活在中層

最緊要有EQ

2010-03-19T17:38:00.000+08:00

同事經常讚我EQ高，唔易發嬲，係一個好上司，跟其他在位的，簡直好到無人有。

被人稱讚，當然高興。不過，講到EQ高=好上司？我倒不認為，EQ高只係其中一個好上司要素，作為一個好上司，條件還包括很多，今次不在此討論，更何況什麼是好上司其實都好subject，好個人主觀，不可一概而論。

我很坦白地跟同事說，EQ高其實係我自私、自我的行為，不是什麼好與不好。正如我上篇文都有講：你係老幾先？你憑什麼要我生你氣？還要氣那麼耐？

老實講，我都只係想在不想影響我經常happy的心情，先至會EQ高、不易生氣呢。計數嘛，點計都是有EQ比較著數d。

我沒有他們所說的那麼好。

當然，不易生氣不代表我沒有要求，得過且過，只係，我用平常心及另一個角度、方法去解決問題。縱使真的不能解決，起碼我都可以以一個平常心情去了解成件事的來龍去脈。

何況，我心信，EQ高是上位的主要條件。我從我舊及現任老頂都可以深深體會到。不講自己公司，只要看各高官被人罵時仍笑口滿面便可知道，懶理在人背後他自己在XYZ@$%#$%#，在人前，最緊要有EQ。

Bygones are bygones 過去已成過去...

2010-03-18T17:09:00.001+08:00

我有一位同事，近來經常唔開心，唔開心既程度，就連粗心大意既上司，即係我，都留意得到。每天返工見他都無離打彩，垂頭喪氣，毫無朝氣。

「二十幾歲仔者，仲乜好似仲老過我，日日都sigh sigh sigh...？」我心不禁好奇地問。

本來從不過問別人私事的我，都忍唔住問一問佢...「你近排發生咩事呀？」

男人，唔開心既理由都係好簡單者，唔係錢就一定係女人。結果原本唔係好想講自己私事的他，被我氹多兩氹，像山洪暴發咁講晒出黎，原來係因為佢女朋友對佢不忠，暗地裡識左第二個，一腳踏兩船。

「咁你想點呀？」我聽完佢既慘況後即刻問。

「嬲佢囉、憎佢囉，可以既話，對番佢唔好，報仇囉；我付出咁多，佢竟然咁對我，我當然要以牙還牙，對番佢唔好啦。」佢激動但好流暢地說這番說話...

我想冇人想發生呢種事情，不幸地真係發生左，當然會唔開心、會嬲、甚至想以牙還牙、要報仇。

我無權阻止別人點樣諗、會作出什麼反應。但管數佬我天生咩都唔識就只係懂計數，又奢僧，我經常會算住算住，我無理由因為你既不是而要令自己以後既日子都唔快樂。

嬲？當然會嬲，我都係人，人自然就有情緒，對我唔住，h我搵唔到理由我唔會生氣。只係呢種情緒唔會carried forward多過一日，訓醒又係一條好漢。我經常奢僧地諗，我點解要執著，點解要嬲你咁耐，嬲你，甚至要以牙還牙，對自己更唔好受，我總覺得成日因為別人(even佢係你既男/女朋友、親人都好)既不事而令自己唔開心係最唔值得，如果仲要去左諗右諗去諗報復就更無聊，有時間既不如去做d開心又有意義既事情。話晒人生有幾多個十年啦，我在世既目的係要開心，唔開心既事絕對唔可以佔我人生多於十份一既時間。

講真，左計右計執著地去生氣點都係唔值，去報仇就攻加蝕上加蝕，要生氣既成本太高，要以牙還牙既opportunity cost就更大，我計到盡，你真係老幾先，你要我成日因為你而生氣？你未夠班、你未夠資格...

「咁好唔抵者...我付出咁多...」我同事仍執著地道。

傻仔，你付出人地冇付出咩？縱使真係你百份百付出又如何？都已經俾左囉，都收唔番啦，縱使真係收到一部份，成本超高，唔化算。何況付出既已經成過去，以成sunk cost，you should know bygones are bygones and should have no influence on the decision you should make for the next...

太執著地對某件事、生一個人的氣，到最後虧蝕咪又係自己？我就唔會咁愚蠢做d令自己唔開心既事。

世界真細少少少少......

2010-03-10T16:38:00.001+08:00

太耐無寫野，藉口當然話自己忙冇時間，何況現在趕緊final results announcement，邊有時間寫呢寫路啦...

不過今日發生既事，就真係不得不寫，當係我老人家好長氣咁訓話d時下後生仔、80後...點都好。

話說公司現在請人，希望吸納d有兩、三年在大行工作過有audit經驗既後生仔入黎train，祈望佢地會成為日後公司另一個FC之類。

當然收到不少回覆，有big4既，又有在2nd tier既...之類...

其中有三個最吸引我既係...

1) A小姐在我同一間big4公司做過，而最抵死既係佢仲係曾經參與過我前公司既audit，即我在位時應該見過佢，怎致問過我野(雖然我唔記得佢個樣)；

2) B先生在一間2nd tier audit firm做，而正係我有大學同學在呢間firm做audit partner；

3) C小姐亦有big4 experience，而咁岩地，佢亦曾經參與過現在我公司前幾年既audit(雖然我一定未接觸過佢，因為當時我都未黎)。

三位Candidates都有相同之處，就係佢地都有我認識既人曾經同佢地共事過(不論係上司、平輩、定下屬)，而作為一個interviewer，第一時間可以做既就係：問d friends攞佢地既reference check。

「性格有d古怪，好有自我個性，唔聽人說話，最衰既係做事求其，得過且過，唔認真，做野好麻麻。」

呢個就係我攞A小姐既第一個reference。

結果呢，我當然冇俾個first interview既機會俾A小姐。

而B先生同C小姐既reference都比較正面，所以就先俾個機會佢地、見一見佢地。

你可能會話我比較求其，只係聽自己d friends三言兩語就決定見唔見呢個Candidate。我唔理別人點睇，只知道Information for human resources is costly and imperfect，要知道呢個Candidate係唔係一個合適既人選，同你一齊共事過既人就係最好既reference。可能一個人此既意見係bias，但同時間幾個人都係說類似既說話，其可信性冇10成都有7、8成，都已經足夠我決定請呢個人與否。

