PGBWU

PGBEA - PGBOU circular 5/2013 dated 25.11.2013

2013-11-26T09:17:00.001+05:30

Pandyan Grama Bank Employees Association

Pandyan Grama Bank Officers Union

சுற்றறிக்கை எண் : 5/2013 நாள்: 25.11.2013

அருமைத்தோழர்களே!

வணக்கம்.

பாண்டியன் கிராம வங்கியின் வரலாற்றில், 24.11.2013 எனும் நாள், நெகிழ்ச்சியும், அன்பும், தோழமையும் நிறைந்த ஒரு அற்புதநாளாக நினைவில் நிறைந்திருக்கிறது. தோழர்.சோலைமாணிக்கத்தின் பணிநிறைவு விழா, ஒரு குடும்பவிழாவாகவும், தொழிற்சங்கத்தின் திருவிழாவாகவும் அமைந்துவிட்டது. அவர்இந்த வங்கியில் வாழ்ந்த வாழ்க்கையின் அர்த்தங்களை எல்லோருக்கும்அழகாகவும் சரியாகவும் சொல்லியிருக்கிறது.

ஐநூற்றுக்கும் மேற்பட்ட நமது தோழர்கள் வருகையால்அரங்கம் நிறைந்து, உட்கார இடமில்லாமல் வெளியேநின்று, விழாவினை ஆர்வத்துடன் பார்த்துக்கொண்டு இருந்தனர். வங்கியின் சேர்மன் திரு.கார்த்திகேயன், அன்றைய தினம் முக்கிய அலுவல்கள்காரணமாக வர இயலாததைத் தெரிவித்துவாழ்த்துச் செய்தி அனுப்பி இருந்தார். பொதுமேலாளர்களும் அனுப்பி இருந்தனர். அழைப்பிதழ்களில்இடம் பெறாவிட்டாலும், AIRRBEAவின் தலைவர் ராஜீவன்அவர்களும், Joint secretary தோழர்மதனன் அவர்களும் நிகழ்வுக்கு வந்திருந்தனர். AIRRBEAவின் vice-president நாகபூஷண் ராவ், விருதுநகர்மாவட்ட சி.பி.எம்செயலாளர் தோழர்.சேகர், தமிழ்நாடு அரசுஊழியர் சங்க மாநிலப் பொதுச்செயலாளர்தோழர்.பாலசுப்பிரமணியன், நமது அட்வகேட் தோழர்.கீதா மற்றும் CITU, BEFI, AIIEA சங்கத்தலைவர்களும், தோழர்களும்வந்திருந்தனர்.

கரிசல் குயில் திருவுடையான் பாடல்களோடுஆரம்பித்த நிகழ்ச்சி, இசையின் வழியாக காலங்களைஅசை போட வைத்தது. PGBEA தலைவர்தோழர்.சங்கரசீனிவாசன் தலைமை தாங்க, PGBOU தலைவர் தோழர்.சாமுவேல் ஜோதிக்குமார்முன்னிலை வகிக்க நிகழ்ச்சி ஆரம்பித்தது. தோழர்.சோலைமாணிக்கம் அவர்களையும், அவரது துணைவியாரையும் மேடைக்குஅழைத்து உட்கார வைத்த கணம், மொத்த அரங்கமும் அன்பின் மிகுதியால் ஆரவாரித்தது.

தோழர் சோலை மாணிக்கத்தை, அவரதுபணிகளை பலரும்நினைவுகூர்ந்து பேசினர். சமரசமற்றஅவரது போர்க்குணம், சலிப்பற்றஅவரது பயணம், எதிர்பார்ப்பற்ற அவரதுநடவடிக்கைகள் அவரவர் அனுபவங்களால் முன்வைக்கப்பட்டன. குடும்ப வாழ்வுக்கும், சங்க வாழ்வுக்குமிடையில் ஒரு தொழிற்சங்க முன்னணிஊழியர் கழித்தநாட்கள் சாதாரணமானவையல்ல. அது ஒருதனிமனிதனின் சாதாரண வாழ்வாக மட்டுமில்லாமல், ஒரு இயக்கத்தின் உயிர்த்துடிப்பு மிக்க காலமாகவும் இருந்ததைஅறிய முடிந்தது.

தோழர்.சோலைமாணிக்கம் தனது ஏற்புரையில், தன்னை `first servant of PGBEA` என அறிமுகப்படுத்திக்கொண்டார். இந்ததொடர் ஓட்டத்தில்தனது கரங்களில் இருந்து, தீபத்தை ஏந்திச் செல்லஇளைய கரங்கள் வந்துவிட்டன என்னும்சந்தோஷமும், திருப்தியும் தனக்கு இருப்பதாக நம்பிக்கையோடுகுறிப்பிட்டார். வங்கியின் பணிகளிலிருந்து மட்டுமே விடைபெறுகிறேன், உங்களிடமிருந்துஅல்ல, என்று சொல்லி `workers unity zindabad, working class unity zindabad' என்னும் தன் கம்பீரமான குரலால்கோஷங்கள் எழுப்ப, அனைவரும் அதைத்திருப்பிச் சொல்ல உணர்ச்சிப் பெருக்கில்நிறைந்திருந்தனர் அனைவரும். இது ஒரு காட்சி.

இப்படி வங்கியில் பணிபுரியும் தோழர்களின் மனநிலையில், உயர்ந்து நிற்கும் தோழர் சோலைமாணிக்கத்தை அவமானப்படுத்தவும், களங்கப்படுத்தவும், தண்டனை வழங்கவும் துடித்துக்கொண்டு இருக்கிறது நிர்வாகம். அது இன்னொரு காட்சி.

தோழர் சோலைமணிக்கத்தைப் பழிவாங்கும் நோக்த்துடன் இந்த நிர்வாகம் 2010ம்ஆண்டு ஆரம்பித்த ஒழுங்கு நடவடிக்கைக்கு இன்னும்Final Order கொடுக்கவில்லை. இந்த நிலையில் தோழர்.சோலைமாணிக்கத்தின் சேமிப்புக்கணக்கைஆராய்வதற்கு நிர்வாகம் ஆய்வாளர்கள் பலரை இறக்கிவிட்டு இருக்கிறது. நேர்மையான, நியாயமான, சமரசமற்ற ஒரு தொழிற்சங்கத்தலைவரின் பணி ஓய்வுஎன்பது நிம்மதியாக இருக்கக்கூடாது என நிர்வாகம் நினைக்கிறது. அவரது ஓய்வூதியச் சலுகைகளை நிறுத்துவதற்கு திட்டமிடுகிறது.

இந்த நேரத்தில் நாம் அனைவரும் தோழர்.சோலைமாணிக்கம் பக்கம் நிற்பதுவும், அவருக்குஆதரவாகக் குரல் எழுப்புவதும் அவசியம். பணி ஓய்வு விழாவில் பேசியநமது அட்வகேட் கீதா அவர்கள் இதனைகுறிப்பிட்டார். அதன் அடிப்படையில் இத்துடன்நாம் அனைவரும் தனித்தனியாக கையெழுத்திட்டு அனுப்ப வேண்டிய கடிதத்தின் நகல் இந்த சுற்றறிக்கையோடுஇணைக்கப்படுகிறது. தோழர்கள் அனைவரும் கையெழுத்திட்டு, கீழ்க்கண்ட முகவரிக்கு கிளை வாரியாக உடனடியகஅனுப்பு வைக்குமாறு கேட்டுக் கொள்கிறோம்.

Com.J.Mathavaraj

General Secretary - PGBEA

Pandyan Grama Bank

Soolakkarai Medu

Virudhunagar Dist

தோழர்களே, நமக்காக உழைத்த ஒருதொழிற்சங்கத் தலைவரோடு நாம் நிற்கிறோம் என்பதைநிர்வாகத்துக்கு நாம் உணர்த்த வேண்டியநேரம் இது. நிர்வாகத்தின் அராஜகமான, அநியாயமான நடவடிக்கைகளை எதிர்த்து ஒன்றுபட்டு நிற்கிறோம் என்பதை வெளிப்படுத்த வேண்டியநேரம் இது.

இந்த சுற்றறிக்கை படித்தவுடன் தாங்கள் செய்கிற முதல்வேலையாக, இத்துடன் இணைக்கப்பட்டுள்ள கடிங்களில் தங்கள் கிளைகளில் உள்ளதோழர்கள் கையெழுத்திட்டு, தபாலில் அனுப்பி வைக்கிறகாரியமாக இருக்கட்டும்.

நமது கையெழுத்தின்வலிமையை உணர்த்துவோம்.

(தோழர் சோலைமாணிக்கம் பணிநிறைவு விழாக் காட்சிகளை கீழ்க்கண்ட லிங்க்கை கிளிக்குங்கள்)

தோழர் சோலை மாணிக்கம் பணி நிறைவு விழா காட்சிகள்

தோழமையுடன்

(J.மாதவராஜ்) (T.சங்கரலிங்கம்)

பொதுச்செயலாளர் - PGBEA பொதுச்செயலாளர் - PGBOU

____________________________________________________________________________

கடித நகல்:

From

Name:

Post:

Roll no:

Pandyan Grama Bank

Branch:

The chairman

Pandyan Grama Bank

Administrative Office

Virudhunagar

Respected sir,

I would like to place on record the service rendered by Mr. Solai Manickan as the General Secretary and President of Pandyan Grama Bank Employees Association in the past years which enabled the smooth functioning of the Bank. He was a leader who stood by his ideologies and principles and looked forward for the welfare of the employees and the Bank.

I hereby urge the Management of the Pandyan Grama Bank to permit Mr. Solaimanickam, Vice President of Pandyan Grama Bank Employees Association who is due to retire from service on 30.11.2013, to retire peacefully and with the satisfaction of serving the Management, by withdrawing all the Disciplinary proceedings initiated against him and not to harass him further by initiating any fresh disciplinary proceedings.

Thanking you

Yours faithfully

( )

Date :

Place:

___________________________________________________________________________

தோழர் சோலைமாணிக்கம் பணிநிறைவு விழாக் காட்சிகளை கீழ்க்கண்ட லிங்க்கை கிளிக்குங்கள்:

தோழர் சோலை மாணிக்கம் பணி நிறைவு விழா காட்சிகள்

Joint Forum of All Trade unions Circular 2/2013

2013-11-25T06:57:00.001+05:30

Joint Forum of All Trade Unions in Pandyan Grama Bank
(PGBOU, PGBOA, PGBSEWA, PGBWU, PGBEA)
Virudhunagar

அருமைத்தோழர்களே!

வணக்கம்.

நிர்வாகம்அப்ரைசர்களுக்கு கிளை மாறுதல் செய்திருப்பதுகுறித்து சென்ற சர்க்குலரில் நமதுநிலைபாட்டை தெரியப்படுத்தி இருந்தோம். அதிகாரபூர்வமற்ற முறையில், வாய்மொழியாக உத்தரவுகள் பிறப்பிக்கப்பட்டு இருப்பதை விமர்சித்து இருந்தோம். சட்டத்திற்கும், விதிமுறைகளுக்கும் எதிராக நிர்வாகம் கடைப்பிடித்துவரும் நடைமுறை கண்டனத்திற்குரியது. இதனைஎதிர்த்து, `அப்ரைசர்களுக்கு கிளை மாறுதல்` குறித்துஎழுத்துபூர்வமாக நிர்வாகம் உத்தரவு பிறப்பிக்க வேண்டும், அதுவரை புதிய அப்ரைசர்களை வைத்துநகைக்கடன்கள் வழங்கவேண்டாம் எனவும் அறிவுறுத்தி இருந்தோம். நமது அறைகூவலை ஏற்று, பல கிளைகளில்புதிய அப்ரைசர்களை வைத்து நகைக்கடன்கள் வழங்கப்படவில்லை.

இந்நிலையில், நமது ஐந்து சங்கங்களின் பிரதிநிதிகளும்மீண்டும் 23.11.2013 அன்று நிர்வாகத்தை சந்தித்துபேசினோம். நமது வேண்டுகோளை ஏற்றுவங்கியின் சேர்மன், வங்கியின் நிர்வாகக்குழுவை 29.11.2013 அன்று ஐந்து சங்கங்களின்பிரதிநிதிகளும் சேர்ந்து சந்தித்துப் பேசுவதற்கும், நமது நிலைபாட்டை நிர்வாகக்குழுஉறுப்பினர்களிடம் தெரிவிக்கவும் ஏற்பாடு செய்திருப்பதாக தெரிவித்தார். அதுவரை நிர்வாகம் வாய்மொழி உத்தரவாக தெரிவித்தபடி, வேறு அப்ரைசர்களை வைத்துநகைக்கடன்கள் வழங்க ஒத்துழைக்க வேண்டுமெனவும்கேட்டுக்கொண்டார்.

பல்வேறுவிஷயங்கள் குறித்து விவாதித்த பிறகு, வங்கியின் நலனைகருத்தில் கொண்டு, 29.11.2013 வரையிலும், நமது கிளை மேலாளர்கள்நிர்வாகத்துக்கு எழுத்து பூர்வ்மாக ஒரு கடிதம் எழுதிவிட்டு, வேறு அப்ரைசர்களை வைத்து நகைக்கடன்கள் வழங்குவார்கள்என தெரிவித்திருக்கிறோம். கடிதத்தின் நகல் இத்துடன் இணைக்கப்படுகிறது. இந்தக் கடிதத்தை எழுதிவிட்டு, நமது மேலாளர்கள் 25.11.2013 அன்று முதல்நிர்வாகத்தால் வாய்மொழி உத்தரவுப்படி அனுப்பப்பட்ட அப்ரைசர்களை வைத்து நகைக்கடன்கள் வழங்கலாம்என தெரிவித்துக் கொள்கிறோம்.

29.11.2013 அன்றுநிர்வாகக்குழுவை சந்தித்து நமது ஐந்து சங்கப்பிரதிநிதிகளும், அப்ரைசர்களுக்கு இடமாற்றம் வேண்டாம் என்னும் நம்கருத்தை முன்வைத்துவிவாதிப்பது எனவும் முடிவு செய்திருக்கிறோம். 29.11.2013 நிர்வாகக்குழுவைசந்தித்து பேசியபிறகு, மேற்கொண்டு நாம் என்ன செய்வதுஎன்பதை முடிவு செய்து அறிவிக்கிறோம்.

கடித நகல்:

-------------------------------------------------------------------

From

Manager

Pandyan Grama Bank
_________________ Branch

The Regional Manager

Pandyan Grama Bank

Regional Office

______________________

Sir

Sub: Engagement of Appraisers

As per the oral/Telephonic instructions given by the Regional Office, we engage Sri. , regular appraiser of the branch to appraise the jewels for the jewel loans granted by our branch from 25.11.2013.

This is for your kind information and our records.

Thanking you

Yours faithfully

Branch Manager

Date:

Place

-------------------------------------------------------------------

தோழர்களே!

அப்ரைசர்கள்பிரச்சினையில் நமது ஐந்து சங்கங்களும்இணைந்து செயல்பட்டுக்கொண்டு இருக்கிறோம். இது ஆரம்பமே.

20.11.2013 அன்றுகூடிய நமது சங்கங்கள், இவ்வங்கியில் அனைவரும் சேர்ந்து எதிர்கொள்ள வேண்டிய பல பிரச்சினைகள்இருப்பதை விவாதித்தோம். முக்கியமாக தலைமையலுவலகத்தை புனரமைப்பது, ஒழுங்கு நடவடிக்கைகளில் காணப்படும்ஒழுங்கீனங்கள், பணி ஓய்வு பெறுகிறவர்களிடம்மனிதாபிமானம் இல்லாமல் பணத்தை அபகரிப்பது மற்றும்லீவுகளில் நடத்தப்படும் கெடுபிடிகள் குறித்து ஒருமித்த கருத்து உருவாகியிருக்கிறது. விரைவில்அவைகளை முன்வைத்து நமது ஒற்றுமையால் வென்றெடுப்பதுஎன முடிவு செய்திருக்கிறோம்.

விரிவானசெய்திகளுடனும், முடிவுகளுடனும் விரைவில்.

தோழமையுடன்

GS-PGBOU GS-PGBOA GS-PGB SEWA GS-PGBWU GS-PGBEA

Joint Forum of All Trade unions Circular 1/2013

2013-11-19T23:31:00.000+05:30

இந்த வங்கியில் அலுவலர்களுக்கு, ஊழியர்களுக்கு விரோதமாக இந்த நிர்வாகம் தொடர்ந்து பல வழிகளிலும் செயல்பட்டு வந்தது. இதுகுறித்து சங்கங்களிடையே தனித்தனி பார்வைகள் இருந்தாலும், அவை இந்த நிர்வாகத்தின் முறையற்ற, மனிதாபிமானமற்ற நடைமுறைகளுக்கு எதிராக இருந்தன. முணுமுணுப்பாக இருந்த அதிருப்தியும், விமர்சனங்களும் இப்போது ஒருமித்த கருத்தாக எழுந்திருக்கின்றன. அப்ரைசர்களுக்கு இழைக்கப்பட்ட அநீதியை எதிர்க்கும் கோபத்தில் அனைத்து ஊழியர்களின் நலன்களும், உரிமைகளும் அடங்கியிருக்கின்றன. அதன் ஆரம்பமே இந்த சுற்றறிக்கை:-
______________________________________________________________________________

Joint Forum of All Trade Unions in Pandyan Grama Bank
(PGBOU, PGBOA, PGBSEWA, PGBWU, PGBEA)
Virudhunagar

அருமைத் தோழர்களே!

வணக்கம்.

கடந்த சில தினங்களாக `அப்ரைசர்களுக்கு டிரான்ஸ்பர்` என்னும் செய்தி அடிபட்டுக் கொண்டு இருந்தது. அதுகுறித்து நிர்வாகம் சங்கங்களோடு கலந்தாலோசித்து முடிவெடுக்கும் என நாம் நம்பியிருந்தோம். ஆனால், நிர்வாகம் எதுபற்றியும் கவலைப்படாமல், சிலரது ஆலோசனைகளையும், தவறான வழிகாட்டுதல்களையும் நம்பி, அவசரம் அவசரமாக அப்ரைசர்களை உடனடியாக டிரான்ஸ்பர் செய்வது என முடிவெடுத்தது.

சென்ற சனிக்கிழமை (16.11.2013) அன்று, மண்டல அலுவலகங்களில் இருந்து ஒவ்வொரு கிளைக்கும் போன் செய்து, அவர்களது அப்ரைசரை வேறொரு கிளைக்கு டிரான்ஸ்பர் செய்திருப்பதாகவும், 18.11.2013 அன்று இன்னொரு கிளை அப்ரைசர் அவர்களது கிளைக்கு வருவார்கள் என்றும் வாய்மொழி உத்தரவு பிறப்பிக்கப்பட்டன. அப்ரைசர்கள் தங்கள் வாழ்வும், எதிர்காலமும் கேள்விக்குறியாக்கப்பட்டு விட்டதாய் பரிதவித்தனர்.

எந்தக் கேள்வியும் கேட்காமல், சொல்வதையெல்லாம் கேட்கவேண்டிய அவலநிலையில் நமது அப்ரைசர்கள் தொடர்ந்து இருந்து வருகின்றனர். கிளைகளில் அவர்கள் ஆற்றிவரும் பணிகள் பல்வேறு வழிகளில் வங்கிக்கு உதவிகரமாக இருந்தபோதிலும், அவர்களை இந்த நிர்வாகம் மரியாதையோடு நடத்துவதிலை என்பதற்கு இந்த மாறுதல்கள் இன்னுமோர் உதாரணம். வாய்மொழியாகவே அப்ரைசர்களை பணிநியமனம் செய்வது, பணி நீக்கம் செய்வது, மாறுதல் செய்வது என்பது தவறான நடைமுறை. இது சட்டத்திற்கு புறம்பானது மட்டுமல்ல, பல மோசமான அனுபவங்களுக்கு வழிவகுக்கவே செய்யும். வங்கியின் வணிகமும் பெரிதும் பாதிக்கும்.

இந்த நிலையில், பாண்டியன் கிராம வங்கியில் உள்ள அனைத்து சங்கங்களும் அப்ரைசர்களுக்கு அநீதி இழைக்கப்பட்டு இருக்கிறது என்பதை உணர்ந்து, ஒருமித்த கருத்தோடு இந்த விஷயத்தில் ஒன்றுபட்டு நிற்பது என முடிவுக்கு வந்தன. 18.11.2013 அன்று வங்கியின் சேர்மனை, அனைத்துச் சங்கங்களின் பிரதிநிதிகளும் சந்தித்துப் பேசினர்.

அப்ரைசர்களை இடமாற்றம் செய்வது என்பது நிர்வாகக்குழுவின் முடிவு என்றும், இதை அமல்படுத்துவதைத் தவிர தனக்கு வேறு வழியில்லை, எனவே நிலைமையைப் புரிந்துகொண்டு சங்கங்கள் ஒத்துழைக்க வேண்டும் என சேர்மன் வேண்டுகோள் விடுத்தார்.

நாம் இதனை ஏற்றுக்கொள்ளவில்லை. அனைத்துச் சங்கங்களும் இணைந்து ஒரு மெமோரெண்டம் கொடுக்கிறோம் என்றும், அதனை நிர்வாகக்குழுவில் வைத்து இம்முடிவை மறுபரிசீலனை செய்ய வேண்டுமென்றும், அதுவரை அப்ரைசர்கள் அவரவர்களுக்குரிய கிளைகளிலேயே பணிபுரிய அனுமதிக்க வேண்டும் என்றும் கேட்டுக்கொண்டோம்.

நிர்வாகத்தரப்பில், மெமொரெண்டத்தை நிர்வாகக்குழுவிற்கு அனுப்பி மறுபரிசீலனை செய்ய சம்மதிப்பதாகவும், அதுவரை அப்ரைசர்கள் புதிய கிளைகளில் பணிபுரிய வேண்டும் எனவும் வலியுறுத்திச் சொல்லப்பட்டது.

நிர்வாகத்தின் இந்த நிலைபாட்டிற்கு நமது வருத்தங்களையும், அதிருப்தியையும் தெரிவித்தோம். `எழுத்துபூர்வமான மாறுதல் உத்தரவு இல்லாமல் அப்ரைசர்களை புதிய கிளையில் பணிபுரிய அனுமதிக்க மாட்டோம் எனவும், அதுவரை அப்ரைசர்கள் இல்லாமல் நகைக்கடன்கள் எதுவும் வழங்க மாட்டோம்` என்றும் நமது முடிவைத் தெரிவித்தோம்.

தோழர்களே!

இதுதான் நிலைமை. இன்று அப்ரைசர்களுக்கு இழைக்கப்படும் அநீதியை நாம் வேடிக்கை பார்த்துக்கொண்டு இருந்தால், நாளை இதே நிலைமை நமக்கும் வரும். இங்கு எதற்கும் கேள்வி கேட்க முடியாத அராஜகங்கள் அரங்கேறும். சகலமும் இங்கு வாய்மொழியாகவே அமலாக்கப்படும் என்றால், அதைவிட மோசமான நடைமுறை எதுவும் இருக்க முடியாது. எனவே நம் தோழர்கள் அனைவரும் இவ்விஷயத்தில் ஒன்றுபட்டு உறுதியாக நிற்போம்.

எழுத்துபூர்வமான மாறுதல் உத்தரவு இல்லாமல் அப்ரைசர்களை புதிய கிளைகளில் அனுமதிக்க வேண்டாம். அப்ரைசர்கள் இல்லாமல் நகைக்கடன்கள் அளிக்க வேண்டாம். மேலாளர்களே நகைக்கடன்கள் போட்டு வம்புகளில் மாட்டிக்கொள்ள வேண்டாம் எனவும் எச்சரிக்கிறோம்.

அநீதிகளுக்கு எதிராக நாம் ஒன்றுபட்டு நிற்போம். தவறான நடைமுறைகளை சரிசெய்வோம். நம் அனைவரின் நலன்களையும் தொடர்ந்து முன்னெடுத்துச் செல்லும் ஒரு நல்ல ஆரம்பமாக இது அமையட்டும்.

தோழமையுடன்

GS-PGBOU GS-PGBOA GS-PGB SEWA GS-PGBWU GS-PGBEA

PGBEA - PGBOU circular 4/2013 dated 11.11.2013

2013-11-13T18:26:00.000+05:30

சுற்றறிக்கை: 4/2013 நாள்: 11.11.2013

அருமைத் தோழர்களே!

வணக்கம்.

அகில இந்திய கோரிக்கைகளை முன்வைத்தும், ஸ்தலக் கோரிக்கைகளை முன்வைத்தும், நவம்பர் 22ம் தேதி தலைமையலுவலகம் முன்பாக நடக்க இருக்கும் தர்ணாவை விளக்கியும் மையக் கூட்டங்கள் நடத்தி வருகிறோம். இதுவரை இராமநாதபுரம், திருநெல்வேலி மையங்களில் கூட்டங்கள் நடத்தப்பட்டு இருக்கின்றன. தோழர்கள் எழுச்சியோடு கலந்துகொண்டது மட்டுமில்லாமல், நிர்வாகத்தின் மீதான தங்கள் விமர்சனங்களையும், அதிருப்தியையும் தெரிவித்தனர். நமது சங்கம் மிகுந்த பொறுமையை கடைப்பிடிப்பதாக ஆதங்கத்தை வெளிப்படுத்தினர். அடிக்கடி இதுபோன்ற கூட்டங்கள் நடத்த வேண்டும் எனவும் கோரிக்கைகளை வென்றெடுக்கும் வரை இயக்கங்களை தொடரவேண்டும் எனவும் கருத்துக்களைத் தெரிவித்தனர். அடுத்து காரைக்குடி, மதுரை மையங்களில் கூட்டங்கள் நடக்க இருக்கின்றன.

தற்காலிக ஊழியர்களின் பணிநிரந்தரம் குறித்த வழக்கு:

நமது வங்கியில் பணிபுரியும் தற்காலிக ஊழியர்களை பணிநிரந்தரம் செய்வதற்கு நம் சங்கம் 2008ம் ஆண்டிலிருந்து தொடர்ந்து முயற்சிகள் மேற்கொண்டு வருகிறது என்பது தோழர்களுக்குத் தெரியும். அவர்களுக்கென்று பிரத்யேகமான மாநாடு, போராட்டங்கள், பேரணி, வழக்கு என நாம் இடைவிடாத முயற்சிகள் செய்து வருகிறோம். இந்த நிலையில் லேபர் கோர்ட்டில் நாம் தொடுத்த தொழில் தாவா failure ஆகியதும், மத்திய அரசின் தொழிலாளர் துறைக்கு அனுப்பப்பட்டதும் ஏற்கனவே தெரியப்படுத்தி இருந்தோம். இப்போது மத்திய அரசின் தொழிலாளர் அமைச்சகத்திலிருந்து சென்னையில் டிரியூப்னலுக்கு விசாரித்து தீர்ப்பினை வழங்க அனுப்பப்பட்டு இருக்கிறது. நமது தரப்பில் வழக்கறிஞர்கள் ஆஜராவார்கள். 12.11.2013 அன்று வழக்கு விசாரணைக்கு வருகிறது. விரைவில் நமது தற்காலிக ஊழியர்களுக்கு ஆதரவான தீர்ப்பு வரும். நம்பிக்கையோடிருங்கள்.

தோழர்.சோலைமாணிக்கத்திற்கு வழங்கப்பட இருக்கும் தீர்ப்பும்
நமது சங்கத்தின் மீதான தாக்குதலும்:

நமது சங்கத்தில் பொதுச்செயலாளராகவும், அகில இந்தியத் தலைவர்களில் ஒருவராகவும் இருந்த தோழர்.சோலைமாணிக்கம் இந்த நவம்பர் மாதத்தில் பணி ஓய்வு பெற இருக்கிறார் என்பதை தோழர்களுக்குத் தெரியப்படுத்தி இருந்தோம்.

அவருக்கு 2010ம் ஆண்டு ஒரு சார்ஜ ஷீட் வழங்கப்பட்டு இருந்தது. அப்போதைய நிர்வாகத்தின் அடக்குமுறைகளை எதிர்த்து போராட்ட வெப்பம் பற்றி இருந்த காலக்கட்டத்தில் இந்த சார்ஜ்ஷீட் வழங்கப்பட்டது. 900 நாட்களுக்கு மேலாக லீவு எடுத்துவிட்டார் என்பதுதான் குற்றச்சாட்டு. தோழர்.சோலைமாணிக்கம் இந்த வங்கியில் பணிபுரியும் தொழிலாளர் நலன்களுக்காகவும், அகில இந்திய அளவில் கூட்டங்களில் கலந்து கொண்டதற்காகவும் அதிகமான லீவு எடுத்தார் என்பது இந்த வங்கியில் பணிபுரியும் அனைவருக்கும் தெரியும்.

எனவே அந்த சார்ஜ் ஷீட்டை நிர்வாகத்தின் தொழிற்சங்க விரோதமான நடவடிக்கை என அறிவித்து நாம் அப்போதே நமது எதிர்யுபைத் தெரிவித்தோம். நிர்வாகம் தனது பழிவாங்கும் நடவடிக்கைகளை நிறுத்திக்கொள்ள வேண்டும் எனவும், சார்ஜ் ஷீட்டை வாபஸ் பெற வேண்டும் எனவும் கோரிக்கை வைத்தோம். நிர்வாகத் தலைமை மாறிய பிறகு, ‘என்கொயரி முடித்து வாருங்கள், சுமூகமாக முடித்துக் கொள்ளலாம்' என முந்தைய சேர்மன் அவர்கள் சொன்னார்கள்.

