يوميات مواطن بلا وطن

تغيرت من أجل وطني

2015-09-23T14:46:00.000+02:00

تغيرت من أجل وطني فأبى وطني أن يتغير من أجلي
كافحت من أجله فأقسم يمينا إن لم أكف ليقتلني
ويحك يا وطني ألستُ من دفعتُ الطغيان بيدي
ألستُ من نادى مجلجلاً أن حبك ما زال ينمو داخلي
قال لي إن كنت معاتبا فانظر لمن أهدرك وأهدرني
انظر لمن نسي من أنا وجعل همه قبل همي
انظر لمن نادى بكفى وهدمك قبل أن يهدمني
علمت حينها أن العيب لم يكن بي أو بوطني
العيب كل العيب في من خدعنا بمظهر الورعِ
تعلمتُ أن لكل منافقٍ يوماً لن يحيد عنه أويلتوي
فدعوت الله أن يحفظ وطني ويحفظني

مصر...المضحكات المبكيات

2015-09-23T14:44:00.000+02:00

فهمونا أن عدونا اللي بيهدد أمننا هم شوية ناس في حتة صغيرة اسمها غزة وبقينا نفرح لما يحصلهم مصيبة وأن إسرائيل وتوغلها في جنوب السودان ووصولها لإثيوبيا وسد النهضة ما بتهددش أمن مصر القومي.

المضحكات المبكيات

قمنا بثورة على نظام مستبد لمدة 30 سنة ودولة بوليسية وأننا نفسنا في رئيس مدني ولما انتخبناه ثورنا تاني وانتخبنا رئيس عسكري بالرغم من وجود شخص مدني في المرشحين.

المضحكات المبكيات

قلنا نشوف العسكر فاهمين وشاطرين وعندهم انضباط وبعد نظر وكويسين في الحكم عشان كدا اختارنا حاكم مدني بخلفية عسكرية على أساس أن اللي خكم مصر لمدة 50 سنة مش عسكر والدولة نزلت للقاع.

المضحكات المبكيات

العجيب أن الناس تبرر وتقول أن عددنا كبير وصعب أن دولة بحجمنا تتحكم بكم الناس اللي فيها وأن مبارك عمل انجاز وطفرة في حين أن مهاتير محمد حكم ماليزيا في نفس سنة تولي مبارك الحكم وابقى كلمني عن الطفرة بينا وبين ماليزيا.

المضكات المبكيات

عرفو يقسمو الشعب لقسمين وأن اللي مش عاجبه وضع فئة هو من الفئة التانية حتى لو كان كلامه صح لمجرد انه مش متفق مع رأيهم

المضحكات المبكيات

الغريبة أن نفس الناس اللي ثارت في 52 وعملت انقلاب ضد الملك عشان الظلم والقهر والطبقية هم نفسهم اللي بيقننو الطبقية والناس راضية وساكتة ... كيدا في الطرف الآخر

المضحكات المبكيات

وصلونا أننا نكره الأخوان ، وأي غلط يعملوه دام بيكيد الاخوان يبقى بالنسبة لنا حلو حتى لو ضد مصلحتنا

المضحكات المبكيات

الفكرة التي لم تمت

2013-02-07T13:02:00.000+02:00

كانت نقطة التحول عندما سقط مني 13 طفلاً من أصل 15 في يوم واحد، كان يوما رهيبا ولم اشعر بنفسي وهم يخبرونني بسقوط الأطفال الواحد تلو الآخر واذا بي اندفع لأخرج من باب المعهد القومي للأورام واجلس على الرصيف وانا ابكي عجزي كطبيب عن فعل اي شيء لهؤلاء الأطفال الضحايا، هناك نقص في كل شيء بداية من خيط الجراحة إلى حقنة الدواء الى العاملين الذين يعملون وليس عندهم اي معلومة عن ماهية مرض السرطان ولم يكن بكاء بل كان انهياراً على اهدار آدمية الأطفال.

