Melparamb മേൽപറമ്പ്

നിലാ വെളിച്ചത്തിൽ ഒഴുകിയ സംഗീതം

2021-10-02T09:30:00.003+04:00

പള്ളിവയൽ മസ്ജിദിൽ നിന്നുള്ള മൈക്കിലൂടെ മഗ്‌രിബ് ബാങ്കിൻറെ വചനങ്ങൾ ഒഴുകി വരുന്നു. ചന്ദ്രഗിരി കോട്ടയുടെ അകത്തളത്തിൽ ക്രിക്കറ്റ് കളിച്ചിരുന്ന പരിസരത്തെ കുട്ടികൾ ഇനി ബാക്കി കളി നാളെയാണെന്ന് പ്രഖ്യാപിച്ച് പള്ളിയിലേക്ക് ഓടി. മഗ്‌രിബ് ബാങ്കിന് മുമ്പ് തന്നെ പള്ളിയിൽ എത്തിചേരണമെന്ന് വീട്ടിൽ നിന്നും കുട്ടികൾക്ക് കർശന നിർദേശമുണ്ട്. അതിന് രണ്ട് കാരണങ്ങളാണ്. ഒന്ന് ആദ്യ സമയത്ത് തന്നെ മഗ്‌രിബ് നിസ്കരിക്കുക. ചന്ദ്രഗിരി കോട്ടയിലും പരിസര പ്രദേശങ്ങളിലും രാത്രി കാലങ്ങളിൽ എന്തോ നിഗൂഢത ചുറ്റിത്തിരിയുന്നുണ്ട് എന്ന ഭയമാണ് രണ്ടാമത്തെ കാരണം. രാത്രീ കാലങ്ങളിൽ ആ പരിസരം നിശബ്ദമാണ്. ഇടയ്ക്ക് ചിലങ്കയുടെയും, സ്ത്രീകളുടെ പൊട്ടിച്ചിരിയുടെയും, അട്ടഹാസങ്ങളുടെയും ശബ്ദങ്ങൾ കേൾക്കാറുണ്ട് എന്ന് പറയുന്നു. കോട്ടയുടെ മുകളിൽ നിന്നും ചിലപ്പോൾ ചെറിയ കല്ലുകൾ താഴേക്ക് പറന്ന് വരും. സന്ധ്യാ നേരം മുതൽ പുലർച്ചെ വരെ കോട്ട റോഡിലൂടെ ആരും ഒറ്റയ്ക്ക് സഞ്ചരിക്കാറില്ല. കൂട്ടമായി പോകുന്ന മുതിർന്നവർ ആ ഭാഗത്ത് എത്തിയാൽ പിന്നെ പരസ്പരം ഒന്നും സംസാരിക്കാറില്ല. മന്ത്രങ്ങളും, പ്രാർത്ഥനയുമായി കടന്ന് പോകും. അപ്പോൾ ചെറിയ അനക്കം എവിടുന്നെങ്കിലും കേട്ടാൽ അതുവരെ അവർ സംഭരിച്ച എല്ലാ ധൈര്യവും ചോർന്ന് പോയിട്ടുണ്ടാവും. പിന്നെ ഒന്നും നോക്കാറില്ല, കൂട്ടയോട്ടം തന്നെ. ഓട്ടത്തിൽ വീണ് പരിക്കേറ്റ് വീടണഞ്ഞാൽ വീട്ടിൽ നിന്നും ഉമ്മയുടെ ശകാരം കൂടി കേൾക്കണം. അസമയത്ത് ആ വഴിയിലൂടെ വന്നതിന്.

അന്നും പതിവ് പോലെ കോട്ടയിൽ കളിച്ചിരുന്ന കുട്ടികൾ സന്ധ്യാ നേരത്ത് കളി നിർത്തി പോയതാണ്. അതുവരെ സാധാരണ പോലെ തന്നെയായിരുന്നു. പിറ്റേന്ന് പുലർച്ചെ പള്ളിയിൽ നിസ്കാരത്തിന് എത്തിയവരോട് പള്ളി മുക്രി പറയുന്നു രാത്രിയിൽ കോട്ടയിൽ നിന്നും എന്തൊക്കെ അപശബ്ദങ്ങൾ കേട്ടിരുന്നു എന്ന്. അത് പതിവുള്ളതെല്ലേ എന്ന് പറഞ്ഞ് പ്രായമുള്ളവർ അതിനെ നിസ്സാരവൽക്കരിച്ചു. പക്ഷെ, മുക്രി വിടുന്നില്ല. ഇന്നലെ കേട്ടത് പതിവ് പോലുള്ള സ്ത്രീകളുടെ പൊട്ടിച്ചിരിയും, ചിലങ്ക ശബ്ദവുമായിരുന്നില്ല. ഹുന്ദുസ്ഥാനി സംഗീതവും, ഹാർമോണിയം എല്ലാം ഉണ്ടായിരുന്നു. ഏതോ സംഗീതത്തിൽ ലയിച്ച പോലെ മുക്രി ഉരുവിട്ടു. "ആ, അത് പണ്ട്, ഒരു ഗായിക അവിടെ ആത്മഹത്യ ചെയ്തിരുന്നു. അവളുടെ ആത്മാവ് വന്ന് അവിടെ കച്ചേരി നടത്തിയതാവും...." നിങ്ങൾ എന്ത് മൊയിലാരെ ഈ പറയുന്നേ....., പോയി രാവിലത്തെ ചായ കുടി, അപ്പോൾ ശരിയാവും എന്ന് പറഞ്ഞ് പ്രായം കൂടിയ മൂസക്ക സ്ഥലം വിട്ടു. മൂസക്ക സ്ഥലം വിട്ടിട്ടും ബാക്കിയുള്ളവരോട് മുക്രി ഇക്കാര്യം തന്നെ പറഞ്ഞു. ആരും കൂടുതൽ ചെവികൊടുക്കാതെ എല്ലാവരും സ്ഥലം വിട്ടു. നാട്ടുകാർക്ക് ഇത് ഒരു വിഷയമല്ലെങ്കിൽ അന്യ നാട്ടുകാരനായ എനിക്കെന്ത് കാര്യം. എന്തേലും ആവട്ടെ എന്ന് പറഞ്ഞ് അദ്ദേഹം തൻറെ റൂമിലേക്ക് പോയി.

അന്ന് സന്ധ്യാ നേരത്ത് മഗ്‌രിബ് നമസ്കാരം കഴിഞ്ഞ് പതിവ് പോലെ ചിലരൊക്ക പള്ളി പരിസരത്ത് അന്നത്തെ ഓരോരൊ വാർത്തകളും, സംഗതികളും ചർച്ച ചെയ്‌തു തമ്പടിച്ചു. ഇഷാ നിസ്കാരം വരെ പലർക്കും അത് പതിവാണ്. രാവിലെ പള്ളിയിൽ വരാത്തവർ മുക്രി രാവിലെ വിളമ്പിയ വിശേഷങ്ങൾ കേട്ടറിഞ്ഞിരുന്നു. കോട്ടയിൽ നിന്നും കളി കഴിഞ്ഞ് വന്ന കുട്ടികളോട് അവിടെ അസാധാരണമായ എന്തെങ്കിലും ഉണ്ടോ എന്ന് ആരാഞ്ഞു. ഒരു കുട്ടി വളരെ കൗതുകത്തോടെ ഇങ്ങനെ പറഞ്ഞു. തുണി സഞ്ചിയുടെ വലിയൊരു ഭാണ്ഡം അവിടെ കിടപ്പുണ്ട്. ഒരു കാലി ബക്കറ്റും, പാട്ടയും ഉണ്ടായിരുന്നു. പിന്നെന്തോ പലഹാരങ്ങളുടെ അവശിഷ്ട്ടങ്ങൾ അവിടവിടായി കിടപ്പുണ്ട്. മുമ്പ് പലപ്പോഴും ഭക്ഷണങ്ങളുടെ അവശിഷ്ടങ്ങൾ ഉണ്ടാവാറുണ്ട്. ഇത് അങ്ങനെയല്ല. അത് കൊണ്ട് ഞങ്ങൾക്കെന്തോ പേടി തോന്നിയത് കാരണം നേരത്തെ കളി നിർത്തി താഴോട്ടേക്ക് വന്നു. അതോടെ തലേന്ന് രാത്രിയിൽ കോട്ടയിൽ നിന്നും കേട്ടു എന്ന് മുക്രി പറഞ്ഞ സംഗീതം ആ പരിസരം മുഴുവൻ ചർച്ചാ വിഷയമായി. ഇഷാ നിസ്കാരം കഴിഞ്ഞ് എല്ലാവരും പിരിയാൻ നേരത്ത് "അതൊക്കെ വെറുതെ തോന്നുന്നതാവും പുള്ളറെ, ബീയം പോരക്ക് പോയി കഞ്ഞി കുടിച്ച് ഉറങ്ങാൻ നോക്ക്" എന്നും പറഞ്ഞ് നീളം കൂടിയ ടോർച്ചിൻറെ തിരിച്ചിട്ട ബാറ്ററി നേരെയാക്കി അതും മിന്നിച്ച് മൂസക്ക വയൽ വരമ്പിലൂടെ നടന്നകന്നു. പിന്നെ ഓരോരുത്തരായി എല്ലാരും പിരിഞ്ഞ് പോയി. ഭയാശങ്കയോടെ എന്തൊക്കെ ഓതിയും, മന്ത്രിച്ചും മുക്രി തൻറെ റൂമിൽ കയറി കതകടച്ചു.

പിറ്റേന്ന് രാവിലും മുക്രി പറഞ്ഞ ഹിന്ദുസ്ഥാനി സംഗീതം ആ പ്രദേശത്തെ രാവിൻറെ നിശബ്ദദ മുറിച്ച് ഒഴുകി വന്നു. ആസ്വാദകരമായ ഒരു സ്ത്രീ ശബ്ദം. പണ്ടെങ്ങോ കേട്ട് പരിചയമുള്ള സ്വരഭംഗിയെന്ന് ചിലർ ആത്മഗതം ചെയ്തു. രാവിലെ മുതൽ പരിസരത്തെ എല്ലാവരുടെയും സംസാര വിഷയം ഇത് തന്നെയായിരുന്നു. സുബഹി നിസ്കാരത്തിന് പള്ളിയിലേക്ക് വന്ന അലിയും കൂട്ടുകാരും നേരം കുറച്ച് വെളുത്താൽ അങ്ങോട്ട് കയറി ചെന്ന് നോക്കാം എന്ന് പറഞ്ഞു കാത്തിരുന്നു. സൂര്യൻ ഉദിച്ച് വരുന്നു. പരിസരത്ത് ചെറിയ വെളിച്ചം വീശി തുടങ്ങി. അലിയും കൂട്ടരും ധൈര്യം സംഭരിച്ച് കോട്ടയുടെ അകത്തേക്ക് ചെന്നു. കോട്ടക്ക് അകത്തെ വിശാലമായ പുൽപ്പരുപ്പിൽ മതിലിനോട് ചേർന്ന് നീണ്ട താണ്ടിയുള്ള ഒരു വയോധികൻ ഏതോ ഒരു പുസ്തകം വായിക്കുന്നുണ്ട്. തൊട്ടടുത്ത് വിരിച്ച പായയിൽ സുന്ദരിയായ ഒരു യുവതി മൂടിപ്പുതച്ച് കിടന്നുറങ്ങുന്നു. ഹാർമോണിയവും, വിരിപ്പും, പുതപ്പുമെല്ലാം അവിടവിടായി ചിതറിക്കിടക്കുന്നു. അലിയും കൂട്ടരും ആ വൃദ്ധൻറെ അടുത്തേക്ക് നടന്നു നീങ്ങി. ആളുകളുടെ കാലനക്കം കേട്ടത് കൊണ്ടാവണം ഉറങ്ങുകയായിരുന്ന യുവതി ഞെട്ടി എണീറ്റു. അപരിചിതരായ ചില മുഖങ്ങൾ അടുത്തേക്ക് വരുന്നതിൽ അസ്വസ്ഥത പൂണ്ട അവൾ കുറച്ച് അപ്പുറത്തുള്ള കൽതൂണുകൾക്കിടയിൽ മറഞ്ഞ് നിന്നു.

അലിയും കൂട്ടരും സലാം പറഞ്ഞ് വൃദ്ധൻറെ സമീപത്തിരുന്നു. വൃദ്ധൻ തൻറെ വായന നിർത്തി വന്നവരോട് മുറി മലയാളത്തിൽ ചോദിച്ചു "ആരാ....?, മനസ്സിലായില്ല ...." ഞങ്ങൾ ഈ നാട്ടുകാരാണ്, നിങ്ങളെ ഇതിന് മുമ്പ് ഇവിടെ കണ്ടിട്ടില്ലല്ലോ....? ആരാണ് നിങ്ങൾ...? എവിടന്ന് വരുന്നു.....? ചോദ്യങ്ങൾക്കിടയിൽ കൂട്ടത്തിലെ പലരും ഒളിക്കണ്ണാലെ തൂണിന് പിന്നിൽ ഒളിഞ്ഞിരിക്കുന്ന സുന്ദരിയായ യുവതിയെ നോക്കുന്നുണ്ടായിരുന്നു. ചോദ്യങ്ങൾ കേട്ട് കുറെ നേരം ഒന്നും മിണ്ടാതെ വയോധികൻ ദൂരേക്ക് നോക്കി ചിന്തിച്ചിരുന്നു..... പിന്നെ തൻറെ വെളുത്ത നീണ്ട താടി തടവിക്കൊണ്ട് പതിഞ്ഞ ശബ്ദത്തിൽ ഉർദുവും മലയാളവും കലർത്തി സംസാരിക്കാൻ തുടങ്ങി. ഞങ്ങൾ ബംഗാളിലെ മുർശിദാബാദിൽ നിന്നുള്ളവരാണ്. കുറെ വർഷങ്ങൾക്ക് മുമ്പ് ഞാനും എൻറെ മകൾ ഹസീന ബീഗവും ബോംബെയിൽ ചെറിയ ഗാനമേളകളും, നൃത്തങ്ങളും അവതരിപ്പിച്ച് ഉപജീവനം നടത്തിയിരുന്നു. ആ ഇടയ്ക്ക് ഒരു പരിപാടിയിൽ വെച്ച് ബോംബെയിൽ ജോലി ചെയ്തിരുന്ന അബു എന്ന ഒരു മലയാളിയെ പരിചയപ്പെട്ടു. ആ പരിചയം എൻറെ മകളുമായി പ്രണയ ബദ്ധരാവുകയും പിന്നീട് അവർ വിവാഹം ചെയ്തു. വിവാഹ ശേഷം ഹസീന ബീഗവും അബുവും ഒന്നിച്ച് താമസിക്കാനുള്ള സൗകര്യം ഇല്ലായിരുന്നു. അബുവിന് ബോംബെയിൽ ചെറിയ വരുമാനമുള്ള ജോലിയായിരുന്നു. അബു ഒഴിവ് ദിവസങ്ങളിൽ ഞങ്ങൾ താമസിച്ചിരുന്ന ഇടുങ്ങിയ മുറിയിലേക്ക് വരുമായിരുന്നു. പിന്നീട് ഗൾഫിലേക്ക് അടുത്ത് തന്നെ പോകുമെന്നും ഉടനെ ഹസീനയെ കൂടി അങ്ങോട്ട് കൊണ്ട് പോകുമെന്ന് പറഞ്ഞ് ഒരു ഞായറാഴ്‌ച യാത്ര പറഞ്ഞ് ഇറങ്ങിയതായിരുന്നു. അപ്പോൾ എൻറെ മകൾ ഹസീന ബീഗം ഗർഭിണിയായിരുന്നു. വയോധികൻ ഒന്ന് നെടുവീർപ്പിട്ടു. ഇപ്പോൾ വർഷം ഇരുപത്തിയഞ്ച് കഴിഞ്ഞു. അന്ന് യാത്ര പറഞ്ഞിറങ്ങിയ അബുവിനെ പിന്നീട് ഇതവരെ കണ്ടില്ല. പിന്നീട് മകൾ ഒരു പെൺ കുഞ്ഞിനെ പ്രസവിച്ചു. കുറെ കാലം അബുവിനെ കാത്ത് ഞങ്ങൾ ബോംബെയിൽ തന്നെ കഴിഞ്ഞു. അബു കുഞ്ഞിനെ കാണാനെങ്കിലും വരുമെന്ന് പ്രതീക്ഷിച്ചു. ഭർത്താവിന് വേണ്ടിയുള്ള അനന്തമായ കാത്തിരിപ്പ് അവൾക്ക് ഒരുതരം വിഷാദ രോഗം പിടിപെട്ടു. പിന്നെ മകൾക്ക് പാടാനോ, നൃത്തം ചെയ്യാനോ വയ്യാതെ വന്നു. ബോംബെയിൽ ജീവിക്കാൻ ഞങ്ങൾക്ക് മറ്റു മാർഗങ്ങൾ ഒന്നുമില്ലാതെയായി. അബു തൻറെ ഭാര്യയേയും കുഞ്ഞിനേയും കാണാൻ വരുമെന്ന പ്രതീക്ഷയും അസ്തമിച്ചപ്പോൾ ഞങ്ങൾ ബംഗാളിലേക്ക് തന്നെ തിരിച്ച് പോയി. കുട്ടിക്ക് പത്ത് വയസ് ആയപ്പോൾ മകൾ ഞങ്ങളെ വിട്ട് പിരിഞ്ഞു. ഇപ്പോൾ അവൾക്ക് വയസ് ഇരുപത്തിനാല്. പേര് സറീന ബീഗം. ഉമ്മയെ പോലെ തന്നെ നന്നായി പാടും, നൃത്തം ചെയ്യും. ഇപ്പോൾ കുറച്ച് കാലമായി കേരളത്തിലെ തെരുവുകളിൽ പരിപാടികൾ നടത്തി ഞങ്ങൾ ഉപജീവനം നടത്തുന്നു.

വയോധികൻറെ സംസാരം കേട്ടിരുന്ന അലിയുടെയും കൂട്ടരുടെയും ചിന്ത അബുവിലേക്കായി. ആരായിരിക്കും അബു...... ഒന്നും മനസ്സിലാവാതെ അവർ വയോധികനോട് ചോദിച്ചു നിങ്ങൾ എങ്ങിനെ ഇവിടെ എത്തപ്പെട്ടു. ഇവിടം വരെ വരാൻ എന്താണ് കാരണം...? തൻറെ നരച്ച താടി തടവിക്കൊണ്ട് വയോധികൻ തുടർന്നു. എനിക്ക് പ്രായം ഏറി വരുന്നു. പഴയ പോലെ ഹാർമോണിയം വായിക്കാനോ തൂക്കി നടക്കാനോ ഒന്നും ആരോഗ്യമില്ല. ഞാൻ മരിക്കുന്നതിന് മുമ്പ് കൊച്ചു മകളെ അവളുടെ പിതാവിനെ ഏൽപ്പിക്കണം. ഞാനും കൂടി പോയാൽ പിന്നെ അവൾക്ക് ഈ ലോകത്ത് വേറെ ആരുമില്ലാതാവും. അങ്ങനെ അബുവിനെ തേടിയാണ് ഈ യാത്ര. അബുവിൻറെ ശരിക്കുള്ള മേൽവിലാസം ഒന്നും അറിയില്ല. കേരളത്തിൽ കാസറഗോഡ് ഏതോ പുഴക്കടവിലാണ് വീട് എന്നൊക്കെ അന്ന് പറഞ്ഞിരുന്നു. ഇവിടത്തെ തെരുവുകളിൽ പരിപാടികൾ അവതരിപ്പിക്കുമ്പോൾ കൂടി വരുന്ന ആളുകൾക്കിടയിൽ ഞാൻ അബുവിനെ തേടും. എനിക്ക് കണ്ടാൽ അറിയാം. ആ മുഖം ഞാൻ ഒരിക്കലും മറക്കില്ല. അബുവിനെ കണ്ടെത്താൻ നിങ്ങൾ സഹായിക്കണം എന്ന യാചനാ സ്വരത്തിൽ വയോധികൻ അഭ്യർത്ഥിച്ചു. അബുവിൻറെ ഫോട്ടോയോ മറ്റോ ഉണ്ടോ എന്ന് ചോദിച്ചപ്പോൾ ഇല്ലാ എന്ന് അദ്ദേഹം മറുപടി പറഞ്ഞു. അബു അന്ന് വെളുത്ത നല്ല സുമുഖനായിരുന്നു എന്ന് വയോധികൻ കൂട്ടിച്ചേർത്തു.

വയോധികൻറെ സംസാരം കേട്ട അലിയും കൂട്ടരും ആകെ പരിഭ്രമത്തിലായി. എന്ത് മറുപടി പറയണം...? ആരാണ് ഈ അബു.....? നമ്മുടെ നാട്ടിൽ അങ്ങനെ ഒരു അബു ഇല്ല. ഫോട്ടോയോ ഒന്നും അവരുടെ പക്കലില്ല. മുൻ കാലത്ത് ജോലി അന്വേഷിച്ച് ഈ പ്രദേശത്തുകാർ കൂടുതലും ബോംബെയിലേക്കാണ് ആദ്യം യാത്ര ചെയ്യാറ്. ചിലപ്പോൾ അബുവിൻറെ ശരിക്കും പേര് അതായിരിക്കുമോ....? പറഞ്ഞ വിലാസം ശരിയായിരിക്കുമോ......? സ്വയം ചോദ്യങ്ങൾ ചോദിച്ച് അലിയും കൂട്ടരും എണീറ്റ് തുടങ്ങി. സമയം എട്ടു മണിയോട് അടുക്കുന്നു. വെയിൽ രശ്മികൾ ആകെ പരന്ന് തുടങ്ങി. വെയിലേറ്റ് വയോധികൻറെ വെളുത്ത താടി രോമങ്ങൾ വെട്ടിത്തിളങ്ങുന്നു. അലിയും കൂട്ടരും ആകാംഷയോടെ ഒരു നോക്ക് കാണാൻ കാത്തിരുന്ന സറീന ബീഗം എന്ന സുന്ദരി അപ്പോളും കൽ തൂണുകൾക്ക് പിറകിൽ തന്നെ മറഞ്ഞിരിക്കുന്നു. വയോധികനോട് നമുക്ക് ശ്രമിക്കാം എന്ന് ഒരു ഔപചാരിതയ്ക്ക് വേണ്ടി പറഞ്ഞ് അലിയും കൂട്ടരും താഴോട്ടിറങ്ങി.

വൈകുന്നേരത്തോട് കൂടി പള്ളിവയൽ പ്രദേശം ആകെ വയോധികനും, ആ സുന്ദരിയും പിന്നെ അബുവും സംസാര വിഷയമായി. അബു ആരായിരിക്കും എന്നത്തിലാണ് കൂടുതൽ പേർക്കും താൽപര്യം. മുമ്പ് ബോംബെയിൽ ഉണ്ടായിരുന്ന ഇപ്പോൾ ഗൾഫിലും, നാട്ടിലുമുള്ള ചിലരുടെ പേരുകൾ അബുവുമായി സാമ്യപ്പെടുത്തി നോക്കുവാൻ പലരും ശ്രമിച്ചു. നാട്ടിലെ സ്ത്രീകൾക്കാണ് ഈ വിഷയത്തിൽ കൂടുതൽ താൽപര്യം. ചിലർ കോട്ടയ്ക്കകത്ത് കയറി ആ സുന്ദരിയെ കാണുവാൻ ശ്രമിച്ചു. അപ്പോളേക്കും വയോധികൻ ഹാർമോണിയം തൂക്കി സറീന ബീഗത്തെയും കൂട്ടി അന്നത്തെ കലാപരിപാടികൾക്കായി തെരുവിലേക്ക് പുറപ്പെട്ടിരുന്നു.

അന്ന് വൈകുന്നേരം ആരും കോട്ടയിലേക്ക് കുട്ടികളെ കളിക്കാൻ വിട്ടില്ല. അവിടെ പിശാചുണ്ടെന്ന് അവരെ പറഞ്ഞ് പിന്തിരിപ്പിച്ചു. പള്ളിയിൽ മഗ്‌രിബ് നിസ്കാരത്തിന് വന്നവർ അബുവിനെ കുറിച്ച് തന്നെ ചർച്ച ചെയ്തു. ഇതൊക്കെ കേട്ടറിഞ്ഞ മൂസക്ക ഒന്നും അറിയാത്ത മട്ടിൽ അക്കരെ നോക്കി പുഴക്കടവിലിരുന്ന് ഓരോന്ന് ചിന്തിച്ചു. ഇഷാ നമസ്കാരത്തിന് ശേഷം പള്ളി പരിസരത്ത് നിന്ന് എല്ലാവരും പിരിഞ്ഞ് പോയി. രാത്രിയുടെ ഏതോ യാമത്തിൽ ഞെട്ടിയുണർന്ന പള്ളി മുക്രി കോട്ടയിൽ നിന്നും കേട്ട ശബ്ദം ചെവി കൂർപ്പിച്ച് ശ്രദ്ധിച്ചു. കഴിഞ്ഞ ദിവസങ്ങളിൽ കേട്ട ഹിന്ദുസ്ഥാനി സംഗീതമായിരുന്നില്ല അത്. ഒരു സ്ത്രീയുടെ നിലവിളിയായിരുന്നു. പതുക്കെ പതുക്കെ ആ ശബ്ദം അന്തരീക്ഷത്തിൽ അലിഞ്ഞ് ചേർന്ന് ഇല്ലാതെയായി. മുക്രി ഘടികാരത്തിൽ സമയം നോക്കി. സുബഹി ബാങ്ക് വിളിക്കാൻ ഇനിയും ഒരുപാട് നേരം ബാക്കിയുണ്ട്. വീണ്ടും കട്ടിലിലേക്ക് ചെരിഞ്ഞു. ഉറക്കം വരുന്നില്ല. ചില കാലനക്കം കേട്ട് ജനാല തുറന്ന് നോക്കി. നിലാ വെളിച്ചത്തിൽ അയാൾക്ക് ശരിക്കും കാണാമായിരുന്നു. ഒരു വൃദ്ധനും, യുവതിയും ക്ഷീണിതരായി തങ്ങളുടെ ഭാണ്ഡങ്ങൾ തോളിലാക്കി നിരാശാ ഭാരം ചുമന്ന് വയൽ വരമ്പിലൂടെ പയോട്ട ഭാഗത്തേക്ക് നടന്നു നീങ്ങുന്നു.

ചന്ദ്രഗിരി പുഴയിൽ നിന്നും പുലരിയിലെ തണുത്ത കാറ്റ് ആഞ്ഞ് വീശുന്നു. അപ്പോൾ ഉച്ചത്തിൽ ചൂളം വിളിച്ച് കട കട ശബ്ദമുണ്ടാക്കി മംഗലാപുരത്ത് നിന്നും പുറപ്പെട്ട തീവണ്ടി ചന്ദ്രഗിരി പാലത്തിലൂടെ നീങ്ങുന്നു. പയോട്ട റെയിൽവേ സ്റ്റേഷനിൽ നിന്നും കയറിയ യാത്രക്കാരെയും വഹിച്ച് ആ തീവണ്ടി ചന്ദ്രഗിരി തുരങ്കത്തിലേക്ക് പ്രവേശിച്ച് അതിൻറെ യാത്ര തുടരുന്നു....

(കഥയും കഥാപാത്രങ്ങളും എല്ലാം തികച്ചും സാങ്കല്പികം മാത്രം)

റാഫി പള്ളിപ്പുറം.

ബുഡാൻ സാഹിബിന്റെ മകൾ

2018-01-24T14:18:00.001+04:00

ഇതെപ്പോഴും ഇങ്ങനെയാ ജമാൽ. ഒരത്യാവശ്യത്തിനു വിളിച്ചാൽ കിട്ടൂല്ല. ബാങ്കിൽ നിന്ന് ഇറങ്ങിയെന്നു സെക്രട്ടറി പറഞ്ഞു. ഇറങ്ങുന്നതിനു മുമ്ബ് വിളിക്കാറ് പ്രതിവാണല്ലോ. ഇന്നെന്ദേ ഇങ്ങനെ? എവിടെ പോയി കാണും? വീണ്ടും ബാല്കണിയിലേക് നടന്നു.. ഇന്നിധ് എത്രാമത്തെ പ്രാവശ്യമാ? ഹോ വരുന്നുണ്ട്...നേരെ താഴത്തേക്കിറങ്ങി, വാതിലിലേക്കോടി...മുഖത്തെ പരിഭ്രമം മറച്ചു പിടിക്കാൻ ഒരു പാഴ്ശ്രമം....

എന്തു പറ്റി ബാനു? വാതിൽ തുറന്ന ഉടൻ ജമാലിന്റെ ആകാംക്ഷ പുറത്തു വന്നു...ഒന്നുമില്ല അവൾ മൊഴിഞ്ഞു. അയാളത് വിശ്വസിച്ചില്ല. സാദാരണ വരുന്നതിനേക്കാളും അര മണിക്കൂർ വൈകിയതിന്റെ കെറുവ് അല്ല എന്നയാൾക്കറിയാം....എങ്കിലും അവളെ തണുപ്പിക്കാനായി പറഞ്ഞു നാളെ ആണ് ഖുര്ബാനി റിലീസ് ആവുന്നത്, വരുന്ന വഴി പ്ലാസ സിനിമയിൽ പോയി ടിക്കറ്റ് ബുക്ക് ചെയ്തിട്ടാണ് വരുന്നത്, അത് കൊണ്ട വൈകിയത്... ജമാൽ ബാനുവിന്റെ മുഖത്തു ഭാവ വ്യത്യാസം വരുന്നോ എന്ന് ഒളികണ്ണിട്ട് നോക്കി....നാളെ അല്ല ഇന്ന് തന്നെ ഇവിടെ ഒരു ഖുര്ബാനി നടക്കും, ബാനു വെടി പൊട്ടിച്ചു.

എന്തു ബാനു, നീ എന്താ പറയുന്നേ, ഒന്നും മനസ്സിലാവുന്നില്ല, ഞാൻ വന്നപ്പഴേ ശ്രദ്ധിച്ചതാ നിന്റെ മുഖത്തെ വാട്ടം...എന്താണ് ഉണ്ടായതു, മക്കൾ വന്നില്ലേ? നളിനി പണി കഴിഞ്ഞു നേരത്തെ പോയോ? പറ എന്തുണ്ടായി...

ജമാലെ നമ്മളെ മോൾ മഞ്ചൂർഡ് ആയി, അവൾ ഒരു പന്ത്രണ്ടു വയസ്സുള്ള കുട്ടിയല്ല ഇപ്പോൾ. എന്ന് പറഞ്ഞു ബാനു നിർത്തി. എന്നെ പ്രാന്തു പിടിപ്പിക്കല്ല നീ വളച്ചു കെട്ടില്ലാതെ കാര്യം പറ ബാനു, നാദിയ എന്തു ചെയ്‌തു? ജമാലിന് കലി കയറി.

പ്രാന്തായിട്ടുള്ളത് എനിക്കാ, ബാനു പിന്നെയും ജമാലിനെ അരിശം പിടിപ്പിക്കാൻ നോക്കി. പിന്നെ മെല്ലെ പതിഞ്ഞ സ്വരത്തിൽ ബാനു പറഞ്ഞു.... ജമാലെ നാദിയ എന്നോട് ചോദിക്കയാണ് ആദിൽ മമ്മിക്ക് പറ്റിയ മിസ്റ്റേക്ക് ആണോന്നു? പിന്നെ ഒരു നിശബ്ദദ...രണ്ടു പേരും കുറച്ചു നേരത്തേക് ഉരിയാടിയില്ല....

നിശബ്ദദക്ക് വിരാമമിട്ടു ജമാൽ ചോദിച്ചു നീ എന്തു മറുപടി പറഞ്ഞു ബാനു?

ആ ചോദ്യം കേട്ട് ഞാൻ സ്തബ്ധയായിപ്പോയി ജമാലെ, അതവളും പ്രതീക്ഷിച്ച പോലെ, എനിക്ക് ഉരിയാടാൻ കഴിയില്ലെന്ന് മനസ്സിലാക്കിയ വണ്ണം രണ്ടാമത് അവൾ പറയാ എന്റെ പ്രോഗ്രസ്സ് കാർഡിൽ ഡോട്ടർ ഓഫിന് പകരം കെയർ ഓഫ് ജമാലുദ്ധീൻ ആയതു എന്ധെ എന്ന് ഞാൻ ചോദിച്ചപ്പോൾ മമ്മി പറഞ്ഞത് അത് ടൈപ്പിംഗ് എറർ എന്നല്ലേ, അപ്പോഴേ ഒരു സ്പെല്ലിങ് മിസ്റ്റേക്ക് എനിക്ക് മണത്തിരുന്നു, ഇന്ന് ക്ലാസ്സിൽ വെച്ച് സൊഫീയ എന്റെ ബാപ്പ ദേര ക്ലോക്ക് ട്ടവരിൽ ഹോട്ടൽ നടത്തുന്ന ഒരു കാൽ ഇല്ലാത്ത മനുഷ്യനാണെന്ന് പറഞ്ഞു, ആക്‌സിഡന്റിൽ ബാപ്പാന്റെ കാൽ നഷ്ടപ്പെട്ടപ്പോൾ മമ്മി ആദിലിന്റെ ഡാഡിയുടെ കൂടെ ഒളിച്ചോടിയതാണെന്നു....മമ്മി ഇത്ര ക്രുഹൽ ആണോ?

