മീനച്ചില്‍ ന്യൂസ്

പച്ചക്കറി പോഷക തോട്ടം ഉൽഘാടനം ചെയ്തു

noreply@blogger.com (meenachilnews) — Tue, 10 Nov 2026 13:59:28 +0000

ഈരാറ്റുപേട്ട നഗരസഭയും കൃഷിഭവനും മഴവിൽ റസിഡൻസ് അസോസിയേഷനും സംയുക്തമായി സംഘടിപ്പിച്ച പച്ചക്കറി പോഷക തോട്ടം പരിപാടി ഈരാറ്റുപേട്ട നഗരസഭ ചെയർമാൻ അഡ്വക്കേറ്റ് വി പി നാസർ ഉദ്ഘാടനം നിർവഹിച്ചു. ചടങ്ങിൽ പങ്കെടുത്ത കർഷകർക്ക് കൃഷി ഓഫീസർ നിവ്യ ജെ. തെങ്ങുംപള്ളി, അസിസ്റ്റൻറ് കൃഷി ഓഫീസർ ഷഹീദ്, എന്നിവർ ക്ലാസ് നയിച്ചു മഴവിൽ റസിഡൻസ് അസോസിയേഷൻ പ്രസിഡണ്ട് മുഹമ്മദ് ഹാരിഫ് ചടങ്ങിൽ അധ്യക്ഷതവഹിച്ചു. കർഷകർക്ക് പച്ചക്കറിതൈകളും,വളങ്ങളും ചടങ്ങിൽ വിതരണം ചെയ്തു

ഫുട്ബോൾ മത്സരത്തിൽ ടിഎഫ്സി ഒന്നാം സ്ഥാനം നേടി

noreply@blogger.com (meenachilnews) — Tue, 10 Nov 2026 12:17:15 +0000

തീക്കോയി ഗ്രാമപഞ്ചായത്തിൽ കേരളോത്സവത്തിൻ്റെ ഭാഗമായി നടന്ന ഫുട്ബോൾ ടൂർണമെന്റിൽ തീക്കോയി ടി.എഫ്.സി ഒന്നാം സ്ഥാനം നേടി. സെൻ്റ് മേരിസ് പള്ളി ഗ്രൗണ്ടിൽ നടന്ന മത്സരത്തിൽ വളവനാർകുഴി ടീം രണ്ടാം സ്ഥാനവും കരസ്ഥമാക്കി.

.ഒന്നാം സ്ഥാനം നേടിയ തീക്കോയി ഫുട്ബോൾ ക്ലബ്ബിന് പഞ്ചായത്ത് അംഗം ജീബിൻ സെബാസ്റ്റ്യൻ ട്രോഫി കൈമാറി. സ്റ്റാൻഡിങ് കമ്മിറ്റി ചെയർമാൻ സജീവ് ഭാസ്കരൻ വളവനാർക്കുഴി ടീമിന് രണ്ടാം സമ്മാനമായ ട്രോഫി നൽകി. പഞ്ചായത്ത് അംഗം സണ്ണി കണിയാർ കണ്ടം, മുൻ പഞ്ചായത്തംഗം രതീഷ് പി.എസ് തുടങ്ങിയവർ സന്നിഹിതരായിരുന്നു.

.പഞ്ചായത്തിലെ കേരളോത്സവം മത്സരങ്ങൾ നാളെ സമാപിക്കും. വെള്ളികുളം സെൻറ് ആൻറണീസ് സ്കൂൾ ഗ്രൗണ്ടിൽ വോളിബോൾ മത്സരം നടക്കും. തുടർന്ന് വടംവലി മത്സരവും അരങ്ങേറും.

ബിജെപി മീനച്ചിൽ പഞ്ചായത്ത് ഓഫീസിന് മുമ്പിൽ ധർണ്ണ നടത്തി

noreply@blogger.com (meenachilnews) — Tue, 10 Nov 2026 08:49:49 +0000

മീനച്ചിൽ പഞ്ചായത്തിലെ പാലിയേറ്റീവ് വാഹനം എത്രയും വേഗം നന്നാക്കി പുറത്തിറക്കണമെന്നാവശ്യപ്പെട്ട് ബിജെപി മീനച്ചിൽ പഞ്ചായത്ത് ഓഫീസിന് മുമ്പിൽ ധർണ്ണ നടത്തി. ഒരു മാസത്തിലേറെയായി പാലിയേറ്റീവ് വാഹനം വർക്‌ഷോപ്പിലാണ്. നിരവധി കിടപ്പു രോഗികളാണ് പാലിയേറ്റിവ് സംവിധാനമില്ലാത്തതിനാൽ കഷ്ടപ്പെടുന്നത്.

. ബിജെപി ഭരണങ്ങാനം മണ്ഡലം ജനറൽ സെക്രട്ടറി സജീവ് പാറക്കടവ് ബിജെപി മീനച്ചിൽ പഞ്ചായത്ത് പ്രസിഡണ്ട് അരവിന്ദൻ നിരവത്ത് പഞ്ചായത്ത് മെമ്പർമാർ സതീഷ് കുമാർ പി ജെ.. ബിജു സി ബി ശരത് കുമാർ എം എസ് എന്നിവർ സംസാരിച്ചു

പ്രായം--57 മെഡലുകൾ--22. ലിസിക്ക് പ്രായം വെറും അക്കങ്ങൾ മാത്രം

noreply@blogger.com (meenachilnews) — Tue, 10 Nov 2026 08:28:08 +0000

കായികരംഗത്ത് പെരിങ്ങുളത്തിൻ്റെ അഭിമാനമായി ലിസി തോമസ് കരോട്ടുചിറയ്ക്കൽ. 57 -ാം വയസിലും അത്‌ലറ്റിക് സ് രംഗത്ത് സജീവമായി തുടരുന്ന ലിസി സംസ്ഥാന-- ദേശീയ തല മത്സരങ്ങളിൽ മി കച്ച നേട്ടങ്ങൾ സ്വന്തമാക്കി ശ്രദ്ധേയയാകുന്നു

വിവിധ അത് ലിറ്റിക്സ് ഇനങ്ങളിലായി ഇതുവരെ 8- സ്വർണ്ണ മെഡലുകളും 8- വെള്ളി മെഡലുകളും 6- വെങ്കല മെഡലുകളും ഉൾപ്പെടെ 22 മെഡലുകൾ ആണ് ലിസി സ്വന്തമാക്കിയിട്ടുള്ളത്.

.ദേശീയ സീനിയർ അത് ലറ്റിക്സിൽ 1500 മീറ്ററിൽ ഒന്നാം സ്ഥാനവും800 മീറ്ററിൽ രണ്ടാം സ്ഥാനവും400 മീറ്ററിൽ മൂന്നാം സ്ഥാനവും നേടി.4 x 100 മീറ്റർ റിലേയിൽ 2-ാം സ്ഥാനവും 4 x 400 മീറ്റർ റിലേയിൽ ഒന്നാം സ്ഥാനവും കരസ്ഥമാക്കി. സംസ്ഥാന തലത്തിൽ 5000 മീറ്റർ നടത്തത്തിൽ ഒന്നാം സ്ഥാനവും 1500 മീറ്ററിൽ രണ്ടാം സ്ഥാനവും 800 മീറ്ററിൽ ഒന്നാം സ്ഥാനവും നേടി.

.പ്രായം കായിക മികവിന് തടസമല്ലെന്നും ആത്മവിശ്വാസവും കഠിനാധ്വാനവും ഉണ്ടങ്കിൽ ഏത് പ്രായത്തിലും നേട്ടങ്ങൾ കൈവരിക്കാമെന്നും ലിസിയുടെ വിജയ യാത്ര തെളിയിക്കുന്നു. ആരോഗ സംരക്ഷണത്തിനും കായികരംഗത്തെ സജീവമായ ജീവിതത്തിനും മാതൃകയായ ലിസിയുടെ നേട്ടങ്ങൾ പെരിങ്ങുളം നാടിന് അഭിമാനമാണ്.

ഭർത്താവ് സിബിയും മക്കളായ ആൻ്റോയും അനുവും ലിസിയുടെ നേട്ടങ്ങൾക്ക് പ്രോത്സാഹനങ്ങൾ നൽകി ഒപ്പമുണ്ട്.

കാനാട്ടുപാറയിൽ ഓപ്പൺ സ്റ്റേഡിയം നിർമ്മിക്കും. മാണി സി. കാപ്പൻ എം.എൽ.എ

noreply@blogger.com (meenachilnews) — Tue, 10 Nov 2026 04:37:24 +0000

പാലാ:- ജനവാസ കേന്ദ്രമായ കാനാട്ടുപാറയിൽ ഓപ്പൺ സ്റ്റേഡിയം നിർമ്മിക്കുമെന്ന തെരഞ്ഞെടുപ്പ് വാഗ്ദാനം പാലിക്കാനുള്ള പരിശ്രമത്തിലാണ് താനെന്ന് മാണി സി. കാപ്പൻ എം.എൽഎ ..

മുനിസിപ്പാലിറ്റിയിലെ 26 വാർഡുകളിലെയും മാലിന്യങ്ങൾ നിക്ഷേപിക്കാനുള്ള സ്ഥലമായി ജനനിബിഡമായ ആറര ഏക്കർ ഭൂമി നീക്കിവെക്കുന്നത് ശരിയല്ലെന്ന നിലപാടിൽ താൻ ഉറച്ചുനിൽക്കുകയാണ്.

