ព័ត៌មាន

ពលរដ្ឋនៅពោធិ៍សាត់៣០០នាក់រកអន្តរាគមន៍ដោះលែងមនុស្ស៣០នាក់

ដោយ មណ្ឌល កែវ — Sun, 17 Feb 2013 23:05:00 -0500

ប្រជាពលរដ្ឋឃុំកំពង់លួង ប្រមាណ ៣០០នាក់ នៅព្រឹកថ្ងៃទី១៧ កុម្ភៈ បានលើកគ្នាមកកាន់សាលាឃុំ ក្នុងបំណងសុំឲ្យអាជ្ញាធរដែនដីជួយធ្វើអន្តរាគមន៍ ដោះលែងអ្នកភូមិដែលត្រូវបានកម្លាំងកងរាជអាវុធហត្ថចាប់ដាក់ពន្ធនាគារពីបទធ្វើការនេសាទដោយខុសច្បាប់។

បុរសអ្នកភូមិឈ្មោះ ហួត ហេង អាយុ ៥៩ឆ្នាំ ដែលបានអះអាងថា ជាតំណាងឲ្យប្រជាពលរដ្ឋដែលនាំគ្នាមកតវ៉ានេះ។ គាត់បានឲ្យដឹងថា ការឡើងមកតវ៉ានេះ អ្នកភូមិមិនមានបំណងប្រឆាំងនឹងច្បាប់ទេ ប៉ុន្តែអ្នកភូមិគ្រាន់ចង់លើកឡើងពីទុក្ខលំបាករបស់ខ្លួនឲ្យថ្នាក់លើបានដឹងប៉ុណ្ណោះ។

តំណាងអ្នកភូមិរូបនេះបន្តថា ដោយយោងលើស្ថានភាពភូមិសាស្ត្រ និងលក្ខណៈជាក់ស្ដែងនៃជីវភាពរស់នៅរបស់ប្រជាពលរដ្ឋនៅតំបន់នេះ ការប្រើអួនអូសប្រវែង ១០០ម៉ែត្រ មិនអាចចាប់ត្រីបានគ្រប់ដើម្បីចិញ្ចឹមគ្រួសារនោះទេ។

លោក ហួត ហេង៖ «គោលបំណងទី១ គឺសុំឲ្យលោកមេឃុំជួយអន្តរាគមន៍ដោះលែងអ្នកដែលត្រូវគេចាប់ទៅដាក់ពន្ធនាគារ ទី២ គឺសុំការអនុញ្ញាតឲ្យធ្វើការនេសាទជាលក្ខណៈគ្រួសារ ដោយប្រើអួនប្រវែងពី ៣០០ ទៅ ៤០០ម៉ែត្រ ដោយប្រមូលគ្នាចូលជាក្រុមសាមគ្គីទើបអាចរកត្រីបានគ្រប់ដោះស្រាយជីវភាព...»។

មេឃុំកំពង់លួង គឺលោក កែវ សុណ្ណារ៉េត ទទួលស្គាល់ពីការលំបាករបស់ប្រជាពលរដ្ឋក្នុងឃុំ។ លោកថា ច្បាប់នេសាទអនុញ្ញាតឲ្យប្រើអួនអូសតែ ១០០ម៉ែត្រសម្រាប់ធ្វើការនេសាទជាលក្ខណៈគ្រួសារក្នុងស្ថានភាពបច្ចុប្បន្ន មិនអាចឲ្យប្រជាពលរដ្ឋរកត្រីបានគ្រប់គ្រាន់សម្រាប់ដោះស្រាយជីវភាពប្រចាំថ្ងៃបានទេ។ លោកថា អាជ្ញាធរជំនាញគួរពិចារណាក្នុងការកំណត់ឧបករណ៍នេសាទលក្ខណៈគ្រួសារជាថ្មីឡើងវិញ ដើម្បីឲ្យសមស្របតាមស្ថានភាពជាក់ស្ដែងក្នុងពេលបច្ចុប្បន្ន។

លោក កែវ សុណ្ណារ៉េត៖ «បងប្អូនប្រជាពលរដ្ឋគាត់ទទូចតាំងពីដើមមក ដោយសារការប្រើអួនតែ ១០០ម៉ែត្រ វាមិនសូវបានផលទេ។ បញ្ហានេះ ខ្ញុំជាអាជ្ញាធរយល់ឃើញថា មានការលំបាកមែន ប៉ុន្តែដោយច្បាប់កំណត់អ៊ីចឹង យើងត្រូវតែគោរព តែប្រជាពលរដ្ឋបានទទូចឲ្យយើងខ្ញុំជួយសំណូមពរឲ្យខាងសមត្ថកិច្ចជំនាញជលផលជួយសំណូមពរបន្តទៅថ្នាក់លើឲ្យជួយធ្វើការកំណត់ឧបករណ៍នេសាទគ្រួសារនេះជាថ្មី...»។

កាលពីយប់ថ្ងៃទី១៥ កុម្ភៈ កម្លាំងកងរាជអាវុធហត្ថបានបើកប្រតិបត្តិការបង្ក្រាបបទល្មើសនេសាទ ដោយចាប់បានជនសង្ស័យចំនួន ៣០នាក់បញ្ជូនមកតុលាការ។ ជនសង្ស័យបានធ្វើនេសាទដោយប្រើអួនវែងអូសដោយទូកម៉ាស៊ីន ដែលត្រូវចាត់ទុកថាល្មើសនឹងច្បាប់ជលផល។

មេបញ្ជាការកងរាជអាវុធហត្ថខេត្តពោធិ៍សាត់ លោក អន សុខុន មានប្រសាសន៍ថា លោកគ្រាន់តែបំពេញតួនាទីជានគរបាលយុត្តិធម៌ប៉ុណ្ណោះ។ ឯការសម្រេចចោទប្រកាន់ ឬយ៉ាងណានោះ គឺជាតួនាទីរបស់តុលាការ៖ «តាមដែលខ្ញុំពិនិត្យឃើញ គឺពួកគាត់ប្រើអួនវែងខុសពីច្បាប់កំណត់ជាលក្ខណៈគ្រួសារ ហើយគាត់ប្រើម៉ាស៊ីនអូសទៀតផង...»។

ព្រះរាជអាជ្ញាអមសាលាដំបូងខេត្តពោធិ៍សាត់ លោក តន់ សីហៈតេជៈ មានប្រសាសន៍ថា ជនសង្ស័យពីបទប្រព្រឹត្តល្មើសនេសាទត្រូវបានចោទប្រកាន់ និងបញ្ជូនទៅឲ្យចៅក្រមស៊ើបអង្កេតរួចហើយ៖ «យើងបានចោទប្រកាន់ និងបញ្ជូនទៅលោកចៅក្រមពីរឿងប្រើឧបករណ៍នេសាទដែលច្បាប់បានហាមឃាត់...»។

យ៉ាងណាក៏ដោយ យោងតាមច្បាប់ស្ដីពីជលផលមាត្រា ៩៥ ជនសង្ស័យពីបទប្រព្រឹត្តល្មើសនេសាទដោយប្រើអួនវែងអូសដោយទូកម៉ាស៊ីនពុំមានទោសត្រូវជាប់ពន្ធនាគារនោះឡើយ។ ច្បាប់កំណត់ឲ្យត្រូវទទួលពិន័យអន្តរការណ៍ពីរដ្ឋបាលជលផលប៉ុណ្ណោះ។

មាត្រា ៩៥ នៃច្បាប់ស្ដីពីជលផលឆ្នាំ២០០៦ ត្រង់ចំណុចទី៨ ចែងថា ការនេសាទជាលក្ខណៈសិប្បកម្មដោយអួនលើសពី ៣០០ម៉ែត្រ នៅក្រៅបឹងទន្លេសាប និងលើសពី ៦០០ម៉ែត្រនៅក្នុងបឹងទន្លេសាប ត្រូវទទួលពិន័យអន្តរការណ៍ពីរដ្ឋបាលជលផលជាប្រាក់សមាមាត្រទៅនឹងថ្លៃឈ្នួលនេសាទ ឯវត្ថុតាងទាំងអស់ត្រូវប្រគល់ឲ្យសាមីជនវិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

សាលាក្ដីខ្មែរក្រហមប្ដូរពីការស្ដាប់សក្ខីកម្មអ្នកជំនាញមកស្ដាប់មតិភាគី

ដោយ ឡេង ម៉ាលី — Sun, 17 Feb 2013 22:40:00 -0500

សាលាក្ដីខ្មែរក្រហមនៅថ្ងៃច័ន្ទ ទី១៨ ខែកុម្ភៈ ធ្វើសវនាការរបស់ខ្លួនលើសំណុំរឿង ០០២ ឡើងវិញ ដែលនឹងត្រូវផ្លាស់ប្ដូរពីការស្ដាប់សក្ខីកម្មរបស់អ្នកជំនាញអន្តរជាតិ មកជាការស្ដាប់មតិយោបល់របស់ភាគីក្នុងសំណុំរឿងវិញ។

អ្នកនាំពាក្យសាលាក្ដីខ្មែរក្រហម លោក នេត្រ ភក្ត្រា មានប្រសាសន៍ នៅថ្ងៃទី១៧ កុម្ភៈ ថា សវនាការនៅថ្ងៃច័ន្ទ ទី១៨ និងថ្ងៃអង្គារ ទី១៩ ខែកុម្ភៈ អង្គជំនុំជម្រះសាលាដំបូងនឹងស្ដាប់មតិយោបល់របស់ភាគីទាំងអស់ក្នុងសំណុំរឿងជុំវិញផលវិបាកដែលកើតមានបន្ទាប់ពីតុលាការកំពូលចេញសេចក្ដីសម្រេចថា ការបំបែកសំណុំរឿងតូចៗ របស់សាលាដំបូងមិនមានសម្អាងហេតុច្បាស់លាស់ និងមិនបានពន្យល់គ្រប់គ្រាន់។

លោក នេត្រ ភក្ត្រា៖ «អ៊ីចឹងសវនាការនៅថ្ងៃទី១៨ និង ១៩ នេះ គឺគេនឹងស្ដាប់នូវការផ្ដល់មតិយោបល់ពីគ្រប់ភាគីទាំងអស់ ដើម្បីឱ្យអង្គជំនុំជម្រះសាលាដំបូងហ្នឹងអាចមានព័ត៌មានបន្ថែមទៀត ក៏ដូចការលើកឡើងរបស់ភាគីផ្សេងៗ ទាក់ទងនឹងកិច្ចដំណើរការបំបែកនីតិវិធីក្នុងសំណុំរឿង ០០២»។

កាលពីខែកញ្ញា ឆ្នាំ២០១១ សាលាដំបូងបានបំបែកសំណុំរឿង ០០២ ដែលមានទំហំធំ ទៅជាសំណុំរឿងក្ដី ៣ ផ្នែកតូចៗ ដោយដាក់លេខថា សំណុំរឿង ០០២/០១ សំណុំរឿង ០០២/០២ និងសំណុំរឿងលេខ ០០២/០៣។

លោក នេត្រ ភក្ត្រា បញ្ជាក់បន្ថែមថា ការបំបែកសំណុំរឿងនេះ ក៏ដោយសារតែសាលាដំបូងយល់ឃើញថា សំណុំរឿង ០០២ មានទំហំធំ និងស្មុគស្មាញច្រើន និងអាចស៊ីពេលច្រើនឆ្នាំទម្រាំចប់ និងចេញសាលក្រមទើបសាលាដំបូងបំបែកសំណុំរឿង ០០២ ទៅតាមឧក្រិដ្ឋកម្មដែលបានកើតឡើង។

លោក នេត្រ ភក្ត្រា៖ «ដោយនៅក្នុងហ្នុង គឺគេបានបំបែកជាសំណុំរឿង ០០២/០១ ដែលផ្ដោតទៅលើការជម្លៀសប្រជាជនដំណាក់កាលទី ១ និងទី ២ ហើយនិងបទចោទនានា ដែលទាក់ទងនឹងឧក្រិដ្ឋកម្មប្រឆាំងមនុស្សជាតិ ហើយសំណុំរឿង ០០២/០២ គឺផ្ដោតទៅលើឧក្រិដ្ឋកម្មសង្គ្រាម ហើយនិងសំណុំរឿង ០០២/០៣ គឺផ្ដោតទៅលើឧក្រិដ្ឋកម្មប្រល័យពូជសាសន៍ទៅលើជនជាតិចាម និងវៀតណាម»។

តុលាការកំពូល កាលពីថ្ងៃទី៨ កុម្ភៈ ចេញសេចក្ដីសម្រេចរបស់ខ្លួនមួយថា ការបំបែកសំណុំរឿងរបស់សាលាដំបូង ជាពិសេសការកំណត់វិសាលភាពនៃសំណុំរឿង ០០២/០១ មិនបានផ្ដល់ឱកាសគ្រប់គ្រាន់ដល់ភាគីភាគីនានា ក្នុងការចូលរួមដាក់សារណា ឬសេចក្ដីសន្និដ្ឋានរបស់ខ្លួនទេ។ សេចក្ដីសម្រេចរបស់តុលាការកំពូល ក៏ជាការសម្រេចលើបណ្ដឹងសាទុក្ខរបស់ភាគីសហព្រះរាជអាជ្ញា ដែលប្រឆាំងនឹងសាលាដំបូង ដែលបដិសេធការពង្រីកវិសាលភាពនៃសំណុំរឿង ០០២/០១ នេះ។

លោក នេត្រ ភក្ត្រា បញ្ជាក់ទៀតថា សវនាការស្ដាប់មតិយោបល់របស់ភាគីនៅថ្ងៃទី១៨ និង ១៩ កុម្ភៈ តាមសេចក្ដីសម្រេចរបស់តុលាការកំពូល គឺដើម្បីធ្វើឱ្យការជំនុំជម្រះសំណុំរឿងក្ដីលេខ ០០២ អាចដំណើរការបានលឿន ងាយស្រួលជាងមុន និងឆ្លើយតបនឹងផលប្រយោជន៍របស់ភាគីនានាផង។

លោក នេត្រ ភក្ត្រា៖ «គឺចង់ជំរុញឱ្យដំណើរការហ្នឹងកាន់តែឆាប់រហ័ស ហើយនិងមានប្រសិទ្ធភាព ក៏ដូចជាឆ្លើយតបទៅនឹងសិទ្ធិរបស់ភាគីផ្សេងៗទៀត ហើយក៏ជាការមួយឆ្លើយតបទៅនឹងក្ដីព្រួយបារម្ភរបស់គ្រប់ភាគីទាំងអស់ ទាក់ទងជាមួយនឹងវ័យចាស់របស់ជនជាប់ចោទផងដែរ»។

លោក នេត្រ ភក្ត្រា ថ្លែងថា ទោះជាដូច្នេះក្ដី សេចក្ដីសម្រេចរបស់តុលាការកំពូលមិនបដិសេធចោលការជំនុំជម្រះរបស់សាលាដំបូង លើអង្គហេតុសំណុំរឿងលេខ ០០២/០១ ដែលចាប់ផ្ដើមធ្វើតាំងពី ២១ ខែវិច្ឆិកា ឆ្នាំ២០១១ មកនោះទេ៕

សង្គមស៊ីវិល៖ ក្រុមហ៊ុនឯកជនមានអំណាចលើប្រព័ន្ធតុលាការ

ដោយ តាំង សារ៉ាដា — Sun, 17 Feb 2013 22:25:00 -0500

មន្ត្រីអង្គការសិទ្ធិមនុស្សឲ្យដឹងថា ដីកាឃុំខ្លួន គឺជាយុទ្ធសាស្ត្រមួយថ្មីរបស់តុលាការដើម្បីបង្ក្រាបពលរដ្ឋមិនអោយហ៊ានក្រោកតវ៉ានៅពេលពួកគេមានទំនាស់ដីធ្លីជាមួយក្រុមអ្នកមានអំណាច។

