રાઈટ ન્યૂઝ

ઇડર માં સાબર દિવેલા સંઘે કર્યો 2.55 કરોડ થી વધુનો ચોખ્ખો નફો 36 મી વાર્ષિક સભાં કરવામાં આવ્યા બિલ મંજુર

2026-09-29T16:29:47.042+05:30

સાબરકાંઠા જીલ્લા ના ઇડર શહેર માં સહકારી દિવેલા તેલીબિયાં ઉત્પાદન સંઘ લી.ની 36 મી વાર્ષિક સાધારણ સભાં યોજાઈ . વર્ષ 2025 થી 2026 ના કામકાજ નો અહેવાલ અને હિસાબો ને સભાસદો એ સર્વાનુમતે મંજૂરી આપી. સંઘે તા. 31.માર્ચ. 2026 ના રોજ રૂ.393. 45 કરોડ થી વધુનો વેપાર કર્યો આમાંથી રૂ.3.66.કરોડ નો વધુ વેપાર કર્યો આમાંથી રૂ. 3.66.કરોડ નો વેપારી નફો અને રૂ.58.07લાખ ની અન્ય આવક મળીને કુલ. 4.23. કરોડ થી વધુ નો નફો બુક કરાવ્યો જેમાંથી રૂ.4.23 કરોડ વધુનો નફો બુક કરાવ્યો હતો

સભાં ના મુખ્ય મહેમાન સિદ્ધાર્થ પટેલ, મોડાસા ના ધારાસભ્ય ભીખુસિંહ પરમાર, સાબરકાંઠા અને અરવલ્લી જીલ્લા પૂર્વ સાંસદ દીપ સિંહ રાઠોડ, સાબર ડેરી ચેરમેન શામળભાઈ પટેલ,સાબરકાંઠા બેન્ક ના ડિરેક્ટર સતીષ પટેલ,ઇડર તાલુકા પંચાયત પૂર્વ પ્રમુખ ધર્મેન્દ્ર પટેલ,વડાલી એ પી એમ સી ના વિજય પટેલ,સાબર ડેરી ડિરેક્ટર રામજીભાઈ પટેલ,ઇડર શહેર પાંજરાપોળ પ્રમુખ પી. સી. પટેલ.,વસાઈ ના પૂર્વ સરપંચ હરિભાઈ પટેલ હાજર રહીને અશોક ભાઈ નું સ્વાગત કરવામાં આવ્યું હતું. સંઘે આં વર્ષે 15.ટકા ડિવિડન્ડ જાહેર કર્યું. ટેકા ના ભાવ થી ખરીદી માં જોડાયેલા 22 સંઘો ના ચેરમેન દ્વારા અશોક પટેલ અને એમ. ડી. પ્રકાશ ભાઈ નું સન્માન કરાયું

ખેડૂતો એ તેમની ખેત પેદાશ નો યોગ્ય ભાવ મળે ગુણવત્તા યુક્ત બિયારણ અને જરૂરી માર્ગદર્શન મળે તો વધુ ઉત્પાદન માટે રસાણીક દવા અને ખાતર ના અતિરેક ઉપયોગ ની જરૂરિયાત ઘટી શકે છે.સહકારી સંસ્થા ઓના આગેવાનો ની જવાબદારી ખેડૂતો ના હિત માં કામ કરવાની છે.સાબરકાંઠા અને અરવલ્લી જીલ્લો ખેતી અને પશુપાલન પર આધારિત હોવાથી ખેડૂતો ની તકલીફ માં તેમની સાથે ઉભા રહી શક્ય તેટલો સહકાર આપવો જોઈએ.

બદલાતી જીવનશેલી, ખોરાક ની પદ્ધતિ અને ખેતી માં વધતા રાસાયણિક ઉપયોગ ના કારણે લોકો માં વિવિધ આરોગ્ય સમસ્યાઓ જોવા મળી રહી છે.આવનારી પેઢી ને સ્વાસ્થ્ય જીવન મળે એ માટે ખેતી થી લઈ દૂધ શાકભાજી સુધી ની ગુણવત્તા જાળવવી જરૂરી છે.ખેડૂતો ને યોગ્ય ભાવ મળે તો તેઓ પણ ગુણવતા યુક્ત ઉત્પાદન તરફ વધુ પ્રોત્સાહિત થઈ શકે છે.સમાજ ના આર્થિક સક્ષમ લોકો અને સંસ્થા ઓએ પણ જરૂરિયાત મદ લોકો માટે મદદરૂપ થવું જોઈએ

જીવન સેવા ચેરિટેબલ ટ્રસ્ટ સંચાલિત બટુક ભોજન આયોજન.

2026-09-14T18:49:17.160+05:30

સમાજમાં સેવાકીય પ્રવૃત્તિઓ દ્વારા જરૂરિયાતમંદો સુધી મદદ પહોંચાડવાના હેતુ સાથે કાર્યરત જીવન સેવા ચેરિટેબલ ટ્રસ્ટ દ્વારા વધુ એક સેવાકીય પહેલ હાથ ધરવામાં આવી છે. ટ્રસ્ટ દ્વારા અમદાવાદ જિલ્લાના બારેજા ગામની આંગણવાડીમાં અભ્યાસ કરતા બાળકો માટે બટુક ભોજનનું આયોજન કરવાનો નિર્ણય લેવામાં આવ્યો છે. આ સેવાકીય કાર્યનો મુખ્ય ઉદ્દેશ બાળકોને પૌષ્ટિક અને ગુણવત્તાયુક્ત ભોજન મળી રહે તે સાથે તેમના સ્વાસ્થ્ય અને સર્વાંગી વિકાસમાં યોગદાન આપવાનો છે.

આ અંગે ટ્રસ્ટના પ્રમુખ સલોનીબેન લાખાણી સાથેની ચર્ચા દરમિયાન તેમણે જણાવ્યું હતું કે, “બાળકો આપણા દેશનું ભવિષ્ય છે. દરેક બાળકને સારું શિક્ષણ મળે અને તેની સાથે યોગ્ય તથા પૌષ્ટિક આહાર પણ મળી રહે તે આપણી સૌની સામાજિક જવાબદારી છે. આ જ વિચાર સાથે અમારી સંસ્થા બાળકો માટે શિક્ષણ અને પૌષ્ટિક આહારને લગતી સેવાઓ સતત પૂરી પાડવાનો પ્રયાસ કરી રહી છે.”

છેલ્લા ઘણા સમયથી જીવન સેવા ચેરિટેબલ ટ્રસ્ટ દ્વારા બાળકો અને સમાજના જરૂરિયાતમંદ વર્ગો માટે વિવિધ સેવાકીય પ્રવૃત્તિઓ કરવામાં આવી રહી છે. ખાસ કરીને બાળકોના શિક્ષણ, પૌષ્ટિક આહાર અને તેમના ઉજ્જવળ ભવિષ્યને ધ્યાનમાં રાખીને ટ્રસ્ટ દ્વારા સતત કામગીરી કરવામાં આવી રહી છે. ટ્રસ્ટનું માનવું છે કે સમાજના વિકાસ માટે બાળકોના સર્વાંગી વિકાસ પર ધ્યાન આપવું અત્યંત જરૂરી છે.તેમણે વધુમાં જણાવ્યું હતું કે, “સેવા માત્ર એક દિવસ પૂરતી મર્યાદિત ન રહે પરંતુ સતત ચાલતી પ્રક્રિયા બને તે અમારો મુખ્ય પ્રયાસ છે. સમાજના જરૂરિયાતમંદ લોકો સુધી શક્ય તેટલી મદદ અને સેવા પહોંચાડી શકાય તે માટે જીવન સેવા ચેરિટેબલ ટ્રસ્ટ સતત કાર્યરત છે.”

બારેજા ગામની આંગણવાડીના બાળકો માટે યોજાનાર આ બટુક ભોજન કાર્યક્રમ પણ આ સેવાકીય અભિયાનનો એક ભાગ છે. બાળકો સાથે થોડો સમય વિતાવી તેમને ભોજન કરાવવાની સાથે તેમના જીવનમાં ખુશી અને હકારાત્મકતા લાવવાનો આ પ્રયાસ છે.જીવન સેવા ચેરિટેબલ ટ્રસ્ટ દ્વારા આગામી સમયમાં પણ શિક્ષણ, આરોગ્ય, પૌષ્ટિક આહાર તેમજ સમાજના અન્ય જરૂરિયાતમંદ વર્ગો માટે અનેક સેવાકીય કાર્યો હાથ ધરવાનું આયોજન કરવામાં આવી રહ્યું છે. સમાજના સહયોગથી સેવા પ્રવૃત્તિઓને વધુ વ્યાપક બનાવવાનો સંસ્થાનો સંકલ્પ છે.

સાબરકાંઠાના વદરાડ ખાતે ૭૭મા જિલ્લા કક્ષાના વન મહોત્સવની ભવ્ય ઉજવણી.

2026-08-25T18:50:34.585+05:30

સાબરકાંઠા જિલ્લામાં ‘એક પેડ મા કે નામ’ અભિયાન હેઠળ ૭૭મા વન મહોત્સવની જિલ્લા કક્ષાની ઉજવણી પ્રાંતિજ તાલુકાના વદરાડના ઉમિયાધામ ખાતે રાજ્ય યોગ બોર્ડના ચેરમેન શ્રી શિશપાલસિંહ રાજપૂતની અધ્યક્ષતામાં કરવામાં આવી હતી. કાર્યક્રમમાં ઉપસ્થિત મહાનુભાવોએ વૃક્ષોનું જતન, પર્યાવરણ સંરક્ષણ, જળસંચય અને યોગને જીવનનો અભિન્ન હિસ્સો બનાવવા અંગે પ્રેરણાદાયી સંદેશ આપ્યો હતો.

રાજ્ય યોગ બોર્ડના ચેરમેન શ્રી શિશપાલસિંહ રાજપૂતે જણાવ્યું હતું કે, માનવજીવન અને પ્રકૃતિ એકબીજા સાથે અવિભાજ્ય રીતે જોડાયેલા છે. જીવનમાં વૃક્ષોનું મહત્વ સમજવું અને વધુમાં વધુ વૃક્ષોનું વાવેતર તથા જતન કરવું સમયની આવશ્યકતા છે. વૃક્ષો પર્યાવરણનું સંતુલન જાળવવાની સાથે જળસંચય, શુદ્ધ હવા અને માનવજીવનના સ્વાસ્થ્ય માટે પણ મહત્વપૂર્ણ છે. તેમણે પર્યાવરણ અને જળ સંરક્ષણ સાથે યોગના મહત્વ પર ભાર મૂકતાં જણાવ્યું હતું કે, સ્વસ્થ જીવન માટે સ્વચ્છ અને હરિયાળું પર્યાવરણ તેમજ નિયમિત યોગ બંને જરૂરી છે. દરેક વ્યક્તિએ પોતાના જીવનમાં વૃક્ષ, પર્યાવરણ, જળ અને યોગને મહત્વ આપીને સ્વસ્થ અને સુખી સમાજના નિર્માણમાં યોગદાન આપવું જોઈએ.

જિલ્લા પંચાયત પ્રમુખ શ્રીમતી રીનાબેન પટેલે “એક વ્યક્તિ એક વૃક્ષ, એક પરિવાર અનેક વૃક્ષ”નો સંદેશ આપતાં જણાવ્યું હતું કે, વન મહોત્સવ માત્ર વૃક્ષારોપણ પૂરતો સીમિત ન રહે, પરંતુ વાવેલા દરેક વૃક્ષની માવજત અને જતનની જવાબદારી પણ આપણે સૌએ સ્વીકારવી જોઈએ. દરેક વ્યક્તિ પોતાના જીવનમાં ઓછામાં ઓછું એક વૃક્ષ વાવે અને દરેક પરિવાર અનેક વૃક્ષો વાવીને તેનું સંવર્ધન કરે તો સાબરકાંઠા જિલ્લાને વધુ હરિયાળો બનાવી શકાય તેમ તેમણે જણાવ્યું હતું.

હિંમતનગર ધારાસભ્ય શ્રી વી.ડી. ઝાલાએ પ્રાસંગિક પ્રવચનમાં વરસાદી પાણીના સંચયના મહત્વ પર ભાર મૂક્યો હતો. વરસાદી પાણીનો મહત્તમ સંગ્રહ અને ભૂગર્ભ જળના પુનઃભરણ માટે વરસાદી પાણીના સંચયની વ્યવસ્થાઓને વધુ વ્યાપક બનાવવાની જરૂરિયાત તેમણે દર્શાવી હતી. સાથે જ વધતી ગરમી અને વૈશ્વિક ઉષ્ણતામાનની સમસ્યા સામે વૃક્ષારોપણ અને પર્યાવરણ સંરક્ષણને મહત્વપૂર્ણ ઉપાય ગણાવી સૌને પર્યાવરણ પ્રત્યે જવાબદારી નિભાવવા અનુરોધ કર્યો હતો.

પ્રાંતિજ ધારાસભ્ય શ્રી ગજેન્દ્રસિંહ પરમારે જણાવ્યું હતું કે, વૃક્ષો સાથે પ્રેમ અને પ્રકૃતિ સાથે નાતો કેળવવો એ આપણી સામૂહિક જવાબદારી છે. આજના સમયમાં પર્યાવરણનું જતન કરીશું તો જ આવનારી પેઢીને સ્વચ્છ હવા, શુદ્ધ પાણી અને સ્વસ્થ જીવન માટે યોગ્ય પર્યાવરણ આપી શકીશું. તેમણે દરેક વ્યક્તિએ વૃક્ષોનું વાવેતર કરવાની સાથે તેનું જતન કરવું અને યોગને પણ પોતાના દૈનિક જીવનનો ભાગ બનાવવો જોઈએ તેવી અપીલ કરી હતી.

