Surendhar's Blog

சிறிது வெளிச்சம்

noreply@blogger.com (Surendhar) — Fri, 29 Apr 2016 14:08:00 +0000

"நம்பிக்கைதான் வெளிச்சம்"

எங்கள் பக்கத்து வீட்டு குழந்தை, இரண்டரை வயது. தனக்கு காயமேற்பட்டதால் வலியிருப்பதாகவும் புண்ணைப் பார்க்கும்படியும் சொன்னாள். குண்டூசி அளவு புண்ணில் பொக்கு கட்டியிருந்தது. மிகவும் சிறியது. அதைப் பற்றி விஸ்தாரமாகச் சொன்னாள். பார்த்து, ஒன்றுமில்லையென ஊதிவிட்டு ஆறிவிடும் என்று சொன்னதும் சரி என ஒப்புக்கொண்டாள்.

சிறியவர்கள் எந்த ஒரு விஷயத்தையும் கவனித்து விடுகிறார்கள். எதைப் பற்றியும் அறியும் ஆவலோடு இருக்கிறார்கள். என் பக்கத்து வீட்டு குழந்தைமட்டுமல்ல எல்லா குழந்தைகளும் ஒன்றுபோலவே இருக்கிறார்கள்.

பட்டாம்பூச்சி பிடிப்பது, ஓடி விளையாடுவது, தெரிந்துகொள்ளும் பொருட்டு எதையும் கேள்வி கேட்பது, அவர்களின் மன இயல்பாக இருக்கிறது. நாம்தாம் புரிந்து கொள்ளாமல் அதட்டி அடக்கிவிடுகிறோம். பெரியவர்களாக நடந்து கொள்கிறோம். அவர்களை அப்படி நடக்கச் சொல்லி பழக்குகிறோம், கட்டாயப்படுத்துகிறோம்.

சின்ன சின்ன விஷயங்களை சிறியவர்களுக்கானது என முடிவு செய்துவிடுகிறோம். ஆனால் இப்படி சிறியது என பெரியவர்கள் மறந்த விஷயங்களை கவனத்தில் கொண்டு தொடர் கட்டுரையாக எழுதி தொகுத்த நூல்தான் 'சிறிது வெளிச்சம்'.

எஸ்.ராமகிருஷ்ணன் எழுதிய இந்த கட்டுரைகளை புத்தகமாக - விகடன் வெளியீடாக வந்திருப்பது நம்மில் பலர் அறிந்தது. இதை முழுவதுமாக இப்போதுதான் படித்து முடித்தேன். ஒரு சில கட்டுரைகளை அது வெளிவரும் காலங்களில் படித்திருக்கிறேன்.

“உண்மையில் நம்மை சுற்றி பகலிலும் கண்டு கொள்ளபடாத எத்தனையோ சம்பவங்கள், நிகழ்வுகள், மனிதர்கள் இருக்கிறார்கள். அவர்கள் மீது சிறிது வெளிச்சமாவது பட வேண்டும் என்று நான் விரும்புகிறேன்.” - என்கிறார் எஸ்.ரா.

வாழ்க்கையில் நாம் என்னவெல்லாம் செய்யத் தவறியிருக்கிறோம் என்பதையும், கிடைத்த வாய்ப்புகளை எப்படியெல்லாம் இழந்திருக்கிறோம் என்பதையும், அன்றாட வேலைப்பளுவினால் தங்களைச் சூழ்ந்துள்ள மனிதர்களை விட்டு விலகி எவ்வளவு தூரம் வந்திருக்கிறோம் என கோர்வையாகச் சொல்லி செல்கிறார். நாம் கவனத்தில் கொள்ளாதவைகளின் நினைவு தொகுப்பு இந்த நூல்.

இதில் மொத்தம் 58 விசயங்களை நம்மோடு பேசுகிறார். ஒவ்வொன்றை பற்றி சொல்லும் போதும், தகுந்த ஒரு சிறுகதை, திரைப்படம் மூலம் அவரது தனித்துவமான நடையில் விளக்கியுள்ளார்.

***

நம்மில் எத்தனைப் பேர் கடைசியாக கடிதம் எழுதியது? இதற்கு நினவுகளின் அடுக்குகளில் இருந்து தேடித்தான் பெரும்பாலானவர்கள் பதில் சொல்வார்கள். நாளைக்கு என்ன கிழமை என்பது போல சுலபமாக பதில் சொல்ல முடிவதில்லை. விஞ்ஞானமும் செல்போனுமாக வளர்ந்துவிட்ட காலத்தில் யாரும் யாருக்கும் கடிதம் எழுதுவதில்லை. இங்கு கடிதம் எழுதுவதில்லை என்பது புகார் அல்ல. அதை நாம் மறந்துகொண்டே வருகிறோம்.

"கடிதம் என்பது வெறும் பரிமாற்றம் மட்டுமல்ல. அது நாம் இன்னொருவரை நேசிக்கிறோம் என்பதன் சாட்சி. ஒருவகையில் கடிதம் நம் மனதின் குரல். நேரில் சொல்ல முடியாத தவிப்பைக் கடிதம் சொல்லிவிடும். கண்ணீர்க்கறை படிந்த கடிதங்களும், பிரிவின் அழியாத மணமுள்ள கடிதங்கள், தற்கொலை செய்து கொண்டவனின் கடிதங்கள், முதல் காதலை சொன்னக் கடிதங்கள்... " என பட்டியலிட்டு சொல்கிறார். உறவுகள் சுருங்கிவிட்ட சூழலில் குறுஞ்செய்தி போதுமானதாக இருக்கிறது. இன்னொரு பக்கம் ஊடகங்கள் விலாவரியாக விளக்கி சொல்கிறன. மிதமிஞ்சிய செய்திகள், தகவல்களால் சலிப்பாகிறது.

எப்போதும் அழ பழகிய நமக்கு உணர்வுகளை கடத்த இருந்த வழிகளை ஒவ்வொன்றாக

அடைத்துவிட்டு வெறுமனே மறுபடியும் அழுகிறோம். நமது கலைகளைப் போல காரணமேயில்லாமல் இப்பழக்கத்தை கைவிட்டுக் கொண்டிருக்கிறோம்.

அடுத்தவரைப் பற்றி அக்கறைப் படுகிறவர்களால் மட்டுமே கடிதம் எழுத முடியும். ரவீந்திரநாத் தாகூர் எழுதிய 'மனைவியின் கடிதம்' சிறுகதை உதாரணமாக தருகிறார். சிறந்த கதை. மேலும் இரானியத் திரைப்படத்தின் (Poet of the wastes) கதையையும் சொல்கிறார். தபால் அட்டையோ, மின்னஞ்சலோ எதுவாயினும் உங்கள் அக்கறைகளை அடுத்தவருடன் பகிர்ந்துகொள்ளுங்கள் என்பதில் உண்மையிருக்கிறது.

***

இப்படியாக.... கதை சொல்ல வேண்டிய அவசியம், வால் இல்லாத நாயின் பின்னணி, குடும்ப விரிசலுக்கான காரணம், அக்கறை, பரஸ்பர அன்பு, நமது முட்டாள்தனங்கள் அபத்தங்கள், புகைப்படத்தை பற்றி, குழந்தையிடம் காட்டும் பேதம், புத்தகங்கள் மீதான ஏளனம், விமான பயணம், இளைஞர்களின் அக்கறையை, வீட்டைவிட்டு ஓடிவந்த சிறுவர்களை, கயிற்றின் மீது நடப்பவர்கள், சாலையில் செத்துகிடக்கும் தவளை என நம் அவசர யுகத்தின் கவனிக்க தவறிய பட்டியல் நீள்கிறது.

இக்கட்டுரைகளின் ஒன்றில் ஒரு கேள்வி வருகிறது, 'உலகில் அதிகம் புரிந்துகொள்ளப்படாமல் போவது எது? – என்பதே அது. யோசிக்க வைக்கும் கேள்வி. இதற்கான பதில் தெரிந்ததும் இன்னும் இன்னும் யோசிக்க வைக்கும்.

எது அதிர்ஷ்டம், எதுவெல்லாம் துரதிர்ஷ்டம் என சுவாரஸ்ய பட்டியலில் ஒரு கட்டுரையிருக்கிறது. ஒட்டகத்தின் கண்ணீர், வீட்டின் இதயத்துடிப்பை கேட்டதுண்டா?, வீட்டுக்காரம்மாவைச் சமாளிப்பது எப்படி? பல்லினா பயமா?, புல்லின் நிழலில் இளைப்பாறுங்கள், உடைகள் பேசும் உண்மை, பெண்ணின் உயரம் பெரும் துயரம், உங்களை இயக்கும் சக்தி.... இன்னும், இன்னும்... இதில், எதை விடுவது?

அன்றாட வாழ்வின் கூண்டுகளைத் தாண்டி சற்று பறந்து பாருங்கள் என்கிறார். இப்பத்திகள் சொல்லும் விஷயங்கள் எளிமையானவை. புரிந்துகொள்ளக் கூடியவை. எல்லா கட்டுரைகளிலும் இருக்கும் பொது அம்சமென நான் கருதுவது எழுத்து வசீகரம்.

All you need is love, nothing more. இதுதான் இப்புத்தகம் சொல்லும் மையம். அடுத்தவர் மேல் அன்பு பாராட்ட வழியுறுத்தும் கட்டுரைகள். நம் காலகட்டதிலும், பின் வரும் காலத்திலும், மானுடத்திற்கு தேவையானது அன்புதானே. வேறென்ன இருக்கமுடியும் ?

***

இவரது எழுத்தில் ஒர் ஈர்ப்பு வாசனையிருக்கிறது எனத் தோன்றுகிறது. எழுத்தில் வாசனை சேர்க்கும் ரசவாதி. "சொற்களுக்கும் வாசனை இருக்கிறது. அது எப்போதோ, யார் கவிதையிலோ, அரிதாக மனம் நழுவும் தருணங்களில் உணரப்படுகிறது" என ஒரு வரி சொல்கிறார். உண்மை! நீங்கள் முழுவதும் படிக்கும்போது ஓர் இடத்திலேனும் நான் கூறும் வாசமறிவீர்கள். மழை தூறத் துவங்கியதும் மண் புரளும் வாசம் போல.

என்னைக் கேட்டால், இதில் 58 வாசனை இருக்கிறது என்பேன்.

முயலும் கேள்வி - Alice in Wonderland

noreply@blogger.com (Surendhar) — Mon, 28 Mar 2016 14:22:00 +0000

"ஆற்றின் கரையில் எதுவும் செய்யாமல் வெறுமனே சகோதரியோடு உட்கார்ந்திருப்பது ஆலிஸிற்கு சோர்வு தருவதாக இருந்தது. ஒன்றிரண்டு முறை சகோதரி படித்துக் கொண்டிருந்த புத்தகத்தை எட்டிப் பார்த்தாள். அதில் படங்களோ, உரையாடல்களோ இல்லை. படங்களும் உரையாடல்களும் இல்லாத புத்தகத்தால் என்ன பிரயோஜனம் என ஆலிஸ் யோசித்தாள்".

நீங்க நினைப்பது சரி. இவள் அதே ஆலிஸ்தான்.

'ஆலிஸின் அற்புத உலகம்' Alice in Wonderland கதை இப்படிதான் ஆரம்பிக்கறது. படிக்கும் பழக்கம் ஏற்படும் ஆரம்பங்களில் எல்லா சிறார்களுக்கும் தோன்றும் கேள்வி - படங்களோ, உரையாடல்களோ இல்லாத புத்தகத்தை இந்த பெரியவர்கள் எப்படி படிக்கிறார்கள்? அதில் என்ன இருக்கும்? - என்பதாக இருக்கிறது.

முயல் வளையில் விழுந்துவிடும் ஆலிஸின் பதட்டத்திலிருந்து கதை விரிகிறது. ஆலிஸின் உலகம் வியப்பும் மர்மமும் நிறைந்த ஒரு மாயக்கனவு. கணித மேதையான லூயிகரோல் 1865ல் குழந்தைகளுக்காக எழுதிய இந்த நாவல் ஒரு ஆச்சரியம் ! கணிதத்தில் பெரும் ஆர்வம் கொண்ட லூயிகரோல் தீர்க்க முடியாத புதிர்கணிதத்தில் ஆழ்ந்த ஈடுபாடு கொண்டிருந்தார். இக்கதையில் கணிதத்தின் பல சூட்சுமங்களும் தேர்ந்த உரையாடல்களும் வியப்பாக இருக்கிறது.

இந்த உரையாடலை கேளுங்கள்:

ஆலிஸ் "இவர்களோடு சற்று விளையாடலாம்" என நினைத்துக்கொண்டு, சொன்னாள்: "வாருங்கள் நாம் விளையாடலாம். நான் உங்களிடம் சில விடுகதைகள் போடுவேன். நீங்கள் விடை சொல்ல வேண்டும்"

"உனக்கு பதில் தெரியுமா ?" என முயல் கேட்டது.

"நிச்சயமாகத் தெரியும்"

"அப்படியானால் அது எதற்கு ?" முயல் தொடர்ந்து கேட்டது. ஆலிஸ் அவசரமாக பதில் சொன்னாள்.

"குறைந்தபட்சம் நான் சொல்வது உங்களுக்கு தெரிந்த அதே புதிர்தான்"

தொப்பிக்காரன் சொன்னான்: "அது அப்படியல்ல. நீ இப்படியும் சொல்லலாம். நான் தின்பதைப் பார்க்கிறேன். நான் பார்ப்பதைத் தின்கிறேன். இரண்டுமே ஒன்று என்று".

இந்த உரையாடலில் என்ன விஷேசம்..? இது ஆண்டிமெட்டபோல் - antimetabole. வார்த்தைகளை திருப்பி போடுவதால் உருவாகும் ஒருவித வாக்கிய கட்டமைப்பு. கொஞ்சம் விளக்குகிறேன்.

எம்.ஜி.ஆர் ஒரு படத்தில் சொல்லுவார், 'நாடு உனக்கு என்ன செய்தது என்று கேட்காதே, நாட்டிற்காக நீ என்ன செய்தாய் என கேள்?' என்பார். உண்மையாக இதை சொன்னவர் 1961ல் ஜான்.எஃப்.கென்னடி .

தமிழில் antimetabole என்பதை வார்த்தைகளை திருப்பி போட்டு ஏற்படுத்தும் 'வார்த்தை ஜாலம்' எனலாம். கொஞ்சம் கிட்ட வருகிறது.

'வாழ்வதற்காக உண், உண்பதற்காக வாழாதே' என சாக்ரடிஸ் சொன்னதும் அதே antimetabole தான்.

நம் ஊரில் விசு, டி.ராஜேந்தர் போன்றோர் இதில் விற்பனர்கள்.

இதையே கணிதத்தில் Inverse relationship என்கிறார்கள்.
The semantic value of a sentence A is not the same value of the converse of A.

***

மற்றொரு உதாரணம்.

இதில் செஷாயர் பூனை (Cheshire cat) என்று ஒரு பூனை வருகிறது. சிரித்தபடியே காற்றில் மறைந்து வேடிக்கை காட்டும். செஷாயர் பூனையை நண்பனாக கொள்கிறாள் ஆலிஸ். 'சிரிக்காத பூனைகளைத்தான் அதிகம் பார்த்திருக்கிறேன். இது போலச் சிரிப்பு மட்டுமிருந்து பூனை மறைந்து போய்விடுவதை இப்போதுதான் பார்க்கிறேன். என் வாழ்வில் முதல் முறையாக ' என்கிறாள் ஆலிஸ்.

சிரிப்பு மட்டுமிருந்து பூனை மறைந்து போய்விடுவதை Deep abstraction of concepts என கணிதத்தில் விளங்கலாம்.
Non-Euclidean geometry, abstract algebra தெரிந்தால் இது சுலபம்.

***

ஜியோமெட்ரியோ, அல்ஜிப்ராவோ விளக்க வரவில்லை. நான் சொல்வது இப்படி கதை நெடுக கிடைக்கும் ஆச்சரியங்களை.

மேலோட்டமாகப் படிக்கும்போது குழந்தைகளுக்காக எழுதபட்ட Fairy tale தான். இதில் Philosophy இருக்கிறது. லூயிகரோல் கணிதம் தெரிந்தவர் என்பதால் அதையும் சேர்த்து எழுதியிருக்கிறார். ஒரு Fantasy கதையில் இதையெல்லாம் கலந்து கட்டி அடிச்சிருக்கிறார்.

அதனாலேயே படிக்கும் ஒவ்வொருவருக்கும் ஓர் அனுவபம் எற்படுகிறது. குழந்தைகளுக்கு ஒன்று, பெரியவர்களுக்கு மற்றொன்று, கணிதம் தெரிந்தால் வேறாகவும் இருக்கிறது. இப்படி இருப்பது என் வரையில் ஸ்பெஷல்.

இந்நூல், உலகின் தலைசிறந்த பத்து புத்தகங்களில் ஒன்றாகத் தேர்வு செய்யப்பட்டிருக்கிறது. பல மொழிகளில் மொழிபெயர்பு செய்யப்பட்டுள்ளது (கிட்டதட்ட 174). தமிழில் விஜயா பதிப்பகம், மற்றும் வம்சி புக்ஸ் வெளியீடாக மிகச் சிறப்பாக மொழிபெயர்த்திருப்பவர் - எஸ்.ராமகிருஷ்ணன்.

விநோத உலகின் அனுபவங்களை, வார்த்தை வசீகரங்களை, கணித நுட்பங்களை உலகிற்கு சொல்லியபடியே இருக்கிறது. இதுவே திரும்ப திரும்ப உலகெங்கும் மக்கள் படிக்க காரணமாகிறது. இதுதான் இந்நூலின் தனி சிறப்பு. குழந்தைகளுக்கு மட்டுமில்லாமல் பெரியவர்களுக்கும் ஆலிஸின் அற்புத உலகம் திறந்தே இருக்கிறது.

பின் குறிப்பு: 20-Mar-2014 எழுதிய கட்டுரை, இன்றுதான் நேரம் கிடைத்தது வெளியிட.

"Alice in Wonderland" was a book of that extremely rare kind which will belong to all the generations to come until the language becomes obsolete.

-by Sir Walter Besant.

'வெண்முரசு' விழா

noreply@blogger.com (Surendhar) — Wed, 12 Nov 2014 19:27:00 +0000

ஜெயஸ்ரீயிடம் மட்டும் சொல்லியிருந்தேன்.

அம்மா, அப்பா, மஹதி, ஜெயஸ்ரீ அழைத்துக்கொண்டேன். எங்கே செல்கிறோம் என்பதை சொல்லவில்லை. ஜெயமோகனின் 'வெண்முரசு' நாவல் வெளியீட்டு விழா என்பது அவர்களுக்கு புதுமையாக இருக்கும். இது இலக்கியம் சார்ந்த நிகழ்வு என்பதால் ஒத்துழைப்பு எப்படி இருக்குமோ? கிளம்பி பாதி வழியில்தான் சொன்னேன்.

ஆரம்பம்
எழும்பூர் மியூசியம் தியேட்டர் வளாகத்துக்குச் செல்லும் வழியில் பாதைகள் அடைக்கப்பட்டிருந்தன. காவலர்கள் வண்டியை வழி மாற்றி அனுப்பிக்கொண்டிருந்தனர். ஆர்.எஸ்.எஸ் ஊர்வலம் நடக்கும் நாள். வேறு வழியில் வளாகத்தை அடைந்தோம்.

மாலை 5.15க்கு, விருந்தினர்களை வரிசையாக அழைத்தனர். 'காக்கைச் சிறகினிலே' பாடலுடன் விழா தொடங்கியது.

போக்குவரத்துச் சிக்கல் காரணமாக இளையராஜா மட்டும் வந்து சேர்ந்திருக்கவில்லை. அசோகமித்திரனுக்கு நடுநாயகமான இடம். அவருடைய இரு பக்கங்களிலும் கமல், இளையராஜா. இளையராஜா பக்கம் பிரபஞ்சன், நாஞ்சில்நாடன். கமல் பக்கம் ஜெயமோகன், பி.ஏ.கிருஷணன்.

கூட்டம் நிரம்பி இருந்தது. அங்கொன்றும் இங்கொன்றுமாக இருந்த காலியிருக்கைகளும் நிரம்பிக்கொண்டுயிருந்தன. அம்மாவை ஒரு இருக்கையில் அமர வைத்தேன். நாங்கள் தரையில் அமர்ந்து கொண்டோம், விழாமேடைக்கு நேர் எதிர்.

இது விஷ்ணுபுரம் இலக்கிய வட்டத்தின் விழா. பிரம்மாண்டமாகவும், இலக்கிய அனுபவம் அளிக்கும்படியாகவும் இருந்தது. நிகழ்ச்சி விஜய் டிவியில் வெளிவருமென்பதால் அவர்களின் கோரிக்கைக்கு ஏற்ப அரங்கு அமைக்கப்பட்டிருந்தது. விழாவுக்கான அரங்கம் இலக்கிய நிகழ்ச்சிகள் என்று பார்க்கையில் பெரியதென்றாலும் கமல், இளையராஜா கலந்துகொள்ளும் நிகழ்ச்சிக்கு சிறியதே! கணிசமானவர்கள் நின்றுகொண்டுதான் பார்த்தார்கள்.

எதற்காக இந்த விழா?

இந்த கேள்விக்கான தன்னிலை விளக்கமாக ஜெயமோகன் எழுதியதில் வெண்முரசு விழா ஏன்? எனக்கு உடன்பாடு என்பதே இவ்விழாவிற்கு நான் குடும்பத்தோடு செல்லக்காரணம்.
"இம்மாதிரியான பெருமுயற்சிகள், நம் தமிழ்ப்பண்பாட்டுச்சூழலால் உதாசீனப்படுத்தப்பட்டு பாதியிலேயே நின்று விடும். சோர்வும் தனிமையுமே அவற்றை செய்தவர்களுக்கு எஞ்சும். காரணம், நம் வாசகர்களும் சரி, ஊடகங்களும் சரி இயல்பாக இத்தகைய பெரு முயற்சிகளை கவனிப்பவர்கள் அல்ல, ஆதரிப்பவர்களும் அல்ல என்பதே".

வெண்முரசு
ராஜாஜியில் தொடங்கி சோ வரை பலரும் வியாசரை அடிப்படையாக வைத்து எழுதியிருக்கிறார்கள். எழுதியும் வருகிறார்கள். 300 முதல் 3000 பக்கங்கள் இவை இருக்கும்.

நான் சோ எழுதிய மகாபாரதத்தை தவிர வேறு படித்ததில்லை!

தினம் ஓர் அத்தியாயமென தொடர்ந்து பத்தாண்டுகள் மகாபாரதம் எழுதும் கற்பனைக்கெட்டாத மகத்தான இலக்கை வகுத்துக் கொண்டு இந்தாண்டின் முதல் நாளிலிருந்து எழுதி வருகிறார் ஜெயமோகன், 'வெண்முரசு' என பெயரிடப்பட்டிருக்கும் அத்தொகுப்பு, சுமார் 35,000 பக்கங்களுடன் 40 நாவல்களாக வருமெனத் தோராயமாகக் கணக்கிடப்பட்டுள்ளது. தொடங்கிய 10 மாதங்களுக்குள் முதற்கனல், மழைப்பாடல், வண்ணக்கடல், நீலம் என 4000 பக்கங்கள் கொண்ட 4 நாவல்களை எழுதிவிட்டார்.

பாகங்கள்
காடு எரியுதுன்னு வைச்சுப்போம். அதுக்கு முதல் பொறின்னு ஒண்ணு இருக்கும் இல்லையா? அது மாதிரி குருக்ஷத்திரப் போரோட முதல் பொறிதான் முதற்கனல். அம்பை முதன்முதலில் சிந்தின கண்ணீர்த் துளிதான் இந்த பாகம்.

மழைக்காக தவளை எப்படி பிரார்த்தனை நடத்துதோ அப்படி குருக்ஷத்திர போரை உள்ளூர விரும்பின, அதுக்காக பிரார்த்தனை செய்த பெண்களைப் பத்தி சொல்கிறது மழைப்பாடல்.

மூன்றாம் பாகமான வண்ணக்கடல், புறக்கணிக்கப்பட்டவர்களைப் பத்தி உரக்கப் பேசுது. ஏகலைவன், துரோணர், கர்ணன்னு பாரதத்துல ஒதுக்கப்பட்ட மாந்தர்கள் நிறைய இருக்காங்க. இவங்க இந்த பாகத்துல சங்கமிச்சிருப்பாங்க.

அடுத்து நீலம். தன்னளவிலேயே தனித்த நாவல். ராதையோட கண் வழியே கிருஷ்ணனோட இளமை பருவத்தை அணுகறது. இதுல ஒரு சுவாரஸ்யம் இருக்கு.

இந்த நான்கையும் தனித்தனி புத்தகமாக 'நற்றினை பதிப்பகம்' வெளியிட்டிருக்கு.

5வது பிரயாகை. இன்னும் புத்தகமாக வெளிவரவில்லை. தொடரா இணையத்தில் வந்துகொண்டிருக்கிறது.

கங்கைல கலக்குற 5 நதிகளை பிரயாகைன்னு சொல்வாங்க. அப்படி பாஞ்சாலி என்கிற திரௌபதியோட பிறப்பை அவங்களோட ஆளுமையை வளர்த்தெடுத்த நிகழ்ச்சிகளை சொல்லுறது இதுல பதிவாகிறது.

பேசும் போது
பி.ஏ.கிருஷ்ணன் அவர்கள் பேசுகையில், "வியாசர் பறந்த வானில், ஈயாக அல்ல, பருந்தாக ஜெயமோகன் இந்த நாவல் மூலமாக பறந்திருக்கிறார்" என்றார்.

"வெண்முரசின் சொல் நயத்தை மெச்சும் வகையில் அதன் சொற்களை எல்லாம் தொகுத்து ஒர் அகராதி வெளியிட வேண்டும்" என்றார் நாஞ்சில்நாடன்.

அசோகமித்ரன் பேசும் போது, "இன்றைய கணினி தொழில்நுட்பம் இல்லாவிட்டால், இப்படியொரு நாவல் முயற்சி சாத்தியமா என்று தெரியவில்லை. கையால் எழுதுவது என்பது மிகவும் அலுப்பு தருகிற விஷயம். கணினி தொழில்நுட்பத்தை சரியான முறையில் பயன்படுத்தி இந்த நாவலை ஜெயமோகன் எழுதுவது, பெரிய மகத்தான முயற்சி" என்றார்.

நீலம் தொகுப்பை முழுவதும் படித்துவிட்டு வந்திருந்த பிரபஞ்சன், அதிலிருந்து சில பகுதிகளைப் படித்துக் காட்டி, "இது எந்த பாரதத்திலும் இல்லை. இது போன்ற புது சிந்தனைகள்தான் எழுத்தாளனுக்குத் தேவை. ஜெயமோகனின் இந்த முயற்சி எனக்கு ஆச்சரியம் அளிக்கவில்லை. அவரால் 3 லட்சம் பக்கங்கள்கூட எழுதமுடியும்.

மகாபாரதத்தை காலத்திற்கேற்ப, புதுமையாக எழுதி வருகிறார். இது உலக பேரிலக்கியமாக மலர வேண்டும்" என்றார்.

நிகழ்ச்சிக்கு நடுவில் பல ஆண்டுகளாக, மகாபாரதம் பிரசங்கம் செய்யும் மஹாபாரதக் கலைஞர்கள் ஐவர் விழாமேடையில் கௌரவிக்கப்பட்டனர்.

ஓவியர் சண்முகவேல், இணையத்தில் பாரத மொழிபெயர்ப்பைச் செய்துவரும் அருட்செல்வப்பேரரசன், ஜெமோகனின் மனைவி அருண்மொழி அவர்கள் அனைவரும் மேடையில் பாராட்டி கௌரவிக்கப்பட்டனர்.

