OpenHouse

അടക്കാതെ പോയ കല്ലറ!

2020-07-28T16:36:00.062+05:30

അടക്കാതെ പോയ കല്ലറ!

നൂറ്റാണ്ട് പിന്നിട്ട കോളേജാണ്, കോട്ടയത്തെ സിഎംഎസ് കോളേജ്. മിഷണറിമാർ കേരളത്തിലെ ആദ്യ ആർട്സ് ആൻഡ് സയൻസ് കോളേജ് സ്ഥാപിക്കുന്ന കാലത്ത് ഇവിടെ നിലമൊരുക്കാനും കാടുവെട്ടാനും പുല്ലരിയാനും ശാരീരികാധ്വാനം ആവശ്യമായി വരുന്ന മറ്റു പലവിധ ജോലികൾക്കുമായി കുറേപ്പേർ ചുങ്കത്ത് താമസമാക്കി. അവർക്ക് പിന്നീട് സിഎസ്ഐ സഭ അഞ്ചുസെന്റ് സ്ഥലം വീതം വീടുവച്ചു നൽകി. ബേക്കർ ജംഗ്ഷനിൽനിന്ന് കോളേജ് ക്യാമ്പസിനു മുന്നിലൂടെവന്ന് ചാലുകുന്നു ചുറ്റി ചുങ്കത്തേയ്ക്ക് ഇറങ്ങുന്ന ചെറിയ വഴിയിൽ സെമിത്തേരിയുടെ പിന്നിലായി സ്ഥാപിച്ച കോളേജ് മാലി, നാഗമ്പടത്തു നിന്ന് ചുങ്കത്തേക്ക് കോളേജ് ക്യാമ്പസിന്റെ പിന്നിലൂടെ പോകുന്ന വഴിയിറമ്പിൽ മീനച്ചിലാറിന്റെ തീരത്തായുള്ള ആറ്റുമാലി, തുടങ്ങിയ സ്ഥലങ്ങളിലായാണ് ഇവരെ പാർപ്പിച്ചത്. ഇവരെല്ലാം മിഷണറിമാരുടെ സ്വാധീനത്താൽ സിഎസ്ഐ സഭാംഗങ്ങളുമായി. അവരിൽ ചിലരുടെയെങ്കിലും പിൻതലമുറ ഇപ്പോഴും സിഎംഎസ് കോളേജിൽ സ്റ്റാഫ് ആയുണ്ട്.

അന്ന് അവിടെ കുടിയേറിപ്പാർത്ത തൊഴിലാളികളുടെ രണ്ടാംതലമുറയിലോ മൂന്നാം തലമുറയിലോ പെട്ട ആളാണ് ഔസേഫ് ജോർജ്ജ്. ദീർഘകാലം കോട്ടയം മുനിസിപ്പാലിറ്റിയിൽ ലാസ്റ്റ് ഗ്രേഡ് (സാനിറ്റേഷൻ) ജീവനക്കാരനായിരുന്നു എന്നാണ് അറിവ്. ഇദ്ദേഹം റിട്ടയർ ചെയ്തിട്ടു തന്നെ മൂന്ന് പതിറ്റാണ്ട് അടുക്കാറാകുന്നു. ഒരു മകൻ അർബുദബാധിതനായി മരിച്ചു. ഒരു മകൾ രോഗപീഡ മൂലം കഷ്ടപ്പെടുന്നു. ഭാര്യ പണ്ടേ മരിച്ചു. ദരിദ്രജീവിതം നയിക്കുന്ന ഈ 83കാരൻ വൃദ്ധനാണ് കഴിഞ്ഞ ദിവസം കോട്ടയം മെഡിക്കൽ കോളേജ് ആശുപത്രിയിൽ കോവിഡ് ബാധിച്ചു മരിച്ചത്.

ഇദ്ദേഹത്തിന്റെ മൃതദേഹം സംസ്കരിക്കാൻ കോട്ടയം മുട്ടമ്പലത്തെ വൈദ്യുത ശ്മശാനത്തിലേക്ക് എത്തിച്ചെങ്കിലും ലൂർദ്ദ് വാർഡ് കൗൺസിലർ ബിജെപി നേതാവ് ഹരികുമാറിന്റെ നേതൃത്വത്തിൽ സമീപവാസികളെ സംഘടിപ്പിച്ച് തടഞ്ഞു. പ്രശ്നം പരിഹരിക്കാനെത്തിയ സ്ഥലം എംഎൽഎ തിരുവഞ്ചൂർ രാധാകൃഷ്ണനും ഒടുവിൽ പ്രതിഷേധക്കാരോടൊപ്പം കൂടി. തെരഞ്ഞെടുപ്പ് അടുത്തുവരുന്ന സമയത്ത് ഇങ്ങനെ എന്തെല്ലാം ഇനി കാണാനിരിക്കുന്നു. ഏതായാലും രാത്രി വൈകി പൊലീസ് ബന്തവസിൽ മൃതദേഹം അവിടെത്തന്നെ സംസ്കരിച്ചു.

ഹരി ചില്ലറക്കാരനല്ല. ചെറിയാൻ ചാക്കോയുടെയും മന്നൻ വിനോദിന്റെയുമൊക്കെ വിഹാരകാലത്ത് കോട്ടയം സിഎംഎസിൽ പഠനം. ഭൂരിപക്ഷം സീറ്റുകളിലും എസ്എഫ്ഐ വിജയിച്ച കോളേജ് യൂണിയൻ തെരഞ്ഞെടുപ്പിൽ എഡിറ്റർ സീറ്റിൽ അട്ടിമറി വിജയം നേടിയ എബിവിപി സ്ഥാനാർത്ഥി. അതേ ക്യാമ്പസിൽ അജീഷ് വിശ്വനാഥൻ ‘ദണ്ഡപ്രയോഗത്തിൽ’ കൊല്ലപ്പെട്ടിട്ട് രണ്ടുവർഷം പോലും ആയിട്ടുണ്ടാവില്ല. എന്നിട്ടും അവിടെ നിന്ന് എബിവിപി പാനലിൽ ജയിക്കണമെങ്കിൽ എടുത്ത പണി ഒന്നാലോചിച്ചു നോക്കണം.

മൃതദേഹം തടഞ്ഞ സംഭവം കേരളമാകെ ചർച്ചയായി. ഹരി വിശദീകരണവുമായി ഫേസ്ബുക്കിൽ എത്തിയെങ്കിലും നാട്ടിലാകെ നാറി. ഇനി ഡാമേജ് കൺട്രോളാണ്. അതിനെന്താണ് എളുപ്പവഴി? അവരുടെ സ്ഥിരം കുത്തിത്തിരിപ്പു തന്നെ. വർഗീയം!

പരേതനെ കബറടക്കാൻ സമ്മതിക്കാതെയിരുന്ന ക്രിസ്ത്യൻ പുരോഹിതന്മാർക്കെതിരെ നടപടിയെടുത്തിട്ടു മതി, ഹരിക്കെതിരെ സംസാരിക്കാൻ എന്നാണ് തിട്ടൂരം. ശാന്തം പാപം!

നമുക്കറിയാം, പൊതുശ്മശാനങ്ങൾ മാറ്റിവച്ചാൽ ജാതിയും മതവും സമുദായവും സഭയും ഒക്കെ തിരിച്ചാണ് നമുക്ക് ശ്മശാനങ്ങൾ. ക്രിസ്ത്യാനികൾ പൊതുവെ കുഴിച്ചിടുകയാണെങ്കിലും കത്തോലിക്കാ സഭ അടുത്തിടെ ഔദ്യോഗികമായി തന്നെ മൃതദേഹം ദഹിപ്പിക്കാൻ അനുമതി കൊടുത്തിട്ടുണ്ട്.

ഇദ്ദേഹവും കുടുംബവും മുമ്പ് സിഎസ്ഐ ആയിരുന്നുവെങ്കിലും 35 വർഷം മുമ്പ് സഭ മാറുകയും അസംബ്ലീസ് ഓഫ് ഗോഡ് എന്ന പെന്തക്കോസ്ത് സഭയിൽ അംഗങ്ങളാവുകയും ചെയ്തു. കോട്ടയം മാങ്ങാനത്തുള്ള അസംബ്ലീസ് ഓഫ് ഗോഡ് പ്രാർത്ഥനാ ഹാളിലാണ് ഇദ്ദേഹം സഭ കൂടിയിരുന്നത്. അവർക്ക് അതിനോടു ചേർന്നു തന്നെ അഞ്ചാറുസെന്റ് സ്ഥലത്ത് സെമിത്തേരിയുണ്ട്.

പെന്തക്കോസ്തുകാരെ സംബന്ധിച്ചിടത്തോളം മരിച്ചവർക്കുവേണ്ടിയുള്ള പ്രാർത്ഥനയൊന്നുമില്ല. കബറടക്കത്തോടു കൂടി പരേതന്റെ പരിപാടി തീർന്നു. പിന്നീട് നാല്പതാം അടിയന്തിരമോ ഓർമ്മ പ്രാർത്ഥനയോ ധൂപം വയ്ക്കലോ അങ്ങനെ പരമ്പരാഗത ക്രിസ്ത്യൻ സഭകൾ പാലിക്കുന്ന ആചാരങ്ങളൊന്നും തന്നെയില്ല. അതുകൊണ്ടു തന്നെ വിശാലമായ സെമിത്തേരിയുടെ ആവശ്യവും അവർക്കില്ല.

തങ്ങളുടെ സെമിത്തേരിയിൽ മൃതദേഹം അടക്കം ചെയ്യാമെന്ന് പാസ്റ്ററും മറ്റ് സഭാധികാരികളും പറഞ്ഞെങ്കിലും ആരോഗ്യപ്രവർത്തകർ സമ്മതിച്ചില്ല. സ്ഥലപരിമിതി മൂലം ഇവരുടെ സെമിത്തേരിയിൽ കുഴികുത്താൻ ഇടമില്ലാത്തതാണു കാരണം. അവിടെയുള്ളതത്രയും സെല്ലാറുകളാണ്. അതായത്, കോൺക്രീറ്റ് വോൾട്ടുകളിലേക്ക് മൃതദേഹം അടങ്ങുന്ന പെട്ടി കുത്തിക്കയറ്റിവയ്ക്കും. പുതിയ ആളെ വയ്ക്കണമെങ്കിൽ പെട്ടിയോടെ തള്ളി മൃതദേഹം വോൾട്ടിന്റെ മറുഭാഗത്തുള്ള കുഴിയിലേക്ക് തട്ടിയിടും. ഇതാണ് രീതി.

സംസ്ഥാനം പിന്തുടരുന്ന കോവിഡ് പ്രോട്ടോക്കോൾ പ്രകാരം വോൾട്ടിൽ മൃതദേഹം അടക്കാൻ പാടില്ല. 12 അടി താഴ്ചയിൽ കുഴിയെടുത്ത് മൂടണം. ഇതാണ് ആരോഗ്യപ്രവർത്തകർ തടസ്സവാദം ഉന്നയിക്കാൻ കാരണം.

പെന്തക്കോസ്തുകാരന്റെ മൃതദേഹം സിഎസ്ഐ പള്ളി സെമിത്തേരിയിൽ അടക്കാൻ സമ്മതിച്ചില്ലാ എന്നാണ് സംഘികളുടെ വാദം. തിരുവനന്തപുരത്തെ സകല മൃദുസംഘി വാട്സ് ആപ് ഗ്രൂപ്പുകളിലും ഇതാണ് ചർച്ച. എന്നാൽ അസംബ്ലീസ് ഓഫ് ഗോഡ് ഒരു ഇവാഞ്ചലിസ്റ്റ് പെന്തക്കോസ്ത് സഭയാണെന്നും അവിടെ പാസ്റ്റർമാരും ബ്രദറന്മാരുമാണുള്ളതെന്നും സിഎസ്ഐ ആകട്ടെ എപ്പിസ്കോപ്പൽ പാരമ്പര്യമുള്ള ആംഗ്ലീക്കൻ പ്രൊട്ടസ്റ്റന്റ് സഭയാണെന്നും രണ്ടും വെവ്വേറെ ക്രിസ്ത്യൻ വിഭാഗങ്ങളാണെന്നും ഈ പ്രചാരണം കണ്ട് തെറ്റിദ്ധരിക്കുന്നവർക്ക് മനസ്സിലാകില്ല. അവരെ സംബന്ധിച്ച് ക്രിസ്ത്യാനിയെ കബറടക്കാൻ പള്ളീലച്ചൻ സമ്മതിച്ചില്ല എന്ന പ്രസ്താവത്തിനാണ് വിശ്വാസ്യത. സത്യം ചെരിപ്പിട്ടുവരുമ്പോഴേക്കും നുണ ആറുപ്രാവശ്യം ലോകം ചുറ്റിവരുമെന്ന് പറയുന്നത് എത്ര ശരി!

സംഘി പ്രചാരണത്തിന്റെ ഒരു സാമ്പിൾ കാട്ടാം. (അവയിലെ അവകാശവാദങ്ങൾ തെറ്റിദ്ധരിപ്പിക്കുന്നതും ദുരുപദിഷ്ടവുമാണ്. ഓരോ ഭാഗത്തേയും സംബന്ധിച്ച എന്റെ കമന്റുകൾ ബ്രാക്കറ്റിൽ കൊടുക്കാം).

കോട്ടയം മുത്തമ്പലത്തെ ശ്മശാനം ഹിന്ദുക്കൾക്ക് വേണ്ടി കൊടുത്തതാണ്

[അല്ല. അത് മുനിസിപ്പൽ ക്രിമറ്റോറിയമാണ്. അവിടെ ആർക്കും ശവദാഹം നടത്താം. സ്ഥലപ്പേര് മുട്ടമ്പലമെന്നാണ്, മുത്തമ്പലമല്ല.]

അജ്ഞാത ജഡങ്ങളും അവിടെ ദഹിപ്പിക്കാറുണ്ട്

ഒരു എതിർപ്പും ഉണ്ടായിട്ടില്ല നാളിന്നു വരെ

[ശരിയാണ്]

ഹൈന്ദവ ആചാര രീതിയിലാണ് കാര്യങ്ങൾ ചെയ്യാറുള്ളത്

[ഭാഗികമായി ശരി. ഹിന്ദു മതവിശ്വാസികളായ ആളുകളുടെ ശവം ദഹിപ്പിക്കുമ്പോൾ ഹൈന്ദവാചാരം പാലിക്കും. അല്ലാത്ത കേസുകളിൽ അങ്ങനെയല്ല.]

കോവിഡ് മൂലം മരണപ്പെട്ട ഔസേപ്പ് എന്നയാൾ ഉൾപ്പെടുന്ന സഭയ്ക്ക് ടൗണിൽ തന്നെ മിനിമം 100 ഏക്കർ സ്ഥലമുണ്ടത്രെ

[അസംബന്ധം. അസംബ്ലീസ് ഓഫ് ഗോഡ് എന്ന പെന്തക്കോസ്ത് സഭയിലെ അംഗങ്ങൾ ബഹുഭൂരിപക്ഷവും ദരിദ്രരും പീഡിതരുമാണ്. പെന്തക്കോസ്ത് വിശ്വാസത്തിലേക്കു വരുന്ന സിറിയൻ ക്രിസ്ത്യാനികൾ സ്വർഗീയ വിരുന്ന് പോലെയുള്ള ന്യൂജനറേഷൻ സഭകളിലേക്കാണു പോകുന്നത്. അസംബ്ലീസ് ഓഫ് ഗോഡ് അംഗങ്ങൾ പ്രാർത്ഥനാ ഹാളിലോ വീടുകളിലോ തുറന്ന സ്ഥലങ്ങളിലോ ഒക്കെയാണ് പ്രാർത്ഥിക്കുക. അവർക്ക് പള്ളികളില്ല. അവകാശപ്പെടുംപോലെ ഏക്കർ കണക്കിനു ഭൂമിയൊന്നും അവർക്ക് നഗരമദ്ധ്യത്തിലില്ല.]

അപ്പോഴാണ് അന്യൻ വിയർക്കുന്ന കാശിനു അപ്പവും തിന്ന് വീഞ്ഞും കുടിച്ച് കഴിയുന്ന പളു പളുത്ത കുപ്പായമിട്ട മെത്രാച്ചന്മാർ ആട്ടിയത്

"പൊതു ശ്‌മശാനത്തിൽ കൊണ്ട് കത്തിച്ചോളാൻ "

[വീണ്ടും അസംബന്ധം. പെന്തക്കോസ്ത് സഭകളിൽ പൗരോഹിത്യ പിന്തുടർച്ചയോ അഭിഷിക്തരായ പട്ടക്കാരോ (പുരോഹിതന്മാർ) മേൽപ്പട്ടക്കാരോ (മെത്രാപ്പൊലീത്തമാർ) ഇല്ല. ബിഷപ്പുമാർക്ക് അവരുമായി ഒരു ബന്ധവുമില്ല. പെന്തക്കോസ്ത് സഭകളുടെ നേതാക്കന്മാർ പാസ്റ്റർമാരാണ്. തങ്ങളിൽപെട്ടവരെ അവർ സഹോദരാ എന്നാണ് സംബോധന ചെയ്യുന്നത്. മേൽപരാമർശിച്ച കേസിൽ പരേതന്റെ മൃതശരീരം തങ്ങളുടെ സെമിത്തേരിയിൽ സംസ്കരിക്കാൻ അവർ തയ്യാറായിരുന്നു. എന്നാൽ മാങ്ങാനത്തെ (മന്ദിരം) അവരുടെ പ്രാർത്ഥനാ മന്ദിരത്തോടു ചേർന്നുള്ള അല്പസ്ഥലത്ത് തയ്യാറാക്കിയ സെമിത്തേരിയിൽ ഉള്ളത് സെല്ലുലാർ വോൾട്ട് ആണ്. അതിലേക്ക് ശവപ്പെട്ടി കയറ്റി ഉന്തിവയ്ക്കുകയാണു ചെയ്യുക. പുതിയ ശരീരം അടക്കം ചെയ്യേണ്ടപ്പോൾ മുമ്പ് അടക്കം ചെയ്തത് പെട്ടിയോടു കൂടി കോൺക്രീറ്റ് വോൾട്ടിനു പിന്നിലെ കുഴിയിലേക്കു തള്ളിയിടും. എന്നാൽ കോവിഡ് പ്രോട്ടോക്കോൾ പ്രകാരം മൃതശരീരം 12 അടി താഴ്ചയിൽ കുഴിയെടുത്ത് അടക്കുകയോ അല്ലാത്ത പക്ഷം ദഹിപ്പിക്കുകയോ ചെയ്യണം. പ്രാർത്ഥനാലയത്തിനു കേടുപറ്റാതെ ഇത്ര ആഴത്തിൽ കുഴിയെടുത്ത് സംസ്കരിക്കാനുള്ള സ്ഥലസൗകര്യം അവിടില്ല. അതിനാലാണ് മൃതദേഹം അവിടെ സംസ്കരിക്കേണ്ടതില്ലെന്നും പകരം മുട്ടമ്പലം വൈദ്യുതി ശ്മശാനത്തിൽ ശവദാഹം നടത്താം എന്ന് തീരുമാനിച്ചതും. ഈ തീരുമാനമാകട്ടെ, ആരോഗ്യവകുപ്പും ജില്ലാഭരണകൂടവുമാണ് എടുത്തത്. ഒരു ബിഷപ്പിനും ഇതിൽ ഒരു റോളുമില്ല.]

സാധാരണക്കാരിൽ സാധാരണക്കാരായ ജനങ്ങൾ ആണ് അവിടെയുള്ളത്

ദിവസ ജോലിക്ക് പോകുന്നവർ...

കൂലിപണിക്കാർ

[ശരിയാണ്. എന്നാൽ ഇത് വൈകാരികമായി സ്വാധീനിക്കുക എന്ന യുക്തിഭംഗമാണ്. പരേതനും അത്ര പന്തിയുള്ള സാമ്പത്തികനിലയിൽ ഉള്ള ആളായിരുന്നില്ല. പാരമ്പര്യമായി കിട്ടിയ അഞ്ചുസെന്റ് ഭൂമിയും അതിലൊരു വീടും മാത്രമേയുള്ളൂ. അതാകട്ടെ, കോളനി പോലെ ഒരിടത്തും. കോട്ടയം നഗരസഭയ്ക്കു കീഴിൽ ദീർഘകാലം ശുചീകരണ തൊഴിലാളിയായിരുന്നു, 55-ാം വയസ്സിൽ വിരമിക്കും വരെ, ഇദ്ദേഹം. മരിക്കുമ്പോൾ 83 വയസ്സായിരുന്നു. വിഭാര്യനും നിസ്വനും ആയിരുന്നു, ഇയാൾ.]

അവർ പേടിക്കും... സ്വാഭാവികമാണ്...

പേടിക്കാൻ ഉള്ള വക സർക്കാരും മാധ്യമങ്ങളും ദിവസം തോറും തരുന്നുമുണ്ട്...

പണ്ടത്തെ വസൂരി രോഗത്തിന് തുല്യമായ രീതിയിലാണ് ഇപ്പോഴത്തെ കൊറോണ ബാധിതരെയും ലക്ഷണം ഉള്ളവരെയുമൊക്കെ ഈ രണ്ട് കൂട്ടരും ചിത്രീകരിക്കുന്നത്.....

[ഒരു വിഭാഗം മാദ്ധ്യമങ്ങളുടെ പേടിപ്പെടുത്തൽ ഞാൻ നിഷേധിക്കുന്നില്ല. എന്നാൽ അതല്ല, സർക്കാരിന്റെ രീതി. ആദ്യംമുതൽ തന്നെ നമ്മുടെ സർക്കാർ ആദ്യം ആരോഗ്യമന്ത്രി മുഖേനയും പിന്നീട് മുഖ്യമന്ത്രി നേരിട്ടും ഏതാണ്ട് ദിവസവുമെന്നോണം പൊതുജനങ്ങളുമായി, ടെലിവിഷനിൽ തൽസമയം സംപ്രേഷണം ചെയ്യുന്ന വാർത്താസമ്മേളനങ്ങളിലൂടെയും ഫേസ്ബുക്ക് ലൈവിലൂടെയും സംസാരിക്കുന്നുണ്ട്.]

പറഞ്ഞു വന്നത്

ഇവിടുത്തെ വില്ലൻ പ്രദേശ വാസികളായ പാവങ്ങൾ അല്ല

ഔസേപ്പിന്റെ ജഡത്തിന് വിലക്ക് കല്പിച്ച അദേഹത്തിന്റെ ഇടവകയാണ്അത് മനസിലാക്കുക

[വീണ്ടും തെറ്റ്. നേരത്തെ വിശദീകരിച്ചു.]

കുറഞ്ഞ പക്ഷം ഈ വിഷയത്തിൽ വിശാല മനസ് കാണിക്കുന്ന മതേതര ഹിന്ദുക്കൾ എങ്കിലും....

നിങ്ങൾ മാധ്യമങ്ങളുടെയും രാഷ്ട്രീയക്കാരുടെയും കെണിയിൽ വീഴരുത്....

[ഈ പോസ്റ്റ് എഴുതിയ വ്യക്തി സ്വയം പാലിക്കേണ്ട നിർദ്ദേശമായി തോന്നി.]

ആ പാവങ്ങളെ ഒറ്റപ്പെടുത്തരുത്

[ഭയം, അനിശ്ചിതത്വം, സംശയം എന്നിവ ജനിപ്പിച്ച് വാർഡ് മെമ്പറുടെ നേതൃത്വത്തിൽ അഴിച്ചുവിട്ട തെറ്റിദ്ധാരണാജനകമായ പ്രചാരണത്തിൽ വശംവദരായി അവിടെ തടിച്ചുകൂടിയ പരിസരവാസികളായ ദരിദ്ര ജനസാമാന്യത്തെ ആരും പ്രത്യേകമായി കുറ്റപ്പെടുത്തുന്നില്ല. ബിജെപി കൗൺസിലർ ഹരികുമാറും സ്ഥലം എംഎൽഎ തിരുവഞ്ചൂർ രാധാകൃഷ്ണനുമാണ് പ്രശ്നം വഷളാക്കിയത്.]

പോസ്റ്റ് സ്ക്രിപ്റ്റ്: ഏതു വാർത്തയ്ക്കു പിന്നിലും കാണുമല്ലോ ഒരു ‘മാധ്യമപ്രവർത്തകൻ’. ചാലുകുന്നിലെ സിഎസ്ഐ സെമിത്തേരിയിൽ മൃതദേഹം അടക്കാൻ സമ്മതിച്ചില്ല എന്ന സ്റ്റോറിയുടെ അവതാരകൻ കോട്ടയത്തെ ഏഷ്യാനെറ്റ് റിപ്പോർട്ടർ വിനോദ് ആണ്. വാർത്തയുടെ വിസ്ഫോടനം സംഭവിക്കുമ്പോൾ ചില തെറ്റൊക്കെ വരും എന്ന് ഏഷ്യാനെറ്റ് എഡിറ്റർ എംജി രാധാകൃഷ്ണൻ സർ പറഞ്ഞത് അവരുടെ റിപ്പോർട്ടർമാർക്ക് നൽകിയ സന്ദേശം എന്താണെന്ന സംശയം ഇപ്പോഴുണ്ടാവില്ലല്ലോ, അല്ലേ?