ഇത്രയും കേട്ടപ്പോൾ എനിക്ക് എവിടുന്നോ ഒരു ധൈര്യം കിട്ടിയ പോലെ, ഞാൻ ചോദിച്ചു മോളെ നാദിയ നീ പറഞ്ഞ ഈ ബാപ്പ എപ്പോഴെങ്കിലും നിന്നെ കാണാൻ വന്നോ? എന്ധെ വരാത്തെ? ക്ലോക്ക് ടവറിൽ നിന്ന് ജുമൈറകുള്ള റൂട്ട് അറിയാഞ്ഞിട്ടോ? അവൾ മുഖം താഴ്ത്തി ഇരുന്നു. ഞാൻ റൂമിൽ പോയി ബ്രീഫ് കേസിൽ നിന്ന് ദുബായ് ഫാമിലി കോർട്ട് ഇഷ്യൂ ചെയ്ത ഡിവോഴ്സ് സെര്ടിഫിക്കറ്റും നമ്മുടെ മാര്യേജ് സെര്ടിഫിക്കറ്റും എടുത്ത് കൊണ്ട് വന്നു അവളെ മുമ്പിൽ വെച്ച്....കുറച്ചു നേരം അവൾ അതും നോക്കിയിരുന്നു..... ഒന്നും മിണ്ടിയില്ല... മോളെ നീ പറഞ്ഞില്ലേ ആദിൽ മമ്മിന്റെ മിസ്റ്റേക്ക് ആണെന്ന്... ഇത് പോലെ നിന്റെ ബാപ്പയും പറഞ്ഞിരുന്നു നീ എന്റെ മിസ്റ്റേക്ക് ആണെന്ന്.... അത് കൊണ്ട അയാൾ വരാത്തത്...

ജമാലെ ഇപ്പോൾ അവളാണ് ഞെട്ടിയത്... അവൾ കരയാൻ കോപ്പു കൂട്ടുന്നു എന്ന് തോന്നിയപ്പോൾ ഞാൻ അവളെ തലയിൽ കൈ വെച്ച് തടവി കൊണ്ട് പറഞ്ഞു...മോളെ നാദിയ നിന്നെ ഞാൻ ഗർഭം ധരിച്ചു ഏഴാം മാസത്തിൽ നാട്ടിലേക് പോവുമ്പോഴാണ് ജമാലിനെ ഞാൻ പരിചയപ്പെടുന്നത്... നിനക്ക് രണ്ടു വയസ്സുള്ളപ്പോളാണ് മമ്മിയും ബാപ്പയും ഡിവോഴ്സ് ആയതു, അവിടുന്ന് ആറു മാസം കഴിഞ്ഞു മമ്മിയും ജമാലും മാരീഡ് ആയി, പിന്നീട് മൂന്നു വര്ഷം കഴിഞ്ഞിട്ടാണ് ആദിലിനെ മമ്മി പ്രസവിക്കുന്നത്, പിന്നെ എങ്ങനെയാണ് മോളെ ആദിൽ മമ്മിന്റെ മിസ്റ്റേക്ക് ആവുന്നത്? നിന്റെ ബാപ്പ ആക്സിഡന്റ് ആയതു ബാപ്പാന്റെ ഹൈദരാബാദ് കാരിയുമായി റിമാരിയേജ് കഴിഞ്ഞു അവര്ക് ഇരട്ട പെൺ കുട്ടികൾ ജനിച്ച ശേഷമാണു.... നിന്റെ മമ്മി ക്രുഹൽ അല്ല മോളെ..

അവളുടെ പതിഞ്ഞ സങ്കടത്തോടെയുള്ള സ്വരം എനിക്ക് കേൾക്കാമായിരുന്നു... മമ്മി ഒരു പ്രാവശ്യം എന്നെ എന്റെ ബാപ്പാന്റെ അടുത്ത് കൊണ്ട് പോകുമോ?

ഞാൻ പറഞ്ഞു കൊണ്ട് പോകാം...ജമാൽ വരട്ടെ, പിന്നെ ഞാൻ ചോദിച്ചു മോളെ നാദിയ നിന്നെയും ആദിലിനെയും ട്രീറ്റ് ചെയ്യുന്നേൽ ജമാൽ എന്ധെങ്കിലും വ്യത്യാസം കാണിച്ചിട്ടുണ്ടോ? അവൾ പറഞ്ഞു ഞാനും ആദിലും അടി കൂടുമ്പോൾ ഡാഡി എപ്പോഴും എന്റെ കൂടെയാണെന്ന്...

അവൾ അങ്ങനെ പറഞ്ഞോ എന്നായി ജമാൽ .... അവൾക്കു ഒരു വിധം കൺവിൻസ് ആയി അല്ലെ ബാനു? ഇനി എന്തു വേണം?

അവളെ ബാപ്പാന്റടുത്തു കൊണ്ട് പോണം....

ശരി, നീ സാദാരണ പറയാറുള്ള ദുബായ് ഇമ്മിഗ്രേഷനിലെ ക്യു മാറി നിന്ന കാര്യം അവളോട് പറഞ്ഞില്ലേ?

ഇല്ല അങ്ങനെ തമാശ പറയാനുള്ള അവസരമല്ലല്ലോ ജമാലെ അത്.

അതാണല്ലോ നമ്മുടെ ജീവിതത്തിലെ വഴിത്തിരിവ് ബാനു?

അങ്ങനെ പറയാൻ പറ്റുമോ ജമാൽ, അത് പോലെ എത്ര പേര് ഐര്പോര്ട്ടിലും ട്രെയിനിലും മറ്റും വെച്ച് പരിചയപ്പെടുന്നു?

ഞാൻ പറഞ്ഞത് അതൊരു നിമിത്തമായി എന്നാണ്, ആദിൽ ജനിക്കേണ്ടത് നമുക്കാണെന്നു പടച്ചവൻ നേരത്തെ രേഖപ്പെടുത്തിയിരുന്നു, അല്ലെ ബാനു?

ചിലപ്പോൾ പോണ്ടിച്ചേരിക്കാരനായ നിന്റെ ബാപ്പ ബുഡാൻ സാഹിബ് മാഹീലെ ബോയ്സ് സ്കൂൾ ഹെഡ് മാസ്റ്ററായി സ്ഥലം കിട്ടി വന്നതും കൽക്കണ്ടം തറവാട്ടിലെ നിന്റെ ഉമ്മ കുഞ്ഞാമിനുവേ വിവാഹം ചെയ്തതും ഒരു നിമിത്തം തന്നെയല്ലേ ബാനു? അന്ന് ഫ്രഞ്ച് സർക്കാർ ഉദ്യോഗസ്ഥനായ നിന്റെ ബാപ്പ പിന്നെ എന്ധെ എയ്ഡഡ് സ്കൂൾ തുടങ്ങാൻ കാരണം?

അത് എന്റെ ഉമ്മ നാലാം ക്ലാസ്സു വരെ പഠിച്ചിട്ടുള്ളൂ, ബാപ്പാക് മലയാളം അറിയില്ലായിരുന്നു...

പിന്നെ എങ്ങനെ കമ്മ്യൂണിക്കേഷൻ?

കുറച്ചു തമിൾ കുറച്ചു ഫ്രഞ്ച് കുറച്ചു മലയാളം, പിന്നെ ബാപ്പ മലയാളം പഠിച്ചു

ബാനൂണ് ഫ്രഞ്ച് അറിയുമോ?

ബാപ്പാന്റല് നിന്ന് കിട്ടിയ ഒരു വാക്ക് അറിയാം ക്വാഞ്ചു ഫ്രെയ്ക്

അതെന്തൊന്നു?

കേട്ടിട്ടില്ലേ ഖൻജി പ്രാക്, ഇംഗ്ലീഷിൽ ബനിയൻ

മുസ്ലിം പെൺകുട്ടികളെ സ്കൂളിൽ വിടാത്ത കാലം, ബാപ്പാക് തന്റെ ഏക മകളെ ഡിഗ്രി പഠിപ്പിക്കണമെന്ന നിര്ബന്ധ ബുദ്ധിയിൽ കുറച്ചു ആളുകളെ കൂട്ടി ഒരു ട്രസ്റ്റ് ഉണ്ടാക്കി, അവർ ഇട്ട പേരാണ് ബുഡാൻസ് സ്കൂൾ...

ബാപ്പാന്റെ മരണ ശേഷം ഇപ്പൊ അതാരാണ് നടത്തുന്നത് ബാനു?

അബൂട്ടി മാഷ്

ഏതു അബൂട്ടി, നിന്നെ കെട്ടാൻ താല്പര്യം കാണിച്ച ആ മാഷോ?

അതെ, ബുഡാൻ സാഹിബിന്റെ മകൾ നിലോഫർ ബാനുവിനെ കെട്ടാൻ പൂതിയുമായി കുറെ ചെക്കന്മാർ പുറകെ നടന്നിരുന്നു ...ബാപ്പ പറഞ്ഞു ഡിഗ്രി കഴിയാതെ ഒരു നിവൃത്തിയുമില്ലന്നു...

അവസാനം അതെന്റെ തലയിൽ വന്നു വീണു, അല്ലെ ബാനു?

അതാണ് ജമാലെ ഇടയ്ക്കിടയ്ക്ക് ഞാനും ആലോചിച്ചു ചിരിക്കാര്...

എന്തു?

ഇത്രയൊക്കെ സുന്ദര കുട്ടപ്പന്മാർ പുറകെ വന്നിട്ടും ഞാന് ഈ കോന്തൻറെ കൂടെ പൊറുക്കേണ്ടി വന്നല്ലോ റബ്ബേ എന്നോർത്ത്...ജാമലിനറിയോ നാദിയ യുകെജി ൽ പഠിക്കുന്ന സമയത്തു നമ്മുടെ കല്യാണ ഫോട്ടോ കണ്ടു അവൾ ചോദിച്ചിരുന്നു മമ്മിന്റടുത് നിൽക്കുന്ന ഈ കോന്തനാരു മമ്മി...ഞാൻ പറഞ്ഞു അത് നിന്റെ ഡാഡി എന്ന്...പിന്നെ ചിരിയുടെ പൂരം....

അങ്ങനെ ഉള്ള കോന്തനെ ഞാൻ വെച്ച് വിളമ്പി തന്ന് ഇന്നൊരു ജന്റിൽമാൻ ലുക്ക് ഉള്ളവനാക്കി....

തൂങ്ങി ചാവേണ്ടവൻ മുങ്ങി മരിക്കാറില്ല എന്ന് കേട്ടിട്ടില്ലേ?

വീണ്ടും വളിപ്പ് കോമഡി

എന്റെ കോമഡി എന്ജോയ് ചെയ്യും എന്നിട്ടു വലിപ്പാണെന്നു പരിഹസിക്കും...

അത് വിട്, ജമാൽ പറഞ്ഞല്ലോ നിമിത്തം... ജമാലെ ഞാൻ കരുതുന്നത് വേറൊന്നാണ്, എന്റെ ഉമ്മ ജമാലിന്റ കയ്യിൽ കൊടുത്തു വിട്ട പലഹാരമാണ് നിമിത്തമായത്, അതല്ല പലഹാരവുമായി ജമാൽ ഞങ്ങളെ ഫ്ലാറ്റിൽ വന്നപ്പോൾ കയറി ഇരിക്കാൻ പറഞ്ഞതോ? അന്ന് ജമാൽ ഒരു തമാശക്ക് ചോദിച്ചു ഞാൻ ഇവിടെ ഇരിക്കുന്ന സമയത്തു ഹസ്സുക്ക വന്നാലോ എന്ന്, പറഞ്ഞു തീരും മുമ്ബ് ഒരു ഇടിത്തീ പോലെ ഡോർ തുറന്നു ഹസ്സുക്ക കേറി വന്നതും രണ്ടു പേരെയും തുറിച്ചു നോക്കി ഒരച്ഛരം ഉരിയാടാതെ റൂമിൽ കേറി എന്ധോ എടുത്തു ഉടൻ സ്ഥലം വിട്ടതും ഇന്നും മനസ്സിൽ നിന്ന് മായുന്നില്ല ജമാല്....അത് ഒരു കണക്കിന് നന്നായി ജമാല്, ഇല്ലെങ്കിൽ ഞാൻ പറയുന്ന വിശദീകരണം കേട്ട് മനസ്സിൽ സംശയവും വെച്ച് ജീവിച്ചിരുന്നെങ്കിൽ എന്റെ ജീവിതം കട്ട പോക ആകുമായിരുന്നു...മൂന്നു ദിവസം ആളെ കുറിച്ച് ഒരു വിവരമില്ലാതെ കുറെ വേദനിച്ചെങ്കിലും ഫാമിലി കോർട്ടിൽ നിന്ന് കൗൺസിലിങ്ങിന് വിളിച്ചപ്പോൾ ഒരു സമാദാനമായി, രണ്ടിലൊന്ന് തീരുമാനിക്കാമല്ലോ, അന്ന് നിന്റെ ഫോൺ കാൾ മാത്രമാണ് ഒരു ആശ്വാസം തന്നത്....

അതിനു ഞാൻ നല്ല വിലയും തരേണ്ടി വന്നില്ലേ ബാനു?

എന്തു ഒരു സെക്കന്റ് ഹാൻഡിനെ തലേൽ വെച്ചെന്നോ?

ഞാൻ ഒരു തമാശ പറഞ്ഞതാണ് ബാനു....

ജമാലെ എനിക്ക് എന്റെ ബാപ്പാനെയും ഉമ്മനെയും നഷ്ടപ്പെട്ടു, ഞാൻ അത് സഹിച്ചു, എന്റെ മോളെയും എനിക്ക് നഷ്ടപ്പെട്ടാൽ പിന്നെ എനിക്ക് പിടിച്ചു നില്ക്കാൻ പറ്റില്ല ജമാലെ ...

ബാനു ധൈര്യായിരിക്ക്, ഒന്നും സംഭവിച്ചിട്ടില്ല, എപ്പോഴായിട്ടും അവൾ ഇതൊക്കെ അറിയാതിരിക്കില്ലല്ലോ? നമുക്ക് അവളെയും കൂട്ടി വൈകുന്നേരം ഹസ്സുക്കന്റടുത് പോവാം......എന്റെ വിശപ്പെല്ലാം പോയി, ഇനി കുറച്ചു കിടക്കട്ടെ ....

ഇനി കിടക്കാനെവിടെ സമയം, കുട്ടികൾ ഇപ്പോൾ ഉറങ്ങി എണീക്കും, നാദിയനേം കൊണ്ട് ക്ലോക്ക് റ്റവരിൽ പോണ്ടേ?

ഇന്ന് തന്നെ വേണോ നാളെ പോയാൽ പോരെ, നാളെ സ്കൂൾ ലീവാണല്ലോ

അവൾക് ഞാൻ ഉറപ്പു കൊടുത്തതല്ലേ ജമാലെ, അവളെ സങ്കടപ്പെടുത്തണ്ട

ശരി, അവൾ ഇന്ന് തന്നെ പോണൊന്നു പറഞ്ഞാൽ പോവാം, ഞാൻ ഡ്രസ്സ് മാറട്ടെ.....

ജമാൽ ഡ്രസ്സ് മാറാൻ റൂമിൽ കയറിയപ്പോൾ നാദിയ എണീറ്റ് വന്നു...മമ്മി ഡാഡി വന്നില്ലേ?

ഡാഡി ഡ്രസ്സ് മാറുന്നുണ്ട്, മോളും റെഡി ആവൂ. ഇന്ന് തന്നെ പോവണോ നാളെ പോയാൽ മതിയോ?

ഇന്ന് തന്നെ പോവാൻ മമ്മി...

ശരി ഞാനും വരാം...

മമ്മി ബാപ്പാന്റെ അടുത്ത് വരുമോ?

ഇല്ല ഞാൻ വണ്ടിയിൽ ഇരിക്കാം, മോളെ ഡാഡി കൊണ്ട് പോകും ഞാൻ ആദിലിനേം റെഡി ആക്കട്ടെ, മോൾ ആദിലിനോട് ഒന്നും പറയണ്ട, അവൻ എന്റെ കൂടെ ഇരിക്കും

ശരി മമ്മി

നാഡിയാന്റെ ഉത്സാഹം കണ്ടു മനസ്സിൽ ഒരു ഭയം...അവൾ എനിക്ക് നഷ്ടപ്പെടുകയാണോ, ഹസ്സുക്ക അവളെ കാണാൻ കൂട്ടാകാതിരിക്കുമോ...

നെഞ്ചിടിപ്പ് കൂടുന്ന പോലെ, പിടിച്ചു നിന്നെ തീരു..

മൂന്നാൾക്കും സ്നാക് എടുത്തു വെച്ച് വാഷ് റൂമിൽ കയറി കണ്ണാടിയിൽ നോക്കി, മനസ്സ് സ്വയം സമദാനിപ്പിച്ചു, ഇല്ല ബാനു നീ തോൽക്കില്ല, എങ്കിലും വയറിന്റെ അടി ഭാഗത്തു ഒരു കാളൽ...

മുഖം കഴുകി, മനസ്സിലെ വിഭ്രാന്തി പുറത്തു കാണിക്കാതെ, ഒന്നും സംഭവിക്കാത്ത മട്ടിൽ ജമാലിന്റേം കുട്ടികളേം മുന്നിലെത്തി, നാദിയ റെഡിയായി നില്കുന്നു, ആദിൽ ചോദിച്ചു ഞാൻ ഡ്രസ്സ് മാറേണ്ടേ മമ്മി, വേണ്ട നമ്മൾ രണ്ടാളും വണ്ടിയിൽ ഇരിക്കും നാദിയാണെ കൂട്ടി ഡാഡി കുറച്ചു നേരത്തേക് ഒരു സ്ഥലം വരെ പോയി വരും...

നദിയാന്റെ ഉത്സാഹം വിറളി പിടിപ്പിക്കുന്നുണ്ട് , ജമാലിന്റെ ഇടക്കിടക്കുള്ള നോട്ടവും, എങ്കിലും ഒന്നും എന്നെ അലട്ടുന്നില്ല എന്ന മട്ടിൽ വണ്ടിയിൽ കയറി, രണ്ടു വരി മാത്രമുള്ള ജുമൈറ റോഡ് കഴിഞ്ഞാലേ ട്രാഫിക് ജാം കുറയൂ, വെറുതെ പുറത്തേക്ക് നോക്കിയിരുന്നു....

അവസാനമായി ഹസ്സുക്കാനേ കണ്ടത് ആക്സിഡന്റ് ആയ പിറ്റേ ദിവസം റാഷിദ് ഹോസ്പിറ്റലിൽ റൂമിലേക്കു കയറി ചെന്നപ്പോഴാണ്, മനസ് മുഴുവനും ഒരു മരവിപ്പ്, വിവാഹ മോചനം നേടിയ സ്ത്രീ മുൻ ഭർത്താവിനെ കണ്ടു കൂടാ എന്ന നിയമം പോലും മറന്നു പോയി, ജമാൽ ഓർമിപ്പിച്ചു പോലും ഇല്ല, കാൽ നഷ്ടപ്പെട്ട ആളുടെ നിസ്സഹായാവസ്ഥ കണ്ടു, അപ്പോഴത്തെ വികാരം എന്തായിരുന്നു, ഓർത്തെടുക്കാൻ പറ്റുന്നില്ല, "എനിക്ക് രണ്ടു കാലും ഉള്ളപ്പോഴെ നിനക്ക് എന്നെ വേണ്ടായിരുന്നല്ലോ?" എന്ന അദ്ദേഹത്തിന്റെ വാക്കാണ്, പറയാൻ വിചാരിച്ചതു മുഴുവൻ തൊണ്ടയിൽ കുടുങ്ങിയത് പോലെ...ശവത്തിൽ കുത്തരുതല്ലോ, ഒന്നും പറയാതെ പുറത്തു ഇറങ്ങി...

ബാനു വരുന്നില്ലല്ലോ എന്ന് ജമാൽ പറഞ്ഞപ്പോഴാണ് വണ്ടി ക്ലോക്ക് ടവറിൽ എത്തിയതറിഞ്ഞത്. ജമാൽ നദിയാനയും കൂട്ടി ഹോട്ടൽ ഭാഗത്തേക്ക് പോയി....

നാദിനെ ഡാഡി എവിടെ കൊണ്ട് പോക മമ്മി?

അവരിപ്പോ വരും, നാഥിന്റെ കൂട്ടുകാരിയുടെ അടുത്തു പോവാ.

ഡാഡി ഒറ്റക്കാണല്ലോ തിരിച്ചു വരുന്നധ്?

ശരിയാണല്ലോ ഇതെന്തു പറ്റി?

ജമാൽ അടുത്തെത്തട്ടെ, മോന്റെ മുമ്പിൽ നിന്നായാൽ അവൻ സംശയിക്കും എന്ന് കരുതി പുറത്തിറങ്ങി, എന്തു പറ്റി ജമാൽ? ദൂരത്തു നിന്ന് തന്നെ ജമാൽ എന്ധോ പറയുന്നുണ്ട്...പൊടിക്കാറ്റിൽ ഒന്നും മനസ്സിലായില്ല...ജമാൽ അടുത്തെത്തി, കിതക്കുന്നുണ്ട്, ബാനു അവരെന്ദോ മുൻ ജന്മ പരിജയം പോലെ, ഞാൻ പരിചയപ്പെടുത്തും മുമ്പേ ബാപ്പ എന്ന് വിളിച്ചു കെട്ടിപിടിച്ചു രണ്ടു പേരും കരഞ്ഞു, കണ്ടു നിൽക്കാൻ പറ്റുന്നില്ല ബാനു....ഹസ്സുക്ക പറഞ്ഞു നാളെ സലാമിന്റെ കൂടെ പറഞ്ഞയക്കാം ഇന്നവളിവിടെ നിൽക്കട്ടെ എന്ന്...

എന്റെ സംശയം ബലപ്പെടുന്നു...അവൾ എനിക്ക് നഷ്ടപ്പെടുകയാണ്.....

എന്റെ മനോഗതം മനസ്സിലാക്കിയ വണ്ണം ജമാൽ പറഞ്ഞു ഇന്നൊരു ദിവസമല്ലേ ബാനു. നാളെ വൈകീട് അവളിവിടെ എത്തും, നീ ഒറ്റക്കല്ലല്ലോ, നാളെ ലീവ് ആയതു കൊണ്ട് ഞാനും ആദിലും വീട്ടിലുണ്ടാവുമല്ലോ, അപ്പൊ അത്ര ബോറടിക്കില്ല

ആദിലിനോട് എന്തു പറയും?

അത് ഞാൻ പറഞ്ഞോളാം നീ വണ്ടീൽ കേറൂ....

നാദിനെ എവിടെ കൊണ്ടാക്കി ഡാഡി

നാദി അവളെ കൂട്ടുകാരീടെ വീട്ടിൽ ഇന്ന് പാർട്ടി ഉണ്ട് അത് കഴ്ഞ്ഞു നാളെ അവൾ വരും മോന്റെ കൂടെ ഡാഡി കളിക്കാം ട്ടോ ....

മമ്മി കളിക്കൂല്ല?

മമ്മിക്ക് നല്ല സുഖം ഇല്ല, ഇന്ന് മമ്മി റസ്റ്റ് എടുക്കട്ടേ

പിന്നെയും രണ്ടു പേരും എന്ധോക്കയോ ചോദിക്കയും പറയുകയും ചെയ്‌തു, ഒന്നിലും മനസ്സ് ഉറക്കുന്നില്ല, എന്ധോ അനർത്ഥം വരാൻ പോന്ന പോലെ...

വീടിന്റെ ഗേറ്റ് കടന്നപ്പോഴാണ് പരിസര ബോധം വന്നത്.

റൂമിൽ കേറി കട്ടിലിൽ വീണു,

വിങ്ങൽ, തേങ്ങൽ, എന്താ സംഭവിക്കുന്നെ എന്നറിഞ്ഞൂടാ....

കുറച്ചു സങ്കടപെട്ടോട്ടെ എന്ന് കരുതി കാണും ജമാൽ, റൂമിൽ കയറിയതേ ഇല്ല, ഒന്നുമില്ല എന്ന് സമദാനിക്കാം ശ്രമിക്കുന്ദോരും പിന്നിൽ നിന്നാരോ പിടിച്ചു വലിക്കും പോലെ......

എന്ധോ ഘോര ശബ്ദം, കൂരിരുട്ടു, ഒന്നും കാണാൻ പറ്റുന്നില്ല....ആരോ വിളിക്കുന്നുണ്ട്, ആരാണ്, ഫോൺ ബെല്ലടിക്കുന്നു, ഈ അസമയത് ആരായിരിക്കും, ഓടി പോയി ഫോൺ എടുത്തു, മറ്റേ തലക്കൽ നിന്ന് ഏങ്ങലിന്റെ ശബ്ദം, ബാബി, ഇത് സലാം, എല്ലാം പോയി ബാബി,

എന്താ സലമേ, എന്തു പറ്റി...

നമ്മുടെ കുഞ്ഞുങ്ങൾ കടലിൽ മുങ്ങി,

നോ ...നോ ...നോ...ഞാൻ വിശ്വസിക്കില്ല, അവൻ കൊന്നു, ആ കാലമാടൻ ....നോ നോ നോ

ജമാലും ആദിലും അട്ടഹാസം കേട്ട് ഓടി കിതച്ചു റൂമിലെത്തി, എന്തു പറ്റി ബാനു?

ജമാലെ നമ്മളെ മോളെ അവൻ കൊന്നു,

ആര്?

ആ കാലമാടൻ

ആര് പറഞ്ഞു

സലാം ഫോൺ വിളിച്ചു പറഞ്ഞു

ഇപ്പോൾ ഇവിടെ ഫോണൊന്നും വന്നില്ലല്ലോ, സിറ്റിംഗ് റൂമിലാണല്ലോ ഫോണുള്ളത്...

നീ എന്താ ഇങ്ങനെ വിയർക്കുന്നത്? നീ ഉറങ്ങിയിരുന്നോ? നീ പേടി സ്വപ്നം കണ്ടതാ ..

മക്കളെ ഇങ്ങനെ സ്നേഹിക്കരുത് ബാനു...ഇത് കുറച്ചു ഓവറാ.....

- by Gafoor Deli

Kp Gafoor

സൗമ്യനായ സീതു ഹാജി തായത്ത്

2018-01-17T14:54:00.003+04:00

"കടവത്ത് പരന്ന് കിടക്കുന്ന വയലിൽ പൂത്തു നിൽക്കുന്ന കതിരുകൾക്കിടയിൽ അദ്ധ്വാനിക്കുന്ന ഒരു കർഷകനെ കാണാം.

വയൽ വരമ്പിൽ കാലനക്കം കേട്ടാൽ തല ഉയർത്തി നോക്കി കുശലാന്വേഷണം നടത്തി നാട്ടു വിശേഷങ്ങൾ സംസാരിക്കുന്ന സൗമ്യനായ ഒരു മനുഷ്യ സ്നേഹി.

1948 ൽ ഇന്ത്യൻ യൂണിയൻ മുസ്ലിം ലീഗ് പിറന്നത് മുതൽ ഹരിത പതാകയേന്തിയ മുസ്ലിം ലീഗ് പ്രസ്ഥാനത്തിന്റെ കർമ്മ പോരാളി. ചെമനാട് പഞ്ചായത്തിൽ പാർട്ടിയെ കെട്ടി പടുക്കുന്നതിനു വേണ്ടി പ്രയത്നിച്ച വിപ്ലവകാരി 2017 നവംബർ 4 ന് ഈ ലോകത്തോട് വിട പറഞ്ഞു."

കടവത്ത് തായത്ത് തറവാട്ടിൽ ഖാളിയാർ അഹമ്മദ് ഖദീജ ദമ്പതികളുടെ ഒമ്പതു മക്കളിൽ 1944 ഡിസംബർ 5 ആം തീയ്യതി സയീദ് എന്ന കടവത്ത് സീതുച്ച ജനിച്ചു. കളനാട് എൽ. പീ സ്കൂൾ ഓൾഡിൽ (മഠത്തിൽ സ്കൂൾ) നിന്നും സ്കൂൾ വിദ്യാഭ്യാസം. ചെറുപ്പത്തിലേ കൃഷിയോടായിരുന്നു അദ്ദേഹത്തിന് താല്പര്യം.

സ്‌കൂൾ പഠനത്തിന് ശേഷം സീതുച്ച മുഴുവൻ സമയ കർഷകനായി. പിന്നീട് കാസറഗോഡ് മാർക്കറ്റ് റോഡിൽ എരുതുംകടവ് സ്വദേശി മുഹമ്മദ് കുഞ്ഞി എന്നവരുമായി ചേർന്ന് പങ്കാളിത്തത്തിൽ ഒരു വളം ഡിപ്പോ ഉണ്ടാക്കി ഇരുപതു വർഷത്തിലധികം കച്ചവടം ചെയ്തിരുന്നു. ശേഷം മാർക്കറ്റ് റോഡിലെ കച്ചവടം നിർത്തി വീണ്ടും കൃഷിയിലേക്കു തന്നെ അദ്ദേഹം തിരിഞ്ഞു.

പിതാവിന്റെ മരണ ശേഷം കുടുംബത്തിന്റെ മുഴുവൻ ഉത്തരവാദിത്വം സീതുച്ചയ്ക്കായിരുന്നു. പിതാവിന്റെ വേർപാടിന് ശേഷം സഹോദരങ്ങൾക്ക് താങ്ങായി തണലായി കുടുംബത്തിന്റെ നെടുംതൂണായി സീതുച്ച മാറി. സഹോദരങ്ങൾക്ക് മാത്രമല്ല കുടുംബത്തിന് മൊത്തം സീതുച്ച എന്നും ഒരു നിറ സാന്നിധ്യമായിരുന്നു.

കുടുംബത്തോട് എന്ന പോലെ കുടുംബ പാരമ്പര്യത്തിലും സീതുച്ച എന്നും നല്ല വില കൽപിച്ചിരുന്നു. സയീദ് എന്ന യഥാർത്ഥ പേരാണ് വിളിയിലും അവസാനം രേഖകളിലും സീതു എന്നായി മാറിയത്.

രേഖപ്പെട്ട ചരിത്ര പ്രകാരം കീഴൂറിന്റെ പ്രഥമ ഖാസി പയോട്ട പള്ളിയിൽ അന്ത്യ വിശ്രമം കൊള്ളുന്ന സയീദ് മുസ്ലിയാർ സീതുച്ചാന്റെ പിതാവിന്റെ വലിയുപ്പയാണ്. എല്ലാ വർഷവും ശവ്വാൽ മാസം അവസാനത്തിൽ പയോട്ട പള്ളിയിൽ സയീദ് മുസ്ലിയാരുടെ ആണ്ടു നേർച്ചയും അതോടു അനുബന്ധിച്ചു ചീരണി വിതരണവും നടത്താറുണ്ട്. അതിനെല്ലാം ഇതുവരെ നേതൃത്വം നൽകിയിരുന്നത് കടവത്ത് സീതുച്ചയായിരുന്നു.

മുസ്ലിം ലീഗിന്റെ പിറവി മുതൽ ലീഗിൽ ആകൃഷ്ടനായ സീതുച്ച ചെമ്മനാട് പഞ്ചായത്തിൽ വിശിഷ്യാ മേൽപറമ്പ് പ്രദേശത്തു പാർട്ടിയെ കെട്ടി പടുക്കുന്നതിൽ തന്റേതായ പണ്ട് വഹിച്ചിട്ടുണ്ട്.

