பிறப்பொக்கும் எல்லா உயிர்க்கும்

தகவல் களம் !

2012-05-25T23:41:00.001-07:00

ஏர்பஸ் ஏ 380 ரக விமானம் போலவே ஒரு உணவகம் சீனாவில் திறக்கப்பட்டுள்ளது. சாங்கிங் நகரில் இருக்கும் 'ஸ்பெஷல் கிளாஸ்' என்ற இந்த உணவகம் ஒரே நேரத்தில் 110 பேர் சாப்பிடலாம். இருக்கைகள், உள் அலங்காரம் எல்லாமே விமானம் போல இருக்கிறது. பரிமாறுகிறவர்கள் விமானப் பணிப் பெண் போலவே உடை அணிந்திருப்பார்கள். விமானத்தில் பறக்க முடியாதவர்கள் இங்கே சாப்பிட்டு திருப்தி அடையலாம். குடும்பத்தோடு சாப்பிட தனி அறைகளும் உண்டு.

இயற்கையின் விசித்திரங்களை அல்பட்ராஸைத் தவிர வேறெந்த பறவையைக் கொண்டும் விளக்கிட முடியாது. காலங்காலமாக நாம் அறிந்ததைவிட, இந்தப் பறவைகள் எவ்வளவு தூரம் பறக்கின்றன என்பதை செயற்கைக் கோள்கள் நமக்குக் காட்டியுள்ளன. பழுப்புத் தலையுள்ள அல்பட்ராஸ் பறவையால் புவியை 42 நாட்களில் வட்டமடிக்க முடிகிறது. ஒரு அல்பட்ராஸினால், புவியின் சுற்றளவைப் போல 3 மடங்கு தொலைவை ஒரே ஆண்டில் கடக்க முடியும். கிட்டத்தட்ட 3 மீட்டர் நீளமுள்ள இதன் இறக்கைகளை நீண்ட தூரப் பயணத்தின்போது இது பயன்படுத்துவதே இல்லை என்பது இன்னொரு ஆச்சரியம்.

அமெரிக்க வெண்ணிற நெற்றிக் கழுகை விட இது இருமடங்கு எடை கொண்டிருந்தாலும், காற்றைக் கிழித்துச் செல்லும் வேகம் அதிகம். அல்பட்ராஸ் காற்றை எல்லா வகையிலும் பயன்படுத்திக் கொண்டு கோணல்மாணலாக ஜிக்ஜாக் வடிவம் போல பறக்கிறது. அல்பட்ராஸின் இதயத் துடிப்பு அது ஓய்வெடுக்கும் போது இருப்பதைவிட, பறக்கும்போது குறைவு ! இறக்கை மற்றும் மூட்டுகளில் உள்ள லாக் அமைப்பு காரணமாகவே, இது பறக்கும்போது இயங்குவதில்லை.

அல்பட்ராஸின் தனித்துவமிக்க அளவு, ஆற்றல், இடைவிடாது மிகமிக நீண்ட தூரம் பறக்கும் தன்மை ஆகியவை பார்ப்பவரை தடுமாறச் செய்யும்.பறவை பிரியர்களுக்கு இது அற்புத விஷயம்....

'இந்த பறவையைப் போல உள் இயங்கும் ஆற்றலைக் கொண்டே நம் வாழ்க்கை பயணத்தை மேற்கொள்ளவேண்டும்' என்கிறார் ஒரு தத்துவ ஞானி.

இப்பறவைகள் இடம்பெயர்வதோடு நிறுத்தாமல், பாதையை நினைவில் வைத்துக் கொண்டு, மீண்டும் தங்கள் கூட்டுக்கே திரும்பிவிடுவதும் ஒரு புதிர்தான்!

குதிரை மேல் அமர்ந்தபடி இருக்கும் போர் வீரர்கள், தளபதிகள் சிலைகளை செதுக்கவும் ஒரு மரபு இருக்கிறது. குதிரை நான்கு கால்களையும் தரையில் பதித்திருந்தால், அந்த சிலையில் இருப்பவர் இயற்கையாக மரணம் அடைந்ததாக அர்த்தம். குதிரையின் ஒரு கால் அந்தரத்தில் இருந்தால், போரில் காயம்பட்டு அதன்பிறகு வீரர் இறந்ததாக அர்த்தம். குதிரையின் இரண்டு கால்கள் அந்தரத்தில் இருந்தால், போர்களத்திலேயே வீரர் இறந்ததாக அர்த்தம்.

தகவல் : லோகேஷ்.

படம் சொல்லும் சேதி

2012-05-23T21:40:00.000-07:00

ஹூண்டாய் நிறுவனம் ஐ 30 காரை அறிமுகம் செய்கிறது. இந்தக் காரின் வலுவை பரிசோதிக்க,இங்கிலாந்தில் இருக்கும் நோவ்ஸ்லி விலங்கியல் பூங்காவில் கொண்டுபோய் விட்டுவிட்டார்கள். பபூன் குரங்குகள் பல மணிநேரம் எத்தனையோ அட்டகாசங்கள் செய்தும், எதுவும் ஆகவில்லையாம் !

புகழ்பெற்ற அமெரிக்க சிற்பி ஜெஃப் கூன்ஸ் கடந்த 94-ம் ஆண்டு முதல் 2006-ம் ஆண்டு வரை செதுக்கிய பல சிற்பங்கள் இப்போது சுவிட்சர்லாந்தில் கண்காட்சிக்கு வைக்கப்பட்டுள்ளன. 'உடைந்த முட்டை' என்ற இந்த சிற்பமும் அதில் ஒன்று. வாழ்க்கையின் நிலையின்மையைப் பேசும் சிற்பங்கள் அவருடையவை.

'நேஷனல் ஜியாக்ராஃபிக்' இதழுக்காக இம்மானுவேல் கூப் கலோமிரிஸ் என்ற புகைப்படக் கலைஞர் எடுத்த அரிய புகைப்படம் இது. கனடா நாட்டின் ஒரு ஏரியில், பனிபொழிவு அதிகம் இல்லாத ஒரு பனிக்கால பகலில் எடுக்கப்பட்டது. பனியாக உறைந்திருக்கும் ஏரி நீர் பாளம் பாளமாக பிளந்திருக்க, அதற்குள் காளான்கள் போல வெள்ளையாக தெரிபவை....உண்மையில் ஊ ற்றுக் குமிழ்கள் ! ஏரியின் அடியிலிருந்து வரும் இயற்கை எரிவாயு, தண்ணீர் உறைந்ததும் அப்படியே குமிழ்களாக சிறைப்பட்டிருக்கிறது.

தகவல் : முத்தாரம் இதழ்.

விண் உலகின் மிகப் பெரிய தொலைநோக்கி!

2012-05-05T04:39:00.008-07:00

(Russian Largest Space Telescope in Orbit-Radio Astron)

சமீபத்தில் கஜகஸ்தான் நாட்டிலிருக்கும் ஏவுதளத்தில் இருந்து ரஷ்யா ஃபெடரேஷன் ஏவியுள்ள விண்கலம்தான் 'ரேடியோ ஆஸ்ட்ரான்'. இந்த விண்கலம், பூமிக்கு மேலே விண்ணில் தந்து சுற்றுவட்டப் பாதையில் நிலைகொள்ளும்போது, இதிலுள்ள 300 மீட்டர் விட்டம் கொண்ட ஆன்டெனா விரியும்.

பூமியில் பல இடங்களில் ஏற்கனவே உள்ள தொலைநோக்கி சிக்னல்களுடன் இது இணைக்கப்படும். அப்போது இந்த விண்கல ஆன்டெனா உலகின் மிகப் பெரிய தொலைநோக்கியாக மாறிவிடும். அப்போது அதன் விட்டம் 3 லட்சத்து 50 ஆயிரம் கிலோ மீட்டராக இருக்கும். கற்பனை செய்து பார்க்கவே முடியாத அளவுக்கு இதன் சிக்னல்கள் மிகத் துல்லியமாக இருக்கும்.

இந்த ஆண்டெனாவை 'இன்டெர்பெர்ரோமெட்ரி' (Interferometry) என்ற தொழில்நுட்பத்தின் உதவியால் பூமியில் இருந்து கொண்டே இயக்க முடியும். விஞ்ஞானிகள் இந்த தொலைநோக்கியை பயன்படுத்தி, தொலை தூரத்தில் இருக்கும் பிரபஞ்சத்தின் பகுதிகளையும் துல்லியமாகப் படமெடுக்கலாம். எனவேதான் இந்த 'ரேடியோ ஆஸ்ட்ரான்' விண்கலம் உலகின் மிகப் பெரிய தொலைநோக்கியாக இருக்கும் என்று கணிக்கப்பட்டுள்ளது.

ஏற்கனவே இதுபோல பல ரேடியோ தொலைநோக்கிகள் விண்ணில் அமைக்கப்பட்டுள்ளன. இருந்தாலும், இந்த ரேடியோ ஆஸ்ட்ரானுக்கென ஒரு தனிச் சிறப்பு உள்ளது. அதாவது, பூமிக்கு மேலே 10 ஆயிரம் கி.மீ. முதல் 3 லட்சத்து 90 ஆயிரம் கி.மீ.வரை உயர்ந்தும் தாழ்ந்தும் நகரும் திறன் கொண்டது இந்த விண்கலம்.

பூமியில் உள்ள கட்டுப்பாட்டு அறையில் இருந்து இதன் உயரத்தை கூட்டவோ, குறைக்கவோ முடியும். அமெரிக்காவின் மேற்கு வர்ஜீனியா, ஜெர்மனி உள்ளிட்ட பல பகுதிகளில் உள்ள தொலைநோக்கிகள் இந்த ரேடியோ ஆஸ்ட்ரான் சிக்னல்கள் மூலம் இணைக்கப்படும்.

எம்.87 எனப்படும் ஒரு நட்சத்திர மண்டலத்தின் நடுப்பகுதியில் ராட்சத கருப்பு ஓட்டை ஒன்று உள்ளது. இந்தக் கருப்பு ஓட்டையில் பல மர்மங்கள் இருப்பதாக ஆராய்ச்சியாளர்கள் கருதுகின்றனர். அந்த மர்மப் பிரதேசத்தை துல்லியமாகப் படமெடுக்க வேண்டும் என்ற நோக்கில்தான் இந்த விண்கலம் செலுத்தப்பட்டுள்ளது.

காரணம், சாதாரண விண்வெளி தொலைநோக்கியைக் காட்டிலும் இது 10 ஆயிரம் மடங்கு அதிக துல்லியமாக செயல்படக் கூடியது. இன்னும் ஐந்து ஆண்டுகளுக்கு விண்ணில் இருக்கப் போகும் இந்த 'ரேடியோ ஆஸ்ட்ரான்' விண்கல தொலைநோக்கியிலிருந்து வினாடிக்கு 144 மெகாபைட்ஸ் வேகத்தில் தகவல்களைப் பெற முடியும்.

தகவல் : முக்கிமலை நஞ்சன்.

வந்தாச்சு பறக்கும் கார் !

2012-05-04T03:14:00.006-07:00

(Flying Car - Terrafugia)

தரையில் சென்று கொண்டிருக்கும் நம் கதைநாயகனின் கார் பட்டென்று மேலே பறந்து வில்லன்களைத் தாண்டுமே... அந்த உட்டாலக்கடி எல்லாம் இனி உண்மையாகப் போகிறது. ஆம், கார் பாதி-விமானம் பாதி' கலந்து செய்த கலவையாக அமெரிக்காவில் உருவாகியிருக்கிறது ஒரு ஜகஜால கார்.

கடந்த ஏப்ரல் 6-ல் நடைப்பெற்ற நியூயார்க் சர்வதேச ஆட்டோ கண்காட்சியில் ஆனானப்பட்ட ஃபோர்டு, நிஸ்ஸான், டொயோட்டாவெல்லாம் வாய்பிளந்து நிற்க, ஒரு குட்டி நிறுவனம் தயாரித்த இந்த அழகிய கார், இறக்கை விரித்துப் பறந்து காட்டி அசத்தியிருக்கிறது.

இந்தப் பறக்கும் காரைத் தயாரிக்க வேண்டும் என்ற ஒரே குறிக் கோளோடு, 'மசாசூசெட்ஸ்' தொழிநுட்ப நிறுவனத்தில் படித்த தொழிநுட்ப பொறியாளர்கள் மற்றும் விமான ஓட்டிகள் 25 பேர் இணைந்து ஆரம்பித்த குட்டி நிறுவனம்தான் டெர்ராஃப்யூஜியா (Terrafugia).2006 - ல் துவங்கப்பட்ட இந்த நிறுவனம், ஆறு வருட ஆராய்ச்சிக்குப் பிறகு இன்று நினைத்ததை சாதித்திருக்கிறது.

'டிரான்ஸிஷன்.... (Transition) அதாவது, மாற்றம் என்றே பெயர் சூட்டப்பட்டிருக்கும் இந்தக் கார், மோட்டார் உலகையே மாற்றப் போவது நிச்சயம்' என்று நம்பிக்கைத் தெரிவித்திருக்கிறார் டெர்ராஃப்யூஜியா நிறுவனத்தின் தலைமை செயல் அதிகாரி கார்ல் டைட்ரிச்.

