മറ്റൊരാള്‍

2020-05-10T22:07:00.003+03:00

രണ്ടാം വരവ്

നീണ്ട പതിനൊന്ന് വർഷങ്ങൾക്ക് ശേഷമാണ് ഞാൻ ഇങ്ങോട്ടൊക്കെ എത്തിനോക്കുന്നത്.

ഇനി ഇവിടൊക്കെ കാണും. പ്രോത്സാഹിപ്പിക്കുമല്ലോ.

എന്റെ കേരളം, എത്ര സുന്ദരം!

2009-05-27T12:22:00.026+03:00

എന്റെ ദൈനംദിന ചിന്തയില്‍, നമ്മുടെ കേരളത്തില്‍ അത്യാവശ്യം വേണ്ടുന്ന ചില മാറ്റങ്ങളെക്കുറിച്ച് ദാ ഇവിടെ എഴുതുന്നു. ഇവയൊക്കാളുപരിയായ് വേറേ ചിലകാര്യങ്ങള്‍ ആണ് ആദ്യം വേണ്ടുന്നതെന്നോ, ഇനി ഇതൊക്കെ പൂര്‍‌ത്തീകരി‍ക്കാന്‍ ധാരളം പണം വേണമെന്നോ എന്നൊന്നും എനിക്കറിയില്ല. എന്തായാലും എന്റെ ചിന്തകളില്‍ ചിലതെങ്കിലും ഇവിടെ പ്രാവര്‍ത്തികമായി നമ്മുടെ കേരളം ഇന്ത്യയ്ക്ക് ഒരു മാതൃകയായി എന്ന് വെറുതെ മോഹിക്കുവാന്‍ ഒരു മോഹം.

1. റോഡുകള്‍:- പ്രധാന റോഡുകള്‍ക്ക് സമാന്തര സംവിധാനം വേണം. അതുപോലെ ലിങ്ക് റോഡുകളും വേണം. പ്രധാന നഗരങ്ങളില്‍ മെട്രോ റെയില്‍‌വേ, ട്രാം എന്നിവ വേണം. ട്രാഫിക് സംവിധാനം വളരെയധികം മെച്ചപ്പെടണം. റോഡുകളുടെ മെയിന്റനന്‍സ് ത്വരിതഗതിയില്‍ നടത്തണം. നോ കോമ്പ്രമൈസ്.

2. പോലീസ് സംവിധാനം:- പോലീസുകാര്‍‌ക്ക് മെച്ചപ്പെട്ട വേതനം, ഭക്ഷണക്രമം, ആരോഗ്യം, കായികം, വിദ്യാഭ്യാസ ക്ഷമത വേണം. അതോടൊപ്പം തന്നെ അവരുടെ സേവനരീതിയും കാര്യമായി മെച്ചപ്പെടണം. വനിതാ പോലീസുകാരുടെ ശാരീരിക ക്ഷമത, ഡ്രസ്സ് കോഡ് എന്നിവ മെച്ചപ്പെടുത്തണം മുടി ക്രോപ്പ് ചെയ്യണം. പാന്റ്സും ഷര്‍ട്ടും ധരിക്കണം. ആധുനിക ആയുധ, വാ‍ഹന, വാര്‍ത്താവിനിമയ സംവിധാനങ്ങള്‍ വേണം. എല്ലാ പഞ്ചായത്തിലും ഇരുപത്തിനാല് മണിക്കൂറും പ്രവര്‍ത്തിക്കുന്ന പോലീസ് സംവിധാനം വേണം. കേരളാ പോലീസിലെ ഉയര്‍ന്ന ഉദ്യോഗസ്ഥന്മാര്‍ക്ക് പ്രശ്നബാധിതപ്രദേശങ്ങളില്‍‌ എത്രയും വേഗം എത്തിച്ചേരാന്‍ ഹെലികോപ്റ്റര്‍ വേണം.

3. വൈദ്യുതി:- വളരെ കുറഞ്ഞ നിരക്കില്‍ നിര്‍വിഘ്നം കിട്ടുന്ന വൈദുതി ഏത് മുക്കിലും മൂലയിലും എത്തപ്പെടണം. നോ കോമ്പ്രമൈസ്. വിതരണത്തില്‍ ഭൂമിക്കടിയില്‍ക്കൂടിയുള്ള കേബിള്‍ സംവിധാനം വേണം. നഗരങ്ങളിലും പൊതുസ്ഥലങ്ങളിലും രാത്രിയിലുടനീളം നല്ല വെളിച്ചം വേണം.

4. അരി, പച്ചക്കറി, പാല്‍ (പച്ചക്കറികളും പാലും, പാലുല്‍പ്പന്നങ്ങള്‍ കൊണ്ട് ഒഴുകുന്ന നമ്മുടെ കൊച്ചു കേരളം!) എന്നിവയില്‍ സ്വയം‌പര്യാപ്തത ഉണ്ടാവണം. ഇതിന് എല്ലാ വാര്‍ഡുകള്‍ തോറും ഗവണ്മെന്റ് സഹായത്തോടെ പ്രവര്‍ത്തിക്കുന്ന സംവിധാനം വേണം.

5. പൊതുജനാരോഗ്യം:- ആരോഗ്യ രംഗത്തെ ജോലിക്കാരുടെ സേവനവേതനം പരിഷ്ക്കരിക്കണം. പ്രൈവറ്റ് പരിശോധന നിര്‍ത്തലാക്കണം. പുതിയതായ് പഠിച്ചിറങ്ങുന്നവര്‍ക്ക് കുറഞ്ഞത് അഞ്ച് വര്‍ഷത്തെക്കെങ്കിലും നിര്‍ബന്ധ സേവനം നടപ്പിലാക്കണം. ജനങ്ങള്‍ക്ക് മെഡിക്കല്‍ പരിരക്ഷ നിര്‍ബന്ധം. നോ കോമ്പ്രമൈസ്.

6. പ്രധാന നിരത്തുകളില്‍ നടത്തുന്ന പ്രകടനങ്ങള്‍, ജാഥ, മതപരമായ റാലി എന്നിവയ്ക്ക് നിരോധനം വേണം. പണിമുടക്ക്, പൊതുമുതല്‍ നശിപ്പിക്കല്‍ എന്നിവയ്ക്ക് കര്‍ശനമായ നിയന്ത്രണം വേണം. അതിനായ് ബന്ധപ്പെട്ടവരുടെ കയ്യില്‍ നിന്ന് നഷ്ടപരിഹാരം ഈടാക്കണം. നോ കോമ്പ്രമൈസ്.

7. എല്ലാ തിരക്കുള്ള സ്ഥലങ്ങളിലും കാര്യക്ഷമമായി പ്രവര്‍ത്തിക്കുന്ന വളരെ വൃത്തിയുള്ള ശൌച്യാലയങ്ങള്‍ വേണം.

8. പരസ്യപ്രചരണ സംവിധാനം പുനരാവിഷ്ക്കരിക്കണം. ഈ കാര്യത്തില്‍ പൊതുസ്ഥലങ്ങള്‍ ദുരുപയോഗപ്പെടുത്തന്നത് തടയണം.

9. സ്കൂള്‍ പാഠ്യപദ്ധതി പുന:പരിഷ്ക്കരിക്കണം. സ്കൂള്‍ സമയം, അവധി ദിവസങ്ങള്‍ എന്നിവയില്‍ മാറ്റം വരുത്തണം. സ്കൂളുകള്‍, കോളേജുകള്‍ എന്നിവയ്ക്കെല്ലാം സ്വന്തമായി വാഹനങ്ങള്‍ ഉണ്ടായിക്കോട്ടേ. അവയെല്ലാം പെട്ടന്ന് തിരിച്ചറിയുന്ന വിധത്തില്‍ ആയിരിക്കണം. കൂടുതല്‍ തൊഴിലധിഷ്ഠിത കോഴ്സുകള്‍ വേണം.

10. ഒരു സ്ഥലത്തുള്ള സര്‍ക്കാര്‍ ആഫീസുകള്‍ എല്ലാം ഒരു സമുച്ചയത്തില്‍ പ്രവര്‍ത്തിക്കണം. ശനിയും ഞായറും പൊതുഅവധി ആയാലും കുഴപ്പമില്ല. എന്നാല്‍ മറ്റ് അവധി ദിവസങ്ങളുടെ എണ്ണം കാര്യമായി കുറയ്ക്കണം, ജോലി സമയം, സമയബന്ധിത ജോലിപൂര്‍ത്തിയാക്കല്‍ എന്നിവയില്‍ നടപടിവേണം. ഗവണ്മെന്റ് സ്ഥാപനങ്ങളില്‍ എല്ലാം കുറ്റമറ്റ കമ്പ്യൂടര്‍ സംവിധാനം നടപ്പിലാക്കണം. ജോലിയില്‍ ഹാജര്‍ നില ഉറപ്പ് വരുത്താനായ് പഞ്ചിംഗ് കാര്‍ഡ് ഒന്നും പോരാ. ഫിംഗര്‍ പ്രിന്റ് അറ്റന്‍ഡന്‍സ് തന്നെ വേണം. വലിയ ആഫീസുകളില്‍ എല്ലാം തന്നെ ഒരു ചെറിയ കഫറ്റേരിയ വേണം. അവര്‍ ചായ, കാപ്പി എന്നിവ വിതരണം ചെയ്യട്ടെ. അപ്പോള്‍ ജോലിക്കാര്‍ പുറത്ത് ചായ കാപ്പി എന്നിവ കുടിക്കുന്നത് ഒഴിവാക്കാം.

11. കുടിവെള്ളം വിതരണം വളരെയധികം മെച്ചപ്പെടുത്തണം. വേനല്‍ക്കാലത്ത് ഉണ്ടാകാവുന്ന ജലദൌര്‍ല്ലഭ്യത്തിനെതിരെ മുന്‍‌കരുതല്‍ വേണം. വെള്ളത്തിന്റെ ദുരുപയോഗം തടയണം. എത്ര സ്ഥലങ്ങളിലാണ് പൈപ്പ് പൊട്ടി വെള്ളം പാഴായി പോകുന്നത്. അതുപോലെ പൊതുനിരത്തിലെ വെള്ളംകൊണ്ട് ആള്‍ക്കാര്‍ വാഹനം കഴുകുന്നതും തടയണം. നോ കോമ്പ്രമൈസ്.

12. നീതിന്യായത്തിലെ തീര്‍പ്പ് കല്‍പ്പിക്കുന്നതിലുള്ള വേഗത കൂട്ടണം.

13. മാലിന്യനിര്‍മാര്‍ജ്ജനം ത്വരിതഗതിയില്‍ നടപ്പാക്കണം. നേരം വെളുക്കുന്നതിന് മുന്‍പ് തന്നെ നിരത്തുകള്‍ വൃത്തിയായിരിക്കണം. ഇതിന് ആവശ്യത്തിന് വാഹനങ്ങള്‍, ഉപകരണങ്ങള്‍ എല്ലാം അടങ്ങിയ കാര്യക്ഷമമായി പ്രവര്‍ത്തിക്കുന്ന സംവിധാനം വേണം. ആവശ്യത്തിന് ജോലിക്കാര്‍ എല്ലാ പഞ്ചായത്തിലും മുനിസിപ്പാലിറ്റികളിലും പട്ടണങ്ങളിലും വേണം. നോ കോമ്പ്രമൈസ്.

14. ഫയര്‍ഫോഴ്സ് നവീകരിക്കണം. തീപിടിത്തത്തിനെതിരേയുള്ള മുന്‍‌കരുതല്‍ നടപ്പാക്കണം. ‘എല്ലാ വര്‍ഷവും ഒരു വെടിക്കെട്ടപകടം ‘ എന്ന പതിവ് ഒഴിവാക്കപ്പെടേണ്ടത് തന്നെയാണ്. കടകള്‍, ഫാക്ടറികള്‍ എന്നിവിടങ്ങളില്‍‌ തീപ്പിടിത്തത്തിനെതിരെയുള്ള സുരക്ഷാസംവിധാനം ശക്തമാക്കണം.

15. എയര്‍പോര്‍ട്ട്, റെയില്‍‌വേ, ആശുപത്രികള്‍‌ തുടങ്ങിയ സ്ഥലങ്ങളിലെ സന്ദര്‍ശകര്‍ക്ക് നിയന്ത്രണം ഏര്‍പ്പെടുത്തണം. എയര്‍പോര്‍ട്ട് പരിസരത്തൊക്കെ എന്തോരം ആള്‍ക്കാരാണ് തിങ്ങിക്കൂടി നില്‍ക്കുന്നത്. അവരൊക്കെ ഇടിച്ചുകേറി യാത്രക്കാര്‍ക്ക് നടക്കാന്‍ മേലാത്ത അവസ്ഥയാണ് പല സ്ഥലങ്ങളിലും കണ്ടിട്ടുള്ളത്.