વન મહોત્સવ અંતર્ગત યોજાયેલા કાર્યક્રમમાં પર્યાવરણ સંરક્ષણ, વૃક્ષારોપણ તથા વન અને પર્યાવરણ ક્ષેત્રે ઉત્કૃષ્ટ કામગીરી કરનાર સંસ્થાઓ અને કર્મચારીઓને સન્માનિત કરવામાં આવ્યા હતા. ઉપરાંત પર્યાવરણ ક્ષેત્રે નોંધપાત્ર કામગીરી કરી રહેલી ગ્રામ પંચાયતોને પણ સન્માનિત કરવામાં આવી હતી. આ સન્માન દ્વારા પર્યાવરણ સંરક્ષણ માટે ગ્રામ્ય સ્તરે થઈ રહેલી શ્રેષ્ઠ કામગીરીને પ્રોત્સાહન આપવામાં આવ્યું હતું.

આ પ્રસંગે મહાનુભાવોના હસ્તે વૃક્ષ રથને લીલી ઝંડી આપી પ્રસ્થાન કરાવવામાં આવ્યું હતું. કાર્યક્રમમાં યોગના વિવિધ પ્રદર્શનો દ્વારા યોગને જીવનનો અભિન્ન ભાગ બનાવવા માટે અપીલ કરવામાં આવી હતી. તેમજ મહાનુભાવોના હસ્તે એક પેડ માં કે નામ અંતર્ગત વૃક્ષારોપણ કરવામાં આવ્યું હતું. ઉમિયાધામના ટ્રસ્ટીઓએ સંસ્થા ખાતે ૫,૦૦૦ વૃક્ષોનો ઉછેર કરવાનો સંકલ્પ લીધો હતો.આ મહોત્સવમાં વરિષ્ઠ વન અધિકારી શ્રી સી. કે. સોનવણે, નાયબ વન સંરક્ષક શ્રી ડૉ. ડી.એફ. ગઢવી, નાયબ વન સંરક્ષક શ્રી પી.જે. ચૌધરી, ઇન્ચાર્જ પ્રાંત અધિકારી શ્રી મૌલિક ડાંગા, પૂર્વ ધારાસભ્ય શ્રી મહેન્દ્રસિંહ બારૈયા, ઉમિયાધામ ટ્રસ્ટના ટ્રસ્ટીઓ, આસપાસની ગ્રામ પંચાયતોના સરપંચશ્રીઓ, વન વિભાગના અધિકારી-કર્મચારીઓ તેમજ મોટી સંખ્યામાં ગ્રામજનો ઉપસ્થિત રહ્યા હતા.

23 ઓક્ટોબરે રિલીઝ થઇ રહેલ ફિલ્મ "ડમરુ”નું પ્રોમોશન સોન્ગ લૉન્ચ.

2026-08-21T20:21:33.546+05:30

ગુજરાતી સિનેમા ૨૩ ઓક્ટોબર ૨૦૨૬ ના રોજ થીયેટરમાં રિલીઝ થઈ રહેલી ફિલ્મ “ડમરુ” સાથે એક તાજગીસભર પારિવારિક મનોરંજક ફિલ્મ રજૂ કરવા માટે તૈયાર છે. કૉમેડી, સસ્પેન્સ, ભાવનાત્મક ઊંડાણ અને એક અર્થપૂર્ણ સામાજિક સંદેશનું મિશ્રણ ધરાવતી આ ફિલ્મ નાનાં બાળકોથી લઈને વરિષ્ઠ નાગરિકો સુધી, તમામ પેઢીના દર્શકોને પસંદ પડે તેવી મનોરંજક રોલર-કોસ્ટર રાઇડનો અનુભવ આપવાનું વચન આપે છે.

ગુજોત્સવ પ્રોડક્શન અને વ્રજ ફિલ્મ્સના બેનર હેઠળ રમેશ પ્રજાપતિ, કૃપા સોની અને સંજય સોની દ્વારા નિર્મિત, 'ડમરુ' ફિલ્મનું નિર્દેશન હાર્દિક જે. પરીખ દ્વારા કરવામાં આવ્યું છે અને તેની વાર્તા ઋષિકેશ ઠક્કર તથા નીરવ જોશી દ્વારા લખવામાં આવી છે. આ ફિલ્મમાં સંજય ગોરડિયા, નક્ષરાજ, નીરવ મુકેશ વૈદ્ય, નિરાલી ઓઝા, સૌરભ રાજયગુરુ, મૌલિક ચૌહાણ, હેમાંગ દવે, સંજય ગલસર, ભાર્ગવ પરમાર, મકરંદ શુક્લા, વિશાલ વૈશ્ય, નિશ્ચય રાણા, નિશિતકુમાર બ્રહ્મભટ્ટ, અન્નપૂર્ણા શુક્લા, આરતી સોની અને સતીશ ભટ્ટ જેવા પ્રતિભાશાળી કલાકારોનો સમાવેશ થાય છે.

ફિલ્મને વધુ ભવ્ય બનાવવા માટે, તેનું પ્રમોશનલ સોંગ પ્રખ્યાત મ્યુઝિક ડિરેક્ટરપાર્થ ભરત ઠક્કર દ્વારા કંપોઝ કરવામાં આવ્યું છે અને તેને લોકપ્રિય ગાયક ભૂમિ ત્રિવેદી તથા જયસિંહ ગઢવીએ પોતાનો અવાજ આપ્યો છે. પ્રિન્સ ગુપ્તા દ્વારા નિર્દેશિત અને કોરિયોગ્રાફ કરાયેલા આ ગીતમાં સૂરજ કુરાડેનું સિનેમેટોગ્રાફી છે, જે દર્શકોને હાઇ-એનર્જી વિઝ્યુઅલ અનુભવ પૂરો પાડશે. ફિલ્મની મુખ્ય સિનેમેટોગ્રાફી ધ્રુવ પંચાલ દ્વારા કરવામાં આવી છે, જ્યારે ઓરિજિનલ સાઉન્ડટ્રેક અને બેકગ્રાઉન્ડ સ્કોર ટ્રીહાઉસ સ્ટુડિયોના દર્શન શાહ દ્વારા તૈયાર કરવામાં આવ્યો છે. રવિશ જૈન આ ફિલ્મના પ્રોડક્શન મેનેજર તરીકે સેવા આપી રહ્યા છે.

તેના ભવ્ય થીયેટ્રિકલ પ્રીમિયર પહેલાં, નિર્માતાઓએ અમદાવાદમાં એક ખાસ સોંગ લૉન્ચ ઇવેન્ટનું આયોજન કર્યું છે. દિવસની શરૂઆત ટીમ દ્વારા સ્થાનિક મંદિરમાં દર્શન કરી આશીર્વાદ લેવાથી થઇ.હાસ્ય, રોમાંચક સસ્પેન્સ અને મજબૂત પારિવારિક મૂલ્યોના અનન્ય મિશ્રણ સાથે, 'ડમરુ' ફિલ્મ આ ઓક્ટોબરમાં દેશભરના સિનેમાઘરોમાં રિલીઝ થઈને દર્શકોને એક યાદગાર સિનેમેટિક અનુભવ આપવાનો ધ્યેય રાખે છે.

ઈડરમાં રેહમાની મદ્રેસાના બાળકો દ્વારા ઉત્સાહભેર “તિરંગા રેલી” યોજાઈ.

2026-08-14T19:20:24.993+05:30

આઝાદીના પર્વની ઉજવણી નિમિત્તે ઈડર કસ્બા મુસ્લિમ મોટી જમાતના આયોજન હેઠળ અને રેહમાની મદ્રેસાના બાળકો દ્વારા દર વર્ષની જેમ આ વર્ષે પણ “તિરંગા રેલી”નું ભવ્ય આયોજન કરવામાં આવ્યું હતું. જુમ્માની નમાજ બાદ બપોરે ૩:૦૦ કલાકે જુમ્મા મસ્જિદ, ઈડર ખાતેથી રેલીનો પ્રારંભ કરવામાં આવ્યો હતો. હાથમાં તિરંગા અને લીલા રંગના ધ્વજ લઈને મોટી સંખ્યામાં બાળકો, યુવાનો અને વડીલોએ રેલીમાં ઉત્સાહભેર ભાગ લીધો હતો. “ભારત માતા કી જય” અને “જય હિન્દ”ના નારાઓ સાથે રેલી જુમ્મા મસ્જિદથી નીકળી ઈડર નગરપાલિકા સુધી પહોંચી અને ત્યાંથી પરત જુમ્મા મસ્જિદ ખાતે સમાપન થયું.

આ પ્રસંગે દેશપ્રેમ, એકતા અને ભાઈચારાનો સંદેશ આપતાં આયોજકોએ જણાવ્યું હતું કે બાળકોમાં નાનપણથી જ રાષ્ટ્રભક્તિનું સિંચન થાય અને સર્વધર્મ સમભાવ તથા એકતાની ભાવના મજબૂત બને તે હેતુસર દર વર્ષે આ રેલીનું આયોજન કરવામાં આવે છે. રેલીમાં મોટી સંખ્યામાં પ્રમુખ.મહમદ હારુન. મદ્રેસા ચેરમેન. સરફરાઝ નાગોરી. મોલાના સાહબ. સય્યદ વારિસ અલી. મસી આસિફ સાહબ હાફિજ શાહબાજ સહિત મુસ્લિમ સમાજના બંધુઓએ હાજરી આપી કાર્યક્રમને સફળ બનાવ્યો હતો.સમગ્ર રેલી દરમિયાન શહેરમાં દેશભક્તિમય વાતાવરણ સર્જાયું હતું અને તિરંગા ધ્વજથી ઈડરનું આકાશ રંગબેરંગી બની ગયું હતું.

ઈડરમાં 28મી ભવ્ય રથયાત્રા ભક્તિભાવ અને કોમી એકતાના માહોલમાં સંપન્ન.

2026-07-16T18:52:04.142+05:30

અષાઢી બીજના પાવન અવસરે ઈડરના ઐતિહાસિક મોટા રામદ્વારા મંદિરથી 28મી ભવ્ય રથયાત્રા ગુરુવારે સવારે 10:45 કલાકે વૈદિક મંત્રોચ્ચાર અને જય જગન્નાથના ગગનભેદી નાદ વચ્ચે પ્રસ્થાન કરી હતી. શહેરના મુખ્ય માર્ગો પર હજારો ભક્તો ઉમટી પડ્યા હતા અને સમગ્ર ઈડર ભક્તિમય માહોલમાં રંગાઈ ગયું હતું.

ઈડર ધારાસભ્ય રમણલાલ વોરા, જિલ્લા ભાજપ પ્રમુખ કનુભાઈ પટેલ, ઈડર તાલુકા પંચાયતના પૂર્વ પ્રમુખ કાંતિભાઈ પટેલ, ઈડર નગરપાલિકા પ્રમુખ અનસૂયાબેન પટેલ ઉપ પ્રમુખ વિનોદભાઈ પરમાર, કારોબારી અધ્યક્ષ જીનલ સગર શહેર પ્રમુખ કુણાલ કંસારા મહામંત્રી પિયુષ ભાઇ દવે ,દિનેશભાઇ પટેલ મહાલક્ષમી જીન,નટુભાઈ પરમાર, ઈડર કોંગ્રેસના રામભાઈ સોલંકી, અનિલભાઈ પંડ્યા,પૂર્વ નગરપાલિકા પ્રમુખ કાન્તાબેન પરમાર,વિપુલભાઈ લોનવાલા,નરેશભાઈ દેસાઈઅશ્વિન ભાઇ પટેલ, સંજયભાઇ ભરવાડ સહીત આગેવાનો ઉપસ્થિત રહ્યા હતા.

ઇડર નગર ઉત્સવ સમિતિના પ્રમુખ પ્રદીપભાઈ ખરાદી, મંત્રી કૃણાલ સગર, ભવરલાલ સોની મોટા રામદ્વારા મંદિરના મહંત રામકૃપાલજી મહારાજ, મહાકાલેશ્વર મંદિરના મહાકાલગીરી મહારાજ તેમજ વડિયાવીર બિલેશ્વર મહાદેવ મંદિરના શાંતિગીરી મહારાજ સહિતના આગેવાનો અને સંત-મહંતો ઉપસ્થિત રહ્યા હતા.રથયાત્રા શહેરના વિવિધ માર્ગો પરથી પસાર થઈ બપોરે 12:10 કલાકે કસ્બા વિસ્તારમાં પહોંચી હતી, જ્યાં લઘુમતી સમાજના આગેવાનો પ્રમુખ હાજી હારુન પઠાણ ઉપપ્રમુખ આસિફ ભાઈ બેલીમ વાહિદભાઈ અને સતારભાઈ મન્સુરી એ રથ યાત્રા નું ભાવભર્યું સ્વાગત કરી કોમી એકતાનો અનોખો સંદેશ આપ્યો હતો.

ત્યારબાદ 12:30 કલાકે ઈડર નગરપાલિકા ખાતે ચીફ ઓફિસર જૈમિન ચૌધરી તેમજ નગરપાલિકાના કર્મચારીઓએ સ્વાગત કર્યું હતું.બપોરે 1:15 કલાકે રથયાત્રા જલારામ મંદિર પહોંચી હતી, જ્યાં મહાઆરતીનું આયોજન કરવામાં આવ્યું હતું. ત્યારબાદ રેલવે સ્ટેશન વિસ્તારમાં વિરામ માટે પધાર્યા હતા. દર વર્ષની પરંપરા મુજબ રેલવે સ્ટેશન વિસ્તારના ભક્તો દ્વારા ભગવાનના ભક્તો માટે ભોજન-પ્રસાદનું આયોજન કરવામાં આવ્યું હતું.આ ઉપરાંત સત્યમ ચોકડી વિસ્તારના વેપારીઓ દ્વારા પરંપરાગત મામેરું ભરવામાં આવ્યું હતું.