អង្គការឃ្លាំមើលសិទ្ធិមនុស្សក្នុងស្រុកមួយឲ្យដឹងថា កម្ពុជាបានប្រើប្រាស់ប្រព័ន្ធតុលាការដើម្បីចាប់ខ្លួនសកម្មជនដែលតវ៉ាករណីជំលោះដីធ្លីក្នុងឆ្នាំ២០១២ មានចំនួនកើនឡើងទ្វេដង។
របាយការណ៍របស់សមាគមការពារសិទ្ធិមនុស្សអាដហុក (Adhoc) ដែលចេញផ្សាយកាលពីថ្ងៃទី១៤ ខែកុម្ភៈ កន្លងទៅនេះ បង្ហាញថា គិតត្រឹមថ្ងៃទី៣១ ខែធ្នូ ឆ្នាំ២០១២ យ៉ាងហោចណាស់មានមនុស្ស ៣៨នាក់ កំពុងស្ថិតក្នុងពន្ធនាគារ ៥០នាក់ផ្សេងទៀតកំពុងរត់ភៀសខ្លួន ហើយមនុស្សប្រមាណ ១៥០នាក់ ក្នុងទីក្រុងភ្នំពេញ បានរងការគំរាមកំហែងឲ្យរើចេញពីលំនៅឋានរបស់ពួកគេ។

មន្ត្រីផ្នែកស៊ើបអង្កេតរបស់សមាគមអាដហុក លោក នី ចរិយា អះអាងថា តុលាការអាចដោះលែងក្រុមសកម្មជនដីធ្លីទាំងអស់នោះបាននៅពេលណាពួកគេយល់ព្រមជាលាយលក្ខណ៍អក្សរ ឈប់ប្តឹងក្រុមហ៊ុនដែលជាប់ពាក់ព័ន្ធនឹងទំនាស់ដីធ្លីទាំងនោះ។

លោក នី ចរិយា៖ «និយាយទៅគ្រាន់តែជាការឃុំដូចធម្មតាដែរទេ ប៉ុន្តែគ្រាន់តែមានលក្ខខណ្ឌមួយជាមួយតុលាការដែលភាគច្រើនគេតែងនិយាយថា ប្រសិនបើឈប់ដឹកនាំប្ដឹងអីនោះ ក្រុមហ៊ុននឹងដកពាក្យឈប់ប្ដឹងអីអ៊ីចឹងទៅ»។

លោកបន្តថា ក្រុមហ៊ុនឯកជននៅកម្ពុជា ភាគច្រើនបានប្ដូរយុទ្ធសាស្ត្រពីការប្រើប្រាស់កងកម្លាំងប្រដាប់អាវុធដេញពលរដ្ឋចេញពីលំនៅឋានទៅជាការប្រើឥទ្ធិពលលើប្រព័ន្ធតុលាការ ដើម្បីចាប់ក្រុមតំណាងសហគមន៍ដែលហ៊ានចេញមុខតវ៉ាជាមួយក្រុមហ៊ុនដាក់ពន្ធនាគារទៅវិញ។

ក្រុមហ៊ុនភាគច្រើនទទួលដីសម្បទានសេដ្ឋកិច្ចពីរដ្ឋាភិបាល បានរំលោភលើកិច្ចសន្យាដែលបានចុះជាមួយរដ្ឋាភិបាល។

លោក នី ចរិយា មានប្រសាសន៍ថា សមាគមអាដហុក បានជំរុញឲ្យរដ្ឋាភិបាលលប់កិច្ចសន្យាជាមួយក្រុមហ៊ុនវៀតណាម ឈ្មោះ ដាយ ដុងយឿង ដោយសារក្រុមហ៊ុនបំផ្លាញបរិស្ថានធ្ងន់ធ្ងរក្នុងខេត្តរតនគិរី៖ «ថ្មីៗនេះអាដហុកយើងបានចេញសេចក្ដីថ្លែងការណ៍ និងបានស្នើទៅរដ្ឋាភិបាលឲ្យលប់កិច្ចសន្យាជាមួយក្រុមហ៊ុនសម្បទានមួយក្នុងខេត្តរតនគិរី គឺក្រុមហ៊ុន ដាយ ដុងយឿង ដោយសារក្រុមហ៊ុននោះបានអនុវត្តផ្ទុយពីកិច្ចសន្យា។ កិច្ចសន្យាបានសរសេរថា ក្រុមហ៊ុនមិនត្រូវធ្វើសកម្មភាពអភិវឌ្ឍន៍ណាមួយដែលធ្វើឲ្យប៉ះពាល់ដល់ធនធានធម្មជាតិ ឬបរិស្ថានអីជាដើម ហើយក្រុមហ៊ុនណាដែលធ្វើប៉ះពាល់ដូច្នេះត្រូវតែលប់កិច្ចសន្យាចោល»។

អង្គការអាដហុក បានរកឃើញថា នៅឆ្នាំ២០១២ រដ្ឋាភិបាលបានផ្តល់ ឬបម្រុងដីជាង ២,៦លានហិកតារឲ្យក្រុមហ៊ុនឯកជន ក្រោមផ្លាកដីសម្បទានដីសេដ្ឋកិច្ច។ ចំនួននេះកើនឡើងជាងឆ្នាំ២០១១ ដែលពេលនោះមានត្រឹមតែជាង ២,២លានហិកតារ (២.២៧៦.៣៤៩) ប៉ុណ្ណោះ៕

កម្មករកាត់ដេរប្រមាណ៧០០នាក់មិនទាន់បើកប្រាក់ឈ្នួលខែមករា

ដោយ ទេព សុរ៉ាវី — Sun, 17 Feb 2013 07:10:00 -0500

ថៅកែរោងចក្រសន្យាថា នឹងបើកប្រាក់ខែឲ្យពួកគេកាលពីថ្ងៃសៅរ៍ ទី១៦ កុម្ភៈ លុះដល់ពេលកំណត់ក៏បានសុំពន្យារពេលម្តងទៀត រហូតដល់ថ្ងៃទី១៩ ខែកុម្ភៈ វិញ ដែលធ្វើឲ្យកម្មករបាត់ទំនុកចិត្ត និងត្រៀមធ្វើកូដកម្មតវ៉ា ប្រសិនបើថៅកែរោងចក្រនៅតែមិនបើកប្រាក់ខែឲ្យកម្មករ។

មន្ត្រីសហជីពសេរីកម្មករនៃព្រះរាជាណាចក្រកម្ពុជា លោក វ៉ាន់ សេងលី ស្នើសុំឲ្យថៅកែរោងចក្រ ហាយ ហ្វេសសិន បើកប្រាក់ខែដល់កម្មករជាង ៧០០នាក់ និងបើកលុយឲ្យអ្នកបើកឡានដឹកកម្មករ កម្មការិនីជាបន្ទាន់ បន្ទាប់ពីថៅកែក្រុមហ៊ុនបានគេចវេះមិនបើកប្រាក់ខែឲ្យពួកគេជាច្រើនខែមកហើយ។

មន្ត្រីសហជីពរូបនោះបន្តថា កម្មករជាង ៧០០នាក់ នៅមិនបើកប្រាក់ខែសម្រាប់ខែមករា នៅឡើយទេ រហូតដល់ថ្ងៃទី១៧ ខែកុម្ភៈ ដែលជាធម្មតាពួកគេត្រូវបើកតាំងពីថ្ងៃទី១០។ ដោយឡែកអ្នកបើកបរឡានដឹកកម្មករមកធ្វើការនៅរោងចក្រ ហាយ ហ្វេសសិន វិញ ក៏មិនបានបើកប្រាក់ខែចំនួ ៤ខែមកដែរ៖ «គាត់សុំលើកពេលដល់ថ្ងៃទី១៦ ថ្ងៃសៅរ៍ នេះ គាត់ឲ្យកម្មករឈប់សម្រាក ៥ថ្ងៃ ដោយគិត ៥០ភាគរយឲ្យកម្មករ មកដល់ថ្ងៃទី១៦ ក្រុមហ៊ុនអត់បានបើកប្រាក់ខែឲ្យកម្មករ ដល់អ៊ីចឹងក្រុមហ៊ុនសុំពន្យារដល់ថ្ងៃទី១៩ ហ្នឹងទៀត»។

អ្នកបើកឡានដឹកកម្មករ លោក អ៊ូ អ៊ន ឲ្យដឹងថា លោកទទួលបានប្រាក់ចំនួន ២.៣០០ដុល្លារក្នុងមួយខែ ដែលប្រាក់នោះបូកទាំងប្រាក់ខែ និងថ្លៃចំណាយលើសាំងរថយន្ត ៣គ្រឿង សម្រាប់ដឹកកម្មករទាំងទៅធ្វើការ និងត្រឡប់មកផ្ទះពីស្រុកពញាឮ ខេត្តកណ្ដាល ទៅសង្កាត់ឃ្មួញ ខណ្ឌសែនសុខ ដែលមានចម្ងាយជាង ៤០គីឡូម៉ែត្រ។ ប៉ុន្តែថៅកែរោងចក្រមិនបានបើកប្រាក់ខែឲ្យគាត់ចំនួន ៤ខែមកហើយ ដោយគ្មានហេតុផលច្បាស់លាស់។

លោក អ៊ូ អ៊ន បញ្ជាក់ថា កន្លងមកថៅកែក្រុមហ៊ុនបានចេញមូលប្បទានប័ត្រចំនួន ២សន្លឹកឲ្យគាត់បើកនៅធនាគារ ប៉ុន្តែមូលប្បទានប័ត្រទាំងនោះមិនមានទឹកប្រាក់នោះទេ រហូតដល់ថ្មីៗនេះ ប្រាក់ខែកម្មករជាង ៧០០នាក់ ក៏ត្រូវរអាក់រអួលមិនបានបើកតាមការកំណត់ ទើបកម្មករសម្រេចមិនធ្វើការ និងរង់ចាំរហូតទាល់តែមានដំណោះស្រាយពីក្រុមហ៊ុន៖ «ស្នើសុំឲ្យថៅកែរោងចក្រហ្នឹង ទី១ បើកលុយឲ្យកម្មករឲ្យទៀងទាត់ ទី២ ខ្ញុំសុំបើកប្រាក់ខែថ្លៃឡានខ្ញុំឲ្យគ្រប់ចំនួនដែលថៅកែបានជំពាក់ខ្ញុំ»។

លោកបញ្ជាក់ថា ក្រុមហ៊ុនសន្យាម្ដងជាពីរដងថា នឹងបើកលុយឲ្យកម្មករ និងរូបលោកដែលជាអ្នកបើកឡានដឹកកម្មករ តែការសន្យានោះតែងតែត្រូវលើកពេលម្ដងថ្ងៃនេះម្ដងថ្ងៃនោះ រហូតធ្វើឲ្យកម្មករគ្មានទឹកចិត្តធ្វើការបន្តទៀត។ លោកបន្តថា ជំហរកម្មករ ប្រសិនបើថ្ងៃទី១៩ ខែកុម្ភៈ ខាងមុខ ថៅកែរោងចក្រមិនព្រមបើកលុយឲ្យកម្មករតាមការសន្យាទេនោះ កម្មករនឹងធ្វើកូដកម្មទាមទារម្ដង។

វិទ្យុអាស៊ីសេរីមិនអាចទាក់ទងលោក វីរៈ ប្រធានរដ្ឋបាលរោងចក្រ ហាយ ហ្វេសសិន បានទេ នៅថ្ងៃទី១៧ ខែកុម្ភៈ ដោយលោកបិទទូរស័ព្ទ។

ប្រភពពីមន្ត្រីសហជីពសេរីកម្មករឲ្យដឹងថា ជំហរកម្មករចង់ឲ្យក្រុមហ៊ុនបើកប្រាក់ខែឲ្យពួកគេឲ្យបានទៀងទាត់ និងបើកប្រាក់ខែដល់អ្នកបើកឡានឲ្យបានត្រឹមត្រូវ ព្រោះពួកគេមិនអាចមកធ្វើការបានទេ ដរាបណាគ្មានឡានដឹកជញ្ជូនពួកគេពីលំនៅឋានទៅកន្លែងធ្វើការនោះ៕

អង្គការ៤គ្រោងធ្វើសិក្ខាសាលាស្ដីអំពីហិរញ្ញវត្ថុនយោបាយ

ដោយ ទីន ហ្សាការីយ៉ា — Sun, 17 Feb 2013 06:05:00 -0500

ការធ្វើសេចក្ដីព្រាងច្បាប់ស្ដីពីហិរញ្ញវត្ថុនយោបាយសម្រាប់ការឃោសនាបោះឆ្នោតនេះ ជាផ្នែកមួយដ៏សំខាន់ដើម្បីឲ្យការបោះឆ្នោតនៅឆ្នាំ២០១៣ កាន់តែសុក្រឹត និងមានតម្លាភាពសម្រាប់គ្រប់គណបក្សនយោបាយដែលចូលរួមប្រកួតប្រជែងទាំងអស់។

អង្គការសង្គមស៊ីវិលចំនួន ៤ គ្រោងនឹងធ្វើសិក្ខាសាលានៅចុងខែកុម្ភៈ និងនៅដើមខែមីនា ខាងមុខ ស្ដីពីហិរញ្ញវត្ថុនយោបាយសម្រាប់ការឃោសនាបោះឆ្នោត មានម្ចាស់ឆ្នោត និងអ្នកតំណាងរាស្ត្រចូលរួម ដែលគេធ្វើឡើងនៅខែត្រព្រះសីហនុ និងនៅខែត្រតាកែវ។

ប្រធានគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរីនៅកម្ពុជា ហៅថា និចហ្វិក (NICFEC) លោកបណ្ឌិត ហង្ស ពុទ្ធា បានឲ្យដឹងនៅថ្ងៃទី១៧ កុម្ភៈ ថា ការរៀបចំសិក្ខាសាលាស្ដីពីហិរញ្ញវត្ថុនយោបាយសម្រាប់ការឃោសនាបោះឆ្នោតនេះ ដើម្បីស្វែងរកការគាំទ្រពីប្រជាពលរដ្ឋដែលជាម្ចាស់ឆ្នោត និងអ្នកនយោបាយ ពីព្រោះថា សេចក្ដីពា្រងច្បាប់នេះមានសារសំខាន់ណាស់ក្នុងការកាត់បន្ថយអំពើពុករលួយ និងការប្រើប្រាស់ថវិការបស់គណបក្សនយោបាយដែលគ្មានប្រភពចំណូលច្បាស់លាស់។

អង្គការចំនួន ៤ សហការគ្នា គ្រោងនឹងធ្វើសិក្ខាសាលាស្ដីពីហិរញ្ញវត្ថុនយោបាយសម្រាប់ការឃោសនាបោះឆ្នោត រួមមាន គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា គណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរីនៅកម្ពុជា អង្គការ ដ្រាក និងសម្ព័ន្ធដើម្បីសុចរិតភាព និងគណនេយ្យសង្គម។

សិក្ខាសាលានេះនឹងធ្វើឡើងនៅខែត្រតាកែវ នៅថ្ងៃទី២៦ កុម្ភៈ និងនៅខែត្រព្រះសីហនុ នៅថ្ងៃទី៤ មីនា ឆ្នាំ២០១៣។

លោកបណ្ឌិត ហង្ស ពុទ្ធា បានសង្កត់ធ្ងន់ថា សេចក្ដីព្រាងច្បាប់នេះ នឹងបញ្ជូនទៅរដ្ឋាភិបាលដើម្បីសុំការគាំទ្រពីរដ្ឋាភិបាល ដើម្បីផ្ញើទៅសភាអនុម័ត។ មួយវិញទៀត អង្គការសង្គមស៊ីវិលក៏ស្វែងរកការគាំទ្រពីសភាដោយផ្ទាល់ដែរ ដើម្បីធ្វើយ៉ាងណាឲ្យសភាទទួលយក និងអនុម័តច្បាប់នេះនៅមុនពេលបោះឆ្នោតឆ្នំា២០១៣។

តំណាងរាស្ត្រគណបក្ស សម រង្ស៊ី លោក សុន ឆ័យ បានគាំទ្រចំពោះសេចក្ដីព្រាងច្បាប់នេះ។ ដោយលោកបានលើកហេតុផលថា ច្បាប់ស្ដីពីហិរញ្ញវត្ថុគណបក្សនយោបាយឃោសនាបោះឆ្នោតនេះ មានសារសំខាន់ណាស់ក្នុងការធានាដល់លទ្ធផលបោះឆ្នោត។