இசையுடனே ஆரம்பித்து பேசத் தொடங்கிய இளையராஜா, "மக்களுக்கு புத்தெழுச்சி கொடுக்காத எந்தக் கலையும் நாட்டில் இருப்பது வீண். அவரின் இந்தப் படைப்புக்கு இசையமைக்க நேர்ந்தால் அவர் எழுதும் வேகத்துக்கு என்னால் இசையமைக்க முடியுமா எனத் தெரியவில்லை. இதனை எழுதுவதன் மூலம், திரைத்துறையில் நானும், கமல்ஹாசனும் செய்ய முடியாததை எழுத்து துறையில் ஜெயமோகன் சாதித்துக் காட்டி உள்ளார்" என்றார்.

கமல்ஹாசன் பேசும் போது - "பைபிளை மிஞ்சும் அளவுக்கு 3000 ஆண்டுகளுக்கு மேலாக பேசப்படும் உலகின் மிகப்பெரிய இலக்கிய படைப்பாக உள்ள மகாபாரதத்தை நாவல் வடிவில் எழுதும் ஜெயமேகனின் முயற்சி மிகவும் தைரியமானது. கடினமான தமது முயற்சியின் மூலம் ஜெயமோகன் பேராசை மிக்கவராக தெரிகிறார்.

மனிதர்கள் எல்லோரும் கதைகளால் பின்னப்பட்டவர்கள். நீங்கள், நாம் எல்லோருமே கதை கேட்பவர்கள். நமக்கு மதம் தேவையோ, இல்லையோ, அந்த மதங்கள் தருகிற, அந்த மதங்களுக்குள் இருக்கிற கதைகள் நமக்கு தேவை. இசை வடிவத்தில் சொல்வதுதான் வேதங்கள். அதனால் சுருதி என்கிறோம். மகாபாரதத்தை ஜெயமோகன் நாவலாக எழுத, இளையராஜா அதை இசையாக தர, நான் கேட்டு கொண்டே இருப்பேன். வேறெதுவும் தேவையில்லை. இவ்வளவு பிரம்மாண்டமான நாவலை நான் இன்னும் படிக்கவில்லை. நம் காலத்தில் வணங்கத்தக்க படைப்பாளனாக இந்த மகாபாரத நாவல் வரிசை வழியாக ஜெயமோகன் நமக்கு கிடைத்திருக்கிறார்’’ என்றார்.

ஜெயமோகன் தனது ஏற்புரையில், "இந்த நாவல் முயற்சி எனது 25 ஆண்டு கால கனவு" என்றார்.

கவர்ந்த அம்சம்

கமல் பேசி முடித்தவுடன் கூட்டம் நகரவில்லை. ஜெயமோகனின் பேச்சை ரசித்துவிட்டுதான் கலைந்தார்கள். Like!

தொழில்நுட்ப வடிவத்துக்கு முதன்மை கொடுத்து உருவாக்குவதால் முன்னெப்போதும் இருந்திராத வகையில் பல லட்சம் வாசகர்களைச் சென்றடையும் - சாத்தியமிருக்கிறது. Technology integration.

அரசோ, பல்கலை கழகமோ, கல்வியமைப்புகளோ இத்தகைய முயற்சிகளுக்கு உதவாத இன்றைய சூழலில், வெண்முரசு நூல்வரிசை மேலும் பரவலாகச் சென்றடைய கமல் செய்யும் இந்த உதவி ஓர் அரசாங்கத்தின் உதவிக்கு நிகரானது. Fame - Popularity.

தனிப்பட்ட முறையில் வெண்முரசு நாவலுக்காக வரைந்த ஓவியங்களின் அழகை சிலாகிக்காமல் இருக்கவே முடியாது. Excitement!

உலகின் மிகப் பெரிய நாவலாக வளர்ந்துகொண்டிருக்கும் ‘வெண்முரசை’ நாம் ஒவ்வொருவரும் வரவேற்க வேண்டும்.

***

என் பேச்சை கேட்டு கூட வந்த அப்பா அம்மா, தீர்ந்ததும் ஒவ்வொரு மிட்டாய் கொடுத்து சத்தம் போடாதே என கெஞ்ச வைத்து பின் தூங்கிப்போன மஹதி, பொறுமையோடு இருந்த ஜெயஸ்ரீக்கும் Thanks.

மறுபடியும் ஓர் இலக்கிய விழாவிற்கு "வா" என்றால் இவர்கள் என்ன சொல்வார்கள்? கேள்வியை நான் கேட்கப்போவதில்லை.

***

துளிகள்
மனுஷயபுத்திரன் மக்களோடு அமர்ந்திருந்தார், பின் வரிசையில்.
*
பாலகுமாரன் தனது மனைவியோடு வந்திருந்தார் என கேள்விபட்டும் பார்க்க முடியவில்லை.
*

நடுத்தர வயதில் இருந்தார் அந்த பெண்மணி.
"ஏங்க நீலம் ஒன்னு தாங்க, எவ்வளவு?"
"முதற்கணல்தான் 1st பாகம்ங்க".
"மூன்று பாகமும் ஏற்கனவே படித்துவிட்டேன்" - புன்னகை.
ஓ...

புன்னகை.
*

"ஏங்க இந்த புக்குக்கு discount கிடைக்குமா..?"
"அதெல்லாம்...இல்லைங்க."
"மொத்த நாலு பாகமும் எவ்வளவு?"
"செம்பதிப்பா?"
"அப்படின்னா...?"
"செம்பதிப்புனா படமிருக்கும், இதுனா சாதா. Text, எழுத்து மட்டும் தான். படம் கிடையாது"
"செம்பதிப்பு எவ்வளவு?"
"மூவாயிரத்தி......"

***

Additional:
சண்முகவேல் - ஓவியரின் வலைதளம்.
இதுதமிழ் - விழா பிரபலங்கள் முழு பேச்சும்.
தினமணி, தமிழ் இந்து, மாலைமலர் - விழா குறித்த நாளிதழ் செய்திகள்.
குங்குமம் பேட்டி

வெண்முரசு - இணையத்தில் இலவசமாக படிக்க.
.

கல்கியின் தியாகபூமி - 2014-ல் எப்படி?

noreply@blogger.com (Surendhar) — Sun, 19 Oct 2014 19:32:00 +0000

சமிபத்தில் கல்கி எழுதிய தியாகபூமி வாசிக்க வாங்கினேன் (ஜீயே பப்ளிகேஷன்). கல்கியின் தியாகபூமி, முதலில் 1938-39ல் ஆனந்த விகடனில் வெளிவந்தது. சரியாக 75 வருஷங்களுக்குப் பின் எழுதுகிறேன். எப்படி இருக்கும்? பார்க்கலாம்...

தியாகபூமி

ஆனந்த விகடனில் ஓவியர் வரைந்த படங்களுக்குப் பதிலாகப் புகைப்படங்களுடன் -- திரைப்படத்துக்கான ஸ்டில் படங்களுடன் -- வெளிவந்திருக்கிறது ‘தியாக பூமி’. கல்கி, இருபது இதழ்களில் தொடராக எழுதியிருக்கிறார். கோடை, மழை, பனி, இளவேனில் ஆகிய 4 பாகங்களாக இருக்கும்.

ஒவ்வொரு அத்தியாத்திற்கும் தலைப்பு வைத்திருக்கிறார். மொத்தம் 69 அத்தியாயம். எவ்வளவு நாள் ஆகிவிட்டது இப்படி வாசித்து.

தியாகபூமி - ஆரம்பத்தில் சரளமாகக் கதைக்குள் இழுத்துவிடுகிறார். நிரம்ப உற்சாகத்துடன் கதை போகும்போது நடுவில் கொஞ்சம் நாடகத்தனத்தோடு சம்பவங்கள் நடந்துவிடுகிறது. பின் traditional ஆக முடிகிறதாகவே எனக்குப் படுகிறது.

தியாகபூமி - கதை

தியாகபூமி பக்கா மசாலா கதை -- சினிமா கதை. அன்றைய Hot topic ஆன தீண்டாமை, மது விலக்கு, பெண்விடுதலை, சுதந்திர போராட்ட பின்புலத்துடன், அப்பழுக்கில்லாத தந்தை, விசுவாச வேலையாள், உச்சு கொட்ட வைக்கும் பெண் குழந்தை, புரட்சி பேசும் பெண் - எல்லாவற்றையும் ஒரு கலக்கு கலக்கி commercial ஆக கொடுத்திருக்கிறார்.

சினிமாவாக எடுக்கப்படும் கதை என்ற விளம்பரம். வாராவாரம் சினிமா ஸ்டில்லோடு தொடர்கதை. அப்புறமென்ன கதை அமோக வெற்றி.

இந்த நாவல் ஒரு யதார்த்தக் குடும்பக்கதை.

அந்தகாலத்து ரயில்வே ஸ்டேஷன் ஒன்றில் துவங்குகிறது புதினம். தஞ்சாவூர் ஜில்லாவின் குடமுருட்டிப் பாசனத்தில், நெடுங்கரை கிராமத்தில் நடப்பதாகக் கதை. வருஷம் 1918.

சம்பு சாஸ்திரியின் மகள் சாவித்திரி. தந்தையுடன் பூஜை, புனஸ்காரங்கள், பஜனை, ஏழை எளியோருக்கு உதவி என்று ஒரு பக்கா கதாநாயகிக்கான அத்தனை குணாதிசயங்களும் கொண்டு வளைய வருகிறாள். அவளது சிற்றன்னை, சிற்றன்னையின் தாயார் என்று இருவரும் சொல்லத் தேவையில்லாமல் சாவித்திரியை அனைத்து விதங்களிலும் படுத்தியெடுக்கிறார்கள்.

மாடர்னான பெண்ணை எதிர்பார்த்துக் காத்துக் கிடக்கும் ஸ்ரீதரன், விருப்பமில்லாமல் பட்டிக்காட்டு சாவித்திரியை மணக்க நேர்கிறது. இங்கேயும் சொல்லத் தேவையின்றி வரதட்சணை கேட்டல், தாலிகட்டும் கடைசி நேரத்தில் இன்னமும் உயர்த்திக் கேட்டல் என்ற குணாதிசயங்கள் கொண்ட ஸ்ரீதரனின் அம்மா.

(அந்தக் காலத்திலேயே) நான்குநாள் கல்யாணம், நான்காயிரம் வரதட்சணை எல்லாம் தாண்டிச் சித்தியிடமிருந்து விமோசனம் கிடைத்தது என்று நினைக்கும் சாவித்திரிக்கு தன் புகுந்த ஊரான கல்கத்தாவில் பேரதிர்ச்சிகள் காத்திருக்கின்றன. வழக்கமான அல்லல்கள், அவலங்கள், மாமியார் அவஸ்த்தைகள்.

ஊரில் சாஸ்திரி நொடித்துப்போய்ச் சென்னை போய்விடுகிறார்.

விஷயம் தெரியாமல் நிறைகர்ப்பிணியாக கல்கத்தாவிலிருந்து தன்னந்தனியே கிராமத்திற்கு சாவித்திரி வந்தால் அடுத்த அதிர்ச்சி காத்திருக்கிறது. ஊரை வெள்ளம் சூழ்ந்தபோது வேற்று சாதியினருக்கு உதவியதற்காக ஊரைவிட்டு ஒதுக்கி வைக்கப்படும் சம்பு சாஸ்திரி மற்றும் குடும்பத்தினர் ஊரைக் காலி செய்து போய்விட்டனர்.

சாவித்திரிக்கு அக்ரஹாரம் அனுமதி மறுக்கிறது. சேரி உதவ வருகிறது. அவளும் சாஸ்திரியை தேடி பட்டணம் செல்ல குழந்தை பிறக்கிறது. குழந்தையை தற்செயலாகப் பார்க்கும் சாஸ்திரியிடம் விட்டுவிட்டு பம்பாய் போய்விடுகிறாள். சம்பு சாஸ்திரி தன் பேத்தி (சாரு) எனத் தெரியாமலேயே அந்தக் குழந்தையை வளர்க்கிறார்.

ஆறேழு வருஷம் கழித்து -- சினிமா போல -- பணக்காரியாக, உமாராணியாகத் திரும்புகிறாள். புரட்சிப் பெண்ணாக, நவநாகரிக மங்கையாக மாறியிருகிறாள் சாவித்திரி. வந்தவுடன் கரெக்டாக சாஸ்திரியைத் தேடி பெண்ணைச் சேர்த்து கொள்கிறாள்.

காலம் கரைகிறது. இதற்குள் கஷ்டபடும் ஸ்ரீதரன் தமிழகம் வந்து உமாராணியை அடையாளம் காண்கிறான். தன்னுடன் மறுபடி சாவித்திரி சேர்ந்து வாழ வேண்டும் என கோர்ட்டுக்குப் போகிறான்.
சாவித்திரி, நான் உனக்கு ஜீவனாம்சம் தருகிறேன், ஆளைவிடு என்கிறாள் (அப்போது விவாகரத்து சட்டம் கிடையாது). ஊரெல்லாம் இதே பேச்சு, பத்திரிக்கையில் வந்து ஒரே பரபரப்பாகிறது.

அப்புறம் சமத்துக் குழந்தையால் எல்லோரும் ஒன்று சேர்ந்து சுபம்!

---

நல்லானும், தீட்ஷிதர் கதாபாத்திரமும் குறிப்பிட்டு சொல்லவேண்டியவை. நல்லான் - சம்பு சாஸ்திரியின் அந்தரங்க உதவியாளன். சம்பு சாஸ்திரியின் சுக துக்கங்கள் அனைத்திலும் கடைசிவரைக் கூட இருப்பவன். தீட்ஷிதர் - வம்பு பேசும் ஒரு காரக்டர். இவர்கள் கதைக்கு துணையாக வந்தாலும் முக்கியமான திருப்பதிற்குக் காரணமானவர்கள்.

---

தியாகபூமி சினிமாவாக 1939-ஆம் ஆண்டு, மே இருபதாம் தேதி அன்றைய கெயிட்டி உட்பட பல தியேட்டர்களில் வெளியானது. கல்கி விகடனில் சினிமா விமர்சனம் என்று எல்லா சினிமாவையும் கிழிகிழி என்று கிழித்துக் கொண்டிருந்த காலம். இவர் கதை எழுதிய சினிமா வந்ததும் எதிர்பார்ப்பு அதிகமாகியது. சினிமாவில் பாபநாசம் சிவன் சம்பு சாஸ்திரியாகவும், எஸ்.டி. சுப்புலட்சுமி சாவித்ரியாகவும் நடித்தனர். சினிமாவில் குழந்தையாக நடித்த பேபி சரோஜா பெரிய ஸ்டார் ஆனார். அந்தக் காலத்தில் அது மிகவும் பாப்புலரான பேர், நிறைய குழந்தைகளுக்கு அப்படி பேர் வைத்தார்கள். பேபி சரோஜா பொம்மை ஒவ்வொரு வீட்டிலும் கொலுவை அலங்கரித்தது. படம் வந்தபோது மூடிபோட்ட பீப்பாய் ஷேப்பில் தூக்குபாத்திரம் 'உமாராணி' தூக்கு எனப்பட்டது.

படம் பெரும் வெற்றி.

பின்னர், தியாகபூமி திரைப்படம் பிரிட்டிஷ் அரசால் தடை செய்யப்பட்டது. அதற்குள் 150 நாள் ஓடிவிட்டு இருந்தது. Interesting.

---

கதையம்சத்தில் மட்டுமல்ல; பாத்திரங்களும் வாக்கியங்களின் ஜாலங்களும் நம்மை சொக்க வைக்கிறது.

இந்தப் புதினத்தின் முக்கிய அம்சங்களின் ஒன்று, கல்கி ஒவ்வொரு கதாபாத்திரத்தின் எண்ணங்களையும் அவரவர் பார்வையிலிருந்து சொல்லியிருப்பார்.

எனக்கு படிக்கும் போது பிடித்த பழைய சினிமா பார்பதுபோல் இருந்தது. Formula கதையாக இருந்தாலும் லேசான சரித்திர மதிப்பு, கல்கியின் தமிழ், எழுத்து நடைக்கும், சுவாரஸ்ய்ய கதை போக்கிற்கும் இக்கதையை நிச்சயம் படிக்கலாம்.

பி.கு:

1) B.A.(Tamilology) 'தியாகபூமி' பாடமாக வைக்கப்பட்டுள்ளது.

http://www.tamilvu.org/courses/degree/p101/p1013/html/p10134fr.htm
2) மலிவு விலை பதிப்பாக குடும்ப நாவல் ஜீ.அசோகன் வெளியிட்டு இருந்தார். (ஜீயே பப்ளிகேஷன் ரூ.30/- Aug, 2014).
3) ஜெயமோகன் இதை சிறந்த social romances லிஸ்டில் சேர்க்கிறார். அசோகமித்ரனும் இ.பா.வும் இதை சிபாரிசு செய்திருக்கிறார்கள்.

தமிழ் நாட்டிற் சினிமா

noreply@blogger.com (Surendhar) — Sat, 10 May 2014 02:29:00 +0000

நீங்கள் சினிமா விமர்சனம் எழுதுவதில்லையா? என கேட்கிறவர்களுக்கு எழுதியிருக்கேனே எனச் சொல்வதை நிறுத்திவிட்டேன். பழகிக்கொண்டேன்.

இப்போதெல்லாம் சினிமா நல்லா இருந்த 140 வார்த்தைகளுக்குள் வாட்ஸ்அப் அல்லது டிவிட்டி விடுகிறேன். விஸ்தாரமாக சொல்வதில்லை. விடாபிடியாக திருட்டு ஸிடியில் பார்க்காமல் தியேட்டரில் மட்டும் பார்க்கிறேன். அப்படியிருக்கும் இன்னும் சிலரும் வழக்கொழிந்து விடாமல் இருக்க வேண்டுமே என்றுதான் கவலையாக இருக்கிறது, நிற்க.

சினிமா விமர்சனம் எழுதும், சொல்லும் விமர்சகர் மேல் எனக்கொரு விசனமுண்டு. இப்போது விமர்சகர் எனத் தனியாக யாரும் இருப்பதில்லை. படம் பார்க்கும் அனைவரும் ரஸிகனாக, பொ போக்க மட்டும் வருவதில்லை, அவர்கள் உள் இருக்கும் விமர்சகனையும் உயிர்போடு வைத்து அழைத்து வருகிறார்கள். இதற்கு தகவல் தொடர்பு விரிந்ததும், நமது ரசனை உயர்ந்ததும்-தாழ்ந்ததும் ஒரு சமூக காரணம். போகட்டும்.

பொதுவாக நமது சினிமா, இப்போது எப்படி இருக்கிறது?

எப்போதும் இருக்கும் கேள்வி, எது ஜெயிக்கும்? இதற்கான பதில் கண்டிபிடித்துவிட்டால் Patent rights வாங்க தயார், நீ நான் என.

எல்லா எழுத்தாளர்களும் பிரியப்பட்டு சினிமா விமர்சனம் செய்திருக்கிறார்கள். அனைத்துப் பத்திரிக்கைகளும் - குமுதம், விகடன், தினத்தந்தி என அவர்கள் ஓரிருப்பக்கம் ஒதுக்கி பாராட்ட குட்ட செய்தார்கள், செய்கிறார்கள். விகடனில் மார்க் வாங்குவது விஷேசம்.

கல்கி அந்த காலத்திலேயே சர்வ தேசிய பிலிம் திருவிழாவுக்காகச் சென்னையில் காட்டப்பட்ட வெளிநாட்டு படங்களைப் பார்திருக்கிறார். ஒப்பிட்டு சொல்லியிருகிறார். 'மனிதன் எப்படி உயர்கிறான்?' ஒரு கட்டுரை எழுதியிருக்கிறார். (கல்கி கட்டுரைகள் தொகுதி-1, மணிவாசகர் பதிப்பகம்). அதில் 'சம்சாரம்' என மகத்தான வெற்றி பெற்ற படத்தை அவரது நடையில் எழுதியிருப்பார் (கழுவி, கழுவி ஊத்தியிருப்பார்!).

"பத்துப் படங்களுக்கு ஒரு படம் வீதமாவது நம் நாட்டையும் நாட்டு மக்களையும் உயர்த்தக் கூடிய முறையில் நம் ஸினிமா முதலாளிகள் உயர்தரப் படமாக எடுக்கக் கூடாதா? வெளிநாடுகளில் காட்டிப் புகழ்பெறக் கூடிய படமா எடுக்கக் கூடாதா?" . ஆனால் நல்ல படங்களை அவர் பாராட்டத் தவறியதில்லை. உதாரணம், நல்லதம்பி, சந்திரலேகா, வேலைக்காரி, வாழ்க்கை - போன்ற படங்களுக்கான இவரது விமர்சனம்.

புதுமைபித்தன் சினிமாவிலே இருந்திருக்கிறார். கல்கியிடம் இருந்த ஏக்கம் சுஜாதவிடமும் இருந்தது. இப்போது நிறைய எழுத்தாளர்கள் சினிமாவில் இருப்பது மகிழ்ச்சி.

விளக்கமாக சொல்லும் விமர்சனமும் ஒரு கலை, வரவேற்க கூடியதே. அதில் விற்பனர்கள் பார்த்துக் கொள்வார்கள். நமது பொறுப்பு நல்ல சினிமா எடுப்பதும், ரசிப்பதும்.

***

இதில் கவிதை செய்திருப்பவர் பாரதிதாசன் என்பது நம்மில் சிலர் தெரிந்திருக்கலாம். சினிமா விமர்சனத்தை கவிதையில் சொன்னதில் இவர்தாம் முன்னோடி. எளிமையாக, படித்ததும் புரியும். 56 வரியில் சொன்ன கவிதை அப்படியே இதோ...

உருவினையும் ஒலியினையும் ஒன்றாகச் சேர்த்தே
ஒளிபெருகத் திரையினிலே படங்காட்டும் கலையைத்
திருவிளைக்கும் நல்லறிஞர், ஐரோப்பி யர்கள்
தெரிந்துவெளி யாக்குகின்றார் எனக்கேட்ட நாளில்
'இருவிழியால் அதுகாணும் நாள் எந்த நாளோ,
என்நாடும் அக்கலையில் இறங்குநாள் எந்நாள்
இருள் கிழித்துத் தமிழ்நாடாம் நிலவுதனை, உலகின்
எதிர்வைக்கும் நாள் எந்நாள்' என்றுபல நினைத்தேன்.

ஒலியுருவப்படம் ஊரில் காட்டுவதாய்க் கேட்டேன்;
ஒடினேன்;ஒடியுட்கார்ந் தேன் இரவில் ஒருநாள்
புலிவாழும் காட்டினிலே ஆங்கிலப்பெண் ஒருத்தி,
புருஷர்சக வாசமிலாப் புதுப்பருவ மங்கை
மலர்க்குலத்தின் அழகினிலே வண்டுவிழி போக்கி
வசமிழந்த படியிருந்தாள்! பின்பக்கம் ஒருவன்
எலிபிடிக்கும் பூனைபோல் வந்தந்த மங்கை
எழில் முதுகிற் கைவைத்தான்! புதுமை ஒன்றுகண்டேன்.

உளமுற்ற கூச்சந்தான் ஒளிவிழியில் மின்ன,
உயிர் அதிர்ந்த காரணத்தால் உடல் அதிர்ந்து நின்றே,
தெளிபுனலின் தாமரைமேற் காற்றடித்தபோது
சிதறுகின்ற இதழ்போல செவ்விதழ் துடித்துச்
சுளைவாயால் நீயார்என் றனல்விழியாற் கேட்டாள்
சொல்பதில்நீ என்றதவள் சுட்டுவிரல் ஈட்டி!
களங்கமிலாக் காட்சி, அதில்இயற்கை யெழில்கண்டேன்!
கதைமுடிவில் 'படம்' என்ற நினைவுவந்த தன்றே!

எந்தமிழர் படமெடுக்க ஆரம்பஞ் செய்தார்,
எடுத்தார்கள் ஒன்றிரண்டு பத்து நூறாக!
ஒன்றேனும் தமிழர்நடை யுடைபா வனைகள்
உள்ளதுவாய் அமைக்கவில்லை, உயிர் உள்ளதில்லை!
ஒன்றேனும் தமிழருமை உணர்த்துவதா யில்லை!
ஒன்றேனும் உயர்நோக்கம் அமைந்ததுவா யில்லை!
ஒன்றேனும் உயர்நடிகர் வாய்ந்ததுவா யில்லை
ஒன்றேனும் வீழ்ந்தவரை எழுப்புவதா யில்லை!

வடநாட்டார் போன்ற உடை, வடநாட்டார் மெட்டு!
மாந்தமிழர் நடுவினிலே தெலுங்கு கீர்த் தனங்கள்!
வடமொழியில் ஸ்லோகங்கள்! ஆங்கில ப்ரசங்கம்!
வாய்க்கு வரா இந்துஸ்தான்! ஆபாச நடனம்!
அடையும் இவை அத்தனையும் கழித்துப் பார்க்குங்கால்,
அத்திம்பேர் அம்மாமி எனுந் தமிழ்தான் மீதம்!
கடவுளர்கள், அட்டைமுடி, காகிதப் பூஞ்சோலை
கண்ணாடி முத்துவடம் கண்கொள்ளாக் காட்சி

பரமசிவன் அருள்புரிய வந்துவந்து போவார்!
பதிவிரதைக் கின்னல்வரும் பழையபடி தீரும்!
சிரமமொடு தாளமெண்ணிப் போட்டியிலே பாட்டுச்
சிலபாடி மிருதங்கம் ஆவர்த்தம் தந்து
வரும் காதல்! அவ்விதமே துன்பம் வரும், போகும்!
மகரிஷிகள் கோயில்குளம் - இவைகள் கதாசாரம்.
இரக்கமுற்ற படமுதலாளிக் கெல்லாம் இதனால்
ஏழைகளின் ரத்தத்தை உறிஞ்சியது லாபம்!

படக்கலைதான் வாராதா எனனினைத்த நெஞ்சம்
பாழ்படுத்தும் முதலாளி வர்க்கத்தின் செயலால்,
படக்கலையாம் சனியொழிந்தால் போதுமென எண்ணும்!
பயன்விளைக்கும் விதத்தினிலே பலசெல்வர் கூடி
இடக்ககற்றிச் சுயநலத்தைச் சிறிதேனும் நீக்கி
இதயத்தில் சிறிதேனும் அன்புதனைச் சேர்த்துப்
படமெடுத்தால் செந்தமிழ் நாடென்னும் இளமயிலும்
படமெடுத்தாடும்; தமிழர் பங்கமெலாம் போமே!

***

56 வரிகளானாலும் பிற்பாடு படிக்கலாம் என வந்துவிட்ட அன்பர்களுக்கும், படித்தவர்களுக்கும் சேர்த்தே நான் சொல்ல விரும்புவது இதைத்தான் - விமர்சனம் வைப்பது முறைமை, ஒரு கலை. அதில் மெனக்கெடல் உண்டு. கவனம் தேவை. அதை விட ரஸிப்பது எளிமையானது. இயல்பாக வருவது.

வாருங்கள்... திறந்த மனதுடன் ரசிக்கலாம், (முடிந்தால்) ஆக்கலாம், பின் விமர்சிக்கலாம். அடுத்தடுத்த படிநிலையும் இதுதான்!

குட்டி இளவரசன் - பிரெஞ்சு நாவல்

noreply@blogger.com (Surendhar) — Mon, 12 Aug 2013 19:12:00 +0000

இதுவொரு குட்டி நாவல்.

LEPETIT PRINCE என பிரெஞ்சிலிருந்து தமிழில் மொழிபெயர்த்தவர்கள் வெ.ஸ்ரீராம், மதனகல்யாணி. பிரமாதமாக செய்திருக்கிறார்கள். இதுவரை 200 மொழிகளில் வெளியாகி, 14 கோடி பிரதிகளுக்கு மேல் விற்பனையாகியிருக்கிறது. 1943-ல் வெளியான இந்த நாவல் தமிழில் 1981-ல் 'க்ரியா' பதிப்பித்திருக்கிறது. Braille முறையிலும் வெளியிட்டு இருக்கிறார்கள். Braille முறை என்பது கண் தெரியாதவர்கள் வாசிக்கும் முறையாகும்.

