ဝိရောဓိ

စိတ်ကူးယဉ်လို့ စိတ်ကူးမယဉ်လို့
နှိမ်ချလို့ နိမ့်ကျလို့
မျှော်လင့်လို့ မမျှော်လင့်လို့
ဝမ်းနည်းလို့ ဝမ်းမနည်းလို့
ဟန်ဆောင်လို့ ဟန်မဆောင်လို့
ကလေးစကားတွေ လူကြီးများပြောလို့
လူကြီးများ ကလေးစကားတွေပြောလို့
လူကြိုက်များတာတွေ ရေရွတ်လို့
ရေရွတ်တာတွေ လူများကြိုက်လို့
သိကြားမင်း ဖန်ဆင်းတဲ့ နွား
ချိုကုပ်လို့ ချိုထောင်လို့
အသက်အရွယ်နဲ့ သိက္ခာအကြား
ဆန္ဒတရားတွေ ထောင်လွှားလို့
ကရားရေလွတ်တွေ ပြောလို့
တရားလက်လွတ်တွေ ဖြစ်လို့ (မရှိတဲ့ တရား)
ကွေ့ကောက်လို့ ကောက်ကွေ့လို့
ခြောက်သွေ့လို့ သွေ့ခြောက်လို့
တွန့်တိုမှုတွေကို ဆုပ်ကိုင်လို့
ဆုပ်ကိုင်မှုတွေကို အပြစ်တင်လို့
မကြည်မလင် ဖြစ်လို့
ဖြစ်နေတာတွေကို မကြည်လင်လို့
မသေချာလို့ သေချာလို့
ရေရာလို့ မရေရာလို့
…….
ခင်ဗျားတို့ ကျွန်တော်တို့
ဒီဘူတာကနေ မြန်မြန်သွားသင့်နေပြီဗျာ။

ဝိရောဓိ is originally a post from: မှော်ဆရာ မှတ်တမ်း Thank you for subscribing and reading my blog!

“ပညာရေးသာ နိုင်ငံများအတွက် အဖိုးနည်းဝန်ပါ ကာကွယ်ရေး မဟာဗျူဟာ” ဆိုတဲ့ စကားတစ်ခွန်းကို တစ်လောက ဆရာ အတ္တကျော်ရဲ့ ဖေ့စ်ဘွခ် စာမျက်နှာမှာ ဖတ်လိုက်ရပါတယ်။ အင်မတန် ရိုးရှင်း မှန်ကန်တဲ့ အဆိုအမိန့် တစ်ခုဆိုတာ အငြင်းပွားဖွယ် မရှိပါဘူး။ ပညာနဲ့ ပတ်သက်လို့ အရင့်အရင် ကတည်းကလည်း မြန်မာစကားမှာ ဆိုရိုးတွေ၊ စကားပုံတွေ များစွာ ရှိခဲ့ပြီး၊ အားလုံးလည်း သိခဲ့ကြပြီးသားပါ။ “ပညာရွှေအိုး လူမခိုး”၊ “ပညာလို အိုသည်မရှိ”၊ “ပညာရှာ ပမာ သူဖုန်းစား”၊ “ပညာရဲရင့် ပွဲလယ်တင့်”၊ “ဉီးကျည်ပွေ့ အတက်ပေါက်” စသဖြင့် ပညာကို ဘယ်လို တန်ဖိုးထားရမယ်၊ ပညာကို ဘယ်လို ရှာရမယ်၊ ပညာကြောင့် ဘယ်လို အကျိုးကျေးဇူး ဖြစ်ထွန်းတယ် စတဲ့ ပညာနဲ့ ပတ်သက်တဲ့ အတွေးအခေါ်တွေ၊ ဆိုရိုးစကားတွေကို ကျွန်တော်တို့ ငယ်စဉ်ကတည်းက အရိုးထဲ၊ အသဲထဲမှာ စွဲမြဲခဲ့ကြပြီးသား ဖြစ်ပါတယ်။

ဒီနေ့ခေတ် ဒီနေ့ အခါမှာတော့ ပညာတတ်သူနဲ့ ပညာမတတ်သူတွေရဲ့ ကွာခြားမှုဟာ မိုးနဲ့ မြေအဆင့်တင် မက ပညာတတ်သူတွေက အင်္ဂါဂြိုလ်ပေါ် ရောက်နေချိန် ပညာ မတတ်သူတွေကတော့ ငရဲကို ဒလိမ့်ခေါက်ခွေး ပြုတ်ကျနေသလို ဖြစ်နေပြီ ဆိုတာ အထူးတလည် ဖွဲ့နွဲ့ပြနေစရာ မလိုလောက်အောင် ရှင်းရှင်းလင်းလင်း မြင်နေကြရပါတယ်။တစ်ဖက်ကလည်း ဒီနေ့ ခေတ်ရဲ့ လူနေမှု စားရိတ်တွေ ကြီးမြင့်လာတာ၊ လူတွေရဲ့ လိုအပ်ချက်တွေ၊ လိုအင်ဆန္ဒတွေ များလာတာနဲ့ အတူ “ပညာရွှေအိုး လူမခိုး” ဆိုပေမယ့် “ရွှေအိုးပါမှ ပညာရ သဗျ” လို့ ဆိုလာကြသူတွေ၊ ပညာသင်ဖို့ အတွက် “ငွေကို ထွေခင်း” မှ ရကြောင်း ပြောလာကြသူတွေ ကလည်း မနည်းလှပါဘူး။

အဲဒီလို အကျပ်အတည်း အထွေထွေနဲ့ ပညာခေတ်ကြီးကို လက်ရှိမှာ ရောက်နေတဲ့ ကျွန်တော်တို့ မျိုးဆက်တွေအတွက် ရွှေအိုးမပါလည်း ဒီနေ့ခေတ်ရဲ့ အဆင်မြင့် ပညာတွေ ရနိုင်တဲ့ နည်းလမ်းတွေ၊ နေရာတွေကို တစ်ချက်လောက် လက်တို့ချင်ပါတယ်။ လက်ချည်းဗလာ၊ ဘာမှ မပါဘဲ အဆင်မြင့် ပညာတွေ ရမယ် ဆိုတော့ ဖြစ်နိုင်ပါ့မလား ကိုယ့်လူလို့ မေးစရာ ရှိပါတယ်။ အခု ကျွန်တော်ပြောမယ့် နေရာတွေက  ခင်ဗျားတို့ကို ဘွဲ့လက်မှတ်တွေ၊ ဆာတီဖီကိတ် တွေ အထိတော့ ပေးချင်မှ ပေးနိုင်ပါလိမ့်မယ်။ ဒါပေမယ့် ခင်ဗျားတို့ ဘွဲ့လက်မှတ်တွေ၊ ဒီဂရီတွေ၊ ဆာတီဖီကိတ်တွေ ယူဖို့ လုပ်နေတဲ့ နေရာတွေက မပေးနိုင်တဲ့ ပညာရေးမျိုး၊ ခင်ဗျားတို့ကို ပညာရပ်တစ်ခုနဲ့ ပတ်သက်လို့ တစ်ကယ် အဆင့်မြင့်မြင့် တတ်ကျွမ်း နားလည်တဲ့ သူတစ်ယောက် ဖြစ်လာအောင် ပြုလုပ်ပေးနိုင်တဲ့ ပညာရေးမျိုးကို တော့ အသေအချာ ပေးနိုင်လိမ့်မယ် ဆိုတာကိုတော့ ကျွန်တော် ရဲရဲကြီး အာမခံပါတယ်။

