لمحات

بتعرف تدفش ؟

2012-05-31T01:00:00.001+03:00

ونحنا طالعين بهالطلعة ، هاد اللي كسر رجلو والتاني ما عاد فيو حيل وعالطريق لفوق وقع معنا ناس واضطرينا نحمل ناس تانيين ع كتافنا ونمشي فين .. وطالعين بهالطريق ..
وأخي بنشرت معنا هالعربية ! فينك تبكي أنو السيارة بنشرت ! إي فينك تبكي طول اليوم
فينك تقعد عالأرض وتزحل حالك زحول لتحت " انا بضمنلك الوضع تحت خرا .. بس فينك تجرب يعني "
فينك تحاول تقلنا أنو انت من أول عارف انو السيارة بتبنشر ، وأنو في حجارة عالطريق وفينك حتى تاخد معك مجموعة مننا ع جنب وتبدا تأقنعن أنو السفر بالطيارة احسن من السفر بالسيارة ..
فينك تقلنا أنو ما رح نصل لفوق بعمرنا ، وتندب حظك وحظنا !
فينك حتى تدوّر ع تغطية وتكتب ستاتوس عالفايس بوك قدي نحنا ما منفهم بميكانيك السيارات ، وبالطرقات الصاعدة والهابطة وانعكاساتها عالحياة الإقليمية ..
فينك تعمل كتير شغلات ابتداء من الشتم والندب والتنظير وحتى الرجعة لورا ..
بس بيبقى السؤال خيي بتعرف تدفش ؟
نحنا كلنا ها بحاجة ندفش بهالسيارة ، بحاجة نجيب هالشوية مازوت اللي باقيين عندي وعندك مخبينن من أيام اللي كنا مرتاحين ونحطن بهالسيارة بلكي بتمشيلها مترين كمان
بفهم انك مشوب والحالة مش كتير ع مزاجك ، وبفهم حتى أنو القمة اللي قالولك بعد خطوتين طلعت ابعد
بس بيبقى السؤال خيي بتعرف تدفش ؟
وبفهم كمان أنك مليت مني ومن حكياتي ومنو من غلطاتو ، وهداك صاحبنا اللي طالع معنا انت بتكره كل شي بيقولو
بس شو نعمل يعني؟ منتركو وهو ابن البلد بنص الطلعة معقولة بترضاها انت ؟

خيو بتسمحلي هيك بهالمناسبة السعيدة ونحنا بنص الطلعة أقلك شغلة ..
خيو ما بعرف يمكن المشوار ما نقدر نكفيه سوا ، واحدنا يتعب واحدنا يوقع عالطريق ويصرلو شي

بس بدي قلك انو انا وعالطريق معك ومع الشباب بالطلعة ما عدت أنا نفسي القديم، وانو الطريق اللي مشيناه كتير مهم بالنسبة ألي ..
غيرتني انت " بهبلك " وهداك بجنانو .. والتالت بإيمانو .. وهيك قيسها
وبدي اعترفلك بشغلة خيو أنا تعبانة متلك ، ونقاقة متلك .. بس يمكن باقي عندي شوية طاقة ادفش اللي تعبان اكتر مني
بتعرف تدفش ؟
عطيني دفشة لفوق لفوق ..

نحنا كمان " حقنا " نعيش

2012-05-27T17:53:00.000+03:00

الصورة من تشييع شهيد في حلب ..

والله أنا كمان بدي عيش ..

وعندي حبيب بيسوى تقلو دهب بيحبني قد الدنيا ، وبيقعد بيستناني كل يوم ع نار لأرجع ع البيت بأمان ، وبراسي هالملان بمليون قصة هلق عندي قصة كاملة عن عرس ما بعرف إذا الله بيطعمني عيشو !

والله أنا كمان عندي احلام ورفقات ومزحات حابة احكيها

عندي أم كلما بتفتح عالأورينت ، بتدور ع وشي بين صور اللي استشهدو او اعتقلو .. وأمي بتحبني قد ما أمك بتحبك ،

وبجي بشوف عيونها هالقد من البكي لما بتسمع " وأني طالع اتظاهر ودماتي بإيديا وان جيتك يما شهيد ما تبكين عليا ".

أي فهمانة أنك حابب تعيش ، بس المشكلة أنو المعادلة ما ضلت بين أنك تعيش وتموت

صارت بين انك تعيش وتسكت وهني عم يسرقو واحد من أعز رفقاتك ، ورفيقك التاني عم ياكل قتل جوا وقلبك ناغزك وما عم يخليك تنام ..

صارت بين أنك تحضر صور لأطفال عم تموت وتقول أنو حياتك أغلى من حياتن ..

لك بالله عليك ما بتنوجع وقت مننجرح ؟ وقت منعتقل ؟ وقت منستشهد؟

أنا كمان بدي عيش ! بس شو بعملك إذا أنا مقتنعة أنو الله ما خلقني لاكل وانام واشرب .. وبس !

شو بعملك إذا انا من جماعة " ليس بالخبز وحده يحيا الإنسان "

أنا متلك متمسكة بالحياة بإيديي وسناني

وبالعكس إذا كنت بتعرفني فأنا من الناس اللي بيعيشوا الفرح لآخر درجة، بس افهمني لحظة ، السوري اللي جوا بشي زنزانة وعم يكهربوه حاسستو برقبتي، واللي تيتم من دون عدالة لشهادة أبوه حاسستو مسؤوليتي .. والبلد كلها مسؤوليتي ودين برقبتي

وكيف الواحد فينو يسكت ومسؤوليات متل هي فوق كتافو ..

أنت ما حاسس أني مسؤوليتك ؟ شلون ؟ نحنا مش رايحين عالموت برجلينا ، ولا كرهانين الحياة ! بس نحنا مش قادرين نتعايش مع حالنا إذا سكتنا ! وقت اللي بسكت عن كل هالدم بحس أنو الدم صار ع إيديي أنا وما بقدر اتحمل طعم وريحة الدم أنا

جربت مرّة شو يعني تدور ع رفيق بتجن ع ضحكتو .. طول الليل من مستشفى لمخفر لتليفونات لتعرف بس وينو ؟ جرّبت تزور أم حدا وما تعرف توعدها أنو ابنها عايش أو لأ

اللي ما عم تفهمو أنو نحنا صعب نرجع .. لأ مو بس صعب نحنا مستحيل نرجع !

خيو الجرح اللي بقلوبنا غير الحرية ما عادت تدملّو ...

فيا منعيش بكرامة يا أما منموت

زنازين

2012-05-24T15:43:00.002+03:00

زنزانة "1"
المكان مزدحمٌ قليلاُ، يحاول ألا يشتكي ومن بين أصوات الشخير المتعب المعذّب يتذكر كم كان من السخف أن يقلق منذ أيام على امتحاناته العملية فهاهو اليوم هنا لا امتحان ولا ما يحزنون فيبتسم مرغما ً .. هنا لا امتحان إلا لصبره ،
هو يعلم تماما ً منذ المظاهرة الأولى أن احتمال الاعتقال سيء ولطالما استمع إلى تعليقات تشير إلى نحولة جسده " لن يتحمل كفين"، لكنه حتى الآن قد تحمّل الكثير، ويشعر طالما أنه قد نجا من الضرب الوحشي في باص النقل المهلهل فإن عليه أن يبتسم مجددا ً
يستلقي كيفما اتفق .. فالمساحة الصغيرة تكفي جسده وتحلّق أحلامه على وطن أفضل فتتخدّر آلامه ويغفو ..

زنزانة "2"
يفكر ..وحيدا ً في زوايته :" لا شيء لديّ لأخسره، أعطيتهم خمس سنين من العمر ماذا يستطيعون أن يأخذوا أكثر ؟
حينها كنت شابا ً ومليئا ً بالدهشة .. اليوم لا حزن أكثر يضفونه على العينين ولا تتسع الجبهة
لأي تجعيدة جديدة
كل حيلهم أحفظها وداخلي من القوّة ما يكفي لأنجو من أي شيء ولأتجاهل أي شيء
لي قدرة اكتسبتها في زيارتي السابقة على خلق عوالم لا تطالها قباحتهم
هذه المرّة أحمل معي رائحة خصلات شعر حبيبتي، أحمل معي صدى الأصوات الصارخة للحرية تلك التي محت فجأة آلام السنين الخمس
هذه المرة أعود إلى زنازينهم أقوى فالرجل الذي كنته قد استفاق على الأمل .. والحب".

