தேவைகளை நிறைவு செய்யவும் தங்களுக்கு விரோதமானவர்களுக்கு மாத்திரமே சட்டம் நிலை நாட்டப்படும். இது தான் இன்று நீதியை நிலை நாட்ட வந்த நல்லாட்சியில் நீதி நிலைநாட்டப்படும் விதமாகும். இவ்வாறான போலி குற்றச் சாட்டுக்களுக்கு அஞ்சி ஒளிபவர்கள் நாங்கள் அல்ல என்பதை இவ்வாட்சியாளர்களுக்கு தான் கூறிக்கொள்ள விருப்புவதாக தனது உரையில் தெரிவித்திருந்தார்.

புலமை பரிசில் பரீட்சை ஆரம்பம்...

2017-08-20T14:14:00.002+05:30

(க.கிஷாந்தன்)

இலங்கை பூராகவும் தரம் ஐந்து மாணவர்களுக்கான புலமை பரிசில் பரீட்சையானது 20.08.2017 அன்று காலை 9.30 மணிக்கு ஆரம்பமாகியது. சுமார் 3 இலட்சத்து 56 ஆயிரத்து 728 பேர் மாணவர்கள் பரிட்சைக்கு தோற்றவுள்ளனர்.

புலமை பரிசில் பரீட்சைக்கான முதலாவது வினாத்தாளுக்கான பரீட்சை காலை 9.30 இலிருந்து 10.15 வரைக்குமான 45 நிமிடங்களை கொண்டிருக்கும். இரண்டாம் வினாத்தாள் முற்பகல் 10.45 மணிமுதல் நண்பகல் 12 மணி வரைக்குமான 1 மணி நேரம் 15 நிமிடங்களை கொண்டிருக்கும்.

அந்தவகையில் மலையகத்திலும் 20.08.2017 அன்று மலையக மாணவர்கள் மிக ஆர்வத்துடன் பரீட்சை மண்டபத்திற்கு செல்லக்கூடியதை எம்மால் அவதானிக்க முடிந்திருந்தது. அந்தவகையில் கொட்டகலை தமிழ் மகா வித்தியாலய மாணவா்கள் மற்றும் ஏனைய பாடசாலை மாணவர்கள் ஆா்வத்துடன் பரீட்சை மண்டபத்திற்கு சென்றமை காணக்கூடியதாக இருந்தது. அத்தோடு பொலிஸ் பாதுகாப்பும் போடப்பட்டுள்ளமை குறிப்பிடதக்கது.

நிந்தவூரில் வறுமைக்கோட்டின் கீழ் வாழும் விசேட தேவையுடையோருக்கு சுயதொழில் முயற்சிகளுக்கான உதவிகள். -பிரதேச செயலர் றிபா உம்மா ஜலீல் பிரதம அதிதி-

2017-08-20T14:09:00.002+05:30

( ஏ.எல்.ஏ.றபீக் பிர்தௌஸ் )

நிந்தவூர்ப் பிரதேசத்தில் வறுமைக் கோட்டின் கீழ் வாழும் விசேட தேவையுடையோருக்கு பல்வேறு சுயதொழில் முயற்சிகளில் ஈடுபடக் கூடிய விதத்தில் ரூபாய் 25,000.00 பெறுமதியான காசோலைகள் வழங்கும் நிகழ்வு நேற்று நிந்தவூர் பிரதேச செயலக கேட்போர் கூடத்தில் இடம் பெற்றது.

நிந்தவூர் பிரதேச செயலக சமூக சேவை உத்தியோகத்தர் எம்.ஐ.எம்.முர்ஷித் தலைமையில் இடம் பெற்ற இந்நிகழ்வில் பிரதேச செயலாளர் திருமதி.றிபா உம்மா ஜலீல் பிரதம அதிதியாகக் கலந்து கொண்டு, உரியவர்களுக்கான காசோலைகளை வழங்கி வைத்தார்.

மேலும் இந்நிகழ்வில் உதவிப் பிரதேச செயலாளர் ஆர்.திரவியராஜ், அபிவிருத்தி உத்தியோகத்தர் திருமதி ஏ.ஜெமீலா புஹாது, சிரேஷ்ட முகாமைத்துவ உதவியாளர் ஏ.மஜீட் உள்ளிட்ட அதிகாரிகள் பலரும் கலந்து கொண்டு சிறப்பித்தனர்.

இந்நிகழ்வில் சமூக சேவை அமைச்சினால் ஒதுக்கீடு செய்யப்பட்ட ரூபாய் 1,46,000.00 நிதி தெரிவு செய்யப்பட்ட 07 பயனாளிகளுக்கு பங்கிட்டு வழங்கப்பட்டமை குறிப்பிடத்தக்கதாகும்.

இலவச மூக்குக்கண்ணாடி வழங்குதல்

2017-08-20T14:03:00.001+05:30

அகில இலங்கை மக்கள் காங்கிரசின் கெளரவ தேசியத் தலைவர் அமைச்சர் ரிஷாட் அவர்களின் ஆலோசனைக்கு அமைவாக, அதன் பிரதித் தலைவரும் முன்னாள் மாகாண சபை உறுப்பினரும் இலங்கை அரச வர்த்தக கூட்டுத்தாபனத்தின் தலைவருமாகிய கொளரவ ஏ.எம்.ஜெமீல் அவர்களின் வறிய மக்களுக்கான 1000ம் இலவச மூக்குக் கண்ணாடிகள் என்னும் திட்டத்திற்கமைவாக, தற்போது19.08.2017 சனிக்கிழமை இரண்டாவது கட்டமாக சாய்ந்தமருது மக்களுக்காக மேலும் 250 மூக்குக் கண்ணாடிகளை வழங்கி வைக்கும் நிகழ்வுகள் இடம்பெற்றன.

அலியார் ஹஸரத் மறைவுக்கு அமைச்சர் ரவூப் ஹக்கீம் அனுதாபம்

2017-08-20T01:49:00.001+05:30

அலியார் ஹஸரத் மறைவுக்கு அமைச்சர் ரவூப் ஹக்கீம் அனுதாபம்

சம்மாந்துறை தப்லீகுல் இஸ்லாம் அரபிக் கல்லூரியின் ஸ்தாபகரும் அதிபருமான அல்ஹாஜ் எம்.பி அலியார் (தேவ்பந்தி) காலமான செய்தி கேட்டு, தான் அதிர்ச்சியும் துயரமும் அடைந்ததாக ஸ்ரீலங்கா முஸ்லிம் காங்கிரஸ் தலைவரும் அமைச்சருமான ரவூப் ஹக்கீம்; தெரிவித்துள்ளார்.

அவர் விடுத்துள்ள அனுதாபச் செய்தியில் மேலும் குறிப்பிட்டுள்ளதாவது,

அலியார் ஹஸ்ரத் ஓர் ஆன்மீகத் தலைவராக மட்டுமன்றி ஒரு சமூகத் தலைவரும் ஒருகாலத்தில் அம்பாறை மாவட்ட முஸ்லிம்களின் அரசியல் தலைவராகவும் திகழ்ந்தார் என்பது நமது சமகால வரலாற்றில் முக்கியமான ஒரு பதிவாகும்.

குறிப்பாக 1980களில் இருந்து கிழக்கில் ஏற்பட்ட அசாதாரண சூழ்நிலைகளில் அலியார் ஹஸ்ரத் ஒரு சமாதான தூதுவராக தொழிற்பட்டார். குறிப்பாக 1985 முதல் 1990 வரை நிகழ்ந்த முஸ்லிம்களுக்கு எதிரான ஒவ்வொரு படுகொலை சம்பவத்திலும் அங்கு இனவன்முறைகள் நிகழ்ந்துவிடாமல் தடுத்து நிறுத்தும் ஆற்றல் இவருககே இருந்தது. அதுமட்டுமன்றி அம்பாறை மாவட்டத்தில் இன சமநிலை குழம்பக்கூடிய எல்லா இடங்களிலும் அலியார் ஹஸ்ரத் பிரசன்னமாகி சமாதானத்தை நிலைநாட்டுவதில் முன்னின்று பாடுபட்டார்.

இந்திய அமைதிப்படையினர் நிலைகொண்டிருந்த காலத்தில் முஸ்லிம்களை தங்கள் எதிரியாக கருதிய அவர்களின் ஜவான்கள் மத்தியில் அவர்களின் மொழியிலேயே உரையாடி முஸ்லிம்களின் தரப்பு நியாயங்களை எடுத்துரைத்து அவர்களை தெளிவுபடுத்தினார். இந்திய அமைதிப்படையின் பிரிகேடியர் டூகல், கேர்னல் ஸிபர், மேஜர் ஷர்மா, மேஜர் குர்டீர் சிங் முதலிய கிழக்கிலங்கையின் தளபதிகளுடன் உறவைப்பேணி முஸ்லிம்களின் பாதுகாப்பு தொடர்பில் அன்றைய அரசியல்வாதிகளை விடவும் உயர்ந்த தரத்தில் மக்களுக்கு உதவினார்.

தலைவர் மர்ஹூம் அஷ்ரஃபின் மிகுந்த நன்மதிப்பை பெற்றிருந்த ஹஸ்ரத், கட்சி ஸ்தாபித்த காலங்களில் அவரின் மதிப்பார்ந்த ஆலோசகராகவும் தொழிற்பட்டார். முக்கியமான அரசியல் தீர்மானங்கள் எடுக்கப்படும்போது தலைவர் ஹஸ்ரத்தின் ஆலோசனையையும் ஆசீர்வாதத்தையும் பெற்றுக்கொள்வதில் பின்னிற்பதே இல்லை. மர்ஹூம் யூ.எல்.எம். முகைடீன் முதலிய அனைத்து தரப்பினரும் ஹஸ்ரத்தின் ஆலோசனையின் அடிப்படையியேயே முக்கிய தீர்மானங்களை எடுத்தனர்.

சம்மாந்துறை தப்லீகுல் இஸ்லாம் அரபுக் கல்லூரியின் ஸ்தாபகராகவும் காலமாகும்வரை அதன் அதிபராகவும் தொழிற்பட்ட அலியார் ஹஸ்ரத்துக்கு எல்லாம்வல்ல அல்லாஹ் ஜென்னதுல் பிர்தௌஸை வழங்குவானாக.