പാർട്ടിയുടെ ദൗർഭാഗ്യകരമായ പിളർപ്പ് ഉണ്ടായപ്പോൾ ഔദ്യോഗിക പക്ഷത്ത് തന്നെ ഉറച്ചു നിന്ന് അദ്ദേഹം. പ്രാദേശിക രാഷ്ട്രീയ പ്രവർത്തനങ്ങളിൽ സജീവമായി ജനങ്ങളുടെ സാമൂഹിക പ്രശ്നങ്ങളിൽ ഇടപ്പെട്ടു തന്റെ സാമൂഹിക പ്രതിബദ്ധത തെളിയിക്കുമ്പോഴും പാർലമെന്ററി മോഹങ്ങളോ പാർട്ടിയിൽ സ്ഥാന മാനങ്ങളോ ആഗ്രഹിക്കാതെ എന്നും സാധാരണ ജനങ്ങൾക്കൊപ്പം നില കൊണ്ടു. മുസ്ലിം ലീഗിന്റെ ചെറുതും വലുതുമായ എല്ലാ പരിപാടികളിലും യോഗങ്ങളിലും എന്നും നേരത്തെ വന്നു മുൻ നിരയിൽ സജീവ സാന്നിധ്യമായ കടവത്ത് സീതുച്ചയെ കാണാമായിരുന്നു. അണികളുടെ നിർബന്ധത്തിനു വഴങ്ങി പലപ്പോഴും ശാഖാ പ്രസിഡന്റ് മുതൽ മറ്റു ഭാരവാഹിത്വങ്ങൾ സീതുച്ച ഏറ്റെടുത്തിട്ടുണ്ട്. ഒരു വേള ചെമനാട് പഞ്ചായത്ത് മുസ്ലിം ലീഗ് വൈസ് പ്രസിഡന്റ് ആയും സീതുച്ച പ്രവർത്തിച്ചിരുന്നു.

പലപ്പോഴും പഞ്ചായത്ത് ബോർഡിലേക്ക് സീറ്റിനായി പരിഗണിച്ചപ്പോഴൊക്കെയും അദ്ദേഹം ഒഴിഞ്ഞു മാറുകയായിരുന്നു. ആ സീറ്റുകളൊക്കെയും പാർട്ടിക്ക് വിജയം സുനിശ്ചിതമായ സീറ്റുകളായിരുന്നു.

മുസ്ലിം ലീഗിനെ അദ്ദേഹം ഒരു ആവേശമായി അതിലുപരി ഒരു വികാരമായി എന്നും നെഞ്ചിലേറ്റിയിരുന്നു. പാർട്ടി നേതാക്കളോടെന്ന പോലെ സാധാരണ പ്രവർത്തകരോടും സീതുച്ച ഒരു പ്രത്യേക സ്നേഹം നില നിർത്തിയിരുന്നു. കുറെ കാലം ചന്ദ്രഗിരി സ്കൂൾ പീ. ടീ. എ ഭാരവാഹിയായും അംഗമായും സീതുച്ച പ്രവർത്തിച്ചിരുന്നു. മുൻ കാലങ്ങളിൽ കലാലയ രാഷ്ട്രീയ സംഭവങ്ങളിൽ സ്‌കൂളിൽ അനിഷ്ട സംഭവങ്ങൾ ഒക്കെയുണ്ടാവുമ്പോൾ എം. എസ്. എഫിന്റെ കുട്ടികൾക്ക് വേണ്ടി പീ. ടീ. എ മീറ്റിങ്ങുകളിൽ സീതുച്ച വികാരപരമായി തന്നെ വാദിക്കുമായിരുന്നു.

തിരഞ്ഞെടുപ്പുകളിൽ യു. ഡീ. എഫ് സ്ഥാനാർത്ഥികളുടെ വിജയത്തിന് വീട് വീടാന്തരം കയറി ഇറങ്ങി വോട്ടു ചോദിക്കാനും പ്രചാരണം നടത്താനും സീതുച്ച കർമ്മ വീഥിയിൽ സജീവമായിരുന്നു. ഈ അടുത്ത് ആരോഗ്യപരമായി വീട്ടിൽ വിശ്രമിക്കുന്നത് വരെയും. വിശ്രമ വേളയിലും അദ്ദേഹം വെറുതെയിരുന്നില്ല. അവസാനമായി കഴിഞ്ഞ പഞ്ചായത്ത് തിരഞ്ഞെടുപ്പിൽ തന്റെ വാർഡിലെ സ്ഥാനാർത്ഥിയുടെ വിജയത്തിന് വേണ്ടി വാർഡിലെ പ്രവർത്തകരെ എന്നും വിളിച്ചു നിർദേശങ്ങൾ നൽകാനും പ്രവർത്തനങ്ങൾ വിലയിരുത്താനും സീതുച്ച പ്രത്യേകം ശ്രദ്ധ ചെലുത്തിയിരുന്നു.

കടവത്ത് എന്ന പ്രദേശത്തിന് വെളിച്ചം നൽകുന്ന ഒരു വിളക്കായിരുന്നു സീതുച്ച. കടവത്തിന്റെയും കടവത്തുകാരുടെയും

ദൈന്യം ദിന കാര്യങ്ങൾ അറിയുന്ന സീതുച്ച. കടവത്ത് നൂർ മസ്ജിദിന്റെയും മദ്രസ്സയുടെയും പരിപാലനത്തിന് പ്രത്യേകം ശ്രദ്ധ ചെലുത്തിയ ദീനി സ്നേഹിയായ വ്യക്തി. ദീർഘ കാലമായി കടവത്ത് നൂർ മസ്ജിദിന്റെ പ്രസിഡന്റ് ആയും അദ്ദേഹം പ്രവർത്തിച്ചു വരികയായിരുന്നു.

2012 സെപ്തംബർ 18 ന് മേൽപറമ്പ് യൂത്ത് ലീഗ് കമ്മിറ്റി കടവത്ത് സീതുചാനെയും ഈ അടുത്ത് നമ്മെ വിട്ടു പിരിഞ്ഞ കട്ടക്കാൽ ഉമ്പിച്ചാനെയും അവരുടെ മുൻ കാല പ്രവർത്തനങ്ങൾ കണക്കിലെടുത്ത് ആദരിച്ചിരുന്നു. ജില്ലാ ജനറൽ സെക്രട്ടറി എം. സീ. ഖമറുദീൻ അടക്കമുള്ള നേതാക്കൾ സംബന്ധിച്ച പരിപാടിയായിരുന്നു അത്.

2016 മാർച്ച് മാസത്തിൽ എം. വൈ. എൽ ഒറവങ്കര യു. എ. ഇ കമ്മിറ്റി ദുബായിൽ നടത്തിയ ഓ പീ. എൽ വേദിയിൽ വെച്ച് കടവത്ത് സീതുചാനെ ആദരിച്ചിരുന്നു. ദുബായ് കെ. എം. സീ. സീ പ്രസിഡന്റ് അൻവർ നഹയായിരുന്നു അദ്ദേഹത്തിനുള്ള ഉപഹാരം സമ്മാനിച്ചിരുന്നത്.

പ്രശസ്ത പണ്ഡിതനും ആദൂർ ഖാസിയുമായിരുന്ന കട്ടക്കാൽ സീതു കുഞ്ഞി മുസ്ലിയാരുടെ മകൾ ആയിഷയാണ് സീതുച്ചാന്റെ ഭാര്യ. മക്കൾ ഹസീന, നിഷാരി, റെമി, സിൽമീന, നവാസ്, നുവൈസ്, ഷാനി, തസ്‌ലി എന്നിവർ.

ഇന്ത്യൻ യൂണിയൻ മുസ്ലിം ലീഗിന്റെ പിറവി മുതൽ എന്നും അടിയുറച്ചു നിന്ന് പാർട്ടിക്ക് വേണ്ടി കഠിനാദ്ധ്വാനം ചെയ്ത അവശേഷിക്കുന്ന അവസാന കണ്ണികളിൽ നിന്നും കടവത്ത് സീതുച്ചായും യാത്രയായി.

ഞാൻ എം. എസ്. എഫിൽ പ്രവർത്തിക്കുന്നത് മുതലാണ് സീതുചായുമായുള്ള സ്നേഹ ബന്ധം തുടങ്ങുന്നത്. ആ ആത്മ ബന്ധം അദ്ദേഹത്തിന്റെ മരണം വരെ നില നിന്നു. അക്കാലത്തു പരസ്പരം കാണുമ്പോൾ അദ്ദേഹം ആദ്യം അന്വേഷിച്ചിരുന്നത് പാർട്ടി പ്രവർത്തനങ്ങളെ കുറിച്ച് തന്നെയായിരുന്നു. പിന്നെ ഒരുപാട് ഉപദേശ നിർദേശങ്ങളും. അവധിക്കു നാട്ടിൽ ചെന്നാൽ അദ്ദേഹത്തിന്റെ വീട്ടിൽ ചെന്ന് സന്ദർശിക്കാൻ സമയം കണ്ടെത്തിയിരുന്നു. അവസാനമായി കണ്ടു സംസാരിച്ചത് ഇളയ മകന്റെ കല്യാണ ദിനത്തിലായിരുന്നു. പിന്നീട് സീതുചാനെ കാണുന്നത് അദ്ദേഹത്തിന്റെ നിശ്ചലമായ ശരീരത്തെയാണ്.

നാഥാ, അദ്ദേഹത്തിന് മഗ്ഫിറത്ത് നൽകി നമ്മെയെല്ലാം സ്വർഗത്തിൽ ഒരുമിച്ചു കൂട്ടേണമേ...... ആമീൻ!

-Rafi Pallippuram

എം. അബ്ദുല്ല

2017-10-02T15:30:00.000+04:00

മേൽപറമ്പ് പഴയ പള്ളിയുടെയും മദ്രസ്സ കെട്ടിടത്തിന്റെയും കിണറിന്റെയും സമീപത്തായി ഒരു ഒറ്റ ഖബറുണ്ടായിരുന്നു. പള്ളി പുതുക്കി പണിയുമ്പോൾ ആ ഖബറിടം പള്ളിക്കടിയിലായി. മേൽപറമ്പുകാർ ചെർച്ച എന്ന് വിളിച്ചിരുന്ന കളനാട് മുഹമ്മദിന്റേതായിരുന്നു ആ ഖബറിടം.

വിദ്യാഭ്യാസത്തോട് മുഖം തിരിച്ചിരുന്നു പൂർവ്വ കാലം. ഇന്ത്യക്ക് സ്വാതന്ത്രം ലഭിക്കുന്നതിന് മുമ്പ് ഉന്നത വിദ്യാഭ്യാസം നേടി കേന്ദ്ര സർക്കാറിന്റെ കീഴിൽ ഇന്ത്യയുടെ പല ഭാഗത്തായി ഉയർന്ന ഉദ്യോഗത്തിൽ ജോലി ചെയ്ത മേൽപറമ്പിലെ അപൂർവ്വ പ്രതിഭ.

തന്റെ ജീവിത രീതി കാലഘട്ടത്തിന് വ്യത്യസ്തമായി പുരോഗമന ചിന്ത പ്രതിഫലിപ്പിച്ച മഹനീയ വ്യക്തിത്വം. ചെർച്ചാന്റെ അദിൻച്ച എന്ന എം. അബ്ദുല്ല.

ചെർച്ച എന്ന കളനാട് മുഹമ്മദ് ആയിഷ ദമ്പതികളുടെ അഞ്ചു മക്കളിൽ മൂത്ത മകനായി 1923 ഏപ്രിൽ 19 ആം തീയ്യതി നെല്ലിക്കുന്നിൽ അബ്ദുല്ലയുടെ ജനനം. ഇന്ത്യ ബ്രിട്ടീഷ് സാമ്രാജ്യത്വത്തിന് കീഴിലുള്ള കാലം. സാക്ഷരത 10 ശതമാനത്തിൽ താഴെ മാത്രമുള്ള കാലഘട്ടത്തിലാണ് കളനാട് മുഹമ്മദ് മകനെ മഠത്തിൽ സ്കൂളിൽ അക്ഷരാഭ്യാസത്തിനായി ചേർക്കുന്നത്. ചെറുപ്പത്തിൽ തന്നെ അദ്ദേഹം പഠനത്തിൽ മികവ് കാണിച്ചിരുന്നു. മഠത്തിൽ സ്കൂളിലെ പഠനത്തിന് ശേഷം ചന്ദ്രഗിരി പുഴ കടന്ന് കാസറഗോഡ് ബോർഡ് ഹൈ സ്കൂളിൽ നിന്നും 1942 ൽ ഉയർന്ന മാർക്കോടെ എസ്. എസ്. എൽ. സീ പാസ്സായി. ആ കാലത്ത് നമ്മുടെ പ്രദേശത്ത് നിന്നും എസ്.എസ്. എൽ. സീ പാസ്സായ ആദ്യ മൂന്നു പേരിൽ ഒരാൾ അബ്ദുല്ലയായിരുന്നു.

ഇസ്ലാമിക വിഷയങ്ങളിലും അബ്ദുല്ലയ്ക്ക് അപാരമായ ജ്ഞാനമുണ്ടായിരുന്നു. പരേതനായ ചെമ്പരിക്ക വലിയ ഖാസി സീ. മുഹമ്മദ് കുഞ്ഞി മുസ്ലിയാരുടെ കീഴിലായിരുന്നു ദീനി വിദ്യാഭ്യാസം അബ്ദുല്ല നേടിയിരുന്നത്. ഖുർആൻ, ഫിഖ്ഹ്, അറബിക് ഗ്രാമർ തുടങ്ങിയ വിഷയങ്ങൾ അദ്ദേഹം ഖാളിയുടെ കീഴിൽ നിന്നും പഠിച്ചു. പരിശുദ്ധ ഖുർആന്റെ മിക്കവാറും അധ്യായങ്ങൾ അദ്ദേഹം ഹൃദയസ്ഥമാക്കിയിരുന്നു. ഇസ്ലാമിക വിഷയങ്ങൾ കൂടുതൽ കൂടുതൽ പഠിക്കാൻ അദ്ദേഹം ജീവിതാവസാനം വരെ സമയം കണ്ടെത്തിയിരുന്നു. പണ്ഡിതൻമാരിൽ നിന്ന് ചോദിച്ചറിഞ്ഞും സംശയ നിവാരണം നടത്തിയും തന്റെ അറിവുകൾ അദ്ദേഹം എന്നും പരിപോഷിപ്പിച്ചു. നമ്മെ വിട്ടു പിരിഞ്ഞ ബഹുമാനപ്പെട്ട ഖത്തീബ് ഉസ്താദിന്റടുത്തിരുന്ന് ഇസ്‌ലാമിക വിഷയങ്ങൾ പഠിക്കുമായിരുന്നു അദ്ദേഹം.

എസ് എസ് എൽ സീ പാസായ ഉടനെ ഇന്ത്യൻ പോസ്റ്റ് ആൻഡ് ടെലിഗ്രാഫ് വകുപ്പിന്റെ മാംഗ്ലൂർ ഹെഡ് പോസ്റ്റ് ഓഫീസിൽ ക്ലർക്ക് ആയി താൽക്കാലിക തസ്തികയിൽ നിയമനം ലഭിച്ചു. തുടർന്ന് താത്കാലിക അടിസ്ഥാനത്തിൽ തന്നെ കർണാടകയിലെ മുൽക്കി, ഉഡുപ്പി എന്നിവിടങ്ങളിലും 1943 വരെ ജോലി ചെയ്തു. 1944 ൽ പോസ്റ്റൽ ആൻഡ് ടെലിഗ്രാഫ് റിക്രൂട്ട്മെന്റ് പരീക്ഷ പാസ്സായ അബ്ദുല്ലയ്ക്ക് ഡിപ്പാർട്മെന്റിൽ സ്ഥിര നിയമനം കൊച്ചി ഹെഡ് പോസ്റ്റ് ഓഫീസിൽ ലഭിച്ചു. 1953 ൽ മധ്യപ്രദേശിലെ ജബൽപൂരിൽ RSA (റിപ്പീറ്റർ സ്റ്റേഷൻ ഏജന്റ്) കോഴ്സ് ട്രൈനിങ്ങിന് ചേർന്നു. കോഴ്സ് പൂർത്തിയാക്കി 1954 ൽ ഇന്ത്യൻ ടെലെകമ്മ്യുണിക്കേഷൻ വകുപ്പിൽ കോഴിക്കോട് ടെലിഫോൺ എക്സ്ചേഞ്ചിൽ നിയമനം ലഭിച്ചു. തുടർന്ന് ഇന്ത്യയുടെ പല ഭാഗത്തായി ടെലെകമ്മ്യുണിക്കേഷൻ വകുപ്പിൽ ജോലി ചെയ്ത ശേഷം 1981 ൽ സർക്കാർ ജോലിയിൽ നിന്നും റിട്ടയർ ചെയ്തു. റിട്ടയർ ചെയ്യുമ്പോൾ കാസറഗോഡ് ടെലിഫോൺ എക്സ്ചേഞ്ചിലായിരുന്നു അദ്ദേഹം ജോലി ചെയ്തിരുന്നത്.

ചെർച്ചൻറെ അദിൻച്ച പഠിച്ചു ഗവൺമെന്റിൽ ഉന്നത ജോലി ചെയ്തു എന്ന് മാത്രമല്ല തന്റെ മക്കൾക്കും ഉയർന്ന വിദ്യാഭ്യാസം നൽകി അവരെ അഭ്യസ്തവിദ്യാരാക്കി സമൂഹത്തിന് മാതൃകയാക്കി. വിദ്യാഭ്യാസത്തിന് നമ്മുടെ നാട്ടിൽ പരിമിതങ്ങളായ സൗകര്യങ്ങൾ ഉള്ളപ്പോൾ തന്റെ മക്കളെ ദൂരെ ദിക്കിലേക്കയച്ച് അവരെ പഠിപ്പിച്ചു മിടുക്കരാക്കി. ശിശു രോഗ വിദഗ്ദനായ മൂത്ത മകൻ ഡോക്ടർ റാഫി, PWD Excecutive എഞ്ചിനീയർ ആയിരുന്ന പരേതനായ എഞ്ചിനീയർ ബഷീർ, ദുബായിൽ ബിസിനസ്സ് ചെയ്യുന്ന എഞ്ചിനീയർ മജീദ്, ഇംഗ്ലണ്ടിൽ സൈക്കാട്രിസ്റ്റായി ജോലി ചെയ്യുന്ന ഡോക്ടർ റൗഫ്, ഷാർജ കസ്റ്റംസ് ഉദ്യോഗസ്ഥൻ മൻസൂർ എന്നിവർ അദ്ദേഹത്തിന്റെ ആൺ മക്കളാണ്. ഏക മകൾ സുഹറ ചെമ്മനാട് ഗ്രാമ പഞ്ചായത്ത് മുൻ അംഗമായിരുന്നു.

ഇസ്‌ലാമിക വിഷയങ്ങൾക്ക് പുറമെ കാലിക വിഷയങ്ങളിലും ലോക കാര്യങ്ങളിലും അദ്ദേഹത്തിന് അപാരമായ ജ്ഞാനമുണ്ടായിരുന്നു.

1970 - 80 കാലഘട്ടത്തിൽ അദ്ദേഹത്തിന്റെ വീട്ടിൽ പോയി ലോക കാര്യങ്ങളും ഇസ്‌ലാമിക വിഷയങ്ങളും ഒക്കെ ചോദിച്ചറിഞ്ഞിരുന്ന ഒരുപാട് പേരുണ്ടായിരുന്നു. പൊതുവെ നിശബ്ദനായി കാണുന്ന അദ്ദേഹം അത്തരം സമയങ്ങളിൽ ഒരു അധ്യാപകനെ പോലെ വാചാലനായി അവർക്കു ക്ലാസ്സ് എടുക്കാറുണ്ടായിരുന്നു. സാമൂഹിക രംഗത്ത് അത്ര സജീവമായിരുന്നില്ലെങ്കിലും മേൽപറമ്പ് ജമാഅത്ത് കമ്മിറ്റിയിൽ ആദ്യ കാലങ്ങളിൽ അദ്ദേഹം പ്രവർത്തിച്ചിരുന്നു.

സാങ്കേതിക രംഗത്ത് പുറം ലോകം അറിയാത്ത ചില സംഗതികൾ അദ്ദേഹം വികസിപ്പിച്ചെടുത്തിരുന്നു. വെള്ളം ടാങ്കിൽ നിറയുമ്പോൾ അലറാം അടിക്കുന്ന വിദ്യയും, ടോർച്ചിന്റെ വെളിച്ചം തട്ടുമ്പോൾ ഇലക്ട്രിക്ക് സ്വിച് ഓണായി ലൈറ്റും ഫാനും ഒക്കെ പ്രവർത്തിക്കുന്ന ലൈറ്റ് സെൻസർ സിസ്റ്റം ഒക്കെ ഇന്ന് പുതുമയുള്ളതല്ലെങ്കിലും 1970 കാലത്ത് തന്നെ അബുല്ല സ്വന്തം വികസിപ്പെച്ചെടുത്ത് തന്റെ വീട്ടിൽ പ്രവർത്തിപ്പിച്ചിരുന്നു.

PWD Superintending എഞ്ചിനീയർ ആയിരുന്ന പരേതനായ അഹമ്മദ് (കളനാട് എഞ്ചിനീയർ), ഇപ്പോൾ തലശേരിയിൽ സ്ഥിര താമസമാക്കിയ ഡോക്ടർ അബ്ദുൽ കാദർ, നെല്ലിക്കുന്ന് സീ. ടീ. മൊയ്‌ദീൻ കുട്ടി ഹാജിയുടെ ഭാര്യ കുഞ്ഞിബി, ഉപ്പള പീ. കെ. അഹമ്മദിന്റെ ഭാര്യ ഹനീഫ എന്നിവർ അബ്ദുല്ലയുടെ സഹോദരങ്ങളാണ്.

78 വർഷത്തെ ഏവർക്കും മാതൃകയാർന്ന ജീവിതം നയിച്ച്

2001 ഒക്ടോബർ 2 ആം തീയ്യതി അബ്ദുല്ല ഈ ലോകത്തോട് വിട പറഞ്ഞു. നാഥാ, അദ്ദേഹത്തിന് മഗ്ഫിറത്ത് നൽകി നമ്മെയെല്ലാം സ്വർഗത്തിൽ ഒരുമിച്ചു കൂട്ടേണമേ...... ആമീൻ!

-Rafi Pallippuram

ധീരനായ നേതാവ്, കട്ടക്കാൽ ഉമ്പിച്ച

2017-09-12T14:42:00.000+04:00

1983 ഫെബ്രുവരി 28 ഉത്തര മലബാറിനെ ആകെ ദുഃഖത്തിലാഴ്ത്തി

രാഷ്ട്രീയ, മത ഭൗതിക വിദ്യാഭ്യാസ രംഗത്ത് നൂതന വിപ്ലവം സൃഷ്ടിച്ച കല്ലട്ര അബ്ദുൽ കാദർ ഹാജി സാഹിബ് വിട പറഞ്ഞു. ഭരണാധികാരികളും, രാഷ്ട്രീയ നേതാക്കന്മാരും, പ്രമാണിമാരും അടങ്ങുന്ന വൻ ജനാ വലി ഹാജി സാഹിബിന്റെ ജനാസ ഒരു നോക്ക് കാണുവാൻ മേൽപറമ്പിലേക്ക് ഒഴുകി. കല്ലട്രയുടെ വീടിന്റെ ഗേറ്റിനരികിൽ കലങ്ങിയ മുഖവുമായി ദുഃഖം സഹിക്കാനാവാതെ ഒരാൾ നിൽക്കുന്നുണ്ടായിരുന്നു. ജനാസ സന്ദർശിക്കാൻ വരുന്നവർക്ക് കൈ കൊടുത്തു കല്ലട്രയുടെ ആകസ്മിക വേർപാടിലുള്ള ദുഃഖം പങ്കു വെച്ച് ആ വേദന സഹിക്കാനാവാത്ത വിങ്ങുന്ന ഒരാൾ.

അത് സീ. എ. അബ്ദുൽ കാദർ എന്ന കട്ടക്കാൽ ഉമ്പിച്ചയായിരുന്നു.

2017 ഓഗസ്റ്റ് 8 ന് ഈ ലോകത്തോട് വിട പറഞ്ഞ പ്രിയപ്പെട്ട കട്ടക്കാൽ ഉമ്പിച്ച.

1927 ൽ ബോംബെ അബ്ദുല്ല ബീഫാത്തിമ ദമ്പതികളുടെ മകനായി ജനിച്ചു. സീ. എ. അബ്ദുൽ കാദർ എന്നാണു അദ്ദേഹത്തിന്റെ യഥാർത്ഥ നാമം. കൃഷിയായിരുന്നു അദ്ദേഹത്തിന്റെ തൊഴിൽ മേഖല. പൂർവികർ കൊളമ്പ് എന്ന് പറഞ്ഞിരുന്ന ശ്രീ ലങ്കയിലും അദ്ദേഹം ജോലിയും കച്ചവടവുമായി കഴിഞ്ഞിരുന്നു. പിന്നീട് സുള്ള്യ ബോംബെ എന്നിവിടങ്ങളിൽ ഉമ്പിച്ച കുറെ കാലം കച്ചവടം ചെയ്തിരുന്നു.

ഇന്ത്യൻ യൂണിയൻ മുസ്ലിം ലീഗിന്റെ പിറവി മുതൽ അദ്ദേഹം ഹരിത പതാകയും, മുസ്ലിം ലീഗ് പ്രസ്ഥാനത്തെയും മനസ്സിൽ കൊണ്ട് നടക്കുന്നു. നാട്ടിൽ സ്ഥിരമായതോടെ ഉമ്പിച്ച മുസ്ലിം ലീഗിന് വേണ്ടി പ്രവർത്തിച്ചു തുടങ്ങി. മുസ്ലിം ലീഗിന്റെ ദൗർഭാഗ്യകരമായ പിളർപ്പിന്റെ കാല ഘട്ടത്തിൽ അദ്ദേഹം ഔദ്യോഗിക പക്ഷത്തു നിലയുറപ്പിച്ചു. പരേതനായ എ. എം. അബ്ദുല്ല (റൈറ്റർ) കെ. പീ. മുഹമ്മദ് കുഞ്ഞി മുതൽ ഇന്ന് പ്രവർത്തനത്തിൽ സജീവമല്ലാത്ത കടവത്ത് സീതു, കുന്നരിയത്ത് ഇബ്രാഹിം, ഡ്രോസർ അബ്ദുല്ല തുടങ്ങിയവർ അദ്ദേഹത്തോടോപ്പോം പ്രായ വ്യത്യാസം നോക്കാതെ തോളോട് തോള് ചേർന്ന് പ്രവർത്തിച്ചവരാണ്. പരേതനായ കല്ലട്ര അബ്ദുൽ ഹാജി സാഹിബുമായി അടുത്ത ബന്ധം അദ്ദേഹം പുലർത്തിയിരുന്നു.

ലീഗ് പിളർന്നത് മുതൽ ലയനം വരെയുള്ള കാലഘട്ടത്തിൽ നാട്ടിൽ രാഷ്ട്രീയ പ്രശ്നങ്ങളും സംഘട്ടനങ്ങളും പതിവായിരുന്നു. ഒന്നിച്ചു പ്രവർത്തിച്ചവർ ഇരു ചേരിയിലായപ്പോൾ പരസ്പരം ശത്രുക്കളായി മാറി. അന്ന് ഉമ്പിച്ച കട്ടക്കാൽ കയറ്റം കയറി വരുന്നത് ദൂരെ നിന്ന് തന്നെ കാണാം. ആകാര വടിവോടെയുള്ള അദ്ദേഹത്തെ കാണുമ്പോൾ തന്നെ എല്ലാവർക്കും പേടിയായിരുന്നു. യൂണിയൻ ലീഗ്കാരെ ആക്രമിക്കുമ്പോൾ ഒരു പ്രതിരോധ നിര തീർക്കലായിരുന്നു യഥാർത്ഥത്തിൽ ഉമ്പിച്ച ചെയ്തിരുന്നത്.

മുസ്ലിം ലീഗിന്റെ ഒരു വളണ്ടിയർ പോലെയാണ് ഉമ്പിച്ച എന്നും പ്രവർത്തിച്ചിരുന്നത്. മുസ്ലിം ലീഗ് സമ്മേളനങ്ങളിലും പ്രകടനങ്ങളിൽ ഒക്കെ അദ്ദേഹം സജീവമായിരുന്നു. പച്ച കുപ്പായവും പച്ച തൊപ്പിയും ധരിച്ച്‌ എന്നും ആവേശത്തിലായിരുന്നു. ലീഗ് ജാഥകളിൽ ഒരു കയ്യിൽ ഹരിത പതാക ഏന്തി മറ്റേ കയ്യ് മുഷ്ടി ചുരുട്ടി വാനിൽ ഉയർത്തി ഉച്ചത്തിൽ മുദ്രാവാക്യം വിളിച്ചു നീട്ടി വലിച്ചു നടക്കുന്ന ഉമ്പിച്ചാ. ആ ഓരോ സിന്ദാബാദ് വിളിയിൽ അദ്ദേഹം കാണിക്കുന്ന ആവേശം ഒന്ന് വേറെ തന്നെയായിരുന്നു. തിരഞ്ഞെടുപ്പുകളിൽ വീട് വീടാന്തരം കയറി വോട്ടു ചോദിക്കാനും പോളിംഗ് ദിവസം വോട്ടർമാരെ പോളിംഗ് സ്റ്റേഷനിൽ എത്തിച്ചു എല്ലാവരെ കൊണ്ടും വോട്ടു ചെയ്യിപ്പിക്കാൻ ഒക്കെ ഉമ്പിച്ച എന്നും മുൻ നിരയിൽ തന്നെ.

1979 ലെ പഞ്ചായത്ത് തിരഞ്ഞെടുപ്പിൽ കട്ടക്കാൽ ഉൾപ്പെടുന്ന കളനാടിൽ യൂണിയൻ ലീഗ് സ്ഥാനാർഥി പരേതനായ കെ. പീ. അസീസ് കളനാട്. അഖിലേന്ത്യാ ലീഗും യൂണിയൻ ലീഗും തമ്മിലുള്ള പൊരിഞ്ഞ പോരാട്ടാണ്. നാട്ടിലെ പൗര പ്രമുഖരും പ്രമാണിമാരും എല്ലാം അഖിലേന്ത്യാ പക്ഷത്ത്. ഉമ്പിച്ചാനെ പോലുള്ള സാധാരണ പ്രവർത്തകരുടെ ആത്മാർത്ഥമായ പ്രയത്നം കൊണ്ട് അന്ന് കെ. പീ. അബ്ദുൽ അസീസ് വിജയിച്ചത് പഞ്ചായത്തിൽ വലിയൊരു ചരിത്ര സംഭവമായിരുന്നു.

പ്രാദേശിക തലത്തിൽ മാത്രമേ ഉമ്പിച്ച പ്രവർത്തിച്ചിട്ടുള്ളു. മുസ്ലിം ലീഗ് മേൽപറമ്പ് ശാഖാ വൈസ് പ്രസിഡന്റ് ആയി കുറെ കാലം പ്രവർത്തിച്ചിട്ടുണ്ട്. ഇടയ്ക്കു ചെറിയ കാലയളവിൽ പ്രസിഡന്റ് പദവിയും അദ്ദേഹം അലങ്കരിച്ചിരുന്നു. ലീഗിന്റെ ചരിത്ര പ്രധാനമായ ലയന ശേഷം നിലവിൽ വന്ന ഹൈ പവർ കമ്മിറ്റിയിൽ മേൽപറമ്പ് ശാഖാ പ്രസിഡന്റ് പരേതനായ കല്ലട്ര മൂസ്സാൻച്ച, ജനറൽ സെക്രട്ടറി ഇ. എം. അബ്ദുൽ കാദർ ആ കമ്മിറ്റിയിൽ ഉമ്പിച്ച വൈസ് പ്രസിഡന്റ് ആയിരുന്നു. പിന്നീട് എം. എം. താജുച്ച പ്രസിഡന്റ് ആയി വന്ന ശാഖാ കമ്മിറ്റിയിലും ഉമ്പിച്ച വൈസ് പ്രസിഡന്റ് ആയിരുന്നു. മേൽ കമ്മിറ്റിയിൽ പ്രവർത്തിക്കാൻ അവസരം ഉണ്ടായിട്ടും അദ്ദേഹം അതിനു കൂട്ടാക്കാതെ താഴെ തട്ടിൽ സാധാരണ പ്രവർത്തകരുടെ കൂടെ നിന്ന് പ്രവർത്തിച്ചു. ഞാൻ മേൽ കമ്മിറ്റിയിൽ പോയി പ്രവർത്തിച്ചാൽ ഇവിടെ പ്രവർത്തിക്കാൻ ആരാണുള്ളത് എന്നാണ് ഉമ്പിച്ചാന്റെ മറു ചോദ്യം. പഞ്ചായത്ത് തിരഞ്ഞെടുപ്പിൽ സ്ഥാനാർത്ഥിയായി പരിഗണിച്ചപ്പോളും അദ്ദേഹം ഒഴിഞ്ഞു മാറി. ചുമർ എഴുതിയും, വാൾ പോസ്റ്റർ ഒട്ടിച്ചും, തോരണം കെട്ടിയും മുദ്രാവാക്യം വിളിച്ചും സാധാരണ പ്രവർത്തകനായി ഉമ്പിച്ച ലീഗിന് വേണ്ടി പ്രവർത്തിച്ചു.