16. ആനകളെ പൊതു നിരത്തില്‍ കൂടി നടത്തിയും, അധിക ജോലിചെയ്യിപ്പിച്ചും കഷ്ടപ്പെടുത്തരുത്. അവ കാട്ടില്‍ വളരേണ്ട ജീവികള്‍ ആണ്. ലോകത്തില്‍ എല്ലായിടത്തും തടിപിടിക്കാനും എടുക്കാനും ആനകളെയാണോ ഉപയോഗിക്കുന്നത്? എത്ര പാവങ്ങളാണെന്ന് പറഞ്ഞാലും എല്ലാവര്‍ഷവും ആള്‍ക്കാര്‍ ആനയുടെ ചവിട്ടേറ്റ് മരിക്കുന്നുണ്ട്. ഗതികെട്ടാല്‍ പിന്നെ എന്ത് ചെയ്യും.

17. ദീര്‍ഘവീക്ഷണത്തോടുകൂടിയുള്ള മെച്ചപ്പെട്ട സ്പോര്‍ട്സ് നയം പ്രൈമറി തലങ്ങളില്‍ നിന്ന് ആരംഭിക്കണം. വിവാഹവും കഴിഞ്ഞ് അവരുടെ സ്വന്തം കാര്യം നോക്കി കഴിയേണ്ടവരെയാണ് ഇപ്പോള്‍ ഒളിമ്പിക്സിലും മറ്റും കളിക്കാന്‍ നിര്‍ബന്ധിക്കുന്നത്.

18. കാലാവധി കഴിഞ്ഞതും പഴകിയതുമായ ഭക്ഷണ സാധനങ്ങളുടെ ഉപയോഗം തടയണം. ഇതിനായ് കര്‍ശനനടപടി വേണം.

19. മെച്ചപ്പെട്ട മദ്യനയം വേണം. കുടിവാറ്റ് തടയുന്നതിന്‍ കര്‍ശന നടപടി വേണം. ‘അടിച്ച വഴിയേ പോയില്ലെങ്കില്‍ പോയവഴിയേ അടിക്കുക‘ എന്ന ശൈലി ഓര്‍ത്തുപോകുന്നു. അതായത് സമ്പൂര്‍ണ്ണ മദ്യനിരോനം നടപ്പിലാക്കാന്‍ പറ്റുമെന്ന് തോന്നുന്നില്ല. മുലകുടിമാറാത്ത പിള്ളേര്‍ വരെ ഒളിച്ചും പാത്തും വെള്ളമടി തുടങ്ങിയിരിക്കുന്നു. അതുകൊണ്ട് കള്ള് ആവ്യശത്തിന് ലഭ്യമാകുന്ന സംവിധാനം ആണ് നിരോധനത്തേക്കാള്‍ നല്ലത്. സര്‍ക്കാരിന് നല്ലൊരു വരുമാനവും ആകും. പക്ഷെ കരള്‍ പെട്ടന്ന് വാടിപോകുന്ന സാധനം ഉണ്ടാക്കുന്നതും വിതരണം ചെയ്യുന്നതും നിരോധിക്കണം. പൊതുസ്ഥലങ്ങളില്‍ മദ്യം ഉപയോഗിച്ച ശേഷമുള്ള പ്രകടനങ്ങള്‍, പൊതുയാത്രാവാഹനങ്ങളില്‍ യാത്രചെയ്യല്‍ , മദ്യപിച്ച് വാഹനമോടിക്കല്‍ എന്നിവയ്ക്കെതിരെ കര്‍ശന നടപടിവേണം.

20. നികുതി:- വരുമാനം കൃത്യമായി കണക്കാക്കാനും അതുവഴി വരുമാന നികുതി പിരിച്ചെടുക്കാനുള്ള സംവിധാനം വേണം.

21. സിനിമാ അവാര്‍ഡുകളില്‍ ഗവണ്മെന്റിന്റെ ഇടപെടല്‍ എന്തിനാണ്? ഒഴിവാക്കുന്നതാണ് നല്ലത്. ഏതെങ്കിലും പ്രൈവറ്റ് ഏജന്‍സിയെ ഏല്‍പ്പിക്കുക.

22. ദൈവത്തിന്റെ നാടെന്ന പേരു മാറ്റുക. എന്നിട്ട് കുറച്ചുകൂടി റീസണബിളായ എന്തെങ്കിലും ഇടുക. അല്ലെങ്കില്‍ നാട്ടുകാരെല്ലാം സ്വയം വിചാരിക്കും അവര്‍ സ്വര്‍ഗ്ഗത്തിലാണു ജീവിക്കുന്നതെന്ന്. (കടപ്പാട്: അപ്പു)

23. കെട്ടിടങ്ങള്‍, പാലങ്ങള്‍, റോഡുകള്‍, വിവിധതരം പദ്ധതികള്‍ എന്നിവയുടെ പ്രവര്‍ത്തനം ഉല്‍ഘാടനത്തിനു വേണ്ടി താമസിപ്പിക്കരുത്.

24. വാഹനവകുപ്പ്:- വാഹനങ്ങളുടെ നമ്പര്‍ പ്ലേറ്റ് ഗവണ്മെന്റ് തന്നെ വിതരണം ചെയ്യട്ടെ. അപ്പോള്‍ നമ്പര്‍ പ്ലേറ്റുകളുടെ വലിപ്പത്തിലും ഫോണ്ടിലുമൊക്കെ ഒരു സമാനസ്വഭാവം കൈവരും. 15-20 വര്‍ഷം പഴക്കമുള്ള വാഹനങ്ങളുടെ രജിസ്ട്രേഷന്‍ റദ്ദാക്കണം. പൊതുജനസേവനത്തിനായി ഉപയോഗിക്കുന്ന വാഹനങ്ങളുടെ പഴക്കം അഞ്ച് വര്‍ഷമായി നിജപ്പെടുത്തണം.

ഇത് വായിക്കുന്നവരൊക്കെ, സമയവും സൌകര്യവും അനുസരിച്ച് അനുബന്ധമായ നിര്‍ദ്ദേശങ്ങളും, മാറ്റങ്ങളും, കൂടുതല്‍ പ്രാധാന്യമര്‍ഹിക്കുന്ന വിഷയങ്ങളുമൊക്കെ എഴുതിയാലും!

അന്തിപൊന്‍‌വെട്ടം മെല്ലെ താഴുമ്പോള്‍ (പടം)

2009-03-18T17:12:00.002+03:00

അന്തിപൊന്‍‌വെട്ടം മെല്ലെ താഴുമ്പോള്‍.....

അച്ഛന്റെ സമ്മാനം

2009-02-09T15:16:00.003+03:00

വര്‍ഷങ്ങള്‍ക്ക് മുന്‍പ്, പത്താം ക്ലാസ്സ് പരീക്ഷയില്‍ അച്ഛന്റെ പ്രതീക്ഷയ്ക്കത്ര ഉയര്‍ന്നില്ല എങ്കിലും അച്ഛനെക്കാള്‍ കൂടുതല്‍ മാര്‍ക്ക് വാങ്ങിയല്ലോ എന്ന് പറഞ്ഞ് തന്ന HMT Vivek വാച്ച്. കൂടാതെ BSA യുടെ ഒരു സൈക്കിളും വാങ്ങി തന്നിരുന്നു. ആ സൈക്കിള്‍ ഇപ്പോഴില്ല. കാലങ്ങള്‍ എത്രയോ കടന്നുപോയി. ഇന്നും എന്റെ കയ്യില്‍ നിലയ്ക്കാതെ ഓടുന്ന ഈ വിവേക് വാച്ച് മാത്രം.

സായൂജ്യം

2009-02-04T12:22:00.002+03:00

മോക്ഷം പ്രാപിക്കുന്നതുമായി ബന്ധപ്പെട്ട്‌ നാല്‌ ഘട്ടങ്ങള്‍:

സാലോക്യം: ഭഗവാന്റേതായ ലോകത്തിലായിരിക്കുക

സാമീപ്യം: ഭഗവാനുമായി സാമീപ്യം പുലര്‍ത്തുക

സാരൂപ്യം: ഭഗവാന്റെ രൂപം പ്രാപിക്കുക

സായൂജ്യം: ഭഗവാനില്‍ ലയിക്കുക

ഇതിനെയാണ്‌ അദ്വൈത ചിന്ത എന്ന് വിളിക്കുന്നത്‌.

ഭക്തന്മാര്‍ ശബരിമലയില്‍ ദര്‍ശനം നടത്തിയതിന്‌ 'ഭഗവാനെ കണ്ട്‌ സായൂജ്യം അടഞ്ഞു' എന്ന് പത്രങ്ങള്‍ എഴുതിക്കണ്ടത്‌ വായിച്ചിട്ട്‌, എന്റെ അച്ഛന്‍ എന്നോട്‌ പറഞ്ഞ കാര്യങ്ങള്‍ ആണ്‌ മുകളില്‍ എഴുതിയവ.

നോറാ ഏബ്രഹാം / Norah Abraham (ഫോട്ടോ പോസ്റ്റ് - 2)

2008-11-10T13:50:00.018+03:00

മൂന്ന് മാസം പ്രാ‍യമായ ഞങ്ങളുടെ മകള്‍ നോറായുടെ ചില പടങ്ങള്‍.

കൂടുതല്‍ പടങ്ങള്‍ക്കായ് ദാ ഇവിടെ ഞെക്കുക.

“കാലമിനിയുമുരുളും;
വിഷു വരും, വര്‍ഷം വരും;
തിരുവോണം വരും;
പിന്നെയോരോ തളിരിനും
പൂ വരും, കായ്‌ വരും;
അപ്പോള്‍ ആരെന്നുമെന്തെന്നുമാര്‍ക്കറിയാം ?"

നോറാ ഏബ്രഹാം / Norah Abraham (ഫോട്ടോ പോസ്റ്റ് - 1)

2008-11-06T09:59:00.029+03:00

മകള്‍ നോറായുടെ ചില പടങ്ങള്‍

ജനിച്ച് ഇരുപത് ദിവസങ്ങള്‍ക്ക് ശേഷം..

ജനിച്ച് രണ്ട് മാസത്തിന് ശേഷം..

ചിരിക്കാന്‍ തുടങ്ങിയപ്പോള്‍..... :)

പുരികം വരയ്ക്കുന്നതിനിടയില്‍ എടുത്തത്
മൂന്ന് മാസം പ്രാ‍യമായപ്പോള്‍!

കുളിപ്പിച്ചതിന് ശേഷം..
ഇനി ഞാനൊന്ന് ഉറങ്ങട്ടെ
"ഉരുക്കിടുന്നു മിഴിനീരിലിട്ടു മുറ്റും ഭുവനൈകശില്പി;
മനുഷ്യഹൃത്താം കനകത്തെയേതോ-
പണിത്തരത്തിനുപയുക്തമാക്കാന്‍!"

പറുദീസാ നഷ്ടം

2008-11-03T07:39:00.007+03:00

ആദത്തെ സൃഷ്ടിച്ചൂ - ഏദനിലാക്കി ദൈവം
ഏകനായിരിക്കാതെ - സ്ത്രീവേണം കൂട്ടവന്‌
നിദ്രയിലാദത്തിന്റെ - യസ്ഥിയേലൊന്നെടുത്തു
സ്ത്രീയാക്കിച്ചമച്ചവള്‍ - ക്കവ്വായെന്നു പേരുമിട്ടു.

തോട്ടം സൂക്ഷിപ്പാനും - കായ്‌കനികള്‍ ഭക്ഷിപ്പാനും
തോട്ടത്തിലവരെ - കാവലുമാക്കി ദൈവം
തോട്ടത്തിന്‍ നടുവില്‍ നില്‍ക്കും - വൃക്ഷത്തിന്‍ ഫലം നിങ്ങള്‍
തിന്നുന്ന നാളില്‍ - മരിക്കും നിശ്ചയം തന്നെ.

ആദത്തെ വഞ്ചിപ്പാന്‍ - സാത്തനൊരു സൂത്രമെടുത്തു
സര്‍പ്പത്തിന്റെ വായില്‍ കേറി - സാത്താന്‍ വദിച്ചീവണ്ണം.
"തോട്ടത്തിന്‍ നടുവില്‍ നില്‍ക്കും - വൃക്ഷത്തിന്‍ ഫലം നിങ്ങള്‍
തിന്നുന്ന നാളില്‍ കണ്ണുതുറക്കും നിങ്ങള്‍
കണ്ണുതുറക്കും നിങ്ങള്‍ - ദൈവത്തെ പോലെയാകും."

നേരെന്നു വിശ്വസിച്ചു പഴം രണ്ടവള്‍ പറിച്ചു
ഒന്നവള്‍ തിന്നുവേഗം - പതിക്കും നല്‍കിയൊരണ്ണം
തിന്നപ്പോളിരുവരും - നഗ്നരായ്‌ തീര്‍ന്നുപോയി‌.

