“ഹെന്റമ്മോ. . . . .! ! ! “

“കന്നാലിക്ലാസ്സൂം വിശുദ്ധപശുക്കളും“

2009-09-20T23:55:00.005+05:30

സരസന്‌ കുറച്ച്‌ ദിവസമായി നല്ല ഉഷാറാണ്‌.കാര്യം എന്താന്നല്ലേ.നമ്മുടെ പത്രങ്ങളിലും ടിവി ചാനലുകളിലും ആകെ ബഹളമല്ലായൊരുന്നോ.ഷാജി കൈലാസിന്റെ സിനിമകളിൽ പോലും ഇത്ര ത്രില്ല് ഉണ്ടാകാറില്ല.

ഒരു കോടീശ്വരപുത്രൻ റോഡിൽ വച്ച്‌ ദാരുണമായി കൊല്ലപ്പെട്ടു.അതെന്തായാലും മാധ്യമങ്ങൾ ആഘോഷമാക്കി.പോളിനെ കുത്തിയത്‌ 'കാരി' എന്നൊരുത്തനെന്ന് പോലീസ്‌.പക്ഷെ കൊന്നത്‌ കാരിയാണോ എന്നു മാധ്യമങ്ങൾക്ക്‌ സംശയം.അവരുടെ സംശയം ന്യായം.പക്ഷെ പിന്നെ നടന്നതൊക്കെയാണ്‌ രസം.കാരി കുത്തിയ കത്തി പോലീസ്‌ കണ്ടെടുക്കുന്നു.'S' ആകൃതിയിലുള്ള കത്തിയിട്ടാണ്‌ കുത്തിയതെന്ന് പോലീസ്‌ പറഞ്ഞു.പോളിന്റെ കൂടെ സഞ്ചരിച്ച ഗുണ്ടകളായ ഓംപ്രകാശും പുത്തൻപാലം രാജേഷും ഒളിവിൽ പോയി.അവരെ പിടികൂടാൻ പോലീസ്‌ ശ്രമം തുടങ്ങി.

അപ്പോൾ ദാ വരുന്നു നമ്മുടെ കുഞ്ഞൂഞ്ഞും ചെന്നിത്തലയും സംഘവും.അവർ പറഞ്ഞു ഓംപ്രകാശും പുത്തൻപാലം രാജേഷും ആഭ്യന്തരമന്ത്രിയുടെ വീട്ടിലുണ്ടെന്ന്.ഉടനെ മാധ്യമങ്ങൾ മന്ത്രിയുടെ വീട്ടിലേക്കോടി.അപ്പോൾ വേറൊരു ചാനൽ പറഞ്ഞു മന്ത്രിയുടെ പുത്രൻ അവരെ ദുബായിലേക്ക്‌ കടത്തിയെന്ന്.അവർ അതു പറഞ്ഞതിന്റെ പിറ്റേന്ന് ഓംപ്രകാശും രാജേഷും തമിഴ്‌നാട്ടിൽ പൊങ്ങി.പൊട്ടിച്ച വാർത്ത തൊണ്ടയിൽ കുടുങ്ങിയ ചാനൽ തുപ്പാനും ഇറക്കാനും വയ്യാതെ നിൽപ്പായി.

അങ്ങനെയവർ ഒരു കൊല്ലനെ പൊക്കികൊണ്ടു വന്നു.പോലീസ്‌ കൊല്ലനെക്കൊണ്ട്‌ 'S' ആകൃതിയിലുള്ള കത്തി ഉണ്ടാക്കിച്ചത്രെ.അന്വേഷണത്തിന്റെ ഏതോ വഴിയിൽ വച്ച്‌ അവർക്ക്‌ കളഞ്ഞുകിട്ടിയതാണത്രെ ഈ കൊല്ലൻ.ഏത്‌ വഴിയാണെന്ന് അവർ പറയുന്നില്ല.വാർത്ത കണ്ട്‌ കൊല്ലനെ പിടിക്കാൻ പോലീസ്‌ ചെന്നപ്പോൾ കൊല്ലനുമില്ല ആട്‌ കിടന്നിടത്ത്‌ പൂടയുമില്ല.സരസന്‌ ഒരു സംശയം! അല്ല, ആ കൊല്ലൻ എവിടെപ്പോയതായിരിക്കും?

അങ്ങനിരിക്കുമ്പോൾ ദാ വരുന്നു അടുത്ത ചാനൽ അടുത്ത വെടിയുമായി.ഓംപ്രകാശ്‌ സിപിഐഎം പ്രവർത്തകനാണെന്ന് അയാളുടെ അച്ഛൻ പറയുന്നത്‌ എക്സ്‌ക്ലൂസീവായി ചാനലുകളിലൂടെ ഒഴുകി.വൈകുന്നേരമായപ്പോൾ അതിന്റെയും വെടി തീർന്നു.നമ്മുടെ പിതാവിന്‌ പറയാനുള്ള കാര്യങ്ങൾ വളരെ നന്നായി പറഞ്ഞു പഠിപ്പിച്ചുകൊണ്ടിരിക്കുന്ന ഒരു ഖദറിട്ട മാന്യൻ അറിയാതെ ക്യാമറയിലകപ്പെട്ടു.ഇനി ടിവിയിൽ മുഖം കാണിക്കാൻ കൊതിതോന്നി അദ്ദേഹം ചെയ്തതാണോന്ന് സരസന്‌ അറിയില്ല.

