(က)
တစ်ခုသော နွေရာသီရဲ့ မေလ (ဂ) ရက်
ကမ္ဘာဦးလယ်မြေမှာ
အချစ်အစစ်တို့ ပွင့်ဖူးတိုးထွက်ဖို့
ကျုပ်တို့ နှစ်ယောက်
မျိုးစေ့တွေ ကြဲပက် စိုက်ပျိုးခဲ့ကြတယ်။

(ခ)
ခြစ်ခြစ်တောက် ပူနေတဲ့ နွေအရောင်အောက်
ကျုပ်တို့ “သည်း” ခဲ့တဲ့ မိုးနဲ့တင်
အဲသည် တစ်ရာသီလုံး
စိမ်းစိမ်းစို တောက်ပစေခဲ့တယ်။

(ဂ)
နှင်းဆီမလိုဘူး၊ ချောကလက် မလိုဘူး
သူ့မျက်ဝန်း တစ်ချက်ညှိုးရင်တောင်
အချစ်နဲ့ ငွေ့ရည်ဖွဲ့ လှုပ်နှိုး
မြတ်နိုးခြင်းမိုးတွေ ရွာသွန်းတတ်တဲ့ ကျုပ်တို့ အတွက်
တစ်နှစ်မှာ ၃၆၅ (၁/၄) ရက်ဟာ
“Valentine Day” တွေချည်းပါပဲ။

(ဃ)
နယ်နမိတ်တွေကို ပုန်ကန်ပြီး
အကွာအဝေးတွေကို တော်လှန်ဖို့
ဝါကျတွေ ရာထောင်၊ သိန်း၊ သန်းနဲ့
သံသယအပင်တွေကို ရိုက်ချိုး
ကျုပ်တို့ နှစ်ယောက်ကြားမှာ
“သစ္စာ” တွေ တံတား အစင်းစင်း ထိုးခဲ့ကြတယ်လေ။

အပိုင်း (၂)

(က)
၄ နှစ် အနှုတ်၊ (၄၇) ရက်
ကျုပ် အငိုက်အလစ်မှာပဲ
ကမ္ဘာတစ်ခုလုံးကို “သူ” ဖျက် ပစ်ပြီ
ကျုပ် “အသက်” ကို ယူဖို့
သူ “အသစ်” တစ်ခုတွေ့သွားခဲ့တယ်။

(ခ)
မစ္စတာ နိုဗယ်ရေ.
ခင်ဗျားပေးတဲ့ ဆုစာရင်းထဲ
“အရက်စက်ဆုံး လူသား” ဆုအမည် ထည့်သွင်းဖို့
ကျုပ်….
ရင်နာနာနဲ့ တိုက်တွန်းပါရစေလားဗျာ။

(ဂ)
အခုလောလောဆယ်တော့.

ကျုပ် ငိုတယ်၊ ကျုပ် မောတယ်
ကျုပ်ရီတယ်၊ ကျုပ် မုန်းတယ်
ကျုပ်သိပါတယ်..
အရူးလုံးလုံး ဖြစ်တယ်ထင်ပြီး
ခင်ဗျားတို့ ပြုံးနေကြတယ်မဟုတ်လား.။

(ဃ)
အမှန်တော့.
အဲသည်အရာဟာ
လူသားဆန်တဲ့ ရောဂါစစ်စစ်ကြီးပါပဲဗျာ
ဟော ဟိုမှာ…
ရာသီဥတု ဆိုးဆိုးတွေထဲ
မျက်ရည်တွေတောင် ဖြိုးဖြိုးဖျစ်ဖျစ် မီးတောက်လို့။    ။

မှော်ဆရာ (13.03.2009) 04:34 AM

(က)
ညောင်ဦးကမ်းပါး ပြိုတိုင်း
စမ္မာနဂိုရ်က နွားမပေါင်ကျိုးရတာ
အခါပေါင်း တစ်ရာ။

(ခ)
စေတနာတွေ ရေစီးတိုင်း
ကမ်းပါးတွေပါ လိုက်လိုက်ပြိုမိတာက
အကြိမ်ပေါင်း တစ်သန်း။

(ဂ)
မှတ်တမ်းမှတ်ရာနဲ့ သိမ်းဆည်းရရင်
ကမ္ဘာကြီးပင် လေးလံလောက်ပေရဲ့

ကိုယ့် အဖြေလွှာ ကိုယ်စစ်၊
ကိုယ့်အမှတ် ကိုယ်ခြစ်ပြီး
တွက်ရေးနဲ့ စက်သူဌေးများ ဖြစ်မြောက်ခဲ့ကြပုံ။

(ဃ)
ဒီလိုနဲ့
အမြင်အာရုံတွေကို တစ်ဘဝစာ အငှားချခံရတယ်။
(ပြောင်းရွှေ့ကြေးမဲ့)

အသက်ရှုခွင့်တွေ အနုကြမ်း စီးနင်းခံရတယ်။

နှစ်ဖက်သော နားများ ပါးသထက် ပါးလာကြရတယ်။

ဦးနှောက် ပူပူနွေးနွေးနဲ့ အသိဉာဏ်တွေ တည်ခင်း ဧည့်ခံကြရတယ်။

(ခံစားမှုများ ရေမျောကမ်းတင်)

အစာအောက်မှာ ချိတ်ပါမှန်း သိသိနဲ့
စေတနာ အပြည့်ကို အန်ထုတ်ဖို့ ကြိုးစား
ဟန်လုပ်ရင်း (ရယ်) မောကြတဲ့ ဒီလောကထဲ
ကိုယ်ရေးတဲ့ ပုစ္ဆာတစ်ပုဒ်
ကိုယ်တိုင်ပဲ အဖြေထုတ် မှားခဲ့ကြပြီ။    ။

မှော်ဆရာ

ဝ၅.ဝ၂.၂၀ဝ၈ (ကြာသပတေးနေ့)

ရည်ညွှန်း။    ။ “တွက်ကွက်” ဆိုသော အမည်သည် ဆရာကြီး ရွှေဥဒေါင်း၏ “အတွေးအမြင်နှင့် ရှုထောင့် ဆောင်းပါးများ” စာအုပ်မှ “ကျွန်ုပ်၏ တွက်ကွက်” ဆိုသော ဆောင်းပါးတစ်ပုဒ် ခေါင်းစဉ်အား တစ်စိတ်တစ်ပိုင်း ရယူသုံးစွဲထားခြင်း ဖြစ်သည်။

TypeFace.js for Myanmar Web Sites

ခုတစ်လော ဟိုရှုပ်၊ ဒီရှုပ်တွေကြားထဲ TypeFace.js ဆိုတဲ့ ကောင်နဲ့ မြန်မာဝဘ်ဆိုဒ်တွေ အတွက် မြန်မာ ဖောင့်ထ်ကို ဘယ် အခြေအနေမှာ မဆို၊ ဘယ် ဘရောက်ဇာ မှာ မဆို အဆင်ပြေပြေ ဖတ်လို့ ရနိုင်မယ့် နည်း လိုက်ရှာနေခဲ့တယ်။ အရင် သုံးနေတဲ့ အီးအိုတီ (Embedded Open Type) ဆိုတဲ့ ကောင်က M$oft က လုပ်တာ ဖြစ်လို့ အိုင်အီး ဘရောက်ဇာတွေမှာပဲ ကောင်းကောင်း အလုပ်လုပ်တယ်။ တစ်ကယ် လူသုံးများတဲ့ မီးမြေခွေး နှင့် အော်ပရာ၊ ဆာဖာရီ စတာတွေမှာ အလုပ်မလုပ်ဘူး။

တစ်ဝက်တစ်ပျက်တော့ ကံကောင်းတယ်လို့ ပြောရမယ်။ Typeface.js ဆိုတဲ့ ကောင်ကို သွားတွေ့တယ်။ မြန်မာ မဟုတ်တဲ့ ကျန်တဲ့ ဖောင့်တွေ အတွက်တော့ တော်တော်များများ အဆင်ပြေနေကြပြီ။ သူတို့ကတော့ Typography အတွက် အလှအပ အဖြစ်သုံးကြတယ်။  ကျွန်တော်တို့ကတော့ မြန်မာလို မြင်လို့၊ ဖတ်လို့ရဖို့ အတွက်ပေါ့။ သူက Open Source ဖြစ်တယ်။ GPL License နဲ့ ဖြန့်ချီတယ်။ သုံးတဲ့ စနစ်က Image Rendering မဟုတ်ဘူး၊ SEO Compatible ဖြစ်တယ်၊ Pure CSS & HTML စနစ်သုံးထားတယ်၊ အဲဒီ ဖောင့်ထ် စနစ်ထဲမှာ ကိုယ်လည်း CSS ကို ကြိုက်သလို အသုံးပြုနိုင်တယ်။ အားလုံး အတွက် အဆင်ပြေတယ်ပြောရမယ်။

ဒီလိုနဲ့ မြန်မာဆိုဒ်တွေမှာ သုံးဖို့ မြန်မာဖောင့်ထ် တွေ စမ်းဖြစ်တယ်။ ASCII Font တွေ အားလုံး နီးပါး Convert လုပ်မရဘူး၊ Unicode Font တွေထဲက Zawgyi ကတော့ နောက်ဆုံး ဗားရှင်းတွေ မရဘူး။ (Zawgyi1) ဆိုတဲ့ အရင်ဗားရှင်းတစ်ခုရတယ်။ နောက် Myanmar3, MyMyanmar, Padauk, Parabaik, (Sans မဟုတ်တဲ့ ဟာ) , MyaZeDi တို့ကို Convert လုပ်လို့ ရတယ်။

Blogspot မှာ တင်ပြီး စမ်းကြည့်တယ်။ မူလဆိုဒ်မှာ Font ကို TypeFace.js ပြောင်းတော့ အားလုံး အဆင်ပြေတယ်။ စာရေးတဲ့ WYSIWYG စနစ်ထဲမှာ အားလုံး အလုပ်လုပ်တယ်။ ပြဿနာက Publish လုပ်လိုက်ရင် ဖောင့်ထ် တွေကို မှန်ကန်အောင် Rendering မလုပ်တော့တာပဲ။ လောလောဆယ် ဒီအောက်က လင့်ခ်မှာ Myanmar3, Padauk နှင့် Parabaik ဖောင့်ထ် သုံးမျိုး စမ်းထားတယ်။ Padauk တစ်ခုပဲ နဲနဲပါးပါး မှန်အောင် Render လုပ်နိုင်တယ်လို့ မြင်ရတယ်။ ဘာတွေ ပြင်ဖို့ လိုမလဲ ကောင်းကောင်း နားမလည်သေးဘူး။

Test Web Page

>> http://mmfontypeface.blogspot.com/

အတွေ့အကြုံရှိသူများ ရှယ်ယာပေးကြပါဦး။

Gmail New Feature "Offline Support"

Gmail ရဲ့ လူတောင်းဆိုခံရမှု အများဆုံး ဖြစ်တဲ့ Offline Support ခေါ်တဲ့ Feature အသစ် ထွက်ရှိလာပါတယ်။ လတ်တလော စမ်းသပ် သုံးစွဲနိုင်သော အဆင့် (LabVersion) ဖြစ်ပြီး မကြာခင်မှာ အပြည့်အစုံ အသုံးချနိုင်တဲ့ အဆင့် (Full Version) ဖြစ်အောင် တိုးတက်မွမ်းမံ ထုတ်လုပ်သွားမယ်လို့ Google Officiail Blog ရဲ့ ကြေညာချက်အရ သိရှိရပါတယ်။

လူသုံးများ၊ လူကြိုက်များလှတဲ့ Google ရဲ့ဝန်ဆောင်မှု တစ်ခုဖြစ်တဲ့ Gmail Services ကို ဒီ Offline Support စနစ် အသုံးပြုပြီး ဝင်းဒိုးစ် စနစ်မှာပါတဲ့ Microsoft Outlook Email လိုပဲ အင်တာနက် ကွန်နက်ရှင် မရှိပေမယ့်လည်း မိမိ အီးမေးလ်တွေကို ဖတ်ရှုနိုင်ခြင်း၊ အီးမေးလ် အသစ်ဖန်တီးနိုင်ခြင်းနှင့် မိမိ အီးမေးလ်များ အားလုံးကို မိမိ ကွန်ပြူတာ စနစ် အတွင်း သိမ်းဆည်းထားနိုင်ခြင်း စတာတွေကို လုပ်ဆောင် နိုင်ပါလိမ့်မယ်။