ഈശന്റെ പാദസ്വനം - കേട്ടവര്‍ ഭയന്നിട്ട്‌
നഗ്നത നീക്കീടുവാ - നില തുന്നിധരിച്ചവര്‍.
ഈശന്നു കോപം വന്നൂ-ആദത്തൊടു ഗര്‍ജ്ജിച്ചൂ:
"ഇതിന്നോ ആദമെ - നിന്നെ ഞാന്‍ സൃഷ്ടിച്ചു."

"കൂട്ടയിത്തന്ന സ്ത്രീ പഴം തന്നൂ - ഭക്ഷിച്ചൂ"
ആദത്തിന്‍ മറുവാക്കി - ലഖിലേശന്‍ കോപിച്ചു,
തോട്ടത്തില്‍ നിന്നവരെ - യാട്ടിപ്പുറത്തിറക്കി
മാലാഖമാരെ - കാവലുമാക്കി ദൈവം.

മൂലകഥാവലംബം:
വി: വേദപുസ്തകത്തിലെ ഉല്‍പത്തി പുസ്തകത്തിന്റെ രണ്ടാം അദ്ധ്യായം: ഏഴ് മുതല്‍ പതിനേഴ് വരെയും, മൂന്നാം അദ്ധ്യായം: ഒന്ന് മുതല്‍ ഇരുപത്തിനാല് വരെയുമുള്ള വാക്യങ്ങളില്‍ നിന്നും.

ഇനി മാര്‍ഗ്ഗംകളി പാട്ട്, പരിചമുട്ടുകളി പാട്ട് എന്നിവയെക്കുറിച്ച് എന്തെങ്കിലും അറിയണമെങ്കില്‍ ദാ ഇവിടെ നോക്കുക.

അശ്വത്ഥാമാ ഹത:

2008-07-06T10:58:00.006+03:00

കഴിഞ്ഞദിവസം കിട്ടിയ കത്തില്‍‌നിന്ന് അച്ചാച്ചന്‍‌ വക ഒരു മഹാഭാരത കഥ.

അച്ഛന്‍ ഇങ്ങനെ എഴുതി:

ഹിന്ദു പുരാണ കഥകള്‍ ധാരാളം പറയുകയും ചര്‍ച്ച ചെയ്യുകയും പതിവുണ്ടായിരുന്നു. സര്‍വ്വീസില്‍ ഇരുന്നപ്പോള്‍ കുളനട സ്വദേശി വാസുദേവക്കുറുപ്പ്‌ സാര്‍, പിന്നെ കിഴക്കേതിലെ ജോയി ഇവരുമായിട്ടൊക്കെ കഥകള്‍ കൈമാറുമായിരുന്നു. ഇപ്പോള്‍ മിക്കവാറും എല്ലാം മറന്നുപോയ മട്ടാണ്‌. ചില പ്രധാനകഥാപാത്രങ്ങളുടെ പേരുപോലും മറന്നുപോയി. എങ്കിലും അശ്വത്ഥാമാവിന്റെ കഥ ചുരുക്കി പറയാം. കൗരവ പാണ്ഡവരെ അസ്ത്രവിദ്യകള്‍ പഠിപ്പിച്ച ഒരു ഗുരുവായിരുന്ന ദ്രോണാരുടെ മകനാണ്‌ അശ്വത്ഥാമാവ്‌. കുട്ടിക്കാലത്ത്‌ കഠിനദാരിദ്യം അനുഭവിച്ചിരുന്നു. കുട്ടിക്കാലത്ത്‌ ഒരിക്കല്‍പോലും പാല്‍ കുടിച്ചിട്ടില്ല. ഒരിയ്ക്കല്‍ അരിമാവ്‌ കലക്കിയ വെള്ളം പാല്‍ ആണെന്ന് പറഞ്ഞുകൊടുത്തു കൂട്ടുകാര്‍ പരിഹസിച്ചിട്ടുണ്ട്‌. തന്റെ മകന്റെ കഷ്ടസ്ഥിതിയില്‍ മന:മുരുകി തന്റെ ഒരു പഴയ ശിഷ്യനായ പാഞ്ചാല രാജകുമാരനായ ദ്രുപദന്റ്‌ അടുക്കല്‍ ചെന്ന് സഹായം അഭ്യര്‍ത്ഥിച്ചു. ദ്രുപദന്‍ സഹായിച്ചില്ല എന്ന് മാത്രമല്ല; തന്റെ തുല്യനിലയിലുള്ളവരെ മാത്രമേ താന്‍ പരിഗണിയ്ക്കുകയൊള്ളൂ എന്ന് പറഞ്ഞ്‌ പുശ്ചിക്കുകയും ചെയ്തു. ഇത്‌ കേട്ട്‌ ദ്രോണര്‍ വ്രണഹൃദയനായ്‌ തിരികെ പോന്നു. പിന്നീട്‌ കൗരവ പാണ്ഡവരെ ആയുധവിദ്യ അഭ്യസിപ്പിക്കുന്ന ജോലി ഏറ്റെടുത്തു. പഠനത്തില്‍ അര്‍ജ്ജുനന്‍ വളരെ മുന്‍പനായിരുന്നുവെന്ന് പറയേണ്ടതില്ലല്ലോ. പഠനം കഴിഞ്ഞ്‌ ഗുരുദക്ഷിണ കൊടുക്കുന്ന പതിവുണ്ട്‌. അപ്പോള്‍‌ അര്‍ജ്ജുനനോട്‌ ദക്ഷിണയായി, തന്നെ അപമാനിച്ച ദ്രുപദനെ പിടിച്ചുകെട്ടി തന്റെ കാല്‍ക്കല്‍ കൊണ്ട്‌ ഇടണമെന്ന് ആവശ്യപ്പെട്ടു. അതിന്‍പ്രകാരം അര്‍ജ്ജുനന്‍ ദ്രുപദനെ യുദ്ധത്തില്‍ തോല്‍പിച്ച്‌ പിടിച്ച്‌ കെട്ടി ദ്രോണരുടെ മുന്‍പില്‍ കൊണ്ടു ചെന്നു. ദ്രോണര്‍ കാല്‍ ഉയര്‍ത്തി ദ്രുപദനെ ചവിട്ടുവാന്‍ തുടങ്ങിയപ്പോള്‍ അര്‍ജ്ജുനന്‍ തടഞ്ഞു. യുദ്ധത്തില്‍ പരാജിതനായി തന്റെ കാല്‍ക്കല്‍ കിടക്കുന്ന ദ്രുപദനെ ചവിട്ടുന്നത്‌ അധര്‍മ്മം ആണെന്ന് ഓര്‍മ്മിപ്പിച്ചു.

അപ്പോള്‍ ദ്രോണര്‍ ദ്രുപദനോട്‌: “നീ സമസ്ഥാനീയരോട്‌ മാത്രമേ സഹവസിക്കൂ എന്ന് പറഞ്ഞിട്ടിണ്ടുല്ലോ. ഇപ്പോള്‍ നീ എന്റെ കാല്‍ക്കല്‍ കിടക്കുന്ന അടിമയാണ്‌, പ്രാണനുവേണ്ടി യാചിക്കുന്ന ആള്‍ ആണ്‌“ എന്നൊക്കെ പറഞ്ഞ്‌ ദ്രുപദനെ പരിഹസിച്ച്‌ പറഞ്ഞ്‌ വിട്ടു.

ഭാരതയുദ്ധത്തില്‍ ദ്രോണര്‍ കൗരവപക്ഷത്തായിരുന്നു. ദ്രോണര്‍ സര്‍വ്വസൈന്യാധിപനായി നില്‍ക്കുന്നിടത്തോളം പാണ്ഡവര്‍ പരാജിതരാകും എന്ന് മനസ്സിലാക്കി ദ്രോണരെ വധിക്കാന്‍ ഒരുപായമുപയോഗിച്ചു. കൃഷ്ണന്‍ ആയിരുന്നു ഇതിന്റേയും ഉപദേശകന്‍. ദ്രോണര്‍ക്ക്‌ തന്റെ മകനോടുള്ള വാല്‍സല്യം ഏറെ പ്രസിദ്ധമാണ്‌. മകന്‍ മരിച്ചു എന്ന് കേട്ടാല്‍ ദ്രോണര്‍ യുദ്ധരംഗത്ത്‌ സ്തംഭിച്ചുനിന്നു പോകും, അപ്പോള്‍ അയാളെ വധിക്കാം. സാക്ഷാല്‍ അശ്വത്ഥാമാവിനെ വധിക്കാന്‍ പറ്റുകയില്ല. പകരം കളിമണ്ണുകൊണ്ട്‌ ഒരു ആനയുടെ രൂപം ഉണ്ടാക്കി അതിന്‌ അശ്വത്ഥാമാവ്‌ എന്ന് പേരിടുക. എന്നിട്ട്‌ അതിനെ തല്ലിയുടച്ച ശേഷം അശ്വത്ഥാമാവ്‌ മരിച്ചു എന്ന് ഉറക്കെ വിളിച്ചുപറയുക. ഇതായിരുന്നു കൃഷ്ണന്‍ ഉപദേശിച്ചുകൊടുത്ത ഉപായം. പാണ്ഡവരുടെ കൂട്ടത്തില്‍ സത്യസന്ധന്‍ എന്ന് പേര്‌കേട്ട ധര്‍മ്മപുത്രര്‍ പറഞ്ഞാലേ ദ്രോണര്‍ വിശ്വസിക്കൂ. അതുകൊണ്ട്‌ ധര്‍മ്മപുത്രര്‍ തന്നെ വിളിച്ചുപറയണം. അങ്ങനെ ഒരു ആനയെ ഉണ്ടാക്കി തല്ലിയുടച്ചശേഷം ‘അശ്വത്ഥാമാ ഹത: കുഞ്ജര!’(അശ്വത്ഥാമാവ്‌ എന്ന ആന ചത്തു എന്നര്‍ത്ഥം. കുഞ്ജരം=ആന) എന്ന് പറഞ്ഞു. ‘അശ്വത്ഥാമാ ഹത:‘ എന്നുറക്കെയും ‘കുഞ്ജര‘ എന്ന് പുറത്ത്‌ കേള്‍ക്കാതെ, പതുക്കെയും പറഞ്ഞു. തന്റെ മകന്‍ അശ്വത്ഥാമാവ്‌ മരിച്ചുപോയി എന്ന് കേട്ടയുടനെ, പാണ്ഡവപക്ഷം പ്രതീക്ഷിച്ചതുപോലെ ദ്രോണര്‍ സ്തംഭിച്ചുപോവുകയും, ഈ സമയം നോക്കി അര്‍ജ്ജുനന്‍ അമ്പെയ്ത്‌ ദ്രോണരെ വധിക്കുകയും ചെയ്തു. സത്യസന്ധനെന്ന് പേര്‍ കേള്‍പ്പിക്കുകയും, സ്വന്തം താല്‍പര്യസംരക്ഷണത്തിന്‌ അര്‍ദ്ധസത്യവും, സത്യം വളച്ചൊടിച്ച്‌ പ്രഖ്യാപിച്ച്‌ എതിരാളിയെ തോല്‍പ്പിച്ച്‌ വിജയം നേടുകയും ചെയ്ത ഒരു കഥാപാത്രമാണ്‌ ധര്‍മ്മപുത്രര്‍. ‘ധര്‍മ്മപുത്രര്‍ ചമയേണ്ട‘ എന്നൊരു ശൈലി രൂപപ്പെട്ടിട്ടുള്ളത്‌ മുകളില്‍ വിവരിച്ച സംഭവത്തെ ആസ്പദമാക്കിയാണ്‌.

തന്റെ പിതാവിനെ ചതിയില്‍ വധിച്ച പാണ്ഡവരെ മുഴുവന്‍ വകവരുത്തുമെന്ന് അശ്വത്ഥാമാവ്‌ ശപഥം ചെയ്തു. പാണ്ഡവപക്ഷം താമസിച്ചിരുന്ന കൂടാരങ്ങളില്‍ രാത്രിയില്‍ കയറി ഗര്‍ഭസ്ഥശിശുക്കളടക്കം സ്ത്രീകളെയും മുതിര്‍ന്നവരേയും മുഴുവനും കൊന്നു നശിപ്പിച്ചു. എന്നാല്‍ പാണ്ഡവരെ വേറെ ഒരു സ്ഥലത്ത്‌ മാറ്റി പാര്‍പ്പിച്ചിരുന്നതുകൊണ്ട്‌ (അതും കൃഷ്ണന്റെ ഒരു തന്ത്രമായിരുന്നു) അവരെ കൊല്ലാന്‍ സാധിച്ചില്ല. സ്തീകളെയും കുട്ടികളേയും ഉറക്കത്തില്‍ കൊന്ന് നശിപ്പിച്ച അശ്വത്ഥാമാവ്‌ ഒരു നീചകഥാപാത്രമായി ചിത്രീകരിക്കപ്പെട്ടിരിക്കുന്നു. പ്രതികാരദാഹം മൂത്ത്‌ ഏത്‌ ദുഷ്‌കൃത്യവും ചെയ്യാന്‍ മടിക്കാത്ത ഇയാളെ ഏഴ്‌ ചിരംജീവികളുടെ പട്ടികയില്‍ പെടുത്തിയിരിക്കുന്നു. ബാക്കി ആറുപേരും ഉത്തമ കഥാപാത്രങ്ങള്‍ ആണ്‌.