2013 பிப்ரவரியில் என்கொயரி நடந்து முடிந்தது. நிர்வாகத்தரப்பில் வாதங்கள் முன்வைக்க மூன்று மாதங்களுக்கும் மேல் கால அவகாசம் எடுக்கப்பட்டது. நாம் நம் தரப்பில் உடனடியாக வாதங்களை சமர்ப்பித்தோம். பிறகு என்கொயரி ஆபிசர் தனது findingsஐ செப்டம்பர் மாதம்தான் சமர்ப்பித்தார். அந்த findings-ஐ அப்படியே குற்றம் சாட்டப்பட்டவருக்கு அனுப்பி கருத்துக்கள் கேட்க வேண்டியதுதான் AIVDயின் பணி. இதற்கு AIVD ஒரு மாதம் தேவையில்லாமல் கால அவகாசம் எடுத்துக்கொண்டது. 18.10.2013 நமக்கு findings கொடுக்கப்பட்டது. நாம் உடனடியாக அதற்கு பதிலளித்தோம். அதன் மீது show cause notice கொடுப்பதற்கும் நாம் இரண்டு முறை சேர்மனிடம் பேச வேண்டி இருந்தது.

இந்த நிலையில், இன்று 11.11.2013 அன்று தோழர் சோலை மாணிக்கம் மீதான குற்றச்சாட்டிற்கு GM(A) கையெழுத்திட்டு show cause notice அனுப்பப்பட்டு இருக்கிறது. அதில் 'உங்களுக்கு ஏன், இரண்டு வருடத்திற்கு ஒரு stage Reduce செய்யும்' தண்டனை வழங்கக் கூடாது என விளக்கம் கேட்கப்பட்டு இருக்கிறது. இதற்கு பதில் அளித்த பிறகு Final order வழங்கப்படும்.

தோழர்களே!

நிர்வாகத்தின் இந்த நடவடிக்கை நாம் எதிர்பாராதது. சுமூகமாக முடித்து விடுவோம் என சொன்ன நிர்வாகத்தின் வார்த்தைகளுக்கு எதிரானது. இந்த வங்கியில் தோழர்.சோலைமாணிக்கத்தை விட அதிகமாக லீவு எடுத்தவர்களுக்கு எந்த தண்டனையும் வழங்காமல், பிரமோஷன் கொடுத்ததும் நடந்திருக்கிறது. அதிகமாக லீவு எடுத்த பலருக்கும் எந்த தண்டனையும் இல்லாமல் சுமூகமாக நிர்வாகம் முடித்திருக்கிறது. இதையெல்லாம் பார்க்கும் போது, முற்றிலும் தொழிற்சங்க நடவடிக்கைகளுக்காகவே லீவு எடுத்த தோழர்.சோலை மாணிக்கத்திற்கு வழங்கப்பட இருக்கும் இந்த தண்டனையை நாம் எப்படி புரிந்து கொள்வது? இது நமது தொழிற்சங்கத்தின் மீதான தாக்குதலாகவே கருதுகிறோம். இன்னும் 2006ம் வருடத்திலிருந்து தோழர்.சோலைமாணிக்கத்திற்கு லீவு regularize செய்யப்படவில்லை. இன்கிரிமெண்ட்டும் வழங்கப்படவில்லை. அதன்பின்னரே Retirement benefitகள் கணக்கிட முடியும்.

எனவே நமது எதிர்ப்பை உடனடியாகத் தெரிவித்து தலைமையலுவலகத்தின் முன்பு, நமது போராட்ங்ககளைத் தொடர வேண்டும் என வேகத்தோடு தோழர்கள் தங்கள் ஆத்திரத்தை வெளிப்படுத்திக் கொண்டு இருக்கிறார்கள்.

இந்த நிலையில் வங்கி சேர்மன் அவர்கள். அமைதி காக்கும்படியும், தோழர்.சோலைமாணிக்கம் மீதான நடவடிக்கையை சுமூகமாக முடித்து விடலாம் என தான் நம்புவதாகவும் சொல்லியிருக்கிறார்.

நாமும் அதனையே விரும்புகிறோம்.

நிர்வாகத்துடன் பேசிவிட்டு அடுத்தக் கட்ட நடவடிக்கைகளை தீர்மானிப்போம். மீண்டும் விரைவில் சந்திப்போம்.

தோழமையுடன்

(J.மாதவராஜ்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

PGBEA - PGBOU circular 3/2013 dated 31.10.2013

2013-11-13T18:21:00.002+05:30

அருமைத் தோழரே!

வணக்கம்..

நமது அகில இந்திய சங்கம் AIRRBEAவின் Working Committee Meeting 26.10.2013 அன்று கோழிக்கோட்டில் நடந்தது. AIRRBEAவின் joint secretary தோழர்.மாதவராஜ் இந்த கூட்டத்தில் கலந்து கொண்டார்.

கிராம வங்கிகளின் எதிர்காலத்தையே சிதைத்து தனியார்மயமாக்கும் விதமாக மத்திய அரசு கொண்டு வந்திருக்கும் RRBs Act Amendment Bill, 2013 எந்த நேரமும் பராளுமன்றத்தில் நிறைவேற்றப்படலாம் என்னும் ஆபத்து நம்மை சூழ்ந்திருக்கிறது. இந்த தருணத்தில் கிராம வங்கி ஊழியர்களின், அலுவலர்களின் முக்கிய கோரிக்கைகளை முன்வைத்து இயக்கம் நடத்துவதென முடிவுகள் எடுக்கப்பட்டு இருக்கின்றன.

கோரிக்கைகள்:

1. Scrap RRBs Act Amendment Bill, 2013 aimed at privatization of Gramin Banks.

2. Implement Pension Parity and agreement dated 29-10-1993 in RRBs.

3. Establish State Level Rural Banks, one for NE States, under NRBI

4. Regularize all Part Time/Casual/Daily Waged workers.

5. Allow participation of Workman/Officers in the Board of RRBs.

6. Recruit adequate staff, promote staff in time and effect massive branch expansion.

7. Allow Special Leave to T.U. Leadership at par with those in Banking Industry.

8. Relax service period for promotion of all cadres of staff including Office Attendant at par with Banking Industry.

இயக்கங்கள்:

1. 22-11-2013· அன்று தலைமையலுவலகங்களின் முன்பு தர்ணா

2. 29.11.2013 அன்று நபார்டு/ ஸ்பான்ஸர் வங்கிக்கு சங்கங்களின் சார்பில் டெபுடேஷன்

3. 10-12.2013 டெல்லியில் தர்ணா

4.RRB Act Amendmentஐ பாராளுமன்றத்தில் கொண்டு வரும் பட்சத்தில் உடனடியாக Flash Strike.

29.10.2013 அன்று நமது சங்க அலுவலகத்தில் கூடிய நமது இரு சங்கங்களின் சப்கமிட்டிகளும் அகில இந்திய சங்கத்தின் முடிவினை அமல்படுத்துவது என்றும், இயக்கங்களை வெற்றிகரமாக நடத்துவது என்றும் தீர்மானித்திருக்கின்றன. அதன்படி, 22.11.2013அன்று நமது பாண்டியன் கிராம வங்கி தலைமையலுவலகம் முன்பாக தர்ணா நடத்துவது என்று முடிவு செய்து இருக்கின்றன. கோரிக்கைகளையும், இயகங்களையும் விளக்கி நான்கு மையங்களில் பிரச்சாரக் கூட்டங்கள் நடத்துவதெனவும் திட்டமிடப்பட்டு இருக்கின்றன.

1. 6.11.2013 - இராமநாதபுரம்

2. 9.11.2013 - திருநெல்வேலி

3. 12.11.2013 - காரைக்குடி

4. 16.11.2013 - மதுரை

இக்கூட்டங்களுக்கான அழைப்புகள் பிரத்யேகமாக தோழர்களுக்குத் தெரிவிக்கப்படும். தோழர்கள் திரளாகக் கலந்துகொள்ள வேண்டுமென அழைக்கிறோம்.

நமதி வங்கியில் நிலவும் பிரச்சினைகளும், எழுந்துள்ள கோரிக்கைகளும்:

வங்கியில் தொழில் அமைதியைப் பேணும் விதமகவும், வங்கியின் வளர்ச்சியை கவனத்தில் கொள்ளும் விதமகவும் சேர்மன் நம்மோடு பேசுகிறார். அவரது எண்ணங்கள் புரிகின்றன. ஆனால் நிலைமைகளும், நடக்கும் விஷயங்களும் அதற்கு நேர்மாறாக இருக்கின்றன. ஊழியர்கள், அலுவலர்களின் மத்தியில் கடும் அதிருப்தியும், மன உளைச்சல்களுமே நாளுக்கு நாள் அதிகரித்துக்கொண்டு இருக்கின்றன. குறைந்த பட்ச மனிதாபிமானமும், நேர்மைத் திறனும் அற்ற நிகழ்ச்சிகளும் செய்திகளையுமே தொடர்ந்து கேள்விப்பட வேண்டியிருக்கிறது.

இந்த வங்கியில் ஒழுங்கு நடவடிக்கைகள் என்ற பெயரில் தொடரும் நிர்வாக வன்முறைகள் எல்லைகளை மீறிகொண்டு இருகிறது. ஓய்வு பெறுவதற்கு சில நாட்களுக்கு முன்பு குற்றப்பத்திரிகைகள் அளிக்கப்பட்டு ஓய்வுகால சலுகைகளை இழந்து வாழ்க்கையே பெரும் அவலமகிப்போனவர்களின் எண்ணிக்கை கூடிக்கொண்டே இருக்கிறது. சஸ்பென்ஷன்கள் செய்யப்பட்டு பல மாதங்களாகியும் குற்றப்பத்திரிக்கைகள் அளிக்கப்படாமல் அலைக்கழிக்கப்படுபவர்களின் எண்ணிக்கையும் ஒரு பக்கம் நீள்கிறது. குற்றப்பத்திரிக்கைகள் அளிக்கப்பட்டு, என்கொயரி நடந்து முடிந்தாலும் உரிய நேரத்தில் findings அளிக்கப்படாமல் வைத்திருப்பது தொடர்கிறது. findings அளிக்கப்பட்டாலும், அதன் மேல் நடவடிக்கைகள் உடனடியாக எடுக்காமல் இழுத்தடிப்பது வாடிக்கையாகி இருக்கிறது. அப்படி அளிக்கப்படும் findings பெரும்பாலும் நேர்மைத்திறனற்று Enquiry Officerகளால் ‘proved' என்றுதான் முடிவு எழுதப்படும். அத்திப் பூத்தாற்போல், நேர்மைத் திறனோடு ஒரு என்கொயரி ஆபிஸர் இங்கு ‘not proved' என எழுதியிருக்கிறார். ஓய்வு பெற்ற தோழர் MLR மோகன் மீது நடத்தப்பட்ட ஒழுங்கு நடவடிக்கைகளில் இப்படி ஒரு நியாயமானத் தீர்ப்பு கிடைத்திருக்கிறது. ஆனால், என்கொயரி ஆபிஸரின் findingsஐ தான் ஏற்றுக்கொள்ளவில்லை என்றும், அந்த குற்றங்கள் அனைத்தும் 'not proved' என்று Disciplinary Authority தீர்ப்பினை திருத்தி எழுதுகிறார். அப்படியென்றால் இந்த என்கொயரி எதற்கு? இவ்வளவு காலக் கொடுமை எதற்கு? இந்தத் தீர்ப்பை அப்போதே கொடுத்து தோழர் MLR.மோகன் அவர்களை தண்டித்திருக்க வேண்டியதுதானே. தாங்கள் எழுப்பிய குற்றங்கள் எப்படியானாலும் நிருபிக்கப்பட வேண்டும் என்னும் திமிரும், ஆணவமும் கொண்ட AIVDயின் பெருமூளைக்கரர்களால் நியாயங்களும், நீதிகளும் இப்படி தொடர்ந்து கொன்று குவிக்கப்பட்டால் ஊழியர்களும், அலுவலர்களும் எப்படி நிம்மதியாக பணிபுரிவார்கள்? வங்கி எப்படி வளரும்?

அடுத்ததாக, ஊழியர்கள் பிரசினைகளில் நிர்வாகம் கையாளும் மிதமிஞ்சிய கால தாமதம் சகிக்க முடியவில்லை. இங்கு பணிபுரிபவர்களது நலனை ஒரு பொருட்டாகவே இந்த நிர்வாகம் மதிக்கவில்லை என்றேத் தோன்றுகிறது. கடந்த போர்டு மீட்டிங்கில் முடிவு செய்யப்பட்ட Staff Housing Loan மற்றும் Staff Vehicle Loan சர்க்குலர்கள் இன்னும் வெளியிடப்படவில்லை. புதிதாக பணிக்குச் சேர்ந்தவர்களில் ஏறத்தாழ இன்னும் 20 பேருக்கு ஒரிஜினல் சர்டிபிகேட்கள் கொடுக்கப்படவில்லை. அதுபோல அவர்களின் graduation increment-ற்கு நாம் சொன்ன வாதங்களின் அடிப்படையில், நபார்டுக்கு சாதகமான கடிதம் எழுதுவதாகச் சொன்னது. இன்று வரை எழுதப்படவில்லை. Lightining strike சென்ற 65 தோழர்களுக்கு ஒப்புக்கொண்டபடி இன்னும் leave regularise செய்யப்படவில்லை. பெருமாள்மலை எனும் ஒரே ஒரு கிளைகு hill and Fuel allowance வழங்கப்படவில்லை. இப்படி எவ்வளவோ இருகின்றன. அனைத்தையும் கோரிக்கைகளாக முன்வைத்து இயக்கம் நடத்துவது நமது இரு சங்கங்களின் சப்கமிட்டிகளும் முடிவு செய்திருக்கின்றன.

1.Revamping of Administrative Office

2. Time Bound and Honest Disciplinary Actions

3.Two Graduate increments to Newly recruited Office Asistantsas per Bi-partite settlement

4. Transfer Policy

5. Defining of Duties and Responsiblities of each cadre

6.Regularise Temporary mesengers

7. Posting Of Officers as per categaorisation of Branches

8. Regularisation of Leave to all

9.Staff Housing Loan and Staff Vehicle Loan on par with sponsor Bank

10.Following allowances on par with sponsor Bank:

a) Transport allowance b) House Maintanence Allowance c) Petrol Allowance d) Boarding and Lodging Facilities e) Compensatory Allowance for Working in Holidays f) Hill and Fuel Allowance

11. LFC/LTC on Par with Sponsor Bank

12.Medical Reimbursement as per settlements in Banking Industry

13. Staff Medical Insurance should be with Public Sector Insurance Company only

14.Enhancement of Local charges, Sweeping charges

15.Sanction of Joining Time and Lumpsum for probationers during Transfers

16. Activating SC/ST Cell and Women Cell

17. TA to Defence Representatives

18 Compiling of all neccesary Old circulars for the reference of New Branches and New Staff

19. Replacement of all Old Computers, Printers, Generators, Counting Machines

20. Seperate Toilets for Women Staff

21. Air conditioning of All Branches

22.Medical Reimbursement to Retired Staff

23. Repayment of recoveries made from Retired Staff

24.Auto Credit System of Salary from Head Office

25. Introduce Technogy updation as per comercial Banks in handling NRGES accounts

கோஷங்களையும், குரல்களையும் இந்த கோரிக்கைகளுக்காகவும் எழுப்ப வேண்டிய அவசியம் ஏற்பட்டு இருக்கிறது. தலைமையலுவலகத்தின் முன் நவம்பர் 22ம் தேதி நாம் நடத்த இருக்கிற தர்ணவில், அகில இந்திய கோரிக்கைகளோடு இந்த கோரிக்கைகளையும் முன்வைப்பது என தீர்மானித்திருக்கிறோம்.

பாதை தெரிகிறது.....

முன்னேறிச் செல்வோம்...

தோழமையுடன்

PGBEA - PGBOU circular 2/2013 dated 23.10.2013

2013-10-23T19:31:00.000+05:30

சுற்றறிக்கை: 2/2013 நாள்: 23.10.2013

அருமைத் தோழரே!

வணக்கம். டிரான்ஸ்பர்கள் குறித்து சென்ற சர்க்குலரில் குறிப்பிட்டு இருந்தோம். பாதிப்புகளை சரிசெய்ய வேண்டுமென்று நம் இரு சங்கங்களின் சார்பில் நிர்வாகத்துடன் பேச்சுவார்த்தைகள் நடத்தினோம். தொடர்ந்து நிர்வாகம் அடுத்த டிரான்ஸ்பர் லிஸ்ட்டை வெளியிட்டது. ஆனாலும் பாதிப்புகள் இருக்கவேச் செய்கின்றன. நம் உறுப்பினர்களுக்கு ஓரளவுக்கு சாதகமான டிரான்ஸ்பர்கள் வாங்க முடிந்திருந்தாலும், குறிப்பிட்ட சிலருக்கு நியாயம் கிடைக்கவில்லை என்பதை முன்வைத்தோம். பொது மாறுதல்களில் அனைவரையும் திருப்தி படுத்த முடியாது என்று நிர்வாகம் சொல்லியது. ஆனால் நிர்வாகம் கையாண்ட குழப்பமான உத்திகளும், நியதிகளுமே டிரான்ஸ்பர்களில் நடந்த குளறுபடிகளுக்கும் காரணம் என்பதை நாம் வலியுறுத்தினோம். ஒரு நிலையான, தொலை நோக்குப் பார்வை நிர்வாகத்திடம் இல்லாததே பாரபட்சங்களுக்கும், பாதிப்புகளுக்கும் காரணமாகிறது என்பதையும் எடுத்துரைத்தோம்.

இப்போது அந்த பாதிப்புகளை சரிசெய்ய வழியில்லை என்பதையும், வருகிற புதிய பணி நியமனங்களையொட்டி 2014ம் ஆண்டு ஏப்ரலில் பாதிப்புகள் அனைத்தும் சரிசெய்யப்படும் என நிர்வாகம் தெரிவித்தது. நாம் அதற்கு ஒப்புக்கொண்டு இருக்கிறோம். அதே வேளையில், நிர்வாகம் அவ்வப்போது ஒன்று, இரண்டு என்று டிரான்ஸ்பர்கள் போட்டுக்கொண்டு இருப்பதுவும் நல்லதல்ல, அதுவும் நிறுத்தப்பட வேண்டும் என தெரிவித்தோம். புதிய கிளைகள் திறப்பதையொட்டி டிரான்ஸ்பர்கள் போடுவதை தவிர்க்க முடியாது என நிர்வாகம் தெரிவித்திருக்கிறது.

நமது அற்புதமான தோழர்.சோலை மாணிக்கம் வருகிற நவம்பர் 2013ல் பணி ஓய்வு பெறுகிறார். 30 வருடங்களுக்கும் மேலாக இங்கே தொழிற்சங்க இயக்கத்தோடு தன்னை இணைத்துக் கொண்டு இருந்தவர். தொழிற்சங்க நடவடிக்கைகளுக்காகவே அவர் மீது நிர்வாகம் தொடுத்த பல்வேறு பழிவாங்கும் நடவடிக்கைகளை மீறி இன்று வரை உறுதியாக நிற்பவர். பாண்டியன் கிராம வங்கி ஊழியர் சங்கத்தின் முக்கிய பொறுப்புகளிலும், மாநில பொதுச் செயலாளராகவும், அகில இந்திய உதவித் தலைவராகவும் இருந்து தன் நாட்களை பெரும்பாலும் தொழிற்சங்கப் பணிகளுக்காகவே அர்ப்பணித்தவர். நமது வங்கியில் தொழிற்சங்க உணர்வையும், உரிமைகளையும் நிலைநாட்டிட அவர் ஆற்றிய பங்கு மகத்தானது. காலங்களை நினைவு படுத்தும் விதமாகவும், அவருக்குரிய மரியாதையை செலுத்தும் விதமாகவும் PGBEAவும், PGBOUவும் இணைந்து நவம்பர் 24ம் தேதி அவருக்கு பணி நிறைவு விழா ஒன்றை மிகச் சிறப்பாக நடத்துவது என முடிவு செய்திருக்கின்றன. முக்கிய தொழிற்சங்கத் தலைவர்கள், முற்போக்கு இயக்கத்தைச் சார்ந்தவர்கள், வங்கியின் உயரதிகாரிகள் மற்றும் இந்த வங்கியில் பணிபுரியும் நாம் அனைவரும் கலந்துகொள்ளும் ஒரு விசேஷமாக அவ்விழா இருக்க வேண்டும் என கருதுகிறோம். முறையான அழைப்பிதழ்கள் அனைவருக்கும் அனுப்பி வைக்கப்படும். வாருங்கள் என முன்கூட்டியே அழைக்கிறோம்.

இந்த விழாவின் போது, மலர் (விளம்பரம் இல்லாமல்) ஒன்று வெளியிடவும் உத்தேசித்திருக்கிறோம். தோழர் சோலைமாணிக்கத்துடன் தாங்கள் இருக்கும் புகைப்படம், அவர் பற்றிய தங்கள் சிந்தனைகளோ, நினைவுக் குறிப்புகளோ, அனுபவமோ அல்லது சுவாரசியமான நிகழ்வுகளோ இருப்பின் எழுதி `தோழர்.மாதவராஜ், பாண்டியன் கிராம வங்கி, சூலக்கரை மேடு, விருதுநகர் மாவட்டம்` என்னும் முகவரிக்கு அனுப்புங்கள். 10.11.2013க்குள் தாங்கள் அனுப்பி வைத்தால், அந்த மலரில் வெளியிட இயலும்.

இவ்விழாவிற்கும், மலர் வெளியிடவும் ஒரு லட்சத்துக்கும் மேலாக செலவாகும். எனவே விருதுநகரில் உள்ள PGBEA சங்கக் கணக்கு 5002-க்கு தோழர்கள் ஒவ்வொருவரும் தங்கள் பங்களிப்பாக ரூ.300/- அனுப்பி வைக்குமாறு வேண்டுகிறோம்.

தோழமையுடன்

(J.மாதவராஜ்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

PGBEA - PGBOU circular 1/2013 dated 07.10.2013

2013-10-08T06:08:00.000+05:30

சுற்றறிக்கை: 1/2013 நாள்: 07.10.2013

அருமைத் தோழர்களே!

வணக்கம்.

ஒரு சிறிய கால அவகாசத்துக்குப் பின்னர் இந்த சுற்றறிக்கை எழுதப்படுகிறது. இந்த இடைப்பட்ட காலத்தில் இரண்டு மிக முக்கிய நிகழ்வுகள் நடந்திருக்கின்றன. ஒன்று, கல்கத்தாவில் நடைபெற்ற நமது அகில இந்திய மாநாடு. இன்னொன்று விழுப்புரத்தில் நடைபெற்ற நமது மாநில மாநாடு.

அகில இந்திய மாநாடு:

நமது அகில இந்திய சங்கம் AIRRBEAவின் மாநாடு, செப்டம்பர் 7, 8, 9 தேதிகளில் கல்கத்தாவில் நடைபெற்றது. மொத்தம் 1400 பிரதிநிதிகள் கலந்துகொண்ட மாநாட்டில் தமிழ்நாட்டிலிருந்து 28 தோழர்கள் கலந்துகொண்டனர். மறைந்த நமது மகத்தான தலைவர் தோழர்.திலிப்குமார் முகர்ஜி அவர்களின் நினைவைப் போற்றும் விதமாகவும், அவரது கனவுகளையும் லட்சியங்களையும் நெஞ்சில் ஏந்தி நமது பயணத்தைத் தொடரும் விதமாகவும் இந்த மாநாடு அமைந்திருந்தது. நமது சங்கங்களிலிருந்து தோழர்கள் அறிவுடை நம்பி (PGBOU), ராஜா கார்த்திகேயன் (PGBEA) ஆகியோர் பிரதிநிதிகள் விவாதங்களில் கலந்துகொண்டனர். புதிதாக பணிக்குச் சேரும் Office Assistantகளுக்கு இரண்டு graduation increment கொடுக்கப்படாமல் நிறுத்தி வைத்திருப்பது, தற்காலிக ஊழியர்களின் பணி நிரந்தரம், Office Assistant (multi purpose), Office Attendant (multi purpose) என designate செய்து இருப்பதற்கு எதிராகவும், ஒழுங்கு நடவடிக்கைகளில் CVC தலையீடுகள் பற்றியும், ஓய்வு பெறும் வேளையில் ஒழுங்கு நடவடிக்கைகள் எடுத்து ஓய்வு காலச் சலுகைகளை நிறுத்தி வைப்பது குறித்தும் அகில இந்திய சங்கத்தின் கவனத்திற்கு கொண்டு சென்றோம்.

உற்சாகமும், எழுச்சியும் மிக்க இந்த மாநாட்டின் இறுதியில் Presidentஆக தோழர்.ராஜீவன் (கேரளா), Secretary General ஆக தோழர்.சையதுகான் (மே.வங்காளம்) தேர்ந்தெடுக்கப்பட்டு இருக்கின்றனர். தமிழ்நாட்டிலிருந்து தோழர்.மாதவராஜ் (pandyan GBEA) Joint Secretary ஆகவும், தோழர்.T.கிருஷ்ணன் (Pandyan GBOU) central committee memberஆகவும், தோழர்.ஆனந்த் (Pallavan GBEU) Central committee memberஆகவும் தேர்ந்தெடுக்கப்பட்டு இருக்கின்றனர். All India women sub committeeக்கு தோழர்.வரலட்சுமி (எட்டையபுரம்) அவர்களும் General council memberகளாக தோழர்கள் அறிவுடை நம்பியும், ராஜா கார்த்திகேயனும், தேர்ந்தெடுக்கப்பட்டு இருக்கின்றனர்.

மாநில மாநாடு:

AIRRBEA TN and Puduvai - யின் மாநில மாநாடு விழுப்புரத்தில் அக்டோபர் 2ம் தேதி நடந்து முடிந்திருக்கிறது. மொத்தம் 150 பிரதிநிதிகள் கலந்துகொண்ட இந்த மாநாட்டிற்கு தோழர்.பிச்சைமுத்து தலைமை தாங்கினார். தோழர்.சோலைமாணிக்கம் வரவேற்றுப் பேசினார். BEFI -TN மாநிலச் செயலாளர் தோழர். சி.பி.கிருஷ்ணன் துவக்கி வைத்து, வங்கித்துறை எதிர்கொண்டு இருக்கும் சவால்களை எடுத்துரைத்தார். NFRRBOவின் பொதுச்செயலாளர் தோழர்.வெங்கடேஸ்வர ரெட்டி தனது சிறப்புரையில், கிராம வங்கிகளின் amalgamation, pension, promotions, recruitment, graduation increments to new recruits குறித்து விளக்கமாகப் பேசினார்.

தோழர்.T.கிருஷ்ணன் (PGBOU) தலைவராகவும், தோழர்.மாதவராஜ் (PGBEA) பொதுச்செயலாளராகவும், தோழர்.சங்கரலிங்கம் (PGBOU) பொருளாளராகவும், தோழர்.சுரேஷ் (Pallavan GBEU) joint secretary ஆகவும் தேர்ந்தெடுக்கப்பட்டு இருக்கின்றனர்.

ஐ.ஓ.பி பொதுமேலாளரோடு பேச்சு வார்த்தை:

அக்டோபர் 3ம் தேதி சென்னையில், நமது ஸ்பான்ஸர் வங்கியில், கிராம வங்கிகளை கவனிக்கும் பொறுப்பிலிருக்கும் பொது மேலாளர் திரு.பாலச்சந்தர் அவர்களை, NFRRBO பொதுச்செயலாளர் தோழர்.வெங்கடேஸ்வரரெட்டி அவர்களோடு தோழர்கள் சோலைமாணிக்கமும், மாதவராஜும் சென்று சந்தித்தனர். ஐ.ஓ.பி பொதுமேலாளர் அவர்கள், ஆந்திராவில் தோழர்.வெங்கடேஸ்வரரெட்டி பணிபுரிந்து கொண்டு இருக்கும் பகுதியிலேயே பல வருடங்கள் பணிபுரிந்து இருந்ததால் இந்த சந்திப்பு நல்ல அறிமுகமாகவும், அர்த்தமுள்ளதாகவும் இருந்தது. நமது வங்கியில் நிலவும் முக்கியப் பிரச்சினைகள் குறித்து விவாதித்தோம். புதிய தோழர்களுக்கு இரண்டு கிராஜுவேட் இன்கிரிமெண்ட்கள், reimbursement of medical expenses, transfer Policy, mounting Disciplinary proceedings, inhuman middle management in PGB என முக்கிய விஷயங்கள் குறித்துப் பேசப்பட்டது. சாதமான சூழல்கள் ஏற்படும் என்கிற நம்பிக்கை தந்த சந்திப்பு இது.

டிரான்ஸ்பர்கள்:

முதலில் ஒன்றைச் சொல்ல வேண்டும். டிரான்ஸ்பர்களில் இந்த நிர்வாகம் கடைப்பிடிக்கும் நடைமுறைகள் அருவருப்பாகவும், அவமதிப்பாகவும் இருக்கின்றன. நடுராத்திரியில் போடுவது, விடிகாலையில் போடுவது என அடிக்கும் லூட்டிகள் எரிச்சலையேத் தருகின்றன. ஒரெயொரு டிரான்ஸ்பர், அவ்வப்போது இரண்டு டிரான்ஸ்பர்கள், திடிரென ஆறு டிரான்ஸ்பர்கள் என போடுவது ஒருபுறம். ‘இதோ மொத்தமாக போடுகிறோம், இன்று மொத்தமாகப் போடுகிறோம்' என நாட்கள் கடத்தப்படுவது இன்னொரு புறம். மேலும் டிரான்ஸ்பர்களில் முறையான நியதிகளும், வரையறைகளும் கடைப்பிடிக்கப்படவில்லை. ஒரு முறையான பாலிசி இல்லாததன் விளைவே இது.

