Sigurjón Guðjónsson

(10)0 ára (internet)gamlar ljósmyndir frá Rússlandi

2010-09-04T04:18:43Z

Fyndið hvernig internetið fer í hringi stundum. Síðustu 2 vikur hef ég víða séð fólk linka á blogg sem The Big Picture kom með í síðustu viku og fjallaði um ljósmyndir (í lit) sem teknar voru á árunum 1909 til 1912. Klárlega mjög merkilegt efni því þarna eru á ferðinni litamyndir sem teknar voru tæpum 30 árum áður en litafilman var fundin upp. En það er nú eins og margt annað, hlutirnir voru löngu fundnir þó svo þeir hafi ekki verið markaðsettir. Til dæmi þess að menn hafi ljósmyndað í lit allt frá 1860, en það er nú lengri saga.

Ég hélt að ég væri að verða geðveikur þegar ég sá svona marga linka og skeggræða þetta blogg frá The Big Picture, því mér fannst eins og ég hafi séð þessar myndir fyrir nokkrum árum síðan. Eftir smá rannsóknir á Google komst ég að því að það var blogg bylgja um málið fyrir ári síðan, síðan fann ég nokkuð blogg frá 2007, og nokkur frá 2006. Það elsta sem ég fann var svo frá Kottle, það blogg er rúmlega 9 ára gamalt.

Edgewater + Manhattan

2010-09-03T19:15:49Z

Ég hef stundum sagt að ég sjái Empire State frá húsinu mínu. Hérna er loksins sönnun.

Þarna á milli húsa sést í Manhattan, og hæsti punkturinn (sést nú varla á þessari mynd, þökk sé iPhone) er Empire State.

Sverrisson

2010-09-03T18:49:54Z

Í dag er 3. september, sem þýðir aðeins eitt, Birgir Sverrisson er hvorki meira né minna en 27 ára gamall í dag.

Því ber að fagna á sama hátt og við Biggi gerðum á þessari mynd, sem tekin var haustið 2007 á Manhattan.

Facebook stuðningur

2010-09-02T20:48:38Z

Já alveg rétt, ég gleymdi að minnast á eitt.

Fólk hefur kannski tekið eftir smá breytingum sem hafa verið hérna, en það hafa kannski færri tekið eftir því að það er alveg glænýr kóði undir síðunni. Ég ætlaði að fara í smá bætingar á síðunni, en það gekk hálf illa vegna þess að WordPress er komið upp í útgáfu 3.0 og ég var að nota kóða sem var byggður á WordPress 2.0-2.5. Ég fór því í þær aðgerðir að skipta út gamla draslinu fyrir nýtt.

Anyway, ég bætti inn Facebook stuðningi þannig að núna, þegar þú ætlar að kommenta, þá þarfu ekki að fylla inn neinar upplýsingar, það eina sem þú þarft að gera er smella á “Connect with Facebook” hnappinn, skrá þig inn (það kemur líklega upp pop-up gluggi sem biður þig um að leyfa innskráningu, hann mun aðeins koma upp einu sinni!) og þá ættir þú að geta tjáð þig hér með Facebook aðgangnum þínum.

Mun léttara, og miklu skemmtilegra!

Fairway súkkulaði

2010-09-02T20:40:17Z

Ég hef minnst á þetta áður en eitt af því sem ég sakna mest frá Íslandi er nammið. Nammið hérna í Ameríku er bara ekki á pari við nammið heima. Það ber að hafa í huga að ég er mikill aðdáandi þess þegar súkkulaði og lakkrís koma sama, sem er blanda sem varla þekkist varla annars staðar, og því ólíklegt að ég verði sáttur með nammi úrvalið erlendis.

Ég bý u.þ.b 150m frá Whole Foods (eða “Whole Paycheck” eins og það þekkist á götunni) og þar er hægt að kaupa suðu súkkulagði frá Nóa, sem mér hefur alltaf fundist vera besta súkkulaði veraldar, eða þangað til núna!

Fairway Market er búð af sama toga og Whole Foods, nema að í stað þess að vera með fjöldan allan af flottum búðum á Manhattan er Fairway aðeins með eina staðsetningu í New York, og það er upp í Harlem, nánar tiltekið á milli 132 og 133 stræti, alveg niður við Hudson. Þar, selja þeir besta súkkulaði sem ég hef á ævinni smakkað, og svo virðist sem þetta súkkulaði sé aðeins selt hjá Fairway, því mér hefur ekki tekist að finna það annars staðar.

Súkkulaðið sjálft er alveg eins og suðu súkkulaðið frá Nóa, nema hvað að það er truffle fyllingu. Maður hefur nú smakkað nokkur súkkulaði með svipaðar pælingar (til dæmis eins og Lindt súkkulaðið) en e-n veginn hefur Fairway tekist að hræra algjörlega fullkomna blöndu.