ကဗျာ ရွတ်မလား၊ သင်္ချာ တွက်မလား။ သမိုင်း ဖတ်မလား၊ ဒီဇိုင်းတွေပဲ စပ်ဉီးမလား။ ပရိုဂရမ် ရေးမလား၊ ဖီလိုဆိုဖီတွေ တွေးမလား။ အွန်လိုင်းပေါ်မှာ တစ်ကယ် ပြီးပြည့်စုံတဲ့ သင်ခန်းစာတွေ ကို နိုင်ငံတကာက ထိပ်တန်း တက္ကသိုလ်ကြီးတွေကနေ အခမဲ့ သင်ခန်းစာ (Open Course Ware) တွေ အနေနဲ့ “က” အစ “အ” အဆုံး မူလတန်းကနေ အဆင့်မြင့်ပညာတွေ အထိ ဖြန့်ဝေပေးနေတဲ့ ဝဘ်ဆိုဒ်တွေ ရှိပါတယ်။ MIT မှာတက်မလား? Oxford မှာတက်မလား? Harvard မှာတက်မလား? Stanford မှာတက်မလား? ဒါမမဟုတ် အဲဒီ တက္ကသိုလ် အားလုံးကို တစ်ပြိုင်နက် တက်မလား။ အဲဒီအတွက် ဝင်ခွင့်တွေ မလိုဘူး၊ စာမေးပွဲတွေ မရှိဘူး။ ကျောင်းဝင်ကြေး မလိုဘူး၊ အချိန်ဇယား မရှိဘူး။ စာအုပ်ဝယ်စရာ မလိုဘူး၊ ကျောင်းခေါ်ချိန် မရှိဘူး။ ခင်ဗျား တက်ချင်တဲ့ လက်ချာချိန် လာတက်ပြီး ခင်ဗျား ဖျက်ချင်တဲ့ လက်ချာချိန်ကို ဖျက်လိုက်ရုံပဲ။ ခင်ဗျားမှာ လိုအပ်တာ ၂ ခုထဲပဲရှိပါတယ်။ နံပါတ် (၁) က ပညာရပ် တစ်ခုခုကို တစ်ကယ် လိုချင် တတ်မြောက်လိုတဲ့ ပြင်းပြတဲ့ စိတ်ဆန္ဒနဲ့ ၊ နံပါတ် (၂)  အင်တာနက်။ အဲဒီ ၂ ခု ပြည့်စုံပြီ ဆိုတာနဲ့ ခင်ဗျား တက်လိုတဲ့ တက္ကသိုလ်ကို စိတ်ကြိုက်ရွေးချယ်ရုံပါပဲ။

ဒီအောက်မှာ ဖော်ပြထားတာတွေကတော့ ကမ္ဘာ့ ထိပ်တန်းတက္ကသိုလ် ကြီးတွေ အပါအဝင် OCW (Open Course Ware) တွေကို အခြေခံကနေ အဆင့်မြင့် ပညာတွေအထိ အနုပညာ၊ စာပေ၊ အတွေးအခေါ်၊ သမိုင်း၊ ပထဝီ၊ စီးပွားရေး၊ လူမှုရေး၊ ဆေးပညာ၊ စိတ်ပညာ၊ သင်္ချာ၊ ရူပဗေဒ၊ ဓာတုဗေဒ၊ မက္ကင်းနစ်၊ အီလက်ထရောနစ်၊ နာနို၊ သတင်းနှင့် နည်းပညာ၊ ကွန်ပြူတာ၊ အင်ဂျင်နီယာ၊ နက္ခတ္တ ဗေဒ၊ လေကြောင်းနှင့် အာကာသဆိုင်ရာ စတဲ့ နယ်ပယ် အသီးသီးအတွက် အခမဲ့ သင်ခန်းစာတွေ ပို့ချပေးနေတဲ့ ထိပ်တန်း ဝဘ်ဆိုဒ် ၆-ခု ပဲ ဖြစ်ပါတယ်။ သက်ဆိုင်ရာ ဝဘ်ဆိုဒ် အသီးသီးမှာ ပညာရပ် ဆိုင်ရာ သင်ခန်းစာတွေကို ကဏ္ဍအလိုက် သီးသန့်စီ ခွဲခြားထားပြီး မိမိလိုအပ်တဲ့ သင်ခန်းစာတွေကို ရွေးချယ် ဖတ်ရှု လေ့လာ ပညာရှာနိုင်ကြပါတယ်။

1. MIT OCW (Massachusetts Institute Of Technology Open Course Ware)

MIT Open Course Ware

မက်ဆာချူးဆက် နည်းပညာတက္ကသိုလ် ရဲ့ တည်ထောင်တာ ၁၀-နှစ်ပြည့်ပြီး ဖြစ်တဲ့ အခမဲ့ တက္ကသိုလ် အဆင့် သင်ခန်းစာများ(Open Course Ware) ဝဘ်ဆိုဒ် ဖြစ်ပါတယ်။ အဓိက အားဖြင့်တော့ အင်ဂျင်နီယာနှင့် လေကြောင်းအာကာသ ဆိုင်ရာ (Aerospace) ဆိုင်ရာ သင်ခန်းစာများအတွက် ထင်ရှားပါတယ်။ Undergraduate ကနေ အဆင့်မြင့် လယ်ဗယ်အထိ သင်ခန်းစာတွေကို အဓိက ဌာနကြီး ၈- ခု၊ ဌာန ခွဲငယ်ပေါင်း ၄၀ ကျော်ကနေ သင်ခန်းစာမှတ်စုတွေ၊ ကျူတိုရီရယ်တွေ၊ ဗီဒီယို လက်ချာတွေ၊ နမူနာ ပရောဂျက်တွေ နှင့်တကွ လေ့လာ သင်ယူနိုင်ကြပါတယ်။

 

 

 

2. Open Yale Courses (Open Cours Ware Project by Yale University)

Open Yale Course

 

OYC Website ကို ၂၀၀၇ ခုနှစ်၊ ဒီဇင်ဘာလမှာ ယေးလ် တက္ကသိုလ်က စတင် လွှင့်တင်ခဲ့ပါတယ်။ စီးပွားရေး၊ လူမှုရေး၊ ဆေးပညာ၊ သမိုင်း၊ နိုင်ငံရေး၊ ဘာသစကား၊ ဉပဒေ ဆိုင်ရာ အစရှိတဲ့ ဌာနကြီး ၂၀ ခု ကနေ အခမဲ့ သင်ခန်းစာတွေ ကို ဗီဒီယို လက်ချာတွေနဲ့ တကွ လေ့လာနိုင်ပါတယ်။

 

 

 

 

3. iTunes U (iTune Universities by Apple.Inc)

iTunes Universities

 

ကမ္ဘာ့ တက္ကသိုလ်ကြီးတွေ အကုန်လုံးနီးပါးကို ပန်းသီးက ပရိုဂရမ်တစ်ပုဒ်ထဲ ထည့်ထားခဲ့တာ ကြာပါပြီ။ အဲဒီ ပရိုဂရမ်ကို တနည်းအားဖြင့် ပန်းသီးရဲ့ ကမ္ဘာ့ ပညာဘဏ်တိုက်ကြီးလို့တောင် ပြောလို့ ရပါတယ်။ သူကတော့ ပန်းသီးရဲ့ iTunes U ပါပဲ။ iTunes ကို အတော်များများ သိကြမယ် ထင်ပါတယ်။ အိုင်ပေါ့ဒ်တွေ၊ အိုင်ပဒ်တွေ၊ အိုင်ဖုန်းတွေမှာ သီချင်းတွေ ဒေါင်းလုဒ်ဆွဲဖို့၊ ဆော့ဖ်ဝဲရ်တွေ ဝယ်ဖို့၊ ရုပ်ရှင်တွေ ကြည့်ဖို့ စသဖြင့် အများစု အသုံးပြုကြပါတယ်။အတော်များများ မသိကြတဲ့ အချက်ကတော့ iTunes ထဲက iTunes U လို ပညာရွှေအိုးကြီး ကို အိုင်ပဒ်၊ အိုင်ဖုန်း၊ အိုင်ပေါ့ဒ် တို့မှာတင်မက ဝင်းဒိုးစ် ပီစီတွေမှာပါ iTunes Software ကို သွင်းပြီး အသုံးပြုလို့ရတယ် ဆိုတာပါပဲ။ iTunes Software ထဲက iTunes U ထဲမှာ လေ့လာလို့ မကုန်ခန်းနိုင်တဲ့ ပညာရပ် အသီးသီးဆိုင်ရာ ဗီဒီယို၊ အော်ဒီယို သင်ခန်းစာတွေ၊ သင်ခန်းစာ မှတ်စုတွေ၊ စာအုပ်တွေ၊ ပေါ့ဒ်ကစ် တွေကို အလွယ်တစ်ကူ ဖမ်းယူ နားဆင်ကြည့်ရှု၊ ဒေါင်းလုဒ်ဆွဲချပြီး အေးအေးလူလူ ပညာရှာနိုင်ကြောင်းပါ။ iTunes Software ကိုတော့ ပန်းသီး ဝဘ်ဆိုဒ်ကနေပဲ အလွယ်တကူ ဒေါင်းလုဒ် ဆွဲချနိုင်ကြောင်းပါ။

 

 

 

