پیغام قرآن و حدیث

سیرت النبی کریم ﷺ ۔۔۔ محمد ﷺ کی تلوار

noreply@blogger.com (پیغام قرآن و حدیث ٹرسٹ) — Sat, 22 Apr 2023 08:30:00 +0000

سیرت النبی کریم ﷺ

محمد ﷺ کی تلوار

دنیا کے ہر براعظم میں قبولِ اسلام کا شور ہے، وہی ”اللہ اکبر“ کے نعرے جو کسی شخص کے پہلی بار ”اَشہد اَن لا الٰہ الا اللہ و اَن محمداً رسول اللہ“ کے الفاظ لب پہ لے آنے پر اول اول ’مکہ‘ نامی ایک بستی میں سنے جایا کرتے تھے، وہی نعرے یورپ، جنوبی امریکہ، شمالی امریکہ اور افریقہ تا آسٹریلیا ”اسلامی سنٹروں“ کے اندر اب روز گونجتے ہیں ۔۔۔

پیرانِ کلیسا اِس پر چپ ہی رہیں گے؟

"توحید“ کے سامنے ’تثلیث‘ کا نہ ٹھہر سکنا۔

اِس تاریخی واقعہ کی تفسیر انسانی ”عقل“ اور ” خرد“ اور ”منطق“ اور ”فطرت“ کی بجائے اور اسلام کی قوت و برہان کی بجائے ’اسلام کی تلوار‘ میں تلاش کرنا، وہ عذر لنگ ہے جو اب بے حد پرانا ہو گیا ہے۔

مستشرقوں نے آج سے کوئی صدی بھر پہلے اِس کو ایک ’مقولہ‘ بنا دینے کی کوشش کر دیکھی ہے، مگر انہیں اِس پر منہ کی کھانی پڑی جب ان کے جھٹلانے کو صرف ماضی کے دل آویز حقائق ہی نہیں، خود آج اِس دور میں بھی خدا نے ان کو محمد صلی اللہ علیہ وسلم کے دین کی اصل قوت کا ایک چھوٹا سا نظارا کروا ہی دیا۔

آج اِس دور سے بڑھ کر تو مسلمانوں پر ضعیفی کبھی نہ آئی ہوگی، ہر قوم ہی آج مسلمانوں پر شیر ہے تو آج کونسی تلوار ہے جو مغرب کے اندر لوگوں کو اسلام قبول کروا رہی ہے؟ سبحان اللہ! اِس دین کے معجزے دنیا اب بھی دیکھ رہی ہے۔

مسلم ضعیفی کے اِس دور میں بھی قبولِ اسلام کی ایک عالمی لہر مسلسل بلند ہو رہی ہے، ہمارے تعجب کے لئے ’جدید دنیا‘ کے اِس چشم کشا واقعہ کے سامنے مستشرق جہاں اب کھسیانے ہو رہے ہیں وہاں کلیسا کے منصب بردار اِس کو ’نہایت مؤثر طعنہ‘ سمجھ کر بآوازِ بلند دہرانے جا رہے ہیں!!!

کلیسا، جس کا نام لیتے ہی ہمیں خود بخود ’اندلس‘ یاد آجاتا ہے، ’قرونِ وسطیٰ‘ کا لفظ اور اس کے سوا ’اور بہت کچھ‘ بھی کلیسا کے حوالے سے تاریخ کی یادداشت کے ساتھ چپک کر رہ گیا ہے، یہ ’کلیسا‘ آج محمد صلی اللہ علیہ وسلم کی دعوت کو طعنہ دینے جا رہا ہے۔

’دلیل کی قوت‘ ہی تو اِس دین کا اصل امتیاز ہے، اسلام کی یہی خصوصیت تو ہے جس کے باعث ہمیشہ کی طرح آج بھی اللہ کے فضل سے لوگ ’تثلیث‘ چھوڑ چھوڑ کر ”توحید“ کا رخ کررہے ہیں!!! اسلام کی اِس اصل خصوصیت کو یہ لوگ یوں نظر انداز کر کے دکھاتے ہیں گویا واقعی انجان ہیں۔

اسلام کی تلوار کی رونمائی کے دوران اِن کے ہاں یہ بھی ضروری رہتا ہے کہ اُس تلوار پر دنیا کی نظر نہ جائے جو ’صلیب‘ کے نام پر طویل صدیاں چلائی جاتی رہی اور جوکہ درحقیقت آج بھی نیام میں نہیں چلی گئی ہے، صرف چولا بدل گئی ہے (آخر الذکر مسئلہ، جیسا کہ ہم کتاب کی ابتدا میں کہہ آئے ہیں، ہماری اِس حالیہ تحریر کا موضوع نہیں، یہاں بات صرف نبی صلی اللہ علیہ وسلم کے حق کے حوالے سے ہوگی)۔

یہ خود جانتے ہیں شہنشاہِ قسطنطین کے قبولِ عیسائیت (312ء) کے ساتھ ہی ’دھونس‘ کس طرح میدان میں آئی تھی۔۔۔۔! اور یہ دھونس بھی بھلا کس لئے تھی؟

سینٹ پال کے دین کو مسیح بن مریم علیہ السلام کے دین پر برتری دلانے کے لئے، جس کے نتیجے میں ’مسیحیت‘ کے نام پر ”خدائے واحد“ کے بجائے ’اقانیمِ ثلاثہ‘ کی بزور پوجا کرائی جانے لگی تھی!!!

سبھی کو معلوم ہے Romans کی بے رحم قوت نے میدان میں آکر کیونکر پانسہ پلٹا اور عرصہء دراز سے عیسائی فرقوں کے مابین پائے جانے والے ”توحید بہ مقابلہ تثلیث“ کے اُس طویل معرکہ کو کس جبر اور تشدد کے ساتھ، تثلیث کے حق میں، اختتام پزیر کروایا۔ کسے معلوم نہیں، رومنز کے میدان میں آنے کے ساتھ ہی، یعنی رومنز کے عیسائیت میں پیر دھرتے ہی مسیح علیہ السلام کے سچے پیروکاروں کے ساتھ کیسا آہنی ہاتھ برتا جانے لگا، جب مسیح علیہ السلام کو خدا کا بندہ اور خدا کا نبی کہنے والوں پر (خصوصاً چوتھی صدی عیسوی کے ”اریوسی فرقہ“ پر جوکہ توحید پر قائم تھا) زمین تنگ کر دی گئی تھی، یہاں تک کہ چھٹی صدی عیسوی کے آواخر یعنی نبیِ آخر الزمان کے دورِ ولادت تک سب ’اریوسیوں‘ ’شمشاطیوں‘ اور ’ابیونیوں‘ (عیسائیوں میں پائے جانے والے بعض موحد فرقےکو معدوم کر کے رکھ دیا گیا تھا۔۔۔۔!

==================> جاری ہے ۔۔۔

*ماخوذ از مستند تاریخ اسلام ویب سائیٹ*

تدبر سورہ الرحمٰن ۔۔۔ از استاد نعمان علی خان ۔۔۔ حصہ 26

noreply@blogger.com (پیغام قرآن و حدیث ٹرسٹ) — Fri, 21 Apr 2023 09:01:00 +0000

تدبر سورۃ الرحمن

از استاد نعمان علی خان

پارٹ 26 آیت(48-49)

ذَوَاتَـآ اَفْنَانٍ

جن میں بہت سی شاخیں ہوں گی.

جنت کے باغ میں بہت سے درخت ہیں جن کی شاخیں نہایت گھنی ہیں. کسی بھی علاقے کے گھنے سایہ دار درخت اس علاقے کی پراپرٹی کی مالیت، خوبصورتی اور پوش ہونے کی نشاندہی کرتے ہیں. درخت کسی جگہ کو پراسرار بناتے ہیں. کیونکہ درخت منظر کو چھپا دیتے ہیں.

فَبِاَيِّ اٰلَآءِ رَبِّكُـمَا تُكَـذِّبَانِ

پھر تم اپنے رب کی کن کن نعمتوں کو جھٹلاؤ گے

تو پھر اپنے رب کی کن کن نعمتوں کا، کتنے ہی معجزات کا انکار کرو گے، کتنے انعامات و کرامات اور لطف و کرم کوجانتے بوجھتے جھٹلاؤ گے؟

جاری ہے ۔۔۔

سیرت النبی کریم ﷺ ۔۔۔ ایک اُسی نبی کا انکار کیوں؟ ، جس کی نبوت کے دلائل سب سے مضبوط ہیں

noreply@blogger.com (پیغام قرآن و حدیث ٹرسٹ) — Wed, 19 Apr 2023 09:30:00 +0000

سیرت النبی کریم ﷺ

ایک اُسی نبی کا انکار کیوں؟، جس کی نبوت کے دلائل سب سے مضبوط ہیں

بُغض کے بھرے عیسائی مبلغین لوگوں کے حضرت محمد ﷺ کی جانب بڑھنے کی راہیں مسدود کردینے کےلئے چند گھسی پٹی باتوں سے بڑھ کر کیا کہہ سکتے ہیں؟ '' قتال ''؟

وہ تو بائبل میں مذکور انبیاء کے ہاں بھی مذکور ہے، کیا پھر یہ موسیٰ اور سموئیل اور داود کو بھی ''تلوار'' کو ہاتھ لگ جانے کے باعث نبی ماننے سے انکار کردیں گے؟ سلیمان کو نبی نہ مانیں مگر ’اَمثال‘ تو ان کی بھی بائبل کا جزولاینفک ہیں، کیا ان سب نبیوں کو اور ان کے صحیفوں کو اور ان کے ذکر کو ’قتال‘ میں ملوث ہونے کے باعث بائبل کے عہد قدیم سے باہر کیا جاسکتا ہے؟ بلکہ عہد جدید کے بھی وہ حصے جن میں ’تلوار‘ کا ذکر ہے، کیا بائبل کے عہدِ جدید کی ان نصوص کی آسمانی نسبت بھی مشکوک ٹھہرا دی جائے گی؟

ایک سے زیادہ شادیاں کرلینے کے باعث محمد ﷺ کو بطور نبی نہیں دیکھا جاسکتا؟ تو پھر ابراہیم، اسحاق، یعقوب اور داود کو بطور نبی دیکھنے پر بھی کیا یہ مبلغین اپنے چرچ میں پابندی عائد کردیں گے؟ ان انبیاء کی کئی کئی شادیوں کا ذکر اسی بائبل میں ہی تو ہے جس کی تقسیمِ عام پر صبح شام محنت ہورہی ہے۔

محمد ﷺ نے عہد شکنی کے مرتکب بنو قریظہ کے سرقلم کروادئیے تھے، بنوقریظہ کے جنگی جرائم تو تاریخ کے ریکارڈ میں ہیں، مگر موسیٰ اور داود نے اپنے قابو آنے والے دشمنوں کے ساتھ جو خوفناک برتاؤ کیا، اپنی ’کتابِ مقدس‘ میں کیا انہوں نے وہ بھی دیکھا ہے؟ بائبل جو ’دکھی انسانیت کی فلاح کےلئے‘ افریقہ کے جنگلوں اور آسٹریلیا کے صحرؤں تک آج مفت پہنچائی جا رہی ہے، خود ہی ان سب سوالوں کا جواب ہے۔

یا تو یہ کہہ دیں کہ خدا نے انسان کی ہدایت کے لئے آج تک کوئی نبی بھیجا ہی نہیں اور نہ ہی کبھی کوئی کتاب اتاری ہے، پھر اس صورت میں بائبل کی ترسیل کے دیوہیکل منصوبے بھی لپیٹ کر رکھ دیں اور عہد قدیم کے انبیاء کی بھی اسی طرح ڈٹ کر مخالفت کریں جس طرح یہ محمد ﷺ کے ساتھ خدا واسطے کا بیر رکھے ہوئے ہیں، بلکہ ’یسوع مسیح ‘ کو اور اس کے کلام کو بھی اسی صف میں کھڑا کریں اور سب پر ایمان کے لئے ایک سا ’علمی معیار‘ بنائیں اور اگر ان کے لئے ایسا ممکن نہیں تو پھر محمد ﷺ کی طرف جانے والے عقل اور دلیل کے ان سب راستوں میں یہ کیونکر اور کب تک جم کر بیٹھ سکتے ہیں؟

اِن کا مقصد یہ تاثر دینا اور ثابت کرنے کی کوشش کرنا ہے کہ محمد ﷺ اگر نبی ہوتے تو آپ کی بابت ایسی غلط غلط باتیں کہی ہی کیونکر جا سکتی تھیں؟ مستشرقین نے اسی لئے حضرت عائشہ اور حضرت زینب بنت جحش کی شادی وغیرہ ایسی باتوں پر بھی لامحدود اوراق سیاہ کئے ہیں تو گویا نبی ہونے کے لئے ضروری ہے کہ اس کی بابت کبھی کوئی غلط بات نہ کی گئی ہو اور اس کی کسی بات کو کبھی کوئی غلط رنگ نہ پہنایا گیا ہو!!! کیا اس بات کا اطلاق یہ ان نبیوں پر بھی کریں گے جن پر یہ خود بھی ایمان رکھتے ہیں۔۔۔۔!!؟

محمد ﷺ کی نبوت کا ’ثبوت‘ چاہیے تو پھر موسیٰ اور عیسیٰ علیہما السلام کی نبوت کا بھی ’ثبوت‘ چاہیے اور عین انہی معیاروں پر جن کو ’تحقیق‘ کی بنیاد بنا کر تم محمد ﷺ کی نبوت پر اعتراضات کی بوچھاڑ کرتے رہے ہو! اور پھر دیکھتے ہیں ’دلیل‘ کس کے پاس ہے!!!!!؟

وہ اعتراضات جو تم محمد ﷺ اور قرآن پر کرتے ہو، ’جدید انسان‘ کو ایسے ہی اعتراضات کرنے کا حق اپنے نبیوں اور اپنے صحیفوں پر بھی تو دو! تمہارے پاس تو کچھ بچے گا ہی نہیں!!! خود موسیٰ اور عیسیٰ علیہما السلام کی نبوت کے ثبوت بھی خدا کے فضل سے آج ہم رکھتے ہیں نہ کہ تم!!!

انبیاء کا آنا اگر سچ ہے تو پھر ایک اُسی نبی کا ہی انکار کیوں جس کی نبوت کے دلائل سب سے مضبوط ہیں؟ جس کی زندگی کے حالات اور جس کی تعلیمات مستند ترین صورت میں آج کے انسان کو سب سے زیادہ اور سب سے وافر اور سب سے روشن صورت دستیاب ہیں؟ جس کا انسانی زندگی پر کسی بھی انسان سے بڑھ کر اثر انداز ہونا تاریخ کا ایک واضح معلوم محسوس واقعہ ہے؟؟؟

کسی مستشرق نے کیا سچ کہا ہے کہ: محمد (ﷺ) ہی ایک وہ نبی ہے جو تاریخ کے نصف النہار میں پیدا ہوا اور سورج کی روشنی میں دیکھا گیا، پچھلے نبیوں کے تو حالات ہی مستند طور پر آج دستیاب نہیں۔

شام کے ایک مصنف نے حال ہی میں مغرب کے کچھ اہم اہم نومسلم مفکروں کے قبول اسلام کے تجربات و محسوسات ایک کتاب میں قلم بند کئے ہیں جس کا عنوان بہت خوبصورت رکھا ہے:

ربحتُ محمداً (ﷺ) ولم اخسر المسیح

یعنی”میں نے محمد ﷺ کو پایا، مگر مسیح کو بھی نہ کھویا“

==================> جاری ہے ۔۔۔

*ماخوذ از مستند تاریخ اسلام ویب سائیٹ*

تدبر سورہ الرحمٰن ۔۔۔ از استاد نعمان علی خان ۔۔۔ حصہ 25

noreply@blogger.com (پیغام قرآن و حدیث ٹرسٹ) — Tue, 18 Apr 2023 08:56:00 +0000

تدبر سورۃ الرحمن

از استاد نعمان علی خان

پارٹ 25 آیت(46-47)

وَلِمَنْ خَافَ مَقَامَ رَبِّهٖ جَنَّـتَانِ

اور اس کے لیے جو اپنے رب کے سامنے کھڑا ہونے سے ڈرتا ہے دو باغ ہوں گے.

اگر کوئی ڈرتا ہے اللہ سے، تو اس کے لیے دو باغ ہیں. اس سے پہلے اس سورۃ میں اللہ کا شکر ادا کرنے پہ زور دیا گیا تھا. اس آیت میں اللہ سے ڈرنے پر انعام کا ذکر ہے. اس میں اور پچھلی آیات میں کیا فرق ہے؟ پہلی چیز جو ایک اچھے انسان کو اللہ کا معبود بننے پر ابھار سکتی ہے وہ ہے اللہ کا فضل و کرم. لیکن ایک ضدی نافرمان شخص کو اللہ کی طرف خوف لے کر جاتا ہے.

یہ نیکی کی طرف اکسانے والی آیات ہیں ، آیات البر، اللہ تعالٰی نے ہمیں ہمارے اعمال کے نتائج بتا دیے ہیں. اولین وجہ جو اللہ کی بندگان اختیار کرنے کے لیے ہونی چاہیے وہ ہے اللہ کا فضل و کرم. اللہ اسی قابل ہے کہ اس کی عبادت کی جائے. نیک اعمال کرنے کی سب سے بڑی وجہ یہی ہونی چاہیے کہ آپ اللہ کے شکر گزار بندے ہیں. ہر کوئی اس مقام پہ نہیں ہوتا اور نہ ہی ہر کسی پہ اللہ کا یہ احسان ہے.

اللہ تعالٰی کہتے ہیں کہ اللہ کی بندگی اختیار کرنے کی اور بھی بہت سی وجوہات ہیں جیسے کہ روزِ قیامت. جو دو اور بڑی وجوہات ہیں اللہ کی بندگی اختیار کرنے کے لیے وہ ہیں جنت کی خواہش، اور جہنم کا خوف. یہ دونوں اللہ تعالٰی کی طرف جانے کے لیے انسان کو ابھارتی ہیں. اس سورۃ کا آغاز اللہ تعالٰی نے ہمیں اللہ کا شکر ادا کرنے کی ترغیب دیتے ہوئے کیا تھا. آپ کو اللہ کی حمد و ثنا بیان کرنی چاہیے اور یہ کافی ہے آپ کے لیے. بعد میں جب مجرموں کا ذکر کیا گیا تو بہتر یہی ہے کہ آپ اللہ سے ڈریں. اللہ تعالٰی جانتے ہیں کہ اس دنیا میں مختلف قسم کے لوگ پائے جاتے ہیں.

دو جنتوں کا وعدہ کیوں کیا گیا؟ عام خیال یہی ہے کہ ایک انسانوں کے لیے اور ایک جنت ان جنات کے لیے جنہوں نے اللہ کی خاطر اپنی خواہشات کو دبا ڈالا. دوسرے علماء کا خیال ہے کہ شاید دو جنتوں کا ذکر اس لیے کیا گیا کیونکہ دو چیزیں انسان کو کامیاب کراتی ہیں. اللہ کا شکر اور اللہ کا خوف. کچھ لوگ نیک کام کرتے ہیں اور کچھ لوگ برائی سے دور رہتے ہیں. کچھ لوگ نیک اعمال میں مصروف رہتے ہیں، اللہ کی عبادت کرتے ہیں لیکن برے کاموں سے دور نہیں رہ پاتے. جبکہ دوسری طرف کچھ لوگ ہیں جو زیادہ برے کام نہیں کرتے لیکن نیک اعمال کرنے میں سستی برتتے ہیں.

اگر آپ واقعی اللہ تعالٰی سے ڈرتے ہیں تو آپ کو دو چیزوں کا خیال رکھنا چاہیے، نیک اعمال میں خود کو مصروف رکھیں اور برے کاموں سے خود کو دور رکھیں. کچھ لوگ سمجھتے ہیں کہ ان کے نیک اعمال ان کے برے کاموں کو ڈھانپ لیں گے لیکن یہ ان کی خام خیالی ہے. آپ کو محنت کرنی لازمی ہے. آپ کو مجرم نہیں بننا اور آپ کو ایک اچھا انسان بننا لازم ہے.( خود کو ان کاموں میں مصروف کرنا جن کا اللہ نے حکم دیا ہے. )

فَبِاَيِّ اٰلَآءِ رَبِّكُـمَا تُكَـذِّبَانِ

پھر( اے گرہ جن و انس ) تم اپنے رب کی کن کن نعمتوں کو جھٹلاؤ گے.

اس آیت میں کن لوگوں کو مخاطب کیا گیا ہے؟ پچھلی کچھ آیات جہنمیوں کے متعلق تھیں. لیکن یہ آیت مختلف ہے. وہ انسان جو جنت میں داخل ہو گیا اس نے دین کو شاید ترجیح دی ہو لیکن جنت میں داخل ہونے کے بعد اسے یہی لگے گا کہ اس نے اللہ کی عبادت کا حق ٹھیک سے نہیں ادا کیا. اللہ کے دین کی خدمت، نیک اعمال، توبہ سب اللہ ہی کی طرف سے ہمارے لیے مواقع تھے. جتنا کچھ انہیں جنت میں ملے گا وہ اس قدر ہی اس پر اللہ کا اتنا زیادہ شکر ادا کریں گے اس کے لیے بھی جو کچھ انہیں دنیا میں ملا. انہیں جنت میں کیا چیز لے گئی؟ ان کا دین، ان کے اساتذہ، وہ مسلمان جنہوں نے اس راہ میں ان کی مدد کی، جو ان کے لیے اللہ کا تحفہ تھے.

