RAJESH KUMAR

AUTOMATIC STARTER

noreply@blogger.com (Anonymous) — Sun, 16 Sep 2012 00:51:00 +0000

பேசுவதற்கு, பாட்டு கேட்பதற்கு, குறுந்தகவல்கள் அனுப்புவதற்கு மட்டுமே பயன்படுத்தப்பட்ட மொபைல் போன், தற்போது, வயல்வெளிக்கு தண்ணீர் பாய்ச்சவும் உதவுகிறது.
திருவள்ளூர் மாவட்டம், திருத்தணி தாலுகா, வேலஞ்சேரி கிராமத்தைச் சேர்ந்த விவசாயி, ரமேஷ் பாபு. வயது 51. பி.காம்., படித்து, தனக்குச் சொந்தமான நிலத்தில் விவசாயம் செய்து வருகிறார்.
விவசாய நிலத்திற்கும், இவரது வீட்டிற்கும், இரண்டு கி.மீ., தூரம் உள்ளது. கரும்பு, நெல் போன்றவற்றை பயிரிட்டுள்ளார். தினசரி, தண்ணீர் பாய்ச்ச நடந்தே சென்று வருகிறார். கடந்த, மூன்றாண்டுகளாக தொடரும் மின்வெட்டால், எப்போது மின்சாரம் வருகிறது, எப்போது போகிறது என்பது தெரியாமல், வயலுக்கு தண்ணீர் பாய்ச்ச முடியாமல் அவதிப்பட்டார்.
இரவு நேரத்தில், மும்முனை மின்சாரம் கிடைப்பதால், அந்த சமயத்தில் வயலுக்கு சென்று மோட்டாரை இயக்க வேண்டியிருந்தது. அப்போது வழியில் பாம்பு போன்ற விஷ ஜந்துகள் குறுக்கீடு இருப்பதால், உயிருக்கு உத்தரவாதம் இல்லாத சூழ்நிலை.
இந்நிலையில், கடந்தாண்டு, சென்னை வர்த்தக மையத்தில் நடந்த கண்காட்சிக்குச் சென்றபோது, மொபைல் போன் மூலம், வீட்டில் உள்ள மின்சாதன பொருட்களை இயக்குவது குறித்து தனியார் கம்பெனி ஒன்றின், "ஆட்டோமேடிக் மொபைல் ஸ்டார்ட்டர்' கருவியைப் பார்த்தார்.

இதே தொழில்நுட்பத்தை பயன்படுத்தி, ஏன், தன் வயலுக்கு மோட்டாரை இயக்கி தண்ணீர் பாய்ச்ச உபயோகப்படுத்தக் கூடாது என சிந்தித்தார். சிந்தனையை தன் மகன் சதீஷிடம் பகிர்ந்து கொண்டார். அவரது துணையுடன், பெங்களூருவில் உள்ள தனியார் நிறுவனத்தை தொடர்பு கொண்டார். அதை பற்றி அவரே கூறுகிறார்:
பெங்களூருவில் உள்ள தனியார் நிறுவனத்திற்குச் சென்று, மொபைல் போன் மூலம் மோட்டார் இயக்கும், "ஆட்டோமேடிக் மொபைல் ஸ்டார்ட்டர்' குறித்து கேட்டோம். அவர்கள், மோட்டாரை இயக்குவதற்காக, ஜி.எஸ்.எம்., தொழில்நுட்பத்தைப் பயன்படுத்தி, ஒரு கருவியை தயாரித்து கொடுத்தனர். இதற்கு, 4,000 ரூபாய் செலவானது. அந்த கருவியை, எங்கள் வயலில் உள்ள மோட்டாரின் சுவிட்ச் போர்டுடன் பொருத்தினோம்.
அந்த கருவியில், மொபைல் போனிற்கு பயன்படுத்தும் சிம் கார்டு பொருத்தப்பட்டிருக்கும். அதனுடன், மோட்டார் உரிமையாளரின் மொபைல் எண்ணுடன் இணைப்பு கொடுக்கப்படும். மோட்டாரை இயக்க வேண்டுமென்றால், உரிமையாளரின் மொபைல் போனில் இருந்து, மோட்டார் அறையில் பொருத்தப் பட்டிருக்கும் ஜி.எஸ்.எம்., தொழில்நுட்பத்துடன் கூடிய கருவியில் இருக்கும் சிம் கார்டு நம்பருக்கு டயல் செய்ய வேண்டும். இணைப்பு வந்ததும், 1 என்ற எண்ணை அழுத்தினால், மோட்டார் இயங்கும். வயலுக்கு தண்ணீர் பாய்ச்சி முடிந்ததும், மீண்டும் அந்த எண்ணுக்கு டயல் செய்து, 0 என்ற எண்ணை அழுத்தினால், மோட்டார் நின்று விடும், என்றார் ரமேஷ் பாபு.
"கடந்த, ஆறு மாதமாக இந்த புதிய கருவியின் துணையுடன் மோட்டாரை இயக்கி, என் 14 ஏக்கர் நிலத்திற்கு தண்ணீர் பாய்ச்சி வருகிறேன். திடீரென வெளியூருக்குச் செல்ல நேர்ந்தால், வயல்வெளியில் பயிருக்கு தண்ணீர் பாய்ச்ச வேண்டுமே என்ற கவலை இல்லை. மொபைல் போனை எடுத்து இயக்கினாலே போதும், வயலுக்கு தண்ணீர் பாய்ச்சி விடலாம்...' என்று மகிழ்ச்சியுடன் கூறுகிறார் இந்த விவசாயி.
இதையறிந்த இவரது நண்பர்கள் சிலர், இந்த ஆட்டோமேடிக் மொபைல் ஸ்டார்ட்டரை பார்த்துச் சென்று, தங்களது நிலத்திற்கும் பொருத்த தயாராகி வருகின்றனர். மின்வெட்டு, இரவில் பாம்பு பயம் போன்றவற்றால், தண்ணீர் பாய்ச்ச சிரமப்படும் விவசாயிகள், தங்களது நிலத்திலும் இந்த கருவியை பொருத்த தகவல் பெற வேண்டுமென்றால், இவரது, 93813 38238 என்ற மொபைல் போனில் கேட்டு, விவரம் அறிந்து கொள்ளலாம்.
***

