oblogdegalix

Día de Rosalía

2026-02-18T14:35:00.004+01:00

Con motivo do Día de Rosalía, que se celebra cada 23 de febreiro, coincidindo coa data de nacemento de Rosalía de Castro, presentamos unha selección de recursos pensados para achegar a súa figura e a súa obra ao alumando e ao publico lector.

Trátase dunha escolma de libros dirixidos á infancia e á adolescencia que achegan a vida e obra de Rosalía dende linguaxes e formatos diversos. Son propostas pensadas para descubrir quen foi, que escribiu e porque segue a ser unha voz fundamental da nosa literatura. Acompañámola, ademais, dunha reflexión sobre Rosalía escrita por Montse Pena Presas, socia de GÁLIX, docente da Universidade de Santiago de Compostela e experta en LIX.

Con estes materiais convidamos ás novas xeracións a achegarse a Rosalía de Castro dunha maneira emocionante e significativa, mantendo viva a súa memoria a través da lectura.

Podes consultar e descargar as recomendacións no seguinte enlace

(premendo na imaxe)

Día Internacional da Muller e da Nena na Ciencia 2026 - Recomendacións Lectoras 2026

2026-02-11T08:57:00.008+01:00

Dende GÁLIX queremos unirnos, neste 11 de febreiro, á celebración e reivindicación do Día Internacional da Muller e da Nena na Ciencia. Por iso presentamos esta guía de recomendacións lectoras centrada na importancia de amosar a presenza feminina nos ámbitos científicos a través da literatura infantil e xuvenil galega.

A publicación recolle unha selección de obras que permiten traballar nas aulas e bibliotecas a ciencia en feminino, ofrecendo a nenas e nenos historias nas que recoñecerse e nas que imaxinar futuros posibles.

Complétase con testemuños de mulleres senlleiras e profesionais galegas que comparten as lecturas que marcaron a súa infancia, poñendo en valor o papel da lectura na construción de vocacións STEAM.

Celebrar esta data dende os libros é tamén unha forma de sementar curiosidade, pensamento crítico e igualdade, abrindo camiños para que máis nenas poidan verse facendo ciencia.

Preme na imaxe para descargar a Guía

"O futuro pasa porque a ciencia sexa cousa de todos e de todas"

Amparo Alonso. Premio María Josefa Wonemburguer Planells 2020

Recomendancións lectoras de Entroido 2026

2026-02-10T12:02:00.006+01:00

Dende GÁLIX presentamos esta guía de recomendacións lectoras para o tempo de Entroido, que achega tanto bibliografía arredor desta temática como recursos e xogos descargables, para centros educativos e bibliotecas.

Contamos tamén con cuestionarios sobre as tradicións destas datas e recomendacións lectoras, por parte de autoras e autores da nosa LIX.

O Entroido constitúe unha das manifestacións máis ricas do noso patrimonio cultural, na que se combinan tradición, creatividade, diversión, participación comunitaria e transgresión. A súa presenza no libro infantil e xuvenil galego permite achegar esta festa ás novas xeracións dun xeito lúdico, de aí esta pequena selección de títulos que, no seu conxunto, contribúe a exaltar a nosa diversidade cultural e identidade colectiva.

No país dos entroidos, descubriremos os seus múltiples nomes, vestirémonos de peliqueiros, boteiros, máscaras, felos, pantallas, xenerais, bonitas ou cigarróns, e comeremos filloas, orellas ou botelos.

A pasalo ben coa lectura e coa festa!!!

Miguel García-Fernández

vogalía de bibliotecas e redes sociais

Accede neste enlace:

Recomendacións lectoras de Entroido

Xogos descargables:

Podes descargar a guía premendo na imaxe!

Visita a nosa biblioteca de Entroido!

Ilustrado por: María Montes (vogalía de ilustración)

Este libro encantoume! Febreiro 2026

2026-01-29T12:33:00.002+01:00

FEBREIRO 2026

Recomendamos Medo me da! de Ramón Domínguez Veiga

En formato de texto teatral, perfectamente representable, cóntanos de maneira impecable unha historia sinxela e divertida que acontece o día 2 de novembro, en que se honra aos mortos e no que nenos e nenas se disfrazan de personaxes tétricos.

Un vampiro, un home lobo, unha bruxa, unha momia, unha pantasma e alguén máis… transitan por espazos nos que una criatura humana de curta idade adoita ter medo, como pode ser ir a unha clínica dental.

O feito de que os “monstros” sexan nesta ocasión os que sufran eses medos tan comúns aos humanos, fainos máis atractivos e a mensaxe “quita-medos”, máis efectiva.

Trátase de seis escenas que van sementando intriga. Ao final de cada escena sempre acontece “algo” inesperado que lle impide ao lector, á lectora, saber de que se disfrazaron, avanzando habilmente cara a un desenlace final que sorprende e satisfai á cativada a quen vai destinada a obra.

Precisamente un dos seus valores é que ten os ingredientes precisos para conquistar á xente miúda cara ao gozo da lectura.