മ്യൂച്ചല്‍‌ അണ്ടര്‍‌സ്റ്റാന്‍ഡിംഗ്

2008-05-15T10:40:00.006+03:00

"എത്രനാളായ് ഞാന്‍ പറയുന്നു, എനിയ്ക്കിത്തിരി പായസം ഉണ്ടാക്കി തരാന്‍."

"ഉം. മധുരം കുറെ കുറച്ച് കഴിച്ചാല്‍ മതി. ഷുഗര്‍‌ ഇപ്പഴേ നിയന്ത്രിച്ചാല്‍ കുറെക്കാലംകൂടി അതിന്റെ പിടിയില്‍‌നിന്ന് രക്ഷപെട്ട് നില്‍‌ക്കാം."

"നിനക്കെന്നോട് ഇത്തിരിയെങ്കിലും സ്നേഹമുണ്ടെങ്കില്‍ ഒരു പായസം ഉണ്ടാക്കി താ."

"ഉണ്ടാക്കി തരാം. പക്ഷെ ഒരു നിബന്ധന."

"അതെന്താ?"

"അതില്‍ മധുരം ചേര്‍‌ക്കില്ല."

ഒരു നിമിഷം ചിന്തിച്ചു. ഉണ്ടാക്കി തരാ‍മെന്ന് സമ്മതിച്ചല്ലോ. സ്നേഹമുണ്ടെങ്കില്‍ പിന്നെന്തിന് മധുരം വേറേ?

“ഓകെ. മധുരം ചേര്‍ക്കാത്ത പായസം മതി.“

അല്‍‌പസമയത്തിനുള്ളില്‍ പഞ്ചസാരയുടെ മധുരം ചേര്‍ക്കാത്ത എന്നാല്‍ മറ്റെല്ലാ ചേരുവയും ഒത്തു ചേര്‍ന്ന ഒന്നാന്തരം സേമിയ പായസം ഇതാ റെഡി.

ഇതിനെയാണോ മ്യൂച്ചല്‍‌ അണ്ടര്‍‌സ്റ്റാന്റിംഗ് എന്ന് പറയുന്നത്?

കുടുംബജീവിതത്തില്‍ പരസ്പരധാരണ വേണം എന്ന് ഒരാള്‍ പ്രസംഗിച്ചപ്പോള്‍ എനിയ്ക്ക് ഓര്‍മ്മവന്ന ഒരു സന്ദര്‍ഭമാണ് മുകളില്‍ വിവരിച്ചത്.

ക്ലെപ്ടൊമാനിയ

2008-04-14T12:14:00.005+03:00

വര്‍ഷങ്ങള്‍ക്ക്‌ മുന്‍പ്‌ കൂടെ പഠിച്ച ഒരു സഹപാഠിയെക്കുറിച്ചുള്ള ഓര്‍മ്മകള്‍ക്കിടയില്‍ കടന്നുവന്നതാണ് ഇനിപറയാന്‍ പോകുന്ന കാര്യം.

റിലീസ്‌ ചെയ്യുന്ന ദിവസം തന്നെ മിക്കവാറും സിനിമകള്‍ കാണുന്നവന്‍, പഠിത്തത്തില്‍ കാര്യമായ ഉഴപ്പില്ലാത്തവന്‍, കോമണ്‍വെല്‍ത്ത്‌ രാജ്യക്കാരുടെ കളിയായ ക്രിക്കറ്റിനെ എനിയ്ക്ക്‌ പരിചയപ്പെടുത്തിയവന്‍, ഗബ്രിയെല സബാറ്റിനി, മാര്‍ട്ടിന, സ്റ്റെഫി, മേരി പിയേഴ്സ്‌, ജിമ്മി കൊണേഴ്സ്‌, ക്രിസ്‌ എവെര്‍ട്ട്‌, ആര്‍തര്‍ആഷ്‌, ബോറിസ്‌ ബെക്കര്‍, ജോണ്‍ മക്‌ന്‍റോ.... തുടങ്ങിയ പഴയകാല ടെന്നീസ്‌ താരങ്ങളെക്കുറിച്ച്‌ വായ്‌ തോരാതെ സംസാരിക്കുന്നവന്‍, പത്തിരുപത്‌ വര്‍ഷങ്ങള്‍ക്ക്‌ മുന്‍പ്‌ റെയ്മണ്ട്സ്ന്റെ നിരവധി കളസങ്ങളുടെ കളക്ഷനുള്ളവന്‍ (അതായത്‌ കയ്യില്‍ കാശിന്‌ എപ്പോഴും പഞ്ഞമില്ലാത്തവന്‍ എന്നര്‍ത്ഥം), അങ്ങനെ പലതിലും ഞാന്‍ പ്രത്യേകത കണ്ടിട്ടുള്ള എന്റെ ഒരു കോളേജ്‌ സഹപാഠി‍. സ്പോര്‍ട്സ്‌സ്റ്റാര്‍ മാഗസിന്‍ പുറത്തിറങ്ങുന്ന‌ എല്ലാ മാസത്തിന്റേയും ആദ്യവാരത്തില്‍ തന്നെ അവന്‍ അടുത്തുള്ള ഒന്ന് രണ്ട്‌ പുസ്തകശാല സന്ദര്‍ശിക്കാന്‍ ഈയുള്ളവനെക്കൂടി വിളിക്കും. അന്നേ ദിവസം അവന്‍ കളസത്തിന്‌ പകരം മുണ്ടായിരിക്കും ധരിച്ചിരിക്കുന്നത്‌. ഞങ്ങള്‍ രണ്ടുംകൂടി പല പുസ്തകങ്ങള്‍, ആഴ്ചപതിപ്പുകള്‍, മാസികകള്‍ എല്ലാം മറിച്ച്‌ നോക്കിയതിനുശേഷം വായിക്കാന്‍ ഒന്നും ഇല്ല എന്ന് ഉറക്കെ പറഞ്ഞു പുറത്തേക്ക് കടക്കും. ചിലപ്പോഴൊക്കെ മറ്റെന്തെങ്കിലും സ്റ്റേഷനറി സാധനങ്ങള്‍ വാങ്ങി തിരികെ കോളേജിലേക്ക്‌ വരും. പകുതി വഴിയെത്തുമ്പോള്‍ അവന്‍‍ മുണ്ടിനുള്ളില്‍നിന്ന് ഒരു മാസിക പുറത്തെടുത്ത്‌ എന്നെ കാണിക്കും. അത്‌ അവന്‌ ഏറ്റവും ഇഷ്ടപ്പെട്ട സ്പോര്‍ട്സ്‌ സ്റ്റാര്‍!!! ഈ സ്പോര്‍ട്സ്‌ സ്റ്റാര്‍ ചൂണ്ടല്‍ കലാപരിപാടി മാസങ്ങളോളം തുടര്‍ന്നിരുന്നു.

വര്‍ഷങ്ങള്‍ക്ക്‌ ശേഷം എന്റെ അച്ഛനുമായി ഈ കാര്യം സംസാരിച്ചപ്പോള്‍ ഇത്തരം സ്വഭാവവിശേഷമുള്ളവരെ ക്ലെപ്റ്റോമാനിയാക്‌ (Kleptomaniac) എന്ന് വിളിക്കുമത്രേ. അതായത്‌, ഭൗതികനേട്ടത്തിനോ അല്ലാതെ, മോഷണത്തിലൂടെ ആത്മസംതൃപ്തി നേടുന്ന മാനസികാവസ്ഥയുള്ളവര്‍. സാധാരണ സിനിമാ നടി/നടന്മാരിലാണ്‌ ഇത്തരം പ്രത്യേകത കൂടുതല്‍ കണ്ടുവരുന്നതത്രേ..??? എന്തായാലും ക്ലെപ്ടോമാനിയ എന്ന വാക്ക്‌ എനിയ്ക്ക് മനസ്സിലായത് അവനിലൂടെ ആണ്‌.

വിളിച്ചുകൊണ്ടേയിരിക്കൂ ((..))

2008-03-28T10:46:00.006+03:00

അരി - 1കിലോ
പഞ്ചസാര - ½കിലോ
കാപ്പിപൊടി - 100ഗ്രാം
വെളിച്ചെണ്ണ - 500മി.ലി.
കടുക് - 50ഗ്രാം
പിന്നെ, 350രൂപയുടെ ഒരു റീ-ചാര്‍‌ജ്ജ് കാര്‍‌ഡുംകൂടി..!!

നാട്ടിലെ ഒരു കടയില്‍നിന്നും കേട്ട സംഭാഷണം ഇവിടെ പകര്‍ത്തിയതാ. ദിവസക്കൂലിയ്ക്ക് ജോലിചെയ്യുന്ന ഒരു സാധാരണ തൊഴിലാളി, അവന്‌ അത്യാവശ്യം വേണ്ടുന്ന സാധനങ്ങള്‍ വാങ്ങാന്‍ ചിലവിടുന്നതിനേക്കാള്‍ എത്രയോ കൂടുതല്‍ രൂപയാണ് മൊബൈല്‍‌ഫോണ്‍ റി-ചാര്‍‌ജ്ജ് ചെയ്യാന്‍ ചിലവിടുന്നത് എന്ന് തോന്നിപ്പോയി..!!!

ചിലപ്പോള്‍ ഇത് ഒരൊറ്റപ്പെട്ട സംഭവമായിരിക്കാം!

ഈ സംഭവത്തില്‍‌ വില്‍പ്പനക്കാരനുതന്നെ കൌതുകം തോന്നിയതുകൊണ്ടാണ് എന്നോട് പറയാന്‍ കാരണം. കേട്ടപ്പോള്‍ എനിയ്ക്കും തോന്നി ഇത് ഒരു പോസ്റ്റാക്കാന്‍!

ആരാച്ചാരോടൊപ്പം ഒരുദിവസം - അവസാന ഭാഗം

2008-03-25T10:35:00.014+03:00

ആദ്യഭാഗം വായിക്കാത്തവര്‍ക്കായി ഇതാ ഇവിടെ.

ആരാച്ചാര്‍ എന്ന്‌ കേള്‍ക്കുമ്പോള്‍ സാധാരണ നമ്മള്‍ പ്രതീക്ഷിക്കുന്ന ഭീകരമുഖമോ, ക്രൗര്യം നിറഞ്ഞ നോട്ടമോ ഒന്നും അല്ല അഹ്മ്മദ്‌ രസഖ്‌ള്ളയ്ക്കുള്ളത്. പിന്നയോ, ആത്മവിശ്വാസവും, സന്തോഷം നിറഞ്ഞ മുഖം. അതോടൊപ്പം സംസാരിക്കുമ്പോള്‍ ചെറിയൊരു പുഞ്ചിരിയും അദ്ദേഹത്തിന്റെ മുഖത്ത്‌ സദാ കാണാം. അതാണ്‌ ഞാന്‍ മിക്കവാറും കണ്ടിട്ടുള്ള ആരാച്ചാരുടെ ജോലി ചെയ്യുന്ന "അഹ്മ്മദ്‌ രസഖ്‌ള്ള".

ഏകദേശം ഇരുപത്തിയഞ്ച്‌ വര്‍ഷം മുന്‍പ്‌ ആരാച്ചാര്‍ തസ്തികയിലേക്ക്‌ സൌദി അറേബ്യന്‍ ഗവണ്‍മന്റ്‌ ആളുകളെ തേടിയിരുന്നു. അന്ന്‌ രസ്ഖള്ളയ്ക്ക്‌ ഇരുപത്‌ വയസ്സ്‌ പ്രായം!!! ഒരു തമാശയ്ക്കെന്നോണം അതിന്‌ അദ്ദേഹം അപേക്ഷിക്കുകയും പിന്നീട്‌ ഒരു നിയോഗമായി ഈ തൊഴില്‍ തിരഞ്ഞെടുക്കുകയും ചെയ്തുവത്രേ. കോടതി വിധിക്കുന്ന വധശിക്ഷ നടപ്പിലാക്കണം. അതാണ് രസ്ഖള്ളയുടെ ജോലി!!