ယခင်ကတော့ မိမိ ရဲ့ Gmail Account အတွင်းမှာ ရှိတဲ့ ဝင်စာ၊ ထွက်စာ နှင့် တကွ အားလုံးသော Attachments File များ စတာတွေ အားလုံးကို Google Webserver တွေပေါ်မှာပဲ သိမ်းဆည်းထာခဲ့တာ ဖြစ်ပြီး ယခု Gmail Offline Support စနစ်ကို မိမိ ရဲ့ Account တစ်ခု အတွင်းမှာ အသုံးပြုမယ် ဆိုရင်တော့ ထို Email Account အတွင်းကို အီးမေးလ် တစ်စောင် ဝင်တိုင်း၊ ထွက်တိုင်း၊ ဖျက်သိမ်းတိုင်း မှာ မိမိစက်ထဲမှာ ရှိတဲ့ အီးမေးလ် ဆာဗာနဲ့ အချိန်ကိုက်ချိတ်ဆက်ပြီး တစ်ချိန်တည်းမှာပဲ အရေအတွက် တိုးခြင်း၊ လျော့ချခြင်း စတာတွေကို Synchronize လုပ်ပေးသွားရုံမျှ မက မိမိရဲ့ အီးမေးလ် အားလုံးတို့နဲ့ တစ်ကွ Attachment ဖိုင်များအားလုံး တို့ကိုလည်း မိမိ စက်အတွင်းမှာ ဒေါင်းလုဒ်လုပ် လုံလုံခြုံခြုံ သိမ်းဆည်း ထားနိုင်ပါပြီ။ နောက် အကြောင်းကြောင်းကြောင့် မိမိ မိမိကွန်ပြူတာမှာ အင်တာနက် ကွန်နက်ရှင် မရှိတုန်း ရေးထားတဲ့ အီးမေးလ် အသစ်တွေကိုလည်း သိမ်းဆည်းထားနိုင်ပြီး အင်တာနက် ကွန်နက်ရှင် ရှိတာနဲ့ တစ်ပြိုင်နက် မိမိ ပေးပို့လိုတဲ့ သူဆီ အရောက် ပို့ပေး နိုင်ဦးမှာပါ။

ဒီ Gmail Offline Support စနစ်က တစ်ကယ်တော့ Browser Base Web Application တွေကို အဓိက ပစ်မှတ်ထား ထုတ်လုပ် ခဲ့တဲ့ Google ရဲ့ Opensource Software တစ်ခုဖြစ်တဲ့ Google Gear ကို အသုံးပြု ဖန်တီးထားတာ ဖြစ်ပါတယ်။  Web Base Application တွေ အတွက် Common Files တွေကို အလိုအလျောက် ဒေါင်းလုဒ်ချပြီး Browser Base Local Server ကနေ တစ်ဆင့် မိမိ ကွန်ပြူတာ အတွင်းမှာ သိမ်းဆည်း ထားနိုင်စေတဲ့ ဒီ Google Gear ကို WordPress ကဲ့ သို့သော ကြီးကျယ် ထင်ရှားတဲ့ Blogging Platform Software တွေမှာလည်း အသုံးပြုကြပါတယ်။

လက်ရှိ Gmail ရဲ့ Offline Support စနစ် ကို မိမိ Email Account မှာ တပ်ဆင် အသုံးပြုဖို့ အတွက် အောက်ပါ အဆင့်များ အတိုင်း လုပ်ဆောင်နိုင်ပါတယ်။

အဆင့်(၁)

Offline Support စနစ် အသုံးပြုလိုတဲ့ Gmail Account အတွင်းကို ဝင်ပါ။ မိမိ အကောင့်ထ် အတွင်းကို ရောက်တာနဲ့ Gmail ရဲ့ညာဘက် အပေါ်ထောင့်မှာ ရှိတဲ့ “Setting ” ဆိုသည်ကို ကလစ်ပါ။ “Setting” အောက်မှာ ပါတဲ့ Tab များထဲမှ “Lab” ဆိုသော Tab ကို ဆက် ကလစ်ပါ။ အောက်ပါ ပုံစံ အတိုင်း ဖြစ်ပါလိမ့်မယ်။

Gmail Offline Support - 01

အဆင့် (၂)

ဒုတိယ အဆင့် အနေနဲ့ Lab Tab အောက်မှာ အောက်ပါ အတိုင်း Lab Features တွေများစွာ ရှိတဲ့ အနက်မှ အပေါ်ဆုံးမှာ ရှိတဲ့ Offline ဆိုတဲ့ Feature ဘေးမှ Enable ဆိုတဲ့ Radio icon ကို ဆက် ကလစ်ရပါမယ်။ ကလစ်ပြီးတာနဲ့ ဝဘ်ပေ့ချ် အောက်ဆုံးကို Scroll Down ဆွဲဆင်းပြီး “Save Changes” ဆိုတာကို ကလစ်လုပ်ပါ။

Gmail Offline Support - 02

အဆင့် (၃)

“Save Changes” ကို ကလစ်ပြီးတာနဲ့ မိမိရဲ့ Gmail User Interface Windows ညာဘက် အပေါ်ထောင့်မှာ အောက်ပါ အတိုင်း “Offline0.1″  ဆိုတဲ့ Offline Support အတွက် Internal Link တစ်ခု ကို ထပ်တွေ့ရပါမယ်။

Gmail Offline Support - 03

အဆင့် (၄)

အထက်ပါ “Offline^0.1” ဆိုတာကို ဆက်ကလစ် ပါမယ်။ အောက်ပါအတိုင်း PopUp Windows တစ်ခု တက်လာပါမယ်။

Gmail Offline Support - 04

အဆင့် (၅)

“Next” ကို ဆက် ကလစ်ပါမယ်။ “Gmail Offline” ကို အသုံးပြုဖို့ အတွက် Gear ကို Access လုပ်ဖို့ မေးတဲ့ အောက်ပါ PopUp တစ်ခု ကို ထပ်တွေ့ရပါမယ်။

Gmail Offline Support - 05

အဆင့် (၆)

အထက်ပါ PopUp Windows မှာ “Allow it use Gears” ဆိုတာကို အမှန် ခြစ် ခဲ့ရပါမယ်။ “Allow” ကို ဆက် ကလစ်တာနဲ့  Gmail Offline Support ကို မိမိ ကွန်ပြူတာကနေ တစ်ဆင့် အလွယ် တစ်ကူ အသုံးပြုနိုင်ဖို့ အတွက် Shortcut Icon ဖန်တီးလိုတဲ့ နေရာတွေကို သတ်မှတ်ပေးဖို့ မေးတဲ့ အောက်ပါ Windows တစ်ခုကို ထပ်တွေ့ရပါမယ်။

Gmail Offline Support - 06

အဆင့် (၇)

Shortcut Icon ကို မိမိ ကွန်ပြူတာ အတွင်း ဖန်တီးပေးစေလိုတဲ့ နေရာတွေကို သတ်မှတ်ခဲ့ပါမယ်။ အပေါ်မှာတော့ ဥပမာ အနေနဲ့ နေရာ (၂) ခုကို ရွေးချယ် သတ်မှတ်ထားပါတယ်။ ပြီးတာနဲ့ “OK” ကို ဆက် ကလစ်ပါမယ်။ OK ကို ကလစ်ပြီးတဲ့ အချိန်မှာ မိမိ Gmail Interface အတွင်း ညာဘက် အပေါ်ထောင့်မှာ အောက်ပါ အတိုင်း PopUp Windows တစ်ခုတက်လာပြီး Google Server တွေ ပေါ်မှာ ရှိနေတဲ့ သုံးနှစ်အောက် သက်တမ်း ရှိတဲ့  မိမိရဲ့ အီးမေးလ်မှန်သမျှနှင့် (Spam နှင့် Trash Folder အတွင်းရှိ မေးလ်များ မပါ)၊ Attachment File များအားလုံးကိုပါ မိမိ စက် အတွင်းကို Download ချ သိမ်းဆည်းပေးမှာ ဖြစ်ပြီး Progress သတင်းပို့ချက် ဝင်းဒိုးစ် တစ်ခုကိုလည်း တစ်ပါတည်း တွေ့ရှိရမှာ ဖြစ်ပါတယ်။

Gmail Offline Support - 07

Gmail Offline Support - 08

အဆင့် (၈)

အထက်ပါ ပုံမှာ ပြထားတဲ့ အတိုင်းပဲ တစ်ကယ်လို့ မိမိ အသုံးပြုနေတဲ့ အင်တာနက် ကွန်နက်ရှင် သိပ်နှေးနေမယ် ဆိုရင် “Go into Flaky Connection Mode” ဆိုတာကို အသုံးပြုနိုင်တယ် ဆိုတာကို လည်း တွေ့ရှိရမှာပါ။ ဒါဟာ အင်တာနက် ကွန်နက်ရှင် နှေးကွေးတဲ့ စက်များ အတွက် ပါ ဒီ Offline Support ကို အသုံးပြုနိုင်အောင်၊ မိမိ Inbox အတွင်းမှာ ရှိနေတဲ့ အီးမေးလ်များ အားလုံးကို Google Gear မှ အဆင်ပြေပြေ ဒေါင်းလုဒ်ချ သိမ်းဆည်းထားနိုင်ဖို့ Google မှ ဖန်တီးပေးထားတာ ဖြစ်ပါတယ်။

မိမိရဲ့ Inbox အတွင်းမှာ ရှိနေတဲ့ အီးမေးလ်များရဲ့ ပမာဏ၊ မိမိအသုံးပြုနေတဲ့ အင်တာနက် ကွန်နက်ရှင် စတာတွေကို မှီတည်ပြီး မိမိ စက်အတွင်းကို Google Offline Support မှ အီးမေးလ်များ အားလုံး ဒေါင်းလုဒ် လုပ်ပြီးတာနဲ့ “Setting”  Tab အောက်မှာ ရှိတဲ့ “Offline” ဆိုတာကို ကလစ်ပြီး “Offline Support” အတွက် အစီအစဉ် တွေကို မိမိ စိတ်ကြိုက် ပြောင်းလဲ သတ်မှတ်နိုင်ပါတယ်။ Offline Support ကို ပြန် ပိတ်ထားချင်ပါက “Disable” ဆိုတာကို ကလစ်ပြီး “Save Changes” လုပ်လို့ ရသလို “Shortcut Icons” တွေနဲ့ ပတ်သက်လို့လည်း မိမိ စိတ်ကြိုက် ပြင်ဆင်ပြောင်းလဲ နိုင်တာကို အောက်ပါ အတိုင်း တွေ့ရှိရမှာပါ။

Gmail Offline Support - 09

အဆင့် (၉)

Setting များအားလုံးကို မိမိ စိတ်တိုင်းကျ ပြင်ဆင်ပြောင်းလဲ သတ်မှတ်ပြီးတာနဲ့ Gmail Offline Support ကို စမ်းသပ် အသုံးပြုဖို့ အတွက် (အင်တာနက် ကွန်နက်ရှင် ရှိနေတဲ့ စက်ဆိုပါကလည်း အင်တာနက် ကေဘယ်လ်ကြိုးကို ခေတ္တ ဖြုတ်ထားပြီး) ၊ Desktop Shortcut ထားခဲ့သူအတွက် Desktop Shortcut မှ တဆင့်၊ Start Menu Shortcut ဖန်တီးခဲ့သူဆိုပါကလည်း Start Menu Shortcut မှ တဆင့် Offline Support Feature ကို Enable လုပ်ခဲ့တဲ့ Email Account ကို အသုံးပြုပြီး ဝင်ရောက် စမ်းသပ် စစ်ဆေးသုံးစွဲနိုင်ပါပြီ။ အောက်က ပုံကတော့ Start Menu Shortcut ကနေ တဆင့် အသုံးပြုနိုင်ပုံကို ဥပမာ အနေနဲ့ ပြသထားတာဖြစ်ပါတယ်။

Gmail Offline Support - 010

သတိပြုရန်

အထက်ပါ “Gmail Offline Support” Feature ကို အသုံးပြုမယ့်သူများ အနေနဲ့  အောက်ပါ အချက်များကို မှတ်သားထားသင့်ပါတယ်။

(၁) အထက်ပါ Offline Support Feature ဟာဆိုရင် Google ရဲ့လက်ရှိ စမ်းသပ်သုံးစွဲ နိုင်သော ဗားရှင်း (Lab or Beta Version) အဆင့်မျှသာ ဖြစ်သေးတဲ့ အတွက်  အသုံးပြုနေရင်း ပုံမှန်မဟုတ်တဲ့ ထူးခြားမှု တစ်ခုခု တွေ့ခဲ့မယ် ဆိုရင်လည်း အထူးတစ်လည် ဘာမှ တွေးတောနေစရာ လိုအပ်မှာ မဟုတ်ပါဘူး။ ဒီ လုပ်ဆောင်ချက် အသစ်နဲ့ ပတ်သက်လို့ အဆင်မပြေမှု၊ အဆင်ပြေမှု အားလုံး အတွက် Google ထံကို စာရေးသားပေးပို့ နိုင်ပါတယ်။

(၂) Offline Support ဟာ မိမိ Enable လုပ်ထားတဲ့ Email Account တစ်ခု အတွက် နှင့် ၎င်း Feature ကို Enable လုပ်စဉ် အသုံးပြုတဲ့ ကွန်ပြူတာ တစ်လုံး အတွင်းမှာ သာ အသုံးပြုနိုင်မှာ ဖြစ်ပြီး အခြား မိမိရဲ့ Offline Support လုပ်မထားတဲ့ အီးမေးလ် လိပ်စာများ နှင့် အခြား ကွန်ပြူတာများကနေ အသုံးပြုမှု အတွက် လုံးဝ အကျိုးသက်ရောက်မှု ရှိမှာ မဟုတ်ပါဘူး။

(၃) အဲဒီအတွက် ဒီ Gmail Offline Support ကို မိမိရဲ့ ကိုယ်ပိုင်အဖြစ် သီးသန့် အသုံးပြုတဲ့ ကွန်ပြူတာ အတွင်းမှာသာ Install လုပ်သင့်ပြီး Publically အသုံးပြုတဲ့ (ရုံး၊ ကျောင်း၊ ကုမ္ပဏီများ နှင့် အင်တာနက် ကဖေးဆိုင်များ) နေရာများမှာ အသုံးပြုခြင်းမှ အထူး ရှောင်ကြဉ်သင့်ပါတယ်။