Þið sem eru miklir aðdáendur suðu súkkulaðis frá Nóa, og eigið leið um New York, þið þurfið nánast að gera ykkur ferð upp eftir til að ná í ykkur í eintak af Fairway súkkulaðinu. Það er allavega klárt mál að næst þegar ég kem heim til Íslands þá mun ég færa karli föður mínum a.m.k 10 stykki.

Framköllunar bakkar

2010-09-01T18:06:01Z

Prufum að henda inn einu bloggi tengt ljósmyndun. Rakst á þessa skemmtilegu seríu í gær á vefsíðu Wired. Myndirnar eru eftir John Cyr og eru þær af framköllunar bökkum sem þekkir ljósmyndarar hafa notað í gegnum tíðina. Frábær hugmynd, og vel afgreidd.

Sjá meira á: For Photo-Geek Eyes Only: Famous Developer Trays

Yard Sale…á Ebay

2010-09-01T04:03:03Z

Ebay er yndisleg vefsíða þegar maður þarf ekki að hugsa um tolla og sendingarkostnað á milli landa. Síðasta árið hef ég verið duglegur að kaupa og selja í gegnum Ebay, þó aðallega selja. Ég hef hægt og rólega verið að selja myndavélabúnaðinn minn, svo dæmi sé tekið. Ég seldi 70-200mm canon linsuna mína um daginn, og síðan tók ég mig til og seldi Leica M6 vélina mína, ásamt 35mm Zeiss linsunni. Ég veit að það kemur kannski einhverjum á óvart að ég hafi látið Leica vélina mína fara, en málið er bara að þegar kemur að 35mm myndavélum, þá sé ég ekki alveg tilganginn (og áhuga) í því að skjóta á filmu. Ég vil skjóta á filmu þegar kemur að 6×7 eða 4×5, en fyrir mér er 35mm algjörlega orðið stafrænt format. Það var því frekar heimskulegt að eiga 150 þús kr. vél upp í hillu sem stofustáss, þó Leica vélin hafa verið fallegasta stofustáss sem ég hef átt. Ég er rólegur yfir þessu, ég mun eignast aðra Leica vél e-n tímann í framtíðinni, þá verður það full frame digital vél, í dag er ég hinsvegar tæpum $8000 frá því þeim draumi.

Anyway, þangað til ætla ég að notast við stafrænan búnað frá Canon, nú eða Nikon, aldrei að vita hvað maður gerir ef maður endar á því að selja allt Canon draslið sitt. Ég held allavega að það sé góður tími núna að reyna að koma þessu í verð, og reyna að uppfæra í eitthvað aðeins nýrra. Mér hefur allavega gengið vel að koma þessu í verð á Ebay, 70-200mm fór til dæmis á sama verði og ég keypti hana á árið 2003, sama á við um Zeiss linsuna. Ég tapaði nokkrum þúsundköllum á Leica vélinni, aðallega vegna þess að það er kreppa í gangi og því mikið framboð á þessum vélum. Tapið var samt alls ekki slæmt með það í huga.

Anyway, ég ætla að sjá hvaða vél Canon kynnir í haust sem arftaka 5D MKII, kannski að maður hoppi á notaða 5D MKII eftir þann tíma. Þangað til notast maður bara við Pentax og svo Linhof vélina sem við Katie höfum nú aðgang að.

Punktablogg

2010-08-30T05:59:44Z

Er að reyna að setja smá fútt í þetta blogg aftur, finn fyrir smá “nennu” síðustu daga en það hefur ekki komið upp svo mánuðum skipti. Reynum fyrir okkur í punktabloggi, sjáum hvort ég man þetta ennþá.

Því miður er sumarið er að renna sitt skeið, maður sér það á veðrinu. Það er búið að vera heitt í sumar, 28 gráðu meðalhiti í júlí og 27 gráður í ágúst. Maður sér það samt á veðrinu núna að kvöldin eru ekki eins heit, og svo er mun minni raki í loftinu. Ég á samt mjög auðvelt með að vera í miklum hita og væri mér alveg sama þó svo það væri 30 stiga hiti ALLA daga ársins, ég nenni ekki þeim kulda sem kemur með vetrinum.

Annars hef ég verið frekar upptekinn í vinnu í sumar. Þrátt fyrir að maður sé “freelance” þá hef ég unnið meira og minna 5 daga vikunnar í allt sumar. Ég get því ekki kvartað því það er alls ekki tilfellið hjá flestum sem útskrifuðust með mér í vor. Ég er nú ekki í miklu sambandi við það fólk, nema í gegnum Facebook, en ég veit samt um nokkuð marga sem hafa þurft að yfirgefa Manhattan vegna þess að þeir fengu enga vinnu í sumar. Þeir hafa því þurft að flytja aftur heim, og dottið í annað hvort gömlu vinnuna sína eða eitthvað sem foreldrar redduðu.