4. KHAN ACADEMY

Khan Academy Open Course Wares

၂၀၀၄ ခုနှစ် နှောင်းပိုင်းမှာ ဝမ်းကွဲညီမ တစ်ဉီးကို ယူကျုဘ်က တဆင့် သင်္ချာပုစ္ဆာတွေ ရှင်းပြရာက အစပြုခဲ့တဲ့ မက်ဆာချူးဆက်စ် နည်းပညာတက္ကသိုလ် (MIT) ကျောင်းထွက်၊ သင်္ချာနှင့် အီလက်ထရောနစ်ဆိုင်ရာ ဘွဲ့ ၃-ခု ရရှိထားသူ Salman Khan ရဲ့ဗီဒီယို ကျူတိုရီရယ် သင်ခန်းစာတွေဟာ သူ့ညီမရဲ့ အပေါင်းအသင်းတွေ၊ ကမ္ဘာအရပ်ရပ်က ကြည့်ရှုအားပေးသူတွေရဲ့ တောင်းဆိုမှု၊ အားပေးမှုတွေက တဆင့် ၂၀၀၆- ခုနှစ် အရောက်မှာတော့ Khan Academy ဆိုပြီး ဖြစ်ပေါ်လာစေခဲ့ပါတယ်။ ဒီနေ့ “ခန်း အကယ်ဒမီ” မှာတော့ သင်္ချာ၊ ရူပဗေဒ၊ ဓာတု၊ ဇီဝ၊ နက္ခတ္တနှင့် ကွန်ပြူတာ၊ သမိုင်း၊ စီးပွားရေး အစရှိတဲ့ ဘာသာရပ်တွေအတွက် အခမဲ့ ဗီဒီယို သင်ခန်းစာပေါင်း ၂၄၂၀-ကျော်ရှိနေပြီ ဖြစ်ပြီး၊ သူရဲ့ ပရိတ်သတ်တွေ ထဲမှာ မိုက်ခရိုဆော့ဖ် ကုမ္ပဏီကို တည်ထောင်သူ ဘီလ်ဂိတ် အပါအဝင် ကမ္ဘာအရပ်ရပ်မှ ပရိတ်သတ်များပါဝင်ကာ အဆိုပါ ဗီဒီယို သင်ခန်းစာများကို ကြည့်ရှုသည့် အကြိမ်ပေါင်း ၆၄-သန်းကျော်ဖြင့် အကြီးအကျယ် အောင်မြင်ကျော်ကြားလျက် ရှိနေပြီ ဖြစ်ပါတယ်။ “ခန်းအကယ်ဒမီ”ရဲ့ ဆောင်ပုဒ်ကတော့ “လူတိုင်းအတွက် နေရာတိုင်းအတွက်၊ အဆင့်မြင့် ပညာရေး အခမဲ့ ပံ့ပိုးပေး” ပါတဲ့ဗျာ။

 

 

 

5. Open Culture

Open Culture Education

 

စတန်းဖို့ဒ် တက္ကသိုလ်က ပညာရေးနှင့် ပူးပေါင်းဆောင်ရွက်ရေး အစီအစဉ်ဆိုင်ရာ ဒါရိုက်တာ တစ်ဉီး ဖြစ်သူ Dan Colman ၂၀၀၆-ခုနှစ်မှာ စတင်တည်ထောင်တဲ့ Open Culture Website မှာတော့  Free audio books, free online courses, free movies, free language lessons, free ebooks အစရှိတဲ့ ပညာရေး ဆိုင်ရာ အခမဲ့ သင်ခန်းစာတွေ ကို မိမိတို့ စိတ်ကြိုက် လေ့လာ သင်ယူနိုင်ကြမှာ ဖြစ်ပါတယ်။ အဲဒီ အခမဲ့ ပညာရေး ဝဘ်ဆိုဒ်မှာပဲ အင်တာနက်ပေါ်မှာ ရှိတဲ့ ကမ္ဘာ့ ထိပ်တန်း တက္ကသိုလ် အသီးသီးက ဘာသာရပ် အသီးသီးအတွက် အခမဲ့ သင်ခန်းစာတွေ၊ ပညာရေး အစီအစဉ်တွေ ပေးနေတဲ့ Open Course Ware ဝဘ်ဆိုဒ်ပေါင်း ၃ဂ၅-ခုကို လွယ်လင့်တကူ ရှာဖွေ ကြည့်ရှုနိုင်အောင် ဒီနေရာမှာ တစ်စုတစ်စည်းတည်း စုစည်း၊ မှတ်သား ပေးထားတာ ကိုလည်း တွေ့မြင် ကြရ ဉီးမှာပါ။

 

 

6. OCW Consortium (Open Course Ware Consortium)

OCW Consortium

 

 

ဒီနေရာမှာတော့ ကမ္ဘာ့နိုင်ငံအသီးသီးက နာမည်ကျော် တက္ကသိုလ် အသီးသီးရဲ့ Open Course Ware သင်ခန်းစာတွေကို မိမိတို့ ဆိုင်ရာ ဘာသာစကား အသီးသီးနဲ့ ဖြစ်စေ အင်္ဂလိပ် ဘာသာနဲ့ ဖြစ်စေ လေ့လာသင်ကြားလို့ ရအောင် တစ်နေရာတည်းမှာ စုစည်းပေးထားတာကို တွေ့ကြရမှာပါ။ ဒီနေရာမှာ အရှေ့၊ အနောက် နိုင်ငံပေါင်းစုံက တက္ကသိုလ်ကြီးတွေ ပေါင်းစုံ ရှိတဲ့ အတွက် နိုင်ငံအသီသီးရဲ့ ပညာရပ် ဆိုင်ရာကို ဖြစ်စေ၊ စာပေ အနုပညာဆိုင်ရာတွေကို ဖြစ်စေ၊ ဘာသာစကားဆိုင်ရာတွေကို ဖြစ်စေ မိမိတို့ စိတ်တိုင်းကျ၊ စိတ်ဝင်စားမှု နယ်ပယ်အလိုက် လက်ချာ မှတ်စုများနှင့် တကွ လေ့လာ ဖတ်ရှုမှတ်သားရင်း လွတ်လွတ်လပ်လပ် ပညာရှာနိုင်ကြပါ လိမ့်မယ်။

 

နောက်ဆုံး တစ်ခုအနေနဲ့ ညွှန်းချင်တဲ့ နေရာကတော့ ဒီ ဘောနပ်စ် လင့်ခ်လေးပါပဲ။ 101 Killer Open Courseware Projects from Around the World လို့ အမည်ရပါတယ်။ အင်တာနက်ပေါ်က အဖိုးတန် အခမဲ့ ပညာရေး ဆိုင်ရာ ဝဘ်ဆိုဒ်ပေါင်း ၁၀၁ ခုကို စုစည်းပေးထားပါတယ်။

 

မြန်မာလူငယ်များ ပညာရဲရင့်ပြီး ရောက်ရာအရပ်တိုင်းမှာ ပွဲလယ်တင့်နိုင်ကြပါစေလို့ အလေးအနက် ဆန္ဒပြုပါတယ်။

အွန်လိုင်းပေါ်ရှိ အခမဲ့ အဆင်မြင့် ပညာရေး is originally a post from: မှော်ဆရာ မှတ်တမ်း Thank you for subscribing and reading my blog!

Later. I look out at the moon.
I lived here once.
I remember the song.

Later. No sound here.
Moon on linoleum.
A child frowning.

Later. A voice singing.
I open the back door.
I lived here once.

Later. I open the back door
Light gone. Dead trees.
Dead linoleum. Later.

Later. Blackness moving very fast.
Blackness fatly.
I live here now.

Harold Pinter (1974)

Source : Poetry Archive

မှတ်ချက်။ ။ကဗျာရွတ်သံကိုပါ နားထောင်ချင်တယ် ဆိုရင်တော့ Source က လင့်ခ် ကိုသာသွားလိုက်ပါ။

Later is originally a post from: မှော်ဆရာ မှတ်တမ်း Thank you for subscribing and reading my blog!

(၂၀ဝ၅-၃-၂၁) နေ့တွင် ကျင်းပသော ကမ္ဘာ့ကဗျာနေ့ မှ ဆရာ သစ္စာနီ၏ ”ခေတ်ပြိုင်မြန်မာ(၂၀ဝ၄) ခေတ်ပေါ်ကဗျာဆု” ရ ကဗျာ

(၁)

ငါးဟာ….

ရေကိုမသိသလို

လူတွေဟာ….

မသိတာကလွဲလို့

အားလုံးသိခဲ့ကြတယ်။

(၂)

ကြည့်ပါ

တခမ်းတနား နေထိုင်ဖို့

ဘုရားသခင်ကအစ

တစ်ခါသုံးဘောပင်အထိ

ကျွန်တော်တို့….