મામેરામાં નવા વસ્ત્રો, દાગીના તેમજ રોકડ ભેટ અર્પણ કરવામાં આવી હતી.ત્યાર બાદ રથયાત્રા મામલતદાર કચેરી, તિરંગા સર્કલ, મેઈન બજાર, ટાવર ચોક, ખરાદી બજાર અને પાંચ હટડીયા વિસ્તાર થઈ સાંજે 7:00 કલાકે નિજ મંદિર મોટા રામદ્વારા ખાતે પરત ફરી હતી. રથ યાત્રા કરતા હતા તે સમયે પોતાના વિસ્તાર માંથી મોટી સંખ્યામાં ભક્તોએદર્શન કરી આશીર્વાદ પ્રાપ્ત કર્યા હતા.સમગ્ર રથયાત્રા દરમિયાન ઈડર ડીવાયએસપી સ્મિત ગોહિલ, ઈડર પી.આઈ. આર.એ. ચૌધરી તેમજએલ સી બી, એસ ઓ જી તેમજ જિલ્લા પોલીસના અધિકારીઓ અને પોલીસ જવાનોના ચુસ્ત બંદોબસ્ત વચ્ચે યાત્રા શાંતિપૂર્ણ અને સુચારુ રીતે સંપન્ન થઈ હતી.

જ્યારે ગુજરાત વિદ્યુત બોર્ડ દ્વારા રફીક મનસુરી ની આગેવાની હેઠળ કોઈ લાઈટ થી શોર્ટ સર્કિટ ન થાય તેની ટીમ દ્વારા ખડે પગે ઊભા રહ્યા હતા ઇડર નગર ઉત્સવ સમિતિના સભ્યો ભારે જહેમત ઉઠાવી હતી સમગ્ર શહેરમાં ભક્તિ, ઉત્સાહ અને સામાજિક એકતાનું અનોખું દૃશ્ય જોવા મળ્યું.

જીવદયા ચેરિટેબલ ટ્રસ્ટ દ્વારા આણંદમાં 500થી વધુ જરૂરિયાતમંદોને મગ પુલાવનું નિઃશુલ્ક વિતરણ.

2026-07-02T12:42:51.636+05:30

જીવદયા ચેરિટેબલ ટ્રસ્ટના ટ્રસ્ટી શ્રી કેસર લાલવાણીના માર્ગદર્શન હેઠળ આણંદ શહેરમાં 500થી વધુ જરૂરિયાતમંદ લોકોને મગ પુલાવનું નિઃશુલ્ક વિતરણ કરવામાં આવ્યું હતું. આ સેવાકીય કાર્યક્રમનો મુખ્ય હેતુ સમાજના વંચિત અને જરૂરિયાતમંદ લોકો સુધી પ્રેમ, કરુણા અને માનવતાનો સંદેશ પહોંચાડવાનો હતો. શ્રી કેસર લાલવાણી છેલ્લા ઘણા વર્ષોથી સમાજસેવાના વિવિધ ક્ષેત્રોમાં સક્રિય રહી જરૂરિયાતમંદ લોકો તેમજ અબોલ પશુઓની નિઃસ્વાર્થ સેવા કરી રહ્યા છે.

એક ઇન્ફ્લુએન્સર તરીકે આણંદ ઉપરાંત સમગ્ર ગુજરાતમાં આગવી ઓળખ અને લોકપ્રિયતા પ્રાપ્ત કર્યા બાદ તેમણે અબોલ પશુઓની સેવા અને સંરક્ષણના ઉદ્દેશ્યથી જીવદયા ચેરિટેબલ ટ્રસ્ટની સ્થાપના કરી હતી. ટ્રસ્ટ દ્વારા નિયમિત રીતે માનવસેવા, જીવદયા અને ગૌસેવાના વિવિધ કાર્યક્રમોનું આયોજન કરવામાં આવે છે.

આ પ્રસંગે શ્રી કેસર લાલવાણીએ જણાવ્યું હતું કે ટૂંક સમયમાં **આણંદ ખાતે "જીવદયા ગૌધામ"**ની શરૂઆત કરવામાં આવશે. આ ગૌધામમાં બીમાર, અકસ્માતગ્રસ્ત, ત્યજી દેવાયેલી તેમજ દૂધ ન આપતી ગાયોને નિઃશુલ્ક સારવાર, પોષણ, યોગ્ય સંભાળ અને કાયમી આશ્રય આપવામાં આવશે. ગૌધામનો મુખ્ય હેતુ અબોલ પશુઓને સુરક્ષિત જીવન અને સન્માનપૂર્ણ સંભાળ પૂરી પાડવાનો રહેશે.કાર્યક્રમમાં ઉપસ્થિત સેવાભાવી કાર્યકરો અને નાગરિકોએ જીવદયા ચેરિટેબલ ટ્રસ્ટની આ સેવાકીય પહેલને બિરદાવી હતી.

શ્રી કેસર લાલવાણીએ સમાજના દાતાશ્રીઓ, ગૌપ્રેમીઓ અને સેવાભાવી નાગરિકોને આ માનવસેવા અને જીવદયાના કાર્યમાં સહભાગી બનવા અપીલ કરી હતી. "માનવ સેવા એ જ માધવ સેવા અને જીવદયા એ જ સાચી સેવા." આ સંદેશ સાથે જીવદયા ચેરિટેબલ ટ્રસ્ટ આગામી સમયમાં પણ સમાજ અને અબોલ પશુઓના કલ્યાણ માટે વિવિધ સેવાકીય પ્રવૃત્તિઓ વધુ વ્યાપક સ્તરે ચાલુ રાખશે.

સિટીના ઝાયરા ડાયમંડ હાઉસ ખાતે હિન્દી ક્રાઇમ-થ્રિલર ફિલ્મ બેબી ડૂ ડાય ડૂ' (Baby Do Die Do)ના પ્રમોશનમાં દિગ્ગજ અભિનેત્રી હુમા કુરેશીએ તેની આગામી ફિલ્મ વિશે માહિતી આપી

2026-06-30T22:26:42.274+05:30

સિટીના સેટેલાઈટ વિસ્તાર ખાતે આવેલા ઝાયરા ડાયમંડ હાઉસ ખાતે બોલિવુડની જાણીતી અને વર્સેટાઈલ એક્ટ્રેસ હુમા કુરેશી તેની આગામી ક્રાઇમ થ્રિલર ફિલ્મના મૂવી પ્રમોશન માટે આવી પહોંચી હતી. જેમાં હુમાએ પત્રકારોને સંબોધીને તેની અપકમિંગ ફિલ્મ બેબી ડૂ ડાય ડૂ' (Baby Do Die Do) ની વાર્તા અંગે વિગતે વાત કરી હતી.“સલીમ સિબિલિંગ પ્રોડક્શન” અને પુણે 04 પીકચર દ્વારા તૈયાર કરવામાં આવેલી આ ક્રાઇમ થ્રિલર ફિલ્મ વિશે વાત કરીએ તો આ ફિલ્મના ડિરેક્ટર નચિકેત સમંત છે. જેમાં ‘બેબી’તરીકે મુખ્ય પાત્રમાં હુમા કુરેશી છે. સાથે સિકંદર ખેર 'ઝફર' નામના મહત્વ રોલમાં છે.

આ ઉપરાંત ચંકી પાંડે 'પી.એમ. જૈન' નામના પાત્રમાં, સીમા પાહવા 'અંજુમ ખાન' તરીકે વિદ્યા માલવદે 'મંજુ મુરઝાની' ના પાત્રમાં જોવા મળશે.આ ફિલ્મની મુખ્ય વાર્તા વિશે વાત કરીએ તો ફિલ્મમાં 'બેબી' નામની એક યુવતીની છે, જે સાંભળી અને બોલી શકતી નથી એટલે કે Deaf અને Mute છે. બેબી મુંબઈ શહેરમાં એક સિરિયલ કિલર બની જાય છે. અને તેને માત્ર તેની મૃત બહેનનો અવાજ જ સંભળાય છે, જેના કહેવા પર તે ગુનાખોરીના રસ્તે આગળ વધે છે. આ ફિલ્મમાં મુંબઈનું અંડરવર્લ્ડ, રહસ્યો અને બદલાની ભાવના મુખ્ય કેન્દ્રમાં છે.ફિલ્મ બેબી ડૂ ડાય ડૂ' માં એક્શન, ક્રાઈમ, મિસ્ટ્રી, અને થ્રિલર જોવા મળશે. આ ફિલ્મ તેના અનોખા વિષય અને હુમા કુરેશીના પડકારજનક રોલને કારણે ચર્ચામાં છે.

"કૌશિક ગરાસિયાએ 'કડકનાથ' દ્વારા સાબિત કર્યું છે કે ગુજરાતી સિનેમા હવે નવા..

2026-06-28T16:30:42.442+05:30

"કૌશિક ગરાસિયાએ 'કડકનાથ' દ્વારા સાબિત કર્યું છે કે ગુજરાતી સિનેમા હવે નવા અને અલગ વિષયો પર પણ ગ્લોબલ લેવલની ફિલ્મો બનાવી શકે છે. શાનદાર સિનેમેટોગ્રાફી, ટાઇટ સ્ક્રિપ્ટ અને સચોટ દિગ્દર્શન આ ફિલ્મની સૌથી મોટી તાકાત છે. કોઈ પણ વધારાનો બિનજરૂરી ડ્રામા કર્યા વિના, દર્શકોને એક પ્યોર સસ્પેન્સનો અનુભવ કરાવતી આ ફિલ્મ આજની યુવા પેઢીને ખાસ પસંદ આવશે. મોટા પડદા પર જઈને આ સિનેમેટિક માસ્ટરપીસનો અનુભવ ખરેખર કરવા જેવો છે."

દાહોદની આદિવાસી સંસ્કૃતિ અને 'ભીલી' બોલીનો આટલો સુંદર અને રિયલ ઉપયોગ ભાગ્યે જ કોઈ ફિલ્મમાં થયો હશે. મર્ડર મિસ્ટ્રીની સાથે સાથે ગામડાનું ભયાનક વાતાવરણ અને સહાયક કલાકારો ડેનિશા ઘુમરા અને ચેતન દૈયા નો દમદાર અભિનય ફિલ્મને એક અલગ જ ઊંચાઈ પર લઈ જાય છે. એક એક સીનમાં મહેનત દેખાઈ આવે છે.

અભિનય બેંકરે અભયસિંહના પાત્રમાં જે માનસિક સંઘર્ષ અને રહસ્યમય ભ્રમ ભજવ્યા છે, તે ખરેખર રૂંવાડા ઊભા કરી દે તેવા છે. ગામનો એક ડાર્ક ભૂતકાળ અને સતત વધતું સસ્પેન્સ તમને એક પણ સેકન્ડ માટે સ્ક્રીન પરથી નજર હટાવવા નહીં દે. કેદાર-ભાર્ગવનું બેકગ્રાઉન્ડ મ્યુઝિક આ રહસ્યમય વાતાવરણને વધુ અસરકારક અને જીવંત બનાવે છે.આ મૂવીને અમારા તરફથી 3 સ્ટાર આપીએ છીએ.

૧૩૦ કિમીની સ્પીડ, લોખંડી ઈરાદા: પિતાના દૃઢ નિશ્ચયથી સર્જાયો અમદાવાદનો યુવા ક્રિકેટ સ્ટાર પ્રાંજલ ભરવાડ.

2026-06-20T16:08:44.446+05:30

માતાની પ્રાર્થના અને પિતાનો સંઘર્ષ, હવે દીકરો નામ રોશન કરવા તૈયાર! ભારતીય ટીમની બ્લુ જર્સી પહેરવાનું એકમાત્ર ઝનૂન.પરિવારના સપનાં ને ક્લીન બોલ્ડ કરવાનું ઝનૂન: પ્રાંજલ ભરવાડની ક્રિકેટ કારકિર્દી પાછળ પિતાના ત્યાગની કહાની કહેવાય છે કે સપનાઓ એમના જ સાચા થાય છે જેના ઈરાદા લોખંડી હોય છે. આવો જ એક અડગ ઈરાદો ધરાવે છે અમદાવાદનો ૧૭ વર્ષનો યુવાન પ્રાંજલ ભરવાડ. પ્રાંજલ માત્ર ક્રિકેટ પાછળ દોડનારો સામાન્ય યુવાન નથી, પરંતુ પોતાના મધ્યમ વર્ગીય પરિવારની કિસ્મત બદલવા માટે મેદાન પર લોહી-પરસેવો એક કરનારો આશાસ્પદ ઓલરાઉન્ડર છે.

પ્રાંજલના ઘરની આર્થિક સ્થિતિ એવી નહોતી કે મોંઘી ક્રિકેટ એકેડમીની ફી સરળતાથી ભરી શકાય. પિતાની કમાણી માત્ર ઘરનું ગુજરાન ચલાવવા પૂરતી જ હતી. પરંતુ પ્રાંજલની આંખોમાં ક્રિકેટ પ્રત્યેની અડગ ધગશ અને ખેવના જોઈને માતા-પિતાએ પોતાના સુખ-સાહેબીના સપનાઓ પર પૂર્ણવિરામ મૂકી દીધું. પિતાએ પોતાના જૂના બૂટ-ચંપલ ન બદલ્યા, પણ દીકરાના પગમાં ક્યારેય મોંઘા સ્પાઇક્સ (ક્રિકેટ શૂઝ) ની અછત ન થવા દીધી.