Eitt sem hefur setið á hakanum í sumar vegna vinnu er ljósmyndun. Ég hef ekki tekið EINA ljósmynd síðan ég útskrifaðist, sem er mjög magnað. Kannski maður geri eitthvað í því á morgun (í dag) þar sem ég er ekki að vinna, aldrei þessu vant. Finnst samt líklegt að maður noti daginn á sama hátt og maður hefur notað aðra frídaga í sumar, í að gera akkúrat ekki neitt.

Fyrsta vikan á nýja hjólinu gekk vel, hjólaði fjórum sinnum. Tók tvo stutta túra og síðan tvo lengri. Var ansi þreyttur í byrjun vikunnar en það er magnað hvað þetta kemur hratt þegar maður hefur grunninn, því ég fór 40km í dag og finn akkúrat ekkert fyrir því.

Einu ætla ég að breyta hérna á síðunni. Ég ætla að hætta að nota Flickr-aðganginn minn og fara að pósta símamyndunum mínum bara beint hingað inn. Það var sama sem enginn að skoða Flickrið mitt hvort sem er, og síðan getur enginn kommentað nema skrá sig inn, sem er glatað. Með því að pósta myndunum hingað, sem er orðið ansi auðvelt með WordPress appinu á iPhone, þá vona ég að það hleypi aðeins lífi í þessa annars dauðu síðu.

Annars er pæling nr. tvö að pósta ljósmyndapælingunum mínum hérna líka, og loka þar af leiðandi Photolab síðunni minni. Pælingin er að hafa þetta allt á sama staðnum, en ég veit samt ekki alveg hvort það gangi með ljósmyndasíðuna, er aðeins hikandi varðandi það. Þú mátt segja hvað þér finnst um það.

Að lokum, um síðuna, þá ætla ég að lappa aðeins upp á hana fljótlega. Ég uppfærði WordPress um daginn og braut í kjölfarið þau plugin sem ég nota hérna hægra meginn, þess vegna lítur allt svona undarlega út. Síðan er planið að bæta við Facebook innskráningu þannig að ef fólk er skráð inn á Facebook, þá er mun auðveldara að kommenta hjá mér. Ég reyndi nú að græja það fyrir nokkrum mánuðum en án árangurs, kannski það gangi betur núna.

Sigga systir á afmæli í dag. Til hamingju Sigga!

Látum það nægja í bili.

Prufa úr síma

2010-08-28T07:22:35Z

Er að prufa að pósta beint úr símanum mínum og á bloggið.

Finn að fíla nýja teppið sem við keyptum í IKEA um síðustu helgi.

Loksins orðinn trúlaus

2010-08-27T22:14:40Z

Mitt samband við Þjóðkirkjuna hefur verið nokkuð normal. Ég fór í sunnudagaskóla sem barn og stundum í sunnudagsmessur í Staðarkirkju með móður minni. Þegar ég fermdist var með svo gefið frjálst val um það hvort ég færi í messur, sem varð til þess að ég fór aldrei í kirkju eftir það nema það væri jarðaför, skírn, ferming, eða gifting. Mér hefur alltaf fundist trú verið hálf asnalegt fyrirbæri sem skapar fleiri vandamál en það leysir. Okkar trú byggist á Biblíunni, og David Cross segir allt sem þarf að segja um þá bók.

Anyway, ég hef aldrei pælt í trú og þ.a.l aldrei pælt í þjóðkirkjunni, hvað hún gerir og fyrir hvað hún stendur. Það var ekki fyrr en með tilkomu bloggsins að ég fór að lesa síðuna hjá Matta, sem er einn af meðlimum Vantrúar. Mér er nákvæmlega jafn sama um Vantrú eins og mér er sama um Þjóðkirkjuna, en Vantrú kom mér þó í skilning um það að hjá ríkinu var ég skráður “kristinnar trúar”, og þar af leiðandi var Þjóðkirkjan að rukka ríkið um fjármuni á mínu nafni, sem eins og að senda stöðumælasekt til manns sem á ekki bíl.

Þetta nagaði mig, en ástæðan fyrir því að ég var ekki búinn að tækla þetta fyrr var vegna þess að ég flutti til NY og hef síðan þá verið meira og minna sama um hvað er að gerast á Íslandi, eins sorglega og það hljómar. Undanfarna daga hefur víða verið að akítera fyrir því að skrá sig úr Þjóðkirkjunni. Það ákvað ég að nýta mér og láta loksins verða að því að skrá mig úr Þjóðkirkjunni. Þó svo ég sé að gera þetta á þessum tímapunkti þá er ég ekki einn af þeim sem er að skrá mig úr kirkjunni vegna þeirra mála sem hafa komið upp síðustu daga, ég er að skrá mig úr henni því ég er trúlaus, án þess þó að vera að gera lítið úr þeim málum sem hafa komið upp, þau eru auðvitað mjög alvarleg.

Ég vil biðja sjálfan mig afsökunar á því hvað það tók mig langan tíma að afgreiða þetta mál.