ဖန်ဆင်းခဲ့ကြ။

ဘာသာစကားကနေ

ဆင်ဖိုနီဓာတ်ပြားအထိ

အင်တာနက်ကနေ

ထရိုဂျင်းနစ် မြင်းရုပ်အထိ

ကျွန်တော်တို့

ဖန်ဆင်းခဲ့ကြ။

စည်သွပ်ဘူးကနေ

ဆိုကရေတီး အဆိပ်ခွက်အထိ

အိတ်ချ်အိုင်ဗွီပိုးကနေ

အင်္ဂါဂြိုဟ်သွားယာဉ်အထိ

ကျွန်တော်တို့

ဖန်ဆင်းခဲ့ကြ။

ပိရမစ်ကနေ

စက္ကူနဲ့လုပ်တဲ့ ပန်းအထိ

ဆံပင်ဆိုးဆေးကနေ

အာဏာရှင်စနစ်အထိ

လူကနေ…

လူပုံတူမျိုးပွားအထိ

ကျွန်တော်တို့

ဖန်ဆင်းခဲ့ကြ။

(၃)

ကျွန်တော်တို့ဟာ

သစ်ပင်ပေါ်ကဆင်းပြီး

အချင်းချင်းလက်ဆွဲနှုတ်ဆက်

ဟဲလို၊ဟိုင်း၊ဟေး

ယဉ်ကျေးခဲ့ကြပါတယ်။

လေးနဲ့မြားကို တင်တတ်အောင်

ကောက်တဲ့အခွန် ဆောင်တတ်အောင်

ထီးဖြူမိုးတတ်အောင်

ယဉ်ကျေးခဲ့ကြပါတယ်။

မိုးမျှော်တိုက်တွေကို ဂူလုပ်ဖို့

နေဝင်ရင် မီးဖွင့်တတ်အောင်

တိုက်ပုံအင်္ကျီ ဝတ်တတ်အောင်

ယဉ်ကျေးခဲ့ကြပါတယ်။

ဒါဝင်က သင်မပေးရအောင်

ရေချိုးခန်းနဲ့ ရေချိုးတတ်အောင်

ကဗျာရေးတတ်အောင်

ယဉ်ကျေးခဲ့ကြပါတယ်။

တံတားဆောက်တတ်အောင်

ဥပဒေပြုတတ်အောင်

ကွန်ဒုံးသုံးတတ်အောင်

ယဉ်ကျေးခဲ့ကြပါတယ်။

ဖဲကစားတတ်အောင်

ဘုရားဖူးသွားတတ်အောင်

နျူကလီယား ဗုံးလုပ်တတ်အောင်

ယဉ်ကျေးခဲ့ကြပါတယ်။

လပေါ်လမ်းလျှောက်တတ်အောင်

ကာကွယ်ဆေး ထိုးတတ်အောင်

ကိုယ့်အိမ်တံခါးကို လုံခြုံစွာ ပိတ်တတ်အောင်

ယဉ်ကျေးခဲ့ကြပါတယ်။

(၄)

ဒီလိုနဲ့…

ကျွန်တော်တို့

စားဖို့အတွက်

ပန်းကန်နဲ့ ချက်ပြုတ်နည်းတစ်ထောင်နဲ့

သူများအသက်နဲ့။

သောက်ဖို့အတွက်

အိုအေစစ်နဲ့ မိုးခါးရေနဲ့

ရေသန့်ဘူးစက်ရုံနဲ့။

နေဖို့အတွက်

လေအေးပေးစက်နဲ့

ပြက္ခဒိန်နဲ့

ရေလိုက်ငါးလိုက် အတွေးအခေါ်နဲ့။

ကြည့်ဖို့အတွက်

ရုပ်ရှင်ရုံနဲ့ ပန်းချီပြတိုက်နဲ့

တတ်ယောင်ကား မျက်စိနဲ့။

နားထောင်ဖို့အတွက်

ရေဒီယိုနဲ့ ဓာတ်ပြားနဲ့

နီရိုးဘုရင်ရဲ့ ဗျပ်စောင်းသံနဲ့။

ရှူရှိုက်ဖို့အတွက်

ပင်လယ်လေနဲ့ ရက်ဗလွန်ရေမွှေးနဲ့

မသူတော်ခုနှစ်ပါး ကိုယ်နံ့နဲ့။

စီးပွားရှာဖို့အတွက်

မတော်လောဘနဲ့ ချိန်ခွင်နဲ့

မာကင်တိုင် ဝါဒနဲ့။

စစ်တိုက်ဖို့ အတွက်

လက်နက်နဲ့ သေနင်္ဂဗျူဟာကျမ်းနဲ့

နိုင်လိုမင်းထက်ဝါဒနဲ့။

အပျင်းဖြေဖို့အတွက်

စီးကရက်နဲ့ အလေလိုက်စရာနဲ့

အမဲပစ် ရိုင်ဖယ်နဲ့။

ငါမှန်ကြောင်း၊ သူမှားကြောင်း

ပြောဖို့အတွက်

ပါးစပ်နဲ့ ကိုးကားစရာစာအုပ်နဲ့

မိုးတစ်လုံး လေတစ်လုံးဘဝင်နဲ့။

ဖျားနာဖို့အတွက်

အထူးကုဆေးခန်းနဲ့ ရုပ်ခန္ဓာနဲ့

ကိုးဆယ့်ခြောက်ပါး ရောဂါနဲ့။

သေဆုံးဖို့အတွက်

သံသရာ သင်္ချိုင်းနဲ့

(သေပြီးမှ)….

သတိရကြမယ့် လူတွေနဲ့။

(၅)

ကျွန်တော်တို့မှာ

ဂေါတမဗုဒ္ဓရှိတယ်

နစ်ရှေးရှိတယ်။

မဟတ္ထမဂန္ဒီရှိတယ်

စတာလင်ရှိတယ်။

မိုးဇက်ရှိတယ်

ဗာဂျီးနီးယားဝုဖ်ရှိတယ်။

သောမတ်အယ်ဒီဆင်ရှိတယ်

ဂျက်ဆင်ပိုးလော့ရှိတယ်။

အက်တလတ်ရှိတယ်

ပီတာဝိုင်ယာရှိတယ်။

ဆစ်မဂန်ဖရွိုက်ရှိတယ်

ကိတ်ဝင်းဆလက်ရှိတယ်။

ဖူကူမားယားရှိတယ်

ယူတူးက ဘိုနိုရှိတယ်။

စတီဖင်ဟော့ကင်း ရှိတယ်

အိုစမာဘင်လာဒင်ရှိတယ်။

ကျွန်တော်တို့မှာ

တိရိစ္ဆာန်ရုံရှိတယ်

ဘေးမဲ့တောရှိတယ်။

ဂေါက်ကွင်းရှိတယ်

အကျဉ်းထောင်ရှိတယ်။

စိပ်ပုတီးရှိတယ်

ဆန့်ကျင်ဘက်လိင်ရှိတယ်။

စီးနေတဲ့မြစ်တွေရှိတယ်

ပေါက်ကွဲမယ့် မီးတောင်ရှိတယ်။

ဝိုင်အိုလက်ပေါင်ဒါရှိတယ်

အဏုမြူဓာတ်ပေါင်းဖိုရှိတယ်။

သစ်ခွပန်းရောင်စုံရှိတယ်

အသားကြိတ်တဲ့စက်ရှိတယ်။

စားမရတဲ့ သစ်သီးတွေရှိတယ်

လကွယ်ညရှိတယ်။

ကျေးပိုင်ကျွန်ပိုင်စနစ်ရှိတယ်

ချွေးနံ့ပျောက်ဆေးရှိတယ်။

(၆)

ဒီလိုနဲ့

ခပ်တည်တည်နဲ့ပဲ

ကျွန်တော်တို့ဟာ

ဘယ်တော့မိုးရွာမယ်ဆိုတာ

ကြိုတင်ပြောလို့။

ယုန် မြေမနင်းသားကို

ဓားနဲ့လှီးကာ

အရသာခံဝါးလို့။

အလင်းနှစ်တစ်သန်းက ကြယ်ကို

နက္ခတ်ကြည့်မှန်ပြောင်းနဲ့ကြည့်လို့။

အပါယ်လေးဘုံကို

ဓာတ်လှေကား အလုအယက်ဆင်းလို့။

ပိုတမ်ကင်သင်္ဘောက အမြောက်သံကို

စပျစ်ဝိုင်စုပ်ရင်း နားထောင်လို့။

ဧဒင်ဥယျာဉ်ကို

မပုပ်သိုးအောင် ဖော်မယ်လင်စိမ်လို့။

ထိုဝါဒ၊ဟိုဝါဒတွေကို

ကိုယ်နဲ့တော်သလို အင်္ကျီချုပ်ဝတ်လို့။

ခပ်တည်တည်နဲ့ပဲ

ကျွန်တော်တို့ဟာ

စစ်ကြေညာလို့

စစ်ပြေငြိမ်းလို့

သစ်ပင်တွေကိုခုတ်လို့

သစ်ပင်တွေကိုစိုက်လို့

လက်ထပ်ကြလို့

ကွာရှင်းကြလို့။

ခပ်တည်တည်နဲ့ပဲ

ကျွန်တော်တို့ဟာ

သရုပ်ဆောင်လို့

သရုပ်မဆောင်လို့

ရေကိုစုန်လို့

ရေကိုဆန်လို့

တစ်ဝက်ကိုစားလို့

တစ်ဝက်ကိုထွေးလို့။

ခပ်တည်တည်နဲ့ပဲ

ကျွန်တော်တို့ဟာ

ငါးတွေမျှားလို့

ငါးတွေလွှတ်လို့၊

မှားတာတွေမှန်လို့

မှန်တာတွေမှားလို့

သေရမှာကြောက်လို့

သေရမှာမကြောက်လို့။

(၇)

