ഊണേശ്വരം പി.ഒ.

'ഡയറി'യ

2012-01-14T18:31:00.002-03:00

“ ഏതാനും ദിവസത്തേയ്ക്ക് ഞാനിവിടെ നിസ്സഹായമായി, എന്നാൽ അതിഭയങ്കരമായി അഡ്മിറ്റായിരിക്കയാണ് “ എന്നറിയിച്ചുകൊണ്ട് ആഗതൻ ലോക്കൽ മാർക്കറ്റിൽനിന്ന് സമാഹരിച്ച നാനാവർണ്ണങ്ങളിലുള്ള തെരഞ്ഞെടുത്ത അഞ്ച് കിലോ ഫലമൂലാദികളുടെ കൂട കൗണ്ടറിന്റെ പുറത്തേയ്ക്ക് ഒരു വെറ്ററൻ ലോഡിങ്ങ് തൊഴിലാളിയെപ്പോലെ കൂൾ കൂളായി എടുത്തുവെച്ചപ്പോൾ, ലോക്കൽ ആശുപത്രിയിലെ ‘ഫ്രണ്ട് ഡെസ്ക്ക് പെൺകൊടികളെ നിയന്ത്രിച്ചുവരുന്ന ഭീകരൻ മാനേജർ ഉഷാറായി. നഴ്സസ് സമരത്തിനു ശേഷം സുകുമാരകലകൾ ആസ്വദിച്ചിട്ടു നാളേറെയായിരിക്കുന്നു.

ഇതിനകം കക്ഷി കലക്കൻ രണ്ടുമൂന്നു ‘ശ്ശരണമയ്യാപ്പാ’ കൂടി കാച്ചി പ്രസ്തുത ഭാരോദ്വഹനം പൂർണ്ണമായും അനായാസവും തന്റെ സാന്നിദ്ധ്യം വിമർശനങ്ങൾക്കതീതവും ആക്കിയിരുന്നു.

പുറത്തെ പ്രപഞ്ചത്തിലേയ്ക്കു ജനൽ തുറക്കുന്ന ഏതു മുറിയായാലും മതി.

പോസ്റ്റ്-മോഡേൺ രോഗി ലിഫ്റ്റിലേയ്ക്കു കയറാൻ തുടങ്ങുന്ന നല്ലൊരു നഴ്സിനെ നോക്കി, അതാ, തന്റെ ഇംഗിതം അറിയിച്ചുകഴിഞ്ഞു. അതെ, അദ്ദേഹം ശരിക്കും തിരക്കിലാണ്.

അതവിടിരിക്കട്ടെ. നിങ്ങടെ അസുഖം പറഞ്ഞില്ല.. ഓപ്പി ടിയ്ക്കറ്റുണ്ടാ ?

ആഗതൻ തോൾ ബാഗിൽനിന്ന് അര ഡസനോളം ഡയറികൾ തുരുതുരാ പുറത്തെടുത്ത് തപ്പാൻ തുടങ്ങുന്നു. ഉടനടി മുഖത്തുനിന്ന് ചോര എന്നാ സാധനം ഓടിയൊളിക്കുന്നു. പകരം പ്രദേശത്ത് ഭീതി വന്നു നിറയുന്നത് 'ക്രൈം ഫയല്‍സ്' പോലുള്ള ടെലിവിഷന്‍ പരിപാടികള്‍ക്കടിമപ്പെട്ട ഏതൊരു പ്രേക്ഷകനും കാണാം.

ചതിച്ചു !. ഡയറി എടുക്കാൻ മറന്നു...

അപ്പൊ, ആ ബാഗിൽ കുറെയേറെ ഡയറികൾ കാണുന്നുണ്ടല്ലൊ.

അതൊക്കെ, ഇതര ആവശ്യങ്ങൾക്കുള്ളതാണ്. ആ പച്ച, പച്ചക്കറി വാങ്ങിക്കാൻ. നീല, ബ്രെഡ്, മുട്ട, പാല് പർച്ചേസിന്. മഞ്ഞയിൽ തൂവെള്ള അർഥസമ്പുഷ്ടിയുള്ള സിൽമാപ്പാട്ടെഴുതാൻ, സന്ധ്യാശോണിമയിൽ പീതച്ഛായപതിഞ്ഞ നിറമുള്ള കവറുള്ളത് എന്റെ ഭാവനാസവാരികൾ, കവനകുതൂഹലങ്ങൾ രേഖപ്പെടുത്താൻ, ഏഷ്യയുടെ മാപ്പുള്ള ആ ചുവന്ന ഡയറിയായിരുന്നു പൂർണ്ണമായും ഹോസ്പിറ്റൽ ആവശ്യങ്ങൾക്കായി നീക്കിവെച്ചിരുന്നത്. അതില്ല. സാരല്യ, ഓപ്പിനമ്പർ നിങ്ങടെ കമ്പ്യൂട്ടറിൽ കാണൂലോലേ ?

തകർപ്പൻ ! ഇത് നഴ്സുമ്മാരുടെ സമരത്തേക്കാൾ കലക്കും. മാനേജർ പുളകിതനായി. റെജിസ്റ്റ്രേഷൻ ഫീസടപ്പിച്ച്, മാനേജർ ആഗതനെ കയ്യോടെ ഡാക്കിട്ടറുടെ അടുത്തെത്തിക്കുന്നു.

എന്താ പ്രശ്നം ? പൊതുവേ ഒരു സുഖല്യ. ഡിസംബർ-ജനവരി മാസങ്ങളിൽ കൊറേക്കൊല്ലായി ഇതു പതിവാ.. ബൈ ദ ബൈ ഡാക്റ്റർക്ക് ഡയറി എഴുതുന്ന ശീലമൂണ്ടല്ലൊ, അല്ലെ ?