മീര പാടുന്നൂ; മീരാബായിയുടെ ഒരു ഗീതത്തിന്റെ പരിഭാഷ

2018-10-30T16:17:00.000+05:30

Do not mention the name of love, O my simple minded companion Strange is the path When you offer your love Your body is crushed at the first step	കഥയില്ലാത്തൊരു ചങ്ങാതീ നീ പ്രേമത്തിൻ പേർ പറയരുതേ എത്ര വിചിത്രമതിന്റെ വഴി പ്രേമാർച്ചിതമാമാദ്യത്തെച്ചുവ -ടയ്യോ മേലുഞെരുങ്ങുന്നൂ
If you want to offer love Be prepared to cut off your head And sit on it Be like the moth, Which circles the lamp and offers its body Be like the deer, which, on hearing the horn, Offers its head to the hunter. Be like the partridge, Which swallows burning coats In love of the moon. Be like the fish Which yields up its life When separated from the sea. Be like the bee, Entrapped in the closing petals of the lotus.	പ്രേമംനൽകണമെന്നാശിക്കിൽ നുള്ളിയെടുത്തശിരസ്സിലിരിക്കൂ നാളംകണ്ടുവലംവച്ചങ്ങനെ തീയിൽവീഴുമൊരീയാമ്പാറ്റയായ് വേട്ടക്കാരന്റെ ചൂളംകേട്ടു ചിനർകൊമ്പാട്ടുമാ മാനായി ചന്ദ്രനെ മോഹിച്ചു കത്തുന്ന മേലാട കൊത്തിപ്പെറുക്കുന്ന തിത്തിരിപ്പക്ഷിയായ് കടലിൽനിന്നുമകന്നാലപ്പോഴേ ജീവനൊടുക്കും മീനായി കൂമ്പുംതാമരത്താരിൽപെട്ടു കുഴഞ്ഞാടുന്നൊരുവണ്ടായി
Mira’s lord is the courtly Giridhara. She says: Offer your mind To those lotus feet.	മീരയ്ക്കൊന്നേ പ്രഭു, മാന്യൻ ഗിരിധരൻ മീരപാടുന്നു: അർച്ചന ചെയ്യൂ നിന്നുള്ളം ആ പദ്പമാദങ്ങളിൽ തന്നെ
Do not mention the name of love, O' my simple-minded companion Strange is the path When you offer your love Your body is crushed at the first step	ലളിതമനസ്കനാം ചങ്ങാതീ നീ പ്രേമത്തിൻ പേർ പറയരുതേ എത്രകടുത്ത നെടുമ്പാത എത്ര വിചിത്രമതിൻ ചുവട് ആദ്യപദംനീയെടുത്തുവയ്ക്കുമ്പോഴേ ദേഹമിതാകെഞെരുങ്ങുന്നു
If you want to offer love Be prepared to cut off your head And sit on it Be like the moth, Which circles the lamp and offers its body Be like the deer, which, on hearing the horn, Offers its head to the hunter. Be like the partridge, Which swallows burning coats In love of the moon. Be like the fish Which yields up its life When separated from the sea. Be like the bee, Entrapped in the closing petals of the lotus.	പ്രേമംകൊണ്ടുനീയർച്ചനചെയ്യുകിൽ ആദ്യേപൂത്യേ തലയൊന്നറുക്കൂ അതിന്മേലങ്ങനെ കുത്തിയിരിക്കൂ വെട്ടംകണ്ടിട്ടുവട്ടംവെച്ചു വിളക്കിൽവീഴും പൂച്ചിയെപ്പോലെ നായാട്ടുകാരന്റെ ചൂളംകേട്ടു ചിനർകൊമ്പുകാട്ടിയ മ്ലാവിനെപ്പോലെ ചന്ദ്രനെക്കാമിച്ചു തീക്കട്ടകൊത്തുന്ന തിത്തിരിപ്പക്കിതൻ പാടവംപോലെ ആഴക്കടലിനെ പിരിയാൻനേരത്തു ജീവൻവെടിയുമാ മത്സ്യത്തെപ്പോലെ കൂമ്പിത്തുടങ്ങുമാ താമരപ്പൂവിന്റെ ഉള്ളിൽകുരുങ്ങിയ മധുപത്തെപ്പോലെ
Mira’s lord is the courtly Giridhara. She says: Offer your mind To those lotus feet.	മീരയ്ക്കൊന്നേ പ്രഭൂ, മാന്യൻ ഗിരിധരൻ മീരപാടുന്നു, നൽകൂ നിന്നുള്ളം പദ്മപാദങ്ങളിൽ അർച്ചിക്കൂ

ലെനിനൊരു പാട്ട് - പാബ്ലോ നെരൂദ

2018-03-09T21:32:00.000+05:30

പാബ്ലോ നെരൂദയുടെ An Ode to Lenin എന്ന കവിതയുടെ പരിഭാഷ

Lenin at the First Subbotnik (Voluntary Saturday); Painting by Vladimir Krikhatsky

വിപ്ലവത്തിനു നാല്പതു വയസ്സ്. അവൾ ഒരു യുവതിയുടെ പ്രായം സുന്ദരികളായ അമ്മമാരുടെ പ്രായം ഇതാണ്. ലോകത്തിലേക്കവൾ പിറന്നുവീണപ്പോൾ നിങ്ങളാ വാർത്തയറിഞ്ഞിരുന്നോ? വേറൊരുവിധത്തിൽ! എന്താണത്? മേല്പട്ടക്കാർ തിരക്കി, ഭൂതലം മാറി, നമുക്കിനിയും സ്വർഗം വിറ്റുകൊണ്ടിരിക്കാനാവില്ല. യൂറോപ്പിലെയും അമേരിക്കയിലെയും ഭരണകൂടങ്ങൾ ക്ഷോഭിച്ചു, സംഭ്രാന്തരായ സ്വേച്ഛാധിപതികൾ ആപൽക്കരമായ സന്ദേശങ്ങൾ മുരടനക്കാതെ വായിച്ചു. കുത്തനെ താഴേക്കിറങ്ങാൻ മൃദുവായ പടികൾക്കായി ഞാനൊരു കമ്പി അടിക്കാം, തെർമോമീറ്ററിൽ പനി എങ്ങനെ? ഒരു സംശയവുമില്ല, ജനം പിടിച്ചടക്കിയിരിക്കുന്നു ലോകം മാറിയിരിക്കുന്നു.	The revolution is 40 years old. She is the age of a young woman. It has the age of beautiful mothers. When he was born, in the world Did you know the news? in a different way. - What's that? Asked the bishops, The earth moved, We can not keep selling heaven. The governments of Europe, of America outraged, the turbid dictators, read in silence the alarming communications. For soft, for deep stairs I would upload a telegram, how about fever on the thermometer: there was no doubt, the people had conquered, the world was transformed.
1 ലെനിൻ, നിന്നെക്കുറിച്ചുപാടാൻ ഞാൻ വാക്കുരിയണം; മരവും ചക്രവും കലപ്പയും ധാന്യവും കൊണ്ടെഴുതണം. ഭൂമിയും വസ്തുതകളും കണക്കെ മൂർത്തമാണു നീ. വി. ഉല്യാനോവിനോളം മൺമയനായി ഒരുവനും ഒരിക്കലുമുണ്ടായിട്ടില്ല. മേഘങ്ങളോടനായാസമായി പള്ളികളെന്നപോൽ സംവദിക്കുന്ന മറ്റു പ്രൗഢ മനുജരുണ്ട്, നെടിയ ഏകാകിളാണവർ. ലെനിനോ, ഭൂമിയുമായി ഉടമ്പടിയിലേർപ്പെട്ടു. മറ്റാരും നോക്കാത്തിടത്തോളം അവൻ നോക്കി. മനുഷ്യരും നദികളും കുന്നുകളും പുൽമേടുകളും, അവനു തുറന്ന പുസ്തകമായിരുന്നു, എന്നിട്ടവൻ വായിച്ചു, എല്ലാവരെക്കാളും കൂടുതലായി വായിച്ചു, ആരെക്കാളും തെളിമയോടെ വായിച്ചു. ജനതയെ, മനുഷ്യനെ, ആഴത്തിൽ വീക്ഷിച്ചു കിണറിലേക്കെന്നോണം നോക്കി, അറിയപ്പെടാത്ത ധാതുവിനെ കണ്ടെത്തിയ മട്ടിൽ നിരീക്ഷിച്ചു. കാലത്തിനും ഭൂമിക്കും ചേർന്നമട്ടിൽ എല്ലാം മുളപൊട്ടുകയും പിറവിയെടുക്കുകയും ചെയ്യേണ്ടതിന് ജനങ്ങളുടെ രഹസ്യ നിധി ഊർജ്ജസ്വലമാം വെളിച്ചം പുടപാകം ചെയ്യുന്നതിന് അതാവശ്യമായിരുന്നു, കിണറ്റിൽ നിന്നു തെളിനീരെടുക്കേണ്ടതിന് അതാവശ്യമായിരുന്നു.	I Lenin, to sing you I must say goodbye to words; I must write with trees, with wheels, with plows, with cereals. You are concrete as the facts and the earth. Never existed a more terrestrial man that V. Ulyanov. There are other high men that as churches usually talk to the clouds, are tall lonely men. Lenin kept a pact with the land. He looked further than anyone else. Men, the rivers, the hills, the steppes, they were an open book and he read, I read further than all, clearer than anyone else. He looked deeply The people, the man, looked at the man like a well, examined him as if it were an unknown mineral that he had discovered. It was necessary to draw the waters from the well. it was necessary to bring the dynamic light, the secret treasure of people, so that everything would germinate and be born, to be worthy of time and earth.
2 അദ്ദേഹത്തെ തണുപ്പൻ എഞ്ചിനീറായി തെറ്റിദ്ധരിക്കാതിരിപ്പാൻ കരുതുക, തീക്ഷ്ണതയുള്ള സിദ്ധനായി തെറ്റിപ്പോവാതെ ശ്രദ്ധിക്കുക. ആളുകയാണാ മനീഷി ചാരമാവാതൊരുനാളും, ചങ്കിലെ തീയണയ്ക്കാനായതില്ല മരണത്തിനും.	II Take care not to confuse him with a cold engineer, be careful not to confuse him with a fiery mystic. His intelligence burned without being ashes ever, death did not yet freeze his heart of fire.
3 പ്രിയമിക്കാഴ്ച സ്വച്ഛമാം റാസ്ലിവ് തടാകത്തിൽ (1) മീൻപിടിക്കും ലെനിൻ, അതിൻ ജലം വിസ്തൃതമാം ഉത്തരദേശത്തെ പുൽപ്പടർപ്പിൽ, നഷ്ടമായ ചെറുദർപ്പണം പോൽ ഉറഞ്ഞ വെള്ളിപോൽ: ഏകാന്തത, പിടിതരാത്തതാമേകാന്തത, രാവിനും മഞ്ഞിനും ബലിയായ സസ്യജാലം, ധ്രുവക്കാറ്റിൻ മൂളക്കമൊരുക്കിയ കുടീരം. അവിടെ, മഴച്ചാർത്തിനും മണിപ്രാക്കൾ (2) തൻ ചിറകടിക്കും ആരുംതൊടാത്തതാം കാടിൻ മിടിപ്പിനും കാതോർക്കും നിന്നെ തനിച്ചുകാണാനെന്തൊരിനിപ്പ്. പാവനപ്രകൃതിയിൽ ചരിത്രവും മരുത്തും തീർത്ത പാദസ്പന്ദനം കേട്ടും വനവും ചേതനയുമറിഞ്ഞും ലെനിൻ.	III I like to see Lenin fishing in transparency of Lake Razliv, and those waters are like a little mirror lost in the grass of the vast north and cold silver: solitudes those, elusive solitudes, plants martyred by night and snow, the arctic hiss of the wind in his hut. I like to see you there alone listening the downpour, the trembling flight of the rolinhas, the intense pulsation of the pure forest. Lenin attentive to the woods and life, listening to the footsteps of the wind and history on the solemnity of nature.
4 ഗ്രന്ഥത്തോളമാഴത്തിൽ ഭാവാത്മ ശാസ്ത്രം പഠിക്കുക മാത്രം ചെയ്തൂ, ചില മനുഷ്യർ മറ്റുചിലരുടെ ആത്മസത്ത തന്നെ മുന്നേറ്റങ്ങളായിരുന്നു. ലെനിനോ, രണ്ടുചിറകുകൾ: ജ്ഞാനവും പ്രസ്ഥാനവും. ചിന്തയിൽ പൊരുത്തും കുരുക്കഴിച്ചും അവ നരന്റെയും നേരിന്റെയും പൊയ്മുഖം ചീന്തി. അവനെല്ലായിടവുമുണ്ടായിരുന്നു എല്ലായിടവുമുണ്ടായിരുന്നു ഒരേനേരത്തുതന്നെ എല്ലായിടത്തും.	IV Some men were only studying, book deep, passionate science, and other men had as virtue of the soul the movement. Lenin had the wings: the movement and the wisdom. Created in thought, deciphered the riddles, It was breaking the masks. of truth and man and was everywhere, was everywhere, was at the same time everywhere.
5 അതിനാൽ ലെനിൻ, ചക്രവാളസീമയ്ക്കപ്പുറം പുതുവ്യവസ്ഥിതി ദൃശ്യമാകുംവരെ നിന്റെ കരങ്ങൾ പ്രവർത്തിച്ചു നിന്റെ പ്രജ്ഞ വിശ്രമമറിഞ്ഞില്ല: അതൊരു രക്താഭയാർന്ന പ്രതിമ പുകക്കറപിടിച്ച്, ആസകലം മുറിപ്പാടുമായി കീറക്കുപ്പായം ചുറ്റിയ വിജയം, പ്രകാശംപോലെ മനോഹരിയായ പെൺകുട്ടി. വിദൂരദേശങ്ങളിൽ നിന്നും ആളുകളതു കണ്ടു: അതവൾ തന്നെയായിരുന്നു, ഒരു സംശയവുമില്ലായിരുന്നു, അതായിരുന്നു വിപ്ലവം. പഴഞ്ചൻ ലോകഹൃദയം മറ്റൊരുവിധം മിടിക്കുന്നു.	V So, Lenin, your hands have worked and your reason knew no rest until across the horizon a new form was seen: it was a bloody statue, was victorious in tatters, was a beautiful girl like the light, full of scars, stained by smoke. From remote lands people have seen it: it was her, there was no doubt, it was the Revolution. The old heart of the world throbbed in another way.
6 ഭൗമിക മനുഷ്യാ, ലെനിൻ, നിന്റെ മകൾ സ്വർഗത്തിലെത്തിയിരിക്കുന്നു. നിന്റെ കൈകൾ താരാവൃന്ദങ്ങളെ ചലിപ്പിക്കുന്നു. അപ്പത്തേയും ഭൂമിയേയും കുറിച്ചുള്ള ഉത്തരവിൽ ജനങ്ങൾക്കുവേണ്ടി തുല്യം ചാർത്തിയ അതേ കൈകൾ ഒരു ഗ്രഹമായിത്തീർന്നിരിക്കുന്നു: നീ മെനഞ്ഞ മനുഷ്യൻ എനിക്കായി ഒരു നക്ഷത്രത്തെ പടുത്തിരിക്കുന്നു.	VI Lenin, earthly man, Your daughter has reached heaven. Your hand move now clear constellations. The same hand who signed decrees about bread and the earth for the people, the same hand has become a planet: the man you made built me a star.
7 എല്ലാം മാറിയിരിക്കുന്നു, എന്നാൽ കാലം കടുത്തതായിരുന്നു ദിനങ്ങൾ പരുക്കനായിരുന്നു. നാല്പതുസംവത്സരങ്ങളായി അവർ ഓരിയിടുന്നു, അതിരുകളിലുള്ള ചെന്നായ്ക്കൾ: ജീവിതമെന്ന എടുപ്പുകുതിരയെ നിലംപതുക്കാൻ പച്ച കണ്ണുകളിൽ ചുണ്ണാമ്പു തേയ്ക്കാൻ, വിശപ്പാൽ, തീയാൽ, വാതകത്താൽ, മരണത്താൽ, അവർക്കെന്നെ കൊല്ലണമായിരുന്നു ലെനിൻ, നിന്റെ മകളെ, വിജയത്തെ, നീണ്ടതും ദൃഢവും മാധുര്യമുള്ളതും ബലവത്തും ഉയരമേറിയതുമായ സോവിയറ്റ് യൂണിയനെ. അവർക്കു കഴിഞ്ഞില്ല. അപ്പവും കൽക്കരിയുമില്ലായിരുന്നു, ജീവിതമില്ലായിരുന്നു, ആകാശത്തുനിന്ന് മാരിയും മഞ്ഞും ചോരയും പൊടിഞ്ഞു, ദരിദ്രഭവനങ്ങൾ കത്തിയമർന്നു, എന്നാൽ പുകയ്ക്കും തീവെളിച്ചത്തിനുമിടയിൽ കുഗ്രാമങ്ങൾ പോലും ആ ജൈവീക വിഗ്രഹത്തെ കണ്ടു സ്വയം പ്രതിരോധിക്കുക, വളരുക വളരുക വളരുക നിങ്ങളുടെ ധീരഹൃദയം അഭേദ്യമായ ലോഹമായിത്തീരുവോളം	VII Everything has changed, but it was hard the time and rough the days. For forty years they howled The wolves near the borders: wanted to bring down the statue life, wanted to calcine their green eyes, for hunger and fire and gas and death they wanted me to die your daughter, Lenin, the victory, long, firm, sweet, strong and tall Soviet Union. They could not. He lacked bread, coal, lacked life from the sky fell rain, snow, blood, about the poor houses burned down, but between the smoke and the light of fire the most remote villages saw the living statue defend yourself and grow grow grow until your brave heart turned into invulnerable metal.
8 ലെനിൻ, ഞങ്ങൾ ദൂരയുള്ളവരാണ്. അന്നുമുതൽ, ചടുലമായ കാൽവെയ്പ്പുകളിലൂടെയും മിഴിയനക്കങ്ങളിലൂടെയും നീ തീരുമാനിച്ചു തുടങ്ങിയതു മുതൽ ആഹ്ലാദത്തിനായുള്ള പോരാട്ടത്തിൽ ജനങ്ങളൊറ്റയ്ക്കല്ല. യുദ്ധവും ഭീഷണിയും പീഡനങ്ങളുമനുഭവിച്ചവർ, തകർക്കാനാവാത്ത കൊത്തളങ്ങൾ ഈടുനിൽക്കുന്ന മാതൃഭൂവിൻ അപരിമേയ പ്രകാശം ഇനിമേൽ നിങ്ങൾക്കവളെ കൊല്ലാനാവില്ല. അതിനാൽ മനുഷ്യർ പുതിയൊരു ജീവിതം ജീവിക്കുന്നു, പ്രതീക്ഷയോടെ മറ്റൊരപ്പം കഴിക്കുന്നു, കാരണം, ഭൂമദ്ധ്യത്തിലുണ്ടേനും, ലെനിന്റെ പുത്രി, വ്യക്തവും നിർണായകവുമായി.	VIII Lenin, we are the distant ones. Since then, since your decisions, from your quick steps and your quick eyes People are not alone. in the struggle for joy. The immense homeland light lasts, who endured the harassment, the war, the threat, it is unbreakable tower. You can not kill her any more. And so men live another life, and eat another bread with hope, because in the center of the earth there is the daughter of Lenin, clear and decisive.
9 കൃതജ്ഞത, ലെനിൻ, ഊർജ്ജത്താലും അധ്യയനത്താലും. ആ ദൃഢതയ്ക്ക് നന്ദി ലെനിൻഗ്രാഡിനും പുൽമേടുകൾക്കും നന്ദി യുദ്ധത്തിനും സമാധാനത്തിനും നന്ദി നിലയ്ക്കാത്ത ഗോതമ്പിന് നന്ദി പള്ളിക്കൂടങ്ങൾക്കു നന്ദി നിന്റെ ചെറുമക്കൾക്ക്, ബലിഷ്ഠഗാത്രരായ പടയാളികൾക്ക് നന്ദി നിന്റെ നാട്ടിൽ ഞാൻ ശ്വസിക്കുന്ന ഈ വായുവിന് മറ്റെങ്ങും ലഭിക്കാത്ത ഈ ജീവവായുവിനു നന്ദി ഇവിടം സുഗന്ധപൂരിതം ഊക്കൻ പർവതങ്ങളിലെ മിൻസാരംപോലെ കൃതജ്ഞത, ലെനിൻ, വായുവിനാൽ, അപ്പത്താൽ, പ്രതീക്ഷയാൽ.	IX Thankful, Lenin, by energy and teaching, grateful for the firmness, grateful for Leningrad and the steppes, grateful for battle and for peace, grateful for the infinite wheat, grateful for schools, grateful for your little ones titanic soldiers, grateful for this air that I breathe in your land which does not look like any other air: the space is fragrant, is electricity from energetic mountains. Thankful, Lenin, by air, by bread, by hope.

പാബ്ലോ നെരൂദ, 1959, കപ്പലോട്ടങ്ങളും പിന്മടക്കങ്ങളും (Navigation and Returns)
________________________

ബാൾട്ടിക് കടലിനോടുചേർന്ന നേവാ ഉൾക്കടലിലേക്ക് തുറക്കുന്ന ലക്തിൻസ്കൈ റാസ്ലിവ് അഥവാ ലക്താ തടാകം സെന്റ് പീറ്റേഴ്സ് ബർഗിലെ പ്രൈമോർസ്കി ജില്ലയിലുള്ള കായൽപ്പരപ്പാണ്. മൂന്നു നദികളിൽ നിന്നുള്ള ജലം ഈ കായലിൽ വന്നുചേരുന്നു. കായലിൽ നിന്നു പുറപ്പെടുന്ന അരക്കിലോമീറ്റർ മാത്രം ദൈർഘ്യമുള്ള മോബിൽക്ക നദിയാണ്, നേവാ ഉൾക്കടലിലേക്ക് ഈ ജലത്തെ കൊണ്ടുപോവുന്നത്. അങ്ങനെ ഇതൊരു കടലിടുക്കിന്റെ സ്വഭാവം പൂണ്ട ലഗൂണായി മാറുന്നു.
ലാറ്റിൻ അമേരിക്കൻ ഭൂഖണ്ഡത്തിൽ കാണപ്പെടുന്ന റോളിന (Rolinha) എന്ന ചെറുപ്രാവുകളെയാണു നെരൂദ പരാമർശിച്ചിരിക്കുന്നത്. (കൊളമ്പീന എന്ന പ്രാവുവർഗത്തിൽ പെട്ടത്). നമ്മുടെ നാട്ടിലെ വലിപ്പം കുറഞ്ഞ മണിപ്രാവുകളുടെ കൂട്ടിരിക്കും ഇവ.

പോർച്ചുഗീസ് ഭാഷയിലെ കവിത ഈ സൈറ്റിലുണ്ട്. ഗൂഗിൾ ട്രാൻസ്ലേഷൻ ഉപയോഗിച്ച് അതിനെ ഇംഗ്ലീഷിലേക്കു മൊഴിമാറ്റിയ ശേഷമാണ്, ഞാൻ വിവർത്തനം ചെയ്തത്.

വിശുദ്ധ വധശിക്ഷയും രാഷ്ട്രീയ കൊലപാതകങ്ങളുടെ നൈതികതയും

2016-08-15T17:51:00.003+05:30

വിശുദ്ധ വധശിക്ഷയും രാഷ്ട്രീയ കൊലപാതകങ്ങളുടെ നൈതികതയും

ഒരു ഡൈലമയെ കുറിച്ചാണ് പറയുന്നത്. ഇക്കഴിഞ്ഞ രണ്ടുദിവസമായി ഫേസ്ബുക്കിലും പൊതുസമൂഹത്തിലും ഉയർന്ന ഒരു വിമർശനമാണ് വിവക്ഷ. വധശിക്ഷ സംബന്ധിച്ച സിപിഐ(എം) നിലപാടും നാദാപുരത്തു നടന്ന relaliatary killingഉം തമ്മിലെ പൊരുത്തക്കേടിനെ കുറിച്ചായിരുന്നു വിമർശമത്രയും. കോടതി വെറുതെ വിട്ടയാളെ സിപിഐ(എം) തെളിവോ വിചാരണയോ കൂടാതെ ശിക്ഷിക്കുന്നു എന്നായിരുന്നു മറ്റൊരു വിമർശനം.

അടുത്തടുത്ത ദിവസങ്ങളിൽ സംസ്ഥാനത്തിന്റെ രണ്ടറ്റത്ത് ഓരോ പ്രതികാരക്കൊലപാതകം വീതമാണുണ്ടായത്. അതിൽ ആദ്യത്തേതു മാത്രമാണ് ഈ ചർച്ചയത്രയും ഉയർത്തിയത്. രണ്ടാമത്തേതാവട്ടെ, രാഷ്ട്രീയഛവിയുണ്ടായിരുന്നെങ്കിലും കേവലം ഗുണ്ടാപ്പകയായി പത്രത്താളുകളിൽ ഒതുങ്ങിപ്പോവുകയായിരുന്നു. പാവം ഗുണ്ടകൾക്കു മാത്രം ചോദിക്കാനും പറയാനും ആളില്ലല്ലോ!

തൂണേരിയിലെ ഷിബിൻ എന്ന 19കാരനെ 2015 ജനുവരി 22നു കൊല്ലുകയും ആറുപേരെ ഗുരുതരമായി പരിക്കേൽപ്പിക്കയും ചെയ്ത കേസിലെ 17 പ്രതികൾ വിചാരണയ്ക്കൊടുവിൽ വിട്ടയയ്ക്കപ്പെട്ടിരുന്നു. സംഭവസമയത്തു പ്രാർപൂർത്തിയാവാഞ്ഞ പ്രതിയുടെ വിചാരണ ജൂവനൈൽ കോടതിയിൽ നടന്നുവരികയാണ്. കേസിലെ മുഖ്യപ്രതി തെയ്യംപാടി ഇസ്മായേൽ, സഹോദരൻ മുനീർ എന്നിവരെ ശിക്ഷാവിധിക്കുശേഷം താരപരിവേഷത്തോടെ എഴുന്നള്ളിക്കുന്ന പോസ്റ്റുകൾ മുസ്ലീം ലീഗ് അനുഭാവികളുടെ ഫേസ്ബുക് സ്ട്രീമുകളിൽ നിറഞ്ഞു. ഫ്ളക്സ് ബോർഡുകളിൽ പണക്കൊഴുപ്പ് എടുത്തുകാട്ടുന്ന വേഷവിധാനങ്ങളിലും വാഹനങ്ങളുടെ പശ്ചാത്തലത്തിലും ഇസ്മായേൽ തിളങ്ങി. അവർക്കെതിരായ കൊലവിളികൾ സിപിഐ(എം) അനുഭാവികളുടെ ഫേസ്ബുക് സ്ട്രീമുകളിലും നിറഞ്ഞുനിന്നു.

