NEWS SUN

RFA | ក្រុមយុវជនខ្លះចាត់ទុកវិធីស្នាមញញឹមខ្មែរបំផុសស្មារតីជាតិនិយម និងបង្ហាញគុណតម្លៃប្រាសាទបុរាណកេរមរតកដូនតា | hot news

noreply@blogger.com (Sotheavy royals) — Thu, 31 Oct 2024 09:58:00 +0000

ក្រុមសិល្បករ និងក្រុមយុវជននៅខេត្តសៀមរាបបានដើរដង្ហែក្បូនទ្រង់ទ្រាយធំក្នុងពិធីស្នាមញញឹមខ្មែរលើកទី០២ នៅបរិវេណប្រាសាទអង្គរវត្ត ដើម្បីបំផុសស្មារតីជាតិនិយម និងបង្ហាញពីគុណតម្លៃប្រាសាទបុរាណកេរមរតកដូនតា ក្នុងបំណងផ្សព្វផ្សាយពីទេសចរណ៍វប្បធម៌។

ពួកគេស្លៀកពាក់ឈុតបុរាណ បង្ហាញកាយវិការរស់រវើក រំលឹកគុណបុព្វបុរសខ្មែរ និងដើម្បីអបអរ ខួបលើកទី២០ ឆ្នាំ នៃការឡើងគ្រងរាជ្យរបស់ព្រះមហាក្សត្រ សម្តេច ព្រះនរោត្ដម សីហមុនី។

មនុស្សរាប់ពាន់នាក់ ភាគច្រើនជាយុវជន និងសិល្បករបានចូលរួមពិធីស្នាមញញឹមខ្មែរលើកទី០២ នៅក្នុងបរិវេណប្រាសាទអង្គរវត្ត រយៈពេលពេល ២ថ្ងៃ ចាប់ពីថ្ងៃទី២៩ ដល់ថ្ងៃទី៣០ ខែតុលា។

ពួកគេបានដើរក្បួនចម្រុះគ្នាតាមទម្រង់ប្រពៃណីជាតិ ដោយយុវជនខ្លះស្លៀកពាក់ប្រពៃណីរួមមាន ឈុតល្ខោនខោល ល្បុក្កតោ ឈុតព្រះមុនីឥសី មេទ័ពសម័យបុរាណ និងឈុតស្តេចសម័យអង្គរ អមដោយគ្រូអាចារ្យស្លៀកស បែបព្រហ្មញ្ញសាសនាជាដើម។ ពិធីនេះធ្វើឡើងដើម្បីបង្ហាញឱ្យកូនខ្មែរជំនាន់ក្រោយ និងភ្ញៀវទេសចរបានឃើញនូវទិដ្ឋភាពអាណាចក្រអង្គរ បំណងពញ្ញាក់អារម្មណ៍ឱ្យកូនខ្មែរដឹងគុណ បុព្វបុរសខ្មែរដែលពលីជីវិតការពារទឹកដី។

សិល្បករខ្មែរគ្រងឈុតមេទ័ពសម័យអង្គរ លោក លាង ឧត្តម ប្រាប់វិទ្យុអាស៊ីសេរីថា វត្តមានរបស់លោកដែលចូលរួមកម្មវិធីនេះ ដើម្បីផ្សព្វផ្សាយពីស្នាដៃវប្បធម៌ខ្មែរ និងបង្ហាញពីភាពអង់អាចមេទ័ពសម័យបុរាណ ធ្វើចម្បាំងការពារប្រជានុរាស្ត្រ។

លោក លាង ឧត្តម៖ «ការស្លៀកពាក់នេះបង្ហាញពីមេទ័ពអង់អាចក្លាហាននាសម័យអង្គរ រាល់មេទ័ពទាំងអស់សុទ្ធតែមានស្នាដៃបន្សល់ទុកនៅក្នុងអង្គរវត្ត ជាពិសេសអ្នកដែលជួយថែទាំមរតកជាតិ»។

យុវជនមួយរូបទៀតគ្រងឈុតអប្សរា កញ្ញា សំអុល សុមនា យល់ថា កញ្ញាចូលរួមវិធីនេះដើម្បីផ្សព្វផ្សាយឱ្យភ្ញៀវទេសចរស្គាល់ពីវប្បធម៌ខ្មែរ ដែលមានទំនៀមទម្លាប់ល្អផូរផង់ និងថ្លៃថ្នូរ លើកមុខមាត់ជាតិខ្មែរ។ កញ្ញាអំពាវនាវឱ្យពលរដ្ឋខ្មែរចូលរួមគាំទ្រ និងផ្តល់តម្លៃផលិតផលខ្មែរ ព្រមទាំងសំលៀកបំពាក់ប្រពៃណីខ្មែរ។

កញ្ញា សំអុល សុមនា៖ «ចង់ឱ្យបងប្អូនខ្មែរទាំងអស់គ្នាចូលរួមលើកស្ទួយនិងគាំទ្រស្នាដៃខ្មែរយើង ដូចជាពេលមានបុណ្យទាន និងកម្មវិធីអ្វីមួយសូមឱ្យចូលរួមស្លៀកពាក់ខោអាវបូរាណឱ្យភ្ញៀវបរទេសស្គាល់ខ្មែរយើងកាន់តែច្បាស់»។

យុវជនម្នាក់ទៀត គឺកញ្ញា ឡេ លីមី និយាយថា កញ្ញាស្លៀកពាក់ឈុតប្រពៃណីមកចូលរួមវិធីនេះ ដើម្បីលើកកម្ពស់តម្លៃស្ត្រីខ្មែរបង្ហាញភ្ញៀវទេសចរឱ្យស្គាល់ពីសំលៀកបំពាក់ស្ត្រីខ្មែរកាលពីបុរាណ៖

កញ្ញា ឡេលីមី៖ «ស្នាមញញឹមគឺជាសិល្បៈមួយដែលមានភាពទាក់ទាញ ដូចជាយើងញញឹមដាក់ភ្ញៀវបរទេសទៅគេពេញចិត្ត ថា ប្រទេសកម្ពុជាពិតជារួសរាយមែន ដែលទទួលស្វាគមន៍ពួកគេយ៉ាងកក់ក្តៅ»។

ក្រសួងវប្បធម៌ និងវិចិត្រសិល្បៈ សមាគមសិល្បករខ្មែរ អាជ្ញាធរជាតិអប្សរា និងអាជ្ញាធរខេត្តសៀមរាបបានរួមគ្នារៀបចំកម្មវិធី «ស្នាមញញឹមខ្មែរលើកទី០២ » ក្រោមប្រធានបទ" យើងរួមគ្នាដើម្បីវប្បធម៌ ទេសចរណ៍" ដើម្បីជំរុញបង្កើតព្រឹត្តិការណ៍សកម្មភាពសិល្បៈវប្បធម៌ព្រមទាំងសកម្មភាពផ្សេងៗ បំណងផ្សព្វផ្សាយផលិតផលខ្មែរ ទាក់ទាញភ្ញៀវទេសចរណ៍ជាតិ អន្តរជាតិ។

ព្រឹត្តិការណ៍នេះអាជ្ញាធរថា ដើម្បីបំផុសស្នាមញញឹមពលរដ្ឋខ្មែរតាមរយ:ការតាំងពិព័រណ៍ស្នាដៃផ្សេងៗរបស់ខ្មែរ បង្ហាញទៅកាន់ពិភពលោក ដែលជាផ្នែកមួយផ្សព្វផ្សាយពីសិល្បៈវប្បធម៌ជាតិ រុញឱ្យវិស័យទេសចរងើបឡើងវិញ។

កម្មវិធីនេះមានការតាំងបង្ហាញពិព័រណ៍មុខម្ហូបខ្មែរ បន្លែធម្មជាតិ អនុផលព្រៃឈើ សិប្បកម្ម និងផលិតផលចម្រុះរបស់ខ្មែរជាដើម។

អាជ្ញាធរអះអាងថា ពិធីនេះមានមនុស្សចូលរួមជាង ៣ម៉ឺននាក់ (៣០.៩៧៨) ក្នុងនោះមានសិល្បករជាង ៥០០ នាក់ និងភ្ញៀវទេសចរអន្តរជាតិជាង ៣ពាន់នាក់ (៣.១៧៨)។ ព្រឹត្តិការណ៍នេះមានសិល្បករល្បីៗស្លៀកពាក់ឈុតបុរាណ លេងល្បែងប្រជាប្រិយខ្មែរ រាំប្រពៃណី និងអមដោយតន្ត្រីករសម័យបុរាណជាដើម។

រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា បានថ្លែងក្នុងវិធីនោះថា កម្មវិធីនេះជាព្រឹត្តិការណ៍ប្រវត្តិសាស្ត្រ ដើម្បីបង្ហាញឱ្យកូនខ្មែរ និងភ្ញៀវទេសចរស្គាល់នូវពិធីឡើងគ្រងរាជ្យសម្បត្តិរបស់ព្រះមហាក្សត្រខ្មែរសម័យបុរាណ រហូតដល់បច្ចុប្បន្ន។

អ្នកស្រី ភៀង សកុណា៖ «យើងដឹងហើយពេលស្ដេចឡើងគ្រងរាជ សព្វថ្ងៃ យើងធ្វើមិនបានដូចពីមុនទេ! ប៉ុន្តែយើងត្រូវដឹងក្នុងនាមខ្មែរថា សម័យអង្គរមានកិត្តិសព្ទល្បីល្បាញដល់កម្រិតណា? ដូច្នេះហើយនៅក្នុងពិធីឡើងគ្រងរាជរបស់ព្រះមហាក្សត្រខ្មែរ តែងតែមាននូវវត្ថុបញ្ចក្សត្រមួយចំនួន និងកេតនភណ្ឌចាំបាច់ ក្នុងការឡើងគ្រងរាជ»។

អាជីវកលក់វត្ថុអនុស្សាវរីយ លោក មាគ ស៊ន យល់ថា វិធីនេះមានសារៈសំខាន់ណាស់ ផ្តល់ឱកាសឱ្យលោកបង្ហាញស្នាដៃច្នៃប្រឌិតផលិតផលខ្មែរ ផ្សព្វផ្សាយប្រាប់ភ្ញៀវទេសចរ។ លោកយល់ថា ព្រឹត្តិការណ៍នេះជាផ្នែកមួយទាក់ទាញភ្ញៀវទេសចរឱ្យកើនឡើងវិញ។

លោក មាគ ស៊ន៖ «នេះជាឱកាសក្នុងការបើកបង្ហាញវប្បធម៌របស់យើង និងបងប្អូនគាំទ្រផលិតផលខ្មែរយើង ហើយតាមកម្មវិធីស្នាមញញឹមនេះ ក៏ឃើញមានពលរដ្ឋខ្មែរនិយមងាកមកប្រើប្រាស់ផលខ្មែរច្រើន»។

កាលពីខែកញ្ញាកន្លងទៅ អាជ្ញាធរពាក់ព័ន្ធបានរួមគ្នារៀបចំកម្មវិធី «ស្នាមញញឹមនៃកម្ពុជាលើកទី០១» ដើម្បីផ្សព្វផ្សាយវប្បធម៌ បំណងទាក់ទាញភ្ញៀវទេសចរមកទស្សនារមណីយដ្ឋានអង្គរ និងដើម្បីរុញឱ្យវិស័យទេសចរណ៍ងើបឡើងវិញ ក្នុងពេលដែលកម្ពុជាកំពុងញាំញីដោយបទឧក្រិដ្ឋធំៗមួយចំនួន ដូចជាការជួញដូរមនុស្ស ការឆបោកតាមអនឡាញ ការចាប់ជំរិត និងអំពើហិង្សាផ្សេងៗ ដែលធ្វើឱ្យភ្ញៀវទេសចរបរទេសញញើតមកទស្សនាប្រទេសកម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

From ព័ត៌មានថ្មីៗ | RFA
via_IFTTT

RFA | សិស្សជាង១សែននាក់បានប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប | hot news

noreply@blogger.com (Sotheavy royals) — Thu, 31 Oct 2024 07:58:00 +0000

សិស្សជាង ១សែននាក់ប្រឡងជាប់សញ្ញាបត្រមធ្យមសិក្សាទុតិយភូមិក្នុងឆ្នាំ២០២៤នេះ។ សេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា នៅថ្ងៃទី៣០ ខែតុលា នេះ ឱ្យដឹងថាសិស្សជាង ១សែន (១០៦.៣៥១) នាក់បានប្រឡងជាប់សញ្ញាបត្រមធ្យមសិក្សាទុតិយភូមិ ដែលស្មើនឹង ៧៩ភាគរយ នៃបេក្ខជនដែលមកប្រឡង។

ក្នុងចំណោមសិស្សជាង ១សែននាក់នោះ មានបេក្ខជនជាប់និទ្ទេស អា (A) មានចំនួនជាង២ពាន់ (២.២១៦) នាក់ និទ្ទេសបេ (B) ចំនួនជិត ១ម៉ឺន (៩.៧០១) នាក់ និទ្ទេសសេ (C) ចំនួនជាង ២ម៉ឺន (២២.៦៧៥) នាក់ និទ្ទេសដេ (D) ចំនួនជិត ៤ម៉ឺន (៣៦.៦៨៣) នាក់ និងនិទ្ទេសអឺ (E) ចំនួនជាង៣ ម៉ឺន (៣៥.០៧៦) នាក់។

ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបបានប្រព្រឹត្តទៅចាប់ពីថ្ងៃទី៨ ដល់ទី៩ ខែតុលា ខណៈដំណើរការកំណែបានប្រព្រឹត្តទៅ ចាប់ពីថ្ងៃទី១១ ដល់ទី១៧ ខែតុលា។ នៅឆ្នាំ២០២៤ នេះ មានបេក្ខជនចុះឈ្មោះប្រឡងសរុបជាង ១សែន ៣ម៉ឺននាក់ (១៣៧.០៤០) ក្នុងនោះមានសិស្សស្រីជាង ៧ម៉ឺននាក់ (៧៤.៨៨២)។ នៅឆ្នាំនេះដែរ មានបេក្ខជនប្រឡងថ្នាក់វិទ្យាសាស្ត្រសង្គមច្រើនជាងឆ្នាំមុនៗ ដោយមានចំនួនជាង ៩ម៉ឺន ៧ពាន់នាក់ (៩៧.៦៨២) ខណៈថ្នាក់វិទ្យាសាស្ត្រ មានចំនួនជិត ៤ម៉ឺននាក់ (៣៩.៣៥៨)។

រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន កាលពីថ្ងៃទី២៧ ខែកញ្ញា លើកឡើងថា បេក្ខជនប្រឡងជ្រើសរើសថ្នាក់វិទ្យាសាស្ត្រសង្គមច្រើនជាងឆ្នាំមុនៗ ដោយសារតែសិស្សមួយចំនួនពុំមានចំណេះដឹងគ្រប់គ្រាន់ ដើម្បីជ្រើសរើសយកថ្នាក់វិទ្យាសាស្ត្រ។

ក្រសួងកំណត់យកថ្ងៃទី៣០ ខែតុលា សម្រាប់ការប្រកាសលទ្ធផលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី៣១ ខែតុលា សម្រាប់ខេត្តផ្សេងៗ នៅទូទាំងប្រទេស។

កាលពីឆ្នាំមុន សិស្សប្រឡងជាប់បាក់ឌុបមានចំនួនជិត ១ សែន (៩៨.៤៦០) នាក់ ស្មើនឹង ៧២.៨៩ភាគរយ នៃអ្នកប្រឡងសរុប៕

From ព័ត៌មានថ្មីៗ | RFA
via_IFTTT

RFA | រដ្ឋាភិបាលរងការរិះគន់ថា ព្យាយាមបិទបាំងព័ត៌មានអំពីការបង្ក្រាបទីតាំងនៃសម្បុកឧក្រិដ្ឋជនឆបោកអនឡាញ | hot news

noreply@blogger.com (Sotheavy royals) — Thu, 31 Oct 2024 06:58:00 +0000

អាជ្ញាធរនៃរដ្ឋាភិបាលលោក ហ៊ុន ម៉ាណែត រងការរិះគន់ថា ព្យាយាមបិទបាំងព័ត៌មានអំពីការបង្ក្រាបទីតាំងនៃសម្បុកឧក្រិដ្ឋជនឆបោកតាមអនឡាញ។ អ្នកឃ្លាំមើលថា ការណ៍ដែលរដ្ឋាភិបាលមិនបង្ហាញតម្លាភាព និងបិទបាំងជនសង្ស័យពាក់ព័ន្ធនឹងអំពើឆបោកតាមអនឡាញ (Online) នោះ នឹងធ្វើឱ្យមហាជន និងអន្តរជាតិកាន់តែអស់ជំនឿលើការអនុវត្តច្បាប់ និងមានមន្ទិលសង្ស័យអំពីការប្រព្រឹត្តអំពើពុករលួយរបស់អាជ្ញាធរសម្រួលឱ្យក្រុមជនល្មើសអាចផ្លាស់ប្ដូរទីកន្លែងសម្រាប់ប្រតិបត្តិការអំពើឆបោកតាមអនឡាញពីមួយកន្លែងទៅមួយកន្លែងនៅលើទឹកដីខ្មែរ។

ពលរដ្ឋ និងអ្នកឃ្លាំមើលលើកឡើងថា ចំណាត់ការបង្ក្រាបរបស់កម្លាំងអគ្គស្នងការដ្ឋាននគរបាលជាតិនៅអគារពាណិជ្ជកម្មនៅតំបន់គីឡូ៣២។ ថ្មីៗនេះ អាចគ្រាន់តែជាឆាកល្ខោនសម្ដែងឱ្យល្អមើលតែប៉ុណ្ណោះ ដើម្បីឱ្យក្រុមបណ្ដាញអ្នកប្រតិបត្តិការឆបោកតាមអនឡាញផ្លាស់ទីទៅតាំងជម្រកឧស្សាហកម្មតាមអនឡាញពួកគេនៅតាមបណ្ដាខេត្តជាយដែនវិញ។

អ្នករត់តាក់ស៊ី (Taxi) ធ្លាប់ដឹកជនបរទេសទម្លាក់នៅអគារពាណិជ្ជកម្មគីឡូ៣២ បានរៀបរាប់ប្រាប់វិទ្យុអាស៊ីសេរីក្នុងលក្ខខណ្ឌមិនបញ្ចេញឈ្មោះថា អគារពាណិជ្ជកម្មស្ថិតក្នុងគីឡូ៣២ ដែលកម្លាំងសមត្ថកិច្ចបង្ក្រាបនោះគឺជា ជម្រកដ៏ធំមួយរបស់ក្រុមឧក្រិដ្ឋជនឆបោកតាមអនឡាញ ហើយជនបរទេសរាប់ពាន់នាក់ត្រូវគេបំបិទសិទ្ធសេរីភាពមិនអនុញ្ញាតឱ្យចេញមកក្រៅឡើយ។

លោកឱ្យដឹងថា កាលពីដើមឆ្នាំ២០២៤ នៅពេលលោកដឹកឥវ៉ាន់ និងជនបរទេសចូលទៅក្នុងអគារ ក្រុមសន្តិសុខបានត្រួតពិនិត្យតឹងរ៉ឹង និងមានច្រើនដំណាក់កាល ចំណែកឯជនបរទេសដែលត្រូវដឹកចូលទៅអគារទៀតសោតភាគច្រើនគឺជាជនជាតិចិន ឥណ្ឌា ឥណ្ឌូណេស៊ី ដែលមេការចិនបានទាក់ទងសម្រាប់ឱ្យបម្រើការងារអនឡាញនៅក្នុងអគារ។

ពលរដ្ឋថ្លែងលាក់ឈ្មោះ៖ «ពួកឥណ្ឌូណេស៊ីល្បីជាងគេ ប្រជាជនគេយកមកលក់ឱ្យចិន ធ្វើការឱ្យចិនហ្មង ប៉ុន្តែវាយកមកប្រកបអាជីវកម្មនៅស្រុកវាអត់កើតទេ វាយកមកតែស្រុកណាស្រួលដូចខ្មែរយើង និងឡាវ។ ជួនកាលវាមានបញ្ហាឈ្លោះគ្នាវាបាញ់តែគ្នាវាហ្នឹង រញ៉េរញ៉ៃណាស់។ ជួនកាលវាធ្វើទារុណកម្មជនជាតិផ្សេងៗដូចជាជនជាតិឥណ្ឌូណេស៊ីគេយកមកលក់។ ចិនវាអត់ខ្លាចទេ វាមកស្រុកខ្មែរវាត្រូវការតែលុយទេ វាធ្វើបាបតែជនជាតិផ្សេងទេ បើខ្មែរវាអត់ធ្វើបាបទេ»។

ការលើកឡើងនេះ គឺក្រោយពីកម្លាំងអគ្គស្នងការដ្ឋាននគរបាលជាតិប្រមាណ ៣០០នាក់ កាលពីថ្ងៃទី២៤ ខែតុលា បានបើកប្រតិបត្តិការទ្រង់ទ្រាយធំចុះបង្ក្រាបទីតាំងមជ្ឈមណ្ឌលអគារពាណិជ្ជកម្មមួយកន្លែងស្ថិតក្នុងស្រុកគងពិសី ខេត្តកំពង់ស្ពឺ ដែលមានមនុស្សជាង ១ពាន់នាក់ ដែលភាគច្រើនជាជនជាតិចិន និងជនបរទេសចម្រុះជាតិសាសន៍ផ្សេងទៀតស្នាក់នៅ។

វិទ្យុអាស៊ីសេរីមិនអាចសុំការឆ្លើយតបពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានទេ រហូតដល់ពេលផ្សាយនេះ។

ចំណែក អ្នកនាំពាក្យរងក្រសួងមហាផ្ទៃលោក ទូច សុឃៈ បញ្ជាក់ថា សំណុំរឿងនេះគឺស្ថិតក្នុងការស៊ើបអង្កេតរបស់កម្លាំងជំនាញនៃអគ្គស្នងការដ្ឋាននគរបាលជាតិ។ លោកបញ្ជាក់ថា ក្នុងពេលកម្លាំងជំនាញចុះប្រតិបត្តិការមនុស្សប្រមាណ ១ពាន់ក៏មិនត្រូវបានឃាត់ខ្លួនដែរ។

លោក ទូច សុឃៈ៖ «មិនមានការឃាត់ខ្លួនជនបរទេសជាង ១ពាន់នាក់ហ្នឹងទេ។ ការណ៍ដែលមានការប្រើពាក្យហ្នឹងតាមបណ្ដាញសង្គមផ្សេងៗហ្នឹង ដោយសារតែក្នុងពេលប្រតិបត្តិការភ្លាមៗបងប្អូនជាជនជាតិបរទេសចម្រុះជាតិសាសន៍ដែលធ្វើការនៅកន្លែងហ្នឹងគឺត្រូវបានឱ្យមកក្រៅអគារ ហើយមើលទៅហាក់បីដូចជាឃាត់ខ្លួនអ៊ីចឹង ប៉ុន្តែតាមពិតអត់មានការឃាត់ខ្លួន អត់មានការចាប់ អត់មានការចង បងប្អូនទាំងអស់ហ្នឹងដូចដែលយើងឃើញក្នុងរូបភាពហ្នឹងទេ។ វាគឺជាការត្រួតពិនិត្យរដ្ឋបាលមួយទាមទារឱ្យពួកគាត់ចេញពីក្នុងបន្ទប់ ចេញពីអគារមកទីលានខាងក្រោម ដើម្បីត្រួតពិនិត្យទៅតាមនីតិវិធីហូរហែជាដើម»។

ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ (Central) លោក ឌី ថេហូយ៉ា អះអាងថា ព័ត៌មានដែលលោកទទួលបានចំពោះការពង្រីកទីតាំងនៃបណ្ដាញក្រុមឧក្រិដ្ឋជនមិនមែនមានតែនៅក្រុងបាវិត និងតំបន់កាស៊ីណូព្រែកចាក ខេត្តកំពតប៉ុណ្ណោះទេ ប៉ុន្តែនៅតាមបណ្ដាខេត្តជាប់ព្រំដែនថៃដូចជាខេត្តឧត្តរមានជ័យ និងក្រុងប៉ោយប៉ែត គឺជាគោលដៅនៃកន្លែងដែលឧក្រិដ្ឋជនកំពុងប្រតិបត្តិការឧស្សាហកម្មឆបោកតាមអនឡាញនេះដែរ។

លោក ឌី ថេហូយ៉ា៖ «យើងបារម្ភខ្លាំងពាក់ព័ន្ធនឹងរូបភាពពិភពលោកមើលមកកម្ពុជាជា ទីតាំងមួយអសន្តិសុខ ឧក្រិដ្ឋជនដែលអាចធ្វើអីតាមតែអំពើចិត្តមិនទទួលបានការអនុវត្តចំណាត់ការឱ្យមានប្រសិទ្ធភាពធ្វើឱ្យគេមើលឃើញថា ប្រទេសកម្ពុជាគឺជាកន្លែងមួយដែលជាជម្រកនៃជនឧក្រិដ្ឋដែលប្រព្រឹត្តអំពើឧក្រិដ្ឋកម្មនៅកម្ពុជា។ អ្នកវិនិយោគក្ដី អ្នកទេសចរណ៍ក្ដីឧទាហរណ៍ថា បើគេមាន ១រយលានដុល្លារគេប្រហែលជាស្វែងរកប្រទេសណា ដែលមានសន្តិសុខ ការអនុវត្តច្បាប់មានប្រសិទ្ធភាពហើយគេមិនជឿទុកចិត្តចំពោះប្រទេសណាដែលគេបារម្ភអំពីសុវត្ថិភាព ជាពិសេសការធូររលុងនៃការចាត់វិធានការលើឧក្រិដ្ឋកម្ម»។

លោក ឌី ថេហូយ៉ា បន្ថែមទៀតថា នៅពេលដែលសមត្ថកិច្ចចុះប្រតិបត្តិការបង្ក្រាប ទីតាំងអាជីវកម្មសង្ស័យពាក់ព័ន្ធអំពើចាប់ជំរិត ឆបោកតាមអនឡាញច្បោលៗ ឬដោយដុំៗ និងមិនបង្ហាញរបាយការណ៍ឱ្យច្បាស់លាស់នោះទេ វានឹងធ្វើឱ្យមហាជន គ្មានជំនឿលើការអនុវត្តច្បាប់របស់សមត្ថកិច្ចក្នុងការលុបបំបាត់ និងបង្ក្រាបបញ្ហាឧក្រិដ្ឋកម្មឆបោកតាមអនឡាញនៅកម្ពុជាឱ្យមានប្រសិទ្ធភាព៕

From ព័ត៌មានថ្មីៗ | RFA
via_IFTTT

RFA | អ្នកកាសែត ដែលរងអំពើហិង្សាមិនទាន់ទទួលបានយុត្តិធម៌ ថែមទាំងរងការប្ដឹងផ្ដល់ទៅតុលាការទៀត | hot news

noreply@blogger.com (Sotheavy royals) — Wed, 30 Oct 2024 17:58:00 +0000

អ្នកកាសែតអនឡាញ (online) របស់គេហទំព័រសំអ៊ាងហតញូស៍ លោក លួន ភារិន និងក្រុមការងារ ដែលត្រូវបានបក្ខពួករបស់ម្ចាស់កន្លែងទូហ្គេមបាញ់ត្រីមួយកន្លែងនៅប៉ោយប៉ែត វាយដំលើរាងកាយតាំងពីខែមីនា រហូតដល់ពេលនេះ មិនត្រឹមតែមិនទទួលបានយុត្តិធម៌នោះទេ ថែមទាំងត្រូវបានម្ចាស់ផ្ទះល្បែងទូហ្គេម ប្ដឹងផ្ដល់ទៅតុលាការទៀត។ សម្ព័ន្ធអ្នកសារព័ត៌មាននៅកម្ពុជាបង្ហាញកង្វល់អំពីអំពើហិង្សា និងការបំភិតបំភ័យតាមផ្លូវច្បាប់ និងតុលាការ ទៅលើអ្នកសារព័ត៌មាន ដែលព្យាយាមធ្វើសេចក្ដីការណ៍អំពីបញ្ហារសើបនៅក្នុងប្រទេសកម្ពុជា។

រយៈពេលប្រមាណ ៩ខែ ក្រោយពីដាក់ពាក្យបណ្ដឹងទៅអធិការដ្ឋាននគរបាលក្រុងប៉ោយប៉ែត ពាក់ព័ន្ធការប្រើអំពើហិង្សា អំឡុងពេលចុះរាយការណ៍ព័ត៌មាននៅទីតាំងហ្គេមបាញ់ត្រីមួយកន្លែងក្នុងសង្កាត់ផ្សារកណ្ដាល ក្រុងប៉ោយប៉ែត មកដល់ចុងខែតុលានេះ អ្នកកាសែតអនឡាញ (Online) រងអំពើហិង្សាអះអាងថា មិនទាន់ទទួលបានយុត្តិធម៌ឡើយ។

អ្នកកាសែតអនឡាញ លោក លួន ភារិន រៀបរាប់ប្រាប់វិទ្យុអាស៊ីសេរី នៅថ្ងៃទី២៨ ខែតុលា ថា លោក និងសហការីពីរនាក់ ត្រូវបានបក្ខពួករបស់ម្ចាស់កន្លែងទូហ្គេមបាញ់ត្រីមួយកន្លែង នៅក្រុងប៉ោយប៉ែត វាយដំលើរាងកាយយ៉ាងដំណំ។ លោកថា លោកមានរបួសនៅត្រង់មាត់ រីឯក្រុមការងារម្នាក់រងរបួសត្រង់ក្បាល ហើយម្នាក់ទៀត ត្រូវគេវាយឱ្យរបួសធ្លាក់ឆ្អឹងស្មា។

លោក លួន ភារិន៖ «ចូលមន្ទីរពេទ្យ ៣នាក់។ យើងទៅគ្នា ៧-៨នាក់ដែរ។ គ្នាគេច្រើនណាស់ យើងចូលទៅកន្លែងគេ សុទ្ធតែពួកក្មេងញៀនថ្នាំ»។

អំពើហិង្សានេះ បានកើតឡើងនៅវេលាម៉ោងប្រមាណ ៨យប់ ថ្ងៃទី២ ខែមីនា ឆ្នាំ២០២៤ នៅពេលលោកចុះទៅធ្វើការឡាយផ្ទាល់ (LIVE) ដល់កន្លែងបើកល្បែងទូហ្គេមបាញ់ត្រីខុសច្បាប់របស់បុគ្គលឈ្មោះ សុខ អាង និងឈ្មោះ ក្រូច ឃឿន ដែលមានទីតាំងនៅភូមិប្រជាធម្មខាងលិច សង្កាត់ផ្សារកណ្ដាល ក្រុងប៉ោយប៉ែត ក្នុងខេត្តបន្ទាយមានជ័យ។

លោកបាននិយាយថា ក្រោយហេតុការណ៍ប្រើហិង្សាវាយដំរូបលោកនោះ លោកក៏បានប្ដឹងទៅសមត្ថកិច្ចមូលដ្ឋាន ដូចជា នគរបាលប៉ុស្តិ៍ និងថ្នាក់ស្រុកដែរ ប៉ុន្តែបែរជាត្រូវម្ចាស់ផ្ទះដាក់ល្បែងទូហ្គេមបាញ់ត្រីប្ដឹងលោកនិងមិត្តរួមការងារពីបទ «កកូរកកាយផ្ទះប្រជាពលរដ្ឋ» ទៅដល់សាលាដំបូងខេត្តបន្ទាយមានជ័យបានមុនលោកទៅទៀត។

លោក លួន ភារិន៖ «យើងប្ដឹងចូលប៉ុស្តិ៍ ប៉ុស្តិ៍គេថា ឱ្យយើងទៅឡើងស្នងការ។ ប្ដឹងនៅស្នងការនៅប៉ោយប៉ែត ២-៣ថ្ងៃហើយ គេអត់មានកោះហៅ ឬអ្នកខាងបទល្មើសបទអីមកទេ តែយើងក៏មិនដែលប្រាប់ថា ម៉េចអីម៉េច យើងអត់មានលុយចាយវាយ ក៏ឡើងមកភ្នំពេញវិញមក។ យើងដាក់ពាក្យប្ដឹង តែគេប្ដឹងយើងវិញទៀតនោះគេថា យើងទៅកកូរកកាយផ្ទះគេ។ គេដាក់ទៅដល់ខេត្តមុនយើងទៀតគេថា យើងទៅកកូរកកាយផ្ទះគេ។ ខ្ញុំអត់មានប៉ះពាល់ចូលទៅដល់ផ្ទះដល់អីទេ មានតែអ្នកទៅយកព័ត៌មាន គេទៅថតភស្តុតាង បានយើងហ៊ានផ្សាយ»។

អ្នកកាសែតអនឡាញរូបនេះ អះអាងថា លោកចុះទៅផ្សាយផ្ទាល់ដល់ទីតាំងល្បែងទូហ្គេមបាញ់ត្រីនោះ ដោយសារមានសំណូមពរពីប្រជាពលរដ្ឋជាច្រើន ដែល មានកូនចៅវក់នឹងល្បែងហ្គេមបាញ់ត្រី។ លោកបញ្ជាក់ថា មុននឹងលោកចុះទៅផ្សាយផ្ទាល់ពេលនោះ លោកក៏បានជូនដំណឹងដល់អាជ្ញាធរមូលដ្ឋានរួចហើយដែរ ប៉ុន្តែសមត្ថកិច្ចមិនយកចិត្តទុកដាក់។

លោក លួន ភារិន បង្ហាញការសង្ស័យថា ម្ចាស់ល្បែងហ្គេមបាញ់ត្រីឈ្មោះ សុខ អាង និងឈ្មោះ ក្រូច ឃឿន មានខ្នងធំហើយករណីនេះ អាចជាប់ពាក់ព័ន្ធនឹងការ ឃុបឃិតរបស់សមត្ថកិច្ចផង ព្រោះសមត្ថកិច្ចធ្វើរបាយការណ៍បង្វែរការពិតថា ម្ចាស់ល្បែងហ្គេមជាស្ត្រីមេម៉ាយ និងគ្មានការបើកទូហ្គេមទៅវិញ។