ഇപ്പോൾ സംഗതി ഒന്നടങ്ങിയിട്ടുണ്ട്‌.കാര്യം മറ്റൊന്നുമല്ല.പുതിയൊരു സാധനം വീണുകിട്ടിയിട്ടുണ്ട്‌.അതും നമ്മുടെ സ്വന്തം തിരോന്തോരത്തെ തരൂരണ്ണന്റെ വിവാദം.വേറൊന്നുമല്ല അണ്ണൻ സ്വസ്ഥമായി ഒരു അഞ്ചുനക്ഷത്രഹോട്ടലിൽ സുഖവാസം നടത്തിവരികയായിരുന്നു.അപ്പോഴാണ്‌ നമ്മുടെ പ്രണബുമാമൻ ഇറങ്ങിപ്പോടാ എന്നും പറഞ്ഞു കലിപ്പുണ്ടാക്കിയത്‌.ഒടുവിൽ മനസ്സില്ലാമനസ്സോടെയാണ്‌ തരൂരണ്ണൻ താമസം മാറിയത്‌.അതും കാലിത്തൊഴുത്തുപോലുള്ളൊരിടത്തേക്ക്‌.ഈ നാടൻമന്ത്രിമാർക്കൊക്കെ ഈ കാലിത്തൊഴുത്തു മതി.പക്ഷെ തരൂരണ്ണനെ പോലെ ഒരു ഫോറിനിറക്കുമതിക്ക്‌ ഈ സൗകര്യമൊന്നും പോര.അമേരിക്കയിലായിരുന്നെങ്കിൽ ഹോട്ടലിൽ താമസിച്ചാൽ ഇറങ്ങി പോകാനെ പറയില്ല.'കണ്ട്രി ഫെല്ലോസ്‌'.

ഈ കലിപ്പുമായി അങ്ങനെ 'ട്വീറ്റി'ക്കൊണ്ടിരുന്നപ്പോഴാണ്‌ ഒരു സാമദ്രോഹി വന്ന് വീണ്ടും നൂഡിൽസിൽ പാറ്റയെ പിടിച്ചിട്ടത്‌.പുള്ളി ചോദിച്ചു അടുത്ത തവണ കേരളത്തിലേക്ക്‌ പോകുമ്പോൾ താങ്കൾ 'കന്നുകാലി ക്ലാസിൽ' തന്നെയാണോ പോകുകയെന്ന്.തമാശക്കാരനായ തരൂരാകട്ടെ ഉരുളക്കുപ്പേരിപോലെ ഒരു മറുപടി നൽകി.'വിശുദ്ധപശുക്കളോട്‌ ഐക്യദാർഢ്യം പ്രഖ്യാപിച്ച്‌ അടുത്ത തവണ കന്നുകാലി ക്ലാസിൽ തന്നെ സഞ്ചരിക്കുമെന്ന്'.കൊടുത്ത ഉരുള അണ്ണന്റെ തൊണ്ടയിൽ തന്നെ വന്നു തടഞ്ഞു.നാടിളകി നാട്ടാരിളകി. പത്രങ്ങളൂം ടിവികളും സംഭവം ചറപറാ ഫ്ലാഷി.ഒടുവിൽ കോൺഗ്രസ്സിലെ വിദ്യാഭ്യാസമില്ലാത്ത സകലഅവന്മാരും വിദ്യാഭ്യാസം കൂടിപ്പോയ അണ്ണനെതിരേ രംഗത്തെത്തി.(അസൂയ അല്ലാതെന്ത്‌!)വിദ്യാഭ്യാസത്തിന്റെ കാര്യത്തിൽ അണ്ണനോട്‌ കട്ടക്കുനിൽക്കുന്ന ഒരേ ഒരു മഹാനായ പ്രധാനമന്ത്രിക്ക്‌ മാത്രമേ നമ്മുടെ അണ്ണന്റെ ബൗദ്ധികമായ തമാശ പിടികിട്ടിയുള്ളൂ.ഒടുവിൽ നിൽക്കക്കള്ളിയില്ലാതെ വന്നപ്പോൾ അണ്ണനൊരു മാപ്പങ്ങു പറഞ്ഞു.'അബദ്ധം പറ്റിപ്പോയി. ഇതു ഇന്ത്യയാണെന്ന് മറന്നുപോയി സോറി'.(നീയൊക്കെ അമേരിക്കയിൽ പോയി നോക്ക്‌.അവിടെ എന്തും പറയാം. മാപ്പു പറയുകയേ വേണ്ട).

സരസന്‌ മനസ്സിലാകാത്തത്‌ അതല്ല.'ഖദറിട്ട മാംസപിണ്ഡങ്ങൾ' എന്നും 'ഇറ്റാലിയൻ മദാമ്മ' എന്നുമൊക്കെ വിളിച്ചു കൂവിയ മനുഷ്യനെ പിടിച്ച്‌ മന്ത്രിയാക്കിയിട്ട്‌ ഇപ്പോൾ 'വിശുദ്ധപശു' എന്നൊന്ന് പൊക്കി വിളിച്ചപ്പോൾ ഇത്ര അരിശം പിടിക്കുന്നതെന്തിന്‌?ഞാൻ പറഞ്ഞില്ലേ എല്ലാവർക്കും അസൂയയാണ്‌.

