人在中環

我不是摩連奴

2008-07-19T00:13:00.005+08:00

擾攘大半年既一份合約，我以為簽完之後會成個人鬆晒，可以有覺好訓。點知，原來唔係。

輕鬆既時間我諗我享受左一晚左右啦，第二朝返工既時候，又感受到一種全新既壓力。

以前公司得拍檔同我兩個，乜都可以圍威喂，賺多賺少，影響既係只係自己既生活。總之未差到冇錢出糧俾同事同埋冇飯開，就OK啦，反正都係自己同自己交代遮。財團科左水之後，情況就唔同啦。我要交待既，仲有呢班財主。萬一公司表現得唔好，財主睇得唔順眼，一個唔該閂埋條水喉，之前做落果堆project，即時可以全軍覆沒。

突然之間，我諗起前車路士教練摩連奴。

油王買起車仔之後，起用左串爆既摩連奴做領隊。摩連奴雖然係串，不過無可否認佢的確係極有料到。頭兩季即時幫車仔捧杯，都叫做有餐安落茶飯食。但係一到成績稍稍回落，油王就一個唔該送鬼左佢走。有好多有錢既財主都有一個共通點，就係好討厭失敗。佢地習慣左要果樣，有果樣，而且要有仲係即刻就有。久而久之就變得冇乜耐性。成功，已經係最低標準啦。佢地除左要贏，仲要贏得夠快，先至岩佢地心水。又咁講，佢地之所以爬得到咁高既位置，賺到咁鬼多錢，仲有一樣野，就係普遍佢地都係非常之decisive。有問題，即改，唔會慢慢等又或者拖拖拉拉。即是話，你一唔掂，即刻執包袱丫，唔該。

財團剛剛入股我間爛鬼公司，合作初期，總係會有d蜜月期既。今日既財團代表對我同拍檔極之友善，樣樣都好似天作之合甚至係相逢恨晚，不過我好清楚，蜜月期絕對唔會一直持續到永遠。到到最後，都係要靠你有幾多成績做到出黎，先至可以維持到財主同你既關係，另佢既水喉唔會貿貿然咁閂左。不過我諗，強如摩連奴都只不過捱左兩季多d就要另謀高就，咁，我未來幾年既命運，會係點樣？

呢一舖，個挑戰變得好大呀，我覺得。

不過，好玩丫。

*****

獲注資之後我所做既第一件事，係去加Kelly同埋另外幾個management staff既人工。

唔係因為公司手頭鬆動左就身痕想亂fing，而係我覺得，不久既未來，有好多場硬杖會接踵而來，我好需要佢地響我身邊幫我去打呢d杖。呢個時候，我諗首要既係去secure佢地繼續留響度效力。

另一方面，我都希望俾個正面既message佢地，等佢地感受到，加入新既股東同資金，除左對公司有幫助之外，佢地自己，都一樣會受惠。

之後，仲有好多野等住做。

祝大家有個愉快既週末。

Season Finale

2008-07-16T21:52:00.005+08:00

外國既電視劇集，一季做完又一季。每一季都有一個season finale。我忽然響度諗，《人在中環》寫左兩年幾，係唔係都應該幫佢做一個季結？

呢幾個星期，響CK既週圍，發生左好多濕濕碎碎既事，而呢d濕濕碎碎既事，都好似響度話俾我聽，我既事業同人生，都可能響不知不覺間進入左個唔同既階段。

於是，突然之間，想幫呢個爛blog，寫返個season finale。

*****

Stephy的新工作

係，老婆終於辭左份工，唔駛再受佢之前果位中女老細既氣。

自私一d咁講，當Stephy唔駛返工既時候，我既心情，其實係比較輕鬆既。我唔駛擔心佢會受氣，亦唔需要擔心佢會捱得太辛苦，影響佢不嬲都唔係太好既健康。(當然，佢本人係認為我呢d擔心係冇乜必要既。)

老婆辭左工果日，我幾乎開心到走去擺番兩圍。之但係，我開心既日子，好快就結束左。是關呢，佢又話咁快搵左份新工。

oh well，多少都預左架啦。

新既工作，同事同老細似乎都唔太差喎。或者係學似老婆自己話齋，試個上一個衰到冇人有既老細，仲有d咩老細會嚇得到佢？

我諗，工作係俾到一d我冇辦法俾得到既快樂俾Stephy。

唯有呢，俾佢繼續做佢鍾意既working lady囉。

只要開心就好。

*****

Kelly的婚禮

我讀大學既時候，陳慧琳剛剛出道。佢既歌，陪住我渡過左我最後幾年既校園生活。所以我對呢位artist，都有幾大既情意結。

當我早排聽到佢結婚既新聞呢…我查實都幾戥佢開心。愛情長跑喎，你估容易？少d定力都唔掂呀。

陳慧琳宣佈結婚之後幾日，我公司既Kelly有一朝走左入我房，同我講：「老細，我都要結婚啦。」

whew，好彩，佢話結左婚後都會繼續響度做。嚇得我丫。

Kelly初初黎做既時候，碰岩佢剛剛俾之前既男友飛鬼左，佢本來做緊果間大機構又cut人唔要佢。咁果陣，我諗都算係佢人生既一個幾低潮既時候。一場賓主，多少都講d緣份既。就係咁，亂打亂撞佢就黎左我間爛鬼公司做，一做就咁多年。

後來佢識左個新男朋友，一直對佢好好。有時放工時候，響公司樓下撞到佢男友等佢放工，我心諗，呢個男仔，都幾好丫。

而且幾靚仔添，我覺得。

Kelly結婚，唔知點解，我好似有少少嫁女feel咁。

今年我有好幾個同事都出嫁，諗起佢地初初入黎做果陣，幾乎全部都係小妹妹。家陣一個二個話去嫁人，忽然覺得，時日，真係如飛。

*****

終於…

傍晚時份，我響中環律師樓既會議室入面，深深吸左一口大氣，提起筆，響合約上面簽左個名。

就係咁，我將公司接近一半既股權，賣左俾一個外地財團。

事情擾擾攘攘大半年，傾完又傾，計完又計，事情終於落實，我終於可以鬆番口氣，訓番一覺似樣些少既。查實失眠問題，真係困擾左我好耐。

賣仔係一件好掙紮既事，有無限既擔心，有好多好多情意結。不過樽頸既日子過得太耐，拍擋同我都認為，係時候要突破一下。

我好期待，引人左財團既資金之後，公司會有點樣既發展，仲有我既事業，可以有幾大既轉變。到底會變得更好更精采，抑或會變到一無所有？

人生，真係可以有無限既可能。

我永遠都期待明天既來臨。

有些職業我一定做唔掂…

2008-07-12T18:11:00.008+08:00

我發覺，有d職業我係真係冇可能做得黎。

例如，會計師同律師，就係其中兩樣。

唉，我諗如果細細個讀書果陣同阿媽講，話自己大個仔果陣一定做唔掂呢兩個「司」，肯定佢人鬧話冇大志。

所以咪衣家先敢咁講囉。

呢個禮拜，真係做到甩晒轆。不過相比呢排同我一齊做野既果班律師同會計師，我諗佢地個轆，應該甩得仲條條fing過我多多聲。我不嬲覺得專業人仕應該係響社會上比較賺到錢既一群。不過我又計一計，佢地既人工，divided by佢地既working hours，嘩，真係…

