என்.கே.அஷோக்பரன்

இனி இலங்கைக்கு என்ன நடக்கும்? (சனல் 4 அண்மையில் வெளியிட்ட யுத்தக்குற்ற ஆதாரங்களின் தொகுப்புக் காணொளியின் பின்...)

noreply@blogger.com (என்.கே.அஷோக்பரன்) — Thu, 16 Jun 2011 19:29:00 +0000

உலகே அதிர்ந்து போனது.... காணொளியைப் பார்க்க முடியாது வேதனையில் எழுந்து சென்று விட்டவர்கள் பலர், காணொளியைக் கண்டபின்னர் தூக்கத்தைத் தொலைத்தவர்கள் பலர்,காணொளியைக் காணும் போதே தம்மையறியாமலேயே கண்ணீர் சிந்தியவர்கள் பலர். இது போலெல்லாம் உலகில் நடக்குமா? என்று யோசித்திருந்தவர்கள், இலங்கையிலே அதுவும் நமது இனமக்களுக்கு நடந்த இந்தக் கொடூரத்தைக் கண்டு தாங்கிக்கொள்ள முடியாமல் அதிர்ச்சியில் உறைந்து போய் இருக்கிறார்கள். பல காணொளிகள் முன்பே வெளிவந்திருந்தாலும், இந்த தொகுப்பைக் காணும் போது நெஞ்சு கனக்கிறது... மனது “நீதி வேண்டும்” என்று கொதிக்கிறது.

செவ்வாய்கிழமை இரவு 11 மணியளவில் பிரித்தானியாவின் சனல் 4 ஒளிபரப்பிய “இலங்கை - கொலைக்களம்” எனத் தலைப்பிடப்பட்ட காணொளி இலங்கை யுத்தத்தின் இறுதி நாட்களின் மறுபக்கத்தை, பொதுமக்கள் ஈவிரக்கமின்றி கொல்லப்பட்டதை, சரணடைந்த போராளிகள் சர்வதேச சட்டத்திற்கெதிராக கொல்லப்பட்டதை, பெண்கள் கற்பழிக்கப்பட்டு கொல்லப்பட்டதை, காணொளி மூலமும், நேரச் சாட்சிகளின் வாக்குமூலமாகவும் உலகத்திற்கு முன்னர் வெளிச்சம் போட்டுக் காட்டியுள்ளது. ( காணொளியை இங்கு காணலாம் - http://www.channel4.com/programmes/sri-lankas-killing-fields/4od )

உலகமே அதிர்ந்து போயுள்ள நிலையில் இன்று உலக நாடுகள் சுதந்திரமான சர்வதேச விசாரணை ஒன்றிற்காக இலங்கையை வலியுறுத்தி வருகிறது - இலங்கை அரசாங்கமும் வழமைபோல குற்றச்சாட்டுக்களை மறுத்தும், பரிசீலிப்போம் என்று சாக்குப் போக்குச் சொல்லி காலதாமதப்படுத்தியவண்ணம் இருக்கிறது. காணொளியைக் கண்டு அதிர்ச்சியுற்ற பிரித்தானிய வெளிவிவாகர அமைச்சர் அலிஸ்ரெயார் பேட் பின்வருமாறு தனது கருத்தைப் பதிவு செய்திருந்தார்.

‎'“I was shocked by the horrific scenes I saw in the documentary that was broadcast on 14 June. ..... The recent UN Panel of Experts’ report, this documentary and previously authenticated Channel 4 footage, constitutes convincing evidence of violations of international humanitarian and human rights law. The whole of the international community will expect the Sri Lankans to give a serious and full response to this evidence.' - British Foreign Minister Alistair Burt.

(முழுமையான அறிக்கையை இங்கு காண்க - http://ukinsudan.fco.gov.uk/en/news/?view=News&id=615115382 )

இதனைத் தொடர்ந்து இலங்கை அரசாங்கம் மீதான சர்வதேச அழுத்தம் அதிகரித்து வருகிறது. ஏற்கனவே இலங்கை இனப்பிரச்சினைக்கு அரசியல் தீர்வு நடவடிக்கையொன்றை எடுக்காததன் காரணமாக இந்தியா வெளிப்படையான ஆதரவை இலங்கைக்கு வழங்காது மௌனம் சாதிக்கிறது, மேலும் தமிழக சட்ட மன்றத்தில் இலங்கைக்கு எதிராக எடுக்கப்பட்ட தீர்மானம், நடைமுறையில் பயனேதுமில்லாவிட்டாலும், அரசியல் ரீதியில் ஒரு அழுத்தமாகவே காணப்படுகிறது. இவற்றைவிட ஐ.நா. நிபுணர் குழு அறிக்கைக்கு ஐரோப்பிய பாராளுமன்றம் தெரிவித்திருந்த ஆதரவும், அமெரிக்கா தெரிவித்த ஆதரவும் இலங்கை அரசாங்கத்துக்கு பாரிய அழுத்தத்தைக் கொடுத்துள்ளது. சனல் 4ன் காணொளி ஒளிபரப்பானது இன்னும் இந்த அழுத்தத்தை அதிகரிக்கும்.

இவ்வேளையில் சனல் 4ன் காணொளி தொடர்பான இலங்கை அரசின் பதிலளிப்புக்களில் பல முரண்பாடுகளைக் காணலாம். இலங்கை அரசாங்கத்தின் பேச்சாளர் கெஹெலிய ரம்புக்வெல்ல இலங்கை அரசாங்கமானது தனது தடவியல் நிபுணர்களைக் கொண்டு குறித்த காணொளியை மீண்டும் பரீசீலிக்கும் என்று கூறியிருந்தார்.

பின்னர் அல்-ஜஸீராவில் கருத்துத் தெரிவித்த ஜனாதிபதியின் ஆலோசகரும், தேசியப்பட்டியல் பாராளுமன்ற உறுப்பினருமான ரஜீவ விஜேசிங்ஹ, யுத்தக் குற்றம் பற்றிய கேள்விகளுக்குப் பதிலளிக்காது, இக்காணொளிகள் போலியென்றும், இவை புலிகளினால் நடிக்கப்பட்டு எடுக்கப்பட்டிருக்கலாம் என்று முழு யானையை மண்பானைக்குள் மறைக்க முயற்சிக்கும் தனது படித்த முட்டாள்தனத்தை உலகிற்கு மீண்டுமொருமுறை பறைசாற்றியிருந்தார். (குறித்த காணொளியை இங்கு காண்க - http://www.youtube.com/watch?v=sdrCR-X4iH0 )

இது தவிர இலங்கையின் பாதுகாப்புச் செயலாளரும், மஹிந்த ராஜபக்ஷவின் தம்பியுமான கோட்டாபய, சனல் 4 தொலைக்காட்சிக்கு புலி ஆதரவு சக்திகள் இலஞ்சம் ஊட்டி இலங்கையினது, இலங்கையினது இராணுவத்தினதும் பெயரைக் கெடுக்கும் செயலில் ஈடுபட்டிருப்பதாகக் கூறினார்.

இவர்கள் எல்லோருடைய பதில்களிலுமிருந்து நாம் அறிய முடிவுது, இலங்கை அரசாங்கம் அதிர்ந்து போய் இருக்கிறது, செய்வதறியாது திகைத்துப் போயிருக்கிறது. அநேகமான காணொளி ஆதாரங்கள் இராணுவ வீரர்களினால் அவர்களது கைத்தொலைபேசியின் மூலம் எடுக்கப்பட்டவையே என சனல் 4 தெரிவிக்கிறது. ஆகவே யுத்தத்தை வென்றபோது (?! - முடிவுக்குக் கொண்டுவந்தபோது!) இலங்கை அரசாங்கமோ, ராஜபக்ஷவோ இப்பொழுது எழுந்திருக்கும் இந்த நிலையைப் பற்றி யோசித்தே இருக்க மாட்டார்கள், யுத்தக்குற்றம் பற்றி கொஞ்சமேனும் தெளிவிருந்திருந்தால் ஒருவேளை கைத்தொலைபேசிக் கமராக்கள் கடைசெய்யப்பட்டிருந்திருக்கும்.

குறித்த காணொளி போலியானது. இது இலங்கையின் பெயரைக் கெடுக்கும் நடவடிக்கை என மீண்டும் மீண்டும் புலம்பும் அரசாங்கம், நீங்கள் அவ்வளவு சுத்தமானவர்கள் என்றால் சுதந்திரமான சர்வதேச விசாரணைக்கு முன்வராதது ஏன் என்ற கேள்விக்குப் பதிலில்லை. சில மேதாவித்தனமான அரசியல்வாதிகள் சர்வதேச விசாரணை என்பது இலங்கையின் இறைமைக்கு எதிரானது என விதண்டாவாதம் புரிவார்கள். இறைமை என்பதே மக்களுடையது, அந்த மக்களே அநியாயமாக, அநீதியான முறையில் கொல்லப்பட்ட, சித்திரவதைசெய்யப்பட்ட, கற்பழிக்கப்பட்ட போது இறைமை என்பது யாரைப் பாதுகாக்கத் தேவைப்படுகிறது?

இன்னும் சில அதிமேதாவிகள், 30 ஆண்டு யுத்தத்தில் நடக்காத யுத்தக்குற்றமா இப்போது நடந்து விட்டது என வியாக்கியானம் பேசுகிறார்கள். இவர்களது முட்டாள்தனத்தக்கு விளக்கமளிப்பது வீண்வேலை. அவர்களிடம் ஒரே கேள்வி, சித்திரவதைசெய்யப்பட்டது, கற்பழிக்கப்பட்டது, கொல்லப்பட்டது உங்கள் சகோதரன் என்றால்? உங்கள் தாயார் என்றால்? உங்கள் சகோதரி என்றால்? உங்கள் மனைவி என்றால்? உங்கள் பிள்ளைகள் என்றால்? இவ்வளவு ஏன் உங்கள் இனம் என்றால் - இதே போன்ற அலட்சியமான கேள்விகளை எழுப்பவீர்களா?

இன்னும் சிலர் புலிகளை (தீவிரவாதிகளைக்) கொன்றது ஒரு குற்றமா என்று கேட்கிறார்கள். இங்கே பிரச்சினை தீவிரவாதிகளைக் கொன்றதல்ல. சர்வதேசச் சட்டங்களுக்கும், மனிதஉரிமைச் சாசனங்களுக்கும் எதிராக நடந்து கொண்டது தான். சிவிலியன்கள் அநியாயமாகக் கொல்லப்பட்டது, வைத்தியசாலைகள் அறிந்தே தாக்கப்பட்டது, மனித உரிமைகளை மதிக்காது அரசாங்கம் செயற்பட்டது, சரணடைந்த போராளிகள் நீதிமுன் நிறுத்தப்படாது கற்பழிக்கப்பட்டது, கொல்லப்பட்டது ஆகிய குற்றச்சாட்டுக்களை சனல் 4 காணொளியும், ஐ.நா. நிபுணர்குழு அறிக்கையும் முன்வைக்கின்றன - இவை தான் பிரச்சினை. இந்த விடயம் தொடர்பில் பிரித்தானிய காடியன் பத்திரிகையின் ஆசிரியம் எழுதியிருந்த ஒரு விடயம் முக்கியம் பெறுகிறது -

That the LTTE assassinated presidents and invented the suicide belt, that the Tigers used civilians as human shields, is no defence from the charge that Sri Lankan soldiers summarily executed prisoners in their custody. Sri Lanka is trying to pretend these events are history, as the economy and tourism pick up. They are not. This evidence has to be faced. - The Guardian Editorial.

(காடியன் ஆசிரியம் முழுமையான வடிவத்தை இங்கு காண்க - http://www.guardian.co.uk/commentisfree/2011/jun/15/sri-lanka-evidence-that-wont-be-buried )

இவை இவ்வாறு இருக்க பலபேர் இன்று கேட்கும் கேள்வி “இனி இலங்கைக்கு என்ன நடக்கும்?” இது தொடர்பில் ஐ.நா. சபையின் செயலாளர் நாயகத்தின் பேச்சாளர் மார்ட்டின் நெசேர்க்கி இலங்கைவிவகாரம் தொடர்பிலான நடவடிக்கை பற்றி ஊடகவியலாளர் ஒருவரின் கேள்விக்குப் பதிலளிக்கையில் கூறிய விடயம் முக்கியமானது. “இலங்கை அரசாங்கள் ஏற்றுக்கொள்ளும் பட்சத்தில் அல்லது பாதுகாப்புச் சபை அல்லது மனித உரிமைகள் சபை அல்லது பொதுச்சபை ஆணையிடும் பட்டசத்தில் மட்டுமே பான் கீ மூனினால் நிபுணர் குழுவின் சிபாரிசின் படி சுதந்திரமான சர்வதேச விசாரணை ஒன்றினை முன்னெடுக்க முடியும்” என அவர் தெரிவித்திருந்தார்.

இது தான் நிதர்சனம். இலங்கை சர்வதேசக் குற்றவியல் நீதிமன்றத்தைத் தோற்றுவித்த ஒப்பந்தத்தில் இலங்கை கைச்சாத்திடவில்லை ஆகவே நேரடியாக இலங்கையை யுத்தக்குற்றம் தொடர்பில் விசாரிக்கும் அதிகாரம் ஹேக்கிற்குக் கிடையாது. (இது பற்றி என்னுடைய முந்திய பதிவில் குறிப்பிட்டிருந்தேன் - http://nkashokbharan.blogspot.com/2010/12/blog-post.html ) ஆகவே ஐ.நா.வின் பாதுகாப்புச்சபை அல்லது மனித உரிமைகள் சபை அல்லது பொதுச்சபை ஆணையிடும் பட்சத்தில் மட்டுமே இது சாத்தியமாகும். ஆனால் இங்கு தான் சிக்கலே. அமெரிக்கா, பிரித்தானியா மற்றும் ஐரோப்பிய ஒன்றியம் ஆகியன ஆதரவளித்தாலும், இவ்வளவு ஏன் பெரும்பான்மை எண்ணிக்கையிலான நாடுகள் ஆதரவளித்தாலும் சீனா, ரஷ்யா என்ற 2 நாடுகளின் ஆதரவு இலங்கைக்கு இருப்பது இலங்கை அரசாங்கத்திற்குச் சாதகமானது. வீட்டோ அதிகாரம் உடைய இந்த 2 நாடுகளும் இலங்கைக்கு ஆதரவளிப்பதால் குறித்த சபைகளில் இலங்கைக்கெதிராக பெரும்பான்மை ஆதரவு இருந்தாலும் அவற்றை வீட்டோ செய்யும் அதிகாரம் இவற்றிடம் உண்டு. இதுதான் இலங்கையரசாங்கத்திற்கிருக்கும் ஒரேயொரு நம்பிக்கை. தற்போது மஹிந்த ராஜபக்ஷ ரஷ்யாவிற்கு விஜயமொன்றை மேற்கொண்டிருக்கிறார். அங்கு நடைபெறும் சர்வதேச பொருளாதார மாநாட்டில் பங்குபெறச் சென்றிருக்கும் அவர் அங்கு ரஷ்ய மற்றும் சீனத் தேசத் தலைவர்களைச் சந்திப்பார் எனத் தெரிவிக்கப்படுகிறது, நிச்சயமாக யுத்தக் குற்றம் தொடர்பிலான ஆதரவு தேடலாகவே இந்தச் சந்திப்பு இருக்கும் என்பது வெள்ளிடைமலை.

இஸ்ரேல் இலங்கைக்குக் ஆதரவு தெரிவித்திருந்தமை இங்கு குறிப்பிடத்தக்கது. உண்மையிலேயே அதை இலங்கைக்கான ஆதரவாக என்னால் பார்க்கமுடியவில்லை. பலஸ்தீன விடுதலையை உலகறிய ஆதரித்த, இஸ்ரேலை எதிர்த்த மஹிந்த ராஜபக்ஷவினுடைய அரசாங்கத்திற்கு அவர்கள் ஆதரவளித்தார்கள் என்பது தர்க்கரீதியாக ஏற்றுக்கொள்ளத்தக்கதாக இல்லை. உண்மையிலேயே இலங்கை மீதான நிபுணர் குழு அறிக்கையை ஆதரிப்பது பின்னர் தனக்கே ஆபத்தாக முடியும் என்ற இஸ்ரேலின் பயம்தான் இஸ்ரேலின் இந்த நிலைப்பாட்டிற்குக்காரணம் என்பது எனது கணிப்பு.

அநியாயத்திற்கு தலைவர்கள் துணைபோகலாம், நாடுகள் துணைபோகலாம், ஏன் வீட்டோ அதிகாரம் கூட துணைபோகலாம் ஆனால் அவற்றால் நியாயத்தையும், நீதியையும், சத்தியத்தையும் மறைக்கவோ, அழிக்கவோ முடியாது. அவை நியாயத்தை, நீதியை, சத்தியத்தைத் தோற்கடிப்பது தற்காலிகமானதே நிரந்தரமல்ல.

ஒருவேளை இலங்கையில் ஒரு அரசியல் மாற்றம் ஏற்பட்டால், புதிய அரசாங்கம் யுத்தக் குற்றம் தொடர்பான சுதந்திர சர்வதேச விசாரணைக்கு அனுமதியளித்தால் நிச்சயம் நீதி பிறக்கும். இந்த நிலை வரவேண்டுமென்றால் இலங்கைக்கு சர்வதேச நாடுகள் அழுத்தம் கொடுப்பது அவசியம், அந்த அழுத்தம் தொடரவேண்டும். குற்றச்சாட்டுக்களுக்கு இலங்கை அரசாங்கம் முகங்கொடுத்தே ஆகவேண்டும், பதிலளிக்கும் கடப்பாடுடைய ஒரு ஜனநாயக அரசாங்கம் அதிலிருந்து மாறுபட்டு பின்வாசலால் தப்பிக்கும் முறையை ஒருபோதும் ஏற்றுக்கொள்ள முடியாது. இது ஜனநாயக தேசம் - தன்னுடைய நாட்டு மக்களின் பாதுகாப்பையே சவாலுக்குட்படுத்தும் ஒரு தேசத்திற்கு சர்வதேச நாடுகள் அழுத்தம் கொடுப்பதில் தவறேதுமில்லை.

உங்கள் கை சுத்தமானது என்றால் அதை நிரூபிக்க நீங்கள் தயங்குவது ஏன்?

“தர்மத்தின் வாழ்வுதனை சூது கவ்வும், தர்மம் மறுபடியும் வெல்லும்”

2010ன் எனது தெரிவுகள்!

noreply@blogger.com (என்.கே.அஷோக்பரன்) — Wed, 29 Dec 2010 09:19:00 +0000

எம்மைக் கடந்து போகிறது இன்னொரு வருடம்! 2010 தனிப்பட்ட வகையில் எனக்கு பாரிய மாற்றத்தை, ஏமாற்றத்தை தந்த வருடம் ஆனால் அதுவும் கடந்து போகிறது. இந்த வருடத்திலிருந்து எனது தெரிவுகள் -

********************************************************

வருடத்தின் சோகம்

ஐக்கிய மக்கள் சுதந்திர முன்னணியின் பாரிய பாராளுமன்றத் தேர்தல் வெற்றிதான் என்னைப் பொருத்தவரை இந்த வருடத்தின் சோகம். இந்த அரசாங்கம் எடுத்த நடவடிக்கைகளும், எடுத்துக்கொண்டிருக்கும் நடவடிக்கைகளும் இந்த அழகிய தேசத்தை சீரழித்துக்கொண்டிருக்கிறது என்பதில் ஐயமேயில்லை. பொருளாதார ரீதியில் அதளபாதாளத்தை நோக்கிப் பயணித்துக் கொண்டிருக்கிறோம். மத்திய வங்கி வீதங்களில் வளர்ச்சியைக்காட்டலாம் ஆனால் பணவீக்கத்தின் விளைவுகளைச் சாதாரண பொதுமக்களே வெளிப்படையாக உணரும் நிலை வந்துவிட்டது. தேங்காயை இறக்குமதிசெய்யுமளவுக்கு பயிர்ச்செய்கை பின்னிலையடைந்துவிட்டது. முட்டைகளும், கோழிக்குஞ்சுகளும் இறக்குமதி செய்யவேண்டிய அளவுக்கு கால்நடை வளர்ப்பு பின்னிலையடைந்துவிட்டது. வெளிநாட்டு உறவுகளில் பாரிய விரிசல்களும், தொய்வும், தோல்வியும் ஏற்பட்டிருக்கிறது.

மொத்தத்தில் இந்த அரசாங்கம் தேசத்தை வீழ்ச்சிப்பாதையில் இட்டுச்செல்கிறது என்பதில் ஐயமில்லை. பணவீக்கத்தினையும், உற்பத்தி வீழ்ச்சியினையும், துறைமுகம், பாதைகள் அமைத்து சரிப்படுத்திவிடலாம் என்று யாராவது நினைத்தால், அவர்களது அறியாமைக்காக நான் வருத்தப்படப் போவதில்லை. மேலும் ஐஃபா போன்ற தனியார் நிகழ்வகளுக்காக அரச பணத்தை வீணடித்தமை, அதற்கு சுற்றுலாத்துறை அபிவிருத்தி என்று சப்பைக்கட்டு கட்டியமை, கடைசியல் நிகழ்வு படு தோல்வியடைய ஜனாதிபதி கூட நிகழ்வில் கலந்துகொள்ளாமல் விட்டமை. இனங்களுக்கிடையில் சமரசம், ஒற்றுமை ஏற்படுத்த வேண்டிய காலகட்டத்தில் தேசிய கீதத்தின் தமிழ்ப்பதிப்பை நீக்க முயன்றமை, யாழில் மாணவர்களைக் கட்டாயப்படுத்திச் சிங்களத்தில் தேசிய கீதத்தைப் பாடச்செய்தமை என்று இந்த அரசு ஆடும் தகிடுதத்தங்கள் தேசத்தை முன்னேற்றப்பாதையிலா இட்டுச் செல்கிறது?

********************************************************

வருடத்தின் மகிழ்ச்சி

தனியார் பல்கலைக்கழகங்களை இலங்கையில் ஆரம்பிக்க உயர்கல்வியமைச்சு நடவடிக்கை எடுத்திருப்பது வரவேற்கத்தக்கதும் மகிழ்ச்சிகரமானதுமாகும். உயர்தரம் சித்தியடையும் ஏறத்தாழ 200 000 பேரில் வெறும் 20 000 பேருக்கே அரச பல்கலைக்கழகங்களில் இடம் இருக்கிறது மீதியுள்ள 90 வீத மாணவர்களின் நிலை என்ன என்பது பற்றிப் பலர் சிந்திப்பதில்லை. எல்லா மாணவர்களுக்கும் இலவச உயர் கல்வியளிக்க அரசாங்கத்தால் இயலாது என்பது யதார்த்தமானது ஆகையில் தனியார் பல்கலைக்கழகங்களின் தேவை என்பது மறுக்கப்பட முடியாது. நீண்ட காலமாக இது தொடர்பான நடவடிக்கைகள் எடுக்கப்பட்டபோதும் பலவித போராட்டங்களால் அவை தடுக்கப்பட்டது, இம்முறை இவற்றையெல்லாம் தாண்டி இதற்கான நடவடிக்கைகள் எடுக்கப்பட்டது பாராட்டுக்குரியது. கோடிக்கணக்கான பணத்தை கல்விக்காக நாம் வருடாவருடம் ஐக்கிய ராஜ்ஜியம், இந்தியா, அவுஸ்திரேலியா, அமெரிக்கா, ரஷ்யா, சீனா ஆகிய நாடுகளுக்கு வழங்கி வருகிறோம் ஆக இலங்கையில் தனியார் பல்கலைக்கழகங்கள் ஆரம்பிக்கப்பட்டால் அது பொருளாதார ரீதியிலும் பண வெளியேற்றத்தைக் கட்டுப்படுத்தும் என்பதுடன் அரச பல்கலைக்கழகங்களுக்குச் செல்ல இயலாத பெரும்பான்மையளவு மாணவர்களுக்கு உயர் கல்வி வாய்ப்பையும் இலகுப்படுத்தும். இந்த விடயம் தொடர்பில் உறுதியாக நடவடிக்கை எடுத்த அமைச்சர் எஸ்.பி.திஸாநாயக்க பாராட்டுக்குரியவர்.

********************************************************

வருடத்தின் அதிர்ச்சி

சந்தேகமேயில்லாமல் விக்கி லீக்ஸின் கேபிள்கேட்! விக்கி லீக்ஸ் தொடர்பில் எனக்கு மாறுபட்ட கருத்து உண்டு. அதைப் பதிவு செய்வதற்கான களம் இதுவல்ல ஆனால் நிச்சயமாக உலகையும், உலக நாடுகளின் அரசியலையும், அரசியல்வாதிகளையும் கேபிள் கேட் ஆட்டிய ஆட்டம் பயங்கரமானது என்பதில் ஐயமில்லை.

********************************************************

வருடத்தின் சிறந்த விளையாட்டுப் போட்டித் தருணம்

என்னைப் பொருத்த வரையில் 2010ன் சிறந்த விளையாட்டுப் போட்டித் தருணம் மார்ச் மாதத்தில் செல்ஸி காற்பந்தாட்டக் கழகம் 3 வருடங்களின் பின் பெற்ற இங்லிஷ் ப்ரீமியர் லீக் வெற்றியும், கழகத்தின் 105 வருட வரலாற்றில் பெற்ற முதல் ப்ரீமியர் லீக் மற்றும் எஃப்.ஏ.கோப்பை டபிள் வெற்றியும் ஆகும்! செல்ஸி கழக ஆதரவாளனான எனக்கு மிகுந்த மகிழ்ச்சியை அளித்த தருணம் இது!

********************************************************

வருடத்தின் சோகமான விளையாட்டுப் போட்டித் தருணம்

என்னைப் பொருத்தவரை கடந்த ஆண்டின் சோகமான விளையாட்டுப் போட்டித் தருணம் காற்பந்து உலகக்கிண்ணப் போட்டியிலிருந்து இங்கிலாந்து வெளியேறிய தருணம். இங்கிலாந்து தேசிய காற்பந்தாட்ட அணியின் உலகக்கோப்பை வரலாற்றில் மிக மோசமான தோல்வியை (4-1) பலமான ஜேர்மனிக்கெதிராக அடைந்து மோசமான முறையில் உலகக் கிண்ணத்திலிருந்து வெளியேறியது இங்கிலாந்து அணி. உலகக் கிண்ணத்தைக் கைப்பற்றக்கூடிய அணிகளுள் ஒன்றாக போட்டிகள் ஆரம்பமாக முன் கணிக்கப்பட்ட அணி பரிதாபமாக வெளியேறியது ஒவ்வொரு இங்கிலாந்துக் காற்பந்தாட்ட ரசிகனுக்கும் பாரிய சோகத்தை ஏற்படுத்திய தருணமாகும்.

********************************************************

வருடத்தின் சிறந்த திரைப்படம்

என்னைப் பொருத்தவரையில் 2010ன் சிறந்த திரைப்படமாக 2 படங்களைக் குறிப்பிடுவேன். முதலாவது, விண்ணைத் தாண்டி வருவாயா?. இரண்டாவது, அங்காடித் தெரு. பொதுவாக தமிழ்த் திரைப்படங்கள் என்னை உணர்வு ரீதியாகப் பாதிப்பது மிகக் குறைவு ஆனால் இந்த இரண்டு படங்களும் என்னை உணர்வு ரீதியாக மிகப் பாதித்தது. இந்த வருடத்தில் நான் பார்த்த திரைப்படங்களுள் இந்த இரண்டு படங்களும் சிறப்பானவை.

********************************************************

வருடத்தின் இனிய பாடல்

நிறைய பாடல்களை இந்த 2010ல் கேட்டுவிட்டேன். ஆங்கிலத்தில் புதிதாக முளைத்திருக்கும் இளம் பாடகனான ஜஸ்டின் பீபரின் பாடல்கள் என்னைக் கவர்ந்து வருகிறது இதை விட ஜி.வி.பிரகாஷ் குமாரின் பூக்கள் பூக்கும் தருணம், கதைகள் பேசும் விழியருகே, உன் பேரைச் சொல்லும் போதே ஆகிய பாடல்களும், விஜய் அண்டனியின் அவள் அப்படியொன்றும் அழகில்லை பாடலும், ஏ.ஆர்.ரஹ்மானின், ஹோசனா, மன்னிப்பாயா, அன்பில் அவன், ஆரோமலே, உசிரே போகுதே, கள்வரே கள்வரே, வீரா வீரா, இரும்பிலே ஒரு இதயம் முளைக்கிதோ, காதல் அணுக்கள், கிளிமஞ்சாரோ ஆகிய பாடல்கள் இந்த வருடத்தில் நான் கேட்டவற்றுள் எனக்குப் பிடித்தவை. இவற்றுள் இந்த வருடத்தின் இனிய பாடலாக “மன்னிப்பாயா...” பாடலைச் சொல்வேன், அந்த இசையும், ஷ்ரேயா கோஷல் மற்றும் ரஹ்மானின் குரலும் அது தரும் உணர்வும் அலாதியானது!

********************************************************

வருடத்தின் சிறந்த பத்திரிகை

சந்தேகமில்லாமல் த சண்டே லீடரைச் சொல்வேன். இலங்கையிலுள்ள ஏனைய பத்திரிகைகள் ஏறெடுத்துப் பார்க்கக்கூடப் பயப்படும் உண்மைகளை துகிலுரித்துக் காட்டுவதில் லீடர் சிறப்பாகச் செயற்படுகிறது. லசந்த விக்ரமதுங்க கொல்லப்பட முன் இருந்த லீடருக்கும் இப்போது இருக்கும் லீடருக்கும் தரத்தில் வேறுபாடிருந்தாலும், இலங்கையிலுள்ள பத்திரிகைகள் மத்தியில் தைரியமாகச் செயற்படும் பத்திரிகையாக லீடரைச் சொல்லலாம். பல ஊழல்களை, முறைகேடுகளை வெளிக்கொண்டு வருவதில் சன்டே லீடரின் பங்கு சிறப்பாக இருந்திருக்கிறது.

********************************************************

வருடத்தின் கேவலம்

ஒரு ஜனநாயக தேசத்தில், தனது பிள்ளைக்கு சுகயீனம் என்பதால் விடுப்பு எடுத்த சமுர்த்தி அதிகாரி ஒருவரை அமைச்சர் ஒருவர் மரத்தில் கட்டித் தண்டித்த கேவலம் இலங்கையில் மட்டும் தான் நடக்கும். மேர்வின் சில்வா இது ஜனநாயக தேசம் என்பதை மறந்து தன்னை மன்னராட்சியின் மந்திரி என்று நினைத்து(?!) ஒரு அரச ஊழியரை மரத்தில் கட்டி தண்டித்தானது அந்த ஊழியரின் தனிமனித உரிமையை மீறிய செயல் மட்டுமல்ல ஜனநாயகம், நீதித்துறை, சுதந்திரம் போன்றவற்றிற்கெதிரான சவாலும் கூட. இது போன்ற எத்தனை கேவலங்களை இலங்கை சந்திக்கப் போகிறதோ? இதற்குப் பிறகும் மக்கள் விவகார மற்றும் மக்கள் தொடர்பு அமைச்சராக இவர் நியமிக்கப்பட்டிருக்கிறார் - கொடுமை!