可知道，有時別人俾你既一句reference，往往勝過你在resume寫上十句既qualification。

我舊公司老頂在請我時都曾經問佢在big4既朋友(大部份都係partners、senior managers等)攞我既reference，他說我既recommendation都好好，先致請我呢個毫無commercial experience既audit仔做佢公司既管數人，當然我可以好proud of咁講佢最後冇搵錯人啦。

藉此我都想同時下後生仔講下，呢個世界其實好細，尢其是會計界、audit呢一行，行埋行埋原來你又識佢、佢又識他、他又識得我。唔理你既同事係你既上司、平輩、定下屬，都要好好咁同他們相處、做好份工、盡自己責任、唔好怕蝕抵、get the job done。因為你既好表現人家係會知道，而最重要既係他朝你唔會知係邊日在咩時候就係要靠佢既一句說話而救左你、得到好處。

有人話咁樣好似好攻心計者，我就話換個角度黎講，你受薪既就當然要盡責任完成工作，雖然好多時眼前你會見到好多不平等、蝕抵既事，但往往就係你今日既蝕抵做成他日既回報。何況你做好本份，人家都只係順水推舟，幫你講句好說話者。

想當年那個recommend我係一個good employee既partner，就係當年令我經常ET(eat time，即超時無補水)既一位audit partner，無佢一句說話，我何來有現在既機會同風光。

現在好多人都只睇到眼前利益，有時要看遠少少，何況後生有的是時間同青春，豪俾佢唔好根根計較又點話？不難發覺，根根計較既人好難會上到位的。

How Significant We are

2010-02-07T01:53:00.002+08:00

After you view this guy's blog, you may find yourself very very very ........................ insignificant and immaterial... then why worry and be angry?

http://freshnessfactorfivethousand.blogspot.com/2010/02/oh-how-significant-we-are.html

Do think!!!

除夕夜...

2009-12-31T15:26:00.001+08:00

自己年紀越大，越發覺自己不喜歡節日：不喜歡因為節日所以專登去消費、專登去做特別的事去討好別人
。可能自小受家庭教導，經常被訓話說「要對你好不是要等到節日，是要平時都應該對你好。」

這句訓話深深印在我腦海中。

有好有不好，好的是不會受節日的影響而麻木地消費；不好的便是被人說自己沒有情趣。

都不是啦...要有情趣，任何時候都可以；若果無既，一年365日都可以無情趣...

近排包括CK及娜姐都有寫關於節日的感受。我絕對同意娜姐講「開心的每一天都是節慶，不快樂節日也難過。」而另方面，我而亦面對CK同樣的情況，身邊朋友越來越難約，約得出來的，亦急急腳說要走，要趕住回去睇住班細路...

所以...今晚除夕有沒有街去？起碼在執筆時都暫時沒有。哈哈！

你若果問我除夕咁普天同慶，應該大事慶祝；我就覺都只係日子一個，跟平時沒有大分別，唯獨是年份變左啦，可以早少少收工啦...

不過話晒都係除夕，我管數佬在此祝大家新年快樂，來年事事順利！

Cheers!!!

人生變幻無常

2009-11-26T18:52:00.001+08:00

人生變幻無常，今日唔知明日事，老天爺要叮你走，無論你幾有錢幾有地位、點叻點勁都好，都一樣無得留低，要即走，比起你老闆炒你叫你立即走，老天爺殘酷好幾百倍。

所以，既然人生變幻無常，今日唔知明日事，我地仲係唔係一定要為左一d芝麻綠豆既小事而爭吵、執著、煩惱？人一定要珍惜現在，並及時行樂。

不過，及時行樂唔得於可以放縱，唔得於鐘意做乜就做乜，想點就點；即係人係在某一個公認既範圍下可以有自由。

唔知大家明唔明我講乜。

希望大閆生可以得到安息！

你當我係朋友嗎？

2009-11-25T19:12:00.001+08:00

互聯網既出現，改變左好多人溝通既方式，亦改變左交朋友既方法，唔再好似以前咁，一定要出來見見面先可以交到朋友，足不出門，只要上上交友網站、社文網站，便可以交到朋友。

當然，有人不太認同呢種交朋友既方式，又有人認為作為朋友一定要定時出出來、見過面先算係朋友；但因互聯網既出現，令到朋友既定義可變左，作為朋友既層次都可能可變左，起碼我認為係已經跟以前大有不同。

網友Bittermelon問我對網友又或者blog友係唔係朋友，我會答我會當佢地既朋友，雖然層次不同。

其實就算沒有互聯網，沒有什麼網友又或者blog友，人長大出黎做事後，或多或少都對不同既朋友都有不同既見解及層次，當然，對不同層次既朋友又會以不同既方式去表達不同既情感。無他既，長大後見既野多左，或多或少令自己有個保護意識，自自然對什麼人會講什麼話。

網友又或者blog友雖然不見面，但因不知道對方真實姓名、何方神性，令自己介心大減，可能仲比較容易交心、跟網友說心事，大家見大大小小不同既discussion forum就可知一二。

當然，有人說這些所謂既網友既朋友鐘意講乜就講乜，不負責任，但我又唔太認同：就好似各大blog友，我相信他們所寫所講，二來縱使自己現實中真係會見面既朋友，我都唔見得他們對自己既行為、說話有幾咁負責任。