មជ្ឈមណ្ឌលសិទ្ធិមនុស្សកម្ពុជា បានចេញផ្សាយកំណត់ត្រាសង្ខេបរបស់ខ្លួនកាលពីសប្ដាហ៍មុន ស្ដីពីកំណែទម្រង់នយោបាយ និងប្រព័ន្ធបោះឆ្នោតសម្រាប់កម្ពុជា។ នៅក្នុងកំណត់ត្រានេះ ក៏បានសរសេរអំពីគម្លាតខុសគ្នារវាងគណបក្សកាន់អំណាច និងគណបក្សដទៃទៀតក្នុងការប្រើប្រាស់ថវិកានៅពេលឃោសនាបោះឆ្នោត គឺគណបក្សប្រជាជនកម្ពុជា បានចំណាយលុយច្រើនលើសលុបនៅក្នុងពេលយុទ្ធនាការបោះឆ្នោត។

អង្គការខុមហ្វ្រែល បានរកឃើញថា នៅក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីឆ្នាំ២០១២ នោះ គណបក្សប្រជាជនកម្ពុជា បានប្រើថវិកាច្រើនជាងគេ គឺការចំណាយក្នុងការឃោសនានៅមូលដ្ឋានម្តង បានចំណាយថវិកាប្រមាណ ៩ពាន់ដុល្លារ។ គណបក្ស សម រង្ស៊ី ចំណាយ ១.៥០០ដុល្លារ គណបក្សសិទ្ធិមនុស្ស ចំណាយ ៣០០ដុល្លារ គណបក្ស នរោត្តម រណឫទ្ធិ ចំណាយ ២០០ដុល្លារ និងគណបក្សហ៊្វុនស៊ិនប៉ិច ចំណាយតិចជាង ២០០ដុល្លារក្នុងមួយដងនៃយុទ្ធនាការឃោសនានៅមូលដ្ឋាន។

ប៉ុន្តែទោះបីជាយ៉ាងនេះក្ដី សេចក្ដីព្រាងច្បាប់នេះគេមិនទាន់ដឹងនៅឡើយទេថា សភានឹងទទួលយក និងអនុម័តឲ្យបានមុនពេលបោះឆ្នោតអាណត្តិទី៥ នៅខែកក្កដា ឆ្នាំ២០១៣ នេះ ឬយ៉ាងណានៅឡើយទេ៕

សាលាឧទ្ធរណ៍គ្រោងបើកសវនាការរឿងលោក ម៉ម សូណង់ដូ នៅថ្ងៃ៥ មីនា

ដោយ ទេព សុរ៉ាវី — Sun, 17 Feb 2013 02:29:00 -0500

លោក ស សូវ៉ាន មេធាវីការពារក្ដីឲ្យលោក ម៉ម សូណង់ដូ បញ្ជាក់ថា ប្រសិនបើគ្មានការផ្លាស់ប្ដូរទេនោះ សវនាការលើអង្គសេចក្ដីនោះនឹងត្រូវបើកជាផ្លូវការនៅវេលាម៉ោង ៨ព្រឹក តាមការកំណត់របស់ចៅក្រមសាលាឧទ្ធរណ៍។

លោក ស សូវ៉ាន៖ «នេះមិនមានជាបណ្ដឹងសុំនៅក្រៅឃុំទេ សុំឲ្យកែសាលក្រមហ្នឹងឡើងវិញ ដាក់ឲ្យជាប់ពន្ធនាគារ ២០ឆ្នាំហ្នឹងវាធ្ងន់ធ្ងររបៀបម៉េច ភស្តុតាងអីគេហៅមកវិញដូចយើងកាត់នៅសាលាដំបូងអ៊ីចឹង វាអាចមួយថ្ងៃ ២ថ្ងៃមិនអាច ១ថ្ងៃចប់ទេ។ ខ្ញុំក៏សប្បាយចិត្តដែរ ឃើញគេធ្វើការរហ័ស ខ្ញុំអ្នកច្បាប់ខ្ញុំសង្ឃឹម យើងនិយាយពីច្បាប់ ហើយសាលាឧទ្ធរណ៍ក៏និយាយពីច្បាប់ដែរ»។

លោក ម៉ម សូណង់ដូ អាយុ ៧១ឆ្នាំ ត្រូវបានចាប់ខ្លួនកាលពីខែកក្កដា ឆ្នាំ២០១២។ បើទោះបីជាគ្មានភស្តុតាងជាក់លាក់ដើម្បីភ្ជាប់រូបលោកទៅនឹងការបះបោរក្នុងចលនាអបគមន៍ ក៏សាលាដំបូងរាជធានីភ្នំពេញ កាលពីថ្ងៃទី១ ខែតុលា ឆ្នាំ២០១២ បានចោទប្រកាន់លោកពីបទញុះញង់ឲ្យកាន់អាវុធប្រឆាំងនឹងរដ្ឋាភិបាល និងញុះញង់ឲ្យមានការបង្កើតតំបន់អបគមន៍ ក្នុងភូមិប្រម៉ា ខេត្តក្រចេះ ហើយត្រូវបានតុលាការផ្ដន្ទាទោសឲ្យជាប់ពន្ធនាគាររយៈពេល ២០ឆ្នាំ និងពិន័យប្រាក់ចំនួន ១០លានរៀល។

ក្រោយពីលោក ម៉ម សូណង់ដូ ជាប់ពន្ធនាគារ លោកត្រូវបានអង្គការក្រុមអ្នកការពារសិទ្ធិមនុស្សឈានមុខ (Front line Defender) ជ្រើសរើសជាបេក្ខជនចុងក្រោយសម្រាប់ទទួលពានរង្វាន់ឈានមុខ ចំពោះសកម្មជនការពារសិទ្ធិមនុស្សដែលប្រឈមមុខនឹងហានិភ័យ ក្នុងឆ្នាំ២០១៣ នេះ។

ក្នុងសេចក្ដីថ្លែងការណ៍របស់ក្រុមអ្នកការពារសិទ្ធិមនុស្សឈានមុខ ចេញផ្សាយកាលពីចុងខែមករា បង្ហាញថា លោក ម៉ម សូណង់ដូ បានលះបង់អាយុជីវិតរបស់ខ្លួនដើម្បីជួយដល់ជនក្រីក្រ និងទាមទារសិទ្ធិសេរីភាពដល់ប្រជាពលរដ្ឋកម្ពុជា ដែលតស៊ូទាមទារសិទ្ធិរបស់ពួកគេដែលប្រតិបត្តិតាមឱវាទប្រៀនប្រដៅអហិង្សាតាមជំនឿរបស់ព្រះពុទ្ធ៕

ភាពទាល់ច្រកនៃការបញ្ចប់ជម្លោះព្រំដែនកម្ពុជា-ថៃនៅតំបន់ប្រាសាទព្រះវិហារ

ដោយ ម៉ម មុនីរតន៍ — Sun, 17 Feb 2013 00:15:00 -0500

ការផ្ទុះសង្គ្រាមព្រំដែនកម្ពុជា-ថៃ កើតឡើងក្រោយពីប្រាសាទដែលមានអាយុកាលជាង ១ពាន់ឆ្នាំមួយនេះ ត្រូវដាក់បញ្ចូលទៅជាសម្បត្តិបេតិកភណ្ឌពិភពលោកសម្រាប់មនុស្សជាតិរួចមក។ ការមិនអាចទម្លាយភាពទាល់ច្រកនេះបាននោះ ក៏ព្រោះតែភាគីថៃ សំអាងលើផែនទីជាឯកតោភាគីថា មានតំបន់ ៤.៦ ក្បែរប្រាសាទព្រះវិហារ គឺជាទីតាំងដែលខ្លួនត្រូវគ្រប់គ្រង។ ប៉ុន្តែភាគីកម្ពុជា ពុំទទួលស្គាល់ថា មានតំបន់ ៤.៦ ក្បែរប្រាសាទព្រះវិហារខ្មែរនោះទេ។

មន្ត្រីរដ្ឋាភិបាលកម្ពុជា និយាយថា អ្វីដែលរដ្ឋាភិបាលថៃ បង្កើតតំបន់ ៤.៦គីឡូម៉ែត្រការ៉េ នៅលើតំបន់ឆ្លងកាត់របស់ខ្មែរទៅកាន់ប្រាសាទនេះ ក៏ព្រោះតែភាគីថៃ មើលឃើញថា ប្រសិនបើគម្រោង ៤.៦ នេះ ខ្លួនទាក់ទាញការជឿទុកចិត្តបានពីអន្តរជាតិ បានន័យថា គឺជាជោគជ័យមួយដ៏ធំក្នុងការកាត់ផ្ដាច់ទាំងស្រុងលើផ្នែកយោធា និងសេដ្ឋកិច្ចរបស់កម្ពុជា។

ក៏ប៉ុន្តែអ្នកស្រាវជ្រាវផ្នែកប្រវត្តិសាស្ត្រ និងជាអ្នកនិពន្ធសៀវភៅជនជាតិអាមេរិកាំង លោក ចន បើកហ្គេស (John Burgess) ដែលបានតាមដានយ៉ាងដិតដល់លើដំណើរការក្ដីប្រាសាទព្រះវិហារ មានប្រសាសន៍កាលពីថ្ងៃទី១៣ កុម្ភៈ ថា ពុំមានអ្វីដែលត្រូវសង្ស័យទៀតនោះឡើយ ថាប្រាសាទព្រះវិហារជារបស់ខ្មែរនោះ។

ក្នុងន័យនេះលោកបញ្ជាក់ថា ពិតណាស់ ផ្អែកតាមសាលដីកាឆ្នាំ១៩៦២ ប្រាសាទព្រះវិហារ គឺជារបស់កម្ពុជា យ៉ាងពិតប្រាកដ៖ «នៅឆ្នាំ១៩៦២ បន្ទាប់ការជំនុំជម្រះអស់រយៈពេលដ៏យូរ ICJ បានសម្រេចថា ប្រាសាទព្រះវិហារស្ថិតក្រោមអធិបតេយ្យរបស់កម្ពុជា។ ការតវ៉ាជាច្រើនត្រូវបានគេដាក់ជូនតុលាការ រួមមានការតវ៉ារបស់ថៃ អំពីដែនដីពិសិដ្ឋ និងការតវ៉ារបស់កម្ពុជា អំពីកេរមរតក។ ប៉ុន្តែនៅទីបំផុត អ្វីដែល ICJ ផ្ដោតការយកចិត្តទុកដាក់នោះ គឺផែនទីដែលផលិតនៅឆ្នាំ១៩០៧»។

នៅមុនការបកស្រាយសាលដីកាឆ្នាំ១៩៦២ ឡើងវិញ ដែលនឹងត្រូវចាប់ផ្ដើមក្នុងខែមេសា ឆ្នាំ២០១៣ ខាងមុខ មជ្ឈដ្ឋាននានាមានជំនឿថា សាលដីកានេះនឹងនាំឲ្យកម្ពុជា មានប្រៀបផ្នែកផ្លូវច្បាប់រួចជាស្រេចលើភាគីជម្លោះ។

យោធាថៃ និងកម្ពុជា ប្រាំបូកប្រាំ (5+5) ដែលប្រចាំការនៅវាលសំបុកឃ្មុំ ស្ថិតនៅខាងមុខប្រាសាទព្រះវិហារ ឲ្យដឹងថា ខ្លួនពិតជាពុំមានចេតនាក្នុងការបង្កឲ្យមានការបង្ហូរឈាមក្នុងជម្លោះប្រាសាទព្រះវិហារនោះទេ។

ពួកគេបន្តថា៖ «រាល់ថ្ងៃកងកម្លាំងខ្មែរនិងថៃ ដែលមានចំនួនម្ខាង ៥នាក់ តែងតែជួបប្រជុំជាមួយគ្នា ហើយមិនមានការប្រើកម្លាំងណាមួយដើម្បីតទល់គ្នាទេ។ ខ្ញុំដឹងថា ប្រាសាទព្រះវិហារជាមរតករបស់ពិភពលោកហើយ។ យើងមិនចង់មានការវាយប្រយុទ្ធគ្នាពាក់ព័ន្ធនឹងបញ្ហាព្រំដែននេះទេ»។

លោក ចន បើកហ្គេស គិតថា រដ្ឋាភិបាលទីក្រុងបាងកក គួរប្រើប្រាស់សិទ្ធិរបស់ខ្លួនក្នុងការទាមទារការកាន់កាប់ប្រាសាទព្រះវិហារ ក្រោយពីមានសេចក្ដីសម្រេចភ្លាមៗ របស់ ICJ ក្នុងឆ្នាំ១៩៦២។លោកបន្តថា គេពុំគួរជំទាស់ចំពោះសេចក្ដីសម្រេចរបស់ ICJ នៅពេលនេះនោះទេ។ បើតាមលោក ចន បើកហ្គេស គេហាក់ពុំឃើញមានឯកសារណាមួយ ដែលមាននិយាយអំពីតំបន់ ៤.៦ នោះឡើយ។

លោក ចន បើកហ្គេស៖ «អស់រយៈពេលជាច្រើនឆ្នាំ ថៃមិនដែលជំទាស់នឹងផែនទីនេះទេ។ ការពិតថៃ ទទួលស្គាល់ផែនទីដែលបង្ហាញថា ប្រាសាទព្រះវិហារស្ថិតនៅក្នុងទឹកដីកម្ពុជា។ នៅឆ្នាំ១៩៦២ តុលាការយុត្តិធម៌អន្តរជាតិ ICJ បានសម្រេចរឿងក្ដីប្រាសាទព្រះវិហារ ហើយប្រទេសថៃ បានទទួលស្គាល់ថា ប្រាសាទព្រះវិហារ មិនមែនស្ថិតនៅក្នុងទឹកដីថៃនោះទេ។ ដូច្នេះវាហួសអាជ្ញាអាយុកាលក្នុងការសើរើរឿងក្ដីនេះហើយ»។

ប្រាសាទព្រះវិហារដែលមានអាយុកាលជាង ១ពាន់ឆ្នាំមួយនេះ ត្រូវខ្ទេចខ្ទាំដោយការបាញ់រះរបស់យោធាថៃ និងក្លាយទៅជាសមរភូមិប្រយុទ្ធដ៏តានតឹង ក្រោយពីប្រាសាទព្រះវិហារ ត្រូវបានដាក់បញ្ចូលជាសម្បត្តិបេតិកភណ្ឌពិភពលោកកាលពីថ្ងៃទី៧ ខែកក្កដា ឆ្នាំ២០០៨។

កាលពីថ្ងៃទី១៨ កក្កដា ឆ្នាំ២០១១ តុលាការយុត្តិធម៌អន្តរជាតិទីក្រុងឡាអេ ICJ បានចេញបទបញ្ជាបន្ទាន់មួយ តម្រូវឲ្យកម្ពុជា និងថៃ ដកកងទ័ពចេញពីតំបន់គ្មានយោធាបណ្ដោះអាសន្នលើទំហំដី ១៧គីឡូម៉ែត្រក្រឡា។ អ្វីដែល ICJទាមទារឲ្យភាគីជម្លោះទាំងពីរដកខ្លួនចេញពីទីតាំងប្រាសាទដ៏ចំណាស់មួយនេះ នោះក៏ព្រោះតែដើម្បីសង្គ្រោះប្រាសាទព្រះវិហារពីការប្រឈមមុខដាក់គ្នាដោយសព្វាវុធ។ នេះគឺជាការឆ្លើយតបនូវសំណើរបស់កម្ពុជា ជាថ្មីម្ដងទៀត ដែលស្នើសុំឲ្យមានកិច្ចអន្តរាគមន៍បន្ទាន់មួយពីតុលាការយុត្តិធម៌អន្តរជាតិមួយនេះ កាលពីខែមេសា ឆ្នាំ២០១១។

លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី និយាយកាលពីថ្ងៃទី១៣ កុម្ភៈ ថា នៅក្នុងផែនទីឧបសម្ពន្ធផលិតក្នុងឆ្នាំ១៩០៨ ដែលមានតម្លៃជាសកលនោះ ពុំមានចែងក្នុងមាត្រាណាមួយដែលកំណត់ថា មានតំបន់ ៤.៦នោះទេ។

