Mogadishu (Alshahid)- Madaxweynaha dowladda Federalka KMG ah ee Soomaaliya Sheikh Shariif Sheikh Axmed ayaa galabta kusoo gurya-noqday dalka ka gadaal markii uu maalmahan Safar uu debadda ugu maqnaa maalmahan.

Madaxweynaha oo Wefdi Wasiiro ay ku jiraan hogaaminaya ayaa waxaa garoonka Dayuuradaha ee Aadan Cadde kusoo dhaweeyay madaxda dowladda Soomaaliya ee haatan dalka joogta.

Todobaadkii hore ayuu Safar  madaxweynuhu ku gaaray dalka Mareykanka oo uu Shir arrimaha Soomaaliya ku saabsan uga qayb galay, ka dibna wuxuu maanta Wadanka Burundi kula kulmay dhigiisa dalkaasi oo uu arimaha Soomaaliya kala hadlay.

Addis Ababa (Alshahid)- Wararka aan ka heleyno magalada Addis Ababa ee dalka Itoobiya ayaa sheegaya in maalinta Isniinta ah ee soo socota halkaasi uu ka furmi doono kullanka ay isugu imaanayaan xubnaha Saxiixayaasha Roadmap-ka ee Soomaaliya.

Kullankan oo maalmahanba la hadal hayay ayaa waxaa xaqiijiyay Safiirka Soomaaliya u fadhiya dalka Itoobiya oo sheegay in xubnaha ka qaybgalayaashu ay billaabeen inay Addis Ababa soo gaaraan.

Danjire Saciid Yuusuf Axmed oo goor dhawayd la hadlayay Laanta Af-Soomaaliga ee BBC-da ayaa shaaciyay in kullanka la qorsheynayo uu yahay mid ay qaban-qaabinayso hey’adda QM.

Hadafka kullankan laga leeyahay wuxuu ku sheegay Safiirku in lagu iftiimiyo mugdi soo kala dhex galay Saxiixayaasha Soomaalida ah ee Roadmap-ka oo iyagu isku khilaafsan arimo ku saabsan qodobadda heshiiskaasi qaarkood.

Maamul gobaleedka Puntiland ayaa dhawaan ku dhawaaqay inaanu ogoleyn Shirka ka soconaya magalada Muqdisho oo dowladda Federalka ee Soomaaliya ay u qabatay Odayaasha dhaqanka Beelaha Soomaaliyeed si ay uga doodaan meel-marinta qabya-qoraalka Dastuurka cusub ee dalka.

Markii diidmada Puntiland ee ansixinta iyo shirka Dastuurka ku saabsan ay soo baxday ka dib waxaa Shirka Odayaasha isaga soo baxay tiro ka mida Oday-dhaqameedyadii ka socday deegaanka Puntiland. Markaa ka dibna madaxweynaha maamulkaasi mudane C/raxmaan Faroole oo hadlay ayaa codsaday in la qabto kullan ay Saxiixayaashu ku yeelanayaan Itoobiya ama Kenya midkood si arrimo uu dhaliilay looga hadlo.

Dowladda Itoobiya ayaa Shirka Saxiixayaasha dhexmaraya iyadu dhinaceeda si madax-banaan uga qayb-galaysa si la mida sida ay dalal kale oo gobalka ka tirsani uga qayb-galayaan. Sidaasina waxaa xaqiijiyay Safiirka Soomaalida.

Dalka Itoobiya waxaa iminka kusii sugan qaar ka mida Saxiixayaasha oo uu ugu horeeyo madaxweynaha maamul gobaleedka Puntiland C/raxmaan Sheikh Maxamed Faroole.

Isku soo wada duube maalinta berrito ah ayaa la filayaa in dhamaan xubnaha harsan ee Saxiixayaasha ahi ay gaaraan Addis Ababa si maalinta ku xigto ee Isniinta ah Shirku uu u furmo.

Wixii faah-faahin ah ee Shirkan iyo ka qaybgalkiisaba kusoo kordha waad la socon doontaan haduu Eebe idmo.

Afgooye (Alshahid)- Kooxda Alshabab ayaa maanta ku gubtay magalada Afgooye ee gobalka Sh/hoose Kiishash badan oo uu ku jiro Qaad lacag dhan 40-Million oo Shillin Soomaali ah ku fadhiya.