Antoine de Saint-Exupery
குட்டி இளவரசன் நாவலை எழுதியவர் அந்த்வான் து செந்த்-எக்சுபெரி Antoine de Saint-Exupery. 1923-ல் இவர் இராணுவத்தைவிட்டு வெளியே வந்துவிட்டார். எழுதுவதில் ஆர்வம் கொண்டு 1925-ல் தனது முதல் புத்தகத்தை வெளியிட்டார்.

இவர் ஒரு முறை சகாரா பாலைவனத்தில் விமானக்கோளாறு காரணமாக தரையிறங்கினார். ஒரு நபர் ஓட்டும் விமானம் என்பதால் துணைக்கும் யாருமில்லை. அங்கு மனிதர்கள் இல்லை. கண்ணுக்கெட்டியவரை மணல். தனிமை. பகலிரவாக மணலையும், ஆகாசத்தையும் பார்த்தபடியே கிடந்தார். இவருக்கு துணையாக காற்று மட்டும் வீசிக்கொண்டேயிருந்திருக்கிறது. அந்த நாட்களில் அவர் அடைந்த பயம், கற்பனை, பரவசம் இன்னும் பலவென அவருக்குள் ஆழமான மாற்றத்தை உருவாக்கியிருக்கிறது.

இரண்டாவது உலகப் போரில் 1944-ல் ஜுலை 31-ஆம் தேதி கார்ஸிகாவில் போர்கோ என்ற இடதிலிருந்து விமானத்தில் சென்ற அவருக்கு என்ன ஆயிற்று என்றறிய முடியாதவாறு மறைந்துபோனார். இவர் கதை ஒன்றின் கதாபாத்திரம் போல காணாமலே போனார்.

இவரது இலக்கியச் சேவையை சிறப்பிக்கும் விதமாக பிரெஞ்சு தேசம் ஐம்பது பிராங்க் நோட்டில் அவரது கதையில் வரும் குட்டி இளவரசன் மற்றும் யானையை விழுங்கிய மலைப்பாம்பு ஆகிய படங்களை வெளியிட்டுள்ளது.

இந்த 'குட்டி இளவரசனை' இத்தனை மொழிகளில் உலவவிட்டிருப்பது எது?

கதையில் குட்டி இளவரசன் கேட்கும் கேள்விகள் எளிமையானவை, தத்துவார்த்தமானவை, உலகை எந்த மனத்தடையும் அற்று நெருங்க சொல்பவை. தான் ஒருமுறை கேட்ட கேள்வியை ஒரு போதும் மறக்காத குட்டி இளவரசன் பதில் பெறும்வரை மீண்டும் மீண்டும் நினைவு படுத்துவான்.

கதை இப்படி ஆரம்பிக்கிறது - "எனக்கு ஆறு வயதானபோது ஒரு அற்புதமான படத்தைப் பார்த்தேன். மலைபாம்பு காட்டுவிலங்கை விழுங்குவதாக. அதேபோல் யானையை ஒரு மலைபாம்பு விழுங்குவதாக நான் வரைந்தேன். பெரியவர்களுக்கு அது புரியவில்லை. பெரியவர்களுக்கு விளக்கங்கள் தேவையாகயிருக்கிறது. எதையும் தாங்களாகவே புரிந்துகொள்வதில்லை. எப்போதும் ஓயாமல் அவர்களுக்கு விளக்கங்கள் தருவது குழந்தைகளுக்குச் சலிப்பாக இருக்கிறது."

The Little Prince - குழந்தைகளுக்கான புத்தகம். பெரியவர்களுக்குமான கதை.

இனி சுருக்கம்,-

கதையை சொல்பவராக விமானி. ஒரு நாள் விமானம் பழுதடைந்து தனியாக பாலைவனத்தில் இருக்கிறார். அங்கு ஒரு சிறுவனைக் காண்கிறார். ஆள் நடமாட்டம் ஏதுமில்லாத இந்த இடத்தில் இச்சிறுவன் எப்படி என ஆச்சரியம் படுகிறார். வேறு கிரகத்தில் இருந்து வந்த சிறுவன் என அறிந்து கொள்கிறார். சிறுவன்தான் குட்டி இளவரசன்.

அவன் விமானியிடம் ஓர் ஆட்டுகுட்டியை வரைந்து தர சொல்கிறான். குட்டி இளவரசனுக்கு தனியாக கிரகம் இருகிறது. சிறிய கிரகம். நமது வீட்டைவிட சற்று பெரியது. அவ்வளவுதான் அந்த கிரகம். அங்கு ஒரு ரோஜா செடியிருக்கிறது. பூவோடு பேசுகிறான். குட்டியாக மூன்று எரிமலையிருக்கிறது. தனி ஒருவனாக கிரகத்தில் வாழ்வதால் அந்த கிரகத்தை சுத்தம் செய்வது முதல் சகல வேலைகளையும் அவன் ஒருவனே செய்கிறான்.

ஒரு வேலையைத் தேடிக்கொள்ளவும் அறிவை வளர்த்துக்கொள்ளவும் தன்னைச் சுற்றிய சிறு கிரங்களை நோக்கி அவன் பயணம் செய்கிறான். முதல் கிரகத்தில் அரசன் ஒருவரைச் சந்திக்கிறான். இன்னொன்றில் தற்பெருமைக்காரன், மற்றதில் குடிகாரன், அடுத்த கிரகத்தில் ஒரு 'பிஸினஸ்மேன்', ஐந்தாவதில் தெருவிளக்கு ஏற்றுபவன், ஆறாவதில் பிரமாண்டமான புத்தகங்களை எழுதிக்கொண்டிருக்கும் புவியியலாளன் - முதியவர் - என வரிசையாக சந்தித்து ஏழாவதாக பூமிக்கு வருக்கிறான்.

பூமியில், பாலைவனத்தில் ஒரு பாம்பைச் சந்திக்கிறான், அதோடு பேசுகிறான். மனிதர்களைத் தேடிச் செல்கிறான். வழியில் ஒரு மலரைச் சந்தித்து அதன் சுகதுக்கங்களைக் கேட்கிறான். பின் நரியை சந்திக்கிறான்.

நரி, அவனிடம் ரகசியம் சொல்கிறது. 'இதயத்திற்கும் பார்வை உண்டு. அது கண்களுக்குத் தென்படாததைப் பார்க்க முடியும்' என்கிறது.

அதனால் நரியோடு நட்பு கொள்கிறான். அதன் பிறகு நமது விமான ஓட்டியைச் சந்தித்து அவனுடன் பழகி நட்பாகிறான். இருவரும் ஒன்றாக பொழுதைக் கழிக்கிறார்கள்.

குட்டி இளவரசன் வானில் உள்ள நட்சத்திரங்கள் வெறும் ஒளி அல்ல. அவை கண்ணுக்குத் தெரியாத சிரிப்பு. அதை நீ உணர வேண்டும் என்று கற்றுத் தந்துவிட்டுப் பிரிந்து போய்விடுகிறான். உயிர் பிழைத்து சொந்த ஊருக்கு வந்தபிறகும் குட்டி இளவரசன் நினைவோடு அவன் மறுமுறை வரக்கூடும் என்று ஏக்கத்துடன் விமானி காத்திருப்பதாக முடிகிறது.

இந்த கதையில் குட்டி இளவரசன் மனிதர்களைத் தேடி செல்லும் வழியில் மலரிடம் பேசும் ஒரு பகுதி வருகிறது. இந்த கதையின் எழுத்து நடைக்கு ஒரு சாம்பிள்.

குட்டி இளவரசன் மிக நவீனமான ஒரு கதாபாத்திரம். அவனால் எலி, நரி போன்றவற்றை எளிமையாகப் புரிந்துகொள்ள முடிகிறது. ஆனால் மனிதர்களை புரிந்துகொள்ள முடியவில்லை.

கதையின் மையமாக நான் கருதும் சம்பவம். விமானிக்கு குட்டி இளவரசன் கற்று கொடுக்கும் 'கண்ணுக்கு தெரியாததைப் பார்க்க முடியும்' என்று சொல்லிக் கொடுப்பதைதான். பெரியவர்களான நமக்கும் குட்டி இளவரசன் சொல்வதும் இதுவே.

இதைப் படிக்கும் போது நமக்கு கிடைக்கும் அனுபவம் அலாதியானது. இளவயதில் படித்தால், நடுத்தர வயதில், பெரியவர்கள் படித்தால் என்று படிக்கும் போது கிடைக்கும் அனுபவமும் புரிதலும் முக்கியமானது. இதனாலேயே குட்டி இளவரசன் புத்தகம் வெற்றி பெறுகிறது. மற்றும் இக்கதை கவித்துவத்தோடு சொல்லப்பட்டிருப்பது ஒரு மேலும் ஒரு சிறப்பு.

குட்டி இளவரசன் அழகான சிறுவன். ஒரு மலரைப் பாதுக்காப்பாகக் காப்பற்ற தெரியாத மனிதர்கள் எப்படி பூமியைக் காப்பாற்றுவார்கள் என்று கேட்கிறான். ரோஜாவை வளர்க்க தெரிந்த மனிதனுக்கு அதை புரிந்து கொள்ளத் தெரியவில்லை என்கிறான். இயற்கை மனிதர்களுக்கு தந்திருப்பதை மனிதர்கள் எப்படி கண்டுகொள்ளாமல் சிதைக்கிறார்கள் என்பதையே நாவல் விவரிக்கிறது.

சின்ன புத்தகம் - வாசித்துவிடலாம்.

***

உதவியவை:

1. குட்டி இளவரசன், க்ரியா பதிப்பகம். Rs.100/-
2. ரயிலேறிய கிராமம், உயிர்மை பதிப்பகம். Rs.125/-
3. http://www.thehindu.com/news/cities/Madurai/braille-edition-of-french-classic-released/article4580383.ece

35வது சென்னை புத்தகக் காட்சி

noreply@blogger.com (Surendhar) — Wed, 25 Jan 2012 21:16:00 +0000

என் முறை

*****

பூவேடு சேர்ந்து நாரும் மணக்கும்

Like the fiber which holds the flower, gets the fragrance of the flower.

*****

சென்னையில் 35-வது புத்தகக் காட்சி கடந்த 5 ஜனவரி 2012 வியாழன் தொடங்கியது. வழக்கம் போல் நண்பர்களுக்கு சொல்லிக் கொண்டேயிருந்தேன்... பல தடவை போய் வந்தேன். அரங்க உட்கட்டமைப்பு மற்றும் வசதிகளில், ஒவ்வொருமுறைக்கும் நல்ல முன்னேற்றம். வந்த நண்பர்களும் நிறைய வாங்கினார்கள்.

முதல் முறையாக தத்தமது ஜோடிகளுடன் வந்தவர்களும் வாங்கினார்கள். சிறு பரிசளிப்புகளில் மகிழ்ச்சியை பகிர்ந்து கொண்டோம். தவறவிட்டவர்கள் அடுத்த ஆண்டு வாருங்கள். இம்முறை வந்தவர்கள் நிச்சயம் அடுத்த தடவை வருவார்கள். வர வைக்கும்!

பார்த்து பார்த்து வாங்கியதில் பட்டியல் கொஞ்சம் நீளம்...

வாங்கிய விவரம்

பகுதி ஒன்று

1. பாரதி நினைவுகள் - யதுகிரி அம்மாள், பாரதி புத்தகாலயம்.ரூ.50

2. ஆமென் - சிஸ்டர் ஜெஸ்மி, காலச்சுவடு பதிப்பகம்.ரூ.175

3. குமாயுன் புலிகள் - ஜிம் கார்பெட், காலச்சுவடு பதிப்பகம்.ரூ.125

4. பரத்தையருள் ராணி(கவிதைகள்) - லீனா மணிமேகலை, உயிர் எழுத்து பதிப்பகம்.ரூ.150

5. எம்.ஆர்.ராதாவின் சிறைச்சாலை சிந்தனைகள் - விந்தன், பாரதி புத்தகாலயம்.ரூ.70

6. ஒரு ரகசிய விருந்திற்கான அழைப்பு(கவிதைகள்) - ஜோமனா ஹத்தாத், உயிர்மை பதிப்பகம்.ரூ.70

7. சிறைப்பட்ட கற்பனை(சிறையிலிருந்து கடிதங்கள்) - வரவர ராவ், எதிர் வெளியீடு.ரூ.150

8. ஐரோம் ஷர்மிளா - க.சிவஞானம், நக்கீரன் வெளியீடு.ரூ.70

9. விழித்திருப்பவனின் இரவு - எஸ்.ராமகிருஷ்ணன், உயிர்மை பதிப்பகம்.ரூ.110

10. அன்டன் செகோவ் சிறுகதைகள் -தமிழில்: எம்.எஸ், பாதரசம் வெளியீடு.ரூ.90

பகுதி இரண்டு

1. மாப்பசான் கதைகள் - தமிழில்: சுரா, ராம்பிரசாந்த் பப்ளிகேஷன்ஸ்.ரூ.55

2. ஷேக்ஸ்பியரின் மெக்பெத்(நாவல் வடிவம்) - ஜே.கே.இராஜசேகரன், நியூ செஞ்சுரி புக் ஹவுஸ்,ரூ.140

3. முன்சுவடுகள்(சில வாழ்க்கை வரலாறுகள்) - ஜெயமோகன், உயிர்மை பதிப்பகம்.ரூ.75

4. போட்டித் தேர்வுகளுக்கான அறிவியல் கட்டுரைகள் - எஸ்.விஸ்வநாதன், (நக்கிரன்)ரூ.40

5. தீராக்காதலி - சாரு நிவேதா, உயிர்மை பதிப்பகம்.ரூ.80

6. ஆண்பால் பெண்பால் - தமிழ்மகன், உயிர்மை பதிப்பகம்.ரூ.200

7. பேசிக்கடந்த தூரம்(நேர்காணல், கேள்வி-பதில்கள்) -எஸ்.ராமகிருஷ்ணன், உயிர்மை பதிப்பகம்.ரூ.130

8. எப்போதுமிருக்கும் கதை (எஸ்.ராமகிருஷ்ணன் நேர்காணல்கள்), உயிர்மை பதிப்பகம்.ரூ.65

9. ஜெயித்தவர்கள் சொல்லாத பாடம்(Outliers) - Malcolm Gladwell, விகடன் பிரசுரம்.ரூ.95

10. எக்ஸைல் - சாரு நிவேதா, கிழக்கு பதிப்பகம்.ரூ.250

பகுதி மூன்று

1. ஆனந்த விகடன் 'பொக்கிஷம்', விகடன் பிரசுரம்.ரூ.180

2. ஆனந்த விகடன் 'காலப் பெட்டகம்'(1926 முதல் 2000வரை...), விகடன் பிரசுரம்.ரூ.180

3. கடைசி டினோசார் - தேவதச்சன், உயிர்மை பதிப்பகம்.ரூ.85

4. அனுபவங்களின் நிழல் பாதை(பயணக் கட்டுரைகள்) -ரெங்கையா முருகன், வி.ஹரிசரவணன், வம்சி புக்ஸ்.ரூ.300

5. இந்தியா ஒரு வல்லரசு: வேடிக்கையான கனவு - அருந்ததி ராய், விடியல் பதிப்பகம்.ரூ.30

6. பெயரிடாத நட்சத்திரங்கள்(ஈழப் பெண்போராளிகளின் கவிதைகள்), ஊடறு + விடியல் வெளியீடு.

7. உயிரினங்களின் தோற்றம் - சார்லஸ் டார்வின், விடியல் பதிப்பகம்.ரூ.65

8. ஜுதான்-எச்சில்(தலித் சுயசரிதை-இந்தி) - ஓம்பிரகாஷ் வால்மீகி, விடியல் பதிப்பகம்.ரூ.65

9. ஊரும் சேரியும்(கன்னட தலித் சுயசரிதை) - சித்தலிங்கையா, விடியல் பதிப்பகம்.ரூ.75

10. பதிற்றுப்பத்து - ஐங்குறுநூறு: சில அவதானிப்புகள் - ராஜ் கௌதமன், விடியல் பதிப்பகம்.ரூ.80

11. சங்கஸ் சித்திரங்கள் - ஜெயமோகன், தமிழினி.ரூ.110

வீடியோ:
இலக்கிய பேருரைகள்(7) - எஸ்.ராமகிருஷ்ணன், ரூ.600

ஜெயஸ்ரீ வாங்கியது

1. காவல் கோட்டம் - சு.வெங்கடேசன், தமிழினி.ரூ.650
(சாகித்ய அகாதமி விருது2011, கனடா தமிழ்ச் சங்க விருது)

*****

ரசித்தது:

http://karkanirka.org/ இங்கு சுவாரஸ்யமாக Tamil Proverbs தொகுத்திருக்கிறார்கள், உதாரணத்திற்கு:

குறையச் சொல்லி, நிறைய அள.

Tell the defect to get more quantity.

Explanation:

To point out the defect in the goods to make a good bargain

*****

அஞ்சும் மூன்றும் உண்டானால், அறியாப்பெண்ணும் சமைக்கும். - என்னவென்று இதை யோசியுங்கள்.

*****

Facebook keyboard shortcuts

noreply@blogger.com (Surendhar) — Tue, 22 Mar 2011 18:34:00 +0000

நம்மில் சிலருக்கு key board shortcut-ஏ தகராறாக இருக்கும் போது... இதுவொரு புது கலாட்டாவாகத் தெரியும்.

'ஃபேஸ் புக்' (Face book-ல்) ஓர் ஆண்டுக்கும் மேலாக பயணீட்டாளராக இருப்பதால், இந்த சலுகையை நானாக எடுத்துக் கொண்டேன்.

பொறுத்தருள்க !

*****

புதியவர்களுக்கு, ஃபேஸ் புக்கின் shortcut key அறிந்துக் கொள்ளும் முன்னர், Modifier key என்பதை என்னவென்று தெரிந்துக் கொள்ளுங்கள். keyboard-ல் இருக்கும் Alt, Ctrl and Shift கீகளே Modifier key.

நீங்கள் உபயோகிக்கும் உலாவி (Browser) மற்றும் இயக்கு தளத்திற்கான (Operating system) key combination கீழே.

உதாரணமாக, நீங்கள் Firefox-ஐ windows-ல் உபயோகிப்பவராக இருந்தால் Alt + Shift + 1 அழுத்தி ஃபேஸ் புக்கின் Home Page திறக்கலாம்.

Internet Explorer உபயோகிப்போர், Alt + 1 அழுத்தி ஃபேஸ் புக்கின் Home Page திறக்கலாம்.

*Internet Explorer-ல் M வேலை செய்யாது.

இது கூட தெரியாதா என்று கேட்கிற நண்பர்களுக்கு மட்டும்:

என்ன Boss பண்றது !
.

நேற்று ஜப்பானில் நடந்தது...

noreply@blogger.com (Surendhar) — Mon, 21 Mar 2011 03:24:00 +0000

***ஜப்பான் உணர்த்தும் பாடம்***

ஜப்பான் தனக்கு ஏற்பட்டிருக்கும் பேரழிவைத் துணிவுடன் எதிர்கொண்டுள்ளது என்பது உண்மை.

ஆனால், மின்வெட்டு, உணவுப் பற்றாக்குறை, எல்லோரையும் பயமுறுத்தும் அணுக் கதிர்வீச்சு அபாயம் என்று நிலைகுலைந்து போயிருக்கிறது. தலைநகரான டோக்கியோ உள்ளிட்ட நகரங்களிலிருந்து வெளியேறி 500 மைல்களுக்கு அப்பாலுள்ள நகரங்களுக்கு இடம் பெயர்கிறார்கள் பலர்.

சுனாமியால் ஆயிரக்கணக்கானோர் பலியாகிவிட்டனர். இதுவரை சுமார் 20 ஆயிரம் பேர். சுனாமியால் ஃபுகுஷிமா நகரிலுள்ள அணு மின் உற்பத்தி நிலையம் வெகுவாகப் பாதிக்கப்பட்டது. நிலையத்திலிருந்து 4 அணு உலைகளும் வெடித்துவிட்டன. இதனால் அங்கு கதிரியக்கப் பாதிப்பு ஏற்பட்டது. அணு மின் நிலையத்தில் மின்சாரம் இல்லாததால் அங்குள்ள குளிர்விப்பாங்கள்(Coolers) செயலிழந்துவிட்டன. தண்ணீர் சூழ்ந்திருப்பதால் அங்கிருக்கும் ஜெனரேட்டர்களையும் இயக்க முடியவில்லை. இதன் காரணமாகவே அணு உலைகள் வெடித்தன.

கடல் நீரைக் கொண்டு அணு உலைகளை குளிர்விக்க நடவடிக்கைகள் தீவிரப் படுத்தியும், இயக்க பொறியாளர்கள் மேற்கொண்ட முயற்சி பலனளிக்கவில்லை.

*****

இது ஜப்பானின், இன்றைய சூழல். அணு மின் நிலையங்கள் மனிதனின் விஞ்ஞான வளர்ச்சிக்கு எடுத்துக் காட்டாக வர்ணிக்கப்பட்டு வந்தன. ஆனால் அணுசக்தியின் அபாயங்கள் எத்தகையவை என்பதை ஜப்பானைப் பார்க்கும்போதுதான் உணர முடிகிறது*.

இந் நிலையில் நம் நாட்டு பாதுகாப்பு பணிகள் எப்படி இருக்கின்றன என்பது தான் நூறு மில்லியன் டாலர் கேள்வி?

பதில் பார்போம்...

அணு உலை குறித்து பாதுகாப்பு அவசியம் என்று பிரதமர் கருத்து கூறியிருக்கிறார். இதை ஒப்புக்காகச் சொன்னதாகவே கருத்து கணிப்பில் (73.92%) மக்கள் நினைக்கிறார்கள்.

நிபுணர்களின் கருத்தும், இதை ஒட்டியதாகவே இருக்கிறது. உதாரணமாக - 'பூவுலகின் நண்பர்கள்’ அமைப்பின் சுந்தர்ராஜன்,

''தமிழகத்தில், கல்பாக்கத்தில் ஓர் அணு உலை செயல்பட்டு வருகிறது. இந்த மார்ச் 31-ம் தேதி முதல் கூடங்குளத்திலும் அணு உலையைத் திறக்கிறார்கள். இதுவரை நாட்டில் உள்ள அனைத்து அணு மின் நிலையங்களில் இருந்தும் பெறப்படும் மின்சாரத்தின் அளவு வெறும் 4,385 மெகாவாட்தான். ஆனால், நமக்கான தேவையோ 1,70,000 மெகாவாட்! எனவே, 'பல்லாயிரம் கோடிகள் செலவழித்து குறைந்த அளவிலான மின்சாரம் ஏன் தயாரிக்க வேண்டும்?’ என்பதுதான் முதல் கேள்வி.

மரபு சாரா எரிசக்தி மூலம் அல்லது சூரிய ஒளியைப் பயன்படுத்தியோ நாம் மொத்த நாட்டுக்கும் மின்சாரம் பெற்றுவிட முடியும் என்கிறபட்சத்தில், அதற்கான நடவடிக்கைகளை ஏன் எடுக்கத் தயங்குகிறது நம் அரசு?

கடந்த 2008-ல் அமெரிக்காவுடன் அணு ஒப்பந்தம் செய்யப்பட்டது. அதில், உலக நாடுகளில் இருந்து யுரேனியத்தையும், அணு உலைகளையும் இந்தியாவில் இறக்குமதி செய்யப்போவதாகத் தெரிவித்துள்ளனர்.

நம் நாட்டிலேயே 1,20,000 மெட்ரிக் டன்னுக்கும் அதிகமாக யுரேனியம் இருக்கும்போது, இறக்குமதி ஏன்? இந்த ஒப்பந்தத்தின் மூலம் 2020-ல் சுமார் 5 லட்சம் கோடி மதிப்பில் வியாபாரம் நிகழ்த்தப்பட இருக்கிறது. மேலும், உபயோகமான யுரேனியத்தை மீண்டும் உபயோகிக்கும்போது, அதில் இருந்து வெளிப்படும் கழிவுகளும் அதிகம் பாதிப்பைத் தரும்.

அந்த ஒப்பந்தத்தில் சொல்லப்பட்டு இருக்கும் இன்னொரு விஷயம்... இழப்பீடு. அணு விபத்துகள் ஏதேனும் ஏற்பட்டால், அதற்கு 1,500 கோடி இழப்பீடாகத் தர வேண்டும். ஆனால், இதில் 500 கோடியை மட்டும் அணு உலை நிறுவனங்கள் செலுத்தினால் போதுமாம். மீதித் தொகையை அரசே செலுத்துமாம். எத்தனை வருடங்கள் கழித்து விபத்து ஏற்பட்டாலும், இதே 1,500 கோடிதான் இழப்பீடு. ஆக, இதை எல்லாம் பார்க்கிறபோது, அணு மின் நிலையங்கள் என்பதே தேவை இல்லாத விபரீதங்கள்தான்!'' என்றார்**.

*****

ஜப்பானில் நம்பர் 1 பாதுகாப்பு என்று சொல்லக்கூடிய அளவுக்கு இருந்த அணு உலையிலேயே விபத்து ஏற்பட்டுவிட்டது.

வாழ்ந்து கெட்டவன் என்று நாம் பரிதாபப்படுவோம். விஞ்ஞானம் தரும் எல்லா சுகத்துக்கும் ஆசைப்பட்டவர்கள் ஜப்பானியர்கள். வசதியான வாழ்வு என்று நாம் கருதும் எல்லாமே அவர்களுக்கு அடிப்படைத் தேவைகள். ஒரு ஆழிப்பேரலை அத்தனையையும் அழித்துப் பல ஜப்பானியர்களை நடுத்தெருவுக்குக் கொண்டு வந்து விட்டிருக்கிறது. எஞ்சி இருப்பவர்களை கதிர்வீச்சு அபாயம் பயமுறுத்திக் கொண்டிருக்கிறது.

ஒரு விபத்து நேர்ந்துவிட்டது என்பதற்காக அணு மின் சக்தி வேண்டாம் என்று கூறுவது முட்டாள்தனம் என்கிறார்கள் சிலர். அவர்கள் தங்களைப் பாதிக்கப்பட்ட ஜப்பானியர்களில் ஒருவராகச் சிந்தித்து, இந்தப் பிரச்னையை அணுகிப் பார்க்கட்டும். விடை கிடைக்கும்!

*****

பின் குறிப்பு:

*http://bit.ly/fXdsTP அணு மின்உலை பற்றி பத்திரிகையாளர் சுந்தர்ராஜனின் பதிவு.
** 20 மார்ச்2011, ஜூ.வி. பேட்டியில்.

முதல்வரின் உண்மை

noreply@blogger.com (Surendhar) — Tue, 22 Feb 2011 19:14:00 +0000

இலேசாக தலைவலி..... அதனால் என்ன என்று நான் இருந்திருக்கலாம். இல்லை தைலம் தடவி சாய்ந்திருக்கலாம். இரண்டும் இல்லாமல் இப்படி ஆகிவிட்டதற்கு காரணமும் நானே!

என்ன நடந்தது?

தமிழக முதல்வர் கருணாநிதி அவர்களின் பேச்சை படிக்க நேர்ந்தது. சமீபத்தில் நடைபெற்ற ப.ஜீவானந்தம் அவர்களின் இல்ல மணவிழாவில் கலந்து கொண்டு பேசினார்.

'அரசியல் நாகரிகத்தை தமிழ் நாட்டைத் தவிர வேறு எல்லா இடங்களிலும் பெற்றிருக்கிறார்கள். தமிழ் நாட்டிலே தான் அந்த உறவு மனப்பான்மை, அந்த நேச மனப்பான்மை, அந்த நாகரிகம் இல்லை. .....இன்றைக்கு என்னவோ, அரசியல் நாகரிகம் என்றால் என்ன விலை - எந்தக் கடையிலே விற்கிறது என்று கேட்கின்ற அளவுக்கு - விசாரிக்கின்ற அளவுக்கு நாகரிகம் நலிந்து போய்விட்டது. நசிந்து போய் விட்டது'.
(முரசொலி 8.2.2011) http://bit.ly/dOR82Z

முதல்வர் கூறியது முற்றிலும் உண்மைதான். தமிழகத்தில் அரசியல் நாகரிகம் சற்றும் இல்லாமல் போய்விட்டதோ என சிந்தித்து, ஏற்றுக் கொண்டுவிட வேண்டியதுதான் என பெருமூச்சு விட்டேன்.