លោក ផៃ ស៊ីផាន ហៅការបង្កើតយុទ្ធសាស្ត្ររបស់ថៃនេះ ថាគឺជាផែនទីផលិតដោយឯកតោភាគី និងជាការប៉ុនប៉ងដើម្បីគ្រប់គ្រងប្រាសាទព្រះវិហារខ្មែរប៉ុណ្ណោះ៖ «ក្នុងឆ្នាំ១៩៦០ ហ្នឹង យើងឃើញថា ថៃហ្នឹងបានគូសពណ៌លឿង ហើយកម្ពុជា បានគូសពណ៌ក្រហម។ ខណ្ឌសីមាពណ៌ក្រហមហ្នឹង តុលាការយុត្តិធម៌អន្តរជាតិបានយកជាផ្លូវការ ទាត់ចោលខ្សែខណ្ឌសីមា ដែលថៃគូសដោយខ្លួនឯង ជាឯកតោភាគីក្នុងឆ្នាំ១៩៦២។ បន្ទាប់ពីហ្នឹងបានយើងឃើញក្នុងឆ្នាំ២០០៨ បានឃើញថៃ គូសខ្សែបន្ទាត់ពណ៌ខ្មៅនេះ ខ្សែបន្ទាត់ពណ៌ខ្មៅនេះ ជាខ្សែបន្ទាត់ខណ្ឌសីមាថ្មី ដែលថៃផលិតខ្លួនឯងដោយកាត់យកតំបន់ប្រាសាទដែលជាតូចនេះរបស់ប្រាសាទ ដែលឲ្យខ្មែរហើយទុករក្សាដីនេះហើយ។ ក៏ប៉ុន្តែបើសិនយើងពិចារណាមើលពីចន្លោះខ្សែពណ៌ខ្មៅទៅខ្សែពណ៌ក្រហមនេះ អានេះហើយដែលគេថា ជាផែនដីដែល ៤.៦ របស់ថៃ ដែលថៃគេទាមទារដោយមិនស្របច្បាប់នេះឯង»។

បើទោះជាតំបន់ ៤.៦ ពុំមានចែងនៅក្នុងផែនទីឧបសម្ពន្ធ ឆ្នាំ១៩០៨ របស់អន្តរជាតិ ក៏ដូចជាការអះអាងរបស់កម្ពុជា យ៉ាងណាក៏ដោយ តែគេនៅមានមន្ទិលថា តើមូលហេតុអ្វីបានជារដ្ឋាភិបាលទីក្រុងបាងកក នៅបន្តមានប្រៀប និងអាចគ្រប់គ្រងតំបន់ ៤.៦ ពីចម្ងាយ នៅគ្រាតំបន់ដែលគូសវាសនេះ ស្ថិតនៅក្នុងអធិបតេយ្យ និងបូរណភាពទឹកដីរបស់កម្ពុជានោះ។

វិទ្យុអាស៊ីសេរី បានស្នើសុំការអត្ថាធិប្បាយតាមសារអេឡិចត្រូនិក (Email) ពីមន្ត្រីស្ថានទូតថៃ ប្រចាំកម្ពុជាដែរ ដើម្បីឲ្យមានការបកស្រាយពីទំហំដី ៤.៦ នៅតំបន់ប្រាសាទព្រះវិហារ ដែលកម្ពុជា ចាត់ទុកថា ជាផែនទីគូសដោយឯកតោភាគី ប៉ុន្តែរហូតមកដល់ពេលនេះ នៅពុំទាន់ឃើញមានការឆ្លើយតបណាមួយនៅឡើយនោះទេ។

ប៉ុន្តែកាលពីដើមខែកុម្ភៈ តាមរយៈការចុះផ្សាយរបស់កាសែតក្នុងស្រុករបស់ថៃ និយាយថា គណបក្សភឿថៃ បានជំរុញឲ្យនាយករដ្ឋមន្ត្រី គឺលោកស្រី យីងឡាក់ ស៊ីណាវ៉ាត់ (Yingluck Shinawatra) បើកការចរចាជាមួយកម្ពុជា ដើម្បីស្នើសុំឲ្យកម្ពុជា ពិចារណាក្នុងការដកពាក្យបណ្ដឹងរបស់ខ្លួនពី ICJ ដោយងាកមកចរចាទ្វេភាគីឡើងវិញ និងអភិវឌ្ឍរួមគ្នាលើទំហំដីដែលថៃ អះអាងដោយឯកតោភាគីថា មានតំបន់ ៤.៦ គីឡូម៉ែត្រការ៉េនោះ។

អ្នកវិភាគបញ្ហាសង្គមគិតថា អ្នកនយោបាយកម្ពុជា បានបោះបង់ជំហរសិទ្ធិជាម្ចាស់ប្រទេស និងហាក់ដើរក្រោយនយោបាយថៃ ជាដរាប ក្នុងជម្លោះព្រំដែនកម្ពុជា-ថៃ ជាពិសេសនៅតំបន់ប្រាសាទព្រះវិហារ។ ការចាញ់ប្រៀបនយោបាយថៃនោះ មានន័យថា កម្ពុជាបរាជ័យចំពោះការទាមទារដាក់ឲ្យមានអ្នកសង្កេតការឥណ្ឌូនេស៊ី នៅតំបន់ដែលមានជម្លោះ និងពុំអាចធ្វើអ្វីបាន ដូចជាការធ្វើផ្លូវឡើងប្រាសាទក្នុងទឹកដីរបស់ខ្លួន ព្រោះតែមានការជំទាស់ពីភាគីថៃនោះ។

បញ្ហានេះ នៅក្នុងអំឡុងថ្ងៃថ្វាយព្រះភ្លើង ព្រះបរមសព ព្រះមហាវីរក្សត្រ សម្ដេចព្រះ នរោត្តម សីហនុ កម្ពុជាបង្ខំទម្លាយអាងស្តុកទឹកមួយកន្លែង នៅក្នុងវត្តកែវសិក្ខាគិរីស្វារៈ ទៅតាមការទាមទាររបស់ភាគីថៃ៕

ទស្សនៈមេធាវីចំពោះតម្រូវការសុំច្បាប់អនុញ្ញាតមុនផ្សព្វផ្សាយច្បាប់

ដោយ វោហារ ជាតិ — Sun, 17 Feb 2013 00:00:00 -0500

លោកក៏បានប្រតិកម្មចំពោះការបកស្រាយរបស់លោក មេធាវី សុក សំអឿន ដែរ ដោយចោទថា លោក សុក សំអឿន បកស្រាយប្រាប់អ្នកយកព័ត៌មានមិនបានស្រាវជ្រាវឯកសារច្បាប់ច្បាស់លាស់ ដែលធ្វើឲ្យមតិសាធារណជនយល់ច្រឡំ។

រឿងរ៉ាវទាក់ទងទៅនឹងសេចក្ដីប្រកាសរបស់ប្រធានគណៈមេធាវីនេះ បានធ្វើឲ្យមានប្រតិកម្មរវាងមតិជាតិ និងអន្តរជាតិជាបន្តបន្ទាប់។

នៅក្នុងសន្និសីទកាសែតថ្ងៃទី១៥ កុម្ភៈ កន្លងទៅនេះ លោក ប៊ុន ហុន ប្រធានគណៈមេធាវីបានវាយបកទៅនឹងការរិះគន់របស់លោក ប្រែដ អាដាម (Brad Adams) ប្រធានអង្គការសិទ្ធិមនុស្ស Human Rights Watch ខ្លាំងៗថា មិនបានស្រាវជ្រាវ និងមិនយល់ច្បាប់នៃប្រទេសកម្ពុជា។

ចំណែកលោកមេធាវី សុក សំអឿន វិញ ក៏ដូច្នេះដែរ គឺលោក ប៊ុន ហុន បានចោទថា លោក សុក សំអឿន កន្លងមក បានបកស្រាយប្រាប់អ្នកសារព័ត៌មានអំពីមាត្រាស្ដីពីក្រមសីលធម៌មេធាវីខុស ដោយច្រឡំមាត្រាចាស់ និងមាត្រាថ្មីទើបកែ ដែលមានលេខ ១៥ ដូចគ្នា។

លោក ប៊ុន ហុន៖ «បញ្ញត្តិមាត្រា ១៥ នេះ គឺក្រមសីលធម៌ថ្មី មិនមែនក្រមសីលធម៌ចាស់ទេ។ បញ្ញត្តិមាត្រា ១៥ នៃក្រមសីលធម៌នេះ គឺចុះថ្ងៃ២១ កញ្ញា ២០១២ ឯមាត្រា ១៥ មួយទៀត គឺមាត្រា ១៥ នៃក្រមសីលធម៌ឆ្នាំ១៩៩៥ លោកយកអានោះមកបកស្រាយ។ ប្រែដ អាដាម ឮអ៊ីចឹងថែមពីលើ សុក សំអឿន នោះទៅ។ ចំណុចនេះសបញ្ជាក់ឲ្យឃើញថា លោក សុក សំអឿន ខ្វះការស្រាវជ្រាវ»។

លោក សុក សំអឿន គឺជាមេធាវីម្នាក់ដែលបណ្ដាញសារព័ត៌មានជាច្រើនឧស្សាហ៍សុំអត្ថាធិប្បាយអំពីច្បាប់ ខណៈមេធាវីខ្លះទៀតមិនចង់និយាយជាមួយសារព័ត៌មាន។

ឆ្លើយតបទៅនឹងលោក ប៊ុន ហុន លោក សុក សំអឿន បញ្ជាក់នៅថ្ងៃទី១៦ កុម្ភៈ មានរឿងពីដែលអាចធ្វើឲ្យលោកបកស្រាយខុស គឺអាចមកពីទំព័រវ៉ឹបសាយរបស់គណៈមេធាវីមិនទាន់ធ្វើបច្ចុប្បន្នភាពមាត្រាថ្មីនៅពេលដែលលោកឆែកមើល មុននឹងឆ្លើយទៅសំណួរអ្នកសារព័ត៌មាន ដែលសួរលោកអំពីក្រមសីលធម៌មេធាវី ទាក់ទងនឹងសេចក្ដីប្រកាសរបស់គណៈមេធាវីនេះ ឬលោកអាចច្រឡំដោយអចេតនា។

កាលពីថ្ងៃទី២៣ មករា ឆ្នាំ២០១៣ ប្រធានគណៈមេធាវីនៃព្រះរាជាណាចក្រកម្ពុជា បានប្រកាសជូនដំណឹងដល់មេធាវីជាសមាជិកទាំងអស់ត្រូវឆ្លងគណៈមេធាវីសិនមុននឹងផ្ដល់បទសម្ភាសន៍ជាមួយវិទ្យុ ឬទូរទស្សន៍ ដើម្បីការពារក្រែងមានការបកស្រាយច្បាប់ខុសធ្វើឲ្យអ្នកស្ដាប់ភណ្ឌច្រឡំ។

សេចក្ដីប្រកាសនេះ បានធ្វើឲ្យមេធាវីមានប្រតិកម្មផ្ទុយគ្នា។

លោកមេធាវី សុក សំអឿន មានប្រសាសន៍ថា នៅពេលមានការបកស្រាយបីប្រធានគណៈមេធាវី លោកយល់ថា សេចក្ដីប្រកាសនេះមិនប៉ះពាល់ដល់សេរីភាពមេធាវីទេ តែលោកសុំឲ្យប្រធានគណៈមេធាវីបើកសេរីភាពដល់មេធាវីបញ្ចេញមតិផ្ទាល់ខ្លួនដោយត្រង់ៗចំពោះសេចក្ដីប្រកាសនេះដែរ។ចំណែកលោកមេធាវី ជូង ជូងី យល់ឃើញថា សេចក្ដីប្រកាសនេះ អាចប៉ះពាល់សិទ្ធិមេធាវីខ្លះៗ។

សេចក្ដីប្រកាសរបស់ប្រធានគណៈមេធាវីនៃព្រះរាជាណាចក្រកម្ពុជា ក៏បានធ្វើឲ្យមេធាវីបរទេស និងខ្មែរខ្លះ ដែលកំពុងបម្រើការក្នុងសាលាក្ដីខ្មែរក្រហមភ្ញាក់ផ្អើលដែរ។ មេធាវីខ្លះបានចោទថា តើសេចក្ដីប្រកាសរបស់ប្រធានគណៈមេធាវីនេះ អាចប៉ះពាល់ដល់ការងារប្រចាំថ្ងៃរបស់មេធាវីនៃសាលាក្ដីខ្មែរក្រហមដែរ ឬយ៉ាងណា?

អ្នកស្រី ស៊ិន សុវ៉ន មេធាវីមួយរូបនៃសាលាក្ដីខ្មែរក្រហម មានប្រសាសន៍ថា សេចក្ដីប្រកាសនេះធ្វើឲ្យខាតពេលវេលាការងារដែលអ្នកស្រីត្រូវចំណាយពេលចុះឡើងសុំច្បាប់ទៅការិយាល័យគណៈមេធាវីសិន មុននឹងមានសិទ្ធិនិយាយជាមួយអ្នកកាសែតបាន។ អ្នកស្រីបញ្ជាក់ថា នៅសប្ដាហ៍ក្រោយនេះអ្នកស្រីត្រូវបានអញ្ជើញទៅបកស្រាយដំណើរការក្ដីរបស់សាលាក្ដីខ្មែរក្រហមនៅស្ថានីយវិទ្យុមួយ តែអ្នកស្រីបញ្ជាក់ថា អ្នកស្រីនឹងមិនឆ្លងគណៈមេធាវីជាមុនដូចការប្រកាសនោះទេ។

យ៉ាងណាមិញ លោក គី តិច មេធាវីរដ្ឋាភិបាល និងជាអតីតប្រធានគណៈមេធាវីបានអំពាវនាវឲ្យមេធាវីទាំងអស់គោរពតាមសេចក្ដីប្រកាសរបស់គណៈមេធាវីថ្មីនេះ ដើម្បីពង្រឹងវិជ្ជាជីវៈមេធាវីផង និងធ្វើឲ្យមេធាវីម្នាក់ៗបកស្រាយច្បាប់ទៅអ្នកស្ដាប់បានត្រឹមត្រូវផង៕

សមត្ថកិច្ចខេត្តសៀមរាបចាប់ខ្លួនអ្នកប្រើឧបករណ៍នេសាទខុសច្បាប់ជាង៦០នាក់

ដោយ ហង្ស សាវយុត — Sat, 16 Feb 2013 07:23:00 -0500

សកម្មភាពនេសាទខុសច្បាប់ទាំងនោះ ដូចជាការប្រើអួនក្រឡាញឹក ការអូសអួនដែលមានប្រវែងរាប់ពាន់ម៉ែត្រ ដើម្បីចាប់យកត្រីទាំងតូចទាំងធំជាដើម។

ប្រជានេសាទខ្លះ បានរិះគន់ថា បើទោះបីជាមានបទល្មើសនេសាទកើតឡើងនៅក្នុងបឹងទន្លេសាប ស្ទើរតែរៀងរាល់ថ្ងៃក៏ដោយ ក៏សមត្ថកិច្ចពាក់ព័ន្ធដូចជារដ្ឋបាលជលផលជាដើម មានការបង្ក្រាបតិចតួច។

ទីបញ្ជាការកងរាជអាវុធហត្ថខេត្តសៀមរាប បានឱ្យដឹងថា គេបានចាប់ខ្លួនអ្នកប្រើឧបករណ៍នេសាទខុសច្បាប់ប្រមាណជាង ៦០នាក់ ព្រមទាំងឃាត់ទុកកាណូតធំៗចំនួន ១៦គ្រឿងទៀត កាលពីព្រឹកថ្ងៃសៅរ៍ ទី១៦ ខែកុម្ភៈ។

ការចាប់ខ្លួនក្រុមអ្នកនេសាទខុសច្បាប់ និងឃាត់ទុកកាណូតជាច្រើនគ្រឿងនោះ បានធ្វើឡើងបន្ទាប់ពីកម្លាំងកងរាជអាវុធហត្ថជាច្រើន បានបញ្ជូនឱ្យចុះប្រតិបត្តិការនៅក្នុងបឹងទន្លេសាប រយៈពេលពេញមួយយប់មក។

លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមរាប លោកបានមានប្រសាសន៍កាលពីរសៀលថ្ងៃសៅរ៍ ទី១៦ ខែកុម្ភៈ ថា បន្ទាប់ពីមានបញ្ជាផ្ទាល់ពីប្រធានគណៈកម្មាធិការនៃអធិការកិច្ចបឹងទន្លេសាប និងពីមេបញ្ជាការកងរាជអាវុធហត្ថលើផ្ទៃប្រទេស គឺលោកបានបញ្ជូនកម្លាំងជាច្រើនចុះប្រតិបត្តិការក្នុងបឹងទន្លេសាប ត្រង់ចំណុចនៃអតីតឡូត៍នេសាទលេខ៤ និងតំបន់ដែននេសាទបម្រុងទុកឱ្យត្រីពងកូន ហើយបានប្រទះឃើញការប្រើប្រាស់ឧបករណ៍នេសាទខុសច្បាប់ជាច្រើននៅទីនោះ។