جاری ہے ۔۔۔۔۔۔۔

سیرت النبی کریم ﷺ ۔۔۔۔ محسنِ انسانیت ﷺ

noreply@blogger.com (پیغام قرآن و حدیث ٹرسٹ) — Mon, 17 Apr 2023 08:00:00 +0000

سیرت النبی کریم ﷺ

محسنِ انسانیت ﷺ

موجودہ عالمگیر مادہ پرستانہ تہذیب کے ظاہر فریب پردوں کے پیچھے جھانک کر انسانیت کا جائزہ لیجیے، تو وہ حالتِ زار سامنے آتا ہے کہ روح کانپ جاتی ہے۔

پوری اولادِ آدم کو چند خواہشات نے اپنے شکنجے میں کس لیا ہے اور ہر طرف دولت و اقتدار کے لیے ہاتھا پائی ہو رہی ہے، آدمیت کے اخلاقی شعور کی مشعل گُل ہے، جرائم تمدنی ترقی کے ساتھ ساتھ تیزی سے بڑھ رہے ہیں، نفسیاتی الجھنوں کا زور ہے اور ذہنی سکون یکسر غائب ہوچکا ہے، انسانی ذہن و کردار میں ایسا بنیادی فساد آگیا ہے کہ زندگی کا کوئی گوشہ اس کی منحوس پرچھائیں سے محفوظ نہیں رہا۔

فلسفہ و حکمت سے سچائی کی روح کھو گئی ہے، اعتقادات و نظریات میں توازن نہیں رہا، روحانی قدریں چوپٹ ہو چکی ہیں، قانون روحِ عدل سے خالی ہو رہا ہے، سیاست میں جذبۂ خدمت کی جگہ اغراض پرستی گھس گئی ہے، معیشت کے میدان میں ظالم اور مظلوم طبقے پیدا ہوگئے ہیں، فنون لطیفہ میں جمال کی ساری رنگ آمیزیاں جنسی جذبوں اور سفلی خواہشوں سے کی جانے لگی ہیں، تمدن کے سارے عوامل میں چپہ چپہ پر تضادات ابھر آئے ہیں جن کے درمیان تصادم برپا ہے اور پوری تاریخ ایک خوفناک ڈرامے میں بدل گئی ہے، عقل ترقی کرگئی ہے مگر اس کی حماقتیں ہمارے درپۓ آزار ہیں، علم کے سوتے ابل رہے ہیں، مگر اسی کی پروردہ جہالتوں کے ہاتھوں آدم زار کا ناک میں دم ہے، دولت کے خزانے ہر چہار طرف بکھرے پڑے ہیں، مگر خاکی مخلوق بھوک، ننگ اور محرومی کے عذاب میں گھری ہے، ہزار گونہ تنظیمیں اور سیاسی ہیئتیں، نظریاتی وحدیں اور معاہداتی رابطے نمودار ہیں، مگر انسان اور انسان کے درمیان بھائی بھائی کا سا تعلق نہیں، چیتے اور بھیڑیے کا سا معاملہ ہے۔ عقلی، سیاسی، اخلاقی اور تہذیبی شعور کی ترقی کے چرچے ہیں، مگر ظلم اور تشدد کے انتہائی ناپاک حربے آج بھی انسانیت کے خلاف کام میں لائے جا رہے ہیں۔

تاریخ ایک وسیع اکھاڑا ہے، جس میں کہیں امپیریلزم اور حریت پسندی کے درمیان، کہیں کمیونزم اور سرمایہ داری کے درمیان، کہیں جمہوریت اور آمریت کے درمیان اور کہیں فرد اور اجتماعیت کے درمیان اور کہیں مغربیت اور ایشیائیت کے درمیان ایک خونخوار آویزش جاری ہے۔

مصنوعی سیاروں اور میزائلوں کے اس دور میں سائنس الہ دین والے روایتی چراغ کے جن کی طرح مادی قوتوں کے نئے نئے خزانے انسان کے ایک ایک اشارے پر بہم پہنچا رہی ہے۔ قدرت کے سربستہ رازوں کے ازلی قفل حکمت کی کنجی سے کھل رہے ہیں، ہیبت ناک رفتار انسان کو زمان و مکان پر وسیع تصرف دلا رہی ہیں، جوہری توانائی نے تباہ دیووں کے لشکر انسان کے سامنے مسخّر کر کے کھڑے کر دیے ہیں جو بس ایک اشارۂ ابرو کے منتظر ہیں۔ دوسری طرف خود انسان کا اپنا یہ حال ہے کہ وہ شیطانی اور تخریبی قوتوں کے پنجے میں پہلے سے زیادہ بے بس دکھائی دیتا ہے جو بار بار اسے اپنے ہی خلاف محشر آرا کرتی رہی ہیں اور جنہوں نے ہر دور میں اس کے عظیم تعمیری کارناموں اور اس کے شاندار تمدنوں کو خود اسی کے ہاتھوں ملیامیٹ کرایا ہے۔

اضطراب کے اس لمحے میں جب چاروں طرف نگاہیں گھماتا ہوں تو تاریکی کا ایک سمندر شش جہت سے محاصرہ کیے ہوئے دکھائی دیتا ہے۔

اس سمندر میں دور ۔۔۔

چودہ صدی کی دوری پر۔۔۔

ایک نقطہ نور دکھائی دیتا ہے۔

یہ انسانیت کے سب سے بڑے محسن محمد صلی اللہ علیہ وسلم کے پیغام کی مشعل ہے!

وہی مشعل جس کی روشنی کو خود ہم نے ۔۔۔ محمد صلی اللہ علیہ وسلم کے نام لیواؤں نے ۔۔۔ اپنے افکار پریشاں اور اپنے اعمال پراگندہ کے غبار میں گم کر رکھا ہے !!

==================> جاری ہے ۔۔۔

*ماخوذ از مستند تاریخ اسلام ویب سائیٹ*

تدبر سورہ الرحمٰن ۔۔۔ از استاد نعمان علی خان ۔۔۔ حصہ 24

noreply@blogger.com (پیغام قرآن و حدیث ٹرسٹ) — Sun, 16 Apr 2023 08:04:00 +0000

تدبر سورۃ الرحمن

از استاد نعمان علی خان

پارٹ 24 آیات (45-43)

هٰذِهٖ جَهَنَّـمُ الَّتِىْ يُكَذِّبُ بِـهَا الْمُجْرِمُوْنَ

یہی وہ دوزخ ہے جسے مجرم جھٹلاتے تھے.

"جہنم" فارسی کا لفظ ہے جو عربی میں آیا اور اس کے معنی ہیں" عقوبت خانہ". یہ ہے وہ عذاب جسے مجرمین جھٹلاتے تھے. اللہ تعالٰی کہتے ہیں کہ اللہ کی عنایات کو جھٹلانا، اپنے انجامِ کار کو جھٹلانے کے ہی برابر ہے. ان غافلوں نے کبھی یہ سوچا ہی نہ تھا کہ ان کا یہ انجام ہو گا. ہمارے دور میں لوگ اس سے بھی آگے بڑھ چکے ہیں اور عذابِ الہی و جہنم کو مذاق سمجھ کے فلموں و ڈراموں میں دکھایا جاتا ہے.

هٰذِهٖ اور تِلْكَ میں کیا فرق ہے؟ "هٰذِهٖ" استعمال ہوتا ہے ایسی چیز کے لیے جو قریب ہو، یہ سامنے کی چیز، جبکہ تِلْكَ یعنی وہ، کچھ ایسا جو دور ہو. اللہ تعالٰی نے یہاں "هٰذِهٖ" کا لفظ استعمال کیا تاکہ ہمیں اندازہ ہو جائے کہ قیامت دور نہیں، نزدیک ہی ہے.

يَطُوْفُوْنَ بَيْنَـهَا وَبَيْنَ حَـمِيْـمٍ اٰنٍ

گناہ گار جہنم میں اور کھولتے ہوئے پانی میں تڑپتے پھریں گے.

اللہ تعالٰی یہ منظر بیان کرتے ہیں کہ دوزخ میں لوگ پانی کو دیکھیں گے. طُوْف کہتے ہیں آگے پیچھے ہونے کو. وہ پانی کو ابلتے ہوئے دیکھیں گے . اٰنٍ یعنی پانی ابل کر جل رہا ہو گا. تو وہ واپس آگ کی طرف دوڑیں گے کہ شاید یہ ٹھنڈی ہو اور پھر اسی طرح وہ آگ اور پانی کے درمیان مسلسل طواف کرتے دوڑتے پھریں گے.

فَبِاَيِّ اٰلَآءِ رَبِّكُـمَا تُكَـذِّبَانِ

پھر(اے گروہ جن و انس) تم اپنے رب کی کن کن نعمتوں کو جھٹلاؤ گے.

یہ جہنمیوں کے لیے طنز بھی ہو سکتا ہے. کہ اگر تم یہ جہنم کا منظر فرض کرو اور اس کے اثرات پہ غور کرو تو تم کیسے اللہ کی آیات سے انکار کر سکتے ہو؟

جاری ہے ۔۔۔۔۔۔۔

سیرت النبی کریم ﷺ دینِ محمدی ﷺ کا پھیلاؤ اور مادی وسائل

noreply@blogger.com (پیغام قرآن و حدیث ٹرسٹ) — Sat, 15 Apr 2023 07:30:00 +0000

سیرت النبی کریم ﷺ

دینِ محمدی ﷺ کا پھیلاؤ اور مادی وسائل

ننھے بچے کی تربیت و پرورش کے لئے محسوس قوتوں میں سب سے بڑی قوت وہ ہے جسے باپ کہتے ہیں، لیکن کیا تماشا ہے کہ وہ بزور توڑ دیا گیا اور پیدا ہونے سے پیشتر ہی توڑ دیا گیا، وہ آیا اور اس شان کے ساتھ آیا کہ جس کو لوگ پالنے والا کہتے ہیں، وہ مدینہ کے ایک میدان میں سویا ہوا تھا، سعد کے کنجے والو دوڑو اور اس بچے کو چھاتی سے لگاؤ، جس کے متعلق کہا جاتا ہے کہ اس کا کوئی نہیں۔

جن کے پاس سب کچھ تھا انہیں دھکیل دیا گیا، جس کی اونٹنی کا تھن خشک ہو چکا تھا اور خود جس کے پاس دودھ کا ایک قطرہ نہ تھا، کچھ نہ تھا اسی نے اپنی گود میں اُٹھا لیا، جب واپس کرنے آئی تو تماشے کا یہ کیسا درد ناک حصہ تھا کہ ابواء کے ایک جھونپڑے میں اس بچہ کی تربیت و پرداخت کرنے والی دوسری قوت بھی ہمیشہ کے لئے گم ہو گئی۔

پیر مرد بوڑھا دادا اُٹھتا ہے اور اس کے سر پر ہاتھ رکھتا ہے، لیکن قدرت جس کے ساتھ کچھ نہیں رکھنا چاہتی وہ اُٹھتی ہے اور اس کے ہاتھ کو بھی جھٹک کر علیحدہ کر دیتی ہے، اب کوئی نہیں، اس بچہ کا کوئی نہیں، اس کے پاس کچھ نہیں، ہاں بہت سے چچا ہیں، لیکن جن کے پاس بہت کچھ تھا، انہوں نے آنکھ اُٹھا کر بھی نہ دیکھا، ان میں جو سب سے نادار تھا اسی کے بچوں میں وہ بھی گھل مل گیا، چچا نے نہیں بلکہ بھتیجے نے بکریاں چرا کر اس کو کچھ دیا اور اسی میں سے کچھ خود بھی کھالیا، (خود آنحضرت ﷺ کا بیان ہے کہ ابو طالب کے بچے کھانے پر اس طرح ٹوٹتے تھے کہ میں بھوکا رہ جاتا تھا، آخر میں ابو طالب نے ضیق معاش سے تنگ آکر اپنے بچوں کو تقسیم کردیا تھا اور اسی تقسیم میں سیدنا علی کرم اللہ وجہہ حضور ﷺ کے حصہ میں آئے۔)

الغرض ایک بچہ پیدا ہوتا ہے (ﷺ) جس کے ساتھ نہ باپ کی قوت ہے، نہ ماں کی قوت ہے، نہ اقرباء و اعزہ کی قوت ہے، کوئی قوت نہیں ہے حتیٰ کہ وہ جس ملک میں پیدا ہوتا ہے، وہ بھی ہر قسم کی نباتی اور حیوانی قوتوں سے خالی ہے، میدان ہے اور چٹیل میدان ہے، اس کا نام بن کھیتی کا بیابان ہے، نہ اس کے آغوش میں ندیاں کھیلتی ہیں، نہ دریاؤں کا شیریں پانی اس کو سیراب کرتا ہے، نہ سبزہ زار مرغزار ہیں نہ نظر فریب گلزار ہیں، الغرض انسانی دل و دماغ کے سنوارنے اور ابھارنے میں جن قدرتی ذرائع کو دخل ہے ان میں سے بھی اس میدان میں کچھ نہیں ہے، وہ جس شہر میں پیدا ہوتا ہے، اس کے باشندوں کے پاس بھی کوئی قوت نہیں ہے، نہ ذہنی قوت نہ سیاسی طاقت، نہ علمی زور یعنی جن قوتوں پر قوموں کی عمارت کھڑی ہوتی ہے وہ ہر ایک سے خالی ہے، نہ وہ آئین رکھتے تھے نہ دستور، نہ ان کا کوئی بادشاہ تھا نہ ان کی جماعتی پراگندگیوں کا کوئی شیرازہ بند، نہ ان کے پاس مکاتب تھے نہ مدارس، نہ کارخانے نہ فیکٹریاں، کچھ نہیں، ان چیزوں میں سے ایک بھی نہیں جس میں داخل ہو کر کوئی بچہ پروان چڑھ سکتا ہو۔

ان کے پاس جو جسمانی طاقت تھی اس کا مصرف بھی بجز اپنی تعداد گھٹانے کے اور کچھ نہ تھا۔ اسی ملک میں، اسی شہر میں، اسی قوم میں اس بچے کا ظہور ہوا اور اس شان کے ساتھ ہوا کہ اس کے سر پر جو قوت بھی سایہ فگن ہوتی تھی یا ہو سکتی تھی، وہ ایک ایک کر کے مٹا دی جاتی تھی، یہاں تک کہ آخر میں یہ بھی ہوا کہ وطن پر جو اسے بھروسہ ہو سکتا تھا اس بھروسے کو بھی ہٹا دیا گیا، برادری والوں پر جو اعتماد ممکن تھا وہ بھی ناممکن کر دیا گیا، یعنی سارا وطن اور وطن والے، قبیلے والے، کنبے والے سب اس کی دشمنی پر متفق ہو کر آمادہ ہو گئے اور وہ جس کے پاس نہ باپ کی قوت تھی اور نہ ماں کی، نہ دادا کا زور تھا نہ اور کسی کا۔ نہ حکومت کی سرپرستی اسے حاصل تھی نہ مدرسوں کی تعلیم سے وہ فیض یاب ہو سکتا تھا، نہ اپنے ملک کے گرد و پیش کے خنک آمیز اثرات سے اپنے دماغ کی تازگی اور اس میں بالیدگی پیدا کر سکتا تھا، اب اس کے ساتھ یہ بھی کیا گیا کہ گھروالے، کنبے والے، قبیلے والے سب کے سب اس سے علیحدہ ہو گئے، مادہ ان سے علیحدہ کرلیا گیا اور اب جا کر یہ ارادہ پورا ہوا کہ دیکھو۔

ؔاس کے پاس کچھ نہیں ہے۔"

وہ ساری قوتیں جن کو لوگ قوت کہتے ہیں اور جن کا نام محسوس پرستوں کی اصطلاح میں ''قوت'' ہے ''زور'' ہے ایک ایک کر کے الگ کرلیا گیا، اس کے بعد دکھایا گیا، مشاہدہ کرایا گیا۔

''جس کے پاس کچھ نہیں ہے، دیکھو کہ اس کے پاس سب کچھ ہوگیا۔''

ایک منظر وہ تھا اور دوسرا منظر یہ ہے کہ زمین کے ایک بڑے قطعے کا مالک ہے۔ اس کے خادموں بلکہ خادموں سے نیچے اگر کوئی درجہ ہو سکتا ہے وہی قیصر کی ٹوپی اچھال رہے ہیں، کسریٰ کے جلال و جبروت کے پرزے اُڑا رہے ہیں، وہی جس کے پاس کچھ نہ تھا، کیا دنیا نے نہیں دیکھا یا نہیں دیکھ رہی ہے، یا نہیں دیکھے گی کہ یہی دنیا میں سب سے بڑا قرار پایا، قومیں اس کی تقدیس میں مصروف ہیں، نسلیں اس کے سراہنے میں منہمک ہیں، افغانستان کی پہاڑیوں میں، مراکو کی وادیوں میں، مصر کے ایوانوں میں، برصغیر کی بستیوں میں، چین کی آبادیوں میں، افریقہ میں، ایشیا میں، یورپ میں، امریکہ میں کون ہوا؟ اتنا بڑا کون ہوا؟ صرف ہمارے پاس نہیں، ہماری تاریخ میں نہیں، دوسروں کی تاریخ میں، کیا اس سے اونچا انسان نسلِ اول میں کوئی ظاہر ہوا، مامون و ہارون کو کس کی غلامی پر ناز تھا؟ صلاح الدین کس کے نام پر صلیب والوں کی بھیڑ میں لرزہ ڈالتا تھا؟ محمود کس کی جوتیوں کے صدقے میں مشرق کا اولوالعزم فاتح قرار پایا، شاہ جہان کس کے نام کی تسبیح پڑھتا تھا؟ عالمگیر کس کی نگاہِ کرم کے لئے دکن کے سنگستانوں میں سالہا سال تک ٹھوکریں کھاتا پھرتا تھا، یہ کس کی ہمنامی کی برکت تھی کہ اناطولیہ کا ترک قسطنطنیہ کی دیواروں کو پھاند گیا۔ یہ کیا تھا؟

اس نے دعویٰ کیا تھا اور یہی اس کی زندگی کا مقصد تھا کہ محسوس قوتوں کا انکار کرے اور جو قوت غیب میں چھپی ہوئی ہے، نظام کائنات کو اسی کے ساتھ وابستہ کرے۔ اس نے دعویٰ کیا اور نہایت بلند آہنگی سے دعویٰ کیا اور خود اس کی دلیل بن کر دنیا کے سامنے آیا، کیونکہ قیاسی حجتوں کا زمانہ نکل چکا تھا، مشاہدات اور تجربات کا وقت آرہا تھا، پس اس عہد کے جو پیغمبر تھے (ﷺ) ان کا دعویٰ بھی تخمینی مقدمات سے نکالے ہوئے نتائج پر مبنی نہ تھا بلکہ کھلا ہوا تجربہ، صاف اور واضح مشاہدہ پر اس کی بنیاد کھڑی کی گئی، دنیا نے دعویٰ کو سنا اور دلیل کو دیکھا، پھر ان میں کس کے ہوش قائم رہے، کلیسا میں تزلزل پیدا ہوا، لوتھر نے ایک ضربِ شدید سے یورپی تنظیم کی بنیادوں کو ہلا دیا، وہ خود بنایا نہیں، لیکن قصر تثلیث کے ایک اہم حصہ کو اس نے اپنے ہاتھوں برباد کر دیا، کیا کوئی اس کا منکر ہو سکتا ہے کہ تثلیث کی یہ جزئی شکست اسی دعویٰ اور دلیل کا نتیجہ تھی جس کی ابتدا عرب سے ہوئی اور کیا ان ہی میں جو یونٹی (Unity) پر آج خطبہ دے رہے ہیں وہ عالم کے اس سب سے بڑے انسان کے احسان سے سبکدوش ہو سکتے ہیں۔؟

شراب پر احتساب قائم کرنے والو دیکھو! حق سے آنکھیں بند نہ کرو۔ ترکستان میں کبیر کیوں پیدا ہوئے، نانک کس دباؤ سے بے چین ہوئے، رام موہن رائے کس کی گرفت سے مضطرب تھے اور آج ہندوستان کے طول و عرض میں وہ جو جماعت نظر آتی ہے جسے اسلام سے عداوت کا دعویٰ ہے، لیکن اسی کے ساتھ وہ بت شکنی میں بھی مصروف ہے، کیا اس عملی فرمانبردار ذہنی نافرمان فرقہ کو اس دعوے کے اثر سے آزاد کہہ سکتے ہیں؟ دیا نندیوں کو ذرا غور کرنا چاہئے۔

==================> جاری ہے ۔۔۔

*ماخوذ از مستند تاریخ اسلام ویب سائیٹ*

سورۃ الکہف میں چُھپے خزانے

noreply@blogger.com (پیغام قرآن و حدیث ٹرسٹ) — Fri, 14 Apr 2023 09:48:00 +0000

👈سورۃ الکہف میں چُھپے خزانے 👉

تحریر : کامران الہی ظہیر

میں نے دو سال لگائے سورہ کہف کو سمجھنے میں اور بہت ساری تفاسیر کا مطالعہ کیا جن میں اردو اور عربی کی تفاسیر کا مطالعہ کیا اس کے علاوہ ایک فارسی تفسیر بھی تھی، ہم اس سورۃ کو صرف غار والوں کا واقعہ سمجھتے ہیں مگر اصل مدعا جو ہے اس کی طرف کسی کی نظر ہی نہیں گئی۔

تو اس سورۃ کا مقصود، لب لباب یا سینٹرل آئیڈیا کہہ لیں یہ ہے کہ اللہ اس دنیا میں لوگوں کو آٹھ طرح کے حالات سے آزماتے ہیں، عزت، ذلت، صحت، بیماری، نفع، نقصان، خوشی اور غمی۔

ہر بندہ ہر وقت ان میں سے کسی ایک حال میں ہوتا ہے، ان آٹھ کو اگر تقسیم کریں تو دو دو حالات میں تقسیم ہوں گے یا تو اچھے حالات ہوں گے یا برے یعنی یا تو بندہ عزت میں ہوگا یا ذلت میں، یا صحت ہو گی یا بیماری، تو اللہ دو حالات میں آزماتے ہیں یا تو اچھے یا برے کہ یہ بندہ اچھے حالات میں شکر کرتا ہے یا نہیں اور برے حالات میں صبر کرتا ہے یا نہیں۔

تو دو پیپر بنے ایک شکر کا پیپر اور دوسرا صبر کا پیپر، اب اگر بندے نے اچھے حالات میں شکر کیا تو اس نے پیپر کو پاس کیا اور اگر ناشکری کی تو اس پیپر کو فیل کیا اور اگر صبر کے پیپر میں صبر کیا تو پاس ہوا اور بے صبری کی تو فیل ہوگیا، یہ زندگی دار الامتحان ہے جہاں ہم نے دو پیپر دینے ہیں ایک صبر کا دوسر اشکر کا۔

اللہ نے جب حضرت آدم علیہ السلام کو پیدا کیا اور ان کو بھی ان دو پیپرز میں آزمایا پہلا شکر کا تھا جو کہ جنت کی نعمتیں تھیں، دوسرا درخت کا پھل تھا جو کھانے سے منع کیا گیا تھا تو یہ صبر کا پیپر تھا جس میں شیطان نے ان کو کامیاب نہ ہونے دیا، سورہ کہف میں پانچ واقعات ہیں۔

حضرت آدم علیہ اسلام کا واقعہ ہے جو کہ اس سورت کا قلب ہے، آیتیں تھوڑی ہیں اس لیے پڑھنے والوں کی توجہ ہی نہیں جاتی، آدم علیہ السلام کے واقعہ سے پہلے دو واقعات عام الناس کے ہیں جن میں سے ایک اصحاب کہف تھے، یہ عام نوجوان تھے اور انہوں نے صبر کا امتحان دیا اور اس پیپر میں پاس ہو کر مقبول بندوں میں شامل ہو گئے۔

دوسرا واقعہ دو باغوں والے شخص کا تھا، یہ بھی عام شخص تھا جس کو مال و دولت دی گئی تھی، اس کا پیپر شکر کا تھا کہ تم نے نعمتوں پر شکر کرنا ہے تو یہ فیل ہو گیا، اس کے بعد آدم علیہ السلام کا واقعہ اور پھر دو واقعات ہیں خواص کے، ایک موسٰی علیہ السلام کا کہ ان سے بھی صبر کا پیپر لیا گیا اور سکندر ذوالقرنین کا شکر کا پیپر تھا اور انہوں نے غرور و تکبر نہیں کیا اور شکر کا پیپر پاس کیا اسی طرح اللہ اولاد آدم سے بھی صبر اور شکر کے پیپر لیتے ہیں۔

کچھ نکات:

اللہ نے اس سورۃ کی شروعات میں اپنی الوہیت کا ذکر کیا اور ختم اپنی ربوبیت کے تذکرے پر کیا۔

شروع سورۃ میں اپنے رسول صلی اللہ علیہ وسلم کی عبدیت کا تذکرہ کیا اور اختتام ان کی بشریت پر کیا۔

انسان کے لیئے دنیا میں سب سے بڑی بلندی عبدیت ہے اسی لیئے انسان ذکر کرتا ہے تاکہ اللہ کی محبت اس کے دل میں آ جائے، اب صرف محبت کا آ جانا مقصود نہیں ہے، جب محبت آ جائے تو پھر محب ہمیشہ محبوب کو راضی کرنے کی فکر میں رہتا ہے اور رضا کیا ہے؟ اللہ کی تقدیر پر راضی رہنا، اگر اللہ اچھے حالات بھیجے تو شکر کرنا اور برے حالات میں صبر کرنا، جب بندے کو یہ مقامِ رضا حاصل ہو جائے تو پھر اس کو مقام عبدیت حاصل ہو جاتا ہے۔

عبد کا لفظ اللہ نے اپنے حبیب کے لیے استعمال کیا، مفسرین کی نظر میں عبد وہ ہوتا ہے جس کو اپنے آقا کے سوا کچھ نظر نہ آئے، بعض کے نزدیک عبد وہ ہوتا ہے جو اپنے آقا سے کسی بات میں اختلاف نہیں کرتا، ہر حال میں راضی رہتا ہے، شکوہ نہیں کرتا۔

چونکہ اس سورہ کو دجال سے حفاظت کے لیے پڑھنے کا ذکر احادیث میں آتا ہے اس لیے کہ یہ ہمیں اس سے بچاتی ہے۔