ഉഗ്രൻ തലവേദന, അതിന്റെ കറക്കം, പൊരിഞ്ഞ ക്ഷീണം എന്നിവ അനുഭവപ്പെടാറുണ്ടോ എന്ന് ആദ്യം പറയൂ…

പറയാം. ഒന്നു ശ്രദ്ധിച്ചു കേട്ടോളണം ഡാക്ട്ടർ. അപ്പൊ, പറഞ്ഞപോലെ ഈ ഡിസംബർ-ജനവരി മാസങ്ങളിൽ …. ബൈ ദ ബൈ, ഡാക്ടർ മനോരമ മാത്രുഭൂമി ഡയറികളെ ഒന്നു താരതമ്യം ചെയ്യാമോ ?

ഹ, പെട്ടെന്ന് നിങ്ങടെ അസുഖം പറയഡോ…

ഞാനതിലേയ്ക്കു വരികയാണു ഡോക്ടർ. പിന്നെ, ഈ ഫോറിൻ ഡയറികൾ ഞാൻ കണ്ടിട്ടില്ല.. ഡോക്ടർ വിദേശത്ത് സെമിനാറിനൊക്കെ ധാരാളം പോകുന്നതല്ലെ. ഒന്നുരണ്ടെണ്ണം കിട്ടീർന്നെങ്കിൽ നന്നായിരുന്നു. എന്റെ ശേഖരത്തിലേയ്ക്ക് ഒരു മുതൽക്കൂട്ടായേനെ.

നഴ്സ്… നെക്സ്റ്റ് . . .

നിൽക്കണം ഡോക്ടർ. ഞാൻ അസുഖത്തിലേയ്ക്ക് കടക്കാം. ഞാൻ ഭയങ്കരമായൊരു പ്രതിസന്ധിയിലാണ് ഡോക്ടർ. താങ്കളെന്നെ ഒരു പക്ഷെ കളിയാക്കുമായിരിക്കാം. പക്ഷെ, ഈ ഡയറികൾ എന്റെയൊരു വീക്നെസ്സാണ്. ഇത്തവണ എനിക്കു കിട്ടിയ ഡയറികൾ വെറും 20. കഴിഞ്ഞ തവണത്തേക്കാൾ 23 എണ്ണം കുറവ് ! ഓഫീസിൽ ആളുകളുടെ മുഖത്തുനോക്കാൻതന്നെ ഇപ്പോളെനിക്കു നാണമാണ്. ഒരു മാസത്തേയ്ക്കിനി ഞാൻ ഓഫീസിലേയ്ക്കില്ല. പറയൂ, ഡോക്, ഏതാണെന്റെ മുറി ? ചക്രവാളം കാണാവുന്ന മുറിയാണെങ്കിൽ…

ഇയ്യാൾ തങ്ങുന്ന ഓരോ സെക്കൻഡും തനിക്കു ധനനഷ്ടമാണ്. സാധനത്തെ ഓടിക്കുക തന്നെ. ശീട്ടെടുത്ത് ഡബിൾ ഡോസിൽ പത്തുതരം മരുന്നെഴുതി നീട്ടി.

കിടക്കാനൊന്നുമില്ല. ഡയറിയൽ ആങ്ക്സൈറ്റി എന്ന പുതിയതരം പാവം രോഗമാണ്.

ഞാൻ രക്ഷപ്പെടുമോ, ഡോക്ടർ ? ജീവിച്ചു കൊതി തീർന്നിട്ടില്ല, സർ…

ച്ഛെ...ച്ഛെ.. ഞാനിതാ വാക്കു തരുന്നു, മാഷെ.

വളരെ നന്ദി, ഡോക്ടർ. പിന്നെ, ഫോറിൻ ഡയറികളുടെ കാര്യം ഞാൻ പറഞ്ഞത് മറക്കണ്ട. ഒന്നറിയിച്ചാല്‍ മതി. ഞാൻ നേരിട്ടു വന്നുകൈപ്പറ്റിക്കോളാം. തൽക്കാലം, മരുന്നു കമ്പനികളുടെ ഏതാനും ബ്രോഷറുകൾ എടുക്കുന്നു. വിരോധമില്ലല്ലൊ ?

ഡയറിയ ബാധിച്ച രോഗിയുടെ പോക്കറ്റിനു വെളിയിലേയ്ക്ക് ഒരു ഗാന്ധിയുടെ രണ്ടു സ്ക്വയർ മില്ലിമീറ്റർ മൂല ചാടിനിൽക്കുന്നത് ഡോക്ടർ ജ്ഞാനദൃഷ്ടിയാൽ കാണുന്നു. ഇനിയും വൈകിയാൽ അപകടമാണ്.

എന്തു വിരോധം ! പകരം ഈ കടലാസ്സ് ഞാനെടുക്കുന്നതിൽ വിരോധം തോന്നാതിരുന്നാൽ മാത്രം മതി.

മിന്നൽ വേഗതയിൽ ഒരു കൊടും ക്രൂര ക്രുത്യം നടന്നതറിയാതെ

രോഗി കൈകൂപ്പുന്നു :

നന്ദി ഡോക്ടർ, വളരെ നന്ദി . ജീവനുണ്ടെങ്കില്‍ ഞാൻ മറക്കില്ല, ഡോക്ടർ.

തെരഞ്ഞടുപ്പ്

2011-05-02T14:54:00.002-03:00

ഒന്നൂല്യാന്ന്.
വെല്യ കഥയില്ലാത്ത
മൂന്ന് തെരഞ്ഞെടുപ്പ് കാർട്ടൂണുകൾ.
അത്ര തന്നെ :)

യേശുദാസ് കീ ജയ് !