其實都幾唔抵。

唔知咁又算唔算係「多勞多得」既一種？

家陣唔係十八廿二，唔係好似以前後生果陣話通頂就通頂咁捱得。我只希望我個轆，甩埋下個禮拜好啦。再甩耐d，我怕且會頂唔順。

祝大家有個愉快既週末。

*****

噢by the way，你地有冇人睇左《赤壁》？

CK係三國迷，所以甩緊轆都走左去睇左夜場。想提提未睇既朋友，呢套成兩粒半鐘既赤壁呢，原來只係上集。睇完兩粒幾鐘，你都仲係未會有機會睇到果場赤壁之戰開波互片既。呢樣野，好似同場既觀眾都唔多expect咁喎，所以完場果陣，都隱約聽到d爆粗聲。

咁撇除呢個失驚無神完鬼左場叫你遲下再俾過錢佢下回分解既安排，搞到有d好似俾人呃既感覺之外呢，overall我覺得，都幾好睇丫。

至於呢個失驚無神出字幕完場話下回分解呢個scene，唔知點解，我覺得，好似好懷舊咁囉。

hmmm…忽然諗起，N年前劉華套《五億探長雷洛傳》，咪又係咁囉。

嘿，玩懷舊。

work under pressure…

2008-07-09T02:07:00.001+08:00

你得唔得？

個個recruitment ad都硬係鍾意咁寫，真係呢…

好明顯，我就唔得囉，其實。

我。想。抖。

唉。

究竟我有幾叻

2008-07-05T18:29:00.008+08:00

買左蔡東豪寫既《金錢之王2》成個禮拜，今朝先終於開始睇。

書裡面第一個訪問既Ｍoney Ｍaster係前怡富基金經理鍾民穎，一個原本響大型基金公司工作，高薪厚祿，兩年前毅然放棄做打工皇帝，自己出黎創業，開設自己既對沖基金公司。書裡面提到點解佢會有咁既選擇時，佢係咁講既：「在大公司工作，尤其是在一間實力雄厚、管理出色的好公司工作，我反而不時質疑自己，這是屬於我的成績，抑或是因為有整間公司作後盾才得出的成績？我的功勞究竟有多少？大市好，所有人都好，究竟我有幾叻？」

如果你覺得，自己都係屬於人工高收入好既打工仔，你會唔會有時都諗下，其實，究竟我有幾叻？

*****

某天同朋友吹水，講開佢細佬份工。

朋友係個engine人，而佢細佬從事金融業，係個剛畢業不久既社會新鮮人。

朋友感嘆話，自己比細佬早六、七年出道，點知細佬一畢業既第一份工，份糧，仲高過佢捱左六年之後既薪水，都仲未計年尾果份花紅。

大家都係大學畢業，投身既行業不同，收入就有所不同。

朋友同細佬感情好，所以細佬搵到份人工高既工作，佢都戥細佬開心。只不過，自己多少有d不是味兒啦。

「唉，三姑六婆既眼中，細佬人工咁好，我就做左咁多年，人工仲少過佢，人地梗係覺得細佬叻仔過我好多啦。」

事實，又係咪咁？

*****

份人工有幾大份，我覺得係反映左，你所持有既知識同技能，響勞工市場上既一種供求關係。係，主要係供求既關係，而唔係三姑六婆口中既「有幾叻仔」。一個識得股票投資分析既人，係咪一定叻仔過一個工程師？人工高低就係分別叻唔叻仔既指標？我唔覺得係。而事實上，邊個叻d，冇得比較既。大家基本上響唔同範疇裡面，好似你要夾硬問，藍球員Ａ好波d，抑或足球員Ｂ好波d，點比較呢？

身處高薪行業，收取高薪厚祿既打工仔，陶醉響自己相信自己已經係「叻仔過人」及「社會精英」既迷霧之中，其實又會有幾多人會回頭諗一諗，究竟自己真係有幾叻？

高薪，等唔等於你叻過人？叻既，係你自己，抑或同你一齊拼既團隊，又抑或好似鍾民穎所講，當大市好，所有人都好？

*****

我喜歡創業帶俾我果種自我肯定既感覺。

創業係一個由零開始既經驗。過程裡面，佢唔會令你覺得自己好叻，反而佢會不斷話你聽，你其實真係好水皮，好多野都唔掂。

但係呢個過程，帶俾你關於自己能力既影像，感覺卻係好紮實，好實在。過程話俾我聽我有幾多料，我就好實在地相信我有幾多料，而有d範疇我有幾唔掂，我亦唔會懷疑個影像既真實性。

以前打工既時候，每次成功又或者失敗，我都總係對自己有d懷疑，掂左，到抵有幾多係自己功勞呀？衰左，又查實關唔關自己事先？

我反而覺得，一個人自信既來源，唔係因為自己認為自己叻，而係關乎自己對自己既了解有幾深。

當我覺得我比你更加清楚我自己果陣，你，就動搖唔到我囉。

自我審查

2008-07-04T16:57:00.002+08:00

我成日話自己係經濟動物，銅臭既商人。對政治，一d興趣都冇。

頭果兩句係真心話，後面果兩句，係謊言。

AM730既同事係一班好好既人，由佢地年幾前搵我寫專欄開始，佢地從來都冇限制過我寫任何題材，亦從冇俾過丁點兒既壓力我。不過有關政治related既topic，我係自己選擇隻字不提。

一來報紙裡面有李慧玲又有施老闆，仲有其他一眾有料之人，響佢地面前我無謂班門弄斧啦，我覺得自己唔夠班寫。二來呢，我係冇膽寫囉，怕有千萬份之一既機會連累家人，又或者自己既生意。

CK老豆係果d幾十年前響國內搏左條命「游水」游落黎香港既人，年幾之前當佢知道我呢個好日都唔寫兩隻字既敗家仔，居然搵左份兼職寫報紙專欄既時候，就千叮萬囑同我講，就算幾手痕，幾想寫，政治相關既題材，千祈千祈唔好掂。即使千萬份之一既機會，拿，如果真係萬一起上黎，就…嘿。

我冇捱過佢受過既野，明既。

不論響報紙、雜誌，甚至係私人網誌，不管係親政府抑或反建制，我都尊敬各位依然勇敢發表自己真心既政治立場既人，你地比我有勇氣得多。事實上，你地亦令我覺得有d慚愧，唉。

祝大家有個愉快、平安既週末。

堅持。本末。

2008-07-03T17:37:00.004+08:00

堅持

講開《向世界出發》，尋晚個show有一幕，我覺得幾感動。

我架低清電視既畫面，播住果位八十幾歲既阿伯，踩住架三輪車去接佢果位七十幾歲既老婆。據節目主持人所講，阿伯過去幾十年，都不斷重覆去做呢一件事，風雨不改。

金童玉女靚仔靚女熱戀既畫面固然係令人賞心悅目，不過我覺得，老伯伯加老婆婆，七八十歲人仲可以拖住手行既畫面，就更加令我覺得感動囉。

感動既位係，阿伯同阿婆對大家感情果份堅持。結婚既時候，大家既外表都接近人生既高峰，兼且有大量既激情幫婚姻吶喊助威，開初果幾年，要恩恩愛愛，有幾難？不過幾十年呀大佬，當男既唔再型女既唔再索，大家對彼此感情果份堅持，先至係最難能可貴。