പക്ഷെ അമേരിക്കൻ മോഡലിൽ മാപ്പു പറഞ്ഞിട്ടും വിവരമില്ലാ കോൺഗ്രസ്സുപിള്ളകൾ തരൂരിന്റെ രക്തത്തിനായി മുറവിളി കൂട്ടുന്നതായാണ്‌ സരസന്‌ ഡൽഹിയിൽ നിന്ന് ലഭിച്ച വിവരം(ഹി ഹി ഞാനും റിപ്പോർട്ടറായേ!!!!)

വിവരവും വിദ്യാഭ്യാസവും നർമ്മബോധവും ലവലേശമില്ലാത്ത ഈ ഭാരതമക്കൾക്കിടയിൽക്കിടന്ന് 'ഭരിക്കുന്ന' പ്രധാനമന്ത്രിയുടേയും വിദേശകാര്യസഹമന്ത്രിയുടേയും കഷ്ടപ്പാടോർത്ത്‌ നെടുവീർപ്പിട്ടുകൊണ്ട്‌ സരസന്റെ ആത്മഗതം: "ഹെന്റമ്മോ. . . . .! ! !"

പിൻകുറിപ്പ്‌:കേരളത്തിലെ ഗുണ്ടാവിളയാട്ടത്തിനെതിരേ യൂത്ത്കോൺഗ്രസ്സുകാർ നടത്തിയ മാർച്ചിനിടെ ജലപീരങ്കിയേറ്റ്‌ ബോധരഹിതനായി നിലം പതിച്ച യൂത്ത്കോൺഗ്രസ്സ്‌ നേതാവിനെ താങ്ങിയെടുത്ത 'തികഞ്ഞ' കോൺഗ്രസ്സുകാരനായ മനുഷ്യൻ ഇരുപതോളം ക്രിമിനൽകേസുകളിൽ പ്രതിയായ 'തികഞ്ഞ' ഒരു ഗുണ്ടയാണെന്ന് സരസൻ എവിടെയോ വായിച്ചു.

വീണ്ടും ഇരുട്ടടി

2009-08-13T20:47:00.004+05:30

കേന്ദ്രത്തിലെ യുപിഎ ഗവൺമന്റ്‌ വീണ്ടും ഒരു സമ്മാനം തന്നിരിക്കുന്നു.മറ്റൊന്നുമല്ല ഇന്ന് ഇന്ത്യ ആസിയാൻ കരാറിൽ ഒപ്പുവച്ചു.അതിനെന്താ,അത്‌ ഒരു കരാറല്ലേ പിന്നെ ഒപ്പുവച്ചത്‌ മൻമോഹൻജി ആകുമ്പോൾ അത്‌ നമ്മുടെ രാജ്യത്തിന്റെ വികസനത്തിന്‌ ആവാതെ വയ്യല്ലോ?

ആസിയാൻ,ആസിയാൻ എന്ന് പറഞ്ഞ്‌ കേട്ടതല്ലാതെ സംഗതി എന്താണെന്ന് സരസനും ആദ്യം പിടികിട്ടിയില്ല.പിന്നെയാണ്‌ അത്‌ കുറേ രാജ്യങ്ങൾ തമ്മിൽ സ്വതന്ത്രവ്യാപാരക്കരാറിൽ ഏർപ്പെടാനുള്ള ഒരു ഏർപ്പാടാണെന്ന്.അതിനിപ്പോ നമുക്കെന്താ അല്ലേ?ആസിയാൻ എന്നത്‌ ആഗോളവൽക്കരണത്തിന്റെ ഒരു ഉൽപ്പന്നമാണെന്ന് അറിയാമോ?

ദേ പിന്നേം ആഗോളവൽക്കരണം ഒന്നു പോടേ സരസാ...............ചിരിക്കാനുള്ള കാര്യമല്ല കേട്ടോ.ആസിയാൻ കരാറിൽ ഏർപ്പെടുന്ന രാജ്യങ്ങൾ തമ്മിൽ സാധനകൈമാറ്റങ്ങൾ അഥവാ വ്യാപാരം സുഗമമാക്കുക എന്നതാണ്‌ ഉദ്ദേശം.അതിനായി ഓരോ രാജ്യങ്ങൾക്കും ആസിയാനിലെ മറ്റ്‌ അംഗരാജ്യങ്ങളിൽ ഇഷ്ടാനുസരണം ഉൽപ്പന്നങ്ങൾ ഇറക്കുമതി ചെയ്യാം.ഇത്‌ തടയാൻ അതാത്‌ രാജ്യങ്ങൾക്ക്‌ അധികാരം ഉണ്ടാകില്ല.അതായത്‌ ഇന്ത്യയിൽ എന്തൊക്കെ സാധനങ്ങൾ ഇറക്കുമതി ചെയ്യണമെന്ന് തീരുമാനിക്കുന്നത്‌ ഇന്ത്യയല്ല.മറ്റ്‌ രാജ്യങ്ങൾ ആയിരിക്കും.

കരാറിലെ മറ്റൊരു പ്രധാനവ്യവസ്ഥയാണ്‌ ഇറക്കുമതി തീരുവ ഒഴിവാക്കുക എന്നത്‌.ചില ഉൽപ്പന്നങ്ങളെ നെഗറ്റീവ്‌ പട്ടികയിൽ ഉൾപ്പെടുത്തി തീരുവ ഒഴിവാക്കാതെ സംരക്ഷിക്കുമെന്ന് കേന്ദ്രം പറയുന്നുണ്ട്‌.പക്ഷെ അതിനോടൊപ്പം ചേർത്ത്‌ വായിക്കേണ്ട ഒന്നുണ്ട്‌.ഘട്ടം ഘട്ടമായി തീരുവ കുറക്കണം എന്നൊരു വ്യവസ്ഥ കരാറിലുണ്ട്‌.ഇത്‌ നെഗറ്റീവ്‌ പട്ടികയിലുള്ള സാധനങ്ങളുടെ കാര്യത്തിലാണ്‌ ഉണ്ടാവുക.അതായത്‌ ഒരു ഉൽപ്പന്നവും സംരക്ഷിക്കപ്പെടില്ല എന്നർത്ഥം.