ஆபிஸர்கள் டிரான்ஸ்பர்களில் பாதிப்புகள் சரிசெய்யப்படாதது மட்டுமின்றி, performanceக்கும் மதிப்பில்லாமல் இருக்கிறது. வங்கியின் வளர்ச்சியை கவனத்தில் கொண்டும், ஆபிசர்களை உற்சாகப்படுத்தும் விதமாகவும் இந்த டிரான்ஸ்பர்கள் இல்லை என்பதை தெளிவாகச் சொல்லிக் கொள்கிறோம். டிரான்ஸ்பர்கள் என்ற பேரில் புதிதாக பணிக்குச் சேர்ந்த இளம் தோழர்களை பந்தாடுவதும், பயமுறுத்துவதும் எதிர்மறை விளைவுகளையே ஏற்படுத்தும்.

மிகப்பெரும் கால தாமதத்திற்குப் பிறகு போடப்பட்ட கிளரிக்கல் டிரான்ஸ்பர்களிலும் பாதிப்புகள் பாதிப்புகளாகவே நீடிக்கின்றன. கைக்குழந்தைகளோடு பல பெண் தோழர்கள் தொலைதூரங்களில் அவதிப்படுகின்றனர். ஒவ்வொரு நாட்களும் அவர்களுக்கு துயரமாகவும், கொடுமையாகவும் இருக்கின்றன. அவர்களது வலியும் வேதனையும் நிர்வாகத்துக்கு எட்டவில்லை. பதவி உயர்வு பெற்ற கடைநிலைத் தோழர்கள், பணி ஓய்வு பெற இருக்கும் தோழர்கள், மருத்துவ ரீதியாக பாதிக்கப்பட்ட தோழர்கள் என பலர் தொலைதூரங்களில் அவதிப்பட்டுக்கொண்டு இருக்கின்றனர். அவர்களுக்கு சாதகமான டிரான்ஸ்பர்கள் வழங்கப்பட வேண்டும் என நாம் வலியுறுத்தினோம். சங்கங்களிடம் லிஸ்ட் வாங்கி, இன்று வரை டிரான்ஸ்பர்களை போடாமல் இழுத்தடித்துக் கொண்டே இருக்கிறது நிர்வாகம்.

காத்திருக்க வைத்து, பிரச்சனைகளை திசைதிருப்பும் தந்திரமாக டிரான்ஸ்பர்களை நிர்வாகம் கையாளுவதாகவே நாம் கருதுகிறோம்.

அசையாத நிர்வாகமும், அலட்சியமான அதன் போக்குகளும்:

அதிக அளவில் இந்தக் காலக்கட்டத்தில் பதவி உயர்வுகள் நடைபெற்று இருந்தன. ஓரளவுக்கு நியாயமாகவும் அந்தப் பதவி உயர்வுகள் இருந்தன. நிர்வாகத்தின் உயர் பொறுப்பிலிருப்பவர்கள் தொழிற்சங்கப் பிரதிநிதிகளோடு ஒரு இணக்கமான அணுகுமுறையை பேச்சுவார்த்தைகளில் காட்டினர். இவைகள் நல்ல சமிக்ஞைகளாய் தென்பட்டன. ஊழியர்கள் நலன்களில் அக்கறையும், வங்கியின் வளர்ச்சியில் ஆர்வமும் ஏற்படும் என நம்பினோம். பிரச்சினைகளை தீர்ப்பதில், கோரிக்கைகளை நிறைவேற்றுவதில் கால தாமதமும், முரண்பாடுகளும் நீடித்த போதிலும், பேச்சுவார்த்தைகளின் மூலம் சரி செய்துகொள்ள முடியும் என பொறுமையை கடைபிடித்தோம். ஆனால் நிலைமைகள் வேறாக இருக்கின்றன.

பெருமாள் மலை என்னும் ஒரே ஒரு கிளைக்கு hill and fuel allowance-ஐ நாம் வருடக்கணக்கில் கேட்டு வருகிறோம். சில மாதங்களுக்கு முன்பு ஒப்புக்கொண்ட நிர்வாகம் இன்னும் நிறைவேற்றவில்லை. நீண்ட காலமாக நாம் கோரிக்கை வைத்து பேசி வந்த - ஸ்பான்ஸர் வங்கியில் உள்ளதுபோல் Staff Housing Loanம், Staff vehicle loanம் உயர்த்துவதற்கு வங்கியின் நிர்வாகக்குழுவில் ஒப்புக்கொள்ளப்பட்டு மாதங்கள் ஆகின்றன. இன்றுவரை சர்க்குலர்கள் போடப்படவில்லை. Transport allowance இப்போது ரூ.200/-ஆக வழங்கப்பட்டு வருகிறது. வணிக வங்கியில் உள்ளது போல் ரூ.275/-ஆக வழங்கப்பட வேண்டும் என நாம் பேசினோம். நிர்வாகம் ஒப்புக்கொண்டது. ஆனால் இன்னும் நிறைவேற்றப்படவில்லை. இப்படிச் சொல்லிக்கொண்டே போகலாம்.

லீவில் செல்பவர்களைக் கண்டால் இந்த நிர்வாகத்துக்கு வெறுப்பும், கோபமும்தான் வருகிறது. வேண்டுமென்றே லீவில் செல்கிறார்கள் என்றும், அடிக்கடி லீவில் செல்கிறார்கள் என்றும், முக்கியமான நேரத்தில் லீவில் செல்கிறார்கள் என்றும் கருகிறது நிர்வாகம். அவர்கள் எடுக்கும் லீவுக்குத் தடை போடுகிறது அல்லது சம்பளப்படித்தம் செய்கிறது. அப்படி சம்பளப்பிடித்தம் செய்யப்பட்டவர்களின் பட்டியல் மிக நீளமானது. அதுகுறித்து சங்கங்கள் தொடர்ந்து பேசி வந்த போதிலும், நிர்வாகம் இழுத்தடித்துக் கொண்டே இருக்கிறது.

அதுபோல் எந்த லீவும் உடனடியாக சாங்ஷன் செய்யப்படுவதில்லை. ஒரு மாதத்துக்கு முன்னரே விண்ணப்பம் செய்திருந்தாலும், கடைசி நாள் வரைக்கும் அந்த லீவு சாங்க்ஷன் செய்யப்படுமா என்று தெரியாமல் ஊழியர்களும், அலுவலர்களும் பதற்றத்தோடும் பரிதவிப்போடும் இருக்க வேண்டும். பிறகு சங்கத் தலைவர்கள் தலையிட்டுப் பேச வேண்டும் (பலமுறை கடிதம் வரவில்லை என்றுதான் டிபார்ட்மெண்டில் பதில் வரும்). டெபுடேஷனுக்கு ஏற்பாடு செய்ய வேண்டும். முன்னதாகவே லீவு சாங்ஷன் செய்யப்பட்டு ஒரு நிம்மதியான, ஆசுவாசமான சூழலில் ஊழியர்களும், அலுவலர்களும் லீவில் சென்றால் என்ன கெட்டுவிடப் போகிறது?

இன்றைய காலக்கட்டத்தில், அதிக மார்க்குகள் எடுத்து தேர்ச்சி பெற்ற மாணவர்களுக்கு பல்வேறு வாய்ப்புகள் இருக்கின்றன. அவர்கள் ஒன்றிலிருந்து betterஆன இன்னொன்று என புதிய வேலைகளை தேர்ந்தெடுக்கின்றனர். எனவே புதிதாக பணிக்குச் சேர்ந்தவர்களில் பலர் நமது வங்கியிலிருந்து ராஜினாமா செய்வது நடக்கிறது. அப்படி ராஜினாமா செய்கிறவர்களை மிகக் கேவலமாகவும், அவமானப்படுத்தும் விதமாகவும் PAD-SM நடத்துகிறார். ஒட்டன்சத்திரம் கிளையில் பணிபுரிந்த புதிய தோழர்.ரத்தீஷ், இந்தியன் வங்கியில் வேலை கிடைத்தவுடன், நமது வங்கியில் இருந்து சில நாட்களுக்கு முன்பு ராஜினாமா செய்தார். PAD-SM அவரிடம் ‘உங்களுக்கு வேலை போட்டு, அருகில் உள்ள கிளையில் posting கொடுத்தோமே, உங்களுக்கு நன்றி இருக்கிறதா' என்று கேட்டு இருக்கிறார். நாம் தலையிட்டு சேர்மனிடம் விஷயத்தைக் கொண்டு சென்றோம். சேர்மனிடம் கொண்டு செல்கிறீர்களா, உங்களுக்கு ஒரிஜினல் சர்டிபிகேட்களைஇன்று தர முடியாது என சொல்லியிருக்கிறார். மீண்டும் நமது சங்கத்தலைவர்களும், சேர்மனும் தலையிட்ட பிறகே அந்தத் தோழர்.ரத்தீஷ் ஒரிஜினல் சர்டிபிகேட்களை பெற முடிந்திருக்கிறது. அப்படியொரு பழிவாங்கும் உணர்வும், வன்மம் பாராட்டும் மனமும் கொண்டவராய் இருக்கிறார் PAD-SM.

ஜூலை மாதத்தில் ஒவ்வொருவருக்கும் தெரிவிக்கப்பட வேண்டிய Leave credit இன்னும் தெரிவிக்கப்படவில்லை. புதிய தோழர்கள் உரிய நேரத்தில் Confirmation செய்யப்படுவதில்லை. இப்படி பல ‘இல்லை'களை பட்டியலிடலாம். ஆனாலும் இரவெல்லாம் தூங்காமல் கண்விழித்து வேலை பார்ப்பதாய் அலட்டிக்கொள்வதற்கு ஒன்றும் குறைச்சல் இல்லை.

கிளைகளில் இருந்து எதுகுறித்து தொலைபேசியில் PAD-SMக்குப் பேசினாலும் அதிகாரச் செருக்கோடும், அலட்சியப்படுத்தும் விதமாகவுமே பதில்கள் கிடைக்கின்றன. பல சமயங்களில் போனை எடுப்பதில்லை.

ஒழுங்கு நடவடிக்கைகள் ஒரு பக்கம் குவிந்துகொண்டே இருக்கின்றன. இன்னொரு பக்கம் அவைகள் மீதான நடவடிக்கைகள் ஒழுங்கற்றும், காலந்தாழ்த்தப்பட்டும் நடக்கின்றன. ஓய்வு பெற்ற பலர் தங்கள் ஓய்வு காலச் சலுகைகளை பெற முடியாமல் தவிக்கின்றனர். பணி ஓய்வு பெறுவதற்கு சில நாட்களுக்கு முன்னர் அலுவலர் தோழர்.கிருஷ்ணசாமிக்கு, அவர் செய்யாத தவறுக்கு சார்ஜ் ஷீட் கொடுக்கப்பட்டது. இத்தனைக்கும் அவர் மீது ஜோடிக்கப்பட்ட ஒரேயொரு குற்றமும் மிகச் சாதாரணமானதுதான். அதற்கு உரிய பதில் அளிக்கப்பட்டுவிட்டது. ஏறத்தாழ ஒரு வருடமாகப் போகிறது. இன்றுவரை அதன் மீது எந்த நடவடிக்கையும் இல்லை. தோழர் கிருஷ்ணசாமி ஓய்வுகாலச் சலுகைகள் பெறாமல் நாட்களை நிம்மதியின்றி கழித்துக்கொண்டு இருக்கிறார்.

அதுபோல மேலசெவல் கிளையில் பணிபுரிந்து மூன்று மாதங்களுக்கு முன்பு ரிடையர் ஆன மெஸஞ்சர்த் தோழர்.செல்வராஜ் அவர்களுக்கு, அவர் அதிகமாக லீவு எடுத்தார் என்ற காரணத்துக்காக, ரிடையர் ஆவதற்கு ஒரு நாளைக்கு முன்பு சார்ஜ் ஷீட் கொடுத்தது நிர்வாகம். அதற்கு உடனடியாக பதில் கொடுக்கப்பட்டு விட்டது. இது misappropriation, fraud, bank loss என்ற வகையான குற்றச் சாட்டும் இல்லை. நிர்வாகம் அந்தப் பதிலை ஏற்றுக்கொண்டு அவர் மன்னிக்கலாம். அல்லது செய்தது தவறுதான் என சொல்லி lenient viewஆக censure செய்து முடிக்கலாம். ஆனால் நிர்வாகம் என்ன செய்தது தெரியுமா? என்கொயரி ஆர்டர் செய்திருக்கிறது. அவர் அதிகமாக லீவு எடுத்தார் என்பதை உறுதிசெய்ய ஒரு என்கொயரி ஆபிஸர் நியமிக்கப்பட்டு இருக்கிறார். எப்படியும் என்கொயரி நடந்து முடிய பல மாதங்கள் ஆகும். அதுவரை தோழர்.செல்வராஜ் ஓய்வு காலச் சலுகைகள் அற்று, நிம்மதியற்று அவதிப்படட்டும் என்பதே ஈவிரக்கமற்ற இந்த நிர்வாகத்தின் ஆசையாக இருக்கிறது.

சொல்வதற்கு இப்படி எவ்வளவோ இருக்கின்றன. ஊழியர்கள் மற்றும் அலுவலர்கள் மிக மோசமாக நடத்தப்படுவதோடு அவர்களது சுயமரியாதையும் இங்கே கேள்விக்குள்ளாக்கப்பட்டு வருகிறது. இரக்கமற்ற, மனிதாபிமானமற்ற காரியங்கள் சர்வ சாதாரணமாக அரங்கேறுகின்றன. சின்னச் சின்ன நடவடிக்கைகள் கூட இங்கே வேண்டுமென்றே காலம் தாழ்த்தப்படுகின்றன. ஒப்புக்கொண்ட பல கோரிக்கைகள் மாதங்கள் பலவாகியும் நிறைவேற்றப்படாமல் இருக்கின்றன. இவைகளை சுட்டிக்காட்டிய போதெல்லாம், 'இதோ முடிந்துவிடும், அதோ முடிந்துவிடும்' என்று வெறும் வார்த்தைகள் மட்டும் அள்ளித் தெளிக்கப்படுகின்றன. வெளிப்படைத் தன்மை அறவே இல்லை. சினேகமான உறவுகள் இல்லை. நம்பிக்கை தரும் நடவடிக்கைகள் இல்லை. நிலையான கொள்கையும், தெளிவான பார்வையும் இல்லை. அவ்வப்போது ஒரு பாலிசி வகுத்துக்கொண்டு, தான் தோன்றித்தனமாக இந்த நிர்வாகம் செயல்பட்டுக்கொண்டு இருக்கிறது.

தலைமையலுவலகத்தில் Middle Management-ஆக பொறுப்பிலிருப்பவர்களில் ஓரிருவரைத் தவிர மற்றவர்கள் நடத்துகின்ற காட்டு தர்பார்களே இதுபோன்ற சூழலுக்கு முக்கிய காரணமாகிறது. குறிப்பாக PAD-SM மற்றும் AIVD-SM ஆகியோரது நடவடிக்கைகள் கண்டனத்திற்கு உரியதாகவும், தடைசெய்ய வேண்டியதாகவும் இருக்கின்றன. வங்கியின் வளர்ச்சிக்கு இவை ஒருபோதும் உதவாது என்பதை நாம் சேர்மன் அவர்களிடம் பலமுறை தெரிவித்து விட்டோம். ஆனால் நிலைமைகள் மேலும், மேலும் மோசமாகிக்கொண்டே இருக்கின்றன என்பதுதான் உண்மை.

இவைகளை சகித்துக் கொள்ளவோ, மேலும் பொறுத்துக் கொள்ளவோ நாம் தயாரில்லை. நமது இரண்டு சங்கங்களின் செயற்குழுக் கூட்டம் மிக விரைவில் கூடி அடுத்தக் கட்ட நடவடிக்கைகளை முடிவு செய்யும்.

தோழமையுடன்

(J.மாதவராஜ்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

EA circular 3/2013 dated 03.09.2013

2013-09-03T19:34:00.000+05:30

சுற்றறிக்கை: 3/2013 நாள்: 03.09.2013

அருமைத் தோழர்களே!

வணக்கம்.

அமெரிக்க டாலருக்கு இணையான ருபாயின் மதிப்பு தொடர்ந்து சரிந்து வருகிறது. அந்நிய நிதி நிறுவனங்களின் முதலீடுகளையும், இறக்குமதியாளர்களையும் சார்ந்து இந்தியப் பொருளதாரம் இருப்பதன் விளைவே இது. அத்தியாவசியப் பொருட்கள், எண்ணெய், எலக்டிரானிக் பொருட்களின் விலை கடுமையாக உயரும் அபாயம் ஏற்பட்டுள்ளது. நாட்டின் நிதியமைச்சரோ, "கவலைப்படத் தேவையில்லை. ருபாயின் மதிப்பு உயரும். காத்திருங்கள்" என அருள்வாக்கு சொல்லிக்கொண்டு இருக்கிறார். மந்திரத்தில் மாங்காய்கள் காய்த்துவிடும் என மீண்டும் மீண்டும் சொல்லிக்கொண்டு இருக்கிறார். நாட்டின் இறையாண்மையையும், சுயச்சார்புத் தன்மையையும் பாதுகாக்க வேண்டும் என இடதுசாரிக் கட்சிகள் தொடர்ந்து குரல் எழுப்பி வந்ததை ஆட்சியாளர்கள் அலட்சியப்படுத்தியதையும், ஊடகங்கள் கேலி செய்ததையும் நாடு நினைத்துப் பார்க்க வேண்டிய தருணம் இது. இப்போதும் இடதுசாரிக்கட்சிகள் சொல்கின்றன, "ஒரு பொருளாதாரச் சுனாமி நாட்டைத் தாக்க காத்திருக்கிறது" என்று. விழித்துக்கொள்ள வேண்டியதும், தற்காத்துக்கொள்ள வேண்டியதும் உழைக்கும் மக்களாகிய நம் கைகளில் இருக்கிறது.

மாறுதல்கள்:

பணிநியமனம், பதவி உயர்வுகளையொட்டி 2013ம் வருடத்திற்கன பொது மாறுதல்களை அனைவரும் எதிர்பார்த்துக் கொண்டிருக்கிறார்கள். நமது தரப்பில் யார் யாருக்கு எங்கெங்கு மாறுதல்கள் வேண்டும் என லிஸ்ட் கொடுக்கப்பட்டு விட்டது. தொலைதூரங்களில் பணிபுரியும் மெஸஞ்சர்களிலிருந்து கிளர்க்குகளாய் பதவி உயர்வு பெற்றவர்களுக்கும், பெண் ஊழியர்களுக்கும், 2008 மற்றும் 2011ம் வருடங்களில் பணிக்குச் சேர்ந்தவர்களுக்கும், உடல்நலக்குறைவால் சிரமப்படுபவர்களுக்கும் முன்னுரிமை கொடுக்க வேண்டும் என பேசியிருக்கிறோம். நிர்வாகமும் அவைகளை கணக்கிலெடுத்து சாதகமான மாறுதல்கள் போடுவதாக சொல்லியிருக்கிறது. சேர்மன் பூனாவிலிருந்து திரும்பி வந்த பிறகு, 4ம் தேதிக்குப் பின்னர் டிரான்ஸ்பர்கள் போடுவதாக நிர்வாகம் சொல்லியது. அதுசமயம் நமது EA, OU தலைவர்கள் அகில இந்திய மாநாட்டிற்காக கல்கத்தா செல்லவிருப்பதால், 10ம் தேதிக்குப் பின்னர் டிரான்ஸ்பர்கள் போடுமாறு நாம் நிர்வாகத்தைக் கேட்டுக்கொண்டோம். நிர்வாகம் ஒப்புக்கொண்டு இருக்கிறது.

புதிய தோழர்களுக்கான பயிலரங்கம்:

இந்த சுதந்திர தினத்தன்று, திருநெல்வேலியில் பரணி ஓட்டலில் புதிய தோழர்களுக்கான பயிலரங்கம் ஒன்றை நாம் நடத்தினோம். 28 புதிய தோழர்கள் கலந்துகொண்டனர். PGBEA தலைவர் தோழர்.சங்கரசீனிவாசன் தலைமை தாங்கினார். AIRRBEA-TN பொதுச்செயலாளர் தோழர்.சோலை மாணிக்கம் துவக்கி வைத்துப் பேசினார். 2011ம் வருடத்தில் வங்கியில் பணிக்குச் சேர்ந்த தோழர்.சந்தான செல்வம், 2008ம் ஆண்டு பணிக்குச் சேர்ந்த தோழர். ராஜா கார்த்திகேயன், 2004ம் ஆண்டு பணிக்குச் சேர்ந்த தோழர்.அருண் பிரகாஷ் சிங், 1988ம் ஆண்டு பணிக்குச் சேர்ந்த தோழர்.சுகுமார், 1981ம் ஆண்டு பணிக்குச் சேர்ந்த தோழர்.சோமசுந்தரம் ஆகியோர் தங்கள் அனுபவங்களை பகிர்ந்து கொண்டனர். ஒவ்வொருக் காலக்கட்டத்திலும் பணிகளும், பணி நிலைமைகளும், உரிமைகளும் எவ்வாறு இருந்தன என்பதை வரலாற்று ரீதியாகச் சொல்லும் நிகழ்ச்சியாக அமைந்திருந்தது. தொடர்ந்து புதிய தோழர்கள் தங்கள் அபிப்பிராயங்களை பகிர்ந்து கொள்ளத் துவங்கினர். ஏறத்தாழ கலந்துகொண்ட அனைத்துப் புதிய தோழர்களுமே பேசினார்கள் என்பதுதான் சிறப்பம்சம். ஒரிஜினல் சர்டிபிகேட்களை நிர்வாகம் வாங்கி வைத்துக் கொண்டதற்கு தங்கள் அதிருப்தியை தெரிவித்தனர். இரண்டு இன்கிரிமெண்ட்கள் கிடைக்குமா என ஆதங்கப்பட்டனர். கேஷ் பார்ப்பதில் ஏற்படும் சிரமங்களை முன்வைத்தனர். பழுதான பிரிண்டர், கவுண்டிங் மெஷின், ஜெனரேட்டர் குறித்து கவலைப்பட்டனர். இறுதியாக எல்லாவற்றையும் தொகுத்துப் பேசிய PGBEA பொதுச்செயலாளர் தோழர்.மாதவராஜ் "இங்கு எந்தக் கதவுகளும் தானாக திறப்பதில்லை. தட்டினால்தான் திறக்கும். அப்படி தட்டுகிற வேலையே தொழிற்சங்கங்களின் முக்கிய கடமையாகிறது. நமது PGBEA கொஞ்சம் பலமாக தட்டுகிற ஒரு சங்கம்' என முடித்தார். தோழர்.சுப்பிரமணியன் அனைவருக்கும் நன்றி கூறினார். வந்திருந்த புதிய தோழர்கள் அனைவருமே, இந்த பயிலரங்கம் பலவிதத்திலும் தங்களுக்கு உபயோகமாக இருந்ததை தெரிவித்தனர்.

26.8.2013 அன்று நிர்வாகத்துடன் பேச்சுவார்த்தை:

நமது சங்கத்தின் செயற்குழு கூடி, கோரிக்கைகளை இறுதிப்படுத்தியிருந்ததை முந்தைய சர்க்குலரில் தெரிவித்திருந்தோம். 26.8.2013 அன்று நாம் இந்தக் கோரிக்கைகள் குறித்து நிர்வாகத்துடன் பேச்சுவர்த்தை நடத்தினோம். சில முக்கிய விஷயங்களில் சாதகமான நிலைமைகள் ஏற்பட்டு இருக்கின்றன. நிர்வாகத்தின் அணுகுமுறையை நாம் வரவேற்கிறோம். பாராட்டுகிறோம்.

1. புதிய தோழர்களுக்கு இரண்டு இன்கிரிமெண்ட்கள் கொடுக்க வேண்டும் என நாம் தொடர்ந்து வலியுறுத்தினோம். நபார்டிலிருந்து 2013ம் வருடம், பிப்ரவரி மாதம் எழுதப்பட்ட கடிதம், அதற்கு முன்பே 2012ம் ஆண்டு ஜுலை மாதத்தில் IBPS முலம் துவங்கப்பட்ட பணிநியமனத்தை எப்படிக் கட்டுப்படுத்தும்? என கேட்டோம். நமது தரப்பில் நியாயமான வாதங்கள் இருப்பதை ஒப்புக்கொண்ட நிர்வாகம், சாதகமான முயற்சிகளும், முடிவுகளும் எடுப்பதாக தெரிவித்தது.

2. எட்டாவது இருதரப்பு ஒப்பந்தத்தின் படி Award staffக்கு Transport Allowance ஆக மாதம் ரூ.105 வழங்கப்பட்டு வந்தது. ஒன்பதாவது இருதரப்பு ஒப்பந்தத்தில் இந்த Transport Allowance, 15 வருடம் சர்வீஸ் முடித்தவர்களுக்கு ரூ.275/- ஆகவும், 15 வருடங்களுக்குள் சர்வீஸ் இருப்பவர்களுக்கு ரூ.250 ஆகவும் உயர்த்தப்பட்டது. ஆனால் நம் வங்கியில் இந்த அலவன்சு அனைவருக்கும் ரூ.200/-ஆக மட்டுமே கொடுக்கப்பட்டு வருகிறது. இதுகுறித்து நிர்வகத்துடன் பேசினோம். இருதரப்பு ஒப்பந்தத்தில் உள்ளது போல வழங்க ஏற்பாடு செய்வதாக நிர்வாகம் ஒப்புக்கொண்டது. அதுபோலவே இருதரப்பு ஒப்பந்தப்படி, LFC/LTC-ஐ நமது வங்கியிலும் அமல்படுத்த ஒப்புக்கொண்டது.

3. ஸ்பான்ஸர் வங்கியில் உள்ளது போல Housing Loan, Vehicle Loan தரவேண்டும் என நீண்ட நாட்களாய் கோரிக்கை வைத்திருக்கிறோம். கடந்த போர்டு மீட்டிங்கில், ஸ்பான்ஸர் வங்கியிலுள்ளது போல நமது வங்கியிலும் உயர்த்த முடிவெடுத்திருப்பதாக நிர்வாகத்தரப்பில் மகிழ்ச்சியுடன் பரிமாறிக்கொள்ளப்பட்டது.

4. ஸ்பான்ஸர் வங்கியில் உள்ளது போல petrol Allowance (மாதம் 15 லிட்டர்) மற்றும் House Maintanence Allowance (மாதம் ரு.1500/-) வழங்க வேண்டும் என பேசினோம். இதுகுறித்து ஸ்பான்ஸர் வங்கியோடு கலந்துகொண்டு முடிவெடுப்பதாக நிர்வாகத்தரப்பில் சொல்லப்பட்டது.

5. கிளைகளிலோ, தலைமையலுவலகத்திலோ ஐந்து மணிக்கு மேல் பணிபுரிபவர்களுக்கு Overtime allowance வழங்க வேண்டும் என கேட்டோம். கிளரிக்கல்கள் யாரையும் 5 மணிக்கு மேல் பணிபுரியும்படி கட்டாயப்படுத்தவில்லை என நிர்வாகத்தரப்பில் சொல்லப்பட்டது.

6. 2012, 2013 ஆண்டு இறுதிக் கணக்கையொட்டி, விடுமுறை நாட்களில் கிளைகளுக்கு வந்து பணிசெய்ய சொல்லப்பட்டது. அந்த தினங்களுக்கு உரிய compensatory allowance வணிக வங்கிகளில் வழங்கப்பட்டு இருக்கிறது. அதனை நம் வங்கியிலும் வழங்க வேண்டும் என கேட்டோம். நிர்வாகம் ஆவன செய்வதாக ஒப்புக்கொண்டு இருக்கிறது.

7. நிரந்தரப்படுத்தப்பட்ட மெஸஞ்சர்களின் சம்பளத்தில் 1:30 வாக, தற்காலிக மெஸஞ்சர்களின் தினசர் ஊதியம் இருக்க வேண்டும் என வலியுறுத்தினோம். இதுகுறித்து ஏற்கனவே நபார்டில் இருந்து வெளியிடப்பட்ட சர்க்குலர்களை சுட்டிக்காட்டினோம். நிர்வாகம் ஆராய்வதாக சொல்லியிருக்கிறது.

8. Local charges குறித்த சர்க்குலர் வெளியிட்டு வருடங்கள் பலவாகின்றன. எனவே அவைகளை உயர்த்த வேண்டும் என கேட்டுக்கொண்டோம். நிர்வாகம் பரிசீலிப்பதாக சொல்லியிருக்கிறது. அதுபோலவே, sweeping charges ஐ உயர்த்தவும் பரிசீலனை செய்வதாக சொல்லியிருக்கிறது.

9. புதிதாக பணிக்குச் சேர்ந்த கிளரிக்கல்களுக்கு (office Asistants) தலைமையலுவலகத்தில் training கொடுக்கும் தினங்களுக்கு TA மற்றும் Halting allowance கொடுக்க வேண்டும் என வலியுறுத்தினோம். நிர்வாகம், இனிவரும் காலங்களில் மதுரையில் வைத்து training கொடுப்பதாக சொல்லியது.