മുസ്ലിം ലീഗ് എന്ന പ്രസ്ഥാനത്തെ ഉമ്പിച്ച അത്രമാത്രം സ്നേഹിച്ചിരുന്നു. ധന ശേഖരണത്തിനും, സംസ്ഥാന സമ്മേളനങ്ങൾക്ക് ബസ് ഏർപ്പാട് ചെയ്യാനും കോഴിക്കോട് സമ്മേളനത്തിന് പോകുന്ന ബസ്സിന്റെ മുൻ സീറ്റിൽ ഇരുന്നു യാത്രയിൽ ഒരു അമീറിന്റെ ചുമതല ഏറ്റെടുത്തു അദ്ദേഹം എല്ലാവരെയും നയിച്ചു. സമ്മേളന യാത്രയിൽ ഉമ്പിച്ച തന്റെ കനമേറിയ ശബ്ദത്തിൽ മുദ്രാവാക്യം വിളിച്ചു തരും.

മുസ്ലിം ലീഗ് ആദ്യം പിളർന്നപ്പോളും പിന്നീട് ഐ എൻ എൽ പിറന്നപ്പോളും അതിൽ ചേർന്ന തന്റെ സുഹൃത്തുക്കളെ അദ്ദേഹം തന്റെ സ്വദ സിദ്ധമായ ശൈലിയിൽ സരസമായി വിമർശിക്കാറുണ്ടായിരുന്നു. സരസമായ സംസാര ശൈലിയായിരുന്നു അദ്ദേഹത്തിന്റേത്.

2012 സെപ്തംബർ 18 ന് മേൽപറമ്പ് യൂത്ത് ലീഗ് കമ്മിറ്റി കട്ടക്കാൽ ഉമ്പിച്ചാനെയും, കടവത്ത് സീതുചാനെയും അവരുടെ മുൻ കാല പ്രവർത്തനങ്ങൾ കണക്കിലെടുത്ത് ആദരിച്ചിരുന്നു. ജില്ലാ ജനറൽ സെക്രട്ടറി എം. സീ. ഖമറുദീൻ അടക്കമുള്ള നേതാക്കൾ സംബന്ധിച്ച പരിപാടിയായിരുന്നു അത്.

ഇക്കഴിഞ്ഞ ഓഗസ്റ്റ് മാസം ഉമ്പിച്ച വിട പറയുമ്പോൾ അദ്ദേഹത്തിന് 90 വയസ്സായിരുന്നു. പ്രാദേശിക നേതൃ പദവികൾ അലങ്കരിച്ചു ആ മേഖലയിൽ പ്രസ്ഥാനത്തെ വളർത്താൻ കഠിനാദ്ധ്വാനം ചെയ്ത പ്രിയപ്പെട്ട ഉമ്പിച്ച ഇനി ഓർമകളിൽ മാത്രം.

നാഥാ, അദ്ദേഹത്തിന് മഗ്ഫിറത്ത് നൽകി നമ്മെയെല്ലാം സ്വർഗത്തിൽ ഒരുമിച്ചു കൂട്ടേണമേ...... ആമീൻ

-Rafi Pallippuram

വേർപാടിന്റെ മൂന്ന് പതിറ്റാണ്ട്

2017-08-10T14:30:00.000+04:00

മത, രാഷ്ട്രീയ, സാമൂഹിക രംഗത്ത് പതിറ്റാണ്ടുകളോളം കളനാട് എന്ന പ്രദേശത്തിന്റെ നേതൃ പദവിയിലിരുന്ന് ആ പ്രദേശത്തിന്റെ ഉന്നമനത്തിന് വേണ്ടി ഒരു പുരുഷായുസ്സ് മുഴുവൻ ജീവിതം സമർപ്പിച്ച കെ. പീ. അബ്ദുൽ അസീസ് എന്ന കളനാട്ടുകാരുടെ പ്രിയപ്പെട്ട അസീച്ച ഈ ലോകത്തോട് വിട പറഞ്ഞു ഇന്നേക്ക് മുപ്പത് വർഷം പൂർത്തിയാകുന്നു. 1930 ജൂലൈ 1 ന് ജനിച്ച അദ്ദേഹം 1987 ഓഗസ്റ്റ് 10 ന് ഈ ലോകത്തോട് വിട പറഞ്ഞു. വേർപാടിന്റെ മൂന്ന് പതിറ്റാണ്ട് പിന്നിടുമ്പോഴും കളനാടിന്റെ രാഷ്ട്രീയ ഭൂമികയിൽ ആ ഒരു നേതൃത്വത്തിന്റെ വിടവ് ഇന്നും അനാഥമായി തന്നെ തുടരുന്നു.

കളനാട് മുഹമ്മദ് കുഞ്ഞി ഉമ്മാലിമ്മ ദമ്പതികളുടെ മകനായി 1930 ജൂലൈ 1 ന് കെ. പീ. അബ്ദുൽ അസീസിന്റെ ജനനം.

ചെമ്മനാട് പഞ്ചായത്തിൽ, വിശിഷ്യാ കളനാട് പ്രദേശത്ത് ഇന്ത്യൻ യൂണിയൻ മുസ്ലിം ലീഗ് പ്രസ്ഥാനം കെട്ടി പടുക്കാൻ വേണ്ടി അന്നത്തെ നേതൃത്വത്തിന്റെ കൂടെ ചേർന്ന് വളരെ ചെറുപ്പത്തിൽ തന്നെ അദ്ദേഹം പാർട്ടി പ്രവർത്തനത്തിൽ സജീവമായി. മുസ്ലിം ലീഗിന്റെ ദൗർഭാഗ്യകരമായ പിളർന്നപ്പോൾ യൂണിയൻ ലീഗിന്റെ പക്ഷത്ത് നിന്ന് കൊണ്ട് പ്രസ്ഥാനത്തിന്റെ വളർച്ചയ്ക്ക് വേണ്ടി അദ്ദേഹം ഊർജസലനായി പ്രവർത്തിച്ചു. അന്ന് നാട്ടിലെ പ്രമാണികളും, പൗര പ്രമുഖരൊക്കെയും അഖിലേന്ത്യാ ലീഗിന്റെ പക്ഷത്തായിരുന്നു.

മേൽപറമ്പ് ഉൾപ്പെട്ട കളനാട് ശാഖാ പ്രസിഡന്റ് സ്ഥാനം അലങ്കരിച്ച് രാഷ്ട്രീയ പ്രവർത്തനം തുടങ്ങിയ അദ്ദേഹം മുസ്ലിം ലീഗ് ചെമനാട് പഞ്ചായത്ത് കമ്മിറ്റിയിൽ വിവിധ ഭാരവാഹിത്വങ്ങൾ വഹിച്ചിരുന്നു. ഉദുമ മണ്ഡലം വൈസ് പ്രസിഡന്റ് ആയി കുറെ കാലം പ്രവർത്തിച്ചിരുന്ന അദ്ദേഹം മുസ്ലിം ലീഗിന്റെ ചരിത്ര പ്രധാനമായ ലയനത്തിന് മുമ്പ് ചെറിയ ഒരു കാലയളവിൽ മണ്ഡലം പ്രസിഡന്റ് പദവിയിലിരുന്നും പ്രവർത്തിച്ചിരുന്നു. അഭിവക്ത കണ്ണൂർ ജില്ലാ മുസ്ലിം ലീഗ് പ്രവർത്തക സമിതി അംഗം, കാസറഗോഡ് ജില്ലാ മുസ്ലിം ലീഗ് പ്രവർത്തക സമിതി അംഗം, മുസ്ലിം ലീഗ് സംസ്ഥാന കൗൺസിലർ തുടങ്ങിയ മേഖലകളിലും അസീസ്ച്ച തന്റേതായ പ്രവർത്തനങ്ങൾ നടത്തിയിരുന്നു.

മുസ്ലിം ലീഗിന്റെ മേൽ കമ്മിറ്റികളിൽ പ്രവർത്തിക്കുമ്പോൾ തന്നെ കളനാടിന്റെ മത സാമൂഹിക രംഗങ്ങളിൽ വളരെ സജീവമായി ഇടപെടാൻ അദ്ദേഹത്തിന് സാധിച്ചിരുന്നു. 1960 മുതൽ മരണം വരെ വിവിധ കാലയളവുകളിൽ കളനാട് ഹൈദ്രോസ് ജുമാ മസ്ജിദ് ജനറൽ സെക്രട്ടറി ആയി അദ്ദേഹം പ്രവർത്തിച്ചിട്ടുണ്ട്. അത് പോലെ തന്നെ അയ്യങ്കോൽ ബദർ മസ്ജിദ് കമ്മിറ്റിയുടെ ആജീവനാന്ത പ്രസിഡന്റ് ആയി അദ്ദേഹം പ്രവർത്തിച്ചിട്ടുണ്ട്.

ഒരേ സമയത്ത് തന്നെ രാഷ്ട്രീയ പ്രവർത്തനവും കൂടെ മത കാര്യങ്ങളിലും വ്യാപൃതനായിരുന്നു അദ്ദേഹം. വിട്ടു വീഴ്ചയില്ലാത്ത ദീനി ചിട്ട ജീവിതത്തിൽ അസീസ്ച്ച നില നിർത്തിർത്തിയിരുന്നു. സുബഹി ബാങ്കിന് മുമ്പ് തന്നെ അയ്യങ്കോൽ പള്ളിയിരുന്നുള്ള അദ്ദേഹത്തിന്റെ ഖുർആൻ പാരായണം കേട്ടായിരുന്നു ആ പ്രദേശത്തുകാർ ഉറക്കമുണർന്നിരുന്നത് തന്നെ. പണ്ഡിതന്മാരുമായി അദ്ദേഹം എന്നും ആത്മ ബന്ധം നില നിർത്തിയിരുന്നു. നമ്മെ വിട്ടു പിരിഞ്ഞ സീയെം ഉസ്താദ്, എം എ ഉസ്താദ്, മേൽപറമ്പ് ഖതീബ്ച്ച തുടങ്ങി ഇന്ന് ജീവിച്ചിരിപ്പുള്ള യു. എം. ഉസ്താദ്, ചിത്താരി ഹംസ മുസ്‌ലിയാർ തുടങ്ങിയവരുമായി അദ്ദേഹത്തിന് നല്ല ബന്ധമായിരുന്നു.

1979 ൽ നടന്ന പഞ്ചായത്ത് തിരഞ്ഞെടുപ്പിൽ കളനാട് വാർഡിൽ നിന്നും മുസ്ലിം ലീഗ് സ്ഥാനാർത്ഥിയായി കെ. പീ. അസീസ്ച്ച വിജയിച്ചിരുന്നു. അത്യന്തം വാശിയേറിയതായിരുന്നു ആ തിരഞ്ഞെടുപ്പ്. എതിർ സ്ഥാനാർഥി പഞ്ചായത്ത് പ്രസിഡന്റ് ആയിരുന്ന പുതിയപുര കുഞ്ഞാലിച്ച. അഖിലേന്ത്യാ ലീഗിന്റെയും, ഇടതുപക്ഷത്തിന്റെയും സ്ഥാനാർത്ഥിയായിരുന്നു കുഞ്ഞാലിച്ച. നാട്ടിലെ പ്രമുഖരായ പ്രമാണികൾ ഒന്നടങ്കം മറുപക്ഷത്ത്.

ആ തീപാറുന്ന മത്സരത്തിലൂടെയാണ് കളനാട്ടുകാരുടെ സുൽത്താനായി കെ. പീ അബ്ദുൽ അസീസ് തിരഞ്ഞെടുക്കുന്നത്. കളനാടിന്റെ വികസനത്തിനായി പ്രവർത്തിച്ച അദ്ദേഹം കളനാട് എന്ന പ്രദേശത്തിന്റെ വികാരം ഉൾക്കൊണ്ട് നാടിന് വേണ്ടി നില കൊണ്ടു.

ദിനേന രാവിലെ മുതൽ അദ്ദേഹത്തിന്റെ വീട്ടിൽ അസീസ്ച്ചയെ കാണാൻ ഒരുപാട് പേര് എത്തുമായിരുന്നു. പഞ്ചായത്തിൽ നിന്നും ലഭിക്കേണ്ട ആനുകൂല്യങ്ങൾ, പാർട്ടി സംബന്ധമായ കാര്യങ്ങൾ, മഹല്ലിലെ കാര്യങ്ങൾ തുടങ്ങി ഒട്ടനവധി കൂടിക്കാഴ്ചകൾ. അതിനിടയിൽ കോഴിയെ അറുക്കാൻ കൊണ്ടു വരുന്നവരും ഉണ്ടാവുമായിരുന്നു. കോഴിയെ അറുത്തു കൊടുത്ത ശേഷമേ അദ്ദേഹം മറ്റു കാര്യങ്ങളിൽ വ്യാപൃതനാവൂ.

ജാമിയ സഅദിയയുടെ തുടക്കം മുതൽ അദ്ദേഹം സ്ഥാപനത്തിന്റെ വളർച്ചയ്ക്ക് വേണ്ടി പ്രവർത്തിച്ചിരുന്നു. സ്ഥാപനത്തിന്റെ തുടക്കം മുതൽ അദ്ദേഹത്തിന്റെ മരണം വരെ സഅദിയ കമ്മിറ്റിയിൽ അംഗമായിരുന്നു. അത്പോലെ കളനാട് സർവീസ് സഹകരണ സംഘത്തിന്റെ ഡയറക്ടർ ബോർഡ് അംഗമായും അദ്ദേഹം പ്രവർത്തിച്ചിട്ടുണ്ട്.

82 ലെ നിയമസഭാ തിരഞ്ഞെടുപ്പിൽ ഉദുമ മണ്ഡലത്തിൽ നിന്നും മത്സരിച്ച ലീഗ് സ്ഥാനാർഥി പീ. മുഹമ്മദ് കുഞ്ഞി മാഷിന് വേണ്ടി അദ്ദേഹം മർഹൂം കല്ലട്ര അബ്ദുൽ കാദർ ഹാജി സാഹിബിന്റെ കൂടെ ചേർന്ന് വിശ്രമമില്ലാതെ പ്രവർത്തിച്ചിരുന്നു. മണ്ഡലം യു. ഡീ. എഫ് വൈസ് ചെയർമാനായിരുന്നു അദ്ദേഹം. നേരിയ വ്യതാസത്തിൽ സീറ്റ് കൈവിട്ടതിലുള്ള ദുഃഖം അസീസ്ച്ച പലരോടായി പങ്കു വെച്ചിരുന്നു.

നാടിന്റെ സമൂലമായ മാറ്റവും വികസനവുമായിരുന്ന അദ്ദേഹത്തിന്റെ സ്വപ്നം. അതിന് വേണ്ടി അദ്ദേഹം ആവുന്നതെല്ലാം ചെയ്തിരുന്നു. പിൽക്കാലത്ത് ചെമനാട് പഞ്ചായത്ത് കളനാടിൽ നിർമിച്ച ഒരു റോഡിനും ഒരു പാലത്തിനും കെ. പീ. അസീസ്ച്ചയുടെ പേരുകൾ നൽകി അദ്ദേഹത്തോടുള്ള ആദരവ് നില നിർത്തി.

മുസ്ലിം ലീഗിന്റെ ജില്ലയിലെ മുൻ നിര നേതാക്കളുമായി അദ്ദേഹം ആത്മ ബന്ധം നിലനിർത്തിയിരുന്നു. മർഹൂം കല്ലട്ര അബ്ദുൽ കാദർ ഹാജി, എ. പീ. അബ്ദുല്ല, കല്ലട്ര അബ്ബാസ് ഹാജി, ബീ. കെ മാഷ് തുടങ്ങിയവരുമായും ജില്ലാ പ്രസിഡന്റ് ചെർക്കളം അബ്ദുല്ല സാഹിബ്, സംസ്ഥാന വൈസ് പ്രസിഡന്റ് സീ. ടീ. അഹമ്മദ് അലി, പീ മുഹമ്മദ് കുഞ്ഞി മാഷ് തുടങ്ങിയവരുമായും അദ്ദേഹം നല്ല ബന്ധം നിലനിർത്തിയിലൂർന്നു.

അദേഹത്തിന്ന് കളനാടുണ്ടായിരുന്ന

സുഹൃത്തുക്കൾ കുഞ്ഞി മാഹിൻ കുട്ടി, തായൽ കുഞ്ഞാമു, എം എ അഹമ്മദ് കുഞ്ഞി, ദേളി അബ്ദുള്ള തുടങ്ങിയവർ.

1987 ഓഗസ്റ്റ് 10 ന് മംഗലാപുരം ആശുപത്രിയിൽ വെച്ചായിരുന്നു അസീസ്ച്ച അന്ത്യ ശ്വാസം വലിച്ചത്. മരണ സമയത്ത് അദ്ദേഹത്തിന്റെ ആത്മാർത്ഥ സുഹൃത്ത് യു. എം. അബ്ദുൽ റഹ്‌മാൻ മൗലവി കൂടെയുണ്ടായിരുന്നു. വീണ്ടും ഒരു ഓഗസ്റ്റ് 10 കടന്നു വരുമ്പോൾ കഴിഞ്ഞ 30 വർഷങ്ങളായി നികത്താനാവാത്ത ഒരു വിടവ് കളനാട് നില നിൽക്കുന്നു. ദുബായ് കെ, എം. സീ. സീ ഉദുമ മണ്ഡലം വൈസ് പ്രസിഡന്റ്, കീഴുർ സംയുക്ത ജമാ അത്ത് യു. എ. ഇ കമ്മിറ്റി ജനറൽ സെക്രട്ടറി, കളനാട് ജമാ അത്ത് യു. എ. ഇ കമ്മിറ്റി പ്രസിഡന്റ് തുടങ്ങിയ സ്ഥാനങ്ങൾ പ്രവർത്തിക്കുന്ന കെ. പീ. അബ്ബാസ് അദ്ദേഹത്തിന്റെ മകനാണ്.

മറ്റു മക്കൾ സുഹറ, ഖൈറു, കെ പി സത്താർ, കെ പി മുഹമ്മദ് കുഞ്ഞി, റാബിയ എന്നിവർ.

നാഥാ, അദ്ദേഹത്തിന്റെ എല്ലാ പാപങ്ങളും പൊറുത്ത് കൊടുക്കുകയും സ്വർഗ്ഗത്തിൽ ഇടം നൽകി അനുഗ്രഹിക്കുകയും ചെയ്യുമാറാവട്ടെ - ആമീൻ

- Rafi Pallippuram

1970 ൽ മേൽപറമ്പിൽ ഒരു ഒന്നാം റാങ്കുകാരൻ

2017-03-21T17:39:00.000+04:00

"1970 വർഷത്തെ കോഴിക്കോട് സർവകലാശാലയിലെ ബിരുദാനന്തര ബിരുദ (MA Arabic ) പരീക്ഷ റിസൾട്ട് വന്നപ്പോൾ കോഴിക്കോട് ഫാറൂഖ് കോളേജ് വിദ്യാർത്ഥിയായ മേൽപറമ്പുകാരന് ഒന്നാം റാങ്ക്. അന്നത്തെ മലയാള മനോരമ അടക്കം എല്ലാ പത്ര മാധ്യമങ്ങളിലും ഫോട്ടോ അടക്കം വാർത്ത പ്രസിദ്ധീകരിച്ചു വന്നിരുന്നു. ആ ഒന്നാം റാങ്കിന്റെ തിളക്കം അഭിവക്ത കണ്ണൂർ ജില്ലയിൽ തന്നെ വലിയൊരു വാർത്തയായിരുന്നു. പരേതനായ പാറപ്പുറം ഷാഫിച്ച എന്ന മുഹമ്മദ് ഷാഫിയാണ് നാടിനു അഭിമാനമായ ആ റാങ്ക് ജേതാവ്."

ബേവിഞ്ച അബ്ദുല്ല, ബീഫാത്തിമ എന്നവരുടെ മൂത്ത മകനായി 1948 ൽ ജനനം. ചെറുപ്പത്തിൽ തന്നെ പഠനത്തിൽ മിടുക്കനായിരുന്നു ഷാഫിച്ച. മഠത്തിൽ സ്കൂളിൽ നിന്നും (കളനാട് ഓൾഡ്) പ്രാഥമിക വിദ്യാഭ്യാസത്തിന് ശേഷം പരവനടുക്കം ഹൈ സ്കൂളിൽ നിന്നും (GHS ചെമനാട്) ഹൈ സ്കൂൾ വിദ്യാഭ്യാസം പൂർത്തിയാക്കി. പ്രീ ഡിഗ്രിയും, ഡിഗ്രിയും കാസറഗോഡ് ഗവൺമെന്റ് കോളേജിൽ പൂർത്തിയാക്കിയ ശേഷം എം. എ. പഠനത്തിന് അദ്ദേഹം അക്കാലത്തെ അതി പ്രശസ്തവും ഏതൊരു വിദ്യാർത്ഥിയും ആഗ്രഹിച്ചു പോവുന്ന ക്യാമ്പസായ കോഴിക്കോട് ഫാറൂഖ് കോളേജിൽ ചേർന്നു. തന്റെ പഠന മികവ് തെളിയിക്കുന്നതായിരുന്നു ഫാറൂഖ് കോളേജിലെ പഠനം. പരീക്ഷ ഫലം വന്നപ്പോൾ എം. എ യ്ക്ക് യൂണിവേഴ്സിറ്റിയിൽ നിന്നും ഒന്നാം റാങ്ക് നേടി നാടിനു ഒരു റാങ്ക് ഹോൾഡറെ സമ്മാനിച്ചു. അതായിരുന്നു ഷാഫിച്ചാന്റെ പഠന മികവ്. വിദ്യാഭ്യാസത്തോടു മുഖം തിരിഞ്ഞിരുന്നു കാലത്താണ് നാട്ടിൽ നിന്നും ഒരാൾ ഉന്നത ബിരുദം നേടുന്നതും സർവകലാശാലയിൽ തന്നെ ഒന്നാമനായി വിജയിക്കുന്നതും. പത്താം ക്ലാസ്സ് പഠനം പോലും പൂർത്തിയാക്കാത്തിരുന്ന പഴയ കാലത്ത് നമ്മുടെ നാട്ടിൽ നിന്നും ഒരാൾ ബിരുദാനന്തര ബിരുദം നേടുക എന്നത് അത്യപൂർവമായ ഒരു നേട്ടമാണ്.

നല്ല ഉയരമുള്ള വ്യക്തിയായിരുന്നു ഷാഫിച്ച. ശാന്ത സ്വഭാവക്കാരനും, സൗമ്യനും, വലിയൊരു പരോപകാരിയുമായിരുന്നു അദ്ദേഹം. തന്റെ നടത്തത്തിലും, സംസാരത്തിലും, പെരുമാറ്റത്തിലും എന്ന് വേണ്ട സകല ഇടപെടലുകളിലും അദ്ദേഹം തന്റെ വ്യക്തിത്വം അടയാളപ്പെടുത്തി. ജീവിതത്തിൽ എല്ലാ കാര്യങ്ങൾക്കും കൃത്യനിഷ്ഠത പുലർത്തിയിരുന്ന അദ്ദേഹം ദീനിന്റെ ചട്ട കൂട്ടിൽ ഒതുങ്ങി നിന്ന് ഏവർക്കും മാതൃകയാർന്ന ജീവിതം നയിച്ചു.

സൽസ്വാഭാവിയും മിത ഭാഷിയുമായിരുന്ന ഷാഫിച്ച നല്ലൊരു വ്യക്തിത്വത്തിന് ഉടമയായിരുന്നു.

1960 - 65 കാലത്ത് മേൽപറമ്പിൽ ഷാഫിച്ചായും സുഹ്രത്തുക്കളും ഒക്കെ ചേർന്ന് പ്രവർത്തിച്ചിരുന്ന കായിക ക്ലബ്ബാണ് ബ്ലൂ സ്റ്റാർ (BLUE STAR ). പാറപ്പുറം ഷാഫിച്ചാനെ കൂടാതെ കെ. പീ. മുഹമ്മദ് കുഞ്ഞി, എം. എ. മുഹമ്മദ് കുഞ്ഞി, കെ. പീ. മാഹിൻ, ഒറവങ്കര ഇബ്രാഹിം, കെ. പീ. അബ്ദുൽ റഹ്മാൻ, കുഞ്ഞി കണ്ണൻ മാസ്റ്റർ, കൃഷ്ണൻ നടക്കാൽ, യു. എം. അഹമ്മദലി, കെ. സീ. സഫറുള്ള, ഇ. എം. ഇബ്രാഹിം, നാരായണൻ കൂവത്തൊട്ടി, ഭാസ്കരൻ മിലിട്ടറി തുടങ്ങിയ അന്നത്തെ യുവ തുർക്കികളായിരുന്നു സജീവ പ്രവർത്തകർ. ഫുട്ബോളും വോളി ബോളും അക്കാലത്തു കളിച്ചിരുന്നു. വോളി ബോളായിരുന്നു അന്നത്തെ പ്രധാന ഇനം കളി. ശരീരം നല്ല ഉയരമുള്ള ഷാഫിച്ചാ ബോളി ബോളിൽ അക്കാലത്തെ പേര് കേട്ട താരമായിരുന്നു.

അത്പോലെ തന്നെ കരാട്ടെയിൽ ബ്ലാക്ക് ബെൽറ്റ് നേടിയിരുന്നു അദ്ദേഹം.

ഫാറൂഖ് കോളേജിൽ നിന്നും എം. എ. പൂർത്തിയാക്കിയ അദ്ദേഹം കുറച്ചു കാലം കാസറഗോഡ് എയർലൈൻസ് ലോഡ്ജിൽ മാനേജർ ആയി ജോലി ചെയ്തിരുന്നു. പിന്നീട് മസ്ക്കറ്റിലേക്കു ജോലി തേടി പോയ ഷാഫിച്ചയ്ക്കു ഒമാൻ ആരോഗ്യ മന്ത്രാലയത്തിൽ ജോലി ലഭിച്ചു. ജോലിയിലുള്ള ആത്മാർത്ഥതയും കൃത്യ നിഷ്ഠത ഒക്കെ കാരണം ആരോഗ്യ മന്ത്രാലയത്തിലെ എല്ലാ ഉദ്യോഗസ്ഥന്മാർക്കും അദ്ദേഹം പ്രിയപ്പെട്ടവനായി. ജോലിയിൽ സ്ഥാന കയറ്റങ്ങൾ അദ്ദേഹത്തിന് ലഭിച്ചു കൊണ്ടേയിരുന്നു. അവസാനം ഒമാൻ ആരോഗ്യ മന്ത്രിയുടെ സെക്രട്ടറിയായി മന്ത്രാലയത്തിലെ ഉയർന്ന പോസ്റ്റിൽ ജോലി ചെയ്തു. മന്ത്രാലയത്തിലെ ജോലിയുടെ കൂടെ തന്നെ ഒമാൻ ടെലിവിഷനിൽ പാർട് ടൈം ജോലിയും ഷാഫിച്ച ചെയ്തിരുന്നു. ഇംഗ്ലീഷ് വാർത്തകൾ അറബിയിലേക്ക് തർജമ ചെയ്യുന്ന ട്രാൻസലേറ്റർ ആയി. ഇംഗ്ലീഷിലും അറബിയിലും അത്രയ്ക്കും ഭാഷാ നൈപുണ്യം അദ്ദേഹത്തിനുണ്ടായിരുന്നു.

ഷാഫിച്ച മസ്കറ്റിൽ ജോലി ചെയ്യുമ്പോൾ അവിടത്തെ സാമൂഹിക, സാംസ്കാരിക, ദീനി രംഗങ്ങളിൽ ഒക്കെ വളരെ സജീവമായിരുന്നു.

ധാരാളം സദസ്സുകളിൽ ദീനി ക്ലാസ്സിനു അദ്ദേഹം നേതൃത്വം നൽകിയിരുന്നു. മസ്കറ്റിലെ എല്ലാ മലയാളീ സംഘടനകളുമായും, വ്യക്തികളുമായും നല്ല സ്നേഹ ബന്ധം അദ്ദേഹം നിലനിർത്തിയിരുന്നു. സുന്നി സെന്റർ, ഇസ്ലാഹി സെന്റർ, ഐ. സീ. സീ, മലയാളി സെന്റർ തുടങ്ങി മിക്ക സംഘടനകളുടെയും വേദികളിൽ ഷാഫിച്ച പ്രാസംഗികനായും, പരിശീലകനായും പങ്കെടുക്കാറുണ്ടായിരുന്നു. നമ്മെ വിട്ടു പിരിഞ്ഞ നമ്മുടെ ബഹുമാനപ്പെട്ട ഖത്തീബ് ഉസ്താദുമായി നല്ല സ്നേഹ ബന്ധം പുലർത്തിയിരുന്ന അദ്ദേഹം ഖതീബിച്ചാക്ക് ധാരാളം ഗ്രന്ഥങ്ങൾ കൊണ്ട് കൊടുക്കാറുണ്ടായിരുന്നു.

2006 ജൂൺ 27ന് ജോലി കഴിഞ്ഞു താമസ സ്ഥലത്തേയ്ക്ക് തിരിച്ചു പോവുമ്പോൾ ഉണ്ടായ വാഹന അപകടത്തിൽ പാറപ്പുറം ഷാഫിച്ച ഈ ലോകത്തോട് വിട പറഞ്ഞു. ഒമാനിലെ മലയാളീ സമൂഹം ഒന്നടങ്കം ഞെട്ടി തരിച്ച ഒരു അപകട വാർത്തയായിരുന്നു അത്.

നാട്ടിലും പ്രവാസ ഭൂമിയിലും ഏവർക്കും പ്രിയപ്പെട്ട ഷാഫിച്ചയുടെ അകാലത്തിലുള്ള വിയോഗം ഏവരെയും ദുഃഖത്തിലാഴ്ത്തി. ആ മയ്യത്തു നാട്ടിലേക്ക് കൊണ്ട് വരുമ്പോൾ ഒമാൻ സർക്കാർ ഷാഫിച്ചയോടുള്ള ആദര സൂചകമായി ആരോഗ്യ മന്ത്രാലയത്തിലെ ഉദ്യോഗസ്ഥരും മയ്യത്തിനെ അനുഗമിച്ചു നാട്ടിലേക്ക് വന്നിരുന്നു.

ഷാഫിച്ചയുടെ സഹോദരങ്ങൾ പരേതനായ ഉമ്പി, ദുബായിലുള്ള അഹമ്മദ്, ഒമാൻ കസബിൽ ആരോഗ്യ മന്ത്രാലയത്തിൽ ജോലി ചെയ്യുന്ന ഹസ്സൻ (അച്ചു), താഹിറ തുടങ്ങിയവർ.

ഭാര്യ ബീ.എഫ്. സഫിയ. മക്കൾ ഫൈസൽ, സമീഉള്ള, ബാസിത് എന്നീ മൂന്നു ആൺ മക്കളും ഷാഹിറ, സമീറ, ഹിബ എന്നീ പെൺ മക്കളും.

നാഥാ, അദ്ദേഹത്തിന് മഗ്ഫിറത്ത് നൽകി പാരത്രിക ജീവിതം വിജയമാക്കേണമേ. ..... (ആമീൻ )

Posted By:

Rafi Pallippuram‎

ഫഖീറുകൾ പട്ടിണി കിടക്കരുത്

2017-03-21T17:27:00.000+04:00

ദിനേന മേൽപറമ്പ് പള്ളിയിൽ എത്തി ചേരുന്ന മുസാഫിറുകളായ ഫകീറുകളെ ആരെങ്കിലും അവരുടെ വീട്ടിൽ കൊണ്ട് പോയി ഭക്ഷണം നൽകി സല്കരിക്കാറുണ്ട്. ചില ദിവസങ്ങളിൽ ആരുടേയും ക്ഷണം ലഭിച്ചില്ലെങ്കിൽ അവർ പള്ളിയുടെ തൊട്ടടുത്തുള്ള ഹിൽ ടോപ്പ് ഹോട്ടലിൽ ചെന്ന് ഭക്ഷണം കഴിക്കും. പക്ഷെ, ഹോട്ടൽ അധികൃതർ മുസാഫിറുകളിൽ നിന്നും പണം വാങ്ങാറില്ല. കാരണം ഫകീറുകളായ മുസാഫിറുകൾക്ക് സൗജന്യമായി ഭക്ഷണം നൽകാൻ എല്ലാ മാസവും ആദ്യത്തിൽ തന്നെ ഒരു നിശ്ചിത തുക രഹസ്യമായി ഹോട്ടലിൽ ഏൽപിച്ചിരുന്ന ഒരു മഹാ മനീഷി മേൽപറമ്പിൽ ജീവിച്ചിരുന്നു. കഴിഞ്ഞ മുപ്പതു വർഷമായി തുടർന്നിരുന്ന കാരുണ്യ സ്പർഷം. തന്റെ നാട്ടിൽ എത്തി ചേരുന്ന ഒരു മുസാഫിറും ഒരിക്കലും പട്ടിണി കിടക്കരുതെന്ന് അദേഹത്തിന് നിർബന്ധമുണ്ടായിരുന്നു. 1987 മുതൽ തുടങ്ങിയതായിരുന്നു അദേഹം ആ പതിവ്. ഹിൽ ടോപ്പ് ഹോട്ടൽ തുടങ്ങുന്നതിനു മുമ്പ് അവരുടെ പഴയ കടയിലായിരുന്നു അദേഹം ഈ ഇടപാട് നടത്തിയിരുന്നത്. വർഷങ്ങളായി അനാരോഗ്യം കാരണം വീട്ടിൽ വിശ്രമത്തിലായിരുന്നുവെങ്കിലും ഒരു വർഷം മുമ്പ് വരെ വന്നു അദേഹം ഹോട്ടലിൽ പണം ഏൽപിച്ചിരുന്നു. അതാണ്‌ മേൽപറമ്പിന്റെ കാരുണ്യത്തിന്റെ, വിജ്ഞാനത്തിന്റെ, സമാധാനത്തിന്റെ പ്രകാശ ഗോപുരം.