លោក លួន ភារិន៖ «ឆ្ងល់ថា ពេលកើតហេតុហើយ ក៏ប៉ូលិសចុះទៅក៏មិនចុះទៅឆែកឆេកន្លែងហ្នឹងដែរ។ ដល់ភ្ញាក់ឡើងគេរើឥវ៉ាន់ចេញអស់ គេយកទូរហ្គេមចេញបាត់អស់ បានគេទៅថតថា ផ្ទះនេះ អត់មានបើកកន្លែងហ្គេមអីទេ គេថា ម្ចាស់ផ្ទះ (ជាស្ត្រី) មេម៉ាយ អត់មានបើកអីទេផ្ទះទុកចោល»។

វិទ្យុអាស៊ីសេរី មិនអាចទាក់ទងម្ចាស់ល្បែងទូហ្គេមបាញ់ត្រីឈ្មោះ សុខ អាង និងឈ្មោះ ក្រូច ឃឿន ឱ្យឆ្លើយតបនឹងការលើកឡើងនេះបានទេ នៅថ្ងៃទី២៩ ខែតុលានេះ។ រីឯអធិការនៃអធិការដ្ឋាននគរបាលក្រុងប៉ោយប៉ែតលោក ព្រហ្ម ពិសិដ្ឋ និងស្នងការនគរបាលខេត្តបន្ទាយមានជ័យ លោក សិទ្ធ ឡោះ ក៏វិទ្យុអាស៊ីសេរី មិនអាចទាក់ទងរកការបំភ្លឺបានដែរ នៅថ្ងៃទី២៩ ខែតុលា ខណៈអ្នកនាំពាក្យក្រសួងព័ត៌មានលោក ទេព អស្នារិទ្ធ ទូរស័ព្ទចូលតែគ្មានអ្នកទទួល។

សម្ព័ន្ធអ្នកសារព័ត៌មានមានខេមបូចា បង្ហាញកង្វល់អំពីអំពើហិង្សា និងការបំភិតបំភ័យតាមផ្លូវច្បាប់ និងតុលាការទៅលើអ្នកសារព័ត៌មាន ដែលព្យាយាមធ្វើសេចក្ដីការណ៍អំពីបញ្ហារសើបនៅក្នុងប្រទេសកម្ពុជា។

នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា (CAMBOJA) លោក ណុប វី ប្រាប់វិទ្យុអាស៊ីសេរីនៅថ្ងៃទី២៩ ខែតុលាថា ការខកខានស្វែងរក និងដាក់ទោសអ្នកប្រព្រឹត្តអំពើឧក្រិដ្ឋ ឬវាយដំទៅលើអ្នកសារព័ត៌មាន នៅតែកើតមានឡើងនៅក្នុងប្រទេសកម្ពុជា។

លោក ណុប វី៖ «បើសិនករណីនេះ មិនត្រូវបានដោះស្រាយ ឬករណីវាយដំ ហើយជនល្មើសមិនត្រូវបានអនុវត្តវិធានការច្បាប់ទេ វាអាចជាការលើកទឹកចិត្តទៅដល់ជនផ្សេងៗ ទៀត ឱ្យប្រព្រឹត្តបទល្មើសមកលើអ្នកសារព័ត៌មាន ឬមួយទៅលើអ្នកដទៃផ្សេងទៀត។ នេះជារឿងមួយ ដែលជាក្ដីព្រួយបារម្ភ ហើយយើងជានិច្ចកាលតែងតែទទូចឱ្យសមត្ថកិច្ចអាជ្ញាធរពាក់ព័ន្ធលោក ពង្រឹងការអនុវត្តច្បាប់ ហើយជាពិសេស ឈានទៅការចាប់យកជន ដែលប្រព្រឹត្តបទល្មើសយកមកផ្ដន្ទាទោសទៅតាមផ្លូវច្បាប់»។

របាយការណ៍ឃ្លាំមើលប្រចាំត្រីមាស ស្ដីពីស្ថានភាពអ្នកសារព័ត៌មាននៅកម្ពុជា ចាប់ពីខែមេសា ដល់ខែមិថុនា ឆ្នាំ២០២៤ របស់សម្ព័ន្ធអ្នកសារព័ត៌មានខេមបូចាឱ្យដឹងថា ការយាយីមកលើអ្នកសារព័ត៌មានមានចំនួន ៧ ករណី ដែលប៉ះពាល់ដល់អ្នកសារព័ត៌មាន ១១នាក់។

ខេមបូចា រកឃើញថា ក្នុង ៧ករណី គឺមាន ៦ករណីហើយ ដែលជាការបំភិតបំភ័យតាមផ្លូវច្បាប់ ឬតាមផ្លូវតុលាការ ឬស្មើនឹង ៨៦ភាគរយ នៃករណីសរុប ដែលបានកត់ត្រា។ ការយាយីតាមផ្លូវច្បាប់ ឬតុលាការ គឺមាន ៦ ករណី ដោយមានអ្នកសារព័ត៌មាន ១០នាក់ ត្រូវបានកោះហៅទៅសាកសួរ ឃុំខ្លួន និងផ្ដន្ទាទោស ដែលវិធានការទាំងនោះ ធ្វើឡើងដោយនគរបាល កងរាជអាវុធហត្ថ អភិបាលស្រុក ខេត្ត និងអាជ្ញាធរមូលដ្ឋាន។

របាយការណ៍ដដែលថា ភាគច្រើននៃការយាយី និងបំភិតបំភ័យ ត្រូវបានធ្វើឡើងដោយមន្ត្រីសាធារណៈ ដូចជា មន្ត្រីយោធា នគរបាល អភិបាលស្រុក ខេត្ត និងអាជ្ញាធរមូលដ្ឋាន ហើយជាញឹកញាប់បំផុតនោះ គឺទាក់ទងនឹងសេចក្ដីរាយការណ៍អំពីបញ្ហាបរិស្ថាន។

ក្រៅពីករណីខាងលើនេះ កាលពីថ្ងៃទី៣០ ខែកញ្ញា អ្នកសារព័ត៌មានឯករាជ្យ លោក ម៉ិច ដារ៉ា ដែលធ្លាប់រាយការណ៍ អំពីការជួញដូរមនុស្សនៅកម្ពុជា ត្រូវកងរាជអាវុធហត្ថចាប់ខ្លួន ចំពោះការបង្ហោះរូបភាពពីរសន្លឹកលើបណ្ដាញសង្គមរបស់លោក ពាក់ព័ន្ធនឹងការបំផ្លាញរមណីយដ្ឋានបាភ្នំ នៅខេត្តព្រៃវែង។ តុលាការក្រុងភ្នំពេញ បានសម្រេចឃុំខ្លួនលោក ក្រោមបទចោទ «ញុះញង់»។ លោក ម៉ិច ដារ៉ា ត្រូវបានតុលាការដោះលែងឱ្យនៅក្រៅឃុំបណ្ដោះអាសន្ននៅថ្ងៃទី២៤ ខែតុលា ដោយសារការសុំទោសលោក ហ៊ុន សែន និងលោក ហ៊ុន ម៉ាណែត គឺពុំមែនដោយការផ្ដល់យុត្តិធម៌ដល់លោក ម៉ិច ដារ៉ា ទេ។

ចំណែកអង្គការសារព័ត៌មានគ្មានព្រំដែន (Reporter Without Border) បានដាក់កម្ពុជាជាប់ក្នុងចំណាត់ថ្នាក់ទី១៥១ ដែលជាចំណាត់ថ្នាក់អន់លើសន្ទស្សន៍សេរីភាពសារព័ត៌មានរបស់ពិភពលោកក្នុងឆ្នាំ២០២៤នេះ។ ការិយាល័យអង្គការសារព័ត៌មានគ្មានព្រំដែនប្រចាំតំបន់អាស៊ីប៉ាស៊ីហ្វិក បានចេញរបាយការណ៍ថា រដ្ឋាភិបាលលោក ហ៊ុន ម៉ាណែត កំពុងរឹតបន្តឹង និងគំរាមកំហែងដល់សេរីភាពសារព័ត៌មានយ៉ាងធ្ងន់ធ្ងរ។

កាលពីឆ្នាំ២០១៣ សន្និបាតអង្គការសហប្រជាជាតិបានអនុម័ត និងប្រកាសយកថ្ងៃទី២ ខែវិច្ឆិកា ជាទិវាអន្តរជាតិដើម្បីបញ្ចប់និទ្ទណ្ឌភាពនៃឧក្រិដ្ឋកម្មលើអ្នកសារព័ត៌មាន។ សេចក្ដីសម្រេចនេះ ថ្កោលទោសគ្រប់ទម្រង់ នៃការវាយប្រហារនិងការប្រើអំពើហិង្សាលើអ្នកសារព័ត៌មាន និងអ្នកធ្វើការនៅក្នុងប្រព័ន្ធផ្សព្វផ្សាយ និងជំរុញរដ្ឋភាគីឱ្យអនុវត្តនូវវិធានការជាក់លាក់ប្រយុទ្ធប្រឆាំងលើវប្បធម៌និទ្ទណ្ឌភាព។
ទិវានេះ តម្រូវឱ្យរដ្ឋជាភាគីទប់ស្កាត់នូវរាល់អំពើហិង្សាលើអ្នកសារព័ត៌មាន និងអ្នកដែលធ្វើការនៅក្នុងប្រព័ន្ធផ្សព្វផ្សាយ ដោយធានានូវគណនេយ្យភាព នាំជនល្មើសមកកាត់ទោស និងធានាថា ជនរងគ្រោះទទួលបាននូវសំណងសមរម្យផងដែរ។

ទោះជាយ៉ាងណា សន្និបាតអង្គការសហប្រជាជាតិ កាលពីខែវិច្ឆិកា ឆ្នាំ២០២៣ បង្ហាញថា ចាប់តាំងពីឆ្នាំ១៩៩៤មកយ៉ាងហោចណាស់ មានអ្នកសារព័ត៌មានចំនួន ១៥ នាក់ត្រូវបានសម្លាប់ នៅក្នុងប្រទេសកម្ពុជា ដោយសារការបំពេញការងាររបស់ខ្លួន ហើយជនរងគ្រោះចំនួន ១២នាក់ស្លាប់ ដោយសារពាក់ព័ន្ធនឹងសកម្មភាពរាយការណ៍ព័ត៌មាន ដែលបង្កហានិភ័យ ដោយផ្ទាល់ដល់បុគ្គលមានអំណាចនៅកម្ពុជា។

មជ្ឈមណ្ឌលសិទ្ធិមនុស្សកម្ពុជានៅថ្ងៃទី២៩ ខែតុលា ចេញសេចក្ដីប្រកាសព័ត៌មានដោយអះអាងថា មកដល់បច្ចុប្បន្ននេះ ការស៊ើបអង្កេតប្រកបដោយប្រសិទ្ធភាព ឯករាជភាព និងតម្លាភាព មិនត្រូវបានដំណើរការ ដើម្បីនាំជនល្មើស ដែលបានប្រព្រឹត្តបទឧក្រិដ្ឋលើអ្នកសារព័ត៌មាន មកធ្វើការជំនុំជម្រះទេ ហើយជនល្មើសនៅតែបន្តរួចផុតពីការផ្ដន្ទាទោសចំពោះអំពើឧក្រិដ្ឋរបស់ខ្លួន៕

From ព័ត៌មានថ្មីៗ | RFA
via_IFTTT

RFA | អ្នកជំនាញច្បាប់ចាត់ទុកការបកស្រាយរបស់រដ្ឋាភិបាលពីការបញ្ចប់ CLV ជាការរំលោភអំណាច | hot news

noreply@blogger.com (Sotheavy royals) — Wed, 30 Oct 2024 09:58:00 +0000

អ្នកជំនាញច្បាប់ និងពលរដ្ឋចាត់ទុកការបកស្រាយរបស់រដ្ឋាភិបាលពីការបញ្ចប់កិច្ចសហប្រតិបត្តិការតំបន់ត្រីកោណអភិវឌ្ឍន៍ ជាការរំលោភអំណាច។ ការលើកឡើងនេះ ធ្វើឡើងបន្ទាប់ពីអង្គភាពអ្នកនាំពាក្យរដ្ឋាភិបាល អះអាងថា ការបញ្ចប់កិច្ចសហប្រតិបត្តិការតំបន់ត្រីកោណអភិវឌ្ឍន៍រវាងកម្ពុជា ជាមួយវៀតណាម និងឡាវ មិនត្រូវឆ្លងកាត់សភា និងឡាយព្រះហស្តលេខាដោយព្រះមហាក្សត្រឡើយ។

ក្រោយពេលឪពុកនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន បានប្រកាសថា កម្ពុជាបញ្ចប់ការចូលរួម ក្នុងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV – DTA ចាប់ពីថ្ងៃទី២០ កញ្ញា ២០២៤ កន្លងទៅ អង្គភាពអ្នកនាំពាក្យរដ្ឋាភិបាល បានចេញមុខបកស្រាយអំពីការដកខ្លួនពីកិច្ចសហប្រតិបត្តិការនេះជាបន្តបន្ទាប់ ខណៈពលរដ្ឋ និងអ្នកជំនាញច្បាប់ នៅតែទាមទារឲ្យរដ្ឋាភិបាល បង្ហាញច្បាស់លាស់ក្នុងការដកកម្ពុជាចេញពីកិច្ចសហប្រតិបត្តិការដដែលនេះ។

ប្រធានសមាគមប្រជាធិបតេយ្យខ្មែរ ដែលមានមូលដ្ឋាននៅទីក្រុងក្វាងជូ (Gwangju) ប្រទេសកូរ៉េខាងត្បូង (South Korea) លោក លួន វិបុល ប្រាប់វិទ្យុអាស៊ីសេរី នៅថ្ងៃទី២៩ ខែតុលា ថា ការអះអាងរបស់អង្គភាពអ្នកនាំពាក្យរដ្ឋាភិបាល ចំពោះការបញ្ចប់កិច្ចសហប្រតិបត្តិការរួមគ្នារវាងកម្ពុជា វៀតណាម និងឡាវ ដោយមិនឆ្លងកាត់យន្តការសភា ជាការមើលងាយដល់ពលរដ្ឋម្ចាស់ឆ្នោត និងការប្រមាថលើស្មារតីរដ្ឋធម្មនុញ្ញ។ លោកទាមទារឲ្យរដ្ឋាភិបាលបង្ហាញភាពច្បាស់លាស់ពីការដកខ្លួនចេញពីកិច្ចសហប្រតិបត្តិការនេះ តាមនីតិវិធីច្បាប់។

លោក លួន វិបុល៖ «គាត់ចង់ចេញសេចក្ដីថ្លែងការណ៍ប៉ុណ្ណឹងឲ្យប្រជាពលរដ្ឋរំងាប់អារម្មណ៍ មិនអាចទេ ហេតុអ្វីដែលខ្ញុំថា មិនអាច ព្រោះថា មិនបាច់ចាំឆ្លងកាត់សភាអ្វីទេ បើកាលណា មិនប្រើពាក្យឆ្លងកាត់សភាមួយមាត់ហ្នឹងហើយ គឺបានមាក់ងាយទៅលើច្បាប់រដ្ឋធម្មនុញ្ញ មាក់ងាយទៅលើប្រជាពលរដ្ឋ ១៧លាននាក់ហ្នឹងបាត់ទៅហើយ»។

ការទាមទារនេះ ធ្វើឡើងបន្ទាប់ពីអង្គភាពអ្នកនាំពាក្យរដ្ឋាភិបាល នៅថ្ងៃទី២៩ ខែតុលា បានចេញសេចក្ដីថ្លែងការណ៍ អំពីការដកខ្លួនចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍រវាងកម្ពុជា ជាមួយវៀតណាម និងឡាវ ដោយផ្អែកតាមការបញ្ជាក់របស់លោកនាយករដ្ឋមន្ត្រី ហ៊ុន ម៉ាណែត និងឪពុករបស់លោក គឺលោក ហ៊ុន សែន។ អង្គភាពអ្នកនាំពាក្យរដ្ឋាភិបាល អះអាងថា កិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ជាកិច្ចសហប្រតិបត្តិការធម្មតា រវាងរដ្ឋាភិបាលទាំងបី គឺកម្ពុជា វៀតណាម និងឡាវ ដូច្នេះការដកខ្លួនចេញពីកិច្ចសហប្រតិបត្តិការនេះ គឺសម្រេចលើរដ្ឋាភិបាលប៉ុណ្ណោះ។

អង្គភាពអ្នកនាំពាក្យរដ្ឋាភិបាល ចេញបំភ្លឺបែបនេះ គឺក្រោយពីពលរដ្ឋខ្មែរនៅក្រៅប្រទេស ធ្វើបាតុកម្មជាបន្តបន្ទាប់ ទាមទារឲ្យរដ្ឋាភិបាល បង្ហាញភាពច្បាស់លាស់ក្នុងការដកកម្ពុជា ចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ដោយការដកខ្លួននេះ ពួកគេទាមទារឲ្យឆ្លងកាត់សភា និងឡាយព្រះហស្តលេខារបស់ព្រះមហាក្សត្រ ឬការចុះហត្ថលេខាដោយប្រមុខរដ្ឋស្តីទី។

ថ្វីបើអង្គភាពអ្នកនាំពាក្យរដ្ឋាភិបាល អះអាងបែបនេះក្ដី អ្នកជំនាញច្បាប់ពន្យល់ថា នីតិវិធីនៃការបញ្ចប់កិច្ចសហប្រតិបត្តិការរវាងប្រទេសដទៃគួរតែត្រូវបានឆ្លងកាត់យន្តការសភា និងឡាយព្រះហស្តលេខាដោយព្រះមហាក្សត្រ ឬការចុះហត្ថលេខាដោយប្រមុខរដ្ឋស្តីទី ដូចកាលដែលកិច្ចព្រមព្រៀងនោះបានប្រកាសដំបូង។

អ្នកសិក្សាច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត ប្រាប់វិទ្យុអាស៊ីសេរី នៅថ្ងៃទី២៩ ខែតុលា ថា កិច្ចសហប្រតិបត្តិការតំបន់ត្រីកោណអភិវឌ្ឍន៍រវាងកម្ពុជា ជាមួយនឹងវៀតណាម និងឡាវ មិនមែនជាសន្ធិសញ្ញាកិច្ចសហប្រតិបត្តិការធម្មតា ដូចការអះអាងរបស់អង្គភាពអ្នកនាំពាក្យរដ្ឋាភិបាលឡើយ ព្រោះកិច្ចសហប្រតិបត្តិការនេះ បានអនុម័តដោយសភា និងចុះហត្ថលេខាដោយប្រមុខរដ្ឋស្ដីទី លោក សាយ ឈុំ កាលពីឆ្នាំ២០១៨។

លោក វ៉ន ចាន់ឡូត៖ «រដ្ឋាភិបាលត្រូវប្រកាសថា គម្រោងប៉ុន្មានដែលកំពុងតែអនុវត្តក្នុងកិច្ចព្រមព្រៀង CLV-DTA នេះ ដែលនឹងត្រូវដកចេញជាមួយ? មានដីសម្បទានសេដ្ឋកិច្ច ចំនួនប៉ុន្មានម៉ឺនហិកតារ? មានពលរដ្ឋបរទេស ដែលចូលមកប្រកបរបររកស៊ីក្រោមកិច្ចនេះ ប៉ុន្មានពាន់ ឬប៉ុន្មានម៉ឺននាក់? មានទឹកប្រាក់ប៉ុន្មាន ដែលនឹងត្រូវដកចេញជាមួយ? នេះគឺជាកិច្ចការ ដែលរដ្ឋាភិបាលត្រូវតែបង្ហាញតម្លាភាពទៅកាន់ប្រជាពលរដ្ឋឲ្យបានដឹង ឲ្យបានយល់ច្បាស់ មិនមែនជាការកែប្រែនូវទម្រង់នៃការអនុវត្ត ហើយហៅថា ជាការដកខ្លួនចេញពីកិច្ចព្រមព្រៀងនេះ ។ ប្រសិនបើរដ្ឋាភិបាលធ្វើបែបនេះ មានន័យថា រដ្ឋាភិបាលកំពុងតែកុហកប្រជាពលរដ្ឋរបស់ខ្លួន កំពុងតែលេងល្បែងបោកបញ្ឆោតប្រជាពលរដ្ឋរបស់ខ្លួន»។

ពលរដ្ឋខ្មែរនៅប្រទេសកូរ៉េខាងត្បូង ត្រៀមធ្វើបាតុកម្មជាថ្មីទៀត ដើម្បីទាមទារឲ្យរដ្ឋាភិបាលត្រកូល «ហ៊ុន» ដកកម្ពុជាចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ។ ពួកគាត់អះអាងថា ការបន្តបាតុកម្មនេះ គឺដោយសារតែរដ្ឋាភិបាល មិនបង្ហាញពីភាពច្បាស់លាស់ក្នុងការដកកម្ពុជាចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ និងបារម្ភពីការបាត់បង់ អធិបតេយ្យ និងបូរណភាពទឹកដៃទៅប្រទេសជិតខាង៕

From ព័ត៌មានថ្មីៗ | RFA
via_IFTTT

RFA | សមាជិកព្រឹទ្ធសភាអាមេរិកអំពាវនាវឱ្យទម្លាក់ចោលបទចោទលើ លោក ម៉ិច ដារ៉ា និងដោះលែងកញ្ញា សេង ធារី | hot news

noreply@blogger.com (Sotheavy royals) — Wed, 30 Oct 2024 07:58:00 +0000

សមាជិកព្រឹទ្ធសភាអាមេរិក លោក ឌិក ឌើប៊ិន (Dick Durbin) មកពីខាងគណបក្សប្រជាធិបតេយ្យសាទរការដោះលែងអ្នកសារព័ត៌មានឯករាជ្យ លោក ម៉ិច ដារ៉ា ឱ្យបាននៅក្រៅឃុំ និងរំពឹងថា នឹងមានការទម្លាក់ចោលបទចោទប្រកាន់លើអ្នកសារព័ត៌មានរូបនេះ។

សមាជិកព្រឹទ្ធសភាមកពីរដ្ឋ អ៊ីល្លីណយស៍ (Illinois) លោក ឌិក ឌើប៊ិន បានសរសេរសារអំពាវនាវនេះនៅលើបណ្ដាញសង្គម អ៊ិច (X) កាលពីថ្ងៃទី២៨ ខែកញ្ញា។ លោកសរសេរបញ្ជាក់ថាបទចោទប្រកាន់ដែលមិនសមផលលើលោក ម៉ិច ដារ៉ា គួរត្រូវបានគេទម្លាក់ចោល។

ការលើកឡើងនេះធ្វើឡើងនៅក្រោយពេលដែលសាលាដំបូងរាជធានីភ្នំពេញ កាលពីថ្ងៃទី២៤ ខែតុលា បានដោះលែង លោក ម៉ិច ដារ៉ា ឱ្យនៅក្រៅឃុំបណ្ដោះអាសន្ន ប៉ុន្តែរាល់បទចោទប្រកាន់លើអ្នកសារព័ត៌មានរូបនេះត្រូវតុលាការរក្សានៅដដែល។ តុលាការចោទប្រកាន់អ្នកសារព័ត៌មាន ដែលធ្លាប់ទទួលបានរង្វាន់ពីសហរដ្ឋអាមេរិកជាជើងឯករាយការណ៍អំពើជួញដូរមនុស្ស លោក ម៉ិច ដារ៉ា ពីបទ «ញុះញង់ឱ្យមានភាពវឹកវរធ្ងន់ធ្ងរ ដល់សន្តិសុខសង្គម» ទាក់ទងនឹងការបង្ហោះរូបថតរមណីយដ្ឋានបាភ្នំ ដែលអាជ្ញាធរថា កាត់ត ឬព័ត៌មានក្លែងក្លាយ។

ជាមួយគ្នានឹងការអំពាវនាវឱ្យតុលាការទម្លាក់ចោទបទប្រកាន់លើលោក ម៉ិច ដារ៉ា នេះ សមាជិកព្រឹទ្ធសភាអាមេរិក លោក ឌិក ឌើប៊ិន ក៏បានលើកឡើងទៀតថា មកដល់ពេលនេះក៏គួរមានការដោះលែង កញ្ញា សេង ធារី ឱ្យមានសេរីភាពវិញដែរ។

មេធាវី និងជាអ្នកជំនាញវិទ្យាសាស្ត្រនយោបាយអន្តរជាតិ កញ្ញា សេង ធារី កំពុងជាប់ពន្ធនាគារក្រោយតុលាការចាប់ខ្លួនកញ្ញា កាលពីថ្ងៃទី១៤ ខែមិថុនា ឆ្នាំ២០២២។ តុលាការកាត់ទោសកញ្ញាឱ្យជាប់ពន្ធនាគារ ៦ឆ្នាំ ដោយចោទពីបទ "រួមគំនិតក្បត់" ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩។

សមាជិកព្រឹទ្ធសភា លោក ឌិក ឌើប៊ិន ស្ថិតក្នុងចំណោមសមាជិកព្រឹទ្ធសភាអាមេរិកមួយចំនួនទៀត ដែលធ្លាប់ស្នើច្បាប់ថ្មីនេះ មានឈ្មោះថា S.1468 ដែលទាមទារឲ្យរបបលោក ហ៊ុន សែន ចាត់វិធានការឱ្យមានប្រសិទ្ធភាព ដើម្បីទប់ទល់នឹងឥទ្ធិពលរបស់ចិនកុម្មុយនិស្ត និងធ្វើយ៉ាងណាឱ្យកម្ពុជា គោរពសិទ្ធិរបស់ពលរដ្ឋខ្មែរ និងធានាឱ្យមានដំណើរការប្រជាធិបតេយ្យ ពោលគឺអនុវត្តកិច្ចព្រមព្រៀងសន្តិភាពទីក្រុងប៉ារីស ឲ្យបានពេញលេញ៕

From ព័ត៌មានថ្មីៗ | RFA
via_IFTTT

RFA | មជ្ឈមណ្ឌលសិទ្ធិមនុស្សកម្ពុជាធ្វើយុទ្ធនាការអប់រំសាធារណជនពីអំពើនិទ្ទណ្ឌភាពករណីឃាតកម្មលើអ្នកសារព័ត៌មាន | hot news

noreply@blogger.com (Sotheavy royals) — Wed, 30 Oct 2024 01:58:00 +0000

អ្នកសារព័ត៌មានខ្មែរចំនួន១៥ នាក់ ដែលត្រូវឧក្រិដ្ឋជនសម្លាប់ រាប់តាំងពីឆ្នាំ១៩៩៤ រហូតមកដល់ពេលនេះ នៅតែមិនបានទទួលយុត្តិធម៌។

មជ្ឈមណ្ឌលសិទ្ធិមនុស្សកម្ពុជានៅថ្ងៃទី២៩ ខែតុលានេះ បញ្ជាក់ជាថ្មីទៀតថា មកដល់ពេលនេះអាជ្ញាធររដ្ឋាភិបាលខកខានមិនបានស៊ើបអង្កេតប្រកបដោយប្រសិទ្ធភាព ឯករាជ្យ និងតម្លាភាព ដើម្បីនាំជនល្មើសមកជំនុំជម្រះ ដែលបណ្ដាលឱ្យករណីទាំងនេះមិនអាចដោះស្រាយ ហើយជនរងគ្រោះនៅតែមិនទទួលបានយុត្តិធម៌ ខណៈជនល្មើសនៅតែបន្តរួចខ្លួនពីការផ្ដន្ទាទោសចំពោះអំពើឧក្រិដ្ឋរបស់ពួកគេ។

ទាក់ទងនឹងបញ្ហានេះមជ្ឈមណ្ឌលសិទ្ធិមនុស្សកម្ពុជា ចាប់ផ្ដើមយុទ្ធនាការរយៈពេលជិត១ខែ ដើម្បីប្រារព្ធទិវាអន្តរជាតិ ដើម្បីបញ្ចប់អំពើនិទ្ទណ្ឌភាពនៃបទឧក្រិដ្ឋលើអ្នកសារព័ត៌មាន ដោយចាប់ផ្ដើមពីថ្ងៃទី ២៩នេះ បន្តរហូតដល់ថ្ងៃទី២៦ ខែវិច្ឆិកា។ យុទ្ធនាការនេះមានគោលបំណងលើកកម្ពស់ការយល់ដឹងពីតួនាទីអ្នកសារព័ត៌មានក្នុងសង្គមប្រជាធិបតេយ្យ និងអំពើនិទ្ទណ្ឌភាព ដែលកំពុងបន្តញាំញីក្នុងប្រទេសកម្ពុជា រួមទាំងឧក្រិដ្ឋកម្មលើអ្នកសារព័ត៌មានផង។

សកម្មភាពក្នុងយុទ្ធនាការទាំងនោះ រួមមាន ការផ្សព្វផ្សាយឡើងវិញនូវវីដេអូរឿង «អ្នកបន្តវេន» រៀបរាប់ពីកូនប្រុសអ្នកសារព័ត៌មានម្នាក់ ដែលព្យាយាមស្វែងរកយុត្តិធម៌ជូនឪពុក ដែលត្រូវគេសម្លាប់ ការចេញផ្សាយវីដេអូប្រវត្តិអ្នកសារព័ត៌មាន ដែលត្រូវគេសម្លាប់ទាំង ១៥នាក់ ការផ្សាយផ្ទាល់កម្មវិធីវិទ្យុ និងវីដេអូស្ដីពីទិវាអន្តរជាតិដើម្បីបញ្ចប់និទ្ទណ្ឌភាព ព្រមទាំងផ្សព្វផ្សាយរបាយការណ៍ប្រចាំឆ្នាំស្ដីពីស្ថានភាពសេរីភាពបញ្ចេញមតិ សេរីភាពសារព័ត៌មាន សិទ្ធិទទួលព័ត៌មានសម្រាប់ឆ្នាំ២០២៤។

អង្គការសហប្រជាជាតិបានកំណត់យកថ្ងៃទី២ ខែវិច្ឆិកា ជាទិវាអន្តរជាតិ ដើម្បីបញ្ចប់និទ្ទណ្ឌភាពនៃឧក្រិដ្ឋកម្មលើអ្នកសារព័ត៌មាន៕

From ព័ត៌មានថ្មីៗ | RFA
via_IFTTT

RFA | សកម្មជនចលនាមាតាធម្មជាតិកំពុងជាប់ឃុំលើកទឹកចិត្តយុវជនឱ្យក្លាហាន និងតស៊ូដើម្បីការពារធនធានធម្មជាតិ | hot news

noreply@blogger.com (Sotheavy royals) — Tue, 29 Oct 2024 09:58:00 +0000

សកម្មជនចលនាមាតាធម្មជាតិដែលកំពុងជាប់ឃុំនៅពន្ធនាគារផ្ញើសារលើកទឹកចិត្តយុវជនឱ្យក្លាហាន និងហ៊ានប្រឆាំងចំពោះភាពអយុត្តិធម៌ ដើម្បីទាមទារសិទ្ធិសេរីភាព ទោះជារដ្ឋាភិបាលប្រើវិធីសាស្ត្របំបាក់ស្មារតីយុវជនយ៉ាងណាក្ដី។ ពួកគាត់អះអាងថា ការជាប់ពន្ធនាគារគឺមិនគួរឱ្យខ្លាចដូចកម្ពុជាត្រូវបាត់បង់ធនធានធម្មជាតិ និងបាត់បង់លទ្ធិប្រជាធិបតេយ្យនោះទេ។

បើទោះជាបាត់បង់សិទ្ធិសេរីភាពដោយសារជាប់ឃុំក្នុងពន្ធនាគារក្ដី ក៏យុវជនចលនាមាតាធម្មជាតិនៅតែមានឆន្ទៈមោះមុត និងពេញចិត្តក្នុងការធ្វើការងារជាអ្នកការពារបរិស្ថាន ហើយចង់ឃើញយុវជនជំនាន់ក្រោយចេះរួបរួមគ្នាដើម្បីប្រយោជន៍ជាតិ។

ប្រពន្ធសកម្មជនចលនាមាតាធម្មជាតិ លោក ថុន រដ្ឋា គឺលោកស្រី ប៉ាត់ រស្មី ប្រាប់វិទ្យុអាស៊ីសេរីនៅថ្ងៃទី២៨ ខែតុលា ថា លោកស្រីបានទៅសួរសុខទុក្ខប្ដីនៅពន្ធនាគារត្រពាំងផ្លុង ខេត្តត្បូងឃ្មុំ កាលពីថ្ងៃទី២៧ តុលា ដោយបានឃើញស្ថានភាពសុខភាពប្ដីលោកស្រីនៅតែរឹងមាំ។ លោកស្រីបន្តថា ប្ដីលោកស្រីបានផ្ដាំផ្ញើឱ្យយុវជនបន្តឆន្ទៈ ការពារបរិស្ថាន និងក្លាហានហ៊ាននិយាយពីបញ្ហាសង្គម ពីព្រោះបញ្ហាសង្គមជាតិគឺជាបញ្ហារបស់ពលរដ្ឋទាំងអស់គ្នា។ លោកស្រីបន្ថែមថា ទោះជាស្ថានភាពគ្រួសារលំបាក និងត្រូវរស់នៅព្រាត់ប្រាសពីគ្រួសារក្ដី ក៏លោកស្រីនៅតែជំរុញលើកទឹកចិត្តប្ដី ដោយសារប្ដីលោកស្រីគឺជាមនុស្សស្អាតស្អំ។

លោកស្រី ប៉ាត់ រស្មី៖ «ពន្ធនាគារវាមិនមែនជាកន្លែងគួរតែឱ្យខ្លាចទេអ៊ីចឹងខ្ញុំគិតថា យុវជនជំនាន់ក្រោយដែលស្រឡាញ់បរិស្ថាន ចង់ការពារបរិស្ថានកុំបាក់ស្បាតដោយសារតែពួកគាត់ជាប់ពន្ធនាគារ»។

ដោយឡែកប្អូនស្រីសកម្មជនចលនាមាតាធម្មជាតិកញ្ញា ឡុង គន្ធា គឺកញ្ញា ឡុង សុខលីន ថ្លែងថា ស្ថានភាពសុខភាពបងស្រីកញ្ញាមិនសូវល្អប្រសើរនោះទេ ដោយសារថ្មីៗនេះគ្រូពេទ្យពិនិត្យឃើញបងស្រីកញ្ញា មានមេរោគនៅក្នុងពោះវៀន ហើយពេទ្យនៅក្នុងពន្ធនាគារក៏ពុំសូវយកចិត្តទុកដាក់ចំពោះបងស្រីកញ្ញាដែរ។ កញ្ញាបារម្ភពីស្ថានភាពសុខភាពរបស់បងស្រីដោយសារបងស្រីគឺជាមនុស្ស ឧស្សាហ៍ឈឺ ប៉ុន្តែបងស្រីកញ្ញាផ្ដាំមកថា កញ្ញាឈឺតែរូបរាងកាយប៉ុណ្ណោះតែកម្លាំងចិត្ត និងឆន្ទៈកញ្ញានៅតែរឹងមាំដដែល។