ஆனாலும் பாருங்கள் இன்னொன்றும் என் கண்ணில் பட்டது.

அது, சுப்ரமணியம் சாமிக்கு, வழக்கறிஞர் நோட்டீஸ் அனுப்பப் பட்டது தொடர்பாக கழக துணைப் பொதுச் செயலாளர், தமிழக சட்ட அமைச்சருமான துரைமுருகன் வெளியிட்டுள்ள பதில். பதிலின் ஒரு பகுதியில் இப்படிக் குறிப்பிட்டுள்ளர். அதுவும் அதே தேதியில்....

'சுப்பிரமணியம் சுவாமி என்பவர் யார், அவருடைய குணாதிசயங்கள் என்ன என்பதை இந்திய நாட்டு மக்கள் நன்கறிவார்கள். தனக்கு சம்பந்தம் இல்லாத விஷயங்களில் எல்லாம் தான் ஏதோ மெத்தப் படித்த "மேதாவி" என்பதைப் போலக் காட்டிக் கொள்பவர். அரசியலில் கூடு விட்டு கூடு பாயும் பேர்வழி. நாடு விட்டு நாடு போய் நஞ்சை கொட்டி விட்டு வரும் ஜென்மம். ஒரு கட்சியில் கூட நிலையாக நிற்காத அரசியல் நாடோடி. ஆதாயம் கிடைக்கிறது என்றால், யாருக்கும் பல்லக்கு தூக்கும் வாடகை மனிதர். விளம்பரம் கிடைக்கும் என்றால் மனிதக் கழிவையும் கூட தொடத் துணியும் அற்ப பேர்வழி. பொதுவாகச் சொல்லப் போனால் இந்தியாவில் ஒரு முதிர்ந்த அரசியல் ஜோக்கர் என்று கூறலாம். ஆனால் அவருக்கு தான் ஒரு அறிவாளி, மேதை என்கிற நினைப்பு. அதனால் எதிலும் மூக்கை நுழைக்கலாம் என்கின்ற அரிப்பு.

அந்த அரிப்பின் விளைவுதான்.....' இப்படி நீள்கிறது. http://bit.ly/ebogFS

இப்போது சொல்லுங்கள். தமிழகத்தில் அரசியல் நாகரிகம் இல்லை என்று கருணாநிதி அவர்கள் கூறியது எப்பேர்பட்ட உண்மை.

துரைமுருகனுக்கு அவரின் தலைவர் சொன்னது தெரியாது போலிருக்கிறது. இல்லை என்றால் தைரியமாக அதே தேதியில் அந்த அறிக்கையை வெளியிடுவாரோ. இல்லையில்லை.... இருக்காது. பின் ஒரு மந்திரிக்கு, முதல்வர் சொன்னது தெரியாமல், முதல்வரின் பேச்சை கேட்காமல் வேறு என்ன செய்துவிடுவார்.

அது மக்களுக்காக மக்களிடம் சொன்னது என்று கூடவா நமது அமைச்சருக்கு தெரியாமல் போய்விடும். அப்படிதான் இருக்க வேண்டும்.

அதே நேரத்தில், முதல்வரும் இதை அறிந்திருப்பார். அப்படியானால் அமைச்சரின் மீது என்ன நடவடிக்கை வருமோ(!), என்னவாகுமோ என்பதையும் பொறுத்திருந்துதான் நாம் பார்க்கவேண்டும். இதற்காக முதல்வர் நடவடிக்கை எடுக்காவிட்டால்? துரைமுருகன் கூறியது நாகரிகமானது என்று (முதல்வர் போல்) ஏற்றுக் கொண்டுவிட்டால் போகிறது !

*****

ஒரு வேளை தைலமே தடவியிக்கலாமோ?
.

கவிதை தருணங்கள்

noreply@blogger.com (Surendhar) — Tue, 15 Feb 2011 19:14:00 +0000

கவிஞர் சொன்னது போல் 'நான் கவிஞனுமில்லை.... நல்ல ரசிகனுமில்லை....' இரு கைகளையும் முதலிலேயே தூக்கிவிடுகிறேன். ஆனாலும் கவிதைப் பற்றி பேச ஆசை.

காதலர் தின பிப்ரவரி, மூச்சு முட்ட தமிழகம் முழுவதும் ஆடி வெள்ளம் போல பொங்கி ஓடுகிறது கவிதை. இதில் விஷயமே, நம் எல்லோருக்கும் கவிதை வருகிறது. கவிதை உள்ளம் அபரிதமாக இருக்கிறது. சென்னை தொட்டு நாகர்கோவில், கன்னியாகுமரி தெருகோடி வரை அத்தனை பேர்களுக்கும் 'கவிதை' சரளம்.

இளைஞர்கள் எந்நேரமும் ஆய்தமாயிருக்கிறார்கள். கைகடிகாரம், காங்கிரீட் வீடுகள், கற்பு, ஏழை, காகா, மழை, முத்தம், யுத்தம், மறதி, துக்கம் என எதுவும் கருப்பொருள் ஆகிவிடுகிறது. குழந்தையோ, பிரசவமோ அவர்களுக்கு சுலபம்.

கவிதை வளர காரணிகளாக வாரம்தோறும் பத்திரிக்கைகள் பத்து ரூபாய் முதல் சன்மானம் கொடுத்து வளர்த்துவிடுகிறது. முதல் மீசை மழித்த கையோடு ஆசை முளைக்க - பால் பயிண்ட் பேனா பிடிக்கிறார்கள். கால் பக்க காகிதம் போதுமானதாக இருக்கிறது. ரோட்டோரம் இயற்கை அழைப்புக்கு ஒதுங்குவதில் உள்ள தயக்கமின்மையே கவிதையிலும் சகஜமாய் வருகிறது. நான் கவிஞர்களை பழிக்கவில்லை. அந்த அளவுக்கு இயல்பாய் தயாராய் இருக்கிறார்கள் என்கிறேன். இது ஒரு ஆரம்ப நிலை.

அடுத்து, சொந்த காசைப் போட்டு அல்லது மனைவியின் நகை என ஒன்றிரண்டு புத்தகம் வரை வந்துவிடுகிறார்கள். சினிமாவில் சங்கமம் ஆவது இலக்கு. இது மத்திய நிலை.

வேலை கிடைக்காதவர்கள் தாடி வளர்த்து கொஞ்சம் கஞ்சா குடித்து தலை கலைந்த இண்டெலக்சுவல், கவிதை படிப்பார்கள் இல்லை வடிப்பார்கள். உபத்திரம் இல்லை. கவிதை எழுதி, புரட்சி பேசி, சமூகம் சாடி கன்னோ (gun), திவிரவாதமோ கையில் எடுக்காதவரை ஒரு பிரச்சனையும் இல்லை. இப்போது இந்த நிலை கிடையாது. எஞ்சியவர்கள் சினிமாவின் கதவு தட்டி காத்திருக்கிறார்கள்.

என் வரையில் மிக அதிகமாய் எழுதப்பட்ட டாப் ஃபைவ் சங்கதிகள்: காதலும் சோகமும், சுயமுன்னேற்றம், தொழிலாளிகள், இயற்கை காட்சிகள், மற்றும் பெண். திகட்டத் திகட்ட எழுதியாகிவிட்டது. தடை உத்தரவு வாங்கி தருபவர்களுக்கு 1 கிராம் தங்க நாணயம் பரிசு! தர காத்திருக்கிறேன்.

*****

தமிழர்கள் தொல்காப்பிய காலத்திலிருந்தே எல்லாவற்றையும் கவிதையில்தான் சொல்லி வந்தார்கள். ஆச்சரியமான சங்கப் பாடல்களை விட்டு விட்டால் எல்லாவற்றையும் விருத்தங்களிலும் வெண்பாக்களிலும் பொருத்திக் கொண்டிருந்தார்கள். கவிதை என்பது எழுத்து தமிழின் சிகர வடிவமாக இருந்தது. உரைநடை பேச்சில்தான் இருந்தது. இலக்கியத்தில் உரை நடை அங்கொன்றும் இங்கொன்றுமாக இருந்ததே தவிர, தனித்து வளர அச்சியந்திரமும் ஆங்கிலேயர்களும் வர வேண்டியிருந்தது.

ஆனால் கவிதை ஏறக்குறைய இரண்டாயிர வருஷ சரித்திரம். நம் முன்னோர்கள் எண்ணற்ற கவிதைகளும் வடிங்களும் கொண்டு எழுதியிருக்கிறார்கள். மொழி ஆளுமை தேவையும் மரபு கட்டுபாடும் இருந்ததால் சென்ற நூற்றாண்டு வரை கவி எழுதுபவர்கள் எண்ணிக்கை மிக குறைவு. கட்டுப்பட்டு இருந்தது.

பாரதி சற்றே எளிமைப்படுத்தினார். இருந்தும் மரபிலிருந்து அதிகம் விலகவில்லை. தேசிய விஷயங்களைப் பற்றி நேரிசை வெண்பாக்களும் விருத்தங்களும் எழுதினார்.

ஆனாலும், புதுகவிதையின் முன்னோடி பாரதி இல்லை. முப்பது-நாற்பதுகளில் நா.பிச்சமூர்த்தி, கு.ப.ரா போன்ற ஆதாரமான சிறுகதை எழுத்தாளர்கள் சிறுகதை அளவுக்கு நீட்ட முடியாத விஷயங்களை, யாப்பைப் பற்றி கவலைப்படாமல் நேரடியாக எழுதிப் பார்த்தார்கள். புதுமைப்பித்தன் நேரிசை வெண்பாவில் எழுதினார். இந்த முயற்சிகள் எல்லாம் கூட அன்று அவர்களுக்குள்ளேயேதான் இருந்தது.

ஐம்பதுகளில்தான் சி.சு.செல்லப்பா, சி.மணி போன்றோர்கள் புதுகவிதையை யாப்பில் இருந்து ஒரு புரட்சி போல இந்த பக்கம் கொண்டு வந்தவர்கள்.

*****

அதன்பின் பளிச்சென வெளிச்சம் பாய்ச்சி, ஒளி வெள்ளம். புது கவிதை புறப்பட தொடங்கிவிட்டது. பாரதிதாசன், பட்டுக்கோட்டை கல்யாணசுந்தரம், போன்றோர் ஏழைகளுக்காக, பாட்டாளி மக்களுக்காக பாடியதில் மரபின் சிரமத்தை குறைத்தனர். மேத்தாவின் கண்ணீர்ப்பூக்கள், மீராவின் ஊசிகள், கனவுகள் கற்பனைகள் காகிதங்கள், அப்துல் ரகுமானின் பால்வீதி போன்ற கவிதைத் தொகுப்புகள் எல்லாம் 'கமர்சியல் ஹிட்'. கலாப்பிரியா, வண்ணதாசன், ஞானக்கூத்தன், ஆத்மநாம், விக்கிரமாதித்தன்.... என தனி படை நடைப் போட்டது.

வாலி, வைரமுத்துகள் எல்லாம் சினிமாவில் ஒதுங்கி அவ்வப்போது புதுகவிதை வளர்த்தார்கள். கண்ணதாசன் குறிப்பிட தகுந்த இடத்தில் இருந்தார். 'இயேசு காவியம்' மரபில் எழுதினார். 'தூங்கும் குழந்தையை' புதுகவிதையில் வைத்தார். இத்தனை எளிமை படுத்தி விஷயம் சுலபம் ஆனவுடன் பலபேர் வாத்சல்யத்துடன் கவிதை துணைப் பிடித்தனர்.

விளைவு - கவிதை! முன்பு சொன்னது போல் கவிதை வெள்ளம்.

கவிதையும் கழிசடைகளும் கலந்துவிட்டன.

இதில் நல்ல கவிதை எது?

'நல்ல' என்பதில்தான் நமக்கு கருத்து பேதம். எது கவிதை, எது கவிதையல்ல - இனம் பிரித்துவிட்டால் போதும், முடிந்தது வேலை. பிரிப்பதில் சிரமம். முயற்சித்து பார்கலாம்.

நல்ல கவிதையில் ஈடுபாடு வருவது கொஞ்சம் கஷ்டம். ஆரம்பத்தில் புரியாது. பழக பழக வரும். யாப்பு வகைகள் தெரியாமல் மரபில் நுழையாதீர்கள். எதுகை என்றால் என்ன? மோனை என்றால் என்ன? எழுத்து, சீர், அடி, பாட்டு என பள்ளியில் வருவது போலவேதான். அவசரப்பட்டு ஒதுக்கிவிடாதீர்கள். உரை வைத்து படியுங்கள். மிக மிக சுவாரஸ்யமானது. பரிட்சை பயம் இல்லாமல் படித்தால் 'கடி'க்காது.

குறள், புறநானூறு தவறவே விடாதீர்கள். Must. முடிந்தால் குறுந்தொகை. என்னிடம் குட்டி பட்டியல் இருக்கிறது. நம் இலக்கியங்கள், அதிர்ஷடமான கனத்தை கொடுக்க இரண்டாயிரம் ஆண்டுகளுக்கு மேலாக காத்திருக்கிறது. நிஜ அதிர்ஷடம்.

மரபின் பரிச்சயம் வந்தவுடன் புதுகவிதைக்கு நகருங்கள். இங்கு யாப்பு பற்றி தெரிந்திருக்க வேண்டும் என்று கட்டாயமில்லை. புது கவிதையில் எழுதப்பட்ட வரிகளைவிட எழுதாத வரிகளைத் கண்டுபிடிக்க வேண்டும். கவிதை புரியவில்லை என்றால் பரவாயில்லை, கவலைப்படாதீர்கள். அவரவர் தளங்களில் இருந்து மெல்ல மெல்ல உயரலாம். புதுகவிதையின் சௌகரியம் இது.

நல்ல கவிதை அடையாளம் கண்டுபிடிக்க சுலப வழிகள்:

1. மரபில் நல்ல கவிதைகள் அனைத்தும் வந்துவிட்டன. இலக்கியங்களை உரையுடன் படியுங்கள். சீர், தளை எல்லாம் கவிதானுபவத்தை பாதிக்கும். பாதித்தால் நீக்கிவிடுங்கள்.

2. எந்த கவிதையிலும் 'ஓ', 'அட', எல்லாவற்றுக்கும் ஆச்சரிய குறி என எழுதியிருந்தால் ஒதுக்கிவிடுங்கள். கவிதைக்கு இந்த 'அட', 'ஓ'வெல்லாம் தேவையில்லை. வெளிப்படையாகத் தேவையில்லை.

3. வர்ணனைகள். அருமையான வர்ணனைகளுக்கு பாரதிதாசன் உத்திரவாதம். பெண், இயற்கை... என்றால் நகம் வெட்டி, முடி திருத்த போய்விடுங்கள். உபயோகமான வேலை நிறைய இருக்கிறது.

4. நல்ல கவிதை என்பது அரிதான மலர் போல. நல்ல கவிதையை ஒப்புக்கொள்வதில் அவசரப்படாதீர்கள். நீங்கள் நினைத்ததைச் சொல்லி வியக்க வைக்கும். உங்கள் மனசை 'ஏதோ' செய்யும். அந்த 'ஏதோ' உங்களுக்கு மட்டும் தெரிந்ததாய் கூட இருக்கலாம். Seize the moment. நல்ல கவிதை என்பது ஒருவிதமான சொந்த உன்னதம்.

5. வாழ்த்து கவிதை, அரசியல் தலைவரை, அடுத்த வீட்டு பெண்ணை சொல்வதெல்லாம் கவிதை இல்லை. சினிமாவில், எதிர்பாராத வரிகளை கவிதை என்று குழப்பிக் கொள்ளும் வாய்பிருக்கிறது. நல்ல கவிதை வரிகள் வந்துவிடுவது மிக மிக தற்செயலே. மற்றது -மாயைகள்.

6. நல்ல கவிதைக்கு பாஷை கிடையாது. காலம் கிடையாது. கவிஞன் தனக்கு கிடைத்த உன்னத கணத்தை உங்களுக்கும் வார்த்தைகளால் அளிக்கிறான். பாசாங்கு இல்லை. Robert Frost எழுதிய Stopping by woods on a snowy Evening உதாரணம்.

7. கவிதை என்பது தனிப்பட்ட அனுபவம். நல்ல கவிதையில் எல்லாவற்றிலும் பொதுவான அம்சமாக 'உண்மை' என்பது இருக்கிறது.

8. புத்திசாலிதனமான வரிகள் கவிதை கிடையாது. குழம்பாதீர்கள். 'பெண் கேட்டு வந்தார்கள், நாய் குரைத்தது.... கொள்ளையர் என்று அதற்கும் தெரிந்துவிட்டது'. வரிகளில் மயங்காதீர்கள்.

9. நல்ல கவிதைகளைப் படியுங்கள். தேடிப் பிடியுங்கள். நம்மைவிட சிறப்பாக ஒருவர் எழுதியிருக்க கூடும். நிறைய படியுங்கள். நல்ல கவிதைகளை கண்டுக்கொள்ள தெரிந்தவுடன், எழுதி பார்க்கும் ஆசை போய்விடும். அசாத்திய துணிச்சல் வராது.

அப்படி கைவிட்டவன் தான் நான்!

ஒரு ஸ்பானிஷ் கவிதை

நான் இறந்து போனாலும்
என் பால்கனி
திறந்தே இருக்கட்டும்

அதோ அந்தச் சிறுவன்
ஆரஞ்சுப் பழங்களைச்
சுவைத்துக் கொண்டிருக்கிறான்.
(என் மாடத்திலிருந்து
என்னால் அவனைப் பார்க்க முடியும்.)

அதோ அந்த விவசாயி
கோதுமை அறுவடையில்
ஆழ்ந்து போயிருக்கிறார்.

நான் இறந்து போனாலும்
என் பால்கனி
திறந்தே இருக்கட்டும்.
- லோர்கா

*****

ஏன் என்று உங்களிடம் தேடுங்கள். கவிதையை கொஞ்சம் யோசியுங்கள்.

வாழ்த்துகள்!

.

34-வது புத்தகக் காட்சி

noreply@blogger.com (Surendhar) — Thu, 13 Jan 2011 20:54:00 +0000

என் முறை...

*****

'தனிமை தீவில் தள்ளப்பட்டால் என்ன செய்வீர்கள்?' என்று கேட்கப்பட்டபோது, 'புத்தகங்களுடன் மகிழ்ச்சியாக வாழ்ந்து விட்டு வருவேன்' என்று பதிலளித்தார் ஜவஹர்லால் நேரு.

*****

சென்னையில் 34-வது புத்தகக் காட்சி கடந்த 4 ஜனவரி 2011, செவ்வாய்க்கிழமை தொடங்கியது. ஏறத்தாழ 1.76 லட்சம்(இது வேறு!) சதுர அடியில் 646 அரங்குகளுடன் அமைக்கப்பட்டுள்ள இந்த காட்சி அரங்கில் 2 லட்சத்துக்கும் மேற்பட்ட தலைப்புகளில் 5 கோடிக்கும் மேற்பட்ட புத்தகங்கள் குவிக்கப்பட்டுள்ளன.

சனி, ஞாற்றுக்கிழமைகளில் சென்றிருந்தேன். போன முறை வருந்தி அழைத்த நண்பர்கள் இந்த முறை முதல் அழைப்பிலேயே ஆர்வம் காட்டி வந்திருந்தனர். முதல் முறையாக இங்கே வந்த நண்பர்களுக்கும் என் அன்பு.

வரும் வரைதான் தயக்கம். வந்தால் நிச்சயம் அடுத்த முறையும் வருவீர்கள். அடுத்தடுத்த முறையில் என்னதான் இருக்கிறது என்று புத்தகத்தைப் புரட்டினால்..... அங்கே இருக்கிறது 'தூண்டில்'. ஒரு நாள் இல்லை ஒரு நாள் நிச்சயம் மாட்டிவிடும்.

சூழல் மாற்றப்பட வேண்டும்

இந்த ஆண்டு மனுஷ்யபுத்திரன் பேசியது, தீவிரமானது.

"தமிழகத்தில் புத்தகம் தொடர்பான நிகழ்வுகள் நடைபெறும்போது அங்கு தவிர்க்க முடியாமல் கேட்கும் குரல்; 'புத்தகங்களை வாங்குங்கள், புத்தகங்களை வாசியுங்கள்' என்பதாகும். எனக்குத் தெரிந்து உலகில் வேறு எந்தச் சமூகத்திலும் இப்படியொரு துர்பாக்கியமான சூழல் கிடையாது.

ஒரு படித்த சமூகம் புத்தகத்தைத் தேடுவதும் வாங்குவதும் வாசிப்பதும் மிக இயல்பானவை. ஆனால், இங்கே என்ன நடக்கிறது படித்தவர்கள் மத்தியில் நின்றுகொண்டுதான் 'படியுங்கள், ஏதாவது படியுங்கள்' என்று கண்ணீர் வரும் அளவுக்கு கோருகிறோம்.

மெத்தப் படித்தவர்கள் என்று சொல்லிக் கொள்பவர்கள்தான் 'எனக்குப் புத்தகங்கள் படிக்கும் பழக்கம் எல்லாம் கிடையாது' என்பதைப் பெருமையாகக் கூறிக்கொள்கிறார்கள்.

அவர்களே பல சமயங்களில் புத்தகங்களை வெளியிடவும் வருகிறார்கள். விசித்திரமான சூழலை மாற்றியே ஆக வேண்டும் நாம்" என்றார் மனுஷ்யபுத்திரன்.

"நிச்சயமாக இந்த சூழல் மாற்றப்பட வேண்டியது. மாற்ற வேண்டும் என்றால் எதாவது படியுங்கள் என்று கோருவதை தவிர்த்துவிட்டு, பேசுபவர்கள் முதலில் ஏதேனும் ஒரு நல்ல புத்தகத்தைப் பற்றி விரிவாகப் பேசிப் பழக வேண்டும். மனுஷ்யபுத்திரனை நான் வழி மொழிகிறேன்" என்றார் தமிழச்சி தங்கபாண்டியன்.

இவர்கள் விரும்புவதை போல மாற்றத்தை தான், நாம் வேறு மாதிரி முயன்று கொண்டிருக்கிறோம்.

குழந்தைகளை....

இங்கு பேசிய வைரமுத்துவின் பேச்சு வசிகரமானது.

"பெற்றோர்கள் குழந்தைகளைப் புத்தகங்கள் இருக்குமிடம் நோக்கி அழைத்துச் செல்லுங்கள். அவர்களைப் புத்தகங்களோடு புழங்கவிடுங்கள். அவர்கள் படிப்பது அப்புறம் இருக்கட்டும்; முதலில் அவர்கள் புத்தகங்களைத் தொட்டுப் பார்க்கட்டும். அந்தத் தொடுதல் - உலகை அவர்களுக்கு சரியான வகையில் அறிமுகப்படுத்தும்" என்றார் வைரமுத்து.

இங்கு பிரச்சனை, சரி வர நாமே பழகவில்லை. நாம் பழக்கவில்லை என்றால் ஒரு தலைமுறையே இதை இழக்கிறது. இதை தான், உணர மறுக்கிறோம்.

*****

இந்த முறை, வாங்கிய விவரம்.

1. திராவிட இயக்க வரலாறு - ஆர். முத்துக்குமார், கிழக்கு பதிப்பகம்(பாகம் 1) ரூ.200

2. திராவிட இயக்க வரலாறு - ஆர். முத்துக்குமார், கிழக்கு பதிப்பகம்(பாகம் 2) ரூ.200

3. முதல் உலகப் போர் - மருதன், கிழக்கு பதிப்பகம். ரூ.160

(ஆரம்பப் புள்ளி முதல் இறுதிக் கட்டம் வரை)

4. இரண்டாம் உலகப் போர் - மருதன், கிழக்கு பதிப்பகம். ரூ.185

(ஆரம்பப் புள்ளி முதல் இறுதிக் கட்டம் வரை)

5. புதுமைப்பித்தனின் சம்சார பந்தம் - கமலா புதுமைப்பித்தன், பரிசல் புத்தக நிலையம். ரூ.30

6. எம்.ஜி.ஆர். பேட்டிகள் - தொகுப்பு எஸ்.கிருபாகரன், மனோன்மணி பதிப்பகம். ரூ.130

7. குறுந்தொகை மூலமும் விளக்கமும், முல்லை பதிப்பகம். ரூ.150

8. கலித் தொகை மூலமும் விளக்கமும், முல்லை பதிப்பகம். ரூ.150

9. The history of mathematics கணிதத்தின் கதை - இரா. நடராசன், பாரதி புத்தகாலயம். ரூ.50 (தமிழக அரசின் பரிசு பெற்ற நூல்)

10. சிலப்பதிகாரம் பன்முக வாசிப்பு - கா. அய்யப்பன், மாற்று பதிப்பகம் ரூ.100

பகுதி இரண்டு

1. ஸ்மைல் ப்ளீஸ் - துக்ளக் சத்யா, அல்லயன்ஸ். ரூ.40

2. சூடிய பூ சூடற்க - நாஞ்சில் நாடன், தமிழினி ரூ.90 (சாகித்ய அகாதமி பரிசு பெற்ற நூல்)

3. தோரணத்து மாவிலைகள் - சுஜாதா, விசா பப்ளிகேஷன்ஸ். ரூ.80

4. சுவை சுவையாய் சமையல் குறிப்புகள் - கோமதி சந்திரசேகரன், ராம்பிரசாந்த் பப்ளிகேஷன்ஸ். ரூ.75

5. விண்வெளிக்கு ஒரு புற்வழிச்சாலை World Science Fiction, உலக விஞ்ஞானச் சிறுகதைகள். தொகுப்பும் மொழிபெயர்ப்பும் - இரா. நடராசன். பாரதி புத்தகாலயம். ரூ.30

6. உங்கள் பிரச்சனைகளுக்கு தீர்வு - பீர்பால் வழி - S.R. Vas & Anita S.R. Vas, PUSTAK MAHAL ரூ.88

7. திசை எட்டும் மொழியாக்கக் காலாண்டிதழ் (ஜனவரி - டிசம்பர் 2010) - ரூ.160

8. திசை எட்டும் மொழியாக்கக் காலாண்டிதழ் (ஜுலை - செப்டம்பர் 2008) - ரூ.30

9. மௌனி படைப்புகள். முழுத் தொகுப்பு -தொகுப்பாசிரியர் சுகுமாரன், காலச்சுவடு பதிப்பகம். ரூ.200

10. தமிழ் நாட்டுப் பழமொழிகள் (4000) - முல்லை பில். முத்தையா, முல்லை பதிப்பகம். ரூ.70

*****

ரசித்த ட்விட்டர் ganesukumar@twitter.com :

உடம்புக்கு எந்த நோவுன்னாலும் முதலில் நெத்தியில் விபூதி வைத்துவிடும் அப்பத்தாவிடம் நாத்திகம் பேச மனம் வருவதில்லை.

*****

2010 பார்க்கவேண்டியது

noreply@blogger.com (Surendhar) — Mon, 27 Dec 2010 20:24:00 +0000

2010 ஆண்டை கடந்துவிட்டோம். திரும்பி பார்க்கும் அனைவருக்கும் திரும்பிப் பார்க்க சம்பவங்கள் இருக்கும். முதல் முறையாக கல்லூரியில் சேர்ந்திருப்பீர்கள், காதலிக்க ஆரம்பித்திருப்பீர்கள், கல்யாணம் கட்டியிருப்பீர்கள், குழந்தை பிறந்திருக்கும், வேலைக் கிடைத்திருக்கும், வீடு வாகனம் வாங்கியிருக்கலாம், First day first show பார்த்திருக்கலாம், பதவி உயர்வு, Twitter, சிறு காயம், நட்பு, விபத்து, நல்ல கவிதை, தற்கொலை, பிரச்சனை, மாற்றல், அரசியல்,மன்னிப்பு என சிறுசும் பெருசுமாக நிறைய நடந்திருக்கும். அசை போட்டுப் பார்பதில் நம் அனைவருக்கும் அலாதி சந்தோசம்.