အားလုံး Gmail Offline Support နဲ့ အဆင်ပြေနိုင်ကြစေသော်ဝ်

Via

1. Google Official Blog

2. Mashable

(က)

အခုလောလောဆယ်

မက်မက်စက်စက် ချစ်တဲ့
အချစ်နဲ့ ပတ်သက်လို့တောင်
အချစ်ကဗျာတွေ ကျုပ် မရေးချင်ဘူး ဖြစ်နေတယ်။

(ခ)

အခုလောလောဆယ်

အိပ်မရတိုင်း ထထ ထိုင်နေရလို့
ခပ်ပြင်းပြင်း အိပ်ဆေးတစ်ခွက်လောက်
ရေမရောပဲ မော့လိုက်ချင်တယ်။

(ဂ)

အခုလောလောဆယ်

တောင်တောင် အီအီ စိတ်ကူးတိုင်း
ရောက်ရောက် လာတတ်တဲ့ အတွေးစက
ကူးစက်ခံနေရတဲ့ စီးပွားပျက်ကပ် အကြောင်းပဲ။

(ဃ)

အခုလောလောဆယ်

“ရာဇဝင်တွင်မည့် အချစ်” ဆိုတဲ့ သီချင်းနားထောင်ရင်း
အချစ်ဆိုတာ ရာဇဝင်တွင်ဖို့ လိုသလား လို့
ခဏခဏ မေးနေမိတယ်။

(င)

အခုလောလောဆယ်

ဒုံးကျည်များ အပြန်အလှန် ပစ်ခတ်ကာ
နှစ်သစ်အား ကြိုဆိုခဲ့ကြကြောင်း
ဂါဇာ-အစ္စရေး သတင်းတစ်ပုဒ်မှာ ဖတ်လိုက်ရတယ်။

(လန်ဒန်၊ နယူးယောက်ခ်၊ ပဲရစ် နှစ်သစ်ကူး သတင်းတွေနဲ့ အပြိုင်ဗျ။)

(စ)

အခုလောလောဆယ်

နင်းပြားဖြစ်နေတဲ့ စိတ်ဓာတ်ဟာ
ဘယ်သူမှ တက်မနင်းခင်ကတည်းက မြေပေါ်မှာ ကျနေခဲ့တာဖြစ်ကြောင်း
တအံ့တသြ တွေ့ရှိလိုက်ရတယ်။

(ဆ)

အခုလောလောဆယ်

တစ်ခြမ်းစောင်းနေတဲ့ ကမ္ဘာကြီး အတွက် အလုပ်လုပ်ဖို့တဲ့
မစ္စ ဟီလာရီ ကလင်တန် တစ်ယောက်
လွှတ်တော်ရှေ့မှောက်မှာ ကျမ်းသစ္စာ ကျိန်ဆိုနေလေရဲ့။

(ဇ)

အခုလောလောဆယ်

Coding တွေအကြောင်းပဲ
ခေါင်းထဲ ပြည့်ညှပ်ကျပ်နေလို့
မနက်ဖြန်စာမေးပွဲဟာ ခပ်လှမ်းလှမ်းက ရပ်ကြည့်နေရှာတယ်။

(ဈ)

အခုလောလောဆယ်

လင်းနစ်စ (Linux) ကို သတ်ဖို့ဆိုပြီး
သတ္တမမြောက် ဝင်းဒိုးစ် တစ်ကောင်ကို
မိုက်ခရိုဆော့ဖ်က ခင်ဗျားနဲ့ ကစားခိုင်းနေတယ်။

(ည)

အခုလောလောဆယ်

ကိုလေးဖြူရဲ့ စာမျက်နှာ (၁၅) မှာ
Red Cross တစ်ခု ကျုပ် ထပ်တွေ့လိုက်ရတယ်
(ကြက်ခြေနီ ဖြစ်ပါစေလို့ ဆုတောင်းတယ်)

(ဋ)

အခုလောလောဆယ်

အတိတ်က အတ္တတွေကို အစာတပ်ပြီး
အနာဂတ် ရေကန်နက်နက်မှာ ငါး သွားမျှားဖို့
ကျုပ် အသေအချာ စဉ်းစားနေတယ်။

(ဌ)

အခုလောလောဆယ်

မြန်မာ ပြက္ခဒိန်အရ
ကမ္ဘာ့ အရှေ့ခြမ်းမှာ ရက်ရာဇာ ဖြစ်နေပေမယ့်
ပြဿဒါးဟာ အနောက်ခြမ်းမှာ ပျော်မွေ့နေတုန်းပဲ။

(ဍ)

အခုလောလောဆယ်

ဒီကဗျာကို အချိန်ပေးပြီး ဖတ်တဲ့ အတွက်
ခင်ဗျားကို ကျေးဇူးတင်ကြောင်း
ကျုပ် လေးလေးနက်နက် ပြောလိုတယ်။

(ဎ)

တစ်ခုရှိတာက…

အခုလောလောဆယ်

ခင်ဗျားရော၊ ကျုပ်ပါ
လောလောလတ်လတ်
(၃) မိနစ်စီ အသက်တိုသွားပြီ ဆိုတဲ့ အကြောင်း
သတိ ထားလိုက်မိဖို့ပါပဲ။    ။

မှော်ဆရာ
၁၅.ဝ၁.၂၀ဝ၉ (ကြာသပတေးနေ့)

Opera Supports for Myanmar1 Font

ပြီးခဲ့တဲ့ ၂၀၀၈ ခုနှစ်၊  အောက်တိုဘာ (၈) ရက်နေ့က ဖြန့်ချီခဲ့တဲ့ အော်ပရာ ၉.၆ အင်တာနက် ဘရောက်ဇာ ဆော့ဖ်ဝဲရ်မှာ ယူနီကုဒ် စနစ်သုံး မြန်မာဖောင့်ထ် တစ်ခုဖြစ်တဲ့ မြန်မာ-၁ (Myanmar1) ကို ရေးသားခြင်း၊ ဖတ်ရှုခြင်းများ နှင့် User Interface ကိုပါ မြန်မာလို မြင်တွေ့ အသုံးပြုနိုင်ဖို့ ဘရောက်ဇာရဲ့ System Preference ထဲမှာ တရားဝင်  ထည့်သွင်းပေးထားတာကို တွေ့ရပါတယ်။ အကယ်၍ မြန်မာ-၁ နဲ့ ဘာသာပြန်ထားတဲ့ Opera Browser Language Pack for User Interface များ ရှိရင်တော့ အခု လက်ရှိ အော်ပရာ ဘရောက်ဇာမှာ Menu Bar, Preference and Setting စတဲ့ အသုံးပြုသူ နယ်ပယ်မှာ အပြည့်အဝ မြန်မာလို အသုံးပြုနိုင်မှာ ဖြစ်ပါတယ်။

ဒီ Software တွေကို Localize လုပ်တဲ့ Language Pack တွေကတော့ စွမ်းဆောင်နိုင်တဲ့  မြန်မာ ပရိုဂရမ်မာ တွေ ကိုယ်တိုင် သက်ဆိုင်ရာ ဆိုဒ်က ထောက်ခံထားတဲ့ ဖောင့်ထ် အမျိုးအစားကို သုံးပြီး ဘာသာပြန်ဆို ပေးနိုင်ကြရင်တော့ အကောင်းဆုံး ဖြစ်လိမ့်မယ် ဖြစ်ပြီး ဒါဟာ အားလုံးသော မြန်မာတို့ အတွက်လည်း နတ်လူသာဓု ခေါ်စရာ ကိစ္စ တစ်ခု ဖြစ်လို့ လိုအပ်ချက်တစ်ခုအား တတ်နိုင်သူများက ဖြည့်စွမ်းပေးနိုင်ကြဖို့ နှိုးဆော် တိုက်တွန်းလိုက်ရပါတယ်။

လောလောဆယ် အနေနဲ့ အော်ပရာ ၉.၆ မှာ လက်ရှိ ယူနီကုဒ် နောက်ဆုံးဗားရှင်းနဲ့ အကိုက် ထုတ်လုပ်ထားတဲ့ မြန်မာ-၃ (Myanmar3) ကို မထည့်ပဲ ဘာကြောင့် မြန်မာ-၁ (Myanmar1) ကိုပဲ ထည့်ထားရသလဲ ဆိုတာတော့ မသိပါဘူး။ ဘာပဲ ဖြစ်ဖြစ် နောက်ထွက်မဲ့ အသစ်ဗားရှင်း ဖြစ်တဲ့ အော်ပရာ-၁၀ မှာတော့ မြန်မာ-၃  (Myanmar3) ကို Support လုပ်လာဖို့ မျှော်လင့်မိပါတယ်။

ဒီအောက်က ပုံတွေကတော့ အော်ပရာမှာ မြန်မာ-၁ ကို တရားဝင် ထည့်သွင်းထားတာကို တွေ့မြင်ရပုံတွေပါ။ Thanks Opera!

In Opera Browser : Goto Tools->Preference-> and Check Language->

Opera Browser officially supports for Myanmar1 Unicode Font

Click “Advance” tab and Choose “Font” -> then Click “International Fonts” and you can change like below.

Opera Officially Supports for Myanmar1 Unicode Font

ဒီအောက်က ပုံကတော့ အော်ပရာဟာ ဝဘ်စာမျက်နှာတွေကို Loading လုပ်ရာမှာ မီးမြေခွေးထက် ၂- ဆလောက် မြန်ပေမယ့်၊ Memory Usage မှာတော့ မီးမြေခွေးရဲ့ သုံးပုံ တစ်ပုံ ခန့်ကိုပဲ အသုံးပြုတာကို တွေ့ရပုံဖြစ်ပါတယ်။ ဒီဟာကို စမ်းသပ်ချိန်မှာ မီးမြေခွေး ဘရောက်ဇာကို Tab ၄ – ခု နှင့် ဖွင့်ထားပြီး၊ အော်ပရာ ကတော့ Tab ၈ – ခု နှင့် ဖြစ်ပါတယ်။

Opera Browser Memory Usage Test

စကားကြွင်း။    ။ လောလောဆယ် အော်ပရာ ဘရောက်ဇာမှာ မြန်မာယူနီကုဒ် ဖောင့်ထ် တွေကို ကောင်းကောင်း မြင်တွေ့၊ ဖတ်ရှုနိုင်ပေမယ့် ရေးသားရာမှာတော့ မီးမြေခွေးလောက် အဆင်ပြေတာ မတွေ့ရသေးပါဘူး။ တစ်ချို့စာလုံးတွေ ရောရောထွေးထွေး ပြနေဆဲ ဖြစ်ပါတယ်။

ဘာပဲဖြစ်ဖြစ် အော်ပရာ ဘရောက်ဇာ ကို ကျွန်တော်တို့ မြန်မာဘာသာအတွက်နဲ့ ၊ ဝဘ်လောက တစ်ခုလုံး အတွက်ပါ Memory အစားနည်း၊ မြန်နှုန်းမြင့်ပြီး၊ သားသား နားနားလည်း ရှိလှတဲ့  အရည်အသွေးကောင်း များစွာနဲ့ အလားအလာ ကောင်းများစွာ ရှိတဲ့ အင်တာနက် ဘရာက်ဇာ တစ်ခုအဖြစ် ဆက်လက် တိုးတက် ဖြစ်ထွန်း လာလိမ့်မယ်လို့ ယုံကြည် မျှော်လင့်မိ ပါကြောင်း။

အဆင့် – ၁

အရင်ဆုံး မိမိစက်ထဲမှာ မီးမြေခွေး ဘရောက်ဇာ နောက်ဆုံးဗားရှင်း ရှိနေဖို့လိုပါမယ်။ မရှိရင် ဒီနေရာမှာ သွားရောက် ဒေါင်းလုဒ်လုပ်ယူနိုင်ပါတယ်။

အဆင့်-၂

မီးမြေခွေးကို အင်စတောလ် လုပ်ပြီးတာနဲ့ ကျွန်တော်တို့ စက်ထဲကို မြန်မာ-၃ ယူနီကုဒ်ဖောင့်ထ် နောက်ဆုံးဗားရှင်းနဲ့ လက်ကွက် အင်စတော်လာကို ဒီနေရာက ရယူပြီး ထည့်သွင်းပါမယ်။ အကယ်၍ မိမိစက်ထဲမှာ ဇော်ဂျီဖောင့် နောက်ဆုံးဗားရှင်း နဲ့ လက်ကွက် အင်စတော်လာ မရှိသေးဘူး ဆိုရင်လည်း ဒီနေရာက နေ ရယူပြီး ထည့်သွင်းထားနိုင်ပါတယ်။

မြန်မာ-၃ ဖောင့် နှင့် လက်ကွက် ထည့်သွင်းပုံ

မြန်မာ-၃ ယူနီကုဒ် ဖောင့် နှင့် လက်ကွက် အင်စတော်လာ မရှိလျင် ဒီနေရာမှ ဖြစ်စေ၊ နောက်ထပ် ဒီနေရာမှ ဖြစ်စေ ဒေါင်းလုဒ် လုပ် ရယူနိုင်ပါတယ်။

အဆင့်(၁)။      ။ မြန်မာ-၃ ဖောင့်နှင့် လက်ကွက်အထုပ်ဟာ Win Rar Zip File နဲ့ရလာမှာ ဖြစ်တဲ့ အတွက် ၎င်းကို အရင် Win Rar သုံးပြီး အထုပ်ဖြေဖို့လိုပါမယ်။ အထုပ်ဖြေပြီးတဲ့ နောက် Myanmar3_Unicode အမည်နဲ့ ဖိုင်တစ်ခု ရရှိလာပါမယ်။

