राजस्थानी

Radio Maruwani

2011-05-20T10:58:00.003+01:00

RAJSTHAN DIWAS __ DNIK NVJYOTI ,JAIPUR

2011-04-07T12:57:00.000+01:00

केइ वार

2010-12-13T18:11:00.002Z

म्हे म्हारो नांव भूल जावूं,
भींत माथै खींचदूं कोरी लींगटियां,
भींत सूं म्हारो आंतरो
अेक पूरो इतियास,
आफळूं संवेटण सारु
मारग रा मांडणा
उमर रै भागोड़ै गोवै,
जाळ अर कैर रै ओळै दोळै
चढाय धजा
बण जावूं देवळी
आखा अर जोत रै सागै
रातीजोगै री बोलमा
करवाय दूं केइ वार,
बगत री बाय
थरपीजै नूंवा थांन
आवै नूंवां भोपा
दीरीजै नूंवा परचा
अर म्हे
आं सूं अळगो
भटकतो फिरुं छांणा अर सिणियां नै,
केई वार म्हे
चढ कागदां री पूठ
पून रै सरणाटै पूंगू मनमरजी रा हलका में
करतौ सांनियां
घालतौ उंधी सीधी आडियां
नाचतौ रैवूं
गमण लाधण री लुका छिपी,
जूनी साळां ,ओरण ,नाडियां
सोधतौ फिरुं
कांई ठा किणनै,
केइ वार जद म्हे म्हारो नांव भूल जावूं........

लिखारा : अर्जुनदेव चारण

सैंया सुणो तो सरी !

2010-12-08T17:50:00.000Z

रामजी दयालु जणे क्यूं बिछड़ी
गाय दूजता गोडा फूटा
भैंस दूवता ढकणी फूटी
घर में जाता सासू रो दुख लागो
घर में जाता बारै वांता!
वातां पाणी जातां
धरमराज री पोळ आगे
जमड़ा मारसी लातां
राती जोगा में राजी बाजी!
हीड मींड गावे गीत
लापसड़ी लुंदा मारे
राम आवे न सीत
चोखा घर रा मोठ बाजरी !
आगा उंडा मेले
कांकरा रा दाणा लेने
साद बामण ठेले
सैंया सुणो तो सरी

रामजी दयालु जणे क्यूं बिछड़ी !?

हिवड़े रा भाव

2010-12-08T17:23:00.000Z

सबदां रै ढीले बंध में

कियां बाधूं !

हिवड़े रा भाव मरम ढाळूं तो

लिपि विखरे

मातरावां सूं नी ताबै

आखरां सूं आपळता

स्वरां नै नीं सांबळै

इण हिये रा भाव !

सूत्र बणा र सांवट ल्यूं

फर्मा में ही टीप द्यूं

रीत रिवाज सूं अळगा

गणित विज्ञान नी है

हिवड़े रा भाव

जो सोचूं

वै कियां लिखूं

सोचां नै समझ समझावै

थाम थाम र राखूं पण

म्हासूं धके भाज जावै

गोखां सूं झांक इ ल्यै

हिवड़े रा भाव
-किरण राजपुरोहित नितिला

राजस्थानी !!

2010-12-08T05:05:00.000Z

अेक अेक नै क्यूं बताणी पड़े

क थांरी भासा राजस्थानी !

थे उठो थे जागो अब

थांरो फरज राजस्थानी !

निज घर में निज रै थाने

क्यूं अणजाणी है राजस्थानी

मना मना र बात मनवावां

अेड थारै संताना राजस्थानी !

डूंगर री कांई बात करां

पगां नीचली बळै राजस्थानी !

पण सदा न यूं रेसी जी

अब समै बदलै है राजस्थानी !

रीढहीनां है वे लिजलिजा प्राणी

जिका थनै कुरावे राजस्थानी !

चोटी सूं अेक वार आइजै नीचै

ईसो इज समै है राजस्थानी !

वो इज पोछो उठै थरपीजै

चोखो समै है आवै राजस्थानी!