堅持到最後，你肯唔肯？

*****

本末

朝早返到公司，一班女同事居然又響度講緊尋晚電視裡面呢個scene。

有女同事話好感動，不過又有另一個同事咁講喎：「唉，假架啦分明。肯定係無線做出黎架啦呢個scene，個節目要賺人熱淚嘛！」

我沖緊咖啡，冇搭咀，不過諗真d，同事既推斷，都唔係唔可能丫。

「呢個世界邊有咁既男人架，我就唔信有男人會咁多年都肯對老婆咁好啦。唉，總之果幕，好假好假呀。」

拿，我呢查實都唔排除果一幕，真係電視台刻意安排去賺人熱淚既（起碼賺左Stephy同我d熱淚丫…），不過同事話，唔信呢個世界有男人肯咁對自己老婆，我就覺得佢咁諗，灰一d啦掛。

世界冇咁差既我覺得，好男人好女人或者數量唔多，但係，我覺得總係未絕種既。

我繼續沖我杯咖啡，繼續都係冇搭嗲。心裡面暗暗替呢個同事擔心。

兩個月後，呢個同事就會出嫁啦。

你既準老公，究竟係個點既人，會令你對男人咁冇信心？又，既然對男人咁冇信心，點解仲選擇嫁佢？

諷刺既係，佢對佢既婚禮，似乎，好緊張下咁。我有時覺得現代人變得好奇怪，當大家都對婚姻越黎越冇信心，甚至係越黎越唔尊重既時候，佢地反而對個婚禮，卻顯得越黎越認真同有要求。

婚姻係一生人既事，婚禮就只係一晚既節目，究竟有幾多人，其實係本末倒置左而不自知？

抗衰老

2008-07-02T12:38:00.003+08:00

頭兩個禮拜既《向世界出發》，主角分別係周海媚同趙雅芝。

咁，呢兩個主角，印像中年紀其實都已經唔細架啦。不過我覺得佢地都有一個共通點，就係望落去，感覺比佢地真實既年齡細好多。CK媽果日同我講：「嘩，呢兩個藝人，保養得真係好！」

我唔知關唔關我屋企仲係處於「低清」年代既關係，所以透過個電視螢光幕，唔係睇得太清楚佢地有幾多皺紋又或者係老人班，所以我覺得佢地感覺仲幾後生。有d周刊雜誌好鍾意zoom個close up埋去搵藝人d皺紋色班之類既野出黎，搵到之後加句：「oh，阿邊個邊個，未老先衰呀」之類咁既caption。

皮膚滑d，少d皺紋，無疑又會俾人覺得靚d後生d既。如果唔係，d護膚品又點會咁好賣？不過我覺得，真正令人望上去，覺得一個女人「老」，其實係佢既神態，多過佢d皮膚囉。有d女人，年紀其實唔細，但係佢地總會不自覺咁流露一d少女既神情，又或者係一d仲係比較天真既笑容咁。係呀，呢d神態表情同笑容，係好自然咁流露出黎，就算你幾好演技，都扮唔到出黎既（唉，夾硬去扮既人都有，不過，好嘔心下既。呢d野，越扮就越弄巧反拙…）。呢d女人，縱使佢地既皮膚同樣係抵受唔住地心吸力既催殘，多年來果d紫外線UVA同UVB響佢地既面上烙下左唔少印記，又即使佢地冇乜用過咩神仙水之類既東西，佢地俾人既感覺，依然會係後生年青囉。

反而我有時睇雜誌，佢地講話阿邊個邊個保養得好好呀，close up埋去睇d皮膚，幾十歲人仲一組白滑咁款咁。部份所謂保養好既artist，一眼望落去，皮膚係好靚啦，不過個感覺，我反而覺得好老好老囉。

我覺得，應該係神態同氣質累事囉。

Oh，其實我私人認為，鐘意笑既人，感覺係冇咁易老既。

Wow

2008-07-01T02:16:00.007+08:00

最近開始有同事話我，我所諗既生意idea越黎越走火入魔，天馬行空得越黎越過份。

事實上，佢地的確講得冇錯。

我記得最初做生意果陣呢，個膽好細既。因為手上既資金實在太少，容唔下蝕多一分一毫，所以成個business既model同意念，都係抄抄襲襲，總之行家點做，我就跟住點做。錢唔求賺得多，只但求檔生意可以生存落黎。

之不過，我跟住行家咁做，我發覺做到既生意，幾乎全部都係行家做唔晒漏出黎，又或者連d行家都唔願接既客仔。單靠呢班「賣剩遮」客戶，長遠要生存落去，跟本係唔可能。而且當經濟環境一轉差既時候，我就連呢班人地漏出黎既客都冇得食，到時檔生意，唔摺至奇。

事實上，你同行家做既野一模一樣，你既行家經驗多過你，商譽又好過你，賣一模一樣既野，人地點解要幫襯你？

我係一個冇膽鬼，好多野唔逼到冇路走，都唔願意去變。不過有時呢d逼虎跳牆既機遇，好多時又真係幫到手。正如因為檔生意真係就快維唔到皮啦，跟住我先「逼住」去諗野變。又因為唔變就死硬，兼且自知再係咁真係唔挨得幾耐，所以我諗，呢一鋪，要變得狠，一變，就要掂，仲要響好短時間之內就要令顧客Wow一聲，拿拿臨轉軑去幫襯你。

就係咁，就做左入行之後第一次既「創新」，創左樣當時全行都未做過既野出黎，希望當客人見到既時候，會不其然發出Wow一聲，從心裡欣賞經營者既創意同誠意，然之後乖乖科水幫襯。

就係因為果一次，練大左個膽。每次「創新」其實都係賭博，因為話明係創新，新既野，冇track record可言，創完分分鐘個market唔受，萬一創新既過程當中，資金控制得唔好，可以蝕到你連阿媽都唔認得。不過，要客人俾錢你駛，同埋將來繼續不停咁俾錢你駛，唔時不時就俾d新野佢地睇下又點掂呢？

試過些少「得左」既經驗，加上累積多左資金，個膽，開始有d生毛啦。總之時不時，拍擋同我就會諗d天馬行空又九唔搭八既idea出黎試試，有時真係會嚇親伙計。伙計們成日話我地傻傻地，得閒得滯冇野做搵事做。我地其實亦知道唔係個個idea都一定work，不過我地好清楚，如果要檔生意要繼續發展同生存既話，就必須要繼續帶更多既驚喜俾d客人同個market。因為我好相信，當客人響"Wow"完之後，就係乖乖科水俾你既時候。

或者學似同事們話齋，我真係已經走火入魔都未定lu，哈哈。

沉著。應戰

2008-06-27T17:50:00.003+08:00

大舊呢個細路仔，我其實幾喜歡佢既。

佢說話唔多，亦唔係d好鍾意出風頭同爭取大人attention既小朋友。不過我一直以為佢唔係好聰明，但係自從果次既棋局之後，我就有唔同既睇法。

呢個o靚仔，小聰明或者欠奉，不過我覺得佢其實心地好，有網友話如果俾對手知道你係刻意讓佢，個對手即使冇輸到，個感覺其實仲侮辱。呢個我都唔否認，不過我以大舊得六歲既心智黎睇，佢應該唔識諗得咁遠。佢在乎既，係自己朋友既感受。刻意求和既做法到底是對抑或錯，我反而覺得未必係重點。重要既係，呢個小朋友決定做呢件事既意識，係希望大家和和氣氣開開心心。一個人去到有幾遠，聰明固然重要，不過更重要係，佢待人處事既意識。會將其他人既感受同反應，包括響自己處事方向既考慮之列既人，莫講話細路，今時今日，就算係大人都已經買少見少。以一個六歲o靚仔有呢個意識響腦袋入面，儘管佢未必好聰明又或者IQ好高，我依然睇好佢將來可以去得好遠好遠。