മറ്റ്‌ രാജ്യങ്ങളിൽ നിന്ന് സാധനങ്ങൾ ഇന്ത്യയിലേക്ക്‌ ഒഴുകുമ്പോൾ സ്വാഭാവികമായും സാധനവില കുറയും.അത്‌ നല്ലതല്ലേ എന്ന് സരസനും ചിന്തിച്ചു.പക്ഷെ വിവരമുള്ളവർ പറഞ്ഞപ്പോഴാണ്‌ സംഗതിയുടെ കിടപ്പ്‌ പിടികിട്ടിയത്‌.മറ്റ്‌ രാജ്യങ്ങളിലൊക്കെ ഉൽപ്പാദനച്ചെലവ്‌ വളരെ കുറവാണ്‌.ഉദാഹരണത്തിന്‌, ഫിലിപ്പീൻസ്‌ തേങ്ങയുടെ കാര്യത്തിലും,തായ്‌വാൻ റബ്ബറിന്റെ കാര്യത്തിലും ഒക്കെ ഉൽപ്പാദനത്തിന്റെ കാര്യത്തിൽ വളരെ മുൻപിലാണ്‌.അവിടത്തെ ഉൽപ്പാദനച്ചെലവ്‌ വളരെ കുറവും.സ്വാഭാവികമായി ഉൽപ്പന്നങ്ങളുടെ വിലയും കുറയും.അപ്പോൾ ഇവിടത്തെ കർഷകർക്ക്‌ ഉൽപ്പന്നങ്ങളുടെ വില കുറക്കേണ്ടിവരും.ഇപ്പോൾ തന്നെ കടം കയറി നട്ടം തിരിയുന്ന 'ഇന്ത്യൻ' കർഷകന്‌ ഇതിൽ കൂടുതൽ സഹായങ്ങൾ ചെയ്ത്‌ കൊടുക്കാൻ മറ്റാർക്ക്‌ കഴിയും.

കേരളത്തിന്റെ പഴയ കൽപ്പവൃക്ഷമായ തെങ്ങിന്റേയും പുതിയ കൽപ്പവൃക്ഷമായ റബ്ബറിന്റേയും കാര്യം അധോഗതി തന്നെ.പിന്നെ കറുത്ത പൊന്നും സുഗന്ധദ്രവ്യങ്ങളും കൂടിയാകുമ്പോൾ പൂർത്തിയായി.ആത്മഹത്യക്ക്‌ മുറുക്കിയ കയർ നമ്മുടെ കർഷകർ ഊരിമാറ്റിയിട്ട്‌ അധികമായിട്ടില്ല.ഇനിയും കയറുകളിൽ ശരീരങ്ങൾ തൂങ്ങിയാടിയാൽ മൻമോഹൻസിംഗ്‌, അതിന്‌ നിങ്ങൾ ഉത്തരം പറയേണ്ടിവരും.

പിന്നെ കേരളത്തിനോടുള്ള പ്രധാനമന്ത്രിയുടെ പ്രത്യേകസ്നേഹത്തെ കുറിച്ച്‌ പറയാതെ വയ്യ.ആദ്യം കുഞ്ഞൂഞ്ഞ്‌ ഇവിടന്ന് എടുത്ത്‌ പിടിച്ച്‌ ചെന്നപ്പോൾ എല്ലാം നോക്കിക്കോളാം എന്ന് സർദാർജി ഉറപ്പ്‌ കൊടുത്തത്താണ്‌.അതും കേട്ടുംകൊണ്ട്‌ വന്ന കുഞ്ഞൂഞ്ഞ്‌ മാധ്യമങ്ങൾക്കും ഉറപ്പ്‌ കൊടുത്തു.പിന്നീട്‌ നമ്മുടെ മുഖ്യനും കൂട്ടരും ചെന്നപ്പോഴും കിട്ടി ചുമ്മാ ഒരു ഉറപ്പ്‌.ഒടുവിൽ പറഞ്ഞ വാക്ക്‌ പഴയ ചാക്കിനേക്കാൾ പഴകിയതാണെന്ന് തെളിയിച്ച്‌ കൊണ്ട്‌ സർദാർജി കാല്‌ മാറി.

വികസനത്തിന്റെ മണി കിലുക്കികൊണ്ട്‌ മന്ത്രിമാർ 'റെയിൽവേവികസനഗവേഷണയാത്രകൾ' നടത്തുന്നത്‌ കണ്ട്‌ നെടുവീർപ്പിട്ടുകൊണ്ട്‌ സരസന്റെ ആത്മഗതം:"ഹെന്റമ്മോ. . . . .! ! !"

പിൻകുറിപ്പ്‌:ഒടുവിൽ ബർമ്മീസ്‌ ഭരണകൂടം ആങ്ങ്‌ സാൻ സൂകിയെ ഒന്നര വർഷത്തേക്ക്‌ വീട്ടുതടങ്കലിൽ ആക്കി.ഇത്രനാളും അന്യായമായി അവരെ തടവിൽ പാർപ്പിച്ചിരുന്ന പട്ടാളം ഇത്രയെങ്കിലും കാട്ടിയില്ലെങ്കിലേ അത്ഭുതമുള്ളൂ.അധികാരമാണല്ലോ 'ഈശ്വരൻ'.