10. பெருமாள்மலை கிளையில் பணிபுரியும் அனைவருக்கும் hill and fuel allowance கொடுக்க வேண்டும் என கடந்த ஒன்றரை வருடங்களாக நிர்வாகம் கேட்டுக் கொண்டு இருந்தோம். அதற்கான ஏற்பாடுகளை செய்துவிட்டதாகவும், இனி hill and fuel allowance வழங்கப்படும் என அறிவிக்கப்பட்டது.

11. இந்த வங்கியில் பணிபுரிபவர்களுக்கு அவரவர் duties and responsibilities குறித்த சர்க்குலர்கள் வெளியிட வேண்டுமென்று விளக்கினோம். நிர்வாகம் இதனை ஒப்புக்கொண்டு இருக்கிறது. 'இது ஒரு பெரிய பணி. கொஞ்சம் காலதாமதமாகலாம் என நிர்வாகத்தரப்பில் சொல்லப்பட்டு இருக்கிறது.

12. புதிதாக பணிக்குச் சேர்ந்த ஊழியர்களிடம் original certificates வாங்கி வைத்துக்கொண்டு இருப்பதுவும், அவைகளுக்கு முறையான acknowledgement கொடுக்காமல் இருப்பதுவும் சரியில்லாத நடைமுறை என்பதை தெரியப்படுத்தினோம். செப்டம்பர் 2ம் தேதி முதல் புதிதாக பணிக்குச் சேர்ந்தவர்களுக்கு training விருதுநகரில் வைத்து கொடுக்க இருப்பதாகவும், அந்த சமயத்தில் நேரில் original certificates திருப்பித் தரப்படும் என நிர்வாகத்தரப்பில் உறுதியளிக்கப்பட்டது. மேலும், இனி புதிதாக பணிக்குச் சேர்பவர்களிடம் Original certificates வாங்கி வைத்துக் கொள்வதற்கு முறையான acknowledgement வழங்கப்படும் எனவும் உறுதியளிக்கப்பட்டது.

13. புதிதாக பணிக்குச் சேர்ந்திருக்கும் ஊழியர்களுக்கு உடனடியாக identity card வழங்க வேண்டும் என்பதை முன்வைத்தோம். நிர்வாகம் ஒப்புக்கொண்டு, அதற்கான வேலைகள் துவங்கப்பட்டு விட்டதாகவும், விரைவில் வழங்கப்பட்டு விடும் எனவும் நம்பிக்கை தெரிவித்தனர்.

14. ஏற்கனவே வெளியிடப்பட்டு இருக்கும் அடிப்படையான முக்கிய சர்க்குலர்களை தொகுத்து, அவைகளை பிரிண்ட் செய்து கிளைகளுக்கு கொடுக்க வேண்டும் என்பதை எடுத்துரைத்தோம். புதிதாக திறக்கப்படும் கிளைகளுக்கும், புதிதாக பணிக்குச் சேர்பவர்களுக்கும், இந்த சர்க்குலர்கள் மிகவும் பயனுள்ளதாகவும், வழிகாட்டுவதாகவும் அமையும் என்பதையும் சுட்டிக்காட்டினோம். நிர்வாகம் ஒப்புக்கொண்டு இருக்கிறது.

15. கிளைகளில் பணிபுரியும் பெண் ஊழியர்களுக்கு என்று பிரத்யேகமாக தனிக் கழிப்பிட வசதி வேண்டும் என்பதை முன்வைத்தோம். நிர்வாகம் ஒப்புக்கொண்டு,பெரிய கிளைகளில் இருந்து இந்த ஏற்பாட்டைத் துவங்கி நடைமுறைப்படுத்துவதாக சொல்லியிருக்கிறது.

16. பெண் ஊழியர்களின் பிரச்சினையை பேசுவதற்கும், தீர்த்து வைப்பதற்கும் women cell செயல்பட வேண்டும் என்பதை தெரியப்படுத்தினோம். நிர்வாகம் ஒப்புக்கொண்டுள்ளது.

17. SC/ST ஊழியர் பிரச்சினைகளை அறியவும், அவைகளை தீர்த்து வைப்பதற்கும் SC/ST cell மீண்டும் செயல்பட வேண்டுமென முன்வைத்தோம். நிர்வாகம் ஒப்புக்கொண்டு, நடைமுறைப்படுத்துவதாக சொல்லியிருக்கிறது.

18. ரிப்பேரான, தரமற்ற பிரிண்டர்களை, cash counting machine மற்றும் Fake Note finding machine களை உடனடியாக மாற்ற வேண்டும் என கோரிக்கை வைத்தோம். அப்படி, கிளைகளில் இருந்து புகார்கள்/ கடிதங்கள் வரும் பட்சத்தில் அவை உடனடியாக கவனிக்கப்பட்டு புதிய மெஷின்கள் வாங்க ஏற்பாடு செய்யப்படுவதாக நிர்வாகம் சொல்லியது.

இந்த கோரிக்கைகள் தவிர, 2008ம் ஆண்டு பணிக்குச் சேர்ந்தவர்களுக்கு கம்ப்யூட்டர் ஆபரேட்டர் அலவன்சு கொடுப்பதற்கு கையெழுத்தான 12(3) செட்டில்மெண்ட்டை அமல்படுத்துவது குறித்துப் பேசினோம். நிர்வாகம் 12(3) செட்டில்மெண்ட்டில் குறிப்பிடப்பட்டுள்ள காலத்துக்குள் ஒப்பந்தம் அமல்படுத்தப்படும் என்று நிர்வாகத்தரப்பில் உறுதியளிக்கப்பட்டது. மேலும் லீவு எடுத்த சில தோழர்களுக்கு Loss of pay போடப்பட்டு இருப்பதை சரிசெய்யவும் பேசினோம்.

இந்த பேச்சுவார்த்தையில் நிர்வாகம் ஒப்புக்கொண்ட கோரிக்கைகளை துரிதமாக நிறைவேற்றினால், ஊழியர்களிடம் ஒரு உற்சாகமான மனநிலை உருவாகும்.

பென்ஷன் வழக்கு நிதி & அகில இந்திய மாநாடு:

AIRRBEA-TN சர்க்குலர் கிளைகளுக்கு வந்திருக்கும். பென்ஷன் குறித்த வழக்கு முக்கியக் கட்டத்தை நெருங்கி வருகிறது. உச்சநீதிமன்றத்தில் வழக்கு தொடர்ந்திருப்பதால், பெரும் செலவு நம் அகில இந்திய சங்கத்தின் முன் நிற்கிறது. கிளரிக்கல் தோழர்கள் ரு.400/-ம், மெஸஞ்சர்த் தோழர்கள் ரு.200/-ம் நம் சங்கக் கணக்கிற்கு (விருதுநகர் கிளை, கணக்கு எண் : 5002) அனுப்பி வைக்கும்படி கேட்டுக்கொள்கிறோம்.

நமது AIRRBEAவின் அகில இந்திய மாநாடு கல்கத்தாவில் செப்டம்பர் 7,8,9 தேதிகள் நடக்க இருக்கிறது. நமது சங்கத்திலிருந்து 11 தோழர்கள் கலந்து கொள்கின்றனர். தேசமெங்கும் நிறைந்திருக்கும் கிராம வங்கி ஊழியர்கள் வந்து சங்கமிக்கும் மாபெரும் சபை இந்த மாநாடு. அர்த்தமுள்ள உரையாடல்களோடு, ஆரோக்கியமான வழிகாட்டுதல்களோடு இந்த மாநாடு நம்மைப் புதுப்பிக்கும். உற்சாகமான, எழுச்சி மிகுந்த சிந்தனைகளோடும், நினைவுகளோடும் மீண்டும் சந்திப்போம்.

தோழமையுடன்

(J.மாதவராஜ்)
பொதுச்செயலாளர் - PGBEA

EA circular 2/2013 dated 22.7.2013

2013-07-23T18:06:00.000+05:30

சுற்றறிக்கை எண்: 2/2013 நாள்: 22.7.2016

அருமைத் தோழர்களே!

வணக்கம்.

நமது வங்கியின் புதிய சேர்மனாக திரு.கார்த்திகேயன் பொறுப்பேற்று இருக்கிறார். நமது வங்கியில் ஏற்கனவே பொதுமேலாளராய் இருந்து நம் வங்கியையும், இங்குள்ள அனைவரையும் அறிந்தவர் அவர். வெளிப்படையான, பாரபட்சமற்ற, நேர்மையான, நட்புமிக்க அணுகுமுறையோடு பாண்டியன் கிராம வங்கி நிர்வாகத்தை அவர் தலைமையேற்று நடத்திட விரும்புகிறோம். வங்கியின் வளர்ச்சி குறித்த சிந்தனைகளில், திட்டங்களில் ஊழியர்கள் நலனையும் கருத்தில் கொள்வார் என எதிர்பார்க்கிறோம். பாண்டியன் கிராம வங்கி ஊழியர்கள் சங்கம் அவரை வாழ்த்தி வரவேற்கிறது.

பல்வேறு விஷயங்கள் நிர்வகத்திடம் பேச வேண்டி இருந்தன. நேற்று நமது வங்கியின் பொதுமேலாளரை சந்தித்துப் பேசினோம்.

1. Drought Relief Loan: ஐந்து வருடத்திற்கும் குறைவான சர்வீஸ் உள்ளவர்களுக்கு Drought relief Loan-ன் முழுக் கடன் தொகை கொடுக்கப்படாமல், சர்வீசுக்கு ஏற்றாற் போல் குறைக்கப்பட்டு வந்தது. நாம் முழுத்தொகை கொடுக்க வேண்டும், instalment தொகையை வேண்டுமானால் கூட்டிக் கொள்ளுங்கள் என நிர்வாகத்திடம் பேசி வந்தோம். மேலும் சில மாதங்களுக்கு முன்பு கிளரிக்கலிலிருந்து, ஆபிசராக பதவியேற்று, இன்னமும் கிளரிக்கலாகவே இருக்கும் தோழர்களுக்கு Drough Relief Loanம் - கிளரிக்கலுக்கு உள்ளது போல ரூ.50000/- கொடுப்பதற்கு மட்டுமே அனுமதி வழங்கப்பட்டு வந்தது. நாம் ரூ.75,000/- கொடுக்க வேண்டும் என வலியுறுத்தி வந்தோம். நேற்று நடந்த பேச்சுவார்த்தையின் போது, நிர்வாகம் இந்த இரண்டு விஷயங்களிலும் நமது கோரிக்கையை ஏற்றுக் கொண்டு விட்டதாக தெரிவித்தார். நிர்வாகத்திற்கு நன்றி தெரிவித்துக் கொள்வோம்.

2. சில தோழர்களுக்கு லீவு எடுத்ததற்கு சம்பளப்படித்தம் செய்யப்பட்டு இருந்தது. மேலசெவல் கிளையில் பணிபுரியும் தோழர்.செல்வராஜ் இம்மாதம் பணி ஓய்வு பெறுகிறார். அவருக்கு ரொம்ப காலமாக லீவு ஒழுங்குபடுத்தப்படாமல் இருந்து வருகிறது. தொடர் விடுப்பில் சென்றிருந்த ஒரு தோழர் மீண்டும் பணியில் சேர அனுமதிக்கப்படவில்லை. கிளரிக்கலாக பதவி உயர்வு பெற்ற தோழர்.புதியம்பூ ராஜா அவர்களை ஒருவருடம் முடிந்த பிறகும் கன்பர்ம் செய்யாமல் இருந்தது நிர்வாகம். நாம் இவைகள் குறித்து பேசினோம். அனைத்துப் பிரச்சினைகளிலும் ஓரிரு நாட்களில் சாதகமான முடிவுகள் எடுப்பதாக தெரிவிக்கப்பட்டது.

3. Transfers: இந்த வருடத்திற்கான பொது மாறுதல்கள் இன்னும் பிறப்பிக்கப்படவில்லை. நாம் தொடர்ந்து வலியுறுத்தி வந்தோம். ஏப்ரல் மாதம் பேசும்போது, clerical recruitment-உடன் சேர்த்து போடுகிறோம், அரசு recruitmentக்கு அனுமதி வழங்கவில்லை என்றது நிர்வாகம். மே மாதம் இறுதியில், அரசு ஒப்புக்கொண்டு விட்டதாகவும், உடனடியாக சங்கத்தின் சார்பில் டிரான்ஸ்பர் லிஸ்ட் கொடுங்கள் என்றது நிர்வாகம். நாம் 1.6.2013 அன்று நம் சங்கத்தின் சார்பில் லிஸ்ட் கொடுத்தோம். ஆனால் ஜூன் மாதங்களில் நடந்து முடிந்த recruitment-உடன் நிர்வாகம் சொன்னது போல டிரான்ஸ்பர் போடப்படவில்லை. தொலைதூரங்களில் அவதிப்படும் நம் தோழர்கள் தங்கள் வேதனைகளை ஒவ்வொரு நாளும் தெரிவித்து வந்தனர். நாம் நிர்வாகத்திடம் சென்று, அனைவருக்கும் உடனடியாக டிரான்ஸ்பர் வழங்க வேண்டும் என வலியுறுத்தினோம். பொதுமேலாளர், சேர்மன் இருவரையும் சந்தித்துப் பேசினோம். இப்போது clerical -ல் waiting list வெளியிடும்போது, தொலைதூரங்களில் அவதிப்படும் தோழர்களின் பாதிப்புகளை சரி செய்வதாக நிர்வாகம் சொல்லி வருகிறது. ஜூலை 6ம் தேதிதான் waiting listலிருந்து புதிய கிளரிக்கல் அப்பாயிண்ட்மெண்ட்டிற்கான லிஸ்ட் இறுதிபடுத்தப்பட வேண்டிய நாள். ஆனாலும் இன்னும் இறுதிப்படுத்தப்படவில்லை. நாம் பொது மேலாளரிடம் நம் வருத்தங்களை தெரிவித்தோம். அதற்கான பணிகள் நடந்துகொண்டு இருப்பதாகவும், இந்த வார இறுதிக்குள், பெரும்பாலும் மாறுதல்கள் இருக்கும் எனவும் பொதுமேலாளர் தெரிவித்தார்.

Graduation increment and original certificates to new Clericals:

ஆடிக்கு ஒரு சர்க்குலர், அமாவாசைக்கு ஒரு சர்க்குலர் போடும் PGBWU சங்கம் சமீப காலமாக வேக வேகமாக உறுப்பினர்களுக்கு கடிதம் எழுதவும், சர்க்குலர்கள் போடுவதுமாக இருக்கிறது.

நாம் புதிய தோழர்களுக்கு graduation increments கொடுக்காமல், குறைத்து ஊதிய நிர்ணயம் செய்து இருப்பதை அம்பலப்படுத்தி, அதுகுறித்து பிரச்சினைகள் எழுப்பிய உடனே, அதுவரை பேசாமல் இருந்த PGBWU சட்டென்று விழித்துக்கொண்டு, உடனே தாங்களும் அப்பிரச்சினை குறித்து பேசுவதாக புதிய தோழர்களுக்கு கடிதம் எழுதியது.

மெஸஞ்சர்த் தோழர்களுக்கு நாம் பதவி உயர்வுக்கு வகுப்புகள் நடத்துகிறோம், கலந்துகொள்ளுங்கள் என அந்தத் தோழர்களுக்கு அழைப்பு விடுத்து கடிதம் எழுதியிருந்தோம். அடுத்த நாளே நாங்களும் அதே நாட்களில் பயிற்சி வகுப்பு நடத்துகிறோம் வாருங்கள் என கடிதம் எழுதியது PGBWU.

புதிய தோழர்களின் அப்பாயிண்ட்மெண்ட்டின் போது original certificateகளை வாங்கிய நிர்வாகம் திருப்பிக் கொடுக்கவில்லை என்பதை சமீபத்தில் அறிந்தோம். இது முற்றிலும் தவறான நடவடிக்கை என்பதை நாம் இணையதளத்தில் எழுதினோம். சம்பந்தப்பட்ட தோழர்களுக்கு கடிதம் எழுதி, original certificateகளை விரைவில் வாங்கித் தருவோம் என நம்பிக்கையளித்திருந்தோம். அடுத்த நாளே, நாங்கள் உங்களுக்கு வாங்கித் தருகிறோம் என PGBWU கடிதம் எழுதியது.

நம்மால், PGBWUவும் ஒரு தொழிற்சங்கமாக செயல்பட முயற்சிகள் செய்வது ஒரு பக்கம் சந்தோஷமாயிருந்தாலும், பிரச்சினைகள் குறித்த அடிப்படை அறிவும், தெளிவும் இல்லாமல் அவர்கள் இவ்விஷயங்களில் தலையிடுவது ஆபத்தானதாகவும் படுகிறது.

நபார்டிலிருந்து வந்த கடிதத்தை PGBWU தலைவர்களுக்கு நமது நிர்வாகம் காட்டியதாம். நிர்வாகம் பதிலுக்கு நபார்டுக்கு கடிதம் எழுதி இருப்பதாகவும், விரைவில் கிடைத்துவிடும் என்று நிர்வாகத்தரப்பில் சொல்லப்பட்டதாம். அதை அப்படியே தங்கள் சுற்றறிக்கையில் இவர்கள் எழுதுவார்களாம். புதிய தோழர்கள் இனி இரண்டு இன்கிரிமெண்ட் குறித்து கவலைப்படாமல் அவர்கள் பாட்டுக்கு வேலை பார்க்கலாமாம். என்னய்யா ஜீபூம்பா வேலை இது!

24.7.2010ம் தேதி, மத்திய அரசு ஒரு ஆணை வெளியிடுகிறது. அதில் கிராம வங்கி ஊழியர்களுக்கும் அலுவலர்களுக்கும் ஒன்பதாவது இருதரப்பு ஒப்பந்தம் வழங்குவதற்கான ஒப்புதல் இருக்கிறது. அதில் கீழ்க்கண்டவாறு சொல்லப்பட்டு இருக்கிறது:

“Pay scales and Dearness allowances of RRB employees as on 1.11.2007 would be equal to the corresponding categories of employees of the nationalised commercial banks. Pay for the purpose of DA, HRA and superannuation benefits shall mean basic pay, stagnation increments, specail pay, graduation pay, professional qualification pay and officiating pay, if any."

இந்த அரசு ஆணையை குறிப்பிட்டுத்தான் நமது வங்கியில் PAD/31/2010-11 எண்ணுள்ள சர்க்குலர் 21.9.2010ம் தேதி வெளியிடப்பட்டு, நம் வங்கியில் உள்ள அனைவருக்கும் 9வது இருதரப்பு ஒப்பந்தம் வழங்கப்பட்டது. 2008, 2011ம் ஆண்டு இங்கு பணிக்குச் சேர்ந்தவர்களுக்கு graduation pay வாக இரண்டு இன்கிரிமெண்ட்கள் கொடுக்கப்பட்டு வந்தன. இப்போது 2013ம் ஆண்டு பணிக்குச் சேர்ந்தவர்களுக்கு மட்டும் எப்படி கொடுக்காமல் இருக்க முடியும் என்பதுதான் நமது கேள்வி. மத்திய அரசிலிருந்து 24.7.2010ம் தேதி வெளியிடப்பட்ட அரசு ஆணையை மீறி, இன்னொரு ஆணை வெளியிடப்பட்டதாக எந்த அறிகுறியுமில்லை. நம் வங்கியிலும் 21.9.2010ம் தேதி வெளியிடப்பட்ட சர்க்குலரை மீறி இதுகுறித்து வேறு சர்க்குலர்கள் வெளியாகவில்லை. பிறகு எப்படி இந்த நிர்வாகத்தால் முறையான அறிவிப்பு இல்லாமல் திடுமென graduation payவை நிறுத்த முடியும்? இங்கே இடையில் நபார்டு எங்கே வரும், எப்படி வரும்? மத்திய அரசின் ஆணையை விட , ஒரு நபார்டின் கடிதத்திற்கு சக்தி அதிகமா? இந்தக் கேள்விகளைத் தானே நாம் எழுப்புகிறோம்.

சரி. அந்த நபார்டு கடிதத்தில் என்ன இருக்கிறது? ‘graduation pay குறித்து சில கிராம வங்கி நிர்வாகங்கள் விளக்கங்கள் கேட்டு வருவதாகவும், அதுகுறித்து நபார்டு ஆராய்ந்து வருவதாகவும், அதுவரை காத்திருங்கள்' என்னும் அர்த்தத்தில் எழுதப்பட்டு இருக்கிறது. இதற்கு ஏன் graduation payவை நிறுத்த வேண்டும். மற்ற கிராம வங்கி நிர்வாகங்கள் நபார்டின் இந்தக் கடிதத்தை கண்டு கொள்ளாமால், புதிதாக பணிக்குச் சேர்ந்தவர்களுக்கு graduation pay கொடுத்திருக்கிறார்களே! நம் வங்கியில் மட்டும் ஏன் கொடுக்கவில்லை? இந்தக் கேள்வியைத்தானே நாம் எழுப்புகிறோம்.

இதுபோலத்தான் புதிதாக பணிக்குச் சேர்ந்தவர்களிடம் original certificateகளை வாங்கி வைத்துக்கொண்டு இந்த நிர்வாகம் இன்னமும் கொடுக்காமல் இருப்பதுவும். PGBWUவிலிருந்து நிர்வாகத்தை சந்தித்துப் பேசினார்களாம். அடுத்த பயிற்சி வகுப்பின்போது நிர்வாகம் அனைவரும் திருப்பிக்கொடுக்கிறோம் என்றதாம். அதை அப்படியே சர்க்குலரில் போட்டுவிட்டு, ‘இனி புதிதாக பணிக்குச் சேர்ந்தவர்கள் அனைவரும் கவலைப்படாமல் அவர்கள் வேலையைப் பார்க்கலாம்” என அருள்வாக்கு வேறு.

இந்தப் பிரச்சினையில் இருக்கிற தார்மீக நெறிகள் குறித்தும், அடிப்படை உரிமைகள் குறித்தும் தெரிந்து கொள்ள வேண்டியது அவசியமாகிறது. ஒரு நிறுவனத்தில் original certificate களை கொடுக்காமல் வைத்துக்கொண்டால், அந்த நிறுவனம் அந்த ஊழியர்களை bonded labor ஆக நடத்துகிறது என்பதுதான் சட்டரீதியான விளக்கமாகும். பெருத்த அநியாயம் என்னவென்றால், இந்த original certificateகளை வாங்கி வைத்துக்கொண்ட நிர்வாகம், அதற்கான acknowledgementஐக்கூட புதிதாக பணிக்குச் சேர்ந்தவர்களுக்கு கொடுக்கவில்லை. இதுவா முறை?

நாம் இப்போதும் சொல்கிறோம். ஒருநாள் கூட நிர்வாகம் இந்த original certificateகளை தங்களிடம் வைத்திருக்க உரிமையில்லை. அதிகாரமில்லை. சட்ட ரிதியாக அனுமதியுமில்லை. எல்லாவற்றையும் புரிந்துகொண்டு நிர்வாகம் இதனை சரிசெய்யும் என விரும்புகிறோம். நிர்வாகத்திற்கு தர்மசங்கடங்கள் எதையும் நாங்கள் கொடுக்க விரும்பவில்லை என்பதையும் தெரிவித்துக் கொள்கிறோம்.

நமது செயற்குழுக் கூட்டமும் முடிவுகளும்:

அகில இந்தியச் செய்திகள், BEFIயின் நடவடிக்கைகள், மாநாடு குறித்த பரீசீலனைகள் என பல அஜெண்டாக்களில் விவாதங்கள் நடந்தன. அவைகளில் முக்கிய முடிவுகளை இங்கு அறிவிக்கிறோம்.

பணிச்சுமையும், பணி நெருக்கடிகளும்:

ஏறத்தாழ அனைத்துத் தோழர்களும் பங்கெடுத்த அர்த்தமுள்ள, ஆரோக்கியமான விவாதமாக இருந்தது. புதிய தோழர்களின் பார்வையில் இருந்த தெளிவும், நுட்பமும் வெளிப்பட்டது. அதிர்ச்சிகரமான உண்மைகள் வெளிப்பட்டன. தலைமையலுவலகத்தில் இருக்கும் பணிச்சூழல், ஒரே கிளையில் 10 business corespondent இருப்பது, கோடிக்கணக்கில் பணத்தை இரு பெண் ஊழியர்கள் மட்டும் பல கீ.மீ பயணம் செய்து கொண்டு செல்ல வேண்டிய நிர்ப்பந்தம்,கேஷ் பார்த்துக்கொண்டு NRGES அக்கவுண்டுகளுக்கு Batch posting போட வேண்டிய நிர்ப்பந்தம், Jewel loan திருப்புவதற்கு ஒருநாளைக்கு 250க்கும் மேற்பட்ட நோட்டிஸ் அனுப்ப வேண்டிய நிர்ப்பந்தம் என பல்வேறு விஷயங்கள் முன்வைக்கப்பட்டன. புதிதாக பணிக்கு ஒருபக்கம் ஆளெடுத்தாலும், புதிய புதிய பணிகள் கிளைகளில் கூடி, ஆள் பற்றாக்குறை நாளுக்கு நாள் அதிகமாவதும் உணரப்பட்டது. நிர்வாகம் இதுகுறித்தெல்லாம் கவலைப்படாமல் வங்கியின் வணிகம் குறித்து மட்டுமே அக்கறை செலுத்துவது சரியல்ல என்பதும் புரிந்தது. இந்நிலையில் நாம் நம்மைக் காப்பாற்றிக்கொள்ள, முதலில், அவரவர்க்கான ‘Duties and responsibilities'ஐ வரையறுத்து நிர்வாகம் சர்க்குலர்கள் வெளியிட வலியுறுத்துவது என தீர்மானிக்கப்பட்டது.

மாறுதல்கள்:

மாறுதல்களில் நாம் எடுத்துக்கொண்ட முயற்சிகள், நிர்வாகம் காலதாமதம் செய்யும் போக்கு அனைத்தும் விவாதிக்கப்பட்டது. தொலைதூரங்களில் அவதிப்படும் தோழர்களுக்கும், பாதிக்கப்பட்ட தோழர்களுக்கும் உடனடியாக மாறுதல்கள் செய்ய வலியுறுத்துவது, இல்லையென்றால், உடனடியாக, எதிர்ப்பைத் தெரிவித்து ஆர்ப்பாட்டம் நடத்துவது எனவும் தீர்மானிக்கப்பட்டது. அதே வேளையில், இருதரப்பு ஒப்பந்தகளில் சொல்லப்பட்டுள்ள விஷயங்களின் அடிப்படையில் முறையான ஒரு டிரான்ஸ்பர் பாலிசியை வரையறுக்க வேண்டும் என்னும் கோரிக்கை வைத்து, நிர்வாகத்தை வலியுறுத்துவது எனவும் முடிவு செய்யப்பட்டது. நம் தரப்பில் ஒரு பாலிசியை முன்வைப்பதற்கு கமிட்டி ஒன்று அமைக்கப்பட்டுள்ளது. அதில் தோழர்கள் சங்கர சீனிவாசன், மாதவராஜ், சோமசுந்தரம், சுப்பிரமணியன், கோபால் சுப்பிரமணியன் ஆகியோர் இருப்பார்கள்.

கோரிக்கைகள்:

கீழ்கண்ட கோரிக்கை சாசனம் ஒன்றை உருவாக்கி நிர்வாகத்துடன் பேச்சு வார்த்தை நடத்தி, அவைகளை வென்றெடுப்பதற்கான நடவடிக்கைகளில் ஈடுபடுவது என தீர்மானிக்கப்பட்டது.

பொருளாதரக் கோரிக்கைகள்:-

1)புதிதாக பணி நியமனம் செய்யப்பட்ட தோழர்களுக்கு இரண்டு graduation இன்கிரிமெண்ட்கள் கொடுக்க வேண்டும்.
2) Transport Allowance வணிக வங்கிகளில் உள்ளது போல ரூ.225/-, 275/- கொடுக்க வேண்டும்.
3) வணிக வங்கிகளில் உள்ளது போல Housing Loan வழங்க வேண்டும்.
4) வணிக வங்கிகளில் உள்ளது போல வாகனக் கடன் வழங்க வேண்டும்.
5) இந்தியன் ஓவர்சிஸ் வங்கியில் உள்ளது போல, Petrol reimbursement, House maintenance allowance வழங்க வேண்டும்.
6) LFC/LTC ஸ்பான்ஸர் வங்கியில் உள்ளது போல உயர்த்தப்பட வேண்டும்.
7) 5 மணிக்குப் பிறகு வேலை பார்ப்பதற்கு Overtime allowance வழங்கப்பட வேண்டும்.
8) 2012, 2013 வருடக்கணக்கையொட்டி லீவு நாட்களில் வேலை பார்த்த தினங்களுக்கு compensatory allowance வழங்க வேண்டும்.
9) 2008ம் வருடம் பணியில் சேர்ந்த office Assistantகளுக்கு probation period -ல், கம்ப்யூட்டர் ஆபரேட்டர் அலவன்சு வழங்க வேண்டும்.
10) 2008ம் வருடம் பணிக்குச் சேர்ந்த பெண் ஊழியர்களுக்கு maternity leaveக்குரிய salary வழங்கப்பட வேண்டும். அவர்களுக்கு தவறுதலாக probation period extend செய்யப்பட்டதும் சரிசெய்யப்பட வேண்டும்.
11) தற்காலிக கடைநிலை ஊழியர்களின் தினசரி ஊதியம், நிரந்தர ஊழியர்களின் ஊதியத்தில் 1:30 ஆக நிர்ணயம் செய்யப்பட வேண்டும்.
12) Local chargesஐ கூட்ட வேண்டும்
13) Sweeping chargesஐ கூட்ட வேண்டும்.