កញ្ញា ឡុង សុខលីន៖ «ចង់រំលឹកថា សកម្មភាពដែលពួកគាត់ធ្វើកន្លងមក វាមិនមែនជាសកម្មភាពញុះញង់ ឬក៏ក្បត់ជាតិទេប៉ុន្តែសកម្មភាពកន្លងមកយើងមើលមកគឺសុទ្ធតែជាសកម្មភាពចូលរួមទៅដល់ការពារប្រទេសជាតិ ការពារធនធានធម្មជាតិទេអ៊ីចឹងសុំផ្ដល់សេរីភាពដល់យុវជនដែលកំពុងឃុំខ្លួនដោយឥតលក្ខខណ្ឌ»។

ក្រៅពីលោក ថុន រដ្ឋា និងកញ្ញា ឡុង គន្ធា ផ្ញើសារលើកទឹកចិត្តដល់យុវជនហើយនោះ ក៏នៅមានសកម្មជនចលនាមាតាធម្មជាតិផ្សេងទៀត ដែលពួកគាត់បានផ្ញើសារតាមរយៈក្រុមគ្រួសាររបស់ពួកគាត់ទៅដល់យុវជនឱ្យមានភាពអត់ធ្មត់ និងរួបរួមសាមគ្គីគ្នាបើទោះបីជាពួកគាត់កំពុងជាប់ពន្ធនាគារ ប៉ុន្តែពួកគាត់ពេញចិត្តក្នុងការរួមចំណែកធ្វើឱ្យកម្ពុជារក្សាបាននៅគម្របព្រៃឈើ មានយុត្តិធម៌សង្គម និងការគោរពសិទ្ធិមនុស្សពេញលេញ។

ក្នុងការបន្តបេសកកម្មជាអ្នកការពារបរិស្ថានរហូតដល់ជាប់ពន្ធនាគារជាលើកទី២នេះ សកម្មជនបរិស្ថានចំនួន៥នាក់ និងយុវជនបរិស្ថានផ្សេងទៀតតែងរងការធ្វើទុក្ខបុកម្នេញ ការគំរាមកំហែង និងអ្នកខ្លះទៀត ឪពុកម្ដាយពួកគេត្រូវបានមន្ត្រីនៅថ្នាក់មូលដ្ឋានហៅទៅដាក់សម្ពាធគ្រួសារឱ្យបញ្ឈប់សកម្មភាពតស៊ូមតិការពារបរិស្ថាន ប៉ុន្តែបញ្ហានេះមិនបានធ្វើឱ្យពួកគាត់បោះបង់គោលជំហរធ្វើសកម្មភាពតស៊ូមតិដើម្បីការពារបរិស្ថានឡើយ។

ទាក់ទងរឿងនេះ ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា មានប្រសាសន៍ថា លោកស្ញប់ស្ញែងចំពោះការលះបង់ និងគំរូវីរភាពរបស់យុវជនបរិស្ថានដែលតស៊ូការពារធនធានធម្មជាតិដោយមិនរុញរា ប៉ុន្តែលោកសោកស្ដាយដែលរដ្ឋាភិបាលចាប់យុវជនបរិស្ថាន ៥នាក់ដាក់ពន្ធនាគារទាំងគ្មានកំហុស។ លោកបន្តថា ការចាប់យុវជនបរិស្ថានដាក់ពន្ធនាគារនេះមិនបានផ្ដល់ផលចំណេញអ្វីដល់មុខមាត់កម្ពុជាឡើយ តែធ្វើឱ្យកម្ពុជារងការថ្កោលទោសពីមជ្ឈដ្ឋានអន្តរជាតិ។

លោក នី សុខា៖ «ការឃុំខ្លួនពួកគាត់មិនមែនផលចំណេញអ្វីដល់រដ្ឋាភិបាលទេ ហើយប្រសិនបើយើងដោះលែងពួកគាត់ឱ្យមានសេរីភាពឡើងវិញ គឺរដ្ឋាភិបាលនឹងទទួលបានផ្ដល់ចំណេញជាពិសេសទទួលនូវការលើកសរសើរ ក៏ដូចជាទទួលបាននូវការគោរពពីដៃគូអន្តរជាតិផ្សេងទៀតអាហ្នឹងគួរតែផលចំណេញដល់រដ្ឋាភិបាល។ ហើយប្រសិនបើរដ្ឋាភិបាលបន្តឃុំខ្លួនពួកគាត់ខ្ញុំគិតថា អាហ្នឹងគឺជារឿងមួយដែលរដ្ឋាភិបាលមិនចំណេញទេ»។

វិទ្យុអាស៊ីសេរីមិនអាចទាក់ទង អ្នកនាំពាក្យក្រសួងយុត្តិធម៌ លោក ជិន ម៉ាលីន ដើម្បីសុំការបកស្រាយជុំវិញបញ្ហានេះបានទេនៅថ្ងៃទី២៨ ខែតុលា។

កាលពីថ្ងៃទី២៤ ខែតុលា នៅក្នុងសម័យប្រជុំលើកទី៥៧ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ (Geneva) ប្រទេសស្វីស (Switzerland) អង្គការរ៉ាយឡាយលីហ៊ូត (Right Livelihood) បានរាយការណ៍ទៅកាន់អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោក វិទិត មុនតាប៊ន (Vitit Muntarbhorn) ស្ដីពីស្ថានភាពសិទ្ធិមនុស្សនៅកម្ពុជាករណីតុលាការកាត់ទោសឱ្យសកម្មជនបរិស្ថាន៥នាក់ ជាប់ពន្ធនាគារដោយចោទប្រកាន់អាជ្ញាធរកម្ពុជាថា បានដំណើរការនីតិវិធីនៅក្នុងតុលាការ ដោយគ្មានភស្តុតាងរឹងមាំ និងលម្អៀងទៅក្រុមហ៊ុនបរទេសធំៗដែលផ្ដល់ផលប្រយោជន៍ជាជាងផ្ដោតលើប្រយោជន៍របស់ពលរដ្ឋខ្លួនឯង។

ក្រុមគ្រួសារសកម្មជនបរិស្ថាន និងមន្ត្រីសង្គមស៊ីវិលជំរុញឱ្យរដ្ឋាភិបាលគោរពសិទ្ធិមនុស្ស និងដោះលែងសកម្មជនបរិស្ថានចំនួន ៥នាក់ឱ្យមានសេរីភាពឡើងវិញ ពីព្រោះការចាប់យុវជនឃុំខ្លួនដោយគ្មានភស្តុតាងច្បាស់លាស់បែបនេះធ្វើឱ្យកម្ពុជា ជាប់ឈ្មោះនៅលើឆាកអន្តរជាតិថា ជាប្រទេសពូកែខាងរំលោភច្បាប់ និងបំផ្លាញលទ្ធិប្រជាធិបតេយ្យ៕

From ព័ត៌មានថ្មីៗ | RFA
via_IFTTT

RFA | អ្នកប្រារព្ធខួបកិច្ចព្រមព្រៀងសន្តិភាពនៅអូស្ត្រាលីបារម្ភពីកម្ពុជា កាន់តែធ្លាក់ក្នុងវិបត្តិធ្ងន់ធ្ងរ | hot news

noreply@blogger.com (Sotheavy royals) — Tue, 29 Oct 2024 04:58:00 +0000

តំណាងអង្គការសង្គមស៊ីវិល តំណាងសហគមន៍ខ្មែរនៅអូស្ត្រាលី និងមន្ត្រីបក្សប្រឆាំង បង្ហាញក្តីព្រួយបារម្ភដូចៗគ្នាថា ប្រទេសកម្ពុជា នឹងកាន់តែធ្លាក់ចូលជ្រៅក្នុងវិបត្តិនយោបាយ សង្គម និងសេដ្ឋកិច្ច ដូចអតីតកាល ប្រសិនបើរដ្ឋាភិបាលនៅតែមិនគោរពនិងអនុវត្តតាមកិច្ចព្រមព្រៀងសន្តិភាពទីក្រុងប៉ារីស។ ពួកគាត់បានលើកឡើងក្តីព្រួយបារម្ភទាំងនេះ នៅក្នុងពិធីប្រារព្ធខួប៣៣ឆ្នាំនៃកិច្ចព្រមព្រៀងសន្តិភាពទីក្រុងប៉ារីសនៅវត្តខ្មែរក្នុងទីក្រុងម៉ែលប៊ន (Melbourne) នៅព្រឹកថ្ងៃទី២៧ ខែតុលា។

សហគមន៍ខ្មែរនៅប្រទេសអូស្ត្រាលី បានជ្រើសរើសយកថ្ងៃអាទិត្យ ទី២៧ ខែតុលា ដែលជាថ្ងៃឈប់សម្រាកពីការងារដើម្បីប្រារព្ធខួបកិច្ចព្រមព្រៀងសន្តិភាពទីក្រុងប៉ារីស នៅក្នុងវត្តពុទ្ធរង្សីក្រុងម៉ែលប៊ន។ ការប្រារព្ធខួបនេះ រៀបចំដោយអង្គការសម្ពន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីស ឬហៅថា អង្គការ២៣ តុលា។ ពិធីនេះ មានការចូលរួមពីតំណាងសហគមន៍ខ្មែរល្បីៗ តំណាងអង្គការពាក់ព័ន្ធ តំណាងគណបក្សនយោបាយមួយចំនួន ដូចជាអនុប្រធានគណបក្សឆន្ទៈខ្មែរ លោក សុន ឆ័យ ព្រមទាំងពលរដ្ឋប្រមាណ ១០០នាក់។

ដូចរាល់ឆ្នាំដែរ ការប្រារព្ធខួបលើកទី៣៣ឆ្នាំ នៃកិច្ចព្រមព្រៀងសន្តិភាពទីក្រុងប៉ារីសនេះ ប្រជាពលរដ្ឋខ្មែរ អ្នកនយោបាយបក្សប្រឆាំង និងក្រុមអង្គការសង្គមស៊ីវិលឯករាជ្យ មិនបានបង្ហាញអារម្មណ៍រីករាយនោះទេ ព្រោះពួកគាត់ កំពុងបារម្ភអំពីការដឹកនាំរបស់រដ្ឋាភិបាលលោក ហ៊ុន សែន និងលោក ហ៊ុន ម៉ាណែត កាន់តែបង្កើនការរំលោភសិទ្ធិមនុស្សធ្ងន់ធ្ងរ ធ្វើឲ្យជាតិខ្មែរបែកបាក់ និងដើរជាន់ដានប្រវត្តិសាស្ត្រអាក្រក់ឡើងវិញ។

ប្រធានអង្គការសម្ពន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីស លោក អ៊ិន ណាត ថ្លែងថា ការជួបជុំគ្នាប្រារព្ធខួបកិច្ចព្រមព្រៀងសន្តិភាពទីក្រុងប៉ារីស ពិតជាមានតម្លៃ និងជាសក្ខីភាពនៃការផ្តល់តម្លៃដល់កិច្ចព្រមព្រៀងជាអន្តរជាតិមួយនេះ និងជាការយកចិត្តទុកដាក់ឈឺឆ្អាលដល់មាតុភូមិកំណើតរបស់ខ្លួន។ លោកបន្តថា កិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ គឺមានតម្លៃជាប្រវត្តិសាស្ត្រដែលបានជួយប្រែក្លាយកម្ពុជាពីប្រទេសដែលខ្ទេចខ្ទាំដោយសារសង្គ្រាម ទៅជាប្រទេសដែលមានសន្តិភាព ប្រជាធិបតេយ្យ ការឯកភាពជាតិ និងបង្រួបបង្រួមជាតិ ការពារអធិបតេយ្យភាព និងបូរណភាពទឹកដីកម្ពុជាសម្រាប់ខ្មែរគ្រប់ជំនាន់។ ប៉ុន្តែលោកថា ជារឿងសោកស្តាយដែលរដ្ឋាភិបាលឪពុកកូន គឺលោក ហ៊ុន សែន និងលោក ហ៊ុន ម៉ាណែត បានព្យាយាមលុបបំបាត់កិច្ចព្រមព្រៀងនេះ ដោយសារដឹកនាំប្រទេសបែបផ្ដាច់ការតវង្សត្រកូល។

លោក អ៊ិន ណាត៖ «ជាការសោកស្តាយណាស់ដែលរដ្ឋាភិបាលមិនបានអនុវត្តកិច្ចព្រមព្រៀងនេះឲ្យបានត្រឹមត្រូវ។ យើងឃើញហើយកម្ពុជា បានជួបវិបត្តិផ្ទួនៗដូចជាវិបត្តិនយោបាយ វិបត្តិសង្គម និងវិបត្តិសេដ្ឋកិច្ច។មកដល់ពេលនេះ សូម្បីអ្នកទេសចរ ក៏គេមិនហ៊ានធ្វើដំណើរទៅលែងកម្ពុជាហើយ។ មេដឹកនាំប្រើប្រាស់អំណាចតាមតែអំពើចិត្ត។ នេះហើយដែលនាំឲ្យមានអំពើពុករលួយពេញទំហឹងនៅកម្ពុជា។ ការដាក់ទណ្ឌកម្មក៏ធ្វើឲ្យសេដ្ឋកិច្ចយើងចុះខ្សោយដែរ។ប្រជាជនគ្មានការងារធ្វើ។ រោងចក្របិទទ្វារជាបន្តបន្ទាប់ តែប្តូរមកវិញនូវការឆបោកតាមអនឡាញ ការចាប់ជំរិត ការជួញដូរមនុស្ស និងជួញដូរគ្រឿងញៀន ហើយបណ្តេញប្រជាពលរដ្ឋចេញពីដីធ្លីដោយគ្មានសំណង»។

លោក អិន ណាត និងអ្នកចូលរួម ក៏បានទាមទារឲ្យរដ្ឋាភិបាលក្រុងភ្នំពេញដោះលែងសកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន កញ្ញា ភឹង សោភា និងសហការី ព្រមទាំងអ្នកទោសនយោបាយ និងអ្នកទោសមនសិការជិត ១០០នាក់ផ្សេងទៀត។ ពួកគាត់ យល់ថា សកម្មជនដែលកំពុងជាប់ឃុំទាំងនេះ ប្រសិនបើនៅប្រទេសអូស្ត្រាលី ឬប្រទេសប្រជាធិបតេយ្យផ្សេងទៀត នឹងទទួលបានពានរង្វាន់ថ្នាក់ជាតិ ពោលគឺមិនមែនផ្តល់គុកច្រវាក់ដូចរដ្ឋាភិបាលក្រុងភ្នំពេញនោះទេ។

អនុប្រធានគណបក្សឆន្ទៈខ្មែរ លោក សុន ឆ័យ ថ្លែងថា កិច្ចព្រមព្រៀងសន្តិភាពទីក្រុងប៉ារីសនេះបានជួយឲ្យកម្ពុជា បិទបញ្ចប់ជម្លោះប្រដាប់អាវុធជាមួយគ្នា ប៉ុន្តែដើម្បីធានាឲ្យកម្ពុជាមានសន្តិភាពយូរអង្វែងដូចមានចែងក្នុងកិច្ចព្រមព្រៀងនេះ កម្ពុជា ត្រូវគោរពសិទ្ធិមនុស្ស ប្រកាន់ខ្ជាប់លទ្ធិប្រជាធិបតេយ្យ សេរីពហុបក្ស និងត្រូវកសាងស្ថាប័នជាតិដូចជាស្ថាប័នតុលាការ រួមទាំងស្ថាប័នកងកម្លាំងប្រដាប់អាវុធឲ្យបានរឹងមាំ និងឯករាជ្យ ដើម្បីបម្រើនិងការពារប្រជាពលរដ្ឋ។ ទោះជាយ៉ាងណា លោកពិនិត្យឃើញថា គោលការណ៍គ្រឹះដែលមានចែងក្នុងកិច្ចព្រមព្រៀងសន្តិភាពទីក្រុងប៉ារីសនេះ ពុំត្រូវបានអនុវត្តឲ្យបានត្រឹមត្រូវនោះទេ។ ប៉ុន្តែអតីតតំណាងរាស្ត្រគណបក្សសង្គ្រោះជាតិរូបនេះ ជឿថា រដ្ឋាភិបាលកម្ពុជា នឹងងាក មកអនុវត្តតាមកិច្ចព្រមព្រៀងនេះវិញ ប្រសិនបើប្រជាពលរដ្ឋខ្មែរទាំងក្នុងប្រទេសនិងក្រៅប្រទេសបន្តតស៊ូមតិកាន់តែខ្លាំង។

លោក សុន ឆ័យ៖ «ពិតណាស់! ដោយសារតែមេរៀនអតីតកាលដ៏ជូរចត់នេះហើយបានជាទាំងភាគីអន្តរជាតិ ទាំងភាគីខ្មែរខ្លួនឯងជាអ្នកអនុវត្តអំពើកាប់សម្លាប់ ជាតស៊ូអំណាចដោយអំពើហិង្សានេះសុខចិត្តទទួលស្គាល់ថា មានតែលទ្ធិប្រជាធិបតេយ្យនេះទេ ដែលអាចធានាសុខសន្តិភាពយូរអង្វែង។ ដូចបានជម្រាបអ៊ីចឹងថា ដើម្បីធ្វើឲ្យមានសុខសន្តិភាពយូរអង្វែង យើងត្រូវតែគោរពសិទ្ធិមនុស្ស ត្រូវតែពង្រឹងស្ថាប័នជាតិ ឲ្យបម្រើសេវាជូនប្រជាពលរដ្ឋ។ កុំឲ្យស្ថាប័នជាតិទៅបម្រើអំណាចក្រុមខ្លួន ឬបក្ខពួកខ្លួន»។

ទន្ទឹមគ្នានេះ ប្រធានសមាគមខ្មែរ លោក ជា យូហ៊ន និងអតីតតំណាងរាស្ត្រអូស្ត្រាលីកំណើតខ្មែរ លោក ហុង លីម ព្រមទាំងវាគ្មិនៗផ្សេងទៀត បានឡើងបញ្ចេញមតិម្នាក់ម្តងប្រហាក់ប្រហែលគ្នាថា កិច្ចព្រមព្រៀងសន្តិភាពទីក្រុងប៉ារីស មានតម្លៃសម្រាប់ប្រជាជាតិខ្មែរទាំងមូល។ ប៉ុន្តែពួកគាត់ សោកស្តាយដែលលោក ហ៊ុន សែន និងលោក ហ៊ុន ម៉ាណែត មិនបានអនុវត្តតាមកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញពេញលេញ ដែលជាហេតុធ្វើឲ្យប្រជាពលរដ្ឋខ្មែរ បន្តរងគ្រោះ រស់នៅគ្មានសិទ្ធិសេរីភាព និងបែកបាក់ជាតិ ហើយប្រទេសកម្ពុជា បាត់បង់ឯករាជ្យភាព អធិបតេយ្យភាព និងបូរណភាពទឹកដី ដូចស្តែងឲ្យឃើញតាមរយៈការដាក់ខេត្តខ្មែរចំនួន៤ក្នុងគម្រោងរកស៊ីរួមគ្នាជាមួយវៀតណាម (Vietnam) និងឡាវ (Lao)។ ពួកគាត់យល់ស្របគ្នាថា មធ្យោបាយដើម្បីឲ្យរដ្ឋាភិបាលត្រកូល «ហ៊ុន» អនុវត្តកិច្ចព្រមព្រៀងសន្តិភាពទីក្រុងប៉ារីសនោះ គឺពលរដ្ឋខ្មែរ ទាំងក្នុងប្រទេសនិងក្រៅប្រទេស ត្រូវតែសកម្ម និងរួបរួមតស៊ូមតិជាមួយគ្នា។

ជាមួយគ្នានេះ ប្រធានអង្គការលទ្ធិប្រជាធិបតេយ្យខ្មែរ លោក ស៊ឹង សែនករុណា លើកឡើងថា ការគោរពសិទ្ធិមនុស្ស និងប្រជាធិបតេយ្យនៅកម្ពុជាបច្ចុប្បន្ននេះ ដើរប្រាសចាកច្រើនពីគោលការណ៍កិច្ចព្រមព្រៀងក្រុងប៉ារីស ដោយសាររដ្ឋាភិបាលឪពុកកូនគឺលោក ហ៊ុន សែន និងលោក ហ៊ុន ម៉ាណែត បន្តធ្វើទុក្ខបុកម្នេញ និងបង្ក្រាបឥតឈប់ឈរទៅលើគណបក្សប្រឆាំង មន្ត្រីសង្គមស៊ីវិល អ្នកសារព័ត៌មានឯករាជ្យ សហជីពនិងសកម្មជនបរិស្ថាន ជាដើម ហើយរៀបការបោះឆ្នោតក្លែងក្លាយ ដើម្បីផ្ទេរអំណាចពីឪពុកទៅកូន។

លោក ស៊ឹង សែនករុណា៖ «ប្រទេសប្រជាធិបតេយ្យពិតប្រាកដ គឺគេរស់នៅដោយក្តីសុខ គឺគេធានានូវប្រព័ន្ធសុវត្ថិភាព សន្តិសុខ ការអនុវត្តច្បាប់អីផ្សេងៗគឺមានភាពល្អប្រសើរ មានការទទួលខុសត្រូវខ្ពស់។ បើយើងមើលប្រទេសប្រជាធិបតេយ្យពិតប្រាកដ គឺអំណាចមិនអាចស្ថិតនៅលើមេដឹកនាំប្រទេសទេ គឺអំណាចនៅក្នុងដៃប្រជាពលរដ្ឋ។ ប្រជាពលរដ្ឋ គឺជាម្ចាស់ប្រទេសម្ចាស់វាសនារបស់ខ្លួនឯង។ តែប្រសិនបើប្រទេសមិនបានដើរតាមប្រជាធិបតេយ្យ ដូច្នេះគឺប្រជាពលរដ្ឋ នឹងក្លាយទៅជាកញ្ជេះ ឬអ្នកបម្រើឲ្យអ្នកនយោបាយ ឬហៅថា ដឹកច្រមុះតាមចិត្ត។ការដឹកនាំរបៀបនេះមិនរីកចម្រើនទេ គឺរីកចម្រើនតែមេដឹកនាំប្រទេសមួយក្តាប់តូច និងក្រុមគ្រួសារមេដឹកនាំដូចដែលយើងមើលឃើញសព្វថ្ងៃ»។

ក្រោយពីការឡើងសម្ដែងមតិរបស់វាគ្មិនរួច អង្គការសម្ពន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីស ក៏បានរៀបចំវេទិកាពិភាក្សាគ្នាដើម្បីប្រមូលមតិយោបល់ ពីអ្នកចូលរួមទាក់ទងនឹងវិធីសាស្ត្រទាមទារឲ្យរដ្ឋាភិបាល ស្តារប្រជាធិបតេយ្យ និងការគោរពសិទ្ធិមនុស្សឲ្យស្របតាមស្មារតីកិច្ចព្រមព្រៀងសន្តិភាពទីក្រុងប៉ារីស។ ពួកគាត់ភាគច្រើនបានផ្ដោតទៅលើការអំពាវនាវឲ្យប្រជាពលរដ្ឋ និងអ្នកស្រលាញ់ប្រជាធិបតេយ្យ ចូលរួមឈឺឆ្អាលបញ្ហាប្រទេសជាតិឲ្យកាន់តែសកម្ម ហើយបញ្ឈប់ខ្វែងគំនិត ឬបែកបាក់គ្នាហើយងាកមករួបរួមគ្នាជាធ្លុងមួយឡើងវិញ ដើម្បីតតាំងនឹងការដឹកនាំបែបផ្ដាច់ការរបស់រដ្ឋាភិបាលត្រកូល «ហ៊ុន»៕

From ព័ត៌មានថ្មីៗ | RFA
via_IFTTT

RFA | សកម្មជនបក្សប្រឆាំងថា ពួកគាត់បង្ខំចិត្តចុះចូលជាមួយបក្សកាន់អំណាចដើម្បីការពារសុវត្ថិភាពផ្ទាល់ខ្លួន និងគ្រួសារ | hot news

noreply@blogger.com (Sotheavy royals) — Mon, 28 Oct 2024 09:58:00 +0000

សកម្មជនបក្សប្រឆាំងអះអាងថា ពួកគាត់ធ្លាប់បង្ខំចិត្តចុះចូលជាមួយបក្សកាន់អំណាច គឺដើម្បីរក្សាសុវត្ថិភាពផ្ទាល់ខ្លួន និងក្រុមគ្រួសារ ជាពិសេសគេចពីការធ្វើទុក្ខបុកម្នេញតាមប្រព័ន្ធតុលាការក្រោមការបញ្ជាពីលោក ហ៊ុន សែន។ ទោះជាយ៉ាងណា សកម្មជនមួយចំនួនដែលបានចុះចូលជាមួយបក្សកាន់អំណាចបានចាកចេញពីបក្សនេះវិញ ក្រោយចុះចូលបានមួយរយៈពេល។ តើមានអ្វីនៅពីក្រោយការបង្ខំចិត្តចុះចូលគណបក្សប្រជាជនកម្ពុជា ហើយរត់ចេញមកបក្សប្រឆាំងវិញ?

មន្រ្តី និងសកម្មជនបក្សប្រឆាំងមួយចំនួនបានចេញវីដេអូសុំទោស លោក ហ៊ុន សែន និងលោក ហ៊ុន ម៉ាណែត ដោយនិយាយទម្លាក់កំហុសលើខ្លួនឯង ឬចុះចូលជាមួយគណបក្សប្រជាជនកម្ពុជា ដើម្បីទទួលបានការដោះលែងឱ្យនៅក្រៅឃុំ ឬបញ្ចៀសការចាប់ខ្លួនដាក់ពន្ធនាគារ និងការធ្វើទុក្ខបុកម្នេញផ្សេងៗទៀត។ ប៉ុន្តែក្រោយមក អ្នកខ្លះក៏រត់ចេញពីគណបក្សកាន់អំណាចវិញ ក្រោយអ្នកទាំងនោះគេចខ្លួនរួចផុតពីកណ្តាប់ដៃរបស់លោក ហ៊ុន សែន ដោយសារតែពួកគេ មិនអាចបម្រើមហិច្ឆតារបស់មេដឹកនាំផ្តាច់ការដែលផ្ទុយពីឧត្តមគិត។

អតីតអនុប្រធានក្រុមការងារគណបក្សភ្លើងទៀនខេត្តព្រះសីហនុ ដែលកំពុងភៀសខ្លួននៅប្រទេសជប៉ុនលោក គង់ ជិ ប្រាប់វិទ្យុអាស៊ីសេរីថា អំឡុងការបោះឆ្នោតជ្រើសតាំងតំណាងរាស្រ្តអាណត្តិទី៧ អតីតថ្នាក់ដឹកនាំគណបក្សភ្លើងទៀនជាង ១០នាក់ ក្នុងនោះរួមទាំងរូបលោក បានទទួលលិខិតគំរាមចាប់ខ្លួន ស្របពេលសកម្មជនមួយចំនួនមានឈ្មោះក្នុងលិខិតដែរ រួមមាន លោក អេង ស្រួយ លោក លី រី អ្នកស្រី វង រុន្នី ត្រូវបានអាជ្ញាធរចាប់ខ្លួនដាក់ពន្ធនាគារជាបន្តបន្ទាប់។ ចំណែករូបលោកត្រូវបានអាជ្ញាធរ និងមន្រ្តីគណបក្សប្រជាជនកម្ពុជាតាមគំរាមពីផលវិបាកផ្សេងៗរហូតលោកបង្ខំចិត្តធ្វើលិខិតចុះចូលដោះទាល់មួយគ្រាដើម្បីរួចផុតពីការចាប់ខ្លួន។

លោក គង់ ជិ៖ «ការចុះចូលកន្លងមក គឺជាការបង្ខិតបង្ខំ ការគំរាមកំហែងពីគ្រប់រូបភាពលើរូបខ្ញុំ បើសិនមិនមានការបង្ខំដល់ខ្ញុំទេគឺខ្ញុំអត់ចុះចូលទេ ហើយបើខ្ញុំចង់ចូលជាមួយបក្សប្រជាជនកម្ពុជានោះវិញ គឺខ្ញុំមិនទៅចំណាយពេលវេលា ថវិកាធ្វើសកម្មភាពគណបក្សប្រឆាំងដូចពេលនេះទេបាទ»។

លោក គង់ ជិ បច្ចុប្បនជាអនុប្រធានគណបក្សកម្លាំងជាតិប្រចាំប្រទេសជប៉ុន។ លោកឱ្យដឹងថាក្រោយការបោះឆ្នោតរួចហើយ លោក និងគ្រួសារបានបង្ខំចិត្តរត់ភៀសខ្លួនទៅប្រទេសជប៉ុន កាលថ្ងៃទី២៥ ខែកក្កដា ឆ្នាំ២០២៣ ដើម្បីគេចចេញពីការតាមធ្វើទុក្ខបុកម្នេញ។ លោកបញ្ជាក់ថាការណ៍ដែលលោកប្រកាសចុះចូលជាមួយលោក ហ៊ុន សែន គឺដើម្បីរក្សាសន្តិសុខសុវត្ថិភាព ដោយពុំបានកើតចេញពីឆន្ទៈពិត ឬស្រឡាញ់តួនាទីអ្វីនោះឡើយ។ លោកចាត់ទុកយុទ្ធសាស្ត្ររបស់លោក ហ៊ុន សែន នេះថាជាឧបាយកលស្មោកគ្រោកក្នុងទិសដៅកម្ទេចកម្លាំងគណបក្សប្រឆាំង ហើយលោកប្តេជ្ញាតស៊ូជាមួយអ្នកប្រជាធិបតេយ្យជំរុញឱ្យកម្ពុជាមានការផ្លាស់ប្តូរជាវិជ្ជមាននៅពេលខាងមុខ។

លោក គង់ ជិ៖ «ប្រទេសកម្ពុជាមានប្រជាធិបតេយ្យ និងសន្តិភាពក្លែងក្លាយ ខ្ញុំទៅដល់ប្រទេសជប៉ុន គឺរដ្ឋាភិបាលរបស់គេអត់ដែលបង្ខិតបង្ខំពលរដ្ឋឯងឱ្យទៅគាំទ្រអ្នកណា ចាប់វាយខ្នោះអីនោះទេ។ រដ្ឋាបាលកម្ពុជាវិញថាគោរពសិទ្ធិមនុស្ស ប្រជាធិបតេយ្យ តែជាក់ស្តែងគឺអត់មានទេ គឺក្លែងក្លាយ បោកប្រាស់ ហើយក្នុងនាមខ្ញុំជាប្រជាពលរដ្ឋខ្មែរមួយខ្ញុំ ថ្កោលទោសចំពោះរដ្ឋាភិបាលកម្ពុជាតែងតែធ្វើទុក្ខបុកម្នេញ បង្ខិតបង្ខំលើពលរដ្ឋខ្មែរ»។

ស្រដៀងគ្នានេះដែរ អតីតអ្នកទោសមនសិការ លោក គង់ រ៉ៃយ៉ា ដែលចូលរួមជាមួយគណបក្សប្រជាជនកម្ពុជា ហើយក៏បានលាឈប់ពីតំណែងវិញ ក្រោយលោកភៀសខ្លួនដល់ប្រទេសថៃ ធ្លាប់និយាយនៅក្នុងវេទិកាវិទ្យុអាស៊ីសេរីថា ជំនួយការផ្ទាល់របស់លោក ហ៊ុន សែន ម្នាក់ជាអ្នកបញ្ចុះបញ្ចូលផង និងគំរាមយកគុកច្រវ៉ាក់ផង បង្ខំឱ្យលោកចូលរួមជីវភាពនយោបាយជាមួយបក្សកាន់អំណាច។ លោកបន្តថា ពេលនោះលោកបារម្ភពីសុវត្ថិភាព ពីព្រោះក្រុមការងាររបស់លោកនៅរាជធានីភ្នំពេញមួយចំនួនត្រូវបានអាជ្ញាធចោទប្រកាន់ និងចាប់ខ្លួនដាក់ពន្ធនាគារ ពាក់ព័ន្ធការតវ៉ាប្រឆាំងនឹង គ.ជ.ប ដែលមិនអនុញ្ញាតឱ្យបក្សភ្លើងទៀនចូលរួមការបោះឆ្នោតកាលពីខែកក្កដា ឆ្នាំ២០២៣។

លោក គង់ រ៉ៃយ៉ា ឱ្យដឹងថា លោកទទួលបានតួនាទីជាទីប្រឹក្សានៅក្រសួងអប់រំ និងទទួលបានលុយមួយកញ្ចប់សមល្មមអាចយកទៅទិញឡានមួយគ្រឿងបាន ក្រោយលោកចូលជួបថតរូបជាមួយលោក ហ៊ុន សែន។ លោកបញ្ជាក់ថា ការសម្រេចចិត្តរបស់លោកកន្លងមក គឺលោកធ្វើឡើងក្នុងគោលបំណងរក្សាសុវត្ថិភាពមួយពេលដោយមិនក្បត់អ្នកប្រជាធិបតេយ្យទេ។

លោក គង់ រ៉ៃយ៉ា៖ «ខ្ញុំមិនអាចបង្ខំចិត្តធ្វើការងារ ដែលខ្ញុំមិនពេញចិត្តឡើយ ហើយដូចខ្ញុំលើកឡើងពីមុនអ៊ីចឹង គោលដៅសំខាន់បំផុត គឺខ្ញុំធ្វើដើម្បីសុវត្ថិភាពផ្ទាល់ខ្លួន ខ្ញុំចូលទៅគណបក្សប្រជាជនពុំមានគោលដៅបម្រើផលប្រយោជន៍ឱ្យគណបក្សប្រជាជនទេ បើទោះបីជាខ្ញុំគោរពសិទ្ធិសេរីភាពនយោបាយរបស់បងប្អូនដទៃទៀតក៏ដោយ»។