2016 ഫെബ്രുവരി 9 ആം തീയ്യതി നാട്ടിൽ പ്രകാശം ചൊരിഞ്ഞ ആ വിളക്ക് അണഞ്ഞു.

നമ്മെ വിട്ടു പിരിഞ്ഞ മേൽപറമ്പ് ഖത്തീബ് ബഹുമാനപ്പെട്ട എം. എ. അബ്ദുൽ ഖാദർ മുസ്ലിയാർ. അദേഹമായിരുന്നു ഈ നാടിന്റെ ഐശ്വര്യവും, നന്മയും. അദേഹത്തിന്റെ സാനിദ്ധ്യം നാട്ടിൽ ഐക്യവും സാഹോദര്യവും, മൈത്രിയും കൊണ്ടാടി. ആരെയും, വിമർശിക്കാതെ, ആരാലും വിമർശിക്കപ്പെടാതെ, വേദനിപ്പിക്കാതെ, മറുത്തൊരു വാക്ക് പോലും ഉരിയാതെ, ആരോടും മുഖം കറുപ്പിക്കാതെ പണ്ഡിത സമൂഹത്തിന് തന്നെ മാതൃകയാർന്ന ജീവിതം സമൂഹത്തിന് മുമ്പിൽ കാണിച്ചു കൊണ്ട് നാനാ ജാതി മതസ്ഥരുടെ ആദരം ഏറ്റു വാങ്ങി കൊണ്ട് നാഥന്റെ വിളിക്ക് ഉത്തരം നൽകി അദേഹം യാത്രയായി.

ഖത്തീബ് എം. എ. അബ്ദുൽ ഖാദർ മുസ്ലിയാർ 1921 ല്‍ ചിത്താരിയില്‍ ജനിച്ചു. മേൽപറമ്പ് കടവത്ത് മാളിക അഹ്മദ് ഹാജിയുടെ കടവത്ത് പള്ളി ദര്‍സില്‍ മുഹമ്മദ്‌ മുസ്ലിയാരുടെ (കുഞ്ഞിപ്പ ഹാജി) കീഴില്‍ മത വിദ്യാഭ്യാസം നേടി. അദേഹത്തിന്റെ 17 ആമത്തെ വയസ്സില്‍ കടവത്ത് പള്ളിയില്‍ ഇമാമായി കൊണ്ടാണ് തുടക്കം. ഇന്നത്തെ മേൽപറമ്പ് ജുമാ മസ്ജിദ് കീഴൂര്‍ ജമാഅത്തിന്റെ കീഴിലായിരുന്ന കാലത്ത് കുഞ്ഞിപ്പ ഉസ്താദിന്റെ താല്പര്യ പ്രകാരം AD 1941 ൽ (ഹിജ്റ 1363, റജബ് 5 വെള്ളിയാഴ്ച) മേൽപറമ്പ് ജുമാ മസ്ജിദില്‍ ഖതീബ് ഉസ്താദ് തന്റെ ആദ്യ ഖുത്ബ നിര്‍വഹിച്ചു. അതിന് ചെമ്പരിക്ക ഖാസി മർഹൂം സീ. മുഹമ്മദ്‌ മുസ്ലിയാര്‍ അധികാരപ്പെടുത്തി. അന്നേരം ഖത്തീബ് ഉസ്താദിനു ഉണ്ടായിരുന്ന ചുമതലകള്‍ ഇമാമതും, ഖത്തീബ്, ജുമുഅ ഖുതുബ എന്നിവ മാത്രം. പ്രധാനപ്പെട്ട മൗലിദ്, റാത്തിബ്, നികാഹ് തുടങ്ങിയ ചടങ്ങുകള്‍ക് അധികാരമുണ്ടയിരുന്നില്ല. മയ്യിത്ത്‌ പരിപാലിക്കാനും, നിക്കാഹിനും, പടിഞ്ഞാര്‍ മുക്രിയെ കൊണ്ട് വരും. പിൽകാലത്ത് മേൽപറമ്പ് ജമാഅത് കീഴൂരിൽ നിന്നും വിഭജിച്ചു സ്വതന്ത്രമായി പുതിയ കമ്മിറ്റി നിലവില്‍ വന്നതോടെ ഖത്തീബ് ഉസ്താദിന് പൂര്‍ണ അധികാരം നല്‍കി.

മേൽപറമ്പ് ജമാഅത്ത് പള്ളിയിലെ ഖത്തീബ് പദവി അദേഹം 60 വര്‍ഷത്തോളം നില നിര്‍ത്തി. 1999 ല്‍ അനാരോഗ്യം കാരണം തല്‍സ്ഥാനത് നിന്നും മാറി വീട്ടില്‍ വിശ്രമ ജീവിതം. ഉസ്താദിന്റെ ആദ്യ ശമ്പളം 15 രൂപ (രണ്ടര മൂഡ നെല്ലിനു തുല്യം). പിന്നീട് 30 രൂപ. പിന്നീട് അത് 40 മൂഡ നെല്ല്. (20 ആള്‍ വീതം 2 മൂട നെല്ല് നല്‍കിയാണ്‌ ശമ്പളത്തിന്റെ 40 മൂഡ നെല്ല് ശേഖരിച്ചിരുന്നത്). ആ കാലഘട്ടത്തില്‍ വര്‍ഷത്തില്‍ 40 ദിവസം മത പ്രഭാഷണം നടത്താറുണ്ട്‌. അതിൽ 30 ദിവസം മേൽപറമ്പിലും 10 ദിവസം ദേളി പള്ളിയിലും. അക്കാലത്ത് ഇടുവുങ്കാല്‍ മുതല്‍ അണിഞ്ഞ വരെയുള്ളവര്‍ വെള്ളിയാഴ്ച ജുമുഅ നമസ്കാരത്തിന് മേൽപറമ്പിൽ സംബന്ധിക്കാറാണ് പതിവ്.

മേൽപറമ്പ് ജമാഅത്ത് കമ്മിറ്റി പ്രസിഡന്റ്‌ ആയിരുന്ന കല്ലട്ര അബ്ദുൽ ഖാദർ ഹാജി 1983 ൽ മരണപ്പെട്ടപ്പോൾ ഖത്തീബ് അബ്ദുൽ ഖാദർ മുസ്ലിയാരെ കമ്മിറ്റി പ്രസിഡന്റായി ഐക്യ കണ്ടേന തിരഞ്ഞെടുത്തു. അന്ന് മുതൽ മരണം വരെ നീണ്ട 33 വർഷം ജമാഅത്ത് പ്രസിഡന്റ്‌ പദവിയിൽ ഖത്തീബ് ഉസ്താദ് പ്രവർത്തിച്ചു. അനാരോഗ്യം കാരണം വിശ്രമിക്കുംബോളും ജമാഅത്ത് കമ്മിറ്റി പ്രസിഡന്റ്‌ പദവി അദേഹം തന്നെ അലങ്കരിച്ചു. കമ്മിറ്റിയുടെ പ്രവർത്തനം സുഗമമാക്കുന്നതിന് വേണ്ടി വർക്കിംഗ്‌ പ്രസിഡന്റ്‌ പ്രവർത്തനത്തിന് മേൽനോട്ടം വഹിച്ചു.

കര്‍മ ശാസ്ത്രം, അറബി സാഹിത്യം, തത്ത്വശാസ്ത്രം, എന്നിവയില്‍ അഗ്രഗണ്യനായിരുന്നു ബഹുമാനപ്പെട്ട ഖതീബ് ഉസ്താദ്.

വായന ലോകത്തെ അത്ഭുത പ്രതിഭയായിരുന്നു അദ്ദേഹം. വലിയൊരു ഗ്രന്ഥ ശേഖരം ഉസ്താദിനു സ്വന്തമായുണ്ടായിരുന്നു. കര്‍മ ശാസ്ത്രത്തിലെ ആധുനികവും അല്ലാത്തതുമായ ഭൂരിപക്ഷം ഗ്രന്ഥങ്ങളും അദേഹത്തിന് സുപരിചിതമായിരുന്നു. ആവശ്യമുള്ള ഗ്രന്ഥങ്ങള്‍ ലോകത്തിന്റെ എവിടെയാണെങ്കിലും അന്വേഷിച്ചു കണ്ടെത്തുമായിരുന്നു. ഗൾഫിൽ നിന്നും ഉസ്താദിനെ സ്നേഹിക്കുന്നവർ പുതിയ പുതിയ കിതാബുകൾ അദേഹത്തിന് എത്തിച്ചു കൊടുക്കാറുണ്ടായിരുന്നു. ജീവിത അവസാനം വരെ വിജ്ഞാനങ്ങൾ തേടി കൊണ്ടേയിരുന്നു.

കര്‍മ ശാസ്ത്രത്തിലെയും, അല്ലാത്തതുമായ തര്‍ക വിഷയങ്ങളില്‍ പ്രതിവിധി തേടി വിവിധ പ്രദേശങ്ങളിൽ നിന്ന് പല പണ്ഡിത പ്രമുഖരും ഉസ്താദിനെ സമീപിക്കാറുണ്ടായിരുന്നു.

വിനയം, ലാളിത്യം ഒക്കെയായിരുന്നു ഉസ്താദിന്റെ മുഖ മുദ്ര. എല്ലാവിധ സുഖ സൗകര്യങ്ങൾ ഉണ്ടായിട്ടും വളരെ ലളിതമായി അദേഹം ജീവിച്ചു. ആഡംബര കാറുകൾ വീട്ടിൽ ഉണ്ടായിട്ടും കൂടുതലും യാത്ര ചെയ്തിരുന്നത് ഓട്ടോ റിക്ഷയിലായിരുന്നു. ആരെയും, വിമർശിക്കുകയോ, കുറ്റപ്പെടുത്തുകയോ അദേഹം ചെയ്യാറില്ല. ഒരു പ്രത്യക വിഭാഗത്തിന്റെ ആളായി നിൽക്കാതെ സുന്നത്ത് ജമാ അത്തിൽ അടിയുറച്ചു നിന്ന് എല്ലാവരെയും സ്നേഹിച്ചു.

നാടിന്റെ ഐക്യവും, സമാധാനവുമാണ് അദേഹം എന്നും ആഗ്രഹിച്ചിരുന്നത്. ഈ വിനീതനായ ഞാൻ മുസ്ലിം വിദ്യാർഥി പ്രസ്ഥാനത്തിന്റെ ജില്ലാ തലത്തിൽ പ്രവർത്തിച്ചിരുന്ന കാലത്ത് സമസതയുടെ വിദ്യാർഥി സംഘടനയുടെ ഒരു യുണിറ്റ് മേൽപറമ്പിൽ രൂപീകരിക്കാൻ അവരുടെ അന്നത്തെ ജില്ലാ നേതാക്കൾ എന്നോട് ആവശ്യപ്പെട്ടിരുന്നു. അത്പ്രകാരം നാട്ടിൽ ഒരു കമ്മിറ്റി രൂപീകരിക്കുന്ന കാര്യം ബഹുമാനപ്പെട്ട ഖത്തീബ് ഉസ്താദിനോട് പറഞ്ഞപ്പോൾ അദേഹം എന്നോട് ഇങ്ങനെ പറഞ്ഞു. ഇപ്പോൾ ഇവിടെ ഒരു കൂട്ടർ ഉണ്ടല്ലോ. ഇനി നമ്മളും പ്രവർത്തനങ്ങളുമായി വന്നാൽ പരസ്പരം തർകിക്കാനും അത്‌ വഴി നാട്ടിൽ ഫിത്ന രൂപപ്പെടാനും കാരണമാവും. അത്‌ കൊണ്ട് വേണ്ട മോനെ, നമുക്ക് ഇങ്ങനയൊക്കെ നിന്നാൽ പോരെ....? അതോടെ ഞാനെന്റെ ഉദ്യമം അവസാനിപ്പിച്ചിരുന്നു.

നാടിന്റെ ചരിത്രങ്ങളും, മൺ മറഞ്ഞു പോയ മഹത് വ്യതികളെ കുറിച്ചുള്ള കാര്യങ്ങളൊക്കെ വാർദ്ധക്യത്തിന്റെ അസ്വസ്ഥതകളിലും

ഖത്തീബ് ഉസ്താദ് ഓർത്ത് വെക്കാറുണ്ടായിരുന്നു. അദേഹം മരിക്കുന്നതിന്റെ ഏകദേശം ഒരു വർഷം മുമ്പ് വരെ ചില കാര്യങ്ങൾ അറിയാൻ വേണ്ടി അദേഹത്തെ സമീപിച്ചിരുന്നു. മനസ്സിൽ നിന്നും ഓരോന്ന് ഓർത്തെടുത്ത് അദേഹം തന്നെ പറഞ്ഞു തുടങ്ങാറാണ് പതിവ്. വർഷവും തീയ്യതിയും വരെ അദേഹം നമുക്ക് പറഞ്ഞു തരും. എല്ലാം കണക്കു വെച്ചിരുന്നത് ഹിജ്ര വർഷ പ്രകാരമായിരുന്നു. മേൽപറമ്പ് ജുമാ മസ്ജിദിന്റെ പ്രാരംഭ ഘട്ടത്തിൽ സിലോൺ മമ്മിന്ചായും, സിലോൺ ആമുചായും സിലോണിൽ നിന്നും, അച്ചു മൊയിലാർച്ച ബോംബെ സന്ദർശിച്ചും, ഔകർചാന്റെ മരുമകൻ സിംഗപ്പൂരിൽ നിന്നും ധനം സമാഹരിച്ചതും സമാഹരിച്ച കൃത്യം രൂപ എത്ര എന്ന് വരെ അദേഹം ഓർത്ത് വെച്ചിട്ടുണ്ടായിരുന്നു.

1999 ൽ സമസ്ത കേരള ജംഇയ്യത്തുൽ ഉലമ പ്രസിഡന്റ്‌ ആയിരുന്ന അസ്ഹരി തങ്ങൾ കളനാട് മദ്രസ്സയുടെ ഉൽഘാടനത്തിന് വന്നപ്പോൾ ആ വേദിയിൽ ഖത്തീബ് ഉസ്താദ് പ്രസംഗിച്ചിരുന്നു. അന്ന് ഖത്തീബ് ഉസ്താദ് തന്റെ പ്രസംഗം തുടങ്ങിയത് അറബിയിലെ പഴയ ഏതോ പദ്യം ചൊല്ലിയായിരുന്നു. പ്രസംഗം സശ്രദ്ധം ശ്രവിച്ച അസ്ഹരി തങ്ങൾ ഖത്തീബ് ഉസ്താദിന്റെ പ്രസംഗം കഴിഞ്ഞ ഉടൻ മൈക്ക് എടുത്തു തിങ്ങി നിറഞ്ഞ സദസ്സിനോട് ഇങ്ങനെ പറഞ്ഞു. വളരെ പഴക്കമുള്ള വലിയ അർത്ഥമുള്ള ഈ പദ്യം ഇപ്പോഴും ഓർത്ത് വെച്ച് ഇത്ര ഭംഗിയായി അവതരിപ്പിച്ച ഇത്ര വലിയ മഹാൻ നിങ്ങളുടെ സമീപത്ത് തന്നെയുള്ളപ്പോൾ ദൂരെ ദിക്കിൽ നിന്നും ഞങ്ങളെയൊക്കെ കൊണ്ട് വന്നു പ്രസംഗിപ്പിക്കേണ്ട ആവശ്യമുണ്ടോ. അതായിരുന്നു ഖത്തീബ് ഉസ്താദിന്റെ പാണ്ഡിത്യവും പരന്ന വായനയും.

(ഖതീബ്ച്ച സ്മരണികയ്ക്ക്‌ വേണ്ടി തയ്യാർ ചെയ്തത്.)

Posted By:

Rafi Pallippuram‎

അധ്യാപനത്തിൽ അര നൂറ്റാണ്ടിന്റെ തിളക്കം -കെ. മുഹമ്മദ് കുഞ്ഞി മാസ്റ്റർ

2017-03-21T17:18:00.000+04:00

അക്ഷര ചെപ്പു തുറന്നു

അറിവിന്റെ വാതായനങ്ങൾ

തുറന്നു

മൂന്നു തലമുറയെ

നേരിന്റെ വഴിയിലേക്ക്

നയിച്ച വന്ദ്യ

ഗുരുനാഥൻ.

1948 ഓഗസ്റ്റ് 4 ന് ചെമനാട് കോളിയാട് ബപ്പൻ കുട്ടി ആസ്യുമ്മ ദമ്പതികളുടെ മകനായി ജനിച്ചു. ഒന്ന് മുതൽ പത്താം ക്ലാസ്സ് വരെയുള്ള പഠനം പരവനടുക്കം സ്കൂളിൽ. (GHS ചെമനാട്). കാസറഗോഡ് ഗവൺമെൻറ് കോളേജിൽ നിന്നും പ്രീ ഡിഗ്രിയും, ഡിഗ്രിയും പൂർത്തിയാക്കി. പിന്നീട് കോഴിക്കോട് ഫാറൂഖ് കോളേജിൽ നിന്നും ബി എഡ് പൂർത്തിയാക്കി തന്റെ ജീവിതം അധ്യാപനത്തിനായി സമൂഹത്തിന് വേണ്ടി സമർപ്പിച്ചു. കുട്ടി കാലത്തു തന്നെ പഠനത്തിൽ മികവ് പുലർത്തിയിരുന്നു അദ്ദേഹം. വിദ്യാഭ്യാസത്തോടും, വിദ്യാലയത്തോടും മുഖം തിരിച്ചിരുന്നു കാലഘട്ടത്തിലാണ് മുഹമ്മദ് കുഞ്ഞി മാഷ് ഉന്നത ബിരുദങ്ങൾ കരസ്ഥമാക്കിയത്.

1970 ലാണ് അദ്ദേഹം അധ്യാപക ജോലിയിൽ പ്രവേശിക്കുന്നത്.

ആദ്യ നിയമനം GHS കുഞ്ചത്തൂർ. അത് താത്കാലിക നിയമനമായിരുന്നു. PSC വഴി സ്ഥിരം നിയമനം ലഭിച്ചത് GHS ചന്ദ്രഗിരിയിൽ. പത്തു വർഷത്തിൽ അധികം ചന്ദ്രഗിരിയിൽ ജോലി ചെയ്തു. 1983 ൽ ചെമനാട് ജമാ-അത്തിന്റെ കീഴിൽ ഹൈ സ്കൂൾ ആരംഭിച്ചപ്പോൾ സ്കൂൾ മാനേജ്മെന്റിന്റെ അഭ്യർത്ഥന മാനിച്ചു സ്ഥലം മാറ്റം വാങ്ങി ജമാ-അത് സ്കൂളിന്റെ ഹെഡ് മാസ്റ്റർ ആയി ചുമതലയേറ്റു.

ചന്ദ്രഗിരി സ്കൂളിൽ നിന്നും മുഹമ്മദ് കുഞ്ഞി മാഷ് മാറി പോവുന്നതിൽ പ്രതിശേധിച്ച് അന്നത്തെ വിദ്യാർത്ഥികൾ കുറെ ദിവസം സ്കൂളിൽ പഠിപ്പു മുടക്കി സമരം ചെയ്തിരുന്നു. മാഷിന്റെ അധ്യാപന ശൈലിയും, വിദ്യാർത്ഥികളോട് വാത്സല്യത്തോടെയുള്ള പെരുമാറ്റം ഒക്കെ തന്നെയാണ് വിദ്യാർത്ഥികൾക്കിടയിൽ അദ്ദേഹം ഏറ്റവും സ്വീകാര്യനായത്. പഠന വിഷയങ്ങൾ കൂടാതെ വിദ്യാർത്ഥികളുടെ മറ്റു കഴിവുകളെ പ്രോത്സാഹിപ്പിക്കുന്നതിനും അദ്ദേഹം പ്രത്യേകം ശ്രദ്ധിച്ചിരുന്നു. 1987 ൽ സർക്കാർ നിർദേശ പ്രകാരം മുഹമ്മദ് കുഞ്ഞി മാഷ് വീണ്ടും ചന്ദ്രഗിരി സ്കൂളിൽ അധ്യാപകനായി തിരിച്ചു വന്നു. പ്രധാനമായും അദ്ദേഹം പഠിപ്പിച്ചിരുന്നത് ഇംഗ്ലീഷ് ആണെങ്കിലും ചന്ദ്രഗിരിയിൽ അദ്ദേഹം സാമൂഹ്യ പാഠവും പഠിപ്പിച്ചിരുന്നു.

1987 ൽ ചന്ദ്രഗിരി സ്കൂളിലേക്ക് തിരിച്ചു പോയപ്പോൾ ചെമനാട് ജമാ-അത് സ്കൂളിൽ പുതുതായി ഒരു ഹെഡ്മിസ്ട്രസ് ചുമതലയേറ്റു. ആ വർഷം ജമാ-അത് സ്കൂളിൽ ചരിത്രത്തിൽ ഇന്നേവരെ നടന്നിട്ടില്ലാത്ത വിദ്യാർത്ഥി സമരവും, വിദ്യാർത്ഥി സംഘട്ടനങ്ങൾ ഒക്കെ കാരണം കുറെ ദിവസം പഠനം മുടങ്ങുകയും കാരണക്കാരായ വിദ്യാർത്ഥികൾക്കെതിരെ അച്ചടക്ക നടപടി എടുത്തിരുന്നു. സ്‌കൂളിന്റെ പിറവി മുതൽ അതുവരെ നിലനിർത്തിയിരുന്ന ഉന്നത പഠന നിലവാരവും വിദ്യാർഥികളിലെ അച്ചടക്കം എല്ലാം താഴോട്ടു കൂപ്പു കുത്തിയ അധ്യയന വർഷമായിരുന്നു അത്. 1988 ൽ ജമാ-അത് സ്‌കൂൾ മാനേജ്‌മന്റ് മുഹമ്മദ് കുഞ്ഞി മാഷിനോട് ഹെഡ് മാസ്റ്റർ ആയി വീണ്ടും ചുമതല ഏൽക്കാൻ നിരന്തരമായുള്ള അഭ്യർത്ഥന മാനിച്ചു അദ്ദേഹം വീണ്ടും ജമാ-അത് സ്‌കൂളിലേക്ക് തന്നെ തിരിച്ചു പോയി. അപ്പോഴും മാഷിൻറെ സ്ഥലത്തെ മാറ്റത്തിൽ പ്രതിഷേധിച്ചു ചന്ദ്രഗിരി സ്‌കൂളിൽ വിദ്യാർത്ഥികൾ പഠിപ്പു മുടക്കിയിരുന്നു. പക്ഷെ, ആദ്യത്തെ പ്രാവശ്യം നടന്നത് പോലുള്ള ശക്തമായ സമരങ്ങൾ അല്ലായിരുന്നു. മുഹമ്മദ് കുഞ്ഞി മാഷ് വീണ്ടും ജമാ-അത് സ്‌കൂളിലേക്ക് തിരിച്ചു പോയതിനു ശേഷം നഷ്ടപ്പെട്ട പ്രതാപം സ്‌കൂളിന് വീണ്ടെടുക്കാൻ സാധിച്ചു എന്ന് മാത്രമല്ല അച്ചടക്കത്തിലും പഠനത്തിലും സ്‌കൂൾ സംസ്ഥാനത്തു തന്നെ എണ്ണപ്പെട്ട സ്‌കൂളിൽ ഒന്നായി മാറ്റിയെടുത്തു.

പിന്നീട് ജമാ- അത് സ്‌കൂൾ ഹയർ സെക്കന്ററി ആയി അപ്ഗ്രേഡ് ചെയ്തപ്പോൾ പ്രിൻസിപ്പാളിന്റെ ചുമതലയും മുഹമ്മദ് കുഞ്ഞി മാഷിന് തന്നെയായിരുന്നു. ഹൈസ്കുൾ ഹെഡ്മാസ്റ്ററായും, പ്രിൻസിപ്പലായും 22 കൊല്ലത്തെ സ്തുത്യർഹമായ സേവനം.

2004 ൽ മുഹമ്മദ് കുഞ്ഞി മാഷ് ഔദ്യോഗിക ജീവിതത്തിൽ നിന്നും റിട്ടയർ ചെയ്തു. അതെ വർഷം തന്നെ പള്ളിക്കര ഇസ്ലാമിക് ഹയർ സെക്കണ്ടറി സ്കൂളിൽ പ്രിൻസിപ്പാലായി ചുമതലയേറ്റു. ഇപ്പോഴും അവിടെ തന്നെ തുടരുന്നു.

ആത്മാർത്ഥ, അർപ്പണ ബോധം, കൃത്യനിഷ്ഠത ഇതൊക്കെ തന്നെയാണ് മുഹമ്മദ് മാഷിനെ മറ്റു അധ്യാപകരിൽ നിന്നും വ്യത്യസ്തനാക്കുന്നത്. വിദ്യാർഥികളിലെ പഠന മികവിനോടൊപ്പം, അവരെ അച്ചടക്കമുള്ള സമൂഹമാക്കി മാറ്റി എടുക്കാൻ സാധിക്കുന്നത് തന്നെയാണ് അദ്ദേഹത്തിന്റെ പ്രത്യേക കഴിവ്.

സർവീസിൽ നിന്നും വിരമിക്കുമ്പോൾ ചെമ്മനാട് ജമാഅത്ത് കമ്മിറ്റി, സഹപ്രവർത്തകർ, പൂർവ്വ വിദ്യാർത്ഥികൾ, പൗരാവലി എന്നിവർ ചേർന്ന് നൽകിയ പ്രൗഢ ഗംഭീരമായ യാത്രയയപ്പ് മാഷിന്റെ ഔദ്യോഗിക ജീവിതത്തിന് ലഭിച്ച ഏറ്റവും വലിയ അംഗീകാരമായിരുന്നു. മൂന്നു തലമുറയിൽ പെട്ട തന്റെ ശിഷ്യഗണങ്ങളുടെ ബഹുമാനവും സ്നേഹവായ്പ്പും കൊണ്ട് അദ്ദേഹം വീർപ്പു മുട്ടിയിരുന്നു. അത്രയ്ക്കും വർണാഭമായിരുന്നു ആ ചടങ്ങ്.

1997 ൽ മികച്ച അധ്യാപകനുള്ള സംസ്ഥാന അവാർഡ് മുഹമ്മദ് കുഞ്ഞി മാഷിന് ലഭിച്ചു. അദ്ദേഹത്തിന്റെ സേവനത്തിനു ലഭിച്ച ഏറ്റവും വലിയ അംഗീകാരം. 2001 ൽ പ്രൈവറ്റ് ഹയർസെക്കണ്ടറി സ്കൂൾ ഹെഡ്മാസ്റ്റേഴ്സ് അസോസിയേഷന്റെ അവാർഡും മാഷിന് ലഭിച്ചു.

മറ്റു ചില വ്യക്തികളും സംഘടനകളും അവാർഡും, അംഗീകാരങ്ങളും നൽകി മാഷിനെ ആദരിച്ചിരുന്നു. മികച്ച അധ്യാപകനുള്ള സംസ്ഥാന അവാർഡ് അന്നത്തെ വിദ്യാഭ്യാസ മന്ത്രി ശ്രീ. പീ. ജെ. ജോസഫ്, പൊതുവിദ്യാഭ്യാസ ഡയറക്ടർ ശ്രീമതി. ലിസ ജേക്കബ്, മറ്റു മന്ത്രിമാർ, ജന പ്രതിനിധികൾ തുടങ്ങി ഉന്നത വ്യക്തികളുടെ സാന്നിധ്യത്തിലാണ് മുഹമ്മദ് കുഞ്ഞി മാഷ് അവാർഡ് സ്വീകരിച്ചത്.

ചെമനാട് ജമാ-അത് കമ്മിറ്റി സെക്രട്ടറി കൂടിയാണ് ഇപ്പോൾ മുഹമ്മദ് കുഞ്ഞി മാഷ്. വിവാഹം 1974 ൽ, ഭാര്യ ആസ്യമ്മ. മക്കൾ ഒരു മകനും മൂന്ന് പെൺമക്കളും. ഫാത്തിമത്ത് റസ് ലി (ടീച്ചർ), മറിയം ബസ് രിയ (Bsc. Nurse), ആസിയ റോഷിന (BTech.), റംഷാദ് അബ്ദുല്ല (എംകോം). കുടുംബ ജീവിതം അല്ലാഹുവിന്റെ അനുഗ്രഹത്താൽ സന്തോഷത്തിൽ കഴിയുന്നു. പരിശുദ്ധ ഹജ്ജ് കർമ്മം നിർവ്വഹിക്കണമെന്ന ആഗ്രഹം മാഷിൻറെ മനസ്സിൽ ബാക്കിയുണ്ട്. ആയുർ ആരോഗ്യത്തോട് കൂടി ഹജ്ജ് കർമം നിർവഹിക്കാനും മാഷിൻറെ ആരോഗ്യത്തിനും ആഫിയത്തിനും വേണ്ടി പ്രാർത്ഥിക്കുന്നു.

Posted By:

Rafi Pallippuram‎

കെ. വീ. മൊയ്തീൻ കുഞ്ഞി മുസ്ലിയാർ

2017-03-20T15:19:00.000+04:00

വീണ്ടും ഒരു മാർച്ച് മാസം കടന്നു പോകുമ്പോൾ മേൽപറമ്പിലെ ഒരു പണ്ഡിത പ്രകാശം അണഞ്ഞിട്ടു 20 വർഷം പിന്നിടുന്നു.

പണ്ഡിത തറവാട്ടിൽ നിന്നും പിറന്ന മറ്റൊരു പണ്ഡിത പ്രമുഖൻ.

പ്രമുഖ പണ്ഡിതൻ ആയിരുന്ന മേൽപറമ്പ് അഹമ്മദ് മുസ്ലിയാരുടെ മകൻ. അറിയപ്പെട്ട മറ്റൊരു പണ്ഡിത പ്രമുഖനായിരുന്ന കടവത്ത് കുഞ്ഞിപ്പ ഹാജി മുസ്ലിയാരുടെ മരുമകൻ (മകളുടെ ഭർത്താവ്).

അധ്യാപന രംഗത്തും, മത പ്രഭാഷണ രംഗത്തും തിളങ്ങി നിന്ന് ഏവർക്കും പ്രയങ്കരനായിരുന്ന സമയത്താണ് ഏവരെയും ദുഃഖത്തിലാഴ്ത്തി കെ. വീ. മൊയ്തീൻ മുസ്‌ലിയാർ നമ്മോടു വിട പറഞ്ഞത്.

മലബാറിലും, കർണാടകയിലും അറിയപ്പെട്ട പണ്ഡിതനും മംഗലാപുരത്ത് പ്രശസ്തമായ സീനത്ത് ബക്ഷ് ജുമാ മസ്ജിദ് ഇമാം ആയിരുന്ന മേൽപറമ്പ് അഹമ്മദ് മുസ്ലിയാരുടെയും (മംഗലാപുരം ആമു മൊയ്‌ലാർച്ച) ബീഫാത്തിമയുടെയും ഏഴു മക്കളിൽ ആറാമനായി 1944 ൽ ജനനം. 5 ആം ക്ലാസ്സ് വരെയുള്ള സ്കൂൾ പഠനത്തിന് ശേഷം നീലേശ്വരം ഭാഗത്തുള്ള കക്കടിപ്പുറം ഉസ്താദിന്റെ ദർസിൽ പഠിച്ചു. പിന്നീട് അതി പ്രശസ്ത ഇസ്ലാമിക കലാലയമായ വെല്ലൂർ ബാഖിയാത്തിൽ നിന്നും 1969 ൽ ബാഖവി ബിരുദം കരസ്ഥമാക്കി.