پہلے دجال کے معنی کو سمجھیں کہ یہ دجل سے نکلا ہے، دجل فریب کو کہتے ہیں اور ملمع سازی کرنے کو کہتے ہیں جس طرح تانبے پر سونے کا پانی چڑھا دیا جائے تو وہ اوپر سے کچھ ہو گا اور اندر سے کچھ اسی طرح دجال بھی اندر سے کچھ اور ہوگا اور باہر سے کچھ اور، آج کے دور میں اسی طرح دجالی تہذیب ہے کہ اوپر سے تو خوش نما نظر آتی ہے مگر اندر سے کچھ اور ہے۔،آج کے دور میں ایمان اور مادیت کی ایک جنگ چل رہی ہے، اب اس دور میں اگر اپنا ایمان بچانا ہے تو ہمیں بھی کہف میں گھسنا ہونا ہوگا، جی ہاں کہف میں۔

آج کے زمانے میں جو کہف ہیں، اگر انسان ان میں داخل ہو جائے تو وہ دجال کے فتنے سے بچ سکتا ہے، جو قرآن کے ساتھ نتھی ہو جاتا ہے اس کو پڑھنا، سیکھنا، سمجھنا شروع کر دیتا ہے تو وہ بھی اپنا دین بچا لیتا ہے اور قرآن اس کے لئیے کہف بن جاتا ہے۔

احادیث کے مطابق جو بھی مکہ اور مدینہ میں داخل ہو جائے وہ بھی دجال سے محفوظ رہے گا، انسان اپنے ایمان کو بچا لیتا ہے اور دجال سے محفوظ ہو جاتا ہے، اس سورت کا ہر واقعہ ہمیں ایک سبق سکھاتا ہے کہ کس طرح ہم نے خود کو دجال سے بچانا ہے۔

اصحاب کہف کے قصے سے یہ سبق ملا کہ ہم کو اپنے ایمان کی حفاظت کے لیے کسی نہ کسی کہف میں پناہ لینی ہے تاکہ ہم اپنا ایمان بچا لیں اور دجال سے محفوظ رہیں۔

صاحب جنتین کے قصے سے یہ سبق ملا کہ اللہ نے جو مال دیا اس کو اپنی طرف منسوب نہ کرے جیسا کہ اس باغ والے نے کیا اور پکڑ میں آ گیا اور اس نعمت سے محروم کر دیا گیا۔

حضرت آدم علیہ السلام کے واقعے سے یہ سبق ملا کہ یہ دنیا ہمارے لیئے دار اقامت ہے، ہمارا اصلی وطن جنت ہے، دنیا میں رہ کر دنیا کو اپنا اصلی وطن سمجھ لینا اور ساری محنتیں اور ساری امیدیں دنیا پر لگا دینا بے وقوفی کی بات ہے، شیطان بدبخت نے ہمیں جھوٹی قسمیں کھا کھا کر اصلی وطن سے نکالا تھا، اب یہاں بھی یہ ہمارا دشمن ہے اور ہم سے گناہ کرواتا ہے تاکہ دوبارہ جنت میں جانے کے قابل نہ رہیں، اللہ شر سے بچائے اور ہمارے اصلی گھر جنت میں پہنچا دے، آمین۔

موسٰی علیہ السلام کے واقعے سے یہ سبق ملتا ہے کہ ہم دنیا میں جتنا بھی علم حاصل کر لیں دنیا میں کوئی نا کوئی ہم سے بھی بڑھ کر جاننے والا ہوگا، انسان کبھی بھی اشیاء کی حقیقت کا احاطہ نہیں کر سکتا، جب ہم یہ سمجھیں گے کہ ہم سب کچھ جانتے ہیں تو پھر ہم دجال فتنے میں پھنس جائیں گے اس لیے اللہ نے موسی علیہ السلام کا واقعہ بیان کر دیا تاکہ ہم لوگ یہ نہ سمجھیں کہ ہمیں سب پتا ہے بلکہ یہ کہیں کہ اللہ ہی حقیقت حال کو جانتے ہیں، علم اور بھی اس سے کہیں زیادہ ہے جو ہمارے پاس نہیں ہے، اسی لیئے سورہ کہف انسان کو دجال کے فتنے سے محفوظ رکھتی ہے اور اس کی ذہن سازی کرتی ہے اور ایسا ذہن بناتی ہے کہ بندے کا ذہن محفوظ ہو جاتا ہے۔

حضرت ذوالقرنین کے واقعے سے سبق ملا کہ حضرت ذوالقرنین جہاں گئے وہ ان کے کوئی دوست رشتے دار نہیں تھے یا کوئی جاننے والے نہیں تھے کیوں کہ وہ تو ان کی زبان تک نہیں جانتے تھے لیکن پھر بھی انہوں نے ان لوگوں کی مدد کی کیوں کہ وہ اللہ کی رضا کے لیے اللہ کے بندوں کو نفع پہنچاتے تھے، ان سے کوئی پیسہ وغیرہ نہیں مانگتے تھے بلکہ جب انہوں نے کہا کہ ہم آپ کو اس کے لیے پیسے دیں گے تو انہوں نے انکار کر دیا، دوسرا یہ کہ وہ اللہ کی زمین پر اللہ کا قانون نافذ کرتے تھے، جب ان کو اختیار دیا گیا کہ آپ اس قوم کے ساتھ جو سلوک چاہیں کریں مطلب چاہیں تو سزا دیں یا اچھا سلوک کریں تو انہوں نے اس قوم کو اللہ کی طرف بلایا تھا اور اپنے اختیار اور طاقت کو اللہ کے قانون کے نفاذ میں استعمال کیا۔

سورہ کہف میں پہلے پانچ واقعات بیان کر کے بندے کی ذہن سازی کی گئی اور اب آخری آیات میں اس ساری سورت کا نچوڑ بیان کیا جا رہا ہے جو کہ تین باتیں ہیں:

1- جو لوگ دنیا ہی کو بنانے میں لگے رہتے ہیں درحقیقت وہی لوگ خسارہ پانے والے ہیں، ہر وقت دنیا اور اس کی لذت کو پانے کی فکر میں رہنا ہے دجالی فتنہ ہے لہٰذا فقط دنیا ہی کی فکر میں نا رہیں بلکہ آخرت کی بھی سوچیں۔

2- اس کے بعد اللہ نے اپنی صفات کو بیان فرمایا کہ اگر تم اپنے رب کی تعریفوں کو بیان کرو اور سمندر سیاہی بن جائیں اور دوسرا سمندر بھی اس میں ڈال دیا جائے تو تم پھر بھی اپنے رب کی تعریف بیان نہ کر سکو گے۔

3- آخر میں بتایا کہ جو اپنے رب کا دیدار کرنا چاہے جو کہ سب سے بڑی اور سب سے بڑھ کر نعمت ہے، اس کا کیا طریقہ بتایا کہ وہ شخص جو کام کرے صرف اللہ کریم اور نبی کریم ﷺ کی خوشی کے لئے کرے اور جو ایسا کرے گا اللہ اس کو اپنا دیدار عطا کریں گے.....

التماسِ دعا:

اللّٰہُمَ صَلِ٘ عَلٰی مُحَمَّدٍ وَّ عَلٰٓی اٰلِ مُحَّمَدٍ کَمَا صَلَّیْتَ عَلٰٓی اِبْرٰھِیْمَ وَ عَلٰٓی اٰلِ اِبْرٰہِیْمَ اِنَّکَ حٓمِیٌدٌ م٘ٓجِیُد۔

اللّٰہُمَ بَارِکْ عَلٰی مُحَمَّدٍ وَّ عَلٰٓی اٰلِ مُحَّمَدٍ کَمَا بَارَکْتَ عَلٰٓی اِبْرٰھِیْمَ وَ عَلٰٓی اٰلِ اِبْرٰہِیْمَ اِنَّکَ حٓمِیٌدٌ م٘ٓجِیُد۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 23

noreply@blogger.com (پیغام قرآن و حدیث ٹرسٹ) — Fri, 14 Apr 2023 08:30:00 +0000

تدبر سورۃ الرحمن

از استاد نعمان علی خان

پارٹ 23 آیات (39-42)

فَيَوْمَئِذٍ لَّا يُسْاَلُ عَنْ ذَنْبِهٓ ٖ اِنْـسٌ وَّلَا جَآنٌّ

پس اس دن اپنے گناہ کی بات نہ کوئی انسان اور نہ کوئی جن پوچھا جائے گا.

قرآن میں بہت سی جگہوں پر اللہ تعالٰی فرماتے ہیں کہ روزِ قیامت لوگ اپنے اعمال کے لیے جواب دہ ہوں گے. لیکن اس آیت میں کہا گیا کہ کسی سے کوئی سوال نہ کیا جائے گا. کسی سے پوچھنے کی ضرورت ہی نہیں ہو گی کہ کون مجرم ہے کیونکہ یہ ان کے چہرے سے ظاہر ہو گا.

فَبِاَيِّ اٰلَآءِ رَبِّكُـمَا تُكَـذِّبَانِ

پھر( اے گروہ جن و انس ) تم اپنے رب کی کن کن نعمتوں کو جھٹلاؤ گے.

يُعْرَفُ الْمُجْرِمُوْنَ بِسِيْمَاهُـمْ فَيُؤْخَذُ بِالنَّوَاصِىْ وَالْاَقْدَامِ

مجرم اپنے چہرے کے نشان سے پہچانے جائیں گے پس پیشانی کے بالوں اور پاؤں سے پکڑے جائیں گے.

مجرموں کو ان کے سروں اور پاؤں سے پکڑ لیا جائے گا. اس دنیا میں جب جانور کو ذبح کرنا ہو تو اس کا سر اور پاؤں پکڑ لیے جاتے ہیں تو روزِ سزا و جزا مجرموں کے ساتھ جانوروں کا سا سلوک ہو گا.

کچھ علمائے کرام نے اس پر اور غور و فکر کیا ہے. کچھ کا خیال ہے کہ اللہ تعالٰی فرماتے ہیں کہ سر، جسم کا وہ حصہ ہے جہاں آپ برے فیصلے لیتے ہیں جیسا کہ جھوٹ. جب کوئی شخص جھوٹ بولتا ہے تو وہ یہ غلط فیصلہ کرنے کے بعد اپنے پیروں سے چل کر دوسروں کے پاس اپنا جھوٹ بولنے جاتا ہے.

فَبِاَيِّ اٰلَآءِ رَبِّكُـمَا تُكَـذِّبَانِ

پھر( اے گروہ جن و انس ) تم اپنے رب کی کن کن نعمتوں کو جھٹلاؤ گے

جاری ہے ۔۔۔۔

سیرت النبی کریم ﷺ ۔۔۔ کیا نظر تھی جس نے مُردوں کو مسیحا کردیا

noreply@blogger.com (پیغام قرآن و حدیث ٹرسٹ) — Thu, 13 Apr 2023 07:00:00 +0000

سیرت النبی کریم ﷺ

کیا نظر تھی جس نے مُردوں کو مسیحا کردیا

عرب قوم جس کے درمیان رسول اکرم صلی اللہ علیہ وسلم کی ولادت ہوئی، پلے، بڑھے اور جوان ہوئے، کیسی تھی مولانا الطاف حسین حالی نے اپنے مسدّس میں اس کو انتہائی حسین اور دلکش پیرایہ میں اس طرح بیان کیا ہے۔

وہ دنیا میں گھر سب سے پہلا خدا کا

خلیل ایک معمار تھا جس بِنا کا

ازل میں مشیت نے تھا جس کو تاکا

کہ اس گھر سے اُبلے گا چشمہ ہُدیٰ کا

وہ تیرتھ تھا اک بت پرستوں کا گویا

جہاں نام حق کا نہ تھا کوئی جویا

قبیلے قبیلے کا بت اک جدا تھا

کسی کا ہبل تھا کسی کا صفا تھا

یہ عُزّا پہ وہ نائلے پر فدا تھا

اسی طرح گھر گھر نیا اک خدا تھا

نہاں ابر ظلمت میں تھا مہر انور

اندھیرا تھا فاران کی چوٹیوں پر

چلن ان کے جتنے تھے سب وحشیانہ

ہر اک لوٹ اور مار میں تھا یگانہ

فسادوں میں کٹتا تھا ان کا زمانہ

نہ تھا کوئی قانون کا تازیانہ

وہ تھے قتل وغارت میں چالاک ایسے

درندے ہوں جنگل میں بے باک جیسے

نہ ٹلتے تھے ہرگز جو اڑ بیٹھتے تھے

سلجھتے نہ تھے جب جھگڑ بیٹھتے تھے

جو دو شخص آپس میں لڑ بیٹھتے تھے

تو صدہا قبیلے بگڑ بیٹھتے تھے

بلند ایک ہوتا تھا گر واں شرارا

تو اس سے بھڑک اٹھتا تھا ملک سارا

کہیں تھا مویشی چرانے پر جھگڑا

کہیں پہلے گھوڑا بڑھانے پہ جھگڑا

لبِ جُو کہیں آنے جانے پہ جھگڑا

کہیں پانی پینے پلانے پہ جھگڑا

یوں ہی روز ہوتی تھی تکرار ان میں

یوں ہی چلتی رہتی تھی تلوار ان میں

جو ہوتی تھی پیدا کسی گھر میں دختر

تو خوفِ شماتت سے بے رحم مادر

پھرے دیکھتی جب تھے شوہر کے تیور

کہیں زندہ گاڑ آتی تھی اس کو جاکر

وہ گود ایسی نفرت سے کرتی تھی خالی

جنے سانپ جیسے کوئی جننے والی

(مسدس حالی صفحہ ۲۵ تا ۲۷ مطبوعہ کتب خانہ امدادیہ، دیوبند)

اولاد سے محبت کسے نہیں ہوتی مگر آہ ․․․․! بے رحمی اور سنگ دلی کی حد ہوگئی، اگر ماں کی ممتا اور شفقت کی وجہ سے یا کسی اور سبب بچپن میں لڑکیوں کو زندہ زیر زمین دفن نہ کرسکتے تو جب بھی موقع ہاتھ آتا انہیں اس میں کوئی عار محسوس نہ ہوتا، بولتی، ہنستی، مسکراتی اور کھیلتی ہوئی معصوم بچیوں کو کسی بہانے کنویں کے قریب لے جاتے اور انتہائی بے دردی سے انہیں منہ کے بل اس میں دھکیل دیتے، کچھ ہی دیر میں یہ کلیاں مرجھا جاتیں، ایک شخص نے اسلام قبول کرنے کے بعد رسول اکرم صلی اللہ علیہ وسلم کے سامنے نسل کشی اور لڑکیوں کو زندہ مار ڈالنے کا واقعہ بیان کیا توآپ صلی اللہ علیہ وسلم اس کی دردناک آپ بیتی سن کر رو پڑے۔

(سیرة النبی جلد ۶ صفحہ ۲۳۶)

مگر قربان جائیے! رسول اکرم صلی اللہ علیہ وسلم پر جنہوں نے اپنی محنت، جدوجہد، بے چین قلب، حکمت بالغہ، شیریں زبانی اور اخلاق کریمانہ کے ذریعہ توحید کا پرچم مکہ کی سنگلاخ زمین میں لہرایا اور دیکھتے ہی دیکھتے ۲۳/سال کے مختصر عرصہ میں عالم عرب کے بیشتر ممالک میں اسلام کے ترانے گائے جانے لگے، نفرتیں محبت میں تبدیل ہوگئیں، بت گر بت شکن ہوگئے، شراب گلیوں میں بہنے لگی، جھوٹ، غیبت، حسد اور جلن کا چلن ختم ہوگیا، زنا کاری کے تصور سے دل کانپنے لگا، عورت اب پھول کی طرح ہرگھر کی چہیتی بن گئی، اُجڈ قوم مہذب بن گئی، خوف خدا اور آخرت کے ڈرنے انہیں لاغر بنادیا، جہنم کے ڈراؤنے منظر اور عذاب قبر کے تصور سے رونگٹے کھڑے ہوجاتے اور اتنا روتے تھے کہ ہچکیاں بندھ جاتیں، جنت کی تڑپ اور طلب میں سارا مال خرچ کردینا ان کے لئے ایک معمولی بات تھی، حاصل یہ کہ سینکڑوں معبودوں کے بجائے اب تمام بندوں کا ایک خدا سے تعلق استوار ہوچکا تھا، یہ شہنشاہ مدینہ رسول اکرم صلی اللہ علیہ وسلم کی عالی صحبت، فیضان نظر اور اعجاز ہی تو تھا کہ شرک و بت پرستی کے عادی انسان خدا کا شیدائی بن گیا، مولانا الطاف حسین حالی نے اس سحر انگیزی کو بیان کرتے ہوئے کہا۔

وہ بجلی کا کڑکا تھا یا صوت ہادی

عرب کی زمین جس نے ساری ہلادی

نئی اک لگن دل میں سب کے لگادی

اک آواز میں سوتی بستی جگادی

پڑا ہرطرف غل یہ پیغام حق سے

کہ گونج اٹھے دشت وجبل نام حق سے

سبق پھر شریعت کا ان کو پڑھایا

حقیقت کا گُر ان کو ایک ایک بتایا

زمانے کے بگڑے ہوؤں کو بنایا

بہت دن کے سوتے ہوؤں کو جگایا

کھلے تھے نہ جو راز اب تک جہاں پر

وہ دکھلا دئیے ایک پردہ اٹھا کر

(مسدس حالی صفحہ ۳۱)

وہ لوگ جو کسی حیثیت کے مالک نہ تھے، گمراہ اور بد چلن تھے، رسول رحمت صلی اللہ علیہ وسلم کی نظر کرم نے ان کو نہ صرف ہدایت کا راستہ دیا، بلکہ ساری کائنات کے لئے شمع ہدایت کا تمغہ عطا کیا، رسول اکرم صلی اللہ علیہ وسلم نے ارشاد فرمایا:

''أصحابی کالنجوم فبأیہم اقتدیتم اھتدیتم'' (مشکوٰة صفحہ: ۵۵۴)

یعنی میرے صحابہ ستاروں کی مانند ہیں ان میں سے تم جس کی بھی پیروی کروگے ہدایت پاؤگے۔

صحابۂ کرام کا امتحان خدا نے لیا، ان کے ایمان، تقویٰ، عدالت و صداقت کو جانچا اور پرکھا، وہ اتنے کھرے نکلے کہ قرآن نے ہمیشہ کے لئے ان سے اللہ کی رضامندی کا اعلان کردیا، انہیں معیار حق بنایا بلکہ انبیاء کرام کے بعد سب سے افضل اور بہترانسان قرار دیا، ارشاد باری ہے:

اُولٰئِکَ الَّذِیْنَ امْتَحَنَ اللّٰہُ قلُوبَہُمْ للتقوٰی لہم مغفرة واَجْرٌ عَظِیمٌ (سورہ حجرات آیت ۳)

”یہی وہ لوگ ہیں جن کے قلوب کو اللہ نے تقویٰ کے لئے خالص کردیا ہے، ان لوگوں کے لئے مغفرت اور اجر عظیم ہے۔“

اللہ کے نبی صلی اللہ علیہ وسلم نے لوگوں کو تنبیہ کی کہ کوئی میرے بعد میرے صحابہ کو طعن و تشنیع کا نشانہ نہ بنائے، ان سے محبت کرو اس لئے کہ ان سے محبت مجھ سے محبت کرنا ہے اور ان سے بغض، حسد اور دشمنی گویا میری ذات سے دشمنی ہے۔ (ترمذی)

یہ کیسی نظر تھی کہ جو مشرک تھے موحد ہوگئے، سخت تھے نرم ہوگئے، ذلیل تھے دنیا کے امام بن گئے، حضرت ابوبکر صدیق کو صدیقیت کا مقام نہ ملتا اگر رسول اکرم صلی اللہ علیہ وسلم کی معیت نصیب نہ ہوتی، حضرت عمر فاروق کو فاروق، حضرت عثمان غنی کو غنی اور ذونورین (دو روشنی والے) اور حضرت علی کو شیر خدا کا خطاب اور اعزاز رسول رحمت صلی اللہ علیہ وسلم کی صحبت اور محبت کا اثر ہے، حضرت بلال حبشی اور حضرت سلمان فارسی عرب کے باہر سے تشریف لائے، کوئی تعارف اور شناسائی نہیں، پہلے غلام تھے لیکن اللہ اوراس کے رسول کی محبت نے انہیں وہ مقام عطا کیا کہ تمام مسلمان کے وہ چہیتے اور سردار بن گئے، بقول شاعر

خود نہ تھے جو راہ پہ اوروں کے ہادی بن گئے

کیا نظر تھی جس نے مردوں کو مسیحا کردیا۔

==================> جاری ہے ۔۔۔

*ماخوذ از مستند تاریخ اسلام ویب سائیٹ*

تدبر سورہ الرحمٰن ۔۔۔ از استاد نعمان علی خان ۔۔۔ حصہ 22

noreply@blogger.com (پیغام قرآن و حدیث ٹرسٹ) — Wed, 12 Apr 2023 09:03:00 +0000

تدبر سورۃ الرحمن

از استاد نعمان علی خان

پارٹ 22 آیات (35-38)

يُـرْسَلُ عَلَيْكُمَا شُوَاظٌ مِّنْ نَّارٍ وَّنُحَاسٌ فَلَا تَنْتَصِرَان.

تم پر آگ کے شعلے اور دھواں چھوڑا جائے گا پھر تم بچ نہ سکو گے.

جب جنات آسمان کے راستے سے بھاگنے کی کوشش کریں گے تو ان پر آگ کے شعلے پھینکے جائیں گے. یہ آگ کی برسات اوپر آسمان سے ہو گی. اور وہ اپنی کوئی مدد نہ کر پائیں گے. نہ ہی بچاؤ کی کوئی اور صورت ہو گی.

فَبِاَيِّ اٰلَآءِ رَبِّكُـمَا تُكَـذِّبَانِ

پھر( اے گروہ جن و انس ) تم اپنے رب کی کن کن نعمتوں کو جھٹلاؤ گے

فَاِذَا انْشَقَّتِ السَّمَآءُ فَكَانَتْ وَرْدَةً كَالدِّهَانِ

پھر جب آسمان پھٹ جائے گا اور پھٹ کر گلابی تیل کی طرح سرخ ہو جائے گا.

َالدِّهَانِ دو چیزوں کو کہا جاتا ہے.

١. جب کسی جانور کی کھال اتاری جائے تو اسے َالدِّهَانِ کہتے ہیں.

٢. جب آپ ہانڈی پکاتے ہوئے کچھ بھونتے ہیں اور تیل کے سرخ قسم کے چھینٹے اڑیں تو انہیں َالدِّهَانِ کہتے ہیں.

تو آسمان گلابی تیل کی طرح سرخ رنگ کی مانند ہو جائے گا. اور آسمان پھٹ جا گا اور اس کی کھال اتر جائے گی.