புங்குடுதீவு “தாயகம்” அமைப்பின் ஏற்பாட்டில், பாதிக்கப்பட்ட தென்னிலங்கை மக்களுக்கு வழங்கப்பட்ட உதவி, இரத்தினபுரியில் பகிர்ந்தளிக்கப் பட்டது… (படங்கள்)

2017-08-20T01:45:00.004+05:30

புங்குடுதீவு “தாயகம்” அமைப்பின் ஏற்பாட்டில், பாதிக்கப்பட்ட தென்னிலங்கை மக்களுக்கு வழங்கப்பட்ட உதவி, இரத்தினபுரியில் பகிர்ந்தளிக்கப் பட்டது… (படங்கள்)

புங்குடுதீவு “தாயகம்” அமைப்பின்; சுவிஸ் பிரதிநிதிகளின் ஏற்பாட்டில், பாதிக்கப்பட்ட தென்னிலங்கை மக்களுக்கு வழங்கப்பட்ட உதவி, இரத்தினபுரியில் பகிர்ந்தளிக்கப்பட்டது…

இருமாதங்களுக்கு முன்னர் இலங்கையின் மலையகம், களுத்துறை, இரத்தினபுரி, காலி, அம்பாந்தோட்டை உட்பட தென்னிலங்கை எங்கும் ஏற்பட்ட மழை, வெள்ளம் அனர்த்தங்களினால், பாதிக்கப்பட்ட மக்களுக்கு, சில தமிழ் உறவுகள் தந்த பொருட்களை “புங்குடுதீவு தாயகம் சமூக சேவை அகம்” அமைப்பின் (சுவிஸ் பிரதிநிதிகள்) சார்பில் பொறுப்பேற்று, சுவிஸில் உள்ள பௌத்த விகாரை பீடாதிபதியின் உதவியுடன் இலங்கைக்கு அனுப்பி வைப்பதற்க்காக ஒப்படைத்து வைக்கப்பட்டது நீங்கள் அறிந்ததே.

மேற்படி பொருட்களை சுவிஸ் பேர்ண் மாநில, கும்லிங்கன் பகுதியில் உள்ள “சிலோவா” வைத்தியசாலையில் (SILOHA Spital, Gumlingen) தொழில் புரியும் திரு.அ.கைலாசநாதன் (குழந்தை), அங்குள்ள நிர்வாகத்திடம் விடுத்த வேண்டுகோளை ஏற்று, அந்த “சிலோவா வைத்தியசாலை” நிர்வாகம் தந்த பொருட்களுடன், மேலும் சில தமிழ் உறவுகளும் தந்த பொருட்கள் யாவும், சுவிஸில் உள்ள சூரிச் பௌத்த விகாரை பீடாதிபதி வணக்கத்துக்குரிய கருவெலகஸ்வெவ அனுருத்த தேரோ அவர்களின் உதவியுடன் இலங்கைக்கு அனுப்பி வைப்பதற்க்காக ஒப்படைத்து வைக்கப்பட்டு அனுப்பப் பட்டதும் நீங்கள் அறிந்ததே.

புங்குடுதீவு "தாயகம் சமூக சேவை அகம்" அமைப்பின் சுவிஸ் பிரதிநிதிகள், நண்பர்களின் ஏற்பாட்டில் வழங்கப்பட்ட உதவிகள் நேற்றுமுன்தினம் (17.08.2017 அன்று) இரத்தினபுரி பகுதியில் வைத்து பாதிக்கப்பட்டோருக்கு வழங்கப்பட்டுள்ளது.

இதுகுறித்து, சூரிச் பௌத்த விகாரை பீடாதிபதி வணக்கத்துக்குரிய கருவெலகஸ்வெவ அனுருத்த தேரோ அவர்கள் கருத்துத் தெரிவிக்கையில், "நாம் இலங்கையில் இருந்து புலம்பெயர்ந்து வந்து இங்கு வாழ்ந்தாலும், தமிழ் சிங்களம் என்ற வேறுபாடு இன்றி, புரிந்துணர்வுடன் ஒற்றுமையாக வாழ்வதுடன், பாதிக்கப்பட்ட மக்களுக்கு மனித நேயத்துடன் உதவி புரிந்த அனைத்து தமிழ் மக்களுக்கும், இதனை ஏற்பாடு செய்த அமைப்பின் (“தாயகம்” -புங்குடுதீவு) பிரதிநிதிகளுக்கும், தமது நன்றி எனவும், இவர்களுக்கு புத்தபெருமானின் ஆசி கிடைக்க, தாம் பிரார்த்திப்பதாகவும், மேற்படி உதவிகளை பெற்றுக் கொண்ட மக்கள் மிக மனம் மகிழ்வதாகவும், அவர்களின் அன்பையும் பகிர்ந்து கொள்வதாகத்” தெரிவித்தார்.

** “இன, மத பேதம் பாராமல்; மனிதத்தையும், மனித நேயத்தையும் மதிக்கும் “மனிதர்கள்” நாம்.. என்பதை புரிய வைத்த, அனைத்து நல்லுள்ளங்களுக்கும் எமது நன்றி”.. **

கடந்த காலங்களிலும், “புங்குடுதீவு தாயகம் சமூக சேவை அகம்” அமைப்பின் சார்பில், வவுனியா, முல்லைத்தீவு, கிளிநொச்சி, செட்டிக்குளம், மற்றும் புங்குடுதீவு வைத்தியசாலைக்கு புங்குடுதீவு உறவுகளின் (குழந்தை, குமார், தயா, பன்னீர், அன்பு) உதவியுடன், எம்மால் முடிந்த உதவிகளை புரிந்து இருந்தோம்.