زنزانة "3"
وتسرقه هواجسه: "ترى ما الذي تفعله الآن ؟ هل يزعجها أولادنا من المؤكد أنهم قد هلكوها بأسئلتهم عني ؟ ينتابني بعض من الذنب ربما مع الشوق إليهم
إنها المرة الثانية هذه السنة .. وهي هناك تحتمل جرح غيابي
كم أود لو أستطيع الاتصال بهم لأخبرهم فقط أني بخير، كلما خرج أحدٌ ما من هنا حملتّه سلامي إليهم،
هل نخرج قريبا ؟
كم غريبة تلك الصداقات التي خلقتها هنا ، كم هم مختلفون .. أشعر أني احمل قصصهم كلها ، آلامهم كلها .. سأكتبها ، سأتلوها أمام الجميع .. عندما أخرج "
ويعيد القصص المؤلمة الذي سمعها اليوم، مراراً وتكررا ً يعيدها فهو مصّر أن يحفظها من النسيان ويغفو وأصابعه المكسورة تحاول كتابة شيء ما .. ربما تخط اسم ابنه .

الحرية لأصدقائي مصطفى طاهر ، دياب سرية ، حسين غرير

دكانة بيع الوهم

2012-05-21T15:57:00.000+03:00

قّرب جرّب ، منكذب عليك منبيعك مواعيد وهمية تغيرات مستقبلية منشوف الكف منقرا البخت و منتوقعلك المكتوب واللي مو مكتوب، هيك صاير حال الكتيرين من الشخصيات " المعارضة " ‘إذا صح هيك نسميهن

بديت القصة أول ما بديت مع سياسة " هانت " و " قربت " وإعطاء الناس مواعيد تقريبية لسقوط نظام علما ً أنو وقتها ما كان مبين لسى راسنا من رجلينا ، يا جماعة بعد العيد أنتو بس تظاهروا برمضان ورح يسقط بعد العيد !
وكل عام وانتو بخير وعيد ميلاد سعيد والفرحة هنا ونعيم مع شامبو شامبو سيم !!! اجى العيد وراح العيد وما طلوا حبايبنا فتحول الموضوع لوهم تاني يلا ياجماعة جاي النصر وجاي الناتو جاي النصر وجاي الناتو
وبدأت الجدالات البيزنطية " بدنا الناتو " ولا ما بدنا وفورا بدي التسويق لأنو الناتو كان رح يجي بس لو ما جماعة هيئة التنسيق موقفين القصة !
وجهة من هالطرف تقلنا أنو تركيا بجيبها ورح تجيب الحظر الجوي بس كام لافتة واسم جمعة وصاروا عالباب وجهة تانية بتكتب شكر للسعودية بينما الشعب السوري عم ينزح ولو من طرف الجيبة اجانا دعم من اللي عم يتشكرون كنا منكون بألف خير " ماديا ً ونزوحيا ً عالأقل"

بعد فترة حسّو أنو الشعب مأفعة معو والناتو شكلو ما رح يجي سواء نحنا كان بدنا أو لأ يعني دقينالو تليفون والتاني والخط مشغول ووقت اللي ردوا علينا جماعة الناتو كانوا واضحين " مافي جية ع سوريا بالقريب العاجل"

أجت بعدها قصة جديدة بيسلحونا ما بيسلحونا ؟ عم ينشقوا مئات الآلاف ولا ما عم ينشقوا ؟ وهيك الله وكيلك كل مرة نفس الأكل هوا

ناس عم تفكر لبعيد، عم تبني شعبية وعم تحاول تقول للناس شو حابة الناس تسمع
عاملة علينا وصاية كأنو عمرنا خمس سنين وخايفة ع مشاعرنا وما بدها تقلنا الحقيقة ،بس يا عمي الحقيقة بتجرح لكنها بتفيد
ونحنا يا جدبة مانّا بلّور بنوب وما مننخدش بالسهولة اللي انت مفكرها
كان فيك تقلنا أنو النظام لسى مطول وبدو جهد ليروح وتقلنا أنو الناتو ولادين الشو أسمو بيجو ع المصالح مش عالإنسانية وأنو ما حدا رح يبيعنا من السلاح إلا كام بارودة عطلانة ! وأنو وأنو

فيك خيي ما تخاف ما رح نحبط من الحقيقة أكتر ما عم يأحبطنا الوهم اللي عم تبيعنا ياه ولا تنسى بالنهاية نحنا ع أرض الواقع وعم نشوف وهمك بسهولة .. وكلما بتعليلنا آمالنا وبتتركنا نوقع من فوق عم نتوجع أكتر

لك ما تخاف نحنا منتحمل أكتر ما محسب ما لهلق متحملين الخذلان منك ومن المجلس الوطني والهيئة والعرب وتركيا وشي كام دولة كمان عالحسبة معنا من فوق الطاولة .
وأصلا عم تسقط من عيني الله وكيلك كلما بتعمل هالحركات القرعة وعم حسك مدوّر ع أصوات انتخابية لبعدين مش ع مصلحة البلد والناس والثورة ..

ولسى عم تتعامل معنا بقلة ثقة فينا ، نحنا نزلنا ومكفيين هالثورة فيك ولا بلاك وفين ولا بلاهن ولو بدنا ناس تكذب علينا كنّا ضلينا عاللي عنا من باب "الكذاب " اللي بتعرفو أحسن من الكذاب اللي بتتعرف عليه
أصلا ً أحنا ما حاطين أملنا غير بالله وببعض وعارفين انو ثورتنا يتيمة ورح نضل مكفيين ومكملين لآخر نفس
فبرضاي عليك سكرلنا " دكانة بيع الوهم " و افتحلك شي صنعة تانية
قرفتنا عيشتنا .

جـــــــامـــــــــعــــــــة

2012-05-04T00:31:00.000+03:00

الباب يا صديقي مغلق
وقطرات دم مبعثرة ملأى بالشباب
تفصل بينك وبين ما كان يوما ً مستقبلك
وورقة بالية تشرح لك .. كم هم خائفون منك

الباب يا صديقي مغلق
وأشخاص جدد لا تستطيع مهما حاولت
تقليد الحقد في عيونهم
قد احتلوا المكان بعدك
يتحدثون ذات مفرداتك ولكنك لا تفهم مهما درست
لغة بغضهم
هنا تعلمت وشققت شرنقتك
ولا يزال على عصيهم آثار أجنحتك

قد احتلوا المكان بعدك
ويصرخون للصنم
وتشفق على عبوديتهم
يسألونك عن الحرية
وتبتسم للاستفزاز
فأنت تدرك أن ما من أحد قادر مهما تجبّر
أن يعادي الحرية والعدالة والعلم
وينتصر

الباب يا زميلي مغلق
وذكرياتك لا تزال في الداخل
مع دفاترك وصباحاتك
ومعك فكرك هاهنا
وعلمك هاهنا
ومن بين قضبان سور جامعتك
يعبر إليك رجع صدى التكبير

الباب يا زميلي مغلق
والقاعة فارغة .. وتضج بالفارغين
وأنت هنا لك الكون كلّه
يسند كتفك آخر
تنظران معا ً بشفقة
إلى كتلة اليأس البشرية التي تعتقد أنها
قد انتصرت إذا احتلت جامعة

الباب يا زميلي مغلق
ولكن الحرية التي نشعر بها
قد اقتلعت كل الأبواب
وأعادت كل الأحلام المسروقة ..
والغد وإن استطاعوا تأجيل شروق شمسه
آت لا محالة ..

الباب مغلق علينا ؟
ام تراهم هم الذين دخلوا إلى غياهب علمنا
وحبسوا ؟

حــــــلب 4/5/2012

خمس أشياء أتعلمها من طلاب طب الأسنان “ الثوار “

2012-02-28T01:02:00.001+02:00

أولا ، حماسهم ، ثورتهم :
تعتبر كلية طب الأسنان من أولى الكليات الثائرة في حلب ، حيث أذكر العديد من الحوادث ، ابتداء من أدائهم لصلاة الغائب على أرواح الشهداء السنة الفائتة ، ومنعهم قوى الأمن من اعتقال طالبة ، إلى رفع علم الاستقلال على مبنى الكلية
انتهاء بالاعتصام للمطالبة بـ زميل معتقل
هؤلاء الشباب بحراكهم النظيف جدا ً والهادف حقا لدفع سوريا نحو الأفضل ، لا أحد منهم يثور لمكسب ما فمعظمهم سيتابع بعد الثورة عمله في الطب
لكنهم مليئون بالطموح ، بالحماسة ، بالشجاعة
وإذا كنت مضطرة لاختيار جهة تمثلني ! فسأختارهم دون تردد

ثانيا ً ، تواضعهم :
هم لا يعتقدون أنهم أكبر من حراك الشارع ، بل هم ابنائه ، لا يدعوّن انهم يعرفون كل شيء ! بل يسألون ويناقشون ويعترفون حتى بأخطائهم ويعتذرون عنها
لا يتجادلون حول من سيقوم بقيادتهم ، فهو أمر ثانوي .. “ إلا فيما ندر “ ، لا يخجلون من الاعتراف بأفكار سابقة خاطئة لديهم عن البلد ، عن السياسة ، او إي شي ء

