ஒற்றைக்குயில்

ஆலமும் அமிர்தமும்

2012-01-17T23:10:00.000-08:00

துளி 17

பித்து பிடிக்கச் செய்துவிட்டாய் என்று
கோபித்துக் கொண்ட பொழுதில்
முத்தத்தைக் கையூட்டாக கொடுத்து
தப்பிச் செல்லும்
குழந்தையைப் போலும்
நழுவிச் செல்கிறாய்
விழிகள் ஒளிரும்
ஆழமானதொரு புன்னகையை
பரிசளித்தபடி

.

ஆலமும் அமிர்தமும்

2012-01-12T23:10:00.000-08:00

துளி 16

பரணின் மூலையில்
ஒண்டியிருக்கும்
அணில் பிள்ளையென
கிறீச்சிட்டுக் கொண்டேயிருக்கிறது
என் இரவுக்குள் நுழைந்த
உன் காதல்

.

ஆலமும் அமிர்தமும்

2011-08-01T23:18:00.000-07:00

துளி 15

தொடர்பு எல்லைக்கு
அப்பாலிருந்த போதும்
குரல் கேட்கிறேன்
நேற்றைய
உனது
குறுஞ்செய்திகளில்

.

ஆலமும் அமிர்தமும்

2011-07-19T02:47:00.000-07:00

துளி. 14

முத்த சாவி
கொண்டு திறக்கிறாய்
நாளெல்லாம் நனைகிறேன்

.

இதழ்தூது

2011-07-02T04:04:00.000-07:00

குறுஞ்செய்திகள்
எட்ட முடியாத
புற எல்லையில்
இருந்தபோதும்
தவறாது
வந்து சேர்ந்துவிடுகிறது
உன் முத்த செய்தி

.

புன்னகை குறிப்பு

2011-06-29T01:49:00.000-07:00

எல்லா புன்னகையும்
மகிழ்வின் அடையாளமா
கேட்டேன்
பதிலாய் தந்த
புன்னகையில்
அறிய முடிகிறது
கேட்கப்படாத
கேள்விகளுக்கான
பதில்களையும்

.

ஆலமும் அமிர்தமும்

2011-05-30T04:51:00.001-07:00

துளி 11.

உறக்கத்திலிருப்பவளை
எழுப்பி
கனவென்னும் அடர்வனத்தில்
தள்ளிச் செல்லும்
கொடுங்கூற்று நீ

துளி 12.

தொலைத்து விட்ட
என் தூக்கத்தைத்
தேடிக் கொண்டிருக்கிறேன்
உன் கனவினில்

துளி 13.

தாகமாய் இதழ்கள்
குவளை
அமுதம் வேண்டாம்
துளி முத்தம்
போதும்

.

ஆலமும் அமிர்தமும்

2011-05-23T03:59:00.000-07:00

துளி 10.

உனது பொழுதுகளை களவாடிப்
போன

தாக
குற்றம் சுமத்தித் திரிகிறாய்

அந்த பொழுதுகளோடு

நானும் இருப்பதை
ஏனோ நீ உணர்வதேயில்லை

உன் தூக்கத்தைப்
பறித்துக் கொண்டதாக
கோபித்துக் கொள்கிறாய்

பறி
போன

தூக்கத்தின் கனவுகளை மட்டும்
திரும்ப தரச்சொல்லி கெஞ்சுகிறாய்

உன் வேலைகளுக்கிடையே
நுழைந்து
கலகமூட்டுவதாக
குறை சொல்லிப்
போகிறாய்

அன்றாட மகிழ்வே நானென
தலையில் வைத்து
கூத்தாடவும்
செய்கிறாய்.

.

ஆலமும் அமிர்தமும்

2011-02-03T03:48:00.000-08:00

துளி 7

என்னுள்ளே

நிறைந்து தளும்புகிறது

வெறுமை

நிறைத்திட

புன்னகை பூங்கொத்துடன்

வருகிறது

உன் காதல்

துளி 8

எதுவுமே எழுதவில்லையா

கேட்ட தோழிக்கு

எப்படி பதிலளிப்பது

ஆயிரமாயிரம் கவிதைகளாய்

நீ மட்டுமே

நிறைந்திருப்பதை

துளி 9

உள்ளிருந்தபடி பயணிக்கும்
இன்னொரு உயிர்
நீ

ஆலமும் அமிர்தமும்

2010-10-28T06:31:00.000-07:00

துளி 4

'விலகிப் போய்விடு
என்னிலிருந்து'
என்றபடியே
துரத்திக் கொண்டிருக்கிறாய்

துளி 5

மௌனமென்னும்
மென்கத்தி கொண்டு
உயிரறுக்கும்
மிதவாதி நீ

துளி 6

ஒரே புன்னகைதான்
சிறையாகவும்
சிறகாகவும்

.