2010-05-17T06:48:00.017-03:00

തിയ്യതി: 11.05.2010.
സ്ഥലം: എര്‍ണാളം, ഓര്‍ത്തിക് സെന്റര്‍ (ഹ! പഴയ കലാപീഠം ന്ന്..)
രംഗത്ത്:
യേശുദാസ്
ഇമ്മള്‍ടെ ഫാമിലി
ചായകള്‍, പരിപ്പുവടകള്‍, ക്യാമറകള്‍

കഥ ഇതുവരെ:
ഗന്ധര്‍വ്വന് (ഹിന്ദുസ്താനി പഠിക്കുന്നവര്‍ ഇത് ഗന്ധഴ്വ് എന്നേ ഉച്ചരിക്കാന്‍ പാടുള്ളൂ)
ഒരു ക്യാരിക്കേച്ചര്‍ വരച്ച് സമ്മാനിച്ചതിന്റെ ക്ഷീണത്തില്‍ ഞാന്‍. കണ്ണുകള്‍ നിറച്ചുകൊണ്ട് എന്റെ ഭാര്യ ലേഖ (ദാസേട്ടന്റെ കൂടെ ‘സിന്ദൂരം പെയ്തിറങ്ങി’ & ‘ മാഘമാസം മല്ലികപ്പൂ’ എന്നീ പാട്ടുകള്‍ സിനിമയില്‍ പാടി). വീട്ടിലെത്തിയതിനു ശേഷമുള്ള പ്രകൃതിവാതകദുരന്തമോര്‍ത്ത് നടുങ്ങി നില്‍ക്കുന്ന തന്റെ അച്ഛനെ ഗൌനിക്കാതെ നിര്‍ദ്ദയം തന്റെ നാലാം പരിപ്പുവടയിലേയ്ക്ക് ദംഷ്ട്രകള്‍ താഴ്ത്തിനില്‍ക്കുന്ന ഞങ്ങടെ പയ്യന്‍ സിദ്ദാണി.
ദാസേട്ടന്‍ എണീക്കാന്‍ തുടങ്ങിക്കഴിഞ്ഞിരിക്കുന്നു.......
*******************************************

പദ്ധതിപ്രദേശം പെട്ടെന്ന് സില്‍മാ മൂളിപ്പാട്ടുകള്‍കൊണ്ട് മുഖരിതമാവുകയായി.
രാഗമാലികയായിരുന്നു പലര്‍ക്കും പഥ്യം. ഏതായാലും, ആദ്യം മരിച്ചുവീണത് ഹരിമുരളീരവമായിരുന്നു.

ഞാനും വിട്ടില്ല. സംഗീതകലാനിധി ഭാര്യാംബാളിന്റെ പെര്‍മിഷനില്ലാതെതന്നെ
ഞാന്‍ ശുദ്ധപരിഭ്രമത്തില്‍ നിന്ന് നാലാം കാലത്തിലേയ്ക്ക് ഒരു നിരവല്‍
ഗ്ലൈഡിങ്ങ് നടത്തി. പരസരത്തെ കാഞ്ചീപുരം പട്ടുടുത്ത
ഒന്നു രണ്ടു മദ്ധ്യവയസ്ക്കകള്‍ എന്നെ നോക്കി നെടുവീര്‍പ്പിട്ടു.

അടുത്ത 10 മിനിറ്റ് നേരത്തേയ്ക്ക് ആര്‍ട്ടിസ്റ്റ് കലാധരന്റെ ഗ്യാലറിയ്ക്ക്
മൂളിപ്പാട്ടുകാരെക്കൊണ്ട് വയ്യാണ്ടായി.

ഗന്ധര്‍വനെ നേരില്‍ക്കണ്ട് ‘ഹല’ പറയാനുഉള്ള ‘ക്യൂ’വില്‍ രണ്ട് പദ്മശ്രീ, ഒരു വായുസേനാമെഡല്‍, ഡസനോളം കോളേജ് പ്രഫസര്‍മാര്‍ എന്നിവര്‍
ബിവറേജസ് കോര്‍പ്പറേഷന്‍ ‘ക്യൂവിനെ തോല്‍പ്പിക്കുന്ന തറവാടിത്തത്തോടെ
സംസാരശേഷി നഷ്ടപ്പെട്ട് ഒതുങ്ങിനിന്നിരുന്നു.

ലേഖാംബാളിനെ കണ്ടതും ‘ങ്ഹാ, എന്താ സുഖല്ലെ’ എന്ന് ഗന്ധര്‍വ് കൂളായി.
സിദ്ദാണി നല്ല ബുദ്ധീണ്ടാവാനുള്ള അനുഗ്രഹം ഇരന്നു വാങ്ങുന്നതു കണ്ടു. ഒമ്പതു വയസ്സായി. ഒരന്തോം കുന്തോല്യ !

എന്റെ ഊഴം വന്നു.

ഒരു ചെയ്ഞ്ചിന് ഗന്ധര്‍വനു ചുറ്റും ഇസ്പീഡില്‍ ഒരു റൌണ്ട്
ശയന പ്രദക്ഷിണം നടത്ത്യാലോന്ന് ഒന്നു ചിന്തിച്ചു വശായി.
പിന്നെ മുളയിലേ നുള്ളിക്കളഞ്ഞു. വേണ്ട, വളവെടുക്കാന്‍ വേണ്ടത്ര സ്ഥലല്യ.

എങ്കില്‍, കാല്‍ തൊട്ടു വന്ദിക്ക്യേ രക്ഷേള്ളൂ എന്ന് ഭാര്യ.
അങ്ങനെയാണെങ്കില്‍, സാഷ്ടാംഗമാണെന്റെ ഫേവറിറ്റ് പോസ് എന്ന് അരോഗദൃഢഗാത്രനായ ഞാന്‍.

ഒന്നാമത്തെ ശ്രമം അമ്പേ പാളിപ്പോയി.
രണ്ടാമത്തേത് ആ വെള്ള ചെരുപ്പിന് പത്തിഞ്ച് അകലെവെച്ച് ചരമമടയുന്നത് കണ്ട് നല്ലവരായ ജനം അടക്കം പറഞ്ഞു ചിരിച്ച് മണ്ണു കപ്പി.