သမိုင်းနိဂုံးချုပ်ခဲ့ပြီ

ဂုဏ်ဆိုတာငွေကိုခေါ်တယ်

ဘယ်သူတရားပျက်ပျက် ကိုယ်မပျက်စေနဲ့

မြစ်တစ်မြစ်ထဲကို နှစ်ခါပြန်မဆင်းနိုင်

စိတ်မလုံရင် တိတ္ထုံကိုကြည့်

အိုဇုန်းလွှာကို ကယ်တင်ကြပါ

အားလုံးဟာ လိုင်ဘီဒိုညာဉ်မှာ အခြေခံတယ်

ငြိမ်းချမ်းရေးအတွက် စစ်လိုတယ်

စပါးတားကတ်ဆိုတာ ဘယ်သူလဲဟေ့

ဖြစ်တည်မှုဟာ အနှစ်သာရထက် ရှေးကျတယ်။

(၈)

သင်..

နေထိုင်ဖို့ရာ

ပျော်ပျော်ရွှင်ရွှင် နေထိုင်ဖို့ရာ

ဒါမှမဟုတ်

မပျော်မရွှင် နေထိုင်ဖို့ရာ

ဘာမှ

မလိုပါ။

ဥပမာ

ဒီဝါကျတွေက အစ မလိုသလိုပေါ့။

သစ္စာနီ
(ဟန်သစ်မဂ္ဂဇင်း၊၂၀ဝ၄၊ နိုဝင်ဘာ)

Source: ခေတ်ကျန်ကဗျာများ

ပိုလျှံနေသော ဝါကျများ is originally a post from: မှော်ဆရာ မှတ်တမ်း Thank you for subscribing and reading my blog!

ဝင်ရိုးစွန်းတူလို့
တစ်ယောက်ကို တစ်ယောက် တွန်းကန်ကြတယ်
ကျွန်တော်တို့ ညီအစ်ကို မောင်နှမတွေ။
အဖေဟာ အရောင်သန်းနေတဲ့ သတ္တု
ကက်ဆက်ကို အကျယ်ကြီးဖွင့်တယ်
လက်မောင်းမှာ ဆေးမင်ကြောင် အဝိုင်းအဝိုင်းတွေနဲ့
အဆုတ်တစ်ခြမ်း မကောင်းတော့ဘူး။
ကျွန်တော်တို့ အမှားအယွင်းတစ်ခုခု လုပ်မိတာနဲ့
အမေဟာ အိမ်ပေါ်က နှင်ချတော့တာပဲ
ကျွန်တော်တို့ကလည်း ခေသူမဟုတ်
ရွေ့တယ်။
ကျွန်တော်တို့ ခေတ် စိတ္တဇများ
ဆံပင်ရှည်ထားလိုက်
ကတုံးဖြစ်လိုက်
အိမ်ဟာ လက်ဖက်ရည်ဆိုင်လို
ဝင်လိုက်
ထွက်လိုက်။ ။

စိုင်းဝင်းမြင့်
(ခင်အောင်မြင့်၏ တိမ်လွှာမို့မို့လ့င်မှသည် ပို့စ်မော်ဒန်အနုပညာဆီသို့စာအုပ်မှ)

Source: ခေတ်ကျန်ကဗျာများ

အရေးအသားတစ်ခု is originally a post from: မှော်ဆရာ မှတ်တမ်း Thank you for subscribing and reading my blog!

(က)
အဲဒီလို
ယမ်းခိုးဝေတဲ့ စာမျက်နှာတွေ
ကျီးလန့်စာစား ညမနက်တွေနဲ့
နေ့စဉ်ရက်ဆက် အိပ်ရေးပျက်တယ်

(ခ)
စွပ်စွဲမှုကိုယ်စီ ကိုင်စွဲလို့
အပြန်အလှန် ခြုံခိုတိုက်ခိုက်
လူမိုက်တွေရဲ့ ရိုက်နှက်မှုအောက်မှာ
ငြိမ်းချမ်းရေးရဲ့ ဉီးခေါင်း
သွေးအလိမ်းလိမ်းနဲ့
အကြိမ်ကြိမ် အက်ကွဲခဲ့ရတယ်

(ဂ)
ခဏခဏ
သံသယတွေကို ဖြန့်ခင်း
ခင်ဗျားတို့ရဲ့ မိုက်မဲမှု စစ်တလင်းတွေထဲ
အားလုံးရဲ့ အိပ်မက်တွေ
အစင်းစင်း ပဲ့ကြွေလို့
သေသေချာချာ မိုင်းနင်းမိကြတာလည်း အခါခါ

(ဃ)
အမှန်တရားကို ထွန်းညှိဖို့
စကားလုံး အကြီးကြီးတွေ မလိုအပ်သလို
ဗုံး ခပ်ကြီးကြီးတွေလည်း မလိုအပ်ပါဘူး
ရက်စက်မှုတွေကို ဖောက်ခွဲ
ရေနည်းငါး ဘဝတွေကို ပြန်ပေးဆွဲစရာလည်း မလိုပါဘူး
တစ်ကယ်တော့
ခင်ဗျားတို့ လိုတာ
“ရိုးသားမှု” ဆိုတဲ့ မီးခြစ်ဆံ တစ်ချောင်းတည်းပါဗျာ

(င)
ကဲဗျာ
လေးစားမှု၊ ချစ်ခင်မှုတွေနဲ့ ပုံဖော်ထုဆစ်
အတိတ်က အဖြစ်အပျက်တွေကိုလည်း
လွှင့်ပစ်သင့်တာ လွှင့်ပစ်လို့
နှစ်နှစ်ကာကာ ယုံကြည်မှုမျိုးနဲ့
စည်းလုံးခြင်းဆိုတဲ့ ပန်းပုတစ်ရုပ်
မလိုအပ်တာတွေ ဖယ်ထုတ်ပြီး
အားလုံးအတွက် အချိန်မှီ ပြုလုပ်လိုက်ကြစို့လားဗျာ။

ပန်းပုထုခြင်း is originally a post from: မှော်ဆရာ မှတ်တမ်း Thank you for subscribing and reading my blog!

အမှန်တရားကို ဖွင့်မယ့် သော့
အကြံအမှားတွေ ဖွင့်မယ့် သော့

ခံစားချက်တွေ ဖွင့်မယ့် သော့
ကံတရားရဲ့ သက်သေကို ဖွင့်မယ့် သော့

နှလုံးသားကို ဖွင့်မယ့် သော့
ဆုံးမတရားတွေ ဖွင့်မယ့် သော့

ဖုံးထားတာတွေ ဖွင့်မယ့် သော့
ဘုံးထားသမျှတွေ ဖွင့်မယ့် သော့

အဲဒီလိုနဲ့
သော့တစ်ချောင်း ကိုင်ထားတဲ့
ဂျူလီယန် အက်ဆန်းချ် ဆီကနေ
ဝီကီလိခ်မှာ မပါသေးတဲ့
ဖြောင့်ချက် တစ်ချို့ ကျုပ် ရလာခဲ့တယ်

ကမ္ဘာကြီးဟာ ငတ်မွတ်နေတယ်တဲ့
အစာရေစာတွေလား ဆိုတော့
မဟုတ်ဘူး
“သော့တွေ” တဲ့

သော့ ကို
“ဖွင့်”ဖို့ အတွက်ပဲ သုံးကြရင် ကောင်းမယ်ဗျာတဲ့
ညည်းညည်းညူညူနဲ့ သူက ဆက်ပြောတယ်
“ခတ်” ဖို့အတွက်ပဲ သုံးနေကြသူ များပုံပါပဲ