ഇവര്‌ കൊള്ളാമല്ലോ......................

2009-08-01T15:58:00.005+05:30

"ആഹ്ലാദിക്കുവിൻ.....ആഘോഷിപ്പിൻ............ഇന്ന് നമ്മുടെ വിജയദിനമാണ്‌.ജനാധിപത്യരീതിയിൽ തെരഞ്ഞെടുക്കപ്പെട്ട ഒരു സർക്കാരിനെ കഴുത്തിന്‌ പിടിച്ച്‌ പുറത്താക്കിയിട്ട്‌ ഇന്നേക്ക്‌ 50 വർഷം തികഞ്ഞു.ഇങ്ങനെ ഒരു ധീരകൃത്യത്തിൽ ഭാഗഭാക്കായ എല്ലാവരെയും ഓർമ്മിക്കുന്നതോടൊപ്പം ഇനിയും ഒരു വിമോചനസമരം ആസൂത്രണം ചെയ്യാനുള്ള പദ്ധതികൾക്കായി നിർദ്ദേശങ്ങൾ സമർപ്പിക്കാനും നിങ്ങളോട്‌ അപേക്ഷിക്കുന്നു."

* * * * * * * * * * * * * *
ലോകത്തിൽ ബാലറ്റിലൂടെ അധികാരത്തിൽ എത്തിയ ആദ്യത്തെ കമ്മ്യൂണിസ്റ്റ്‌ മന്ത്രിസഭയെ നിങ്ങൾ ഭരിച്ചാൽ ശരിയാവില്ല എന്നു മുട്ടാപ്പോക്ക്‌ പറഞ്ഞ്‌ കുതന്ത്രങ്ങളിലൂടെ പുറത്താക്കിയിട്ട്‌ ജൂലൈ 31-ന്‌ 50 വർഷം തികയുന്നു.അതും ജനാധിപത്യത്തിന്റെ അപ്പോസ്‌തലന്മാർ എന്ന് പറഞ്ഞ്‌ നടക്കുന്ന കോൺഗ്രസ്സുകാർ തന്നെ.അന്ന് ഇതിനായി പറഞ്ഞ ന്യായങ്ങൾ കേട്ടപ്പോൾ സരസനു ചിരി പൊട്ടി.

അന്ന് വിമോചനസമരം തുടങ്ങുമ്പോൾ കോൺഗ്രസ്സുകാർ മാത്രമായിരുനു മറുചേരിയിൽ.പിന്നീട്‌ ക്രിസ്‌ത്യൻ മാനേജ്‌മന്റും നായർസമുദായവും ചേർന്നു.അന്ന് അവർ നാടൊട്ടുക്ക്‌ പറഞ്ഞ്‌ നടന്നത്‌ കമ്മ്യൂണിസ്റ്റ്കാർ ഇവിടത്തെ അമ്പലങ്ങളും പള്ളികളും തകർക്കും.ആരാധനാസ്വാതന്ത്ര്യം നിഷേധിക്കപ്പെടും,ന്യൂനപക്ഷവിദ്യാഭ്യാസ സ്ഥാപനങ്ങൾ കയ്യടക്കും എന്നൊക്കെയാണ്‌.1959-ന്‌ ശേഷം പല തവണ കമ്മ്യൂണിസ്റ്റ്‌ സർക്കാരുകൾ അധികാരത്തിലെത്തി.അപ്പോൾ സ്വാഭാവികമായും പള്ളികളും അമ്പലങ്ങളും ഒക്കെ തകർക്കപ്പെടണമല്ലോ?അങ്ങനെ തകർക്കപ്പെട്ട ആരാധനാലയങ്ങൾ കണ്ടു പിടിക്കാനുള്ള ഒരു ഗവേഷണം നടത്താനുള്ള ശ്രമത്തിലാണ് സരസൻ.എന്തെങ്കിലും തുമ്പോ വാലോ കിട്ടിയാൽ ഉടനെ സരസനെ അറിയിക്കുക.

പിന്നെ വിദ്യാഭ്യാസസ്ഥാപനങ്ങളുടെ കാര്യം പറയണ്ടല്ലോ...ന്യൂനപക്ഷമാനേജ്‌മന്റുകളുടെ 'കാര്യക്ഷമമായ' നടത്തിപ്പ്‌ കാരണം ഈ സ്ഥാപനങ്ങളെയൊക്കെ വിദ്യാലയങ്ങൾ എന്നതിനെക്കാൾ കച്ചവടസ്ഥാപനമെന്നോ ബ്ലേഡ്‌ എന്നോ ഒക്കെ വിളിക്കുന്നതാണ്‌ നല്ലത്‌.