********************************************************

வருடத்தின் சிறந்த நாடகம்

விமல் வீரவன்சவின் ஐ.நா.வுக்கெதிரான உண்ணாவிரதமும், விமலின் மகள் தந்தை வீட்டுக்கு வராவிட்டால் சாப்பிடமாட்டேன் என்று அடம்பிடித்ததால் ஜனாதிபதி விமலை நேரில் உண்ணாவிரதம் இடம்பெற்ற ஸ்தலத்திற்குச் சென்று நீர் அருந்தச் செய்து உண்ணாவிரதத்தை முடிக்கச் செய்தது தான் இந்த ஆண்டின் மிகச் சிறந்த (கேவலமான) நாடகம்! இவ்வளவற்றுக்கும் விமல் சேலைன் ஏற்றியபடி தான் உண்ணாவிரதமிருந்தார். நான் விடுதலைப் புலிகளையோ ஆயுதப் போராட்டத்தையோ என்றும் ஆதரித்ததில்லை ஆனால் விமல் போன்றவர்களெல்லாம் உண்ணாவிரதம் என்றால் என்ன என்பதை திலீபனிடமிருந்து கற்றுக்கொள்ள வேண்டும். ஆயுதம் ஏந்திப் போராடுவதை விட உண்ணாவிரதமிருந்து போராடத் தான் அதிக மனஉறுதியும், பலமும் தேவை, விமலின் சேலைன் ஏற்றிய உண்ணாவிரதமெல்லாம் படிப்பறிவில்லாத மக்களை ஏமாற்றும் செயலே தவிர வேறொன்றுமில்லை.

********************************************************

வருடத்தின் சிறந்த மனிதன்

சி.என்.என். இன் வருடத்தின் முதற் பத்து ஹீரோக்களுள் ஒருவராகத் தெரிவுசெய்யப்பட்ட நாராயணன் கிருஷ்ணன் தான் என்னைப் பொருத்தவரை இந்த ஆண்டின் சிறந்த மனிதன். மனநிலைகுன்றியவர்களுக்கும், வீடில்லாதவர்களுக்கும் கிருஷ்ணன் செய்யும் உதவி அளப்பரியது. தினமும் அவர்களுக்கு அன்னமிட்டு, அவர்களைச் சுத்தம் செய்து அவர்களை வாழவைக்கும் புனித செயலை கிருஷ்ணனும் அவரது நண்பர்களும் செய்கிறார்கள். கிருஷ்ணனுக்கும் அவரது குழுவுக்கும் தலைவணங்குகிறேன்!

********************************************************

நான் சுவைத்த சுவையகங்கள் (02) - மூன் ரிவர் (கொழும்பு)

noreply@blogger.com (என்.கே.அஷோக்பரன்) — Thu, 16 Dec 2010 16:39:00 +0000

உங்களில் பலர் ஏலியன் கதை கேள்விப் பட்டிருப்பீர்கள். ஒரு முறை இரண்டு ஏலியன்கள் பறக்கும் தட்டில் புவிக்கு வந்து கொண்டி ருந்தார்களாம், காரணம் சீனாவைத் தேடி வந்திருக்கிறார்கள். சீனாவைத் தேடிக்கொண்டு வந்தவர்கள் சீனா என்று நினைத்து இலங்கையில் தரையிறங்கி விட்டார்களாம், காரணம் என்ன தெரியுமா? பார்த்த இடமெல்லாம் “சைனீஸ்” உணவகங்கள் இங்கு தான் தென்பட்டதாம்!

கதை விளையாட்டாகச் சொல்லப்பட்டாலும், இலங்கையிலுள்ளவர்கள், குறிப்பாக கொழும்பு போன்ற நகர்ப்புறங்களிலுள்ளவர்கள் பயறும், கட்ட (கார) சம்பலும் சாப்பிட்டிருப்பார்களோ இல்லையோ நிச்சயமாக “சைனீஸ்” உணவை ருசித்திருப்பார்கள். உலகிலேயே மிகப் பிரபலமான உணவு வகைகள் “சைனீஸ்” உணவு வகைகளே, ஆனால் இங்கு “சைனீஸ்” உணவை விரும்பும் நாம் சீனா போனால் ஒருவேளை அதை விரும்பமாட்டோம், எத்தனை பேர் நாய்க்கறி, தவளை சூப், பாம்புக் கறி எல்லாம் இங்கு சாப்பிடத்தயாராக இருக்கிறீர்கள்? சரி இப்போதைக்கு அந்தக் கதையை விட்டுவிட்டு விஷயத்திற்கு வருவோம்.

இலங்கையில் பலநூறு “சைனீஸ்” உணவகங்கள் இருக்கின்றன, அதுவும் கொழும்பில் எக்கச்சக்கமான “சைனீஸ்” உணவகங்கள் இருக்கின்றன, அவற்றுள் அண்மைய ஆண்டுகளில் பிரபலமான ஒரு உணவகம் தான் “மூன் ரிவர் சைனீஸ் ரெஸ்ரோறண்ட்”. நான் முதன் முதலாக இந்த சுவையகத்திற்குச் சென்றது இற்றைக்கு 5-6 வருடத்திற்கு முன்பு என்று நினைக்கிறேன். இந்தச் சீன உணவகத்தை நடத்துவது ஒரு சீனர். இங்கே பணியாற்றும் பிரதான “ஷேஃப்” கள் (சமையற்கலைஞர்கள்) சீனாவின் ஐந்து நட்சத்திர ஹோட்டல்களிலிருந்து வரவழைக்கப்பட்டவர்களாம். அசல் சீன உணவை இங்கு சுவைக்கலாம். அநேகமான மற்றைய பிரபலமான சீன உணவகங்களில் சீன உணவுகளை இலங்கையர்க்கேற்ற விதத்தில் கொஞ்சம் மாற்றித் தயாரிப்பார்கள், உப்பு, காரம், சமைக்கப்படும் அளவு எல்லாம் எமக்கு பழகிய விதத்திலிருக்கும், இங்கும் அதுபோலத்தான் ஆனால் மற்ற இடங்களிலிருந்து கொஞ்சம் வித்தியாசம். விசேடமாகக் காரம்கொண்ட உணவு வகைகளைக் கேட்டாலன்றி சாதாரணமாக கறிகளில் பெரியளவில் காரம் இருக்காது. இங்கு நம்மவர்கள் மட்டுமல்ல இலங்கையில் .இருக்கும் சீனர்களும் அடிக்கடி வருவார்கள். கட்டாயம் நீங்கள் எப்போது இங்கு போனாலும் அங்கே சீனர்களைக் காணலாம். சீனர்கள் உணவுண்ணும் கலையே தனி, “சொப்ஸ்டிக்ஸை” அவர்கள் பயன்படுத்தும் வேகமும் இலாவகமும், அப்பப்பா பலமுறை முயன்றும் தோற்றுவிட்டேன்.

உணவு வகைகள் இங்கு மிகச் சுவையாகவும், தரமாகவும் இருக்கும். ஃரைட் ரைஸ், ஃரைட் நூடில்ஸ், சிக்கன், மட்டின், பீஃப், போக், டக், ப்ரோன்ஸ் என வகை வகையாய் வித விதமாய் கறி வகைகளுண்டு! சைவப் பிரியர்களுக்கு வெஜிடபிள் சொப்ஸி, பீன் கேட் போன்ற வகையறாக்களுண்டு ஆனால் சைவம் மட்டும் உண்பவர்கள் இங்கு செல்வதில் பயனில்லை என்று தான் சொல்ல வேண்டும். கட்டாயமாக கட்டில் ஃபிஷ் அல்லது ப்ரோன் போல் என்று ஒரு சிற்றுண்டி வகையுண்டு - சுவைத்துப் பாருங்கள்! டெஸேட் என்று பார்த்தால் பெரிதாக விசேடமாக ஏதுமில்லை, ஐஸ்கிரீம், ஃபுருட் சலட் என்பன உண்டு அதைவிட ஃப்ரைட் ஐஸ்கிரீம் என்று ஒன்றும் உண்டு - சுவைத்துப்பாருங்கள்!

சேவை என்று பார்த்தால் நன்று என்று சொல்லலாம். விசேடமாக சேவை தொடர்பில் குறிப்பிடுவதற்கு ஏதுமில்லை. குடும்பமாகச் செல்லும் போது தனிமையை விரும்பினால் இரண்டு தனியறைகள் உண்டு. அநேகமாக விடுமுறை நாட்களில் உணவகத்தில் இடம் தேடிப்பிடிப்பது கடினம் சில வேளைகளில் மணிக்கணக்காகக் காத்திருக்க வேண்டி வரலாம், ஆகவே விடுமுறை தினங்களில் முற்பதிவுசெய்து விட்டுச் செல்வது நலம்.

விலை எனும் போது உயர்தரமான சீன உணவகமொன்றிற்கு ஏற்புடைய விலை என்றுதான் சொல்லவேண்டும். சில கறி வகைகள் (உதாரணமாக வாத்து) விலை கூடுதலாக இருந்தாலும், மற்றப்படி அளவான விலைதான், நிச்சயமாக விலை குறைவு என்று சொல்ல முடியாது. இருவர் சென்று அளவான சீன உணவினைச் சுவைப்பதற்கு ஏறத்தாழ 1500 - 2000 ரூபாய் வரையில் ஆகும். இங்கு மென் மற்றும் வன் பானங்கள் என்பன ஆனால் விலை இரண்டும் மிக அதிகம் தான். ஒரு கோக் போத்தல் (அதை க்ளாசில் ஊற்றித் தருவார்கள்) ஏறத்தாழ 100 ரூபாய் + சேவைக்கட்டணம் + வரிகள்.

வாகனத்தரிப்பிட வசதிகள் சிறப்பாக இருக்கிறது. உணவக முற்றத்திலும் பரந்த இடம் இருப்பதோடு, அதனருகிலே பெரிய இடமொன்றை வாகனனத் தரிப்பிற்காக ஒதுக்கியுள்ளார்கள், வலே பார்க்கின் சேவையுமுண்டு.

சீன உணவின் சுவையை அறிந்துகொள்ள அருமையான உணவகம் இது.

அமைவிடம் - திம்பிரிகஸ்யாய வீதியில், ஜாவத்தை சந்திக்கு அருகில்.

சிறப்புக்கள் - சுவையான சீன உணவு, உணவின் தரம், கவனிப்பு மற்றும் சேவை.

குறைபாடுகள் - கொஞ்சம் அதிக விலை.

பரிந்துரையளவு - ★ ★ ★ ★ 7.0 / 10

தொடரில் அடுத்ததாக வர இருப்பது சுவையான சைவ உணவகம் (உணவகங்கள்!)

நீக்கப்படவிருக்கும் இலங்கையின் தமிழ்த்தேசிய கீதமும், அமைச்சரவையின் அப்பட்டமான பொய்களும்.

noreply@blogger.com (என்.கே.அஷோக்பரன்) — Sun, 12 Dec 2010 06:11:00 +0000

இலங்கையில் நடைமுறையிலுள்ள தேசிய கீதத்தின் தமிழ்ப் பதிப்பை நீக்குவதற்கு அமைச்சரவை முடிவெடுத்திருப்பதாக Sunday Times செய்தி வெளியிட்டிருக்கிறது.

http://www.sundaytimes.lk/101212/News/nws_01.html

மேற்படி செய்தியில், ஜனாதிபதி மஹிந்த ராஜபக்ஷ வேறு ஒரு தேசத்திலும் 2 மொழிகளில் தேசிய கீதம் இல்லை என்று அமைச்சரவையில் தெரிவித்ததாகவும், அதனை ஆதரித்த விமல் வீரவன்ச, 300ற்கும் மேற்பட்ட மொழிகளுடைய இந்தியாவில் கூட ஹிந்தியில்தான் தேசிய கீதம் இருப்பதாகக் கூறியதாகவும் அச்செய்தி குறிப்பிடுகிறது. அமைச்சரவையில் வாசுதேவ நாணயக்கார, றாஜித சேனாரத்ன ஆகிய அமைச்சர்கள் இருவர் மட்டுமே தமிழ் மொழியிலான தேசிய கீதத்தை நீக்கும் முன்மொழிவுக்கு மறுப்பாகக் கருத்துத் தெரிவித்ததாகவும் அச்செய்தி குறிப்பிடுகிறது.

இந்தப் பதிவை நான் எழுதக்காரணம் அமைச்சரவையின் முடிவைக்கண்டிப்பதற்கு மட்டுமல்ல மாறாக, பொய்யான கருத்துக்களைக்கூறி ஜனாதிபதி மஹிந்த ராஜபக்ஷவும், விமல் வீரசின்ஹவும் மக்களை ஏமாற்ற விளைந்ததைச் சுட்டிக்காட்டவுமேயாகும்.

முதலாவதாக ஜனாதிபதி, உலகில் இரண்டு மொழிகளில் தேசிய கீதம் வேறு தேசமெதிலும் இல்லை என்று கூறிய கருத்து, அப்பட்டமான பொய். கனடாவின் தேசிய கீதம் 3 மொழிகளில் காணப்படுகிறது. ஆங்கிலம், ஃபிரெஞ்ச் மற்றும் இனுக்டிடுட் ஆகிய மொழிகளில் கனேடிய தேசிய கீதம் பாடப்படுகிறது. சுவிற்சலாந்துத் தேசிய கீதம் சுவிற்சலாந்தின் நான்கு உத்தியோகபூர்வமொழிகளிலும் மொழிபெயர்க்கப்பட்டுள்ளது. ஜேர்மன் மொழியில் முதலில் எழுதப்பட்டிருந்தாலும், சுவிஸ்ஸின் ஏனைய உத்தியோகபூர்வ மொழிகளான ஃபிரெஞ்ச், இத்தாலியன் மற்றும் றொமான்ஷ் ஆகிய மொழிகளில் சுவிஸ் தேசிய கீதம் மொழிபெயர்க்கப்பட்டு பாடப்படுகிறது. இதை விட தென்னாபிரிக்க தேசிய கீதத்தில் ஒரே கீதமாக இருப்பினும் அது தென்னாபிரிக்காவில் பேசப்படும் 5 மொழிகளை கொண்டு எழுதப்பட்டுள்ளது. தென்னாபரிக்கத் தேசிய கீதம் ஸோசா (முதற் பந்தியின் முதலிரு வரிகள்), செசோதோ (முதற்பந்தியின் கடைசி இரண்டு வரிகள்), சுலு(இரண்டாம் பந்தி), அஃப்ரிகான்ஸ் (மூன்றாம் பந்தி) மற்றும் ஆங்கிலம் (நான்காம் பந்தி) ஆகிய ஐந்து மொழிகள் சேர்த்து எழுதப்பட்டது.

அடுத்ததாக விமல் வீரவன்ச சொன்ன கருத்து - “இந்தியத் தேசிய கீதம் ஹிந்தியில் எழுதப்பட்டுள்ளது” - அடுத்த அப்பட்டமான பொய், இதை இவர் சொன்னதற்குக் காரணம், இந்தியாவில் பெரும்பான்மையானோரின் மொழி ஹிந்தி, ஆகவே பெரும்பான்மையானோரின் மொழியிலேயே தேசியகீதம் இருக்க வேண்டும் என்பதைச் சுட்டிக்காட்ட இந்தியாவின் தேசிய கீதம் ஹிந்தியில் தான் இருக்கிறது என்ற அப்பட்டமான பொய்யைச் சொல்லியிருக்கிறார். இந்தியத் தேசிய கீதம் பெங்காலியில் (சமஸ்கிருதப்படுத்தப்பட்ட பெங்காலி) நோபெல் பரிசு பெற்ற கவிஞர் ரபீந்திரநாத் தாகூரினால் எழுதப்பட்டது. ஆக பெரும்பான்மை இந்தியர் பேசும் மொழியில் அல்ல இந்தியாவின் தேசிய கீதம் பாடப்படுகிறது. இவ்வளவு ஏன், சீனர்கள் பெரும்பான்மையாகவுள்ள சிங்கப்பூர் தேசிய கீதம் மலேயிலேயே எழுதப்பட்டது, அதற்கு சீன, தமிழ் மற்றும் ஆங்கில உத்தியோகபூர்வ மொழிபெயர்ப்புக்கள் உண்டு எனினும் அது மலேயிலேயே பாடப்படுகிறது. ஆகவே பெரும்பான்மையோரின் மொழியிலேயே தேசிய கீதம் அமையவேண்டும் என்ற அவசியம் இல்லை.

அமைச்சர்களாக இருப்பவர்கள் மக்களை முட்டாள்கள் என்று நினைத்தக்கொண்டிருக்கக்கூடாது. நீங்கள் சொல்வதெல்லாம் உண்மை என்ற நம்ப நாங்கள் படிப்பறிவில்லாதவர்கள் அல்ல.

இலங்கைத் தேசிய கீதத்தின் தமிழ்ப்பதிப்பை நீக்கியதன் மூலம், அரசாங்கம் தனது தமிழின விரோத நிலைப்பாட்டைத் தெளிவாக வெளிக்காட்டியுள்ளது. யுத்தத்தின் பின்னரான மீளிணக்கப்பாட்டுச் செயற்பாடுகளில் இது பாரிய பின்னடைவாகும், அதுவும் தமிழ்த் தேசியக் கூட்டமைப்பு இணங்கிச் செயற்படச்சம்மதித்து ஒரு நாள் கூட ஆகமுன் இத்தகைய முடிவானது தமிழ் மக்களை அதிருப்திக்குள்ளாக்கும் என்பதை அரசாங்கம் மறந்துவிட்டது போலும்.

இனவாத அரசியலை இலங்கைத் தலைவர்கள் கைவிடும் வரை இலங்கையின் பிரச்சினைகள் தீரப்போவதில்லை.

"Racism is man's gravest threat to man - the maximum of hatred for a minimum of reason." ~Abraham Joshua Heschel

**************************************************************************

அமைச்சரவை நீக்குவதற்கு முடிவெடுத்த இலங்கைத் தேசிய கீததத்தின் தமிழ்ப்பதிப்பு (இனி சுவடியாகப் பாதுகாக்கப்படவேண்டியதுதானா?!)

ஸ்ரீ லங்கா தாயே - நம் ஸ்ரீ லங்காநமோ நமோ நமோ நமோ தாயே

நல்லெழில் பொலி சீரணி

நலங்கள் யாவும் நிறை வான்மணி லங்கா

ஞாலம் புகழ் வள வயல் நதி மலை மலர்

நறுஞ்சோலை கொள் லங்கா

நமதுறு புகலிடம் என ஒளிர்வாய்

நமதுதி ஏல் தாயே

நமதலை நினதடி மேல் வைத்தோமே

நமதுயிரே தாயே - நம் ஸ்ரீ லங்கா

நமோ நமோ நமோ நமோ தாயே

நமதாரருள் ஆனாய்

நவை தவிர் உணர்வானாய்

நமதோர் வலியானாய்

நவில் சுதந்திரம் ஆனாய்

நமதிளமையை நாட்டே

நகு மடி தனையோட்டே

அமைவுறும் அறிவுடனே

அடல்செறி துணிவருளே - நம் ஸ்ரீ லங்கா

நமோ நமோ நமோ நமோ தாயே

நமதோர் ஒளி வளமே

நறிய மலர் என நிலவும் தாயே

யாமெல்லாம் ஒரு கருணை அனைபயந்த

எழில்கொள் சேய்கள் எனவே

இயலுறு பிளவுகள் தமை அறவே

இழிவென நீக்கிடுவோம்

ஈழ சிரோமணி வாழ்வுறு பூமணி

நமோ நமோ தாயே - நம் ஸ்ரீ லங்கா

நமோ நமோ நமோ நமோ தாயே

யுத்தக் குற்றம் என்றால் என்ன?

noreply@blogger.com (என்.கே.அஷோக்பரன்) — Sun, 05 Dec 2010 09:19:00 +0000

அண்மைக்காலங்களாக தமிழர்கள் மத்தியில் பரபரப்பாக பேசப்படும் சொற்களில் / விடயங்களில் ஒன்று யுத்தக் குற்றம் (war crime). இது யுத்தக் குற்றம் என்றால் என்ன என்பது பற்றிய ஒரு சுருக்கமான பார்வை.

யுத்தக் குற்றம் என்பதை சுருக்கமாக பின்வருமாறு வரையறுக்கலாம் :

யுத்தக் குற்றம் என்பது யுத்தவிதிகளை மீறும் தனிநபர்கள், ராணுவம், சிவிலியன்கள் என்பவருக்குரிய சர்வதேசச் சட்டங்களின் கீழான தண்டனைக்குரிய குற்றமாகும்.

யுத்தக் குற்றம் என்ற எண்ணக்கரு 20ம் நூற்றாண்டிலேயே தொடங்கியது அதிலும் குறிப்பாக 2ம் உலக யுத்தத்தின் பின்னரே யுத்தக் குற்றம் என்ற எண்ணக்கரு வலுப்பெறத்தொடங்கியது எனலாம். 2ம் உலப் போரின் போது நாட்ஸிப் படைகள் யூதர்களை (பொதுமக்களை) கொத்துக்கொத்தாகக் கொன்று குவித்தது (இன அழிப்பு), ஜப்பானியப் படைகள் சிவிலியன்களையும், அரசியற்கைதிகளையும் இழிவான விதத்தில் நடத்தின, கொன்று குவித்தன. 2ம் உலக யுத்தம் நேசநாடுகளால் முடிவுக்குக் கொண்டு வரப்பட்ட நிலையில் நேச நாடுகள் மேற்கூறிய யுத்தக் குற்றங்களை இழைத்ததாக நம்பப்படும் ஜேர்மனியப் படைத்தளபதிகளையும், ஜப்பானியப் படைத்தளபதிகளையும் கைது செய்து, சட்டப்படி மரண தண்டனை நிறைவேற்றின. 1945 மற்றும் 1946ல் இடம்பெற்ற “நுரெம்பேர்க் விசாரணைகளின்” பின்னர் 12 நாட்ஸித் தளபதிகளுக்கு யுத்தக் குற்றம் இழைத்தமைக்காக மரண தண்டனை நிறைவேற்றப்பட்டது. இதே போன்று 1948 ஜப்பானின் டோக்கியோவில் யுத்தக் குற்றம் இழைத்த 7 தளபதிகளுக்கும் மரணதண்டனை நிறைவேற்றப்பட்டது (நேச நாடுகள் ஜப்பானின் சக்கரவர்த்தி ஹிரோஹிட்டோவுக்கெதிராக எந்தச் சட்ட நடவடிக்கையும் எடுக்கவில்லை). இவை தான் யுத்தக் குற்றம் என்ற எண்ணக்கரு வலுப்பெற்றதற்கான முன்னோடிகளாகும்.

இதை விட தனியாக அரசாங்கங்களும் யுத்தக்குற்றம் இழைத்தவர்களைத் தண்டித்திருக்கிறது. உதாரணமாக 1960ல் ஆர்ஜன்ரீனாவில் வைத்து இஸ்ரேலிய முகவர்களால் பிடிக்கப்பட்டு இஸ்ரேலுக்குக் கடத்தப்பட்டு அங்கு சட்டப்படி மரணதண்டனை நிறைவேற்றப்பட்ட ஜெர்மனிய நாட்ஸிப் படையைச் சேர்ந்த, “த ஹொலொகோஸ்ட்” (பேரழிவு) இல் பங்குபற்றி ஆயிரக்கணக்கான யூதர்களைக் கொன்று குவித்த அடல்ஃப் எய்ஷ்மன்-ஐக் குறிப்பிடலாம். இதே போல 1987ல் க்ளோஸ் பார்பி என்ற நாட்ஸிப் படை முக்கியஸ்தர் பொலிவியாவில் கைது செய்யப்பட்டு ஃபிரான்ஸிற்கு நாடு கடத்தப்பட்டு அங்கு யுத்தக் குற்றங்களுக்காக ஆயுள் தண்டனை அவருக்கு விதிக்கப்பட்டது.

யுத்தக் குற்றம் என்ற எண்ணக்கருவானது, குறித்த தேசம் அல்லது அதன் .இராணுவ வீரர்கள் இழைத்த குற்றங்களுக்கு (யுத்த விதி/தர்ம மீறல்களுக்கு) தனி நபர் ஒருவரைப் பொறுப்பாளியாக்க முடியும் என்கிறது. அதாவது இராணுவ வீரர்கள் இழைத்த குற்றத்திற்கு அவர்களுக்கு மேலான தளபதிகள், தலைமைத் தளபதிகளைப் பொறுப்பாக்க முடியும்.

இன அழிப்பு, சிவிலியன்களை இழிவான / முறையற்ற விதத்தில் நடத்துதல், போர்க்கைதிகளை முறையற்ற விதத்தில் நடத்துதல் போன்றன் குறிப்பிடத்தக்க யுத்தக் குற்றங்களாகும். அதிலும் இன அழிப்பு என்பது பாரிய யுத்தக் குற்றமாகக் கருதப்படுகிறது.

யுத்தக் குற்றங்களை வரையறுக்கும் சட்ட அதிகாரங்களாக ஜெனீவா மரபுகள் (Geneva Conventions) மற்றும் பழமையான யுத்த தர்மச் சட்டங்களும் காணப்படுகிறது. 4வது ஜெனீவா மரபின் 147வது சரத்து பின்வருமாறு யுத்தக்குற்றத்தை வரையறுக்கிறது :

"Wilful killing, torture or inhuman treatment, including... wilfully causing great suffering or serious injury to body or health, unlawful deportation or transfer or unlawful confinement of a protected person, compelling a protected person to serve in the forces of a hostile power, or wilfully depriving a protected person of the rights of fair and regular trial, ...taking of hostages and extensive destruction and appropriation of property, not justified by military necessity and carried out unlawfully and wantonly."

அதாவது மனவுறுதியுடன் உடல்ரீதியான அல்லது ஆரோக்கிய ரீதியான தீவிரமான காயங்களை அல்லது துன்பங்களை விளைத்தல், சட்டத்திற்குப் புறம்பான வலுக்கட்டாயமான நாடுகடத்தல் (இடம் பெயர்த்தல்) அல்லது சட்டத்துக்கெதிரான வகையில் நபரொருவரை தடுத்துவைத்தல் அல்லது சிறைப்படுத்தல், நபரொருவரை வலுக்கட்டாயமாக எதிர்ப்புணர்வுமிக்க படைகளில் சேவையாற்றச் செய்தல், மனவுறுதியுடன் நபரொருவரது நியாயமான விசாரணைக்கான உரிமையை இல்லாது செய்தல், பணயக்கைதிகளாகப் பிடித்துவைத்திருத்தல், பாரிய அழிப்புக்கள் மற்றும் சொத்துக்களை சட்டவிரோதகமாக அபகரித்தல் உள்ளிட்ட சட்டவிரோதமானதும், நியாயமான இராணுவத் தேவை என நிரூபிக்கமுடியாததுமான கொலை, சித்திரவதை மற்றும் மனிதத்தன்மையற்ற நடத்துமுறைகள் யுத்தக்குற்றமாகும் என்று 4வது ஜெனீவா மரபின் 147வது சரத்துக் கூறுகிறது.

இதைத் தாண்டியும் யுத்தக் குற்றம் என்ற எண்ணக்கரு கூர்ப்படைந்து வருகிறது. யுகோஸ்லாவியா தொடர்பான சர்வதேச ஹேக் ட்ரபியுனல் யுத்தக்குற்றங்களை வரையறுப்பதில் முக்கியம் பெறுகிறது. ஆயுதப் போராட்டங்களின் போது மக்களுக்கு (சிவிலியன்களுக்கு) எதிராக நடத்தப்படும் சட்டவிரோதமான கொலை, குழுரீதியான அழிப்பு, அடிமைப்படுத்தல், வலுக்கட்டாயமான நாடுகடத்தல், இடப்பெயர்த்தல், கைதுகள், சித்திரவதை, கற்பழிப்பு, இன, மத, அரசியல் காரணங்களுக்கான கொலைகள் என்பன பிரதான யுத்தக்குற்றங்கள் என்கிறது. இங்கும் பிரதான குற்றமான இன அழிப்பு கருதப்படுகிறது.

2002ல் உரோம சர்வதேசக் குற்றவியல் நீதிமன்றச் சட்டம் என்ற சர்வதேச ஒப்பந்தத்தின் படி சர்வதேசக் குற்றவியல் நீதிமன்றம் (ஹேக் ட்ரிபியுனல்) அதன் அங்கத்தவ நாடுகளின் யுத்தக் குற்ற விசாரணைகளை மேற்கொண்டு வருகிறது. ஒப்டோபர் 2010 வரை 114 நாடுகள் இதில் இணைந்துள்ளன. 114வதாக இணைந்த நாடு மோல்டோவா. அமெரிக்காவும், ரஷ்யாவும் உரோம ஒப்பந்தத்தில் கையெழுத்திட்டுள்ள போதும் அதை நிறைவேற்றவில்லை. அமெரிக்கா இன்னும் பார்வையாராகவே கலந்து கொள்கிறது. சீனாவும், இந்தியாவும் ஒப்பந்தத்தில் கையெழுத்திடவில்லை. இலங்கையும் ஒப்பந்தத்தில் கையெழுத்திடவில்லை.

ஒப்பந்தத்தில் கையெழுத்திட்டுள்ள நாடுகள் தொடர்பிலேயே சர்வதேசக் குற்றவியல் நீதிமன்றம் விசாரணைகள் மேற்கொள்ள முடியும் ஆனால் ஐ.நா. உறுப்பு நாடுகள் தொடர்பில் ஐக்கிய நாடுகள் சபையின் பாதுகாப்புச்சபை பரிந்துரைக்கும் சந்தர்ப்பத்திலும் சர்வதேசக் குற்றவியல் நீதிமன்றத்திற்கு விசாரணை நடத்தும் நீதியதிகாரமுண்டு.

பேரிழிவிற்குரிய யுத்தமானாலும் மனித உரிமைகளைப் பாதுகாப்பதில் முக்கியம் பெறுகிறது இந்த யுத்தக் குற்றம் என்ற எண்ணக்கரு, ஆனால் மனித உரிமைகள், ஜனநாயம் பற்றிய விழிப்புணர்வு, அறிவு இல்லாதவர்களுக்கு யுத்தக் குற்றத்தின் தார்ப்பரியத்தை புரிய வைப்பது இயலாது.

**********************************************************************
இந்தக் கட்டுரை 12-12-2010 ஞாயிறு தினக்குரலில் 11ம் பக்கத்தில் பிரசுரிக்கப்பட்டுள்ளது. (நன்றி - யாழ்தேவி மற்றும் தினக்குரல்)

றோயல் - தோமியத் தமிழ் விவாதச் சமர் - ஒரு பார்வை

noreply@blogger.com (என்.கே.அஷோக்பரன்) — Mon, 29 Nov 2010 11:06:00 +0000

‘எந்தையர் எம்முன் தம்வழியைக் கற்ற கல்லூரி!

ஏட்டையும் கற்று, மானுடரையும் கற்றனரே –

அவர்வழியே நாமும் அதைனையே செய்திடுவோம்!’