சராசரி அளவுள்ள உங்கள் வீட்டு கார் நிறுத்துமிடத்தில் இது அடங்கிவிடும். இதை சாலையில் சாதாரணமாக விமான நிலையம் வரை ஓட்டிச் செல்ல முடியும். அங்கிருக்கும் ரன்வேக்குப் போனதும் இதை விமான மோடுக்கு மாற்றி இறக்கை விரித்துக் கிளம்பலாம். இது அதிகபட்சம் 740 கி.மீ. தூரம் வரை பயணிக்கும்.

அந்த தூரத்துக்குள் உள்ள எந்த நகரத்திலும் நீங்கள் தரையிறங்கிவிட்டு மீண்டும் இதைக் காராக்கிக் கொள்ளலாம். இரண்டு பேர் மட்டும் பயணிக்கக் கூடிய இந்தக் கார், சாதாரண பெட்ரோலிலேயே இயங்கும். 1400 அடி உயர வரை பறக்கும்' என்று தொழில்நுட்ப விவரங்களை அடுக்குகிறார் இதை சோதனை ஓட்டம் செய்து காட்டும் பைலட்டான பில் எம்டீர்.

இந்த வருட இறுதிக்குள் இந்தக் கார் விற்பனைக்கு வரும் என்று தெரிகிறது. விலை சுமார் 3 லட்சம் டாலர்....அதாவது 1 கோடியே 53 லடசத்து 7470 ரூபாயாம் !

"எவ்வளவு காசியிருந்தாலும் இந்தக் காரை சுலபமாக வாங்கிவிடமுடியாது. "ஸ்போர்ட் பைலட்' ஓட்டுனர் உரிமம் வைத்திருப்பவர்களே இதை வாங்க முடியும்' என்கின்றனர் மோட்டார் வல்லுனர்கள்.

தகவல்: கோகுலவாச நவநீதன்.

என் பெயர் அம்பேத்கர்!

2012-05-02T02:41:00.003-07:00

'அம்பேத்கர்னு பேர்வெச்சுக்கிட்டு தலித்களுக்குத் துரோகம் பண்றான்’பார் ஒரு அரசியல்வாதி. 'அம்பேத்கர்னு பேரைப் பார்த்தாலே தெரியலையா? தலித்தா இல்லாதவங்களுக்கு இவன்கிட்ட என்ன நியாயம் கிடைக்கும்’ பார் இன்னொரு அரசியல்வாதி. இப்படித்தான் நான் கடந்த பல வருஷங்களா அவங் கவங்க விருப்பங்களுக்கு ஏத்த படி முத்திரை குத்தப்பட்டு இருக்கேன். அதனாலேயே, அம்பேத்கராகிய நான் யாருங்கிறதை நிரூபிக்க ஒவ்வொரு கணமும் கவனமாக இருக்க வேண்டி இருக்கு'' என்று புன்னகைக்கும் அம்பேத்கர், கடலூர் மாவட்ட உணவுக் கடத்தல் தடுப்புப் பிரிவின் ஆய்வாளர்.

அம்பேத்கர் என்றால், ஒரு தலைவரின் முகம் நினைவுக்கு வரும் முன்னர்... அவர் சாதியும் நினைவுக்கு வரும் மோசமான சூழலில்தான் நம் நாடு இன்னும் இருக்கிறது. அம்பேத்கர் என்று தனக்கு வைக்கப்பட்ட பெயர் காரணமாக இவர் அனுபவித்த துயரங்களின் பட்டியல்...

''விழுப்புரம் மாவட்ட தியாகதுருவம்தான் என் சொந்த கிராமம். வளர்ந்தது, வேப்பூர் கிராமத்தில். சுகாதாரத் துறையில் தொழுநோயாளிகளுக்குச் சிகிச்சை அளிக்கும் கிராம மருத்துவர் என் அப்பா கதிர்வேலன். தீவிரமான கடவுள் பக்தரான அவருக்குத் தந்தை பெரியாரின் கொள்கைகள் மீது ஈர்ப்பு ஏற்பட, நாத்திகரா மாறினார். திராவிட இயக்கம், அம்பேத்கர், பெரியார்னு ஈடுபாடு காட்டினார். எனக்கு பரணீதரன்னுதான் முதலில் பேர்வெச்சு இருந்தாங்க. ஆறு வயசுல வேப்பூர் ஊராட்சி ஒன்றியத் தொடக்கப் பள்ளியில் சேர்த்தப்ப, என் பேரை அம்பேத்கர்னு எழுதச் சொன்னார் அப்பா. அன்னையிலேர்ந்து நான் அம்பேத்கர் ஆயிட்டேன்.

பள்ளிக் காலங்களில் எனக்கு முத்திரைகள் எதுவும் இல்லை. காரணம், சின்ன ஊர். எல்லோருக்கும் எல்லோரையும் தெரியும். சட்டம் படிக்க சென்னை அம்பேத்கர் சட்டக் கல்லூரிக்கு வந்தேன். எல்லை கடந்து அப்பதான் சாதிய அடையாளங்களோட வடிவங்கள் தெரிய ஆரம்பித்தன. சேர்ந்த புதிதில், 'எவன் உன்னை ராகிங் பண்ணுறான்னு பார்ப்போம்’னு என்னைப் பிடிச்சுப் பத்திரப்படுத்துச்சு ஒரு குழு. என் பெயரே எனக்கு ஒரு பக்கச் சார்பைக் கொடுத்துச்சு. அடுத்து போலீஸ் வேலைக்குத் தேர்வா னேன். ஆவடி வீராபுரத்தில் பயிற்சி.

தமிழ்நாடு முழுக்க 280 பேர் வந்திருந்தாங்க. வரிசையா ஒவ்வொருத்தர் பேரா சொல்லிக் கூப்பிட்டாங்க. அம்பேத்கர்னு என் பேரைச் சொல்லிக் கூப்பிட்டவுடனே அத்தனை பேர் கண்ணும் என்னை மொய்க்க ஆரம் பிச்சுடுச்சு. அந்தப் பார்வைக்குத்தான் எத்தனை எத்தனை அர்த்தங்கள்?

'டேய்! இவன் நம்மாளுடா...’ 'ஓ... அவனா நீயி?’ங்கிற மாதிரி எத்தனையோ பார்வைகள்!

பயிற்சிக் காலத்தின்போது பலரும் வந்து சாதிரீதியாகத் தங்களுக்கு ஏற்படுற சிரமங்களை என்கிட்ட வந்து சொல்வாங்க. நான் ஆறுதல் சொல்லி அனுப்பிவைப்பேன். அப்படி வர்றவங்க எந்த நியாயத்தின்பேரில் என்கிட்ட வர்றாங்கங்கிறதை என்னால புரிஞ்சுக்க முடிஞ்சுது.

அப்புறம், போலீஸ் சப் இன்ஸ்பெக்டராக கடலூர் மாவட்டம், சேத்தியாத்தோப்பில் வேலைக்குச் சேர்ந்தேன். சாதி தொடர்பான சச்சரவுகளுக்குப் பஞ்சமே இல்லாத பகுதி அது. 2000-ல் புளியங்குடிங்கிற இடத்தில் ஒரு சமூகத்தைச் சார்ந்த மூணு பேரைக் கொடூரமாக் கொன்னுட்டாங்க. கடலூர் மாவட்டமே பற்றி எரியுற அளவுக்குப் பதற்றம். உயர் அதிகாரிகள் அத்தனை பேரும் வந்துட்டாங்க. என்னோட உயர் அதிகாரியாக இருந்த நரசிம்மன், 'பாடியைத் தூக்கி ஆம்புலன்ஸில் வைப்பா’ன்னார். நான் போய் பிணத்தைத் தூக்கினேன். உடனே, அங்கிருந்த சிலர் 'பிணத்தைத் தூக்கக்கூட நம்ம போலீஸ்தாண்டா வர்றான்’னாங்க. அப்போ நிலைமையைச் சுமுகமான சூழலுக்குக் கொண்டுவந்தார் சைலேந்திரபாபு.

ஆனா, அம்பேத்கர்ங்கிற பேர் காரணமாவே நான் அந்தச் சம்பவத்தப்ப ஒதுங்கி இருக்க வேண்டிய நிலை. ரவுண்ட்ஸ் போனால், குடிக்கத் தண்ணீர்கூடக் கொடுக்க மாட்டாங்க. சிலர் வீட்டிலேயோ, விருந்து கொடுக்காத குறையாக உபசரிப்பாங்க. எல்லாம் 'அம்பேத்கர்’ங்கிற பேருக்குக் கிடைக்கிற மரியாதை.

என் மேல, 'குறிப்பிட்ட சமூகத்தைச் சார்ந்தவர் என்பதால், பாரபட்சமாக நடந்துகொள்கிறார்’னு ஒரு வழக்கு பதியப்பட்டு, 10 வருஷங்களுக்கு மேல விசாரணை நடந்துக்கிட்டு இருக்கு. கடலூர் மாவட்டத்துக்கு வந்து 12 வருஷங்கள் ஆகுது. தப்பு செஞ்சா, ஒரு போலீஸ் அதிகாரிங்கிற முறையில் நான் என்ன செய்யணுமோ, அதைப் பாரபட்சம் இல்லாம செய்வேன்கிறதை எல்லாத் தரப்பு மக்கள்கிட்டேயும் நிரூபிச்சு இருக்கேன்.

என் சங்கடங்களைத் தெரிஞ்சுகிட்ட எங்கப்பா ஒருகட்டத்துல, 'உனக்கு நான் சிரமம் கொடுத்துட்டேனோ? நீ வேணும்னா, உன் பேரை மாத்திக்கப்பா’னு சொன்னார். 'அரை நூற்றாண்டுக் காலம் இந்த நாட்டோட அடித்தட்டு மக்களுக்காகப் போராடியவரோட பேர் என் பேர்ங்கிறது எனக்குப் பெருமைதான்பா. வேணாம்பா’ன்னுட்டேன்.

அண்ணல் அம்பேத்கரை இந்தச் சமூகம் இன்னமும் ஒரு சாதியின் தலைவராகப் பார்க்குதேங்கிறதுதான் என் வேதனை'' என்று முடித்தார் அம்பேத்கர்.

இவ்வளவு கஷ்டங்களையும் அனுபவித்த இந்த அம்பேத்கர், பிறப்பால் தலித் அல்ல. அம்பேத்கரின் பெயரைவைத்துக்கொண்டு இருப்பதாலேயே இவர் அனுபவிக்கும் கொடுமைகள் இப்படி என்றால், உண்மையான அடித்தட்டு மக்கள் படும் துன்பம்?

நன்றி : நிருபர் டி.அருள் எழிலன்

படம் : ஜெ.முருகன் - ஆனந்த விகடன்

புகழ் பெற்ற எழுத்தாளர்கள் எழுதும் விதம்!

2012-04-29T20:35:00.000-07:00

எழுத்தாளர் ஆல்க்ரென்

ஆல்க்ரென் எனும் எழுத்தாளர், சில சுவையான சம்பவங்களை மட்டுமே யோசிப்பார். அவற்றை எழுதத் தொடங்கி ஒன்றுக்கொன்று முடிச்சுப் போடும் போதுதான் கதைக் கரு என்ற ஒன்றே உருவாகும்.

மாரியக் என்ற எழுத்தாளர் எழுதத் தொடங்கிவிட்டால் அது முடியும் வரை எழுதிக் கொண்டே போவார். ஒரு நாவல், எந்தக் காரணத்துக்காகவும் ஒரு நிமிடம் கூட தடைபட்டு நிற்கக்கூடாது என்பது இவருடைய கொள்கையாகும். உணவு, உறக்கம் என எல்லாவற்றையும் மறந்து நாள் கணக்கில் இவர் நாவல்கள் எழுதியுள்ளார்.

அன்டோனி பார்சன் என்பவர் துப்பறியும் நாவலாசிரியர். உணவுக்காகக் கூட தன் நாவலை இடையில் நிறுத்தி வைக்க மாட்டார். ஆனால், எழுதி முடித்த பின்பு வயிறு முட்ட உணவு சாப்பிட்டு விட்டு இரண்டு நாட்கள் தூங்குவாரம்.

எழுத்தாளர் ட்ரூமன் கபோட்

ட்ரூமன் கபோட், தான் எழுத நினைக்கும் கதையை வரிக்கு வரி சிந்தித்து மனதுக்குள் கற்பனையாக ஒரு முறை எழுதி விடுவாராம். அதன் பின்புதான் முதல் வரியையே எழுதத் தொடங்குவாரம்.

எழுத்தாளர் பெர்னார்ட் ஷா

ஜார்ஜ் பெர்னார்ட் ஷா ஒரு நாளைக்கு ஐந்து பக்கங்களுக்கு மேல் ஒரு வார்த்தை கூட எழுதமாட்டார். ஐந்தாவது பக்கம் எழுதி முடிக்கும்போது ஒரு வாக்கியம் பாதி எழுதப்பட்டிருந்தால் கூட, எழுதுவதை நிறுத்திவிட்டு அதை மறுநாள்தான் எழுதத் தொடங்குவார்.

எழுத்தாளர் சார்லஸ் டிக்கன்ஸ்

சார்லஸ் டிக்கன்ஸ் எழுதும்போது தன் எழுத்தில் உள்ள நகைச்சுவைப் பகுதியைப் படித்து தானே வயிறு குலுங்கச் சிரிப்பார். சோகமாக எழுதும்போது, அந்தப் பக்கம் முழுவதும் அவர் கண்ணீரால் நனைந்திருக்கும். அந்த அளவுக்கு உணர்ச்சிப் பிழம்பானவர்.