Aínda que convida a ser representada coma un musical, tanto por escolares (en calquera curso de primaria) como por profesionais da escena. Cada escena remata cunha canción a modo dos populares romances de cego daquela literatura chamada “de cordel” (con temas truculentos e sucesos insólitos) e con “baile”. Préstase tamén a ser lida individual o colectivamente coma unha peza literaria moi amena que trata de desmontar os medos máis comúns da infancia cun humor ateigado de equívocos e lúcida ironía, da que nenos e nenas poden gozar porque hai no autor ese esforzo en comunicarse con quen é máis novo ca nós, non menos intelixente.

FinaCasalderrey

GÁLIX publica cada mes unha recensión feita por algunha ou algún dos socios para a sección Este libro encantoume da OEPLI. Todos os meses poderás ver neste blog as recomendacións de Literatura Infantil e Xuvenil en galego e na web da OEPLI as propostas das asociacións dos diferentes ámbitos lingüísticos que forman a organización. Se queres colaborar coas túas recomendacións, non dubides en nos contactar.

Rescate en audio 12. O misterio do cemiterio vello de Fina Casalderrey

2026-01-19T20:38:00.004+01:00

Antía Yáñez rescata "O misterio do cemiterio vello" de Fina Casalderrey, candidata ao ALMA 2026 a proposta de GÁLIX.

Nesta sección, dedicada a evitar que grandes obras literarias galegas se nos perdan no esquecemento, as nosas socias e socios están compartindo as súas lembranzas e opinións sobre as obras desta autora de referencia para a LIX galega, como parte da campaña que estamos despregando para apoiar a súa candidatura.

Este podcast está dispoñible no programa Rescate en audio de Ivoox e no programa Fina Casalderrey ao Premio ALMA 2026.

Antía Yáñez é Enxeñeira de Camiños, Canles e Portos e escritora. Foi Vicepresidenta da Asociación Galega do Libro Infantil e Xuvenil (GÁLIX).

No eido da literatura infantil e xuvenil ten publicado:

O misterio de Portomarín
A reconquista, Premio Fina Casalderrey de literatura infantil pola Igualdade, 2018
O misterio do torque de Burela, tamén adaptado a Lectura Fácil.
Be Water
Plan de rescate, Premio Agustín Fernández Paz de narrativa infantil e xuvenil pola Igualdade 2019
Be Water II

No ano 2022 recibiu o Premio dos Clubs de Lectura da Consellería de Cultura, Educación e Universidade

Consideracións sobre as xornadas Educar dende a LIX.

2026-01-07T21:23:00.000+01:00

O pasado mes de novembro celebramos as Xornadas-Obradoiro "Ensinar dende a LIX", coordinadas por Miguel Alonso Diz e nas que contamos coa colaboración de Raquel Castro, Anxo Iglesias Mariño e Xavier Estévez Ferreiro.

A actividade contou co apoio da OEPLI e a axuda do Ministerio de Cultura e Deporte.

Realizouse en tres días diferentes usando as ferramentas pedagóxicas que nos proporciona a LIX nos ámbitos do teatro, a poesía e a narrativa.

No seu desenvolvemento constatamos a necesidade de crear sinerxías entre os distintos sectores da mediación para conseguir un intercambio de ideas, experiencias e ferramentas para enfocar a transmisión da LIX dunha forma eficaz, amena e resolutiva á hora de traballar co alumnado (infantil, primaria e ESO) e usuarios e usuarias das bibliotecas. As persoas asistentes traballaron man a man co profesorado que impartiu as diferentes sesións. Así, durante os tres días transmitíronse experiencias en vivo dunha metodoloxía eficaz para a promoción da lectura, afianzamento dos lectores e lectoras e captación de novo lectorado.

Neste sentido, un dos resultados que consideramos fundamental foi definir o marco teórico e os campos de actuación na práctica da mediación lectora.

Evidenciouse a importancia de coñecer unha extensa e contrastada bibliografía de LIX para que as persoas mediadoras saiban recomendar obras de calidade e, sobre todo, aquelas que promovan a adquisición de valores tan sensibles como os referidos ao acoso escolar, solidariedade, igualdade e diversidade, ou sexa, a realidade na LIX e a súa importancia na formación de mellores persoas no futuro.

Rescate en audio 11. O misterio dos fillos de Lúa de Fina Casalderrey

2026-01-01T11:00:00.003+01:00

Como parte da campaña que GÁLIX está despregando para apoiar á candidatura de Fina Casalderrey ao Premio ALMA (Astrid Lindgren Memorial Award) 2026 impulsada pola asociación, a nosa socia Pilar Sampedro rescata a obra O misterio dos fillos de Lúa, unha libro infantil, publicado en 1995 pola Editorial S.M. que gañou o Premio Nacional de Literatura infantil en 1996.

Este podcast está dispoñible no programa Rescate en audio de Ivoox e no programa Fina Casalderrey ao Premio ALMA 2026.

Pilar Sampedro Martínez é mestra e licenciada en Ciencias da Educación.

Traballou en educación Primaria e Secundaria, en educación no exterior, en formación do profesorado e na Asesoría de bibliotecas escolares.

