Sustatu.eus - Aktualitatea

Euskarazko Wikipedia: 25 urte, 500.000 artikulu

Fri, 06 Nov 2026 09:26:17 +0000

Euskarazko Wikipediak 500.000 artikuluen langa gainditu du, juxtu bere 25. urteurrena betetzera doanean. 500.000. artikulua Gasteizko Armentia Ikastolako, DBH2ko, lau ikaslek sortu dute Txikipedian, honako hau.

Euskarazko Wikipedia kudeatzen duen Euskal Wikilarien Kultur Elkarteak (EWKE) artikulu batean aurkeztu ditu milioi erdia erdietsi duten ikasleak, irakurri hemen.

Asteazkenean igaro zen milioi erdiaren marka, eta jarraitzen du gorantz artikulu zenbaketak. Gaur goizean hau idazten dugun unean, estatistiken orriak diosku 500.111 artikulu daudela. Irailean beste mugarri ikusgarri bat gainditu zuen Wikipediak gainera: 200 milioi hitz euskaraz.

Une politean etorri da EWKErentzat aste honetako marka. Gaur ostirala (hilak 6) arratsaldez, hain zuzen ere, ospakizun jaia egingo dute Bilboko Euskal Museoan. Euskal Wikilarien Kultura Elkarteak antolatutako hitzorduan, wikilariak, kolaboratzaileak eta erakundeetako ordezkariak elkartuko dira, euskarazko Wikipediaren ibilbideari begirada bat emateko.

25. urteurren zehatza datorren abenduaren 6an izango da, ordukoa baita lehen artikulua. Baina berezko azala, eu.wikipedia.org domeinua, 2023ko azaroaren 7an ireki zen (bihar 23 urte, beraz).

Pixkanaka hasi zen euskarazko Wikipedia. Bost urte behar izan zituen 10.000 artikulu izateko; hamar urte 100.000 erdiesteko. Geroztik, azkarrago eta indartsuagoa ari da.

Bazkidetu Wikilarien Elkartean

EWKE euskarazko Wikipediaren "zaintza" egiten duen bazkidetza txikiko taldea da. Wikilari editatzailea izatea eta EWKEko partaide izatea ez datoz bat derrigor. Wikipedia osa dezake edonork, baita anonimoki ere, euskaraz eta beste hizkuntzetan berdintsu. Baina EWKEren bitartez euskarazko Wikipedia aberasteko ekimenak bultza daitezke, ideiak planteatu eta gauzatzeko bidean jarri, erakundeekin interokutore izan eta hitzarmenen bidez proiektuari lagundu, beste wikilari batzuekin konektatu elkarlanerako…

Eta orain, elkarteak izan duen estatutu aldaketa baten ondoren, ahalegin horietan ere parte hartu daiteke wikilari-idazlea izan bage ere: editatzen ez duen kolaboratzailearen figura daukagu orain.

Ez bazara moldatzen artikuluak sortu edo osatzeko edo irudiak kargatzeko baina hala ere lagundu nahi baduzu, aukera berria daukazu: egin zaitez EWKEren bazkide kolaboratzailea. Milioi erdi orri sortu dituzte 25 urtean. Hurrengo 25etan eta milioiA osatzen parte har dezakezu.

Urteko 5 euroko kuotarekin ez dago talde-bazkidetza merkeagorik inguruetan. Osatu formularioa, ongi etorria izango zara. (bide batez, editatzaile eta Wikipedia-idazle edo Wiki-ilustratzaile bazara jada, orduan ere bazkidetu, nola ez).

Adin nagusikoentzat ere bai Gurot app lehiaketa datorren astetik aurrera

Fri, 06 Nov 2026 07:54:42 +0000

Gurot Euskal Tribial aplikazioa berriro dator, eta datorren astean aktibatzen den denboraldi honetan, gainera, modalitate berri batekin. Aurreko edizioetako gazteentzako proposamenari jarraipena emanez, 16 urte edo gehiagoko herritarrei zuzendutako modalitate berria jarriko da martxan.

Amorebieta-Etxano, Durangaldea, Getxo, Gernika-Lumo, Enkarterri, Mungia edota Txorierri bizi edo ikasten duten 16 urtetik gorakoek izango dute parte hartzeko aukera. Oraingoan ere, erronka argia izango da: zeure inguruko eta mundu zabaleko galderak euskaraz erantzutea, ezagutza probatzea eta, batez ere, jolasean ondo pasatzea.

Prest al zaude zure ezagutza probatzeko?

GUROT Euskal Tribiala ez da soilik lehiaketa bat. Euskaraz jolasteko, ikasteko eta norberaren ezagutza probatzeko aukera ere bada. Galderak askotarikoak izango dira, gertuko errealitatetik hasi eta mundu zabaleko gaietaraino.
Eta lehiaketa hasi aurretik, nahi beste praktikatzeko aukera izango dute parte-hartzaileek, azaroaren 9an erronka ofiziala hasi aurretik prest egoteko.

Horregatik, 16 urte edo gehiago badituzu, animatu eta parte har ezazu! Ez da beharrezkoa aditua izatea: jolastea, probatzea eta euskaraz gozatzeko gogoa izatea da behar duzun bakarra.

Noiz?
● Praktikatu: lehiaketa hasi aurretik, nahi beste.
● Lehiaketa: azaroak 9 – abenduak 13.
● Nori zuzendua: 16 urte edo gehiagoko herritarrei.
● Sustatzaileak: Amorebieta-Etxano, Durangaldea, Getxo, Gernika-Lumo, Enkarterri, Mungia eta Txorierri.

Saria: asteburu-pasa EAEko nekazal-turismo batean
Parte-hartzaileen artean 2 opari-bono banatuko dira. Bono bakoitza 2 lagunentzat izango da eta 2 gau + gosaria barne hartuko ditu, EAEko nekazal-turismo batean.

Beraz, badakizu: praktikatu, animatu eta erakutsi zenbat dakizun!
Eman izena eta hasi jolasten. Zure txanda da!

Webgunea: Gurot.eus

Aplikazioa: Android / iOS

Euskararen sustapenerako Jauzia Gara estrategiaren ildoak azaldu ditu Eusko Jaurlaritzak

Thu, 05 Nov 2026 08:50:51 +0000

Atzo aurkeztu zuen Eusko Jaurlaritzak, Imanol Pradales lehendakaria buru zela, "Jauzia Gara" estrategia. Barakaldoko BEC-en izan zen ekitaldia, eta bertan izan ginen, euskararen erabilera indartzeko datozen urteetan landuko diren proiektuak eta lan-ildoak edo ezagutzeko. Helburua, azaldu zigutenez, "euskararen erabileran jauzi berria egitea", bereziki lan-munduan, aisialdian, kirolean eta ingurune digitalean; erakundeen, enpresen eta gizarte-eragileen arteko elkarlana sustatuz.