ودعوت ربي ان يساعدني واذا بي اتقدم نحو احد المطاعم التي كنت اعلم ان شيخ جليل يجتمع فيها مع اصدقائه في هذا اليوم، ودخلت عليهم وقلت لهم انا طبيب بمعهد الاورام وحكيت لهم قصة الأطفال فاذا بالشيخ الجليل يقول لي يا ولدي سأعطيك مائة وخمسين جنيها مدى الحياة وسيلتزم بها اولادي بعد مماتي وكانت هذه النقود هي بداية تدفق نهر الخير على الأطفال من كل جانب، اذ اشتريت بها "حقن" وبعض الأدوية وبدأت حكمة هذا التبرع تتضح امامي بانه اذا تبرع الأصحاء شفى المرضى وترائى لي حديث الرسول صلى الله عليه وسلم : اعظم الأشياء أدومها ولو صغرت

هذا الطبيب هو الدكتور شريف ابو النجا طبيب بالمعهد القومي للأورام

الشيخ الجليل هو الشيخ محمد متولي الشعرواي رحمه الله

النتيجة بناء مستشفى 57357 أحد أكبر مستشفيات سرطان الأطفال بالعالم

رحلتي في الميكروباص

2013-02-05T23:42:00.001+02:00

كنت مسافر مشوار طويل وراكب ميكروباص مع سواق قلبه حديد ونيته حلوة وكله خير بس للأسف متهور وهو سايق دخل بينا في مطب دغدغنا ودغدغ العربية بعد المطب بشوية السواق تعب فنزل وركب سواق تاني كان حكيم وغير متهور وبيعرف يوزن الأمور قدر يحل مشكلة الميكروباص وصلحه وباقي فيه شوية شغل بدأ يصلحه على مراحل ومشي بعدها كويس بالميكروباص وبرغم أن في مطبات كتير إلا أنه قدر يكمل وفي النهاية تعب ونزل كمل المسيرة بعده التباع وقدر يصلح باقي الحاجات اللي في الميكروباص ومشى كويس بس وهو سايق فجأة بدأ يدخل بالميكروباص في مطبات ونقله براحة يا أسطى وهو مصمم في النهاية اتخنقنا منه قلنا له امشي مش عايزينك تكمل سواقة وهنجيب حد غيرك قالنا خلاص يا أساتذة هنوصل أقرب محطة ومن هناك حد غيري هيكمل معاكم بلاش هنا عشان ما تورطوش كدا مش كويس عشان ما فيش حد هيعرف يكمل بيكم الطريق واحنا صممنا وراسنا وألف سيف المهم نزلناه المهم السواق اللي هو جابوه يكمل الطريق مكانه ماشي زي ما يكون شارب مش شايف دخلنا في 100 مطب على ما يوصل للمحطة اللي اتفقنا أنه هيوصلنا ليها وناخد ميكروباص تاني أنضف ولما وصلنا ركبنا ميكروباص بس ايه الواحد انشرح بعد ما الواحد اتدغدغ من اللي فات بسواقينه ميكروباص جديد يفتح النفس كله مزز حاجة جميلة وطلع بينا السواق وساق فجأة اتقلب بينا ولقيت نفسي في حضن السواق والميكروباص الجديد اتفرم

أبطال قصتي الميكروباص الأول الجمهورية الأولى وسواقينه عبد الناصر ونزل في مطب النكسة والسواق التاني السادات وصلح اللي اتكسر بانتصار أكتوبر وباقي الحاجات اللي سابها استلام الأرض بالتدريج والسواق التالت مبارك وبداية حكمه والحتة الي كمل تصليحها سينا واستلام طابا السواق اللي جابه مكانه المجلس العسكري ومطباته الرخمة

الميكروباص التاني الجمهورية التانية وركبناه بعد الثورة أما المزز دا الأمل اللي شفناه بعد الثورة حاجة حلوة وللأسف ما كملتش لأنه اتقلب ولقيت نفسي في حضن مرسي لبسته

أما الميكروباص فهو مصر وأنا أبقى مين أنا الثورة والثوار

الخطأ لا يبرر بخطأ

2013-02-02T00:10:00.000+02:00

لا يبرر الخطأ بخطأ بمعنى ما أقولش انك غلطان ترد تقول ما كل الناس بتعمل غلط أفظع مني مش مبرر ان فلان أخطأ انك تبرر خطأهك بأن الناس تخطأ..

