Quessa deve esse un prublemu di lèttere maiùscule. Verificate puru cum'elli sò stati creati sti dui cartulari ind'è u vostru òspite. S'elli sò scritti minùsculu, richjamate li torna in maiùsculu, (cù l'aiutu di u vostru prugrammu da trasferisce i schedari).

Da chì qualchì sbagliu di prugrammazione in i scripts PHP ùn andessi à bluccà u funziunamentu di u servore, l'òspiti impiantanu un tempu màsimu d'eseguimentu per ogni pàgina PHP. Di règula stu tempu vale 30 seconde: in casu chì una pàgina «si lampi» in un càlculu chì franchi e 30 seconde (un càlculu sprupusitatu, un ciclu senza fine...), u servore rompe u càlculu è vi ne avisa cù un messagiu d'errore. Per SPIP, bastanu 30 seconde per pudè fà tutti sti càlculi.

Ma certi òspiti impiantanu tempi lìmiti assai più corti, in particulare Free (15 seconde) è Online (8 seconde). In più di quessa, cù st'òspiti, a memoria dedicata à u viaghjà di PHP hè abbastanza chjuca, è ne vene u viaghjà ancu rallentitu. Cusì ne, e funzioni di SPIP cù st'òspiti piglianu più tempu à esse eseguiti, è u tempu màsimu da ch'elli appiinu finitu hè cortu cortu... Imaginate appena un trenu chì un pò viaghjà chè un'ora, chì deve ghjunghje à 120 chilòmetri più in là, nant'à ragli chì a vitezza li vene limitata à 60 chm/ora: di sicuru, à metà viaghju si pianta u trenu, à mezu à i pampasgioli...

Accade stu prublemu sempre sempre cù l'artìculi longhi: cù st'òspiti, u càlculu di ste pàgine vene rottu da u servore prima ch'ellu vàghi à bon'fine, cusì vene impussìbule di fà cumparisce l'artìculu, ma invece vene u messagiu «Maximum execution time exceeded».

Suluzione tècnica ùn ci n'hè. SPIP hà digià fattu tuttu ciò ch'ellu pudia da viaghjà più in furia, u penseru avà l'anu l'òspiti.

- a sola suluzione sè vo ùn vulete tricà: andate à fà vi uspità in altrò, da òspiti chì pruponenu un serviziu cunfurtèvule, è micca strettu à rumpitura. Sè vo avete accessu à a cunfigurazione di PHP (schedariu /etc/php/apache/php.ini nant'à Linux), vi tocca à mudificà u paràmetru max_execution_time.

- Scrivite puru à u rispunsèvule di l'òspite, da dumandà li a crèscita di u tempu màsimu d'eseguimentu di i scripts (30 seconde cum'è tuttu u mondu, per esempiu). Ùn si sà mai, à forza à forza... Ma fin'ad avà, siccume risposte ùn si ne sente, nanzi chì qualchì ragione tècnica, pare invece chì ci sia propriu a vuluntà di stringhje l'uspitata di gràtisi, da furzà i webmaestri à sceglie l'uspitata da pagà.

[SPIP 1.4] A creazione in autumàticu di figurette di vista in antìcipu adopra una funziunalità assuciata à PHP, di nome «GD» (si chjama una «libreria»). Sta libreria ùn face parte di e funzioni integrate à PHP, ma hè un'upzione sviluppata fora (da Thomas Boutell), ch'elli ponu o micca stallà cù PHP, i rispunsèvuli di i servori.

(1) Prima cunseguenza: certi òspiti ùn stallanu micca GD cù PHP. Ind'è elli, venenu dunque propriu disattivate e funzioni gràfiche. In particulare SPIP ùn puderà creà in autumàticu e figurette.

In stu casu, bisogna à dumandà à l'òspite di stallà a libreria GD.