到佢年紀大d既時候，假如佢對其他人反應同感受既掌握更加有經驗、準確度更高的話呢…

嘿。

*****

沉著。應戰

呢一刻既CK，響談判桌上面，同對手拉鋸又拉鋸。

談判係心理戰，籌碼多少當然會影響你既勝算。不過你所表現出黎既信心同姿態，分分鐘會將成件事情扭轉。所以響對手面前既一言一行，都唔可以掉以輕心。

談判係一個大家估對方有幾多籌碼既過程，而通常最後既籌碼係，大不了，一拍兩散囉。

當然一拍兩散大家都唔想，但係你表現得對「一拍兩散」有幾唔介意幾冇所謂，就要睇你有幾好演技同膽色囉。

通常，邊個能夠更沉得住氣，將呢個角色演到最尾既，先至會贏。

冇耐性沉唔住氣唔夠淡定信心動搖，是但一樣，都可以輸死冇命陪。

有時，真係會精神分裂。

祝大家有個愉快既週末。

棋局

2008-06-25T01:41:00.003+08:00

我最近冇去板長壽司食過野，不過大概夏天黎到，食物都係比較容易變壞。早幾日唔知食錯d乜，痾嘔肚痛頭暈發燒乜鬼病徵都出齊，足足搞左幾日。

我同老婆講，九成九食物中毒啦我。

呢d時候，永遠都好脆異既。老婆同你同檯食飯。你食左乜佢又食左乜，咁又淨係你先有事？中乜鬼毒呀你？

痾到腳軟都唔係問題。更脆異既係，響你一日痾十九幾十次既日子，你住緊果棟大廈，話要維修咸水渠，要暫停供應廁所水。

人手倒夜香？ Nice。

*****

棋局

早排，親戚飯局，等開飯。

兩個表侄拎左盒中國象棋出黎玩。hmmm，兩個六歲0靚仔大對決，我又湊熱鬧去睇下佢地捉成點。

表侄B仔我一向知佢聰明，不嬲都話頭醒尾。佢既對手大舊，講醒目講頭腦，應該唔係B仔果皮。所以我地班大人暗地開左個盤口，個個都買呀B仔贏硬。

點知睇到咁上下，大家都發覺落錯注啦。大舊呢，以一個六歲0靚仔黎講，棋藝真係幾有章法。行每一步都有佢既用意，而且一d都唔衝動。相反平時響大人面前醒醒目目既B仔，d棋亂晒籠，而且仲好多時忍唔住衝動亂行。

大舊一步一步咁進逼，終於去到將軍，而且將到B仔冇棋。B仔勉強將隻「帥」移歪，正當大家都以為大舊會一野搵隻「車」食左佢之際，大舊居然冇咁做，仲行左隻九唔搭八既棋，睇到大家莫名其妙。

搞左一大輪，大舊主動提出，呢鋪棋不如當打和啦。B仔聽到，拿拿臨應承左，仲鬼死咁開心。

眾人散去之後，我坐左埋大舊身邊，靜雞雞問佢：「你頭先特登唔贏呀B仔架，係咪？」

大舊點了點頭，露出了一個細路仔獨有既天真笑容。

「點解呀？」我問。

「B仔如果輸左，佢會唔開心。」大舊答。

「咁你唔想贏咩？」我好奇又問。

大舊個樣好似傻下傻下咁，又露出佢果個招牌笑容，跟住拎左拎頭，就走開左去搵呀B仔玩。

我忽然諗，好多野，贏輸其實都唔係最重要，最緊要既係，個遊戲會繼續有人肯陪你玩。

至於真正既輸贏，邊個先係技高一籌，其實自己早就心裡有數。

贏在心還是贏出面，你會點樣選擇？

細路仔既兒童智慧，有時比機關算盡既成年人，有時，仲要勁。

隱藏

2008-06-18T17:17:00.004+08:00

冇膽同虛偽所衍生出黎既副產品，係將自己真實既感覺，隱藏再隱藏。呢樣野，我發覺在於我自己黎講，似乎越黎越嚴重。

之前寫過啦，隱藏既原因，係計算過之後既結果。出發點，多少係自私既。不過自私既出發點之外，又有好多時，因為怕影響到人而開始收埋。呢幾晚夜媽媽等開波既時候我無聊響度諗下呢個問題，又諗返下呢幾十年人自己點樣做，發覺呢個「隱藏自己」既特質，早響小朋友既時候，已經開始萌芽。

一直覺得冇乜問題，唔知點解，去到最近，總覺得好似唔係好妥。

好似有d「受夠啦，妖！」既感覺咁囉。

*****

我越黎越發覺，做生意其中一個最重要要學既野，係「等」。

財不入急門，你急都急唔黎。

有個deal趕住成交，你慌死怠慢客人，拿拿臨做完你手上既野準備交差，點知中間仲有唔知幾多個party去拖住個進度。到頭黎，你發覺心急既，原來得你自己一個。於是，乜都要hold住，只有乾等。

最唔高興既係，進度既快慢，根本完全唔響你掌握之中。

所以，要學識「等」。仲係要等得心平氣和，身心愉快果隻。

好明顯，我響呢方面，絕對係唔夠道行。

法國隊

2008-06-18T13:05:00.001+08:00

睇波捱到四點幾，睇住主將開波唔夠十分鐘傷出，轉個頭中堅唔生性紅牌罰埋出場兼輸埋個十二碼。大半場打少人一個，形勢差成咁，輸兩粒，輸得少啦。

我鍾意阿仙奴，因為阿仙奴我又鍾意埋亨利，因為亨利所以我都有少少鍾意法國隊。

咁，你或者會話佢地呢場唔好彩，屋漏兼逢夜雨所以慘遭淘汰。

冇運還冇運，最應該淘汰果個，我覺得應該係個教練。

揀人同佈陣，真係保守到頂唔順。

成晚睇到我粗口連篇。

忍耐和虛偽

2008-06-17T16:34:00.002+08:00

我係一個冇乜膽既人。

面對一d我好唔鍾意既人，好睇唔過眼既事，好多時我響面對面既時候，我都會選擇吞左啖氣落肚，唔會即場當面同你開片。我係生意人，好多野都慣性有一個計算響入面。同人開片會傷和氣，指明道姓去插人，人地反抗又finger pointing咁去插返你轉頭，到頭黎出唔到啖氣不特止，破壞左既關係分分鐘仲有手尾跟，計落點都係蝕。冇著數兼且有風險，當面開片呢d野，除非必要，否則我一般都冇乜膽做。