في مشكلتين حابب أتكلم فيهم

المشكلة الأولى:

للأسف تعاملنا مع مشاكل في حياتنا اليومية بهذا الأسلوب، تبرير الناس للشخص الي اتعرى قدام الإتحادية أنه غلطان بلطجي ليه نزل المظاهرات حقه ينزل وحقك تحمي لكن مش من حقك تتعامل ببشاعة عارية تماما من أي إنسانية ومش معنى كدا أني بقول أن اللي ضرب مولوتوف أو تعامل بعنف انه صح وأبرر تعامل الشرطة بهذا الأسلوب الهمجي المخطأ يعاقب من الطرفين الشرطة والمتظاهرين كفاية تعميم بالبلطجة مش معنى أن الناس نزلت تقول كفاية يوصفوا بالبلطجة وصور التشويه كفاية قلة أدب لو في شخص بلطجي وقليل الأدب هو اللي عنده انحراف فكري في مخه ويتعامل مع الناس أنهم بلطجية وسياسة الشرطة مش هتتعدل لأن الفكر الجديد من الإخوان زي الفكر القديم من مبارك

المشكلة التانية :

نفس الأولى النبرة الخارجة كل ما مرسي يخطأ فين اللي عصرو الليمون مبسوطين أكيد ما حدش بيشوف الخطأ ويفرح بيه وأكيد ما كانش الهروب من مرسي في شفيق.. مرسي تريبة الإخوان طلع زي مبارك أمال شفيق تربية مبارك هيطلع زي مين؟؟ اشتروا دماغكم لأن عمر ما كان شفيق الحل ولا هيكون وبطلو اصطياد في المياه العكرة كل ما تحصل مصيبة في البلد، مش كون أن في مصيبة بتحصل أني هولول وأقول يا ريت كان شفيق لأن اللي أنا شايفه منكم ما بتعملوش حاجة غير الشماتة ودا أسلوب قذر لا مؤاخذة في التعبير

في النهاية مشكلتنا احنا بنخلقها بايدينا لانه كان عندنا اكتر من فرصة للهروب منها واحنا بنوصل نفسنا ليها بنفسنا

خطيب الجمعة والفيسبوك

2013-02-01T15:40:00.002+02:00

بيعجبني الإمام في خطبته برغم أن ليا تحفظات على بعض خطبه وطريقة إلقائها لكن كلامه على المنبر النهاردة أنقلهلكم....

بدأ قوله في نهاية الخطبة بعد كلامه عن التغير مننا وان ازاي الناس عايز تتغير وبتعيب على التعليم وراهن أن ما فيش طالب في إعدادية أو ابتدائية إلا وغش ودخله حل الامتحان وضرب مثل ببنت اتخرجت وما تعرفش تقرأ هو حضر القصة على كلامه كانت في الترم الاول مجموعها 53 من 140 والترم التاني بمساعدة عامل البوفيه جابت 131 حقيقة صدق لان الناس تطالب التغير وهي رافضة أنها نفسها تتغير ذكرني الإمام ببيت الشعر "نعيب زماننا والعيب فينا وما لزماننا عيب سوانا" بعد نهاية القصة بدأ يتكلم ويقول:

جماعة قالولي: يا شيخ علي في مشايخ ليهم حساب على الفيسبوك ليه حضرتك ما لكش حساب زيهم .

هو : نعمل حساب على الفيسبوك ليه لأ ورحت جبت وصلة النت واهو اتابع الاخبار بالمرة بدل ما اشتري كل يوم جرنال ب 2جنيه.

هم: عشان يبقى عندك حساب على الفيسبوك لازم يكون عندك إيميل.