இப்போது தென்னிலங்கையில் ஏற்பட்ட அனர்த்தத்தினை தொடர்ந்து “புங்குடுதீவு தாயகம் சமூக சேவை அகம்” அமைப்பின் சார்பில், எம்மால் முன்வைக்கப்பட்ட கோரிக்கையை ஏற்று உதவிய அனைத்து நல் உள்ளங்களுக்கும் எமது நன்றி.. அத்துடன் சுவிஸில் உள்ள சூரிச் பௌத்த விகாரை பீடாதிபதியுடன் தொடர்பை ஏற்படுத்தித் தந்து உதவிய திரு.அஜீவன் அவர்களுக்கும் எமது நன்றி..

இவ்வண்ணம்..
செல்வி.ஜெகநந்தினி முத்துக்குமாரு.
செயலாளர்,
“தாயகம் சமூக சேவை அகம்” -புங்குடுதீவு
18.08.2017

மலையகத்தில் சீரற்ற காலநிலை

2017-08-20T01:41:00.002+05:30

(க.கிஷாந்தன்)

மஸ்கெலியா – நோட்டன்பிரிட்ஜ் பிரதான வீதியில் ஹப்புகஸ்தென்ன பகுதியில் 19.08.2017 அன்று விடியற்காலை பாரிய மரம் ஒன்று முறிந்து விழுந்ததன் காரணமாக அவ்வீதியினூடான போக்குவரத்து சில மணி நேரம் தடைப்பட்டிருந்ததாக மஸ்கெலியா பொலிஸார் தெரிவித்தனர்.

எனினும் மரத்தை வெட்டி அகற்றி பிரதான வீதியினூடான போக்குவரத்தை சீர் செய்துள்ளதாக பொலிஸார் மேலும் தெரிவித்தனர்.

போக்குவரத்து தடைப்பட்டிருந்ததன் காரணமாக அட்டன், நோட்டன்பிரிட்ஜ் மற்றும் லக்ஷபான, ஒஸ்போன் போன்ற பிரதேசங்களுக்கு செல்லும் வாகனங்கள் பல சிரமங்களுக்குள்ளாகியுள்ளமை குறிப்பிடதக்கது.

மேலும் மேல் கொத்மலை, கெனியன், மவுஸ்ஸாக்கலை, காசல்ரீ போன்ற நீர்தேக்கங்களின் நீர்மட்டமும் சடுதியாக உயர்ந்துள்ளது.

இதனால் நீர்தேக்கங்களை அண்டிய பிரதேசங்களில் வாழும் பிரதேச மக்களை மிகுந்த அவதானத்துடன் செயற்படுமாறு பொலிஸார் கேட்டுக்கொள்கின்றனர்.

“அத்துமீறி திறந்து வைக்கப்பட்ட நினைவுக் கல்வெட்டுக்கள் கழற்றி எரியப்படும்”

2017-08-20T01:38:00.000+05:30

(ஆர்.ஹஸன்)

பிரதமர் ரணில் விக்கிரமசிங்க பிரதம அதிதியாக கலந்து கொள்ளும் காத்தான்குடி நகர சபையின் புதிய கட்டிட திறப்பு விழா நிகழ்வை, மட்டு மாவட்ட அபிவிருத்திக் குழு இணைத்தலைவரும், புனர்வாழ்வு மற்றும் மீள்குடியேற்ற இராஜாங்க அமைச்சருமான எம்.எல்.ஏ.எம்.ஹிஸ்புல்லாஹ் புறக்கணிப்பதாக நேற்று வெள்ளிக்கிழமை உத்தியோகபூர்வமாக அறிவித்தார்.

தனது முழுமையான நிதி ஒதுக்கீட்டிலும் - பங்களிப்புடனும் கட்டி முடிக்கப்பட்ட காத்தான்குடி நகர சபையின் புதிய கட்டிடத்தை கிழக்கு முதல்வர் மற்றும் அவரது சகாக்கள் இணைத்து அவர்களது அரசியல் இலாபங்களுக்காக என்னை புறக்கணித்து விட்டு திறந்து வைக்க திட்டமிட்டுள்ளதாக இதன்போது குற்றம்சாட்டிய இராஜாங்க அமைச்சர், கலைக்கபட்டுள்ள காத்தான்குடி நகர சபையின் அதிகாரத்தை நாங்கள் மீண்டும் கைப்பற்றிய பின்னர் அதன் நினைவுக் கல்வெட்டு கழற்றி எரியப்பட்டு மீண்டும் புதிய நினைவுக் கல்வெட்டு நடப்படும் என எச்சரிக்கை விடுத்தார்.

மட்டக்களப்பு பல்கலைக்கழக கல்லூரி மண்டபத்தில் நேற்று வெள்ளிக்கிழமை இரவு நடைபெற்ற ஊடகவியலாளர் சந்திப்பில் கலந்து கொண்டு உரையாற்றும் போதே அவர் மேற்கண்டவாறு தெரிவித்தார்.

அவர் அங்கு மேலும் கூறியதாவது:-

மத்திய அரசு மற்றும் எனது தனிப்பட்ட நிதிப் பங்களிப்பு ; ஒதுக்கீட்டில் நிர்மாணம் செய்யப்பட்ட காத்தான்குடி நகர சபையின் புதிய கட்டிட திறப்பு விழா எதிர்வரும் ஞாயிற்றுக்கிழமை நடைபெறவுள்ளது. இதில் பிரதமர் ரணில் விக்கிரமசிங்க பிரதம அதிதியாக கலந்து கொள்ளவுள்ளதுடன் ஊர் பேர் தெரியாதவர்கள் எல்லாம் இந்நிகழ்வுக்கு அழைக்கப்பட்டுள்ளனர்.