ثالثاً ، إيد وحدة :
هم يساندون بعض ،بطريقة جميلة جدا ً .. يدافعون عن حرية بعضهم ، يعتصمون ، يجابهون الامن .. ويتجادلون في كثير من الأمور دون أن ينسو أنهم في صف واحد
ورغم أن معرفتي ببعضهم حديثة جدا ً ، أشعر بكثير من الأمان وأنا كلي ثقة أنهم أول من سيسأل عني في حال اعتقالي

رابعا ً ، مؤمنون أننا سننتصر :
إيمانهم البديهي أن الثورة منتصرة … لو مهما حصل

خامسا ً ، يستغلون وقت الألم للعمل :
عندما قرأت خبر استشهاد الطالب الزميل “ محمد عطار “ ، بدأت الغصّة تسرق كل شيء وهكذا أعتقد أن كثيرين منهم كانت حالهم ، لكن عوضا ً عن الاستسلام للوعة رأيت فيهم رغبة صادقة أن يبقى الشهيد حيا ً فيما بينهم ، بذكراه ، بالصلاة لأجله .. بالعمل لمتابعة ما استشهد من أجله ، لم يقضوافي حزنهم ربع الوقت الذي أخذوه في التفكير بما العمل ؟ وهذا ما اتمنى لو نتعلمه جميعا ً ..

زملائي فخورة بكنّ وبكم جدا ً ..
p.s وبكل أخطائكم كذلك “ من لا يعمل هو الوحيد الذي لا يخطأ “

استفتي

2012-02-26T01:52:00.001+02:00

انزل لتصبغ الورقة بـ “ نعمــ” ـك

ودعني هنا أعدُّ الأصدقاء
لأتأكد أن عيونهم لا زالت تلتمع بذات البريق

أن لا زنزانة سرقتهم

ولا تابوت ..

انزل غدا ً لتمثلّ مسرحية التغيير
أرتدي اجمل ثيابك ، فأنت لا تشبهنا نحن البسطاء
ودعني هنا بين من لأجل أن تتغير البلاد

فعلا ً
هم على استعداد للموت ..

انزل ، وقل كلمتك ..

لكن تمهل لحظة بين السطور حول عمّ فعلا ً تدور كلمتك

انزل وقل كلمتك .. واغمض العينين
عن دمعة لصديق قد خسر الكثير
بسبب من تصوت لأجلهم

انزل وقل كلمتك .. فأنت منذ شهور
خائف على البلاد
ومتمسك بنظارة العقلاني والعالم بالأمور
واسمح لي انا الحالمة
أن أسألك

ألا تخاف علي ّ ؟ وعلى الملايين من أمثالي

شارك ، يقولون أنه حقك ..
لكن توقف لحظة واحدة وأنت ترمي ورقتك

عن البقية من شعبك
المحاصر .. المدمّى
واشعر ولو للحظة واحدة بغصّة لغيابنا

شارك .. بـــــ نعم أو لا
لا يهم
فهذه المرة قد ابتكر الحاكم
مهرجانا جديدا ً
وعرسا ً فوق أشلائنا

شارك بــــ نعم أو لا
لايهم
فصرير قلمك على الورقة
مجرد صدى ً لمسيرات التصفيق

تــــــــ ع ــــــــــــــــب

2012-02-20T01:38:00.000+02:00

أبحث عن مساحة صغيرة

لم يضع فيها إي عسكر ، حاجزا ً داخل دمي

علّ هذه المساحة تنبض بـــــك

أبحث عن لحظة واحدة من وقتنا المسروق
لا أحصي فيها وأنا معك
من ماتوا ومن سُرقوا

أحاول أن انتشي بك ، فيعتريني شعوري البارد بالذنب

كيف أستطيع بعد كل هذا التشوّه أن أحبك ؟
كيف لا أخاف من وردتك الحمراء
أنا التي على أسمالي دمٌ أحمر مقدس
هو لأخوتي

أخجل أن أشتاقك
أخجل أن احلم بك ..
اشعر أن للغائبين عيونا ً
كالله تراقبنا ..
كالله تحاسبنا
كالله تحبنا
وليتها كالله تغفر لنا إن نحن سهونا

أجمع من هنا وهناك ، بعضا ً من فرح وأخبئه

أسرق ابتسامات من على وجوه من استطاعوا
أن يثوروا بابتسامة
اجمع الشحيح من الأمل .. وأشعر أنني لا استطيع مقاسمته معك
هناك وطن ٌ كامل يحتاج فرحه

ليتابع ثورته

أتدرب على مفردات جديدة للحب
فلا “ منحبك “ أصبحت تشبهني
وحزفت “ الأبد “ من قاموسي

كل شيء في ّ تغيّر
لم اعد أقو على ترديد الشعارات المنسقة
حتى لو كانت لك ..
كل شيء في ّ تحرر
كل عتم تنوّر ..
أأخبرك سرا ً ؟
كل ما أؤمن به تكسر تكسر

أتمسك بك كي لا اتوه
وأخشى على القلب مشقة محبتك
كيف أجد وقتا ً لأحبك ؟ انا المشغولة بحريتي الجديدة ؟
كيف أجد روحا ً لتصبح معك واحدا ً
والرصاص ثقّب روحي

أحاول أن أحبك ..
لكنني متعبة ، أبحث للرأس عن متكأ
وأخجل من آلامي الصغيرة
في ازدحام الخسارات

أنوء بآلاف التفاصيل التي لا استطيع سردها
وأنوء بالحياة التي اعيشها ولا تحياها معي
ويتعبني قلقك .. وغيرتك
ويؤلمني خوفك أبحث عنك .. هنا
لتهتف معي .. هنا
لتصرخ معي .. هنا
او ربما لتموت معي .. هنا

أبحث عن كتف لا يدين اختلافي

وعن يد لم تغلق على الحجر

عن يد تتشابك مع أصابعي المرتجفة

أبحث بين أصدقاء الطفولة عن أوجه

لأحتفظ بها في زحام الذكريات

أرجوك .. لا تحبني أكثر
فأنا جاهزة للرحيل ..
للموت .. للاعتقال .. لكل شيء معد مسبقا لمن هم مثلي
انا جاهزة للرحيل .. ولا شيء يربطني بالإرض إلاك

أرجوك .. لا تقترب أكثر
فكل شيء في ّ قد تشوّه

أحاول أن أحبك ..
لكنني نسيت كيف كان الحب ؟

مو هيك

2012-02-18T02:33:00.002+02:00

رايح يصرلنا سنة تمام يا صديقي والثورة بديانة “ انت مش مقتنع انها ثورة وانا مش عم اعرف لاقيلها اسم يأقنعك لهيك مرقلي ياها “ ، قبل ما تبدا الثورة كنت بتذكر منيح انو انا وانت متفقين انو في فساد بيرعب بيبدا بالعيلة وانت جاي .. وكنا انا وانت متفقين انوللحيطان دانين وانو اللي بيحكي بالبلد بيصير ورا الشمس ! حتى انا وانت كنا متفقين ونمرقها بالمزح وبالغصة أنو اللي بيروح ع شي فرع “ بتصير نمرة رجلو خمسين “ و بياكل “ كم دولاب “
وكنا ياما وياما قاعدين وعم نحكي عن رفقاتنا اللي هاجروا كلن لأنو الوضع بالبلد مستحيل يأسس الواحد فيه لشي ، ورفقاتنا مش جهلة ولا ما تعبو عحالن لأ اغلبن درسوا وتعبوا بس ما في فرص
بس أول ما بديت الثورة وأنت فجأة سكتت وصرت تقلي شغلة اول شي بعز الزحمة والعنفوان والمفاجأة يمكن ما كتير دققت عندها .. كنت تقلي “ كلنا بدنا التغيير بس مو هيك “
وتبدا تفصفصلي ليش “ هيك “ ما عاجبك و شي تقلي مؤامرة وشي تقلي فتنة
اخي ؟ شو مستغرب ؟ انو الناس اللي كانت مستاءة متلنا طلعت ع الشارع ؟ ولا مستغرب انو الشي اللي كان يصير بالقبوصار يصير قدام الكاميرات