ഇത്തരം ആഘോഷങ്ങളും പോർവിളികളും ഇതാദ്യമായിരുന്നില്ല. കതിരൂർ മനോജ് കൊല്ലപ്പെട്ടപ്പോൾ ആഹ്ലാദിച്ച മാർക്സിസ്റ്റ് പാർട്ടി അണികളും പോർവിളിച്ച ആർഎസ്എസുകാരും ധാരാളമായിരുന്നു. ടി പി ചന്ദ്രശേഖരൻ കൊല്ലപ്പെട്ടപ്പോഴും ആർഎംപി – സിപിഐ(എം) അണികൾ തമ്മിലുള്ള പോർവിളികൾ ഏറെക്കാലം നീണ്ടുനിന്നു. ആ കേസിൽ അറസ്റ്റ് ചെയ്യപ്പെട്ട കൊടിസുനിയുടെയും കൂട്ടരുടെയും ജയിൽചിത്രങ്ങൾ വീരാരാധനയോടെ പങ്കുവയ്ക്കപ്പെട്ടു.

അതേസമയം ഇതിനിടയിൽ സംസ്ഥാനത്തിന്റെ പല ഭാഗത്തായി ഒട്ടേറെ മാർക്സിസ്റ്റ് പാർടി പ്രവർത്തകർ കൊലക്കത്തിക്കിരയായി. മകനെത്തേടിവന്ന് അച്ഛനെ കൊന്നിട്ടുപോയ സംഭവം വരെ തിരുവനന്തപുരത്തുണ്ടായി. ഇതടക്കം ഭൂരിഭാഗം കേസുകളിലും പ്രതികൾ ആർഎസ്എസുകാരായിരുന്നു. അവയിൽ പലതും മാദ്ധ്യമശ്രദ്ധയിൽ കാര്യമായി വരുന്നില്ല എന്നതു യാഥാർത്ഥ്യമാണ്. ചില ആഖ്യാനങ്ങൾക്കു നിരക്കാത്തതാണ്, അവ എന്നതാവാം കാരണം. ഇക്കാര്യം സജീഷ് നാരായണനോളം വ്യക്തമായി എഴുതിയ വേറെയാരെയും മലയാളം ഓൺലൈൻ ലോകത്ത് ഇതെഴുതുന്നയാളിനു പരിചയമില്ല. സജീഷിന്റെ വരികൾ ഇങ്ങനെയായിരുന്നു.

അസമമായ നീതിയെ കുറിച്ചുള്ള ബോധം ഉറപ്പിക്കുന്ന കാര്യമാണിത്. ആ ബോധമാണു നിയമവാഴ്ചയിലുള്ള വിശ്വാസത്തെ ഇളക്കുന്നതും നിയമം കൈയിലെടുക്കാൻ പ്രേരിപ്പിക്കുന്നതും. ഭരണകൂടം ഇല്ലാതാക്കേണ്ടത്, അതിനുള്ള സാഹചര്യമാണ്.

കൊലപാതകങ്ങളും അതിനുശേഷമുള്ള പരസ്പരമുള്ള പോർവിളികളും സംഘർഷത്തെ ആഴമുള്ള മുറിവുകളാക്കുന്നു. സോഷ്യൽ മീഡിയയ്ക്കു മുമ്പ് ഇതു പ്രദേശത്ത് ഒതുങ്ങിനിൽക്കുന്ന കാര്യമായിരുന്നെങ്കിൽ ഇന്ന് അതങ്ങനെയല്ല. പാനൂരിലൊരു കൊലപാതകം നടന്നാൽ അതിനു പ്രതികാരം ചെയ്യണമെന്ന ആഹ്വാനം വരുന്നതു തിരുവനന്തപുരത്തുനിന്നാവാം. കൊലപാതകം നടന്നതിന്റെ വിജയഘോഷം മുഴങ്ങുന്നതു ബഹറിനിൽ നിന്നാവാം. കൊല്ലപ്പെട്ടവനെ നായ്ക്കുസമാനം ഇകഴ്ത്തുന്നത് ചെന്നൈയിലിരുന്നാവാം. ഈ തരത്തിൽ പ്രതികാരവാഞ്ചയെ സോഷ്യൽ മീഡിയ ലോകമെങ്ങുമെത്തിക്കുന്നുണ്ട്.

ഇതൊക്കെ കുറ്റകൃത്യത്തെ ന്യായീകരിക്കുന്നതോ കൂടുതൽ കുറ്റകൃത്യങ്ങളെ ജനിപ്പിക്കുന്നതോ ആയ സംഗതികളാണ്. കൊലപാതകത്തെ കുറ്റകൃത്യമായെണ്ണാതെ രാഷ്ട്രീയപ്രവർത്തനത്തിന്റെ ഉദാത്താനുഭവമാക്കിയും തങ്ങളും സഹപ്രവർത്തകർക്കുവേണ്ടി കൊല്ലപ്പെടുവാൻ തയ്യാറായവരാണെന്ന് ഊറ്റംകൊണ്ടും കൊലയിൽ നേരിട്ടു പങ്കെടുക്കാൻ കഴിയാഞ്ഞതിന്റെ നൈരാശ്യം പങ്കുവച്ചുമൊക്കെയാണു പോസ്റ്റുകൾ വരുന്നത്. അവയ്ക്കെതിരെ കർശനമായ നടപടികൾ ഉണ്ടാവേണ്ടതുണ്ട്. സമാധാനം പുലരുന്ന സമൂഹത്തിന് അത് അത്യാവശ്യമാണ്. രാഷ്ട്രീയക്കാരുടെ പോർവിളികളേക്കാൾ അഹസഹ്യമാണ് തങ്ങൾ ഇന്നവരുടെകൂടെയാണെന്നു ബോധ്യപ്പെടുത്താനുള്ള, അകലങ്ങളിലിരുന്നുകൊണ്ടുള്ള ഈ അഭ്യാസം. അത് നിർത്തലാക്കിയേ തീരു. അല്ലാതെ സ്കോർ സെറ്റ്ലിങ് നിൽക്കില്ല.

ഷിബിൻ വധക്കേസിൽ മൂന്നാംപ്രതിയായി പേരുചേർക്കപ്പെട്ടിരുന്ന നാദാപുരം താഴെകുനിയിൽ കാളിയറമ്പത്ത് അസ്ലം അന്ന (20) ആണ് കഴിഞ്ഞദിവസം കൊല്ലപ്പെട്ടത്. തൊട്ടുപിന്നാലെ തിരുവനന്തപുരം നെയ്യാറ്റിൻകരയ്ക്കടുത്ത് വണ്ടന്നൂരിൽ മേലാറന്നൂർ സ്വദേശിയായ സുരേഷ് കുമാർ എന്ന യുവാവ് കൊല്ലപ്പെട്ടു.

തമലം റിസർവ് ബാങ്ക് ക്വാട്ടേഴ്സിനു സമീപം 2013 സെപ്റ്റംബർ 4 ബുധനാഴ്ച പുലർച്ചെ രണ്ടുമണിക്ക് പൂജപ്പുര തമലം കാമരാജ് നഗർ കൊച്ചുതോപ്പുവീട്ടിൽ ഡി ബിനുമോൻ (36) കൊല്ലപ്പെട്ട കേസിലെ പ്രതിയായിരുന്നു സുരേഷ് കുമാർ. സിപിഎമ്മിൽ നിന്നു ബിജെപിയിൽ പോയ ആളായിരുന്നു ബിനുമോൻ. സുരേഷ് കുമാറാകട്ടെ, ആ കൊലപാതകം നടക്കുന്ന സമയത്ത് സിഐടിയു തൊഴിലാളിയുമായിരുന്നു. ആ കൊലപാതകത്തിൽ പങ്കെടുത്തതായി ആർഎസ്എസ് ആരോപിക്കുന്ന പൂടൻ ബിജു എന്നയാളുടെ കാല് ഇതേ ബിനുമോന്റെ നേതൃത്വത്തിൽ വെട്ടിയരിഞ്ഞതാണ്. ഇത്തരം പശ്ചാത്തലവിവരങ്ങൾ നിലനിർത്തിയാൽ തന്നെ ഇവരുടെ കൊലപാതകത്തിൽ പ്രത്യക്ഷമായ രാഷ്ട്രീയ നിറം ഇല്ലായിരുന്നു. ഗുണ്ടാപ്പിരിവു സംബന്ധിച്ച തർക്കമാണ് ആദ്യ കൊലപാതകത്തിൽ കലാശിച്ചത്. മുൻകാല സംഘർഷങ്ങളുടെ culmination ആയിരുന്നു, കൊലപാതകം. അതിന്റെ പ്രതികാരമാണ് കഴിഞ്ഞദിവസം ഉണ്ടായത്.

ഇവിടെ ശ്രദ്ധിക്കേണ്ട ഒരു കാര്യമുണ്ട്. ബിനുമോൻ കൊല്ലപ്പെട്ടപ്പോൾ തന്നെ ആർഎസ്എസ് പേജുകളിൽ കൊലയാളികൾക്കെതിരായ പരസ്യമായ വധാഹ്വാനങ്ങൾ ഉയർന്നിരുന്നു. വിശ്വസംവാദ് കേന്ദ്ര കേരള എന്ന പേജിൽ ഇതെഴുതുമ്പോഴും കിടപ്പുണ്ട്, പരസ്യമായ പോർവിളികളും പകരം ചോദിക്കുമെന്നുള്ള പ്രതിജ്ഞകളും. അതിനെതിരെ ഒരു നടപടിയുമുണ്ടായില്ല എന്നതുകൊണ്ടുതന്നെയാണ് ഇന്ന് പ്രതികാരക്കൊലയും ഉണ്ടായത്.

മേലാറന്നൂരിലെ സുരേഷ് കുമാറിന്റെ കാര്യത്തിലെന്നപോലെ രാഷ്ട്രീയ പാർട്ടികളുടെ അക്കൗണ്ടുകളിൽ എഴുതിച്ചേർക്കപ്പെടുന്ന കൊലപാതകങ്ങളിൽ പലതിനും കക്ഷിരാഷ്ട്രീയബാഹ്യമായ കാരണങ്ങളുണ്ട്. പ്രാദേശികമായ ഗുണ്ടാരാജും അതിലെ അധോലോകസമാനമായ മൂപ്പിളമത്തർക്കങ്ങളും സാമ്പത്തിക ഇടപാടുകളും അതുമായി ബന്ധപ്പെട്ട അധികാരപ്രയോഗങ്ങളും ലൈംഗികവിഷയങ്ങളും ഒക്കെ അതിൽ പെടും. കണ്ണൂർ – കോഴിക്കോട് ജില്ലകളുടെ അതിർത്തിയിൽ നടക്കുന്ന ചില കൊലപാതക പരമ്പരകളിൽ മാത്രമാണ് എണ്ണമൊപ്പിക്കാൻ വേണ്ടി സിപിഐ(എം) ആയതുകൊണ്ടു മാത്രമോ ആർഎസ്എസ് ആയതുകൊണ്ടു മാത്രമോ കൊല്ലപ്പെട്ട സംഭവങ്ങളുണ്ടായിട്ടുള്ളത്. ആളുമാറി കൊലചെയ്യപ്പെട്ട കേസുകളും ഇല്ലാതില്ല. അല്ലാത്തിടങ്ങളിൽ കൊല്ലപ്പെട്ടയാളുടെ പാർട്ടി അഫിലിയേഷനപ്പുറം അയാളുടെയോ അയാൾമൂലം ഉറക്കം കെട്ടവരുടെയോ സാമൂഹ്യാധികാരവുമായി ബന്ധപ്പെട്ട വിഷയങ്ങൾ ശവക്കച്ചയ്ക്കടിയിൽ മറയ്ക്കപ്പെടും. നാദാപുരത്തെ കൊലപാതകങ്ങളിലും സാമ്പത്തികനില ഘടകമായി വരുന്നുണ്ട് എന്നത് പതുക്കെപ്പറയേണ്ട കാര്യമല്ല.

രാഷ്ട്രീയ കൊലപാതകങ്ങൾ എന്നല്ല, എല്ലാ കൊലപാതകങ്ങളും ഒഴിവാക്കേണ്ടതാണ്. അതൊരു ideal position ആണ്. ideal situationനിൽ മാത്രം സാധ്യമാവുന്നത്. survival gameൽ ഏർപ്പെട്ടവരുടെ അടുത്ത് ആദർശവാദവുമായി ചെന്നാൽ അവർ നിങ്ങളെ ഒരാട്ടാട്ടും.

എല്ലാവരും പരസ്പരം ബഹുമാനിച്ചും പ്രശ്നങ്ങളുണ്ടാക്കാതെയും സമശീർഷരായി വിളയാടുന്ന സുന്ദരസുരഭില ലോകത്ത് കൊലപാതകങ്ങളുണ്ടാവില്ല. എന്നാൽ അതു പ്രകൃതിനിർദ്ധാരണത്തിന്റെ സ്വാഭാവികനീതിക്കു വഴങ്ങുന്നതല്ല. കോൺഫ്ലിക്റ്റും സ്ട്രെസും അതിനോടുള്ള എക്സ്ട്രീം ആയ പ്രതികരണങ്ങളും ജീവാണുതലത്തിൽ തന്നെയുണ്ട്.

Microcosm: E.Coli and the New Science of Life എന്ന ഒരു കുഞ്ഞു പുസ്തകമുണ്ട്. Carl Zimmer എഴുതിയത്. അതിൽ ഇ-കോളി എന്ന ബാക്റ്റീരിയ ഓരോ stressful situationsൽ പ്രതികരിക്കുന്നതെങ്ങനെ എന്നു വിശദമായി പ്രതിപാദിച്ചിട്ടുണ്ട്. കൂട്ടആത്മഹത്യകൾ, ചാവേർ സ്ഫോടനങ്ങൾ, അതിവേഗതയിലുള്ള മ്യൂട്ടേഷനുകൾ, അഡ് ഓപ്പറോണുകൾ ചില എൻസൈമുകളുടെ ഉത്പാദനം പൊടുന്നനെ സ്വിച്ച് ഓൺ ചെയ്യുകയും മറ്റുചിലവ സ്വിച്ച് ഓഫ് ആക്കുകയും ചെയ്യുന്നത്, അവ ഉത്പാദിപ്പിക്കുന്ന ടോക്സിക് പ്രോട്ടീനുകൾ കെമിക്കൽ വെപ്പൺ ആയി ഉപയോഗിക്കപ്പെടുന്നത്, കോളനികളുടെ മെഷ് സ്ഥാപിക്കുന്നത്, ഒരേ തലമുറയിലെ തന്നെ ബാക്ടീരിയകൾ ആന്റി ബയോട്ടിക്കുകളോടു പ്രതികരിക്കുന്ന വിധം, തുടങ്ങി അതിൽ പറയുന്നതെന്തും ജീവിവർഗ്ഗത്തിലെ മുകൾത്തട്ടിൽ നിൽക്കുന്ന മനുഷ്യവർഗ്ഗത്തിനും ബാധകമാണ്. അത്തരം പെരുമാറ്റ വൈചിത്ര്യങ്ങൾക്ക് നിലനില്പുമായി അഭേദ്യബന്ധമുണ്ട്.

ശാസ്ത്രം ഉപയോഗിച്ച് കുറ്റകൃത്യത്തെ വെള്ളപൂശാൻ ശ്രമിക്കുകയല്ല. കാര്യങ്ങളെ അതിന്റെ പെർസ്പെക്റ്റീവിൽ കാണാൻ ശ്രമിക്കുകയാണ്. പത്തൊൻപതുകാരനായ ഒരു പയ്യനെ മഴുകൊണ്ടു വെട്ടിക്കൊന്ന കേസിലെ പ്രതികളെയെല്ലാം കോടതി വിചാരണ നടത്തി വെറുതെ വിടുന്നു. പ്രതികൾക്കെതിരെ കുറ്റം തെളിയിക്കാൻ മതിയായ തെളിവു ഹാജരാക്കുന്നതിൽ പൊലീസും പ്രോസിക്യൂഷനും പരാജയപ്പെട്ടതാണു കാരണം. ഈ പരാജയം വെറുതെയുണ്ടാവുന്നതല്ലല്ലോ. ഷിബിൻ വധക്കേസ് കൈകാര്യം ചെയ്ത രീതിയും അതിനുമുമ്പു നടന്ന ഷുക്കൂർ വധക്കേസ് കൈകാര്യം ചെയ്ത രീതിയും കണ്ടാൽ ഇരട്ടനീതി വെളിവാകും.

അവിടംകൊണ്ടും തീർന്നില്ല. ഷിബിൻ വധക്കേസിൽ വെറുതെ വിട്ട പ്രതികൾക്കൊരുക്കിയ സ്വീകരണവും അവരെ വീരപരിവേഷത്തോടെ സോഷ്യൽ മീഡിയയിലടക്കം എഴുന്നള്ളിച്ചുനടന്നതും ഒക്കെ അധികാരവും പൊതുബോധവും മാദ്ധ്യമപിന്തുണയും ഒരുമിച്ചു കൈയടക്കിയാൽ എന്തുമാകാമെന്നും അവർക്കു നിയമമൊന്നും ബാധകമല്ല എന്നുമുള്ള ബോധം സൃഷ്ടിക്കും. നിയമവാഴ്ച തകരുന്നു എന്നു കാണുമ്പോൾ സ്വാഭാവിക പ്രതികരണമെന്നോണം നിയമം സ്വയം നടപ്പിലാക്കാനുള്ള ശ്രമം aggreived ആയ കക്ഷികളിൽ നിന്നുണ്ടാവും. അതുകൂടുതൽ നിയമ ലംഘനങ്ങളിലേക്കു നയിക്കും.

മറിച്ച് അന്നു ഷിബിനെ കൊന്നവരെ ശിക്ഷിക്കാവുന്ന തരത്തിൽ പൊലീസ് പെരുമാറിയിരുന്നെങ്കിൽ ഇതുണ്ടാകുമായിരുന്നില്ല. നാദാപുരത്തു നടന്ന കലാപത്തോടും അതേ രീതിയിൽ തന്നെ നീങ്ങണമായിരുന്നു. പകരം നിയമം നിയമത്തിന്റെ വഴിക്ക് എന്നു പ്രസ്താവനയിറക്കുകയും നിയമം അധികാരമുള്ളവന്റെ ഇംഗിതത്തിനനുസരിച്ചു നീങ്ങുകയും ചെയ്യുമ്പോൾ അനിഷ്ടകരമായതു സംഭവിക്കും.

ഇത്തരം സംഭവങ്ങളിൽ ഏതൊരു കൂട്ടത്തിനും തങ്ങളിലൊരാളുടെ സുരക്ഷയോളം തന്നെ പ്രധാനമാണ് തങ്ങളുടെ സാഹോദര്യത്തെ ഭേദിച്ചവരോടുള്ള പ്രതികാരവും. ആ പ്രതികാരവാഞ്ചയിൽ കൂടിയാണ്, ആ കൂട്ടം അതിന്റെ സംഘബലം നിലനിർത്തുന്നത്. അതിൽ ജനാധിപത്യമൂല്യങ്ങൾ തിരയുന്നത് അസംബന്ധമാണ്.

പകയുടെ ഒരു പ്രശ്നം അത് ഇടതുപക്ഷം മുന്നോട്ടുവയ്ക്കുന്ന സമഭാവനയുടെയോ ആർഎസ്എസുകാർ അവകാശപ്പെടുന്ന വിശ്വപുരുഷന്റെയോ ലീഗുകാർ ഉന്നയിക്കുന്ന സാഹോദര്യത്തിന്റെയോ കോൺഗ്രസുകാർ പറയുന്ന വിശ്വമാനവികതയുടെയോ പരിധിക്കു പുറത്താണെന്നതാണ്. പക ജനിക്കുന്നതോടെ ഇല്ലാതാവുന്നത് ഈ സങ്കല്പങ്ങൾ കൂടിയാണ്.

അതുകൊണ്ടാണ് ഷിബിനെ നഷ്ടപ്പെട്ടപ്പോൾ തോന്നിയ ആത്മരോഷം അസ്ലം കൊല്ലപ്പെടുമ്പോൾ മാർക്സിസ്റ്റുകൾക്ക് ഉണ്ടാവാത്തത്. അതുകൊണ്ടാണ് അസ്ലത്തിന്റെ കൊലപാതകത്തെ ചൊല്ലി കണ്ണീർ പൊഴിക്കുന്ന ലീഗുകാർ ഷിബിന്റെ കൊലപാതകത്തെ അബദ്ധത്തിൽ സംഭവിച്ചത് എന്ന മട്ടിൽ ലഘൂകരിക്കുന്നത്.

സ്നേഹത്തിന്റെയും സാഹോദര്യത്തിന്റെയും ഗാഥകൾ ഫ്രറ്റേണിറ്റിക്കുള്ളിൽ മാത്രമാണ്. പുറത്തോട്ട് ശത്രുവിന്റെ തല തകർക്കുന്ന പോരാളിയുടെ വീര്യമാണ്. ഇത് ഒരു പ്രശ്നമെന്ന നിലയിൽ തിരിച്ചറിയപ്പെടേണ്ടതുണ്ട്.

പക വീട്ടാനുള്ളതാണ് എന്നാണ് സോഷ്യൽ മീഡിയയിലെ ന്യായം. തെയ്യംപാടി ഇസ്മായീലിന് ആദരാഞ്ജലികൾ എന്ന പോസ്റ്റർ ഇപ്പോൾ തന്നെ ഫേസ്ബുക്കിൽ പറന്നു നടക്കുന്നു. അതായത്, മൂന്നാം പ്രതിയെ കൊന്ന ശേഷം ‘അടുത്ത നമ്പർ നിന്റെയാടാ’ എന്ന പരസ്യഭീഷണിയാണ് മുഴങ്ങുന്നത്. നിയമവാഴ്ചയോടു തരിമ്പെങ്കിലും ബഹുമാനമുള്ള ഒരു പൊലീസ് സംവിധാനത്തിനും ഇതു നോക്കിനിൽക്കാനാവില്ല. പക്ഷെ ഇതിനോളം തന്നെ ഗൗരവമുള്ളതാണ് ഇസ്മായീലിനെ വീരനായകനാക്കി പെരുന്നാളാശംസകൾ നേരുന്ന ഫ്ലക്സുകൾ. അസ്ലത്തിന്റെ കൊലപാതകത്തിലേക്കു വഴിതെളിച്ച വിദ്വേഷം ആളിക്കത്തിക്കുന്നതിൽ ആ ഫ്ളക്സുകൾക്കും പങ്കുണ്ടായിരുന്നു. നടപടിയെടുക്കുമ്പോൾ അതു വച്ചവർക്കെതിരെയും നടപടി ഉണ്ടാവേണ്ടതാണ്.

രാഷ്ട്രീയ കക്ഷികളുടെ അണികളിൽ നിറഞ്ഞുനിൽക്കുന്ന ഈ വിദ്വേഷം പൊതുസമൂഹത്തിലുണ്ടാക്കുന്ന negative vibe കാണാതിരുന്നുകൂടാ. ഭരണം കൈയിലുള്ള സമയത്തു തീരെ പൊറുക്കാവതല്ല, ഈ പങ്കം. സിപിഐ(എം) അക്രമകാരികളാണെന്ന കഥ രാജ്യം മുഴുക്കെ എത്തിക്കാൻ ആർഎസ്എസ് കച്ചകെട്ടുന്ന സമയത്ത് ആ ആഖ്യാനത്തിനു ശക്തിപകരുന്ന പ്രവർത്തികളിൽ ഏർപ്പെടാതിരിക്കയാണ് കാമ്യം. പിണറായി വിജയന്റെ വിജയാഘോഷപ്രകടനം പോലും കലക്കി കലാപമുണ്ടാക്കാൻ ആർഎസ്എസ് ശ്രമിച്ചത് ഒന്നും കാണാതെയല്ല. ആ കെണിയിലേക്കു വീണുകൊടുക്കുകയാണ് മാർക്സിസ്റ്റ് പാർട്ടി പ്രവർത്തകർ.

വാസ്തവത്തിൽ ഇനിയൊരു കൊലപാതകം ചെയ്യാൻ മടിക്കുംവിധത്തിൽ ശക്തമായ നടപടികളെടുത്തു മുന്നോട്ടുപോകാൻ കൈയിലുള്ള പൊലീസ് സംവിധാനത്തെ ഉപയോഗിക്കാമെന്നിരിക്കെ പൊലീസിങ് സ്വയം നടപ്പാക്കാൻ ശ്രമിക്കുന്നിടത്തോളം മണ്ടത്തരം വേറെയില്ല. ഇതാണു വിപ്ലവമെന്നു ധരിച്ചുപോയാൽ ആരോടു പറയാനാണ്?

ആരെങ്കിലും അതിനെ അപലപിക്കുമെന്നായാൽ ഉടനെ തുറുപ്പുചീട്ട് പുറത്തെടുക്കുകയായി. അവരാരും കൊലചെയ്തപ്പോൾ നിങ്ങൾ ശബ്ദിച്ചില്ലല്ലോ, ഇപ്പോൾ ശബ്ദിക്കുന്നത് ഏകപക്ഷീയമല്ലേ എന്നാണു ചോദ്യം. ശബ്ദിക്കുന്നവരെല്ലാം ‘ഉത്തമ’ന്മാരാണെന്നാണു തീർപ്പ്. കൊലപാതകം നടത്തിയതിനെ ന്യായീകരിക്കുന്നതിൽ തങ്ങൾക്കൊപ്പം പങ്കുകാരാവുകയോ അല്ലാത്ത പക്ഷം നിശബ്ദത പാലിക്കുകയോ ചെയ്യാനുള്ള സാമൂഹ്യസമ്മർദ്ദം സൃഷ്ടിക്കുകയാണവിടെ.