ဝတ်လစ်စလစ် ဖြစ်နေတဲ့
ကုလသမဂ္ဂ ဌာနချုပ်ထဲ ခင်ဗျားရောက်ဖူးလား?
အဲဒီမှာ သော့ တွေ အစား
ဖိနပ်တွေပဲ ရှိတယ်တဲ့
ကံကောင်းရင်
ကိုယ့်လူတောင် ဖိနပ်တစ်ရံလောက်
အချောင်ရနိုင်သေး ဆိုပဲ

အထီးကျန်နေတဲ့
နိုင်ငံတကာ အာကာသစခန်းကို ဖွင့်ဖို့အတွက်
“အတ္တလန်တစ်” အမည်ရတဲ့ သော့တစ်ချောင်း
မနေ့တနေ့ကပဲ အာကာသထဲ ပျံတက်သွားတယ်
သူ့အတွက် ကုန်ကျစားရိတ်က
၂၀၉ ဘီလီယံ ဒေါ်လာ တဲ့

အဲဒီသော့မျိုးတော့ ကျုပ်မလိုချင်ဘူးဗျာ
အဲဒီအစား
အာဖရိက ဉီးချိုပေါ်က
ဗိုက်ဟောင်းလောင်းနဲ့ ကလေးတစ်ယောက်အတွက်ပဲ
၂၀၉ ဒေါ်လာတန် သော့တစ်ချောင်း ပေးလိုက်ချင်တယ်

သော့တွေ? သော့တွေ? သော့တွေ?
သော့တွေ အစား ကျည်ဆံတွေ ဘာလို့ လုပ်နေကြလဲ
သော့တွေ အစား ဗုံးတွေ ဘာလို့လုပ်နေကြလဲ
သော့တွေ အစား ကာဗွန်ဒိုင်အောက်ဆိုက်တွေ ဘာလို့လုပ်နေကြလဲ
သော့တွေ အစား ညစ်ညမ်းမှုတွေ ဘာလို့လုပ်နေကြလဲ
သော့တွေ အစား ရက်စက်မှုတွေ ဘာလို့ လုပ်နေကြလဲ
သော့တွေ အစား မိုက်မဲမှုတွေ ဘာလို့ လုပ်နေကြလဲ
သော့တွေ အစား လှည့်ဖျားမှုတွေ ဘာလို့ လုပ်နေကြလဲ
“သော့တွေ” အစား “သော့တွေ”ပဲ လုပ်ကြရင် ကောင်းမယ်ဗျာ
“ဖွင့်ရန် သီးသန့်သာ” ဆိုတဲ့ စာတန်းလေးတော့ ပါပါစေပေါ့

စကားမစပ်
မြန်မာပြည်က ရန်ကုန်မြို့ထဲ
သွားရင်းလာရင်း
သော့ပျောက်ဖူးသူ နှစ်ယောက်ရှိသလဲ?

မော်စကိုမှာ
သော့ပျောက်ဖူးသူ ဘယ်နှစ်ယောက်ရှိလဲ?
မန္တလေးမှာ
သော့ပျောက်ဖူးသူ ဘယ်နှစ်ယောက်ရှိလဲ?
နယူးယောက်ခ်မှာ
သော့ပျောက်ဖူးသူ ဘယ်နှစ်ယောက်ရှိလဲ?
နေပြည်တော်မှာ
သော့ပျောက်ဖူးသူ ဘယ်နှစ်ယောက်ရှိလဲ?
ဘန်ကောက်မှာ
သော့ပျောက်ဖူးသူ ဘယ်နှစ်ယောက်ရှိလဲ?
ဘုတလင်မှာ
သော့ပျောက်ဖူးသူ ဘယ်နှစ်ယောက်ရှိလဲ?

အမှန်တော့ “သော့” ဆိုတာ
ကွဲပြားခြင်းမရှိတဲ့ ကာလာ
ဘာသာတရားမရှိတဲ့ ဘာသာ
အတ္တ ကမ္ဘာရဲ့ အနတ္တ ကဗျာ
ဆိတ်ငြိမ်ခြင်းရဲ့ မိဘမဲ့ကလေး
အဆုံးမဲ့ အမှန်တရားရဲ့ အစပြုရာ
ချေဂွေဗားရားရဲ့ မသေဆုံးနိုင်တဲ့ ဝိညာဉ်
မာသာထရီဇာရဲ့ ဘယ်တော့မှ မခြောက်တဲ့ လက်နှစ်ဖက်
မဟတ္တမ ဂန္ဒီကြီး ချက်ခဲ့တဲ့ ပင်လယ်ကမ်းခြေက ဆား
အဲဒီမှာ
တစ်ချိန်မဟုတ် တစ်ချိန် ရင်ထဲ
“စစ်” ကနဲ “မျက်” ကနဲ ခံစားဖူးရင်
အဲဒါ ခင်ဗျားလည်း
တစ်နေရာမဟုတ် တစ်နေရာမှာ “သော့”ပျောက်ဖူးတာ သေချာလို့ပေါ့ဗျာ။

သော့ is originally a post from: မှော်ဆရာ မှတ်တမ်း Thank you for subscribing and reading my blog!

ဒါကတော့ အခုတစ်လော လူပြောသူပြောများနေတဲ့ ဂူဂယ်ပလပ်စ် နှင့် ဖေ့စ်ဘွခ် တို့ရဲ့ ခြားနားချက်ကို နှိုင်းယှဉ်ပြထားပုံလေးပါ။ ကျွန်တော့်ကိုယ်ပိုင် အမြင်အရ ဆိုရင်တော့ ဂူဂယ်အနေနဲ့ ရှေ့က ထင်တိုင်း မပေါက် ဖြစ်ခဲ့တဲ့ Google Wave, Google Buzz တို့ရဲ့ အတွေ့အကြုံတွေကို ကောင်းကောင်း သင်ခန်းစာ ဖော်ထုတ်ပြီး အခု ဂူဂယ်ပလပ်စ် ကိုတော့ ဘက်ထောင့်စုံကနေ ဟာကွက်မရှိအောင် သေချာ အချိန်ယူ စီမံထားတယ်၊ ဖေ့စ်ဘွခ်ကို ကောင်းကောင်း ယှဉ်နိုင်မယ့် ဆိုရှယ် နက်ဝါ့ခ် တစ်ခု လို့ မြင်မိပါတယ်။ ကျွန်တော်တို့တော့ အချိန်တွေ ပိုကုန်ကြဉီးမှာပေါ့ဗျာ။

Google+ Vs Facebook

Source : MakeUseOf

Google+ Vs Facebook Infographic is originally a post from: မှော်ဆရာ မှတ်တမ်း Thank you for subscribing and reading my blog!

မနေ့က ညီတစ်ယောက်နှင့် မရည်ရွယ်ဘဲ စကားစမြည် ပြောဖြစ်သည်။ သူက ပေါင်းသင်း ဆက်ဆံရေး လည်းကောင်း၊ လူဝင်လည်း ဆန့်လှသဖြင့် သူ့တွင် လူမျိုးပေါင်းစုံမှ အပေါင်းအသင်းများလည်း စုံလှသည်။ အထူးသဖြင့်တော့ သူ့ မိတ်ဆွေတွေက ဉရောပသားတွေ ဖြစ်ကြသည်။ မနေ့ကတော့ သူ့ အနှီ အပေါင်းအသင်းများ ထဲမှ တစ်ယောက်နှင့် မြို့ထဲတွင် ဆုံလာသည့် အကြောင်းနှင့် သူ့အား ထိုမိတ်ဆွေမှ ညနေစာဖြင့် တစ်နေရာရာတွင် ကျွေးမွေး ဧည့်ခံလိုကြောင်း ပြောသည်ကို သူက ငြင်းပယ်လာသည့် အကြောင်း၊ သူငြင်းသည်ကို တစ်ဖက်က သူ့ မိတ်ဆွေကလည်း ထပ်အတွန့်မတက် အသာတကြည်ပင် လက်သင့်ခံကြောင်း စသည်တို့ကို ကျွန်တော့်အား ပြောပြခြင်း ဖြစ်သည်။

သူပြောပြီး တဆက်တည်း ကျွန်တော် တွေးမိသည်ကို သူ့အား ပြန်ပြောဖြစ်သည်က ထိုနေရာတွင် သူ့ မိတ်ဆွေသည် လူမျိုးခြားမဟုတ်ဘဲ မြန်မာ တစ်ယောက်ယောက် ဖြစ်မည် ဆိုပါက ထိုသို့သော ဖိတ်ခေါ်မှုကို အတော်ပင် ငြင်းရ ခက်လိမ့်မည် ဖြစ်ကြောင်းနှင့် အကယ်၍ ဇွတ်ငြင်း မိမည် ဆိုပါကလည်း အခန့်မသင့်ပါက ထိုမိတ်ဆွေ၏ ငြိုငြင်မှုကိုပင် ခံရနိုင်စရာ ရှိကြောင်း စသည်တို့ဖြစ်သည်။