எழுத்தாளர் எட்கார்ட் வாலஸ்

எட்கார்ட் வாலஸ் என்பவர், வெள்ளிக் கிழமையில்தான் எழுத ஆரம்பிப்பாராம். வெள்ளி இரவு உணவு முடித்து பின் பேனாவைக் கையில் எடுத்தால், திங்கட் கிழமை காலை ஒன்பது மணிக்குள் முடித்து விடுவார். இடையில் உணவும் இல்லை தூக்கமும் இல்லை. கற்பனை வளத்துக்காக தேநீர் மட்டும் நிறையக் குடிப்பாராம்.

கவிஞர் ஷெல்லி

ஷெல்லி கவிதைகள் எழுதும்போது, அவருடைய வாய் எதையாவது மென்று கொண்டே இருக்கும். அப்பொழுதுதான் கறபனை தடைபடாமல் பெருக்கெடுத்து ஓடும்.

இமானுவேல் பர்க் தனது கற்பனை வளம் குன்றும்போதெல்லாம் சூடான நீரில் கால்களை நனைத்துக் கொண்டே சிந்திப்பார். அப்பொழுதுதான் அவருக்கு கற்பனை சுரக்குமாம்!

அப்பாஸ் என்ற எழுத்தாளர் மிகவும் இரைச்சலும் கூச்சலும் நிறைந்த மக்கள் சந்தடியுள்ள இடத்தில்தான் உட்கார்ந்து எழுதுவார். இதற்காகவே கூச்சல் மிகுந்த ஓட்டலை நாடிச் சென்று அங்கே அமர்ந்து எழுதுவாராம்!.

தகவல் : மெர்வின்.

கருப்பு மருந்துகளின் தந்தை!

2012-04-28T02:09:00.000-07:00

Louis Pasteur

பாம்பு,தேள், போன்ற விஷ ஜந்துகளுக்கு மட்டுமல்ல...தான் வீட்டில் வளர்க்கும் செல்ல நாய்க் குட்டிகளிடமும் கூட மனிதன் அப்போதெல்லாம் பயந்து நடுங்கிய காலம் அது. ஆம், வெறிநாய்க்கடி என்பது அப்போதெல்லாம் ஓர் உயிர்கொல்லி நோய். எந்த மருந்துக்கும் கட்டுப்படாத அந்த ராபீஸ் நோயைக் கட்டுபடுத்தினார் லூயி பாஸ்டர் என்ற மருத்துவ மேதை.

பிரான்ஸில் 1822-ம் ஆண்டு டிசம்பர் 27-ம் தேதி பிறந்த லூயி பாஸ்டர், சிறுவயது முதலே வேதியியல் பாடத்தில் அதிக கவனம் செலுத்தினார். அந்த ஆர்வம்தான், படிப்பை முடித்தவுடன் சிறிய அளவில் ஒரு ஆய்வுக் கூடத்தை நிறுவவும் அவரைத் தூண்டியது. ஒரு முறை லூயி தன் ஆய்வுக் கூடத்தில், வேதியியல் மாற்றங்களை உற்று நோக்கிக் கொண்டிருந்தபோது, கிருமிகள் எனப்படும் நுண்ணுயிரிகளை கவனித்தார். உலகையே வருத்திக் கொண்டிருக்கும் நோய்களையும் இந்த நுண்ணுயிரிகளையும் பொருத்திப் பார்த்தார். எல்லா நோய்களுக்கும் அடிப்படைக் காரணம் கிருமிகளே, கிருமிகளின்றி ஓரணுவும் அசையாது என்று தன் ஆராய்ச்சிகளின் மூலம் நிரூப்பித்தார்.

நோய்களுக்கான காரணத்தைக் கண்டறிந்ததோடு நிற்காமல், தடுப்பு மருந்துகளை உருவாக்கும் முயற்சியிலும் தீவிரமாக இறங்கினார்.முதலில் பால் போன்ற திரவங்களில் உள்ள தீய பாக்டீரியாக்களை அழிக்கும் வழிமுறையைக் கண்டறிந்தார். இன்றுவரை பால் தொழிற்சாலைகளில் பின்பற்றப்படும் இந்த வழிமுறை, லூயி பாஸ்டரின் பெயரிலேயே 'பாஸ்டரைஸிங்' என்று அழைக்கபடுகிறது.

அதன்பின் கடும் முயற்சியின் விளைவாக, ஆந்த்ராக்ஸ் மற்றும் வெறிநாய்க்கடி (ராபீஸ்) கிருமிகளைக் கட்டுபடுத்தும் வழி முறையைக் கண்டுபிடித்தார் லூயி.

1885-ம் ஆண்டில் ஜோசப் மெயிஸ்டர் என்ற ஒன்பது வயது சிறுவனை வெறிநாய் ஒன்று 15 முறை கடித்துவிட்டது. அன்றையை மருத்துவர்கள் அனைவரும் கை விரித்துவிட்ட நிலையில், அவனுக்கு லூயி தந்து தடுப்பு மருந்து மூலம் சிகிச்சை அளித்தார். உயிரையும் காப்பாற்றினார். அந்தச் சிகிச்சையின் வெற்றிக்குப் பிறகு, லூயி உலகம் முழுவதும் பிரபலமாகி, லட்சக்கணக்கான உயிர்களைக் காப்பாற்றினார்.

தனிப்பட்ட வாழ்க்கையில் தனது 5 குழந்தைகளில் மூவரை டைபாய்டு நோய்க்கு பலி கொடுத்தவர் லூயி. பிற்காலத்தில் அவர் டைப்பாய்டு மட்டுமல்லாமல், டைபஸ், மஞ்சள் காமாலை, டிப்தீரியா, இன்புளூயன்சா போன்ற நோய்களையும் தன் மருந்துகளால் கட்டுபடுத்திக் காட்டினார்.

இறுதியாக 1895-ம் ஆண்டு செப்டம்பர் 28-ம் தேதி... லூயி பாஸ்டர் என்ற பொக்கிஷத்தை இந்த உலகம் இழந்தது. மரணத்தோடு போராட அவர் கொடுத்துவிட்டுப் போன சில மருத்துவப் பொக்கிஷத்தை மரணத்தால் பறித்துக் கொள்ள முடியுமா என்ன ?

தகவல் : சி.பரத்.

நிலம்....நடுக்கம்.

2012-04-26T20:43:00.001-07:00

அருகருகே நகரும் இரண்டு பூமித் தட்டுகள் லேசாக உராயும்போது பெரிய அளவில் அழிவு இல்லை. அது லேசான நடுக்கமே. ஆனால், எதிரெதிர் திசையில் நகரும் இரண்டு பூமித் தட்டுகள் முட்டிக் கொள்ளும்போதுதான் பிரளயமே நடுங்குகிறது.

பொதுவாகவே பூமித் தட்டுகள் நகர்வது ரொம்ப குறைவான வேகத்தில்தான். ஆண்டுக்கு சில சென்டி மீட்டர்கள். ஆனால் முட்டிக்கொள்ளும்போது நீயா - நானா என்கிற அளவிற்கு கங்கணம் கட்டிக் கொள்கின்றன. இரண்டும் தட்டுகளும் ஆண்டுக்கணக்காக அப்படியே முட்டிக் கொண்டு நிற்கும். தட்டின் பின் பக்க சுமை இதை அழுத்தி முன்னால் தள்ளப் பார்க்கும். இப்படி ஒருபுறம் நகரமுடியாமல் தவிக்கும் இந்தத் தட்டுகளில் அழுத்தம் அதிகமாகிக் கொண்டே இருக்கும்.

ஸ்பிரிங் விளையாட்டு போலத்தான் இது. இருபுறமும் கைகளால் ஒரு ஸ்பிரிங்கை அழுத்திப் பிடித்திருக்கிறீர்கள். அதை அழுத்தி வைக்கும்போது எப்படியாவது இயல்பு நிலைக்கு திரும்ப முயற்சிக்கும். இரண்டு புறமும் பிடித்திருக்கும் கைகளை விட்டுவிடுகிறீர்கள். சட்டென அது விரிந்துவிடும் இல்லையா ? அதுபோல இரண்டு தட்டுகள் ஆண்டுக்கணக்கில் முட்டிக் கொண்டிருக்கும்போது சேரும் அழுத்தம் திடீரென சில நொடிகளில் வெளிப்படும். அந்த சக்தியின் வெளிப்பாடு மிகப் பயங்கரம்.

அப்போது அந்தத் தட்டுகள் நகர்ந்து, இத்தனை ஆண்டுகளாக பாக்கி வைத்திருந்த தூரத்தை ஒரே சமயத்தில் கடக்கப் பார்க்கும். இதில் ஒரு தட்டு பெரியதாகவும் இன்னொன்று சிறியதாகவும் இருந்தால் ஒரு தட்டு இன்னொரு தட்டிற்கு அடியில் கொஞ்ச தூரம் போய்விடும். அதன் பின் சில காலம் ஆட்டம் கண்டு கொண்டே இருக்கும். நிலை பெறுவதற்கு 6 மாதங்கள் கூட ஆகலாம்.

நன்றி : முத்தாரம் இதழ்.

நம்பினால் நம்புங்கள் !

2012-04-25T20:37:00.001-07:00

ஆச்சா என்கிற மரத்திலிருந்துதான் நாதஸ்வரம் இசைக் கருவி செய்யப்படுகிறது.

கிளியோபாட்ரா என்பது ஒரு அழகியின் பெயர் அல்ல. மாசிடோனிய இளவரசிகளின் பட்டத்துப் பெயரே கிளியோபாட்ரா.

நம் உடலிலேயே அதிக அளவு வேலை செய்வது நம் கைகளில் உள்ள கட்டை விரல்தான்.

இந்தியா - பாகிஸ்தான் என இரு நாடுகளுக்கும் எல்லைக் கோடாக அமைந்திருக்கும் கிராமத்தின் பெயர் யூரி.

தகவல் : டி. கார்த்திக்.

தேங்காய் நண்டு !

2012-04-24T20:40:00.001-07:00

(Coconut Crab-Chennai Museum)

"மனிதர்களில் பராக்கிரமசாலிகளை நாம் பாராட்டத்தான் செய்வோம். ஆனால், விலங்குகளில் மட்டும் பராக்கிரமசாலிகளை வசை பாடப் பழகிவிட்டோம். அப்படி நம்மிடம் கெட்ட பெயர் வாங்கிய பராக்கிரமசாலி தான் திருட்டு நண்டு எனப்படும் தேங்காய் நண்டு!"

-- காட்சிக்கு வைக்கப்பட்டிருக்கும் பாடம் செய்யப்பட்ட தேங்காய் நண்டைக் காண்பித்து இந்தத் தகவலைச் சொன்னார் சென்னை அருங்காட்சியகத்தின் விலங்கியல் பிரிவு காப்பாட்சியர் அசோகன். அப்படி என்ன பராக்கிரமம் இந்த நண்டுக்கு ? அதையும் அவரே விளக்குகிறார் ?

"நிலத்தில் காணப்படும் முதுகெலும்பற்ற விலங்கினங்களிலேயே இதுதான் மிகப் பெரியது. மூன்றடிக்கு மேல் நீளமும் நான்கு கிலோ வரை எடையும் இருக்கும். தண்ணீரில் வாழும் பெரும்பாலான நண்டுகளுக்கு மத்தியில்.... நிலத்தில், அதிலும் தென்னை மரங்கள் அடர்ந்த பகுதிகளில் அதிகம் வாழும் நண்டுகள் இவை. தென்னை மரத்தில் ஏறி தேங்காயைப் பறித்து அதன் நாரையும் உரித்து உடைத்து உட்கொள்வதால்தான் தேங்காய் நண்டு என்ற பெயரைப் பெற்றது.

மனிதர்கள் வாழக்கூடிய பகுதிக்கு இது வந்தால் அவ்வளவுதான். மனிதர்கள் பயன்படுத்தும் சட்டி,பானை இத்யாதிகளை எல்லாம் ஏதோ உணவுப் பொருள் என்று நினைத்து உருட்டிக் கொண்டு போய்விடும். அதனால்தான் திருட்டு நண்டு என்றும் பெயர் பெற்றது.

இந்த வகை நண்டுகள் கடல் நீரில்தான் முட்டைகளை இடும். முட்டையிலிருந்து வெளிவரும் குஞ்சுகள் சிப்பி, நத்தை,சங்கு, ஆமை போன்ற உயிரினங்களின் ஓடுகளில் ஒட்டிக்கொண்டு சிறிது காலம் வாழும்.கொஞ்சம் வளர்ச்சியடைந்தாலும் தரைக்கு வந்து நிலத்தில் குழிகளைத் தோண்டி, மெத்தென்று தேங்காய் நார்களைப் போட்டு அதில் வசிக்க ஆரம்பிக்கின்றன.

இந்தியப் பெருங்கடல் மற்றும் பசிபிக் கடல் தீவுகளில் அதிகம் வாழும் தேங்காய் நண்டுகள், பல நிறங்களிலும் காணப்படுகின்றன. நல்ல நுகரும் சக்தி இருப்பதால் இவை எளிதில் இரையைக் கண்டுபிடிக்கின்றன. பொதுவாக இது மற்ற நண்டினங்களிருந்து மாறுபட்ட் இருப்பதால் இதை உன்ன விரும்ப மாட்டார்கள்.