.ഓപ്പൺ സ്റ്റേഡിയം, ഇൻഡോർ സ്റ്റേഡിയം, പൂന്തോട്ടം, പാർക്കിംഗ് സൗകര്യം എന്നിവക്ക് ആവശ്യമായ സ്ഥലം കാനാട്ടുപാറയിലെ ആറര ഏക്കറിലുണ്ട്. പോളി ടെക്ക്നിക്ക് കോളേജ് ഭാഗത്തുനിന്നും 40 അടി വീതിയിൽ ഒരു റോഡ് നിർമ്മിച്ചാൽ ഈ മേഖലയുടെ മുഖച്ഛായ മാറും. കായിക താരങ്ങളുടെയും കായിക പ്രേമികളുടെയും ചിരകാലാഭിലാഷമാണ് പാലായിൽ ഒരു ഓപ്പൺ സ്റ്റേഡിയം. ഇപ്പോൾ സ്പോർട്സ് അതോറിറ്റി ഓഫ് ഇന്ത്യയുടെ കൈവശമുള്ള ഇൻഡോർ സ്‌റ്റേഡിയം ഉപയോഗിക്കണമെങ്കിൽ ഫീസ് നൽകണം. സ്റ്റേഡിയത്തിൽ നടക്കുന്നതിനു പോലും ഫീസ് കൊടുക്കണമെന്നത് നീതീകരിക്കാൻ കഴിയില്ല. ജനപക്ഷത്തു നിന്ന് ചിന്തിക്കുന്ന ഒരു ജനപ്രതിനിധി എന്ന നിലയിൽ സങ്കുചിത രാഷ്ട്രീയത്തിന് അതീതമാണ് തന്റെ നിലപാട്. അതുകൊണ്ടാണ് കാനാട്ടുപാറയിൽ ഡംപിംഗ് ഗ്രൗണ്ട് നിർമ്മിക്കുന്നതിനെ താൻ എക്കാലവും എതിർക്കുന്നത്.

.സാധാരണക്കാരും പാവപ്പെട്ടവരുമായ കുട്ടികൾക്ക് പരിശീലനത്തിനും അത് ലറ്റിക്സ് , ഗയിംസ് മത്സരങ്ങൾക്കും സഹായിക്കുന്ന സ്റ്റേഡിയം എന്നത് യാഥാർത്ഥ്യമാക്കാൻ മുഖ്യമന്ത്രിയെ കണ്ട് കാര്യങ്ങൾ ബോധ്യപ്പെടുത്തിയിട്ടുണ്ട്. കായിക ഭൂപടത്തിൽ എക്കാലവും തനതായ സ്ഥാനം അലങ്കരിക്കുന്ന പാലായുടെ പ്രൗഢിക്ക് ചേരുന്ന ഈ ആവശ്യം അനുഭാവപൂർവ്വം പരിഗണിക്കുമെന്ന് മുഖ്യമന്ത്രി ഉറപ്പ് നൽകിയതായും മാണി സി. കാപ്പൻ എം.എൽ.എ പറഞ്ഞു.

പ്രിയപ്പെട്ട വാർഡ് മെമ്പർ അന്നമ്മ ജോസഫിന് നാടിന്റെ അന്ത്യാഞ്ജലി

noreply@blogger.com (meenachilnews) — Mon, 09 Nov 2026 17:13:06 +0000

നാടിന്റെ പൊതുസേവന രംഗത്ത് നിറസാന്നിധ്യമായിരുന്ന മേലുകാവ് ഗ്രാമപഞ്ചായത്ത് ആറാം വാർഡ് മെമ്പർ അന്നമ്മ ജോസഫിന് കണ്ണീരിൽ കുതിർന്ന യാത്രാമൊഴിയേകി മേലുകാവ് നാട്. പ്രിയപ്പെട്ട ജനപ്രതിനിധിയുടെ അപ്രതീക്ഷിത വേർപാടിന്റെ വേദനയിൽ നാട് ഒന്നാകെ അന്ത്യാഞ്ജലി അർപ്പിച്ചു.

ഭവനത്തിലെ സംസ്കാര ശുശ്രൂഷകൾക്ക് സഭയിലെ വിവിധ വൈദികരും ശുശ്രൂഷകരും നേതൃത്വം നൽകി.

.ഭവനത്തിൽ നടന്ന പൊതുദർശനത്തിൽ അന്ത്യോപചാരമർപ്പിക്കാൻ ആയിരങ്ങളാണ് ഒഴുകിയെത്തിയത്. ഇന്ന് ഈസ്റ്റ് കേരള മഹായിടവക ബിഷപ്പ് റൈറ്റ്. റവ. വി.എസ്. ഫ്രാൻസിസ് കോണിപ്പാട് കണ്ണംപള്ളിൽ ഭവനത്തിലെ സംസ്കാര ശുശ്രൂഷകളിൽ പങ്കെടുത്ത് അന്തിമോപചാരമർപ്പിച്ചു.

തുടർന്ന് മേലുകാവ് മറ്റം ഗ്രാമപഞ്ചായത്ത് അങ്കണത്തിൽ ഒരുക്കിയ പൊതുദർശനത്തിലും ആയിരക്കണക്കിനാളുകൾ തങ്ങളുടെ പ്രിയപ്പെട്ട ജനപ്രതിനിധിയെ അവസാനമായി ഒരുനോക്ക് കാണാൻ എത്തി. ജനപ്രതിനിധികളും രാഷ്ട്രീയ-സാമൂഹിക-സാംസ്കാരിക രംഗത്തെ പ്രമുഖരും നാട്ടുകാരും ഉൾപ്പെടെ നിരവധിപേർ ആദരാഞ്ജലികൾ അർപ്പിച്ചു.

.പിന്നീട് വാഹനങ്ങളുടെ നീണ്ട നിരയുടെ അകമ്പടിയോടെ ഭൗതികശരീരം ആംബുലൻസിൽ എള്ളുംപുറം സെന്റ് മത്ഥിയാസ് സി.എസ്.ഐ. ദേവാലയത്തിലേക്ക് വിലാപയാത്രയായി കൊണ്ടുപോയി. ഗ്രാമപഞ്ചായത്ത് പ്രസിഡന്റ് ബിൻസി ടോമി വെട്ടത്തിലിന്റെ നേതൃത്വത്തിൽ പഞ്ചായത്ത് ഭരണസമിതി അംഗങ്ങൾ പരേതയുടെ ശവമഞ്ചം ചുമലിലേറ്റി ദേവാലയത്തിലേക്ക് പ്രവേശിപ്പിച്ചത് വികാരനിർഭരമായ കാഴ്ചയായി.

ദേവാലയത്തിൽ നടന്ന സംസ്കാര ശുശ്രൂഷകൾക്ക് ഈസ്റ്റ് കേരള മഹായിടവക മുൻ ബിഷപ്പ് റൈറ്റ്. റവ. കെ.ജി. ദാനിയേൽ മുഖ്യകാർമികത്വം വഹിച്ചു. എള്ളുംപുറം സെന്റ് മത്ഥിയാസ് സി.എസ്.ഐ. ചർച്ച് ഇടവക വികാരി റവ. രാജേഷ് പത്രോസ്, മേലുകാവ് ക്രൈസ്റ്റ് കത്തീഡ്രൽ അസിസ്റ്റന്റ് വികാരി റവ. കെ.ജെ. ജേക്കബ്, തൊടുപുഴ ഹോളി ട്രിനിറ്റി ചർച്ച് ഇടവക വികാരി റവ. എം.ടി. ജോർജ്, റവ. അഡ്വ. പി.ഡി. ജോസഫ് എന്നിവർ ശുശ്രൂഷകൾക്ക് നേതൃത്വം നൽകി.

ഷിബു പീറ്ററിന് അമേരിക്കയിലെ നാഷണൽ കിഡ്നി ഫൗണ്ടേഷന്റെ സർവീസ് എക്സലൻസ് പുരസ്‌കാരം:

noreply@blogger.com (meenachilnews) — Mon, 09 Nov 2026 16:49:46 +0000

പാലാ: പാലാ പീറ്റർ ഫൗണ്ടേഷൻ ചെയർമാനും പ്രമുഖ സാമൂഹിക പ്രവർത്തകനുമായ ഷിബു പീറ്റർ വെട്ടുകല്ലേലിന് അമേരിക്കയിലെ നാഷണൽ കിഡ്നി ഫൗണ്ടേഷന്റെ ഹ്യുമാനിറ്റി സർവീസ് എക്സലൻസ് അവാർഡ് ലഭിച്ചു.

വൃക്കരോഗ പ്രതിരോധ പ്രവർത്തനങ്ങൾക്കും നിർധനരായ വൃക്കരോഗികൾക്ക് സൗജന്യ ഡയാലിസിസ് സഹായം ലഭ്യമാക്കുന്നതിനും ആരോഗ്യരംഗത്തെ ബോധവൽക്കരണത്തിനുമായി അദ്ദേഹം ദീർഘകാലമായി നടത്തിവരുന്ന നിസ്വാർത്ഥ സേവനങ്ങൾ പരിഗണിച്ചാണ് ഈ പുരസ്കാരം സമ്മാനിച്ചത്.

.കേരളത്തിലെ വിവിധ ആശുപത്രികൾക്ക് ഡയാലിസിസ് മെഷീനുകൾ സംഭാവന നൽകിയും അർഹരായ നിർധന രോഗികൾക്ക് സൗജന്യമായി ഡയാലിസിസ് ചെയ്യുന്നതിനുള്ള സൗകര്യങ്ങൾ ഒരുക്കിയും അദ്ദേഹം ശ്രദ്ധേയമായ പ്രവർത്തനങ്ങളാണ് നടത്തിവരുന്നത്. വൃക്കരോഗം നേരത്തേ കണ്ടെത്തുന്നതിനും രോഗപ്രതിരോധ പ്രവർത്തനങ്ങൾ ജനങ്ങളിലേക്ക് എത്തിക്കുന്നതിനുമായി മൊബൈൽ ലാബ് സംവിധാനങ്ങൾ ഉൾപ്പെടെയുള്ള പദ്ധതികൾക്കും അദ്ദേഹം നേതൃത്വം നൽകിവരുന്നു.