Azken batean, ulertzen dugunagatik, Jauzia Gara ez da kanpaina puntual bat, epe luzerako estrategia baizik. Eta apunte batzuk hartu genituen estrategia horretan gauzatzen joango diren ekimenen inguruan:

Lan-mundua: LANera programa indartuko da, enpresei aholkularitza eta baliabide egokituak eskainiz, eta esperientziak partekatzeko enpresa-sarea sustatuz. INDEUS plataforma ere enpresa-sare funtsezkotzat aipatu zen.
Bikain ziurtagiria eta LanHitz: lan-munduan euskararen erabilera sustatzeko baliabideek eta programek lekua izango dute datozen urteetako hizkuntza-politikan.
IKT eta hizkuntza-teknologiak: 2,6 milioi euro aurreikusi dira hizkuntza-teknologietarako. HPSren proiektuak honetara bideratuko dira hein handi batean.
Euskararen Ahotsak entzute-prozesua; gazteen euskalduntzea indartzeko ekimenak; eta Ate Berriak izenekoa, etorkinak euskarara hurbiltzeko.
2027ko urrian Bilbon egingo den III. Euskal Mundu Biltzarra nabarmendu zuten baita ere.

Informazio gehiago Irekian, Argazkia, cc-by Irekia - Wikimedia Comnons.

Aurtengo Jokoteknian, euskal bideojokogileen 1. azoka

Wed, 04 Nov 2026 08:17:17 +0000

Duela urte batzuk antolatzen dute Jokoteknia topaketa Game Erauntsia Elkarteak eta Azkue Fundazioak. Aurtengo edizioa Bilboko La Perrera espazioan izango da, azaroaren 7an larunbatarekin, eta egun osoko ekimena izango da. Nobedadea aurten: Euskal bideojokogileen 1. azoka egingo dela. Euskal Herriko bideojoko estudioak eta sortzaileak elkartuko dira erakustaretoan hamasei erakusmahai instalatuta, Euskal Herrian edo euskaraz garatutako jokoak probatzeko aukera eskainiko dute postu horietan.

Jardunaldiaren egitarauari dagokionez, osagai hauek izango ditu.

Paula Olaz konpositoreak bideojokoetarako musika sortzeko erronkak eta pausoak azalduko ditu.
Josu Igoa bideojokozaleak itzulpengintza eta euskaratze prozesuari buruz hitz egingo du, bere kabuz hainbat bideojoko gure hizkuntzara lokalizatu baititu.
Jon Juarez diseinatzaileak marrazkilaritza eta animazioa edukiko ditu ardatz bere hitzaldian, bideojokoen munduan arte kontzeptuala sortzen ibilita.
Nestor Uriarte bideojokogile eta Rockstar Game Workers Union sindikatuko ordezkariak azken hilabeteetan enpresa ezagunean bizitako egoerari buruz hitz egingo du.

Aurkezpenen atalari bukaera emateko, mahai-ingurua antolatu da Digipen Europe-Bilbao Institute of Technology-ko, Harrobia Ikastolako eta Tartanga Lan Heziketarako Zentro Integratuko ikasleen parte hartzearekin: Oier Elorduy, Laia Antxutegi eta Iker Abasolo ikasleek parte hartuko dute, hurrenez hurren.

Hurbiltzerik ez duenak saio horiek EITBren webgunean eta Youtubez ere emango dituzte zuzenean.

Informazio gehiago: Jokoteknia.eus

BAAI.EUS webgune-sortzailea aurkeztu du PUNTUEUSek, Latxa euskal adimen artifizialean oinarritutako lehen aplikazioa

Tue, 03 Nov 2026 14:12:42 +0000

HiTZ zentroak garatutako Latxa euskal adimen artifizialak ikerketatik eguneroko erabilerarako jauzia egin eta lehen aldiz integratu da aplikazio praktiko batean. BAAI.EUSek euskarazko teknologia herritarren, profesionalen eta enpresen eskura jartzen du, euskararen presentzia digitalean beste urrats bat aurrera eginez.

PUNTUEUSek BAAI.EUS aurkeztu du, euskarazko adimen artifizialaren garapenean mugarri berri bat ezarriko duen tresna digital berritzailea. HiTZ zentroak garatutako Latxa euskal adimen artifiziala aplikazio praktiko batean txertatzen den lehen aldia da. Gaurtik aurrera, BAAI.EUSek, erabiltzaileei webgune profesionalak sortzeko aukera eskainiko die, inolako programazio ezagutzarik izan beharrik gabe.

Euskararen presentzia indartzea eta gizarte digital hobe bat eraikitzen laguntzea da PUNTUEUSen helburu nagusietako bat. Urteotan .EUS domeinua eskuratzeaz gain, erabiltzaile askok beren webgunean sortzeko laguntza ere eskatu dute, eta behar horri erantzun integrala emateko sortu da BAAI.EUS.

Aldi berean, euskararen presentzia Interneten nahiko egonkor mantendu da azken urteotan, baina adimen artifiziala errotik ari da eraldatzen Internet. Testuinguru horretan, BAAI.EUSek aukera ematen du euskara eta euskal komunitatea eraldaketa horren parte aktibo izan daitezen.

BAAI.EUSen berrikuntza nagusia da erabiltzaileak ez duela webgunea hutsetik sortu behar, lehendik sortuta duten informazioa baliatuta sor baitezakete lehen bertsioa. Horrela, negozio txikiek, beren kontura lanean aritzen diren profesionalek zein bestelako edozein erakundek eta enpresek, bere jarduera euskaraz ere digitalizatzeko aukerak zabaltzen dira.

Aurkezpenean parte hartu dute Josu Waliño, PUNTUEUSeko zuzendariak; Unai Andueza, Gipuzkoako Foru Aldundiko Ekonomia Sustapeneko eta Proiektu Estrategikoetako foru diputatuak; Eneko Agirre, HiTZ zentroko zuzendariak; eta Lorea Arakistain, PUNTUEUSeko marketin zuzendariak.

“BAAI.EUS mugarri bat da euskal ingurune digitalarentzat. Euskal Herrian garatutako adimen artifiziala baliatuta, webgune profesionalak euskaraz eta modu errazean sortzeko aukera eskaintzen dugu. Horrela, digitalizazioa edonoren eskura jartzeaz gain, euskararen presentzia digitalean beste urrats bat egiten dugu», nabarmendu du Josu Waliño PUNTUEUSeko zuzendariak.

“Tresna honekin, enpresa txikiei, autonomoei eta bestelako eragileei beren proiektuak .EUS domeinuarekin sareratzeko aukera eman nahi diegu, orain arteko oztopo teknologikoak gainditzen lagunduz”, gaineratu du.