所以，我雖然唔會跟網友blog友見面，但唔代表我唔當佢地係朋友；縱使實質上我唔會幫助呢類朋友，但精神上，我所付出既，分分鍾比現實既朋友還多。

Unfriend

2009-11-18T18:41:00.001+08:00

今日睇各大報章，說「新牛津美語字典」新加上了幾個新詞彙，其中一個係Unfriend：動詞，意指在Facebook等社交網站將某人從朋友名單上移除。

你有冇unfriend你既朋友？

我都有玩開facebook，到現在為止都未試過unfriend，不過在心目中其實係有。

可能好多人都有我同樣經驗，只要係識得自己既就add，可能add埋add埋有3、5幾百個，不過真真正正既朋友，會出黎見面既朋友，可能10隻手指數得出。在你個friends list中，可能有一些你根本唔會在意佢既去向、佢既存在，例如你一些舊同學、舊同事，基本上，同unfriend呢類既朋友，冇分別。

不過咁，縱使呢類個list係friends但其實實際上係unfriend既朋友，我都慶幸因為科技發達，有呢類網站能夠將我地失散多年既朋友在某個平台拉番一齊，縱使日後仍不是經常聯絡見面，呢個人既出現不竟在你人生歷史中留下回憶，何況你add得既，我相信都係一些值得回味既回憶。調番轉我相信對方都不會期望當add左我之後會經常和我有聯絡。我覺得沒有聯絡唔代表唔係朋友，只係層次不過，因大家既人生同際遇都不同，在此刻未必適合做經常聯絡既朋友，我覺得，大家有時一句好簡單既問候，都已經好足夠。

曾經看過鎚兄既「朋友太多，朋友太少」既文章，內容大致講科技發達多左好多溝通媒介(facebook, msn, email, QQ, etc)，但唔代表人與人之間既距離拉近左，可能反而仲疏遠左。

我同意鎚兄既見解，不過任何事都有兩面，如果冇左呢類溝通媒介，可能一世子都唔會再跟呢類朋友有聯絡；又縱使呢類朋友同unfriend好似冇分別，唔會見面、唔會溝通，但籍平台知道他們既近況，偶爾一句既問候，其實都已經相當足夠。

真係咁難???

2009-11-13T15:19:00.001+08:00

我唔知道係唔係英文既文法真係咁困難，我經常收到別人send俾我既email，睇完真係一肚火。

剛今日又收到一個好例子：話說我經email send我既application去申請某d銀行服務，然後收到對方一句好簡單既回覆如下：

Hi! FC

We are received your documents & the application is processing now. Please feel free to contact us by Tel: 2123 4567 Mr. ABC. Thank you!

XXX Bank Ltd

OMG，你話睇完呢句咁簡單既回覆，係唔係即刻火都黎？

唔好睇小一句說話，一來句句子已經係唔同左意思(雖然我知佢想表達d咩)，二來呢句說話真係會影響到我對呢間銀行既整體形象。

係唔係我要求過份地高呢？ Active 同 Passive 真係咁難分？

不過如果咁都話要求高既，我真係冇話可說。

引火自焚

2009-11-10T19:06:00.001+08:00

近排管數佬我除了工作外，就係忙於睇電視追劇集，不論其他人點樣說套劇無新意，又或者話係抄襲某套韓劇，我仍然睇得津津有味，晚晚乖乖地番屋企睇電視，因為當我欣賞這套劇集中，鬥生鬥死既情況，我在不其然諗起公司既情況。

我經常同老婆講，自己公司既情況某程度上都幾相似，只係...唔需要陪上性命罷了。

公司有個做operation既高層，基本上都已經係一人之下，萬人之上既高層。佢係天生一個極囂張臭吋既人，任何人在他眼中都是不濟的人，沒有人夠佢叻夠佢醒，喜歡將別人踏低而抬高自己或自己下屬。用人為親就一定，永遠在公司不停搞政治、搞小動作，將佢既眼中釘趕走，而我手下其中一個同事都成為佢刀下亡魂，就連老闆有時都會不善意地批評，高調地張揚公司所有野都靠佢，無左佢一定唔得咁。

情況真係有d似劇集中既馬將軍一樣，基本上係打橫黎行。

不過佢始終都忘記左一樣野，就係佢自己始終唔係老闆，佢始終唔係皇上，佢只不過係一個臣子，皇上要臣死，臣又點可以不死？

結果公司皇上把握左一次機會，將其宰殺，亦把他在公司的餘黨遂一鏟除。

其實今次既大屠殺，都係佢自己攞黎，搞辦公室政治已經好容易玩火自焚，更何況仲要燒埋老細？公司老闆受威脅，又點會再留自己在身邊？幾時被殺，只係時間既問題。

都唔明白，點解公司咁多人咁自以為事，目中無人，咁鐘意玩辦公室政治。

你「軟」左未？

2009-09-02T23:45:00.003+08:00

最近睇報紙睇左一段有關在職培訓既報導，而文中說：

「僱員要在工作上持續取得成功，有兩大要素，技術知識只佔當中25%，其餘75%則與人際及軟性技巧有關；調查又指出，缺乏人際及軟性技巧(interpersonal and soft skills)的員工往往成為僱主裁員開刀的對象。」

管數佬我非常認同這句說話，尢其是當你到達中、高層既階段。

有人會不停讀書增值自己；有人積極進修希望取得專業資格；但當人人有相同的想法，愈來愈多人擁有學位、專業知識的時候，又如何能在人才群中突出自己？何況當個個都差不多的時候，要繼續上位，人際關係及軟性技巧就顯的非常重要，而不難發覺，成功的管理人在人際關係及軟性技巧都是很好，反而發現他們的在職、專業知識或會有所退步，甚至比他的下屬還不及。

軟性技巧泛指領導才能、人際關係、自我形象、自信心、個人自尊、溝通技巧、團隊精神、情緒管理及解難能力等，我以前都有跟大家分享過一些，自問自己的人際關係及軟性技巧都不差，當然仍有很大進步空間，日後可再跟大家分享。