માતા-પિતાના આ જ ત્યાગનું પરિણામ છે કે પ્રાંજલ આજે અમદાવાદની પ્રખ્યાત ક્રિકેટ એકેડમીમાં એક ચમકતો સિતારો બન્યો છે. રોજ સવારે અને સાંજે જ્યારે શરીર જવાબ આપી દે ત્યારે પણ પ્રાંજલ નેટ્સમાં બોલિંગ ચાલુ રાખે છે. આ જ અથાગ મહેનતના બળે તે આજે પ્રતિ કલાક ૧૩૦ કિલોમીટરની પ્રચંડ ગતિએ બોલ ફેંકે છે. તેની આ સ્પીડ પાછળ પિતાનો સંઘર્ષ અને માતાની પ્રાર્થનાઓ જોડાયેલી છે.ટીમ માટે સંકટ સમયની સાંકળપ્રાંજલ માત્ર એક ફાસ્ટ બોલર નથી, પરંતુ એક ઉત્કૃષ્ટ ઓલરાઉન્ડર પણ છે. જ્યારે પણ ટીમ મુશ્કેલીમાં હોય અને વિકેટો પડી રહી હોય, ત્યારે પ્રાંજલ બેટ હાથમાં લઈને ક્રીઝ પર અડીખમ ઊભો રહી જાય છે અને ટીમને જીત તરફ દોરી જાય છે.

પ્રાંજલનું હવે એક જ સપનું અને એક જ ઝનૂન છે—ભારતીય ક્રિકેટ ટીમની એ પ્રતિષ્ઠિત બ્લુ જર્સી પહેરવી, જેના પર તેના પરિવારનું નામ લખેલું હોય. સ્પર્ધા ખૂબ મોટી છે અને રસ્તો કાંટાળો છે, પરંતુ પોતાના પરિવારના આંસુઓને ખુશીમાં બદલવા માંગતા આ યુવાનના ઈરાદાઓ સામે તમામ મુશ્કેલીઓ નાની સાબિત થઈ રહી છે.

મોદીની અપીલ છતાં ભાજપ કોર્પોરેટર જૈનિક વકીલ ન્યૂઝીલેન્ડના પ્રવાસે ઉપડ્યા.

2026-06-18T15:36:54.025+05:30

વડાપ્રધાન નરેન્દ્ર મોદી જ્યારે દેશની અર્થવ્યવસ્થાને મજબૂત કરવા માટે પેટ્રોલ-ડીઝલ બચાવવાની અને વિદેશ પ્રવાસો ટાળવાની 'સ્વદેશી' અપીલ કરે, ત્યારે સામાન્ય જનતાથી માંડીને મંત્રીઓ પણ અમલ કરે છે. મુખ્યમંત્રીથી માંડીને ગૃહ રાજ્યમંત્રી હર્ષ સંઘવીએ પણ વીઆઈપી કાફલા ટૂંકાવીને કે વિદેશ પ્રવાસ મોકૂફ રાખીને આ અપીલનું અક્ષરશઃ પાલન કરી રહ્યા છે. પરંતુ અમદાવાદના પાલડી વોર્ડના ભાજપના કોર્પોરેટર, કર્ણાવતી ક્લબના ડિરેક્ટર અને ચાર્ટર્ડ એકાઉન્ટન્ટ જૈનિક વકીલ માટે કદાચ પક્ષની શિસ્ત કરતાં ન્યૂઝીલેન્ડનો પ્રવાસ વધુ મહત્વ નો છે.

સરકારે જ્યારે વિદેશ જવાને બદલે ઓનલાઈન વેબિનારથી કામ ચલાવવાની સ્પષ્ટ ભલામણ કરી છે, ત્યારે જૈનિક વકીલ ન્યૂઝીલેન્ડનો પ્રવાસ ખેડી આવ્યા છે. પ્રજાના પ્રશ્નો ઉકેલવાને બદલે કોર્પોરેટરને વિદેશ પ્રવાસમાં વધુ રસ જાગ્યો છે, જેને પગલે હવે ભાજપના આંતરિક વર્તુળોમાં ગણગણાટ શરૂ થયા છે.

રાજકીય ગલીયારાઓમાં ચર્ચાતી વિગતો મુજબ, કોર્પોરેટરની આ 'વિદેશી ઉડાન' પાછળ તેમની ભારોભાર નારાજગી છુપાયેલી છે. અમદાવાદ મ્યુનિસિપલ કોર્પોરેશન માં મેયર કે સ્ટેન્ડિંગ કમિટીના ચેરમેન જેવું મોટું પદ ન મળતા તેઓ પક્ષથી રૂઠ્યા હોવાનું ચર્ચાઈ રહ્યું છે. આ નારાજગીના કારણે જ તેમણે પક્ષની ગાઈડલાઈનને ઘોળીને પી જવાનું સાહસ કર્યું છે. પક્ષમાં એવા પણ સવાલો ઉઠી રહ્યા છે કે, સામાન્ય કાર્યકરોને શિસ્તના પાઠ ભણાવતા ભાજપમાં એક કોર્પોરેટર વડાપ્રધાનની અપીલને સરેઆમ ફગાવી દે, તેની પાછળ રાજકીય પીઠબળ હોવાનું ચર્ચાઈ રહ્યું છે.

કસ્બા પ્રીમિયર લીગ ફાઈનલ ઉસ્તાદ ઈલેવનો ભવ્ય વિજય ઐયાસ ઇલેવન રનર્સ – અપ બની.

2026-06-05T14:25:59.464+05:30

ઇડર મોટા કસ્બા આયોજીત કસ્બા પ્રીમિયર લીગ ટુનામેન્ટ માં (KPL) માં ફાઈનલ મેચમાં ઉસ્તાદ ઇલેવને ઐયાસ ઇલેવન ને હરાવી KPL ટુનામેન્ટ ચેમ્પીયન બની હતી કસ્બા જમાત આયોજીત આ ટુનામેન્ટ માં ફાઈનલ મેચમાં ટોસ જીતી પ્રથમ બેટીગ કરતા ઐયાસ ઈલેવન ૧૨૭ નો સ્કોર કર્યો હતો જેમાં જવાબ માં ઉસ્તાદ ઇલેવને આશાનીથી લક્ષ્યાંકનો પીછો કરી ૯.૩ ઓવરમાં ૧૨૮ બનાવી વિજયી હાસીલ કર્યા હતો મેંન ઓફ ધ મેચ ઈરજાન નાયક જાહેર કર્યો હતો.

આ રોમાંચીત મેચમાં મોટી સંખ્યા માં સ્પોન્શર , કિકેટપ્રેમીઓ , સમાજ અગ્રણીઓ મેચ આનંદ લીધો હતો મેચની પૂર્ણાહતિ દરમિયાન ખેલદિલીના રોમાંચક દશ્યો જોવા મળ્યા હતાં સમાજ દ્વારા આયોજીત આ ટુનામેન્ટ નો ધ્યેય સમાજમાં એકતા ભાઈચારો , અને આ યુવાનો રમત ગમત પ્રત્યે જુસો વધે તેવા પ્રયત્નો હાથ ધર્યા હતાં વિજેતા ટીમને રોકડા તથા પુરસ્કાર આપવામાં આવ્યો હતો

ફિલ્મ "શુભ મંગલ ધમાલ" થિયેટરમાં ધૂમ મચાવી રહ્યું છે.

2026-05-24T13:01:48.855+05:30

ફિલ્મમાં તુષાર સાધુ,વ્યોમા નાન્દી, ખુશ્બુ ત્રિવેદી, રાગી જાની,પ્રશાંત બારોટ,જય પંડ્યા અને આકાશ પંડ્યા જોવા મળશે.તુષાર અને વ્યોમાની કેમેસ્ટ્રી ફિલ્મમાં ખૂબ સરસ લાગી રહી છે દર્શકો ફિલ્મ ને ખૂબ વધાવી રહ્યા છે.

શુભ મંગલ ધમાલ પારિવારિક ફિલ્મ છે 22 મેં શુક્રવાર એ થિયેટરમાં રિલીઝ કરવામાં આવી છે.લેખક ડાયરેક્ટ ફિલ્મના વિપુલ શર્મા અને પ્રોડ્યુસર કૃપા સોની અને સંજય સોની છે.

વેજલપુર વિધાનસભા દ્વારા “વેજલપુર હિડન હીરોઝ” કાર્યક્રમનું આયોજન.

2026-05-19T20:50:19.141+05:30

વેજલપુર વિધાનસભા વિસ્તારના ધારાસભ્ય શ્રી અમિત ઠાકર દ્વારા “વેજલપુર હિડન હીરોઝ” કાર્યક્રમનું ભાવપૂર્ણ આયોજન કરવામાં આવ્યું હતું, જેમાં સમાજ માટે નિઃસ્વાર્થ સેવા, બહાદુરી અને માનવતાનું ઉત્તમ ઉદાહરણ પૂરું પાડનાર 40 ફાયર ફાઇટર્સનું સન્માન કરવામાં આવ્યું હતું. કાર્યક્રમ દરમિયાન તમામ અગ્નિશામક જવાનોને એપ્રિસિએશન સર્ટિફિકેટ, ગિફ્ટ હેમ્પર, શાલ અને મોમેન્ટો અર્પણ કરીને તેમની બહાદુરીને બિરદાવવામાં આવી હતી.આ કાર્યક્રમ ખાસ કરીને તાજેતરમાં શ્યામલ ચાર રસ્તા નજીક સાંગ્રીલા આર્કેડ ખાતે લાગેલી ભયાવહ આગ દરમિયાન પોતાના જાનની પરવા કર્યા વિના અનેક નાગરિકોના જીવ બચાવી આગ પર કાબૂ મેળવનાર અગ્નિશામક જવાનો અને સેવાભાવી હીરોને સમર્પિત હતો.

આગની ભયાનક પરિસ્થિતિ વચ્ચે જીવના જોખમે કરાયેલી બચાવ કામગીરીએ સમગ્ર શહેરને ગર્વની લાગણી અનુભવાવી હતી.કાર્યક્રમ દરમિયાન ફાયર વિભાગની ટીમ દ્વારા રેસ્ક્યૂ ઓપરેશન દરમિયાનના અનુભવો, પડકારો અને માનવજીવન બચાવવાની ક્ષણોની ભાવુક રજૂઆત કરવામાં આવી હતી. ઉપસ્થિત લોકોએ ફાયર ફાઇટર્સના સમર્પણ અને સાહસને ઊભા રહી તાળીઓથી વધાવી લીધા હતા.કાર્યક્રમનો મુખ્ય હેતુ અગ્નિકાંડ દરમિયાન બહાદુરી અને માનવતાનું અસાધારણ ઉદાહરણ પૂરું પાડનાર ફાયર ફાઇટર્સને સન્માનિત કરવાનો હતો. સાથે જ સમાજમાં સેવાભાવ, હિંમત અને માનવતાના મૂલ્યોને પ્રોત્સાહન આપવાનો તેમજ યુવાનોમાં જવાબદારી અને સમાજસેવાનો સંદેશ પહોંચાડવાનો પણ આ પ્રયાસ હતો.

આ પ્રસંગે વેજલપુર વિધાનસભાના ધારાસભ્ય શ્રી અમિત ઠાકરે જણાવ્યું હતું કે,*“સમાજમાં એવા અનેક હીરો છે, જે કોઈ પ્રસિદ્ધિ કે અપેક્ષા વગર માત્ર માનવતાના હેતુથી સેવા આપે છે. આગ જેવી ભયાનક પરિસ્થિતિમાં પોતાના પરિવારની ચિંતા છોડીને અજાણ્યા લોકોના જીવ બચાવવા દોડી જનાર ફાયર ફાઇટર્સ ખરેખર આપણા સમાજના સાચા હીરો છે. આવા બહાદુર જવાનોને સન્માન આપવું માત્ર એક કાર્યક્રમ નથી, પરંતુ તેમની હિંમત, ત્યાગ અને માનવસેવાને દિલથી સલામ કરવાનો એક નમ્ર પ્રયાસ છે.

સન્માન એ સમાજની ફરજ છે અને એવો સમાજ કે જે એકબીજાની ચિંતા કરે છે, સહાય માટે હંમેશા આગળ આવે છે, એવા સંવેદનશીલ સમાજનું નિર્માણ આપણે સૌએ મળીને કરવું જોઈએ. ‘વેજલપુર હિડન હીરોઝ’ એ સમાજને એ સંદેશ આપે છે કે સાચી હીરો ગીરી પ્રસિદ્ધિમાં નહીં, પરંતુ નિઃસ્વાર્થ સેવાભાવમાં વસે છે.વેજલપુર હિડન હીરોઝ” કાર્યક્રમે ઉપસ્થિત સૌના મનમાં ફાયર ફાઇટર્સ પ્રત્યે ગૌરવ અને કૃતજ્ઞતાની ભાવના જગાવી હતી અને માનવતા માટે નિષ્ઠાપૂર્વક કાર્ય કરનાર અજાણ્યા હીરોને સમાજના કેન્દ્રસ્થાને લાવવાનો અર્થપૂર્ણ પ્રયાસ સાબિત થયો હતો.

ફિલ્મ રિવ્યૂ: 'વાંકી ચૂકી લવ સ્ટોરી'

2026-05-11T09:56:00.001+05:30

ગુજરાતી સિનેમામાં અત્યારે અવનવા પ્રયોગો થઈ રહ્યા છે, ત્યારે દિગ્દર્શક ધ્વનિ ગૌતમની ફિલ્મ 'વાંકી ચૂકી લવ સ્ટોરી' એક અત્યંત આધુનિક, રંગીન અને લાગણીસભર પારિવારિક ફિલ્મ તરીકે ઉભરી આવી છે. ફિલ્મની વાર્તા લગ્ન, પ્રેમ અને ભૂતકાળની યાદો વચ્ચે ઝૂલતા સંબંધો પર આધારિત છે. મુખ્ય પાત્ર દેવ (ભાવિન ભાનુશાલી) જ્યારે તિથિ (પૂજા જોશી) સાથે લગ્ન કરવા જઈ રહ્યો હોય છે, ત્યારે તેની એક્સ-ગર્લફ્રેન્ડ માયરા વેડિંગ પ્લાનર તરીકે એન્ટ્રી લે છે, જે વાર્તામાં એક રોમાંચક વળાંક લાવે છે. આ આખી ગૂંચવણ જે રીતે સ્ક્રીન પર રજૂ કરવામાં આવી છે તે પ્રેક્ષકોને અંત સુધી જકડી રાખે છે.