*****

நம் கவலைகளின் ஒரு பகுதியான பண பரிவர்தனைகளில் நம் நாட்டு பொருளாதாம், நம் பொருளாதாரம் எப்படி? நிலை உயர்ந்திருக்கிறதா? அலசிப் பார்போம்.

பங்குச் சந்தை

முதலில் பங்குச் சந்தை... அதன் செயல்பாடு 2009-ம் ஆண்டை போல ஆஹா, ஓஹோ (81% வளர்ச்சி) என்று இல்லாவிட்டாலும், 2008-ம் ஆண்டைப் போல் மைனஸாக (-52%) இல்லை என்பதே பெரிய ஆறுதல்தான். 2010-ம் ஆண்டு சென்செக்ஸ் 14.61%, நிஃப்டி 15.06% வருமானம் கொடுத்திருக்கிறது. இவை கிட்டத்தட்ட ஓராண்டுக்கான ஃபிக்ஸட் டெபாசிட்டைவிட இரு மடங்கு அதிகம். அந்த வகையில் நல்ல லாபம்தான்!

இந்த ஆண்டு நம் பங்குச் சந்தை அள்ளியும் கொடுத்திருக்கிறது தள்ளியும் விட்டிருக்கிறது என்றுதான் சொல்ல வேண்டும். பி.எஸ்.இ. ஆட்டோ, கன்ஸ்யூமர் டியூரபிள் இண்டெக்ஸ்கள் முறையே 112% மற்றும் 60% வளர்ச்சி கண்டன. ஆனால், பி.எஸ்.இ. ரியால்டி இண்டெக்ஸ் 29%, பவர் 9% வீழ்ச்சி அடைந்தன.

நம் சந்தை லாபத்தில் அதாவது எழுச்சியில் இருந்தால் காளையின் பிடியிலும், நஷ்டத்தில் அல்லது சரிவில் இருந்தால் கரடியின் பிடியில் இருப்பதாகவும் சொல்லுவோம். உண்மையில் பங்குச் சந்தையின் போக்கை நிர்ணயிப்பவர்களாக முதலிடத்தில் இருப்பவர்கள் எஃப்.ஐ.ஐ-க்கள், அதாவது அந்நிய நிதி நிறுவனங்கள்தான்.

இந்திய பங்குச் சந்தையில் அவற்றின் நிகர முதலீடு 2009-ல் 80,500 கோடியாக இருந்தது. இது 2010-ம் ஆண்டில் 1,29,980 கோடியாக அதிகரித்துள்ளது. இவர்களின் முதலீடு அதிகரிக்க வாய்ப்பிருப்பதாக பலரும் கருதுகிறார்கள். இது உண்மையாகும் பட்சத்தில் வரும்காலத்தில் சந்தை பாசிடிவ்- ஆக இருக்கும் என்பதில் சந்தேகம் இல்லை.

கச்சா எண்ணெய்

பொதுவா கச்சா எண்ணெய் விலை அதிகரிச்சா நம்ம பொருளாதாரத்துக்கும் பங்குச் சந்தைக்கும் நல்லதல்ல. பெட்ரோலியப் பொருட்களின் விலை உயர்வால் விலைவாசியும் ஏறிவிடுகிறது. நாட்டின் வர்த்தகப் பற்றாக்குறை நிச்சயம் அதிகரிக்கும். 2008ல் கச்சா எண்ணெய்யின் சராசரி விலை 91.48 டாலர். அந்த ஆண்டு சந்தை வீழ்ச்சி அடைந்தது. 2009ல் நல்ல வருமானம் கொடுத்தது பங்குச் சந்தை அப்போ கச்சா எண்ணையின் சராசரி விலை 53.56 டாலர். 2010ல் சராசரியாக 70 டாலர். அதிகபட்சம் 93 டாலர் வரை போனது.

பனை மரத்தில் நெறி கட்டும் கதைதான். நம் கைகளில் ஒன்றும் இல்லை. இதை ஒரு குறியீடாக வைத்துக்கொள்ளலாம், பங்கு சந்தையை கவனிப்பவர்கள்.

பணவீக்கம்

அதிகபட்சமாக பணவீக்கம் 16.22% ஆக இருந்தது. படிப்படியாக குறைந்து ஒற்றை இலக்கை எட்டியிருக்கிறோம். பணவீக்கத்தின் ஏற்ற இறக்கம் பங்குச் சந்தையில் சாதக பாதக விளைவுகளை ஏற்படுத்தும். பொதுவாக பணவீக்கம் குறைவாக இருந்தால் சாதகம்.

ஜி.டி.பி. வளர்ச்சி மற்றும் தொழில் உற்பத்தி

2010-ம் ஆண்டில் ஜி.டி.பி. வளர்ச்சி சராசரியாக 8.9%, இந்திய தொழில் உற்பத்தி (ஐ.ஐ.பி.) வளர்ச்சி குறியீடு 11.64% பாஸிடிவ் சிக்னலைத் தான் தருகிறது.

கவலை அளிக்கும் விஷயங்கள்

வேலை இல்லாதவர்களின் சதவிகிதம் 7.32% ஆக இருந்து 8% ஆக அதிகரித்துள்ளது. உலக பொருளாதாரம் குறிப்பாக அமெரிக்காவோ ஐரோப்பாவோ ஆட்டம் கண்டால் நம்மை நிச்சயம் கவலை கொள்ளச் செய்யும். அவர்களின் நிலை கவலைக் கொள்ளவே செய்கிறது. பக்கத்து வீடு பற்றி எரிவது என்றால் நமக்கும் கவலைதானே.

தொடர்ந்து கற்றலும், அடிப்படை அறிவும் தேவை என்பதை இங்கு 'குறிப்பாக' சொல்கிறேன். வரும் ஆண்டில் ஸ்டீல், பார்மா, சிமென்ட் துறை நன்றாக இருக்கும். துறை முன்னோடி நிறுவனங்களை வாங்கலாம். முக்கியமாக, பங்குச் சந்தை தெரியாமல் இறங்க வேண்டாம். கவனம்.

இனி நாம் செய்ய வேண்டியது.

மேலே சொன்னது எல்லாம் நம் சக்திக்கு மீறியது. நம்மால் செய்யக் கூடியதில், நாம் என்னவெல்லாம் செய்யலாம்.

யோசிக்கலாம்.

Concentrate on your portfolio: பிரித்து போடுவது ரிஸ்க் அளவை குறைக்கும். ஆனால் பணம் சேர்த்தவர்கள் பிரித்துப் பிரித்து போடுவதில்லை. உம்: அஸிம் பிரேம்ஜி, ரத்தன் டாடா, பில் கேட்ஸ். அவர்கள் ஒரு துறையில் போட்டுதான் வளர்ந்தார்கள். உங்கள் portfolioவில் இருக்கும் நல்ல பங்கு தொடர்ந்து வளரும் போது, அதைக் கொஞ்சம் கொஞ்சமாக சேர்ப்பதும் நல்லதுதான். 1995ல் Tata Power வாங்கியிருந்தால் அதன் தொடர்ச்சியை கவனிக்கவும். லாபகரமானதாகவே இருக்கும்.

Ignore some rules: எதையும் எழுதி வையுங்கள். பெரும்பாலானவர்கள் அறிந்த '100 minus age' thumb rule. இதன் மூலம் கணக்கிடப் பட்ட %, பங்குச் சந்தையில் போடலாம். குழப்புகிறதா. உங்களுக்கு சரியெனப் படும் சதவிகிதத்தை தனியே ஒதுக்கிவிட்டு, மீதியை பங்குச் சந்தையில் போடுங்கள். தேவையில்லாத குழப்ப கணக்குகளை தூர எறியுங்கள்.

Get rid of niche plans: Don't go for Specific policies, such as child plans, pension plans, etc. நல்ல ரிட்டன் தரக்கூடிய Mutual fund ல் போடுங்கள். அதை எடுத்து குழந்தையின் படிப்பிற்கோ, முதுமைகோ நம் சௌகரியத்திற்கு பயன்படுத்திக் கொள்ளலாம். போடும் பணம் பொருக வேண்டும். அவ்வளவுதான்.

Get an adviser: பொரும்பாலும் நாம் பொற்றவர்களின் அறிவுரைப்படிதான் பண விஷயத்தில் நடந்து கொள்கிறோம். ஆரம்ப கட்டதில் அது சரி. போகப் போக அந்த துறை சார்ந்தவர்களின் ஆலோசனை கேட்பதே சரியானது. பாட்டி வைத்தியம் உடம்புக்கு ஓ.கே. ஆனால், அறுவை சிகிச்சைக்கு பட்டம் பெற்ற மருத்துவரே மிகச் சரியானவர்.

Surrender policies: தவறான முடிவின் பேரில் தேவை இல்லாத பாலிசியை சிலர் வைத்துக் கொண்டிருப்பார்கள். சிரமத்திலும் தொடர்ந்து கொண்டிருப்பார். அதை கணக்கு தீர்த்து தலை முழுகுங்கள். மனதளவில் அதன் நஷ்டத்தை ஏற்றுக் கொள்ளுங்கள். ஒன்றும் குடி முழுகவில்லை. வாய்ப்பு நிறைய உள்ள கடல். படகை வேறு திசை திருப்பி வலை வீசுங்கள். புத்திசாலித்தனமாக முதலீட்டை ஆரம்பியுங்கள். இலக்கு வைத்துக் கொள்ளுங்கள். உங்கள் பணம், கண் முன்னே வளரும்.

Spend Analysis: செலவை கணக்கிடுங்கள். எவ்வளவு திறமையிருப்பினும் ஓட்டை படகு இடம் போய் சேராது. செலவை குறைக்கவாது செய்யலாம்.

*****

சேமிப்பு வேறு முதலீடு வேறு. உணர்ந்துக் கொள்ளுங்கள்.

கடைசியாக ஒன்று, முடிந்தால் சேமியுங்கள்.

முடியும்.

*****

வேறு பல விஷயங்களை மற்றொரு பொழுதில் பேசலாம்.

வாழ்த்துக்கள்.

கனவு பூமியின்...

noreply@blogger.com (Surendhar) — Sun, 31 Oct 2010 18:00:00 +0000

இன்று ஏறக்குறைய பிறந்த நாள்.

1931 அக்டோபர் 31-ம் நாள் சனிகிழமை....

செலுலாயிட் ஃபிலிம் தமிழிலும் பேசத் தொடங்கிய அற்புதத்தை 'காளிதாஸ்' படத்தின் மூலம் தமிழன் கண்டான்.

ஆம்....

தமிழ் சினிமா பிறந்துவிட்டது....

கனவு பூமிக்குள் தமிழன் பிரவேசித்து விட்டான். (80 வயதாகிறது).

இப்போது இருக்கும் 'தமிழ் சினிமா' நம் எல்லோருக்கும் அத்துப்படி. அலச, ரசிக்க எப்போதும் நாம் தயாராய் இருக்கிறோம். நம் கணத்தை திருடியிருக்கிறது. தெரிந்தே ஆசையோடு திருடு கொடுத்திருக்கிறோம். கொடுப்போம். சிரிக்க, கோபப்பட, பயப்பட, காதல், காமம் கொள்ளச் செய்திருக்கிறது. ஆச்சரியப்படுத்தி இருக்கிறது. இதில் விதிவிலக்குகள் மியூசிம் ஆசாமிகள். விதிவிலக்குகள் உண்டா, என்ன?

இன்று நாம் காணுகின்ற 'தமிழ் சினிமா' எப்படி இருக்கிறதோ, இப்படியாக உருக்கொள்ள எண்ணற்ற பலர் உழைத்தனர். ரஜினி, கமலுக்கு முந்தைய எம்.ஜி.ஆர், சிவாஜியைத் தெரியும். படங்கள் பார்த்திருக்கிறோம். அவர்களுக்கு முந்தைய தியாகராஜ பாகவதர், பி.யு.சின்னப்பா பற்றியும் கேள்விபட்டிருக்கிறோம். அதற்கும் முன்....

தமிழ் சினிமாக் குழந்தையைத் தாலாட்டி வளர்த்தவர்களைப் பற்றி வரலாறு இல்லை, படங்கள் இல்லை, அவர்கள் எடுத்த படங்களில் பல இல்லை. காலணா விலையில் வந்த பாட்டு புத்தகங்களின் கதைச் சுருக்கத்தில் நம் தமிழ் சினிமா வரலாறு கிடைக்கிறது!

காளிதாஸ் தனித் தமிழ் படமல்ல; தமிழிலும் தெலுங்கிலும் பேசிய பாடிய படம்! எச்.எம்.ரெட்டி டைரக்க்ஷனில், நாயகி டி.பி.ராஜலட்சுமி நடித்த படம். ஹீரோ தெலுங்கு நடிகர். பெயர் தெரியவில்லை. இந்தப் படம் எட்டே நாளில் எட்டாயிரம் ரூபாய் செலவில் தயாரிக்கப்பட்டது. வசூல் 75 ஆயிரம்.

பல பழைய பத்திரிக்கைகளில் இங்கொன்றும் அங்கொன்றுமாய் செய்திகள் விமர்சனங்கள், குறிப்புகள், போட்டோக்கள். தொடர்ந்த தேடல்... இடைவிடாத தேடல்.... தேடிக் கண்டுபிடித்து, திரட்டி தொகுத்திருக்கிறார் திரு.அறந்தை நாராயணன். 'கனவு பூமியின்...' என்னும் கட்டுரைத் தொடராக 'பொம்மை' இதழில் வந்திருக்கிறது. இப்போது புத்தகமாக, 'ஆரம்பகால தமிழ் சினிமா' (ரூ.100/- விஜயா பதிப்பகம். 044-2471 8757). அறந்தை நாராயணனின் பணி ஒரு இமாலய சாதனை.

வரலாற்றை சுருக்கமாக புதியதாகத் தந்திருக்கிறார். நிச்சயம் இந்த தலைமுறைக்கு தெரியாது. தெளிவான படங்களோடு இருக்கிறது.

எம்.ஆர்.ராதா நடித்த முதல் படம்(ராஜசேகரன்). 1939-ல் 'வீர ரமணி' என்றொரு படம். கதாநாயகி கே.டி. ருக்மணி. மோட்டார் சைக்கிளில் சவாரி செய்து ரசிகர்களின் இதயத்தில் பரபரப்பை ஏற்படுத்தினார், சிகரெட் பற்றவைத்துப் புகைத்து, சுருள் சுருளாகப் புகைவிட்டிருக்கிறார். இது ஒரு சண்டைப் படமாம்.'1939' என்பதுதான் இதில் விசேஷம். அவரின் புகைப்படம் இருக்கிறது.

புராணம் இல்லாமல் கதைகளிலும் புதுமை, புரட்சி செய்திருக்கிறார்கள் - பிராமண வகுப்பைச் சேர்ந்த வாலிபன், பிராமணரல்லாத வகுப்பைச் சேர்ந்த இளம் பெண்ணைக் காதலிக்கும் கதை 'சாந்தா'. 1941-ல் வெளிவந்திருக்கிறது. 'யம வாதனை', 'அடங்காப் பிடாரி', 'புலி வேட்டை', 'போலிச் சாமியார்', 'மாலைக் கண்ணன்' ஆகிய தனித்தனிச் சிறு கதைகளை இணைத்து 'சிரிக்காதே' என்ற பொது தலைப்பில் ஓர் படம் 1939-ல் வெளிவந்தது. என்.எஸ்.கிருஷ்ணன், டி.ஏ.மதுரம், கொத்தமங்கலம் சுப்பு, என நகைச்சுவை நடிகர்கள் நடித்தது.

1941 'சாயா' என்று ஒரு படம் தயாரிக்கப்பட்டு வெளி வரவில்லை. வந்திருந்தால் வரலாற்றுப் புகழைப் பெற்றிருக்கும். எம்.ஜி.ஆர் கதாநாயகனாக நடித்த முதல் படம் இது!

இப்படி, சுவாரஸ்ய பளிச் !..... உண்டு.

அறந்தை நாராயணன் அவர்கள், படங்கள் வெளிவந்த காலம், படங்களில் நடித்தவர்கள் போன்ற விஷயங்களில் அதிக கவனம் செலுத்தியிருக்கிறார். தமிழ் சினிமா ரசிகர்களுக்கு இந்த புத்தகம் ஒரு Fast forward.

இப்பொழுது இருக்கும் நடிகைகள் சினேகா, பாவணா, அசின், நயந்தாரா கணக்காய் அப்பொழுதும் கண்ணுக்கு நிறைவாய் எம்.வி.ராஜம்மா, டி.சூர்யகுமாரி...... இருந்திருக்கிறார்கள்.

நான் வெகுவாக ரசித்தது - அப்போது வந்த படங்களின் பெயர்களை. உ.ம்:- 'பாலாமணி (அ) பக்கா திருடன்', 'உஷா கல்யாணம் & கிழட்டு மாப்பிள்ளை', 'வாலிபர் சங்கம்', 'மட சாம்பிராணி', 'டூபான் - குயின்', 'போர் வீரன் மனைவி & அசட்டு வீரன் மனைவி', 'என்னை அடியாதே பெத்தப்பா'.

இதில்,

'சைரந்திரி (அ) கீச்சவதம்' - இந்த பெயர் இப்போது வைத்தால் வரிவிலக்கு கொடுப்பார்களோ?

தீண்டும் இன்பம்

noreply@blogger.com (Surendhar) — Tue, 26 Oct 2010 18:46:00 +0000

எந்திரன் - நமது பார்வை

எந்திரன் - திரையிலோ, திருட்டு ஸிடியிலோ இணையத்திலோ பார்த்துவிட்ட பிறகு, அவரவருக்கு கருத்தும் அபிப்பிராயமும் ஏற்பட்டுவிட்டது. முதல் நாள் விடியற்காலை 4 மணிக்கு படம் பார்த்த ஆரம்ப சந்தோஷம் அலாதியானது. ஆரவாரம் அடங்கி, அவரவர் வேலைப் பார்க்க தொடங்கிவிட்டிருக்கிறோம். இப்பொழுது சற்றே உணர்ச்சிவசப்படாமல், நுரை விளக்கிப் பார்ப்போம்.

எந்திரனுக்கு அதை உருவாக்கியவரின் காதலி மேல் காதல். இந்த கதையின் திரைக்கதையில், சில சுவாரஸ்யங்கள் தள்ளி நிறைய கோட்டைவிட்டிருக்கிறார்கள். ஒவ்வொன்றாக,

1. Prime numberன் அத்தனை சொல்லும் ரோபோவுக்கும் பெண்ணின் காதல் பெரிசு.

2. சுயசிந்தனை பெற்றவுடன் கவிதை படிக்க ஆரம்பித்து விடுகிறது, கட்டளையை மீறி.

3. ஒரு ரெட் சிப்பில் அத்தனை அடம் வந்துவிடுகிறது, ரெட் சிப்- உவமை. மக்களுக்கு புரியாமல் போய்விடக்கூடாது என்ற கவலை இயக்குனருக்கு.

4. ரோபோவினால் எல்லாம் முடியும் என்பதை வசனத்திலும் காட்சிகளிலும் திரும்ப, திரும்ப சொல்லிக்கொண்டே இருப்பது. பாடல்களிலும் அதே.

5. எந்த வேலை செஞ்சாலும் - ஆராய்ச்சி செய்வது வரை - அழகான காதலி இருந்தே தீருவாள். இந்த க்ளிஷேவை எப்போது மீறுவோம்?

6. பாடல் காட்சிக்காக (கிளிமாஞ்சாரோ) ரஜினியை கோழையாக காண்பிக்க வேண்டுமா என்ன? காமெடி முயற்சி பண்ணியிருந்தாலும் 'சாரி'.

7. ரெண்டு, ஒரு ரஜினி ஓகே. திகட்ட திகட்ட எதற்கு அத்தனை ரஜினி.

8. Climax Graphics காட்சிகளை எவ்வளவு தூரம் justify பண்ண முடியும் - இயக்குனரால்? கதைக்காக.

9. செக்ஸை தாண்டி யோசிக்கும் ரோபாவால், சிக்கலான கேள்விக்கு - 'hypothesis' சொல்லும் ரோபோவால், நுட்பமாக பிரசவிக்கும் ரோபோவால், 'ஐஸ்'ஸின் மனதை புரிந்துகொள்ள முடியவில்லை. ஆச்சர்யம். ஒரு வேளை கதையின் ட்விஸ்ட் அதுதானோ!

10. ஏன் கடைசிவரை ஒரு 'பெண் ரோபோ' செய்யும் யோசனை, ரஜினிக்கு தோன்றவில்லை.

இருந்தும்.....இவ்வளவு இருந்தும்...

பணம் வைத்திருக்கிறார் - தயாரிப்பாளர்.

வித்தை கற்றவர் - இயக்குனர்.

அழகும், திறமையும், நடிக்கவும் - நாயகி.

பாடலாகட்டும், காட்சியாகட்டும், கிராஃபிக்ஸ் ஆகட்டும் - கூட்டணி, கூட்டணி உழைப்பும் அபாரம்.

அத்தனைக்கும் மேல் ரஜினி - மாஸ் பலம், ஓடும் குதிரை, ஜெயித்திருக்கிறது. 'வெற்றி' எல்லாவற்றையும்விட ஓங்கி உரைக்கும்.

*****

சமிபத்தில், சுஜாதா எழுதிய நாவலான 'தீண்டும் இன்பம்' படிக்க சந்தர்பம் வாய்த்தது (கிழக்கு பதிப்பகம்). கிட்டதட்ட பத்தாண்டுகளுக்கு முன் 'விகடனில்' தொடராக வந்திருக்கிறது. உங்களில் சிலர் படித்திருக்கலாம். நான் இப்போதுதான்.

நாவலின் ஒன் லைன் - கல்லூரிக்குப் போகும் பெண் கர்ப்பமானால் என்ன ஆகும்? இந்த ஒற்றைவரியை வைத்துக்கொண்டு, ஒரு பெண்ணின் மனப் போராட்டங்களை, இயல்பு மாறாமல், வெகு யதார்த்தமாக, ரசிக்கும்படி தந்திருக்கிறார். இதில் குறிப்பிடும்படியாக நான் கருதுவது, இன்றும் பல விஷயங்களில் முரண்படாமல் அப்படியே ஏற்றுக்கொள்ளும்படி இருப்பதுவே. பொழுதுபோகும்படியாகவே இருந்தாலும் இளைஞர்களுக்கான 'மணி' கட்டப்பட்டு இருக்கிறது. வாத்தியாராச்சே !

ரசித்த இடம் -

"தேசியக் கருத்தரங்கம். அதற்கு பரீட்சைக்குப் படிப்பது போல இரண்டு பேரும் லைப்ரரி ஹாலில் படித்தார்கள். 'Unplanned Pregnancy' என்ற புத்தக்கதை பிரிட்டிஷ் கவுன்சிலிலிருந்து ப்ரமோத் எடுத்து வந்திருந்தான். சன்னமான குரலில் படித்துக்காட்டினான்.

'ஒரு பெண்ணுக்கு வேண்டாத கர்ப்பம் என்பது மிகக் கடினமான, கடுமையான ஒரு அனுபவம் ...............................................................................................................................................

அமெரிக்காவில் மாத்திரை சாப்பிடுபவர்களில் 16 சதவிகிதமும், உறைகளைப் பயன்படுத்துபவர்களில் 16 சதவிகிதமும் வேண்டாத கர்ப்பம் அடைகிறார்கள்.'

ப்ரமோத் அதைப் படித்துவிட்டு நிமிர்ந்தான். 'இதெல்லாமா சொல்லப்போறோம் ப்ரமோத்' என்றாள்.

'ரிஸ்க் இருக்கிறது தெரியாம மாணவ-மாணவிகள் அது பத்திரமானதுன்னு நெனைச்சுக்கிட்டு மாட்டிக்கறாங்கன்னு சொல்லலாம். செக்ஸ் எஜுகேஷ்னுக்கு வலுவான சாட்சியமாப் பயன்படுத்தலாம் இல்லையா? என்ன?'

'நீங்க என்ன யூஸ் பண்றீங்கன்னு கலாட்டா பண்ணுவாங்களே ப்ரமோத்? பயமா இருக்கு.'

'கேட்டா, சிரிச்சிட்டு ஐஸ்வாட்டர்னு சொல்லு.'

'புரியலை.'

புரிஞ்சவங்க நம்ம கட்சி. புரியாதவர்களுக்கு ஒரு க்ளு- வயது வந்தவர்களுக்கான சைவ ஜோக் இது. அடம்பிடிப்பவர்களுக்கு - ஒரு நடை நாவலை படிச்சுட்டு வாங்க, அப்புறமா சொல்லுறேன்.

*****

ரசித்த கவிதை

எந்திரன் என்றோர் ஏகாதிபத்தியன்!

noreply@blogger.com (Surendhar) — Wed, 06 Oct 2010 18:21:00 +0000

நன்றி தினமணி.

ஏறத்தாழ 5 ஆண்டுகள் உழைப்பில் - 6 மில்லியன் டாலரில் (இன்றைய மதிப்பில் ரூ. 140 கோடி) "ஜெமினி பிலிம்ஸ்" உருவாக்கிய இந்தியாவின் பிரம்மாண்டமான படமான "சந்திரலேகா" 1948-ல் தமிழிலும் தொடர்ந்து ஹிந்தியிலும் வெளியானது. இந்தியா முழுவதும் விநியோகிக்கப்பட்டது. படிப்படியாக 609 பிரதிகள் போடப்பட்டன. அமெரிக்காவிலும் திரையிடப்பட்டது, இடையிடையே ஆங்கிலத்தில் கதைச் சுருக்கத்துடன். இந்தியத் திரை வரலாற்றில் இவை எல்லாமே அப்போதுதான் முதல் முறை.

தஞ்சாவூரில் "சந்திரலேகா" வெளியானபோது கூடுதலாக தன்னுடைய திரையரங்கிலும் வெளியிட விரும்பினார் மற்றொரு திரையரங்கின் அதிபர். தஞ்சாவூர் மாவட்டத்துக்காரர் என்ற உரிமையில் வாசனை நேரடியாகவே அவர் அணுகினார். வாசனோ மறுத்துவிட்டார். அதற்கு அவர் சொன்ன காரணம்: "ஒரு சின்ன நகரத்தில் பல திரையரங்குகளில் படம் வெளியிடுவது நல்லதல்ல. யாரும் நஷ்டப்பட்டுவிடக் கூடாது. நாம் மட்டும் வாழ்ந்தால் போதாது. எல்லோரும் பிழைக்க வேண்டும் அல்லவா?''

படம் மிகப் பெரிய வெற்றி பெற்றது. படத்தின் வெற்றியில் எல்லோருக்கும் பங்கு தரப்பட வேண்டும் என நினைத்தார் வாசன். படத் தயாரிப்புக் குழு மேலாளரிலிருந்து படம் ஓடிய திரையரங்குகளில் டிக்கெட் கிழித்த தொழிலாளிகள் வரை எல்லோருக்கும் சிறப்பு ஊக்கப் பரிசு அளித்தது "ஜெமினி ஸ்டுடியோ". "சந்திரலேகா" வரலாறானது. தொழில் தர்மத்துக்காக இன்றளவும் வாசன் நினைவுகூறப்படுகிறார்!

ஏறத்தாழ ரூ.160 கோடி முதலீடு, ஒரே நேரத்தில் 3 மொழிகளில் 2,200 பிரதிகளுடன் உலகின் பல்வேறு நாடுகளிலும் வெளியீடு, ஹாலிவுட் படங்களில் பணியாற்றிய தொழில்நுட்பக் கலைஞர்களின் பங்களிப்பு, இதுவரை இந்திய கதாநாயகிகள் யாரும் பெற்றிராத ரூ. 6 கோடி சம்பளத்தில் கதாநாயகியாக முன்னாள் உலக அழகி ஐஸ்வர்யா ராய், ஆஸ்கர் விருதுபெற்ற ஏ.ஆர். ரஹ்மான் இசை, எல்லாவற்றுக்கும் மேலாக

"சூப்பர் ஸ்டார்" ரஜினிகாந்த்...