هو: اعمل يا ابني ايميل طبعاً أنا ماليش في الكلام دا ولا بعرف فيه اهو المهم اتعمل الايميل والفيسبوك ودخلت عليه ويا رتني ما دخلت فعلا يا ريتني ما دخلت قلة أدب وبذائة وسفالة من ناس المسمى أنهم مشايخ وتطاول بالسان وصل لحد التكفير ناس زي حالتي مشايخ لمجرد عدم انتمائه للجماعة وأردف قائلاً احنا لو في دولة قانون.. دلة قانون بحق دول يتعدموا يا ناس كفاية قلة أدب وعايزين حالنا يتغير دول في الإسلام يقام عليهم الحد بالكلام اللي بيقولوه والمفترض انهم مشايخ واصحاب دين ولا هم مشايخ ولا اصحاب دي .. وأكمل حديثه بكرا كل واحد هيكفر التيار الغير منتمي له ويخون الطرف الآخر

وانتهت الخطبة بالدعاء لمصرنا وتوحد الناس وعدم التقاتل لكن ما قاله حقيقة بمعنى الكلمة لأننا لسنا في دولة قانون

الثقافة والعلم

2013-01-30T15:41:00.000+02:00

أنت إنسان مثقف متعلم فاهم الدنيا ماشية ازاي، جملة بنسمعها في حياتنا كتير لما نتعامل مع الناس السؤال الأهم هل الثقافة تساوي العلم أم هناك اختلاف؟؟ طبعاً في اختلاف ومن وجهة نظري المتواضعة الثقافة أهم وأفضل من العلم فأنت تتعامل في حياتك اليومية بالعلم بتكتب طلباتك بالعلم اللي اتعلمته وهو الكتابة بتشتغل مهنتك بالعلم اللي اتعلمته سواء كنت طبيب، مهندس، أو حتى نجار لكن مش شرط أنك تكون متعلم أنك تكون مثقف بدليل أراء بعض المتعلمين التي تبنى على خلفية من معلومات عامة بتكون خطأ لأن الثقافة تكتسب بطرق كتير زي القرائة، التجارب، الانفتاح على ثقافات أخرى، متابعة الأخبار وليس شرط تكون أخبار سياسية لأنه هناك أخبار علمية اقتصادية ودي أبسط الأمور عشان كدا مش بعيد تلاقي جاهل مثقف وتلاقي متعلم غير مثقف لأن ممكن يكون المتعلم وضع نفسع في قالب ضيق بتطوير منظوره العلمي في مجاله كالطبيب لا يقرأ سوا في الطب لكن ممكن تلاقي فلاح مثقف بالرغم من أنه غير متعلم وهنا تأتي طريقة اكتسابه باحتكاكه بطبقات مجتمعية مختلفة من طبيب محامي معلم أو متابعة التليفزيون والأخبار السياسية والاقتصادية فيحب توسيع أفقه وتطويره بمتابعة ما يحدث من حوله من العالم وممكن تسأله في شيء عن دولة أجنبية ويجاوب أفضل من أي شخص آخر لمتابعة أخبار هذه الدولة في النهاية الثقافة لا تقاس كما الذكاء لا يقاس فهناك شخص ذكي في مجال دون آخر متفوق في الرياضيات لكنه فاشل في الكيمياء فيصعب علينا الحكم عليه بأنه إنسان فاشل
في النهاية أتذكر كلمة أينشتاين " الثقافة هي ما يبقى بعد أن تنسى كل ما تعلمته في المدرسة" بمعنى سيأتي يوم ولن تتذكر سوا ما اكتسبتها من خبرات وثقفافة لأنك من سعيت لاكتسابه ولم تلقن به لأن التلقين من وجهة نظري ينسى بعكس التجربة