Eneko Agirre HiTZ zentroko zuzendariak, berriz, Latxaren garapenetik aplikazio praktikoetara egindako jauziaren garrantzia azpimarratu du. “HiTZ zentroarentzat oso berri pozgarria da Latxa aplikazio praktiko batean integratuta ikustea. Duela bost urte euskarazko hizkuntza-ereduak garatzen hasi ginenean, ez zegoen euskaraz behar bezala aritzen zen eredurik, eta ikerketa-galdera irekia zen euskaraz kalitatezko txatbot bat sortzea posible ote zen. Ikerketa-lan horren fruitu dira testu gutxi dituzten hizkuntzetarako ereduak garatzeko metodologia, eta Latxa bera. Hasierako aurreikuspenak gaindituz, erabiltzeko moduko kalitatea lortu genuen, bereziki euskarari eta euskal kulturari dagokienez”, azaldu du.

“Latxa proiektu bizia da, etengabe garatzen ari dena, eta laster bertsio berri bat aurkeztuko dugu, adimen artifizialaren arloko azken aurrerapenei esker ahaltsuagoa eta hobea izango dena. Aldi berean, enpresa eta zentro teknologikoekin elkarlanean ari gara, Latxaren inguruan eraikitzen ari garen adimen artifizialeko plataforma produktu berritzaileetan txertatzeko. BAAI.EUS ikerketa hori eguneroko erabilerara eramateko urrats garrantzitsua da”, gaineratu du.

Latxa euskal adimen artifiziala, webguneak sortzeko burmuin

BAAI.EUSen ezaugarri nagusietako bat Latxa euskal adimen artifizialaren integrazioa da. Horri esker, erabiltzaileek lehendik duten sareko informaziotik abiatuta sor dezakete beren webgunearen lehen bertsioa, programazio-lan aurreraturik egin beharrik gabe.

Horretarako, plataformak hainbat informazio-iturri erabiltzeko aukera eskaintzen ditu abiapuntu gisa: Google Business profila, sare sozialak, aurretik sortutako webguneak, argazkiak edo dokumentuak. Informazio hori oinarri hartuta, Latxa euskal adimen artifizialak webgunearen lehen bertsioa prestatzen laguntzen du, erabiltzaileak ondoren bere beharretara egokitu dezan. Horrela, euskarazko adimen artifizialaren garapena erabilera zehatz batera eramaten da, teknologiaren ahalmenak eguneroko zeregin batean aplikatuta.

Adimen artifizialaren bidezko sorkuntzaz gain, BAAI.EUSek beste bi aukera ere eskaintzen ditu: aurrez prestatutako txantiloi batetik abiatzea edo webgunea hutsetik eraikitzea. Hiru bide horiei esker, erabiltzaile bakoitzak bere ezagutza teknikoen eta proiektuaren beharren arabera aukera dezake webgunea sortzeko modua.

Plataformak editore intuitibo bat eskaintzen du, webgunearen diseinua, edukiak eta bestelako elementuak pertsonalizatzeko. Halaber, 250 txantiloi baino gehiago ditu aukeran, eta itzulpen automatikoa, online dendak eta bestelako funtzionalitateak integratzeko parada eskaintzen du.

BAAI.EUSek .EUS domeinua eta hosting-zerbitzua ere barne hartzen ditu, webgunea sortzeko, pertsonalizatzeko eta argitaratzeko prozesu osoa ingurune bakar batean gauzatzeko.

Askotariko erabiltzaileak jomugan

BAAI.EUS askotariko erabiltzaileei zuzenduta dago, besteen artean: norbanakoei, bere kontura aritzen diren profesionalei, negozio txikiei, enpresei eta erakundeei. Helburua da erabiltzaileek beren webguneak sortzeko eta eguneratzeko autonomia izatea, programazio-ezagutza aurreratuen beharrik gabe.

Tresna web diseinuan eta komunikazioan aritzen diren profesionalentzako ere pentsatuta dago. Izan ere, diseinatzaileek eta agentziek bezeroentzako webguneak sortu eta hainbat proiektu plataforma bakar batetik kudeatu ditzakete.

Tresna digitala dagoeneko erabili dutenen artean daude Jon Maia bertsolari eta kulturgilea, Leire Santillan moda-diseinatzailea, Leire Martija web diseinatzailea eta Sostengu osasun zentroko Leire Mendez eta Felipe Murillo koordinatzaileak. Kultura, diseinu edota osasun alorreko esperientzia horiek erakusten dute BAAI.EUS jarduera eta behar desberdinetako erabiltzaileetara egoki daitekeela.

Euskarazko AA: ikerketatik eguneroko erabilerara

BAAI.EUSen aurkezpenak mugarri berri bat ezarri du euskararen eraldaketa digitalean. Latxa bezalako euskarazko adimen artifizialaren garapenak aplikazio zehatzetan izan dezakeen erabilgarritasuna erakusten du, ikerketa teknologikoa herritarren, negozio txikien, enpresen eta entitateen eguneroko beharretara hurbiltzeko.

PUNTUEUSek egitasmo honekin euskarak ingurune digitalean duen presentzia indartzeko eta teknologia berrien garapenean euskararen erabilera sustatzeko duen konpromisoa berresten du.

BAAI.EUS tresnari buruzko informazio gehiago: www.baai.eus

Elhuyarrek 6 hitz-jolas sortu ditu gure euskara aberasteko

Tue, 03 Nov 2026 09:59:04 +0000

Sei jolasak Elhuyar Hiztegiaren atarian txertatu dira, eta, haiekin, erabiltzaileek euskararekin modu atsegin eta dibertigarrian jolasteko aukera dute.
Hitz-jolasak mota askotako erabiltzaileei zuzenduta daude: ikasle, irakasle eta profesionalei, euskara ikasten ari direnei nahiz hitzekin jolastea gustuko dutenei.

Elhuyarrek sei hitz-jolas jarri ditu martxan jolasen bidez euskara aberasteko. Hitzekin jolasteak euren hiztegia osatzeko eta hitzen inguruko informazio osagarria izateko aukera emango die erabiltzaileei. Hitz-jolasak Elhuyar Hiztegiaren webgunean txertatu dira, eta gaurtik aurrera erabiltzaileek aukera izango dute euskara modu ludiko eta entretenigarrian lantzeko. Jolasak mota askotako erabiltzaileei zuzenduta daude: egunerokoan euskaraz aritzen direnei, ikasle, irakasle eta profesionalei, euskara ikasten ari direnei zein, besterik gabe, hitzekin jolastea gustuko dutenei.

Jolas hauek daude aukeran: Hitz-katea, Anagrama, Urkatua, Hitzak konektatu, Asmatu hitza eta Hitza ezabatu. Jolas bakoitzean modu librean edo lehiaketa-moduan aritzeko aukera izango da. Horietako batzuetan, gainera, bertsio erraza edo zaila aukeratu ahal izango da. Asmatu beharreko hitz guztiak Elhuyar Hiztegian daude. Gainera, nahi duten erabiltzaileek izena eman eta sailkapenean parte hartu ahal izango dute, beste jokalariekin lehiatzeko. Horretaz gain, «Gaurko jolasa» izeneko aukera bat ere egongo da: egunero, sei jolasetako bat egongo da erabilgarri, eta parte-hartzaile guztiek baldintza beretan jolastu ahal izango dute, ahalik eta emaitzarik onena lortzeko.