我老頂曾經在討論某中層員工的表現時跟我說：一個軟性技巧差的人好難再有得上。

我好信架。

你有冇咁好定力呀？鬼信你

2009-08-28T18:57:00.000+08:00

有朋友睇完我那篇「陪唱」後笑我，說「你有冇咁好定力呀，好似o靚模既索女在面前都唔心動？鬼信你…」

Well，冇所謂，都係一句，信不信由你。

不過我跟這位朋友(同埋有些扑友)都認同，如果有得避免，都係唔好去呢d風月場所。當然啦，你係都要去個火爐邊，始終都係容易被火燒親。

管數佬我點會唔明呢個道理，所以我其實都好睇實際情況，面對客人，真係可以拒既就拒，而當然，又唔係話所有既大陸老闆都迫你地去唱歌，總有情況係例外，可以避免。

不過始終唔係樣樣都有得避。

有人問，點可以讓小姐直接入你房？Well，其實我有原則係點唱歌都好都一定唔會帶女上房，而通常老闆們都不會再繼續追迫。但那天一事，在不知情的情況下開門給老闆，老闆便介紹這按摩小姐給我，便離開，我連拒絕的機會都沒有。所以說，有時有一些事情你想避都未必避得到，唯有去面對。

而要去面對，當然要有自己既原則囉，有人選擇有得食就食，但呢個唔係我囉。

你話我吋話我自己讚自己都係咁話啦。

陪唱

2009-08-26T19:20:00.001+08:00

在大陸工作，一定要有「陪唱」既能力。陪唱，即係陪唱歌，當然，所去既卡拉ok(內地叫KTV)絕對唔係一般既卡拉ok，而係有小姐俾你任選，陪你一齊唱歌既卡拉ok (KTV)，當然你更可以選擇同小姐有「下文」交易。

去呢類KTV傾生意、消遣作樂，對內地老闆們來說，是正常不過既事。一般內地老闆們招待男性客人時，晚飯後多數邀請你去「唱唱歌」、「輕鬆輕鬆」，一來他們認為呢種先算係上級既招待，二來同客人打正祺號出公數去happy，對他們來說，何樂而不為？所以當調番轉要招待呢類大陸老闆時，相同既招待可以講係expected。

身為客人，你當然有權拒絕他們既「好意」，之不過，他們會覺得你唔俾臉子。唔俾臉子是中國人做生意既大大忌，縱使你係客，若然因此拒絕而攪壞大家既關係，呢個損失可能你負擔唔起。

若然要調番轉招待呢類大陸老闆，你認為可以對他們想「唱歌」既要求有得say no？可能你個「no」字，值成幾千萬、幾十、幾百億，係唔係真係可以say no先。

既然陪大陸老闆/客人唱歌對他們來講係「必需」，不論你願意與否，你都要去接受，要一齊陪唱。之不過，有條女坐在旁邊可以俾你有「下文」唔代表一定要同呢位小姐有「下文」，要分清楚，「可以有」唔等於「一定要有」，係兩回事。

管數佬我在逼科工作時當然有同大陸老闆陪唱歌，還記得做某隻IPO，客人當然好客地同我地「唱唱歌」，我地呢班做細既起初當然拒絕，但大陸老闆說句「唔去好唔俾面喎」，做細既點敢拒絕唔去？

大陸老闆好熱情，還記得他叫「媽媽」一定要搵d又「大」又靚既小姐陪我地，仲要一人選擇兩個，咁熱情既招待，你覺得我地可以say no咩？

不過咁，我地都好有規矩冇多手多腳，我地同小姐們吹下水唱下歌飲下酒，有講有笑大家都不知幾開心，而小姐們見我地冇對佢地多手多腳，反而令佢地覺得我地好特別、好有好奇心。

當然，老闆們有叫我們同小姐上房，我地當然拒絕，而慶幸老闆們沒有繼續「追迫」。

其實我都試過類似Bittermelon既朋友例子，客人直情安排小姐到我房「按摩」，我卻付足小費並請她離開，她反而不好意思仲不停追問我她是不是不夠靚身材不夠好 (哈哈，她外貌身材絕對跟現時既o靚模有得揮)，跟她說不是她的問題而是自己原則既問題後她才放下心，不過她說收得錢就一定要提供服務，結果佢同我作按摩(正經的)，而途中有說有笑、又知佢身世都幾可憐(佢話啦)，不過點都好，那次就開心但並冇發生「下文」既情況下完結左。

信不信，由你啦！

在大陸工作，「四陪」中既「陪唱」一定要有，不過我以前都講過，牛唔飲水點撳得牛頭低，有得食唔一定要食，可以做唔一定真係要去做，從來無被迫去滾呢回事，問題卻只有自己去選擇做定唔做。「有得食卻唔食係罪大惡極」對我呢講唔applied在我身上，唔通有K仔食自己又要跟住一齊食？

其他人點諗係人家既事，只不過，我唔想做一個只係用細佬諗野、唔負責任既男人囉。

給全港師奶的信

2009-08-19T19:29:00.001+08:00

小弟近排忙住公司既interim，都冇乜時間寫野，但當然，吊頸都要投下氣，都會睇下他人既blog。

平時都有睇Daisy既blog，覺得佢本人所寫既口吻係就係好吋，但所寫既內容卻好有道理。好似以下條link既內容我就好認同：做女人可以長得不美，但不可以沒有 spirit。

推薦俾大家：給全港師奶的信

專業人仕不會罷工

2009-08-10T16:43:00.000+08:00

近排聽到/見到好多工人罷工，如運水工人、巴士司機、甚至係紀律部隊如入境處、警察等等。

但好奇怪，從來未聽過專業人仕會罷工，專業人仕的待遇好好咩？又不見得，工時長、無補水、福利少、等等，絕對及得上現時罷工的工人、巴士司機等的待遇，分分鐘仲衰過工人他們。唯一可能比他們好既，就係人工高少少，之但係人工高唔等於一日要做足十幾二十小時，一星期做足7日、OT無補水架嘛。

唔通專業人仕讀咁多書反而係好蝦d？

就以自己熟識既專業 - 會計行業，唔會有人罷工，員工只會默默地不停不停地做、做、做，叫你OT、星期六日返工不會say no。工時長、無補水、福利少、等等唔通佢地唔識計數，唔知道自己被人搵苯、蝕低左？

又唔知點解，有好多工人都會有工會，但點解專業人仕冇工會support、同佢地爭取應有福利？

每次見到不同公司既工人在罷工、不同公司既工會為會員爭取福利時，我不禁為自己所謂既專門感到婉惜。

I think you should XYZ...