Qaadka ayaa waxaa la qabtay Shalay galinkii dambe iyadoo ay watteen haween ganacsato ah oo doonayay inay gudaha degmada Afgooye soo galiyaan si ay uga ganacsadaan.

Horay ayaa Afgooye looga mamnuucay iibinta iyo isticmaalka Qaadka oo ay Shabaabku xayireen iyagoo ku eedeeyay inuu yahay wax aan inaba wanaagsanayn.

Sida goob-joogayaashu ay sheegayaan goob fagaaro ah oo ay dadweyne ku suganyihiin ayeey Alshababku ku gubeen Qaadka iyo Kiishashka uu ku jiray.

Haweenkii Qaadka wattay ee lagu qabtay ayaa Xabsi la galiyay oo Xalayna halkaa ku hoyda. Saakay ayeeyna Shabaabku halkaas kasoo daayeen Haweenkaasi iyagoo ku xukumay Ganaax lacageed oo qofkiiba gaaraya 3-Million oo Shillin Soomaali ah.

Mogadishu (Alshahid)- Gobalka Benadir ayaa lagu wadaa inuu dhawaan dib usoo ceshado billicdiisii ka gadaal muddo 22-Sano ah oo dagaalo ay jireen. Arintanna waxaa sheegay afhayeenka maamulka gobalka.

Maxamed Yuusuf oo maanta la hadlayay warbaahinta gudaha qaarkood ayaa sheegay inay soconayaan isku dayyo uu maamulka gobalku horboodayo oo lagu doonayo in lagu dayactiro waddooyinka muhiimka ah ee magalada laguna sameeyo Leeyrar kuwa habeenkii iftiima ee cadceedda ka shidaal qaata ah.

Afhayeenka cusub ee maamulka gobalka Benadir oo sii hadlaya ayaa yiri “ Waxaa jira wadooyin iminka la dhisayo oo tan Makka Almukarama ay ku jirto. Waxaa loo sameeyay Marshabiyeedigii wadada dhinacyadeeda ahaa. Sidoo kalena wadooyin kale ayaa la samaynayaa”.

Wuxuu afhayeenku xusay in gudoomiyaha gobalku uu dadka ugu baaqayo inay wax ku darsadaan howlahan oo muhiim ah.

Dadka debadaha jira ee Soomaaliyeed ayuu afhayeenka gobalku tibaaxay inay iyaguna wadaan dadaalo ay lacago ugu uruurinayaan qorshayaashan gobalka dib loogu billiceynayo.

Leeyrarka gobalka la surayo ayaa waxay noqonayaan kuwo wax wayn ka tari doona iftiinka iyo muuqaalka guud ee magaalada waqtiyada habeenkii ah.

Tani waxay noqonaysaa mid horumar wayn kusoo kordhisa gobalka Benadir oo haatan laga dareemayo inuu dib usoo noolaanayo waqti dheer oo dhimasho iyo burbur uu ku jiray ka dib.

Mogadishu (Alshahid)- Askari la sheegay inuu ka tirsanaa Ciidamada dowladda Soomaaliya ayaa maanta lagu dilay Muqdisho. Iyadoo dilkiisana ay fuliyeen Ciidamo kale oo kuwa dowladda ka mid ah.

Dilka Askarigan ayaa yimid waqti ay Ciidamada ka tirsan Saldhiga Booliska degmada Xamar-Weyne howlgal ka samaynayeen Suuqa degmadaasi.

Taliyaha Booliska Xamar-Weyne oo arintan ka hadlay ayaa xusay in Ciidamadoodu ay samaynayeen howlgal ka dhan ah Ciidamada sida sharci darada ah hubka u watta ee Suuqyada degmada wareegaya.

Wuxuu kale oo uu taliyuhu sheegay inay Ciidamadoodu amar ku siiyeen askarigan oo isagu hub wattay isagoo aan dareeska Ciidanka lagu yaqaano ku labisanayn inuu hubka dhigo balse uu diiday iskuna dayay inuu dhibaato geysto sidaasina loo toogtay.

Degmada Xamar-Weyne waxaa maalmihii lasoo dhaafay ka soconayay howlgallo ay Ciidamada amaanku samaynayaan si ay u joojiyaan dhibaatooyin ay rag hubeysan oo Ciidamada ka tirsan fulinayaan oo dadka rayidka ah lagu boobayo laguna dhibaateynayo.