*முழுக்க முழுக்க, ஜி.எஸ்.எம்., தொழில்நுட்பத்தில் செயல்படுகிறது. எந்த மொபைல் நிறுவனத்தின் சிம் கார்டையும் பயன்படுத்திக் கொள்ளலாம்.
*மின்வெட்டு இருக்கும் போது, மொபைலில் தொடர்பு கொண்டால், எந்தவித தொடர்பும் கிடைக்காது.
*ஆட்டோமேடிக் மொபைல் ஸ்டார்ட்டரை, நாம் மொபைலில் தொடர்பு கொண்டு இயக்கியதும், ஒரு நிமிடம் கழித்து, நம் மொபைல் போனிற்கு, "மோட்டார் ஆன்' என்ற குறுந்தகவல் வரும். மோட்டார் நின்றதும், "மோட்டார் ஆப்' என்ற குறுந்தகவல் வரும்.
* மோட்டார் இயங்கிக் கொண்டிருக்கிறதா என்பதை அறிய, ஆட்டோமெடிக் மொபைல் ஸ்டார்ட்டரில் பொருத்தப்பட்டிருக்கும் சிம் கார்டு எண்ணிற்கு தொடர்பு கொண்டால், "பீப் பீப்' என விட்டு, விட்டு சத்தம் வரும். அதுவே பீப்... என நீண்ட சத்தம் வந்தால், மோட்டார் ஆப் ஆகி விட்டது என தெரிந்து கொள்ளலாம்.
*மொபைல் போன் பில் அதிகம் ஆகும் என கவலைப்பட வேண்டியதில்லை. சாதாரணமாக வருடத்திற்கு, 100 ரூபாய் ரீசார்ஜ் செய்தாலே போதும். இலவச எஸ்.எம்.எஸ்., திட்டம் உள்ள மொபைல் நிறுவனத்தின் சிம் கார்டையும் பயன்படுத்திக் கொள்ளலாம்!