.അമേരിക്കയിലെ കെയർ ആൻഡ് ഷെയർ ചാരിറ്റബിൾ ഓർഗനൈസേഷന്റെ എക്സിക്യൂട്ടീവ് അംഗം, ചിക്കാഗോ ക്നാനായ കത്തോലിക്ക സൊസൈറ്റി ബോർഡ്‌ മെമ്പർ കൂടിയായ ഷിബു പീറ്റർ, വിവിധ സന്നദ്ധ സംഘടനകളുമായും റോട്ടറി ക്ലബ്ബുകളുമായും സഹകരിച്ച് നിരവധി ജീവകാരുണ്യ പ്രവർത്തനങ്ങളിൽ സജീവമായി പങ്കാളിയാണ്.

പെട്രോൾ പമ്പിലെ ഡീസൽ ബില്ലിൽ 'B5' രേഖപ്പെടുത്തൽ; ഡീസലിൽ ബയോഡീസൽ കലർത്തുന്നുണ്ടോ?

noreply@blogger.com (meenachilnews) — Mon, 09 Nov 2026 16:28:32 +0000

ഡീസൽ വിതരണ രേഖയിൽ HSD BS VI (B5) എന്ന് രേഖപ്പെടുത്തിയതോടെ ഇന്ധനത്തിലെ ബയോഡീസൽ സാന്നിധ്യം സംബന്ധിച്ച് ചർച്ചകൾ സജീവമാകുന്നു. ജില്ലയിലെ എച്ച് പി സി എൽ പെട്രോൾ പമ്പിലേക്ക് ഇന്ധനവുമായി എത്തിയ ടാങ്കറിന്റെ ഡെലിവറി രേഖയിലാണ് HSD BS VI (B5) എന്ന രേഖപ്പെടുത്തൽ ശ്രദ്ധയിൽപ്പെട്ടത്.

ഡീസലിൽ അഞ്ച് ശതമാനം ബയോഡീസൽ കലർത്തിയ മിശ്രിതത്തെയാണ് പൊതുവെ B5 എന്ന് വിളിക്കുന്നത്. സാധാരണ ഡീസലിനൊപ്പം സസ്യ എണ്ണകളിൽനിന്നോ ഉപയോഗിച്ച പാചക എണ്ണയിൽനിന്നോ ഉൽപ്പാദിപ്പിക്കുന്ന ബയോഡീസൽ ചേർത്താണ് ഇത്തരം ഇന്ധനം തയ്യാറാക്കുന്നത്.

.രാജ്യത്തെ ദേശീയ ജൈവ ഇന്ധന നയം അനുസരിച്ച് 2030-ഓടെ ഡീസലിൽ അഞ്ച് ശതമാനം ബയോഡീസൽ കലർത്തുക എന്നതാണ് കേന്ദ്രസർക്കാരിന്റെ ലക്ഷ്യം. 2022-ൽ ഭേദഗതി ചെയ്ത നയത്തിലും ഈ ലക്ഷ്യം ആവർത്തിച്ചിട്ടുണ്ട്. അതേസമയം, ബ്യൂറോ ഓഫ് ഇന്ത്യൻ സ്റ്റാൻഡേർഡ്സിന്റെ IS 1460:2017 പ്രകാരം ഡീസലിൽ ഏഴ് ശതമാനം വരെ ബയോഡീസൽ കലർത്താൻ വ്യവസ്ഥയുണ്ട്.

ഡെലിവറി രേഖയിൽ B5 എന്ന് രേഖപ്പെടുത്തിയിട്ടുണ്ടെങ്കിലും പമ്പിലെത്തുന്ന ഉപഭോക്താക്കൾക്ക് ഇന്ധനത്തിലെ ബയോഡീസൽ മിശ്രണത്തിന്റെ അളവ് സംബന്ധിച്ച് വ്യക്തമായ വിവരം ലഭിക്കുന്നുണ്ടോ എന്ന ചോദ്യം ഉയരുന്നുണ്ട്. ഇന്ധനത്തിന്റെ ഗുണനിലവാരം, വാഹനങ്ങളുടെ പ്രവർത്തനക്ഷമത, ഉപഭോക്താക്കൾക്ക് നൽകേണ്ട വിവരങ്ങൾ എന്നിവയിലും വ്യക്തത ആവശ്യമാണ്.

.എന്നാൽ രേഖയിലെ B5 എന്ന പരാമർശം മാത്രം ഉപയോഗിച്ച് ഈ ബാച്ചിൽ കൃത്യമായി അഞ്ച് ശതമാനം ബയോഡീസൽ കലർത്തിയിട്ടുണ്ടെന്ന് അന്തിമമായി സ്ഥിരീകരിക്കാനാവില്ല. എണ്ണക്കമ്പനിയുടെ ഔദ്യോഗിക വിശദീകരണമോ ഗുണനിലവാര പരിശോധനാ റിപ്പോർട്ടോ ആവശ്യമാണ്. ഡീസൽ വിതരണത്തിൽ ബയോഡീസൽ മിശ്രണം നടക്കുന്നുണ്ടെങ്കിൽ അതിന്റെ അളവ്, വിതരണരീതി, ഉപഭോക്താക്കളെ അറിയിക്കുന്ന സംവിധാനം എന്നിവയിൽ കൂടുതൽ സുതാര്യത വേണമെന്ന ആവശ്യവും ഉയരുകയാണ്. പുതിയ വാഹനങ്ങൾ ബയോ ഡീസൽ കലർന്ന ഇന്ധനത്തിന് അനുയോജ്യമാണെങ്കിലും പഴയ വാഹനങ്ങൾക്ക് ഇത് എത്രത്തോളം അനുയോജ്യമാണെന്ന് ചോദ്യവും ഉയരുന്നുണ്ട്.

നിങ്ങളുടെ അഭിപ്രായം രേഖപ്പെടുത്താൻ ഇവിടെ ക്ലിക്ക് ചെയ്യൂ

കുട്ടികളുടെ സുരക്ഷ: ബോധവൽക്കരണ ക്ലാസ് സംഘടിപ്പിച്ചു

noreply@blogger.com (meenachilnews) — Mon, 09 Nov 2026 16:12:50 +0000

കുട്ടികളുടെ സുരക്ഷയും സമഗ്രമായ വളർച്ചയും ഉറപ്പാക്കുന്നതിനും ഇന്നത്തെ കാലഘട്ടത്തിൽ കുട്ടികൾ നേരിടുന്ന വിവിധ വെല്ലുവിളികളെക്കുറിച്ച് സമൂഹത്തിൽ അവബോധം സൃഷ്ടിക്കുന്നതിനുമായി പൂഞ്ഞാർ പയ്യാനിത്തോട്ടം ഹോളി സ്പിരിറ്റ് പബ്ലിക് സ്കൂളിൽ ബോധവൽക്കരണ ക്ലാസ് സംഘടിപ്പിച്ചു.

.ക്ലാസിന് ഈരാറ്റുപേട്ട ജനമൈത്രി പോലീസ് സ്റ്റേഷനിലെ എസ്.ഐ. ബിനോയ് തോമസ് നേതൃത്വം നൽകി. കുട്ടികൾ നേരിടുന്ന സാമൂഹികവും വ്യക്തിപരവുമായ വെല്ലുവിളികൾ, അവരുടെ സുരക്ഷ ഉറപ്പാക്കേണ്ടതിന്റെ ആവശ്യകത, രക്ഷിതാക്കളും അധ്യാപകരും പൊതുസമൂഹവും പുലർത്തേണ്ട ജാഗ്രത തുടങ്ങിയ വിഷയങ്ങൾ ക്ലാസിൽ വിശദീകരിച്ചു.

.കുട്ടികളുടെ സുരക്ഷ കേവലം വിദ്യാലയത്തിന്റെയോ രക്ഷിതാക്കളുടെയോ മാത്രം ഉത്തരവാദിത്വമല്ലെന്നും സമൂഹത്തിലെ ഓരോ വ്യക്തിക്കും അതിൽ നിർണായകമായ പങ്കുണ്ടെന്നും യോഗം ഓർമിപ്പിച്ചു. കുട്ടികൾക്ക് സുരക്ഷിതവും സൗഹൃദപരവുമായ അന്തരീക്ഷം ഒരുക്കാൻ കൂട്ടായ പ്രവർത്തനം അനിവാര്യമാണെന്നും ചർച്ചയിൽ അഭിപ്രായപ്പെട്ടു.

സ്കൂൾ പ്രിൻസിപ്പൽ സി. സുനിത, പി.ടി.എ. ഭാരവാഹികൾ, പഞ്ചായത്ത് മെമ്പർമാർ, വ്യാപാരി പ്രതിനിധികൾ, സ്കൂൾ ബസ് ഡ്രൈവർമാർ, അധ്യാപകർ, വിദ്യാർത്ഥികൾ തുടങ്ങിയവർ പരിപാടിയിൽ പങ്കെടുത്തു.