ឧបករណ៍នេសាទល្មើសច្បាប់ទាំងនោះ មានដូចជាការប្រើអួនក្រឡាញឹក ការអូសអួនប្រវែងរាប់ពាន់ម៉ែត្រ ដោយប្រើម៉ាស៊ីនដើម្បីចាប់ត្រីជាដើម៖ «ការងារនេះ គឺចាប់ផ្ដើមធ្វើតាំងពីយប់មិញ រហូតដល់ភ្លឺ ហើយយើងក៏បានរឹបអូសសម្ភារៈដែលបង្កបទល្មើសនៅក្នុងដែនឡូត៍នេសាទ ហាមឃាត់ហ្នឹង គឺមានកាណូតទាំងអស់ ១៦កាណូត ហើយនិងប្រជាពលរដ្ឋទាំងអស់ជាង ៦០នាក់។ នេះមិនមែនជាប្រតិបត្តិការជាលើកដំបូងទេ គឺជាប្រតិបត្តិការ យើងធ្វើបន្តបន្ទាប់កន្លងមកហើយ ក៏ប៉ុន្តែលើកនេះ គឺយើងប្រើទ្រង់ទ្រាយធំបន្តិច»។

ទីបញ្ជាការកងរាជអាវុធហត្ថកំពុងកសាងសំណុំរឿងក្រុមអ្នកនេសាទទាំងជាង ៦០នាក់ ដែលសមត្ថកិច្ចចាប់ខ្លួន និងកាណូតផង ដើម្បីបញ្ជូនទៅកាន់តុលាការនាពេលឆាប់ៗ។

មន្ត្រីកងរាជអាវុធហត្ថខេត្តសៀមរាប បានឱ្យដឹងថា ក្នុងពេលដែលកងកម្លាំងចុះប្រតិបត្តិការបង្ក្រាបឧបករណ៍នេសាទល្មើសច្បាប់នោះ គឺគេដឹងថា មានបទល្មើសនេសាទជាច្រើនកំពុងកើតមាននៅក្នុងបឹងទន្លេសាប ក៏ប៉ុន្តែការបង្ក្រាបមិនទាន់អាចទប់ស្កាត់បានទាំងស្រុងនៅឡើយ។

ទោះយ៉ាងណា មន្ត្រីរដ្ឋបាលជលផលមិនបានអធិប្បាយជុំវិញប្រតិបត្តិការបង្ក្រាបបទល្មើសនេសាទនៅពេលនេះទេ។

លោក ព្រិន សាវិន ជានាយខណ្ឌរដ្ឋបាលជលផលខេត្តសៀមរាប នៃអធិការដ្ឋានរដ្ឋបាលជលផលខាងជើងបឹងទន្លេសាប បានមានប្រសាសន៍យ៉ាងខ្លីថា លោកបានដឹងថាកងរាជអាវុធហត្ថបានចុះបង្ក្រាបបទល្មើសនេសាទនោះ ក៏ប៉ុន្តែលោកមិនបានពន្យល់ទាក់ទងនឹងមូលហេតុអ្វីបានជាបទល្មើសនេសាទនៅតែកើតមាននោះទេ។

ក្រុមប្រជានេសាទខ្លះនៅឃុំកំពង់ឃ្លាំង នៃស្រុកសូទ្រនិគម ខេត្តសៀមរាប បានឱ្យដឹងថា បទល្មើសនេសាទកំពុងកើតមានយ៉ាងខ្លាំង នៅក្នុងបឹងទន្លេសាប ជិតតំបន់ពួកគេរស់នៅ។ បទល្មើសទាំងនោះមានដូចជាការប្រើអួនក្រឡាញឹក និងការអូសអួនប្រវែង ១ពាន់ ឬ ២ពាន់ម៉ែត្រ ដើម្បីចាប់យកត្រីជាដើម។ ក្រៅពីការនេសាទត្រីដោយប្រើឧបករណ៍ខុសច្បាប់នោះ គឺអ្នកមានលុយខ្លះបានសូកប៉ាន់ឱ្យសមត្ថកិច្ចពាក់ព័ន្ធ ដើម្បីឃុបឃិតគ្នាចូលទៅនេសាទនៅក្នុងតំបន់ឡូត៍បម្រុងដែលរក្សាទុកឱ្យត្រីពងកូនទៀតផង។

ប្រជានេសាទបានគាំទ្រចំពោះកងរាជអាវុធហត្ថខេត្តសៀមរាប ដែលបង្ក្រាបទៅលើបទល្មើសនេសាទនេះ៖ «ខ្ញុំគាំទ្រ ១០០% ចុះទៅបង្ក្រាបនោះ ព្រោះអាដាក់អួនអូសលើមងនេះ គឺទាញដាច់អស់របស់អ្នកនេសាទតូចតាច ហើយតំបន់ដែលហាមឃាត់នៅក្នុងបឹងទន្លេសាបយើង ឡូត៍បម្រុងទុកឱ្យត្រីពងកូន។ ឥឡូវឡូត៍បម្រុងនោះ វាអស់ទៅហើយ ដូចពួកអួនអីឱ្យគេចូលទៅរុញស៊ីបនៅក្នុងនោះអស់ទៅហើយ គ្មានអីតពូជទៀតទេ»។

មេបញ្ជាការកងរាជអាវុធហត្ថខេត្តសៀមរាប បានឱ្យដឹងថា គេនៅតែបញ្ជូនកម្លាំងឱ្យចុះប្រតិបត្តិការនៅក្នុងបឹងទន្លេសាប តទៅទៀត ដើម្បីបន្តការបង្ក្រាបបទល្មើសនេសាទឱ្យបានជាស្ថាពរ៕

អាជ្ញាធរខណ្ឌសែនសុខរងការចោទថារើសអើងក្នុងការឃាត់រថយន្តតាក់ស៊ី

ដោយ អ៊ុក សាវបូរី — Sat, 16 Feb 2013 07:03:00 -0500

ក្នុងប្រតិបត្តិការចាប់រថយន្តនោះ ក្រុមអ្នករត់តាក់ស៊ីបានចោទថា អាជ្ញាធរខណ្ឌឃាត់រថយន្តមិនឲ្យចរាចរនៅលើផ្លូវសហព័ន្ធរុស្សី នោះ មានការរើសអើង និងពុករលួយ។

រថយន្តកូរ៉េ ចំណុះ ១២កៅអី រត់តាក់ស៊ីជាង ១០គ្រឿង នៅព្រឹកថ្ងៃសៅរ៍ ទី១៦ ខែកុម្ភៈ ឆ្នាំ២០១៣ ត្រូវអាជ្ញាធរខណ្ឌសែនសុខ ចាប់ឲ្យឈប់បើកបរ ខណៈរថយន្តខ្លះចតនៅមហាវិថីសហព័ន្ធរុស្សី ខ្លះបើកបរយឺតៗដើម្បីហៅម៉ូយនៅក្បែរគល់ស្ពានអាកាស ៧មករា។

លោក សែម សឿន អ្នករត់តាក់ស៊ី ពីភ្នំពេញទៅខេត្តកំពង់ស្ពឺ ថ្លែងថា អាជ្ញាធរខណ្ឌសែនសុខ ចាប់រថយន្តដែលគាត់កំពុងតែបើកបរហៅម៉ូយ លើមហាវិថីសហព័ន្ធរុស្សី។ គាត់មិនដឹងអាជ្ញាធរខណ្ឌនោះចាប់ឃាត់ឡានគាត់មិនឲ្យបើកបរតទៅទៀតមានកំហុសអីទេ៖ «បើករិកៗតាមផ្លូវពេទ្យលោកសង្ឃហ្នឹង ហើយគេកៀងចាប់យកមកដាក់ខណ្ឌ ហើយថាទុកប្រហែលជា ៣ខែ បានមកដោះស្រាយ»។

លោក ប៉ាត់ ប្រុស អ្នករត់តាក់ស៊ីដែរ ថ្លែងថា រថយន្តគាត់មានឆៀកត្រឹមត្រូវ មានលេខសម្គាល់រថយន្ត និងមានលិខិតអនុញ្ញាតឲ្យធ្វើអាជីវកម្ម។ គាត់មិនបានចតរថយន្តលើផ្លូវសហព័ន្ធរុស្សី ទេ តែអាជ្ញាធរចាប់ឡានគាត់ដែលកំពុងបើកតិចៗ រង់ចាំភ្ញៀវឡើងជិះឡានគាត់៖ «ចាប់នោះវាអយុត្តិធម៌ត្រង់ឡានអ្នកស្គាល់អីចឹងទៅ លែងវិញ។ អ្នកណាស្គាល់ គេឲ្យលុយឲ្យកាក់ អីចឹងទៅលែងទៅ ហើយអ្នកណាដែលអត់មានខ្សែអីទៅ គេយកមកទុកចោលអីចឹងទៅ»។

លោក ជា ចាន់ថន អ្នកបើកតាក់ស៊ីភ្នំពេញ-ស្រែអំបិល ថ្លែងថា សកម្មភាពចាប់ឡានតាក់ស៊ី នោះ គឺអ្នកចាប់រើសអើង បើអ្នកបើកតាក់ស៊ី ស្គាល់គ្នាជាមួយសមត្ថកិច្ចនៅទីនោះ គេអត់ចាប់ឡានទេ គ្រាន់តែឲ្យលុយតិចតួច គេឲ្យបើកចេញទៅហើយ។ ចំណែករថយន្តគាត់ គេចាប់ហើយមិនដោះស្រាយភ្លាមទេ ដោយត្រូវឲ្យរង់ចាំ ៣ខែទៀត។ ការរង់ចាំ ៣ខែ ទើបដោះស្រាយនោះ ធ្វើឲ្យពួកគាត់បាត់ចំណូលប្រចាំថ្ងៃ និងគ្មានប្រាក់បង់ការឲ្យធនាគារ ដែលខ្ចីគេមកទិញឡាននេះរកស៊ី៖ «បាតុកម្មអីបានកើត បើមិនអីចឹងទេ ធ្វើម៉េចចេញ គេទុក ៣ខែមិនងាប់អស់ហើយ។កញ្ចក់អីស្អី មានគ្រប់គ្រាន់ទាំងអស់ ពែរមីអីមានទាំងអស់ហ្នឹង ហើយអត់មាននិយាយផាកពិន័យទេ គេដេញយើងទៅផ្ទះតែម្តង ឲ្យទុកឡាននៅហ្នឹង ចាំថ្ងៃណាគេត្រូវការ គេកោះអញ្ជើញហៅយើងមកវិញ ហើយបើផ្ទះនៅស្រែអំបិល កំពង់សោម មកភ្នំពេញ ងាយណា»។

លោក ស៊ិន សឿង អ្នកបើកតាក់ស៊ី ពីភ្នំពេញទៅខេត្តតាកែវ និងខេត្តកំពត ថ្លែងថា ការចាប់ឃាត់រថយន្តទុកក្នុងបញ្ជាការដ្ឋានអាវុធហត្ថខណ្ឌសែនសុខ យូរថ្ងៃខែមិនដោះស្រាយ អាចមានការធ្វើបាតុកម្មដោយក្រុមអ្នករត់តាក់ស៊ី នៅពេលខាងមុខ ព្រោះអ្នករកស៊ីចង់បានប្រាក់ដោះស្រាយជីវភាពប្រចាំថ្ងៃ៖ «ហើយដល់អីចឹង គេចាប់ទៅ ខ្ញុំមិនដឹងធ្វើម៉េចទេ ហើយគេអត់ផាកអីទេ ខ្ញុំសុំអង្វរគេយ៉ាងម៉េចក៏គេអត់ព្រមដែរ»។

ពាក់ព័ន្ធបញ្ហានេះ មេបញ្ជាការអាវុធហត្ថខណ្ឌសែនសុខ លោក គិត សុផល ថ្លែងថា អាជ្ញាធរខណ្ឌជាអ្នកឃាត់រថយន្តតាក់ស៊ីទាំងនោះយកមកទុកនៅកន្លែងអាវុធហត្ថនេះ។ លោកថា កន្លងមកក្រុមអ្នករត់តាក់ស៊ីនេះ បានបង្កឲ្យខូចសណ្ដាប់ធ្នាប់ចាប់ពីស្ពានអាកាស ៧មករា ទៅដល់ទឹកថ្លា។ ការចត និងបើកតិចៗដើម្បីហៅម៉ូយឲ្យជិះឡានតាក់ស៊ីនោះ ធ្វើឲ្យចរាចរណ៍តាមដងមហាវិថីសហព័ន្ធរុស្ស៊ី កាន់តែចង្អៀត៖ «មានការណែនាំគាត់ច្រើនលើកច្រើនសារពាក់ព័ន្ធនឹងរឿងផ្លូវសហព័ន្ធហ្នឹង ណែនាំមិនឲ្យគាត់ដាក់ គាត់ចរាចរបាន ក៏ប៉ុន្តែគាត់អត់អាចឈប់យកមនុស្សតាមផ្លូវនេះបានទេ»។

ជារឿយៗអាជ្ញាធរក្រុងបានណែនាំរថយន្តតាក់ស៊ី មកពីតាមបណ្ដាខេត្តនានាឲ្យចូលចតក្នុងចំណតនៅតាមផ្សារនានា មានផ្សារដើមគរ ផ្សារថ្មី ជាដើម ចៀសវាងការចតគ្មានសណ្ដាប់ធ្នាប់តាមដងផ្លូវ ហើយរដ្ឋក៏បាត់ចំណូលដែរ។ ចំណែកក្រុមតាក់ស៊ី តាមដងផ្លូវសហព័ន្ធរុស្សី បានអះអាងថា ពួកគាត់មិនចូលចតបេនក្នុងផ្សារព្រោះត្រូវរង់ចាំតាមលេខរៀងចាប់ពី ៣ ទៅ ៤ថ្ងៃ ទម្រាំបានសិទ្ធិចូលចត។ ម្យ៉ាងទៀត មិនទាន់ដល់លេខរៀងចតផង គាត់ត្រូវបង់លុយឲ្យខាងចំណតផ្សាររាល់ថ្ងៃច្រើនម៉ឺនរៀលទៀត៕

ក្រសួងមហាផ្ទៃប្រតិកម្មចំពោះការផ្សាយព័ត៌មានទាហានតំបន់ព្រះវិហារខ្វះទឹក

ដោយ វណ្ណ វិចារ — Sat, 16 Feb 2013 06:30:00 -0500

ការប្រតិកម្មនេះ ធ្វើឡើងបន្ទាប់ពីវិទ្យុអាស៊ីសេរី កាលពីថ្ងៃទី១៥ កុម្ភៈ បានផ្សាយពីការត្អូញត្អែររបស់កងកម្លាំងនៅជួរមុខកំពុងខ្វះខាតទឹកប្រើប្រាស់ប្រចាំថ្ងៃ ហើយប្រការនេះពួកគាត់តម្រូវឲ្យរាជរដ្ឋាភិបាលជួយអន្តរាគមន៍ជាបន្ទាន់។

ការខ្វះខាតទឹកប្រើប្រាស់របស់កងកម្លាំងប្រដាប់អាវុធមួយចំនួន នៅតាមព្រំដែនខេត្តព្រះវិហារ ក្លាយជាបញ្ហារសើបមួយ ហើយមន្ត្រីជាន់ខ្ពស់ក្រសួងមហាផ្ទៃ បានព្រមានចំពោះការផ្សព្វផ្សាយពីព័ត៌មាននេះ។

មន្ត្រីអ្នកនាំពាក្យក្រសួងមហាផ្ទៃ លោកឧត្តមសេនីយ៍ ខៀវ សុភ័គ នៅថ្ងៃទី១៦ កុម្ភៈ មានប្រសាសន៍ថា អ្នកយកព័ត៌មានត្រូវមានការប្រយ័ត្នប្រយែងចំពោះការផ្សាយព័ត៌មាននេះ ដែលអាចប៉ះពាល់ដល់បញ្ហាសន្តិសុខជាតិ។