Formou parte da directiva de GÁLIX en diversas ocasións. Publica en diferentes revistas dixitais ou en papel e xestiona os blog: De libros e outros artefactos e No país das marabillas.

Na nosa biblioteca (473)

2025-12-19T13:10:00.002+01:00

Novas achegas de libros xuvenís de Editorial Galaxia para a Biblioteca de GÁLIX :

Unha historia de amor como outra calquera
Adelina

Título: Unha historia de amor como outra calquera
Autora: Rosa Aneiros

Editorial: Galaxia
Colección: Costa Oeste

Premio Raíña Lupa modalidade xuvenil 2024

+ info: https://editorialgalaxia.gal/produto/unha-historia-de-amor-como-outra-calquera/

Título: Adelina
Autora: Sandra Lodi

Editorial: Galaxia
Colección: Banda Deseñada

Premio Castelao de banda deseñada2024

+ info: https://editorialgalaxia.gal/produto/adelina/

Na nosa biblioteca (472)

2025-12-16T18:15:00.001+01:00

Chegou á Biblioteca de GÁLIX esta novidade da Editorial Baía:

O segredo das Cíes

Título: O segredo das Cíes

Texto: A. R. Do Lobo
Ilustracións: Blanca Millán

Editorial: Baía

Obra gañadora do V Premio Fina Casalderrey de literatura infantil pola igualdade (2025)

+ info:https://baiaedicions.gal/conto-x-conto/608-o-segredo-das-cies.html

Rescate en audio 10. A lagoa das nenas mudas de Fina Casalderrey

2025-12-15T19:31:00.002+01:00

Como parte da campaña de apoio á candidatura de Fina Casalderrey ao Premio ALMA (Astrid Lindgren Memorial Award) 2026 impulsada por GÁLIX, o noso socio Héctor Cajaraville rescata a obra A lagoa das nenas mudas, unha novela infantil, publicada por Xerais, na súa colección Sopa de libros, en 2007.

Este podcast está dispoñible no programa Rescate en audio de Ivoox e no programa Fina Casalderrey ao Premio ALMA 2026.

Héctor Cajaraville, licenciado en Xornalismo pola USC, traballou como xornalista durante varios anos e neste momento é profesor de Lingua e Literatura Galega no ensino secundario.

Como escritor ten publicado numerosas obras para o lectorado infantil e xuvenil.

Quen dá a quenda?
A caixiña dos rancores, Premio Raíña Lupa de Literatura Infantil e Xuvenil 2015, traducido ao inglés baixo o título The Box Of Resentments
Denébola a Roxa, Premio Meiga Moira de Literatura Infantil e Xuvenil 2016
O segredo da casa de Formoso
Kusuma
Os metrosiderais
Xestas olímpicas. Escolma de relatos heroicos no mundo do deporte
Moita froita
Aurora Austral, Premio Meiga Moira de Literatura Infantil e Xuvenil 2024.

E tamén biografías amenas e ben documentadas

Antonio Fraguas: o bo mestre, o mestre bo.
Ricardo Carvalho Calero: a pegada do compromiso.
Florencio Delgado Gurriarán: polos vieiros da saudade.
Francisco Fernández del Riego: o legado silandeiro.

Fina Casalderrey. As lecturas que nos acompañan

2025-12-02T19:04:00.002+01:00

Dende que se confirmou que Fina Casalderrey é unha das candidatas ao Astrid Lindgren Memorial Award (ALMA) 2026, GÁLIX está desenvolvendo unha campaña de difusión e apoio na que están colaborando todas as nosas socias e socios e á que están convidadas todas as persoas que queiran sumarse a este labor.

O premio ALMA, o recoñecemento internacional máis destacado no ámbito da literatura infantil e xuvenil e da promoción da lectura, é outorgado anualmente polo goberno sueco coma homenaxe á creadora de Pippi Mediaslongas, e nel recoñécese o traballo dos diversos actores que conforman o mundo do libro infantil e xuvenil e pode recaer tanto nunha organización coma nun persoa individual.

Your browser does not support the video tag.

Fina Casalderrey é unha das autoras máis queridas, lidas e fundamentais da nosa literatura, mestra de vocación e referencia para varias xeracións de lectoras e lectores.

A obra de Fina abrangue todos os xéneros, aínda que centrou o seu interese na necesidade de referentes literarios do lectorado infantil e xuvenil.

Como figura literaria é coñecida e respectada dentro e fóra de Galicia, recibiu numerosos premios, incluído o Nacional, e as súas obras foron traducidas ás linguas peninsulares, incluído o portugués, e tamén ao Braille, francés, inglés, chinés, serbio, ilaliano, córnico ou bretón.

Entendemos que esta candidatura é, tamén, unha oportunidade para celebrar o libro galego, a lectura compartida e a creación feita desde Galicia.

Rescate en audio 9. Lúas de nácara de Fina Casalderrey

2025-11-30T12:05:00.002+01:00

Dentro da campaña de apoio á candidatura de Fina Casalderrey ao Premio ALMA (Astrid Lindgren Memorial Award) 2026 impulsada por GÁLIX, a nosa socia An Alfaya rescata a obra Lúas de nácara, unha novela xuvenil, publicada por Xerais, na súa colección Fóra de xogo, en 2003.