فَبِاَيِّ اٰلَآءِ رَبِّكُـمَا تُكَـذِّبَانِ

پھر( اے گرہ جن و انس ) تم اپنے رب کی کن کن نعمتوں کو جھٹلاؤ گے

جاری ہے ۔۔۔۔۔۔

سیرت النبی کریم ﷺ ۔۔۔ رسول اللہ ﷺ کی انقلابی حکمتِ عملی

noreply@blogger.com (پیغام قرآن و حدیث ٹرسٹ) — Tue, 11 Apr 2023 09:00:00 +0000

سیرت النبی کریم ﷺ

رسول اللہ ﷺ کی انقلابی حکمتِ عملی

فلسفے کا دائرہ ہمیشہ فکر کا دائرہ ہے، فلسفی کو عملی زندگی اور تاریخ کے مدّو جزر سے براہِ راست واسطہ نہیں ہوتا، وہ واقعات و احوال سے نتائج تو نکالتا ہے، لیکن واقعات و احوال کا رُخ بدلنے کے لیے کسی عملی جدوجہد میں حصہ نہیں لیتا، مذہب (مروجہ محدود معنوں میں) ذرا سا آگے بڑھتا ہے، وہ کچھ اعتقادات دینے کے ساتھ ساتھ فرد کو تمدّن سے الگ کر کے اسے ایک اخلاقی تعلیم بھی دیتا ہے، لیکن مذہب کا راستہ نظامِ اجتماعی سے باہر باہر ہوکے گزرتا ہے اور وہ نہ سیاسی ہیئت سے کوئی تعرض کرتا ہے، نہ معاشرے کے ادارات میں کوئی جامع تبدیلی چاہتا ہے، اور نہ وقت کی قیادت کو چیلنج کرتا ہے۔

مذہب کی دعوت ہمیشہ وعظ کے اسلوب پر ہوتی ہے، واعظ نے نرم و شیریں انداز سے کچھ نصیحتیں کیں اور اپنا رستہ لیا۔ اسے نہ اس کی فکر کہ اس کے مخاطب حالات کے کس قفس میں گرفتار ہیں، نہ اس کی پرواہ کہ کون سے طبقے اور عناصر کن اقدامات اور سرگرمیوں سے لوگوں کے ذہن و کردار کو کس رُخ پر لے جارہے ہیں، نہ اس طرف توجہ کہ روزمرہ حالات و واقعات کی رُو کیا اثرات چھوڑ رہی ہے، نہ یہی کاوش کہ میرے وعظ کے حق میں اور اس سے خلاف کیا کیا افکار ونظریات کس کس جانب سے کتنا اثر ڈال رہے ہیں، نہ یہ پیشِ نظر کہ میرے مذہبی سانچے میں ڈھلنے والے متقی ترین افراد کیسے نظامِ تمدن کے پُرزے بنے ہوئے ہیں، کوئی اجتماعی نصب العین نہیں ہوتا، تبدیلی کا کوئی منصوبہ نہیں ہوتا، کسی سیاسی اور قائدانہ بصیرت کی ضرورت نہیں ہوتی، زندگی کے ایک چھوٹے سے خانے میں جزوی نیکی پیدا کرنے کے لیے جو کچھ بن آیا کردیا اور بقیہ وسیع دائرے میں بدی اپنا جھنڈا اطمینان سے لہراتی رہے، کسی اللہ والے کو اس سے کیا مطلب!

حضور صلی اللہ علیہ وسلم نہ تو ایک فلسفی تھے کہ محض چند اُونچے اور گہرے خیالات دے دیتے، اور واقعاتی احوال سے تعرض نہ کرتے، اور نہ ایک واعظ تھے جو اجتماعی فساد سے آنکھیں بند کر کے محض فرد کو مخاطب بناتے اور ٹھنڈے اور میٹھے وعظ سنایا کرتے اور نتائج پر سرے سے سوچا ہی نہ کرتے، انسانیت کے اس محسن نے پورے تمدنی شعور کے ساتھ حیاتِ انسانی کی کامل تبدیلی پیشِ نظر رکھی، ان قوتوں اور عناصر کو پہچانا جو نظامِ حیات پر حاوی تھیں، اس قیادت کو زیر نظر رکھا جو جاہلی تمدن کی گاڑی چلا رہی تھی، اسے دلائل کے ساتھ دعوت بھی دی، اس پر تنقید بھی کی اور اسے چیلنج بھی کیا، تاریخ کے دھارے پر نگاہ رکھی، حالات و واقعات کی ایک ایک لہر پر توجہ دی، ہر واقعے کو قائدانہ بصیرت اور سیاسی شعور کے ساتھ دیکھا کہ وہ کس پہلو سے اصلاح کی مہم کے لیے مفید ہے اور کس پہلو سے خلاف جاتا ہے، معاشرے کے جملہ عناصر پر توجہ رکھی کہ دعوت کے لیے کس موقع پر کس سے کیا اُمیدیں کی جاسکتی ہیں، اپنی قوت اور رفتار کو حریفوں کی قوت و رفتار کے مقابل میں ملحوظ رکھا، ہراقدام کے لیے صحیح ترین وقت کا انتظار صبر سے کیا اور جب موزوں گھڑی آگئی تو جرأت سے قدم اُٹھا دیا، رائے عامہ کے ہر مدّوجزر کا کامل فہم حاصل کیا اور مخالفین کے ہر پروپیگنڈے کا مقابلہ کرکے ان کے اثرات کو توڑا، شعر اور خطابت کے مخالفانہ محاذ قائم ہوئے تو ان کے جواب میں اپنے شعراء اور خطیبوں کو کھڑا کیا، اپنے اصولوں کی کڑی پابندی کی، مگر آنکھیں بند کرکے نہیں، بلکہ احوال و ظروف کو دیکھا، وقت کی مصلحتوں کو سمجھا اور حکیمانہ نقطۂ نگاہ اختیار کیا، جہاں قدم آگے بڑھانے کا موقع ملا آگے بڑھایا، آگے بڑھنا جب موزوں نہ دیکھا تو قدم روک لیا، دو بلائیں سامنے آگئیں تو ایک سے بچ کر دوسری کا مقابلہ کیا، جنگی کارروائی کی ضرورت پڑی تو دریغ نہیں کیا، مصالحت کی راہ ملی تو دستِ صلح بڑھا دیا اور پھر کمال یہ کہ اس ساری جدوجہد میں خدا پرستی کی روح اور اخلاقی اقدار کا نہ صرف تحفظ کیا، بلکہ ان کو مسلسل نشوونما دی، اس پورے نقشۂ کار اور اس پورے طریق کار کو اگر قرآن اور سیرتِ پاک کے اوراق سے اخذ کر کے سامنے رکھیے تو وہ فرق بیّن طور پر معلوم ہوجائے گا جو مذہب اور دین میں، وعظ اور انقلابی دعوت میں، انفرادی تزکیے اور تمدنی تحریک میں ہوتا ہے۔

حضور ﷺ نے چونکہ ایک مکمل دین کو برپا کرنے کے لیے تحریک برپا کی تھی، اس لیے آپؐ نے ایک ایک کرکے سلیم الفطرت افراد کو تلاش کیا، پھر جس کے سینے میں بھی کلمۂ حق کی شمع روشن ہوگئی اسے ایک تنظیم میں پرو دیا، اس کی تربیت کی، اسے اپنے ساتھ کش مکش کی بھٹی میں ڈالا اور پھر جس مرحلے میں جتنی منظم قوت حاصل تھی، اُسے اپنی قیادت کے تحت جاہلی نظام کے خلاف معرکہ آرا کیا، فکری میدان میں بھی، سیاسی میدان میں بھی اور بالآخر جنگ کے میدان میں بھی۔

جو لوگ حضور ﷺ کے گرد جمع ہوئے، ان کو آپؐ نے صوفی اور درویش نہیں بنایا، راہبوں اور جوگیوں کے نقشے پر نہیں ڈھالا، بدی سے بھاگنے اور غالب قوتوں سے خوف کھانے اور دولت و اقتدار سے مرعوب ہونے والی ذہنیت انہیں نہیں دی۔

وہ لوگ بھولے بھالے اور معذورانہ شان کے زہّاد نہیں تھے، وہ جری اور بے باک، باشعور اور بصیرت مند، خود دار اور غیور، ذہین اور زیرک، فعّال اور متحرک، پیش رُو اور تیزگام تھے، وہ پادریوں اور سادھوؤں کے سے انداز نہیں رکھتے تھے، بلکہ کارفرما بننے کی صلاحیتوں سے آراستہ تھے۔

بہترین فطرت کے لوگ بہترین تربیت پا کر، بہترین تنظیمی رشتے سے بندھ کر اور بہترین قیادت کے ہاتھوں میں جاکر ایک ناقابلِ شکست قوت بن گئے، یہی وجہ ہے کہ ان لوگوں نے ایک چھوٹی سی اقلیت میں ہونے کے باوجود سارے عرب کی عظیم ترین اکثریت کو اپنے سایے میں لے لیا، جب مکّہ میں اسلامی جماعت کی تعداد ۴۰ تھی تو مکّہ اور اردگرد کی آبادیوں میں اس تعداد نے ایک ہمہ وقتی مدّوجزر پیدا کردیا اور پھر برسوں تک گھرگھر اور کوچہ کوچہ اگر کوئی موضوعِ گفتگو تھا تو وہ حضور ﷺ کی اسلامی دعوت تھی، مدینہ میں جاکر ابھی تحریکِ اسلامی کے علَم برداروں کی تعداد چند سو سے زیادہ نہ تھی کہ غیرمسلم اکثریت کے علی الرغم اسلامی ریاست کی ِنیو ڈال دی گئی۔

==================> جاری ہے ۔۔۔

*ماخوذ از مستند تاریخ اسلام ویب سائیٹ*

تدبر سورہ الرحمٰن ۔۔۔ از استاد نعمان علی خان ۔۔۔ حصہ 21

noreply@blogger.com (پیغام قرآن و حدیث ٹرسٹ) — Mon, 10 Apr 2023 08:02:00 +0000

تدبر سورۃ الرحمن

از استاد نعمان علی خآن

پارٹ 21 آیات(34-33)

يَا مَعْشَرَ الْجِنِّ وَالْاِنْسِ اِنِ اسْتَطَعْتُـمْ اَنْ تَنْفُذُوْا مِنْ اَقْطَارِ السَّمَاوَاتِ وَالْاَرْضِ فَانْفُذُوْا ۚ لَا تَنْفُذُوْنَ اِلَّا بِسُلْطَانٍ

اے جنوں اور انسانوں کے گروہ! اگر تم آسمانوں اور زمین کی حدود سے باہر نکل سکتے ہو تو نکل جاؤ، تم بغیر زور کے نہ نکل سکو گے (اور وہ ہے نہیں)

لوگ نہایت کوشش کر رہے ہیں کہ وہ کسی طرح جزا و سزا کے دن سے بچ نکلیں. انسان زمین کے اندر چھپنے کی کوشش میں ہیں اور جنات آسمان کی سرحدوں سے نکل کر کہیں دور بھاگ جانا چاہتے ہیں.

اللہ تعالٰی نے آسمانوں کا ذکر کیا. اور اللہ تعالٰی نے فرمایا کہ سب سے نچلے آسمان کو ستاروں سے سجایا گیا ہے. کائنات میں ہم جہاں تک نظر دوڑاتے ہیں ہمیں ستارے ہی نظر آتے ہیں یعنی ہم ابھی تک پہلے آسمان سے آگے جا ہی نہیں سکے. یہ گفتگو روزِ جزا و سزا کے متعلق ہے.

فَبِاَيِّ اٰلَآءِ رَبِّكُـمَا تُكَـذِّبَانِ

پھر تم اپنے رب کی کن کن نعمتوں کو جھٹلاؤ گے

جاری ہے ۔۔۔۔۔

سیرت النبی کریم ﷺ ۔۔۔۔ احکامِ الہی اور حقوقِ انسانی کا جامع منشور- خطبہ حجۃ الوداع

noreply@blogger.com (پیغام قرآن و حدیث ٹرسٹ) — Sun, 09 Apr 2023 10:00:00 +0000

سیرت النبی کریم ﷺ

احکامِ الہی اور حقوقِ انسانی کا جامع منشور- خطبہ حجۃ الوداع

یہ عجیب بات ہے کہ جس کام کا آغاز آپ ﷺ نے مکہ کے کوہ صفا سے کیا تھا اور شدید مجبوری کی بنا پر اللہ کے حکم سے نقل مکانی کی تھی، اس کی تکمیل بھی وہیں آ کر ہوئی اور ٹھیک اسی مقام پر ہوئی، جسے میدان عرفات کہا جاتا ہے۔ یہیں آپ صلى الله عليه وسلم نے اپنا تاریخ ساز خطبہ دیا، جسے ”حجة الوداع “ کہا جاتا ہے۔

خطبہ حجة الوداع کا تذکرہ ہوتے ہی عام طور سے ذہن میں اس کا وہ حصہ گردش کرنے لگتا ہے، جس میں چند بنیادی باتوں کے ساتھ انسانیت کا احترام اور اس کے حقوق کی حفاظت کا ذکر ملتا ہے، یہی حصہ بیشتر کتب متون اور سِیَر میں بھی ملتا ہے، حالانکہ یہ خطبہ اس سے بھی زیادہ طویل ہے، جس میں اساسیات اسلام، اجتماعات، دینیات، عبادات اور معاملات کی تعلیم مختصر اور جامع انداز میں دی گئی ہے، اس موقع پر آپ صلى الله عليه وسلم نے تین خطبے ارشاد فرمائے تھے۔ پہلا ۹/ذی الحجہ کو عرفات کے میدان میں، دوسرا ۱۰/ ذی الحجہ کو منیٰ میں اور تیسرا بھی ۱۱/یا۱۲/ ذی الحجہ کو منیٰ میں دیا، لیکن ان تینوں میں عرفات کا خطبہ زیادہ اہم ہے، اس خطبہ نے انسانی دنیا پر جو اثرات ڈالے ہیں اور اس سے قوموں وملکوں کی حالت زار میں جو تبدیلی واقع ہوئی ہے، اس کا ذکر کرتے ہوئے اسی سیرت نگار نے یہ بھی تحریر کیا ہے:

”خطبہ حجة الوداع نہایت ہی خوبی سے اس حقیقت کو اجاگر کردیتا ہے کہ اب تک کے دو تین ہزار سالہ دور تاریخ میں حضور پیغمبر آخرالزماں صلى الله عليه وسلم وہ پہلی مبارک شخصیت ہیں جو ساری انسانیت کے لیے وسیع اور جامع پیغام لے کر آئے اور اس پیغام کو ایک تحریک کی شکل میں جاری کیا، اس پر مبنی ریاست قائم کی اور اسے دنیا کی تمام اقوام تک پہنچانے کے لیے شُہداء علی الناس کی ایک جماعت قائم کردی۔“

(سید انسانیت صلی اللہ علیہ وسلم، نعیم صدیقی،ص: ۲۰۸، مرکزی مکتبہ اسلامی پبلشرز، دہلی،۱۹۹۷/)

خطبہ حجة الوداع:

حصہ الف (دیباچہ)

سب تعریف اللہ کے لیے، ہم اس کی حمد وثنا کرتے ہیں اور اسی سے مغفرت طلب کرتے ہیں، اسی کی طرف رجوع کرتے ہیں اور اسی کے دامن عفو میں اپنے نفس کی شرارتوں اور برے اعمال سے پناہ چاہتے ہیں، جس کو اللہ ہدایت عطا کرے اس کو کوئی گمراہ نہیں کرسکتا اور جس کو وہ گمراہ کردے اسے کوئی ہدایت نہیں دے سکتا اور میں گواہی دیتا ہوں کہ اس کے سوا کوئی معبود نہیں، وہ اکیلا ہے، اس کا کوئی سہیم وشریک نہیں اور گواہی دیتا ہوں کہ محمد ( صلى الله عليه وسلم) اس کے بندے اور رسول ہیں۔امابعد:

الف: لوگو!

میری بات اچھی طرح سن لو، سمجھ لو، کیا خبر، شاید اس سال کے بعد اس جگہ میری تمہاری ملاقات کبھی نہ ہوسکے۔

ب: بندگان خدا!

آج کے بعد واللہ! مجھے نہیں معلوم شاید میں تم سے اس مقام پر کبھی نہ مل سکوں گا۔

ج: لوگو!

خاموش ہوجاؤ، تم لوگ اس سال کے بعد شاید مجھے نہ دیکھ سکو۔

د: لوگو!

سنو! میں تمہیں وضاحت کے ساتھ(سب کچھ)بتادینا چاہتا ہوں، کیوں کہ شاید اس سال کے بعد پھر کبھی تم سے نہ مل سکوں۔

ہ: لوگو!

حج کے مسئلے مسائل مجھ سے سیکھ لو، میں نہیں جانتا، شاید اس کے بعد مجھے دوسرے حج کی نوبت نہ آئے۔

و: اللہ اسے تروتازہ اور شاداب رکھے جس نے میری باتیں سنیں اور انہیں دوسروں تک پہنچایا، بعض اوقات سننے والا سمجھ دار نہیں ہوتا اور کبھی کبھی جس کو پہنچایا جائے، وہ اس سے زیادہ سمجھ دار نکلتا ہے۔

ز: لوگو!

تم لوگ شاید مجھ سے آئندہ اس حال میں نہ مل سکو جس حال میں اب مل رہے ہو۔

حصہ ب (اساسیات)

دفعہ:۱ لوگو!

۱۔ تمہارا رب ایک ہے اور تمہارا باپ ایک ہے، تم سب آدم علیہ السلام کی اولاد ہو اور آدم علیہ السلام مٹی سے بنے تھے۔

۲۔ تم میں سے اللہ کے نزدیک معزز وہ ہے جو زیادہ تقویٰ شعار ہے، بے شک اللہ علیم وخبیر ہے۔

۳۔ دیکھو! کسی عربی کو کسی عجمی پر اور کسی عجمی کو کسی عربی پر اور کسی کالے کو کسی سرخ پر اور کسی سرخ کو کسی کالے، سیاہ پر کوئی فضیلت وامتیاز نہیں، مگر ہاں تقویٰ کے سبب۔

دفعہ:۲ بندگان خدا!

میں تمہیں تقویٰ شعاری (اللہ سے ڈرنے) کی وصیت کرتا ہوں اور تمہیں اس کی اطاعت کا حکم دیتا ہوں (کیوں کہ تم اللہ کے سوا کسی اور کے بندے نہیں) اور اپنے خطبے کا آغاز نیک بات سے کرتا ہوں۔

دفعہ:۳ جان لو!

جاہلیت کی ہر چیز میرے قدموں تلے روندی گئی ہے، اب تمام آثار جاہلیت کالعدم اور ساقط ہوگئے ہیں۔

۱۔ خبردار! اہل جاہلیت کی ہر چیز میرے (ان دونوں) قدموں کے نیچے ہے۔

۲۔ سن لو! جاہلیت کا ہر خون (انتقام) مال (مغضوبہ) اور آثار جاہلیت (خاندانی، موروثی مفاخر) میرے قدموں تلے تاقیامت کالعدم ٹھہرائے جاتے ہیں۔

۳۔ اور جاہلیت کے تمام باعث فخر وغرور عہدے (مآثر ومفاخر) ختم کیے جاتے ہیں، صرف سدانہ (کعبہ کی نگرانی ونگہبانی) اور سقایہ (حاجیوں کو پانی پلانے) کے عہدے باقی رہیں گے، قتل عمد کا قصاص (بدلہ) لیا جائے گا، قتل عمد کے مشابہ وہ (قتل) ہے جو لاٹھی یا پتھر سے وقوع میں آئے اور اس کی (دیت) سو اونٹ مقرر ہے، اس سے زیادہ جو طلب کرے گا وہ اہل جاہلیت میں شمار ہوگا۔

۴۔ اور ہر قسم کا سود آج ممنوع قرار پاتا ہے، البتہ تمہیں اپنی اصل رقم لینے کا حق ہے، جس میں نہ اوروں کا نقصان ہے اور نہ تمہارا نقصان، اللہ نے یہ بات طے کردی ہے کہ سود کی گنجائش نہیں ہے۔

۵۔ اور زمانہ جاہلیت کے تمام سود (سودی کاروبار) اب باطل ہیں۔ (اور جہاں تک کہ عباس بن عبد المطلب کے سود کا تعلق ہے تو وہ تمام کا تمام ساقط ہے۔)

۶۔ اور زمانہ جاہلیت کے تمام خون (کے بدلے، انتقام) اب کالعدم ہیں اور اپنے خاندان میں سے پہلا انتقام جسے میں معاف کرتا ہوں ربیعہ بن الحارث بن عبدالمطلب کے بچے کا ہے، جس کی رضاعت بنی لیث میں ہورہی تھی کہ بنو ہذیل نے اسے قتل کردیا تھا، پس میں پہل کرتے ہوئے انتقام ہائے جاہلیت میں سے خون کا بدلہ معاف کررہا ہوں۔

۷۔ لوگو!

الف: بے شک نسئی (مہینوں کو اپنی جگہ سے ہٹا دینا) ازدیاد کفر کا ہی باعث ہے، اس سے کافر گمراہی میں پڑجاتے ہیں کہ ایک سال تو (اپنی نفسانی غرض سے) اسے حلال ٹھہراتے ہیں، پھر دوسرے سال (جب کوئی ذاتی غرض نہ ہو) اس کو حرام کردیتے ہیں، تاکہ اللہ نے جو گنتی (حرام مہینوں کی) مقرر کر رکھی ہے اسے پورا کرلیں، اس طرح وہ اللہ کے حرام کیے ہوئے مہینے کو حلال اور اس کے حلال کیے ہوئے کو حرام کرلیتے ہیں۔

ب: دیکھو!

اور اب زمانہ گھوم پھر کر اسی جگہ آگیا ہے، جہاں سے کائنات کی پیدائش کا دن شروع ہوا تھا، مہینوں کی گنتی(تعداد) اللہ کے نزدیک سال میں بارہ ہے۔ ان میں سے چار محترم، حرام ہیں کہ تین (ذی قعدہ، ذی الحجہ اور محرم) تو متواتر ہیں اور ایک الگ آتا ہے، یعنی رجب جو شَہر مضر کہلاتا ہے اور جو جمادی الثانی اور شعبان کے بیچ ہے اور مہینہ انتیس دن کا بھی ہوتا ہے، تیس کا بھی۔

کہو! میں نے اپنی بات تم تک پہنچادی ہے نا؟ تو مجمع نے کہا: بے شک۔ آپ صلى الله عليه وسلم نے فرمایا: اے اللہ گواہ رہنا!

ج: سن لو!

حج قیامت تک اب ذی الحجہ کے مہینے کے ساتھ مخصوص رہے گا۔

دفعہ:۴ لوگو!

تمہیں معلوم ہے کہ تم پر کون سا مہینہ سایہ فگن ہے؟ تم کس دن میں یہاں جمع ہو؟ کس شہر میں موجود ہو؟ سب نے کہا: محتر م شہر اور محترم مہینے میں! تب آپ صلى الله عليه وسلم نے فرمایا:

بے شک تمہارا خون ایک دوسرے پر حرام ہے۔

دفعہ:۵ اور تمہارا مال وملکیت

دفعہ:۶ تمہاری عزت وآبرو

دفعہ:۷ تمہاری کھال (جلد، جسم، بدن) بھی ایک دوسرے کے لیے معزز و محترم ہے۔ (جس طرح حرمت تمہارے اس دن کو تمہارے اس مہینے کو، تمہارے اس شہر کو (حاصل ہے) یہاں تک کہ تم اللہ سے جاملو۔)

دفعہ:۸ میری بات سنو! زندگی پا جاؤٴگے، مگر اس شرط کے ساتھ کہ

۱۔ خبردار! ایک دوسرے پر ظلم نہ کرنا۔

۲۔ دیکھو! ظلم وزیادتی نہ کرنا۔

۳۔ خوب سمجھ لو! ایک دوسرے پر باہم ظلم وستم نہ کرنا۔

حصہ ج (اجتماعات):

دفعہ:۹ اللہ کے بندو! میری بات سنو اور سمجھو!

