Мојот дом

Живот

2026-04-06T18:05:00.000+02:00

Чинка по чинка - починка.

Семејна чест

2023-06-27T09:08:00.000+02:00

„Не мора светот да ги знае грдите нешта од нашата фамилија!“

И после половина век сфаќаш дека си само дел од светот.

Ѕидар

2022-05-23T14:41:00.003+02:00

Гради домови. Живее под наем.

Споменден

2022-05-10T14:33:00.000+02:00

Немало кој да ти прославува роденден.

Си оставила за да ти слават споменден.

„Нечии зборови копаат гробови“ - Илија Илиев Струмјан

2022-01-13T19:35:00.001+01:00

Повелете мојата нова книга.

Книгата ја објавувам како електронско издание кое може секој да си го преземе и чита кога сака, ако сака де :)

Авторските права се „позајми си... ама спомни ме“.

Кликнете на линкот подолу за да ја преземете книгата:

„Нечии зборови копаат гробови“ - Илија Илиев Струмјан

Пресметка

2021-04-23T08:04:00.001+02:00

-Сине, ја проверив нејзината фамилија, не е таа жена за тебе!

-Мамо, зарем ти така го одбра тато?!

Товар

2015-06-25T23:21:00.003+02:00

Магарето не носи товар колку што му душа сака, туку онолку колку што газдата на плеќи му ака.

Вишок ли си?

2015-05-25T21:15:00.000+02:00

Груб поглед и прекорен збор добиваш од чедото свое дур прашуваш само „За перење што е?“

Азбучните маки на Никола П.

2015-05-23T15:14:00.001+02:00

... еж ... прст ... уф ...

Одземен живот

2015-05-04T23:50:00.002+02:00

Ти следиш традиции: си роди дете за да ги одживее твоите амбиции!

Вени

2015-04-06T23:23:00.001+02:00

Дури стоејќи го сеќаваш попуштањето на нова вена низ глава ти минуваат сите клупи и столчиња кои во младоста ги газеше потсмевајќи им се на намената.

Тест

2015-04-02T23:03:00.002+02:00

Ручавте гравче.
Скришум се погледнувате.
Ниеден нема храброст да прдне прв.
Се виткате од подуеност.
Не сте еден за друг.

Не се

2015-03-31T22:54:00.001+02:00

-Веќе не сме едно - рече и замина.
-Не сме - потврди сопругата гушкајќи ги децата.

Иднина

2015-03-27T23:37:00.003+01:00

Кроиш планови за иднината која еднаш нема да дојде.

Свадба

2015-03-26T23:39:00.000+01:00

Викнаа едночудо гости.
Сватовите викнаа уште повеќе.
Банките ги благословија обичаите.

Промена

2015-03-25T23:30:00.000+01:00

Појдете во театар.
Внесете малку живот во вашата секојдневна претстава.

Помош

2015-03-24T21:46:00.000+01:00

-Ми го уништуваш животот!
-...ама ти побара да ти помогнам?!
-Да, но мислев дека ќе биде по мое!

Субвенции за дарба

2013-04-18T21:33:00.003+02:00

Ми помина Осман бегот мила мајчице, умрев за него...
Опа, кај опева непријател па уште и се заљубува во него.

Сè си имам либе Димчо, само едно немам - од срце порода...
Ццц, едно нема а не пак до трето дете да стигне.

Три невесте тикве брале бре. Куде брале туј заспале бре...
За малку бре! Убаво што промовираат земјоделско производство, ама какво е тоа спиење, треба ли да се работи, да се сади и гради татковината? Какви тоа вредности ќе промовираме кај младите луѓе?

На 223 305 те чекам драга јави се...
Какво нарушување на редот, па секој вистински маж знае дека машкото треба да биде прв што ќе се јави. И, плус, што е тоа по цел ден на телефони, а учење, работа?

Никој Тодорка не позна дека е Тодорка девојка...
Што сака да каже, дека била грда, дека личела на машко? Ало ЛГБТ заедницо камо реакција?

Свет си мој, а ниту име не ти знам...
Како бре не знаеш, па нели „Едно име имаме, во душата го носиме...“? Всушност, имаме и едно привремено, ама тешко е за пеење. Ај здравје ќе го смениме, привремено де.

Зајди, зајди јасно сонце и ти јасна, ле, месечино...
Па добро, кај е патриотизмот тука?! Какво бре црно заоѓање на сонцето, нашиот вековен симбол? Па и месечината, а соживот?

...Набројте си примери по ваш избор...

Муабетот ми беше: Песниве, такви какви што се, си опстанале низ годините само затоа што се помалку или повеќе добри. И затоа што допреле до срцата кои ги зачувале за иднината. Ако е нешто добро не му се потребни субвенции за да опстане. А за да направиш нешто добро треба Господ да ти даде, не владата.