(2) Siccume u furmatu GIF hè dipoi u 2004 furmatu pruprietariu, certe versioni appena più anziane di GD ùn u piglianu micca in contu. Difatti, fin'à tandu, era furmatu pruprietariu, ma chì aduprava funzioni ch'ùn eranu micca prugrammi lìberi (in particulare, u pruprietariu richeria un ritributu per i prugrammi gràfichi chì ammanitteghjanu u furmatu GIF). Tandu ùn era pò pussìbule di stallà lu in un prugrammu lìberu. Èppuru, ùn essendu à capu di sti prublemi di copyright, tutte e prime versioni di GD ammanittavanu u furmatu GIF.

A versione 2 di GD piglia in contu stu furmatu dipoi u 21 di lugliu di u 2004.

S'ellu ùn viaghja micca u GIF, pudete puru dumandà à u vostru òspite di tramutà versu GD2, s'ella ùn hè ancu fatta.

(3) Da pudè viaghjà, a libreria adopra anch'ella altri prugrammi è librerie chì gestiscenu i furmati PNG è JPEG. Sì l'òspite ùn hà ancu à stallà quelli prugrammi capunanzu, viaghjerà GD, ma ùn viaghjerà micca l'unu o l'altru furmatu. Cusì ne, puru cù una versione recente di GD, accade spessu chì solu u furmatu PNG sia gestitu, perchè chì i prugrammi chì permettenu di manighjà u JPEG ùn sò micca stallati nant'à l'urdinatore...

In stu casu, dumandate puru à u vostru òspite di cumplettà u so stallamentu di modu ch'ellu venga gestitu u JPEG.

In a cunfigurazione di SPIP, sè vo dumandate l'attivazione di a creazione autumàtica di e figurette, SPIP hà da andà à pruvà i trè furmati d'imàgine, da sapè qualessi sò gestiti da u vostru òspite. Sè vo avete capitu qualcosa à u discorsu quì sopra, sapete chì ùn puderete mai aduprà i trè furmati d'imàgine; à spessu averete solu PNG è JPEG; certe volte solu JPEG; è GIF ancu più scarsu..

INNÒ. Mai ch'ella sia. Jamais. Mancu per ride. Never ever. Nichts.

Leghjite bè ciò chì seguita: «Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. Ùn ci vole mai à stallà una vechja copia di salvezza in una versione nuvella di SPIP. »

Un ghjornu, un tippu hè andatu à pruclamà in a lista di SPIP chì cusì ci vulia à fà, anderete voi à sapè perchè..., è malgradu tutte e nostre spiegazioni cuntrarie, tanti utilizatori fermanu scunvinti chì ci vole à turnà à stallà a so vechja copia di salvezza quandu chì omu scambia di versione di SPIP.

Què hè un sbagliu murtale, peghju chè un viru chì si rode u vostru Outlook. U vostru urdinatore piccia focu, u discu duru si ne parte in pappina, u vostru òspite si ritrova à chere a limòsina in carrughju, France Telecom face splusà a vostra fattura, a DNAT vi sbarca in casa à matina à bon'ora, è diventate privu d'Internet per i sèculi di i sèculi...

A prucedura ghjusta per fà un aghjurnamentu ? Hè spiegata quì.

Ci ponu esse trè ragioni maiò chì un aghjurnamentu dessi messagi d'errori.

1. U spaziu privatu viaghja d'incantu, senza fà sbagli, ma u situ pùbblicu sbattuleghja. Ùn circate più... Iè, certe «funzioni» di SPIP sò state mudificate (chì osinnò aghjurnamentu ùn ci ne serebbe); à listessu tempu, e pàgine di u situ pùbblicu si sò trove cullucate dipoi un certu tempu in u cache. Dopu l'aghjurnamentu, pò accade chì e pàgine di u situ pùbblicu, caricate prima, adòprinu funzioni chì ùn anu più listessu funziunamentu.

U più sèmplice: sviutà u cache. Andate puru à vede a pàgina «Salvà/risturà a basa», è cliccalte nant'à u buttone «Sviutà u cache».