Este podcast está dispoñible no programa Rescate en audio de Ivoox e no programa Fina Casalderrey ao Premio ALMA 2026.

María de los Ángeles Alfaya Bernárdez, An Alfaya, diplomada en Maxisterio e en Criminología, é unha escritora prolífica e multipremiada:

No campo do libro infantil e xuvenil galego é autora de libros como:

O maquinista Antón
O caderno azul
Sireno, Sireno!
Bua, bua, requetebuá
A recortada
O baúl de Wensel
Folerpas
Down
A estrela volarina da torre colarina
Buguina namorada.
O cero escuro
A encontadora
Unha xanela para Cecilia
A sombra descalza
Zoa e Azor
Illa Soidade
A lenda da lúa de Montealto
Os seres con raíces na cara
Vacas na cidade?
A ánfora exipcia
O aroma do liquidámbar
O recendo das clementinas
O fío vermello
A cea das enaguas
Soleando
O grupo
O corazón das casas
Irracionais

Na nosa biblioteca (471)

2025-11-26T20:17:00.000+01:00

Chegaron á Biblioteca de GÁLIX, como doazón da editorial, as novidades de Kalandraka:

A panadería
Limón
A banda que ninguén coñece

Título: A panadería

Texto: Lucía Belarte

Ilustración: David Lorenzo

Editorial: Kalandraka

Colección: MareMar

+ info: https://kalandraka.com/a-panaderia-galego.html

Título: Limón

Texto: Antonio Rubio

Ilustración: Óscar Villán
Tradución: Manuela Rodríguez

Editorial: Kalandraka

Colección: Do berce á lúa

+ info: https://kalandraka.com/limon-galego.html

Título: Flores

Texto: Antonio Rubio

Ilustración: Óscar Villán
Tradución: Manuela Rodríguez

Editorial: Kalandraka

Colección: Do berce á lúa

+ info: https://kalandraka.com/flores-galego.html

Libros contra a barbarie. En Compostela o sábado 22 de novembro

2025-11-18T15:18:00.002+01:00

"Asistimos con horror e impotencia a un masacre de poboación civil e, especialmente, ao asasinato de nenos e nenas en Gaza e en Cisxordania. A ofensiva militar israelí custou xa a vida a máis de 60.000 palestinos e estímase que polo menos un terzo deles son menores de 14 anos. A esta ofensiva militar atroz únense os continuos asasinatos nas colas para recoller alimentos, o bloqueo dos camións con axuda humanitaria e unha cifra crecente de mortos por fame e enfermidades produto da situación extrema á que ven sometidos estes territorios".

Libros contra a barbarie. Iniciativa de apoio aos nenos e nenas de Gaza e Cisxordania é unha acción pola que persoas e entidades do eido do libro e a lectura de diferentes lugares do mundo pretenden amosar apoio e solidariedade a todos os nenos e nenas afectados pola barbarie xenocida en Gaza e expresar unha fonda indignación pola morte, mutilación e terror que sofren estes nenos e nenas por causa dos bombardeos, a falta de alimentos e de asistencia médica.

Este sábado, 22 de novembro, organizarase, en varias cidades, unha venda solidaria de libros e ilustracións e entregarase a totalidade do recadado ás ONG acreditadas que se ocupen de fornecer á infancia de Gaza con auga, alimentos e atención médica.

En Santiago de Compostela en Oficina Rúa, na Rúa de San Pedro 52, de 11.00 a 19.00 horas.

A primeira xornada desenvolveuse xa paralelamente en Barcelona, Berlín e Bogotá o día 25 de outubro de 2025.

A XANELA DE GÁLIX. Clara do Roxo

2025-11-15T11:30:00.007+01:00

Clara Isabel Rodriguez Giráldez (Clara do Roxo)

Socia nº 339 de GÁLIX

Licenciada en Xeografía e Historia, especializouse en Escritura e Narración e realizou diversos estudos sobre o acoso laboral, escolar, a integración e os problemas nas aulas, os conflitos bélicos e o maltrato, temas que procura deixar á vista na súa escrita.

No ano 2012 edita a novela infantil A princesiña que conducía unha locomotora con Ed. Galaxia.

Continúa a publicar obras alicerzadas na emoción e na visibilidade: A mamá que perdeu as cóxegas, Sombras no Ensanche, Actrices Secundarias, Mar e a pantasma das treboadas e A raposa muiñeira.

Forma parte en diversas publicacións colectivas: O Libro dos Reis Magos, Obras breves de imaxinación, Aliterarte, Escolma aberta, Creadores na Reserva, A forza e a firmeza do traballo, Oroza 100 e compilacións de relatos premiados.

No ano 2014 crea o obradoiro de escrita creativa Aliteraclara e dese xerme parte a Escola de escrita creativa en lingua galega Aliteraclara que combina coa súa actividade docente no Portal del Escritor dende 2017.