بلاشبہ ہر مسلمان دوسرے مسلمان کا بھائی ہے اور تمام مسلمان بھائی بھائی ہیں۔

دفعہ :۱۰ خبردار! ہر مسلمان دوسرے مسلمان پر حرام ومحترم ہے۔

دفعہ :۱۱ اور ہر مومن دوسرے مومن پر حرام ومحترم ہے، جس طرح آج کے دن کی حرمت ہے:

۱۔ اس کا گوشت اس پر حرام ہے۔

۲۔ کہ اسے کھائے، اس کی عدم موجودگی میں غیبت کرے۔

۳۔ اور اس کی عزت وآبرو اس پر حرام ہے کہ (اس کی چادر عزت) پھاڑ دے۔

۴۔ اس کا چہرہ اس پر حرام ہے کہ اس پر تمانچے لگائے جائیں۔

۵۔ اور تکلیف دہی بھی حرام کہ اسے تکلیف پہنچائی جائے۔

۶۔ اور یہ بھی حرام کہ تکلیف رسانی کے لیے اسے دھمکایا جائے۔

۷۔ اور کسی مسلمان کے لیے یہ بھی جائز نہیں سوائے اس کے کہ جو وہ اپنی خوشی سے دے۔

۸۔ مال مسلم بھی حلال وجائز نہیں سوائے اس کے کہ وہ اپنی خوشی سے دے۔

(اور میں تمہیں بتاؤں کہ مسلمان درحقیقت ہے کون؟)

دفعہ:۱۲ مسلمان وہی ہے جو اپنی زبان اور ہاتھ سے دوسرے لوگوں کو محفوظ رکھے۔

دفعہ:۱۳ اور مومن درحقیقت وہ ہے جس سے دوسرے لوگوں کا جان ومال امن وعافیت میں رہے۔

دفعہ:۱۴ اور مہاجر درحقیقت وہ ہے جو اپنے گناہوں اور خطاؤں سے کنارہ کشی کرلے۔

دفعہ:۱۵ اور مجاہد تو دراصل وہ ہے جو اطاعت الٰہی کی خاطر اپنے نفس کا مقابلہ کرے۔

دفعہ:۱۶ خبردار! اگر کسی کے پاس امانت رکھوائی جائے تو وہ اس بات کا پابند ہے کہ امانت رکھوانے والے کو امانت واپس لوٹادے۔

دفعہ:۱۷ قرض واپس ادائیگی کا متقاضی ہے۔

دفعہ:۱۸ ادھار لی ہوئی چیز کو واپس کیا جانا چاہیے۔

دفعہ:۱۹ عطیہ لوٹا یا جائے۔

دفعہ:۲۰ ضامن ضمانت (تاوان) کا ذمہ دار ہوگا۔

دفعہ:۲۱ دیکھو! اب ایک مجرم اپنے جرم کا خود ہی ذمہ دار ہوگا۔

دفعہ:۲۲ جان لو! اب نہ باپ کے جرم کے بدلے بیٹا پکڑا جائیگا اور نہ بیٹے کا بدلہ باپ سے لیا جائیگا۔

دفعہ:۲۳ عورتوں کے بارے میں اللہ سے ڈرو، کیوں کہ تم نے انہیں اللہ کی امانت کے طور پر حاصل کیا ہے اور اللہ کے کلمات (احکام) کے تحت ان کے ستر تمہارے لیے حلال ہوئے۔

دفعہ:۲۴ خبردار! تمہارے لیے عورتوں سے نیک سلوکی کی وصیت ہے، کیوں کہ وہ تمہاری پابند ہیں اور اس کے سوا تم کسی معاملے میں حق ملکیت نہیں رکھتے۔

دفعہ: ۲۵ لوگو! جس طرح عورتوں کے کچھ حقوق تمہارے ذمہ ہیں، اسی طرح ان پر بھی تمہارے کچھ حقوق واجب ہیں۔ (سنو! تمہاری عورتوں پر جس طرح کچھ حقوق تمہارے واجب ہیں، اسی طرح تمہاری عورتوں کا بھی تم پر کچھ حق ہے۔)

(جہاں تک تمہارے ان حقوق کا تعلق ہے جو تمہاری عورتوں پر واجب ہیں) تو وہ یہ ہیں:

۱۔ وہ کوئی کام کھلی بے حیائی کا نہ کریں۔

۲۔ وہ تمہارا بستر کسی ایسے شخص سے پامال نہ کرائیں جسے تم پسند نہیں کرتے۔

۳۔ وہ تمہارے گھر میں کسی ایسے شخص کو داخل نہ ہونے دیں جسے تم ناپسند کرتے ہو، مگر یہ کہ تمہاری اجازت سے۔

۴۔ اگر وہ عورتیں (ان باتوں) کی خلاف ورزی کریں تو تمہارے لیے اجازت ہے کہ:

الف: تم انہیں بستر وں پر اکیلا، تنہا چھوڑ دو۔

ب: (ان پر سختی کرو) مگر شدید تکلیف والی چوٹ نہ مارو (اگر مارنا ہی چاہو۔)

دیکھو! کچھ حقوق ان کے بھی تمہارے اوپر عائد ہوتے ہیں۔ مثلا:

۵۔ یہ کہ کھانے پینے، پہننے اوڑھنے (خوراک ولباس) کے بارے میں ان سے اچھا سلوک کرو (اگر وہ تمہاری نافرمانی سے بازآجائیں اور کہا مانیں تو (حسب حیثیت) ان کا کھانا کپڑا (خوراک، لباس، نان نفقہ) تمہارے ذمہ ہے۔

(اور عورتوں پر یہ بھی واجب ہے کہ)

۶۔ عورتیں معروفات میں تمہاری نافرمانی نہ کریں۔

۷۔ اور اگر وہ فرماں برداری کریں تو ان پر (کسی قسم کی) زیادتی کا تمہیں کوئی حق نہیں۔

۸۔ کوئی عورت اپنے گھر میں اخراجات نہ کرے، مگر ہاں اپنے شوہر کی اجازت سے۔

۹۔ جان لو! لڑکا (اولاد) اس کی طرف منسوب کیا جائے گا جس کے بستر پر وہ پیدا ہوا۔ (بچہ شوہر کی اولاد متصور ہوگا۔)

اور جس پر حرام کاری ثابت ہو اس کی سزا سنگ ساری ہے (زنا کار کے لیے پتھر) اور ان کا حساب اللہ کے ذمے۔

۱۰۔ دیکھو! کسی عورت کےلئے جائز نہیں کہ وہ اپنے شوہر کا مال اس کی اجازت کے بغیر کسی کو دے۔

۱۱۔ خبردار! جس نے خود کو اپنے باپ کے علاوہ کسی اور سے منسوب کیا، یاکسی غلام نے (جان بوجھ کر) اپنے آقا کے سوا کسی آقا سے نسبت قائم کی تو اس پر اللہ کی، اس کے فرشتوں کی اور تمام انسانوں کی لعنت ہوگی اور قیامت کے دن اس سے کوئی بدلہ یا معاوضہ قبول نہیں کیا جائے گا۔

دفعہ:۲۶

۱۔ اور ہاں غلام، تمہارے غلام! (ان سے حسنِ سلوک کرو)

الف: جو تم کھاتے ہو اس میں سے ان کو بھی کھلاؤ۔

ب: جو تم پہنتے ہو اس میں سے ان کو بھی پہناؤ۔

ج: اگر وہ کوئی ایسی خطا کریں جسے تم دیکھو کہ معاف نہیں کرسکتے تو اللہ کے بندو انہیں فروخت کردو۔ (مگر)

د: انہیں بھیانک سزا (عذاب) تو نہ دو۔

۲۔ اور ان کے بارے میں بھی تمہیں (حسن سلوک کی) وصیت کرتا ہوں، جو لونڈیاں (تمہارے زیر تصرف) ہیں، پس ان کو وہ کھلاؤ اور پہناؤ جو تم کھاتے پہنتے ہو۔

حصہ: د (دینیات، عقائد، عبادات، معاملات، اخلاقیات)

دفعہ:۲۷ لوگو! بے شک مجھے حکم دیا گیا تھا کہ لوگوں سے لڑوں، یہاں تک کہ لاالٰہ الااللہ کے قائل ہوجائیں اور جب وہ اس کلمے کا اقرار کرلیں تو گویا انہوں نے اپنی جانوں اور مالوں کو بچالیا اور باقی حساب اللہ کے ذمے ہے۔

دفعہ:۲۸ اللہ کے ساتھ کسی چیز کو شریک نہ ٹھہراوٴ۔

دفعہ:۲۹ اور نہ کسی کی ناحق جان لو۔ (نہ قتل کرو)

دفعہ:۳۰ نہ بدکاری (زنا) کرو۔

دفعہ:۳۱ اور نہ ہی چوری (سرقہ) کرو۔

دفعہ:۳۲ لوگو! (اچھی طرح سمجھ لو!) میرے بعد نہ کوئی پیغمبر (آنے والاہے اور نہ تمہارے بعد کوئی امت ہوگی۔

۱۔ اپنے خطاب کے دوران رسول صلى الله عليه وسلم نے مسیح الدجال کا ذکر فرمایا، پھر ذکر میں کافی طول پکڑا، پھر دجال کا ذکر کرتے ہوئے فرمایا:

۲۔ کوئی نبی ایسا نہیں گزرا کہ جس نے اپنی امت کو دجال سے نہ ڈرایا ہو۔

(پس میں بھی) (میں بلاشبہ تمہیں اس سے ڈراتا ہوں)

۳۔ بے شک میری سب سے افضل دعاء بلکہ تمام انبیائے ما قبل کی یہی ہے:

لاالٰہ الا اللّٰہ وحدہ لاشریک لہ، لہ الملک ولہ الحمد بیدہ الخیر، یحی ویمیت وھو علیٰ کل شیء قدیر۔

دفعہ:۳۳ خوب سن لو! اپنے پروردگار کی عبادت کرو، نماز پنج گانہ ادا کرو، رمضان کے روزے رکھو، اپنے رب کے گھر (خانہ کعبہ) کا حج کرو، اپنی زکوٰة خوشی خوشی دیا کرو، اپنے حکام کی اطاعت کرو (اس طرح ان امور کی انجام دہی کے بعد بطور اجر) اپنے رب کی جنت میں داخل ہوجاؤ۔

دفعہ: ۳۴ اللہ سے ڈرو! (ترازو سیدھی رکھ کر تولا کرو) اور لوگوں کو ان کی چیزیں (ناپ تول میں) کم نہ دیا کرو اور ملک میں فساد کرتے نہ پھرو۔

دفعہ: ۳۵ خبردار! دین میں غلو (مبالغہ آمیزی) سے بچو، اس لیے کہ تم سے پہلے جو قومیں تھیں وہ دین میں غلو کی وجہ سے ہلاک کردی گئیں۔

دفعہ:۳۶ لوگو!

دیکھو، شیطان اس بات سے تو بے شک بالکل مایوس ہوچکا ہے کہ تمہاری اس سرزمین پر کبھی اس کی پرستش کی جائے گی، مگر چوکنا رہو! وہ اس بات پر بھی راضی ہوگا کہ اس (پرستش) کے سوا چھوٹی چھوٹی باتوں میں اس کے اشاروں کی تعمیل کی جائے، پس اپنے دین وایمان کی (حفاظت کی) خاطر اس سے بچے رہنا۔

دفعہ:۳۷ لوگو!

۱۔ اللہ نے میراث (ترکہ) میں ہر وارث کا (جداگانہ) حصہ مقرر کردیا ہے۔

۲۔ اس لیے وارث کے لیے (تمام مال میں) وصیت کرنا جائز نہیں۔

(چنانچہ) کسی کو ایک تہائی سے زائد (مال) کی وصیت کاحق نہیں۔

(بقول راوی پھر حضور صلى الله عليه وسلم نے ہمیں صدقے کا حکم دیا اور فرمایا:)

دفعہ: ۳۸ صدقہ دیا کرو! اس لیے میں نہیں جانتا، مگر شاید تم آج کے بعد مجھے پھر نہ دیکھ سکو۔

دفعہ: ۳۹ اللہ کے نام پر (جھوٹی) قسمیں نہ کھایا کرو، کیوں کہ جو اللہ کے نام پر (جھوٹی) قسم کھائے گا، اللہ اس کا جھوٹ ظاہر کردے گا۔

دفعہ: ۴۰ لوگو!

۱۔ علم (تعلیم، معلومات) میں سے جو کچھ حاصل کرسکتے ہو، لےلو۔ اس سے پہلے کہ وہ سمیٹ لیا جائے اور قبل اس کے کہ علم کو اٹھا لیاجائے۔

۲۔ خبردار! علم کے اٹھائے جانے (ختم ہوجانے) کی ایک شکل یہ بھی ہے کہ اس کے جاننے والے ختم ہوجائیں۔ ( آپ صلى الله عليه وسلم نے یہ بات تین مرتبہ فرمائی۔)

دفعہ:۴۱ دیکھو!

۱۔ تین باتیں ایسی ہیں جن میں (مومن کا) دل (دھوکہ فریب) کینے کا شکار نہیں ہوتا۔ یعنی:

الف: عمل میں اخلاص کہ صرف اللہ کے لیے۔

ب: (مسلمان) حاکموں کی خیرخواہی میں۔

ج: عام مسلمانوں (کی جماعت) سے وابستگی میں، کیوں کہ ان (مسلمانوں) کی دعائیں انہیں گھیرے رہتی ہیں (اس پر سایہ فگن رہتی ہیں۔)

۲۔ اللہ نے ایسی کوئی بیماری (دکھ، تکلیف) پیدا نہیں کی جس کی دوا نہ اتاری ہو، سوائے بڑھاپے کے۔

دفعہ: ۴۲ لوگومیری بات سمجھو!

کیوں کہ میں نے سب کچھ تم تک پہنچادیا ہے:

۱۔ میں نے تمہارے درمیان ایک ایسی چیز چھوڑ دی ہے کہ تم کبھی گمراہ نہ ہوگے اگر مضبوطی سے تھامے رہے اور وہ ہے اللہ کی کتاب۔

۲۔ اور میں نے تمہارے درمیان ایسی چیزیں چھوڑ دی ہیں کہ اگر ان کو تھامے (پکڑے) رہے تو پھر کبھی بھی گمراہ نہ ہوگے۔ صاف وروشن اللہ کی کتاب اور اس کے نبی صلى الله عليه وسلم کی سنت۔

دفعہ:۴۳ لوگو!

سنو اور اطاعت کرو اگرچہ تمہارے اوپر کوئی نک کٹا حبشی غلام امیر بنادیا جائے جو تمہارے درمیان کتاب اللہ (کے احکام) کو قائم (نافذ) کرے۔

دفعہ:۴۴ جان لو!

۱۔ ہر نبی (پیغمبر) کی دعوت گزر چکی ہے، سوائے میری دعوت (دین و شریعت) کے کہ (وہ ہمیشہ کے لیے ہے) میں نے اس کو اپنے پروردگار کے پاس قیامت تک کے لیے ذخیرہ (جمع) کردیا ہے۔

۲۔ امابعد! انبیاء علیہم السلام قیامت کے دن کثرت تعداد پر فخر کریں گے، پس تم مجھے (اپنی بداعمالیوں کے سبب) رسوا نہ کردینا، میں حوض کوثر پر (تمہارے انتظار میں) رہوں گا۔

۳۔ خبردار! میں حوض کوثر پر تم سے پہلے پہنچوں گا اور دوسری امتوں پر تمہاری کثرت کے سبب فخر کروں گا تو کہیں میری رسوائی کا باعث نہ بن جانا۔

۴۔ سنو! میں بعض کو (شفاعت کرکے) چھڑالوں گا، مگر بعض لوگ مجھ سے چھڑالیے جائیں گے۔ پھر میں کہوں گا: اے میرے رب! یہ تو میرے اصحاب (امتی) ہیں؟ اللہ فرمائے گا کہ آپ نہیں جانتے کہ ان لوگوں نے آپ کے بعد کیا کیا بدعتیں کرڈالی تھیں۔

دفعہ:۴۵ خبردار! میرے بعد کہیں کافر نہ بن جانا کہ آپس میں ایک دوسرے کی گردنیں مارنے لگو۔

دفعہ:۴۶ اور ہاں سنو!

۱۔ تم اپنے رب سے ملوگے تو اللہ تم سے تمہارے اعمال کے بارے میں (ضرور) باز پرس کرے گا۔

۲۔ پس جو (دنیا میں رہتے ہوئے ہمہ وقت) آخرت کو ہی اپنے پیش نظر رکھے گا تو اللہ اسے دل جمعی عطا کرے گا اور اسے اس کی آنکھوں کے سامنے (دنیا میں ہی) بے نیازی وتونگری عطا کرے گا اور دنیا اس کے (قدموں میں) سرنگوں ہوکر خود آئے گی، لیکن جودنیا کو ہی محبوب ومقصود قرار دے گا تو اللہ اس کے معاملات کو منتشر ومتفرق کردے گا اور وہ (آدمی دنیا میں ہی) اپنی آنکھوں کے سامنے افلاس وتنگ دستی دیکھ لے گا اور دنیا میں سے تو اسے اتنا حصہ ملے گا جتنا کہ اس کے لیے (مقدر میں) لکھا جاچکا ہے۔

دفعہ: ۴۷ دیکھو!

اب تم نے مجھے (جی بھر کر) دیکھ بھی لیا ہے اور مجھ سے ان تمام باتوں کو سن بھی لیا ہے، تم سے عنقریب میرے بارے میں پوچھا جائے گا (تو سچ سچ بتانا) پس جس نے بھی مجھ پر جھوٹ باندھا تو وہ اپنا ٹھکانہ جہنم میں بنالے۔

دفعہ:۴۸ دیکھو!

۱۔ جو یہاں موجود ہے وہ غیر حاضر تک (میری) یہ سب با تیں (ضرور) پہنچا دے۔

۲۔ شاید کہ بعض ایسے کہ جن تک (یہ باتیں) پہنچیں گی یہاں موجود بعض سننے والوں سے زیادہ سمجھ دار ثابت ہوں۔

۳۔ سن لو! تم میں سے جو یہاں قریب ہیں (ان کے لیے لازم ہے کہ) اپنے دور والوں (بعد میں آنے والے لوگوں) تک یہ باتیں پہنچادیں۔

حصہ: ر (اختتامیہ)

پھر آپ صلى الله عليه وسلم نے فرمایا:

اے اللہ! (دیکھ لے) میں نے (تیرا پیغام بھر پور طور پر) پہنچادیا ہے یا نہیں؟

پھر لوگوں سے فرمایا:

کیا میں نے اللہ کا پیغام تم تک اچھی طرح نہیں پہنچا دیا؟

سنو! کیا میں نے حق تبلیغ ادا نہیں کردیا؟

دیکھو! کیا میں نے تعلیم وتلقین دین کی انتہا نہیں کردی؟

(تو سب حاضرین، سامعین، مجمع والے بیک آواز اقرار واعتراف کرنے لگے۔) بے شک! بے شک! (تب رسول صلى الله عليه وسلم نے) فرمایا: اے اللہ گواہ رہنا! (تیرے بندے کیسا صاف اقرار کررہے ہیں)، اے اللہ گواہ رہنا (یہاں موجود لوگ کیا کہہ رہے ہیں)، اے اللہ گواہ رہنا! (پھر آپ صلى الله عليه وسلم نے فرمایا:) اور تم لوگوں سے (آخرت، قیامت میں اللہ کی طرف سے) میرے بارے میں پوچھا جائے گا تو تم لوگ کیا کہوگے؟

تو سب نے کہا: ہم گواہی دیتے ہیں کہ بے شک آپ نے امانت الٰہی ہم تک پہنچادی اور حق رسالت ادا کردیا اور (امت کو) نصیحت کرنے کی انتہا فرمادی۔ (پس رسول صلى الله عليه وسلم نے اپنی انگشت شہادت کو آسمان کی طرف اٹھایا اور) پھر اسے لوگوں کی طرف جھکایا اور فرمایا: اے اللہ گواہ رہنا! اے اللہ گواہ رہنا! اے اللہ گواہ رہنا! والسلام علیکم ورحمة اللہ وبرکاتہ۔

==================> جاری ہے ۔۔۔

*ماخوذ از مستند تاریخ اسلام ویب سائیٹ*

تدبر سورہ الرحمٰن ۔۔۔ از استاد نعمان علی خان ۔۔۔ حصہ 20

noreply@blogger.com (پیغام قرآن و حدیث ٹرسٹ) — Sat, 08 Apr 2023 09:12:00 +0000

تدبر سورۃ الرحمن

از استاد نعمان علی خان

پارٹ 20 آیات(32-31)

بِسْمِ اللَّـهِ الرَّحْمَـٰنِ الرَّحِيم

سَنَفۡرُغُ لَكُمۡ أَيُّهَ ٱلثَّقَلَانِ

فَبِاَىِّ اٰلَاۤءِ رَبِّكُمَا تُكَذِّبٰنِ

اے دونوں جماعتو! ہم عنقریب تمہاری طرف متوجہ ہوتے ہیں۔

تو تم اپنے پروردگار کی کون کون سی قدرتوں / طاقتوں / نعمتوں کا انکار کرو گے ؟

ثقلان کا مطلب ہے "بوجھ"

أَيُّهَ ٱلثَّقَلَان- دو مخلوقات جو اس "زمین کا بوجھ" ہے اسی زمین سے وہ وجود میں آئی ہیں اور اسی میں ان کا مسکن ہے یعنی" انسان اور جن۔"

اللہ نے یہاں یہ نہیں کہا (یا ایھا الجن والانس) بلکہ ثقلان کہا ؛

یعنی اللہ کا قیامت کے دن اپنی دو مخلوقات سے مخاطب ہوں گے جو ثقل "بوجھ" اٹھائے ہوئے ہو گیں ۔جن کے بوجھ اور اعمال کا حساب ہوگا

اللہ نے یہاں میں خاص طور پر "ثقلان" کہہ کر مخاطب کیا ہے تاکہ ہم اپنے "بوجھ ،اپنے اعمال" کا خیال کریں ۔۔

جس دن ہمارے اعمال کا وزن ہوگا ۔۔جس کے ثقل بھاری ہوں گے وہ کامیاب ہو جائیں گے اور جس کے ثقل وزن میں کم ہوں گے وہ ناکام ہو جائیں گے؛ یہاں ہماری توجہ آخرت کی طرف دلائی جا رہی ہے ۔

فَأَمَّا مَن ثَقُلَتۡ مَوَٲزِينُهُ ۥ

پھر جس کے پلڑے بھاری ہوں گے

فَهُوَ فِى عِيشَةٍ رَّاضِيَةٍ

وہ دل پسند عیش میں ہو گا

Surah Al-Qariah

سَنَفۡرُغُ لَكُمۡ - عنقریب ہم تمہارے لئے فارغ ہو جائیں گے۔

اس کا مطلب یہ نہیں ہے جیسے میں کہوں ابھی میں مصروف ہوں فارغ ہو کر تم سے پوچھتی ہوں۔ لیکن اللہ تو کبھی بھی مصروف نہیں ہوسکتے کوئی بھی کام ان کو اتنا مشغول نہیں کیا ہوا کہ وہ ہماری طرف متوجہ نہ ہو سکے ۔

پھر اس بات کا کیا مطلب ہے کہ عنقریب ہم تمہارے لئے فارغ ہو جائیں گے ؟؟

قرآن پاک اس زبان میں نازل ہوا جو انسانوں کی زبان تھی ۔ الفاظ وہی ہوتے ہیں لیکن ان کے معنی میں زمین آسمان کا فرق ہوتا ہے ۔

جیسے عالم انسان بھی ہیں اور اللہ کی صفت بھی علیم ہے لیکن دونوں میں زمین آسمان کا فرق ہے۔

کچھ صفات انسان کے لئے استعمال ہوتی ہیں اور وہی اللہ کے لیے بھی استعمال ہوتی ہیں لیکن دونوں میں بے انتہا فرق ہے۔

سَنَفۡرُغُ لَكُمۡ أَيُّهَ ٱلثَّقَلَان

اسی طرح یہاں الفاظ تو وہی ہیں جن سے یہ نتیجہ نکلتا ہے کہ تم نےجو سرکشی کرنی ہے جو بغاوت کرنی ہے کرلو۔۔۔ عنقریب فارغ ہو جائیں گے ہم تمہاری خبر لیں گے ۔۔

الفاظ وہی ہیں لیکن ان کا مفہوم مختلف ہے کیونکہ یہ اللہ کے لئے استعمال ہو رہے ہیں تو ان کا معنی بدل جاتا ہے ۔۔۔

اصل مطلب یہ ہے کہ اللہ نے اس دنیا کے وقت کو جن ادوار میں تقسیم کیا ہے ابھی یہ "دور "جو تیرا ہے وہ "دور امتحان" ہے ۔۔

ابھی جزا سزا کا دور شروع نہیں ہوا یہاں اللہ نے چھوٹ دے رکھی ہے، ابھی میں بڑی سے بڑی سرکشی کر جاوں، اللہ نہیں پکڑتا، ابوجہل نے رسول صلی اللہ علیہ وسلم کے ساتھ جو سلوک کیا اللہ نے نہیں پکڑا،

اللہ تو ہر چیز پر قادر ہے وہ چاہتا تو ابوجہل اسی وقت مر جاتا ۔۔

اس دور میں جو کرنا ہے وہ کرو۔۔ اگر تمہارے اندر خیر ہے، تو وہ بھی ظاہر ہو جائے اچھی طرح اور تمہارے اندر اگر کوئی شر ہے تو وہ بھی سامنے آجائے

یہ عالم ۔ ۔ ۔ عالم جزا نہیں ہے ۔

یہاں کی جزا اور سزا کا لفظ آتا ہے وہ درحقیقت اپنے اصل مفہوم میں نہیں ہے جیسے موت درحقیقت سزا نہیں ہے۔۔

موت ہماری اس زندگی کا خاتمہ ہے اور وہ ہمارے سفر کا ایک اہم سٹاپ ہے یعنی ہمارے امتحان کی مہلت ختم ہو رہی ہے ۔۔

اتنی قوموں کو جو ہلاک کیا گیا ہے وہ ان قوموں کی اجتماعی موت ہے، اس میں عذاب کا جو لفظ استعمال ہوا ہے وہ مجازاً ہے یعنی اصل میں عذاب آخرت میں ملے گا

"دارالجزا " وہ ہے جو آنے والا ہے ..‼

۔ ۔ یہ دارالامتحان ہے ۔ ۔ ۔ !