အဘယ့်​ကြောင့်နည်း။ ကျွန်တော်တို့ မြန်မာလူမျိုး အများစုတွင် ပုဂ္ဂိုလ်ရေး ခင်မင်ရင်းနှီးမှု ရှိခြင်းနှင့် ယဉ်ကျေးမှုရှိခြင်း၊ အပြန်အလှန် လေးစားမှုရှိခြင်း စသည်တို့အား ခွဲခြားရှုမြင်တတ်သော အလေ့အထ အလွန်ပင် နည်းပါးလှသည်ဟု ထင်မြင် ယူဆမိ သောကြောင့် ဖြစ်သည်။ ထိုအထဲတွင် ကျွန်တော် ကိုယ်တိုင်လည်း အပါအဝင်ဖြစ်ခဲ့၊ ယခုအထိလည်း အချို့သော ကိစ္စများတွင် ဖြစ်နေဆဲ ဖြစ်သည်ဟု မိမိကိုယ်ကို နားလည်မိပါသည်။

ထင်ရှားအောင် ဉပမာ တစ်ခုဖြင့် ပြဆိုပါမည်။ ကျွန်တော်တို့ မြန်မာလူမျိုး ယောက်ျားလေး အများစုတွင် ယောက်ျားလေး သဘာဝ သူငယ်ချင်း အပေါင်းအသင်းများဖြင့် သောက်ဝိုင်း၊ စားဝိုင်း ဖွဲ့ကြသည်များ၊ အထိမ်းအမှတ် ပွဲများ၊ အောင်ပွဲ အခမ်းအနားများ တွင် တွေ့ဆုံခြင်း ပြုကြသည်များ စသဖြင့် တစ်ချိန်မဟုတ် တစ်ချိန်၌ ရှိခဲ့ဖူးကြမည်ဖြစ်သည်။ ထိုသို့သော ပွဲများတွင် များသောအားဖြင့် ကြားရလေ့ရှိသော စကားတစ်ခုမှာ သူငယ်ချင်း တစ်ယောက်မှ အခြားတစ်ယောက်အား ပုံမှန်အားဖြင့် “သူငယ်ချင်း တစ်ခွက်လောက် သောက်ပါဉီးလား”ဟု ဖိတ်ခေါ်၍ တစ်ဖက်မှ ငြင်းပယ်သည့် အခါတွင် “သူငယ်ချင်း၊ မင်း ငါ့ကို ခင်ရင် ဒီတစ်ခွက်တော့ သောက်လိုက်” ဆိုသည့် စကားဖြင့် ခြိမ်းခြောက် အကျပ်ကိုင်သည့် သဘောဆန်သော စကားမျိုး ပြောလေ့ ပြောထ ရှိကြခြင်း ဖြစ်သည်။ ထိုအခြေအနေတွင် တစ်ဖက်လူသည် အရက်၊ ဘီယာ စသည့် ယမကာများအား လုံးဝ မသောက်သူလည်း ဖြစ်ချင်ဖြစ်မည်၊ သို့မဟုတ် တစ်ခါတစ်လေမှ သောက်သူလည်း ဖြစ်ချင်ဖြစ်မည်၊ သို့တည်းမဟုတ် သူ့ အကန့်အသတ်နှင့် သူ ထိန်းထိန်းသိမ်းသိမ်း သောက်သုံးသူလည်း ဖြစ်ချင်ဖြစ်မည် ဖြစ်သည်။

မည်သို့ပင် ဖြစ်စေ ယဉ်ကျေးမှု အရ မိမိမှ တစ်ဖက်လူကို ဖိတ်ခေါ်သည်ကို တစ်ဖက်မှလည်း ယဉ်ယဉ်ကျေးကျေး ငြင်းပယ်ပြီးချိန်တွင် ထပ်ဆင့်၍ “ခင်ရင် ဒီတစ်ခွက်တော့ သောက်လိုက်” ဟူသော စကားမျိုး ဆိုသည်မှာ အမှန်စင်စစ် လူနှစ်ဉီး၏ ခင်မင် ရင်းနှီးမှုကို ပြသရန် ရည်ရွယ်သော စကားမဟုတ်ဘဲ တစ်ဖက်သား၏ ဆန္ဒပါသည် ဖြစ်စေ မပါသည် ဖြစ်စေ မိမိဆန္ဒအတိုင်း လိုက်ပါလုပ်ဆောင်စေရန် (တစ်နည်းအားဖြင့် မိမိဆန္ဒကို တစ်ဖက်မှ ဖြည့်ဆည်းပေးရန်) ခင်မင်ရင်းနှီးမှု ဆိုသည့် စကားလုံးကို ခုတုံးလုပ် အကျပ်ကိုင်သော၊ ခြိမ်းခြောက်မှု သဘော သက်ရောက်သော၊ တစ်ဖက်သား၏ ဆန္ဒအား အသိအမှတ် မပြု၊ လေးစားမှု မရှိသော အလွန် မယဉ်ကျေးသည့် အပြုအမူ တစ်ခုသာ ဖြစ်သည်ဟု ကျွန်တော့် ကိုယ်ပိုင် အမြင်အားဖြင့် လက်ခံ ယုံကြည်မိပါသည်။ ထိုသို့သော စကားများနှင့် အလား သဏ္ဍာန်တူသော “ကိုယ့်ကို ချစ်ရင် ဒါလေးတော့ လိုက်လျောပေး၊ ကျွန်မကို ချစ်ရင် ဒါလေးဝယ်ပေး” စသဖြင့် အခြားသော မြန်မာစကား များစွာလည်း ရှိပါသေးသည်။ ထိုသို့သော စကားများ၏ နောက်ကွယ်မှ တစ်ကယ့် အဓိပ္ပါယ် အမှန်များကိုတော့ စာရှုသူများ ကိုယ်တိုင်သာ သုံးသပ် ဆုံးဖြတ်ကြပါဟု တိုက်တွန်းလိုပါသည်။

ထိုသို့ တင်တင်စီးစီး ရှိလှသော မြန်မာ စကားများ အကြောင်း တွေးတောရင်း ပြောဆိုရင်းဖြင့် တစ်ခုသော ကာလက ကျွန်တော်၏ အထက်လူကြီး တစ်ဉီးမှ တင်တင်စီးစီး နိုင်လှသော အများကြိုက် မြန်မာစကား တစ်ခုကို အဖိုးတန်လှသော အလွန် ယဉ်ကျေးမှုရှိသည့် စကားတစ်ခွန်းအဖြစ် ပြောင်းလဲ ပြောဆိုသွားသည် ကို အလျင်အမြန် ပြေးသတိရမိ ပြန်ပါသည်။

အချိန်က သိပ်မကြာသေးသော ၂၀၀၉-၂၀၁၀ ကာလတွင် ဖြစ်သည်။ ထိုကာလက ကျွန်တော် အလုပ်လုပ်နေသော ဌာနတွင်လည်း ဝန်ထမ်းငယ်များနှင့် ပတ်သက်၍ ပြဿနာ အသေးအမွှားလေးများ မကြာခဏ တက်နေသော ကာလ ဖြစ်သည်။ ပြဿနာ အသေးအမွှားဟု ဆိုသော်လည်း မကြာခဏ ဆိုသလို ဖြစ်နေသဖြင့် တစ်ရက်တွင် ဌာန၏ အကြီးအကဲမှ တစ်ဌာနလုံး အစည်းအဝေးလုပ်ကာ နောက်နောင် အလားတူ ဖြစ်ရပ်မျိုး မဖြစ်ရန် တာဝန်ရှိသူများနှင့် တိုင်ပင်ညှိနှိုင်းခြင်း၊ ပြဿနာ မကြာခဏ ဖြစ်တတ်သူများကို ဆုံးမစကား ပြောကြားခြင်း စသည်တို့အား ပြုလုပ်ပါတော့သည်။