ഇത്തവണ ശര്യാവും, നിങ്ങള് ‘അപ്...അപ്പ്’ എന്ന് എന്നെ ഒന്ന്
സഹര്‍ഷം പ്രോത്സാഹിപ്പിച്ചാ മാത്രം മതി എന്ന് സിദ്ദാണി-അവന്റമ്മ എന്നീ കാണികളോട് ഞാന്‍ നാണമില്ലാതെ കെഞ്ചി.... കണ്ടുനിന്നവര്‍ കണ്ണീരണീഞ്ഞു.
‘ശ്രമിക്കൂ, എല്ലാറ്റിനും കാരണഭൂതനായ ഒരാള്‍ ഇതെല്ലാം കാണുന്നു‘ണ്ടെന്ന്
ദാസേട്ടന്റെ പ്രോമിസ്.

ഹാളില്‍ തിങ്ങി നിറഞ്ഞിരുന്ന സകലമാന കുഞ്ഞുകുട്ടിവയസ്സരുടെ
കയ്യടികളുടെ അകമ്പടിയോടെ മൂന്നാം ട്രൈ-യില്‍ ഞാന്‍ വിജയിച്ചു.

കുശലത്തിനു ശേഷം ഞാന്‍ ആ നെടുനാള്‍-ആഗ്രഹം പുറത്തെടുത്തു -
ദാസേട്ടനുമൊത്ത് എനിക്ക് ......

ലേഖാംബാള്‍ ഞെട്ടി വിറച്ചു. തന്റെ പാട്ട് ചാന്‍സ് തട്ടിയെടുക്കുന്നല്ലോ
ഈ ഘാതകന്‍ !

എന്തായാലും പറയൂ എന്ന് ദാസേ...

അരുത്, ഗായികയായ താനുള്ളപ്പോള്‍ ആ ചാന്‍സ് ദാസേട്ടന്‍
തടിയനും സംഗീതവിരുദ്ധനുമായ ഇച്ചങ്ങായിക്ക് കൊടുത്താല്‍
പിന്നെ ഭൂമി പിളര്‍ത്തി ചാടി മരിക്യേ ഗതീള്ളൂ എന്ന് ഭാര്യ.

ലേഖ മിണ്ടരുത്. ഞാനീ ആഗ്രഹം സാധിപ്പിക്കും. പറയൂ, കാര്‍ട്ടൂണിസ്റ്റ്, എന്താണ്
ലാസ്റ്റ് വിഷ്.... ഈ ദാസേട്ടനുമൊത്ത്... ?

പിന്നൊന്നും നോക്കിയില്ല. ഹൃദയം തുറന്നു.
“ ഒരൂണു കഴിക്കണംന്ന്ണ്ടായിരുന്നു ..... ന്താ, പറ്റ്വോ ആവൊ? ”

ഒരു സത്യന്‍ അന്തിക്കാട് സിനിമേലെ പോലെ എല്ലാരും ഒരു കാരണോല്യാതെ സന്തോഷംകൊണ്ട് തുള്ളിച്ചാടി. ഈ തക്കം നോക്കി ലേഖ ആശ്വാസം കൊണ്ട് ബോധം കെടാന്‍ പോയി. സിദ്ദാണി പഴം പൊരിയിലേയ്ക്ക് പ്രവേശിച്ചു.

ഒന്നും പറയണ്ട ...
------------------------ ശുഭം -------------------------

ആതിഥേയന്‍ Vs. അതിഥി (0-1)

2010-01-28T05:59:00.004-03:00

രണ്ടാഴ്ച്ചയായി എന്നെ ആക്രമിച്ച് വല്യ ശബ്ദത്തോടെ നിലമ്പരിശാക്കിയ ഗൌട് അഥവാ ഗൌഡയുടെ ആറ് അഡീഷണല്‍ ഇടി ചോദിച്ചുവാങ്ങിയതിന്റെ അപാര ദു:ഖത്തില്‍ ഒരു വാശിക്കിരുന്നു വരച്ച പടങ്ങളാണ്. ദു:ഖം കാരണം ധൃതി കൂടിയിട്ടുണ്ട്.

ഹല്ലാ! അച്ഛന്‍ ഇവിടെ ഇരിക്ക്യായിരുന്നോ?
ദേ, ആരൊക്ക്യാ വന്നേക്കണെ എന്നു നോക്കൂ !

ഇവനാ ശേരിക്കും ഭാവഗായകന്‍ !

മറ്റവന്‍ കേവലം ഗായകഭാവന്‍....
അവന്റമ്മേടെ ലൈനാ

ഇത്രയും ആയ സ്ഥിതിക്ക്,

ഇനി ഞാനൊരു ഞെട്ടിക്കുന്ന സത്യം പറയട്ടെ.
അത് കല്യാണസമ്മാനമല്ല. മറിച്ച്, സദ്യയുടെ
എരിശ്ശേരി പകര്‍ച്ച കൊണ്ടുപോകാന്‍ വന്നതാ..

എല്ലാരും ഇങ്ങനെ തുരുതുരാ

ഏമ്പക്കം വിട്ടോണ്ടിരിക്കുന്ന സ്ഥിതിക്ക്,
ആത്മാര്‍ഥായിട്ട് പറയ്യ്യാ...
വെറുതേ ഇവിടുന്ന് ഊണു കഴിക്കണ്ട...

ഗജരാജന്‍ 2 : മേമല അച്യുത വാരിയര്‍

2010-01-12T19:58:00.006-03:00

തീര്‍ത്തും വ്യത്യസ്തനായ ഒരാനയെ മതി
എന്ന് ഈ പാപ്പാന് ഒരേ നിര്‍ബ്ബന്ധ്.
എങ്കില്‍ മേമല അച്യുത വാരിയരെ മേച്ചോ
എന്ന് ഞാനും.

ഗജമേള

2010-01-11T23:45:00.006-03:00

ഗജരാജന്‍ 1. ഊണേശ്വരം തടിയപ്പന്‍

അറിയാലൊ, ഊണേശ്വരത്ത്
ഗുണ്ടോത്സവത്തിനു ശേഷം
ഒരുത്സവോണ്ടായിട്ട് മാസങ്ങളായി.