Dende 2015 preside a Asociación Cultural CatroPatacos, que tenta poñer en valor a lingua e a cultura galega por medio de obradoiros, certames literarios, publicacións e actuacións nas que mesturan a escrita coa música, a pintura ou a fotografía.

Coordina as coleccións de libros do proxecto da AC CatroPatacos, Historias para coñecermos..., proxecto vivo para coñecer diversas vilas galegas que se publican con Ed. Elvira.

Dende 2016 forma parte de “4ghatos”, grupo de narradores e músicos contra as atrocidades dos conflitos bélicos.

E Clara do Roxo escribe, escribe, escribe...

Ti es a socia número 339.ç Por que te asociaches a GALIX e continúas apoiando este proxecto?
Asocieime porque escribo LIX e considerei que é importante darlle visibilidade de forma conxunta. Sen esa visión de conxunto non é posible chegar ao lectorado
Que ou quen che axudou a achegarte á LIX galega?

Non lembro quen foi, quizais dende a AELG

Que libro marcou a túa infancia ou a túa mocidade?

A Illa do Tesouro, por ser o primeiro do que lin con consciencia

Un libro de literatura infantil ou xuvenil galego que consideres imprescindible?

Memorias dun neno labrego

Con que personaxe da nosa LIX te sentes máis identificada?

Síntome identificada co personaxe principal do meu último libro: A raposa muiñeira, unha femia empoderada, conciente do espazo que a arrodea, amiga dos seus amigos, defensora do medio ambiente e loitadora polo que cre xusto.

A que ilustradora ou ilustrador galego escollerías para poñer imaxes aos teus soños ?

Darei dous: Franchesca D’a Silva e Xavier Magalhaes

Sinala a maior fortaleza e a maior debilidade do libro infantil e xuvenil galego.

A maior fortaleza é permanecer vivos sen axudas gubernamentais.

A maior debilidade é o escaso interese que hai nas institucións e nas aulas para promocionalos. Faltan lecturas colectivas en espazos públicos Escenificación das historias e obradoiros nos que a rapazada cree Certames literarios

Dende que ti te vinculaches ao LIXG ata a actualidade, que cambios destacarías na súa evolución

Hai un lixeiro aumento no interese pola lectura de LIX en galego, algunha implicación por parte de certo sector do profesorado, aínda que non sempre se corresponde cos intereses dos centros.

Con respecto a autoras/es, observo unha maior complicidade nos temas de actualidade, na forma de facerllo chegar á rapazada de xeito natural, na fuxida dos estereotipos.

Cal consideras que é o grao de coñecemento e respecto pola LIX galega?

Escaso. Ten pouca visibilidade e unha competencia brutal cos libros de LIX en castelán, best-seller que son “productos” das grandes editoriais e soterran obras en galego que fican nos andéis sen visibilidade. Habería que preguntarse cal é o criterio polo que algunhas librerías expoñen eses best-sellers e ocultan a LIX en galego

Apunta un par de iniciativas necesarias para promover a lectura de libros infantís e xuvenís galegos e para conseguir unha maior proxección fóra de Galicia.

Estadías de autoras/es fóra de Galicia, axudas a libros en galego para traducilos a outras linguas e non queden relegados só ao mercado galego. Intercambios e estadías literarias para autoras/es de LIX en universidades que inclúan a lingua galega como si existen para a literatura de adultos.

Na nosa biblioteca (470)

2025-11-10T11:00:00.002+01:00

Novas achegas de literatura xuvenil de Editorial Galaxia para a Biblioteca de GÁLIX , :

Irracionais
Pontealbar
Os rapaces só se tocan para darse de hostias

Título: Os rapaces só se tocan para darse de hostias

Texto: Iván Caloto

Editorial: Galaxia
Colección: Bitátora

PREMIO ROBERTO VIDAL BOLAÑO 2025

+ info: https://editorialgalaxia.gal/produto/os-rapaces-so-se-tocan-para-darse-de-hostias/

Título: Irracionais
Texto: An Alfaya

Editorial: Galaxia
Colección: Costa Oeste

+ info: https://editorialgalaxia.gal/produto/irracionais/

Título: Pontealbar

Texto: Adrián Noia

Editorial: Galaxia
Colección: Costa Oeste

+ info: https://editorialgalaxia.gal/produto/pontealbar/

Celebración da xornada de formación Historia e Literatura na LIX galega

2025-11-04T10:47:00.003+01:00

Co obxectivo de reflexionar sobre tratamento da historia na literatura infantil e xuvenil galega celebrouse o pasado mes de outubro, na Facultade de Ciencias da Educación de Santiago de Compostela, a Xornada GÁLIX. Desfacendo a Raia XVI: Historia e Literatura na LIX galega, que contou co apoio da OEPLI e recibiu axuda do Ministerio de Cultura e Deporte.

María López Sández e Miguel García-Fernández

A xornada, presentada pola vicedecana María López Sández, estruturouse ao redor dunha conferencia inaugural de Miguel García-Fernández, historiador, investigador e vogal de GÁLIX, sobre o peso e protagonismo do diálogo entre a Historia e a Literatura na LIX galega.