ஆனால், இந்த நண்டின் மாமிசத்தில் மருத்துவ குணம் உண்டென்று ஒரு புரளி உள்ளதால் சில நாடுகளில் இதை வேட்டையாடுவதும் உண்டு. இதனால் இந்த இனம் சில பகுதிகளில் முற்றிலும் அழியும் நிலைக்கு வந்துவிட்டது!" என்று அபயாமணி அடித்தார் அசோகன்.

இன்றுவரை நாம் ஆச்சரியப்படுவதற்கென்று இருக்கும் ஒன்றிரண்டு உயிரினங்களையும் நம் மூடநம்பிக்கைகள் அழித்துவிடக் கூடாது அல்லவா ?

தகவல் : டி.ரஞ்சித்.

படம் சொல்லும் சேதி !

2012-04-23T23:45:00.005-07:00

உலகின் மிகக் குட்டியான நாய் என்ற பெருமையைப் பெற்றிருக்கிறது இது. டாஷண்ட் கலப்பின குட்டியான இது அமெரிக்காவின் கலிபோர்னியாவில் பிறந்திருக்கிறது. பிறந்த குட்டியாக இருந்தபோது ஒரு ஸ்பூனுக்குள் அடங்கிவிட்டதாம். மூன்றரை இஞ்ச் நீளமே இருக்கும் இதற்கு, உலகின் மிகப் பெரிய பாப் பாடகியான பியான்ஸ் நோல்ஸ் பெயரை வைத்திருக்கிறார்கள்.

மனித இனம் நெருப்பைப் பயன்படுத்தத் தெரிந்து கொண்ட பிறகுதான் நாகரீகத்தை நோக்கிய முதல் பாய்ச்சல் நிகழ்ந்தது.எப்போது முதல் மனிதர்கள் நெருப்பைப் பயன்படுத்தினார்கள் என்பதில் மானுட ஆராய்ச்சியாளர்கள் மத்தியில் கருத்து வேறுபாடு நிகழ்கிறது. இதை தீர்க்கும் ஆதாரம் தென் ஆப்பிரிக்க நாட்டில் கிடைத்திருக்கிறது.

இங்கிருக்கும் ஒன்டர்வெர்க் குகையில் தொல்பொருள் ஆராய்ச்சியாளர்கள் நடத்திய ஆய்வில் நிறைய சாம்பல் கிடைத்திருக்கிறது. கூடவே எரிந்த எலும்புகளும்! இவை பத்து லட்சம் ஆண்டுகளுக்கு முற்பட்டவை என்று கண்டறிந்து உள்ளனர். நமது முன்னோர்களான ஹோமோ எரெடக்ஸ் இனத்தவர் விலங்குகளை எரித்து மாமிசம் சாப்பிட்டிருக்கிறார்கள் என்பது தெரிய வந்திருக்கிறது.

நம் ஊர்களில் ஆண்டு தேர்வு முடிந்ததும் பள்ளி மாணவர்கள் ஒருவர் சட்டையில் இன்னொருவர் இங்க் அடித்து மகிழ்ச்சியடைவார்கள். அவ்வாறு அசாம் மாநிலத் தலைநகர் கௌகாத்தியில் தேர்வு முடிந்த கல்லூரி மாணவர்கள் தங்கள் முகத்தில் வெள்ளி மூலாம் பூசி தங்கள் மகிழ்ச்சியைக் கொண்டாடுகின்றனர்.

தகவல் : முத்தாரம் இதழ்.

மணல் சாலை இல்லை, இது சணல் சாலை !

2012-04-20T20:41:00.001-07:00

சணல் கயிறு, சணல் சாக்கு, சணல் பைகள், சணல் சட்டைகள் கூடக் கேள்விப்பட்டிருக்கலாம். ஆனால், சணல் சாலை தெரியுமா உங்களுக்கு ? இது வேறெங்கோ வெளிநாட்டில் நடக்க உள்ள அதிசயம் இல்லை. நம் இந்தியாவில்தான் போடுகிறார்கள் !

கொல்கத்தாவில் உள்ள சணல் ஆராய்ச்சி நிறுவனம் ஒன்று, 24 கி.மீ. தூரத்துக்கு சணல் ரோடு அமைக்கத் திட்டமிட்டுள்ளது. சாதாரண தார் சாலையைக் காட்டிலும் இந்த 'நார்' சாலை வலுவானதாக இருக்கும் என்று அடித்துச் சொல்கிறது அந்நிறுவனம்.

நமது நாட்டில் பெரும்பாலான சாலைகள் வாட்ட சாட்டமாக காட்சியளித்தாலும், ஒரே மழைக்காலம் வந்துவிட்டால் அடித்துப் போட்ட 'கைப்புள்ள' மாதிரி, குற்றுயிரும் குலையுயிருமாகி விடுகின்றன. அவற்றைப் பழுது பார்க்கவே நமது பொருளாதாரம் ததிங்கிணத்தோம் போடுகிறது. ஆனால், இந்த சணல் சாலை வலுவானதாக மட்டுமின்றி, மழைக்காலங்களிலும் பாதிக்கப்படாமல் இருக்குமாம். இத்தனை வாக்குறுதிகளையும் அவர்கள் சும்மா சொல்லவில்லை. ஏற்கனவே மாதிரிச் சாலை ஒன்றை உருவாக்கி சணலின் மதிப்பை சோதித்த பிறகே சொல்கிறார்கள்.

கொல்கத்தாவிலிருந்து நூறு கிலோ மீட்டர் தூரத்தில் உள்ள குப்தி பாரா என்ற கிராமத்தில்தான் அமைத்திருக்கிறது அந்த மாதிரிச் சாலை. சாலை போட பரப்பப்படும் சரளைக் கற்களுக்கும் மண்ணுக்கும் இடையே சிறு பட்டையாகச் சணலை அங்கே அவர்கள் பயன்படுத்தினார்கள். இந்தச் சணல் பட்டை, மழை நீரை உள்வாங்கிச் சாலையைப் பழுதுபடாமல் பாதுகாத்தது. அது மட்டுமல்ல...சரளைக் கற்களையும் நகர விடாமல் பிடித்து வைக்கிறதாம் சணல் பட்டை.

"சணலைப் பயன்படுத்துவதன் மூலம் சாலையின் ஆயுளை மூன்று அல்லது நான்கு ஆண்டுகளுக்கு நீட்டித்து உத்தரவாதப்படுத்தலாம்" என்கிறார் ஒரு ஆராய்ச்சியாளர்.

மேற்கு வங்கத்தில் சணல் உற்பத்தி அதிகம்.ஆனால், இந்தியா முழுக்க சணலின் பயன்பாடு குறைந்துவிட்டது. சணல் சாக்குகளுக்கு பதில் பாலிதீன் சாக்குகள் வந்துவிட்டன. அதற்கு எதிர்ப்பு கிளம்பிய பிறகும் காகித பைகள் பயன்படுத்தப்படுகின்றனவே தவிர, சணல் சாக்குகள் புத்துயிர் பெறவில்லை. அதனால், உபரியாக இருக்கும் சணலை சாலைகள் போட உபயோகிப்பது ஒரே கல்லில் இரண்டு மாங்காய் அடிக்கும் திட்டம் !

கிராமத்து சணல் உற்பத்தியாளர்களும் நகரத்து இரண்டு சக்கர தோழர்களும் ஒருசேர மகிழ்ச்சியடையும் நாளை விரைவில் எதிர்பார்க்கலாம் !

தகவல் : ஆர்.ஆர்.பூபதி.

அந்தரத்தில் மிதக்கும் சீனர் !

2012-04-19T22:52:00.000-07:00

அடுத்த நொடி இவர் கதி என்ன ஆகியிருக்கும் ? பதைபதைப்போடு இந்தக் கேள்வியைக் கேட்டாலும், லி வெய் அதை புன்னகையோடு எதிர்கொள்கிறார். சீனாவின் ஹூபெய் நகரைச் சேர்ந்த இந்த 37 வயது மனிதர், புவி ஈர்ப்பு விசைக்கே சவால் விடுகிறார். புகைப்படக் கலைஞரான இவர் எடுத்த புகைப்படங்களைவிட, இவரை இப்படி பிறர் எடுத்த படங்களே புகழ் பெற்று உள்ளன.

" அடுக்குமாடியின் உயரத்திலிருந்து உதைக்கப்பட்டு விழுவது, வில்லில் அம்பாக சாய்ந்திருப்பது, அந்தரத்தில் நடப்பது, தலைகீழாய் மிதப்பது என எல்லா படங்களிலும் நான் ரிஸ்க் எடுத்திருக்கிறேன். இது சர்க்கஸ் இல்லை: மேஜிக்கும் இல்லை; இயந்திரங்களின் உதவியோடு செய்யப்படும் சின்னசின்ன சாகசங்கள்" என்கிறார் இவர். சில புகைப்படங்களை உற்றுப் பார்த்தால் இவரை பிணைத்திருக்கும் கயிறு தெரியலாம் !

தகவல் : லோகேஷ்.

புள்ளிகளுக்குள் பெரும் புள்ளி - லூயி பிரெய்லி!

2012-04-18T20:31:00.000-07:00

பார்வை இழந்தவர்கள் என்றால் வாழ்வையே இழந்தவர்கள் என்றுதான் முன்பெல்லாம் மக்கள் கருதினார்கள். அதை மாற்றிக் காட்டிய மாமேதைதான் லூயி பிரெய்லி!.

1809-ம் ஆண்டு ஜனவரி 4-ம் தேதி பிரான்ஸ் நாட்டில் கூப்வெரி என்ற இடத்தில் பிறந்தார். இவர் தந்தை சைமன் ரேனே பிரெய்லி, தோல் பொருட்கள் செய்யும் திறம்மிக்க கலைஞர். லூயி மூன்று வயதுக் குழந்தையாக இருந்தபோது, தந்தையின் தோல் தொழிற்சாலையில் பயன்படும் குத்தூசியைக் கையில் வைத்து விளையாடினார்.

அது அவர் வலது கண்ணில் குத்திக் கிழித்தது. சில நாட்களில் வலது கண் காயத்திலிருந்து நுண்கிருமிகள் இடது கண்ணையும் தாக்கியதால் இரு கண்களிலும் பார்வையை இழந்தார்.

லூயி பிரெய்லியின் பிறந்த வீடு

அந்தக் காலத்தில் பார்வையற்றவர்கள் பிச்சை எடுத்து வாழும் நிலையிலேயே இருந்தனர். இந்நிலை தன் மகனுக்கு வந்துவிடக்கூடாது என்று நினைத்த அவர் தந்தை, எழுத்துகளை ஆணி மூலம் பலகையில் பதித்து அவருக்குக் கல்வி கற்பித்தார். மேலும், யார் துணையுமின்றி நடந்து செல்ல ஊன்று கோல் ஒன்றையும் தயாரித்துக் கொடுத்தார்.

பார்வை இல்லை என்ற குறைபாட்டை அறிவுக் கூர்மை ஈடுசெய்ய, நன்கு படித்து கல்வியில் தேறினார். பின்பு பாரிஸில் இருந்த பார்வை இழந்தோர் சிறப்புப் பள்ளியில் சேர்ந்தார். அங்குதான் தன் வாழ்நாள் முழுவதையும் கற்பதிலும், கற்பிப்பதிலும் கரைந்தார்.

1821-ம் ஆண்டு, பார்வையற்றோருக்கான 'நைட் ரைட்டிங்' என்ற புதிய எழுத்து வடிவம் அந்தப் பள்ளியில் அறிமுகபடுத்தபட்டது. விரலால் தொட்டு அறியக் கூடிய 12 புள்ளிகளை அது கொண்டிருந்ததால் மாணவர்கள் படிப்பது கடினமானதாகவும், சிரமமாகவும் இருக்கும் என்று லூயி நினைத்தார்.

1824-ம் ஆண்டு இம்முறைக்கு மாற்றாக 6 புள்ளிகளைக் கொண்ட புதிய பிரெய்லி குறியீட்டை அவர் உருவாக்கினார். இம்முறையை உலகம் முழுவதும் பார்வையற்றோர் வரவேற்றனர். அதன் மூலம் அவர்களால் வேகமாகவும் எளிதாகவும் படிக்க முடிந்தது. 1829-ம் ஆண்டு பிரெய்லி முறையில் எழுத்தப்பட்ட தன் முதல் புத்தகத்தை வெளியிட்டார் லூயி. மேலும், பார்வை இழந்தோருக்கான பிரெய்லி தட்டச்சு இயந்திரத்தை பியரி என்பவருடன் இணைந்தது தயாரித்து வெற்றி கண்டார்.

சாதனையாளர்களை விழுங்கினால்தான் நோய்களின் அகோரப் பசி அடங்குமோ என்னவோ.... பிரெய்லியைத் தாக்கியது எலும்புருக்கி நோய். 1852-ம் ஆண்டு...தனது பிறந்த நாளைக் கொண்டாடிய இரண்டே நாட்களில், அதாவது ஜனவரி 6-ம் தேதி தனது 43-வது வயதில் மறைந்தார்.

இன்றும் பார்வையற்றோர் தொட்டு உணரும் அந்த ஆறு புள்ளிகளுக்கு இடையே ஒரு பெரும் புள்ளியாக அவர் வாழ்ந்து கொண்டிருக்கிறார்.