എല്ലാവരും പാർടിക്കാരായ ഇടത്തുനിന്നു വരുന്നയൊരാൾക്ക് അതിലൊന്നും ഒരു പ്രശ്നവും കാണാനാവില്ല. എന്നാൽ പാർടി ന്യൂനപക്ഷമായ ഇടങ്ങളിൽ അതുണ്ടാക്കുന്ന ഡാമേജിനെ അവർക്കു സങ്കല്പിക്കാനുമാവില്ല. അത്തരക്കാരെ നിലയ്ക്കു നിർത്താത്തിടത്തോളം കാലം ഈ രാഷ്ട്രീയകക്ഷിയെ സംബന്ധിച്ച ചില വലതുപക്ഷധാരണകൾ തിരുത്തപ്പെടാതെ തന്നെ കിടക്കും.

അതെന്തുമാവട്ടെ. രാഷ്ട്രീയ പ്രതിയോഗികളെ സിപിഐ(എം) വധശിക്ഷയ്ക്ക് വിധേയമാക്കുന്നുവെന്നും അതുകൊണ്ടുതന്നെ ഭരണകൂടം നടത്തുന്ന വധശിക്ഷയ്ക്കെതിരെ പ്രതികരിക്കാൻ അവർക്ക് അവകാശമില്ല എന്നുമാണ് ഉമ്മൻ ചാണ്ടിയും രമേശ് ചെന്നിത്തലയും വി എം സുധീരനും കുമ്മനം രാജശേഖരനും എന്നുവേണ്ട സോഷ്യൽ മീഡിയയിലെ ശരാശരി രാഷ്ട്രീയ ബുദ്ധിജീവി വരെ വിലയിരുത്തുന്നത്. തങ്ങൾ വധശിക്ഷയെ അനുകൂലിക്കുന്നതിനാൽ തങ്ങൾക്ക് രാഷ്ട്രീയ കൊലപാതകങ്ങൾ നടത്താൻ അവകാശമുണ്ട് എന്നാണോ അപ്പോൾ ആർഎസ്എസിന്റെയും കോൺഗ്രസിന്റെയും ലീഗിന്റെയും ഒക്കെ നിലപാട്?

കൊലപാതകം രാഷ്ട്രീയകാരണങ്ങളാലായാലും മറ്റു കാരണങ്ങളാലായാലും ക്രിമിനൽ പ്രവർത്തിയാണെന്നു കാണണം. ഒരിനം കൊലപാതകത്തെ അപേക്ഷിച്ചു മറ്റൊരിനം കൊലപാതകത്തിന് യാതൊരു മേന്മയും അവകാശപ്പെടാനില്ല. സ്വത്തുതർക്കത്തിന്റെ പേരിലായാലും അപഥസഞ്ചാരത്തിന്റെ പേരിലായാലും വിശ്വാസവഞ്ചനയുടെ പേരിലായാലും രാഷ്ട്രീയഭിന്നതയുടെ പേരിലായാലും കോടതിവിധിയുടെ പേരിലായാലും കൊലപാതകം അപലപനീയമാണ്.

രാഷ്ട്രീയസംഘർഷങ്ങളുടെ ബാക്കിപത്രമായ പ്രതികാരനടപടികളും പ്രതികാരക്കൊലപാതകങ്ങൾ പോലും ഒരു തരത്തിലും ഒരു ഭരണകൂടം അതിന്റെ പ്രജകൾക്കുമേൽ ചുമത്തുന്ന വധശിക്ഷയെ ന്യായീകരിക്കാനുള്ള പഴുതല്ല. ഭരണകൂടവും പൗരസമൂഹവും ഒരേ പ്രതലത്തിൽ നിൽക്കുന്നവരല്ല. സിപിഐ(എം) കൊലപാതകം നടത്തിയാൽ ശിക്ഷിക്കാൻ നിയമമുണ്ട്. ആർഎസ്എസ് കൊലപാതകം നടത്തിയാലും ശിക്ഷിക്കാൻ നിയമമുണ്ട്. അതേ സമയം ഭരണകൂടം വധശിക്ഷ നടപ്പാക്കിയാൽ ശിക്ഷിക്കാൻ നിയമമില്ല. വളരെ അസമമായ പ്രതലമാണത്.

മുമ്പൊരിക്കൽ എഴുതിയ ഒരു ലേഖനത്തിൽ നിന്നും ഏതാനും ഖണ്ഡികകൾ കടംകൊള്ളുകയാണ്.

ജീവന്‍കൊടുക്കാന്‍ കഴിയാത്ത ഭരണകൂടം എന്തിന്റെ പേരിലായാലും ഒരു ജീവന്‍ എടുക്കുന്നതു സ്റ്റേറ്റ് ചെയ്യുന്ന കൊലപാതകം തന്നെയാണു. പരിഷ്കൃതമായ സമൂഹത്തിനു ചേര്‍ന്നതല്ല, അത്.

വധശിക്ഷയില്‍ ഇല്ലാതെയാവുന്നതാണു കുറ്റകൃത്യങ്ങള്‍ എന്ന ധാരണ അബദ്ധമാണ്. അങ്ങനെയെങ്കില്‍ ലോകത്തു യുദ്ധങ്ങള്‍ തന്നെ ഉണ്ടാകുമായിരുന്നില്ല. ശിക്ഷയെ സംബന്ധിച്ചു നമ്മുടെ പ്രാഥമിക ധാരണ തന്നെ തിരുത്തേണ്ടതുണ്ട്. ഒരു തെറ്റ് തിരുത്തുന്നതിനാണു ശിക്ഷയിലൂടെ പരിശ്രമിക്കേണ്ടത്. അല്ലാതെ ഭരണകൂടം അനുവര്‍ത്തിക്കുന്ന മറ്റൊരു തെറ്റിലൂടെ അതിനെ ന്യൂട്രലൈസ് ചെയ്യുകയല്ല, ആധുനികസമൂഹം ചെയ്യേണ്ടത്. അവനെ ക്രൂശിക്കുക എന്ന മുറവിളികള്‍ക്കു ചെവികൊടുക്കാതെ ഈ രക്തത്തില്‍ എനിക്കു പങ്കില്ലെന്നു കൈകഴുകാനുള്ള സത്യസന്ധതയെങ്കിലും നാമാര്‍ജ്ജിക്കേണ്ടതുണ്ട്.

എത്രതന്നെ വലിയ കുറ്റം ചെയ്തവരാണെന്നുവരികിലും ഒരു ദേശം അതിന്റെ പ്രജകളെ / പൌരന്മാരെ അതിന്റെ പേരില്‍ കൊലയ്ക്ക് എറിഞ്ഞുകൊടുക്കുന്നതിനേക്കാളും ഹീനമായ മറ്റൊരു കുറ്റകൃത്യമുണ്ടാവില്ല. ഒരു പ്രദേശത്തെ സംബന്ധിച്ചിടത്തോളം പരമമായ അധികാരകേന്ദ്രം എന്നുപറയുന്നതു ഭരണകൂടമായിരിക്കേ, ആ അധികാരസ്ഥാനത്തുനിന്നു നിവര്‍ത്തിക്കുന്ന ശിക്ഷാവിധി പ്രതികാരത്തിന്റെ യുക്തി ആവാതിരിക്കേണ്ടതുണ്ട്. അതാണു ജനാധിപത്യം ആവശ്യപ്പെടുന്ന സമത.

പ്രാഥമികമായും അതിന്റെ പൌരന്മാരുടെ ജീവനും സ്വത്തിനും സംരക്ഷണം നല്‍കുക എന്ന ബാധ്യതയാണു ദേശരാഷ്ട്രത്തിനുള്ളത്. അവിടെ സംഭവിക്കുന്ന ഓരോ കുറ്റകൃത്യവും ഈ ബാധ്യതയെ പരാജയപ്പെടുത്തുകയാണ്. അതിനിടയാക്കിയവരും പൌരന്മാര്‍ തന്നെയാണെന്നിരിക്കെ, മരിച്ചുപോവുകയോ കൊല്ലപ്പെടുകയോ ചെയ്ത ഒരാള്‍ക്കുപോലും ജീവന്‍ തിരികെക്കൊടുക്കാന്‍ ന്യായാധിപര്‍ക്കോ ഭരണകൂടത്തിനോ ദേശരാഷ്ട്രത്തിനോ ആവില്ലെന്നുമിരിക്കെ, അതു പറിച്ചെടുക്കാന്‍ വെമ്പുന്നതില്‍ അനീതിയുണ്ട്. തങ്ങള്‍ക്കു നല്‍കാനാവാതെയിരുന്ന ഒരു കാര്യം നഷ്ടപ്പെടാന്‍ ഇടയാക്കിയവരോടു ചെയ്യുന്ന പ്രതികാരമായി ശിക്ഷ മാറുന്നതിലൂടെ ആ കുറ്റകൃത്യം ചെയ്തവര്‍ക്കു തിരുത്താനുള്ള അവസരം നഷ്ടപ്പെടുത്തുക മാത്രമല്ല, ആ സാഹചര്യത്തെ അതേപടി നിലനിര്‍ത്തുന്നതിലൂടെ അതേ കുറ്റകൃത്യം മറ്റാളുകളിലൂടെ വീണ്ടുമാവര്‍ത്തിക്കാനുള്ള സാധ്യതയെ അവശേഷിപ്പിക്കുകകൂടിയാണു ചെയ്യുന്നത്.

പശ്ചാത്താപലേശമില്ലാത്ത കൊടുംകുറ്റവാളികളെ സമൂഹത്തില്‍ നിന്നു ദീര്‍ഘകാലത്തേക്കു മാറ്റിനിര്‍ത്താന്‍, അവരുടെ പലവിധത്തിലുള്ള സ്വാതന്ത്ര്യങ്ങള്‍ നിഷേധിക്കാനും നിയന്ത്രണവിധേയമാക്കാനും നിലവില്‍ മാര്‍ഗ്ഗങ്ങളുണ്ടെന്നിരിക്കെ അവയെ സമയത്തും കാലത്തും നടപ്പാക്കുക എന്നതേ ചെയ്യേണ്ടതായുള്ളൂ. പ്രതികാരമല്ല, തിരുത്താണു ശിക്ഷയിലൂടെ ഉദ്ദേശിക്കുന്നത് എന്ന് എപ്പോഴുമോര്‍ക്കുക.

ക്രിമിനൽ കുറ്റങ്ങളിൽ നിയമം നടപ്പിലാക്കേണ്ടത് ഇച്ഛാശക്തിയുള്ള ഭരണകൂടത്തിന്റെയും അതിനെ നിയന്ത്രിക്കുന്ന രാഷ്ട്രീയകക്ഷികളുടെയും പൗരസമൂഹത്തിന്റെ തന്നെയും താത്പര്യമാണ്. സിപിഐ(എം) പ്രതിസ്ഥാനത്താകുന്ന ഘട്ടങ്ങളിൽ കേരളത്തിൽ അതു നടക്കുന്നുമുണ്ട്. മാദ്ധ്യമങ്ങൾ അതുറപ്പാക്കുന്നുണ്ട്. അതേ സമയം മുസ്ലീം ലീഗോ കോൺഗ്രസോ ആർഎസ്എസോ നടത്തുന്ന കൊലപാതകങ്ങളിൽ അതു പലപ്പോഴും നടക്കാറുമില്ല. കോൺഗ്രസ് ഗ്രൂപ്പുവഴക്കിനെ തുടർന്നു തൃശ്ശൂരിലുണ്ടായ തുടർക്കൊലപാതകങ്ങൾ കെപിസിസിയുടെ കോടിക്കു മുന്നിൽ ഇല്ലാതായതോർമ്മിക്കുക.

പാടത്തെ പണിയും വരമ്പത്തെ കൂലിയും ഒരേപോലെ നിൽക്കേണ്ടതുണ്ട്. പാടത്തു പണി തുടരുകയും കൂലിയില്ലാതിരിക്കുകയും ചെയ്യുന്നത് നെൽക്കതിരുകളുടെ തലപ്പുകൾ അരിയാനുള്ളതാണെന്ന ഉറപ്പിക്കലാണ്. മാർക്സിസ്റ്റുകാർ കൊല്ലപ്പെടേണ്ടവരാണെന്ന ഉറപ്പിക്കലാണ്. അതിൽ ഒരു ശരികേടുണ്ട്.

വരമ്പത്തു കൂലി നൽകുന്നത് പാടത്തു പണികിട്ടിയവരാകുന്നതാണു പ്രശ്നം. അത് നിയമപാലകർ ചെയ്യേണ്ടതാണ്. കൈയിലുള്ള അധികാരത്തെ അതിനായി ഉപയോഗിക്കുകയാണ് ചെയ്യേണ്ടത്. കൊലപാതകങ്ങളിൽ ഏർപ്പെടുന്നവർക്കു ശിക്ഷ ലഭിക്കുമെന്നുറപ്പാക്കിയാൽ തന്നെ ഇതിനു ശമനമുണ്ടാവാം.

കൊലപാതകങ്ങളെ അപലപിക്കുമ്പോഴും രാഷ്ട്രീയസംഘർഷങ്ങളാലോ ഇതരകാരണങ്ങളാലോ കൊലപാതകങ്ങളുണ്ടാവുന്നതിനെ നിഷേധിക്കാനാവില്ല. അതേ സമയം ഭരണകൂടത്തിന്റെ പ്രാഥമിക കർത്തവ്യം ജീവിക്കാനുള്ള അവകാശത്തെ സംരക്ഷിക്കുക എന്നതാണ്. വധശിക്ഷയാവട്ടെ, അതിനെ കയ്യൊഴിയലാണ്. അല്ല, അട്ടിമറിക്കലാണ്.

മറ്റുള്ളവർക്ക് അപകടകാരിയായ ഒരാളെ ക്വാരന്റൈൻ ചെയ്യാൻ നിയമം അനുവദിക്കുന്നുണ്ട്. അതിനുമപ്പുറം അയാളെ ഭൂമുഖത്തുനിന്നേ ഇല്ലാതാക്കണം എന്ന നിർബന്ധം ഭരണകൂടത്തിനു ചേർന്നതല്ല. ജന്മംകൊടുക്കാനാവാത്ത ഒരു സംവിധാനം ജീവൻ നശിപ്പിക്കുന്ന പരിപാടിയായി വധശിക്ഷയെ മനസ്സിലാക്കേണ്ടതുണ്ട്.

രാഷ്ട്രീയ പാർട്ടികൾ ചെയ്യുന്ന കൊലപാതകങ്ങളിലും ഇതേയുക്തി ബാധകമാണ്. കാരണം രാഷ്ട്രീയപാർട്ടികൾക്കും ജീവൻ കൊടുക്കാനാവില്ല. എന്നാൽ രാഷ്ട്രീയകക്ഷികളെ – അതിന്റെ നേതാക്കന്മാരെ – കൊലപാതകക്കുറ്റത്തിനു വിചാരണ ചെയ്യാനും ശിക്ഷിക്കാനും സാധിക്കും. വിദ്വേഷ പ്രചാരണം നടത്തുന്ന അണികൾക്കെതിരെ കേസ് എടുക്കാൻ സാധിക്കും. ഭരണകൂടം നടപ്പാക്കുന്ന വധശിക്ഷയിൽ കോടതിക്കെതിരെയോ ആരാച്ചാർക്കെതിരെയോ പൊലീസിനെതിരെയോ ആഭ്യന്തരമന്ത്രാലത്തിനെതിരെയോ അത്തരമൊരു നടപടി സാധ്യമല്ല. അത് വലിയ വ്യത്യാസമാണ്.

ആയതുകൊണ്ടുതന്നെ വധശിക്ഷയെ അപലപിക്കുന്ന സിപിഐ(എം) നിലപാടിൽ ഇരട്ടത്താപ്പ് ആരോപിക്കുന്നതിൽ കാര്യമില്ല. അതും ചില കൊലപാതകങ്ങളിൽ ആ പാർട്ടിയിലെ അംഗങ്ങൾ പ്രതികളാക്കപ്പെടുന്നതും തമ്മിൽ ഒരു താത്പര്യസംഘർഷവും ഉടലെടുക്കുന്നില്ല.

കൊലപാതകങ്ങളിൽ ഏർപ്പെടുന്ന അണികൾ ഉള്ളതിനാൽ വധശിക്ഷയെ എതിർക്കരുത് എന്നു പറയുന്നത് കൊലപാതകം തടയണം എന്ന ഉദ്ദേശത്തിലല്ല. മറിച്ച് ഭരണകൂടത്തിന്റെ കിരാതമായ ശിക്ഷാനടപടി നിലനിർത്തണം എന്ന അധീശവർഗ്ഗ താത്പര്യത്തിലാണ്. കൊലപാതകം ക്രിമിനൽ കുറ്റമാണെന്നും അത് രാഷ്ട്രീയ പ്രവർത്തനമല്ലെന്നുമുള്ള ബോധ്യമാണ് എല്ലാ രാഷ്ട്രീയ പ്രവർത്തകരെയും ഭരിക്കേണ്ടത്. ഭരണകൂടം നടത്തുന്ന കൊലപാതകം വിശുദ്ധ കൊലപാതകം ആവുന്നില്ല.

പൂക്കാലമാണു്, പൂക്കാലം

2016-03-20T18:07:00.004+05:30

Spring is here, The spring is here
All the fauna are sprouting with fear
Young and old, meek and cold
Blossom each day like Rafflesias are
Life just left, but warmth is left
Creeping in night, from shrubs high up

First I saw, two little girls
The girls who went to read up a bit
Next I saw, a boy and a man
The boy had went to herd buffaloes
Hanging like weed from trunks either side
Of that lone tree that stands up the winds

They ain’t them, Oh they ain’t them
They are the one’s who happened to be
They had once loved the scent of this mud
They have now kissed the sound of this thud

Last week it bloomed in a village in south
For tying the knot with a higher caste girl
This day it bloomed in a city in north
For dating a girl who learns by his side

Hyderabad had a Rafflesia bloom
Insipid as a passing day fad
He had but put a BheemRao hat
Blue as it turns and red as it twits

How could we help, but bloom in a flash,
Though vapid as ice, as spring is in here
There are no horns, and nothing be heard
These are the rays of spring, the good days

And on that banks of Yamuna cerulean
Where Jamun kala had sprouted violet
There lies a bed of dreadful deeds
Of pleasure hunters, those lily-livered.

Time needn’t ripe, be youthful enough
Even those salted hair can then bloom
Enter a shrine or devour some steak
From public well, right, you drink a little
Concrete your roof or walk by the road, not
taking the path that goes round the nook

Age is no bar, no gender divide
No reason at all, to sprout there and bloom
When dusk is near, you be at the door
Like a Lotus that wither and fade
For spring is here, The spring is here.

പൂക്കാലമാണു്, പൂക്കാലം
നാട്ടിലെ നാരായമരങ്ങളിലെല്ലാം
ചെറുപ്പക്കാർ പൂക്കുകയാണു്.
വള്ളിപ്പൂക്കളാണു്.
ഒടിഞ്ഞുതൂങ്ങിയാണു കിടക്കുന്നതു്
ചത്തിട്ടുണ്ടെന്നേയുള്ളൂ.
ചൂടുപോയിട്ടില്ല.

രണ്ടുപെൺപൂവുകളായിരുന്നു ആദ്യം.
പഠിക്കാൻ പോയതായിരുന്നു കുറ്റം.
രണ്ടാൺപൂവുകളാണിന്നലെ.
മേയ്ക്കാൻ പോയതാണു കുറ്റം.

അവർ മാത്രമല്ല;
ചിലപ്പോൾ നിന്നനിപ്പിൽ
തെരുവിൽ
ചോര പൂക്കുന്നതുകാണാം.
സ്നേഹിച്ചുപോയെന്ന കുറ്റത്തിനു്…

കഴിഞ്ഞയാഴ്ച ഉദുമൽപേട്ടയിൽ പൂത്തിരുന്നു
തേവരുടെ മകളെ വേട്ടിയതിനു്.
ഇന്നിപ്പോൾ മറാത്തവാഡയിലും പൂത്തിട്ടുണ്ടു്.
കൂടെപ്പഠിക്കുന്നവളെ പ്രേമിച്ചതിനു്.

ഹൈദരാബാദിൽ പൂത്തിരുന്നു
ഭരണഘടനയെഴുതിയ തെണ്ടിയുടെ ചിത്രം
ചുമരിൽ പതിച്ചതിനു്,
നെഞ്ചുപൊട്ടി
ജയ്ഭീം വിളിച്ചതിനു്…

പൂക്കാതിരിക്കാനെനിക്കാവതില്ലേ
വിഷുക്കാലമല്ലേ കണിക്കൊന്നയല്ലേ
എന്നൊക്കെ ചൊല്ലുന്നുണ്ടാവണം.
ഒന്നും കേൾക്കുന്നില്ല.
പൂക്കാലമാണു്. നല്ല ദിനങ്ങളാണു്.
യമുനാതടത്തിൽ ആഹ്ളാദത്തിന്റെ
പൂപ്പാടങ്ങളാണു്.

കാലം കഴിഞ്ഞുവെന്നു വിഷമിക്കേണ്ട,
ചിലനാൾ പ്രായമേറിലും പൂക്കാം.
അമ്പലത്തിൽകയറിയതിനു്,
പൊതുകിണറ്റിൽ നിന്നു വെള്ളം കോരിയതിനു്,
ഇറച്ചികഴിച്ചതിനു്,
വീടു് ഓടുമേഞ്ഞതിനു്…

പൂക്കാൻ അങ്ങനെ പ്രത്യേകിച്ചു കാരണമൊന്നും വേണ്ട
പ്രായം ഒരു തടസ്സമേയല്ല.
ചെറുപ്പക്കാർ തന്നെ വേണമെന്നില്ല.
സന്ധ്യയായാൽ
താമരപോലെ
വാടിക്കുഴഞ്ഞുകിടക്കാം.
പൂക്കാലമാണു്, പൂക്കാലം.

ഓൾ അൽഗൊരിഥംസ് ഗോ റ്റു യുവർ ക്ലാസസ് അഥവാ ഫേസ്‌ബുക്ക് പോസ്റ്റിൽ ഞാൻ കാണുന്ന ലാക്ക്

2015-08-12T22:39:00.000+05:30

1. ഫേസ്‍ബുക്കിന്റെ real name endowment policyയോടു യോജിപ്പില്ല. അതിലെ surveillance element ആധാറിനോളമോ അതേക്കാളുമോ പ്രശ്നതരമാണെന്നു കാണുന്നു. whistle blowerക്കു സംരക്ഷണം നൽകണം എന്നു് എന്തുകൊണ്ടു് സ്റ്റേറ്റിനോടു് ആവശ്യപ്പെടുന്നുവോ, അതേ കാരണത്താൽ social networkൽ anonymityക്കു് അവകാശമുണ്ടാകണമെന്നു് ആഗ്രഹിക്കുന്നു.

2. ഫേസ്‍ബുക്ക് ഒരു voyeur application ആണു് എന്ന തിരിച്ചറിവു് എനിക്കുണ്ടു് . My new car, My dear stallion / bitch, my valued glass mates എന്നിങ്ങനെ എന്നെ ചുറ്റിപ്പറ്റിയ ഒരു flirting paradise സൃഷ്ടിക്കാനാണു് ഫേസ്‌ബുക്ക് എന്നോടു് അബോധത്തിൽ ആവശ്യപ്പെടുന്നതു്. എന്റെ രാഷ്ട്രീയം എന്നതു് അതിലെ collateral damage ആണു്. സ്നോഡന്റെ revelationsസിൽ അടക്കം അവർ ഗവൺമെന്റുകൾക്കുവേണ്ടി നടത്തുന്ന surveillance വെളിപ്പെട്ടതാണു്. അവരുടെ കാലാകാലങ്ങളിൽ മാറുന്ന privacy policy, comply ചെയ്തുകൊള്ളാം എന്നു് സമ്മതിച്ചാണു് ഇവിടെ account എടുത്തിട്ടുള്ളതു്. അതിന്റെ പകർപ്പു് എന്റെ പക്കലില്ല. അവർ നാളെ വരുത്തുന്ന ഒരു മാറ്റം real timeൽ check ചെയ്തു്exit ചെയ്യുക എന്നതു് ചിലപ്പോൾ സാധ്യമായെന്നും വരില്ല. നമ്മുടെ private messages പോലും ഒരുവേള അവർ public ആക്കില്ല എന്നതിൽ എനിക്കു് ഒരുറപ്പുമില്ല. അതുകൊണ്ടുതന്നെ, ഫേസ്‍ബുക്കിൽ എഴുതുന്നതിൽ inherent social cost ഉണ്ടെന്നു് ഞാൻ കരുതുന്നു.

3. എനിക്കു പറയാനുള്ള കാര്യങ്ങൾ കൂടുതൽ പേരിലേക്കെത്തിക്കാൻ നിലവിൽ ഫേസ്‌ബുക്കാണു് ഏറ്റവും ഫലപ്രദമായ മാദ്ധ്യമം എന്നതുകൊണ്ടു് ഇവിടെ തുടരുകയും ഇടപെടുകയും ചെയ്യുന്നു. ഫേസ്‌ബുക്ക് ഉപയോഗിക്കുന്നതിലെ social cost-നേക്കാൾ അതുപയോഗിക്കുന്നതിലൂടെ എനിക്കുണ്ടാകുന്ന social capital-നെ ഇപ്പോഴത്തെ അവസ്ഥയിൽ വിലമതിക്കുന്നതിനാലാണിതു്. എനിക്കു് ഫേസ്‌ബുക്കിന്റെ സഹായമില്ലാതെ തന്നെ ഒട്ടധികം പേരിലേക്കെത്താവുന്ന അവസ്ഥ ഉണ്ടാവുകയാണെങ്കിൽ ഞാൻ തീർച്ചയായും ഇതിനെ ഉപേക്ഷിക്കും. എന്നാൽ അങ്ങനെയൊന്നുണ്ടാക്കാൻ വേണ്ടി പരിശ്രമിക്കൂ എന്നു പറഞ്ഞാൽ അതു് എന്റെ മുൻഗണനാവിഷയമല്ല എന്നുവരുന്നു. diasporaയിൽ ചെന്നു പറഞ്ഞോളാൻ പറഞ്ഞാൽ അവിടെ എന്നെ കേൾക്കാനും വായിക്കാനും ഇത്രയും പേരില്ല എന്നതിനാൽ അപ്രായോഗികമാണു് എന്നു കരുതുന്നു. വിസ്തൃതമായ വിപണി എന്നതാണു് ആശയവ്യാപാരി എന്ന നിലയിൽ എന്നെ ഫേസ്‌ബുക്കിൽ glue ചെയ്യുന്നതു്.