លោក ខៀវ សុភ័គ ទទួលស្គាល់ថា រដូវប្រាំងនេះកងកម្លាំងជួរមុខពិតជាខ្វះទឹកប្រើប្រាស់ខ្លះមែន ប៉ុន្តែកងកម្លាំងការពារព្រំដែនទាំងអស់មិនមានទឹកចិត្តរាថយឡើយ។ លោកបន្តថា ព័ត៌មានដែលវិទ្យុអាស៊ីសេរី ផ្សាយពីកងទ័ពខ្វះទឹកប្រើប្រាស់នេះ មិនបានផលប្រយោជន៍អ្វីដល់ជាតិទេ ផ្ទុយទៅវិញអាចឲ្យបរទេសឈ្លានពានមើលងាយខ្មែរទៅវិញ។

លោកបញ្ជាក់ថា រាជរដ្ឋាភិបាលនឹងអន្តរាគមន៍ដោះស្រាយបញ្ហាខ្វះខាតទឹកនេះ ហើយសង្ឃឹមថាក្រុមអ្នកសារព័ត៌មាននឹងអាចបែងចែកបានច្បាស់ ពីព័ត៌មានណាគួរផ្សាយ និងមិនគួរផ្សាយ៖ «យើងសំណូមពរការផ្សព្វផ្សាយព័ត៌មានអ្វីក៏ដោយ ចំពោះវិស័យការពារជាតិ ត្រូវគិតផលប្រយោជន៍ជាតិជាចម្បង។ និយាយរួម ក្នុងកុំហុចដងដាវឲ្យសត្រូវឈ្លានពាន។ ព័ត៌មានហ្នឹងត្រូវហើយ តែមិនគួរនិយាយហ្នឹង វាប៉ះពាល់ដល់ជាតិ។ យើងខិតខំការពារទៀតហ្នឹង យើងបដិសេធចំពោះព័ត៌មានដែលវិទ្យុអាស៊ីសេរី ផ្សាយចំពោះការខ្វះទឹក»។

លោក ខៀវ សុភ័គ បន្តថា លោកជឿថាវិទ្យុអាស៊ីសេរី ផ្សាយព័ត៌មានពីការខ្វះទឹកនេះពិតជាក់ស្តែង តែអ្នកសារព័ត៌មានក៏ត្រូវគិតពីបញ្ហាជាតិជាចំបងសិន។

ទោះជាយ៉ាងណាក្តី ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ យល់ឃើញថា ការផ្សាយព័ត៌មានរបស់វិទ្យុអាស៊ីសេរី ពីការខ្វះខាតទឹកប្រើប្រាស់របស់កងកម្លាំងការពារព្រំដែននេះ ជាការដាស់តឿនឲ្យមន្ត្រីថ្នាក់ខ្ពស់បានដឹងពីចំណុចអសកម្មទាំងឡាយដែលកើតមាន ដើម្បីរកដំណោះស្រាយ។ លោកបន្តថា បើរាជរដ្ឋាភិបាលចង់ពន្យល់បន្ថែមទៀតពីរឿងទ័ពខ្វះខាតទឹកនាំឲ្យប៉ះពាល់សន្តិសុខជាតិនោះ អាចចេញសេចក្តីប្រកាសពន្យល់ណែនាំជាលាយលក្ខណ៍អក្សរបាន តែអ្វីដែលសំខាន់ គឺដោះស្រាយបញ្ហាទឹកជូនកងកម្លាំងជាមុនសិន។

លោក អ៊ូ វីរៈ បញ្ជាក់ថា ការហាមប្រាមមិនឲ្យផ្សព្វផ្សាយព័ត៌មានទៅវិញទេ ដែលបង្កឲ្យមានផលប៉ះពាល់យ៉ាងខ្លាំងដល់សង្គមជាតិទាំងមូល៖ «បានន័យថា បើសិនជាទ័ពយើងអត់មានទឹកមានអីមែន ឬមួយមានបញ្ហាមួយចំនួនគាត់ចង់លើកឡើង ត្រូវបានគេរារាំងទៅវិញ វាប៉ះពាល់ច្រើនណាស់ ប៉ះពាល់អ្នកសារព័ត៌មានផង ប៉ះពាល់ការការពារជាតិផង ប៉ះពាល់ប្រទេសយើងក្នុងការលើកតម្កើងរកបញ្ហាដើម្បីដោះស្រាយបញ្ហាជូនប្រជាពលរដ្ឋផង»។

លោក អ៊ូ វីរៈ បញ្ជាក់ថា សារព័ត៌មានមានកាតព្វកិច្ចក្នុងការផ្សាយព័ត៌មានដែលទាក់ទងនឹងផលប្រយោជន៍ជាតិផលប្រយោជន៍សង្គម ហើយសារព័ត៌មានជាដៃគូល្អបំផុតរបស់អាជ្ញាធរថ្នាក់លើ ក្នុងការស្វែងរកចន្លោះប្រហោងទាំងឡាយដែលខ្លួនមិនទាន់បានដឹង ដើម្បីបំពេញសេចក្តីត្រូវការជូនប្រជាពលរដ្ឋ។

ទាក់ទងនឹងបញ្ហានេះ កងកម្លាំងប្រចាំការនៅព្រំដែនព្រះវិហារ ឲ្យដឹងថា បញ្ហាប្រឈមចំពោះមុខរបស់កងទ័ព និងនគរបាលនៅតំបន់ប្រាសាទព្រះវិហារ គឺបញ្ហាខ្វះទឹក មានពេលខ្លះកងកម្លាំងនៅតំបន់នោះក្នុងរយៈពេល ២ ឬ ៣ថ្ងៃ ទើបងូតទឹកម្តង ឬត្រឹមក្រមាជ្រលក់ទឹកដើម្បីជូតខ្លួនប៉ុណ្ណោះ។ ហើយដើមហេតុនាំឲ្យខ្វះទឹក អាចបណ្ដាលមកពីទុយោបូមទឹកសម្រាប់បូមទឹកឡើងភ្នំត្រូវភ្លើងព្រៃឆេះបំផ្លាញ និងគួបផ្សំម៉ាស៊ីនបូមទឹកខូច ទើបខ្វះខាតទឹកប្រើប្រាស់។

ប៉ុន្តែទាំងលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី និងលោក ខៀវ សុភ័គ អ្នកនាំពាក្យក្រសួងមហាផ្ទៃ សុទ្ធតែបានសន្យាថារាជរដ្ឋាភិបាលនឹងដោះស្រាយរឿងខ្វះទឹកនេះជាបន្ទាន់។ អ្នកតាមដានបញ្ហាសង្គម យល់ថា រាជរដ្ឋាភិបាលគួរដោះស្រាយបញ្ហាដែលកើតមាន និងលើកទឹកចិត្តកងទ័ព វាប្រសើរជាងបិទបាំងព័ត៌មាន ឬហាមមិនឲ្យសារព័ត៌មានចុះផ្សាយនូវរឿងរ៉ាវដែលបានកើតឡើងរួចទៅហើយនោះ៕

តុលាការខេត្តបាត់ដំបងសម្រេចឃុំខ្លួនជនសង្ស័យគប់គ្រាប់បែកចូលពិធីរាំកម្សាន្ត

ដោយ សួន សុផលមុន្នី — Sat, 16 Feb 2013 05:55:00 -0500

តំណាងអយ្យកាអមសាលាដំបូងខេត្តបាត់ដំបង បានបើកការចោទប្រកាន់លើជនសង្ស័យបីនាក់ ពីបទឃាតកម្មគិតទុកជាមុន និងបទរក្សាអាវុធជាតិផ្ទុះខុសច្បាប់នៅក្នុងផ្ទះ។ ជនទាំងបីនាក់នោះ គឺជាមុខសញ្ញាដែលមានជាប់ពាក់ព័ន្ធទៅនឹងការវាយប្រហារគ្រាប់បែកដៃមួយគ្រាប់ ទៅលើហ្វូងមនុស្សនៅក្នុងពិធីចាក់ធុងបាសរាំលេងកម្សាន្តមួយ នៅស្រុកកំរៀង ខេត្តបាត់ដំបង។

ព្រះរាជអាជ្ញាតុលាការខេត្តបាត់ដំបង លោក នួន សាន បានមានប្រសាសន៍កាលពីថ្ងៃសៅរ៍ ទី១៦ កុម្ភៈ ថា ជនសង្ស័យទាំងបីនាក់បច្ចុប្បន្នត្រូវចៅក្រមស៊ើបសួរបញ្ជូនទៅឃុំខ្លួននៅក្នុងពន្ធនាគារជាបណ្ដោះអាសន្ន៖ «រឿងនេះយើងចោទប្រកាន់ពីបទឃាតកម្មគិតទុកជាមុនមួយបទ ហើយបទរក្សាអាវុធគ្រឿងផ្ទុះដោយគ្មានការអនុញ្ញាតមួយបទ វាពីរបទ ម្នាក់មានមួយបទ ពីរនាក់មានមួយបទ ហើយយើងបានបញ្ជូនទៅឃុំខ្លួនបណ្ដោះអាសន្ននៅល្ងាចថ្ងៃម្សិលមិញតែម្ដង។ បញ្ជាក់ជូនដែរ ដោយសារម្នាក់នោះមានពីរបទល្មើស ដោយសារគាត់រក្សាគ្រាប់មីន៦៩មួយទៀតនៅលើផ្ទះ វត្ថុតាងយើងឆែកយកតែម្ដង ព្រោះយើងសង្ស័យធ្ងន់ទៅគាត់ជាអ្នកបោកគ្រាប់បែក»។

ជនសង្ស័យទាំងបីនាក់នោះមានឈ្មោះ ឡាំ រ៉េត អាយុ ៥០ឆ្នាំ ទី២ ឈ្មោះ អោម សំណាង អាយុ ៤៣ឆ្នាំ អ្នកទាំងពីរនាក់មានមុខរបរធ្វើស្រែចម្ការនៅឃុំតាក្រៃ ស្រុកកំរៀង ខេត្តបាត់ដំបង និងឈ្មោះ ទី វន អាយុ ៤៨ឆ្នាំ មានរបរធ្វើចម្ការមកពីខេត្តពោធិ៍សាត់ ស្នាក់នៅភូមិក្រៃ ឃុំតាក្រៃ ស្រុកកំរៀង ខេត្តបាត់ដំបង។

សមត្ថកិច្ចប៉ូលិសបានចាប់ខ្លួនអ្នកទាំងបីនៅក្រោយការវាយប្រហារគ្រាប់បែកដៃមួយគ្រាប់ ចូលទៅលើហ្វូងមនុស្សជាច្រើននាក់នៅក្នុងពិធីចាក់ធុងបាសរាំលេងកម្សាន្ត នៅភូមិតាក្រៃ ឃុំតាក្រៃ ស្រុកកំរៀង ខេត្តបាត់ដំបង កាលពីម៉ោងជាង ៩យប់ ថ្ងៃទី៩ ខែកុម្ភៈ ឆ្នាំ២០១៣ ចំថ្ងៃចូលឆ្នាំចិន វៀតណាម ដែលការវាយប្រហារនោះបណ្ដាលឲ្យមនុស្សក្មេងចាស់ប្រុសស្រីចំនួន ១៤នាក់ បានរងរបួសធ្ងន់ និងរបួសស្រាល។

លោក ជេត វណ្ណនី ស្នងការរងទទួលបន្ទុកកណ្ដាលនគរបាលយុត្តិធម៌ នៃស្នងការខេត្តបាត់ដំបង បានបញ្ជាក់ថា សមត្ថកិច្ចបានស៊ើបអង្កេតស្រាវជ្រាវរកឃើញថា ជនសង្ស័យទាំងបីនាក់មានភាពស៊ីសង្វាក់គ្នាទៅនឹងសកម្មភាពបោកគ្រាប់បែកចូលវង់រាំធុងបាស នៅផ្ទះជនរងគ្រោះឈ្មោះ ឈិន ឌី ក្នុងភូមិក្រៃ ឃុំតាក្រៃ ស្រុកកំរៀង ខេត្តបាត់ដំបង៖ «មុនពេលកើតហេតុ ពេលកើតហេតុ និងក្រោយពេលកើតហេតុ យើងអាចមើលឃើញថា ការបញ្ជាក់របស់សាក្សី ការវៀងចម្លើយដើម្បីបិទបាំងកំហុស ដូចជា ឡាំ រ៉េត នេះ ហើយអ្នកទាំងពីរនាក់មានទំនាស់ខ្លាំង ព្រោះ ឡាំ រ៉េត មានទំនាស់ជាមួយជនរងគ្រោះរហូតឈានចូលទៅដល់ការប្រុងកាប់ចាក់គ្នា។ អ៊ីចឹងទេ ឯកសារមានភស្តុតាងស៊ីចង្វាក់អំពីបញ្ហាចម្លើយ»។

ទោះយ៉ាងនេះក្ដី ជនសង្ស័យទាំងបីនាក់បានបដិសេធថា ពួកគេពុំបានជាប់ពាក់ព័ន្ធនៅក្នុងការវាយប្រហារគ្រាប់បែកដៃនោះទេ។ លោក នួន សាន តំណាងអយ្យកាអមសាលាដំបូងខេត្ត បញ្ជាក់ថា ថ្វីត្បិតជនសង្ស័យពុំបានសារភាពក៏ដោយ ប៉ុន្តែករណីនេះយើងមានភស្តុតាង និងភាពស៊ីសង្វាក់គ្នា៖ «រឿងនេះយើងបានសួរអស់ ប៉ុន្តែគាត់មិនឆ្លើយសារភាពទេ។ ប៉ុន្តែសំខាន់លើភស្តុតាងស៊ីសង្វាក់។ អ៊ីចឹង យើងសម្រេចធ្វើការឃុំខ្លួន ហើយដើមចមដែលយើងរកឃើញ គាត់ធ្លាប់មានទំនាស់គ្នាមានពីមុនមក រឿងដីធ្លី ហើយក្រោយមកគាត់ក៏មានឈ្លោះកាប់ចាក់គ្នាស៊ីសាច់ហុតឈាម ត្រូវបានគេឃាត់ម្ដង។ តម្រុយទាំងនេះ យើងស្រាវជ្រាវទៅ យើងផ្ដោតលើគាត់តែម្ដង»។

នៅក្នុងហេតុការណ៍វាយប្រហារគ្រាប់បែកដៃនៅថ្ងៃចូលឆ្នាំចិន វៀតណាម នោះ បានធ្វើឲ្យមនុស្សក្មេងចាស់ប្រុសស្រីចំនួន ១៤នាក់ រងរបួសធ្ងន់ និងអ្នកខ្លះទៀតរងរបួសស្រាល ខណៈដែលអ្នកទាំងនោះកំពុងរាំលេងកម្សាន្តនៅផ្ទះជនរងគ្រោះឈ្មោះ ឈិន ឌី។ ជនសង្ស័យទាំងបីនាក់ បច្ចុប្បន្នត្រូវគេឃុំខ្លួនជាបណ្ដោះអាសន្ននៅពន្ធនាគារខេត្តបាត់ដំបង៕

យុវជនខេត្តស្វាយរៀងចាប់អារម្មណ៍ពីការប្រឆាំងអំពើពុករលួយក្នុងមូលដ្ឋាន

ដោយ ខែ សុណង — Sat, 16 Feb 2013 03:44:00 -0500

ក្រុមយុវជនជាង ៦០នាក់នៅខេត្តស្វាយរៀង កំពុងចូលរួមកម្មវិធីពង្រឹងសិទ្ធិអំណាចមូលដ្ឋាន រៀនសូត្រពីបទពិសោធន៍នៃការប្រឆាំងអំពើពុករលួយ ដើម្បីប្រយុទ្ធប្រឆាំងអំពើពុករលួយនៅកម្ពុជា។

កម្មវិធីនេះ យុវជននឹងទទួលបានបទពិសោធន៍ពីអង្គការប្រឆាំងអំពើពុករលួយ មេធាវីដែលបង្ហាញអំពីច្បាប់ អាជ្ញាធរ និងអង្គការសង្គមស៊ីវិលក្នុងមូលដ្ឋាន ទាក់ទងទៅនឹងកាតព្វកិច្ចតួនាទីរបស់យុវជនក្នុងការចូលរួមអភិវឌ្ឍសង្គម និងប្រយុទ្ធប្រឆាំងអំពើពុករលួយ។ ក្រៅពីនេះ យុវជនទាំងនោះក៏មានឱកាសចូលរួមក្នុងសកម្មភាពរៀនសូត្រដែលធ្វើឲ្យពួកគេមានទំនាក់ទំនង និងស្គាល់គ្នាថែមទៀត។