بعدين شو طرق التغيير اللي مو هيك ؟ عطينا ؟
إعلام ما في ، أحزاب مافي ، .. “ ما تقلي انو نزلو قوانين ، ما تخلينا نضحك ع بعض … إي أنا لحالي بعرف اكتر من ست اشخاص معتقلين لأنو عندن رأي .. تجي تقلي بدنا نعمل اعلام
وضعنا مش وضع جديد واعتقد بالاربعين سنة اللي مضوا ما كان فيها شي ولاكان في ناس بالشوارع ورغم هيك غير “ الجزرة “ ما حدا عطانا
شي وعود بـ “ ربيع “ طلع قصير ، شي “ تطوير وتحديث “ ، وشي “ محاربة فساد “ .. وصدقني “ الاصلاح “ ما بيفرق عن هدول بشي
ما في إلنا غير الشارع وهاد حقنا !
وع كل أخي .. إذا بعدك مقتنع بعد سنة انوالتغيير مو هيك ؟ تعا وسمعنا صوتك ! شور علينا بطرق تانية ، ابدع محل ما انت شايف نحنا قصرنا
بس اعمول شي
قلنا اخي .. مو هيك ، طيب كيف ؟

يا اللي واقف عـ الرصيف

2012-02-17T01:48:00.001+02:00

امبارح كتبتلك شي “ هون “ ، أنت اللي لسى ثورتنا ما شدتّك ..
ومن وقتها حسيت انو اخي في شي غلط واقف بيناتنا ، وطالما أنو انا وانت بلاد بلد واحد بيسوى اخد من وقتي خمس دقايق كل يوم
لقلك شو عم يصير معي ، اعتبرها طق حنك ، اعتبرها دردشة ، اعتبرها اخي من الأخير فشة خلق .. متل هي الدعاية الغليظة اللي بالطرقات “ همي هو همك “

يمكن عم قضي وقت أتمسخر ع اشيا انت بتعنيلك اكتر من الوقت اللي عم قضيه اشرحلك شو بدي ، بس الله وكيلك يعني اوقات عم تطلع المسخرة من حرقة القلب مو من أي شي تاني

فحقك علينا

اليوم ، كنت الصبح متلك مشلوشة بشو الناس عم تحكي عن الدستور الجديد وع هاد وما منوّ .. وبعدين بسمع خبر اعتقال رفيقتي رزان

رزان لاحكيلك هي صبية سكّرة “ مو لأنها رفيقتي .. عندي رفقا مان سكاكر ولا شي … بحكيلك عنن بعدين “ ، رزان هالصبية فهمانة بدون ما تتفزلك عليك ، صبية جدعة شعراتا قصار

وقت بتقعد معها عندا عادة انها بتقعد وبتحط رجليها فوق الكرسي ! هيك حتى وقت منكون قاعدين بمحلات المفروض انها “ كتير كلاس وياي “

إذا كان عندك قضية وحابب حدا يمسكها وما يتخلى عنها ، مالك إلا هالبنت وقت بتآمن بشي بتدافع عنو بكل جوارحها .. وقت سمعت خبر اعتقال رزان ! انفعلت سبيت وبكيت وما بخفيك بلحظتها ما كان بدي شوف اي حدا متلك بوشي ، لهيك اوقات إذا التقيت بحدا مع الثورة وشفت خلاقو ضيقة شوي ،حاول تعطيه عذر بالنهاية ما بتعرف يمكن هو كمان عندو صديقة متل رزان اعتقلها الأمن لأنها عندا موقف وقضية

بعد ما خلصت موشح البكي ع رزان ،وإذ بفوت عالنت لأكتشف انو حسين كمان اخدينو .. اوف حسين وزران وللمرة التانية
من اسبوع كمان قضيت نهار ببيت هالصديق ، مع عيلتو وولادو ..
وصبية اسمها ميادة ، تعرفت عليها وحبيتها .. وقلت لأحد اصدقائنا المشتركين ، بتعرف ميادة ممكن تكون صديقة مقربة

بالنهاية اخي ، نهاري كان زفت .. اخدوا اقرب رفقاتي ، ومشروع صديقة ..
انت كيف كان نهارك ؟
منحكي بكرة .. سلام

إلى د. بثينة شعبان

2011-12-15T19:24:00.001+02:00

تحية لست أدري إن كانت طيبة ، لكنها على الأكيد مملوءة بكثير من الأسى
التقينا في بداية شهر آذار الماضي ، حينما لم يكن بعد الشارع السوري مملوء بالمظاهرات
اجتمعت بي وبستة من زملائي المدونين في حديث " ودي غير رسمي " وددت من خلاله الحديث عن أسباب " الهوة " بين " الدولة والشباب " واستمعت بابتسامة لآرائنا التي قد تكون فاجئتك قليلا ً بصراحتها

لا أزال أذكر جيدا ً استغرابك أننا اعتبرنا سطوة رجال الأمن و التقييد المخابراتي للحريات أحد أهم أسباب تلك الهوة ..
دعيني أذكرك قليلا ً بنا نحن ،
أتذكرين الشاب الهادئ ؟ الذي كان لا يتحدث إلا ليضيف شيئا يعتبره مهما ولا بد من ذكره ؟ الشاب الخلوق هذا هو المدون أنس معراوي
الذي اعتقل بتاريخ (1/7 ) ليفرج عنه بتاريخ ( 28/8 )
الزميل الصديق الذي كان صادقا في نقل ما يؤمن به ، الذي كان صريحا حول الحاجة إلى تغيير سريع في سوريا ! ذاك الذي تستطيعين تذكره من خلال شغفه بهذا البلد ، الصديق حسين غرير الذي اعتقل بتاريخ ( 24/10 ) ليفرج عنه بتاريخ ( 1/12 )
هل تتذكرين على وجه الخصوص ، الصبية التي انفردت بقوة للدفاع عن الأكراد وحقوقهم ، على الرغم أنها ليست كردية الأصل ، تلك الفتاة التي ستتذكرينها حتما ً بتقديسها الإنسان وحقوقه بطريقة مطلقة ، الصديقة رزان غزاوي التي اعتقلت بتاريخ (4/12 ) ولازالت معتقلة حتى الآن ..
ولربما ينتظر بقيتنا دورهم في مسلسل الاعتقال هذا
أعتقد أن اعتقال ثلاثة من أصل سبعة أشخاص لا سلاح لهم سوى الفكر والكلمة .. يجيب تماما ً وأكثر من حوارنا بكثير عن أسباب الفصام بين الدولة والشباب ، وينفي استغرابك استيائنا من السطوة الأمنية ..
ولأجيب على سؤال آخر حول ما يريده الشباب السوري

دولة بلا اجهزة قمعية ورقابة على الفكر ، بلا انتخابات مزورة و فساد .. دولة مدنية وتعددية وديمقراطية .. دولة يسود فيها القانون على الجميع
الشباب السوري .. بدو حرية

رزان حرة .. حرة

2011-12-05T11:14:00.000+02:00

بالكاد تنفّسنا الصعداء بعد الإفراج عن زميلنا حسين غرير قبل أن يعود اختناق الغضب والحزن ليذكّر صدورنا بواقع القمع والكبت وعبادة الصّمت الذي نعيشه.. وردنا خبر اعتقال زميلتنا رزان غزّاوي.
رزان غزّاوي سوريّة بامتياز.. سوريّة بعملها المحموم للمرافعة عن القضية الفلسطينيّة وﻻجئيها في وسائط الإعلام اﻻجتماعي باللغتين العربيّة واﻻنكليزيّة، سوريّة بالتزامها بكل قضايا التقدّم والعدالة اﻻجتماعيّة والمساواة، سوريّة بوقوفها مع الأحرار في طريقهم لنيل الحرّية والكرامة.. رزان صوتٌ ﻻ يريد له الصمت إﻻ أعداء الحقّ والكرامة والعدالة والحرّية.

نطالب السلطات السوريّة بالإفراج الفوري عن رزان غزّاوي وعن كلّ معتقلات ومعتقلي الرأي والضمير والكرامة، ونحمّلها مسؤوليّة أي أذى قد تتعرّض له، كما نطالبها بكف سياسة القمع الإرهابي الرعناء بحق المواطنين السّوريين، وندعو جميع أنصار الحقّ والحرّية للتضامن مع رزان غزّاوي، معنا، مع سوريا..!

للتضامن مع رزان غزاوي على الفيس بوك اضغط هنا.

عندما يعتقل الإنسان .. لأبوته

2011-11-27T02:10:00.000+02:00

اعتدت ان أمازح حسين غرير دوما ً ، بأنك أب لطفلين وأننا لسنا مسؤولون في حال تم اعتقالك " فانضب وعود بالبيت " ..
طبعا ً من يعرف حسين و شغفه بسوريا .. وبطفليه سيفهم تماما ً أنه لأجلهم .. لم يستطع أن يصمت

لأجل أن يفتحوا أعينهم على سوريا أجمل ، ليكي يستعيدوا قدرتهم على الحلم بحرية ... ناضل بصوته وقلمه وقناعاته

لأن أبوته أبت .. أن يورثهم القمع الذي نعيشه .. اعتقل دون أدنى خبر ودون أن نعرف حتى إي جزء من مسيرة الأصلاح يتضمن اعتقال أشخاص كحسين ؟
مر على اختفائه شهرا ً كاملا ً وأنا أؤؤجل الكتابة عنه وأستيقظ على انتظار الإفراج عنه
حسين الصديق والمدون ..