係呀，係冇乜膽做，唔係唔想做。

咁又通常遇到呢d人呢d事，頂得順的話我都仲會隔硬「必」個笑容出黎，當打個完場啦，你好我又好。我堅信山水有相逢，唔好咁多火氣，他朝好相見嘛。

反正呢d火氣，過一陣就通常都會消。發左出黎大家心入面多條刺。呢d刺，唔好彩既可以揹住一世唔走，一時間意氣之爭忍唔住發左老脾，咁就可能煩到自己一世，超唔抵。

所以冇膽之外，我仲相當虛偽。總之計過數，唔抵，就唔做囉。忍一時，風平浪靜呀。生意佬，好多都係咁。

*****

我唔鍾意鬧交。更加唔鍾意指明道姓咁鬧人。做完呢d野，永遠係鬧人同被鬧既都一齊唔舒服唔開心。

只不過我有時都會懷疑，將心入面既一d感受，不停咁去cover up，會唔會係一件好唔岩既事。

即是當遇到一d唔like既人與事，即時兜口兜面爆返句「仆你個X啦」舒一舒暢，會唔會就代表咁我係冇咁虛偽冇咁怕事？

我諗，唔係咁架下話。

係忍耐還是係虛偽，我覺得今時今日，界線其實幾模糊。

*****

多口一問，各位bloggers，你地寫野既時候，會唔會有時會有d「自我審查」？

坦白講，我查實有。(頂！)

乜都冇心機

2008-06-16T16:07:00.000+08:00

好啦，呢個Euro2008呢，俾佢玩死。

我以為，今屆冇英格蘭我會睇得冇咁投入。點知原來一鬼樣。

12點開波果場，睇完都已經要捱眼訓。敝在好睇d刺激d果場，永遠係開兩點九。完場既時候，開始聽到出面有雀叫。

以前d人話，逢親世界杯呀，歐洲杯呀果段時間，個股市都係靜到冇影，個個都冇心機做野。我越黎越相信呢d咁既講法。事實上，呢一排，真係乜都唔想做。包括寫野同返工。

今屆睇好邊隊呀你地？荷蘭好似好強，不過我總覺得咁早就show quali，好容易見光死。

聽日仲有兩點九場，法國大戰意大利。呢個時候，仲邊會有心機返工？

續我的經濟科問題

2008-06-12T12:04:00.002+08:00

就上次提出既問題呢，我又嘗試搵返最近幾個月既sales data睇睇，有以下咁既發現喎：

1) 最近幫襯我買貴貨既客仔，幾乎係清一係外資公司。以前我呢個sector既客人，外資同本地既機構，一半一半左右啦，中檔次既銷量呢，外資佔三成，本地既佔七成左右。不過最近呢幾個月，個pattern係，貴價貨幾乎全部由外資公司承接。
2) 本地機構響我公司既spending係明顯少左。買既數量冇乜變，不過買既檔次，最近係普遍低左。
3) 我嘗試同幾個幫襯我買左貴價貨既買家傾計，佢地話呢一年，總公司批既budget都鬆手左。所以買野，又可以買好d。學似有網友話齋，呢個係公司批落既budget，所以，用得就用埋佢。另一個客仔就同我講，公司今年加左香港區既budget，講真，其實個budget比所需要既多，不過你如果用唔晒既話，下次個budget就唔會批咁多俾你。咁，budget呢樣野，就算用黎擺，都好過用唔晒俾總公司cut返轉頭。
4) 另一個客仔同我講既解釋係，佢地今年多左人從北美地區調左去香港。呢班老外願意洗錢，所以買貨都買多左貴貨。低價既當然對佢地黎講係唔入流，中檔既佢地都睇唔上，唯獨係貴價野，佢地就覺得買得過。

咁，我又咁睇衣家既情況：

1) 假設我賣既產品，係真係反映呢d商業機構對經濟前景既睇法的話(其實我覺得我果行都算係架…)，即是話，表面上係，外資比本地機構對前景比較有信心。不過有一樣野我有d concern既係，外資公司客仔，公司規模比較大，佢地既budget同spending，應該唔係最近批出既。即是話，我呢行高檔貨既「小陽春」，如果要同客人對前景信心掛勾去睇的話，應該係有一定程度上既滯後。亦即是話，佢地睇好前景既，可能其實已經係大半年前既事。

2) 本地既客仔，有唔少係中小企。物價上漲，人工租金開資都增加，令到佢地響其他地方既spending，被逼要減，於是買開中檔貨既客仔，要轉買低檔次既。中小企既planning同budgeting，冇大機構做得咁長遠，對前景既睇法同spending pattern，時間既滯後並唔多，即是話，呢一個spending pattern，好可能係反映左佢地呢一刻對短期未來既憂慮。

3) 外資客仔話，總公司派多左人黎香港做野。我忽然諗，北美同歐洲既經濟呢期都唔係好掂，亞洲區相對之下係呢d跨國公司賺錢較多既地方。咁，send呢班老外黎香港，出香港既糧instead of外國既糧，係代表佢地真係睇好香港，抑或屬粹係冇辦法之中既辦法，將多餘既資源送去d仲叫做賺緊錢既地方去消耗？

4) 仲有一件事，我覺得有d奇怪既。CK公司樓上有個單位，遲遲都租唔出。最近業主居然主動搵我，同我傾寫字樓續約問題，又問我有冇興趣擴充，要埋樓上果層個單位。我心諗，我個單位，都仲有成年先到期喎，早幾年，只有我求d業主同我續租，業主從來都唔會主動搵我。

又講時講，對面海機鐵站上蓋ICC，幾間投資銀行都準備由中環搬過去。冇左幾間ibank坐鎮，中環閒閒地吉左幾十萬呎寫字樓出黎，幾十萬呎，炒到過百蚊一呎租既寫字樓，我其實有d懷疑，係咪真係會有咁多公司有能力承接。

都仲未計太古坊附近果棟One Island East都係差唔多時間落成。中環區既office，真係仲會繼續租得咁貴？

抑或學似我果位客仔講，外資越黎越派得多人黎香港(或者亞洲區啦)，外資響呢區既business會越擴越大，所以d貴租既office space，多多都唔怕冇人要？

點都唔落

2008-06-09T22:29:00.002+08:00

呢排睇電視，睇到泳兒果個扮跳傘員既快餐店廣告。個廣告係sell佢地其中一條Line，講明呢條Line既食物，係「點都唔落」味精。

廣告所sell既野，正計係食正家陣既城市人，追求食得健康呢樣野。只不過，唔知係咪我敏感呢，我睇完呢個TV Ad之後，第一個反應係：「哦？乜淨係得呢條Line唔落唔精？其他既Line全部都落？」咁衣家先開始話死都唔落味精，咁以前食落果d呢？

快餐店，例如M記好多廣告，都係一水一水咁出，即是出完呢期將軍漢堡，轉頭又會唔見左呢款包，再推第二款主打食物。今次呢個「唔落味精」既series，俾左我一個感覺係，「唔落味精」同之前一水一水既綽頭食物一樣，都係推完一排，就會「退役」。不過問題我覺得係，「唔落味精」正計好似唔應該係綽頭，而係現今鼓吹食物健康既「基本」。或者我諗得太多啦，不過，今次快餐店呢個宣傳廣告，其實係反而令我對果間快餐店，扣多左分添。

*****

我鍾意睇《同事三分親》。雖然有時故事只係創作出黎，不過我覺得，好多時同現實都有好多相似既地方。

hmmm，例如，好似奸國舊，阿大企問黃國立咁。

現實中係咪真係咁小人咁白鴿眼呢，我又唔敢講，不過，一間公司裡面，需要返一個咁既「奸角」，我其實又覺得係喎。

例如，管理層需要一個箭靶去幫手擋一擋，基層員工又需要一個情感上既出氣袋，又有時有d表面上好似無無謂謂冇料到既「半高層」，終日無所事事白逗公司人工，但其實卻不知不覺響人事上為公司唔同派別既人作出左平衡。