ചോനമല ടൂറിസം കേന്ദ്രം വികസനത്തിന് കാത്തിരിക്കുന്നു; അടിസ്ഥാന സൗകര്യങ്ങളില്ലാതെ സഞ്ചാരികൾ ദുരിതത്തിൽ

noreply@blogger.com (meenachilnews) — Mon, 09 Nov 2026 15:55:44 +0000

തലനാട്: പ്രകൃതിഭംഗിയും മലനിരകളുടെ മനോഹരമായ കാഴ്ചകളും കൊണ്ട് സഞ്ചാരികളുടെ ശ്രദ്ധയാകർഷിക്കുന്ന തലനാട് ചോനമല ടൂറിസം കേന്ദ്രം അടിസ്ഥാന സൗകര്യങ്ങളുടെ അഭാവത്തിൽ വീർപ്പുമുട്ടുന്നു. തലനാട് ഗ്രാമപഞ്ചായത്തിലെ മൂന്നാം വാർഡിൽ സ്ഥിതി ചെയ്യുന്ന ചോനമലയിലേക്ക് കേരളത്തിന്റെ വിവിധ ഭാഗങ്ങളിൽനിന്ന് ദിവസേന നിരവധി സഞ്ചാരികളാണ് എത്തുന്നത്. സമുദ്രനിരപ്പിൽനിന്ന് ഏകദേശം 3000 അടി ഉയരത്തിലുള്ള ഈ പ്രദേശത്തേക്കുള്ള മനോഹരമായ റോഡും പ്രകൃതിദൃശ്യങ്ങളും സഞ്ചാരികളെ ഏറെ ആകർഷിക്കുന്നതാണ്. എന്നാൽ ഇവിടേക്കുള്ള യാത്രയിലും ടൂറിസം കേന്ദ്രത്തിലും അടിസ്ഥാന സൗകര്യങ്ങൾ ഒരുക്കുന്നതിൽ അധികൃതരുടെ ഭാഗത്തുനിന്ന് കൂടുതൽ ശ്രദ്ധയുണ്ടാകണമെന്നാണ് നാട്ടുകാരുടെയും സഞ്ചാരികളുടെയും ആവശ്യം.

.പ്രധാനമന്ത്രി ഗ്രാമീണ റോഡ് പദ്ധതിയിൽ ഉൾപ്പെടുത്തി നിർമിച്ച റോഡിന്റെ ഇരുവശങ്ങളിലും കാടും പുല്ലും വള്ളിപ്പടർപ്പുകളും വളർന്നുനിൽക്കുന്നതിനാൽ വാഹനങ്ങൾക്ക് പരസ്പരം സൈഡ് കൊടുക്കാൻ പോലും കഴിയാത്ത സാഹചര്യമാണ് പല ഭാഗങ്ങളിലും. വലിയ ടൂറിസ്റ്റ് വാഹനങ്ങളുൾപ്പെടെ എത്തുന്ന റോഡിൽ ഈ അവസ്ഥ യാത്ര ദുഷ്കരമാക്കുന്നു. റോഡിന്റെ വശങ്ങൾ വെട്ടിത്തെളിക്കാനും ആവശ്യമായ അറ്റകുറ്റപ്പണികൾ നടത്താനും അധികൃതർ നടപടി സ്വീകരിക്കുന്നില്ലെന്നാണ് നാട്ടുകാരുടെ പരാതി. കഴിഞ്ഞ മണ്ണിടിച്ചിലിൽ റോഡിലേക്ക് പതിച്ച മണ്ണും പൂർണമായി നീക്കം ചെയ്തിട്ടില്ല. റോഡരികിലെ സംരക്ഷണ ഭിത്തികളും കാടുകയറി മറഞ്ഞ നിലയിലാണ്.

റോഡിലെ പല ഹമ്പുകളുടെയും മുന്നറിയിപ്പ് സൈൻ ബോർഡുകൾ മാഞ്ഞുപോയിട്ടുണ്ട്. ദൂരസ്ഥലങ്ങളിൽനിന്ന് എത്തുന്നവർക്ക് കൃത്യമായ മുന്നറിയിപ്പ് ലഭിക്കാത്തത് അപകടസാധ്യത വർധിപ്പിക്കുന്നു. റോഡിന്റെ വിവിധ ഭാഗങ്ങളിൽ ആവശ്യമായ മുന്നറിയിപ്പ് ബോർഡുകൾ സ്ഥാപിക്കുകയും നിലവിലുള്ളവ പുതുക്കുകയും വേണം. രാത്രികാല യാത്ര സുരക്ഷിതമാക്കാൻ റോഡിന്റെ ഇരുവശങ്ങളിലും വഴിവിളക്കുകൾ സ്ഥാപിക്കണമെന്ന ആവശ്യവും ശക്തമാണ്.

.മല്ലി വ്യൂ പോയിന്റിൽ ശൗചാലയമില്ല; സ്ത്രീകളും കുട്ടികളും ദുരിതത്തിൽ

ചോനമലയിലെ മല്ലി വ്യൂ പോയിന്റ് ഉൾപ്പെടെയുള്ള കാഴ്ചകേന്ദ്രങ്ങളിൽ പൊതുശൗചാലയ സൗകര്യമില്ലാത്തത് സഞ്ചാരികൾക്ക് വലിയ ബുദ്ധിമുട്ടാണ് സൃഷ്ടിക്കുന്നത്. മണിക്കൂറുകൾ യാത്രചെയ്ത് എത്തുന്ന സ്ത്രീകൾക്കും കുട്ടികൾക്കും പ്രായമായവർക്കും പ്രാഥമിക ആവശ്യങ്ങൾ നിർവഹിക്കാൻ പോലും സൗകര്യമില്ലാത്ത അവസ്ഥയാണ്. കുടിവെള്ള ലഭ്യതയും ഉറപ്പാക്കേണ്ടതുണ്ട്. സമീപപ്രദേശത്തുള്ള പഞ്ചായത്ത് കിണർ നവീകരിച്ച് മോട്ടോർ സ്ഥാപിച്ച് ടൂറിസം കേന്ദ്രത്തിലേക്ക് വെള്ളമെത്തിക്കാനുള്ള സാധ്യതയും അധികൃതർ പരിശോധിക്കണമെന്നാണ് നാട്ടുകാരുടെ നിർദേശം.

സഞ്ചാരികൾക്ക് വിശ്രമിക്കാനും പ്രകൃതിഭംഗി ആസ്വദിക്കാനും കഴിയുന്ന തരത്തിൽ ഇരിപ്പിടങ്ങളും മറ്റ് സൗകര്യങ്ങളും ഒരുക്കണം. മനോഹരമായ വ്യൂ പോയിന്റുകളും പ്രകൃതിദൃശ്യങ്ങളും ഉണ്ടായിട്ടും അടിസ്ഥാന സൗകര്യങ്ങളുടെ കുറവുമൂലം പലരും നിരാശയോടെയാണ് മടങ്ങുന്നതെന്ന് സഞ്ചാരികൾ പറയുന്നു.

.രാത്രികാല സുരക്ഷയും ഉറപ്പാക്കണം

ടൂറിസം കേന്ദ്രത്തിലും സമീപപ്രദേശങ്ങളിലും രാത്രികാല സുരക്ഷ ഉറപ്പാക്കണമെന്ന ആവശ്യവും ഉയരുന്നുണ്ട്. പ്രദേശത്തെ കടകളിൽ മോഷണശ്രമങ്ങൾ ഉണ്ടായിട്ടുണ്ടെന്നും വ്യാപാരികൾ ആശങ്ക അറിയിക്കുന്നുണ്ട്. ആഴ്ചയിൽ രണ്ടുതവണയെങ്കിലും രാത്രികാല പോലീസ് പട്രോളിങ് ഏർപ്പെടുത്തണമെന്നാണ് നാട്ടുകാരുടെ ആവശ്യം. ഇല്ലിക്കക്കല്ല് ഉൾപ്പെടെയുള്ള സമീപ വിനോദസഞ്ചാര കേന്ദ്രങ്ങളിലേക്കും മലമുകളിലേക്ക് നടന്ന് പോകുന്നവർക്കും ആവശ്യമായ സുരക്ഷാ നിർദേശങ്ങളും മുന്നറിയിപ്പുകളും ഒരുക്കേണ്ടതുണ്ട്.

ടൂറിസം സീസണിന് മുമ്പ് അടിയന്തര വികസന പാക്കേജ് വേണം

വിനോദസഞ്ചാര സീസൺ ആരംഭിക്കുന്നതോടെ ചോനമലയിലേക്ക് ആയിരക്കണക്കിന് ആളുകൾ എത്താനുള്ള സാധ്യതയുണ്ട്. അതിനാൽ പൊതുശൗചാലയം, കുടിവെള്ളം, വഴിവിളക്കുകൾ, റോഡ് വശങ്ങൾ വൃത്തിയാക്കൽ, സംരക്ഷണ ഭിത്തികളുടെ പരിപാലനം, മുന്നറിയിപ്പ് ബോർഡുകൾ, വിശ്രമിക്കാനുള്ള സൗകര്യങ്ങൾ എന്നിവ ഉൾപ്പെടുത്തി അടിയന്തര വികസന പാക്കേജ് നടപ്പാക്കണമെന്നാണ് നാട്ടുകാരുടെയും സഞ്ചാരികളുടെയും ആവശ്യം.

തലനാട് ഗ്രാമപഞ്ചായത്തും പൊതുമരാമത്ത് വകുപ്പും ടൂറിസം വകുപ്പും മറ്റ് ബന്ധപ്പെട്ട അധികൃതരും സംയുക്തമായി ഇടപെട്ട് ചോനമലയുടെ വികസനത്തിന് ആവശ്യമായ നടപടികൾ സ്വീകരിക്കണം. പ്രകൃതിയുടെ മനോഹാരിത മാത്രം പോരാ, അവിടെയെത്തുന്നവർക്ക് സുരക്ഷിതമായ യാത്രയും അടിസ്ഥാന സൗകര്യങ്ങളും ഉറപ്പാക്കണം. വലിയ ടൂറിസം സാധ്യതയുള്ള ചോനമലയെ അടിസ്ഥാന സൗകര്യങ്ങളോടുകൂടിയ മികച്ച വിനോദസഞ്ചാര കേന്ദ്രമായി വികസിപ്പിക്കണമെന്നതാണ് നാട്ടുകാരുടെ ആവശ്യം.