أعيدوا لنا حسين ، أعيدوه لعائلته وقلمه و اطفاله

أعيدوه لسوريتنا الجديدة

اعيدوه لا خوفا ً عليه بل خوفا ً عليكم !
فعشق حسين للحرية معدي ونخاف على عتمتكم منه

صفحة المطالبة بالحرية لحسين
مدونة حسين غرير

صفحة المدونة على الفايس بوك

بيان للتوقيع من أجل الإفراج عن حسين
بيان حول الوضع الصحي للمدون حسين غرير

خيانات اللغة والصمت ، فرج بيرقدار

2011-11-23T17:03:00.001+02:00

من الجيد بعد تسع شهور أن نقرأ شهادة حية لأشخاص ذاقت الاعتقال لما يفوق العشر سنوات .. لنتذكر كلما صرخنا حرية ، آلامهم وحقوقهم .. آلامنا وحقوقنا ! هذه ليست رواية ولا سرد درامي
هذا انطباع لواقع أب .. وأخ .. ومفكر وشاعر ، هذه صرخة الآلاف في سوريا .. قد لا يكون الأول في بلادنا لكن علينا أن نسعى سويا كي لا نقرأ قصصا كهذه في سوريا الجديدة ..
بعض ما اخترته لكم من الكتاب ..

باسم الحرية المغدورة في وطني منذ أكثر من ثلاثين موتاً طارئاً أو عرفيا ً
باسم المحرومين منها ، ماديا ً ومعنويا ً ، جسدا ً أو فكرا ً أو روحا ً
باسم ابنتي ، التي لاتستطيع أن تخون طفولتها وتصدق الشعارات التي يرغمونها على تردادها في المدرسة كل صباح ،
أعلن بوصفي إنسانا ً وشاعرا ً وسياسيا ً أن الحرية هي القيمة الأسمى في فلسفة التاريخ
وأني ضد من يقف ضد الحرية ، حتى لو كان المعني أنا أو حزبي

القمع السافر والمعمم هو العدالة الوحيدة التي يجهد حكامنا في تطبيقها على المحكومين
وأنا لا أتلاعب بالألفاظ حين أقول أن السائد في سوريا هو قانون القوة لا قوة القانون

أليس أمرا ً مضحكا ً إلى حافة الجنون ، مؤلماً حتى البكاء ، أن تطبق الأحكام الاستثنائية على الجماهير وقواها السياسية ، فندخل قاعة محكمة أمن الدولة ، في الوقت التي تدخل فيه إسرائييل قاعة المفاوضات ؟

مرة أخرى باسم الحرية هذه الكلمة الموسيقى هذه الروح القدس ، أعلن أن اعتقال أي شخص سلاحه الكلمة وليس البندقية هو بالمعنى الأخلاقي ممارسة اجرامية صافية السلالة ،
هو خرق لإنسانية الإنسان بالإطلاق قبل أن يكون خرقا ً بالمعنى الحقوقي لقوانينه ودساتيره
أن دولة تعتبر فيها الكلمة جريمة يحاكم عليها المرء هي دولة عير جديرة بالحياة ولا حتى بالدفن
وبشكل خاص ذلك الطراز من الدول التي تفترس فيها الكلمة بالسياط والبنادق والزنازين

أنتم لم تشاهدوا كيف تتكسر البروق في عيني أم تزور ولدها بعد أكثر من خمس سنوات على اعتقاله ولم تعرفوا ما يعنيه بكاء تلك المرأة التي زارت ذلك السجين بعد أكثر من عشر سنوات على وجوده في ذلك البرزخ الملون . كان هو لا يتمالك نفسه من تكرار ندائه : يما كيفك يما مالك يما ، جاوبيني أيش في يما
وكانت هي تختنق بالنشيج وتظل عاجزة عن إخباره بأنها أخته وأن أمه .... !

هذا الذي نكتب فيه ليس حبرا ً بل دم ولغت فيه قوانين الديكتاتورية وخوضت في حرماته أشرس أجهزتها فإية كوابيس هذه التي أسميها بلادي ؟!

شكرا ً لأمي علمتني أن الحرية التي في داخلنا أقوى من السجون التي نحن في داخلها ولهذا سوف تنتصر الحرية وتنهزم السجون

ما من سجين يضمر ما هو أدنى من الحرية

انتصار أنقى من الدمع وأغلى من الدم .. فلنغسل جراحنا وعذاباتنا على مهل على مهل .. ولا بأس أن نبكي قليلا ً ونحن نرقب نجمة الكرامة تشق عباءة ليل طويل من الذل وترتفع ..

وأنت ليس لك إلا أن تقبض بيديك على جمر الحلم وتطأ بقدميك على جمر الواقع وفي صدرك جمر كثير يحرس قلبك في الليل ويوقظه في الصباح ، لكي لا تنسى إن الله ليس شيئا ُ آخر غير الغياب في أقصى تجلياته ..

أعرف مسبقا ً أنكم ستحاولون تكذيبي بطريقة ما ولسبب ما .. على الأقل تهربا ً مما يمكن أن يرتبه عليكم تصديق مثل هذه الأمور من تبعات وجدانية وأنتم تريدون أن تنامو بأمان
ولكن هل تنامون بأمان حقا ً ؟!
كثيرا ً ما أسأل نفسي هذا السؤال .
أحيانا أفكر أن الفارق بيننا كسجناء كاملي العضوية وبينكم كسجناء مرشحين او احتماليين هو في موقع الكابوس وليس في وجوده أو عدمه
بالتسبة إلينا فإن الكابوس في داخلنا
أما أنتم فإنكم داخل الكابوس

الديكتاتورية عندنا لم تنهزم ، وهذا وحده جدير بأن يضحّي المرء بأشياء كثيرة لمواجهته .

الا ترى الأمر مضحكا ً ، عندما تحاول إقناع سجين بأن الحرية تدق أطنابها في سورية ؟

لا يسمحون لك حتى بمرارة الاختيار بين لحمك وحلمك
إنهم يريدون الاثنين ، يريدونك مسلوخا من الداخل والخارج في آن معا ً .. مهزوما ً من رأس مستقبلك حتى أخمص ماضيك
يعرفون أنه ما لم تنهزم أنت .. بروحك وقصائدك ونبوءاتك ، فإن جميع الهزائم الأخرى تبقى غير نهائية .

دون المرأة .. بدون أطيافها وأصدائها أو رائحتها على الأقل ، لايكون الرجل إنسانا ً . أعني لا يكون إنسانا ً كامل المعنى

قبل الثورة كنت سأشعر أمام هذا الكتاب بالخجل ، اليوم أشعر بالمسؤولية .

لتحميل نسخة إلكترونية من هنا وشراء نسخة ورقية من هنا

قصة الصخرة

2011-11-03T23:35:00.000+02:00

بضيعة صغيرة فيها كذا مليون وكسور اكتشفو انو في شح عندن بالمي ، الناس كانت بتعرف انو في مي قريبة بس في طريق لازم يقطعوه ليوصلو المي ع الضيعة
وبنص هالطريق في صخرة سادة الطريق ومانعة الناس توصل عالمي او حتى تلمح الشمس هي وعم تشرق

يوم ورا يوم ومن هالتراكمات ومطر ونشح وغبرا .. الصخرة كبرت كتير وصار تحريكها مهمة صعبة ..

بس في مجموعة من الشباب قررت تحاول تزيح الصخرة .. وفورا الضيعة كلها تكركبت

أول شي في ناس قالت هدول مجانين لك ما في شي بيحرك هالصخرة فتحنا عيوننا عالدنيا وهي موجودة

وناس كانت اصلا فرحانة بالصخرة هاد اللي اخد منها كام حجرة وعمرلو كام بيت لطش ! واللي فاتح بسطة بفياتها هدول قاوموا بكل قوتن حدا يحرك الصخرة لحتى وصلت انن يضربو كل مين يسترجو الله وكيلك يقول أو يفكر أو يحلم يوصل للصخرة ..

البعض تعود ع المي الشحيحة وتنبل وما بدو لا مي ولا هوا .. وبأحسن اﻷحوال بدو ياخد حالو ويعيش بضيعة اكبر وفيها مي كتير !س

وفي ناس قال شو ؟ بدنا نتخانق بالضيعة بس تصل المي وتنقسم الملضيعة فبلاها وجعة راس الصخرة
شوي شوي بديوا الشباب والصبايا اللي بدن يعيشو ويربوا ولادهن بهالضيعة يحلمو ويتحركو سوا .. وهيي ويلا .. وبديوا يهزوها ..