-किरण राजपुरोहित नितिला

राजस्थान रा लूण हराम

2010-07-01T21:14:00.000+01:00

इयूं तौ आखै आर्याव्रत मांय थांनै लूण हरामीयां रा घणां नांव मिळै ज्यूं कै आमेर रौ राजा मानसिंघ इत्याद. पण अठै आपां बात करां लारला 100 सुं 150 बरसां मांय राजस्थान रै सागै लूण हरामी करण वाळा भारत रै इतिहास मांय महान गिनीजन वाळा लोगां री. आ बात तौ सगळा जाणै कै भारत सरकार री पोथीयां मांय छत्रपती शिवाजी नै त्रासवादी अर अकबर नै महान केवीजै.
आवां आपां जाणा अबार रा लूण हरामी. थोड़ा घणा तौ राजस्थान रा पण दूजा अेड़ा जिणा रौ राजस्थान सूं कांई लेणौ देणौ कोनीं पण लूण हरामी करण मांय सगळां नै लारै बैठावै. माफी चावूं सगळां सूं क्यूं कै थे अबार घणकरा अेड़ा नांव सुणौला ज्यांरी थे सुपणां मांय ईं कळ्पणा नी कर सकौ, पण हकीकत बतावणी म्हारौ फरज समझू, घणी खम्मा सा :

पं. मदनमोहन मालविय : अचुम्भौ हुवै ? पण हकीकत आ कै पंडितजी बिकाणै (बिकानेर) अर जोधाणै (जोधपुर) रा घणा आंटा मार्‌या अर महाराजा गंगासिंघजी अर महाराजा उमेदसिंघजी सूं काशी हिंदू विश्वविद्यालय मांय राजस्थानी भासा रौ डिपार्टमेंट खोलण रै नांव पर खासा पईसा लूंटिया. काशी हिंदू विश्वविद्यालय तौ बण्यौ पण राजस्थानी रै वास्तै डिपार्टमेंट तौ कांई इणरौ नांव कै इतिहास ईं दुर-दुर तांई निंगे नीं आवै.
सरदार वल्लभ भाई पटेल : सरदार जी रौ राजपुताना मांय घणौ आवणौ जावणौ रेवतौ. महाराजा उमेदसिंघजी अर गंगासिंघजी जैड़ा दान दाता जकौ बैठ्या हा. कोंग्रेस पार्टी रै वास्तै घणा रुपिया भीख मांय ले जावता. राजपुतानै री आजादी अर इणरी भासा-संस्क्रती री रखवाळी रौ आश्वासन ईं पटेल साब दे ग्या हा. भारत सूं अंगरेजां रै जावता ईं हाथ में दिल्ली री सत्ता मिळ्ता ई असल रंग दिखावणौ चालु कर्‌यौ. पटेल साब घणी कोशिश करी अर अेकवार तौ सिरोही जिल्ला नै गुजरात मांय लेग्या. सिरोही री पिरजा रै विरोध रै बावजुद अंबाजी गुजरात में राख’र आबू तक रौ हिस्सौ राजस्थान नै दियौ अर हर संभव कोशिश करी कै आबु नै गुजरात मांय ले लेवै. गुजरात मांय खुद री मायड़भासा गुजराती रा हिमायती बण्या रह्‌या अर राजस्थानी री राष्ट्रवाद अर देशहित रै नांव पर बळी लेवण मांय पटेल रौ हाथ सबसूं आगै है.
इंदिरा गांधी : भारत री प्रधानमंत्री बण’र इण पद रौ घणौ गळत फायदौ उठायौ महाराणी इंदिरा गांधीजी. भारत मांय इमरजेंसी रै लगा’र तानाशाही राज चलावण वाळां मांय हालतांई फक्त अेक नांव आवै अर वौ नांव इंदिरा गांधी रौ. राजपुताना अर देस रै दूजा राज्यां रौ जद भारत मांय विलय कर्‌यौ उण बखत रा विलय पत्र माथै साफ लिख्यौ हौ कै ना तौ भारत सरकार अर ना ईं उण राज्य रौ प्रमुख (राजा) या उणरा उत्तराधिकारी इण विलय पत्र मांय कोई फेर बदळ कर सकै. लोकतंत्र आया पछै ईं हर जागा पिरजा खुद रै राजा नै बोट देवती आज ईं अेड़ा उदारण देखण मांय आवै, ज्यूं कै ग्वालियर, बिकाणौ, जोधाणौ. जद गायत्री देवी री एतिहासिक जीत गीनिज बुक ओफ वर्ल्ड रिकोर्ड मांय आयी तौ इंदिरा गांधी रातौ रात संविधान मांय फेर बदळ करनै सगळा राजावां सू वांरी पदमी, प्राविपर्स सै की खोस लिया. राजपरिवार रै म्हैला उपर छापा नाख’र खजाना लुटिया अर वौ खजानौ कठै गयौ हाल तांई कोई हिसाब कोनीं. अगर विलय पत्र मांय साफ लिख्यौ है कै इण मांय कोई फेरबदळ नीं कर सकै तौ इंदिरा गांधी कुण हुवै फेरबदळ करण वाळी. इंदिरा गांधी री लुण हरामी इतिहास मांय भारत री राजस्थान रै पुठ मांय खंजर मारण वाळी बात रै रुप मांय हमेश जाणीजैला.
स्वामी दयानंद सरस्वती : स्वामीजी मूळ रुप सूं गुजराती हा. गुजरात मांय बापड़ौ री दाळ गळी कोनीं अर बार-बार मारवाड़ नरेश रा पांवणा बण’र जोधाणै पुंग जावता. हिंदी रा खासा हिमायती हा अर राजस्थानी रा विरोधी. स्वामीजी गुजरात वाळौ नै तौ हिंदी रौ पाठ पढा कोनीं सक्या पण जोधपुर नरेश सुं हमेश हिंदी नै राजभासा बणावण री वकालत करता रेवता. आखर इण खोटा करमां रै कारण इयूं केविजै के जोधाणै मांय स्वामीजी नै ज्‍हैर देरीजियौ. आज स्वामीजी रा चमचा (चेला) आर्य समाज रै नांव माथै राजस्थानी भासा रै विरोध रौ आंदोलण छेड़ राख्यौ है.
जयनारायण व्यास : व्यास जी मारवाड़ राज्य रा प्रधानमंत्री हा. इयांनै प्रधानमंत्री पद ओछौ लागतौ अर एकरकी महाराजा हनवंतसिंघ नै केवै ”बापजी, आप घणौ राज कर्‌यौ इब म्हानै करण दौ”. मारवाड़ रा अे प्रधानमंत्री कोंग्रेस री बातां मांय आय’र खुद रै राज्य सूं लूण हरामी करी अर आखै राजपुतानै रा प्रधानमंत्री बणन रा सुपणा देखण लागा. आ बात न्यारी है कै पेला चुणावां मांय इणांरी जमानत जब्त व्हेगी ही. मारवाड़ राजघराणै सूं संबध राखण वाळा लोग आज ईं आ बात मानै कै महाराजा हनवंतसिंघजी री अपघात मौत मांय व्यासजी रौ हाथ है.!
सिंधी समाज : भारत पाकिस्तान रा जद भागला पड्या तौ सिंधी हिंदू समाज नै सिंध छोड़णौ पड़्यौ. पंजाब अर बंगाळ रै ज्यूं सिंध रा दो टुकड़ा नीं करिज्या अर सिंधी समाज रै कनै माथौ ढाकवा नै ईं जगा नीं बची. अेड़ा समै में मारवाड़ नरेश महाराजा हनवंतसिंघजी अर बकनर नरेश महाराजा सार्दुल सिंघजी आगे आया अर सिंधी समाज नै आसरौ दियौ. इण समाज नै राजपुतानै री मारवाड़ रियासत अर बीकानेर रियासत में रेवण नै घर गुवाड़ी अर बिणज वौपर रै वास्तै पुरौ सैयोग राज सूं मिळ्यौ. इण पछे ऐ आज रे राजस्थान में ठोड-ठोड पसरग्या ने आपरो जाचो ज़चा लियो ने लारै जाय’र इण समाज री युनिवर्सिटी अर पोसाळां बणावण वास्तै ईं पुरौ सैयोग दियौ. इण समाज री भासा अर संस्क्रती री रिछपाल करण में राजस्थानी समाज हमेश आगे रैयौ है. इब इण समाज री लूण हरामी आ कै औ समाज राजस्थानी भासा संस्क्रती री रिछपाल री जदै ईं बात निकळै उण समै खुद री टांग सैं सूं पैली अड़ावै. औ समाज आ बात समझण री कोशिश नी करै कै जद सिंध सूं आया उण समै अठै आय’र हिंदी सिखी व्यूंईं राजस्थानी ईं सिखी. सिंध पाकिस्तान मांय रेवण वाळा राजस्थानी भासी ईं हमेश सिंधी नै मान संम्मान दियौ है.