அக்டோபர் 26ல் விண்டோஸ் 8

noreply@blogger.com (Anonymous) — Wed, 15 Aug 2012 00:45:00 +0000

வரும் அக்டோபர் 26ல் அனைவரும் ஆவலுடன் எதிர்பார்த்துக் காத்திருக்கும் விண்டோஸ் 8 ஆப்பரேட்டிங் சிஸ்டம் பொதுமக்களுக்கு வழங்கப்படும் என மைக்ரோசாப்ட் அறிவித்துள்ளது. இது தனியாக வழங்கப்பட மாட்டாது. மைக்ரோசாப்ட் நிறுவனத்துடன் ஒப்பந்தம் மேற்கொண்டு கம்ப்யூட்டர்களைத் தயாரித்து வழங்கும் நிறுவனங்கள் வழியாகக் கம்ப்யூட்டர்களில் பதிந்தே வெளியிடப்படும். எனவே ஒரு விண்டோஸ் 8 சிஸ்டம் காப்பி, அது பதியப்படும் மதர் போர்டுடன் மட்டுமே செயல்படும். அதனை மற்ற மதர்போர்டு உள்ள கம்ப்யூட்டருக்கு மாற்ற முடியாது. எனவே இன்னொரு புதிய பெர்சனல் கம்ப்யூட்டருக்கு மாற வேண்டும் என எண்ணினால், புதிய விண்டோஸ் 8 ஒன்று வாங்க வேண்டியதிருக்கும்.
ஏற்கனவே உள்ள ஆப்பரேட்டிங் சிஸ்டங்களை, விண்டோஸ் 8 சிஸ்டத்திற்கு அப்கிரேட் செய்திட விரும்புபவர்களுக்கு, அதற்கான கட்டணமாக 40 டாலர் செலுத்திய பின்னர், உரிமம் வழங்கப்படும். மூன்று வாரங்களுக்கு முன்னர், அக்டோபர் இறுதியில் வெளியிடப்படும் என நாள் குறிக்காமல், மைக்ரோசாப்ட் அறிவித்திருந்தது.
இப்போது சரியாக என்று கிடைக்கும் என தன் திட்டத்தினை வெளியிட்டுள்ளது. மைக்ரோசாப்ட் நிறுவனத்தைப் பொறுத்தவரை, விண்டோஸ் 8 ஆப்பரேட்டிங் சிஸ்டம் அதன் சாப்ட்வேர் வரலாற்றில் ஒரு புதிய திருப்பத்தினை உண்டாக்கப் போகிறது. முதல் முறையாக இரு வேறு வகை கம்ப்யூட்டர் சாதனங்களில் இயங்கும் வகையில் ஓர் ஆப்பரேட்டிங் சிஸ்டத்தினை மைக்ரோசாப்ட் வழங்க இருக்கிறது. டெஸ்க்டாப் மற்றும் டேப்ள்ட் பிசி மட்டுமின்றி, விண்டோஸ் போனிலும் இது இயங்கும். மைக்ரோசாப்ட் அறிவித்த சர்பேஸ் டேப்ளட் பிசியும் இதனுடன் சேர்ந்து வெளியாகும் என எதிர்பார்க்கலாம்.
2011ல் நுகர்வோருக்கான எலக்ட்ரானிக்ஸ் சாதனங்களுக்கான கண்காட்சியில், விண்டோஸ் 8 குறித்த திட்டவரைவை மைக்ரோசாப்ட் வெளியிட்டது. சிப் ஒன்றில் இது சிஸ்டமாகக் கிடைக்கும் எனக் கூறிய போது, அனைவரும் கவனிக்கத் தொடங்கினர். அடுத்து ஜூன் 1, 2011 அன்று கம்ப்யூட்டக்ஸ் 2011ல் அதிகாரபூர்வமாக அறிவிப்பு வெளியானது. அன்று அறிவிக்கப்பட்ட விண்டோஸ் மெட்ரோ இன்டர்பேஸ், மக்களிடையே ஆர்வத்தைத் தூண்டியது. அதே நேரத்தில் பழையவகை விண்டோஸ் திரையும் இருக்கும் எனவும் அறிவிக்கப்பட்டது. விண்டோஸ் 7 சிஸ்டத்தைக் காட்டிலும் அதிவேகமாக விண்டோஸ் 8 பூட் ஆகும்; யு.எஸ்.பி. 3 கிடைக்கும்; விண்டோஸ் ஸ்டோருக்கான இணைப்பு தரப்படும்; யு.எஸ்.பி. ட்ரைவிலிருந்து விண்டோஸ் இயக்கலாம் என்ற புதிய தகவல்கள் கம்ப்யூட்டர் பயன்படுத்துபவர்களிடையே அதிக எதிர்பார்ப்புகளை ஏற்படுத்தி வருகின்றன.