Elhuyarrek 2024an jarri zuen lehen aldiz martxan hitz-jolas bat; orduan izandako arrakasta akuilu hartuta, jolas gehiago eskaintzea erabaki du orain, hitzekin jolastuz ikasteko eta hiztegia aberasteko aukera gehiago emateko erabiltzaileei.

Hitz-jolas berriak Elhuyar Hiztegiaren webgunean egongo dira eskuragarri (https://hiztegiak.elhuyar.eus/jolasa), eta baita mugikorretarako aplikazioan ere. Horrela, erabiltzaileek edozein unetan eta edozein lekutatik izango dute hitzekin jolasteko aukera.

Entretenimendua eta ikasketa uztartzeko aukera

Jolasetan erabiltzen diren hitz guztiak Elhuyar Hiztegitik hartuak dira, eta erabiltzaileek edozein unetan kontsultatu ahal izango dituzte hiztegiko sarrerak, hitzen esanahiak, erabilerak eta bestelako informazioa ikusteko. Horrela, entretenimendua eta ikasketa uztartzen dira, eta jolasean sortzen diren zalantzak argitzeko eta hitz berriak ezagutzeko aukera eskaintzen da.

Elhuyarrek gizartearekin eta kalitatezko euskara erabiltzearekin duen konpromisoaren emaitza da egitasmo hau. Izan ere, Elhuyar Hiztegia erreferentziazko gune bat da erabiltzaileentzat, euskara hobetzeko, euskaraz trebatzeko eta euskara ikasteko baliabideak eskaintzen dituen gune bat. Asmo horretan irmo jarraitzen du Elhuyarrek.

Justwatch orain streaming plataforma ere bada

Tue, 03 Nov 2026 07:28:53 +0000

Badira 10 urte Justwatch martxan dela. Sustatun 2017an aurkeztu genizuen, bere funtzio praktiko nagusia aipatuz: film edo telesail jakin bat zein plataforman ikusi daitekeen. Orain horrekin jarraitzen dute, baina aldi berean zuzenean bertatik streaming bidez ikusteko zerbitzua ere jarri dute martxan. Mundu mailako hainbat merkatutan aktibatu da Justwatch TV izendatu duten aukera, tartean Espainia eta Frantzia, eta beraz Euskal Herrian ere erabil daiteke.

Hiru modutan funtzionatzen du Justwatch TV honek.

Doako aukera. Zenbait film doan ikus daitezke plataforaren bidez, Adibidez The Figth Club (1999), The Lobster (2015). (Espainiako Justwach estekak horiek).
Alokairua: Justwatch TV Store deitu dutena. Banan banako alokairua edo ordainketa, The Truman Show adibidez, 3.99 EUR ordaindu eta ikus dezakezu.
Harpidetza: Justwatch TV Plus deitu dutena. Hilean 3.99 euro, baina ez dakigu horrekin zein katalogo zehatz dagoen. Truman ere badago aukera honetan, eta hortaz, behin alokatu edo Plus harpidedunaren ordainketa berdina da eta horretarako Plus hobeto ze beste film batzuk sartzen dira? Ba ez dakigu. Beste zalantza bat da eskaintzen dutela, epe mugatuko eskaintza gisa, 50 euroko harpidetza bat "bizitza osorako". Bizitza osorako, benetan?

Hona, esploratu nahi baduzue:

Espainiako Justwatch TV.
Frantziako Justwatch TV.

Inportantea: Justwatch-ek ez ditu bere datubasean Makusi edo Primeran, EITBren euskarazko edukien plataformak. Horretarako, ZerNonIkusi erabili.

Goiko irudia, Oasis taldeari buruzko dokumentala: Supersonic, doan Justwatch TV berri honetan. Film ona da, sinetsi Sustaturi.

Instagram: zer hintzen eta non hago

Mon, 02 Nov 2026 08:09:00 +0000

2012an Instagram ekarri genuen Sustatu albistegira, eta merezi du gauzak aipua gure 25 urteen historia honetan. 2010etik zebilen martxan aplikazioa, baina iPhoneetan bakarrik: Android bertsioa ez zuten atera 2012ko apirileraino, eta handik egun batzuetara gurean, artikulu honetan.

Errepasatzen baduzue 2012ko hura, Instagram eta Vignette aplikazioak biak batera aipatzen dituen gure ekarpena, konturatuko zarete argazkigintzaz ari garela: Polaroid itxurako argazkiak sortu edo eraldatzeko gauza batez. Haiek ere ez zuten susmatzen zer izango zen Instagram gero.

Eta zer izan da gero? Zertan bilakatu da? Guk gurea argitaratu eta gutxira, urte hartako irailean, Facebook-ek erosi zuen, eta ibilbide independente batekin jarraitu zuen app-ak.

Bideoak, reel-ak, eta alderdi algoritmoak maximizatuz, beste batzuen fitturrak kopiatuz, lehenbizi Snap aplikazioarenak, gero TikTok-enak, Instagram munstro bat bilakatu da. Euskal Herrian zehatzago, eta euskaldunen azpi-multzoan ere, Instagram "euskaldunon komunikabide nazionala" da 2026an, Sustatuko editorearen iritziz. "Ez Berria, ez EITB, ez fedibertsoa jakina. (...) Erakunde euskaldunek, ofizialetatik undergroundetara, Instagram dute guztiek igortzeko eta komunikatzeko kanal nagusia: ez web, ez prentsa idatzia, ez kristo".

Instagramek bazuen ezaugarriren bat 2012 aspaldiko hartan Internetek daraman norabidearena. Orduan app bat besterik ez zen. Ez zegoen WWW edo web ingurunean. Gerora ireki zuten webgunea, baina mugikorreko esperientzia bat da; eta app mugikor gisa lorategi itxi bat, irekitasunaren antipodetan, algoritmo merkantil-politiko baten arabera antolatua bakoitzak ikusten duena.

X-Twitterren oraindik kontsumo ez-algoritmiko bat egin daiteke: jario kronologiko bat zuk jarraitzen duzunarena. Instagramen ez da esistitzen hori. Eta erabiltzaileek sinets dezakete bakoitzak bere apeten araberako "algortimo egoki domestikatua" daukala, baina ez ahaztu han nork agintzen duen. Mark Zucjkerberg eta trumpismoak. Termino ezin argiagoetan Trumpen bigarren agintaldiaren garaian, 2025eko hasieratik.