हाल ईं घणां दूजा नांव है, पण फेरू कदै.

जै राजस्थान! जै राजस्थानी!!

- हनवंतसिंघ राजपुरोहित

अम्बा थारौ आसरो

2010-04-10T23:42:00.000+01:00

गढं जोधाण उपरे, बैठी पंख पसार ।

अम्बा थारौ आसरो, तूं हीज है रखवार ॥

चावण्ड थारी गोद में, खेल रह्‌यौ जोधाण ।

तूं हीज निंगे राखजे, थारा टाबर जाण ॥

तूं राणी ब्रम्हाण्ड री, जग री पालण हार ।

किण रै आगे जायनै, मांगू हाथ पसार ॥

तूं शक्ति तूं सरस्वती, तूं लक्ष्मी तूं माय ।

इक थारी किरपा होयां, रिध सिध सारा आय ॥

दे दे इसड़ौ दीद मद, होवै मन तिरपत ।

अटल लोय लागी रहे, चावण्ड चरणां नित ॥

ममतावां री डोर बट, बांध दई चरणाह ।

मृग तृष्णा रेवै नहिं, तरसै नहिं हिरणांह ॥

चुग चुग डोरा मोह रा, बटलूं डोर अजब्ब ।

चावण्ड चरणां बांध दूं, मांडू मौज गजब्ब ॥

करणी री किरपा तणी, आहीज बड़ी पिछाण ।

चित चरणां लागण चहै, सफळ जमारौ जाण ॥

रचित : महाराज प्रेमसिंघ

राजस्थांन दिवस

2010-03-30T10:00:00.000+01:00

राजस्थांन दिवस मनावण री मन मांय उमक जागी, अेक’र पाछौ टटोळ्यौ जकौ पोसाळां मांय बांच्यौ हौ. राजस्थांन कंया बण्यौ अर इणरौ इतिहास कांई हौ.

सब देख’र लागौ कै फक्त इणरौ नांव इज राजस्थान पड़‌यौ छै, राजस्थान मांय रेवणीयौ राजस्थानी कुहावै पण वौ ई फक्त नांव रौ राजस्थांनी, उणनै उणरी भासा अर संस्क्रती सूं हेत राखण रौ हक ईं नीं दियौ भारत सरकार.

सरदार पटेल राजपुतानै रै सगळा राजावां नै लाळा-लुंभा करनै अर वांनै वांरी अर वांरै रईयत (प्रजा) री भलाई बताय’र भारत मांय विलय वास्तै राजी कर दिया. इणरै साथै ईं अठा री संस्क्रती, अठा री सभ्यता, रीति रिवाज सैं कीं खतम कर दियौ. भारत मांय विलय रै साथै ईं आपां आपणी हजारूं बरसां री परंपरा, भासा अर संस्क्रती रौ राष्ट्रीय अेकता अर अखंडता रै नांव पर समर्पण कर दियौ.

राजस्थांनी भारत मांय सबसूं विशाळ भाग मांय बोली जावण वाळी भासा छै. आ भासा आखै राजस्थांन, मध्य प्रदेश रै माळवै, उत्तर गुजरात, पाकिस्तान रै सिंध, थारपारकर अर पंजाब रा घणकरा इलाकां, हरियाणा अर इणरी अेक बोली गुजरी तौ कश्मिर, पाकिस्तान, अफगानिस्तान, चेकोस्लाविया अर सोवियत रुस रा घणकरा देसां मांय बोलीजे.

भारत सरकार राजपुतानै नै राजस्थांन नांव तौ दे दियौ, पण राजस्थांन रा प्राण अठा री भासा नै मानता नीं दी. राजस्थांन री सगळी बोलियां सूं मिळ’र जै भासा बणै वा अेक राजस्थांनी नै इण री बोलीयां रै हिसाब सूं तोड दी अर इणनै हिंदी भासा री अेक बोली बताय दि.

भारत सरकार नै औ डर ई सतावै कै जिण हिंदी भासा नै राष्ट्रभासा बणावण रौ वा सुपणां देखै छै, अर बोलै छै कै आ भासा दुनीया री तीजी सबसूं ज्यादा बोली जावण वाळी भासा छै. राजस्थानी भासा नै मान्यता मिळ जावै तौ इण भारत सरकार री आ बात झुठी हु जावै, क्युं कै राजस्थांनी अेक स्वतंत्र भासा रै रुप मांय भारत री सबसूं ज्यादा बोली जावण वाळी भासा छै.

राजस्थान रै भारत मांय विलय सूं राजस्थांन नै अेक हिसाब सूं गुलामी इज हाथ लागी है. भारत मांय रेवता राजस्थांनीयां नै आपरी भासा वापरवा रौ इधकार कोनीं, जिणसूं वांनै वांरै राज्य मांय भासा रै आधार पर मिलण वाळा सगळा हकां सूं हाथ धोवणा पडे छै. राजथांनीयां नै वांरै खुद रै राज्य मांय नौकरी नीं मिळै. दूजा राज्यां रा हिंदी भासी आय’र अठै नौकरी करै अर आपणा राजस्थांनी भाई प्रदेसा कांनी न्हावै.