மைக்ரோசாப்ட் நிறுவனத்தின் புதிய ஆப்பரேட்டிங் சிஸ்டம் விண்டோஸ் 8, இந்த ஆண்டின் அக்டோபர் மாதம் விற்பனைக்கு வர இருக்கிறது என்ற செய்தியுடன், ஆப்பரேட்டிங் சிஸ்டம் சார்ந்த பல செய்திகள் தொடர்ந்து வந்து கொண்டிருக்கின்றன. அண்மையில், ஆய்வமைப்பு வெளியிட்ட செய்தியில், விண்டோஸ் 8 ஆப்பரேட்டிங் சிஸ்டத்தினை எதிர்பார்ப்பதால், தற்போது பெர்சனல் கம்ப்யூட்டர் வாங்கத் திட்டமிடுபவர்கள், தங்கள் முடிவை சற்று ஒத்தி போட்டுள்ளனர். இதனால், பெர்சனல் கம்ப்யூட்டர் விற்பனை உலக அளவில் சரியத் தொடங்கி உள்ளது. இதற்குக் காரணம் விண்டோஸ் 8 வர்த்தக வெளியீட்டிற்கான தேதி அறிவிப்பு மட்டுமல்ல. அதன் ரிலீஸ் பிரிவியூ காட்டியுள்ள பல புதிய வசதிகளும் தான்.
மேலும் நோட்புக் கம்ப்யூட்டர் விற்பனை உச்சகட்டத்தினை அடைந்து இப்போது அவ்வளவாக விரும்பப்படுவதில்லை. புதியதாக விண்டோஸ் 8 என்ன தரும் என இதனைப் பயன்படுத்துபவர்கள் காத்திருக்கின்றனர்.
கம்ப்யூட்டர் விற்பனை செய்பவர்களும், விண்டோஸ் 8 ஆப்பரேட்டிங் சிஸ்டம் வர இருப்பதால், தங்களிடம் உள்ள பெர்சனல் மற்றும் லேப் டாப் கம்ப்யூட்டர்களின் இருப்பு எண்ணிக்கையினைக் குறைக்க விரும்பி, செயலில் காட்டி வருகின்றனர்.
உலக அளவில் மொத்த கம்ப்யூட்டர் விற்பனை கடந்த மூன்று மாதங்களில், சென்ற ஆண்டின் இதே காலாண்டுடன் ஒப்பிடுகையில், 0.1 சதவிகிதம் குறைந்துள்ளது. ஆனால், இதே காலத்தில், லெனோவா தன் கம்ப்யூட்டர் விற்பனையை உயர்த்தியுள்ளது. 25% கூடுதல் விற்பனையுடன், மூன்றாவது இடத்தில் இருந்து இரண்டாவது இடத்திற்கு வந்துள்ளது. முதல் இடத்தை எச்.பி. கம்ப்யூட்டர்கள் தொடர்ந்து தக்க வைத்துக் கொண்டிருந்தாலும், இந்த சந்தையில் இவற்றின் விற்பனைப் பங்கு 17.6 சதவிகிதத்திலிருந்து 15.5%க்கு இறங்கியது. அசூஸ் நிறுவனத்தின் மொத்த விற்பனை 39.8% உயர்ந்தாலும், ஐந்தாவது இடத்திலேயே தொடர்ந்து இருந்து வருகிறது. விண்டோஸ் 8 சிஸ்டத்தினைத் தாங்கள் விற்பனை செய்திடும் கம்ப்யூட்டர்களில் பதிந்து அளித்திடும் நிறுவனங்களிடம் இருந்து, லைசன்ஸ் ஒன்றுக்கு 100 டாலர் மைக்ரோசாப்ட் கட்டணமாக விதித்திருந்தது.
இதனைத் தற்போது குறைத்துள்ளதாக, உறுதி செய்யப்படாத தகவல்கள் தெரிவிக்கின்றன. விண்டோஸ் ஆர்.டி. பதிந்த கம்ப்யூட்டர்களுக்கான உரிமக் கட்டணம் 80 முதல் 100 டாலராகவும், எக்ஸ்86 பதிப்புக்கு 60 முதல் 80 டாலராகவும் இருக்கலாம் என்று எதிர்பார்க்கப்படுகிறது. இதனால், விண்டோஸ் 8 பதிந்து விற்பனை செய்திட, ஒப்பந்தம் மேற்கொண்டுள்ள நிறுவனங்களின் லாபம் அதிகமாகும். இதனால், அவை கம்ப்யூட்டர் விற்பனை விலையைக் குறைக்கலாம்.