உணர்விருக்கை

2010-10-25T05:10:00.000-07:00

பேருந்து நிறுத்த
சிமெண்ட் இருக்கையிடம்
இருக்கக் கூடும்
எண்ணற்ற கதைகள்

முக்கிய சாலையிலிருந்து
ஒதுங்கி நிற்கும்
கிராமத்து மாந்தர்களின்
நடைபயண குறிப்புகள்

சுமை தூக்கிகளாய்
பள்ளி செல்லும்
சின்னஞ் சிறுசுகளின்
கண்களில் மின்னும்
வண்ணக் கனவுகள்

'என் ஆளு வருவா
நீ போடா மாப்ள'
காத்திருக்கும்
இளவட்டங்களின்
இனிய அவஸ்தைகள்

ஜன சந்தடிகள்
ஏதுமற்ற போதுகளில்
தனிமையில் காயும்
நண்பகலின் வெறுமை

அடக்கி வைப்பார்
யாரும் இல்லாமல்
துள்ளி நடமிடும்
மேகக் குழந்தையின்
வியர்வைக் கதைகள்

கூடவே....

கூப்பிடு தூரத்தில்
இல்லாத நீ
அருகினில் அமர்ந்து
கைகோர்த்து பேசுகின்ற
பல கதைகளும்

.

2010-10-25T04:51:00.000-07:00

வசனகவிதை புசித்து
பாட்டினை பருகி
கவிதையின் கைபிடித்து
காலம் கடக்க
பாரதியல்ல நான்
துரத்திப் பிடிக்கும்
துயரத்தின் கரங்கள்
நெரித்து செல்கின்றன
கவிதையின் கழுத்தையும்

.

இடைவெளி

2010-10-19T05:02:00.000-07:00

அதிக வேலைப் பளுவின் காரணமாக அடிக்கடி நம் நண்பர்களை சந்திக்க இயலவில்லை. வாரம் இரு முறையேனும் சந்திக்க முயற்சிக்கிறேன்.

நன்றி நண்பர்களே.

நட்புடன்

கல்யாணி சுரேஷ்.

நிராதரவான பசி

2010-09-23T22:39:00.000-07:00

சற்று முன்னர்

விழுந்திருந்ததாலேயே
அதிகம் சேதப்படாதிருந்தது

இரண்டு இட்லிகளும்
கிருஷ்ணவேணி அத்தையை
நினைவூட்டும் சாம்பாருமாய்

சாலையில் கிடக்கும்

உணவுப் பொட்டலம்

சாலையைக் கடக்கும்

சிறுமிக்கு சொந்தமானதா?
ஆதரவென யாருமற்ற

தள்ளாடும் முதியவருடையதா

கனரக சக்கரங்களில் சிதையாமல்

அப்புறப்படுத்தலாமா?
சாலையோரத்தில் ஒண்டியிருக்கும்

பிரக்ஞையற்ற பாட்டியின்

பசியைத் தணிக்கலாமா?

சமூகம் குறித்த
அக்கறை ஏதுமின்றி
ஓடிச் சென்று
அள்ளி எடுத்து
என்னை விழுங்கிக்கொண்டிருக்கும்
பசிக்கு இரையாக்கலாமா?

மனதில் யோசனைகளுடன்
கடந்து செல்கிறேன்
இன்னும் பலரும்
கடந்து செல்லலாம்
ஏதேதோ எண்ணியவாறு

உணவுப் பொட்டலமோ
அங்கேயே கிடக்கிறது
முகமறியா ஜீவனின்
பசியை நினைவூட்டியபடி

அன்புள்ள அண்ணா

2010-08-23T23:05:00.000-07:00

அன்புள்ள அண்ணா
நலமா னு கேட்க வழியில்லை. இன்றைக்கு சகோதரர்கள் தினமாம். பெண்கள் தங்கள் சகோதரனுக்கு ராக்கி கட்டி, அவர்களின் நீண்ட ஆயுளுக்காக பிரார்த்தனை செய்யும் நாளாம். நானும் உனக்காக வாழ்த்து அட்டையெல்லாம் வாங்கி விட்டேன். ஆனால் நீதான் என்னிடம் ஒரு வார்த்தை கூட சொல்லாமல், முகவரியும் தராமல் நெருங்க முடியாத தொலைவிற்கு சென்றுவிட்டாய்.

உனது நீண்ட ஆயுளுக்கென வேண்டிக் கொள்ள வேண்டிய இந்த நாளில் உனது ஆன்ம சாந்திக்காக வேண்டிக் கொள்ளச் செய்த கடவுளை என்ன சொல்லி நொந்துகொள்வது?

எனது ஒவ்வொரு பதிவும் உனது கருத்தினைக் கேட்ட பின்பு பதிவிடப்படுவதே வழக்கம். இன்றைய எனது இந்த பதிவினை குறித்த கருத்தை நான் யாரிடம் போய் கேட்பது?

மாறாத அன்புடன்
கல்யாணி.