വായനക്കാർ വിചാരിക്കും ഈ സരസന്‌ വേറെ പണിയില്ലേ ഇപ്പോൾ ഇതൊക്കെ പറയുന്നതെന്തിനാ എന്ന്.ഇന്നലെ വിമോചനസമരത്തിന്റെ പേരും പറഞ്ഞ്‌ നടന്ന കോപ്രായങ്ങൾ കണ്ട്‌ പറഞ്ഞ്‌ പോയതാണേ.ഇന്നലെ വിമോചന സമരത്തിന്റെ സുവർണ്ണജൂബിലി ആഘോഷിക്കാൻ ഒരുപാട് പേരെയൊക്കെ വിളിച്ച്‌ കൂട്ടി ചില കുഞ്ഞാടുകൾ നടത്തിയ പ്രഹസനങ്ങൾ കണ്ട്‌ "ഇവന്മാർ ഇതു വരെ നന്നായില്ലേ?" എന്ന് നെടുവീർപ്പിട്ട് പോയി സരസൻ.വിമോചനസമരം അത്യാവശ്യമായിരുന്നുപോലും.അന്ന് ന്യൂനപക്ഷത്തിന്റെ മേൽ നടത്തിയ ചില കടന്ന് കയറ്റങ്ങളുടെ പേരിൽ ആയിരുന്നു അത്രെ വിമോചനസമരം നടത്തിയത്‌.അല്ലാതെ കയ്യിലുള്ള സ്കൂളുകൾ പോവും എന്ന് ഭയന്നിട്ടൊന്നുമല്ല.പാവങ്ങൾ.. സത്യം വിളിച്ച്‌ പറയുന്നത്‌ കണ്ടോ?

ഒരു ചെറിയ വ്യാമോഹത്തിന്റെ തിരയിളക്കങ്ങളും അവിടെ കണ്ടു.ഒരു രണ്ടാം വിമോചനസമരം.അത്‌ നടത്തുന്നതിന് ഒരു കാരണവും പറഞ്ഞു ,രണ്ടാം മുണ്ടശ്ശേരി കളിയാണ്‌ സർക്കാർ കളിക്കുന്നത്‌ എന്ന്.ഇപ്പോ എങ്ങനെയുണ്ട്‌?

മുണ്ടശ്ശേരി എന്ന ക്രാന്തദർശിയായ ഭരണാധികാരി ഭാവിയിലേക്കായി കരുപ്പിടിപ്പിച്ചതായിരുന്നു 1957-ലെ വിദ്യാഭ്യാസനിയമം.പൊതുഖജനാവിൽ നിന്ന് ശമ്പളം വാങ്ങുന്ന അധ്യാപകരെ സർക്കാർ തന്നെ നിയമിക്കും എന്ന് പറയുന്നതിൽ പക്ഷെ സ്കൂൾ മാനേജ്‌മന്റിന് എന്തോ പന്തികേട്‌ ഉള്ളത്‌ പോലെ തോന്നി.അവർ ആളിനെ ഇറക്കി കളിച്ചു.മതത്തിന്റെ പേരും പറഞ്ഞ്‌ വിശ്വാസികളെ കളിപ്പിക്കുകയും ചെയ്തു.എന്നിട്ട്‌ ഇപ്പോഴും നീട്ടിയും കുറുക്കിയും അതിനെ ന്യായീകരിക്കുകയാണല്ലോ ഇവിടെ ചിലർ.

വിമോചനസമരത്തിന്റെ വേറെ ചില ഗുണഭോക്താകളും സുവർണ്ണജൂബിലി വർണ്ണാഭമായി കൊണ്ടാടി.ഒരു കേന്ദ്രമന്ത്രിയെ കൊണ്ടുവന്ന് കൊഴുപ്പിച്ചില്ലേ ചടങ്ങ്‌.കേന്ദ്രമന്ത്രിമാരെക്കൊണ്ട്‌ വേറെ ഉപയോഗമൊന്നും ഇല്ല.എന്നാൽ പിന്നെ ഇങ്ങനെയെങ്കിലും ഒരു ഉപയോഗം ഉണ്ടാകട്ടെ എന്ന് വിചാരിച്ചാണോ എന്തോ?അതെന്തായാലും പുള്ളി വന്നത്‌ വെറും കയ്യോടെ ആയിരുന്നില്ല.ഒരു ഗമണ്ടൻ കണ്ടുപിടിത്തവുമായിട്ടാണ്‌.അത്‌ കേട്ട്‌ തലമുതിർന്ന കൊൺഗ്രസ്സ്കാർ പോലും ആകാശത്തേക്ക്‌ നോക്കി ‘എന്റെ ഹൈക്കമാന്റമ്മച്ചിയേ‘ എന്ന് വിളിച്ചെന്നാണ്‌ സരസന്‌ കിട്ടിയ റിപ്പോർട്ട്‌.കണ്ടുപിടിത്തം ഇത്രയെ ഉള്ളു-കേരളത്തെ ഒരു സ്വതന്ത്രരാഷ്ട്രമാക്കാൻ 1957-ലെ ഇ എം എസ്‌ സർക്കാർ ശ്രമിച്ചെന്ന്.കൊള്ളാമല്ലോ.പത്ത്‌ അമ്പത്‌ വർഷത്തിന്‌ ശേഷമാണേലും ഇതിയാൻ മഷിയിട്ട്‌ കണ്ട്‌ പിടിച്ചു കളഞ്ഞല്ലോ.ഇതിയാൻ വയലാറും വയലേഴും ഒക്കെ നീന്തികടന്നില്ലെങ്കിലെ അൽഭുതമുള്ളു.