175 வருடங்கள் நிறைவு செய்யும் றோயல் கல்லூரியின் பாரம்பரிய வைரிகள் கல்கிசைப் பரி தோமாவின் கல்லூரியாகும். அந்தப் பாரம்பரியத்தில் றோயல் கல்லூரித் தமிழ் விவாத அணியைப் பொருத்த வரையில் எங்களது பாரம்பரிய வைரிகள் பரி தோமாவின் கல்லூரி அணிதான். நூறாண்டுகள் கடந்த றோயல்-தோமியப் பாரம்பரியம் இங்கும் தமிழ் விவாதத்திலும் தொடர்கிவது வேத்தியர்களும், தோமியர்களும், தமிழர்களும் பெருமைப்ப்பட வேண்டியவிடயம். கடந்த 16 வருடங்களாக தொடர்ந்து றோயல் தோமிய தமிழ் விவாதச் சமர் வருடாவருடம் நடைபெற்று வருகிறது. 1994ம் ஆண்டு றோயல் கல்லூரி விவாத அணித் தலைவனாக நிலக்‘ன் சுவர்ணராஜா அவர்கள் இருந்த போது முதன்முறையாக றோயல்-தோமிய விவாதம் ஆரம்பிக்கப்பட்டது. 56 ஆண்டுகால பாரம்பரியமுடைய றோயல் கல்லூரி தமிழ் விவாத அணியின் மறுமலர்ச்சி இந்தக் காலகட்டத்தில் தான் துளிர்விடத் தொடங்கி அதன் பின் இலங்கையில் தலைசிறந்த விவாத அணிகளுள் ஒன்றாக வேத்திய அணி உயரக் காரணமானது.

றோயல் தோமியத் தமிழ் விவாதப் போட்டியில் வெற்றி பெறும் அணிக்குக் குலசேகரம் ஞாபகார்த்தக் கேடயம் வழங்கப்படுகிறது, இது றோயல் கல்லூரியின் முன்னாள் உப அதிபரும், பதில் அதிபருமான திரு.எம்.எம்.குலசேகரம் அவர்களின் ஞாபகார்த்தமாக வழங்கப்படுகிறது. திரு.எம்.எம்.குலசேகரம் அவர்கள் 1922ம் ஆண்டு றோயல் கல்லூரியில் கணித மற்றும் பௌதீகவியல் ஆசிரியராக இணைந்தார். 1946ம் ஆண்டு றோயல் கல்லூரியின் உப-அதிபராக நியமிக்கப்பட்டார். 1953ம் ஆண்டு பதில் அதிபராகக் கடமையேற்று 1954ம் ஆண்டு ஓய்வுபெறும் வரை மிகச் சிறப்பான கடமையாற்றினார். றோயல் கல்லூரியின் விளையாட்டுத்துறைக்கு குறிப்பாக றக்பி விளையாட்டுத் துறைக்கு பெரும் பணி ஆற்றிய ஆசான் அவர். அவரது நினைவாக றோயல்-தோமிய தமிழ் விவாதக் கேடயம் வழங்கப்படுகிறது. அத்துடன் றோயல் தோமிய விவாதப் போட்டியில் வருடாவருடம் சிறப்பாக வாதிக்கும் வாதி ஒருவருக்கு அல்லது இருவருக்கு ‘சிறந்த விவாதிக்கான விருதும்’ வழங்கப்பட்டு வருகிறது.

எந்தவொரு வேத்தியனுக்கும், தோமியனுக்கும் இந்தப் போட்டியில் பங்கெடுப்பது என்பது மிகவும் மதிப்பான, பெருமையான ஒரு விடயம். காரணம் மிகப்பழமையான றோயல்-தோமிய பாரம்பரியத்தைப் பிரதிநிதித்துவப்படுத்துவது என்பது சாதாரணமான ஒரு விடயமல்ல. தேசியளவிலான விவாதப் போட்டிகள் இருந்தாலும் அவற்றை எல்லாம் விட றோயல்-தோமிய விவாதத்திற்கு இரு பாடசாலைகளிலும் சிறப்பான இடம் இருக்கிறது என்பதில் ஐயமில்லை.

நான் 3 முறை இப்போட்டிகளில் பங்குபற்றி வெற்றியும் பெற்றிருக்கிறேன். அதில் 2 முறை அணியின் தலைவனாக வெற்றிபெற்ற மகிழ்ச்சிக்கு ஈடு இணை இல்லை. றோயல்-தோமிய விவாதங்களில் கடைசியாக பரி. தோமாவின் கல்லூரி அணி வெற்றி பெற்றது 2002ம் ஆண்டில் அதன் பின் தொடர்ந்து 7 வருடங்கள் எமது அணியே வெற்றிபெற்று வருகிறது. தொடர் ஆரம்பிக்கப்பட்ட முதல் இரண்டு வருடங்கள் உட்பட ஆரம்பகாலங்களில் பரி தோமாவின் கல்லூரி வெற்றிபெற்றிருந்தாலும் கடந்த சில வருடங்களாக பரி தோமாவின் கல்லூரி அணி சிறப்பான நிலைமையில் இல்லை என்பதையும் நான் இங்கு சுட்டிக்காட்ட வேண்டும். ஆனால் கடைசியாக நடைபெற்ற 16வது றோயல்-தோமிய தமிழ் விவாதச்சமாரில் தோமிய அணி கடுமையான சவால் கொடுத்தது என்பதை மறுக்க முடியாது, கிட்டத்தட்ட 5 வருடங்களின் பின் மிகச்சிறப்பான தோமிய அணியாக அது காணப்பட்டது, ஆக வருங்காலங்களில் தோமிய அணி இன்னும் வலுவானதாக வரும் என்று எதிர்பார்க்கலாம். இதை விசேடகமாகக் குறிப்பிடுவதற்குப் பிரதான காரணம் கடந்த 7 வருடங்களில் தொடர்ந்து றோயல் கல்லூரி வெற்றிபெற்ற போது அநேகமான வெற்றிகள் 5-0 என்ற பெரும் வெற்றிகளாகவே இருந்தன ஆனால் கடந்த வருடம் இடம்பெற்ற 16வது தொடரில் றோயல் கல்லூரி 3-2 என்றளவிலேயே வெற்றி பெற்றது, தோமிய அணி மிகச் சவாலாக வாதிட்டது என்பதை மறுக்கமுடியாது, முதல் சில வருடங்களோடு ஒப்பிட்டுப் பார்க்கையில் தோமிய விவாத அணி தற்போது பலமடைந்திருப்பதை அனைவராலும் காணக்கூடியதாக இருக்கிறது ஆகவே மீண்டும் மிகச் சவாலான தொடராக இது உருப் பெற்று வருகிறது என்பதையும் இதன் மூலம் உணர்ந்துகொள்ள முடிகிறது.

றோயல் தோமிய விவாதத் தொடரின் சிறப்புக்கள் பலவுள. தமிழ் மொழியில் தொடர்ந்து ஒன்றரைத் தசாப்தத்திற்கும் மேலாக நடைபெற்று வரும் ஒரே தமிழ் விவாதத் தொடராக றோயல் தோமிய தமிழ் விவாதச்சமரே காணப்படுகிறது. மேலும் மிகச் சவாலான தலைப்புக்கள் அலசப்படும் விவாதப் போட்டியாகவும் இதுவே காணப்படுகிறது. அமெரிக்க ஏகாதிபத்தியம் முதல் அரசியலில் மதங்களின் தலையீடு, 13வது அரசியல் அமைப்புச் சீர்திருத்தம் எனச் சாதாரணமாக பாடசாலை மட்டத்தில் விவாதிக்கத் தயங்கும் தலைப்புக்கள் தான் றோயல் தோமிய விவாதப் போட்டிகளில் வாதிக்கப்படுகிறது. சமூகம், அரசியல் சார்ந்த மாணவர்களின் விழிப்புணர்வு, சிந்திக்கும், ஆராயும் தன்மைகள் என்பவற்றைப் பெரிதும் ஊக்கப்படுத்துவதாக றோயல்-தோமிய விவாதங்கள் அமைகிறது என்பதிலும் ஐயமில்லை. அதிலும் குறிப்பாக கடந்த வருடம் நடத்தப்பட்ட 13வது அரசியலமைப்புத் சீர்திருத்தம் இலங்கை இனப்பிரச்சினைக்குத் தீர்வாகும் - தீர்வாகாது என்ற தலைப்பிலான விவாதம் பல தரப்பிலும் வரவேற்பைப்பெற்றது குறிப்பிடத்தக்கது. அன்றைய நிகழ்வில் பிரதம அதிதியாக கலந்துகொண்ட இந்நாள் நாடாளுமன்ற உறுப்பினரும், பிரபல சட்டத்தரணியும், முன்னாள் றோயல் கல்லூரித் தமிழ் விவாத அணித் தலைவருமான திரு.எம்.சுமந்திரன் அவர்கள் இந்தத் தலைப்பினை எடுத்து வாதிட்டதற்காகவே இரு அணிகளுக்கும் தனது பாராட்டுதல்களைத் தெரிவித்திருந்தார். நடுவர் குழாமிலிடம்பெற்றிருந்த கொழும்புப் பல்கலைக்கழக அரசியல் விஞ்ஞான பீடப் பீடாதிபதி கலாநிதி.கீதபொன்கலனும் இந்தத் தலைப்பை ஆழமாக அலசியதற்காக இரண்டு அணிகளையும் பாராட்டியிருந்தமையும் குறிப்பிடத்தக்கது. ஆக ஒரு சாதாரண விவாதப் போட்டி என்றில்லாமால், வெற்றி தோல்விகளுக்கப்பால், றோயல்-தோமிய விவாதம் ஒவ்வொராண்டும் ஏதோ ஒரு செய்தியை விவாதத்தினூடாக இந்தச் சமூகத்திற்குச் சொல்கிறது. அமெரிக்காவின் முக்கிய சிவில் செயற்றிட்டவாதியான ஜெசி ஜக்ஸன் கூறிய கருத்திலொன்று இங்கு குறிப்பிடத்தக்கது. ‘கலந்துரையாடலும் விவாதமுமே, ஜனநாயகத்தின் ஆன்மாவைத் தூண்டிவிடுவதற்கான வழிகளாகும்’ என்கிறார் அவர். – கற்பிற்; சிறந்தவள் கண்ணகியா? சீதையா?, பாசத்தில் சிறந்தவர்கள் இராம லக்குமணரா? பஞ்சபாண்டவரா? என்ற வழமையான, அடையாளமான தமிழ் விவாதப் பாரம்பரியத்தை மாற்றியதும் றோயல் தோமிய விவாதத்தின் பெருமை. இதன் மூலம் இலக்கிய வாதங்களைப் புறக்கணிப்பதாக அர்த்தமில்லை, ஆனால் அவற்றைத்தாண்டி சமூகம், அரசியல், கொள்கைகள் என்ற பரந்துவிரிந்த பயன் நிறைந்த வாதத்தைச் செய்வதே றோயல் தோமிய பாரம்பரியத்தின் அடையாளமாகிறது. இதுவரை பரி தோமாவின் கல்லூரி 5 முறையும், றோயல் கல்லூரி 9 முறையும் குலசேகரம் நினைவுக் கேடயத்தை சுவீகரித்திருக்கிறது. றோயல் தோமியப் பாரம்பரியமும், தமிழின் பெருமையும் சங்கமிக்கும் இத்தொடர் இன்னும் சிறப்பாகத் தொடர்ந்து நடைபெறவேண்டும் என்பதே பழைய மாணவராகிய எம் அனைவரதும் அவாவாகும்.

‘எனது வாழ்க்கையில் என்றுமே என்னுடைய கருத்துடன் உடன்பட்டவர்களிடமிருந்து நான் எதையுமே கற்றுக்கொண்டதேயில்லை’ – டட்லி ஃபீலட் மலோன் (அமெரிக்க சட்ட வல்லுனர்).

ஆரோக்கியமான விவாதங்கள் எமது அறிவுக் கண்களைத் திறக்கின்றன, ஃபெரஞ்ச்சுத் தார்மீகவாதியான ஜோசஃப் ஜோபேர்ட் சொல்கிறார், ‘ஒரு வினாவினை விவாதித்துப் பின் முடிவுகாணாது விடுவது என்பது, அவ்வினாவினை வாதிக்காமலேயே முடிவு ஒன்றை எடுப்பதை விடச் சிறந்தது’ என்கிறார். ஆகவே மாணவர்களின் திறனுக்கும், அறிவுக்கும் மட்டுமல்ல சமூகத்திற்கும் பயனளிக்கும் வேத்திய-தோமிய தமிழ் விவாதப் பயணம் தொடர எல்லாம் வல்ல இறைவனைப் பிரார்த்திக்கின்றேன்.

‘அது மலரட்டுமாக!’ [Floreat] ‘அது என்றும் நிலைத்திருக்கட்டுமாக’ [Esto Perpetua]

**************************************************************************

இந்தக் கட்டுரை றோயல் கல்லூரித் தமிழ் இலக்கிய மன்றத்தின் “தமிழ்நயம் 2010” இதழில் இடம்பெற்றது.

படங்கள் - நன்றி திரு.நிமலபிரகாசன் (www.nimal.info)

நான் சுவைத்த சுவையகங்கள் (01) - றெஜீனா மார்கறீடா (கொழும்பு)

noreply@blogger.com (என்.கே.அஷோக்பரன்) — Mon, 12 Jul 2010 10:51:00 +0000

எல்லோரும் விரும்பும்படி என்ன எழுதலாம் என்று எண்ணியிருந்த வேளை, அதுவும் நான் நன்கு அறிந்த, அதேநேரம் எல்லோருக்கும் பிடித்த தலைப்பு ஒன்றில் தொடர்ந்து எழுத நீண்ட நா்களாக எண்ணிக்கொண்டிருந்தேன். தமிழகப் பதிவர்கள் தாம் சுவைத்த உணவகங்கள் பற்றிய அறிமுகங்களைப் பல பதிவுகளில் கண்டிருக்கிறேன், அது புதிய உணவகங்கள் பற்றி மற்றவர்களுக்கு நல்ல அறிமுகத்தைத் தருவதை உணர்ந்தேன். உணவு என்பது நாம் அனைவரும் விரும்பு சமாச்சாரம், ஆகவே நான் சுவைத்த சுவையகங்கள் பற்றித் தொடராக பதிவு எழுத விளைகிறேன். எங்கிருந்து தொடங்குவது என்று சரியாகத் தெரியவில்லை, ஆகவே நேற்றிரவு சுவைத்த இத்தாலிய சுவையகத்திலிருந்து ஆரம்பிக்கலாம் என்று முடிவுகட்டித் தொடங்குகிறேன். உணவகத்தின் அமைவிடம், பரிந்துரைக்கும் உணவுகள், விலைமட்டம், சேவை போன்ற தகவல்கைளையும் தரவிளைகிறேன்! சுவைக்கத் தொடங்குவோம்!

பொதுவான ஒரு ஐரோப்பிய வாசகம் இருக்கிறது; “இத்தாலிய உணவைச் சுவைக்க முடியாதவனுக்கு, எந்தச் சுவையுந் தெரியாது” என்பார்கள் ஐரோப்பியர்கள். உலகம் முழுவதும், குறிப்பாக மேற்குலக நாடுகளில் இத்தாலிய உணவு அவ்வளவு பிரபலமானது. அவர்களது உணவு எனும் போது, பிட்ஸா, பாஸ்டா, லசான்யா, ஸ்பகடி போன்ற உணவுகளும், எஸ்பிரஸ்ஸோ, கபசினோ போன்ற பானங்களும் உலகப்பிரபலம். உண்மையான இத்தாலிய சுவையை நான் முதலில் சுவைத்தது இத்தாலியில், 2008ம் ஆண்டு இத்தாலி சென்றிருந்த போது அந்த உணவின் சுவை என்னை ஆட்கொண்டுவிட்டது, பின்னர் தற்போது 2 வருடங்களின் பின் இத்தாலியில் சுவைத்த அதே சுவையை கொழும்பில் சுவைக்கும் வாய்ப்புக் கிடைத்தது.

றெஜினா மார்கறீடா - கொழும்பு ஐந்தில், பார்க் வீதியில் அமைந்துள்ள இத்தாலிய உணவகம். பார்பரா என்ற இத்தாலியப் பெண்மணியினால் நடத்தப்படும் இந்த உணவகத்தில் அசல் இத்தாலிய உணவுகள், மரபு ரீதியான முறையில் தயார் செய்யப்பட்டு தரப்படுகிறது. நான் எனது நண்பர்கள் இருவரும் அவர்களின் விருந்தளிப்புக்காக அங்கு சென்றிருந்தோம், இந்த உணவகத்திற்கு இதுதான் முதல் முறை. உணவகத்திற்குள் நுழைந்தவுடனேயே இத்தாலிய உணவின்வாசம் மூக்கைத் துளைக்கும்... மிகவும் நட்பாக சிரித்துக்கொண்டே மேசையொன்றை எமக்காக ஒதுக்கித்தந்துவிட்டு நீளமான, பெரிய மெனு அட்டையை நீட்டுகிறார் உபசரிப்பாளர். நான் இதுவரை பார்த்த மெனுஅட்டைகளிலேயே வித்தியாசமான மெனுஅட்டை இது. எதுவும் ஒரு ஒழுங்கில் அச்சிடப்பட்டிருக்கவில்லை, அங்கும் இங்கும் வேறு வேறு எழுத்துருவில், வேறு வேறு அளவுகளில் எழுதப்பட்டிருந்தது. எல்லாம் இத்தாலியப் பெயர்கள், ஆனால் கீழே அடைப்புக்குறிக்குள் ஆங்கிலத்திலே விளக்கம் தரப்பட்டிருக்கிறது. நாங்கள் ஒரு லசான்யா பொலோன்யேவும், கடலுணவுப் பிட்ஸாவும், ஸ்பைசிப் பாஸ்டாவும் தருவித்தோம். நான் தருவித்த லசான்யா பொலோன்யே அருமையாக இருந்தது, அத்தோடு பிட்ஸாவின் சுவை, அசல் இத்தாலிய பிட்ஸாவேதான். அருமையான இராப்போசனம், நண்பனுக்கு அவனது விருந்தளிப்புக்கு மனம் நெகிழ்வுடன் நன்றி கூறியது. அடுத்ததாக டெஸேட், நாங்கள் மூவரும் நட்டேலா க்ரஸ்ட் கேக் தருவித்தோம், ம்ம்ம்.... அவ்வளவு சுவையான டெஸேட்! - மிக மிகத் திருப்தியான இத்தாலிய உணவு!

எல்லாம் சரி.... விலை என்ன மாதிரி என்று கேட்பது புரிகிறது, அதுதான் விஷயமே. நடத்துபவர் இத்தாலியர் என்பதால் அவர் எல்லாவற்றையும் யூரோவின் இலங்கைப் பெறுமதிக்கேற்பப் போட்டிருப்பார் போல இருக்கிறது. பெரிய்ய்ய பிட்ஸா ஒன்று அதன் டொப்பிங்கிற்கு ஏற்ப 1000 ரூபா முதல் 2500 ரூபாய் வரையில் இருக்கிறது. லசான்யா, பாஸ்டா, ஸ்பகட்டி என்பன 500 ரூபாய் முதல் 2000 ரூபாய் ஈறாக அமைகிறது. தண்ணீர்ப் போத்தல் 150 ரூபாய், மென்பானங்கள் 300 ரூபாய் முதலும் கிடைக்கிறது. டெஸேட் 400 ரூபாய் முதல் கிடைக்கிறது. இல் ஜெலாட்டோ (இத்தாலிய மொழியில் ஐஸ்க்றீம்) 300 ரூபாய் முதல் கிடைக்கிறது. எஸ்பிரஸ்ஸோ, கபசினோ என்பன 300 ரூபாய் முதல் கிடைக்கிறது. மதுவகைகளும் உண்டு - விலைவிபரம் தெரியவில்லை. ஆக உணவு, சுவை, தரம், சேவை எல்லாவற்றிலும் நன்றாக இருந்தாலும், விலை அதிகம்தான். ஏறத்தாழ இருவர் உண்டு மகிழ ஆகக்குறைந்தது 2500 ரூபாய்கள் தேவை.

அமைவிடம் - கொழும்பு 5, பார்க் வீதியில், பார்க் வைத்தியசாலைக்கு எதிரில். (அன்டர்சன் தொடர்மாடியருகே பார்க் வீதியில் இருக்கும் கார்கில்ஸ் ஃபுட் சிட்டியிலிருந்து ஏறத்தாழ 100 மீற்றர் தொலைவில்.)

சிறப்புக்கள் - அசல் இத்தாலிய சுவை, நல்ல சேவை, விரைவு

குறைபாடுகள் - விலை, வார இறுதிகளில் மற்றும் விடுமுறைதினங்களில் இடம் கிடைப்பது கடினம்.

பரிந்துரையளவு - ★ ★ ★ ★ 7.5 / 10

தொடரின் தொடக்கத்திலே இவ்வளவு விலையான உணவகத்தை அறிமுகப்படுத்தியதற்காக மன்னிக்கவும். அடுத்தது முதல் பட்ஜட் உணவகங்கள் தான் முக்கியம் பெறும் (அங்கு தானே அடிக்கடி செல்வேன்!)

ஒரு அருமையான இசை அனுபவம்!

noreply@blogger.com (என்.கே.அஷோக்பரன்) — Mon, 05 Jul 2010 15:00:00 +0000

இசை காதுகளினூடு பயணித்து இந்த உடலையும், மனத்தையும் தன்வசப்படுத்திய ஒரு இனிய அனுபவம் இது.

பொதுவாக ஏ.ஆர்.ரஹ்மானின் பாடல்கள் என்றால் எனக்குக் கொள்ளைப் பிரியம்! என்னை மயக்கும் இசை அவருடையது. அண்மையில் அவர் இசையில் வந்த ஒரு பாடலை, வித்தியாசமான முறையில் அனுபவிக்கும் சந்தர்ப்பம் வாய்த்தது, அந்த அனுபவம் அமைதியையும், மனத்திற்குப் புத்துணர்ச்சியையும் தருவதாக இருந்தது. இசை மூலம் ஒரு தவம் என்றும் இதைச் சொல்லலாம், அந்த சில நிமிடங்கள், அந்த மயக்கும் இசையில் மூழ்கி எழுகையில் மனம் தெளிவுபெறும் விந்தையை நான் உணர்ந்தேன்.

ஒரு மாலைப்பொழுது - இல்லை - அந்தி சாய்ந்து இருள் கவ்வத்தொடங்கும் வேளை.... அமைதியான தனி அறை... குறைவான வெளிச்சத்தில், குளிர்மையான தென்றல் யன்னலூடு பயணித்து உடலை வருடிச்செல்லும் பொழுது... எனது “சோனி - வோக்மன் எம்பி3 ப்ளெயரில்” முழுமையான சப்தத்தில் ஒலிக்கிறது அந்தப் பாடல்.... கண்ணை மூடி, ஒரு தவம் போல என்னை மறக்கிறேன்.... காற்றில் பறப்பது போல ஒரு அனுபவம்.... இதுதான் முதல்முறை!

அந்தப் பாடல் ஏ.ஆர்.ரஹ்மான் இசையில் ஜோதா-அக்பர் திரைப்படத்தில் இடம்பெற்ற “க்வாஜா எந்தன் க்வாஜா” என்ற பாடல். அந்த அனுபவத்திற்குப் பிறகு அந்தப் பாடலின் இசை பற்றித் தேடியறிந்தேன். அந்தப் பாடல் சூஃபி இசை வடிவத்தினடிப்படையில் உருவானது, படத்தில் பாடல் இடம்பெறும் சந்தர்ப்பமும் அதையொத்ததுதான். நான் கேட்ட முதலாவது சூஃபி இசைப் பாடலும் இதுதான் என்று நினைக்கிறேன்... இந்தப் பாடலை இதற்கு முதல் பலமுறை கேட்டிருக்கின்றேன், என்னைக் கவர்ந்தும் இருக்கிறது, ஆனால் தனியாக, அமைதியான நிலையில், கண்ணைமூடி இரசிக்கும் போது மெய்சிலிர்க்கும் அனுபவத்தை இது தந்தது!

இதை நீங்களும் அமைதியான சூழலில் நீங்களும் கேட்டுப்பாருங்கள், உங்கள் அனுபவத்தையும் இங்கு பகிர்ந்து கொள்ளுங்கள். வரிகள் உங்கள் கவனத்தைச் சிதைக்கிறது என உணர்ந்தால், இதே பாடலின் ஹிந்திப் பதிப்பைக் கேளுங்கள்! வரிகளை விட, இங்கு இசையின் அனுபவம் தான் இனிமையானது!

சொற்சமர்க் கால ஞாபகங்கள்! - (03) எதிரிகளும், வைரிகளும்...

noreply@blogger.com (என்.கே.அஷோக்பரன்) — Tue, 29 Jun 2010 17:45:00 +0000

இது ஒரு தொடர்ப்பதிவு

இதன் முன்னை அங்கத்தைப் படிக்க : சொற்சமர்க் கால ஞாபகங்கள்! - (02) கூர் தீட்டப்படுகிறோம்...

சமர் என்று வந்துவிட்டால் எதிரிகள் இல்லாமல் முடியுமா? சொற்சமரான விவாதத்தைப் பொருத்த வரையில் எதிரணிகள் தான் எங்கள் எதிரிகள். ஆம் விவாதம் தொடங்கி முடியும் வரை அந்த உணர்வோடுதான் வாதிடுவோம், வெற்றிக்கனி பறிக்கும் வரை அந்தச்சூடு உடலில் தணியாது. விவாதத்திற்கு முன்னும், பின்னும் நண்பர்களாக இருப்போம், விவாதச் சமரின் போது எங்கள் எதிரிகளாகவே பாவிப்போம், காரணம் அப்போதுதான் அந்த உணர்வு விவாதத்திற்கு இன்னும் உயிரூட்டுவதாக இருக்கும்.

எதிரிகள் என்றால் அதில் நிறைய வகையுண்டு. றோயல் கல்லூரித் தமிழ் விவாத அணியைப் பொருத்த வரையில் எங்களது பாரம்பரிய வைரிகள் பரி தோமாவின் கல்லூரி அணிதான். றோயல்-தோமிய பாரம்பரியம் இங்கும் தொடர்கிறது. கடந்த 16வருடங்களாக தொடர்ந்த றோயல் தோமிய தமிழ் விவாதச் சமர் வருடாவருடம் நடைபெற்று வருகிறது, எந்தவொரு வேத்தியனுக்கும் இந்தப் போட்டியில் பங்கெடுப்பது என்பது மிகவும் மதிப்பான, பெருமையான ஒரு விடயம், நான் 3 முறை இப்போட்டிகளில் பங்குபற்றி வெற்றியும் பெற்றிருக்கிறேன். அதில் 2 முறை அணியின் தலைவனாக வெற்றிபெற்ற மகிழ்ச்சிக்கு ஈடு இணை இல்லை. றோயல்-தோமிய விவாதங்களில் கடைசியான பரி தோமாவின் கல்லூரி அணி வெற்றி பெற்றது 2002ம் ஆண்டில் அதன் பின் தொடர்ந்து 7 வருடங்கள் எமது அணியே வெற்றிபெற்று வருகிறது. பரி தோமாவின் கல்லூரி அணி கடந்த சில வருடங்களாக சிறப்பான நிலைமையில் இல்லை என்பதையும் நான் இங்கு சுட்டிக்காட்ட வேண்டும் ஆனால் கடைசியாக நடைபெற்ற 16வது றோயல்-தோமிய தமிழ் விவாதச்சமாரில் தோமிய அணி கடுமையான சவால் கொடுத்தது என்பதை மறுக்க முடியாது, கிட்டத்தட்ட 5 வருடங்களின் பின் மிகச்சிறப்பான தோமிய அணியாக அது காணப்பட்டது, ஆக வருங்காலங்களில் தோமிய அணி இன்னும் வலுவானதாக வரும் என்று எதிர்பார்க்கலாம். றோயல்-தோமிய பாரம்பரிய தமிழ் விவாதச் சமர் பற்றி மேலுமறிய இங்கே சொடுக்கவும்.

றோயல்-தோமிய விவாதத்திற்கு அடுத்தபடியாக நாங்கள் சவாலான போட்டியாகக் கருதுவது றோயல்-பம்பலப்பிட்டி இந்து விவாதப் போட்டிகளைத்தான். றோயல்-தோமிய பாரம்பரியம் போல ஏதுமில்லாவிட்டாலும், தமிழ் விவாதத்தைப் பொருத்தவரை பம்பலப்பிட்டி இந்துக் கல்லூரி எங்களுக்குச் சவாலான ஒரு அணிதான். அண்மைக்கால (கடந்த 5 வருடங்கள்) தமிழ் விவாதப் போட்டிகளின் முடிவுகளை பார்த்தீர்களேயானால் 80வீதமான சுற்றுப் போட்டிகளின் இறுதிப் போட்டிகள் றோயல்-பம்பலப்பிட்டி இந்து போட்டிகளாகவே அமைந்திருக்கிறது. சில வருடங்களில் நாமும், சில வருடங்களில் அவர்களும் வென்றிருக்கிறார்கள். பருவகாலத்திற்கும், அணிகளின் நிலைக்கும் ஏற்ப இது மாறுபடும். நாங்கள் முக்கியமாக மோதும் போட்டிகளில் முதன்மையானது கல்வி அமைச்சு நடத்தும் தமிழ்த்தினப்போட்டிகள் 2006ம் ஆண்டு றோயல் கல்லூரி அணி முதலாம் சுற்றுடன் வெளியேறிவிட, வலைய மட்டத்தில் பம்பலப்பிட்டி இந்து வெற்றிபெற்றது. 2007 மற்றும் 2008ம் ஆண்டுகளில் தொடர்ந்து இரு முறையும் றோயல் கல்லூரியே வலையமட்டத்தில் வெற்றிபெற்று பின்னர் அகில இலங்கை மட்டம் வரை சென்றது, இதில் 2008ல் அகில இலங்கை ரீதியில் முதலிடத்தையும் பெற்றமை குறிப்பிடத்தக்கது, அந்த இரண்டு ஆண்டுகளும் அணியைத் தலைமைதாங்கியவன் என்ற விதத்தில் எனக்கு அதில் கொள்ளை மகிழ்ச்சி (இதற்கு முன்னர் 2004ல் நிஷாந்தன் அண்ணாவின் தலைமையில் றோயல் கல்லூரி அணி தேசிய மட்டத்தில் முதலிடம் பெற்றது குறிப்பிடத்தக்கது)! இதோ 2009ம் ஆண்டுப் போட்டியில் சில பம்பலப்பிட்டி இந்து வென்றிருக்கிறது. ஆகவே பம்பலப்பிட்டி இந்து அணி சவாலான அணி, அதை நாம் எப்படி எதிர்கொள்கிறோம் என்பதைப்பொருத்துத்தான் விவாதத்தில் வெற்றி தோல்வி நிர்ணயமாகிறது. அவர்களது பலம் மொழியாற்றலும் கருத்தும், எமது பலம் பயிற்சி அனுபவமும், சமயோசிதமும், இது இரண்டிற்குமிடையேயான யுத்தத்தை நீங்கள் காண விரும்பினால் கட்டாயம் ஒரு றோயல்-பம்பலப்பிட்டி இந்து விவாதப் போட்டியைப் பாருங்கள்!