അഹ്മ്മദ്‌ രസ്ഖള്ള ചെയ്യുന്ന ആരാച്ചാര്‍ ജോലിസംബന്ധമായ ചില വിശേഷങ്ങള്‍ ഇതാ:

"വധശിക്ഷ നടപ്പിലാക്കുന്നതിന്‌ മുന്‍പ്‌ മിക്കപ്പോഴും ഞാന്‍ മിക്കവാറും ആപത്ത്‌ നേരിട്ടവരുടെ കുടുംബാംഗങ്ങളുടെ വീട്ടില്‍ പോകാറുണ്ട്. എന്തിനെന്നാല്‍ അവര്‍‌ മാപ്പ്‌ നല്‍കി കുറ്റവാളിയ്ക്ക്‌ തന്റെ തെറ്റ്‌ മനസ്സിലാക്കി പുതിയൊരു ജീവിതവുമായി മുന്നോട്ട്‌ പോകുന്നതിന്‌ പ്രേരിപ്പിക്കുവാന്‍. അല്ലെങ്കില്‍ അവര്‍ ആവശ്യപ്പെടുന്ന തുക (Blood Money) നല്‍കി വധശിക്ഷ പിന്‍വലിക്കാന്‍. ചിലപ്പോഴൊക്കെ വധശിക്ഷ നടപ്പിലാക്കുന്നതിന്‌ തൊട്ട്‌മുന്‍പ്‌ അങ്ങനെയൊക്കെ സംഭവിക്കാറുണ്ട്‌. വധശിക്ഷയില്‍നിന്നും വിടുതല്‍ കിട്ടുമ്പോഴുള്ള സന്തോഷത്തിന്റേയും ആഹ്ലാദത്തിന്റെയും പ്രകടനങ്ങള്‍ വാക്കാല്‍‌ വര്‍ണ്ണിക്കാന്‍ വളരെ പ്രയാസം."

രസ്ഖള്ള പറയുന്നത്‌, വധശിക്ഷയ്ക്ക്‌ തടസ്സമോ, താമസ്സമോ വരാത്തവിധത്തില്‍ അതിന്‌ വിധേയരാകേണ്ടിവരുന്നവരുടെ അവസാനത്തെ ആഗ്രഹം കഴിവതും നടത്തികൊടുക്കാറുണ്ട്‌ എന്നാണ്‌. മിക്കവാറും പേര്‍ക്ക്‌ അവസാ‍നമായി ഒന്ന് പ്രാര്‍ത്ഥിക്കാന്‍ ആണ്‌ ആഗ്രഹം.

ശിരഛേദം ചെയ്യാന്‍ ഉപയോഗിക്കുന്ന വാളിന്റെ മൂര്‍ച്ച വളരെ പ്രധാനമാണ്‌. അതിന് നല്ല ബലവും ഉണ്ടായിരിക്കണം. അതുപോലെ തന്നെ ആരാച്ചാരുടെ മനോധൈര്യവും, തന്റെ പ്രവൃത്തി എന്തിനുവേണ്ടി ചെയ്യുന്നു എന്നുള്ള ബോധവും വേണം. സ്ത്രീകളെയും പുരുഷന്‍മാരേയും ഉള്‍പ്പടെ ഏകദേശം മുന്നൂറോള്ളംപേരുടെ വധശിക്ഷ ഇതിനോടകം അദ്ദേഹം നടപ്പിലാക്കിയിട്ടുണ്ട്‌. രണ്ട്‌ കുട്ടരേയും വധിക്കുന്ന രീതിയില്‍ കാര്യമായ വ്യത്യാസം ഒന്നും ഇല്ലെന്നാണ്‌ രസ്ഖള്ളയുടെ വെളിപ്പെടുത്തല്‍.

ഇവിടെയുള്ള സ്ത്രീകള്‍ പൊതുവെ മന:ശക്തിയില്ലാത്തവര്‍ എന്നാണ്‌ സാധാരണയായി ആളുകള്‍ കരുതുന്നത്‌. എന്നാല്‍ രസ്ഖള്ള പറയുന്നത്‌ നേരെ തിരിച്ചാണ്‌. മിക്ക പുരുഷന്‍മാരും അവര്‍ക്കുള്ള ഈ കടുത്ത ശിക്ഷ കേള്‍ക്കുമ്പോള്‍ തന്നെ തളര്‍ന്ന് പോകും. ഇനി ചിലപ്പോള്‍ ശിക്ഷാവിധി നടപ്പിലാക്കുന്നതില്‍നിന്ന് അവസാന നിമിഷം മോചനം കിട്ടിയാലും അങ്ങനെയൊക്കെ സംഭവിക്കും. അല്ലെങ്കില്‍ ഭ്രാന്ത്‌ പിടിക്കും. എന്നാല്‍ ഭൂരിഭാഗം സ്ത്രീകള്‍ക്കും യാതൊരും ഭാവഭേദവും ഉണ്ടാകാറില്ല.

വര്‍ഷങ്ങള്‍ക്ക്‌ മുന്‍പ്‌ വധശിക്ഷയ്ക്ക്‌ വിധേയയാകേണ്ട ഒരു സ്ത്രീയ്ക്ക്‌ ശിക്ഷ നടപ്പിലാക്കേണ്ട അവസാനമുഹൂര്‍ത്തത്തില്‍ അതില്‍നിന്നും മോചനം ലഭിച്ചു. എന്നാല്‍‌ ഈ വാര്‍ത്തയറിഞ്ഞപ്പോള്‍‌ ആ സ്ത്രീയ്ക്ക്‌ യാതൊരും ഭാവഭേദവും ഉണ്ടായില്ല. അവര്‍ വളരെ ശാന്തമായി ജയിലിനുള്ളില്‍ ഉപയോഗിക്കുന്ന കാറിനുള്ളില്‍ കയറിയിരുന്നു. ഇത്തരം അവസ്ഥ ഒരു പുരുഷനാണ്‌ സംഭവിച്ചിരുന്നതെങ്കില്‍ തീര്‍ച്ചയായും അവന്‌ ഹൃദയാഘാതം വന്നേനെ എന്ന്‌ രസ്ഖള്ള. അദ്ദേഹം ശിക്ഷ നടപ്പിലാക്കിയിട്ടുള്ള മിക്ക സ്ത്രീകളും ശക്തകളും, നല്ല മന:ധൈര്യം ഉള്ളവരും ആയിരുന്നു. വിഷമഘട്ടത്തില്‍ സ്ത്രീകള്‍ക്കാണ് പുരുഷന്‍മാരേക്കാള്‍ കുടുതല്‍ കരുത്തും സഹനശക്തിയും എന്ന്‌ രസ്ഖള്ളയുടെ ഭാഷ്യം.

ഇത്തരം ഒരു ജോലി തെരെഞ്ഞെടുത്തതുകൊണ്ട്‌ അതിന്റേതായ ചില ഭവിഷ്യത്തുകളും രസ്ഖള്ളയ്ക്ക്‌ അനുഭവിക്കേണ്ടി വന്നിട്ടുണ്ട്‌. പലരും അദ്ദേഹവുമായി വലിയ സംസര്‍ഗ്ഗം കാണിക്കാന്‍ ആഗ്രഹിക്കുന്നില്ല. തിരിച്ചറിയാവുന്നവര്‍ ‍തന്നെ ഏതോ ഒരു അന്യഗൃഹ ജീവിയായി കാണുന്നു. പാര്‍ട്ടികളിലും മറ്റും അഹ്മ്മദ് രസ്ഖള്ളയെ തിരിച്ചറിയാത്തവര്‍ അടുത്ത്‌ വന്നിരിക്കും. എന്നാല്‍ കുശലം പറഞ്ഞ്‌ അടുത്ത്‌ കൂടി, തന്റെ ജോലി എന്താണെന്ന് അറിയുമ്പോള്‍ പെട്ടെന്നുതന്നെ എങ്ങനെയെങ്കിലും അകന്ന് പോകാന്‍ ആയിരിക്കും അടുത്ത ശ്രമം.

"എനിയ്ക്ക്‌ എല്ലാവരുമായും സംസാരിക്കുന്നതും അവരോടൊക്കെ ഇടപഴകുന്നതും വളരെ ഇഷ്ടമാണ്‌. എന്നാല്‍ മറുഭാഗത്തുനിന്നും അങ്ങനെയൊരു സ്ഥിതിയില്ലാത്തതിനാല്‍ ചെറിയ വിഷമമുണ്ട്‌. അതിനാല്‍ തന്റെ ഒഴിവുസമയം കൂടുതലും കുടുംബാംഗങ്ങളോടൊപ്പം ചെലവിടാനാണ്‌ അഹ്മ്മദ് രസ്ഖള്ളയ്ക്ക്‌ താല്‍പര്യം. അവരെങ്കിലും എന്നെ നന്നായി മനസ്സിലാക്കുന്നുണ്ടല്ലോ."

അഹ്മ്മദ് രസ്ഖള്ളയ്ക്ക്‌ രണ്ട്‌ ആണ്‍ മക്കളാണ്‌ ഉള്ളത്‌. എന്തായാലും തന്റെ മക്കള്‍ ഈ പാത പിന്തുടരുന്നതിനോട്‌ അദ്ദേഹത്തിന് തീരെ യോജിപ്പില്ല. അവര്‍ നന്നായി പഠിച്ച്‌ വേറെ എന്തെങ്കിലും ജോലി നോക്കട്ടെ എന്നാണ്‌ രസ്ഖള്ളയുടെ ആഗ്രഹം.

ഇത്രയുമൊക്കെ അറിഞ്ഞപ്പോള്‍ എനിയ്ക്ക്‌ അദ്ദേഹത്തിനോട്‌ മുന്‍പുണ്ടായിരുന്ന പേടിയൊക്കെ പോയി. പിന്നീട്‌ അദ്ദേഹത്തെ കണ്ടുമുട്ടാറുണ്ടായിരുന്ന കമ്പനിയില്‍‍നിന്ന് നാലുവര്‍ഷം മുന്‍പ്‌ ഞാന്‍ വിരമിച്ചിരുന്നു. അതിനുശേഷം ഒരിക്കല്‍ മാത്രം ഏതോ ട്രാഫിക്‌ സിഗ്നല്‍ കാത്തുകിടക്കുംവേളയില്‍ അദേഹത്തെ കാറില്‍ വച്ച്‌ കണ്ടിരുന്നു. അപ്പോള്‍ പരസ്പരം അഭിവാദ്യം ചെയ്ത്‌ എന്തെങ്കിലും പറയാന്‍ തുടങ്ങുമ്പോഴേക്കും സിഗ്നല്‍ തെളിഞ്ഞു. ഞങ്ങള്‍ ഇരുവരും അവരവരുടെ വഴിയ്ക്ക് യാത്രയായി.

ഇന്ത്യയുടെ മുഖം (ഫോട്ടോ പോസ്റ്റ്)

2008-03-11T15:59:00.008+03:00

ഏതോ ആവശ്യത്തിന്‌ വീടിന്റെ ആധാരം (വീട്ടുടമസ്ഥനുമായുള്ള വാടകക്കരാര്‍) തപ്പിയപ്പോള്‍ വീടിനുള്ളില്‍ സൂക്ഷിച്ചിരുന്ന എന്റെ ആര്‍കൈവ്‌സില്‍ നിന്നും കിട്ടിയതാണ്‌ ഈ ഫോട്ടോ. ഏഴ്‌ വര്‍ഷം മുന്‍പ്‌ ഗള്‍ഫിലെ ഒരു പ്രമുഖ ദിനപത്രത്തിന്റെ മുഖപേജില്‍‌ വന്ന ഈ ഫോട്ടോ, കോപ്പിയെടുത്ത്‌ (അന്ന് സ്കാന്‍ ചെയ്ത്‌ സൂക്ഷിക്കാനുള്ള സൗകര്യം കിട്ടിയില്ല.) ഇതുവരെ സൂക്ഷിച്ചിരുന്നു.

വിദേശമാധ്യമങ്ങള്‍, നമ്മുടെ രാജ്യത്തെയും ജനങ്ങളേയും, ഏറെക്കുറെ ഏത്‌ തരം വീക്ഷണകോണിലൂടെയാണ്‌ കാണുന്നത്‌ എന്നറിയാന്‍ ഈ പടം ഒരു ഉദാഹരണം മാത്രം.

ഗര്‍ഭവും ജോലിയും

2008-03-10T08:52:00.005+03:00

അന്നൊരു ഉച്ചസമയത്ത്‌, എന്റെ ഫോണ്‍ പതിവില്ലാതെ നിലവിളിച്ചുകൊണ്ടേയിരുന്നു.

ദൈവമേ! ബെറ്റി മൈ ബെറ്റര്‍ ഹാഫ്‌ ആണല്ലോ. എന്താണാവോ ജോലിയ്ക്കിടയില്‍ ഇത്രയധികം നിലവിളി? ജോലിയോട്‌ അനുബന്ധിച്ച്‌ എന്തെങ്കിലും ഇന്റര്‍നെറ്റില്‍ നിന്ന് തപ്പി ഇപ്പൊ പറയാന്‍ ആയിരിക്കും. അല്ലെങ്കില്‍ ഏതെങ്കിലും വാക്കിന്റെ സ്പെല്ലിംഗ്‌ അറിയാന്‍. തീര്‍ച്ച.