எம்.எஸ். ஆபீஸ் 2013

noreply@blogger.com (Anonymous) — Wed, 15 Aug 2012 00:44:00 +0000

மைக்ரோசாப்ட் நிறுவனத்தின் ஆபீஸ் 2013 தொகுப்பு வெளியாகிறது. இதன் நுகர்வோருக்கான முன்னோடி (Consumer Preview Consumer Preview) தொகுப்பு அண்மையில் ஜூலை 16ல் வெளியானது. இதில் பல புதிய டெஸ்க்டாப் அப்ளிகேஷன்களும், சர்வர் இயக்கம் சார்ந்த பல புரோகிராம்களும், வசதிகளும் தரப்பட்டுள்ளன. இதனை http://www.microsoft.com/office/preview/en என்ற முகவரியில் இருந்து டவுண்லோட் செய்து பயன்படுத்திக் கொள்ளலாம். இதனைத் தரவிறக்கம் செய்து கொள்ள உங்களிடம் விண்டோஸ் லைவ் ஐ.டி. ஒன்று தேவை. இல்லாதவர்கள் உடனே ஒன்றை உருவாக்கிக் கொள்ளலாம். விண்டோஸ் லைவ் ஐ.டி. மூலம் ஆபீஸ் 2013 தொகுப்பில், எந்த சாதனம் வழி நுழைந்தாலும், நீங்கள் அமைத்த செட்டிங்ஸ், நிலைகள் கிடைக்கும். எனவே எங்கிருந்து இதனை இயக்கினாலும், உங்கள் கம்ப்யூட்டரில் நீங்கள் உருவாக்கிய நிலைகள் கிடைக்கும்.
ஆபீஸ் 2013 தொகுப்பு வர்த்தக ரீதியாக என்று விற்பனைக்கு வரும் என இன்னும் மைக்ரோசாப்ட் அறிவிக்கவில்லை. 2013 ஆம் ஆண்டின் தொடக்கத்தில் வெளிவரக் கூடும் என உறுதியற்ற தகவல்கள் தெரிவிக்கின்றன. மேலும் விண்டோஸ் ஆர்.டி. சிஸ்டத்துடன், ஹோம் அண்ட் ஸ்டூடண்ட் ஆபீஸ் 2013 (Office Home and Student 2013) இலவசமாக இணைந்து கிடைக்கும் என மைக்ரோசாப்ட் அறிவித்துள்ளது. இதில் வேர்ட், எக்ஸெல், ஒன் நோட், பவர்பாய்ண்ட் ஆகியவை இருக்கும். மைக்ரோசாப்ட் தர இருக்கும் சர்பேஸ் டேப்ளட் பிசிக்களில், ஆபீஸ் 2013 பதிப்பு இலவசமாகவே பதிந்து தரப்பட இருப்பதால், இந்த முடிவினையும் மைக்ரோசாப்ட் எடுத்துள்ளது இயற்கையே.
ஆபீஸ் 2013 தொகுப்பு இயக்க தேவையான ஹார்ட்வேர் கூறுகள் பின்வருமாறு. ஒருகிகா ஹெர்ட்ஸ் வேகத்தில் இயங்கும் ப்ராசசர் அல்லது SSE2 இன்ஸ்ட்ரக்ஷன் செட்டுடன் கூடிய x86/x64 ப்ராசசர், 32 பிட் இயக்கமாக இருப்பின் 1 ஜிபி ராம் நினைவகம், 64 பிட் இயக்கமாக இருந்தால் 2 ஜிபி ராம், விண்டோஸ் 7 அல்லது பின்னர் வந்த புதிய ஆப்பரேட்டிங் சிஸ்டம் அல்லது விண்டோஸ் சர்வர் 2008/2012 ஆகியவை தேவைப்படும். எனவே விஸ்டா அல்லது எக்ஸ்பியில் இன்னும் இயங்கிக் கொண்டிருப்பவர்கள், புதிய ஆபீஸ் 2013 தொகுப்பு வேண்டும் என்றால், உயர்நிலை ஆப்பரேட்டிங் சிஸ்டத்திற்கு மாறிக் கொள்ள வேண்டும்.
ஏற்கனவே ஆபீஸ் 2003, 2007 அல்லது ஆபீஸ் 2010 இயக்கிக் கொண்டிருப்பவர்கள், அதனை சிஸ்டத்திலிருந்து நீக்க வேண்டியதில்லை. ஆபீஸ் 2013 பதிந்த பின்னர், இரண்டையும் தனித்தனியே இயக்கி வேலைகளை மேற்கொள்ளலாம்.
வழக்கமான எம்.எஸ். ஆபீஸ் தொகுப்பின் நவீனத் தொகுப்பாகத்தான், ஆபீஸ் 2013 வெளியிடப்படுகிறது. ஆபீஸ் 365 தொகுப்பிற்கும் இதற்கும் தொடர்பு இல்லை. ஆனால், ஆபீஸ் 365 பிளாட் பார்மில் இயங்க ஒப்பந்தம் மேற்கொண்டவர்களுக்கு, ஆபீஸ் 2013 கூடுதல் வசதியாகத் தரப்படுகிறது.
ஆபீஸ் 2013ல் உருவாக்கப்பட்ட பைல்களை, விண்டோஸ் போனில் படிக்கலாம். ஸ்கை ட்ரைவ் மற்றும் ஷேர் பாய்ண்ட் மூலமாகவும் பெற்றுக் கொள்ளலாம். இந்த தொகுப்பில் உருவாக்கப்படும் பைல்கள் அனைத்தும், மாறா நிலையில் ஸ்கை ட்ரைவில் பதிந்து வைக்கப்படும். எனவே எங்கிருந்தும், எந்த சாதனம் மூலமாகவும், உங்கள் பைல்களை நீங்கள் பெற்று படித்துக் கொள்ளலாம்.
விண்டோஸ் 8 ஆப்பரேட்டிங் சிஸ்டம் மூலம், கம்ப்யூட்டர் இயக்கத்தினை முற்றிலுமான ஒரு மாறுதலுக்குக் கொண்டு வந்த மைக்ரோசாப்ட், தற்போது தன் ஆபீஸ் தொகுப்பிலும் அதே வேகத்துடன் மாற்றங்களையும் கூடுதல் வசதிகளையும் கொண்டுள்ளது. எக்ஸெல், வேர்ட் மற்றும் பவர்பாய்ண்ட் ஆகிய அனைத்தும் முழுமையான மாற்றங்களை மேற்கொண்டுள்ளன.