தகவல் : சி.பரத்.

உலகம் பல விதம் !

2012-04-17T20:39:00.000-07:00

கழுகு இனங்களில் பிரமாண்டமானது அமெரிக்காவில் வாழும் 'கலிபோர்னியா காண்டேர்' இனப் பருந்துகள். இவை இன்னொரு சாதனைப் பட்டியலிலும் இடம்பெறப் போகின்றன. சான் டியாகோ விலங்கியல் பூங்காவில் 'காண்டேர் கேம்' என்ற புதிய திட்டத்தை அறிமுகம் செய்திருக்கிறார்கள். அடை காக்கப்படும் ஒரு முட்டையிலிருந்து கழுகுக் குஞ்சு ஓட்டை உடைத்துக் கொண்டு வெளியில் வந்து, இந்த உலகை தன் கண்ணால் முதன்முதலில் பார்க்கும் காட்சியை நேரடி ஒளிபரப்பு செய்வதுதான் இந்தத் திட்டம். 'இப்படி கழுகின் பிறப்பைப் பார்ப்பவர்கள், உயிரின் மதிப்பை உணர்வார்கள். அதன்பின் விலங்குகளுக்கு தொல்லை தரமாட்டார்கள்' என நம்பிக்கை தெரிவிக்கிறார்கள் விலங்கியல் பூங்கா நிர்வாகிகள்.

ஒவ்வொரு நகரிலும் ஒரு மணிக்கூண்டு இருக்கும்; அதில் பெரிய கடிகாரம் கட்டாயமாக இருக்கும். அந்த மணிக்கூண்டுக்குப் பின் ஒரு வரலாறு இருக்கும். காலப்போக்கில் அது அந்த நகரின் அடையாளமாகவும் மாறிப் போகும்.

இதேபோல் செக் குடியரசின் தலைநகர் பிராக்கில், நகர சதுக்கத்தில் ஒரு பிரமாண்ட கடிகாரம் உள்ளது. இதை கடிகாரம் என்று சொல்வதைவிட அதிசயம் என்று சொல்லலாம். இது சாதாரணமான நேரம் காட்டும் கடிகாரம் இல்லை. வானசாஸ்திர கடிகாரம். சூரியன், நிலா, இதர கோள்கள் ஆகியவை ஒன்றுக்கொன்று எந்தெந்த திசையில் இருந்தபடி சுழல்கின்றன என்ற கிரக அமைப்பைக் காட்டும். 1410-ம் ஆண்டு நிறுவப்பட்ட இந்த கடிகாரம், இப்போதும் இயங்கும் உலகின் மிகப்பழமையான ஒரே வானியல் கடிகாரம். இரண்டாம் உலகப் போரின் போது நாஜிக்கள் இதை தீயிட்டு அழிக்க முயல, நகர மக்கள் பெரும் போராட்டம் நடத்தி இதைக் காத்தனர்.

குழந்தைகள் விரும்பும் 'பேட்மேன்' போல உடை அணிந்த இந்த வௌவால் மனிதன் ஸ்லோவாக் நாட்டைச் சேர்ந்தவர். 26 வயதாகும் இவர் பெயர் ஜோல்டன் கோஹாரி. தண்ணீர், மின்சாரம் ஏதும் இல்லாத பழைய வீட்டில் தனியாக வாழ்ந்துவரும் இவரை அந்நாட்டு மக்கள் செல்லமாக 'ஸ்லோவாக் பேட்மேன்' என்று அழைக்கின்றனர். இவர் நாட்டில் நடக்கும் அநியாயத்தை தட்டிக் கேட்கும் சினிமா ஹீரோ கிடையாது.

ஆனால் மக்களுக்கு சேவை செய்வதுதான் இவரின் வேலை. தன் ஏரியாவில் வசிப்பவர்களுக்கு தன்னால் முடிந்த சின்ன சின்ன உதவிகளைச் செய்ய ஆரம்பித்தார். அதுவே அவரின் நிரந்தர வேலையாக மாறிவிட்டது. வெளியே செல்லும்போது இந்த உடையில் இருப்பதால், குழந்தைகள் மத்தியில் ஜோல்டன் மிகவும் பிரபலம்.

தகவல் : ப்ரியா.

தூங்க வைக்கும் தொலைபேசி !

2012-04-16T20:43:00.001-07:00

தூங்கியே காலத்தைக் கழிக்கும் சோம்பேறிகள் ஒருபுறம் இருக்க, தூக்கமே வராமல் துன்பப்பட்டுக்கொண்டு தூக்க மாத்திரைகளை நாடும் துக்கமான நோயாளிகளும் இன்னொரு பக்கம் இருக்கிறார்கள். அப்படிப்பட்ட நோயாளிகள் 'இன்சோம்னியாக்கள்' (insomniacs) எனப்படுகிறார்கள்.

தூக்கம் வராமல் இந்நோயால் பரிதவிப்பவர்களுக்காவே நியூயார்க்கில் இயங்குகிறது ஸ்லீப் லைன் சேவை. அதாவது, ஒரு தொலைபேசி அழைப்பின் மூலமாகவே நம்மைத் தூங்க வைக்கும் தூக்க சேவை. "ஆம், தொலைபேசியில் இந்த ஸ்லீப் லைனைத் தொடர்பு கொண்டால் போதும்.... எப்பேர்ப்பட்ட ஆளையும் நாங்கள் பேசியே தூங்க வைத்துவிடுவோம்" என்று சவால் விடுகிறது இந்த சேவை அமைப்பு.

முதன் முதலில் இந்தப் பேச்சு - ஹிப்னாட்டிச முறையை அறிமுகப்படுத்தியவர் டான் டக்லஸ் (Don Douglas) என்ற நரம்பியல் மற்றும் மனநோய் மருத்துவர்தான். தூக்கத்தைத் தூண்டும் விதமாக இவர் பேசிய 8 நிமிட உரையைத்தான் இந்த ஸ்லீப் லைன் சேவையிலும் ஓட விடுகிறார்கள். அந்தக் குரல் செய்யும் மாயாஜாலமோ, அல்லது பேசும் விஷயம் அவ்வளவு மொக்கையோ தெரியவில்லை..... இந்த சேவையைத் தொடர்பு கொள்பவர்களில் பெரும்பாலனவர்கள் நல்ல தூக்கத்தைப் பெற்று விடுகிறார்களாம்.

முதலில் தூங்க வசதியான, பிடித்த இடத்தைத் தேர்ந்தெடுத்துக் கொள்கிறது. இவை சிகிச்சையின் முதல் படிகள். சிகிச்சையின் போது தொலைபேசிக் குரலின் ஒலி கொஞ்சம் கொஞ்சமாகக் குறைந்து கொண்டே வரும். கடைசியாக அந்தக் குரல் பேசி முடிப்பதற்குள் மறுமுனை 'கொர்ர்....கொர்ர்'தான்!

"ஏராளமான பக்க விளைவுகள் கொண்ட தூக்க மாத்திரைகளைப் பயன்படுத்துவது இதனால் வெகுவாகக் குறைந்த்திருக்கிறது" என்கிறது இந்தச் சேவையை நடத்திவரும் "லென்னாக்ஸ் ஹில்' மருத்துவமனை.

ஸ்லீப் லைன் பெற்று வரும் வெற்றியின் விளைவாக, விரைவில் நீரிழிவு நோய்க்கு ஒரு ஹெல்ப் லைன், காச நோய்க்கு ஒரு ஹெல்ப் லைன் என்று இவர்கள் கொண்டு வரவிருக்கிறார்கலாம். இந்த இரண்டு நோய்களுக்கும் பேச்சால் தீர்வு தர முடியாது என்றாலும், சிகிச்சை தொடர்பான பயனுள்ள ஆலோசனைகளை தொலைபேசியில் வழங்குவார்கள்.

தகவல்: ஆர்.ஆர்.பூபதி.

உலகின் மிக விலையுர்ந்த ஓவியங்கள் !

2012-04-15T20:43:00.001-07:00

"மோனலிசா"

இன்றுவரை விலை மதிப்பிடமுடியாத இடத்தில் இருப்பது மோனலிசாதான். இத்தாலிய எழுச்சியின்போது, பிரபல இத்தாலிய ஓவியர் லியனார்டோ டா வின்சி இதை வரைந்தார். இப்போது பிரான்ஸ் நாட்டின் லாவ்ரே அருங்காட்சியகத்தில் பொக்கிஷமாக மாட்டி பாதுகாக்கப்படும் மோனலிசா ஓவியத்தை இன்சூரன்ஸ் செய்வதற்காக 1962-ம் ஆண்டு மதிப்பிட்டார்கள். அப்போது,'460 கோடி ரூபாய் பெரும்' என கணக்கிட்டார்கள். ஐம்பது ஆண்டுகள் கழித்து இன்றைய கணக்கில் மதிப்பிட்டால், இது சுமார் 3220 கோடி ரூபாய் ! இந்த விலையிலும் இதனை வாங்கி தங்கள் சொந்தமாக்கிக் கொள்ள உலகின் பெரும் பணக்காரர்கள் தயார். ஆனால், பிரெஞ்சு அரசுதான் விற்க தயாராக இல்லை.

"தி கார்டு பிளேயர்ஸ்'

"தி கார்டு பிளேயர்ஸ்' இதுவரை ஏலங்களிலும் தனிப்பட்ட முறையிலும் உலகெங்கும் விற்கப்பட்ட ஓவியங்களிலேயே மிக அதிக விலைக்கு விற்பனையாகி சரித்திரம் படைத்தது. இரண்டு பேர் சீட்டாடும் காட்சியில் அப்படி என்ன ரசனைக்குரிய அம்சம் இருக்கிறதோ தெரியவில்லை.... இதேபோல பல ஓவியங்களை வரைந்திருக்கிறார் பிரெஞ்சு ஓவியர் பால் செழான். அதில் 1892-ம் ஆண்டு வரைந்த இந்தக் குறிப்பிட்ட ஓவியத்தை கடந்த ஆண்டு கத்தார் குடும்பம் விலைக்கு வாங்கியது. பொது ஏலத்தில் இல்லாமல் தனிப்பட்ட முறையில் வாங்கியது என்பதால் சரியான விலையை அவர்கள் சொல்லவில்லை. என்றாலும், கிட்டத்தட்ட 1250 கோடி ரூபாய் கொடுத்து அவர்கள் வாங்கியதாகத் தகவல்.

"நம்பர் 5 1948"

அமெரிக்க ஓவியர் ஜாக்ஸன் போல்லாக் வரைந்த 'நம்பர் 5 1948' என்ற ஓவியம் விற்பனை சாதனையில் மூன்றாம் இடத்தில் இருக்கிறது. நவீன ஓவியங்களுக்கு முன் மாதிரியாகக் கருதப்படும் இது 1948-ம் ஆண்டு வரையப்பட்டது. கோடுகளும் வண்ணங்களும் தாண்டி இதில் என்ன உருவம் இருக்கிறது என்பது சாதாரணர் கணகளுக்குப் புலப்படாது. கடந்த 2006-ம் ஆண்டு அமெரிக்காவில் நடந்த ஏலத்தில் இந்த ஓவியம் 700 கோடி ரூபாய்க்கு ஏலம் போனது.

"வுமன் 3"

நெதர்லாந்தில் பிறந்து அமெரிக்காவில் வசித்த வில்லெம் டி கூனிங் என்ற ஓவியர் வரைந்த ஓவியம் வுமன் 3 என்ற ஓவியம் இந்தப் பட்டியலில் நான்காவது இடத்தில் இருக்கிறது. பெண்களை மையக் கருவாக வைத்து இவர் வரைந்த ஆறு ஓவியங்களில் இதுவம் ஒன்று. 1953-ம் ஆண்டு வரையப்பட்டது. கடந்த 2006-ம் ஆண்டு இது 681 கோடி ரூபாய்க்கு ஏலம் போனது.

'அடேல் ஃபிளாச் பாயர்-1

இந்த பட்டியலில் ஐந்தாவது இடம் பிடித்திருக்கும் ஓவியம் 'அடேல் ஃபிளாச் பாயர்-1 ஹஸ்டவ் கிலிமிட் என்ற ஓவியர் 1907-ம் ஆண்டு வரைந்து முடித்த ஓவியம் இது. முழு வேலைப்பாடுகளுடன் கூடிய மங்கையை சித்தரித்து முடிக்க, 3 வருடங்கள் ஆனதாம் அவருக்கு. நியூயார்க் நகரில் உள்ள நியூ கேலரிக்காக, ரோஸ்ட் லாடர் என்பவர் 2006-ம் ஆண்டு ஜூன் மாதம் இந்த ஓவியத்தை 621 கோடி ரூபாய் விலை கொடுத்து வாங்கினார்.

தகவல்: ராஜிராதா.

அறிவுலக நாயகன் அம்பேத்கர்.

2012-04-13T20:50:00.001-07:00

சிறு சம்பவம்...