கொள்கை ரீதியான கோரிக்கைகள்:

14) கிளரிக்கல், மெஸஞ்சர்த் தோழர்களின் Duties and responsibilities வரையறுத்து சர்க்குலர் வெளியிட வேண்டும்.
15) வணிக வங்கியில் இருதரப்பு ஒப்பந்தகளில் சொல்லப்பட்ட விஷயங்களை உள்ளடக்கி ஒரு முறையான Transfer policy வரையறுக்கப்பட வேண்டும்.
16) புதிதாக பணிக்குச் சேர்ந்தவர்களிடம் வாங்கி வைத்திருக்கும் ஒரிஜினல் சர்டிபிகேட்களை உடனடியாக நிர்வாகம் அவரவர்களிடம் திருப்பி கொடுக்க வேண்டும்.
17) ஒரு கிளர்க்/கேஷியர், ஒரு நாளைக்கு அதிக பட்சமாக எத்தனை வவுச்சர்கள் / டிரான்சாக்ஷன்கள் Post செய்ய வேண்டும் என்பதை விஞ்ஞான பூர்வமாக வரையறுக்க வேண்டும்.

அடிப்படை வசதிக்கான கோரிக்கைகள்:

18) புதிதாக பணிக்குச் சேர்ந்தவர்களுக்கும், புதிதாக திறந்த கிளைகளுக்கும் Ready Referenceஆக முக்கிய பழைய சர்க்குலர்களை தொகுத்து வெளியிட வேண்டும்.
19) அனைத்துக் கிளைகளிலும் ஏ.சி வசதி செய்யப்பட வேண்டும்.
20அனைத்துக் கிளைகளிலும், பெண் ஊழியர்களுக்கு என்று தனி கழிப்பிடங்கள் ஏற்பாடு செய்ய வேண்டும்.
21 தலைமையலுவலகத்தில் பெண் ஊழியர்/அலுவலர் பிரச்சினைகளை முன்வைத்து பேசுவதற்கு, அரசு விதிப்படி, உடனடியாக Women cell அமைக்கப்பட வேண்டும்.
22 பழுதான பிரிண்டர்கள், கவுண்டிங் மெஷின்கள், கள்ள நோட்டு கண்டு பிடிக்கும் இயந்திரங்கள், ஜெனரேட்டர்கள் அனைத்தும் புனரமைக்கப்பட வேண்டும்.

Regional Committee:

சங்கத்தின் நடவடிக்கைகளை பரவலாகக் கொண்டு செல்ல நான்கு Regional committee கள் கீழ்க்கண்டவாறு அமைக்கப்பட்டுள்ளன.

தூத்துக்குடி:

1. தோழர்.சுகுமார், தருவைக்குளம் (கன்வீனர்)
2. தோழர். சோமசுந்தரம், ஆறுமுகனேரி
3. தோழர். கனகராஜ், எட்டையபுரம் ரோடு
4. தோழர்.அருளானந்தம், பொட்டகவயல்
5. தோழர். சதீஷ் , பழையகாயல்
6. தோழர்.சந்தான செல்வம், கீழக்கரை
7. தோழர். காளிராஜன் , முதுகுளத்தூர்

விருதுநகர்:

1. தோழர். ராஜ்குமார், காரியாப்பட்டி (கன்வீனர்)
2. தோழர். சங்கர், சங்கரலிங்கபுரம்
3. தோழர்.சுப்பிரமணியன், எம்.ரெட்டியாப்பட்டி
4.தோழர்.ராமநாதன், கீழடி
5.தோழர்.ராஜா கார்த்திகேயன், கன்னிவாடி
6. தோழர்.கணேசன், திருத்தங்கல்
7.தோழர்.சமுத்திரக்கனி, ராஜபாளையம்.

சிவகங்கை:

1. தோழர்.கலைசெல்வன், புதுக்கோட்டை (கன்வீனர்)
2. தோழர்.சுவாமிநாதன், தேவகோட்டை
3. தோழர்.அழகப்பன், திருவாடனை
4. தோழர்.வைரவன், அன்னவாசல்
5. தோழர்.வெள்ளைச்சாமி, கல்லுப்பட்டி
6. தோழர்.பழனியப்பன், ராயவரம்
7. தோழர்.வள்ளியப்பன், பெருமாள்மலை.

திருநெல்வேலி:

1. தோழர்.அருண் பிரகாஷ் சிங், வி.எம்.சத்திரம் (கன்வீனர்)
2. தோழர். சுப்பிரமணியன், பழைய பேட்டை
3. தோழர். மகரபூஷணம்
4. தோழர்.ராஜமனோஹர், அம்பாசமுத்திரம்
5. தோழர்.சகிதாராமன், வள்ளியூர்
6. தோழர்.ஓ.சண்முகம், ராதாபுரம்
7. தோழர். செல்வகுமரேசன், பரப்பாடி.

வங்கியில் நிலவும் மந்த நிலையும்,
ஊழியர்கள் அலுவலர்களின் மனோநிலையும்:

பொதுமேலாளரிடம் பேச்சுவார்த்தை நடத்தியபோது மிகுந்த வருத்தத்துடன் ஒரு விஷயத்தை பகிர்ந்து கொண்டார். நடந்து முடிந்த clerical to officers பதவி உயர்வில் மொத்தம் 103 இடங்களுக்கு, 13 பேரே எழுத்துத் தேர்வில் கலந்துகொண்டதையும், இது ஆரோக்கியமான நிலைமை இல்லையே என ஆதங்கப்பட்டார். நாமும் அதே கருத்தைத்தான் தெரிவித்தோம். இதுகுறித்து நமது எண்ணங்களை பகிர்ந்துகொண்டோம்.

ஆபிஸர் பதவி என்பது கிளரிக்கலாக பணிபுரியும் பலருக்கும் கனவாக இருக்கும். அதற்கு பொருளாதார ரீதியான உயர்வு மட்டும் காரணமில்லை, சமூக ரீதியான அந்தஸ்தும் முக்கியமான காரணம். இந்த ஆபிஸர் பதவிக்கு இதே வங்கியில் எவ்வளவோ போட்டிகள் நடந்திருக்கின்றன. நாலு பேர் தன்னை ‘கிளர்க்' எனச் சொல்வதை விட, ‘ஆபிஸர்' எனச் சொல்லும்போது கிடைக்கும் மரியாதைக்கும், மதிப்புக்கும் ஏங்கிய மனோபாவம் அது. ஒருமுறை கிளர்க் ஒருவரிடம் பேசிக்கொண்டு இருக்கும்போது, “நமக்காக இல்லை என்றாலும், நம் குழந்தைகளுகாகவாது ஆபிஸர் ஆகணும். அவர்களது திருமண அழைப்பிதழில் தன் தந்தை ஆபிஸர் என குறிப்பிட வேண்டும் என குழந்தைகள் விரும்புகிறார்கள்” எனச் சொல்லிக்கொண்டு இருந்தார். இப்பேர்ப்பட்ட ஆபிஸர் பதவி வேண்டாமென்று பலரும் இன்று ஒதுங்கி நிற்க என்ன காரணம்?

ஒரு நிறுவனத்தில் பணிபுரிகிறவருக்கு, அந்த வேலை மீது ஒரு பற்றும், பிடிப்பும் இருக்கும். அந்த வேலை தரும் ஆத்ம சுகம், திருப்தி, அந்த வேலை மூலம் தன் வாழ்வில் மேலும் முன்னேற முடியும் என்னும் நம்பிக்கை என எதோ ஒருவகையில், அந்த ஊழியருக்கு வேலை பார்ப்பதற்கான உந்துசக்தி ஒன்று இருக்கும். இந்த உந்துசக்தி அவரின் வளர்ச்சிக்கு மட்டுமில்லை, அந்த நிறுவனத்தின் வளர்ச்சிக்கும் காரணமாகிறது. வேலைபார்ப்பதில் ஈடுபாட்டையும், திறனையும் வளர்ப்பதற்கு இந்த உந்துசக்தியே அடிப்படையாகிறது. ஊதிய உயர்வு பதவி உயர்வு என்பதெல்லாம் அந்த உந்துசக்தியின் சில வடிவங்கள் அல்லது அடையாளங்களாய் இருக்கின்றன. ஆபிஸர் பதவி வேண்டாமென்று புறக்கணிப்பதன் மூலம், பலருக்கும் இந்த வங்கியில் உந்துசக்தியாக எதுவும் இல்லை என்பது வெளிப்பட்டு இருக்கிறது. ஒருவகையான வெறுமையின் குறியீடாகவே இதனை புரிந்துகொள்ள வேண்டி இருக்கிறது. அதுதான் நம்மை கவலை கொள்ள வைக்கிற விஷயமாகவும் இருக்கிறது.

“என்ன வேலை பார்த்து என்ன?”, “ இருக்கிற வரைக்கும், இப்படியே இருந்து எந்த பொல்லாப்பும் இல்லாம சீக்கிரம் ரிடையர் ஆயிரணும்”, “முழுசா என் கிராஜுவிட்டியை நான் வீட்டுக்கு கொண்டு போக முடியுமான்னு தெரியல..” “லோன் கொடுத்தாலும் தப்பு, கொடுக்கலன்னாலும் தப்பு...” “பிராஞ்ச்சில் என்ன நடக்குமோ, எது நடக்குமோன்னு தினம்தினம் கழிக்க வேண்டியிருக்கு..”, “வேலை பாக்குறவங்களுக்கு என்ன மரியாதை இருக்கு?” இப்படியான குரல்களை அடிக்கடி கேட்க முடிகிறது. இதன் பின்னணியில் நாம் மேலே குறிப்பிட்ட ‘வெறுமை'க்கான அர்த்தங்கள் விளங்குகின்றன.

இந்த வங்கியில் பணிபுரிகிற ஊழியர்களையும், அலுவலர்களையும் motivate செய்வதற்கு பதிலாக இந்த நிர்வாகம் அவர்களை terroriseசெய்து கொண்டு இருக்கிறது. Friendlyயான சூழல் இல்லை. எல்லாமும் எல்லோரும் நெகடிவ்வாகவே பார்க்கப்படுகின்றனர். இந்த நிலையில், வெறுமைதான் சூழும். இதனால் வங்கியின் வளர்ச்சியும் கேள்விக்குறியாக்கி விடும்.

புதியவர்கள் நம் வங்கியில் காலடி எடுத்து வைத்துக்கொண்டு இருக்கிற சூழலில், இங்கு ஏற்கனவே வேலை பார்ப்பவர்கள் சந்தோஷமாகவும், உற்சாகமாகவும் இருந்தால்தான், அது ஆரோக்கியமான சூழலை உருவாக்கும். புதியவர்களுக்கு தெம்பையும், நம்பிக்கையையும் கொடுக்கும்.

சகலத்தையும் அடைத்துக்கொண்டு, இறுகிப்போய் இருக்கிற போக்குகளை விட்டொழித்து தலைமையலுவலகம் தன்னை புனரமைத்துக் கொள்ளாவிடில், நிலைமை இன்னும் மோசமாகும். நட்பும், பிரியமுமாய் மனம் இருந்தால்தான் உறவுகள் விரிவடையும். உந்துசக்திகள் ஏற்படும். இல்லையென்றால் யாருக்கோ வந்ததாய் ஒரு பிடிப்பற்ற, விட்டுப்போன மனோபாவாங்களே தலைதூக்கும். மரங்கள் துளிர்க்கும் இடங்களில் வெறுமை சூழ்வதில்லை. இதை எச்சரிக்கையாக மட்டுமில்லை, மிகுந்த வருத்தத்தோடும் சொல்லிக் கொள்கிறோம்.

ஒரு சந்தோஷமான, உற்சாகமான மனநிலையை இங்கு பணிபுரிகிறவர்களுக்கு ஏற்படுத்துவது குறித்து தீவீரமாக யோசிக்க வேண்டிய நேரமிது.

தோழமையுடன்

(J.மாதவராஜ்)
பொதுச்செயலாளர்

PGBEA - PGBOU circular 6/2013 dt 09.07.2013

2013-07-12T23:41:00.002+05:30

சுற்றறிக்கை: 6/2013 நாள்: 09.07.2013

அருமைத் தோழர்களே !

வணக்கம்.

மேடையில் தன் விரல் உயர்த்தி ஒரு இயக்கத்தின் துடிப்பாக தோழர்.முகர்ஜி நின்று கொண்டு இருந்தார். தோழர்கள் மாநாட்டு அரங்கிற்குள் நுழைந்துகொண்டு இருக்க, ஒருவரையொருவர் நலம் விசாரித்து, தேனீர் அருந்தி, அங்கங்கு பேசிக்கொண்டு இருந்தனர்.

ஜூலை 6ம் தேதி, சனிக்கிழமை சாயங்காலம், கொடிகள், பேனர்கள் என அலங்கரிக்க மாநாட்டின் அரங்கிற்குள் நுழைந்த கணத்திலிருந்து ஒவ்வொரு தருணத்தையும் துளித் துளியாய் சேகரித்து, நினைவு படுத்தி பார்க்கும்போது உற்சாகமும், நம்பிக்கையும் நம்மை ஆட்கொள்கின்றன.

மாநாட்டில் மறைந்த மகத்தான தலைவர் தோழர்.முகர்ஜி அவர்கள் குறித்த ஒரு படக் கண்காட்சி வைக்கப்பட்டு இருந்தது. 1987ம் ஆண்டிலிருந்து அவரது புகைப்படங்கள் சேகரிக்கப்பட்டு இருந்தன. லேசாக மீசை வைத்து ஒல்லியாக இருந்த தோழர்.முகர்ஜி ஆந்திரப்பிரதேசத்தில் ஒரு பேரணியை தலைமை தாங்கி நடத்தியதிலிருந்து துவங்கி, அவரது உருவத்தை தலைக்கு மேல் தூக்கி வைத்துக் கொண்டு பாண்டியன் கிராம வங்கி ஊழியர்கள் மௌன ஊர்வலமாக அஞ்சலி செய்தது வரையில் நிகழ்வுகளை கண்காட்சி பதிவு செய்திருந்தது. திரும்பிய பக்கமெல்லாம் முகர்ஜி, நம்மை பார்த்துக் கொண்டு இருப்பதாக உணர்வு ஏற்பட்டது.

AIRRBEA- TN தலைவர், கொடியேற்றி வைக்க, தியாகிகளுக்கு அஞ்சலி செலுத்த, ஜூலை 6ம் தேதி குறிப்பிட்ட தோழர்களோடு மாநாடு துவங்கியது. PGBEA பொதுச்செயலாளர் தோழர்.சோலைமாணிக்கம் வரவேற்புரையாற்றினார். ஐ.ஓ.பியில் இருக்கிற, ஒரு நேர்மையான, எளிமையான சங்கத்தின் தலைவர் என்னும் அழுத்தத்தோடு இந்தியன் ஓவர்சீஸ் வங்கி ஸ்டாப் பெடரேசன் தலைவர் தோழர்.ஜீ.பாலச்சந்திரனை மாநாட்டை துவக்கிவைத்து பேச அழைத்த போது மாநாட்டு அரங்கம் அதை புரிந்துகொண்டு ஆரவாரித்தது. PGBEAவின் வெப்சைட்டை வெகுவாக தோழர்.ஜி.பாலச்சந்திரன் பாராட்டினார். அகில இந்திய அளவில் கூட பெரிய சங்கங்கள்கூட இவ்வளவு சிறப்பாகவும், தொழில்நுட்பத்திறனோடும் தங்கள் வெப்சைட்களை பயன்படுத்தியதில்லை எனக் குறிப்பிட்டார். இந்தியன் ஓவர்சீஸ் வங்கியில் சமீபத்தில் பத்திரிகைகளில் வந்த முறைகேடுகளுக்கு அந்த வங்கி நிர்வாகமும், அங்குள்ள எம்ப்ளாயீஸ் யூனியனுமே காரணம் என அவர் சாடினார். அதனால் பாண்டியன் கிராம வங்கியில் தற்காலிக ஊழியர்கள் நிரந்தரப்படுத்தப்படுவதில் பின்னடைவுகள் ஏற்பட்டு இருந்தாலும், PGBEAவும், PGBOUவும் சேர்ந்து அந்த தற்காலிக ஊழியர்களின் வாழ்வில் வெளிச்ச்சத்தை நிச்சயம் ஏற்றுவார்கள் என நம்பிக்கையளித்தார். லாபம் ஈட்டுவதற்காவே முதலாளிகளும், நிர்வாகங்களும் ஆட்குறைப்பையும், ஊதிய வெட்டையும் அமல்படுத்துவதாக அவர் குற்றம்சாட்டினார். ஊழியர்கள் ஒன்றுபட்டு நின்று இவைகளை எதிர்த்து முறியடிக்க வேண்டும் என்று அவர் கேட்டுக்கொண்டார்.

பொதுமாநாடு ஜூலை 7, ஞாயிறன்று காலை துவங்கியது. நம் சங்க மாநாடுகளில், இதுவரை இல்லாத அளவுக்கு மிக அதிக எண்ணிக்கையில் பெண் தோழர்கள் வந்திருந்தனர். சில வாரங்களுக்கு முன்பு பணிக்குச் சேர்ந்த தோழர்களில் பலர் வந்திருந்தனர். நானூறுக்கும் மேற்பட்ட தோழர்கள் அரங்கம் நிறைந்திருக்க மாநாடு களைகட்டியிருந்தது.

PGBEA சங்கத்தலைவர் தோழர். மாதவராஜ், PGBOU தலைவர் தோழர்.போஸ் பாண்டியன் ஆகியோர் தலைமையுரையாற்றினர். இந்தியன் வங்கி ஊழியர் சம்மேளனத்தின் (BEFI) தமிழ் மாநிலப் பொதுச் செயலாளர் தோழர்.சி.பி.கிருஷ்ணன் பேசுகையில், இந்தியாவில் இன்னும் வங்கிச்சேவை பெறாமல் 50 சதவீதத்திற்கும் மேலான மக்கள் இருக்கிறார்கள் என்பது குறித்து கவலைப்படாமல், வங்கித்துறையில் மத்திய அரசு தனியார்களின், முதலாளிகளின் நலன்களுக்காக மாற்றங்களைச் செய்து வருவதிலேயே குறியாக இருக்கின்றன என்றார். சாதாரண மக்களுக்கான வங்கிச்சேவையை உறுதிப்படுத்துகிற வேளையில், வங்கி ஊழியர்கள் தங்கள் நலன்களையும் உரிமைகளையும் பாதுகாத்துக் கொள்ளவும் போராட வேண்டி இருக்கிறது என்பதை எடுத்துரைத்தார். வங்கி அரங்கில் சங்கங்களுக்குள் தனித்தனியாக பல முரண்பாடுகள், மோதல்கள் இருந்த போதும், பொதுவான பிரச்சினைகளில் அவையெல்லாம் ஒன்றுபட்டு நிற்கிற, போராடுகிற நிலைமை ஏற்பட்டு இருப்பதை சுட்டிக்காட்டினார். 10வது இருதரப்பு பேச்சுவார்த்தைகளில்,நமது கோரிக்கைகளை வென்றெடுப்பதில் நாம் தெளிவான புரிதல்களோடு இருப்பதாகவும், பேச்சுவார்த்தைகள் தொடர்ந்து நடைபெற்று வருவதாகவும் சொன்னார்.

அகில இந்திய கிராம வங்கி ஊழியர்கள் சங்கத்தின் பொதுச் செயலாளர் சையீது கான் பேசுகையில், தான் முதன்முதலாக இப்போதுதான் தென்னிந்தியாவில் ஒரு கிராம வங்கி ஊழியர்களின் மாநாட்டில் கலந்துகொள்வதாக தெரிவித்தார். மாநாட்டிற்கு வந்திருந்தவர்கள் காட்டும் அன்புக்கும், தோழமைக்கும் நன்றி தெரிவித்தார். தன் வாழ்வை கிராம வங்கிகளுக்காகவும், கிராம வங்கி ஊழியர்களுக்காகவும் அர்ப்பணித்துக்கொண்ட மறைந்த நமது மகத்தான தலைவர் திலிப்குமார் முகர்ஜியின் நினைவுகளைப் போற்றினார்.பென்ஷனுக்காக நாம் எப்படியெல்லாம் போராடி இருக்கிறோம் என்பதையும், ஏறத்தாழ அதனைப் பெறுகிற சூழல் இப்போது ஏற்பட்டு இருப்பதையும் விளக்கினார். கிராம வங்கி ஊழியர்களுக்கு விரைவில் ஓய்வூதியம் கிடைக்கும் எனவும், அதற்கான முயற்சிகளில் சங்கம் முழுமையாக ஈடுபட்டு வருகிறது என்றும் நம்பிக்கை தெரிவித்தார். கிராம வங்கிகளை தனியார்மயமாக்கும் அரசின் முயற்சிகள் கைவிடப்பட வேண்டும் எனவும், இல்லையெனில் கிராம வங்கி ஊழியர்கள் கிளந்தெழுந்து போராட வேண்டிய நிலைமை ஏற்படும் எனவும் எச்சரித்தார்.

நம் அழைப்பை ஏற்று, பாண்டியன் கிராம வங்கியின் பொதுமேலாளர்கள் திரு.ராமநாதன் அவர்களும், திரு.ராமசுப்பு அவர்களும், மாநாட்டிற்கு வந்திருந்தனர். அவர்களை மேடைக்கு அழைத்து கௌரவித்தோம். இருவரும் மாநாட்டை வாழ்த்திப் பேசினார்கள்.

இந்தியன் வங்கி ஊழியர் சங்கத்தலைவர்களில் ஒருவரான தோழர் எஸ்.வி.வேணுகோபால் மாநாட்டினை வாழ்த்தியும், மாநாட்டில் கலந்துகொண்ட புதிய தோழர்களை வரவேற்றும் பேசினார். தொழிற்சங்கம் என்பது எவ்வளவு அவசியமானது என்பதை இந்தியாவின் இரண்டு முக்கிய வழக்குகளின் கதைகளிருந்து விளக்கினார். உலகமயம் நம்மை தனித்தனி தீவுகளாய் தகவமைத்துக் கொண்டு இருப்பதையும், தொழிற்சங்கங்கள் அதை உடைத்து நம்மையெல்லாம் ஒன்று சேர்த்துக்கொண்டு இருக்கின்றன என்பதையும் இலக்கிய நயத்தோடு புரிய வைத்தார். ஐ.ஓ.பியில் இருக்கிற ஒரு பெரிய சங்கத்தின் தலைவர்கள் தற்காலிக ஊழியர்களை நிரந்தரப்படுத்துவதற்காக கொள்ளை கொள்ளையாய் பணம் சம்பாதித்ததையும், இங்கே நமது சங்கத்தின் தலைவர்கள் தற்காலிக ஊழியர்களை நிரந்தரப்படுத்துவதற்காக போராடி சஸ்பென்ஷன் ஆனதையும் சொல்லி, எது தொழிற்சங்கம் என்பதை புதிய தோழர்கள் முடிவு செய்யுங்கள் என முடித்த போது, மாநாட்டு அரங்கத்தில் ஆரவாரமும் கரகோஷமும் அடங்க நேரமானது.

கிராம வங்கிகளை தனியார் மயமாக்கக் கூடாது எனவும் அனைத்து கிராம வங்கிகளையும் ஒன்றிணைத்து தேசிய கிராமப்புற வங்கி அமைக்க வேண்டும் என்று தீர்மானங்கள் நிறைவேற்றப்பட்டன. தர்மபுரியில் தலித் சமுதாயத்தைச் சேர்ந்த இளவரசன் மர்மமான முறையில் மரணமடைந்தது அதிர்ச்சியையும், வேதனையையும் ஏற்படுத்தியுள்ளது. தர்மபுரியில் நடைபெற்ற தலித் மக்கள் மீதான தாக்குதலைத் தொடர்ந்து இளவரசனுக்கு பாதுகாப்பு அளிக்க வேண்டும் என்று நீதிமன்றம் உத்தரவிட்டும் மாவட்ட காவல்துறை பாதுகாப்பு அளிக்கத் தவறிவிட்டது. இளவரசன் மரணம் குறித்து நீதிவிசாரணை நடத்துவதுடன், சாதிய சக்திகளை தமிழக மக்கள் புறக்கணிக்க வேண்டும் என்றும் தீர்மானம் நிறைவேற்றப்பட்டது.

மதிய உணவுக்கு பிறகு இரு சங்கங்களின் பிரதிநிதிகள் மாநாடுகள் தனித்தனியாக நடைபெற்றன. பொதுச்செயலாளர் அறிக்கைகள், பொருளாளர் அறிக்கைகள் முன்வைக்கப்பட்டு விவாதங்களுக்குப் பிறகு ஏற்றுக்கொள்ளப்பட்டன.

அடுத்து- இரண்டு சங்கங்களின் புதிய செயற்குழுக்கள் தேர்ந்தெடுக்கப்பட்டன.

பாண்டியன் கிராம வங்கி ஆபிசர்ஸ் யூனியன் - செயற்குழு

1. தோழர்.சாமுவேல் ஜோதிக்குமார், திருப்பத்தூர் - தலைவர்
2. தோழர்.போஸ்.பாண்டியன், கல்குறிச்சி - உதவித்தலைவர்
3. தோழர்.லூர்து ஆரோக்கியராஜ், துவரங்குறிச்சி - உதவித்தலைவர்
4. தோழர்.சங்கரலிங்கம், விருதுநகர் - பொதுச்செயலாளர்
5. தோழர்.டி.கிருஷ்ணன், திருப்புவனம் - இணைப் பொதுச் செயலாளர்
6. தோழர்.பிச்சைமுத்து, ராயவரம் - இணைப் பொதுச்செயலாளர்
7. தோழர்.பரதன், தலைமையலுவலகம் - பொருளாளர்
8. தோழர்.நடராஜன், தி.டவுண் - உதவிப் பொருளாளர்
9. தோழர்.சண்முகநாதன், ஆலங்குளம் - செயற்குழு உறுப்பினர்
10. தோழர்.ராஜேந்திரன், இடைக்காட்டூர் - செயற்குழு உறுப்பினர்
11. தோழர்.காமராஜ், இராமநாதபுரம் - செயற்குழு உறுப்பினர்
12. தோழர்.சிவகாமி, எட்டையபுரம் - செயற்குழு உறுப்பினர்
13. தோழர்.அறிவுடை நம்பி, மங்கை நல்லூர் - செயற்குழு உறுப்பினர்
14. தோழர்.ரஜிதா, எட்டியபுரம் ரோடு - செயற்குழு உறுப்பினர்
15. தோழர்.மகாராஜன், காரைக்குடி - செயற்குழு உறுப்பினர்

பாண்டியன் கிராம வங்கி ஊழியர்கள் சங்கம் - செயற்குழு

1. தோழர். சங்கர சீனிவாசன், உப்பத்தூர் - தலைவர்
2. தோழர். சோலைமாணிக்கம், கொத்தடி - உதவித்தலைவர்
3. தோழர். சுப்பிரமணியன், பழையபேட்டை - உதவித்தலைவர்
4. தோழர். சங்கர், சங்கரலிங்கபுரம் - உதவித்தலைவர்
5. தோழர். மாதவராஜ், சாத்தூர் - பொதுச்செயலாளர்
6. தோழர். அருண் பிரகாஷ் சிங், வி.எம்.சத்திரம் - இணைப் பொதுச்செயலாளர்
7. தோழர். அருளானந்தம், பொட்டகவயல் - உதவிப் பொதுச்செயலாளர்
8. தோழர். வரலட்சுமி, எட்டையபுரம் - உதவிப் பொதுச்செயலாளர்
9. தோழர். சந்தான செல்வம், கீழக்கரை - உதவிப் பொதுச்செயலாளர்
10. தோழர். சக்திவேல், தலைமையலுவலகம் - பொருளாளர்
11. தோழர். சங்கரக்குமார், நெடுவயல் - உதவிப் பொருளாளர்
12. தோழர். சோமசுந்தரம், ஆறுமுகநேரி - செயற்குழு உறுப்பினர்
13. தோழர். நாசர், அடைக்கலப்பட்டினம் - செயற்குழு உறுப்பினர்
14. தோழர். மகரபூஷணம், சிவந்திப்பட்டி - செயற்குழு உறுப்பினர்
15. தோழர். வைரவன், அன்னவாசல் - செயற்குழு உறுப்பினர்
16. தோழர். ராஜ்குமார், காரியாப்பட்டி - செயற்குழு உறுப்பினர்
17. தோழர். முனியசாமி, இராமநாதபுரம் - செயற்குழு உறுப்பினர்
18. தோழர். பாலசுப்பிரமணியன், பழங்காநத்தம் - செயற்குழு உறுப்பினர்
19.` தோழர். சோபியா ஜோஸ்மின் மேரி, சிவகங்கை - செயற்குழு உறுப்பினர்
20. தோழர். சாந்தி, அரசரடி - செயற்குழு உறுப்பினர்
21. தோழர். சொர்ண சங்கரி, கமுதி - செயற்குழு உறுப்பினர்
22. தோழர். கோபால் சுப்பிரமணியன், எஸ்.வி.கரை - செயற்குழு உறுப்பினர்
23. தோழர். ராஜா கார்த்திகேயன், கன்னிவாடி - செயற்குழு உறுப்பினர்
24. தோழர். சதீஷ், பழைய காயல் - செயற்குழு உறுப்பினர்

மாநாட்டில், பொதுச் செயலாளர் அறிக்கைகளில் , எதிர் கால நடவடிக்கைகளில் நமக்கான வேலைகள் வரையறுக்கப்பட்டு இருக்கின்றன. அவைகளில் சில அடிகளாவது நாம் முன்னேறிச் செல்ல வேண்டும். இதுதான் புதிய செயற்குழுக்களிடம் ஒப்படைக்கபட்டு இருக்கும் பொறுப்பு. இந்த எளிய உண்மையை புரிந்துகொண்டு நாம் இயங்குவோம்.