ထိုနေ့က သူပြောသွားသော ဆုံးမစကားမှာ တိုတိုကျဉ်းကျဉ်းသာ ဖြစ်သည်။ သို့သော်လည်း အလွန် အဓိပ္ပါယ် ပြည့်ဝပြီး အလွန်ပင် လူကြီးလူကောင်း ဆန်လှသော စကားဖြစ်သဖြင့် မှတ်စု စာအုပ်တွင် ရေးရန် မလို၊ အလိုလိုပင် ရင်ထဲ အသည်းထဲ အထိ စွဲနစ် ကျန်ရစ် ခဲ့ပါသည်။ သူ ပြောသွားသည်က မြန်မာ စကားများထဲတွင် “သင်ကောင်းလျင် ကျွန်ုပ်မဆိုးပါ” ဆိုသည့် အလွန် တင်တင်စီးစီး နိုင်လှသော စကားတစ်ခု ရှိကြောင်းနှင့် ထိုစကား မည်မျှ တင်စီး သနည်းဟု ဆိုလျင် လူနှစ်ယောက် ဆက်ဆံရေး တစ်ခုရှိရာ တစ်ယောက်က အခြားတစ်ယောက်ကို ” ခင်ဗျား ကျုပ်ကို ကောင်းကောင်း မွန်မွန် အရင် ဆက်ဆံပါ၊ ခင်ဗျား ကောင်းကောင်းမွန်မွန် ဆက်ဆံပြီ ဆိုမှ ကျုပ် မဆိုးဘဲ နေပေး ဉီးမယ်၊ ကျုပ် ခင်ဗျားအပေါ် ပြန်ကောင်းလိမ့်မယ် လို့တော့ အာမ မခံနိုင်သေးဘူး” စသည့် အဓိပ္ပါယ် သက်ရောက်ကြောင်း နှင့် “ခင်ဗျား ဆိုးပြီ ဆိုရင်တော့ ကျုပ်က ခင်ဗျားထက် အဆ ၁၀၀ ပိုဆိုးလိုက်မယ်” ဆိုသည့် အခြား မမြင်နိုင်သည့် အဓိပ္ပါယ်မျိုးလည်း သက်ရောက် နေကြောင်း စသည်တို့နှင့် ရုတ်တရက် ဖတ်ကြည့်လိုက်လျင် ထိုသို့သော စကားမျိုးမှာ ခပ်မိုက်မိုက်နှင့် အများကြိုက် အထာကျ လှသည်မှာ မှန်သော်လည်း အမှန် တစ်ကယ် လူမှု ဆက်ဆံရေး နယ်ပယ်တွင် မည်သို့မျှ အလုပ်မဖြစ်၊ အနှုတ် လက္ခဏာသာ အမြဲဆောင်သော စကားမျိုး ဖြစ်ကြောင်း စသည်တို့ ဖြစ်သည်။

သို့အတွက် သူက ထိုစကားကို အားလုံးအတွက် အဆင်ပြေစိမ့်သောငှာ ပြင်ပြီး ပြောလိုကြောင်း ဆက်ပြောသည်။ မည်သို့ ပြင်ပြောသနည်း ဆိုသော် “ကျွန်ုပ်ကောင်းပါမည်၊ သင်တို့ မဆိုးကြပါနဲ့” ဟူ၏။

“ကိုယ်လိုတဲ့ အရာမျိုး သူတစ်ပါးကို အရင်ပေး” ဆိုသော စကားကို လက်ကိုင် ထားသည့် ကျွန်တော့် အတွက်ကား အလွန်ပင် အဓိပ္ပါယ် ပြည့်ဝ၊ ယဉ်ကျေးလှပသည့် စကားမျိုးပင် ဖြစ်သည်ဟု ဆိုချင်ပါသည်။ အထက်တွင် ဆွေးနွေးခဲ့သော တင်တင်စီးစီး နိုင်လှသော မြန်မာ စကားများနှင့် ကွာခြားချင်တိုင်း ကွာခြား လှသည်ကတော့ စာရှုသူ မိတ်ဆွေများပင် ဆုံးဖြတ်ကြဖို့ ဖြစ်ပါသည်။

အချုပ်အားဖြင့် ဆိုသော် ကျွန်တော်တို့ လူနေမှုနယ်ပယ်တွင် ကျွန်တော်တို့ ကိုယ်တိုင်ပင် မသိနားမလည်၍ သော်လည်းကောင်း၊ အများ သူငါ ပြော၊ မိတ်ဆွေ သူငယ်ချင်းများ ပြောနေသဖြင့် ထိုသို့ ပြောသည်က အမှန်ဟု ထင်နေမိတတ်သော အလွန် တင်စီးလှသည့်၊ မယဉ်ကျေးသည့် စကားများ အမှန်ပင် ရှိနေကြပါသည်။ တချိန်က မသိ၍ ပြောခဲ့သည် ဖြစ်စေ၊ သိသိနှင့် ပြောခဲ့သည် ဖြစ်စေ ထိုသို့ တင်တင်စီးစီး နိုင်လှသော စကားများအစား ယဉ်ကျေးလှပသည့်၊ အပြန်အလှန် လေးစားမှု အဓိပ္ပါယ် သက်ရောက်သည့် စကားများအဖြစ် ပြောင်းလဲ ပြောဆို ဆက်ဆံကြခြင်းဖြင့် မိမိအတွက်ရော၊ အများသူငါ အတွက်ပါ ပိုမိုကောင်းမွန်သည့် လူမှု ဆက်ဆံရေးနယ်ပယ် တစ်ခုကို အတူတကွ တည်ထောင်ကြရာ ရောက်ကြောင်း လေးလေးစားစား တင်ပြ ဆွေးနွေး လိုက်ရပါသည်။

တင်စီးလှသော မြန်မာစကားများ is originally a post from: မှော်ဆရာ မှတ်တမ်း Thank you for subscribing and reading my blog!

(က)
ဟုတ်ပြီ
အပင်တွေ စိုက်တယ်
အထင်တွေ စိုက်တယ်၊ အမြင်တွေလည်း စိုက်တယ်
ဘာပြောပြော
အရင်ထက်တော့ မိုက်သွားတာ အမှန်ပဲလေ။

(ခ)
ဒီနေ့မှာ
ကမ္ဘာသိသိ၊ ကမ္ဘာကြည့်ကြည့် ပြီး
ကမ္ဘာထဲမှာနေ၊ ကမ္ဘာထဲမှာ နား
ကမ္ဘာထဲမှာပဲ စားစရာရှိတာ စားပြီးတဲ့နောက်
ကမ္ဘာကြီးနဲ့ အစပ်အဟပ် တည့်မိဖို့တော့ လိုတာပေါ့။

(ဂ)
မထူးခြားပါဘူး
ဒုတ်ထိုး အိုးပေါက်တွေ ပစ်ခွဲ
စစ်ပွဲတိုင်းကို ငါက အနိုင်နွဲလိုတယ် ဆိုရင်လည်း
ကိုယ့် စွန်ကို အမှန်ခြစ်
လေဆန်တိုင်း ပျံမတက်မိဖို့ သတိထားသင့်တယ်။

(ဃ)
ပူရှ်ကင်ကတော့ ပြောဖူးတယ်
“အဲဒီ စစ်ပွဲရဲ့ မိုးကြိုးသွား
ဘာဖြစ်လို့ ဒီလောက်လှပတဲ့ နိုင်ငံငယ်လေးရဲ့
မြို့ရွာတွေ၊ လယ်ကွင်းတွေပေါ်ကိုပဲ ပစ်ချချ နေရတာတုန်းဗျာ” တဲ့
အဲဒီမေးခွန်းအတွက် အဖြေ “ကဗျာ”
ဒီနေ့အထိ ကျုပ် ရှာမတွေ့ခဲ့သေး ပါဘူးဗျာ။

(င)
ဓားစိုက်မလား၊ လှံစိုက်မလား
မလုပ်ကြပါနဲ့ ကိုယ့်လူတို့
ဘုရားမကြိုက်၊ တရားမကြိုက်လို့လည်း မပြောလိုပါဘူး
သို့သော်လည်း
ခါးလိုက်တဲ့ နားတွေ အတွက်
ခါးသွားတဲ့ ဘဝတွေ အတွက် ယဉ်ယဉ်ကျေးကျေးလေး တောင်းပန်ရတာပါ။

(စ)
အဲဒီအတွက်
သုံးသီးစား ညီညွတ်ရေးပဲ ဖြစ်ဖြစ်
သီးထပ်သီးညှပ် ငြိမ်းချမ်းရေးပဲ ဖြစ်ဖြစ်
နွေညီအစ်ကို၊ ဆောင်းညီအစ်မတွေမှာ စိုက်ကြစမ်းပါ
သေချာတာကတော့
ညီအစ်ကိုချင်း ဓားစိုက်၊ လှံစိုက်ထက်
ကမ္ဘာကြီး ပိုပြီး ငြိမ်းချမ်း၊ စိမ်းလန်းခြင်းလမ်းကို ပိုမိုရောက်စေမှာ အမှန်ပါပဲ။

အပင်စိုက်ခြင်း is originally a post from: မှော်ဆရာ မှတ်တမ်း Thank you for subscribing and reading my blog!