Mesa redonda: Pere Tobaruela, Eva Mejuto, Pilar Sampedro, Jorge Campos e Alexandra Cabana Outeiro.

A continuación houbo unha mesa redonda na que participaron Alexandra Cabana Outeiro, historiadora, docente e asesora de bibliotecas escolares, Jorge Campos, ilustrador, Eva Mejuto, escritora e responsable da colección “Pequena memoria” de Xerais e Pere Tobaruela, escritor e historiador e que estivo moderada por Pilar Sampedro, socia de GÁLIX especialista en LIX galega.

O acto, de gran interese para docentes en formación, contou coa presenza de numerosos estudantes, docentes e mediadoras.

Este libro encantoume! Novembro 2025

2025-11-01T11:00:00.006+01:00

NOVEMBRO 2025

Recomendamos O xenio da Cidade do Sal de Fina Casalderrey.

A autora está nominada pola OEPLI, a proposta de GÁLIX, para os premios ALMA (Astrid Lindgren Memorial Award), a máxima distinción en literatura infantil e xuvenil a nivel mundial, outorgado anualmente polo Consello Cultural Sueco. Entre os gañadores anteriores hai persoas tan importantes como Shaun Tan, Christine Nöstlinger ou Maurice Sendak.

Se algo caracteriza a obra de Fina Casalderrey é que sempre sorprende, agás na indubidable calidade literaria que impregna cada unha das súas historias.

O xenio da Cidade do Sal é unha sinfonía literaria, que dá acubillo á música e á ilustración, para crear un conxunto artístico, transversal e suxestivo, que se traduce nunha viaxe sensorial da que ninguén logra fuxir.

O eixe central da obra é a figura dun Mozart aínda neno, quen, rompendo as regras do tempo e do espazo, vai ir amosando, ademais das súas filias e fobias, os efectos derivados da síndrome de Tourette que padece. Mais o relato de Fina Casalderrey, malia estar moi ben documentado, non peca dun didactismo no que sería sumamente fácil caer nunha obra destas características; a autora, cunha mestría extraordinaria, vai descubríndonos a faceta de xenio de Mozart, pero tamén a máis humana, a dun rapaz de 12 anos cuxo maior desexo é liberarse das imposicións da súa familia, máis preocupada por explotar as magníficas calidades que posúe ca polos seus sentimentos.

Especialmente importante é o papel da irmá do protagonista; ela é o centro do universo emocional do pequeno Amadeus (ou Xoán como quere que lle chamemos) e reflicte a visión que da muller tiña a sociedade patriarcal da época. E, xunta ela, o fabuloso cabalo branco que aparece perante a súa casa co que vivirá significativas experiencias ao longo do Camiño de Santiago.

Da complicidade e do apego que a autora sente polos personaxes creados pola súa desbordante imaxinación, dá boa conta a segunda carta; nela, Fina convértese na destinataria das palabras de Mozart e reflexiona sobre o proceso da escrita.

Toda a obra é un gran diálogo… entre manifestacións artísticas, entre dúas voces narrativas, entre realidade e ficción, entre culturas, entre emocións contrapostas, entre a idade adulta e a infancia, entre pinceladas de humor e verdades descarnadas.

Deixádevos levar polas magníficas ilustracións de Xosé Cobas, polas notas da frauta de Luis Soto e pola exquisitez narrativa de Fina Casalderrey en O xenio da Cidade do Sal.

Irene Penas Murias

Primeiro Seminario GALIX. Educar dende a LIX

2025-10-30T11:49:00.000+01:00

Dirixido preferentemente ás persoas que traballan na mediación lectora: docentes, bibliotecarias/os, animadoras/os socioculturais, etc. GÁLIX organiza este ano o I Seminario GáLIX: Ensinar desde a LIX, unha actividade eminentemente práctica para crear, compartir e difundir ferramentas que contribúan á creación de sinerxías e métodos de traballo co alumnado e os usuarios de ludotecas e bibliotecas.

As persoas interesadas en participar deberán inscribirse en galix@galix.org, antes do martes, 4 de novembro de 2025, indicando Nome, Apelidos e NIF.

Raquel Castro, que ten unha ampla traxectoria como escritora no xxénero dramático infantil e xuvenil, estará a cargo da primeira sesión sobre teatro: Ergamos á rapazada da cadeira: aprender co corpo.

Da segunda sesión do seminario, o xoves 13, ocuparase Anxo Iglesias Mariño, escritor, membro da asociación Espazo Lectura e coordinador do Club de Lectura Compartida Lendo Contigo, que levará o obradoiro de poesía: A mirada rara da rimA (e un S.O.S de verSOS sós)

O xoves, día 20, o docente e escritor Xavier Estévez Ferreiro desenvolverá a sesión sobre narrativa: Educando con historias.

O Seminario desenvolverase nas aulas 2 e 10 da EGAP (Escola Galega de Administración Pública) os xoves 6, 13 e 20 de novembro en horario de cinco a oito (17:00 a 20:00) para facilitar a asistencia do profesorado e estará homologada pola Consellería de Educación, Ciencia, Universidades e Formación Profesional.