"അതേയ്‌, മെഡിക്കല്‍ ഡയറക്ടറെ മുഖം കാണിക്കാന്‍‌ വിളിപ്പിച്ചിരിക്കുന്നു"
"ചെല്ല്.. ചെല്ല്.. ഡയറ്ററി & നുട്രീഷ്യനെക്കുറിച്ച്‌ പ്രസന്റേഷന്‍ അവതരിപ്പിച്ചതിന്‌ വിളിച്ച്‌ അനുമോദിക്കാനായിരിക്കും!" “ഓ! അതൊക്കെ നേരത്തെ കഴിഞ്ഞതാ”.

“യെന്നാപ്പിന്നെ..? എന്തായാലും സമയം കളയാതെ ചെല്ലക്കിളി ചെല്ല്..“

അല്‍പ്പം സമയം കഴിഞ്ഞ് അവള്‍ വീണ്ടും വിളിച്ചു. ഇത്തവണ ശരിക്കുള്ള നിലവിളിയായിരുന്നു.

"ഉം?"

"എല്ലാം പോയി! ജോലി പോയി"

ആത്മഗതം: ദൈവമേ, വൈകുന്നേരം ടിഡാ വാങ്ങുന്നതിനായ് പൂരിപ്പിച്ച ലോണ്‍ അപേക്ഷ കയ്യില്‍.

"ജോലി പോകാനുള്ള കാരണം?"

"ഗര്‍ഭിണിയായിരിക്കെ ഇവിടെ ജോലി ചെയ്യാന്‍ പറ്റില്ലത്രേ. വീട്ടില്‍ പോയി വിശ്രമിച്ചോളാന്‍."

"ഓ അതാണോ കാര്യം. ജോലി പോയെങ്കില്‍‌ പോകട്ടെ. ഇനിയിപ്പം ജോലിയ്ക്ക്‌ വേണ്ടി ഗര്‍ഭം പോകട്ടെ എന്ന് വയ്ക്കാന്‍ പറ്റുമോ!"

പാവാടത്തുമ്പിലെ വിസ്മയം

2008-03-05T13:58:00.008+03:00

കഴിഞ്ഞ രാത്രിയില്‍, ഉറങ്ങാന്‍ കിടന്നപ്പോഴാണ്‌ യാദൃച്ഛികമായ്‌ ഞാന്‍ അത്‌ ശ്രദ്ധിച്ചത്‌.
മറ്റൊന്നുമല്ല, ഭാര്യയുടെ പാവാടയില്‍‍നിന്നും ചെറിയ ചെറിയ ചില മിന്നല്‍പ്രകാശങ്ങള്‍!
ഇത് എന്റെ വെറും തോന്നല്‍‌ മാത്രം ആണോ?
അല്ലെന്ന് ഉറപ്പ് വരുത്താന്‍‌ ഭാര്യയോട്‌ പറഞ്ഞപ്പോള്‍, അവളും ആ മിന്നല്‍ പ്രകാശം കണ്ടു എന്ന് പറഞ്ഞു.
ങേ? ഇതെന്ത്‌ മായാജാലം!.
തുണിയുടെ തിളക്കമാണോ? അല്ല.
പുറത്ത്‌ നിന്നുള്ള ഏതെങ്കിലും വെളിച്ചമാണോ? അല്ലേയല്ല.
പിന്നെ?
തുണി അനങ്ങുമ്പോള്‍ മാത്രമായിരുന്നു ഈ പ്രതിഭാസം.
പിന്നിട്‌ അതങ്ങോട്ട്‌ ആവര്‍ത്തിച്ചുമില്ല.
അല്പനേരം അതിനെക്കുറിച്ച്‌ ആലോചിച്ചപ്പോഴാണ്‌, യുറേക്കാ.....!!!!!
“സ്റ്റാറ്റിക്‌ വൈദ്യുതി!“
ഇനിയും ഇതിനെക്കുറിച്ച്‌ കൂടുതലായി എന്തെങ്കിലും അറിയണമെന്നുണ്ടെങ്കില്‍, ദാ ഇവിടെ.

ഗൃഹനാഥന്റെ(?) സ്ഥാനം

2008-01-05T13:28:00.001+03:00

വളരെനാളുകളായി എന്തെങ്കിലും ഒന്ന് പോസ്റ്റിയിട്ട്‌ എന്നോര്‍ത്തപ്പോഴാണ്‌, മേശപ്പുറത്ത്‌ കിടന്ന ഒരു കടലാസ്‌ ശ്രദ്ധിച്ചത്‌. എന്നാല്‍പ്പിന്നെ അത്‌ തന്നെയാകട്ടെ എന്ന് വച്ചു.

കമ്പനിയുടെ ഓപ്പറേഷന്‍ മാനേജര്‍ ആണ്‌ ഇംഗ്ലീഷുകാരനായ Mr. Allan Jones. അദ്ദേഹം പറയുന്നതൊക്കെ എനിയ്ക്ക്‌ മനസ്സിലാകുന്നുണ്ടെന്ന് തോന്നിപ്പിക്കാനായ്‌, ജിജ്ഞാസ നിറഞ്ഞ കണ്ണുകളുമായി അദ്ദേഹത്തിന്റെ മുഖത്തേക്ക്‌ നോക്കി തലയാട്ടുകയും, പിന്നെ കൂടെ കുടെ ചിരിക്കുകയും, ഇടയ്ക്കൊക്കെ പരസ്പര-ബന്ധമില്ലാതെ Yes, No എന്നൊക്കെ പറയുകയും കൂടി ചെയ്യുന്നതിനാല്‍, കിളവന്‍ അടുത്തെങ്ങാനും വന്നാല്‍ കുറെ സമയം കൊണ്ടേ പോകൂ.

കഴിഞ്ഞ ദിവസത്തെ ഒരു സംഭാഷണത്തിനിടയില്‍ വീട്ടിലെ അദ്ദേഹത്തിന്റെ സ്ഥാനം കാണിക്കാനായി വരച്ച ഗ്രാഫാണ്‌ താഴെ കൊടുത്തിരിക്കുന്നത്‌. 'One picture is worth a thousand words' എന്നതിനാല്‍ കൂടുതല്‍ വിശദീകരിക്കുന്നില്ല.

ആങ്ങളമാര്‍ എന്താണിങ്ങനെ?

2007-11-22T10:05:00.000+03:00

കൊച്ചുത്രേസ്യയ്ക്ക്‌ ഇടയ്ക്കിടെ അഭിമുഖീകരിക്കേണ്ടി വരുന്ന അല്ലറ ചില്ലറ കുഞ്ഞാങ്ങള ശല്ല്യങ്ങളുടെ (ഇത്‌ ആങ്ങളമാരുള്ള മിക്കവാറും പെങ്ങന്മാര്‍ അനുഭവിക്കുന്ന ഒരുതരം ആഗോള പ്രതിഭാസമാണെന്ന് എനിയ്ക്ക് തോന്നുന്നു!) ചില വിവരണങ്ങള്‍ വായിച്ചപ്പോഴാണ്‌, ഈ പോസ്റ്റിന്‌ ആധാരമായ ഒരു ചെറിയ സംഭവം എന്റെ ഓര്‍മ്മയില്‍ നിന്ന് ചികഞ്ഞെടുത്തത്‌.

പ്രി-ഡിഗ്രിയ്ക്ക്‌ പഠിക്കുന്ന കാലം. സഹപാഠിയായ സുരേഷിന്റെ അകലെയുള്ള വീട്ടിലേക്ക്‌ ഒരു സന്ദര്‍ശനം നടത്തി. അന്ന് അവന്റെ ചേച്ചിയും ഞങ്ങളുടെ കോളേജില്‍ തന്നെ സീനിയര്‍ ആയി പഠിക്കുന്നുണ്ടെന്ന് അറിയാമായിരുന്നു. അത്രമാത്രം.

ഇനി കാര്യത്തിലേക്ക്‌ വരാം. സുരേഷിന്റെ വീട്ടില്‍ ചെന്നു, വളരെ ഊഷ്മളമായ സ്വീകരണത്തിനിടയില്‍ ഞാന്‍ സുരേഷിന്റെ സഹോദരിയെ, പ്രായത്തെ മാനിച്ച്‌ ചേച്ചി, ചേച്ചി, എന്ന് വിളിക്കുന്നുണ്ടായിരുന്നു. എന്തോ, എന്റെ കൂടെക്കൂടെയുള്ള ചേച്ചി വിളി ശ്രദ്ധിച്ചിട്ടാവണം, അവര്‍ സുരേഷിനോട്‌ ഇങ്ങനെ പറഞ്ഞു. "കേള്‍ക്കെടാ, കേള്‍ക്ക്‌. നിന്റെ പ്രായമുള്ളവര്‍ എന്നെ എന്താണ്‌ വിളിക്കുന്നതെന്ന്" സുരേഷ്‌ ഇത്‌ കേട്ട്‌ നിസ്സംഗത നടിച്ചു.

പിന്നീട്‌ എന്നോട്‌. "കേട്ടോ അനിയാ, ഞാന്‍ ഇവന്റെ തുണികളെല്ലാം നനച്ച്‌ കൊടുക്കും, ഷര്‍ട്ടും പാന്റ്‌സും അയണ്‍ ചെയ്ത്‌ കൊടുക്കും, പിന്നെ ചിലപ്പോഴൊക്കെ ഷൂസും പോളിഷ്‌ ചെയ്ത്‌ കൊടുക്കും. കൂടാതെ എന്റെ പേഴ്‌സില്‍ നിന്ന് പൈസയൊക്കെ അടിച്ചുമാറ്റും. എന്നാലും അവന്‍ എന്നെ എടി, പോടി എന്നൊക്കെയാണ്‌ വിളിക്കുന്നത്‌. ഈ നാട്ടിലുള്ള സകലയെണ്ണത്തിനേം വിളിച്ചുകേറ്റി അവന്റെ ബൈക്കില്‍ കൊണ്ടുപോയാലും, എന്നെ കോളേജില്‍ കൊണ്ടുപോവുകയില്ല.

" ഇത്‌ കേട്ട സുരേഷ്‌ ഇങ്ങനെ പറഞ്ഞു. "നീ പോടി അവടൂന്ന്. നാളത്തേക്ക്‌ എന്റെ പച്ച ഷര്‍ട്ടൊന്ന് തേച്ച്‌ വച്ചേക്കണം."

കാര്യങ്ങളൊക്കെ ഇങ്ങനെയാണെങ്കിലും, ഈ വിളിയിലും, കേള്‍വിയിലുമെല്ലാം ഒരു സുഖമുണ്ടെന്നു എനിയ്ക്ക്‌ തോന്നുന്നു.

കപ്പലിന് സ്ത്രീവിശേഷണം വന്ന വഴി

2007-11-18T12:18:00.000+03:00

പണ്ടെങ്ങോ ഒരു കപ്പല്‍ സേവന സ്ഥാപനം സന്ദര്‍ശിക്കാന്‍ ഇടയായപ്പോള്‍, അതിലെ പ്രധാന ഉദ്യോഗസ്ഥന്റെ ആഫീസിനുള്ളിലെ നോട്ടിസ്‌ ബോര്‍ഡില്‍ കണ്ട ഒരു തലക്കെട്ട്‌ എന്റെ ശ്രദ്ധയാകര്‍ഷിച്ചു. അത്‌ ഇങ്ങനെയായിരുന്നു. WhY Is a ShiP AlwayS CallD ShE? തുടര്‍ന്ന് വായിച്ചപ്പോള്‍, കപ്പലിനെ എന്തുകൊണ്ടാണ്‌ സ്ത്രീയായി വിശേഷിപ്പിക്കാനുള്ള കാരണങ്ങള്‍ എന്ന് അറിയാന്‍ കഴിഞ്ഞു. അതൊക്കെ എന്താണെന്ന് നിങ്ങള്‍ക്കും അറിയണ്ടേ? ഇതാ ഇവിടെ താഴെ കൊടുത്തിട്ടുണ്ട്.

ഇതൊക്കെയൊന്ന് മലയാളത്തിലേക്ക്‌ മൊഴിമാറ്റം നടത്താമെന്ന് വിചാരിച്ചപ്പോള്‍ എന്റെ ഭാഷാപ്രാവണ്യം തീരെ അനുവദിക്കുന്നില്ല. ഇതില്‍ ഉപയോഗിച്ചിട്ടുള്ള മിക്കവാറും പദങ്ങള്‍ കപ്പലുമായി ബന്ധപ്പെട്ടവ ആണെന്നതാണ്‌ ഏറേ രസകരം.

വായിച്ചിട്ട്‌, യോജിപ്പും വിയോജിപ്പുമൊക്കെ അറിയിക്കുമല്ലോ!

A ship is called 'she' because:

There is always a great-deal of bustle around her;
There is usually a gang of men about;
She has a waist and stays;
It takes a lot of paint to keep her good looking;
It is not the initial expense that breaks you. It is the upkeep.
She can be all decked out;
It takes an experienced man to handle her correctly;
And without a man at the helm, she is absolutely uncontrollable.
She shows her topsides only;
And when coming into port, always heads for the buoys.