لہذا اس آیت کا مطلب یہ ہو گا کہ اے ثقلان تم جوسر کشیاں کر رہے ہو، عنقریب وقت آیا چاہتا ہے۔ ۔ ۔

سَنَفۡرُغُ = "س" کا مطلب ہے "عنقریب" SOON "

اس لفظ کا مفہوم ہمیں سورہ معارج کی آیت سے معلوم ہوگا

إِنَّہُمۡ يَرَوۡنَهُ ۥ بَعِيدًا (6)

وہ ان لوگوں کی نگاہ میں دور ہے

وَنَرَٮٰهُ قَرِيبًا (7)

اور ہماری نظر میں نزدیک۔

یعنی اللہ کہہ رہے ہیں کہ وہ قیامت انہیں دور نظر آ رہی ہے اور ہماری نگاہوں کے سامنے موجود ہے، ہم اسے قریب دیکھ رہے ہیں۔

اس بات کو مثال سے سمجھتے ہیں جیسے میں لاہور سے کراچی جارہی ہو تو میرے راستے میں ملتان آتا ہے

اور میں کہوں کے ملتان سے لاہور آدھے گھنٹے کی مسافت پر ہے. اس کا مطلب ہے ملتان ابھی موجود تو ہے لیکن میرے اعتبار سے بھی آدھا گھنٹہ دور ہے یہ Relative Time کا concept ہے.

لیکن اللہ کے علم کے اعتبار سے ہر شے "ابھی اسی وقت موجود ہے" اس کا علم تو کامل ہے، اس کے لیے Relative Timeاور absolute time کچھ نہیں ہے۔۔ ماضی اور مستقبل کچھ نہیں ہے ۔

اللہ کے نزدیک وقت ہے ہی نہیں۔۔ اس کا علم تو کُل ہے ۔

لہذا اللّه کہہ رہے ہیں کہ یہ لوگ اس کو دور دیکھ رہے ہیں جبکہ ہم اس کو قریب دیکھ رہے ہمارے سامنے وہ گھڑی رکھی ہوئی ہے ۔

ان کے حساب سے بھی ملتان آئے گا لیکن ملتان تو ہمارے سامنے موجود ہے۔

یہاں اس آیت میں اسی اعتبار سے فرمایا؛

سَنَفۡرُغُ لَكُمۡ أَيُّهَ ٱلثَّقَلَان

یعنی ہم عنقریب فارغ ہوا چاہتے ہیں یعنی اب عنقریب وہ گھڑی آئی چاہتی ہے وہ زیادہ دور نہیں ہے۔

سَنَفۡرُغُ لَكُمۡ =( 'کم ' Second Person Pronoun )

مطلب ''تم سب''؛ اللہ ہر ایک کی طرف متوجہ ہوں گے انفرادی طور پر "اکیلے اکیلے "

ابھی تم جو سرکشیاں کر رہے ہو کرلو ؛ ابھی تو کوئی کھڑے ہو کر اللہ کو نعوذباللہ گالیاں بھی دے دے ۔

کوئی رسول صلی اللہ علیہ وسلم کی شان میں جتنی چاہے گستاخی کرے ابھی تمہارے پاس مہلت ہے۔ ابھی تمہیں کچھ نہیں کہہ رہے لیکن وہ وقت آیا جاتا ہے۔

یہ معنی نہیں ہیں کہ ہم تمہیں اپنی مجبوری کی وجہ سے ڈھیل دے رہے ہیں بلکہ

كُلَّ يَوۡمٍ هُوَ فِى شَأۡنٍ

ہم نے ہر اپنے ہر دور کے لئے ایک چیز طے کی ہوئی ہے کہ اس وقت ہم تمہیں نہیں پکڑیں گے ۔

اس وقت ہم نے تمہیں چھوٹ دی ہوئی ہے ڈھیل دی ہوئی ہے

سَنَفۡرُغُ لَكُمۡ أَيُّهَ ٱلثَّقَلَانِ

عنقریب وہ وقت آیا چاہتا ہے ، جب ہم تمہاری رسی کھینچیں گے

فَبِاَىِّ اٰلَاۤءِ رَبِّكُمَا تُكَذِّبٰنِ‏

اب بتاؤ کون سی قدرت کا انکار ہے؟؟

جاری ہے ۔۔۔۔۔

قرآن فہمی سیریز۔۔۔ 09

noreply@blogger.com (پیغام قرآن و حدیث ٹرسٹ) — Thu, 06 Apr 2023 11:00:00 +0000

قرآن فہمی سیریز

از ڈاکٹر فرحت ہاشمی

اللہ سبحانہ و تعالی سے اس کا فضل مانگنا

سورہ البقرہ آیت ۴۷ میں اللہ سبحانہ و تعالی فرمارہے ہیں:

یٰبَنِیْۤ اِسْرَآءِیْلَ اذْكُرُوْا نِعْمَتِیَ الَّتِیْۤ اَنْعَمْتُ عَلَیْكُمْ وَ اَنِّیْ فَضَّلْتُكُمْ عَلَى الْعٰلَمِیْنَ۔

اے بنی اسرائیل یاد کرو میری نعمت وہ جو میں نے تم پر انعام کی اور بے شک میں نے فضیلت دی تمھیں تمام جہانوں پر۔

اس آیت میں اللہ سبحانہ و تعالی بنی اسرائیل سے مخاطب ہو کر ان کو ان پر کیے گئے بے شمار دینی اور دنیاوی احسانات یاد دلا رہے ہیں۔

دینی اعتبار سے بنی اسرائیل میں بے شمار انبیاء آئے جو کسی اور قوم میں نہیں آئے۔ جس کا ذکر سورہ المائدہ آیت ۲۰ میں آتا ہے۔

قَالَ مُوْسٰى لِقَوْمِهٖ يٰقَوْمِ اذْكُرُوْا نِعْمَةَ اللّٰهِ عَلَيْكُمْ اِذْ جَعَلَ فِيْكُمْ اَنْۢبِيَاۗءَ وَجَعَلَكُمْ مُّلُوْكًا ۔۔۔۔۔۔

دنیاوی اعتبار سے بنی اسرائیل میں ایسے پیغمبر آئے جو پیغمبر ہونے کے ساتھ بادشاہ بھی تھے۔ اور ان کی بادشاہت صرف انسانوں تک محدود نہیں تھی بلکہ وہ جنات، حشرات، چرند پرند پر بھی تھی۔ ان کے لیے لوہے کو مسخر کیا گیا اور پیتل کے چشمے بہادیے گئے۔

ان نعمتوں کو یاد کروانے کا مقصد بنی اسرائیل کو شکر گزاری کی طرف متوجہ کرنا ہے تا کہ وہ ایسے شکر گزار بن جائیں جس میں دل، زبان اور جوارح سے شکر شامل ہو۔ اور وہ اپنے اعمال کی اصلاح کرسکیں۔

اللہ سبحانہ و تعالی نے بنی اسرائیل کو اپنے دور میں تمام لوگوں پر فضیلت عطا فرمائی۔ یہ فضیلت ان کو ہدایت اور رہنمائی کے منصب کے ساتھ عطا کی گئی تھی۔ یعنی وہ خود بھی اللہ سبحانہ و تعالی کی عبادت کریں اور دوسرے لوگوں کو بھی رہنمائی دیں۔ لیکن جب انھوں نے اپنی ذمہ داری نہیں نبھائی تو اللہ سبحانہ و تعالی نے ان سے یہ ذمہ داری لے کر امت محمد صلی اللہ علیہ وسلم کو سونپ دی۔ سورہ آل عمران ۱۱۰ میں ارشاد ہے:

كُنْتُمْ خَيْرَ اُمَّةٍ اُخْرِجَتْ للنَّاسِ تَاْمُرُوْنَ بالْمَعْرُوْفِ وَتَنْهَوْنَ عَنِ الْمُنْكَرِ وَتُؤْمِنُوْنَ باللّٰهِ) (آل عمران :110)

اسی طرح رسول اللہ صلی اللہ علیہ وسلم نے فرمایا کہ ”ہم قیامت کے دن کامل ستر امتوں کی شکل میں ہوں گے ، اور ہم ان سب سے آخری اور بہتر امت ہوں گے “ (سنن ابن ماجہ 4287)

اس آیت سے جو باتیں ہمیں معلوم ہوتیں ہیں وہ مندرجہ ذیل ہیں:

▪️ نعمت اللہ دیتا ہے۔

▪️ فضیلت اللہ کی طرف سے عطا ہوتی ہے۔

▪️ فضیلت علم کی بنا پر ملتی ہے۔ عزت اور شرف انسان کو ذمہ داری کے ساتھ ملتی ہے۔ انسان اگر اپنی ذمہ داری نبھاتا ہے تو اس کے عزت و شرف میں اضافہ ہوتاہے اور اگر وہ ذمہ داری پوری نہیں کرتا تو وہ ذمہ داری ذلت و رسوائی کا باعث بنتی ہے۔

▪️ فضل اللہ کی طرف سے آتا ہے۔ فضل کی مثالیں مندرجہ ذیل ہیں:

▫️ ہدایت کا ملنا

▫️ قرآن کا ملنا

▫️ کتاب کا وارث بنایا جانا

▫️ نیکیوں میں آگے بڑھنا

▫️ دنیاوی نعمتیں

▫️ رزق کا ملنا

اللہ سبحانہ و تعالی سے اس کا فضل مانگنے میں انسان کے لیے کیا چیز رکاوٹ بنتی ہے؟

ہم انسان خود دلوں کے چھوٹے ہیں اس لیے ہم کسی کو کچھ دینا نہیں چاہتے۔ یہی وجہ ہے کہ ذرہ سا بھی کس پر شبہ ہو کہ وہ ہم سے مانگ لے گا تو ہم اس سے کنارہ کشی کرلیتے ہیں۔ اسی پر ہم دوسروں کو قیاس کرلیتے ہیں کہ سارے انسان ایسے ہونگے۔

پھر نعوذ باللہ انسانوں پر کیے گئے قیاس اللہ سبحانہ و تعالی پر کرلیتے ہیں۔ ہم سمجھتے ہیں کہ:

> اللہ سبحانہ و تعالی ہمیں نہیں دے گا۔

> یا ہم اس کی اہلیت نہیں رکھتے۔

> ہمیں مانگنا نہیں آتا۔

حالانکہ اللہ سبحانہ و تعالی کا فضل وسیع ہے۔ جسے چاہے دے اس کے فضل کو کوئی روکنے والا نہیں ہے۔ اس لیے جب ہم فضل مانگنے سے رک جائیں تو اس وقت ہمیں خود سے سوالات کرنے چاہیں:

کیا اللہ کے خزانوں میں کمی آئے گی؟ نہیں

کیا اللہ ہمیں مانگنے پر شرمندہ کرے گا؟ نہیں

اللہ نعوذ باللہ بخیل ہے؟ نہیں

کیا اللہ کے خزانوں کا کوئی اور مالک ہے؟ نہیں

نہیں! اللہ سبحانہ و تعالی ایسا نہیں ہے لہذا ہمیں چاہیے کہ کسی بھی معاملے میں مشکل نظر آرہی ہو تو ہم اللہ سبحانہ و تعالی سے اس کا فضل خوب خوب مانگیں۔

ہمارے کرنے کے کام:

☘️ اللہ سبحانہ و تعالی سے اس کا فضل مانگتے رہیں۔

قرآن فہمی سیریز --- 08

noreply@blogger.com (پیغام قرآن و حدیث ٹرسٹ) — Tue, 04 Apr 2023 10:30:00 +0000

قرآن فہمی سیریز

از ڈاکٹر فرحت ہاشمی

دوسروں کو حکم دینا اور خود کو بھول جانا

سورہ البقرہ آیت ۴۴ میں اللہ سبحانہ و تعالی فرماتے ہیں۔

اَتَاْمُرُوْنَ النَّاسَ بِالْبِرِّ وَ تَنْسَوْنَ اَنْفُسَكُمْ وَ اَنْتُمْ تَتْلُوْنَ الْكِتٰبَ١ؕ اَفَلَا تَعْقِلُوْنَ۔

کیا تم حکم دیتے ہو لوگوں کو نیکی کا اور اپنے نفسوں کو بھول جاتے ہو۔ حالانہ تم کتاب کی تلاوت کرتے ہو۔ کیا بھلا نہیں تم عقل رکھتے۔

اس آیت میں اللہ سبحانہ و تعالی بنی اسرائیل سے مخاطب ہیں کہ تم لوگوں کو بھلائی کا حکم دیتے ہو اور خود اپنے آپ کو بھول جاتے ہو۔ یعنی جو باتیں دوسروں کو کرنے کا حکم دیتے ہو اس پر خود عمل نہیں کرتے۔ حالانکہ تورات پڑھتے ہو۔

یہاں بالخصوص بنی اسرائیل کے علماء سے خطاب ہے اور بالعموم تمام لوگوں سے خطاب ہے۔ اور یہ حکم صرف بنی اسرائیل کے لیے ہی نہیں ہے بلکہ اس میں ہمارے لیے بھی سبق ہے۔ مثلا:

اگر ہم بچوں کو نماز پڑھنے کا کہیں اور خود ٹی-وی کے آگے بیٹھے رہیں تو ہم بچوں کے سامنے انتہائی غلط مثال پیش کرتے ہیں کہ ہم جو دوسروں کو کہہ رہے ہیں وہ خود ہی نہیں کر رہے۔

ہمارے گھروں میں ویسے قرآن کھلتا نہیں لیکن بچوں کے لیے ناظرہ پر زور ہوتا ہے۔

ہم بچوں سے کہتے ہیں چیخو نہیں اور خود ہم ان پر ہی چیخ رہے ہوتے ہیں۔

ہم بچوں سے کہتے ہیں اپنے بہن بھائیوں کو مارو نہیں جبکہ ہم خود بچوں کو مار رہے ہوتے ہیں۔

ابن عباس کہتے ہیں مدینہ کے یہود میں ایک شخص اپنے داماد اور رشتہ داروں میں سے جس کسی کا مسلمانوں سے تعلق ہوتا وہ اس کو کہتا کہ جس دین پر قائم ہو ثابت قدمی سے قائم رہو۔ اس سے مراد یہ تھی کہ نبی صلی اللہ علیہ وسلم حق پر ہیں لیکن وہ خود مسلمان نہیں ہوتا تھا۔

اسی طرح دوسرا واقعہ یہودی بچے کا ہے جو رسول اللہ صلی اللہ علیہ وسلم کی خدمت کرتا تھا۔ وہ بچہ بہت بیمار ہوگیا۔ رسول اللہ صلی اللہ علیہ وسلم نے اس کو اسلام کی دعوت دی۔ بچے نے اپنے والد کی طرف دیکھا۔ والد نے کہا کہ مان لو جو کہہ رہے ہیں۔ آپ صلی اللہ علیہ وسلم نے بچے کو کلمہ پڑھوادیا اور وہ مسلمان ہوگیا اور پھر فوت ہوگیا لیکن اس کے والد نے اسلام قبول نہیں کیا۔

اس لیے کسی بھی صاحب علم کے لیے ضروری ہے کہ وہ جو دوسروں کو کہے اس پر وہ خود بھی عمل کرے۔ کیونکہ اس آیت میں ایسے لوگوں کی مذمت بیان کی گئی ہے جو دوسروں کو نیکی کا حکم دیتے ہیں اور خود اس پر عمل نہیں کرتے۔

ایسے لوگ عقل والے نہیں ہوتے۔ علم ہونے کے باوجود عمل نہ کرنے والے جاہل سے بھی بد تر ہیں۔

جو لوگ نیکی کا حکم دیں اور خود اس پر عمل نہ کریں اس کی سزا مسند احمد کی حدیث میں ہے کہ رسول اللہ ﷺ فرماتے ہیں۔ معراج والی رات میں نے دیکھا کہ کچھ لوگوں کے ہونٹ آگ کی قینچیوں سے کاٹے جا رہے ہیں میں نے پوچھا یہ کون لوگ ہیں تو کہا گیا کہ یہ آپ کی امت کے خطیب اور واعظ اور عالم ہیں جو لوگوں کو بھلائی سکھاتے تھے مگر خود عمل نہیں کرتے تھے اور علم کے باوجود سمجھتے نہیں تھے۔

اسی طرح قیامت کے دن پانچ سوالوں میں سے ایک سوال علم کے بارے میں ہوگا کہ ہم نے علم پر کتنا عمل کیا۔

سوال: اگر کوئی شخص کچھ کرنے کی استطاعت نہیں رکھتا تو کیا وہ دوسروں کو کہہ سکتا ہے۔؟

مثلا ایک شخص بیمار ہے خود تہجد نہیں پڑھ سکتا لیکن کیا وہ دوسروں کو بتا سکتا ہے؟

کسی کے پاس مال نہیں ہے کیا وہ دوسروں کو زکاۃ کے بارے میں بتاسکتا ہے؟

جواب: جی بتایا جاسکتا ہے کیونکہ پہلی مثال میں وہ شخص خود کمزور ہے۔ اور دوسری مثال میں اس کے خود کے پاس مال نہیں ہے۔

سوال: اگر کوئی شخص کسی گناہ کو چھوڑنے کی بھرپور کوشش کررہا ہے لیکن وہ دیکھتا ہے کہ اس کا بچہ بھی اس کا عادی ہورہا ہے تو کیا وہ اپنے بچے کو روک سکتا ہے؟

جواب: جی روک سکتا ہے کیونکہ وہ اس گناہ کو چھوڑنے کے لیے اپنی طرف سے پوری کوشش کر رہا ہے۔

سوال: کیا اس آیت کا مطلب یہ ہے کہ ہم کسی کو کچھ بھی نہ کہیں کیونکہ ہم خود عمل نہیں کرتے؟

جواب: اگر ہم نے کسی کو کسی چیز سے کرنے سے نہ روکا تو ہمارے لیے دگنا گناہ ہے۔ پہلا خود عمل نہ کرنے کا اور دوسرا دوسرے کو نہ بتانے کا۔

ہمیں یہ بات رکھنی ہے کہ ہمارے اوپر دونوں فریضے ہیں۔ پہلا یہ کہ جب ہم کوئی حکم سنیں تو خود اس پر عمل کریں۔ اور دوسرا دوسروں کو بھی بتائیں۔

یعنی ہم جب خود عمل کریں گے تو پچاس فیصد کام کریں گے اور جب ہم عمل کرنے کے ساتھ دوسروں کو بھی بتائیں گے تو سو فیصد کام کریں گے۔ ہمارے لیے ضروری ہے کہ ہم سو فیصد کام کریں۔

ہمارے کرنے کا کام:

جب بھی کوئی حکم سنیں تو اس پر خود عمل کریں اور دوسروں کو بھی بتائیں۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 19

noreply@blogger.com (پیغام قرآن و حدیث ٹرسٹ) — Tue, 04 Apr 2023 08:30:00 +0000

تدبر سورۃ الرحمن

از استاد نعمان علی خان

پارٹ 19 آیات(30-29)

بِسْمِ اللَّـهِ الرَّحْمَـٰنِ الرَّحِيم

يَسۡـَٔلُهُ مَن فِى ٱلسَّمَـٰوَٲتِ وَٱلۡأَرۡضِۚ

كُلَّ يَوۡمٍ هُوَ فِى شَأۡنٍ

فَبِاَىِّ اٰلَاۤءِ رَبِّكُمَا تُكَذِّبٰنِ

يَسۡـَٔلُهُ مَن فِى ٱلسَّمَـٰوَٲتِ وَٱلۡأَرۡضِ

اللہ نے ہمیں وجود عطا کیا ہے ،وجود پہلے نہیں تھا ہم ہر چیز کے لئے اللہ کے محتاج ہیں ہم اپنے وجود اور بقا کے لئے بھی اسی کے محتاج ہے اس لیے اگر کوئی شعوری طور پر اللہ سے نہ بھی مانگ رہا وہ اپنے وجود کے لئے اللہ کا سوالی ہے

اللہ کہتا ہے ؛

سورہ فاطر آیت نمبر 15

۞ يَـٰٓأَيُّہَا ٱلنَّاسُ أَنتُمُ ٱلۡفُقَرَآءُ إِلَى ٱللَّهِ ۖ وَٱللَّهُ هُوَ ٱلۡغَنِىُّ ٱلۡحَمِيدُ

لوگو، تم ہی اللہ کے محتاج ہو اور اللہ تو غنی و حمید ہے-

اب چاہے ہم اس کی نعمتوں کا احسان مان رہے ہیں یا نہیں ہم اللہ کے آگے فقیر ہیں ،

چاہے کوئی فرعون ہو یا قارون ہو، ہر صاحب وجود جس کو بھی اللہ نے وجود عطا کیا ہے وہ اللہ کے آگے فقیر ہے اس کا محتاج ہر وقت ۔۔

ہم اپنی حماقت یا نادانی میں دوسروں کے آگے سوال کرنے لگ جاتے ہیں ہم یہ نہیں سوچتے کہ جس سے ہم سوال کریں وہ تو خود اللہ کا محتاج ہے _

ہماری کوئی ہماری ضرورت کو پوری نہیں کرسکتا سوائے اللہ کے ۔۔

اور حال یہ ہے کہ کوئی قبر کے آگے ہاتھ پھیلائے ہوئے ہیں یا کوئی جنات سے مدد مانگ رہا ہے اللہ کہہ رہا ہے کہ زمین اور آسمان میں جتنی مخلوق ہے وہ سب اللہ کے آگے سوالی ہیں_

یہاں تک کہ اللہ کے مقرب ہستیاں انبیاء کرام علیہ السلام فرشتے ہر کوئی اللہ کا محتاج ہے تو تم کس سے مانگے رہے ہو وہ تو خود اللہ کے محتاج ہے ۔

كُلَّ يَوۡمٍ هُوَ فِى شَأۡنٍ

وہ ہر روز کسی شان میں ہوتا ہے

"شان" کا معنی ہے کسی کی کیفیت, حالت, مصروفیت, مشغولیت, کسی چیز کی طرف متوجہ ہونا, یہ ساری کیفیات مل کے شان کا معنی دیتی ہیں -