Esta actividade formativa está organizada por GÁLIX (Asociación Galega do Libro Infantil e Xuvenil, sección da OEPLI correspondente ao ámbito galego) con axuda do Ministerio de Cultura e Deporte.

Convidamos ás persoas interesadas e profesionais da mediación e a creación do libro infantil e xuvenil galego, a participar nestes obradoiros nos que pretendemos crear sinerxías entre os diferentes sectores da mediación para lograr un intercambio de ideas, experiencias e ferramentas que permitan enfocar a transmisión da literatura dun xeito eficaz e ameno.

Na nosa biblioteca (469) Premios Xerais 2025

2025-10-24T18:34:00.001+02:00

Recibimos a Biblioteca de GÁLIX os premios Merlín e Xules Verne de Edicións Xerais de Galicia 2025:

Erin e o lobo
O corvo sobre a neve

Título: Erin e o lobo

Texto: Érica Esmorís
Ilustración: Blanca Millán

Editorial: Xerais
Colección: Merlín

XL Premio Merlín de Literatura Infantil

+ info: https://www.xerais.gal/libro/de-11-anos-en-diante/erin-e-o-lobo-erica-esmoris-9788411107365/

Título: O corvo sobre a neve
Texto: Andrea Maceiras

Editorial: Xerais
Colección: Fóra de Xogo

Premio Jules Verne de Literatura Xuvenil

+ info: https://www.xerais.gal/libro/fora-de-xogo/o-corvo-sobre-a-neve-andrea-maceiras-9788411107297/

Rescate en audio 8. O estanque dos parrulos pobres de Fina Casalderry

2025-10-21T10:45:00.005+02:00

María Montes, que ocupa a vogalía de ilustración na Directiva de GÁLIX, rescata O estanque dos parrulos pobres de Fina Casalderrey para esta sección na que tratamos de recuperar do esquecemento todos os libros que guiaron o progreso do libro infantil e xuvenil galego. Esta obra foi Premio Edebé de Literatura Infantil 1996, cando os certames de editoras de ámbito estatal premiaban obras de calquera idioma oficial.

Graduada e bioloxía, con mestrado en Biotecnoloxía, María Montes compaxina o seu labor na ilustración e o deseño profesional co seu traballo nunha clínica veterinaria en Pontevedra.

Elegante e expresiva, traballa en diferentes obras e proxectos; no campo do libro infantil e xuvenil galego é autora das ilustracións de libros como:

A brétema de María Victoria Moreno en Urco (2017)
Irmá Paxaro de Tamara Andrés en Cuarto de inverno (2020)
A casa da Moira de Sergio Sánchez Benítez en Bululú (2021)
Unha nova dimensión de Anxo Iglesias en Xerais (2022)
E que vai ser? de Adelaida Vidal en Baía (2023)
Quen precisa unha avoa? Andrea Barreira Freije en Xerais (2024)

Do seu compromiso coa igualdade e a cultura galega parten tamén numerosas colaboracións con entidades e asociacións para eventos e celebracións.

Manuel Figueiras: Socio de Honra de GÁLIX 2025. Sábado 18 de outubro, no CSC O Ensanche en Santiago de Compostela

2025-10-13T20:18:00.004+02:00

A Asociación Galega do Libro Infantil e Xuvenil (GÁLIX) ten previsto homenaxear a Manuel Figueiras, un dos socios máis veteranos, en recoñecemento ao seu inxente e discreto labor a prol da LIX galega e a súa dedicación desinteresada nesta asociación.

Formou parte da Directiva de GÁLIX, como Vicepresidente 2º no período 1996-98. Entre 1998 e 1999 foi parte da Directiva colexiada. No período 2005-07 ocupou o cargo de Vicepresidente 1º e foi o presidente de GÁLIX entre 2008 e 2010.

O seu labor como profesor de galego, dinamizador de iniciativas culturais e promotor da LIXG (Literatura Infantil e Xuvenil Galega) é especialmente relevante.

Presidente da Asociación Filix, organizadora da Feira Internacional do Libro Infantil e Xuvenil de Chantada (1994–1997), que se converteu nun referente internacional da literatura infantil, con participación de editoriais de diversos países. Nesta feira entregábase o Premio Rañolas, en 1994 e 1995 a Cando petan na porta pola noite de Xabier P. Docampo, Cartas de inverno de Agustín Fernández Paz; en 1996, O trasno de Alqueidón de Marilar Aleixandre e o premio de ilustración a Manuel Uhía por Lolo anda en bicicleta; en 1997 Cidades de Fran Alonso e o premio de ilustración a Xan López Domínguez por Sete casas, sete bruxas e un ovo.

Manuel Figueiras é o creador e mantedor da páxina BLIX
(Biblioteca do Libro Infantil e Xuvenil Galego), un completísimo catálogo-repositorio da produción infanto-xuvenil galega que foi un recurso imprescindible para docentes e mediadores mentres estivo activa. Esta páxina obtivo o Premio Irmandade do Libro 2003 da Federación de Libreiros de Galicia, na modalidade de medios de comunicación.