Myanmar3 Installation Step-1

အဆင့်(၂)။      ။ Myanmar3_Unicode ဖိုင်ထဲမှာ (၁) Installation.txt (မဖြစ်မနေ ဖတ်ကြည့်ရန်လိုအပ်) (၂) keyman_free_6-2-176-0.exe (၃) mm3 True Type Font File (၄) Myan3_Layout (လက်ကွက်ပုံစံ) (၅) myanmar3 Keyman Keyboard File (၆) Myanmar3_IE Registry Entries File စတဲ့ မတူညီတဲ့ ဖိုင်အမျိုးအစား (၆) ခု ပါဝင်ပါတယ်။

Myanmar3 Installation Step-2

မြန်မာ-၃ ကို မိမိ ကွန်ပြူတာ အတွင်း ထည့်သွင်းဖို့ အထက်က ပုံမှာ ပြထားတဲ့ (၃) mm3 True Type Font File ပေါ်မှာ Right Click ထောက်ပြီး Install လုပ်ခြင်းဖြင့် ဖြစ်စေ၊ အဆိုပါ ဖောင့်ထ်ဖိုင် ကို C:/Windows/Fonts (သို့) Start/Control Panel (Classic View)/Fonts အတွင်းသို့ ကော်ပီကူးပြီး ပေ့စ်ထ် (Copy & Paste) လုပ်ခြင်းဖြင့် ဖြစ်စေ ထည့်သွင်း နိုင်ပါတယ်။

ဒီအဆင့်ပြီးလို့ အကယ်၍ ဆန္ဒရှိမယ် ဆိုရင် မိမိရဲ့ ကွန်ပြူတာမှာ မူလပါတဲ့ အိုင်အီး (Internet Explore) ဘရောက်ဇာမှာ မြန်မာ-၃ ကို Default အဖြစ် အသုံးပြု နိုင်ဖို့ အတွက် နံပါတ် (၆) Myanmar3_IE Registry Entries File ဆိုတာကို Double Click ပေးပြီး Run လိုက်ရုံပါပဲ။

အဆင့်(၃)။      ။ မိမိ ကွန်ပြူတာ အတွင်းကို မြန်မာ(၃) လက်ကွက်ထည့်သွင်းဖို့ အတွက် နံပါတ် (၂)  keyman_free_6-2-176-0.exe ဖိုင်ကို Double Click ပေးပြီး အရင် Run ရပါမယ်။

Myanmar3 Installation Step-3

ပြီးတာနဲ့ နံပါတ် (၅) myanmar3 Keyman Keyboard File ကို လည်း Double Click ပေးပြီး ကီးမန်း အတွင်း ထည့်သွင်းလိုက် ပါမယ်။

အဆင့်(၄)။      ။ နောက်ဆုံး အနေနဲ့ မြန်မာ-၃ ကီးဘုတ်ကို သုံးပြီး စာရိုက်ဖို့ အတွက် Start->All programs->Tavultesoft Keyman-> Keyman ဆိုတာကို သွားပြီး ကလစ်လုပ် Run ပါမယ်။ ဝင်းဒိုးစ် စနစ်ရဲ့ Task Bar ညာဘက် အောက်ထောင့်မှာ လေးထောင့် ကွက် အိုင်ကွန် နဲ့ ကီးမန်း ဆော့ဖ်ဝဲရ် တက်လာပြီ ဆိုရင် အဲဒီ အိုင်ကွန်ပေါ် မှာ Right Click->Keyman Configuration ဆိုတာကို ရွေးပါမယ်။

Myanmar3 Installation Step-4

ပြီးတာနဲ့ ကျွန်တော်တို့ အောက်မှာ ပြတဲ့ အတိုင်း မြန်မာ-၃ ကီးဘုတ် အချိန်းအပြောင်း အတွက် ဘယ်ကီးတွေကို Short Cut Key တွေအဖြစ် တွဲနှိပ်သုံးမယ် ဆိုတာကို   မိမိစိတ်ကြိုက် သတ်မှတ်ထားရှိ  နိုင်ပါမယ်။ ကျွန်တော်ကတော့ လက်ရှိ ကီးဘုတ် တစ်ခုကနေ မြန်မာ-၃ ကီးဘုတ် လက်ကွက်ကို ပြောင်းသုံးဖို့ အတွက် Ctrl+Alt+M ကီးသုံးခုကို သတ်မှတ်ထားပြီး မြန်မာ-၃ လက်ကွက်ကို ပိတ်ဖို့ အတွက် Ctrl+Alt+O ကို သတ်မှတ်ထားပါတယ်။

Myanmar3 Installation Step-5

ဒါဆိုရင် ကျွန်တော်တို့ ကွန်ပြူတာ အတွင်းမှာ ဇော်ဂျီဖောင့်ထ် အပါအဝင်  မြန်မာ-၃ ဖောင့်ထ် နှင့် လက်ကွက် ကို အောင်မြင်စွာ ထည့်သွင်း ပြီးပြီဖြစ်လို့ ကြိုက်နှစ်သက် ရာကို စတင် အသုံးပြုနိုင်ပြီ ဖြစ်ပါတယ်။

အဆင့် – ၃

အဆင့် – ၃ အနေနဲ့ မြန်မာ-၃ ဖောင့်ထ်နဲ့ လက်ကွက်၊ ဇော်ဂျီဖောင့်ထ် နဲ့ လက်ကွက်တို့ကို မီးမြေခွေး ဘရောက်ဇာ အတွင်းမှာ ယှဉ်တွဲလို့ အဆင်ပြေပြေ ရေးနိုင်၊ ဖတ်နိုင်ဖို့ အောက်ပါ အဆင့်များ အတိုင်း လုပ်ဆောင်သွားနိုင်ပါတယ်။

အဆင့်(၁)။      ။ မီးမြေခွေး ဘရောက်ဇာကို ဖွင့်ပါ။ ပြီးတာနဲ့ မီနူးဘား မှာ ရှိတဲ့ Tools ကနေ တဆင့် Options … ဆိုသည်ကို သွားပါ။

Integrating Myanmar3 Font into Mozilla Firefox-1

အဆင့်(၂)။      ။ Options.. ကို ကလစ် လိုက်တာနဲ့ အောက်က အတိုင်း ဝင်းဒိုးစ် အသစ်တစ်ခု တက်လာပါမယ်။ Content  Tab ကို ကလစ်ပါ။ Default Font ကို Drop Down List မှတစ်ဆင့် Myanmar3 အား ရွေးပါ။ ပြီးလျင် ၎င်းဘေးမှာ ရှိတဲ့ Advanced အား ဆက် “ကလစ်” လုပ်ပါ။

Integrating Myanmar3 Font into Mozilla Firefox-2

အဆင့်(၃)။      ။ Advanced အား နှိပ်လိုက်ပါက အောက်ပါ အတိုင်း Advanced Options Box တစ်ခု တက်လာမှာဖြစ်ပြီး ပုံမှာပြထားတဲ့ အတိုင်းပဲ Serif: ဆိုတဲ့နေရာမှာ မြန်မာ-၃ ကိုရွေးချယ်ပါမယ်။ Sans-serif နှင့် Monospace ကိုတော့ ဇော်ဂျီဖောင့်ထ် ကို ရွေးချယ်ထားပါမယ်။ နောက် Allow pages to choose their own fonts, instead of my selection above. ကို အမှန်ခြစ်ထားဖို့ လိုပါတယ်။ ကျွန်တော်တို့ စက်ထဲမှာ ဇော်ဂျီရော၊ မြန်မာ-၃ ရော ရှိနေပြီဖြစ်တဲ့ အတွက်၊ ဝဘ်ပေ့ချ်တွေမှာ မည်သည့်ဖောင့်ထ် နဲ့ပဲ ရေးထား ရေးထား ဒီဟာလေးကို ကလစ်ထားခြင်းဖြင့် ကျွန်တော်တို့ ဘရောက်ဇာတွေထဲမှာ အားလုံး အဆင်ပြေပြေ မြင်တွေ့ ဖတ်ရှုနိုင်ပါလိမ့်မယ်။ ပြီးတော့ အခုလို ဖောင့်ထ် ဖွဲ့စည်းပုံ ပြင်ထားတဲ့ မီးမြေခွေး ဘရောက်ဇာထဲမှာ ဇော်ဂျီနဲ့ပဲ ရိုက်ရိုက်၊ မြန်မာ-၃ နဲ့ပဲ ရိုက်ရိုက် ကြိုက်သလို လက်ကွက်ကို ပြောင်းလဲ အသုံးပြုနိုင်မှာဖြစ်ပါတယ်။

Integration Myanmar3 Font into Mozilla Firefox-3

အောက်ဆုံးက Default Character Encoding မှာတော့ Unicode (UTF-8)  ဆိုတာကို ရွေးချယ် သတ်မှတ်ပေးရပါမယ်။ အားလုံးပြင်ဆင်ပြီးတာနဲ့ OK ကို ဆက် ကလစ်ပြီးအားလုံး ပြင်ဆင် ပြီးပါပြီ။

တစ်ကယ်လို့ မြန်မာ-၃ ကို Google Reader တို့လိုမျိုး Feed Reader တွေထဲမှာပါ အဆင်ပြေပြေ မြင်တွေ့ ဖတ်ရှုချင်တယ် ဆိုရင်တော့ Sans-serif နှင့် Monospace တို့ နေရာတွေမှာပါ မြန်မာ-၃ ဆိုတာကို ရွေးချယ်သတ်မှတ်ပေးဖို့ လိုပါလိမ့်မယ်။ အဲဒီ အခါကျရင်တော့ မီးမြေခွေး ဘရောက်ဇာထဲမှာ ဇော်ဂျီနဲ့ ရေးထားတွေကို မြင်တွေ့ ဖတ်ရှုနိုင်တော့မှာ မဟုတ်တော့တဲ့ အတွက် ဇော်ဂျီစာမျက်နှာတွေကို ဖတ်ဖို့၊ ရေးဖို့ အိုင်အီး ဒါမှ မဟုတ် တစ်ခြား ဘရောက်ဇာ တစ်ခုခုကို အသုံးပြုဖို့ လိုလာပါလိမ့်မယ်။

အဆင့် (၄)

ဒီအဆင့်ကတော့ Optional လို့ပြောလို့ရပါတယ်။ မြန်မာ-၃ ယူနီကုဒ်ဖောင့်ထ် နဲ့ ပြောင်းရေးတဲ့ ဘလော်ဂါ တွေအတွက် မိမိတို့ရဲ့ ဘလော့ဂ်မှာ အော့ဖ်လိုင်း ဖောင့်ထ် ကွန်ဗာတာ လေး တစ်ခုကို တပ်ဆင်ထားပေးခြင်းဖြင့် ဇော်ဂျီဖောင့်ထ်ပဲ လောလောဆယ် စက်ထဲမှာ ရှိနေသူတွေ အတွက်လည်း မိမိဘလော့ဂ်ကို အဆင်ပြေပြေ ဖတ်ရှုနိုင်ပါ လိမ့်မယ်။ ၎င်း ကွန်ဗာတာ တပ်ဆင်နည်း (For Blogspot & WordPress Blogs) ကို မြန်မာ ဘလော်ဂါ နှင့် ဖွဲ့တည်ရာ မဂ္ဂဇင်းရဲ့ အယ်ဒီတာ တစ်ဦး ဖြစ်သူ ကိုသင်ကာ ရေးထားတာ ကို ဒီနေရာမှာ အလွယ်တစ်ကူ ဖတ်ရှုပြီး လက်တွေ့ ပြုလုပ် အသုံးချနိုင်ပါတယ်။

အားလုံးပဲ ယူနီကုဒ် ၅.၁.၀ နဲ့ အဆင်ပြေပြေ ဘလော့ဂ်ဂင်း နိုင်ကြပါစေ…။ 

ကျွန်တော်တို့ မြန်မာ ဘလော်ဂါတွေ အသုံးများတဲ့ ဝါ့ဒ်ပရက်စ် Themes များ ဖြစ်ကြတဲ့ Options Theme, Structure Theme အပါ အဝင် ကျော်ကြားတဲ့ Theme သုံးခုခန့် ကို အခြေအနေ အကြောင်းကြောင်းတို့ကြောင့် နောက် ထွက်မယ့် ဝါ့ဒ်ပရက်စ် ဗားရှင်းများအတွက် ဆက်လက် Support လုပ်နိုင်တော့မှာ မဟုတ်ကြောင်း နှင့် ယခုလ (၃၁) ရက်နေ့ ည (၁၂းဝ၀) နာရီ အချိန်မှာ ယခု လက်ရှိ နောက်ဆုံး ဝါ့ဒ်ပရက် ဗားရှင်းအထိ ထုတ်လုပ်ထားတဲ့ Theme များကိုပါ ဒေါင်းလုဒ် လုပ်ခွင့် ဖျက်သိမ်းတော့မှာ ဖြစ်ကြောင်း အဆိုပါ Theme  များကို ထုတ်လုပ်ဖန်တီးသူ Justin Tadlock မှ သူ့ရဲ့ Theme Club မှာ ကြေညာ ထားတာကို တွေ့ရပါတယ်။