舉個最簡單既例，一個「半高層」出黎能夠成為同事間既公敵，下屬既「團結」，就有望囉。

曾經聽過有朋友係被某機構請去全職做「衰人」，仲係要有咁衰得咁衰，為既，係要為公司某個部門帶黎一d徹底既改變。你以為睇戲先有？有時又真係戲如人生。

*****

小一派位結果出左。電視新聞記者訪問其中一位小妹妹。

小妹妹話：「好開心，可以入到一間好學校，唔駛讀d垃圾學校！」

嘩，我心諗，小妹妹真係知咩叫做垃圾學校？唔知佢既父母，用咩標準去解釋呢個term俾個女聽呢？

又如果，他日俾呢個小妹妹，識到另一個小朋友，係就讀佢口裡面講果d「垃圾學校」的話，佢會點樣睇呢個朋友仔？

睇完新聞裡面既呢個畫面，硬係覺得，好似唔係好妥咁喎。

我的經濟科問題

2008-06-07T19:09:00.001+08:00

我公司其中一條售賣既product line，對像主要係商業客戶。客仔由細細間既中小企，以致上市既跨國機構，都係我potential既client。呢一條product line，我覺得有些少特別，佢過往既銷售情況，我覺得好多時都好反映市場上面既信心。

例如零三年沙士之後，呢條line之中最低檔次既產品，曾經係非常好賣。直至後來經濟慢慢好轉，客人既購買pattern，就慢慢移上去中檔次同高檔次既product果度。我design呢條line既時候，中檔產品應該係最value for money既。除左沙士之後果段信心低迷既時段，低檔產品曾一度超越中檔產品既銷售量之外，呢條line裡面，中檔既產品一直係我公司既cash cow，帶俾我最多既利潤。

上年開始，情況又開始改變。我諗應該係經濟好，市場信心亦其佳，高檔次既產品銷量越黎越好，中檔既呢，hmmm，由於係最value for money，所以銷量依舊保持，而低檔次果堆product呢，大概係大家都搵到錢，有得揀，大家都唔揀d最cheap既野買，所以銷貨量，幾乎係四年黎既新低。

去到今年既農曆新年之後，出現左個現象，我自已唔係好搞得清既。

呢條product line裡面，最high end既product，賣到斷晒市。呢個high end product既利潤，係眾product之冠，我見到呢期佢咁好賣，甚至供不應求，我當然happy。不過，同時我覺得奇怪既係，最low end果隻產品，居然響呢幾個月同時銷量大增。

至於我一直認為最value for money，過去幾年都係我公司既cash cow既中檔產品，自今年年頭開始，銷量一直插水。銷量之差令我感到極到奇怪。我同幾個行家傾過，似乎佢地都遇到類似既情形。

因為margin最高既貴價貨賣得出奇地好，所以拉均黎計，最近既利潤其實係算係相當滿意既。各位行家面對最近呢個市，情緒上都係輕鬆愉快既。不過呢條line既客人主要係商業客戶，銷售既pattern有咁既轉變，我多少覺得，應該響未來經濟既cycle之上，係有些少meaning既。

不過，我自己又唔多諗得通。

簡單地咁去理解，貴價貨銷量向上，代表市場信心好。當消費者放棄貴價貨而選擇劣質平價貨既時候，又多少代表市場既信心唔足夠。咁衣家係，最貴同最平既product，銷量同時向上，反而中檔貨銷情大跌，其實又係咪有d咩啟示？

有冇人有高見？

摺扑

2008-06-04T15:59:00.006+08:00

尋晚又失眠，我如常咁週圍去睇各位blog友有冇新post，去到其中一個睇開既blog時，發覺，oh shit，入唔到去。

拿拿臨send左個email去問扑主搞乜鬼，係咪唔再歡迎我去睇啦？今朝收到佢既回覆證實，原來冇估錯，個扑，真係摺左。

唉，又一個。

*****

今年有好幾個我成日睇既扑，都先後摺左啦。原因可能個個唔同，有人可能怕身份暴光，有人可能因為見到一d刺眼既留言而感到洩氣，又有人因為現實身活同網上世界聯系太過密切而感到不安，亦有人寫到悶，意興欄柵。早排睇過有博客話，每個話唔寫，話封扑既blogger，最終都係會寫返。大家都係姣婆唔守得寡。唔寫呢回事，以前我都試過，最後我又係抵唔住頸出返黎再寫，算係應驗左果位搏客既見解同預言。我當然希望呢個博客既預言係會繼續實現落去，遲下，會見到呢班摺扑既blogger走返晒出黎。

我既扑，唔覺唔覺寫左兩年幾啦，唔知呢，總覺得衣家寫既感覺，同最初有些少唔同。至於果種唔同我又講唔出exactly係d乜。穿戴提到寫文章時候既避忌，怕為一些人帶來不便既感覺，事實上我係有唔少既共鳴。最近我開始有少少預感覺得，果個「所有摺扑既博客最終都會寫返」既預言，日後既靈驗度可能會有所下降。

*****

一直以黎，比較少朋友會選擇響留言裡面鬧我。我諗人呢，大部份都唔會太過喜歡俾人鬧既。

不過唔喜歡歸唔喜歡，我有時覺得，耐不時有返一個半個比較腰心腰肺既留言，都未必唔好丫。用「反省」呢個詞語去形容，或者太過誇張一d。不過一個俾人鬧既留言，不管係善意抑或惡意，多少都係一個幾唔錯既警號，提醒你係時候review一下最近自己所寫既野，自己既思維同埋價值觀，係咪唔覺唔覺咁走埋左一邊，甚至跌左落個死角果度，以致引起讀者同網友不安。

我諗，最近我既負能量應該係釋放得太多啦。

要諗辦法調整一下啦，我諗。

*****

仲有仲有。

今日，係六月四號。

記得嗎？

有關炫燿

2008-06-03T17:24:00.006+08:00

或者講到尾都係，吃不到既葡萄永遠都係比較酸既。不得不承認，我對於喜歡炫耀財富既人，都係有d反感。

我更加唔鍾意，有d人因為財富既差距，而衍生出黎果種階級觀念。認為自己因為有錢過你，所以比你「高級」。我絕對唔會因為一個人財富少而睇佢唔起，反而最令我睇唔起既人，係果d會因為人地窮，又或者人地際遇唔好，就會輕易睇人唔起，覺得自己高人一等果班友仔。我未出黎做野之前，以為三色台電視劇描寫呢d人，特別講得誇張丫。原來現實社會，真係好多咁既人，個程度，俾電視劇裡面仲誇。

唔知係咪我錯覺/偏見？呢幾年當香港迅速金融化之後，好似情況仲嚴重過以前。

之前聽過有朋友想同拍拖多年既女朋友拉埋，點知人地外家開左個嚇壞人既禮金數字出黎。男仔冇能力俾，女方家長極度睇佢唔起，又話佢冇出色，又話佢襯自己個女唔起芸芸。搞左一大餐，終於搞到個女到今日都未嫁得出。

個男仔，我覺得都ok架，唔係搵得特別多，不過都踏踏實實丫。男仔話：「有朝一日，你會後悔今日咁樣對過我…」果把火，我feel得到。我諗，佢應該會好努力咁向上爬，好努力咁工作。