തല്‍ക്കാലം ഒരു ഗജമേള നടത്തുകയാണ്.
എത്ര ദിവസം എന്ന് നിശ്ചയല്യ.
കയ്യിലെ കാശ് പൊടിഞ്ഞു തീരുംവരെ
ഡെയ് ലി ഒറ്റയാനകള്‍ നേരെ വരും... ചെരിഞ്ഞ് പോവും.

അവിയല്‍ - ഒരു പരീക്ഷണം

2009-10-14T23:03:00.010-03:00

സത്യത്തില്‍ ഈ കാര്‍ട്ടൂണുകളെ തട്ടിന്‍പുറം സീരീസില്‍ പെടുത്തേണ്ടതാണ്. എന്റെ മര്യാദയ്ക്ക് ചെയ്യുന്നില്ല. ഇതില്‍ മൂന്നാമനെ ഒരു 23 കൊല്ലം മുന്‍പ് ഞാന്‍ തന്നെ വരച്ച് മനോരമയിലോ മറ്റോ പ്രസിദ്ധീകരിച്ചതിന്റെ 41-ആം ദിവസം മറ്റൊരുത്തന്‍, ഒരു അജയകുമാര്‍ പറവൂരോ എന്നോ മറ്റോ എന്നൊരാള്‍ അടിച്ചുമാറ്റിയെന്നു തോന്നിപ്പിക്കും വിധത്തില്‍ മറ്റൊരു വാരികയില്‍ പ്രത്യക്ഷപ്പെടുത്തി. ഇത് ചൂണ്ടിക്കാണിച്ച് എഴുതിയ, മൃദുഭാഷിയായ എനിക്ക് ആ.. ആ.. കശ്മല്‍ അയച്ച മറുപടി !

പിന്നീട് ഞാന്‍ എന്റെ ഒരു കോപ്പിയടിക്കാരെയും ഉപദേശിക്കാന്‍ പോയിട്ടില്ല... :) എന്തിനാന്ന് വെറുതെ....

ഗുണ്ടവധം ഏഴാം ദിവസം

2009-10-05T01:38:00.002-03:00

പത്തു ദിവസം എന്നാണുദ്ദേശിച്ചിരുന്നതെങ്കിലും, നോക്കൂ,
യേഴേയേഴു ദിവസംകൊണ്ട്
കേരളഗുണ്ടകളെയെല്ലാം വധിക്കാന്‍ കഴിഞ്ഞു
എന്ന സിമ്പിള്‍ ചാരിതാര്‍ഥ്യം കാര്‍ട്ടൂണിസ്റ്റിനുണ്ട്.

ഇനി അറിയാനുള്ളത് കമല-കൃഷ്ണന്മാരെക്കുറിച്ചാണ്.
അവര്‍ക്കിടയില്‍ എന്താണ് ? എന്താകാം ?
അല്ല, എന്തുതന്നെ ആയിക്കൂടാ ?
അതൊരു നൂറു സ്കൂപ്പിനുള്ള വഹയാണ്.

ഞാന്‍ പേന കൂര്‍പ്പിച്ചു വെക്കുക മാത്രം ചെയ്യുന്നു, തല്‍ക്കാലം....

ഗുണ്ടവധം ആറാം ദിവസം

2009-10-05T01:35:00.001-03:00

ഗുണ്ടവധം ആട്ടക്കഥ

2009-09-30T22:53:00.005-03:00

......

ഗുണ്ടവധം ആട്ടക്കഥ

2009-09-29T09:38:00.004-03:00

ഗുണ്ടവധം ആട്ടക്കഥ

2009-09-28T04:15:00.003-03:00

ഗുണ്ടവധം ആട്ടക്കഥ

2009-09-28T04:08:00.004-03:00

ഗുണ്ടവധം ആട്ടക്കഥ

2009-09-26T00:06:00.007-03:00

പത്തു ദിവസങ്ങളിലായി
നിലവിലുള്ള ഗുണ്ടകളെയെല്ലാം
വധിച്ചു തീര്‍ക്കാമെന്നു
വിചാരിക്കുന്നു.
പറ്റ്വോ ആവോ !

ഓണാശംസകള്‍ 2009

2009-09-01T05:46:00.003-03:00

ഒമ്പതും അഞ്ചും 14 ' നവ ' രസങ്ങള്‍..

2009-04-25T23:43:00.009-03:00

ഈ ഞാന്‍ കേരള കലാമണ്ഡലത്തില്‍ ചേര്‍ന്നു.

ഇപ്പൊ, രസാഭിനയത്തിലേയ്ക്ക് കടന്നിരിയ്ക്കുണൂ.

ഇനി മുതല്‍
“ കലാമണ്ഡലം കാര്‍ട്ടൂണിസ്റ്റ് ”
എന്ന പേരിലായിരിക്കും ഞാന്‍ അറിയപ്പെടുക.
ആദ്യം
നവരസങ്ങൾ എക്സിബിറ്റ് ചെയ്യുന്നു.

ശൃംഗാരം

ഊണു കഴിയ്ക്കുന്ന വേളയില്‍ ഓടിച്ചു വിടേണ്ടുന്ന ഏക രസം ഇവനാണ്. ..

ആത്മനിയന്ത്രണം വിട്ടാല്‍ ടാര്‍ഗറ്റ് നിലം പരിശാക്കിക്കളയും.

ഹാസ്യം

ഇലയില്‍ വിളമ്പി വെച്ചിരിക്കുന്ന ചില പപ്പടങ്ങളുടെ ഷേപ്പ് കാണുമ്പോളുണ്ടാവുന്ന ഭാവം.
കരുണം
കല്യാണത്തിരക്കില്‍വെച്ച് ആദ്യമായി നേരില്‍ കാണാനിടയായ പഴയ ക്ലാസ്സ്മേറ്റിന് ഒരു ഇല തരപ്പെടുത്താനായില്ല എന്നറിയുമ്പോള്‍ മുഖത്ത് അവശ്യം വരുത്തേണ്ടുന്ന ഭാവം.
രൌദ്രം
ചോറടക്കം കേവലം മൂന്നാലു വിഭവങ്ങള്‍ കൊണ്ട് ഊണ്‍
മുടിക്കേണ്ടി വരുന്ന ലാസ്റ്റ് പന്തിക്കാരന്റെ എളുപ്പം മായാത്ത ഭാവം.
അത്ഭുതം
സദ്യക്കിടയില്‍ പരിചയപ്പെടാനിടയായ കല്യാണ ബ്രോക്കര്‍ ക്ഷണീക്കാതെ പോകാവുന്ന കല്യാണങ്ങളെക്കുറിച്ചുള്ള വിവരങ്ങള്‍ തരുമ്പോള്‍ സംഭവിക്കുന്നത്.