4. സംവാദങ്ങൾ തർക്കങ്ങളാക്കാനും thrust ചെയ്യുന്ന pointന്റെ പ്രഹരശേഷി വർദ്ധിപ്പിക്കാനും രൂക്ഷമായ വാഗ്‌പ്രയോഗങ്ങൾ ഉപകരിച്ചേക്കാം. പരിഹാസം, ചാപ്പകുത്തു്, തെറിവിളി തുടങ്ങിയവയൊക്കെ ഇങ്ങനെയാണുണ്ടാവുന്നതു്. എന്നെ സംബന്ധിച്ചു് ഇതൊക്കെയും distractions ആണു്. നല്ല ഒരു debateനെ വിഷയത്തിന്റെ meritൽ നിന്നു് വാക്കിന്റെ ശരിതെറ്റുകളിലേക്കു് വലിച്ചിഴയ്ക്കുന്നതിൽ ഇവ വഹിക്കുന്ന ഋണാത്മകമായ പങ്കു് തിരിച്ചറിയുന്നു. മാന്യന്മാർ മാത്രമുള്ളതല്ല ലോകം എന്നതുകൊണ്ടു്, മാന്യത അതിജീവനത്തിനു് ഉതകില്ല എന്നതുകൊണ്ടും അങ്ങനെയേ പാടുള്ളൂ എന്നു് നിർബന്ധം പിടിക്കുന്നില്ല. എന്നാൽ കഴിവുള്ളിടത്തോളം നേരെ വാ നേരെ പോ രീതിയിൽ മാത്രമേ ഞാൻ ഇടപെടാറുള്ളൂ. ഇതു് generic ആയി പറഞ്ഞതാണു്. അപവാദങ്ങൾ എന്റെ വാക്കുകളിൽ തന്നെ കണ്ടെത്താനാവും.

5. പ്രീതയുടെ വിഷയത്തിൽ വിവിധവശങ്ങളുണ്ടു്. ഒന്നു് പ്രീത കൈകാര്യം ചെയ്യുന്ന രാഷ്ട്രീയമാണോ സിപിഎം അനുഭാവികൾ എന്ന നിലയിൽ പ്രീതയെ ആദ്യം ആക്രമിച്ചവർ കൈകാര്യം ചെയ്യുന്ന രാഷ്ട്രീയമാണോ ഇടതുരാഷ്ട്രീയം എന്ന ചോദ്യം address ചെയ്യേണ്ടതുണ്ടു്. ഇടതുരാഷ്ട്രീയം എന്നതു് ഏകശിലാരൂപമാണോ അതോ അതിനു പല manifestations ഉണ്ടാവാം എന്നു് അംഗീകരിക്കുന്നുണ്ടോ എന്നുകൂടി ആ ചോദ്യം നീളും.

പ്രീതയ്ക്കെതിരെ online സിപിഎം അനുഭാവികളെ തിരിച്ച രണ്ടു സംഭവങ്ങൾ, ഒന്നു് എളമരം കരീമിനെതിരായ നിലപാടും രണ്ടു് ജി സുധാകരനെതിരായ നിലപാടുമാണു്. കരീമിനെതിരെ പ്രസംഗത്തിലെ പ്രയോഗത്തിന്റെ പേരിൽ രൂക്ഷമായ നിലപാടു പ്രീത സ്വീകരിച്ചതിൽ സ്വാനുഭവത്തിന്റെ ചൂരും ഉണ്ടു്. അതില്ലെങ്കിൽ തന്നെയും അങ്ങനെ നിലപാടെടുക്കുന്നതിനു് അവർക്കു് രാഷ്ട്രീയമായ കാരണങ്ങളുമുണ്ടു്. എന്നാൽ തന്റെ പ്രയോഗത്തിലെ പിഴ തിരിച്ചറിഞ്ഞു് അതിനെ തിരുത്താൻ എളമരം പെട്ടെന്നു തന്നെ തയ്യാറാകുന്നുണ്ടു്. അതിലേക്കു് അദ്ദേഹത്തെ നയിച്ചതിൽ സോഷ്യൽ മീഡിയയിലെ reactions വഹിച്ച പങ്കിനെ ഞാൻ ചെറുതായി കാണുന്നുമില്ല. ഒരു വ്യക്തി തിരുത്താൻ തയ്യാറാകുമ്പോൾ അതിനെ അംഗീകരിക്കുന്നതും ബഹുമാനിക്കുന്നതുമാണു് എന്റെ രീതി. ഈ വിഷയത്തിൽ പ്രീതയോ പ്രസന്നൻ ധർമ്മപാലനോ ടെഡിയോ ഒന്നും സ്വീകരിച്ചതു് ആ രീതിയല്ല. അതു് അവരുടെ വ്യക്തിപരമായ സ്വാതന്ത്ര്യമായി കണ്ടു് അംഗീകരിക്കുന്നു.

ജി സുധാകരന്റെ വിഷയത്തിലേക്കു വരുമ്പോൾ അദ്ദേഹത്തിന്റെ പ്രസംഗം - ഈ ഒരൊറ്റ പ്രസംഗമല്ല, മറ്റു നിരവധി പ്രസംഗങ്ങൾ, പ്രവർത്തികൾ - അത്യന്തം സ്ത്രീവിരുദ്ധമാണു് എന്നു് പുരോഗമനരാഷ്ട്രീയം കൈകാര്യം ചെയ്യുന്നവർക്കു തിരിച്ചറിയുന്നതിൽ വലിയ ബുദ്ധിമുട്ടൊന്നും ഉണ്ടാകേണ്ട കാര്യമില്ല. അദ്ദേഹം അതംഗീകരിക്കില്ലെന്നു മാത്രമല്ല, താൻ പിടിച്ച മുയലിനു മൂന്നുകൊമ്പു് എന്ന രീതിയിൽ നിൽക്കുകയും ചെയ്യും. മറ്റു നിരവധി ഗുണങ്ങളുള്ള നേതാവാണു് ജി സുധാകരൻ. എണ്ണംപറഞ്ഞ സംഘാടകനുമാണു്. അദ്ദേഹത്തോടു് സ്നേഹവും അടുപ്പവും ഉള്ള നിരവധി പേർ അദ്ദേഹം എന്തുപറഞ്ഞാലും അതിനെ സ്നേഹവായ്പോടെ പിൻപറ്റുകയും ചെയ്യും.

ഇവിടെ ഒരു കോൺഫ്ലിക്റ്റിനു സാധ്യതയുണ്ടാകുന്നു. പരമ്പരാഗതമായി മാർക്സിസ്റ്റായവരും (എന്റെ അപ്പൂപ്പനും അമ്മൂമ്മയുമൊക്കെ കമ്മ്യൂണിസ്റ്റായിരുന്നു, പാർടി നിരോധിച്ച കാലത്തു് നേതാക്കന്മാർ ഞങ്ങളുടെ തട്ടുമ്പുറത്താണു് ഒളിവിൽ കഴിഞ്ഞതു്, അല്ലാതെ കമ്മ്യൂണിസ്റ്റ് മാനിഫെസ്റ്റോ വായിച്ചിട്ടോ മൂലധനം വായിച്ചിട്ടോ ഒന്നുമല്ല ഞാൻ കമ്മ്യൂണിസ്റ്റായതു്...) കരിയർവൈസായി മാർക്സിസ്റ്റായവരും (എന്റെ ബിസിനസിനു് ഇവിടെ നിൽക്കുകയാണു നല്ലതു്, എന്നെ ബുദ്ധിജീവിയായോ നേതാവായോ നാലുപേർ അംഗീകരിക്കാൻ ഇതാണു നല്ലതു്, എന്റെ പുസ്തകം ചെലവാകാൻ ഇതുവേണം) ഒരു വശത്തും ബൗദ്ധികജീവിതത്തിന്റെ ഭാഗമായും പുസ്തകം വായിച്ചും കാര്യങ്ങൾ അനലൈസ് ചെയ്തും രാഷ്ട്രീയം പഠിച്ചും രാഷ്ട്രീയ പ്രക്രിയയിൽ പലവിധത്തിൽ ഇടപെട്ടും നേതാക്കന്മാരെക്കാൾ ആശയത്തോടു് ആഭിമുഖ്യം പുലർത്തിയും മഴവില്ലിടതിന്റെ കുടക്കീഴിൽവരുന്നവർ മറ്റൊരുവശത്തും അണിനിരന്നേക്കാം. ഇതിൽ അവസാനത്തെ വിഭാഗത്തിൽ തന്നെ ചിലർ അവർക്കു ബോധ്യമായ റീസണിങ്ങിനു പുറത്തു് ആദ്യ വിഭാഗത്തോടു് ഒട്ടിനിൽക്കയും ചെയ്യാം. കരിയറിസ്റ്റുകൾ തരംപോലെ എവിടെയും നിൽക്കും. പരമ്പരാഗതക്കാരാവട്ടെ, ജീവൻ പോയാലും നേതാക്കന്മാരെ സംരക്ഷിച്ചേ അടങ്ങൂ. പരമ്പരാഗത മാർക്സിസ്റ്റുകളും കരിയർ മാർക്സിസ്റ്റുകളും മാത്രമേ പലപ്പോഴും ഗ്രൗണ്ടിൽ പണിയെടുക്കാൻ കാണൂ എന്ന അവസ്ഥയുമുണ്ടു്. തിയറൈസേഷനും ലെഫ്റ്റ് ഓറിയന്റേഷനും ഉള്ളപ്പോഴും മൂന്നാമത്തെ വിഭാഗത്തിൽ പെട്ട ഗണ്യമായ ഒരു ഭാഗം തങ്ങളുടെ രാഷ്ട്രീയം സ്വകാര്യമായി വച്ചുകൊണ്ടിരിക്കുകയും ചെയ്യാം. അവരിൽ പലരെയും സംബന്ധിച്ചു പ്രവർത്തിക്കുന്ന ഒരു പാർടി എന്നതിനേക്കാൾ മാർക്സിസ്റ്റ് ശരികൾ മാത്രം ചെയ്യുന്ന ഒരു മ്യൂസിയം പീസ് ആയി പാർടി നിലനിന്നാലും മതിയാകും. ഉദാരവത്കൃതലോകത്തിൽ ഈ conflict ഇനിയും മൂർച്ഛിക്കുകയേ ഉള്ളൂ. ഇതിനെ എങ്ങനെ നേരിടുന്നു എന്നതു് പാർടിയുടെ നിലനില്പിനെക്കൂടി ബാധിക്കുന്ന കാര്യമാണു താനും.

ഒരു working left formation എന്ന നിലയിൽ അതിന്റെ എല്ല inherent ദോഷങ്ങളോടെയും സിപിഎമ്മിനെ പിന്തുണയ്ക്കുന്ന വ്യക്തിയാണു ഞാൻ. ശരി മാത്രമായി ഒന്നുമില്ലെന്നും ഒരു ശരിയും എല്ലാവർക്കും ശരിയായിക്കൊള്ളണമെന്നില്ലെന്നും ഭംഗിയായി അറിയാം. എങ്കിലും നിലനില്ക്കുന്ന അവസ്ഥയിൽ മറ്റു് ഏതൊരു പൊളിറ്റിക്കൽ ഫോർമേഷനെക്കാളും സിപിഎമ്മിനു പ്രസക്തിയുണ്ടെന്നു ഞാൻ വിശ്വസിക്കുന്നു. അതുകൊണ്ടുതന്നെ പല സന്ദർഭങ്ങളിലും പാർടിയെ പോളിറ്റിക്കലായി defend ചെയ്യേണ്ടതു് എന്റെ ചുമതലയാണെന്നു സ്വയം കരുതി ഏറ്റെടുക്കുകയും ചെയ്യാറുണ്ടു്. പൊളിറ്റിക്കൽ പൊസിഷന്റെ പേരിൽ ഏതെങ്കിലും കോമ്രേഡ് ആക്രമിക്കപ്പെടുന്നുണ്ടെങ്കിൽ അവരോടു് സാഹോദര്യം തോന്നുകയും സമയം അനുവദിച്ചാൽ സഹായിക്കാൻ എത്തുകയും ചെയ്തെന്നുമിരിക്കും. അതേ സമയം നേതാക്കന്മാർ നടത്തുന്ന എല്ലാ പ്രസ്താവനകളെയും പ്രതിരോധിക്കുക എന്റെ കർത്തവ്യമല്ല എന്നു ഞാൻ വിശ്വസിക്കുന്നു. സാംസ്കാരികമായ വലതുപക്ഷയുക്തികളെ നിരന്തരം പ്രഹരിക്കേണ്ടതു് ആവശ്യമാണെന്നും കരുതുന്നു.

സുധാകരന്റെ മേപ്പടി പ്രസ്താവന വരുമ്പോൾ അതിനെ അംഗീകരിക്കാൻ എന്റെ ബുദ്ധി സമ്മതിക്കുന്നില്ല. എന്നാൽ അതിന്റെ പേരിൽ സുധാകരനെ പൂർണ്ണമായും മോശക്കാരനാക്കി ചിത്രീകരിക്കാനും അദ്ദേഹത്തിന്റെ മറ്റെല്ലാ സംഭാവനകളെയും negate ചെയ്യാനും ഞാനായിട്ടു് ഒരവസരം ഉണ്ടാക്കുകയുമില്ല. അതുകൊണ്ടു് ഇത്തരമൊരു സന്ദർഭം വരുമ്പോൾ പൊതുവിൽ ഞാൻ സ്വീകരിക്കാറുള്ള കാര്യം, uncomfortable ആയ silence ആണു്. അതു് വ്യവസ്ഥിതിയോടു ഞാൻ നടത്തുന്ന ഒത്തുതീർപ്പാണു്. ഇത്തരം ഒത്തുതീർപ്പു നടത്താനുള്ള ബാധ്യത വാസ്തവത്തിൽ എനിക്കില്ല. അതേ വിശ്വാസം പങ്കുവയ്ക്കുന്ന പ്രീത അതിനെതിരെ നിലപാടെടുക്കുമ്പോൾ എനിക്കു ധൈര്യമില്ലാത്തതു് പറയാൻ അവർ ധൈര്യം കാട്ടുന്നുണ്ടല്ലോ എന്നു് ഉള്ളിൽ ഒരു സന്തോഷവും ഉണ്ടാകുന്നുണ്ടു്. എന്നാൽ പ്രീതയ്ക്കു പറ്റുന്നതു് എന്നു ഞാൻ കരുതുന്ന പ്രശ്നം, വിഷയത്തെ വികാരപരമായി നേരിടുന്നതാണു്. പരമ്പരാഗത സഖാക്കൾ എത്രമാത്രം വൈകാരികജീവികളാണോ അത്രമാത്രമോ അതിനേക്കാളുമോ വികാരത്തോടെയാണു് പ്രീത ഇതുപോലെയുള്ള വിഷയങ്ങളിൽ അഭിപ്രായം പാസ്സാക്കുന്നതു്. അതിൽ മാർക്കിടാൻ ഞാനാരു് എന്നു ചോദിച്ചാൽ ഞാനാരുമല്ല, എന്നാൽ 4ാമത്തെ പോയിന്റിൽ ഞാൻ പറഞ്ഞ അഭിപ്രായം ഇവിടെ പ്രസക്തമാണു്. പ്രീത ഉന്നയിക്കുന്ന വിഷയത്തെക്കാൾ അതിൽ passionate ആയി അവർ നടത്തുന്ന പ്രയോഗങ്ങളിലേക്കാണു് ചർച്ച പലപ്പോഴും പോകാറു്. അതു് ആശാസ്യമാണോ അല്ലയോ എന്നു് അവരാണു തീരുമാനിക്കേണ്ടതു്.

ഏതായാലും വിഡ്ഢിക്കൂശ്മാണ്ഡം എന്നു് ഒരു നേതാവിനെ ഒരു വഴിപോക്ക വിളിക്കുമ്പോൾ അതിൽ വികാരഭരിതനായി "ഫെമിനിസ്റ്റ് കൊച്ചമ്മ മലരിനു മൂത്തെന്നു തോന്നുന്നു" എന്ന പ്രസ്താവനയിലൂടെ ഫെമിനിസത്തേയും സ്ത്രീയുടെ ക‌ർതൃത്വത്തേയും ചെറുതാക്കിയും veiled ആയി തെറിവിളിച്ചും (മൈരേ എന്നു നേരെ നോക്കി വിളിക്കാൻ ചമ്മലുണ്ടു്, മലരെന്താ തെറിയാണോ എന്നാണു മറുചോദ്യം) ഭ്രാന്തിയായി കല്പിച്ചും പ്രതികരിക്കാൻ ഒരു സഖാവ് മുന്നോട്ടുവരുന്നു. നിരന്തരമായ itchingന്റെ ഫലമായാകാം, ഇങ്ങനെ സംഭവിക്കുന്നതു്. സംവാദത്തിൽ പാലിക്കേണ്ടതെന്നു ഞാൻ വിശ്വസിക്കുന്ന പ്രതിപക്ഷ ബഹുമാനം എന്ന മര്യാദ പാലിക്കുന്നതിൽ തീരെ വിശ്വാസമില്ലാത്ത വ്യക്തിയാണു പ്രീത എന്നു് എനിക്കു പലപ്പോഴും തോന്നിയിട്ടുണ്ടു്. അതിനേക്കാൾ അസഹിഷ്ണുത പ്രീതയോടു വഴക്കിടാൻ ചെല്ലുന്നവർ കാട്ടാറുമുണ്ടു്. സഖാക്കന്മാർക്കു ചേരാത്ത രാഷ്ട്രീയം എഴുതുന്ന സിപിഎം അനുഭാവികളെ ചകാവ് എന്നാണു് പ്രീത സംബോധന ചെയ്യാറു്. വലതുപക്ഷരാഷ്ട്രീയം കൈകാര്യം ചെയ്യുന്നവരെ ഇതിനേക്കാൾ മോശമായി സംബോധന ചെയ്യാറുമുണ്ടു്. എന്നാൽ തിരുത്തി കൂടെ നിർത്തേണ്ടവരെ അകറ്റാനെ ഇമ്മാതിരി പദപ്രയോഗങ്ങൾ ഉപകരിക്കൂ എന്നാണു ഞാൻ കരുതുന്നതു്. സംഘാവ് (സംഘി സഖാവ്), സഖാപ്പി (സുഡാപ്പി സഖാവ്) തുടങ്ങിയ പ്രയോഗങ്ങളും അനുബന്ധമായി ഇവരെപ്പോലെയുള്ളവർ നടത്തുന്നുണ്ടു്. ഇനി സഖദേശി കൂടി വന്നാൽ കുശാലായി. ക്രിപ്റ്റോ എന്ന ഒരു ലേബൽ ഉണ്ടെന്നതു മറന്നുകൊണ്ടല്ല, ഇതുപറയുന്നതു്. ഇങ്ങനെ ഇടതുപക്ഷക്കാരെ തന്നെ മതത്തിന്റെ പേരിൽ ചാപ്പയടിക്കാനും മറ്റുമുള്ള ശ്രമം ആത്യന്തികമായി തങ്ങൾ ഉയർത്തിപ്പിടിക്കുന്ന causeനു ദോഷം ചെയ്യും എന്നു തിരിച്ചറിയാനുള്ള വിവേകം കൈമോശം വന്നതുകണക്കാണു്, ഇടപെടലുകൾ.

പാർടി എന്ന കെട്ടുപാടില്ലാത്ത ഒരാൾക്കു് ഇതുപറയാം. അതേ സമയം പാർടിക്കുവേണ്ടി എന്ന നിലയിൽ സോഷ്യൽ മീഡിയയിൽ ഇടപെടുന്ന ഒരാൾ ഇതുപോലെയോ ഇതിനേക്കാൾ രൂക്ഷമായോ പദപ്രയോഗങ്ങൾ നടത്തുകയും അധോഗമന രാഷ്ട്രീയം പറയുകയും ചെയ്താൽ അതു് പൊതുജനമദ്ധ്യത്തിൽ ഇടതുപക്ഷത്തിന്റെ causeനുണ്ടാക്കുന്നdamage കൂടുതലാവും. അവിടെ ഇടതുരാഷ്ട്രീയം ഉയർത്തിപ്പിടിക്കാനാണു് rational being തയ്യാറാകേണ്ടതു് എന്നാണു് എന്റെ വിനീതമായ അഭിപ്രായം. അതുകൊണ്ടാണു്, ഇത്തരമൊരു പ്രയോഗം ഉണ്ടായപ്പോൾ അതിനെതിരെ പ്രീതയോടൊപ്പം എല്ലാ വിയോജിപ്പുകളും പരണത്തുവച്ചു് നിൽക്കാൻ ഞാൻ തയ്യാറായതു്. അതായതു്, അതു പ്രീതയ്ക്കുവേണ്ടി എന്നതിനേക്കാൾ ഇടതുരാഷ്ട്രീയത്തിനുവേണ്ടി എന്ന നിലയ്ക്കായിരുന്നു. ആ നിലപാടു് ഇപ്പോഴും തുടരുന്നു.

ഇതിനു ശേഷമാണു് പ്രീതയ്ക്കെതിരെ hate pages ഉണ്ടാകുന്നതു്. എന്നാൽ കലാമിന്റെ മരണശേഷം ഉണ്ടായ ഈ പേജുകളിലെ തികച്ചും vulgar ആയ ഉള്ളടക്കം പ്രകടമായ വലതുപക്ഷയുക്തിയാൽ സമൃദ്ധമായിരുന്നിട്ടും സഖാക്കന്മാരാണു് അതുണ്ടാക്കിയതു് എന്ന മുൻവിധിയോടെയാണു പലരും അതിനെ കണ്ടതു്. ഈ ഘട്ടത്തിൽ, അതു ചെയ്തതു് ആരായിരുന്നാലും അവർക്കെതിരെ ഒരു hate wave ഉടലെടുക്കുന്നതിൽ സഖാക്കന്മാർക്കും പങ്കുണ്ടായിരുന്നു എന്ന വസ്തുത നിലനിൽക്കുന്നതിനാൽ ഈ മുൻവിധിയെ പ്രത്യക്ഷമായി ചോദ്യം ചെയ്തുകൊണ്ടു് ആരും മുന്നോട്ടുവരികയുണ്ടായില്ല. അങ്ങനെയുണ്ടായ പേജ് ലൈക്ക് ചെയ്യാൻ ഡേവിസ് ക്ഷണിക്കുന്നതായ ഒരു സ്ക്രീൻ ഷോട്ട് പുറത്തുവന്നതോടെ വിവാദം തീർത്തും nasty ആയി. തോമസ് ഐസക് തന്നെ രംഗത്തുവന്നു് സിപിഎം അനുഭാവികൾ സോഷ്യൽ മീഡിയയിൽ പാലിക്കേണ്ട മിനിമം മര്യാദയെക്കുറിച്ചു സംസാരിച്ചു. അതിനു ശേഷം പാർടി അനുഭാവികളുടെ ഭാഗത്തുനിന്നു് ഇത്തരം നീക്കങ്ങളിൽ നിന്നു് യുടേൺ തന്നെയുണ്ടായി. അതിനിടെ താൻ ഹേറ്റ് പേജ് ലൈക്ക് ചെയ്യാൻ ആരെയും ക്ഷണിച്ചിട്ടില്ലെന്നും അതു് തന്റെപേരിലാരോ തുടങ്ങിയ വ്യാജ profile ആണെന്നും വാദിച്ചു് ഡേവിസ് രംഗത്തെത്തി. സുധാകരൻ വിഷയത്തിൽ പ്രശ്നങ്ങളിലേക്കു നയിച്ച ഡേവിസിന്റെ ആദ്യ പോസ്റ്റിൽ ഏതോ anonymous IDയിൽ നിന്നു വന്ന അത്യന്തം സ്ത്രീവിരുദ്ധമായ കമന്റുകളെ ഒരു ദിവസം മുഴുവൻ delete ചെയ്യാതെ നിലനിർത്തിയ കാരണത്താൽ ഡേവിസിന്റെ വാദങ്ങളെ മുഖവിലയ്ക്കെടുക്കാൻ ആരും തയ്യാറായില്ല .Hate pageനെതിരെ ഒട്ടേറെപ്പേർ റിപ്പോർട്ട് ചെയ്തിട്ടും അതിനെ ആദ്യം നിലനിർത്തുകയും പിന്നീടു മാത്രം നീക്കം ചെയ്യുകയുമാണു് ഫേസ്ബുക്ക് ചെയ്തതു്. എന്നാൽ ഹേറ്റ് പേജുകൾ വീണ്ടും പ്രത്യക്ഷപ്പെട്ടുകൊണ്ടുമിരുന്നു. പ്രീതയ്ക്ക് പിന്തുണയുമായി രംഗത്തെത്തിയ വൈഖരി, മായാലീല, അരുന്ധതി, രാഹുൽ പശുപാലൻ തുടങ്ങിയവരുടെ പ്രൊഫൈലുകൾ mass reporting-നെ തുടർന്നു് ഫേസ്ബുക്ക് real name verification-നായി ID ചോദിക്കുന്നതിലേക്കും എത്തി. അവരെല്ലാം ഇതിനോടു comply ചെയ്യുകയും തിരിച്ചെത്തുകയും ചെയ്തു. അതേ സമയം ഇഞ്ചിപ്പെണ്ണ് എന്ന profile ഇതിനോടു comply ചെയ്യാൻ വിസമ്മതിക്കയും പ്രൊഫൈൽ disable ആവുകയും ഉണ്ടായി. ഇതു് സംഭവങ്ങളുടെ പോക്കിൽ വരുത്തിയ വ്യത്യാസം വലിയതാണു്.