दूजी कांनी पोसाळां मांय शिक्षा हिंदी भासा मांय हुवण सूं टाबरां नै भणाई मांय तकलिफ आवै. टाबर डाफाचुक व्है जावै कै, घरै तौ वौ दूजी भासा बोलै अर पोसाळां मांय दूजी भासा छै. वौ खुद री भासा नै हिनता री निजर सूं देखण लागै. अेड़ौ टाबर ना तौ हिंदी बराबर सिखै ना ई राजस्थांनी रौ ग्यान हुवै. सेवट ૪-૫ पास करनै वौ पोसाळां (स्कुलां) छोड’र प्रदेशां कांनी मुंडो करै.

राजस्थांन रै भारत मांय विलय सूं अठा रै मानखां नै बेरोजगारी मिळी, लोगां नै आपणी भासा-संस्क्रती रै प्रती हिन भावना मिळी. पछै बतावौ कैड़ौ राजस्थांन दिवस. हकिकत मांय तौ ૩૦ मार्च नै राजस्थांन वासियां नै काळा दिन रै रुप मांय मनावणौ चाईजै. लोग केह्‌वै इण दिन राजपुतानै री सगळी रियासतां आपस रौ बैर भुलाय’र अेक हूगी, ना आ बात नीं है, राजस्थान सूं पैली जद राजपुतानौ हौ उण समै अेकता अबार रै राजस्थान करता वधारै ही, हर रियासत री राजभासा राजस्थानी ही. लोगां रै कन्नै रुजगार हौ अर आपसरी मांय घणौ भाईपौ हौ.

रहसी राजस्थान, राजस्थानी राखिया ।

Are you Rajasthani?????

2009-11-04T13:12:00.000Z

If yes, then please note down that RAJASTHANI is our language and not HINDI......... Please don't use this language as this language is destroying our culture and our language.

Since last 60 years all people of our rajasthan are using HINDI, just because of this we are still Underdeveloped as a state.

Because of HINDI, Following are main problems in Rajasthan:

There is huge unemployment in Rajasthani people, because anyone who knows HINDI can apply for job in Rajasthan and work there. If you know, Rajasthan is very low populated state and UP & BIHAR are higly populated area. They don't get job there and apply in Rajasthan.·
Almost all the call centre relating to Mobile phone, Electricity, Gas and many more use HINDI as the only language and no one is using Rajasthani. Because of this many people from UP, Bihar, MP, Punjab, Himachal, Delhi, Uttarakhand, Jharkhand, Chattisgarh are getting jobs at these call centres in Rajasthan and because of this lots of Rajasthanies are losing their jobs in their own state.
All the education system in Rajasthan is in HINDI; because of this people from UP & BIHAR are getting jobs to teach all most all the subjects in Rajasthan. This is one of the reasons of Unemployment.

Now you will ask what does this matter, INDIA is one country and anyone can work anywhere:

In other state like Maharashtra, Gujarat. All the jobs are based on their own language so all the people of the state are getting first chance and prefrence to get jobs there. Rajasthani, some passing graduation and some leave in-between. They run out of the state because they are not able to get job in Rajasthan. ·
These Rajasthanies who run away from state are become Chay-wala, Bhangar-wala etc in other state.

Influence of HINDI on Rajasthan and Rajasthani culture:

People hesitate to speak Rajasthani. Most of families nowdays speak HINDI to talk in between family. If they do so... where is the family value remain? We are just like stranger in our own family (because we speak with strangers in HINDI)·
People think that whoever speak Rajasthani are Anpadh-Ganwar·
We lose our cultural value and lose our ancestor's connections·
Because of HINDI there is huge unemployment in Rajasthan and Rajasthan remain under-developed.·
We already lost two of our own scripts in which we were writing our language (Many people are asking ''is there any script of Rajasthani language?'', yes there was which we have already forgotten)·
Rajasthani language is now corrupt. Nowdays lots of HINDI words are mixed with Rajasthani. Because of this we lost lots of original Rajasthani words from our language.

There are many more to say, but I think you will notice many more thing from this. This is 60 years time period in INDIA. We have lost many things. Our state is still poor. Just wake-up and join us to fight for our state, our culture and our language.

Just remember, your language is RAJASTHANI.... You are known as Rajasthani or Marwadi. If you don't speak your Rajasthani or Marwari, then I don't think you will be identified as Marwari in near future. Don't lose your identity.