2009-07-31T18:24:00.001+08:00

出黎做事咁耐，當然知道你要有料子(如對工作的知識)，先可以生存，先可以繼續上位；而亦有很多人都知道，好既人際關係，良好既interpersonal skill對工作都非常重要。但唔知點解，定係我年紀已大，總覺得現時d後生仔既interpersonal skill，真係麻麻地，甚至有時以「差」來形容。

時不時都收到第二個部門阿頭既微言(其實直接講，係投訴)，說我某下屬對同事的態度不好，尢其是以email對答，像命令式要求呢樣要求個樣；呢個部門阿頭說，他自己都不會用呢種語氣去命令下屬，他都會唔該前唔該後，何況係佢(即我下屬)，他希望我提點一下佢。

好彩我同呢個阿頭關係唔錯，都有句計傾，先令結果不致攪大。

唔知係唔係現時的後生仔自我中心、自我形象過份澎湃，我經常從佢地彼此之間的emails看到：

I think you should …

I tell you that …

You are wrong to …

You should not do …

You should do … for me

You need to do … for me

… etc.

If you don’t do this, you should explain to boss…

呢d好直接要求、批評，唔單止在他們平輩既emails之間經常出現，甚至他們與另一個部門/公司的同事，甚至阿頭，都是用呢種語調、呢種tone去提出要求、批評。結果會係點大家或者可以想像得出，一些無謂既心病、不滿、甚至罵戰便因此而起，而最麻煩既係，呢d事會煩到你地老頂我呀嘛，你估我好得閒？

除左以上外，後生仔都喜歡將自己的事過份重要化，視自己要做既事比其他任何部門的都來得重要。曾經我下屬要求銷售部某同事不要以忙碌於銷售會做借口遲交銷售報表，更批評他應該事先有計劃及安排好他自己時間。無錯，道理可能是在自己呢邊，但唔需要以訓話形式教訓人地如何做事，更何況唔知頭唔知路亂咁作批評只會有反效果。

其實只要簡單講一句：認同銷售會的重要性，但亦希望你能夠準時提交報表… (再以老闆角度間接壓一壓他)… 使老闆們可以以第一時間知道我們我的銷售情況。

我相信咁寫會比較容易得人家接受。

好既interpersonal skill，絕對對自己既前(錢)途好有幫助，大家要注意。

你既中文好Stexhy吓喎...

2009-07-28T18:24:00.001+08:00

自問自己中文程度差，考cert考a-level時都係緊緊合格，到出黎做事寫英文多過寫中文更令自己既寫作中文能力更差。在呢度寫下blog都係同各位扑友吹下水、發下牢騷咁，慶幸都有人喜歡睇我所寫既野，唔介意我既小學生中文程度。

自己既中文錯別字多就一定，但求有人明白、睇得明都已經可以。但我會知道，他朝有日如果有人咁冇眼光搵我出書，我除左寫好我既文章外，還有一件事係一定要做的是搵個專人幫我執一執下篇文，如錯別字、文法等等，幾趕幾急都好都要做好proof read。話晒出街既野，點都要小心，唔好俾人睇到自己條「底」係咩顏色。

呢d咁common既程序，一般人都應該識應該會去做，但偏偏呢個世界就有人喜歡俾自己條底俾人睇：自稱係「才女」既某位藝人就冇做好proof read，結果輪為笑柄，被人搵到很多錯別字，瘀到爆。

其實我諗冇人expect一個藝人可以十項全能，文又得武又得。中文唔好既藝人出書，其實一d問題都冇，坊間其實有好多所謂才俊才女，佢地既文筆都唔好；但最緊要既係佢幕後有一班人幫佢「化妝」，幫佢「補飛」。唔好話藝人，其實某程度上一間公司既老闆，一個國家既元首，都係一樣，幕後有一大班人支持佢，唔通連廁所冇廁紙都要大佬去出手？

既然有咁多「槍手」都唔好好地利用，咁呢個所謂既才女，係唔係低被人笑先？

呢件事發生之後呢幾日聽到一個新既「潮語」，話：你既中文好Stexhy吓喎...

haha，真係ｏ晒嘴。

逼科新鮮人要有能力

2009-07-24T16:33:00.000+08:00

睇完呢編有關在「逼科」工作既情況，真係有點感觸。文章中所說的一點一滴，絕對沒有誇張成份，縱使每個人既遭遇不同，但是文章所說既情況都可以represent 大約90%既在逼科工作auditors所經歷既情況。

其中文章所說：「…所以新入職的會計新鮮人一做得唔好﹑工作態度差﹑所謂問一些愚蠢的問題﹑放工準時走……很快全個department都會知道。那麼會有什麼下場呢? 下場是這位「可憐」的小朋友就沒有人願意book，終日Idle沒有job出…」

呢個我絕對有體驗，亦係未入逼科做野時都已經知會有咁既情況。

其實相信每個人都想有好既下屬，可以幫佢把工作順利完成，尢其是在逼科既工作環境，根本唔容許你慢慢學慢慢做，講一句你要明，第二句你要開始上手，仲要講第三句？開始係你既問題，如果再要繼續講6、7、8句？你一定被black-listed，就好似上述咁，一傳十、十傳百，全department都知。

呢個就係逼科，其實相信有好多professional firms既情況都係一樣。何況其實有時唔都可以埋怨他人，自己做得唔好，能力又唔好，工作態度又差，叫他人點幫你？唔通仲叫他人在別人前highly recommended你？換轉係你自己，我相信你都唔會推薦一位有問題既「小朋友」。