இதைவிட குறிப்பிட்டுச் சொல்லக்கூடிய எதிர் அணிகள் இன்னும் ஒன்றிரண்டுண்டு. வெள்ளவத்தை இந்து மகளிர் கல்லூரி (சைவ மங்கையர் கழகம்) அணி, பம்பலப்பிட்டி இராமநாதன் இந்து மகளிர் கல்லூரி அணி என்பன குறிப்பிடத்தக்கது. 2007ம் ஆண்டு என்று நினைக்கிறேன், கொழும்பு மகளிர் கல்லூரியினால் நடத்தப்பட்ட தமிழ் விவாதப் போட்டிகளின் அரை இறுதிச்சுற்றில் பலமான இந்து மகளிர் கல்லூரி அணியைச் சந்திக்க நேர்ந்தது. தலைப்பு - சகோதர பாசத்தில் சிறந்தவர்கள் இராம இலக்குமணரே என்று நாங்களும் பஞ்ச பாண்டவரே என்று அவர்களும். விவாதம் நடந்தது - மிக்க சூடாகவும் கொதிப்புடனும். அவர்கள் அணியில் எல்லோரும் எம்மை விட வயதில் மூத்தவர்கள் ஆக எம்மிடம் தோற்கக்கூடாது என்று வைராக்கியத்துடன் சூடாகவே வாதிட்டனர். எனது விவாதப் பயணத்தில் நான் கண்ட மிகச் சூடான வாதங்களுள் இதுவும் ஒன்று. விவாதத்தின் சூட்டில் விவாதம் மிகப்பெரும் எல்லைகளையெல்லாம் தொட்டது, கடைசியில் நாம் வெற்றி பெற்றோம், அந்த விவாதம் பற்றி எழுதவேண்டுமானால் தனிப்பதிவு வேண்டும், ஆனால் அது விவரித்து எழுதுவதைச் நாம் பிறர் சார்ந்த சில காரணங்களுக்காகத் தவிர்த்து விடுகிறேன். விவாதத்தில் நாம் வென்று இறுதிப் போட்டிக்குச் சென்று இந்துவை வீழ்த்தி வெற்றிகண்டோம், தொடர்ந்து அடுத்தவருடமும் இந்துவை வீழ்த்தி வெற்றிகண்டோம்.

அந்த 2007 மற்றும் 2008 இரு பருவகாலங்களிலும் நாம் இந்துவிடம் தோற்றது 4 முறைதான், 2 முறை பெனடிக்ட் கல்லூரி அணி நடத்திய போட்டிகளில் (இதுவரை றோயல் கல்லூரி அணி வெற்றி பெறாது போட்டி, இது ஒன்றுதான், காரணம் சொல்வதில் விருப்பமில்லை, உடன்பாடுமில்லை - ஆனால் நீங்களே யூகித்துக்கொள்ளுங்கள்.) மற்ற ஒன்று இரத்மலானை இந்துக் கல்லூரி நடத்திய போட்டியிலும், அடுத்தது உவெஸ்லிக் கல்லூரி அணி நடத்திய போட்டியிலுமாகும். இரத்மலானை இந்து போட்டியில் நாம் இந்துவிடம் தோற்றது கற்பு பற்றிய சர்ச்சையிலாகும், கற்பிற் சிறந்தவள் கண்ணகி என்று நாங்களும், சீதை என்று அவர்களும் வாதிட்டார்கள் - கற்பு என்ற சர்சையில் தோல்வி. அடுத்தது உவெஸ்லிக் கல்லூரி போட்டியில் தோற்றமைக்கு அலட்சிம் தான் முக்கிய காரணம், நான் அதை மமதை, அதீத நம்பிக்கை என்று கூடச்சொல்வேன், அது வரை பெற்ற வெற்றிகள் கொடுத்த போதை அலட்சியமான வாதத்திற்கு வழிகாட்டியது, ஆனால் அந்தத் தோல்வி எம்மைத் தட்டியெழுப்பி, மீண்டும் கால்களை நிலத்திற் படச்செய்தது என்று சொன்னால் மிகையில்லை. அதன் பின்தான் இந்துவை சந்தித்த இடத்திலெல்லாம் தகர்க்கத் தொடங்கினோம், அதற்காக இந்து ஒன்றும் சளைத்த அணி என்று எண்ணிவிட வேண்டாம், அருமையான விவாதிகளைக் கொண்ட பலமான அணியாகவே இருந்தது. இதன் பின்பே கொழும்புப் பல்கலைக்கழக சட்டபீடம் நடாத்திய பாராளுமன்ற முறையிலான தமிழ் விவாதப் போட்டிகளில் 2008. 2009ல் நாம் வெற்றி பெற்றோம். இந்துக் கல்லூரிக்கு இன்றுவரை அந்தமுறையிலான விவாதம் சவாலாகவே இருக்கிறது.

என்னதான் விவாதம் சார்ந்த விடயங்களில் நாம் வைரிகளாக இருந்தாலும், அதற்கு வெளியில் நட்புணர்வுடன் தான் பழகினோம். என்னுடைய காலத்தில் விவாதித்த வைரி அணி விவாதிகளுள் என்னைக் கவர்ந்த விவாதிகளை இங்கு குறிப்பிட விரும்புகிறேன். இந்துக் கல்லூரி அணியின் தலைவராக இருந்த விதூஷன் ஒரு மிகத்தரமான விவாதி, கருத்துக்களை உணர்ச்சியுடன் கூறுவதில் சிறந்தவர், அனல் பறக்க விவாதிப்பது அவர் பாணி. இந்துக் கல்லூரியின் 4ம் விவாதியாக இருந்த சஞ்சீவனையும் குறிப்பிட வேண்டும், நக்கல் விவாதத்திற்கும், நகைச்சுவைக் கருத்துகளுக்கும் ஆள் பெயர்போனவர். இதைவிட இந்துக் கல்லூரிக்கு பின்னர் தலைமைதாங்கிய சிவாம்சன், தற்போது தலைமைதாங்கும் கஜானன் ஆகியோர் சிறப்பான தமிழ் பேசும் நல்ல விவாதிகள். அந்த 2007 மகளிர் கல்லூரி அணியில் பங்குபற்றிய இந்து மகளிர் கல்லூரி அணி நான் பார்த்த மிகச் சிறந்த அணிகளில் ஒன்று, அண்மையில் கொழும்பச் சட்ட பீட பாராளுமன்ற விவாதப் போட்டிகளில் நடுவராகப் பணியாற்ற அழைக்கப்பட்டிருந்தேன், அதன் போது வந்த இந்து மகளிர் அணியைக் கண்டு அதிர்ச்சி அடைந்தேன், அவ்வளவு தமிழ்க்கொலை, எப்படியிருந்த அணி இப்படி ஆயிட்டே என்று வருத்தம் தான். விவாதத்தில் எந்த முரண்பட்ட கருத்தையும் என்னால் ஏற்றுக்கொள்ள முடியும் ஆனால் தமிழ்க்கொலையை ஏற்றுக்கொள்ளவே முடியாது, தமிழைச் சரியாகப் பேச முடியாதவர்கள், அதைப் பயின்றபின் மேடையேறவேண்டும் என்பது எனது அபிப்ராயம். அண்மையில் மீண்டும் பழைய நிலைக்குத் திரும்பி, சிறப்படைந்து வரும் தோமிய விவாத அணியின் விஜய் அபிநந்தன் சிறப்பாக வாதிக்கிறார், கடந்த றோயல்-தோமிய விவாதத்தில் சிறப்புமிக்க சிறந்தவிவாதிக்கான விருதையும் வென்றவர் இவர்.

ஒவ்வொரு விவாத அணிக்கும் ஒரு பலம் இருக்கிறது, பலவீனமும் இருக்கிறது. நான் அறிந்த பல அணிகள் எமது வேத்திய அணியுடன் இலக்கிய விவாதங்களில் ஈடுபடுவதை விரும்புவதில்லை, அது போலவே ஒவ்வொரு அணிக்கும் பலம், பலவீனம் இருக்கிறது, இவற்றைச் சரியாகக் கணித்தால் வெற்றியை அதன் பாதையில் செப்பனிட முடியும். இந்த வருடத்தில் நடைபெற்ற சில போட்டிகளில் பம்பலப்பிட்டி இந்து பெற்ற வெற்றிகளுக்குக் காரணம் அவை வேத்திய அணியில் காணப்பட்ட சில தொய்வு நிலைகளை அடையாளங் கண்டுகொண்டதாக இருக்கலாம் என்பது எனது கணிப்பு.

இது தொடர்பிலான சில வெற்றியின் இரகசியங்கள், சாதித்தவர்கள், அனுபவஸ்தர் கூற்றுக்களாக -

உன் எதிரி உன்னை அச்சம் கொள்ளச் செய்யும் முயற்சிகளை அவதானிப்பதன் மூலம் அவன் எதற்கெல்லாம் அச்சப்படுகிறான் என்று அறிந்திட முடியும் - எரிக் ஹொஃபர்.

உன் எதிரி பிழைவிட்டுக்கொண்டிருக்கும் போது இடையூறு செய்யாதே - நெப்போலியன் போனபார்ட்

எங்கள் எதிரிகளிடமிருந்தும் நாங்கள் நிறையக் கற்றுக்கொள்ளலாம் - ஓவிட்

பாம்பைப் பிடிப்பதற்கு உன்எதிரியின் கரத்தைப் பயன்படுத்து - பாரசீகப் பழமொழி

இவையெல்லாம் விவாதத்தில் பயன்படுத்தக்கூடிய உத்திகள்! பலமான எதிரணிகள் இருந்தால் தான் விவாதம் சூடுபிடிக்கும், அந்த வகையில் நான் எங்களைச் சவாலுக்குட்படுத்திய இந்த அணிகளை பெருமிதத்துடன்தான் பார்க்கிறேன்! எனது விவாதப் பயணத்தில் மறக்கமுடியாத தருணங்களைத்தந்ததற்கு அவர்களுக்கு நன்றி.... மறக்கமுடியாத மட்டுமல்ல மறக்க நினைக்கும் சில தருணங்களும் உண்டு... அவை பற்றி அடுத்த பதிவில்....

(தொடரும்)

இலங்கை அரசியல் யாப்பும், பௌத்த மதமும்.

noreply@blogger.com (என்.கே.அஷோக்பரன்) — Mon, 28 Jun 2010 17:32:00 +0000

உலகிலுள்ள பௌத்த நாடுகளுள் முதன்மையாகக் கருதக்கூடிய தேசமாக இலங்கை காணப்படுகிறது. இலங்கையில் 70 சதவீதமளவிற்கு தேரவாத பௌத்தமே பின்பற்றப்படுகிறது. மேலும் இலங்கையில் நடைமுறையிலுள்ள அரசியல் யாப்பின் பிரகாரம், பௌத்த மதத்திற்கு முதன்மை இடமும், புத்தசாசனத்தைக் காப்பதும், வளர்ப்பதும் அரசின் கடமையாக்கப்பட்டிருக்கிறது. பௌத்தம் என்ற தலைப்பிலேயே இலங்கை அரசியல் யாப்பின் இரண்டாவது அத்தியாயம் எழுதப்பட்டுள்ளது.

1978ம் ஆண்டு இலங்கை ஜனநாயக சோசலிசக் குடியரசின் 1978ம் ஆண்டு யாப்பின், இரண்டாம் அத்தியாயம் (9வது சரத்து) பின்வருமாறு குறிப்பிடுகிறது.

Buddhism.

9. The Republic of Sri Lanka shall give to Buddhism the foremost place and accordingly it shall be the duty of the State to protect and foster the Buddha Sasana, while assuring to all religions the rights granted by Articles 10 and 14(1)(e).

அதாவது, இலங்கைக் குடியரசானது, பௌத்தத்திற்கு முதன்மை இடத்தை வழங்குவதுடன், புத்தசாசனத்தைக் காப்பதும், வளர்ப்பதும் அதன் கடைமையாகும் அதேவேளை ஏனைய 10 மற்றும் 14(1)(e) சரத்துக்கள் மூலம் ஏனைய மதங்களுக்கான உரிமைகளை உறுதிப்படுத்தல் வேண்டும் என இலங்கை அரசியல் யாப்பின் 2ம் அத்தியாயம் (9வது சரத்து) குறிப்பிடுகிறது.

10ம் சரத்தானது, மூன்றாவது அத்தியாயமான அடிப்படை உரிமைகள் அத்தியாயத்தில் இடம்பெறுகிறது, அது பின்வருமாறு குறிப்பிடுகிறது,

Freedom of thought, conscience and religion.

10. Every person is entitled to freedom of thought, conscience and religion, including the freedom to have or to adopt a religion or belief of his choice.

அதாவது, சிந்திப்பதற்கான சுதந்திரம், மனச்சாட்சி சுதந்திரம் மற்றும் மதச் சுதந்திரம் எனத் தலைப்பிடப்பட்டுள்ள இந்தச் சரத்தானது, ஒவ்வொரு மனிதனுக்கும், சிந்தனை, மனச்சாட்சி, மதச் சுதந்திரத்தை வழங்குவதுடன், அவரது தெரிவான நம்பிக்கையை, மதத்தைச் சார்ந்திருக்கும், பின்பற்றும் சுதந்திரத்தை வழங்குகிறது.

14ம் சரத்தும் அடிப்படை உரிமைகள் அத்தியாயத்திலேயே இடம்பெறுகிறது. பேச்சு, ஒன்றுகூடல், கூட்டம் நடத்தல் போன்ற சுதந்திரங்களை உறுதிப்படுத்தும் அச்சரத்தின் 1ம் உபசரத்தின் e பிரிவு பின்வருமாறு குறிப்பிடுகிறது.

14. (1) Every citizen is entitled to -

(e) the freedom, either by himself or in association with others, and either in public or in private, to manifest his religion or belief in worship, observance, practice or teaching;

அதாவது, ஒவ்வொரு குடிமகனும், தான் அல்லது தன்னுடன் இணைந்துகொண்ட மற்றவர்களுடன் கூடி, பொதுவாக அல்லது தனியாக தனது மதத்தைப் அல்லது தனது வழிபடும் நம்பிக்கையைப் பிரகடனம் செய்யவும், அதைப் பின்பற்றவும், அதை நடைமுறைப்படுத்தவும், அதைப் போதிக்கவும் உரித்துடையவராகிறான்.

இந்த அடிப்படையில் வைத்து நோக்கும் போது, இலங்கையில் அரச மதமாக பௌத்தம் ஆகிறது, ஏனைய மதங்களைப் பின்பற்றும் உரிமை வழங்கப்பட்டாலும், அரசியல் அமைப்பின் படி அவை தொடர்பில் அரசிற்கேதும் கடப்பாடோ, கடமையோ நிர்ணயிக்கப்படவில்லை. ஆனால் பௌத்தமதத்தைப் (புத்த சாசனத்தைப்) பாதுகாப்பதும், வளர்ப்பதும் அரசின் கடமையாகிறது.

இந்தச் சரத்தை இலகுவாக நீக்கவோ திருத்தவோ முடியாத படி அரசியலமைப்பு பாதுகாப்பையும் வழங்குகிறது. அதாவது இந்த 9வது சரத்தை மாற்ற, நீக்க வேண்டுமென்றால் வெறுமனே பாராளுமன்றில் 3ல் 2 பெரும்பான்மை மட்டும் போதாது, அத்துடன் சர்வசன வாக்களிப்பு ஒன்றின் மூலம் பெரும்பான்மை பெறப்பட்டு அதைச் சனாதிபதி 80ம் சரத்தின் படி சான்றளிக்கும் பட்சத்திலேயே இச்சரத்தை மாற்றவோ, நீக்கவோ முடியும்.

இது இவ்வாறாக இருக்க, பலபேருக்கு இலங்கையில் பௌத்தத்தின் நிலை பற்றி பல சந்தேகங்களுண்டு அதில் குறிப்பாக பலருக்கு எழும் சந்தேகம் இலங்கையில் பௌத்தரல்லாதவர் சனாதிபதியாக முடியுமா என்பதாகும். நிச்சயமாக பௌத்தரல்லாத ஒருவர் தேர்தலில் வெற்றிபெறும் பட்சத்தில் சனாதிபதியாக முடியும், அது தொடர்பில் எந்தக் கட்டுப்பாடுமில்லை. இதுவரை நடந்த சனாதிபதித் தேர்தல்களில் திரு.குமார் பொன்னம்பலம், சிவாஜிலிங்கம் ஆகிய தமிழர்கள் போட்டியிட்டிருக்கிறார்கள், இதில் குமார் பொன்னம்பலம் கணிசமானளவு வாக்குகள் பெற்றிருந்ததும் குறிப்பிடத்தக்கது. இதைவிட முஸ்லிம்களும் போட்டியிட்டிருக்கிறார்கள், ஆக அரசியலமைப்பில் நீங்கள் எண்ணுவதுபோன்ற ஒரு தடையிருந்தால் எவ்வாறு இவர்களது வேட்புமனு ஏற்கப்பட்டு தேர்தலில் போட்டியிட அனுமதிக்கப்பட்டார்கள்? - இந்த தர்க்கத்தைப் புரிந்தாலே உங்கள் நம்பிக்கை பிழை என்பது தெரிந்துவிடும். மேலும் இலங்கை அரசியல் யாப்பின்படி இலங்கையில் தேர்தல்களில் போட்டியிடவோ. பதவிகள் பெறவோ மதம் ஒரு தடையல்ல.

ஆனால் 9ம் சரத்தின் படி சில நடைமுறைச்சிக்கல்கள் வரலாம், அதாவது அரசாங்கம் புத்தசாசனத்திற்கு எதிராக, முரணாக செயற்பட முடியாதவாறு இச்சரத்து கட்டுப்படுத்துவதாகவும் கொள்ளலாம், ஏனெனில் அவ்வாறு செய்யும் போது அரசாங்கம் புத்தசாசனத்தைக் காக்கும், வளர்க்கும் கடமையிலிருந்து தவறுகிறது என வாதிடலாம். இது தொடர்பில் மேலும் விளக்க புத்தசாசனம் தொடர்பான ஆழ்ந்த அறிவு தேவை.

மேலும் இந்தச் சரத்துக்களைப் படித்தக்கொண்டிருக்கும் போது எனக்கு இன்னொரு விடயமும் தென்பட்டது. அதாவது 9ம் சரத்தின் மூலம் பௌத்தத்திற்கு முன்னுரிமை கொடுக்கும் அரசியல் யாப்பு, அதே சரத்தில், அடிப்படை உரிமைகள் அத்தியாயத்தின் 10 மற்றும் 14(1)(e) சரத்துக்கள் மூலமே மற்ற மதச் சுதந்திரத்தை அங்கீகரிக்கிறது. ஆனால் அடிப்படை உரிமைகள் அத்தியாயத்தில், 15வது சரத்தின் 7வது உபபிரிவானது பின்வருமாறு குறிப்பிடுகிறது.

Restrictions on fundamental Rights.

15.

(7) The exercise and operation of all the fundamental rights declared and recognized by Articles 12, 13(1), 13(2) and 14 shall be subject to such restrictions as may be prescribed by law in the interests of national security, public order and the protection of public health or morality, or for the purpose of securing due recognition and respect for the rights and freedoms of others, or of meeting the just requirements of the general welfare of a democratic society. For the purposes of this paragraph " law " includes regulations made under the law for the time being relating to public security.

அதாவது சுருக்கமாக, தேசிய பாதுகாப்பு, பொது ஒழுங்கு மற்றும் பொதுச் சுகாதாரம் மற்றும் விழுமியங்கள் தொடர்பில் 14ம் சரத்தை நடைமுறைப்படுத்துவதை சட்டரீதியாகக் கட்டுப்படுத்தலாம் என்கிறது. ஆக வெளிப்படையாக மேற்கூறிய காரணங்களைக் காட்டி 14ம் சரத்தின் 1ம் உபசரத்தின் e ப்பிரிவினால் தரப்பட்ட மதத்தைப் பின்பற்றும், போதிக்கும், நடைமுறைப்படுத்தும் சுதந்திரத்தை கட்டுப்படுத்தலாம்.

**********************************************************************

Reference

The Constitution of the Democratic Socialist Republic of SriLanka (1978) -

http://www.priu.gov.lk/Cons/1978Constitution/CONTENTS.html

மேலே தரப்பட்ட அரசியல் அமைப்பின் தமிழ் விளக்கமும், கருத்துக்களும் எனது தனிப்பட்ட தெளிவின் அடிப்படையிலான, தனிப்பட்ட அபிப்ராயமாகும். இது அரசியல் அமைப்பின் மிகச் சரியான தமிழாக்கமோ, விளக்கமோ அல்ல. அரசியலமைப்பிற்கும், சட்டங்களுக்கும் விளக்கம் கொடுக்கும் அதிகாரம் நீதிமன்றுக்கே உண்டு.

இலங்கைத் தமிழரிடையே பிரதேசவாதம் மீண்டும் தலைதூக்குகிறதா?

noreply@blogger.com (என்.கே.அஷோக்பரன்) — Tue, 22 Jun 2010 18:03:00 +0000

இலங்கை உள்நாட்டு யுத்தம் அரச படைகளால் முடிவுக்குக் கொண்டுவரப்பட்டு ஒரு வருடகாலம் ஆயிட்டு. இன்னும் அகதி முகாம்களில் மக்கள் அல்லற்பட்டுக்கொண்டுதான் இருக்கிறார்கள், மீள்குடியேற்றப்பட்டோர் என்பவர்கள் எல்லாம் வெற்றுக் குடில் அமைத்து உயிருடன் இருந்துகொண்டிருக்கிறார்கள், வாழ்கிறார்கள் என்று சொல்ல முடியவில்லை, வாழ்வாங்கு வாழ்ந்த மக்கள், இன்று உயிரோடு அலைந்துகொண்டிருக்கிறார்கள். இலங்கைத் தமிழர்கள் என்ற பதமே ஒரு காலத்தில் பிரச்சினைக்குரிய பதமாகவே இருந்தது. இலங்கைத் தமிழர்கள் என்றால் யார்? ஒவ்வொருவரும் தங்களைச் சார்ந்து வரைவிலக்கணப் படுத்திக்கொண்டாலும், அரசின் உத்தியோகபூர்வ பிரிப்பின் படி இந்தியத் தமிழர், முஸ்லிம் அல்லாத தமிழர்களே இலங்கைத் தமிழர்களாகக் கொள்ளப்படுகிறார்கள். இந்தப் பிரிப்பினைக்கும் காரணம் இலங்கைத் தமிழர்கள் அக்காலத்தில் தம்மை இந்தியாவிலிருந்து தோட்ட வேலைகளுக்காக இங்கு வந்த இந்தியத் தமிழர்களிடமிருந்து வேறுபடுத்தி இம்மண்ணின் வம்சாவழிக்குடிகளாக அடையாளப்படுத்த எண்ணியதும், இஸ்லாம் மார்க்கத்தையுடைய தமிழ் பேசுவோர் தங்களை தமிழர்களாக அன்றி முஸ்லிம்களாகவே அடையாளப்படுத்தியதும் ஆகும். பிற்காலத்தில் தமிழ்-முஸ்லிம் இனத்தவர் இணைந்து சிலவேளைகளில் தமிழ்பேசும் இனத்தவர் என்றும் அடையாளப்படுத்தியதைக் காணலாம்.

ஒவ்வொரு பிரிவினைக்கும் ஏதோ ஒரு சுயநலமே காரணமாக இருக்கிறது. நான், எனது குடும்பம், எனது உறவுகள், எனது நண்பர்கள், எனது சுற்றும், எனது இனம், எனது கிராமம், எனது பிரதேசம், எனது மாவட்டம், எனது மாகாணம், எனது தேசம் என்று ஒரு படிமுறை உலகில் அனைத்து மனிதர்களிடமும் உண்டு. இதில் சிலது மற்றையதை விட முக்கியம் பெறுகிறது. இந்த முக்கியத்துவம் மனிதனிலிருந்து மனிதனுக்கு வேறுபடும். ஜின்னா எனது இனம் என்று சிந்தித்தார், கஸ்ட்ரோ எனது நாடு என்று சிந்தித்தார், திரு.எக்ஸ் எனது குடும்பம் என்று சிந்திக்கலாம்! இவ்வாறாக இலங்கையிலுள்ள தமிழ்பேசும் மக்கள், இலங்கைத் தமிழர், இந்திய வம்சாவழித் தமிழர், முஸ்லிம்கள் எனப்பிரிவடைந்தனர். இலங்கைத் தமிழரிடையே யாழ்ப்பாணத் தமிழர், வன்னித் தமிழர், கொழும்புத் தமிழர், மட்டக்களப்புத்தமிழர், திருகோணமலைத் தமிழர், மன்னார்த் தமிழர், தீவுத் தமிழர் என்று பல பிரிவினைகளைக் காணலாம். இவற்றைச் சுருக்கி மேலோட்டமாக வடக்குத் தமிழர், கிழக்குத் தமிழர், கொழும்புத் தமிழர் எனப்பிரிக்கலாம். இதைவிட அந்தந்தத் தமிழரிடையே சாதிப்பிரிவினைகளையும் காணலாம். யாழ்ப்பாணத்திலுள்ள சாதிப்பிரிவுகளைப் பார்த்தோமேயானால், கலாநிதி.எச்.டபிள்யு. தம்பையாவின் 'The Laws and Customs of The Tamils of Jaffna' என்ற நூலின் படி பிராமணர், வேளாளர் (வெள்ளாளர்), மடைப்பள்ளி, கரையார், சிவியார், குசவர், வண்ணார், அம்பட்டர், கோவியர், தனகாரர், நளவர், பள்ளர், பறையர், துரும்பர் என வகைப்படுத்தப்படுகிறது, இவை செய்தொழில் வேற்றுமையால் ஏற்படுத்தப்பட்ட பிரிவினைகள் பின்பு வம்சாவழி ரீதியாகக் கருதப்பட்டன. இது போன்ற சாதிப்பிரிவினைகளை ஏனைய தமிழர்களிடமும் காணலாம். இப்படியாக இலங்கைத் தமிழர்கள் பிரதேச ரீதியாக, சாதி ரீதியாக பெருமளவு பிரிந்தேயிருந்தனர். இலங்கையில் காணப்படும் பாரம்பரியச் சட்டங்களிலில் யாழ்ப்பாணத்தமிழரின் தேசவழமைச் சட்டமும், மட்டக்களப்புத்தமிழரின் முக்குவச் சட்டமும் குறிப்பிடத்தக்கது, இதில் முக்குவர்ச் சட்டம் காலப்போக்கில் வழக்கிழந்துவிட இன்று வரை எழுதப்பட்ட சட்டமாகிய தேசவழமை தொடர்கிறது. இலங்கைத் தமிழர்களது அரசியலைப் பார்த்தோமேயானால் யாழ்ப்பாண, வன்னி இராச்சியங்களின் பின் ஐரோப்பிய ஆதிக்க காலத்தில் எல்லாம் வேளாளர் (வெள்ளாளர்) இனத்தவரின் ஆதிக்கத்தைக் காணலாம். பேராசிரியர் அம்பலவாணர் சிவராஜா அவர்கள் எழுதிய “இலங்கைத் தமிழர்களின் அரசியலை விளங்கிக் கொள்ளல்” என்ற ஆய்வில் அவர் கூறுவதாவது -

........இலங்கைத் தமிழர்களின் அரசியல் யாழ்ப்பாண இராச்சியக் காலத்திலிருந்து குறிப்பிட்ட குழுவினரால் ஆக்கிரமிக்கப்பட்டு வந்துள்ளதெனக் காண்கிறோம். அதாவது சாதியில் உயர்ந்த வேளாளர்களே அரசியல் ரீதியில் பிரதானமான பதவிகளை வகித்து வந்துள்ளார்கள். இந்நிலை போர்த்துக்கேயர், டச்சுக்காரர் ஆட்சிக்காலப் பகுதிகளிலும் தொடர்ந்தது. பிரித்தானியர் ஆட்சியின்போது இது மிகவும் தெளிவாகியது. இலங்கைத் தமிழர்களுக்குள்ளேயும் யாழ்ப்பாணத் தமிழர்களும் அவர்களிலும் வேளாளர் சாதியமைப்பை சேர்ந்த, நிலவுடைமை, ஆங்கிலக் கல்வி என்பவற்றைப் பெற்றுக்கொண்டவர்களே அரசியலிலும் ஆக்கிரமிப்புச் செலுத்த முடிந்தது........ மிகவும் அண்மைக்காலம் வரை அதாவது தமிழ்த் தீவிரவாதக் குழுக்கள் இலங்கைத் தமிழர் அரசியலைத் தமது கட்டுப்பாட்டின் கீழ் கொண்டுவரும்வரை வேளாள உயர்ந்தோர் குழாமே இலங்கைத் தமிழர்களின், குறிப்பாக யாழ்ப்பாணத் தமிழர்களின் அரசியலை ஆக்கிரமித்து வந்துள்ளது என்பது தெளிவாகிறது. ஆனால், கிழக்கு மாகாணத் தமிழர்களின் அரசியலை முக்குவர் ஆக்கிரமித்ததற்கான சான்றுகள் இல்லை.

ஆகவே இலங்கைத் தமிழர் அரசியலை யாழ்ப்பாணத் தமிழர்கள் ஆதிக்கம் செலுத்தியதைக் காணலாம். இந்நிலை ஆயுதக்குழுக்களின் வருகை வரை தொடர்ந்தது. ஆயுதக் குழுக்களின் வருகையின் பின் சாதி, பிரதேசவாதப் பிரிவுகளில் நிறைய மாற்றம் வந்தது. எல்லாப் பிரதேசத்தைச் சேர்ந்து, எல்லாச்சாதிகளையும் சேர்ந்த இளைஞர்கள் ஆயுதம் தூக்கியதன் விளைவு இலங்கைத் தமிழரிடையே இருந்த பிரிவினைகள் மறக்கப்பட்டு தனித் தமிழீழக் கொள்கை உருவானது. வடக்கு - கிழக்குப் பிரிவினைகள் மூட்டை கட்டப்பட்டு இணைந்த வடகிழக்கையுடைய தமிழீழக் கனவினை இவ்வாயுதக்குழுக்கள், அதிலும் குறிப்பாக பிற்காலத்தில் பலம்பொருந்திய தனி அமைப்பாக விளங்கிய விடுதலைப்புலிகள் அறிமுகஞ்செய்தனர். வடக்குக் கிழக்கில் ஆயுதக்குழுக்களின் அரசியல் ஆக்கிரமிப்பால் ஏனைய கட்சிகள் பலம் இழந்தன, அழிந்தன அல்லது ஆயுதக்குழுவின் கொள்கையை ஆதரித்தன. ஆயுதக் குழுக்கள் பலம்பெற்றிருந்த காலகட்டத்தில் இலங்கைத் தமிழர்களிடையே கொள்கையளவிலாவது பிரிவினை இல்லாதிருந்தது. இலங்கைத் தமிழரை ஒன்றுபடுத்தி அவர்களின் ஒருமித்த கருத்தாக தமிழீழக் கோரிக்கையைக் காட்டவே ஆயுதக்குழுக்களும் அவை சார்ந்த அரசியல் கட்சிகளும் முயன்றன. 2002-2004 காலப்பகுதியில் மலையத் தலைமைகளையும் அதே குடையின் கீழ் இணைக்கவே முயற்சித்தன. கொள்கையளவிலாவது ஒன்றுபட்டிருந்தது இலங்கைத் தமிழர்களுக்கு ஒரு பலமாகவே இருந்தது. இதற்கு பெருஞ்சூத்திரமெல்லாம் அவசிமில்லை நாம் சிறுவயதில் படித்த ஒற்றுமையே பலம் கதையே போதும், இது மனிதவளம், எண்ணிக்கை சார்ந்த பலமாக இருந்தது. விடுதலைப் புலிகள் அமைப்பிலிருந்து கருணாவின் பிரிவினை வரை இந்த கொள்கையளவு ஒற்றுமை ஆயுதக்குழுக்களினால் காப்பாற்றப்பட்டே வந்தது, கருணாவின் வெளியேற்றமும், அதனைத் தொடர்ந்து கருணாவின் கிழக்குத் தமிழர் மைய அரசியலும் மீண்டும் ஒரு வடக்குக்-கிழக்குத் தமிழர் பிரிவினையை உண்டாக்க வித்திட்டது, அதன் தொடர்ச்சிதான் இன்று பிள்ளையானின் கிழக்குமாகாண அரசியல். ஆனால் அவர்களுக்கு மக்கள் கொடுத்ததோ பேரதிர்ச்சி. அண்மையில் நடந்த பொதுத்தேர்தலில் வடக்கு-கிழக்கு இரண்டிலுமே பிள்ளையானின் படுதோல்வியடைந்தது குறிப்பிடத்தக்கது.