எனினும், எனது பங்களிப்பில் கட்டி முடிக்கப்பட்ட கட்டிடத் திறப்பு விழாவில் எனக்கே அழைப்பிதழ் இல்லை. அழைப்பிதழில் குறித்த ஊரின் பிரதிநிதியாக எனக்கு வழங்க வேண்டிய மரியாதையும் வழங்கப்படவில்லை. அத்துடன், குறித்த அபிவிருத்திப் பணியை நான் செய்ததாக நினைவுக் கல்வெட்டில் எனது பெயர் இடம்பெறவும் இல்லை.

எனவே, இவ்வாறான காரணங்களால் பிரதமர் கலந்து கொள்ளும் இந்த நிகழ்வை புறக்கணிப்பது என்ற தீர்மானத்தை எமது மத்திய குழு எடுத்துள்ளது. அதற்கமைய நான் எனது சொந்த ஊரில் நடக்கும் இந்த நிகழ்வில் கலந்து கொள்ளவில்லை.

எனது சொந்த ஊரில் நடைபெறும் பிரதமர் கலந்து கொள்ளும் நிகழ்வில் நான் கலந்து கொள்ளாவிட்டால் மக்கள் மத்தியில் தப்பான அபிப்பிராயங்கள் ஏற்பட்டு விடும். எனவே, நான் இந்நிகழ்வை புறக்கணிப்பதற்கான காரணம் தொடர்பில் தெளிவுபடுத்த வேண்டியுள்ளது.

எனது முழுமையான நிதிப்பங்களிப்புடன் காத்தான்குடியில் மேற்கொள்ளப்பட்ட பல அபிவிருத்திப் பணிகள் வேறு தரப்பினரால் திறந்து வைக்கப்படுகின்றன. கடந்த இரண்டு வருடங்களாக காத்தான்குடி நகர சபை கலைக்கப்பட்டுள்ள நிலையில் இவ்வாறான செயற்பாடுகள் இடம்பெறுகின்றன.

உள்ளுராட்சி தேர்தலின் பின்னர் மீண்டும் காத்தான்குடி நகர சபையின் அதிகாரத்தை நாங்கள் கைப்பற்றுவோம். அதன் பின்னர் எனது பங்களிப்பில் நிர்மாணிக்கப்பட்டு வேறு தரப்பால் திறந்து வைக்கவுள்ள காத்தான்குடி நகர சபையின் நினைவுக் கல்வெட்டை நாங்கள் கழற்றி எரிந்து வேறு ஒரு நினைவுக் கல்வெட்டை நடுவோம். அதுமட்டுமல்லாது, கிழக்கு முதல்வர் உள்ளிட்ட அவரது சகாக்கள் திறந்து வைத்த எனது நிதிப்பங்களிப்பினால் மேற்கொள்ளப்பட்ட அபிவிருத்திப் பணிகள் அனைத்தினதும் நினைவுக் கல்வெட்டுக்கள் கழற்றி எரியப்படும்.
இதேவேளை, காத்தான்கு நகர சபையின் திறப்பு விழா மற்றும் பிரதமர் ரணில் விக்கிரமசிங்கவின் மட்டு.

விஜயம் சம்பந்தமான ஏற்பாடுகள் மேற்கொள்ளப்பட்டமை இம்மாவட்டத்தில் உள்ள நாடாளுமன்ற உறுப்பினர்களுக்கு தெரியப்படுத்தப்படவில்லை. இது சம்பந்தமாக பிரதியமைச்சர் அமீர் அலி மற்றும் அலி ஸாஹிர் மௌலான ஆகியோர் பிரதமருடன் கலந்துரையாடினர். பின்னர், பிரதமர் இந்த விடயம் சம்பந்தமாக என்னுடன் தொலைபேசியிலும் உரையாடினார். இதன் காரணமாகவே பிரதமர் தனது விஜயத்தை ஒத்தி வைத்திருந்தார்.

இந்நிலையில், பிரதமர் மீண்டும் ஆகஸ்ட் 20ஆம் திகதி வருகைத் தருவதாக அறிவித்தாலும் முன்னர் நடைபெறவிருந்த நிகழ்வுக்கு கடந்த ஒரு மாதங்களுக்கு முன்னர் அச்சிட்ட அழைப்பிதழையே முதல்வர் மீண்டும் விநியோகம் செய்துள்ளார். அவருடன்; இது சம்பந்தமாக பேசி பயனில்லை என்பதால் இந்த நிகழ்வில் கலந்து கொள்ளாது தவிர்ந்து கொள்ள தீர்மானித்தோம்.

இந்த அபிவிருத்திப் பணியை செய்தவன் என்ற அடிப்படையில் எனக்கு அழைப்பிதழ் வழங்கியிருக்க வேண்டும். இல்லையென்றால் நான் இந்த மாவட்டத்தின் சிரேஷ்ட நாடாளுமன்ற உறுப்பினர் என்றோ, அரசில் அங்கம் வகிக்கும் இராஜாங்க அமைச்சர் என்ற ரீதியிலோ, மாவட்டத்தின் அபிவிருத்திக் குழு இணைத்தலைவர் என்பதாலோ அல்லது காத்தான்குடி மக்களின் நீண்டகால பிரதிநிதி என்ற அடிப்படையிலோ எனக்கு அழைப்பிதழ் வழங்கியிருக்க வேண்டும்.
காத்தான்குடி நகர சபை நிர்மாணப் பணிக்கு முழுமையான நிதிப் பங்களிப்பு மத்திய அரசினாலே பெற்றுக்கொடுக்கப்பட்டது.