ឆ្លើយតបរឿងនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់វិទ្យុអាស៊ីសេរីថា គណបក្សកាន់អំណាចទទួលយកសមាជិកភាពមកពីគណបក្សប្រឆាំងដោយសារការយោគយល់ដើម្បីជួយឱ្យពួកគេរួចផុតពីសំណាញ់ច្បាប់ដែលលោកអះអាងថា មន្រ្តីបក្សរបស់លោកមិនបានធ្វើសកម្មភាព ដើរសូកប៉ាន់ទិញទឹកចិត្តទេ។ លោក សុខ ឥសាន បានចោទអ្នកដែលធ្វើលិខិតសារភាពកំហុស និងប្រកាសចូលរួមជីវភាពនយោបាយជាមួយបក្សកាន់អំណាច ហើយរត់ត្រឡប់ទៅធ្វើសកម្មភាពប្រឆាំងរដ្ឋាភិបាលវិញ ថា ជាការចុះចូលមិនស្មោះត្រង់ ហើយលោកព្រមានអ្នកទាំងនោះនឹងប្រឈមវិធានការផ្លូវច្បាប់ថែមទៀត។

ក្រៅពីការលួងលោម ទិញទឹកចិត្ត ផ្តល់តួនាទី មុខតំណែង ឋានៈ និងបុណ្យសក្តិនោះ រដ្ឋាភិបាលឪកូនគឺលោក ហ៊ុន សែន និងលោក ហ៊ុន ម៉ាណែត បានប្រើប្រាស់គុកច្រវ៉ាក់ ឬការលើកលែងទោសធ្វើជាមធ្យោបាយ ដើម្បីបង្ខំ និងកែប្រែផ្នត់គំនិតមនុស្សដែលមានទំនោរប្រឆាំង ឱ្យងាកមកគាំទ្រគណបក្សប្រកាន់អំណាចវិញ។ រយៈពេលចុងក្រោយនេះ រដ្ឋាភិបាលត្រកូល ''ហ៊ុន'' មិនត្រឹមតែធ្វើទុកបុកម្នេញ ចាប់ខ្លួនអ្នករិះគន់ និងអ្នកប្រឆាំងយកទៅធ្វើបាបក្នុងគុកប៉ុណ្ណោះទេ ថែមទាំងធ្វើបាបសមាជិកគ្រួសាររបស់ពួកគាត់ថែមទៀត ដើម្បីដាក់សម្ពាធឲ្យអ្នកទាំងនោះ បញ្ឈប់ការតស៊ូមតិ និងចុះចូលជាមួយបក្សកាន់អំណាច។ ឧទាហរណ៍ដូចជាករណីសកម្មជនបក្សប្រឆាំងប្រចាំប្រទេសជប៉ុនលោក ហៃ វណ្ណា ជាដើម។

ទោះបីជារដ្ឋាភិបាលត្រកូលហ៊ុនប្រើអំណាចគាប់សង្កត់បែបនេះក្តី បច្ចុប្បន្នមានអ្នកទោសមនសិការជិត ១០០នាក់កំពុងជាប់ឃុំ ដោយភាគច្រើនពួកគាត់នៅតែរក្សាជំហររឹងមាំដោយសុខចិត្តបន្តជាប់ពន្ធនាគារ រីឯអ្នកខ្លះទៀតសុខចិត្តរត់ភៀសខ្លួនទៅក្រៅប្រទេសដោយមិនចុះញមឡើយ។

ប្រពន្ធសកម្មជនគណបក្សសង្គ្រោះជាតិដែលកំពុងជាប់ឃុំពន្ធនាគារព្រៃសលោក វឿង សំណាង គឺលោកស្រី ទៀង ចិន្តា ប្រាប់វិទ្យុអាស៊ីសេរីថា ប្តីលោកស្រីជាប់ពន្ធនាគារជិត ៣ឆ្នាំទាំងអយុត្តិធម៌ ប៉ុន្តែប្តីលោកស្រីមិនព្រមធ្វើលិខិតសុំទោសដោយនៅតែបន្តរក្សាឆន្ទៈនយោបាយ រឹងមាំជាមួយបក្សជំទាស់ដដែល។ លោកស្រី ទៀង ចិន្តា កោតសរសើរទឹកចិត្តរបស់ប្តីដែលលះបង់សេចក្តីសុខ ស៊ូទ្រាំលំបាកនៅក្នុងពន្ធនាគារ ដើម្បីបុព្វហេតុការពារយុត្តិធម៌ រក្សាភាពស្មោះត្រង់ បើទោះបីជាមន្រ្តីបក្សកាន់អំណាច និងមន្រ្តីពន្ធនាគារព្យាយាមបញ្ជុះបញ្ចូល សន្យា ថា នឹងដោះលែង ផ្តល់ប្រាក់ខែ និងតូនាទីក្នុងស្ថាប័នរដ្ឋជាង១០ដងមកហើយក្តី។ លោកស្រីទាមទារឱ្យរដ្ឋាភិបាលដោះលែងប្តីឱ្យមានសេរីភាពឡើងវិញដោយគ្មានលក្ខខណ្ឌដោះដូរ។

លោកស្រី ទៀង ចិន្តា៖ « ប្តីខ្ញុំស្រឡាញ់លទ្ធិប្រជាធិបតេយ្យ ចង់បានសិទ្ធិសេរីភាពដោយមិនមានការសុំទោស ឬចុះចូលគេទេ ពីព្រោះគាត់ចង់បានសេរីភាពដោយយុត្តិធម៌»។

ជុំវិញរឿងនេះ មន្រ្តីសិទ្ធិមនុស្សលើកឡើងថាប្រជាពលរដ្ឋគ្រប់រូបមានសិទ្ធិសេរីភាពពេញលេញ ក្នុងការគាំទ្រគណបក្សនយោបាយណាមួយដែលខ្លួនស្រលាញ់ពេញចិត្ត ដោយមិនមានការបង្ខិតបង្ខំក្រោមរូបភាពគាបសង្កត់នោះឡើយ។ ប៉ុន្តែបើសិនមានករណីគំរាមកំហែងឱ្យសារភាពកំហុស ឬប្រកាសចុះចូលគណបក្សកាន់អំណាចនោះជាទង្វើខុសច្បាប់ និងបំពានសិទ្ធិនយោបាយរបស់ពលរដ្ឋ។

ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា កត់សម្គាល់ថា រូបភាពដែលសកម្មជននយោបាយបក្សជំទាស់ និងសកម្មជនសង្គម ធ្វើវីដេអូសុំទោស ប្រកាសចុះចូលជាមួយបក្សកាន់អំណាចកន្លងមកកើតឡើងនៅក្រោយពេលអ្នកទាំងនោះទទួលរងសម្ពាធផ្សេងៗ ដូចជាការចោទប្រកាន់តាមប្រព័ន្ធតុលាការ និងការចាប់ខ្លួនដាក់ពន្ធនាគារ។ លោកយល់ថា បើការសារភាពកំហុសក្នុងកាលៈទេសៈនិយាយយករួចខ្លួន ដោយសាររងសម្ពាធ ការគំរាមកំហែងនោះ ពុំមែនកើតចេញទឹកចិត្តពិតទេ។ ម្យ៉ាងទៀតលោកបញ្ជាក់ថា គោលការណ៍ច្បាប់ចាត់ទុករាល់ចម្លើយសារភាពទាំងឡាយដែលទទួលបានពីការដាក់ទណ្ឌកម្ម ការបង្ខិតបង្ខំគឺមិនអាចយកទៅធ្វើជាមូលដ្ឋានផ្លូវច្បាប់បានដែរ។

លោក នី សុខា៖ «សិទ្ធិនយោបាយគឺបុគ្គលម្នាក់ៗមិនត្រូវទទួលរងការបំភិតបំភ័យ ការគំរាមកំហែង ឬការសម្លុតតាមរូបភាព ឬរហូតដល់មានការរើសអើងនៅក្នុងរូបភាពណាមួយទេ។ បើសិនមានការគំរាមកំហែង ការបំភិតបំភ័យ ការរើសអើងក្រោមរូបភាពនយោបាយ អាហ្នឹងជារឿងមួយដែលមានការរំលោភលើសិទ្ធិនយោបាយ រំលោភលើគោលការណ៍សិទ្ធិមនុស្ស ហើយក៏ដូចជារំលោភលើគោលការណ៍ច្បាប់យើងផងដែរ»។

កន្លងមក អ្នកនយោបាយដែលចុះចូលជាមួយគណបក្សកាន់អំណាច លោក ហ៊ុន សែន បានព្យាយាមប្រើប្រាស់ឱ្យពួកគេអូសទាញមន្ត្រីបក្សប្រឆាំង និងបង្ក្រាបអ្នកណាដែលនៅតែមិនព្រមចុះចូល ជាមួយបក្សកាន់អំណាច ក្រោយមកអ្នកខ្លះក៏បាត់មុខពីឆាកនយោបាយ និងបាត់បង់តួនាទីក្នុងជួររដ្ឋាភិបាល ឬអ្នកខ្លះមានតែឋានៈតែគ្មានកន្លែងធ្វើការ ហើយអ្នកខ្លះទៀតត្រូវលោក ហ៊ុន សែន បោះបង់ចោលនៅពេលអស់តម្លៃជាដើម។

កាលពាក់កណ្តាលឆ្នាំ២០២៣ លោក ហ៊ុន សែន បានចេញសារព្រមានមន្ត្រីបក្សប្រឆាំងដែលមកចុះចូល ជាមួយគណបក្សកាន់អំណាចថា បើហ៊ានក្បត់លោកនឹងប្រឈមវិធានការផ្លូវច្បាប់គ្រប់ពេល ដូចជាការសើរើលើបទល្មើសចាស់ ឬសំណុំរឿងដែលមិនទាន់បានលើកលែងទោស។

លោក ហ៊ុន សែន៖ «បើអ្នកឯងគ្រាន់តែបោកប្រាស់ខ្ញុំ ក៏អ្នកឯងអត់រួចដែរ ក្នុងចំណោមសំណុំរឿងប្រាំលើកលែងបានតែមួយសល់បួនទៀត ហើយឥឡូវលើកលែងហើយ យើងដកដីកាចាប់ខ្លួន ហើយទុកសំណុំរឿងមួយកន្លែង ធ្វើមិនដឹងមិនលឺ ប៉ុន្តែបើអ្នកឯងហ៊ានក្បត់ជាមួយការសន្យាជាមួយខ្ញុំ ហើយពេលហ្នឹងអ្នកឯងអត់នៅក្រៅប្រទេសទៀតទេ អ្នកឯងចូលមកក្នុងស្រុកហើយ អ៊ីចឹងទេ អ្នកឯងក៏ចេញទៅក្រៅវិញអត់រួចដែរ »។

ពាក់ព័ន្ធរឿងនេះ ប្រធានសមាគមការពារសិទ្ធិមនុស្សអាដហុក លោក នី សុខា ផ្តល់យោបល់ដល់អ្នកនយោបាយគួរប្រកាន់ជំហរមាំ អត់ធ្មត់ឱ្យបានខ្ពស់ ពីព្រោះការចេញលិខិតសុំទោស ឬប្តូរជំហរនយោបាយមិនបានត្រឹមត្រូវនឹងអាចធ្វើឱ្យប៉ះពាល់ដល់កិត្តិយស គុណតម្លៃនយោបាយរបស់ខ្លួន និងបាត់ការគាំទ្រពីពលរដ្ឋនៅថ្ងៃអនាគត។ លោកចង់ឃើញអ្នកនយោបាយប្រគួតប្រជែងគ្នាដោយសុច្ចរិតភាព សេចក្តីថ្លៃថ្នូរ ដើម្បីធានាឱ្យសង្គមមានយុត្តិធម៌ ប្រជាធិបតេយ្យ និងការប្រកួតប្រជែងដោយស្មើភាពគ្នា៕

From ព័ត៌មានថ្មីៗ | RFA
via_IFTTT

RFA | អ្នកភូមិថា តំណាងក្រុមហ៊ុនចិននៅខេត្តព្រះវិហារលួចច្រូតស្រូវពលរដ្ឋអស់ជាង ២ហិកតារ | hot news

noreply@blogger.com (Sotheavy royals) — Mon, 28 Oct 2024 08:58:00 +0000

អ្នកភូមិថា បក្ខពួកតំណាងក្រុមហ៊ុនចិននៅខេត្តព្រះវិហារ បានសហការជាមួយទាហានលួចច្រូតស្រូវពលរដ្ឋអស់ជាង ២ហិកតារ ដោយសារតែពលរដ្ឋមិនព្រមធ្វើកិច្ចសន្យាប្រគល់ដីឱ្យទៅក្រុមហ៊ុន។ មន្ត្រីសង្គមស៊ីវិលថា ទង្វើរបស់ក្រុមហ៊ុនធ្វើទុក្ខបុកម្នេញ មកលើពលរដ្ឋតាមអំពើចិត្តនេះ គឺជាអំពើខុសច្បាប់ ហើយពលរដ្ឋត្រូវតែហ៊ានក្រោកឈរតវ៉ា។

អ្នកភូមិរស់នៅឃុំម្លូព្រៃពីរ ស្រុកឆែប ឈឺចាប់និងហួសចិត្ត នៅពេលដែលអាជ្ញាធរមូលដ្ឋានមិនព្រមកោះហៅ តំណាងក្រុមហ៊ុន ហេងហ្វូ គ្រុប ស៊ូហ្គឺរ អីនដាស្ទ្រី (Hengfu Group Sugar Industry) គឺលោក ឈៀង គង់នៅ មកដោះស្រាយវិវាទដីធ្លី ជូនពលរដ្ឋឱ្យបានត្រឹមត្រូវ ប៉ុន្តែ បែរជាបណ្ដែតបណ្ដោយឱ្យបុគ្គលរូបនេះដើរគំរាមកំហែងពលរដ្ឋ និងលួចច្រូតស្រូវពួកគាត់យកទៅលក់តាមអំពើចិត្ត។

ពលរដ្ឋរស់នៅភូមិបុស្ស លោក ឈឿន ដាណូ ប្រាប់វិទ្យុអាស៊ីសេរីនៅថ្ងៃទី២៧ ខែតុលា ថា កាលពីថ្ងៃទី២៤ ខែតុលា បក្ខពួក លោក ឈៀង គង់នៅ បានសហការជាមួយកម្លាំងទាហាន លួចច្រូតស្រូវ របស់លោកអស់ចំនួន ២ហិកតារកន្លះ។ ក្រោយមកលោកនិងអ្នកភូមិ ជិត ១០០នាក់ បាននាំគ្នាទៅសាលាឃុំម្លូព្រៃពីរ ដើម្បីស្នើសុំឱ្យអាជ្ញាធរជួយអន្តរាគមន៍ ប៉ុន្តែអាជ្ញាធរថា ករណីនេះ ពួកលោកគ្មានលទ្ធភាព ដោះស្រាយនោះឡើយ។

លោក ឈឿន ដាណូ បានចំណាយលុយអស់ជាង ៣លានរៀល សម្រាប់ដាំស្រូវលើដីជាង ២ហិកតារនេះ។ លោកថា ស្រូវនេះប្រសិនបើ លក់អាចបានថវិកា ចន្លោះពី ៨លាន ទៅ៩លានរៀល។ លោកសោកស្ដាយស្រូវជាខ្លាំង ដែលតំណាងក្រុមហ៊ុនលួចច្រូតអស់។ លោកស្នើឱ្យអាជ្ញាធរពាក់ព័ន្ធជួយរកយុត្តិធម៌។

លោក ឈឿន ដាណូ ៖ «សំណូមពរឱ្យអាជ្ញាធរដែនដីយើង ឱ្យគាត់ជួយដោះស្រាយ ជាសំណងសងមកខ្ញុំវិញ ព្រោះស្រូវខ្ញុំធ្វើហត់ណាស់ ទម្រាំបានផលប៉ុណ្ណឹង ចំណាយទាំងជីផង ថ្នាំផង។ អ៊ីចឹងសូមឱ្យគាត់សងឱ្យសមរម្យ ដូចអ្វីដែលខ្ញុំបាន បាត់បង់ទៅ ដែលគាត់យករបស់ខ្ញុំទៅ»។ វិទ្យុអាស៊ីសេរី នៅមិនទាន់អាចបញ្ជាក់បន្ថែមបាន ពីតំណាងក្រុមហ៊ុន លោក ឈៀង គង់នៅ ជុំវិញករណីអ្នកភូមិចោទនេះនៅឡើយទេ នៅថ្ងៃទី២៧ ខែតុលា។ ប៉ុន្តែ បញ្ហាបាត់ស្រូវរបស់ពួកគាត់នេះ កើតឡើងក្រោយពេលដែល អភិបាលរងខេត្ត លោក យឹម បញ្ញា បានសហការជាមួយអាជ្ញាធរភូមិឃុំ និង តំណាងក្រុមហ៊ុន លោក ឈៀង គង់នៅ ទៅបញ្ចុះបញ្ចូល និងគំរាមកំហែងអ្នកភូមិឱ្យធ្វើកិច្ចសន្យាឈប់អាស្រ័យផល លើដីនោះទៀត ដោយអះអាងថា ដីដែល ពលរដ្ឋអាស្រ័យផលនោះ គឺជាដីក្រុមហ៊ុន។

ទោះជាបែបនេះក្ដី អ្នកភូមិជាច្រើនមិនព្រមធ្វើកិច្ចសន្យានោះទេ ដោយពួកគាត់ថា ដីនេះ គឺជាកម្មសិទ្ធិ របស់អ្នកភូមិជាយូរមកហើយ។ ក្រោយមកទៀត ករណីនេះ បានធ្វើឱ្យលោក ឈៀង គង់នៅ ខឹងសម្បាជាខ្លាំង ហើយបានសហការជាមួយកម្លាំងទាហាន ប្រដាប់ដោយកាំភ្លើង ដើរគំរាមកំហែងបាញ់អ្នកភូមិមិនឱ្យប្រមូលផលស្រូវលើដីនោះ ហើយ ប្រសិនបើពលរដ្ឋណាប្រមូលផលស្រូវ នឹងត្រូវចាប់ខ្លួន ដកហូតវត្ថុមានតម្លៃ ដូចជាគោយន្ត និងម៉ាស៊ីនច្រូតស្រូវជាដើម។

វិទ្យុអាស៊ីសេរី មិនអាចទាក់ទងអភិបាលខេត្ត ព្រះវិហារ លោក គីម រិទ្ធី និងអភិបាលស្រុកឆែបស្ដីទី លោក អ៊ុំ សុភឿន ដើម្បីឆ្លើយតបជុំវិញរឿងនេះបានទេ នៅថ្ងៃទី២៧ ខែតុលា។

រីឯមេឃុំម្លូព្រៃពីរ លោក កាន់ សុវណ្ណគា ប្រាប់វិទ្យុអាស៊ីសេរី នៅថ្ងៃដដែលនេះថា ករណីក្រុមហ៊ុនលួចច្រូតស្រូវពលរដ្ឋនៅភូមិបុស្ស ជាង២ហិកតារនោះ លោកក៏បានទទួលដំណឹងនេះ តាមរយៈពលរដ្ឋដែរ កាលពីថ្ងៃទី២៥ ខែតុលា នៅពេលដែលពលរដ្ឋទាំងនោះ បានមកស្នើសុំឱ្យអាជ្ញាធរជួយអន្តរាគមន៍ ប៉ុន្តែ លោកថា ករណីនេះ អាជ្ញាធរឃុំពុំមានលទ្ធភាពដោះស្រាយនោះទេ។

លោក កាន់ សុវណ្ណគា៖ «ហ្នឹងហើយ ឮពួកគាត់(ពលរដ្ឋ) រាយការណ៍មកថាមានច្រូតស្រូវ ប៉ុន្តែ ស្រូវដែលប៉ះពាល់ជាមួយនឹងមិនម៉េចទេ មិនទាន់បានទៅមើល។ ការងារនេះ គឺវានិយាយទៅខាងឃុំរាងផុតដៃហើយ ទាល់តែខាងថ្នាក់ខេត្តចុះមកដោះស្រាយ បានអាចទៅរួច ព្រោះថាការងារនេះ វារាងធំដែរទាក់ទងជាមួយក្រុមហ៊ុន»។

ទាក់ទិនរឿងនេះ នាយកប្រតិបត្តិអង្គការពន្លកខ្មែរ លោក ប៉ឹក សោភ័ណ ប្រាប់វិទ្យុអាស៊ីសេរីនៅ ថ្ងៃទី២៧ ខែតុលា ថា ទង្វើដែលតំណាងក្រុមហ៊ុនចិន លោក ឈៀង គង់នៅ លួចច្រូតស្រូវរបស់ពលរដ្ឋនេះ គឺជាអំពើខុសច្បាប់ ដែលអាជ្ញាធរពាក់ព័ន្ធ ត្រូវតែកោះហៅ បុគ្គលរូបនេះ ដើម្បីចូលបំភ្លឺ។ លោកបន្តថា ករណីនេះ គួរតែដល់ពេលហើយ ដែល អាជ្ញាធរមូលដ្ឋាន និងខេត្ត ត្រូវតែដោះស្រាយ ដោយឈរលើគោលការណ៍យុត្តិធម៌ជូនដល់ពលរដ្ឋរងគ្រោះ។

លោក ប៉ឹក សោភ័ណ៖ «ភាសាសាមញ្ញគេហៅថាចោរ។ ចោរទៅលួចច្រូតស្រូវរបស់ពួកគាត់ ។ អ៊ីចឹង ប្រសិនបើ ចោរទៅលួចច្រូតស្រូវរបស់គាត់ គឺអ្នកនោះ ជាអ្នកមានទោស បើនិយាយតាមផ្លូវច្បាប់ គឺជាអ្នកប្រព្រឹត្តទោស។ អ៊ីចឹង អាជ្ញាធរគាត់គួរតែពិនិត្យមើលស្ថានទម្ងន់ទោស របស់បុគ្គលនោះ ហើយពលរដ្ឋក៏គាត់ មានសិទ្ធិ ប្ដឹងបុគ្គលនោះដែរ តាមនីតិវិធីច្បាប់»។

លោក ប៉ឹក សោភ័ណ ថា ការពន្យារពេលមិនដោះស្រាយវិវាទដីធ្លីនេះឱ្យបានឆាប់ ពីសំណាក់អាជ្ញាធរពាក់ព័ន្ធ នឹងធ្វើឱ្យពលរដ្ឋធ្លាក់ក្នុងជីវភាពក្រីក្រ។ ទន្ទឹមនឹងនោះលោកថា បញ្ហានេះ ក៏មិនអាចបញ្ចប់បានដោយងាយនោះទេ ប្រសិនបើពលរដ្ឋមិននាំគ្នាតវ៉ា។ លោកថា ពលរដ្ឋទាំងអស់ត្រូវសាមគ្គីគ្នា ដាក់ពាក្យបណ្ដឹង ទៅអាជ្ញាធរឃុំស្រុកខេត្ត ហើយប្រសិនបើអាជ្ញាធរទាំងនោះ នៅតែគ្មានដំណោះស្រាយទេនោះ អ្នកភូមិត្រូវដាក់ពាក្យបណ្ដឹងនៅតាមក្រសួងពាក់ព័ន្ធនានា នៅរាជធានីភ្នំពេញ ឱ្យជួយរកដំណោះស្រាយ៕

From ព័ត៌មានថ្មីៗ | RFA
via_IFTTT

RFA | ស្ថានទូតខ្មែរនៅអាមេរិកច្រានចោលការលើកឡើងថា មិនបានយកចិត្តទុកដាក់សម្អាតបរិស្ថានជុំវិញស្ថានទូត | hot news

noreply@blogger.com (Sotheavy royals) — Mon, 28 Oct 2024 07:58:00 +0000

ស្ថានឯកអគ្គរាជទូតខ្មែរប្រចាំនៅសហរដ្ឋអាមេរិកច្រានចោលការលើកឡើងថា ស្ថានទូតមិនបានយកចិត្តទុកដាក់សម្អាតបរិស្ថានជុំវិញស្ថានទូត។

សេចក្ដីជូនដំណឹងរបស់ស្ថានទូតខ្មែរ ដែលមានមូលដ្ឋាននៅរដ្ឋធានីវ៉ាស៊ីនតោន ចេញកាលពីថ្ងៃទី២៥ ខែតុលា បញ្ជាក់ថា ស្ថានទូតបានយកចិត្តទុកដាក់រៀបចំបរិស្ថានជុំវិញ និងក្នុងស្ថានទូត ដោយរៀបចំ និងកាត់ស្មៅជាប្រចាំ ថែមទាំងមានកន្លែងដាំបន្លែ កន្លែងកីឡា និងកន្លែងធ្វើកម្មវិធីទទួលបងប្អូនប្រជាពលរដ្ឋខ្មែរ និងភ្ញៀវអន្តរជាតិទៀតផង។

ការលើកឡើងរបស់ស្ថានទូតនេះធ្វើឡើងបន្ទាប់ពីមានពលរដ្ឋខ្មែររស់នៅសហរដ្ឋអាមេរិក កាលពីពេលថ្មីៗនេះបាននាំគ្នាទៅធ្វើបាតុកម្មនៅខាងមុខស្ថានទូត រឿងបញ្ហាប្រជាធិបតេយ្យនៅកម្ពុជា រួចស្នើឱ្យស្ថានទូត យកចិត្តទុកដាក់សម្អាតបរិស្ថានជុំវិញស្ថានទូតឱ្យស្អាតកុំឱ្យមានសំរាម និងស្មៅដុះទ្រុបទ្រុល ដែលធ្វើឱ្យប៉ះពាល់ដល់មុខមាត់ប្រទេសជាតិ។

ត្រង់ចំណុចនេះស្ថានទូតពន្យល់ថា ការមានស្មៅដុះ និងស្លឹកឈើបន្តិចបន្តួចជុំវិញរបងស្ថានទូត បានកើតឡើងដោយសារមានព្យុះ និងភ្លៀងធ្លាក់ជាប់ៗគ្នា ស្របពេលរដូវស្លឹកឈើជ្រុះប៉ុណ្ណោះ។ ស្ថានទូតបន្តថា ការផ្សព្វផ្សាយថា ស្ថានទូតមិនបានយកចិត្តទុកដាក់សម្អាតបរិស្ថានជុំវិញស្ថានទូត ជាការផ្សព្វផ្សាយតែមួយជ្រុង ដើម្បីតែការរិះគន់ តិះដៀល ប្រមាថថ្នាក់ដឹកនាំ និងមន្ត្រីស្ថានទូត។

ជាមួយគ្នានេះស្ថានទូតក៏បានភ្ជាប់នូវរូបភាព ដែលស្ថានទូតធ្វើកម្មវិធីមួយចំនួនរបស់ស្ថានទូត នាពេលកន្លងទៅ ដោយបង្ហាញឱ្យឃើញការជួបជុំទទួលភ្ញៀវនៅក្នុងបរិវេណស្ថានទូត ដែលមានទីធ្លាស្អាត មានការតុបតែងលម្អ និងមានភ្លើងបំភ្លឺស្អាតនៅពេលយប់ថែមទៀត។

បើទោះជាយ៉ាងណាក្រុមពលរដ្ឋអះអាងថា ពួកគាត់ចង់ឃើញមន្ត្រីស្ថានទូតបំពេញការងារដោយយកចិត្តទុកដាក់ ដើម្បីមុខមាត់ប្រទេស ដើម្បីបម្រើប្រយោជន៍ពលរដ្ឋដោយគ្មានការរើសអើង មិនមែនបម្រើតែបក្សកាន់អំណាច និងក្រុមគ្រួសារលោក ហ៊ុន សែន៕

From ព័ត៌មានថ្មីៗ | RFA
via_IFTTT

RFA | បណ្ដាញយុវជន និងសហគមន៍មូលដ្ឋាន ចេញសេចក្ដីថ្លែងការណ៍រួម ស្ដីពីការកាប់ឈើខុសច្បាប់នៅក្នុងវេទិការបស់អង្គការសហប្រជាជាតិ | hot news

noreply@blogger.com (Sotheavy royals) — Sun, 27 Oct 2024 20:58:00 +0000

តំណាងសហគមន៍ជនជាតិដើមភាគតិច ព្រះសង្ឃ និងបណ្ដាញយុវជនកម្ពុជា ជំរុញរដ្ឋាភិបាលឱ្យទប់ស្កាត់បទល្មើសអារឈើខុសច្បាប់ និងលើកម្ពស់សិទ្ធិសេរីភាពជាមូលដ្ឋានរបស់ពលរដ្ឋក្នុងកិច្ចការអភិរក្សធនធានធម្មជាតិ។ ការលើកឡើងនេះធ្វើឡើងក្នុងសេចក្ដីថ្លែងការណ៍រួម ក្រោយពីពួកគាត់បានចូលរួមវេទិការបស់អង្គការសហប្រជាជាតិ ស្ដីពីជីវចម្រុះលើកទី១៦ នៅប្រទេសកូឡុំប៊ី (Colombia)។

បណ្ដាញសហគមន៍ព្រៃឡង់ បណ្ដាញសហគមន៍ព្រៃព្រះរកា សង្ឃសហគមន៍រុក្ខាវ័ន និងសមាគមបណ្ដាញយុវជនកម្ពុជា ក្នុងសេចក្ដីថ្លែងការណ៍រួមមួយនៅថ្ងៃទី២៥ ខែតុលាថា បញ្ហាកាប់ទន្ទ្រានដីព្រៃខុសច្បាប់ និងការរឹតត្បិតសិទ្ធិជាមូលដ្ឋាន ពីសំណាក់អាជ្ញាធរមូលដ្ឋាន គឺជាក្ដីបារម្ភរបស់ពលរដ្ឋកម្ពុជា។ ពួកគាត់ថា ការកាប់ទន្ទ្រានដីព្រៃ បង្កការគំរាមកំហែងដល់បរិស្ថាន និងដីព្រៃជំនឿរបស់ជនជាតិដើមភាគតិច។

សេចក្ដីថ្លែងការណ៍ដដែលៗ លើកឡើងថា ព្រៃឈើដែលនៅសេសសល់នៅលើពិភពលោកភាគច្រើន ស្ថិតនៅក្នុងទឹកដី នៃសហគមន៍មូលដ្ឋាន និងជនជាតិដើមភាគតិច ដែលពួកគាត់រក្សាអត្តសញ្ញាណគោរពជំនឿសាសនា និងរក្សាប្រពៃណីដ៏យូរអង្វែង។ករណីនេះ បានជំរុញឱ្យជនជាតិដើមភាគតិចចូលរួមចំណែកយ៉ាងសំខាន់ ក្នុងការទប់ស្កាត់ការបាត់បង់ជីវជាតិប្រព័ន្ធ អេកូ ការប្រែប្រួលអាកាសធាតុ និងការថែរក្សាភាពស្រស់ស្អាតរបស់ភពផែនដី។

សមាជិកស្នូលនៃបណ្ដាញសហគមន៍ព្រៃឡង់ លោក យុត សឿម លើកឡើងក្នុងសេចក្ដីថ្លែងការណ៍ថា ជនជាតិដើមភាគតិច និង សហគមន៍មូលដ្ឋាន នៅតាមបណ្ដាប្រទេសមួយចំនួន ដូចជានៅប្រទេសកូឡុំប៊ី និងប្រេស៊ីល ជាដើម ត្រូវបានរដ្ឋាភិបាល របស់ពួកគេ គាំទ្រពេញទំហឹងក្នុងការផ្ដល់មូលនិធិ ដើម្បីអភិរក្សធនធានធម្មជាតិ។ លោកសង្ឃឹមថា រដ្ឋាភិបាលកម្ពុជា ជាពិសេសក្រសួងបរិស្ថាន នឹងគាំទ្រដល់កិច្ចខិតខំប្រឹងប្រែងអភិរក្សព្រៃឈើ និង ជីវចម្រុះ របស់ពលរដ្ឋមូលដ្ឋានឱ្យបានល្អប្រសើរ ដូចគ្នានឹង បណ្ដាប្រទេសនៅលើពិភពលោកដែរ។

ចំណែកប្រធានសមាគមបណ្ដាញយុវជនកម្ពុជា (CYN) លោក ហេង គឹមហុង លើកឡើងក្នុងសេចក្ដីថ្លែងការណ៍ដែរថា ការវិនិយោគលើយុវជនដើម្បីការពារបរិស្ថាន និងជីវចម្រុះ គឺចាំបាច់ណាស់។ លោកសង្ឃឹមថា វេទិកា COP16 នឹងធានាបាននូវប្រព័ន្ធគាំទ្រដ៏រឹងមាំ សម្រាប់ការចូលរួម របស់យុវជន ក្នុងការអភិរក្សជីវចម្រុះ និងតាមដានការអនុវត្តគោលនយោបាយរបស់ប្រទេសសមាជិក រួមនឹងការបង្កើនមូលនិធិសម្រាប់គំនិតផ្ដួចផ្ដើមរបស់យុវជនត្រូវតែជាអាទិភាព។ លោកបន្តថា រដ្ឋាភិបាលកម្ពុជា គួរតែមានតម្លាភាពអំពីគោលនយោបាយរបស់ខ្លួន និងលើកទឹកចិត្តឱ្យមាន ការចូល រួមរបស់យុវជនក្នុងការការពារបរិស្ថាន។

លោក ហេង គឹមហុង ប្រាប់វិទ្យុអាស៊ីសេរី នៅថ្ងៃទី២៦ ខែតុលា បន្ថែមថា ការចេញសេចក្ដីថ្លែងការណ៍នេះ ដើម្បីបង្ហាញក្ដីកង្វល់អំពីកាប់ព្រៃឈើខុសច្បាប់ និងស្ថានភាពសិទ្ធិជាមូលដ្ឋានរបស់អ្នកការពារព្រៃឈើនៅកម្ពុជា ឱ្យពិភពលោកបានដឹង។ បន្ថែមពីនោះ លោកជំរុញឱ្យរដ្ឋាភិបាលកម្ពុជា និងអាជ្ញាធរមូលដ្ឋានទប់ស្កាត់បទល្មើសអារឈើខុសច្បាប់ឱ្យមានប្រសិទ្ធភាព រួមនឹងបើកលំហសិទ្ធិសេរីភាពដល់សហគមន៍ និងអង្គការសង្គមស៊ីវិលដោយគ្មានការរឹតត្បិត។