នាយកប្រតិបត្តិនៃអង្គការតម្លាភាពកម្ពុជា ហៅជាភាសាអង់គ្លេសថា ត្រេន ស្ពែរិនស៊ី អ៊ិនធឺណេសិនណល ខេមបូឌា (Transparency International Cambodia) លោក ព្រាប កុល មានប្រសាសន៍នៅថា សិក្ខាសាលាស្ដីអំពីការពង្រឹងសិទ្ធិអំណាចយុវជនមូលដ្ឋាន ស្វែងយល់ពីតម្លាភាព និងគណនេយ្យភាព នៅថ្ងៃទី១៥ កុម្ភៈ មានគោលដៅចង់ឲ្យយុវជនមានការយល់ដឹងអំពីអ្វីទៅហៅថាតម្លាភាព អ្វីទៅហៅថាគណនេយ្យភាពសង្គម អ្វីទៅជាបញ្ហាអំពើពុករលួយ យល់ដឹងអំពីច្បាប់អំពើពុករលួយ និងផលប៉ះពាល់នៃអំពើពុករលួយ ដើម្បីឲ្យពួកគេស្វែងយល់ និងចូលរួមចំណែកក្នុងការទប់ស្កាត់ និងកាត់បន្ថយអំពើពុករលួយ។

លោកថា មិនត្រឹមតែប៉ុណ្ណេះ លោកចង់ឲ្យយុវជនយល់ដឹងអំពីតួនាទីរបស់ខ្លួនក្នុងនាមជាពលរដ្ឋដើម្បីឲ្យយុវជនរួមចំណែកក្នុងការទប់ស្កាត់អំពើពុករលួយទៅថ្ងៃអនាគត៖ «បាទ! មានសារៈសំខាន់ណាស់ ពីព្រោះយុវជនគាត់ជាសសរទ្រូងនៃប្រទេសជាតិ។ គាត់ជាអនាគតនៃអ្នកដឹកនាំ ហើយបច្ចុប្បន្ននេះ គាត់មានចំនួនច្រើននៅក្នុងប្រទេសកម្ពុជា យើង។ អីចឹង យើងគិតថាជាកម្លាំងសង្គមមួយយ៉ាងធំ ហើយបើសិនជាពួកគាត់មិនបានយល់ដឹងពីបញ្ហាអំពើពុករលួយនេះទេ គាត់មិនអាចចូលរួមជួយទប់ស្កាត់បានហើយ ឬក៏គាត់ជាអ្នកអាចប្រព្រឹត្តអំពើពុករលួយដោយផ្ទាល់ក្នុងប្រការណាមួយនោះជាបញ្ហាវាលវដ្តសង្សារមួយដែលយើងមិនអាចដោះស្រាយបាននៅថ្ងៃខាងមុខ។ ការវិនិយោគជាមួយយុវជននេះ គឺសំខាន់មែនទែន គឺយើងឲ្យគាត់ចូលរួមទប់ស្កាត់បញ្ហាអំពើពុករលួយបច្ចុប្បន្ន។ ទី២ យើងកសាងនូវអត្តចរិត និងភាពស្អាតស្អំនៅក្នុងឧត្ដមគតិនៅក្នុងផ្នត់គំនិតនៅក្នុងចរិតលក្ខណៈពេលដែលគាត់ទៅជាអ្នកដឹកនាំនោះ គាត់មិនដើរតាមគន្លងពេលបច្ចុប្បន្ន គាត់អាចដឹកនាំប្រទេសជាតិមួយថ្លៃថ្នូរ និងស្អាតស្អំ»។

យុវជនយុវតីដែលបានចូលរួមកម្មវិធីពង្រឹងសិទ្ធិអំណាចយុវជន បានសម្ដែងក្ដីរីករាយ និងប្ដេជ្ញាចិត្តថានឹងចែករំលែកការយល់ដឹងនេះទៅសហគមន៍របស់ពួកគេ។

យុវជន ចាន់ សុជា និស្សិតនៃសាកលវិទ្យាល័យស្វាយរៀង បានថ្លែងថា វាជាឱកាសដ៏វិសេសដែលផ្ដល់ឲ្យពួកគេងាកមកចាប់អារម្មណ៍ពីការប្រយុទ្ធប្រឆាំងអំពើពុករលួយ ហើយខ្លួននឹងចែករំលែកចំណេះដឹងបានមកពីការជួបជុំនេះ ទៅឲ្យយុវជនក្នុងសហគមន៍របស់គេ។

យុវជន ចាន់ សុជា៖ «សម្រាប់និស្សិតទាំងអស់ដែលគាត់ចូលរួមថ្ងៃនេះ គាត់មានការភ្ញាក់ផ្អើល។ ប្រធានបទយើងនិយាយអំពីអំពើពុករលួយ។ ពីមុនមក គាត់មិនសូវចាប់អារម្មណ៍ខ្លាំងទេ គាត់រវល់តែការសិក្សារបស់គាត់នៅសកលវិទ្យាល័យភាគច្រើន។ ហើយគាត់ភ្លឺភ្នែកមែនទែន គាត់បានស្ដាប់ការបង្ហាញរបស់លោក សុក សំអឿន និងលោក ព្រាប កុល គាត់ភ្ញាក់ផ្អើល។ ប្រយោជន៍ធំធេងណាស់ និស្សិតទាំងអស់បានជួបនឹងវាគ្មិនដែលល្បីៗ គាត់បានប្រឹងស្ដាប់ដោយយកចិត្តទុកដាក់មែនទែន ហើយម្នាក់ៗប្ដេជ្ញាចិត្តថានឹងផ្ដើមដោយខ្លួនឯង ដើម្បីទប់ស្កាត់អំពើពុករលួយ»។

យុវតី ឡោ សុគន្ធារី ជានិស្សិតផ្នែកគណនេយ្យ និងអក្សរសាស្ត្រអង់គ្លេស ឆ្នាំទី២ នៃសាកលវិទ្យាល័យស្វាយរៀង មានមតិថា នេះជាលើកដំបូងដែលនាងបានចូលរួមក្នុងវគ្គបណ្ដុះបណ្ដាលដូច្នេះ។ ប្រធានបទនេះ គឺជាប្រធានបទមួយដែលនាងចាប់អារម្មណ៍យ៉ាងខ្លាំង។ ក្ដីស្រមៃរបស់នាង គឺចង់បានសង្គមមួយដែលគ្មានអំពើពុករលួយ មានតម្លាភាព ហើយមានការរីកចម្រើន។

យុវតី ឡោ សុគន្ធារី៖ «ដូចជាប៉ូលិសចរាចរ បើយើងអត់មានមួកសុវត្ថិភាពអីចឹង បើថាគាត់ស្គាល់គ្នាគាត់ប៉ូលិសៗគ្នាគាត់អ៊ីចឹង គាត់ឲ្យទៅធម្មតា គាត់អត់ផាកពិន័យទេ។ ប៉ុន្តែសម្រាប់យើងដែលអត់អ៊ីចឹង គាត់មានការគាបសង្កត់យើងអ្នកតូចទាប គឺគាត់មើលមកថាយើងមិនបានស្មើអ៊ីចឹង។ គាត់ផាកពិន័យ ហើយគាត់ប្រើពាក្យមិនគួរសមជាច្រើនផងដែរ។ យើងចង់ឲ្យសង្គមទាំងមូលមានតម្លាភាព ហើយចូលរួមទាំងអស់គ្នា ដើម្បីឲ្យការងារហ្នឹងរីកចម្រើនទាំងអស់គ្នា»។

យ៉ាងណាក៏ដោយ នៅក្នុងសិក្ខាសាលាស្ដីអំពីការពង្រឹងសិទ្ធិអំណាចយុវជនមូលដ្ឋាន ស្វែងយល់ពីតម្លាភាព និងគណនេយ្យភាព នៅថ្ងៃទី១៥ កុម្ភៈ ក៏មានអាជ្ញាធរសង្កាត់ចេក ក្រុងស្វាយរៀង ខេត្តស្វាយរៀង ចូលរួមគាំទ្រដែរ។

ចៅសង្កាត់ចេក ក្រុងស្វាយរៀង លោក ញឹម ស៊ាំ មានប្រសាសន៍ថា លោករីករាយណាស់ដែលមានកម្មវិធីដូច្នេះ។ លោកចង់ឲ្យមានអង្គការក្រៅរដ្ឋាភិបាលផ្ដល់នូវវគ្គដូច្នេះឲ្យបានច្រើន ដើម្បីឲ្យយុវជនក្នុងខេត្តរបស់គាត់កាន់តែមានការយល់អំពីគណនេយ្យភាពក្នុងសង្គម ដែលគ្មានអំពើពុករលួយ។ មិនត្រឹមតែប៉ុណ្ណោះ សូម្បីតែពលរដ្ឋទូទៅក៏លោកចង់ឲ្យបានទទួលចំណេះដឹងពីវគ្គសិក្សាដូចគ្នានេះដែរ។

លោក ញឹម ស៊ាំ៖ «អូ! ចង់បានការងារនេះបន្តថែមទៀត។ ចង់ឲ្យដឹងដល់ពលរដ្ឋនៅក្នុងមូលដ្ឋានផង។ គ្រាន់ថានិស្សិត និងយុវជនគាត់ដឹងមួយចំនួន ឥឡូវនៅខាងប្រជាពលរដ្ឋគាត់មិនទាន់បានដឹង។ នៅទាល់តែចប់ហ្មង ដើម្បីអបអរសាទរជាមួយបងប្អូនគាត់មកធ្វើការហ្នឹង អរគុណណាស់។ ចង់ចេះដឹងខ្លួនឯងទៀត យកទៅអនុវត្តន៍»។

កម្មវិធីនេះ គឺបានទទួលការឧបត្ថម្ភថវិកាដោយអង្គការតម្លាភាពកម្ពុជា ក្រោមមូលនិធិពីប្រទេសអូស្ត្រាលី និងប្រទេសស៊ុយអែត។

មន្ត្រីអង្គការដដែលបានរំពឹងទុកថា តាមរយៈកម្មវិធីនេះ យុវជនរាប់ពាន់នាក់ទៀតនៅកម្ពុជា នឹងទទួលបានការយល់ដឹងរួមទាំងបទពិសោធន៍ ដើម្បីលើកស្ទួយតម្លាភាព និងសុចរិតភាពនៅក្នុងសង្គម។ យុវជននឹងបង្កើតវិធីសាស្ត្រក្នុងការចែករំលែកចំណេះដឹង ដែលពួកគេបានទទួលទៅដល់មិត្តភ័ក្ដិនៅក្នុងសហគមន៍របស់ខ្លួន ទាក់ទងនឹងតម្លាភាព គណនេយ្យភាព និងការទទួលខុសត្រូវសង្គម និងតួនាទីរបស់ខ្លួន ក្នុងការរួមចំណែក និងលើកតម្កើងគណនេយ្យភាព និងសុចរិតភាពសង្គម។

ក្រៅពីនោះ យុវជននឹងបានយល់ដឹងពីមធ្យោបាយក្នុងការរាយការណ៍អំពីការប្រព្រឹត្តអំពើពុករលួយនៅក្នុងសហគមន៍ដែលគាត់រស់នៅ។ កម្មវិធីក៏នឹងផ្ដល់នូវផ្នត់គំនិត និងការកែលំអនូវចរិតលក្ខណៈរបស់យុវជនជំនាន់ក្រោយ ដែលនឹងក្លាយទៅជាអ្នកដឹកនាំនៅក្នុងជួររដ្ឋាភិបាល វិស័យឯកជន សង្គមស៊ីវិល ប្រព័ន្ធផ្សព្វផ្សាយ ឬអាជីពការងារដទៃទៀត ដើម្បីឲ្យពួកគេផ្លាស់ប្ដូរនៅក្នុងសង្គមការងាររបស់គេប្រកបដោយការយល់ដឹងពីតម្លៃនៃភាពស្អាតស្អំ គ្មានអំពើពុករលួយ៕

ព្រៃការពារនៅតំបន់ជុំវិញបឹងទន្លេសាបរងការកាប់បំផ្លាញ

ដោយ សួន សុផលមុន្នី — Sat, 16 Feb 2013 02:55:00 -0500

សមាជិកក្រុមប្រឹក្សាគណបក្ស សម រង្ស៊ី បានអះអាងថា ដីព្រៃលិចទឹកក្នុងតំបន់បីជាច្រើនហិកតារ រងការកាប់បំផ្លាញដើម្បីយកដីបង្កបង្កើនផល។ ទីតាំងដីនោះ ស្ថិតនៅភូមិព្រែកទ្រព្យ ឃុំព្រែកនរិន្ទ ស្រុកឯកភ្នំ ខេត្តបាត់ដំបង។ មន្ត្រីគណបក្សប្រឆាំងបានចោទថា អ្នកនៅពីក្រោយខ្នងនៃការកាប់រានដីព្រៃដែលរដ្ឋហាមឃាត់នេះ មានជាប់ទាក់ទងទៅនឹងអាជ្ញាធរមូលដ្ឋាន និងសហគមន៍ព្រែកទ្រព្យ។

ជំទប់ទី២ ឃុំព្រែកនរិន្ទ លោក យៀប រ៉ុត បានថ្លែងកាលពីថ្ងៃទី១៥ ខែកុម្ភៈ ថា ការកាប់រានដីព្រៃលិចទឹកនោះមានប្រហែលជា ២គីឡូម៉ែត្រ។ ករណីនេះ គេបារម្ភថានឹងមានផលប៉ះពាល់ដល់ដែនជម្រករបស់មច្ឆាជាតិកាន់តែខ្លាំងឡើង៖ «ដីនោះគេចែកជាតំបន់មួយ តំបន់ពីរ តំបន់បី ដីនោះវានៅក្នុងតំបន់បី វាច្រើន។ គេថាប្រជាជនអ្នកកាប់ ប៉ុន្តែអាហ្នឹងគេគ្រាន់តែយកធ្វើជារបាំងទេ មានប្រជាជនចុះទៅកាប់អីដល់ប៉ុណ្ណឹងទេ ព្រោះកាប់ប៉ុណ្ណឹងដឹងប៉ុណ្ណឹង គេចាប់យកមកធ្វើកិច្ចសន្យា ប៉ុន្តែអានេះអត់ទេ ព្រោះមានការ ព្រោះមេឃុំគេចង់ធ្វើបានដីហ្នឹង»។

លោកបន្តថា បច្ចុប្បន្នដីនៅតំបន់បីនោះ កន្លែងខ្លះមានការដាំដុះដំណាំ និងកន្លែងខ្លះកំពុងរៀបចំធ្វើជាបន្តទៀត។

ឆ្លើយតបការចោទប្រកាន់នេះ មេឃុំព្រែកនរិន្ទ លោក សេង យី បានថ្លែងថា ដីនៅតំបន់នោះពុំមានការកាប់រានថ្មីនោះទេ។ លោកថា ដីនៅក្នុងតំបន់បីមានប្រជាពលរដ្ឋជាង ១០០គ្រួសារជាអ្នកធ្លាប់បានកាប់រាននៅលើដីនៅតំបន់បីនោះតាំងពីឆ្នាំមុន៖ «គណបក្សប្រឆាំងគេអត់មានរឿងអីធ្វើ ហើយគេយកអ្នកកាសែត អ្នកសារព័ត៌មានទៅថត សូម្បីតែប្រជាពលរដ្ឋកំពុងបាញ់ថ្នាំស្តែក ក៏គាត់ទៅថតថាអាហ្នឹងកាប់រានដីថ្មី អាមួយវាស្មៅ អាមួយវាព្រៃ ដីហ្នឹងគេធ្វើបាន ៧ខែទេ ដល់ខែ៦ ខែ៧ ទឹកលិចហើយ គេទុកចោលដល់ទឹកស្រកទៅវិញបានគេត្រាយស្មៅទុកចោលដុះស្មៅហើយ»។

ទោះជាមានការបកស្រាយដូច្នេះក៏ដោយ ប៉ុន្តែមន្ត្រីគណបក្សប្រឆាំង និងប្រជាពលរដ្ឋ បានអះអាងថា សហគមន៍ព្រែកទ្រព្យ និងអាជ្ញាធរភូមិ ឃុំ មានជាប់ពាក់ព័ន្ធនៅក្នុងការកាប់បំផ្លាញដីព្រៃលិចទឹកនៅតំបន់បីនោះ។