Jai Rajasthan, Jai Rajasthani

From The son of Marudhar des Rajasthan,

HanvantSingh Rajpurohit

(Proud to be Rajasthani)

घोड़ळिये री करी वीणती, मिळ्यो बछेरियो

2009-10-29T23:10:00.000Z

अेक जाट अळगै गांव पाळौ जावतौ हौ। आसोजां रौ तावड़ौ हो। च्यारूंमेर जांणै झाळां दाझै। लांबी भांय। जाट परसेवा में घांण व्हैगौ। उणरी फींचा तूटण लागी। पण जोर कांईं करै। पैंडौ तौ हालियां ही कटै। धमेक बिसाई खावण सारू वौ खेजड़ी री छींयां में लातरनै हेटै बैठो। ऊभी आंगळियां करनै रामसापीर नै वीणती करी—रामसा पीर, थूं घट—घट रौ वासी है, दुखां रौ मेटणहार है, पछै म्हारै मन री पीड़ा थारा सूं छांनी क्यूं? जे अबार भगत री पीड़ा जांणनै अेक घोड़लियौ भेजदै तौ थारा जलम—जलम गुण गावूं।

सताजोग री बात के ज्यूं ईं आंख्यां मींचनै वीणती करी के उणनै आवाज सुणीजी—औ कुण बैठौ है? जाट जांणियौ के रामदेवजी सांप्रत परगटिया है। वौ आंख्यां मींच्यां थकां ईं बोल्यौ—औ तौ म्हैं आपरौ भगत हाजरियौ जाट हूं। पाछी आवाज आई—अठै क्यंू बैठौ? जाट जाणियौ के आज तौ रामदेव बाबौ तूठौ ही तूठौ। हाथ जोडऩै कह्यौ—बाबा, एक घोड़लिया री खातर बैठौ हूं। लांबौ गांवतरौ है। अबै म्हारा सूं अेक पावंडौ ई धकै नीं चालीजै। थांरै तबेला में अलेखूं घोड़ा है। देदै रामसा—पीर, अेक थाकोड़ौ ई टारड़ौ देदै।

आ कैयनै जाट आंख्या खोली तो देखै के साम्ही घोड़ी री लगाम पकडिय़ां अेक असवार उभौ। घोड़ी रै अड़ौअड़ एक नैन्हौ सीक बछेरियौ निगै आयौ। घोड़ी रौ असवार जाट नै रौब सूं कह्यौ—घोड़ी मारग में ठांठ दै दियौ। म्हनै दिन बंधियां पैली गांव पूगणौ जरूरी है। चाल फुरतरी कर। इण बछेरिया नै खांधा माथै उखण लै। बछेरियौ कंवळौ है, इणरा पग सावळ जमे कोनी। मोटियार काठी है, लै अबै मोड़ौ मत कर। इण बछेरिया नै माथै उखण अर घोड़ी रै साथै —साथै चाल।

जाट जाणियौ, आ तौ जबरी व्ही। म्हैं तौ चढ़ण सारू गीत गाया, आ वीणती तौ सांम्ही मूंघी पड़ी। कह्यौ—बापजी एक चिलम पीवूं जितै थोड़ा सुस्तावौ। जाट आपरी कडिय़ां सूं बंधी पावोरी खोलनै जरदौ काढिय़ौ। चिलम भरनै सिळगाई। असवार घणौ आंचौ करियौ तौ वौ पांच सातेक फूंका खाचनै ऊभौ व्हियौ। घोड़ी रा बछेरिया नै पूठ माथै उखणियौ अर घोड़ी रै साथै—साथै वहीर हुवौ। मन में विचार करतौ जावतौ के रामसा पीर हेलौ सुणियौ पण सांभळियौ कौनीं। म्हैं तौ म्हारे बैठण सारू घोड़ौ मांगियौ हौ पण बाबौ म्हारै ऊंचावण सारू बछेरियौ भेज दियौ। वीणती भरै तौ पड़ी पण आराम री ठौड़ दुख देवण नै।

आपणी ओळख

2007-10-16T15:19:00.000+01:00

आजादी मिळ्यां पछै 30 मार्च 1949 रे दिन राजपुताना री सगळी रियासतां नै अेकठ कर जिण राजस्थान प्रांत रौ गठण व्हियौ, उणरै साथै सगळां सूं म्होठी विडंबना रह्‌यी कै उणरा रैवास्यां नै आपरै काम-काज, विकास अर राज रै साथै संचार-संवाद सारू आपरी मायड़भासा (मातृभाषा) नै बरतण रौ इधकार अर सुविधा नीं हासल व्ही. वां नै आ समझावण री कोसीस करीजी कै शिक्षा, विकास अर राज-काज मांय आपरी भागीदारी बधावण सारू वां नै बेगी-सूं-बेगी उण संपरक भासा नै अंगीकार कर लेवणी चाईजै, जिणरौ राष्ट्रभासा रै रूप मांय पुरौ आव-आदर करै अर उण नै आगै बधावै, पण उणमांय वां री मायड़भासा कठै आड़ी आवै अर उणसूं विकास में कठै फांटौ पड़ै, इण बात रौ उथळौ वां नै किणी नीं दियौ. वांनै इण बात रौ ईं गाढौ अफसोस रह्‌यौ कै वां अंग्रेजी हकूमत अर देसी राजावां सूं लड़ती बगत अर आपरी जीवारी सारू जिण भासा माथै अथाग भरौसो राख्यौ - वांरौ इतिहास, संस्क्रती, रीत-रिवाज, साहित, गीत-संगीत, बिणज-बौपार अर चिट्टी-पत्री सगळौ-कीं परी उणी भासा मांय संज आवतौ, वा भासा आजादी मिळतां ईं रातू-रात राज री निजर मांय इत्ती अकारथ अर अणखावणी किण भांत व्हेगी? नुंवै राज री इण नीती रौ म्यानौ भला कुण बूझतौ अर किण सूं बूझतौ, जद फैसलौ लेवण वाळां मांय वां रा ई आगीवाण भेळौ हूंकार भरियौ व्है?