លោក ហេង គឹមហុង៖ «កម្ពុជាត្រូវប្រកាន់ការប្ដេជ្ញាចិត្តរបស់ខ្លួន នូវគោលនយោបាយល្អប្រសើរ បើកលំហឱ្យសហគមន៍ចូលរួមក្នុងការការពារព្រៃឈើឱ្យទូលំទូលាយ។ ជាពិសេស ភាគីពាក់ព័ន្ធ ត្រូវគោរពទៅដល់ជំនឿ សិទ្ធិសេរីភាពរបស់ជនជាតិដើមភាគតិច និងសិទ្ធិរបស់សហគមន៍មូលដ្ឋាន ព្រោះអី ពួកគាត់សំខាន់ណាស់ ក្នុងការជួយអភិរក្សមានប្រសិទ្ធភាព ប្រកបទៅតាមផ្នែកនានា ដែលគេហៅថា ជួយជំរុញឱ្យអាជ្ញាធរ មានការអនុវត្តគោលនយោបាយជាតិ និងអន្តរជាតិ»។

វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងបរិស្ថាន លោក ខ្វៃ អាទិត្យា និងអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតបជុំវិញរឿងនេះបានទេ នៅថ្ងៃទី២៦ ខែតុលា ដោយសារទូរស័ព្ទហៅចូល តែគ្មានអ្នកទទួល។

វេទិកាអង្គការសហប្រជាជាតិស្ដីពីជីវចម្រុះ លើកទី១៦ នេះ មានគោលបំណងតាមដានការអនុវត្តក្របខណ្ឌជីវចម្រុះជាសកល ដើម្បីលើកកម្ពស់ការប្រើប្រាស់ប្រកបដោយនិរន្តរភាព នៃព្រៃឈើ ប្រព័ន្ធ អេកូឡូស៊ី និង ជីវចម្រុះ។ វេទិកានេះមានអ្នកចូលជាង ២ម៉ឺននាក់ មកពីបណ្ដាប្រទេសនៅលើពិភពលោក ដែលភាគច្រើន ជាសមាជិក តំណាងមកពីប្រទេសហត្ថលេខី សហគមន៍ និងអង្គការសង្គមស៊ីវិល ដើម្បីផ្លាស់ប្ដូរបទពិសោធន៍ និងបន្តការប្ដេជ្ញាចិត្តរបស់ពួកគេក្នុងការការពារធនធានធម្មជាតិ និងសត្វព្រៃ។ វេទិកានេះធ្វើឡើងនៅទីក្រុងកាលី (Cali) ប្រទេសកូឡុំប៊ី (Colombia)។

បណ្ដាញសហគមន៍ព្រៃឈើ និងបណ្ដាញយុវជនអះអាងថា ក្នុងនាមតំណាងអង្គការសង្គមស៊ីវិល និងសហគមន៍ព្រៃឈើនៅកម្ពុជា ប្ដេជ្ញាចិត្តយ៉ាងមុតមាំក្នុងការគាំទ្ររដ្ឋាភិបាលកម្ពុជាក្នុងការអនុវត្តក្របខណ្ឌជីវចម្រុះសកល និងផែនការយុទ្ធសាស្ត្រ និងសកម្មភាពជីវចម្រុះ ដើម្បីធនធានធម្មជាតិ។ ពួកគាត់លើកទឹកចិត្តឱ្យរដ្ឋាភិបាលចូលរួមជាមួយយុវជន ជនជាតិដើមភាគតិច និងសហគមន៍មូលដ្ឋាន ដើម្បីការពារ និង អភិរក្សព្រៃឈើ និងជីវចម្រុះ ដ៏មានតម្លៃ របស់កម្ពុជាឡើងវិញ។

មាត្រា២១ ស្ដីពីតំបន់ការពារធម្មជាតិបានចែងថា សហគមន៍មូលដ្ឋាន សហគមន៍ជនជាតិដើមភាគតិច សាធារណជន និងសង្គមស៊ីវិលត្រូវបានលើកទឹកចិត្តឱ្យមានការចូលរួមយ៉ាងពេញលេញក្នុងការផ្ដល់ និងទទួលយកព័ត៌មានទាក់ទងនឹងការគ្រប់គ្រង ការអភិរក្ស និងការអភិវឌ្ឍក្នុងតំបន់ការពារធម្មជាតិ។ ទោះជាយ៉ាងណា កន្លងទៅ មន្ត្រីបរិស្ថានតែងរារាំងមិនឱ្យក្រុមប្រជាសហគមន៍ និងនិស្សិត ចូលល្បាតព្រៃនោះឡើយ៕

From ព័ត៌មានថ្មីៗ | RFA
via_IFTTT

RFA | ពលរដ្ឋខ្មែរនៅអឺរ៉ុបបាតុកម្មទាមទារឲ្យបារាំងដាក់សម្ពាធទៅរដ្ឋាភិបាលដឹកនាំដោយត្រកូល«ហ៊ុន» | hot news

noreply@blogger.com (Sotheavy royals) — Sun, 27 Oct 2024 11:58:00 +0000

ពលរដ្ឋខ្មែររស់នៅសហភាពអឺរ៉ុប ព្រមទាំងអ្នកនយោបាយ និងសកម្មជនសិទ្ធិមនុស្សនៅទីនោះផង រួមគ្នាទាមទារឲ្យរដ្ឋាភិបាលបារាំង ដាក់សម្ពាធទៅលើរដ្ឋាភិបាលខ្មែរបច្ចុប្បន្នដែលដឹកនាំដោយគ្រួសារត្រកូលហ៊ុន ឲ្យគោរពនូវកិច្ចព្រមព្រៀងសន្តិភាពទីក្រុង ប៉ារីស២៣ តុលា ឆ្នាំ១៩៩១។

ការទាមទារនេះ ធ្វើឡើងតាមរយៈការធ្វើបាតុកម្មធំមួយនៅទីក្រុងប៉ារីស ប្រទេសបារាំង នៅថ្ងៃសៅរ៍ ទី២៦ តុលា ដែលមានអ្នកចូលរួម ជាច្រើនរយនាក់ ក្នុងនោះ ក៏មានប្រធានស្ដីទីគណបក្សសង្គ្រោះជាតិ លោក សម រង្ស៊ី ចូលរួមដើរក្បួនធ្វើបាតុកម្ម និងបានថ្លែងសារមួយចំនួនទាក់ទងនឹងបញ្ហាប្រជាធិបតេយ្យ និងសិទ្ធិមនុស្សនៅកម្ពុជានាពេលនោះដែរ។

ពលរដ្ឋខ្មែររស់នៅសហភាពអឺរ៉ុប ចង់ឃើញរដ្ឋាភិបាលបារាំង ដែលជាម្ចាស់ហត្ថលេខីដ៏ដំខាន់មួយ នៃកិច្ចព្រមព្រៀងសន្តិភាពទីក្រុងប៉ារីស មានវិធានការជាក់លក្ខណ៍ម៉ឺងម៉ាត់ ជាមួយរដ្ឋាភិបាលដឹកនាំដោយត្រកូល ហ៊ុន ដែលកាន់អំណាចតជំនាន់មកនេះ ឲ្យងាកមកដើរតាមគន្លងប្រជាធិបតេយ្យ និងគោរពសិទ្ធិមនុស្សឡើងវិញ។

ជាងនេះទៅទៀត ពួកគាត់ក៏ចង់ឲ្យរដ្ឋាភិបាលបារាំង ជំរុញទៅប្រទេសជិតខាងកម្ពុជា គោរពអធិបតេយ្យភាពជាតិខ្មែរ ឲ្យបានត្រឹមត្រូវ ដូចដែលមានចែងក្នុងរដ្ឋធម្មនុញ្ញ។ ជាពិសេសមានចែងក្នុងកិច្ចព្រមព្រៀងសន្តិភាពទីក្រុង ប៉ារីស២៣ តុលា១៩៩១។

តំណាងគណបក្សសង្គ្រោះជាតិ នៅប្រទេសបារាំង និងជាអ្នកសម្របសម្រួល ការធ្វើបាតុកម្ម លោក ទេព មនោរម្យ មានប្រសាសន៍ថា អ្នកចូលពីគ្រប់ទិសទីក្នុងប្រទេសបារាំង និងសហភាពអឺរ៉ុបមានគ្នាប្រមាណ ៥០០នាក់ កាលពីថ្ងៃទី២៦ ខែតុលា បានស្នើឡើងបែបនេះតាមរយៈ ការដើរដង្ហែក្បួន ស្រែកជ័យឃោស លើកបដា ដើរកាត់តាមតំបន់សំខាន់ៗក្នុងទីក្រុងប៉ារីស និងផ្សាយផ្ទាល់តាមបណ្ដាញសង្គមជាច្រើន ដើម្បីឲ្យរដ្ឋាភិបាលបារាំង និងសហគមន៍អន្តរជាតិទូទាំងពិភពលោកបានដឹងអំពីការចង់បានរបស់ពលរដ្ឋខ្មែរទាំងក្នុងប្រទេស និងខ្មែររស់នៅទូទាំងពិភពលោក។

លោក ទេព មនោរម្យ៖ «គាត់មើលឃើញថា ការចាប់យុវជនបរិស្ថាន និងចាប់មនុស្សផ្សេងទៀតដាក់គុក គឺជាការរំលោភកិច្ចព្រមព្រៀងសន្តិភាពទីក្រុង ប៉ារីសយ៉ាងធ្ងន់ធ្ងរ អញ្ចឹងហើយបងប្អូនខ្មែរយើងគាត់មានទឹកចិត្តក្តៅផុសផុលមែនទែន ហើយនៅក្នុងបដាគឺបានទាមទារឲ្យដោះលែង អ្នកទោសមនសិការ សកម្មជន បរិស្ថាន និងឲ្យគោរពកិច្ចព្រមព្រៀងសន្តិភាពទីក្រុង ប៉ារីស...»។

ចំណែកបាតុករជាស្ត្រីខ្មែររស់ប្រទេសបារាំងម្នាក់ទៀត ស្នើឲ្យរដ្ឋាភិបាលរៀបចំការបោះឆ្នោតឡើងវិញដែលជាការបោះឆ្នោតមួយធានាបាននូវឯករាជ្យ តម្លាភាព ត្រឹមត្រូវ និងយុត្តិធម៌ដោយមានការចូលរួមពីគ្រប់គណបក្សនយោបាយទាំងអស់ដោយគ្មានការរើសអើង គំរាមកំហែង និងធ្វើទុក្ខបុកម្នេញ។

«យើងក្នុងនាមជាខ្មែរ សូមឲ្យអន្តរជាតិ ពិភពលោកទាំងអស់ជួយធ្វើអន្តរាគមន៍ ដើម្បីប្រទេសយើងទាំងអស់គ្នា យើងរងទុក្ខអស់រយៈពេល៣៣ឆ្នាំមកហើយ ក្រោយកិច្ចព្រមព្រៀងសន្តិភាពទីក្រុងប៉ារីស ដែលគ្មានដំណោះស្រាយ ហ៊ុន សែន មិនបានគោរពទេ មែនទេ បងប្អូន....? »

ពួកគាត់បញ្ជាក់ថា ការបោះឆ្នោត ដែលអាចទទួលយកបាននោះ គឺការបោះឆ្នោតដែលមានការចូលរួមសង្កេតការណ៍ពីសហគមន៍អន្តរជាត គ.ជ.បឯករាជ្យ ជាពិសេស មានគណបក្សសង្គ្រោះជាតិ ដែលជាគណបក្សប្រឆាំងធំជាងគេ ហើយដែលត្រូវលោក ហ៊ុន សែន រំលាយចោល។

ប្រធានស្ដីទីគណបក្សសង្គ្រោះជាតិ លោក សម រង្ស៊ី ក៏បានចូលរួមដើរក្បួនធ្វើបាតុកម្ម ដូចពលរដ្ឋដទៃទៀតដែរ។

លោកលើកឡើងថ្លែងសារជាសាធារណៈចំពោះក្រុមបាតុករថា កត្តាសំខាន់ ពលរដ្ឋខ្មែរទូទាំងពិភពលោក ត្រូវរួមគ្នាជាធ្លុងមួយ ធ្វើយ៉ាងសង្គ្រោះប្រជាធិបតេយ្យ និងបញ្ហាសិទ្ធិមនុស្សនៅកម្ពុជាឲ្យរស់ឡើងវិញ ហើយសំឡេងទាមទាររបស់ខ្មែរទូទាំងពិភពលោកជាសំឡេងរួមតែមួយ និងតំណាងឲ្យមនសិការពលរដ្ឋខ្មែរនៅក្នុងស្រុកដែលពួកគាត់ធ្វើអ្វីមិនកើត និយាយអ្វីមិនបាន ដោយរបបត្រកូលហ៊ុន ដកហូតសិទ្ធិពួកគាត់ទាំងស្រុងដោយយកតុលាការ និងគុកច្រវាក់មកគំរាម។

លោក សម រង្ស៊ី៖ «ដូច្នេះការទាមទាររបស់ពួកយើងទាំងអស់គ្នា គឺជាការទាមទារត្រឹមត្រូវ យើងតំណាងឲ្យប្រជាពលរដ្ឋក្នុងប្រទេសកម្ពុជា ដែលលោកអត់មានសិទ្ធិតវ៉ាទេ តែយើងមានសិទ្ធិ មានសេរីភាពនៅប្រទេសប្រជាធិបតេយ្យ ដូចជានៅប្រទេសបារាំងនេះ យើងត្រូវតែសម្ដែងមតិរបស់យើង ដើម្បីទាមទារនូវអ្វីដែលប្រជាពលរដ្ឋទាំងមូលចង់បានគឺសេរីភាព និងយុត្តិធម៌...»។

វិទ្យុអាស៊ីសេរី មិនអាចទាក់ទងមន្ត្រីរដ្ឋាភិបាល លោក ហ៊ុន ម៉ាណែត ដើម្បីឆ្លើយតប ជុំវិញរឿងនេះបានទេ កាលពីថ្ងៃទី២៦ តុលា។

ក៏ប៉ុន្តែ កន្លងមក រដ្ឋាភិបាល តែងតែអះអាងថា ខ្លួនកំពុងអនុវត្តទៅតាមច្បាប់ និងដើម្បីការពារសន្តិភាព និងតែងតែបានច្រានចោលនូវរបាយការណ៍របស់អង្គការអន្តរជាតិនានា ដែលបង្ហាញអំពីការធ្លាក់ចុះគួរឲ្យបារម្ភ អំពីការអនុវត្តច្បាប់ សិទ្ធិមនុស្ស និងប្រជាធិបតេយ្យនៅកម្ពុជា។

ទោះយ៉ាងណាក្ដី ក្រុមបាតុករប្រកាសថា ពួកគេនឹងមកជួបជុំគ្នាជាថ្មីម្ដងទៀត បើសិនរដ្ឋាភិបាល លោក ហ៊ុន ម៉ាណែត មិនព្រមកែទម្រង់ការដឹកនាំប្រទេសដូចពេលបច្ចុប្បន្ន និងមិនព្រមដោះលែងអ្នកទោសមនសិការ អ្នកនយោបាយ ព្រមទាំងក្រុមយុវជនបរិស្ថានឲ្យមានសេរីភាពឡើងវិញនោះទេ៕

From ព័ត៌មានថ្មីៗ | RFA
via_IFTTT

RFA | បក្សក្រៅរដ្ឋាភិបាល និងសង្គមស៊ីវិល ស្នើដល់រដ្ឋាភិបាលឱ្យបង្ហាញគម្រោងលម្អិតអំពីចំណាយថវិកាជាតិឆ្នាំ២០២៥ | hot news

noreply@blogger.com (Sotheavy royals) — Sun, 27 Oct 2024 02:58:00 +0000

បក្សក្រៅរដ្ឋាភិបាលសម្ដែងការបារម្ភអំពីតម្លាភាព នៃគម្រោងចំណាយថវិកាជាតិឆ្នាំ២០២៥ និងស្នើឱ្យបង្ហាញគម្រោងលម្អិត។ ការបារម្ភនេះ ធ្វើឡើងបន្ទាប់ពីអង្គប្រជុំគណៈរដ្ឋមន្ត្រីកាលពីថ្ងៃទី២៥ ខែតុលា បានអនុម័តថវិកាជាតិជាង ៩ពាន់លានដុល្លារ សម្រាប់ចំណាយនៅឆ្នាំ២០២៥ ខាងមុខនេះ ហើយក្រសួងហិរញ្ញវត្ថុថា នឹងផ្សព្វផ្សាយសេចក្ដីព្រាងច្បាប់ ១សប្ដាហ៍ក្រោយ ក្រោយទៅដល់រដ្ឋសភា។

មន្ត្រីជាន់ខ្ពស់គណបក្សឆន្ទៈខ្មែរស្នើរដ្ឋាភិបាលត្រូវផ្ដល់ឯកសារព័ត៌មាននៃគម្រោងចំណាយ នៅមុនពេលដាក់ជូនរដ្ឋសភាអនុម័ត ដើម្បីផ្ដល់ឱកាសដល់មជ្ឈដ្ឋានពាក់ព័ន្ធនឹងថវិកា លើកមតិយោបល់ជាមូលដ្ឋាន សម្រាប់ឱ្យសមាជិកសភាតវ៉ា ក្នុងគោលដៅកែលម្អការចំណាយរបស់រដ្ឋឱ្យត្រឹមត្រូវតាមសេចក្ដីត្រូវការ។

អនុប្រធានគណបក្សឆន្ទៈខ្មែរ លោក សុន ឆ័យ ប្រាប់វិទ្យុអាស៊ីសេរីនៅថ្ងៃទី២៦ ខែតុលា ថា តាមបទពិសោធន៍ កាលលោកនៅជាតំណាងរាស្ត្រ និងអតីតជាប្រធានគណៈកម្មាធិការហិរញ្ញវត្ថុ លោកទទួលបានឯកសារគម្រោងថវិកាជាតិក្នុងអំឡុងខែតុលា ដែលមានពេលពិនិត្យលើការចំណាយ មុននឹងពិភាក្សាអនុម័តនៅសភា។

លោកថា សម្រាប់កម្ពុជាលោកតែងតែចាប់អារម្មណ៍លើការចំណាយក្នុងវិស័យអប់រំ សុខាភិបាល និងវិស័យសង្គមកិច្ច ហើយច្បាប់ថវិកាជាតិ ទាមទារឱ្យមានការផ្ដល់យោបល់ពីអង្គការសង្គមស៊ីវិល និងក្រុមអ្នក ដែលយល់ដឹងអំពីស្ថានភាពពលរដ្ឋនៅមូលដ្ឋាន ទាក់ទងនឹងវិស័យទាំងនេះ ដើម្បីឱ្យឆ្លើយតបនឹងជីវភាពរស់នៅរបស់ប្រជាពលរដ្ឋ។

លោកសម្ដែងការបារម្ភពាក់ព័ន្ធនឹងច្បាប់ថវិកាជាតិប៉ុន្មានឆ្នាំចុងក្រោយនេះ ដែលរដ្ឋាភិបាល និងសភាបានធ្វើ ដោយលោកកត់សម្គាល់ថា រាល់គម្រោងចំណាយរបស់រដ្ឋាភិបាល មិនត្រូវបានផ្សព្វផ្សាយទូលំទូលាយឡើយ។ លោកថា ការធ្វើច្បាប់ថវិការបស់ប្រទេសកម្ពុជា មិនផ្ដល់ឱកាសឱ្យស្ថាប័នថ្នាក់មូលដ្ឋានធ្វើសំណើទេ គឺច្រើនតែធ្វើពីថ្នាក់ជាតិទៅ។ ដូច្នេះ មិនអាចធ្វើឱ្យការចំណាយអនុវត្តចំតាមសេចក្ដីត្រូវការរបស់ប្រទេសជាតិទេ។

លោក សុន ឆ័យ៖ «ក្រោយៗ មកនេះ ខ្ញុំមិនបានដឹងច្បាស់លាស់អំពីចំណាយលម្អិតទេ។ ប៉ុន្តែ ព័ត៌មានថា នឹងផ្សព្វផ្សាយថវិកាជាតិ សម្រាប់បម្រើសកម្មភាពវិមជ្ឈការ ជាពិសេស សម្រាប់ថ្នាក់ឃុំសង្កាត់ ដើម្បីឱ្យមានលទ្ធភាពធ្វើការអភិវឌ្ឍនៅមូលដ្ឋានផ្ទាល់ជាមួយពលរដ្ឋ។ វាជាការព្រួយបារម្ភ ព្រោះកន្លងទៅនេះ យើងឭព័ត៌មានថា អាចនឹងមានការកាត់ការចំណាយនៅតាមមូលដ្ឋានឃុំសង្កាត់នោះ មានចំនួនជាច្រើន ដែលអាចនឹងប៉ះពាល់ទៅដល់ការជួយទៅដល់ជីវភាពរស់នៅរបស់ប្រជាពលរដ្ឋនៅក្នុងមូលដ្ឋាន»។

គណៈរដ្ឋមន្ត្រីកាលពីថ្ងៃទី២៥ ខែតុលា បានអនុម័តសេចក្ដីព្រាងច្បាប់ថវិកាឆ្នាំ២០២៥ ដែលរាជរដ្ឋាភិបាលគ្រោងចំណាយ ៩.៣០០ លានដុល្លារ (៣៧.៩៥០.៣៨៥លានរៀល)។ គម្រោងចំណាយឆ្នាំ២០២៥ នេះ កើនលើសការចំណាយក្នុងឆ្នាំ២០២៤ចំនួន៤០០លានដុល្លារដែលគម្រោងចំណាយរបស់រដ្ឋាភិបាលឆ្នាំ២០២៤ មានប្រមាណ ៨.៩០០លានដុល្លារ (៣៧.១១០.៤០៤លានរៀល)។

យ៉ាងណា គម្រោងចំណាយរបស់រដ្ឋាភិបាលនៅឆ្នាំ២០២៥ នៅតិចជាងការ ចំណាយកាលពីឆ្នាំ២០២៣ ចំនួន ៣០០លានដុល្លារ ដែលកាលពីឆ្នាំ២០២៣ រដ្ឋាភិបាលចាយថវិកាប្រមាណ ៩.៦០០លានដុល្លារ (៣៩.២០៦.២០៥លានរៀល) ។

នាយកប្រតិបត្តិនៃអង្គការតម្លាភាពកម្ពុជាលោក ប៉ិច ពិសី ប្រាប់វិទ្យុអាស៊ីសេរីនៅថ្ងៃទី២៦ ខែតុលា ថា ចំណាយចរន្តនៅឆ្នាំ២០២៥ ដូចជា ការចំណាយលើប្រាក់ខែមន្ត្រីរាជការ និងផ្នែកប្រតិបត្តិរដ្ឋបាលនៅស្ថាប័នរដ្ឋជាដើម មានកំណើនតិចតួច តែកើនច្រើនលើចំណាយមូលធន ដែលរដ្ឋាភិបាលមានគម្រោងបង្កើនការវិនិយោគហេដ្ឋារចនាសម្ពន្ធសាធារណៈ។

លោក ប៉ិច ពិសី៖ «មកដល់ពេលនេះ យើងមិនទាន់បានទទួលសេចក្ដីព្រាងច្បាប់សង្ខេបទេ។ អ៊ីចឹងយើងពិបាកក្នុងការវិភាគខ្ទង់ចំណាយថវិកាលម្អិត ដោយសារតែមកដល់នេះ យើងមិនទទួលការផ្សព្វផ្សាយជាសាធារណៈឱ្យពលរដ្ឋដឹងអំពីសេចក្ដីសង្ខេបសេចក្ដីព្រាងច្បាប់ថវិកាឆ្នាំ២០២៥ទេ។ កន្លងមកយើងរដ្ឋាភិបាលចែកចាយ តែឆ្នាំនេះ មានការពន្យារពេល។ យើងចាំមើលប្រហែលអាទិត្យក្រោយក្រែងរដ្ឋាភិបាលអាចធ្វើការផ្សព្វផ្សាយ»។

អ្នកនាំពាក្យក្រសួងសេដ្ឋកិច្ច និងហិរញ្ញវត្ថុលោក មាស សុខសេនសាន ប្រាប់វិទ្យុ អាស៊ីសេរីនៅថ្ងៃទី២៦ ខែតុលាថា ក្រសួងនឹងផ្សព្វផ្សាយសេចក្ដីព្រាងច្បាប់ ១សប្ដាហ៍ក្រោយ ក្រោយទៅដល់រដ្ឋសភា។

លោក មាស សុខសេនសាន៖ «យើងនឹងមានតួលេខលម្អិតនៅពេលទៅសភា»។

ប្រធានកម្មវិធីវេទិកានៃអង្គការមិនមែនរដ្ឋាភិបាល លោក ម៉ារ សុផល ស្នើឱ្យ រដ្ឋាភិបាលផ្សព្វផ្សាយសេចក្ដីព្រាងច្បាប់ថវិកាឆ្នាំ២០២៥ ឱ្យបានលឿន ដើម្បីឱ្យអ្នកពាក់ព័ន្ធមានឱកាសផ្ដល់យោបល់កែលម្អ។

លោក ម៉ារ សុផល ប្រាប់វិទ្យុអាស៊ីសេរីនៅថ្ងៃទី២៦ ខែតុលា ថា បញ្ហាសេដ្ឋកិច្ច បានធ្វើឱ្យការប្រមូលពន្ធធ្លាក់ចុះ ដែលធ្វើឱ្យប៉ះពាល់ទៅដល់ការវិនិយោគ និងការបែងចែកថវិកាថ្នាក់ក្រោមជាតិមួយចំនួន។

លោក ម៉ារ សុផល៖ «ស្នើឱ្យរាជរដ្ឋាភិបាលពន្លឿនការផ្សព្វផ្សាយឱ្យបានលឿន ប្រសិនបើទុកពេលយូរឱ្យខាងសាធារណជន អង្គការសង្គមស៊ីវិល មានពេលវេលាគ្រប់គ្រាន់ក្នុងការពិនិត្យ និងផ្ដល់យោបល់ធាតុចូល ទៅដល់តំណាងរាស្ត្រក្នុងការជជែកពិភាក្សា អនុម័តជាការល្អ ហើយធ្វើម៉េចធានាការអនុវត្តចាយវាយថវិកាប្រកបដោយតម្លាភាព និងគណនេយ្យភាព មិនមានភាពមិនប្រក្រតីជៀសវាងអំពើពុករលួយផ្សេងៗ»។

គណបក្សក្រៅរដ្ឋាភិបាល និងសង្គមស៊ីវិល លើកឡើងថា ការលាក់បាំងការចំណាយលម្អិត នៃគម្រោងថវិកាជាតិ គឺជាប្រព័ន្ធនយោបាយ ដែលបង្ហាញពីភាពមិនច្បាស់លាស់ក្នុងការចំណាយរបស់រដ្ឋាភិបាល ហើយករណីបែបនេះ ជាការឆ្លុះបញ្ចាំងពីភាពមិនច្បាស់លាស់នៃការដឹកនាំសេដ្ឋកិច្ច ដែលមិនអាចធានារកចំណូលឱ្យគ្រប់ការចំណាយ និងរុញប្រទេសឱ្យធ្លាក់ចុះ ក្នុងអំពើបក្ខពួកនិយមនិងពុករលួយក្នុងប្រព័ន្ធគ្រប់គ្រងថវិកាជាតិ៕

From ព័ត៌មានថ្មីៗ | RFA
via_IFTTT

RFA | លោក ហ៊ុន ម៉ាណែត អំពាវនាវឱ្យពលរដ្ឋចូលរួមទប់ស្កាត់អំពើអស្ថិរភាពសង្គម ខណៈរដ្ឋាភិបាលបង្ក្រាបសំឡេងអ្នករិះគន់ | hot news

noreply@blogger.com (Sotheavy royals) — Sat, 26 Oct 2024 22:58:00 +0000

លោកនាយករដ្ឋមន្ត្រី ហ៊ុន ម៉ាណែត ស្នើឱ្យពលរដ្ឋចូលរួមទប់ស្កាត់សកម្មភាពអស្ថិរភាពសង្គម និងអ្វីមួយ ដែលលោកហៅថា សន្តិភាព។ ទោះជាយ៉ាងណាក្ដី យុវជន និងអ្នកឃ្លាំមើលសង្គមយល់ឃើញថា បញ្ហាអស្ថិរភាពសន្តិសុខសង្គមកើតមានឡើង គឺដោយសារការដឹកនាំរបស់ក្រុមគ្រួសារត្រកូល ហ៊ុន ដឹកនាំប្រទេសបែបផ្ដាច់ការ និងអនុវត្តច្បាប់ធូររលុង។

លោកនាយករដ្ឋមន្ត្រី ហ៊ុន ម៉ាណែត នៅថ្ងៃទី២៦ ខែតុលា បានចូលរួមសម្ពោធសមិទ្ធផលនានា ក្រោមគម្រោងជំនួយរបស់ប្រទេសចិន សម្រាប់គម្រោងកែលំអបរិស្ថានសាលារៀន និងការផ្គត់ផ្គង់សម្ភារបរិក្ខារអប់រំនៅកម្ពុជានៅស្រុកកងមាស ខេត្តកំពង់ចាម។

នៅក្នុងវេទិកានោះលោក ហ៊ុន ម៉ាណែត បានថ្លែងនៅចំពោះអ្នកគ្រូលោកគ្រូ និងសិស្សានុសិស្សពីបញ្ហាអស្ថិរភាពសង្គម ដែលលោកចោទថា មានក្រុមប្រឆាំងមួយចំនួន មានបំណងដុតប្រទេសកម្ពុជាឱ្យធ្លាក់ចូលក្នុងវិបត្តិសង្គម ដូចជា នៅប្រទេសបង់ក្លាដេស្ហ (Bangladesh) ហើយលោកអំពាវនាវឱ្យពលរដ្ឋចូលរួមថែរក្សាអ្វីមួយ ដែលហៅថា សុខសន្តិភាព។

លោក ហ៊ុន ម៉ាណែត៖ «ការចូលរួមរបស់ប្រជាពលរដ្ឋ គឺជាកត្តាសំខាន់ កត្តាចូលរួមទីមួយ ការចូលរួមទីមួយគឺ ការចូលរួមការថែរក្សាលំនឹងស្ថិរភាពសន្តិភាពរបស់យើង ហើយនេះ គឺជាកត្តាធំណាស់។ ខ្ញុំសូមអរគុណដល់បងប្អូនអ្នកកងមាស ប៉ុន្តែ អត់មានការអំពាវនាវឱ្យដុតប្រទេស ដើម្បីផ្ដួលរំលំរដ្ឋាភិបាលយកគំរូបង់ក្លាដេស្ហ តែពលរដ្ឋយល់ពីតម្លៃនៃសន្តិភាព»។

មិនខុសពីឪពុករបស់លោកនោះទេ លោក ហ៊ុន ម៉ាណែត តែងប្រើវេទិកាសាធារណៈ ដើម្បីចោទប្រកាន់ពលរដ្ឋស្លូតត្រង់ និងក្រុមអ្នកប្រឆាំង ដែលចង់ឃើញកម្ពុជាមានលទ្ធិប្រជាធិបតេយ្យពិតប្រាកដថា ជាក្រុមមនុស្សប៉ុនប៉ងធ្វើបដិវត្តពណ៌ផ្ដួលរំលំរដ្ឋាភិបាល ឬក្រុមប្រឆាំងជ្រុលនិយម ហើយលោកតែងតែថ្លែងឱ្យពលរដ្ឋដឹងគុណឪពុករបស់ គឺលោក ហ៊ុន សែន នូវអ្វីដែលលោកហៅថា សុខសន្តិភាព។

ទោះជាយ៉ាងណាក្ដី ប្រធានបណ្ដាញយុវជនកម្ពុជាសកល (CGYN) ប្រចាំប្រទេសជប៉ុន អ្នកស្រី វ៉ាន់ លក្ខិណា ប្រាប់វិទ្យុអាស៊ីសេរី នៅថ្ងៃទី២៦ ខែតុលាថា ការអំពាវនាវរបស់លោក ហ៊ុន ម៉ាណែត ឱ្យពលរដ្ឋចូលរួមការពារសន្តិភាពនេះ គឺជាសារនយោបាយបែបប្រជាភិថុតិ ពីព្រោះរដ្ឋាភិបាលក្រោមការដឹកនាំរបស់លោក គឺតែងតែចាប់ពលរដ្ឋដាក់ពន្ធនាគារ ដើម្បីរក្សាអំណាច។ អ្នកស្រីបន្តថា លោក ហ៊ុន ម៉ាណែត កំពុងព្រួយបារម្ភពីជោគវាសនារបស់លោកអាចនឹងមិនខុសគ្នាពីអតីតនាយករដ្ឋមន្ត្រីនៃប្រទេសបង់ក្លាដេស្ហនោះឡើយ។

អ្នកស្រី វ៉ាន់ លក្ខិណា៖ «ចំពោះសន្តិភាព ដែលគាត់កំពុងតែកាងការពាររាល់ថ្ងៃនេះ ខ្ញុំកំពុងតែមានអារម្មណ៍ថា គាត់កំពុងការពារអំណាចពួកគាត់ច្រើនជាងការពារ គេហៅថា សន្តិភាពរបស់ប្រជាពលរដ្ឋ។ សន្តិភាពរាល់ថ្ងៃនេះ គឺសន្តិភាពរបស់គាត់ សន្តិភាពរបស់មន្ត្រីក្រោមឱវាទរបស់គាត់ បក្ខពួកគាត់ គណបក្សគាត់តែប៉ុណ្ណោះ។ ចំពោះប្រជាពលរដ្ឋទូទៅ យើងកំពុងជួបអស្ថិរភាពជាខ្លាំង ហើយយើងក៏កំពុងតែស្វែងរកដំណោះស្រាយជាមួយរដ្ឋាភិបាលផងដែរ»។

អ្នកឃ្លាំមើលសង្កេតឃើញថា រដ្ឋាភិបាលបច្ចុប្បន្នរងការរិះគន់ខ្លាំងពីប្រជាពលរដ្ឋ គឺដោយសារតែរដ្ឋាភិបាលលោក ហ៊ុន ម៉ាណែត មិនបានលើកកម្ពស់សិទ្ធិមនុស្សតាមការចង់បានរបស់ពលរដ្ឋ តែផ្ទុយទៅវិញ លោក ហ៊ុន ម៉ាណែត បានបង្កើនការចាប់សកម្មជនសង្គម និងនយោបាយដាក់ពន្ធនាគារតាមទំនើងចិត្ត។