வலையுலக நண்பர்களே,
எனது இனிய சகோதரனும், நண்பனும், வழிகாட்டியும் எல்லாவற்றிற்கும் மேலாக எனது நலம் விரும்பியுமான சக பதிவர் திரு.நேர்மறை அந்தோணிமுத்து (http://positiveanthonytamil.blogspot.com/) அவர்கள் நேற்று இறையடி சேர்ந்துவிட்டார்கள். எனது சகோதரனின் ஆன்ம சாந்திக்காக இறைவனை வேண்டிக் கொள்ளுமாறு கேட்டுக்கொள்கிறேன்.

ஆலமும் அமிர்தமும்

2010-08-07T04:58:00.000-07:00

துளி 1.

வேண்டியதெல்லாம் கேள்
கடவுள் சொன்னார்
ஒற்றை வரமாய்
பெற்று வந்தேன்
உன்னை மட்டும்.

துளி 2.

ஆர்ப்பரித்துக் கொட்டும்
அருவி போலும்
உன் காதல்.
மூச்சடைத்த போதும்
நனைந்து கொண்டேயிருக்கிறேன்
விலகாமல்.

துளி 3.

நீள்கின்றதான காலம்
சேமித்துக் கொண்டிருக்கிறது
முத்தங்களையும்
கண்ணீர்த் துளிகளையும்.

யெளவனம்.

2010-08-01T23:12:00.000-07:00

இசையும்

கவிதையும்

குறித்ததான

நமது விவாதங்களில்

அன்றைக்கு இடம்பெற்றது

யெளவனம் குறித்ததோர்

உரையாடல்.

கட்டுடலும்

காதல் நிறைந்த

கண்களும்

கவர்ந்திழுக்கும்

புன்னகையும் கொண்டிருக்கும்

காதலின் நுழைவாயிலா

கேட்டேன்

நரைத்த பின்னும்

வெளிறிடாத நேசமும்

கருணை பொழியும்

விழிகளும்

நட்பினை உடுத்திருக்கும்

புன்னகையும்

மனங்களின் தொடுகையில்

சுகம் காணும்

முதுமை கூட

பதில் தந்தாய்

புன்னகை கலந்து.

இறுதியாக கூறினாய்

அன்பினில் சங்கமிப்பதே

யெளவனம்!

வழித்துணை

2010-07-27T23:53:00.000-07:00

கூடவே வருகிறது
கிளம்பும் நேரத்தில்
கட்டிக் கொண்டு
விலக மறுத்த
ஹர்ஷிதா குட்டியின்
வாசனை.

.

விடுதலை விரும்பி

2010-05-22T05:26:00.000-07:00

தினம்தோறும் வாசலில்

ரங்கோலி கோலமிடுகிறாள்

வளைந்து நெளியும்

கோடுகளுக்குள்

புள்ளிகளை

சிறை வைக்க

விரும்பாமல்.

வானவில் தருணம்.

2010-05-03T07:18:00.000-07:00

நீள்கின்ற மௌனக்கோடு
இயம்புகிறது
இருவருக்குமான இடைவெளியை

சிறைப்பட்டிருக்கும் வார்த்தைகளை
விடுவிப்பதற்கான சாவி
உன்னிடமிருப்பதாய் நானும்
என்னிடமிருப்பதாய் நீயும்
பாவனை செய்கிறோம்

சிறு விசும்பல்
அழிக்கக் கூடும்
மௌனக் கோட்டினை

ஒற்றைத் துளி
உடைக்கக் கூடும்
சிறைக் கதவுகளை

ஊடல் உடைபடுமொரு
வானவில் தருணத்திற்கென
காத்திருக்கிறோம் உள்ளபடியே.

.

சிலைகள்

2010-05-03T07:05:00.000-07:00

உயிர் நீத்த
பின்னும்
சிறைக்குள்ளேயே
எம் தலைவர்கள்.

.

நீராலானது

2010-04-23T01:59:00.000-07:00

கிழவியின்
வற்றிப்போன முலை
போலும்
பரந்து கிடக்கிறது
ஆற்றுவெளி
எங்களின்
கண்ணீர்த் தடங்களைப்
போலும்
நீண்டு கிடக்கின்றன
ஒற்றையடிப் பாதைகள்

.

.

நிலைக்கண்ணாடியின் பதில்கள்

2010-02-19T05:20:00.000-08:00

நான் கேட்கும்
எல்லா கேள்விகளுக்கும்
பதிலளிக்கிறாய் சலிப்பேதுமின்றி,
என் வீட்டு
நிலைக்கண்ணாடியினுள்
இருந்தபடி...!

.

புன்னகை.

2010-02-15T05:00:00.001-08:00

புத்தகத்தின் முதல்
பக்கத்தில் இருக்கும்
உன் பெயரை
மெல்ல வருடுகிறேன்
விரல்களில் உணர்கிறேன்
புன்னகையை.

.

மழை அஞ்சல்

2010-01-07T21:25:00.000-08:00

தூரத்தில்
பெய்கின்ற மழை
கொண்டு சேர்க்கிறது.....
நாசியில்
மண் வாசனையையும்
மனதில்
உன் நினைவுகளையும்

.