വാർത്ത റോബിൻ ഇരുമാപ്ര

ജോസ്കുട്ടി ജോസഫ് തേവർപറമ്പിൽ നിര്യാതനായി

noreply@blogger.com (meenachilnews) — Mon, 09 Nov 2026 14:58:07 +0000

പാലാ: മുത്തോലി തേവർപറമ്പിൽ പരേതരായ ജോസഫിന്റെയും മേരിയുടെയും മകൻ ജോസ്കുട്ടി ജോസഫ് (UAE) നിര്യാതനായി. സംസ്കാര ശുശ്രൂഷകൾ ചൊവ്വാഴ്ച്ച (10/11/26) ഉച്ചകഴിഞ്ഞ് 2 മണിക്ക് ഭവനത്തിൽ ആരംഭിച്ച്, തുടർന്ന് മുത്തോലി സെന്റ് ജോർജ് പള്ളി സെമിത്തേരിയിൽ നടക്കും. പരേതന്റെ ഭൗതികശരീരം ചൊവ്വാഴ്ച്ച രാവിലെ 8 മണിക്ക് മുത്തോലിയിലെ ഭവനത്തിൽ കൊണ്ടുവരുന്നതാണ്.

.ഭാര്യ: അന്നമ്മ ജോസ്, UAE (കട്ടപ്പന ഈട്ടിക്കൽതടത്തിൽ കുടുംബാംഗം)

മക്കൾ: Joel Jose, Jessel Ann Jose, Justin Jose

സഹോദരങ്ങൾ & കുടുംബാംഗങ്ങൾ:

ജോർജ്കുട്ടി ജോസഫ് RTD MANAGER ബാങ്ക് OF INDIA& ജോളികുട്ടി ജോർജ് (തോമക്കൽ, പത്തനംതിട്ട)

ജോസമ്മ ജോസ് &RTD MANAGER, SBI,ജോസ് (കോയിപ്പുറത്ത്,PSC RTD,അമയന്നൂർ)

ജോജി K തേവർ പറമ്പൻ, അച്ചായൻസ് ഷോപ്പ്, Santhome Complex& ജാക്വിലിൻ കാപ്പൻ, പാലാ

ജോസ് ലിൻ ബി ജോർജ്, UAE & ബിനോയ്‌ ജോർജ്, UAE (മുകളേൽപറമ്പിൽ, കാരിത്താസ്)

ജോബി ജോസഫ് UAE&JJ FILMSഡാനി ജോബി UAE (കിടങ്ങയിൽ, ചാമംപതാൽ)

പുതിയ വാട്ടര്‍ടാങ്കിന്റെ നിര്‍മ്മാണം ആരംഭിച്ചു

noreply@blogger.com (meenachilnews) — Mon, 09 Nov 2026 14:37:29 +0000

കടപ്ലാമറ്റം: കടപ്ലാമറ്റം പഞ്ചായത്ത് ആറാം വാര്‍ഡിലെ പാളയം സ്രോതസ്സ് കുടിവെള്ള പദ്ധതിയുടെ ജലവിതരണ സംവിധാനത്തിലെ പരാതികള്‍ പരിഹരിക്കപ്പെടുന്നു. നൂറോളം കുടുംബങ്ങളില്‍ കുടിവെള്ളം എത്തുന്ന ഈ പദ്ധതിയ്ക്കായി നിലവിലുണ്ടായിരുന്നത് പതിനായിരം ലിറ്ററില്‍ താഴെയുള്ള ജലസംഭരണ ടാങ്ക് ആയിരുന്നു. വാട്ടര്‍ടാങ്കിന്റെ ഉയരക്കുറവുകൊണ്ടും സംഭരണശേഷിയുടെ കുറവുകൊണ്ടും എല്ലാ വീടുകളിലും സുഗമമായി വെള്ളം എത്തുന്നത് അസാധ്യമായിരുന്നു. ഈ പ്രശ്‌നം പരിഹരിക്കുന്നതിനായി ജില്ലാ പഞ്ചായത്ത് മെമ്പര്‍ ജോസ്‌മോന്‍ മുണ്ടയ്ക്കല്‍ അനുവദിച്ച 18 ലക്ഷം രൂപ ഉപയോഗിച്ച് കുടിവെള്ള പദ്ധതിയ്ക്കായി 45000 ലിറ്റര്‍ കപ്പാസിറ്റിയുള്ള പുതിയ വാട്ടര്‍ടാങ്ക് നിര്‍മ്മിക്കുന്നതാണ്.

.മുപ്പത്തിയ്യായിരം ലിറ്റര്‍ കപ്പാസിറ്റിയുള്ള 35 അടി ഉയരമുള്ള വാട്ടര്‍ടാങ്കും അതിനുമുകളിലായി പതിനായിരം ലിറ്ററിന്റെ ഫൈബര്‍ ടാങ്കുമാണ് ഈ പദ്ധതിയുടെ ഭാഗമായിട്ട് ഇപ്പോള്‍ പുതുതായിട്ട് സ്ഥാപിക്കുന്നത്. സി.സി. മൈക്കിള്‍ സംഭാവനയായി നല്‍കിയ സ്ഥലത്താണ് പദ്ധതിയ്ക്കായുള്ള പുതിയ വാട്ടര്‍ടാങ്കിന്റെ നിര്‍മ്മാണം നടത്തുന്നത്. പന്ത്രണ്ടുവര്‍ഷക്കാലം മുമ്പ് നടപ്പിലാക്കിയ ഈ പദ്ധതിയില്‍ വേനല്‍ക്കാലങ്ങളിലും മറ്റവസരങ്ങളിലും കുടിവെള്ളം ലഭ്യമാകാതിരുന്ന നിരവധി കുടുംബങ്ങള്‍ക്കാണ് ഈ പദ്ധതി കൊണ്ട് പ്രയോജനം ഉണ്ടാകുന്നത്.

.വാട്ടര്‍ടാങ്കിന്റെ നിര്‍മ്മാണ ഉദ്ഘാടനം ജില്ലാ പഞ്ചായത്ത് മെമ്പര്‍ ജോസ്‌മോന്‍ മുണ്ടയ്ക്കല്‍ നിര്‍വ്വഹിച്ചു. ഗ്രാമപഞ്ചായത്ത് പ്രസിഡന്റ് ജീന സിറിയക് അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പര്‍ ബോണി കുര്യാക്കോസ് മുഖ്യപ്രഭാഷണവും ഗ്രാമപഞ്ചായത്ത് മെമ്പര്‍ നീതു ഗോപി ആമുഖപ്രസംഗവും നടത്തി. യോഗത്തില്‍ കുടിവെള്ള പദ്ധതിയുടെ നിര്‍മ്മാണ കമ്മറ്റി ചെയര്‍മാന്‍ സി.സി. മൈക്കിള്‍ ചെമ്പകമറ്റം, ജോസ് കൊടിയംപുരയിടം, ജോസഫ് നിരവത്ത്, ബിനു രണ്ടാനിക്കല്‍, സജി എബ്രാഹം, ഔസേപ്പച്ചന്‍ മാന്നാത്ത് എന്നിവര്‍ പ്രസംഗിച്ചു.

വിദ്യാഭ്യാസത്തിൻ്റെ ലക്ഷ്യം തൊഴിൽ നേടൽ മാത്രമല്ല മൂല്യാധിഷ്ഠിത ജീവിത രീതി കൂടി ലക്ഷ്യമാക്കണം - ഡോ. മുരളീ വല്ലഭൻ.

noreply@blogger.com (meenachilnews) — Mon, 09 Nov 2026 12:56:26 +0000

പാലാ: വിദ്യാഭ്യാസത്തിൻ്റെ ലക്ഷ്യം തൊഴിൽ നേടൽ മാത്രമല്ലെന്നും ധാർമികമായ ജീവിത പദ്ധതി കൂടി ലക്ഷ്യം വെക്കണമെന്നും കുട്ടിക്കാനം മരിയൻ കോളേജ് സെൻ്റർ ഫോർ സസ്റ്റൈനബിൾ ഡെവലപ്മെൻ്റ് അഡ്വൈസർ ഡോ.മുരളീ വല്ലഭൻ പറഞ്ഞു.

സഫലം 55 പ്ലസ്സിൻ്റെ നേതൃത്വത്തിൽ നടന്ന പ്രഭാഷണ പരമ്പരയിൽ പങ്കെടുത്ത് സംസാരിക്കുകയായിരുന്നു അദ്ദേഹം.

.സുസ്ഥിര വികസനം അത്യന്തികമായി മനുഷ്യൻ്റെ മൂല്യാധിഷ്ഠിത മനസ്സിലും, ശാസ്ത്രാധിഷ്ഠിത സമീപനങ്ങളിലും കാണാൻ കഴിയും. കേരളത്തിന് സുസ്ഥിര വികസനത്തിൻ്റെ റാങ്കിംഗിൽ ഒന്നാംസ്ഥാനമുണ്ടെങ്കിലും, ആരോഗ്യ വിദ്യാഭ്യാസ മേഖലകളിലെ വെല്ലുവിളികൾ വളരെ പ്രധാനപ്പെട്ടതാണ്;അദ്ദേഹം പറഞ്ഞു. പ്രൊഫ. കെ. പി.ജോസഫ് അധ്യക്ഷത വഹിച്ചു.സഫലം സെക്രട്ടറി വി എം അബ്ദുള്ള ഖാൻ, പി എസ് മധുസൂദനൻ, എലിസബത്ത് ആൻ്റണി എന്നിവർ പ്രസംഗിച്ചു.

എൻ.എസ്.എസ് വോളന്റിയർമാർ മുണ്ടകൻ കൃഷിയിറക്കി

noreply@blogger.com (meenachilnews) — Mon, 09 Nov 2026 12:16:02 +0000

പുസ്തകത്താളുകളിലെ കൃഷിപാഠങ്ങൾ വിട്ട് വയലേലകളിലേക്ക് ഇറങ്ങി മാതൃകയായി രാമപുരം സെന്റ് അഗസ്റ്റിൻസ് ഹയർ സെക്കൻഡറി സ്കൂളിലെ എൻ.എസ്.എസ് വോളന്റിയർമാർ.