Bujumbura (Alshahid)- Madaxweynaha dowladda Soomaaliya Sheikh Shariif Sheikh Axmed oo ku sugan wadanka Burundi ayaa ka helay dalkaasi ballan-qaad Ciidamo dheeraad ah loogu soo dirayo Soomaaliya.

Ballan-qaadkan waxaa bixiyay madaxweynaha Burundi Mr. Pierre Nkurunziza oo kullan la yeeshay madaxweynaha Soomaaliya.

Sheikh Shariif wuxuu soo gaaray Burundi Shalay galinkii dambe isagoo Safarkiisana ku tilmaamay mid uu dalkaasi ugaga mahadcelinayo dadaalka ay ugu jiraan soo celinta nabadda Soomaaliya iyo Ciidamada ay usoo direen dalka.

Kullanka labada madaxweyne dhex-maray waxaa looga hadlay sidii loo xoojin lahaa dadaalada nabadeynta Soomaaliya oo Ciidamo Burundi ka socda ay qayb ka yihiin.

Dowladda Burundi waxay sheegtay inay diyaarinayso Ciidamo dheeraad ah oo lagu biiriyo kuwa iminka kaga sugan dalka Soomaaliya ee qaybta ka ah howlgalka AMISOM.

Ciidamada dheeraadka ah ee ay Burundi direyso ayaa haatan waxay tababar ku qaadanayaan gudaha dalkaas si waqti dhaw loogu diro Soomaaliya. Sidaasina waxaa xaqiijiyay Saraakiil Ciidamada dalkaasi ka mida oo dhankooda la kulmay madaxweyne Shariif.

Wali madaxweynaha Soomaaliya wuxuu ku suganyahay magalada Bujumbura ee xarunta Burundi.

Ceel-Buur (Alshahid)- Maliishiyaadka Kooxda Alshabab iyo kuwa Ehlu Sunna Wal-Jameecah ayaa maanta ku dagaalamay deegaan ku yaala duleedka degmada Ceel-Buur ee gobalka Galgaduud.

Dagaalkan ayaa wuxuu dhacay barqanimadii maanta. Waxaana Ehlu Sunna ku wehlinayay dhinaceeda dagaalka Ciidamada Itoobiya.

Madaafiic xoogan iyo hub kale ayeey labada dhinac isku adeegsanayeen intii uu dagaalku socday oo dhowr Saacadood gaaraysay.

Saraakiil u hadashay Ciidamada Ehlu Sunna ayaa Saxaafadda u sheegay inay Ciidamadoodu weerar ku qaadeen deegaanka uu dagaalku ka dhacay oo Dacda lagu magacaabo una dhaw degmada Ceel-Buur. Waxayna Saraakiishu intaas ku dareen inay Alshababku halkaasi la weeraray isku uruursanayeen.

Warar dheeraad ah oo dagaalkan ku saabsan sooma aysan bixin. Dhinac alshababna wax warbixin ahi wali sooma saarin. Hase yeeshee dagaalku iminka waa uu joogsaday sida wararku ay sheegayaan.

Ciidamada Ehlu Sunna oo Itoobiyaanku ay wehlinayaan ayaa dhawaan la wareegay degmada Ceel-Buur oo ay Alshababku waqti dheer maamulayeen.

Mogadishu (Alshahid)- Waxaa goor dhawayd warar inaga soo gaaray gudaha Suuqa Bakaaraha ee magalada Muqdisho ay sheegayaan inay halkaas ka dhaceen tiro qaraxyo ah oo aad u xoogan.

Qaraxyadan ayaa ka kala dhacay laba qaybood oo gudaha Suuqa ka tirsan. Waxaana loo adeegsaday Bambaanooyinka gacanta laga tuuro.

Illaa 2 qof ayaa dhimatay ku dhawaad 10-kalena waa ay ku dhaawacantay Qaraxyada oo ka kala dhacay Qaybta Dahabka lagu iibiyo ee Suuqa iyo qaybta kale ee Cabdalle Shideeyaha loo yaqaan.

Dadka wax noqday waxaa la sheegaya inay ku jiraan Ciidamo kuwa dowladda ka tirsan.

Marka qaraxu uu dhacayay waxaa gudaha Suuqa ka soconayay howlgallo ay Ciidamada amaanku samaynayeen oo ay gudaha Suuqa ku baarayeen.

Ciidamada dowladda Soomaaliya gaar ahaanna kuwa Booliska oo aan Suuqa ka fogeyn ayaa durbadiiba soo gaaray goobaha ay qaraxyadu ka dhaceen. Lamana sheegin in lasoo qabtay dadkii falalkaasi ka dambeeyay.