坦白地，我當senior/manager時我都會給意見別人關於某些好唔掂既「小朋友」，唔通我想我朋友死咩…

在逼科，絕對係一個適者生存，極tough既地方，我自問就冇呢個生存能力，所以我選擇離開。當然，離開跟我有冇呢方面既工作能力又係兩回事，我係在入左公會，攞到工作經驗、年資、title，仲要有另一個發展機會我先選擇離開。

作為一個新人，只有學歷但其他乜都冇既新人，想在逼科生存，就要有死捱既心態(除非你係RP，即related party，即同老闆/partners有關係既人，如親戚、相熟朋友）。而且，除左基本會計知識外，仲要有其他各方能力包括(但不限於啦)：唔怕蝕底、勇於接受爛job/爛任務、唔駛訓覺、有rec數能力(reconciliation)、捱得肚餓、適當既交際能力、要聽話、做事快靚正、等等，到你senior時，除左以上，我個人覺得仲要將交際能力提升至「四陪」能力，即「陪食、陪飲、陪吹、陪唱」。

曾經講過陪食、陪飲、陪吹，等下次講下陪唱。

Please confirm us we can do this without problem...

2009-07-20T18:15:00.000+08:00

在professional firm做過既人，在寫英文既correspondence時都會好小心所用既字眼，無非有絕對既必要都唔會用confirm、agree等等呢類字。一來在一個商業既opinion上，好難會有一個真正confirm既situation，二來叫人去confirm某件事物，唔多唔少有點命令人做事既意思。要知道可以confirm既人，多數唔會係junior，就算職位唔係高過你都算係平背，有一定地位身份既人，所以confirm呢類字眼要小心用。

經過professional firm既training，當然對呢方面會好有經驗，我想大家都未曾叫個個audit partner去confirm某d野啦。轉做commercial後我仍好少用confirm既字眼，但偏偏在呢間公司，就經常有叫你confirm呢樣、confirm o個樣。真係Fxxking Shxt！！！

「管數佬，明白大陸某某條例要公司咁樣做，但現階段公司唔能夠full compliance，我地剛傾過呢一刻暫時咁做，你睇一睇，並confirm我地咁樣咁樣做絕對冇問題。」

真係頂頂，呢句說話我點樣confirm呀？Confirm你non-compliance一定得一定ok？仲要係confirm絕對冇問題？我根本唔可以make呢句statement，仲要我白紙黑字，佢地都痴痴地。

但唔回咩，又唔得，話晒佢都係第二個部門阿頭，點都要有d回應。結果我只回答佢：「如果based on 咁咁咁、點點點，我相信(I believe)問題應該會比唔做既好。」

我都寫得幾有保留(其實仲可以再保留一d)。

有人曾經話最唔鐘意財務部阿頭永遠都唔confirm唔agree d野，好似好唔想負責任咁。我卻認為岩岩相反，首先，你反問番自己你既request statement係咩先！第二，我認為咁樣回應先係一個負責任既表現，好讓你地班友仔仍然有個警覺性，做左呢d補救功夫仍要警惕，唔係完全沒有問題。

要承擔既就一定會承擔，但唔係咁樣囉；而且，呢個亦係保護自己既方法，要知道呢個世界有好多小人當出左事時第一時間就會話：「你confirm/agree左過喎...」，推得一乾二淨。

Confirm/agree呢類字，一定要小心d用，唔係亂咁用。

不要作只用「細佬」諗野既男人

2009-07-17T19:01:00.001+08:00

小妮曾在CK那篇「think as one」中留意，說：

成日陪老婆的人,一般事業都梅過條鹹魚，不過比較忠誠，因為佢冇咩choice；事業好的男性朋友一般多女朋友／婚外情，因為呢D男人多choice。

小妮講既雖然好似消極左d，但現實係殘酷既，的而且確已上述係鐵一般既事實，事業好的男人有條件，自然容易認識多女朋友，要攪婚外情亦比較容易。

不過，有能力有條件同去唔去做係兩馬子事，我又覺得牛唔飲水唔及得牛頭低，所有事情的發生都是相向，如果自己唔放手行出第一步，又點會讓呢類事情發生？當然，世事冇絕對，亦唔係1+1=2咁簡單，但如果自己唔走出第一步，事情未必會咁易發生。

自問自己沒有英俊外表，但都算事業有成，收入都算唔錯，絕對養得起「三萬蚊港女」，在內地包養對自己來說更是easy job。但再講一次，有能力唔代表我可以做、會去做，反而我經常做的是在同事面前(當然包括一眾女性同事)把老婆掛在嘴邊，說「我老婆鐘意乜」、「我老婆會點」、「如果我老婆就會」呢類說話，好讓其他女性清楚知道我老婆在我心中的地位及重要性，讓她人不會對我有什麼「其他」不必要既想頭。而經驗話我知咁樣做又真係幾有成效。

當然，有時唔係話你唔做就唔等於事情一定不會發生，小妮都有說：

你很專重你的婚姻咩？sorry，出面很多女仔都唔係好專重人地的婚姻。

外面的而且確有很多很多女人，明知你有女朋友、結左婚，仍然會主動痴埋黎。不管呢位女仕其目的何在，佢既行為一定會對原先的一對有所衝擊。

我就覺得，遇著呢類人，除左會經常掛老婆在嘴邊外，我會盡量避開呢類女人，避得就避，不作任何單獨相處接觸，唔會俾任何機會或閒想。

當然，像小妮說，作為有另一半既女仕，在一個咁keen既competition下，真係要醒目D，要對妳的另一半considerate，唔好成人怨，真係要appreciate對方為妳做的事。

而作為負責任既男人，有條件亦不等於你可以事無忌憚去作對不起另一半既事，有時男人實在俾自己太多籍口去做錯事。真男人係用腦去諗野，要對另一半負責任、要有所交代，而不要作只用「細佬」諗野既男人。