ഇതേക്കുറിച്ചു് ഇംഗ്ലീഷ് മാദ്ധ്യമത്തിൽ ഇഞ്ചിപ്പെണ്ണ് സ്റ്റോറി എഴുതുകയും പ്രീതയുടെ വിഷയം പ്രീതയുടെ വിഷയമല്ലാതെ മാറുകയും ചെയ്തു. ശരിയാണു്, അതു പ്രീതയുടെ മാത്രം വിഷയമല്ലതന്നെ. എന്നാൽ പ്രീതയേക്കാൾ ഇരയുടെ വേഷമണിയാൻ ഇ‍ഞ്ചിക്കുണ്ടായ പ്രാവീണ്യം അവരുടെ ലേഖനങ്ങളിൽ പ്രകടമാണു്. സ്ത്രീയായതുകൊണ്ടാണു് അവരോടു് ഐഡി ചോദിക്കുന്നതു് എന്ന നിലവാരത്തിലേക്കു് അതെത്തുകയുമുണ്ടായി.

6. സി ആർ നീലകണ്ഠൻ ഒരു പ്രാദേശിക സമരത്തിൽ ഇടപെട്ടാൽ അതോടെ ആ സമരം കുളമായി എന്നു വിശ്വസിക്കുന്ന കൂട്ടത്തിലാണു ഞാൻ. ഒരു personal insinuation എന്ന നിലയിലല്ല, ഇതു പറയുന്നതു്. പ്രിയ സി ആർ ക്ഷമിക്കുക. എന്നാൽ ഫലത്തിൽ അതാണു കണ്ടുവരുന്നതു്. സമരനേതൃത്വം അദ്ദേഹം ഏറ്റെടുക്കുകയും സമരക്കാർ അതിവേഗം അപ്രസക്തമാവുകയും ചെയ്യും. അതു് അദ്ദേഹത്തിന്റെ ആത്മാർത്ഥതക്കൂടുതൽ കൊണ്ടു സംഭവിക്കുന്നതുമാകാം. 2006 മുതലുള്ള ഓൺലൈൻ ജീവിതത്തിൽ നിന്നു് ഇതേപോലെ എനിക്കുണ്ടായ subjective ആയ അഭിപ്രായമാണു്, ഇഞ്ചിപ്പെണ്ണിന്റെ ഓൺലൈൻ ഇടപെടലുകളെ കുറിച്ചുള്ളതു്. ഒരു വിഷയത്തെ എങ്ങനെയൊക്കെ വഷളാക്കാം എന്നും ഒരു പ്രശ്നമുണ്ടായാൽ എങ്ങനെ അതിന്റെ മദ്ധ്യത്തിൽ തന്നെ സ്വയം പ്രതിഷ്ഠിക്കാം എന്നും അവർക്കു കൃത്യമായി അറിയാം എന്നതാണു് എന്റെ നിരീക്ഷണം.

ഫേസ്ബുക്കിൽ ഞാൻ പരാമർശിച്ച കറിവേപ്പിലപ്രശ്നം അത്തരത്തിലൊന്നാണു്. യാഹൂ മലയാളത്തിൽ വാർത്ത നൽകി തുടങ്ങിയ കാലത്തു് ആ പണി ഔട്ട് സോഴ്സ് ചെയ്തിരുന്നു. വെബ് ലോകം എന്ന പോർട്ടലിനായിരുന്നു, അതിനുള്ള ചുമതല. യാഹൂ മലയാളത്തിൽ അവരുടെ കോപ്പിറൈറ്റോടെ പ്രസിദ്ധീകരിച്ച ചില പാചകക്കുറിപ്പുകൾ കറിവേപ്പില അടക്കമുള്ള ബ്ലോഗുകളിൽ നിന്നു് ചൂണ്ടിയവയായിരുന്നു. പരിപ്പുവടയുടെയും നാരങ്ങാവെള്ളത്തിന്റെയുമൊക്കെ റെസിപ്പീ ഇനി ആരെഴുതിയാലും വലിയ മാറ്റമൊന്നും വരില്ലെന്നതു വേറെ കാര്യം. അതിഗഹനമായ ബൗദ്ധികസ്വത്താണു് പാചകക്കുറിപ്പു് എന്ന വിശ്വാസമൊന്നും എനിക്കില്ല. എങ്കിലും അതു് അന്നത്തെ കാലത്തു് ടൈപ്പ് ചെയ്തിടുന്നതിൽ ഇന്നു ചിന്തിക്കാൻ പോലുമാകാത്ത അദ്ധ്വാനം ടൈപ്പിങ് പഠിച്ചിട്ടില്ലാത്ത ഒരാളെ സംബന്ധിച്ചുണ്ടായിരുന്നു. അതിനു മനസ്സും വേണമായിരുന്നു. ആ നിലയ്ക്കു് അവിടെ ഒരു പകർപ്പവകാശ ലംഘനം ഉണ്ടായിരുന്നു. അതിനെതിരെ സൂ എന്ന ബ്ലോഗർ പോസ്റ്റിടുകയും സംഗതി മലയാളം ഓൺലൈൻ ലോകത്തു് ചൂടുപിടിക്കയും ചെയ്തു. വെബ് ലോകത്തിന്റെ ചുമതലക്കാരനായി ഉണ്ടായിരുന്ന ബെന്നി വിഷയത്തിൽ ഇടപെട്ടു് അപ്പോൾ തന്നെ പ്രശ്നകാരിയായ ഉള്ളടക്കം നീക്കം ചെയ്യുകയും വിഷയം രമ്യമായി പരിഹരിക്കാൻ നഷ്ടപരിഹാരം വരെ നൽകാൻ തയ്യാറാണെന്നു് അറിയിക്കുകയും ചെയ്തെങ്കിലും യാഹു മാപ്പുപറഞ്ഞേ അടങ്ങൂ എന്നായിരുന്നു നിലപാടു്. ഇതു് ഡമ്മി കണ്ടന്റ് എന്ന നിലയിൽ ഇട്ടതും പ്രൊഡക്ഷനിലേക്കു പോയപ്പോൾ മാറ്റാൻ വിട്ടുപോയതുമാണെന്നു് ഒരു വിശദീകരണം ഉണ്ടായി. അതു് ആരും ചെവിക്കൊള്ളുകയുണ്ടായില്ല. ഈ സമ്മർദ്ദം മൂലം അന്നു് വെബ് ലോകത്തിൽ ജോലി ചെയ്തിരുന്ന കോൺട്രാക്റ്റ് സ്റ്റാഫിനു് ജോലി നഷ്ടമാകുന്ന അവസ്ഥയുണ്ടായി. അവിടംകൊണ്ടും തീർന്നില്ല. ഇതു രമ്യമായി പരിഹരിച്ചുകൂടേ എന്നു് ഒരു സ്യൂഡോണിമസ് ഐഡിയിൽ അന്നു് പോപ്പുലറായിരുന്ന ഒരു ബ്ലോഗർ കമന്റ് ചെയ്തു. അതിനടിയിൽ അനോണിമസ് ആയി ആരോ ഒരു മോശം കമന്റിട്ടു. ഈ രണ്ടു കമന്റും ഒരു പ്രത്യേക വ്യക്തിയുടേതാണെന്നു കാട്ടി, അയാളുടെ കമ്പനിയിലേക്കു് പരാതി അയയ്ക്കപ്പെട്ടു. രമ്യമായ പരിഹാരം ആയിക്കൂടേ എന്നു ചോദിച്ചുപോയതിന്റെ പേരിലാണു്, ആരോ ഇട്ട കമന്റിന്റെ കൂടി പിതൃത്വം ഇയാളിലേക്കു ചുമത്തി ഇങ്ങനെ വിഷയം വഷളാക്കിയതു്. വലിയ തോതിൽ scale up ചെയ്ത വിഷയമായി അതുമാറി. അനോണിമിറ്റിക്കു വേണ്ടി വാദിക്കുന്ന വ്യക്തിയാണു്, ഈ സ്യൂഡോണിമസ് നെയിമിന്റെ കർത്താവിനെ കണ്ടെത്തിയതും മറ്റൊരു അനോണിയുടെ കമന്റിന്റെ ഭാരം അയാളുടെ മേൽ ചുമത്തിയതും എന്നതാണു് ഇതിലെ വിരോധാഭാസം. (അതു കണക്കായിപ്പോയി എന്നാണു്, ഇപ്പോഴും അവരുടെ നിലപാടു്). ഇന്നു് സ്വന്തം പേരിൽ തന്നെ ആവശ്യത്തിനു പ്രശസ്തിയുള്ള ഇദ്ദേഹത്തിനെതിരെ നടന്ന hate campaign അന്നു് ബ്ലോഗിൽ ഉണ്ടായിരുന്നവർക്കൊക്കെ അറിയാം. യാഹൂ ആവട്ടെ, ഈ പ്രശ്നത്തിൽ ഇതേ വരെ മാപ്പുപറയാൻ തയ്യാറായിട്ടില്ല. എന്നാൽ കോപ്പിറൈറ്റ് വയലേഷൻ മൂലം മലയാളം ബ്ലോഗിങ് കമ്മ്യൂണിറ്റിക്കു് (ഏതു്, കമ്മ്യൂണിറ്റിക്കേയ്...) എന്തെങ്കിലും ബുദ്ധിമുണ്ടായിട്ടുണ്ടെങ്കിൽ അതിൽ ഖേദം പ്രകടിപ്പിച്ചിട്ടുണ്ടു്. അതു് വലിയ വിജയമായി ആഘോഷിക്കപ്പെട്ടു. വാങ്ങാമായിരുന്ന നഷ്ടപരിഹാരം കിട്ടുകയുമുണ്ടായില്ല.

ഇതോടെ ഇത്തരം ഇടപെടലുകളുടെ രുചി പിടിച്ച ഈ ഐഡി പകർപ്പവകാശ സംരക്ഷണത്തിന്റെ കാവൽമാലാഖയായി. ഇവരുടെ ബ്ലോഗ് വായിക്കാൻ എനിക്കിഷ്ടമായിരുന്നു. എന്റെ ബ്ലോഗിന്റെ side panelൽ വരെ ഞാൻ ലിങ്കും നൽകിയിരുന്നു. എന്നാൽ 2009ലെ പാർലമെന്റ് തെരഞ്ഞെടുപ്പുകാലത്തു് അവർ ഇട്ട ഒരു പോസ്റ്റിനു മറുപടിയായി ആ ചിരി നിലനിൽക്കണേ ദൈവമേ എന്ന തലക്കെട്ടിൽ ഞാനൊരു പോസ്റ്റ് ഇടുന്നതോടെയാണു്, എന്നെ അവർ ശത്രുപക്ഷത്തു നിർത്തുന്നതു്. പിന്നീടൊരിക്കൽ അഭിപ്രായവ്യത്യാസത്തെ തുടർന്നു് പിരിഞ്ഞുപോയ ഒരാൾ ചോർത്തി നൽകിയ ഒരു വിവരത്തിന്റെ അടിസ്ഥാനത്തിൽ ഒരു പ്രൈവറ്റ് ഗ്രൂപ്പിൽ നടന്ന ഡിസ്കഷനിൽ ആരൊക്കെയോ അവരെ മോശമായി ചിത്രീകരിച്ചെന്നും ഗ്രൂപ്പിന്റെ അഡിമിനിസ്ട്രേറ്റർ എന്ന നിലയിൽ ഞാൻ മാപ്പുപറയണമെന്നും അല്ലാത്ത പക്ഷം എനിക്കെതിരെ നിയമനടപടികൾ സ്വീകരിക്കുമെന്നും ഭീഷണിപ്പെടുത്തി എനിക്കൊരു മെയിൽ അയച്ചു. ആരോ നടത്തിയതെന്നു പറയപ്പെടുന്ന സ്വകാര്യസംഭാഷണങ്ങൾക്കു മേലെയുള്ള പൊലീസിങ് ശ്രമം കണ്ടു്, പ്രേമം ശൈലിയി‍ൽ പറഞ്ഞാൽ “പകച്ചുപോയി എന്റെ യൗവ്വനം!”2010ൽ malayal.am തുടങ്ങിയ സമയത്തു് അതായിരുന്നു, മലയാളത്തിൽ ആദ്യമായി CC-By-SA പ്രകാരം കണ്ടന്റ് ലൈസൻസ് ഓപ്പണാക്കിയ പോർട്ടൽ. ചിത്രശേഖരമില്ലാതിരുന്നതിനാൽ ഓൺലൈനിൽ നിന്നു ചിത്രമെടുത്തുപയോഗിക്കുകയും അങ്ങനെ ചെയ്യുമ്പോൾ എടുത്തതെവിടെനിന്നോ, അവിടേക്കു ബാക് ലിങ്ക് കൊടുക്കുകയും ചിത്രകാരന്റെ പേരുണ്ടെങ്കിൽ ക്രെഡിറ്റ് കൊടുക്കുകയും ചെയ്തുകൊണ്ടാണു് ഞങ്ങൾ രംഗത്തുവന്നതു്. ഇക്കാര്യം കോപ്പിറൈറ്റ് നോട്ടീസിൽ പ്രത്യേകം പരാമർശിക്കയും ചെയ്തിരുന്നു. അന്നു് മലയാളത്തിൽ പ്രമുഖ പത്രങ്ങളുടേതടക്കം portals പരസ്പരം വാ‌ർത്തകൾ പകർത്തുകയും അവിടുന്നുമിവിടുന്നുമുള്ള ചിത്രങ്ങൾ ഊരുംപേരുമില്ലാതെ കൊടുക്കുകയും ചെയ്തിരുന്നുതാനും . ഞങ്ങളാവട്ടെ സ്വന്തം കണ്ടന്റുമായാണു് മുന്നോട്ടു പോയതു്. അതാണു് ക്രിയേറ്റീവ് കോമൺസിൽ നൽകിയതും. എന്നാൽ നിരന്തരം മലയാളത്തിനെതിരെ moral / ethical പ്രശ്നങ്ങളുന്നയിച്ചും ചിത്രങ്ങളുടെ പകർപ്പവകാശം ലംഘിക്കുന്നു എന്നു പറഞ്ഞും ബുദ്ധിമുട്ടിക്കാനാണു്, അന്നു് പ്രസ്തുത ഐഡി ശ്രമിച്ചതു്. ഇതു് എന്നെ സംബന്ധിച്ചു് ഏക അനുഭവമായിരുന്നില്ല. നെല്ലും പതിരും എന്ന ബ്ലോഗിലെ ഇന്റർനെറ്റിലെ പിരാനകൾ എന്ന പോസ്റ്റ് വായിച്ചാൽ വേറെ ഒരു വിഷയം കണ്ണിൽപ്പെടും. ഗൂഗിൾ പൂട്ടിക്കെട്ടിയ ബസിലും ബ്ലോഗിലും ഒക്കെയായി നിരവധി ചൊറിച്ചിലുകളാണു് ഈ ഐഡി ഇങ്ങനെ നടത്തിക്കൊണ്ടേയിരുന്നതു്. ബ്ലോഗ് ലോകത്തെ തന്റെ അനുകൂലികളും പ്രതികൂലികളും എന്നു രണ്ടാക്കി തിരിക്കാൻ മാത്രം നേതൃപാടവവും ബുദ്ധിയും ഇവർക്കുണ്ടായിരുന്നു. ചാരിറ്റബിൾ ടോക്ക് എന്ന, വിഷമത്തിൽ നമ്മളോടു പങ്കുചേരുന്ന, ഇമോഷണൽ രീതിയിലൂടെയാണു് ഇവർ ഏതുകൂട്ടത്തിലും വളരെ അടുപ്പമുള്ള ആളുകളെ സൃഷ്ടിച്ചതു്. അങ്ങനെ ഇവരോടു സമരസപ്പെടാത്ത ആളുകളെ self righteous attitude ലൂടെ വെറുപ്പിക്കുകയും ചെയ്തുപോന്നു. പ്രീതയുടെ പ്രശ്നത്തിൽ ഇഞ്ചിപ്പെണ്ണു് ഇടപെട്ടതോടെ എനിക്കു് അതിന്റെ പോക്കിൽ വിശ്വാസം നഷ്ടപ്പെട്ടതു്, ഇത്തരം subjective ആയ അനുഭവങ്ങളുടെ പശ്ചാത്തലത്തിലാണു്. എത്രവേഗമാണു്, വിഷയം പ്രീതയുടെ കയ്യിൽ നിന്നും വഴുതിപ്പോയതു് എന്നു നോക്കുക – പ്രീത അതു പരസ്യമായി സമ്മതിക്കാൻ ഇടയില്ലെങ്കിലും.

7. അങ്ങനെയിരിക്കുമ്പോഴാണു്, സുനിത ദേവദാസും രാഹുൽ പശുപാലനും ചേർന്നു് ഈ പേജിനു പിന്നിൽ പ്രവർത്തിച്ചതെന്നു സംശയിക്കപ്പെടുന്ന മറ്റൊരു പ്രൊഫൈലിലേക്കു വിരൽ ചൂണ്ടിയതു്. അതു തനിക്കു് വിശ്വാസമില്ലെന്നു പ്രഖ്യാപിച്ചു് ഇഞ്ചിപ്പെണ്ണെഴുതിയ സൗത്ത് ലൈവ് ലേഖനം വ്യക്ത്യാധിക്ഷേപത്തിന്റെ കൂത്തരങ്ങാണു്. രാഹുലിനെ പശു, പോത്തു് എന്നെല്ലാം വിളിക്കാൻ അതിൽ അവർ തഞ്ചം കണ്ടെത്തുന്നുണ്ടു്. സുനിതയെ പണ്ടു് ചിലർ ദേവദാസി എന്നു വിളിച്ചു കളിയാക്കിയിരുന്നു. ഇഞ്ചി ഒരുപടികൂടി കടന്നു്, സുനിതയുടെ പേരു് സണ്ണി ലിയോണിന്റെ പേരുമായി ചേർത്തുവച്ചിരിക്കുന്നു. ഫസ്റ്റ് നെയിം മാത്രം ഉപയോഗിച്ചിരിക്കുന്നതിനാൽ സുനിത ദേവദാസിനെ കുറിച്ചല്ല, താൻ പറഞ്ഞതെന്നു് അവർക്കുരുളാം . ഇവ‌ർ പിന്നെ സ്ത്രീകളുടെ എന്തു modestyയെക്കുറിച്ചാണു സംസാരിക്കുന്നതു്?

ഇഞ്ചിപെണ്ണിന്റെയും മറ്റു ചിലരുടെയും നേതൃത്വത്തിൽ ഈ വിഷയം പരിപൂർണ്ണമായും നിസ്സഹായരായ കുറച്ചു സ്ത്രീകളും സിപിഎം അനുഭാവികളും തമ്മിലുള്ള പ്രശ്നമാക്കി നിലനിർത്താനുള്ള ശ്രമം തുടങ്ങിയതിനു ശേഷമായിരുന്നു, അതു്. അബ്ദുൾ കലാമിനോടുള്ള നിലപാടിനെ ചാരി പ്രീതയെ അധിക്ഷേപിച്ചവരുടെ യുക്തി സംഘപരിവാറിന്റേതാണു് എന്നു കണ്ണുമടച്ചുപറയുവാൻ സാധിക്കും. ആർഎസ്എസുകാരാണു് അതു ചെയ്തതു് എന്നു ഞാൻ ആരോപിക്കുന്നില്ല. എന്നാൽ ആർഎസ്എസിന്റെ രാഷ്ട്രീയമാണു്, അവർ ഉന്നയിച്ചതു് എന്നാണു ഞാൻ പറയുന്നതു്. അതുകാണാതെ സിപിഎമ്മിനുനേരെ അതിനെ തിരിച്ചുവിടാനാണു ശ്രമം ഉണ്ടായതു്. മീഡിയ വൺ ചർച്ചയിൽ പോലും സുധാകരൻ വിഷയം മാത്രമായിരുന്നു, ഹൈലൈറ്റ്. ഒരു നോട്ടിലെ നോട്ടം, പ്രീതയെ അടുത്ത ചിത്രലേഖയാക്കാൻ എങ്ങനെ സാധിക്കും എന്നതായിരുന്നു. ഈ അവസരത്തിലാണു മായാലീലയുടെ ലേഖനം വരുന്നതും അതിലെ ടെക്നിക്കൽ കാര്യങ്ങളിലെ പിഴവു ചൂണ്ടിക്കാട്ടി അനിവർ അരവിന്ദും റോഷൻ തോമസും പോസ്റ്റിടുന്നതും. അതിലെ വാദങ്ങളെ ടെക്നിക്കലായി ദിലീപും ചില ലിങ്കുളെ മുൻനിർത്തി സുരേഷും ചോദ്യം ചെയ്യുന്നു. സുരേഷിന്റെ വാക്കുകളെ ഇഞ്ചിപ്പെണ്ണു തന്റെ ലേഖനത്തിൽ കൊണ്ടാടുന്നുണ്ടു്. എന്നാൽ അതിന്റെ ലോജിക്കിനെ ഭദ്രമായി പൊളിച്ചുകൊണ്ടു് ഇന്നലെ രാത്രി ഋഷികേശിന്റെ പോസ്റ്റ് വന്നിരുന്നു. അതിനെ തുടർന്നാണോ എന്നറിയില്ല, അതുമായി ഒരു ബന്ധവുമില്ലാത്ത സീമാസ് വിഷയം ഉന്നയിച്ചു് സുരേഷ് ഇന്നു് വേറെ പോസ്റ്റ് ഇട്ടിട്ടുണ്ടു്. ഇതിനിടയിൽ വിഷയത്തിൽ ഇടപെട്ട ഒട്ടുമിക്ക ആളുകൾക്കുമെതിരെ ഓരോരോ ഐഡികളിൽ നിന്നു് വ്യക്തിഹത്യാപരമായ പരാമർശങ്ങൾ വന്നുകൊണ്ടേയിരിക്കുന്നു. തങ്ങൾക്കെതിരെ വ്യക്തിഹത്യ നടത്തുന്നു എന്നു പറയുന്നവർ തന്നെയാണു്, നേരിട്ടും ഭൂതഗണങ്ങളെ ഉപയോഗിച്ചും അതുതന്നെ ചെയ്യുന്നതു് എന്നു കാണാം. ഇതുപറഞ്ഞാൽ നാളെ എനിക്കെതിരെ എന്തെല്ലാം വന്നുകൂടാ എന്ന ഭയവുമുണ്ടു്.

8. എന്നെ സംബന്ധിച്ചു മായാലീല ഉന്നയിക്കുന്ന മിക്ക പ്രശ്നങ്ങളും ഗൗരവമുള്ളതും അതിനെ ഞാൻ അനുകൂലിക്കുന്നതുമാണു്. ഫേസ്ബുക്ക് ആൽഗൊരിഥം സ്ത്രീവിരുദ്ധമാണെന്ന ഒറ്റ ഭാഗത്തോടു മാത്രമേ വിയോജിപ്പുള്ളൂ. എന്നാൽ ഇഞ്ചിപ്പെണ്ണിനെ മുന്നിൽ നിർത്തിയുള്ള ഒരു സമരത്തെ വിശ്വാസത്തിൽ എടുക്കുന്നതിൽ നിന്നും എന്റെ മുന്നനുഭവങ്ങൾ എന്നെ വിലക്കുന്നു. മാരീചന്റെ കാര്യം പ്രസക്തമാകുന്നതു് ഇവിടെയാണു്. മാരീചൻ എന്ന ഐഡിയോടു് അതിനു പിന്നിൽ പ്രവർത്തിച്ച വ്യക്തി എത്രമാത്രം അറ്റാച്ച്ഡ് ആയിരുന്നു എന്നു് എനിക്കു നിശ്ചയമില്ലായിരുന്നു. ഇടതുപക്ഷത്തിനുവേണ്ടി, വിശിഷ്യ സിപിഎമ്മിനുവേണ്ടി ഒട്ടേറെ പണിയെടുത്ത പ്രൊഫൈൽ ആണതു്. ഇക്കാണായ വർഷങ്ങളിൽ ആ പ്രൊഫൈൽ എഴുതിക്കൂട്ടിയതത്രയും ഒരു ബാക് അപ്പുമില്ലാതെ നഷ്ടമായി. ഫേസ്‌ബുക്ക് ഐഡി ചോദിച്ചപ്പോൾ അതു കൊടുക്കാൻ കഴിയാത്തതുകൊണ്ടാണു്, അങ്ങനെ സംഭവിച്ചതു്. അന്നു് തന്റെ അവസ്ഥ അദ്ദേഹം പലരോടും പറഞ്ഞെങ്കിലും ഞാനടക്കം ആരും അദ്ദേഹത്തിനുവേണ്ടി രംഗത്തുവന്നില്ല. ഫേസ്‌ബുക്ക് പ്രൊഫൈലിൽ അനോണിമിറ്റി അംഗീകരിക്കുന്നില്ല എന്നും പേജിനു് അനോണിമസ് ആകാം എന്നും അറിയാവുന്നതുകൊണ്ടു്, എന്തുചെയ്യാൻ എന്ന നിസ്സഹായാവസ്ഥയായിരുന്നു. മാരീചനെതിരെ സോഷ്യൽ മീഡിയയിൽ രംഗത്തുവന്ന സിപിഐക്കാരനായ ഒരു ചാക്യാർവേഷധാരി പേജായിട്ടാണു് അവതരിച്ചതു് എന്നതോർക്കുക. ഇഞ്ചിപ്പെണ്ണിന്റെ കാര്യത്തിൽ അവർക്കു് സ്വന്തം പ്രൊഫൈലിൽ വരുവാനും അതു പ്രൈവറ്റാക്കിവച്ചു് ഇഞ്ചിപ്പെണ്ണു് എന്ന പേരിൽ പേജ് തുടങ്ങാനും ഇപ്പോഴും കഴിയും . റിയാക്ഷനറി പൊസിഷനുകളെടുക്കുകയോ ആളുകളെ വെല്ലുവിളിക്കുകയോ ഒന്നുമല്ലാതെ ഇന്റലക്ച്വൽ റെലത്തിൽ ഇവരൊക്കെ എന്തുപണി ചെയ്യുന്നു എന്നു് എനിക്കിന്നും അറിഞ്ഞുകൂടാ. എന്നാൽ മാരീചനെ സംബന്ധിച്ചിടത്തോളം ഇത്രയും നാളത്തെ അദ്ധ്വാനം നഷ്ടപ്പെട്ടുകഴിഞ്ഞു. അതുണ്ടാക്കിയ പൊളിറ്റിക്കൽ ഡാമേജ് ചില്ലറയല്ല. മാരീചൻ ഇപ്പോൾ ഇഞ്ചിപ്പെണ്ണിനെ പിന്തുണച്ചു രംഗത്തുവന്നിട്ടുണ്ടു്. അനോണിമസ് പ്രൊഫൈലുകൾ അനുവദിക്കണം എന്ന വാദത്തോളം അതിനോടു് എനിക്കു യോജിപ്പാണു്. എന്നാൽ സ്ത്രീ ആയതുകൊണ്ടാണു് തന്റെ പ്രൊഫൈൽ പൂട്ടിപ്പോയതു് എന്ന ഇഞ്ചിപ്പെണ്ണിന്റെ വാദം അംഗീകരിക്കാനാവില്ലെന്നു തന്നെയല്ല, അതു് ഇരയുടെ കാർഡ് ഇറക്കലാണു് എന്നു കരുതുകയും ചെയ്യുന്നു.