പരവനടുക്കത്ത് പ്രവർത്തിക്കുന്ന ആലിയ അറബിക് കോളേജ് സുന്നി സിലബസ് പ്രകാരം പഠിപ്പിച്ചിരുന്ന കാലത്തു നമ്മെ വിട്ടു പിരിഞ്ഞ ചെമ്പരിക്ക ഖാസി സീ. എം. ഉസ്താദിന്റെ കൂടെ കെ.വീ. മൊയ്തീൻ മുസ്ലിയാരും ആലിയയിൽ അധ്യാപനം നടത്തിയിരുന്നു. 1971 ൽ മർഹൂം കല്ലട്ര അബ്ദുൽ കാദർ ഹാജിയുടെ സഹായത്തോടെ സീയെം ഉസ്താദ് സ-അദിയ അറബിക് കോളേജ് ആരംഭിക്കുമ്പോൾ മുദരിസായി കൂടെയുണ്ടായിരുന്നത് കെ. വീ മൊയ്‌ദീൻ മുസ്ലിയാരായിരുന്നു. ഒറവങ്കര മഠത്തിലെ കല്ലട്രയുടെ പഴയ വീട്ടിൽ സ അദിയ പിറവി കൊണ്ടത് മുതൽ ദേളിയിലെ വിശാലമായ പറമ്പിൽ സ അദിയ എന്ന സ്ഥാപനം പടർന്നു പന്തലിക്കുമ്പോൾ അതിന്റെ പിന്നണി പ്രവർത്തനങ്ങളിൽ കെവി മൊയ്‌ദീൻ മുസ്ലിയാരുടെ പ്രവർത്തനങ്ങളും ദർശിക്കാൻ സാധിക്കും.

കോളേജിന്റെ പ്രാരംഭ ഘട്ടത്തിൽ മുദരിസായി സേവനം ചെയ്ത അദ്ദേഹം 1989 ൽ സഅദിയയുടെ അസിസ്റ്റന്റ് മാനേജർ ആയി ചുമതലയേറ്റു. തൻറെ ആത്മാർത്ഥതയ്ക്കും കഴിവിനുമുള്ള അംഗീകാരമായിരുന്നു പുതിയ ചുമതല. സ- അദിയയുടെ ശക്തിയും സ്ഥാപനം വളർച്ചയുടെ ഓരോ പടവുകളും താണ്ടുമ്പോൾ അതിന്റെ ചാലക ശക്തിയായി നിന്ന പണ്ഡിത ശ്രേഷ്ടനും ഈ അടുത്ത് നമ്മെ വിട്ടു പിരിഞ്ഞ ബഹുമാനപ്പെട്ട എം. എ ഉസ്താദിന്റെ അസിസ്റ്റന്റ് ആയിരുന്നു ആ പദവി. എം. എ ഉസ്താദിന്റെ വിശ്വസ്തനും പ്രിയങ്കരനായിരുന്നു അദ്ദേഹം. കെവി മൊയ്തീൻ മുസ്‌ലിയാർ അദ്ദേഹത്തിന്റെ മരണം വരെ ആ പദവിയിൽ തുടർന്നു.

സഅദിയയിൽ ജോലി ചെയ്യുമ്പോൾ തന്നെ അദ്ദേഹം ദേളി ജുമാ മസ്ജിദ് ഖത്തീബായും സേവനം ചെയ്തിരുന്നു. 1993 വരെ ദേളി പള്ളിയിൽ ജുമുഅ ഖുതുബ നിർവഹിച്ചിരുന്നത് മൊയ്തീൻ മുസ്ലിയാരായിരുന്നു. മത പ്രസംഗ വേദികളിൽ അദ്ദേഹം അക്കാലത്ത് വളരെ പ്രശസ്തനായിരുന്നു. വിവിധ നാടുകളിൽ പല വേദികളിലായി അദ്ദേഹം പ്രഭാഷണം നടത്തിയിട്ടുണ്ട്.

മേൽപറമ്പ് ജുമാ മസ്ജിദിന്റെ മൂന്നാമത്തെ പള്ളി നിർമാണ വേളയിൽ ധന ശേഖരണാർത്ഥം ബഹുമാനപ്പെട്ട ഖത്തീബ് ഉസ്താദിന്റെ കൂടെ മൊയ്തീൻ മുസ്ലിയാരും യു. എ. ഇ സന്ദർശിച്ചിരുന്നു.

ശാരീരികമായി ഏറെ രോഗങ്ങൾ സഹിച്ച അദ്ദേഹം 1997 മാർച്ച് 28 ന് ഈ ലോകത്തോട് വിട പറയുമ്പോൾ അദ്ദേഹത്തിന്റെ പ്രായം 53. അധ്യാപനം കൊണ്ടും, മത പ്രഭാഷണങ്ങളാലും, മത സ്ഥാപനത്തിന്റെ അമരത്തിരുന്നു സമുദായത്തിന് ഏറെ സേവനം ചെയ്യവേ ജീവിതത്തിന്റെ മധ്യാഹ്നത്തിൽ ഈ ലോകത്തോട് വിട പറയുമ്പോൾ നഷ്ടമാവുന്നത് നാടിനും സമുദായത്തിനും മത വിജ്ഞാനത്തിന്റെ വിളക്കുകളാണ്.

അദ്ദേഹത്തിന്റെ കുടുംബം, പ്രശസ്ത പണ്ഡിതനായിരുന്ന കടവത്ത് മുഹമ്മദ് മുസ്ലിയാരുടെ (കുഞ്ഞിപ്പ ഹാജി ഉസ്താദ്) മകൾ മറിയം ആണ് അദ്ദേഹത്തിന്റെ ഭാര്യ. മക്കൾ ഷരീഫ്, അഷ്‌റഫ്, ഷറഫ്, ജുനൈദ്, സഅദ്, സകിയുദീൻ എന്നീ ആൺ മക്കളും സാജിത, സുമയ്യ, സാബിറ എന്നീ പെൺ മക്കളും.

മൊയ്തീൻ മുസ്ലിയാരുടെ സഹോദരങ്ങൾ പരേതനായ മുഹമ്മദ് മുസ്ലിയാർ, പരേതനായ അബ്ദുല്ല, അബ്ദുൽ ലത്തീഫ് എന്നീ സഹോദരന്മാരും ആയിഷ, നഫീസ, ദൈനബി എന്നീ മൂന്നു സഹോദരികളും.

അകാലത്തിൽ നമ്മെ വിട്ടു പിരിഞ്ഞ അദ്ദേഹത്തെയും നമ്മെയുമെല്ലാം നാളെ സ്വർഗത്തിൽ ഒരുമിപ്പിക്കേണമേ..... ആമീൻ!

-Rafi Pallippuram

കയ്യെഴുത്തിന്റെ മധുരം നുണഞ്ഞ ഹജ്ജി പെരുന്നാൾ

2016-09-10T17:31:00.000+04:00

വീണ്ടും ഒരു ഹജ്ജ് ദിനം അടുത്തു വന്നു. ഹസ്രത് ഇബ്രാഹിം നബി (അ) യുടെ ത്യാഗ പൂർണമായ ജീവിതം ഓർത്ത് ഒരിക്കൽ കൂടി ബലി പെരുന്നാൾ കടന്നു വരുന്നു. ഇസ്‌ലാമിലെ പഞ്ച സ്തംഭങ്ങളിൽ പെട്ട പരിശുദ്ധ ഹജ്ജ് കർമം നിർവഹിക്കാൻ പുണ്യ ഭൂമിയായ മക്കയിലെത്തിയ ലോകത്തിന്റെ വിവിധ ഭാഗങ്ങളിൽ നിന്നും വർണ, വർഗ, ദേശ, ഭാഷ വ്യാതാസമന്യെ ഒരൊറ്റ മന്ത്രവും ഒരൊറ്റ നിയ്യത്തുമായി ഹജ്ജിന്റെ ഓരോരോ കർമങ്ങൾ ചെയ്യുവാൻ വിശ്വാസികൾ ഒത്തു കൂടി. എല്ലാ വിശ്വാസികൾക്കും മബ്‌റൂറും, മഖ്ബൂലുമായ ഹജ്ജ് നിർവഹിക്കാൻ റബ്ബ് തൗഫീഖ് നൽകട്ടെ എന്ന് നമുക്ക് പ്രാർത്ഥിക്കാം.

ബലി പെരുന്നാൾ അടുത്തു വരുമ്പോൾ മനസ്സിൽ ആദ്യം ഓർമ വരുന്നത് കുട്ടി കാലത്തു മദ്റസയിലെ കൈയെഴുത്താണ്. പെരുന്നാൾ അവധിക്കായി മദ്രസ്സ അടക്കുന്ന ദിവസമാണ് കയ്യെഴുത്തു ഉണ്ടാവാറുള്ളത്. ഉസ്താദുമാർ മുൻ കൂട്ടി തന്നെ കയ്യെഴുത്തിന്റെ കാര്യം കുട്ടികളോട് പറഞ്ഞിരിക്കും. കൈ നിറയെ കാശ് കൊണ്ട് വരണം. എന്നാൽ കൈ നിറയെ എഴുതി തരാം എന്നാണ് തമാശ രൂപത്തിൽ ചില ഉസ്താദ്മാർ പറയാറുള്ളത്. കുട്ടികൾ വീട്ടിൽ നിന്നും കൊണ്ട് വന്ന കാശ് കൈ എഴുതുമ്പോൾ ഉസ്താദുമാർക്കു ഗുരു ദക്ഷിണയായി നൽകും. ആ പണം ഉസ്താദുമാർക്കുള്ളതാണ്.

ചില മദ്രസകളിൽ ഓരോ മുഹല്ലിംങ്ങൾക്കും കിട്ടിയ കാശ് എല്ലാം ഒന്നായി കൂട്ടി എല്ലാവരും തുല്യമായി വീതിച്ചെടുക്കും. ചില സ്ഥലങ്ങളിൽ അപ്ന, അപ്ന.

അറബി മഷി കൊണ്ടോ തേൻ കൊണ്ടോ കുട്ടികളുടെ വലതു കയ്യിൽ അറബി വചനങ്ങൾ എഴുതി കൊടുക്കുന്നതാണ് കയ്യെഴുത്ത്. നമ്മുടെ നാട്ടിൽ കൂടുതലായും ഉപയോഗിക്കുന്നത് അറബി മഷിയാണ്. പിഞ്ഞാണം (ബട്ട ഏഴുത്ത്) എഴുതാനും അത് പോലുള്ള ആവശ്യങ്ങൾക്ക് ഉപയോഗിക്കുന്ന മഷിയാണത്. എഴുതാൻ ഉപയോഗിക്കുന്നത് പേന രൂപത്തിൽ ചെത്തിയെടുക്കുന്ന മുള കൊള്ളികളാണ്. എഴുതി കഴിഞ്ഞാൽ മഷി ഉണങ്ങുന്നതിനു മുമ്പായി വീട്ടിൽ നിന്നും കൊണ്ട് വരുന്ന പഞ്ചസാര ഉള്ളം കയ്യിൽ പുരട്ടി ബിസ്മി കൂട്ടി എഴുത്തുകൾ നക്കി തുടക്കണം. മദ്രസ്സയിൽ ചേരാത്ത ചെറിയ കുട്ടികളെയും കയ്യെഴുതാൻ ആവേശത്തോടെ കൊണ്ട് വരുന്നവരുമുണ്ട്. മലബാറിലെ ചില ഭാഗങ്ങളിൽ ഇതിനെ പറയാറുള്ളത് കയ്യെഴുത്തു പെരുന്നാൾ എന്നാണ്. മലബാറിൽ നൂറ്റാണ്ടുകളായുള്ള ഒരു ആചാരമാണ് കയ്യെഴുത്ത്. ചില സ്ഥലങ്ങളിൽ അത് ഇന്നും പഴയ പോലെ തന്നെ തുടർന്ന് വരുന്നുണ്ട്.

കുട്ടിക്കാലത്തു കയ്യെഴുത്തിന്റെ മധുരം നുണയുമ്പോളാണ് ഹജ്ജി പെരുന്നാൾ നമുക്ക് മുമ്പിലെത്തിയത് അറിയുന്നത്.

ഓരോ ബലി പെരുന്നാൾ ദിനം അടുത്തു വരുമ്പോൾ ഇന്നും ഓർത്തു പോകുന്നത് കുട്ടിക്കാലത്ത് വലതു ഉള്ളം കയ്യിൽ പതിഞ്ഞ കറുത്ത നിറത്തിലുള്ള അറബി അക്ഷരങ്ങളും പഞ്ചസാര കൂട്ടി മധുരം നുണഞ്ഞ കയ്യെഴുത്തിന്റെ അക്ഷര ഭംഗിയുമാണ്.

By - Rafi Pallippuram

"മീനോ" !!

2016-07-10T16:34:00.000+04:00

വെയില് കൊണ്ട് ക്ഷീണിച് അടുത്തുള്ള കടയിൽ കയറി ഒരു ജ്യുസ് കുടിച്ചോണ്ടിരിക്കുമ്പോഴാണ് കൂടെ പഠിച്ചിരുന്ന സമീറിനെ കണ്ടത് .. ജ്യൂസ് വേണോ സമീറെ ? എന്നു ചോദിച്ചപ്പോ .. അവനിത്തിരി ഗൗരവത്തിൽ ..പൊടിക്ക് അഭിമാനത്തോടെ എന്നോട് പറഞ്ഞു "മീനോ" !!മീനൊന്നുമല്ല ചെക്കാ .. നല്ല പൈനാപ്പിൾ ജ്യുസാണ് .. നിനക്ക് വേണോ ? എന്നു നിഷ്‌കളങ്കനായ ഞാൻ വീണ്ടും ചോദിച്ചപ്പോ ആ തെണ്ടി പറയാണ്..

ഹേയ് മിഷ്ടർ അലവലാതി ഷാംജാദ് .. "മീനോ"എന്നു പറഞ്ഞാൽ ഇംഗ്ലീഷിൽ "എനിക്കു വേണ്ടാ" എന്നാണ് അർത്ഥം !! ME "എനിക്കു" NO "വേണ്ട" .. "MENO".. എനിക്കു വേണ്ട .. understand ? എന്നും പറഞ്ഞു അവൻ അവന്റെ ഹീറോ ഹോണ്ട കമ്പനി വരെ എഴുതി തള്ളിയ കൽക്കരി തീവണ്ടി പോലെ പുക തുപ്പുന്ന പഴയ സ്‌പ്ലെൻഡറിൽ കയറി അവന്റെ കണ്ണിന്റെ പത്തിരട്ടി വലിപ്പമുള്ള roymon ( റെയ്ബാൻറെ കോപ്പി ) സൺഗ്ളാസ്സും വെച്ചു എന്നെ നോക്കി പുച്ഛത്തോടെ ഒന്നു ഇളിച്ചിട്ടു പോയി !!

വെറും രണ്ടാഴ്ച കൊണ്ട് "ഇംഗ്ലീഷ്" ഞരമ്പിൽ കുത്തിവെച്ചു രക്തത്തിൽ അലിയിച്ചു കൊടുക്കപ്പെടും എന്നും പറഞ്ഞു പരസ്യം ചെയ്ത ഏതോ സ്പോക്കൺ ഇംഗ്ലീഷ് ഇൻസ്റ്റിട്യൂട്ടിന്റെ ജീവിച്ചിരിക്കുന്ന രക്തസാക്ഷിയാണ് സമീറെന്നു ബില്ല് കൊടുക്കാൻ നേരം കടയിലിരുന്ന ഫ്രീക്കൻ കാഷ്യർ പറഞ്ഞപ്പോഴാണ് അറിയുന്നത് !!

Posted By:

Shamjad Shan

ഫാസ്ക് കടവത്ത് റിലീഫ് നടത്തി

2016-07-05T13:11:00.001+04:00

മേൽപറമ്പ് : ഫോർട്ട്‌ നൈബേര്സ് ആർട്സ് & സ്പോർട്സ് ക്ലബ്‌ കടവത്ത് റിലീഫ് ജി സി സി കമിറ്റി താജു കടവത്ത് കേന്ദ്ര കമിറ്റി സെകട്രറി കലീൽ കടവത്തിന്ന് കയ്മാറുന്നു .

നിർധരായ കുടുംബങ്ങൾക്കുള്ള കിറ്റ് കലീൽ കടവത്ത്‌ വിതരണം ചെയ്തു.ധന സഹായം താജു കടവത്ത് വിതരണം ചെയ്തു .

ഷാനി തായത്ത് ,ഇജാസ് തായത്ത് ,കബീർ ചളയംഗോഡ് ,സർഫറാസ്‌ സി കെ,റാഷി കടവത്ത് ,ശഹ്സി തായത്ത് , മുഹമ്മദ്‌ കുഞ്ഞി പൊയക്കര , നിയാസ് ,മഷൂദ് , ഫയാസ്‌,അഫ്രീദ് , തൗഫീർ , സിറാജ് സി കെ,കമാൽ, നബുഹാൻ എന്നിവർ സംബന്ധിച്ചു .

പെരുന്നാൾ ഓർമകൾ

2016-07-04T15:28:00.002+04:00

ബയക കാച്ചിയതും, കേങ്ങു കാച്ചിയതും, പൈസ പത്തലും......

കായി കാച്ചിയതില്ലാതെ നമുക്കെന്തു പെരുന്നാൾ!

പവിത്രവും പുണ്യവുമാക്കപ്പെട്ട പരിശുദ്ധ റമസാൻ മാസം നമ്മോടു വിട പറയുന്നു. ആരാധന, പ്രാർത്ഥനാ നിരതമായ ദിന രാത്രങ്ങളാണ് ഒരു മാസക്കാലമായി ഓരോ വിശ്വാസിയും ധന്യമാക്കിയത്. വിശ്വാസികൾക് റബ്ബിന്റെ സമ്മാനമാണ് ഈദുൽ ഫിത്തർ. നോമ്പിന്റെ തുടക്കത്തിൽ തന്നെ പെരുന്നാൾ ആഘോഷത്തിനുള്ള തയ്യാറെടുപ്പുകൾ നടത്തി വരുന്നു. പുത്തൻ വസ്ത്രങ്ങളും, ചെരുപ്പുകളും എല്ലാം വാങ്ങിയും ഒക്കെ പെരുന്നാൾ ദിനത്തിനായി ആകാംഷയോടെ കാത്തിരിക്കുന്നു. അവസാനത്തെ പത്തിലേക്ക് കടന്നാൽ മിക്ക വീടുകളുടെ പരിസരത്തും പലഹാരം വറുക്കുമ്പോളുള്ള എണ്ണയുടെ കൊതിയൂറും മണമാണ്. വീട്ടിലെ സ്ത്രീകൾ പാചക തിരക്കുകളിലാണ്. പെരുന്നാളിനുള്ള ഉണക്ക പലഹാരങ്ങൾ ഉണ്ടാക്കിയെടുക്കാൻ. നമ്മുടെ നാട്ടിൽ മുൻ കാലങ്ങളിൽ കണ്ടു വന്നിരുന്ന പ്രധാന ഉണക്ക അപ്പങ്ങളുണ്ട്. ഇപ്പോൾ പുതിയ പുതിയ പേരിലും രുചിയിലും കുറെ അപ്പങ്ങൾ മഹതികൾ പാചകം ചെയ്യുന്നു. അവയിൽ ചിലതു മറ്റു നാടുകളിൽ നിന്നും പകർത്തിയതും ചിലവ അവർ തന്നെ ഗവേഷണം നടത്തി കണ്ടു പിടിച്ചതും. എന്റെയൊക്കെ കുട്ടിക്കാലത്തു കൂടുതലും ഉണ്ടായിരുന്നത് ബാട്ട് പത്തൽ, പൊരി അപ്പം, അരീരം, നെയ്യട, പൈസ പത്തൽ, അച്ചപ്പം, ഈത്തപ്പഴം കാച്ചിയത്, കടല കാച്ചിയത് അങ്ങനെ പോവുന്നു വിഭവ നിരകൾ. എന്നാലും കുട്ടികളായ ഞങ്ങൾ കൂടുതലും ഇഷ്ടപ്പെട്ടിരുന്നത് ചെറിയ വൃത്തത്തിലുള്ള പൈസ പത്തലും അരീരവും തന്നെയായിരുന്നു. ഇന്നത്തെ വിഭവങ്ങളിൽ പൈസ പത്തൽ, അരീരം ഇപ്പോൾ അങ്ങനെ കാണാറില്ല. പകരം ചുക്കപ്പം സ്ഥാനം പിടിച്ചു. പിന്നെ കുഴലപ്പം, ചൊറോട്ട്, കൊട്ട അപ്പം, കെയ്ക്ക്, നെയ് കെയ്ക്ക് തുടങ്ങി ഒരുപാട് പുതിയ വിഭവങ്ങൾ സ്ഥാനം പിടിച്ചു.

പെരുന്നാൾ തലേന്ന് രാത്രിയിലും പ്രഭാതത്തിലുമാണ് ഫ്രഷ് പൊരികളുടെ പാചക മേള. ബയക കാച്ചിയത്, കേങ്ങു കാച്ചിയത്, നെയ് പത്തൽ, നെയ്യപ്പം, മുട്ട സർക്ക, ..... തുടങ്ങി അങ്ങനെ പോവുന്നു ഫ്രഷ് നിരകൾ. പെരുന്നാളിന് രണ്ടു ദിവസം മുമ്പേ നേന്ത്രം കായി (ഏത്തക്ക) വാങ്ങി കരുതി വെച്ചിരിക്കും. നമ്മുടെ കാസറഗോഡ് പ്രദേശത്തു പെരുന്നാൾ പലഹാരത്തിൽ മുഖ്യമായതും ഒഴിച്ചു കൂട്ടാൻ പറ്റാത്തതും പഴം പൊരി തന്നെ. ഇപ്പോൾ നമ്മൾ പഴം പൊരി എന്നു വാക്കു പ്രയോഗം നടത്തുന്നുണ്ടെങ്കിലും ഗൃഹാതുരത്വം ഉണർത്തുന്ന രുചി ഓർമകളും ബാല്യ കാല പെരുന്നാൾ ഓർമകൾ ഒക്കെ അയവിറക്കാൻ "ബയക്കാച്ചി" അല്ലെങ്കിൽ "കായി കാച്ചി" എന്നു തന്നെ പറയണം. നാം ഒരിക്കലും ഏത്തക്ക എന്ന്‌ പറയാറില്ല. കുട്ടി കാലം മുതലേ പഠിച്ചതും, പറഞ്ഞതും, ശീലിച്ചതും എല്ലാം "നേന്ത്രം കായി " അല്ലെങ്കിൽ വലിയ കായി എന്ന്‌ തന്നെ.

കായികാച്ചി ഇല്ലെങ്കിൽ നമുക്ക് പെരുന്നാൾ ഇല്ല എന്ന അവസ്ഥ തന്നെയാണ് അന്നും ഇന്നും. മുമ്പ് നമ്മുടെ ഉമ്മമാർ അരി അരിച്ചു മാവുണ്ടാക്കിയായിരുന്നു കായി കാച്ചിയിരുന്നത്. പിന്നീട് മൈദ മാവിലേക്കു മാറിയതോടെ രുചി മാറി പാചകം എളുപ്പമായി.

പെരുന്നാളിന് അന്ന് കുട്ടികളായ ഞങ്ങൾ കൂട്ടുകാരുമായി സംസാരിച്ചിരുന്നത് വീട്ടിലുണ്ടാക്കിയ പലഹാര വിഭവങ്ങളുടെ പേരും എണ്ണവും പറഞ്ഞായിരുന്നു. വസ്ത്രങ്ങളുടെ വില നിലവാരം അന്ന് ചർച്ചിച്ചിരുന്നില്ല. അന്ന് നാട്ടിൽ നിന്നും വസ്ത്രങ്ങൾ അങ്ങനെ വാങ്ങാറില്ലായിരുന്നു. കൂടുതലും ഉപ്പ ഗൾഫിൽ നിന്നും കൊണ്ടു വന്നതോ കൊടുത്തു വിട്ടതോ ആയിരിക്കും.

എന്നാലും ഇന്നത്തെ പോലെ അന്നും പെരുന്നാൾ പൈസ കിട്ടിയ കണക്കുകൾ പറഞ്ഞു കൂടുതൽ കിട്ടിയവർ ഹീറോ ആയിരുന്നു. ഒരു വ്യതാസം ഇന്നത്തെ പോലെ വലിയ നോട്ടുകളല്ല ലഭിച്ചിരുന്നത്.

കൂടുതലും നാണയ തുട്ടുകളാണ്. കണക്കുകൾ "അണയിൽ" ആയിരുന്നു.

ഏവർക്കും മുൻകൂറായി നന്മ നിറഞ്ഞ ഈദുൽ ഫിത്തർ ആശംസകൾ

Posted By:

Rafi Pallippuram‎

'ലഹരി മുക്ത മേൽപറമ്പ് 'നെ കുറിച് തന്നെ...

2016-06-23T15:49:00.004+04:00

മേൽസൂചക ലക്ഷ്യത്തിനായി രൂപം കൊണ്ട സാംസ്കാരിക കൂട്ടായ്‌ മക്ക് അഭിനന്ദനങ്ങൾ... മേൽപറമ്പ്, പേര് പോലെത്തന്നെ എന്നും മേലെയാണ്,

അത് അതിന്റെ മഹത്തായ പാരമ്പര്യവും പൈതൃകവും നില നിർത്തിപ്പോരുന്നതോടൊപ്പം സാംസ്കാരിക മുന്നേറ്റം വരിച്ചു കൊണ്ടിരിക്കുകയും ചെയ്യുന്നു, ഇവിടെ തലയുയർത്തി നിൽക്കുന്ന പള്ളിയും മത-ഭൗതിക വൈജ്ഞാനിക കേന്ദ്രങ്ങളും, സർക്കാർ സേവന കാര്യാലയങ്ങളും നമുക്കെന്നും അഭിമാനമാണ് , കൂടാതെ നമ്മുടെ നേതൃ പാരമ്പര്യവും ചരിത്ര പിൻബലവും മേല്പറമ്പിനെ ശ്രദ്ധേയമാക്കുന്നു.

എന്നാൽ നാം ഔന്നിത്യം നേടിയവയെ ഇടിച്ചു താഴ്ത്തും വിധം മാരകമായ പല വിപത്തുകളും ഈ നാടിനെ പിടികൂടുന്നുണ്ടോ എന്നത് ഗൌരവത്തോടെ ചര്ച്ച ചെയ്യേണ്ടുന്ന ഒന്ന് തന്നെയാണ് , നാടിന്റെയും നാട്ടാരുടേയും നന്മ മാത്രം ലക്ഷ്യം വെച് പ്രവർത്തിക്കുന്ന നല്ലൊരു 'യുവ നിര' തന്നെ മേല്പറമ്പിനായി സ്വദേശത്തും വിദേശത്തും ഉണ്ടെന്നത് നമുക്കഭിമാനിക്കാവുന്നതാണ്,

വേറിട്ട പ്രവർത്തനങ്ങളിലൂടെ ഉന്നതരുടെ പ്രശംസകൾ പിടിച്ചു പറ്റാൻ കഴിഞ്ഞിട്ടുള്ള സാംസ്കാരിക കൂട്ടായ്മകളും ഈ നാടിനെ അലങ്കരിക്കുന്നു,

ഇങ്ങനെയൊക്കെ ഉന്നതിയിൽ നിൽക്കുന്ന നമ്മുടെ നാട്ടിൽ ലഹരി ഉല്പ്പന്നങ്ങളുടെ വ്യാപനത്തെ അനുവദിച്ചു കൂടാ..

ഈ രംഗത്തെ അതിവ്യാപനം ഇനിയും കണ്ടില്ലെന്ന് നടിക്കുന്നത് നാം ഉൾക്കൊള്ളുന്ന ഓരോ കുടുംബത്തിന്റെയും 'അടിവേര് അറുക്കുന്നതിന്ന് ' തുല്യമായിക്കും, ഇതിന്റെ വ്യാപനം അത്രക്ക് താഴ്ന്ന തട്ടിലേക്ക് എത്തിക്കഴിഞ്ഞിക്കുന്നു എന്നത് ഭീതിയോടെ നാം കാണണം

'നാമറിയാതെ നമ്മുടെ മക്കൾ നമ്മുടെതല്ലാതായി' തീരുന്ന ഒരു ചുറ്റുപാടിലേക്കാണ് നാട് നീങ്ങിക്കൊണ്ടിരിക്കുന്നത്,

ഇരുട്ടിന്റെ മറവിൽ നാടിനെ നശിപ്പിക്കനൊരുങ്ങിത്തിരിച്ചവരെ തിരിചരിഞ്ഞ് അതിന് തടയിടണം, അവരുടെ ജീവിത മാർഗ്ഗമാണെന്ന രീതിയിൽ ഇനിയും കയറൂരി വിട്ടാൽ മറ്റു കുറെ കുടുംബങ്ങളുടെ സ്വപ്‌നങ്ങൾ പൊലിഞ്ഞു പൊകുമെന്നതോടൊപ്പം കുടുംബ ബന്ധങ്ങൾ ശിഥിലമാകുമെന്നതിലും സംശയമില്ല.

ഈ രംഗത്തെ ബോധവൽക്കരണ വിഷയവുമായി ബന്ധപ്പെട്ട് ധാരാളം ചർച്ചകൾ ഉയർന്ന് വന്നിരുന്നു, ബോധവൽക്കരണം അത്യാവശ്യമായി വരുന്നത് കുടുംബത്തിൽ തന്നെയാണ്,

ഈ ദുശീലങ്ങളിൽ അകപ്പെട്ടു കൊണ്ടിരിക്കുന്നവരിൽ അധികവും കൗമാരക്കാരാണ് -ഹൈസ്കൂൾ പ്രായക്കരെയാണ് 'ലഹരി വ്യാപാരികൾ' ഏറയും വല വീശുന്നത്, ഇവിടെയാണ് രക്ഷിതാക്കളെ ബോധവൽക്കരിക്കുന്നതിന്റെ പ്രസക്തിയെറുന്നത്,

കാരണം സന്ധ്യാ സമയങ്ങളിലെ 'അങ്ങാടിക്കൂട്ടുകെട്ടാ'ണ് നമ്മുടെ മക്കളെ ഇത്തരം ദുശീലങ്ങളിലേക്കെതിക്കുന്നത് , ലഹരി വസ്തുക്കളുടെ പ്രചാരകരായ പാൻപരാഗ്, മധു പോലുള്ള 'പാൻമസാലകൾ' നുണയുന്നതും ഈ സമയത്താണ്, പിന്നീടത് വൻ മയക്കുമരുന്നുകളിലേക്കും ഒഴിച്ചുകൂടാനാവാത്ത വിധം അതിന്റെ അടിമകളുമാക്കിതീർക്കുന്നു,

ഇങ്ങനെയുള്ള സന്ധ്യാ സമയങ്ങളിലെ അങ്ങാടി കൂട്ടുകെട്ട് തടയാനായാൽ മാത്രമേ നമ്മുടെ മക്കളെയും നാടിനെയും ഈ വിപത്തിൽ നിന്ന് രക്ഷിക്കാനാകൂ...

ഇവിടെ ഒരു മനശാസ്ത്ര വശംകൂടി നാം മനസ്സിലാക്കേണ്ടാതുണ്ട്, 'കൗമാര'ത്തിന്റെ ആവശ്യങ്ങളിലൊന്നാണ് കുടുംബാംഗങ്ങളുടെയും സമൂഹത്തിന്റെയും 'അംഗീകാരം' എന്നത്; അത് അനുവധിക്കപ്പെടെ ണ്ടത് തന്നെ...,

മതിയായ തോതിൽ അത് ലഭ്യമലല്ലാതിരിക്കുമ്പോഴാണ് ലഭ്യതയനുസരിച് അവർ പുറംലോകത്തെത്തുന്നത് , ഇത് അസാന്മാർഗ്ഗിക കൂട്ടു കെട്ടുകളിലേക്ക് വഴി തെളിയിക്കുകയും ചെയ്യുന്നു, അതേസമയം അമിത ലാളനയും ഫ്രീഡവും കുട്ടികളെ തിന്മയിലേക്ക് നയിക്കാനേ സഹായകമാകൂ എന്നതും നാം തിരിച്ചറിയണം.

Posted By:

Basheer Vlmk

മന്ത്രി കെ. പീ. നൂറുദീന്റെ മേൽപറമ്പിലെ പരിപാടി

2016-05-31T15:51:00.000+04:00

29/05/2016 - മുൻ മന്ത്രിയും കോൺഗ്രസ്‌ നേതാവുമായിരുന്ന കെ. പീ. നൂറുദീൻ ഈ ലോകത്തോട്‌ വിട പറഞ്ഞു. 30 വർഷം മുമ്പ് 29/05/1986 ന് അദേഹം മന്ത്രിയായിരിക്കെ മേൽപറമ്പിൽ പമ്പ് ഹൗസ് ഉത്ഘാടനത്തിന് വേണ്ടി വന്നിരുന്നു.