فلآسفی اور سائنس دان کہتے ہیں کہ یہ ساری کائنات اللہ نے تخلیق کر دی ہے اور تخلیق کرنے کے بعد اس کا مخلوق سے کوئی تعلق نہیں ہے ،

اس کو کیا پتہ بحر میں کیا ہو رہا ہے کون سی کشتی ڈوب رہی ہے اسے ان چیزوں سے دلچسپی نہیں ہے اس نے ایک بار بنا دیا ہے اور وہ بنا کر چھوڑ دیا ہے اب کائنات از خود قوانین طبیعہ کے مطابق چل رہی ہے

ہمارے شعور میں بھی خدا کا یہی تصور ہے کہ وہ خالق ہے اس نے ہمیں پیدا کیا ہے لیکن اب قوانین طبیعہ ہیں ؛ ازخود سارے کام ہو رہے ہیں، خود بخود یہ کائنات رواں دواں ہے

اس میں ہر لمحہ اللہ کی مشیت یا اس کا فیصلہ یا اس کا اذن یا اس کی منشا۔۔ ہر شے کا اس کے علم میں ہونا ، یہ درحقیقت ہمارے تصور میں عموما موجود نہیں ہے۔

قران کا تصور پیش کرتا ہے ہمارے سامنے؟

۞ وَعِندَهُ ۥ مَفَاتِحُ ٱلۡغَيۡبِ لَا يَعۡلَمُهَآ إِلَّا هُوَ ۚ وَيَعۡلَمُ مَا فِى ٱلۡبَرِّ وَٱلۡبَحۡرِ ۚ وَمَا تَسۡقُطُ مِن وَرَقَةٍ إِلَّا يَعۡلَمُهَا

اور اللہ تعالیٰ ہی کے پاس ہیں غیب کی کنجیاں، (خزانے) ان کو کوئی نہیں جانتا بجز اللہ کے۔ اور وه تمام چیزوں کو جانتا ہے جو کچھ خشکی میں ہیں اور جو کچھ دریاؤں میں ہیں اور کوئی پتا نہیں گرتا مگر وه اس کو بھی جانتا ہے 6:59

یعنی کوئی پتا بھی نہیں گرتا مگر اس کے علم میں ہے

ہر آن ہر لمحہ ہر شے کے بارے میں اس کو علم ہے ،

ہر آن ہر لمحہ اس کا "اذن" کارفرما ہے _

ہر معاملے میں اللہ کی رضا اور معیشت شامل ہوتی ہے

اس بات کا تصور کرنا ہم انسانوں کے لیے آسان نہیں ہے کہ کیسے اس کو ہر ایک ایک معاملے کی خبر ہے, ایک ایک چیز کو باریک بینی سے دیکھ رہا ہے، وہ ہر معاملے میں انوالو ہے ۔

كُلَّ يَوۡمٍ هُوَ فِى شَأۡنٍ

ہر لمحہ اس کی ایک شان ہے اس کی ایک کیفیت ہے اور وہ مشغول اور مصروف ہے

وہ ہر وقت اس کائنات کے انتظام و اہتمام میں لگا ہوا ہے یہاں کوئی کام اس کےعلم اور اذن کے بغیر نہیں ہورہی کوئی پتہ نہیں گرتا جب مگر اس کے علم میں ہوتا ہے اس کی رضا سے گرتا ہے اس کی اجازت سے گرتا ہے

اگر یہ بات ہماری سمجھ میں آجائے گی اللہ کی مرضی سے ہر کام ہو رہے ہیں تو ہماری کیفیت ہی بدل جائے گی

اب "یوم" کا معنی کیا ہے یوم کا مطلب یہ نہیں جو ہمارا 24 گھنٹے کا دن ہے قرآن میں اللہ کے دن کے لئے ہزار سال یا پچاس ہزار سال بھی آیا ہے یہ ایام کا مطلب ہے "ہر دور "

اللہ نے اس کائنات کی تخلیق "ادوار" میں کی ہے، ہر دور کی کیفیات اس نے پہلے سے ہی متعین کی ہوئی ہے کہ اس دور میں وہی کچھ ہوگا ،

اللہ نے ایک ترتیب رکھی ہے جس دور کا معاملہ ہے وہ اُسی دور کے مطابق ہوگا ،اللہ نے اپنا فعل اور عمل "اُس دور" کے حساب سے طے کیا ہوا ہے ۔اللہ ہر دور کے مطابق انتظام و اہتمام کر رہا ہے ۔۔۔۔۔۔۔

جاری ہے ۔۔۔۔۔۔۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 18

noreply@blogger.com (پیغام قرآن و حدیث ٹرسٹ) — Mon, 03 Apr 2023 08:00:00 +0000

تدبر سورۃ الرحمن

از استاد نعمان علی خان

پارٹ 18 آیات(28-29)

بِسْمِ اللَّـهِ الرَّحْمَـٰنِ الرَّحِيم

يَسۡـَٔلُهُ مَن فِى ٱلسَّمَـٰوَٲتِ وَٱلۡأَرۡضِ ۚ

كُلَّ يَوۡمٍ هُوَ فِى شَأۡنٍ

فَبِاَىِّ اٰلَاۤءِ رَبِّكُمَا تُكَذِّبٰنِ‏

آسمان اور زمین میں جتنے لوگ ہیں سب اسی سے مانگتے ہیں۔ وہ ہر روز کام میں مصروف رہتا ہے.

تو تم اپنے پروردگار کی کون کون سی قدرتوں / طاقتوں / نعمتوں کا انکار کرو گے ؟

اس سے پچھلی آیت ہم نے پڑھا تھا کہ جب دنیا کی ہر چیز فنا ہو جائے گی ،صرف اللہ کی ذات ہی باقی رہے گی تو اس کا مطلب ہے کہ انسان کو مان لینا چاہیے کہ وہ کچھ نہیں ہے ،وہ اللہ کا محتاج ہے، اس میں انا کے بجائے عاجزی آجانی چاہیے، کہ وہ صرف اور صرف اللہ کا ہی محتاج ہے ،

اگلی آیت میں اللہ نے فرمایا

"جو بھی آسمانوں اور زمین میں ہے وہ اسی سے مانگتا رہتا ہے اور وہ ہر وقت کسی ایسے کام میں مشغول ہے جو صرف وہی کرسکتا ہے ۔"

"شآن" کا مطلب ہے کوئی ایسا کام جو صرف آپ ہی کرسکتے ہیں اور کوئی نہیں کر سکتا۔

اب اس بات کا کیا مفہوم ہے؟ پہلی بات تو یہ کہ ہر کوئی تو اللہ سے نہیں مانگ رہا ہوتا۔ کافر تو نہیں مانگتا ،ہندو اپنے بتوں سے مانگتے ہیں، عیسائی کسی اور سے مانگتے ہیں ، ملحد تو کسی سے بھی نہیں مانگتا ، فرعون نے کس سے مانگا تھا؟

جب اللہ کہہ رہا ہے کہ جو کچھ بھی آسمان اور زمین میں ہے سب "اسی" سے مانگ رہا ہے ، تو اس سے دو باتیں نکلتی ہیں ۔۔

عربی میں لفظ "سائل" سوال کرنے والے کو ہی نہیں بلکہ "محتاج "کو بھی کہتے ہیں یعنی یہاں کہا گیا ہے کہ جو کچھ بھی آسمان اور زمین میں ہے وہ سب اللہ کے محتاج ہیں۔

ہمارا دل اللہ سے اگلی دھڑکن کی بھیک مانگ رہا ہے ہماری آنکھوں کو دیکھنے کے لیے ہر لمحہ اللہ کی مدد کی ضرورت ہے ۔

كُلَّ يَوۡمٍ هُوَ فِى شَأۡنٍ

ہر لمحے اللہ ہی وہ سب کچھ کر رہا ہے جِسے وہی کرسکتا ہے اگر ہمارے پاس دولت، پیسہ، شہرت، رتبہ ہو لیکن صحت نہ ہو تو ہم کیا کرسکتے ہیں؟

ہماری بولنے دیکھنے چلنے کی صلاحیت کو واپس لے جائے تو ہم کیا کرسکتے ہیں۔؟ ہماری آنکھ کان بازو ٹانگ واپس لے جائے تو ہم کیا کرسکتے ہیں؟

ہمارا ذہنی توازن نہ رہے گا ہم کس کام کے رہ جائیں گے؟ ہمارا دماغ اتنا ملائم ہے کہ اگر اسے ٹرک کی ٹکر لگے اور معاملہ ختم ۔

سیڑھیوں سے گر جائیں دماغ کو چوٹ لگ جائے سارے انا ساری طاقت سارا مقام ایک بار میں ختم۔

یہ اصل میں کہا جا رہا ہے کہ تم کتنے محتاج ہو اور جیسا خیال اللّه تمہارا رکھتا ہے اور کوئی نہیں رکھ سکتا۔ یہ اس کی رحمت ہے اور ماں کی محبت سے تھوڑا سا مقابلہ ہے اسکی محبّت کا۔

کچھ بچے ماں کا اتنا دل دکھاتے ہیں کہ ماں کہتی ہے کہ میں اپنے بیٹے کو دیکھنا ہی نہیں چاہتی میں ہے اور اس سے ملنا نہیں چاہتی۔

لیکن اللہ کا بندہ اس کو بھولتا ہے؟ اس کی نافرمانی ناشکری ناقدری کرتا ہے ۔ کبھی کبھار اس کو کوستا بھی ہے لیکن اللہ پھر بھی اپنے بندے کو نہیں چھوڑتا ۔جب تک سانسیں باقی ہیں واپس آنے کا موقع دیا ہوا ہے جتنے بھی دور نکل جاؤ واپس آنے کا دروازہ کھلا ہوا ہے۔

ہمیں جب کوئی ایک بار دکھ دے تو اس کو معاف کرنا بہت مشکل ہوتا ہے اللہ ہمیں بار بار موقع دیتا ہے اللہ تو ان لوگوں کو بھی سانس دیتا ہے جو اللہ کے رسول صلی اللہ علیہ وسلم کی مخالفت کررہے تھے ۔۔ جو جنگ میں رسول اللہ ؐ کے مخالف کھڑے ہیں ۔ان کے قتل کی سازشیں کر رہے ہیں۔

ان لوگوں کی بھی ضروریات اللہ پوری کر رہا ہے ، ان کو بھی کھانا کھلا رہا ہے ،ایک نوالے میں ان کو ہارٹ اٹیک کو سکتا ہے پھر بھی ان کو سانس دے رہا ہے ان سب باتوں کو اگر ہم الرحمان کے سائے میں نہیں سمجھیں گے تو کیسے سمجھیں گے؟

الرحمٰن (o) كُلَّ يَوۡمٍ هُوَ فِى شَأۡنٍ

یہ رحمان ہی تو ہے جو بار بار موقع دیا جا رہا ہے اب تم اس کس بات کا انکار کرو گے کس طاقت، معجزے ، قدرت کا انکار کرو گے؟

کہ تم کہاں اور تمہارا رب کہاں ہے تم کیا حرکتیں کر رہے ہو اور تمہارا رب تمہارے ساتھ کیا سلوک کررہا ہے۔

کچھ مفسرین اس آیت کے زمرے میں ایک مثال دی ہے

ایک کتا ہے وہ اپنے مالک کے خلاف باغی ہو جاتا ہے وہ مالک پر بھونکتا اور کاٹتا ہے، مالک اس کتے کو باہر سورج میں باندھ دیتا ہے، دو دن گزرتے ہیں نہ اس کو پانی ملتا ہے، نہ کھانا ملتا ہے، پہلے مالک جب گھر سے نکلتا ہے ،تو کتا دانت نکلتا ہے اور کاٹنے کو آتا ہے۔

جب وہ کتا بالکل پیار سا اور بھوکا مرنے لگتا ہے تو اس کی حالت کیا ہو جاتی ھے؟ پاؤں آگے کو نکل آتے ہیں اور سر زمین پر جھک جاتا ہے پھر اگر مالک اپنے ہاتھ سے پانی پلائے تو چپ چاپ پانی پینے لگتا ہے۔ کوئی بغاوت کوئی غصہ ،کوئی اکڑ، نہیں کرتا، چپ چاپ پی رہا ہے یہ کیسے ہوا؟

جب کوئی باغی "محتاج" بن جائے تو اس کی ساری بغاوت نکل جاتی ہے اللہ بھی کہہ رہا ہے کہ تمہاری ساری ضروریات "میں" پوری کر رہا ہوں۔

اگر میں چاہتا کہ تمہیں تمہاری اوقات دکھا دو تو میں کیا کرتا؟

تھوڑی دیر کے لئے تمہاری ضرورتیں روک دیتا۔ اگر میں چاہتا تو تمہارا پانی زمین میں خشک کر دیتا پھر کون تمہیں پانی لگا دیتا میں آسمان سے بادل برسانا بند کر دو تو تم کیا کرو گے؟

اللہ بتا رہا ہے کہ اس کے ہاتھ میں ہمارے یہ سارے Resources ہیں جن کے بغیر ہم زندہ نہیں رہ سکتے لیکن وہ ہم سے یہ چیزیں نہیں چھینتا۔

وہ اور طریقے سے ہمیں سیدھا کرنا چاہتا ہے .اس طریقے سے جانور کو سیدھا کیا جاتا ہے ہم انسان ہیں ، ہمیں الفاظ کے ذریعے سیدھا کرنا ہے، تمہیں قرآن کے ذریعے سیدھا کرنا ہے، اللہ کہہ رہا ہے کہ دیکھو آرام سے سمجھا رہا ہوں سمجھ جاؤ انسان بن جاؤ یعنی شکر گزار بن جاؤ ۔ !!

اس ساری سورت کا Main Theme یہی ہے کہ ہم "شکر گزار" بن جایں۔

جاری ہے ۔۔۔۔۔

قرآن فہمی سیریز ۔۔۔ 07

noreply@blogger.com (پیغام قرآن و حدیث ٹرسٹ) — Sun, 02 Apr 2023 11:00:00 +0000

قرآن فہمی سیریز

از ڈاکٹر فرحت ہاشمی

علم کی فضیلت

سورہ البقرہ کی آیت ۳۱-۳۳ میں اللہ سبحانہ و تعالی فرماتے ہیں:

وَ عَلَّمَ اٰدَمَ الْاَسْمَآءَ كُلَّهَا ثُمَّ عَرَضَهُمْ عَلَى الْمَلٰٓئِكَةِ١ۙ فَقَالَ اَنْۢبِئُوْنِیْ بِاَسْمَآءِ هٰۤؤُلَآءِ اِنْ كُنْتُمْ صٰدِقِیْنَ۔

اور اس نے آدم کو سب (چیزوں کے) نام سکھائے پھر انھیں فرشتوں کے سامنے کیا اور فرمایا کہ اگر تم سچے ہو تو مجھے ان کے ناموں کی خبر دو۔

اللہ سبحانہ و تعالی نے آدم علیہ السلام پر اپنا فضل اور اکرام فرمایا اور ان کو دنیا کی تمام اشیاء کے نام، ان کی صفات اور ان کے افعال سکھائے۔

آدم علیہ السلام کے علم سیکھنے کی وجہ سے اللہ سبحانہ و تعالی نے ان کے درجات کو بلند فرمایا۔

پھر اللہ سبحانہ و تعالی نے فرشتوں سے امتحان لیا کہ اگر تم سچے ہو تو مجھے تمام اشیاء کے نام بتاؤ۔

قَالُوْا سُبْحٰنَكَ لَا عِلْمَ لَنَاۤ اِلَّا مَا عَلَّمْتَنَا١ؕ اِنَّكَ اَنْتَ الْعَلِیْمُ الْحَكِیْمُ۔

انھوں نے کہا پاک ہے تو نہیں ہے کوئی علم ہمارے لیے مگر جو سکھایا تو نے ہمیں بیشک تو تو ہی ہے بہت علم والا بہت حکمت والا۔

اس آیت میں بتایا گیا ہے کہ اللہ سبحانہ و تعالی کے تمام اشیاء کے نام پوچھے جانے پر فرشتوں کو فورا اپنی غلطی کا احساس ہوگیا اور انھوں نے اپنی عاجزی اور کم علمی کا اظہار اللہ سبحانہ و تعالی کی تسبیح کے ساتھ کیا کہ پاک ہیں آپ ہم بس اتنا علم رکھتے ہیں جتنا آپ نے ہمیں سکھایا۔

قَالَ یٰۤاٰدَمُ اَنْۢبِئْهُمْ بِاَسْمَآئِهِمْ١ۚ فَلَمَّاۤ اَنْۢبَاَهُمْ بِاَسْمَآئِهِمْ١ۙ قَالَ اَلَمْ اَقُلْ لَّكُمْ اِنِّیْۤ اَعْلَمُ غَیْبَ السَّمٰوٰتِ وَ الْاَرْضِ١ۙ وَ اَعْلَمُ مَا تُبْدُوْنَ وَ مَا كُنْتُمْ تَكْتُمُوْنَ۔

‎پھر اللہ نے آدم سے کہا ”تم اِنہیں اِن چیزوں کے ناموں کی خبر دو۔“ پھر جب اُس نے ان کو خبر دی ،تو اللہ نے فرمایا ”میں نے تم سے کہا نہ تھا کہ میں آسمانوں اور زمین کی وہ ساری حقیقتیں جانتا ہوں جو تم سے مخفی ہیں،جو کچھ تم ظاہر کرتے ہو ، وہ بھی مجھے معلوم ہے اور جو کچھ تم چھُپاتے ہو، اُسے بھی میں جانتا ہوں۔

اس آیت میں بتایا گیا ہے کہ پھر اللہ سبحانہ و تعالی نے آدم علیہ السلام

کو فرشتوں کے سامنے تمام ناموں کے بتانے کا حکم دیا۔ ۔ اس پر آدم علیہ السلام نے بغیر کسی غلطی کے تمام نام بتادیے۔ جس پر فرشتے آدم علیہ السلام کے علم کے قائل ہوگئے۔

ان تینوں آیات میں ہمارے لیے کئی اسباق ہیں۔

۱- علم کا منبع اللہ سبحانہ و تعالی کی ذات ہے۔

۲- اللہ سبحانہ و تعالی کا اپنے بندوں کو علم سکھانا اس کے فضل اور احسان میں سے ہے۔

۳- اللہ سبحانہ و تعالی نے علم سکھانے کے لیے انبیاء کو بھیجا۔

۴- علم درجات کی بلندی اور فضیلت کا باعث ہے۔ آدم علیہ السلام کو فرشتوں پر فضیلت علم کے بنا پر تھی۔

۵- دنیاوی علوم بھی درست نیت کے ساتھ سیکھے جاسکتے ہیں۔

۶- علم کو سیکھنا ہر مسلمان پر فرض ہے۔

۷- عمل سے پہلے علم سیکھنا ضروری ہے۔

۸- علم سے اللہ سبحانہ و تعالی کی خشیت آتی ہے۔

۹- علم ہمیشہ سیکھنے سے آتا ہے۔ کوئی بھی اپنی ماں کی کوکھ سے سیکھ کر نہیں آتا۔ اس لیے انسان کو چاہیے کو مندرجہ ذیل کام کرے۔

- علم سیکھنے کے لیے آگے قدم بڑھائے اور اپنی پوری کوشش کرے۔

- علم کے حصول کے لیے گھر سے نکلے۔

- علم والوں سے رجوع کرے۔

- علم والوں کے سامنے عاجزی اختیار کرے۔

- علم کی جستجو میں لگا رہے۔

- علم میں اضافے کی دعا مانگے۔

- علم حاصل کر کے امتحان اور اس میں پاس یا فیل ہونے سے نہ گھبرائے۔ کیونکہ علم کےحصول میں اصل چیز محنت ہے۔ اس کا اجر انسان کے اعمال نامہ میں لکھا جائے گا۔

۱۰ ۔ فرشتوں کے پاس صرف اتنا علم ہے جتنا اللہ سبحانہ و تعالی نے ان کو سکھایا۔ ہر فرشتہ اپنی فیلڈ کا ماہر ہے۔ بارش کرنے والا فرشتہ صرف اسی کا علم رکھتا ہے۔

۱۱- فرشتے غیب کا علم نہیں رکھتے۔

۱۲- فرشتوں کے اندر عاجزی اور انکساری ہے یہی وجہ ہے کہ انھوں نے اپنے علم کو اندازہ لگاکے ثابت کرنے کی کوشش نہیں کی۔ انسان کو بھی چاہیے کہ:

- جس چیز کا علم اس کے پاس نہ ہو اس کا جواب بغیر علم کے نہ دے ۔ صرف اسی وقت جواب دے جب معلوم ہو۔

- دین کا معاملہ ہو یا دنیا کا ایک ہی اصول رکھے کہ جب بھی بات کرے علم کے ساتھ کرے۔

- جس چیز کا علم نہیں اس کا اعتراف کرنے میں عار محسوس نہ ہو۔

۱۳- اللہ سبحانہ و تعالی کا علم وسیع ہے۔

۱۴- اللہ سبحانہ و تعالی کا علم مکمل ہے جس کا احاطہ کوئی نہیں کرسکتا۔

۱۵- اللہ سبحانہ و تعالی زمین اور آسمان کی ہر چیز جانتا ہے۔

۱۶- اللہ سبحانہ و تعالی بندوں کے ظاہر و باطن کو جانتا ہے۔

۱۷- اللہ سبحانہ و تعالی کی کونی، قدری اور شرعی تمام آیات میں حکمتیں ہیں۔

۱۹- آدم علیہ السلام نے اللہ سبحانہ و تعالی کا حکم سنتے ہی تعمیل کرلی۔

۲۰- اللہ سبحانہ و تعالی کا حکم آئے تو بغیر وجہ پوچھے فورا اطاعت کرلیں۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 17

noreply@blogger.com (پیغام قرآن و حدیث ٹرسٹ) — Sun, 02 Apr 2023 08:31:00 +0000

تدبر سورۃ الرحمن

از استاد نعمان علی خان

پارٹ 17 آیات(27-28)

بِسْمِ اللَّـهِ الرَّحْمَـٰنِ الرَّحِيم

وَيَبۡقَىٰ وَجۡهُ رَبِّكَ ذُو ٱلۡجَلَـٰلِ وَٱلۡإِكۡرَامِ

صرف تیرے رب کی ذات جو عظمت اور عزت والی ہے باقی ره جائے گی

جلال عربی میں کسی عظیم الشان چیز کو کہا جاتا ہے جس کو دیکھ کر انسان پر ہیبت طاری ہو جائے کہ کیا عظیم الشان شاندار چیز ہے جیسے کوئی محل ہو یا کوئی شاندار ہوٹل ہو ۔

اورجلال کے لیے سامعین اور ناظرین چاہیے ، کوئی شاندار ہوٹل کو دیکھے گا تو اس کا جلال ہوگا، کوئی دیکھنے والا نہ ہو تو جلال کیسے ہوگا؟

اس طرح عزت کے لئے بھی عزت کو دینے والا ہونا چاہیے اگر ہم اکیلے رہتے ہیں اور ہم کہیں کہ ہماری بہت عزت ہے تو ایسا نہیں ہوتا کوئی عزت کرنے والا ہوگا تو ہماری عزت ہوگی

یعنی جلال اور اکرام (عزت ) یہ دونوں باتیں دوسروں پر ڈیپینڈ کرتی ہیں ۔

اب ہم دیکھتے ہیں کہ اس آیت کا پچھلی آیت سے کیا تعلق ہے

كُلُّ مَنۡ عَلَيۡہَا فَانٍ

جو (مخلوق) زمین پر ہے سب کو فنا ہونا ہے

اللہ کا ایک منفرد مقام ہے پہلے وہ کہتا ہے کہ اس زمین پر جو کچھ بھی مخلوق ہے سب نے فنا ہو جانا ہے اور پھر اس کے بعد کہتا ہے بس تیرے رب کی ہستی ہے جو باقی رہے گی ۔۔اور پھر اس کا جلال بھی رہے گا اور پھر اس کی عزت رہے گی

یعنی چاہے صفحہ ہستی پر عزت کرنے والا کوئی بھی موجود نہ ہو تب بھی اسکی عزت برقرار رہے گی۔۔

کبھی کبھی ہم سوچتے ہیں کہ اللہ کو ہماری نمازوں کی کیا ضرورت ہے اس کا جواب ان آیات میں ہے

اللہ کو ہمارے شکر کی تعریف کی کسی بھی چیز کی ضرورت نہیں ہے اس کی تعریف ہمیشہ ہوتی رہے گی ہم اس کا جلال مانے یا نہ مانے اس کا جلال اور اکرام ویسا ہی رہے گا

ہمارے شکر کرنے سے کیا اللہ کے خزانوں میں کوئی اضافہ ہوتا ہے ہوجائے گا اس کی تعریف کرنے سے اس کی شان میں کوئی اضافہ ہوجائے گا؟

پھر اس کی شکر اور تعریف کا فائدہ کس کو ہے؟؟ ہمیں ۔۔ !