Herrezpalak musika taldearen berpizkundea

Sun, 01 Nov 2026 08:06:18 +0000

Joxerra Garziak eta Iñaki Ugarte Rekartek 1970eko hamarkadan Herrezpalak izeneko musika bikotea osatu zuten, ahotsa biek jarrita eta gitarra Garziak; eta han ibili zen kantu kantari. Aurten orduko abestiak berriro grabatu eta Herrezpalak.eus webgunean denon entzungai jarri dituzte. Garai hartako errealitatea ezagutzeko (testuz hornitua baitator webgunea) eta kantu eder batzuk entzuteko aukera ederra.

1981an utzi zioten musikan aritzeari, baina 2023an berriro elkartu ziren, biak erreturatuta, eta entseguen bidez kantu zaharrak berreskuratzeari ekin zioten.

CD bat ekoiztu dute harrezkero, eta oraintsu, webgunea. Diskoaren azala Garbiñe Ubedak egin zien, eta haren gomendioz webgunea apailatu diena Joxerra Aizpurua izan da. Sinple eta polita geratu da.

Kantuak, hemen. Hamalau abesti, bakoitzaren hitz, kreditu eta istorio txikia ere kontatu bertan.

Garzia eta Ugarte sustapena egiten Herrezpalak taldearen sasoi berri honetarako:

IEB Jauzi kuantikoa: lehen egitaraua

Fri, 30 Oct 2026 08:49:18 +0000

UEUk publiko egin du datorren azaroaren 12an egingo den Informatikari Euskaldunen Bilkurako lehen egitaraua. Era berean, izena emateko epea irekita dago.

2026ko azaroaren 12a (Ostegunarekin) Donostiako EHUren kanpuseko- Ignacio Mª Barriola zentroan izango da IEB 2026, goizeko 9.00etatik 16.00etara.

Egitaraua

08:30 - 09:00

Harrera eta dokumentazio banaketa.

09:00 - 09:10

Ongietorria eta jardunaldiaren aurkezpena.

Aitor Bengoetxea Alkorta (UEUko zuzendaria).
Donostiako udala.
Jardunaldiaren antolatzaileak.

09:10 - 10:00

Hitzaldi nagusia.

Javier Aizpurua Iriazabal (BasQ Basque Quantumeko zuzendari akademikoa).

10:00 - 10:30

Programazio kuantikoaren paradigma aldaketa.

Jose Antonio Pascual Saiz (EHU)

10:30 - 11:00

Ikerketa konputazio kuantikoan.

Aitor Gómez-Tejedor (Tecnalia)

11:00 - 11:30

Atsedenaldia.

11:30 - 12:00

Laborategitik enpresetara.

Aitor Moreno Fernandez de Leceta (LKS Next).

12:00 - 13:30

Komunikazioak (saio paraleloak).

13:30 - 15:00

Bazkaltzeko tartea.

15:00 - 16:00

IBM Quantum System Two ordenagailu kuantikoa (bisita gidatua).

***

Komunikazioen atala falta da zehazteko. Matrikula egitean bazkaltzera geratu ala ez erabaki dezakezu, eta baita ea ordenagailu kuantikoaren bisitaren zoazen.

Matrikula eta informazioa hemen.

2011ko hitza: Bakea

Thu, 29 Oct 2026 13:39:44 +0000

Hainbat urtean Maite Goñik ekimen bat bizirik izan zuen Interneten: Gaurko Hitza. 2011ko urriaren 21ean, Bakea izan zen egun hartako hitza. Bezperan, urriaren 20ko arratsaldea iluntzen ari zela, ETAk behin betiko jarduera armatua amaitu zela jakinarazi zuen. Sustaturen 25 urteetan, 10 bizi izan genituen ETArekin, 15 harrezkero ETA gabe (desagerpen definitiboa 2018an gauzatu zen arren).

ETA iragana da jada.

Maite Goñi gaur egunean Guau-ren arduraduna da EITBn, audioaren (irrati eta podkastak) plataforma irrati-telebista publikoan. Euskal Herriko lehen influentzerra deitzen ausartuko gara gaur: hezkuntza alorreko kezkarekin hasi zen Interneten, asmo praktikoz, Beasaingo Jakintza ikastolan lehenbizi eta Mondragon Unibertsitatean gero. Baina pedagogia egin zuen ez bakarrik ikasleentzat, Interneteko komunitate euskaldun guztiarentzat.

Argazkia ere duela 15 urtekoa da. Gaurko Hitzarentzako 3. urteurreneko jaitxo bat antolatu zen, eta hangoa. 2011ko azaroko Sustatuko argazki artxiboan gehiago, halako atal bat ere bai baitago gure artxiboan urte batzuetan bederen.

Euskal Herriko giza-DNA zaharrena analizatu dute: Izturitzeko emakume bat, duela 30.000 urtekoa

Wed, 28 Oct 2026 07:29:57 +0000

Paleolitoko europarren historia genetikoa datu berriekin aberastu duen ikerketa bat argitaratu berri da. Analizatu diren aztarnen artean, Izturitzeko hezur bateko DNA sekuentziatu dute. Emakume bat zen, duela 30.000 urte bizi izan zena Izturitzeko leizean (edo han luperatu zutena).

Izturitzeko leizeko hezur bat da analizatu dena, duela 30.850 urte eta 29.970 urte artean datatu dute; eta ez da bakarrik Euskal Herriko aztarna genetiko zaharrena orain arte aztertutakoen artean, baita ere Europako hego-mendebaldeko zaharrena ere. Azterketa berean beste genoma batzuk aztertu dituzte Okzitaniakoak eta Iberiakoak, baina Izturitzekoa baino 2.000 urte gazteagoak dira. Gravette aroko europar populazioen irudi berri bat lortu dute ikerlariek.

Azterketak lehendik ezagutzen ziren genomak beste berri batzuekin batera analizatu dituzte. Berri horien artean daude Izturitzekoa eta inguruko beste batzuk, Okzitaniakoak, Espainiakoak eta Italiakoak.

Konparaketak erakutsi du paleolito antzinako hartan nolabait bi "arbaso-lerro" edo populazio bereizi egon zirela Europan, elkarrekin konexio bat bazuten arren. Bitxia bada ere, Izturitzekoa nolabait lotuago dago Vestonice (Txekia) izendatu duten klusterrarekin, Okzitaniako Fournol klusterrarekin baino (gertuagokoa, eta Iberiako adibideen populazioa litzatekeena). Mapak erakusten duen moduan Vestoniceko taldea ipar eta ekialdeko Europarekin lotua dugu (puntu moreak), eta baita Italiarekin ere.

Nolanahi ere, Vestonice eta Fournol klusterrak ez dira elkarren ezezagunak, eta bien arteko konexioak ikusten dira, besteak beste Izturitzeko aztarnan. Artikulu zientifikoaren irakurketa dibulgatiboagoa egiten duen beste honen arabera, "Izturitze talde desberdinen elkargune izan zitekeelako ideia indartzen dute aurkikuntzek". Era berean, eremu franko-kantabriarreko populazioa lehen homogeneoagoa zela uste zen eta orain badirudi ekialdeko Europarekin loturak ageri direla.