राजस्थान री सगळी बोलियां रै रुप-गुणां रै मेळ सूं बण्योड़ी राजस्थानी भासा रै मानक सरूप रौ बैवार सन्‌ 1857 री लड़ाई सूं ई मोकळा बरस पैली सूं अठा रै साहित अर कळा-रूपां मांय बखूबी देखण नै मिळै अर उणी मानक सरूप मांय लिख्योड़ै अथाग साहित अर दूजा कळा-रूप राजस्थानी री लूंठी विरासत मानिजै. उण विरासत माथै राज ई मोकौ आया घणौ गुमेज दरसावै पण उणरी मान्यता रौ सवाल सामी आवता ई जाणै क्यूं राज री सगळी कारवायां मौळी पड़ जावै.

आजादी मिळ्यां पछै जिग्यां-जिग्यां टाबरां री स्कूलां खुली. हरेक हलकै अर टाबर आपरै घर-गवाड़ मांय मारवाड़ी, मेवाड़ी, ढूंढाड़ी, हाड़ोती, वागड़ी, मेवाती, माळवी क ब्रज बोलता (ब्रज टाळ ए सगळी राजस्थानी री बोलीयां है, ज्यूं हरेक समर्थ भासा मांय व्हिया करै), पण स्कूली भणाई तौ हिन्दी-अग्रेजी मांय ई व्हैती, वांनै राजस्थानी रै मानक सरूप री ओळख कुण करावतौ? बड़ा स्‍हैरा मांय तौ स्कूलां टाळ हिन्दी नै ई कुण पुछै?

अेक ड़ा हालात मांय जद प्रदेस री नुंवी पीढ़ी स्कूल-कोलेजां सूं बारै आय आपरौ आपौ संभाळियौ अर खुद री पिछाण बाबत विचार करणौ सरू कर्‌यौ तौ वा एक अजब दुविधा मांय पजगी. वांरौ समाजू ढांचौ, परिवेस, रीत-रिवाज सैं कि तौ मायड़ भासा मांय ही, पण राज-काज, भणतर अर खुद रै कमतर-करोबार स्सौ कीं हिन्दी कै अंग्रेजी मांय पार पड़तौ. जिका इणमें पैली सूं पारंगत हा अर ठायै री जिग्या माथै हा, वांरौ हाथ तौ उपर रैवणौ ई हौ, जिका कोशिस कर नै वा दियोड़ी भासा सिख लीवी, वै सीखण मांय कामयाब व्हिया पछै ई विकास अर संवाद रा मामला मांय आपरी राय मनावण जोगा कम ई मानीजिया. इणसूं भासा नै लेय’र अेक झिझक अर हिणताबोध मांय-ई-मांय बरसां पळतौ रह्‌यौ अर आगै चाल’र वौ अठै रै मिनखा रौ मांयलौ सुभाव बण्ग्यौ. इण प्रक्रिया सूं जिण लिखण-पढण वाळी पीढी रौ निरमाण व्हियौ उणरौ कन्नै आपरै मन री ओक्ता सारू नीं हिन्दी पूरसल पड़ी नीं राजस्थांनी, दूजी भासावां री बात ई कांई करीजै!

राजस्थानी कविता अठै री न्यारी-न्यारी रियासतां मांय चालती आजादी री लड़ाई रै जोड़ा-जोड़ जिण भांत जन जागरण रौ जिम्मौ संभाळ राख्यौ हौ, वा हिन्दी ई कांई सगळी भारतीय भासावां रै साम्ही अेक ओपती मिशाल ही. बिसवी सदी रै दूजै दसक मांय जठै हिन्दी पौराणिक आख्यान, रूमानी छायावाद अर नुंवै छंद-विधान मांय आपरी पिछाण सोधण सारू आथड़ै ही, राजस्थानी भासा रौ साहित सिरै हौ.