காலையில் மழை சோவென கொட்டத்துவங்கியது. சதாராவின் வீதியில் பள்ளிக்குப் புறப்படும் தருவாயில் இருந்த சிறுவர்கள் ஐந்தாறு பேர் மழையையே வேடிக்கைப் பார்த்துக் கொண்டிருந்தனர். இதை சாக்காக வைத்துக் கொண்டு இன்று பள்ளிக்கு எப்படியும் மட்டம் போட்டுவிடுவது என்பது அவர்களுடைய திட்டம். அவர்களுள் ஒருவனாக நின்ற பீமின் மனதிலோ வேறு எண்ணம்.(பீமாராவ் சக்பால் அம்பேத்கரின் இயற்பெயர்)

என்னதான் மழை விடாமல் பெய்தாலும் இன்று எப்படியும் பள்ளிக்குச் செல்வது என அவன் முடிவெடுத்திருந்தான். இதைக் கேட்ட மற்ற சிறுவர்கள் பீமைக் கேலி செய்தனர். "உன்னால் இந்த அடை மழையில் பள்ளிக்குச் செல்லமுடியுமா ?" எனச் சவால் விட்டனர்.

அடுத்த நொடியே எதையும் பொருட்படுத்தாமல் பீம் தெருவில் இறங்கி நடக்கத் துவங்கினான். எப்படியெல்லாம் தன் புத்தக பையை ஈரம் படாமல் பாதுகாக்க முடியோமோ, அதற்கான முயற்சிகள் அத்தனையும் மேற்கொண்டபடி, பள்ளியை நோக்கி விறுவிறுவென நடந்துச் சென்றான்.

ஓரிடத்தில் மழை மிகக் கடுமையாகக் கொட்டத் துவங்க, அருகிலிருந்த வீடொன்றில் அவன் ஒதுங்கி நின்ற சமயம், வீட்டிலிருந்து வெளியே வந்த ஒரு பெண்மணி கோபத்துடன் பீமைப் பார்த்தாள். அடுத்த நொடி பீம் தெருவில் விழுந்து கிடந்தான். அவன் பிடித்திருந்த புத்தக பையினுள் இப்போது நீர் முழுவதுமாகப் புகுந்திருந்தது. எழுந்து நின்றான்.

அவனுக்கு எதிரே இன்னமும் அந்தப் பெண்மணி ஆவேசத்துடன் நின்றுகொண்டு இருந்தாள். "நீ ஒரு மகர். (மகர் என்பது தாழ்த்தப்பட்டச் சாதிகளுள் ஒன்று ). என்ன தைரியம் இருந்தால் வீட்டுக்குள் காலடி எடுத்து வைப்பாய்?" என இரைந்தாள்.

அந்த கொட்டும் மழை ஈரத்தையும் மீறி, தீண்டாமை எனும் கொடிய நெருப்பு சிறுவன் பீமின் இதயத்தை எரித்தது. தனது குழந்தைகளை எந்தப் பேய் நெருங்கிவிடக் கூடாது என்று கிராமத்தில் இருந்து ராம்ஜி சக்பால் (அம்பேத்கரின் தந்தை) நகரத்துக்கு அழைத்து வந்தாரோ, அங்கேயும் அது வெவ்வேறுவிதமான ரூபங்களில் தன் குழந்தைகளைப் பயமுறுத்துவதைக் கண்டு அவர் மிகுந்த வேதனை கொண்டார்.

பீம் வளர்ந்து பெரியவன் ஆனான்.ஆரம்பக் கல்வி முடிந்து, உயர்நிலைக் கல்வியில் சேரும் நேரமும் வந்ததது. பள்ளியில் தனது மகனைச் சேர்க்கச் சென்றபோது, இம்முறை ராம்ஜி கூடுதல் கவனத்துடன் புதிய பள்ளியின் சாதியத் தொந்தரவுகளிலிருந்து மகனைப் பாதுகாக்க ஒரு புதிய உத்தியைக் கையாண்டார்.

அதன்படி பீம் எனும் அவன் பெயருக்குப் பின்னால் ஒட்டிக்கொண்டிருக்கும் பட்டப் பெயரான சக்பாலை எடுத்துவிட்டு, பீமின் மேல் பற்று வைத்திருந்த ஆசிரியர் ஒருவரின் பெயரைச் சேர்க்க முடிவு செய்தார். அந்தப் பெயர்தான் அம்பேத்கர். இன்று இந்தியாவின் ஒவ்வொரு கடைசி மனிதனுக்கும் வாழ்வதற்கான நம்பிக்கையையும், போராடுவதற்கான வலிமையையும் ஊட்டும் பெயராக விளங்கிவரும் அந்தப் பெயர் உருவாக்கம் பெற்றது இப்படித்தான். பீமாராவ் சக்பால் என்று அழைக்கப்பட்ட அந்த சிறுவன், அன்றுமுதல் பீமாராவ் அம்பேத்கராக மாறினான்.

ராம்ஜி சக்பாலுக்கு இச்சமயத்தில் மகாராஷ்டிரத்தில் காரேகான் எனும் இடத்தில் காசாளர் வேலை கிடைத்தது. எனவே அவர், தன் பிள்ளைகளை அவர்களின் அத்தையின் பொறுப்பில் விட்டுவிட்டு அங்கே சென்றுவிட்டார். விடுமுறை நாளின்போது அம்பேத்கர், அவரின் சகோதரன் மற்றும் அக்காள் மகன் ஆகிய மூவரும் தங்கள் தந்தையைச் சந்திக்கவேண்டி, காரேகானுக்கு ரயிலில் புறப்பட்டு மசூர் ரயில் நிலையத்தை அடைந்தனர்.

அங்கே அவர்களுக்கு ஓர் அதிர்ச்சி காத்திருந்தது. குறித்த நேரத்தில், இவர்கள் வரும் தவகல் கிடைக்காத காரணத்தாலோ என்னவோ, இவர்களை அழைத்துப்போக ரயில் நிலையத்துக்குத் தந்தை வரவில்லை. மூவரும் வாடகைக்கு ஒரு மாட்டு வண்டியைப் பிடித்து காரேகான் செல்லத் தயாராயினர். பாதித் தொலைவு சென்றிருப்பார்கள்... வண்டிக்காரனுக்கு தான் மகர் இனச் சிறுவர்களை ஏற்றிச் செல்கிறோம் என்பது தெரியவர, சட்டென ஆத்திரப்பட்டவன் அப்படியே அந்த வண்டியைக் குடை சாய்த்து, மூன்று சிறுவர்களையும் கீழே உருண்டு விழச் செய்தான். அதன்பிறகு மிகுந்த சிரமத்துக்கிடையே மூவரும் தட்டுத்தடுமாறி, ஒருவழியாகக் காரேகானுக்குச் சென்று சேர்ந்தனர்.

இந்தச் சம்பவத்தைத் தொடர்ந்து, தாக மிகுதியால் ஒரு குளத்தில் இறங்கி நீர் குடிக்கச் சென்றபோது, ஊரார் ஒன்று சேர்ந்து துரத்தி அடித்த சம்பவம், சிகை திருத்தும் நிலையத்தில் முடி பாதி வெட்டப்பட்ட நிலையில் அரைகுறையாக இறக்கிவிடப்பட்டு அவமானத்தோடு வீடு வந்து சேர்ந்து, சகோதரிகளால் மீதமுள்ள முடி திருத்தப்பட்ட சம்பவம் எனச் சிறுவயதிலேயே தீண்டாமையின் கொடுமை வெந்தணல் கொப்புளங்களாக அவர் உள்ளத்தில் நீர் கட்டி நின்றன. கல்வி ஒன்றுதான் இவை அனைத்துக்கும் தீர்வு என்பதை நன்கு உணர்ந்துகொண்ட அம்பேத்கர், முன்னிலும் தீவிரமாகப் படிப்பில் நாட்டம் செலுத்தத் துவங்கினார்.

பள்ளியில் அம்பேத்கர் தனது ஆழ்ந்த படிப்பாலும், இனிமையான சுபாவத்தாலும், எதனையும் ஆய்ந்தறிந்து வெளிப்படுத்தும் நுண்ணறிவாலும் தனித்துவமான மாணவனாக விளங்கினார். என்றாலும், சில மாணவர்கள் மற்றும் ஆசிரியர்களின் மூளையில் புற்றுநோயாக ஒட்டிக் கொண்டு இருந்த சாதியம் எனும் வெறி, அவரை மனதளவில் பள்ளியிலிருந்து விலகியிருக்கவே செய்தது.

இதனால், பள்ளிகாலங்களில் அம்பேத்காருக்குத் தோழர்கள் என யாரும் இல்லை. ஆனால், அந்தக் குறையைப் புத்தகங்கள் போக்கின. ஒரு நல்ல நூலைக் காட்டிலும் சிறந்த நட்பு வேறு எதுவாக இருந்துவிட முடியும்? சமயம் கிட்டும்போதெல்லாம் அந்த நண்பர்களுடன் தனது நேரத்தை முழுமையாகச் செலவிடுவார் அம்பேத்கர். மாலை நேரங்களில் அருகில் இருக்கும் பூங்காக்களுக்குச் சென்று, இந்த உலகத்தையும் மனிதர்களையும் வேடிக்கை பார்க்கத் துவங்குவார்.

இப்படிச் சிறு வயதிலேயே ஆழ்ந்த சிந்தனையும் தனிமையுமாகக் காணப்பட்ட அந்தச் சிறுவனை, அந்தச் சிறுவனை, அந்தப் பூங்காவுக்கு வழக்கமாக வரும் ஒரு நபர் நாள்தோறும் கவனிக்கத் துவங்கினார். அவர் பெயர் கிருஷ்ண அர்ச்சுன ராவ் கெலுஸ்கர். வில்சன் ஹைஸ்கூலின் தலைமை ஆசிரியரான அவர், அப்போதே இந்தச் சிறுவனிடம் அசாத்தியமானதொரு திறமை இருக்கிறது என்பதை உணர்ந்து கொண்டார்.

அந்த வருட மெட்ரிகுலேஷன் தேர்வுகளின் முடிவுகள் வெளியானபோது, தாழ்த்தப்பட்ட மாணவர்களில் ஒருவன் முதல் முறையாக மெட்ரிக்கில் தேர்ச்சி பெற்றது மிக முக்கியமான செய்தியாக அங்கிருப்பவர்களால் பேசப்பட்டது. 'நமது சமூகத்தில் முதல் முறையாக ஒருவன் செய்திருக்கும் சாதனையை நாம் கொண்டாடவேண்டும்' என அந்த மக்கள் முடிவு செய்து, அதற்கென ஒரு விழாவை ஏற்பாடு செய்தார்கள். அந்த விழாவுக்கு அவர்கள் சிறப்பு விருந்தினராக ஒருவரை அழைத்தார்கள். அவர் கெலுஸ்கர். 'பூங்காவில் பார்த்து, எந்த மாணவனைப் பற்றி ஒரு நல்ல அபிப்ராயம் கொண்டிருந்தோமோ, அதே மாணவனுக்குத்தான் நாம் பரிசளிக்கப் போகிறோம்' என்பதை அறிந்து, அந்த ஆசிரியருக்கு மட்டற்ற மகிழ்ச்சி.

இனி....

சாதாரண ஒரு படைவீரனின் மகனாக, வரலாற்று வார்த்தைகளால் ஒடுக்கப்பட்ட குலத்தில் பிறந்து, இந்தியாவின் ஈடு இணையற்ற அறிஞராக, சாதி வெறியின் தலை மேல் சம்மட்டி அடிகொடுத்து ஒடுக்கப்பட்ட மக்களுக்கு புது வெளிச்சம் தந்த புரட்சி வீரனாக மறைந்த அம்பேத்கரின் வாழ்வில் எதிர்கொண்ட வேதனைகளின் சரித்திரம் இனி வேறு எவராலும் நினைத்துப் பார்க்க முடியாதது.

சிறுவயதில், பள்ளியிலும் மழைக்கு ஒதுங்கிய வீட்டிலும் பட்ட அவமானங்களினால் அன்று மட்டும் முடங்கியிருந்தால் இன்றைய இந்தியாவில் ஒடுக்கப்பட்ட மக்களின் நிலை எப்படியாக இருக்கும் என ஒருமுறை யோசித்துப் பாருங்கள். அன்று அவரை சுற்றிச் சூழ்ந்திருந்தது அடர் இருட்டு, கடைத்தேறவே வழியில்லாமல் சாதி வெறியர்களால் உருவாக்கப்பட்ட இருட்டு. அப்போது அவருக்கு முன் இருந்த ஒரே தூரத்து வெளிச்சம் கல்வி. கண்களை இறுக மூடி தளராத நெஞ்சுரத்துடன் அந்த வெளிச்சத்தை மட்டுமே பற்றுக்கோடாக்கி அவர் நடை பயின்றதன் பலன் இன்று லண்டன் மியூசத்தில் பெருமைப்படத்தக்க அறிஞர்களின் வரிசையில் கார்ல் மார்க்ஸுக்கு இணையான இடத்தில் அவரைப் புகைப்படமாக மாட்டப்படும் அளவுக்கு உயர்த்தியுள்ளது.

அரசியல், சமூகம், சட்டம், பொருளாதாரம், தத்துவம், வரலாறு, வணிகம், கல்வி, சமயம் என சகல துறைகளிலும் அசாத்தியமான அறிவாற்றலும், எழுத்து வன்மையும், மேதமையும் கொண்டிருந்த இதுவரையிலான இந்தியாவின் ஒரே அறிவுலக நாயகன் அம்பேத்கர் மட்டுமே. அப்படிப்பட்ட மேதை வேறு எந்த நாட்டில் பிறந்திருந்தாலும் கணக்கில்லாத விருதுகளைத் தந்து அந்த நாட்டின் அரசாங்கம் பெருமைக் கொண்டிருக்கும்.