Waxaase la shaacinayaa in Ciidamada Boolisku ay hakad galiyeen howllihii ka socday qaybaha ay qaraxyadu ka dhaceen ee Suuqa oo illaa iyo iminka dhaq-dhaqaaqa Ciidamadu ay ka soconayaan.

Saraakiisha Booliska ayaa warbaahinta u xaqiijiyay in tiro ka badan 40-qof oo la tuhunsanyahay lagu qabqabtay howlgallo ay Ciidamadu sameeyeen iyadoo walina ay qabqabashada dadku soconayso.

Wixii warar ah ee kusoo kordha qaraxyadan dib ayaad kala socon doontaan Insha allah.

Bujambura (Alshahid)- Madaxweynaha dowladda KMG ee Soomaaliya Shariif Sheikh Axmed ayaa wuxuu ku suganyahay dalka Burundi halkaas oo uu waqti dambe oo Shalay ah gaaray.

Safarka madaxweynaha oo xubno kale ay ku wehliyaan oo Wasiirrana ka midyihiin ayaa wuxuu kasoo tagay dalka  Mareykanka oo uu horay ugu sugnaa. Wuxuuna magalada Bujumbura ee dalkaasi Burundi ku gaaray cazuumaad rasmi ah oo dowladda dalkaasi ay u fidisay.

Illo-wareed dowladda Soomaalida ka tirsan ayaa sheegaya in goor dhaw lagu wado inay furmaan kullamo madaxweyne Shariif iyo dhigiisa Burundi dhex maraya. Waxyaabaha ay ka hadlayaan oo aan si cad loo shaacinina waxaa la qiyaasayaa inay ku salaysanyihiin xiriirka labada dal.

Burundi waxaa Soomaaliya kaga sugan Ciidamo dhowr Kun gaaraya oo ka mid ah kuwa midowga Afrika ee dowladda Soomaalida ku caawinaya inay awoodeeda ku fidiso guud ahaan dalka.

Madaxweyne Shariif wuxuu maalmihii lasoo dhaafay ku maqnaa Safarro dibadda uu ku bixinayay isagoo meelaha uu gaarayna ay ku jiraan dalalka Uganda iyo Mareykanka .

Afgooye (Alshahid)- Kooxda Alshabab ee dagaalka Diinta lagu saleeyay ka wada gudaha Soomaaliya ayaa waxay mar kale ku celisay baaq ay u jeedinayso Qabiilada Soomaalida oo ay ka dalbanayso inay garab siiyaan.

Baaqan waxaa si gaar ah u jeediyay gudoomiyaha Kooxda Alshabab ee gobalka Sh/hoose xilli uu la hadlayay Odayaal ka socda Beelaha Soomaaliyeed gaar ahaanna kuwa gobalkaasi ku dhaqan.

Kullan dhex maray Odayaashaasi  iyo mas’uuliyiinta Alshababka ayaa wuxuu ka dhacay Shalay galinkii dambe deegaanka No.50 ee gobalka Sh/hoose.waxaana halkaa looga hadlay arimo dhowr ah oo iskaashiga labada dhinac ku saabsan.

Sheikh Maxamed Abu-Cabdallah oo ah gudoomiyaha Alshabab ee gobalka ayaa u jeediyay Beelaha uu Odayaashoodu la kulmay inay ka qayb qaataan dagaalka ay Kooxdo waddo si looga hortago dowladda Soomaaliya iyo Xulufadeeda oo Shabaabku ay cadaw u arkayaan.

Si gaar ah wuxuu Sheikhu ula hadlay mid ka mida Beelahaasi oo lagu magacaabo Biya-Maal isagoo Beeshaasi ugu yeeray inay tiro badan oo Askar ah kusoo biiriso Xoogaga Kooxda safkeeda ku jira ee dagaalka kaga horjeeda dhinaca dowladda iyo Ciidamada la socda.

Ma ahan markii ugu horeysay ee sidan oo kale ay mas’uuliyiinta Shabaabku u shiriyaan Odayaasha gobalkaasi oo haatan ah mid ka mida deegaanada fara-ku-tiriska ah ee ay Shabaabka awoodoodu ku hartay ka gadaal markii inta badan gobalada Koofurta dalka Soomaaliya iyo bartamaha ku yaala laga soo saaray Alshabab.