Izturitzeko giza-aztarnak Gravette aldiko kulturarekin daude lotuta. Leize horretan elementu oso bereziak aurkitu dira, txirula sorta harrigarria, munduko musika-tresna zaharrenen artean daudenak. Txirula horien artean Gravette baino zaharragoa den baten bat bada, Aurignac aldikoa, baina gehienak gravetiarrak dira, analizatu duten hezurraren garaikoak. Txirulajole baten DNA dugu hau agian (ez hartu esaldi hau literalki). Emakumezko bat zen, hori badakigu DNAgatik.

Gauza batean ez dago aldaketarik azterketa honek dakarren informazioan: gaurko euskaldunok (eta egungo europarrek) oso konexio txikia dugu paleolitoko europarrekin, ez Izturitzekoekin ez inongoekin. Hau lehendik ere jakina zen, eta orain berdin jarraitzen du inferentzia horrek. Gravette aldiko genoma hauen ondorengo hurrengo 22.000 urteetan izan ziren aldaketez gain, neolitoan Anatoliatik iritsirako nekazari-abeltzain populazioek eraldatu eta ordezkatu zuten Europako aurreko populazioen aztarna. Horiekin lotura estuagoa du geroko euskaldunen genetikak, Izturitzeko txirulari harekin baino.

Gehiago jakiteko:

Ez eskatu maparik adimen artifizialari

Tue, 27 Oct 2026 09:36:44 +0000

Atzo akordioa iragarri zuten PP eta Vox alderdiek Espainiako Senatuko bozketetarako probintzia batzuetan zerrendak banatzeko. Telecincon pentsatu zuten AA bidez erraz egin ahal izango zutela mapa grafiko bat, albistea ilustratzeko. Desastre bat irten zitzaien. AA asko ari da aurreratzen, baina txat ohikoetan oinarritutakoari ez eskatu maparik oraingoz. Abisatuko dizuegu egoera hobetzen denean.

Ikus Telecincok osatutakoa, Twitterreko erabiltzaile honek ikusi zuen moduan:

Euskal Herrira zoom eginda, hor ditugu, Huesca eta Kantabria artean Hego Euskal Herriko bederatzi herrialdeak, hiru berdez eta sei zuriz.

Honetaz abisatu genuen Sustatun uztailean. Eusko Jaurlaritzak sortutako eklipseko webgune mapa desastre hau izan zen:

Baina munduak ez du kasurik egiten. Abuztuan Israelgo Atzerri Ministerioak honakoa zabaldu zuen Twitterren eta Telegramen:

Handik gutxira ezabatu zuten, baina batzuek izan zuten denbora albistea jasotzeko. Ekialde Hurbilaren geografia ezagutzen baduzue ikusiko duzue mugak ez daudela oso zorrotz marraztuta, eta batez ere, Afrika / Egipto nola irristatu den hegoalderantz Sinai penintsularen aldetik...

Beste pare bat adibide. Uztailean eklipsearen desastrearena (ikus gorago) irten zenean, aproba gisa geuk ere eskatu genion mapa bat AA bati. Hauxe izan zen emaitza (orduan ez genuen argitaratu, baina bueno, gorde genuen(:

Maparen proportzioak, tira, hortxe hortxe, baina errotulazioa eta batez eklipsearen bide guztiz faltsua, desastre bat.

Beheko beste kasu honetan, produktu prototipo batean honako mapa agertu zitzaion Sustatuko editoreari:

Ez da argiegi ikusten, baina adi bereziki Nafarroa Beherearen kokapen zoragarriari.

Beraz, badakizue, izenburuan esan duguna: ez eskatu maparik AAri.

2010ean iPad fresko-fresko bat testeatu genuen

Tue, 27 Oct 2026 08:03:28 +0000

Sustatu 25 errepasoan, 2010ari begiratuta, iPad bat testeatu genuen, eta horrekin egin genuen artikulu bat. Produktu berria zen Appleren gauza hura, egun gutxi batzuk lehenago kaleratua, iPhonea jaio eta 3 urtera.

Une batez ematen zuen mugikorraren formatua bezalaxe, tarteko hau ere gailenduko zela alternatiba inportante baten eran, mugikorren eta mahaigaineko ordenagailu arteko nitxoan, baina ez zen hala gertatu. Nitxo batean jarraitzen dute tablet delako aparailuek. Badute erabilpena, baina etxeko edo erabilera pertsonalerako baino gehiago, praktikotasun profesionala dute batez ere 2026an: kontrol panel, erakusleiho eramangarri, funtzio definitu batzuetarako ona da tableta.

Eta tableten artean, Android sistema eragilekoak badauden arren, iOS-ekin dabilen Appleren iPad-a nagusi da oraindik. Beste iOS gailuak, aldiz, telefono mugikorrak alegia, ez dira gailendu gure merkatuan bederen Android ugariago eta oro har merkeagoen gainetik. Egunean Behin jokoaren erabilpen estatistikengatik dakigu %20 direla iOS mugikorrak jokalari euskaldunen artean, azken urteetan egonkor dagoen zenbaki bat.

Gauza batean berdin dago iOS mundua orain duela 20 urte bezalaxe: sistema eragilea ez du euskaratu nahi Applek. Konfigurazio batzuetan euskara lehenetsi daiteke (app batzuk zein webgune bisitatuak euskaraz ager daitezen), baina sistma bera eta bere ezarpen eta gauzak, ez. Hemen, horregatik, Android-zaleak gara.

Blocus deialdien slopolitika

Mon, 26 Oct 2026 09:16:55 +0000

Joan den larunbatean Bartzelonan egondako istilu batzuen harira, haien antolakuntzaren inguruko zalantzak agertu dira sareetan. Blocus eta beste marka edo izen batzuk erabiliz Tiktok bitartez ari dira zabaltzen mezuak, ezkerreko erreakzio militante bat bailitzan. Hego Euskal Herriko hirietarako ere egon dira dei batzuk, baina beraien estetika eta mezu-saldari begiratuta, argi dago hau AA bidez slopolitika jokaldi bat da (slop-a politikara aplikatua), auskalo zein interesek bultzatua

Ikus Bilboko Blocus horrek zer mezu zituen jarrita bere TikTokean joan den astean. Orain itxitako profila da, baina ematen du Bilbon ere egin nahi izan zuela norbaitek dei bat joan den larunbaterako (urriak 24), beste bat dagoela gaurko Vito Quiles propobakatzaile ultraeskuindar espainiarra datorrelako Deustuko Unibertsitatera, eta beste deialdi globalago bat dago Espainiarako, ikurrina eta bandera espainola nahastuta, azaroaren 30erako, non Hego Euskal Herriko beste hiriburuak ere aipatzen diren.