الصيانة والبنية التحتية

2013-01-29T14:06:00.004+02:00

مشكلة البنية التحتية لمصر خدمة ما بعد التنفيذ بمعنى دور شركات الصيانة ملغي ما فيش صيانة للبنية التحتية من طرق، كباري، سكك حديد، مدارس، مستشفيات وغيره... الفكرة أن دور شركات الصيانة فاهمينه غلط مش مستوعبينه فاهمين أن الصيانة فقط للشيء التالف بإعادة تصليحه الطريق اتكسر صلحه بالترقيع جدار المدرسة شرخ رممه الفصول غير مؤهلة امسحها وحاول تسايس أمورك وتمشي حالك ... حل المشكلة دي عشان نحافظ على البنية التحتية للبلد من أي خراب إنشاء شركات صيانة دورها صيانة دورية للمنشئات كلها سواء حصل تلف أم لم يحدث وتكون شهريا عن طريق مناقصات منها حليت مشكلتين حافظت على البنية التحتية من الخراب ووجدت فرص عمل جديدة للشباب ويفضل أن تكون شركات الصيانة حكومية ليعود دخلها لخزانة الدولة ويكون في الشركة فرع مسئول عن النظافة بمعنى كل مصلحة حكومية ومدارس ومستشفيات وجامعات وطرق مسئولة عن نظافة المكان كله وعن نظافة الطرق بكنسها وغسلها وتشجيرها لكن الظاهر من نظافة الاماكن العامة لا شيء صفر ادخل مستشفى أو مدرسة أو أي مصلحة حكومية أكرمكم الله من المناظر اللي تشوفها والروائح .... الحل الصيانة الدورية حتى لا تستهلك المباني لأنها تكون كويسة بداية إنشائها وتتلف بمرور الزمن وعدم النظر لها وصيانتها.

عدالتكم مبتورة

2013-01-26T17:29:00.001+02:00

العجب كل العجب من قضية مجزرة بور سيعد بعد النطق بها تذكرت قوله صلى الله عليه وسلم أنه إذا سرق فيهم القوي تركوه وإذا سرق فيهم الضعيف أقامو عليه الحد وهذا ما حدث بأن تم تسليم الأداة للعدالة وترك المحرك الرئيسي لهذه المجزرة وما أقوله ليس بتعاطف مع المدانين في الحكم الصادر ضدهم لكن هذه عدالة مبتورة ناقصة المعالم عندما تحاسب الضعيف وتترك القوي المدانين اليوم والصادر ضدهم أحكام يستحقو ما صدر بحقهم ولكن أين أصحاب الياقات البيضاء من هذه العدالة؟؟؟ ما تعجبت إليه من الأحكام الصادرة أحد المتهمين محمد عادل شحاته والشهير بحمص بأن تهمته صاحب إشارة الهجوم على أولتراس أهلاوي ومنسقه مع قيادات أمن بور سعيد!! كيف تكون التهمة الموجهة التنسيق مع قيادات الأمن ويحاكم هو وتترك قيادات الأمن حرة ولا يحاكمو برغم أن المسؤولية كاملة تقع على عاتقهم سواء بالتنسيق أو بالتقصير