المشكلة هالصخرة اللي الها سنين ما بتنقام بسهولة , والشباب بديت تتعب وفي ناس تدموا ايديها وهي عم تحاول تحرك هالصخرة النتنة .. ومع انن كانو عم يكترو شوي شوي .. وايدين عم تكتر والصخرة بديت تنهز في مجموعة منن صارت مركزة كتير عالصخرة ، ونسيت المي والطريق

وصار بدها بس تشيل الصخرة ! واحد يقترح يفجروها نووي .. والناس تقلو يا أخي شو نووي ما بتنشف المي يللي نحنا بدنا ياها وبتحترق الضيعة بس مشان نشيل الصخرة ؟
واحد تاني قال منجيب ناس من ضيعة تانية ومنعطيهن المي اللي رح نلاقيها ! لك كيف منعطيهن المي

وانقسموا هالشباب والصبايا واللي بطل بدو مي واللي اتهم التاني انو ما حرك الصخرة من كل قلبو وبديت المشاكل !!

لك والله يا جماعة الصخرة رح تروح .. بس تكتر اﻹيدين اللي عم تهزها لتتحرك

والشباب اللي وحدن العطش ، فرقتن الصخرة

بس يتذكروا هالضيعة أنو هني بدن يمشوا الطريق ويجهو يبوا المي عالضيعة ﻷلهن ولولادن .. وأنو الصخرة مجرد تفصيل عالطريق .. لازم نشيلو لنعبر الطريق بس ما شيل الصخرة هو الهدف .. الهدف تنعم الضيعة بالمي .. لنعيش فيها نحنا وولادنا وولاد ولادنا

2011-10-28T18:24:00.002+02:00

عشر أسباب على اﻷقل تجعلني ضد الحظر الجوي :

هذه تدوينة مفتوحة بمعنى انني سأضيف إليها تباعا ً أية أسباب تأتيني عن طريق " الفايس بوك " أو " التويتر " أو التعليق على المدونة هنا

أسباب تجعلني ضد الحظر الجوي كتسمية وكمطلب :

1- إن من يطالب بالحرية والكرامة لا يستجديها من دول آخرى
2- ﻷنه برأيي مجرد مقدمة خجولة ( قليلا وأحيانا تكون غير خجولة أطلاقا ً ) لطلب التدخل اﻷجنبي في سوريا
3- ﻷن للحظر والتدخل فاتورة ما ، سيدفعها الشعب السوري " بأكمله " وأعتقد اننا لسنا في موقف نستطيع فيه المفاوضة حول هذه الفاتورة ، وإيا كانت الدولة او الدول التي ستمنحنا " هبة " الحظر ستفرض علينا شروطها وسنقبل صاغرين
4- لأنني أعتقد ان طلب الحظر وصداقة اميركا او غيرها يتضمن ان نتناسى الجولان ودعم أي مقاومة مستقبلا ، إلا إذا كانت أميركا قررت استبدال صديقتها اسرئيل بنا طواعية
5- ﻷنني أخاف أن يفرض علينا أخ أكبر .. نشاوره بالحكومة والرئيس والسياسة و .. إلخ ، وهذا يعيد إلى مخيلتي كم كانت الحكومة السورية سيئة كاخ أكبر بعد تدخلها في لبنان !!!
6 - ﻷن سوريا " شئنا أم أبينا " هي لكل السوريين حتى أكثرهم خوفا ً ومنحبكجية ولا يحق لنا نحن المطالبون بالديمقراطية أن نفاوض عن السوريين بشأن خطير كهذا
7- لا أعرف ا ي دولة مدنية ديمقراطية تعددية بناها الحظر الجوي او التدخلل اﻷجنبي وأنا أحلم أن تصبح سوريا دولة ديمقراطية طبعا ً
8 -ﻷنه يقسم الشارع السوري ليس إلى منحبكجية ومندسين بل يقسمهم إلى ضد أو مع التدخل الأجنبي وسيحمل بعضنا السلاح حينها لا للدفاع عن النظام بل بمنظوره للدفاع عن "وطنه "
9 - ﻷن النظام السوري متفوق عنفيا ً علينا بدباباته لا طائراته .. وبأجهزته الأمنية فلم إذا الحظر الجوي ؟
10 - ﻷننا بهذا اﻷسم ساعدنا النظام السوري مرتين .. أولا في تقسيم الحراك ، وثانيا بإظهار نفسه أكثر وطنية وممانعة و اظهار الثورة على انها تستقوي بالخارج
11- أجد من المهزلة أن نطلب الحظر الجوي من الدول التي لازلت من تحت الطاولة تمد النظام بالمال والسلاح ؟ هل نريد مساعدتهم في اللعب على الحبلين ؟
12 - السبب اﻷهم برأيي ان النضال السلمي لم يفشل بعد والدعم الدولي الذي نريده هو إيقاف دعم النظام ، محاكمة مرتكبي الجؤائم

ولهذا بدون أدنى تأنيب للضمير أحقد على صفحة الثورة السورية " مجددا ً " واعترف أن هذه الجمعة لم تكن الثورة تمثلني
وشكرا

أنا بقرا لياسين …

2011-10-11T17:02:00.001+03:00

احتجاجا ً منّا على قرار الحكومة السورية بمصادرة أموال المفكر والكاتب والمعارض ياسين الحاج صالح ، أدعوكم إلى تدوال كتبه وقرائتها .. لنرسل بذلك رسالة واضحة مفادها " أنهم مصرون على المصادرة والتضييق ونحن مصرّون على أن ننتج فكرا ً وحرية "

صدر للكاتب كتابان :

الأول : دراسة بعنوان "سوريا من الظل: نظرات داخل الصندوق الأسود" ، 2010

عن دار جدار للثقافة والنشر.

وتجدونه في :
- مكتبة سنابل في مصر ، شارع صبرى ابو علم مع تقاطع شارع شريف 23926593

- مكتبة البلد، مصر -31 ش محمد محمود- أمام الجامعة الأمريكية

- دار المعرفة للتوزيع ، جدة ، السعودية هاتف : 0096626514222

- وتستطيعون تحميل نسخة إلكترونية من الكتاب

الثاني : كتاب "أساطير الآخرين: نقد الإسلام المعاصر ونقد نقده". 2011

عن دار الساقي .

وتجدونه في :

- مكتبة نادي الكتاب السعودية - المركز الثقافي العربي المغرب - مكتبة الساقي لندن - المكتبة الوطنية البحرين - دار الحكمة الإمارات - دار الأمان المغرب - الدار الوطنية الجديدة سوريا - دار الأهلية للنشر والتوزيع الأردن - دار أقلام مصر - مكتبة المعرفة السعودية - دار البراق فرنسا - مؤسسة زين المعاني الإمارات - مكتبة آفاق المعرفة الكويت - مؤسسة الأيام البحرين

- أو يمكنكم شراء نسخة من النيل والفرات من هنا

- لمن في سوريا ، السؤال في المكتبات الكبرى عن توافر الكتاب وإمكانية تأمينه من دار الساقي ، او دار جدار

الأيفنت على الفايس بوك ..

يمكنكم قراءة :
لمحة عن حياة الكاتب والمعارض ياسين الحاج صالح من مدونة كبريت

لمحة عن حياة الكاتب في ويكبيديا

مدونة الكاتب " بدل ضائع "

على فكرة ؟

2011-10-04T15:49:00.001+03:00

قال المسيح " ان المحبة لن تسقط ابدا " ،

لذلك إي شيء تراهنون عليه دونها ..
فهو ساقط ساقط

* * * * * *

كل شيء في بلادي قد تغير
إلا أنتم
فلا يعقل أن نعيد كل شيء إلى الوراء
أوليس من الأسهل أن نغيركم أنتم ؟

* * * * * * *

هل يشمل قرار منع الاستيراد ؟
منع استيراد الحلول الأمنية الفاشلة
التي جربتها كل الأنظمة الديكتاتورية
في العالم ؟

* * * * * * * *
أنت مصّر انك تود التغيير

لكن ليس بهذه الطريقة

ولولا هذه الطريقة

لما استطعت اصلا أن تعبر أنك تريد التغيير

* * * * * * * * *

بعد الثورة في سوريا
لا اعتقد انني سأستطيع
أن أقول لرجل ما اني سأحبه إلى الأبد
لقد حزفنا “ إلى الأبد “ من اللغة

لمحات سورية

2011-09-28T00:56:00.001+03:00

كنت التزمت الصمت حول ما يجري

لولم يكن في بلادي

من يموتون لأجل أن نستعيد أصواتنا

* * * * *
كيف سنعبر طريق الإصلاح الطويل
ما دام ان وجودك يسده ؟

* * * * *
يقول المسيح “ إذا اجتمع اثنان او ثلاثة باسمي
أكون بينهم “

بعد مرسوم الطوارئ الآخير
أصبح إذا اجتمع اثنان او ثلاثة في سوريا

السجن مع الغرامة
* * * * *

لا يعنيني كم تحب جورج وسوف
إذا تلوثت يداه بالدماء ، فعليه أن يخضع للمحاكمة
العدالة غير معنية بقدار محبتك
وهكذا دواليك