മേൽപറമ്പിലുള്ള കളനാട് വില്ലേജ് ഓഫിസിന് പിറക് വശം വള്ളിയോട് സർക്കാർ വക ഒരു കുളം ഉണ്ട്. അതിൽ നിന്നും ദിനേന ദേളി ജങ്ക്ഷന് കുന്നാറയിലുള്ള വലിയ ടാങ്കിലേക് വെള്ളം പമ്പ്‌ ചെയ്യുന്നു. ചെമനാട് പഞ്ചായത്തിന്റെ വിവിധ ഭാഗങ്ങളിലെകുള്ള ജല വിതരണം ഈ ടാങ്കിൽ നിന്നും ചെയ്യുന്നു.

29/05/1986 ന് കേരള സംസ്ഥാന ജല സേചന വകുപ്പ് ചെമനാട് പഞ്ചായത്തിൽ മേൽപറമ്പ് മുതൽ പരവനടുക്കം വരെയുള്ള പ്രദേശങ്ങളിലെകുള്ള ജല വിതരണത്തിന് വേണ്ടി നടപ്പിലാക്കിയ പദ്ധതിയുടെ ഉത്ഘാടനം ചെയ്തിരുന്നത് അന്നത്തെ കരുണാകര മന്ത്രിസഭയിലെ വനം വകുപ്പ് മന്ത്രിയായിരുന്ന കെ. പീ. നൂറുദീന് ആയിരുന്നു. മേൽപറമ്പിള്ള വില്ലേജ് ഓഫിസ് പരിസരത്ത് ഉല്ഘാടനതിന് വേണ്ടി നല്ലൊരു വേദിയും ഒരുക്കിയിരുന്നു. വൈകുന്നേരം നടക്കേണ്ടിയിരുന്ന പരിപാടിയായിരുന്നു. പക്ഷെ, മന്ത്രി എത്താൻ ഒരുപാട് വൈകിയിരുന്നു. മഗിരിബിനു ശേഷം പരിപാടി നടത്തന്നു. അന്നത്തെ കാസറഗോഡ് MP ഐ. രാമറൈ ആയിരുന്നു അദ്ധ്യക്ഷത വഹിച്ചിരുന്നത്. സ്ഥലം MLA കുഞ്ഞിരാമന് നമ്പ്യാര്, പഞ്ചായത്ത് പ്രസിഡന്റ്‌ കല്ലട്ര അബ്ബാസ്‌ ഹാജി തുടങ്ങി അന്നത്തെ കോണ്‍ഗ്രസ്‌, ലീഗ് നേതാക്കന്മാർ എല്ലാം പരിപാടിയിൽ സജീവമായിരുന്നു. വല്ലപ്പോഴൊക്കെ ഒരു മന്ത്രിയെ കണി കണ്ടിരുന്ന അക്കാലത്ത് മന്ത്രിയുടെ പരിപാടി വീക്ഷിക്കാന് നാട്ടുകാരുടെയും സജീവ സാന്നിധ്യം ഉണ്ടായിരുന്നു.

കുളം വള്ളിയോടു ആണെങ്കിലും ഉല്ഘാടനതിന്റെ ഫലകം സ്ഥാപിച്ചിരുന്നത് വില്ലേജ് ഓഫിസ് പരിസരത്ത് തന്നെയായിരുന്നു. പിന്നീട് ആ ഫലകം വള്ളിയോടുള്ള കുളത്തിന്റെ പമ്പ്‌ ഹൌസില് സ്ഥാപിച്ചു. 86 ലെ ഇരുട്ട് വന്നു തുടങ്ങിയ ഒരു സന്ധ്യാ നേരത്ത് ഒരു മന്ത്രിയുടെ പരിപാടിക്ക് സാക്ഷ്യം വഹിച്ച് മേല്പരമ്പ് പ്രദേശം പിറ്റേന്നാളത്തെ പുലരിക്കു വേണ്ടി ഉറങ്ങി..

Posted By:

Rafi Pallippuram‎

മേല്‍പ്പറമ്പിലെ ഫുട്ബോള്‍ ആരവങ്ങള്‍ അവസാനിക്കുകയാണോ?.

2016-05-30T15:27:00.000+04:00

2016 ലെ എന്‍ എ ട്രോഫി അതിനെ നെഞ്ചിലേറ്റി നടന്നിരുന്ന കായിക പ്രേമികളുടെ മുമ്പിലെത്തിയ രൂപ്പവും ഭാവവും കണ്ടാല്‍ ആരായാലും മൂക്കത്ത് വിരല്‍ വെച്ചുപോകും.എല്ലാവരും മനസിലെങ്കിലും ചോദിച്ചുപോയി "എന്‍ എ ട്രോഫിക്ക് ഇതെന്ത് പറ്റി?''.വെളുത്തവരയ്ക്ക് പുറത്ത് നിന്ന് എന്‍ എ ട്രോഫി കാണാന്‍ തുടങ്ങിയതാണ്‌ എന്റെ തലമുറയിലെ ബാല്യം.പിന്നെയത് കയറുകൊണ്ട് വേര്‍ത്തിരിച്ച് കസേരയിട്ട് കളിക്കാണാന്‍ സൌകര്യമൊരുക്കി.പിന്നെയും ഒരുപടി കടന്ന്‌ പ്രൊഫെഷണല്‍ ഫുട്ബാള്‍ ടൂര്‍ണമെന്റിന്റെ നിലവാരത്തില്‍ ഗാലറിയില്‍ ഇരുന്നു കളിക്കാണാനുള്ള സൌകര്യത്തോടെ എന്‍ എ ട്രോഫി എത്തിയപ്പോള്‍ മേല്‍പ്പറമ്പിലും പരിസര പ്രദേശങ്ങളിലും ഒരു കായിക ഉത്സവത്തിന്റെ പ്രതീതി തന്നെ ഉണ്ടാക്കി.

കാലം പിന്നെയും ചന്ദ്രഗിരി പുഴയിലൂടെ അറബിക്കടലിലേക്ക് ഒഴുകിപ്പോയി . ആണ്ടുനേര്‍ച്ച പോലെ എല്ലാ വര്‍ഷവും കൃത്യസമയത്ത് തന്നെ മേല്‍പ്പറമ്പിന് ചുറ്റുമുള്ള ഫുട്ബാള്‍ പ്രേമികളുടെ സിരകളെ ചൂട് പിടിപ്പിക്കാന്‍ എത്തിയിരുന്ന എന്‍ എ ട്രോഫി പിന്നീട് ഒന്നരാടം എന്ന നിലയിലായി.എങ്കില്ലും നാട്ടുക്കാര്‍ നിരാശരായില്ല.ഇതിനിടയില്‍ എന്‍ എ ട്രോഫിയുടെ അതേ നിലവാരത്തില്‍ മൊയ്തു ട്രോഫിയും എത്തിയതോടെ ആ കുറവ് നികത്തപ്പെട്ടു.പക്ഷെ കഴിഞ്ഞുപ്പോയ എന്‍ എ ട്രോഫിയുടെ പതനം ആരും പ്രതീക്ഷിച്ചതോ ആഗ്രഹിച്ചതോ അല്ല.നാടിനെ ആവേശം കൊള്ളിച്ചിരുന്ന ആരവങ്ങള്‍ നേര്‍ത്ത്‌ ഇല്ലാതാവുന്നതിന്റെ ഒരു അപകട സൂചന അതിലില്ലേ?.

അന്തര്‍ദേശീയ കായിക താരങ്ങളെയും കേരളത്തിന്റെ പുറത്തുള്ള ടീമുകളും വന്ന് കളിച്ച് പഞ്ചനക്ഷത്ര നിലവാരത്തിലേക്ക് ഉയര്‍ത്തപ്പെട്ടിരുന്ന എന്‍ എ ട്രോഫി ജില്ലാ നിലവാരത്തിലേക്ക് ഒതുങ്ങി മൂന്നാംകിട നിലവാരത്തിലേക്ക് കൂപ്പുകുതിയിരിക്കുകയാണ്.എന്‍ എ ട്രോഫിയുടെ സംഘാടകരായ തമ്പിന്റെ പഴയക്കാല പടക്കുതിരകള്‍ അവശരരോ സ്വകാര്യമായ പ്രതിബന്ധങ്ങളലില്‍ സ്വയം കെട്ടിയിട്ടവരുയിരിക്കാം.പത്ത് മുപ്പത് വര്‍ഷങ്ങള്‍ക്ക് മുമ്പ് കലാ കായിക മേഖലകളിലേക്ക് കൈപിടിച്ചു കൊണ്ട് പോയി വിസ്മയലോകം കാണിച്ചുതന്ന ആ യുവതുര്‍ക്കികളെ എന്റെ ബാല്യം ഒരിക്കലും മറക്കില്ല.കലാപ്രതിഭകള്‍ക്ക് തങ്കളുടെ സര്‍ഗ്ഗാത്മകമായ കഴിവുകള്‍ അവതരിപ്പിക്കാനുള്ള വേദികള്‍ നമ്മുടെ നാട്ടില്‍ അന്യം നിന്നിട്ട് കാലമേറെയായി എങ്കിലും ഇരുപ്പതിനാല് വര്ഷം പൂര്‍ത്തീകരിച്ച എന്‍ എ ട്രോഫിയുടെ പെട്ടെന്നുള്ള പതനം ഒരു ദുരന്തവാര്‍ത്ത തന്നെയാണ്.

ചുറ്റിലും ഗാലറി കെട്ടി അന്തര്‍ദേശീയ ടീമുകളും അന്തര്രാഷ്ട്ര കളിക്കാരും

വന്നു കളിക്കുന്ന ഒരു ഫുട്ബോള്‍ ടൂര്‍ണമെന്റ് ഇനി മേല്‍പ്പറമ്പില്‍ ഉണ്ടാകുമോ എന്നറിയില്ല.തമ്പിന്റെ ഈ മനമാറ്റം മേല്‍പ്പറമ്പിന് ചുറ്റുമുള്ള കായിക പ്രേമികള്‍ക്ക് നഷ്ടമാക്കിയിരിക്കുന്നത് ഒരു പ്രൊഫെഷണല്‍ ഫുട്ബോള്‍ ടൂര്‍ണമെന്റ് സ്വന്തം വീട്ടുമുറ്റത്ത് കാണാനുള്ള അവസരമാണ്. മൊയ്തു ട്രോഫി നടത്തി കഴിവ് തെളിയിച്ച ചന്ദ്രഗിരി ക്ലബ്ബും ഇത്തരത്തില്‍ വലിയ അധ്വാനം ആവിശ്യമായി വരുന്ന ഫുട്ബാള്‍ ടൂര്‍ണമെന്റിനോട്‌ ബായ് പറയാനുള്ള തയ്യാറെടുപ്പിലാണ് എന്നാണു അറിയാന്‍ കഴിഞ്ഞത്.മേല്‍പ്പറമ്പിലെ മറ്റൊരു പ്രമുഖ ക്ലബായ ജിംഖാന വലിയ '' റിസ്ക്ക് '' എടുക്കാന്‍ ഇതുവരെ തയ്യാറായിട്ടുമില്ല.

പ്രതീക്ഷകള്‍ അസ്തമിക്കുമ്പോള്‍ മേല്‍പ്പറമ്പിലെ ഫുട്ബോള്‍ ആരവങ്ങളാണ് അവസാനിക്കുന്നത്.അന്യജില്ലാക്കാരോട് മേല്‍പ്പറമ്പ് എന്ന് പറയുമ്പോള്‍ ഫുട്ബോള്‍ ടൂര്‍ണമെന്റ് നടക്കുന്ന ഇടമല്ലേ എന്ന് തിരിച്ചു ചോദിച്ചിരുന്ന ഒരു നല്ലക്കാലം മേല്‍പ്പറമ്പുക്കാര്‍ക്ക് ഉണ്ടായിരുന്നു.ഒരു ഫുട്ബോള്‍ വസന്തക്കാലം ഇലകൊഴിഞ്ഞു തീരാറാകുമ്പോള്‍ മറ്റൊരു വസന്തക്കാലത്തിന് വേണ്ടി മേല്‍പ്പറമ്പുക്കാര്‍ വേഴാമ്പലിനെ പോലെ ഏറെക്കാലം കാത്തിരിക്കേണ്ടി വരുമോ?.ചന്ദ്രഗിരി സ്കൂള്‍ ഗ്രൗണ്ടിലെ ഗാലറികളില്‍ ഇനിയും ആരവങ്ങള്‍ ഉയരുമോ....?

Posted By:
Yachu Pattam

ബാറാഹത്തിന്റെ ദിനത്തിലെ ചക്കര കഞ്ഞി

2016-05-23T09:30:00.000+04:00

ശഹബാൻ 15, കഴിഞ്ഞ ദിവസം ബാറാഹത്ത് ദിനം കടന്നു പോയി.

ബറാഹത് ദിനം വരുമ്പോൾ കുട്ടിക്കാലത്തെ മധുരമുള്ള ഒരു സായാഹ്നത്തിന്റെ ഓർമ്മകളാണ് ജീവിതാനുഭവങ്ങളുടെ മാറാല നീക്കി പുറത്തു വരുന്നത്.

രാവിലെ തന്നെ ഉമ്മ എന്നെ പീടികയിലേക്ക്‌ പറഞ്ഞയച് വൈകുന്നേരം ചക്കര കഞ്ഞിയുണ്ടാക്കാൻ ബെല്ലം വാങ്ങിക്കും.

ബെല്ലം വാങ്ങി വരുമ്പോൾ തന്നെ ചക്കര കഞ്ഞിയുടെ മധുരം നാവിൻ തുമ്പിൽ തത്തി കളിക്കും. അന്ന് ഒരു ഉത്സാഹത്തിന്റെ ദിവസമായിരുന്നു.

ഉച്ചയ്ക്ക് ചോറ് കഴിക്കുമ്പോൾ തന്നെ ഉമ്മ ഞങ്ങളോട് പറയും വൈകുന്നേരം കളിക്കാൻ ഒന്നും പോവണ്ട. കുളിച്ചു അസർ നമസ്കരിച്ച ശേഷം യാസീൻ ഓതണം എന്ന്. മൂന്നു യാസീൻ ഒതാനും അവ എന്തിനൊക്കെ വേണ്ടിയാണെന്നും പറഞ്ഞു തന്നു ദുആ ചെയ്യിപ്പിക്കും. അപ്പോഴേക്കും നല്ല ചൂടുള്ള ചക്കര കഞ്ഞി റെഡി. ചൂടോടോ കഴിച്ച ശേഷം ഒരു പാത്രത്തിലാക്കി പള്ളിയിലേക്ക് പറഞ്ഞയക്കും. പള്ളിയിൽ വലിയ ചെമ്പ്. പല വീടുകളിൽ നിന്നും കൊണ്ട് വരുന്ന ചോറുകൾ അതിലിട്ട് ഒന്നിളക്കിയ ശേഷം ചെമ്പിൽ നിന്നും നമ്മൾ കൊണ്ട് പോയ പാത്രത്തിലേക്ക് വീണ്ടും നിറച്ചു തരും. വീട്ടിലെത്തിയാൽ അതിൽ നിന്നും കുറച്ചു കുറച്ചു എടുത്തു എല്ലാവരും കഴിക്കണം. അത് നേര്ച്ചന്റെ ചോറ് എന്നാണു പറയുന്നത്." ഒരു കോടി പുണ്യം.

ബറാഹത്തിന്റെ തേങ്ങ എന്നും പറഞ്ഞു നമ്മുടെ വീട്ടിലൊക്കെ അന്ന് ആരൊക്കെയോ വരാറുണ്ടായിരുന്നു തേങ്ങ വാങ്ങാൻ.

പിന്നെ പിന്നെ ബറാഹത്തിന് പുതിയ പേരുകൾ വന്നു തുടങ്ങി. "കോടി ബറാഅത്ത്" ജനിച്ച കുട്ടികളുടെ ആദ്യത്തെ ബറാഅത്ത് കോടി ബറാഅത്ത്. അത്‌ സഹിക്കാം ആർക്കും അങ്ങനെ ഉപദ്രമില്ല. വേറൊരു കോടി ബറാഅതുണ്ട്. അതൊരു തരം വിഭവ പെരുമഴ പെയ്ത സൽകാരം. കല്യാണം കഴിഞ്ഞാൽ ആദ്യത്തെ ബറാഅതിന്‌ പെണ് വീട്ടില് പുതിയാപ്പിളക്ക് കൊടുക്കുന്ന സൽകാരം. മുമ്പൊക്കെ അത്‌ നിശ്ചിത വിഭവങ്ങളിൽ മാത്രം ക്ലിപ്തമായിരുന്നു. എന്നാലിപ്പോൾ ഒക്കെ പരിഷ്കരിച്ചു പുതിയ പുതിയ ആചാരങ്ങളും സംബ്ര് തായങ്ങളും ഒക്കെ ആയി മാമുലുകൾ മാറിയിരിക്കുന്നു. പെണ് വീട്ടില് സൽകാരം ഒരുക്കുമ്പോൾ പുതിയാപ്പിളന്റെ വക ഒരു ലോഡ് ഫ്രൂട്ടും പെണ്ണിന് ബറാഅത്ത് വക സ്പെഷ്യൽ ഡ്രസ്സ്‌ എടുത്തു കൊടുക്കണം. ചില സ്ഥലത്ത് പെണ് വീട്ടിലുള്ളവർക്കും ഡ്രസ്സ്‌ എടുത്തു കൊടുക്കണം. വിശാസത്തിന്റെ യാതൊരു വിധ അടിത്തറയില്ലാത്ത ആചാരങ്ങളാണ് ഇവയൊക്കെ.

ഇന്നലെ ബറാഅത്ത് ദിനം കടന്നു പോവുമ്പോൾ കുട്ടിക്കാലത്തെ മധുരമുള്ള ആ ചക്കര കഞ്ഞി വീണ്ടും നാവിൻ തുമ്പിലെത്തി.

Posted By:

Rafi Pallippuram

കെ എസ് ടി പി യുടെ ജല ചൂഷണത്തിനെതിരെ ജനകീയ പ്രതിരോധം തീര്‍ക്കും: ചന്ദ്രഗിരി ക്ലബ്ബ്

2016-03-05T18:12:00.003+04:00

മേല്‍പറമ്പ്: (www.melparamb.com 05/03/2016) കാസര്‍കോട് - കാഞ്ഞങ്ങാട് റോഡ് പണിയുമായി ബന്ധപ്പെട്ട് ചെമ്മനാട് പഞ്ചായത്തിലെ കളനാട് പാലത്തിന് സമീപത്ത് നിന്നും വ്യാപകമായി കെ.എസ്.ടി.പി ജലം എടുത്തുകൊണ്ട് പോകുന്നു. മേ പറമ്പ്, മരവയല്‍, കുളിക്കുണ്ട് വഴിയുള്ള തോടും, കുണ്ട്യങ്ങാനം, കാപ്പങ്ങാനം, അരമങ്ങാനം വഴിയുള്ള തോടും, കളനാട് വയലിന് സമീപത്ത് കൂടി പാറമ്മല്‍ സംഗമിച്ച് നൂമ്പില്‍ പുഴയിലേക്ക് എത്തിച്ചേരുന്ന ജല സ്രോതസ്സാണിത്.

കളനാട് പാലത്തിന് സമീപത്തുള്ള വയലിന്റെ അരികില്‍ കുഴിയെടുത്ത് ദിവസേന ലക്ഷത്തിലധികം ലിറ്റര്‍ വെള്ളമാണ് അവിടെ നിന്നും എടുത്ത് കൊണ്ടുപോകുന്നത്. ഇത് കാരണം മേല്‍പറമ്പിലെ താഴ്ന്ന പ്രദേശങ്ങളായ മരവയല്‍, കട്ടക്കാല്‍, കളനാട്, ചാത്തങ്കൈ, മാണി, അരമങ്ങാനം എന്നീ മേഖലകളില്‍ ഇപ്പോള്‍ തന്നെ കുടിവെള്ള ക്ഷാമം രൂക്ഷമായിരിക്കുകയാണ്. കൂടാതെ ഇവിടങ്ങളില്‍ കൃഷി ആവശ്യത്തിനും ജലം ഉപയോഗിച്ചിരുന്നതും ഈ തോടില്‍ നിന്നാണ്.

എന്നാല്‍ കെ എസ് ടി പി റോഡ് പണിയുടെ പേരില്‍ ജലം വ്യാപകമായി കടത്തിക്കൊണ്ട് പോകുന്നതിനാല്‍ ഇതിലൂടെയുള്ള ജലത്തിന്റെ ഒഴുക്കും നിലച്ചിരിക്കുകയാണ്. ഈ പ്രദേശം മറ്റൊരു പ്ലാച്ചിമട ആവാതിരിക്കാന്‍ വേണ്ടി ചന്ദ്രഗിരി ക്ലബ്ബിന്റെ നേതൃത്വത്തില്‍ മാര്‍ച്ച് ആറിന് രാവിലെ 10 മണിക്ക് കളനാട് പാലത്തിന് സമീപം ജനകീയ പ്രതിരോധം തീര്‍ക്കാന്‍ ക്ലബ്ബ് എക്‌സിക്യൂട്ടീവ് യോഗം തീരുമാനിച്ചു. പരിപാടിയില്‍ സാമൂഹിക - സാംസ്‌കാരിക രംഗത്തെ പ്രമുഖര്‍ പങ്കെടുക്കും.

ക്ലബ്ബ് പ്രസിഡണ്ട് അബ്ദുല്‍ ഖാദര്‍ ചട്ടഞ്ചാലിന്റെ അധ്യക്ഷതയില്‍ ചേര്‍ന്ന യോഗത്തില്‍ ഫസല്‍ റഹ് മാന്‍ എ.എച്ച്, നാസിര്‍ ഡീഗോ, നിയാസ് എം.എ, മുഹമ്മദ് റഫീഖ് കൂവത്തൊട്ടി, മുഹമ്മദ് കോളിയടുക്കം, അഫ്‌സല്‍ സീസ്‌ളു, ഷാഫി പി.എ തുടങ്ങിയവര്‍ സംസാരിച്ചു. അശോകന്‍ പി.കെ സ്വാഗതവും, മുഹമ്മദ് ഷാ ബി.കെ നന്ദിയും പറഞ്ഞു.

Keywords: Melparamba, Club, Road, Development Project, Water, Kalanad, KSTP, Chandragiri Club.

മേൽപറമ്പ് പ്രവാസി ലീഗ് ഫുട്ബോൾ ടൂർണമെന്റ് (MPL 5)

2016-02-28T16:01:00.001+04:00

ദുബൈ: കാസറഗോഡ് ജില്ലയിൽ ഫുട്ബോൾ കളികൾക്ക് പേര് കേട്ട സ്ഥലമാണ് മേൽപറമ്പ്. സംസ്ഥാനത്ത് അറിയപ്പെട്ട ഫുട്ബോൾ ടൂർണമെന്റുകൾ മേൽപറമ്പിൽ വർഷങ്ങളായി നടന്നു വരുന്നുണ്ട്. നാട്ടിലെ കളി കളത്തിൽ കാൽ പന്ത് കളിയുടെ സകല അടവുകളും പയറ്റിയ യു. എ. ഇ യിലുള്ള മേൽപറമ്പുകാർക്ക് കഴിഞ്ഞ അഞ്ചു വർഷങ്ങളായി MPL എന്നുള്ളത് ആവേശമാണ്. ഇങ്ങ് ദുബായിൽ MPL അരങ്ങേറുമ്പോൾ പ്രവാസികളായ നാട്ടുകാർക്ക് ഒത്തു കൂടാനും പഴയ സൌഹൃദം പങ്കു വെക്കാനും ഒപ്പം ഫുട്ബോൾ കളിക്കാനും ആസ്വദിക്കാനുമുളള അവസരം. അതാണ്‌ MPL ജന പ്രിയമാകുന്നത്. കഴിഞ്ഞ അഞ്ചു വർഷങ്ങളായി തുടർച്ചയായി MPL എന്ന പേരിൽ മേൽപറമ്പ് പ്രവാസി ലീഗ് ഫുട്ബോൾ ടൂർണമെന്റ് നടന്നു വരുന്നുണ്ട്. മേൽപറമ്പിലും ചുറ്റുവട്ടത്തുമുള്ള കളിക്കാർ മാത്രമേ മത്സരങ്ങളിൽ പങ്കെടുക്കാറുള്ളൂ. IPL മാതൃകയിൽ ലേലം വഴിയാണ് ടീമുകൾ കളിക്കാരെ സ്വന്തമാക്കുന്നത്. മിക്ക ടീമുകളും നാട്ടിൽ നിന്നുള്ള മികച്ച താരങ്ങളെ ടൂർണമെന്റിൽ കളിക്കാൻ മാത്രമായി സന്ദർശന വിസയിൽ കൊണ്ട് വന്നിരുന്നു.

കാസറഗോഡ് ജില്ലയിലെ മേൽപറമ്പ് നിവാസികളുടെ ഓണ്‍ലൈൻ കൂട്ടായ്മയായ എറൌണ്ട് മേൽപറമ്പിന്റെ ആഭിമുഖ്യത്തിൽ അഞ്ചാമത് മേൽപറമ്പ് പ്രവാസി ലീഗ് (എം. പീ. എൽ-5) ബ്രിട്ട് കാർട്ട് ട്രോഫിക്ക് വേണ്ടിയുള്ള ഫുട്ബോൾ ടൂർണമെന്റ് ദുബൈ കിസീസ് എമ്പറർ സ്റ്റേഡിയത്തിൽ വെച്ച് വർണ ശബളമായ ചടങ്ങുകളോടെ നടന്നു.

ഓണ്‍ലൈൻ ലേലം വഴി കളിക്കാരെ തിരഞ്ഞെടുക്കുന്ന നൂതന പ്രക്രിയയിലൂടെ യഥാക്രമം ഫ്രണ്ട് മേൽപറമ്പ്, ഫൈറ്റെർസ് കട്ടക്കാൽ, ചോയ്സ് കുന്നിൽ, അപ്സര അവഞ്ചെർസ് ഒറവങ്കര, ഫാസ്ക് പള്ളിപ്പുറം, വാരിയെർസ് ചെമ്പരിക്ക, ബ്ലാസ്റ്റെർസ് ദേളി, സ്റ്റീൽ ഹാക്സ് കായിന്റടി, എഫ്. സീ. മാക്കോട്, വളപ്പിൽ ബുൾസ്, യുനൈറ്റട് ഫ്രണ്ട് നയാ ബസാർ, മിൽ ജംക്ഷൻ എഫ്. സീ, തുടങ്ങിയ പന്ത്രണ്ട് ടീമുകൾ ആവേശകരമായ കളിയിൽ മാറ്റുരച്ചു. അത്യന്തം വാശിയേറിയ ഫൈനൽ മത്സരത്തിൽ സ്റ്റീൽ ഹാക്സ് കായിന്റടിയെ പരാചയപ്പെടുത്തി വളപ്പിൽ ബുൾസ് എം. പീ. എൽ -5 ബ്രിട്ട് കാർട്ട് ട്രോഫി സ്വന്തമാക്കി.

വിജയികൾക് ബ്രിട്ടീഷ്‌ ഗ്രൂപ്പ് ചെയർമാൻ അഷ്‌റഫ്‌ ബ്രിട്ടീഷ്‌, മുഹമ്മദ്‌ കുഞ്ഞി കാദിരി, എം. എ. മുഹമ്മദ്‌ കുഞ്ഞി, ഖാലിദ് എ. ആർ, ഹനീഫ ടീ. ആർ, ഹനീഫ മരവയൽ, നഫീർ അബ്ദുൽ നാസ്സർ, അഷ്‌റഫ്‌ വളപ്പിൽ, ഇർഷാദ് ഇബ്രാഹിം, ഫൈസൽ ഉലൂജി, ഹകീം ഒറവങ്കര, നൂർഷ ദേളി, ഷുഹൈബ് കല്ലട്ര, അഹമദ് മരവയൽ, നിസാർ കൈനോത്ത്, മുഹമ്മദ്‌ കീഴൂർ, മലബാർ ഗോൾഡ്‌ പ്രതിനിധികളായ റഹീം, അൻവർ സീ. എൽ തുടങ്ങിയവർ ക്യാഷ് അവാർഡുകളും ട്രോഫികളും വിതരണം ചെയ്തു.

യാസ്സർ കുന്നിൽ, അബ്ദുൽ അസീസ്‌ സീ. ബീ, ഹാരിസ് കല്ലട്ര തുടങ്ങിയവർ പരിപാടികൾക്ക് നേത്രത്വം നൽകി.

Posted By:

Rafi Pallippuram

ഫാസ്ക് കടവത്ത് ഇരുപത്തിയഞ്ചാം വാര്ഷികം

2016-02-24T13:58:00.000+04:00

ഫോർട്ട്‌ നൈബേർസ് ആർട്സ് സ്പോർട്സ് ക്ലബ്‌ കടവത്ത് ക്ലബ്‌ (FASC) 25 )ò വാർഷികത്തോടെ അനുബന്ധിച് നടത്തിയ ചാരിറ്റി യുടെ ഭാഗംമായുള്ള ഫണ്ട്‌

ജി സി സി ഭാരവാഹികളായ രിഫായി ഖത്തെർ,അർഷു സൗദിയ എന്നിവർ യു എ ഇ പ്രതിനിധി നവാസ് ചളയഗോഡ് നെ ഏല്പിക്കുന്നു .

ക്ലബ്‌ പ്രസിഡന്റ്‌ അൻവർ മാളിക അദ്യക്ഷത വഹിച്ചു .ഷാനി തായത്ത് വരവ് ചിലവ്കൾ അവതരിപിച്ചു .സർഫറാസ് സി കെ

കബീർ ,അമീർ ,നിയാസ്.സിറാജ് ,ഫയാസ്‌, ,ഖലീൽ,ഗൾഫ്‌ പ്രതിനിധികളായ ഹർഷദ്‌,സിയാബ് ,നവാസ് ,അർഷു ,രിഫായി എന്നിവർ സംസാരിച്ചു .സെകെട്രി ഷഹദാഫ് സ്വാഗതവും ഇജാസ്‌ തായത്ത് നന്ദി യും പറഞ്ഞു .

"നമ്മുടെ അക്കുസേട്ടൻ"

2016-02-07T15:26:00.006+04:00

കാസറഗോഡ് നഗരത്തിന്റെ തെരുവുകളിൽ ഒന്നര പതിറ്റാണ്ടിലതികം നരഗ ജീവിതം നയിച്ച മുത്തുവിന് പുതു ജീവിതം. തമിഴ് ദമ്പതികൾ മനോ നില തെറ്റിയ മകനെ കാസറഗോഡ് നഗരത്തിൽ ഉപേക്ഷിച്ചു കടന്നു കളഞ്ഞതാണെന്നു പറയപ്പെടുന്നു. വളരെ അഴുക്കു പുരണ്ട ശരീരത്തിൽ അതിനേക്കാളും അഴുകിയ വസ്ത്രങ്ങൾ ധരിച്ചു ജഡ കെട്ടിയ നീണ്ട തല മുടിയും, താടിയും വളർത്തി ആരോടും ഒന്നും ഉരിയാടാതെ മുത്തു പതുക്കെ നടന്നു നീങ്ങും. നെല്ലിക്കുന്ന് റോഡ്‌, KSRTC പരിസരം, റെയിൽവേ സ്റ്റെഷൻ എന്നിവിടങ്ങളിലായിരുന്നു മുത്തുവിന്റെ താവളം. ആരോടും കൈ നീട്ടാത്ത മുത്തു ആരെങ്കിലും വല്ല നാണയ തുട്ടുകൾ നൽകിയാൽ ഭക്ഷണം വാങ്ങി മുത്തുവും തെരുവ് നായ്ക്കളും കഴിക്കും. അവസാനം പുലിക്കുന്ന് ചിന്മയ റോഡിൽ തെരുവ് നായ്കളൊടൊപ്പം ഉണ്ടും ഉറങ്ങിയും മുത്തു ജീവിതം തള്ളി നീക്കുമ്പോൾ "സെക്കുലർ സാംസ്കാരിക വേദി" പ്രവർത്തകരായ അശോകാൻ പീ. കെ, റഫീക്ക് മണിയങ്കാനം എന്നിവരുടെ നേതൃത്വത്തിൽ മുത്തുവിനെ തെരുവിൽ നിന്നും രക്ഷിക്കുന്നത്.

പുത്തൻ വസ്ത്രം ധരിപ്പിച്ചും, നീട്ടി വളർത്തിയ താടി മുടികൾ വെട്ടിച്ചു വയറു നിറയെ ഭക്ഷണം നൽകി പള്ളികരയിൽ ചാകോച്ചനും കുടുംബവും നടത്തുന്ന മലബാർ പുനരധിവാസ കേന്ദ്രത്തിലേക്ക് മുത്തുവിനെ മാറ്റിയപ്പോൾ മുത്തുവിന് സത്യത്തിൽ ഒരു രണ്ടാം ജന്മമായിരുന്നു.