ഈ വിമോചനസമരഏകോപനസമിതിക്കാർ വേറെ ചില വാർത്തകൾ ശ്രദ്ധിച്ചോ ആവോ?വിമോചനസമരത്തിന്‌ കേരളം മുഴുവൻ പ്രസംഗിച്ചു നടന്ന ജ.കെ.ടി. തോമസ്‌ സമരത്തിൽ പങ്കെടുത്തതിനെ കുറിച്ചോർത്ത് പശ്ചാത്തപിച്ചതാണ്‌ ഒരു വാർത്ത.മറ്റൊന്ന് വിമോചനസമരത്തിന്റെ കൺ‌വീനർ കെ.എം.ചാണ്ടിയുടെ വെളിപ്പെടുത്തലുകളും.അദ്ദേഹത്തിന്റെ സഹോദരനായ പാലാ കെ.എം.മാത്യു രചിച്ച 'വരിക വരിക സഹജരെ' എന്ന പുസ്തകത്തിൽ അദ്ദേഹത്തിന്റെ ചില അഭിപ്രായങ്ങൾ ഉണ്ട്‌-വിമോചനസമരത്തിലൂടെ സമ്പന്ന-മത-സമുദായിക സംഘടനകൾ കേരളത്തെ വർഗ്ഗീയശക്തികളുടെ വരുതിയിലാക്കി എന്ന് അദ്ദേഹം പറയുന്നു.ഭരണഘടനാസംരക്ഷണത്തിന്റെ പേരിൽ ക്രിസ്ത്യൻ മാനേജുമന്റുകൾ അഹങ്കരിച്ചിരുന്നു എന്നും മുണ്ടശ്ശേരിയുടെ വിദ്യാഭ്യാസനിയമം അധ്യാപകരെ അംഗീകരിക്കുന്നതായിരുന്നു എന്നും അദ്ദേഹം പറയുന്നു-ഈ വാർത്തകളൊക്കെ നമ്മുടെ മുഖ്യധാരാമാധ്യമ മേലാളന്മാർക്ക് കണ്ണീന് പിടിക്കാത്തത് കൊണ്ട് അപ്രത്യക്ഷമായി എന്നാണറിവ്.
ഭൂപരിഷ്കരണത്തിലൂടെ പാവപ്പെട്ടവന്റെ നട്ടെല്ലുയർത്തിയ,വിദ്യാഭ്യാസപരിഷ്കരണങ്ങളിലൂടെ ഒരു മാറ്റത്തിന് തുടക്കം കുറിക്കാൻ ശ്രമിച്ച,പ്രഗത്ഭമതികളായ വ്യക്തികളുടെ ഒരു അധികാരകേന്ദ്രത്തെ പുറത്താക്കി ജനാധിപത്യത്തെ കശാപ്പുചെയ്ത 1959 ജൂലൈ 31 ജനാധിപത്യകേരളത്തിലെ ഒരു കരിദിനമാണെന്ന് സരസന്‌ സംശയമില്ല. നിങ്ങൾക്കോ?

ഇത്രയൊക്കെയായിട്ടും രണ്ടാം വിമോചനസമരത്തിനായി കോപ്പ്‌ കൂട്ടുന്ന ഇവന്മാരുടെയൊക്കെ തൊലിക്കട്ടി കണ്ട്‌ കാണ്ടാമൃഗവും പിന്നെ സരസനും ഒരുമിച്ച്‌ ഒരാത്മഗതം:"ഹെന്റമ്മോ. . . . .! ! !"

പിൻകുറിപ്പ്‌:ഇന്ത്യൻ സിനിമാസംഗീതചരിത്രത്തിലെ ചക്രവർത്തിയായി,മനുഷ്യമനസ്സുകളിൽ കുളിർമഴയായി പെയ്തിറങ്ങിയ,ഇന്നും മരിക്കാത്ത ആ അനശ്വരശബ്ദത്തിന്റെ ഉടമ നമ്മെ വിട്ട്‌ പിരിഞ്ഞിട്ട്‌ 29 വർഷമായി.മഹാനായ റഫി സാഹ്ബ്‌ താങ്കൾ ഇന്നും ജീവിക്കുന്നു ഞങ്ങളുടെ മനസ്സുകളിൽ.

എന്നിട്ടിപ്പൊ എന്തായി......................?

2009-07-24T16:36:00.000+05:30

ഇപ്പോൾ കേന്ദ്രത്തിലെ യുപിഎ സർക്കാർ കിടന്ന് ചക്രശ്വാസം വലിക്കുന്നത്‌ കാണുമ്പോൾ സരസന്‌ ചിരി വരുന്നു.എന്തൊക്കെയായിരുന്നു.ആണവോർജ്ജം ഒഴുകാൻ പോകുന്നു,പുത്തൻ സാങ്കേതികവിദ്യകൾ കിട്ടാൻ പോകുന്നു,ഇന്ത്യ ആണവരാജ്യങ്ങളിൽ മുൻനിരയിലേക്ക്‌ വരും,അമേരിക്ക നമ്മളെ കെട്ടി പിടിച്ച്‌ ഉമ്മ വക്കും.എന്നിട്ടിപ്പോ എന്തായി?