အသေးစိတ်ကိုတော့ သူ့ရဲ့ ဝဘ်စာမျက်နှာမှာ ဆက်လက် စုံစမ်း မေးမြန်း ဖတ်ရှု နိုင်ပါကြောင်း။

ကိုသင်ကာ နဲ့ အင်တာဗျူးကို ဒီနေရာ မှာ ဖတ်ရှုနိုင်သလို ကျွန်တော့်ရဲ့ အင်တာဗျူး ကိုတော့ ဒီအောက်မှာပဲ ဖြစ်စေ၊ လောကအလှစာမျက်နှာ မှာ ဖြစ်စေ သွားရောက် ဖတ်ရှုနိုင်ပါကြောင်း။

” မြန်မာယူနီကုဒ်နှင့် မြန်မာဝဘ်ဆိုဒ်များ အနာဂတ် (အင်တာဗျူး)”

မြန်မာဘာသာဖြင့်ရေးသားသော အင်တာနက်စာမျက်နှာများကို လေ့လာကြည့်ရတာတွင် ကိုမှော်ဆရာ ၏ ဘလော့ဂ်မှာ မြန်မာသရီးဖောင့် ဖြင့် ရေးသားသည်ကို တွေ့ရသဖြင့် ဘလော့ဂ်ရေးသားသော ကိုမှော်ဆရာနဲ့ ကျွန်မတို့လောကအလှတို့ စကားပြောဖြစ်ခဲ့ကြပါတယ်။ လောကအလှမှ သိလိုသည်များကို မေးမြန်းပြီး ကိုမှော်ဆရာက ဖြေကြားသွားပေးခဲ့ပါတယ်။

ကိုမှော်ဆရာရဲ့ ဘလော့ဂ်မှာ မြန်မာသရီး ဖောင့်ကို သုံးထားတာကို တွေ့ရပါတယ်။ တခြား အင်တာနက် စာမျက်နှာတွေမှာ ဇော်ဂျီဖောင့်ကို သုံးထားကြတော့ ကိုမှော်ဆရာက ဘာကြောင့် မြန်မာသရီးဖောင့်ကို သုံးတာပါလဲ သိပါရစေ။

>> ဒီဟာက သိပ်ကို ကျယ်ကျယ်ပြန့်ပြန့်နဲ့ ဂရုတစိုက်ဖြေမှ ရမယ့် မေးခွန်းမျိုးပါ။အမှန်တော့ ဒီမေးခွန်းရဲ့ အဖြေကို ကျွန်တော် “ယူနီကုဒ် နှင့် မြန်မာစာ ယဉ်ကျေးမှု” ဆိုတဲ့ စာတမ်းမှာ အပြည့်အစုံ ဖြေပြီးသား ဖြစ်ပါတယ်။ ဒါပေမယ့် စာတမ်းကို မဖတ်ရှုရသေးသူတွေ အနေနဲ့ရော ဒီစာတမ်း တစ်ခုလုံးရဲ့ အဓိက ဦးတည်ချက်နှင့် ရည်ရွယ်ချက် ကိုပါ ခြုံငုံမိအောင် တတ်နိုင်သမျှ အကျဉ်းချုံးပြီး ကျွန်တော် ကြိုးစား ဖြေကြည့်ပါ့မယ်။

(၁) လူအားလုံး ဇော်ဂျီဖောင့်ထ် သုံးနေချိန်မှာ မြန်မာသရီးကို ကျွန်တော်သုံးကြည့်ဖို့ ကြိုးစားတာဟာ သူ့ရဲ့ စံနှုန်းကိုက် ဖြစ်တည်မှု (လက်ရှိ ကမ္ဘာ့ စံပြုအဖွဲ့အစည်း တစ်ခုက လက်ခံ သတ်မှတ်ထားတဲ့ စံနှုန်းကိုက်ခြင်း ကိုဆိုလိုပါတယ်) ကို နေရာပေး၊ အသိအမှတ်ပြုဖို့ ကြိုးစားခြင်း ဖြစ်သလို အဲဒီ စံနှုန်းကိုက် ဖြစ်တည်မှုက တဆင့် ရရှိလာနိုင်မယ့် အကျိုးကျေးဇူးတွေကို အနာဂတ် အတွက် ကြိုတင် ရင်းနှီးမြှပ်နှံခြင်း လို့လည်း ဆိုနိုင်ပါတယ်။

(၂) နောက် တစ်ချက်ကိုတော့ ဥပမာ တစ်ခုနှင့် နှိုင်းယှဉ်စဉ်းစားပြီး ပြောလိုပါတယ်။ ဥပမာ တစ်ခုအနေနဲ့ အရက်ကြိုက်တဲ့ လူတစ်ယောက် အရက်စွဲတဲ့ ဝေဒနာ အပြင်၊ အစာအိမ်ဝေဒနာ ကိုပါ နှစ်ရှည်လများ ခံစားနေရသူ တစ်ဦးရှိသည်ဟု ဆိုပါစို့။ သူအရက် ကိုသောက်လာသည်ကလည်း အတော်ကြာနေပြီ၊ အဟာရဖြစ်မည့် အစားအစာ ကို အဟာရဖြစ်လောက်ရုံမျှပင် မစားသည်အထိ အရက်ကို ကြိုက်တတ်၏။ ကြာတော့ ထိုလူ့ အတွက် အရက်ကပင် အဟာရ ဖြစ်လာသည်။ နောက်ပိုင်း ထိုအရက်ကြောင့် ပင် အစာအိမ် ရောဂါ ဆိုသော ဝေဒနာ တစ်ခုပါ ထပ်တိုးလာသည်။ လတ်တလော အနေဖြင့်တော့ သူခံစားနေရသော ဝေဒနာတွေ အတွက် အရက်က အကောင်းဆုံးနှင့် အဆင်ပြေဆုံး ဆေးဝါး တစ်ခုဖြစ်သည်။ အရက်တစ်ခွက် သောက်လိုက်ရုံဖြင့် ဝေဒနာ အားလုံး သက်သာသည့် နည်းတူ လူလည်း လန်းလန်းဆန်းဆန်း ၊ တက်တက်ကြွကြွ နှင့် မြင်ရသမျှ လူတို့က ရောဂါသည် တစ်ဦးဟုပင် မထင်မှတ်စရာ ဖြစ်နေသည်။ သို့သော် လတ်တလော အတွက် အကောင်းဆုံး ဖြေဆေးဟု ထင်မှတ်ထားသော အရက်ကပင် သူ့အသက်ကို တစ်ဖြည်းဖြည်း ဇီဝိန်ချွေနေသည့် သေဆေး အဖြစ်သို့ ရောက်ရောက် လာနေသည်ကိုတော့ သူ့ကိုယ်သူလည်း သတိထားမိလာသည်။ ထိုအခြေအနေမှာ သူ့အတွက် လတ်တလော အကောင်းဆုံး ဖြေဆေး တစ်ခုဖြစ်တဲ့ အရက်ကိုပဲ ဆက်သောက်မည်လား၊ ဒါမမဟုတ် တစ်ကယ့်ကို ထိထိရောက်ရောက် ကိုယ့်ဝေဒနာတွေကို သက်သာပျောက် ကင်း စေမယ့် အစားအစာ နဲ့ ဆေးဝါးမျိုးတွေကို ပြောင်းလဲမှီဝဲ သုံးစွဲမည်လား ဆိုသည်ကိုတော့ သူဆုံးဖြတ်ရတော့မည် ဖြစ်သည်။

အထက်က ဥပမာ အရပြောရရင် ကျွန်တော် မြန်မာ-၃ ကိုသုံးတာဟာ ဖြေဆေး အစစ်ကို ရှာကြည့်ဖို့ ကြိုးစား ကြည့်တာပါ လို့လည်း ပြောလို့ရပါတယ်။

(၃) မြန်မာ-၃ ကိုပြောင်းသုံးခြင်းဖြင့် ကျွန်တော့် အတွက် အခက်အခဲ၊ အကြပ်အတည်း ကြီးကြီးမားမား တွေနဲ့ တွေ့လာရနိုင်တယ် ဆိုတာ ကျွန်တော် သိပြီးသားဖြစ်ပါတယ်။ ပထမဆုံး အချက်ကတော့ ကျွန်တော့်ဘလော့ဂ်ရဲ့ မများလှတဲ့ စာဖတ်ပရိတ်သတ် အနည်းငယ်ဟာ ဘလော့ဂ်ကို ဖတ်မရခြင်း ဆိုတဲ့ အခက်အခဲနဲ့ ပထမဆုံး ရင်ဆိုင်ရမယ် ဆိုတာပါပဲ။ နောက်တစ်ချက်ကတော့ ကျွန်တော်ကိုယ်တိုင် မြန်မာ-၃ ကိုပြောင်းသုံးပေမယ့် လည်း ဇော်ဂျီကို လုံးလုံးလျားလျား မပစ်ပယ်နိုင်သေးသည့် နည်းတူ သူ့ရဲ့ သြဇာ၊ အရှိန်အဝါနဲ့ ကျေးဇူးတွေဟာ ကျန်တဲ့ အားလုံးသော ဝက်ဘ်စာမျက်နှာတွေပေါ်မှာပါ တည်ရှိနေဆဲ ဖြစ်တဲ့ အတွက် ဇော်ဂျီကိုပါ မဖြစ်မနေ တွဲသုံးဖို့ လိုအပ်တဲ့ အနေအထား တစ်ခုကို ဖြစ်လာစေပါတယ်။ အဲဒီလို အစစအရာရာ နှင့် အခြေအနေအတော်များများမှာ ဇော်ဂျီကိုပဲ ရှေ့တန်းတင် သုံးတဲ့ အနေအထား တစ်ခုကနေ ဘလော့ဂ် ဆိုတဲ့ နယ်ပယ်မှာတော့ စံနှုန်းကိုက် ယူနီကုဒ် ဖောင့်ထ်တစ်ခု ဖြစ်တဲ့  မြန်မာ-၃ ကိုတော့ ဦးစားပေး-၁ အနေနဲ့ စမ်းသုံးကြည့်ဖို့ စတင်ကြိုးစားခြင်း လို့လည်း ပြောနိုင်ပါတယ်။

(၄) နောက်ဆုံး အချက်အနေနဲ့ကတော့ အခု ဇော်ဂျီသည်လည်း ယူနီကုဒ် စံနှုန်းကိုက် မဟုတ်သည့်တိုင် ပေါ်စကတည်းက အနယ်နယ် အရပ်ရပ်ရှိ အသုံးပြုသူတွေထံမှ Feedback အမျိုးမျိုးကို လက်ခံရရှိခဲ့ပြီး အဲဒီ့ အချက်တွေအရပဲ နောက်ထပ် ဗားရှင်း အသစ်တွေကို ဖြည့်စွက် ပြင်ဆင်မှုတွေ လုပ်ခဲ့ကြတယ် လို့ သိရှိမှတ်သား မိပါတယ်။ အခု ကျွန်တော်တို့ ယူနီကုဒ် စံနှုန်းကိုက် လို့ ဆိုတဲ့ မြန်မာ-၃ ဖောင့်ထ် မှာရော ဘာလိုအပ်ချက်တွေရှိ တယ်၊ ဘာတွေ ထည့်သွင်းဖို့ လိုနေတယ်၊ ဘယ်လို အားနည်းချက်တွေ ရှိတယ် ဆိုတာကို တစ်ကယ် လက်တွေ့ ထဲထဲဝင်ဝင် မသုံးကြည့်ပဲ အဆင်မပြေဘူး၊ မကောင်းဘူး၊ မှားနေတယ်၊ ဖောင့်ထွက် မလှဘူး. လို့  ပြောနေမယ့် အစား မကောင်းဘူး ဆိုရင်လည်း ဘာတွေ မကောင်းတာလဲ၊ မှားနေတယ် ဆိုရင် ဘာတွေမှားနေတာလဲ၊ အဆင်မပြေဘူး ဆိုတာ ဘာတွေ အဆင်မပြေတာလည်း စသဖြင့် အခြေအနေအားလုံး အတွက် အမျိုးမျိုးဖြစ်နိုင်တဲ့ အားနည်းချက်၊ လိုအပ်မှုတွေကို တိတိကျကျလေး ဖြစ်လာနိုင်အောင် စမ်းသပ် အဖြေရှာ သုံးစွဲ ကြည့်ခြင်း ဖြစ်သလို၊ အနာဂတ်မှာ အများပြည်သူနဲ့ အနီးစပ်ဆုံး ယူနီကုဒ်ဖောင့် တစ်ခုဖြစ်လာနိုင်တဲ့ ဒီဖောင့်ထ် ကို ယခုကတည်းက ကျယ်ကျယ်ပြန့်ပြန့် စတင်သုံးစွဲကြပြီး လူအမျိုးမျိုးထံက အမြင် အမျိုးမျိုး၊ မှတ်ချက် အမျိုးမျိုး ရရှိလာခြင်း ဖြင့် အနာဂတ်မှာ ပိုမိုကောင်းမွန်တဲ့၊ User Friendly ဖြစ်တဲ့ ဗားရှင်းတွေ ထွက်လာနိုင်ရေး တစ်ဖက်တစ်လမး်က ကူညီကြည့်ကြဖို့ ကြိုးစားကြည့်ခြင်း လို့လဲ ပြောနိုင်ပါတယ်။

ခုကြားနေရတာတွေပေါ့။  ဖိုင်းရားဖောက်စ် ဗားရှင်းအသစ် သုံးတဲ့သူတွေက ဇော်ဂျီဖောင့်ကို အင်စတောမလုပ်ဘဲ မမြင်ရဘူးလို့ ဆိုပါတယ်။ အဲဒါ ဟုတ်ပါသလား သိပါရစေ။