இந்தப் பணிக்கும் கிழக்கு மாகாண சபைக்கோ அல்லது கிழக்கு மாகாண முதலமைச்சருக்கோ எந்த தொடர்பும் இல்லை. அவர்கள் ஒரு ரூபாய் கூட இதற்காக வழங்கவில்லை.

காத்தான்குடி நகர சபையில் உள்ள நிதியைப் பயன்படுத்தியே திறப்பு விழாவுக்கான ஏற்பாடுகளையும் செய்கின்றனர். அந்த நிதியை தேவையற்ற விதத்தில் வேறு தேவைகளுக்காகவும் பயன்படுத்துகின்றனர். எனினும், நாங்கள் நகர சபையின் நிதியை எமது சொந்த தேவைகளுக்காவோ – அரசியல் தேவைகளுக்காவோ ஒருபோதும் பயன்படுத்தியதில்லை.

நாங்கள் எமது சொந்த நிதியைப் பயன்படுத்தியே நகர சபையின் தேவைகளை நிவர்த்தி செய்து நகர சபையின் நிதியை சேமித்தோம். அவசர தேவைகள், அனர்த்தம் ஏதும் ஏற்படும் பட்சத்தில் பயன்படுத்துவதற்காகவே அந்த நிதி சேமிக்கப்பட்டது. ஆனால், இன்று அனைத்துமே தலைகீழாக மாறியுள்ளது – என்றார்.

அலியார் ஹஸரத்தின் மறைவு முஸ்லிம் சமூகத்துக்கு பேரிழப்பு

2017-08-20T01:32:00.002+05:30

இலங்கையின் மூத்த உலமாக்களில் ஒருவரும், சம்மாந்துறை தப்லீகுல் இஸ்லாம் அரபுக் கல்லூரியின் ஸ்தாபகருமான ஷேகுத் தப்லீக் அலியார் ஹஸரத்தின் (தேவ்பந்தி) மறைவு முஸ்லிம் சமூகத்துக்கு பேரிழப்பாகும் என புனர்வாழ்வு மற்றும் மீள்குடியேற்ற இராஜாங்க அமைச்சர் ஹிஸ்புல்லாஹ் இரங்கல் தெரிவித்தார்.

பெரியார் ஹஸரத் என எல்லோராலும் கண்ணியமாக அழைக்கப்பட்ட அலியார் ஹஸரத் இன்று சனிக்கிழமை வபாத்தானார்கள். இது தொடர்பில் இராஜாங்க அமைச்சர் ஹிஸ்புல்லாஹ் விடுத்துள்ள இரங்கல் செய்தியிலேயே மேற்கண்டவாறு குறிப்பிடப்பட்டுள்ளது.

அதில் மேலும் கூறப்பட்டுள்ளதாவது:-

“மிக நீண்ட காலமாக மகத்தான சன்மார்க்கப் பணியில் தன்னை ஈடுபத்திக் கொண்டு முஸ்லிம் சமூகத்துக்காக அளப்பரிய சேவைகளை ஆற்றியுள்ள அன்புக்குரிய பெரியார் ஹஸரத்தின் மறைவு செய்தி கேட்டு மிகவும் கவலையடைந்தேன். அவரது இழப்பால் வாடுகின்ற அவரது குடும்பத்தினர், மாணவர்கள், சம்மாந்துறை மக்களுக்கு எனது ஆழ்ந்த அனுதாபங்களைத் தெரிவித்துக் கொள்கின்றேன்.

சம்மாந்துறை மண்ணை சமூக ரீதியாகவும் சன்மார்க்க ரீதியாகவும் தலைநிமிரச் செய்ததில் பெரியார் ஹஸரத்துக்கு பெரும் பங்குள்ளது. குறிப்பாக தப்லீக் ஜமாஅத்தின் வளர்ச்சிக்காக தன்னை முழுமையாக அர்ப்பணித்து கிழக்கு மாகாணத்தில் தப்லீக் ஜமாஅத் வளர்ச்சியடைய பெரும்பாடுபட்ட ஒருவர்.

சிரமங்களுக்கும் மத்தியிலும் சம்மாந்துறையில் தப்லீகுல் இஸ்லாம் அரபுக் கல்லூரியை நிறுவி சன்மார்க்கப் பணியில் அரும் பெரும் சேவையாற்றியுள்ளார். அரசியல் தலைமைத்துவங்களுடன் எப்போதும் நெறுக்கமான உறவைப் பேணிய அவர், அதன் ஊடாக சமூகத்தின் ஒற்றுமை – அபிவிருத்திக்கு அதிக பங்களிப்பு செய்துள்ளார்.