2. Avete scaricatu l'ùltima versione beta-x24 infrugnata in fondu di u nostru servore, per sente ciò ch'ella dice.

Sè vo ùn ci capite nunda in PHP/mySQL, hè una gattiva idea. E versioni beta sò in corsu di sviluppu, è nancu à compie. Certi ghjorni, sè vo site furtunatu, anu da esse abbastanza stàbbile; altri ghjorni, cuntenenu pezzi di funzioni mancu compie, è sopratuttu mancu sbuggate...

Duie pussibulità:

- sè vo avete fatta una copia di salvezza di a vostra basa di dati (pàgina «Salvà/risturà a basa») prima di stu gattivu aghjurnamentu; sguassate puru tutta a basa di dati (buttone «TUTTU sguassà»). Stallate torna a versione prima di SPIP (attenti, s'agisce di a versione cù chì avete fattu a copia di salvezza), è turnate à stallà u situ da a vostra copia;

- sè vo ùn avete nisuna copia di a vostra basa di dati... site in un bellu colpu. Sè vo ùn site tantu «à a manesca», megliu ferete à aspettà qualchì ghjornu a prùssima versione beta, sperendu ch'ella sia stàbbile di più (di règula, ùn stanu tantu; vene sempre un mumentu ch'elle viaghjanu à pocu pressu: ma à spessu l'interfaccia ùn hè tantu aggalabbata...).

3. Dopu messu à ghjornu SPIP, ete vulsutu turnà à stallà a copia di salvezza fatta capunanzu, prima di l'aghjurnamentu. Ma cumu serà chì tanta ghjente abbia st'idea strana?...

Emu cunsacratu una pàgina apposta da spiegà cumu fà un aghjurnamentu «cum'è di si deve».

Quandu chì SPIP scambia versione, accade spessu chì, per stallà e nuvelle funziunalità è megliurisce u viaghjà di u sistema, venga mudificata a struttura di a basa di dati, vene à dì u modu chì l'infurmazioni di u vostru situ sò assestate. Vulè stallà una vechja copia in una versione nova di SPIP, hè quant'à vulè fà entre un piattu in un bichjeru...

A sola suluzione «pulita»: andate puru à a pàgina «Salvà/risturà a basa», poi sguassate a basa sana sana («TUTTU sguassà»). Stallate a vechja versione di SPIP (si ponu truvà tutte quante in l'archivi), poi risturate a basa da a vostra copia. Fatta questa, puderete stallà a nuvella versione di SPIP, u sistema ferà da per ellu e mudìfiche necessarie nant'à a struttura di u vostru situ.

Tanti utilizatori adopranu Dreamweaver (di Macromedia) per mudificà i mudelli d'appaginamentu di u so situ. Difatti, pò esse ghjustificata sta scelta chì Dreamweaver permette di travaglià in modu gràficu (WYSIWYG) è d'accede à u còdice fonte (indispensèvule per travaglià cum'ellu ci vole nant'à i mudelli).

Ma Dreamweaver hà u gattivu mendu di mudificà u còdice di i mudelli è di srègulà u funziunamentu di i cicli. Difatti, i còdici specìfichi à SPIP ùn sò micca ricunnisciuti da còdice HTML, tandu Dreamweaver a si prova à currege li, è dunque ùn viaghjanu più e vostre pàgine (si ottene un messagiu d'errore: «tag chì chjode mancante»).

A suluzione hè simpliciamente d'interdisce à Dreamweaver di currege «da per ellu» u còdice:

- in u menù «Edit», sceglite «Preferences»;

- sceglite «Code rewriting», è disattivate tutte l'upzioni.

Fatta questa, Dreamweaver ùn duverebbe più mudificà u vostru còdice senza chè vo a sàppite.

Eccu un'altra «minichichja» da chì u còdice à u screnu sia ghjustu :

Incullà in ...../dreamweaver/configuration/ThirdPartyTags
- duie imàgini di nome SPIP.gif (per esempiu scrittori-off.gif et scrittori-on.gif)
- un schedariu spip.xml chì cuntene :

E balise SPIP seranu tandu rimpiazzate da l'imàgine, è puderanu esse editate in a finestra «pruprietà di l'ugettu».