Azaroaren 30a baino lehenago, badirudi hurrengo astebururako, Halloween edo Animen Gauerako, berotu nahi dituztela kaleak. Hau Espainiako hegoalderako deialdi ustezko bat da, mozorro iradokizunekin.

Badirudi Joker eta V of Vendetta filmetako matxinada mozorrotu moduko bat piztea dela asmoa.

Mezuetan ezkerraren erreibindikazioak ikusten dira, hezkunta publikoaren alde, etxegabetzerik ez... Baina helburu praktikoa bandalismoa dela ematen du.

Blocus izena esanahirik gabea dela ematen du, baina beste profil batzuetan Generation Z edo Europe Revolution bezalako izenak dira. Izenak baino hobeto, agian markak. Eta izatez Europako beste herrialde batzuetan ere antzeko kanpainak ari dira zabaltzen.

Ikus Alemaniako adibide hauek, hurrengo asteburuko Halloweenen inguruko datekin baita ere:

Estetikarekin ez dago dudarik: AA sorkuntza da hau guztia, slop, eta mezularitza eta asmoa ere AA bidezkoa dela dirudi. Horregatik jarri dugu slopolitika izenburuan.

Irudi hauetarik batzuk eta iruzkin interesgarriak Carmela Ríos kazetariaren hari honetan aurkitu ditugu.

Mintzola mintegia 2026: euskaraz jarduteko erraztasunari buruzko ikerketak

Sun, 25 Oct 2026 08:52:46 +0000

Datorren azaroaren 5ean, 2026ko Mintzola Mintegia egingo da Donostiako Euskaltzaindiaren egoitzan (Luis Villasante Ikerketa Zentroa, Tolare baserria). Euskarazko ahozkotasunaren ikerketa egiten duen ekimena da Mintzola, Euskaltzaindiak sustatua. Aurtengo mintegian azken 12 hilabetotan ikerketan sarituak izan diren eta master-amaierako lanen ondorioak aurkeztuko dira.
Horiez gain, euskaraz jarduteko erraztasunari buruzko ikerketaren oinarri teoriko-metodologikoak ere bai.

Mintegia goiz osokoa izango da, eta doakoa, aurrez izena emanda (detaileak hemen).

Egitaraua

9.15: harrera.
Libe Miner | Euskararen erabilera eta hizkuntza-hautuak eskola-inguruneko ahozko interakzioetan: Haur Hezkuntzako 4 urteko gela bateko kasu-azterketa
Aidé Elustondo | Orioko euskararen bilakaera fonologikoaren azterketa
Camila Utrera | Aisialdi antolatuaren eta euskararen erabilera informalaren arteko elkarreragina: kasu-azterketa
Martin Lopez | Dokumentazioa eta deskribapena: Ahotsak.eus eta ikerlanak alderatzen Busturialdeko euskararen kasuan
11:00 - 11:30 Atsedenaldia
Izaro Urreta | Ahoskeraren lekua irakaskuntzan: euskara bigarren hizkuntza gisa helduaroan
Uxue Cárdenas | Hitzetik oholtzara: euskararen erabilera sustatzeko antzerkian oinarritutako proposamen didaktikoa
Maddi Ormazabal | Nola landu ahozkotasuna eskolan? Bilboko Miguel de Unamuno eskolako kasua
Unai Oiartzun (Siadeco) | Euskaraz jarduteko erraztasunari buruzko ikerketa: oinarri teoriko-metodologikoak

Hitzokei: gure meme beteranoena eta onenetakoa

Fri, 23 Oct 2026 10:20:41 +0000

Sustatu 25 urte sortan 2009ari begira, #Htzokei aurkitu dugu. Memea hazten zihoala eta haren inguruko post bat Hitzokei kontua asmatu zuen jeinuaren eskutik: Markos Gimenok sinatutako pieza hau. Gure meme zaharrenetakoa da. Politena agian; eta bizi da oraindik, ez dago ahaztua.

#Hitzokei hiztegi kreatibo bat da, euskaraz asmatutako hitz-joko edo txantxa berriak. Twitterren asmatu zuen traola eta jokoa Markos Gimenok, eta han bizi da oraindik memea, ez jardun handiarekin baina tartekako agerpenarekin. Akaso pixkat biziago dago traola Mastodonen.

Aurkitu dugun azken alea:

FIT-E: gorputzaldi sasoitsua azkar batean lortzeko app digitala

Urte hauetan asmakuntza ederrak eskaini dizkigu memeak. Garai batean biltegi bat ere bazebilen, Twiterrekoak automatikoki jasotzen zituena, eta jada ez dabil, baina urte batzuez bildutakoa kontsultagarri dago oraindik, hemen: https://hitzokei.tximinia.net/

Harrikada hau asmatu zuen sortzailea Markos Gimeno izan zen. 2018ko abenduan hil zen: bere buruaz beste egin zuen. Ez zen gizon neurotipikoa; sormenerakin gaitasun eta grina berezia zuen, eta buruak ziztada latzak ere ematen zizkion sarri. Hitzekin jolasten zekien gutako beste inork baino hobeto, #Hitzokei asmatu zuen eta hitzokeiak egiten zituen; euskarazko palindromo sortzaile eta sustatzaile handiena izan zen, hitz joko elebidunak ere asmatzen zitun, Skizopoziks ikuskizunean bezala... @Smuakr, @Markosgice do @Zerorajasoa izan zen sareetan, eta musikaria The Pepes, Julio Kageta, Dantzut eta Puto Amoak Matematiketan taldeetan.

Markos gogoan, edo zein izan zen jakin gabe ere, jarraitu dezagun #Hitzokei hauek sortzen.

SUSTATKAMON: Hedabide digital momia #Hitzokei

Ziber-segurtasun zuloen astean, PHP sistemen arazoa

Fri, 23 Oct 2026 06:48:17 +0000

Astean zibersegurtasun arazoen kateatze bat izan dugu, eta hemen beheko ilustrazioan Antonio Ortiz tekno-adituak bildu dituen batzuk, AA bidez geuk euskaratuak. Sustatun pare bat aipatu ditugu, eMudhra-rena eta auskalo zerekin lotuta egon zen Jaurlaritzaren web zerbitzuen erorketarena. Orain akaso larriena izan (izaten ari) dena komentatuko dugu, PHP programazio lengoaiaren zuloarena.

PHP programazio lengoaia bat da, informatikan oso erabilia eta bereziki Interneteko azpiegituretan. Proiektu informatiko oro bezala, doiketa eta hobekuntza ziklo batean bizi da PHP, software librea izanik modu publikoan banatzen direlarik doiketak eta erroreentzako zuzenketak.