ആണവവിജ്ഞാനം അമേരിക്കക്കാർ പകർന്ന് തരുന്നതും സ്വപ്നം കണ്ട്‌ വേഴാമ്പലിനെപ്പോലെ വായും തുറന്നിരുന്ന നമ്മുടെ ആണവശാസ്ത്രജ്ഞന്മാർക്ക്‌ ഇനി ധൈര്യമായി വായടക്കാം.ഹിലാരി അമ്മച്ചി ഇന്ത്യയിൽ സുഖവാസത്തിന്‌ വന്നപ്പോൾ പറയുകയാണ്‌:" പൈസ കൊടുത്താൽ റിയാക്ടറും അത്‌ കറക്കാൻ ഇന്ധനവും തരാം.ബട്ട്‌ അത്‌ എങ്ങനെ ഉണ്ടാക്കുന്നു എന്ന് മാത്രം ചോദിക്കരുത്‌ പ്ലീസ്‌ പറയാൻ പറ്റാത്തത്‌ കൊണ്ടാ.ഇനി അതും കൂടി പറഞ്ഞ്‌ തന്നാൽ നിങ്ങൾ ഇന്ത്യക്കാർ ഞങ്ങളെക്കാൾ വളർന്നാലോ എന്ന് ഒബാമഅണ്ണന് പേടി?അതൊന്നും കണ്ട്‌ നിൽക്കാനുള്ള കരുത്ത്‌ പാവം അമേരിക്കക്കാർക്ക്‌ ഇല്ല.ഇപ്പോ തന്നെ ആ ചൈനയെ കാരണം ഇരിക്കപ്പൊറുതി ഇല്ല.പിന്നെ നിങ്ങളും ആ പാകിസ്ഥാനുമായുള്ള യുദ്ധത്തിന്‌ വിസിലൂതി നിൽക്കുന്നത്‌ കൊണ്ടാ ഞങ്ങൾ പിടിച്ച്‌ നിൽക്കുന്നത്‌.ഞങ്ങളുടെ കയ്യിലുള്ള 18-‍ാമത്തെ അടവാണ്‌ ഇത്‌.അതുകൂടി പോയാൽ പിന്നെ ഞങ്ങൾ പല്ല് പോയ പട്ടികളെപ്പോലെ ആയിപ്പോകും.മാത്രമല്ല നിങ്ങളുമായി കമ്പനി അടിക്കുന്നത്‌ ആ ഇസ്രയേലിന്‌ അത്ര പിടിക്കുന്നില്ല.കെറുവിച്ച്‌ നിൽക്കുവാ.അതുകൊണ്ടാ ഇപ്പോൾ ഒബാമയണ്ണൻ പറഞ്ഞിട്ടുപോലും കേൾക്കാത്തത്‌..അതുകൊണ്ട്‌ സോറി.ഒന്നും തോന്നരുത്‌."

ഹിലാരിയമ്മച്ചി ഇങ്ങനോക്കെ പറഞ്ഞപ്പോ ഇന്ത്യയിൽ എല്ലാവർക്കും നിരാശ തോന്നി.പക്ഷെ ഒരാൾ മാത്രം അപ്പോഴും മിണ്ടാതങ്ങനെ ഇരിക്കുകയാണ്‌.പാവം ഒന്നും അറിഞ്ഞിട്ടില്ല.ഈ കരാർ ഒപ്പിട്ടതേ അദ്ദേഹമല്ല എന്നാണ്‌ പുള്ളിയുടെ ഇരുപ്പിൽ നിന്ന് സരസൻ മനസ്സിലാക്കുന്നത്‌.പാവം അദ്ദേഹത്തിനെ വെറുതെ കുറ്റം പറഞ്ഞു.ഈ കാരാട്ടിനെയൊക്കെ ഞാൻ.....................................

അല്ല ഈ കരാർ ഒപ്പിട്ടത്കൊണ്ട്‌ ഇന്ത്യക്ക്‌ ഉപയോഗമില്ലെങ്കിൽ എന്താ സാമ്പത്തികമാന്ദ്യത്തിൽ പെട്ട്‌ നട്ടം തിരിയുന്ന ഒരു ദരിദ്രരാജ്യത്തെ രക്ഷിക്കാൻ കഴിഞ്ഞില്ലേ?അമേരിക്ക നിലനിൽക്കുന്നത്‌ തന്നെ ഇപ്പോ ഇന്ത്യയുടെ കാരുണ്യത്തിൽ ആണ്‌.അവിടത്തെ റിയാക്ടർ കമ്പനികളുടെ വിൽക്കാതെ കിടന്ന റിയാക്ടറുകൾ നമ്മൾ വാങ്ങുമ്പോൾ പിന്നെ നമ്മൾ ആരെയാണ്‌ സഹായിക്കുന്നത്‌?ഇത്രയൊക്കെയായിട്ടും എന്തിനാ ഒരു സംശയം.ഒരൽപ്പം പൈസ ചെലവാകിയാലെ ഇക്കാലത്ത്‌ ആളാകാൻ പറ്റൂ.അത്‌ അറിയില്ല എന്നുണ്ടൊ,ങേ........?ഇനിയുള്ള ദിനങ്ങൾ ഇന്ത്യയുടെ പോക്ക്‌ കണ്ട്‌ ലോകം മുഴുവൻ കണ്ണും തള്ളി ഇരിക്കും.

ശരിയാ,ഇന്ത്യയുടെ പോക്കിനെ കുറിച്ച്‌ ഓർത്തപ്പോൾ സരസന്റെ കണ്ണ് ഇപ്പോഴേ തള്ളുന്നു.

കണ്ണ് തള്ളിക്കൊണ്ട് സരസന്റെ ആത്മഗതം:“ഹെന്റമ്മോ. . . . .! ! !“

പിൻ‌കുറിപ്പ്:മലയാളസിനിമയിൽ വില്ലനായും സ്വഭാവനടനായും കൊമേഡിയനായും ഒട്ടേറെ നല്ല കഥാപാത്രങ്ങൾക്ക് ജീവൻ നൽകിയ രാജൻ പി ദേവിന് സരസന്റെ ആദരാഞ്ജലികൾ