Зад решетки

2012-05-13T21:17:00.001+02:00

Секогаш кога полицијата сакаше да го прибере, мајка му наоѓаше начин да го извлече. Вчера, тој се обиде со секира да влезе во нејзиниот стан. Денес, таа живее зад решетките кои, мајсторот кој го повика, ги постави на нејзината влезна врата.
(Објавено на 14.07.2011)

Коментари: on 14/07/2011 at 17:56 bijonse1 Said: рани куче да ти лае…. on 14/07/2011 at 20:56 gjoamitipoezija Said: koga i da e, greskite napraveni pri vospituvanjeto na deteto roditelot skapo kje gi plati… lesno e sega od strana da se iskomentira, trebala uste prviot pat da go ostavi zad resetki, no da ne si vo nejzina koza…

Диви копачи

2012-05-13T21:15:00.000+02:00

Не им треба многу. Збор-два, мапа не мора, и веќе го намирисуваат златото. Тоа се дивите копачи по нашите питоми животи.
(Објавено на 10.07.2011)

Коментари:
on 10/07/2011 at 23:40 promenlivo Said: da, sosema taka… zosto im e mapa koga imata drska bezobraznost, da prasuvaat bezobzirno, i trepkaat so ocite… aj pozzz
on 10/07/2011 at 23:52 виолетова Said: Такви колку сакаш, ама лесно се препознаваат, или да речам – се издаваат :)
on 11/07/2011 at 07:32 gocheska Said: Ох , колку кажа сè што и јас сакав да кажам . Само ќе додадам , забележливо е копањето колу и да и се верни на својата „дивост“.
on 11/07/2011 at 07:48 algorit007 Said: нека копаат…дал господ злато…

Черга

2012-05-13T21:12:00.005+02:00

Живееше според народната: Протегни ги нозете колку што ти е чергата. Но, по некое време, чергата на чуден начин почна да се намалува. Мислеше привремено е, па најпрвин ги вовлече нозете да не штрчат преку чергата. Потоа ги вовлече рацете, па главата… Конечно, се затвори во клопче кое се оттркала накај светот по волја на ветрот. Оние кои, за забава, ја подизвлекуваа чергата од под нечиј задник најдоа друга черга.
(Објавено на 07.07.2011)

Коментари:
on 07/07/2011 at 08:58 toshomachorot Said: “Оние кои, за забава, ја подизвлекуваа чергата од под нечиј задник најдоа друга черга.“ Да си избришат нозете……….
on 07/07/2011 at 10:11 nerzima Said: Сурова вистина….за жал…..
on 07/07/2011 at 15:55 bijonse1 Said: затоа велам подобро од теписон нема никаде…..

Ќерка ми

2012-05-13T21:10:00.003+02:00

Сакам да ги прочитам нејзините записи. Сакам да знам како размислува, каков човек станала. Но, таа строго ми забранува да ги читам. Ако ги прочитам и дознае за тоа, ќе ми се налути, ќе биде повредена. Дали да бидам љубопитен татко или верен пријател? Се гордеам со неа што ме става пред ваква дилема!
(Објавено на 04.07.2011)