* * * * *
متفقون أنا وأنت على أمرين اثنين

وجود المؤامرة والعصابات
ومختلفون حول من هو ضحية المؤامرة
ومن هم العصابات

* * * * *
قد نختلف على متى وكيف
سيكون المجي الثاني للمسيح
لكنني متأكدة أنه لن يأتي
على سطح الدبابة

* * * * *
كم أخشى عليكم يا أصدقائي
ان “ تدانو بالكيل الذي تدينون به “

* * * * *

ثورة .. حياة

2011-09-20T19:57:00.001+03:00

في الـ خامس عشر من هذا الشهر ، يكون قد مضى على بداية الثورة في سوريا ستة أشهر ، حاولت ان أحتفل بها في هذا الفيديو الذي يكرس بعض من ذكريات هذه الشهور

ثورة لأجل حياة أفضل ووطن للكل

وسوريا بدا “ حرية “

مين بيسقط قبل ؟

2011-09-08T01:08:00.001+03:00

اذكر تماماً ، عندما بدأت الثورة وبعيدا ً عن مطالبها ( التي يدعي البعض أنه لم يعرفها بعد ) انها ارتكزت على ثلاث ، “ دولة تعددية ، إن كنا خجلين من أن نقول دولة مدنية “، سلمية ، ولا للتدخل الاجنبي ..
اليوم يثارموضوع التدخل الخارجي و التسلح في سوريا ، والبعض ارتأى لنفسه ان يخرج عن هذه المرتكزات سواء فرديا ً او كجماعة في هذه المنطقة او تلك ، وهذا وإن بررناه بكثافة العنف والدم ، فإنه حل أسوأ من المشكلة
فالكثيرين سواء الداعمين للثورة أو الصامتين نرفض هذان الحلان جملة وتفصيلا ، فلا جرّ سوريا لنزاع مسلح هو ما نبغيه ولا المساومة بين السيادة والحرية واختيار احدهما على الاخر وارد لدينا
فإذا كان هؤلاء مدفوعون حقا ً برغبتهم الصادقة لبناء مستقبل افضل لهذا البلد ، فعليهم عن التوقف حالا ً عن اتباع المرسوم المعد لدى النظام واتباع المسار الذي خطّته لنا آلة القمع الوحشية ، فإذا كان التسلح خيارا ً ؟ فهو خيار يراهن عليه النظام أولا لترتمي الناس في أحضانه ، وقد يتبرع في تسليح الراغبين !! ويبقى النظام ( لأنه الأقوى في سباق التسلح ) و تسقط الثورة
وإن كان الناتو خيارا ً فإن السوريين المعروفون بحساسيتهم من الخارج ، سيعتنقون فكرة المؤامرة التي سخروا منها قبلا ً ويبقى النظام وتسقط الثورة
وإي اعتناق لأحد هذين الخيارين ، هو محاولة لأسقاط الثورة لا لإسقاط النظام ..

المطلوب منا اليوم ، الا نبرر هذه الخيارات وندافع عنها ، المطلوب منا ايضا عدم تحويل الثورة لمقدس لا يجب المساس به ، الشارع السوري مزيج متنوع ، قد يخطأ طائفيا ً ، قد يخطأ عنفيا ً .. ونفهمه لكننا كداعين للمواطنة واللاعنف علينا ألا نخجل من نقد أخطائه علنا ، علينا ان لا نعمل جاهدين لنعطي اخطائه المبررات او لنتجاهلها برميها على كاهل النظام في سوريا
هناك صوت اعلى من صوت المعركة ، صوتنا نحن !!! لا نريد ان نستبدل صنما بآخر ، والثورة هي نحن ، هي أن نقول “ لا “ حتى لذواتنا وللطرف الذي نحن فيه ..سئمنا التأييد “ الفول باكيج “ فعلينا الا نستبدله بمعارضة معلبة

علينا أن نتذكر أن هذه الثورة رغم الموت .. هي ثورة لأجل “ حياة افضل “ ، لنزن خياراتنا هل تقود السوريين لحياة افضل أم لا ؟
لم يعد السؤال الذي يؤرقني اليوم “ هل يسقط النظام ام لا ؟ “ السؤال هل نسقط نحن ومبادئنا قبله ؟

الصورة مسروقة من بروفايل صديق ..

اجتمعوا .. مشان الله

2011-08-29T17:43:00.001+03:00

إلى العشرين أو الثلاثين أسم من المعارضة السورية .. التي تحظى إعجابي العميق

ست شهور على بداية الانتفاضة / الثورة / الحراك ..سموها ما شئتم ، ولا زال الحراك المعارض المنظم سياسيا ً طفلا في خطواته ، أو معيدا لخطابات تعيد لذاكرتنا الخطابات التي تلقى في اروقة القيادة القطرية للبعث
لا اذكر حتى اليوم عدد مؤتمرات المعارضة التي عقدت ( سواء التي قاطعتوها او شاركتم بها ) لكنني اذكر جيدا ً خيبات املي وامل الكثيرين من الشباب ، على اصداء تلك المؤتمرات ، أشكالها وبياناتها ونوغية المشاركين فيها حتى

ست شهور وانتم لم تجتمعوا بعد ، علما أنكم تناولون اعجابنا ، نتابع تصريحاتكم ، مقالاتكم ، افكاركم وننتظر ..
وفي حين استطاع الشباب السوري اليوم ، أن ينتج فكرا وفنا وإعلاما حتى ! مناسبا ً للثورة في سوريا ،لم تلتقوا حتى اليوم لتشكلو مجلسا “ ما “ سموه ما شئتم “ انتقالي .. وطني .. معارضاتي .. لا يعنينا التسميات “

لكننا منذ ست شهور ندور في الحلقة المفرغة ذاتها : الشعب السوري والثورة تحتاج لممثل عنها .. لكن من يستطيع تمثيل الشعب السوري بدون انتخابات ؟ ونعود مجددا ً إلى الحقيقة الأولى ..الشعب السوري يحتاج تمثيلا ً اليوم

لا اريد ان اسمع بعد عن جرائم النظام في سوريا .. فأنا وكل الذين يخصصون الوقت للاستماع اليكم مدركون تماما ً طبيعة هذا النظام …
أود منكم ان تنشروا للسوريين ، رسالة واضحة عن وجود معارضة تملك رؤى مستقبلية ، تستطيع الاجابة على سؤال : ماذا بعد هذا النظام ؟ كيف ستخرج سوريا من الثورة أقوى؟

نريد منكم ان تدحضوا بصراحة مقولة ان لا بديل سياسي “ جاهز “ في سوريا .. نريد منكم ان تطمئنوا الخائفين من الفوضى ، وأن تثبتوا انه رغم التصحر السياسي الذي عاشته سوريا لا زال لدينا قيادات وسياسيين

نريد منكم الكثير باسم الثقة ، باسم احترامنا لنضالكم ، باسم تطلعنا لكلماتكم وحراككم … باسم ثورتنا ، ونتوقع الكثير

لكن بداية نريد منكم ان تجتمعوا ..
اجتمعوا مشان الله !

ليش السلمية ؟

2011-08-22T17:06:00.001+03:00

بسم الله الرحمن الرحيم

بالأيام الأخيرة آلمني جداً أنو بعض الشباب لما وصل البل لدقنهم، ولما وصل العنف لمدينتهم، بلشو ينسو الشعار يلي هنن نفسهن كانو رافعينو وهو "السلمية".. وبلشو شوي شوي يطلبو التدخل الخارجي العسكري أو عالأقل ما يمانعوا حدوثه!!

حابب بحكيي هلأ أني ذكركم وذكر حالي قبلكم ببعض المفاهيم يلي لازم تبقى راسخة بذهننا لحتى نحافظ على ثورتنا وعلى دم شعبنا..

أول شي يا جماعة بدنا نتذكر أنو رفضنا لرفع السلاح هو خير علينا، والمثال كتير كتير قريب وليكنا كلنا فاتحين التلفزيون عم نحتفل مع أخواتنا بليبيا..

يا جماعة ثورتهن بلشت 17 شباط ونحنا ب15 آذار (ولو أنو أحداث درعا يلي بلش فيها القتل الفعلي كانت بعد هالتاريخ)..

يلي بدي أوصله أنو شهداءنا بأسوأ التقارير الحقوقية يلي سمعتها لهلأ عم تقول أنو بيوصلو 2900 تقريباً..