ஆனால், அப்பேர்ப்பட்ட தலைவருக்கு, 'பாரத ரத்னா' விருது கொடுக்கப்பட்டதே அவர் இறந்து இருபத்தைந்து ஆண்டுகள் கழிந்த பிறகுதான் என்பது நாம் அனைவரும் வருத்ததோடு கவனத்தில் கொள்ளவேண்டிய விஷயம்.

எந்த நாட்டின் அரசியல் சாசன சட்டத்தை வடிவமைக்க அம்பேத்கர் அல்லும் பகலும் அயராது வியர்வை சிந்தினாரோ அந்தச் சட்டங்களை செயல்படுத்தும் அந்த நாட்டின் நாடாளுமன்ற கட்டடம் அவரை தேசத்தின் சிற்பியாக அங்கீகரிக்க மனமில்லாமல் அவரது புகைப்படத்துக்கு அனுமதி மறுத்து வந்தது. பாரதப் பிரதமராக வி.பி.சிங்.பதவி ஏற்று கட்டளை இட்ட பிறகுதான் அந்தத் தடையும் விலகி நம் நாடாளுமன்றம் தன் கதவுகளைக் திறந்து வழிவிட்டது.

(இன்றும் கிராமப்புற மக்கள் தங்களின் ஒடுக்கப்பட்ட நிலையிலிருந்து விடுபட்டு கொஞ்சமேனும் பொருளாதார சுவாசக் காற்றை சுவாசிக்க காரணமான, தாழ்த்தப்பட்ட, பிற்படுத்தப்பட்ட, சிறுபான்மை சமூகங்களுக்கு இட ஒதுக்கீட்டை தன் ஆட்சிக் காலத்தில் அமுல்படுத்தியவர்தான் திரு.வி.பி.சிங் அவர்கள்)

இவை அனைத்துக்கும் சிகரமாக இருக்கும் இன்னொரு முக்கியமான விஷயம் அம்பேத்கரின் வாழ்க்கை வரலாற்றை மையாமாக வைத்து எடுக்கப்பட்ட திரைப்படத்துக்கு உண்டான நெருக்கடி...! இயக்குனர் ஜாபர் படேல் இயக்கத்தில் என்.எப்.டி.சி. தயாரிப்பில் உருவான அந்தத் திரைப்படம் கூட தற்பொழுதுதான் வெளிவந்து சில நாட்களில் ஆதிக்க சாதியின் அழுத்தத்தில் திரையரங்கில் இருந்து தூக்கப்பட்டது.

வாழ்நாள் முழுவதும் எந்த தேசத்தின் உண்மையான அகவிடுதலைக்காகப் போராடினாரோ அந்த தேசத்தில்அவருக்கான முழுமையான மதிப்பும் மரியாதையும் அங்கீகாரமும் கிடைப்பதற்க்குத்தான் எத்தனை தடங்கல்கள், எத்தனை தடைகள்!

இவையனைத்தையும் கடந்து இதே தேசத்தில் இன்னொரு புறம் உலகம் வியக்கும் ஒரு மகத்தான பெருமையும் அவருக்கு உண்டு. காஷ்மீர் முதல் கன்னியாகுமரி வரை இந்தியாவின் 6 லட்சம் கிராமங்களிலும் இன்று நின்றுகொண்டிருக்கும் அவரது சிலைகளின் சாதனை, உலகின் வேறு எந்தத் தலைவருக்கும் இல்லாத பெருமைகளில் ஒன்று. ஆனால், எண்ணிக்கையில் 6 லட்சமாக இருந்தாலும் அவை இரண்டாகப் பிளவுண்டு 12 லட்சம் கிராமங்களாகவே இந்தியா இன்றும் காணப்படுவதுதான் மிக மோசமான வேதனை!

நூல்: அம்பேத்கர் வாழ்க்கை வரலாறு.
ஆசிரியர் அஜயன் பாலா.
விகடன் வெளியீடு.

முன்படம் : வே.மதிமாறன் வலைப்பூ.
மற்ற படங்கள் : கூகுள் இமேஜ்.

அண்ணல் அம்பேத்கரைப் மற்றொரு நிகழ்வு:

உலகின் உயர குகைப் பாலம்!

2012-04-11T20:43:00.001-07:00

(Aizhai Suspension Bridge - China)

மலைக்குகைகளின் உள்ளே போகும் சாலை, திடீரென கிடுகிடு பள்ளத்தாக்கின் மீது தொங்கும் பாலத்தைத் தொட்டு, அடுத்த மலைக்குகைக்குள் நுழைந்தால் எப்படி இருக்கும் ? இது ஹாலிவுட் பட கற்பனை இல்லை. நிஜமாகவே இப்படி ஒரு பாலத்தை சீனாவில் கட்டி திறந்திருக்கிறார்கள். அய்ஸாய் பாலம் என்ற அது கடந்த வாரம் திறக்கப்பட்டது.

சீனாவின் ஹூனான் மாகாணத்தில் இருக்கும் இரண்டு பெரிய நகரங்கள் ஜிஷோ மற்றும் ஸடோங். இரண்டும் இரண்டு வெவ்வேறு மலைத்தொடர்களில் இருக்கின்றன. ஒரு நகரத்திலிருந்து இன்னொரு நகரம் போக, ஒரு மலையிலிருந்து இறங்கி, இன்னொரு மலையில் ஏற வேண்டும். வளைந்து செல்லும் மலைப்பாதைகளில் சாலை அருமையாக இருந்தாலும், போக நான்குமணி நேரம் ஆகும்.

இரண்டு மலைகளையும் பிரிக்கும் 1102 அடி ஆழ பள்ளத்தாக்கின் மீது தொங்கு பாலம் கட்ட முடிவெடுத்தது அரசு. உயரத் தூண்களிலிருந்து தொங்கும் இரும்புக் கம்பிகள் தாங்கிப் பிடிக்க 1146 மீட்டர் தூரத்துக்கு - அதாவது ஒரு கிலோமீட்டரையும் விட நீளமாக தொங்குகிறது இந்தப் பாலம். இருபுறமும் மலைகளைத் குடைந்து, குகைகளில் சாலை அமைத்து, பாலத்தோடு இணைத்திருக்கிறார்கள். ஆறு வழிப் பாதை என்பதால் ஏராளமான வாகனங்கள் பயணிக்கலாம். பாதசாரிகள் நடக்க பக்கத்தில் பாதை உண்டு. பள்ளத்தைப் பார்த்து பயப்படாதவர்கள் தாராளமாக நடைப் பயிற்சி கூட மேற்கொள்ளலாம். உலகின் உயர குகைப் பாலம் என்ற பெருமை பெற்றிருக்கிறது இது!

தகவல் : லோகேஷ்.

புவி வெப்பத்தால் குள்ளமாகிறோமா நாம்?

2012-04-10T20:35:00.001-07:00

நமது உடல் அளவுக்கும் தட்ப வெப்பத்துக்கும் தொடர்பு உள்ளதாக அமெரிக்காவின் ஃப்ளோரிடாவைச் சேர்ந்த விஞ்ஞானிகள் சமீபத்தில் கண்டறிந்துள்ளார்கள். மனிதர்கள் மட்டுமல்ல... எல்லா பாலூட்டி இனங்களுமே இப்படித்தானாம். குளிர்ந்த சூழ்நிலையில் இருந்தால் தலைமுறை தலைமுறையாக அதன் சந்ததிகளின் உயரமும் எடையும் வளர்ந்து கொண்டே வந்து, சில ஆயிரம் வருடங்களில் மிகப் பெரிய உயிரினமாக பரிமாணம் பெற்றுவிடும். அதுவே வெப்பம் மிகுந்திருந்தால், படிப்படியாக அளவு குறைந்து மினியேச்சர் உயிரினமாகிவிடுமாம்.

ஆயிரக்கணக்கான வருடங்களுக்கு முன்பு வாழ்ந்த குதிரைகளின் புதை படிம எச்சங்களை ஆரய்ச்சி செய்த விஞ்ஞானிகள்தான் இந்தக் கருத்தை வெளியிட்டிருக்கிறார்கள்.

முதன் முதலில் பூமியில் தோன்றிய குதிரைகளான சிஃப்ருஹிப்புஸ் இனத்தவை, வெறும் 6 கிலோ எடையோடு ஒரு நாயின் அளவில்தான் இருந்தனவாம். அது எப்படி இன்றிருக்கும் பிரமாண்டமான குதிரையாக மாறியது ? அதைத்தான் ஆராய்ச்சி செய்து கண்டுபிடித்துருக்கிறார்கள்.

பல்லாயிரம் வருடங்களாக நம் உலகம் குளிரையும் வெப்பத்தையும் மாறி மாறி அனுபவித்தே வந்திருக்கிறது. கடும் குளிர் சில ஆயிரம் வருடங்கள் என்றால், வெப்பம் சில ஆயிரம் வருடங்கள். இதுவே நம் பூமியின் வரலாறு.

"அப்படியொரு குளிரில் இருந்து உலகம் வெப்பமடைந்த காலத்தில், நாயளவு இருந்த சிஃப்ருஹிப்புஸ் குதிரைகள், மேலும் படிப்படியாக எடை குறைந்து பூனைக் குட்டி அளவிற்கு மாறி விட்டன. அதன் பிறகு மீண்டும் பூமி குளிர்ந்த போது, அவை மறுபடியும் வளர்ச்சியடைந்து தற்போதிருக்கும் குதிரைகளின் உயரத்திற்கு வந்து விட்டன " என்கிறார் ஃப்ளோரிடாவில் உள்ள இயற்கை வரலாற்று அருங்காட்சியகத்தைச் சேர்ந்த மருத்துவர் ஜோனாதன் ப்ளச்.

மருத்துவர் ஜோனாதன் ப்ளச் (Dr Jonathan Bloch).

குதிரைக்கு நேர்ந்த இந்த பரிமாண மாற்றம் நமக்கும் ஏற்படலாம்; தற்போது அதிகரித்து வரும் புவி வெப்பம், மனிதர்களின் அளவையும் குறைக்கலாம் என்பதே விஞ்ஞானிகளின் கருத்து.

ஆனால், இது உடனடியாக நிகழ்ந்து விடாது. தலைமுறை தலைமுறையாக நம் உடலும் எடையும் குறைந்து கொண்டே வந்து, சில ஆயிரம் வருடங்களுக்குப் பிறகு நாம் மினியேச்சர் மனிதர்கள் ஆவோம் என்பதும், புலி, சிங்கம், யானை போன்ற விலங்குகளும் நம்மோடு சேர்ந்து மினியேச்சர்கள் ஆகிவிடும் என்பது ஆறுதல் செய்திகள்....

அப்போது பொம்மை காரில் நிஜ மனிதர்கள் பயணிக்கக்கூடும் !

தகவல்: கோகுலவாச நவநீதன்.

படம் சொல்லும் சேதி !

2012-04-09T20:42:00.002-07:00

(Veteran Artist Tim Storrier's Self-Portrait-Australia)

ஆஸ்திரேலியாவில் நடைபெற்ற ஒரு ஓவியப்போட்டியில் முதல் பரிசு பெற்ற 'வழிப்போக்கன்' ஓவியம்தான் இது. வரைந்தவர் ஓவியர் டிம் ஸ்டோர்ரியர். அந்தக்கால வழிப்போக்கனுக்கு கட்டுசோறு மூட்டை போதும். ஆனால், இப்போது என்னவெல்லாம் தேவைப்படுகிறது.

(Mammoth Reproductions in the Exhibition 'Giants of the Ice Age', Nebra, Central Germany)

ஜெர்மனியின் நெப்ரா நகரில் 'ஐஸ் ஏஜ் ஜென்ட்ஸ்' என்ற கண்காட்சி இந்த மாதம் தொடங்கி டிசம்பர் வரை நடைபெறுகிறது. பனி யுகத்தில் வாழ்ந்த பிரமாண்டமான மிருகங்களை அப்படியே உயிருள்ள உருவங்கள் போலச் செய்து கண்காட்சியில் வைக்கிறார்கள். அப்படி உருவாக்கப்பட்ட மம்மூத் யானையும், அதன் குட்டியும்...

(A Flower Horn Fish-Thailand)

தலையில் கொம்பு முளைப்பது என்பது தரையில் வாழும் விலங்கினங்களுக்கே உரிய சிறப்பம்சம். மீனுக்கு கொம்பு முளைத்தால்.... அது இப்படிதான் கொண்டை போட்டுவிட்டது போல இருக்கும். தாய்லாந்தில் அழகிய மீன் கண்காட்சி நடந்தது. அதில் எல்லோரது கவனத்தையும் ஈர்த்த இந்த மீனுக்கு பெயர் ' ஃபிளவர்ஹார்ன் ஃபிஷ்'. அதாவது பூக்கொம்பு மீன்.

(9.5 Crores Kelly bag- France)

பிரான்சின் புகழ்பெற்ற ஹெர்ம்ஸ் பர்கின் நிறுவனம் அறிமுகம் செய்திருக்கும் இந்தப் புதிய கைப்பையின் விலை ஒன்பதரை கோடி ரூபாய். முதலைத் தோலில் செய்து, அதன்மீது விலை உயர்ந்த 11,303 வைரங்களும் இதர கற்களும் பதிக்கப்பட்ட கைப்பை. இதன் கைப்பிடியை கையில் மாட்டிக் கொண்டால் அழகிய பிரேஸ்லெட் போலத் தெரியும். வைரங்கள் எதுவும் சுலபத்தில் விழுந்து விடாதபடி கவனமாக பதிக்கப்பட்டு இருக்கின்றன.