للأسف وطني العزيز عدالتكم مبتورة

رسالة لكل سياسي

2013-01-22T22:45:00.003+02:00

سيدي الرئيس الحالي والقادم أيا كنت سيدي الوزير، المحافظ، السياسي رجاء طلب ممكن ما تستخفش بعقلي!!! أنا مش أهبل وعبيط، أنا مش من الهند، ولا كوكب المريخ. أنا مش من أرض السند والهند، أنا من مصر، أنا لا أعمى ولا مجنون، أنا عاقل وبشوف، وأسمع.. ليا عقل يوزن الأمور، الصح والخطأ. ليا أذن تفرق الكدب والصدق. ليا عين تشوف مين كويس ومين سيء... ممكن طلب ما تستخفش بعقلي!!! ما تستخفش لأني إنسان بيفهم، لأني عاقل بيفكر، لأني لسة ما دقتش غربان على قفايا، لأنك لما بتكدب بتهين عقلي، بتهين كرامتي الفكرية، مش مطلوب منك تقول تصريح كدب احفظه في سرك وما تقولوش أحسن ما تكدب وتستخف بيا لأني مش عيل صغير. عايزني اقول ايه لما أشوف ناس متقطعة في حادثة قطر وناس مش لاقية سراير في المستشفى ولا معاملة آدمية وأنت بتلف على مريض وبتسلم عليه على أساس أنه بيتعالج أحسن علاج. ما طلبتش منك تكدب وتستخف بعقلي لأنها واضحة ومفهومة.. ومش ذنبك أنك شايل حمل تقيل لكن ذنبك أنك ما بتسعاش خطوة للإمام لحله وذنبك أنك تكدب. مش ذنبك أنك مستلم دولة ضايعة اقتصاديا لكن ذنبك أنك بتهدر المال العام وتصرف في جانب دون آخر في الداخلية وكأنك بتجهزهم للحفاظ على كرسي السلطان. ما طلبتش منك تكدب وتقول تصريح مستفز لمشاعر الناس وكأنهم جماد بلا قلب ولا مشاعر كأننا بهايم ما بنحسش. استخفافك بينا إهانة لينا فما تزعلش لما الناس تهينك الزم حدودك وتعامل بمبدأ الرجولة وكن صادق مش شرط مع نفسك ممكن تكون متعود تكدب على نفسك لكن ما تتعودش تكدب علينا لأننا عايشين على كوكب الأرض مش كائنات فضائية مش عارفين ايه بيحصل حوالينا.

سبب الكلام استفزاز مرسي بتصريحه "المملكة أفضل دولة في العالم معاملة للمصريين" وكأننا جايين من كوكب الهولولكو ومش فاهمين ولا شايفين المعاملة هناك ازاي

إنـســـان

2013-01-15T23:03:00.003+02:00

عندي إحباط رهيب من كميته مش قادر أوصفه تعبان نفسيا من البلد زهقت اتخنقت حاسس ان البلد مش مكتوبلها تكون كويسة مش طالب كتير في البلد دي طالب إني أحس إني إنسان كلمة إنسان كلمة رهيبة وليها معاني كتيرة مش أي حد يقدرها ما قلتش عايز أعيش في جنة خضراء وعايز عيشة مرتاحة وعربية ومرتب عالي وشقة جميلة وخدمات عالية المستوى ما يهمنيش كل دا يهمني أن البلد دي تفهم يعني إيه إنسان يعني ايه كرامة ليه المريض في المستشفى بيتعامل أسوأ معاملة وبدون اهتمام مش مطلوب ان الخدمة في المستشفى تكون فندقية مش بطمح لدا لكن حسس المريض أنه إنسان أنك مهتم بيه بصحته لأنك لو قدرت أنه إنسان أنا متأكد ان الخدمات هتكون كويسة ليه لما أدخل مصلحة حكومية أتمرمط وأنا بخلص ورقة وبتعامل مع 10 موظفين من كل دور عشان ورقة ويتنك عليا وكأنه بيتفضل ويمن عليا بالعمل دا عايز أكون إنسان أدخل المصلحة الحكومية مصلحتي تخلص بكل احترام مش طالب اني ادخل مكان مكيف وفاخر طالب معاملة إنسانية وبكل رقي وأخلاق أدخل قسم الشرطة ما ألاقيش لفظ غير محترم وأسلوب سيء في التعامل عشان بخلص ورقة عايز أكون إنسان نفسي الحاكم اللي يجي ما يفهمش أنه بيتعمل مع رعاع وأنه بيتفضل علينا ويمن بفضل خدماته اللي بيقدمهلنا ويتعامل ويفهم أنه خادم للإنسان الإنسان الكلمة اللي ربنا قالها في قرآنه بكل معاني الاحترام { لقد خلقنا الإنسان في أحسن تقويم} وقوله { وَلَقَدْ كَرَّمْنَا بَنِي آدَم وَحَمَلْنَاهُمْ فِي الْبَرّ وَالْبَحْر وَرَزَقْنَاهُمْ مِنْ الطَّيِّبَات وَفَضَّلْنَاهُمْ عَلَى كَثِير مِمَّنْ خَلَقْنَا تَفْضِيلًا } وسمى سورة في القرآن باسم الإنسان