અભિનયની વાત કરીએ તો, ભાવિન ભાનુશાલીએ એક મૂંઝવણમાં રહેલા પ્રેમી અને જવાબદાર પુત્ર તરીકેની ભૂમિકા ખૂબ જ નિષ્ઠાપૂર્વક ભજવી છે. પૂજા જોશીએ ફરી એકવાર સાબિત કર્યું છે કે તે ગુજરાતી સિનેમાની સૌથી પ્રતિભાશાળી અભિનેત્રીઓમાંની એક છે; તેની સાદગી અને તેના સંવાદો હૃદયસ્પર્શી છે. પરીક્ષિત તમલિયાએ ફિલ્મમાં હળવી પળો અને કોમેડી દ્વારા પ્રેક્ષકોનું ભરપૂર મનોરંજન કર્યું છે, જ્યારે મિલોની ઝાંસા અને ધર્મેશ વ્યાસ જેવા કલાકારોએ ફિલ્મના કથાતંતુને મજબૂતી આપી છે. દરેક કલાકારની કેમેસ્ટ્રી ફિલ્મને વધુ વાસ્તવિક બનાવે છે.

ટેકનિકલ પાસાઓ પર નજર કરીએ તો, ફિલ્મનું નિર્દેશન ખૂબ જ પ્રભાવશાળી છે. ધ્વનિ ગૌતમે કચ્છના સુંદર લોકેશન્સ અને લગ્નના ભવ્ય સેટ્સને એવી રીતે રજૂ કર્યા છે કે જાણે તમે પોતે કોઈ મોટા લગ્ન પ્રસંગનો હિસ્સો હોવ. ફિલ્મની સિનેમેટોગ્રાફી આકર્ષક છે અને સંગીત પણ વાર્તાના વહેણને સાથ આપે તેવું કર્ણપ્રિય છે. ખાસ કરીને યુવા પેઢીને આ ફિલ્મ વધુ સ્પર્શી જશે કારણ કે તેમાં આજના જમાનાના સંબંધો અને તેના ગૂંચવાડાઓને કોઈ પણ જાતના બોજ વગર સહજતાથી દર્શાવવામાં આવ્યા છે.

નિષ્કર્ષમાં, 'વાંકી ચૂકી લવ સ્ટોરી' એ માત્ર એક લવ સ્ટોરી નથી, પરંતુ તે સંબંધોની પરિપક્વતાની સફર છે. ફિલ્મમાં ડ્રામા, ઈમોશન્સ અને કોમેડીનું ઉત્તમ સંતુલન જળવાયું છે. 4 સ્ટાર રેટિંગ સાથે આ એક મસ્ટ-વોચ ગુજરાતી ફિલ્મ છે જે તમે તમારા પરિવાર સાથે નિહાળી શકો છો. ગુજરાતી ફિલ્મોમાં આ પ્રકારની ક્લીન અને એન્ટરટેઈનિંગ વાર્તાઓ આવતી રહે તે ખરેખર આવકારદાયક છે.

પ્રાઇડ હોટેલ્સ લિમિટેડ દ્વારા પ્રાઈડ એલિટ હિંમતનગરનું ભવ્ય ઉદ્ઘાટન: 51 રૂમ્સ સાથે પ્રીમિયમ ડાઇનિંગ, બેન્ક્વેટ સ્પેસ અને તમામ પ્રવાસીઓ માટે આધુનિક સુવિધાઓ.

2026-05-07T21:37:00.003+05:30

પ્રાઇડ હોટેલ્સ લિમિટેડ એ હિંમતનગરમાં પ્રાઈડ એલિટ હિંમતનગરના શુભારંભની જાહેરાત કરી છે. અમદાવાદ–ઉદયપુર હાઇવે પર વ્યૂહાત્મક રીતે સ્થિત અને અમદાવાદથી માત્ર 60 કિલોમીટર દૂર આવેલું આ આધુનિક 51 રૂમ્સ ધરાવતું હોટેલ બિઝનેસ તેમજ લેઝર પ્રવાસીઓ માટે આધુનિક સુવિધાઓ, વિશાળ રહેવાની વ્યવસ્થા અને લક્ઝુરિયસ ડાઇનિંગનો ઉત્તમ સમન્વય પ્રદાન કરે છે.

હિંમતનગરના કેન્દ્રસ્થાને આવેલ આ હોટેલમાં ત્રણ વિશિષ્ટ રેસ્ટોરન્ટ્સ છે – કાસાબ્લાંકા, જ્યાં મલ્ટી-ક્યુઝિન વેજિટેરિયન ભોજનનો આનંદ માણી શકાય છે; સીઝલિંગ BBQ, જે રૂફટોપ લાઇવ ગ્રિલ્સ અને શહેરના મનમોહક નજારાઓ સાથે અનોખો અનુભવ આપે છે; તેમજ 360° રૂફટોપ રેસ્ટોરન્ટ, જે શાંત સાંજ અને યાદગાર ઉજવણીઓ માટે આદર્શ સ્થળ છે. આ ઉપરાંત, હોટેલમાં 7000 ચોરસ ફૂટથી વધુનું બેન્ક્વેટ સ્પેસ ઉપલબ્ધ છે, જે કોર્પોરેટ મીટિંગ્સ, કોન્ફરન્સ, લગ્ન પ્રસંગો અને સામાજિક કાર્યક્રમો માટે અનુકૂળ છે.

હોટેલનું ડિઝાઇન આરામ અને ભવ્યતાનો અનોખો અનુભવ આપે છે. આધુનિક ઇન્ટિરિયર્સ, સુસજ્જ રૂમ્સ અને આધુનિક સુવિધાઓ સાથે ડિલક્સ ટ્વિન, સુપિરિયર ટ્વિન, પ્રીમિયમ કિંગ, પ્રીમિયમ કિંગ વિથ બાથટબ અને લક્ઝુરિયસ પ્રાઈડ સુઈટ જેવી વિવિધ રહેવાની વિકલ્પો ઉપલબ્ધ છે. બિઝનેસ પ્રવાસીઓ માટે હાઈ-સ્પીડ વાઈ-ફાઈ અને નજીકના જીઆઇડીસી સુધી સરળ પહોંચ ઉપલબ્ધ હોવાથી આ હોટેલ આદર્શ પસંદગી બની રહે છે. જ્યારે લેઝર પ્રવાસીઓ માટે સ્પા અને રૂફટોપ ડાઇનિંગ જેવી વેલનેસ સુવિધાઓ દિવસભરના વ્યસ્ત કાર્યક્રમ પછી આરામદાયક અનુભવ પ્રદાન કરે છે.

અતુલ ઉપાધ્યાય, એક્ઝિક્યુટિવ ડિરેક્ટર, પ્રાઇડ હોટેલ્સ લિમિટેડ એ લોન્ચ અંગે જણાવ્યું હતું કે* , “પ્રાઈડ હોટેલ્સ ખાતે અમે સતત એવા વ્યૂહાત્મક સ્થળોએ વિસ્તરણ કરવા પ્રયત્નશીલ છીએ, જ્યાં વિકાસની વિશાળ સંભાવનાઓ ઉપલબ્ધ હોય. ગુજરાત–રાજસ્થાન કોરિડોર પર વ્યૂહાત્મક રીતે આવેલ હિંમતનગર બિઝનેસ તેમજ લેઝર ટૂરિઝમ બંને માટે ઉત્તમ તક પ્રદાન કરે છે. પ્રાઈડ એલિટ હિંમતનગર દ્વારા અમે લક્ઝરી અને સુવિધાનો અનોખો સમન્વય રજૂ કરી રહ્યા છીએ, જ્યાં મહેમાનોને શ્રેષ્ઠ હૉસ્પિટાલિટી સાથે પ્રીમિયમ સ્ટેનો અનુભવ મળશે.”

કોસ્તુવા મુખર્જી, એવીપી – ગુજરાત, તેલંગાણા, આંધ્ર પ્રદેશ અને ગોવા, એ ઉમેર્યું હતું કે* , “અમદાવાદ–ઉદયપુર હાઇવે પર આવેલ પ્રાઈડ એલિટ હિંમતનગરનું પ્રાઈમ લોકેશન અને ઔદ્યોગિક તેમજ બિઝનેસ હબ્સની નજીકતા તેને કોર્પોરેટ પ્રવાસીઓ માટે આદર્શ ગંતવ્ય બનાવે છે. સાથે જ, હોટેલની લેઝર સુવિધાઓ અને શાંત વાતાવરણ આરામદાયક ગેટઅવે ઈચ્છતા મહેમાનો માટે પરફેક્ટ પસંદગી છે. ઉત્તર ગુજરાતના હૉસ્પિટાલિટી ક્ષેત્રમાં આ પ્રોપર્ટી મહત્વપૂર્ણ યોગદાન આપશે તેવી અમને આશા છે.”

અજયભાઈ પટેલ સાથેની ભાગીદારીમાં, જેમણે હિંમતનગરમાં પ્રાઈડ બ્રાન્ડને સ્થાપિત કરવામાં મહત્વપૂર્ણ ભૂમિકા ભજવી છે, હોટેલનું વધુ વિસ્તરણ આગામી “રીગલ લૉન્સ બાય પ્રાઈડ” સાથે થવાનું છે. અજયભાઈ પટેલે જણાવ્યું હતું કે, “હિંમતનગરમાં પ્રાઈડ હોટેલ્સની શ્રેષ્ઠ હૉસ્પિટાલિટી લાવવા માટે અમે ગર્વ અનુભવી રહ્યા છીએ. ફેઝ-2 હેઠળ ‘રીગલ લૉન્સ બાય પ્રાઈડ’ લોન્ચ કરવામાં આવશે, જે 2,00,000 ચોરસ ફૂટ વિસ્તારમાં ફેલાયેલ વિશાળ સ્થળ હશે અને મોટા ઇવેન્ટ્સ, લગ્ન સમારંભો તેમજ લેઝર પ્રવૃત્તિઓ માટે ડિઝાઇન કરવામાં આવશે. આ પ્રોજેક્ટ હિંમતનગરને કોર્પોરેટ અને સામાજિક કાર્યક્રમો માટે પ્રીમિયમ ડેસ્ટિનેશન તરીકે વધુ મજબૂત બનાવશે.

રોહિત મલૈયા, જનરલ મેનેજર, પ્રાઈડ એલિટ હિંમતનગર, એ અંતમાં જણાવ્યું હતું કે* , “પ્રાઈડ એલિટ હિંમતનગર ખાતે અમારી પ્રાથમિકતા દરેક મહેમાનને શ્રેષ્ઠ અનુભવ પ્રદાન કરવાની છે. વિશાળ અને ભવ્ય રીતે ડિઝાઇન કરાયેલા રૂમ્સથી લઈને ખાસ રીતે ક્યુરેટ કરાયેલા ડાઇનિંગ અને ઇવેન્ટ સ્પેસ સુધી, અમે આરામ અને લક્ઝરીનો સુંદર સમન્વય સર્જ્યો છે. અમારી ટીમ ઉષ્માભર્યું આતિથ્ય અને વ્યક્તિગત સેવાઓ દ્વારા દરેક સ્ટેને યાદગાર બનાવવા માટે પ્રતિબદ્ધ છે.”પ્રાઈડ એલિટ હિંમતનગર ઉત્તર ગુજરાતના વિકસતા હૉસ્પિટાલિટી ક્ષેત્રમાં મહત્વપૂર્ણ ઉમેરો સાબિત થશે. આગામી “રીગલ લૉન્સ બાય પ્રાઈડ” સાથે આ પ્રોપર્ટી બિઝનેસ તેમજ લેઝર પ્રવાસીઓ માટે પ્રીમિયર રિસોર્ટ ડેસ્ટિનેશન તરીકે ઉભરી આવશે.

એસ ડિઝાઇનર્સે દ્વારા અમદાવાદ પ્લાન્ટનો શુભારંભ, આગામી તબક્કામાં 4,000 મશીનોનું વાર્ષિક ઉત્પાદન લક્ષ્ય.