സ്കൂൾ എൻ.എസ്.എസ് യൂണിറ്റിന്റെ നേതൃത്വത്തിൽ സീറോ ബഡ്ജറ്റ് കൃഷി പദ്ധതിയുടെ ഭാഗമായി കൊണ്ടാട് ചുരവേലി പാടത്ത് സംഘടിപ്പിച്ച മുണ്ടകൻ കൃഷി ഞാറ് നടീൽ വിദ്യാർത്ഥികൾക്ക് വേറിട്ടതും ഹൃദ്യവുമായ അനുഭവമായി മാറി. നെൽകൃഷിയുടെ വിവിധ ഘട്ടങ്ങൾ വോളന്റിയർമാർക്ക് നേരിട്ട് അനുഭവവേദ്യമാക്കുന്ന സമഗ്ര കാർഷിക പരിശീലന പദ്ധതിയാണ് ഇത്.

.കോട്ടയം ജില്ലാ പഞ്ചായത്തംഗം ശ്രീമതി. ഷിബി മത്തായി പരിപാടി ഉദ്ഘാടനം ചെയ്തു. രാമപുരം ഫൊറോനാ പള്ളി അസിസ്റ്റന്റ് വികാരി ഫാ. മാത്യു പനങ്ങാട്ട്, പ്രിൻസിപ്പൽ ശ്രീ. ഡീറ്റോ സെബാസ്റ്റ്യൻ, എൻ.എസ്.എസ് പ്രോഗ്രാം ഓഫീസർ ശ്രീ. മെൽവിൻ കെ. അലക്സ്, സ്കൂൾ ഹെഡ്മാസ്റ്റർ ശ്രീ. നെൽസൺ അലക്സ്, വാർഡ് മെമ്പർ ശ്രീമതി. മിനി റ്റി. ജോൺ എന്നിവർ ആശംസകൾ അർപ്പിച്ചു.

പ്രോഗ്രാം ഓഫീസർ മെൽവിൻ കെ. അലക്സ് കൃഷി പ്രവർത്തനങ്ങൾക്ക് നേതൃത്വം നൽകി. പ്രമുഖ പ്രകൃതി കർഷകൻ ശ്രീ. മധു ചൂരവേലിൽ കുട്ടികൾക്ക് കൃഷിക്കാവശ്യമായ പ്രായോഗിക നിർദ്ദേശങ്ങളും മാർഗനിർദേശങ്ങളും പകർന്നുനൽകി.

.സുഭാഷ് പാലേക്കറുടെ പ്രകൃതിസൗഹൃദ 'സീറോ ബഡ്ജറ്റ്' കൃഷിരീതി അവലംബിച്ചാണ് ഇവിടെ കൃഷിയിറക്കിയിരിക്കുന്നത്. പൂർണ്ണമായും രാസവളങ്ങളും രാസകീടനാശിനികളും ഒഴിവാക്കി, നാടൻ പശുവിന്റെ ചാണകം, ഗോമൂത്രം എന്നിവ ചേർത്തുണ്ടാക്കുന്ന ജീവാമൃതവും പ്രകൃതിദത്ത വളക്കൂട്ടുകളുമാണ് മണ്ണിൽ പ്രയോഗിക്കുന്നത്. വിഷമില്ലാത്ത നാളേക്കായി മണ്ണും വിത്തും ഒരുക്കേണ്ടതിന്റെ പ്രാധാന്യം കുട്ടികൾ ഇതിലൂടെ നേരിട്ട് മനസ്സിലാക്കി.

ക്ലാസ് മുറികളിലെ നാലുചുവരുകൾക്കുള്ളിൽ നിന്ന് ചേറിലിറങ്ങിയ വോളന്റിയർമാർക്ക് ഇത് നവ്യാനുഭവമായി. ഞാറ്റുവേല പാട്ടുകളുടെ ഈണവും താളവും നെഞ്ചിലേറ്റി, പരിചയസമ്പന്നരായ കർഷകരെപ്പോലെ വരിതെറ്റാതെ ഞാറുനടാൻ വിദ്യാർത്ഥികൾ മത്സരിച്ചു.

.പാദങ്ങളിൽ ചേറുതൊട്ടപ്പോൾ ആദ്യമുണ്ടായ സങ്കോചങ്ങൾ മറന്ന്, കാർഷിക സംസ്കാരത്തിന്റെ പാരമ്പര്യം തൊട്ടറിയാൻ കഴിഞ്ഞതിന്റെ ആവേശത്തിലായിരുന്നു ഓരോ വിദ്യാർത്ഥിയും. അന്നം തരുന്ന മണ്ണിന്റെ വിലയും ഒരുമണി നെല്ലിനു പിന്നിലെ കർഷകന്റെ വിയർപ്പും തിരിച്ചറിഞ്ഞ ദിനമായി ഇത് മാറി.

എല്ലാ എൻ.എസ്.എസ് വോളന്റിയർമാരും അധ്യാപകരും പരിപാടിയിൽ പങ്കെടുത്തു

കൊല്ലപ്പള്ളി എസ് വളവ് - പുളിച്ചമാക്കൽ റോഡ് നാടിന് സമർപ്പിച്ചു

noreply@blogger.com (meenachilnews) — Mon, 09 Nov 2026 10:46:57 +0000

കടനാട്: കടനാട് ഗ്രാമപഞ്ചായത്തിലെ കൊല്ലപ്പള്ളി വാർഡിൽ നവീകരിച്ച എസ് വളവ് - പുളിച്ചമാക്കൽ റോഡ് മാണി സി. കാപ്പൻ എം.എൽ.എ നാടിന് സമർപ്പിച്ചു. പത്തുലക്ഷം രൂപ വിനിയോഗിച്ച് കോൺക്രീറ്റ് പണികൾ പൂർത്തിയാക്കിയതോടെ കാഞ്ഞിരമല, പ്രവിത്താനം ഭാഗങ്ങളിലേക്ക് നീലൂർ റോഡിൽ നിന്ന് എളുപ്പത്തിൽ പ്രവേശിക്കാവുന്ന സുപ്രധാന ഗ്രാമീണ പാതയാണ് യാഥാർഥ്യമായത്. റോഡ് കാഞ്ഞിരമല റോഡുമായി ബന്ധിപ്പിച്ചതോടെ പ്രദേശത്തെ ദീർഘകാല യാത്രാക്ലേശത്തിന് വലിയൊരു പരിഹാരമായി.

.വാർഡ് മെമ്പർ ജ്യോതി ലക്ഷ്മി യുടെ നിരന്തര പരിശ്രമത്തിന്റെ ഫലമായാണ് റോഡ് നിർമാണം വേഗത്തിൽ യാഥാർഥ്യമായതെന്ന് നാട്ടുകാർ പറഞ്ഞു.

ചടങ്ങിൽ ളാലം ബ്ലോക്ക് പഞ്ചായത്ത് പ്രസിഡന്റ് ജോസ് പ്ലാക്കൂട്ടം അധ്യക്ഷത വഹിച്ചു. കടനാട് ഗ്രാമപഞ്ചായത്ത് പ്രസിഡന്റ് ലാലി സണ്ണി, വൈസ് പ്രസിഡന്റ് മണിക്കുട്ടി സന്തോഷ്, വാർഡ് മെമ്പർ ജ്യോതി ലക്ഷ്മി എന്നിവർ മുഖ്യാതിഥികളായി.

.പഞ്ചായത്ത് അംഗങ്ങളായ പി.ഡി. സെബാസ്റ്റ്യൻ, ബിന്ദു സതീഷ് കുമാർ, സ്നേഹ തോമസ്, മാധ്യമപ്രവർത്തകൻ ബിനു വള്ളോംപ്പുരയിടം, പൊതുപ്രവർത്തകരായ ബിന്നി ചോക്കാട്ട്, ജോസ് വടക്കേക്കര, സിബി അഴകൻപറമ്പിൽ, വ്യാപാരി വ്യവസായി ഏകോപന സമിതി പ്രസിഡന്റ് സാം കുമാർ എന്നിവർ സംസാരിച്ചു. പ്രദേശവാസികളും ജനപ്രതിനിധികളും ചടങ്ങിൽ പങ്കെടുത്തു.

കെ ആർ നാരായണൻ സ്മൃതിമണ്ഡപത്തിൽ പുഷ്പാർച്ചന നടത്തി

noreply@blogger.com (meenachilnews) — Mon, 09 Nov 2026 10:10:53 +0000

കുറിച്ചിത്താനം: മുൻ രാഷ്ട്രപതി കെ ആർ നാരായണൻ്റെ ഇരുപത്തിയൊന്നാമത് ചരമവാർഷികത്തോടനുബന്ധിച്ചു പൂവത്തിങ്കലുള്ള കെ ആർ നാരായണൻ സ്മൃതി മണ്ഡപത്തിൽ കെ ആർ നാരായണൻ ഫൗണ്ടേഷൻ്റെ ആഭിമുഖ്യത്തിൽ പുഷ്പാർച്ചന നടത്തി. ഫൗണ്ടേഷൻ രക്ഷാധികാരി മന്ത്രി മോൻസ് ജോസഫ് അനുസ്മരണ പ്രഭാഷണം നടത്തി. കെ ആർ നാരായണൻ്റെ ജീവിതം തലമുറകളെ പ്രചോദിപ്പിക്കുമെന്ന് അദ്ദേഹം പറഞ്ഞു. അദ്ദേഹത്തിൻ്റെ മാതൃക ഭരണാധികാരികൾക്കു മാർഗ്ഗദർശനമാണെന്നും മന്ത്രി ചൂണ്ടിക്കാട്ടി.