الدول لا تفلس

2013-01-07T10:45:00.001+02:00

ادخل عليا بالشعار. "مصر لن تركع" ، لا لا لأ يا افندم الشعار التاني"مصر مش تونس" هو دا مصر مش تونس ما هو ما فيش دول بتفلس الدول ما بتفلسش الدول بتنهار وتعيش على المجاعة أنا على يقين أن الرئيس ما يمتلكش عصاية موسى السحرية هيوجهها ومصر تكون من الدول المتقدمة الاقتصادية لكن اللي أنا متأكد منه برضه أن لما يطلع رئيس وزراء يقول الدول ما بتفلسش يبقى فاشل ونظرته دي ممكن تاخد البلد للانهيار وهو لا يشعر لان كلمة زي دي تدل على أنه ما لوش خبرة في إدارة اقتصاد دولة لو الدولة ما بتفلسش طيب هي بتدفع رواتب الموظفين ازاي؟؟ ولا بتطور المنشئات والبنية التحتية للبلد من فلوس مين؟؟ رسالتي اللي بتمناها توصلكم بلاش أسلوب تفكير عدى عليه الزمن وتفكير العواجيز دا حضراتكم من أول الرئيس حتى وزرائه بتديرو بلد اقتصاد دولة مش اقتصاد منزلي استقيموا أثابكم الله

أنا والفوضى!!

2013-01-06T19:08:00.002+02:00

كفاية فوضى، كفاية خراب، خربتو البلد.... كلام كتير سمعناه اتقال كتير في البرامج التليفزيونية في الشارع في المواصلات ع القهوة في كل مكان وكانت الكلمة دي تتبعها كلمة زهقنا عايزين نعيش. لحظة يا عم الحاج لحظة يا أستاذ يا أختي يا أمي يا أبويا يا كل واحد في البلد هو ايه الفوضى ان البلد بتقف،أو المصالح بتعطل؟؟ نهائياً هم شحنو دماغ الناس ان دي فوضى لكن لو جينا نسأل نفسنا المعنى الحقيقي للفوضى هنلاقي كل الناس دي فوضوين كل اللي قالو كفاية سيبونا نعيش. اصحى الصبح هتلاقي انك عايش في فوضى لا نهائية مش مصدقني فكر معايا كدا انا صحيت رحت أجيب عيش من الفرن اللي في شارعنا لقيته بيقلي انت عارف ان العيش غلى يا أستاذ أبص بنظرة استعجاب!!! خرجت من بيتي رايح شغلي ركبت المواصلة فجأة لقيت السواق قال الأجرة زادت يا حضرات. طيب يا اسطى مين زودها هيقلك كل الناس واسأل السواقين هتلاقيها زايدة، برضه ما فهمتش حضرتك مين زودها يتضح منهم لدماغهم صحو الصبح قرروا يزودو الأجرة لمجرد انه عرف ان في علاوة نازلة للموظفين. ارجع من شغلك هات كيلو لحمة عشان مراتك تعمل غدوة حلوة تلاقي عم عبده الجزار بيقلك اللحمة زادت طيب برضه ايه اللي زودها يا عم عبده يقلك الدنيا غلت والايجار والظروف والجوابات ويتضح أن عم عبده قرر من دماغه يغلي اللحمة لمجرد انه عرف ان الموظفين رواتبهم زادت صدمة انه بيبص في رزقك ورزق عيالك قرر يشاركك فيه ويغلي من دماغه وهكذا ادخل البقالة السكر زاد ادخل مطعم اشتري سندوتشين فول تلاقيه زاد..... السؤال اللي في بالي يا جماعة الخير ليه غليتو الدنيا يتضح ان البقالة زادت لمجرد صاحب المحل رفع الايجار عليه او لسبب تافه وأنا شايفه حقد وغل ان الموظفين رواتبهم بتزيد واحنا دخلنا ثابت هو هو يا سبحان الله يا أخي بتبصلي في رزقي... تيجي للمواصلات تلاقي الاسطى زود الاجرة لمجرد انه الاجرة مش مالية عينه أو انه لما بيروح يغير زيت يلاقي بياع الزيت غلا زيت العربية هو كمان من دماغه وكله على الزبون سواق التاكسي وسواقي التاكسي نفس المبدأ كله على الزبون أنا مش هدفع الفرق دا وبرغم انه لما يغلي بيجيب الفرق أضعاف مضاعفة.