អ្នកសិក្សាកិច្ចការសង្គម និងនយោបាយ លោក ប៉ោ មករា មានប្រសាសន៍ថា បញ្ហាអស្ថិរភាពសង្គមកើតឡើង បច្ចុប្បន្ននេះ គឺបណ្ដាលមកពីការអនុវត្តច្បាប់ធូររលុង ដែលធ្វើឱ្យក្រុមឧក្រិដ្ឋជនអាចចូលមករកស៊ីដោយខុសច្បាប់នៅកម្ពុជា ដូច្នេះ រដ្ឋាភិបាលគួរតែពង្រឹងការអនុវត្តច្បាប់ឡើងវិញ។ លោកស្នើដល់រដ្ឋាភិបាលឱ្យបញ្ឈប់ការចាត់ទុកពលរដ្ឋ ដែលទាមទារឱ្យមានយុត្តិធម៌សង្គមថា ជាក្រុមចង់ផ្ដួលរំលំរដ្ឋាភិបាល ពីព្រោះបញ្ហានេះមិនបានផ្ដល់ផលចំណេញដល់ជាតិនោះឡើយ។

លោក ប៉ោ មករា៖ «អ្វីដែលរដ្ឋាភិបាលគួរតែធ្វើ គឺបើកលំហលទ្ធិប្រជាធិបតេយ្យឡើងវិញ កុំឱ្យមានការរឹតត្បិត កុំមានការចោទប្រកាន់តាមប្រព័ន្ធតុលាការ ជាពិសេស គឺអ្នកធ្វើការងារសង្គម នយោបាយ សកម្មជនសង្គមផ្សេងៗ គួរតែមានសិទ្ធិគ្រប់គ្រាន់ ក្នុងការចូលរួមកសាងជាតិទាំងអស់គ្នា»។

រដ្ឋាភិបាលក្រោមការដឹកនាំរបស់លោក ហ៊ុន សែន និងលោក ហ៊ុន ម៉ាណែត បានរងការចោទប្រកាន់ថា មិនបានធ្វើឱ្យពលរដ្ឋរស់នៅប្រកបដោយសុខសន្តិភាពពិតប្រាកដនោះទេ ប៉ុន្តែ ពួកគាត់រស់នៅរងទុក្ខវេទនាក្នុងស្ថានភាពលំបាក ដោយសារតែអំពើពុករលួយ បក្ខពួកនិយមចាក់ស្រេះ ការរំលោភសិទ្ធិមនុស្ស និងការប្រើប្រព័ន្ធតុលាការ ដើម្បីបង្ក្រាបទៅលើសំឡេងអ្នករិះគន់។ កាលពីថ្ងៃទី២៣ ខែតុលា អង្គការគម្រោងយុត្តិធម៌ពិភពលោក (World Justice Project) បានបន្តដាក់ចំណាត់ថ្នាក់នីតិរដ្ឋនៅកម្ពុជាឱ្យស្ថិតនៅបាតតារាង សម្រាប់ឆ្នាំ២០២៣ ពោលគឺ ស្ថិតនៅចំណាត់ថ្នាក់លេខ១៤១ ក្នុងចំណោមប្រទេសចំនួន១៤២ នៅលើពិភពលោក ដែលបញ្ហានេះ គឺបណ្ដាលមកពីកម្ពុជាមិនបើកទូលាយសិទ្ធិជាមូលដ្ឋាន ការពង្រឹងការអនុវត្តច្បាប់ និងប្រព័ន្ធយុត្តិធម៌ជាដើម៕

From ព័ត៌មានថ្មីៗ | RFA
via_IFTTT

RFA | សកម្មជនសិទ្ធិមនុស្សខ្មែរកម្ពុជាក្រោមស្នើរដ្ឋាភិបាលភ្នំពេញឱ្យធ្វើអន្តរាគមន៍ទៅរដ្ឋាភិបាលវៀតណាមឲ្យដោះលែងព្រះសង្ឃ និងសកម្មជនខ្មែរក្រោម ដែលវៀតណាមចាប់ឃុំ | hot news

noreply@blogger.com (Sotheavy royals) — Sat, 26 Oct 2024 02:58:00 +0000

សកម្មជនសិទ្ធិមនុស្ស និងអង្គការសិទ្ធិមនុស្សខ្មែរកម្ពុជាក្រោមស្នើរដ្ឋាភិបាលភ្នំពេញអន្តរាគមន៍ទៅរដ្ឋាភិបាលវៀតណាមឲ្យដោះលែងព្រះសង្ឃ និងសកម្មជនខ្មែរក្រោម ដែលវៀតណាមចាប់ដាក់ពន្ធនាគារ។ សំណើនេះធ្វើឡើងមុនពេលប្រធានព្រឹទ្ធសភាលោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត នឹងដឹកនាំដង្ហែកឋិនទៅវត្តនៅកម្ពុជាក្រោមនៅខែវិច្ឆិកាខាងមុខ។

អង្គការសិទ្ធិមនុស្សខ្មែរកម្ពុជាក្រោមនិងសកម្មជនសិទ្ធិមនុស្សស្វាគមន៍គម្រោងដង្ហែកឋិនទៅវត្តនៅកម្ពុជាក្រោមរបស់លោក ហ៊ុន សែន ប៉ុន្តែពួកគេក៏ចង់ឲ្យរដ្ឋាភិបាលកម្ពុជាដោះស្រាយបញ្ហារំលោភសិទ្ធិមនុស្សនិងសាសនាព្រះពុទ្ធរបស់អាជ្ញាធរវៀតណាមមកលើព្រះសង្ឃនិងពលរដ្ឋខ្មែរក្រោមផងដែរ។ ពួកគេក៏ស្នើឲ្យពលរដ្ឋទាំងអស់កុំយល់ច្រឡំថា វៀតណាមនឹងគោរពសិទ្ធិខ្មែរក្រោមដោយសារតែកឋិនរបស់ប្រធានព្រឹទ្ធសភា លោក ហ៊ុន សែនលើកដំបូង ទាំងដែលលោកបានដឹកនាំប្រទេស រាប់ទសវត្សរ៍មកហើយក្ដី។

សកម្មជនសិទ្ធិមនុស្សកំពុងរស់នៅលើទឹកដីខេត្តព្រះត្រពាំង លោក ថាច់ ង៉ា ប្រាប់វិទ្យុអាស៊ីសេរីថា លោកចង់ឃើញមន្ត្រីរដ្ឋាភិបាលកម្ពុជា ដែលដង្ហែកឋិនទៅវត្តនៅកម្ពុជាក្រោម ហ៊ានទាមទារឲ្យវៀតណាមគោរពសិទ្ធិមនុស្ស និងព្រះសង្ឃខ្មែរក្រោម។

លោក ថាច់ ង៉ា «ខ្មែរក្រោមត្រូវការឲ្យរដ្ឋាភិបាលកម្ពុជាផ្ដាំផ្ញើឲ្យវៀតណាមមើលថែពលរដ្ឋខ្មែរក្រោមឲ្យដូចវៀតណាមផ្ដាំផ្ញើឲ្យរដ្ឋាភិបាលកម្ពុជាមើលកូនចៅរបស់គេផងដែរ»។

លោក ថាច់ ង៉ា បន្តថា បច្ចុប្បន្នអាជ្ញាធរវៀតណាមនៅតែបន្តធ្វើទុក្ខបុកម្នេញខ្មែរក្រោម ដែលហ៊ានងើបឡើងទាមទារសិទ្ធិ។ លោកថា សូម្បីខ្លួនលោកផ្ទាល់ ក៏ត្រូវសមត្ថកិច្ចវៀតណាមជិះម៉ូតូដេញតាមពីក្រោយបណ្ដាលប្រពន្ធលោករងរបួសក្នុងគ្រោះថ្នាក់ចរាចរណ៍ ពេលលោកចង់ធ្វើដំណើរទៅសួរសុខទុក្ខសកម្មជនខ្មែរក្រោមផ្សេងទៀត។

លោកនាយកមន្ត្រី ហ៊ុន ម៉ាណែត កាលពីថ្ងៃទី៤ ខែតុលា បានបង្កើតគណៈកម្មាធិការរៀបចំអង្គកថិនទៅវត្តខ្មែរក្រោម ដែលមានសមាសភាពថ្នាក់ដឹកនាំរបស់រដ្ឋាភិបាលមួយចំនួន។ អតីតនាយករដ្ឋមន្ត្រី លោក ហ៊ុន សែន បានលើកឡើងថា លោក និងប្រពន្ធលោក នឹងដង្ហែអង្គកឋិនមហាសាមគ្គីគ្រួសារខ្មែរមួយ ទៅវត្តខ្មែរក្រោម នៅថ្ងៃទី៤ ខែវិច្ឆិកាខាងមុខ ដោយមានថ្នាក់ដឹកនាំជាន់ខ្ពស់ផ្សេងទៀតដង្ហែទៅដោយផ្ទាល់។ លោក ហ៊ុន សែន ថា ខ្មែរលើ ខ្មែរកណ្ដាល ខ្មែរក្រោម ជាខ្មែរតែមួយ ទើបឈ្មោះអង្គកឋិនទាននេះថា (អង្គកឋិនទានមហាសាមគ្គីគ្រួសារខ្មែរ) ដែលជនជាតិខ្មែរនៅគ្រប់ទីកន្លែង គ្រប់គណបក្សនយោបាយ គ្រប់និន្នាការនយោបាយ អាចចូលរួមបានទាំងអស់គ្នា។

ជុំវិញកឋិនរបស់កម្ពុជានេះដែរ ប្រធានគណៈកម្មការព័ត៌មានសហព័ន្ធខ្មែរកម្ពុជាក្រោម ព្រះភិក្ខុ សឺង យ៉ឹងរតនា មានថេរដីកាថា កឋិននេះ ជាឱកាសល្អសម្រាប់ពលរដ្ឋខ្មែរនៅកម្ពុជា បានស្វែងយល់បន្ថែមទៀតពីស្ថានភាពខ្មែរកម្ពុជាក្រោម ក្នុងនោះ មានការរស់នៅ ការគោរពប្រតិបត្តិសាសនា វប្បធម៌ និងប្រពៃណី។

ព្រះភិក្ខុ សឺង យ៉ឹងរតនា៖ «មានប្រយោជន៍ដល់ប្រជាពលរដ្ឋខ្មែរ និងខ្មែរក្រោមនៅដែនដីកម្ពុជាក្រោមហ្នឹង ទទួលបាននូវការយល់ដឹងបន្ថែមដោយប្រជាជាតិខ្មែរបានចុះទៅទឹកដីកម្ពុជាក្រោមដោយផ្ទាល់ ហើយឃើញស្ថានភាពផ្ទាល់មិនដូចលឺ ថា និងតាមព័ត៌មានទេ។ចុះទៅផ្ទាល់ឃើញទឹកដី វត្តអារាម ប្រពៃណី និងទំនៀមទម្លាប់។ ខ្មែរក្រោមនៅកម្ពុជាក្រោម ជាអ្នករក្សាកេរដំណែលដូនតាពីអតីតកាលមក»។

ព្រះអង្គបន្តថា ពេលដង្ហែ កឋិន រដ្ឋាភិបាលកម្ពុជាដឹកនាំដោយ លោក ហ៊ុន ម៉ាណែត នឹងមានឱកាសអន្តរាគមន៍ទៅរដ្ឋាភិបាលវៀតណាមឲ្យគោរពសិទ្ធិជនជាតិដើមខ្មែរកម្ពុជាក្រោម។

បច្ចុប្បន្នមានព្រះអង្គ ៥អង្គ និងសកម្មជនខ្មែរក្រោម ៨នាក់ ត្រូវបានតុលាការវៀតណាមកាត់ទោសដាក់ពន្ធនាគារជាច្រើនឆ្នាំ ដោយសារតែពួកគេទាមទារសិទ្ធិជនជាតិដើមនិងសាសនា។ ព្រះសង្ឃ ៥អង្គ ដែលត្រូវបានអាជ្ញាធរវៀតណាមខេត្តលង់ហោ ចាប់កាលពីខែមីនា រួមមាន ព្រះចៅអធិការ និងព្រះសង្ឃគង់នៅវត្តប្រជុំពលមង្គលបូរី ឬហៅថា វត្តទ្រនំសេក ចំនួន ៥អង្គ អំពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ» និងអំពីបទ «ការចាប់ខ្លួន ឃាត់ខ្លួន ឬឃុំខ្លួនមនុស្សដោយខុសច្បាប់»។ ដោយឡែក ព្រះសង្ឃខ្មែរក្រោមមួយអង្គទៀតគឺព្រះភិក្ខុ គឹម សំរិន្ទ ដែលជាសកម្មជនសង្ឃ និងជាអ្នកកសាងរូបសំណាកលោកវីរបុរសខ្មែរកម្ពុជាក្រោមឧកញ៉ា សឺន គុយ តម្កល់ទុកនៅផ្ទះក្នុងខេត្តព្រះត្រពាំង ត្រូវបានគណៈសង្ឃខេត្តក្រោមឥទ្ធិពលវៀតណាម ប្រកាសមិនទទួលស្គាល់ព្រះអង្គជាអ្នកបួស និងមិនអនុញ្ញាតឱ្យវត្តជាង ១៤០វត្ត ក្នុងខេត្តព្រះត្រពាំង ទទួលយកព្រះអង្គគង់។ កម្ពុជានឹងដង្ហែកឋិនទៅវត្តស្វាយសៀមថ្មី នៅខេត្តព្រះត្រពាំង នៅដើមខែវិច្ឆិកា។ ខេត្តព្រះត្រពាំងជាខេត្តមួយ ដែលសម្បូរដោយទៅទីតាំងប្រវត្តិសាស្ត្ររបស់ខ្មែរកម្ពុជាក្រោម ៕

From ព័ត៌មានថ្មីៗ | RFA
via_IFTTT

RFA | អង្គការ Right Livelihood ស្នើអ្នករាយការណ៍សិទ្ធិមនុស្សរបស់ UN ឱ្យជួយធ្វើអន្តរាគមន៍ទៅរដ្ឋាភិបាលកម្ពុជា ឱ្យដោះលែងសកម្មជនចលនាមាតាធម្មជាតិ | hot news

noreply@blogger.com (Sotheavy royals) — Fri, 25 Oct 2024 20:58:00 +0000

អង្គការ រ៉ៃថ៍ ឡៃហ្វ៍លីហ៊ូដ (Right Livelihood) ដែលធ្លាប់ប្រគល់ពានរង្វាន់ដល់សកម្មជនចលនាមាតាធម្មជាតិ បានធ្វើសេចក្ដីថ្លែងការណ៍ផ្ទាល់មាត់ លើការកាត់ទោសសកម្មជនបរិស្ថានរបស់ចលនាមាតាធម្មជាតិទាំង ១០នាក់ ដោយតុលាការក្រុងភ្នំពេញ ទៅកាន់អង្គប្រជុំរបស់ក្រុមប្រឹក្សាសិទ្ធិមនុស្ស នៃអង្គការសហប្រជាជាតិ ដើម្បីរកយុត្តិធម៌ជូនពួកគេ។ សង្គមស៊ីវិល គាំទ្រសេចក្ដីថ្លែងការណ៍របស់អង្គការផ្ដល់ពានរង្វាន់ រ៉ៃថ៍ ឡៃហ្វ៍លីហ៊ូដ ថា មានអំណះអំណាងច្បាស់លាស់។

នេះជាលើកទី២ ហើយ ដែលអង្គការផ្ដល់ពានរង្វាន់ រ៉ៃថ៍ ឡៃហ្វ៍លីហ៊ូដ (Right Livelihood) ដែលមានមូលដ្ឋាននៅប្រទេសស៊ុយអែត (Sweden) បានថ្លែងការណ៍ទៅកាន់អ្នករាយការណ៍ពិសេស ស្ដីពីស្ថានភាពសិទ្ធិមនុស្សនៅកម្ពុជា ដោយលើកយកករណីតុលាការក្រុងភ្នំពេញ កាត់ទោស និងចាប់ឃុំលើសកម្មជនចលនាមាតាធម្មជាតិ ៥នាក់ ដោយសារពួកគេប្រើសិទ្ធិរបស់ខ្លួន ដើម្បីការពារបរិស្ថាន។

នៅក្នុងសម័យប្រជុំលើកទី៥៧ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ (Geneva) ប្រទេសស្វីស (Switzerland) កាលពីថ្ងៃទី២៤ ខែតុលា មន្ត្រីតស៊ូមតិរបស់អង្គការ តុលាការក្រុងភ្នំពេញ (Right Livelihood) អ្នកស្រី ហ្វេដូរ៉ា ប៊ែរណាដ៍ (Fédora Bernard) បានស្នើទៅ អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា លោក វិទិត មុនតាប៊ន (Vitit Muntarbhorn) ឱ្យជជែកដោះស្រាយជាមួយរដ្ឋាភិបាលកម្ពុជា អំពីករណីចោទប្រកាន់ និងចាប់ខ្លួនសកម្មជនចលនាមាតាធម្មជាតិដាក់ពន្ធនាគារ ដោយលោកស្រីអះអាងថា មានភាពអយុត្តិធម៌។ ទន្ទឹមគ្នានេះ មន្ត្រីផ្នែកតស៊ូមតិរូបនេះ ក៏បានចោទសួរទៅកាន់ លោក វិទិត មុនតាប៊ន អំពីវិធីដោះស្រាយ និងកិច្ចសហប្រតិបត្តិការជាមួយអង្គការសង្គមស៊ីវិល ដើម្បីស្វែងរកយុត្តិធម៌ចំពោះសកម្មជនការពារបរិស្ថាននៅកម្ពុជា។

អង្គការ រ៉ៃថ៍ ឡៃហ្វ៍លីហ៊ូដ បានលើកឡើងនៅក្នុងសេចក្ដីថ្លែងការណ៍ថា សកម្មជនចលនាមាតាធម្មជាតិ គួរតែទទួលបានការកោតសរសើរចំពោះសកម្មភាពការពារបរិស្ថាន និងធនធានធម្មជាតិរបស់ខ្លួន ដោយមិនគួរទទួលបានការកាត់ទោស និងជាប់ពន្ធនាគារបែបនេះឡើយ។ អង្គការអន្តរជាតិមួយនេះ លើកឡើងទៀតថា អាជ្ញាធររបស់រដ្ឋាភិបាលកម្ពុជា បានដំណើរការនីតិវិធីក្នុងតុលាការ ដោយគ្មានភស្តុតាងរឹងមាំ លាយឡំនឹងភាពមិនប្រក្រតី ហើយសកម្មជនចលនាមាតាធម្មជាតិទាំង ៥នាក់ ត្រូវបានអាជ្ញាធរចាប់ខ្លួនដោយហិង្សា មុននឹងយកទៅដាក់ក្នុងពន្ធនាគារ ដែលសកម្មភាពទាំងនេះ បានបង្ហាញទៅកាន់ពិភពលោកថា រដ្ឋាភិបាលកម្ពុជា លម្អៀងទៅរកផលប្រយោជន៍របស់ក្រុមហ៊ុនបរទេសធំៗ ជាជាងផ្ដោតលើប្រយោជន៍របស់ប្រជាពលរដ្ឋខ្លួនឯង។

ទាក់ទិនរឿងនេះ សកម្មជនចលនាមាតាធម្មជាតិ លោកស្រី ស៊ុន រដ្ឋា ប្រាប់វិទ្យុអាស៊ីសេរីនៅថ្ងៃទី២៥ ខែតុលា ថា ការអំពាវនាវរបស់អង្គការ រ៉ៃថ៍ ឡៃហ្វ៍លីហ៊ូដ (Right Livelihood) នឹងបង្ហាញកាន់តែច្បាស់ទៅកាន់ពិភពលោក ជាពិសេស រដ្ឋាភិបាលកម្ពុជាថា សហគមន៍អន្តរជាតិមិនគាំទ្រចំពោះការរំលោភសិទ្ធិមនុស្សឡើយ។

លោកស្រី ស៊ុន រដ្ឋា៖ «ដោយសារតែលោក ហ៊ុន ម៉ាណែត បានបញ្ចប់ការសិក្សានៅប្រទេសលោកសេរី អ៊ីចឹងលោកប្រាកដជាដឹងពីការលើកមុខមាត់ និងធ្វើយ៉ាងម៉េចអាចឈានជើងចូលទៅក្នុងប្រទេសលោកសេរីបាន។ សង្ឃឹមថា លោកនឹងយកចំណេះដឹង ក៏ដូចជា បទពិសោធន៍ក្នុងការរស់នៅប្រទេសសេរីហ្នឹង យកមកធ្វើការអភិវឌ្ឍនៅក្នុងប្រទេសកម្ពុជា មិនមែនប្រើប្រាស់របៀបចាស់ៗ មកចាប់ចងយុវជនដូច្នេះទេ»។

កាលពីថ្ងៃទី៣០ ខែកក្កដា អង្គការ រ៉ៃថ៍ ឡៃហ្វ៍លីហ៊ូដ ក៏ធ្លាប់បានចេញសេចក្ដីថ្លែងការណ៍ថ្កោលទោសទៅលើប្រព័ន្ធតុលាការក្រុងភ្នំពេញ និងលើកយកការកាត់ទោសទាំងអយុត្តិធម៌ទៅលើសកម្មជនចលនាមាតាធម្មជាតិ ទៅកាន់កិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៥៦ នៅទីក្រុងហ្សឺណែវ (Geneva) ប្រទេសស្វីស (Switzerland) ម្ដងរួចមកហើយ។

ការថ្កោលទោសនេះគឺក្រោយពេលដែល តុលាការក្រុងភ្នំពេញ កាលពីថ្ងៃទី២ ខែកក្កដា បានកាត់ទោសសកម្មជនចលនាមាតាធម្មជាតិចំនួន ១០រូប ឱ្យជាប់ពន្ធនាគារក្នុងម្នាក់ចន្លោះពី៦ ទៅ ៨ឆ្នាំ ក្រោមបទចោទរួមគំនិតក្បត់ និងប្រមាថអង្គព្រះមហាក្សត្រ។ ក្នុងនោះ សកម្មជន ៥នាក់ រួមមាន លោក លី ចាន់ដារ៉ាវុត, លោក ថុន រដ្ឋា, កញ្ញា ឡុង គន្ធា, កញ្ញា ភួន កែវរស្មី និងលោក យឹម លាងហ៊ី ត្រូវបាននគរបាលចាប់ខ្លួនយកទៅឃុំឃាំងក្នុងពន្ធនាគារនៅខេត្តដាច់ស្រយាលផ្សេងៗគ្នា ក្រោមមូលហេតុមិនច្បាស់លាស់។

វិទ្យុអាស៊ីសេរី មិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងយុត្តិធម៌ លោក ជិន ម៉ាលីន ដើម្បីសុំការបកស្រាយជុំវិញរឿងនេះបានទេ នៅថ្ងៃទី២៥ ខែតុលា។

ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា សេចក្ដីថ្លែងការណ៍របស់អង្គការផ្ដល់ពានរង្វាន់ រ៉ៃថ៍ ឡៃហ្វ៍លីហ៊ូដ (Right Livelihood) ទៅកាន់លោក វិទិត មុនតាប៊ន គឺមានអំណះអំណាងច្បាស់លាស់ ដោយផ្អែកទៅលើសិទ្ធិក្នុងការចូលរួមថែរក្សាបរិស្ថានរបស់ប្រជាពលរដ្ឋ។ បន្ថែមពីលើនេះ លោក អំ សំអាត ចាត់ទុកការផ្សព្វផ្សាយវីដេអូ របស់សកម្មជនមាតាធម្មជាតិនាពេលកន្លងមក គឺជាការចែករំលែកចំណេះដឹងផ្នែកបរិស្ថាន និងស្វែងរកកិច្ចអន្តរាគមន៍ពីអាជ្ញាធរពាក់ព័ន្ធ។

លោក អំ សំអាត៖ «បើខ្ញុំមើលទៅ ការណ៍ដែលបន្តឃុំខ្លួនទៅលើសកម្មជនបរិស្ថានហ្នឹង វាជាការណ៍មួយ ដែលមិនចំណេញសម្រាប់កម្ពុជាយើងទៅវិញទេ។ ប៉ុន្តែប្រសិនបើមានការដោះលែងទៅលើសកម្មជនបរិស្ថាន កម្ពុជានឹងទទួលផលចំណេញជាង ជាពិសេស គឺយើងឃើញថា កាត់បន្ថយនូវភាពតានតឹង ក៏ដូចជាការរិះគន់ទាក់ទងទៅនឹងការចាប់ឃុំខ្លួនសកម្មជនបរិស្ថាន»។

កាលពីឆ្នាំ២០២៣ សកម្មជនចលនាមាតាធម្មជាតិ ធ្លាប់ទទួលពានរង្វាន់កម្រិតអន្តរជាតិ រ៉ៃថ៍ ឡៃហ្វ៍លីហ៊ូដ (Right Livelihood) របស់ប្រទេសស៊ុយអែត (Sweden) ចំពោះភាពក្លាហានរបស់ពួកគេ ក្នុងការការពារបរិស្ថាន និងធនធានធម្មជាតិ តាមរយៈការរាយការណ៍ពីអាជីវកម្មខ្សាច់ខុសច្បាប់ អាជីវកម្មជីករ៉ែមាស ដែលគ្មានសុវត្ថិភាព និងការបំពុលបរិស្ថានដោយមនុស្សជាដើម។ ពានរង្វាន់នេះមានតម្លៃប្រហាក់ប្រហែលនឹងពានរង្វាន់ណូបែលសន្តិភាព ជាពានរង្វាន់ដែលឱ្យតម្លៃទៅលើសមិទ្ធផល ការលះបង់ និងការតស៊ូរបស់បុគ្គល ឬក្រុមណាមួយដែលផ្ដល់ប្រយោជន៍ដល់សង្គម មនុស្សជាតិ និងពិភពលោក៕

From ព័ត៌មានថ្មីៗ | RFA
via_IFTTT

RFA | តុលាការដោះលែងស្ថាបនិកគណបក្សបេះដូងជាតិ លោក សៀម ភ្លុក បន្ទាប់ពីលោកអនុវត្តទោស ២ឆ្នាំ ៦ខែនៅក្នុងពន្ធនាគារ | hot news

noreply@blogger.com (Sotheavy royals) — Fri, 25 Oct 2024 14:58:00 +0000

ស្ថាបនិកគណបក្សបេះដូងជាតិលោក សៀម ភ្លុក ទទួលបានសេរីភាពវិញហើយ នៅថ្ងៃទី២៥ ខែតុលា បន្ទាប់ពីជាប់ពន្ធនាគារជាង ២ ឆ្នាំ ក្នុងសំណុំរឿងបង្កើត គណបក្សបេះដូងជាតិ។ យ៉ាងណាលោក សៀម ភ្លុក នៅតែចាត់ទុកការកាត់ឱ្យ លោកមានទោសនិងជាប់ឃុំ ២ឆ្នាំ ៦ខែកន្លងមកនេះថា ជារឿងអយុត្តិធម៌។

ស្ថាបនិកគណបក្សបេះដូងជាតិលោក សៀម ភ្លុក ដែលទើបចេញពីពន្ធនាគារ ប្ដេជ្ញាចិត្តបន្តជីវភាពនយោបាយ និងទាមទារសិទ្ធិសេរីភាព ព្រមទាំងយុត្តិធម៌នៅ ក្នុងសង្គម បន្ទាប់ពីលោកទទួលបានសេរីភាពវិញ។ ប៉ុន្តែលោកមិនទាន់បញ្ជាក់នៅឡើយ ថានឹងបន្តជីវភាពនយោបាយជាមួយគណបក្សណាមួយនៅឡើយ។

លោក សៀម ភ្លុក៖ «សោកស្ដាយដែលគេចាប់ដាក់គុកដោយអយុត្តិធម៌។ យើងអ្នកនយោបាយនៅតែទាមទារយុត្តិធម៌ដដែល យើងមានអីក្រៅពីសេរីភាព និងយុត្តិធម៌ដដែល គ្រាន់តែវិធីសាស្ត្រទាមទារយើងនឹងផ្លាស់ប្ដូរទៅតាមរបត់នយោបាយ»។

លោក សៀម ភ្លុក ត្រូវតុលាការក្រុងភ្នំពេញ ផ្ដន្ទាទោសឱ្យជាប់ពន្ធនាគារ ២ឆ្នាំ ៦ខែ ពីបទ«ក្លែងបន្លំឯកសារ» ពាក់ព័ន្ធនឹងការប្រមូលស្នាមមេដៃពីពលរដ្ឋ ដើម្បីបង្កើតគណបក្សបេះដូងជាតិ បន្ទាប់ពីសមត្ថកិច្ចចាប់ខ្លួនលោក កាលពីថ្ងៃទី២៧ ខែមេសា ឆ្នាំ២០២២។

ទីប្រឹក្សាគណបក្សកម្លាំងជាតិ លោក រ៉ុង ឈុន ដែលទៅទទួលលោក សៀម ភ្លុក ចេញពីពន្ធនាគារ ប្រាប់វិទ្យុអាស៊ីសេរីថា លោកកោតសរសើរចំពោះស្មារតី ឧត្ដមគតិ និងសេចក្ដីក្លាហានរបស់លោក សៀម ភ្លុក ដែលតស៊ូនៅក្នុងពន្ធនាគាររយៈពេលជាង ២ ឆ្នាំ។ លោកថា ជំហររឹងមាំរបស់លោក សៀម ភ្លុក នេះ គឺជាគំរូល្អដល់អ្នកដែលស្រឡាញ់ប្រជាធិបតេយ្យផងដែរ។

លោក រ៉ុង ឈុន៖ «គណបក្សកម្លាំងជាតិ យើងស្វាគមន៍យើងបើកទ្វារចំហ ទទួលអ្នកប្រជាធិបតេយ្យដូចករណីលោក សៀម ភ្លុក បើគាត់ចូលរួមជាមួយគណបក្សកម្លាំងជាតិ ទទួលស្វាគមន៍ ដូចខ្ញុំបានលើកឡើងអ៊ីចឹង ជំហរគាត់ច្បាស់លាស់រឹងមាំ ជាគំរូដ៏ល្អ សម្រាប់យុវជនក៏ដូចជាប្រជាពលរដ្ឋដែរ»។

ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ថ្លែងថា លោក សៀម ភ្លុក គួរតែត្រូវបានដោះលែងយូរហើយ ពីព្រោះ ករណីឃុំខ្លួននេះ ត្រូវបានសហគមន៍អន្តរជាតិ មើលឃើញថា ពាក់ព័ន្ធនឹងរឿង នយោបាយ ច្រើនជាងការអនុវត្តច្បាប់។ លោកថា រដ្ឋាភិបាលគួរពិចារណា ដោះលែងសកម្មជនសិទ្ធិមនុស្ស សកម្មជននយោបាយ និងសកម្មជនសង្គម ផ្សេងៗ ដែលកំពុងជាប់ឃុំឱ្យមានសេរីភាពវិញ ដើម្បីឆ្លើយតបនឹងការស្នើរបស់សហគមន៍អន្តរជាតិ។

លោក នី សុខា៖ «កន្លងមកគេបានស្នើអំពីការធ្វើម៉េចឱ្យរដ្ឋាភិបាល លើកកម្ពស់សិទ្ធិមនុស្ស សិទ្ធិពលរដ្ឋ សិទ្ធិនយោបាយអីទាំងអស់ហ្នឹង ហើយស្នើឱ្យមានការដោះលែងអ្នកជាប់ឃុំមនសិការទាំងអស់ឱ្យមានសេរីភាពហ្នឹង។ គិតថា ហ្នឹងហើយជារឿងមួយដែលរដ្ឋាភិបាលថ្មី គួរតែមានការឆ្លើយតបឱ្យបានច្បាស់លាស់ និងឱ្យបានជាវិជ្ជមាន ដើម្បីឱ្យយើងបង្កើនឱ្យមានកិច្ចសហប្រតិបត្តិការជាមួយសហគមន៍អន្តរជាតិ ជាពិសេស គឺសហគមន៍អឺរ៉ុប ក៏ដូចជា ប្រទេសសហរដ្ឋអាមេរិក ហើយនឹងប្រទេសដៃគូរមួយចំនួនទៀតដែលប្រកាន់ប្រជាធិបតេយ្យ»។

ប្រទេសលោកសេរី តែងថ្កោលទោសរដ្ឋាភិបាល ចំពោះការផ្ដន្ទាទោសលើលោក សៀម ភ្លុក និងអ្នកពាក់ព័ន្ធផ្សេងទៀតថា ជារឿងនយោបាយ និងទាមទារឱ្យ រដ្ឋាភិបាលលោក ហ៊ុន ម៉ាណែត ដោះលែងអ្នកទោសមនសិការទាំងអស់ ឱ្យត្រឡប់មកធ្វើសកម្មភាពនយោបាយ ព្រមទាំងស្តារប្រជាធិបតេយ្យ និងការ គោរពសិទ្ធិមនុស្សនៅកម្ពុជាឡើងវិញ។

អ្នកឃ្លាំមើលលើកឡើងថា ប្រសិនបើរដ្ឋាភិបាលលោក ហ៊ុន ម៉ាណែត នៅតែមិនខ្វល់ពីសំណើរបស់បណ្ដាលប្រទេសលោកសេរី និងអង្គការអន្តរជាតិ កម្ពុជាអាចនឹងរងការដាក់ទណ្ឌកម្មបន្ថែមទៀត ដែលធ្វើឱ្យប៉ះពាល់ដល់ផលប្រយោជន៍ជាតិ និងពលរដ្ឋ៕

From ព័ត៌មានថ្មីៗ | RFA
via_IFTTT

RFA | ពលរដ្ឋនៅខេត្តកោះកុង ស្នើឲ្យរដ្ឋាភិបាលដកអាជ្ញាប័ណ្ណអាជីវកម្មបូមខ្សាច់របស់ក្រុមហ៊ុន SV Asset | hot news

noreply@blogger.com (Sotheavy royals) — Thu, 24 Oct 2024 23:58:00 +0000

ប្រជាពលរដ្ឋ ដែលកំពុងរស់នៅពឹងផ្អែកលើមុខរបរនេសាទ នៅស្រុកបូទុមសាគរ ខេត្តកោះកុង ស្នើឲ្យរដ្ឋាភិបាលពិនិត្យ និងដកអាជ្ញាប័ណ្ណអាជីវកម្មបូមខ្សាច់របស់ក្រុមហ៊ុន អេសវី អ៊ែសេត (SV Asset Co.Ltd) តទៅទៀត។ សកម្មជនបរិស្ថាន យល់ឃើញថា រដ្ឋាភិបាលគួរយកសំណើ និងទុក្ខកង្វល់របស់ប្រជាពលរដ្ឋទៅរកដំណោះស្រាយប្រសើរជាជាងទុកបញ្ហាទាំងអស់នេះចោល។