தொட்டு இயக்கு: விண்டோஸ் 8 ஆப்பரேட்டிங் சிஸ்டத்தின் தொட்டு இயக்கு தொழில் நுட்பத்திற்கேற்ப ஆபீஸ் 2013 தொகுப்பும் தயாரிக்கப்பட்டுள்ளது. உங்கள் டாகுமெண்ட்டைக் கிள்ளி விரிக்கலாம். படங்களை விரல்களால் ஸூம் செய்திடலாம். ஸ்டைலஸ் வைத்து முதலில் கிறுக்கலாம்; பின்னர் அதனையே டெக்ஸ்ட்டாக மாற்றி பதிந்து வைக்கலாம். ஸ்டைலஸ் பேனாவினை, பிரசன் டேஷன் காட்டுகையில் லேசர் பாய்ண்ட்டர் போலப் பயன்படுத்தலாம்; வண்ணம் தீட்டலாம்; நம் தவறுகளைத் திருத்தலாம். இவற்றுடன் மவுஸ் மற்றும் கீ போர்டும் செயல்படும்.
வேர்ட் புரோகிராமில், புதிய மெனு மற்றும் ரிப்பன்கள் கொண்டு வந்த பின்னர், எந்தவிதமான பெரிய மாற்றமும் ஏற்படுத்தப்படாமல் இருந்தன. இப்போது மிக அதிகமான இடம், தேவையற்ற எதுவும் இல்லாமல் சுத்தமான கிளீன் ஸ்லேட் போன்ற தளம் தரப்படுகிறது. பயனாளர்கள் விருப்பப்பட்டால், ரிப்பன் இன்டர்பேஸையும் மறைத்து வைத்து இயக்கலாம். ஆபீஸ் இப்போது அனைத்து வகை சாதனங்களிலும் இயங்குவதால், டாகுமெண்ட்கள் திரையின் அளவிற்கேற்ப சுருங்கி விரிந்து படிக்க எளிதாக அமைக்கப்படுகின்றன.
ஆபீஸ் 2013 தொகுப்பின் மிகப் பெரிய வசதியாக, அதில் தரப்பட்டிருக்கும் பி.டி.எப். பைல் படிக்கும், உருவாக்கும் வசதியினைக் கூறலாம். பி.டி.எப். பைல் ஒன்றை, வேர்ட் தொகுப்பிலேயே எடிட் செய்திடலாம். பி.டி.எப். பைலை இதிலேயே திறக்கலாம்; அதன் ஹெடர், வரிசைப் பத்தி, புட்நோட் என அனைத்தையும் காணலாம்; அதன் கிராபிக்ஸ் வரை எடிட் செய்திடலாம். டேபிள்களைக் கூட, நீங்களே அவற்றை உருவாக்கியது போல எடிட் செய்திடலாம்.
ஆபீஸ் 2013 தொகுப்பில், நெட்வொர்க் இணைப்பினை எளிதாகப் பெறலாம். விண்டோஸ் டேப்ளட், பி.சி., அல்லது விண்டோஸ் போன் என எந்த சாதனத்தில் இதனை இயக்கினாலும், ஸ்கை ட்ரைவ் மூலமாக, ஆபீஸ் பைல்களைப் பெற்று இயக்கலாம். மாறா நிலையில் இந்த ஆபீஸ் தொகுப்பில் உருவாக்கப்படும் பைல்கள் அனைத்தும் ஸ்கை ட்ரைவில் உங்கள் பகுதிக்குச் செல்கின்றன.
டாகுமெண்ட்களைப் பார்க்க புதியதாக Reader என்னும் வியூ தரப்படுகிறது. இந்த வியூவில் டாகுமெண்ட்களைப் பார்க்கையில், ஒவ்வொரு பத்தியின் முன்னரும் ஒரு சிறிய முக்கோணம் காணப்படுகிறது. இந்த முக்கோணம் சார்ந்த பத்தியினைப் படித்த பின்னர், பாரா சுருக்கப்பட்டு தொடர்ச்சி காட்டப்படுகிறது. அடுத்த பக்கத்திற்குச் செல்ல வேண்டியதில்லை.
டாகுமெண்ட் ஒன்றைப் படித்து செயல்படுத்துகையில், எதுவரை நீங்கள் எடிட் செய்தீர்களோ, அந்த இடம் புக் மார்க் போல குறித்து வைக்கப்படுகிறது. அடுத்த முறை அந்த டாகுமெண்ட்டினை வேறு எந்த சாதனத்தில் திறந்தாலும், இறுதியாக நீங்கள் எடிட் செய்த இடத்தில் திறக்கப்பட்டு காட்டப்படுகிறது.
டாகுமெண்ட்டில், இணையதளத்திலிருந்து பெறுபவற்றை அப்படியே இணைக் கலாம். அதற்கான லிங்க் அமைக்கலாம். அவற்றை டாகுமெண்ட்டை மூடாமலேயே பார்க்கலாம். பதிக்கப்பட்ட வீடியோ அளவில் சிறியதாக இருந்தால், அதனை விரித்துப் பார்க்கவும் வசதி செய்யப்பட்டுள்ளது.
ஆபீஸ் 2013 தொகுப்புடன் ஸ்கைப் வசதியும் கிடைக்கிறது. ஆபீஸ் தொகுப்பின் சந்தாதாரர் ஆனவுடன், ஒவ் வொரு மாதமும் 60 நிமிடங்கள் ஸ்கைப் பயன்படுத்தலாம். ஆபீஸ் தொகுப்பில் டிஜிட்டல் நோட் டேக்கிங் வசதி கிடைக்கிறது. தொடுதிரை, ஸ்டைலஸ் பென், கீ போர்ட் என எதனைப் பயன்படுத்தியும் குறிப்புகளை நினைத்த மாத்திரத்தில் அமைக்கலாம்.
பவர் பாய்ண்ட் தொகுப்பிலும் புதிய வசதிகள் தரப்பட்டுள்ளன. புதிய வியூ கொடுக்கப்பட்டு, அதில் அடுத்து நீங்கள் பெறும் ஸ்லைடுகள், பிரசன்டேஷன் நேரம், ஸ்பீக்கர் நோட்ஸ் ஆகியவற்றைத் தனியே பார்த்துக் கொள்ள வசதி ஏற்படுத்தப்பட்டுள்ளது.
இன்னும் பல புதிய அம்சங்களை நாம் நிச்சயம் எதிர்பார்க்கலாம். மைக்ரோசாப்ட் இந்த வகைகளில் ஆப்பிள் நிறுவனத்தின் தயாரிப்புகளோடு போட்டியில் இறங்கியுள்ளது எனலாம். ஆப்பிள் தங்கள் புரோகிராம்கள் அனைத்து வகைகளிலும் தனித்தன்மை பெற்றவை என்றும், அதே நேரத்தில் அவற்றைப் பயன்படுத்துவது எளிது என்றும் கூறி வருகிறது.
""நான் மட்டும் என்ன சளைத்தவனா! பார் என் புரோகிராமினை'' என விண்டோஸ் 8 ஓ.எஸ். மற்றும் ஆபீஸ் 2013 தொகுப்பினை மைக்@ராŒõப்ட் களம் இறக்குகிறது. இன்னும் என்ன புதிய வசதிகள் கிடைக்கின்றன என்று போகப் போகத் தெரியவரும்.