Cómpre valorar tamén o seu valor como tradutor para achegar obras de calidade ao idioma galego.

O acto, como se indica no convite, celebrarase este sábado, 18 de outubro ás 12:00, no Salón de Actos do CSC O Ensanche en Santiago de Compostela.

Animádevos a acompañarnos!

Xornadas GÁLIX. Desfacendo a Raia XVI: Historia e Literatura na LIX galega

2025-10-12T19:04:00.001+02:00

Este vindeiro xoves, 16 de outubro de 2025, celebraremos a Xornada GÁLIX. Desfacendo a Raia XVI: Historia e Literatura na LIX galega no Salón de Actos da Facultade de Ciencias da Educación de Santiago de Compostela O proxecto recibiu unha axuda do Ministerio de Cultura e Deporte, e celébrase co apoio da OEPLI.

A actividade ten como obxectivo a reflexión sobre tratamento da historia na literatura infantil e xuvenil galega, sempre tan necesaria, pero aínda máis na actualidade.

Inaugura o acto Miguel García Fernández, historiador e investigador falando de "Historia e LIX, un diálogo posible".

Pilar Sampedro moderará a mesa "O pasado no libro infantil e xuvenil galego" que contará coa participación de Alexandra Cabana Outeiro, Jorge Campos, Eva Mejuto e Pere Tobaruela.

A xornada está aberta á participación de todas as persoas interesadas no libro infantil e xuvenil galego.

Coa organización deste evento, GÁLIX pretende achegar este interesante debate ao profesorado en formación e abrir espazos de diálogo entre expertos da creación, da mediación literaria e cultural e tamén cos participantes e socias e socios.

Na nosa biblioteca (468)

2025-10-09T18:33:00.001+02:00

A Editorial Sushi Books achéganos estas novidades para a Biblioteca de GÁLIX:

Amelia Fang e os gaticornios travesos
O rei Cuu. A maldición do tesouro da momia

Título: Amelia Fang e os gaticornios travesos

Autora: Laura Ellen Anderson

Tradución: Eva Almazán

Editorial: Sushi Books

Colección: Intermedio
+ info: https://rinoceronte.gal/sushibooks/produto/amelia-fang-e-os-gaticornios-travesos/

Título: O rei Cuu. A maldición do tesouro da momia
Texto: Adam Stower

Tradución: Estela Villar Nogueira

Editorial: Sushi Books

Colección: Intermedio
+ info: https://rinoceronte.gal/sushibooks/produto/o-rei-cuu-a-maldicion-do-tesouro-da-momia/

Na nosa biblioteca (467)

2025-10-07T11:00:00.008+02:00

Recibimos de Edicións Xerais de Galicia, como doazón para a Biblioteca de GÁLIX, o XIII Premio Manuel María de literatura dramática infantil :

O carteiro de Ximaraos

Título: O carteiro de Ximaraos

Texto: Carlos Labraña
Ilustración: Luz Beloso

Editorial: Xerais
Colección: Biblioteca Dramática Galega

XIII Premio Manuel María de literatura dramática infantil

+ info: https://www.xerais.gal/libro/biblioteca-dramatica-galega/o-carteiro-de-ximaraos-carlos-labrana-9788411107129/

oblogdegalix

Día de Rosalía

Día Internacional da Muller e da Nena na Ciencia 2026 - Recomendacións Lectoras 2026

Recomendancións lectoras de Entroido 2026

Este libro encantoume! Febreiro 2026

Rescate en audio 12. O misterio do cemiterio vello de Fina Casalderrey

Consideracións sobre as xornadas Educar dende a LIX.

Rescate en audio 11. O misterio dos fillos de Lúa de Fina Casalderrey

Na nosa biblioteca (473)

Unha historia de amor como outra calquera

Adelina

Na nosa biblioteca (472)

O segredo das Cíes

Rescate en audio 10. A lagoa das nenas mudas de Fina Casalderrey

Fina Casalderrey. As lecturas que nos acompañan

Rescate en audio 9. Lúas de nácara de Fina Casalderrey

Na nosa biblioteca (471)

A panadería

Limón

A banda que ninguén coñece

Libros contra a barbarie. En Compostela o sábado 22 de novembro

A XANELA DE GÁLIX. Clara do Roxo

Na nosa biblioteca (470)

Irracionais

Pontealbar

Os rapaces só se tocan para darse de hostias

Celebración da xornada de formación Historia e Literatura na LIX galega

Este libro encantoume! Novembro 2025

Primeiro Seminario GALIX. Educar dende a LIX

Na nosa biblioteca (469) Premios Xerais 2025

Erin e o lobo

O corvo sobre a neve

Rescate en audio 8. O estanque dos parrulos pobres de Fina Casalderry

Manuel Figueiras: Socio de Honra de GÁLIX 2025. Sábado 18 de outubro, no CSC O Ensanche en Santiago de Compostela

Xornadas GÁLIX. Desfacendo a Raia XVI: Historia e Literatura na LIX galega

Na nosa biblioteca (468)

Na nosa biblioteca (467)

O carteiro de Ximaraos