விசேடமாக யுத்த காலத்தில் இராணுவத்துடன் ஏனைய தரப்புடன் பேச்சுக்களை நடத்தி முஸ்லிம்களின் பாதுகாப்பை உறுதி செய்வதில் அவர் முன்னணியில் இருந்து செயற்பட்டதை எவராலும் மறக்கவோ மறைக்கவோ முடியாது. அவரது இறப்பால் கவலையடைந்துள்ள சம்மாந்துறை மக்களுக்கு எனது ஆழ்ந்த அனுதாபங்களைத் தெரிவித்துக் கொள்கிறேன்” – என அதில் குறிப்பிடப்பட்டுள்ளது.

மருதமுனை ஸம்ஸ் மத்திய கல்லூரி மைதானம் விஸ்தரிப்பு.

2017-08-20T01:28:00.003+05:30

(அகமட் எஸ். முகைடீன்)

ஸ்ரீலங்கா முஸ்லிம் காங்கிரஸ் பிரதித் தலைவரும் விளையாட்டுத்துறை பிரதி அமைச்சருமான சட்டத்தரணி எச்.எம்.எம். ஹரீஸ் தனது நிதி ஒதுக்கீட்டில் மேற்கொள்ளப்பட்ட மருதமுனை ஸம்ஸ் மத்திய கல்லூரி மைதான அபிவிருத்தி வேலைத்திட்டத்தை நேற்று வெள்ளிக்கிழமை (18) நேரில் சென்று பார்வையிட்டார்.

இதன்போது கல்முனை மாநகர சபை முன்னாள் உறுப்பினர்களான சட்டத்தரணி ஏ.எம். றகீப், ஏ.எல்.எம். முஸ்தபா, எம்.எஸ். உமர் அலி, விளையாட்டுத்துறை பிரதி அமைச்சரின் இணைப்புச் செயலாளர்களான நௌபர் ஏ. பாவா, கே.எம். தௌபீக், மருதமுனை ஸம்ஸ் மத்திய கல்லூரி அதிபர், ஆசிரியர்கள், நலன்விரும்பிகள், விளையாட்டு ஆர்வலர்கள் எனப் பலரும் பிரசன்னமாகியிருந்தனர்.

இம்மைதானத்தை விஸ்தரிப்புச் செய்யும் வகையில் மேலும் 40 இலட்சம் ரூபா நிதியினை ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமின் நகர திட்டமிடல் அமைச்சின் மூலம் ஒதுக்கீடு செய்து தருவதாக விளையாட்டுத்துறை பிரதி அமைச்சர் ஹரீஸ் இதன்போது குறிப்பிட்டார்.

சம்மாந்துறை பெரிய ஹஸரத்தின் மறைவுக்கு அமைச்சர் றிஷாத் அனுதாபம்

2017-08-20T01:24:00.002+05:30

பெரிய ஹஸரத் என எல்லோராலும் கண்ணியமாக அழைக்கப்படும் அல்ஹாஜ் ஷேகுத் தப்லீக் அலியார் ஹஸரத் அவர்கள் வபாத்தான செய்தி தனக்கு கவலை அளிப்பதாக அகில இலங்கை மக்கள் காங்கிரஸ் தலைவரும் அமைச்சருமான றிஷாத் பதியுதீன் தெரிவித்துள்ளார்.

சம்மாந்துறையின் மூத்த ஆலிம்களில் ஒருவராகவும் தப்லீகுள் இஸ்லாம் அரபிக் கல்லூரியின் ஸ்தாபராகவும் பணியாற்றிய பெரிய ஹஸரத் சம்மாந்துறை மண்ணின் அடையாளங்களில் ஒன்றாகத் திகழ்ந்தவர். அந்த ஊரின் பெருமையை இவர் மூலம் துலங்கியது என்றால் அதற்கு மாறுபட்ட கருத்துக்களுக்கு இடமில்லை.

சம்மாந்துறை என்றால் புரியாத வெளியூர் முஸ்லிம்களிடம் அலியார் ஹஸரத்தின் ஊர் என்றார் இலகுவாக புரிந்துவிடும் அளவுக்கு அவர் சமூகப்பணிகளிலும் ஆத்மீகப்பணிகளிலும் மார்க்கப்பணிகளிலும் திகழ்ந்து விளங்கியவர். அவரது இழப்பால் கவலையுறும் சம்மாந்துறை மக்களுக்கும் குடும்பத்தாருக்கும் எனது ஆழ்ந்த கவலையை தெரிவிக்கின்றேன். அல்லாஹூத்தாலா

பொறியியலாளர் ஷிப்லி பாறுக்கின் முயற்சியினால் காத்தான்குடி விடுதி வீதிக்கான வடிகாண் அமைப்பதற்கு நிதி ஒதுக்கீடு

2017-08-20T01:21:00.003+05:30

பொறியியலாளர் ஷிப்லி பாறுக்கின் முயற்சியினால் காத்தான்குடி விடுதி வீதிக்கான வடிகாண் அமைப்பதற்கு நிதி ஒதுக்கீடு

புதிய காத்தான்குடி விடுதி வீதியினை வடிகானுடனான வீதியாக அமைப்பதற்குரிய அங்கிகாரங்கள் கிடைக்கப் பெற்றுள்ளதாக கிழக்கு மாகாண சபை உறுப்பினர் பொறியியலாளர் ஷிப்லி பாறுக் தெரிவித்தார்.