வரலாறுதானா 'சன் பிக்சர்'ஸின் "எந்திரன்"?

நிச்சயமாக "எந்திரன்" ஒரு வரலாறுதான். ஒரு ஜனநாயக நாட்டில் விஞ்ஞானத்தின் உதவியுடன், அரசாங்கத்தின் ஆசியுடன் வணிக மோசடியும் வணிக ஏகாதிபத்தியமும் எப்படி ஜனநாயகமாக மாற்றப்படுகிறது என்கிற வரலாறு.

மொத்தம் 3,000-க்கும் மேற்பட்ட திரையரங்குகள். முதல் நாளன்று சராசரியாக ஒரு திரையரங்குக்கு 500 இருக்கைகள்; 4 காட்சிகள்; டிக்கெட் விலை ரூ. 250 எனக் கொண்டால்கூட முதல் நாள் வசூல் மட்டும் ரூ. 150 கோடி. 'சன் குழும' ஊடகங்கள் பறைசாற்றும் தகவல்களின்படி, தமிழகம் மட்டும் இன்றி ஐரோப்பாவின் மிகப் பெரிய திரையரங்கமான 'கோலோஸியம்' உள்பட எல்லா இடங்களிலும் முன்பதிவில் புதிய சாதனைகளை 'எந்திரன்' உருவாக்கி இருக்கிறது. ஆக, எப்படிப் பார்த்தாலும் ஒரு வாரத்துக்குள் மட்டும் குறைந்தது ரூ. 1,000 கோடி வருமானம்! எனில், மொத்த வருமானம்?

ஒரு தொழில் நிறுவனம் தன் புத்திசாலித்தனத்தைப் பயன்படுத்தி இப்படிச் சம்பாதிப்பதில் என்ன தவறு இருக்கிறது என்று நீங்கள் கேள்வி கேட்கலாம். நியாயம்தான். தொழில் நிறுவனம்தான், புத்திசாலித்தனமாகத்தான் சம்பாதிக்கிறார்கள்; "வால்மார்ட்"டுக்கும் "கோகோ கோலா"வுக்கும் "ரிலையன்ஸ் ஃப்ர"ஷுக்கும்கூட இந்த நியாயம் பொருந்தும். ஆனால், நாம் அவர்களை ஆதரிக்கவில்லையே, ஏன்? அவர்களை எந்தக் காரணங்கள் எதிர்க்க வைக்கின்றனவோ அதே காரணங்கள்தான் 'எந்திர'னையும் எதிர்க்கவைக்கின்றன.

சென்னையில் 30-க்கும் மேற்பட்ட திரையரங்குகளில் 'எந்திரன்' வெளியாகி இருக்கிறது. ஆனால், ஆச்சர்யம் இது இல்லை. தமிழகத்தின் மிக சாதாரண நகரங்களில் ஒன்றான (தமிழகத்தில் பொருளாதார ரீதியாக மிகவும் தங்கிய மாவட்டத்தின் தலைநகரமும்கூட) புதுக்கோட்டையில்கூட 4 திரையரங்குகளில் வெளியாகி இருக்கிறது. தமிழகத்தின் பல்வேறு பகுதிகளிலும் இதுதான் நிலை.

இந்தச் சூழல் இதுவரை ஒருபோதும் இல்லாதது. இந்தியத் திரையுலகம் முன்னெப்போதும் எதிர்கொண்டிராதது. ரசிகனுக்கு 'எந்திரன்' படத்தைத் தவிர, வேறு எந்தப் படத்தையுமே பார்க்க முடியாத சூழலை ஏற்படுத்தி, தங்களது பணபலத்தாலும், அரசியல் செல்வாக்காலும் பெருவாரியான திரையரங்குகளில் தங்களது படத்தை மட்டுமே திரையிட வைத்திருக்கும் ஏகபோக மனோபாவம்.

படம் வந்த சில நாள்களுக்குள் படத்தைப் பார்த்துவிட வேண்டும் என்ற ரசிகர்களின் ஆர்வமே பரந்துபட்ட 'எந்திரன்' பட வெளியீட்டுக்கான வியாபார சூட்சமமாக மாறியிருக்கிறது. பொதுவாக, எந்த ஒரு வெற்றித் திரைப்படத்துக்கும் அதிகபட்சம் 10 நாள்களுக்குத்தான் கூடுதல் விலையில் டிக்கெட்டை விற்க முடியும். நூறு நாட்கள் ஓடக்கூடிய ஒரு வெற்றிப் படம் ஓர் ஊரில் ஒரேயொரு திரையரங்கில் திரையிடப்பட்டால், முதல் 10 நாட்களில் பார்க்கும் ரசிகர்கள்தான் கூடுதல் கட்டணத்தில் படம் பார்க்க நேரிடும். எஞ்சிய 90 நாட்களில் படம் பார்க்கும் ரசிகர்கள் சாதாரண கட்டணத்திலேயே படம் பார்த்துவிடலாம். ஆனால், ஒரு திரையரங்குக்குப் பதில் ஊரிலுள்ள 10 திரையரங்குகளிலும் படத்தை வெளியிட்டால், 100 நாள்களும் படத்தைக் கூடுதல் கட்டணத்திலேயே ஓட்டியதற்குச் சமம். இதுதான் 'எந்திரன்' அறிமுகப்படுத்தி இருக்கும் "ஏகபோக" (மோனாப்பலி) வியாபார சூட்சமம்.

தயாரிப்பாளர்கள் சங்கம் சில ஆண்டுகளுக்கு முன்பு தயாரிப்பாளர்களைப் பாதுகாப்பதற்காக ஒரு எழுதப்படாத விதியை அறிவித்தது. அதன்படி, ரஜினி, கமல், விஜய், அஜித், சூர்யா, விக்ரம், சிம்பு, தனுஷ் போன்ற ஆரம்ப எதிர்பார்ப்பை ஏற்படுத்தும் கதாநாயகர்கள் நடித்த திரைப்படத்தை தீபாவளி, பொங்கல், சித்திரைப் புத்தாண்டு போன்ற விசேஷ தினங்களில் மட்டுமே திரையிட வேண்டும். ஏனைய நாள்களில் சிறிய திரைப்படங்கள் திரையிடப்பட்டு அவை குறைந்தது இரண்டு வாரங்களாவது ஓடி விநியோகஸ்தர்களுக்கு குறைந்தபட்ச லாபத்தையாவது ஏற்படுத்திக் கொடுக்கும். மற்றவர்களுக்கு நியாயம் சொல்லும் தமிழ்நாடு திரைப்படத் தயாரிப்பாளர் சங்கமோ, விநியோகஸ்தர்கள் சங்கமோ, 'எந்திரன்' விஷயத்தில் வாயைத் திறக்கவே இல்லையே, ஏன்? பயமா இல்லை ஆட்சியாளர்களின் பாததூளிகளுக்கு சாமரம் வீசும் அடிமைத்தன மனோபாவமா!

'எந்திரன்' திரைப்படத்தை தீபாவளிக்கு வெளியிட்டிருந்தால் திரையிடக் காத்திருக்கும் பல சிறிய திரைப்படங்கள் வெளியிடப்பட்டு இரண்டு, மூன்று வாரங்கள் ஓடியிருக்கும். 'எந்திரன்' வெற்றிப்படமாகவும் அமைந்துவிட்டால், பாவம் சிறிய படங்களைத் தயாரித்து வைத்திருக்கும் தயாரிப்பாளர்கள் தங்கள் படங்களை வெளியிட மேலும் இரண்டு மாதங்கள் காத்திருக்க வேண்டும். அதுவரை திரையரங்குகள் கிடைக்காது. கிடைத்தாலும் 'எந்திரன்' படத்தின் வெற்றி ஜுரத்தில் அந்தப் படங்கள் ஓடாது. போட்ட முதலும், அதிகரித்த வட்டியும், அந்தத் தயாரிப்பாளர்களை திவாலாக்கி நடுத்தெருவில் நிறுத்தும். ஏகபோகத்தின் கோர முகம் இதுதான்!

http://bit.ly/9hMsaO

நமது கருத்து, வரும் பதிவில்....

ட்விட்டர் - ஓர் பார்வை

noreply@blogger.com (Surendhar) — Sat, 28 Aug 2010 23:02:00 +0000

அறிமுகம்

ட்விட்டர் - இந்த வார்த்தை இணைய உலகத்தில் மிக பிரபலம் அடைந்திருக்கிறது. இந்த நாளில் இணையத்தின் சூப்பர் ஸ்டாராகத் தொடர்வது - சந்தேகம் இன்றி டிவிட்டர் (www.twitter.com).

புறாவிடு தூதாகத் தொடங்கிய தகவல் தொடர்பு, கடிதம், தந்தி, ஃபேக்ஸ், இ-மெயில் என முன்னேறி இப்போது சிட்டுகுருவியில் வந்து நிற்கிறது. எழுச்சியும், வீரியமும் கிடைக்க சிட்டுகுருவிகளை (!) லேகியத்திற்காக வம்பிழுத்துக் கொண்டிருந்த நமக்கு - இது புதுசு. பகலில் கண் சிமிட்டும் வெளிச்ச மத்தாப்பாய் - பல தொழில்நுட்ப நண்பர்களுக்கே தெரிந்தும் தெரியாமலும் இருக்கிறது. ஆதலால், டிவிட்டர் என்றால் என்னவென்று முதலில் பார்த்துவிடலாம். இது வேற வகை 'சிட்டுகுருவி'.

"நமது கருத்தை, சொல்ல விரும்புவதைச் சிக்கன வார்த்தைகளில் இணையத்தில் தெரிவிப்பது".

நறுக்கென்று 140 எழுத்துக்களில் "இப்போது என்ன செய்கிறீர்கள் ?" என்பதை ட்விட்டரில் தட்டினால் அதை ஆயிரக்கணக்கானவர்களுக்கு நொடிகளில் கொண்டுசேர்க்கும் இந்த இணைய தொழில் நுட்பத்தை பல பிரபலங்கள் பயன்படுத்துகிறார்கள். தனக்கு சாதகமாகப் பயன்படுத்தி வெற்றி கண்ட பிரபலம் பராக் ஒபாமா!

அமெரிக்கத் தேர்தலில் போட்டியிடும் வேட்பாளர்கள் தமது துணை அதிபர் வேட்பாளரை அறிமுகப்படுத்துவது அங்கே மிகப் பெரிய மீடியா நிகழ்வு. 'செனட்டர் ஜோ ஃபைடனை துணை அதிபர் வேட்பாளராக அறிவிக்கிறேன்!' என ட்விட்டிவிட்டு சில மணி நேரங்களுக்குப் பின்தான் மீடியாவுக்கே அறிவித்தார் ஒபாமா. (நம் ஊரில் சினிமா பிரபலங்கள்தான் உள்ளனர்!.)

டிவிட்டரில் யார் வேண்டுமானாலும், எவருடைய டிவிட்டர் பக்கத்தையும் படிக்கலாம். இதில் இரண்டு விஷயம். 1.நீங்கள் படிக்கும் பக்கத்தின் சொந்தக்காரர் உங்களுக்குத் தேவையான தகவல்களை டிவிட்டியபடி இருந்தால், நீங்கள் அவரைப் பின்பற்றலாம் (Following). நீங்கள் பின்பற்றுபவரின் டிவிட்டுகள் உங்களது டிவிட்டர் பக்கத்தில் பிரசுரமாகும். 2.உங்களை யாராவது பின்பற்றினால் (Followers) அவர்களது டிவிட்டர் பக்கங்களில் உங்களது டிவிட்டுகள் பிரசுரமாகும். பை தி வே, Twitting என்பது வினைச்சொல்லாகவும், Tweet என்பது பொருட்சொல்லாகவும் பயன்படுத்தப் படுகிறது. Tweet என்றால் 'குட்டியான தகவல் பிட்' என்றால், Twitting என்பது மேற்படி பிட்டுகளை அனுப்புவது.

சரி, ஓரளவிற்கு புரிந்திருக்கும். இனி....

*****
கண நேர இணையம்

பாயின்ட் A-யில் இருந்து பாயின்ட் B-க்குத் தகவலைக் கொண்டு சேர்த்த தொழில் நுட்பங்களை ஒதுக்கிவிட்டு, சமநேரத்தில் (real time) அப்டேட் செய்ய முடிகிற தொழில் நுட்பங்களுக்குத்தான் இனி எதிர்காலம் என்கிறார்கள். (நன்றி அண்டன்). ஓவர்நைட் சக்சஸ் ஆன டிவிட்டர் இதற்கு நல்ல உதாரணம்.

எப்படி...? புரியும்படி பார்க்கலாம். அதற்கு முன் ஒரு குட்டியூண்டு Flash back.

இணையத்தை இரு மாபெரும் யுகங்களாகப் பிரிக்கிறார்கள். முதல் யுகமான இணையம் 1.0-ல் தகவல்கள் (data) வலைத்தளப் பக்கங்களில் கொடுக்கப்பட, நீங்கள் அவற்றைப் படித்துத் தகவல்களை எடுத்துக்கொண்டீர்கள் (Static). கிடைத்த தகவலை வைத்து எதிர்க் கேள்வி கேட்பதோ, பின்னூட்டம் இடுவதோ, கலந்துரையாடுவதோ சாத்தியமில்லை. கிட்டத்தட்ட நூலகம் சென்று புத்தகம் படிப்பது போன்ற ஒரு சாதாரண மீடியாவாகவே இருந்த இணையம் 2001-ல் புது வடிவம் எடுக்க ஆரம்பித்தது.

இணையம் 2.0 என அழைக்கப்படும் இந்தப் புதிய யுகம், எல்லோரையும் ஒருங்கிணைக்க ஆரம்பித்தது. வலைப்பதிவுக் கலாசாரம் தொடங்கப்பட்டது; விக்கிகள் முளைத்தன; மின்னல் வேகத்தில் பின்னூட்டங்கள் இடப்பட்டன; (Dynamic). சமூக நெட்வொர்க்கிங் தளங்களில் படங்களும், வீடியோக்களும் அப்லோட் செய்யப்பட்டு நண்பர்களுடன் பகிரப்பட்டன. கீ-போர்டு தட்டுவதையும் தாண்டி அலைபேசியிலிருந்து நொடிக்கு நொடி ட்விட்டத் தொடங்கினர்.

Flash back ஒவர். இதில், முன்பு சொன்ன கண நேர இணையம் (Real Time Web) எங்கே, எப்படி வருகிறது ?

சொல்கிறேன்.

தேடல் இயந்திர (Google, Yahoo) நிறுவனங்களுக்கும், சமூக வலைதள நிறுவனங்களுக்கும் (Facebook,etc) ஆதார சுருதி விளம்பரங்கள்தான். ஆனால், இந்த இரண்டு தரப்பினரும் பின்பற்றும் டெக்னிக்குகள் வித்தியாசமானவை.

தேடல் இயந்திரங்களின் மிகப் பெரிய சவால், லேட்டஸ்டான தகவல்களைத் தேடல் முடிவுகளில் முதல் பக்கத்தில் கொண்டுவருவது. கூகுளை அதிகம் பயன்படுத்துபவர்களுக்கு, கூகுள் சாதாரண வலைதளங்களைவிட, வலைப்பதிவுப் (Blogs) பக்கங்களுக்கு முக்கியத்துவம் கொடுப்பது தெரிய வரும். வலைதளங்களைவிட வலைப்பதிவர்கள் தகவல்களை வேகமாகப் பிரசுரிக்க முடியும் என்பதால் இந்த முக்கியத்துவம். திறம்பட வேகமாகத் தொகுக்கும் திறன் மட்டுமல்லாது, பொருத்தமான தளங்களை ஒரு தேடல் தளம் அடையாளம் காட்டுவது பயனீட்டாளர்களுக்கும் முக்கியம். அவர்களுக்குப் பொருத்தமான (Targeted Advertisements) விளம்பரங்களை அளிக்க விரும்பும் விளம்பர ஸ்பான்சர்களுக்கும் முக்கியம்.

ஆனால், சமூக வலைதள நிறுவனங்களில் (Social Network) இருந்து பயனீட்டாளர்களும், விளம்பரதாரர்களும் எதிர்பார்ப்பது சற்றே வித்தியாசமானது. தனது நட்பு வட்டாரத்தின் (Social graph) செயல்பாடுகளை உடனுக்குடன், தெரிந்துகொள்வதை பயனீட்டாளர் விரும்புகிறார் என்றால், இந்த நட்பு வட்டாரத்தின் மத்தியில் நடக்கும் உரையாடல்களையும், பரிமாறிக்கொள்ளப்படும் புகைப்படம், வீடியோக்களையும் புரிந்துகொண்டு, அதற்குத் தகுந்த பொருத்தமான விளம்பரங்களைக் காட்ட விளம்பரதாரர் விரும்புகிறார்.

ஓர் எளிய உதாரணம்...,

'இன்னும் இரண்டு வாரத்தில் விடுமுறைக்கு லண்டன் செல்கிறேன்!' என்று நட்புவட்டத்துக்கு நீங்கள் ஃபேஸ்புக்கில் எழுதிவைத்தால், லண்டனில் வாழும் உங்கள் நண்பர்கள் சில ஆலோசனைகளைக் கொடுக்கக்கூடும். அது உங்களுக்குப் பயனுள்ளதாகவும் இருக்கும். ஆனால், விளம்பரதாரர்களுக்கோ, உங்களது வலைப்பக்கத்தில் லண்டனில் தங்கும் விடுதி, வாடகை கார் போன்றவற்றின் விளம்பரங்களைக் காட்டுவது பயனுள்ளது. ஆக, நடைபெறும் தகவல் பரிமாற்றத்தை எவ்வளவு விறுவிறுப்பாக கிரகித்துக்கொள்ள முடியுமோ, அந்த சமூகத் தளங்களுக்கு வெற்றி பெறும் வாய்ப்பு அதிகம். அதனால்தான், ஃபேஸ்புக் நிறுவனம் இந்தத் தளத்தில் ஆதிக்கம் செலுத்துகிறது.

பல லட்சம் பேர் இப்படித் தங்கள் மனதில் இருப்பதை எழுதியபடி இருப்பதைக் கிரகித்தால், மக்கள் மனதில் ஓடும் எண்ணங்கள் வெளிப்படும். என்ன விஷயங்கள் முக்கியமாகக் கருதப்படுகிறது என்ற உண்மை வெளிப்படும். இதில், கண நேர இணையத்தின் நோக்கம், நட்பு வட்டாரத்தின் உரையாடல் மட்டுமல்ல... இணையத்தின் பயனீட்டாளர் எவருடைய தகவல்களையும், அந்த நொடிப் பொழுதில் தேடித் தர முடிகிற இந்த Concept தான் டிவிட்டரின் Secret of Success !. கண நேர இணையத்தில் இருக்கும் தகவல்கள் ரொம்பவே முக்கியம். உதாரணமாக, திரைப்படம் ஒன்றை ரிலீஸ் செய்த அன்றே, அந்தப் படம் வெற்றியடையுமா, தோல்வி அடையுமா என்பதை டிவிட்டுகளைத் தேடிக் கண்டறிய முடியும்.

நான் சொல்ல வந்தது இதைத்தான். இதன் சாத்தியங்கள் யோசித்தால், ஆச்சரியங்களைக் கொடுக்கும். பல மில்லியன் டாலரையே கொடுத்திருக்கிறது - கொட்டிக் கொண்டும் இருக்கிறது !.

*****

என் ட்விட்டர் முகவரி @JSurendhar

சில ட்விட்டர் சுவாரஸ்யங்களும்,

ட்விட்டர் மொழிகள்

ட்விட்டர் ராமாயணம்

மேலும் அறிய

ட்விட்டர் கணக்கு உருவாக்குவது எப்படி?

ட்விட்டர்: எளிய அறிமுகம்

ட்விட்டர் கையேடு

சில வலைத்தள சேவைகள்

பிரபலமான டிவிட்டர் உரலிகளைத் தொகுத்து அளிக்கும் தளம்: www.tweetmeme.com

டிவிட்டரில் உங்களைப் பின்பற்ற (followers) ஆட்களைப் பிடிக்க வேண்டுமா? மல்டி லெவல் மார்க்கெட்டிங் ஸ்டைலில் உதவுகிறது - www.twitproquo.com/

*****

கடைசியாக ஒர் வார்த்தை, இந்தக் களத்தில் குதித்திருக்கிறது கூகுளும்தான். கூகுள் வெளியிட்டிருக்கும் கண நேர இணையத்தின் பெயர் பஸ்ஸ் (http://www.google.com/buzz/).

இன்னென்றும் இருக்கிறது.

அதன் பெயர் "டம்ளர்" !.

ஞானப் பல்

noreply@blogger.com (Surendhar) — Sat, 07 Aug 2010 15:17:00 +0000

அடிக்கடி தொந்தரவான பல் வலி உபாதையுடன் அலுவலகம் வருகிறேன். பல் வலிக்கான காரணம் - ஞானப் பல் முளைக்கிறது.

ஒருவருக்கு கடைசியாக முளைக்கும் நான்கு கடைவாய்ப் பற்கள்தான் ஞானப் பற்கள் (Wisdom teeth). 'விஸ்டம்' என்றால் அறிவு, ஞானம் என்று மட்டும் அர்த்தமில்லை. தற்பெருமை உணர்வு என்றும் பொருள் உண்டு. Late teen age 17 அல்லது 18 வயதிற்கு பின் நமக்கு நன்கு விபரம் தெரிந்து முளைப்பதால் இதை ஞானப் பற்கள் என்று சொல்கிறார்கள் !.

பொதுவா பற்களில் பற்சொத்தை, பயோரியா (பற்களை சுற்றியுள்ள எலும்பை தாக்கும் நோய்), ஹாலி டோலிஸ் (பற்சிதைவால் ஏற்படும் வாய் துற்நாற்றம்)- னு பிரச்சனை வரும். ஆனால் நமக்கு, (ஞான !) பல் முளைக்க போதுமான இடம் இல்லாத காரணத்தால் தொந்தரவு.

காரணம் தெரிந்திருப்பதால் டாக்டரை சந்திப்பதில் தாமதம். வலி அவ்வளவு திவிரம் இல்லை. முன்பொருமுறை இதே காரணம் ஏற்பட்டு இருக்கிறது. அதை பிறகு சொல்கிறேன்.பல் வலி முதல் பாதினா, டாக்டர் பார்க்கும், அனஸ்தீசியா, ஆஸ்பிட்டல் வாசம்னு ஜோரா போகும் இரண்டாம் பகுதி.

இதில் அனஸ்தீசியா பற்றி கொஞ்சம் சேர்ந்து சிந்திப்போம்.

அனஸ்தீசியா என்பது ஒரு கிரேக்கச் சொல். இதற்கு, இல்லாத என்றும், உணர்வுக்காக என்றும் பொருள். ஆலிவர் வென்டால் ஹோம்ஸ் என்பவர்தான் 1946-ல், இந்த வார்த்தையை உருவாக்கினார். உணர்வு நீக்கி கண்டுபிடிப்பால், பல வகை அறுவை சிகிச்சையின் கதவுகள் திறந்தன.

1946க்கு முன்வரை அறுவை சிகிச்சை என்றாலே அனைவருக்கும் நடுக்கம்தான். 'பல்லை' எடுப்பதுகூட பயங்கரமான விஷயம் தான். அறுவை சிகிச்சை செய்யும் நபருக்கு, ஆல்கஹால், ஓபியம் கொடுத்து, நல்ல பலசாலியான பத்து மனிதர்களைக் கொண்டு அவரைப் பிடித்துக் கொள்ளச் செய்துவிட்டு, அறுவை சிகிச்சை நிபுணர், மிக துரித கதியில் சிகிச்சையை முடிப்பார். இந்த நிலையில் நோயாளி மிக பயங்கரமாக அலறுவார்; மயங்கிவிடுவார்; இறப்பு நேரிடுவதும் உண்டு.

*****

உணர்வு நீக்கியின் உபயோகம், பழங்கால 'இங்கா' இன மக்களிடம் இருந்திருக்கிறது. 'கோக்கோ' மர இலைகளைச் சுவைத்தபின் நோயுண்டாக்கும் கெட்ட ஆவியை விரட்ட மண்டையில் துளை போடுவார்கள். கோக்கோ மரப்பிசினை துளை போடும் இடத்தில் பலமணி நேரம் தடவி, அந்த இடம் மரத்துப் போகச் செய்து ஆவி விரட்டுவர். கெட்ட ஆவி உடலுக்குள் நுழைந்தது நோய்க்கு காரணம் என அக்கால மக்கள் நம்பினார்கள்.

*****

நாம் பாடத்தில் படித்தது போல், பிரிஸ்ட்லி(Priestley) என்ற அமெரிக்க கெமிஸ்ட் கி.பி.1772-ல் 'நைட்ரஸ் ஆக்ஸைடை'க் (N2O) கண்டு பிடித்தார். அதை சுவாசித்தால், மனம் லேசாகி, ரொம்ப சந்தோஷப்பட்டது. அவருக்கு ஏற்பட்ட சிரிப்பை அடக்கவே முடியவில்லை. தொடர்ந்து சிரித்துக்கொண்டே இருந்தார். எனவே இவ்வாயுவுக்கு 'சிரிக்கும் வாயு' எனப் பெயரிட்டார்.

கார்டனர் கியூன்கி கால்ட்டன் (Gardner Quincy Colton) என்ற நிபுணர் 1844-ம் ஆண்டு, டிசம்பர் 10 ஆம் நாள் நைட்ரஸ் ஆக்ஸைடின் சாதனைகளை நடுத் தெருவில் எல்லோரும் பார்த்து, மெய்சிலிர்த்து வியப்படையும்படி செய்து காட்டினார். பார்வையாளர் கூட்டத்தில் 'ஹோரஸ் வெல்ஸ்' (Horace Wells) என்ற பல் மருத்துவரும் இதையெல்லாம் கவனித்துக் கொண்டிருந்தார். N2O தான் வலி நீக்கியாகச் செயல்படுகிறது என வெல்ஸின் மூளை சொல்லியது.

வெல்ஸ், நைட்ரஸ் ஆக்ஸைடின் குணத்தை, பல் பிடுங்கும் நோயாளிகளிடம் செலுத்தி சோதிக்க விரும்பினார். நைட்ரஸ் ஆக்ஸைடு உள்ள ரப்பர் பையைத் திறந்து, நோயாளியின் முகத்தருகே கொண்டு சென்றார். நோயாளி வாயுவை சுவாசித்ததும், தோல் வெளுத்து, கண் நீலமாகி, தலை சாய்ந்தது. நோயாளியின் பல்லை வெகு வேகமாகப் பிடுங்கினார். நோயாளி பயங்கரமாக அலறுவார் என எதிர்பார்த்தால், அவரிடம் ஒரு சத்தமும் இல்லை. நோயாளி கொஞ்ச நேரத்தில் கண்விழித்தார்.

1846ம் ஆண்டு வெல்ஸ் பெயர், உணர்வு நீக்கியின் கண்டுபிடிப்பில் வெளியானது. புத்தகம் வெளியிட்டார். நியூயார்க் போய் குளோரோபார்ம் பயன்படுத்தி, பல் பிடுங்குதலின் போது குளோரோபார்மே பாதுகாப்பானது, சிறந்தது என நிரூபித்தார்.

பின்னர் ஜனவரி, 1848 தற்கொலை செய்து கொண்டது தான் சோகம்.

வெல்ஸ் உலகைவிட்டு மறைந்தபின் Father of anesthesia என்று மருத்துவ கழகம் பாராட்டியது.