Oraingoan, ikertzaile batzuek (diotenez AA tresnen laguntzarekin) bi ahulezia kritiko aurkitu zituzten, PHP2Shell izenarekin bataiatu zituztenak. "Kritikoak" dira zuloak, zeren ahalbidetzen dute sistema baten gaineko kontrola hartzea kudeaketa-pasahitzik gabe.

Partxe edo konponketa prestatu zen, baina noski, jakinarazi eta zabaldu behar da. Eta jakinaraztetik eta garatzaileek nork bere PHP instantzian ezartzeraino denbora tarte bat egon daiteke zeinean zuloa baliatu dezakete asmo gaiztokoek. Horregatik, izan dira erakundeak eta baita gobernuak ere Interneteko zerbitzu asko saretik kendu dituztenak apropos, une kritiko horretan zirrikiturik ez uzteko.

PHPren erabilera zabalak, gainera, arriskua handitzen du. Wikipediaren oinarria da PHP, eta baita Wordpress izeneko web-azpiegitura ezagunarena. Munduko webguneen %40 edo gehiago Wordpress dira; toki batzuetan gehiago (Errusian %90 direla irakurri dugu), eta Euskal Herrian ere askok erabiltzen dute. (argipena: Sustatun ez dabil ez PHP ez Wordpressekin, baizik eta Python programazio lengoaiarekin eta Django azpiegiturarekin).

Wikipedian erorketa zabaldu samarrak izan ziren asteazken eta ostegunean, eta une honetan, haren inguruko zenbait tresna osagarri dauzkate. Wordpressak dituztenen artean, bertsio eguneraketan ari dira hornitzaileak eta haiekin mantentze-kontratuak dituztenak; zerbitzu artesanalagoak pixkat larriago ibil daitezke.

Maddi Etxebarria Bilbao izango da Elhuyarreko koordinatzaile nagusi berria

Thu, 22 Oct 2026 13:56:09 +0000

Elhuyar fundazioaren patronatuak aho batez izendatu zuen atzo Maddi Etxebarria Bilbao Elhuyarreko koordinatzaile nagusi. Jon Abril Olaetxearen lekukoa hartuko du Etxebarriak, hark, ezbehar bat tarteko, kargua uztea erabaki baitu. Elhuyarreko kidea da Maddi Etxebarria Bilbao 1999az geroztik. Koordinazio-lanetan aritu da, eta zuzendaritzako kidea ere izan da; azkenaldian, euskararen alorrean aritu da lanean. Euskal gizarteak aurrean dituen erronkei adi jarraituko die Elhuyarrek aurrerantzean.

Maddi Etxebarria Bilbao, 1971n Gernikan jaioa, Komunikazio Zientzietan lizentziaduna da (Euskal Herriko Unibertsitatea). 1999az geroztik, Elhuyarren aritu da lanean: azken urteetan, euskararen alorreko aholkularitzako teknikari-lanetan, eta, aurretik, koordinazio-lanetan. Zuzendaritzako kidea ere izan da.

Euskararen alorrean, euskalgintzako hainbat erakundetan ordezkatu du Elhuyar, hala nola Euskalgintzaren Kontseiluko zuzendaritzan eta Soziolinguistika Klusterrean. Irakasle ere aritu da EHUko Euskararen jabekuntza, kudeaketa eta hizkuntza-praktikak XXI. mendean: hizkuntzen kudeaketa aro globalean izeneko aditu-tituluan eta UEUk antolatutako Euskara eta digitalitatea graduondokoan. Hainbat hitzaldi eta argitalpen ere eginak ditu; batez ere, euskara lan-munduan txertatzeko gaiei buruz. Horretaz gain, talde-gidaritzan eta -estrategian esperientzia eta formazio zabala du.

Euskal gizartearen erronkei adi egoteko beharra

Maddi Etxebarria Bilbaoren izendapenarekin, Elhuyarrek euskal gizarteak dituen erronkei erantzuten jarraitu nahi du, euskaratik gizarte kritiko, aktibo eta berdinzaleagoa eraikitzeko. Euskara erdigunean jarri nahi du, euskara alor eta sektore gehiagotara zabaltzeko eta euskararen esperientzia beste hizkuntza gutxiagotu batzuetara hedatzeko. Gainera, adimen artifizialaren aroan euskara lehen mailan kokatzeko lanetan jarraituko du, arreta jarriz erabilera arduratsuan.

Elhuyarrek erreferentzia izaten jarraitu nahi du kultura zientifikoaren euskarazko zabalpenean, zientziaren alorreko eragileekin elkarlanean eta zientziaren eta gizartearen arteko zubi-lanetan.

Hori guztia egiteko, Elhuyarrek ohiko bideari jarraituko dio: eraldaketa soziala jomugan, pertsonak eta komunitatea erdigunean jarriko ditu eta askotariko eragileekin elkarlanean jardungo du. Izan ere, sinetsita dago, gizarteak gaur egun dituen erronken aurrean, ikuspegi kritikoa eta berdinzalea gero eta beharrezkoagoak direla.

Agur Iker eta Ane, ongi etorri Oihan eta Laia

Thu, 22 Oct 2026 09:48:35 +0000

Sustatuko albisteak teknofiloak izan ohi dira sarri, baina ez beti. Anekdota jakingarriak ere interesgarriak suertatzen dira. Sustatu 25 errepasoan 2008ko alea aukeratu dugu gaur, eta halakoxea da: Iker eta Ane dira izen erabilienak EAEn. Orduan ziren. Gaur egunean, ez.

Eustat estatistika erakundearen datuak ziren. Orduko esteka ez dabil, baina laburpentxoa egin genuen Sustaturako. Hona taula batean 2007ko izen erabilienak (aurreko urteko datuak banatu ohi ditu datu hau ematen duenean Eustatek). Kontuan izan hiru probintziako jaiotzen datuak direla, Araba, Bizkaia eta Gipuzkoakoak.

Neskak 2007	Mutilak 2007
Ane	Iker
Irati	Jon
Naroa	Unai
June	Ander
Uxue	Mikel
Leire	Oier
Nahia

Eustatek gaur egunean ere jarraitzen du datu hau ematen, eta aurtengo udan kaleratu zituzten azken zerrendak. Hona mutil izenena, eta hau neska izenena.

Tauletara ekarrita datu zaharra eta hamarkada honetako bi hemen dituzue.

Mutilak 2007	2022	2025
Iker	Martin	Oihan
Jon	Markel	Markel
Unai	Julen	Martin
Ander	Oihan	Julen
Mikel	Jon	Luken
Oier	Luka	Aimar

Neskak 2007	2022	2025
Ane	Ane	Laia
Irati	June	Ane
Naroa	Malen	June
June	Laia	Nora
Uxue	Nahia	Malen
Leire	Maddi	Sofia

Ikusten denez, Ane ez da jada ohikoena, baina ondo eutsi dio moda aldaketari. Ikerrek ez. 26. postuan dago 2025 honetan.