ഇപ്പോ മനസ്സിലായല്ലോ എന്തുകൊണ്ടാണ് കപ്പലിനെ സ്ത്രീയായി വിശേഷിപ്പിക്കുന്നതെന്ന്. ഇതൊക്കെ തന്നെ കാരണങ്ങള്‍!

സ്വിറ്റ്‌സര്‍ലന്റുകാരുടെ ഒരു നേരമ്പോക്ക്

2007-11-05T11:09:00.000+03:00

അടുത്തയിടെ സ്വിറ്റ്‌സര്‍ലന്റില്‍ പോയി മടങ്ങിവന്ന ഒരു സുഹൃത്ത്‌, അവിടെ കണ്ടവരുടെ ചില നേരമ്പോക്കുകളില്‍ ഒന്ന് ഇതാ. പണ്ടൊക്കെ കുട്ടികളുടെ കൂടെയും, ഇപ്പോള്‍ വല്ലപ്പോഴുമൊക്കെ കമ്പ്യൂട്ടറിന്റ്‌ കൂടെയും ചെസ്സ്‌ കളിക്കുന്ന എനിയ്ക്, ഇപ്പോഴാണ്‌ ചെസ്സിന്‌ ഇങ്ങനേയും ഒരു രൂപമുണ്ടെന്ന് അറിയുന്നത്‌.

അമ്മാവന്മാര്‍ രണ്ടുപേരും കണ്‍ഫ്യൂഷനില്‍ ആണെന്ന് തോന്നുന്നു. ആരെങ്കിലും ഒന്ന് സഹായിച്ചേ..!

ഒരു നാടന്‍ കപ്പെചിനൊ (Cuppaccino)

2007-10-28T11:57:00.000+03:00

കപ്പെചിനൊ കുടിയ്ക്കാന്‍ ഇനി അധികം പണം മുടക്കേണ്ട. വീട്ടിലും ഓഫീസിലുമൊക്കെ എളുപ്പത്തില്‍ ഒരു നാടന്‍ കപ്പെചിനൊ ഉണ്ടാക്കാനുള്ള ചെപ്പടിവിദ്യ ഇതാ.

ഒരു കപ്പിന്‌ വേണ്ട സാധനങ്ങള്‍:

വെള്ളം: ഒന്നേകാല്‍ കപ്പ്‌ (സാധാരണ കാപ്പി കപ്പിനുള്ള അളവ്)

പഞ്ചസാര: ഒന്നര (1½) റ്റീ സ്പൂണ്‍. അധികമധുരം വേണ്ടവര്‍ക്ക്‌ രണ്ട്‌ സ്പൂണ്‍ വരെയാകാം.

കാപ്പി പൊടി: കാല്‍ (¼) റ്റീ സ്പൂണ്‍ മതി. കൂടുതല്‍ കടുപ്പത്തിന്‌ അര (½) റ്റീ സ്പൂണ്‍ വരെയാകാം. കോഫി പൊടി ഞാന്‍ നെസ്‌ലെയുടേതാണ്‌ ഉപയോഗിക്കുന്നത്‌. ഞാന്‍ അതിന് അടിമയായിപ്പോയി അതുകൊണ്ടാണ്.

പാല്‍: നല്ലയിനം കണ്ടന്‍സ്ഡ്‌ പാല്‍ ചെറിയ ടിന്‍. എനിയ്ക്ക്‌ കൃത്യമായ അളവൊന്നുമില്ല. എങ്കിലുമുദ്ദേശം ചെറിയ ടിന്‍ പാലിന്റെ കാല്‍ഭാഗം മതിയാകും.

പകരം പാല്‍പൊടിയും ഉപയോഗിക്കാം. അതാണെങ്കില്‍ നല്ലവണ്ണം പതയുന്ന ഏതെങ്കിലും പാല്‍പൊടി രണ്ട്‌ റ്റീസ്പൂണ്‍.

എന്നാല്‍ ഇനി തുടങ്ങിക്കളയാം.

വെള്ളം അടുപ്പത്ത്‌ തിളയ്ക്കാന്‍ വയ്ക്കുക. ഈ സമയം കൊണ്ട്‌ കപ്പെചിനൊ കുടിയ്ക്കാന്‍ ഉപയോഗിക്കുന്ന കപ്പില്‍ തന്നെ പഞ്ചസാരയും, കാപ്പിപൊടിയും യഥാക്രമം ഇട്ട്‌ ഒരു ചെറിയ സ്പൂണ്‍ ഉപയോഗിച്ച്‌ ഇളക്കുക. ഇതിലേക്ക്‌ ഒരു തുള്ളി വെള്ളം ഒഴിച്ച്‌ പഞ്ചസാരയും കാപ്പിപൊടിയും ലയിപ്പിച്ച്‌ ചേര്‍ക്കുക. ഒന്ന് എന്ന് പറഞ്ഞാല്‍ ഒരു തുള്ളി മാത്രം. കൂടുതല്‍ ഒഴിച്ച്‌ കുളമാക്കരുത്‌. ഈ വെള്ളം ഒരു ഉല്‍പ്രേരകമായി പ്രവര്‍ത്തിച്ച് നനവില്ലാത്ത പഞ്ചസാരയും, കാപ്പിപൊടിയും തമ്മില്‍ വേഗം ചേരാന്‍ സഹായിക്കും! ഇത്‌ നന്നായി ചേര്‍ന്ന് കഴിയുമ്പോള്‍ ഈ മിശ്രിതത്തിന്റെ നിറം, ഏകദേശം പാല്‍ ചേര്‍ത്ത കാപ്പിയുടേതുപോലെ ആകും. അല്ലെങ്കില്‍ അങ്ങനെയാകുവരെ നന്നായി ഇളക്കി യോജിപ്പിക്കണം. പിന്നീട്‌ ആവശ്യത്തിനു വേണ്ട പാല്‍ ഒഴിക്കുക. പാല്‍ ഒഴിച്ച ശേഷം ഇളക്കരുത്‌. ഇനിയും അടുപ്പത്തുനിന്നും തിളച്ച വെള്ളം അല്‍പം ഉയര്‍ത്തിപിടിച്ച്‌ നേരേ കപ്പിലേക്ക്‌ ഒഴിക്കുക. നമ്മുടെ നാട്ടില്‍ നാടന്‍ ചായക്കടക്കാരൊക്കെ ചെയ്യുന്നത് കണ്ടിട്ടില്ലേ? അതുപോലെ. സൂക്ഷിച്ചൊഴിക്കണം അല്ലെങ്കില്‍ കപ്പില്‍ വീഴേണ്ട വെള്ളം വേറെ എവിടെങ്കിലുമായിരിക്കും വീഴുന്നത്‌. കപ്പിലുള്ള മിശ്രിതം വെള്ളത്തോട്‌ ചേര്‍ന്ന് കപ്പെചിനൊ നല്ലവണ്ണം പതഞ്ഞ്‌ വരാന്‍ വേണ്ടിയാണ്‌ ഇങ്ങനെ ചെയ്യുന്നത്‌. ഇളക്കേണ്ട ആവശ്യം തീരെയില്ല. ഇതാ കപ്പെചിനൊ തയ്യാര്‍! ചൂടോടെ ഉപയോഗിക്കുക.

മുകളില്‍ പറഞ്ഞ രീതിയില്‍ ഉണ്ടാക്കിയ കപ്പെചിനൊയിക്ക്, പ്രീയ വായനക്കാര്‍ അതിന് കൂടുതല്‍ മണവും, രുചിയും, ഭംഗിയും, പിന്നെ എന്തൊക്കെ മേമ്പൊടികള്‍ ചേര്‍ക്കാമോ അതൊക്കെ ചേര്‍ത്ത്‌ തികച്ചും ആസ്വാദ്യകരമാക്കുക!

Lotus-Eatersന്റെ കഥ

2007-10-22T16:48:00.000+03:00

14-07-2001ല്‍ എന്റെ അച്ഛന്‍ എനിയ്ക്കയച്ച കത്തിന്റെ അവസാന ഭാഗമാണ്‌ താഴെ കൊടുത്തിരിക്കുന്നത്‌.

ഗ്രീക്ക്‌ പുരാണത്തിലെ, അതിഥികളെ കാല്‍ വലിച്ച്‌ നീട്ടിയോ മുറിച്ചോ കൊല്ലുന്ന ഒരു രാക്ഷസന്റെ കഥയെപ്പറ്റി ചോദിച്ചിരുന്നല്ലോ. കഥാപാത്രത്തിന്റെ പേര്‌ Procrustes എന്നാണെന്നല്ലാതെ കൂടുതല്‍ വിവരങ്ങള്‍ എനിയ്ക്‌ക്‍ അറിഞ്ഞു കൂടാ. അന്വേഷിച്ച്‌ പിന്നീട്‌ എഴുതാം.

വേറെ ഒരു കഥ പറയാം. ഇതും ഗ്രീക്ക്‌ പുരാണത്തില്‍നിന്നുമാണ്‌. Lotus-Eatersന്റെ കഥ. ഇവിടെ ലോട്ടസ്‌ എന്നാല്‍ താമര എന്നല്ല, ഒരു പ്രത്യേകതരം ചെടിയാണ്‌. ഇതിന്റെ സവിശേഷത എന്തെന്നാല്‍ അതിന്റെ കായ്‌ കാണാന്‍ വളരെ ഭംഗിയുള്ളതാണ്‌ എന്നാല്‍ ഇത്‌ തിന്നു കഴിഞ്ഞാല്‍ തിന്നവന്റെ കര്‍ത്തവ്യബോധം നഷ്ടപ്പെടും. അതായത്‌ ഭാവിയെപ്പറ്റി ഒരു ചിന്തയുമില്ലാതെ അലക്ഷ്യമായി പെരുമാറുന്ന സ്വഭാവമായിത്തീരും. ട്രോയിയിലെ യുദ്ധം ജയിച്ചു ഗ്രീക്ക്‌ യോദ്ധാക്കള്‍ തിരികെ മടങ്ങിയ കഥ നേരത്തെ എഴുതിയിരുന്നല്ലോ. കൂട്ടത്തില്‍ തിരിച്ച യൂളീസിസിന്റെ കപ്പല്‍, കാറ്റില്‍പ്പെട്ട്‌ വഴിതെറ്റി ഒരു ദ്വീപിന്റെ പരിസരത്തെത്തി (ദ്വീപിന്റെ പേര്‌ ഓര്‍മ്മയില്ല,. അവിടെ മുന്‍പ്‌ പറഞ്ഞ ലോട്ടസ്‌ ചെടികള്‍ ധാരാളം ഉണ്ടായിരുന്നു.) കൂടെയുണ്ടായിരുന്ന ഭടന്മാര്‍ ആ ദ്വീപില്‍ ഇറങ്ങി ലോട്ടസ്‌ ചെടികളുടെ കായ്‌ പറിച്ചുതിന്നു. അതിനുശേഷം അവിടെ എങ്ങനെ/എന്തിന്‌ വന്നുവെന്നോ, തിരിച്ച്‌ നാട്ടില്‍പോകണമെന്നോ, ഒരു ചിന്തയുമില്ലാതെ, ലഹരിയടിച്ച്‌ കറങ്ങി നടക്കുന്നവരെപ്പോലെ അവിടെയൊക്കെ അലഞ്ഞ്‌ നടക്കുന്നു. നേതാവായ യൂളീസിസ്‌ എത്ര ശ്രമിച്ചിട്ടും അവരെ തിരികെ കപ്പലില്‍ കയറ്റാന്‍ സാധിച്ചില്ല. എതായാലും കുറെ നാളത്തെ കഠിനശ്രമവും പോരാട്ടവും നടത്തി കുറെപ്പേരെ തിരികെ കപ്പലില്‍ കയറ്റി യൂളീസിസ്‌ ഒരു വിധം നാട്ടിലെത്തി.

ചുമതലാബോധമോ, ലക്ഷ്യബോധമോ ഇല്ലാതെ കറങ്ങി നടക്കുന്നവരെ "Lotus-Eaters" എന്ന് പറയാറുണ്ട്‌. നിങ്ങളുടെ കൂടെയുള്ളവരില്‍ ചിലര്‍ Lotus-Eaters എന്ന് വിളിക്കപ്പെടാന്‍ യോഗ്യതയുള്ളവര്‍ കണ്ടേക്കും. ഇതോടെ തത്ക്കാലം ഇവിടെ നിര്‍ത്തട്ടെ.

ഉദ്ദേശശുദ്ധിയോടെ അച്ചാച്ചനെനിയ്ക്ക്‌ അയച്ചുതന്ന ഇത്തരം കഥകള്‍ ഇനിയുമുണ്ട്‌. സൗകര്യം പോലെ അവ പിന്നീട്‌ പ്രസിദ്ധപ്പെടുത്താം.