கூகுள் பைபர்: மின்னல் வேக இன்டர்நெட்

noreply@blogger.com (Anonymous) — Wed, 15 Aug 2012 00:43:00 +0000

        கூகுள் அண்மையில் ஓர் அட்டகாசமான திட்டம் ஒன்றை அமெரிக்க மக்களுக்குத் தந்துள்ளது. இன்டர்நெட் வரலாற்றில் இது அடுத்த கட்டமாக அமைய உள்ளது.

இது வெற்றிகரமாகச் செயல்பட்டால், உலகின் அனைத்து இடங்களிலும், கூகுள் இதனைச் சாத்தியப்படுத்தலாம். கூகுள் பைபர் (Google Fiber) என்ற பெயரில், அதி வேக, மின்னல் வேக பிராட்பேண்ட் இன்டர்நெட் இணைப்பினை வழங்கும் திட்டம் ஒன்றை வடிவமைத்துள்ளது.
2011 ஆம் ஆண்டில் இந்த திட்டம் குறித்த அறிவிப்பினை கூகுள் வெளியிட்டது. பைபர் ஆப்டிக் வழி தகவல் தொடர்பினை இணைய தொடர்பிற்குத் தருவதே இந்த திட்டம். உலகிலேயே அதிக வேகத்தில் இன்டர்நெட் இணைப்பினை இதன் மூலம் பெறலாம். மின்னல் வேக டேட்டா பரிமாற்றம் என்பது நிஜமாகவே இதன் மூலம் நடைபெறும். ஒரு நொடியில், ஒரு கிகாபிட் பிட்ஸ் டேட்டா பரிமாறப்படும். ஆப்டிகல் பைபர் மூலம் இது சாத்தியமாகிறது. நூற்றுக்கும் மேற்பட்ட நெட்வொர்க்கினை இதற்கென அமைத்து வெற்றிகரமாக செயல்படுத்த கூகுள் சோதனை நடத்தியுள்ளது. இன்டர்நெட் மட்டுமின்றி, வீடியோ, தொலைக்காட்சி சேனல்கள் ஆகியவையும் இதன் மூலம் வழங்கப்பட இருக்கின்றன. ஆனால், தொலைபேசி சேவை இதில் சேர்க்கப்படவில்லை.