இவ்வேலைத்திட்டத்திற்கான நிதியினை பெறுவதற்காக கிழக்கு மாகாண சபை உறுப்பினர் பொறியியலாளர் ஷிப்லி பாறுக் அவர்கள் மேற்கொண்ட முயற்சியின் பயனாக ஸ்ரீ லங்கா முஸ்லிம் காங்கிரஸினுடைய தலைவரும், நகர திட்டமிடல் நீர் வழங்கல் மற்றும் வடிகாலமைப்பு அமைச்சருமான கௌரவ. அல்ஹாஜ். சட்டத்தரணி. ரவூப் ஹக்கீம் அவர்களினுடாக 98 இலட்சத்து ஐம்பதாயிரம் ருபாய் நிதி ஒதுக்கீடு செய்யப்பட்டு முதற்கட்ட வடிகாண்
வேலைத்திட்டம் ஆரம்பிக்கப்படவிருக்கின்றது.

மேலும், வடிகாண் அமைப்பதற்குரிய அங்கிகாரம் கிடைக்கப்பெற்று அதற்குரிய விலைமனுக்கள் கோரப்பட்டிருப்பதுடன், மிக விரைவாக இதனுடைய வேலைகள் ஆரம்பிக்கவிருக்கின்றன.

அத்துடன், இவ்வீதியினை காபட் வீதியாக செப்பணிடுவதற்கு ஏற்கனவே மாகாண சபையினுடைய ஐ ரோட் திட்டத்திற்குள் உள்வாங்கப்பட்டு அதற்குரிய அனைத்து விதமான அங்கிகாரங்களும் கிடைக்கப் பெற்றிருப்பதனால் இந்த வீதியினை சிறந்த முறையில் வடிகாண் அமைந்ததாக செப்பனிட்டு 2018ஆம் ஆண்டு மார்ச் மாதமளவில் இவ்வேலைத்திட்டம் பூர்த்தியாக்கப்படவுள்ளதாக கிழக்கு மாகாண சபை உறுப்பினர் பொறியியலாளர் ஷிப்லி பாறுக் தெரிவித்துள்ளார்.

இவ்வீதியினை பார்வையிடுவதற்காக தொழிநுட்ப உத்தியோகத்தர்களுடன் கிழக்கு மாகாண சபை உறுப்பினர் பொறியியலாளர் ஷிப்லி பாறுக் அவர்கள் 2017.08.17ஆந்திகதி - வியாழக்கிழமை நேரில்சென்று பார்வையிட்டதுடன், ஆலோசனைகளையும். கருத்துக்களையும் பறிமாறிக்கொண்டார்.

நாபீர் பௌண்டேசன் அமைப்பின் ஸ்தாபகத் தலைவரும் பொறியியலாளருமான யூ.கே. நாபீர் தனது இரங்கல் செய்தியில் தெரிவித்துள்ளார்.

2017-08-20T01:17:00.002+05:30

(எஸ்.அஷ்ரப்கான்)

இலங்கையின் அதிசிறந்த உலமாக்களில் ஒருவரும், சம்மாந்துறை தப்லீகுல் இஸ்லாம் அரபுக் கல்லூரியின் ஸ்தாபகருமான ஷேகுத் தப்லீக் அலியார் ஹஸரத்தின் மறைவு இலங்கை வாழ் முஸ்லிம்களுக்கு பெரும் இழப்பாகும் என்று நாபீர் பௌண்டேசன் அமைப்பின் ஸ்தாபகத் தலைவரும் பொறியியலாளருமான யூ.கே. நாபீர் தனது இரங்கல் செய்தியில் தெரிவித்துள்ளார்.

அதில் மேலும் குறிப்பிடும்போது,

அன்புக்குரிய அலியார் ஹஸரத்தின் மறைவுச் செய்தி கேட்டு மிகவும் வேதனையடைந்தேன். ஆரம்ப காலத்தில் பல்வேறு சிரமங்களுக்கு மத்தியில் சம்மாந்துறையில் தப்லீகுல் இஸ்லாம் அரபுக் கல்லூரியை நிறுவி சன்மார்க்கப் பணியில் அரும் பெரும் சேவையாற்றியுள்ளார். முழு இலங்கையிலும் இவரது மாணவர்கள் மௌலவிமார்களாகவும், இன்னும் பல்வேறு உயர் அந்தஸ்துக்களிலும் இன்று வாழ்ந்து வருகின்றார்கள். சுமார் 300 இற்கும் மேற்பட்ட உலமாக்களை உருவாக்கிய பெருந்தகை இன்று எம்மை விட்டுப்பிரிந்தது சம்மாந்துறை மண்ணுக்கு மட்டுமல்ல முழு நாட்டிற்குமே பேரிழப்பாகும்.

தனது ஊர் மற்றும் சமூகத்தின் ஒற்றுமையுடன் பிற மதங்களுடனான ஒற்றுமையான வாழ்ககைக்கு அதிக பங்களிப்பு செய்துள்ள ஒருவரை இன்று நாம் இழந்துள்ளோம். அவரது இழப்பால் வாடுகின்ற அவரது குடும்பத்தினருக்கு எனது ஆழ்ந்த அனுதாபங்களைத் தெரிவித்துக் கொள்வதுடன், முஸ்லிம் சமூகத்துக்காக அளப்பரிய சேவைகளை ஆற்றியுள்ள அன்னாரது பணிகளை ஏற்றுக்கொண்டு அழ்ழாஹூதஆலா அன்னாருக்கு ஜன்னதுல் பிர்தௌஸ் என்ற மேலான சுவர்க்கத்தை வழங்க வேண்டுமென பிரார்த்திக்கின்றேன்.