.ഫൗണ്ടേഷൻ ചെയർമാൻ എബി ജെ ജോസ്, വൈസ് ചെയർമാൻ ഡോ സിന്ധുമോൾ ജേക്കബ്, ജില്ലാ പഞ്ചായത്ത് മെമ്പർ ജോസ്മോൻ മുണ്ടയ്ക്കൽ, ഉഴവൂർ ഗ്രാമപഞ്ചായത്ത് പ്രസിഡൻ്റ് ബിനു ജോസ് തൊട്ടിയിൽ, വികസന കാര്യ സ്റ്റാൻ്റിംഗ് കമ്മിറ്റി ചെയർപേഴ്സൺ ആൻസി തോമസ്, ഫൗണ്ടേഷൻ ജനറൽ സെക്രട്ടറി സാംജി പഴേപറമ്പിൽ, കെ ആർ നാരായണൻ്റെ പിതൃസഹോദരപുത്രി സീതാലക്ഷ്മി, ഭർത്താവ് വാസുക്കുട്ടൻ, വിവേക് പി വി, കെ അജിത്കുമാർ തുടങ്ങിയവർ പങ്കെടുത്തു.

ആരോലിൽ ചെമ്പരത്തിക്കുന്നേൽ കുടുംബ സംഗമം നടന്നു.

noreply@blogger.com (meenachilnews) — Mon, 09 Nov 2026 09:33:39 +0000

ഈരാറ്റുപേട്ട: ആരോലിൽ ചെമ്പരത്തിക്കുന്നേൽ പ്രഥമ കുടുംബസംഗമം ഈരാറ്റുപേട്ട ഫുഡ് ബുക്ക് ഓഡിറ്റോറിയത്തിൽ പൂഞ്ഞാർ എം.എൽ .എ . അഡ്വ. സെബാസ്റ്റ്യൻ എം.ജെ ഉദ്ഘാടനം ചെയ്തു. പാലാഎം.എൽ.എ മാണി സി കാപ്പൻ മുഖ്യപ്രഭാഷണം നടത്തി റിട്ട. ജില്ലാ ജഡ്ജിയും കുടുബ സംഗമം രക്ഷാകാരിയുമായ ബി.വിജയൻ അദ്ധ്യക്ഷത വഹിച്ചു..ആശംസകൾ അർപ്പിച്ചു കൊണ്ട് എസ്.എൻ ഡി പി യോഗം മീനച്ചിൽ യൂണിയൻ, ജോയിന്റ് കൺവീനർ ഷാജി തലനാട് , ശശി വായക്കാപ്പാറ, എന്നിവർ ആശംസ അർപ്പിച്ച് സംസാരിച്ചു.

.കുടുംബ സംഗമത്തിന്റെ കാലികപ്രസക്തി എന്ന വിഷയത്തിൽ കുടുംബ സംഗമം രക്ഷാധികാരിയും റിട്ട. സയന്റിസ്റ്റുമായ ഡോ. എ.ജി രാജേന്ദ്രൻ സംസാരിച്ചു. മികച്ച വിജയം കൈവരിച്ച കുട്ടികളേയും, കുടുബത്തിലെ ജനപ്രതിനിധികളേയും അനുമോദിച്ചു. എഴുപത് വയസിന് മുകളിൽ പ്രായമുള്ള മുതിർന്ന കുടുബാഗങ്ങളെ ആദരിച്ചു. ഗുരുദേവന്റെ ഫോട്ടോയ്ക് മുൻപിൽ പ്രാത്ഥനക്ക് ശേഷം മാണ് സംഗമം ആരംഭിച്ചത്.

.അർക്ക പ്രിയ ഗിരിസൺ ഈശ്വര പ്രാത്ഥന നടത്തി. കുടുബ യോഗം ചെയർമാൻ ഗിരിസൺ.സി.ജി സ്വാഗതവും, കുടുബ യോഗം കൺവീനർ ഏ.ആർ ലെനിൻ മോൻ നന്ദിയും പറഞ്ഞു. തുടർന്ന് ഫാമിലി ടീ അവതരണം നടത്തി. കലാപരിപാടികൾ, ഉച്ച ഭക്ഷണം, വിനോദ മത്സരങ്ങൾ , സമ്മാനദാനം, പുതിയ കമ്മറ്റി തിരഞ്ഞെടുപ്പ്എന്നിവ നടത്തി.

ഓക്‌സിജന്‍ മൊബൈല്‍ കാര്‍ണിവെല്‍; മൊബൈല്‍ ഫോണ്‍ വാങ്ങിയ ഉപഭോക്താവിന് സ്‌കൂട്ടര്‍ സമ്മാനം

noreply@blogger.com (meenachilnews) — Mon, 09 Nov 2026 09:21:01 +0000

കോട്ടയം: ഓക്‌സിജന്‍ ദി ഡിജിറ്റല്‍ എക്‌സ്‌പേര്‍ട്ടില്‍ നടന്നുവരുന്ന മൊബൈല്‍ ഫോണ്‍ കാര്‍ണിവെല്ലിലെ ഡിജിറ്റല്‍ ലക്കി ഡ്രോയിലൂടെ ഉപഭോക്താവിന് സ്‌കൂട്ടര്‍ സമ്മാനമായി ലഭിച്ചു. പട്ടം ഓക്‌സിജന്‍ ഷോറൂമില്‍ നിന്നും മൊബൈല്‍ ഫോണ്‍ വാങ്ങിയ തിരുവനന്തപുരം ശാസ്തമംഗലം സ്വദേശിനി ദിനു എലിസബത്ത് റോയിക്കാണ് സ്‌കൂട്ടര്‍ സമ്മാനമായി ലഭിച്ചത്.

.മൊബൈല്‍ കാര്‍ണിവെല്ലിന്റെ ഭാഗമായി ഓക്‌സിജനില്‍ നിന്നും ഏതൊരു മൊബൈല്‍ ഫോണ്‍ പര്‍ച്ചേസ് ചെയ്യുമ്പോഴും ആകര്‍ഷകമായ സമ്മാനങ്ങള്‍ സ്വന്തമാക്കാനുള്ള അവസരമാണ് ഉപഭോക്താക്കള്‍ക്കുള്ളത്. കാര്‍, സ്‌കൂട്ടര്‍, സ്വര്‍ണ്ണമോതിരം, സൈക്കിള്‍, ഇലക്ട്രിക് തയ്യല്‍ മെഷീന്‍, എല്‍ഇഡി ടിവി, ഫ്രിഡ്ജ്, വാഷിംഗ് മെഷീന്‍, മിക്‌സര്‍ ഗ്രൈന്‍ഡര്‍ തുടങ്ങി നിരവധി സമ്മാനങ്ങളാണ് ഉപഭോക്താക്കളെ കാത്തിരിക്കുന്നത്.

മൊബൈല്‍ ഫോണുകള്‍ വാങ്ങുമ്പോള്‍ ഉപഭോക്താക്കള്‍ക്ക് അനുയോജ്യമായവ തിരഞ്ഞെടുക്കാന്‍ ആവശ്യമായ മാര്‍ഗനിര്‍ദേശം ഓക്സിജന്റെ വിദഗ്ധ സംഘം നല്‍കും. ഓക്‌സിജന്‍ കെയറിലൂടെ വാറന്റി കാലാവധി കഴിഞ്ഞ ഏത് പ്രമുഖ ബ്രാന്‍ഡഡ് സ്മാര്‍ട്ട് ഫോണുകള്‍ക്കും പൂര്‍ണ്ണമായും സൗജന്യ സര്‍വീസ് ചെക്ക്അപ്പ് സൗകര്യവും ഒരുക്കിയിട്ടുണ്ട്. ഫോണ്‍: 9020100100.

പാലാ സെൻ്റ് മേരീസിൽ വിജയദിനാഘോഷം നടന്നു

noreply@blogger.com (meenachilnews) — Mon, 09 Nov 2026 06:37:19 +0000

പാലാ: പാലാ ഉപജില്ലാ കലോത്സവത്തിൽ എൽ.പി.വിഭാഗം ഓവറോൾ കിരീടം കരസ്ഥമാക്കിയ പാലാ സെൻ്റ് മേരീസ് എൽ.പി.സ്കൂളിൽ വിജയദിനാഘോഷം നടത്തി. പങ്കെടുത്ത 13 ഇനങ്ങളിലും എ ഗ്രേഡ് നേടി 65 പോയിൻ്റുമായാണ് പാലാ സെൻ്റ് മേരീസ് ഒന്നാം സ്ഥാനത്തെത്തിയത്. ഹെഡ്മിസ്ട്രസ് സി.ലിൻസി ജെ.ചീരാംകുഴിയുടെ നേതൃത്വത്തിൽ അധ്യാപകരും മാതാപിതാക്കളുടെയും ചിട്ടയായ പരിശീലനമാണ് വിജയത്തിന് പിന്നിൽ.

.ഹെഡ്മിസ്ട്രസ് സി.ലിൻസി ജെ ചീരാംകുഴി, അധ്യക്ഷത വഹിച്ചു. ത്രേസ്യാമ്മ തോമസ് ,സി.ലിജി, ബിൻസി സെബാസ്റ്റ്യൻ, സി.ഡെൽനാ, സി.ജെസ്സ് മരിയ, ലിജോ ആനിത്തോട്ടം, നീനു ബേബി, കാവ്യാമോൾ മാണി, ജോളി മോൾ തോമസ്, സി. മരിയാ, അനു മെറിൻ അഗസ്റ്റിൻ, ജോസ്മിൻ പി.ജെ., ടെസിൻ മാത്യു, ഡോണാ തോമസ്, സുമി തോമസ്, സുജ ഷാജി എന്നിവർ പ്രസംഗിച്ചു.