祝大家有個愉快既週末。

我認為咁、咁、咁，你要聽我的

2009-07-15T18:53:00.000+08:00

我絕對同意CK同Hana所講婚姻就像一個「合作社」，任何事情上都不是單方面可以完全決定，而係雙方都要一齊維護呢個「共同利益」。不過，當兩公婆決定呢個共同利益後，我覺得仍要不時溝通檢討，因為，今天的共同利益並不等於日後既共同利益目標。

就好似一對夫妻，未有小孩，可能大家既共同利益是在這一刻搵多d錢，所以，比較放少左時間在對方、在這家庭上；到有了小孩，環境變了，需要在家既時間多了，共同利益在這時便需改變，不再只顧搵錢而忽略家庭，可能要平衡一d。

當然，好多時不是話變就變，環境亦唔容許你隨時改變。所以真的要多溝通，等大家都可以早有心理準備。

而溝通一定會有意見不同。香港人自我中心強，很多事情上都說「我認為」，我認為咁、咁、咁是對你最好，你要聽我的。當然，呢種自我中心不單止在日常工作中發生，同時亦帶到家庭上。有時兩公婆真係要靜心地坐低傾一傾「咁樣做、真係對大家好？」

管數佬同老婆Sharon其實都在學習當中，有時大家都會把持己見，自己認為最好既東西、又或者應該係咁咁咁既道理強加在另一半身上，結果當然係罵戰一場，兩敗俱傷。自己認為好係唔係代表對別人都是好，有時當罵交後靜下來才開始反省，去了解成件事，先發覺原來真係自己唔好，那又何必呢？

兩公婆係合作，唔係各持己見；係溝通，唔係強加人意。

好多人都知以上道理，但知而行難，包括我自己，所以，我都要努力。

兩個「長唔大」既人走埋一齊，衰梗

2009-07-13T14:04:00.002+08:00

睇完CK既「結婚幾年」，真係有D感觸。

管數佬我跟老婆Sharon由拍拖到相識已十多年，你說從未罵過交？一定冇可能，苦要維繫一段感情，有一D固中道理同現實，雙方都一定要接受及去做，不然，就像CK說，兩個「長唔大」既人走埋一齊，點會有好結果？

我經常聽過兩個人一齊，時間一耐就會悶、冇晒神秘、冇晒話題，當突然出現另一個好似好新鮮、好合得來、好多話題既potential 3rd party時，就好容易會發生情變。如果你認為感情一定係常新既，我只會覺得你只不過係一個「長唔大」既大人，唔適合結婚。老實講，無論你同一個幾咁有趣、幾咁多野講、幾咁funny、幾咁好動既人走埋一齊，日子一耐佢所做既對你自己黎講已再唔係新鮮既事物，會變悶、會冇晒神秘感。第三者的出現，一定會對自己帶來新鮮感，久而久知便認為已對舊一半合唔來，出現問題，當初我開始是錯，有相逢幸晚既感覺，到時唔發生事先出奇。

其實覺得相逢幸晚既人，好多時都忘記當初同舊的另一半都係有過一段好新鮮既時期；現在既另一個新既新鮮，只係重複歷史。

我覺得，好多人或者明白以上道理，但接受唔到呢個事實情況。如果你係一個這樣身的人，對不起，婚姻並不適合你，請你最多拍下散拖，但都唔好拖人太耐。

其次，要維繫一段婚姻，可以乜都唔好講，唯一需要做既係「忍」，仲要係咩都忍，要忍及原諒佢所有唔好既事情、習慣、喜好等等。Sharon曾經問過我，她問佢有D乜野係我一定忍唔到、接受唔到，我諗左陣，跟佢話，除左你有第二個、又或者你傷害我家人既事，其他既，我都會接受到，會去遷就，會去忍。而忍，又需要EQ，EQ唔好，好多野都好難去忍。

如果你EQ低，唔能遷就、唔去容忍，那千萬唔好同人結婚。

兩公婆咩都可以講，但唔好一時之氣好隨便咁講分手、講離婚，可能說話既人根本冇呢個意思，只係發悔氣一時口快；可能今次罵完分手、離婚之後到最後都冇事，但講一次、兩次...六次...十次...二十次...可能終有一次便「願望成真」，你係唔係真係想離先？

兩個人相處既學問真係有排學，有排寫，不過一D好fundamental既野，一定要去接受，一定要去做，如果唔係，就唔好結婚。

1 + 1 = 2 ？

2009-07-10T16:33:00.000+08:00

問問大家：「1 + 1 等於幾多？」

「管數佬，你…你冇病呀嘛...」你可能會咁話我，認為我係唔係近排工作煩忙，忙到short Q左…

我可以話，就係因為自己工作經驗多左，人生體驗多左，先會問呢條問題。

如果1 + 1就只係等於2咁簡單，呢個世界就唔會咁複雜、咁多紛爭、咁多爭吵了。

先唔好講別人既事，講講自己可以控制既事，係唔係你付出既努力，加上另一努力，就一定得出你所要既結果？相信你一定知道答案。自己既事都唔可以百份百得「2」，其他事情又點可能100% guaranteed？