இந்தக் காரியங்களை தலைவரோ, பொதுச்செயலாளரோ அல்லது சில செயற்குழு உறுப்பினர்களோ மட்டும் நிறைவேற்றிட முடியாது. அப்படி எந்த சாகசங்கள் மீதும், சாதனைகள் மீதும் எந்த மூட நம்பிக்கையும் நமக்கு இல்லை. எல்லாவற்றையும் நாம் அனைவரும் சேர்ந்துதான் நிறைவேற்ற முடியும். கூட்டுச் சிந்தனை, கூட்டு செயல்பாடுகள் மூலமே காரியங்களை சாதிக்க முடியும். அதுதான் நம் பலமும், சக்தியுமாகும்.

தோழமையுடன்

(J.மாதவராஜ்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

EA circular 1/2013 dated 29.6.2013

2013-06-30T07:43:00.000+05:30

சுற்றறிக்கை: 1/2013 நாள்: 29.6.2013

அருமைத் தோழர்களே!

வணக்கம்.

புதிதாக 22 ஆபிஸர்களும், 102 கிளர்க்குகளும் நமது வங்கியில் பணிக்குச் சேர்ந்திருக்கின்றனர். இந்த வங்கியின் இளைய தலைமுறை அவர்கள். அவர்களை வாழ்த்தி வரவேற்போம். கிளைகளில் அவர்களுடன் சினேகத்துடனும், தோழமையுடனும் பழகி, இந்த வங்கியைப் பற்றி, வேலைகளைப் பற்றி, தொழிற்சங்கம் பற்றி எடுத்துச் சொல்லுவோம். நம்பிக்கையளித்து அவர்களை அற்புதமான நம் PGB குடும்பத்தின் புதிய சொந்தமாக்குவோம்.

25 வருடம் சர்வீஸ் முடித்தவர்களுக்கு மட்டும் Compliment :

25 வருடம் சர்வீஸ் முடித்தவர்களுக்கு ரூ.2000/- பெறுமானமுள்ள Compliment கொடுக்க இருப்பதாக நமது வங்கியின் நிர்வாகக்குழு சந்தோஷத்துடன் அறிவித்திருக்கிறதாம். அதுபோல வணிகத்தில் முக்கிய parameterகளில் சாதனை படைக்கும் கிளைகளில் பணிபுரியும் அனைவருக்கும் தலா ரூ.500/-க்கு incentive கொடுக்க இருப்பதாகவும் போர்டில் முடிவு செய்யப்பட்டு இருக்கிறதாம். போர்டின் இந்த முடிவில் நமக்கு இருக்கும் வருத்தங்களையும், விமர்சனங்களையும் பொதுமேலாளரிடம் முன்வைத்திருக்கிறோம். இந்த வங்கியில் பணிபுரியும் அனைவருக்கும் compliment/incentive கொடுக்க வேண்டும் என்றோம். நிர்வாகத்தின் இந்த முடிவு ஊழியர்களிடையே பாகுபாடுகளை ஏற்படுத்தும் என்றோம். போர்டு மீட்டிங்கின் முடிவை நடைமுறைப் படுத்தினால், PGBEA மற்றும் PGBOU சங்கங்களின் தலைவர்கள் இந்த complimentகளை பெறுவதில்லை என முடிவு செய்திருக்கிறோம். அனைவருக்கும் கிடைக்கும் போது, அதனைக் கடைசியாக பெறுகிறவர்களாக, நமது சங்கத் தலைவர்கள் இருப்பார்கள்.

TRANSFERS:

இந்த வருடம் இன்னும் General Transfers போடப்படவில்லை. 20 வருடங்கள், 25 வருடங்கள் சர்வீஸ் முடித்த பிறகு நமது மெசஞ்சர்த் தோழர்கள் கிளர்க்குகளாக பிரமோஷன் பெற்று, தொலைதூரக் கிளைகளில் மாறுதல் செய்யப்பட்டனர். பணி ஓய்வுக்கு இன்னும் சில வருடங்களே இருக்கிற அவர்கள் குடும்பத்தை விட்டு எங்கோ உள்ள கிளைகளில் பணிபுரிந்து வருகின்றனர். அதுபோல 2011ம் ஆண்டு பணிக்குச் சேர்ந்த பலர், பெண் ஊழியர்கள் உட்பட தொலைதூரக் கிளைகளில் பணிபுரிந்து வருகின்றனர். அவர்களுக்கு புதிய பணி நியமனத்தையொட்டி இந்த வருடம் நிச்சயம் அருகாமைக் கிளைகளில் மாறுதல் செய்து தருவதாக நிர்வாகம் நம்பிக்கையளித்திருந்தது. இன்னும் அவர்களுக்கு மாறுதல்கள் ஏற்பாடு செய்யப்படவில்லை. அவநம்பிக்கையோடும், வேதனையோடும் அந்தத் தோழர்கள் தினம் தினம் நம்மிடம் மாறுதல்கள் குறித்து கேட்டுக்கொண்டு இருக்கின்றனர். நாம் இதுகுறித்து பொது மேலாளரிடம் இரண்டு முறை பேசிவிட்டோம். இறுதியாக 25.6.2013 அன்று சேர்மன் அவர்களையும் சந்தித்துப் பேசியிருக்கிறோம். இன்னும் 24 புதிய Office Assistantகளுக்கு appointment மற்றும் posting செய்ய வேண்டி இருக்கிறது. அதனையொட்டி மாறுதல்கள் இருக்கும், நிச்சயம் பாதிப்புகள் சரிசெய்யப்படும் என உறுதியளிக்கப்பட்டு இருக்கிறது.

புதிய Office Assistant களின் ஊதியத்தில் மோசடியும் அநீதியும்:

புதிதாக பணிக்குச் சேர்பவர்களின் அடிப்படை ஊதியத்தின் ஆரம்ப நிலை என்பது ரூ.7200/- ஆகும். Graduates-ஆக இருந்தால் அவர்களுக்கு ஆரம்பத்திலேயே additional-ஆக இரண்டு இன்கிரிமெண்ட்கள் (ரு.400 + ரூ.400) கொடுக்கப்பட்டு, ரூ.8000/- அடிப்படை ஊதியமாக நிர்ணயம் செய்யப்பட வேண்டும். இதுதான் விதி. ஆனால் இது மீறப்பட்டு இருக்கிறது. ரூ.8000/- த்தை basic pay யாக விதிக்காமல் ரூ.7200/- அடிப்படை ஊதியமாக நிர்ணயம் செய்திருக்கிறது பாண்டியன் கிராம வங்கி நிர்வாகம். விசாரிக்கும்போது, முன்பு office Assistantகள் பணிநியமனம் செய்யப்படுவதற்கு minimum qualification என்பது SSLC/ +2 பாஸ் செய்திருக்க வேண்டும் என்றிருந்தது. அதனால் graduation முடித்தவர்களுக்கு இரண்டு இன்கிரிமெண்ட்கள் கொடுக்க வேண்டும் என்றிருந்தது. இப்போதோ minimum qualificatiion என்பதே graduation ஆகிவிட்டது. எனவே, அந்த இரண்டு இன்கிரிமெண்ட்கள் கொடுக்க வேண்டியதில்லை என புதிய வில்லங்கம் ஒன்று முன்வைக்கப்படுகிறது.

ஆனால் உண்மை அதுவல்ல. கமர்ஷியல் வங்கிகளிலும் இப்போது minimum qualification என்பது graduation ஆகிவிட்டது. ஆனாலும் அங்கு graduation incrementகள் கொடுக்கப்படுகின்றன. அருகில் இருக்கிற பல்லவன் கிராம வங்கியில் இந்த 2013ம் வருடத்தில் புதிய பணிநியமனம் செய்யப்பட்ட office Assistant களுக்கு graduation incrementகள் கொடுக்கப்படுகின்றன. அது எதற்கு? நமது வங்கியில் 2011ம் ஆண்டு புதிதாக பணிநியமனம் நடந்தபோதே, office Assistantகளுக்கு minimum qualificatiion என்பது graduation தான். ஆனால் அவர்களுக்கு graduation incrementகள் வழங்கப்பட்டுள்ளது. எனவே நாம் இதனை மிகப்பெரும் மோசடியாகவும், புதிய தோழர்களுக்கு இழைக்கப்பட்ட அநீதியாகவும் பார்க்கிறோம்.

ஆழமாய் சிந்தித்தால், நாம் போராடி வென்ற "சம வேலைக்கு சம் ஊதியம்' என்னும் கோட்பாட்டிற்கு வைக்கப்பட்ட வேட்டு என்பதும் தெளிவாகும். PGBEA சார்பில் தோழர்கள் மாதவராஜும், சோலைமாணிக்கமும் நமது வங்கியின் சேர்மனை சந்தித்து இப்பிரச்சினையை முன்வைத்துப் பேசினார்கள். விரைவில் இதுகுறித்து ஆராய்ந்து முடிவெடுப்பதாக சேர்மன் சொல்லியிருக்கிறார். சாதகமான நிலைபாடு எடுக்கப்படும் என நம்புகிறோம். இல்லையெனில் நாம் நமக்கான பாதையை மேற்கொள்வோம்.

Transport Allowance-லும் வெட்டு!

8 வது இருதரப்பு ஒப்பந்தத்தின் போது, நமது தொடர் முயற்சியால் மெசஞ்சர் தோழர்களுக்கும், கிளரிக்கல் தோழர்களுக்கும் Transport Allowance ஆக, மாதம் ரு.105/-ஐப் பெற்றது நினைவிருக்கும். 9 வது இருதரப்பு ஒப்பந்தத்தில் அந்த Transport Allowance உயர்த்தப்பட்டது. 15 வருடத்திற்குள் சர்வீஸ் இருப்பவர்களுக்கு ரூ.225/- என்றும், அதற்கு மேல் சர்வீஸ் இருப்பவர்களுக்கு ரூ.275/- என்றும் நிர்ணயம் செய்யப்பட்டது. நமது வங்கியில் பொத்தாம் பொதுவாக அனைவருக்கும் ரூ.200/- கொடுக்கப்பட்டு வருகிறது. 9 வது இருதரப்பு ஒப்பந்தம் அமல்படுத்தப்பட்ட 2010ம் ஆண்டில் இது குறித்து நமது எதிர்ப்பைத் தெரிவித்திருந்தோம். அப்போதைய நிர்வாகம் ஐ.ஓ.பிக்கு கடிதம் எழுதியிருப்பதாகச் சொன்னது. இன்னும் சரிசெய்யப்படவில்லை. இப்போது 10 வது இருதரப்பு ஒப்பந்தம் வர இருக்கிறது. எனவே உடனடியாக நிர்வாகம் அதனை சரிசெய்து 1.11.2007ம் ஆண்டிலிருந்து அரியர்ஸ் தரவேண்டும் என கோரிக்கை வைத்திருக்கிறோம்.

தற்காலிக ஊழியர்கள் பிரச்சினையில் பின்னடைவும், நமது முயற்சிகளும்!

நமது வங்கியில் ரூ.2000/-த்திற்கும், ரூ.3000/-த்திற்கும் பணிபுரிந்து வருகிற தற்காலிக கடைநிலை ஊழியர்களை நிரந்தரப்படுத்துவதற்காக நாம் தொடர் முயற்சியில் ஈடுபட்டு வருகிறோம். 2009ம் வருடத்தின் மே மாதத்தில், பாண்டியன் கிராம வங்கியில் பணிபுரியும் தற்காலிக ஊழியர்களுக்கான மாநாடு நடத்தினோம். யார் யாரெல்லாம் , எத்தனை வருடம் பணிபுரிந்தார்கள் என்கிற தகவல்களை சேகரித்தோம்.

அவர்களுக்காக, PGBEA மற்றும் PGBOUவின் தலைவர்கள் அனைவரும் 2010ம் ஆண்டு ஜூன் மாதத்தில் ஒருநாள் உண்ணாவிரதம் இருந்தோம். 'ரூ.1000/-த்திற்கும், ரூ.2000/-த்திற்கும் பாண்டியன் கிராம வங்கியில் தற்காலிக ஊழியர்கள்' என பத்திரிகை செய்திகள் வெளியாயின. அதனை விளக்கி PGBEA வின் தலைவர்கள் தோழர்கள் காமராஜ், அண்டோ கால்பர்ட் இருவரும் பத்திரிக்கைகளில் எழுதினர். நிர்வாகம் உண்மையை பொறுக்க முடியாமல் இருவரையும் சஸ்பெண்ட் செய்தது. சேர்மன் அறையை முற்றுகையிட்டு போராடினோம். ஹைகோர்ட்டு அந்த சஸ்பென்சன்கள் செல்லாது என தடை விதித்தது. தோழர்கள் காமராஜும், அண்டோ கால்பர்ட்டும் மீண்டும் பணிக்குச் சேர்ந்தனர்.

லேபர் கமிஷனர் முன்பு, 'தற்காலிக ஊழியர்களை நிரந்தரம் செய்ய வேண்டும்' என தொழில் தாவா ஏற்படுத்தினோம். ஒரு நிறுவனத்தில் ஒரு வருடத்தில் ஒருவர் 240 நாட்கள் பணிபுரிந்தால் அவர் நிரந்தம் செய்யப்பட வேண்டும் என்பது Industrial Dispute Act, 1947ன் படி உள்ள நியதி. 'அப்படி தற்காலிக ஊழியர்களே இல்லை' என நிர்வாகம் தற்காலிக ஊழியர்களை எந்த அறிவிப்பும் இல்லாமல் வீட்டுக்கு அனுப்ப ஏற்பாடு செய்தது. அதனை எதிர்த்து நாம் மதுரை ஹைகோர்ட்டில் வழக்கு தொடர்ந்தோம். தற்காலிக ஊழியர்களை வேலையை விட்டு அனுப்புவதற்கு ஹை கோர்ட்டு தடை விதித்தது. லேபர் கமிஷனர் முன்பு நாம் தொடர்ந்த தாவா விசாரணைக்கு வந்தது.

இந்த சமயத்தில், புதிதாக வந்த சேர்மன் திரு.நடரஜன் அவர்களிடம் தற்காலிக ஊழியர்களை நிரந்தரப்படுத்த வேண்டும் என நாம் பலகட்ட பேச்சுவார்த்தை நடத்தினோம். அவரும், நிர்வாகக்குழுவில் இப்பிரச்சினையை முன்வத்து தற்காலிக ஊழியர்களை நிரந்தரப்படுத்த ஒரு தீர்மானத்தை 2011ம் ஆண்டு நவம்பர் மாதம் நிறைவேற்றினார். நிர்வாகக்குழுவில் ஐ.ஓ.பியின் மதுரை மண்டல மேலாளராக இருக்கும் திரு.ஞானசம்பந்தம் அவர்களும் மிகவும் உதவிகரமாக இருந்தார். அவர்களை நம் சங்கம் அப்போதும் பாராட்டியது. இப்போதும் பாராட்டுகிறது. நிறைவேற்றப்பட்ட தீர்மானத்தை, லேபர் கமிஷனரிடம் சொல்லி, 'நாங்கள் ஐ.ஓ.பிக்கு அந்தத் தீர்மானத்தை அனுப்பி இருக்கிறோம். ஐ.ஓ.பியில் இருந்து ஒப்புதல் வந்தவுடன் தற்காலிக கடைநிலை ஊழியர்களை நிரந்தரப்படுத்துகிறோம்' என நிர்வாகத்தரப்பிலிருந்து சொல்லப்பட்டது.

இந்த நிலையில்தான் ஐ.ஓ.பியில் தற்காலிக கடைநிலை ஊழியர்களை நிரந்தரப்படுத்தியதில் இருந்த முறைகேடுகளும், மோசடிகளும் வெளிவரத் துவங்கின. ஐ.ஓ.பி யூனியன் (இந்த சங்கத்துடன்தான் Pandyan Grama Bank Workers Union இணைந்திருக்கிறது) தலைவர்கள் பலர் தற்காலிக ஊழியர்களிடம் லட்சக்கணக்கில், பணம் பெற்றதாக எங்கும் செய்திகளாய் பரவத் தொடங்கின. 16க்கும் மேற்பட்ட சங்க பொறுப்பாளர்கள் குற்றம் சாட்டப்பட்டு சஸ்பெண்ட் செய்யப்பட்டனர். ஐ.ஓ.பி நிர்வாகம் 'கிணறு தோண்ட பூதம் வெட்டிய கதையை' உணர்ந்தது. பாண்டியன் கிராம வங்கி நிர்வாகக்குழுவில் தற்காலிக ஊழியர்களை நிரந்தரம் செய்ய எடுத்த முடிவுக்கு அனுமதி அளிக்க தயக்கம் காட்டியது. இப்போது ALC முன்பு நாம் நடத்தி வந்த தொழில்தாவாவில், நமது நிர்வாகம், தற்காலிக ஊழியர்களை நிரந்தரப்படுத்துவது சாத்தியமில்லை என மறுத்தும் விட்டது.

தற்காலிக ஊழியர்கள் இதனால் ஒன்றும் நம்பிக்கை இழந்திட வேண்டியதில்லை. அவர்களுக்காக PGBEAவும் PGBOUவும் சமரசமில்லாமல் முயற்சி செய்யும். நாம் லேபர் கமிஷனரிடம் தெளிவாக சொல்லி இருக்கிறோம். "எங்களுக்கு ஐ.ஒ.பியின் அனுமதி ஒரு பொருட்டில்லை. முதலில் பாண்டியன் கிராம வங்கியில் தற்காலிக ஊழியர்களே இல்லை என்ற நிர்வாகம், பிறகு தற்காலிக ஊழியர்கள் இருக்கிறார்கள்.... அவர்களை நிரந்தரம் செய்ய இருக்கிறோம் எனவும் சொல்லியிருக்கிறது. இதன் மூலம், இங்கு தற்காலிக ஊழியர்கள் பணிபுரிந்து கொண்டு இருக்கிறார்கள் என்பதை நிர்வாகமே ஒப்புக்கொண்டுள்ளது. Industrial Disputes Actன்படி, 240 நாட்கள் ஒருவர் பணிபுரிந்தால் போதும். அந்த அடிப்படையில் பாண்டியன் கிராம வங்கியில் பணிபுரியும் தற்காலிக ஊழியர்களை நிரந்தரம் செய்ய வேண்டும்' என நாம் சட்டரீதியான வாதங்களை முன்வைத்திருக்கிறோம்.

இப்போது லேபர் கமிஷனர் முன்பு பேச்சுவார்த்தை தோல்வியில் முடிவடைந்து இருக்கிறது. இனி, இந்த வழக்கு லேபர் கோர்ட்டில் தொடரும். அங்கு தற்காலிக ஊழியர்களுக்கு ஆதரவாக நிச்சயம் சாதகமான முடிவு கிடைக்கும், காலதாமதம் ஆகலாம். அவ்வளவுதான்.

அதுவரை, தற்காலிக ஊழியர்களுக்கு இப்போது நாளொன்றுக்கு நிர்வாகம் வழங்கி வரும் ரூ.175/- ஊதியத்தை, ரூ.300/-ஆக உயர்த்த வேண்டும் என கோரிக்கை வைத்திருக்கிறோம். நிர்வாகம் ஒரு குறிப்பிட்ட தொகையை உயர்த்துவதற்கு ஏற்பாடு செய்வதாக சொல்லியிருக்கிறது.

Chief manager, PAD-திருவாளர் சுரேஷின் அடாவடித்தனங்களும், அக்கிரம வார்த்தைகளும்:

புதிதாக பணிக்குச் சேர்ந்த Office Assistant ஒருவர், தன் கிளை மேலாளரிடம் நமது, 'Know your work, know your duty' வழிகாட்டி புத்தகத்தைப் படித்துவிட்டு தனக்கு medical aid-ஆக ரூ.2000/- உண்டா எனக் கேட்டு இருக்கிறார். அந்தக் கிளையில் உள்ள நமது தோழர்கள், "ஆமாம், நீங்கள் ஜூன் மாதம் சேர்ந்திருக்கிறீர்கள். எனவே ஏப்ரல், மே மாதம் நீங்கலாக பத்து மாதத்திற்கு பெற்றுக் கொள்ளலாம்" என சொல்லியிருக்கிறார்கள். எதற்கும் தெளிவு படுத்துக் கொள்வோமே என்று அந்தக் கிளையின் மேலாளர் Chief manager, PAD- திருவாளர் சுரேஷிற்கு போன் செய்து கேட்டு இருக்கிறார். அவ்வளவுதான். "அதற்குள் புதுசா வந்தவருக்கு உடம்பு சரியில்லாமப் போய்விட்டதா? எத்தனை நாள் டிரிட்மெண்ட் எடுத்தார். எத்தன நாள் லீவு போட்டார். எந்த டாக்டர்கிட்ட போனார்..." என பொரிந்து தள்ளி இருக்கிறார். இந்த medical aid என்பது நம் குடும்பத்திற்கு ஆகும் பொதுவான மருத்துவச் செலவு. இதனை வழக்கமாக நாம் அனைவரும் ஏப்ரல் 2ம் தேதியே எடுத்துவிடுவோம். அப்போது ரூல் பேசும் இந்த சுரேஷ் என்ன செய்தாராம். என்ன செய்ய முடியுமாம்? புதிதாக பணிக்குச் சேர்ந்த ஒருவர் இதனைக் கேட்டதுதான் இங்கு அவருக்கு பொறுக்க முடியவில்லை. இதுவா இளைய தலைமுறையை நடத்தும் லட்சணம்? இதுவா வழிகாட்டும் பெருந்தன்மை? இப்படி கடுப்படித்து கடுப்படித்து 2011ம் ஆண்டு பணிக்குச் சேர்ந்த அருமையான அலுவலர் ஒருவரை, இந்த வங்கியை விட்டு நேஷனல் வங்கியொன்றில் கிளர்க் பதவிக்கு ஒட வைத்தது போதாதா? 'ரூலர் சுரேஷின்' ராஜ்ஜியத்தில் சலுகைகள், உரிமைகள் பற்றி யாரும் கேள்விகள் கேட்டுவிடக் கூடாது!

20 வருடங்களுக்கு மேல் பணிபுரிந்து, நமது வங்கியில் ஒரு மெஸஞ்சர்த் தோழர் பதவி உயர்வு பெற்று சென்ற வருடம் கிளர்க்காக பதவி உயர்வு பெற்றிருக்கிறார். கம்ப்யூட்டரைக் கையாளக் கற்றுக் கொள்வதில் ஆரம்பத்தில் கொஞ்சம் சிரமப்பட்டு இருக்கிறார். இங்கு பல ஆபிசர்களே திணறிக்கொண்டு இருக்கிறார்கள் என்பதும் உண்மைதானே. இதனை PADக்கு முதலில் தெரிவித்த கிளை மேலாளார், பிறகு சில மாதங்களில், 'அவர் இப்போது கம்ப்யூட்டர் கையாள்வதில் தேர்ச்சி பெற்றுவிட்டார்" என்பதையும் PAD-க்கு தெரிவித்து இருக்கிறார். ஆனாலும் அந்தத் தோழர்க்கு கன்பர்மேஷன் கொடுக்காமல், இன்கிரிமெண்ட் நிறுத்தப்பட்டு இருக்கிறது. Chief manager, PAD- திருவாளர் சுரேஷிற்கு அந்தக் கிளை மேலாளர் போன் செய்து கேட்டு இருக்கிறார். அவ்வளவுதான். "ஆமாம் சார், நீங்க ஒருநாள் கம்ப்யூட்டர் அவருக்குத் தெரியவில்லை என்பீர்கள். இன்னொரு நாள் கம்ப்யூட்டர் தெரியும் என்பீர்கள்." என ஆரம்பித்து வியாக்கியானங்களை பொரிந்திருக்கிறார். இத்தனை வருடம் கழித்து வாழ்வில் முதன் முறையாக பிரமோஷன் பெற்று மெல்ல மெல்ல வேலைகளைக் கற்றுக் கொள்ளும் ஒருவரை பரிவுடனும், ஆதரவுடனும் நடத்த வேண்டிய ஒரு முக்கிய துறையின் பொறுப்பாளருக்கு வருகிற சிந்தனையா இது? 'ரூலர் சுரேஷின்' ராஜ்ஜியத்தில் மனிதாபிமானத்திற்கும், இரக்கத்திற்கும் இடமில்லை.

ஒரு மேலாளர், தனது கிளையில் ஆள் பற்றாக்குறை இருப்பதை சொல்லி, "எப்ப சார் ஆள் போடப் போறீங்க" என்று கேட்டு இருக்கிறார். அவ்வளவுதான். "மிஸ்டர் நீங்க இந்த சீட்டுல வந்து உட்கார்ந்து டிரான்ஸ்பர் போடுங்க.." என்று கோபமாக பதில் சொல்லியிருக்கிறார். சரி. இதுபோல தலைமையலுவலகத்திலிருந்து ஒரு கிளை மேலாளருக்கு போன் செய்து, இந்தந்த வேலைகளை நீங்கள் செய்யவில்லை என்றால், "மிஸ்டர் நீங்க வந்து கிளையில் உட்கார்ந்து அதைச் செய்யுங்கள்" எனச் சொன்னால் அது எவ்வளவு மரியாதைக் குறைவானதாகவும், ஒழுக்கமின்மையாகவும் கருதப்படும்? 'ரூலர் சுரேஷின்' ராஜ்ஜியத்தில் ஒழுக்கம் என்பது கீழ் இருப்பவர்களுக்கு மட்டும்தான்.

இப்படி 'ரூலர் சுரேஷை'ப் பற்றி அடுக்கிக்கொண்டே போகலாம். அவர் செய்யும் அக்கிரமங்களுக்கும் அராஜகங்களுக்கும் அளவே இல்லாமல் போய்க்கொண்டு இருக்கிறது. தனக்குக் கீழ் இருப்பவர்கள் யாரும் அவரைக் கேள்வி கேட்டுவிட்டால், அடுத்த கணம் திருவாளர்.சுரேஷிற்கு கோபம் தலைக்கேறிவிடும். உலகின் மிக மோசமான எதிரியாக கேள்வி கேட்டவரை பாவித்து, அவர் மனம் வருந்தும்படி எதாவது செய்ய வேண்டும் என்கிற வெறியோடு சதாநேரமும் சிந்திக்க ஆரம்பிப்பார். நடந்து கொள்வார். குற்றம், குறை காண்பதில் ஒரு அலாதியான சுகமும், துடிப்பும் அவருக்குண்டு. சலுகைகள், உரிமைகளை வெட்டி சாய்ப்பதில் அளப்பரிய ஆனந்தத்தையும், பிறவிப்பயனையும் அடைவார். அதன் மூலம் தன் அறிவை உலகுக்கு காட்டிக்கொள்வார். ஆனால் இதற்கு பேர் வக்கிரம் என்பது அவருக்குத் தெரியாமல் போனதுதான் கொடுமை. அதிகாரத் திமிரிலும், ஆணவத்திலும் அவர் உதிர்த்த வார்த்தைகளை, அவர் செய்த காரியங்களை எல்லாம் நாமும் சகித்து சகித்துப் பார்த்தோம். திருந்துவதற்கு பல சந்தர்ப்பங்கள் அளித்தோம். ஆனால் அவர் திருந்துகிற மாதிரி இல்லை. எனவே அவரை இனி தொடர்ந்து அம்பலப்படுத்துவது என முடிவு செய்திருக்கிறோம்.

இந்த வங்கியில் இவரைப் போல எத்தனையோ பேர் அதிகாரத் திமிரில் ஆடாத ஆட்டமெல்லாம் ஆடி அடங்கி, கடைசியில் அடையாளம் தெரியாமல் போனார்கள். அதுதான் இப்படிப்பட்டவர்களுக்கான வரலாறு.

நமது PGBEA, PGBOU வின் மாநாடுகள்:

நமது மாநாடுகள் வரும் ஜூல 6, 7 தேதிகளில் மதுரையில் நடக்க இருப்பதையும், தோழர் முகர்ஜியின் நினைவாக ஏற்பாடுகள் செய்யப்பட்டு வருவதையும் தோழர்களுக்குத் தெரியப்படுத்தி இருந்தோம். அதற்கான பங்களிப்பாக கிளரிக்கல் தோழர்கள் ரூ.600/-ம், மெஸஞ்சர்த் தோழர்கள் ரூ.300/-ம் , விருதுநகரில் உள்ள நமது சங்கக் கணக்கு 5002ற்கு அனுப்பி வைக்கும்படி கேட்டுக் கொள்கிறோம்.

நமது அகில இந்தியப் பொதுச் செயலாளர் தோழர்.சையது கான் இந்த மாநாட்டிற்கு வருவது உறுதி செய்யப்பட்டு விட்டது. ஜூலை 9 ம் தேதி டெல்லியில் சுப்ரீம் கோர்ட்டில் பென்ஷன் வழக்கு வர இருக்கிற சூழலில், அவரது வருகை சிறப்பு பெறுகிறது.