இன்று யுத்தம் முடிவுக்குக் கொண்டுவரப்பட்டுள்ள நிலையில் மீண்டும் பிரதேசவாத விஷமப் பிரச்சாரங்கள் சுயநல-அரசியல் தரப்புக்களால் கட்டவிழ்த்து விடப்படுகிறது. மீண்டும் தமிழர்களிடையே பிரதேச வாதப் பிரிவினைகளை உருவாக்கி அதில் தமது சொந்த இலாபங்களைச் சேர்த்துக்கொள்ள சில அரசியல் விஷமிகள் இந்தப் பிரிவனையைத் தூண்டுகின்றன. பழைய அரசியல் கதைகளை மீண்டும் எழுதி குழம்பித் தெளிந்த குட்டையை மீண்டும் குழப்ப விளைகிறார்கள். இவர்களிடம் சில கேள்வி கேட்க என் மனம் விளைகிறது. நீங்கள் சொல்வது உண்மையாகவே இருக்கட்டும் (ஒரு பேச்சுக்கு!) இதைச் சொல்வதன் மூலம் நீங்கள் அடைய நினைப்பது என்ன? மீண்டும் பிரதேச வாதப் பிரிவினையால் தமிழர்கள் சாதிக்கப்போவது என்ன? தமிழர்கள் ஒரு குடையின் கீழ் ஒன்று பட முடியாதா? பழையன கழிதலும், புதியன புகுதலும் வேண்டும். பழைய கதைகளை மீண்டும் ஓதி, குரோதத்தை வளர்த்து, பேராதிக்க சக்திகளின் பிரித்தாழும் தந்திரத்திற்கு இரையாகலாமா?

இன்று பிரதேசரீதியாகப் பிரிவோம், மீண்டும் சாதிகள் ரீதியாகப் பிரிவோம், ஏற்கனவே சிறு பான்மையினம், இனிக் குறுஞ் சிறு பான்மை இனங்களாகப் பிரிந்துபோவோமா? இலங்கைத் தமிழ்மக்கள் பிரிவினைகளைக் களைந்து இன்னும் உறுதியாக ஒன்றுபட வேண்டிய காலம் இது.

****************************************************

References / உசாத்துணை

Tambiah H.W. Dr. 'The Laws and Customs of The Tamils of Jaffna', Women's Education & Research Center Publication 2004.

அம்பலவாணர் சிவராஜா, 'இலங்கைத் தமிழர்களின் அரசியலை விளங்கிக் கொள்ளல் ', கொழும்புத் தமிழ்ச் சங்கம், 2003.

இலங்கையில் இறக்குமதி வரிக்குறைப்பு - ஒரு பார்வை!

noreply@blogger.com (என்.கே.அஷோக்பரன்) — Sat, 12 Jun 2010 10:45:00 +0000

அண்மையில் இலங்கை அரசாங்கம் வாகனங்கள் மற்றும் இலத்திரனியற்பொருட்கள் மீதான இறுக்குமதி வரிகளை கணிசமான அளவு குறைத்துள்ளது. சராசரியாக 50வீதமளவிற்கு இறக்குமதி வரிக்குறைப்பு செய்யப்பட்டிருக்கிறது. பற்றாக்குறை வரவுசெலவையுடைய தேசத்தில் திடீரென அரசாங்கம் 50வீதளமளவிற்கு இறக்குமதி வரியைக் குறைப்பதன் நோக்கமென்ன? இறக்குமதிகள் அதிகரித்தால் பொருளாதாரத்திற்கு நன்மை பயக்காது, ஆக அதனைக் கட்டுப்படுத்தவும், வருமானம் பெறவுமே அரசாங்கம் இறக்குமாதிகளுக்கு வரிவிதிக்கிறது ஆனால் இலங்கையரசாங்கத்தின் இந்தத் திடீர்முடிவுக்குக் காரணமென்ன?

30 வருட யுத்தம் முடிந்து இப்பொழுதுதான் சுமுகமான சூழல் நிலவுவாதாகக் கூறும் அரசாங்கம், இச்சூழலைப் பயன்படுத்தி உள்நாட்டு உற்பத்தி மற்றும் ஏற்றுமதிகளை ஊக்குவிப்பதைவிடுத்து இறக்குமதியை ஊக்குவிக்கும் செயற்பாட்டில் ஈடுபடுவதேன்? இதில் ஏதும் உட்-காரணங்கள் ஒளிந்திருக்குமா? போன்ற சந்தேகங்கள் எழவே செய்கிறது.

சாதாரணமாக கொழும்பில் வசிக்கும், நல்ல வேலையில் இருக்கும், இளைஞர்கள் இந்த வரிக்குறைப்பை ஆவலுடன் வரவேற்கிறார்கள். ஏனெனில் இதுவரை விலைகூடவாக இருந்த வாகனங்களைக்கூட இனி கணிசமானளவு குறைந்தவிலைக்கு வாங்கலாம். உதாரணமாக வரிக்கு முன்னைய பெறுமதி 500000 உடைய 1000cc க்கு குறைந்த இயந்திரவலுவுடைய பெற்றோல் காரொன்று முன்பு வரியின் பின் 1435000 ஆகக் காணப்பட்டது, இப்போது வரிக்குறைப்பின் பின் அதன் விலை 950000 ஆகக்குறைந்துள்ளது. வாகனங்கள் போலவே இலத்திரனியற்பொருட்களின் மீதான இறக்குமதி வரியும் கணிசமானளவு குறைக்கப்பட்டுள்ளது. அதுவும் குறிப்பாக வளிச்சீராக்கி இயந்திரங்கள் (Air Conditioning Machines) மீதான இறக்குமதி வரி 94வீதம் குறைக்கப்பட்டுள்ளது. இனி கொழுத்தும் வெயில்காலத்தில் அநேகமான நடுத்தர வீடுகளும் குளிரூட்டப்பட்டிருக்கும் என எதிர்பார்க்கலாம். இப்படியான விலைக்குறைப்பு நல்லதுதானே என சாதாரண பொதுமகன் சொல்வது கேட்கிறது. என்ன செய்ய இந்தச் சாதாரண பொதுமகன்கள் தானே இந்த அரசாங்கத்தை அரியணையில் இருத்தியவர்கள்! அவர்களுக்குச் சந்தோஷம் ஆனால் அந்த சந்தோஷ மிகுதியில் ரணில் விக்கிரமசிங்ஹ அவர்கள் கூறிய கருத்து ஒன்றும் கூட காற்றோடு காற்றாய் அலட்சியம் செய்யப்பட்டுப் போய்விட்டது. இந்த வரிக்குறைப்பு செய்யப்பட்ட மறுதினம் ரணில் விக்கிரமசிங்ஹ ஒரு கேள்வியெழுப்பியிருந்தார். “பென்ஸ் காரின் விலையைக் குறைத்த அரசால், ரின் மீன் விலையைக்குறைக்க முடியாதா?” என்று அவர் கேட்டிருந்தார். வழமையாகவே ரணிலின் பேச்சை யாரும் பொருட்படுத்தவில்லை ஆனாலும் அதில் அர்த்தம் இல்லாமல் இல்லை. கொஞ்சம் யோசித்துப் பாருங்கள், சிறுபிள்ளைகளுக்குக் கொடுக்கும் பால்மாவிலிருந்து, தினம் உண்ணும் அரிசி முதல் முக்கிய உணவுப்பொருள் இறக்குமதிக்கெல்லாம் வரி விதிக்கப்பட்டிருக்கிறது. இன்றைய அரிசி, சீனி, பருப்பு விலைகளெல்லாம் உச்சஸ்தாயியில் ஏறிக்கொண்டிருக்கிறது ஆனால் இதைக்குறைக்க வேண்டும் என்று எண்ணாத அரசு வாகனங்கள், இலத்திரனியல் பொருட்கள் என்பவற்றின் மீதான வரியினைக் குறைத்ததன் சூட்சுமம் என்ன?கார் மற்றும் ஏனைய சொகுசு வாகனங்களின் மீதான இறக்குமதிவரிகளைக் குறைத்த அரசாங்கம், நடுத்தரப் பொதுமக்கள் அதிகம் பயன்படுத்தும் மோட்டார் சைக்கிள்கள் மீதான இற்குமதி வரியைக் குறைக்காதது ஏன்? இதை யோசிக்கத் தெரிந்தவர்கள் இத்தேசத்தில் பெரும்பான்மையளவில் இருந்திருந்தால் இந்த அரசாங்கமே அரியணையேறியிருக்காது.

இரண்டாவதாக வாகன இறக்குமதியை ஊக்குவிக்கும் முகமாக வரிகளைக் குறைத்த அரசாங்கம் வாகனம் பயணிப்பதற்கான வசதிகள் செய்து கொடுக்கும் திட்டங்களை தொடங்கியிருக்கிறதா? இந்த வரிக்குறைப்பினால் நாட்டுக்குள் வரும் இலட்சோப இலட்சம் வாகனங்களும் இதே வீதிகளிலேயே பயணித்தால் போக்குவரத்து நெரிசல் இன்னும் பலமடங்காகும், அப்படி உருவாகும் நெரிசலை இரும்பு மேம்பாலங்களை 3மாத காலத்துக்குள் போட்டுக்கூடக் கட்டுப்படுத்த முடியாது. இன்று காலைவேளைகிலும், மாலை அலுவலகம் முடியும் நேரங்களிலும் கொழும்பு வீதிகளில் பயணிப்பது என்பது சவலான காரியம், இன்னும் வாகனங்கள் இதே வீதியில் இறக்கப்பட்டால் போக்குவரத்தின் நிலையென்ன? இதற்கான மாற்றுத்திட்டங்களை அரசாங்கம் வகுத்திருக்கிறதா? அப்படி வகுத்தாலும் பாதைகள் பெருப்பிக்கப்பட்ட பின் தான் இந்த வரிக்குறைப்பு நிகழ்த்தப்பட்டிருக்க வேண்டும், அது நீண்டகாலத்திட்டமாக அமுல்ப்படுத்தப்பட்டிருக்கவேண்டும் மாறாக இரவோடு இரவாக வரியைக்குறைப்பது என்பது பொருந்தாத செயல்.

அடுத்ததாக இந்த விலைகுறைந்த காலத்தில் வாகனங்களை வாங்குபவர்கள் யோசிக்க வேண்டிய சில விடயங்கள் இருக்கிறது. முதலாவதாக எரிபொருள் விலை. இன்று வாகன வரிகளைக் குறைத்த அரசாங்கம் சில மாதம் கழித்து கணிணசமான வாகனங்கள் இறக்குமதிசெய்யப்பட்ட பின் எரிபொருள் விலைகளை அதிகரித்தால் என்ன செய்வது என்பதைத் திட்டமிட வேண்டும். அண்மை வருடங்களில் ஒரு லீற்றர் பெற்றோல் 180ரூபாய்கள் வரை கூடியிருந்ததைக் கருத்திற்கொள்ளவேண்டும். ஆக விலை இன்று குறைவு என்பதற்காக வாகனங்களை அவசரப்பட்டு ஆராயாமால் வாங்கிவிட முடியாது. அடுத்ததாக இரண்டாம் சந்தைவிலை. அண்மை வாரங்களில் இரண்டாஞ்சந்தை விலைகள் இந்த வரிக்குறைப்புக் காரணமாக ஓரளவு தளம்பலடையத் தொடங்கியுள்ளன. ஆக இரண்டாஞ்சந்தையில் வாகனம் வாங்க எண்ணியிருப்பவர்கள் இன்னும் சிலவாரங்கள் பொருத்திருக்கலாம். ஆனால் இன்று புதிதாக வாகனங்களை குறைந்த விலையில் இறக்குமதி செய்பவர்கள், எதிர்காலத்தில் எரிபொருள் விலைகள் கூடினால் வாகனங்களின் இரண்டாஞ்சந்தைவிலைகள் குறையும் என்பதையும் யோசிக்கவேண்டும். மேலும் அதிக விலையுள்ள சொகுசு ரக வாகனங்களை வாங்க எண்ணியுள்ளவர்கள், இறக்குமதி வரிமட்டுமே குறைக்கப்பட்டுள்ளது, வருடாவருடம் கட்ட வேண்டிய சொகுசு வாகனங்களுக்கான சொகுசுவரிகள் குறைக்கப்படவில்லை என்பதைக் கருத்தற்கொள்க.

நல்ல குளிர் காலத்தில் குளிர்களி விற்பதைப்போல அரசாங்கமும் வேண்டாத நேரத்தில், வேண்டப்படாத சலுகையை அறிவித்துள்ளது. நாளை இதன் மூலம் அரசாங்கம் இழக்கும் வருவாயை உணவுப்பொருட்கள், உடைகள் மற்றும் ஏனைய அத்தியாவசியத் தேவைகள் மீது இன்னும் அதிக வரி விதிப்பதன் மூலம் மீட்டுக்கொண்டாலும் வியப்பதற்கில்லை.

குறைக்கப்பட்ட இறக்குமதி வரி விபரங்கள் :

சொற்சமர்க் கால ஞாபகங்கள்! - (02) கூர் தீட்டப்படுகிறோம்...

noreply@blogger.com (என்.கே.அஷோக்பரன்) — Tue, 25 May 2010 17:42:00 +0000

இது ஒரு தொடர் பதிவு

இதற்கு முன்னைய அங்கத்தைப் படிக்க : சொற்சமர்க் கால ஞாபகங்கள்! - (01) ஒரு பயணம் தொடங்குகிறது...

முடியாத ஒரு சுற்றுப்போட்டியுடன் எனது றோயல்கல்லூரி விவாத அணிப்பயணம் ஆரம்பமானது. புனித பேதுரு கல்லூரி நடாத்திய அந்த விவாதச்சுற்றுப் போட்டியின் இறுதிப் போட்டிக்கு றோயல் கல்லூரி அணி தெரிவாகியிருந்தது, இறுதிப் போட்டியைப் பின்னொருநாள் நடத்துவோம் என்று கூறியவர்கள் அதன் பின் இன்றுவரை 6 வருடங்களாகியும் இன்னும் நடத்தவேயில்லை. சிலர் தமது விவாத பயணத்தை ஆரம்பிக்கும் முதல் போட்டியின் முடிவை sentimental ஆக நினைப்பது வழக்கம். முதல் போட்டியில் வென்றிருந்தால் நன்று, தோற்றிருந்தால் கவலை ஆனால் எனக்கு எல்லாம் கலந்த ஒரு sentimental உணர்வு!

ஒருவாறு விவாதக் கழகத்திலிருந்து அணிக்குத் தெரிவாகிவிட்டாச்சு இனி ராஜா போல இருக்கலாம் என்று நான் அந்த பதினைந்தாம் வயதில் கட்டிய மனக்கோட்டை உடைய சில நாட்களே தேவைப்பட்டது. அடுத்த பயிற்சி நாளில் எங்களுக்கான பயிற்சிகள் இன்னும் அதிகமாக்கப்பட்டது. முன்னமே குறிப்பிட்டது போல றோயல் கல்லூரி விவாத அணியில் இடம்பெறுவது என்பது இன்னொரு பாடத்தை மேலதிகமாப்க படிப்பதற்குச்சமமானது, அந்த பயிற்சி வகுப்பில் நாம் படிக்கவேண்டிய புத்தகங்கள், எமக்குத் தெரிந்திருக்க வேண்டிய விடயப்பரப்புக்கள், மனப்பாடம் செய்ய வேண்டிய பாடல்கள் என பட்டியல் பட்டியலாக எமக்கு வீட்டு வேலை தரப்பட்டது. அதுவும் இலக்கியத்தில் இன்பம் காணும் senior ஒருத்தர் எங்களுக்கு தந்த இலக்கியப் புத்தகங்களின் பட்டியலைக் கண்டால் பல்கலைக்கழகத்தில் தமிழ் படிப்பவருக்குக்கூட வயிற்றைக்கலக்கும். மிகைப்படுத்திச் சொல்லவில்லை ஆனால் அதுதான் உண்மை. சங்க இலக்கியம் முதல் இன்றைய நவீன இலக்கியங்கள் வரை ஓரளவாவது அனைவரும் தெரிந்திருக்க வேண்டும் என்பதால் அகநானூறு, புறநானூறு, பதிற்றுப்பத்து, சிலப்பதிகாரம், மணிமேகலை, சீவக சிந்தாமணி, குண்டலகேசி, வளையாபதி, திருக்குறள், நாலடியார், கம்பராமாயணம், மகாபாரதம், பாரதியார் கவிதைகள், கண்ணதாசன் கவிதைகள், வைரமுத்து கவிதைகள், சினிமாப் பாடல்கள், புதுக்கவிதைகள், புரட்சிக்கவிதைகள் என்று கட்டுக்கட்டாய் இன்னும் பல (நான் இப்போது ஞாபகப்படுத்த விரும்பாத) இலக்கிய வீட்டுவேலைகள் ஒருபுறம், மறுபுறம் அரசியல் சமூகஞ் சார்ந்த விடயங்கள் பற்றிய வாசிப்புக்களைச் செய்யவேண்டும், அத்தோடு தினமும் பத்திரிகைகள் வாசித்து, அதிலும் குறிப்பாக ஞாயிறு வாரப் பத்திரிகைகள் வாசித்து அவற்றில் வரும் அரசியல், இலக்கியக் கட்டுரைகள் என்பனவற்றில் முக்கியமானவற்றை தொகுக்கவும் வேண்டும். இவ்வளவும் எங்களுக்குத் தரப்பட்டது நாங்கள் தரம் 10 படிக்கும் போது. அன்றைக்கு நாங்கள் எங்களுக்குள் எங்கள் seniors ஐ திட்டடியது போல இதற்கு முன்பு யாரும் திட்டியிருக்கமாட்டார்கள் என்று நினைக்கிறேன். இத்தனை ஆக்கங்களைப் படிக்க வேண்டியிருந்தாலும் இவற்றில் பலதை நான் விருப்புடன் படித்தேன், அதிலும் குறிப்பாக கம்பராமாயணத்தை மிகவும் ஆர்வத்தோடு படித்தேன், கம்பனுக்குப் பிறகு எனக்கு மிகப்பிடித்தது பாரதியார் கவிதைகள். சங்கப் பாடல்களில் புறநானூற்றுப் பாடல்களிலும் எனக்கொரு காதல் பிறந்தது. அரசியல் சமூக விடயங்களைப் படிப்பதில் எனக்கு அவ்வளவு பிரச்சினை இருக்கவில்லை ஏனெனில் ஏற்கனவே நான் அதைப் படித்துக்கொண்டுதான் இருந்தேன். ஆனாலும் நாம் எல்லோரும் எல்லாவற்றையும் படித்தோம் என்று சொல்வதற்கில்லை.அப்படியே seniors அதிகம் கண்டிப்போடு கேட்டால் கூட O/L exam வருது என்று சாக்குச் சொல்லி escape ஆகிவிடுவோம்! ஆனாலும் அந்தக் கண்டிப்பு எங்கள் அறிவிற்கு நிறைய ஊட்டத்தை வழங்கியது என்பது மறுப்பதற்கில்லை.

இதை எழுதிக்கொண்டிருக்கும் இவ்வேளையில் எனது தம்பி அடுத்த மேசையிலிருந்து 10 பாரதியார் கவிதைகளை மனனஞ்செய்து கொண்டிருந்தான், அதுவும் சும்மா அல்ல, இடைவெளிக்கிடைவெளி அந்த வீட்டுவேலையைத் தந்த senior ஐ நன்கு திட்டியபடி. அதைப் பார்த்ததும் எனக்கு ஒரு சின்ன புன்முறுவல் பூத்தது. அடடா நாங்கள் அன்று செய்தததைத் தான் இன்று வருபவர்களும் செய்கிறார்கள், நாங்கள் எங்கள் seniors ஐத் இந்த கண்டிப்புக்காக மனதுக்குள் திட்டினோம், நாங்கள் seniors ஆன போது எங்களையும் சிலர் திட்டித்தானே இருப்பார்கள்! “வாழ்க்கை ஒரு வட்டமடா”! - என்தம்பிக்கும் ஒருநாள் புரியும் இந்த வீட்டுவேலைகளின் அருமை! (எனக்கும் ஒரு நாள் புரிந்தது போல....)

இத்தனை இலக்கியங்கள் படிப்பது மட்டுமல்ல அதை அடுத்த பயிற்சி நாளில் விவாதத்தில் பயன்படுத்தவும் செய்தோம். Theory மட்டுமல்ல Practicals ம் எங்கள் பயிற்சியில் முக்கியம் பெற்றது. அண்மையில் வெற்றியின் சூத்திரம் பற்றிய ஆங்கில நூல் ஒன்றை்ப படிக்கும் போது அதில் குறிப்பிட்டிருந்த ஒரு விடயம், உங்களிடம் எவ்வளவு வளம் இருக்கிறதென்பது பிரச்சினையல்ல, அதை திறமையாகப் பயன்படுத்தும் திறன் உங்களிடம் இருக்கிறதா? என்பதே முக்கியமானது. வெறுமனே புத்தகங்களை வாசித்துவிட்டால் போதாது அந்த அறிவைச் சரியாகப் பயன்படுத்தும் திறன் தான் வெற்றியின் திறவுகோல். நாங்கள் இரண்டையும் இங்கு படித்தக்கொண்டோம்!

இன்றைய கல்வித்திட்டத்தில் இணைப்-பாடவிதானச் செயற்பாடுகளுக்கு முக்கியத்துவம் கொடுக்கிறார்கள், காரணம், நாம் பெறும் ஏட்டுக்கல்வியைப் பிரயோகப் படுத்த அதுவே சந்தர்ப்பமாக அமைகிறது. ஆனால் பல மாணவர்கள் இணைப்-பாடவிதானச் செயற்பாடுகளில் அதிகம் அக்கறைகாட்டாமல் இருப்பது மிகக்கவலையளிக்கிறது. படிப்பதைவிட்டு விட்டு ஏனைய செயற்பாடுகளில் ஈடபடவேண்டும் என்ற தேவையில்லை ஆனால் வெறும் புத்தகங்களும் பரீட்சைகளும், உயர்புள்ளிகளும் மட்டும் வாழ்க்கைக்குத் தேவையானதைத் தந்து விடாது. இந்த உண்மையை நான் உணர்ந்து கொண்டது இந்த அணியில் சேர்ந்ததன் பின்புதான். எனக்கு நல்ல நண்பர்களைத் தந்ததும், தோல்வியைக் கண்டால் துவண்டுவிடும் எனக்கு, அந்தத் தோல்வியையே தோற்கடித்துவிடும் மனத்திடத்தை உண்டாக்கியதும், மனிதர்களைப் படிக்கும் அனுபவத்தைத் தந்ததும் இந்த விவாத அணிதான் என்பதை மகிழ்ச்சியோடு சொல்லுவேன்..... வெற்றி தோல்வி நிறைந்த ஒரு பயணத்தின் ஆரம்பத்திற்கு அருமையான பயிற்சியை விவாத அணி எனக்கு வழங்கியது.....

தேடிச் சோறு நித‌ந்தின்று

பல‌ சின்னஞ் சிறு கதைகள் பேசி

மனம் வாடித் துன்பம் மிக உழ‌ன்று

பிறர் வாடப் பல செயல்கள் செய்து

நரை கூடிக் கிழப்பருவமெய்திக்

கொடுங்கூற்றுக்கிரையெனப் பின் மாயும்

பல வேடிக்கை மனிதரைப் போல்

இவனும் வீழ்வானென நினைத்தாயோ....

- மகாகவி சுப்ரமணிய பாரதி

இரண்டு நிகழ்வுகளும் அவற்றுக்கான இரண்டு பாடல்களும்!

noreply@blogger.com (என்.கே.அஷோக்பரன்) — Thu, 20 May 2010 14:00:00 +0000

அண்மை நாட்களாக இரண்டு பாடல்கள் எனது இசைத்தொகுப்பில் தொடர்ந்து ஒலித்த வண்ணமுள்ளது. இவையிரண்டும் இரண்டு வேறுபட்ட நிகழ்வுகளுக்காக இசைக்கப்பட்ட பாடல்கள்.

முதலாவது செம்மொழி மாநாட்டிற்காக ஏ.ஆர்.ரஹ்மான் இசையமைத்துள்ள பாடல். “செம்மொழியான தமிழ் மொழியாம்....” என்ற இந்த பாடலை கருணாநிதி தொகுத்துள்ளார் (எழுதியுள்ளார் என்பதில் எனக்குடன்பாடில்லை, ஏனெனில் பல வரிகள் எம்பழந்தமிழ் இலக்கியங்களிலிருந்து எடுக்கப்பட்டவையே!) 27 பாடகர்கள் பாடியுள்ளார்கள் மேலும் 15 பேர் பின்னணியில் பாடியிருக்கிறார்கள். 3 தலைமுறை பாடகர்களையும் ஒன்றிணைத்து ரஹ்மான் இந்த பாடலை உருவாக்கியிருக்கிறார்.

பாடியவர்கள்

A. R. ரஹ்மான்
T. M. சௌந்தராஜன்
T. L. மகாராஜன்
P. சுஷீலா
ஹரிஹரன்
நித்யஸ்ரீ மகாதேவன்
சின்ன பொண்ணு
ஸ்ரீநிவாஸ்
ப்ளாஷி
கார்த்திக்
நரேஷ் ஐயர்
சின்மயி
சவீதா மோகன்
ஹரிணி
ஸ்ருதி ஹாசன்
யுவன் ஷங்கர் ராஜா
விஜய் யேசுதாஸ்
குணசேகரன்
T. M. கிருஷ்ணன்
அருணா சாய்ராம்
சௌம்யா
G. V. பிரகாஷ்
ரைஹானா
சுஷீலா ராமன்
காஷ்
பாம்பே ஜெயஸ்ரீ
நாகூர் சகோதரர்கள்

பின்ணனி குரல்கள்

நேஹா
உஜ்ஜைநீ
தேவன்
சரிசி
நிதின் ராஜ்
சகித்
R. விஜய் நாராயண்
DR. நாராயண்
பாக்யராஜ்
சுபிக்ஷா
அனிதா
K. ரேணு
மாயா ஸ்ரீசரண்
கல்யாணி
ரகீப் ஆலம்

இதோ கருணாநிதி தொகுத்த பாடல் வரிகள் -

பிறப்பொக்கும் எல்லா உயிர்க்கும் -
பிறந்த பின்னர், யாதும் ஊரே, யாவரும் கேளீர்!

உண்பது நாழி உடுப்பது இரண்டே
உறைவிடம் என்பது ஒன்றேயென
உரைத்து வாழ்ந்தோம் - உழைத்து வாழ்வோம்

தீதும் நன்றும் பிறர்தர வாரா எனும்
நன்மொழியே நம் பொன் மொழியாம்!
போரைப் புறம் தள்ளி
பொருளைப் பொதுவாக்கவே
அமைதி வழி காட்டும்
அன்பு மொழி
அய்யன் வள்ளுவரின் வாய்மொழியாம்!

ஓரறிவு முதல் ஆறறிவு உயிரினம் வரையிலே
உணர்ந்திடும் உடலமைப்பை பகுத்துக் கூறும்
ஒல்காப் புகழ் தொல்காப்பியமும்
ஒப்பற்ற குறள் கூறும் உயர் பண்பாடு
ஒலிக்கின்ற சிலம்பும், மேகலையும்
சிந்தாமணியுடனே வளையாபதி குண்டலகேசியும்
செம்மொழியான நம் தமிழ் மொழியாம்!

அகமென்றும் புறமென்றும் வாழ்வை
அழகாக வகுத்தளித்து
ஆதி அந்தமிலாது இருக்கின்ற இனியமொழி -
ஓதி வளரும் உயிரான உலகமொழி -
நம் மொழி - நம் மொழி - அதுவே
செம்மொழி - செம்மொழி - நம் தமிழ் மொழியாம்!
வாழிய வாழியவே! வாழிய வாழியவே! வாழிய வாழியவே!

நல்ல இசையுடன் பாடல் ஆரம்பிக்கிறது, ஆனால் செம்மொழி மாநாட்டுப் பாடல் என்ற வகையில் இடையிடையே வரும் ரப் வ(இ)சையை தவிர்த்திருக்கலாம். மேலும் தமிழ் வரிகளைப் பாடியதில் சில பிழைகள் என்காதுக்கு எட்டின. யாதும் ஊரே யாவரும் கேளிர் என்பதில் கேளிர் என்பது கேளீர் என்று பாடப்பட்டிருக்கிறது (அல்லது ஒழுங்காகப் பாடப்பட்டிருந்திருந்தாலும் இசைச் சேர்க்கை, effects சேர்க்கையின் பின் கேளீர் என்றே கேட்கிறது.) மேலும் “பிறப்பொக்கும் எல்லா உயிர்க்கும்” என்பதில் பிறப்பொக்கும் என்பது பிறப்புக்கும் என்றே ஒலிக்கிறது. எமது தமிழ்மொழியின் பெருமை கூறும் வரிகளைப் பிழையாக ஒலிக்கும்படி அமைத்ததில் எனக்கு வருத்தம். மற்றப்படி “வந்தே மாதரம்” அளவிற்கு சிறப்பாக அமையக்கூடிய பாடல் இது. இந்தப் பிழைகளை சீரமைத்து, ரப் வசையை நீக்கிவிட்டால் சிறப்பாக இருக்கும்! இந்த செம்மொழிப் பாடலுக்கு ரப் இசை பொருந்தவில்லை அல்லது பொருத்தமில்லை என்பது என் கருத்து.

இதோ அந்த செம்மொழி மாநாட்டுப் பாடல் :

அடுத்த பாடல் ஃபிஃபா 2010 காற்பந்தாட்ட உலகக்கிண்ணத்தின் Theme பாடல். தென்னாபிரிக்காவில் அடுத்தமாதம் நடைபெறவிருக்கும் உலகக்கிண்ணக் காற்பந்தாட்டப்போட்டிகளைப் பிரபலப்படுத்த ஃபிஃபா உலகக்கிண்ணம் தென்னாபிரிக்கா 2010ன் துணை நிறுவனமான கொககோலா நிறுவனம் சோமாலிய-கனேடிய பாடகரான கேனானின் ட்ரௌபடோ என்ற இசைத் தொகுப்பில் இடம்பெற்ற “வேவின் ஃப்ளாக்” என்ற பாடலைத் தெரிவு செய்துள்ளது. அதனை சில மாற்றங்களுடன் கேனான் ஃபிஃபா உலகக் கிண்ணத்தின் theme பாடலாக வெளியிட்டிருக்கிறார். ஹிப் ஹொப் வகையைச் சேர்ந்த இப்பாடல் அருமையான மென்மைத் துள்ளலாக இருக்கிறது! கடந்த கிரிக்கெட் உலகக்கிண்ணத்திற்கு ஷகி மற்றும் சில மேற்கிந்தியத்தீவுப் பாடகர்கள் இணைந்து வழங்கிய theme பாடல் போல இதுவும் மிகச்சிறப்பாக இருக்கிறது! கேட்டுப்பாருங்கள் :

முகப்புத்தகத்தில் இராமாயணம்!

noreply@blogger.com (என்.கே.அஷோக்பரன்) — Fri, 30 Apr 2010 09:16:00 +0000

FUN Message களை எனக்கு தினந்தோரும் அனுப்பிவைக்கும் குழுமத்திலிருந்து இன்று வந்த மின்னஞ்சல் ஒன்றில் இந்த அருமையான கற்பனை இடம்பெற்றிருந்தது. இராமாயணம் முகப்புத்தகத்தில் இடம்பெற்றிருந்தால் எப்படியிருந்திருக்கும் என்பதை அழகாக உருவாக்கிருக்கிறார்கள். உருவாக்கியது யார் என்று தெரியவில்லை. உங்களை அனைவரோடும் இதைப் பகிர்ந்துகொள்வதில் மகிழ்கிறேன்!