好多人都知道，你同樣既付出，唔一定有收穫，可能到頭來乜都冇；而有時又不知為何，明明冇乜付，卻最後換來意想不到既結果。

呢個世界，太多野太多事情根本唔係1 + 1 = 2 咁簡單…

你努力讀書，唔一定會得到好成績；

你努力工作，唔一定得到相應金錢回報；

你努力希望另一半開心，到頭來換黎分手收場；

好多好多例子，相信唔駛我多講大家都仲可以再多講幾千幾百。

但管數佬我明白一件事，如果當初你連個「1」都唔肯去付出，我相信你最後只會得個「0」，連「0.1、0.5、0.8」都得唔到。

又因為呢個「2」太過unpredictable，縱使我會希望得到「2」呢個結果既心，但我唔會不設實際的要求一定要得「2」。

有好多人都會話「我明明已經咁、咁、咁，點解個結果會係咁、咁、咁…」

明明熟讀課本，成績仍然不理想；

明明努力工作，仍得不到上司既認同；

明明我對佢好好，點解佢仲咁對我。

太多太多「明明…但…點解」

管數佬我就一於好少理，會去學習點樣唔好睇得個結果太重，我仍然會付出「1」，仍然會希望得個「2」，但唔會想一定要得個「2」。

人最緊要開心，睇得個結果「2」太重，人會有精神病的…明冇？

記得帶袋呀

2009-07-08T01:00:00.004+08:00

以前如果有人叫你「記得帶袋」，你一定會話佢心邪；但現在呢？可能係一句必要既說話，如果唔係又要俾五毫子(或者可能更多)。

相信大家都知道我講緊咩野，從昨天開始，買野時要手抽膠袋，需要俾五毫子稅款，收稅目的是希望D人用少D膠袋，購物時會自備購物袋。

好多扑友都曾經講過呢個政策既好與不好，有效或無效；而管數佬我一向支持環保，對政策其實都支持，不竟人係有惰性，有D野唔要錢唔靠罰真係唔會「的」起心乾去做，懶理你日日同佢講污染、講危害下一代，甚至講世界末日，一日唔殺埋身都唔去改。

其實膠袋徵費都唔係一件新鮮既事，在外國基本上已經係一定要俾，已成習慣，仲唔單止膠袋，就連紙袋都要；唔單止係某些商鋪，係所有零售商鋪都要徵費；價錢仲一D都唔平，我試過去一個北歐城市既超市，一個普通「惠X」 size既膠袋要1.5元歐羅，差唔多成10多蚊港幣一個，同香港區區五毫子相比...真係差得遠。

有時我都覺香港人真係竉壞，一有少少改變、一有少少不方便就鬼殺咁嘈、要生要死刀仔吉大脾。唔該大家為環境出少少力，用少D膠袋啦。

雖然有人話五毫子實在太少，根本唔會影響人用膠袋既模式及數目，不過我又覺得呢個其實係心態覺得值唔值既問題，如果佢本人覺得唔值，縱使是一個少數目，佢都會想辦法去避免。不過咁，我自己都覺得五毫子實在太少，驚好快唔會再有效，我都覺得可以再提高一D會更好。

唔用膠袋結果多左人用環保袋，環保袋以為真係環保D，點知最近才知道D環保袋原來都係石油既副產品，唔可以分解，會對環境做成污染。而現在因需求大增而大量生產呢D所謂既環保袋，到第時要棄置又污染環境，真係晒氣...

其實政府明知道因膠袋徵費時會多人轉用呢D所謂既環保袋，點解唔做多D野再教導一下市民，呢D環保袋棄置時都要攞去回收循環再造？政府次次都係慢半拍，踢一腳郁一郁，頭痛醫頭，腳痛醫腳，唉~~~

但慶幸知道有廠商開始用可分解植物原料來做環保袋，希望將來所有既袋都係真真正正既環保袋。

總括黎講我都係支持徵費，希望大家改變一下生活習慣，為環境出番分力。

我唔讚成一個女仔走去做核數

2009-07-07T18:24:00.000+08:00

管數佬我從來都唔讚成一個女仔走去做核數，尢其是在「逼科」裡做，點解？

行內人可能都會知點解我會咁講，行外人就未必咁清楚。

在「逼科」做核數，基本上係7-11，一星期7日，每日做(平均啦)10幾小時。咁長既工作時間一定會有得有失。或者咁，等我公平d列出一個女仔在「逼科」做核數，會得d咩失d咩：

得既：

1) 錢；很明顯，年年升一級，畢業工作5年已經係經理，人工肯定過4皮，事問有一些人工作十多年都只係2、3萬(可能更少)，拍馬都追唔上。

2) 都係錢：工作十年分分鐘都已經係partner，人工點只10餅？唔partner就算只係senior manager，收入7、8皮都唔錯，三十出頭有咁既收入算唔錯啦。

3) 地位、名譽：唔駛多講，「逼科」既partner喎，點會唔威？

4)同性親密伴侶；沈小姐既文章都話，會計師樓女性比例較多，日對夜對都係女同事(甚至女同誌)，在大家互相申訴，分分鐘日久生情，唔搞都變左同性戀。(計數佬你唔係嘛，咁都叫係得？係呀，我認為係得架，起碼我親眼見過好幾次活生生既例子。)

失既：

1) 樣貌：女auditor既樣貌depreciation rate 係極高，我自己目睹好幾個新入識既女junior，原本個個花枝招展、花容月貌，3個月後已變得殘枝敗柳，跟當初有好大分別。例子真係多的是。

2) 精神及健康：日做夜做唔捱到有病至出奇，甚至捱到有精神病。

3) 男朋友/老公；如果另一半唔係同行就更嚴重。另一半跟本唔會了解做audit既辛苦情況，何況日日都唔見，星期六、日都要工作，又異地相隔，聚少離多，點會唔出問題？試過一個女性朋友跟我講，話佢男朋友唔信佢連星期日都要返公，話我朋友只係想搵籍口離開佢，結果冷戰左成個幾月，到最後confirm左佢地已經玩完…

4) 金錢：係就賺好多錢，但咁辛苦壓力又大，搵得黎唔洗確實對唔住自己，結果一唔小心好容易洗過攏，變購物狂就仲衰…

5) 朋友/家人；唔駛講，咁長既工作時間邊有可能見朋友同家人？自己返到屋企d家人都訓晒，一星期都可能講不到10句說話，同同事傾audit issues就仲多。

6) 私人時間：對每一個auditor黎講私人時間價值係奢侈品，唔應該渴望擁有。

7) 貞節：係就嚴重左d，不過都聽聞過…

以上係小弟既愚見，其實對男性都係一樣，只係某方面個impact冇對女性既咁大，唔知各女auditors認唔認同，不過將來如果我有個女，我都唔鼓勵佢做audit，太辛苦，女仔人家唔好捱得太辛苦。