ប្រជាពលរដ្ឋរងគ្រោះដីធ្លី ហើយបច្ចុប្បន្នកំពុងរស់នៅពឹងផ្អែកលើមុខរបរនេសាទសម្រាប់ចិញ្ចឹមជីវិត ស្ថិតនៅឃុំតានូន ស្រុកបូទុមសាគរ ខេត្តកោះកុង ទទូចឲ្យរដ្ឋាភិបាល ចុះសិក្សាអំពីផលប៉ះពាល់ និងដកហូតអាជ្ញាប័ណ្ណបូមខ្សាច់ពីក្រុមហ៊ុន អេសវី អ៊ែសេត (SV Asset Co.Ltd) ដោយពលរដ្ឋអះអាងថា ក្រុមហ៊ុននេះមិនបានពិគ្រោះយោបល់ជាមួយប្រជាពលរដ្ឋ និងមិនបានគោរពទៅតាមលក្ខខណ្ឌដែលក្រសួងបានកំណត់នោះទេ។

តំណាងសហគមន៍តានូន លោក សំ ធី បានរៀបរាប់ប្រាប់វិទ្យុអាស៊ីសេរី នៅថ្ងៃទី២៤ ខែតុលាថា ក្រុមហ៊ុន អេសវី អ៊ែសេត បានធ្វើអាជីវកម្មបូមខ្សាច់ បានបង្កផលប៉ះពាល់ដល់បរិស្ថាន និងមុខរបរនេសាទរបស់ប្រជាពលរដ្ឋរស់នៅតំបន់នោះ ហើយអាជ្ញាធរពាក់ព័ន្ធមិនបានសិក្សា និងពិគ្រោះយោបល់ជាមួយប្រជាពលរដ្ឋនៅក្នុងឃុំឲ្យបានគ្រប់ជ្រុងជ្រោយនោះទេ ដោយអាជ្ញាធរបានកោះហៅប្រជាពលរដ្ឋតែ ៣០គ្រួសារប៉ុណ្ណោះ ដើម្បីសិក្សាអំពីផលប៉ះពាល់ ខណៈពលរដ្ឋអាស្រ័យផលនៅតំបន់នោះមានរហូតដល់ជាង ៤០០គ្រួសារ ដែលមិនយល់ព្រមឲ្យក្រុមហ៊ុន អេសវី អ៊ែសេត ធ្វើអាជីវកម្មនៅតំបន់នោះឡើយ។ លោកស្នើឲ្យរដ្ឋាភិបាលពិនិត្យឡើងវិញ និងត្រូវដកហូតអាជ្ញាប័ណ្ណបូមខ្សាច់ ពីព្រោះមិនមានផលចំណេញដល់ប្រជាពលរដ្ឋរស់នៅតំបន់នោះឡើយ។

លោក សំ ធី៖ «ពលរដ្ឋទាំងអស់គ្នាមានការព្រួយបារម្ភហើយស្នើសុំឲ្យរដ្ឋាភិបាលក៏ដូចសម្ដេចធិបតី និងអតីតនាយករដ្ឋមន្ត្រី ហ៊ុន សែន ដែលកាន់តំណែងពីមុនមកនោះ សុំអំពាវនាវឲ្យគាត់ជួយពិនិត្យអាជ្ញាប័ណ្ណនេះឡើងវិញ ចុះមកពិនិត្យម្ដងទៀត ពីព្រោះប្រជាពលរដ្ឋមានការព្រួយបារម្ភខ្លាំង»។

អាជីវកម្មបូមខ្សាច់របស់ក្រុមហ៊ុន អេសវី អ៊ែសេត បានធ្វើឲ្យបាត់បង់ឆ្នេរខ្សាច់មាត់ពាមតានូនស្ទើរទាំងស្រុង ហើយពលរដ្ឋក៏លែងអាចទទួលបានផលពីរបរនេសាទដូចមុននោះដែរ។

បុរសម្នាក់ដែលរស់នៅពឹងផ្អែកលើមុខរបរនេសាទ នៅតំបន់មាត់ពាមតានូនជាង ៣០ឆ្នាំ គឺលោក ហេង ទូក ឲ្យដឹងថា លោកមិនគាំទ្រឲ្យមានការធ្វើអាជីវកម្មបូមខ្សាច់នោះទេ ដោយសារការធ្វើអាជីវកម្មនេះ ធ្វើឲ្យប៉ះពាល់ដល់ការនេសាទ របស់ប្រជាពលរដ្ឋនឹងមិនអាចរកជលផលដូចមុនឡើយ។ លោកបន្ថែមថា កាលពីមុនក្នុងរយៈពេល២យប់២ថ្ងៃ លោកអាចរកប្រាក់បានពីការនេសាទនេះ ចន្លោះពីជាង ២០ ទៅ ៤០ម៉ឺនរៀល ប៉ុន្តែបច្ចុប្បន្នអាចរកបានចាប់ពី ១០ម៉ឺន ទៅ ២០ម៉ឺនរៀលប៉ុណ្ណោះ ។

លោក ហេង ទូក៖ «ពិបាកដែរ យើងធ្វើការងារខាងនឹងបើគេបូមវានឹងបាក់ច្រាំងបាក់ដើមកោងកាង ចម្ងាយពីច្រាំងមិនឆ្ងាយប៉ុន្មានទេ យើងថា៥០០ម៉ែត្រចុះ បើបាក់ច្រាំងអស់យើងរកវាអត់បាន មិនថាតែខ្ញុំឬក៏គេនោះទេ អ្នកគេមកពីចម្ងាយក៏គេរអ៊ូដែរ អ្នកដែលធ្លាប់មករកនៅទីនេះ ចង់សំណូមពរបើគេផ្អាកបូមវាល្អតែម្ដង»។

ជុំវិញរឿងនេះ វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា និងអភិបាលខេត្តកោះកុង អ្នកស្រី មិថុនា ភូថង បានទេនៅថ្ងៃទី២៤ ខែតុលា។ ចំណែកតំណាងក្រុមហ៊ុន អេសវី អ៊ែសេត (SV Asset CO.Ltd ក៏វិទ្យុអាស៊ីសេរី មិនអាចទាក់ទងបានដែរ នៅថ្ងៃដដែលនេះ។

ទោះជាយ៉ាងណា កាលពីថ្ងៃទី២៦ ខែកុម្ភៈ ឆ្នាំ២០២៤ រដ្ឋមន្ត្រីក្រសួងរ៉ែ និងថាមពល លោក កែវ រតនៈ បានចុះហត្ថលេខាលើលិខិតមួយយល់ព្រមឲ្យក្រុមហ៊ុន អេសវី អ៊ែសេត ធ្វើអាជីវកម្មបូមខ្សាច់លើផ្ទៃសមុទ្រចំនួន ២៩ហិកតារ ស្ថិតនៅភូមិសាស្ត្រឃុំតានូន ស្រុកបូទុមសាគរ ខេត្តកោះកុង ហើយក្រុមហ៊ុនត្រូវសិក្សាពីផលប៉ះពាល់បរិស្ថាន និងត្រូវពិគ្រោះយោបល់ជាមួយសហគមន៍នៅតំបន់នោះ។ ក្នុងលិខិតដដែលបានបញ្ចាឲ្យក្រុមហ៊ុន បោះតម្រុយ ឬស្លាកសញ្ញាសម្គាល់ព្រំប្រទល់ឲ្យបានច្បាស់លាស់ជាមុនសិន មុនដំណើរការអាជីវកម្ម ប៉ុន្តែបច្ចុប្បន្នក្រុមហ៊ុនមួយនេះមិនបានធ្វើតាមលក្ខខណ្ឌរបស់ក្រសួងរ៉ែ និងថាមពល នោះទេ។

ទាក់ទិននឹងបញ្ហានេះ យុវជនចលនាមាតាធម្មជាតិ ថ្លែងក្នុងលក្ខខណ្ឌមិនបញ្ចេញឈ្មោះព្រោះបារម្ភពីសុវត្ថិភាព យល់ឃើញថា ការធ្វើអាជីវកម្មបូមខ្សាច់នៅក្នុងខេត្តកោះកុង វាមិនមែនជាលើកទីមួយនោះទេ ហើយប្រជាពលរដ្ឋរស់នៅឃុំតានូនតែងតែរងគ្រោះម្ដងហើយម្ដងទៀត។ លើសពីនោះកញ្ញាថា ធនធានធម្មជាតិស្ថិតនៅក្នុងខេត្តកោះកុង ត្រូវបានរដ្ឋាភិបាលបែងចែកឲ្យទៅក្រុមហ៊ុនឯកជនដែលមានងារជាឧកញ៉ាគ្រាក់ៗ ចំណែកពលរដ្ឋរស់នៅរងទុក្ខវេទនា។ កញ្ញាទាមទារឲ្យរដ្ឋាភិបាលយកសំណើ និងទុក្ខកង្វល់របស់ប្រជាពលរដ្ឋទៅរកដំណោះស្រាយប្រសើរជាជាងទុកបញ្ហាទាំងអស់នេះចោល។

យុវជនចលនាមាតាធម្មជាតិ៖ «ខ្ញុំនៅតែបារម្ភពីប្រជាពលរដ្ឋដែលពឹងអាស្រ័យទៅលើការនេសាទ ប្រសិនបើការបំផ្លាញធនធានធម្មជាតិការបូមខ្សាច់នៅតែបន្តកើតមាននេះ វាផ្ដល់ផលប៉ះពាល់ច្រើនមែនទែនទៅលើពួកគាត់ អ៊ីចឹងបន្តស្នើទៀតហើយ រដ្ឋាភិបាលគួរតែគិតលើបញ្ហានេះឲ្យបានច្រើនលម្អិតមែនទែន មិនមែនគ្រាន់តែចេញមកហើយ ចោទប្រកាន់ប្រជាពលរដ្ឋ ចេញមកលាបពណ៌ហើយមិនព្រមទទួលស្គាល់ការពិត»។

ប្រជាពលរដ្ឋលើកឡើងថា តំបន់ដែលមានសាឡង់កំពុងបូមខ្សាច់មានពលរដ្ឋរាប់រយគ្រួសារ មកពីស្រុកចំនួន៣ កំពុងប្រកបរបរនេសាទដើម្បីផ្គត់ផ្គង់ជីវភាពគ្រួសារ ក្នុងនោះមានស្រុកបូទុមសាគរ គីរីសាគរ និងស្រុកស្រែអំបិល។ ពលរដ្ឋព្រមានលើកគ្នាតវ៉ាបណ្ដេញសាឡង់បូមខ្សាច់ចេញពីតំបន់នោះ ប្រសិនបើរដ្ឋាភិបាលគ្មានចំណាត់ការលើក្រុមហ៊ុនបូមខ្សាច់ ដោយពួកគាត់អះអាងថា រដ្ឋាភិបាលបានយកដីស្រែចម្ការរបស់ពួកគាត់ឲ្យទៅក្រុមហ៊ុនឯកជនម្ដងរួចហើយ ដូច្នេះរដ្ឋាភិបាលមិនគួរបំផ្លាញមុខរបរចិញ្ចឹមជីវិតចុងក្រោយរបស់ពួកគាត់ថែមទៀតនោះទេ៕

From ព័ត៌មានថ្មីៗ | RFA
via_IFTTT

RFA | អ្នកឃ្លាំមើលនិងពលរដ្ឋថា អំពើចាប់ជំរិតបង្កភាពភ័យខ្លាច និងប៉ះពាល់ដល់សន្តិសុខសង្គម | hot news

noreply@blogger.com (Sotheavy royals) — Thu, 24 Oct 2024 19:58:00 +0000

អ្នកឃ្លាំមើល និងពលរដ្ឋលើកឡើងថា អំពើចាប់ជំរិតកំពុងបង្កភាពភ័យខ្លាចដល់ការរស់នៅប្រចាំថ្ងៃ និងគំរាមកំហែងដល់សន្តិសុខសង្គម។ ការលើកឡើងនេះធ្វើឡើងបន្ទាប់ពីអាជ្ញាធរខេត្តកណ្ដាលបានរំដោះជនរងគ្រោះពីអំពើចាប់ជំរិតចំនួន២នាក់ និងឃាត់ខ្លួនជនល្មើសជាជនបរទេសចំនួន៣នាក់។

កម្ពុជាមិនមែនជាទីកន្លែងសម្រាប់ពលរដ្ឋរស់នៅ ដោយមានសុវត្ថិភាព និងមានសន្តិសុខសង្គមល្អនោះឡើយ។ ការលើកឡើងនេះ ក្រោយពីករណីចាប់ជំរិត ដែលកើតមានជាបន្តបន្ទាប់ ។

ពលករខ្មែរ ធ្វើការនៅប្រទេសថៃ លោក សុះ សល់ ប្រាប់វិទ្យុអាស៊ីសេរីនៅថ្ងៃទី២៣ ខែតុលាថា អំពើឧក្រិដ្ឋកម្មមួយចំនួនដូចជា អំពើឆបោកតាមអនឡាញ និងចាប់ជំរិតជាដើម កំពុងប៉ះពាល់ដល់ពលរដ្ឋ និងកេរ្តិ៍ឈ្មោះ កិត្តិយសកម្ពុជានៅលើឆាកអន្តរជាតិ។ លោកស្នើដល់រដ្ឋាភិបាល ឲ្យស្វែងរកវិធានការដោះស្រាយបញ្ហាទាំងនេះឲ្យមានប្រសិទ្ធភាព។

លោក សុះ សល់៖ «បើនិយាយពីកិត្តិយស គឺប៉ះពាល់ខ្លាំងមែនទែន ពីព្រោះប្រទេសយើង ជាប្រទេសមួយដែលមានថ្នាក់ដឹកនាំមួយ ដែលមានអំពើទាំងអស់នេះកើតឡើង ហើយប៉ះពាល់ទី១ ទៅលើប្រជាពលរដ្ឋនៅតាមបណ្ដាប្រទេសផ្សេងៗ ដែលមានបងប្អូនខ្មែររស់នៅ ព្រោះគេឮថា កម្ពុជា គឺពេលហ្នឹងគេចាប់អារម្មណ៍តែម្ដងព្រោះជាធម្មតា បើសិនជាអត់មានរឿងអាស្រូវ ហើយរឿងហ្នឹងគឺរឿងមិនល្អទៀត គឺវាប៉ះពាល់ដល់កិត្តិយសប្រទេសទាំងមូលតែម្ដង»។

ការលើកឡើងនេះ ធ្វើឡើងបន្ទាប់ពីស្នងការដ្ឋាននគរបាលខេត្តកណ្ដាល នៅថ្ងៃទី២៣ ខែតុលា ឲ្យដឹងថា កាលពីថ្ងៃទី២២ ខែតុលា សមត្ថកិច្ចបានចុះបង្ក្រាបករណីចាប់ជំរិតមួយ នៅឃុំវិហារលួង ស្រុកពញាឮ ដោយបានឃើញរថយន្តម៉ាក អាល់ផាត (Alphard) ចំនួន២គ្រឿង ដែលកំពុងចត នៅក្នុងឃ្លាំងទុកចោលមួយកន្លែង និងមនុស្សចំនួន ៣នាក់ បានរត់ចេញពីកន្លែងកើតហេតុ។ បន្ទាប់មកអាជ្ញាធរបានចូលទៅពិនិត្យរថយន្តទាំងពីរ ហើយបានរកឃើញជនរងគ្រោះចំនួន ២នាក់ ដែលកំពុងជាប់ខ្នោះដៃ ហើយចងភ្ជាប់នៅក្នុងរថយន្ត។ ក្នុងចំណោមជនរងគ្រោះទាំងពីរ មានជនរងគ្រោះម្នាក់ជាជនជាតិចិន ស្នាក់នៅក្នុងកាស៊ីណូម៉ាកាវ នៅខេត្តស្វាយរៀង និងជនរងគ្រោះម្នាក់ទៀតជាជនជាតិខ្មែរ មានមុខរបរជាអ្នកបើកបរ រស់នៅខេត្តកណ្ដាល។ អាជ្ញាធរអះអាងថា បានឃាត់ខ្លួនជនសង្ស័យ ជាជនជាតិកាហ្សាក់ស្ថាន (Kazakhstan) ចំនួន ៣នាក់ ដែលបានរត់ចេញពីរថយន្ត និងបន្តនីតិវិធីតាមផ្លូវច្បាប់។

វិទ្យុអាស៊ីសេរីនៅមិនទាន់អាចទាក់ទងស្នងការ នៃស្នងការដ្ឋាននគរបាលខេត្តកណ្ដាល លោក ឈឿន សុចិត្ត ដើម្បីសុំការអត្ថាធិប្បាយបន្ថែមជុំវិញបញ្ហានេះ បាននៅឡើយទេ នៅថ្ងៃទី២៣ ខែតុលា ដោយទូរស័ព្ទចូលតែគ្មានអ្នកទទួល។

អ្នកសិក្សាច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត ប្រាប់អាស៊ីសេរីថា អំពើចាប់ជំរិត បានកើតឡើងនៅប្រទេសមួយចំនួនទូទាំងសាកលលោក ជាពិសេសនៅប្រទេសកំពុងអភិវឌ្ឍដូចជាកម្ពុជាជាដើម ។ លោកថា ដើម្បីដោះស្រាយបញ្ហានេះ រដ្ឋាភិបាលគួរតែពង្រឹងការអនុវត្តច្បាប់អន្តោប្រវេសន៍ និងលុបបំបាត់អំពើពុករលួយ។

លោក វ៉ន ចាន់ឡូត៖ «រដ្ឋាភិបាលត្រូវពង្រឹងនូវអភិបាលកិច្ចជាពិសេស គឺត្រូវលុបបំបាត់ឲ្យបាននូវអំពើពុករលួយ ដែលជាដើមហេតុចំបង នៃអំពើឧក្រិដ្ឋផ្សេងៗ ហើយត្រូវធ្វើយ៉ាងម៉េចធ្វើកំណែទម្រង់ប្រព័ន្ធតុលាការឲ្យទៅជាតុលាការមួយដែលមានសមត្ថភាព មានប្រសិទ្ធភាពក្នុងការពង្រឹងនូវនីតិរដ្ឋ ជាពិសេសត្រូវធានាថា ជនល្មើសដែលចាប់បាននឹងត្រូវទទួលទោសតាមច្បាប់»។

ចាប់តាំងពីឆ្នាំ២០១៩មក ករណីចាប់ជំរិត ដែលបង្កឡើងដោយជនបរទេស រួមទាំងជនជាតិចិនមួយចំនួន បានបន្តកើតឡើងនៅតាមបណ្ដាខេត្តមួយចំនួន ដូចជារាជធានីភ្នំពេញ ពោធិ៍សាត់ កំពត ស្វាយរៀង កណ្ដាល និងព្រះសីហនុជាដើម ដោយជនសង្ស័យបានធ្វើសកម្មភាព ចាប់ខ្លួនជនរងគ្រោះញាត់បញ្ចូលក្នុងរថយន្តដើម្បីជំរិតទារប្រាក់។

សេចក្ដីរាយការណ៍របស់សមត្ថកិច្ចបង្ហាញជាបន្តបន្ទាប់ឱ្យដឹងថា ករណីមួយចំនួនក្រុមជនដៃដល់ ព្យាយាមចាប់ជនរងគ្រោះឲ្យចូលទៅក្នុងរថយន្ត ដើម្បីជំរិតទារប្រាក់ និងខ្លះទៀត ចាប់ឃុំឃាំងជនរងគ្រោះធ្វើទារុណកម្មនៅតាមទីតាំងអគារពួកគេ ដើម្បីបង្ខំឱ្យទាក់ទងសាច់ញាតិផ្ញើលុយតាមចំនួនដែលឧក្រិដ្ឋជនទាមទារ។

ពលរដ្ឋ និងអ្នកឃ្លាំមើលស្នើដល់រដ្ឋាភិបាល ពង្រឹងការអនុវត្តច្បាប់អន្តោប្រវេសន៍ និងលុបបំបាត់អំពើពុករលួយ ដើម្បីបង្ការ ឬទប់សង្កាត់អំពើចាប់ជំរិតនានា ដែលអាចប៉ះពាល់ដល់កិត្តិយស និងកេរ្តិ៍ឈ្មោះរបស់កម្ពុជានៅលើឆាកអន្តរជាតិ ជាពិសេសប៉ះពាល់ដល់វិស័យទេសចរណ៍ និងអ្នកវិនិយោគជាដើម៕

From ព័ត៌មានថ្មីៗ | RFA
via_IFTTT

RFA | អ្នកសារព័ត៌មានឯករាជ្យ លោក ម៉ិច ដារ៉ា នឹងផ្អាកការងារមួយរយៈ ខណៈសុខភាពលោកចុះខ្សោយ ក្រោយជាប់ឃុំជិតមួយខែ | hot news

noreply@blogger.com (Sotheavy royals) — Thu, 24 Oct 2024 17:58:00 +0000

អ្នកសារព័ត៌មានឯករាជ្យ លោក ម៉ិច ដារ៉ា ដែលធ្លាប់ទទួលបានពានរង្វាន់ពីសហរដ្ឋអាមេរិក ត្រូវបានតុលាការ ដោះលែងឱ្យនៅក្រៅឃុំបណ្ដោះអាសន្ន នៅថ្ងៃទី២៤ ខែតុលា ក្រោយជាប់ឃុំចំនួន ២៥ ថ្ងៃ។ យ៉ាងណា អ្នកជំនាញ សារព័ត៌មាន និងសង្គមស៊ីវិលទទូចឱ្យតុលាការទម្លាក់ចោលបទចោទប្រកាន់លើលោក ម៉ិច ដារ៉ា ដើម្បីឱ្យលោកបន្តអាជីពជាអ្នកសារព័ត៌មានទៀត។

អ្នកសារព័ត៌មានឯករាជ្យលោក ម៉ិច ដារ៉ា ថ្លែងប្រាប់ក្រុមអ្នកសារព័ត៌មាន ក្រោយចេញពីពន្ធនាគារ នៅថ្ងៃទី២៤ តុលាថា លោកនឹងផ្អាកការងារជាអ្នកសារព័ត៌មាន ឯករាជ្យមួយរយៈ ខណៈលោកនៅមានសុខភាពទន់ខ្សោយនៅឡើយ។

លោក ម៉ិច ដារ៉ា៖ «និយាយតាមត្រង់ទៅខ្ញុំក្អក ថ្ងៃខ្ញុំចូលពន្ធនាគារថ្ងៃទី១ រហូតមកដល់ពេលនេះ ខ្ញុំនៅតែក្អកគេងអត់លក់ អារម្មណ៍ អស់អារម្មណ៍។ សុខភាពខ្ញុំនៅខ្សោយ ខួរក្បាលខ្ញុំអត់ទាន់ដំណើរការ»។

លោក ម៉ិច ដារ៉ា បញ្ជាក់បន្ថែមថា ការបាននៅក្រៅឃុំរបស់លោកនេះ មានកិច្ច អន្តរាគមន៍ច្រើនពីស្ថាប័នពាក់ព័ន្ធ។

លោក ម៉ិច ដារ៉ា៖«អរគុណអ្នកទាំងអស់គ្នា ដែលបានធ្វើអ្វីៗ បង្ហាញការគាំទ្រមកលើរូបខ្ញុំ ហើយខ្ញុំឃើញមានមិត្តភក្ដិខ្ញុំជាច្រើននាក់ ទាំងនៅក្នុងស្រុក ទាំងនៅក្រៅស្រុកពួកគាត់បានខិតខំព្យាយាមអស់ពីកម្លាំងកាយចិត្តធ្វើយ៉ាងណា ឱ្យខ្ញុំបាននៅក្រៅឃុំ ហើយក៏មានការសន្ដោសប្រណីពីថ្នាក់ដឹកនាំដែរ ហើយក៏មានការអន្តរាគមន៍ពីស្ថាប័ន ពីស្ថានទូតផ្សេងៗជួយរូបខ្ញុំផងដែរ»។

ការដោះលែងលោក ម៉ិច ដារ៉ា ឱ្យនៅក្រៅឃុំបណ្ដោះអាសន្ននេះ ធ្វើឡើង ក្រោយពីតុលាការបានសាកសួរលោកអស់រយៈពេលជាច្រើនម៉ោងកាលពីថ្ងៃទី ២៣ តុលា ហើយនៅយប់ថ្ងៃដដែលនោះ បណ្ដាញសារព័ត៌មានស្និទ្ធនឹងគ្រួសារត្រកូលហ៊ុន Fresh News បានផ្សព្វផ្សាយវីដេអូខ្លីមួយរបស់លោក ម៉ិច ដារ៉ា ក្នុងសំលៀកបំពាក់ជាអ្នកជាប់ឃុំលើកដៃសំពះ សុំទោសលោក ហ៊ុន សែន និងលោក ហ៊ុន ម៉ាណែត ហើយនិយាយដាក់បន្ទុកខ្លួនឯងថា បានប្រព្រឹត្តកំហុសរួមជាមួយនឹងលិខិត ៣ សន្លឹកផ្សេងទៀតដែលនិយាយអំពីកំហុសទាំងនោះ។

វិទ្យុអាស៊ីសេរីមិនអាចផ្ទៀងផ្ទាត់ជាមួយប្រភពឯករាជ្យអំពីទីតាំង និងពេលវេលា នៃការថតវីដេអូនោះបានទេ ហើយក៏មិនដឹងថា តើលោក ម៉ិច ដារ៉ា ត្រូវបានគេបង្ខំឱ្យចេញវីដេអូ និងលិខិតសុំទោស ឬយ៉ាងណានោះដែរ។

វិទ្យុអាស៊ីសេរីមិនអាចទាក់ទងសុំការអត្ថាធិប្បាយបន្ថែមពីលោក ម៉ិច ដារ៉ា បាន ទេគិតត្រឹមម៉ោងផ្សាយនេះ។

ទាក់ទងនឹងការដោះលែងលោក ម៉ិច ដារ៉ា ឱ្យនៅក្រៅឃុំបណ្ដោះអាសន្ននេះ សហមេធាវីការពារក្ដីឱ្យលោក ម៉ិច ដារ៉ា គឺលោក ឌុច ពិសិដ្ឋ ប្រាប់វិទ្យុអាស៊ីសេរីថា លោកនឹងពិភាក្សាជាមួយកូនក្ដី និងធ្វើការតស៊ូមតិបន្តទៀត។

លោក ឌុច ពិសិដ្ឋ៖ «ខ្ញុំត្រូវការជួបកូនក្ដីទៅមុខទៀតសិន ដែលយើងនៅមាននីតិវិធីបង្ហាញភស្តុតាងផ្សេងៗ ដែលថា គាត់មិនមានចេតនាក្នុងការ«ញុះញង់ឱ្យមានប្រព្រឹត្តបទឧក្រិដ្ឋ ឬវឹកវរអីទេ។ យើងសង្ឃឹមថា តុលាការឬចៅក្រម នឹងអាចពិចារណាទម្លាក់បទចោទទៅលើគាត់»។

ជុំវិញរឿងនេះ នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា CAMBOJA លោក ណុប វី ស្នើដល់តុលាការឱ្យទម្លាក់ចោលបទចោទប្រកាន់លើលោក ម៉ិច ដារ៉ា ។

លោក ណុប វី៖ «យើងនៅតែទទូចទៅដល់តុលាការ ក៏ដូចជា សមត្ថកិច្ចពាក់ព័ន្ធឱ្យមានការពិចារណាលើកការចោទប្រកាន់ទៅលើលោក ម៉ិច ដារ៉ា។ យើងយល់ឃើញថា ការចោទប្រកាន់និងប្ដឹងផ្ដល់ ឬការចាប់ខ្លួនអ្នកសារព័ត៌មាននេះ វាអាចនឹងបន្តធ្វើឱ្យមានការភ័យខ្លាច សម្រាប់អ្នកសារព័ត៌មានផ្សេងៗទៀត ដែលវានឹងជះឥទ្ធិពលជាអវិជ្ជមានទៅលើដំណើរការចូលរួមចំណែករបស់អ្នកសារព័ត៌មានក្នុងការផ្ដល់ព័ត៌មានគ្រប់ជ្រុងជ្រោយ ព័ត៌មានដែលបង្ហាញពីចំណុចអសកម្មឬក៏ចំណុចខ្លះដែលយើងធ្វើមិនទាន់បានល្អនៅក្នុងសង្គម»។

តុលាការក្រុងភ្នំពេញបានឃុំខ្លួនអ្នកសារព័ត៌មានឯករាជ្យលោក ម៉ិច ដារ៉ា រយៈពេលជិតមួយខែ នៅ ពន្ធនាគារខេត្តកណ្ដាលដោយចោទប្រកាន់ពីបទ«ញុះញង់ឱ្យមានភាពវឹកវរធ្ងន់ធ្ងរ ដល់សន្តិសុខសង្គម» បន្ទាប់ពីចាប់ខ្លួនលោកកាលពីថ្ងៃទី៣០ ខែកញ្ញា ទាក់ទងនឹង ការបង្ហោះរូបថតរមណីយដ្ឋានបាភ្នំ ដែលអាជ្ញាធរថាកាត់ត ឬព័ត៌មានក្លែងក្លាយ។

ប៉ុន្តែអ្នកសង្កេតការណ៍មួយចំនួនយល់ថា ការចាប់ខ្លួនលោក ម៉ិច ដារ៉ា នេះ ទំនងជាការសងសឹកច្រើនជាង ពីព្រោះការចោទប្រកាន់និងឃុំខ្លួននេះ ធ្វើឡើងនៅពីរសប្ដាហ៍ក្រោយ ដែលសហរដ្ឋអាមេរិកបានដាក់ ទណ្ឌកម្មបង្កកទ្រព្យសម្បត្តិមនុស្សសំខាន់របស់គណបក្សកាន់អំណាចលោក លី យ៉ុងផាត់ និងសម្ព័ន្ធអាជីវកម្មរបស់លោក ពាក់ព័ន្ធនឹងអំពើជួញដូរមនុស្ស និងពលកម្មដោយបង្ខំក្នុងជំនួញបោកតាមអនឡាញនិងរូបិយប័ណ្ណគ្រីបតូ (Cryptocurrency) ខណៈលោក ម៉ិច ដារ៉ា ធ្លាប់ទទួលបានពានរង្វាន់ពីក្រសួងការបរទេសអាមេរិក ចំពោះភាពក្លាហាននៃការរាយការណ៍ព័ត៌មានអំពីការជួញដូរមនុស្ស និងការឆបោកតាមប្រព័ន្ធអនឡាញ (Online Scams)។

នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូលោក អំ សំអាត មានប្រសាសន៍ថា លោក ម៉ិច ដារ៉ា នៅតែមានសម្ពាធដដែល ពីព្រោះតុលាការមិនទាន់ទម្លាក់ចោលបទចោទប្រកាន់នៅឡើយទេ ។

លោក អំ សំអាត៖ «លោក ម៉ិច ដារ៉ា គាត់ដើរតួនាទីសំខាន់ក្នុងការយកព័ត៌មានទាក់ទងនឹងរឿងរសើបៗ ដូចជាការជួញដូរមនុស្ស ការឆបោកតាមអនឡាញល្បែងអនឡាញជាដើមរហូតទទួលបានពានរង្វាន់ពីសហរដ្ឋអាមេរិក។ ការដាក់ឱ្យនៅក្រោមការដោះលែងក្រៅឃុំបណ្ដោះអាសន្ននេះ វាមិនមែនជាសេរីភាពសម្រាប់លោកទេ។ អ៊ីចឹងគួរណាស់ទម្លាក់បទចោទប្រកាន់»។

ទាក់ទងនឹងករណីលោក ម៉ិច ដារ៉ា នេះដែរ ក្នុងជំនួបជាមួយលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី២៣ ខែតុលា នាយិកានៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិសកល (USAID) អ្នកស្រី សាមែនថា ផៅវ័រ (Samantha Power) បានលើកឡើងអំពីកង្វល់មួយចំនួន ដូចជា ការគំរាមកំហែងលើសិទ្ធិជាមូលដ្ឋាន និងការចាប់ខ្លួន ដោយមិនត្រឹមត្រូវជាដើម ក្នុងនោះ អ្នកស្រីថា សហរដ្ឋអាមេរិកបានតាមដានយ៉ាងដិតដល់ចំពោះករណីចាប់ខ្លួនអ្នកសារព័ត៌មានឯករាជ្យលោក ម៉ិច ដារ៉ា ផងដែរ។

ការដោះលែងលោក ម៉ិច ដារ៉ា ឱ្យនៅក្រៅឃុំបណ្ដោះអាសន្ននេះ កើតមានឡើងមួយថ្ងៃ ក្រោយពីសហរដ្ឋអាមេរិកតាមរយៈទីភ្នាក់ងារ USAID ក្នុងដំណើរទស្សនៈកិច្ចរបស់អ្នកស្រី Samantha Power បានប្រកាសអំពីការផ្ដល់មូលនិធិលើសពី ៥០លានដុល្លារអាមេរិកដល់កម្ពុជា សម្រាប់កម្មវិធីដោះមីនប្រយុទ្ធប្រឆាំងនឹងជំងឺរបេង និងកម្មវិធីជាច្រើនទៀត សម្រាប់ផ្នែកបរិស្ថាន ប្រព័ន្ធផ្សព្វផ្សាយនិងសង្គមស៊ីវិល៕

From ព័ត៌មានថ្មីៗ | RFA
via_IFTTT

RFA | ប្រទេសហត្ថលេខីកិច្ចព្រមព្រៀងសន្តិភាពទីក្រុងប៉ារីសស្នើឱ្យកម្ពុជាគោរពសិទ្ធិមនុស្ស និងស្ដារលទ្ធិប្រជាធិបតេយ្យ | hot news

noreply@blogger.com (Sotheavy royals) — Thu, 24 Oct 2024 04:58:00 +0000

ប្រទេសដែលបានចុះកិច្ចព្រមព្រៀងសន្តិភាពទីក្រុងប៉ារីសដូចជា ប្រទេសបារាំង និងអូស្ត្រាលីជាដើម បានថ្លែងសារក្នុងខួបលើកទី៣៣ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ដោយស្នើឱ្យរដ្ឋាភិបាលកម្ពុជាគោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញ។