>> ကျွန်တော် ယူဆတာကတော့ အဲဒီ အခြေအနေဟာ တစ်ချို့ အတွက် မှန်ပြီး တစ်ချို့အတွက်တော့ မှားလိမ့်မယ် လို့ ထင်ပါတယ်။ ဆိုလိုတာကတော့ ဒါဟာ ဖတ်ရှုတဲ့ (မြန်မာ) ဘလော့ဂ် ရဲ့ Coding (CSS) အပိုင်းမှာ အများကြီး မှီတည်ပါလိမ့်မယ်။  အကယ်၍ မိမိဖတ်ရှုတဲ့ ဘလော့ဂ်ဟာ ဘလော့ဂ်ရဲ့ CSS (Cascading Style Sheets) လို့ ခေါ်တဲ့ အသွင်အပြင်နေရာ ချထားမှု၊ ခေါင်းစဉ်၊ ခေါင်းစဉ်လေး၊ စာကိုယ်စတာတွေမှာ EOT (Embedded Open Type File) လို့ခေါ်တဲ့ မိုက်ခရိုဆော့ဖ် ကုမ္ပဏီထုတ် Web Embedding Fonts Tool (WEFT) နဲ့ ZawgyiOne Font ကို Embedded Font File ပြုလုပ်ပြီး သုံးစွဲထားမယ် ဆိုရင်တော့ ဖိုင်းရားဖောက်စ် ဗားရှင်း အသစ်ဖြစ်စေ၊ အဟောင်းဖြစ်စေ၊ ဇော်ဂျီကို အင်စတောလ် လုပ်ထားသည်ဖြစ်စေ၊ မလုပ်ထားသည် ဖြစ်စေ အားလုံး အဆင်ပြေပြေ မြင်ရပါလိမ့်မယ်။ သဘောကတော့ ဒီ ဇော်ဂျီဖောင့်ထ်ကို Embedded လုပ်ထားတဲ့ ဝဘ်စာမျက်နှာ ကိုယ်တိုင်က သူသုံးမယ့် ဖောင့်ထ်ကို သူကိုယ်တိုင် ပုံသေအဖြစ် သတ်မှတ် ထားလိုက် လို့ဖြစ်ပါတယ်။  အကယ်၍ မိမိကြည့်ရှုလိုတဲ့ ဘလော့ဂ် သို့မဟုတ် ဝဘ်စာမျက်နှာက Embedded လုပ်ထားတဲ့ ဖောင့်ထ် တစ်မျိုးမျိုး ကို မသုံးစွဲထားပဲ သာမန်အတိုင်းပဲ ရေးပြီး ဝဘ်ပေါ်ကို တင်ထားတာ မျိုး ဆိုရင်တော့ အဲဒီ ဝဘ်စာမျက်နှာကို ဖတ်ရှုဖို့ မိမိစက်ထဲမှာ သူသုံးထားတဲ့ ဖောင့်ထ် အမျိုးအစား မရှိပဲ အဆင်ပြေပြေ မြင်ရဖို့  မဖြစ်နိုင်ပါဘူး။ ဒီ အခြေအနေဟာလည်း အထူးသဖြင့် မြန်မာ ဘာသာနဲ့ ရေးတဲ့ ဝဘ်ဆိုဒ်တွေအတွက် ရင်ဆိုင် နေရတဲ့ ပြဿနာ တစ်ခုပါပဲ။ ယူနီကုဒ် စံနှုန်းကိုက် မြန်မာဖောင့်ထ်များ မရှိသေးခြင်း တွေရဲ့ အကျိုးဆက်တွေလို့ ပြောလို့ရပါမယ်။ အကယ်၍ ကျွန်တော်တို့ လက်ရှိသုံးနေတဲ့ မြန်မာ ဖောင့်ထ်များ အားလုံးသာ စံသတ်မှတ်ချက် တစ်ခုတည်းအောက်မှာ ထုတ်လုပ်ခဲ့ကြတာ ဆိုရင် ဒီပြဿနာ ကြုံလာဖို့ လုံးဝ မရှိပါဘူး။ ဆိုလိုတာကတော့ အဲဒီလို စံနှုန်းကိုက် ဖောင့်ထ်များ ဖြစ်ကြောင်းမှန်ရင် မိမိ စက်ထဲမှာ မြန်မာသရီးပဲ ရှိရှိ၊ ဇော်ဂျီပဲ ရှိရှိ၊ ပိတောက်ပဲ ရှိရှိ၊ မိုင်မြန်မာပဲရှိရှိ ကြိုက်ရာ မြန်မာဖောင့်ထ် တစ်ခုရှိရုံနဲ့ အဲဒီဝဘ်စာမျက်နှာကို ဖတ်ရှုနိုင်ရမှာ ဖြစ်ပါတယ်။ စံနှုန်း သတ်မှတ်ချက် တစ်ခုတည်းအောက်မှာ ထုတ်လုပ်ခဲ့ကြတာ ဖြစ်တဲ့ အတွက် တစ်ခုမရှိရင် နောက်တစ်ခုက အလိုအလျောက် နေရာယူ အစားထိုး ပြသ ပေးသွားပါလိမ့်မယ်။ ဒီ့ထက် ပိုတိုးတက်တဲ့ အခြေအနေမှာ ဆိုရင်တော့ မိမိစက်ထဲမှာ ယူနီကုဒ် စနစ်အောက်မှာ ထုတ်လုပ်ထားတဲ့ မည်သည့် ယူနီကုဒ် ဖောင့် (En, Ru, Cn, Jp, ..etc) အမျိုးအစား မဆို တစ်ခုရှိရုံနဲ့  ယူနီကုဒ်နဲ့ ရေးသားထားတဲ့ မြန်မာဝဘ်စာမျက်နှာတွေကို အလွယ်တစ်ကူ ဖတ်ရှုနိုင်မှာပါ။  ဘယ်လိုပဲ ဖြစ်ပါစေ. စံနှုန်းကိုက် ဖောင့်ထ် တစ်ခုကို မသုံးနိုင်သေးတဲ့ ကျွန်တော်တို့အနေနဲ့ ကိုယ်ဖတ်ချင်တဲ့ မြန်မာ ဝဘ်စာမျက်နှာကို အဆင်ပြေပြေနှင့် အကောင်းဆုံး ဖတ်ရှုဖို့ အတွက် အဲဒီ ဝဘ်စာမျက်နှာမှာ သုံးထားတဲ့ ဖောင့်အမျိုးအစားကိိုု မိမိစက်ထဲ သေချာပေါက် ထည့်သွင်းပြီးမှ ဖတ်ရှုခြင်းကသာ အကောင်းဆုံးနှင့် အဆင်အပြေဆုံး ဖြစ်နိုင်ပါကြောင်း ဖြေကြား လိုပါတယ်။ နောက် လိုအပ်ခဲ့ရင် မိမိ အသုံးပြုတဲ့ ဘရောက်ဇာတွေရဲ့ View နှင့် Options တွေမှာလည်း Font နှင့် Encoding Method တွေကို ပြောင်းလဲ သတ်မှတ် ပြီး ဝဘ်စာမျက်နှာတွေကို မိမိမြင်ချင်သလို မြင်နိုင်အောင် သတ်မှတ်ထားရှိ နိုင်ပါသေးတယ်။

နောင်မှာ ဇော်ဂျီဖောင့်ကို သုံးထားတဲ့ အင်တာနက်စာမျက်နှာတွေမှာ ဇော်ဂျီဖောင့်ကို စက်ထဲမှာ ဇော်ဂျီဖောင့် မရှိပဲ မမြင်ရတော့ဘူးလို့ ပြောနေသံတွေ ကြားနေရတာ အဲဒါကို နားမလည်လို့ နည်းနည်း ရှင်းပြပေးပါလား။

>> ကျွန်တော် နားလည်တာကတော့ ဒီမေးခွန်းဟာ နားလည်မှု အနည်းငယ် လွဲချော်ခြင်း ကြောင့် ဖြစ်လာရတယ်လို့ ယူဆမိပါတယ်။  အမှန်တစ်ကယ် ဖြစ်သင့်တဲ့ မေးခွန်းက “ နောင်တစ်ချိန်မှာ ယူနီကုဒ် ဆိုတဲ့ စံအောက်၊ စနစ်အောက်မှာ မြန်မာဘာသာစကား တစ်ခုလုံးနဲ့ ဖောင့်ထ်တွေ အလုပ်လုပ်ကြတော့မယ် (သက်ဆိုင်ရာ ဆော့ဖ်ဝဲရ်ရေးတဲ့ ကုမ္ပဏီကြီးတွေကလည်း အဲဒါကို Support လုပ်ကြတော့မယ်) ဆိုရင် ကွန်ပြူတာ အတွင်းမှာ အကယ်၍ မည်သည့် မြန်မာဖောင့်ထ် မှ မရှိသည့်တိုင် ယူနီကုဒ်စနစ်အောက်မှာ မြန်မာဘာသာစကား အခြေခိုင်ခိုင်နဲ့ ရောက်နေပြီဖြစ်တဲ့ အတွက် မြန်မာစာလုံးတွေကို မြင်တွေ့၊ ဖတ်ရှုနိုင်ပါလိမ့်မယ်။ (အခုအခြေအနေနဲ့ ဆိုရင် တရုတ်၊ ဂျပန် နှင့် စပိန်၊ ရုရှား စတဲ့ ဘာသာစကားနဲ့ ရေးထားတဲ့ ဝဘ်စာမျက်နှာတွေကို မိမိကွန်ပြူတာ အတွင်းမှာ သက်ဆိုင်ရာ ယူနီကုဒ်ဖောင့်ထ် တွေ မိမိကိုယ်တိုင် အထူးတလည် ရှာဖွေထည့်သွင်း မထားသည့်တိုင် မြင်တွေ့ဖတ်ရှုရနိုင်ပုံမျိုး နဲ့ သွားတူပါလိမ့်မယ်) ယူနီကုဒ်ရဲ့ နေရာချထားမှုနှင့် စံသတ်မှတ်ချက်တွေကို အပြည့်အဝ လိုက်နာမထားတဲ့ ဇော်ဂျီဖောင့်သုံး စာမျက်နှာတွေ အနေနဲ့ကတော့ အဲဒီလို ဘာဖောင့်ထ် မှ မရှိပေမယ့်လည်း မြန်မာလို မြင်တွေ့ဖတ်ရှုနိုင်တဲ့ အခွင့်အရေးမျိုး ရနိုင်ပါ့မလား.”  အဲဒီလိုသာ ဖြစ်သင့်ပါတယ်။

အဲဒီမေးခွန်းအတွက် အဖြေကတော့ မြင်တွေ့ဖတ်ရှု မရနိုင်ပါဘူး လို့ပဲ ဖြေရပါလိမ့်မယ်။ ဒါပေမယ့် အခြေအနေအားလုံး အတွက် လုံးဝကို မြင်တွေ့ ဖတ်ရှု မရနိုင်လောက်အောင် ဖြစ်သွားတာမျိုးတော့ မဟုတ်ပါဘူး။ အခု ကျွန်တော်တို့ မြန်မာဆိုဒ်တွေထဲမှာလည်း ယူနီကုဒ် မဟုတ်တဲ့ ASCII ဖောင့်ထ် အမျိုးအစားတွေကို သုံးနေကြတဲ့ ဆိုဒ်တွေ အများအပြား ရှိကြပါတယ်။ အဲဒီလို ဆိုဒ်တွေကို မြင်တွေ့ ဖတ်ရှုနိုင်ဖို့ အတွက် ၎င်းဆိုဒ်က သက်ဆိုင်ရာ ဖောင့်ထ် ကို မိမိစက် အတွင်း ထည့်သွင်းလိုက်ရုံနဲ့ အဆင်ပြေသွားတာကို တွေ့ရမှာပါ။ နောက်ပိုင်း အနာဂတ်မှာ ဇော်ဂျီအနေနဲ့ ထပ်မံပြီး စံနှုန်းကိုက် ဖောင့်ထ် အမျိုးအစားမျိုး Develop  မလုပ်လာသည့်တိုင် ယခု လက်ရှိသုံးနေတဲ့ ဇော်ဂျီဖောင့်ထ် ကိုပဲ မိမိစက်ထဲမှာ ထည့်သွင်းထားခြင်းဖြင့် ဇော်ဂျီသုံး စာမျက်နှာတွေကို ဖတ်ရှုနိုင်ပါလိမ့်မယ်။ နောက် မိမိရဲ့ အင်တာနက် ဘရောက်ဇာ Setting ကိုလည်း ပြင်ဆင်သင့်ရင် ပြင်ဆင်ဖို့ လိုအပ်ကောင်း လိုအပ်ပါလိမ့်မယ်။

ခုနောက်ပိုင်းမှာ ဝင်းဒိုးအသစ်တင်ရင် ၊ ဂျီတော့ခ် အသစ်တင်ရင် ဇော်ဂျီဖောင့်ကို ရိုက်လို့ မရတာမျိုးဖြစ်တာ ဘာကြောင့်ပါလဲ သိပါရစေ။ ရိုက်လိုက်တိုင်း လေးထောင့်ကွက်တွေပဲ ပေါ်နေတာမျိုးပေါ့။