In a maiò parte di i casi, i servori chì usanu PHP4 sò cunfigurati da ricunnosce i schedari chì adopranu l'estensione «.php3», da assicurà ne a cumpatibulità. Ma in casu ch'ella ùn fussi (vi vene à u screnu u còdice, o u vostru navigatore dice ch'ellu ùn ricunnosce micca u furmatu di u schedariu), cuntattate puru u vostru òspite da ch'ellu fessi ellu qualcosa.

A squatra vi cunsiglia forte forte di sceglie un modu uspitatu in PHP4 o puru 5, nunda chè per pudè gode l'ùltima versione di SPIP.

Privene Karl quelli chì ammaistreghjanu u so propriu servore : Sè vo avete l'accessu à u vostru httpd.conf è chè vo avete cumpilatu PHP4, mudificate puru cusì u vostru httpd.conf:

Trasferendu i vostri schedari à u vostru òspite, cù FTP, averete sceltu qualchì gattivu furmatu di schedariu. Pruvate la torna indettendu à u vostru cliente FTP un altru furmatu (binariu, testu...).

Di tantu in tantu, simu noi à sbaglià ci stallendu SPIP nant'à u nostru servore pùbblicu, è tandu i schedari ùn sò più aduprèvuli! Ma senza tricà mandemu qualchì versione curretta...

Prima di tuttu, verificate chì u prublemu venga veramente da u vostru òspite. Per ciò, usate a lista di ragiunata di SPIP da dumandà à d'altri utilizatori s'elli anu avutu listessi guai cù st'òspite quì.

In secondu tempu, in casu ch'ellu sia identificatu u prublemu cù st'òspite, è ch'ellu dipendi di qualchì scelta soia di cunfigurazione, cuntattate puru u rispunsèvule è dumandate li puru di mudificà a so cunfigurazione da ch'ella sia accuppièvule cù SPIP; certi rispunsèvuli di servori òspiti anu digià fattu i sforzi per aiutà i so utilizatori di SPIP.

In fine, pò accade chì u vostru òspite o ùn possi, o ùn voli mudificà a so cunfigurazione da ch'ella diventi puru accuppièvule cù SPIP. Esisterà qualchì «patch» (vale à dì pezzùculu di prugrammu) specìficu à certi òspiti, o mudìfiche specìfiche da fà in corpu à SPIP ? A risposta hè : Innò. U scopu di a squatra di sviluppu hè di chjode a sparghjera à buzeffu di «patches» è di cumbrìccule d'ùltima stonda dentr'à u còdice, da distribuisce una versione ùnica, aduprèvule à tutti (una di e nostra primure hè a facilità di stallazione di SPIP). S'ellu presenta u vostru òspite qualchì specìficu prublemu, videremu s'ellu ci hè manera di risolve lu, è ne includeremu a suluzione in versione successiva di SPIP.

Aduprendu qualchì cliente FTP (o qualsìasi mezu d'accessu à u vostru spaziu uspitatu), andate puru in u cartulare config/, scaricate vi u schedariu connect.php è poi sguassate lu o scambiate li u nome. S'ellu esiste, sguassate dinò u schedariu .htaccess. Poi seguitate a prucedura di cunfigurazione standard, seguitendu l'indirizzu http://umositu.org/ecrire/: «Installer SPIP». Per a cunnessione à a basa di dati, aduprate puru sè bisogna u còdice è a parulla piatta (password) cuntenuti in u vechju schedariu connect.php.

Appena di storia: Fin'à SPIP 1.9.1, u schedariu da sguassà si chjamava inc-connect.php3 (o inc-connect.php) è era cullucatu in u cartulare ecrire/.

Fate casu: sta prucedura di torna stallazione ùn sguassa micca a basa di dati (artìculi, rùbbriche, etc.). Serve solu da turnà à creà un accessu amministratore à u situ, è à creà schedari d'autentificazione ghjusti.