தொடக்கத்தில் கேன்சாஸ் நகரத்தில் இது அமல்படுத்தப்படுவதாக அறிவிக்கப்பட்டுள்ளது. ஏறத்தாழ 1,100 இல்ல வளாகங்கள் முதல் சந்தாதாரர்களாக விண்ணப்பித்தன. சென்ற ஜூலையில் இவை பதியப்பட்டன. மூன்று வகைகளில் இது கிடைக்கும். இலவச இன்டர்நெட் இணைப்பு, மாதம் 70 டாலர் செலுத்துவோருக்கான ஒரு கிகா பிட் வேக இன்டர்நெட் இணைப்பு மற்றும் 120 டாலருக்கு, தொலைக்காட்சி சேவை இணைந்த இன்டர்நெட். தொலைக்காட்சி இணைந்த சேவையில், ஒரு டெராபைட் அளவிலான கூகுள் ட்ரைவ் வசதி தரப்படுகிறது. அத்துடன் ஒரு டெராபைட் டி.வி.ஆர். ரெகார்டிங் வசதியும் கிடைக்கிறது. இதன் மூலம் ஒரே நேரத்தில் எட்டு தொலைக் காட்சி சேனல் நிகழ்ச்சிகளைப் பதிவு செய்து வைத்து, பின்னர் வேண்டும் போது பார்த்துக் கொள்ளலாம். இந்த வகை சேவை பெறுவோருக்கு நெக்சஸ் 7 டேப்ளட் பிசி ஒன்று தரப்படுகிறது. இதனை ரிமோட் கண்ட்ரோல் போல பயன்படுத்தலாம். இலவச இன்டர்நெட் வகையில், இன்ஸ்டலேஷன் கட்டணமாக 300 டாலர் கட்டிவிட்டால், ஏழு ஆண்டுகளுக்கு நொடிக்கு 5 மெகா பைட் டவுண்லோட் மற்றும் நொடிக்கு ஒரு மெகா பைட் அப்லோட் இன்டர்நெட் சேவை, அப்லோட் மற்றும் டவுண்லோட் பிரிவில் எந்த விதக் கட்டுப்பாடும் இன்றிக் கிடைக்கும். இந்த 300 டாலர் கட்டணத்தை, ஓராண்டு காலத்தில் தவணை முறையில் செலுத்தலாம். மாதம் 70 டாலர் கட்டணம் செலுத்துவோருக்கு, இன்ஸ்டலேஷன்
கட்டணம் இல்லை. நொடிக்கு ஒரு கிகா பிட் வேகத்தில் அப்லோட் மற்றும் டவுண்லோட் இருக்கும். கூகுள் ட்ரைவில் ஒரு டெரா பைட் அளவு இடம் இலவசம்.
கேன்சஸ் நகர வாசிகள் முன் கூட்டியே பதிவு செய்திட, இணைய தளப் பக்கம் ஒன்றை கூகுள் திறந்துள்ளது. வரும் செப்டம்பரில் வீடுகளுக்கான இணைப்பு தரப்படும். ஒரே நேரத்தில் இணையான இணைப்பினை அனைவரும் பெறுவார்கள். குறிப்பிட்ட ஏரியாவில், எதிர்பார்க்ப்படும் எண்ணிக்கையில் வாடிக்கையாளர்கள் சேர்ந்த பின்னரே, பைபர் நெட்வொர்க்கினை அமைத்து, கூகுள் மின்னல் வேக இன்டர்நெட் சேவையைத் தரத் தொடங்கும். இந்த சேவையில், நொடிக்கு ஒரு கிகா பிட் டேட்டா கிடைக்கும். தற்போது அமெரிக்காவில் கிடைக்கும் இன்டர்நெட் இணைப்பின் வேகத்தைப் போல, இது நூறு மடங்கு அதிகமானது. என்னதான், பெரிய அளவில் விளம்பரம் செய்தாலும், அமெரிக்க நகரங்களில் இன்டர்நெட் டவுண்லோட் வேகம் நொடிக்கு 4 மெகா பிட்ஸ் தான்.
கேன்சஸ் நகரம், அமெரிக்காவில் இரு மாநிலங்களில் அமைந்துள்ளது. இந்த இரண்டு பிரிவுகளிலும் தர கூகுள் முடிவெடுத்துள்ளது. இந்த நிகழ்வை ஒட்டி, முன்பு பிரபலமான "கிவ் அ லிட்டில் பிட்' (“Give a Little Bit”) என்ற பாடல் "கிவ் எ கிகாபிட்' (“Give a Giga Bit”) என ரீமேக் செய்யப்பட்டது. கேன்சஸ் நகரின் ஒரு பிரிவான டொபேகா (Topeka) என்ற பெயர் தற்காலிகமாக கூகுள் என மாற்றி அழைக்கப்பட்டது. ப்ளோரிடா மாநிலத்தில் உள்ள சரசோடா (“Sarasota”) என்ற தீவு தற்காலிகமாக கூகுள் தீவு என அழைக்கப்பட்டது.
கூகுள் பைபர் இன்டர்நெட் வெற்றி அடைந்தால், தற்போது இன்டர்நெட் சேவை வழங்கி வரும், இன்டர்நெட் சர்வீஸ் புரவைடர் நிறுவனங்கள் தங்கள் வாடிக்கையாளர்களை நிச்சயம் இழப்பார்கள். இந்த அளவிலான வேகத்திலும், வகைகளிலும் சேவையினை அவர்களால் தர முடியாது. கூகுள் தற்போது மக்கள் வசிக்கும் இல்லங்களுக்கு மட்டுமே இந்த இணைப்பினைத் தர இருக்கிறது. விரிவடையும் காலத்தில் வர்த்தக நிறுவனங்களுக்கும் இதனை நீட்டிக்கலாம்.