*****

தலையனையாக புத்தகம் படித்து, நவீன மருத்துவதுடன் சடுதியில் பிடுங்கி விடுகின்றனர், இப்போதெல்லாம். என் ஞானப் பல்லில் ஒன்றை, ஏற்கனவே அனஸ்தீசியா பெற்றுகொண்டு இழந்துவிட்டேன். நோகாமல் பல்லை தட்டி கையில் கொடுத்து விடுகிறார்கள். இப்போது, இன்னொன்று போக்கு காட்டிக்கொண்டிருக்கிறது.

சொல்லியிருக்கலாம்...சொல்லிவிட்டேன்!

noreply@blogger.com (Surendhar) — Sun, 11 Jul 2010 22:33:00 +0000

நான் அரை மூச்சாய் [இன்னும் முழு மூச்சாய் ஆரம்பிக்கவில்லை] புத்தகம் படிக்க ஆரம்பித்ததே 2 வருடங்களுக்கு முன் தான். அதற்கு முன் குமுதம், விகடன், அதுவும் எப்போதாவது கையில் மாட்டும் போது. 5 வருடம் கல்லூரியில் கழித்தேன். அந்த மாலை நேரங்களை என்ன செய்தேன் என்று இன்று கவலைப் படுகிறேன். அப்போவே ஒழுங்காய் படித்திருந்தால் இன்னைக்கு தில்லா… -பிரதீப் குமார் (வலைப் பதிவர்)

மேலே சொன்ன 'பிரதீப் குமார்' என்ற பெயருக்குப் பதிலாக நம்மில் பல பெயரை போட்டுக் கொள்ளலாம். மேலே சொன்ன வாசகம் அவரது பதிவொன்றில் சொன்னது.

நபருக்கு நபர் வருடமும், சூழலலும் மாறுபடலாம். ஆதாரமான அந்த 'அடடா' நம் எல்லோருக்கும் பொது!.

அடடா... நாம் செய்யாமல் விட்டு விட்டோமே, கொஞ்சம் யோசிச்சிருக்கலாம், அடடா... அப்படி பண்ணியிருக்கலாம் - என அந்த 'அங்கலாய்ப்பு' அனுபவம் நிச்சயம் நம்மில் இருக்கிறது. விதி விலக்கில்லாமல்.

*****

நான் கொஞ்சமே கொஞ்சம் போல் படிக்கும் காலத்தில் (பாடம் தவிர்த்து) படிக்காமல் போனேனே என்று அங்கலாய்க்க அவசியமில்லாமல் தேடித் தேடிப் படித்திருக்கிறேன். செமஸ்டர் நடக்கும் இடையில், இரவில் படித்திருக்கிறேன்.(கல்கியின் சிவகாமியின் சபதம்). பஸ் பயணங்களில், இரயில் பயணங்களில், காத்திருக்கும் வேளைகளில், ஏன் ஊருக்கு போய் பாட்டியை பார்க்கும் வேளைகளில் என விவஸ்த்தையில்லாமல், நேரங்காலம் பார்க்காமல் படித்திருக்கிறேன். கல்கி, சாண்டில்யன், லா.ச.ர, மௌனி, ஜி.நாகராஜன், நா.பிச்சமூர்த்தி, கலைஞர் மு.கருணாநிதி, ஜெயகாந்தன், சுஜாதா, பாலகுமாரன், சிவசங்கரி, அனுராத ரமணன், சுபா, ராஜேஷ்குமார், பி.கே.பி, கண்ணதாசன், வைரமுத்து, வாலி என நீளும் பட்டியலின் எழுத்துகளை வெகு அருகில் வைத்து ரசித்திருக்கிறேன். உறவாடியிருக்கிறேன்.

வகை என பிரிக்காமல் சொன்னதைப் படித்தேன். மனம் போனபோக்கில் புத்தகங்களை தேர்ந்தெடுப்பேன். இன்னது என பாகுபடுத்தாத 'பொது' பிரிவிலேயே இருந்திருக்கிறேன்.

உலக சினிமாக்களை மாதம் ஒரு முறை போட்டுக் காட்டுவார்கள். சந்தாதாரர் ஆக ரூபாய் 50 அல்லது 60 வசூலிப்பார்கள். சந்தா கட்டி உறுப்பினர் ஆகி படம் பார்த்திருக்கிறேன். படம் முடிந்தவுடன் அதைப் பற்றி விவாதிப்பார்கள். படம் பார்த்து அவர்கள் சொல்லும் கருத்தையே என் கருத்தாக எடுத்துக் கொண்டு வெளி வருவேன். படம் பார்த்து புரியாத எனக்கு அவர்கள் விவாதிக்கும் விஷயமும் பாதிதான் விளங்கும். அப்புறம் நான் எங்கு அந்த விவாதத்தில் பங்கெடுத்துக் கொள்வது!. இதெல்லாம் 2003 முந்தைய திருச்சியில். நான் பார்த்த தமிழ் படங்கள், ஊர் சுற்றும் என் ஆர்வம், நண்பர்கள் எல்லாம் புத்தகம் படிக்கும் ஆசைக்கு சமமாகவே இருந்ததால், நான் ஒரேயடியாக புத்தக புழுவாகவும் ஆகவில்லை. எதைதான் உருப்படியாகச் செய்தேன்?!.

அந்த சமயத்தில் நான் செய்து பார்க்க துணியாதது 'காதல்' மட்டுமே. பெண்களை கண்ணில் பார்பதோடு சரி... அதற்கும் காரணம் இருந்தது. எந்த பெண்ணும் என்னை 'மோகித்து' காத்திருக்கவில்லை. ஆத்து நீச்சல் (சுமாராக!) மட்டும் தெரிந்த எனக்கு 'காதல்' கடலில் குதிக்கும் தைரியமும் வாய்த்திருக்கவில்லை. நான் பார்த்த பெண்களுக்கு பின்புலமும் கூடவே சகோதரனும் இருந்ததால் என் 'உடல் பத்திரம்' கருதி வாளாவி இருந்து விட்டேன். என்னுடன் தவறி பழகியவர்களும் சகோதர பாசத்தைக் காட்டியவர்கள். இதில் என் நல்ல நண்பர்களை சேர்க்கவில்லை. எதற்கும் இருக்கட்டும் என்று சிலரிடம் சிரித்து மட்டும் வைத்திருந்தேன். 'ஃபிக்செட் டெபாஸிட்'!. என் டெபாஸிடை களவாடிய 'களவாணி'களே அதிகம். தீராத வேலைக்கிடையில் செமஸ்டர் அறிவித்து, புண்ணியம் கட்டிக் கொண்ட பல்கலை கழகத்தின் நிர்வாகத்திற்கு என் 'காதல்' தேவை புரியவில்லை. ச்சே.... ?! என் பார்டர் தாண்டாத காதலும் தேறவில்லை. அதனால், பெண்களை பார்பதோடு சரி!

இதனால் எல்லாம் என் பாட படிப்பு தனியாக பாதித்தாக சொல்ல முடியவில்லை. ஒழுங்காகவே பாஸ் செய்து வெளிவந்தேன். (பட்ட கஷ்டம் நமக்குதான் தெரியும்!.)

*****

அந்த காலகட்டத்தில்தான், நான் முதன் முதல் படித்த முழு மொழிபெயர்ப்பு நாவல் 'பட்டாம்பூச்சி'.

பட்டாம்பூச்சி - ஹேன்றி ஷாரியர் எழுதிய Papillon என்னும் பிரெஞ்சு நூலின் ஆங்கிலம் வழியான தமிழ் மொழிபெயர்ப்பு. 800 பக்கங்களைத் தாண்டும் இந் நூல். மயிர்கூச்செறிதல் என்று சொல்வார்களே - அந்த அனுபவத்தைப் பெற்றுக்கொண்டேன்.

நூலின் ஆசிரியர் தனது இருபத்தைந்தாவது வயதில் கொலைக் குற்றமொன்றிற்காக ( செய்யாத கொலையென்கிறார் ) ஆயுட் தண்டனை பெற்று அட்லாண்டிக் சமுத்திரத்தின் மறு கோடிக்கு, பிரெஞ்சுக் கயானாவில் இருந்த கொடிய தீவாந்தர சிறைக்கு கொண்டு செல்லப்பட்டு அடைக்கப் படுகிறார்.

அவர் ஒவ்வொரு சிறையாகத் தப்பிப்பதும், பிடிபடுவதும், அடைபடுவதுமாக 13 வருட காலத்தை, அவர் தனது விடுதலை மீதான இலக்கில் மீண்டும் மீண்டும் செலவிடுகிறார். கொடிய தீவுச் சிறைகளில் இருந்து புதைமணலிலும், ஒட்டைக்கட்டுமரங்களிலும் தப்பிப்பதுவும், மீண்டும் அகப்பட்டு இருண்ட தனிமைச்சிறைகளில் அடைக்கப்படுவதும், அதிலிருந்து வெளியேற தொடர்ந்து முயற்சிப்பதுமாக விரிகிறது கதை.

தமிழின் மிகச் சிறந்த மொழி பெயர்ப்பு நூலாகக் இதைக் சொல்லலாம். Must read வரிசையில் இந்த புத்தகத்திற்கு என்றும் இடமுண்டு. பெரும்பாலான மொழிகளில் மொழியாக்கம் செய்யப்பட்டுள்ளது. இக்கதை ஓர் உண்மை சம்பவம்!. உலக புகழ் பெற இது மட்டும் காரணம் அல்ல. மனிதனின் சுதந்ததிர வேட்கை உலக பொது!. மனிதனின் அந்த சுய விருப்ப 'விடுதலை'. நான் யாருக்கும் அடிபணிய தேவையில்லை என்ற உற்சாகம். அந்த உணர்வு கொடுக்கும் உற்சாகமே! இதை உலக இலக்கியத்தில், உலக மக்களிடம் புகழ் பெற காரணம்.

தமிழில் பெயர்த்தவர் ரா.கி.ரங்கராஜன். ( 'சிவாஜி' பட சூட்டிங்கில் ரஜினிகாந்திற்கு நடிகர் விவேக் பரிசளித்தது இந்த நூலைத்தான்! )

ரா.கி. ரங்கராஜன்: 05.10.1927 ல் கும்பகோணத்தில் பிறந்தார். தன் 16வது வயதில் எழுத ஆரம்பித்தார். குமுதம் இதழில் 42 ஆண்டு காலம் உதவி ஆசிரியராகப் பணியாற்றியுள்ளார். இவர் 1500க்கும் மேற்பட்ட சிறுகதைகளும், 50 நாவல்களும், ஏராளமான கட்டுரைகளும், மொழிபெயர்ப்பு நாவல்களும் எழுதியுள்ளார். இவருடைய மூன்று நாவல்கள் திரைப்படமாக வெளிவந்துள்ளன. பல படைப்புகள் சின்னத்திரையிலும் இடம்பெற்றுள்ளன. எழுத்துலகின் மேதாவி, பிஷ்மர் என்று போற்றபடுபவர்.

இந்த புத்தகத்தை வாங்க விரும்புபவர்கள், வரும் அடுத்த புத்தக கண்காட்சியில் வாங்கிப் படியுங்கள். குறித்து வைத்துக் கொள்ளலாம். அவசரப்படுபவர்கள் இப்போதே தேடி, ஆரம்பிக்கலாம்.

இது படமாகவும் வந்திருக்கிறது. அதன் ட்ரைலர்.

"ஓசைப்படாமல் சாதனை படைத்த தமிழர்களில் ஒருவரான எனது இனிய நண்பர். ரா.கி. ரங்கராஜன் ஒரு கர்மயோகி. குமுதம் ஸ்தாபன விசுவாசம், ஆசிரியர் எஸ்.ஏ.பி மேல் பக்தி, கிடைத்தது போதும் என்கிற திருப்தி, சக எழுத்தாளர்கள் மேல் பொறாமையற்ற பரிவு, நேசம், வெள்ளைச்சட்டை, வெள்ளை வேட்டி, நண்பர்களைக் கண்டால் கட்டியணைத்து முதுகில் ஒரு ஷொட்டு - இவை இவருடைய சிறப்புகள்"

- சுஜாதா

நீங்களும் உங்கள் நண்பர்களிடம் இந்த பத்தியின் தலைப்பைச் சொல்லி பேச்சை ஆரம்பித்து விடுங்கள்.

அடடா... இதை முன்பே சொல்லியிருக்க வேண்டுமோ!

செம்மொழி மாநாடு - நம் பார்வை II

noreply@blogger.com (Surendhar) — Sat, 10 Jul 2010 11:36:00 +0000

செம்மொழி மாநாட்டு ஆரவாரமெல்லாம் முடிந்து, தமிழர்கள் தத்தமது வேலைகளில் இறங்கிவிட்டனர். ஆட்சியாளர்கள் கட்சி பணி பார்க்கவும், நாமெல்லாம் மற்றுமொரு உலக கோப்பையை பார்க்க - ஆக்டோபஸ்ஸின் உதவியோடு - நகம் கடித்து துப்ப தொடங்கியிருக்கிறோம்.

களிமண், கல்வெட்டு, ஓலை, காகிதம் தாண்டி கணினியிலும் பட்டொளி வீசிப் பறக்கும் தமிழ்க் கொடியை இன்னும் உயரே தூக்கிப் பிடிக்கும் நோக்கில், செம்மொழி மாநாடு நடத்தப்பட்டது!பேசும் மொழிக்காக இத்தனை லட்சம் பேர் கூடுவார்கள் என்ற ஒன்றே கோவை மாநாட்டுக்குக் கிடைத்த வரலாற்றுப் பெருமை.

கொஞ்சம் அருகில் சென்று, நுரை தள்ளி தண்ணீர் அள்ளி பார்ப்போம்.

*****

மொழியியல் சார்ந்த உலக மேதைகளும் உள்ளூர் அறிஞர்களும் ஒன்றாகச் சேர்ந்து தங்களது ஆய்வு முடிவுகளை, இது வரை இருக்கும் ஆதாரங்களை நினைவுபடுத்துவதும், அடுத்த கட்டமாகத் தங்களது ஆய்வை எதை நோக்கிச் செலுத்துவது என்று முடிவு எடுக்கவுமே ஆய்வரங்குகள் நடத்தப்படுகின்றன. ஆனால், கோவையில் நடந்த ஆய்வரங்குகள் இதில் எந்த நோக்கத்தையும் நிறைவு செய்ததாகத் தெரியவில்லை.

ஆய்வரங்க நிகழ்வுகளில் கருணாநிதி பற்றி சமர்ப்பிக்கப்பட்ட கட்டுரைகள்கூட யாரையும் நெருட வில்லை. அவர் மகள் கனிமொழி பற்றியும் ஆய்வுக் கட்டுரைகள் சமர்ப்பிக்கப்பட்டதில்... தமிழறிஞர்களுக்கு முகச்சுளிப்பு!

கனிமொழி பற்றி மூன்று தலைப்புகளில்! அந்தக் கட்டுரைகளின் பொருளடக்கமும் சரி... சமர்ப்பித்தவர்களின் விஷயஞானமும் சரி... அந்த அரங்கத்திலேயே காற்று இறங்கிப் போனது இன்னும் சோகம்! நல்ல வேளை பொது மக்களை பார்க்க அனுமதிக்கவில்லை (!).

ஒர் உதாரணம் பார்ப்போம்.

'கவிஞர் கனிமொழியின் கவிதைகளில் பெண் மன உணர்வுச் சித்திரிப்பு' என்ற தலைப்பில் வெ.கலைச்செல்வி என்பவர் ஓர் ஆய்வுக் கட்டுரையை சமர்ப்பித்தார். அங்கீகரிக்கப்பட்டு அனுமதிக்கப்பட்ட கேள்வியாளர்கள் மொத்தமே 10 பேர்தான் அமர்ந்திருந்தார்கள். அவர்களில் ஒருவர் எழுந்து, 'கனிமொழி எத்தனை கவிதைத் தொகுப்புகள் எழுதி இருக்கிறார் என்று உங்களுக்குத் தெரியுமா?' என முதல் கேள்வியைப் போட்டார்.

இதற்கு பதில் சொல்ல முடியாமல் கொஞ்சம் நேரம் தயங்கி, எதையோ யோசித்த போஸில் நின்றார் கலைச்செல்வி.கேள்வி கேட்டவரே கனிமொழி எழுதிய மூன்று புத்தங்களின் பெயர்களைக் குறிப்பிட்டு, ''அவர் எழுதிய புத்தகங்களின் பெயர்களைக்கூடத் தெரிந்துகொள்ளாமல் எப்படி ஆய்வுக் கட்டுரை எழுதினீர்கள்?' என்று மடக்கினார்.

''நான் 'கருவறை வாசனை' பற்றி மட்டும்தான் ஆய்வு செய்தேன்!' என்று சமாளித்தார் கலைச்செல்வி. இதில் சமாதானம் அடையாத கேள்வியாளர், 'ஆய்வு என்பது சம்பந்தப்பட்டவருடைய எல்லா எழுத்துகளையும் படித்துவிட்டு அவற்றில் இருந்து நீங்கள் அறிந்துகொண்டதாகத்தான் இருக்க வேண்டுமே தவிர, பொத்தாம் பொதுவான கட்டுரையாக இருக்கக்கூடாது!' எனச் சொல்ல, கலைச்செல்வியின் முகம் இருண்டது.

*****

பெ.பகவத் கீதா 'கனிமொழியும் கவிதைமொழியும்' என்கிற தலைப்பில் ஆய்வுக் கட்டுரை வைத்தார். இந்த ஆய்வுக்கும் சரமாரி கேள்விகள்! முதலில் எழுந்த ஒரு கேள்வியாளர், 'கருவறையின் வாசத்தை ஆண்கள் உணர்ந்தது இல்லையா? ஆண்களைப்பற்றியும் கனிமொழி எழுதி இருப்பது உங்களுக்குத் தெரியுமா? 'சிகரங்களில் உறைகிறது காலம்' என்ற புத்தகத்தில் தந்தையரைப் பற்றியும் அவர் பாடி இருக்கிறாரே..?' என்று அடுக்கிக்கொண்டே போனார் கேள்விகளை. பகவத்கீதா, 'நான் பெண்மை தொடர்பான விஷயத்தை மட்டுமே எடுத்துக்கொண்டேன். அவ்வளவுதான்!' என்றார். அடுத்து பழனிசாமி என்பவர் எழுந்து, 'உங்கள் ஆய்வுக் கட்டுரை முழுக்கப் பாராட்டு மழையாக அல்லவா இருக்கிறது. நடுநிலையான விமர்சனம் எதுவும் இல்லையே? கனிமொழியின் படைப்புகளில் இருக்கும் முரண்பாடுகள் பற்றி நீங்கள் எதையும் குறிப்பிடவில்லையே... ஏன்?' என ஒன்றுக்குள் ஒன்றாகப் பல கேள்விகளை அடுக்க, 'அவையடக்கத்தின் காரணமாக, அதுபற்றி எல்லாம் ஆய்வு செய்யவில்லை!' என்று பகவத்கீதா பதில் சொன்னாரே பார்க்கலாம்.

இதைக் கேட்டு அரங்கமே ஒரு நிமிடம் அமைதி காக்க, 'ஆய்வுக் கட்டுரைகள் சமர்ப்பிப்பதற்கும் அவையடக் கத்துக்கும் என்ன சம்பந்தம்? ஒன்றுமே புரியவில்லையே?'' என்று இன்னொரு கேள்வியாளர் அரங்கத்தின் அமைதியைக் கலைத்தார். தொடர்ந்து அவரே, ''எடுத்துக்கொண்ட பொருளைப் பற்றிய நன்மை - தீமையை அலசி ஆராய்ந்து சொல்வதுதான் ஆய்வுக் கட்டுரை! ஒருவரைப் பாராட்டி எழுதுவது ஆய்வுக் கட்டுரையே இல்லை. அதை வெறும் கட்டுரை என்றுதான் சொல்ல முடியும்!' என்று ஆவேசமாகக் குரல் எழுப்பினார். நல்ல வேளை இந்தக் கேள்விக்கு பகவத்கீதா பதில் சொல்ல அரங்கத் தலைவர் கனல்மைந்தன் அனுமதிக்கவில்லை. காரணம் நேரமின்மைதான்! (ஜு.வி யில் (04-07-2010) விரிவாக வந்திருக்கிறது.)

*****

கிளம்பிற்றுகாண் ஜால்ரா கூட்டம்!

என விகடன் கொட்டு வைக்கும் அளவுக்கு சத்தம் அதிகம்.

அதே கவிஞர்கள், அதே கூட்டம் சூழ்ந்திருக்க, நடுநாயகமாக வீற்றிருக்கிறார் முதல்வர். 'யாரங்கே... தொடங்கட்டும்' என ஆரம்பமாகிறது கவியரங்கம்...

"கலைஞரின் கபாலக் களஞ்சியத்தில் ஆண் எண்ணங்களைவிட, ஈரப் பெண் எண்ணங்களே அதிகம். இல்லாவிட்டால், கோபாலபுரம் வீட்டை கொடையாகத் தர முடியுமா?, அந்த ஒளவையார் காலத்தில் இவர் இருந்திருந்தால், அதியமான் ஏமாந்திருப்பான்!" என்றெல்லாம் கவிதை மழை. சொன்னது ஈரோடு தமிழன்பன்.

வாலி, வைரமுத்து போன்ற கவிஞர்கள் மேல் நமக்கு தனிபட்ட பகையில்லை. கேட்பவர்களுக்கும் சில வேளை கூச்சம் வரலாம் என்பதே நமது கருத்து! வேறென்ன சொல்ல?

*****

கண்காட்சிக்கு ஜெ !

அந்த அரங்கத்துக்குள் நுழைந்தால், சிந்துச் சமவெளிக்குள் பயணிப்பதுபோலவே இருந்தது. மொகஞ்சதாரோ - ஹரப்பா நாகரிங்களாகக் கண்டுபிடிக்கப்பட்ட இடங்களில் இருந்த எழுத்துக்கள் திராவிட எழுத்துக்களே என்று நிரூபிக்கப்பட்டதால், அந்த எழுத்துக்களில் தொடங்கி, அங்கே இருந்த வீடுகள், கிணறுகள், அம்மக்கள் பயன்படுத்திய பொருட்களின் சிதைவுகளை மாதிரியாகச் செய்துவைத்து இருந்தார்கள். ஓலைச் சுவடிகளை ஊர் ஊராக அலைந்து திரிந்து கைப்பற்றி புத்தகங்களாகப் பதிப்பித்தவர் உ.வே.சாமிநாதய்யர். அவர் வைத்து இருந்த திருக்குறள், புறநானூறு, சீவகசிந்தாமணி ஆகிய இலக்கியங்களின் ஓலைச் சுவடிகள், அதை எழுதப் பயன்படுத்திய எழுத்தாணிகள் வைக்கப்பட்டு இருந்தன. புராதனச் சிலைகள், தமிழர் வாழ்க்கையைக் காட்டும் ஓவியங்கள், பழைய காலத்துத் தமிழ் எழுத்துக்கள் என எல்லாமே பழமையை நினைவுபடுத்துவதாக இருந்தன. இலக்கியக் காட்சிகளை வைத்துத் தயாரிக்கப்பட்ட 3டி அனிமேஷன் காட்சிகள்கொண்ட ஒலி - ஒளி கண்காட்சி அரங்கம் அருமை! (கண்காட்சி வருணனை - ஆ.வி., நன்றி)

அறுதலான விஷயம், 'தமிழிலேயே பாடம் படித்தால், தமிழக அரசுப் பணிகளில் முன்னுரிமை'. அச்சுத் துறையில் கணினித் தமிழை உலகளாவ ஒருமுகப்படுத்தும் விதமாக, 'யூனிகோட்' மற்றும் 'டிஏசிஇ-16' ஆகியவற்றை ஆரத் தழுவும் ஆணை பிறப்பிக்கப்பட்டுள்ளது. உலகத் தமிழர் அனைவரும் ஒரே எழுத்துருவில் படிக்கலாம் இனி!

'டிஏசிஇ-16' புரியாதவர்களுக்கு வேறொரு சந்தர்பத்தில் சொல்கிறேன்.

*****

தமிழுக்கு இவை மட்டும் போதுமா? இன்னும் செல்வதற்கும் செய்வதற்கும் எவ்வளவோ இருக்கின்றன!

யானைக்கு சோள பொரி. என்ன! இந்த பொரி அவிக்க, 380 சொச்சம் கோடி தேவைப் பட்டிருக்கிறது!

செம்மொழி மாநாடு - நம் பார்வை I

noreply@blogger.com (Surendhar) — Mon, 28 Jun 2010 19:27:00 +0000

நாடாளுபவரின் நிறைவேறாத பெருங்கனவாக இருந்ததை, உலகத் தமிழ் செம்மொழி மாநாடு நடத்தி தற்போது நிறைவேற்றியுள்ளார் கலைஞர்.

திராவிட இயக்கத்தில் ஏற்கனவே அண்ணா, எம்.ஜி.ஆர், ஜெயலலிதா ஆகியோர் உலகத் தமிழ் மாநாடுகளை நடத்திவிட்டனர்.

நமது கருத்துக்களை பகிரும் முன் - மாநாட்டுத் துளிகள் - உங்களுக்காக!

செம்மொழி மாநாட்டிற்காக போய் இறங்கியதும் ஜில்லென்று இருந்தது ஊர்.

"செம்மொழி மாநாடு நடக்கும் ஐந்து நாட்களுக்கும் சேர்ந்து ஆறு லட்சம் பேர் வருவார்கள்!" - இப்படித்தான் கணக்குப் போட்டிருந்தார்கள் போலீஸ் புலனாய்வுத்துறை அதிகாரிகள். அவர்கள் போட்ட கணக்கு தப்பாகி விட்டது. முதல் நாளே ஆறு லட்சத்தைத் தாண்டியிருக்கலாம். அந்த அளவுக்கு கூட்டம் என்றால் அப்படியொரு கூட்டம்.

கோவை மாநகருக்குள்ளும், மாநகரைத் தொட்டும் மாநாட்டை ஒட்டி பல்வேறு சாலை வசதிகள் மேம்படுத்தப்பட்டுள்ளன. நெடுஞ்சாலைத் துறை மூலம் சாலைப்பணிகள் மேற்கொள்ள சுமார் 60 கோடிக்கு அரசாணை பெறப்பட்டுப் பணிகள் நடைபெற்றுள்ளன.

மாநாட்டில் கலந்துகொள்ள ஒருநாள் முன்னதாகவே ஜனாதிபதியும் வந்து விட்டார்.

மாநாட்டிற்கு வந்த நடிகர்கள் பாடு படுதிண்டாட்டம். நடிகர் சிவகுமார், பிரபு, விஜயகுமார், பிரகாஷ்ராஜ், தியாகு போன்றவர்கள் கேலரியில் 'கலைஞர்கள்' என்று எழுதப்பட்ட ஒரு கோடியில்தான் அமர வேண்டியிருந்தது. அங்கிருந்து பார்த்தால் மேடையே தெரியாத நிலை. மின்விசிறி வேறு இல்லை. அழைப்பிதழையே விசிறிக் கொண்டனர். (மற்றொரு நாள் இந்த பகுதியில்தான் நாம் அமர வைக்கப்பட்டோம் !).

பிரகாஷ்ராஜ் வரும்போது அவரை யார் என்று தெரியாமல்(!) ஒரு பாதுகாப்பு போலீஸ்காரர் தடுத்து தள்ளியது தனிக் கதை.

மாநாட்டு பட்டிமன்றம் முடிந்த போது வெளியே கட்டுக்கடங்காத மக்கள் கடல். அதை நீந்தி கடந்து செல்ல ஒரு கி.மீ.க்கு ஒரு மணி நேரத்திற்கும் மேல் ஆயிற்று.

நாம் பார்த்த பிரபலங்கள். வாலி, வைரமுத்து, சிவக்குமார், வடிவேலு, பாரதிராஜா, சந்திரசேகர் (விஜய் அப்பா அல்ல), எஸ்.வீ.சேகர், லியோனி, நக்கீரன் கோபால், எழுத்தாளர் திருப்பூர் கிருஷ்ணன், சாலமன் பாப்பையா, மனுஷய புத்திரன், மற்றும் அறிஞர் பெருமக்கள்.