2026-04-30T19:03:00.002+05:30

એસ ડિઝાઇનર્સ લિમિટેડ (“Ace” અથવા “ADL”), એ 'એસ માઇક્રોમેટિક ગ્રુપ'ની ફ્લેગશિપ કંપની છે, જે પ્રીસીઝન મેટલવર્કિંગ મશીન ટૂલ્સના ઉત્પાદન, માર્કેટિંગ અને સર્વિસિંગ ક્ષેત્રે કાર્યરત અગ્રણી ભારતીય કંપનીઓનું સંગઠન છે, એ આજે અમદાવાદના પંચરત્ન ઇન્ડસ્ટ્રીયલ પાર્ક ખાતે તેની નવી અત્યાધુનિક એસેમ્બલી સુવિધાના શુભારંભની જાહેરાત કરી છે. આ વ્યૂહાત્મક વિસ્તરણ ADL ની વિકાસયાત્રામાં એક મહત્વપૂર્ણ સીમાચિહ્નરૂપ છે,

જે તેની ક્ષમતા વધારવા, વ્યવસાયિક વિસ્તરણ અને વૈશ્વિક સ્તરે પોતાની ઉપસ્થિતિ મજબૂત કરવાની તેની પ્રતિબદ્ધતાને વધુ દ્રઢ બનાવે છે.આગામી પાંચ વર્ષમાં એસ ડિઝાઇનર્સનું આ એકમ વાર્ષિક અંદાજે ૩,૦૦૦ ટર્નિંગ મશીનો અને ૧,૦૦૦ મશીનિંગ સેન્ટર્સની ઉત્પાદન ક્ષમતા હાંસલ કરવા માટે સજ્જ છે. આ પ્લાન્ટ પ્રાદેશિક વેન્ડર્સના વિકાસ અને કુશળ માનવબળના જોડાણ દ્વારા સ્થાનિકીકરણ પર વિશેષ ભાર મૂકશે. ૧૦૦ કર્મચારીઓના પ્રારંભિક કાર્યબળ સાથે શરૂ થતો આ પ્લાન્ટ, નિર્ધારિત સમયગાળામાં ૩૫૦ કર્મચારીઓ સુધી વિસ્તરણ પામે તેવી અપેક્ષા છે.સેન્ટ્રલ મેન્યુફેક્ચરિંગ ટેકનોલોજી ઇન્સ્ટિટ્યૂટ (CMTI) ના ત્રણ ઇજનેરો દ્વારા ૧૯૭૯ માં સ્થાપિત 'એસ ડિઝાઇનર્સ'ની શરૂઆત એક ડિઝાઇન કન્સલ્ટિંગ કંપની તરીકે થઈ હતી,

જેણે આગળ જતાં 'એસ માઇક્રોમેટિક ગ્રુપ'નો પાયો નાખ્યો. એસ ડિઝાઇનર્સ, એસ મેન્યુફેક્ચરિંગ સિસ્ટમ્સ અને માઇક્રોમેટિક મશીન ટૂલ્સના સંકલન બાદ, એસ ડિઝાઇનર્સ લિમિટેડ આજે CNC ટર્નિંગ અને મશીનિંગ સેન્ટર્સના ક્ષેત્રમાં ભારતના સૌથી મોટા ઉત્પાદક તરીકે ઉભરી આવી છે.નાણાકીય વર્ષ ૨૦૨૫-૨૬માં ₹૨,૮૦૦ કરોડથી વધુના અપેક્ષિત વાર્ષિક ટર્નઓવર સાથે, એસ ડિઝાઇનર્સ લિમિટેડ (ADL) પ્રતિ વર્ષ ૮,૦૦૦ ટર્નિંગ સેન્ટર્સ અને ૩,૪૦૦ મશીનિંગ સેન્ટર્સનું ઉત્પાદન કરવાની અત્યાધુનિક ક્ષમતા ધરાવે છે.

એશિયા, ઓસ્ટ્રેલિયા, મધ્ય પૂર્વ, અમેરિકા (ઉત્તર અને દક્ષિણ) તેમજ યુરોપમાં મજબૂત વૈશ્વિક પદચિહ્ન ધરાવતી આ કંપનીએ ભારતના CNC ટર્નિંગ અને મશીનિંગ સેન્ટર માર્કેટમાં છેલ્લા ૨૫ વર્ષથી વધુ સમયથી પોતાનું અગ્રણી સ્થાન અકબંધ રાખ્યું છે.

ADL ના મેનેજિંગ ડિરેક્ટર ટી.કે. રમેશે જણાવ્યું હતું કે: "ગુજરાતમાં આ પ્લાન્ટ સ્થાપવાનો અમારો નિર્ણય મુખ્ય ઔદ્યોગિક હબ અને અમારા ગ્રાહકોની વધુ સમીપ રહેવાની અમારી પ્રતિબદ્ધતાનું પરિણામ છે. આ ભૌગોલિક નિકટતા અમને ગ્રાહકોની જરૂરિયાતો પર ઝડપી પ્રતિસાદ આપવા, શ્રેષ્ઠ સર્વિસ સપોર્ટ પૂરો પાડવા અને તેમની ઉત્પાદકતા વધારવા માટે વધુ ગાઢ સહયોગ સાધવામાં સક્ષમ બનાવશે."

ADL ના જોઈન્ટ મેનેજિંગ ડિરેક્ટર બિલ શુક્લાએ જણાવ્યું હતું કે: "આ સુવિધાને અદ્યતન પ્રક્રિયાઓ અને ડિજિટલ ટેક્નોલોજીના સમન્વય સાથે 'નેક્સ્ટ-જનરેશન' મેન્યુફેક્ચરિંગ યુનિટ તરીકે સાકાર કરવામાં આવી છે. તે આધુનિક ઉત્પાદન ક્ષેત્રની બદલાતી જરૂરિયાતોને અનુરૂપ હાઈ-પ્રીસીઝન અને હાઈ-પરફોર્મન્સ મશીન ટૂલ્સ પૂરા પાડવામાં નિર્ણાયક ભૂમિકા ભજવશે."

ધ ફોરમ હોટલ એન્ડ કન્વેન્શન' દ્વારા ગુજરાતના હોસ્પિટાલિટી ક્ષેત્રમાં નવા અધ્યાયનો પ્રારંભ.

2026-04-29T18:23:00.001+05:30

ગુજરાતના હોસ્પિટાલિટી અને ઇવેન્ટ સેક્ટરને નવી ઊંચાઈએ લઈ જવાના ઉદ્દેશ્ય સાથે અમદાવાદમાં ‘ધ ફોરમ હોટલ એન્ડ કન્વેન્શન’નો શુભારંભ કરવામાં આવ્યો છે. આ નવી પ્રોપર્ટી ૧૯૫ ભવ્ય રૂમ્સ અને સ્યુટ્સ ધરાવે છે, જે તેની બાજુમાં જ આવેલી ‘વિન્ડહામ અમદાવાદ શેલા’ સાથે આંતરિક રીતે જોડાયેલી છે. વિન્ડહામના ૧૯૨ પ્રીમિયમ રૂમ્સ અને સુવિધાઓ સાથે મળીને હવે અહીં કુલ ૩૮૭ લક્ઝરી રૂમ્સનો વિશાળ ઇન્વેન્ટરી આધાર ઉપલબ્ધ બન્યો છે.

આ સંયુક્ત પ્રોજેક્ટ ગુજરાતમાં મોટા પાયાના લગ્ન સમારોહ, આંતરરાષ્ટ્રીય પ્રદર્શનો અને કોર્પોરેટ ઇવેન્ટ્સ માટેની વધતી જતી જરૂરિયાતોને પૂર્ણ કરવામાં મહત્વની ભૂમિકા ભજવશે.અંદાજે ૧૨,૦૦,૦૦૦ ચોરસ ફૂટના વિશાળ વિસ્તારમાં ફેલાયેલું આ ડેસ્ટિનેશન એકસાથે ૫,૦૦૦ મહેમાનોની યજમાની કરવાની ક્ષમતા ધરાવે છે, જે તેને રાજ્યના સૌથી મોટા ઇવેન્ટ-લક્ષી હોસ્પિટાલિટી પ્રોજેક્ટ્સમાં સ્થાન અપાવે છે. આધુનિક આંતરમાળખાકીય સુવિધાઓની સાથે અહીં અંદાજે ૧,૫૦૦ વાહનો માટે વિશાળ પાર્કિંગ વ્યવસ્થા છે, જે અમદાવાદ જેવા મેટ્રો શહેરમાં આયોજિત થતા હાઈ-ફૂટફોલ કાર્યક્રમો માટે અત્યંત મહત્વનું પાસું સાબિત થશે.

ઇવેન્ટ ઇન્ફ્રાસ્ટ્રક્ચરની વાત કરીએ તો, 'ધ ફોરમ હોટલ એન્ડ કન્વેન્શન' માં ૩૨થી વધુ અત્યાધુનિક બેન્ક્વેટ વેન્યુ તૈયાર કરવામાં આવ્યા છે, જેમાં ૪૦,૦૦૦ ચોરસ ફૂટનો ભવ્ય ‘પિલરલેસ’ (થાંભલા વગરનો) બોલરૂમ મુખ્ય આકર્ષણ છે. આ ઉપરાંત, કોન્ફરન્સ રૂમ્સ અને અદ્યતન સાઉન્ડ સિસ્ટમ ધરાવતું ઓડિટોરિયમ તેને ‘માઈસ’ (MICE - Meetings, Incentives, Conferences, and Exhibitions) ક્ષેત્ર માટે આદર્શ બનાવે છે. અહીં એક જ સમયે અનેક કાર્યક્રમોનું સરળતાથી સંચાલન કરી શકાય તેવી વ્યવસ્થા ગોઠવવામાં આવી છે.

આ પ્રોપર્ટી માત્ર રહેવા કે ઇવેન્ટ પૂરતી મર્યાદિત નથી, પરંતુ શહેરમાં એક નવી લાઇફસ્ટાઇલ પણ રજૂ કરે છે. અહીં ગ્લોબલ ક્યુઝિન પીરસતી પ્રીમિયમ રેસ્ટોરન્ટ ‘ઓરી’ (Aurii), શહેરમાં અનોખો ફ્રેન્ચ અનુભવ આપતી ‘+33’ અને મનોરંજન માટે ‘રિસ્કે’ (Risqué) નાઇટ ક્લબ જેવી સુવિધાઓ ઉપલબ્ધ છે. આ ઉપરાંત ‘ફોર્થ’ નામનો એક નવો ક્યુલિનરી કન્સેપ્ટ પણ ટૂંક સમયમાં શરૂ થવા જઈ રહ્યો છે.

આ લોન્ચિંગ પ્રસંગે મેનેજિંગ ડિરેક્ટર શ્રી કલ્પેશ પ્રજાપતિએ જણાવ્યું હતું કે, “ધ ફોરમ હોટલ એન્ડ કન્વેન્શન'ના માધ્યમથી અમારો પ્રયાસ ગુજરાતની વિકાસગાથા અને મહત્વાકાંક્ષાને અનુરૂપ એક શ્રેષ્ઠ ડેસ્ટિનેશન પૂરું પાડવાનો છે. અમારો ઉદ્દેશ્ય માત્ર ઈન્ફ્રાસ્ટ્રક્ચર ઊભું કરવાનો નથી, પરંતુ એક એવું સ્થળ બનાવવાનો છે જ્યાં લોકો યાદગાર સંભારણાં બનાવી શકે. અમે દરેકને' ધ ફોરમ'માં પધારીને આ આધુનિક હોસ્પિટાલિટીનો અનુભવ લેવા માટે આમંત્રિત કરીએ છીએ.”પોતાના વિશાળ કદ અને વૈશ્વિક કક્ષાની સુવિધાઓ સાથે 'ધ ફોરમ હોટલ એન્ડ કન્વેન્શન' આગામી સમયમાં ગુજરાતના ટૂરિઝમ અને હોસ્પિટાલિટી ઉદ્યોગમાં એક મહત્વનું કેન્દ્ર બની રહેશે.

શ્રી અમ્રત બાપા મેલડી ધામ મંદિર દ્વારા નિરાધાર દીકરીઓના તૃતીય સમૂહ લગ્નોત્સવનું ભવ્ય આયોજન.

2026-02-12T17:20:00.003+05:30

મોટી ખાડોલ, ગુજરાત* : સમાજમાં માનવતા, સંવેદના અને સેવાભાવનું અનોખું ઉદાહરણ પૂરું પાડતા શ્રી અમ્રત બાપા મેલડી ધામ મંદિર (મોટી ખાડોલ) દ્વારા નિરાધાર, માબાપ વિહોણી તથા જરૂરિયાતમંદ દીકરીઓ માટે તૃતીય સમૂહ લગ્નોત્સવનું આયોજન કરવામાં આવ્યું. આ સમૂહ લગ્નોત્સવમાં કુલ 19 નિરાધાર દીકરીઓના વિવાહ સન્માનપૂર્વક સંપન્ન કરવામાં આવશે, જે તેમના જીવનમાં નવા અધ્યાયની શરૂઆત કરશે.

આ પાવન આયોજન માત્ર લગ્ન સુધી સીમિત નથી, પરંતુ સમાજના સૌથી નબળા વર્ગ માટે આશાનો દીવો બની રહ્યું છે. ટ્રસ્ટ દ્વારા આવનારા સમયમાં વધુ ને વધુ નિરાધાર દીકરીઓના લગ્ન કરાવવાની પણ મહત્ત્વાકાંક્ષી યોજના ઘડવામાં આવી છે, જે સમાજમાં સમાનતા અને સન્માનની ભાવનાને મજબૂત બનાવે છે.લગ્નોત્સવ દરમિયાન દીકરીઓને જરૂરી તમામ ઘરગથ્થુ ચીજવસ્તુઓનું કરિયાવર પણ આપવામાં આવશે, જેથી તેઓ આત્મવિશ્વાસ સાથે નવા જીવનની શરૂઆત કરી શકે. આ ઉપરાંત ટ્રસ્ટ દ્વારા સતત વિવિધ લોકહિતકારી સેવાઓ હાથ ધરવામાં આવે છે, જેમાં માતાજીની બેઠક, જરૂરિયાતમંદ લોકો માટે ભોજન રથ (ભોજન સેવા), ગૌશાળા સહિતના સેવાકાર્યો સામેલ છે.

આ પ્રસંગે ટ્રસ્ટી ઉષાબેનએ ભાવુક શબ્દોમાં જણાવ્યું કે,* “નિરાધાર દીકરીઓને સમાજમાં સન્માનપૂર્વક સ્થાન મળે અને તેઓ કોઈપણ ભય કે અસુરક્ષાની લાગણી વિના પોતાના જીવનની શરૂઆત કરી શકે — એજ અમારું મુખ્ય લક્ષ્ય છે. આ દીકરીઓ માત્ર લાભાર્થી નથી, પરંતુ અમારા પરિવારનો અવિભાજ્ય ભાગ છે. સમાજના સહકારથી અમે આવનારા સમયમાં વધુ દીકરીઓના સપનાઓ સાકાર કરવા પ્રતિબદ્ધ છીએ.”