நாம் அனைவரும் ஓரிடத்தில் கூடி நிற்கப் போகிறோம்.
ஒருவரையொருவர் நலம் விசாரித்து உற்சாகம் கொள்ள இருக்கிறோம்.
அன்பை பரிமாறிக் கொள்ளவும், கடந்த காலத்தின் அனுபவங்களை பகிர்ந்து கொள்ளவும் இருக்கிறோம்.

வாருங்கள்.

தோழமையுடன்

(M.சோலைமாணிக்கம்)
பொதுச்செயலாளர் - PGBEA

PGBEA - PGBOU circular 5/2013 dt 11.5.2013

2013-05-19T08:29:00.002+05:30

அருமைத் தோழர்களே!

வணக்கம்.

கிராம வங்கிகளை தனியார் மயமாக்குவதற்கு எதிராக:

கிராம வங்கிகளை தனியார் மயமாக்க, மத்திய அரசு பாராளுமன்றத்தில் ஒரு மசோதாவை அறிமுகம் செய்ததையும், அதன் மோசமான அம்சங்களையும் சென்ற சர்க்குலரில் விளக்கமாய் தெரிவித்திருந்தோம். ஏப்ரல் 29ம் தேதி தேசம் முழுவதும் ஆர்ப்பாட்டம் நடத்துமாறு AIRRBEA அறைகூவல் விடுத்திருந்ததையும் தெரியப்படுத்தியிருந்தோம். அதன் முதல் குரலாய், BEFI-TN சார்பில் திருச்சி, ஐ.ஓ.பி மண்டல அலுவலகத்தின் முன்பு ஒரு எழுச்சிமிக்க ஆர்ப்பாட்டத்தை நடத்தியது. பாண்டியன் மற்றும் பல்லவன் கிராம வங்கி ஊழியர்களும், வணிக வங்கி ஊழியர்களும், எல்.ஐ.சி ஊழியர்களும், அரசு ஊழியர்களும் கலந்துகொண்டனர். AIRRBEA-TN தலைவர் தோழர்.பிச்சைமுத்து தலைமை தாங்கினார். BEFI-TN பொதுச்செயலாளர் தோழர்.சி.பி.கிருஷ்ணன், PGBEA பொதுச்செயலாளர் தோழர். சோலைமாணிக்கம் கிராம வங்கிகளின் பங்குகளை தனியாருக்கு தாரை வார்ப்பதில் இருக்கும் ஆபத்துக்களை எடுத்துரைத்தனர்.

அடுத்தநாள் ஏப்ரல் 30ம் தேதி, பாண்டியன் கிராம வங்கித் தலைமை அலுவலகத்தின் முன்பு, நம் இரு சங்கங்களும் சேர்ந்து ஆர்ப்பாட்டம் நடத்தினோம். ஏறத்தாழ 75 தோழர்கள் கலந்துகொண்டனர். PGBOU தலைவர் போஸ்பாண்டியன் தலைமை தாங்கினார். BEFI-TN விருதுநகர் மாவட்டத் தலைவர் தோழர்.மாரிக்கனி ஆர்ப்பாட்டத்தில் கலந்து கொண்டு ஆதரவளித்துப் பேசினார்.

அடுத்தக்கட்டமாக, AIRRBEAவின் தலைவர்கள், அனைத்துக் கட்சி பாராளுமன்ற உறுப்பினர்களையும் சந்தித்து, ஆதரவு திரட்டி வருகின்றனர். தொடர்ந்த போராட்டங்களுக்கும் திட்டமிட்டு வருகின்றனர். நாம் ஊழியர்கள் மத்தியில் முதலில் ஒரு முழுமையான பிரச்சாரம் செய்வது எனத் திட்டமிட்டு இருக்கிறோம். 23.5.2013 அன்று தூத்துக்குடியிலும், 25.5.2013 அன்று காரைக்குடியிலும், 26.5.2013 அன்று திருநெல்வேலியிலும் வட்டாரக்கூட்டங்கள் நடத்துவது என முடிவு செய்திருக்கிறோம். இடம், நேரம் ஆகியவற்றைக் குறிப்பிட்டு பிரத்யேக அழைப்புகள் அனுப்பி வைக்கப்படும். தோழர்கள் திரளாக கலந்துகொள்ள அழைக்கிறோம்.

வங்கியின் லாபமும், ஊழியர்கள் நலனும்:

நமது வங்கி இந்த வருடம் 136 கோடி லாபம் ஈட்டியுள்ளது. கடும் போட்டிகளுக்கு இடையில், நெருக்கடிகளுக்கு நடுவே இந்த லாபம் பெருமைக்குரியதாகவும், சந்தோஷம் தரக்கூடியதாகவும் இருக்கிறது. அதே வேளையில், நேரம் காலமில்லாமல், தேவையான ஊழியர்கள் இல்லாமல், சரியான பணிச்சூழல் இல்லாமல் நாம் அனைவரும் கடும் அவதிப்பட்டுத்தான் இந்த லாபத்தை ஈட்டியுள்ளோம் என்கிற சிந்தனையும் மேலோங்குகிறது. அதற்கான மரியாதையோ, அங்கீகாரமோ இந்த வங்கியின் நிர்வாகத்திலிருந்து இல்லையே என்ற விமர்சனமும் கூடவே வருகிறது. ஒரு compliment கூட இல்லையே என்கிற குரல் எழுகிறது. கிளைகளில் நம் தோழர்கள் தினம் தினம் படும் வேதனைகளையும், வலிகளையும் கணக்கிலேயே எடுக்காமல் இந்த நிர்வாகம் தன் காரியத்தை சாதிப்பதில் மட்டுமே கவனமாய் இருப்பதையும் காணமுடிகிறது. உண்மைகள் கசப்பாய் இருக்கின்றன.

தலைமையலுவலகத்தில் பொறுப்பில் இருப்பவர்களிடம் குறைகளை எடுத்துச் சொன்னாலோ, கேள்விகள் கேட்டாலோ பொறுத்துக்கொள்ளும் மனோநிலையில் இல்லை. யாராவது கேட்டுவிட்டால் அவர்களை ஜென்ம விரோதிகளாய் பாவித்து படுத்துகிற பாடு கொடுமையானது. லீவிற்கு அனுமதி கொடுப்பதில் கடைப்பிடிக்கப்படும் கெடுபிடிகள், சம்பளப் பிடித்தங்கள் என ஊழியர் விரோத நடவடிக்கைகளின் பட்டியல் நீள்கிறது. இது ஆரோக்கியமானது இல்லை என்பதை தெரியப்படுத்த விரும்புகிறோம். வன்மங்களையும், வக்கிரங்களையும் மூளையில் இருந்து அப்புறப்படுத்தி, எல்லோரையும் சக மனிதர்களாய், சமமான மனிதர்களாய் பாவிப்பதும், மதிப்பதும் அவசியம். இந்த வங்கிக்கு லாபம் ஈட்டித் தந்தவர்களை அவமானப்படுத்தாதீர்கள். அடிமைகளாய் நடத்தாதீர்கள்.

சொஸட்டி தேர்தலில் நம் வெற்றியும், சிலரின் புழுக்கங்களும்:

Thrift Societyயின் டைரக்டர்கள் தேர்தலில் நம் தோழர்கள் அனைவரும் வெற்றிபெற்றார்கள் என்பதை ஏற்கனவே தெரியப்படுத்தி இருந்தோம். இப்போது சொஸைட்டியின் தலைவராக தோழர்.ஸ்ரீராமச்சந்திரன் அவர்களும், உதவித் தலைவராக தோழர்.விஜயராகவன் அவர்களும் தேர்ந்தெடுக்கப்பட்டு இருக்கின்றனர். அவர்களுக்கு நம் வாழ்த்துக்களைத் தெரிவித்துக் கொள்கிறோம்.

இந்த வெற்றியைத் தாங்க முடியாமல் சர்க்குலர்கள் வெளியிடப்பட்டு இருக்கின்றன. Thrift society என்பது நம் ஊழியர்கள் அனைவருக்குமான பொது ஸ்தாபனம். அதற்கான தேர்தல் முறையாக நடத்தப்பட்டு, நம் தோழர்கள் வெற்றி பெற்றிருக்கிறார்கள். நாம் வெற்றி பெற்றதால், அந்த பொது ஸ்தாபனம் தனியார் கைகளுக்குச் சென்றுவிட்டதாக புலம்புகிறது PGBWU. கிராம வங்கிகள் தனியார் கைகளுக்குச் செல்வதை எதிர்த்து குரல் எழுப்ப சிந்தனையற்றவர்கள், நமது சொஸைட்டி தனியார் கைகளுக்குச் சென்றுவிட்டதாகச் சொல்வது வேடிக்கை. இதைவிடக் மோசமானது PGBOA சர்க்குலர். தேர்தலில் நின்றவர்கள் அனைவரும் அரசியல்வாதிகளை விடக் கேவலமாக நடந்துகொண்டதாகவும், காசு கொடுத்து வாக்கு சேகரித்ததாகவும் கன்னபின்னாவென உளறிக் கொட்டியிருக்கிறது. தேர்தலில் நின்றவர்கள், வாக்கு அளித்தவர்கள், தேர்தலை நடத்திய அதிகாரிகள் அனைவரையுமே அவதூறு செய்யும் வார்த்தைகள் இவை. வன்மையாக கண்டிக்கிறோம்.

புதிய பணிநியமனங்கள்:

புதிய பணிநியமனங்களுக்கான இண்டர்வியு, மே மாதம் 15 தேதி முதல், 21 தேதி வரை நடக்க இருக்கிறது. அனேகமாக ஜூன் முதல் வாரத்தில் முடிவுகள் வெளியாகி, புதியவர்கள் பணிக்குச் சேர்வார்கள். அதுசமயம், அலுவலர்கள், கிளரிக்கல் தோழர்களுக்கான மாறுதல்கள் இருக்கும். நம் சங்கங்கள் நிர்வாகத்திடம் இதுகுறித்து பேச ஆரம்பித்திருக்கின்றன. நம் தோழர்களுக்கு சாதகமான மாறுதல்களை சென்ற முறை போலவே பெற்றுத் தருவோம் .

நமது அடுத்த மாநாடு:

தோழர்களே! நமது இரு சங்கங்களின் அடுத்த மாநாடுகளை நடத்த கூட்டு செயற்குழு முடிவு செய்திருக்கிறது. ஜூலை 6, 7 தேதிகளில், மதுரையில் நடக்க இருக்கிறது.

நமது மகத்தான தலைவர் தோழர்.திலிப்குமார் முகர்ஜியின் நினவுகளை போற்றும் விதமாக, பிரம்மாண்டமாக நடத்துவதற்கு ஏற்பாடுகள் நடந்து வருகின்றன.

பெரும் பொருட்செலவுகள் இருப்பதால், அலுவலர் தோழர்கள் ரூ.1000/-ஐ PGBOUவின் சேமிப்புக் கணக்கிற்கும் (எண்:5000, கிளை: விருதுநகர்) , எழுத்தர்கள் ரு.600/-ஐயும், மெஸஞ்சர்கள் ரூ.300/-ஐயும் PGBEAவின் சேமிப்புக் கணக்கிற்கும் (எண்:5002, கிளை: விருதுநகர்) அனுப்பி வைக்க வேண்டுமென கேட்டுக்கொள்கிறோம்.

தோழர்களே, இது நம் திருவிழா.

சந்தோஷத்துடனும், ஆரவாரத்துடனும் தயாராவோம்.

தோழமையுடன்

(M.சோலைமாணிக்கம்) (T.சங்கரலிங்கம்)

பொதுச்செயலாளர் - PGBEA பொதுச்செயலாளர் - PGBOU

PGBEA - PGBOU circular 4/2013 dt 26.4.2013

2013-05-10T08:56:00.001+05:30

அருமைத் தோழர்களே!

வணக்கம்.

நடந்து முடிந்த Thrift Society தேர்தலில் நம் இரு சங்கத்தின் ஆதரவு பெற்ற 11 தோழர்களுமே வெற்றி பெற்றிருக்கின்றனர்.

1. தோழர். புஷ்பராணி , 2. தோழர்.தமிழ்மலர், 3.தோழர்.விஜயலட்சுமி, 4.தோழர்.சண்முகம், 5.தோழர்.ஸ்ரீராமச்சந்திரன், 6.தோழர்.பாலசுப்பிரமணியன், 7.தோழர்.பரதன், 8.தோழர்.நடராஜன், 9.தோழர்.ரெங்கநாதன், 10.தோழர்.செல்வராஜ், 11.தோழர்.விஜயராகவன் ஆகியோர் Thrift Societyயின் டைரக்டர்களாகியிருக்கின்றனர். அவர்கள் அனைவருக்கும் நம் சங்கங்களின் வாழ்த்துக்களைத் தெரிவித்துக் கொள்கிறோம்.

இந்த வெற்றிகள் மூலம் பாண்டியன் கிராம வங்கி ஊழியர்கள் மற்றும் அலுவலர்கள் மத்தியில் நம் இரு சங்கங்களின் செல்வாக்கு உறுதி செய்யப்பட்டு இருக்கிறது, நிலைநாட்டப்பட்டு இருக்கிறது. நம் சங்கங்கள் மீது தோழர்கள் வைத்திருக்கும் நம்பிக்கையும், மரியாதையும் வெளிப்பட்டு இருக்கிறது. வெற்றி பெற்ற தோழர்கள் அந்த நம்பிக்கைக்கு பாத்திரமானவர்களாய் இருந்து சொஸைட்டியின் வளர்ச்சியையும் அதன் உறுப்பினர்களின் நலனையும் முன்னிறுத்தி செயல்படுவார்கள் என PGBEAவும், PGBOUவும் இந்த நேரத்தில் உறுதியளிக்கின்றன.

பாண்டியன் கிராம வங்கியில் Clerks to Officers, Scale III to Scale IV officers பிரமோஷன்கள் நடந்து முடிவுகள் உடனடியாக அறிவிக்கப்பட்டுள்ளன. ஏறத்தாழ கலந்துகொண்ட அனைவருக்குமே பதவி உயர்வுகள் கிடைத்திருக்கின்றன. அந்தத் தோழர்களுக்கு நம் வாழ்த்துக்களைத் தெரிவித்துக் கொள்கிறோம். அதே வேளையில் சில தோழர்களுக்கு Scale IV பிரமோஷன் வழஙக்கக்கூடாது என்று வேண்டுமென்றே அவர்கள் மீது தொடரப்பட்ட கடந்தகாலத்தின் பழிவாங்கும் நடவடிக்கைகள் இன்னும் தொடர்கிறது என்னும் விமர்சனத்தையும் வைக்க வேண்டியதிருக்கிறது. பாரபட்சமற்ற, பழிவாங்கும் நோக்கங்களற்ற, வெளிப்படையான நிர்வாகத்தைத்தான் அனைவரும் எதிர்பார்க்கிறார்கள்.

மே முதல் வாரத்தில் புதிய பணி நியமனங்களுக்கான நேர்முகத் தேர்வு நடைபெறும் என தலைமையலுவலகத்தில் சொல்லப்படுகிறது. மே இறுதி வாரத்தில் அதன் முடிவுகள் வெளியாகும் என்றும் அதையொட்டி அனைத்து நிலைகளிலும் மாறுதல்கள் இருக்கும் என்றும் சொல்லப்படுகிறது. தொலைதூரக்கிளைகளில் அவதிப்படும் தோழர்களுக்கு, அருகில் உள்ள கிளைகளுக்கு மாறுதல்கள் பெறுவதற்கான முயற்சிகளில் நம் சங்கங்கள் ஈடுபட்டு வருகின்றன.

தோழர்களே!
'பேயரசு செய்தால் பிணம் தின்னும் சாத்திரங்கள் உருவாகும்' என்பதை மத்தியில் ஆளும் காங்கிரஸ் அரசு திரும்பத் திரும்ப ஊர்ஜிதம் செய்து கொண்டு இருக்கிறது. பொதுத்துறை நிறுவனங்களை காவு கொடுப்பதற்கென்றே அவதாரம் எடுத்திருக்கும் மன்மோகன்சிங் தலைமையிலான அரசின், ஈவிரக்கமற்ற நிதியமைச்சர் ப.சிதம்பரம் தனது வெறிகொண்ட பார்வையை இப்போது கிராம வங்கிகள் பக்கம் திருப்பி இருக்கிறார். கடந்த திங்கட்கிழமை 22.4.2013 அன்று, பாராளுமன்றத்தில் கிராம வங்கிகளில் தனியார்கள் முதலீடு செய்யும் வகையிலான ஒரு மசோதாவை அறிமுகம் செய்திருக்கிறார். அதற்கேற்ப, RRB ACT 1976ன் 6வது ஷரத்தை திருத்தம் செய்யப் போவதாக அறிவித்திருக்கிறார்.

இதுவரை, கிராம வங்கிகளில் தனியார் முதலீடு செய்வதற்கான எந்த ஷரத்தும் RRB ACTல் இல்லை. இனி, மத்தியரசு, மாநில அரசு, ஸ்பான்ஸர் வங்கி தவிர தனியார்களிடமிருந்தும் முதலீடுகளை பெறலாம் என்றும், மத்திய அரசும், ஸ்பான்ஸர் வங்கியும் சேர்ந்து குறைந்த பட்சம் 51 சதவீதம் பங்குகளை வைத்திருக்க வேண்டுமென்றும் RRB ACTன் 6வது ஷரத்தை திருத்தம் செய்யப் போவதாக நிதியமைச்சர் ப.சிதம்பரம் சொல்லியிருக்கிறார்.

இந்த மசோதா நிறைவேற்றப்பட்டால் மாநில அரசின் பங்குகள் இனி தேவையில்லை என்பதும், அதிகபட்சமாக கிராம வங்கிகளின் 49 சதவீதம் பங்குகளை இனி தனியார்களுக்கு கொடுக்கலாம் என்பதும் நடைமுறையாக்கப்படும். கிராம வங்கிகளின் நிர்வாகக்குழுவில் தனியார்கள் இடம் பெறுவார்கள். கிராமப்புற வங்கிகளின் நோக்கம் முற்றிலும் சிதைக்கப்படும். 'முற்றிலும் அரசுக்கு சொந்தமானது' என்று சொல்லிக்கொள்ள முடியாது. தொழிலாளர்களின் உரிமைகளும், நலன்களும் காற்றில் விடப்படும். பிரமோஷன், மாறுதல்கள் எல்லாம் நிர்வாகத்திற்கு அனுசரணையாய் இருப்பவர்களுக்கு மட்டுமே சாத்தியமாகும். இட ஒதுக்கீடு போன்ற சமூகநீதிகளை புறம் தள்ளும். மெல்ல மெல்ல அரசு, தன் கட்டுப்பாட்டை தளர்த்தி, ஒருநாள் 49 சதவீதத்திற்கும் மேலாக தனியார்களுக்கு பங்குகளை விற்று, ஒரு மகத்தான அத்தியாயத்திற்கு முடிவுரை எழுதும்.

இந்த ஆபத்துக்களை உணர்ந்த நமது அகில இந்திய சங்கம் AIRRBEA உடனடியாக தனது எதிர்ப்பைத் தெரிவித்திருக்கிறது. நமது அருமைத் தோழர்.திலிப் குமார் முகர்ஜியின் மறைவையொட்டி, புதிய Secretary Generalஆக மத்தியக்கமிட்டியினால் தேர்ந்தெடுக்கப்பட்டு இருக்கிற தோழர்.சையத் கான், தேசம் முழுவதும் இருக்கிற கிராம வங்கி ஊழியர்களும், அலுவலர்களும் ஏப்ரல் 29ம் தேதி தலைமையலுவலகங்கள் முன்பாக கண்டன ஆர்ப்பாட்டம் நடத்துமாறு அறைகூவல் விடுத்திருக்கிறார். மேலும் அதே நாளில் டெல்லியில் நமது அகில இந்தியத் தலைவர்கள், பல்வேறு அரசியல் கட்சியைச் சேர்ந்த எம்பிக்களை சந்தித்து, பாராளுமன்றத்தில் இந்த மசோதாவுக்கு ஆதரவு தெரிவிக்க வேண்டாமென்று பிரச்சாரம் செய்யவும் திட்டமிடப்பட்டு இருக்கிறது.

நமது வங்கியில் ஏப்ரல் 30ம் தேதி கண்டன ஆர்ப்பாட்டம் நடத்தத் திட்டமிட்டு இருக்கிறோம். தோழர்கள் வரும் செவ்வாய்க்கிழமை மாலை 5 மணிக்கு தலைமையலுவலகம் முன்பாக திரண்டு வருமாறு நம் இரு சங்கங்களும் கேட்டுக்கொள்கின்றன.

தோழர்களே!
அரசின் விபரீத நடவடிக்கையினால், நமது எதிர்காலமும், கிராம வங்கிகளின் எதிர்காலமும் ஒருசேர கேள்விக்குள்ளாகி இருக்கின்றன. நாம் நமது குரலை கடுமையாக எழுப்பி, அரசின் நடவடிக்கைக்கு எதிர்ப்பு தெரிவிப்பதன் மூலமே இதனை தடுத்து நிறுத்த முடியும். கிராம வங்கிகள் தனியார் மயமாவதை, ஆரம்பத்திலேயே முறியடிக்க முடியும்.

வாருங்கள்.
புகையும் தீயை அணைக்க புறப்படுவோம், வாருங்கள்.
எந்த சமரசமும் இல்லாமல் போராடுவோம், வாருங்கள்.

தோழமையுடன்

(M.சோலைமாணிக்கம்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

PGBEA - PGBOU circular 3/2013 dt 21.3.2013

2013-03-22T15:43:00.002+05:30

சுற்றறிக்கை: 3/2013 நாள்: 21.3.2013

அருமைத் தோழர்களே!

“மார்ச் 30 அகில இந்திய வேலை நிறுத்தம்”

திட்டமிட்டபடி நடக்கும் என AIRRBEA அறிவித்துள்ளது.

இந்த வேலை நிறுத்தத்தின் பிரதான கோரிக்கையாகவும், முதல் கோரிக்கையாகவும் பென்ஷன் முன்வைக்கப்பட்டு இருக்கிறது. கம்ப்யூட்டர் இன்கிரிமெண்ட் வழங்கப்பட வேண்டும், தற்காலிக பணியாளர்களை நிரந்தரப்படுத்த வேண்டும் என்பதும், கிராம வங்கிகளுக்கு போதிய manpower நிச்சயிக்கப்பட வேண்டும், மாநில அளவிலான கிராம வங்கிகள் உருவாக்கப்பட்டு அவைகளை இணைத்து தேசீய கிராமப்புற வங்கி உருவாக்கப்பட வேண்டும் போன்ற கோரிக்கைகளும் வலியுறுத்தப்பட்டு இருக்கின்றன.

பதினைந்து வருட நெடிய போராட்டத்தின் இறுதிக்கட்டத்தில் நாம் நிற்கிறோம். அதுதான் இந்த வேலை நிறுத்தத்தின் முக்கியத்துவம்.

வஞ்சகமும், சூதும், துரோகமும் நிறைந்த மத்திய அரசுக்கு எதிராக நாம் நமது குரலை கடுமையாக உயர்த்தியாக வேண்டிய தருணம் இது. அதுதான் இந்த வேலை நிறுத்தத்தின் அர்த்தம்.

மாபெரும் இயக்கங்களின் மூலமாகத்தான் வணிக வங்கிக்கு இணையான ஊதியத்தையும், சலுகைகளையும் பெறுகிற நிலைக்கு நாம் வந்தடைந்தோம். அதையும் முழுமையாக அமல்படுத்தாமல், மத்திய அரசு செய்த கொடுமைகளில் ஒன்றுதான், வணிக வங்கியில் 1993ல் அமல்படுத்தப்பட்ட பென்ஷன் திட்டத்தை கிராம வங்கி ஊழியர்களுக்கு வழங்காமல் மறுத்தது.

இந்த சூழ்ச்சியை எதிர்த்து நாம் வாயை மூடிக்கொண்டு இருக்கவில்லை. கத்தியின்றி, ரத்தமின்றி காரியங்களை சாதித்துவிடலாம் என சத்தம் போடாமல் இருக்கவில்லை. தட்டாமலேயே கதவுகள் திறந்துவிடும் என அமைதி காக்கவில்லை.. ‘இது அநியாயம், இதனை நாங்கள் ஏற்றுக்கொள்ள முடியாது” என ஆவேசத்துடன் எழுந்து நின்றோம். அன்றிலிருந்து தொடர்ந்து இயக்கங்கள், தர்ணாக்கள், டெல்லி பேரணிகள் , நீதிமன்றங்களில் வழக்குகள் என பென்ஷனை பெறுவதற்கு நாம் மேற்கொண்ட முயற்சிகள் உயிர்த்துடிப்பு கொண்டவர்களின் மூச்சுக்காற்றிலும், மூளையிலும் நிறைந்தே இருக்கும்.

தொடர்ந்து போராடி போராடியே நாம் கர்நாடகா, இராஜஸ்தான் உயர்நீதிமன்றங்களில் நமக்கு சாதகமான தீர்ப்புகளைப் பெற்றோம். இதன் மூலமே, கிராம வங்கி ஊழியர்களுக்கு பென்ஷன் வழங்குவதற்கு மத்திய அரசுக்கு நிர்ப்பந்தத்தை ஏற்படுத்தினோம். இதன் விளைவாகத்தான், இப்போதைய ஜனாதிபதியும், அப்போதைய நிதியமைச்சருமான பிரணாப் முகர்ஜி அவர்கள் 2012ம் ஆண்டு ஜூன் மாதம் 20ம் தேதி, ‘கிராம வங்கி ஊழியர்களுக்கும் அலுவலர்களுக்கும் பென்ஷன் வழங்குவற்கான' நிதியமைச்சக ஃபைலில் கையெழுத்து இட்ட வரலாற்று சிறப்பு மிக்க நிகழ்ச்சி நடந்தது. லட்சக்கணக்கான கிராம வங்கி ஊழியர்கள், அலுவலர்களின் எதிர்பார்ப்பு நிறைவேறும் சூழல் ஏற்பட்டது.

நிதியமைச்சகத்தின் முடிவைத் தொடர்ந்து, கிராம வங்கி ஊழியர்களுக்கும், அலுவலர்களுக்கும் பென்ஷன் வழங்க நபார்டு தலைமையில் குழு அமைக்கப்பட்டது. லாபம் ஈட்டிய கிராம வங்கிகளுக்கு மட்டுமே பென்ஷன் வழங்கவேண்டும் என்கிற அரசின் முடிவுக்கு எதிரானதாக இராஜஸ்தான் உயர்நீதிமன்றத் தீர்ப்பு இருந்தது. நபார்டின் நிலைபாடும் அதுவாகவே இருந்தது. இந்த முரண்பாடுகளிடையே பென்ஷன் திட்டம் அமல்படுத்துவதில் காலதாமதம் ஏற்பட்டது. இருப்பினும், நபார்டின் பரிந்துரைகளையடுத்து, நிதியமைச்சகம் கிராம வங்கி ஊழியர்களுக்கும் அலுவலர்களுக்கும் ஒரு பென்ஷன் திட்டத்தை எழுத்துபூர்வமாக ஏறத்தாழ உருவாக்கி வைத்திருந்தது. அதன் சிறப்பம்சங்களை நாம் தோழர்களுக்கு தெரியப்படுத்தியிருந்தோம்.

சாதகமான சூழல்கள் ஒருபக்கம் உருவாகிக்கொண்டு இருக்கும்போதே, நிதியமைச்சகம் இன்னொரு பக்கம் இந்த பென்ஷன் திட்டத்தை முறியடிக்கும் சதி வேலைகளிலும் ஈடுபட்டு வந்தது. இராஜஸ்தான் உயர் நீதிமன்றத்தில் வழங்கப்பட்ட தீர்ப்புக்கு எதிராக மேல்முறையீட்டை செய்தது. நிதியமைச்சகத்தின் இந்த முடிவு பச்சை துரோகமானது. கிராம வங்கி ஊழியர்களுக்கும் அலுவலர்களுக்கும் பென்ஷன் வழங்க ஒப்புக்கொண்டு, கையெழுத்திட்டு, அமல்படுத்துவதற்கான ஏற்பாடுகளும் செய்த பிறகு, முடிவுகளிலிருந்து பின் வாங்குவது என்பது நேர்மையற்ற செயல்.

இதனை எதிர்த்து AIRRBEA ஒருபுறம் நீதிமன்றங்களில் நியாயம் கிடைப்பதற்கான வழிகளில் ஈடுபட்டு வருகிறது. உச்சநீதிமன்றத்தை அணுகி இருக்கிறோம். ஏப்ரல் 29ம் தேதி அது ஹியரிங்குக்கு வருகிறது. அதே வேளையில், இன்னொருபுறம் கிராம வங்கி ஊழியர்களையும், அலுவலர்களையும் திரட்டி இந்த அரசுக்கு மேலும் நிர்ப்பந்தம் கொடுப்பதற்கான இயக்கங்களையும் அறிவித்து நாடெங்கிலும் ஒரு பெரும் போராட்டத்தை நடத்தி வருகிறது AIRRBEA.