Коментари: on 04/07/2011 at 20:33 mackica Said: Остави ја во нејзиниот свет :) Подобро е така одколку да и ги прочиташ дилемите, прашања, чуствата, збунетоста.. :) Остави ја самата да ти прочита или да ти даде дозвола кога таа ќе биде подготвена :) Многу е полесно да пишуваш и да те оценуваат непознати, одколку да ја отвориш душата пред сопствените родители кои те познаваат најубаво :) Поздрав од една ќерка :) on 04/07/2011 at 20:40 filip22 Said: Аиии не закачај таму чоек,ќе направиш некоја беља па тешко тебе.Само штом си го открил тоа,ќе те јаде некоја јанѕа да ѕирнеш.Поарно не се чепкај таму каде што не те чеша,подалеку од тоа и заборави. on 04/07/2011 at 21:09 kocevaaa Said: Не им ја одземајте приватноста на вашите деца никогаш..Тоа е како една мало катче каде што се кријат оние длабоки рани,насмевки,тајни …тамо се крие нејзиниот живот,она што ја тера да продолжи напред…Дозволете и сама да успее да се изгради во вистински човек,бидејќи само на тој начин ќе биде своја и единствена. Вие ако сакате да и помогнете: Гледајте со поглед да ја разберете,подадете и рака кога и е најпотрено,храбрете ја,сакате ја,фалете ја,покажете и дека светот е лицемер ама дека и сепак постои нешто добро во него…Нека научи да ги цени вредните работи …Верувајте ми само на тој начин ќе бидете вистински родител .. on 04/07/2011 at 23:18 promenlivo Said: Да провалиш во нејзините записи?! Без дозвола?! На ќерката?! … седи си мирен. Биди пријател. on 05/07/2011 at 01:15 lupcobocvarov Said: Спрема малолетните деца родителот треба да има целосна контрола. За неа треба да се избори на другарски начин, со отворање на муабети за сите теми кои детето го интересираат, вклучително и за сексуалните односи. Во однос на родителите, децата не смеат да забрануваат било што од својот живот. Веќе самата изјава дека на родителот му забранува да ги чита нејзините записи, малолетната ќерка ја квалификува како семеен тиранин. Почитувањето на малолетничката тиранија му прави мечкина услуга на детето и негативно ќе влијае на неговото оформувања во реалистичен човек. on 05/07/2011 at 06:31 lepa angelina nl Said: секој има право на приватност, без разлика дали е малолетен или полнолетен. секој има право на катче што ќе биде само негово. сакаш ли да ги читаш нејзините дневници? свесен ли си што сакаш? и после? ти нема да видиш каков човек станала, сакаш да ја контолираш, што е разбирливо.тешко е да се биде родител во денешно време, ама тоа не е никакво оправдување да се ровари по текстовите на детето. посвети се малку на себе и на жената. on 05/07/2011 at 06:39 sina Said: :) убаво е кога човек се гордее со своите деца и не верувам дека би ги прочитал, колку и да копка љубопитноста on 05/07/2011 at 07:25 promenlivo Said: Бочаваров, денешниве деца не променија како родители, се сменија работите, сепак Струјман терба да ја испочитаува нејзината отвореност што му кажала дека запишува нешто, го поделила тоа како со пријател. Тоа што рекла не, не ја прави тиранин, според мене малолетнича тиранија е ,,толчи-молчи,,на децата денес. Искустевно , со оглед на годините си во право, но психолошкиот профил на малдите генерации е крајно променет од оние во 60-70 -ти, овие се емотивно кршливи, многу многу покршливи… ај поззз.. on 05/07/2011 at 07:41 nerzima Said: Почитувањето на приватноста , прави младите луѓе да се чувствуваат прифатени и еднакви во светот на возрасните.Нејзините дилеми се сепак НЕЈЗИНИ, а ако ти како родител посакаш да ги расчистиш наместо неа, и крадеш нешто многу ВРЕДНО а тоа е основното средство за созревање : самоодлучувањето. Таа мора да се избори со себе. Мора да си го спознае животот сама а ти па ( колку и да боли ) мора да и дозволиш умерено да подизгори некаде. Тоа е ризик кој мора да го превземе секој родител за да му помогне на детето да изгради самодоверба. А превенцијата е во отворената врата кон детето, кое ,ако е добронамерно отворена, ќе ја искористи во моментот кој сама ќе го процени, ќе дојде и ќе побара помош…..ТОГАШ можеш да СОВЕТУВАШ …но пак адаптирајќи се на нејзиниот свет и на нејзината перцепција…. И биди горд на керка ти, бидејќи била доволно стабилна да предизвика дилема кај тебе…Во спротивно, ако била проблематична, ти ни за момент не би се двоумел, би ѕирнал СЕГДЕ и би ПРОВЕРИЛ СЕ ….Ама ова слаткава дилема , збори за зрелоста на твоето дете…Почести го со доверба. Со доверба и ЌЕ ТЕ ПОЧЕСТИ :) on 05/07/2011 at 14:28 lupcobocvarov Said: Колку што може да се разбере од постот, се работи за записи на ќерката која има литературни амбиции. Пишувањето е вештина која се учи, тоа може да биде и занает. На млада личност која со тоа се занесува треба да и` се објасни дека во тоа нема никаква мистика или место за интима – тоа е технологија за создавање слики и пренесување чувства преку зборови. Во суштина, пишувањето е мамење од голем калибар. Тука самодовербата нема речиси никаква вредност, битно е што мислат читателите, бидејќи за нив се пишува, никој не пишува сам за себе како публика. А најкритички расположена публика треба да бидат родителите, браќата и сестрите, тие треба да постават високи критериуми околу писателката. Кој поскоро тоа го сфати и научи, полесно ќе расчисти со своите амбиции да биде писател. on 05/07/2011 at 14:35 gocheska Said: И јас не верувам дека би и ги прочитал нејзините записи дури и да стојат пред тебе . Претпоставувам дека се работи за дете тинејџер, а тогаш се тие најранливи … затоа колку и да ти е дилемата да или не , јас би рекла дека ти веќе си одлучил тоа да биде Не.

Денот на независноста

2012-05-13T21:07:00.003+02:00

Ја сакав баба ми, сè додека не пораснав а таа почна да ми се меша во животот. Веројатно добронамерно, ама јас посакував што поскоро да се ослободам од нејзиното влијание. Не можев да си заминам, живеевме заедно. Таа замина на Денот на независноста. Оттогаш, барем на тој ден, ми недостига зависноста.
(Објавено на 04.07.2011)

Пет пари

2012-05-13T21:06:00.001+02:00

Лекот е пет пари – рече оставајќи токму толку и грабајќи ги останатите од кутијата пред детенцето. Но не жали, утре пак ќе те донесам тука.
(Објавено на 03.07.2011)

Свет

2012-05-13T21:05:00.000+02:00

Ова ти е толку убаво, треба да го споделиш со светот. Па штотуку ти го раскажав.
(Објавено на 03.07.2011)