கற்பனை என்பது ஒரு அரிய கலை, அது யாவருக்கும் சிறப்பாக வாய்ப்பதில்லை. இந்த வித்தியாசமான கற்பனைக்குச் சொந்தக்காரருக்கு எனது பாராட்டுக்கள்!

சொற்சமர்க் கால ஞாபகங்கள்! - (01) ஒரு பயணம் தொடங்குகிறது...

noreply@blogger.com (என்.கே.அஷோக்பரன்) — Thu, 29 Apr 2010 07:26:00 +0000

றோயல் கல்லூரி - என் வாழ்வின் முக்கியமான அத்தியாயாம், அது எனக்குத் தந்த இனிமையான விடயங்களில் முதன்மையான அனுபவம் - விவாதம்! நான் றோயல் கல்லூரி விவாதக் கழகத்திற்குத் தெரிவு செய்யப்பட்டது தரம் 9ல். அது வரை பேச்சுப்போட்டிகளில் மட்டுமே நான் பங்குபற்றி வந்தேன். தரம் 9ல் நான் விவாதக் கழகத்திற்குத் தெரிவு செய்யப்பட்டிருந்தாலும், தரம் 10ன் இறுதிக்காலத்தில் தான் விவாத அணியில் உதிரியாக இடம் கிடைத்தது. றோயல் கல்லூரித் தமிழ் விவாத அணி 55 வருட பாரம்பரியமும், தனித்துவமும் கொண்டது, அத்தகைய பெருமையான அணியில் இலகுவில் இடம்பெற்றுவிட முடியாது என்பது வேத்தியர்கள் அனைவரும் அறிந்த உண்மை. சில வேளை கழகத்தில் இணைந்து 2-3 ஆண்டுகள் கழிந்துங்கூட அணியில் இடம்கிடைப்பது நிச்சயமானது அல்ல. தனிப்பட்ட திறமைகளுக்கப்பால், குழுரீதியான ஒருமித்த செயற்பாடுகளே அணித்தெரிவில் முக்கியமாகக் கருதப்படுகிறது - பேச்சுப் போட்டிக்கும், விவாதப் போட்டிக்கும் இடையேயான அடிப்படை வித்தியாசமே அதுதான்.

என்னுடன் ஆரம்பத்தில் என்னுடைய தரத்திலிருந்து (batch) 6 பேர் விவாதக் கழகத்திற்குத் தெரிவுசெய்யப்பட்டார்கள். முதலில் சிவசங்கரனும், நானும், ராகவனும் தெரிவுசெய்யப்பட்டோம். அடுத்த பிரிவில் விசாகனும், முகுந்தராஜீம், ராகுலனும் தெரிவு செய்யப்பட்டார்கள். எங்களுக்கு அடுத்த தரத்திலிருந்து (next batch) கபிலனும், உமாசங்கரனும், அர்ஜீனரும் தெரிவுசெய்யப்பட்டார்கள். ஒவ்வொரு புதன்கிழமையும் 2 மணி முதல் 5 மணி வரை பயிற்சி விவாதங்கள் இடம்பெறும் - ஆனால் அப்போதெல்லாம் அதில் பங்கு கொள்வதில் எனக்கு அவ்வளவு ஆர்வமிருக்கவில்லை, காரணம் மிக எளிமையானது, அங்கு எமக்கு விவாதிக்க வாய்ப்புக் கிடைப்பதே அரிது. எமக்கு முன்னைய தரத்திலிருந்து விவாதக் கழகத்திற்கு யாரும் தெரிவு செய்யப்படாவிட்டாலும், அதற்கு முன்னைய தரத்திலிருந்து விவாதக் கழகத்திலும், அணியிலுமாக மொத்தம் 6 பேரும், அவர்களுக்கு முன்னைய தரத்திலிருந்து ஒருவரும், அதற்கும் முன்னைய தரத்திலிருந்து மூவரும் அணியிலிருந்தனர். ஆகவே அவர்களது பயிற்சி விவாதங்களைப் பார்ப்பதே எங்களின் ஆரம்பகட்டப் பயிற்சி. அன்றைக்கு என்னவோ அதன் அருமையும் அவசியப்பாடும் எனக்குத் தெரியவில்லை - ஒவ்வொரு பயிற்சி நாள் வரும் போதும் ஏதாவது சாக்குப் போக்குச் சொல்லிவிட்டு பாடசாலைவிட்டது வீட்டுக்குப்போய்விடுவேன். இது தரம் 9ன் இறுதிக்காலம் முதல் தரம் 10ன் இடைக்காலம் வரை நடந்தது.

இப்படியே அடிக்கடி பயிற்சிக்கு கட் அடித்துக்கொண்டே இருந்தேன் அதற்காக அன்று எனக்குள் நான் உருவாக்கிக்கொண்ட நியாயம் - சும்மா விவாதங்களில் மற்றவர்கள் பேசுவதைக் கேட்பதால் பயனில்லை - எங்களைப் பேச விட்டால்கூடப் பரவாயில்லை. ஆனால் பின்பு மற்றவர்களின் விவாதங்களைப் பார்க்கக்கிடைக்காதா என்று நான் எண்ணி வருந்திய காலங்கள் நிறைய வந்தது (அவை பற்றியும் அதற்கான காரணங்கள் பற்றியும் பின்னர் எழுதுகிறேன்). இவ்வாறே அடிக்கடி கட் அடித்துக்கொண்டிருந்த எனக்கு ஒரு முறை ஒரு பயிற்சி விவாதத்திற்குப் போனபோது தான் புதிய ஒரு செய்தி கிடைத்தது, அதாவது எங்களுடைய தரத்திலிருந்து சிறப்பாகச் செயற்படும் விவாதிகள் விரைவில் விவாத அணியில் அறிமுகப்படுத்தப்படலாம் என்பதே அது. எனக்கோ எப்படியாவது நான் அணியில் இடம்பிடித்துவிட வேண்டும் என்கிற ஆர்வம், ஆனால் என்னுடைய தரத்திலிருந்தே போட்டிக்கு 5 பேர் இருந்தார்கள். இந்த ஐவரில் நான் மிகக்கடினமான போட்டியாகக் கருதியது சிவசங்கரனையும், விசாகனையும் தான். சிவசங்கரன் கடுமையான விவாதியல்ல ஆனால் குளிர்மைகவே தான் சொல்லவந்ததைச் சொல்லிவிடக்கூடிய திறமைசாலி. விசாகன் இன்னும் வித்தியாசமானவன், நகைச்சுவை, நக்கல் மற்றும் கவித்துவமான வரிகள் என விவாதத்தை ஜனரஞ்சகப்படுத்துவதில் வல்லவன், இன்று வரை நான் கண்டு வியக்கும் விவாதிகளில் ஒருவனும் கூட, அவன் என்னுடைய இனிய நண்பன் என்பதில் மகிழ்ச்சி ஆனால் அந்த நெருங்கிய நட்புக்கு அத்திவாரமிட்டது இந்த விவாத அணிதான். இவர்கள் இருவரும் கடுமையான போட்டியாக இருக்க, உண்மையைச் சொல்லவேண்டுமென்றால் நான் கொஞ்சம் பயந்துதான் போனேன், இவ்விருவரை விட எனக்கு இருந்த ஒரே advantage நான் அதிகளவில் பேச்சுப் போட்டிகளில் பங்குபற்றியிருந்ததுதான். ஆனால் ஒன்று அந்த அறிவிப்பு வந்த நாள் முதல் எனது புதன்கிழமைகள் விவாதத்திற்காகவே அர்ப்பணிக்கப்பட்டன.

நான் பல விவாத அணிகளைப் பின்னைய நாட்களில் அதிகமாகக் கண்டிருக்கின்றேன். அவற்றிற்கும் றோயல்கல்லூரி விவாத அணிக்குமான வித்தியாசத்தைத் தேடிப்பார்க்கையிலே தான் சில அடிப்படை வேறுபாடுகள் எனக்குத் தெட்டத்தெளிவாகத் தென்பட்டன. அநேகமான பாடசாலைகள் சனிக்கிழமை விவாதப் போட்டியென்றால், வெள்ளிக்கிழமைதான் தமது அணிகளைத் தெரிவுசெய்கின்றன. ஆனால் எம்மைப் பொறுத்தவரை அந்தக் கட்டகம் வித்தியாசமானது, தெரிவுச்சுற்றுகள் பாடசாலை மட்டத்தில் நடத்தப்பட்டு, சிறப்பானவர்கள் கழகத்திற்குத் தெரியப்பட்டு, அதிலிருந்து பயிற்சிக்காலத்தில் சிறப்பாகச் செயற்படுபவர்கள் அணிக்குத் தெரிவுசெய்யப்படுகிறார்கள், இதனால் எங்கள் அணியில் ஒரு consistency இருப்பதைக் காணமுடியும். சில பாடசாலைகள், ஒரு சில ஆண்டுகளுக்கு முன்பு சிறப்பான, மிகச் சிறப்பான அணிகளைக் கொண்டிருந்தன ஆனால் அந்த அணியிலே இருந்தவர்கள் பாடசாலைக்காலம் முடிந்து போய்விட்டதும் அந்த அணியும் மறைந்துவிடும். கடந்த 5 ஆண்டுகளும் அப்படி மறைந்து போன அணி என்றால் வத்தளை புனித அந்தோனியார் கல்லூரி அணியைக் குறிப்பிடலாம், 2004-06 காலப்பகுதியில் விவாதப் போட்டிகளில் இருக்கும் மிகச்சவாலான அணியாக அது காணப்பட்டது, ஆனால் பின்பு அவ்வணி போட்டிகளில் பங்கேற்பதே அரிது. இதுபோலவே புனித சூசையப்பர் கல்லூரி அணியும். அன்று விவாதப் போட்டிகள் மீது இருந்த craze இப்போது குறைந்துவிட்டதோ என்றே தோன்றுகிறது....

றோயல் கல்லூரி விவாதக் கழகத்தில் இணைவது இன்னொரு extra பாடம் ஒன்று படிப்பது போன்றது. பயிற்சியின் ஆழம் அதற்காகப் படிக்கவேண்டிய விடயங்கள் என பிழிந்து எடுத்துவிடுவார்கள் seniors. மிகக்குறுகிய காலத்துள் தமிழ் இலக்கியம், அரசியல் என நிறைப் புத்தகங்களைப் படிக்க நிர்ப்பந்திக்கப்பட்டோம் (அதன் நன்மை பின்புதான் எமக்குப் புரிந்தது). நான் கம்பராமாயணத்தைப் படிக்கத் தொடங்கியதும் இப்படித்தான், சங்க இலக்கியங்களை நயக்கத் தொடங்கியதும் இப்படித்தான். எங்கள் காலகட்டத்தில் இலக்கிய விவாதங்களில் சிறந்த அணியாக நாங்கள் விளங்கினோம் என்பதை நான் பெருமையோடு சொல்வேன், அதற்கான அடித்தளம் எங்கள் பயிற்சிக் காலத்தில் தான் இடப்பட்டது.

சரி, அணித்தெரிவுப் போட்டிக்குப் போவோம் - உண்மையில் அது போட்டியேயல்ல, எங்களிடையே போட்டியை ஏற்படுத்துவது எங்கள் seniors ன் நோக்கமுமல்ல, அவர்கள் சும்மா கொடுத்த அந்த hint ஐ நான் தான் போட்டியாகக் கருதிவிட்டேனோ என்று எனக்குத் தோன்றியது. எது எப்படியோ, அதன் பின் ஒவ்வொரு புதனும் விவாதப்பயிற்சிகளுக்குச் சென்றேன், இடையில் ஒரு முறை எமக்கும் விவாதிக்கும் வாய்ப்புக் கிடைத்தது, ஆனால் அந்தத் திடுக்கிடும் அதிர்ச்சியை நாம் யாரும் எதிர்பார்க்கவில்லை என்னுடைய அதிர்ஷ்ட நேரம் தலைப்போ அரசியல் சம்பந்தமானது, அதுவும் அமெரிக்க ஏகாதிபத்தியம் சம்பந்தமானது, பிய்த்த உதறிவிட்டேன் என்று நம்புகிறேன். தொடர்ந்தும் அடிக்கடி எமக்குப் பயிற்சி விவாதங்களில் ஈடுபட வாய்ப்புக்கள் மலரத் தொடங்கியது கூடவே எனக்கு விவாதத்தின் மீதான அதீத பற்றும் மலரத்தொடங்கியது.

தரம் 10ன் இறுதிக்காலம் என்று நினைக்கின்றேன், புனித பேதுருக் கல்லூரியின் தமிழ் இலக்கிய மன்றத்தினால் நடத்தப்பட்ட விவாதப் போட்டியில் எனது அணியில் 6வது விவாதியாக (உதிரி விவாதி) அறிமுகம் பெற்றேன். அந்தத் தொடரில் வாதிடும் வாய்ப்பு எனக்குக்கிடைக்கவில்லை. அந்தத் தொடரின் இறுதிப்போட்டிக்கு எமது அணி தகுதி பெற்றது ஆனால் இறுதிப் போட்டியை வேறொருநாள் நடத்துவதாகக் கூறியவர்கள் இன்று வரை நடத்தவேயில்லை. ஆக முடியாத ஒரு விவாதச் சுற்றுப்போட்டியுடன் எனது விவாத அணிப்பயணம் தொடங்கியது......

பலருக்குக் காதலைப் பற்றி எழுதும் போது மகிழ்ச்சி பிறக்கிறது, எனக்கு நான் காதலித்த விவாதத்தைப் பற்றி, அந்த இனிய ஞாபகங்களை மீட்டுவதில் ஒரு மகிழ்ச்சி!

இனிய தமிழ்-சிங்களப் புத்தாண்டு நல்வாழ்த்துக்கள்!!

noreply@blogger.com (என்.கே.அஷோக்பரன்) — Wed, 14 Apr 2010 06:38:00 +0000

அனைவருக்கும் இன்பம் பொங்கும் விகிர்தி வருடப்பிறப்பு நல்வாழ்த்துக்கள்!!

2010 ஜனவரி 26ம் அடுத்த இலங்கை ஜனாதிபதியும் - பகுதி 04

noreply@blogger.com (என்.கே.அஷோக்பரன்) — Mon, 25 Jan 2010 08:34:00 +0000

நாளை இலங்கையின் தலையெழுத்தை மட்டுமல்ல மக்களின் நிலையையும் தீர்மானிக்கவிருக்கும் முக்கியமான தேர்தல். எத்தனையோ தேர்தல்களைக் கண்டிரக்கின்றேன், தேர்தல் காலப் பிரச்சாரப் பணிகளில் கூட ஈடுபட்டிருக்கின்றேன், தேர்தல் அரசியலின் உள்ளும் புறமும் பற்றி குறிப்பிட்டளவு தெரிந்து வைத்திருக்கின்றேன் ஆனால் இந்தத் தேர்தல் போன்ற படு மோசமான, கேவலமான தேர்தல் காலத் “தந்திரங்கள்” நிறைந்த தேர்தலை நான் கண்டதேயில்லை. அத்தளை தூரத்திற்கு குறிப்பாக அரசாங்கம் வளங்களைத் துஷ்பிரயோகம் செய்து பிரசாரப் பணிகளில் ஈடுபட்டுவருகிறது இதன் உச்சகட்டமாக இந்த நாட்டின் தேர்தல்கள் ஆணையாளர் அழாத குறையாக இப்படிநடந்துகொள்ளவேண்டாம் என்று வேண்டிக்கொண்டதும், இறுதியில் இவர்களின் நடத்தையைக் கட்டுப்படுத்தமுடியாது இதுவே தனது இறுதித் தேர்தல் என்றும் தேர்தலின் பின் தான் பதிவி விலகுவதாகவும் தேர்தல்கள் ஆணையாளர் அறிவிக்குமளவிற்கு படு கேவலமான அரசியல் அரங்கேறிக்கொண்டிருக்கிறது.

சிந்தித்துப பாருங்கள் - தேர்தல்கள் ஆணையாளரே இப்படி விரக்தியடையும் நிலையில் தேர்தல் நடக்கிறதென்றால் அது எத்தனை தூரம் நியாயமான தேர்தலாக அமையும்? மறுகையில் தேர்தல் நாடகங்கள் பல மேடையேறிய வண்ணமுள்ளது அதுவும் குறிப்பாக மக்களை ஏமாற்றும் அல்லது தவறாக வழிகாட்டும் முகமாக கையேடுகளும், போலித் தேர்தல் வாக்குச்சீட்டுக்களும் எல்லாவற்றிற்கும் உச்சமாக இலங்கையின் தலைசிற்ந்த தமிழ் தினசரிகள் போன்று போலித் தினசரிப் பத்திரிகைகளையே அச்சிட்டு வெளியிடுமளவுக்கு ஈனத்தனமாக நடந்துகொள்கிறார்கள். குறிப்பாக தினக்குரல், வீரகேசரி ஆகிய பத்திரிகைகள் போலப் போலிப் பத்திரிகைகள் அச்சிட்டு தமக்குச் சார்பான செய்திகளை வெளியிட்டு தமது கேவலத்தை நிரூபித்திருக்கிறார்கள். இது ஒருபுறமிருக்க மலையகத்தில் போலி வாக்குச் சீட்டுக்களை கட்டவிழ்த்து விட்டு அந்த அப்பாவி மக்களை ஏமாற்றியிருக்கிறார்கள். அதிலும் குறிப்பாக சரத் ஃபொன்சேகா அன்னமல்ல தாராச்சின்னம் என மிகக்குழறுபடியான மக்களைக் குழப்பும் முகமான தேர்தல் சிட்டைகளை விநியோகித்திருக்கிறார்கள் - இந்த வதந்தி இணையத்திலும் பெருமளவில் பரப்பப்பட்டது (அதை நானும் நம்பியது - மிகவும் வருத்தம் தருகிறது).

இப்படியாக நாகரீகமற்ற முறையில் தேர்தல் பிரசாரங்கள் முடுக்கிவிடப்பட்ட நிலையில் அரச ஊடகங்கள் தாம் “பொது ஊடகம்” என்பதை மறந்து ஆட்சியாளரின் ஊடகமாக மாறி பொய்களையும் கட்டுக்கதைகளையும் கட்டவிழ்த்துவிட்டு வருகிறது. இவற்றையும் விட தொலைபேசிகள், குறுஞ்செய்திகள் ஊடாகவும் போலியான தகவல்கள் பரப்பப்பட்டு வருகிறது. இவையனைத்தும் பதிவியிலுள்ள ஜனாதிபதிக்குச் சார்பான தகவல்களாகவே இருக்கிறது.

இவ்வளவு தூரம் அசிங்கமான வேலைகளில் ஈடுபட்டுத்தான் தேர்தலை வெல்லவேண்டுமென்றால் தனது பதவிக்காலம் முடிவதற்கு 2 வருடகாலம் முன்பே ஜனாதிபதித்தேர்தலை நடத்த மஹிந்த ராஜபக்ஷ முடிவெடுத்தது ஏன்? உண்மையிலே இந்தத் தேர்தல் இவ்வளவு கஷ்டமாக இருக்கும் என்று அவர் கனவிலும் நினைத்துப்பார்த்திருக்க மாட்டார். யுத்த வெற்றி என்ற பிரம்மாஸ்திரத்தை வைத்துக்கொண்டே தேர்தலிலும் வெற்றிபெற்று விடலாம் என்பது தான் அவர் கணிப்பாக இருந்தது. ஆனால் சரத் ஃபொன்சேகா போட்டிக்கு வந்தபோது கூட மஹிந்த பெரிதாகக் கலங்கியிருக்கமாட்டார் ஆனால் சரத் யுத்த வெற்றி என்ற மஹிந்தவின் பிரம்மாஸ்திரத்தைப் பங்குபோட்டதோடில்லாமல், இலஞ்சம், ஊழல், இனப்பிரச்சினை, அகதிகள் என மஹிந்தவிற்கு எதிரான அஸ்திரங்களை ஏவத்தொடங்கியபோதுதான் மஹிந்த ராஜபக்ஷவிற்கு இந்தத் தேர்தலின் ஆழம் புரிந்தது. அதுவும் உள்ளுக்குள் விரக்தியால் புழுங்கிக்கொண்டிருந்த மக்களுக்கு சரத் நம்பிக்கை ஒளியாக வந்ததும் தான் மஹிந்த விழித்தக்கொண்டார் - அதன் பின் ஆரம்பமான அதிஅதிஅதிதீவிரப் பிரச்சார நடவடிக்கைகள் மூலம் எப்படியாவது, என்னசெய்தாவது பதிவியைக் காப்பாற்றிக்கொள்ளப் போராடுகிறார் - அதற்காக அசிங்கமான - நாகரீகமற்ற கருத்துக்களை விளம்பரமாகவும், பிரச்சாரக்கூட்டங்களிலும் சொல்வது அபத்தமானது. இன்று மஹிந்த ராஜபக்ஷவின் பிரதான அஸ்திரமாக மாறியிருப்பது சரத்-சம்பந்தன் ஒப்பந்தம் - அதை ஏதோ தமிழீழப் பிரிவினையொப்பந்தம் போல வர்ணித்து பேசிக்கொண்டிருக்கிறார்கள் ஆனால் உண்மையில் அப்படி ஒப்பந்தமேதும் இல்லை என மறுதரப்பு உறுதியாகக் கூறுகிறது. மேலும் தமிழ்த் தேசியக்கூட்டமைப்பை விடுதலைப்புலிகளின் பிரதிநிதிகள் என அரசு வர்ணிக்கிறது. விடுதலைப் புலிகளின் முன்னாள் தலைவர்களை அமைச்சர்களாக வைத்துக்கொண்டிருக்கும் அரசாங்கத்துக்கு கூட்டமைப்பைப் பற்றி இவ்வாறு கூற என்ன அருகதையிருக்கிறது? ஒருவேளை கூட்டமைப்பு மஹிந்தவை ஆதரித்திருந்தால் அவர்கள் நல்லவர்களாக, செல்லக்குழந்தைகளதக இருந்திரு்பபார்கள் மாறாக சரத்தை ஆதரித்ததனால் விடுதலைப்புலிகளுக்கு மறுவாழ்வளிப்பவர்களாகச் சித்தரிக்கப்படுகிறார்கள்.

தமிழ் மக்கள் இன்று முடிவெடுப்பதில் தயக்கம் காட்டுகிறார்கள் - காரணம் அங்கொன்றும், இங்கொன்றுமாக வரும் முரண்பட்ட கருத்துக்கள். குறிப்பாக புலம்(ன்) பெயர்ந்த தமிழர்கள் எனக் கூறிக்கொள்வோர் சிலர் தேசப்பற்று பற்றியும், அரசாங்கத்திற்கு ஆதரவு பற்றியும் அறிக்கை விடுகிறார்கள். என்னடா இது இப்படி நடக்கிறார்களே என்று தேடித்துருவிப்பார்த்ததில் உண்மை புரிந்தது. அதாவது அப்படிச் சொல்வோரில் பலர் வெளிநாடுகளில் அகதி அந்தஸ்த்தில் இருப்பவாகள் ஒரு வேளை நாடு சுமுகமான நிலைக்குத்திரும்பினால் அவர்களுக்கு மீண்டும் இலங்கைக்குத் திரும்பிவர நேரிடும், ஆக தமிழருக்கு இலங்கையில் பாதுகாப்பான சூழல் இல்லை என்று காட்டும் வரைதான் அவர்கள் அங்கே பிழைக்கமுடியும். இது தான் அப்பட்டமான உண்மை. ஆக இலங்கை ஒரு அமைதியான, சுபீட்சமான தேசமாக மாறுவதில் அவர்களுக்குக் கொஞ்சம் பயம் இருக்கத்தான் செய்கிறது. அந்த ஒருசிலருக்காக இந்த நாட்டில் இருந்து சிரமப்படும் மக்களெல்லாம் அவல வாழ்க்கையைத் தொடர வேண்டுமா? - யோசியுங்கள். (நான் எல்லாப் புலம் பெயர்ந்த தமிழர்களையும் குறிப்பிடவில்லை ஆனால் இலங்கைத் தமிழர் பிரச்சினையை வைத்துப் பிழைத்தக்கொண்டிருப்போரையே குறிப்பிடுகிறேன்)

இந்தத் தொடரை முடிக்கமுன் இறுதியாக ஒன்று - இதுவரை நான் இவ்வளவு வெளிப்படையாக எழுதியதில்லை - இன்று எழுதலாம் என்னும் சுதந்திர உணர்வும் நம்பிக்கையும் துளிர்விட்டிருக்கிறது - நாளை மறுதினமே அந்த நம்பிக்கை கொழுந்திலேயே கிள்ளியெறியப்படலாம் அல்லது இன்னும் வளர்ச்சிக்கான ஒளிபிறக்கலாம் எல்லாம் தேர்தல் முடிவுகளில் தங்கியிருக்கிறது. சிலபேர் அமெரிக்கா, சீனா அது, இது என்றெல்லாம் அதிகம் யோசிக்கிறார்கள் என்னைப் பொருத்தவரை ஒரு மனித குலத்தின் வளர்ச்சிக்கு அத்தியாவசியமான உரிமைகளும், சுதந்திரங்களும் இருந்தாலே போதும் அந்த மனிதக் கூட்டம் விரைவில் வளர்ச்சியடைந்துவிடும். உரிமைகள் மட்டுறுத்தப்பட்ட, சுதந்திரம் எல்லைப்படுத்தப்பட்ட நிலையில் வாழ்வது கடினம் என்பது யாவருக்கும் புரிந்ததே ஆகையில் இந்நிலை தொடரவேண்டுமா இல்லை மாற்றம் வேண்டுமா என்று நாம் தான் முடிவெடுக்கவேண்டும்.

நான் சரத் ஃபொன்சேகா ஆதரவாளனா? இல்லை நிச்சயமாக இல்லை. நான் யாருக்கும் ஆதரவாளன் அல்ல ஆனால் கொள்கைகளின் ஆதரவாளன். ஏமாற்றுக்கள், போலிப்பித்தலாட்டங்களற்ற கொள்கைகளை மதிப்பவன். இம்முறை நான் சரத் ஃபொன்சேகாவின் தரப்பில் நியாயத்தைக் காண்கிறேன் - நிறைவேற்றதிகார ஜனாதிபதிமுறையை ஒழித்தல், பாராளுமன்றத்தை மையப்படுத்திய அரசை உருவாக்குதல் ஆகியவற்றை விரும்புகிறேன். சரத் ஃபொன்சேகாகூட பல பிரச்சினைகளுக்கு முழுமையான தீர்வு பற்றி தனது விஞ்ஞாபனத்தில் குறிப்பிடவில்லை ஆனால் அதற்குள் மறைந்துள்ள .ராஜதந்திரத்தை உணர்கின்றேன். உள்ளதுக்குள்ள வள்ளிசாய் சரத் ஃபொன்சேகாவைத் தெரிகிறேன் அவ்வளவே.

ஒருவேளை 27ம் திகதி பித்தலாட்டங்களும், ஏமாற்றுவேலைகளும் வெற்றிபெற்றுவிட்டால் - என் (எனது மட்டுமல்ல யாவருடையதும்) சுதந்திரம் மீண்டும் உறங்கிவிடும்..... அடுத்தத் தேர்தல் திகதி வரை (8 வருடங்கள்) நம்பிக்கை கூட கோமா நிலைக்குச் சென்றுவிடும் ஆனால் உயிருடன் இருக்கும் ஏனென்றால் நம்பிக்கைகள் மீது எனக்கு அளவற்ற நம்பிக்கை இருக்கிறது.

முற்றும். (ஆனால் தொடரும்....)

பி.கு. இதை எழுதும் போது நான் இருந்த மனநிலை கொஞ்சம் குழப்பகரமானது. ஒரு மனிதனுக்கு எது பறிபோனாலும் பரவாயில்லை ஆனால் சுதந்திரமும், உரிமைகளும் பறிபோய்விடுமோ என்ற பயம் வந்துவிட்டால் மனம் துடிக்கும் வேதனை சொல்வதற்கரியது. அந்த பயம் மனத்தினைக் குழைத்துச் சரித்தாலும் நம்பிக்கை என்னும் விதை வேர்கொண்டிருக்கிறது.... அந்த நம்பிக்கையுடன் இருக்கின்றேன்...

2010 ஜனவரி 26ம் அடுத்த இலங்கை ஜனாதிபதியும் - பகுதி 03

noreply@blogger.com (என்.கே.அஷோக்பரன்) — Fri, 15 Jan 2010 18:09:00 +0000

ஜனாதிபதித் தேர்தல் பிரசாரங்கள் சூடு பிடித்துள்ள இந்நிலையில் எனது தொடர் பதிவின் 3வது பகுதியைப் பதிவதில் கொஞ்சம் தாமதம் ஏற்பட்டதற்கு வருத்தத்தைத் தெரிவித்துக்கொண்டு தொடர்கிறேன்.

கடந்த பதிவைச் சில கேள்விகளுடன் முடித்திருந்தேன்...

அடுத்த ஜனாதிபதியாக ஃபொன்சேகாவால் வர முடியுமா? அவரது கொள்கை என்ன? தமிழர்கள் அவரை நம்பலாமா? சிறுபான்மையினர் தொடர்பான அவரது நிலைப்பாடு என்ன? ஒரு வேளை சிறுபான்மையினர் ஃபொன்சேகாவை ஆதரிப்பது இஞ்சி கொடுத்த மிளகாய் வாங்கிய கதையாகுமா?