आपणी भासा रै बिना कियां

2007-07-13T15:00:00.000+01:00

मायड़ भासा नै भूल कियां, मायड़ रौ करज चुकावांला ।

आपणी भासा रै बिना कियां, आपणौ अस्तित्व बचावांला ॥

मायड़ भासा वा भासा है, जो घर में बोली जावै है ।

मायड़ री गोदी में टाबर जीं भासा में तुतळावै है ॥

धरती री सौन्धी महक लियां, जो घुंटी-सी पच जावै है ।

मां ममता सूं दुलरावै, जीं भासा में प्रेम लुटावै है ॥

आपणी मायड़ भासा सूं आपां ईं आपणौ सिणगार करां ।

आपणी भासा सूं हेत करया ईं आपणौ धरम निभावांला ॥

आ राजस्थांनी नुवी कोनीं, ईं रौ इतिहास पुराणौ है ।

वौ टौड अर ग्रियसन तक, इणरी महत्ता नै मानी है ॥

मरुधर री आ भासा पण, सबदां रौ घणौ खजानौ है ।

ग्रंथां री कोई कमी कोनीं, या सच्चाई समझणी है ॥

सैं लोग आपणी भासा नै, मायड़ भासा नै चावै है ।

आपां ईं मायड़ भासा रा, इब सांचा पूत कुहावांला ॥

जीं भासा में मीरा गाई, रस भगती रौ सरसायौ हौ ।

राणा प्रताप-भामासा, जीं धरती रौ मान बधायौ हौ ॥

पदमणियां सत रक्षा नै, जौहर रौ पाठ पढायौ हौ ।

धोरा धरती संगीत बणी, किस्सां में जोश सवायौ हौ ॥

वीं राजस्थांनी नै आपणौ, सगळौ अधिकार दिराणौ है ।

यो धरम निभावांला नहीं, तौ पूत कपूत कुहावांला ॥

या सांत करोड़ सपूतां री नीज भासा राजस्थांनी है ।

हरियाणै राजस्थांन अर माळवै री घर-धणियाणी है ॥

तेस्सीतोरी-इटली जायै री, सैं सूं प्यारी वाणी है ।

या मरुभोम री मरुभासा, वीरां री जोश जवाणी है ॥

रजपूतां री तलवारां पर मरुभासा धार चढावै है ।

रणखेतां री ईं भासा पर आपणौ ईं शीश नवावांला ॥

भासा आपणी रै रहया बिना, यो देस कियां बच पावैलौ ।

अर राजस्थांनी बिना कियां, यो राजस्थांनी कुहावेलौ ॥

आपणी संस्कृती नै छोड्या सूं, कियां सम्मान बचावेलौ ।

मायड़ भासा नै बिसरायां, सैं माटी में मिळ जावेलौ ॥

आपणी भासा नै अपणावौ, आपणी भासा मत दुरसावौ ।

धरती माता नै भूल कियां, माटी रौ मोल चुकावांला ॥

मायड़ भासा गळै लगावौ रे

2007-07-13T14:31:00.000+01:00

गांव-गांव ढाणी सैरां में अलख जगावौ रे

राजस्थांनी भासा नै गळै लगावौ रे

मायड़ भासा नै सगळाई हिवड़ै लगावौ रे

इण में मीरा री भगती है

इण में वीरां री सगती है

आवौ नीं अणमोल खजानौ खोल बतावौ रे

इण में पदमण री पूंजी है

आजादी इण्में गूंजी है

गफ़लत में सूतां भाया नै परा जगावौ रे

प्रीत कळसिया भर-भर पाया

हालरियौ पूतां रै सुलाया

मावड़ री ममता नै भायां कियां भुलावौ रे

सावण बरसै इंदर गाजै

ढोल नगाड़ा इणमें बाजै

सातौईं फेरा खावै लाडेसर आवै सावौ रे

कुटंब-कबीला एक राखिया

इमरत रा फळ आपां चाखिया

घर सूं काढ़ स्यान थां मत घमावौ रे

रेत में रमियोड़ी भासा

मिनखां रै मनड़ै री आसा

मानतौ मिळ जावै इणनै जतन करावौ रे

इणमें मूमल री मेड़ी है

प्रीत-रीत राचै जैड़ी है

ढोला-मारु हुया मुलक में कोई बतावौ रे

जीवड़ौ कळपावै क्यूं

2007-07-12T15:37:00.000+01:00

चंदौ खुद सरमावै थां सूं, मुखड़ौ थूं मुरझावै क्यूं ।