വീരം
നമ്മളൊന്ന് മര്യാദയ്ക്ക് ഇല വെടുപ്പാക്കുന്നതിനു മുന്‍പ്,

പിറകില്‍ നിന്ന് സീറ്റ് ബുക് ചെയ്യാന്‍ വന്നു നില്‍ക്കുന്ന

കണ്ണില്‍ച്ചോരയിലാത്തവരെ തിരിഞ്ഞു നോക്കി

കണ്ണുരുട്ടുമ്പോള്‍ സൂക്ഷിക്കേണ്ടുന്ന ഭാവം.

ഭയാനകം

കല്യാണ വിരുന്ന് എ.കെ. ആന്റണി സ്റ്റൈലിലാണെന്ന്

അറിയുമ്പോളുണ്ടാവുന്ന ആ വിവരിയ്ക്കാമ്പറ്റാത്ത അവസ്ഥ.

ബീഭത്സം

ഇഞ്ചിത്തൈരും ബോളിയും പുളിയിഞ്ചിയും

കുഴച്ചടിക്കുന്ന സഹ ഊണുകാരനെ കാണുമ്പോള്‍

‍പ്രേക്ഷകന്റെ മുഖത്തു താനേ വരുന്നതെന്തോ അത്.

ശാന്തം

പ്രഥമന്‍ കഴിഞ്ഞയുടന്‍ എണീയ്ക്കേണ്ടി വര്വോന്ന്

ഉല്‍ക്കണ്ഠനായി ഇരിയ്ക്കുന്ന സമയത്തിങ്കല്‍

തൊട്ടു മുന്നില്‍ ചോറുകാരനെ കാണുമ്പോളുണ്ടാവുന്ന ഭാവം.

-------------------------------------------------------------

നിരന്തരമായ ഗവേഷണം നടത്തിയിട്ടും

ഇമ്മടെ പച്ചാളം ഭാസിക്ക് വികസിപ്പിച്ചെടുക്കാനാകാതെ

പോയ ഒരഞ്ചു രസങ്ങള്‍ കൂടി

ഞാനായിട്ട് ഇവീടെ ഉല്‍പ്പാദിപ്പിച്ചിരിക്യാണ്...

മൂന്ന് പുതുവത്സര തീരുമാനങ്ങള്‍...

2009-01-22T00:33:00.006-02:00

2009-01-11T01:21:00.005-02:00

സമസ്തബ്ലോഗ്ഗര്‍മാരുടേം അടിയന്തിര ശ്രദ്ധയ്ക്ക് ...
ഞങ്ങള്‍, നാട്ടില്‍ അതതു പഞ്ചായത്തുകളിലെ,

ആര്‍.കെ.ലക്ഷ്മണും എമ്മെസ്.സുബ്ബലക്ഷ്മിയും

വിവാഹിതരായിട്ട് 11.01.2009 ന്, ഏതാണ്ട് ഒരു..ഒരു..

mailto:#@#$%5!!))%##E=MC2 ഒരു$%##

..101..ഇല്ല..അത്ര വരില്ല...11

സംഘര്‍ഷഭരിതമായ കൊല്ലങ്ങളായിരിക്കുന്നൂന്ന്...

വിശ്വസിക്കാമ്പറ്റ്ണ്ടോ ?!

... എനിക്ക് വിശ്വസിക്കാമ്പറ്റണില്യ

ഒരു പീഢനകഥ !

2008-11-11T00:02:00.000-02:00

മിക്കപ്പോഴും അദ്ധ്യാപകനും ശാന്തമായ വേളകളില്‍ ശാസ്ത്രജ്ഞനും ആയ നമ്മുടെ വി.കെ.ആദര്‍ശ് എന്നെ കഴിഞ്ഞ 2 മാസങ്ങളായി കൊല്ലാക്കൊല ചെയ്യുകയായിരുന്നു, സുഹൃത്തുക്കളേ... ചെയ്യുകയായിരുന്നു. ഊര്‍ജ്ജസംരക്ഷണത്തിനെപ്പറ്റി ഒരു കാര്‍ട്ടൂണ്‍ - അത്രേള്ളൂ ആവശ്യം.

ഇല്ലാ, വരുന്നില്ലാ, ആ മൂഡ് ഒന്ന് എത്തിനോക്കുന്നുപോലുമില്ല. പിന്നങ്ങോട്ട്, ആത്മപീഢനത്തിന്റെ നാളുകളായിരുന്നു. എര്‍ണാളത്തെ, കൊതുകുരാത്രികളില്‍ ഞാന്‍ ചൈനീസ് മോസ്ക്വിറ്റൊ നെറ്റെന്ന ചുരികത്തലപ്പു വീശാതെ, പ്രതിദിനം ഒരു എഴുന്നൂറ് കലോറി സേവ് ചെയ്തു, ധൃതിയില്‍ ഊണു കഴിക്കുന്നത് ഭയങ്കരമായി സ്ലോ ആക്ക്യപ്പഴോ, ഫേഷ്യല്‍ മസ്സിളുകളുടെ അനക്കം വെച്ചടി വെച്ചടി കുറച്ച് ഒരു 50 കലോറി അടിച്ചുമാറ്റി. ബാക്കി ഉപായങ്ങള്‍ കരടാണ്. ഗോപ്യവുമത്രേ.