இன்று தமிழ்த்தேசியக் கூட்டமைப்பு, முஸ்லிம் காங்கிரஸ், ஜனநாயக மக்கள் முன்னணி என்பவற்றோடு இலங்கைத் தொழிலாளர் காங்கிரஸிலிருந்து பிரிந்த சிலர், அரசாங்கத்திலிருந்து பிரிந்துவந்த சிறுபான்மைப் பிரதிநிதிகள் என அநேக சிறுபான்மையினங்களின் பிரதிநிதிகள் சரத் ஃபொன்சேகாவுக்கு ஆதரவளித்திருக்கும் இந்நிலையில் சிறுபான்மையினர் எவ்வளவு தூரம் அவரை நம்பலாம் என்பது சிறுபான்மையினர் எவ்வளவு தூரம் தமது பிரதிநிதிகளை நம்பலாம் எனும் நிலைக்குத் திரிபடைந்துள்ளது. விரிவாகக்கூறின் இன்று தமிழர்கள் ஒரு முன்னாள் இராணுவத் தளபதியை ஆதரிக்க நிச்சயம் தயக்கம் காட்டுவார்கள் ஆனால் அதை மீறியும் சரத் என்ற தனிநபருக்கு ஆதரவு அளிக்க அந்தத் தனிநபர் மீதான நம்பிக்கையை விட அவரை ஆதரிக்கும் நம்பிக்கைக்குரிய தலைவர்கள் மீதான நம்பிக்கையின் பேரிலேயே வாக்களிக்கவுள்ளார்கள் என்பது நிதர்சனம். இலங்கையின் எந்த ஜனாதிபதித் தேர்தலை விடவும் இம்முறைத் தேர்தல் மிகவும் சிக்கலான நிலையை சிறுபான்மையினருக்கு மட்டுமன்றி பெரும்பான்மைச் சிங்களவர்களுக்கும் ஏற்படுத்தியிருக்கிறது. இலங்கை வரலாற்றில் தமிழர்களும், சிங்களவர்களும் இணைந்து நம்பி வாக்களித்த தலைவர்கள் கடைசியில் தமிழர்களுக்கு ஏமாற்றத்தையும் விரக்தியையுமே அளித்துள்ளார்கள் என்பது வரலாறு கூறும் கதை (உதாரணம் - ஜே.ஆர், சந்திரிக்கா) ஆனால் இம்முறை தமிழர்களாகட்டும், முஸ்லிம்களாகட்டும் சரத் ஃபொன்சேகாவிற்கு வாக்களிக்கப்போகின்றார்கள் என்றால் அதன் காரணம் சரத் மீது கொண்ட நம்பிக்கை என்பதைவிட அவரை ஆதரிக்கும் தமது நம்பிக்கைக்குரிய தலைவர்கள் மீதான நம்பிக்கையே ஆகும். தமிழர்களைப்பொருத்தவரை கூட்டமைப்பு, மனோகணேசன் மற்றும் ரணில் விக்ரமசிங்ஹ மீதான நம்பிக்கையிலேயே மக்கள் சரத்திற்கு வாக்களிக்கப் போகின்றார்களேயன்றி அது சரத் மீதான முழு நம்பிக்கையினால் அல்ல.

அண்மையில் எனக்கு முதலில் அதிர்ச்சி கொடுத்த விடயம் சரத் ஃபொன்சேகாவின் தேர்தல் விஞ்ஞாபனமான “விஷ்வாசனீய வெனசக்” - நம்பிக்கையான மாற்றம். 10 முக்கிய அம்சங்களை முன்வைத்திருக்கும் ஃபொன்சேகா அதில் இனப்பிரச்சினைக்கான தீர்வு பற்றிய உறுதியான தீர்வேதும் பற்றிக் கூறாதமை பற்றி நான் முதலில் அதிர்ச்சியடைந்திருந்தேன் ஆனாலும் அதற்கான காரணத்தை ஊகிக்க நீண்ட நேரம் பிடிக்கவில்லை. முன்னர் குறிப்பிட்டது போல இம்முறை ஜனாதிபதித் தேர்தல் மிகவும் சிக்கலானதாக இருக்கிறது. இம்முறை தேர்தல் பிரச்சாரத்தின் முதுகெலும்பாக அமைவது “யுத்த வெற்றி” - அதைப் பெற்றுக்கொடுத்தது மஹிந்தவா? சரத்தா? என்பது தான் ஆரம்ப கட்டப் பிரச்சாரமாக இருக்கிறது. இந்நிலையில் சிங்கள மக்களைப் பொருத்தவரையில் யத்த வெற்றி தொடர்பில் இருவரும் சமமான நிலையிலேயே கருதப்பட்டாலும் மாற்றம் ஒன்று அவசியம் - ஊழலற்ற தேசம் வேண்டும் என்ற நோக்கத்துக்காக சரத்தை அவர்கள் ஆதரிக்கலாம் இந்நிலையில் மஹிந்த ராஜபக்ஷ தன்னுடைய மஹிந்த சிந்தனை 2ல் இனப்பிரச்சினைத் தீர்வு தொடர்பாக ஏதும் குறிப்பிடாத நிலையில் சரத் ஃபொன்சேகா அது பற்றித் தனது தேர்தல் விஞ்ஞாபனத்தில் குறிப்பிட்டிருந்தால் உடனே அரசாங்கமும், அரச ஊடகங்களும் அடித்துப்பிடித்தக்கொண்டு தேசத்தை சரத் துண்டாக்கப்போகிறார் தமிழருக்கு தனிநாடு கொடுக்கப்போகிறார் எனப்பிரச்சாரப் பீரங்கிகளை இயக்கத்தொடங்கிவிடுவார்கள் - இது சரத்தின் வாக்கு வங்கியைப் பெரிதும் பாதிக்கும். இது நடக்கும் என்பதற்கு உதாரணத்தை நாம் இங்கு எமது கண்முன்னே கண்டு கொண்டுதான் இருக்கிறோம். கூட்டமைப்பக்கும்-சரத்துக்கும் இடையில் இரகசிய ஒப்பந்தம் - அதை வெளிப்படுத்துக என அரசாங்கம் இப்போது பிரச்சாரத்தில் ஈடுபடுவதும், பாராளுமன்ற உறுப்பினர் துரைரட்ணசிங்கம் கூறிய கருத்தை வைத்தக்கொண்டு விளம்பரம் செய்து சரத் தமிழருக்கு சுயாட்சி கொடுக்கப்போகிறார் என விளம்பரம் செய்வதையும் காணக்கூடியதாக இருக்கிறது. இந்நிலையில் அவர்களின் ராஜதந்திரத்தைப் புரிந்துகொள்வது அவசியம் என நான் எண்ணுகிறேன். ஏனெனில் தமிழர் அல்லது முஸ்லிம்கள் ஃபொன்சேகாவிற்கு அளிக்கும் வாக்குகளுக்கு அவரை ஆதரிக்கும் சிறுபான்மைத் தலைவர்களே நம்பிக்கைப் பொறுப்பாளர்கள்.

மேலும் சரத் ஃபொன்சேகாவைவிட உறுதியான வேறு வேட்பாளர் இல்லாமையை குறிப்பிட்டே ஆகவேண்டும். சிலர் விக்கிரமபாகுவையும், சிவாஜிலிங்கம் பற்றியும் குறிப்பிடலாம். என்னுடைய முழுத்திறனையும் பந்தயத்திலிட்டு சவாலிடுகிறேன் இந்தத் தேர்தலல்ல, எந்தத் தேர்தலிலும் விக்கிரமபாகுவால் வெற்றி பெற முடியாது - விக்கிரமபாகு தமிழருக்காகக் குரல் கொடுத்தார் என்பார்கள் - நான் ஏன் என்று யோசித்தென். விக்கிரமபாகு சிங்களவர்களால் புறக்கணிக்கப்பட்ட ஒரு தலைவர் - அவருக்கு அடுத்த வாக்கு வங்கி உருவாககத்திற்குத் தமிழர்களை விட்டால் வேறு வழி?

சிவாஜிலிங்கத்தை பொருத்த வரையில் எனக்குச் சில முரண்பாகள் தோன்றியது - அவற்றின் விளைவாக ஒரு முடிவும் தோன்றியது. முரண்பாடுகளைச் சொல்கிறேன் முடிவுகளை நீங்கள் எடுத்துக்கொள்ளுங்கள். இலங்கைக்கு வந்தால் கைது செய்யப்படுவார் என்ற நிலையிலிருந்தவர் - இங்கு வந்து இதுவரை கைது செய்யப்படாது ஜனாதிபதித் தேர்தலில் போட்டியிடுவது எங்ஙனம்? அவர் தமிழ்த்தேசியக் கூட்டமைப்பைச் சார்ந்தவர் என்றால் ஏன் கூட்டமைப்பு அவரை ஆதரிக்கவில்லை? கூட்டமைப்பில்அதிகம் “பேசக்” கூடியவரான ஸ்ரீகாந்தா இப்போதெல்லாம் ஏன் அமைதியுடன் இருக்கிறார்? சரத்தை ஆதரசிக்கும் தமிழ்த்தேசியக் கூட்டமைப்பைத் திட்டும் அரசாங்கம் - சுயாட்சிக் கோரிக்கையுடன் களம் புகுந்த சிவாஜிலிங்கம் பற்றி ஏன் கருத்தேதும் பேசவில்லை - அவருக்கு வாக்களிக்கவேண்டாம் என்று ஏன் கூறவில்லை? இந்த முரண்பாடுகளை வைத்து இந்த Puzzle ஐப் பொருத்திப் பாருங்கள் உங்களுக்கும் ஒரு முடிவு கிடைக்கும். ஆக தமிழ் புத்திஜீவிகள் பகிரங்கமாகக் கோரிக்கைவிடுத்தது போல - எமது வாக்குகளை ஜனாதிபதியாக வரவாய்ப்பில்லாதவர்களுக்கு அளித்து வீணாக்குவதைவிட - வரத் தகுதியானவர்களுக்கு அளித்து அவர்களிடம் எமது கோரிக்கைகளை பேரம் பேசுவதன் மூலமே நாம் எமது தேவைகளைப் பூர்த்தி செய்து கொள்ளலாம். இங்க ஒன்றைக் கவனிக்க வேண்டும். தமிழ்த் தேசியக் கூட்டமைப்போ. ஜனநாயக மக்கள் முன்னணியோ, முஸ்லிம் காங்கிரஸோ எழுமாற்றாக சரத்தை ஆதரிக்கவில்லை - தமது கோரிக்கைக்கு அவர் இசைந்ததனால் மட்டுமே அவரை ஆதரிக்கின்றன்.

சரத் ஃபொன்சேகாவின் கொள்கையைப் பொருத்தவரை அவரது எல்லாத் திட்டங்களதும் அடிநாதம் பாராளுமன்றத்தில் தங்கியுள்ளது. நிறைவேற்று ஜனாதிபதி முறையை ஒழித்து பாராளுமன்றை மையப்படுத்திய ஆட்சியை கொண்டு வர அவர் உறுதிகூறுகிறார். ஆக அது நிறைவேறும் பட்சத்தில் மக்கள் சரத்தின் தனிப்பட்ட நிலைப்பாடுகள் பற்றிப் பயப்படத் தேவையில்லை. ஆனால் ஒரு வேளை அது நடைபெறாது போனால்?

ஒருவேளை பதவிக்கு வந்தபின்னே அவர் அவரை ஆதரித்த ஏனைய தலைவர்களை உதாசீனம் செய்துவிட்டு எதேச்சாதிகாரமாக நடந்துகொண்டால்? இந்தக் கேள்வி பலர் மனதில் இருக்கிறது. ஆனால் இங்கே ஒரு முக்கிய விடயத்தைக் கவனிக்க வேண்டும். சரத் ஜனாதிபதியானாலும் அவருக்கென்று தனிக் கட்சியோ, அல்லது பாரளுமன்ற பலமோ இல்லை. ஆக அவர் எதேச்சாதிகரமாகச் செயற்படத்துணிந்தால் நிச்சயமாக பாராளுமன்றத்தில் ஒரு நம்பிக்கையில்லாப் பிரேரணையை நிறைவேற்றுவதன் மூலமோ (அது நடப்பது கொஞ்சம் சிக்கலானது) அல்லது பாராளுமன்றம் அரசியல் யாப்புத் திருத்தமொன்றைக் கொண்டு வந்து அவரது நிறைவேற்றதிகாரத்தை ஒழிப்பதன் மூலமும் அந்நிலையை மாற்றிவிடலாம். மஹிந்த ராஜபக்ஷவைப் பொருத்தவரையில் அவருக்கு என்று கட்சியிருக்கிறது - பாராளுமன்ற பலம் இருக்கிறது ஆகவே அவர் ஒருவேளை எதேச்சாதிகரமாகச் செயற்பட்டால் (!?) அவரது கட்சியினர் அவருக்கு ஆதரவளிக்கும் பட்சத்தில் அவர் தயக்கமின்றி தனது எதேச்சாதிகாரத்தைத் தொடரலாம், ஆனால் சரத் ஃபொன்சேகாவின் நிலைவேறு - அவர் மக்களுக்கு கொடுத்திருக்கும் வாக்குப்படி அவர் நிறைவேற்று அதிகாரத்தை ஒழிக்க முன்வருவார் (இங்கு அவர் சார்ந்து நிறைவேற்று அதிகார ஒழிப்பு அமையாது என்பதை கருத்திற் கொள்க - அது முழுமையாகப் பாராளுமன்றம் சார்ந்தது - ஆனால் ஜனாதிபதியாக அவர் அதை செய்ய ஆதரிப்பது ஒரு பலம் - அவ்வளவே). அவர் முன்வராத பட்சத்தில் அவருக்கு ஆதரவளிக்கும் கட்சிகளெல்லாம் இந்த ஜனாதிபதி முறை ஒழிப்பையே எதிர் பார்த்திருக்கிறது ஆகவே அவை நிச்சயமாக தமது பாராளுமன்ற பலத்தின் மூலம் (இன்றைய ஆளுங்கட்சியும் உடன்படும் - ஏனெனில் அவர்கள் தாம் சாராத ஒருவரை நிறைவேற்றதிகாரத்தில் வைக்க விரும்பமாட்டார்கள்) அரசியல் யாப்புத்திருத்தமொன்றினூடாக நிறைவெற்றதிகாரமுள்ள ஜனாதிபதிமுறையை ஒழிப்பார்கள். ஆக மொத்தத்தில் சரத் விரும்பினாலும், விரும்பாவிட்டாலும் அவரது வாக்குறுதி நிறைவேற்றப்படும் என்பது நிதர்சனம். நிறைவேற்று அதிகாரமுள்ள ஜனாதிபதி முறை ஒழிக்கப்பட வேண்டுமா? அதன் விளைவுகள் என்ன? - இது பற்றி பின்னர் வேறொரு பதிவில் அலசுவோம். ஆக இன்று உள்ள முக்கிய ஜனாதிபதி வேட்பாளர்களுள் பல கட்சிகளின் ஆதரவு உள்ள சரத் ஃபொன்சேகா அடுத்த ஜனாதிபதியானாலும் அவரின் தன்னிச்சையான செயற்பாடுகளைத் தடுக்கும் பிரம்மாஸ்திரமும் அந்தக் ஆதரவுக் கட்சிகளிடமுண்டு.

அடுத்த கேள்வி சரத் ஜனாதிபதியாவாரா? வாய்ப்பு இருக்கிறதா? - இந்தக் கேள்வி பற்றி நான் சிந்தித்திருந்த வேளை ஒரு குறுஞ்செய்தி என் கைத்தொலைபேசியை எட்டியது - அதில் கூறியதை தருகின்றேன் - நீங்கள் யோசித்துப்பாருங்கள்.

இலங்கையில் ஒருவர் ஜனாதிபதியாக 50 வீத வாக்குகள் தேவை. ஐ.தே.கவிடம் 35வீத வாக்குப்பலமுண்டு, ஜே.வி.பியிடம் ஒரு 5 சதவீத வாக்குப்பலமும், ஜ.ம.மு, த.தே.கூ, மலையத் தலைவர்கள் மற்றும் ஃபொன்சேகாவின் ஏனைய ஆதரவுத் தலைவர்களிடம் எனக்கூட்டாக ஒரு 10வீத வாக்குப்பலமும் இருக்கிறது. இவை மொத்தமாக 50 வீதத்தைத் தந்துவிடும். இதைவிட ஃபொன்சேகாவுக்கென மேற்கூறிய கட்சிகள், தலைவர்கள் சாராத வாக்குகள் (சுதந்திரக்கட்சி ஆதரவாளர்கள் பலர் கூட ஃபொன்சேகாவை விரும்புகிறார்கள்) இன்னும் எத்தனை வீதமுண்டு ஆக அவருக்கு வெற்றிவாய்ப்பு உண்டு!

இப்படிச் சொல்கிறது அந்த குறுஞ்செய்தி - இது கொஞ்சம் மிகையான பக்கச்சார்பான தகவல்தான் ஆனால் இதை முற்றிலுமாக மறுப்பதற்குமில்லை. நான் இலங்கையின் அனேக பகுதிகளைச் சார்ந்தவர்களோடு எதேச்சையாக பேசியதில் பலர் நேரடியாகத் தங்கள் விருப்பத்தைச் சொல்ல விரும்பாவிடினும் (இல்லை - பயப்பட்டாலும்) மாற்றத்தை விரும்புகிறோம் என்கிறார்கள்.

எல்லாம் சரி நான் என்ன ஃபொன்சேகா ஆதரவாளனா? (நீங்கள் யோசிக்கலாம்) - பதிலுடன் மேலும் பல்வேறுபட்ட தேர்தல் சம்பந்தமான அலசல்களுடன் அடுத்தபதிவில் சந்திக்கின்றேன்.

பி.கு. - 2ம் பகுதிக்கும் 3ம் பகுதிக்குமிடையிலான நீண்ட கால இடைவெளிக்கு வருத்தத்தைத் தெரிவித்தக்கொள்கின்றேன். களநிலவர தேடலுக்காகக் கொஞ்சக் காலம் காத்திருந்தேன் அவ்வளவுதான்.

பகுதி 04ல் அலசல் தொடரும்....

வவுனியாவில் ஒரு உள்ளூர் “மஹிந்த ராஜபக்ஷ”!

noreply@blogger.com (என்.கே.அஷோக்பரன்) — Fri, 15 Jan 2010 08:37:00 +0000

எனது தாய்வழிப் பாட்டனாரின் மரணச்சடங்குக்காக வவுனியா சென்றிருந்தேன். மரணச்சடங்குகளின் இறுதிநாளில் ஒருவர் மரணவீட்டிற்கு வந்திருந்தார். அவரைக் கண்டதும் - ஆகா வவுனியாவில் “லோக்கல்” ராஜபக்ஷ வந்திருக்கிறாரோ என்று தோன்றியது - எனது தம்பியின் உதவியுடன் சில படங்கை எடுத்தேன். நாகரீகம் கருதி முகம் மறைக்கப்பட்டுள்ளது. நீங்களும் பாருங்கள். எப்படி வவுனியாவின் “லோக்கல்” ராஜபக்ஷ ??

உண்மையில் இவர் ஒன்று மஹிந்த ராஜக்ஷ ஆதரவாளரோ, விசுவாசியோ அல்லவாம் - இது இவரின் தனிப் பாணியாம். இவர் ஒரு ஓதுவார் - மரணச்சடங்குகளில் தெய்வப்பாசுரங்கள் பாடுதல் இவர் தொழில்.

2010 ஜனவரி 26ம் அடுத்த இலங்கை ஜனாதிபதியும் - பகுதி 02

noreply@blogger.com (என்.கே.அஷோக்பரன்) — Mon, 28 Dec 2009 09:28:00 +0000

2010 ஜனவரி 26ம் அடுத்த இலங்கை ஜனாதிபதியும் - பகுதி 01 ன் தொடர்ச்சி...

சரத் ஃபொன்சேகா

இலங்கை இராணவ வரலாற்றின் முதலாவது நான்கு நட்சத்திர அந்தஸ்துப் பெற்ற ஜென்றள் தர அதிகாரி. விடுதலைப் புலிகளுக்கு எதிரான யுத்த வெற்றிக்குக் முக்கிய காரணகர்த்தா என ஜனாதிபதி மஹிந்த ராஜபக்ஷவினாலேயே “முன்பு” புகழப்பட்டவர். இன்று அரசாங்கத்துடனான கசப்புணர்வுகளால் தனது பாதுகாப்புப் படைகளின் தலைமையதிகாரி என்ற பதவியிலிருந்து ஓய்வு பெற்று இன்று ஐக்கிய தேசிய முன்னணி மற்றும் ஜே.வி.பி கூட்டின் பிரதான எதிர்த்தரப்பு ஜனாதிபதி வேட்பாளராகக் களமிறங்கியிக்கிறார் ஆனால் ஐ.தே.க வின் யானைச் சின்னத்திலோ ஜே.வி.பி யின் மணிச் சின்னத்திலோ தேர்தல் களம் புகாது புதிய ஜனநாயகக் கட்சியின் சார்பில் அன்னச் சின்னத்தில் தேர்தல் களம் புகுந்திருக்கிறார்.

சரத் ஃபொன்சேகா என்றதும் விடுதலைப்புலிகளக்கெதிரான யுத்த வெற்றிதான் மக்கள் கண் முன் நிற்கின்றது. என்னதான் “மன்னன்” அந்தஸ்திலிருந்து யுத்தத்தை நடாத்தியது மஹிந்த ராஜபக்ஷவாக இருந்தாலும் களத்திலிருந்து படைகளை வழிநடாத்தி வெற்றியைத் தேடிக்கொடுத்ததில் பெருமளவு பங்கு ஃபொன்சேகாவைச் சார்ந்தது - இதனை “முன்பு” அரசாங்கமும், ஜனாதிபதியும் கூட நேரடியாகவும் மறைமுகமாகவும் புகழ்ந்திருந்தார்கள். இப்படியாக ஜனாதிபதியின் “வெற்றி” முழக்கத்தின் முக்கிய காரணகர்த்தாவாக முன்பு இருந்தாலும் எங்கு இவர்களிடையெ முரண்பாடு தோன்றியது என்பதில் இன்றுவரை தெளிவாக விடைகாண இயலவில்லை. அண்மையில் ஃபொன்சேகா வழங்கிய செவ்விகளிலிருந்தும் வெளியிட்ட அறிக்கைகளிலிருந்தும் சில, பல கருத்துக்கள் வெளிவந்திருந்தாலும் எதுவும் அந்த வினா முடிச்சை முற்றாக அவிழ்க்கவில்லை. மேலும் சரத் .பொன்சேகா வெளியிட்ட பெரும்பாலான கருத்தக்களிலிருந்து அவருக்கும் ஜனாதிபதிக்குமிடையிலான பிரச்சினையைவிட அவருக்கும் பாதுகாப்புச் செயலாளருக்கும் (கோத்தாபய ராஜபக்ஷ) இடையிலான கருத்துமுரண்பாடுகளும், புரிந்துணர்வின்மையுமே இந்தப் பிரிவுக்குக் காரணமாக இருக்கலாம் என ஊகிக்க முடிகிறது. குறிப்பாக கடந்த 24ம் திகதி இரவு சிரச தொலைக்காட்சியில் ஃபொன்சேகா வழங்கிய செவ்வியில் அவர் பாதுகாப்பச் செயலாளரைப் பெருமளவு தாக்கியிருந்தார், “15 வருடங்கள் நான் யுத்த களத்தில் போரிட்டுக்கொண்டிருந்த போது அமெரிக்காவில் கணணியில் தட்டிக்கொண்டிருந்தவர், பிறகு இங்கு வந்து விட்டு என்னைப் பற்றி அவதூறு கூறவும், எனது இராணுவ அனுபவம் பற்றிப் பேசவும் அவருக்கு லாயக்கில்லை” என ஃபொன்சேகா அந்தச் செவ்வியில் கூறியிருந்தார்.

இப்படியாக அவர்கள் இருவருக்கிடையிலான முறுகல் நிலையே ஃபொன்சேகாவின் ஓய்வு பெறுகைக்கும் அரசியல் களப் பிரவேசத்திற்கும் காரணம் என்பது தெளிவான நிலையில் ஒரு ஜனாதிபதி வேட்பாளராக வந்திருக்கும் ஃபொன்சேகாவின் கொள்கைகள் பற்றியம். அவரது திட்டங்கள் பற்றியும் மக்கள் கேள்வியெழுப்புகிறார்கள். என்னதான் சொன்னதைச் சொன்னவாறு செய்து முடிப்பவர் எனும் நன்மதிப்பு ஃபொன்சேகாவுக்கு மக்கள் மத்தியில் இருந்தாலும் அவர் என்ன மாற்றத்தைச் செய்யப்போகிறார் என்பது பலர் மத்தியில் கேள்விக்குறியாகத் தொக்கு நிற்கிறது. அதிலும் குறிப்பாகத் தமிழர்கள் ரணில் விக்ரமசிங்ஹ போட்டியிட்டிருந்தால் கூட இவ்வளவு யோசிக்காமல் தங்கள் வாக்குகளை இவ்வேளை தீர்மானித்திருப்பார்கள் ஆனால் சரத் ஃபொன்சேகா என்றதும், அதுவும் முன்னாள் இராணுவத் தளபதி - யத்தத்தை வென்றவர் - தமிழரின் இரத்தம் சிதறடிக்கப்பட்ட யத்தத்தை நடாத்தியவர் என்றதும் மிகவும் தயக்கம் காட்டுகிறார்கள். பலர் ஜனாதிபதியாகட்டும், ஃபொன்சேகாவாகட்டும் இருவரும் ஒன்றுதான் என்ற மனப்பான்மை கொண்டிருக்கிறார்கள். இந்நிலையில் ஃபொன்சேகாவின் வாக்கு வங்கியைப் பொறுத்தவரையில் இளைஞர்கள் பலரும் ஃபொன்சேகாவின் பக்கத்தில் நிற்பதைக் காணக்கூடியதாக இருக்கிறது. சமூக வலைப்பின்னல்களில் ஏனைய வேட்பாளர்களுக்குள்ள ஆதரவை விட சரத் ஃபொன்சேகாவிற்கு அதிக ஆதரவு உள்ளதைக் காணக்கூடியதாக இருக்கிறது. மேலும் கொழும்பைப்பொறுத்த வரையில் அது ஐ.தே.க வின் தொகுதி அத்துடன் ஏனைய கட்சி சார்ந்தவர்களிடம் கூட ஃபொன்சேகாவுக்கு ஆதரவு இருப்பதைக் காணக்கூடியதாக உள்ளது. கொழும்பில் ஃபொன்சேகாவுக்கிற்கிருக்கம் அதிக ஆதரவுக்குப் பிரதான காரணம் மக்கள் ஒர மாற்றத்தை வேண்டுவதாகும். பொருளாதார நிலை தொடர்பில் இந்த அரசாங்கத்தின் மேல் மக்கள் கொண்டுள்ள அதிருப்தி முதலாவது காரணம். பொருளாதார மாற்றங்கள் இலங்கையின் வேறு எப்பகுதியையும் தாக்குவதை விட கொழும்பைத்தான் உடனடியாக, அதிகமாகப் பாதிக்கிறது. மேலும் கொழும்பில் அதிகரித்த பாதுகாப்புக் கெடுபிடிகளும், அடிக்கடி பாதைகள் மூடப்படுதலும் கூட மக்களுக்கு அதிருப்தியை மட்டுமல்லாது எரிச்சலையும் ஏற்படுத்தியிருக்கிறது. அதுவும் யுத்தம் முடிந்தபின்னும் அங்குமிங்குமாகப் பாதுகாப்புச் சாவடிகள் இருப்பதும் அதே பாதுகாப்புக் கெடுபிடிகள் தொடர்பதும் மக்களை மிகவும் எரிச்சலடையச் செய்துள்ளது. கொழும்பின் நிலை இப்படியிருக்க வெளிமாவட்டங்களைப் பொறுத்தவரையில் இவை பெரிதும் பாதிப்பை ஏற்படுத்தவில்லை ஆனால் அம்மாவட்டஙக்ளின் கட்சி வாக்கு வங்கிகளின் படி வேட்பாளர்களிடையே வாக்குகள் பிரிவடையும் என்பதே எனது கருத்து.

இந்தத் தேர்தலைப் பொறுத்தவரையில் சரத் ஃபொன்சேகாவின் பிரதான பலம் மக்களும் இளைஞர்களும் அவர் மீது கொண்டுள்ள நம்பிக்கை மற்றும் அவரது “ஹீரோ” அந்தஸ்து. ஃபொன்சேகா நியாயமானவர், கறைபடியாதவர் என மக்கள் அவர் மீது நம்பிக்கை கொண்டுள்ளார்கள். அத்தோடு ஃபொன்சேகாவுக்கு பிரதான எதிர்க்கட்சியான ஐ.தே.க மற்றும் 3வது பெரிய கட்சி ஜே.வி.பி. மங்கள் சமரவீர, மனோகணேசன், ரவுஃப் ஹக்கிம், முன்னாள் ஜனாதிபதி சந்திரிக்கா பண்டாரநாயக்க குமாரதுங்க ஆகியோரின் ஆதரவு இருப்பது பெரும்பலம். ஒரு வேளை தமிழ்த் தேசியக் கூட்டமைப்பும் தங்கள் ஆதரவுக்கரத்தை வழங்கினால் சரத் ஃபொன்சேகாவினால் மஹிந்த ராஜபக்ஷவிற்கு பலமான போட்டியை வழங்க முடியும். இந்தச் சந்தர்ப்பத்தில் இவ்வளவு ஆதரவு இருந்த போதும் பிரச்சாரம், விளம்பரங்கள் என்று பார்த்தால் சரத் ஃபொன்சேகாவின் தரப்பு இந்நாள் வரை பலம் குறைந்துதான் காணப்படுகிறது.

சரத் ஃபொன்சேகாவின் விளம்பரங்களும். பிரச்சாரங்களும் ஜனாதிபதியின் பிரச்சாரம் அளவுக்கு இன்னும் சூடுபிடிக்கவில்லை என்பதே பலரது கருத்து - அது ஏன் என்பது இன்னும் சிதம்பரசக்கரமாகவே இருக்கிறது. அத்துடன் மறுபக்கத்தில் ஃபொன்சேகாவுக்கு எதிரான கருத்துக்கள் மற்றும் அவர் வெளியிட்ட சச்சரவுமிக்க கருத்துக்கள் (குறிப்பாக யுத்தகால மனித உரிமை மீறல் தொடர்பானவை) இன்று சகல ஊடகங்களிலும் அவருக்கெதிரான பிரச்சாரத்தை அரசாங்கம் கட்டவிழ்த்து விட்டுள்ளதைக் காணலாம். அதிலும் குறிப்பாக இலங்கை முழுக்க வீச்சுள்ள அரச இலத்திரனியல் ஊடகங்கள் பெருமளவு ஜனாதிபதிக்கு ஆதரவான கருத்தக்களைக் கொண்டுசெல்வதால் அதற்குச் சமமான மாற்றுப் பிரச்சாரத்தை ஃபொன்சேகா செய்ய வேண்டியிருக்கிறது. என்ன தான் சுவரொட்டி நிபுணர்களான ஜே.வி.பி.யினர் ஃபொன்சேகாவுடன் இருந்தாலும் ஒப்பீட்டளவில் அவைகூட மிகக் குறைவாகத்தான் கண்களில் படுகிறது.

சரி, அடுத்த ஜனாதிபதியாக ஃபொன்சேகாவால் வர முடியுமா? அவரது கொள்கை என்ன? தமிழர்கள் அவரை நம்பலாமா? சிறுபான்மையினர் தொடர்பான அவரது நிலைப்பாடு என்ன? ஒரு வேளை சிறுபான்மையினர் ஃபொன்சேகாவை ஆதரிப்பது இஞ்சி கொடுத்த மிளகாய் வாங்கிய கதையாகுமா? போன்ற கேள்விகள் பலர் மனதில் உள்ளன என்பதை என்னால் ஊகிக்கமுடியகிறது. இவற்றுக்கான பதில்களுடன் அடுத்த பகுதியில் தொடர்கின்றேன்.

பகுதி 03ல் அலசல் தொடரும்....