അമ്മാവിയമ്മപ്പോര്‌ (അവസാന ഭാഗം)

2007-10-18T09:27:00.000+03:00

വീട്ടിലുള്ളാ‍ളുകളെല്ലാം കഴിച്ചിട്ട്
പട്ടിക്കും ചോറു കൊടുത്താല്‍ പിന്നെ
കല്ലും നിറഞ്ഞു കലത്തിനടിക്കുള്ള-
തെല്ലാം കൂടെയവള്‍ക്കേകും നിത്യം

ഇങ്ങനെ കാലം കഴിഞ്ഞുപോകും വിധൌ
ജീവിതമൊന്നു തിരിഞ്ഞുവരും
വാര്‍ദ്ധക്യമേറി സ്വശക്തിയുമില്ലാതായ്
ധാത്രിയില്‍ ജീവിതം ഭാരമാകും

പാരം വലഞ്ഞു വസിച്ച മരുമകള്‍
‍താരുണ്യമാര്‍ന്നു സ്വതന്ത്രയാകും
അക്കാലമങ്ങവളമ്മായിയമ്മയോ-
ടുള്‍ക്കാമ്പില്‍ വൈര്യം തുടങ്ങും പിന്നെ

മാതൃ ശുശ്രൂഷണമെന്നുള്ള കൃത്യത്തെ
ഭര്‍ത്താവു ഭാര്യയെയേല്‍പ്പീക്കുമ്പോള്‍
‍ഭര്‍ത്താവു ചൊന്നതു കാര്യമാക്കാതവള്‍
‍മാതാവെ ‘ശുശ്രൂഷ’ ചെയ്തീടുന്നു.

കണ്ണും കാണാതെയായ് കര്‍ണ്ണവും കേള്‍ക്കാതെയായ്
തിണ്ണയില്‍ മാതവിരുപ്പുമായി
അക്കാലം തന്‍ സുതന്‍ മാതൃചാരേ
ചെന്നുവൃത്താന്തമോരോന്നു മോതിടുന്നു.

എണ്ണയും തേച്ചു കുളിച്ചു രസിച്ചവള്‍
‍പെണ്ണുങ്ങളോടൊത്തു പാഴ്വാക്കുകള്‍
‍തിണ്ണയില്‍ തന്നെയിരിക്കുന്ന തള്ളയെ
“കണ്ണില്ലവര്‍ക്കെന്നു’ ചൊന്നീടുന്നു

ഏതും മറുപടി യോതുവാനാകാതെ
മാതാവു തപ്പുന്നതെത്ര താപം.
പാറിയ കാര്‍കൂന്തല്‍ കീറിയ വസ്ത്രവും
കോറയാം ദേഹവും മാറും കഷ്ടം!

വട്ടേപ്പം ഇഡ്ഡലി ചട്ടിയപ്പം
നല്ലകൊട്ടത്തേങ്ങ ചേര്‍ത്ത കുട്ടയപ്പം
ഒട്ടു ചുരുട്ടുമിടിയപ്പം നെയ്യപ്പം
ചുട്ടവള്‍ നിത്യമായ് ഭക്ഷിക്കുന്നു.

ഇപ്രകാരമുള്ള ഭോജനമമ്മയ്ക്ക്
സ്വല്പവുമേകിടാതെന്നുമവള്‍
‍തന്നോടു ചെയ്തൊരു പാതകങ്ങള്‍ക്കവള്‍
‍തെല്ലും വിടാതെ പകരം ചെയ്തു.

അണ്ണിയെ കല്ല്യാണം ചെയ്ത വീട്ടില്‍ നിന്നും
ഉണ്ണികളൊത്തവള്‍ വന്നിടുന്നു
ഗേഹത്തിലന്നവളെത്തുമ്പോള്‍
നാത്തൂന്റെ സ്നേഹമില്ലായ്മകളെത്ര ചിത്രം

മുന്‍ ചെയ്ത കൃത്യങ്ങള്‍ ചിത്തത്തിലോര്‍ത്തോത്ത്
ഓരോന്നുമങ്ങോട്ടും ചെയ്തിടുന്നു
“നല്ല തങ്കാളെ’ന്ന സ്ത്രീയോടു ചെയ്തപോല്‍
‍ഒട്ടും വിടാതവള്‍ ചെയ്ത കഷ്ടം

മരുമക്കളെ ഞാ‍നും കുറ്റം വിധിക്കില്ല
പരമപരാപശന്‍ കോപമത്രേ
സച്ചിതാനന്ദനെ ചിന്തിക്കാതുള്ളോര്‍ക്ക്
ഭാവിയില്‍‍ ദോഷങ്ങള്‍ വന്നു ചേരും.

(അവസാനിച്ചു..)

അമ്മാവിയമ്മപ്പോര്‌ (ആദ്യ ഭാഗം) ഇവിടെ

അമ്മാവിയമ്മപ്പോര്‌ (ആദ്യ ഭാഗം)

2007-09-24T08:28:00.000+03:00

ഏറെ വര്‍ഷങ്ങള്‍ക്ക്‌ മുന്‍പുവരെ സാധാരണക്കാരുടെ ഇടയില്‍ ഉണ്ടായിരുന്ന അമ്മാവിയമ്മപ്പോര്‌ ആണ്‌ കുമ്മിയടിപ്പാട്ട്‌ രൂപത്തില്‍ താഴെ പ്രതിപാദിച്ചിരിക്കുന്നത്‌. അമ്മാവിയമ്മ മരുമകളോട്‌ കാട്ടുന്ന വിദ്വേഷവും, പോരും, മരുമകള്‍ പലിശ സഹിതം തിരികെ കൊടുക്കുന്നതാണ്‌ ഇതിലെ വിഷയം. ഈ പാട്ടിന്റെ ഉപജ്ഞാതാവ്‌ ആരാണെന്ന് കൃത്യമായി എനിയ്ക്‌ അറിയില്ല. വര്‍ഷങ്ങള്‍ക്ക്‌ മുന്‍പ്‌ വല്ല്യപ്പച്ചനില്‍നിന്ന് കേട്ടു പകര്‍ത്തിയ ഈ പാട്ട്‌, പ്രിയ ബ്ലോഗ്‌ വായനക്കാര്‍ക്കുവേണ്ടി ഇവിടെ അവതരിപ്പിക്കുന്നു. വായനാ സൗകര്യാര്‍ത്ഥം രണ്ട് ഭാഗങ്ങളായി ഇതിനെ തിരിച്ചിട്ടുണ്ട്‌.

അല്ലയോ സോദരീ സോദരന്‍മാരേ
ഞാന്‍ചൊല്ലീടുമിക്കഥ കേട്ടുകൊള്‍വിന്‍
കാലേകലിയുഗ വൈഭവമാര്‍ന്നങ്ങു
കാലം കഴിക്കുന്നു മാനുജന്‍മാര്‍.

പുത്രന്റെ ഭാര്യയെ പുത്രിയെന്നോര്‍ക്കാതെ
കൃത്യങ്ങള്‍ മാതാക്കളാചരിച്ചു.
എന്‍മകള്‍ സൗഖ്യമായ്‌ വാഴ്‌ക; മരുമകള്‍-
ഉണ്‍മയായ്‌ ചെയ്യണം ജോലിയെല്ലാം.

കൃത്യം പ്രഭാതെയെഴുന്നേറ്റു നിത്യവും
വൃത്തി വരുത്തണം മുറ്റമെല്ലാം
കാലേ കടുങ്കാപ്പി യപ്പമെന്നീ വക
ചാലവേ കാലമങ്ങാക്കീടേണം.

തൂത്തു തളിക്കേണം പാത്രങ്ങള്‍ തേക്കണം
മദ്ധ്യാഹ്ന ഭക്ഷണം വച്ചീടേണം
തീയെരിച്ചീടുവാന്‍ വേണ്ട വിറകെല്ലാം
മായമില്ലാതെ കരുതീടേണം.

ചാണകം പൂശണം ചായിപ്പു തൂക്കണം
തണ്ണികാച്ചീടേണം ഭര്‍ത്താവിന്നായ്‌
നെല്ലുപുഴുങ്ങിയുണങ്ങണം കുത്തണ-
മെല്ലാമവള്‍ തന്നെ ചെയ്തീടേണം.

വെണ്ട വഴുതന്‍ യെന്നിവകള്‍ക്കെല്ലാം
വേണ്ടപോല്‍ വെള്ളമൊഴിച്ചീടേണം
ഉണ്ണിക്കിടാങ്ങളെ താലോല മാട്ടണം
എണ്ണയും തേച്ചു കുളിപ്പിക്കേണം.

അത്താഴമൂണിനു വേണ്ട വിഭങ്ങള്‍
ചേര്‍ത്തു ചമച്ചങ്ങു വച്ചീടേണം.
ഇപ്രകാരമുള്ള വൃത്തികള്‍ നിത്യവും
സുപ്രസന്നേനയായ്‌ ചെയ്തീടേണം.

നാത്തൂന്റെ പ്രീതി ലഭിപ്പതിനായവള്‍
എത്രയും താപം സഹിച്ചിടേണം.
കര്‍ക്കശ ഭാവനേ കര്‍ണ്ണ ശൂലങ്ങളാം
വാക്കുകള്‍ കേട്ടവള്‍ പാര്‍ത്തിടേണം.

ഏതുമേ തൃപ്തിയാ മാതാവിന്നില്ലൊട്ടും
ചേതസ്സുറ പ്പേറും പാറ തന്നെ
തന്‍ മകന്‍ ചത്തുപോയാലും മരുമക്ക-
ടാമയം കണ്ടിടാന്‍ വാഞ്ചിക്കുന്നു.

അമ്മാവിയമ്മമാര്‍ തന്നുടെ കാഠിന്യം
ചെമ്മേ പറവിതിന്നാവതില്ല
കുറ്റമല്ലാതില്ല ചെയ്തതഖിലവു-
മേറ്റം ദാരുണ്യമാമീയവസ്ഥ.

ചോറും പലഹാരം സാമ്പാറു തീയലും
ചാറില്ലാതെ വച്ച മത്സ്യക്കറി
പച്ചടി കിച്ചടി പച്ചക്കറികളും
പച്ചമോരും നല്ല പച്ചത്തൈരും.

മരുമകള്‍ കാണാതെ മാതാവും നാത്തൂനും
പാരം മടിക്കാതെ കട്ടുതിന്നും
ഒന്നുമറിയാത്ത പാവമാ നാത്തൂനും
തിന്നെന്നു ചൊന്നിടും നാരിമാരും.

"ഉണ്ണിപ്രായം മുതല്‍ ഭോജനം നല്ലത്‌
കണ്ണില്‍ കണ്ടിട്ടില്ലാത്തീ മൂശേട്ട
കണ്ണു തപ്പീടുകില്‍ ചോറും കറികളും
കയ്യിട്ടു വാരി ഭുജിച്ചീടുന്നു.

പട്ടിണിയിട്ടു വളര്‍ത്തിയ കുട്ടികള്‍
‍കട്ടിടും നിശ്ചയമായ്‌ വളര്‍ന്നാല്‍."
ഇത്തരമോരോരോ കുത്തുവാക്കോതീടും
അമ്മാവിയമ്മയും തന്‍ മകളും.

കുറ്റവും തന്റ കുറവും പറഞ്ഞിട്ട്‌
ഭര്‍ത്താവിനേക്കൊണ്ടു തല്ലിച്ചിട്ടും
ഇഷ്ടമായുള്ള നല്‍ഭോജനം ചെയ്തവര്
‍ഇഷ്ടമ്പോല്‍ കൂസലില്ലാതെ തിന്നും.

(തുടരും.....)

ThE..MooN..HaS..SeT

2007-09-19T17:22:00.000+03:00

താഴെ പകര്‍ത്തിയിരിക്കുന്ന കവിതാശകലം എന്റെ മനസ്സില്‍‌‌‌‌ തങ്ങിനില്‍‌ക്കാന്‍ തുടങ്ങിയിട്ട് വര്‍ഷങ്ങള്‍ ഏറേയായി. ആരെഴുതിയതാണെന്ന് അറിയില്ല. അറിയാന്‍ ശ്രമിച്ചിട്ടുമില്ല.
The moon has set
It is midnight, time passes
And I lie alone.
Now Eros shakes my soul
A wind on the mountain
Falling on the oaks.
I strike the reel in a spider's fang,
In a cold crab's claw, in a lobster's tail.
I clutch the heights in a fire-stairs gleam
And sink my days in the watery womb!

ഇത് എന്റെ ഒരു സുഹൃത്തിനയച്ചു കൊടുത്തിരുന്നപ്പോള്‍, അവന്‍ എനിയ്ക്ക് തിരിച്ച് അയച്ചുതന്ന മുകളിലത്തെ കവിതയുടെ വേറൊരു മുഖമാണിവിടെ.
The sun has set
It is midday, time passes
And I sit together with a crowd.
Now feelings shake my heart
A tornado in the valley
Rising up to the skies.
I strike a film which’s of Shakeela,
It was a noon show, a youngster’s love.
I clutch the heights of a fire-warm high
And sink my hands in the watery mountains!