பிப்ரவரி 5ம் தேதி நமது தலைமை அலுவலகத்தின் முன்பாக ஒருநாள் தர்ணா நடத்தியிருக்கிறோம். அதையடுத்து, பிப்ரவரி 25ம் தேதி, மாநிலத் தலைநகர் சென்னையில் நபார்டு அலுவலகத்தின் முன்பு தர்ணா நடத்தியிருக்கிறோம். பாண்டியன் கிராம வங்கி, பல்லவன் கிராம வங்கி, புதுவை பாரதியார் கிராம வங்கிகளில் உள்ள AIRRBEAவின் இணைப்புச் சங்கங்களின் சார்பில் 80க்கும் மேற்பட்ட தோழர்கள் தர்ணாவில் கலந்து கொண்டனர். BEFI-TN தலைவர்கள் கலந்து கொண்டு வாழ்த்திப் பேசினர். நபார்டு எம்ப்ளாயிஸ் யூனியன் தோழர்கள் மதிய உணவு தந்து, ஆதரவு தெரிவித்தனர். எழுச்சி மிக்க நமது போராட்டங்களில் ஒன்றாக அந்த போராட்டம் அமைந்திருந்தது.

இப்போது, மார்ச் 30 வேலை நிறுத்தம் செய்ய இருக்கிறோம். தோழர்களே! இது நம் எதிர்காலத்தை நம்பிக்கை நிறைந்ததாகவும், வெளிச்சம் கொண்டதாகவும் அமைத்துக்கொள்வதற்காக நாம் நடத்துகிற போராட்டம்.

இந்த வங்கியில் 30 ஆண்டுகளுக்கும் மேலாக பணிபுரிந்துவிட்டு, பணி நிறைவு பெறுகிற நாளில், ‘நாளை என்ன செய்யப் போகிறோம்' என்ற கேள்வி ஒவ்வொருவருக்குள்ளும் எழுந்து நிலைகுலைய வைப்பதை பார்க்கிறோம். 'பென்ஷன் வந்துவிடும்' என்ற கனவோடும், எதிர்பார்ப்போடும் இங்கு நாட்களை கடத்தும் அவர்களின் முகங்கள் நினைவுக்கு வருகின்றன. நாம் சும்மா இருந்தால் எதிர்காலம் வெறுமையும், விரக்தியும் கொண்டதாக மாறிவிடும்.

எனவே, இந்த வேலைநிறுத்ததில் பங்குகொள்கிற ஒவ்வொருவரும், இந்த இருளை விரட்டுகிற ஒரு மெழுகுவர்த்தியை ஏற்றி வைக்கிறீர்கள் என்பதை உணர்ந்து கொள்ளுங்கள்.

யாருக்கோ வந்தது என்றோ, யாராவது போராடி வாங்கிக் கொடுப்பார்கள் என்றோ இருக்கும் மனநிலையை தயவுசெய்து மாற்றிக்கொள்ளுங்கள்.

சங்க வித்தியாசம் கொண்டு, இந்த வேலை நிறுத்தத்தை முறியடிக்கிற செயலில் ஈடுபட வேண்டாம் என மாற்று சங்கத்தினரை வேண்டுகிறோம். அது நமக்கு நாமே தோண்டிக்கொள்கிற குழியாகும்.

நாம் நமக்காகவும், நம் அனைவருக்காகவும் போராடுகிறோம். நாளை நாம் வாங்கப் போகும் பென்ஷனில், அதன் மூலம் கிடைக்கிற உணவில், உடையில், மரியாதையில் இந்த வேலை நிறுத்தத்தில் ஈடுபட்ட அனைவரின் பெயர்களும் நிச்சயம் இருக்கும். அதில் உங்கள் பெயரும் இருப்பதை உறுதி செய்யுங்கள். அதுதான் சுயமரியாதைக்கான அர்த்தமாகும்.

வாருங்கள், மார்ச் 30 வேலை நிறுத்தத்தை வெற்றிகரமாக்குவோம்.

தோழமையுடன்

(M.சோலைமாணிக்கம்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

PGBEA - PGBOU circular 2/2013 dt 17.2.2013

2013-03-06T19:14:00.000+05:30

சுற்றறிக்கை: 2/2013 நாள்: 16.2.2013

அருமைத் தோழர்களே!

வணக்கம்.

திட்டமிட்டபடி பிப்ரவரி 5 ம்தேதி, நமது அகில இந்திய தர்ணா எழுச்சியோடு நடந்து முடிந்திருக்கிறது. பென்ஷன், தற்காலிக ஊழியர்களை நிரந்தரப்படுத்துதல், ஆட்குறைப்பை நியாயப்படுத்தும் மத்திய அரசின் HR பாலிசிக்கு எதிர்ப்பு போன்ற முக்கிய கோரிக்க்கைகளை வலியுறுத்தி நடந்த இந்த தர்ணா நம்மை அடையாளப்படுத்தும் ஒரு இயக்கம். ஏறத்தாழ நூறு தோழர்கள் திரண்டு வந்திருந்தனர்.

அடுத்தக் கட்டமாக, பிப்ரவரி 25ம் தேதி சென்னை நோக்கி நமது பயணம் நடக்க இருக்கிறது. அறிவித்தப்படி, திருநெல்வேலி, மதுரை, காரைக்குடி பகுதிகளிலிருந்து மினி பேருந்துகள் ஏற்பாடு செய்யப்பட்டு இருக்கின்றன. இதுவரை 50க்கும் மேற்பட்ட தோழர்கள் வருவதாக தெரிவித்து இருக்கின்றனர். வர இருக்கும் தோழர்கள் உடனடியாக தங்களையும் இணைத்துக்கொள்ள வேண்டுகிறோம்.

நிர்வாகத்துடன் பேச்சுவார்த்தை:

14.2.2013 அன்று நமது இரு சங்கங்களும் நிர்வாகத்துடன் பேச்சுவார்த்தை நடத்தினோம். சேர்மனும், இரு பொது மேலாளர்களும் கலந்துகொண்ட இந்த பேச்சுவார்த்தையில் நாம் பிரதானமாக வலியுறுத்தியது, Recruitment- ஐத்தான். இன்று வங்கியில் ஒரு அசாதாரண, மோசமான பணிச்சூழல் நிலவுகிறது. வேலைப்பளு அதிகரித்துக்கொண்டே இருக்கிறது. ஆனால் பணி செய்ய போதுமான ஆட்கள் இல்லை. லீவு, டெபுடேஷன் என அனைத்தும் பெரும் சிரமமாய் இருக்கிறது. நமது ஊழியர்கள் மற்றும் அலுவலர்களின் கடுமையான, வலிநிறைந்த பணியினால் அது சரிக்கட்டப்படுகிறது என்பதே உண்மை. ஆனால் இதுவே தொடர்கதையாகிவிடக் கூடாது. உடனடியாக Recruitment நடத்தப்பட வேண்டும். ஆனால் சென்ற வருடம் செப்டம்பர் மாதத்திலிருந்து ‘இதோ Recrutiment வந்துவிடும்' என சொல்லப்பட்டுக்கொண்டே இருக்கிறது. இன்னும் வந்தபாடில்லை. மத்திய அரசு அனுமதி கிடைக்கவில்லை என முதலில் சொல்லப்பட்டது. இப்போது மத்திய அரசு அனுமதித்துவிட்டது, ஐ.ஓ.பியிலிருந்து கடிதம் வரவில்லை எனச் சொல்லப்படுகிறது. ஆனால் பல்லவன் கிராம வங்கியிலோ Recruitment நடந்து முடியும் தறுவாயில் இருக்கிறது.

நமக்கு வாய்த்த ஸ்பான்ஸர் வங்கி நம்மீது காட்டும் அக்கறை, ஈடுபாடு மீது கேள்விகள் எழுவதைத் தவிர்க்க முடியவில்லை. நமது பிரச்சினைகள் குறித்து ஐ.ஓ.பிக்கு எழுதப்பட்ட கடிதங்களுக்கு உடனடியாகவும் முறையாகவும் பதில்கள் எப்போதுமே வருவதில்லை. ஆனால் ஐ.ஓ.பியின் உயரதிகாரிகள் இங்கு வரும்போதெல்லாம் அவர்களுக்கு அளிக்கப்படும் வரவேற்பிற்கும், தடபுடல் மரியாதைகளுக்கும் எந்த குறைவுமில்லை. இந்த முரண்பாடு விசித்திரமாயிருக்கிறது.

நமது தரப்பை பொறுமையாகக் கேட்டுக்கொண்ட சேர்மன் அவர்கள் இன்னும் ஓரிரு நாட்களில் Recrutiment குறித்த அனுமதி கிடைத்துவிடும் பொறுத்துக் கொள்ளுங்கள் என்று சொன்னார்.

தொடர்ந்து leave regularisation, Enhancement of Staff housing loan, Enhancement of Staff vehicle loan, Solor power loan to staff, DPN loan to charge sheeted employees and officers, Reimbursement of fuel expenses to officers and employees, Physically Handicapped Allowance, Disciplinary Actions என பல விஷயங்களைப் பேசினோம். அனைத்திற்கும் நிர்வாகம் சாதகமான பதிலைச் சொல்லி நம்பிக்கையளித்திருக்கிறது. அவைகள் குறித்து விரிவாக இனி வரும் சர்க்குலர்களில் விவாதிப்போம்.

பிப்ரவரி 20, 21 இரண்டு நாள் வேலை நிறுத்தம்:

அனைத்து மத்திய தொழிற்சங்கங்களின் கூட்டமைப்பின் சார்பாக, மத்திய அரசின் மக்கள் விரோத செயல்பாடுகளுக்கு எதிராக பிப்ரவரி 20, 21 இருநாள் வேலைநிறுத்தம் குறித்து சென்ற சர்க்குலரில் தெரியப்படுத்தி இருந்தோம். ஏறத்தாழ 10 கோடி பேர்களுக்கும் மேல் உறுப்பினர்களைக் கொண்ட சங்கங்கள் இணைந்து நடத்தும் ஒரு மகத்தான போராட்டம் இது. இந்திய சுதந்திரத்திற்குப் பின், இத்தனை பெரும் அளவில் தொழிலாளர்களின் அணிவகுப்பை நாடு சந்தித்ததில்லை என சமூக ஆர்வலர்கள் சொல்கிறார்கள்.

நமது அன்றாட வாழ்வை பாதிக்கும் பிரச்சினைகளை முன்வைத்துத்தான் இந்த இரண்டுநாள் வேலை நிறுத்தம் நடக்க இருக்கிறது. விலைவாசி உயர்வைக் கட்டுப்படுத்தாவிட்டால், நமது ஊதியமும், ஊதிய உயர்வும் அர்த்தமில்லாமல் போய்விடும். தொழிற்சங்க சட்டங்கள் மீறப்பட்டால், தொழிலாளர்களுக்கு பணிப் பாதுகாப்பு என்பதே கேள்விக்குறியாகிவிடும். பொதுத்துறை நிறுவனங்களை பாதுகாப்பது என்பது நமது எதிர்காலத்தை உறுதிசெய்து கொள்ளும் ஒரு மகத்தான காரியம். போனஸ், பிராவிடண்ட் பண்ட் மற்றும் கிராஜுவிட்டியில் உள்ள உச்ச வரம்புகளை நீக்க வேண்டும் என்பதும், அனைவருக்கும் பென்ஷன் உறுதி செய்யப்பட வேண்டும் என்பதும் அவுட்சோர்சிங் நிறுத்தப்பட்டு தற்காலிக பணியாளர்களுக்கு நிரந்தர ஊதியம் வழங்கப்பட வேண்டும் என்பதும் நமது கோரிக்கைளே. இவைகளுக்கு நாம் போராடாமல் யார் போராடுவது?

எனவேதான் பிப்ரவரி, 20, 21 இருநாள் வேலைநிறுத்தத்தை வெற்றிகரமக்குவோம் என அழைக்கிறோம். இதுகுறித்து விருதுநகர், இராமநாதபுரம், காரைக்குடி ஆகிய மையங்களில் வேலை நிறுத்தத்திற்கான ஆயத்தக் கூட்டங்கள் நடைபெற்று இருக்கின்றன. வேலை நிறுத்தத்தில் முழுவீச்சோடு கலந்துகொள்வது எனமுடிவு செய்யப்பட்டு இருக்கிறது.

வங்கித்துறையில் ஏற்கனவே AIBEA, BEFI, AIRRBEA போன்ற அகில இந்திய சங்கங்கள் இந்த வேலை நிறுத்தத்தில் கலந்துகொள்ள தீர்மானித்திருந்தன. இப்போது இந்த கோரிக்கைகளின் நியாயம் உணர்ந்து வங்கித்துறையில் உள்ள AIBOC, NCBE, AIRRBOFபோன்ற சங்கங்களும் வேலை நிறுத்தத்தில் கலந்துகொள்ள முடிவு செய்திருக்கின்றன. நமது வங்கியில் PGBOAவும் வேலைநிறுத்தத்தில் கலந்துகொள்வதாக சர்க்குலர் வெளியிட்டு இருக்கிறது. இதனை நாம் வரவேற்கிறோம். பாராட்டுகிறோம். எனவே, இந்தியாவில் உள்ள அனைத்து வங்கிக்கிளைகளும் பிப்ரவரி 20, 21 தேதிகளில் மூடப்பட்டு விடும்.

அதுபோல், பாண்டியன் கிராம வங்கியிலும் அனைத்துக் கிளைகளும் மூடப்படுவதற்கு தோழர்கள் களமிறங்குவோம். இரண்டுநாள் ஊதியத்தை ஒரு பொருட்டாக கருதாமல் தேசத்தின் நலனை முன்னிறுத்துவோம்.

நாம் விழித்துக் கொள்ளாமல் தேசம் விழித்துக்கொள்ளாது. வாருங்கள் தோழர்களே, தேசம் காக்க வேலை நிறுத்தம் செய்வோம், வாருங்கள்.

தோழமையுடன்

(M.சோலைமாணிக்கம்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU

PGBEA - PGBOU circular 1/2013 dt 29.1.2013

2013-01-30T06:52:00.000+05:30

சுற்றறிக்கை எண்: 1/2013 நாள்: 29.1.2013

அருமைத்தோழர்களே!

வணக்கம்.

பாண்டியன் கிராம வங்கி நிர்வாகம், புத்தாண்டுப் பரிசாக PGBEA தலைவர் மாதவராஜ் அவர்களுக்கு சார்ஜ் ஷீட் கொடுத்தது. சில குறிப்பிட்ட தினங்களில் அவர் வங்கிக்கு குறித்த நேரத்தில் வரவில்லையென்பதும், 2010 முதல் 2012 வரையிலான காலத்தில் 80 நாட்கள் unauthorised absence என்பதும் அவர் மீது வைக்கப்பட்ட குற்றச்சாட்டுகள். தொழிற்சங்கப்பணிகளுக்காக இங்கு Duty Relief கிடையாது. Special Leave கிடையாது. தொழிற்சங்க நடவடிக்கைகளுக்காக, நாம் நமது ஊதியத்தை இழந்து, LLPயில் சென்றால் அதையும் அனுமதிக்க முடியாது என்று நிர்வாகம் சார்ஜி ஷீட் செய்கிறது. இதையே காரணம் காட்டி, ஏற்கனவே தோழர்கள் சோலைமாணிக்கம் அவர்களுக்கும், மாதவராஜ் அவர்களுக்கும் 2005ல் இருந்து இன்கிரிமெண்ட் கொடுக்கப்படவில்லை. Leave regularise செய்யப்படவில்லை. முறையாக Leave regularise செய்யப்பட்டால் இப்போது கொடுக்கப்பட்ட சார்ஜ் ஷீட்டே தேவையே இல்லாத ஒன்றாகிவிடும்.

நிர்வாகத்தின் ஒழுங்கு நடவடிக்கை தாக்கீதுகளை வாங்கிக் கொண்டு வந்து நிற்கும் ஊழியருக்கு சங்க பிரதிநிதி உட்கார்ந்து பதில் எழுத வேண்டி இருக்கிறது. டெபுடேஷன், லீவு என அன்றாடம் தோழர்கள் எதிர்கொள்ளும் பல்வேறு பிரச்சினைகளை தீர்த்து வைப்பதற்கான முயற்சிகளில் ஈடுபட வேண்டி இருக்கிறது. சங்க வேலைகளுக்காக பயணங்கள் மேற்கொள்ள வேண்டி இருக்கிறது. ஆனால் அவர் இருக்கையிலிருந்து வெளியே போய் யாருடனாவது பேச நேரிட்டாலும், அல்லது யாரையாவது பார்த்துவிட்டு தாமதமாக வந்தாலும் அதற்கு ஒரு குற்றச் சாட்டு. சரி, விடுப்பில் போய் தொழிற்சங்கப் பொறுப்புகளை கவனித்து விட்டு வந்தாலும், அதிக நாள் விடுப்பு என்று அதற்கு வேறொரு குற்றச் சாட்டு. இந்த இரண்டும் தானே மாதவராஜ் மீது இப்போது நிறுத்தப் பட்டிருப்பது. தோழர் மாதவராஜ் என்ன, லீவு போட்டுவிட்டு, வங்கிக்கு தாமதமாக வந்து தனிப்பட்ட பிஸினஸ் ஏதும் செய்தாரா?

நிர்வாகத்தின் அடக்குமுறைக்கு எதிராக 4.1.2013 அன்று தலைமை அலுவலகத்தில் கண்டன ஆர்ப்பாட்டத்திற்கு நமது இரு சங்கங்களும் அறைகூவல் விடுத்தன. நூற்றுக்கும் மேற்பட்ட தோழர்கள் திரண்டு வந்து பாண்டியன் கிராம வங்கி நிர்வாகத்தின் தொழிற்சங்க விரோத நடவடிக்கைக்கு எதிராக ஆவேசமாக குரல் எழுப்பினர்.

இரு சங்கத்தின் சார்பிலும் பொதுமேலாளரையும், சேர்மனையும் சந்தித்துப் பேசியிருக்கிறோம். நம் தரப்பு நியாயங்களைக் கேட்டுக்கொண்ட அவர்கள், இப்பிரச்சினையை சுமூகமாக தீர்ப்பதற்கான வழிகளை மேற்கொள்வதாக சொல்லியிருக்கின்றனர்.

அகில இந்திய கோரிக்கைகளும், இயக்கங்களும்:

(1) கிராம வங்கி ஊழியர்களுக்கும், அலுவலர்களுக்கும் பென்ஷன் வழங்கும் திட்டம் ஒப்புக்கொள்ளப்பட்டு, அதுகுறித்து விரிவான விவாதங்கள் நடத்தப்பட்டு, ஒரு பென்ஷன் திட்டம் தயாரான நிலையில் மேலும் காலதாமதம் செய்கிற காரியத்தை மத்திய அரசு மேற்கொண்டு வருகிறது. (2) தேசீய கிராமப்புற வங்கி என்னும் நீண்டநாள் கோரிக்கையை நிஜமாக்க வேண்டியதிருக்கிறது. (3) நம் வங்கியில் உள்ளது போல நாடு முழுவதும் உள்ள கிராம வங்கிகளில் உள்ள தற்காலிக ஊழியர்கள் நிரந்தரம் செய்யப்பட்டமல் இருக்கின்றனர். (4) கிராம வங்கி நிர்வாகக்குழுவில், தொழிற்சங்கப் பிரதிநிதிகளுக்கு இடம் வேண்டும் என்னும் நமது கோரிக்கையை இன்னும் அரசு பரிசீலிக்காமல் இருக்கிறது. (5) ஏற்கனவே குறைவான ஊழியர்களும், அதிகமான வேலைப்பளுவும் நம்மை அழுத்திக்கொண்டு இருக்கிற நிலையில், மத்திய அரசு தற்போது திட்டமிட்டு இருக்கும் HR பாலிசி, மேலும் நெருக்கடிகளையும், சுமைகளையும் நம்மீது திணிப்பதாக உள்ளது.

இந்தப் பிரச்சினைகளை முன்னிறுத்தி, அவைகளை தீர்ப்பதற்காக நமது அகில இந்திய சங்கம் தொடர் இயக்கங்களை அறிவித்துள்ளது. நமது இரு சங்கங்களின் செயற்குழுக்கள் கூடி கீழ்க்கண்டவாறு, அவ்வியக்கங்களை நடத்த திட்டமிடப்பட்டு இருக்கின்றன. அதன்படி-

1.பிப்ரவரி 5ம் தேதி நம் தலைமையலுவலகம் முன்பு ஒருநாள் தர்ணா.

2. பிப்ரவரி 25ம் தேதி, சென்னையில் நபார்டு, மண்டல அலுவலகம் முன்பு ஒருநாள் தர்ணா.

3. மார்ச் 31ம் தேதி ஒருநாள் வேலை நிறுத்தம்.

கிராம வங்கி ஊழியர்களின், அலுவலர்களின் எதிர்காலம் குறித்த தெளிவானப் புரிதலுடனும் அக்கறையுடனும் தீர்மானிக்கப்பட்டு இருக்கும் இந்த இயக்கங்களை வெற்றிகரமாக்குவது நம் அனைவரின் கடமையாகிறது. சென்னையில் நடைபெறும் தர்ணாவுக்குச் செல்வதற்கு மதுரை, திருநெல்வேலி, காரைக்குடி ஆகிய மையங்களில் இருந்து மினி பேருந்துகள் ஏற்பாடு செய்யப்பட உள்ளன. தர்ணாவில் கலந்துகொள்ள விரும்பும் தோழர்கள் அந்தந்த மையங்களில் உள்ள சங்கப் பொறுப்பாளர்களை அணுகும்படி கேட்டுக்கொள்ளப்படுகிறார்கள்.

இந்தப் போராட்டங்களுக்காக, நிதி திரட்டுவது எனவும் முடிவு செய்யப்பட்டு இருக்கிறது. அதன்படி அலுவலர்த் தோழர்கள் ரூ.500/-, கிளரிக்கல் தோழர்கள் ரூ.300/- மற்றும் மெஸஞ்சர்த் தோழர்கள் ரூ.200/-ம், விருதுநகரில் உள்ள AIRRBEA- TN கணக்கு எண்: 5001 க்கு, இந்த ஜனவரி மாத ஊதியத்தில் அனுப்பிட வேண்டுகிறோம்.

பிப்ரவரி 21, 22 அகில இந்திய வேலை நிறுத்தம்:

இந்தியாவில் அனைத்துத் துறைகளிலும் உள்ள முக்கிய சங்கங்கள் ஒன்றிணைந்து தேசம் காக்கும் போராட்டம் நடத்த திட்டமிட்டு இருக்கின்றனர். CITU, AITUC, INTUC, BMS, HMS முதற்கொண்டு முக்கிய மத்திய சங்கங்கள், மத்திய அரசின் மக்கள் விரோத நடவடிக்கைகளுக்கு எதிராக பிப்ரவரி20 மற்றும் 21 தேதிகளில் இரண்டு நாள் வேலை நிறுத்தம் செய்ய அறைகூவல் விடுத்திருக்கின்றனர். பல கோடி தொழிலாளிகள் சங்கமிக்க இருக்கும் மிக உக்கிரமான போராட்டம் இது. நம் நாடு சுதந்திரம் பெற்ற பிறகு, மிக விரிவான தளத்தில் நடைபெற இருக்கும் மகத்தான தொழிற்சங்க வரலாற்று நிகழ்வு இது. மக்களை வாட்டி வதைக்கும் விலைவாசி உயர்விலிருந்து, தொழிலாளர்களுக்கு பென்ஷன், போனஸ் உள்ளிட்ட பல பிரச்சினைகளை முன்வைத்து இந்த இருநாள் வேலைநிறுத்தம் நடைபெற இருக்கிறது.

கோரிக்கைகள்
1. விலைவாசி உயர்வைக் கட்டுப்படுத்த வேண்டும்.

2. தொழிற்சங்க சட்டங்களை கறாராக அமல்படுத்த வேண்டும்.

3. அணி திரட்டப்பட்ட/ திரட்டப்படாத தொழிலாளர்கள் அனைவருக்கும் சமூகப் பாதுகாப்பு அளிக்கப்பட வேண்டும்.

4. பொதுத்துறை நிறுவனங்களை தனியாருக்குத் தாரை வார்ப்பது நிறுத்தப்பட வேண்டும்.

5. அவுட்சோர்சிங் நிறுத்தப்பட்டு, தற்காலிக பணியாளர்களுக்கு நிரந்தர ஊதியம் வழங்கப்பட வேண்டும்.

6. குறைந்தபட்ச ஊதியம் நிர்ணயிக்கபட வேண்டும்.

7. போன்ஸ், பிராவிடண்ட் பண்ட் மற்றும் கிராஜுவிட்டியில் உள்ள உச்ச வரம்புகளை நீக்க வேண்டும்.

8.அனைவருக்கும் பென்ஷன் உறுதி செய்யப்பட வேண்டும்.

வங்கித்துறையில் AIBEAவும், BEFIயும், AIRRBEAவும் இந்த வேலைநிறுத்தத்தில் பங்குபெறுகின்றன. நமது வங்கியில், இந்த வேலைநிறுத்தத்தை வெற்றி பெறச் செய்யும் பொறுப்பும், அர்ப்பணிப்பும் நம் அனைவருக்கும் வேண்டும்.

இதுகுறித்து, மூன்று கருத்தரங்குகளை நடத்துவது என நமது இரு சங்கங்களும் முடிவு செய்திருக்கின்றன.

1. விருதுநகர் : 8.2.2012 மாலை 5.30 மணி

2.இராமநாதபுரம்: 11.2.2013, திங்கள் மாலை 5.30 மணி

3.காரைக்குடி: 15.2.2013, வெள்ளி மாலை 5.30 மணி

கருத்தரங்கம் நடக்கும் இடம் குறித்த விவரங்கள் தோழர்களுக்கு தபால்கள் மூலம் தெரியப்படுத்தப்படும்.

மேலும், மதுரை, திருநெல்வேலி, தூத்துக்குடி ஆகிய மையங்களில், அனைத்துத் தொழிற்சங்கங்கள் இனைந்து நடத்தும் கருத்தரங்குகளில் நம் தோழர்கள் பெருமளவில் கலந்துகொள்ள வேண்டும் எனவும் அழைக்கிறோம்.

3.3.2013 அலுவலர்களுக்கான சிறப்பு பயிற்சி முகாம்:

இன்று அலுவலர்கள் பல்வேறு வகையான நெருக்கடிக்கு உள்ளாகிக்கொண்டு இருக்கின்றனர். கம்ப்யூட்டர் மயமான புதிய பணிச்சூழல் சிரமங்களைத் தருகிறது. ஓய்வு பெறுகிற நேரம், மன உளைச்சல் அலைக்கழிக்கிறது. ஒழுங்கு நடவடிக்கைகள் பயமுறுத்துகின்றன. இந்த நிலையில் கிளைகளில் பணிகளை சீரமைத்துக் கொள்ளவும், நம்மை பாதுகாத்துக் கொள்ளவும் ஒரு பயிற்சி முகாம் அவசியம் என பல தோழர்கள் வேண்டுகோள் விடுத்திருந்தனர். அதன் அடிப்படையில் அலுவலர்களுக்கென்று ஒரு சிறப்பு பயிற்சி முகாம் நடத்துவதென முடிவு செய்திருக்கிறோம். 3.3.2013 அன்று மதுரையில் வைத்து நடத்த ஏற்பாடு செய்யப்பட்டு வருகிறது. பிரத்யேகமான அழைப்பிதழ்கள் தோழர்களுக்கு அனுப்பி வைக்கப்படும்.

தோழர்களே!

புதிய ஆண்டில் அகில இந்திய அளவிலான இயக்கங்கள் கூர்மையடைந்து இருக்கின்றன. சவால்கள் மிக்கதாகவும், போராட்டங்கள் நிறைந்ததாகவும் நாட்கள் துவங்கி இருக்கின்றன.

நமது வங்கியில், தலைமை அலுவலகத்தை சீரமைக்க வேண்டுமென கடந்த மே மாதம் ஒரு இயக்கம் ஆரம்பித்தோம். தொடர்ந்து நிர்வாகத்தின் ஒழுங்கு நடவடிக்கைகளுக்கு எதிராக ஒரு இயக்கத்தை ஆரம்பித்து இருந்தோம். அவைகள் ஒருநாளில் சரிசெய்யப்பட முடியாதவை என்றும், தொடர்ந்த இயக்கங்களால் மட்டுமே சரியாகும் என்றும் தெளிவு நமக்குண்டு. இப்போது சில மாற்றங்களும், நல்ல அறிகுறிகளும் தெரிய ஆரம்பித்து இருக்கின்றன. சேர்மன் அவர்களும் மற்றும் பொது மேலாளர் அவர்களும் ஒரு புதிய, சுமூகமான நிலைமையை உருவாக்குவது குறித்த தங்கள் நல்லெண்ணத்தை வெளிப்படுத்தி உள்ளனர். வங்கியின் சிகரங்களை உயர்த்தவும் தங்கள் விருப்பத்தை தெரியப்படுத்தி இருக்கின்றனர். வெளிப்படையான, பாரபட்சமற்ற நிர்வாகத்தால் அது சாத்தியமாகும் என்பதையும், இப்போது இருக்கும் negative approachலிருந்து தலைமையலுவலகம் முதலில் மாற்றத்தை துவக்க வேண்டும் எனவும் அத்தகு முயற்சிகளுக்கு நாம் உறுதுணையாய் இருப்போம் என்பதையும் நம் தரப்பில் சொல்லி இருக்கிறோம். நம்பிக்கையோடு எதிர்கொள்வோம்.

தோழமையுடன்

(M.சோலைமாணிக்கம்) (T.சங்கரலிங்கம்)
பொதுச்செயலாளர் - PGBEA பொதுச்செயலாளர் - PGBOU