શ્રી અમ્રત બાપા મેલડી ધામ મંદિર દ્વારા કરવામાં આવતું આ સમૂહ લગ્નોત્સવ માત્ર એક કાર્યક્રમ નથી, પરંતુ માનવતા, કરુણા અને સામાજિક જવાબદારીનું જીવંત પ્રતીક છે, જે સમાજને નવી દિશા આપે છે અને દરેક દીકરી માટે સુરક્ષિત અને સન્માનપૂર્ણ ભવિષ્યનું સ્વપ્ન સાકાર કરે છે.

સસ્પેન્સ થ્રિલર ફિલ્મ ‘પાતકી’ 30 જાન્યુઆરીએ થશે રિલીઝ.

2026-01-25T18:04:00.001+05:30

ગુજરાતી સિનેમા જ્યારે નવી ઊંચાઈઓ સર કરી રહ્યું છે, ત્યારે વર્ષ 2026ની સૌથી વધુ રાહ જોવાતી સસ્પેન્સ થ્રિલર 'પાતકી' હવે મોટા પડદા પર દસ્તક દેવા માટે તૈયાર છે. અગાઉ લોન્ચ થયેલા ટ્રેલરને મળેલા અભૂતપૂર્વ પ્રતિસાદ બાદ, આજે અમદાવાદ ખાતે આયોજિત એક ખાસ પ્રેસ કોન્ફરન્સમાં ફિલ્મની સ્ટારકાસ્ટ હિતેન તેજવાણી, શ્રદ્ધા ડાંગર અને ગૌરવ પાસવાલા તથા ડિરેક્ટર અને રાઇટર અભિનય દેશમુખ, પ્રોડ્યુસર આલાપ કિકાણી અને પ્રોડ્યુસર ચૌલા દોશી એ ફિલ્મ અંગે ખાસ માહિતી આપી હતી. આ ફિલ્મ આગામી 30 જાન્યુઆરી, 2026 ના રોજ વિશ્વભરના સિનેમાઘરોમાં રિલીઝ થશે.

અભિનય દેશમુખ દ્વારા નિર્દેશિત અને લિખિત અને 'એએમપી સ્ટુડિયો પ્રોડક્શન્સ'ના બેનર હેઠળ બનેલ આ ફિલ્મ અવિરત પિક્ચર્સ, કાલાંશ ક્રિએટીવ્સ, પામ સ્ટુડિયો, કનક પિક્ચર્સ અને વિઝન મુવી મેકર્સના એસોશિએશન સાથે નિર્માણ થયેલ છે. આ ફિલ્મમાં પ્રતિભાશાળી અભિનેત્રી શ્રદ્ધા ડાંગર અને જાણીતા અભિનેતા ગૌરવ પાસવાલા મુખ્ય ભૂમિકામાં જોવા મળશે. દિવ્યેશ દોશી, આલાપ કિકાણી, નૃપલ પટેલ, આનંદ ખમર અને રાજુ રાયસિંઘાની આ ફિલ્મના પ્રોડ્યુસર્સ છે. મુખ્ય કલાકારો ઉપરાંત સુચિતા ત્રિવેદી, હિતેન તેજવાણી, ઉજ્જવલ દવે, કરણ જોશી અને આકાશ ઝાલા જેવા દિગ્ગજ કલાકારો મહત્વના રોલમાં છે.

ફિલ્મની વાર્તા અંગે જણાવીએ તો, "એક માણસ જ્યાં સુધી દોષિત સાબિત ન થાય ત્યાં સુધી નિર્દોષ છે, પરંતુ જો તે ખરેખર દોષિત હોય અને તેમ છતાં નિર્દોષ સાબિત થાય તો? માનવ (ગૌરવ પાસવાલા) એક મહત્વાકાંક્ષી છતાં જમીન સાથે જોડાયેલો કોર્પોરેટ પ્રોફેશનલ છે, જેનું જીવન આદર્શ લાગે છે. તેની પત્ની નિત્યા (શ્રદ્ધા ડાંગર) તેની તાકાત છે અને તેમનું લગ્નજીવન એકદમ સુખી છે. પરંતુ અચાનક જ માનવની આ સપના જેવી દુનિયા વિખેરાઈ જાય છે. સર્જાયેલી અરાજકતામાં માનવ બધી ઘટનાઓ માટે પોતાને જવાબદાર માને છે. અપરાધભાવથી પીડાતો માનવ પોલીસ સમક્ષ શરણાગતિ સ્વીકારવાનું નક્કી કરે છે, પરંતુ વાર્તા ત્યારે વિચિત્ર વળાંક લે છે જ્યારે દરેક પુરાવા માનવના નિવેદનને પડકારે છે. તે જ્યારે આત્મશંકાના વમળમાં ફસાય છે, ત્યારે સત્ય બહાર આવે છે. "પાતકી" એ જ દર્શાવે છે કે આપણે બધા એક સ્તરે નિર્દોષ છીએ અને બીજા સ્તરે દોષિત.

આ ફિલ્મ થકી પ્રેક્ષકોને સસ્પેન્સનો એક નવો જ સ્તર જોવા મળશે. એક એવી વાર્તા જે તમને દરેક ક્ષણે વિચારતા કરી દેશે. 'પાતકી' માત્ર એક ફિલ્મ નથી, પણ માનવ મનની જટિલતાઓની સફર છે.'એએમપી સ્ટુડિયો પ્રોડક્શન્સ' દ્વારા નિર્મિત અને પેનોરમા સ્ટુડિયો દ્વારા વિતરિત આ ફિલ્મ 30 જાન્યુઆરીએ ગુજરાત અને મુંબઈ ઉપરાંત યુએસ, યુકે, કેનેડા, દુબઈ અને ઓસ્ટ્રેલિયા જેવા દેશોમાં પણ રિલીઝ થશે.

ફ્યુઝન બાય રિઝવાન પરફ્યુમ બ્રાન્ડ સફળતાના શિખરે પહોંચી.

2026-01-20T15:43:00.002+05:30

અમદાવાદ ગુજરાત સહિત ઘણી જગ્યાએ પરફ્યુમ બ્રાન્ડ ઉપલબ્ધ છે પણ "ફ્યુઝન બાય રિઝવાન" પરફ્યુમ બ્રાન્ડ એક અલગ સફળતા ના શિખરે પહોંચી છે.12 જેટલા પરફ્યુમ થી કરેલી શરૂઆત આજે 100 પ્લસ ફ્લેવર સાથે ઉપલબ્ધ છે.ફ્યુઝન બાય રિઝવાન ના ફાઉન્ડર અંસારી રિઝવાન સાથે વાત કરતા જાણવા મળતા જણાવ્યું કે "હું પરફ્યુમ પોતે મેન્યુફેક્ચરિંગ કરું છું મેં મારી શરૂઆત 5000 રૂપિયા થી કરેલી ત્યારે વિચાર્યું પણ નહોતું કે આજે 1 કરોડ રૂપિયા ની ગ્રોથ પર પહોંચી.

અમારા મુખ્ય ફ્લેવર્સ બ્લ્યુ, વાઇકિંગ રાગ, ડિઝર્ટ ગાર્ડન, ઓલ્ડ સલૂન, નાવિક, લક્સ ટબેક, પાર્ટી લેધર, ઓમ્બર્સ રોઝ છે.ફ્યુઝન બાય રિઝવાન પરફ્યુમ ગુજરાત માં અમદાવાદ ઉપરાંત દિલ્હી, મુંબઇ, વેસ્ટ બંગાળ સહિત ના રાજ્યો માં વેચાણ થાય છે જો તમારે પણ આ પરફ્યુમ જોઈએ તો વેબસાઇટ fusionbyrizwan.com પર થી ખરીદી કરી શકો છો.એમેઝોન અને ફ્લિપકાર્ટ પર પણ પ્રોડકટ ઉપલબ્ધ છે.

જો તમારા માં અથાત પરિશ્રમ મેહનત અને રુચિ હોય તો તમે કોઈ પણ સ્ટાર્ટઅપ કરી શકો છો એવું ફ્યુઝન બાય રિઝવાન ના ફાઉન્ડર નું કહેવું છે.તમે 5000 રૂપિયા થી પણ આ સ્ટાર્ટઅપ કરી શકો છો.જે પરફ્યુમ બિઝનેસ માં રુચિ ધરાવતા હોય તે પરફ્યુમટોક2 ચેનલ પર ફ્રી માં એજ્યુકેશન લઈ શકે છે.રિઝવાન ની આ પોતાની યુટ્યુબ ચેનલ છે જેમાં 28000 સબસ્ક્રાઈબર છે.

ઇતિહાસમાં પહેલીવાર ૨૬મી જાન્યુ.એ ગાંધીનગરમાં મધરાત્રે ગુજરાત ઠાકોર ક્ષત્રિય સેનાનું મહાસંમેલન: લાખો લોકો ઉમટશે.

2026-01-18T13:36:00.003+05:30

પાટનગર ગાંધીનગરમાં ૨૬મી જાન્યુઆરીની મધરાતે ત્રણ વાગે ગુજરાત ઠાકોર ક્ષત્રિય સેનાનું મહાસંમેલન યોજાવવા જઈ રહ્યું છે. આ મહાસંમેલનનો ઉદ્દેશ સમાજના ઉદ્ધાર, ઉત્થાન અને સકારાત્મક બદલાવના મિશનને પ્રોત્સાહિત કરવો છે. મહાસંમેલનમાં સામાજિક આગેવાનો, યુવાનો, મહિલા પ્રતિનિધિ સહિત લાખો લોકો એકત્રિત થશે

ઠાકોર સમાજ હંમેશા મહેનતી, સ્વાભિમાની અને દેશભક્ત રહ્યો છે. હવે સમય આવ્યો છે કે એકતા, શિક્ષણ અને સ્વાવલંબનને જીવનનો મુખ્ય મંત્ર બનાવવો એ વાત નો ઉલ્લેખ કરતાં ગુજરાત ઠાકોર ક્ષત્રિય સેનાના પ્રમુખ અને ધારાસભ્ય અલ્પેશ ઠાકોરે જણાવ્યું કે, ૨૬મી જાન્યુઆરીના દિવસે આયોજિત આ પ્રસંગ માત્ર એક કાર્યક્રમ નથી, પરંતુ ઠાકોરોનું સામૂહિક મિશન છે. આ દિવસ સંવિધાન, સમાન અધિકાર, જવાબદારી અને ફરજનો છે એટલે આ દિવસની પસંદગી કરાઈ છે

ઠાકોર સમાજે ખેતી, મજૂરી, સૈન્ય, પોલીસ, અને દરેક ક્ષેત્રમાં સેવા આપી છે. પરંતુ આજે પ્રશ્ન એ છે કે —શું ઠાકોર સંગઠિત છે?શું ઠાકોર યુવાનો યોગ્ય દિશામાં આગળ વધી રહ્યા છે. સમાજને જાગૃત કરવા માટે સંમેલનનું આયોજન કરવામાં આવ્યું છે. આ સંમેલન ના મુખ્ય વિષયો છે કે...

(). 🔷 સમાજની એકતા

એકતા એ સમાજની શક્તિ છે. વિભાજનનો કોઇ સ્થાન નથી, સહયોગ અને ભાઈચારો એ મુખ્ય હથિયાર છે."સમાજના વિવિધ વર્ગો વચ્ચે ભાઈચારો વધારવો એ હેતુ છે. યુવા, મહિલાઓ અને વડીલો વચ્ચે સંવાદ અને સહયોગને મજબૂત બનાવવું છે. ઠાકોર સમાજમાં ફૂટફાટ, ભેદભાવ અને આંતરિક વિવાદો દૂર કરી એકતા સાથે આગળ વધવાનો સંકલ્પ લેવા નક્કી કરાશે.

() 🔷 યુવા અને રોજગાર

સરકારી નોકરી ,ખાનગી ક્ષેત્ર, સ્વરોજગાર, વ્યવસાય

દરેક ક્ષેત્રમાં આગળ આવવું પડશે. સમાજ પડખે ઊભો રહેશે .યુવાનો સમાજ નું ભવિષ્ય છે. "યુવાનોને વ્યવસાય અને સ્વરોજગાર માટે તાલીમ અને માર્ગદર્શન આપવા મંચ રચવાનો નિર્ણય લેવામાં આવશે

🔷 મહિલાઓનું સશક્તિકરણ

આજના સમયમાં મહિલાઓની ભૂમિકા મહત્વપૂર્ણ છે. . સમાજને મજબૂત બનાવવા માટે મહિલાઓને આગળ લાવવી જ પડશે."માતા-બહેનો વગર સમાજ અધૂરો છે, મહિલાઓની કોઈ પણ નિર્ણયમાં ભાગીદારી હશે. સ્વસહાય જૂથ સહિત અન્ય યોજના થકી તેમને સ્વાવલંબન બનાવી શકાશે.

🔷 સમાજ સુધારણા

આજે નિર્ભયતાથી કહેવું પડશે:

❌ દારૂ અને નશો — સમાજનો શત્રુ છે

❌ દહેજ — દીકરીઓનું અપમાન છે

❌ ફાલતુ ખર્ચ — ગરીબીનું કારણ છે

જો ખરેખર સમાજને આગળ લઈ જવું હોય,

તો આ કુરિવાજોને દૂર કરવા પડશે. નશામુક્તિ અને વ્યસન નિવારણ જાગૃતિ અને સહાય દ્વારા લોકોને વ્યસનથી મુક્ત કરાશે.

🔷 શિક્ષણ – ભવિષ્યની ચાવી

આજના યુગમાં શિક્ષણ વગર કોઈ સમાજ આગળ જઈ શકતો નથી.આપણાં બાળકો સ્કૂલમાં જાય — એટલું પૂરતું નથી

તેમને ગુણવત્તાયુક્ત શિક્ષણ, માર્ગદર્શન આપવું પડશે.