ഒടുവില്‍, ഇന്നലെ രാത്രി അതു സംഭവിച്ചു. പുല്ലുപറിയെക്കുറിച്ച് ഒരാശയം ഒരിടത്ത് ഒറ്റയ്ക്കുനില്‍ക്കുന്നു.

കടന്നുപിടിച്ചു. പീഢനമെങ്കില്‍ പീഢനം, ആദര്‍ശ്-അം ആണെനിക്കു വലുത്....... ഒന്നു കണ്ടാലും .

ഹൊബാമയങ്ങ് ക്ഷീണിച്ചുപോയല്ലൊ !

2008-11-05T13:21:00.004-02:00

തോമസ് കുരിയന്‍ തെക്കനത്തിന്റെ (t.k. formerly known as തൊമ്മന്‍) ഒബാമയെക്കുറിച്ചുള്ള

ചെറിയ നല്ല പുസ്തകത്തിന് ഒരു കവര്‍ വരയ്ക്കാന്‍ ഭാഗ്യം കിട്ടി.

അതൊന്നു പറയാമെന്നുവെച്ചു....

(കവര്‍ ഡിസൈന്‍ : അനില്‍ )

അപ്പൊ, പെട്ടെന്നു തോന്നിയതാണിത്. അല്പം അലസമായി വരച്ചതും. (ഞാനിവിടെ ചുറ്റിപ്പറ്റ്യൊക്കേണ്ട്ട്ടൊ.. ഊണേശ്വരമാണെന്റെ പോസ്റ്റോഫീസ്)

ശ്ശരണമയ്യപ്പാ, ഇതെന്താ കഥ !!!?!

2008-10-15T23:57:00.000-03:00

ശബരിമലയിലെ മേല്‍ശ്ശാന്തി നിയമനത്തെച്ചൊല്ലി ആരോപണങ്ങള്‍.ഹൈക്കൊടതി നിയമിച്ച നിരീക്ഷകന്റെ ദൃഷ്ടിയില്‍ പോരായ്മകളേറെ... ‘മാതൃഭൂമി’യില്‍ ഇന്നു വന്ന വാര്‍ത്ത താഴെ...

ഊണേശ്വരം വിദ്യാരംഭം 2008

2008-10-09T09:51:00.007-03:00

ഈ പടങ്ങള്‍ കണ്ട്, ഇത്തവണ നേരെ ചൊവ്വെ വിദ്യാരംഭം കുറിച്ചവര് വല്ലാണ്ടാവരുത്. സംസ്ക്കൃതവ്യാകരണത്തിന്റെ പിതാവാരെന്ന കസ്റ്റമറി ചോദ്യത്തിന് പാണിനി എന്ന് പറഞ്ഞതിന് മുപ്പത്തിമൂന്നു കൊല്ലം മുന്‍പേ ഏഴാം ക്ലാസ്സു മാഷ്ക്കടെ കയ്യീന്ന് രണ്ടു പൂശ കൂടുതല്‍ കിട്ട്യ ഒരാളാ ഈ കാര്‍ട്ടൂണിസ്റ്റ് ...

26 കൊല്ലം മുന്‍പ് എന്റെ സ്വയം പ്രഖ്യാപിത ശുശ്ശൂദ്രസ്സുഹൃത്ത് പൂണൂലൊക്കെ ഇട്ട് ഒരു ടെന്റും കുത്തി ആലുവാ ശിവരാത്രി മണപ്പുറത്ത് ‘എളേത് ’ ആയി അറയുന്നത് കണ്ടവനാ ഈയുള്ളവന്‍. ഒരഞ്ചു കൊല്ലോം കൂടിക്കഴിഞ്ഞ്, ദിവസവും രുദ്രം ജപിക്കുന്ന തൃപ്പൂണിത്തുറ സമൂഹം മഠത്തിലെ കിച്ചാമണി, വിവിധ രൂപത്തിലും ഭാവത്തിലുമുള്ള നൂറ്റിച്ചില്ല്വാനം ഭസ്മക്കുറികളും ശ്രീശാന്തിനെ പുളിശ്ശേരി കുടിപ്പിക്കുന്ന വിധം രണ്ടു ഡസന്‍ എക്സ്ട്രാ ജപിച്ച ചരടുകളും സഹിതം ഫുള്‍ട്ടിഫുള്‍‍ ബ്രാഹ്മണ മുദ്രയോടെതന്നെ എറണാകുളം ‘കവിത’യിലെ ഗുണ്ടുപടത്തിന് അപാരക്ഷമയോടെ ക്യൂ നില്‍ക്കുന്നതു കാണാനും ഇവനു ഭാഗ്യണ്ടായി !

കേരളത്തില്‍ കുറേക്കാലമായി ക്ഷേത്രപള്ളിമോസ്ക്ക്-ഇസ്ക്ക് ആഘോഷക്കമ്മറ്റി സംഘാടകര്‍ കീച്ചുന്നപോലെ ശരിക്കും “പൂര്‍വാധികം ഭംഗിയോടെ” തന്നെയാണ് ഉത്സവങ്ങള്‍ ആഘോഷിക്കുന്നത് എന്നതും ഓര്‍ക്കുക. ആചാരങ്ങളുടെ ലോകത്ത്, ദേവസ്വംബോര്‍ഡുകളും തന്ത്രി അസ്സോസ്യേറ്റ്സും ചേര്‍ന്ന് ഗെറില്ലാ മുറയിലൂടെയാണ് പാവം ഭക്തജനങ്ങളുടെ മനസ്സ് കൊള്ളയടിച്ചുകൊണ്ടിരിക്കുന്നത്.

ഈ നാട്ടുകാരനായിപ്പോയി എന്നതാണ് എന്നെക്കൊണ്ട് ഈ കാര്‍ട്ടൂണുകള്‍ വരപ്പിച്ചത് എന്നു കൂടി ഒന്നോര്‍ക്കുമല്ലൊ...