>> ဒါကတော့ ဇော်ဂျီကို ထုတ်လုပ်သူတွေရဲ့ စီစဉ်ဆောင်ရွက်မှု လို့ပြောလို့ ရသလို အခုနောက်ပိုင်း ဘရောက်ဇာတွေ၊ ဝင်းဒိုးစ် စနစ်တွေနဲ့ ဂျီတော့ခ် စတာတွေရဲ့ ဗားရှင်း အပြောင်းအလဲနှင့် သူတို့ သတ်မှတ်တဲ့ Encoding စနစ်တွေ ကွာဟသွားမှုကြောင့်လို့ လည်း ပြောလို့ရပါတယ်။ ဥပမာ အနေနဲ့ ပြောရရင် အရင်က ဝင်းဒိုးစ် XP မှာ ယူနီကုဒ် အတွက် Default Character Encoding က UTF-8 ပါ။ အခု ဝင်းဒိုးစ် Vista မှာတော့ ယူနီကုဒ် အတွက် Default Character Encoding ကို UTF-16 အဖြစ်ပြောင်းလဲ သတ်မှတ်ထားတာကို တွေ့ရပါတယ်။

ကျွန်တော်တို့ရဲ့ မြန်မာယူနီကုဒ် နဲ့ တစ်ကွ အများစုသော ယူနီကုဒ် ဖောင့်ထ် တွေ သတ်မှတ်သုံးစွဲကြတဲ့ Character Encoding စနစ်ကတော့ UTF-8 ဖြစ်ပါတယ်။ အရင်ကတော့ ဇော်ဂျီကို မိမိစက်ထဲမှာ အင်စတောလ် လုပ်လိုက်တာနဲ့ ဝင်းဒိုးစ်၊ ဘရောက်ဇာ၊ ဂျီတော့ခ် စတာတွေမှာ အလိုအလျောက် Default Font ဖြစ်အောင် ဝင်းဒိုးစ် စနစ်ရဲ့ Registry ထဲကို အလိုအလျောက် သွားပြင်ပေးအောင် ဇော်ဂျီ Installer Package ထဲမှာ ပါကောင်းပါခဲ့ ပါလိမ့်မယ်။ အခုနောက်ပိုင်းမှာ အဲဒီ Default Font အလိုအလျောက် သတ်မှတ်ပေးတဲ့ စနစ်ကို ဇော်ဂျီထုတ်လုပ်သူတွေ ကိုယ်တိုင် ဖြုတ်ထားရစ်ခဲ့တာ ဖြစ်နိုင်သလို၊ အကယ်၍ အဲဒီ စနစ်ပါခဲ့သည့်တိုင် အထက်မှာ ကျွန်တော်ပြောခဲ့သလို Encoding စနစ်တွေချင်း သွား ကွာဟ နေတဲ့ အတွက် အလုပ်မဖြစ်တော့တာ ဖြစ်နိုင်ပါတယ်။ အဲဒီ ပြဿနာ အတွက် ဂျီတော့ခ် မှာဆိုရင်လည်း ဂျီတော့ခ် ရဲ့ Setting ကနေတဆင့် Font ကို မိမိ စိတ်ကြိုက် ရွေးချယ်သတ်မှတ်ခြင်း ဖြင့် အလွယ်တစ်ကူ ဖြေရှင်းနိုင်ပါတယ်။ ဝင်းဒိုးစ် စနစ်မှာ ဆိုရင်တော့ System Default Font ကို မိမိကိုယ်တိုင် Zawgyi Font လိုက်ပြောင်းပေးခြင်း ဖြင့် အဆင်ပြေစေမှာပါ။

မြန်မာဘာသာကို အသုံးပြုတဲ့ website တွေမှာ ဘယ် မြန်မာဖောင့်ကို သုံးရင် အဆင်ပြေဆုံး ဖြစ်ပါမလဲဆိုတာ သုံးသပ်ပေးပါလား။

>> ဒီမေးခွန်းကို အဖြေပေးဖို့ အတွက် အခြေအနေ လေးခုကို ကျွန်တော်တို့ ကြိုတင် စဉ်းစားကြည့်ပါမယ်။ အဆင်ပြေဆုံး ဆိုတဲ့ နေရာမှာ (၁) ဝဘ်ဆိုဒ်ကို ဖန်တီး ရေးသားသူ အတွက် အဆင်ပြေဆုံး ဖြစ်မှု၊ (၂) ဝဘ်ဆိုဒ်ကို ဖတ်ရှုသူတွေ အတွက် အဆင်ပြေဆုံး ဖြစ်မှု နှင့် (၃) ဖန်တီးသူရော ဖတ်ရှုသူ နှစ်ဦးလုံး အသုံးပြုကြတဲ့ ဝဘ်ဘရောက်ဇာ (Web Browser) တွေ အတွက် အဆင်ပြေဆုံး ဖြစ်မှု၊ (၄) ရှေ့က အချက်သုံးခုလုံးကို ရေရှည် လုပ်ငန်းများ အတွက်ပါ အာမခံနိုင်ပြီး အဆင်ပြေဆုံး ဖြစ်လာနိုင်မှု စတဲ့ လေးချက်ပါ။

လတ်တလော အခြေအနေအရတော့ ကျွန်တော်တို့ မြန်မာ အင်တာနက် နှင့် ဝဘ်ယူဇာ တွေ အတွက် ဇော်ဂျီဖောင့်ထ် က ပထမဆုံး အခြေအနေသုံးခု အတွက် အဆင်ပြေဆုံး ဆိုတဲ့ ဘုံ အနေအထား တစ်ခုကို ဖန်တီးပေးထားတာ အမှန်ပါပဲ။ ဒါပေမယ့် ဒီ အဆင်ပြေဆုံး ဆိုတဲ့ အနေအထားဟာ လတ်တလော အတွက်သာ ဖြစ်ပြီး နံပါတ် (၄) အချက်ဖြစ်တဲ့ အထက်က အချက်သုံးချက်လုံးကို အနာဂတ်အတွက်ရော၊ လက်ရှိမှာ လုပ်ကိုင် အသုံးပြုနေကြတာတွေ အတွက်ပါ အသင့်တော်ဆုံး ဖြစ်ပါ့မလား ဆိုတာကိုတော့ ကျွန်တော်တို့ ထပ်စဉ်းစား ကြည့်ကြဖို့ လိုပါမယ်။ ဒီနေရာမှာ အဆင်ပြေဆုံး ဖြစ်သည်ဖြစ်စေ၊ အသင့်တော်ဆုံး ဖြစ်သည်ဖြစ်စေ အနေအထား ၂-ရပ်လုံးဟာ လူတွေကိုယ်တိုင် ဖန်တီး သတ်မှတ်ယူလို့ရတယ် ဆိုတာကိုတော့ တစ်ချက် လေးလေးနက်နက် မှတ်သား ထားခဲ့ စေချင်ပါတယ်။ တစ်ခု ရှိသေးတာကလည်း ဒီ စကားစု ၂-ခု ကိုလည်း ရောရောထွေးထွေး မစဉ်းစားပဲ သီးခြားစီ မိမိစိတ်ထဲ မှာ နားလည် သဘောပေါက်ထားဖို့လည်း လိုပါသေးတယ်။ အသင့်တော်ဆုံး ဆိုတိုင်း အရာရာနှင့် အံဝင်ဂွင်ကျ အဆင်ပြေဆုံး မဖြစ်နိုင်သလို၊ အဆင်ပြေဆုံး ဆိုတိုင်းလည်း အခြေအနေအားလုံး အတွက် အသင့်တော်ဆုံး မဖြစ်နိုင်ပါဘူး။

ဆိုတော့ကာ လက်ရှိ လူမြန်မြန်သိဖို့ လိုတဲ့၊ အလွယ်တစ်ကူလည်း အသုံးပြုနိုင်ဖို့ လိုတဲ့ ရေတိုလုပ်ငန်းနှင့် သက်ဆိုင်တဲ့ ဝဘ်ဆိုဒ်တစ်ခုကို ကျွန်တော် Develop လုပ်ရမယ် ဆိုရင်တော့ ကျွန်တော် လတ်တလော အဆင်ပြေဆုံး ဆိုတဲ့ ဇော်ဂျီဖောင့်ထ် ကို သုံးဖြစ် ပါလိမ့်မယ်။ ဒီလိုမဟုတ်ပဲ နှစ်ကာလများစွာ ရင်းနှီးမြှပ်နှံ လုပ်ကိုင်ရမယ့် လုပ်ငန်းသုံး ဝဘ်ဆိုဒ်မျိုးတွေ (ဥပမာ – ပညာရေး ဆိုင်ရာ ဝဘ်ကွန်ယက်မျိုး၊ ဘာသာစကား အဘိဓာန် ဆိုင်ရာ ဝဘ်ဆိုဒ်မျိုး၊ မြေပုံ၊ ဈေးကွက် နှင့် သန်းခေါင်စာရင်း ဆိုင်ရာ ၊ ရှာဖွေ အသုံးချခြင်း ဆိုင်ရာ ဝဘ်ဆိုဒ်မျိုး.. စသဖြင့် ) ထဲက တစ်ခုခုကို တည်ဆောက်ရမယ် ဆိုရင်တော့ ကျွန်တော် ယူနီကုဒ် စံသတ်မှတ်ချက်နှင့် ကိုက်ညီတဲ့ အလွယ်တစ်ကူနှင့် လူတိုင်း အခမဲ့ ရနိုင်တဲ့ မြန်မာ-၃ ၊ ပိတောက်၊ ပုရပိုဒ်. စတဲ့ ဖောင့်ထ် တွေ အနက်က တစ်ခုခုကို အားလုံး အတွက် လက်ရှိမှာ အဆင်ပြေဆုံး မဖြစ်ပေမယ့်လည်း မဖြစ်မနေ အသုံးပြုဖို့ ဆုံးဖြတ်မိမှာပါပဲ။ ဒါဟာ ရေတို အဆင်ပြေဆုံး ဆိုတဲ့ အနေအထားကို ကျော်လွန်ပြီး ရေရှည်မှာ အဆင်ပြေဆုံး ဖြစ်လာနိုင်တဲ့ လက်ရှိ အသင့်တော်ဆုံး ဆိုတာကို စဉ်းစား ရွေးချယ် လိုက်တာပဲ ဖြစ်ပါတယ်။

အကျဉ်းချုပ် ပြောရရင်တော့ မည်သည့်ဖောင့်ထ် အမျိုးအစား ကိုပဲ သုံးသုံး မိမိရဲ့ လိုအပ်ချက်၊ စားသုံးသူ ဈေးကွက် ရဲ့ လိုအပ်ချက်နှင့် အနာဂတ်အတွက်ပါ အဲဒီဖောင့်ထ်ဟာ လိုအပ်ချက် ရှိလာနိုင်၊ မလာနိုင် စတာတွေ ကိုပါ ထည့်သွင်း စဉ်းစားပြီး လတ်တလော အဆင်ပြေဆုံး ဆိုတဲ့ အနေအထား အပြင် အခြေအနေ အားလုံး အတွက် အသင့်တော်ဆုံး ဆိုတာကိုပါ မဖြစ်မနေ ထည့်သွင်း စဉ်းစားပြီးမှ အသုံးပြုသင့်တဲ့ အကြောင်း ဖြေကြား လိုပါတယ် ခင်ဗျား။

အခုလို ဖြေကြားခွင့်ရတဲ့ အတွက် လောကအလှ မဂ္ဂဇင်းကို အထူးကျေးဇူး တင်ရှိပါကြောင်း ပြောလိုပါတယ် ခင်ဗျား။

ဟုတ်ကဲ့… ကိုမှော်ဆရာ ။ ခုလို စိတ်ရှည် လက်ရှည် ဖြေကြားပေးတာကို ကျွန်မတို့ လောကအလှမှလည်း ကိုမှော်ဆရာကို ကျေးဇူးတင်ပါတယ် ရှင်။

Spread the World!

Update!