ഒന്നുകൂടി വ്യക്തമാക്കട്ടെ, സോഷ്യൽ നെറ്റ്‌വർക്കിൽ അനോണിമിറ്റി അനുവദിക്കണം എന്നതാണു് എന്റെ നിലപാടു്. തൂലികാനാമമുള്ള വ്യക്തിക്കു് തന്റെ സ്വന്തം പേരിൽ പ്രൊഫൈൽ തുടങ്ങാനും ആ പ്രൊഫൈൽ തികച്ചും പ്രൈവറ്റ് ആയി വച്ചുകൊണ്ടു് തൂലികാനാമത്തിൽ പബ്ലിക് ആയി ഫേസ്‌ബുക്‍ പേജ് ആരംഭിക്കാനും തനിക്കു പറയാനുള്ളതു് പേജിലൂടെ പറയാനും ഉള്ള സൗകര്യം നിലവിലുണ്ടു്. അതല്ലാതെ പ്രൊഫൈലിൽ തന്നെ തൂലികാനാമം അനുവദിക്കണം എന്നതാണു ഡിമാൻഡെങ്കിൽ ആ ഡിമാൻഡിനെ ഞാൻ നൂറുശതമാനം സപ്പോർട്ട് ചെയ്യുന്നു. അതു സ്ത്രീകൾക്കു മാത്രമായി അനുവദിക്കേണ്ട പ്രത്യേക അവകാശമല്ല. എന്നാൽ ഇതു താൻ മാത്രം നേരിട്ട ഒരു പ്രത്യേക പ്രശ്നമാണെന്നും തനിക്കാണു് ഇതാദ്യമായി നേരിടേണ്ടിവന്നതെന്നും ഇതു തനിക്കുവേണ്ടിയുള്ള സമരമാണെന്നും ഈ സമരത്തിന്റെ നേതൃത്വം തനിക്കാണെന്നും അങ്ങനെ എല്ലാം താനാണെന്നും വരികയും അതുവരെയുള്ളതൊക്കെ അഗണ്യകോടിയിലേക്കു പോകുകയും ചെയ്യുമ്പോൾ ഇതാദ്യമല്ല, ഇത്തരം സംഭവങ്ങൾ എന്നു പറഞ്ഞെന്നിരിക്കും. ബാലഗംഗാധര തിലകനെ നേതാവായി അംഗീകരിച്ചു സ്വാതന്ത്ര്യ സമരത്തി‍ൽ പങ്കെടുക്കാൻ പറഞ്ഞാൽ ബ്രിട്ടീഷ് ഭരണം മതീന്നു ഞാൻ പറയും. അത്രേയുള്ളുസാർ.

9. ഈ ബഹളം മൂലം ഫേസ്ബുക്കിനു് ഒരു പോളിസി ചേഞ്ചുണ്ടാവുകയാണെങ്കിൽ നല്ലതാണു് എന്നു ഞാൻ കരുതുന്നു. കോഴിക്കു മുലവരുന്നതും കാത്തിരിക്കുന്ന എല്ലാവരെയും പോലെ ഞാനും പ്രതീക്ഷയുള്ളവനാണു്. എങ്കിലും വിഷയങ്ങളോടൊപ്പം വ്യക്തികളും അവരുടെ മുൻകാലനിലപാടുകളും പ്രസക്തമാണു് എന്നു് ഞാൻ കരുതുന്നു. മാരീചൻ തിരിച്ചുവരണമെന്നു് എനിക്കു് ആത്മാർത്ഥമായും ആഗ്രഹമുണ്ടു്. ഫേസ്ബുക്കിനോടു പടവെട്ടി ഇഞ്ചിപ്പെണ്ണു് ജയിച്ചുവരുന്ന ആ സുദിനത്തിൽ ഡിങ്കനു രണ്ടുമൂടു കപ്പ നേദിക്കുകയും ചെയ്യാം. അപ്പോഴും ഒരു കാര്യം പറയണം. ഫേസ്ബുക്ക് ആണു് പ്രൊഫൈൽ പൂട്ടിയതെങ്കിൽ ഐഡി വേരിഫിക്കേഷനിലൂടെയല്ലാതെ തിരിച്ചുവരാനാകുമെന്നു ഞാൻ വിശ്വസിക്കുന്നില്ല. അവരുടെ ബിസിനസിന്റെ ആണിക്കല്ലുതന്നെ, ഓൺലൈനിൽ സ്ക്രീൻ നെയിമുകളല്ലാതെ റിയൽ നെയിമുകൾ ഉപയോഗിക്കാൻ ഉപയോക്താക്കളെ സജ്ജരാക്കി എന്നിടത്താണു്. അതിനെ ഒരു ചെറിയ പ്രശ്നത്തിന്റെ പേരിൽ തിരുത്താൻ ഒരു വഴിയുമില്ല. എങ്കിലും അത്ഭുതങ്ങൾ സംഭവിച്ചുകൂടായ്കയില്ല. ഇനി ഇഞ്ചിപ്പെണ്ണു തന്നെയാണു് പൂട്ടിയതെങ്കിൽ? പേജായല്ലാതെ പ്രൊഫൈലായി തന്നെ തിരിച്ചുവരുന്നതുംകാണാം. പറയുമ്പോൾ രണ്ടുസാധ്യതകളും പറയണമല്ലോ...

ഈ വിഷയത്തിൽ ഞാനിട്ട ഫേസ‌്ബുക്ക് പോസ്റ്റുകൾ

൧. https://www.facebook.com/sebinaj/posts/10153525289384083
൨. https://www.facebook.com/sebinaj/posts/10153527287609083
൩. https://www.facebook.com/sebinaj/posts/10153527516054083
൪. https://www.facebook.com/sebinaj/posts/10153547983849083
൫. https://www.facebook.com/sebinaj/posts/10153557007829083
൬. https://www.facebook.com/sebinaj/posts/10153557074834083
൭. https://www.facebook.com/sebinaj/posts/10153568492269083

കോട്ടയം: അനുഭവമില്ലാത്തവന്റെ തെരുവ്

2015-07-22T12:11:00.000+05:30

തെരുവ് മഴപോലാണ്. കേറിക്കെടക്കാന്‍ ഒരു കൂരയുള്ളോര്‍ക്കു് മഴ ഓഞ്ഞ നൊസ്റ്റാള്‍ജിയ ആണ്. മഴയുടെ വരവും ഊത്തപിടിക്കാനുള്ള പോക്കും ഒറ്റാലി‍ല്‍ കൈയിട്ടപ്പോള്‍ കാരിയുടെ കുത്തുകിട്ടിയതിന്റെ നിര്‍ത്താക്കഴപ്പും ഒക്കെ നായാട്ടാസ്വദിക്കുന്ന ചേലിലാണു വിവരിക്കുക. സുരേഷ് തിരി‍ഞ്ഞുനോക്കി, മുറ്റത്തൊരു മൈന എന്ന ടോണില്‍ പറഞ്ഞാ‍ല്‍ ഡേവിഡേട്ടന്മാരുടെ ഏറ്റവും മുന്തിയ രാക്കാമന തന്നെ മഴയത്തൊരു ക്ലാര ആണ്. അഥവാ മഴ ക്ലാരയാണ്. മഴയോടുള്ള ഇതേ വളിച്ച പ്രേമമാണ് തെരുവെന്നും തെരുവുജീവിതമെന്നും പറയുമ്പോഴുമുള്ളത്. വല്ലപ്പോഴും നനയുന്ന മഴ പോലെ വല്ലപ്പോഴും കൈപിടിക്കുന്ന തെരുവ് ആനന്ദത്തിന്റെ ചെറിയ ചെറിയ പുകച്ചുരുളുകളാണ്.

നഗരത്തില്‍ പാതിരാത്രി മതിലായ മതിലെല്ലാം കോളജ് തെരഞ്ഞെടുപ്പിന്റെ പോസ്റ്ററൊട്ടിച്ചു നടന്നതിന്റേം വിമന്‍സ് ഹോളിന്റെ അകംചുവരി‍ല്‍ തനിക്കു വോട്ടുചെയ്യണമെന്നഭ്യര്‍ത്ഥിക്കുന്ന പടംവച്ച പോസ്റ്റര്‍ പതിച്ചിട്ട് അതുനോക്കി ആത്മനി‌ര്‍വൃതിയടയുന്ന വിദ്യാര്‍ത്ഥിനേതാവിന്റേം ബാധ്യതകളില്ലാത്ത സ്വപ്നങ്ങളാണ് കഷ്ടപ്പാട് കണ്ടിട്ടില്ലാത്ത തലമുറ തെരുവിനോടുകൂടി തൊട്ടുനക്കുന്നത്. എന്നാല്‍ കാലം തെറ്റിയെത്തിയ ഒരു മഴക്കാലത്ത് തെരുവിനെക്കുറിച്ചു ചിന്തിക്കുമ്പോള്‍ പഠിച്ചുവളര്‍ന്ന കോട്ടയത്തെ തെരുവിനേക്കാള്‍ ഇരച്ചുവരുന്ന ചിത്രം ബോംബെയിലെ മീരാറോഡി‍ല്‍ താമസിച്ചിരുന്ന ഹ്രസ്വകാലത്തെ ദിനരാത്രങ്ങളാണ്. രാത്രിയില്‍ ചര്‍ച്ച് ഗെയ്റ്റില്‍ നിന്നു വിരാറിലേക്കുള്ള 12.50ന്റെ ലാസ്റ്റ് ലോക്കലി‍ല്‍ ഡാന്‍സ് ബാറുകളിലെ നര്‍ത്തകികള്‍ക്കും പാട്ടുകാരികള്‍ക്കുമൊപ്പം മുട്ടിനിടിച്ചും തൊഴിച്ചും പരസ്പരം പഴിച്ചുമങ്ങനെ കമ്പിയില്‍ തൂങ്ങിനിന്നുറങ്ങിയും വീടുപിടിക്കാനോടുമ്പോള്‍ രാത്രി 2.17 എന്നൊരു സമയമുണ്ടെങ്കി‍ല്‍ ഫ്ലാറ്റിലെത്തിയിരിക്കും എന്നേ ചിന്തകാണൂ. അന്നേരമാവും പുറത്തുഘോരമെത്തുന്ന മഴയി‍ല്‍ മുട്ടറ്റം കൊഴുത്ത കാനവെള്ളത്തില്‍ നടന്നലച്ച് ഫ്ലാറ്റ് പൂകാനുള്ള യോഗമുണ്ടാവുക. അക്കാലത്താണ് കയറിക്കിടക്കാനൊരിടം ഉണ്ടായിട്ടുപോലും മഴയുടെയും തെരുവിന്റെയും വെറി നേരിട്ടനുഭവിച്ചത്. തെരുവുറക്കത്തിനെ ലാത്തികൊണ്ടു കുത്താന്‍ മഴയോളം മനസ്സുറപ്പ് ഒരു പൊലീസുകാരനുമുണ്ടാവില്ല.

വളര്‍ന്നുവളര്‍ന്ന് നെടുമ്പാതകളായ തെരുവുകളാണ് കോട്ടയത്തിന്റേത്. അത് ഏതു ചെറുനഗരത്തിന്റേയും കഥയാണ്. നഗരത്തില്‍ നിന്നു ഗ്രാമങ്ങളിലേക്കു് വളരുന്ന കഥയുമാണ്. മശയുടെ(1) വശപ്പെശകുള്ള ചിരിയെ അവഗണിച്ച്, നിവ‌ര്‍ത്താന്‍ തയ്യാറായ കുടയെപ്പോലെ വിജൃംഭിച്ചു നില്‍ക്കുന്ന സ്വവര്‍ഗ്ഗപ്രേമിയുടെ മൂത്രമണമുള്ള രാച്ചെരുവുകളിലേക്ക് പോകുന്ന മദ്ധ്യവയസ്കന്റെ പൂതിപ്പാച്ചില്‍ ഞാനാദ്യം കണ്ടത് കോട്ടയത്തെ പഴയ വെസ്റ്റ് പൊലീസ് സ്റ്റേഷന്റെ അപ്പുറത്തെ അനശ്വര തീയേറ്ററിലേക്കു പോകുന്ന ഇടവഴിയിലായിരുന്നു. തറബാറിന്റെ കൌണ്ടറില്‍ചെന്ന് ഒരു നില്‍പ്പനടിക്കുന്ന ലാഘവത്തില്‍ കാര്യം സാധിച്ചു തിരികെ വരുന്ന ആ മുഖത്തെ സംതൃപ്തിയും പിന്നാലെ കണ്ടു. അതെവിടെപ്പോയി സാധിച്ചെന്നോ അതിനെവിടെ സ്ഥലമുണ്ടായിരുന്നെന്നോ അറിയില്ല. നഗരത്തിലെല്ലായിടത്തും അങ്ങനെ ഒറ്റപ്പെട്ട കോണുകളുണ്ടായിരുന്നു. ചുറ്റോടുചുറ്റും വാഹനങ്ങളുടെ ഹെഡ് ലൈറ്റുകളും സൌണ്ട് ഹോണുകളും കണ്ണും കാതും അടപ്പിക്കുമ്പോഴും നൂലില്‍ സൂചികോര്‍ക്കുന്ന ശ്രദ്ധയോടെ ഒഴിഞ്ഞിടം നോക്കി രതി തേടുന്ന വിഹ്വലതകള്‍. കുട്ടിക്കാലത്ത് ബന്ധുവീട്ടില്‍ അന്തിയുറങ്ങവേ രാത്രിയിലൊരു പെണ്‍വിരല്‍ നീണ്ടുവന്ന് നിക്കറിന്റെ കുടുക്കഴിക്കുന്നതിനെക്കുറിച്ച് പകപ്പോടെ കവിതയെഴുതിയിട്ടുണ്ട്, എന്റെയൊരു ചങ്ങാതി. കന്നിമാസത്തിലേക്കാരോ കല്ലെറിഞ്ഞു, പേപിടിച്ച മുറിവുമായി ഒരു പെണ്‍പട്ടി എന്നുപറഞ്ഞാണ് വിശ്വനാഥന്‍ ആ കവിത അവസാനിപ്പിക്കുന്നത്. തെരുവിന്റെ രതിക്ക്, അഥവാ രതിയുടെ തെരുവിന് ഈ പേപിടിച്ച കൊടിച്ചിയുടെ വേവാണ്. അതിനു വേദനിക്കുകയും അമര്‍ഷം തോന്നുകയും എതിര്‍ക്കാന്‍ മുട്ടുകയുമൊക്കെ ചെയ്യുന്നുണ്ട്. എങ്കിലും അടുത്തകല്ല് പൊങ്ങുംമുമ്പെ അത് അപമാനം കടിച്ചിറക്കി മണ്ടുന്നുണ്ട്. വാല് കാലുകള്‍ക്കിടയില്‍ പൂഴ്ത്തുന്നുണ്ട്.

അവകാശികള്‍ വിദേശത്തായതിനാലോ കേസില്‍ പെട്ടു കിടക്കുന്നതിനാലോ നോക്കാന്‍ ആളില്ലാതെ കാടാര്‍ത്തുകിടക്കുന്ന ഒറ്റപ്പെട്ട പറമ്പുകള്‍ക്ക് മുന്നിലാണ് തെരുവുകച്ചവടം ഏറ്റവും സ്വസ്ഥമായി നടക്കുക. അവിടെ നിന്ന് അവരെ തുരത്താന്‍ പിന്‍വാതിലിലെ വലിയ കച്ചവടക്കാരന്‍ വരില്ല. ബേക്കര്‍ ജംഗ്ഷനില്‍ നിന്നു സിഎംഎസ് കോളജ് റോഡിലേക്കു കയറുന്നിടത്ത് ഒഴിഞ്ഞുകിടന്നയിടത്തു് പത്തുപതിനെട്ടു കൊല്ലമെങ്കിലും അങ്ങനെ പ്രതാപത്തോടെ കച്ചവടം നടത്തിവന്ന ഒരു തട്ടുകട ഒഴിഞ്ഞുപോയത് പിന്നില്‍ മലബാര്‍ ഗോള്‍ഡ് തലയുയര്‍ത്തിയപ്പോഴായിരുന്നു. ഇവരൊക്കെ എവിടേക്കു പോകുന്നു എന്നറിയില്ല. ഇവരുടെ തൊഴില്‍നഷ്ടത്തിന് ആരു പരിഹാരം നല്‍കുന്നുവെന്നും. ചെരുപ്പുകുത്തികളുടെ ചെറിയ ചെറിയ ഇരിപ്പുകളൊക്കെ ഇങ്ങനെ അപ്രത്യക്ഷമായത് അവരുടെ ജീവിതനിലവാരം മെച്ചപ്പെട്ടിട്ടോ അതോ പുതിയ തെരുവിന് അവരെ ആവശ്യമില്ലാതായിട്ടോ? മുതലാളി സ്വയമോ ജീവനക്കാരെ വച്ചോ ചുമടിറക്കുമ്പോള്‍ തൊഴില്‍ നഷ്ടം വരുന്ന ചുമട്ടുകാരന്‍ കണ്ണുരുട്ടി വാങ്ങുന്ന തുകയെ നമ്മള്‍ നോക്കുകൂലിയെന്നു വിളിക്കും. എന്നാല്‍ വാട്ട്സ് ആപ്പും വൈബറും ഉപയോഗിക്കുന്നത് തങ്ങളുടെ എസ്എംഎസ് വരുമാനത്തെ ബാധിക്കുമെന്ന് പറഞ്ഞ് ടെലികോം കമ്പനികള്‍ കണ്ണുരുട്ടുമ്പോള്‍ ലോകത്തു മറ്റൊരു രാജ്യത്തുമില്ലാത്തതുപോലെ എടുകുടുക്കേ ചോറുംകറിയും എന്ന് ഉപഭോക്താക്കളോടു പറയും, ട്രായി. ഇടയ്ക്കിടെ നഗരസഭയുടെ റെയ്ഡ് പേടിച്ച്, നിരത്തിവച്ച വസ്ത്രങ്ങളും വാച്ചുകളും ഇലക്ട്രോണിക് ഉപകരണങ്ങളുമൊക്കെ വിരിപ്പില്‍ കൂട്ടിക്കെട്ടി നെട്ടോട്ടമോടും തെരുവു കച്ചവടക്കാര്‍. കാലാവധി കഴിഞ്ഞിട്ടും ഇറങ്ങാന്‍ കൂട്ടാക്കാതെ വര്‍ഷങ്ങളോളം കേസ് പറഞ്ഞ് ഞെളിഞ്ഞിരിക്കും വലിയ കച്ചവടക്കാര്‍. അതിജീവനം തെരുവിനു പറഞ്ഞിട്ടുള്ളതല്ല.

തെരുവ് പലതിന്റെയും ഓര്‍മ്മകളാണ്. കോട്ടയം ചിത്രനഗരിയായി സ്ഥാപിതമാകുന്നതിന്റെയും പതിറ്റാണ്ടുകള്‍ക്കു മുന്നെ, കോട്ടയം മുതല്‍ തലയോറപ്പറമ്പു വരെയുള്ള ദേശങ്ങളില്‍ കാല്‍പ്പെരുമാറ്റമുള്ള ബസ് സ്റ്റാന്‍ഡുകളിലും, രാഷ്ട്രീയക്കാരും സിനിമാക്കാരും ഉപേക്ഷിച്ചു പോയ ചുവരുകളിലും, കരിക്കട്ടയും ഇഷ്ടികയും കമ്മ്യൂണിസ്റ്റ് പച്ചയും പിന്നെയും എന്തൊക്കെയോ ഉപയോഗിച്ചും തോടും പ്രകൃതിയും ഗ്രാമപാതകളും പള്ളിമേടകളും പകര്‍ത്തിയ പേരറിയാത്ത തെരുവുചിത്രകാരനെ ഓര്‍മ്മവരുന്നു. ഇവിടെ പരസ്യം പതിക്കരുത് എന്ന ബോര്‍ഡ് എല്ലാ ചുവരിലും പതിയുന്നതിനു മുന്നെ ചുവരായ ചുവരെല്ലാം തന്റെ ക്യാന്‍വാസാണെന്നു കരുതിയ ഒരു ഭ്രാന്തനായിരുന്നു ഇയാളെന്നു മാത്രം മനസ്സു പറയുന്നു. വരയ്ക്കു ശേഷം മുന്നില്‍ വിരിച്ച കള്ളിമുണ്ടില്‍ വീഴുന്ന നാണയത്തുട്ടുകളിലായിരുന്നു, അയാളുടെ അന്നം.

തെരുവ് സമരങ്ങളുടേതു കൂടിയാണ്. കോട്ടയം തിരുനക്കരയിലെ ഗാന്ധിപ്രതിമയുടെ ചുവടായിരുന്നു, സമരങ്ങളുടെ കേന്ദ്രം. ഇവിടെ നില്‍ക്കാത്ത സമരങ്ങള്‍ മാത്രമാണു സിവില്‍ സ്റ്റേഷന്‍ പടിക്കലേക്കു നീണ്ടത്. പ്രീഡിഗ്രി ബോര്‍ഡ് സമരമൊന്നും നടക്കുന്ന ഓര്‍മ്മ എനിക്കില്ല. എന്നാല്‍ ഇടതുവിദ്യാര്‍ത്ഥി സംഘടനകളുടെ നേതൃത്വത്തിലുള്ള സംയുക്ത വിദ്യാര്‍ത്ഥി സമരങ്ങളില്‍ ഓര്‍മ്മയില്‍ പച്ച കത്തി നില്‍ക്കുന്നത് പോളിടെക്നിക് സമരമാണ്. കേരള സര്‍വ്വകലാശാലയില്‍ വിളനിലം സമരം നടക്കുമ്പോള്‍ തന്നെയാവണം, പോളി സമരം സംസ്ഥാനമെങ്ങും കത്തിപ്പടര്‍ന്നത്. അന്ന് ഗാന്ധിപ്രതിമയ്ക്കു് ചുവടെയുള്ള സത്യഗ്രഹപ്പന്തലില്‍ മണിക്കൂറുകള്‍ ചെലവഴിച്ചിട്ടുണ്ട്.

അതൊരു സ്ഥിരം സമരവേദികൂടിയായിരുന്നു എന്നു മുന്നമേ പറഞ്ഞുവല്ലോ. ഗാന്ധി പ്രതിമ കണ്ട വളരെക്കാലം നീണ്ട ഒരു ഒറ്റയാള്‍ സമരത്തെക്കുറിച്ചു കൂടി പറയാതെ പോകവയ്യ. ടി ജെ സാമുവല്‍ എന്ന കോട്ടയം എംടി സെമിനാരി സ്കൂള്‍ അദ്ധ്യാപകന്റെ സമരവിരുദ്ധ സമരമായിരുന്നു, അത്. ഗാന്ധി സ്ക്വയറിനെ സമരകേന്ദ്രമാക്കുന്നതിന് എതിരെയായിരുന്നു, എല്ലാ വൈകുന്നേരങ്ങളിലും ഏതാനും മണിക്കൂറുകള്‍, മുനിസിപ്പല്‍ കൌണ്‍സിലര്‍ കൂടിയായിരുന്ന സാമുവല്‍ സാര്‍ ഗാന്ധി സ്ക്വയറിലെ വെല്ലിനുള്ളില്‍ നിന്നു പ്രതിഷേധിച്ചത്. സത്യവാന്‍ കൊട്ടാരക്കരയുടെയും സുഗതകുമാരിയുടെയും നേതൃത്വത്തില്‍ അക്രമരാഷ്ട്രീയത്തിനെതിരെ എന്ന പേരില്‍ നടന്ന, വിദ്യാര്‍ത്ഥികളില്‍ നിന്നു രാഷ്ട്രീയത്തെ പടിയിറക്കാനുള്ള യത്നത്തിലെ മുന്നണിപ്പോരാളി കൂടിയായിരുന്നു, സാമുവല്‍സാര്‍. ഒടുവില്‍ ഒരു ഹൈക്കോടതി വിധിയിലൂടെ സാമുവല്‍ സാറിന്റെ പ്രയത്നം വിജയിച്ചു. പിറ്റേക്കൊല്ലം സംസ്ഥാനത്തു കത്തിപ്പടര്‍ന്ന മെഡിക്കല്‍ സമരം 18 ദിവസത്തോളം നീണ്ട അനിശ്ചിതകാല പഠിപ്പുമുടക്കിലേക്കൊക്കെ പോയെങ്കിലും അന്നത്തെ നിരാഹാരസമരത്തിന്റെ വേദി പഴയ ബസ്റ്റ് സ്റ്റാന്‍ഡിന്റെ എതിര്‍വശത്ത് ഇപ്പോഴത്തെ ജോസ്കോ ജൂവലേഴ്സ് കെട്ടിടത്തിന്റെ മുന്‍വശത്തുള്ള നടപ്പാതയിലേക്കു മാറിയിരുന്നു.