എന്റെ ഭക്ഷണാനുഭവങ്ങള്‍ - അങ്കം 1

2008-10-04T12:25:00.004-03:00

ഊണേശ്വരത്തെ പഷ്ണി അകറ്റൂ, ഒരു പംക്തി തുടങ്ങൂ, എന്തെങ്കിലും ഫീഡ് തരൂ

എന്ന് ഒരൊറ്റയാള്‍‍ പലകുറി ആവശ്യപ്പെട്ടതനുസരിച്ച്...

1993-ത്രോന്ത്രം. കവടിയാര്‍. ഇന്‍കംടാക്സാപ്പീസിനരികിലുള്ള നര്‍മ്മദ കഫെറ്റീരിയ.

ഞാനും കസിനും ചായയെ നിഷ്പ്രഭമാക്കുന്ന പലഹാരങ്ങളില്‍ മുഴുകിയങ്ങനെയങ്ങനെ...
എതിരെയിരിക്കുന്ന ഒരിക്കല്‍ച്ചെറുപ്പക്കാരന്‍ എന്നെത്തന്നെ നോക്കിനോക്കിനോക്കാന്‍ തുടങ്ങിയിട്ട് 10 മിനിറ്റായി. കസിന്‍ ഉഴുന്നുവടകളെ സോഴ്സില്‍ച്ചെന്ന് എതിരേല്‍ക്കാന്‍ ഒന്നു മാറിയതും... പെട്ടെന്ന്, ഒരു മിന്നല്‍പ്പിണറായി അപരിചിതന്‍ അടുത്തുവന്നിരുന്ന് നാടക ഡയലോഗു കണക്കെ ഒറ്റക്കാച്ചാ :

“നന്ദി സുഹൃത്തെ.. ഒരായിരം നന്ദി....നമ്മടെ കക്ഷി കലക്കന്‍ ! എന്നെ ഞെട്ടിച്ചുകളഞ്ഞ പെര്‍ഫോമന്‍സ് ! എന്നാലോ, തീര്‍ത്തും മിതമായ നിരക്കും ..! നന്ദി സുഹൃത്തെ.. ഒരായിരം നന്ദി....”

ഭാഗ്യം, ആരും ശ്രദ്ധിച്ച മട്ടില്ല. എങ്കിലും ധൈര്യം സംഭരിച്ച് ചോദിച്ചു:
“അല്ല, ഞാനാരാന്ന്വെച്ചിട്ടാ മാഷെ ? ”

അടുത്ത ഒറ്റ സെക്ക്ന്ഡുകൊണ്ട്, അത്ഭുതം, ഭയാനകം, ശാന്തം എന്നീ മൂന്നു ഭാവങ്ങള്‍ മാത്രം യഥാക്രമം പുറത്തെടുത്ത് കക്ഷി പതുക്കെ എണീറ്റ് ആ ചായപ്പീടികേലെ പറ്റ് ഫുള്‍ട്ടിഫുള്ളും തീര്‍ത്ത് എന്നെന്നേയ്ക്കുമായി ജില്ലയില്‍നിന്നും അപ്രത്യക്ഷനായി.

ഒരു ഊണാഗ്രഹചിന്ത

2008-09-29T23:25:00.001-03:00

ആരുടെയെങ്കിലും പിറന്നാളുണ്ടെങ്കില്‍ ഒരുഗ്രന്‍ ആശംസയുമായി ഡാവില് അങ്ങേരുടെ വീട്ടില്‍ ചെല്ലാമായിരുന്നു.

“നന്നായി വരട്ടെ” , “എന്താ ഇപ്പഴത്തെ ഒരു ചൂട്” എന്നൊക്കെപ്പറഞ്ഞ് ഒരുവിധം ലഞ്ച്ബ്രേക് വരെ എത്തിക്കാമായിരുന്നു.

ഇത്രയുമായാല്‍, കുചേലന്‍ സ്റ്റൈലില്‍ ഒളിപ്പിച്ചുവെച്ചിരിക്കുന്ന സഞ്ചി മുന്നിലേയ്ക്കിട്ട് അതില്‍ നിന്ന് ഒന്നല്ല, ഒരുപത്ത് തൂശനിലകള്‍ ഒന്നൊന്നായി പുറത്തെടുത്ത് ഗൃഹനാഥന്‍, നാഥ എന്നിവരെ പരിഭ്ര..., സോറി, അത്ഭുതപ്പെടുത്താമായിരുന്നു.

പിന്നെയൊരു പ്രശംസാപത്രസമര്‍പ്പണമാണ് - “വ്യത്യസ്തമാമീ വീട്ടിന്റെ നാഥനേ...ഞാന്‍, സത്യത്തിലൂണു കഴിച്ചില്ലിതേവരേ”. അതില്‍ നാഥന്‍ വീഴും, ഇല്ലെങ്കില്‍ ഞാന്‍ വീഴും.

ശബ്ദായമാനമായ ഒരു പ്രകടനം കഴിഞ്ഞ്, പിന്നില്‍ വിറങ്ങലിച്ചുനില്ക്കുന്ന കുടുംബനാഥന്റേയും വീണ്ടും അരി അടുപ്പത്തിടാനായി കലവറയിലേയ്ക്ക് പായാന്‍ തിരിയുന്ന നാഥയുടേയും ശ്രദ്ധയാകര്‍ഷിക്കാനായി, അതുവരെ വിടാതെവെച്ചിരുന്ന ഒരു ഡസന്‍ ഏമ്പക്കങ്ങള്‍ ഒരുമിച്ച് , ഒരമിട്ടു കണക്കെ വിടുന്നതിനിടയിലും അവര്‍ക്ക് ഒരിക്കല്‍ ക്കൂടി നന്ദി പ്രകാശിപ്പിക്കാന്‍ മറക്കാതെ, ഒരൊറ്റ നടയോ നട...

‘ഹല്ലാ, ഇത്ര പെട്ടെന്ന് തിരിച്ച് വീട്ടിലെത്തേണ്ടീര്‍ന്നില്ല !’ എന്ന് തോന്നണം.

എല്ലാര്‍ക്കും 2008 ഓണാശംസകള്‍ !

2008-09-13T02:56:00.000-03:00