والناس يلي عم يحكو عن المذابح وغيرها عم يقولوا أنو الشهداء بيوصلو لحوالي 8000..

بليبيا ما في رقم واضح بس بيقولو أنو عشرات الآلاااف.. وللعلم أنو الجمع بيبدأ من تلاتة وفوق.. يعني 30,000 شهيد أو أكتر

فرق شهر بيننا بس فرق العدد واضح تماماً أنه أضعاف!!

وكلنا منعرف أنو الأسد وفرق الموت تبعه مو أقل إجراماً من القذافي وكتائبه بنوب، لأ والكل بيعرف أنه كان صاحب القبضة الأمنية الأقسى عربياً..

شو سبب هالفرق بالعدد؟

السبب الأهم أنو أهلنا بالمدن المحاصرة وحتى بأسوأ الأحوال ما رفعوا السلاح..

شو بتفرق؟

يا سيدي بتفرق من ناحيتين..

أول شي دولياً: أنو لما عم يقاتل مدنيين، وعم يقصف مدنيين، والفيديوهات تثبت هالشي، وبشار وإعلامو الكذاب ما قدروا يثبتو العكس وحتى صوروا كم مسلسل مكشوفين عن مسلحين عم يطلقوا النار وما حدا صدقهم...

بقا هو رح يتركوه يقتل فترة بس الرأي العام بيضوووج وبتبدأ الشعوب يعترضوا عالدول تبعهن أنو شو هالصمت..

وبالتالي شفنا مظاهرات بكل العالم نصرة لثورة الشعب السلمية وبلش سحب السفراء والحصار الاقتصادي والمطالبة بالتنحي ولا حدا يقلي أنو هاد ما بيأثر، كل هالحكي بيأثر وبيهم النظام وإلا ما كان استمات الإعلام السوري بنفيه....

تاني شي بتفرق عسكرياً: كلنا سمعنا أنو الجيش مو دريان شو الأخبار وحتى سمعنا أنو الجيش ما بيعرفو شو المدينة يلي رايحين عليها!!!! يعني بياخدوهن على مدينة وبيقولولهن هدول مندسين سلفيين مجرمين قوصوهن..

الجيش لو شاف ناس معها سلاح وعم تحاربه كان دخل بالمعركة وزبطت الفبركة تبع النظام، بينما الجيش عم يفوت يلاقي ناس واقفة حاملة ورود وعم تنادي: الجيش والشعب ايد وحدة...

يعني وصلت رسالة لشرفاء الجيش أنو نحنا الشعب، أنا أخوك وهاد أبوك وهالشريفة أمك... وهون منصير منسمع بالانشقاقات!!

وكدليل على أنو تسليح الشعب مفيد للنظام، أننا سمعنا قصص واقعية ومؤكدة عن كتير مدن صار النظام يبعتلهن ناس يعرضو عليهن السلاح مشان يتسلحو، وكلنا منعرف أنو النظام ما رح يضر نفسو بنفسو، إذاً حمل السلاح بيفيده!!

وبالنهاية، ولو أجا كم واحد عبقري وحب يطنش هالحكي يلي فوق ويطلع السلاح بحب قلو أنو أنت بالكتير رح تدبر مسدس أو بارودة أو رشاش بالكتيييير!! النظام ما رح يجي لعندك وقتها حامل سكينة، رح يجيك بالدبابة والطيارة وبدون ما يقرب بيضرب البناية صاروخ بينزلها عالأرض بحجة وجود مسلحين...

قلي واحد مرة: بكرة بس الواحد يشوف أخوه تقوص قدام عيونو ما رح يبقى عم يقول سلمية

وبقلو لأخونا: إذا أخي باع دمه مشان البلد، أنا ما بروح ببيع البلد كرمال دم أخي!! وإلا وقتها بكون خسرت البلد وأخي...

وكلمة أخيرة: على مر التاريخ، مافي ثورة مسلحة أجا بعدها نظام ديمقراطي، ونحنا مو نيئة عن الخليقة لتزبط معنا ووالله مالنا حندفع كل هالشهداء لحتى يجينا نظام مو ديمقراطي بعدين!! أي شو استفدنا إذا راح الأسد وأجا ديناصور؟ :D

بظن لهون ما حدا بقي عم يشك بمنطق السلمية ويلي لسا ناوي يرفع سلاح بدي طلع سلاح وقوصه لأنو مالنا حابين نخسر الثورة بسببه.. وثورتنا ثورة سلمية، قلناها من أول يوم

هالتدوينة مسروقة من الصديق :مومو بج

بدي اتجوز مندس

2011-08-20T16:57:00.001+03:00

بدي اتجوز مندس وما باخد منحبكجي ..
هالمندس لو كان منتوف منطلعها درجي درجي

بدي اتجوز مندس ونحكي عن الحرية ..
ونجيب كوشات ولاد بس نخلص من البعثية

هالمندس يا عيني بيسوى مية مليون شبيح
بيعمر بلدو بإيدو ..ويا جبل ما تهزك ريح

اللي من شلة منحبك..صرعني بأمن وأمان

بيرقص و بيدربكلك وانا اتظاهر بالميدان !!!

هالمنحبكجي الجبان .. بيضل خايف من الأخوان
لو قلتلو " مدنية " ما بيفهمها هالحيوان

بيقلك بلدنا جنة .. وأنو حاميها ربي ..
وعم يشحد فيزا تيروح ع ها الغربة ..

عالدنيا ليل نهار وما همو كل مين ماتو
رغم الشهدا ،المعتقلين ما استحى ع دماتو

بعد الأخد وبعد الرد .. وشي يسار وشي يمين
بيقلي بشار منيح بس الل جنبو عاطلين ..

بدي اتجوز مندس ، ولو بالفرع مقضيها ...

وكلمة حرية منو بالدنيا واللي فيها

P.s فاصل ترفيهي تحشيشي .. جاي من أوفر دوز أحباطي .. فتغيرة شكل .. واللي حابب يلحنها يتفضل
اهداء خاص لصبايا الجروب السري

ما عندي مانع .. اني “ أمانع “

2011-08-13T21:09:00.001+03:00

قبل 15 آذار كنت فكّر أني امانع هالعدو اللي اخد الأرض وشرّد الناس وعمل العمايل ،بس المشكلة كانت وين ؟

أول مرة أنا وصغيرة تساءلت عن حقوقي اللي عم تروح بقلب هالبلد ، سكتوني عالسريع وكأني تعديت الخطوط الحمر كلها ع بعضها وقالولي “ امشي جنب الحيط وقول يا رب السترة “ومع الوقت ارتبط بمخي المسكين أنو المطالبة بالحقوق ما بتجر وراها إلا البهادل .. ووقت جيت بدي طالب “ العدو “ بحقي ..نطت براسي هالحقيقة اللي اتعلمتها من الصغر .. وما اقدرت امانع ..

تاني مرة وقت جيت بدي “ أمانع “ ، جيت بدي قلوللعدو “ “ لأ .. بيكفي لهون “ ، “ تذكرت واحد من أصدقائي مثقف وفهمان .. قولة “ لأ “ لحالها وهنت نفسية الأمة تبعنا وراح فيها تلت سنين سجن ، فحزفت كلمة الـ “ لأ “ من قاموسي واستبدلتا بسرعة بـ “ نعم “ وبصوت التصفيق ، بشرفكن في حدا فينو يمانع بدون كلمة “ لأ “

تالت مرة وقت جيت بدي امانع ، دورت ع كرامتي لاقيتا منتهكة ، دورت ع حريتي بالرأي والفكر مشان افقع العدو مقالة من تحت الدست .. اكتشفت انو اللغة تبعي لازم تكون ركيكة ومخصصة للمدح مو للذم ،دورت ع ثقتي بنفسي حسيت انو ع قد ما عاملوني اهل البيت على اني مواطن نصف نجمة ، اقتنعت… دورت عالعلم لاقيت فروعة الامن اكتر من الجامعات

وقت جيت بدي أمانع ، واحتج على سرقة هالأرض منا ، اكتشفت انو جسمي تعوّد عالسرقة وما عادت تثير حفيظتي او انزعاجي .. انا ببساطة مواطن منهوب منهوب فصفت على هالقطعة ارض ؟

انا ما عندي مانع أني “ أمانع “ ، وما عندي مانع حتى تكون قضية فلسطين قضية العرب المركزية والأولى ..

بس لأمانع .. لازم رجّع حريتي وكرامتي وصوتي

لازم رجّع إحساسي أنو هالبلد بلدنا والأرض اللي راحت قطعة منا وألنا حق فيها ،

لازم ارجع درّب لغتي على لأ وبيكفي .. وذكّر حالي أني أنا والمواطنين المتلي منستاهل حرية وبلد وحقوق

من بعد 15 آذار ، انا صار فيني أمانع ..