மாநாட்டு மைய நோக்கு பாடல் திரும்ப திரும்ப ஒலித்துக் கொண்டேயிருந்தது, டிவியிலும், பெரிய திரையிலும் காட்டிக் கொண்டிருந்தார்கள். ஒரு தமிழ் அலை பரவ மிக முக்கிய காரணமாய் இதைக் குறிப்பிடலாம்.

உணவில் 'சுவை, தரம் முக்கியம்' என்பது முதல்வரின் கறார் கட்டளையாம். ரூ.30-க்கு சாப்பாடு விநியோகிக்கப்பட்டது. ஒரு வெரைட்டி ரைஸ், ஒரு தயிர் சாதம், ஒரு பாட்டில் தண்ணீர், ஊறுகாய், இனிப்பு, சிப்ஸ் இருந்தது. (அதை 'ஊசி, புளித்துப் போன சாப்பாடு, விலையும் அதிகம்' என்று திட்டிக்கொண்டே சிலர் சாப்பிட்டனர்.)

கழிவுகளைக் கொட்ட 660 குப்பைத் தொட்டிகள் மாநாட்டு திடலில் ஆங்காங்கே வைக்கப்பட்டு இருந்தன. சாதாரணக் காய்ச்சலில் துவங்கி விபத்து வரை எவ்வகையான உடல் நலப் பிரச்னைகள் ஏற்பட்டாலும், விரைந்து சேவையாற்ற நூற்றுக்கணக்கான மருத்துவர்களும் தயார் நிலையில். வி.ஐ.பி-க்களுக்கு என ஸ்பெஷல் ஏற்பாடுகளுடன் அதி நவீன மருத்துவ வாகனங்கள்!

மாநாடு முழுக்க டாய்லெட் வசதி ஏற்படுத்திக் கொடுத்து பெண்களின் புண்ணியத்தை கட்டிக்கொண்டனர். பெண்களிடம் முகச்சுழிப்பில்லை. பஞ்சமில்லாமல் தண்ணீர் வசதி செய்து கொடுத்தார்கள். ஆண்களில் சிலர் வசதியை புறக்கணித்து இயற்க்கை அழைத்த போதெல்லாம் சுவர் ஓரம் ஒதுங்கினர்!.

தமிழ்க் கணினி இணைய கண்காட்சி நடந்தது. 123 அரங்குகளில் மத்திய, மாநில அரசுத் துறை சார்ந்த 123 இணைய தளங்கள் இடம்பெற்றன. இந்திய தகவல் தொழில் நுட்ப அமைச்சகமும் இதில் பங்கேற்றது. இதன் சார்பில் கண்காட்சிக்கு வரும் பார்வையாளர்களுக்கு யூனிகோட் தமிழ் மென்பொருள்கள் அடங்கிய ஒரு லட்சம் சி.டி-க்கள் இலவசமாக வழங்கப்பட்டது. கண்காட்சியில் பங்கேற்கும் மற்ற நிறுவனங்களும் தங்களது தமிழ் மென்பொருட்கள் அடங்கிய சி.டி-க்களை இலவசமாக வழங்கின. (நாம் கேட்ட லினக்ஸ் சிடி பெற, அரை மணி கழித்து வர சொன்னார்கள். மெயில் ஐடி, செல் நம்பர் கொடுத்து வந்தேன், இது வரை தொடர்பில்லை!)

புத்தக கண்காட்சியிலும் பெரும் கூட்டம். சிந்து சமவெளி மற்றும் பல பெருமைகள் விளக்கும் கண்காட்சியிலும் கூட்டம். அவசியம் குழந்தைகளும் பெரியவர்கள் காண வேண்டியது.

லட்சக்கணக்கில் மக்கள் கூடுவார்கள் என்பதை நிகழ்ச்சி ஏற்பாட்டாளர்கள் எதிர்பார்க்கவில்லையோ போலும். சுய உதவிக் குழுக்களைச் சேர்ந்த பெண்களை பல்லாயிரக்கணக்கில் வரவழைத்திருந்தனர். கூட்டத்தில் அந்த பெண்கள் சிக்கி சங்கடப்பட்டனர். கஷ்டமாக இருந்தது. (யாருக்கு என்று கேட்காதீர்கள் !)

கட்சிக் கரை வேட்டியினரை வெகு அரிதாகத்தான் விழாவில் காணமுடிந்தது. நாம் பார்த்த வரை, நகரில் எந்த மூலையிலும் தி.மு.க பேனர்களையோ, போஸ்டர்களையோ காணமுடியவில்லை. கட்சி நிர்வாகிகள் ஆச்சரியப்படுத்தினர். பாராட்டலாம்.

ரத ஊர்வலத்தை தொடங்கி வைக்க (லக்ஷ்மி மில்ஸ் சந்திப்பு) வந்த கனிமொழி, அங்கு நின்றிருந்த நாதஸ்வரம், கரகாட்டப் பெண்கள், ஆண்களிடம், "ரொம்ப நேரமா நிற்கிறீங்களே. கால் சுடுமே. உட்கார்ந்துகொள்ளலாமே?" என்றார். அவர்களோ, "நாங்கள் நாள்கணக்கில் இப்படி நின்றாலும் எங்களுக்குக் கால் சுடாது. வலிக்காது. கடவுளிடம் அப்படியொரு வரம் வாங்கி வந்திருக்கிறோம்" என்று கூறி அசத்தினர்.

ஸ்டாலினும் கனிமொழியும் விழா முழுக்க ஜொலித்தனர். நமது பத்திரிக்கைகளும் இதை சிலாகித்தது.

இந்த லட்சோப லட்சம் மக்கள் கூட்டத்தைப் பார்த்துவிட்டு ஒரு பெண்மணி பேசி வந்த வார்த்தைகள் இதுதான். "அடுத்த தடவையும் தேர்தல்ல கருணாநிதிதான் வருவார் போலிருக்கு!"

தொடரும்.....

என்றுமுள தமிழ்

noreply@blogger.com (Surendhar) — Sat, 19 Jun 2010 20:02:00 +0000

தமிழ் மொழியையும், நம்மையும் பெருமையுறச் செய்த தமிழறிஞர்கள் பலர். இவர்களைப் பற்றி பிறகு.

******

செம்மொழி என்ற வார்த்தை திடிரென்று நம் எல்லோருக்கும் பரிச்சயம் ஆகியிருக்கிறது. கோவை செம்மொழி மாநாட்டு செய்திகள் நம்மை வந்து சேருவதற்கு எல்லா வழிகளிலும் அரசாங்கம் முயன்று, வெற்றியும் பெற்றிருக்கிறது. இதில் அரசியல் பார்க்கத் தேவையில்லை. மொழி வளர்ச்சிகான வாய்பாக இதைப் பார்க்கலாம்.
தமிழ் இணைய தொழில்நுட்ப வல்லுநர்களும் ஆய்வறிஞர்களும் இம்மாநாட்டில் கலந்துகொண்டு ஆய்வுக் கட்டுரைகள் வழங்க உள்ளனர்.

கணினியில் தமிழும் பிற திராவிட மொழிகளும், கணினிக் கலைச் சொல்லாக்கத்தில்(Technical terms) புதுச் சொல் உருவாக்கம், தமிழ் நாட்டில் தமிழ்க் கல்வி நடைமுறைச் சவால்கள், கணினி மயமாக்கலுக்கான தேவைகளும் தரப்படுத்தலின் முக்கியமும்(Needs & standards), கணினி வழி தமிழ் எழுத்து உணரி செயற்பாடுகள்(language recognization) அதில் உள்ள சிக்கல்கள், இரு வழி மொழி பெயர்ப்பு, கணினி வழி கல்வி, தமிழில் தேடு பொறிகள்(search engines), கையடக்கக் கருவிகளில் தமிழ், தமிழில் சிந்தனைத்திறன் கணினி ப்ரோக்ராம், கணினியில் தமிழ்ப் பேச்சு மற்றும் சொற்பகுப்பு ஆய்வு, தமிழ் ஒருங்குறி (unicode) - இன்னும் இன்னும் நாம் செய்ய வேண்டியது பாக்கி இருக்கிறது.

இதை விவாதிக்க வேண்டாமா? நாம் எங்கே தடுமாறுகிறோம், தவறுகிறோம் என்று பார்க்க வேண்டாமா? பிழை திருத்த வேண்டாமா? இதுவரை கண்டு பிடித்ததை சொல்ல வேண்டாமா? உண்ணத படுத்த வேண்டாமா? அதற்கு ஒரு தளம் வேண்டும், வாய்ப்பு வேண்டும், முயற்சி வேண்டும், ஆரோக்கியமான சூழல் வேண்டும், தொழில்நுட்பம் வேண்டும், இப்படி நிறைய வேண்டும். இதில் அரசியல் பார்த்து கோட்டை விட்டுவிடக் கூடாது.

******

உலகத் தமிழ்ச் செம்மொழி மாநாட்டை ஒட்டி, தமிழகத்தில் உள்ள அனைத்துப் பள்ளிகள், கல்லூரிகள், பல்கலைக்கழகங்களுக்கு ஜூன் 23 முதல் 25 வரை விடுமுறை அறிவிக்கப்பட்டுள்ளது. அரசுப் பணியாளர்களுக்கு சிறப்பு தற்செயல் விடுப்பு. இதில் பலன் இல்லாதவர்கள் நம்முடன் சேர்ந்து பெருமூச்சு விட்டுக்கொள்ளலாம். (மாநாட்டு விவரங்களுக்கு http://www.ulakathamizhchemmozhi.org/)

நம் கணினி வாழ் நவீன தமிழ் குடிகளுக்கு, அவர்களை அறிமுகம் செய்வதாய் உத்தேசம். என்னது அறிஞர்களையா? என்று பதறுபவர்களாய் நாம் இருக்கிறோம். இந்த 'டாப்பிக்' உங்களுக்கு 'போர்' அடிக்கும் என்று நீங்கள் ஒதுங்கும் அபாயம் இருக்கிறது. அதை உணர்ந்தே இருப்பதால், என் தீர்மானங்களை இப்படியாக வைத்துக்கொண்டேன். சுருக்கமாகச் சொல்வது என்று. ஒரு நிமிடத்திற்குள் உங்களுக்கான 'ஈகிள் வீவ்' கிடைக்கச்செய்வது. கிடைத்துவிடும்! வள்ளுவர், ஔவை, கம்பர், பாரதி, பாரதிதாசன் பற்றி ஓரளவு பரிச்சயம் நமக்கு இருப்பதால் அவர்களை தொடப்போவது இல்லை.

ஆய்வும் தொகுப்புமே மூச்சாய் இருந்தவர்கள் இந்த அறிஞர்கள். சில உத்திகளை பயன்படுத்தியே இவர்களைப் பற்றி சொல்லப் போகிறேன். பாதி வழியில் நீங்கள் அதைக் கண்டுகொண்டால் என் நல்ல நோக்கம் கருதி மன்னிப்பீர்கள். நம்புவோமாக!

முதல் யுக்தி, என் லிஸ்டில் இருப்பவர்களை உங்களுக்கு அவ்வப்போது அறிமுகப்படுத்துவது. ஒரேயடியாக சொல்லப் போவது இல்லை. சந்தோஷம் தானே.

நீங்கள் செய்ய வேண்டியதெல்லாம், படிக்க ஒரு நிமிடம் செலவழித்தல். தெரிந்து கொள்ள, முழுதாக ஒரே ஒரு நிமிடம்.

******

ஒரு சின்ன சந்தேகம்?
ம்…. கேளுங்கள்.
அந்த லிஸ்டில் எத்தனை பேர் இருக்கிறார்கள்?
எத்தனை பேர் பற்றிய விஷயங்கள் என்று கேளுங்கள்.
சரி எத்தனை விஷயங்கள் ?
உங்களுக்கு Duodecad என்றால் தெரியுமா?
அப்படீனா?
அதுதான் உங்கள் சந்தேகத்திற்கான பதில்!

2010 இயர் அப்ரைசல்

noreply@blogger.com (Surendhar) — Fri, 18 Jun 2010 05:09:00 +0000

ஒரு அலசல்:

தி.மு.க அரசு - யாருக்கு எவ்வளவு மார்க்?

சிறந்த மற்றும் மோசமான அமைச்சர்கள் யார், யார்?

தி.மு.க அரசுக்கு எதிர்க்கட்சிகள் தந்த மார்க் எவ்வளவு? என இந்தியா டுடே (ஜுன் 23,2010) கவர் ஸ்டோரி வெளியிட்டு இருக்கிறார்கள்.

தி.மு.க அரசின் அமைச்சர்களின் சாதனைகள் தோல்விகள் தர்மசங்கடங்களை அலசி இருக்கிறார்கள்.

தரப் பட்டியலில் 29 அமைச்சர்களுக்கு மதிப்பெண்(%) கொடுக்கப்பட்டிருக்கிறது. முதல்வருக்கு 64% ஸ்டாலின் 63% அன்பழகன் 55% தந்திருக்கிறார்கள். முதல் முறை அமைச்சர்களில் வெகு சிலரே திருப்திகரமாகச் செயல்பட்டுள்ளனர்.

புள்ளிவிவரங்களுடன் அணுகினால் தமிழகம் ஒன்றும் இந்தியாவின் முதன்மையான மாநிலமாகத் திகழவில்லை. இப்போது தமிழகத்தின் கடன் ரூ.75,000 கோடி. தரப்பட்டியலில் 3வது இடத்தில் இருக்கிறது. விவசாயத்திலும் மூன்றாமிடம்தான். ஆரம்ப சுகாதாரத்தில் நான்காவது இடம். உள்கட்டமைப்பில் ஆறாவது இடம்.

இலவசங்கள், மானியங்களுக்காக மட்டும் ஆயிரக்கணக்கான கோடி ரூபாய் மதிப்பீட்டில் திட்டங்கள் போடப்பட்டுவருகின்றன. இது சாமானிய மக்களின் வாழ்க்கைத் தரம் இன்னும் உயரவில்லை என்பதைத்தான் காட்டுகிறது. கருணாநிதி, எதிர்க்கட்சியான அ.இ.அ.தி.மு.கவை பல வகைகளிலும் பலவீனமாக்கியிருக்கிறார். பதவி கேட்டுப் போராடிய காங்கிரசை அடக்கியும், ஆதரித்துக் கொண்டே எதிர்ப்பு அரசியலை நடத்தும் பா.ம.கவை ஓரங்கட்டியும் ஓர் அரசியல் தலைவராக சிறந்த ராஜ தந்திரியாக செயல்பட்டிருக்கிறார்.

ஆனால் அது மட்டும் போதாதே, தமிழகத்தை முதலிடத்தில் வைக்க. மின் பற்றாக்குறை இல்லாத, குடிதண்ணீருக்குப் பஞ்சம் இல்லாத, விலைவாசி கட்டுக்குள் இருக்கிற, நாளொரு கொலை, பொழுதொரு கொள்ளை இல்லாத, தொழில் வளம் மேம்பட்டு வேலைவாய்ப்புகள் பெருகியிருக்க வேண்டும். எல்லாவற்றுக்கும் மேலாக, இலவசம் இனி தேவையில்லை என்கிற சூழலுக்கு தமிழகம் வந்திருக்க வேண்டும். அப்போதுதான் நாம் முதலிடத்தை பிடித்திருக்க முடியும்.

******

நமது மதிப்பீட்டை ஒப்பிட்டு பார்க்கலாம்.

தெரியாதவர்கள் தெரிந்துக்கொள்ளலாம்.

ஆர்வமிருப்பின் படித்துப்பாருங்கள்.

******

நான் ரசிச்ச 'பாசம்' கவிதை -- ரசிச்ச கேள்வி பதில்

ஜோதிகாவும் குட்டி ஆப்பிளும்

noreply@blogger.com (Surendhar) — Thu, 10 Jun 2010 18:19:00 +0000

பக்கத்தில் இருக்கும் குழந்தையை யார் என்று தெரியவில்லையென்றால், நீங்கள் தமிழ் சினிமாவை விட்டு வெகு தூரம் தள்ளி இருக்கிறீர்கள் என்று அர்த்தம்.

இந்த பாப்பாவுக்கு ஒரு தம்பி பாப்பா பிறந்திருக்கிறான்.

ஆம். சூர்யா ஜோதிகாவுக்கு ஒரு மகன் பிறந்ததுதான் இப்போதைய கோடம்பாக்க லேட்டஸ்ட். பத்திரிக்கைகளில் செய்திச் சொல்லி ரசிகர்கள் இனிப்பு கொடுத்தார்கள். பாதகம் யாருக்கும் இல்லை என்பதால் அனைவருக்கும் மகிழ்ச்சி.

*****

மத நம்பிக்கையிலும், பழமொழியிலும், வரலாற்றிலும் இடம் பெற்ற ஒரு பழம். ஏவாள் முதலில் கடித்து ஆதாமிடம் கொடுத்தது. தினம் ஒன்று சாப்பிட்டால் மருத்துவனை தள்ளி வைக்கலாம் என - நமக்கு வெகுவாக பரிச்சயம் ஆனதுதான். அறிவியல் கண்டுபிடிப்புக்கு உதவியதில் தான் சுவாரஸ்யம்.

நாம் அறிந்திருப்பதைப் போல் புவிஈர்ப்பு விசை தத்துவத்தை கண்டுபிடித்தவர், இங்கிலாந்து விஞ்ஞானி ஐசக் நியூட்டன். அவர் ஓர் ஆப்பிள் மரத்தடியில் படுத்து இருந்தபோது, மரத்தில் இருந்து ஒரு ஆப்பிள் கீழே விழுந்ததை வைத்து இந்தத் தத்துவத்தை கண்டுபிடித்தார்.”மேலே எறியப்படும் எல்லாப் பொருளும், புவிஈர்ப்பு விசை காரணமாக கீழே வந்தே தீரும்” என்றார். அந்த ஆப்பிள் மரத்தை, லண்டனில் உள்ள ஆவணக் காப்பகத்தில் வைத்து பராமரித்து வருகிறார்கள்.

இந்த ஆப்பிள் மரத்தில் இருந்து 4 அங்குல நீளத்துக்கு ஒரு பகுதியை வெட்டி எடுத்து, விண்வெளிக்கு கொண்டு சென்றார்கள். போன மாதத்தின் ஒரு நாளில் நாசா, விண்வெளிக்கு அனுப்பிய அட்லாண்டிஸ் விண்கலத்தில், இந்த மரத்துண்டையும், நியூட்டன் புகைப்படத்தையும் எடுத்துக் கொண்டு 6 விண்வெளி வீரர்கள் சென்றார்கள்.

“விண்வெளியில் புவிஈர்ப்பு விசை கிடையாது என்பதால், அங்கு இந்த மரத்துண்டு கீழே விழாமல் அந்தரத்தில் மிதக்கும். இதனால் விண்வெளியில் நியூட்டனின் ஈர்ப்பு விசை விதி செல்லாது என்பதை அவருடைய ஆப்பிள் வைத்து நிரூபிக்கப்போகிறோம்” என்றார் அதை எடுத்துச் சென்ற விண்வெளி வீரர்.

விண்வெளி பயணத்தை முடித்த பிறகு, அந்த மரத்துண்டும், நியூட்டன் புகைப்படமும், லண்டன் ஆவணக்காப்பகத்தில் திரும்ப ஒப்படைக்கப்பட்டது. “நியூட்டன் உயிரோடு இருந்தால்கூட, விண்வெளியில் தனது விதி பொய்யாகும் அதிசயத்தை காண விரும்புவார்” என்று விண்வெளி வீரர்கள் வேடிக்கையாக கூறினார்கள்.

*****

நம்மில் எத்தனை பேர்களுக்கு இந்த விஷயம் தெரியும். இதை பத்திரிக்கைகளும் இங்கு சொல்லவில்லை. சினிமா சார்ந்த செய்திகளே போதும் என்று விட்டார்களோ என்று நினைக்க தோன்றுகிறது. நித்தியானந்தாவின் படுக்கையில் கிடைத்த சுவாரஸ்யம் உலக நடப்புகளில் கிடைப்பது இல்லை என்பதும் ஒரு காரணமாய் இருக்கலாம். விஞ்ஞானத்தை வேப்பங்காய் ஆக நினைக்காமலும், விளையாட்டு சினிமா தாண்டியும் நாம் வர வேண்டிய தூரம் நிறைய.

பின் வரும் ஒர் நாளில் நம் மெயில் பாக்ஸ் நிரப்ப அந்த இரண்டாவது குழந்தையின் ஃபோட்டோ வரலாம். அப்போது நான் சொன்ன விஷயம் மறந்திருக்கும்.

அதனால் என்ன இப்போ?

.

ஐந்து நட்சத்திர 'தயிர் சாதம்'

noreply@blogger.com (Surendhar) — Sun, 30 May 2010 06:33:00 +0000

இத்தனை ஆண்டுகளில் ஒரு முறை கூட போனதில்லை. சமிபத்தில் ஐந்து நட்சத்திர விடுதி செல்லும் வாய்ப்பு கிட்டியது, நண்பன் ரூபத்தில்.

பார்ட்டி என்றாலே இரவுதான். நான் போய் சேர்ந்தபோது மெல்லிசை நிகழ்ச்சிகள் முடிந்திருந்தன. எனக்கு முன்பே நண்பர் அங்கு காத்திருந்தார். சரியான நேரத்திற்கு வந்திருப்பதாகவும் இனிமேல் தான் 'மற்ற சங்கதிகள்' என்றபடி நிகழ்ச்சி நடந்த மைய பகுதியை அடைந்தோம்.

மூன்று ஹால்கள் பிரிக்கப்பட்டிருந்தன. மெல்லிசை நிகழ்ச்சிகள் காண இருந்த இடம். கண் சிமிட்டும் கலர் கலர் வெளிச்சத்தில், அதிரும் இசைக்கிடையில் நடனமாட ஒரு இடம். சாப்பிடும் இடம்.

மிக மிக நவீன உடையில் யுவதிகளும் இளைஞர்களும் மற்றும் பிரபலங்கள் வந்திருந்தவர்களாலும் நிரம்பி இருந்தது. சொல்லி வைத்தார் போல் அத்தனை பெண்களும் ஒல்லியாக சிவப்பாக. ஆங்கிலமும் இந்தியும் உருதும் தமிழும் பேசிக்கொண்டிருந்தார்கள். இளைஞர்கள் இடுப்புக்கு கீழ் இறங்கிய ஜீன்ஸும், ஷேவிங்கில் இருந்து பாதி தாடியிலும் வந்திருந்தார்கள். குளித்து தலை துவட்டியவுடன் வந்தவர்களுள் (!) ஒருவன் மட்டும் கூம்பு வடிவில் தலை வாரியிருந்தான். பெரும்பாலானோர் முடி வெட்டவும், தலை வாரவும் மறுத்திருந்தனர். தெரிந்த கடைகள் விடுமுறை விட்டிருக்கலாம். மற்றபடி நாகரிகமாக நடந்துக் கொண்டனர்.

Soft drinks ஆக ஆப்பிள் ஜுஸ் ஆரஞ்ச் ஜுஸ் மற்றும் பியர் வகைகள் ஒரு புறம். Hot drinks ஆக Scotch whisky rum என மற்றொறு புறம் விநியோகிக்கப்பட்டது. இடையிடையே சேவகர்கள் snacks-ஐ கையில் ஏந்தி நடந்தார்கள். கையில் கோப்பையுடன் இருப்பதே கௌரவமென அறிவுறுத்தப்பட்டு, Soft drinks-ஐ நிரப்பிக் கொண்டேன்.

ஷாம்பெய்ன் குலுக்கி நுரை தெளித்து ஃபோட்டோ எடுத்துக்கொண்டார்கள். ஹை ஹீல்ஸில் தத்தி தத்தி வந்து நிஜ நடனமாடினார்கள். நாசூக்காய் கைபிடித்து அழைத்து வந்தவன் அழகாய் இருந்தான். வேறொறுவன் மைக் பிடித்து நிகழ்ச்சிகளை ஒருங்கிணைத்தான்.

ஆண்களும் பெண்களும் கட்டியே அன்பை வெளிப்படுத்தினார்கள். விடை பெறும்போது அணைத்து முத்தமிட்டார்கள். அணைத்து முத்தமிட்டதில் மனதளவில் தொந்திரவுக்கு உள்ளானர் சிலர். நாம் உட்பட.

வந்திருந்த பெண்களையும் சூழல்லையும் பார்த்ததில் ஒன்று நிச்சயம். இது வேறு உலகம். இவர்கள் வெயிலில் அலைபவர்கள் அல்ல, கடைகளில் பேரம் பேச மாட்டார்கள், poor என்பதன் அர்த்தம் மட்டும் தெரியும், நாகரிகமாய் நடந்துக் கொள்ளவும் பழகவும் சிறு வயதிலே பழக்கப்பட்டவர்கள். ஏக சிக்கனமாய் உடையணிந்திருந்தாலும் ஆண்களை எங்கே நிறுத்துவது என்று கற்றவர்கள். நிறுத்தும் பெண்களிடமும் நெருக்கம் காட்டத் தெரிந்தவர்கள். ஆங்கிலத்தில் சிரிப்பவர்கள், நகம் வெட்டவும் முடி திருத்தவும் சில நூறுகளில் காரியத்தை முடிப்பவர்கள். வாசனையாய் இருப்பார்கள். நிச்சயம் படித்தவர்கள்.

தமிழ் தெரியுமா என்று கேட்டால் 'தமிழில் எத்தனை poem படிச்சிருக்கேன் தெரியுமா. ஜுஜு கூட சொல்லும்' என்பார்கள். ஜுஜு என்பது அவர்கள் வளர்க்கும் நாயா அல்லது பாய் ஃப்ரெண்ட்டா என்று குழம்பக் கூடாது.

******

தட்டு நிறைய வகை வகையான உணவுகள். ஆடு, கோழி, பிரியாணி - நான் வெஜ் வகையறா. ஃப்ரூட் சாலட், ஐஸ் கிரீம், குலோப் ஜாமுன், வெஜ் உணவு என வெரைட்டி விருந்து. ஏற்கனவே நிறைந்திருந்ததில், தயிர் சாதம் வைத்துக்கொண்டேன். அருமையான ருசி. சாப்பிட்ட விருந்து பிளேட் கணக்கு. உண்மையாய் என்று தெரியவில்லை, ஒரு பிளேட்டின் விலை சற்றேறகுறைய நாலு இலக்கத்தில் சொன்னார்கள்.

தயிர் சாதத்தை தங்கம் போல பாவித்தேன். ஒரு கிராம் தங்கத்தின் விலைக்கு கூப்பிடும் தூரத்தில் இருந்தது. பய பக்தியுடன் கீழே வைத்துவிட்டேன்.

Rest Room-ல் டி வி வைத்திருக்கிறார்கள். சிறிய சைஸ். ஆறு பேர் நிற்கும் இடத்தில் இரண்டு டிவி. டிவியில் 'ஷேர் மார்க்கெட் அலசலில் கருத்து சொல்லிக்கொண்டிருந்தார்' நிபுணர் ஒருவர்.

அண்டா குடித்துவிட்டு இயற்கை அழைத்தவர்களுக்கு 'செய்தி' மழை. auto flush வசதி. சுடு தண்ணீர் பைப், சாதா தண்ணீர் பைப், கை கழுவ, முகம் கழுவ, கையை காய வைக்க, ஷு துடைக்க, முகம் பார்க்க என ஒளிரும் டெக்னாலஜி வெளிச்சத்தில் பணம் ஜொலித்தது.

'உள்ளே' கழுவுவதற்கு பதிலாக டிஷ்யு பேப்பரை வைத்திருக்கிறார்கள். இத்தாலி மேக். அதன் நோக்கம் தவிர்த்து, கை மட்டும் துடைத்துக் கொண்டேன். நல்லவேளை!

******

நண்பர் கேட்டார், 'எப்படிபா இருந்தது?'

'பெரிய மனிதர்கள் அடிக்கடி வந்து போகும் இடம், ஒரு சொம்பு வாங்கி வைத்திருக்கலாம்'.