ពួកគេបានអះអាងថា មានប្រជាពលរដ្ឋដែលពុំជាបក្ខពួករបស់សហគមន៍ព្រែកទ្រព្យ និងជាអ្នកមិនត្រូវជាមួយអាជ្ញាធរមូលដ្ឋាននោះ បាននាំគ្នាចូលទៅកាប់ដែរ តែត្រូវគេចាប់ខ្លួន៖ «ខ្ញុំបានចុះទៅមើលផ្ទាល់ ថតមានឯកសារអីត្រឹមត្រូវ ឃើញកាប់រំលោភទៅមែន ២០ ទៅ ៣០ហិកតារ ចូលព្រៃលិចទឹក តំបន់ហាមឃាត់ដែលរដ្ឋាភិបាលបានហាម ហើយពួកហ្នឹងនៅពេលដឹងថាខ្ញុំចុះទៅអ៊ីចឹង គាត់មានផែនការហៅប្រជាជនព្រែកទ្រព្យហ្នឹង ទៅឲ្យផ្ដិតមេដៃ។ ចំនួនអ្នកកាប់នោះមាន ១៥នាក់ ភាគច្រើនជាសហគមន៍ ជាអ្នកដឹងសាច់រឿង។ អ៊ីចឹងហើយគាត់ហៅប្រជាជនទាំងអស់ហ្នឹងចំនួនជិត ១០០គ្រួសារ សព្វថ្ងៃទៅផ្ដិតមេដៃដើម្បីសុំកាត់ដីហ្នឹង។ អានេះជាវិធីមួយដើម្បីឲ្យខ្ញុំចាលច្រកថា ខ្ញុំធ្វើយ៉ាងម៉េច បើប្រជាជនភាគច្រើនដល់ទៅ ១០០គ្រួសារទៅហើយ គេសុំកាប់ដីហ្នឹង ផ្ដិតមេដៃសុំដីហ្នឹងធ្វើកសិកម្ម»។

វិទ្យុអាស៊ីសេរី នៅពុំទាន់អាចទាក់ទង លោក រ៉ាយ ណម ប្រធានសហគមន៍ព្រែកទ្រព្យ ដើម្បីសួរបញ្ជាក់បន្ថែមជុំវិញបញ្ហានេះទេ។ ចំណែកឯមន្ត្រីនៃរដ្ឋបាលជលផលបាត់ដំបង ក៏មិនអាចទាក់ទងបានដូចគ្នា។

ក្នុងរយៈពេលប៉ុន្មានឆ្នាំកន្លងទៅនេះ រដ្ឋាភិបាលបានចេញអនុក្រឹត្យកំណត់ដែនព្រៃលិចទឹកនៅជុំវិញទឹកបឹងទន្លេសាប ជាបីតំបន់ គឺតំបន់១ តំបន់២ និងតំបន់៣។ ដីនៅក្នុងតំបន់១ រដ្ឋអាចចេញប័ណ្ណកម្មសិទ្ធិស្របច្បាប់ជូនប្រជាពលរដ្ឋធ្វើជាម្ចាស់។ ដីនៅតំបន់២ រដ្ឋអនុញ្ញាតឲ្យប្រជាពលរដ្ឋបង្កបង្កើនផលបាន ប៉ុន្តែមិនអាចចេញប័ណ្ណកម្មសិទ្ធិឲ្យនោះទេ។ ចំណែកដីនៅតំបន់៣ រដ្ឋាភិបាលហាមឃាត់ដាច់ខាតមិនអនុញ្ញាតឲ្យកាប់ទន្ទ្រានទៀតនោះឡើយ៕

កងទ័ពនិងនគរបាលប្រចាំការនៅតំបន់ប្រាសាទព្រះវិហារខ្វះទឹកប្រើប្រាស់

ដោយ ដែន អយុធ្យា — Sat, 16 Feb 2013 02:20:00 -0500

កងកម្លាំងបានស្នើឲ្យរាជរដ្ឋាភិបាល ឬស្ថាប័នពាក់ព័ន្ធ ជួយផ្គត់ផ្គង់ទឹក ឬមានវិធានការផ្តល់ទឹកឲ្យបានគ្រប់គ្រាន់។ បញ្ហានេះ មន្ត្រីជាន់ខ្ពស់រាជរដ្ឋាភិបាល មិនធ្វេសប្រហែស ឬព្រងើយកន្តើយនោះទេ។

ពលទាហាន នគរបាល និងសមត្ថកិច្ចផ្សេងទៀត ដែលកំពុងបំពេញបេសកកម្មការពារទឹកដីតាមព្រំដែន និងការពារប្រាសាទព្រះវិហារ បានរអ៊ូរទាំថា សព្វថ្ងៃនេះពួកគេកំពុងប្រឈមបញ្ហាខ្វះទឹក ដោយហេតុថា ស្រះទឹក ឬអាងស្តុកទឹកនៅលើភ្នំត្រូវរីងស្ងួត ហើយម៉ាស៊ីនបូមទឹកបញ្ជូនទឹកពីផ្នែកខាងក្រោមទៅចែកចាយលើភ្នំ បានខូច និងទុយោទឹកខ្លះត្រូវភ្លើងព្រៃឆេះមិនទាន់ជួសជុល។

យោធាមិនបង្ហាញអត្តសញ្ញាណម្នាក់ ស្ថិតក្នុងចំណោមកងទ័ពផ្សេងទៀត បានឲ្យដឹងថា នៅពេលម៉ាស៊ីនបូមទឹកខូច កងទ័ពមិនបានងូតទឹកពី ២ ទៅ ៣ថ្ងៃ និងមានពេលខ្លះស្ទើររកទឹកចំអិនអាហារហូបចុកពុំបានផង៖ «ទឹកបានត្រឹមតែលាងខ្លួនទេ មិនហ៊ានងូតទេខ្លាចអត់ទឹកដាំបាយ។ គ្មានទឹកទេខាងលើ គេបូមនៅក្រោយពយតាឌី។ អាងនៅជិតវត្ត ខ្ញុំទៅមើលស្ងួតអស់ហើយៗស្រះនៅលើភ្នំក្បែរប្រាសាទទី៤ ជិតរីងអស់ហើយ»។

បញ្ហានេះ យោធាដែលកំពុងប្រចាំការនៅតាមជំរាលភ្នំឡើងទៅប្រាសាទព្រះវិហារ តាមជណ្ដើរបុរាណ បានទទូចស្នើឲ្យរដ្ឋាភិបាលជួយធ្វើអាងស្តុកទឹក ឬពិនិត្យចំពោះបញ្ហាខ្វះទឹកសមរភូមិជួរមុខជាបន្ទាន់ ព្រោះរដូវនេះជារដូវក្តៅ។ លោកថា ដោយសារតែផ្លូវមានចម្ងាយឆ្ងាយ និងខ្វះមធ្យោបាយមិនអាចឲ្យកងទ័ពធ្វើដំណើរចុះទៅដងទឹកពីក្រោមទៅលើភ្នំបានងាយទេ។

មន្ត្រីកងទ័ពឲ្យដឹងថា បញ្ហាផ្គត់ផ្គង់ទឹកសម្រាប់ផ្តល់ជូនកងទ័ពសមរភូមិជួរមុខ ឬកំពុងបំពេញបេសកកម្មនៅតាមព្រំដែនតំបន់ព្រះវិហារ មិនគួរឲ្យខ្វះខាតទេ ព្រោះទឹកជាដង្ហើមរស់នៃជីវិត។ លោកថា បើគ្មានទឹក គ្មានជីវិត ហើយក៏មិនអាចបំពេញបេសកកម្មការងារ ឬធ្វើកិច្ចការបានជោគជ័យទេ។

មិនខុសគ្នាទេ សម្រាប់មន្ត្រីនគរបាលការពារបេតិកភណ្ឌ ប្រចាំការនៅលើប្រាសាទព្រះវិហារ បានទទួលស្គាល់ថា កងកម្លាំងពិតជាកំពុងប្រឈមខ្វះទឹកប្រើប្រាស់ប្រចាំថ្ងៃពិតមែន ដែលបញ្ហានេះទាមទារឲ្យរដ្ឋាភិបាលជួយមានវិធានការជាបន្ទាន់៖ «ទឹកជាក់ស្តែងពិតជាខ្វះមែន ដោយសារតែរដូវនេះជារដូវក្តៅគ្មានភ្លៀងធ្លាក់»។

ឆ្លើយតបបញ្ហានេះ លោក ផៃ ស៊ីផាន មន្ត្រីនាំពាក្យ និងជារដ្ឋលេខាធិការទីស្ដីការគណៈរដ្ឋមន្ត្រី មានប្រសាសន៍ថា រដ្ឋាភិបាលមិនធ្វេសប្រហែលក្នុងការផ្តល់សម្ភារៈប្រើប្រាស់ ឬអាហារហូបចុកដល់កងកម្លាំងប្រចាំការនៅតំបន់ព្រំដែនប្រាសាទព្រះវិហារ ទេ គឺបានបន្តជួយទំនុកបម្រុង និងចុះពិនិត្យជាប្រចាំខែ៖ «រាជរដ្ឋាភិបាលមិនដែលព្រងើយកន្តើយទេ ប៉ុន្តែមានជួបឧបសគ្គម្តងម្កាលដូចជាការបញ្ជូនទឹកទៅតាមម៉ាស៊ីនៗខូចជាដើម។ ហើយយើងនឹងជួសជុល នឹងនៅតែថែរក្សាបន្តឧបត្ថម្ភម្ហូបអាហារដល់កន្លែង។ ជាពិសេសខ្លួនខ្ញុំផ្ទាល់ ខ្ញុំតែងតែ ១ខែកន្លះ ឬ ២ខែ ខ្ញុំទៅដល់កន្លែងហ្នឹងម្តង ដើម្បីវាយតម្លៃសភាពការណ៍ ម្ហូបហូបចុក និងទំនាក់ទំនងកងកម្លាំងរវាងឆ្មាំព្រំដែនកម្ពុជា និងថៃ ដើម្បីរាយការណ៍ជូនប្រមុខរាជរដ្ឋាភិបាល»។

ទោះជាបែបនេះក្តី កងកម្លាំងស្នើមិនបង្ហាញឈ្មោះ ឲ្យដឹងថា បច្ចុប្បន្នបញ្ហាប្រឈមចំពោះមុខរបស់កងទ័ព និងនគរបាលនៅតំបន់ប្រាសាទព្រះវិហារ គឺបញ្ហាខ្វះទឹក។ លោកថា មានពេលខ្លះកងកម្លាំងនៅតំបន់នោះក្នុងរយៈពេល ២ ឬ ៣ថ្ងៃ ទើបងូតទឹកម្តង ឬត្រឹមក្រមាជ្រលក់ទឹកដើម្បីជូតខ្លួនប៉ុណ្ណោះ។ លោកថា ដើមហេតុនាំឲ្យខ្វះទឹក អាចបណ្ដាលមកពីទុយោបូមទឹកសម្រាប់បូមទឹកឡើងភ្នំ ត្រូវភ្លើងព្រៃឆេះបំផ្លាញ និងគួបផ្សំម៉ាស៊ីនបូមទឹកខូច ទើបប្រឈមការខ្វះខាតទឹក៖ «ធ្វើអាងទឹកបាន៣ ឥឡូវស្ងួតទឹកអស់ហើយ។ មានថ្ងៃខ្លះ កងកម្លាំងងូតទឹក ២ដបទឹកសុទ្ធ គឺថ្នាក់លើផ្តល់ទឹកមិនបានទាន់ពេលវេលាខ្លះដែរ ប៉ុន្តែកងកម្លាំងនៅបន្តអត់ធ្មត់តស៊ូការពារទឹកដីនៅតំបន់ប្រឈមជាមួយទ័ពសៀម។ ទីតាំងដែលខ្ញុំឈរជើង គឺនៅខ្សែត្រៀមទី១ ទ័ពសៀមនៅខាងលើខ្ញុំនៅខាងក្រោម។ យប់ឡើងកម្លាំងយើងខ្ញុំយាមកាម ២៤ម៉ោង»។

កងកម្លាំងជួរមុខ បានអះអាងថា ដោយសារតែផ្លូវមានចម្ងាយឆ្ងាយ ហើយការដឹកទឹកឡើងលើភ្នំ ត្រូវចំណាយថវិកាមួយចំនួនផងនោះ នាំឲ្យពួកគេជួបការលំបាក និងប៉ះពាល់ដល់សតិអារម្មណ៍បំពេញបេសកកម្មការពារទឹកដី។ បញ្ហានេះ ស្នើឲ្យប្រមុខរាជរដ្ឋាភិបាលបញ្ជូនមន្ត្រីចុះអង្កេត និងមានវិធានការផ្គត់ផ្គង់ទឹកដល់កងកម្លាំងជួរមុខឲ្យបានគ្រប់គ្រាន់ជាបន្ទាន់៕

ព័ត៌មាន

ពលរដ្ឋ​នៅ​ពោធិ៍សាត់​៣០០​នាក់​រក​អន្តរាគមន៍​ដោះលែង​មនុស្ស​៣០​នាក់

សាលាក្ដី​ខ្មែរ​ក្រហម​ប្ដូរ​​ពី​ការ​ស្ដាប់​សក្ខីកម្ម​អ្នក​ជំនាញ​មក​ស្ដាប់​មតិ​ភាគី

សង្គម​ស៊ីវិល​៖ ក្រុមហ៊ុន​ឯកជន​​មាន​អំណាច​លើ​ប្រព័ន្ធ​តុលាការ

កម្មករ​កាត់​ដេរ​ប្រមាណ​៧០០​នាក់​មិន​ទាន់​បើក​ប្រាក់​ឈ្នួល​ខែ​មករា

អង្គការ​៤​គ្រោង​ធ្វើ​សិក្ខាសាលា​ស្ដី​អំពី​ហិរញ្ញវត្ថុ​នយោបាយ

សាលាឧទ្ធរណ៍​គ្រោង​បើក​សវនាការ​រឿង​លោក ម៉ម សូណង់ដូ នៅ​ថ្ងៃ​៥ មីនា

ភាព​ទាល់ច្រក​នៃ​ការ​បញ្ចប់​ជម្លោះ​ព្រំដែន​កម្ពុជា-​ថៃ​នៅ​តំបន់​ប្រាសាទ​ព្រះវិហារ

ទស្សនៈ​មេធាវី​ចំពោះ​តម្រូវ​ការ​សុំ​ច្បាប់​អនុញ្ញាត​មុន​ផ្សព្វផ្សាយ​ច្បាប់

សមត្ថកិច្ច​ខេត្ត​សៀមរាប​ចាប់​ខ្លួន​អ្នក​ប្រើ​ឧបករណ៍​នេសាទ​ខុស​ច្បាប់​ជាង​៦០​នាក់

អាជ្ញាធរ​ខណ្ឌ​សែនសុខ​រង​ការ​ចោទ​ថា​រើសអើង​ក្នុង​ការ​ឃាត់​រថយន្ត​តាក់ស៊ី

ក្រសួង​មហាផ្ទៃ​ប្រតិកម្ម​ចំពោះ​ការ​ផ្សាយ​ព័ត៌មាន​ទាហាន​តំបន់​ព្រះវិហារ​ខ្វះ​ទឹក

តុលាការ​ខេត្ត​បាត់ដំបង​សម្រេច​ឃុំ​ខ្លួន​ជន​សង្ស័យ​គប់​គ្រាប់​បែក​ចូល​ពិធី​រាំ​កម្សាន្ត

យុវជន​ខេត្ត​ស្វាយរៀង​ចាប់​អារម្មណ៍​ពី​ការ​ប្រឆាំង​អំពើ​ពុករលួយ​ក្នុង​មូលដ្ឋាន

ព្រៃ​ការពារ​នៅ​តំបន់​ជុំវិញ​បឹង​ទន្លេសាប​រង​ការ​កាប់​បំផ្លាញ

កងទ័ព​និង​នគរបាល​ប្រចាំ​ការ​នៅ​តំបន់​ប្រាសាទ​ព្រះវិហារ​ខ្វះ​ទឹក​ប្រើប្រាស់