کِبرِا - بڑائی- وہ اصل میں اللہ کے لئے ہے۔

انسان جب تک شکر نہیں کرے گا وہ اپنے اندر سے کبریا کو نہیں نکال سکتا

" بڑائی صرف اسی کی ہے آسمان میں بھی اور زمین میں بھی "

جب تک انسان شکر گزار نہیں بنے گا وہ اپنی انا سے نہیں بھاگ سکتا جب تک وہ اپنی انا میں گم رہے گا اپنے لیے بھی تباہی کرے گا اور انسانیت کے لیے بھی تباہی کرے گا

جب انسان لالچ اور حرص میں آجاتا ہے تو اس کو کسی کی فکر نہیں ہوتی وہ بس میں میں کرتا ہے کہ مجھے سب کچھ مل جائے

لَٮِٕن شَڪَرۡتُمۡ لَأَزِيدَنَّكُمۡ‌ ۖ

اگر تم شکر گزاری کرو گے تو بے شک میں تمہیں زیاده دوں گا 14:7

تمہیں اپنے لیے زیادہ چاہیے تھا نہ اگر تم شکر گزار بن جاتے ہو تو میں تمہیں اور زیادہ دیتا اور زیادہ دیتا یعنی اگر تم واقعی زیادہ چاہتے ہو تو شکر گزار بن جاؤ۔

فَبِاَىِّ اٰلَاۤءِ رَبِّكُمَا تُكَذِّبٰنِ

تو تم اپنے پروردگار کی کون کون سی قدرتوں / طاقتوں / نعمتوں کا انکار کرو گے ؟

یہاں کہا جا رہا ہے کہ اللّه کو تمہاری کوئی ضرورت نہیں ہے۔ تم تو بچو گے بھی نہیں،

تم تو زندہ ہی نہیں رہو گے۔۔ پھر بھی تم سمجھتے ہو کہ تم اللّه کی نعمتوں کا انکار کرسکتے ہو؟؟

ہماری سب سے بڑی کمزوری" موت" ہے_

جاری ہے ۔۔۔۔۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 16

noreply@blogger.com (پیغام قرآن و حدیث ٹرسٹ) — Sat, 01 Apr 2023 08:29:00 +0000

تدبر سورۃ الرحمن

از استاد نعمان علی خان

پارٹ 16 آیات(26-27)

بِسْمِ اللَّـهِ الرَّحْمَـٰنِ الرَّحِيم

كُلُّ مَنۡ عَلَيۡہَا فَان ٍ

جو (مخلوق) زمین پر ہے سب کو فنا ہونا ہے

"فانی" کہتے ہیں ختم ہونے والی شے , ختم ہونے اور مرنے میں بہت فرق ہے ,

فانی کا مطلب ہے کہ ایسی چیز جس کا مقصد ہی ختم ہونا تھا.جیسے ہم بوڑھے ہو جاتے ہیں ہماری کھال لٹک جاتی ہے۔ جھریاں آجاتی ہیں ، نظر خراب ہوجاتی ہے، ہماری کمر جھک جاتی ہے اصل میں ہمارا مقصد ہی بوڑھا ہونا تھا، ہمیں ختم ہونے کے لیے بنایا گیا تھا ۔۔ !!

ہم آہستہ آہستہ مٹی ہوتے جاتے ہیں

ہمارا جسم مٹی سے بنا تھا اور اب یہ آہستہ آہستہ مٹی بن رہا ہے اس کا اصل گھر مٹی ہے ،

بس اس کے اندر ایک نور ہے "روح" اور وہ اپنے رب کے لئے تیار ہو رہی ہے، اس کو اِس بات کا احساس دلایا جا رہا ہے کہ اب اصل گھر کو چھوڑنے کا وقت آ رہا ہے۔

اگر ایسا نہ ہوتا تو انسان کو اپنے رب کے پاس واپس آنے کی کیا خواہش ہوتی؟

جو لوگ ایمان کی زندگی گزارتے ہیں ان کے لیے ان کے آخری دن سب سے اچھے دن ہوتے ہیں ان کو اپنے رب سے ملنے کی خوشی ہوتی ہے۔

اللہ نے انسان کی شخصیت میں "ہمیشگی" کی خواہش رکھی ہے انسان کسی عارضی گھر میں نہیں رہنا چاہتا اس کو خواہش ہوتی ہے کہ اپنا گھر ہو جہاں وہ ہمیشہ رہے انسان کو خواہش ہوتی ہے کہ اس کی جوانی ہمیشہ رہے۔

عربی میں دو الفاظ استعمال ہوتے ہیں

خَيۡرٌ وَأَبۡقَىٰ ٰ - بہتر اور ہمیشہ رہنے والا

ہم جب بھی کوئی چیز خریدتے ہیں اور چاہتے ہیں کہ وہ سب سے بہتر ہو اور ہمیشہ رہنے والی ہو

اور انہی دو باتوں کو سامنے رکھ کر ہم گاڑی کپڑا اپنی روزمرہ کی چیزیں، یہ سب خریدتے ہیں اور ان دونوں باتوں کا ذکر اللہ نے جنت کے زُمرے میں کیا ہے .

وَمَا عِندَ ٱللَّهِ خَيۡرٌ وَأَبۡقَىٰ لِلَّذِينَ ءَامَنُواْ وَعَلَىٰ رَبِّہِمۡ يَتَوَكَّلُونَ

اور اللہ کے پاس جو ہے وه اس سے بدرجہ بہتر اور پائیدار ہے، وه ان کے لیے ہے جو ایمان ﻻئے اور صرف اپنے رب ہی پر بھروسہ رکھتے ہیں

42:35

جو اللہ کے پاس ہے وہ اصل میں بہتر اور ہمیشہ رہنے والا ہے , یہ جو ہم انسانوں میں" ہمیشگی" کی خواہش اللہ نے ہمارے اندر اسی لئے ڈالی ہے کہ ہمیں آخرت کے لئے تیار کرسکے

اور انسان کو دل سے یہ بات مان لینی چاہیے کہ اصل میں یہ خواہش جنت میں ہی پوری ہو گئی ہم خود بھی ہمیشہ کے لئے نہیں ہے ہم بھی ختم ہونے والے ہیں

یہاں ہر چیز ختم ہوجائے گی کچھ بھی ہمیشہ نہیں رہے گا صرف جو کچھ ہمیں جنت میں لے گا وہ ہمیشہ رہے گا اسی لئے ہمیں آخرت کے لئے تیاری کرنی چاہیے نہ کہ دنیا کیلئے جہاں ہر چیز ختم ہونے والی ہے ،

اس آیت کا اگلی آیت سے بہت خوبصورت تعلق ہے _

وَيَبۡقَىٰ وَجۡهُ رَبِّكَ ذُو ٱلۡجَلَـٰلِ وَٱلۡإِكۡرَامِ

صرف تیرے رب کی ذات جو عظمت اور عزت والی ہے باقی ره جائے گی۔

جاری ہے ۔۔۔۔۔

قرآن فہمی سیریز --- 06

noreply@blogger.com (پیغام قرآن و حدیث ٹرسٹ) — Fri, 31 Mar 2023 10:30:00 +0000

قرآن فہمی سیریز

از ڈاکٹر فرحت ہاشمی

فاسق اور اس کی صفات

سورہ البقرہ کی آیت ۲۶ میں اللہ سبحانہ و تعالی فرماتے ہیں:

۔۔۔۔وَ مَا یُضِلُّ بِهٖۤ اِلَّا الْفٰسِقِیْنَۙ۔

۔۔ اور نہیں گمراہ کرتا اس سے مگر نافرمان

الْفٰسِقِیْنَۙ کا لفظ فسق سے مأخوذ ہے۔ جس کے لغوی معنی باہر نکل جانے کے ہیں۔ اور اس سے مراد گناہ اور نافرمانی کے کام کر کے اللہ سبحانہ و تعالی کی اطاعت سے باہر نکل جانا ہے۔

یعنی فاسق اللہ سبحانہ و تعالی کی بنائی گئی حدود کی احتیاط نہیں کرتا اور بغیر حدود کے تعین کے جو اس کا دل کرتا ہے وہ کرتا چلا جاتا ہے۔

فسق کی ۲ اقسام ہیں۔

فسق اکبر: اس سے مراد ایسا عمل کرنا جس کی وجہ سے آدمی اسلام کے دائرے سے خارج ہو جاتا ہے۔

فسق اصغر: اس سے مراد اسلام کے دائرے میں رہ کر کوئی نافرمانی کرنا ہے۔ یعنی رسول اللہ صلی اللہ علیہ وسلم کی کوئی بات نہ ماننا۔

پھر ایسا شخص جو عمل نہیں کرنا چاہتا ہو اور ایسے طریقے ڈھونڈتا رہے جس سے اس کو عمل نہ کرنا پڑے تو پھر اللہ سبحانہ و تعالی اس کو بھٹکا دیتا ہے۔

اس طرح کے کردار کی صفات کو اللہ سبحانہ و تعالی سورہ البقرہ کی آیت ۲۷ میں بیان فرمارہے ہیں۔

الَّذِیْنَ یَنْقُضُوْنَ عَهْدَ اللّٰهِ مِنْۢ بَعْدِ مِیْثَاقِهٖ١۪ وَ یَقْطَعُوْنَ مَاۤ اَمَرَ اللّٰهُ بِهٖۤ اَنْ یُّوْصَلَ وَ یُفْسِدُوْنَ فِی الْاَرْضِ١ؕ اُولٰٓئِكَ هُمُ الْخٰسِرُوْنَ۔

وہ جو توڑتے ہیں عہد اللہ کا بعد اس کے مضبوط کرنے کے، اور وہ کاٹتے ہیں جو حکم دیا ہو اللہ نے اس کا کہ وہ جوڑا جائے اور وہ فساد کرتے ہیں زمین میں، یہی لوگ ہیں وہ جو خسارہ پانے والے ہیں۔

اس آیت میں فاسقین کے ۳ اوصاف بتائے گئے ہیں۔

۱- اللہ سبحانہ و تعالی سے کیے گئے عہد کو توڑنا

۲- اللہ سبحانہ و تعالی نے جس چیز کو جوڑنے کا حکم دیا ہے اس کو کاٹنا۔

۳- زمین میں فساد کرنا

۱- اللہ سبحانہ و تعالی سے کیے گئے عہد کو توڑنا:

فاسقین اللہ سبحانہ و تعالی کے ساتھ کیے گئے عہد کو مضبوط کرنے کے بعد توڑدیتے ہیں۔ یہاں پر عہد سے مراد ہر طرح کا معاہدہ ہے۔ جیسے:

▪️اللہ اور بندے کے درمیان کیا گیا عہد الست

▪️اللہ کی اطاعت کا عہد

▪️نبی صلی اللہ علیہ وسلم پر ایمان لانے کا عہد جو ہر نبی نے اپنی قوم سے لیا تھا

▪️انسان کا دوسرے انسان کے ساتھ کیا گیا عہد

ہمارے دین میں عہد توڑنے کی ممانعت ہے۔

وَلَا دِینَ لِمَنْ لَا عَھْدَ لَہ“(سنن بیھقی-۱۲۶۹۰)

جس شخص میں معاہدہ کی پابندی نہیں اس میں دین نہیں۔

عہد کے توڑنے کو منافقین کا وصف کہا گیا ہے۔ رسول اللہ صلی اللہ علیہ وسلم نے فرمایا:

۳ خصلتیں جس میں ہوں وہ منافق ہے خواہ نماز پڑھتا ہو ، روزہ رکھتا ہو ، اپنے آپ کو مسلمان سمجھتا ہو۔ ان میں سے ایک خصلت عہد کی پاسداری نہ کرنا ہے۔ [صحیح مسلم]

عہد شکنی کی مثالیں:

کاروبار میں ڈیلیوری کے اوقات کا عہد کر کے تاخیر کرنا

کسی کام کو کرنے کا عہد کر کے اس کو ٹال مٹول کرنا

ملاقات کا وقت مقرر کرکے اس وقت سے دیر سے آنا

جب کوئی شخص عہد شکنی کرتا ہے تو اس کے اندر نفاق کا بیج پڑجاتا ہے۔ جس کی وجہ سے اس کو قیامت کے دن شرمندگی اٹھانا ہوگی۔

۲- اللہ سبحانہ و تعالی نے جس چیز کو جوڑنے کا حکم دیا ہے اس کو کاٹنا۔

فاسق کی دوسری صفت میں اللہ سبحانہ و تعالی نے جس چیز کو جوڑنے کا حکم دیا ہے اس کو کاٹنا شامل ہے۔

اللہ نے کن چیزوں کو جوڑنے کا حکم دیا ہے؟

۱- اللہ کے ساتھ تعلق جوڑنا

۲- قرآن کے ساتھ تعلق جوڑنا

۳-نبی صلی اللہ علیہ وسلم کے ساتھ تعلق جوڑنا

۴- رشتہ داروں سے تعلق جوڑنا

کن رشتہ داروں کے ساتھ صلہ رحمی کرنی ہے؟

رشتہ داروں سے تعلق جوڑنے (یعنی صلہ رحمی) میں وہ تمام رشتے شامل ہیں جو نسب سے ماں یا باپ کی طرف سے ہیں۔ رسول اللہ صلی اللہ علیہ وسلم نے فرمایا: رشتے چوتھے باب تک ہیں۔

ماں باپ، بہن اور اس کی اولاد، بھائی اور اس کی اولاد

دادا دادی، چاچا اور اس کی اولاد، پھوپھو اور اس کی اولاد

نانا نانی، خالہ اور اس کی اولاد، ماموں اور اس کی اولاد

پر دادا پر دادی اور ان کی اولاد

پر نانا اور پر نانی اور ان کی اولاد

ان تمام رشتوں کے ساتھ صلہ رحمی لازمی ہے۔

ابو ذر غفاری سے روایت ہے کہ نبی اکرم صلی اللہ علیہ وآلہ وسلم نے فرمایا: میں صلہ رحمی کروں اگرچہ وہ (رشتہ دار) مجھ سے منہ پھیر لیں۔

سیدنا سوید بن عامر انصاری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”صلہ رحمی کو تروتازہ رکھو، اگرچہ سلام کے ذریعہ ہی ہو۔ (سلسلہ صحیحہ ۲۳۷۵)

جسے یہ بات خوشگوار لگے کہ اس کے رزق میں اضافہ ھو اور اس کی عمر دراز ہو ، اسے صلہ رحمی کرنی چاہئیے " ۔ ( بخاری و مسلم )

قطع رحمی ملعون فعل ہے۔

رسول اللہ صلی اللہ علیہ وسلم نے فرمایا:

''قطع رحمی کرنے والا جنت میں داخل نہیں ہوگا۔''

(جامع ترمذی ۱۹۰۹)

رسول اللہ صلی اللہ علیہ وسلم نے فرمایا: جو اپنے بھائی سے تین دن سے زیادہ ترک تعلق رکھے، پس جس نے تین روز سے زیادہ ترک تعلق رکھا (اسی دوران) اسے موت آگئی تو وہ آگ میں داخل ہوگا۔ (البخاري ومسلم)

ابوہریرہؓ روایت کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: بنی آدم کے اعمال جمعرات کی شام اور جمعہ کی رات کو اللہ تعالیٰ کے پاس پیش کئے جاتے ہیں تو آپ قطع رحمی کرنے والے کے عمل کو قبول نہیں کرتے۔ (مسند احمد:9883)

یاد رہے کہ صلہ رحمی کرنے والا وہ نہیں جو بدلہ چُکائے، بلکہ جوڑنے والا وہ ہے کہ جب اس سے رشتہ توڑا جائے تو وہ اسے جوڑ دے۔

فاسقین کی تیسری صفت زمین میں فساد پھیلانا ہے۔ یہ فساد حسی اور معنوی دونوں طرح ہوسکتا ہے۔ اس کے مثالیں مندرجہ ذیل ہیں:

🔺مکانوں کو ڈھانا

🔺درخت کاٹنا

🔺اللہ کی نافرمانی کرنا۔

🔺ایمان نہ لانا

🔺خون بہانا

🔺عیبوں کی ٹوہ لگانا

🔺چغلی کرنا

🔺 ناپ تول میں کمی

ہمارے کرنے کے کام:

☘️ایسی باتوں کو چھوڑدیں جس میں اللہ سبحانہ و تعالی پر الزام لگائے جائیں کہ وہ ہمیں ہدایت نہیں دینا چاہتا۔

☘️فسق سے بچنے کے لیے تقوی اختیار کریں جو سچائی کے ساتھ احتیاط والی زندگی بسر کرنا ہے۔

☘️فاسقین کی صفات سے بچنے کی منصوبہ بندی کریں۔

☘️اپنے معاہدوں کو اہمیت دیں اور ان کو پورا کریں۔

☘️ اپنے رشتے داروں کی فہرست بنائیں اور ان کو ترو تازہ رکھنے کا سلسلہ شروع کریں۔

☘️ایسے کاموں سے بچیں جن سے زمین میں فساد پھیلے۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 15

noreply@blogger.com (پیغام قرآن و حدیث ٹرسٹ) — Fri, 31 Mar 2023 10:28:00 +0000

تدبر سورۃ الرحمن

از استاد نعمان علی خان

پارٹ 15 آیات(24-25)

وَلَـهُ الْجَوَارِ الْمُنْشَاٰتُ فِى الْبَحْرِ كَالْاَعْلَامِ

اور سمندر میں پہا ڑوں جیسے کھڑے ہوئے جہاز اسی کے ہیں.

بڑے بڑے بحری جہاز سمندر کی سطح پر تیرتے ہیں، اور ایک چھوٹا سا موتی سمندر کی تہہ میں ڈوبا ہوا رہتا ہے. جسے تم سوچتے ہو کہ وہ تیر سکے گا وہ ڈوب جاتا ہے اور جس کے بارے میں تم خیال کرتے ہو کہ وہ ڈوب جائے گا اسے اللہ سمندر کی سطح پر رکھتا ہے اور ڈوبنے نہیں دیتا.

َالْاَعْلَامِ کا مطلب جہاز اور پہاڑ دونوں ہو سکتے ہیں. جب آپ بڑے بڑے بحری جہازوں کو ساحلِ سمندر پر لنگر انداز ہوتے دیکھیں تو آپ کو اللہ کی بڑائی بیان کرنی چاہیے.

فَبِاَيِّ اٰلَآءِ رَبِّكُـمَا تُكَـذِّبَانِ

پھر تم اپنے رب کی کس کس نعمت کو جھٹلاؤ گے

جاری ہے۔۔۔۔۔

تدبر سورہ الرحمٰن ۔۔۔ از استاد نعمان علی خان ۔۔۔ حصہ 14

noreply@blogger.com (پیغام قرآن و حدیث ٹرسٹ) — Thu, 30 Mar 2023 09:26:00 +0000

تدبر سورۃ الرحمن

از استاد نعمان علی خان

پارٹ 14 آیات(22-23)

بِسْمِ اللَّـهِ الرَّحْمَـٰنِ الرَّحِيم

يَخۡرُجُ مِنۡهُمَا اللُّـؤۡلُـؤُ وَالۡمَرۡجَانُ‌ۚ‏ ﴿۲۲﴾

فَبِاَىِّ اٰلَاۤءِ رَبِّكُمَا تُكَذِّبٰنِ‏ ﴿۲۳﴾

دونوں دریاؤں سے موتی اور مونگے نکلتے ہیں ﴿۲۲﴾

تو تم اپنے پروردگار کی کون کون سی نعمت کو جھٹلاؤ گے؟ ﴿۲۳﴾

اللہ نے پہلے بات کی کہ کیسے دو سمندر ٹکرا رہے ہیں۔ اور دونوں اللہ کے حکم سے ایک دوسرے پر چڑھائی نہیں کر رہے۔

مَرَجَ الۡبَحۡرَيۡنِ يَلۡتَقِيٰنِۙ‏ ﴿۱۹﴾

اسی نے دو دریا رواں کئے جو آپس میں ملتے ہیں ﴿۱۹﴾

اس میں جو لفظ ہے يَلۡتَقِيٰنِۙ‏۔ اس کا روٹ ورڈ ہے التقاء۔

یہ لفظ قرآن مجید میں استعمال ہوتا ہے ''جب دو فوجیں آپس میں ٹکرا رہی ہوتی ہیں ''۔

یعنی بہت بڑی بڑی طاقتیں ہیں جو آپس میں ٹکرا رہی ہیں۔ ایک جنگ کا سماں کھینچا گیا ہے یعنی دو پانیوں کے درمیان ایک جنگ ہو رہی ہے وہ ایک دوسرے پر غالب نہیں آ سکتے کیونکہ اللہ نے دونوں کو روکا ہوا ہے۔

اب اس کے بعد ایک بہت ہی خوبصورت کا منظر پیش کیا گیا ہے۔ اب اللہ پاک آیت نمبر 22 میں کہتے ہیں کہ اگر دونوں سمندروں میں پانی کی گہرائی میں اترو تو موتی اور مرجان نکلتے ہیں۔یہ نازک سی شے بالکل گہرائی کے اندر ڈوبی ہوئی ہے ۔

پھر اس کے بعد کہا کہ تمہیں اندازہ ہے کہ کوئی بہت عظیم طاقت ہو اور اس میں تباہ وبرباد کرنے کی قوت ہو۔ بڑے سے بڑے قلعے اور عمارتیں پانی کی طاقت کے آگے کچھ بھی نہیں ہیں ۔اسی طاقتور پانی میں اللہ نے اتنی نازک سی شے کو برقرار رکھا ہوا ہے اور وہ بھی دونوں سمندروں کے اندر..!

دو سمندروں کے درمیان ایک بہت بڑی جنگ ہو رہی ہے لیکن لُّـؤۡلُـؤُ اور مرجان کو کوئی فرق نہیں پڑتا ،بالکل محفوظ ہیں۔

سبحان اللہ

وہ نازک سے سمندر کی تہہ میں بڑھ رہے ہیں ۔ان کو نقصان نہیں پہنچ رہا یہ اللہ پاک کی'' طاقت کا بیلنس'' ہے ۔ وہ جہاں تک چاہتا ہے اپنی قوت استعمال کرتا ہے اور جہاں تک چاہتا ہے اس کو روک لیتا ہے ۔ باریکی اور لطافت سے کام لیتا ہے۔

اللہ کہہ رہے ہیں کہ اے انسانو تمہاری کیا حیثیت ہے ؟ تمہاری حیثیت ان موتیوں سے زیادہ نہیں ہے۔ میں تم سے نرمی سے پیش آرہا ہوں ،نرمی کا فائدہ نہ اٹھاؤ۔

اللہ کے ہاتھ میں بڑی بڑی طاقتیں ہیں وہ چاہتا تو تم بچ نہیں سکتے ۔ اس سے کچھ سیکھو اس کی طاقت اور رعب سے ڈرو۔

تم اللہ کی کون کون سی طاقتوں اور قدرتوں اور عجائب کا انکار کرو گے۔

جاری ہے...