ကျွန်တော့် ရဲ့ တတိယ အကြိမ်ပြောင်းရွှေ့ခြင်း အဖြစ် ဝါ့ဒ်ပရက်စ် ဘလော့ဂ် ကို မြန်မာ-၃ ဖောင့်ထ် နဲ့ အပြည့်အဝ ရေးနိုင်ဖို့ ဒီဘလော့ဂ် အသစ်ကို ထပ်မံ ဖန်တီး လိုက်ပါတယ်။ Feed မှ တစ်ဆင့်၊ အီးမေးလ် မှ တစ်ဆင့် ယူဖတ်သူများ အတွက်ဘာမှ ပြောင်းလဲစရာ မလိုသလို၊ ယူနီကုဒ် ဖောင့်ထ်နဲ့ လုံးဝအပြည့်အဝ ရေးထားတာ ဖြစ်ပေမယ့် ဇော်ဂျီနဲ့ပါ ဖတ်လို့ရအောင် မြန်မာဖောင့်ထ် ကွန်ဗာတာ တစ်ခုကို ဘလော့ဂ် ညာဘက် အပေါ်ထောင့် မှာ တပ်ဆင်ပေးထားပါတယ်ခင်ဗျာ။

ယခင် ဇော်ဂျီနဲ့ ရေးထားတဲ့ ဘလော့ဂ် အဟောင်းက ပို့စ်များကိုလည်း ယခင်အတိုင်းပဲ ဒီလိပ်စာအသစ်နဲ့ ဆက်လက်ဖတ်ရှုနိုင်ပြီး တစ်ချို့ သရုပ်ပြပုံတွေ ပျောက်သွားတာ၊ မတွေ့တာတွေ အတွက် ကျွန်တော် အမြန်ဆုံးနဲ့ အကောင်းဆုံး ဖြစ်အောင် ပြန်လည် တပ်ဆင်ပေးသွားပါမယ်။

ယခု ဒီဘလော့ဂ်ကို ကူးထည့်ထားတဲ့ ” ယူနီကုဒ်နှင့် မြန်မာစာယဉ်ကျေးမှု ” ဆိုတဲ့ ပို့စ်က ကောမန့်များ၊ နောက် တစ်ခြားလိုအပ်ချက်များ အားလုံးကိုလည်း အတတ်နိုင်ဆုံး အမြန်ဆုံး နဲ့ အဆင်ပြေဆုံး ဖြစ်အောင် ဖြည့်သွင်း တပ်ဆင်သွားမယ် ဆိုတဲ့ အကြောင်း လေးလေးစားစား အကြောင်းကြားလိုက် ပါကြောင်း ခင်ဗျား။

လာရောက်၊ လည်ပတ် ဖတ်ရှုခြင်း အတွက် အထူး ကျေးဇူးတင်ရှိပါတယ် ခင်ဗျာ။

ကျွန်တော့် ဘလော့ဂ်ကို အောက်ပါ ယခု ပို့စ်မှ စတင်ကာ ယူနီကုဒ်စနစ်သုံး မြန်မာဖောင့်များ ပြောင်းရေးနေပြီ ဖြစ်၍ အခမဲ့ ဒေါင်းလုဒ် လုပ်နိုင်သော မြန်မာ ဆီးရီး ဖောင့်ထ်များ ( မြန်မာ ၁၊ ၂၊ ၃)၊  ပုရပိုဒ် ဖောင့်ထ် သို့မဟုတ် ပိတောက် ဖောင့်ထ် တစ်ခုခုအား မိမိ စက်ထဲတွင် ထည့်သွင်းထားမှ အဆင်ပြေပါမည်။ ယခု ပို့စ် မတိုင်မှီ ပို့စ် အဟောင်းများ အားလုံးကိုမူ ဇော်ဂျီဖြင့်ပင် ဖတ်ရှုနိုင်မည် ဖြစ်ပြီး ယခုပို့စ်မှ စတင်ကာ နောက်ဆက်လက် ရေးသားမည့် ပို့စ်များအား ဖတ်ရှုရန် အတွက် အထက်ပါ ဖောင့်ထ်များ မိမိစက်ထဲတွင် ရှိနေရန် လိုအပ်မည်ဖြစ်သည်။

အဆိုပါ ယူနီကုဒ် စနစ်သုံး ဖောင့်ထ်များအား ဖတ်ရှုရုံ သက်သက် အသုံးပြုရန် အတွက် စာရိုက်သည့် လက်ကွက်ဆော့ဖ်ဝဲရ် အင်စတောလ် လုပ်စရာ  လုံးဝ မလိုပါ။ အခြား မိမိ လက်ရှိ သုံးနေသော ဇော်ဂျီ အစရှိသည့် ဖောင့်ထ် နှင့် လက်ကွက်များကိုလည်း ဖယ်ရှားရန် မလို  ပြဿနာတက်ရန် မရှိ သည့် အတွက် အသုံးပြုရန် အလွန်ပင် လွယ်ကူပါသည်။

ယူနီကုဒ် စနစ်သုံး မြန်မာဖောင့်ထ် များကို ဖတ်ရှုရုံ သက်သက် အသုံးပြုရန် အတွက် အောက်ပါ အဆင့် (၂) ဆင့်ဖြင့်လုပ်ဆောင်ရုံဖြင့် လုံလောက်ပါသည်။

(၁) မြန်မာ-၃၊ သို့ ၊ ပုရပိုဒ်၊ သို့၊ ပိတောက် ဖောင့် တစ်ခုခုကို ဒေါင်းလုဒ်ချပါ။ ဒေါင်းလုဒ်ချပြီးလျင် ဖိုင်တစ်ထုပ်ရရှိလာမည် ဖြစ်ပြီး ၎င်းဖိုင်ထဲတွင် OpenType Font File တစ်ခုစီ ကိုတွေ့ရပါမည်။

(၂) ၎င်း ဖောင့်ထ် ဖိုင်ကို ဝင်းဒိုးစ်၏ Start မှ တစ်ဆင့် Control Panel ထဲရှိ Font ဆိုသော Folder ထဲသို့ Copy & Paste လုပ်လိုက်ရုံသာ ဖြစ်ပါသည်။
သို့မဟုတ်ပါကလည်း ၎င်း ဖောင့်ထ် ဖိုင်ပေါ်တွင် Right Click လုပ်ပြီး Install လုပ်ခြင်ဖြင့် အလွယ်တစ်ကူ မိမိစက်ထဲတွင် Install လုပ်ပြီး ဖြစ်စေပါမည်။

ယူနီကုဒ် စနစ်သုံး မြန်မာဖောင့်များ အား မိမိကြိုက်နှစ်သစ်ရာ ဖောင့်ထ် ကိုဒေါင်းလုဒ် လုပ်ရန် အတွက် အောက်ပါ ဝဘ်စာမျက်နှာတွင် အသင့် စုစည်းထားရှိပြီး လွယ်လင့်တစ်ကူ ဒေါင်းလုဒ် လုပ် အသုံးပြုနိုင်ပါသည်။

>> Download Unicode Standard Myanmar Fonts

_____________________________________________________________________________

” ယူနီကုဒ် မြင်းရိုင်းနှင့် ဘိုင်နရီ ခေတ်လွန်  မြန်မာစာ ယဉ်ကျေးမှု စာတမ်း ” နှင့် ကျေးဇူးတင်စကား

စာတမ်းအား အောက်ပါ ဖိုင် အမျိုးအစား သုံးမျိုးဖြင့် အွန်လိုင်းပေါ်တွင် လည်းကောင်း ဒေါင်းလုဒ်လုပ်၍ သော်လည်းကောင်း ဖတ်ရှု နိုင်သည်။

ဖလက်ရှ်စာမျက်နှာ (FlashPaper) ဖြင့် ဖတ်ရှုရန်

ပီဒီအက်ဖ် (.PDF) ဖိုင်ဖြင့် ဖတ်ရှုရန် (ဒေါင်းလုဒ်လုပ်ရန်)

မိုက်ခရိုဆော့ဖ်ဝါ့ဒ်(.DOC) ဖိုင်ဖြင့်ဖတ်ရှုရန်(ဒေါင်းလုဒ်လုပ်ရန်)

ကျေးဇူးတင်စကား

ဤ စာတမ်းဆောင်းပါးသည် ကျွန်တော် ဘလော့ဂ် ရေးလာသော သက်တမ်းတစ်လျောက် အချိန်အကြာဆုံး (စုစုပေါင်း ၂၄-ရက် တိတိ) ရေးခဲ့သည့် ဆောင်းပါး တစ်ပုဒ်ဖြစ်ပြီး မိမိအတွက် စိမ်းလွန်းလှသော နယ်ပယ်တစ်ခု ထဲသို့ စိတ်ဝင်စားမှု နှင့် ရေးသားလိုခြင်း ဆန္ဒ တစ်ခုတည်းကို အရင်းပြု၍ ဆောင်းပါးပါ အကြောင်းအရာများ အားလုံးကို မိမိဘာသာ မိမိ “က”  ကြီးမှ စတင် သင်ကြား လေ့လာ ရှာဖွေခဲ့ရပါ၏။ ဤဆောင်းပါး ရေးသားရန် အတွက် ၂၀ဝ၈-ခုနှစ်၊ နိုဝင်ဘာလ (၆) ရက်နေ့တွင် အင်တာနက် တစ်ခွင်၌ ကနဦး စူးစမ်း ရှာဖွေ လေ့လာမှုများ စတင်ခဲ့ပြီး ပထမပိုင်း ဆောင်းပါး “ယူနီကုဒ် မြင်းရိုင်း”ကို နိုဝင်ဘာ (၁၀) ရက်၊ ၂၀ဝ၈-ခုနှစ် တွင် ဖော်ပြနိုင်ခဲ့သည်။ ဒုတိယပိုင်း “မြစေတီကျောက်စာမှသည် မိုက်ခရိုပရိုဆက်ဆာ ဆီသို့”  ကို နိုဝင်ဘာလ (၂၉)၊ ၂၀ဝ၈-ခုနှစ် တွင်မှ အပြီးသတ် နိုင်ခဲ့သည်။ တတိယပိုင်း “ယူနီကုဒ် စနစ်သုံးမြန်မာ စာလုံးများ” နှင့် နောက်ဆုံးပိုင်း “မည်သည့် ယူနီကုဒ် ဖောင့်ထ် ကိုသုံးစွဲကြမည်နည်း” တို့အား ၂၂.၁၂.၂၀ဝ၈ နေ့တွင် အပြီးသတ်၊ အချောကိုင် ရေးသားနိုင်ခဲ့၏။

ဤစာတမ်းအား အပြီးမသတ် နိုင်မှီ ကာလ များတွင်လည်း အလုပ်ကိစ္စနှင့် ကျောင်းကိစ္စများ၊ ကိုယ်ရေးကိုယ်တာ ကိစ္စများ ဖြင့် အချိန်လု နပန်းလုံးရင်း တစ်ခါတစ်ရံ တစ်ရက်လုံးလုံး စာတစ်ကြောင်းသာ ရသည့်အခါလည်း ရှိခဲ့သလို တစ်ခါတစ်ရံလည်း တစ်ရက်လုံး ရေးဖို့ကြိုးစားရင်းနှင့်ပင် လိုအပ်သော အထောက် အထား ရှာမတွေ့၍  စာတစ်လုံး၊ တစ်ပါဒမျှပင် ထွက်မလာသည် များလည်း ရှိခဲ့ပါသည်။ တစ်ခါတစ်ရံလည်း ဝါကျအထားအသို များအား ရေးပြီးမှ မကြိုက်၍ သော်လည်းကောင်း၊ အချက်အလက် မခိုင်လုံဟု ယူဆ၍ သော်လည်းကောင်း၊ ဤသို့ မရေးသားသင့်ဟု မိမိဘာသာ မိမိ ယူဆ၍ သော်လည်းကောင်း ဖြုတ်၊ ထုတ်၊ နှုတ်ပယ်၊ ပြုပြင်ခြင်းများ ပြုလုပ်ခဲ့သည့် အကြိမ်တွေကလည်း များပြားလှစွာပင် ဖြစ်သည်။

ဆိုခဲ့သည့် အတိုင်း တစ်ခုတည်းသော စိတ်အား ထက်သန်မှုနှင့် ခိုင်မာ တည်တံ့ပြီး အသုံးပြုရန် လွယ်ကူသည့်၊ အားလုံး လက်ခံသဘောကျသည့် မြန်မာယူနီကုဒ်စနစ် တစ်ခု အမြန်ဆုံး ပေါ်ပေါက် စေလိုခြင်း တည်းဟူသော တစ်ကြောင်းတည်းသော ရည်ရွယ်ချက် စေတနာ တို့အပေါ်တွင် အလုံးစုံ အခြေပြု၍ ကျွန်တော်၏ တစ်ထွာ၊ တစ်မိုက် မျှသာဖြစ်သော ဦးနှောက်နှင့် နုံနဲ့လှသည့် အသိဉာဏ်ကို မဖြစ်ဖြစ်အောင် ကြိုးစား ဖြစ်ညှစ် ရေးသားခဲ့ခြင်းသာ ဖြစ်သဖြင့် စာတမ်းပါ အချက်အလက်များ၏ မတိကျ၊ မခိုင်လုံမှုများ၊ မှားယွင်းချွတ်ချော်မှုများ နှင့် အခြားသော လိုအပ်ချက်များ အားလုံး တို့အတွက် ကျွန်တော့်တွင်သာ အပြည့်အဝ တာဝန်ရှိပါကြောင်း တို့အား စာဖတ်သူအားလုံးကို လေးစားစွာ တစ်ပါတည်း အသိပေး အပ်ပါသည် ခင်ဗျား။

ဤစာတမ်း ပြုစုနိုင်ရေး အတွက် အင်တာနက်ပေါ်တွင် လေ့လာဖွယ်၊ မှတ်သားဖွယ် မှတ်တမ်းမှတ်ရာများအား စနစ်တကျ ပြုစု စုဆောင်း ထားရှိခဲ့ကြသူများ အားလုံး နှင့် ကျွန်တော် ရေးသမျှ ဆောင်းပါးတိုင်းတို့ကို လာရောက် ဖတ်ရှုအားပေးကြသူများ၊ နောက်ထပ်၊ နောက်ထပ် ဆောင်းပါးများ ထပ်မံ ရေးသားလိုစိတ်ဖြစ်လာအောင် မှတ်ချက်များ ချီးမြှင့် ပေးသွားခဲ့ကြသူများ နှင့် ယခုစာဖတ်နေသူ အပါအဝင် စာဖတ်သူအားလုံးတို့ကိုလည်း ကျေးဇူး အထူးတင်ရှိပါကြောင်း ထပ်ဆင့် ပြောကြား လိုက်ရပါသည်။

အားလုံး ပျော်ရွှင်ဖွယ် ခရစ်စမတ်နှင့် နှစ်သစ်ကူး အချိန်ဖြစ်ကြပါစေ!

Merry X’mas & Happy New Year to All!