2010 ஜனவரி 26ம் அடுத்த இலங்கை ஜனாதிபதியும் - பகுதி 01

noreply@blogger.com (என்.கே.அஷோக்பரன்) — Sun, 27 Dec 2009 13:31:00 +0000

ஜனவரி 26! இலங்கையின் அடுத்த ஜனாதிபதியைத் தேர்ந்தெடுப்பதற்கான தேர்தல் திகதி. 22 வேட்பாளர்கள் போட்டியிடும் இந்தத் தேர்தலில் வெற்றி பெற்று ஜனாதிபதியாகப் போவது யார் என்ற கேள்வி இன்று அனைத்து இலங்கையர் மனத்திலும் இருந்துகொண்டிருக்கிறது. இம்றை 22பேர் போட்டியிட்டாலும் 2 பேரின் பெயர்தான் பரபரப்பாக அடிபடுகிறது, அவை தற்போதைய ஜனாதிபதி மஹிந்த ராஜபக்ஷவினதும், பிரதான எதிர்க்கட்சிக் கூட்டணியின் வேட்பாளா் ஜென்றள்.சரத் ஃபொன்சேகாவினதும் ஆகும். ஆனால் தமிழர் மத்தியில் , இடதுசாரி முன்னணியின் வேட்பாளர் விக்ரமபாகு கருணாரத்ணவும், சுயேட்சைத் தமிழ் வேட்பாளர் சிவாஜிலிங்கமும் கூடக் கருதப்படுகிறார்கள். இந்தச் சந்தியில் அடுத்த ஜனாதிபதியாக யார் வரப் போகின்றார்? (யாருக்கு எந்தளவு வாய்ப்பு இருக்கிறது), பிரதான வேட்பாளர்களின் குறை நிறைகள் பற்றிய கொள்கைகள் பற்றிய அலசலாக இந்தப் பதிவு அமையும்.

மஹிந்த ராஜபக்ஷ

தற்போதைய ஜனாதிபதியாக மஹிந்த ராஜபக்ஷ இரண்டாவது தவணைக்காக தனது முதற்தவணைப் பதவிக்காலம் நிறைவடைய 2 வருடக காலம் முன்பாகவே ஜனாதிபதித்தேர்தலை நடாத்துகிறார். இவருக்கு மக்கள் மத்தியில் அதிலும் குறிப்பாக சிங்கள, முஸ்லிம் மக்கள் மத்தியில் அதிக ஆதரவு காணப்படுவதாகத் தெரிகிறது இதற்கு மிகப்பிரதானமான காரணம் விடுதலைப் புலிகளுக்கெதிரான யுத்த வெற்றியேயாகும். இவற்றைவிட நாட்டின் பின்தங்கிய பிரதேசங்களில் இடம்பெற்ற சமூக, பொருளாதாரக் கீழ்க் கட்டுமானப் பணிகளும் அதிலும் குறிப்பாக தென் மாகாணத்தில் செய்த அபிவிருத்திப் பணிகளும் மக்கள் மத்தியில் இவருக்கான நன்மதிப்பை ஏற்படுத்தியிருக்கிறது என்பது மறுக்கமுடியாத உண்மை. இதை நான் எழுமாற்றாக எழுதவில்லை - இந்நாட்டில் பல பகுதிகளிலுமுள்ள வேறுபட்ட மக்களிடையே பேசி அவர்களது கருத்துக்களின் அடிப்படையில் தான் நான் இந்தப் பதிவை வரைகின்றேன். இப்படியாக தற்போதைய ஜனாதிபதி மீது மக்களுக்கு (குறிப்பாகச் சிங்கள மக்களுக்கு) நன்மதிப்பு இருந்தாலும் அவற்றை மீறி பல அதிருப்திகளும் இருக்கத்தான் செய்கிறது. அடிப்படையில் பொருளாதார ரீதியில் மக்கள் ஏதோ ஒரு குறையை உணர்ந்த வண்ணம் தான் இருக்கிறார்கள். விலையேற்றம் பாரிய பிரச்சினையாக மக்கள் மத்தியில் உலாவிக்கொண்டிருந்தாலும் “யுத்த வெற்றி” என்ற மாயத்திரை அதை மறைத்துக்கொண்டு தான் இருக்கிறது.

இதை விட இன்னும் பல அதிருப்திகள் மக்கள் மத்தியில் இருக்கிறது. குறிப்பாக இலங்கையின் மெகா அமைச்சரவை தொடர்பிலும், அமைச்சர்களின் நியமனம் தொடர்பிலும் இலங்கையின் பலதரப்பட்ட மக்களும் அதிருப்தியுற்றே இருக்கின்றார்கள். கட்சி தாவியவர்களுக்கெல்லாம் அமைச்சர் பதவி பரிசளிக்கப்படுவதும், “தகுதி” அற்றவர்கள் எல்லாம் அமைச்சர்களாக நியமிக்கப்பட்டதும், ஒரே துறைக்கு பல அமைச்சர்கள் நியமிக்கப்பட்டிருப்பதும் மக்கள் இதை ஒரு கேலிக்கூத்தாகவே பார்க்கும் படி செய்திருக்கிறது. இந்த அமைச்சர்களுக்கான வீண் செலவுகள் தொடர்பிலும் இலங்கையின் புத்திஜீவிக் குழாம் கவலை தெரிவித்திருக்கிறது - இதை பொதுநிதியின் வீணாக்கலாகவே பலர் கருதுகிறார்கள். மேலும் குடும்ப ஆட்சி தொடர்பிலும் பலர் அதிருப்தியை வெளிப்படுத்தியிருக்கின்றார்கள். அதிலும் குறிப்பாக சரத் .ஃபொன்சேகா பாதுகாப்புச் செயலாளர் கோதாபய ராஜபக்ஷவை பெரும்பாலான ஆட்சிக்கேடுகளுக்குக் காரணம் எனக் குற்றஞ்சாட்டியிருப்பது கவனிக்கத்தக்கது.

இவற்றுக்கும் மேலாக யுத்த வெற்றி என்பதையே ஜனாதிபதி பிரதான பிரச்சார ஆயுதமாகப் பயன்படுத்துகிறார். ஆனால் அது “தமிழ்ச் சமூகத்தைப்” பெரிதும் ஆர்வங்கொள்ள வைக்கும் ஒன்றாக இருக்கவில்லை. தமிழர் விடுதலைப் போரின் தோல்வி என்பதற்கப்பால் (அதை ஒரு பயங்கரவாத ஒழிப்பு நடவடிக்கையாக நியாயப்படுத்தினாலும் கூட) அகதி முகாம்களில் தமிழர்கள் அகதிகளாகச் சிக்கிச் சின்னாபின்னமாகிச் சீரழிந்ததும், மேலும் யுத்தத்தின் இறுதிக்காலகட்டத்தில் இடம்பெற்ற மனித அவலங்கள் தொடர்பிலான பல்வேறுபட்ட கருத்துக்களும் தமிழர்களை இந்த அரசாங்கத்தின் மீது பெருமளவு நம்பிக்கை இழக்கும் நிலைக்கு இட்டுச் சென்றுள்ளது.

என்னதான் கோடி கோடியாகக் கொட்டி விளம்பரங்களும், பிரச்சாரங்களும் செய்தாலும் மக்களின் மனதில் இருக்கும் வடுக்களுக்கு மருந்து கொடுக்காத வரை அவர்களது நிகழ்காலப் பிரச்சினைகளுக்கே தீர்வினைப் பெற்றுக் கொடுக்காத வரை “வளமான எதிர்காலம்” பற்றி மக்கள் சிந்திக்கவே மாட்டார்கள். இன்று காயத்தால் அவதிப்பட்டுக்கொண்டிருப்பவனுக்கு நாளைக்குக் கிடைக்கப்போகும் மாடமாளிகை பற்றிக் கவலையில்லை அவனது கவலையும் தேவையுமெல்லாம் இரத்தம் ஒழுகிக்கொண்டிருக்கும் காயத்திற்கான மருந்தும் தீர்வும்தான்.

இவற்றைவிட யுத்தவெற்றிக்குப் பெரிதும் பங்களித்த சரத் ஃபொன்சேகா (தற்போதைய பிரதான எதிர்த்தரப்பு ஜனாதிபதி வேட்பாளர்) தற்போது ஜனாதிபதி பற்றியும் அரசாங்கம் பற்றியும் வெளிப்படுத்தியிருக்கும் அதிருப்திகளும், குற்றச்சாட்டுகளும் குறிப்பிட்டளவு தாக்கத்தை ஜனாதிபதியின் வாக்கு வங்கி மீது ஏற்படுத்தியிருக்கிறது என்பது நிதர்சனம். பதவிக்காலம் நிறைவடைய 2 வருடங்கள் முன்பே ஜனாதிபதித் தேர்தலை நடாத்தக் கோரியதன் காரணம் வெற்றியின் மீது ஜனாதிபதி மஹிந்த ராஜபக்ஷவிற்கிருக்கும் உறுதியான நம்பிக்கையாகும் ஆனால் இன்று அரச ஊடகங்களின் மூலம் நடாத்தப்படும் அதீத பிரச்சாரங்களும், பிரதான எதிர்த்தரப்பு வேட்பாளர் மீதான வசைத் தாக்குதல்களும் அவரது வெற்றியின் மீதான உறுதியான நம்பிக்கை சரத் ஃபொன்சேகாவின் அரசியற் பிரவேசத்தால் அசைக்கப்பட்டிருக்கிறது என்பதையே பறை சாற்றுகிறது. எதிரிகள் தானாக உருவாவதில்லை - நாமாகத்தான் உருவாக்கிக் கொள்கின்றோம் என்பது பிரபலமான கூற்று அதுபோல மீதம் 20 வேட்பாளர்கள் இருக்க ஒரு வேட்பாளர் மீது வசை பாடத் தொடங்கியதனூடாக அவரையே தனது பிரதான எதிர்த்தரப்பாக அடையாளப்படுத்தியுள்ளதைக் காணக்கூடியதாக இருக்கிறது.

இந்நிலையில் இத்தேர்தலில் ஜனாதிபதியின் அதீத வெற்றியின் நம்பிக்கை குறைந்து போய்த்தான் இருக்கிறது. ஆனால் வெற்றிபெற மாட்டார் என்று அறுதியாகக் கூறிவிட முடியாது. நிகருக்கு நிகராகப் போட்டியிருந்தாலும் அமைச்சர்கள், அரசியல் தலைவா்கள் பலரின் ஆதரவும் விளம்பரம், பிரச்சாரங்கள் என்பனவற்றுக்காகச் செலவழிக்கப்படும் பல கோடி ரூபாய்களும் அதிலும் இம்முறை புதுமையாக இணையவழி விளம்பரங்கள் அதிகளவில் இடம்பெறுவதைக் காணக்கூடியதாக இருக்கிறது. சமூக வலைப்பின்னல்களிலும், செய்தி, விளையாட்டு மற்றும் இலங்கையர்கள் சொடுக்கும் முக்கிய தளங்களிலெல்லாம் “வளமான எதிர்காலம்” தேர்தல் பிரச்சார விளம்பரங்களும் அந்த மிக நெருங்கிய போட்டியை மீறி மயிரிழையில் வெற்றியை ஜனாதிபதிக்குத் தரவாய்ப்பிருக்கிறது. மேலும் இலங்கை ஜனாதிபதித் தேர்தல் வரலாற்றில் பதவியிலிருந்த ஜனாதிபதி 2ம் முறை தேர்தலில் போட்டியிட்டுத் இதுவரை தோல்வி கண்டதில்லை. எது எவ்வாறு இருப்பினும் இம்முறை தேர்தல் மிக விறுவிறுப்பானதாக அமையும் என்பது மட்டும் உறுதி.

பகுதி 02ல் அலசல் தொடரும்....

அடுத்தடுத்த பகுதிகளில் ஏனைய முக்கிய வேட்பாளர்கள் தொடர்பாக அலசப்படுவதுடன், வெற்றிவாய்ப்புக்கள், தேர்தல் கால நிகழ்வுகள் பற்றியும் ஆராயப்படும்.

இலங்கை ஜனாதிபதித் தேர்தல் - ஒரு அறிமுகம்.

noreply@blogger.com (என்.கே.அஷோக்பரன்) — Sun, 27 Dec 2009 11:31:00 +0000

இலங்கையில் ஜனாதிபதித் தேர்தல் 2010ம் ஆண்டு ஜனவரி மாதம் 26ம் திகதி நடைபெறவுள்ளது. இந்நிலையில் ஜனாதிபதித் தேர்தலில் வாக்களிக்கும் முறை பற்றியும், வாக்குகள் எண்ணப்பட்டு வெற்றியாளர் தீாமானிக்கப்படும் முறைபற்றியும் விளக்கம் தருவதாக இப்பதிவு அமையும்.

இலங்கை சனநாயகச் சோசலிசக் குடியரசின் 1978ம் ஆண்டு முதல் நடைமுறையிலிருக்கும் அரசியல் யாப்பின் 94வது சரத்தும் அதன் உப பிரிவுகளும் நிறைவேற்றதிகாரமுள்ள ஜனாதிபதியொருவரைத் தேர்ந்தெடுப்பதற்கான தேர்தல் பற்றி விபரிக்கின்றது.

Election of the President.

94. (1) At the election of the President every voter while casting his vote for any candidate may-

(a) where there are three candidates for election, specify his second preference ; and

(b) where there are more than three candidates for election, specify his second and third preferences.

(2) The candidate, if any, who receives more than one-half of the valid votes cast shall be declared elected as President

(3) Where no candidate is declared elected under paragraph (2) of this Article, the candidate or candidates, other than the candidates who received the highest and second highest number of such votes, shall be eliminated from the contest, and -

(a) the second preference of each voter whose vote had been for a candidate eliminated from the contest, shall, if it is for one or the other of the remaining two candidates, be counted as a vote for such candidate and be added to the votes counted in his favour under paragraph (2), and

(b) the third preference of each voter referred to in sub-paragraph (a) whose second preference is not counted under that sub-paragraph shall, if it is for one or the other of the remaining two candidates, be counted as a vote for such candidate and be added to the votes counted in his favour under sub-paragraph (a) and paragraph (2),

and the candidate who receives the majority of the votes so counted shall be declared elected as President.

(4) Where an equality is found to exist between the votes received by two or more candidates and the addition of one vote would determine-

(a) which candidate is to be declared elected under this Article ; or

(b) which candidate is not to be eliminated under this Article, then the determination of the candidate to whom such additional vote shall be deemed to have been given for the purpose of such determination shall be made by lot.

//
The above extract from the 1978 Constitution of the Democratic Socialist Republic of SriLanka is taken from The Official Website of the Government of SriLanka. (http://www.priu.gov.lk/Cons/1978Constitution/Chapter_14_Amd.html)

இலங்கையில் ஜனாதிபதித் தேர்தல் ஒற்றைமாற்று (தனிமாற்று) வாக்கு முறைப்படி நடாத்தப்படும். இதன் பிரகாரம் வாக்காளர்கள் 3 வேட்பாளர்களுக்குக் குறைவாகப் போட்டியிடும் சந்தர்ப்பத்தில் தமது முதலாவது மற்றும் இரண்டாவது விருப்பத்தெரிவுகளைக் குறித்து வாக்களிக்கலாம், 3ற்கு மேற்பட்ட வேட்பாளர்கள் போட்டியிடுமிடத்து 3வது விருப்பத்தெரிவையும் சேர்த்து வாக்களிக்கலாம். உதாரணமாக அ,ஆ,இ என 3 நபர்கள் போட்டியிடுமிடத்து வாக்காளர்கள் தாம் விரும்பியவர்களுக்கு முதலாவது, இரண்டாவது மற்றும் மூன்றாவது விருப்புவாக்குகளை விருப்ப வரிசையில் அளிக்கலாம்.

வாக்குகளின் எண்ணிக்கையில் முதலாவதாக முதன்மை விருப்பு வாக்குகள் மட்டுமே எண்ணப்படும். அதில் செல்லுபடியான மொத்தவாக்குகளில் 50வீதத்திற்கும் அதிகமாக யார் வாக்குகளைப் பெறுகிறாரோ அவரே ஜனாதிபதியாகத் தெரிவுசெய்யப்படுவார். இலங்கையில் இதுவரை நடந்த சகல ஜனாதிபதித் தேர்தல்களிலும் முதல்விருப்பெண்ணிக்கையிலேயே செல்லுபடியான மொத்தவாக்குகளில் 50வீதத்திற்குமதிகமாக வாக்குகளைப்பெற்றே ஜனாதிபதிகள் தெரிவானார்கள்.

ஒருவேளை எந்த வேட்பாளரும் செல்லுபடியான மொத்தவாக்குகளில் 50வீதம் அல்லது அதற்கு மேல் பெறாதவிடத்து, முதல் விருப்பு எண்ணிக்கையில் அதிக தொகை வாக்குகள் பெற்ற முதல் இருவர் தவிர்த்த ஏனையோர் போட்டியிலிருந்த நீக்கப்படுவர். இதன் பின்னர் போட்டியிலிருந்து நீக்கப்பட்டவர்கள் பெற்ற முதல் விருப்பு வாக்குச்சீட்டுக்களிலிருந்து போட்டியிலுள்ள இருவரில் எவர்க்காவது 2ம் விருப்பு வாக்கு இருந்தால் அது அவர்களது வாக்குகளுடன் சேர்க்கப்பட்டு எண்ணப்படும், மேலும் அதன் பின்னும் எஞ்சியுள்ள போட்டியிலிருந்து விலக்கப்பட்டவர்களின் வாக்குகளில் போட்டியிலுள்ள இருவரில் எவர்க்காவது 3ம் விருப்பு வாக்கு இருந்தால் அவையும் அவர்களது வாக்குகளுடன் சேர்த்து எண்ணப்பட்டு பெரும்பான்மை (சாதாரண பெரும்பான்மை) வாக்குகள் பெறுபவர் ஜனாதிபதியாக தேர்ந்தெடுக்கப்படுவார்.

இம்முறையின் பின்னும் இருவரும் சம அளவான வாக்குகள் பெற்றிருந்தால் இருவரில் ஒருவருக்கு மேலதிக வாக்கு ஒன்று வழங்கப்படும் - அந்த வாக்கு யாருக்கு வழங்கப்படும் என்பதை ஒரு லொத்தர் (திருவுளச்சீட்டு) மூலம் தீர்மானிப்பார்கள். அந்த ஒரு வாக்கைப் பெற்றவர் ஜனாதிபதித் தேர்தலில் வெற்றிபெற்றவராக அறிவிக்கப்படுவார்.

இது தான் 1978லிருந்து இலங்கையில் நடைமுறையிலிருக்கும் இலங்கை சனநாயக சோசலிசக் குடியரசின் 2ம் குடியரசு அரசியலமைப்பின் படியிலான ஜனாதிபதித் தேர்தல் முறை.

வரும் தேர்தல் தொடர்பான அலசல் பதிவு ஒன்றை தயார் செய்து வருகிறேன். விரைவில் பகுதி பகுதியாக பிரசுரிக்கப்படும்.

இவ்விடத்தே அனைவரிடமும் அன்பான வேண்டுகோள் ஒன்றை வைக்கவிரும்புகின்றேன். வாக்கு என்பது நவீன ஜனநாயகத்தின் முக்கிய கருவி. ஜனநாயகத்தின் முதுகெலும்பும் கூட ஆகவே அதை சரியாகப் பயன்படுத்துதல் எமது அனைவரினதும் கடமை. வாக்களிக்காமல் விடுதலோ, வாக்குகளை செல்லுபடியற்றதாக்கலோ எமது பிரச்சினைகளுக்கு ஒருபோதும் தீர்வாகாது. ஆகவே பொறுப்பான குடிமக்களாகச் செயற்படுவோம் - எமது ஜனநாயகக் கடமையைச் சரியாகச் செய்வோம்.

இனிய நத்தார் தின நல்வாழ்த்துக்கள்!

noreply@blogger.com (என்.கே.அஷோக்பரன்) — Thu, 24 Dec 2009 06:28:00 +0000

அமைதியின் தூதனாய் இயேசு கிறிஸ்து உதித்த இனிய நத்தார் தினம் - அனைவருக்கும் சாந்தியையும், சமாதானத்தையும் மகிழ்ச்சியையும் தரட்டும்!

அனைவருக்கும் இனிய நத்தார் தின நல்வாழ்த்துக்கள்!!!

ஜென்றள்.சரத் ஃபொன்சேகாவின் ஓய்வு பெறுகையும் அடுத்த ஜனாதிபதித் தேர்தலும்.

noreply@blogger.com (என்.கே.அஷோக்பரன்) — Sat, 14 Nov 2009 06:18:00 +0000

ஜென்றள். சரத் ஃபொன்சேகாவின் ஓய்வு பெறுகையே இவ்வாரத்தின் மிக முக்கிய நிகழ்வாக இலங்கையில் கொள்ளப்படுகிறது. அதுவும் அவரது ஓய்வு பெறுகைக் கடிதத்தில் குறிப்பிடப்பட்டுள்ள 16 காரணங்களும் அவரது அடுத்த இலக்கைக் கட்டியங்கூறுவதாக அமைகிறது. இதுநாள் வரை அடுத்த ஜனாதிபதித் தேர்தலில் தற்போதைய ஜனாதிபதி மஹிந்த ராஜபக்ஷவை எதிர்த்து யார் போட்டியிடப்போகின்றார்கள் என்பது தொடர்பில் நிலவி வந்த ஐயப்பாட்டையும் 90 வீதம் அந்தக் கடிதம் தெளிவாக்கியிருக்கிறது.

இலங்கை வரலாற்றில் 4 நட்சத்திர அந்தஸ்துப் பெற்ற ஒரே ஜென்றள் சரத் ஃபொன்சேகா மட்டுந்தான் - யுத்த வெற்றியின் காரணமாக அவருக்கு அந்த தரவுயர்வு வழங்கப்பட்டது ஆனாலும் இருவாரங்களுக்குள்ளாகவே இராணுவத் தளபதிப் பதிவியிலிருந்து அவர் நீக்கப்பட்டு படைகளின் தலைமையதிகாரி என்ற உயர் பதவி வழங்கப்பட்டது. ”மக்களுக்கு அது ஓர் உயர்பதவி போல காட்டப்பட்டாலும் அதில் எனக்கு அதிகாரங்கள் இருக்கவில்லை” என சரத் ஃபொன்சேகா தனது ஓய்வ பெறுகைக் கடிதத்தில் காரணப்படுத்தியிருக்கின்றார் மேலும் தன்னைத் தேசத்துரோகி போல ஊடகங்களில் மறைமுகமாக பிரச்சாரம் செய்வதாகவும் தனக்கு இது மிகுந்த வேதனையையும் மன உளைச்சலையும் தருவதாகவும் அவர் குறிப்பிட்டிருக்கின்றார் - இவையெல்லாம் தனிப்பட்ட ரீதியில் அவர் பாதிக்கப்பட்ட காரணங்கள். ஆனால் அடுத்த சில காரணங்கள் இங்கு உற்று நோக்கப்பட வேண்டியவை. அரச படைகளிடையே விசுவாச வேறுபாட்டைத் திணிப்பதாகவும், இந்தியாவை உள்நாட்டு விவகாரங்களிலும் பாதுகாப்பிலும் தலையிட விடுவதாகவும், அகதி முகாமிலுள்ள மக்களை விடுதலை செய்ய முறைப்படி நடவடிக்கை எடுக்கவில்லை எனவும், தமிழ் மக்களுக்கு நம்பிக்கையை ஏற்படுத்தவில்லை எனவும் அரசாங்கத்தின் மீது குற்றஞ் சுமத்தியுள்ளார் - இது தனிப்பட்ட காரணங்களுக்கப்பால் அவரது அரசியல் பிரவேசத்தை உறுதியாகக் கூறக்கூடிய வகையில் பொதுமக்கள், நாடு சம்பந்தமான குறைகளை அவர் இங்கு சுட்டிக்காட்டியிருப்பதை நோக்கலாம்.

அதிலும் குறிப்பாக அகதிகள் பிரச்சினை, தமிழர்கள் பற்றிய விடயங்கள் தொடர்பான கருத்து தமிழ் மக்கள் மத்தியில் அவருக்கு ஒரு நற்பெயரையும், நம்பிக்கையையும் ஏற்படுத்தும் விடயமாகக் கூட அமையும். தனது ஓய்வு பெறுகைக் கடிதத்தில் தனிப்பட்ட காரணங்களுக்கப்பால் அரசாங்கத்தை விமர்சித்திருப்பதானது இன்றைய அரசாங்கத்தில் அவருக்கு இருக்கும் திருப்தியின்மையையும், தான் மாற்றத்தை விரும்புவதையும் பறை சாற்றுகிறது.

அப்படியானால் சரத் ஃபொன்சேகா அடுத்த ஜனாதிபதித் தேர்தலில் போட்டியிடப் போகின்றாரா? இதுவரை அது தொடர்பில் நேரடியான கருத்தினை அவர் தெரிவிக்கவில்லை ஆனால் அதற்கான சாத்தியக்கூறுகள் இருப்பதுடன் அது ஏறத்தாழ 90வீதம் உறுதிப்படுத்தப்பட்டிருக்கிறது. இலங்கையின் பிரதான எதிர்க்கட்சியான ஐக்கிய தேசியக் கட்சி இது வரை தனது அடுத்த ஜனாதிபதித் தேர்தல் வேட்பாளரை அறிவிக்கவில்லை. சாதாரணமாக தேர்தல் நெருங்குவதற்கு 1 வருடம் முன்பே நேரடியாக இல்லாவிட்டாலும் மறைமுகமாகவாவது பிரதான கட்சிகள் தங்கள் அபேட்சகர்களை அடையாளப்படுத்துவது வழக்கம். மேலும் இம்முறை ரணில் விக்ரமசிங்ஹ போட்டியிட மாட்டார் என்பதும் உறுதியாகத் தெரிகிறது அத்துடன் ஐக்கிய தேசியக் கட்சியின் இந்தத் தாமதம் தற்போதைய ஜனாதிபதியை எதிர்த்து வெற்றி கொள்ளக் கூடிய அல்லது வெற்றியின் விளிம்பையாவது எட்டக்கூடிய ஒருவரைத் தேடிக்கொண்டிருக்கிறார்கள் என்பதைப் புலப்படுத்துகிறது. இதேவேளை ஜே.வி.பி. பகிரங்கமாகவே சரத் ஃபொன்சேகாவை ஆதரித்ததுடன் ஐக்கிய தேசியக் கட்சியிடமும் சரத் ஃபொன்சகாவை எதிர்க்கட்சிகளின் பொது வேட்பாளராக நிறுத்தக் கோரியமையுமு் குறிப்பிடத்தக்கது. இதற்கு ஐக்கிய தேசியக் கட்சி இதுவரை பதிலளிக்காவிட்டாலும் வெளிநாட்டில் ரணில் விக்ரமசிங்ஹவும், சரத் ஃபொன்சேகாவும் சந்தித்துப் பேசிக்கொண்டதாக செய்திகள் வெளிவந்திருந்தன. ஐக்கிய தேசியக் கட்சியிக் கூட்டணியிலுள்ள கட்சியான ஜனநாயக மக்கள் முன்னணியின் தலைவர் மனோகணேசன் ஜே.வி.பி. கோரிக்கை வைத்த போது அதை தாம் எதிர்ப்பதாக அறிவித்திருந்த போதும், பின்னர் தனது கேள்விகளுக்கு தகுந்த பதிலும், உத்தரவாதமும் சரத் ஃபொன்சேகாவால் தரப்பட்டால் ஆதரிப்போம் எனக் கூறினார். இவற்றைத் தொடர்ந்து சரத் ஃபொன்சேகாவின் ஓய்வு பெறுகையும் நடைபெற்றது அடுத்த ஜனாதிபதித் தேர்தலில் சரத் ஃபொன்சேகா நிற்பார் என்பதை உறுதிப்படுத்துகிறது.

ஒரு வேளை சரத் ஃபொன்சேகா தேர்தலில் நின்றால் கூட என்ன மாற்றம் நிகழ்ந்துவிடப் போகின்றது என்பது பலரது கேள்வி. ஏனெனில் இலங்கையின் நிறைவேற்று அதிகாரம் கொண்ட ஜனாதிபதி முறையில் இடம்பெற்ற தேர்தல்களில் ஜனாதிபதியாக இருந்து கொண்டு இரண்டாம் முறை போட்டியிட்டவர்கள் தோற்றதில்லை - மேலும் இன்றைய நிலைமையில் தற்போதைய ஜனாதிபதி மஹிந்த ராஜபக்ஷவைத் தோற்கடிப்பது அவ்வளவு சுலபமல்ல - போரிட்டது ஃபொன்சேகாவாக இருந்தாலும் பல அழுத்தங்களுக்கு மத்தியில் போரை நடத்தி வெற்றியைத் தந்தவர் ஜனாதிபதி தான் என்ற நம்பிக்கை பெரும்பான்மை மக்களிடையே இருக்கிறது மேலும் தற்போது இருக்கும் மகா அமைச்சரவையின் அமைச்சர்களின் ஆதரவும், பலதரப்பட்ட பெரிய சிறிய கட்சிகளின் மற்றும் அழுத்தக் குழுக்களின் ஆதரவும் குறிப்பாக பல பெரிய சிறுபான்மைக் கட்சிகளின் ஆதரவும் இருப்பதால் அது கட்டாயமாக 51வீதம் வாக்குகளுக்கு அதிகமாகப் பெற்றுக்கொடுக்கும் - ஆகவே தற்போதைய ஜனாதிபதியின் அடுத்த வெற்றி என்பது நிச்சயம்.

மேலும் சிறுபான்மையினர் நிலமையிலிருந்து பார்த்தாலும் சரத் ஃபொன்சேகாவிற்கான ஆதரவு தொடர்பில் தமிழர்கள் இருமுறை சிந்திக்க வேண்டிய நிலமையிலேயே இருக்கின்றார்கள். இன்று இவர் தமிழர் நலம் பற்றிப் பேசலாம் ஆனால் ஒரு வேளை ஜனாதிபதியான பின்பு என்ன நடக்கும்? ஏற்கனவே இந்த அனுபவம் தமிழ் மக்களுக்குண்டு. சந்திரிக்கா பண்டாரநாயக்க குமாரதுங்க தேர்தலில் போட்டியிட்ட போது தமிழ மக்கள் மட்டுமல்ல அனைத்துச் சிறுபான்மையினர்களும் அவர் சமாதானம் பெற்றுத் தருவேன் என்று கூறியதை நம்பி வாக்களித்து வெற்றியை வழங்கி கடைசியில் அல்லல்பட்டது ஞாபகம் இருக்கும். அது தான் மீண்டும் நடக்கும் என்பது நிச்சயமல்ல ஏனெனில் சந்திரிக்கா குமாரதுங்கவும், சரத் ஃபொன்சேகாவும் இரு வேறு நபர்கள். ஆனாலும் அந்த பழைய கசப்பான அனுபவம் இன்னும் தமிழர்கள் மனதைவிட்டுப் போவதாக இல்லை.

எது எவ்வாறு நடந்தாலும் இலங்கையின் தற்போதைய நிலை தொடர்ந்தால் இவர்கள் எல்லாம் வார்த்தைகளால் வர்ணிக்கும் சுபீட்சம் என்பதை இலங்கைத் தேசம் இனிக் காணவே முடியாது. இப்போது இலங்கைக்குத் தேவை “நல்ல மாற்றம்” அதை யார் வழங்கினாலும் ஆதரிக்கலாம்.