સ્ટુડિયો અર્વા પ્રોડક્શન લાવે છે ગુજરાતી સિનેમાની સૌથી મોટી સસ્પેન્સ મર્ડર મિસ્ટ્રી 'બ્લેક બર્થડે' : ફિલ્મનું ટ્રેલર લોન્ચ

2026-01-17T10:48:00.004+05:30

ગુજરાતી સિનેમામાં નવો વળાંક લાવવા માટે સ્ટુડિયો અર્વા પ્રોડક્શન પ્રસ્તુત ફિલ્મ 'બ્લેક બર્થડે'નું દમદાર ટ્રેલર આજે અમદાવાદ ખાતે આયોજિત એક પ્રેસ કોન્ફરન્સમાં લોન્ચ કરવામાં આવ્યું હતું. આ પ્રસંગે ફિલ્મના મુખ્ય કલાકારો આર્જવ ત્રિવેદી, યોગીતા પટેલ, ચેતન દૈયા, જિતેન્દ્ર ઠક્કર, ધ્રુવી સોની, સ્મિત જોશી, મગન લુહાર, કલ્પેશ પટેલ, ગૌરાંગ જેડી ખાસ ઉપસ્થિત રહ્યા હતા. આ હાઈ-વોલ્ટેજ થ્રિલર ડ્રામાનું દિગ્દર્શન બ્રિજેશ બૌદ્ધ અને શાહિદ અલી દ્વારા કરવામાં આવ્યું છે, જ્યારે સાહિલ પટેલ અને વિશાલ પ્રજાપતિએ આ ફિલ્મને પ્રોડ્યુસ કરી છે.

ઉલ્લેખનીય છે કે ફિલ્મ 13 ફેબ્રુઆરી, 2026 ના રોજ રિલીઝ થઈ રહી છે.ટ્રેલર લોન્ચ દરમિયાન ફિલ્મના નિર્માતા અને દિગ્દર્શકોએ જણાવ્યું હતું કે 'બ્લેક બર્થડે' એ એક એવી રહસ્યમયી વાર્તા છે જે દર્શકોને અંત સુધી જકડી રાખશે. ફિલ્મમાં આર્જવ ત્રિવેદી અને ચેતન દૈયા જેવા સક્ષમ કલાકારોની જુગલબંધી જોવા મળશે, જે ગુજરાતી સિનેમામાં સસ્પેન્સના એક નવા સ્તરની પ્રતીતિ કરાવશે. સ્ટુડિયો અર્વા પ્રોડક્શનના બેનર હેઠળ બનેલી આ ફિલ્મ માત્ર મનોરંજન જ નહીં, પરંતુ એક તદ્દન અલગ પ્રકારનો સિનેમેટિક અનુભવ પૂરો પાડવા માટે તૈયાર છે.

આ ફિલ્મની વાર્તા એક જટિલ ત્રિકોણીય પ્રેમ પ્રકરણની આસપાસ વણાયેલી છે, જે એક ભયાનક વળાંક લેતા રહસ્યમય મર્ડર મિસ્ટ્રીમાં ફેરવાઈ જાય છે. ટ્રેલરમાં જોવા મળતું સસ્પેન્સ અને ડાર્ક થીમ દર્શકોને સતત વિચારવા માટે મજબૂર કરે છે. પ્રેમ, ઈર્ષ્યા અને ગુનાના તાણાવાણા સાથે બનેલી 'બ્લેક બર્થડે' ગુજરાતી સિનેમામાં એક નવી જ ઉંચાઈ પ્રસ્થાપિત કરશે તેવો વિશ્વાસ નિર્માતાઓએ વ્યક્ત કર્યો હતો.

સ્ટુડિયો અર્વા પ્રોડક્શનના બેનર હેઠળ બનેલી આ સસ્પેન્સ મર્ડર મિસ્ટ્રી ટૂંક સમયમાં જ સિનેમાઘરોમાં રિલીઝ થવા જઈ રહી છે, જે દર્શકોને સીટ પર જકડી રાખશે તેવો દાવો કલાકારો દ્વારા કરવામાં આવ્યો છે. અમદાવાદની મીડિયા સાથેની વાતચીતમાં કલાકારોએ ફિલ્મના શૂટિંગના અનુભવો શેર કર્યા હતા અને 13 ફેબ્રુઆરી, 2026 ના રોજ આ ફિલ્મ સિનેમાઘરોમાં રિલીઝ થઇ રહી છે.

ગુજરાત પોલો ક્લબ દ્વારા આયોજિત 'અમદાવાદ પોલો ટુર્નામેન્ટ'નો ભવ્ય ઉદ્ઘાટન સમારોહ યોજાયો

2026-01-03T12:21:00.006+05:30

ત્રણ દિવસની 'અમદાવાદ પોલો ટુર્નામેન્ટ' શુક્રવારે ભવ્ય ઉદ્ધાટન સમારોહ સાથે શરૂ થઈ હતી. ગુજરાત પોલો ક્લબ દ્વારા આયોજિત અને અદાણી ગ્રુપ દ્વારા સંચાલિત, આ ત્રણ દિવસીય ટુર્નામેન્ટ, સ્કેલ અને પ્રેઝન્ટેશનની રીતે ગુજરાતમાં અત્યાર સુધીની સૌથી મોટી પોલો ઇવેન્ટ છે. 2 થી 4 જાન્યુઆરી દરમિયાન યોજનારી આ ઇવેન્ટ દર્શકોને એક નવીન અને રોમાંચક અનુભવ આપશે.

શેલાના ગુજરાત પોલો ક્લબ ગ્રાઉન્ડ ખાતે યોજાયેલા ઉદ્ઘાટન સમારોહમાં એક વિશાળ ડાન્સ ગ્રુપે જબરજસ્ત પર્ફોર્મન્સ આપ્યું હતું અને ત્યારબાદ પ્રખ્યાત એક્રોબેટિક ડાન્સ ક્રૂ વી અનબીટેબલે પણ પર્ફોર્મન્સ આપ્યું હતું. અભિનેત્રી અને ભૂતપૂર્વ મિસ વર્લ્ડ માનુષી છિલ્લર અને ટીમના માલિકો દ્વારા ટુર્નામેન્ટ ટ્રોફીનું અનાવરણ કરવામાં આવ્યું, જેણે ઔપચારિક રીતે સ્પર્ધાની શરૂઆત કરી હતી.

અમદાવાદમાં પોલો માટે ઓપનિંગ ઈવનિંગ સ્કેલ અને પ્રોડક્શન ખરેખર અભૂતપૂર્વ હતું, જેમાં દર્શકોની હાજરી અને ઉત્સાહથી ભરપૂર રિસ્પોન્સ જોવા મળ્યો હતો. પ્રથમ દિવસે, પ્રથમ મેચમાં જિંદાલ પેન્થર્સનો મુકાબલો મેફેર પોલો સાથે થયો હતો, ત્યારબાદ NAV યુનિકોર્નનો મુકાબલો પુણે વોરિયર્સ સાથે થયો હતો, જ્યારે ત્રીજી મેચમાં KP કિંગ્સનો મુકાબલો અદાણી આર્ચર્સ સાથે થયો હતો. આ મેચો દરમિયાન ઘોડેસવાર રમતોના પ્રદર્શનોએ પરંપરાગત રમતગમતના માહોલમાં વધારો કર્યો હતો.

આ પ્રસંગે ગુજરાત પોલો ક્લબના પ્રમોટર અર્પણ ગુપ્તાએ જણાવ્યું હતું કે, "આ ટુર્નામેન્ટ, ગુજરાતમાં પોલોના મંત્રમુગ્ધ કરી દેનારા અનુભવને પ્રથમ વખત લઈને આવી છે. શરૂઆતના દિવસનો પ્રતિસાદ અત્યંત પ્રોત્સાહક રહ્યો છે અને એણે અમારા એ વિશ્વાસને મજબૂત બનાવ્યો છે કે, અમદાવાદ શહેર, પોલોને એક મુખ્ય રમતગમત અને સાંસ્કૃતિક કાર્યક્રમ તરીકે અપનાવવા માટે તૈયાર છે."

ગુજરાત પોલો ક્લબના પ્રમોટર સંજય પાલડિયાએ જણાવ્યું હતું કે, "આજે અમે જે જોયું અને અનુભવ કર્યું, તે ગુજરાતમાં પોલો માટે અભૂતપૂર્વ છે. અમારું ફોકસ એક વલ્ડ-ક્લાસ ટુર્નામેન્ટ રજૂ કરવા પર છે, જે રમતના વારસાનું સન્માન કરવાની સાથે પ્રેક્ષકોને પસંદ પડે એવા સ્તરે પ્રસ્તુત કરવામાં આવી રહી છે. અમદાવાદની સ્પોર્ટિંગ ઇકોસિસ્ટમ, તેને આ પહેલ માટે એક આદર્શ સ્થળ બનાવે છે." આ ટુર્નામેન્ટમાં 30 થી વધુ પોલો ખેલાડીઓ ભાગ લઈ રહ્યા છે, જેમાંથી 25 ખેલાડીઓએ આંતરરાષ્ટ્રીય સ્તરે ભાગ લીધો છે. શરૂઆતના દિવસની રમતના ધોરણે સમગ્ર ટુર્નામેન્ટ માટે અત્યંત સ્પર્ધાત્મક રમતનો માહોલ સેટ કર્યો હતો.

મેચ ઉપરાંત, આ ઈવેન્ટને દર્શકો માટે એક સંપૂર્ણ મનોરંજક અનુભવ આપવાની રીતે તૈયાર કરવામાં આવી છે. જેમાં હેરિટેજ ઇન્સ્ટોલેશન, અશ્વ પ્રદર્શનો, ફેમિલી-ફ્રેન્ડલી ઝોન અને સમગ્ર સ્થળ પર લાઇવ મનોરંજનનો સમાવેશ થાય છે. આગામી બે દિવસ સુધી, મ્યુઝિકલ પર્ફોર્મન્સ ચાલુ રહેશે તેમજ ભવ્ય આતશબાજી, લેસર ડિસ્પ્લે અને પુરસ્કાર વિતરણ સમારોહ સાથે ટુર્નામેન્ટનું સમાપન થશે. અમદાવાદ પોલો ટુર્નામેન્ટનો ઉદ્દેશ્ય, ગુજરાતમાં 'ધ કિંગ ઓફ ગેમ્સ'ને પુનર્જીવિત કરવાનો તેમજ વારસા, સંસ્કૃતિ અને રમતગમતને એકસાથે સાંકળતી વાર્ષિક રમતગમત પરંપરા સ્થાપિત કરવાનો છે.

સિનેસ્ટાર મિનિપ્લેક્સ અમદાવાદ ખાતે હિન્દી ફિલ્મ ઘી સાઇલેન્ટ વિટનેશ નો પ્રીમિયર શૉ યોજાયો.

2025-11-24T09:43:00.002+05:30

૨૩ નવેમ્બર ૨૦૨૫ ના રોજ સિનેસ્ટાર મિનિપ્લેક્સ અમદાવાદ ખાતે હિન્દી ફિલ્મ *ઘી સાઇલેન્ટ વિટનેશ* નો પ્રીમિયર શૉ યોજાયો હતો.જેમાં ફિલ્મ ના *લેખક* અને દિર્ગદર્શક *જસ્મિત કુમાર* તેમજ ફિલ્મ ના મુખ્ય કલાકારો *ચંદ્રિકા દેવડા, મનીષ ભદોરિયા અને ભરત સોલંકી, ઑમ દેસાઈ, શિલ્પી દેબનાથ* આ કાર્યક્રમ માં હાજરી આપી હતી.*JK & SB* ની નવીનતમ ફિલ્મ, ધ સાયલન્ટ વિટનેસ માટે ઉત્સાહ, ઉલ્લાસ, ગર્જના અને પ્રશંસાથી ભરેલી હતી. આ ફિલ્મ તેના નામની જેમ સાયલન્ટ નથી. તે એક ખૂન, રહસ્ય અને સસ્પેન્સ છે. તે દર્શકોને 96 મિનિટ સુધી સીટ છોડ્યા વિના જકડી રાખે છે. અમે તેની OTT રિલીઝની રાહ જોઈ રહ્યા છીએ. અમે તેમની પાસેથી વધુ ફિલ્મોની અપેક્ષા રાખીએ છીએ અને લોકોને વિનંતી કરીએ છીએ કે તેઓ આવી કૌટુંબિક મનોરંજક સામગ્રી અને ફિલ્મ નિર્માતાઓને ટેકો આપે.

જેમ *RAAJ* અને *DK* બોલીવુડમાં રાજ કરી રહ્યા છે, તેમ *Shailesh Bhambhani* અને *Jasmit Kumar* ગુજરાતમાં અજાયબીઓ કરી રહ્યા છે. તેઓ 2025 માં બીજી વખત તેમની હિન્દી ફિલ્મનો પ્રીમિયર યોજાયો હતો.જસ્મીત કુમાર ઘ્વારા લખાયેલી આ ફિલ્મ માં મુખ્ય ભૂમિકા માં પણ તેઓ પોતે જ *ડેવિડ* ના પાત્ર માં દેખવામાં આવ્યા.! *સુરેશ મકવાણા* અને *શૈલેષ ભમ્ભાની ઘ્વારા* નિર્મિત આ ફિલ્મ માં માધવ પટેલ, સચિન શર્મા આ અદ્દભુત કેમેરા ની કમાલ બતાવી અને અપૂર્વ બાજપાઈ એ પોતાની ક્રેએટિવિટી બતાવી.મીતા જોશી ના અદભુત મેકઅપ અને દીજે ના કોસ્ચુમે ફિલ્મ માં નવા રંગ ભર્યા. આ ફિલ્મ માં ડૉક્ટર પ્રિન્સ પરીખ (દેવપ્રિયા હોસ્પિટલ) અને રેણુ ભમ્ભાની નો ઘણો સહકાર રહ્યો..!