ഭരണങ്ങാനം ഗ്രാമ പഞ്ചായത്ത് കേരളാ ത്സവം

noreply@blogger.com (meenachilnews) — Mon, 09 Nov 2026 04:09:07 +0000

ഭരണങ്ങാനം ഗ്രാമ പഞ്ചായത്തിലെ കേരളാ ത്സവം പ്രവിത്താനം സ്കൂൾ ഗ്രൗണ്ട്, ഉള്ളനാട് സ്കൂൾ ഗ്രൗണ്ട്, തെങ്ങുംപള്ളി ഇൻഡോർ സ്റ്റേഡിയം എന്നിവിടങ്ങളിൽ നടന്നു. പ്രസിഡന്റ് ശ്രീമതി സുധ ഷാജി ഉദ്ഘാടനം ചെയ്തു.

.ക്ഷേമ കാര്യ സ്റ്റാന്റിംഗ് കമ്മിറ്റി ചെയർപേഴ്സൺ ശ്രീമതി അനുമോൾ മാത്യൂ, ആരോഗ്യ സ്റ്റാന്റിംഗ് കമ്മറ്റി ചെയർമാൻ ശ്രീ C J മാർട്ടിൻ, മെമ്പർമാരായ സുനിത ബൈജു, ശ്രീവിജയൻ രാഘവൻ, പഞ്ച . അസ്സി. സെക്രട്ടറി അനൂപ് മോഹൻ മറ്റ് പഞ്ചാ. സ്റ്റാഫ്, യൂത്ത് കോർഡിനോ റ്റർ സക്കറിയാസ് ജയിംസ് പൊതുജനങ്ങൾ വിവധയിനം മത്സരാർത്ഥികൾ തുടങ്ങിയവർ പങ്കെടുത്തു

അന്നമ്മ ജോസഫിൻ്റെ സംസ്കാരം രാവിലെ 11 ന്

noreply@blogger.com (meenachilnews) — Sun, 08 Nov 2026 18:14:28 +0000

അപ്രതീക്ഷിതമായി മരണപ്പെട്ട മേലുകാവ് ഗ്രാമപഞ്ചായത്ത് ആറാം വാർഡ് മെമ്പർ കോണിപ്പാട് കണ്ണംപള്ളിൽ അന്നമ്മ ജോസഫിൻ്റെ സംസ്കാരം രാവിലെ 11 ന് നടക്കും. സംസ്കാര ശുശ്രൂഷ നവംബർ 9 തിങ്കളാഴ്ച രാവിലെ 10ന് ഭവനത്തിൽ ആരംഭിക്കും. 10.30ന് മേലുകാവ് മറ്റം പഞ്ചായത്ത് അങ്കണത്തിൽ പൊതുദർശനവും 11ന് എള്ളുമ്പുറം സെന്റ് മത്തിയാസ് സി.എസ്.ഐ പള്ളിയിൽ സംസ്കാര ശുശ്രൂഷയും നടക്കും.ഭർത്താവ്: ജോൺസൺ ജോർജ് (സബ് ഇൻസ്പെക്ടർ, മുല്ലപ്പെരിയാർ).

.കോണിപ്പാട് നടുത്തൊട്ടിയിൽ കുടുംബാംഗമാണ്. മുട്ടം എം.എം. ആശുപത്രിയിലും ഈരാറ്റുപേട്ട സൺറൈസ് ആശുപത്രിയിലും നഴ്‌സായി സേവനമനുഷ്ഠിച്ചിട്ടുണ്ട്. സാമൂഹിക–പൊതുപ്രവർത്തന രംഗത്ത് സജീവമായിരുന്നു. ഇന്നലെ കേരളോത്സവ സംഘാടനത്തിൽ പങ്കെടുത്ത അന്നമ്മ പിറ്റേന്ന് രാവിലെ വിനോദയാത്രയ്ക്ക് ഒരുങ്ങുന്നതിനിടെ കുഴഞ്ഞുവീഴുകയായിരുന്നു. ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

സൗജന്യ നേത്ര പരിശോധന ക്യാമ്പ് നടത്തപ്പെട്ടു

noreply@blogger.com (meenachilnews) — Sun, 08 Nov 2026 12:30:56 +0000

യൂത്ത് കോൺഗ്രസ് പൂഞ്ഞാർ തെക്കേക്കര മണ്ഡലം കമ്മിറ്റിയുടെയും അഹല്യ ഫൗണ്ടേഷൻ ഹോസ്പിറ്റലിന്റെയും സംയുക്താഭിമുഖ്യത്തിൽ ഇന്ന് രാവിലെ 9 30 മുതൽ 12. 45 വരെ സൗജന്യ നേത്ര പരിശോധന ക്യാമ്പ് നടത്തപ്പെട്ടു. ക്യാമ്പ് പൂഞ്ഞാർ എംഎൽഎ അഡ്വക്കറ്റ് സെബാസ്റ്റ്യൻ എം ജെ ഉദ്ഘാടനം ചെയ്തു. യൂത്ത് കോൺഗ്രസ് മണ്ഡലം ജോബിൻ വിളക്കുന്നേൽ അധ്യക്ഷത വഹിച്ചു

.കുന്നോന്നി യൂണിറ്റ് പ്രസിഡന്റ് ജെസ്വിൻ ജോർജ് സ്വാഗതം ആശംസിച്ചു യൂത്ത് കോൺഗ്രസ് അസംബ്ലി വൈസ് പ്രസിഡന്റ് അഡ്വക്കറ്റ് ബോണി തോമസ് എമൽ ജോണി വയലിൽ പെരിങ്ങുളം യൂണിറ്റ് പ്രസിഡന്റ് ജ്യോതിഷ് ദാസ് കോൺഗ്രസ് നേതാക്കളായ എം സി വർക്കി ജോർജ് സെബാസ്റ്റ്യൻ സാജൻ വാഴയിൽ റെമി പെരിങ്ങുളം ജോഷി പെരിങ്ങുളം തുടങ്ങിയ ഒട്ടനവധി യൂത്ത് കോൺഗ്രസ് കോൺഗ്രസ് നേതാക്കൾ സാന്നിധ്യം വഹിച്ചു ക്യാമ്പിൽ നൂറോളം ആളുകൾ പങ്കെടുത്തു.

പൂഞ്ഞാർ ഈട്ടിക്കൽ ദേവകി അന്തരിച്ചു

noreply@blogger.com (meenachilnews) — Sun, 08 Nov 2026 12:13:38 +0000

പൂഞ്ഞാർ ഈട്ടിക്കൽ പരേതനായ മാധവന്റെ ഭാര്യ ദേവകി (99) അന്തരിച്ചു. സംസ്കാരം നവംബർ 9 തിങ്കളാഴ്ച രാവിലെ 11 മണിക്ക് വീട്ടുവളപ്പിൽ. പരേത ചേന്നാട് പിണമറുകിൽ കുടുംബാംഗമാണ്. മക്കൾ: രഘു (റിട്ടയേഡ് HNL), രാധാമണി (റിട്ടയേഡ് ടീച്ചർ), ശോഭന, മധു (PWD Contractor), രാജീവൻ (റിട്ടേർഡ് ജോയിന്റ് ഡയറക്ടർ കോ-ഓപ്പറേറ്റീവ് ഡിപ്പാർട്ട്മെന്റ്). മരുമക്കൾ: ലളിത, ശേഖരൻ(പരേതൻ), രഘുനാഥൻ, ഓമന, ശ്രീജ.

അപകടങ്ങളിൽ മൂന്നു പേർക്ക് പരിക്ക്

noreply@blogger.com (meenachilnews) — Sun, 08 Nov 2026 10:59:49 +0000

വിവിധ അപകടങ്ങളിൽ പരുക്കേറ്റ 3 പേരെ ചേർപ്പുങ്കൽ മാർ സ്ലീവാ മെഡിസിറ്റിയിൽ പ്രവേശിപ്പിച്ചു. ബസും ബൈക്കും കൂട്ടിയിടിച്ചു രാമപുരം സ്വദേശി ഷൈൻ ജോസഫിന് ( 45 )പരുക്കേറ്റു. 2.30 യോടെയാണ് അപകടം. തൊടുപുഴയിൽ വച്ച് തെരുവുനായയെ ഇടിച്ച ശേഷം ബൈക്ക് നിയന്ത്രണം വിട്ട് മറിഞ്ഞ് തൊടുപുഴ സ്വദേശി മനു തോമസിന് ( 21 ) പരുക്കേറ്റു. രാവിലെ 5.30 യോടെയാണ് അപകടം . ഇന്നലെ രാത്രി രാമപുരത്ത് വച്ച് ബൈക്ക് നിയന്ത്രണം വിട്ട് മറിഞ്ഞ് രാമപുരം സ്വദേശി പി.ജി ജോണിക്ക് ( 5 2 ) പരുക്കേറ്റു.

സൗജന്യ മെഡിക്കൽ ക്യാമ്പ് നടത്തി

noreply@blogger.com (meenachilnews) — Sun, 08 Nov 2026 06:52:43 +0000

പാലാ മാർ സ്ലീവാ മെഡിസിറ്റിയുടെ നേതൃത്വത്തിൽ മംഗളാരം സെൻ്റ് സെബാസ്റ്റ്യൻസ് പള്ളിയുമായി സഹകരിച്ച് സൗജന്യ മെഡിക്കൽ ക്യാമ്പ് നടത്തി. വികാരി റവ ഫാ. ജോസഫ് മുണ്ടയ്ക്കൽ ഉദ്ഘാടനം ചെയ്തു.

.മാർ സ്ലീവാ മെഡിസിറ്റി ജനറൽ മെഡിസിൻ വിഭാഗം സീനിയർ കൺസൾട്ടൻ്റ് ഡോ. ജൂബിൽ ജോസ് , ജെയ്സൺ കളപ്പുര എന്നിവർ പ്രസംഗിച്ചു. ക്യാമ്പിന് ജനറൽ മെഡിസിൻ , പൾമണറി മെഡിസിൻ , ഗൈനക്കോളജി , ഹോമിയോപ്പതി വിഭാഗങ്ങൾ നേതൃത്വം നൽകി.