ഒന്നര പതിറ്റാണ്ടിലതികം നഗര മദ്ധ്യത്തിൽ ദിനേന ആയിര കണക്കിന് ജനങ്ങളുടെ കാഴ്ചയിലൂടെ മുത്തു എന്ന കഥാപാത്രം ഒരു നിസ്സാര ജീവിയായി കടന്നു പോവുമ്പോൾ, അതീവ ഗൌരവത്തൊടെ മനുഷ്യത്വത്തിന്റെ വില നൽകി മുത്തുവിന് ഒരു പുതു ജീവിതം നൽകാൻ മുൻ കയ്യെടുത്തത് അശോകനും സെക്കുലർ വേദി പ്രവർത്തകരും. മനുഷ്യ സ്നേഹികളായ നിങ്ങൾക്ക് ഒരു "ബിഗ്‌ സല്യൂട്ട്

അതാണ്‌ മനുഷ്യ സ്നേഹിയായ നമ്മുടെ അക്കുസേട്ടൻ.

അശോകൻ പീ. കെ. ഒരു സഖാവാണ്, സാമുഹിക, സാംസ്കാരിക, കലാ, കായിക പ്രവർത്തകനാണ്. വെറും ഒരു ഇടതു പക്ഷ പ്രവർത്തകൻ എന്ന് മാത്രം പറഞ്ഞാൽ പോര. കമ്മ്യുണിസത്തിന്റെ യഥാർത്ഥ രാഷ്ട്രീയ ആദർശം പഠിച്ചു ജീവിതത്തിൽ ഉൾക്കൊണ്ട്‌ പ്രവർത്തിക്കുന്ന സഖാവ്. ഒരു സഖാവായിരിക്കുമ്പോൾ തന്നെ അദേഹം പുലർത്തുന്ന മാനുഷിക ബന്ധം മത രാഷ്ട്രീയ മതിൽ കെട്ട് ഒന്നുമില്ലാത്ത വിശാല മനസ്സോടെയാണ്. മേൽപറമ്പിന്റെ സാമുഹിക സാംസ്കാരിക വിഷയത്തിൽ അശോകൻ കാണിക്കുന്ന താല്പര്യവും ആത്മാർത്ഥതയും തന്നെയാണ് അശോകനെ വേറിട്ട വ്യക്തിത്വത്തിന് ഉടമയാക്കുന്നത്. " അതാണ്‌ സഖാവ് പീ. കെ. അശോകൻ"

പേര് പീ. കെ. അശോകൻ, 1988 ൽ ചന്ദ്രഗിരി സ്കൂളിൽ നിന്നും പഠനം പൂര്ത്തിയാക്കി. സ്കൂൾ പഠന കാലത്തും പഠനത്തിനു ശേഷവും ഫുട് ബോൾ രംഗത്ത്‌ സജീവമാവുകയും ശ്രദ്ധേയമായ തന്റെ കായിക മികവിലൂടെ തന്റെ ടീമുകൾക് തിളക്കമാർന്ന വിജയം നേടാൻ സാധിച്ചിട്ടുണ്ട്. 1987 ൽ സ്കൂൾ ടീമിന് വേണ്ടി ത്രികരിപ്പൂരിൽ നടന്ന സുബ്രതോ ട്രോഫിക്ക് വേണ്ടി ഗോൾ വലയം തന്റെ അപാരമായ കഴിവിലൂടെ കാത്തു സൂക്ഷിച്ചു വിജയം നേടാൻ സാധിച്ചിട്ടുണ്ട്. അന്ന് ജേതാക്കൾക്കുള്ള പ്രൈസ് മണി പതിനായിരം രൂപയായിരുന്നു.

സ്കൂൾ ടീമിൽ പ്രകടിപ്പിച്ച മികവ് കണ്ണൂർ കാസറഗോഡ് ജില്ലാ സ്കൂൾ ടീമുകൾ ഉൾപെട്ട കണ്ണൂർ സോണൽ ടീമിൽ കളിക്കാൻ അവസരം ലഭിചിരിന്നു. കണ്ണൂർ മുന്സിപൽ സ്റ്റെടിയത്തിൽ നടന്ന വാശിയേറിയ മത്സരങ്ങളിൽ ക്വാർട്ടർ വരെ കളിക്കാൻ സാധിച്ചിരുന്നു. ക്വാർട്ടറിൽ എതിരാളി ശക്തരായ കോഴിക്കോട് സോണൽ ടീമായിരുന്നു.

സ്കൂൾ പഠനത്തിനു ശേഷം ഫുട് ബോൾ രംഗത്ത് അശോകാൻ സജീവമായിരുന്നു. എം. എസ്. സീ മേൽപറമ്പ്, തമ്പ്, ജിംഖാന, ചന്ദ്രഗിരി, നാഷണൽ കാസറഗോഡ് തുടങ്ങി ജില്ലയിലെ പല പ്രമുഖ ടീമുകൾക്ക് വേണ്ടി എൻ. എ ട്രോഫി, ഉത്തരദേശം ട്രോഫി, ബേകൽ ടൂർണമെന്റ്, കാലിക്കടവ് ടൂർണമെന്റ് തുടങ്ങി ഒട്ടനവധി ടൂർണമെന്റുകളിൽ പല ടീമുകൾക്കായി അശോകാൻ ഗോൾ വലയം കാത്തിറ്റുണ്ട്.

ഉത്തര കേരളത്തിൽ തന്നെ അതി പ്രശസ്തമായ ചന്ദ്രഗിരി ക്ലബീന്റെ സ്ഥാപക അംഗമായ അശോകൻ സംഘടനയുടെ രണ്ടാമത്തെ ജനറൽ സെക്രടറിയായി തുടർച്ചയായി പതിമൂന്നു വർഷം പ്രവർത്തിച്ചിരുന്നു. ചന്ദ്രഗിരിയുടെ വളർച്ചയിൽ അശോകനും മുഖ്യ പങ്കു വഹിച്ചു. പിന്നീട് വ്യതസ്ത കാലയളവിലായി ക്ലബീന്റെ ഭാരവാഹിത്വം വഹിച്ചിട്ടുണ്ട്‌. ജില്ലയിൽ ഫുട് ബോൾ ടൂർണമെന്റ് ചരിത്രത്തിൽ പുതിയ അദ്ധ്യായം കുറിച്ച "മൊയ്ദു ട്രോഫി" ടൂർണമെന്റ് 2012 ൽ ചന്ദ്രഗിരി ക്ലബ്ബ് തുടക്കം കുറിച്ചപ്പോൾ സംഘാടക സമിതിയുടെ ജനറൽ കൺവീനറായി മേളയ്ക് നേത്രത്വം വഹിച്ചിരുന്നത് അശോകനായിരുന്നു. അതാണ്‌ അശോകന്റെ സംഘാടക മികവ്.

കമ്മ്യുണിസ്റ്റ് ആശയം ഉൾക്കൊണ്ട്‌ രാഷ്ട്രീയ പ്രവർത്തനം നടത്തിയിരുന്ന അശോകൻ DYFI ഉദുമ ബ്ലോക്ക്‌ കമ്മിറ്റി അംഗം, ആറ് വർഷം കളനാട് മേഖല സെക്രടറി, CPM ചെമനാട് ലോക്കൽ കമ്മിറ്റി അംഗം തുടങ്ങി പാർട്ടിയുടെ നിർണായകമായ നിർവാഹക സമിതിയിൽ ഒക്കെ അംഗമായി സജീവമായി പ്രവർത്തിച്ചിരുന്നു.

ഇപ്പോൾ രാഷ്ട്രീയ രംഗത്ത് അത്ര സജീവമല്ല. നിലവിൽ പാർട്ടിയുടെ പ്രാഥമിക അംഗത്വം മാത്രം.

രാഷ്ട്രീയ രംഗത്ത് സജീവമായി പ്രവർത്തിക്കുമ്പോൾ തന്നെ കാസറഗോഡ് ജില്ലയിൽ തന്നെ അറിയപ്പെടുന്ന സാമുഹിക പ്രവർത്തകനായി അശോകൻ ഒരു നിറ സാനിധ്യമാവുമ്പോൾ തന്റെ പ്രസ്ഥാന സുഹൃത്തുകളേക്കാൾ മറ്റു രാഷ്ട്രീയ പ്രസ്ഥാനത്തിൽ പ്രവർത്തിക്കുന്ന ധാരാളം സുഹ്രത്തുക്കളെ നേടാൻ സാധിച്ചു. ആ വലിയൊരു സുഹ്രത് വലയം ജാതി, മത, രാഷ്ട്രീയ ഭേദമില്ലാതെ ഇന്നും തുടരുന്നു എന്നുള്ളത് തന്നെ അശോകനെ മറ്റുള്ളവരിൽ നിന്നും വ്യത്യസ്തനാക്കുന്നു.

കാസറഗോഡ് സൗഹൃദ വേദിയുടെ ബാനറിൽ മേൽപറമ്പിലും കാസറഗോഡും 2011 ൽ നടത്തിയ മത സൗഹാർദ സമ്മേളനവും ഡിബേറ്റും പരക്കെ പ്രശംസ പിടിച്ചു പറ്റിയ പരിപാടികളായിരുന്നു. ആ പരിപാടികൾക്ക് നേത്രത്വം നൽകിയിരുന്നത് മേൽപറമ്പ് പള്ളി ഇമാം ബഹുമാനപ്പെട്ട ഇ. പീ അബ്ദുൽ റഹ്മാൻ ബാഖവിയും അശോകനും ഒക്കെ ചേർന്നായിരുന്നു.

''രക്ത ദാനം, ജീവ ദാനം,

നേതൃ ദാനം, മഹാ ദാനം"

ഈ വാക്യം തന്റെ ഇരു ചക്ര വാഹനത്തിന്റെ നെറ്റിയിലും അശോകന്റെ ഹോട്ടലിന്റെ ചുമരിലും ലോകത്തിന് വലിയൊരു സന്ദേശമായി കുറിചിട്ടിരിക്കുന്നു. വെറും വര മൊഴിയിൽ മാത്രമുള്ള സന്ദേശമല്ല ഇത്. സഹ ജീവി സ്നേഹം സമൂഹത്തിനു മുമ്പിൽ കാണിച്ചു കൊടുത്തു അത്യാസന്ന നിലയിൽ ജീവന് വേണ്ടി മല്ലടിച്ചിരുന്ന രോഗികൾക്ക് 26 പ്രാവശ്യം അശോകൻ രക്തം നൽകിയിട്ടുണ്ട്. ഗർഭ പാത്രത്തിലെ മുഴ നീക്കം ചെയ്യുന്നതിന് വേണ്ടി ശാസ്ത്ര ക്രിയ ചെയ്ത ഒരു ഉമ്മയ്ക് രക്തം അത്യാവശ്യമായി വന്നപ്പോൾ അശോകൻ ആദ്യമായി രക്തം നൽകി. പിന്നീട് പലപ്പോഴായി പലർക്കും രക്തം നൽകിയപ്പോൾ അശോകൻ ഒരിക്കലും അവരുടെ ജാതിയോ, മതമോ, രാഷ്ട്രീയമോ നോക്കിയിരുന്നില്ല. സഹ ജീവി സ്നേഹം കൊണ്ട് നടക്കുന്ന അശോകാൻ ഇപ്പോഴും മനുഷ്യത്വത്തിന് മാത്രം വില നൽകി.

തിരുവനന്തപുരം ആസ്ഥാനമായുള്ള കേരള യൂത്ത് വെൽഫയർ ബോർഡ് 2007 ൽ നടത്തിയ യൂത്ത് വിഷൻ ലീഡർഷിപ്‌ ക്യാമ്പിൽ ജില്ലയെ പ്രധിനിധീകരിച്ചു പങ്കെടുത്തിരുന്നു.

ദേശീയ ക്ഷയരോഗ നിയന്ത്രണ പരിപാടിയുടെ ഭാഗമായി ജില്ലയിൽ നടക്കുന്ന യോഗങ്ങളിലും സർക്കാർ, സർകാരെതര പരിപാടികളിൽ അശോകാൻ സജീവമായി തന്നെ ഇടപെടാറുണ്ട്. നിലവിൽ ജില്ലാ ടീ ബീ ഫോറം അംഗം കൂടിയാണ് അശോകൻ.

ഏറ്റവും കൂടുതൽ രക്തം നൽകിയതിന് 2013 ൽ കാസറഗോഡ് ഹെൽത്ത്‌ ലൈൻ "രക്ത ധാന" പുരസ്കാരം നൽകി അശോകനെ ആദരിച്ചിരുന്നു.

ചന്ദ്രഗിരി ഗൾഫ്‌ കമ്മിറ്റി ഏർപ്പെടുത്തിയ മികച്ച പൊതു പ്രവർത്തകനുള്ള അവാർഡ് അശോകന് ലഭിച്ചിരുന്നു.

അരമങ്ങാനം യൂത്ത് ബ്രതെർസ് യു. എ. ഇ കമ്മിറ്റി മികച്ച പൊതു പ്രവർത്തകനായി അശോകനെ തിരഞ്ഞെടുത്തു അവാർഡ് നൽകി ആദരിച്ചിരുന്നു.

അശോകൻ ഇക്കഴിഞ്ഞ ഏപ്രിൽ മാസത്തിൽ രജനിയുടെ കഴുത്തിൽ താലി ചാർത്തി. തന്റെ ജീവിതത്തിലെ പ്രധാന ഒരു ചടങ്ങ് എല്ലാവർക്കും മാതൃകയായി പരവനടുക്കം വൃദ്ധ സദനത്തിൽ സ്വന്തക്കാർ ഉപേക്ഷിച്ച മാതാ പിതാക്കൾക്ക് മുമ്പിൽ വളരെ ലളിതമായി നടത്തി നവ മാധ്യമങ്ങളിലും പത്ര, ദൃശ്യ മാധ്യമങ്ങളിൽ നിറഞ്ഞു നിന്നു. ഗൾഫിലെ റേഡിയോവിലും അശോകന്റെ വിവാഹ വാർത്തയെ കുറിച്ച് ഫീച്ചർ പ്രക്ഷേപണം ചെയ്തിരുന്നു.

അതാണ്‌ അശോകന്റെ ലളിത ജീവിതം.

2003 ൽ ലോക സഭാ സ്പീക്കർ ആയിരുന്ന സോമനാഥ് ചാറ്റർജി അശോകന് പുതുവര്ഷ ആശംസ സന്ദേശം സ്വന്തം ഒപ്പോടു കൂടി ഗ്രീറ്റിങ്ങ്സ് കാർഡ് അയച്ചിരുന്നു.

അമ്മാവൻ രാമേട്ടന്റെ വിയോഗത്തിന് ശേഷം അശോകനും സഹോദരൻ ചന്ദ്രനും ചേർന്ന് പതിറ്റാണ്ടുകളുടെ ചരിത്രമുള്ള ടീ. കെ റെസ്റ്റൊറന്റ് ഏറ്റെടുത്തു നടത്തി വരുന്നു.

അശോകന് ജീവിതത്തിൽ ആയുർ ആരോഗ്യം നേരുന്നതോടൊപ്പം സാമുഹിക സാംസ്കാരിക ജീവ കാരുണ്യ രംഗത്ത് കൂടുതൽ പ്രവർത്തിക്കാനും സൗഹാർദം നില നിൽകുന്ന മേൽപറമ്പിൽ മത മൈത്രിയുടെ ഒരു പ്രതീകമായി നില കൊള്ളാൻ ആവട്ടെ എന്ന് ആശംസിക്കുന്നു.

ആശംസകൾ.

Posted By:

Rafi Pallippuram‎

നോമ്പ് കാലത്തെ ക്രിക്കറ്റ്...!! ( Photo By Maji Melparamba )

2016-01-10T11:45:00.002+04:00

നോമ്പ് കാലത്തെ ക്രിക്കറ്റ്.. !! @മേൽപറമ്പ്

Photo By: Maji Melparamba

ജമീല അദ്ദിൻച - മേൽപറമ്പിന്റെ വളർച്ചയുടെ ദൃസാക്ഷി

2016-01-02T16:46:00.001+04:00

അര നൂറ്റാണ്ടിലതികം മേൽപറമ്പിന്റെ ഹൃദയ ഭാഗത്ത്‌ കച്ചവടം നടത്തി ഏവര്ക്കും പ്രിയങ്കരനായിരുന്ന ജമീല അദ്ദിൻച, ചെര്കാരൻ അദ്ദിൻച എന്ന പേരിലൊക്കെ അറിയപ്പെട്ടിരുന്ന പരേതരായ മൊയ്ദീൻ കുട്ടി ഫാത്തിമ എന്നവരുടെ മകൻ അബ്ദുള്ള കുഞ്ഞി മേൽപറമ്പ് 2015 ഒക്ടോബർ 5 ന് ഈ ലോകത്തോട്‌ വിട പറഞ്ഞു.

കുന്നിലെ അങ്ങാടിയിലെ ആദ്യ കാലത്തെ കച്ചവടക്കാരിൽ ഇനി അധികമാരും ജീവിച്ചിരിപ്പില്ല. അര നൂറ്റാണ്ടിലതിമായി മേൽപറമ്പിന്റെ ഓരോ ദിവസത്തെയും ഹൃദയ സ്പന്ദനം തൊട്ടറിഞ്ഞ വ്യക്തി കൂടിയായിരുന്നു അദേഹം. മേൽപറമ്പിന്റെ വളർച്ചയുടെ ഓരോ പടവുകളും നേരിൽ കണ്ടു സാക്ഷ്യപ്പെടുത്തിയ അദ്ദിൻചയുടെ വേർപാടിലൂടെ നാടിന്റെ ഒരു ചരിത്ര പുസ്തകമാണ് നമുക്ക് നഷ്ട്ടമായത്.

ചെറിയ പ്രായത്തിൽ   തന്നെ   അദ്ദിൻച സിലോണിൽ   പോയിരുന്നു.    പിന്നീട്   ചന്ദ്രഗിരി സ്കൂൾ   റോഡിൽ   ഇ. ബീ അന്ത്കാർചയുടെ   കെട്ടിടത്തിൽ   ജമീല ക്ലോത്   സ്റ്റോർ എന്ന പേരിൽ   ഒരു തുണി കട തുടങ്ങി.    അതോടെ പഴയ കാലതുള്ളവർ   അദേഹത്തെ   ചെര്കാരൻ അദ്ദിൻച   എന്നും    പിൻ   തലമുറ   ജമീല അദ്ദിൻച   എന്നും വിളിച്ചു തുടങ്ങി.    അമ്പതു വർഷത്തിൽ അധികം   അദേഹം   മേൽപറമ്പിൽ   തുണി കച്ചവടം നടത്തി.    ആദ്യ കാലത്ത്   എല്ലാ വിധ തുണി തരങ്ങളും      റ്റൈലറിംഗ്   മെറ്റീരിയലുകലും, പിന്നെ മയ്യത്തിനു ആവശ്യമായ സാധനങ്ങളും    വിറ്റിരുന്നു.    അക്കാലത്ത് കാസറഗോഡ്   തുണി കച്ചവടത്തിന്റെ കുത്തകരായിരുന്ന മുബാറക്, കണ്ണന്സ്   എന്നിവിടങ്ങളിൽ നിന്നായിരുന്നു   കൂടുതലും വിൽപന   സാധനങ്ങൾ   വാങ്ങിയിരുന്നത്.   മുബാറക് ഹാജി,   കണ്ണൻ തുടങ്ങിയവരുമായി   ഇടപാടുകാർ എന്നതിൽ   കവിഞ്ഞു   നല്ല സ്നേഹ, സൗഹാർധ   ബന്ധവും   അദേഹം നിലനിർതിയിരുന്നു.

മേൽപറമ്പ് വാണിജ്യ രംഗത്ത്   മുന്നേറി കൊണ്ടിരുന്നപ്പോൾ   ആധുനിക വിപണന തന്ത്രങ്ങൾ മെനയാതെ   ഇതൊരു കച്ചവടം എന്നതിനേക്കാൾ   കൂടുതൽ   ഒരു സേവനം   എന്നു കണക്കാകി അദേഹം സ്ഥാപനം   നില നിർത്തി.       മേൽപറമ്പിലെയും പരിസര പ്രദേശങ്ങളിലെയും എല്ലാവരും   മയ്യത്ത് പരിപാലത്തിനു   ആവശ്യമായ തുണികളും   മറ്റും വാങ്ങിയിരുന്നത്   അദ്ദിൻചാന്റെ   കടയിൽ നിന്നായിരുന്നു.    മയ്യത്തിനു ആവശ്യമായ   സാധനങ്ങൾ ഏത് പാതി രാത്രിയിൽ വന്നു ആവശ്യപ്പെട്ടാലും   അദേഹം ഒരു മുഷിപ്പും കാട്ടാതെ കട തുറന്നു   കൊടുക്കുമായിരുന്നു.    അത് വലിയൊരു സേവനമായി   അദേഹം കണ്ടിരുന്നു.

സ്കൂൾ റോഡിലുള്ള   ജമീല ക്ലോത് സ്റ്റോർ, ഇ ബീ. അന്ത്കാർചയുടെ കട, കോട്ടയിൽ അദ്ദിൻചാന്റെ   കട, മുന് വശത്തുള്ള   കോട്ടയിൽ മമ്മര്ഞ്ഞിചാന്റെ   ചായ കട   തുടങ്ങി കുറച്ചു   കടകൾ   ഉൾപെട്ട   ആ മുക്കിൽ    പഴയ കാലത്തെ   വലിയൊരു   സൗഹാർധ വലയങ്ങൾ   തമ്പടിച്ചിരുന്ന   സ്ഥലമായിരുന്നു.    ബഹുമാനപ്പെട്ട   നമ്മുടെ ഖത്തീബ് ഉസ്താദ് അടക്കം അവിടെ   സ്ഥിരമായി   ഇരിക്കാറുണ്ടായിരുന്നു.

പ്രഭാത   പത്രത്തിലെ   പ്രധാന വാർത്തകൾ    ഖതീബ്ച്ച   അടക്കമുള്ളവർക്ക്   ജമീല അദ്ദിൻച   ഉറക്കെ   വായിച്ചു   കൊടുക്കാറുള്ളത്   രാവിലത്തെ   സ്ഥിരം കാഴ്ചയായിരുന്നു.

എന്നും രാവിലെ തന്നെ കട തുറന്നു പീടികയും പരിസരവും അദേഹം സ്വയം അടിച്ചു വൃത്തിയാക്കുമായിരുന്നു.

ഏകദേശം പത്തു വർഷങ്ങൾക്ക് മുമ്പ് താൻ വർഷങ്ങളോളം കച്ചവടം ചെയ്ത പീടിക കെട്ടിടം പൊളിക്കുമ്പോൾ സ്കൂളിനു മുമ്പിലുള്ള കെട്ടിടത്തിലേക്ക് തന്റെ കച്ചവടം പറിച്ചു നട്ടു.
മുകളിൽ പറഞ്ഞത് പോലെ അപ്പോഴും കട ആധുനികമായി ഒന്നും നവീകരിക്കാതെ പഴയത് പോലെ തന്നെ നില നിർത്തി. ഒരു കച്ചവടം എന്നതിനേക്കാൾ സേവനം കണക്കാകി എന്നും കട തുറന്നു. ശാരീരികമായി വയ്യാതെ ഇടയ്ക് രണ്ടു മാസത്തോളം അദേഹം കച്ചവടം നിർത്തിയിരുന്നു. വെറുതെ വീട്ടിലിരിക്കുമ്പോൾ ഉള്ള മുഷിപ്പ് കാരണം വീണ്ടും കട തുറയ്ക്കാൻ ആരംഭിച്ചു.

അര നൂറ്റാണ്ടിലതിമായി പ്രഭാതം മുതൽ പ്രദോഷം വരെ മേൽപറമ്പിന്റെ ഹൃദയ ഭാഗത്ത്‌ സജീവമായി തന്നെ അദേഹമുണ്ടായിരുന്നു. മേൽപറമ്പിന്റെ ഇന്ന് വരെയുള്ള വളർച്ചയുടെ നേർ സാക്ഷി എന്ന് വിശേഷിപ്പികാവുന്ന ഒരാൾ കൂടി ജമീല അദ്ദിൻചയുടെ വിയോഗത്തിലൂടെ നമുക്ക് നഷ്ടമായി.
മരിക്കുമ്പോൾ അദേഹത്തിന് എണ്‍പത് വയസായിരുന്നു.

നാഥാ, അദേഹത്തിന് മഗ്ഫിറത്ത് നല്കി നമ്മെയെല്ലാം സ്വർഗത്തിൽ ഒരുമിച്ചു കൂട്ടേണമേ.........

Posted By: +Rafi Pallippuram

Rafi Pallippuram‎

കുട്ടികളുടെ കൂട്ടുകാരൻ റഹീമുച്ച...

2015-12-24T12:40:00.004+04:00

ഒരു ആഡംബര കാറ് മേല്പറമ്പ് പള്ളിയുടെ സമീപത്തു നിർത്തി അന്വേഷിക്കുന്നു "റഹീമുച്ചാന്റെ കട" ഏതാണെന്ന്....?

അപരിചിത മുഖം കണ്ടപ്പോൾ റഹീമുചായും തെല്ലൊന്ന് അമ്പരന്നു.

കുട്ടിയുടെ കയ്യും പിടിച്ചു പീടികയിൽ കയറിയ അദേഹം നിനക്ക് വേണ്ടത് തിരയുക എന്ന് പറഞ്ഞപ്പോൾ ആകാംഷയോടെ തൂക്കിയിട്ട കളിപ്പാട്ടങ്ങളിലൂടെ കുട്ടി തന്റെ കണ്ണ് പായിച്ചു. പിന്നെ ലോകം കീഴടക്കിയ സന്തോഷത്തോടെ കുട്ടി അങ്ങോട്ട്‌ കൈ ചൂണ്ടി. "......അതാണ്‌ ഉപ്പപ്പ....." താൻ കാഞ്ഞങ്ങാട് മുതൽ മേല്പറമ്പ് വരെയുള്ള സകല പീടികയിലും കയറി തിരഞ്ഞ ആ കളിപ്പാട്ടം കിട്ടിയതിൽ അയാളും ആശ്വസിച്ചു.

അതാണ്‌ ''ബേ ബ്ലേഡ്" എന്ന് വിളിക്കുന്ന ഒരു ചെറിയ കളിപ്പാട്ടം.

കഥ ഇങ്ങനെ. കാഞ്ഞങ്ങാടിനത്തുള്ള ഈ കുട്ടി പഠിക്കുന്നത് അപ്സര സ്കൂളിൽ. കുട്ടിയുടെ മേൽപറമ്പുകാരനായ സഹപാഠിയുടെ കയ്യിൽ കണ്ട കളിപ്പാട്ടം സ്വന്തമാക്കുവാൻ വല്ലാതെ കൊതിച്ചു. പേര കുട്ടിയുടെ ആഗ്രഹത്തിന് മുമ്പിൽ വല്യുപ്പ കീഴടങ്ങി. കാഞ്ഞങ്ങാട് മുതൽ മേൽപറമ്പ് വരെയുള്ള സകല പീടികയിലും അദേഹം കയറുംബോളും റഹീമുച്ചാന്റെ കടയിൽ കിട്ടുമെന്ന് കുട്ടി കൂടെ കൂടെ പറയുന്നുണ്ടായിരുന്നു. അതാണ്‌ കുട്ടികളുടെ പ്രിയ കൂട്ടുകാരാൻ റഹീമുച്ച.

ഭരണിയിലാക്കിയ മധുരങ്ങളും, നിരത്തി വെച്ച കളിപ്പാട്ടങ്ങളുമായാണ് റഹീമുച്ച കുട്ടികളെ കാത്തിരിക്കുന്നത്. കഴിഞ്ഞ പതിനേഴ്‌ വർഷത്തോളമായി മേൽപറമ്പ് മസ്ജിദ് കെട്ടിടത്തിൽ കുട്ടികളുടെ കൂട്ടുകാരനായി റഹീമുച്ച നിറ സാനിധ്യമാണ്. പക്ഷെ, മേൽപറമ്പിന്റെ വാണിജ്യ ചരിത്രത്തിൽ ഏകദേശം അര നൂറ്റാണ്ടിന്റെ ചരിത്രം ആ കടയ്ക്കുണ്ട്.

അമ്പതു വർഷം മുമ്പ് ബീ എച്. അദ്ളച്ച (ബീ. എച് അബ്ദുള്ള) തുടങ്ങിയ സ്ഥാപനം. മേൽപറമ്പിലെ പല പല കെട്ടിടങ്ങളിലായി അദേഹം കച്ചവടം ചെയ്തു. അവസാനം മസ്ജിദ് കെട്ടിടത്തിലേക്ക് പറിച്ചു നട്ടു. എന്റെയൊക്കെ കുട്ടികാലത്ത് സ്കൂള്, മദ്രസ്സയിലൊക്കെ പഠിക്കുമ്പോൾ വല്ലപ്പോഴും കിട്ടിയിരുന്ന നാണയ തുട്ടുകൾ കൊണ്ട് മധുരം നുകർന്നിരുന്നത് അദ്ളച്ചാന്റെ കടയിൽ നിന്നായിരുന്നു. ഇന്നത്തെ പോലെ ഒരുപാട് വിഭവങ്ങൾ സുലഭമല്ലാത്ത അക്കാലത്ത് ലഭിച്ചിരുന്നത് പത്തു പൈസക്ക് പത്തു മിട്ടായി, ചേകര മിട്ടായി, പേരിസ് മുട്ടായി, കടിച്ചാൽ പൊട്ടാത്ത മിട്ടായി, ചെമന്റെ മിട്ടായി, റബ്ബർ മിട്ടായി, തിരിക്കുന്ന മുട്ടായി, കോട്ടി മുട്ടായി, കട്ടായി, തൊണ്ട കുഴൽ, കടല അച്ച്, ചെറുപുളി അച്ചാർ, നില കടല, പൊരി കടല മുതലായാവയായിരുന്നു. അന്ന് ഇതിനൊക്കെ അഞ്ചും പത്തും പൈസ മാത്രമേ വിലയുള്ളൂവെങ്കിലും ആ നാണയ തുട്ടുകൾ നമുക്ക് യഥേഷ്ടം ലഭിക്കാറില്ല. അന്നത്തെ വില കൂടിയ ഐറ്റംസ് "പോപിന്സ്" ആയിരുന്നു. ഒരു രൂപയ്ക്കു പത്തെണ്ണം ലഭിക്കുന്ന പാകറ്റ്.

അങ്ങനെ അക്കാലത്തെ മധുരങ്ങൾ ഞങ്ങളുടെ കൈ വെള്ളയിൽ വെച്ച് തന്നു ഞങ്ങളുടെ കുട്ടികാലം അദ്ളച്ച മധുരമുള്ളതാക്കി.

1998 ഡിസമ്പറിൽ ബീ. എച്ച് അദ് ലച്ച ഈ ലോകത്തോട്‌ വിട പറഞ്ഞപ്പോൾ അദേഹത്തിന്റെ മരുമകൻ ചെമനാട് സ്വദേശിയായിരുന്ന റഹീമുച ആ കട ഏറ്റെടുത്തു.

ഇന്നത്തെ മധുര ലോകം വില കൂടിയ പല പല വിഭവങ്ങളാൽ സമ്പന്നമാണെങ്കിലും റഹീമുചാന്റെ കടയിലേക് കുട്ടികൾ ആകർഷിക്കുന്നത് ചെറു വിഭവങ്ങളാൽ. ചക്ക കുരു, തേൻ ചക്ലി, പുളി മുട്ടായി, കട്ടായി, ചെരിപ്പിന്റടി, കറുത്ത അച്ചാർ, പുളി അച്ചാർ, ബൊകിരി അച്ചാർ അങ്ങനെ തുടങ്ങിയ ലഘു മധുരങ്ങളും, ചെറു കിട കളിപ്പാട്ടങ്ങളും. ഓരോരോ സമയത്ത് ഓരോരോ കളിപ്പാട്ടങ്ങളോട് കുട്ടികൾക്ക് പ്രിയമേറുന്നു. അതിൽ പെട്ടതാണ് ബേ ബ്ലേഡും, യോ യോ എല്ലാം.......

അങ്ങനെ റഹീമുച്ചയിലൂടെ മേൽപറമ്പിൽ കുട്ടികളുടെ മധുര, വിനോദ ലോകത്തിന്റെ വാതായനം തുറക്കപ്പെടുന്നു.

മണ്‍ മറഞ്ഞ ബീ. എച്ച് അദ് ലച്ചാന്റെ മഘ്ഫിറത്തിന് പ്രാർഥിക്കുന്നതോടൊപ്പം കുട്ടികളുടെ കൂട്ടുകാരൻ റഹീമുചാക്ക് എല്ലാ വിധ ആയുർ ആരോഗ്യം നേരുന്നു.

+Rafi Pallippuram

Rafi Pallippuram‎