個「你」，當然係講女朋友既屋企人啦。唉，咩年代呀大佬，今時今日，都仲有d咁既故仔。

*****

另一個朋友問我，你既伙計有錢抑或冇錢，對我點樣對待佢地，有冇分別。

我話：「冇喎，點解咁問？」

朋友話，響佢公司，一個有錢既staff，同一個冇錢既staff，上司對佢地係有幾明顯既分別既。

原因係咁既。屋企有錢果個呢，因為份工唔係bread and butter，所以受氣既能力比較低，鬧得太過份呢，真係同你玩劈砲唔撈。劈砲唔撈大家都冇好處，所以上司鬧起上黎，都會比較就住。不過屋企環境唔好果d staff呢，份工係bread and butter，所以點鬧，鬧到隻狗咁，都要死死地氣留響度做。佢上司就係睇中呢樣野，所以對住d家境冇咁好既staff呢，就…

我話，咁你上司，心地唔好喎。邊有得咁架。

朋友話：「所以你真有錢又好，假有錢又好，有得炫耀，就要晒下囉。如果唔係，俾班現實既老細恰死都似。」

我有d不以為然，亦都唔敢肯定呢個講法適唔適用於大部份既老闆/上司身上。不過香港地有個別心地唔好既而又白鴿眼上司會係咁，我都信既。

你一定以為，我呢個朋友，咁唔妥佢老細對「有錢下屬」同「冇錢下屬」既分別，佢一定係佢上司厚此薄彼下既受害者？咁又錯啦。佢呢，其實係屋企有錢果個，不過，既得利益者都feel到個分別，我覺得，佢老細d戲，都幾屎。

*****

我好唔鍾意人炫燿，但係，又好怕自己唔覺意會炫燿而不自知。

我相信，呢樣野，係確實存在既。

即是有人會覺得我比佢有錢，而我又會覺得有好多人比我有更多財富。

有時我又會覺得，喜歡炫耀既人，好多。多到即使你冇心炫燿，其他人聽響耳裡，都會懷疑：「咦？你係咪想show野呀？」

所以，說話又會變得小心一d。

我覺得，將自己既成就講俾人聽，某程度上動機係想同人分享快樂。例如有一日我傾成一單大生意，我會好開心咁走去同stephy講，動機應該係搵人分享快樂囉。我諗，唔會有人覺得，我係特登響老婆面前炫燿d乜掛。

咁乜野構成炫燿呢？我諗，當你表面上係同人「分享」緊你既快樂，但心裡面既動機係，希望透過呢個表面既分享，而去話俾人聽，我「高你一班」，用你擁有既野，響階級既scale度對號入座既話，咁就應該算係炫耀囉。

係係，我知，講到好鬼亂丫嘛。

查實我自己都唔係好搞得清楚。

平民高爾夫

2008-06-03T11:59:00.003+08:00

Golf呢，曾經都係我一個非常喜歡既運動黎既。

我打得唔叻，不過以前響番鬼佬地方讀書既時候，呢個係一個好平既大眾運動。睇場戲食餐飯既價錢可以俾你消磨大半日既時間。其實打波都係其次，呢個運動最開心既地方，係俾左個機會你，同幾個好朋友，響個綠草如茵既環境，一齊行下吹下水。果種relax既感覺先至係主菜。贏同輸，關個牙較事既遮，其實有乜所謂。

咁，返到黎香港之後，冇再打啦。我套廉價golf set，亦早就擺左入去迷你倉裡面封塵。一來冇乜時間玩啦，二來，返黎之後，總覺得呢度既人對呢個遊戲既態度，有d唔同囉。

最近有幾個舊同學，都話要走去學golf。我記得以前呢幾個同學仔，我成日同佢講話打golf過癮喎，不如一齊玩丫，佢地打死都唔肯黎join，成日話呢d運動悶爆喎。咁，我問佢地衣家做乜要學呢？佢地話，冇辦法，工作需要呀喎。唔學，同班有錢佬客仔少左個話題，分分鐘搞到少單生意咁話喎。

另外一個朋友有個同事，成日都響公司週圍同人講，唔知邊間邊間私人銀行既event，請左佢同佢老公去邊度打golf，響個golf場度，又俾佢撞到邊個邊個名人。然之後就話，阿邊個邊個名人d波，好屎呀，我老公都贏佢唔知幾多桿咁呀…呢類咁既閒話家常，佢班同事幾乎個個禮拜都聽。聽到有d…呵欠。

幾年前，九龍機鐵站隔離開左個driving range，曾經都牽起過一陣香港人走去學打golf既熱朝。果時我記得有宣傳話，打golf再唔係有錢佬專有既運動。我當時其實好認同架，事關以前響外國讀書果陣，打golf，我覺得真係絕對唔係咩有錢佬玩意。跟住你響後面tee off果個阿伯，分分鐘都可以係拎緊綜援。只不過返到黎香港，情形就好似唔係咁囉。即使大家不停響度講，呢個唔係咩有錢佬專有既活動時，硬係好多人心裡面，呢種運動對佢地既吸引力，都落左響呢個活動「曾經」係有錢人同blue blood專享既玩意既呢個特性果度，你玩既時候，除左享受運動本身既樂趣之外，仲多少享受緊一種高人一等既虛榮感…雖然可能只係你自己以為。

咁樣，個遊戲就變得唔好玩囉我覺得。

我套golf set，我諗應該都仲有排會擺響迷你倉入面封塵。

那一些男孩子

2008-05-30T13:20:00.003+08:00

早陣子有個以前追過我老婆既男仔，約左stephy出黎食飯聚聚舊。晚飯後，老婆返到屋企之後同我講：「hmmm，阿Andrew呢，大個仔晒啦。今次見佢真係同以前唔同晒，成熟左同承擔左好多。」

Andrew嘛，我諗一諗先，讀大學果陣追我老婆果個，我記得佢。幾高大靚仔架，老老實實，當年我都有些少心驚驚會俾佢追左個女朋友去架。不過印像中，呢個Andrew成日大唔透，兼且恃住靚仔成日口花花，老婆當日冇落佢答，多少都有d原因。

由拍拖到結婚，同老婆一齊好多年，由於時間長，所以都「認識」左唔少當年老婆響唔同「年代」既追求者。呢一班當年既「情敵」，無可否認，係曾經俾過一d幾高質素既挑戰我既。最初我都好唔鍾意呢班同我爭女既男仔既，覺得佢地好鬼煩好鬼阻頭阻勢。唉，你知啦，細路仔，係咁諗野架啦。

後來年紀大左，同stephy既關係亦都慢慢穩固起黎之後，反而慢慢體會到，假如stephy真係揀人唔揀我既話，查實勉強死纏留住個女友響身邊都冇乜意思呢個道理。有左呢個體會之後，我對呢班情敵既感覺，反而有左好大既改變。

我有時諗，你同我鍾意埋同一個女仔，證明你有眼光，識貨丫。有時面對佢地既「叉輪廚」，反而有少少「識英雄重英雄」同埋「惺惺相識」既feel添。係咪有d變態？

咁，家陣去到呢個年紀，我同呢d男仔，都大個仔晒啦。我已經結左婚，佢地響「challenge」失敗之後亦好多搵到自己既另一半。當日恃住靚仔花花fit fit既後生仔，今日都變成有承擔既有能力而且成熟穩重既大男人。而當中幾個，後來居然會同我成為左朋友，得閒仲會約埋出黎飲返餐茶，吹吹水，感覺都幾得意。

呢d朋友仔，同我既連繫，都只係因為某年某月因為某個女孩子而起。有d野，果真係估唔到既。

年青呢，總係讓人懷念。

(好鍾意呢首歌既歌詞呀真係…)