من هنا الفوضى مش احنا أو اضرابات او اعتصاامات الفوضى ان كل واحد في البلد عايز يمشي بمدأ وقانون لنفسه الفوضى انه ما يكنش في رقابة على الفوضويين دول ومركزين مع الناس اللي بتقلك ركزوا للفوضى والحرامية وتتهموهم بالفوضوية.

في النهاية الفوضى هي هي الاستغلالية هي هي النصب المقنع باسم لقمة العيش

الإسلام هو الحل

2013-01-03T13:58:00.001+02:00

صدقت الجماعة المحظورة في قولها الإسلام هو الحل لكن يبقى السؤال الأهم الإسلام من وجهة نظر من؟ لأني من أراهم على الساحة لا يوجد خير ممثل ومستخدم لهذا الشعار مع اختلافي بالرأي بأن الإسلام أسمى وأرقى من استخدامه كشعار لأنه خلق ومعاملات حسنة نعيش بها لكن ما نراه من تحول الجماعة المحظورة لجماعة محظوظة يأكد أن هذا الشعار لم يتعدى حناجرهم وتعاملو بخلق أبعد ما تكون للإسلام فتارة يكذبون وأخروى يقذفون المسلمون برغم أنها من كبائر الذنوب لقوله صلى الله عليه وسلم اجتنبوا السبع الموبقاتولا أظن أن ديننا فقط عبادات وتسبيح فكل الكون يسبح بحمد ربي لكن إسلامننا أسمى لقوله صلى الله عليه وسلم الدين المعاملة. لا يضيرني بأن هذه الجماعة في سدة الحكم ولست ضد أخونة الدولة لأنهم كالدواء أأخذه لأنظف به ما بداخلي ولكسر فزاعة الإخوان والأسطورة التي ابتدعوها لأن ما أراه أنهم أسطورة فاشلة.

نزعت الشوك وزرعت الصبار

2013-01-02T20:58:00.005+02:00

حلمي وطن.

وطن بسيط أعيش فيه مثلما عاش في داخلي سنين كثيرة، حلمي بسيط ألا يرفضني وطني ألا يطردني منه برغم ناره برغم آلامه وأشواكه المزروعة. لم أكن أحلم بأن يأتي يوماً وينتزع هذا الشوك ويزرع مكانه ورود كان حلم بعيد المدى لكن يأبى القدر بأن يطول هذا الحلم وتأتي رياح الحرية، نسيم الكرامة، عبق الانسانية وينتزع الشوك من وطني. سال الدم وتفتحت جراح لكن لم أأبه لهذا الألم وأنا أنتزع الشوك فعندما أتذكر أني سأزرع الورد، سأغرس الريحان على أرضي أتحمل. يا لها من فرحة وأنا أنظر لوطني وقد زال الشوك منه لكن فرحة ممزوجة بطعم الألم والحزن لما أراه على أرض الوطن من دم أهدر ذرفت دمعتين كانت أولاها حزن على كم الدماء المهدرة وأخراها فرح بانتزاع الشوك وانتهاء عهد الظلم والاستبداد. حملت بيدي ريحان الحرية لأغرسه تخليدا لذكرى من ساعدني ووقف بجانبي برغم أني لم أعرفه يوما ولم يعرفني لكن جمعنا هدف واحد. زرعت الريحان لأنظر أن من ساعدني بانتزاع الأشواك نزع شوكة بيدي وزرع بالأخرى زرع شيطاني.

شكراً أخوتي شهداء 25 يناير وآسف على كل ألم طالكم في حياتكم وبعد مماتكم.

مواطن بلا وطن