ស្ថានទូតសហភាពអឺរ៉ុបបានថ្លែងសារលើទំព័រហ្វេសប៊ុកនៅថ្ងៃទី២៣ ខែតុលា ថា កិច្ចព្រមព្រៀងសន្តិភាពទីក្រុងប៉ារីសគឺការឆ្លុះបញ្ចាំងឱ្យឃើញពីការសម្រេចបាននូវកិច្ចខិតខំប្រឹងប្រែងផ្នែកការទូតអស់រយៈពេលជាច្រើនឆ្នាំ ដែលមានគោលដៅបញ្ចប់សង្គ្រាម និងការឈឺចាប់ជាច្រើនឆ្នាំនៅកម្ពុជា។ កិច្ចព្រមព្រៀងនេះឆ្លុះបញ្ចាំងឱ្យឃើញពីការប្ដេជ្ញាចិត្តរបស់សហគមន៍អន្តរជាតិក្នុងការគាំទ្រការផ្លាស់ប្ដូររបស់កម្ពុជាឆ្ពោះទៅកាន់ការផ្សះផ្សា ការអភិវឌ្ឍ និងការគោរពសេរីភាពជាមូលដ្ឋាន។

សេចក្ដីប្រកាសព័ត៌មានដដែលថា កិច្ចព្រមព្រៀងសន្តិភាពទីក្រុងប៉ារីសមិនត្រឹមតែមានគោលដៅស្វែងរកសន្តិភាពប៉ុណ្ណោះទេ ថែមទាំងបង្កើតនូវមូលដ្ឋាននៃការអភិវឌ្ឍប្រកបដោយចិរភាព និងស្ថិរភាពដែលផ្អែកលើការគោរពសិទ្ធិមនុស្ស អភិបាលកិច្ចប្រកបដោយប្រជាធិបតេយ្យ និងនីតិរដ្ឋ។ ប្រវត្តិសាស្ត្រដ៏សោកនាដកម្មដែលកម្ពុជាបានឆ្លងកាត់បានតម្រូវឱ្យអាជ្ញាធរ និងសហគមន៍អន្តរជាតិគោរពការប្ដេជ្ញាចិត្តដែលត្រូវបានធ្វើឡើងដើម្បីស្ដារសន្តិភាព និងការអភិវឌ្ឍ។

សេចក្ដីប្រកាសព័ត៌មានដដែលឱ្យដឹងថា សហភាពអឺរ៉ុបមានមោទនភាពចំពោះភាពជាដៃគូដ៏រឹងមាំដែលបានបង្កើតឡើងជាមួយប្រទេសកម្ពុជាក្នុងអំឡុងបីទសវត្សរ៍ចុងក្រោយនេះ។ ក្នុងស្មារតីនៃកិច្ចសហប្រតិបត្តិការនេះ និងអនុលោមតាមមរតកនៃកិច្ចព្រមព្រៀងសន្តិភាពទីក្រុងប៉ារីស ដែលគោលការណ៍មានចារនៅក្នុងរដ្ឋធម្មនុញ្ញ សហភាពអឺរ៉ុបជំរុញឱ្យអាជ្ញាធរកម្ពុជាដកចេញនូវការដាក់សម្ពាធលើការអនុវត្តសិទ្ធិពលរដ្ឋ និងសិទ្ធិនយោបាយ ជាពិសេសសម្រាប់អ្នកសារព័ត៌មាន សមាជិកក្រុមប្រឆាំង និងអង្គការក្រៅរដ្ឋាភិបាលនានា។

ចំណែកស្ថានទូតអូស្ត្រាលីប្រចាំប្រទេសកម្ពុជាលើកឡើងថា ៣៣ ឆ្នាំមុន រដ្ឋាភិបាលអូស្ត្រាលី គឺជាសហហត្ថលេខីមួយក្នុងចំណោមសហហត្ថលេខីចំនួន ១៩ ដែលបានចុះហត្ថលេខាលើកិច្ចព្រមព្រៀងនេះ ដែលនាំឱ្យមានដំណើរការឆ្ពោះទៅរកសន្តិភាព និងការបញ្ចប់សង្គ្រាមស៊ីវិលជាច្រើនទសវត្សរ៍។

អូស្ត្រាលីមានសេចក្តីរីករាយ ដែលបានដើរតួនាទីយ៉ាងសំខាន់ក្នុងការជួយឱ្យមានកិច្ចព្រមព្រៀងទាំងនេះជាការត្រួសត្រាយផ្លូវសម្រាប់អាជ្ញាធរបណ្ដោះអាសន្នអង្គការសហប្រជាជាតិនៅកម្ពុជា ហៅកាត់ថា អ៊ុនតាក់ (UNTAC) ដែលជួយសម្រួលដល់ការរៀបចំការបោះឆ្នោតដោយសេរី និងយុត្តិធម៌នៅកម្ពុជាក្នុងឆ្នាំ១៩៩៣។ កិច្ចព្រមព្រៀងទាំងនេះ បានបង្កើតគោលការណ៍នានាសម្រាប់ការបង្កើតប្រជាធិបតេយ្យនៅកម្ពុជា ដោយផ្អែកលើនីតិរដ្ឋ និងការការពារសិទ្ធិមនុស្ស។

ចំណែកអតីតនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន ថា ទោះបីមានកិច្ចព្រមព្រៀងសន្តិភាពប៉ារីស ២៣ តុលា ១៩៩១ ក៏ពិតមែន ប៉ុន្តែសង្គ្រាមស៊ីវិលនៅកម្ពុជា នៅបន្តដែលបង្កដោយភាគីកម្ពុជាប្រជាធិបតេយ្យ ឬខ្មែរក្រហម។ លោកថា ក្រោមនយោបាយ ឈ្នះ-ឈ្នះ របស់លោក គឺបានបញ្ចប់សង្គ្រាមស៊ីវិលទាំងស្រុង នៅឆ្នាំ១៩៩៨ ដែលលោកថា បានធ្វើឱ្យប្រទេសកម្ពុជាទាំងមូលស្គាល់នូវសន្តិភាពពេញលេញ និងសម្បូរសប្បាយរហូតមកដល់សព្វថ្ងៃ។

រីឯប្រធានស្ដីទីគណបក្សសង្គ្រោះជាតិ លោក សម រង្ស៉ី លើកឡើងថា កិច្ចព្រមព្រៀងសន្តិភាពទីក្រុងប៉ារីសនាំមកនូវក្តីសង្ឃឹមសម្រាប់កម្ពុជាជាលើកដំបូង ប៉ុន្តែកិច្ចព្រមព្រៀងនេះត្រូវបានបំផ្លាញ ដោយសាររបប ហ៊ុន សែន មិនគោរពតាមលក្ខខណ្ឌបន្តិចម្តងៗ។ លោក សម រង្ស៉ី ថា ប៉ុន្មានឆ្នាំក្រោយមកនេះ ប្រទេសកម្ពុជាបានឆ្ពោះទៅរករបបផ្ដាច់ការ ដោយគ្រួសារ លោក ហ៊ុន សែន បានប្រមូលក្ដោបអំណាចទាំងមូល និងកាត់ផ្ដាច់សេរីភាពនយោបាយ។

ដោយឡែកសម្ព័ន្ធភាពឆ្ពោះទៅអនាគតរបស់គណបក្សក្រៅរដ្ឋាភិបាលចំនួន៥ បានចេញសេចក្ដីថ្លែងការណ៍ថា ក្នុងរយៈពេល ៣៣ឆ្នាំកន្លងមកនេះ គោលការណ៍គ្រឹះនៃកិច្ចព្រមព្រៀងសន្តិភាពទីក្រុងប៉ារីស មិនត្រូវបានគោរព និងអនុវត្តឱ្យបានពេញលេញឡើយ ដូចជា ការបង្រួបបង្រួម និងឯកភាពជាតិ ការគោរពសិទ្ធិមនុស្ស គោលការណ៍ប្រជាធិបតេយ្យ សេរីពហុបក្ស និងឯករាជ្យភាពនៃប្រព័ន្ធតុលាការ។ ដូច្នេះសម្ព័ន្ធភាពឆ្ពោះទៅអនាគត ទាមទារឱ្យរាជរដ្ឋាភិបាលកម្ពុជាអនុវត្តកិច្ចព្រមព្រៀងសន្តិភាពទីក្រុងប៉ារីស ហើយសម្ព័ន្ធភាពឆ្ពោះទៅអនាគត អំពាវដល់បណ្ដាប្រទេសហត្ថលេខីទាំងអស់ បន្តជួយជំរុញការអនុវត្តកិច្ចព្រមព្រៀងសន្តិភាពទីក្រុងប៉ារីស ឱ្យបានពេញលេញ ដើម្បីជួយស្ការ និងកសាងប្រទេសកម្ពុជា ព្រមទាំងរួមចំណែកដល់ការកសាងសន្តិភាព និងសន្តិសុខទាំងក្នុងតំបន់ និងអន្តរជាតិ។

ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ទោះបីជាខ្លឹមសារនៃកិច្ចព្រមព្រៀងសន្តិភាពប៉ារីសត្រូវបានដាក់បញ្ចូលទៅក្នុងរដ្ឋធម្មនុញ្ញក្ដី ក៏លោកថារដ្ឋាភិបាលនៅតែគាបសង្កត់ទៅលើសំឡេងរិះគន់ និងធ្វើឱ្យលំហសិទ្ធិមនុស្សកាន់តែរួមតូច។ លោកអំពាវនាវដល់អ្នកនយោបាយគ្រប់និន្នាការងាកមកផ្សះផ្សាជាតិឡើងវិញ។

លោក នី សុខា៖ «ប៉ុន្តែបើយើងពិនិត្យមើលស្មារតីនៃការអនុវត្ត ស្មារតីនៃកិច្ចព្រមព្រៀងសន្តិភាពប៉ារីសដែលនិយាយអំពីដែលនិយាយពីការគោរពសិទ្ធិមនុស្ស ការគោរពគោលការណ៍ប្រជាធិបតេយ្យ ដំណើរការបោះឆ្នោតដោយសេរី និងយុត្តិធម៌ ការផ្សះផ្សាការបង្រួបបង្រួមជាតិទាំងអស់នេះ យើងឃើញថា មកទល់ពេលនេះការអនុវត្តនូវស្មារតីហ្នឹង យើងសង្កេតឃើញថាមិនទាន់មានលក្ខណៈពេញលេញនៅឡើយទេ»។

កាលថ្ងៃពី២៣ ខែតុលា ឆ្នាំ១៩៩១ ភាគីជម្លោះទាំង ៤ របស់កម្ពុជារួមមាន រដ្ឋាភិបាលកម្ពុជាតំណាងដោយអតីតនាយករដ្ឋមន្ត្រី លោក ហ៊ុន សែន ចលនាតស៊ូហ៊្វុនស៊ិនប៉ិច តំណាងដោយសម្តេចព្រះ នរោត្តម សីហនុ និងសម្តេចក្រុមព្រះ នរោត្តម រណឫទ្ឋិ រណសិរ្សជាតិរំដោះប្រជាពលរដ្ឋខ្មែរ តំណាងដោយលោក សឺន សាន និងក្រុមចលនាកម្ពុជាប្រជាធិបតេយ្យឬ ក្រុមខ្មែរក្រហម តំណាងដោយ លោក ខៀវ សំផន បានឈានទៅចុះហត្ថលេខា លើកិច្ចព្រមព្រៀងសន្តិភាព នៅទីក្រុងប៉ារីស ប្រទេសបារាំង ក្រោមវត្តមានសាក្សីមកពី ១៨ប្រទេស រួមទាំងអគ្គលេខាធិការអង្គការសហប្រជាជាតិ (UN) ផងដែរ ដើម្បីបញ្ចប់សង្គ្រាមស៊ីវិលនៅកម្ពុជា។ ខ្លឹមសារនៃកិច្ចព្រមព្រៀងនេះក្រោយមកត្រូវបានបញ្ចូលទៅក្នុងរដ្ឋធម្មនុញ្ញកម្ពុជាឆ្នាំ១៩៩៣។ ទោះជាយ៉ាងណា រហូតមកដល់ពេលនេះ រដ្ឋាភិបាលដឹកនាំដោយគណបក្សប្រជាជនកម្ពុជា ត្រូវបានសហគមន៍អន្តរជាតិចោទប្រកាន់ថាមិនបានគោរពទៅតាមស្មារតីនៃកិច្ចព្រមព្រៀងនេះឱ្យបានពេញលេញនៅឡើយ ជាពិសេសនៅមានការរំលោភសិទ្ធិមនុស្សធ្ងន់ធ្ងរ និងការបន្តធ្វើទុក្ខបុកម្នេញអ្នកនយោបាយបក្សប្រឆាំង ដែលប្រាសចាកទៅនឹងគោលការណ៍ប្រជាធិបតេយ្យសេរីពហុបក្សជាដើម៕

From ព័ត៌មានថ្មីៗ | RFA
via_IFTTT

RFA | អាជ្ញាធរខេត្តកំពតដោះលែងពលរដ្ឋ៩នាក់និងព្រះសង្ឃមួយអង្គក្រោយពីឃាត់ខ្លួនសួរនាំជិត២០ម៉ោង | hot news

noreply@blogger.com (Sotheavy royals) — Thu, 24 Oct 2024 02:58:00 +0000

អាជ្ញាធរក្រុងកំពតសម្រេចដោះលែងពលរដ្ឋ ៩នាក់ និងព្រះសង្ឃមួយអង្គ ក្រោយពីឃាត់ខ្លួនសួរនាំជិត២០ម៉ោងពាក់ព័ន្ធនឹងការជួបជុំគ្នាផ្សាយផ្ទាល់ពីអត្ថន័យកិច្ចព្រមព្រៀងសន្តិភាពទីក្រុងប៉ារីស ក្នុងខួប៣៣ឆ្នាំ កាលពីព្រឹកថ្ងៃទី២៣ តុលា។

ទោះជាយ៉ាងណាក្តី មន្ត្រីសិទ្ធិមនុស្សថា ឃាត់ខ្លួននេះធ្វើឡើងដោយខុសច្បាប់ និងរំលោភសិទ្ធិពលរដ្ឋ និងសិទ្ធិសេរីភាពនៃការបញ្ចេញមតិធ្ងន់ធ្ងរ។

អាជ្ញាធរក្រុងកំពតបានតាក់តែងលិខិតមួយច្បាប់ឲ្យពលរដ្ឋ និងព្រះសង្ឃមួយអង្គផ្ដិតមេដៃ សន្យាឈប់ធ្វើសកម្មផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស និងច្បាប់ផ្សេងៗទៀត រួមទាំងរដ្ឋធម្មនុញ្ញដែលជាច្បាប់កំពូលរបស់ជាតិផង ដោយគ្មានការអនុញ្ញាតពីអាជ្ញាធរមូលដ្ឋាន។

នេះបើយោងតាមលិខិតរបស់អាជ្ញាធរក្រុងកំពត ដែលវិទ្យុអាស៊ីសេរីទទួលបានតាមរយៈពលរដ្ឋដែលអាជ្ញាធរឃាត់ខ្លួនកាលពីយប់ថ្ងៃទី២៣ តុលា។

ពលរដ្ឋប្រាប់វិទ្យុអាស៊ីសេរី ដោយសុំមិនបញ្ចេញឈ្មោះឲ្យដឹងបន្ទាប់ពីអាជ្ញាធរដោះលែងថា ពួកគាត់ព្រមផ្ដិតមេដៃនេះទាំងបង្ខំចិត្ត ព្រោះពួកគាត់មិនមានកំហុសអ្វីឡើយ ផ្ទុយទៅវិញអាជ្ញាធរទេដែលអនុវត្តខុសច្បាប់ និងតួនាទី លើពួកគាត់ ព្រមទាំង រំលោភសិទ្ធិពលរដ្ឋ និងរំលោភសិទ្ធិសេរីភាពនៃការបញ្ចេញមតិធ្ងន់ធ្ងរ។

ពលរដ្ឋថ្លែងលាក់ឈ្មោះ៖ «បើនិយាយតាមច្បាប់រដ្ឋធម្មនុញ្ញពួកខ្ញុំអត់បានធ្វើអីខុសទេ ឬធ្វើឲ្យប៉ះពាល់ខាតប្រយោជន៍ដល់បុគ្គលណា ឬបង្កភាពចលាចលដល់សង្គមគឺអត់មានទេ រដ្ឋធម្មនុញ្ញគឺបានចែងអំពីសិទ្ធិអំណាចរបស់ពលរដ្ឋ»។

អាជ្ញាធរក្រុងកំពតបានឃាត់ខ្លួនមនុស្សចំនួន៩ នាក់និងព្រះសង្ឃមួយអង្គ ដែលបានជួបជុំគ្នាផ្សាយផ្ទាល់អត្ថន័យកិច្ចព្រមព្រៀងសន្តិភាពទីក្រុងប៉ារីស កាលពីព្រឹកថ្ងៃទី២៣ ខែតុលា នៅត្រង់ម្តុំសួនច្បារក្រុង ជាប់មាត់ព្រែកកំពត ក្បែររូបសំណាកព្រះអង្គឌួង កាលពីម៉ោងជាង៨ព្រឹក។ បន្ទាប់មកបានបញ្ជូនពួកគាត់ទៅសួរនាំនៅសាលាក្រុងកំពត រួចហើយបន្តបញ្ជូនទៅស្នងការនគរបាលក្រុងកំពត រហូតដល់ម៉ោងជិត ១០យប់ថ្ងៃដដែលនេះ។
ពលរដ្ឋទាំងនោះមួយចំនួនរស់នៅខេត្តកំពត និងខេត្តកែប និងចំណែកយុវជនមួយរូប និងព្រះសង្ឃមួយអង្គ និមន្តពីខេត្តព្រៃវែង។

វិទ្យុអាស៊ីសេរីមិនទាន់អាចទាក់ទងអាជ្ញាធរក្រុងកំពត ដើម្បីបកស្រាយអំពីករណីនេះបាននៅឡើយទេ គិតត្រឹមម៉ោងផ្សាយនេះ។

មន្ត្រីសិទ្ធិមនុស្សនៃអង្គការអាដហុក (Adhoc) ប្រចាំការិយាល័យខេត្តកំពត លោក យន់ ផល្លី ដែលបានតាមដានរឿងនេះ យល់ឃើញថា ពលរដ្ឋបានយល់ដឹង នឹងប្រើសិទ្ធិស្របច្បាប់របស់ពួកគាត់បានត្រឹមត្រូវទៅតាមច្បាប់។

លោក យន់ ផល្លី៖ «អ៊ីចឹងពលរដ្ឋទាំងអស់គាត់អាចចូលរួមយ៉ាងសកម្មដើម្បីមជ្ឈដ្ឋានទូទៅមានការយល់ដឹងនៅក្នុងប្រទេសកម្ពុជាយើង...»។

ទាក់ទងនឹងការផ្សព្វផ្សាយពីកិច្ចព្រមព្រៀងសន្តិភាពទីក្រុងប៉ារីសនេះ អាជ្ញាធររដ្ឋាភិបាលលោក ហ៊ុន ម៉ាណែត កាលខែកក្កដា បានចាប់ខ្លួនសកម្មជនកិច្ចព្រមព្រៀងសន្តិភាពក្រុងប៉ារីសចំនួន ៤នាក់ គឺលោក ស្រ៊ុន ស្រ៊ន កញ្ញា ភឹង សោភា និងលោក សាន សិទ្ធិ និងលោក ចក់ ប៊ានមុន្នី។ មកដល់ពេលនេះអ្នកទាំង៤នោះ កំពុងជាប់ឃុំក្នុងពន្ធនាគារនៅឡើយ៕

From ព័ត៌មានថ្មីៗ | RFA
via_IFTTT

RFA | អ្នកជំនាញសារព័ត៌មាន និងអ្នកសិទ្ធិមនុស្សអំពាវនាវដល់តុលាការឱ្យទម្លាក់ចោលបទចោទប្រកាន់លើអ្នកសារព័ត៌មាន លោក ម៉ិច ដារ៉ា | hot news

noreply@blogger.com (Sotheavy royals) — Thu, 24 Oct 2024 00:58:00 +0000

អ្នកជំនាញសារព័ត៌មាន និងអ្នកសិទ្ធិមនុស្សអំពាវនាវឱ្យតុលាការទម្លាក់ចោលបទចោទប្រកាន់លើអ្នកសារព័ត៌មាន និងដោះលែងអ្នកសារព័ត៌មានរូបនេះ ដោយសំអាងថា លោកមិនបានប្រព្រឹត្តកំហុសដូចការចោទប្រកាន់។

ការអំពាវនាវនេះធ្វើឡើងបន្ទាប់ពីមានវីដេអូ លោក ម៉ិច ដ៉ារ៉ា សុំទោស លោក ហ៊ុន សែន និងលោក ហ៊ុន ម៉ាណែត និងទទួលស្គាល់ថាបានបង្ហោះព័ត៌មានក្លែងក្លាយនៅលើបណ្ដាញសង្គម។

វីដេអូសុំទោសរបស់ លោក ម៉ិច ដារ៉ា ត្រូវបានបណ្ដាញសារព័ត៌មានស្និទ្ធនឹងគ្រួសារត្រកូលហ៊ុន Fresh News ផ្សព្វផ្សាយកាលយប់ថ្ងៃទី២៣ ខែតុលាម្សិលមិញ និងបន្ទាប់ពីតុលាការក្រុងភ្នំពេញបាននាំខ្លួនលោកពីពន្ធនាគារខេត្តកណ្ដាលទៅសាកសួរបន្ថែមអស់ជាច្រើនម៉ោង។

ស្របគ្នានឹងវីដេអូខ្លីនោះក៏មានលិខិតលាយលក្ខណ៍អក្សរ ដែលសរសេរដោយដៃចំនួន ២សន្លឹកផ្ញើទៅលោក ហ៊ុន សែន និងលោក ហ៊ុន ម៉ាណែត។ ក្នុងវីដេអូដែលមានរយៈពេល ១ នាទី លោក ម៉ិច ដារ៉ា ក្នុងសំលៀកបំពាក់អ្នកជាប់ឃុំ រៀបរាប់ថា លោកសុំទោសចំពោះការបង្ហោះព័ត៌មានចំនួន៥ លើកនៅលើបណ្ដាញសង្គមរួមទាំងរូបថតរមណីយដ្ឋានបាភ្នំ ដែលគេវាយចោលថា ជាការបង្ហោះព័ត៌មានក្លែងក្លាយ។ លោក ម៉ិច ដារ៉ា បានទម្លាក់កំហុសឱ្យខ្លួនឯងថាបានធ្វើឱ្យប៉ះពាល់ដល់សន្តិសុខសង្គម និងការដឹកនាំរបស់រដ្ឋាភិបាល ប៉ះពាល់ដល់ដល់សាធារណជន និងភ្ញៀវបរទេស។

«សុំធ្វើការសុំទោស ចំពោះនូវកំហុសខុសឆ្គងដែលខ្ញុំបានបង្ហោះ ហើយខ្ញុំបាទសូមសន្យាថា នឹងឈប់បង្ហោះនូវព័ត៌មាន ដែលធ្វើឱ្យប៉ះពាល់ដល់ប្រមុខថ្នាក់ដឹកនាំ និងប្រទេសជាតិទៀតហើយ។»

យ៉ាងណាក៏ដោយ វិទ្យុអាស៊ីសេរីមិនទាន់អាចផ្ទៀងផ្ទាត់បញ្ជាក់បានទេ ថារូប និងសំដីសារភាពកំហុសក្នុងវីដេអូនោះ ពិតជារបស់លោក ម៉ិច ដារា ដែលធ្វើឡើងដោយស្ម័គ្រចិត្ត ឬស្ថិតក្រោមការបង្ខិតបង្ខំនោះទេ។

បើទោះជាយ៉ាងណាក្ដី អ្នកជំនាញផ្នែកសារព័ត៌មាន និងអ្នកសិទ្ធិមនុស្សនៅតែចាត់ទុករឿងនេះថា ជាការអនុវត្តសេរីភាពបញ្ចេញមតិ ដែលពុំគួរមានការចាប់ចងលោកដាក់ពន្ធនាគារតាំងពីដំបូង។ ពួកគាត់អំពាវនាវឱ្យតុលាការទម្លាក់ចោលបទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព។

នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា CAMBOJA លោក ណុប វី ប្រាប់វិទ្យុអាស៊ីសេរីថា លោក ម៉ិច ដារ៉ា គួរមានឱកាសកែកំហុសរបស់លោកតាំងពីដំបូង ប្រសិនបើអាជ្ញាធររកឃើញថា មានកំហុសដោយអចេតនា មិនគួរឈានដល់ឃុំឃាំងដាក់ពន្ធនាគារក្រោមបទព្រហ្មទណ្ឌឡើយ។ លោក ណុប វី ដែលបានទៅសួរសុខទុក្ខ លោក ម៉ិច ដារ៉ា ឱ្យដឹងថាស្ថានភាពក្នុងពន្ធនាគារបានធ្វើឱ្យលោកមានបញ្ហាសុខភាពដូចជាកើតរមាស់ ហូបមិនបាន និងដេកមិនលក់ជាប្រចាំ។

លោក ណុប វី៖ «ក្នុងរូបភាពនៃវិជ្ជាជីវៈគួរតែយើងប្រើប្រាស់ច្បាប់ស្ដីពីរបបសារព័ត៌មាន។ ក្នុងករណីនៃការបញ្ចេញមតិដែលធ្វើឡើងដោយប្រជាពលរដ្ឋ ហើយអ្នកសារព័ត៌មានក៏ជាប្រជាពលរដ្ឋ គួរតែមានការស្នើសុំមានការស្នើសុំឱ្យមានការបកស្រាយ គួរតែមានការត្រឹមតែសុំទោសអីទៅបានហើយ បើសិនជាអាជ្ញាធរពាក់ព័ន្ធរកឃើញថា អ្វីដែលជាការបង្ហោះនៅលើបណ្ដាញសង្គមហ្នឹង វាជាព័ត៌មានមួយ ដែលមិនទាន់ត្រឹមត្រូវ»។

សាលាដំបូងរាជធានីភ្នំពេញបានសម្រេចឃុំខ្លួន លោក ម៉ិច ដារ៉ា បណ្ដោះអាសន្ន នៅពន្ធនាគារខេត្តកណ្ដាល ដោយចោទប្រកាន់លោកពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា ៤៩៤ និង៤៩៥ នៃក្រមព្រហ្មទណ្ឌ ចំពោះការបង្ហោះរូបភាពនៅលើបណ្ដាញសង្គម។ កាលពីថ្ងៃទី១៨ ខែតុលា តុលាការដដែលនេះសម្រេចច្រានចោលបណ្ដឹងសុំនៅក្រៅឃុំរបស់លោក ដារ៉ា ដែលស្នើឡើងដោយសំអាងថា លោកមានបញ្ហាសុខភាពទាំងផ្លូវកាយ និងផ្លូវចិត្ត។

នាយកទទួលបន្ទុកកិច្ចការទូទៅនៃ អង្គការសិទ្ធិមនុស្សលីកាដូ លោក អំ សំអាត ដែលបានទៅតាមដានការសាកសួរ លោក ម៉ិច ដារ៉ា នៅសាលាដំបូងកាលពីថ្ងៃទី២៣ ខែតុលា លើកឡើងថា ការចាប់ខ្លួនពលរដ្ឋ និងអ្នកសារព័ត៌មានដាក់ពន្ធនាគារ ដោយសារការបញ្ចេញមតិ បន្ទាប់មកក៏មានការចេញវីដេអូសុំទោស បង្ហាញឱ្យឃើញថា សេរីភាពបញ្ចេញមតិរបស់ពលរដ្ឋនៅតែរងការរឹតត្បិត ហើយប្រព័ន្ធយុត្តិធម៌នៅកម្ពុជានៅតែរងការរិះគន់ថា ការប្រើប្រាស់ក្រមព្រហ្មទណ្ឌ ចាប់មនុស្សដាក់គុកនៅតែមានអាទិភាពខ្ពស់ជាងសេរីភាពបញ្ចេញមតិក្នុងសង្គមប្រជាធិបតេយ្យមួយនេះ។ លោក អំ សំអាត នៅតែទទូចថា អាជ្ញាធរគួរប្រើប្រាស់ច្បាប់របបសារព័ត៌មានក្នុងករណីរបស់លោក ម៉ិច ដារ៉ា នេះមិនគួរចោទប្រកាន់តាមក្រមព្រហ្មទណ្ឌ។

លោក អំ សំអាត៖ «ជាការបំពានទៅលើសេរីភាពរបស់ពលរដ្ឋដែលមានធានានៅក្នុងរដ្ឋធម្មនុញ្ញ ក៏ដូចជាបទដ្ឋានអន្តរជាតិ។ បញ្ហាទាំងអស់ហ្នឹងមិនគួរត្រូវបានចោទប្រកាន់ និងធ្វើការឃុំខ្លួនទេ ផ្ទុយទៅវិញគួរតែត្រូវបានធានាតាមបទដ្ឋានអន្តរជាតិស្ដីពីសិទ្ធិមនុស្ស ដើម្បីលើកកម្ពស់សេរីភាពជាមូលដ្ឋាន និងសិទ្ធិរបស់ពួកគាត់»។

លោក អំ សំអាត បញ្ជាក់ទៀតថា នៅក្រោយមានវីដេអូសុំទោសនេះមេធាវី លោក ម៉ិច ដារ៉ា អាចដាក់សំណើទៅតុលាការសុំឱ្យដោះលែង និងទម្លាក់ចោលបទចោទប្រកាន់។

និន្នាការចាប់ខ្លួនសកម្មជនដាក់ពន្ធនាគារ បន្ទាប់មកមានការចេញវីដេអូសុំទោស បានកើតមានញឹកញាប់នៅរយៈពេលចុងក្រោយនេះ ដែលនាំឱ្យមានការរិះគន់ថាអាជ្ញាធរប្រើប្រាស់ការចាប់ឃុំខ្លួនដាក់ពន្ធនាគារជាទណ្ឌកម្មបង្ខំឱ្យសកម្មជនទាំងនោះទទួលកំហុសទាំងដែលពួកគេមិនបានប្រព្រឹត្ត។

ករណីអ្នកសារព័ត៌មាន លោក ម៉ិច ដារ៉ា អង្គការជាតិ និងអន្តរជាតិ រួមទាំងបណ្ដាទូតប្រទេសលោកសេរីបានថ្កោលទោសរដ្ឋាភិបាលលោក ហ៊ុន ម៉ាណែត និងទាមទារឱ្យអាជ្ញាធរដោះលែងអ្នកសារព័ត៌មានឯករាជ្យ លោក ម៉ិច ដារ៉ា ដោយគ្មានលក្ខខណ្ឌតាំងពីដំបូង។ ពួកគេកោតសរសើរលោក ម៉ិច ដារ៉ា ដែលក្រសួងការបរទេសសហរដ្ឋអាមេរិកផ្ដល់ពានរង្វាន់ថា«ជាវីរបុរសរបាយការណ៍ពីការជួញដូរមនុស្សឆ្នាំ២០២៣ (2023 Trafficking in Persons Report Hero)។

ជាមួយគ្នានេះ ក៏មានការលើកឡើងថា ការចាប់ខ្លួនលោក ម៉ិចដារ៉ា ជាការសងសឹក ដ្បិតការចោទប្រកាន់ និងឃុំខ្លួននេះ ធ្វើឡើងនៅពីរសប្ដាហ៍ក្រោយ ដែលសហរដ្ឋអាមេរិក បានដាក់ទណ្ឌកម្មបង្កកទ្រព្យសម្បត្តិមនុស្សសំខាន់របស់គណបក្សកាន់អំណាច លោក លី យ៉ុងផាត់ និងសម្ព័ន្ធអាជីវកម្មរបស់លោក ពាក់ព័ន្ធនឹងអំពើជួញដូរមនុស្ស និងពលកម្មដោយបង្ខំ ក្នុងជំនួញឆបោកតាមអនឡាញ និងរូបិយប័ណ្ណគ្រីបតូ (Cryptocurrency)៕

From ព័ត៌មានថ្មីៗ | RFA
via_IFTTT

NEWS SUN

RFA | សិស្ស​ជាង​១​សែន​នាក់​បាន​ប្រឡង​​ជាប់​សញ្ញាបត្រ​​មធ្យម​សិក្សា​ទុតិយភូមិ ឬ​បាក់ឌុប | hot news

RFA | អ្នកជំនាញ​ច្បាប់​ចាត់ទុក​ការ​បកស្រាយ​របស់​រដ្ឋាភិបាល​ពី​ការ​បញ្ចប់ CLV ជា​ការ​រំលោភ​អំណាច | hot news

RFA | អ្នក​ភូមិ​ថា តំណាង​ក្រុមហ៊ុន​ចិន​នៅ​ខេត្ត​ព្រះវិហារ​លួច​ច្រូត​ស្រូវ​ពលរដ្ឋ​អស់​ជាង ២​ហិកតារ | hot news

RFA | អ្នកឃ្លាំមើល​និង​ពលរដ្ឋ​ថា អំពើ​ចាប់​ជំរិត​បង្ក​ភាព​ភ័យខ្លាច និង​ប៉ះពាល់​ដល់​សន្តិសុខ​សង្គម | hot news

RFA | សិស្សជាង១សែននាក់បានប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប | hot news

RFA | អ្នកជំនាញច្បាប់ចាត់ទុកការបកស្រាយរបស់រដ្ឋាភិបាលពីការបញ្ចប់ CLV ជាការរំលោភអំណាច | hot news

RFA | អ្នកភូមិថា តំណាងក្រុមហ៊ុនចិននៅខេត្តព្រះវិហារលួចច្រូតស្រូវពលរដ្ឋអស់ជាង ២ហិកតារ | hot news

RFA | អ្នកឃ្លាំមើលនិងពលរដ្ឋថា អំពើចាប់ជំរិតបង្កភាពភ័យខ្លាច និងប៉ះពាល់ដល់សន្តិសុខសង្គម | hot news