祝大家有個愉快既週末。

邊行壓力最大？

2008-05-29T18:11:00.004+08:00

如果我問呢個問題，你會點答？

金融業？ibank出名壓力大，個個都話做ibank好tough，咁係咪佢壓力最大？

做Audit?聽過唔少做audit既朋友講，deadline之前幾日幾夜留響公司不眠不休，工時之長直頭係收買人命，咁係咪佢壓力最大？

抑或做醫生壓力最大呀？工時長不特止，仲要日日面對人命攸關既決定，有咩疫症發生果陣，做前線既分分鐘連條命都冇埋，壓力最大仲唔係佢？

唉，唔爭在講埋我呢d中小企老闆啦。工時compare樓上果幾個職業，應該係最短最嘆架啦，不過自己將自己副身家押注左落去盤生意上面，一個唔好彩做錯左咩商業決定，分分鐘傾家蕩產，仲要禍及妻兒。咁，最大壓力果個，仲唔係我？

oh well，講左咁多廢話，我只係想講，行行都大壓力架啦。唔好成日覺得，自己做緊果份工，所身處既行業，永遠係toughest on earth，人地做緊果d工，就一定比自己輕鬆自在。要大壓力，即使係個家庭主婦都好，一個唔好彩遇著個麻煩奄尖既老公再加個教極唔聽既奀皮仔仔的話，壓力一樣可以大到嚇死人呀。

我好怕有d人，成日去remind住自己有幾辛苦，有幾慘，又或者不停remind自己「我比你地辛苦」。更加唔喜歡d人要將呢種壓力同辛苦，當成一個籍口，去讓自己放肆起黎。壓力唔係你隨便亂鬧下屬既籍口，唔係你亂鬧老婆既理由。呢個唔係因果關係黎既，壓力大唔係大晒，要全世界都要遷就你。呢個擋箭牌，留俾d弱者用啦。

朋友話，佢公司，個個都壓力太大啦，搞到個個都失晒控咁。響佢公司，發狂鬧人既文化，已經成為風氣。一層層向下咁鬧，鬧到最低果層，就最慘囉，因為已經無處比佢再發洩，上頭鬧你又唔敢反抗。朋友覺得，呢個係壓力做成既問題。我又唔係咁睇。最低果一層既staff，點解可以忍到唔再發脾氣呢？係咪因為佢地壓力唔大呢？我又唔覺，唔發老脾既原因，係因為唔敢囉，飯碗攸關嘛。所以壓力唔係令你放肆鬧人同唔尊重人既真正理由囉我覺得。真正既reason，係階級既分別囉，唉。

除左因為最討厭既階級觀念之外，當然，佢地響管理上，應該係千蒼百孔啦。

打份工遮

2008-05-28T17:31:00.005+08:00

我成日響度諗，好多爬到去middle management，公司裡面有三五七個下屬跟住自己做野既人，究竟點睇自己既工作？

佢地到底會唔會覺得，佢地係需要「管理」好自己既下屬，自己果條team，而唔係淨係做完上頭交落既工作咁簡單架呢？

或者我係有d偏見啦。我總係覺得，香港地好多既middle management，呢一方面既意識好鬼弱。對佢地黎講，佢地既下屬，係工人，係機器。只係幫佢地完成老闆交俾佢既工作既機械人。

管理？管咩理呀？團隊精神？廢話啦，d野叫你做就做啦。做得唔開心？咪唔x好做囉，炒左你，大把人做。反正你份糧又唔係我出。

*****

當然唔係話個個都係咁既，只不過，公司裡面既middle management，上頭會俾好多task佢地去finish。咁佢地變得task oriented，好理所當然既。至於個task點樣完成，中間果層唔會好理既，最緊要係完成到，交到貨俾樓上班大佬。當然樓上班大佬，亦唔會好理樓下果個中層，用咩方法去完成任務。反正完成左，其他野，出事先算啦。

不過響完成一個task既過程裡面，就係好多中層既management，管理意識太弱，搞到種下左好多禍根。又當有問題出現既時候，呢d禍根就會浮現出黎，搞到一鑊泡收場。跟住個故仔係，求其搵個好蝦但係又可能唔係好關事既人揹鬼左隻黑鑊佢，於是case closed，但問題依舊。

到下一round又爆鑊果陣，個cycle，又重複一次。

*****

唔知呢，見到呢d咁既事情，睇響我眼裡面，心裡面總係有一陣鬱悶。

你可能話，打份工遮，搞掂交貨俾老細，task done，仲想點？

唔知係咪我要求高？我硬係覺得，有班下屬響你下面，你就有責任好好地維持好呢一個團隊。團隊既效率，人手既穩定，團員之間既teamwork，以致下屬響能力上既growth，佢地日常既工作情緒同士氣，通通都應該關你事。管理唔係下下要有一萬幾千人俾你管，先叫做management。就算得三幾個人，你一樣要去用心manage。當你升到咁上下高，人工又有返咁上下大份果陣，你對自己既要求，麻煩都提高返d。

唔係一句task completed就夠囉。

呢班乜乜manager, VP物物, 咩咩director, 又或者head of 唔知咩部門 etc., 對自己要求高返d啦，好嘛？

你唔俾心機去做，做你班細既，好難捱架。

化妝

2008-05-27T12:39:00.002+08:00

印象中呢，黃子華響棟篤笑裡面好似講過句咁上下既說話：「如果你落左妝我都仲認得你既，咁果d叫做化妝。如果你落左妝我唔認得你既，果d，叫做喬裝。」

咁老實講，喬裝又好化妝又好，我自己反而覺得冇乜所謂。講到尾都係出黎既效果，最緊要靚就得啦。呢家野，正計都幾講功夫，都唔係話你肯去喬裝，就實喬得靚架。

我個人好膚淺下既，咁查實我係幾鍾意見到女仔化左妝個樣。唔係話唔化妝素顏個樣就必定唔好，只不過，我鍾意女仔化妝後，比較neat同埋精神既感覺。我公司班女同事，初初入黎做既時候都係小妹妹，牛記粒記再加個素顏返工。咁，as long as佢地唔係見客既staff，我又懶民主懶冇所謂咁由得佢地。之但係心裡面呢，其實總希望佢地執得四四正正，化返個妝，靚靚女女咁返工。

後來佢地慢慢大個女，有d又拍拖啦，咁，佢地開始會化下妝，著衫著得lady返d。呢個轉變，我睇在眼裡面，心諗：「唉，安落晒。」

係呀，大部份既女仔，我覺得都係化左妝就會靚(如果佢識化既話…)。所以呢，我係好讚成我既staff，化個靚妝返工。老老實實，佢地習慣左化妝返工之後，就連我自己，返工都覺得醒神d。試諗下，對一個男人黎講，如果成個office都係整整齊齊打扮入時既靚靚OL，compare with成個辦公室都係打扮烏烏weawea既素顏女同事，你既工作情緒，會有幾大既差別？

係，我都承認，呢方面，我係的確好膚淺既。

成日有d娛樂雜誌，好鬼鍾意影d女明星冇化妝個素顏殘樣，我總係覺得，唉，咪咁陰質啦。

人地花左心機裝扮個靚樣出黎咪幾好，多d靚野響條街度行黎行去，美化下個市容都好嘛。何必要下下挖人肉酸果面出黎呢。

咁，你今日有冇化妝返工呀？