എഐഡിഎസ്ഒ എന്ന വിദ്യാര്‍ത്ഥി സംഘടന സംയുക്ത സമരസമിതിയില്‍ ഉണ്ടായിരുന്ന നാളുകളാണ് അത്. എസ്യുസിഐയുടെ ഫീഡര്‍ സംഘടനയായാണ് ഇവര്‍ പ്രവ‌ര്‍ത്തിച്ചുവന്നിരുന്നത്. സമൂഹത്തെ വൈദ്യവത്കരിക്കുന്നതിനെതിരെയായിരുന്നു, അവരുടെ പ്രചാരണമത്രയും. അത് മുദ്രാവാക്യമെന്ന നിലയില്‍ ഇതരവിദ്യാര്‍ത്ഥിസംഘടനാ പ്രവര്‍ത്തകരെ പോലും സ്വാധീനിച്ചിരുന്നു. സമരകാലത്തിനു ശേഷം റാഷ് ബിഹാരി ബോസിന്റെയും സുഭാഷ് ചന്ദ്ര ബോസിന്റെയും ഐഎന്‍എയുടെയും മറ്റും അനുസ്മരണ ചടങ്ങുകള്‍ എസ്യുസിഐ സംഘടിപ്പിച്ചു. സമരവേദി നിന്നിരുന്ന സ്ഥലത്തു തന്നെ അവര്‍ പോസ്റ്റര്‍ പ്രദര്‍ശനം വച്ചു. മുന്നില്‍ വലിയ സ്റ്റേജ് കെട്ടി കവിസമ്മേളനം വച്ചു. ബാനര്‍ എന്ന സാംസ്കാരിക സംഘടനയുടെ പേരിലായിരുന്നു, അത്. ബാനറിലേക്ക് എസ്എഫ്ഐക്കാരും എഐഎസ്എഫുകാരും കെവിഎസുകാരും അടക്കമുള്ളവരെ ഭാഗികമായെങ്കിലും അടുപ്പിക്കാന്‍ അവര്‍ക്കു സാധിച്ചു. മനോജ് കുറൂറും എസ് ജോസഫും അടക്കമുള്ള കവികള്‍ ബാനറിന്റെ പ്രതിവാര കൂട്ടായ്മകളില്‍ തിരുനക്കര അമ്പലനടയിലിരുന്നു കവിത ചൊല്ലി. ഇത്തരം പരിപാടികള്‍ അവര്‍ സംസ്ഥാനത്തു പലയിടത്തും പയറ്റിയിട്ടുണ്ടാവാം. അടുത്തവര്‍ഷം പരിയാരത്ത് സര്‍ക്കാര്‍ ഭൂമിയില്‍ സഹകരണവകുപ്പിന്റെ കാര്‍മ്മികത്വത്തില്‍ സ്വകാര്യ ട്രസ്റ്റിന്റെ പേരില്‍ മെഡിക്കല്‍ കോളജ് തുടങ്ങുന്നതിനെതിരെ സമരം നടക്കുമ്പോള്‍ ഇവര്‍ സംയുക്ത സമരസമിതിയില്‍ ഇല്ലാതെ പോയതിനു കാരണം വേറെയൊന്നാകാന്‍ വഴിയില്ല.

സമരങ്ങളുടെ കാര്യം പറയുമ്പോള്‍ മറന്നുപോകരുതാത്ത ഒരു സമരമുണ്ട്. സി കെ ജാനുവും ഗീതാനന്ദനും മറ്റും ഗോത്രമഹാസഭയുമായി മലയാള രാഷ്ട്രീയ മണ്ഡലത്തിലേക്ക് കടന്നുവരുന്നതിനും മുന്നെ അതിശക്തമായി തന്നെ, തെരുവുകളില്‍ രാപാര്‍ത്തിരുന്ന മലയരയന്മാരുടെ പാര്‍പ്പിടാവകാശത്തിനു വേണ്ടി നടന്ന ഒരു സമരത്തിന് മാസങ്ങളോളം കോട്ടയം കളക്ട്രേറ്റ് വേദിയായിട്ടുണ്ട്. കെകെ റോഡില്‍ പന്തലു കെട്ടി സമരം നടത്തിയത് നരവീണ നീണ്ട താടിയൊക്കെയുള്ള ഒരാളായിരുന്നു. ചരിത്രത്തില്‍നിന്ന് ഇത്തരം സമരങ്ങളുടെ മാഞ്ഞുപോകലിന്റെ ഒരുദാഹരണമെന്ന പോലെ, എന്റെ ഓര്‍മ്മയില്‍ നിന്ന് ആ വലിയ മനുഷ്യന്റെ പേര് മാഞ്ഞുപോയിരിക്കുന്നു. ഇതെഴുതുമ്പോള്‍ ആ പേര് ഒന്നോര്‍ത്തെടുക്കാനായി പഴയ കുറേസുഹൃത്തുക്കളെ വിളിച്ചുനോക്കിയെങ്കിലും ഈ സമരത്തെക്കുറിച്ച് ഓര്‍മ്മയെങ്കിലുമുള്ളതായി കണ്ടത് വളരെ കുറച്ചുപേര്‍ക്കാണ്. എന്നാല്‍ അത്രമേല്‍ മുഖ്യധാരയില്‍ നിന്നു മാറിനിന്ന സമരമായിട്ടുകൂടി വിജയം വരിച്ച പോരാട്ടമായിരുന്നു, അത്. ദളിതര്‍ അസ്പൃശ്യര്‍ മാത്രമല്ല, സമൂഹത്തില്‍ അദൃശ്യരും കൂടിയാണെന്നു കാട്ടുന്ന ഈ മറവി എന്നെ കുറ്റബോധത്തിലാഴ്ത്തുന്നു. ആദ്യമൊന്നും സമരക്കാരെ കാണാന്‍ കൂട്ടാക്കാതിരുന്ന കളക്ടര്‍ ഇറങ്ങിച്ചെന്ന് ഇവരോടു ചര്‍ച്ച നടത്തുകയും ഒടുവില്‍ ആ സമരത്തിന്റെ ഭാഗമായി, അന്ന് കോട്ടയത്ത് തെരുവുകളില്‍ കഴിഞ്ഞിരുന്ന, വീടില്ലാത്ത എല്ലാവര്‍ക്കും മൂന്നുസെന്റ് വീതം സ്ഥലവും വീടും നല്‍കാന്‍ സര്‍ക്കാര്‍ ഏര്‍പ്പാടാക്കുകയും ചെയ്തു. എന്നാല്‍ സമരനായകനായ ആ നേതാവു മാത്രം തനിക്കു വീടോ സ്ഥലമോ വേണ്ടെന്ന് പറഞ്ഞ്, തന്റെ ഭാര്യയ്ക്കും രണ്ട് ചെറിയ പെണ്‍മക്കള്‍ക്കുമൊപ്പം, ജവഹര്‍ ബാലഭവന് എതിര്‍വശത്തുള്ള ഉപേക്ഷിക്കപ്പെട്ട വലിയ പൈപ്പിനുള്ളിലേക്ക് താമസം മാറ്റി. ഇതുവഴി സിപിഐ(എം)ന്റെ ജില്ലാ കമ്മിറ്റി ഓഫീസില്‍ പോകുമ്പോഴെല്ലാം ദ ഹിന്ദുവോ ഇന്ത്യന്‍ എക്സ്പ്രസോ അരിച്ചുപെറുക്കി വായിക്കുന്ന ഇദ്ദേഹത്തെ കാണാമായിരുന്നു. കുട്ടികള്‍ വളര്‍ന്നപ്പോള്‍ സുരക്ഷിതമല്ലെന്നു കണ്ട് ഇവിടം ഉപേക്ഷിച്ചതുകൊണ്ടാവണം, ഇപ്പോള്‍ ഇദ്ദേഹത്തെ കാണാറില്ല.

എന്റെ കൌമാരകാലത്ത്, കോട്ടയത്തെ തെരുവുകള്‍ പ്രക്ഷുബ്ധമായ ഏതാനും അവസരങ്ങള്‍ ഉണ്ടായിട്ടുണ്ട്. മെഡിക്കല്‍ സമരത്തിനിടെ ബേക്കര്‍ ജംഗ്ഷനില്‍ ജീപ്പ് കത്തിച്ചപ്പോഴായിരുന്നു ഒന്ന്. സമരത്തിന്റെ മൂര്‍ദ്ധന്യത്തില്‍ തിരുവനന്തപുരത്തും കോഴിക്കോടുമൊക്കെ വലിയ തോതില്‍ ഇത്തരം അക്രമങ്ങള്‍ നടക്കുമ്പോഴും കോട്ടയം ഏറെക്കുറെ ശാന്തമായിരുന്നു. അതിനിടെയിലാണ്, ഒരു ദിവസം ബേക്കര്‍ ജംഗ്ഷനില്‍ നിന്ന സീമാട്ടി റൌണ്ടിലേക്കുള്ള പാതയില്‍ ഒരു സര്‍ക്കാര്‍ ജീപ്പ് അഗ്നിക്കിരയാവുന്നത്. ബേക്കര്‍ ജംഗ്ഷന്‍ മുതല്‍ സിഎംഎസ് കോളജ് വരെയും ഇപ്പുറത്ത് ശാസ്ത്രി റോഡ് വരെയും അപ്പുറത്ത് വൈഡബ്ല്യുസിഎ വരെയുമുള്ള പ്രദേശത്തെ കടകള്‍ ഒന്നടങ്കം ഷട്ടര്‍ താഴ്ത്തി, റോഡ് സ്വിച്ച് അമര്‍ത്തിയാലെന്ന പോലെ വിജനമായി. കോട്ടയം അക്ഷരാര്‍ത്ഥത്തില്‍ പകച്ചു എന്നുപറയാം. അന്ന് ഇതിനിടെ കൈപൊള്ളിയ ഒരു പ്രീഡിഗ്രി വിദ്യാര്‍ത്ഥിയെ നാഗമ്പടം ബസ്റ്റ് സ്റ്റാന്‍ഡില്‍ നിന്ന് പൊലീസ് അറസ്റ്റ് ചെയ്തു. മണിക്കൂറുകളോളം നഗരത്തിനുള്ളില്‍ ഇടിവണ്ടിയിലിട്ടു കറക്കിയ ശേഷമാണ് ആളെ സ്റ്റേഷനില്‍ പോലും ഹാജരാക്കിയത്. റിമാന്‍ഡ് കഴിഞ്ഞിറങ്ങുമ്പോള്‍ ആള്‍ നീരുവച്ച് ചീര്‍ത്തിരുന്നു. വര്‍ഷങ്ങള്‍ക്ക് ശേഷം മുംബൈയില്‍ വച്ചു കാണുമ്പോള്‍ അന്നത്തെ ഈ വിദ്യാര്‍ത്ഥി ബോളിവുഡിലെ ഒരു പ്രമുഖ പ്രൊഡക്ഷന്‍ കണ്ട്രോളറായി മാറിയിരുന്നു.

ബസേലിയസ് കോളജില്‍ ഉണ്ടായ ഒരു സംഘര്‍ഷത്തെ തുടര്‍ന്ന് കോട്ടയം ജില്ലാ ആശുപത്രിയില്‍ പ്രവേശിപ്പിച്ചിരുന്ന എസ്എഫ്ഐ - കെ എസ് യു പ്രവര്‍ത്തകര്‍ തമ്മില്‍ ആശുപത്രിയിലും അടിപൊട്ടിയ ഒരു സന്ദര്‍ഭമുണ്ട്. അതിനു പിന്നാലെയാണ് പ്രതികളെ അറസ്റ്റ് ചെയ്യണം എന്നാവശ്യപ്പെട്ട് ഉമ്മന്‍ ചാണ്ടി നിരാഹാരം അനുഷ്ഠിക്കുന്നത്. സൂര്യനെല്ലി വിഷയം കത്തിനില്‍ക്കുന്ന കാലമായിരുന്നു, അത്. കെ കെ റോഡിലൂടെ കടന്നുപോകുന്ന ബസുകള്‍ തടഞ്ഞുനിര്‍ത്തി ബസേലിയസിലെ വിദ്യാര്‍ത്ഥികള്‍ പോസ്റ്റര്‍ ഒട്ടിച്ചുവിട്ടു. ഖദറന്മാര്‍ നഗരത്തില്‍: പെണ്‍കുട്ടികള്‍ സൂക്ഷിക്കുക, ആരാണ് ബാജി, തുടങ്ങിയ വാചകങ്ങളായിരുന്നു പോസ്റ്ററില്‍. ഈ ബസുകളെല്ലാം പഴയ ബസ് സ്റ്റാന്‍ഡില്‍ കയറിയേ പോകൂ. സ്വാഭാവികമായും സമരപ്പന്തലിന്റെ മുന്നില്‍ ഇവയെത്തും. ഇതേത്തുടര്‍ന്ന് പത്തുനാനൂറു പേരടങ്ങുന്ന ഒരു സംഘം വലിയ വടിയും കമ്പുമായി ബസേലിയസിലേക്കു പാഞ്ഞടുത്തു. സെക്യൂരിറ്റിക്കാര്‍ ചിലരെ അടച്ചിട്ട ക്ലാസ് മുറികളില്‍ കയറ്റിയും ചിലരെ സൊസൈറ്റിക്കുള്ളില്‍ കയറ്റി ഷട്ടറിട്ടും രക്ഷിച്ചു. മറ്റുള്ളവര്‍ ഈരയില്‍ക്കടവിലേക്ക് ഓടി കടത്തുകടവില്‍ കണ്ട വള്ളം എടുത്തു തുഴഞ്ഞ് അക്കരെയെത്തിയൊക്കെയാണ് രക്ഷപെട്ടത്.

കൂത്തുപറമ്പ് വെടിവയ്പ്പിനെ തുടര്‍ന്ന് രൂപപ്പെട്ട സംഘര്‍ഷത്തില്‍ ആള്‍ക്കൂട്ടത്തിനു നേരെ ഒരു കോണ്‍സ്റ്റബിള്‍ (അന്ന് സിവില്‍ പൊലീസ് ഓഫീസര്‍ എന്ന തസ്തിക ആയിട്ടില്ല) തോക്കുചൂണ്ടിയതും വയ്ക്കടാ വെടി, നെഞ്ചത്തേക്ക് എന്നു പറഞ്ഞ് അന്നത്തെ എസ്എഫ്ഐ ജില്ലാ സെക്രട്ടറി കെ എം ഹിലാല്‍ പാഞ്ഞടുത്തതും ഓര്‍മ്മയിലുണ്ട്. ഹിലാല്‍ ഇന്ന് ജൈവകൃഷി പ്രചാരകനാണ്. തെരഞ്ഞെടുപ്പുകലാശക്കൊട്ടലിനു മാത്രമേ, ഗാന്ധി സ്ക്വയര്‍ അത്രയും നിറഞ്ഞു കണ്ടിട്ടുള്ളൂ, അതിനു മുമ്പും ശേഷവും.

തെരുവുനാടകങ്ങള്‍ കേരളത്തിലെ ആശയപ്രചാരണവേദികളില്‍ വലിയ തോതില്‍ ഉപയോഗിക്കപ്പെട്ടിട്ടുള്ള ഒന്നാണ്. ശാസ്ത്രസാഹിത്യ പരിഷത്തിന്റെയും സര്‍വ്വകലാശാലാ യൂണിയന്റെയും എസ്എഫ്ഐയുടെയും ഒക്കെ കലാജാഥകള്‍ തെരുവായ തെരുവൊക്കെ സഞ്ചരിച്ചു രാഷ്ട്രീയം പ്രചരിപ്പിച്ചിട്ടുണ്ട്. എന്നാല്‍ എല്ലാ വര്‍ഷവും മുടങ്ങാതെ നടക്കുമായിരുന്ന ഒരു തെരുവുനാടകമായിരുന്നു, മേരി റോയിയുടെ പള്ളിക്കൂടം സ്കൂളിലെ വിദ്യാര്‍ത്ഥികളുടേത്. കോട്ടയത്തെ തിരക്കേറിയ ശാസ്ത്രി റോഡ് ബസ്റ്റ് സ്റ്റോപ്പിലേക്കുള്ള വഴിയില്‍ കെ എം ജോര്‍ജ്ജ് പ്രതിമയുടെ എതിര്‍വശത്ത് പെട്രോള്‍ പമ്പിനോടു ചേര്‍ന്ന ഇത്തിരി സ്ഥലത്ത് നിന്ന് അവര്‍ സ്ത്രീവിമോചനത്തെക്കുറിച്ചും മറ്റും മറ്റും പണിക്കുപോയി മടങ്ങുന്ന സാധാരണക്കാരായ പുരുഷന്മാരെയും സ്ത്രീകളേയും ഉത്ഭോധിപ്പിച്ചുപോന്നു.

നഗരസഭാ ഓഫീസിന്റെ ഒരു വശത്ത് ജനറല്‍ പോസ്റ്റ് ഓഫീസിനു മുന്നില്‍ മുമ്പു നീണ്ട ക്യൂ കാണുമായിരുന്നു. ഏതെങ്കിലും പി.എസ്.സി പരീക്ഷയ്ക്ക് അപേക്ഷ അയയ്ക്കേണ്ട അവസാന തീയതിക്കു മുമ്പായിരിക്കും ഈ ക്യൂ. ഇതിനേക്കാള്‍ വലിയ ക്യൂവായിരുന്നു, സിവില്‍ സ്റ്റേഷനില്‍ ലേബര്‍ ഡയറക്ട്രേറ്റില്‍ രജിസ്റ്റര്‍ ചെയ്യുന്നതിന്. ചാരായ നിരോധനത്തിനും സ്വകാര്യ മദ്യ ഷോപ്പുകള്‍ നിര്‍ത്തലാക്കിയതിനും ശേഷം ഈ ക്യൂ കാണുന്നത് ബിവറേജസ് ഔട്ട് ലെറ്റുകള്‍ക്ക് മുമ്പിലാണ്. വൈഎംസിഎയുടെ അപ്പുറത്തും കാരാപ്പുഴയിലേക്കു പോകുന്ന വഴിയിലും കെഎസ്ആര്‍ടിസി സ്റ്റാന്‍ഡിന്റെ അപ്പുറത്തും ഒക്കെ ഇങ്ങനെ നെടുനീളന്‍ വരികള്‍ രൂപപ്പെട്ടു. തൊഴിലിന് അപേക്ഷിക്കുന്നതിലും പ്രധാനമായി, അച്ചടക്കത്തോടെ മദ്യത്തിന് അപേക്ഷ വയ്ക്കുന്നത്.

കോട്ടയത്തെ ലേണേഴ്സ് ലൈസന്‍സുകാരുടെ പരിശീലന കേന്ദ്രമാണ് കുര്യന്‍ ഉതുപ്പു റോഡും പരിസരങ്ങളും. ശാസ്ത്രി റോഡില്‍ നിന്ന് നാഗമ്പടത്തേക്ക് പോകുന്ന ഈ വഴി പലപ്പോഴും വലിയ ലോറികളുടെ പാര്‍ക്കിങ് ഇടം കൂടിയായി കാണാറുണ്ട്. പബ്ലിക് ലൈബ്രറിയില്‍ നിന്നും പുസ്തകമെടുത്തു മടങ്ങുന്നവരും കോളജ് വിട്ടുവരുന്ന വിദ്യാര്‍ത്ഥികളുമാണ്, ഈ റോഡ് ഉപയോഗിക്കുന്ന വഴിയാത്രക്കാരില്‍ മുഖ്യം. ഒരുപക്ഷെ കോട്ടയത്തിന്റെ മാനവീയം വീഥി ആക്കാവുന്ന റോഡ്. ഹോര്‍ട്ടികള്‍ച്ചര്‍ സൊസൈറ്റിയുടെ കോട്ടയം പുഷ്പമേള നടക്കുമ്പോഴും ഫുഡ് ഫെസ്റ്റ് നടക്കുമ്പോഴും മാത്രമേ ഈ റോഡ് നിറഞ്ഞുകാണൂ. ആ സമയങ്ങളില്‍ ഇതുവഴി കടന്നുപോകാന്‍ നന്നേ പാടാവും.

നഗരത്തില്‍ തന്നെ ഉള്ളിലേക്കു കയറിയുള്ള ചെറിയ ചെറിയ തെരുവുകള്‍ക്കു മുന്നില്‍ കാരംസ് കളിക്കാരെയും മറ്റും പണ്ടു കാണാറുണ്ടായിരുന്നു. ഇന്ന് കാരംസൊക്കെ ഉപേക്ഷിക്കപ്പെട്ടുവെന്നു തോന്നുന്നു. കീച്ചും പന്നിമലത്തും റമ്മിയും ഒക്കെ ഒതുക്കത്തില്‍ കാശുവച്ചു കളിക്കുന്ന ചെറുകളങ്ങളും അവിടിവിടൊക്കെ കാണും.

തെരുവെന്നാല്‍ തെരുവു മാത്രമല്ല. കോട്ടയത്തിന്റെ പടിഞ്ഞാറന്‍ ഭാഗത്തേക്കിറങ്ങിയാല്‍ ഇഷ്ടംപോലെ തോടുകളും പുഴകളും കാണാം. ഓരോ തോടും ഓരോ തെരുവാണ്. ഇതുവഴിയാണ് വള്ളത്തില്‍ നടന്ന് കച്ചവടം നടത്തിക്കൊണ്ടിരുന്നത്. താഴത്തങ്ങാടി തന്നെ കോട്ടയത്തെ ഏറ്റവും പ്രമുഖമായ കച്ചവടകേന്ദ്രമായിരുന്നല്ലോ. ഇവിടെ കേന്ദ്രീകരിച്ചു കച്ചവടം നടത്തിയിരുന്ന വണിക്കുകള്‍ കോട്ടയത്തിന്റെ സംസ്കാരത്തിന്റെ ഭാഗമാണ്. താഴത്തങ്ങാടിയിലെ ക്രിസ്ത്യന്‍ തറവാടുകളുടെ വീടുകളൊക്കെ ഇന്ന് ഹെറിറ്റേജ് ഭവനങ്ങളായി സംരക്ഷിച്ചിരിക്കയാണ്. അവ പൊളിക്കാന്‍ പ്രത്യേക അനുമതിയൊക്കെ വേണം. ഇവിടുത്തെ പാചക നൈപുണ്യം സുറിയാനി കിച്ചണ്‍ എന്ന പാചകപ്പുസ്തകത്തിനും നിദാനമായി. ഭക്ഷണത്തിലും ജാതിയുണ്ടെന്നു പറയുന്നത് വെറുതെയല്ല. തോടുകളിലൂടെയും കൈവഴികളിലൂടെയും വള്ളത്തില്‍ നടന്നു വില്‍പ്പന നടത്തിയിരുന്നവരും ഓരോ കടവിലും കടത്തുവഞ്ചിയുമായി കാത്തിരുന്നവരും ഇന്ന് ഓര്‍മ്മചിത്രങ്ങളില്‍ മാത്രമാണ്. അവസാനമായി അവരെ കാണുന്നത് ഒരുപക്ഷെ കണ്ണെഴുതി പൊട്ടുംതൊട്ട് എന്ന സിനിമയിലാകാം. എന്നാല്‍ എന്റെ കുട്ടിക്കാലത്ത് മീനും മുട്ടയും സോപ്പുചീപ്പുകണ്ണാടിയും അടക്കം കൊണ്ടുവന്നിരുന്നത്, വള്ളങ്ങളിലായിരുന്നു.

തെരുവ് പ്രമേയമാക്കി പരിചമുട്ടുകളി പാട്ട് ഒരെണ്ണമുണ്ട്. കോട്ടയത്തുനിന്ന് ആലപ്പുഴ വരെയുള്ള യാത്രയും മുല്ലക്കല്‍ ക്ഷേത്രത്തിലെ ഉത്സവവും മറ്റുമാണ് പ്രതിപാദ്യം. ആ പാട്ടിവിടെ: കേരളനാട്ടിലെ ഞാൻ ചുറ്റിയ സഞ്ചാരം.

ചുരുക്കത്തില്‍ അനുഭവമില്ലാത്തവന്റെ തെരുവാണ്, എന്റെ തെരുവ്. അല്ലെങ്കില്‍ ഇതിനപ്പുറം തെരുവിനെ ഒന്നും ഒരുകാലത്തും ഞാന്‍ അനുഭവിച്ചിട്ടില്ല. അടിച്ചു കോങ്കിയായി വഴിയരുകില്‍ കിടക്കുകയോ മൂലയ്ക്കു മാറിനിന്ന് ഗ്രാസ് തെറുക്കുകയോ ഉണ്ടായിട്ടില്ല. പറയത്തക്ക അരാജക്വമൊന്നും അനുഭവിച്ചിട്ടില്ല. ആകെപ്പാടെ കുറേ സമരങ്ങളുടെ ഭാഗമായി തെരുവ് അനുഭവിച്ചിട്ടുണ്ട്. അങ്ങനെയുള്ള ഞാന്‍ തെരുവിനെക്കുറിച്ച് എന്തെഴുതിയാലും തുടക്കത്തില്‍ പറഞ്ഞതുപോലെ ഒരുതരം ഓഞ്ഞ നൊസ്റ്റാള്‍ജിയ മാത്രമേ ആവൂ. തെരുവിനെക്കുറിച്ച് ചോദിക്കേണ്ടത് ചെരുപ്പുകുത്തികളോടും തട്ടുകടക്കാരോടും ലൈംഗികത വില്‍ക്കുന്നവരോടുമാണ്. അവര്‍ക്കേ അറിയൂ, രാത്രി ഇരുട്ടി വെളുക്കും വരെയുള്ള തെരുവിന്റെ ഗൂഢതകള്‍. അവരെയൊക്കെ നമ്മള്‍ കണ്ടുകൊണ്ടിരിക്കുമ്പോഴും കാണാതെയാവുന്നു. ചുമരുകള്‍ മാത്രമല്ല, വശം ചേര്‍ത്തു ടാര്‍ ചെയ്ത തെരുവുകളും ആളുകളെയും ഓര്‍മ്മകളേയും രാഷ്ട്രീയത്തെയും പടിയിറക്കുന്നു.

(സമകാലിക മലയാളം 2014ലെ ഓണപ്പതിപ്പിൽ പ്രസിദ്ധീകരിച്ചതു്)