தகவல் : முத்தாரம் இதழ்.

நம்பினால் நம்புங்கள் !

2012-04-08T20:45:00.000-07:00

எலெக்ட்ரிக் ஈல் எனும் மீன் வகை வெளிப்படுத்தும் மின்சாரமானது, ஒரு குதிரையையே கொல்லும் அளவு ஆற்றல் வாய்ந்தது.

மனித நாவை விட ஈயின் கால்கள் ஒரு கோடி மடங்கு நுட்பமான உணர்வு கொண்டவை.

வௌவால் ஆண்டுக்கு ஒரு குட்டி மட்டுமே இடும். அதன் அளவில் உள்ள பாலூட்டிகளில் மிக மெதுவாக இனப்பெருக்கம் செய்பவை வௌவால்களே.

கொசு ஒரு மைல் சுற்றளவைத் தாண்டி வெளியே செல்லாது.

தகவல் : முத்தாரம் இதழ்.

குழந்தைகள் படிக்க சிரமப்படுவது ஏன் ?

2012-04-06T20:45:00.001-07:00

தேர்வு நேரம் இது. நமது கல்வி முறை மனப்பாடம் செய்வதையே மையமாகக் கொண்டு இயங்குகிறது. 'படி...படி...' என்று பெற்றோரும் பிள்ளைகளை வாட்டி வதைக்கும் காலத்தில் அமெரிக்காவில் நினைவு தவறுதல், கவனம் சிதைவுறுதல் குறித்து மேற்கொள்ளப்பட்ட ஆய்வின் முடிவுகள் வெளியிடப்பட்டுள்ளன. ஓஹியோவில் உள்ள தேசிய குழந்தைகள் மருத்துவமனை வெளியிட்ட அந்த ஆய்வில், 'குழந்தைகள் படிக்க சிரம்பப்படுவது ஏன்' என்பது குறித்த அதிர்ச்சியளிக்கும் விபரங்கள் உள்ளன.

சின்ன வயதில் விளையாட்டின்போது சில குழந்தைகள் தலையில் லேசாக அடிபட்டு பின் சரியாகி விடுவதைப் பார்த்திருப்போம். ஆனால், இந்தக் காயம் ஆறியதால், அது முடிந்து விட்டதாக அர்த்தமில்லையாம். அது மூளைக்குள் ஊடுருவி அழுத்தமாக நினைவைத் தாக்கி, மறதியை அதிகரிக்கச் செய்கிறதாம். 'லட்சக்கணக்கான குழந்தைகள் ஆண்டுதோறும் இப்படி காயங்களுடன் வருகின்றனர். நாமும் சிகிச்சையளித்து விட்டு குழந்தை குணமாகி விட்டதாக வீட்டுக்கு அனுப்பி வைக்கிறோம். ஆனால் அப்படி சிகிச்சை பெற்ற குழந்தைகளில் பலர் இந்த பாதிப்புக்கு ஆளாகி வருகின்றனர்' என்கிறார் இந்த மருத்துவமனையின் மருத்துவ நிபுணர் கீத்யீட்ஸ். சில குழந்தைகளுக்கு ஓராண்டு வரை இந்த நினைவு மறதி பாதிப்பு நீடிக்கிறதாம்.

அடிபட்டு சரியாகிவிட்டாலும் அலட்சியமாக இருக்காமல் குழந்தையைக் கண்காணிக்க வேண்டும் என்று மருத்துவர்கள் அறிவுறுத்துகின்றனர். தலைவலி, கோபம், எரிச்சல், சமநிலை குலைதல், படிப்பில் கவனமின்மை, அசதி, மறதி போன்ற அறிகுறிகள் இருந்தால் உடனடியாக குழந்தையை பரிசோதிக்க வேண்டும் என்று அமெரிக்க நிபுணர்கள் வலியுறுத்துகின்றனர். 8 முதல் 15 வயதுக்குட்பட்ட குழந்தைகளே இத்தகைய பாதிப்புக்கு அதிகம் ஆளாகின்றனர்.

அடி, விபத்து போன்ற புறக்காயங்கள் மட்டுமின்றி, கடுமையான வன்முறையை சந்தித்தல், கோரமான விபத்துகள், படுகொலைகளைப் பார்த்தல், பயம், புறக்கணிக்கப்படுதல், அவமதிக்கப்படுதல் போன்ற அகரீதியான காயங்களும் குழந்தைகளுக்கு ஆழமான பாதிப்பை மூளைக்குள் ஏற்படுத்துவதாக இந்த ஆய்வு கூறுகிறது. குழந்தைகளை விளையாட அனுமதிக்காமல் வீட்டுக்குள் முடக்குவதும் அதிகமான படிப்புச் சுமையை ஏற்றுவதும் குழந்தையின் மூளையை மந்தமாக்கி விடுகிறது என்றும் உளவியல் நூல்கள் தெரிவிக்கின்றன.

எனவே, குழந்தை மதிப்பெண் எடுக்கவில்லை என்பதற்காக தண்டிப்பதைத் தவிர்த்து, குழந்தையின் நடவடிக்கைகளை தாயுள்ளத்துடன் கண்காணித்து உதவி செய்தால், அவசியமான நேரத்தில் சிகிச்சையளித்தால், நிச்சயம் எந்தக் குழந்தையும் நல்ல குழந்தைதான் !

தகவல் : செந்தூரம் ஜெகதீஷ்.

உலகம் பலவிதம் !

2012-04-05T20:49:00.001-07:00

இந்தப் புகைப்படத்தைப் பார்த்ததும், 'ஏதோ எரிமலை சீறுவதால் அதிலிருந்து நெருப்புக் குழம்பு பொங்கி வழிகிறது' என்று தோன்றலாம். ஆனால், உண்மை அதுவல்ல ! இது சாதாரண அருவி, தண்ணீர் வழிந்து விழும் அற்புத அருவி. இதன் தண்ணீர்தான் இயற்கையின் மாயாஜாலத்தில் இப்படி நெருப்புக் குழம்பு போல சீற்றத் தோற்றம் காட்டுகிறது.

அமெரிக்காவின் கலிபோர்னியா மாகாணத்தில் இருக்கிறது யோஸ்மைட் தேசிய பூங்கா. இந்தப் பூங்காவில் ஒரு அருவிக்குப் பெயர் 'குதிரைவால் அருவி'. மலை முகட்டிலிருந்து ஒரு நேர்க்கோடாக தண்ணீர் தரையில் வந்து விழுகிற விதத்தில் இருக்கிறது இந்த அருவி. பிப்ரவரி மாதத்தின் மத்தியில் இரண்டே இரண்டு வாரங்களுக்கு சூரியன் மிகச் சரியாக இந்த அருவியின் தலைப் பக்கமாக அஸ்தமன நேரத்தில் வரும்போது சிவப்பான சூரியக் கதிர்கள் பட்டு அருவி அப்படியே செந்நிறமாகிறது. அப்போது புகைப்படம் எடுத்தால் இப்படித்தான் தோன்றுகிறது அருவி.

வெறும் இரண்டே நிமிடங்களில் இப்படி மாயாஜாலம் காட்டிவிட்டு மறைகிறது சூரியன். வானம் தெளிவாக இருந்து, அருவியிலும் போதுமான தண்ணீர் கொட்டினால்தான் இந்தக் காட்சி சாத்தியமாகும் ! இதைப் படம் பிடிக்க உலகெங்கிலும் இருந்து புகைப்படக் கலைஞர்கள் இங்கு வந்து காத்து இருக்கிறார்கள்.

உலகெங்கிலும் பல விமான நிறுவனங்கள் சிக்கலை சந்திக்கும் நேரம் இது. ஹங்கேரி நாட்டின் 'மாலேவ்' விமான நிறுவனம் நஷ்டத்தைத் தாங்காமல் மூடப்பட்டு விட்டது. அந்த நிறுவனத்தின் ஆறு விமானங்களையும் அமெரிக்காவில் தனித் தனியாகப் பிரித்து பழைய இரும்புக்குப் போடுகிறார்கள். இவற்றைப் புதுப்பிக்க ஆகும் செலவுக்கு புதுசே வாங்கிவிடலாம் என்பதால் சீண்டுவாரில்லை !

தேள் கொட்டுவது என்பது வலி மிகுந்த அனுபவம். சில சமயம் இறப்பு நிலையும் ஏற்படக்கூடும். ஆனால், அந்தத் தேளின் விஷமே மருந்தாகவும் பயன்படுத்தப்படுகிறது. ஆமாம், நரம்பு நோய்களுக்கு சுத்திகரிக்கப்பட்ட தேள் விஷம் மருந்தாகிறது. தேள்களில் இதுவரை மொத்தம் 12 வகை இருப்பதாக சொல்கிறார்கள். அவை: வெண்தேள், செந்தேள், கருந்தேள், கொள்ளிதேள், சித்திரத்தேள், சந்தித்தேள், சினைத்தேள், மணித்தேள், ஜூனைத்தேள், நீர்த்தேள், உச்சிலிங்கத்தேள், நச்சுத்தேள்.

தகவல் : லோகேஷ்,வித்யுத்.

தகவல் களம் !

2012-04-04T20:47:00.000-07:00

மென்மையான காஷ்மீர் கம்பளங்கள் உலகப் புகழ் பெற்றவை. இவை மென்மையாக இருப்பதற்குக் காரணம், பாஷ்மினா ஆடுகள். இமயமலையை ஒட்டிய பனி படர்ந்த பகுதிகளில் பிரத்யேகமாக வசிக்கும் இந்த ஆடுகள், அந்தக் குளிரைத் தாங்குவதற்கு ஏதுவான மென்மையான அடர் ரோமங்கள் அமையப் பெற்றவை. அவற்றிலிருந்து தான் புகழ் பெற்ற காஷ்மீர் சால்வைகளும் கம்பளங்களும் உருவாகின்றன.

குறைந்துவரும் இந்த இனத்தை அபரிமித ஆற்றலோடு உருவாக்குவதற்கான முயற்சி, காஷ்மீரின் ஷெர்-இ-காஷ்மீர் பல்கலைக்கழக விலங்கியல் துறையில் நடக்கிறது. அவர்கள் குளோனிங் முறையில் பாஷ்மினா ஆட்டை உருவாக்கி சாதித்துள்ளனர். 'நூரி' என இந்த ஆட்டுக் குட்டிக்கு பெயர் வைத்துள்ளனர். கடந்த 2009-ம் ஆண்டு 'கரிமா' என்ற எருமைக் கன்றுக் குட்டியை ஹரியானாவில் குளோனிங் முறையில் உருவாக்கினார்கள். அதன் பின் இந்தியாவின் இரண்டாவது குளோனிங் வெற்றி இது!

உலகிலேயே மிக விரைவாகச் செல்லக்கூடிய எலிவேட்டரை ஜப்பானின் மிட்ஸூபிஷி நிறுவனம் உருவாக்குகிறது. சீனாவின் ஷாங்காய் நகரில் 'ஷாங்காய் டவர்' என்ற வானுயர்ந்த கட்டிடம் கட்டப்பட்டு வருகிறது. வரும் 2014-ம் ஆண்டு இது கட்டி முடிக்கப்டும். 632 மீட்டர் உயரத்தில் கட்டப்படும் இந்த ஷாங்காய் டவர், உலகின் மிக உயர்ந்த கட்டிடமான புர்ஜ் கலீஃபாவை விட சற்றே உயரம் குறைவானது. 128 மாடிகள் கொண்ட இந்தக் கட்டிடத்தில் சிறப்பு அம்சமே இந்த எலிவேட்டர்தான்.

ஒரு நிமிடத்திற்கு ஆயிரம் மீட்டர் வேகத்தில் செல்லக்கூடிய இந்த எலிவேட்டார். தரைத் தளத்தில் ஏறும் ஒருவர், 128-வது மாடியை வெறும் 37 நொடிகளில் சென்றடைய முடியும். இப்போது புர்ஜ் கலீஃபா கட்டிடத்தில் இருக்கும் எலிவேட்டரைவிட இது இரண்டு மடங்கு வேகம். இவ்வளவு வேகமாகச் சென்றாலும், உள்ளே பயணிப்பவர்கள் சிறு அதிர்வையோ, காது அடைத்துக் கொள்ளும் அவஸ்தையோ உணர முடியாது. இப்படி வேகமாக பயணிக்கும் போது, அந்த இயக்கத்தில் கொஞ்சம் மின்சாரத்தையும் இது உற்பத்தி செய்யுமாம்.

தென் கொரியாவுக்கும், வட கொரியாவுக்கும் ஜென்மப் பகை இருந்தாலும், இசை இரண்டு தேசங்களையும் இணைக்கிறது. பிரான்ஸ் ரேடியோவுக்காக தலைநகர் பாரிஸில் நடந்த இசை நிகழ்ச்சி ஒன்றுக்கு இரண்டு கொரியாக்களைச் சேர்ந்த கலைஞர்களும் இணைந்துவந்து தங்கள் பாரம்பரிய வாத்தியங்களை இசைத்தார்கள்!

தகவல் : லோகேஷ்.